\id 1PE
\h 1 Pegro
\mt2 Bachá osirúami mapurigá
\mt SAN PEGRO
\mt2 osali
\c 1
\s Echi Pegro osé echi jaré bichíyami mapu wikaná chijanárami níili
\p
\v 1 Nijé Pegro, Jesucristo jiti julárami juni nawisánala. Nijeni 'yemi mi je'ná jerigá osé, 'yemi máputamo chijaga piré echo'ná wikanáami si'wina kawírali, echo'ná Póntochi anilíwachi, echo'ná Galásiachi anilíwachi ayénachó, echo'ná Kaparósiachi anilíwachi ayénachó, echo'ná Ásiachi anilíwachi ayénachó, echo'ná Bitíniachi anilíwachi asíchiko.
\m
\v 2 Riosi Onorúami ma 'yemi mi chapili mapurigá Binói níwala niráa, mapurigá Binói nakili olánala chabé ki'yá jonsa. Alí echi Wabé Galabé Riosi Iwigala ma 'yemi mi galabérali pachana 'yemi sulálachi mapujiti Jesucristo wabé léniga mukuli 'yemi chati sitíi olalila jiti. Alí bichétamo echirigá wabé galabératami níili mapurigátamo galá nijéwami níibo Riosi, ayénachó mapurigátamo ku bi'wárami níibo mapujiti Jesucristo echirigá léniga mukuli 'yemi jiti, mapurigá 'yemi chati sitíi olalila ku wikawárami níima. Nijeni nakí mapurigátamo suwaba ne galabé niráa ku'wíratami níibo, ayénachó mapurigátamo ne galá kilí ologá pirélabo.
\s Tamujeta bichíi máputa ne wabé galá ku'wíratami níibo
\p
\v 3 Galá níima máputa waminabi wabé walubéraga anebo Riosi, echi mapu echi Walubela Jesucristo Onolá ju, mapujiti Riosi tamujé tamí ne wabé natimaga 'yali mapurigata bukulíwami niráa pirélabo, mapujiti Jesucristo ku o'wíntarami níili mapalí Binói ma mukúami níili. Echijítita ne galá bichíiga buwé,
\v 4 mapurigata arigá narepo suwaba echi galabéala mapu Riosi tamujé tamí 'yama waminánomí, echi mapu Binói galá nuté echo'ná ripá riwigachi, mapo'ná tarapé nirú echi chati sitíi oluwáwami. Alí echi galabéala mapu Riosi 'ya, ne sinibí niráa nirúlama. Alí ke siné suwibama, ketasi mapurigá echi jaré namuti jena'í wichimóbachi nirúami.
\v 5 Alí mapujiti 'yémitamo ne galá bichíi Riosi niráa, echijiti echi Walubela Riosi 'yemi mi ne wabé jiwériga tibútama mapuyénasítamo ne bichíwali narepo echi galabéala mapu Riosi 'yemi mi 'yama, ayénachó mapuyénasítamo ne sébali galá ku'wíratami níibo, mapalí Jesucristo ku nolínama echalí ne jubá rawé.
\p
\v 6 Echijiti 'yémitamo ne wabé simírami kanila, chopi siné káachi arigá 'wérali níima mapu 'yémitamo pe téeli niráa risúu olárami níibo.
\v 7 Mapujiti echi wabé natéami oro anilíwami wenomí, arigá galá bi'walíwami ju, ne wabé simírami ratabáchaga echo'ná na'írali mapuyénasí basunú, alí Riosi echirigá achigórigá galá machimea mapu churigá 'yémitamo galá bichíi Binói niráa, mapalítamo wabé risúu olárami ju mapurigátamo waminabi galá bichíyami níibo. Alí átamo abijí waminabi galá bichíisagá mapalítamo echirigá risúu olárami ju, echalí 'yemi bichíilawala waminabi ne wabé natéami níima, ketasi mapurigá echi oro mapu ketasi sinibí niráa nirúlama. Alí Riosi chopi ariwé mapurigátamo echirigá risúu olárami níibo mapurigátamo waminabi galá bichíyami níibo, mapuyénasí Riosi omérama aniyá máputamo galá bichíyami ju, ayénachó mapurigá Binói omérama 'yemi mi waminabi ne wabé simírami o'wéalatiya, echalí mapalí Jesucristo ku nawama jena'í wichimóbachi.
\p
\v 8 'Yémitamo ne wabé galé echi Walubela Jesucristo, chópitamo ke siné riwali echi Binói. Alí mapujítitamo ne galá bichíi Jesucristo jipi rawé, mapalítamo ketasi cho ritiwá Binói, echijítitamo ne wabé simírami kaníila echi Walubela Riosi yuwa, mapurigátamo kanílabo echo'ná ripá riwigachi. Alí bichétamo ketasi chirigá omero ra'íchaga niráa ku ruyá mapu chuyena 'yémitamo echirigá ne wabé simírami kaníili.
\v 9 Jípitamo ma ku wikawárami ju 'yemi aliwálachi niráa mapujítitamo echirigá galá bichíili Jesucristo niráa.
\p
\v 10 Chabé ki'yá echi jaré o'wéala Riosi jiti nawésami ne wabé machináali mapu churigá ku wikawárami níibo riwéali 'yemi jipi piréami galá bichíyami pagótami. Alí mapalí Riosi galá machírali aboni, echalí aboni echo'ná oselichi osali mapurigá Riosi ne wabé galigá 'yama riwéali, mapurigá 'yémitamo ku wikawárami níibo ne wabé wakinánala.
\v 11 Echalí Jesucristo Iwigala echo'ná pachana echi jaré nawésamichi asali. Alí Jesucristo Iwigala bachá niráa echirigá machírali echi jaré nawésami mapu churigá Binói risúu olárami níima riwéali, ayénachó mapu churigá Binói wabé walubératami níima riwéali pe wakinana, chopi aboni ketasi cho machili Chigá níili mapu echirigá risúu olárami níima riwéali. Nibilé cho machili chu kilíbuko echirigá ikimea riwéali, chopi aboni ne wabé nakili machinala ne suwaba.
\v 12 Chopi Riosi machírali mapurigá echi jaré namuti mapu aboni osali ketasi osirúami níili mapurigá aboni chopi galá machimea chu aniwáami níili, mapujiti echi jaré namuti chopi osirúami níili mapurigá tamujé jipi piréami pagótami ne galata machiboa. Alí jipi 'yémitamo ne galá nawésarami níili suwaba je'ná Galabé Ra'íchali. Alí echi jaré mapu 'yemi mi nawésali, ne galá nulérami níili echirigá nawésanala, mapujiti echi Galabé Riosi Iwigala echirigá nuleli. Alí echi jaré o'wéala Riosi kapitánawala ne wabé nakí machinala je'ná jeyiri namuti.
\s Riosi tamujé tamí bayé mapurigata ne galabé ologá pirélabo
\p
\v 13 Echijiti bachá niráa ne galá 'natasi mapu churigátamo ologá pirélabo, alí bichétamo ne bichíwali a'láratami níibo. Sinibí galá bichíiga pirélasi mapujiti Riosi ne wabé galigá 'yemi mi 'yama echi wabé Galabéala mapalí Jesucristo ku nawama jena'í wichimóbachi.
\v 14 Mapujítitamo ma galá nijéwiami ju Riosi, mapurigá Binói kúchuwala niráa, ma ketasi waminabi chuwé olasi mapurigátamo chabénala olali mapalítamo ketasi cho machíyami níili Riosi.
\v 15 Chopi ne wabé galabé oláami nílasi 'yemi, mapujiti echi Walubela Riosi mapu 'yemi mi bayeli bichíinala, Échiko ne wabé simírami galabé oláami ju.
\v 16 Mapujiti echo'ná Riosi Ra'íchala oselíwalachi je'ná jerigá osirúami ju mapurigá Riosi Binói jeaní: Ne galabé oláami nílasi 'yemi, mapujiti Nijeni ne wabé galabé oláami ju.
\p
\v 17 Alí 'yémitamo Onorúami niráa ané echi Walubela Riosi, echi mapu galá machí suwaba mapu ikí ibilíiga olá. Echijiti galá níima mapu 'yémitamo sinibí ne galá nijéwabo Riosi, ne galá majáami niráa, ne sinibí mapuyénasítamo abijí piré jena'í wichimóbachi, mapujiti Riosi wabé wi'nijima echi jaré chati sitíi oláami, chopi Binói galabé anema echi auché jaré galá oláami.
\v 18 Ne galá níima 'yémitamo echirigá nijéwasa, mapujítitamo galá machí mapurigá Riosi ma 'yemi mi ku wikáwali, mapurigátamo ma ketasi waminabi chuwé sitíi chati ologá pirélabo mapurigá 'yemi pagótamawala echirigá chuwé sitíi chati ologá piréali. Ayénachótamo galá machí mapu Riosi ne wabé simírami nakili mapurigá 'yémitamo echirigá ku wikawárami níibo, chopi Riosi ketasi natétali jaré namuti jiti mapu suwíbami ju mapurigá 'yémitamo echijiti ku wikawárami níibo. Riosi ketasi natétali echi ne wabé natéami oro jiti, nibilé cho natétali echi we natéami plata jiti,
\v 19 chopi Riosi nijali echi Walubela Jesucristo mapurigá Binói wabé léntiga mi'lirúami níima 'yemi chati sitíi olalila jiti, mapurigátamo ne bichíwali echijiti ku wikawárami níibo. Echalí echi wabé galabé Jesucristo lalá echirigá ku'luwárami níili mapurigá echi jaré Juríosi pagótami ku'lúwali echi jaré galabé bo'wá lalá; chopi echi Walubela Jesucristo lalá waminabi simírami galabé níili mapujiti Binói ke siné chati sitíi olali.
\v 20 Alí ki'yá chokichí jonsa mapalí Riosi ketasi cho niwáli je'ná kawí, echalí Riosi galá 'nátaga a'lárali mapurigá echi Walubela Jesucristo je'ná jerigá olárami níima, chopi Jesucristo bukulí wabé wakinánala nawali jena'í wichimóbachi mapurigá Binói 'yemi mi wabé ku'wírama.
\v 21 Alí 'yémitamo ma galá bichíi Jesucristo niráa, echijítitamo ma ne galá bichíyami ju Riosi Onorúami, mapujiti echi Walubela Riosi ma ku owíntali echi Walubela Jesucristo mapalí Binói ma mukúami níili. Ayénachó Riosi ne wabé walubérali Jesucristo. Echijiti mapalí 'yémitamo echirigá bichíili Jesucristo niráa, echalítamo ayénachó galá bichíili echi Walubela Riosi Onorúami, ayénachótamo buwé mapurigá Échiko 'yemi mi waminabi ku'wírama.
\p
\v 22 Alí mapalítamo ma galá bichíiga nijéwali echi ne bichíwali Riosi nawésawala, mapalí echi Wabé Galabé Riosi Iwigala 'yemi mi echirigá bichíirali, echalí jonsa 'yemi aliwala ma galá ku bi'wárami níili. Echijiti jípitamo galá galé echi auché jaré ritémtami. Alí ne galá ju máputamo echirigá galebo a'nagupi, ne sulachí niráa, ayénachó galá níima máputamo ne wabé simírami echirigá galebo a'nagupi.
\v 23 Mapujiti 'yémitamo ma auchecho siné bukulíwami niráa ku ranarúami níili, chopi mapalítamo echirigá ku ranarúami níili 'yémitamo ma ketasi ranarúami níili echi pagótami kúchuwala niráa, echi mapu waminá suwí. Echalítamo chopi echirigá auchecho siné ku ranarúami níili, Riosi kúchuwala niráa, mapujítitamo galá bichíili Riosi Ra'íchala, echi mapu sinibí niráa bitéami ju, echi mapu ke siné suwibama.
\v 24 Mapurigá osirúami ju echo'ná Riosi Ra'íchala oselíwalachi mapo'ná je'ná jerigá aní:
\q Ne si'néami pagótami jena'í wichimóbachi piréami waminá suwimea,
\q mapurigá echi kasalá we yáati waminá suwiba, ayénachó echi pagótami o'wéalawala waminá suwibama mapurigá echi kasalá siwalá we yáati waminá suwiba,
\q mapujiti echi kasalá waminá wakiché, ayénachó echi kasalá siwalá waminá rujuní,
\q
\v 25 chopi Riosi Ra'íchala sinibí niráa nirúlama.
\m Alí je'ná Galabé Riosi Ra'íchala ju mapurigá 'yémitamo ma nawésarami níili, mapurigátamo ku wikawárami níibo.
\c 2
\p
\v 1 Echijiti waminá ariwesi suwaba chati sitíi oluwáwami. Ketasi wesi 'yékaka ra'ichási, nibilé siné 'yékasi echi auché jaré. Ketasi korúkasi auché jaré níwala namuti, nibilé cho kichisi auché jaré mapu ne wabé simírami machíami ju ketasi mapurigá 'yemi. Alí ketasi sitíi chati ra'ichási auché jaré jiti rugá.
\v 2 Jipi 'yémitamo mapurigá echi jaré kúuchi múchali niráa ju, echijiti ne galá níima mapu 'yémitamo wabé nakiboa mapurigá Riosi 'yemi mi binérama Binói Ra'íchala, mapurigátamo waminabi galá bichíyami níibo, achigórigá mapurigá echi jaré múchali galá ochera mapalí aboni galá chi'í, mapujiti echi Galabé Riosi Ra'íchala mapurigá galabé leche niráa ju mapurigá 'yémitamo waminabi ochérabo galá bichíyami niráa, ayénachó mapurigátamo galá ku'wíratami níibo.
\v 3 Mapujiti mátamo galá machíili Riosi Ra'íchala, ayénachótamo ma galá machí mapu echi Walubela Riosi ne wabé simírami galabé ju.
\s Jesucristo mapurigá bilé galabé Rité ju, sinibí bitéami niráa
\p
\v 4 Galá bichíiga mulubéanasi echi Walubela Jesucristo yuwa. Binói mapurigá bilé galabé Rité niráa ju, alí Binói sinibí bitéami ju. Echi jaré pagótami waminá chakena pali echi Rité mapurigá tarapé natéami niráa, chopi Riosi ma chapili echi Rité mapurigá ne wabé simírami natéami niráa.
\v 5 Jesucristo ma 'yemi mi 'yali mapurigátamo bukulíwami niráa sinibí pirélabo mapujítitamo Binói níwala ju, ayénachó Binói Galabé Iwigala pachana 'yemi yuwa bité, echijiti si'néami 'yemi napawika bichíyami ne napawika niráa mapurigá Riosi ri'obáwala ju. Alí ibili 'yemi mapurigá kúuchi rité ju echo'ná ri'obachi tigótami niráa. Échiko echi ne bichíwali Riosi ri'obáwala ju, tarapé ritiwíwami niráa. Echijiti ariwesi mapurigá Riosi 'yemi mi jawama mapurigá sacerdote niráa, mapurigátamo chopi olabo mapurigá Riosi nakí. Ayénachó máputamo ne wabé galá o'wikebo Riosi, sulachí niráa ne suwaba galá 'yasa mapurigá Riosi Binói nakí, mapujítitamo bichíi Jesucristo niráa.
\v 6 Echijiti ayénachó echo'ná Riosi Ra'íchala osilíwalachi je'ná jerigá osirúami ju:
\q Echo'ná Siónachi anilíwachi Riosi níwala walúlachi Nijeni julama Nijé Ranala mapurigá Binói echi Galabé Rité níima, echi mapu bachá niráa tigótami ju echo'ná sitochi Riosi kalílachi.
\q Echi Rité ne wabé natéami ju.
\q Alí si'néami mapu ikí galá bichíiko Binói niráa ketasi riwélatarami níima.
\m
\v 7 Alí 'yemi galá bichíyami yuwa, echi Rité ne wabé natéami ju. Chopi echi auché jaré ketasi bichíyami yuwa, je'ná jerigá ikimea mapurigá osirúami ju echo'ná Riosi Ra'íchala osilíwalachi:
\q Echi Rité mapu echi jaré kaliráami waminá chakena pali mapurigá ke natéami niráa,
\q échiko echo'ná ri'lé sitochi ma bachá tigótami ju.
\m
\v 8 Ayénachó ikili mapurigá echo'ná osirúami ju jeanigá:
\q Nijé Ranala mapurigá bilé Rité níima mapo'ná aboni turúpama.
\q Alí Binói jiti jaré waminá i'mema, mapujiti aboni ketasi bichíinali Binói niráa.
\m Echijiti echi jaré aboni ma turúpali echi Rité jiti, mapujiti aboni ketasi bichíili Riosi Ra'íchala. Echalí aboni arigá chakena rujuili mapujiti echirigá nulárami níili mapu echi jaré ke bichíyami echirigá waminá rujuima.
\s Echi jaré Riosi níwala pagótami
\p
\v 9 Chopi 'yémitamo chapirúami níili mapurigátamo galá o'wikéami níibo Riosi, mapurigá jaré sacerdote niráa, echi Walubela Riosi níwala. Riosi 'yemi mi waná rojuánali mapurigátamo Binói níwala pagótami níibo, ne galabé oláami niráa. Alí Riosi je'ná jerigá olali mapurigá 'yémitamo nawisabo mapurigá Riosi Binói ne wabé omériga oláami ju suwaba namuti mapu echi jaré pagótami ketasi omero olayá. Alí echi Walubela Riosi ju mapu 'yemi mi bayeli mapurigátamo 'machínabo echo'ná rokowárali jonsa, mapo'nátamo chopi chati sitíi ologá piréali, mapurigátamo mo'wiboa Riosi yuwa echo'ná mapo'nátamo chopi wabé galabé olabo, mapo'ná ne suwaba namuti ne galá machíami niráa machirúami ju.
\v 10 'Yémitamo chabénala ketasi Riosi níwala pagótami níili, chopi jípitamo ma Riosi níwala pagótami ju. Chabénala 'yémitamo ketasi machili mapurigá Riosi 'yemi mi natimali, chopi jípitamo galá machí mapurigá Riosi 'yemi mi ne wabé natimá.
\s Galá o'wikesi Riosi
\p
\v 11 'Yemi keni ritémawa wabé galérami, 'yémitamo ketasi sinibí niráa piréami ju jena'í wichimóbachi, chópitamo echo'ná ripá riwigachi piréami níibo ne sinibí niráa. Echijiti nijeni 'yemi mi ne wabé táni mapurigátamo ma ketasi chuwé sitíi chati olabo, mapurigá 'yemi aboni, siné káachi, chopi nakí olánala. Alí 'yémitamo chopi waminá 'wigáami níima sinibí niráa mapujítitamo chati sitíi chuwé olánali, átamo ketasi ku wikawárami níisagá.
\v 12 Ne galabé ologá pirélasi echi auché jaré pagótami yuwa mapu ketasi cho machíami ju Riosi. Alí mapalí 'yémitamo echirigá olá, echalí aboni riwimea mapurigá 'yémitamo chopi olá echi wabé galabéala. Alí aboni ayénachó waminabi walubéraga anema Riosi mapalí Binói justicia olama. Chopi jipi iyénasí aboni, abijí wabé sayéraga ra'ícha 'yemi sayéraga, mapurigá 'yémitamo ne wabé chati sitíi oláami niráa.
\p
\v 13 Ne galá nijéwasi si'néami echi jaré pagótami o'wéalawala, mapujítitamo galá bichíyami ju echi Walubela Jesucristo niráa. Ne galá nijéwasi echi ne walula bachá nuláami presidente, mapujiti échiko ne bachá walula ju.
\v 14 Ayénachó ne galá nijéwasi si'néami echi auché jaré igúsuwami mapu ikí echi walula presidente nulé kastigo 'yánala echi jaré chati sitíi oláami, echi jaré mapu binói ayénachó nulé galabé oláami niráa anénala echi auché jaré mapu ikí galabé olako.
\v 15 Mapujiti Riosi chopi nakí mapurigá 'yémitamo sinibí wabé galabé olabo, mapurigá echi auché jaré ke machíami, mapu ketasi cho bichíyami ju, ketasi omérama 'yemi mi sitila anigá sayériya.
\p
\v 16 'Yémitamo ma ketasi nulérami ju wikabé namuti olánala, mapurigátamo nulérami níili echi nulalíwami jiti. Echijiti galá kanílaga pirélasi, chopi ketasi chuwé olasi. Sinibí ne wabé galá nijéwaga pirélasi Riosi, mapurigá Binói piónawala niráa.
\v 17 Ne galá o'wikesi si'néami galabé oláami pagótami. Ne wabé galesi si'néami echi auché jaré ritémtami. Ne galá bichíiga majasi Riosi. Ne galá o'wikesi echi ne walula bachá nuláami presidente.
\s Jesucristo ne galá anáchali mapalí Binói risúu olárami níili
\p
\v 18 'Yemi máputamo pióntami ju, ne galá o'wikeka nijéwasi echi jaré o'wéala mapu 'yemi mi nuleko. Ketasi chopi echirigá nijéwasi echi jaré mapu galabé oláami ju, chopi ayénachó echirigá o'wikeka nijéwasi echi auché jaré mapu wabé na'áwami ju.
\v 19 Mapujiti ne galabé oluwáwami ju mapalí bilé rijói, Riosi jiti 'nátaga, arigá galá anacha mapalí binói risúu olárami ju, mapalí binói arigá ketasi biyiri namuti chati sitíi oláliko.
\v 20 Chopi a 'yémitamo chati sitíi olásagá, ayénachó átamo echijiti kastigo 'yárami níisagá, echalí ke wesi 'yemi mi galabé oláami anema, arigátamo kilí niráa anachásagá. Alí a bilé rijói ne galabé olásagá, alí a binói arigá risúu olárami níisagá, echalí Riosi Binói anema mapu echi rijói galabé olá mapalí échiko kilíi niráa anachasa.
\v 21 Echijiti Riosi 'yemi mi bayeli najátanala Binói yuwa, mapujiti echi Walubela Jesucristo ma wabé risúu níili 'yemi jiti. Alí galá níima 'yémitamo achigórigá risúu olárami níisa mapurigá Binói risúu olárami níili.
\v 22 Echi Walubela Jesucristo ke bilé siné chati sitíi olali. Alí Binói nirapé siné 'yékali echi auché jaré.
\v 23 Alí mapalí echi auché jaré we sitila anigá ra'íchali, echalí Jesucristo ketásirapé ku kuwana sitila anigá nimili. Alí mapalí auché jaré wabé risúu olali Binói, echalí Jesucristo ketasi ku kuwana yónali, chopi Binói niráa 'yali Riosi. Alí echirigá buweli mapurigá Riosi chopi kastigo 'yama echi jaré Binói sayela, mapujiti Riosi sinibí galá wachínaga olá justicia.
\v 24 Alí echi Walubela Jesucristo Binói walú kastigo 'yárami níili mapalí Binói klavo jiti michóniga mi'lirúami níili echo'ná kúrsichi, chopi Binói echirigá kastigo 'yárami níili tamujé chati sitíi olalila jiti. Alí echirigá olárami níili mapurigá tamujé bichíyami ma ketasi waminabi chati sitíi olabo, chopi mapurigata galá wachínaga ologá pirélabo. Echalí echi Walubela Jesucristo waminá mi'lirúami níili, mapurigá 'yémitamo galá bichíiga ku wikawárami níibo.
\v 25 Chabénala 'yémitamo 'yénali mapurigá jaré bo'wá 'wigáami niráa, chopi jípitamo ma ku ro'wili echi Walubela Jesucristo yuwa. Alí Jesucristo ne galá tibútaga nisera 'yemi aliwala.
\c 3
\s Galá níima echi jaré niwíkami je'ná jerigá ologá pirélasa
\p
\v 1 'Yemi muguí kunéami ne galá nijéwasi 'yemi aboni kunala, mapurigá a jaré aboni ketasi bichíisagá Riosi Ra'íchala, echalí aboni arigá bichíiratami níima mapalí aboni ritiwá mapurigá 'yemi jubítami ne galá bichíiga olá. Alí aboni echirigá bichíiratami níima mapalí 'yemi jubítami arigá ketásirapé nawésaga ruyé aboni.
\v 2 Echalí aboni ne galá bichíima mapujiti aboni riwimea mapurigá 'yemi jubítami ne galabé ologá piré, ayénachó mapurigá 'yémitamo galá o'wiké Riosi.
\v 3 Ketasi galá níima 'yemi muguí, chopi machímana niráa wabé ba'yórasa. Ketasi galá níima máputamo ripabé niráa achagá ne wabé simírami ba'yóraga tichisa 'yemi kupala, nirapé cho mapurigátamo uchuchasa echi jaré wabé natéami namuti oro niwárami, nirapé cho mapurigátamo ne wabé simírami natéami niráa sipusa,
\v 4 chopi galá níima 'yémitamo wabé galéami nílasa. Alí átamo echirigá olásagá, echalí 'yémitamo sinibí niráa ba'yóami níibo, mapujítitamo wabé galéami níibo ne sulachí niráa, ayénachótamo wabé galá kilíi ologá piréami níibo. Alí Riosi wabé kaníila mapalítamo echirigá ologá pireko.
\v 5 Alí echirigá ikili echi jaré galabé oláami muguí, chabé ki'yá piréami, ne si'néami mapu ikí galá bichíiga o'wikeli Riosi. Alí aboni ayénachó galá o'wikeka nijéwali aboni kunala.
\v 6 Echirigá olali echi Sara, echi mapu ne galá nijéwali echi Abrami, echi mapu ayénachó jeanigá aneli echi Abrami: Mujemi ju keni walula. Alí 'yemi jubítami ayénachó ne bichíwali galabé oláami níibo, mapurigá echi Sara niráa, átamo sinibí galabé olásagá, ayénachó átamo tarapé namuti majásagá.
\p
\v 7 'Yemi rijói kunátami ne wabé galigá nisérasi 'yemi jubila. Galá o'wikesi aboni mapujiti echi jaré muguí ketasi 'me jiwela, ketasi mapurigá 'yemi rijói niráa. Ayénachó galá o'wikesi 'yemi jubila mapujiti aboni achigórigá 'yárami ju mapurigá aboni sinibí niráa pirélama, mapurigá 'yemi galá bichíyami rijói 'yárami níili, mapujiti Riosi 'yemi mi echirigá wabé galigá 'yali. Echirigá ologá pirélasi, mapurigátamo galá omérabo Riosi yuwa tániga ra'ícha.
\s Echi jaré mapu risúu olárami ju mapalí aboni chopi galabé olá
\p
\v 8 Ne jubá 'yemi nimí ané mapu si'néami 'yémitamo a'nagupi nagúuraga pirélabo. A'nagupi wabé galigá natimasi mapurigá ritémtami niráa. Wabé galéami nílasi, tarapé nóchami niráa.
\v 9 Ketasi ku nimíkasi mapalí auché jaré 'yemi mi sitila olá, nibilé cho ku kuwana ni'yókasi sitila anigá mapalí aboni 'yemi mi sitila ané. Chopi si'winárigá wabé galigá ra'íchasi echi jaré aboni, mapujiti Riosi 'yemi mi bayeli mapurigátamo ayénachó galabé ra'ícharami níibo Riosi Binói jiti.
\v 10 Mapujiti echo'ná Riosi Ra'íchala oselíwalachi je'ná jerigá osirúami ju:
\q Ne si'néami echi jaré mapu ikí nakiko kaníliga pirélanala sinibí rawé,
\q galá níima abóniko we galabé, tarapé chati sitíi ra'ichása,
\q ayénachó mapurigá aboni tarapé 'yékaka ra'ichása.
\q
\v 11 Galá níima echi jaré aboni waminá ariwesa suwaba chati sitíi oluwáwami, mapurigá aboni chopi wabé galabé olama,
\q ayénachó galá níima aboni chopi sinibí galabé kilí ologá pirélasa.
\q
\v 12 Mapujiti echi Walubela Riosi ne galá nisera si'néami echi jaré galabé wachínaga oláami pagótami,
\q ayénachó Binói ne galá nami mapalí aboni tániga ra'ícha Binói yuwa, chopi echi Walubela Riosi we sayera echi jaré mapu chati sitíi olako.
\p
\v 13 Alí a 'yémitamo chopi wabé galabé olásagá, echalí ke wesi omérama 'yemi mi ne sinibí risúu olayá.
\v 14 Chopi átamo risúu olárami níisagá mapujítitamo galabé wachínaga ologá piré, arigátamo wabé kaníliami níibo. Ke wesi majasi, nirapé majajasi.
\v 15 Chopi echo'ná 'yemi sulálachi niráa, sinibí waminabi galá bichíisi Jesucristo mapurigá ne Wabé Walubela niráa. Alí sinibí galá kariwesa muchisi mapurigátamo galá ruwigá binérabo echi auché jaré mapu ikí 'yemi mi rukué mapu píritamo galá bichíi. Chopi galá níima máputamo kilíi niráa, wabé galigá ku ruyebo.
\v 16 Sinibí galabé ologá pirélasi, mapurigátamo echijiti wabé kaníliami sulélabo. Alí wabé riwélama echi auché jaré mapu 'yemi mi chopi sití oláami ané, mapalítamo arigá wabé galabé olá, mapurigá Jesucristo bichíyami niráa.
\v 17 Átamo chati sitíi olásagá 'yémitamo risúu olárami níibo mapujítitamo ne bichíwali echijiti kastigo 'yárami níibo; chopi ketasi galá níima máputamo echirigá chati sitíi olabo. Waminabi galá níima máputamo risúu olárami níibo mapujítitamo galabé chopi olá, a Riosi echirigá nakisáagá.
\p
\v 18 Mapujiti echi Walubela Jesucristo Binói ayénachó ne wabé risúu olárami níili mapalí Binói waminá mi'lirúami níili ne si'néami tamujé chati sitíi olalila jiti. Alí echi Walubela Jesucristo ne wabé galabé wachínaga oláami níili, chopi Binói echirigá mukuli tamujé tamí jiti, máputa chati sitíi oláami ju, mapurigá Binói echijiti galá omérama tamujé tamí ku toyá mapo'ná echi Walubela Riosi atí. Echalí Binói ne bichíwali mukúami níili, chopi auchecho ku bitéali Iwigá niráa.
\v 19 Echalí Binói mapurigá Iwigá niráa simigá nawésali ne si'néami echi jaré suwíami iwigala mapu pachá mo'warami niráa tibútarami níili.
\v 20 Mapujiti chabé ki'yá je'ná jaré ketasi galá nijéwali Riosi, echalí mapalí echi Noé riwéami rijói bitéali. Echalí Riosi kilí niráa buweli mapuyénasí echi Noé sunili niwayá echi walú kalí ba'wechi moba iyénami, arka anilíwami, mapujiti Riosi nakili mapurigá ne si'néami pagótami galá bichíima. Alí echalí chopi osá nawó pagótami galá bichíiga mo'wili echo'ná pachá árkachi mapurigá aboni echo'ná galá ku'wíratami níima, mapurigá aboni ketasi suwimea mapalí ripabé buchili ba'wí jena'í wichimóbachi.
\v 21 Jipi rawé mapalita ba'wí jiti pagótami ju, echalí tamujeta achigórigá ku'wíratami ju mapurigá aboni ku'wíratami níili, mapujiti mapalita ba'wí jiti pagótami ju, echalí tamujeta galá 'nera echi auché jaré pagótami mapurigata bachá niráa ma ku wikawárami níili, mapurigata ma ketasi kastigo 'yárami níibo. Mapujítita ma galá bichíili mapurigá echi Walubela Jesucristo ma ku owínali mapalí Binói waminá mi'lirúami níili tamujé chati sitíi olalila jiti. Alí tamujeta ketasi ku wikawárami ju chopi mapujiti tamujé sapala pabákarami niráa níili echo'ná ba'wírali mapalita ba'wí jiti pagótami níili, chópita galá ku wikawárami ju mapalita echirigá ba'wí jiti pagótami ju, mapujítita ma tánali Riosi mapurigá Binói ku bi'wama mapurigata chati sitíi olali.
\v 22 Alí Jesucristo ku simili echo'ná ripá riwigachi mapo'ná Riosi yuwa echo'ná watonachi atí. Alí Jesucristo ne Walubela ju si'néami echi jaré o'wéala Riosi kapitánawala yuwa, ayénachó Binói ne Walubela ju si'néami echi auché jaré o'wéala yuwa. Alí ne si'néami echi jaré o'wéala galá nijéwami ju echi Walubela Jesucristo.
\c 4
\s Galá níima ibili niráa arigá galá nochasa mapurigá Riosi Binói omératali ibili mapurigá nochama
\p
\v 1 Alí mapujiti Jesucristo echirigá risúu olárami níili, ayénachó galá níima mapu ibili 'yemi galá bichíyami arigá waminabi nokuísabo galá bichíisiya, mapalítamo siné káachi wabé risúu olárami níibo mapujítitamo echirigá bichíi. Mapujiti echi jaré mapu ikí wabé risúu olárami níili, mapujiti aboni bichíili Jesucristo niráa, abóniko ma ketasi nakimea chati sitíi olánala,
\v 2 nibilé cho nakimea chuwé ologá pirélanala mapurigá aboni chopi olánali; chopi jipi jonsa aboni galabé ologá pirélama mapurigá Riosi nakí.
\v 3 Mapujiti chabénala 'yémitamo wi'libé rawé chuwé ologá piréali mapurigá we nakí olánala echi auché jaré pagótami, si'néami mapu ikí ketasi cho machí Riosi. Echalí chabénala 'yémitamo we chuwé olali mapurigá 'yemi aboni chopi nakili olánala. Echalítamo wabé tékali, mapalítamo napawika buchuwí anigá walú bajili suguí, ayénachó mapalítamo omáwali. Alí bichétamo chopi o'wikeli echi jaré amachíkalawami namuti, mapu Riosi 'yemi mi aneli máputamo ketasi o'wikebo.
\v 4 Jipi rawé echi auché jaré echirigá oláami wabé charigá 'nata mapujiti 'yémitamo ma ketasi 'yena aboni yuwa mapalí aboni echirigá chati sitíi chuwé olayá. Echijiti aboni wabé sitíi chati ra'ícha 'yemi sayéraga.
\v 5 Alí arigá 'wérali ju mapu aboni ku ruyema echi Walubela Jesucristo mapu churigá aboni olali. Alí Jesucristo wilárami ju mapurigá binói justicia olama echi jaré abijí piréami yuwa, ayénachó echi auché jaré ma suwíami yuwa.
\v 6 Mapujiti echi jaré pagótami mapu ma suwíami ju, arigá nawésarami níili Riosi Ra'íchala, mapurigá aboni aliwala sinibí pirélama mapurigá Riosi Binói sinibí bité. Chopi mapalí aboni abijí piréali jena'í wichimóbachi, echalí aboni arigá justicia olárami níili mapurigá si'néami echi auché jaré pagótami.
\p
\v 7 Ke 'me ayó suwibama suwaba namuti. Echijiti galabé 'nátami nílasi 'yemi. Sinibí tániga ra'ichási Riosi yuwa.
\v 8 Arigá 'wérali ju máputamo a'nagupi ne wabé galebo, mapujiti átamo echirigá a'nagupi galésagá echalí 'yémitamo wisabé a'nagupi ku wikáwabo.
\v 9 Echo'ná 'yemi pirélachi we kaníliga naresi echi jaré ritémtami mikabé jonsa síami, mapurigá aboni 'yemi mi yuwa chi'libama.
\v 10 A'nagupi nagúurasi mapuyena Riosi 'yemi mi ibili 'yali mapurigátamo nagúurabo. Echirigá a'nagupi nagúurasi achigórigá mapurigá Riosi 'yemi mi wikanáami si'winárigá ku'wira.
\v 11 Alí a bilé 'yemi nawisásagá, galá níima échiko chopi nawisasa echi Galabé Riosi Ra'íchala. Alí a bilé 'yemi ku'wírasagá auché jaré, galá níima galabé niráa ku'wírasa mapurigá Riosi 'yemi mi jiwérata. Echirigá ne suwaba galá olasi mapurigá Riosi Binói waminabi walubéraga anérami níima, mapujiti Jesucristo ne wabé Walubela ju. Alí galá ju mapurigá Jesucristo sinibí niráa walubéraga anérami níima, ayénachó mapurigá Binói sinibí niráa suwaba omérami níima. ¡Echirigá níima!
\s Galá níima mapu echi jaré bichíyami galá anachama mapalí aboni risúu olárami ju
\p
\v 12 'Yemi keni ritémawa, ketasi majasi mapalítamo ne wabé risúu olárami ju, mapurigá chabénala niráa 'yémitamo ke siné riwali echirigá ikíachi. Echirigá chopi ikimea 'yemi mi yuwa mapurigá Riosi galá machimea mapu chuyena galá bichíyami ju 'yemi.
\v 13 Chopi ne bachá niráa galá kanílasi mapujítitamo omero echirigá risúu olárami níliya, achigórigá mapurigá Jesucristo risúu olárami níili, mapurigátamo ayénachó ne wabé simírami kanílabo waminánomí, mapalítamo riwiboa Jesucristo ne wabé Walubela niráa ku nawáachi jena'í wichimóbachi.
\v 14 Alí 'yémitamo wabé kaníliami níibo, a jaré pagótami 'yemi mi wabé sitila ra'íchasagá mapujítitamo bichíyami ju Jesucristo niráa, mapujiti echi Galabé Walubela Riosi Iwigala 'yemi mi yuwa mulubé atí. Echi jaré aboni wabé sitila ané echi Walubela Jesucristo, chopi 'yémiko ne wabé Walubela ané echi Binói.
\v 15 Ke siné ko'wisí auché jaré, nibilé siné chigosi, nibilé chati sitíi olasi. Ketasi siné echomí así nílasi, auché jaré pagótami níwala ra'íchali katewa, mapalítamo ketasi así risensia ju. Mapujiti a 'yémitamo echirigá olásagá, echalítamo arigá risúu olárami níibo, chopi ketasi galá níima máputamo echirigá chati sitíi olabo.
\v 16 Si'winárigá átamo risúu olárami níisagá chopi mapujítitamo bichíyami ju Jesucristo niráa, echalí ketasi riwélasi, chopi waminabi walubéraga anesi Riosi, mapujítitamo Jesucristo níwala ju.
\p
\v 17 Jipi ma mulubé seba mapalí echi jaré pagótami kastigo 'yárami níima. Alí jipi, ne chokichí niráa, tamujé máputa Riosi kúchuwala ju ayénachó ma péebi niráa kastigo 'yárami ju mapalita risúu olárami ju echi auché jaré jiti. Alí a tamujé echirigá péebi niráa kastigo 'yárami níisagá, pe waminánomí echi auché jaré ne wabé simírami kastigo 'yárami níima, si'néami mapu ikí ketasi nijéwiami ju Riosi Ra'íchala.
\v 18 Alí a péeriko ku wikáwarami níisagá echi jaré galabé oláami pagótami, ¿churigá ikimea echi auché jaré wabé chati sitíi oláami yuwa?
\v 19 Alí a Riosi echirigá nakisáagá máputamo ne bichíwali risúu olárami níisagá mapujítitamo galá bichíi Binói niráa, galá níima mapu 'yémitamo waminabi olabo echi galabé oluwáwami. Ayénachó galá níima máputamo waminabi galá bichíibo Riosi, echi mapu 'yemi mi niwáli; mapurigá Binói tibútama 'yemi aliwala, mapujiti Riosi sinibí ne wabé bichíwaga oláami ju.
\c 5
\s Echi Pegro galá ruyé echi auché jaré bichíyami
\p
\v 1 Jipi 'yemi nimí je'ná jerigá ruyé, 'yemi máputamo jawárami níili o'wéala ochérami niráa, echo'ná echi jaréana napawika bichíyamichi mapo'ná 'yémitamo piré. Nijeni ayénachó wilárami níili mapurigá bilé walula ochérami niráa, ayénachóni nawesa jeanigá mapu nijeni riwali mapurigá Jesucristo wabé risúu olárami níili. Alí waminánomí mapalí echi Walubela Jesucristo abijí waminabi walubéraga anérami níima echo'ná ripá riwigachi, echalí nijeni ayénachó echo'ná Binói yuwa asimea, achigórigá mapurigá aboni ayénachó echo'ná Binói yuwa muchima.
\v 2 Galá nisérasi echi auché jaré Riosi níwala pagótami mapurigá bilé bo'wá niséami galá nisera binói pugula bo'wá, mapujiti Riosi Binói 'yemi mi nuleli tibúnala aboni. Ne galá kaníliga tibútasi echi jaré aboni mapurigá Riosi nakí. Ketasi chopi echirigá tibútasi mapurigá 'wérali nulérami niráa, nibilé cho nakigá máputamo natétarami níibo, chopi sinibí wabé kaníliga nochasi suwaba Riosi nóchala olayá.
\v 3 Chopi ketasi ne wabé jiwériga nulesi echi jaré mapu Riosi 'yemi mi nuleli echirigá tibúnala, ketasi mapurigá 'yemi aboni piónawala niráa. Chopi sinibí galabé olasi aboni yuwa, mapurigá aboni ayénachó nakimea galabé olánala mapurigá 'yémitamo olá.
\v 4 Alí átamo echirigá oláami níisagá mapalí echi Walubela Jesucristo ku nawá, echalítamo 'yárami níibo jaré wabé galabé nijíwami, máputamo echijiti ne wabé o'wéalatami níibo, mapujiti Binói echi Walubela Bo'wá Niséami ju. Alí echi mapu Riosi nijá ketasi waminá suwibama, ketasi mapurigá echi jaré sawá sitúlaga niwárami, mapuyiri koyela, mapu we yáati waminá wakiché.
\p
\v 5 Echirigá achigórigá 'yemi ri'malí bichíyami ne galá nijéwasi echi jaré o'wéala ochérami bichíyami. Alí galá níima mapu ne si'néami 'yemi napawika bichíyami a'nagupi nijéwama, ne wabé galá kilí ologá, mapujiti:
\q Riosi ne wabé sayera echi jaré wabé nóchami, chopi Binói galabé ologá ku'wira echi auché jaré mapu ikí ketasi nóchami ju.
\m
\v 6 Echijiti mapurigá kuchípala niráa nílasi bacháami Riosi yuwa, mapujiti Binói ne suwaba omériami ju. Alí waminánomí Riosi 'yemi mi o'wéalatama mapalí ma seba tétali.
\v 7 Sinibí ariwesi mapurigá Riosi 'yemi mi tibútama. Ketasi ne wabé nílaga 'natasi karúmati jiti, mapujiti Riosi Binói 'yemi mi ku'wírama.
\p
\v 8 Sinibí wabé galabé 'nátami nílasi. Ne galá 'nagá 'yénasi, mapurigá echi riablo ketasi 'yemi mi 'yékama, mapujiti échiko 'yemi mi ne wabé sayera. Alí echi riablo we iyena mapurigá bilé wabé aparúami namuti, wabé rolóami, echi mapu we áa iyena mapu chigá mi'agá suwábama.
\v 9 Sinibí ne galá bichíiga sayérasi echi riablo, mapujítitamo galá machí mapurigá echi auché jaré 'yemi ritémawala galá bichíyami, ne suníami jena'í wichimóbachi piréami, achigórigá risúu olárami ju echi riablo jiti.
\v 10 Chopi pe waminana mapalí 'yémitamo ma pe téeli niráa risúu olárami níisa, echalí Riosi 'yemi mi ne sébali galabé niráa ku niwáma. Alí bichétamo ne wabé galá bichíyami níibo. Alí Riosi sinibí 'yemi mi waminabi tibútama. Alí Riosi Binói ayénachó sinibí 'yemi mi wabé galigá ku'wírama. Ayénachó Binói tamujé tamí bayeli mapurigata sinibí niráa Binói yuwa muchibo echo'ná ripá riwigachi, echi Walubela Jesucristo yuwa.
\v 11 Echi Walubela Jesucristo sinibí niráa ne suwaba omériami ju. ¡Echirigá níima! Binói sinibí niráa waminabi walubéraga anérami níima. ¡Echirigá níima!
\s Echi Pegro ripora echi jaré ritémtami
\p
\v 12 'Yemi nimí je'ná jerigá pe okuáa niráa osé. Alí nijeni júuli echi Silibano riwéami rijimá je'ná oselí tórataga. Nijeni mayé mapu échiko ne galá bichíyami ju. Nijeni 'yemi mi je'ná jerigá ruyé: Mapu Riosi ne bichíwali 'yemi mi ne wabé galé. Je'ná jerigá ne bichíwali ju, mapujiti Riosi 'yemi mi ne wabé simírami, wabé galigá ku'wírali. Sinibí waminabi galá bichíisi, mapurigá Binói 'yemi mi waminabi galema.
\p
\v 13 Echi jaré napawika bichíyami jena'í Babilóniachi muchúami 'yemi mi ripora. Riosi ayénachó chapili aboni achigórigá mapurigá Binói 'yemi mi chapili. Echi Márkosi ayénachó 'yemi mi ripora. Binói mapurigá nijé ranala niráa ju.
\v 14 A'nagupi ne wabé galigá ripórasi, ritémtami niráa.
\p Nijeni nakí mapurigá 'yémitamo ne wabé galá kilí ologá pirélabo, si'néami mapu ikítamo Jesucristo níwala ju. ¡Echirigá níima!