\id 2pe
\h 2 Pegro
\mt2 Osá osirúami mapurigá
\mt SAN PEGRO
\mt2 osali
\c 1
\s Echi Pegro auchecho siné osé echi jaré bichíyami
\p
\v 1 Nijé, Simoni Pegro, Jesucristo piónawala ju, ayénachó Jesucristo tamí júuli nawisánala. Jipi nijeni 'yemi mi je'ná jerigá osé, máputamo achigórigá ne wabé galá bichíili, mapurigá tamujeta bichíili. Alí 'yémitamo echirigá bichíili mapujiti tamujé Riósawala ne wabé wachínaga oláami ju, tamujé Walubélawala Jesucristo ayénachó, echi mapu tamujé tamí Ku'wíriami ju.
\m
\v 2 Nijeni nakí mapurigátamo ne simírami niráa ku'wíratami níibo, ayénachó máputamo 'yárami níibo mapurigátamo wabé galá kilíi ologá pirélabo, mapujítitamo ma galá machí Riosi, ayénachó mapujítitamo ma galá machí tamujé Walubélawala Jesucristo.
\s Mapurigá galá níima olasa echi jaré mapu galá bichíiko Riosi
\p
\v 3 Riosi ne suwaba omérami ju, echijiti Binói tamujé tamí 'yali suwaba mapu ikita newalé mapurigata galabé ologá pirélabo, ayénachó mapurigata galá o'wikebo Binói Riosi. Alí Binói tamujé tamí machírali echi Walubela Jesucristo, echi mapu tamujé tamí bayeli mapujiti Binói ne Walubela ju, ayénachó mapujiti Binói wabé jiwériga olali wikabé namuti mapurigá ke wesi auché jaré omero olayá.
\v 4 Alí Jesucristo ayénachó tamujé tamí ne wabé bichíwaga aneli wikabé namuti mapurigá oselichi osirúami ju jena'í Riosi Ra'íchala oselíwalachi. Ayénachó Riosi ne wabé omérami ju achigórigá olayá mapurigá tamujé tamí bichíwaga aneli. Alí suwaba je'ná ne wabé simírami natéami ju. Ayénachó Riosi echirigá tamujé tamí ne bichíwaga aneli mapurigátamo echijiti galá omérabo na'ura, mapurigátamo ketasi nijéwaga olabo mapurigá echi auché jaré pagótami wabé nakí chati chuwé sitíi olánala. Alí bichétamo ayénachó echijiti achigó yiri níibo mapurigá Riosi Binói ju.
\v 5 'Yémitamo ma galá bichíi, echijiti arigá 'wérali ju máputamo ayénachó sinibí wabé galabé ologá pirélabo. Alí mapalítamo sinibí wabé galabé ologá piré, arigá 'wérali ju máputamo ayénachó galá machíami níibo.
\v 6 Alí mapalítamo galá machíami ju, ayénachó arigá 'wérali ju máputamo ketasi chuwé ologá pirélabo. Alí mapalítamo ketasi echirigá chuwé ologá piré, echalí arigá 'wérali ju máputamo chopi galabé kilí ologá pirélabo. Alí mapalítamo chopi echirigá kilí ologá piré, echalí arigá 'wérali ju máputamo galá o'wikebo Riosi.
\v 7 Alí mapalítamo echirigá galá o'wiké Riosi, echalí ayénachó arigá 'wérali ju máputamo galá natimapo echi auché jaré 'yemi ritémawala galá bichíyami. Alí mapalítamo echirigá galá natimáami ju, echalí ayénachó arigá 'wérali ju máputamo ne wabé galéami níibo.
\p
\v 8 Alí átamo waminabi wabé echirigá olásagá, 'yémitamo galabé ologá pirélabo mapurigá tamujé Walubélawala Jesucristo nakí, mapujítitamo galá machili Jesucristo, alí bichétamo chopi nakili olánala mapurigá Binói nakí.
\v 9 Chopi echi mapu ketasi echirigá olako, échiko ne noguí mapurigá ke machíliami niráa ju. Ayénachó échiko chopi omero 'néniya echi jaré mulubé muchúami namuti. Alí échiko ketasi machí mapu binói chati sitíi olalila ma ku bi'wárami níili, suwaba mapu ikí binói chabénala chati sitíi olali.
\v 10 Echijiti, keni ritémawa, waminabi wabé galabé ologá pirélasi, mapurigátamo echirigá galá machiboa mapu Riosi ne bichíwali 'yemi mi bayegá chapili. Alí átamo echirigá olásagá 'yémitamo ketasi siné chakena rujuibo, chópitamo sinibí galá bichíyami níibo.
\v 11 Alí Riosi 'yemi mi ne wabé simírami 'yama mapurigátamo galá mo'wiboa echo'ná ripá riwigachi, mapo'ná tamujé Walubélawala Jesucristo sinibí niráa nulama Walubela niráa. Ayénachó Binói tamujé tamí Ku'wíriami ju.
\p
\v 12 Echijiti nijeni 'yemi mi sinibí waminabi 'natáratama je'ná jeyiri namuti, chopi 'yémitamo arigá ma galá machí suwaba. Ayénachótamo ne galá bichíi echi ne bichíwali, mapurigátamo galá ruyérami ju.
\v 13 Nijeni mayé mapu wabé galá ju mapu nijeni 'yemi mi je'ná jerigá ruyema mapuyénasí nijeni abijí bité, mapurigátamo sinibí ne galá machísabo,
\v 14 mapujiti echi tamujé Walubélawala Jesucristo ma tamí machírali mapu arigá 'wérali ju mapurigá nijeni ke 'me ayó waminá mukumea.
\v 15 Chopi nijeni arigá ne suwaba 'wérali olama, mapuyénasíni omero, mapurigá mapalí nijeni ma waminá mukusá, echalí waminánomí 'yémitamo ayénachó sinibí galá 'natabo je'ná jeyiri namuti jiti.
\s Echi jaré mapu riwali mapalí Jesucristo ne wabé walubératami níili
\p
\v 16 Tamujeta ma 'yemi mi binéraga nawésali mapurigá echi tamujé Walubélawala Jesucristo ne wabé walubératami níili, ayénachó mapurigá Binói wabé omériga ku nawama jena'í wichimóbachi. Alí echirigá mapurigata 'yemi mi nawésali ne bichíwali níili, alí tamujeta ketasi nakili 'yemi mi 'yékanala, mapujiti tamujé ne aboni niráa, ne bichíwali galá riwali mapalí echi tamujé Walubélawala wabé ratábataga walubératami níili.
\v 17 Mapujiti tamujé aboni ne galá riwali mapalí Riosi Onorúami ne wabé simírami ratábataga walubérali echi Walubela Jesucristo. Ayénachóta kipuli mapalí Riosi Binói ripá riwigachi jonsa ra'íchaga jeanili: ¡Je'ná ju keni Raná, mapu Nijeni ne wabé galé! Nijeni ne wabé kanila Binói jiti.
\v 18 Echalí tamujé aboni galata námali mapalí, echo'ná ripá riwigachi jonsa, Riosi Binói echirigá ra'íchali Jesucristo jiti rugá, mapujiti tamujeta Binói yuwa 'yénali echo'ná galabéalachi ripá rabó.
\p
\v 19 Ayénachóta níwa Riosi Ra'íchala osirúami, mapurigá echi jaré chabé ki'yá piréami Riosi jiti nawésami osali, echi mapu ke siné nakuliwa. Alí Riosi Ra'íchala osirúami tamujé tamí ruyé mapurigá Riosi Binói ra'íchaga anili; echijiti waminabi ne wabé bichíwali ju. Alí Riosi Ra'íchala mapurigá bilé na'í rajáami niráa ju, mapu tamujé tamí galá ratábata pachana tamujé sulálachi niráa. Ne galá níima 'yémitamo galá nijéwasa Riosi Ra'íchala mapuyénasí chi'limea echi galabé Rawé, Riosi Rawéwala, mapuyénasí ku nawama echi Walubela Jesucristo, echi mapu 'yemi mi ne galá machíratama echo'ná 'yemi sulálachi niráa.
\v 20 Ne bachá niráa galá machisí mapu ke wesi omérama aboni niráa machiyá churigá aniwáami ju Riosi Ra'íchala osirúami, mapurigá osali echi jaré ki'yá piréami Riosi jiti nawésami rijói, mapujiti echi Wabé Galabé Riosi Iwigala chopi ju mapu echirigá galá machírata echi jaré pagótami.
\v 21 Mapujiti echi jaré chabé ki'yá piréami Riosi jiti nawésami ke siné osali mapurigá aboni chopi 'nátali, aboni niráa. Si'winárigá aboni sinibí osali mapurigá Riosi Binói nuleli aboni osínala, mapujiti Riosi echijiti chapili echi jaré aboni. Alí echi Galabé Riosi Iwigala galá machírali aboni mapurigá aboni osimea riwéali.
\c 2
\s Echi jaré wabé 'yékaka nawésami
\r (Judas 4-13)
\p
\v 1 Chopi ayénachó nirúali jaré rijói wabé 'yékaka nawésami echo'ná echi jaré Isaeli anilíwami pagótami yuwa. Alí echirigá achigórigá nirúlama jaré 'yékaka binériami echo'ná 'yemi bichíyami yuwa. Alí echi jaré aboni chiná niráa, wabé chati sitíi ologá, si'winárigá binérama echi mapu ketasi galá ju mapu 'yémitamo bichíibo. Alí aboni echirigá ologá sayérama echi Walubela Jesucristo mapu aboni jiti mukuli. Echijiti aboni ke 'me ayó waminá suwábarami níima.
\v 2 Alí wikabé auché jaré pagótami ayénachó achigórigá chuwé sitíi ologá najátama echi jaré aboni yuwa. Echijiti wikabé pagótami wabé chati sitíi olalíwami niráa anema echi ne bichíwali bichíilawami mapurigá tamujeta galá bichíi echi Wabé Galabé Riosi Ra'íchala.
\v 3 Alí echirigá binéraga, aboni 'yemi mi wabé 'yékaka bichíiratama, mapujiti aboni wabé korúkami ju echi wenomí. Alí aboni ketasi ku wikawárami níima, chopi ke 'me ayó aboni suwaba suwábarami níima.
\p
\v 4 Chabé ki'yá mapalí jaré o'wéala Riosi kapitánawala wabé chati sitíi olali, echalí Riosi ketasi ku wikáwali aboni, chopi echo'ná ri'lé riáblochi u'luka, echo'ná rokowárali ariweli aboni. Alí aboni jiero wiya jiti bulugá tibútarami níima, mapuyénasí Riosi waminabi walubé kastigo 'yama waminánomí.
\v 5 Alí Riosi nirapé cho ku wikáwali echi auché jaré ki'yá piréami chati sitíi oláami pagótami, chopi Binói walú júuli ba'wí mapurigá ripabé buchima jena'í wichimóbachi, mapurigá waminá suwaba suwibama si'néami echi jaré chati sitíi oláami pagótami. Echalí Riosi chopi ku'wili echi bilepi Noé riwéami rijói, echi mapu arigá nawésali jeanigá mapu echi jaré pagótami galá wachínaga ologá pirélama. Alí auché jaré kichao, echi binói Noé níwala pagótami, ayénachó asi ku'wírtami níili.
\v 6 Ayénachó Riosi nulali waminá suwábanala echo'ná Sorómachi anilíwachi walúlachi piréami wabé chati sitíi oláami pagótami, echo'ná Gomórachi anilíwachi walúlachi piréami chati sitíi oláami pagótami ayénachó. Echalí ne si'néami echi jaré chati sitíi oláami pagótami waminá ikósaga ko'wirúami níili. Alí Riosi echirigá walú kastigo 'yali aboni, mapurigá echijiti ne wabé majama wakinánala piréami pagótami, si'néami mapu ikí chati sitíi oláami níimako.
\v 7 Chopi echalí rawé Riosi arigá ku'wili echi Lote riwéami rijói, echo'ná Sorómachi bitéami. Échiko galabé wachínaga oláami rijói níili. Alí echi Lote ma ne wabé o'mónali mapujiti sinibí rawé riwali mapurigá echi auché jaré chati sitíi oláami rijói echo'ná piréami chopi waminabi wabé simírami chati sitíi chuwé olali.
\v 8 Echalí echi galá oláami Lote arigá echo'ná bitéali echi jaré chati sitíi oláami pagótami yuwa. Chopi sinibí rawé échiko ne wabé o'mónali, binói sulálachi niráa, mapalí binói námali, ayénachó riwali aboni echirigá ne wabé simírami chati sitíi oláachi.
\v 9 Echirigata galá machí mapu echi Walubela Riosi galá omériami ju ku'wíriya echi jaré mapu ikí sinibí galá nijéwaga olako mapurigá Binói nakí, mapurigá aboni ke siné nijéwaga olama mapurigá echi riablo nulé. Ayénachó Riosi galá omériami ju tibútasiya echi auché jaré chati sitíi oláami pagótami, mapurigá aboni chopi kastigo 'yárami níima echalí ne jubá rawé.
\p
\v 10 Echalí Riosi bachá niráa walú kastigo 'yama echi jaré mapu ikí wabé chati sitíi chuwé olako, mapurigá aboni chopi nakí olánala. Ayénachó Riosi kastigo 'yama ne si'néami echi jaré mapu ikí ketasi nijéwanali. Echiyiri pagótami ketasi nakí mapurigá aboni si'nú, galabéala niráa, nakulíwarami níima. Aboni ne wabé jobátami ju. Alí aboni tarapé majáami ju sayéraga ra'íchiya echi riablo níwala o'wéala, mapu arigá ne wabé simírami omériami ju, ketasi mapurigá aboni.
\v 11 Chopi echi jaré o'wéala Riosi kapitánawala waminabi simírami omériami ju, ayénachó waminabi ne wabé o'wéala ju, ketasi mapurigá echi riablo níwala o'wéala. Alí echi jaré Riosi kapitánawala ketasi nakili sitila anigá wi'nijiya echi riablo níwala o'wéala, bacháami echi Walubela Riosi yuwa.
\p
\v 12 Chopi echi jaré chati sitíi oláami rijói ke newalite ju. Aboni chopi mapurigá echi jaré jobátami namuti ju mapu tarapé 'nata. Echi jaré aboni chopi chati sitíi ologá piré mapurigá aboni chopi nakí olánala. Alí aboni chopi ranarúami ju jena'í wichimóbachi mapurigá aboni chapirúami nílaga, waminá suwábarami níima. Alí echi jaré aboni ne wabé sitila ané jaré namuti mapu aboni ketasi machí. Chopi si'néami aboni waminá suwábarami níima, achigórigá mapurigá echi jaré jobátami niráa.
\v 13 Alí aboni echirigá wabé risúu olárami níima, mapujiti aboni wabé risúu olali auché jaré. Alí aboni mayé mapu wabé kaníliami ju, mapalí aboni echirigá chati chuwé sitíi olá mapurigá aboni chopi nakí olánala. Chopi aboni wabé riwéliga olá, alí 'yemi napawika bichíyami ayénachó riwératami níibo mapalí echi auché jaré chati sitíi oláami pagótami 'yemi yuwa ko'wá, mapujiti aboni abijí wabé chati chuwé olama mapurigá aboni chopi nakí olánala.
\p
\v 14 Alí aboni chopi wabé nakí mapuyíripi mukí mapu aboni ritiwá. Alí aboni sinibí nakí wabé chati sitíi olánala, ayénachó aboni ne wabé 'yeka echi auché jaré ketasi galá bichíyami pagótami. Aboni ne wabé machíami ju wabé chati sitíi olayá; echijiti aboni walubé kastigo 'yárami níima.
\v 15 Echi jaré aboni ma waminá 'wigáli mapujiti aboni ma ariweli galabé olayá. Aboni chopi olá mapurigá echi Balami riwéami nawésami rijói olali, echi mapu Beori riwéami rijói ranala níili, echi mapu wabé nakili ménala wenomí, wabé chati sitíi ologá.
\v 16 Chopi echi Balami wabé oyératami níili, mapalí binói echirigá chati sitíi olali, mapujiti bilé bulito mapu tarapé ra'íchami níili arigá ra'íchali mapurigá rijói niráa. Echalí echi bulito we ra'íchaga waminá oyérali echi Balami, alí binói ketasi waminabi simili chati sitíi olámiya.
\p
\v 17 Alí si'néami je'ná jaré chati sitíi oláami rijói mapuyiri ju jaréana bajichi jótami, ke téami ba'wí. Ayénachó aboni mapuyiri jaré nolí ju, echi iká jiti torúami. Alí Riosi ma nulali mapurigá aboni sinibí niráa muchuwárami níima echo'ná ri'lé ne wabé simírami rokowárali.
\v 18 Aboni wabé nóchaga ra'ícha echi mapu ketasi galá ju. Alí mapalí auché jaré ma ariweli chati sitíi olayá mapurigá jena'í wichimóbachi piréami sinibí we chati sitíi olá, echalí je'ná jaré chati sitíi oláami rijói 'wérali olá mapurigá echi jaré auchecho siné wabé chati sitíi olama, jeanigá mapu we galá ju echirigá chati sitíi oluwawa, ayénachó mapu galá ju chati sitíi oluwawa suwaba mapu ikí echi pagótami nakí chati sitíi olánala.
\v 19 Echi jaré chati sitíi oláami pagótami 'yemi mi ané máputamo wabé kanílaga pirélabo, átamo auchecho siné chotásagá echirigá chati chuwé olayá, chopi aboni ketasi kanílaga piré. Alí aboni arigá wabé chati sitíi olá, mapujiti aboni nulérami niráa ju echirigá chati sitíi olánala, echi riablo jiti, mapujiti aboni mapurigá echi riablo piónawala niráa ju.
\v 20 Jaré ibili pagótami ma galá machili echi Walubela Jesucristo, echi mapu tamujé tamí Ku'wíriami ju, echijiti aboni ma ariweli echi chati sitíi oluwáwami, mapurigá sinibí we chati sitíi olá echi auché jaré pagótami jena'í wichimóbachi piréami. Chopi a jaré aboni pe waminánala auchecho siné ne wabé simírami chati sitíi olásagá, echalí aboni waminabi wabé simírami chati sitíi oláami níima, ketasi mapurigá bachánala.
\v 21 Alí waminabi galá níimili echi jaré pagótami ke siné machisá echirigá galá wachínaga olayá, mapurigá aboni ketasi echirigá auchecho siné ku ariwema. Chopi aboni ma galá machigá, alí biché ariweli nijéwiya echi Galabé Nulalíwami mapurigá aboni nulérami níili.
\v 22 Echirigá aboni yuwa ma ne bichíwali ikili mapurigá echi jaré pagótami je'ná jerigá aní: Echi kochí waminá upéesa, auchecho pe echi ku ko'wá. Ayénachó echi kochi káraga ubáratami níisa, auché ku wisogátali 'wiba.
\c 3
\s Echi Walubela Jesucristo ne bichíwali ku nawama
\p
\v 1 Keni ritémawa, nijeni 'yemi mi ne wabé galé. Je'ná ma osá chokéami ju mapu nijeni 'yemi mi oseli. Alí nijeni 'yemi mi echirigá osá chokéami oseli mapujítini nakili mapurigátamo ne galá machíami niráa 'natabo mapurigá nijeni 'yemi mi ruyé.
\v 2 Ne galá ku 'natasi mapurigá echi jaré galabé oláami Riosi jiti nawésami rijói anili, echi jaré mapu chabé ki'yá nawésali. Ayénachó galá ku 'natasi mapurigá echi Walubela Jesucristo nulali, echi mapu wabé Ku'wíriami ju. Chabé chokichí echi jaré Riosi jiti julárami rijói 'yemi mi echirigá binérali mapurigá Jesucristo nulali.
\p
\v 3 Ne bachá niráa galá machisí mapu echalí ne jubá rawé jaré wikabé pagótami wabé sitila anema echi Galabé Riosi Ra'íchala, ayénachó aboni wabé chati chuwé ologá pirélama mapurigá aboni chopi nakimea olánala.
\v 4 Echalí aboni jeanigá rukuema: ¿Churékula ke ku nawali echi Jesucristo mapurigá Binói bichíwaga niráa anili mapu ku nawama? Mapujiti chabé ki'yá jonsa mapalí jonsa suwili echi jaré ki'yá piréami tamujé pagótamawala, ne suwaba namuti sinibí chopi a yiri ju, mapalí jonsa niwálati je'ná kawí.
\v 5 Echi jaré pagótami echirigá aní mapujiti aboni ketasi nakí bichíinala mapurigá ki'yá jonsa nirúali suwaba namuti echo'ná ripá riwigachi nirúami mapu ikí Riosi niwáli. Alí aboni nibilé cho nakí bichíinala mapu chabé ki'yá nirúali je'ná kawí mapu Riosi niwáli nasipa echo'ná walú ba'wírali niráa, mapurigá jipi rawé yénasí jena'í kawírali suwé noligá maní echi walubé ba'wí.
\v 6 Alí aboni nibilé cho bichíinali mapurigá echalí ki'yánala je'ná kawí waminá nosobúrami níili mapalí ne wabé ripabé buchili ba'wí, ne suníami jena'í wichimóbachi.
\v 7 Jipi rawé je'ná kawí abijí tibí. Echo'ná ripá riwigachi nirúami namuti ayénachó abijí tibí. Jipi rawé echi Walubela Riosi echirigá galá tibuta mapurigá waminánomí ne suwaba ikósaga suwábarami níima, mapujiti echalí ne jubá wi'nijíwachi rawé Riosi nulama ne suwaba ikósanala. Alí echalí rawé echi jaré chati sitíi oláami pagótami waminá suwábarami níima.
\p
\v 8 'Yemi keni ritémawa, nijeni 'yemi mi ne wabé galé. Ne galá níima mapu 'yémitamo sinibí ne galá 'natabo mapurigá, echi Walubela Riosi yuwa, bilé rawé wi'libé niráa ju mapurigá bilé mili bamíbali niráa, ayénachó mapurigá Riosi yuwa bilé mili bamíbali wabé téeli ju mapurigá bilé rawé niráa.
\v 9 Chopi ne bichíwali ju mapu echi Walubela Jesucristo ke 'me ayó ku nawama jena'í wichimóbachi, mapurigá Binói bachá niráa bichíwaga anili. Jaré pagótami mayé mapu echi Walubela Jesucristo wi'libésika, ketasi ku nawasa, arigá ke ku nawama. Chopi Binói arigá ke 'me ayó nolínama. Echi Walubela Jesucristo ketasi cho ku nawá, chopi mapujiti Binói kilí niráa buwé mapurigá echi jaré pagótami wikáwali tánama Riosi. Jesucristo ketasi nakí mapu nibilé waminá 'wigama, chopi Binói nakí mapu si'néami pagótami ku ro'wima Riosi yuwa, mapurigá aboni ku 'wikáwarami níima.
\p
\v 10 Echirigá ke sayiná sebama echi Walubela Jesucristo níwala rawé, mapujiti Binói níwala rawé ke sayiná nolínama mapurigá bilé chigórami ke sayiná nawá, rokogó niráa. Echalí rawé ne suwaba echi jaré namuti rajáami sopolí waminá ikósaga suwábarami níima ne wabé chati anigá, ne wabé charigá majáriami niráa. Echalí karúmati namuti mapu ikí nirú káraga suwábarami níima, ne wabé simírami ratáami jiti ikósaga. Ayénachó je'ná kawí káraga ikótaga waminá suwibama, ne suwaba echi jaré namuti jena'í wichimóbachi nirúami ayénachó.
\p
\v 11 Ne bichíwali ju mapu ne suwaba namuti echirigá suwibama, echijiti waminabi galá níima mapu 'yémitamo sinibí galá bichíyami níibo, ayénachó máputamo sinibí wabé galigá pirélabo Riosi.
\v 12 Echijiti galá bichíiga buwesi mapuyénasí sebama echi Walubela Riosi níwala rawé; ayénachó sinibí 'wérali ologá nochasi, Riosi nóchala olayá, mapurigá we yáati, ke 'me ayó, sebama echalí rawé. Echalí ne suwaba echi jaré rajáami namuti echo'ná ripá riwigachi nirúami ne suwaba ikótaga waminá suwibama, ayénachó ne suwaba namuti jena'í wichimóbachi nirúami ne suwaba ikótaga waminá basuma.
\v 13 Alí tamujé bichíyami chópita buwé mapu nirúlama auché biléana bukulíwami riwigachi, mapurigá Riosi bachá niráa bichíwaga anili mapu nirúlama. Ayénachóta buwé mapu nirúlama auché biléana bukulíwami wichimoba, mapo'ná chopi nirúlama echi wabé galabé wachínaga oluwáwami, mapurigá Riosi bachá niráa bichíwaga anili mapu nirúlama.
\p
\v 14 Echijiti 'yemi keni ritémawa, wabé galérami, jipi mapalítamo abijí buwé mapurigá je'ná jerigá ikimea, sinibí ne wabé galabé olasi mapurigá Riosi 'yemi mi riwimea galabé kilíi ologá piréami, tarapé chati sitíi oláami niráa.
\v 15 Galá ku 'natasi mapu Riosi chopi echirigá buwé mapurigá echi Galabé Riosi Ra'íchala waminabi nawisárami níima, mapurigá auché jaré pagótami galá bichíiga, galá ku wikawárami níima. Alí tamujé rijimala Pablo, mapu wabé galérami ju, ayénachó 'yemi mi achigórigá oseli mapurigá Riosi ma 'yali echi binói mapurigá wabé machíami níima.
\v 16 Alí echi Pablo sinibí echirigá achigórigá osali. Ayénachó binói osali jaré namuti jiti rugá mapu echi jaré pagótami ke 'me omero machiyá. Alí echi jaré ke machíami pagótami mapu ketasi cho galá bichíi, sinibí echirigá si'winárigá machigá 'neni ne suwaba Riosi Ra'íchala osirúami. Alí aboni echijiti chopi waminá 'wigama.
\p
\v 17 Echijiti 'yemi keni ritémawa wabé galérami, sinibí ne galá 'nátaga pirélasi, mapujítitamo chabé chokichí jonsa galá machili je'ná jeyiri namuti. Echalítamo ketasi waminá chakena torúami níibo mapurigátamo achigórigá bichíibo mapurigá echi auché jaré chati sitíi oláami pagótami. Sinibí galabé 'nátaga pirélasi mapurigátamo waminabi galá bichíyami níibo.
\v 18 Chopi waminabi ne galá machisí echi tamujé Walubélawala Jesucristo, echi mapu tamujé tamí Ku'wíriami ju. Ayénachó sinibí waminabi ne wabé galabé olasi, mapurigá Jesucristo 'yemi mi waminabi ne wabé galema. Ne galá níima mapu Jesucristo waminabi walubéraga anérami níima ne sinibí niráa. ¡Echirigá níima!