\id 1ti
\h 1 Timoteo
\mt2 Bachá osirúami
\mt2 mapurigá San Pablo oséli echi
\mt TIMOTEO
\c 1
\s Pablo galá osé echi Timoteo
\p
\v 1 Nijé Pablo, nimí osé mápuni Jesucristo jiti julárami ju mapurigani nawisama Binói Ra'íchala. A'lí Riosi Binói mapu tamujé tamí Ku'wíriami ju, échiko tamí echirigá nuleli mapurigani nawisama je'ná Galabé Ra'íchali. Ayénachó Jesucristo Binói echirigá tamí nuleli. A'lí tamujeta Jesucristo jiti galá bichíiga buwé mapurigata galá ku'wíratami níibo.
\v 2 Mujé Timoteo, nijé nimí osé mápumi mapurigá nijé ranala niráa ju, mapujítimi galá bichíili Jesucristo niráa mapalí nijé nimí nawésali. Nijeni wabé nakí mapu Riosi, tamujé Onolá, mi wabé galigá ku'wírama, ayénachó mapu mi wabé natimama, ayénachó mapu Binói mi 'yama mapurigami sinibí galá kilí ologá bitélama. Ayénachóni ne wabé nakí mapu tamujé Walubélawala Jesucristo mi ayénachó echirigá 'yama.
\s Echi Pablo ruyé echi Timoteo mapurigá ketasi ariwema mapu jaré 'yékami nawésami arigá binérama echo'ná Ejésochi piréami pagótami
\p
\v 3 Chabénala nimí aneli mapurigami echo'ná Ejésochi anilíwachi ripima, mapuyénasí nijeni echo'ná bo'ómana Maseróniachi anilíwachi kawírali simili. Jipi abijí echo'ná tibí mapurigami nulema jaré echo'ná piréami mapu aboni ketasi 'yékaka binérama echi auché jaré echo'ná Ejésochi piréami.
\v 4 Ayénachó nijeni mi aneli mápumi nulema echo'ná Ejésochi piréami pagótami mapurigá aboni ketasi nijéwama echi jaré pagótami karúmati irétaga ra'íchami, mapu chopi we nílaka nakí machinala mapu chu riwéami níilo ne si'néami echi jaré ki'yá bachánala piréami tamujé pagótamawala, mapujiti echalí aboni echirigá chopi 'nátaga, ketasi waminabi galá bichíisama Riosi Ra'íchala, mapurigá Riosi nakí máputa chopi bichíibo.
\p
\v 5 Echalí nijé nimí júuli echirigá nulénala echo'ná Ejésochi piréami pagótami, mapurigá a jaré aboni echirigá galá nijéwasagá, aboni ne galá galéami níima, mapujiti echalí aboni ne galá bi'wíami níima pachana aboni sulálachi niráa. Ayénachó nijé nimí echirigá júuli nulénala aboni mapurigá aboni ketasi waminabi o'monáratami níima mapurigá chati sitíi oláami niráa, chopi mapurigá aboni sinibí galá bichíyami níima.
\v 6 Chopi jaré aboni ketasi nakili echirigá olánala. Si'winárigá aboni sinibí wepi 'yena wikabé namuti ra'íchaga mapu ketasi galá ju.
\v 7 Aboni wabé nakí binéranala Riosi nulalila echi auché jaré pagótami, chopi aboni ketasi ne galá machí echi nulalíwami, nirapé cho ne galá machí echi auché jaré namuti mapu aboni galá bichíiga niráa binera echi auché jaré.
\p
\v 8 Chopi tamujeta galá machí mapu echi Riosi nulalila we galabé olalíwami ju, ayena echirigá suwaba galá nijéwasagá.
\v 9 Si'néamita galá machí mapu ketasi arigá 'wérali ju nulékowa echi jaré galabé oláami pagótami mapurigá aboni echirigá galabé olama. Chopi ayena arigá 'wérali ju mapu echi jaré chuwé oláami pagótami nulérami níima mapu aboni ketasi waminabi echirigá olama. Ayénachó arigá 'wérali ju mapu echi jaré pagótami mapu ikí ketasi galá nijewa Riosi, ayena nulérami níima mapurigá galá nijéwama. Ayénachó arigá 'wérali ju mapu echi jaré Riosi sayérami pagótami nulérami níima mapurigá aboni ketasi waminabi echirigá sayérama Riosi. Ayénachó arigá 'wérali ju mapu echi jaré wabé chati sitíi oláami pagótami galá nijéwama Riosi nulalila, ayénachó mapu echi jaré mapu ikí ketasi o'wikéami ju Riosi arigá nulérami níima mapu aboni ne galá o'wikema, ayénachó mapu echi jaré mapu ketasi nakiko mapu auché jaré bichíima Riosi arigá nulema mapurigá aboni ketasi waminabi echirigá sayérama Riosi. Ayénachó 'wérali ju mapu echi jaré mapu ikí nakí ko'winália aboni 'wénawala, ayénachó echi jaré mapu ikí nakiko ko'winália auché jaré pagótami, si'néami galá nulérami níima Riosi nulalila jiti mapu ketasi echirigá olama.
\v 10 Ayénachó arigá 'wérali ju mapu echi jaré chuwé bilétari yuwa kochíami nulérami níima mapu aboni ketasi waminabi echirigá olama, ayénachó mapu echi jaré chati sitíi oláami rijói mapu auché jaré rijói chópika yuwa napawika echirigá wabé chati sitíi olako ayénachó nulérami níima mapu ketasi waminabi echirigá chati sitíi olama. Ayénachó 'wérali ju mapu echi jaré chigórami mapu chiná 'wisa auché jaré pagótami, arigá nulérami níima mapu ketasi echirigá 'wísama, ayénachó mapu echi jaré 'yékaka ra'íchami nulérami níima mapu ketasi waminabi 'yékaka ra'icháma, ayénachó mapu echi jaré mapu wepi 'yékaka aní mapu a bichíwali ju, ketasi waminabi echirigá 'yékaka animea. Ayénachó arigá 'wérali ju mapu echi auché jaré mapu ikí auché wiká karúmati chati sitíi olako nulérami níima mapu ketasi echirigá olama, ne si'néami mapu ikí ketasi galá nijéwaga olako mapurigá tamujeta binera mapu galá ju oluwawa.
\v 11 A'lí nijeni sinibí binera echi ne bichíwali binérawami. A'lí je'ná Wabé Galabé binérawami je'ná jerigá ju: Mapu echi wabé Galabé Walubela Riosi we nakí mapu jena'í wichimóbachi piréami pagótami ku wikáwarami níima. A'lí nijeni je'ná jerigá binera echi auché jaré pagótami, mapujiti Riosi Binói tamí júuli echirigá binéranala.
\s Echi Pablo walú natétara 'ya mapujiti Jesucristo wabé galigá ku'wírali binói
\p
\v 12 Jipi nijeni walú natétara 'ya echi tamujé Walubélawala Jesucristo, echi mapu tamí ku'wírali mapurigani galá omérama echirigá binériya Binói Ra'íchala, mapujiti Binói tamí galá bichíyami niráa nirali, a'lí echijiti Binói tamí nochárali, Binói nóchala olayá.
\v 13 Echi Walubela Jesucristo tamí 'yali suwaba je'ná jeyiri, chopi chabénala nijeni wabé chati sayériga ra'íchami níili echi Walubela Jesucristo sayériga. Ayénachó nijeni we kichiga a'najátali echi jaré mapu ikí bichíyami níili Binói niráa. Ayénachó nijeni ne wabé sitila aneli. Chopi Riosi arigá tamí wabé natimali, mapujiti echalí nijeni ketasi cho bichíyami níili, a'lí nijeni ketasi machili mapurigá nijeni olali.
\v 14 Echijiti nijeni mayé mapu tamujé Walubélawala Jesucristo ne wabé simírami tamí galeli, ayénachó tamí bichíirali, ayénachó tamí 'yali mapurigá nijeni wabé galema Binói Jesucristo, mapujiti Binói sinibí je'ná jerigá 'ya si'néami mapu ikí napawíkami ju Binói yuwa.
\p
\v 15 Je'ná jerigá ne bichíwali ju, ayénachó galá níima mapu si'néami pagótami je'ná jerigá galá bichíima: Mapu Jesucristo chopi nawali jena'í wichimóbachi mapurigá Binói omérama ku wikáwiya echi jaré chati sitíi oláami pagótami. A'lí nijé binói ne wabé simírami chati sitíi oláami níili, ketasi mapurigá echi auché jaré.
\v 16 A'lí Riosi ne wabé simírami tamí natimali, mapalí Binói tamí ku wikáwali, mapurigá Jesucristo echirigá bachá niráa 'nérama mapurigá Binói ne wabé nakí ku wikawánala echi auché jaré wabé simírami chati sitíi oláami pagótami. A'lí Jesucristo echirigá tamí natimali mapurigá waminánomí si'néami pagótami galá machimea mapu Jesucristo Binói galá ku wikáwama ne si'néami mapu ikí galá bichíimako Binói niráa, mapurigá aboni sinibí niráa pirélama Riosi yuwa.
\v 17 Echijiti arigá 'wérali ju mapu tamujé sinibí waminabi 'natabo mapu echi Walubela Riosi ne Wabé Walubela ju, ayénachó mapurigata sinibí waminabi walubélaga anebo echi Binoí, ne sinibí niráa, mapujiti Riosi tamujé Walubela Silínawala ju, mapu ke siné mukumea, chopi ne sinibí niráa bitélama. A'lí echi Walubela Riosi Binói bi'nélipi ne wabé galá machíami ju, chopi tamujeta ketasi omero 'néniya echi Binoí. ¡Echirigá níima!
\p
\v 18 Mujé Timoteo mapurigá nijé ranala niráa ju, mapujítimi galá bichíili nijé nawésawala. Jipi nijeni mi je'ná jerigá nulé, achigórigá mapurigá echi auché jaré ritémtami bachá niráa mi jiti ruwigá anili mapurigá Riosi nuleli anínala, mápumi sinibí galá bichíiga olama echi wabé chati sitíi oluwáwami sayéraga, mapurigá bilé sontarsi sayéraga nikowa echi jaré binói sayéraga. A'lí ami echirigá ologá mujé binói galá machimea mápumi ketasi chati sitíi olá.
\v 19 Auché jaré ma waminá ku ariweli bichíisiya, mapujiti aboni waminabi chati sitíi olali mapalí aboni arigá galá machili, pachana aboni sulálachi niráa, mapu aboni we chati sitíi ologá 'yénali.
\v 20 A'lí echi Imeneo riwéami rijói echirigá olali, echi Alejanto ayénachó. A'lí nijeni ariweli aboni mapurigá echi Satanasi riwéami riablo waminá omérama aboni, mapurigá aboni echijiti galá binema mapurigá aboni ma ketasi chati ra'icháma, Riosi sayéraga.
\c 2
\s Echi Pablo ruyé mapu churigá galá níima Riosi yuwa ra'ichása
\p
\v 1 Ne bachá niráa nijeni 'yemi mi ané máputamo sinibí we tánabo Riosi, máputamo Riosi yuwa ra'íchaga we tánabo, ne si'néami pagótami jiti, ayénachó máputamo sinibí walú natétara 'yabo Riosi.
\v 2 Nijeni 'yemi mi echirigá ané máputamo sinibí tánabo Riosi ne si'néami echi jaré o'wéala silíami jiti, ayénachó ne si'néami echi auché jaré igúsuwami jiti, mapurigá tamujé omérabo ne galá kilí ologá piréliya, mapurigata sinibí olabo mapurigá Riosi nakí, ayénachó mapurigá echi auché jaré pagótami galá machimea mapu tamujeta galabé oláami ju.
\v 3 Ne wabé galabé ju máputa echirigá tániga ra'ichábo Riosi yuwa. Ayénachó Riosi Binoí, mapu tamujé tamí Ku'wíriami ju, ne wabé nakí máputa echirigá ra'ichábo Binói yuwa.
\v 4 A'lí Riosi ne wabé nakí mapu ne si'néami pagótami galá ku wikáwarami níima, ayénachó mapu ne si'néami galá machimea echi ne Bichíwali.
\v 5 A'lí bilepi Riosi chopi nirú. Ayénachó bilepi nirú Walubela Katéwaga Ra'íchami mapu Riosi yuwa katéwaga ra'ícha, tamujé chati sitíi oláami pagótami jiti. Échiko echi Walubela Jesucristo ju. A'lí Binói ayénachó bitéali jena'í wichimóbachi mapurigá Rijói niráa.
\v 6 Ayénachó echi Walubela Jesucristo a Binói niráa nijali mapurigá Binói mi'lirúami níima, si'néami pagótami chati sitíi olalila jiti. A'lí mapalí ma sébali tétali, echalí Riosi júuli jaré je'ná jerigá nawesánala ne si'néami pagótami.
\v 7 A'lí nijeni echijiti nawesánala julárami níili mapurigani binérama echi auché jaré isena pagótami mapu ketasi Juríosi ju, mapurigá aboni ayénachó galá machigá bichíima echi ne bichíwali. A'lí nijeni je'ná jerigá ne wabé bichíwaga, ketasi 'yékaka aní, mapujítini galá bichíyami ju Jesucristo niráa.
\p
\v 8 Echijiti nijeni ne wabé nakí mapu ne suníami piréami pagótami ne galá bichíiga, tániga ra'icháma Riosi yuwa. Chópini ketasi nakí mapu aboni chopi nakimea chati sitíi sulega pirélanala mapalí aboni echirigá ra'icháma Riosi yuwa, nirapé mapurigá aboni na'áwami níima, nirapé mapurigá a'nagupi nakichíami níima.
\v 9 Achigórigá nijeni nakí mapu echi jaré muguí galá pólaga napachama, ayénachó mapu aboni galá sébali i'wéli sipúchama, ketasi ne wabé simírami ba'yóraga. Ketasi galá níima mapu echi jaré muguí, ripabé niráa achagá, ne wabé simírami ba'yóraga tichima aboni kupala. Nirapé galá níima mapu aboni uchuchama echi ne wabé natéami oro anilíwami, nibilé cho echi wabé natéami perla anilíwami, nirapé mapu aboni ne wabé natéami sipuma.
\v 10 Chopi galá níima mapu echi jaré muguí bichíyami sinibí ne galabé niráa olasa, achigórigá mapurigá galá ju oluwawa echi jaré muguí mapu chopi nakí galabé olánala mapurigá Riosi Binói nakí.
\v 11 Galá níima mapu echi jaré muguí galá kilí ke anigá kipusa mapalí nawisálawa Riosi Ra'íchala. Ketasi galá níima mapu aboni chuwé ku kuwana ra'íchaga nijéyama.
\v 12 Mapujiti nijeni ketasi risensia 'ya mapu echi jaré muguí binérama echi auché jaré echo'ná napawíkowachi, nibilé cho mapu aboni ne wabé o'wéalatama echi jaré rijói yuwa. Chopi galá níima mapu echi jaré muguí kilí niráa ketasi ra'íchaga kipusa.
\v 13 Mapujiti Riosi ne bachá niráa niwáli echi Arani riwéami rijoí. A'lí jubáami niráa niwali echi Eba riwéami mukí.
\v 14 A'lí echi Arani ketasi 'yékarami níili, chopi echi mukí wabé 'yékarami níili. A'lí bachá niráa chati sitíi olali, Riosi sayéraga.
\v 15 Echijiti Riosi 'yali mapurigá echi jaré muguí wabé okoka ranamea aboni tanala. Chopi aboni arigá ku wikáwarami níima a aboni galá bichíisagá Riosi, ayénachó a aboni galá galéami níisagá, ayénachó a aboni galabératami níisagá Riosi jiti, ayénachó a galá 'nátami níisagá.
\c 3
\s Arigá 'wérali ju mapu ne wabé galabé oláami níima si'néami echi jaré mapu ikí nakiko o'wéala niráa níilanala echi auché jaré napawika bichíyami ritémtami yuwa
\p
\v 1 Je'ná jerigá ne bichíwali ju: A bilé rijói nakisáagá walula niráa níilanala echi auché jaré napawika bichíyami ritémtami yuwa, echi nóchali mapu echi rijói nakí olánala we galabé nóchali ju.
\v 2 Chopi arigá 'wérali ju mapu ne wabé galabé oláami níima mapuyíripi rijói mapu walula níilanaliko echi auché jaré napawika bichíyami ritémtami yuwa, mapurigá echiyiri rijói ke siné riwirúami níima mapurigá chati sitíi oláami niráa. Arigá 'wérali ju mapu echiyiri rijói chopi bilepi mukí upélasa, ayénachó mapu binói galabé 'nátaga, galabé kilí ologá bitélama. Galá níima mapu echiyiri rijói galá nakíami níima narée echi jaré pagótami echo'ná binói bitélachi, ayénachó galá níima mapu echiyiri rijói galá binériami níisa Riosi Ra'íchala.
\v 3 Ayénachó arigá 'wérali ju mapu ketasi bajíami níima echi suguí si'néami echi jaré mapuyíripi nakiko o'wéala niráa nílama echi auché jaré napawika bichíyami ritémtami yuwa. Ayénachó arigá 'wérali ju mapu echiyiri rijói ketasi kichíami níima auché jaré pagótami. Ayénachó arigá 'wérali ju mapu echiyiri rijói ketasi nakíami níima 'yékaka niráa ménala echi wenomí. Chopi si'winárigá arigá 'wérali ju mapu echi jaré mapu ikí nakiko o'wéala niráa níilanala echi auché jaré napawika bichíyami ritémtami yuwa sinibí ne wabé galabé oláami níima, kilí oláami niráa, ketasi korúkami niráa echi wenomí.
\v 4 Ayénachó arigá 'wérali ju mapu aboni ne galá nuléami níima si'néami echi jaré mapu ikí napawika pireko echo'ná aboni pirélachi niráa, ayénachó mapu aboni galá omérama nulée mapurigá aboni kúchuwala sinibí ne galá nijéwami níima, ne galá o'wikéami niráa.
\v 5 Mapujiti a bilé rijói ketasi machisáaga nulée binói kúchuwala, échiko ketasi cho machí tibúu echi jaré wikabé ritémtami mapu ikí galá bichíyami ju Riosi.
\v 6 A'lí arigá 'wérali ju mapu echi rijói mapuyíripi nakiko walula nílama echi auché jaré napawika bichíyami ritémtami yuwa, ketasi ne bukulí bichíyami níima, mapurigá échiko ketasi wabé nóchami níima mapalí echirigá wilárami ju walula niráa, ayénachó mapurigá échiko ketasi chati sitíi oláami níima achigórigá mapurigá echi riablo chati sitíi olali mapujiti binói ne wabé nóchami níili.
\v 7 Ayénachó arigá 'wérali ju mapu echi rijói galá o'wikérami níima echi auché jaré ke bichíyami pagótami jiti, mapurigá echi rijói ketasi riwélatami níima mapurigá bilé chati sitíi oláami niráa, nirapé mapurigá echi chati sitíi olántarami níima echi riablo jiti.
\s Galá níima mapu echi jaré riákono anilíwami rijói sinibí galabé oláami níima
\p
\v 8 Ayénachó arigá 'wérali ju mapu echi auché jaré nagúurami rijoí, riákono anilíwami, ne galabé wachínaga oláami níima, tarapé 'yékami niráa, nirapé bajíami suguí. Ayénachó arigá 'wérali ju mapu aboni ketasi nakíami níima 'yékaka niráa ménala echi wenomí.
\v 9 Arigá 'wérali ju mapu aboni galá machíami níima ne suwaba mapurigata bichíi Jesucristo niráa, ayénachó arigá 'wérali ju mapu aboni ne galabé oláami níima mapurigá aboni sinibí machimea, pachana aboni sulálachi niráa, mapu aboni ketasi chati sitíi oláami ju.
\v 10 Ayénachó arigá 'wérali ju mapu 'yémitamo chopi jawabo, riákono niráa, echi jaré rijói mapu ma galá machirúami ju mapurigá galabé oláami niráa. A'lí mapalí aboni ma chapirúami níisa riákono niráa, echalí galá níima aboni sinibí we galabé oláami níima. Chopi a jaré aboni riwirúami níisa, ketasi galabé oláami niráa, echalí ketasi galá níima mapu aboni waminabi riákono niráa níima.
\v 11 Achigórigá galá níima mapu echi jaré riákono anilíwami rijói jubila ne galabé wachínaga oláami níima, ayénachó mapu aboni ketasi chuwé sitíi chati ra'íchaga 'yénami níima, echi auché jaré sayéraga, chopi mapurigá aboni sinibí ne galabé kilí oláami níima, ne galabé bichíwaga oláami niráa.
\v 12 A'lí arigá 'wérali ju mapu echi jaré riákono anilíwami rijoí, ibili niráa, chopi bilepi mukí upélama. Ayénachó arigá 'wérali ju mapu aboni galá machimea nulée aboni kúchuwala, ayénachó mapu aboni galá machimea nulée ne si'néami echi auché jaré echo'ná aboni pirélachi nóchami.
\v 13 Mapujiti echi auché jaré napawika bichíyami ritémtami sinibí galabé oláami niráa anema echi jaré rijói mapu galabé olako, riákono niráa. Ayénachó echi galabé oláami riákono galá omérama nawésiya suwaba mapurigá tamujé galá bichíyami ju, Jesucristo niráa.
\s Tamujé bichílawala ne wabé walubela ju
\p
\v 14 Nijeni mayé mápuni ke 'me ayó echo'ná simea, mi 'némiya. Chopi jipi nijé nimí je'ná jerigá osé,
\v 15 mapurigá áni ketasi we yáati echo'ná simisáagá, echalí mujé Timoteo arigá galá machimea mapu churigá galá níima olasa echo'ná echi jaré napawika bichíyami yuwa. A'lí si'néami echi jaré bichíyami, ne napawika niráa, mapurigá echi sinibí bitéami Riosi kalila niráa ju, mapujiti Riosi Binói galá bité echo'ná pachana aboni sulálachi niráa. A'lí echi jaré napawika bichíyami sinibí ne galá bichíiga piré, ayénachó aboni sinibí galá nawésa echi ne Bichíwali jena'í wichimóbachi.
\v 16 Ne bichíwali ju mapu tamujé bichílawala ne wabé walubela ju:
\q Riosi nawali jena'í wichimóbachi mapurigá Rijói niráa.
\q A'lí echi Wabé Galabé Riosi Iwigala nawésali jeanigá mapu Binói ne wabé galabé oláami níili.
\q A'lí echi jaré o'wéala Riosi kapitánawala galá riwali Binói echirigá oláachi.
\q A'lí echi jaré isena pagótami mapu ketasi Juríosi pagótami ju, arigá nawésarami níili jeanigá mapu Binói echi Bilepi Riosi Ranala níili.
\q A'lí jaré pagótami ne suníami jena'í wichimóbachi piréami arigá bichíili Binói niráa.
\q A'lí Binói auchecho siné ku torúami níili echo'ná ripá riwigachi.
\c 4
\s Jaré waminá ariwema bichíiya
\p
\v 1 A'lí echi wabé galabé Riosi Iwigala tamujé tamí ne machiná niráa machira mapu echalí ne jubá rawé jaré pagótami waminá ariwema bichíiya Riosi. A'lí aboni chopi bichíima jaré wabé 'yékami iwigá echi riablo níwala. Ayénachó aboni chopi bichíima mapurigá echi jaré riablo níwala chati sitíi oláami iwigá nakí mapu aboni bichíima.
\v 2 Ayénachó aboni galá bichíima mapurigá nawésama jaré wabé 'yékaka oláami pagótami, ne wabé ikaléami. A'lí echi jaré 'yékaka oláami pagótami ketásirapé o'mónami níima mapujiti aboni echirigá chati sitíi olá. A'lí aboni chopi waminabi chati sitíi olísama.
\v 3 A'lí echi jaré wabé 'yékami pagótami ketasi risensia 'yama mapurigá echi auché jaré pagótami galá niwima. Ayénachó aboni nulama mapu echi auché jaré pagótami ketasi ko'mea jaré ko'wáami. Chopi Riosi galá niwali suwaba ko'wáami mapurigá echi jaré galá bichíyami pagótami, mapu galá machiko echi ne bichíwali, ne suwaba walú natétara 'yasa ko'mea.
\v 4 Mapujiti ne suwaba ko'wáami mapu Riosi niwali galá ju ko'wáwa. Echijiti ketasi galá ju chijúnasa echi ko'wáami, chopi galá níima galá kosá, walú natétara agá Riosi,
\v 5 mapujiti echi jaré ko'wáami wabé galabératami ju, Riosi Ra'íchala jiti, mapalita walú natétara 'ya Riosi.
\s Echi Timoteo mapurigá bilé galabé oláami pioni níili, Jesucristo piónawala
\p
\v 6 Mujé Timoteo, ami je'ná jerigá binérasagá echi jaré ritémtami, echalimi ne galá oláami níima, mapurigá bilé galabé oláami pioni, Jesucristo piónawala niráa, mapujítimi waminabi galá bichíiratami níima echi Galabé Riosi Ra'íchala máputa ma galá bichíi, ayénachómi waminabi bichíiratami níima echi galabé binélawami mapurigami ma galá nijéwaga olá.
\v 7 Chopi ketasi bichíiwi echi jaré pagótami irétawala mapu chopi mapurigá ke newalite ju. Si'winárigá sinibí nakiwi waminabi wabé 'wérali olánala mapurigá Riosi nakí.
\v 8 Echi nóchali galá ju, mapujiti mapalita jiwériga nocha, echalita iwéami níibo. Chopi mapalita 'wérali olá mapurigata waminabi galá bichíyami níibo Riosi, echalita ku'wíratami ju, abijí piréliya jena'í wichimóbachi, ayénachóta ku'wíratami níibo echo'ná ripá riwigachi, ne sinibí niráa, ne sinibí.
\v 9 Je'ná ra'íchali ne wabé bichíwali ju. Galá níima ne si'néami pagótami je'ná jerigá galá bichíisa.
\v 10 Echijiti tamujeta ne wabé nocha, Riosi nóchala olayá. Ayénachóta echijiti wabé risúu olárami ju, mapujítita chopi bichíiga buwé mapurigá echi Sinibí Bitéami Riosi tamujé tamí ku'wírama. A'lí echi Walubela Riosi wabé omérami ju ku wikáwiya si'néami pagótami, ayénachó Binói ne bichíwali ku wikáwama si'néami mapu ikí galá bichíimako Binói niráa.
\p
\v 11 Arigá 'wérali ju mápumi je'ná jerigá nulema echi jaré pagótami, ayénachó mápumi je'ná jerigá binérama aboni.
\v 12 Mujé Timoteo abijimi we ri'malí ju, echijiti sinibí ne galabé olá suwaba mapu ikimi olá, mapurigá echi jaré pagótami ketasi mi kichima mapujítimi ri'malí ju. Sinibí suwaba ne galabé olá mapurigá echi auché jaré bichíyami achigórigá olánalama. Echirigá sinibí ne galabé niráa ra'íchaga, ayénachó sinibí galabé ologá, ne wabé galéami nili, sinibí galabé olá mapurigá Jesucristo jiti bichíyami niráa, sinibí ne galá bichíiwi Riosi, ayénachó sinibí galá oláami nili echi jaré muguí yuwa.
\v 13 A'lí mapuyénasí nijeni ke cho nawá echo'ná mi yuwa ne sinibí galá 'neni Riosi Ra'íchala osirúami, echirigá galá námtaga auché jaré. Sinibí galá ruyegá bineri echi auché jaré ritémtami.
\v 14 Ke siné ariwé Riosi Ra'íchala nawésiya, mapujiti mujemi 'yárami níili mapurigami galá omérama Riosi nóchala olayá, mapalí Riosi Binói júuli echi jaré o'wéala ochérami bichíyami moba mujé mo'ólachi nochánala, aboni sikala jiti; ayénachó mapalí aboni bachá niráa anili mápumi galabé nawésami níima Riosi Ra'íchala.
\p
\v 15 Ne sinibí 'wérali niráa je'ná jerigá olá, mapurigá si'néami pagótami galá machimea mapurigami waminabi sísima Riosi nóchala olayá.
\v 16 A binói niráa ne galá tibuti, ayénachó sinibí chopi binera echi ne bichíwali Riosi Ra'íchala. Sinibí waminabi galabé ologá nochá, Riosi nóchala olayá. A'lí ami je'ná jerigá olásagá, mujemi galá ku'wíratami níima, ayénachó galá ku'wíratami níima si'néami echi jaré mapu kipunuko, mapalimi nawésa Riosi Ra'íchala.
\c 5
\s Pablo galá ruyé mapu churigá galá níima olásata echi auché jaré ritémtami yuwa
\p
\v 1 Ketasi wabé oyeri echi jaré rijói ma ochérami, chopi kilí niráa ruyé echi jaré ochérami mapurigá aboni galabé olama, achigórigá mapurigami kilí niráa ruyé mujé binói onolá niráa. Ayénachó echirigá kilí niráa ruyé echi auché jaré témali achigórigá mapurigami kilí niráa ruyé mujé binói ritémawala niráa.
\v 2 Ayénachó kilí niráa ruyé echi jaré muguí mapu ma 'wékami ju, achigórigá mapurigami kilí niráa ruyé mujé binói iyela niráa. Ayénachó galá kilí niráa ruyé echi jaré iwé, achigórigá mapurigami kilí niráa ruyé mujé binói 'wayela niráa. Sinibí ne wabé galabé niráa olá aboni yuwa.
\p
\v 3 Sinibí nulé echi jaré napawika bichíyami ritémtami mapurigá aboni ku'wírama echi jaré muguí kunámami mapu aboni yuwa muchuwi, si'néami mapu ikí ne bichíwali ne wabé newaléami juko.
\v 4 Chopi a bilé mukí kunámami níwasagá binói kúchuwala kúruwi ma ochérami, a níwasagá omá binói usúula jaré kúruwi ma ochérami, echalí galá níima mapu echi mukí kúchuwala, binói usúula kéremá, galá ku'wírama aboni iyela, aboni su'ulá kéremá. Wabé galá ju mapu echi jaré kúruwi echirigá wabé galigá ku'wírama aboni iyela, aboni su'ulá kéremá, mapujiti echi jaré kúruwi ne bichíwali echirigá o'wiké. A'lí echirigá oluwáwami we galabé ju, ayénachó Riosi we nakí máputa echirigá ku'wírabo tamujé 'wénawala, tamujé su'ulá ayénachó.
\v 5 A'lí echi jaré muguí kunámami mapu ne a'wínali tibíliko, echi jaré mapu ke wesi ku'wírako, abóniko chopi galá bichíiga buwé mapurigá Riosi ku'wírama aboni, ayénachó aboni sinibí rawé we tániga ra'ícha Riosi yuwa, sinibí rokogó ayénachó. Galá níima mapu echi jaré napawika bichíyami ku'wírasa echi jaré kunámami echirigá oláami.
\v 6 Chopi echi auché jaré kunámami mapu wepi chuwé ologá pireko mapurigá aboni chopi nakí olánala, abóniko abijí pirélaga, mapurigá ma suwíami niráa ju. Ketasi galá níima mapu echi jaré napawika bichíyami ku'wírama echirigá oláami kunámami.
\v 7 Mujé Timoteo ayénachó je'ná jerigá nulé echi jaré napawika bichíyami ritémtami, mapurigá aboni echirigá olama, ayénachó mapurigá ke wesi aboni wi'nijírami níima mapurigá ke nijéwami niráa.
\v 8 Mapujiti a jaré ketásirapé ku'wírasagá aboni níwala pagótami, a ketasi ku'wírasagá aboni 'wénawala kéremá, abóniko echirigá ologá ma ketasi galabé nirá echi galabé bichíilawami. A'lí echirigá oláami waminabi wabé simírami chati sitíi oláami níima, ketasi mapurigá echi jaré ke bichíyami.
\p
\v 9 Galá níima mapu echo'ná ibílana napawika bichíyamichi, echi jaré ritémtami biléana oselichi ro'wasa si'néami echi jaré muguí kunámami riwalá mapu ikí narémako echi ko'wáami, mapu echi jaré napawika bichíyami ritémtami 'yama isena rawé niráa. A'lí galá níima mapu echo'ná oselichi chopi ro'wárami níisa echi jaré muguí kunámami riwalá mapu ikí ma usansa makói bamíbami juko, si'néami mapu ikí chopi bilepi rijói yuwa kunéami níiliko.
\v 10 Ayénachó galá níima mapu echo'ná oselichi chopi ro'wárami níisa echi jaré muguí kunámami riwalá mapu galabé oláami níiliko, echi jaré mapu ma galá ochébanali aboni kúchuwala, ayénachó echi jaré mapu galá nareli auché jaré pagótami echo'ná aboni pirélachi, ayénachó echi jaré mapu galá, ke nóchaga, ku'wíraliko echi auché jaré ritémtami bichíyami, ayénachó echi jaré mapu galá ku'wírali echi auché jaré mapu ne wabé risúu níili, ayénachó echi jaré mapu galabé oláami níiliko mapuyíripi oluwáwami mapu ikí aboni olali.
\p
\v 11 Chopi ketasi galá níima mapu echo'ná oselichi ro'wárami níisa echi auché jaré muguí kunámami riwalá mapu ikí ketasi cho sébami juko usansa makói bamíbali, mapujiti siné káachi pe waminana echi jaré ke 'me 'wékami muguí kunámami waminá ariwema olayá mapurigá Jesucristo nakí mapu aboni galabé ologá pirélama. Echalí siné káachi aboni chopi nakimea chuwé ologá pirélanala, ayénachó aboni auchecho siné nakimea kunénala.
\v 12 Echalí echiyiri muguí kunámami chati sitíi oláami niráa níima, mapujiti ma ariwesa olayá mapurigá aboni bichíwaga anili mapu abóniko chopi Jesucristo nóchala ologá pirélama, echalí aboni chopi chokila níima.
\v 13 Ayénachó a echi jaré muguí kunámami chopi wikanáami bitichí 'yénsagá, echalí siné káachi aboni ne wabé nasínami nílama, ayénachó sití ra'íchaga ruyami nílama, ayénachó wikabé namuti nakimea olánala mapu ketasi risensia ju mapu aboni olama, ayénachó wikabé namuti ra'icháma mapu ketasi galá ju.
\v 14 Echijiti nijeni chopi nakí mapu echi jaré kunámami, ke 'me 'wékami, auchecho siné kunema, mapurigá aboni galá kúchalama, ayénachó mapurigá aboni níwama aboni kalila, ayena mapurigá aboni sinibí galabé oláami níima, mapurigá echi jaré mapu tamujé tamí sayérami ju ketásirapé omérama sayériga ra'ícha.
\v 15 Mapujuti jaré muguí kunámami ma ariweli echi Walubela Jesucristo yuwa najata. A'lí aboni ma auchecho siné nijéwaga olali mapurigá echi Satanasi riwéami riablo nulá.
\p
\v 16 Chopi mapuyíripi galá bichíyami níwasagá bilé mukí kunámami, arigá galá níima mapu binói galá ku'wírama. Echalí ketasi arigá 'wérali níima mapu si'néami echi auché jaré napawika bichíyami ku'wírama, chopi aboni galá omérama ku'wíriya echi auché jaré kunámami mapu ikí ne bichíwali a'wínali tibíliko.
\p
\v 17 Ne wabé galabé niráa nilasi si'néami echi jaré o'wéala ochérami bichíyami mapu galá machiko galá nuleya echi auché jaré napawika bichíyami ritémtami. Chopi waminabi 'wérali ju máputamo galabé nílabo echi jaré mapu we nocha Riosi Ra'íchala nawésaga binériya.
\v 18 Ayénachó galá níima mapu aboni galá kóorami níima, mapujiti echo'ná Riosi nulalila oselíwalachi je'ná jerigá osirúami ju: Ketasi chu'wajíwasi echi jaré boisi mapalí moba rimisoka 'yena wikabé turío napabuka achárami mosiya. Galá níima mapu pe táa ko'mea. A'lí echijiti ayénachó galá níima mapu echi jaré o'wéala ochérami kóorami níisa, mapujiti ayénachó je'ná jerigá osirúami ju: Galá níima natétarami níisa ibili rijói mapu ikí we nocha.
\p
\v 19 Ketasi bichiwi mapalí bilepi rijói chopi mi ruyéeko, bilé walula ochérami bichíyami rijói wi'nijiga. Chopi ayena galá bichiwi mapalí okuá rijói chópirigá, a'nawí anisáagá, bakiyá kéremá.
\v 20 Chopi echo'ná bacháami si'néami echi auché jaré napawika bichíyami yuwa, ne galá oyeri echi jaré o'wéala ochérami mapu echirigá waminabi chati sitíi olísamiko, mapurigá echi auché jaré bichíyami ayénachó we majama chati sitíi olayá.
\v 21 Jipi rawé mapalí Riosi tamí galá ritiwá, ayénachó mapalí Jesucristo tamí galá ritiwá, ayénachó mapalí echi jaré o'wéala Riosi kapitánawala tamí galá ritiwá, jipi rawé nijeni mi ne wabé nulé mápumi sinibí je'ná jerigá nijéwaga olama, ayénachó mápumi sinibí ne si'néami pagótami chopi a yiri nílama.
\v 22 Ketasi we yáati niráa jawá auché jaré mapurigá o'wéala ochérami niráa, echi auché jaré napawika bichíyami yuwa. Chopi buwé mapuyénasími ne galá machimea churigá oláami ju aboni. Ke siné waminá wi'nijírami nili mapujítimi wilali pe bilé chati sitíi oláami rijoí, mapurigá walula niráa echi jaré napawika bichíyami yuwa. Ayénachó sinibí ne wabé galabé olá mujé binói niráa.
\p
\v 23 Jipi jonsa ketasi waminabi chopi bají echi ba'wí, mapujítimi echijiti wisabé we nawilú ropachí, ayénachómi ketasi jiwera. Si'winárigá galá níima mápumi ayénachó pe táa bajisa echi uva ba'wila.
\p
\v 24 Ketasi echirigá we yáati jawá jaré ritémtami mapurigá o'wéala ochérami niráa, mapalimi ketasi cho machí acha galá oláami ju. Jaré pagótami chati sitíi olalila ma galá machirúami ju, ne si'néami echi auché jaré pagótami jiti. Echijiti mujemi galá omérama machiyá mapu aboni chati sitíi oláami ju. A'lí auché jaré pagótami chati sitíi olalila ketasi cho machirúami ju, chopi siné káachi, ke 'me ayó ne suwaba galá machiná niráa machirúami níima.
\v 25 Ayénachó achigórigá echi jaré pagótami galabé olalila ma galá machiná niráa machirúami ju. Chopi a aboni galabé olalila ketasi cho machirúami níisagá, siné káachi ke 'me ayó suwaba galá machirúami níima.
\c 6
\p
\v 1 Arigá 'wérali ju mapu echi jaré pióntami galá bichíyami ne galá nijéwaga olama mapurigá aboni o'wéalawala nulé, mapurigá echi jaré o'wéala ketasi sitila anema 'yemi Riósawala Riwalá, nibilé cho sitila anema mapu tamujeta galá bichíi, jeanigá mapu 'yemi galá bichíyami pioni ketasi galabé olá.
\v 2 A'lí a jaré 'yemi galá bichíyami pióntami nulérami níisagá jaré o'wéala jiti mapu ayénachó galá bichíyami ju Jesucristo niráa, echalí ketasi galá níima máputamo kichibo 'yemi o'wéalawala. Ke bilé cho mayesi mapu aboni ketasi galá bichíyami ju Jesucristo niráa. Chopi galá níima máputamo waminabi wabé galá nochasa echi jaré 'yemi o'wéalawala yuwa, mapujiti echi jaré 'yemi o'wéalawala ayénachó galá bichíyami ju, ayénachó aboni wabé galérami ritémtami ju. Nijeni mi nulé, mujé Timoteo, mápumi sinibí je'ná jerigá binérama, ayénachó mápumi je'ná jerigá ruwigá nawisama.
\s Echi galabé bichíilawami
\p
\v 3 Chopi a bilé rijói 'yékaka binérasagá echi mapu ketasi bichíwali ju, echalí échiko ketasi chopi a yiri binera mapurigá tamujé Walubélawala Jesucristo sinibí galá ra'íchaga binérali, nibilé cho mapurigá tamujeta ne galá bichíi, nibilé cho mapurigata ne galá bichíiga binera echi jaré pagótami.
\v 4 A'lí echiyiri rijói ne wabé nóchami ju, ayénachó tarapé galá machíami ju, chopi wikabé namuti we chuwé ra'íchami ju. A'lí echiyiri ra'íchali ketasi galá ju, mapujiti mapalí echi pagótami echirigá ra'ícha, echalí aboni chopi wabé korúkami nílama, ayénachó aboni wabé sayéraga ra'íchami nílama, ayénachó chati 'nátami nílama, a'lí aboni ayénachó chati sitíi oláami mayema si'néami echi auché jaré pagótami.
\v 5 Ayénachó mapalí echi jaré pagótami echirigá 'nátami ju, echalí aboni sinibí a'nagupi nakichiga nakówami nílama, mapujiti aboni ketasi wachínaga 'nátami níima. Ayénachó aboni ketasi machimea echi ne bichíwali. A'lí aboni chopi binérama mapurigá aboni chopi bichíi, mapujiti aboni ne wabé nakimea ménala wenomí. Mujé Timoteo, ketasi yuwa iná echi yiri pagótami.
\v 6 Ne bichíwali ju mapu echi jaré pagótami mapu ikí galá bichíyami ju Riosi, ne sulachí niráa, ketasi ne bichíwali newaléami ju, mapujiti aboni ne wabé níwami ju kanílawami, mapalí aboni arigá tarapebi yiri níwami ju echi auché jaré namuti jena'í wichimóbachi nirúami. Echirigá ju mapu echi jaré mapu ikí galá bichíi Riosi ne galá kanila echi jaré namuti jiti mapu ikí aboni ma niwa jena'í wichimóbachi.
\v 7 Mapujiti tamujeta tarapebi yiri namuti pali mapalita ranarúami níili jena'í wichimóbachi. Nirapé omérabo ku toyá jaré namuti mapalita ma suwiboa jena'í wichimóbachi.
\v 8 Chopi ayénata níwasagá echi ko'wáami máputa kopoa, ayénachó níwasagá máputa galá napachabo, galá níima máputa echijiti ne galá kanílabo.
\v 9 Chopi echi jaré pagótami mapu simírami wikabé karúmati namuti níwanaliko, abóniko arigá chati sitíi olá, mapujiti aboni chopi nakí wikabé namuti jena'í wichimóbachi nirúami, a'lí ketasi bachá nakí Riosi níwala galabéala. Echijiti aboni mapurigá ke newalite niráa ju, mapujiti aboni ketasi nakí echi jaré namuti mapu ne bichíwali ku'wírama aboni, sinibí niráa. A'lí aboni suwaba 'wikama, ayénachó aboni walú kastigo 'yárami níima.
\v 10 Mapujiti jena'í wichimóbachi piréami pagótami karúmati chati sitíi olá chopi mapujiti aboni ne wabé simírami korú echi wenomí. A'lí jaré ma waminá ariweli bichiya echi ne Bichíwali, mapujiti aboni ne wabé simírami koruli echi wenomí. A'lí aboni echijiti ne wabé simírami o'monáratami níili sulachí niráa.
\s Galá níima mapu echi jaré bichíyami galá nakosa, echi chati sitíi oluwáwami sayéraga
\p
\v 11 Mujé Timoteo mápumi ma Riosi níwala ju, ariwé ne suwaba chati sitíi oluwáami. Sinibí ne galá wachínaga olá. Chopi galá 'natá echi Walubela Riosi. Ayénachó galá bichiwi Jesucristo, waminabi ne wabé galéami nílaka. Sinibí galá kilí ologá iyeni, tarapé aparúami niráa.
\v 12 Sinibí ne galá bichíiga mapurigá nikóaka olá suwaba chati sitíi oluwáwami sayéraga. Ne galá bichiwi mapurigami ne sinibí niráa bitélama. Echijiti Riosi Binói mi bayeli mapurigami galá bichíima. Ayénachó mujemi ma galá nawésali bacháami wikabé pagótami yuwa, mapurigami galá bichíi Jesucristo niráa.
\v 13 Echi Walubela Riosi ne galá machí mapurigá nijeni mi nulé, ayénachó Binói ju mapu galá iwita ne suwaba echi jaré namuti mapu ikí 'yena. A'lí echi Walubela Jesucristo ayénachó galá machí mapurigá nijeni mi nulé, a'lí Binói ayénachó ne galá nawésali echi mapu ne bichíwali ju, mapalí Binói pálati bacháami echi walula silíami Ponsio Pilato riwéami yuwa. Jipi nijeni mi ané,
\v 14 mápumi sinibí ne galá nijéwaga olama mapurigá nijeni mi nulé, mapurigá ke wesi omérama mi wi'nijiya mapuyénasí tamujé Walubélawala Jesucristo ku nawama jena'í wichimóbachi.
\v 15 Waminánomí mapalí ma galá sébachi ju, echi Walubela Riosi suwaba je'ná jerigá olama, mapujiti Binói bi'nélipi ju echi ne wabé Galabé Riosi, Suwaba Omérami, mapu galabé anérami níima ne si'néami pagótami jiti. Ayénachó Riosi echi ne Walubela Silíami ju, ne si'néami echi auché jaré o'wéala isélkami nuléami. Binói ne wabé simírami Walubela ju, ne si'néami echi auché jaré o'wéala yuwa.
\v 16 A'lí Riosi bi'nélipi ju mapu tarapé siné mukú. Ayénachó Riosi bité mapo'ná ne wabé simírami ratábami ju, mapo'ná ke wesi omero mulubéaniya Binói yuwa. A'lí ke wesi pagótami riwali Riosi, nirapé siné. Ayénachó ke wesi omero 'néniya echi Walubela Riosi. ¡Sinibí ne wabé walubélaga anérami nílaka Riosi! ¡Sinibí ne suwaba omérami nílaka Riosi! ¡Echirigá níima!
\p
\v 17 Mujé Timoteo galá nulé echi jaré wabé níwami pagótami jena'í wichimóbachi piréami mapu aboni tarapé nóchami níima. Ayénachó nulé mapurigá aboni ketasi mayema mapu aboni wabé ku'wíratami níima chopi mapujiti aboni wikabé namuti níwami ju. Siné káachi echi wikabé namuti aboni níwala ketasi sinibí niráa nirúlama. Si'winárigá we nulé mapu aboni chopi bichíima mapu aboni ku'wíratami níima echi Sinibí Bitéami Riosi jiti, echi mapu tamujé tamí ne wabé simírami 'ya suwaba namuti mapurigata echijiti ne wabé kanílabo.
\v 18 Ayénachó nulé mapu echi jaré wabé níwami pagótami ne wabé galabé olama, mapurigá aboni ayénachó ne wabé níwami níima echi galabé oluwáwami 'nalina. Ayénachó nulé mapu aboni ne galá 'yáami níima jaré namuti aboni níwala echi auché jaré we newaléami pagótami.
\v 19 A'lí aboni echirigá ologá wabé níwami níima echo'ná ripá riwigachi, mapurigá aboni echijiti galá pirélama pe waminánomí, ayénachó mapurigá aboni sinibí niráa ku pirélama Riosi yuwa.
\s Ne jubáami echi Pablo galá nulé echi Timoteo
\p
\v 20 Mujé Timoteo sinibí ne sébali olá mapurigá Riosi mi nuleli olánala. Ketasi bichiwi echi auché jaré wabé ra'íchami pagótami mapu ketasi bichíyami ju Riosi. Aboni chopi a'nagupi sayéraga ra'ícha, mapujiti jaré aboni ne wabé simírami machíami niráa mayé aboni niráa.
\v 21 A'lí auché jaré ma ariweli najátiya Riosi mapujiti aboni chopi nakili ne wabé machíami niráa nílabiya mapurigá echi jaré wabé ra'íchami pagótami mayé aboni niráa.
\p Nijeni chopi nakí mapu Riosi mi wabé ku'wírama mujé Timoteo. ¡Echirigá níima!