\id phm
\h Filemón
\mt2 Osirúami
\mt2 mapurigá San Pablo oseli echi
\mt JILEMONI
\c 1
\s Echi Pablo oseli echi Jilemoni riwéami rijói
\p
\v 1 Nijé, Pablo, jena'í pachá bachara atí, mapujítini nawésali Jesucristo Ra'íchala. Jipi nimí je'ná jerigá osé, mujé Jilemoni riwéami, mápumi tamujé yuwa nóchami ju. Echi rijimala Timoteo ayénachó mi ripora. Tamujeta mi ne wabé galé.
\v 2 Ayénachóni osé echi auché jaré napawika bichíyami, si'néami mapu ikí sinibí napawiko echo'ná mujé bitélachi. Ayénachóni osé echi tamujé rijimala, echi Ápia riwéami mukí. Ayénachóni osé echi Arkipo riwéami rijói mapu achigórigá bichíiga nócha mapurigá tamujeta sinibí olá.
\v 3 Nijeni nakí mapu echi Walubela Riosi, tamujé Onolá, 'yemi mi ne wabé galigá ku'wírama, ayénachó mapurigá Riosi 'yemi mi 'yama mapurigátamo galá kilí ologá pirélabo. Ayénachóni nakí mapurigá echi Walubela Jesucristo echirigá 'yemi mi ku'wírama.
\s Echi Jilemoni ne wabé galéami níili, ayénachó ne galá bichíyami Riosi
\p
\v 4 Sinibí mapalí nijeni ra'ícha Riosi yuwa, echalini walú natétara 'ya mapujítini we 'nata mi jiti.
\v 5 Mapujiti mani námali mapurigá mujemi wabé galigá bichíyami ju echi Walubela Jesucristo niráa, ayénachó mapurigami wabé galé si'néami pagótami mapu ikí Riosi níwala ju.
\v 6 A'lí bicheni táni Riosi mapurigá echi auché jaré mapu ma galá bichíili mapujiti mujemi galá bichíyami níili, ayénachó ne galá machimea ne suwaba echi ne wabé galabéala mapu tamujeta níwa mapujítita galá bichíili echi Walubela Jesucristo niráa.
\v 7 Nijeni ne wabé kanili, ayénachóni waminabi jiwératami ju, sulachí niráa, mapujiti mujemi echirigá ne wabé galéami ju, ayénachó rijimala, mapujiti echi auché jaré ritémtami ma we kanílatami ju, mujé jiti, aboni sulálachi niráa.
\s Pablo táni mapurigá bilé pioni, Onésimo riwéami, galá ku'wíratami níima
\p
\v 8 A'lí mapujiti echi Walubela Jesucristo tamí júuli, Binói nóchala olánala, echijiti nijeni risensia níwa mapu nijeni mi nulema olánala mapurigá galá níima mápumi olama.
\v 9 Chopi si'winárigá nijé nimí wabé galigá táni mápumi echirigá olama. Nijeni mi echirigá risensia táni, mápuni ma ochérami ju. Ayénachó jipi nijeni pachá bachárami ju, mapujítini galá bichíi echi Walubela Jesucristo niráa.
\v 10 Perikó, nijeni nakí mápumi ku'wírama echi Onésimo riwéami rijói, echi mapu mujé piónawala níili. Échiko ma galá bichíili Jesucristo niráa, mapujiti nijeni galá nawésali echi Binói mapalí nijeni jena'í pachá bachara asali, echijiti binói mapurigá nijé ranala niráa ju.
\p
\v 11 Chabénala echi Onésimo, pióntami niráa níisa, ketasi galá ku'wíriami níili mi yuwa, chopi jipi binóima mi wabé galigá ku'wíriami ju. Ayénachó binói tamí wabé ku'wíriami ju.
\v 12 Jipi nijeni auchecho siné mi yuwa júla echi Onésimo. Nijeni nakí mapurigami galá narema échiko, achigórigá mapurigami sinibí tamí wabé galigá naré.
\v 13 Nijeni nakíimili mapurigá binói tamí yuwa tibima mapurigá binói sinibí tamí ku'wírama, mujé jiti, mapuyénasíni jena'í pachá bachara atí, mapujítini nawésali echi Galabé Riosi Ra'íchala.
\v 14 Chópini ketasi biyiri nakili olánala mapalimi ketasi cho tamí risensia 'yali, mapurigá ketasi arigá 'wérali níima mapurigami tamí ku'wírama, mapalimi siné káachi ketasi nakisá. Nijeni chopi nakí mapurigami tamí ku'wírama mapalí mujé binói we galá nakí.
\v 15 Mapujiti siné káachi echi Onésimo mi ariweli pe téeli niráa, mapurigá jipi jonsa echi binói sinibí niráa mi yuwa níima.
\v 16 Chopi binóima ketasi mapurigá pióntami niráa níima. Si'winárigá echi binói mapurigá mujé rijimala niráa ju, ne wabé galérami. A'lí echirigá ne wabé simírami galabé ju. Nijeni ne wabé galé echi Onésimo, nijé rijimala niráa, chopi galá níima mapu mujemi waminabi ne wabé simírami galema echi binói, mapujiti mujé piónawala ju, ayénachó mapujiti echi binóima mapurigá mujé rijimala niráa ju, mapujítitamo okuánika galá bichíyami ju echi Walubela Jesucristo niráa.
\p
\v 17 A'lí a mujemi mayésagá mapu nijé binói mapurigá mujé panérawala ju, galá ku naré echi Onésimo, achigórigá mapurigá mujé sinibí we galigá tamí naré.
\v 18 A'lí ami mayésagá mapu echi Onésimo mi wabé chati sitíi olali, ami mayésagá mapu échiko mi wiké bilé namuti kéremá, tamí 'nalí bujé ne suwaba.
\v 19 Nijé, Pablo, nimí je'ná jerigá osé, nijé binói sikala jiti. Nijé nimí ku natétama ne suwaba. Chopi nijeni omérama mi 'natáratiya mapurigá chabénala mujemi bichíili Jesucristo niráa mapalí nijeni mi nawésali. Echijiti mujé binói ayénachó tamí wikéami niráa jumi, mapujiti jipi mujemi galá bichíi Jesucristo niráa, mapujiti nijeni mi echirigá nawésali.
\v 20 Ayena rijimala, perikó je'ná jerigá olá mapurigá nijeni mi ané, mapujiti tamujeta okuánika galá bichíyami ju echi Walubela Jesucristo niráa. Echirigá tamí kanílati sulachí niráa, ne galá nijéwaga mapurigá nijeni mi ané.
\p
\v 21 Nijé nimí je'ná jerigá osé mapujítini ne bichíwali mayé mapu mujemi ne galá nijéwaga olama mapurigá nimí ané. Ayénachóni galá machí mapu mujemi waminabi wabé echirigá olama, ketasi chopi mapurigá nijé nimí táni.
\v 22 Achigórigá a'lari mapo'ná nijeni tibima echo'ná mujé bitélachi, mapujítini mayé mapu nijeni ke 'me ayó ku machí pátami níima, mapurigani omérama echo'mí simiyá, mapujiti 'yémitamo wabé tánali mapurigá Riosi tamí ku'wírama.
\s Auché jaré ritémtami walú ripóraga náwala
\p
\v 23 Echi Epajorito riwéami rijói mi wabé ripora. Échiko ayénachó pachá bachárami ju tamí yuwa, mapujiti binói ayénachó nawésali Jesucristo Ra'íchala.
\v 24 Echi Marko ayénachó mi wabé ripora. Echi Aristarko ayénachó mi ripora, echi Rémasi ayénachó, echi Lúkasi asíchiko. Si'néami aboni tamí yuwa nóchami ju.
\v 25 Nijeni we nakí mapu tamujé Walubélawala Jesucristo ne wabé galigá ku'wírama ne si'néami 'yemi echo'ná piréami napawika bichíyami ritémtami. ¡Echirigá níima!