\id HEB
\h Hebreos
\mt2 Echi Jaré
\mt EBREO ANILÍHUAMI PAGÓTAMI
\mt2 Jerigá Osélati
\c 1
\s Riosi júuli kepu Raná ra'íchanala jena'í wichimóbachi piréami pagótami
\p
\v 1 Chabé ki'yá Riosi wisabé ra'íchali echi jaré ki'yánala piréami tamujé pagótamawala. Echalí Binói wisabé niráa, si'winárigá ra'íchali echi jaré aboni, mapalí Riosi Binói júuli echi jaré Riosi jiti nawésami ra'íchanala Riosi Binói Ra'íchala niráa.
\v 2 Chopi jipi, bukulí rawé, Riosi Binói tamujé tamí galá ra'íchali mapalí Binói júuli kepu Raná tamujé tamí nawésanala Riosi Binói ra'íchala niráa. Alí ki'yá chokichí Riosi nuleli kepu Raná je'ná kawí niwánala, ayénachó Binói nuleli kepu Raná niwánala ne suwaba echi jaré o'weli namuti mapu ikita ritiwá echo'ná ripá riwigachi. Ayénachó Riosi 'yali echi Binói Ranala ne suwaba echi jaré namuti.
\v 3 Alí echi Walubela Riosi Ranala ne wabé ratábami ju mapujiti Binói Riosi Onorúami ne wabé Walubela ju. Alí echi Walubela Riosi Ranala achigó yiri ju Riosi Onorúami yuwa. Ayénachó echi Walubela Riosi Ranala, Binói walubela Ra'íchala jiti, galá jiwébana suwaba namuti mapu ikí nirú, mapurigá ketasi waminá suwibama. Alí mapalí echi Walubela Riosi Ranala ma katéwali mapu churigá galá ku bi'wama mapurigá tamujé pagótami chati sitíi olali, mapujiti Binói mukuli echi pagótami chati sitíi olalila jiti, echalí Riosi Ranala, ne wabé Walubela niráa, ma ku asíbali echo'ná ripá riwigachi, echo'ná watonachi mapo'ná echi Walubela Riosi Onorúami ne wabé omériga nulá.
\s Echi Walubela Riosi Ranala ne wabé simírami Walubela ju, ketasi mapurigá echi jaré Riosi kapitánawala
\p
\v 4 Alí echi Riosi Ranala ma sébali ne wabé simírami Walubela níliya, ketasi mapurigá echi jaré o'wéala Riosi kapitánawala, mapujiti echi Walubela Riosi ma 'yali mapurigá echi bilepi Binói Ranala ne wabé simírami Walubela níima ketasi mapurigá echi jaré o'wéala Riosi kapitánawala.
\v 5 Mapujiti Riosi ke siné jeaneli nibilé Binói kapitánawala jeanigá:
\q Mujemi ju keni Raná;
\q Jipi rawé Nijé nimí iwítali.
\m Chopi Riosi ne bichíwali echirigá aneli echi Bilepi Binói Ranala. Ayénachó Riosi ke siné anili, ke bilé Binói kapitánawala jiti rugá, jeanigá:
\q Nijeni níima echi Binói Onolá.
\q Alí echi Binói, Nijé Ranala níima.
\m Chopi Riosi ne bichíwali echirigá anili echi Bilepi Binói Ranala jiti rugá.
\m
\v 6 Alí mapalí Riosi pali echi bilepi ne bacháwala Binói Ranala jena'í wichimóbachi, echalí Riosi jeaneli echi jaré Binói kapitánawala jeanigá:
\q ¡Ne si'néami 'yemi waminabi walubéraga anesi echi Bilepi Riosi Ranala!
\m
\v 7 Chopi mapalí Riosi ra'íchali echi jaré Binói kapitánawala jiti rugá, echalí jeanili:
\q Riosi olá echi jaré Binói kapitánawala mapurigá iwigá niráa.
\q Ayénachó Riosi olá echi jaré Binói níwala nagúurami mapurigá rajáami niráa.
\m
\v 8 Chopi mapalí Riosi ra'íchali echi bilepi Binói Ranala, echalí jeaneli:
\q Mujemi Walubela Riosi ju. Alí Mujemi ne Walubela Nuláami níima ne sinibí niráa.
\q Ayénachó Mujemi sinibí ne wabé wachínaga olama mapurigá ne Walubela Silíami niráa.
\q
\v 9 Mujemi wabé galeli echi galabé wachínaga oluwáwami, chópimi wabé kichili echi chati sitíi oluwáwami.
\q Echijiti Mujé Riósawala mi ne wabé simírami 'yali kanílawami ketasi mapurigá Binói kanírali echi auché jaré mujé apanérawala.
\q Riosi mi ne wabé simírami 'yali echi kanílawami mapurigá echi jaré ki'yánala piréami pagótami ne wabé simírami ro'weli echi akeite echo'ná moba bilé rijói mo'ólachi mapalí wilárami níili walula niráa.
\m
\v 10 Ayénachó Riosi jeaneli echi bilepi kepu Raná:
\q Walubela, ki'yá chokichí mujemi niwáli je'ná kawí. Ayénachó ne suwaba echo'ná ripá riwigachi nirúami niwárami níili Mujé Binói sikala jiti.
\q
\v 11 Ne suwaba echi jaré namuti mapu Mujemi niwáli suwaba waminá suwibama.
\q Chopi mujé sinibí niráa bitélama, ne sinibí.
\q Pe waminana ne suwaba echi jaré namuti suwaba 'ocháarama mapurigá bilé napacha niráa.
\q
\v 12 Alí mapurigami romínaga katewa bilé napacha,
\q echirigá Mujemi ariwema echi jaré namuti mapu Mujemi niwáli.
\q Alí ne suwaba nakulíwarami níima.
\q Chopi Mujé Binói ke siné nakuliwa.
\q Mujemi sinibí niráa bitélama.
\m
\v 13 Alí Riosi ke siné jeaneli bilé Binói kapitánawala jeanigá:
\q Tamí yuwa, keni watonachi asagá, mapuyénasíni ro'wábama echi jaré mujé sayéla mapurigami omérama moba ri'keka olayá,
\m chopi Riosi ne bichíwali echirigá aneli echi Bilepi Binói Ranala.
\m
\v 14 Ne si'néami echi jaré Riosi kapitánawala chopi iwigá niráa ju, mapu si'nabí nagúuraga olá Riosi nóchala olayá. Alí Riosi jula aboni ku'wíranala ne si'néami echi jaré pagótami mapu ikí ku wikawárami níima mapalí aboni galá bichíima Jesucristo niráa.
\c 2
\s Ketasi ariwesi bichíiya
\p
\v 1 Echijiti arigá 'wérali ju máputa waminabi galá bichíiga nijéwabo echi ne Bichíwali máputa ma námali nawisálawachi, mapurigata ketasi chakena rujuibo.
\v 2 Mapujiti Riosi ne galá machírali echi jaré ki'yá piréami pagótami mapu Binói nulalila ne bichíwali níili, echi mapu echi jaré o'wéala Riosi kapitánawala ma osirúami niráa 'yali echi jaré ki'yá bachánala piréami pagótami. Alí echalí ki'yá rawé echi jaré pagótami mapu ikí chati sitíi ologá, ketasi galá nijéwaga olali mapurigá aboni echirigá nulérami níili, abóniko arigá walú kastigo 'yárami níili, mapalí Riosi Binói we galá wachínaga ologá waminá kastigo 'yali.
\v 3 ¿Churigá bicheta ku wikawárami níibo tamujé jipi piréami pagótami, ata ketasi bichíiga nijiyásagá mapurigá Riosi ne wabé simírami nakí tamujé tamí ku wikawánala jipi rawé? Je'ná Galabé Riosi Ra'íchala ne bachá niráa nawisárami níili echi Walubela Jesucristo jiti. Alí echi jaré mapu galá kipúliko, abóniko ayénachó galá machíratami níili mapu Riosi Ra'íchala ne bichíwali ju. Echalí aboni ayénachó echirigá achigórigá tamujé tamí bichíwaga ruyeli, mapurigá tamujeta ayénachó echirigá nawésabo echi auché jaré pagótami.
\v 4 Alí Riosi ayénachó galá machírali jipi piréami pagótami mapu Binói Ra'íchala ne bichíwali ju, mapujiti Riosi wisabé ne wabé omériga olali wikabé namuti mapurigá ke wesi pagótami omero olayá. Ayénachó Riosi 'yali mapurigá echi jaré bichíyami wisabé wabé omériga olama mapurigá ke wesi auché jaré pagótami omero olayá. Alí echi Wabé Galabé Riosi Iwigala 'yárami níili echi jaré galá bichíyami pagótami mapurigá aboni wisabé si'winárigá ne wabé omériga olama mapurigá Riosi chopi nakí.
\s Jesucristo bitéali jena'í wichimóbachi mapurigá Rijói niráa
\p
\v 5 Alí ki'yá chokichí mapalí Riosi niwáma riwéali je'ná kawí, echalí Riosi ketasi risensia 'yali echi jaré o'wéala Riosi kapitánawala mapurigá aboni nulama mapurigá o'wéala niráa jena'í wichimóbachi, chopi Binói 'yali mapu echi Bilepi Riosi Ranala mapurigá Walubela Nuláami níima jena'í wichimóbachi waminánomí rawé, mapurigá tamujeta rugá nawesa.
\v 6 Mapujiti echo'ná biléana Riosi Ra'íchala oselíwalachi je'ná jerigá ne bichíwaga osirúami ju:
\q ¿Chuyena Walula ju echi Rijói, mapurigá Mujé Riosi galá 'nata Binói jiti?
\q ¿Chuyena Walula ju echi Rijói, mapurigá Mujé Riosi galá natimá echi Binói?
\q
\v 7 Mujé Riosi pe téeli tabéala niráa niwálimi echi Rijói, ketasi mapurigá echi jaré o'wéala Mujé kapitánawala.
\q Chopi Mujemi arigá ma Walula niráa niwáli echi Rijói mapurigá ne Walubela Nuláami níima, ne suwaba echi jaré namuti yuwa mapu ikí Mujemi niwáli.
\q
\v 8 Echirigá Mujé Riosi nulali mapu echi Rijói ne Walubela níima suwaba namuti yuwa,
\q achigórigá mapurigá bilé rijói ne walula ju, mapalí binói galá omero si'néami echi jaré binói sayera.
\m Alí mapujiti Riosi ma echirigá 'yali mapurigá echi Rijói Walubela níima ne suwaba echi jaré namuti yuwa, alí tarapé biyiri namuti tibili mapu echi Rijói ke omérali. Chopi jipi rawé tamujeta ketasi cho abijí ritiwá mapu echi Rijói echirigá galá omero suwaba echi jaré namuti.
\v 9 Chopi jípita galá ritiwá Jesucristo ne wabé Walubela niráa, echi mapu Riosi pe téeli niráa tabéala niwáli echi jaré o'wéala Riosi kapitánawala yuwa. Alí Riosi ne wabé galigá nakili mapurigá echi Walubela Jesucristo ne wabé okoka mukumea echi jaré pagótami chati sitíi olalila jiti, mapurigá si'néami mapu ikí bichíima, galá ku wikawárami níima. Echijiti jipi rawé echi Walubela Jesucristo ne wabé walubératami ju, ayénachó Binói ne wabé walubéraga anérami ju, mapujiti Binói echirigá mukuli tamujé chati sitíi olalila jiti.
\p
\v 10 Alí echi Walubela Riosi ju mapu niwáli ne suwaba namuti. Ayénachó suwaba namuti abijí tibí mapujiti Riosi arigá tibuta ibili namuti. Alí Riosi nakí mapu ne si'néami Binói kúchuwala ayénachó o'wéalatami níima echo'ná ripá riwigachi, mapurigá Riosi Binói ne Walubela ju. Echijiti arigá 'wérali níili mapurigá Riosi ne wabé galabérama echi Walubela Jesucristo, echi jaré namuti jiti, mapurigá Jesucristo ne wabé risúu olárami níili, mapurigá Jesucristo echijiti galá omérama ku wikáwiya echi jaré aboni.
\v 11 Alí Jesucristo ku bi'wá mapurigá echi jaré pagótami ma chati sitíi olali, mapalí aboni galá bichíi. Echalí echi jaré mapu ikí bichíiko we onée Riosi Onorúami, achigórigá mapurigá Jesucristo onée. Echijiti echi Walubela Riosi Ranala ketasi riwela ritémtami niráa anée aboni.
\v 12 Mapujiti echo'ná Riosi Ra'íchala oselíwalachi je'ná jerigá osirúami ju mapurigá Binói jeanili:
\q Nijeni nawésama echi jaré keni ritémawa, Mujé jiti rugá.
\q Ayénachó nijeni nawajima mi nawajímiya echo'ná ne nasipa wiligá echi auché jaré napawika bichíyami yuwa.
\m
\v 13 Ayénachó Binói jeanili:
\q Nijeni galá bichíima Riosi.
\m Alí auchecho siné jeanili:
\q Jena'ini atí, echi jaré kúcharami yuwa mapu Riosi tamí 'yali.
\p
\v 14 Bilepi rijói kúchuwala, a bilepi cho iyéami, si'néami chopi a yiri sapéami ju, ayénachó chopi a yiri léwami ju. Echirigá ayénachó Jesucristo achigó yiri sapéami níili, ayénachó achigó yiri léwami níili mapurigá jena'í wichimóbachi piréami pagótami niráa, mapurigá Binói galá omérama mukuyá echi jaré pagótami jiti, mapurigá echirigá suwábama echi riablo, echi mapu galá omérali waminá ko'oyá echi jaré pagótami.
\v 15 Alí echirigá ologá Jesucristo ma ku machí a'wali mapurigá ma ketasi pióntami niráa níima echi jaré pagótami jena'í wichimóbachi piréami mapu sinibí rawé ne wabé majaga piréali mapurigá pióntami niráa, mapujiti aboni arigá waminá suwimea riwéali.
\v 16 Mapujiti ne bichíwali ju mapu Jesucristo ketasi ku'wírimiya nawali echi jaré Riosi kapitánawala, chopi Binói ne bichíwali ku'wírimiya nawali echi jaré wikabé Juríosi pagótami mapu echi Abrami kúchala kúchuwala ju.
\v 17 Echijiti arigá 'wérali níili mapu Jesucristo, rijói niráa, niwárami níima achigó yiri mapurigá echi jaré Binói ritémawala niráa, mapurigá Binói níima bilé wabé natimáami, galá bichíyami, walubela sacerdote, mapurigá Binói olama Riosi nóchala olayá, mapurigá Binói ma mukugá echi jaré pagótami jiti, echirigá omérama ku wikáwiya echi pagótami chati sitíi olalila.
\v 18 Alí mapujiti Jesucristo wabé risúu olárami níili, ayénachó mapujiti echi riablo chati sitíi olánaraga ra'íchali Binói, echijiti Binói ne wabé omero galá natimáa echi auché jaré mapu ayénachó chati sitíi oláratami ju.
\c 3
\s Jesucristo waminabi wabé Walubela ju ketasi mapurigá echi walula Moisesi
\p
\v 1 Alí 'yemi keni ritémtami máputamo wabé galabératami níili chabé jonsa mapalítamo bachá niráa galá bichíili, 'yémitamo bayérami níili mapurigátamo Riosi níwala pagótami níibo. Jipi ne galá 'natasi mapurigá echi Walubela Jesucristo olali, mapujiti Binói Jesucristo, Riosi Onorúami jiti julárami níili, ayénachó Binói wilárami níili mapurigá Walubela Sacerdote niráa, echi mapu Walubela Katéwami ju Riosi yuwa, tamujé pagótami yuwa, mapurigá tamujeta galá bichíiga nawesa.
\v 2 Mapujiti Jesucristo sinibí ne galá bichíiga olali mapurigá Riosi nakili, mapujiti Riosi wilali echi Binói mapurigá walubela sacerdote niráa. Alí echi walula Moisesi ayénachó achigórigá galá olali suwaba mapu ikí Riosi 'yali mapurigá Binói olama echo'ná echi jaré Riosi kúchuwala yuwa.
\v 3 Chopi galá níima mapu echi Walubela Jesucristo waminabi ne wabé simírami walubéraga anérami níima, ketasi mapurigá echi Moisesi. Alí echirigá ju achigórigá mapurigá bilé rijói onorúami ne wabé simírami walula ju, ketasi mapurigá echi jaré binói kúchuwala.
\v 4 Alí ibili echi jaré kúcharami arigá bilepi rijói kúchuwala ju, chopi echi Walubela Riosi niwáli ne si'néami echi jaré pagótami mapu ikí nirú.
\v 5 Echi walula Moisesi ne bichíwali galá olali echo'ná echi jaré Riosi kúchuwala yuwa, mapurigá Riosi piónawala niráa, mapujiti binói julárami níili nawésanala echi jaré Riosi kúchuwala echi jaré namuti jiti mapu Binói Riosi rumea riwéali pe waminánomí.
\v 6 Chopi echi Walubela Jesucristo sinibí ne suwaba galá bichíwaga olá tamujé tamí yuwa máputa Riosi kúchuwala ju, mapujiti Binói echi bilepi Walubela Riosi Ranala ju. Alí Jesucristo sinibí echirigá bichíwaga olama tamujé tamí yuwa, ata sinibí najátasaga Binói yuwa, ayénachóta sinibí galá bichíisagá echalí ne jubá yénasí, ayénachóta sinibí galá kanílasagá mapujítita galá bichíi Binói niráa.
\s Riosi pagótamawala arigá isábama
\p
\v 7 Echijiti mapurigá echi Wabé Galabé Riosi Iwigala jeaní:
\q Jipi rawé átamo námasagá mapurigá Riosi aní,
\q
\v 8 Ketasi biwárami níisi 'yemi sulálachi niráa, mapurigá echi jaré ki'yá piréami 'yemi pagótawala wabé biwárami suléami níili.
\q Alí aboni ketasi galá nijéwali Riosi, chopi aboni wabé yórali Riosi mapalí aboni 'yénali echo'ná biléana waná kawichí.
\q
\v 9 Alí echi Wabé Galabé Riosi Iwigala waminabi jeaní:
\q Echo'ná waná kawichí echi jaré ki'yá piréami 'yemi pagótawala ketasi tamí nijéwali, chopi aboni tamí yórali nawosa makói bamíbali yénasí, mapalí aboni arigá galá riwali mapurigá Nijeni wisabé ne wabé omériga olali mapurigá ke wesi rijói omero olayá.
\q
\v 10 Echijiti Nijeni yoli echi pagótami yuwa.
\q Alí Nijeni bichíwaga jeanili: Aboni sinibí we chuwé 'nátaga 'yena echo'ná aboni sulálachi.
\q Alí aboni ke siné nakili machináliya Nijé buwilá.
\q
\v 11 Echijiti Nijeni ne wabé yoli aboni yuwa. Ayénachó Nijeni ne bichíwaga jeanili mapu aboni ke siné tamí yuwa mo'wigá isábama.
\p
\v 12 Keni ritémawa, a aboni niráa ne galá tibusi mapurigá ke wesi 'yemi chati sitíi sulérama, chopi mapurigá si'néami 'yémitamo sinibí ne galá bichíyami níibo, mapurigátamo ke siné ariwebo bichiya echi sinibí bitéami Riosi.
\v 13 Chopi sinibí rawé a'nagupi waminabi galá bichíratasi mapuyénasítamo abijí piré jena'í wichimóbachi, ayénachó mapuyénasítamo abijí galá omérabo bichíisiya echi Walubela Jesucristo niráa, mapurigá ke wesi 'yemi 'yékarami níibotamo, echi we chati sitíi oluwáwami jiti, ayénachó mapurigá ke wesi 'yemi echijiti ke nijéwiyami níibotamo Riosi, echo'ná pachana 'yemi sulálachi niráa.
\v 14 Mapujiti echi Walubela Jesucristo abijí tamujé tamí ku'wírama echalí ne jubá rawé yénasí, ata sinibí ne galá bichíisagá mapurigata chabé chokichí jonsa bichíili.
\p
\v 15 Alí echo'ná Riosi Ra'íchala oselíwalachi je'ná jerigá anirúami ju:
\q Jipi a 'yémitamo námasagá mapurigá Riosi aní, ketasi biwárami níisi echo'ná 'yemi sulálachi niráa,
\q mapurigá echi jaré ki'yá piréami 'yemi pagótawala wabé biwárami suléami níili,
\q alí aboni ketasi galá nijéwali Riosi.
\m
\v 16 ¿Chigá biché níili echi jaré mapu galá namsa Riosi Ra'íchala arigá ketasi galá nijéwali? Ne bichíwali níili ne si'néami echi jaré mapu echi walula Moisesi ku machí a'wali echo'ná Ejíptochi anilíwachi kawírali jonsa.
\v 17 Alí ¿chigá yuwa yoli Riosi nawosa makói bamíbali yénasí? Ne bichíwali níili echi jaré mapu ikí chati sitíi olali, echi jaré mapu ikí waminá suwili echo'ná waná kawichí.
\v 18 Alí ¿chigá níili echi jaré mapu Riosi bichíwaga aneli mapu aboni ketasi omérama mo'wigá isaba Binói yuwa? Ne bichíwali níili echi jaré mapu ketasi galá nijéwali Riosi.
\v 19 Echirigata ma galá machí mapu aboni ketasi omérali mo'wiyá Riosi yuwa, mapujiti aboni ketasi bichíili Riosi.
\c 4
\s Echo'ná Riosi Ra'íchala oselíwalachi
\p
\v 1 Echo'ná Riosi Ra'íchala oselíwalachi osirúami ju mapurigá Riosi ne bichíwaga anili mapurigá si'néami mapu ikí bichíima Jesucristo niráa, galá mo'wimea isábabiya Riosi yuwa, echo'ná ripá riwigachi. Echirigá jipi rawé mapuyénasí Riosi abijí echirigá tamujé tamí bichíwaga ané, ne galá níima ibili tamujé, aboni niráa tibusa, mapurigá ke wesi tamujé, siné káachi, ke 'me sebámiré echirigá mo'wigá isaba Riosi yuwa, echo'ná ripá riwigachi.
\v 2 Mapujiti tamujé ayénachó galá nawésarami níili echi Galabé Riosi Ra'íchala, achigórigá mapurigá aboni nawésarami níili, chopi aboni ketásirapé ku'wíratami níili mapalí aboni námali echi Galabé Riosi Ra'íchala, mapujiti aboni ketasi galá bichíili.
\v 3 Chopi tamujé máputa ma galá bichíili, tamujeta ju máputa mo'wiboa isábabiya Riosi yuwa echo'ná ripá riwigachi. Chopi Riosi anili mapu jaré ketasi echirigá mo'wili isábabiya Binói yuwa, mapalí Riosi jeanili:
\q Echijítini wabé yoka je'ná jerigá nulali: Aboni ketasi isábama tamí yuwa.
\m Chopi ki'yá chokichí jonsa mapalí Riosi sunili niwayá je'ná kawí, echalí jonsa Riosi ma sunili Binói nóchala.
\v 4 Mapujiti auché biléana echo'ná Riosi Ra'íchala oselíwalachi je'ná jerigá osirúami ju mapurigá Riosi anili echi kicháosa rawé jiti rugá:
\q Echalí kicháosa rawé echi Walubela Riosi galá isábali, mapujiti Riosi ma suwaba sunili Binói nóchala.
\m
\v 5 Alí auché biléana echo'ná Riosi Ra'íchala oselíwalachi je'ná jerigá osirúami ju mapurigá Riosi jeanili:
\q Echi jaré aboni ketasi mo'wimea mapurigá aboni tamí yuwa isábama.
\m
\v 6 Echirigá bichíwali ju mapu jaré abijí mo'wimea isábabiya Riosi yuwa, chopi echi jaré chabé ki'yá piréami mapu bachá niráa, námali mapurigá Riosi nakili ku wikawánala echi pagótami, abóniko ketasi mo'wili isábabiya Riosi yuwa, mapujiti aboni ketasi galá nijéwali Riosi.
\v 7 Echijiti Riosi auchecho bukulíwami ne bichíwaga anili mapu jipi galá níima echi jaré pagótami we 'yáati galá bichíisa, mapujiti Riosi Binói abijí tamujé tamí ra'ícha mapalita kipú mapurigá Riosi júuli echi walula Rabiri osínala mapurigá echi binói wabé wakinánala osali, mapurigá osirúami ju echo'ná Riosi Ra'íchala oselíwalachi, mapurigá tamujé aboni ma bukulí 'neli osirúami mapo'ná Riosi tamujé tamí jeaneli:
\q Jipi rawé a 'yémitamo galá námsagá mapurigá Riosi aní, ketasi biwárami suléami níisi.
\m
\v 8 Mapujiti a echi Josué riwéami walula ne bichíwali 'yásagá mapurigá echi jaré Isaeli pagótami ne bichíwali isábama Riosi yuwa mapalí binói bayébali aboni echo'ná Kanánchi anilíwachi kawírali yénasí, echalí Riosi ma ketasi auchecho ra'ichámili wakinana jeanigá mapu waminánomí níima mapalí echi pagótami isábama riwéali Riosi yuwa.
\v 9 Echijiti ne bichíwali ju mapu echi jaré Riosi pagótamawala pe waminánomí ne bichíwali galá isábama Riosi yuwa.
\v 10 Mapujiti si'néami mapu ikí ma galá mo'wigá isábako Riosi yuwa, abóniko ma ketasi waminabi auché nócha, achigórigá mapurigá Riosi Binói ma ketasi nócha mapujiti Riosi ma sunili Binói nóchala.
\v 11 Echijiti galá níima tamujeta we 'yáati ása mapurigata echirigá mo'wigá isábabo Riosi yuwa, mapurigá ke wesi tamujé ketasi bichíyami níibo, mapurigá echi jaré aboni ketasi bichíyami níili.
\p
\v 12 Mapujiti Riosi Ra'íchala sinibí bitéami ju, ayénachó ne wabé omérami ju. Alí Riosi Ra'íchala waminabi ne wabé simírami oláami niráa ju, ketasi mapurigá mapuyíripi wi'lí ripiyá a'nagú okoná oláami niráa, mapujiti Riosi Ra'íchala ne wabé pachá seba echo'ná echi jaré pagótami sulálachi, mapurigá echi ripiyá wabé pachá chi'wana. Echirigá ayénachó Riosi Ra'íchala wabé pachá chi'wana mapuyénasí seba echo'ná pachana echi jaré pagótami aliwálachi, echo'ná aboni iwigálachi ayénachó, mapuyénasí Riosi Ra'íchala ne galá machiná niráa, machira mapurigá aboni 'nata, ayénachó mapurigá aboni chopi 'nátaga nakí olánala.
\v 13 Alí Riosi sinibí ne galá ritiwá ne suwaba namuti mapu ikí Binói niwáli, echijiti ke bilé wesi omero waminá ichipiya mapurigá Riosi ma ketasi riwimea. Alí arigá 'wérali ju ibili niráa tamujé ku ruyesa Riosi ne suwaba mapurigata ologá piréali jena'í wichimóbachi. Alí Riosi echirigá galá machiná ritiwá suwaba namuti, ayénachó Binói galá machí suwaba namuti.
\s Jesucristo ju echi ne Walubela Sacerdote
\p
\v 14 Echi Walubela Jesucristo Riosi Ranala ju, ayénachó ne walubela sacerdote anilíwami ju. Binói ma bakili Riosi yuwa echo'ná ripá riwigachi. Echijiti galá níima mapu tamujeta sinibí waminabi galá bichíibo Binói niráa.
\v 15 Alí tamujé Walubela Sacerdótawala galá omero tamujé tamí natimaya máputa ketasi me jiwérami ju, mapujiti Binói ayénachó chati sitíi oláratami níili, achigórigá mapurigá echi riablo sinibí tamujé tamí chati sitíi olánali, chopi echi Walubela Jesucristo tarapé siné echirigá nijéwaga chati sitíi olali.
\v 16 Echijiti galá níima tamujé sinibí ne galá bichíiga ra'íchasa Riosi yuwa mapalita risúu olárami ju, ayénachó mapalita newaléami ju. Alí echirigá bichíiga tamujeta mulubéanabo Riosi yuwa, echo'ná Binói níwala walubela asibálachi mapo'ná Riosi sinibí atí mapurigá Binói sinibí ne wabé galigá nulema echi jaré pagótami. Alí a tamujeta echirigá ologá, echalita ne galá natimátami níibo, ayénachó Riosi sinibí tamujé tamí ne wabé galigá ku'wírama mapalita newaléami ju.
\c 5
\p
\v 1 Mapalí bilé rijói wilárami ju mapurigá walubela sacerdote niráa, échiko echirigá wilárami ju mapurigá binói sinibí olama Riosi nóchala olayá bacháami Riosi yuwa, echi auché jaré pagótami jiti, mapurigá binói ko'wisáa 'yama Riosi jaré namuti, mapurigá echi jaré pagótami chati sitíi olalila galá ku wikawárami níima.
\v 2 Alí mapujiti echi ne walubela sacerdote arigá chati sitíi oláami ju, achigórigá mapurigá echi auché jaré pagótami chati sitíi oláami ju, echijiti echi rijói walubela sacerdote galá omero natimáa echi auché jaré pagótami mapu ketasi galá machíami ju, ayénachó echi jaré mapu ma 'wigáami niráa ju.
\v 3 Echirigá echi ne walubela sacerdote sinibí ko'yagá 'yali Riosi jaré namuti echi auché jaré pagótami chati sitíi olalila jiti, chopi mapujiti Binói ayénachó chati sitíi oláami níili, echijiti arigá 'wérali níili mapu binói ayénachó ko'yagá 'yama Riosi auché jaré namuti, echi binói chati sitíi olalila jiti, achigórigá mapurigá binói ko'yagá 'yali echi jaré pagótami chati sitíi olalila jiti.
\p
\v 4 Alí ke wesi a binói niráa wiliba mapurigá walubela sacerdote niráa. Chopi Riosi wilá bilé rijói mapurigá walubela sacerdote níima, achigórigá mapurigá Riosi Binói wilali echi Aroni riwéami rijói mapurigá binói walubela sacerdote niráa níima.
\v 5 Alí echi Walubela Jesucristo tarapé cho echirigá walubélali Binói niráa mapurigá Binói arigá wilárami níima mapurigá Walubela Sacerdote niráa. Chopi Riosi Binói echirigá wilali echi Walubela Jesucristo. Alí Riosi Binói níili mapu chabénala jeaneli:
\q Mujemi ju keni Raná.
\q Jipi nijé nimí iwítali.
\m
\v 6 Mapurigá ayénachó je'ná jerigá osirúami ju echo'ná auché biléana osirúamichi mapurigá Riosi jeaneli echi Walubela Jesucristo:
\q Mujemi Walubela Sacerdote níima ne sinibí niráa,
\q mapurigá echi Melkisereki riwéami rijói ayénachó walula sacerdote níili.
\m
\v 7 Alí mapalí echi Walubela Jesucristo bitéali jena'í wichimóbachi mapurigá rijói niráa, echalí Binói ne o'weli ra'íchaga, ne wabé nalaka tániga ra'íchali Riosi yuwa. Alí Riosi galá omérali ku'wíriya echi Walubela Jesucristo mapurigá Binói ketasi mukumea, a Riosi echirigá nakisáagá. Echalí Riosi arigá galá kipuli echi Walubela Jesucristo echirigá aníachi, mapujiti Binói ne wabé galá bichíiga waminabi walubéraga aneli Riosi.
\v 8 Alí echi Walubela Jesucristo bilepi Riosi Ranala ju, chopi Binói arigá galá bineli nijéwiya Riosi mapalí Binói Jesucristo arigá wabé risúu olárami níili.
\v 9 Alí mapalí echi Walubela Jesucristo echirigá ne sébali riwíralati mapurigá echi galabé nijéwami Riosi Ranala niráa, echalí Binói ma galá omérali ne sinibí niráa ku wikáwiya ne si'néami echi jaré pagótami mapu ikí galá nijéwaga olako mapurigá Binói nulé aboni.
\v 10 Alí Riosi wilali echi Walubela Jesucristo ne Walubela Sacerdote niráa, achigórigá mapurigá echi Melkisereki walula sacerdote níili.
\s Echi jaré mapu ketasi bichíyami níima sinibí niráa, arigá kastigo 'yárami níima
\p
\v 11 Jipi tamujeta abijí wikabé namuti níwa máputa wabé nakí 'yemi mi ruyénala Jesucristo jiti rugá, mapurigá Binói ju echi ne Walubela Sacerdote niráa. Chopi je'ná jerigá ne wabé nóchali ju irétaga ruwáwa, mapujiti 'yémitamo ketasi 'me nakí binénala je'ná jeyiri.
\v 12 'Yémitamo ma galá omérati riwéali binériya Riosi Ra'íchala echi auché jaré pagótami, mapujiti 'yémitamo ma wisabé bamíbali jonsa galá nawésarami níili Riosi Ra'íchala. Chopi abijí arigá 'wérali ju máputamo ne bukulíwami niráa auchecho siné binératami níibo Riosi Ra'íchala, achigórigá mapurigátamo chabé chokichí binératami níili. Echirigátamo we newalé echi leche niráa chópitamo ketasi cho omero ko'yá echi jaré ochérami ko'wámawala.
\v 13 Alí ne si'néami echi jaré mapu ikí abijí chopi bajiko echi leche niráa, echi jaré mapu ketasi cho galá machiko Riosi Ra'íchala, abóniko abijí mapurigá echi jaré kúuchi chi'íami niráa ju. Alí biché aboni ketasi cho machí galabé wachínaga ologá piréliya mapurigá Riosi nakí.
\v 14 Chopi echi jaré ma ochérami we ko'wá karúmati echi auché jaré ko'wáami. Abóniko we nakí machináliya ne suwaba Riosi Ra'íchala, mapujiti aboni ma galá 'nátami ju. Alí aboni we 'nátaga, galá machí mapu chuyiri 'nalí ju echi galabé oluwáwami, ayénachó aboni galá machí mapu chuyiri 'nalí ju echi chati sitíi oluwáwami.
\c 6
\p
\v 1 Echijiti waminá bacháami nokuísabota echi Walubela Jesucristo bichíisiya, mapuyénasíta ne sébali galá bichíyami níibota. Ketásita chopi ra'ichábo echi jaré namuti jiti máputa ne chokichí bichíili mapalita chótali Jesucristo yuwa najata. Chópita ayénachó waminabi ne wabé simírami ra'ichábo mapu churigá tamujeta omérabo ne sébali galabé niwárami níliya ata waminabi galá bichíisagá Jesucristo niráa. Mata galá bichíili echi Walubela Riosi niráa. Ketásita auchecho wisabé chotabo bichíiya mapurigata ne chokichí jonsa ma galá bichíili. Chabeta chati sitíi oláami níilita, echijítita chopi suwíami níibo riwéali, chopi mata Riosi yuwa ju.
\v 2 ma ketasi galá ju máputa sinibí chopi wabé nawésaka ra'íchabo mapu churigá galá níima mapu echi jaré bichíyami ba'wí jiti pagótami níima, nirapé máputa sinibí ra'ichábo jeanigá mapu galá níima mapu echi jaré o'wéala si'winárigá nocháma aboni sikala echo'ná moba echi jaré bichíyami mo'ólachi. Mata galá bichíi mapu echi jaré suwíami ku o'wínama echalí ne jubá rawé, ayénachó mapu echi auché jaré ke bichíyami pagótami sinibí niráa kastigo 'yárami níima, echijiti ma ketasi 'wérali ju máputa sinibí nawésiga ra'ichábo mapu churigá echi jaré suwíami níima mapalí aboni ku o'wínama, nibilé cho mapu churigá echi jaré ke bichíyami sinibí niráa echirigá kastigo 'yárami níima.
\v 3 Chópita waminabi nokuísabo Riosi yuwa, a Binói tamujé tamí risensia 'yásagá.
\p
\v 4 Alí jaré mapu we galá machíratami níili echi Galabé Riosi Ra'íchala arigá ketasi bichíili. Aboni galabé niráa mayeli echi galabéala mapu Riosi nijá, ayénachó aboni ma ra'ícharami níili echi Galabé Riosi Iwigala jiti,
\v 5 ayénachó aboni galabé niráa mayeli echi Galabé Riosi Ra'íchala, ayénachó aboni galá machili mapu waminánomí Riosi wabé omérami niráa nulama ne sinibí niráa,
\v 6 chopi aboni mapurigá waminá chakena rujuíimi niráa, arigá ketasi bichíili. Echijiti jipi aboni ma ketasi omero auchecho siné bukulíwami niráa ku ro'wí Riosi yuwa, mapujiti aboni ma ketasi nakí bichíinala. Alí echirigá ologá aboni ne noguí achigórigá risúu olá echi Walubela Jesucristo, mapurigá auchecho siné echo'ná biléana kúrsichi michóniya niráa, ayénachó mapurigá sitíila ané echi Walubela Jesucristo, bacháami wikabé pagótami yuwa.
\v 7 Echi jaré aboni mapurigá echi wi'yé ju mapo'ná we ukú, mapujiti a galá rakésagá karúmati namuti mapu ikí echi pagótami echo'ná ichá, echalí echi wi'yé galabé anérami ju echi Walubela Riosi jiti.
\v 8 Alí a echo'ná chopi a'wisáagá karúmati so'uwéami namuti, echi jaré namuti kasalá ayénachó, echalí echi wi'yé ketasi iré. Alí Riosi chopi we sitíi wi'yé anema, alí waminánomí suwaba waminá ikósarami níima.
\s Tamujé galá bichíi Riosi, echijiti waminabi nokuísabo galabé olayá
\p
\v 9 Alí a tamujé arigá echirigá ra'ichásagá echi auché jaré pagótami jiti rugá, si'néami mapu ikí waminá ariweli bichíiya, ketásita echirigá ra'ícha 'yemi galá bichíyami ritémtami jiti rugá, mapujítita ne bichíwali mayé mapu Riosi waminabi wabé ku'wírama 'yemi, mapujítitamo ma ku wikawárami ju.
\v 10 Mapujiti Riosi ne wabé wachínaga oláami ju, alí Binói sinibí niráa 'natama mapurigá 'yémitamo wabé galabé olali, ayénachó mapurigátamo ne wabé galigá ku'wírali echi auché jaré napawika bichíyami ritémtami, mapurigátamo abijí sinibí waminabi echirigá olísimí, mapujítitamo ne wabé galé Riosi.
\v 11 Chopi tamujeta nakí mapu ibili 'yemi sinibí waminabi ne wabé nílasagá galá bichíibotamo mapuyénasí 'yemi abijí piré jena'í wichimóbachi, mapurigátamo ne sébali ku'wíratami níibo, mapurigátamo bichíi mapu Riosi 'yemi mi wabé ku'wírama.
\v 12 Echirigá tamujeta ketasi nakí mapurigá 'yémitamo nasinákuli níibo, chopi mapurigátamo sinibí achigórigá galá bichíiga olabo mapurigá echi auché jaré chabé bachánala piréami galá bichíyami ritémtami olali, si'néami mapu ikí ma narésimí echi ne wabé galabéala mapu Riosi bachá niráa bichíwaga aneli mapu aboni narema riwéali echo'ná ripá riwigachi.
\p
\v 13 Alí mapalí Riosi ne bichíwaga aneli echi Abrami mapu binói ku'wíratami níima riwéali, echalí Riosi Binói chopi echirigá ne bichíwaga aneli, mapujiti ke téeli auché bilé walubela waminabi simírami walubela ketasi mapurigá Riosi niráa, echijiti Riosi ketasi echirigá bichíwaga aneli bacháami auché bilé walubela yuwa, chopi Riosi Binói echirigá bichíwaga aneli echi Abrami,
\v 14 jeanigá: Ne bichíwali Nijé nimí wabé simírami ku'wírama. Ayénachó Nijé nimí 'yama mapurigá mujé kúchuwala auché jaré ne wikabé muwema.
\v 15 Alí mapalí echi Abrami wikabé bamíbali kilí ologá buweli, echalí binói arigá echirigá 'yárami níili mapurigá Riosi bachá niráa ne bichíwaga aneli.
\v 16 Mapujiti echi jaré pagótami aní mapu aboni ra'íchala ne bichíwali ju mapalí aboni jeaní: Riosi galá nami mápuni chopi bichíwaga aní. Alí aboni echirigá aní mapujiti Riosi ne wabé simírami Walubela ju, ketasi mapurigá echi jaré pagótami. Alí echi pagótami galá bichíima mapu ne bichíwali ju mapurigá bilé rijói echirigá ne bichíwaga aní.
\v 17 Echijiti Riosi ayénachó bichíwaga anili mapu Binói ku'wírama riwéali echi Abrami. Echalí Riosi echirigá bichíwaga anili mapujiti Binói nakili ne galá machiná niráa machíranala mapu echi auché jaré pagótami ayénachó ne bichíwali narema achigórigá mapurigá Riosi bachá niráa bichíwaga anili mapu Binói 'yama riwéali.
\v 18 Echirigá biché nirú okuá Ra'íchali mapu ketasi siné nakulíwarami níima. Riosi Ra'íchala sinibí ne bichíwali ju, ayénachó mapurigá Riosi Binói ne bichíwaga anili sinibí ne bichíwali ju, mapujiti Riosi ketasi bilé ikaléami ju. Alí Riosi sinibí tamujé tamí ne wabé natimaga kanílata echi okuá Ra'íchali jiti, máputa ma tánali mapu Binói tamujé tamí ku'wírama, ayénachó máputa ma galá bichíili mapurigá Riosi tamujé tamí bichíwaga aneli.
\v 19 Alí tamujé aliwala echijiti sinibí niráa ne bichíwali galá tibútarami ju mapurigá bilé walú barko ne galá tibútarami ju mapalí bilé wabé jiwérami jiero wiya jiti bologá uchárami ju. Echirigá tamujé aliwala ayénachó ne bichíwali, bulirúami niráa, tibútarami ju echo'ná pachá echi ripá riwigachi nirúami Riosi Ri'obáwalachi, ne wabé pachánala, echo'ná kuwana, mapo'ná chukú echi wabé runáami mapuyiri kimá
\v 20 mapo'ná Jesucristo ma bakili mapurigá Binói echo'ná katiwama tamujé tamí jiti, mapujiti Jesucristo wilárami ju mapurigá Binói sinibí niráa ne Walubela Sacerdote níima, achigórigá mapurigá echi Melkisereki walubela sacerdote níili.
\c 7
\s Jesucristo ne Walubela Sacerdote ju achigórigá mapurigá echi Melkisereki ne walubela sacerdote níili
\p
\v 1 Alí je'ná Melkisereki ne walula silíami níili echo'ná Salémachi anilíwachi. Alí binói ayénachó echi Ripabé Atíami Riosi níwala sacerdote níili. Alí mapalí echi Melkisereki natipámiya simili echi Abrami mapalí echi Abrami ma omérasa echi auché jaré o'wéala, alí ku nawali echo'ná binói walúlawachi, echalí echi Melkisereki ne wabé galabéraga aneli echi Abrami.
\v 2 Echalí echi Abrami ku pali wikabé namuti mapu ikí binói ni'yúraga 'yeli echi auché jaré o'wéala. Alí echi Abrami pe bilé 'yesa galá 'yali echi Melkisereki ibílana makói namuti mapu ikí binói ku pali. Alí echi Melkisereki riwalá je'ná jerigá aniwáami ju: Walubela silíami, ne wachínaga oláami. Alí mapujiti walubela silíami níili echo'ná Salémachi anilíwachi, ayénachó je'ná jerigá aniwáami ju: Walubela silíami galabé kilí oláami, mapujiti Salémachi je'ná jerigá aniwáami ju: Mapo'ná echi pagótami galá kilí ologá piré.
\v 3 Ketasi osirúami ju echo'ná Riosi Ra'íchala oselíwalachi mapu churigá riwéami níili echi Melkisereki onolá, nibilé cho osirúami ju mapu churigá riwéami níili binói iyela. Ketasi cho osirúami ju mapu chu riwéami níili binói aparóchawala. Ketasi osirúami ju mapu chu kilíbuko jonsa echi Melkisereki ranarúami níili, nibilé cho mapu chu kilíbuko jonsa binói waminá mukuli. Echijiti echi Melkisereki ketasi achigó yiri níili echi auché jaré sacerdote, echi jaré Juríosi pagótami sacerdótawala yuwa, mapujiti ne si'néami aboni echi chabé ki'yá bitéami Lebí riwéami rijói kúchala kúchuwala níili. Chopi echi Melkisereki sinibí niráa níili Riosi sacerdótawala, ayénachó binói sinibí niráa echirigá níima Riosi sacerdótawala, achigórigá mapurigá echi bilepi Riosi Ranala sinibí niráa ne Walubela Sacerdote níima.
\p
\v 4 Galá 'natasi mapu chu yena walubela níili je'ná Melkisereki, mapujiti echi tamujé walúlawala Abrami pe bilé 'yesa galá 'yali echi Melkisereki ibílana makói namuti mapu ikí binói ni'yúraga 'yeli echi auché jaré o'wéala.
\v 5 Alí echi walula Moisesi osogá nulali mapu chopi echi jaré sacerdote mapu echi Lebí kúchala kúchuwala ju, sinibí pe bilé 'yesa chapimea ibílana makói namuti mapu ikí echi auché jaré pagótami galá meli. Alí echi auché jaré arigá aboni ritémawala niráa ju, mapujiti ne si'néami aboni echi bilé Abrami kúchala kúchuwala niráa ju achigórigá mapurigá echi jaré Lebí kúchuwala ayénachó echi Abrami kúchala kúchuwala ju.
\v 6 Alí echi Melkisereki ketasi bilé Lebí kúchala kúchuwala níili, chopi binói arigá pe bilé 'yeka chapili ibílana makói namuti mapu ikí echi Abrami meli. Alí echi walula Abrami níili mapu Riosi Binói bichíwaga aneli wikabé namuti. Ayénachó echi Melkisereki arigá wabé galabéraga aneli echi Abrami.
\v 7 Alí si'néami pagótami galá machí mapu aboni chopi waminabi o'wéalatami níima mapalí aboni wabé galabéraga anérami níima auché jaré jiti mapu waminabi o'wéala ju ketasi mapurigá aboni niráa. Echijiti echi jaré mapu ikí ne bichíwali echirigá galabéraga aneko auché jaré sinibí waminabi o'wéala ju ketasi mapurigá echi auché jaré pagótami mapu echirigá galabéraga anérami juko, echijiti echi Melkisereki waminabi walubela níili ketasi mapurigá echi walula Abrami.
\v 8 Jipi rawé tamujé Isaeli pagótami yuwa, echi jaré sacerdote mapu pe bilé 'yesa chapí ibílana makói namuti mapu ikí tamujeta me, abóniko chopi pagótami ju mapu pe waminánomí arigá suwimea, chopi echo'ná Riosi Ra'íchala oselíwalachi, echi Melkisereki jiti rugá, ketasi osirúami ju mapu binói waminá mukuli.
\v 9 Alí si'néami echi jaré sacerdote mapu jipi rawé pe bilé 'yesa chapiko ibílana makói namuti mapu ikí tamujeta me, ne si'néami aboni echi Lebí kúchala kúchuwala ju. Chópita galá omero aniyá mapu ne si'néami aboni, echi Lebí yuwa, ayénachó echirigá 'yali echi Melkisereki pe bilé namuti ibílana makói mapu ikí aboni meli. Alí aboni echirigá 'yali chabé ki'yá, echalí we yáati mapalí echi Abrami pe bilé 'yeka 'yali echi Melkisereki echi jaré namuti mapu ikí binói Abrami meli.
\v 10 Echalí ke cho ranarúami níili si'néami echi jaré sacerdote mapu jipi rawé pe bilé 'yeka chapiko ibílana makói mapu ikí echi jaré Isaeli pagótami me. Chopi je'ná jerigá 'nátaga, omérabo aniyá mapu echi Abrami galá natétali si'néami aboni jiti mapalí echi Melkisereki natépali echi Abrami. Aboni ke cho ranarúami níili, chopi echi Abrami mapurigá si'néami aboni onolá niráa níima riwéali. Echalí echi Abrami echirigá galá natétali si'néami aboni jiti, mapalí binói natétali echi Melkisereki.
\p
\v 11 Echi jaré Lebí kúchala kúchuwala, mapu sacerdote níili, galá 'yali echi jaré Isaeli pagótami echi nulalíwami, Riosi nulalila. Alí aboni ayénachó echi Aroni riwéami rijói kúchala kúchuwala níili, mapu pe kinana bitéali. Alí a echi jaré sacerdote omérasagá ne galabé niráa niwayá echi pagótami mapu arigá galá nijéwaga olali mapurigá aboni echirigá nulérami níili, echalí ma ketasi arigá 'wérali níimili mapu wakinana nawami auché bilé sacerdote mapu ketasi echi Aroni kúchala kúchuwala niráa níima, chopi mapu achigórigá mapurigá echi Melkisereki níisa.
\v 12 Mapujiti a auché jaré isena rijói jawárami níisagá mapurigá o'wéala sacerdote niráa, echalí arigá 'wérali níima mapurigá echi nulalíwami ayénachó nakulíwarami níisa, mapujiti osirúami ju echo'ná Riosi nulalila oselíwalachi mapu chopi echi jaré Aroni kúchala kúchuwala o'wéala sacerdote níima.
\v 13 Chopi echo'ná Riosi Ra'íchala oselíwalachi osirúami ju mapu tamujé Walubélawala Jesucristo ne walubela sacerdote níima. Alí Binói auché biléana rojuáami ju echi jaré Isaeli pagótami. Alí ke wesi echi auché jaré mapu echi Jurá anilíwami rojuáami níili ayénachó walubela sacerdote níili.
\v 14 Mapujiti galá machirúami ju mapu tamujé Walubélawala ranarúami níili jena'í wichimóbachi mapurigá bilé echi jaré wikabé Jurá anilíwami rojuáami pagótami. Alí echi Moisesi tarapé siné rugá anili mapu echi jaré Jurá anilíwami rojuáami pagótami jawárami níima riwéali, o'wéala sacerdote niráa.
\p
\v 15 Alí je'ná jerigá abijí waminabi wabé machiná ju a wilibásagá auché bilé si'nú walubela sacerdote mapu achigórigá mapurigá echi Melkisereki niráa níisa,
\v 16 Echi mapu chopi wilárami ju Walubela Sacerdote niráa mapujiti Binói ne wabé omériga ne sinibí niráa bité, ayénachó mapujiti Binói ketasi siné mukumea. Alí echi bilepi Walubela Sacerdote ketasi wilárami ju chopi mapujiti Binói bilé níili echi jaré Lebí kúchala kúchuwala, mapurigá echi Moisesi osogá nulali mapu echi jaré Lebí kúchala kúchuwala ibílipi niráa, chopi jawárami níima riwéali mapurigá o'wéala sacerdote niráa.
\v 17 Mapujiti echi Bilepi Walubela Sacerdote jiti rugá, je'ná jerigá osirúami ju mapurigá Riosi jeaneli:
\q Mujemi ne Walubela Sacerdote níima ne sinibí niráa, achigórigá mapurigá echi Melkisereki ayénachó walubela sacerdote níili.
\m
\v 18 Echijiti echi nulalíwami ma nakubárami ju mapurigata chabénala nulérami níili, mapujiti echi jaré pagótami ketasi ku'wíratami níima riwéali echi nulalíwami jiti, mapujiti aboni ketasi omérali nijéwaga olayá mapurigá aboni nulérami níili.
\v 19 Alí echi nulalíwami, mapurigá echi walula Moisesi osali, ketasi omérali galabératiya echi jaré pagótami. Chopi tamujeta máputa ma galá bichíi Jesucristo niráa sinibita galá bichíiga buwé mapurigá Binói Jesucristo tamujé tamí echirigá galabératama. Alí echirigá waminabi galabé ju, mapujítita mulubéana Riosi yuwa mapujítita ma galá bichíili Jesucristo niráa.
\p
\v 20 Alí Riosi Binói ne bichíwaga anili mapu echi Walubela Jesucristo wilárami níili, mapurigá ne Walubela Sacerdote niráa.
\v 21 Chopi Riosi ketasi siné bichíwaga aneli ke wesi auché jaré o'wéala sacerdote jeanigá mapu aboni o'wéala sacerdote níima ne sinibí niráa, chopi echi Walubela Jesucristo jiti rugá, Riosi ne bichíwaga anili mapu Binói ne Walubela Sacerdote ju, mapalí Riosi je'ná jerigá aneli mapurigá osirúami ju echo'ná Riosi Ra'íchala oselíwalachi jeanigá
\q Echi Walubela Riosi ne bichíwaga anili, alí ma ketasi nakulíwama, chopi je'ná jerigá ne bichíwaga jeaneli:
\q Mujemi ne sinibí niráa ne Walubela Sacerdote jumi, achigórigá mapurigá echi Melkisereki walula sacerdote níili.
\m
\v 22 Echijiti waminabi wabé galabé ju mapurigá echi Walubela Jesucristo ne bichíwaga anili mapurigá Binói tamujé tamí ku'wírama riwéali, ketasi mapurigá suwaba mapu echi walula Moisesi osogá nulali jeanigá máputa ku'wíratami níibo riwéali, ata suwaba galá nijéwasagá mapurigá binói tamujé tamí osogá nuleli.
\v 23 Alí wikabé rijói ibílipi niráa ne walubela sacerdote níilasali, mapujiti aboni ibili niráa waminá suwísali, echijiti ma mukusá bilé, echalí auché bilé rijói wilárami níili mapurigá walubela sacerdote niráa.
\v 24 Chopi mapujiti je'ná Walubela Jesucristo ma ketasi auchecho siné mukumea, echijiti Binói ne sinibí niráa níima Walubela Sacerdote niráa. Alí echijiti auché jaré isena rijói ke siné echirigá jawásarami níima mapurigá walubela sacerdote niráa.
\v 25 Echi jaré pagótami chopi omero mulubéana Riosi yuwa mapalí aboni galá bichíi echi Walubela Jesucristo niráa. Alí echi Walubela Jesucristo Binói sinibí niráa bité, echijiti Binói galá omero ku wikáwiya si'néami echi jaré mapu ikí mulubéanako Riosi yuwa mapurigá aboni echirigá ku wikawárami níima ne sinibí niráa, ne sinibí. Alí echi Walubela Jesucristo sinibí niráa bité mapurigá Binói sinibí tánama Riosi aboni jiti.
\p
\v 26 Echirigá mata riwali mapurigá echi Walubela Jesucristo ne bichíwali echiyiri ne wabé simírami galabé oláami Walubela Sacerdote ju mapurigá tamujé pagótami newaleli. Echi Walubela Jesucristo ne wabé galabé oláami ju. Alí Binói tarapé chati sitíi oláami ju, nirapé chibi síami niráa. Alí Binói ketasi olá mapurigá echi jaré chati sitíi oláami pagótami olá. Alí Riosi ma wilali echi Walubela Jesucristo echo'ná ripá riwigachi, ne wabé simírami ripabé niráa, ketasi mapurigá echi auché jaré namuti echo'ná ripá riwigachi nirúami niráa.
\v 27 Alí echi Walubela Jesucristo ketasi achigó yiri ju mapurigá echi auché jaré o'wéala sacerdote niráa, mapujiti arigá 'wérali níili mapu si'néami echi auché jaré o'wéala sacerdote sinibí rawé ko'wisáa 'yama Riosi echi jaré namuti. Ayénachó arigá 'wérali níili mapu aboni bachá niráa echirigá ko'wisáa 'yama Riosi jaré namuti mapujiti aboni niráa chati sitíi oláami níili, ayénachó pe wakinana arigá 'wérali níili mapu aboni ko'wisáa 'yama Riosi auché jaré namuti echi auché jaré pagótami chati sitíi olalila jiti, mapujiti echi Walubela Jesucristo sinepi niráa, a Binói niráa nijili mapurigá Binói mi'lirúami níima, ne si'néami echi auché jaré pagótami chati sitíi olalila jiti, alí ketasi arigá 'wérali ju mapurigá Binói auchecho siné echirigá mi'lirúami níima.
\v 28 Chabé ki'yá echi walula Moisesi osogá nulali mapu echi jaré rijói jena'í wichimóbachi piréami jawásarami níima riwéali, ibílipi niráa, mapurigá walubela sacerdote niráa. Alí echi jaré rijói jena'í wichimóbachi piréami arigá ketasi ne sébali galabé oláami ju. Chopi pe wakinánala mapalí echi Moisesi ma echirigá osogá nulali, echalí Riosi Binói bichíwaga anili mapu echi Bilepi Riosi Ranala ne Walubela Sacerdote ju. Alí echi bilepi Riosi Ranala ne wabé simírami galabé oláami ju ne sinibí niráa.
\c 8
\s Echi Walubela Jesusi Katéwami ju mapurigá Riosi bukulíwami bichíwaga anili
\p
\v 1 Alí mapurigá tamujeta ma osogá anili, je'ná chopi waminabi walubéala ju: Tamujeta ma níwa echiyiri Walubela Sacerdote, echi mapu ma asíbali echo'ná ripá riwigachi, echo'ná watonachi mapo'ná Riosi níwala walubela asíbalachi ju, echo'ná mapo'ná echi Walubela Riosi atí.
\v 2 Alí Binói we olá, Walubela Sacerdote niráa, echo'ná pachá ri'obachi, ripá riwigachi nirúami, mapu echi ne bichíwali Riosi ri'obáwala ju, echi mapu echi Walubela Riosi Binói gayénali, echi mapu ke wesi rijói niwáli.
\v 3 Mapujiti ne si'néami echi auché jaré o'wéala sacerdote jawárami ju mapurigá aboni 'yama Riosi jaré namuti kónawami, ayénachó mapurigá aboni ko'wisáa 'yama Riosi echi jaré namuti 'akami mapu ikí echi auché jaré pagótami pama riwéali. Echijiti arigá 'wérali ju mapu echi Walubela Jesucristo ayénachó níwama mapurigá Binói 'yama Riosi.
\v 4 Alí jipi rawé a echi Walubela Jesucristo abijí jena'í wichimóbachi asisáagá, Binói ketasi níimi Walubela Sacerdote niráa, mapujiti abijí nirú jaré rijói sacerdote mapu abijí echirigá 'ya Riosi echi jaré namuti kónawami, mapu echi walula Moisesi osogá nulali, mapu 'yárami níima riwéali Riosi.
\v 5 Alí echi jaré sacerdote jena'í wichimóbachi muchúami we nóchaga olá mapurigá sacerdote niráa echo'ná pachá echi walubé Juríosi pagótami ri'obáwalachi. Chopi echi jaré namuti echo'ná pachá walubé Juríosi ri'obáwalachi nirúami chopi péebi noguí achigó yiri ju echi auché jaré galabé namuti yuwa, echo'ná ripá riwigachi nirúami. Mapujiti echi walula Moisesi je'ná jerigá anérami níili mapalí binói nulérami níili niwánala echi ne bachá niwárami Riosi galila, mapalí Riosi Binói jeaneli: Nibira, mujemi niwáma ne suwaba namuti achigó yiri mapurigá Nijeni mi riwírali mapalimi tamí yuwa asali echo'ná ripá biléana rabó.
\v 6 Chopi tamujé Walubela Sacerdótawala waminabi galabé nóchaga olá Walubela Sacerdote niráa, ketasi mapurigá echi auché jaré sacerdote jena'í wichimóbachi nirúami olá, mapujiti echi tamujé Walubela Sacerdote 'yárami níili mapurigá Binói nóchaga olama Walubela Katéwami Riosi yuwa, echi auché jaré pagótami yuwa, mapurigá Riosi Binói ne wabé galabé bichíwaga aneli echi Binói.
\p
\v 7 Mapujiti a echi jaré pagótami omérasagá nijéwiya mapurigá Riosi chabénala, bachá niráa, nuleli aboni, alí ma ketasi arigá 'wérali níimi mapurigá Riosi bukulíwami, auchecho siné katiwama aboni yuwa.
\v 8 Chopi Riosi riwali mapu echi jaré pagótami ketasi galá nijéwami níili, mapurigá je'ná jerigá osirúami ju echo'ná Riosi Ra'íchala oselíwalachi:
\q Echi Walubela Riosi jeaní: Waminánomí rawé Nijeni bukulíwami auchecho siné katiwama echi jaré Isaeli pagótami yuwa, echi jaré Jurá kúchala kúchuwala yuwa.
\q
\v 9 Chopi Nijeni ketasi achigórigá katiwama aboni yuwa mapurigá Nijeni ki'yánala katéwali aboni pagótamawala yuwa echalí rawé mapalí Nijeni ne sikachí niráa chapigá bayérali aboni echo'ná Ejíptochi anilíwachi kawírali jonsa.
\q Mapujiti echi jaré aboni pagótamawala echalí ki'yánala piréami ketasi nijéwaga olali mapurigá Nijeni katéwali aboni yuwa.
\q Ayénachó echi Walubela Riosi jeaní: Echijiti Nijeni waminá waná ariweli echi jaré ke nijéwami pagótami.
\q
\v 10 Alí echi Walubela Riosi jeaní:
\q Waminánomí rawé Nijeni je'ná jerigá katiwama echi jaré Isaeli anilíwami pagótami yuwa:
\q Echalí Nijeni galá machírama aboni Nijé nulalila niráa, mapurigá aboni galá 'natáma Nijé nulalila jiti.
\q Ayénachó Nijeni osimea Nijé nulalila echo'ná pachana aboni sulálachi niráa, mapurigá aboni galá nakimea nijéwiya.
\q Alí Nijeni níima aboni Riósawala.
\q Alí aboni Nijé Binói pagótamawala níima.
\q
\v 11 Echalí rawé ma ketasi waminabi arigá 'wérali níima mapu ibili aboni waminabi binérama echi auché jaré echo'ná mulubé aboni yuwa piréami,
\q nibilé mapurigá ibili binérama echi jaré aboni ritémawala jeanigá mapu galá níima mapu aboni galá machimea Riosi,
\q mapujiti Riosi jeaní:
\q Echalí rawé ne si'néami pagótami galá tamí machimea.
\q Echalí echi jaré kuchípala galá tamí machimea,
\q ayénachó echi auché jaré o'wéala galá tamí machimea.
\q
\v 12 Mapujiti Nijeni suwaba ku wikáwama mapurigá aboni wabé chati sitíi olali.
\q Alí Nijeni ketásirapé siné auchecho ku 'natama echi jaré aboni chati sitíi olalila jiti.
\m
\v 13 Alí mapalí Riosi aní mapu Binói bukulíwami, auchecho siné katiwama echi jaré pagótami yuwa, echalí Binói echirigá anigá ruyé mapu ma ocháarami ju echi katiwálawami mapurigá Binói bachánala katéwali echi jaré Isaeli pagótami yuwa. Alí suwaba echi jaré namuti mapu ikí ma ocháarami ju, ayénachó suwaba mapu ikí ma ketasi iré, ne suwaba echiyiri ke 'me ayó waminá nakuma.
\c 9
\s Echi jaré Juríosi pagótami ri'obáwala, echi Riosi ri'obáwala yuwa
\p
\v 1 Alí mapalí Riosi bachá niráa katéwali echi jaré Juríosi pagótami yuwa, echalí Binói nuleli mapu churigá nilátarikó mapu aboni chokoba jaga waminabi walubéraga anema Binói Riosi. Ayénachó nuleli mapurigá aboni echirigá olama echo'ná pachá biléanapi ri'obachi jena'í wichimóbachi nirúami.
\v 2 Alí echi ri'obá je'ná jerigá katiwárami níili: Echo'ná pachá echi bachá yéachi, mapo'ná Galabéalachi anérami níili, echo'ná nirúali bilé namuti rajékowami, kicháona rajáami. Ayénachó echo'ná nirúali bilé jubétami mapo'ná muchuwálati echi jaré pani mapu echo'ná 'yárami níili Riosi.
\v 3 Alí echo'ná waminabi pachánala, echo'ná okoná yéachi simíraga, mapo'ná 'yérataga chukuli echi auché biléala chiní wabé ru'náami mapuyiri kimá, echo'ná pachá, ne Wabé Simírami Galabéalachi anérami níili.
\v 4 Alí echo'ná pachá ne wabé Simírami Galabéalachi nirúali bilé namuti jubétami, echi wabé natéami oro jiti niwárami, mapo'ná echi moluwá na'élati. Ayénachó echo'ná nirúali bilé mapuyiri kajoni, ayénachó moba buchuwí uchérami echi wabé natéami oro. Alí echi kajoni chopi niwárami níili mapurigá echi jaré Isaeli pagótami galá newalama mapurigá Riosi bachá niráa katéwali aboni yuwa. Alí echo'ná pachana kajónachi nirúali bilé taa mapuyiri sikolí, oro niwárami, pachánala buchiga muchúami echi maná anilíwami ko'wáami mapurigá Riosi chabénala nijali, ripá riwigachi jonsa. Ayénachó echo'ná pachana kajónachi nirúali echi Aroni níwala kusí, echi mapu auchecho ku sawarali. Ayénachó echo'ná pachana nirúali echi okuá rité chipérami niwárami, mapo'ná osirúami níili echi makói nulalíwami Riosi nulalila, mapurigá Riosi katéwaga nuleli echi jaré pagótami.
\v 5 Alí echi okuá kerubina anilíwami echo'ná we galá kajónachi moba a'nagú wéemi raweka jali. Echirigá aniwáami níili mapu echi Walubela Riosi, echo'ná nasipa asali. Alí okuánika echirigá pe buná uchuga moba pe na'ómali aboni analá jiti echo'ná ri'lé nasipa. Alí echo'ná nasipa níili mapo'ná echi jaré namuti lalá 'yárami níili Riosi, mapurigá echi pagótami chati sitíi olalila ku wikawárami níima. Alí jipi nijeni ketasi omero suwaba ruwigá ra'ícha ne suwaba je'ná jaré namuti jiti.
\p
\v 6 Alí mapalí karúmati je'ná namuti ma echirigá muchúami níisa echo'ná pachá echi walubé rióbachi echi Juríosi pagótami níwala, echalí echi jaré sacerdote sinibí wisabé mo'wili echo'ná pachá ne bachá bakiwáami galabéalachi mapurigá aboni nóchaga olama sacerdote niráa mapurigá Riosi nuleli aboni olánala.
\v 7 Alí echo'ná waminabi pachánala, pachá echi osá bakiwáamichi galabéalachi, chopi bakí echi ne walubela sacerdote. Alí échiko sinibí bamíbali sinepi rawé niráa echo'ná bakili, ayénachó binói sinibí bamíbali echo'ná pachá togá bakili jaré namuti lalá echi Walubela Riosi 'yámia, mapurigá echi binói sacerdote chati sitíi olalila ku wikawárami níima, ayénachó mapurigá echi auché jaré pagótami chati sitíi olalila ku wikawárami níima.
\v 8 Alí suwaba je'ná jaré namuti jiti echi wabé Galabé Riosi Iwigala tamujé tamí machírata mapu ketasi cho iráparami níili echo'ná auché biléana yéachi, mapurigá tamujeta mo'wiboa echo'ná pachá echi osá bakiwáami galabéalachi mapo'ná Wabé Simírami Galabéalachi anélati, ayénachó mapo'ná Riosi atí, mapuyénasí echi jaré sacerdote abijí sinibí rawé waminabi walubéraga anigá Riosi we mo'wili echo'ná pachá echi bachá bakiwáami galabéalachi.
\v 9 Suwaba je'ná jerigá aniwáami ju mapu echi jaré pagótami ketasi omérali mulubéaniya mapo'ná Riosi asali mapujiti ketasi risensia níili mapu aboni simárama echo'ná bachá bakiwáami galabéalachi, mapurigá aboni echirigá mulubéanama Riosi yuwa. Alí aboni ketasi galá bichíiga mulubéana Riosi yuwa mapujiti aboni chopi nakí wikabé namuti mi'agá 'yánala Riosi, ayénachó aboni we 'ya Riosi wikabé auché jaré namuti. Alí ne suwaba echiyiri namuti tarapé omero ne galabé ku bi'wíami niráa niwayá echi jaré pagótami sulálachi mapalí aboni abijí echirigá olako mapurigá Riosi waminabi walubéraga anérami níima.
\v 10 Echi jaré pagótami nulérami níili mapu aboni ketasi ko'méa jaré karúmati ko'wáami, ayénachó mapu aboni ketasi bajima jaré karúmati bajíwami, ayénachó aboni nulérami níili mapu aboni wisabé si'winárigá ubama. Chopi aboni echirigá nulérami níili olánala jena'í wichimóbachi mapuyénasí Riosi ketasi cho si'winárigá nuleli aboni, mapujiti ne suwaba echi jaré nulalíwami si'nú nakulíwarami níima riwéali.
\p
\v 11 Chopi echi Walubela Jesucristo ma nawali chabénala niráa. Alí jipi rawé echi Walubela Jesucristo ne Walubela Sacerdote ju echi ne wabé galabéala jiti mapu ma nawali. Alí jipi echi Walubela Jesucristo we olá sacerdote niráa echo'ná pachá biléana ne wabé simírami galabé ri'obachi, ne wabé simírami galabé niwárami, echi mapu ketasi pagótami niwáala ju. Echirigá aniwáami ju mapu echi wabé simírami galabé ri'obachi mapo'ná Jesucristo we olá sacerdote niráa, ketasi jena'í wichimóbachi nirúami ju, chopi echo'ná ripá riwigachi nirúami ju.
\v 12 Alí echi Walubela Jesucristo ma sinepi bakili echo'ná pachá echi ne wabé Simírami Galabéalachi mapurigá Binói sinepi sunima Walubela Sacerdote niráa olayá, mapurigá ma ketasi 'wérali níima mapu auché bilé walubela sacerdote auchecho siné echirigá olama. Chopi echi Walubela Jesucristo ketasi togá bakili echi jaré chibá owila lalá, nibilé cho toga bakili echi jaré bisero lalá, chopi Binói bakili echo'ná ripá riwigachi nirúami ne wabé Simírami Galabéalachi galá riwíraga mapu Binói lalá ma ku'luwasa 'yárami níili Riosi.
\v 13 Bichíwali ju mapu echi jaré toro lalá, ayénachó echi jaré chibá owila lalá, ayénachó echi bisero mukila ikósatami napisóolawala, ba'wí ro'wérami, ne suwaba galá omérami ju ku bi'wayá echi pagótami mapalí aboni pée uchérami ju echi la jiti, ayénachó echi napisó ba'wí ro'wérami jiti, mapurigá aboni echirigá olasa galá omérama waminabi walubéraga anée Riosi echo'ná pachá echi walubé Juríosi pagótami ri'obáwalachi.
\v 14 Chopi a echirigá ne bichíwali níisagá, waminabi ne wabé simírami omérami ju echi Walubela Jesucristo lalá, mapujiti echi Walubela Jesucristo a Binói niráa nijili, echi sinibí bitéami Riosi Iwigala jiti, echi Walubela Riosi ayá, mapurigá Binói mi'lirúami níima mapurigá suwaba echi jaré namuti ko'wirúami níili. Alí Jesucristo tarapé chati sitíi oláami níili. Alí echi Walubela Jesucristo lalá tamujé tamí ku bi'wá suwaba mapu ikita chati sitíi olali. Alí mapalita chati sitíi olali, echalí tamujé olalila we sitíi níili, ayénachó echirigá ologá tamujeta tarapé kaníili, chopi echi Walubela Jesucristo lalá tamujé tamí ku bi'wá mapurigata chopi ologá pirélabo mapurigá echi Sinibí Bitéami Riosi nakí.
\p
\v 15 Echijiti echi Walubela Jesucristo Walubela Katéwami ju mapurigá Riosi bukulíwami niráa bichíwaga aneli echi pagótami jena'í wichimóbachi piréami. Alí echi Walubela Jesucristo mi'lirúami níili mapurigá galá ku wikawárami níima echi pagótami chati sitíi olalila mapurigá aboni chati sitíi olali mapalí aboni ketasi galá nijéwaga olali mapurigá Riosi bachá niráa nuleli aboni. Ayénachó Jesucristo mukuli mapurigá si'néami mapu ikí Riosi bayeli arigá 'yárami níima mapurigá aboni sinibí niráa pirélama, mapurigá Riosi bichíyami anérami níima aboni.
\v 16 Mapujiti mapalí bilé rijói ne bichíwaga niráa osá bilé oselí jeanigá mapu churigá rojonárami níima binói níwala namuti mapalí binói ma mukumea, alí echi jaré binói níwala namuti ketasi cho echirigá rojonárami níima mapalí abijí ketasi cho bichíwali riwirúami juko mapu ma mukuli echi rijói.
\v 17 Mapujiti mapurigá echi rijói ne bichíwaga osali, ketasi cho olárami níima mapuyénasí abijí bité echi rijói. Chopi echirigá olárami níima mapalí ma mukú echi mapu echirigá ne bichíwaga osali.
\v 18 Echijiti mapurigá Riosi chabé ki'yá, bachá niráa, ne bichíwaga aneli echi jaré Isaeli pagótami, echirigá ayénachó chopi anérami níili mapalí echi jaré namuti lalá ma ku'luwárami níili.
\v 19 Mapujiti mapalí echi walula Moisesi ma ruyeli echi jaré Isaeli pagótami ne suwaba echi jaré nulalíwami jiti, mapurigá Riosi nuleli aboni, alí binói Moisesi chapili echi jaré bisero lalá, echi jaré chibá owila lalá ayénachó, ba'wí asíchiko. Echalí binói chapili pe taa bo'osali sitákami, bilé kusí sawéami, isopo anilíwami yuwa. Alí binói pakeli echi kusí sawéami, echi bo'osali yuwa echo'ná lárali, ba'wí nasóami. Alí binói kúuchi niráa bachímali echi lá, ba'wí nasóami echo'ná oselichi mapo'ná osirúami níili Riosi nulalila. Alí binói ayénachó kúuchi niráa bachímali echi lá, ba'wí nasóami echo'ná moba si'néami echi jaré pagótamichi.
\v 20 Echalí echi walula Moisesi jeaneli: Je'ná ju echi lá mapu ku'luwárami níili mapalí Riosi 'yemi mi ne bichíwaga aneli máputamo ku'wíratami níibo riwéali, átamo galá nijéwasagá mapurigá Riosi 'yemi mi nuleli.
\v 21 Alí echi Moisesi ayénachó lá jiti kúuchi niráa bachímali echi ri'obá. Ayénachó lá jiti kúuchi niráa bachímali suwaba echi jaré namuti echo'ná pachá ri'obachi nirúami mapu ikí echo'ná néerati mapalí aboni waminabi walubéraga aneli Riosi echo'ná pachá ri'obachi.
\v 22 Alí echo'ná Riosi nulalila osirúamichi nulárami níili mapu ne noguí suwaba namuti chopi galá ku bi'wárami níima, echi lá jiti bachímaga olárami. Alí mapalí echi lá ketasi ku'luwárami níisagá, alí echi chati sitíi oluwáwami ketasi ku wikawárami níima.
\s Echi jaré pagótami chati sitíi olalila chopi ku wikawárami ju mapujiti Jesucristo mi'lirúami níili.
\p
\v 23 Alí echi jaré namuti echo'ná ri'obachi nirúami, ibili niráa, ne noguí achigó yiri ju echi auché jaré waminabi galabéala namuti yuwa mapu echo'ná ripá riwigachi nirúami ju. Alí arigá 'wérali níili mapu je'ná jaré namuti echo'ná pachá jena'í wichimóbachi nirúami ri'obachi arigá galabératami níima bacháami Riosi yuwa jaré namuti lalá jiti bachímaga. Chopi echi auché jaré waminabi galabé namuti echo'ná ripá riwigachi nirúami chopi galabératami níili bacháami Riosi yuwa echi Walubela Jesucristo lalá jiti.
\v 24 Mapujiti echi Walubela Jesucristo ke siné bakili echo'ná pachánala echi wabé simírami galabéalachi jena'í wichimóbachi nirúamichi ri'obá mapu pagótami jiti niwárami níili. Alí jena'í wichimóbachi nirúami ne wabé simírami galabéalachi chopi pe ne noguí achigó yiri níili echi ne wabé simírami Galabéalachi echo'ná ripá riwigachi nirúami yuwa. Chopi echi Walubela Jesucristo ma bakili echo'ná ne wabé simírami Galabéalachi, echo'ná ripá riwigachi nirúami, mapo'ná jipi rawé Binói we ra'ícha bacháami Riosi yuwa, tamujé tamí jiti.
\v 25 Alí echi jaré Juríosi pagótami ne walula sacerdótawala ne sinibí bamíbali bakí echo'ná pachá echi wabé simírami galabéalachi, jena'í wichimóbachi nirúami ri'obachi ne wabé pachánala, mapurigá binói 'yama Riosi echi lá mapu ke binói lalá ju, chopi echi Walubela Jesucristo ketasi echirigá wisabé niráa a Binói nijá mapurigá waminá mi'lirúami níima.
\v 26 Mapujiti a echirigá níisagá, echalí arigá 'wérali níimili chabé chokichí jonsa, mapalí jonsa je'ná wichimoba gayenárami níili, mapurigá echi Walubela Jesucristo wisabé, ibili bamíbali niráa, waminá mi'lirúami níimi. Chopi jipi mapalí ma mulubé ju mapalí ma suwibama suwaba namuti jena'í wichimóbachi nirúami, jipi bukulí rawé jonsa, echi Walubela Jesucristo sinepi niráa a Binói nijali mapurigá waminá mi'lirúami níima, mapurigá Binói echirigá waminá 'yema suwaba echi chati sitíi oluwáwami.
\v 27 Mapujiti arigá 'wérali ju mapu ne si'néami pagótami, ibili niráa, sinepi suwimea. Ayénachó 'wérali ju mapurigá ma suwisáa, aboni ibili niráa bacháami jábama Riosi yuwa, mapurigá si'néami mapu ikí ketasi ku wikawárami ju arigá kastigo 'yárami níima.
\v 28 Echirigá ayénachó echi Walubela Jesucristo sinepi nijírami níili mapurigá Binói mi'lirúami níima, mapurigá Binói echirigá 'yema wikabé pagótami chati sitíi olalila. Alí Binói Jesucristo auchecho siné ku nawama jena'í wichimóbachi mapurigá Binói ku'wírama si'néami echi jaré mapu ikí galá bichíiga buweko mapurigá Binói ku nawama. Chopi mapalí echi Walubela Jesucristo echirigá auchecho siné ku nawasa, echalí Binói ma ketasi auchecho siné mukumea, echirigá ku 'yémiya echi chati sitíi oluwáwami.
\c 10
\p
\v 1 Mapujiti echi jaré pagótami chopi péebi niráa machíralati, Riosi nulalila jiti, mapurigá waminánomí aboni ne sébali ku'wíratami níima riwéali, echi Walubela Jesucristo jiti. Mapujiti echi nulalíwami ketasi omérali ne galabé wachínaga oláami niráa niwayá echi jaré pagótami mapu arigá mulubéanali Riosi yuwa, ne si'néami mapu ikí sinibí bamíbali ko'wigá 'yali Riosi echi jaré namuti mapurigá nulárami ju, echo'ná Riosi nulalílachi.
\v 2 Mapujiti a echi nulalíwami omérasagá wachínaga oláami niráa niwayá echi pagótami, alí aboni ma ketasi waminabi echirigá ko'yagá 'yami Riosi echi jaré namuti. Chopi echi jaré pagótami mapu echirigá ko'yagá 'ya Riosi echi jaré namuti ma sinepi bi'wíami níisagá, alí aboni ma ketasi waminabi chati sitíi oláami mayemi.
\v 3 Chopi si'winárigá mapalí echi jaré pagótami echirigá ko'yagá 'ya Riosi echi jaré namuti, echalí aboni sinibí bamíbali we o'mónaga newalá aboni chati sitíi olalila jiti.
\v 4 Mapujiti echi jaré toro lalá, ayénachó echi jaré chibá owila lalá ketásirapé omero ku'wíriya echi pagótami mapurigá aboni chati sitíi olalila ku wikawárami níima.
\p
\v 5 Echijiti mapalí echi Walubela Jesucristo nawali jena'í wichimóbachi, echalí Binói jeaneli echi Riosi Onorúami:
\q Mujé ketasi nakí mapu echi jaré pagótami mi ko'yagá 'yama echi jaré namuti, nibilé mi nakí mapu aboni mi 'yama jaré namuti mapurigami echijiti ku wikáwama aboni chati sitíi olalila.
\q Chopi Mujemi tamí 'yali mapurigani bitélama mapurigá Rijói niráa.
\q
\v 6 Ayénachó echi Walubela Jesucristo jeaneli Riosi:
\q Mujemi ketasi galá nirali mapurigá echi jaré pagótami ko'yagá ikósali echi jaré namuti, nirapé mapurigá aboni ko'yagá 'yali jaré namuti mapurigá aboni chati sitíi olalila echijiti ku wikawárami níima.
\q
\v 7 Echalí echi Walubela Jesucristo waminabi jeaneli Riosi:
\q Nijeni mi jeaneli: Nibira, mani nawali jena'í wichimóbachi mapurigani chopi olama mapurigá mujemi nakí, achigórigá mapurigá osirúami ju tamí jiti rugá,
\q echo'ná Mujé Ra'íchala osurúmachi.
\m
\v 8 Alí echirigá anigá echi Walubela Jesucristo arigá aneli mapu Riosi ketasi nakí mapu echi pagótami ko'yagá 'yama echi jaré namuti, nibilé cho nakí mapu aboni ko'yagá ikósama jaré namuti mapurigá aboni chati sitíi olalila echijiti ku wikawárami níima, chopi echirigá arigá nulárami ju mapurigá echi walula Moisesi osogá nulali.
\v 9 Alí pe wakinánala echi Walubela Jesucristo jeaneli Riosi:
\q Nijeni ma nawali jena'í wichimóbachi mapurigani chopi olama mapurigá Mujemi nakí.
\m Echirigá aniwáami ju mapu echi Walubela Jesucristo chopi olali mapurigá Riosi nakili, mapurigá ma ketasi arigá 'wérali níima mapurigá echi jaré pagótami waminabi ko'yagá 'yama Riosi echi jaré namuti, mapujiti echi Walubela Jesucristo a Binói niráa nijali mapurigá Binói mi'lirúami níima, echi jaré pagótami chati sitíi olalila jiti.
\v 10 Alí mapujiti echi Walubela Jesucristo chopi echirigá olámiya nawali mapurigá Riosi nakili, echijiti Riosi ma tamujé tamí wabé galabérali, mapujiti echi Walubela Jesucristo sinepi niráa a Binói nijili mapurigá mi'lirúami níima, tamujé chati sitíi olalila jiti, chopi jipi echi Walubela Jesucristo ma ketasi auchecho siné mi'lirúami níima.
\p
\v 11 Alí sinibí rawé echi jaré sacerdote ne bichíwali we nócha echo'ná pachá echi walubé Juríosi ri'obáwalachi, mapo'ná aboni wisabé niráa ko'yagá 'ya Riosi echi jaré achigó yiri namuti. Chopi aboni echirigá ologá ke siné omero ku wikáwiya echi jaré pagótami chati sitíi olalila.
\v 12 Chopi mapalí echi Walubela Jesucristo ma sinepi niráa nijali a Binói niráa, mapurigá Binói mi'lirúami níima, echi jaré pagótami chati sitíi olalila jiti, alí Binói ma ku owinsa, echalí ku asíbali Riosi yuwa, echo'ná watonachi.
\v 13 Echalí jonsa echi Walubela Jesucristo chopi echo'ná Riosi yuwa watonachi atí, mapuyénasí echi jaré Binói asayela omératami níima, mapujiti Riosi Onorúami echo'ná ri'léami echi Walubela Jesucristo ralálachi ro'wábama echi jaré Binói asayela, mapurigá jaré namuti rikékowami niráa.
\v 14 Mapujiti mapalí echi Walubela Jesucristo sinepi niráa a Binói nijali mapurigá mi'lirúami níima, echalí Binói echirigá ologá ne sébali galabératali echi jaré mapu Binói chapili mapurigá Binói níwala niráa, mapurigá aboni sinibí niráa echirigá galabératami níima.
\v 15 Ayénachó echi Wabé Galabé Riosi Iwigala tamujé tamí achigórigá ané; mapujiti bachá niráa jeaní:
\q
\v 16 Echi Walubela Riosi je'ná jerigá aní:
\q Waminánomí rawé Nijeni je'ná jerigá katiwama echi jaré Isaeli pagótami yuwa:
\q Nijeni galá machíratama aboni, Nijé nulalila jiti, mapurigá aboni ne galá machimea Nijé nulalila, ne sulachí niráa.
\q Ayénachóni osimea Nijé nulalila echo'ná pachana abónichi niráa, mapurigá aboni sinibí 'natama Nijé nulalila jiti.
\m
\v 17 Alí echi Wabé Galabé Riosi Iwigala waminabi jeaní:
\q Nijeni ke siné ku auché 'natama mapurigá aboni chati sitíi olali. Nibilé sineni ku auché 'natama mapurigá aboni ketasi nijéwaga olali mapurigá Nijeni nuleli aboni.
\m
\v 18 Echirigá biché mapalí Riosi ma ku wikáwali echi jaré chati sitíi oluwáwami, echalí ma ketasi arigá 'wérali ju mapurigá bilé namuti mi'lirúami níima mapurigá echi chati sitíi oluwáwami auchecho ku wikawárami níima.
\s Galá níima máputa mulubéanabo Riosi yuwa
\p
\v 19 Echijiti keni ritémawa, jipi tamujeta galá omero mo'wiyá echo'ná pachánala echi ne Wabé simírami Galabéalachi echo'ná ripá riwigachi nirúami mapo'ná Riosi atí, mapujiti echi Walubela Jesucristo lalá ma ku'luwárami níili tamujé tamí jiti.
\v 20 Jípita galá omero echo'ná pachánala mo'wiyá, mapujiti Jesucristo bukulíwami buwirali mapurigá tamujeta, sinibí piréami niráa, echo'ná simáraga mo'wiboa, echo'ná ripá riwigachi wabé simírami Galabéalachi, achigórigá mapurigá echi Juríosi pagótami walubela sacerdótawala bakí echo'ná pachánala echi wabé simírami galabéalachi, jena'í wichimóbachi nirúami ri'obachi. Alí Jesucristo echirigá buwirali mapalí Binói ma ku owinsa bakili echo'ná ripá riwigachi mapurigá Rijói niráa.
\v 21 Jipi echi Walubela Jesucristo tamujé Walubela Sacerdótawala ju. Jipi Binói galá nulé ne si'néami echi jaré Riosi kúchuwala.
\v 22 Echijiti galá níima máputa tarapé 'yékami sulélabo, chopi máputa galá bichíiga mulubéanabo Riosi yuwa, mapujiti Jesucristo ma tamujé tamí ku bi'wali tamujé sulálachi niráa, mapurigá tamujeta ma ke o'monabo mapurigá chati sitíi oláami niráa. Alí galá níima mapurigata ubáratami niráa níibo, ne galabéala ba'wí jiti, tarapé wikúamiti mapurigá echi Juríosi sacerdótawala olali.
\v 23 Alí waminábita galá bichiga olabo achigórigá mapurigata ma galá bichíili. Ketásita si'winárigá bichíibo, mapujiti Riosi ne bichíwali olama achigórigá mapurigá tamujé tamí bichíwaga aneli mapu Binói olama riwéali, mapurigá osirúami ju echo'ná Riosi Ra'íchala oselíwalachi.
\v 24 Alí ne galá níima mapu tamujeta a'nawita galá 'natasa, mapu churigata a'nagupi nagúurabo mapurigata ibili niráa waminabi wabé galéami níibo, ayénachó mapurigata ibili niráa waminabi galabé oláami níibo.
\v 25 Alí ketasi galá níima máputa waminá ariwebo napawíi echi auché jaré bichíyami yuwa, ketasi mapurigá jaré ma ketasi napawí echi auché jaré yuwa. Chopi galá níima tamujeta a'nagupi waminabi galá bichíiratasa. Jipi waminabi galá níima echirigá a'nagupi bichíiratasa mapujítita galá machí mapu echi Walubela Jesucristo rawéwala ma ne mulubé níilasimí.
\p
\v 26 Mapujiti mapalí echi jaré pagótami ma galá machíratami níisa echi ne Bichíwali, alí a aboni waminabi nokuísagá chati sitíi olayá, ayénachó a aboni we nakisáagá echirigá chati sitíi olánala, echalí aboni ma ketasi ku wikawárami níima, mapujiti aboni ketasi galá bichíili mapurigá Jesucristo mi'lirúami níili aboni chati sitíi olalila jiti.
\v 27 Echalí aboni wabé majaga buwema mapuyénasí Riosi ne wabé 'yoka, walú kastigo 'yama, mapalí Binói waminá ikósaga suwábama echi jaré Binói sayela.
\v 28 Chabé ki'yá mapalí jaré pagótami ketasi galá nijéwaga olali mapurigá echi walula Moisesi osogá nulali, echalí echiyiri pagótami arigá waminá ko'wirúami níili, mapalí okuá testigo chópirigá wi'nijili aboni, bikiyá kéremá. Echalí echi jaré chati sitíi oláami tarapé natimaga arigá ko'wílati.
\v 29 Alí jaré pagótami ke 'me nirá echi Walubela Riosi Ranala. Ayénachó aboni echirigá ologá wabé sitíi nirá echi Walubela Jesucristo lalá mapu sinepi ku'luwárami níili mapurigá aboni chati sitíi olalila ku bi'wárami níima, mapurigá Riosi bachá niráa ne bichíwaga anigá katéwali jena'í wichimóbachi piréami pagótami yuwa. Alí echi jaré ke bichíyami pagótami mapurigá bilé namuti rimisókawami niráa mayé echi Walubela Riosi Ranala. Ayénachó echiyiri ke bichíyami pagótami ne wabé riwélata echi wabé Galabé Riosi Iwigala. Chopi echi Walubela Riosi arigá wabé galé si'néami pagótami. Echijiti galá níima mapu echiyiri chati sitíi oláami pagótami waminabi wabé simírami kastigo 'yárami níima, ketasi mapurigá echi auché jaré kastigo 'yárami níima mapu ketasi nijéwaga olali mapurigá echi walula Moisesi osogá nulali.
\v 30 Alí tamujeta galá machí mapu echi Walubela Riosi jeanili: Nijeni chopi ju mápuni kastigo 'yama echi jaré chati sitíi oláami. Nijeni walú kastigo agá ku natétama aboni. Ayénachó jeanili: Echi Walubela Riosi waminá justikia olama echi jaré Binói pagótamawala yuwa.
\v 31 ¡Ne wabé simírami majawíwami ju mapu echi sinibí bitéami Riosi sinibí niráa ne walú kastigo 'yama echi jaré chati sitíi oláami pagótami!
\p
\v 32 Chopi galá ku 'natasi 'yemi mapurigá chabénala rawé 'yémitamo ne wabé risúu olárami níili, mapalítamo ne chokichí machíratami níili echi Galabé Riosi Ra'íchala, ayénachó mapurigátamo galá bichíiga anáchali mapalítamo echirigá risúu olárami níili.
\v 33 Echalí jaré 'yemi ne wabé risúu olárami níili, ayénachó jaré walú kastigo 'yárami níili, echi auché jaré pagótami riwírataga. Ayénachó auché jaré 'yemi risúu olárami níili chopi mapujítitamo achigórigá bichíili mapurigá echi jaré mapu bachá niráa risúu olárami níili.
\v 34 Echalítamo ayénachó wabé natimali echi auché jaré ritémtami mapu pachá mo'wárami níili, mapujiti aboni nawésali Riosi Ra'íchala. Alí bichétamo arigá wabé kaníili mapalí echi auché jaré pagótami 'yemi mi chuwé 'yeli 'yemi níwala namuti, mapujítitamo galá machili máputamo níwami ju ne wabé simírami galabé namuti echo'ná ripá riwigachi nirúami, echi mapu ne sinibí niráa nirúlama.
\v 35 Echijiti sinibí waminabi galá bichíisi mapurigátamo ma galá bichíili, mapujítitamo echijiti ne wabé simírami galabéala 'yárami níibo.
\v 36 Galá níima mapu 'yémitamo sinibí kilíi ologá pirélabo mapurigátamo galá omérabo olayá mapurigá Riosi nakí, ayénachó mapurigátamo echirigá narepo mapurigá Riosi 'yemi mi bichíwaga aneli máputamo arigá 'yárami níibo.
\v 37 Mapujiti echo'ná Riosi Ra'íchala oselíwalachi je'ná jerigá osirúami ju:
\q We yáati, ke 'me ayó nolínama echi mapu arigá nawama.
\q Échiko ketasi waminá wi'lí buwema.
\q
\v 38 Chopi si'néami mapu ikí Nijeni nareko, abóniko ne galá bichíiga pirélama.
\q Chopi jaré tamí ariwesa, ku kuwana simásagá,
\q Nijeni ketasi kanílama echi jaré aboni jiti.
\m
\v 39 Chopi tamujé ketasi ku kuwana ro'wíami ju, mapurigá auché jaré mapu ku ro'wiga 'wigá. Chopi tamujeta galá bichíyami ju Riosi. Echijiti tamujé aliwala sinibí niráa piréami níima.
\c 11
\s Echi Bichíilawami
\p
\v 1 Mapalita galá bichíi Riosi, echalita bichíwali mayé máputa waminánomí narepo echi jaré namuti máputa we buwé, mapujiti Riosi bichíwaga anili mapu tamujé tamí echirigá 'yama. Ayénachó mapalita galá bichíi Riosi, echalí tamujeta ne bichíwali mayé mapu arigá nirú echi jaré namuti máputa ke chirigá ritiwá jipi rawé.
\v 2 Echi jaré tamujé pagótamawala chabé ki'yá piréami galabé oláami anélati mapujiti aboni galá bichíili Riosi.
\p
\v 3 Mapujiti tamujeta galá bichíi Riosi Ra'íchala, echijítita galá machí mapu Riosi niwáli ne suwaba namuti mapalí Binói chopi ra'íchaga anili mapu echi jaré namuti arigá niwárami nílama. Echirigá echi jaré namuti mapu jípita ritiwá, ketasi niwárami níili auché jaré namuti jíti, mapujiti echalí ki'yá chokichí tarapé biyiri nirúali.
\p
\v 4 Echi chabé ki'yá bitéami Abeli galá bichíili Riosi, echijiti binói bilé bo'wá mi'yagá 'yali Riosi. Alí echirigá ologá echi Abeli 'yali Riosi bilé waminabi galabéala namuti, ketasi mapurigá echi binói rijimala Kaíni riwéami 'yali. Echijiti Riosi anili mapu echi Abeli we galabé oláami níili. Ayénachó Riosi nareli echi jaré namuti mapu echi Abeli ko'yagá 'yali. Echijiti echi Abeli mapu arigá mukúami ju, abijí tamujé tamí galá binera, mapujítita nawésarami ju mapurigá echi Abeli echirigá galá bichíili Riosi.
\p
\v 5 Echi Enoko riwéami rijói galá bichíili Riosi, echijiti binói tólati echo'ná ripá riwigachi mapalí ke cho mukuli. Alí echi Enoko ma ketasi auché riwílati jena'í wichimóbachi, mapujiti Riosi ma toli. Alí echo'ná Riosi Ra'íchala oselíwalachi osirúami ju mapu chabénala mapalí echi Enoko ketasi cho tólati echo'ná ripá riwigachi, mapu echi Enoko chopi ologá bitéali mapurigá Riosi nakili.
\v 6 Alí echi jaré pagótami ketasi chirigá omero olayá mapurigá Riosi nakí, mapalí aboni ketasi bichíi Riosi, mapujiti arigá 'wérali ju mapu echi jaré mapu ikí nakiko mulubéanala Riosi yuwa, arigá galá bichíiga mayema mapu ne bichíwali nirú Riosi. Ayénachó 'wérali ju mapu aboni bichíima mapu Riosi galá ku'wírama echi jaré mapu ikí galá ága machináliko Binói Riosi.
\p
\v 7 Alí echi Noé galá bichíili Riosi. Echijiti mapalí Riosi ruyeli echi Noé mapurigá pe wakinánala arigá ikimea mapurigá binói Noé ke cho siné riwali ikíachi, echalí echi Noé galá nijéwaga mapurigá Riosi nuleli, arigá niwáli bilé walubé barko anilíwami, mapuyiri kalí niráa, mapurigá echo'ná walubé ba'wírali moba inama. Echalí echi Noé echirigá niwáli echi barko mapurigá echi jaré binói kúchuwala ketasi waminá si'lima echi walubé ba'wí ukúuchi jena'í wichimóbachi. Echi Noé echirigá galá bichíili Riosi, echijiti binói galá nijéwali mapurigá Riosi nuleli. Alí echirigá ologá echi Noé arigá wi'nijili echi auché jaré ke bichíyami pagótami jena'í wichimóbachi piréami. Ayénachó Riosi galá nirali echi Noé mapujiti binói echirigá bichíili Riosi.
\p
\v 8 Echi Abrami galá bichíili Riosi, echijiti binói galá nijéwali mapalí Riosi júuli echo'ná auché biléana kawírali simínala. Echalí Riosi bichíwaga aneli mapu arigá 'yama echi auché biléana kawírali mapurigá binói Abrami kawíwala niráa. Alí echi Abrami arigá simili echo'ná binói kawíwalachi jonsa, echo'ná echi auché biléana kawírali simiyá, tarapé cho machigá mapu kumi simea riwéalo.
\v 9 Echi Abrami ne galá bichíili Riosi, echijiti binói bitéali mapurigá si'wina bitéami niráa, echo'ná kawírali mapo'ná Riosi bichíwaga aneli mapu Binói 'yama mapurigá echi Abrami kawíwala niráa. Alí echo'ná ibílana echi Abrami pe téeli niráa bitélasali, mapuyiri chiní niwárami kalirasa. Alí pe kinánala echi Isaka ayénachó echirigá olali, echi Jakobo asíchiko. Alí aboni okuánika achigórigá ne bichíwaga anélati mapurigá Riosi bichíwaga aneli echi Abrami.
\v 10 Alí echi Abrami echirigá pe téeli niráa bitélasali echo'ná, mapujiti binói we nakigá buweli mapurigá binói bitélama echo'ná Walúlachi, ripá riwigachi nirúami, mapo'ná ibílana kalírali ne wabé jiwériga tigoka jawárami ju, echi Walúlachi mapu Riosi Binói a'láraga niwáli.
\p
\v 11 Alí echi Abrami upila, Sara riwéami, ayénachó galá bichíili Riosi, echijiti Riosi 'yali mapurigá echi Sara galá omérama bilé táa ranaya mapalí binói ne wabé simírami wiláami níili mapuyena ma ke omérama riwélia echi táa ranaya. Echijiti echi Sara echirigá ne wabé wiláami níisa, arigá ranali bilé táa towí, mapujiti binói galá bichíili mapu Riosi arigá 'yama riwéalo mapurigá Binói bachá niráa bichíwaga anili.
\v 12 Echirigá mapalí echi Abrami wabé ochérami níili, mapalí ma ne mulubé mukumea riwéali, echalí arigá ranarúami níili binói nolá. Alí wakinánokuá echi Abrami nolá kúchala kúchuwala ne wabé simírami wikabé muweli, mapu ikí echi jaré sopolí ripá riwigachi muchúami, ayénachó mapu ikí echi saté echo'ná walú ba'wírali suwé nirúami, mapu ketasi omérawami ju taráa.
\p
\v 13 Alí ne si'néami je'ná jaré mapu ne galá bichíyami níili Riosi, arigá waminá suwili ke cho naresa mapurigá Riosi bichíwaga aneli mapu Binói 'yama riwéalo. Alí aboni echirigá galá bichíili, echijiti aboni mikabé niráa riwali echi jaré namuti. Echirigá aboni galá bichíiga, ne wabé kaníili mapurigá ma 'yárami niráa echi jaré namuti. Alí echirigá ologá aboni galá machírali echi auché jaré pagótami mapu echi jaré mapu ikí galá bichíi Riosi pe téelipi niráa piréami níima riwéali jena'í wichimóbachi, mapujiti aboni chopi echo'ná ripá riwigachi piréami níima riwéali ne sinibí niráa.
\v 14 Alí ne si'néami echi jaré mapu ikí echirigá bichíiga nawésako, abóniko ne galá machili echi auché jaré pagótami mapu aboni abijí 'yasa 'yena biléana kawí, mapu aboni kawíwala níima, mapujiti aboni ketasi jena'í wichimóbachi piréami níima sinibí niráa.
\v 15 Alí a aboni ne bichíwali 'natásagá jena'í wichimóbachi nirúami kawí jiti, mapo'ná jonsa aboni simíbali, echalí aboni ne bichíwali omérami ku siyá echo'ná.
\v 16 Chopi echi jaré bichíyami nakili bilé kawí ne wabé simírami galabéala, echi mapu echo'ná ripá riwigachi nirúami ju. Echijiti echi Walubela Riosi ketasi riwela mapalí Binói anérami ju aboni Riósawala, mapujiti Binói ma a'lárali biléana walúlachi mapo'ná echi jaré bichíyami sinibí niráa pirélama.
\p
\v 17 Alí mapalí Riosi nakili machinália acha galá nijéwama echi Abrami, echalí Riosi machinálaga aneli echi Abrami mapu mi'agá 'yama binói ranala, Isaka riwéami. Alí echi Abrami ne galá bichíili Riosi, echijiti binói arigá nakili echirigá mi'agá 'yánala Riosi echi Isaka. Echalí echi Abrami arigá echirigá mi'agá 'yama riwéali Riosi echi bilepi kepu raná. Chopi chabénala, bachá niráa, Riosi arigá ne bichíwaga aneli echi Abrami jeanigá:
\v 18 Echi Isaka riwéami mujé ranala kúchala kúchuwala ne wikabé muwema, alí ne si'néami aboni ne bichíwali mujé binói pagótamawala níima.
\v 19 Echirigá níili mapu echi Abrami galá machili mapu Riosi we omérami ju ku o'wíntiya echi jaré suwíami. Ayénachóta omero aniyá mapu echi Isaka ne noguí mi'lirúami níili. Chopi binói ku 'yárami níili echi Abrami, galá ku bitéami niráa.
\p
\v 20 Alí echi Isaka ayénachó galá bichíili Riosi. Echijiti echi Isaka galá omérali bichíwaga aniya echi okuá binói kúchuwala, echi Jakobo riwéami, echi Esaú riwéami, mapu Riosi bichíwali ne wabé ku'wírama aboni waminánomí.
\v 21 Echi Jakobo ayénachó galá bichíili Riosi, echijiti mapalí binói ma ke 'me ayó mukumea riwéali, echalí binói arigá ne galá bichíwaga anili mapu Riosi ne wabé ku'wírama riwéali echi José kúchala kúrowi okuánika. Alí echalí echi Jakobo waminabi walubéraga aneli Riosi, echo'ná binói tisólachi moba bunaga chukugá.
\v 22 Echi José galá bichíili Riosi, echijiti mapalí binói ma ke 'me ayó mukumea riwéali, echalí binói rugá anili mapurigá echi jaré wikabé Isaeli kúchala kúchuwala arigá ne bichíwali wabé wakinánomí ku simama echo'ná Ejíptochi anilíwachi kawírali jonsa. Ayénachó echi José galá nuleli echi jaré aboni mapu echalí ayénachó ku tomea binói José mukúami sapala.
\p
\v 23 Alí echi Moisesi 'wénala ayénachó galá bichíili Riosi, echijiti mapalí echi Moisesi ranálati, echalí binói 'wénala wabé chiná niráa nasoli echo'ná pachá aboni pirélachi, bikiyá michá iyénasí, mapujiti binói 'wénala ne wabé ba'yórali echi táa towí. Ayénachó aboni ketasi majali mapujiti echi walula silíami arigá ma nulali ko'winala echi kúuchi kúruwi.
\v 24 Alí echi Moisesi ayénachó galá bichíili Riosi. Echijiti mapalí binói ma walú ochérali, echalí binói ketasi nakili mapurigá binói echi walula silíami malala ranala anérami níima, echo'ná Ejíptochi bitéami.
\v 25 Alí binói Moisesi waminabi nakili risúu olárami níilanala echi auché jaré Riosi pagótawala yuwa, chopi binói ketasi nakili wabé kaníliga chati sitíi olánala, mapujiti echi jaré mapu echirigá kaníliga chati sitíi olako, pe téeli niráa echirigá kanili.
\v 26 Echirigá echi Moisesi waminabi galabé nilali mapurigá binói risúu olárami nílama mapurigá echi Walubela Jesucristo risúu olárami níima riwéali. Chopi echi Moisesi ketásirapé echirigá galabé nirali ne suwaba echi jaré namuti níilawami echo'ná Ejíptochi nirúami, mapujiti binói chopi galabé nirali suwaba mapurigá binói 'yárami níima riwéali Riosi jiti waminánomí.
\v 27 Echi Moisesi galá bichíili Riosi, echijiti binói ku simili echo'ná Ejíptochi anilíwachi kawírali jonsa, chopi ketasi echirigá ku simili mapujiti binói, siné káachi we majali echi walula silíami, mapu wabé yóami níili. Echalí echi Moisesi chopi waminabi galá bichíiga ku simili, mapurigá galá riwalá niráa Riosi, echi mapu ketasi ritiwíwami ju.
\p
\v 28 Echi Moisesi galá bichíili Riosi, echijiti binói we omáwali echalí omowálawachi mapalí echi kúuchi bo'wá ko'wílati. Echalí binói nulali echi la jiti uchénala ibílana yéachi mapo'ná piréali echi jaré Isaeli pagótami, mapurigá echi walubela Riosi kapitánawala mapu ko'wimea riwéali echi jaré bachá o'wéalapala bachirúami ketasi echirigá ko'wimea echi jaré Isaeli pagótami níwala o'wéalapala bachá jáwami kúrowi.
\v 29 Alí echi jaré Isaeli pagótami galá bichíili Riosi, echijiti aboni galá omérali waminá bo'ómana nasipa simara, echo'ná walú ba'wírali Sitánachi anilíwachi simara, mapurigá echo'ná wi'yérali wakichéachi niráa. Chopi mapalí echi jaré Ejíptochi piréami achigórigá simáranali, echalí ne si'néami aboni waminá si'lili.
\p
\v 30 Echi jaré Isaeli pagótami galá bichíili Riosi, echijiti suwaba najuli echi ripabé tigótami mapu noligá tigótami níili echo'ná walúlachi Jerikochi anilíwachi, mapalí echi jaré Isaeli pagótami galá bichíiga, noligá simáraga nolérali echo'ná walúlachi, isínapi niráa, kichao rawé yénasí.
\v 31 Echi Ra'aba riwéami mukí mapu chabénala chati sitíi oláami níili, arigá galá bichíili Riosi. Echijiti binói ketasi mi'lirúami níili mapalí echi auché jaré ke nijéwami pagótami arigá waminá suwábarami níili. Echalí echi Ra'aba galá ku'wíratami níili mapujiti binói bachá niráa ku'wíraga nareli echi okuá Isaeli rijói mapu chiná niráa, bachá 'nésiya mo'wili echo'ná walúlachi.
\p
\v 32 ¿Piri jítini rugá waminabi animea? Ketásini omero waminabi wi'lí ra'ícha echi Gereoni jiti rugá, nibilé cho echi Baraka jiti rugá, nibilé cho echi Sansoni jiti rugá, nibilé cho echi Jepaté jiti rugá, nibilé cho echi Rabiri jiti rugá, nibilé cho echi Samueli jiti rugá, nibilé cho echi auché jaré jiti rugá, si'néami mapu ikí Riosi jiti julárami níili nawisánala.
\v 33 Ne si'néami echi jaré aboni echirigá galá bichíili Riosi. Echijiti jaré aboni galá nayúrali sayériga nakoa auché jaréana piréami o'wéala. Alí auché jaré galá omérali wachínaga nuláa mapurigá o'wéala silíami niráa mapujiti aboni galá bichíili Riosi. Ne si'néami aboni galá ku'wíratami níili achigórigá mapurigá Riosi bachá niráa ne bichíwaga anili mapurigá aboni galá ku'wíratami níima. Alí jaré aboni ayénachó galá ku'wíratami níili mapalí Riosi 'yérali echi jaré wabé jobátami o'wéala namuti chumulá mapurigá echi jaré bichíyami ketasi waminá ko'wirúami níima echi jaré jobátami namuti jiti.
\v 34 Auché jaré ne galá bichíili Riosi, echijiti Binói galá cho'wali echi walú na'í wabé ratáami mapurigá aboni ketasi waminá ikósarami níima. Auché jaré ayénachó galá bichíili Riosi, echijiti aboni ketasi waminá ko'wirúami níili i'wéala ripiyá jiti mapalí jaré arigá nakili echirigá ko'winala aboni. Auché jaré mapu tarapé jiwérami níili, arigá ne wabé jiwérami niráa niwálati mapujiti aboni galá bichíili Riosi. Auché jaré mapu ayénachó galá bichíili Riosi, echijiti jiwérawami 'yárami níili mapurigá aboni galá omérama nakówaga nayúriya auché jaréana jonsa síami o'wéala sontarsi sayeria.
\v 35 Ayénachó nirúali jaré muguí mapu galá bichíili Riosi, echijiti aboni auchecho siné ku nareli, ku o'wíntarami niráa, jaré aboni níwala mapu ma suwíami níili.
\p Chopi auché jaré galá bichíyami ritémtami ne wabé simírami risúu olárami nílasa, arigá waminá suwili. Echalí aboni arigá ko'wirúami níili mapujiti aboni ketasi nakili aninala mapu aboni ketasi bichíi Riosi. Aboni chopi nakili mapu pe waminánomí aboni auchecho ku o'wínaga, waminabi galabéala niráa, sinibí pirélama Riosi yuwa.
\v 36 Auché jaré mapu galá bichíyami níili Riosi ne wabé sitíila anélati. Ayénachó jaré ne wabé wipisólati. Ayénachó aboni jiero wiya jiti bulirúami níisa, echo'ná pachá kumurachi mo'wálati.
\v 37 Auché jaré rité jiti basibuka ko'wirúami níili. Auché jaré nasipa ripunárami níili echi seruchi jiti. Auché jaré wabé risúu olárami níili. Auché jaré i'weli ripiyá jiti ko'wirúami níili. Alí auché jaré a'najátarami nílaga, wikanáami 'yénali, bo'wá wichila chopi napáchaga, chibá wichila napáchaga ayénachó. Alí ne si'néami echi jaré aboni ne wabé risúwati niwálati. Si'néami aboni ne wabé sitíila olárami níili, ne wabé chibi olárami ayénachó.
\v 38 Alí si'néami je'ná galá bichíyami pagótami waminabi ne wabé simírami galabé oláami níili, ketasi mapurigá echi auché jaré jena'í wichimóbachi piréami mapu echirigá ne wabé risúu olali echi jaré bichíyami. Chopi aboni echirigá ne wabé risúu ologá a'najátarami nílaga, kanápuromí 'yénali áya mapo'ná pirélama echo'ná jaréana mikabé waná kawichí mapo'ná tarapebi yiri nirúali, echo'ná jaréana ripá rabó omá, echo'ná jaréana risochí kéremá, echo'ná jaréana ri'lé wi'yérali jótachi omá.
\v 39 Ne si'néami je'ná jaré ne galá bichíili Riosi, echijiti jipi rawé yénasí tamujeta abijí galá ra'ícha aboni jiti rugá. Chopi mapuyénasí aboni abijí piréali jena'í wichimóbachi echalí aboni ketasi cho 'yárami níili mapurigá Riosi bachánala ne bichíwaga aneli mapurigá aboni 'yárami níima riwéali.
\v 40 Mapujiti Riosi arigá waminabi ne wabé galabé olama riwéali si'néami echi jaré Binói níwala yuwa. Ayénachó Riosi galá 'nátali tamujé jipi piréami bichíyami jiti. Alí ne si'néami echi jaré mapu ikita bichíyami ju Jesucristo niráa, chopi suwaba galabératami níibo mapujiti Jesucristo Binói echirigá tamujé tamí galabératama waminánomí. Alí Binói ketasi nakili mapu echi auché jaré mapu ma suwili, echirigá bachá niráa galabératami níima, chopi mapu waminánomí ne si'néamita sinepi niráa echirigá suwaba galabératami níibo.
\c 12
\s Sinibí waminabi nokuísabo bichíisiya Jesucristo mapurigá ne galá machiná 'yénami niráa
\p
\v 1 Ne si'néami je'ná jaré pagótami ne galá bichíili Riosi. Alí aboni ma echo'ná ripá riwigachi muchuwi mapujiti aboni echirigá bichíiga, je'ná jerigá ne wabé galabé oláami níili. Jipi aboni echo'ná muchuwi mapurigá tamujé tamí galá ritée niráa. Echijiti galá níima tamujeta waminá chakena ariwesa ne suwaba mapu ikí tamujé tamí kumé, mapujiti echi jaré namuti jiti tamujeta ketasi omero olayá mapurigá Riosi nakí. Ayénachó galá níima máputa waminá ariwebo echi chati sitíi oluwáwami mapu tamujé tamí ne buchuwí, ne noligá bulé. Echalí ayénachó galá níima máputa ne galá bichíiga, waminabi nokuísabo galabé olísiya mapuyénasíta piré jena'í wichimóbachi.
\v 2 Sinibí waminabi nokuísabo bichíisiya Jesucristo, mapurigá ne galá machiná 'yénami niráa. Echi Walubela Jesucristo tamujé tamí bichíirali, ayénachó Binói tamujé tamí sinibí niráa waminabi galabé niráa bichíirama. Chabé ki'yá echi Walubela Jesucristo we nakili risúu nílaga mukunala echo'ná kúrsichi, jena'í wichimóbachi piréami pagótami chati sitíi olalila jiti. Alí Binói tarapé riwéali echirigá ne wabé risúu ologá mi'lirúami níliya, mapujiti Binói galá machili mapu a echirigá mi'lirúami níisagá, alí waminánomí Binói echijiti ne wabé simírami kaníliami níima. Alí pe wakinánala Jesucristo asíbali echo'ná ripá riwigachi, echo'ná echi Walubela Riosi Onorúami yuwa watonachi.
\p
\v 3 Ne galá 'natasi 'yemi mapurigá echi Walubela Jesucristo olali. Ayénachó 'natasi mapurigá Binói ne wabé simírami risúu olárami níili echi jaré chati sitíi oláami pagótami jiti. Alí echirigá 'nátaga ketasi nasínami níisi Jesucristo yuwa najátiya, nibilé cho ariwesi bichíiya echi Binói.
\v 4 Mapujiti 'yemi bichíyami arigá sinibí wabé sayera echi chati sitíi oluwáwami, chópitamo ketasi siné cho ko'wirúami níili mapujítitamo echirigá sayéraga olá.
\v 5 'Yémitamo siné káachi ma ketasi 'nátaliré mapurigá Riosi 'yemi mi galá ruyé, mapujiti Riosi ne bichíwali 'yemi mi ruyé achigórigá mapurigá Binói ruyé echi auché jaré Binói kúchuwala, mapujiti echo'ná Riosi Ra'íchala oselíwalachi osirúami ju mapurigá Riosi 'yemi mi je'ná jerigá ruyé:
\q Keni kúchuwa, ketasi na'áwasi mapalí Nijeni 'yemi mi kastigo 'ya mapujítitamo ketasi olali mapurigá Nijeni 'yemi mi nuleli.
\q Nibilé cho ariwesi bichíiya mapalí Nijeni 'yemi mi we yona.
\q
\v 6 Mapujiti echi Walubela Riosi we galá binéraga ruyé si'néami echi jaré mapu ikí Binói galeko.
\q Ayénachó mapalí aboni chati sitíi olako, echalí echi Walubela Riosi arigá kastigo 'ya echi jaré mapu Binói naré mapurigá Binói kúchuwala niráa.
\m
\v 7 Ne galá níima 'yemi arigá anachasa mapalí Riosi 'yemi mi kastigo 'ya. Echalí Riosi chopi 'yemi mi galá nisé, mapurigá Binói kúchuwala niráa, mapujiti ne si'néami echi jaré kúcharami arigá kastigo 'yárami ju aboni 'wénawala jiti.
\v 8 Alí a Riosi ketasi 'yemi mi péebi niráa echirigá kastigo 'yásagá, achigórigá mapurigá Binói kastigo 'ya ne si'néami echi auché jaré Binói kúchuwala, echalí 'yémitamo ketasi ne bichíwali Riosi kúchuwala níibitamo, chópitamo isena kúchuwala niráa níibo.
\v 9 Echirigá achigórigá cho níili chabénala mapalí tamujeta abijí we kúuchi níili. Echalí echi jaré tamujé 'wénawala tamujé tamí wabé ruyeli máputa ketasi chati sitíi oláami níibo. Alí tamujeta we galabé nílaga nijéwali aboni. Jipi waminabi ne wabé galabé níima máputa sinibí galá nijéwaga olabo mapurigá tamujé Onolá, ripá riwigachi atíami tamujé tamí nulé, mapurigata sinibí niráa pirélabo Binói yuwa.
\v 10 Echalí chabénala tamujé 'wénawala pe téeli bamíbali sinibí tamujé tamí we ruyeli máputa ketasi chati sitíi oláami níibo. Echalí aboni chopi tamujé tamí ruyeli mapurigá aboni galabé nirali, chopi echi Walubela Riosi tamujé tamí pée kastigo 'ya mapurigata ne bichíwali ku galabé 'natabo, ayénachó mapurigata galabé oláami niwárami níibo, achigórigá mapurigá Riosi Binói galabé oláami ju.
\v 11 Ne bichíwali ju mapu tamujeta ke siné kanila echalí we 'yáati mapalita kastigo 'yarami juta, mapujiti echalita wabé okolá. Chopi waminánomí tamujeta galá wachínaga ologá pirélabo, ayénachóta galá kilíi ologá pirélabo, ata ne bichíwali binésagá galabé olayá mapujítita echirigá kastigo 'yárami ju Riosi jiti.
\s Ne wabé simírami majawíwami ju ke nijéwasagáta Riosi
\p
\v 12 Echirigá biché galá ku jiwératasi 'yemi sikala mapu ma risíami ju, mapurigá echalítamo omérabo olayá mapurigá Riosi nakí. Ayénachó ku jiwératasi 'yemi chokóbala mapu ma ketasi jiwera, mapurigá echalítamo omérabo Riosi yuwa najata.
\v 13 Alí we ási bilé galabé wachíami buwé, mapurigátamo echo'ná 'yénabo. Echalí a bilé 'yemi ralala ke akánami níisagá, échiko ketasi waminabi bi'lima, chopi galá ku sa'wimea.
\p
\v 14 Sinibí galabé olasi si'néami echi auché jaré pagótami yuwa. Ke wesi sayérasi echi auché jaré, chopi galabé ologá pirélasi, mapujiti ke wesi riwimea echi Walubela Jesucristo, a ketasi galabé ku niwárami níisagá.
\v 15 Ne galá tibútasi 'yemi aboni niráa, mapurigátamo sinibí ne galá bichíyami níibo, mapurigá ibili 'yemi echijiti galá ku'wíratami níibo, achigórigá mapurigá Riosi nakí 'yemi mi ku'wíranala. Echirigá olasi mapurigá ke wesi 'yemi wabé chati sitíi olírabotamo auché jaré pagótami, ketasi mapurigá bilé namuti we chati sitíi oméami mapu wabé nayútaga ko'yá echi pagótami.
\v 16 Echijiti ke wesi 'yemi chuwé bilétari yuwa kochisí. Sinibí we galá nílasi echi jaré Riosi níwala galabé namuti. Echi ki'yá bitéami Esaú ketasi galá nirali echi jaré namuti mapu binói narema riwéali mapujiti bachirúami níili, chopi binói ne suwaba waminá nijili, pe táa sinepi ko'wáami jiti nakulíwaga.
\v 17 Ayénachó 'yémitamo galá machí mapurigá pe kinana echi Esaú ne wabé nakili mapu binói echirigá galabéraga anérami níima binói onolá jiti mapujiti bachirúami níili. Chopi echalí echi Esaú arigá ketasi galabéraga anérami níili. Echalí echi Esaú ne wabé nalali, chopi binói arigá ketasi galabéraga anérami níili, mapujiti chabénala niráa binói chijúnali mapurigá binói galabéraga anérami níima riwéali.
\p
\v 18 Alí echi Walubela Riosi ke siné 'yemi mi nuleli, 'yemi jipi piréami galá bichíyami ritémtami, máputamo mulubéanabo echo'ná biléana ripabé rabó ne wabé rajáachi, mapurigá echi jaré Isaeli pagótami mulubéanali echo'ná ripá rabó Sinaíchi anilíwachi mapalí ne wabé rajali. Echalí rawé echo'ná ripá rabó ayénachó ne wabé simírami rokowárali níili, ayénachó ne wabé iwéami ikali. Alí echi ripá rabó Sinaíchi anilíwachi ne bichíwali nirú, ayénachó echi pagótami abijí galá omero simara echo'ná.
\v 19 Alí 'yémitamo ke bilé cho námali ne wabé iwéami anéachi echi korneta anilíwami, nibilé chótamo námali echi Walubela Riosi ripana jonsa wabé iwéami ra'íchachi, mapurigá echi jaré Isaeli pagótami galá námali. Echalí ki'yá rawé echi jaré Isaeli pagótami mapu echirigá námali Riosi ra'icháchanachi, we yáati ne wabé risúu anigá tánali mapu Riosi ma ketasi waminabi echirigá ra'icháma.
\v 20 Echalí aboni ketasi nakili mapu echi Walubela Riosi waminabi ra'icháma aboni yuwa, mapujiti aboni ne wabé majali mapujiti Riosi ma bachá niráa jeaneli: A bilé rijói simírasagá echo'ná ripá rabó mapo'ná Nijeni atí, ayénachó a bilé namuti echo'ná simírasagá, arigá 'wérali ju mapu echiyiri basibuka mi'lirúami níima, bilé silá jiti omá.
\v 21 Echalí ki'yá rawé suwaba je'ná jeyiri mapu echi pagótami riwali, ne suwaba ne wabé simírami majárami níili. Echijiti echi walula Moisesi binói jeanili: ¡Nijeni ne wabé sayirúmaga majawá!
\p
\v 22 Bichíwali ju mapu Riosi ke siné 'yemi mi nuleli máputamo mulubéanabo echo'ná biléana ripá rabó ne wabé rajáachi. Chopi mapujítitamo ma galá bichíili Riosi, echijiti Riosi Binói 'yemi mi mulubéantali echo'ná Riosi níwala ripá rabó Siónachi anilíwachi, echo'ná echi Sinibí Bitéami Riosi walúlawalachi mapu echo'ná ripá riwigachi nirú, echi mapu bukulíwami Jerusalémachi anilíwachi ju. Ayénachótamo mulubéansa echo'ná ne wikabé mili o'wéala Riosi kapitánawala yuwa
\v 23 mapu napawika muchuwi mapurigá aboni sinibí niráa chopi waminabi walubéraga anema Riosi. Ayénachótamo mulubéansa ne si'néami echi jaré wikabé Riosi kúchuwala yuwa, ne si'néami mapu ikí aboni riwalá ma ro'wárami ju echo'ná ripá riwigachi. Ayénachótamo mulubéansa echi Walubela Riosi yuwa, echi mapu walubela justisia olama ne si'néami pagótami yuwa. Ayénachótamo mulubéansa ne si'néami echi jaré galá bichíyami pagótami aliwala yuwa, mapu echo'ná ripá riwigachi muchuwi, ne si'néami mapu ikí Riosi Binói ma suwaba ne wabé simírami galabé niráa niwáli.
\v 24 Ayénachótamo mulubéansa echi Walubela Jesucristo yuwa, echi mapu Walubela Katéwami ju Riosi yuwa, echi jaré pagótami jiti, mapurigá Riosi Binói auché osáala si'nú bukulíwami niráa bichíwaga anili. Ayénachótamo mulubéansa mapo'ná echi Walubela Jesucristo lalá bachíntami níili. Alí tamujeta sinibí binératami ju waminabi ne wabé simírami galabéala namuti, mapalita binératami ju echi Walubela Jesucristo lalá jiti rugá, ketasi mapurigá mapalita binératami ju echi ki'yá chokichí bitéami Abeli lalá jiti rugá.
\p
\v 25 Echijiti we galá 'nátaga nijéwasi echi Walubela Riosi mapu 'yemi mi galá ruyé. Chabé ki'yá echi jaré pagótami arigá kastigo 'yárami níili, si'néami mapu ikí ketasi galá nijéwali mapalí Riosi ra'íchali aboni jena'í wichimóbachi. Alí jipi rawé echi Walubela Riosi ripá riwigachi atíami, arigá tamujé tamí ruyé Binói Ra'íchala jiti. Alí echalí chabé ki'yá echi jaré mapu ketasi galá nijéwali mapalí Riosi ra'íchali aboni jena'í wichimóbachi, aboni arigá kastigo 'yárami níili. Echijiti tamujé ayénachó waminabi walubé kastigo 'yárami níibo, ata ketasi galá nijéwasagá echi Walubela Riosi mapu tamujé tamí binéraga ruyé echo'ná ripá riwigachi jonsa.
\v 26 Chabé ki'yá mapalí Riosi ra'íchali echi pagótami, echalí Binói we nokérali echo'ná kawírali, chopi jipi echi Walubela Riosi jeaní: Auchecho siné Nijeni ne wabé iwéami nokérama jena'í wichimóbachi, ayénachó Nijeni ne wabé iwéami nokérama echo'ná ripá riwigachi.
\v 27 Alí mapalí Riosi je'ná jerigá anili: Auchecho siné Nijeni nokérama suwaba je'ná kawí, echalí tamujeta machí mapu je'ná jerigá aniwáami ju: Mapalí Riosi auchecho siné nokérama suwaba namuti mapu ikí Binói niwáli, echalí suwaba echiyiri namuti waminá 'yérami níima, mapurigá chopi tibima echi auché jaré galabéala namuti echo'ná ripá riwigachi nirúami mapu ke siné nokuáami ju.
\v 28 Mapujiti echi galabé kawí mapu Riosi tamujé tamí 'yama, ne sinibí niráa nirúlama. Echijiti galá níima máputa sinibí walú natétara 'yabo Riosi, ayénachó galá níima máputa waminabi walubéraga anebo echi Binói. Alí bicheta echirigá we galá majaga nijéwaga olabo mapurigá Riosi nakí.
\v 29 Mapujiti echi Walubela tamujé Riósawala ne wabé suwábiami ju, mapurigá biléana walú rajáachi niráa.
\c 13
\s Mapu churigata ologá pirélabo mapurigá Riosi nakí
\p
\v 1 Sinibí ne galá galesi a'nagupi mapurigá ritémtami niráa.
\v 2 Sinibí galá 'natasi mapu arigá galá níima máputamo echo'ná 'yemi pirélachi narepo auché jaré si'wina piréami pagótami, mapujiti jaré ritémtami echirigá ologá, arigá naleli jaré o'wéala Riosi kapitánawala, tarapé machigá mapu Riosi kapitánawala níili.
\p
\v 3 Ne galá natimaga 'natasi si'néami echi auché jaré ritémtami jiti mapu ikí pachá mo'wárami juko, achigórigá mapurigá 'yémitamo ayénachó pachá mo'wárami muchuwa niráa aboni yuwa. Echirigá sinibí galá natimaga 'natasi si'néami echi auché jaré jiti mapu ikí risúu olárami ju, mapujiti 'yemi aboni ayénachó siné káachitamo risúu olárami níibo.
\p
\v 4 Ibili 'yemi rijói jubéami sinibí galabé ologá pirélasi ibili 'yemi aboni jubila chopi yuwa. Ayénachó ibili 'yemi muguí 'kunéami sinibí galabé ologá pirélasi ibili 'yemi aboni kunala chopi yuwa. Ketasi chuwé bilétari yuwa kochisí, mapujiti Riosi walú kastigo 'yama si'néami echi jaré ke cho jubéami, ayénachó si'néami echi jaré ke cho 'kunéami mapu ikí chuwé bilétari yuwa kochiko. Ayénachó Riosi walú kastigo 'yama echi jaré jubéami mapu ikí isena muguí yuwa kochiko, ayénachó echi jaré muguí 'kunéami mapu ikí isena rijói yuwa kochiko.
\p
\v 5 Ketasi korusi echi wenomí, chopi galá kanílasi echi jaré namuti jiti mapu ikítamo ma níwa, mapujiti Riosi jeanili: Sinibí Nijé nimí tibútama. Nijeni tarapé siné mi wana bi'neli ariwema.
\v 6 Echirigá tamujé bichíyami galata omero ne bichíwaga jeaniyá:
\q Echi Walubela Riosi ju mapu tamí ku'wira. Ketásini majama mapu ikí echi pagótami omero tamí chati sitíi olayá.
\p
\v 7 Ne galá galabéala 'nalí 'natasi echi jaré jiti mapu 'yemi napawika bichíyami o'wéalawala níili, ne si'néami mapu ikí 'yemi mi nawésali Riosi Ra'íchala. Sinibí galá 'natasi mapurigá aboni ne galabé ologá piréali mapuyénasí aboni abijí muchili jena'í wichimóbachi. Sinibí ne galá bichíisi Riosi, achigórigá mapurigá aboni galá bichíili.
\p
\v 8 Echi Walubela Jesucristo ke siné nakuliwa. Binói achigó yiri ju jipi, mapuyiri chabénala níili. Alí Binói ne sinibí echirigá achigó yiri chopi níima.
\v 9 Ketasi bichíiga najátasi mapuyíripi pagótami mapu 'yemi mi si'nú niráa, si'winárigá binélako. Ne sinibí chopi galá bichíisi mapurigátamo ma galá binératami níili echi Wabé Galabé Riosi Ra'íchala. Ne wabé galabé ju mapu Riosi sinibí wabé kaligá tamujé tamí jiwérata sulachí niráa, chopi ketasi galá ju máputa chopi nijéwabo karúmati nulalíwami mapurigá echi jaré Juríosi pagótami tamujé tamí nulé. Abóniko chopi tamujé tamí nulé máputa ketasi kopoa wikabé ko'wáami mapu arigá galabé ju ko'wawa. Alí echi jaré pagótami mapu echirigá nijéwa ketasi ku'wíratami ju ne sulachí niráa.
\p
\v 10 Echi jaré sacerdote echo'ná walubé Juríosi pagótami ri'obáwalachi nóchami sinibí, kúuchi niráa, ko'wá echi sapá mapalí aboni ko'wigá 'ya Riosi echi jaré namuti. Chopi tamujeta galá bichíi mapu echi Walubela Jesucristo arigá mi'lirúami níili tamujé chati sitíi olalila jiti. Alí mapuyénasí echi jaré sacerdote abijí ko'yagá 'ya Riosi echi jaré namuti, echalí aboni ketasi omero bichíiya Jesucristo niráa.
\v 11 Alí echi walula sacerdote echo'ná pachá ne wabé simírami galabéalachi uchémiya echi jaré namuti lalá, mapurigá echi jaré Juríosi pagótami chati sitíi olalila ku wikawárami níima, chopi echi jaré namuti sapala suwaba ikósarami ju waminá chakena mapo'ná ketasi wesi piré.
\v 12 Echijiti echi Walubela Jesucristo ayénachó waminá machímana torúami níili, echo'ná walúlachi jonsa, mapalí Binói waminá mi'lirúami níili, mapurigá Binói galá omérama ku galabé niwayá tamujé pagótami, mapujiti Binói lalá echirigá ku'luwárami níili.
\v 13 Echijiti jipi galá níima mapu tamujé bichíyami ayénachó risúu nílabo mapujiti tamujé Walubélawala echirigá wabé risúu olárami níili. Alí mapurigá Jesucristo echo'ná walúlachi jonsa togá machímana mi'lirúami níili, echirigá ayénachó 'wérali ju mapu tamujé jipi piréami, máputa galá bichíyami ju, ma ketasi achigórigá olabo mapurigá echi auché jaré pagótami, chopi máputa ayénachó risúu nílabo mapurigá Jesucristo risúu níili.
\v 14 Mapujiti jena'í wichimóbachi tamujeta ketasi níwa biléana walúlachi mapo'nata sinibí niráa pirélabo, chópita abo echi wabé galabé walúlachi mapo'nata sinibí niráa pirélabo waminánomí.
\v 15 Echijiti galá níima mapurigá tamujeta sinibí niráa waminabi walubéraga anebo Riosi, mapujiti Jesucristo tamujé tamí jiti mukuli. ma ketásita waminabi ko'wigá 'yabo Riosi echi jaré namuti, chópita sinibí echirigá waminabi walubéraga anebo Riosi.
\v 16 Ke siné ariwesi galabé olayá. Sinibí a'nagupi nachútaga olasi mapu ikítamo níwa, mapujiti Riosi waminabi wabé kaníila mapalita echirigá olá, ketasi mapurigata ko'yagá 'yabo Binói jaré namuti.
\p
\v 17 Ne galá nijéwasi echi jaré 'yemi o'wéalawala mapu 'yemi mi binera Riosi Ra'íchala. Ne wabé galabé nílasi 'yemi o'wéalawala mapujiti aboni nulérami níili Riosi jiti 'yemi mi tibútanala, mapurigá 'yémitamo waminabi galá bichíyami níibo. Alí bichétamo galá machí mapu arigá 'wérali ju mapu aboni auchecho ku ruyema Riosi mapu churigá aboni 'yemi mi tibútali. Galá níima yémitamo echirigá ne wabé galabé nílasa aboni, mapurigá aboni echijiti galá kanílaga, ketasi o'mónaga nochama, mapujiti 'yémitamo ketásirapé kaníliga binebo, a aboni ne wabé o'mónami níisagá.
\p
\v 18 Sinibí tansi Riosi tamujé tamí jiti. Tamujé sinibita mayé máputa galabé ologá piréali mapurigá Riosi nakí, mapujítita sinibí ne suwaba jiti ne wabé galabé olánali.
\v 19 Jipi nijeni 'yemi mi waminabi wabé táni mapu 'yémitamo tánabo Riosi mapurigá ke 'me ayó nijeni galá omérama ku simiyá echo'ná 'yemi yuwa. Tamujé Riósawala ne wabé Walubela ju
\p
\v 20 Echi Walubela Riosi ju mapu 'yemi mi 'yali mapurigátamo kilíi ologá pirélabo. Ayénachó Binói ju mapu ku owíntali echi tamujé Walubélawala Jesucristo, mapalí Binói ma mi'lirúami níili. Alí Jesucristo ne Walubela Niséami ju mapu tamujé tamí nisé, ne si'néami tamujé mapu ikita Binói pugula bo'wá niráa ju, mapujiti Binói wabé léntaga mi'lirúami níili tamujé chati sitíi olalila jiti. Alí Riosi Onorúami tamujé tamí bichíwaga ané mapu Binói tamujé tamí ku wikáwama mapujiti echi Walubela Jesucristo echirigá mukuli tamujé chati sitíi olalila jiti. Echijiti nijeni nakí mapu echi Walubela Riosi
\v 21 'yemi mi galabératama mapurigátamo sinibí galabé olabo, achigórigá mapurigá Riosi Binói nakí. Ayénachó nijeni nakí mapu Riosi si'néami tamujé tamí ne wabé galabé oláami niwáma, achigórigá mapurigá Binói nakí máputa galabé oláami níibo, mapujítita bichíyami ju Jesucristo niráa. Ayénachó nijeni nakí mapu echi Walubela Jesucristo sinibí niráa, ne sinibí waminabi walubéraga anérami níima. ¡Echirigá níima!
\p
\v 22 'Yemi keni ritémawa, nijé 'yemi nimí táni mapurigátamo ne kilíi niráa galabeala 'natabo je'ná ra'íchali jiti mapurigá nijeni 'yemi mi galá ruwigá oseli, mapujiti nijeni 'yemi mi pe okuá oseli.
\v 23 Jipi nijeni 'yemi mi ruyé mapurigá echi tamujé rijimala Timoteo riwéami ma ketasi waminabi pachá bachárami ju. Alí a binói we yáa ku nawásagá jena'ibi, echalí binói ayénachó tamí yuwa simea mapalini echo'ná 'yemi mi 'némiya simí.
\p
\v 24 Galá ripórasi si'néami echi jaré ritémtami mapu ikí 'yemi o'wéalawala ju. Ayénachó galá ripórasi ne si'néami echi jaré napawika bichíyami ritémtami echo'ná piréami. Echi jaré ritémtami jena'í Itáliachi anilíwachi kawírali piréami ayénachó 'yemi mi galá ripóraga 'náwala.
\p
\v 25 Nijeni we nakí mapurigá Riosi si'néami 'yemi mi ne wabé galigá ku'wírama. ¡Echirigá níima!