\id 2ti
\h 2 Timoteo
\mt2 Osá Osirúami
\mt2 mapurigá San Pablo oséli echi
\mt TIMOTEO
\c 1
\s Echi Pablo galá osé echi Timoteo
\p
\v 1 Nijé Pablo nimí osé, mápuni julárami níili Jesucristo Ra'íchala nawisánala, mapurigá Riosi Binói nakili. Nijeni julárami níili nawésanala si'néami pagótami mapurigá Riosi bichíwaga anili mapu si'néami pagótami mapu ikí bichíima Jesucristo niráa, ne sinibí niráa pirélama Riosi yuwa.
\v 2 Mujé Timoteo, nijé nimí je'ná jerigá osé, mápumi mapurigá nijé binói ranala niráa ju, mapu nijé nimí ne wabé galé. Nijeni ne wabé nakí mapu echi Riosi Onorúami mi wabé galigá natimama. Ayénachóni ne wabé nakí mapu Riosi Onorúami mi 'yama mapurigami ne galá kilí ologá bitélama. Ayénachóni ne wabé nakí mapu tamujé Walubélawala Jesucristo mi ayénachó echirigá 'yama.
\s Echi Pablo nulé echi Timoteo Jesucristo jiti nawisánala
\p
\v 3 Mapalini 'nata mujé jiti, echalini ne walú natétara 'ya Riosi, echi mapu nijeni ne galá bichíiga o'wiké, mapurigá nijé 'wénawala ayénachó o'wikeli echi Binói. Nijeni tarapé wi'nijírami niráa ju, nijé sulálachi niráa, mapujítini galá bichíi Riosi. A'lí nijeni walú natétara 'ya Riosi mapujítini sinibí rawé we 'nata mujé jiti, sinibí rokogó ayénachó, mapalini tániga ra'ícha Riosi yuwa.
\v 4 Nijeni sinibí we 'nata mapurigami nalaka ukuénali chabé mapalí nijé nimí ariweli. Echijítini ne wabé nakí auchecho siné mi 'nénala, mapurigani auchecho ne wabé kanílama.
\v 5 Ne sinibí nijeni we 'nata mapurigami ne wabé galá bichíi, achigórigá mapurigá mujé su'ulá, Loira riwéami, ne bachá niráa bichíili, ayénachó mapurigá mujé iyela, Eunise riwéami, ayénachó galá bichíili. A'lí nijeni galá machí mapurigá mujemi ayénachó ne galá bichíili.
\p
\v 6 Echijiti nijé nimí ané mapu we galá níima mápumi auchecho siné we nílama Riosi nóchala olayá, mapurigami we nílaka olali chabé chokichí mapalimi bachá niráa julárami níili Riosi Ra'íchala nawisánala, mapalí nijé nimí echijiti wilali mapalini moba mujé mo'ólachi nocháli nijé sikala.
\v 7 Mapujiti Riosi ketasi tamujé tamí 'yali mapurigata ne wabé majabo. Chopi Riosi tamujé tamí wabé jiwératali Binói Iwigala jiti, mapurigata wabé galéami níibo, ayénachó mapurigata ketasi chuwé olabo.
\v 8 Echijiti ke siné riweli tamujé Walubélawala Jesucristo jiti nawésiya. Nirapé cho riweli tamí jiti, chopi mapujiti nijeni pachá bachárami ju mapujítini bichíi Jesucristo niráa. Si'winárigá sinibí we galá anácha mapalimi arigá echijiti risúu olárami ju mapujítimi nawésa Riosi Ra'íchala, mapurigá Riosi Binói sinibí mi galá jiwérata mapurigami echirigá galá anachama.
\v 9 A'lí Riosi tamujé tamí ku wikáwali mapurigata chati sitíi olali. A'lí Binói tamujé tamí bayeli mapurigata ne galabé ologá pirélabo mapurigá Binói nakí. Chopi Riosi ketasi echirigá olali chopi mapujiti tamujé, siné káachi, ne galabé oláami níili. Echalí Riosi chopi tamujé tamí echirigá bayeli mapujiti Binói echirigá nakili olánala, mapujiti Binói tamujé tamí wabé galeli máputa bichíibo riwéali Jesucristo niráa. A'lí Riosi arigá tamujé tamí ne wabé galeli ki'yá chokichí jonsa mapalí je'ná kawí ketasi cho niwárami níili.
\v 10 Chopi jipi Riosi tamujé tamí galá machírali mapurigá Binói tamujé tamí ne wabé galé, mapujiti Binói ma ku'wíramiya júuli echi tamujé Walubélawala Jesucristo jena'í wichimóbachi. Echi Walubela Jesucristo tamujé tamí ku Wikáwami ju. A'lí Jesucristo wabé omériga olali mapurigá echi mukuwáwami ma ketasi tamujé tamí omérama. Ayénachó Binói tamujé tamí galá machírali mapurigata omérabo sinibí niráa piréliya Riosi yuwa, ata galá bichíisagá echi wabé Galabé Riosi Ra'íchala.
\p
\v 11 A'lí echi Walubela Riosi tamí wilali mapurigani nawésami níima je'ná Galabé Ra'íchali. Ayénachó Riosi tamí júuli mapurigani nawésaga binérama echi jaré pagótami mapu ketasi Juríosi ju.
\v 12 Echijiti nijeni risúu olárami ju jena'í pachá bachárami niráa, chopi nijeni ketasi riwela mapujítini galá machí Chigá nijeni galá bichíi. Ayénachó nijeni galá bichíi mapu echi Walubela Jesucristo ne wabé omérami ju tamí tibútiya echalí ne jubá rawé yénasi.
\p
\v 13 Ne galá bichiwi mujé Timoteo achigórigá mapurigá nijé nimí binérali echi wabé Galabé Riosi Ra'íchala. Sinibí galá bichíiga olá. Ayénachó ne wabé galéami nili mapujiti Jesucristo sinibí tamujé tamí 'ya máputa we galéami níibo mapalita galá bichíi Binói niráa.
\v 14 Echi Walubela Riosi ma mí galá 'yali mapurigami omérama nawésiya Binói Ra'íchala. Sinibí ne galá tibuta echi wabé galabéala mapu Riosi mí ma galá 'yali. A'lí echi wabé Galabé Riosi Iwigala mapu pachana tamujé yuwa bité, Échiko sinibí mi ku'wírama.
\p
\v 15 Mujemi ma galá machí mapurigá si'néami echi jaré ritémtami echo'ná Ásiachi anilíwachi kawírali piréami, ma tamí ariweli. A'lí echi auché jaré yuwa, echi Jijelo riwéami rijói ayénachó tamí ariweli, echi Emójene riwéami rijói ayénachó.
\v 16 Nijeni wabé nakí mapu echi Walubela Riosi ne galá natimama si'néami mapu ikí echo'ná echi Onesíjoro riwéami rijói bitélachi piréami ju, mapujiti echi rijói wisabé tamí iwébanali sulachí niráa, mapalini jena'í pachá bachárami níili, ayénachó binói ketasi riwéali mapujítini pachá bachárami níili.
\v 17 Chopi si'winárigá mapalí echi Onesíjoro jena'í Rómachi asali, echalí binói 'wérali ologá, tamí áli, mapuyénasí binói galá tamí riwali.
\v 18 Nijeni ne wabé nakí mapu echi Walubela Jesucristo ne galá natimama echi Onesíjoro, mapurigá binói ne galá ku'wíratami níima echalí ne jubá rawé. Mujé Timoteo, galá machí mapurigá echi Onesíjoro tamujé tamí ne wabé ku'wírali chabénala mapalí tamujeta echo'ná Ejésochi muchili.
\c 2
\s Echi Timoteo nulérami níili galabé olánala mapurigá bilé galabé oláami sontarsi, Jesucristo sontársawala
\p
\v 1 Mujé Timoteo mapurigá nijé binói ranala niráa jumi. Ne wabé galéami nili sulachí niráa, achigórigá mapurigata ne wabé galérami ju mapujítita napawíkami ju Jesucristo yuwa.
\v 2 A'lí achigórigá mapurigami galá kipuli tamí nawésachi Riosi Ra'íchala, echi jaré wikabé pagótami, jipi echirigá ayénachó nawisánala julá auché jaré bichíwaga oláami ritémtami mapu mujemi mayé ne bichíwali omérama nawésiya auché jaré pagótami.
\p
\v 3 A'lí galá níima mapu mujemi galá anachama mapalimi risúu olárami ju mapujítimi nawésa Jesucristo jiti rugá. Echirigá ne galá anachá, mapurigá bilé galabé oláami sontarsi, Jesucristo sontársawala niráa.
\v 4 A'lí ke wesi sontarsi wabé nílaka nocha auché jaré si'nú nóchali olayá. Si'winárigá ne si'néami echi jaré sontarsi chopi galá nijéwaga olá mapurigá sontarsi niráa, achigórigá mapurigá aboni walúlawala nakí.
\v 5 Echirigá achigórigá echi mapu ralajípako chopi galá mé mapalí binói ne sébali galá ologá 'mawá mapurigá nulérami níili.
\v 6 Ayénachó galá níima echalí 'wíwachi mapu echi mapu icháliko ne bachá naresa binói níwala 'wíwami.
\v 7 Ne galá 'natá mujé Timoteo mapurigá nijeni mí je'ná jerigá aneli. A'lí echi Walubela Jesucristo mí galá machírama ne suwaba.
\p
\v 8 Sinibí galá 'natá echi Walubela Jesucristo jiti, echi mapu echi walula silíami Rabiri riwéami kúchala kúchuwala niráa níili, echi mapu auchecho ku owínali mapalí ma mukúami níili. Nijeni sinibí je'ná jerigá ruwigá nawésa, mapalini nawésa Riosi Ra'íchala, mapurigá echi jaré pagótami ku wikáwarami níima.
\v 9 Echijiti mapalini risúu olárami ju mapujítini nawésa je'ná Galabé Riosi Ra'íchala, echalini sinibí galá anácha. Ayénachó nijeni abijí galá anácha mapalini bulérami ju bilé jiero wiya jiti, mapurigá bilé wabé chati sitíi oláami niráa. Chopi echi Galabé Riosi Ra'íchala tarapé mapurigá bulérami niráa ju, echi jiero wiya jiti, mapujiti si'néami pagótami mapu ikí bichíimako ne galá ku wikáwarami níima.
\v 10 Ayénachó nijeni echijiti arigá anácha mapalí nijeni risúu olárami ju, mapujítini we galé echi jaré mapu ikí Riosi ma chapili mapurigá aboni ku wikáwarami níima Jesucristo jiti. A'lí Riosi ayénachó chapili aboni mapurigá aboni ne wabé o'wéalatami níima, ayénachó mapurigá aboni sinibí niráa wabé kanílaga ku pirélama echo'ná ripá riwigachi. A'lí si'néami tamujé bichíyami echirigá 'yárami níibo mapujítita galá bichíi Jesucristo niráa.
\p
\v 11 Je'ná ra'íchali ne bichíwali ju:
\q A tamujeta ma ko'wirúami niráa níisagá mapujítita bichíi Jesucristo niráa, a'lí tamujeta ayénachó auchecho siné ku pirélabo Binói yuwa.
\q
\v 12 A tamujeta risúu olárami níisagá mapujítita bichíi Jesucristo niráa, ayénachóta Binói yuwa jawárami níibo mapurigá o'wéala niráa, mapujiti Jesucristo Binói ne wabé Walubela Silíami ju.
\q Chopi ata jeanisáagá máputa ketasi machí Binói Jesucristo, echalí Binói ayénachó jeanimea mapu Binói ketasi cho tamujé tamí machí.
\q
\v 13 Chopi a tamujeta ketasi galá bichíisasagá, echalí echi Walubela Jesucristo arigá sinibí niráa ne wabé bichíwaga olísiami níima, mapujiti Riosi sinibí wabé bichíwaga oláami ju.
\q A'lí Riosi ketasi omero Binói niráa 'yékaka aniyá.
\s Echi Pablo nakili mapu echi Timoteo bilé wabé galá oláami nóchami níima Jesucristo nóchala olayá
\p
\v 14 Mujé Timoteo je'ná jerigá ne galá machili echi auché jaré pagótami. Ayénachó ne galá ruyé mapurigá aboni ketasi wikabé ra'íchaga a'nagupi na'áwama. Je'ná a'nagupi na'áwaga ra'ichálawami tarapé galá ju. Siné káachi echi auché jaré mapu ikí nami echirigá ra'ichálawami sití cho 'natama.
\v 15 Ne wabé 'wérali olá mujé Timoteo mapurigá Riosi nakí mápumi olama, Binói nóchala olayá, mapurigami ketásirapé riwélama, chopi mapurigami galá machimea nawésiya echi ne bichíwali Galabé Riosi Ra'íchala.
\v 16 Ke siné chuwé ra'ichá mujé, mapurigá auché jaré jena'í wichimóbachi piréami we ra'ícha, mapujiti echi jaré pagótami echirigá ra'íchaga chopi waminabi ne wabé chati sitíi olásimi.
\v 17 A'lí aboni binélawala wabé chati sitíi olila echi auché jaré pagótami, mapurigá biléana wabé chati cháanami niráa, mapo'ná waminabi ne wabé cháansimi. A'lí echi Imeneo riwéami rijói echirigá we binera, echi Jileto riwéami ayénachó.
\v 18 Aboni ma ariweli echi ne bichíwali, mapujiti aboni we binéraga nawésa jeanigá mapu echi jaré suwíami ketasi auchecho siné ku o'wínama. A'lí aboni echirigá nawésaga, chopi olá mapurigá auché jaré ma ketasi waminabi bichíima echi ne Bichíwali.
\v 19 Ne wabé bichíwali ju echi Galabé Riosi Ra'íchala. A'lí echo'ná Riosi Ra'íchala oselíwalachi je'ná jerigá osirúami ju: Echi Walubela Riosi galá machí mapu chigá ju Binói níwala pagótami. Ayénachó je'ná jerigá osirúami ju: Waminá ariwesi chati sitíi olayá, ne si'néami 'yemi máputamo Jesucristo níwala ju.
\p
\v 20 Mapujiti echo'ná biléana walubé kalírali nirúlama jaré bitoli echi wabé natéami oro jiti niwárami, ayénachó nirúlama jaré bitoli, plata jiti niwárami. A'lí echo'ná ayénachó nirúlama jaré kusí niwárami bitoli, ayénachó nirúlama jaré wicholí niwárami bitoli. A'lí jaré echi bitoli ro'wárami níima echi we galabéala namuti, chopi auché jaré ro'wárami níima echi wabé sitíala namuti.
\v 21 A'lí a bilé rijimala nakisáagá mapu binói galá nirárami níima, echi Walubela Jesucristo jiti, ne galabé oláami niráa Riosi nóchala olayá, echalí arigá 'wérali ju galá bi'wíami niráa bitélasa mapurigá Riosi nakí, ketasi chati sitíi oláami niráa. Echalí echiyiri rijimala mapurigá bilé bitoli ne wabé galabéala ro'wárami niráa níima. A'lí echiyiri rijimala galá omérama olayá suwaba galabé oluwáwami.
\v 22 Ketasi chuwé chati sitíi ologá biteli, ketasi mapurigá jaré ri'malí olá. Chopi sinibí galá wachínaga ologá biteli. Sinibí waminabi galá bichíyami nílaka Riosi. Ne wabé galéami nili. Ayénachó sinibí galá kilí ologá biteli mapurigá sinibí olá echi jaré mapu ikí galá bi'wíami suléami juko, echi jaré mapu sinibí tániga ra'ícha echi Walubela Riosi yuwa.
\v 23 Ketasi nijewi mujé mapalí auché jaré a'nagupi ra'ícha mapurigá ke newalite niráa, mapujítimi galá machí mapu echirigá ologá, aboni chopi waminabi na'áwaga nakichima a'nagupi.
\v 24 A'lí ketasi galá níima echirigá wabé yoka inasa mujé, mapujítimi echi Walubela Riosi piónawala niráa ju. Si'winárigá galá níima mápumi ne wabé galéami níima, si'néami echi auché jaré pagótami. Ayénachó galá níima mápumi galabé binériami níima Riosi Ra'íchala, ayénachó mápumi galá anáchami níima mapalí auché jaré mi wabé kumé.
\v 25 Galá níima mápumi kilí ologá ruyema echi jaré mapu wabé sayérami ju Riosi Ra'íchala, mapurigá aboni ma ketasi echirigá olama. A'lí siné káachi pe waminana Riosi galá bichíiratama aboni, mapurigá auchecho ku ro'wiga, aboni galá bichíima echi ne Bichíwali.
\v 26 Echalí aboni galá ku 'natama. A'lí aboni echijiti auchecho ku botonárami niráa níima, mapujiti jipi aboni mapurigá bulirúami niráa ju, echi riablo jiti. A'lí echi riablo chopi olá aboni yuwa, mapurigá binói nakí olánala.
\c 3
\s Echalí ne jubá rawé jena'í wichimóbachi piréami pagótami ne wabé chati sitíi oláami níima
\p
\v 1 Ayénachó galá níima mapu mujé Timoteo galá machimea mapu echalí wabé waminánomí rawé si'néami mapu ikí galá bichíiko Riosi ne wabé risúu olárami níima.
\v 2 Mapujiti echi auché jaré ke bichíyami pagótami chopi a aboni niráa galéami níima. Aboni ne wabé korúkami níima echi wenomí. Ayénachó aboni ne wabé o'wéalatama a aboni niráa. A'lí aboni ne wabé nóchami níima. Ayénachó aboni ne wabé sayéraga ra'íchama Riosi. Ayénachó aboni ketasi nijéwami níima aboni 'wénawala. A'lí aboni ketasi nakimea natétara ayá. A'lí aboni ketasi galá niráma echi bichíilawami mapurigá auché jaré pagótami ne galá bichíima.
\v 3 Echalí wabé waminánomí rawé echi jaré ke bichíyami pagótami ketásirapé galéami níima. Aboni ketasi ku wikáwama echi jaré aboni sayela. A'lí aboni ne wabé sití ra'íchami níima. Ayénachó aboni wabé jobátami níima. A'lí aboni ne wabé sayérami níima suwaba galabé oluwáwami.
\v 4 Echalí rawé echi jaré ke bichíyami pagótami a'nagupi wi'nijíami níima, ayénachó aboni chuwé ke 'nátaga oláami níima, ayénachó echi jaré ke bichíyami pagótami, aboni niráa, ne bachá o'wéala niráa mayema. A'lí aboni ne wabé nakimea olánala mapurigá aboni kanílaga olá, chopi aboni ketasi nakimea bichíinala Riosi.
\v 5 A'lí echi jaré ke bichíyami pagótami arigá ne wabé amachíami níima, chopi aboni ketasi machimea mapu Riosi ne wabé omérami ju galabéala ku niwayá echi pagótami.
\p Chopi mujé Timoteo, ketasi siné yuwa iná echiyiri pagótami.
\v 6 Mapujiti jaré je'ná jeyiri rijói echo'ná jaréana kalírali mo'wisáa, ne wabé 'yékaka ané echi jaré ne wabé chati sitíi oláami muguí, ke newalite, echo'ná piréami.
\v 7 A'lí je'ná jeyiri muguí sinibí niráa we bineka kipugú, chopi aboni ketasi galá omero machiyá echi ne Bichíwali.
\v 8 Chabé ki'yá echi okuá rijói sukurúami, echi Jánesi riwéami, echi Jámberesi riwéami yuwa, ne wabé sayérali echi walula Moisesi mapu Riosi jiti julárami níili. Jipi rawé echi jaré chati sitíi oláami rijói echirigá achigórigá ne wabé sayérami ju echi ne Bichíwali. Ayénachó aboni ne wabé chati 'nátami ju, tarapé bichíyami Riosi niráa.
\v 9 Chopi echi jaré chati sitíi oláami rijói arigá ketasi omérama olayá mapurigá wabé wikabé auché jaré ayénachó ketasi bichíima Riosi niráa, mapujiti ne si'néami echi auché jaré pagótami ne galá machíratami níima mapu echi jaré chati sitíi oláami rijói ke newalite ju, achigórigá mapurigá echi Jánesi, echi Jámberesi ayénachó machirúami níili mapurigá ke newalite niráa.
\s Ne jubáami niráa, echi Pablo ruyeli echi Timoteo mapu ne wabé galabé olama
\p
\v 10 Chopi mujé Timoteo ne galá nijéwaga olali mapurigá nijeni nawésaga binérali. Ayénachómi galá ologá bitéali mapurigá nijeni olali. Mujemi sinibí galabé olánali achigórigá mapurigá nijeni galabé olali. Ayénachómi galá bichíili mapurigá nijeni bichíi. Ayénachómi kilí ologá binérali echi auché jaré achigórigá mapurigá nijeni olali. Ayénachómi galá galéami níili mapurigá nijeni wabé galéami níili. Ayénachómi galá anáchali
\v 11 mapalimi risúu ologá a'najátarami níili, ayénachó mapalimi ne wabé risúu olárami níili echi auché jaré ke bichíyami pagótami jiti. A'lí mujemi ma galá machí mapurigá nijeni ikili echo'ná Antiokíachi, echo'ná Ikóniachi ayénachó, echo'ná Lístrachi asíchiko, mapurigani ne wabé risúu ologá a'najátarami níili, chopi echi Walubela Jesucristo sinibí tamí galá ku'wírali.
\v 12 A'lí ne si'néami echi jaré bichíyami pagótami mapu ikí sinibí nakiko chopi galabé ologá pirélanala mapurigá Jesucristo nakí, abóniko arigá kichiga a'najátarami níima.
\v 13 Chopi echi auché jaré chati sitíi oláami pagótami, echi jaré wabé 'yékami ayénachó, si'néami waminabi nokuísama waminabi ne wabé chati sitíi olayá, ne wabé 'yékaka echi auché jaré pagótami, ayénachó wabé 'yékarami níilasagá echi auché jaré jiti.
\p
\v 14 Chopi waminabi galá bichíiwi mujé Timoteo, mapurigami ma galá bineli Riosi Ra'íchala, mapujítimi galá machí mapu Riosi Ra'íchala ne bichíwali ju. Ayénachómi galá machí mapu chigá mi binérali echi Galabé Riosi Ra'íchala.
\v 15 Galá 'natá mapurigami táaka jonsa galá machili echi We Galabé Riosi Ra'íchala osirúami, echi mapu ne wabé omérami ju galá machíriya echi jaré pagótami, mapurigá aboni galá ku wikáwarami níima mapalí aboni galá bichíima Jesucristo niráa.
\v 16 Chabé ki'yá Riosi galá 'natárali jaré galabé oláami rijói mapurigá aboni osimea Riosi Ra'íchala achigórigá mapurigá Riosi Binói binérali aboni osayá. Echijiti ne suwaba Riosi Ra'íchala osirúami wabé galá ju tamujé tamí ne wabé galabé niráa binériya. Ayénachó Riosi Ra'íchala tamujé tamí oyérami ju mapalita ketasi galá bichíi. Ayénachó Riosi Ra'íchala tamujé tamí galá ruyé mapurigata ketasi waminabi chati sitíi olabo. A'lí Riosi Ra'íchala ayénachó galá binera echi jaré Riosi níwala pagótami mapurigá aboni omérama ne galá wachínaga ologá piréliya,
\v 17 mapurigá si'néami Riosi níwala pagótami galá omérama olayá karúmati galabé oluwáwami.
\c 4
\p
\v 1 Waminánomí rawé echi Walubela Jesucristo ne wabé Walubela niráa ku nawama, justicia olámiya ne si'néami pagótami yuwa mapu ikí abijí piréami níima jena'í wichimóbachi, ayénachó ne si'néami echi jaré mapu ma suwíami níima. A'lí echi Binói Walubela Jesucristo galá machí mapurigani aní, ayénachó Riosi Onorúami galá machí mapurigani aní mapalini ne wabé mi nulé
\v 2 mapurigami galá nawisama echi Galabé Riosi Ra'íchala. Ne sinibí galá bichíiga nawesi mapalí galá nílatirikó, ayénachó mapalí ketasi galá nílatirikó. Ne galá machili echi jaré pagótami mapu aboni chati sitíi oláami ju. Ayénachó galá nawésaga oyeli echi jaré chati sitíi oláami. A'lí galá nawésaga ruyé echi jaré bichíyami, sinibí ne galá kilí niráa binéraga echi jaré aboni.
\v 3 Mapujiti pe waminánomí rawé jena'í wichimóbachi piréami pagótami ketasi risensia 'yama mapurigá aboni waminabi nawésarami níima echi Galabé Riosi Ra'íchala. Si'winárigá aboni chopi nakimea jaré pagótami ra'íchala námanala, mapurigá aboni chopi chuwé niráa 'nata. Echalí echi jaré pagótami chopi bayema echi jaré nawésami mapu ikí echirigá nawésaga, risensia 'yama mapurigá echi pagótami olama mapurigá aboni chopi nakimea olánala.
\v 4 Echalí echi jaré pagótami ma ketasi nakimea kipúnala echi ne Bichíwali. Chopi aboni ne wabé nakimea echi pagótami irétawala kipúnala.
\v 5 Chopi mujé Timoteo, sinibí ne galabé wachínaga 'natá. Sinibí galá anachá mapalimi risúu olárami ju. Sinibí galá nawesá echi Galabé Riosi Ra'íchala. Ne sébali galabé olá mapurigá Riosi mi nuleli.
\p
\v 6 Mapujiti ke 'me ayó nijeni ma mi'lirúami níima mapujítini bichíyami ju Jesucristo niráa. Ma ne mulubé ju mapalini mi'lirúami níima.
\v 7 Mani ne sébali galá nikówali suwaba chati sitíi oluwáwami sayéraga. Mani ne sébali suwaba sunili nawésa Riosi Ra'íchala mapurigá bilé 'máami ma galá suní. Ne sinibí nijeni galá bichíili Riosi.
\v 8 Echijiti nijeni arigá narema echi ne wabé galabéala, echi mapu echi Walubela Jesucristo tamí 'yama echalí ne jubá rawé, mapujítini galá wachínaga ologá bitéali. A'lí echi Walubela Jesucristo sinibí ne galabé justicia oláami ju. A'lí Binói ketasi chopi tamí 'yama echi galabéala, chopi ayénachó 'yama ne si'néami echi jaré mapu ikí wabé galigá buweko mapu Binói ku nawama jena'í wichimóbachi.
\s Echi Pablo galá ruyé echi Timoteo
\p
\v 9 Mujé Timoteo 'wérali olá we yáati wakiná siminala tamí 'némiya.
\v 10 Mapujiti echi Rémasi riwéami rijimala ma tamí ariweli. Binói ne wabé simírami galeli echi jaré jena'í wichimóbachi nirúami namuti. Echijiti binói echo'ná Tesalónachi anilíwachi walúlachi simili. A'lí echi Kresente riwéami rijimala simili echo'ná Galákiachi anilíwachi kawírali. A'lí echi Tito echo'ná Ralmásiachi anilíwachi kawírali simili.
\v 11 Chopi echi Lúkasi bi'neli tamí yuwa atí. Wakiná bayera echi Márkosi mapalimi wakiná simea, mapujiti binói galá omérama tamí ku'wíriya, Riosi nóchala olayá.
\v 12 A'lí echo'ná Ejésochi júulini echi Tíkiko.
\v 13 Wakiná to echi nijé níwala wi'lí napacha mapalimi wakiná simea. Nijeni ariweli echo'ná Tróachi anilíwachi, echo'ná echi Karpo riwéami rijimala bitélachi. Ayénachó wakiná to echi jaré nijé níwala oselí. Chopi bachá niráa to echi jaré wichí osirúami.
\v 14 Echi Alejanto mapu jiero michoka niwáami ju karúmati, échiko tamí wabé sayérali. Echi Walubela Jesucristo ku natétama echi rijói, achigórigá mapurigá binói olali.
\v 15 Mujé Timoteo ayénachó a mujé binói niráa ne galá tibuti echi rijói jiti, mapujiti échiko chabé jonsa ne wabé sayérali mapu tamujeta nawésa.
\p
\v 16 A'lí chabénala mapalí nijeni bachá niráa ni'yúraga ra'íchali bacháami echi jaré igúsuwami yuwa mapujiti aboni tamí wi'nijili, echalí ke wesi echi auché jaré ritétami tamí ku'wírali, chopi ne si'néami tamí waminá bi'neli ariweli. Jipi nijeni ketasi nakí mapu Riosi echijiti waminabi wi'nijima aboni.
\v 17 Chopi echalí echi Walubela Jesucristo arigá tamí ne wabé ku'wírali. A'lí Binói tamí jiwératali mapurigani ne sébali nawésama echi galabé Riosi Ra'íchala, mapurigá ne si'néami echi auché jaré isena pagótami ayénachó galá kipuma. Echalí echi Walubela Jesucristo echirigá tamí ku'wírali mapurigani ketasi suwábarami níima mapurigá bilé wabé aparúami mawiyá wabé suwaba.
\v 18 Ayénachó echi Walubela Jesucristo sinibí tamí ku'wírama mapurigá echi wabé chati sitíi oluwáwami ketasi tamí omérama. Ayénachó Binói tamí tibútama mapurigani sebama echo'ná ripá riwigachi mapo'ná Binói we nulá mapurigá Walubela niráa. Galá níima mapu echi Walubela Jesucristo waminabi walubélaga anérami níisa sinibí niráa, ne sinibí. ¡Echirigá níima!
\s Echi Pablo ripóraga náwala auché jaré ritémtami
\p
\v 19 Mujé Timoteo galá ripori echi Priska riwéami mukí, echi binói kunala, Akila riwéami ayénachó. A'lí ayénachó galá ripori si'néami mapu ikí piré echo'ná echi Onesíjoro riwéami rijói bitélachi.
\v 20 Echi Erasto riwéami rijimala echo'ná Koríntochi aripili. A'lí echo'ná Milétochi ariwélini echi rijimala Trójimo riwéami mapujiti binói nayúami níili.
\v 21 Mujé Timoteo we sapú wakiná simí, ke cho romó níliachi. Echi rijimala Eúbulo riwéami ayénachó mi ripora, echi Purénsia riwéami ayénachó, echi Lino riwéami ayénachó, echi Kalária riwéami mukí asíchiko. Ne si'néami echi auché jaré ritémtami ayénachó mi galá ripora.
\p
\v 22 Nijeni nakí mapurigá echi Walubela Jesucristo mi yuwa asimea. Ayénachó mapurigá Riosi si'néami 'yemi mi ne wabé ku'wírama. ¡Echirigá níima!