\id 1JN
\h 1 Juan
\mt2 Bachá osirúami mapurigá
\mt SAN JUANI
\mt2 osali
\c 1
\s Ne suwaba Riosi nawésawala Jesucristo jiti ruáami ju
\p
\v 1 Nijeni 'yemi mi osé echi Walubela Jesucristo jiti rugá, Echi mapu bachá niráa sinibí bitéali ki'yá chokichí mapalí ne suwaba echi jaré namuti mapu ikí nirú ketasi cho niwárami níili. Nijé binói galá námali mapalí echi Walubela Jesucristo ra'íchali, ayénachó nijé binói galá 'néniga riwali Jesucristo, ayénachóni riwali mapurigá Binói galabé ologá bitéali, ayénachó nijé binói nóchali echi Walubela Jesucristo jiti. Alí ne suwaba Riosi nawésawala Jesucristo jiti rugá nawésami. Alí si'néami pagótami mapu ikí bichíiko Jesucristo niráa ne sinibí pirélama.
\v 2 Alí nijeni galá riwali je'ná Jesucristo mapu galá 'ya mapurigá echi pagótami sinibí niráa pirélama. Ayénachó nijeni nawésali Jesucristo jiti rugá, mapu Binói 'yemi mi 'yama máputamo sinibí niráa pirélabo. Ki'yá chokichí jonsa Jesucristo echi Onorúami yuwa asali, chopi chabé bukulí Binói nawali jena'í wichimóbachi.
\v 3 Echirigá nijeni 'yemi mi ruyé suwaba mapu nijeni riwali, ayénachó suwaba mapu nijeni námali, mapurigá 'yémitamo galá bichíiga napawíkami níibo tamujé yuwa máputa ma galá bichíili Jesucristo niráa, mapujiti tamujeta ne bichíwali napawíkami ju Riosi Onorúami yuwa, ayénachóta napawíkami ju Jesucristo yuwa, echi mapu bilepi Riosi Ranala ju.
\v 4 Echirigá nijeni 'yemi mi je'ná jerigá osé mapurigá 'yémitamo galá bichíiga, ne sébali kanílabo.
\s Riosi ne wabé Ratábami ju
\p
\v 5 Alí nijeni 'yemi mi je'ná jerigá nawésaga ruyé, mapurigá Jesucristo tamí binérali: Mapu Riosi ne wabé simírami Ratábami ju. Alí Binói sinibí ne galabé machiná oláami ju, mapujiti Riosi yuwa tarapé nirú rokowárali.
\v 6 Alí a tamujeta jeanisáagá máputa galá bichíiga napawíkami ju Riosi yuwa, chopi ata sinepi niráa sinibí chati sitíi olásagá, mapurigá echo'ná rokowárali piréami olá, echalita chopi wabé 'yékaka ra'íchami ju, ayénachóta wabé 'yékaka oláami ju.
\v 7 Chopi ata sinibí galabé olásagá mapurigá echo'ná galá rayénachi piréami niráa, mapurigá Riosi Binói galabé olá, ayénachó mapurigá Binói sinibí echo'ná galá rayénachi atí, echalita ne bichíwali a'nagupi napawíkami ju echi auché jaré galá bichíyami yuwa, ayénachó Jesucristo lalá tamujé tamí ku bi'wá ne suwaba mapurigata chati sitíi olali. Échiko bilepi Riosi Ranala ju.
\p
\v 8 Alí ata jeanisáagá máputa ma ke chirigá omero chati sitíi olayá, echalita aboni niráa wabé 'yeka, ayénachóta ketasi bichíwaga aní.
\v 9 Chopi ata ku ruyésagá Riosi mapurigá tamujeta chati sitíi olali, echalí Binói tamujé tamí ku wikáwama tamujé chati sitíi olalila, ayénachó Binói tamujé tamí suwaba ku bi'wama mapurigata chati sitíi olali, mapujiti Riosi sinibí galabé wachínaga oláami ju.
\v 10 Chopi ata jeanisáagá máputa ke siné chati sitíi olali, echalita wabé 'yékami niráa Riosi, ayénachóta ketasi ne galá bichíili Binói Ra'íchala.
\c 2
\s Jesucristo ju ne Walubela Ra'íchami tamujé tamí jiti rugá
\p
\v 1 Keni kúchuwa, nijeni 'yemi mi je'ná jerigá osé mapurigátamo ke siné chati sitíi olabo. Chopi a bilé arigá chati sitíi olásagá, tamujeta níwa bilé Walubela nigúuraga Ra'íchami mapu echo'ná bacháami Onorúami yuwa ra'ícha, mapujiti tamujé tamí ku'wíranali. Échiko, echi Walubela Jesucristo ju, mapu sinibí galabé wachínaga olá.
\v 2 Jesucristo mi'lirúami níili mapalí Binói kastigo 'yárami níili tamujé chati sitíi olalila jiti. Echalí Binói echirigá mi'lirúami níili ne si'néami jena'í wichimóbachi piréami chati sitíi olalila jiti.
\p
\v 3 Alí ayena galá nijéwasagá Riosi nulalila, echalita galá machí máputa ma galá machí Riosi.
\v 4 Chopi a bilé jeanisáagá: Nijeni galá machí Riosi, alí a binói ketasi galá nijéwasagá Riosi nulalila, échiko we ikaléami ju, ayénachó binói wabé 'yékaka olá.
\v 5 Chopi echi jaré mapuyíripi galá nijéwaga olako mapurigá Riosi nulá, abóniko ne sébali galá galé Riosi. Alí bicheta echijiti galá machí máputa napawíkami ju Riosi yuwa.
\v 6 Arigá 'wérali ju mapu si'néami mapu ikí aniko mapu aboni ma napawíkami ju Riosi yuwa, sinibí galabé ologá pirélama mapurigá Jesucristo galabé ologá bitéali.
\s Echi bukulíwami nulalíwami
\p
\v 7 'Yemi keni ritémawa ne wabé galérami, nijeni ketasi 'yemi mi osé auché bilé si'nú nulalíwami, chopi je'ná jerigá mápuni 'yemi mi osé achigó yiri ju mapurigátamo nulérami níili chabé chokichí jonsa, mapalítamo bachá niráa galá bichíili. Alí je'ná nulalíwami, chabé chokichí jonsa nirúami, achigó yiri ju mapurigá echi Galabé Riosi Ra'íchala nawisálawami máputamo ma námali.
\v 8 Chopi je'ná jerigá mapurigá nijeni 'yemi mi osé, arigá mapurigá auché bilé si'nú nulalíwami ju, echi mapu Jesucristo yuwa ne bichíwali ju, ayénachó 'yemi yuwa ne bichíwali ju. Alí echi rokowárali ma simírasimi, mapujiti echi ne bichíwali rajáami ma galá rajá, mapujiti echi Galabé Riosi Ra'íchala ma nawisárami ju.
\p
\v 9 A bilé jeanisáagá mapu binói echo'ná galá rajáachi niráa, galabé ologá iyena, chopi a échiko arigá we kichísagá auché bilé rijimala galá bichíyami, échiko abijí echo'ná rokowárali niráa, wabé chati sitíi ologá iyena.
\v 10 Chopi echi mapu galá galeko echi auché jaré binói ritémawala galá bichíyami, échiko echo'ná galá rajáachi niráa, galabé ologá bité. Alí biché a echirigá olásagá, échiko tarapé chati sitíi olírama auché jaré.
\v 11 Alí echi mapu we kichiko auché bilé binói rijimala galá bichíyami, échiko abijí chati sitíi ologá bité echo'ná rokowárali niráa, ayénachó chati sitíi ologá iyena echo'ná rokowárali. Alí échiko ketasi machí mapu kumi simí mapujiti binói ma ke machíliami niráa niwálati, mapujiti echo'ná rokowárali bité.
\p
\v 12 Keni kúchuwa, nijeni 'yemi mi osé mapujiti Riosi ma 'yemi mi ku wikáwali mapurigátamo chati sitíi olali, mapujítitamo ma galá bichíili Jesucristo niráa.
\v 13 'Yemi 'wéntami, nijeni 'yemi mi osé mapujítitamo ma galá machili Echi mapu ma bitéami níili ki'yá chokichí, mapalí ke cho niwálati suwaba echi jaré namuti. 'Yemi témali, nijeni 'yemi mi osé mapujítitamo galá bichíiga ma omérali echi riablo.
\p 'Yemi keni kúchuwa, nijeni 'yemi mi je'ná jerigá oseli mapujítitamo ma galá machili echi Onorúami.
\v 14 'Yemi 'wéntami, nijeni 'yemi mi je'ná jerigá oseli mapujítitamo ma galá machili Echi mapu ma bitéami níili ki'yá chokichí mapalí ke cho niwálati suwaba echi jaré namuti. 'Yemi témali, nijeni 'yemi mi je'ná jerigá oseli mapujítitamo jiwérami ju, ayénachó mapujítitamo ma galá bichíi Riosi Ra'íchala, ne sulachí niráa, ayénachó mapujítitamo ma galá bichíiga omérali echi riablo.
\p
\v 15 Ketasi galesi echi chati sitíi oluwáwami mapurigá jena'í wichimóbachi piréami we chati sitíi olá. Nibilé cho galesi jena'í wichimóbachi nirúami namuti. A bilé galésagá echi chati sitíi oluwáwami mapurigá jena'í wichimóbachi piréami we chati sitíi olá, échiko ketasi galá galé Riosi Onorúami,
\v 16 mapujiti Riosi ketasi 'yali mapurigá jena'í wichimóbachi piréami echirigá chati sitíi olama. Jena'í wichimóbachi piréami pagótami we chati sitíi olá mapurigá aboni chopi nakí chati sitíi olánala, ayénachó aboni ne wabé korú echi jaré namuti mapu ikí aboni chopi wabé ba'yóraga nakí 'nénala. Ayénachó aboni chopi nakí ne wabé nóchaga pirélanala.
\v 17 Alí je'ná kawí waminá suwibásimi. Alí suwaba mapu ikí jena'í wichimóbachi piréami chati sitíi oláami pagótami nakí olánala, ayénachó waminá suwibásimi, chopi echi auché jaré pagótami mapu ikí olako mapurigá Riosi nakí, abóniko sinibí niráa pirélama.
\s Riosi Ra'íchala ne bichíwali ju chopi jaré pagótami wabé 'yékami ju
\p
\v 18 Keni kúchuwa, ma ne jubá rawé ju. 'Yémitamo ma námali mapurigá jena'í wichimóbachi nolínama bilé walula mapu wabé sayérami ju, echi Walubela Jesucristo sayéraga. Jípita galá machí mapu ma ne jubá rawé ju, mapujiti wikabé ma sili mapu wabé sayérami ju Jesucristo sayéraga.
\v 19 Echi jaré aboni ma ku ariwesa, waminá simíbali tamujé napawika bichíyamichi jonsa. Chopi aboni ketasi ne bichíwali galá bichíyami níili mapurigá tamujeta galá bichíi, mapujiti a aboni ne bichíwali galá bichíyami níisagá, echalí aboni arigá tamujé tamí yuwa tibímili jipi yénasí, chopi aboni echirigá ku ariwesa ma ku simíbali, mapurigá ne galá riwirúami níima mapu jaré wikabé ketasi achigórigá bichíyami ju mapurigá tamujeta galá bichíi.
\p
\v 20 Chopi echi Walubela Jesucristo 'yemi mi 'yali echi Wabé Galabé Riosi Iwigala, alí si'néami 'yemi galá machíami ju.
\v 21 Ne bichíwali ju mapu 'yémitamo ma galá machí echi ne Bichíwali. Jipi nijeni 'yemi mi osé mapujítitamo echirigá galá machí echi ne Bichíwali.
\p
\v 22 ¿Chigá ju echi ne wabé 'yékami? Ne si'néami wabé 'yékami ju mapu ikí aniko mapu echi Jesusi riwéami Rijói mapu echo'ná Nasarétachi bitéami níili ketasi ju Jesucristo echi mapu bilepi ju Riosi Ranala. Alí si'néami echirigá aníami pagótami ne wabé sayera echi Walubela Jesucristo. Abóniko aní mapu Riosi ketasi Jesucristo Onolá ju, ayénachó aboni aní mapu Jesucristo ketasi bilepi ju Riosi Ranala.
\v 23 Ne si'néami echi jaré mapu ikí aniko mapu Jesucristo ketasi echi Bilepi Riosi Ranala ju, abóniko ketasi cho Riosi tanala niráa ju. Chopi si'néami echi jaré mapu ikí aniko mapu aboni galá bichíi echi Bilepi Riosi Ranala, abóniko ma Riosi tanala niráa ju.
\p
\v 24 Echijiti ne sulachí niráa waminabi galá bichíisi echi Galabé Riosi Ra'íchala, mapurigátamo nawésarami níili chabé chokichí jonsa, mapalí jonsa 'yémitamo galá bichíili. Alí átamo ne bichíwali galá bichíisagá, ne sulachí niráa, mapurigátamo nawésarami níili chabé chokichí jonsa, alí bichétamo sinibí napawíkami níibo echi bilepi Riosi Ranala yuwa, ayénachó echi Walubela Riosi Onorúami yuwa.
\v 25 Echi Walubela Jesucristo ne bichíwaga anili mapu tamujé tamí 'yama mapurigata ne sinibí niráa pirélabo.
\p
\v 26 Nijeni 'yemi mi je'ná jerigá oseli, echi auché jaré jiti rugá, si'néami mapu ikí 'yemi mi wabé 'yékaka binera.
\v 27 Alí 'yemi bichíyami ma níwa echi Wabé Galabé Riosi Iwigala echo'ná pachana 'yemi sulálachi, mapurigá Jesucristo ma 'yemi mi 'yali. Echijiti ketasi 'wérali ju mapu auché jaré 'yemi mi binérama, mapujiti echi Wabé Galabé Riosi Iwigala Binói 'yemi mi binera ne suwaba. Alí biché mapurigá echi Wabé Galabé Riosi Iwigala 'yemi mi binera ne bichíwali ju, alí tarapé 'yékami ju. Echirigá waminabi nokuíisi napawika niráa pirélasiya echi Walubela Jesucristo yuwa, mapurigá echi Wabé Galabé Riosi Iwigala 'yemi mi binera.
\p
\v 28 Jipi 'yemi keni kúchuwa sinibí echirigá napawíkami níisi Jesucristo yuwa, mapurigá waminánomí mapalí Binói ku nolínama, echalí tamujé ibili ketasi majabo, nibilé chota riwélabo, mapalita bacháami Binói yuwa jábabo.
\v 29 Alí mapujiti 'yémitamo ma galá machí mapu echi Walubela Jesucristo ne galá wachínaga oláami ju, galá níima máputamo ayénachó machiboa mapu ne si'néami echi jaré pagótami mapu ikí ne bichíwali galá wachínaga olako, ne si'néami ma Riosi kúchuwala ju.
\c 3
\s Echi jaré Riosi kúchuwala
\p
\v 1 Ne galá machisí mapu chuyena tamujé tamí ne wabé simírami galé Riosi Onorúami. Alí mapujiti Binói tamujé tamí echirigá galé, echijítita Binói kúchuwala niráa anérami ju, ayénachóta ne bichíwali Binói kúchuwala ju. Alí echi auché jaré ke bichíyami pagótami jena'í wichimóbachi piréami ketasi tamujé tamí machí, mapurigá Riosi kúchuwala niráa, mapujiti aboni ketasi cho machili Riosi Binói.
\v 2 'Yemi keni ritémawa wabé galérami, mata Riosi kúchuwala ju, chópita ketasi cho galá machíralati mapu chu yírita níibo waminánomí, chópita galá machí mapu echalí mapalí Jesucristo ku nolínama, tamujeta achigó yiri níibo mapurigá Binói ju, mapujítita riwiboa Jesucristo mapurigá Binói ju.
\v 3 Alí ne si'néami mapu ikí je'ná jerigá bichíiga buweko mapurigá echi Walubela Jesucristo echirigá ku'wírama, abóniko ketasi waminabi chati sitíi ologá piré, achigórigá mapurigá Jesucristo Binói ke siné chati sitíi olá.
\p
\v 4 Chopi ne si'néami echi jaré mapu ikí chati sitíi olako, abóniko ketasi nijewa Riosi nulalila, mapujiti mapalí echi pagótami chati sitíi olako, echalí aboni ketasi nijéwami ju Riosi nulalila.
\v 5 Echi Walubela Jesucristo nawali; jena'í wichimóbachi mapurigá Binói tamujé tamí ku 'yema tamujé chati sitíi olalila. Alí Jesucristo tarapé chati sitíi oláami ju.
\v 6 Echirigá biché ne si'néami echi jaré mapu ikí Jesucristo yuwa napawíkami ju, abóniko ketasi waminabi chati sitíi ologá piré; chopi si'néami echi auché jaré mapuyíripi chati sitíi ologá pireko, abóniko ke siné riwali, nirapé siné machili echi Walubela Jesucristo.
\v 7 Keni kúchuwa, ketasi ariwesi mapurigá auché jaré 'yemi mi 'yékama. Ne si'néami echi jaré pagótami mapu ikí galabé ologá pireko, abóniko chopi galabé oláami ju, achigórigá mapurigá Jesucristo galabé oláami ju.
\v 8 Alí echi jaré pagótami mapu ikí chati sitíi ologá pireko, abóniko chopi echi riablo níwala ju, mapujiti echi riablo sinibí we chati sitíi olá, ki'yá chokichí jonsa. Echijiti echi Walubela Riosi Ranala nawali jena'í wichimóbachi, mapurigá suwaba suwábama echi riablo olalila.
\p
\v 9 Alí ke wesi echi jaré Riosi kúchuwala waminabi chati sitíi ologá piré, mapujiti Riosi ma 'yali mapurigá aboni sinibí niráa piréami níima, alí aboni ketasi omérama waminabi chati sitíi ologá piréliya, mapujiti aboni ma Riosi tanala niráa ju.
\v 10 Ne galá machiwáwami ju mapu chigá ju echi jaré Riosi kúchuwala, ayénachó mapu chigá ju echi riablo kúchuwala, mapujiti si'néami mapu ikí ketasi galabé wachínaga olako, abóniko ketasi Riosi níwala ju. Ayénachó echi jaré mapu ikí ketasi galeko echi auché jaré aboni ritémawala, abóniko ketasi Riosi níwala ju.
\v 11 Mapujiti je'ná ju echi nawisálawami máputa námali ne chokichí jonsa: Máputa sinibí ne wabé galebo a'nagupi.
\s Galá galesi a'nagupi
\p
\v 12 Chopi ketasi galá níima máputa wabé chati sitíi olabo mapurigá echi Kaini riwéami rijói olali. Échiko echi riablo níwala níili, alí waminá mi'yali binói rijimala. ¿Churékula waminá mi'yali? Echi Kaini waminá mi'yali binói rijimala mapujiti echi binói Kaini olalila wabé chati níili, chopi binói rijimala olalila galabé níili.
\p
\v 13 'Yemi keni ritémawa, ketasi ne chati nílaga majasi, a echi auché jaré ke bichíyami pagótami 'yemi mi wabé kichísagá.
\v 14 Chabénala mapalita chati sitíi ologá piréali tamujeta mapurigá suwíami niráa níili, chopi jipi tamujé galá machí máputa bukulíwami niráa ku piré, mapujiti tamujeta ma galá galé echi auché jaré tamujé ritémawala, galá bichíyami. Echi jaré mapu ketasi galeko echi auché jaré aboni ritémawala abóniko abijí mapurigá suwíami niráa ju.
\v 15 Ne si'néami echi jaré mapu ikí kichiko auché jaré aboni ritémawala, abóniko we nakówami ju. Alí 'yémitamo galá machí mapu echi jaré mapu ikí nakówami juko, ke wesi sinibí piréami ju.
\v 16 Tamujeta galá machí mapu chu yena galá níima máputa ne wabé simírami galebo echi auché jaré pagótami; mapujítita ma galá machí mapurigá Jesucristo a Binói niráa nijali mapurigá waminá mi'lirúami níima tamujé chati sitíi olalila jiti, mapujiti Binói tamujé tamí ne wabé simírami galeli. Alí echirigá ayénachó wabé galá níima mapurigá tamujeta ne wabé simírami galebo echi auché jaré tamujé ritémawala, mapalí siné káachi arigá 'wérali níimilé máputa waminabi ku'wíruami níibo, ata echirigá ne wabé simírami galésagá.
\v 17 Alí a bilé rijói ne sébali níwasagá echi jaré namuti mapuyénasí binói galá omero kaníliga bitélasiya, chopi a binói riwisáagá auché bilé wabé risúwati rijimala mapu tarapé te mapu binói níilaga bitélama, alí a echi we níwami rijimala ketasi natimaga 'yásagá mapu ikí we newalé echi auché bilé, ¿churigá bichíwali níima mapu echi we níwami rijói galá galé Riosi, ne sulachí niráa?
\v 18 'Yemi keni kúchuwa, ketasi ne sébali ju máputa chopi ra'íchaga aniboa máputa wabé galé echi auché jaré pagótami. Chopi arigá 'wérali ju máputa ne bichíwali, ne sulachí niráa galebo aboni, ayénachó máputa wabé galigá ku'wírabo echi jaré aboni.
\s Echi jaré galá bichíyami ketasi majama Riosi
\p
\v 19 Alí ata echirigá olásagá, tamujeta galá machiboa mapu Riosi ne bichíwali ju, ayénachóta machiboa mapu tamujeta Binói kúchuwala ju. Echalita ketasi majabo Riosi mapalita arigá galá machí mapu Binói sinibí tamujé tamí ritiwá.
\v 20 Chopi a tamujé aboni we o'mónami níisagá, tamujé sulálachi niráa, mapujítita auché siné chati sitíi olali, echalí Riosi Binói abijí waminabi wabé simírami tamujé tamí wi'nijí, mapujiti Binói ne galá machí suwaba máputa chati sitíi olali, mapujiti Riosi machí ne suwaba namuti, chopi tamujeta ketasi machí ne suwaba namuti.
\v 21 Echirigá biché, 'yemi ritémtami ne wabé galérami, ketasi biyiri chati sitíi olásagá, mapurigata echijiti o'monáratami níibo, echalita ketasi majabo Riosi.
\v 22 Ayénachó Riosi tamujé tamí 'ya suwaba mapu ikita táni, mapujiti tamujeta echirigá ne galá nijewa Binói nulalila, ayénachóta olá mapurigá Binói nakí máputa olabo.
\v 23 Alí Riosi nulalila je'ná ju: Máputa galá bichíibo Jesucristo niráa, echi mapu bilepi Riosi Ranala ju; ayénachó máputa a'nagupi galebo mapurigá Jesucristo tamujé tamí nuleli.
\v 24 Alí si'néami mapu ikí galá nijewa Riosi nulalila, abóniko napawika piré Riosi yuwa, ayénachó Riosi pachana aboni yuwa bité. Alí tamujeta galá machí mapu Riosi pachana tamujé tamí yuwa bité, mapujiti Binói ma tamujé tamí 'yali echi Wabé Galabé Riosi Iwigala pachana tamujé sulálachi bitéranala.
\c 4
\s Echi Wabé Galabé Riosi Iwigala ayénachó echi wabé chati si'nú iwigá mapu ne wabé sayérami ju Jesucristo
\p
\v 1 'Yemi ritémtami ne wabé galérami, ketasi bichíisi ne si'néami echi jaré mapu ikí aniko mapu Riosi júuli aboni nawisánala, chopi ne galá machisí ibili aboni, acha aboni ne bichíwali níwa echi Wabé Galabé Riosi Iwigala, mapujiti ne buchuwíami jena'í wichimóbachi 'yena wikabé ne wabé 'yékami nawésami, jeanigá mapu Riosi Binói júuli aboni echirigá nawisánala.
\v 2 Alí je'ná jiti 'yémitamo galá omérabo machiyá echi jaré mapu ikí ma níwa echi Galabé Riosi Iwigala: Ne si'néami echi jaré mapu ikí galá bichíiga nawesa jeanigá mapu Jesucristo, echi Walubela Riosi Ranala, ne bichíwali nawali jena'í wichimóbachi mapurigá bilé rijói niráa, abóniko ayena níwa echi Wabé Galabé Riosi Iwigala.
\v 3 Alí si'néami pagótami mapu ikí ketasi aniko mapu Jesucristo ne bichíwali nawali jena'í wichimóbachi mapurigá bilé rijói niráa, abóniko ketasi níwa echi Wabé Galabé Riosi Iwigala, si'winárigá aboni chopi níwa echi we chati si'nú iwigá mapu wabé sayérami ju echi Walubela Jesucristo. Alí 'yémitamo ma galá námali mapu echi wabé sayérami iwigá nolínama riwéali jena'í wichimóbachi, chopi jipi échiko ma jena'í wichimóbachi iyena.
\p
\v 4 Keni kúchuwa, 'yémitamo ma Riosi níwala ju, alí bichétamo ma omérali echi auché jaré wabé 'yékami nawésami, mapujiti echi Wabé Galabé Riosi Iwigala mapu pachana 'yemi yuwa atí, échiko ne wabé simírami Walubela ju, ketasi mapurigá echi wabé chati si'nú iwigá mapu pachana echi auché jaré jena'í wichimóbachi piréami pagótami yuwa atí, si'néami mapu ikí ke galá bichíyami ju.
\v 5 Echi jaré 'yékaka nawésami chopi jena'í wichimóbachi piréami ju. Echijiti aboni we ra'ícha jena'í wichimóbachi nirúami namuti jiti rugá, alí echi auché jaré jena'í wichimóbachi piréami ke bichíyami pagótami ne wabé kaníliga kipunú.
\v 6 Chopi tamujé Riosi níwala juta. Alí ne si'néami pagótami mapu ikí galá machiko Riosi, abóniko galá kipunú mapalita nawesa Riosi Ra'íchala. Chopi echi auché jaré mapu ikí ketasi Riosi níwala juko, abóniko ketasi kipunú mapalita nawesa Riosi Ra'íchala. Alí je'ná jítita galá omérabo machiyá mapu chigá níwa echi Wabé Bichíwali Galabé Riosi Iwigala, ayénachó mapu chigá chopi níwa echi wabé 'yékami si'nú iwigá.
\s Riosi ne wabé galéami ju
\p
\v 7 'Yemi keni ritémawa, ne wabé galérami, galá níima máputa a'nagupi ne wabé galebo, mapujiti Riosi Binói tamujé tamí 'ya máputa ne wabé galéami níibo. Alí ne si'néami pagótami mapu ikí wabé galéami juko, aboni ma Riosi kúchuwala niráa ju, ayénachó aboni galá machí Riosi.
\v 8 Si'néami echi jaré mapu ikí ketasi galéami juko, aboni ketasi cho galá machili Riosi, mapujiti Riosi ne wabé galéami ju.
\v 9 Alí Riosi ma tamujé tamí machírali mapurigá Binói tamujé tamí ne wabé simírami galeli; mapujiti Riosi júuli echi Bilepi Binói Ranala jena'í wichimóbachi, mapurigata ne sinibí niráa pirélabo, ata galá bichíisagá mapu Binói mukuli tamujé chati sitíi olalila jiti.
\v 10 Echi galelíwami je'ná jerigá ju: Mapu Riosi Binói bachá niráa tamujé tamí ne wabé galeli, ayénachó mapu Binói júuli echi Bilepi Binói Ranala jena'í wichimóbachi mapurigá Échiko waminá mi'lirúami níima tamujé chati sitíi olalila jiti. Chopi tamujeta ketasi ne bachá niráa galeli Riosi.
\p
\v 11 'Yemi ritémtami, ne wabé galérami, ne bichíwali ju mapu Riosi echirigá tamujé tamí ne wabé galeli; echijiti galá níima mapu tamujeta ayénachó wabé galebo a'nagupi.
\v 12 Ke wesi nirapé siné riwali Riosi; chopi ata a'nagupi galésagá, echalí Riosi pachana tamujé tamí yuwa bité, ayénachóta ne sébali galé Riosi.
\v 13 Alí je'ná jiti tamujeta galá machí máputa napawika piré Riosi yuwa, ayénachó mapu Riosi pachana tamujé tamí yuwa bité: Mapujiti Riosi ma tamujé tamí 'yali echi wabé galabé Binói Iwigala.
\v 14 Alí tamujé aboni ma galá riwali, ayénachóta nawésaga ruyé echi auché jaré pagótami mapu Riosi Onorúami júuli echi bilepi Kepu Raná, mapurigá jena'í wichimóbachi piréami pagótami ku wikawárami níima mapurigá aboni chati sitíi olali.
\v 15 Alí mapuyíripi galá bichíiga aniko mapu Jesucristo echi bilepi Riosi Ranala ju, Riosi sinibí pachana aboni yuwa bité, alí aboni sinibí napawika Riosi yuwa piré.
\p
\v 16 Tamujeta ma galá machí mapu chuyena Riosi tamujé tamí galé, mapujiti chabé jonsa tamujeta galá machigá bichíili mapurigá Binói echirigá tamujé tamí ne wabé galé. Echi Walubela Riosi ne wabé galéami ju. Alí ne si'néami mapu ikí galá galigá pireko, abóniko napawika Riosi yuwa piré, ayénachó Riosi Binói pachana aboni yuwa bité.
\v 17 Je'ná jiti tamujeta ma ne sébali galá galé Riosi, mapurigata tarapé majáami níibo echalí ne jubá wi'nijíwachi rawé, mapujiti tamujé galá bichíyami jena'í wichimóbachi piréami wabé galéami ju, achigórigá mapurigá Jesucristo Binói ne wabé galéami ju.
\v 18 Alí echi jaré pagótami mapu ikí wabé galeko Riosi, abóniko tarapé majáami ju, mapujiti mapalí echi pagótami ne sébali wabé galé Riosi, echalí aboni ketasi waminabi majama, mapujiti aboni chopi bichíima mapu Riosi sinibí wabé galigá ku'wírama aboni. Alí echi jaré mapu ikí wabé majáami juko, abóniko chopi echirigá majawá, mayega mapu aboni kastigo 'yárami níima. Echijiti si'néami mapu ikí majáami juko, abóniko ketasi ne sébali galé Riosi.
\p
\v 19 Alí tamujeta we galá galé Riosi, mapujiti Binói bachá niráa tamujé tamí ne wabé galeli.
\v 20 Chopi a bilé jeanisáagá: Nijeni wabé galé Riosi, chopi echalí arigá wabé kichísagá auché bilé rijimala, galá bichíyami, échiko arigá ne wabé 'yékami ju. Mapujiti a bilé ketasi galésagá binói rijimala mapu binói galá ritiwá, échiko ketasi omero galéa echi Walubela Riosi mapu binói ke siné riwali.
\v 21 Alí Riosi ma tamujé tamí je'ná jerigá nuleli: Mapu ne si'néami mapu ikí galeko Riosi, ayénachó galema echi auché jaré ritémtami galá bichíyami.
\c 5
\s Ketasi chati sitíi olabo, ketasi mapurigá echi auché jaré jena'í wichimóbachi piréami we chati olá
\p
\v 1 Si'néami echi jaré mapu ikí bichíiko mapu echi Jesusi riwéami Rijói mapu echo'ná Nasarétachi bitéami níili bilepi ju echi Walubela Riosi Ranala abóniko ma Riosi kúchuwala ju. Alí biché mapuyíripi galeko Riosi Onorúami, échiko ayénachó we galé echi jaré mapu ikí Riosi kúchuwala ju.
\v 2 Alí mapalita wabé galé Riosi, ayénachó mapalita galabé olá mapurigá Riosi nulá, echalita galá machí máputa ayénachó wabé galé echi auché jaré mapu ikí ma Riosi kúchuwala ju.
\v 3 Mapujiti mapuyíripi pagótami galá galeko Riosi, abóniko ayénachó galá nijéwaga olá mapurigá Riosi nulá. Alí ketasi wabé nóchali ju echirigá nijéwaga oluwawa.
\v 4 Mapujiti si'néami echi jaré mapu ikí ma Riosi kúchuwala juko, abóniko galá nayura, mapujiti aboni ketasi achigórigá chati sitíi olá, ketasi mapurigá echi auché jaré jena'í wichimóbachi piréami olá. Alí bicheta chopi omero echirigá nayúria mapujítita galá bichíi Jesucristo niráa.
\v 5 Mapujiti echi jaré mapu ikí bichíiko mapu echi Jesusi riwéami Rijói mapu echo'ná Nasarétachi bitéami níili ne bichíwali echi bilepi Riosi Ranala ju, abóniko chopi galá omero echirigá nayúria, mapurigá aboni ketasi chati sitíi olama, ketasi mapurigá echi auché jaré jena'í wichimóbachi piréami chati sitíi olá.
\s Jesucristo bilepi ju Riosi Ranala
\p
\v 6 Mapalí Jesucristo iyénali jena'í wichimóbachi, echalí bichíwaga nawésarami níili mapu Jesucristo bilepi ju Riosi Ranala. Jesucristo nawali echi ba'wí jiti, mapalí ba'wí jiti pagótami níili; ayénachó Binói nawali echi la jiti, mapalí wabé léntaga mi'lirúami níili echo'ná kúrsichi. Echirigá Jesucristo bichíwali nawali echi ba'wí jiti, chopi ayénachó nawali echi la jiti. Alí echi Wabé Galabé Riosi Iwigala achigórigá bichíwaga nawesa Jesucristo jiti rugá. Alí echi Wabé Galabé Riosi Iwigala sinibí ne wabé bichíwali nawesa.
\v 7 Echirigá ju mapu echo'ná ripá riwigachi bikiyá nirú mapu ne bichíwaga nawesa jeanigá mapu Jesucristo ne bichíwali bilepi Riosi Ranala ju: Echi Onorúami echirigá aní, ayénachó echi Galabé Riosi Ra'íchala echirigá aní, ayénachó echi Wabé Galabé Riosi Iwigala achigórigá aní. Alí je'ná bikiyá arigá Bilepi niráa ju.
\v 8 Alí mapalí Jesucristo bitéali jena'í wichimóbachi, echalí baisá chokéami ne bichíwali nawésarami níili jeanigá mapu Binói bilepi ju Riosi Ranala: Echi Wabé Galabé Riosi Iwigala sinibí echirigá aní; alí Riosi Onorúami echirigá anili mapalí Jesucristo ba'wí jiti pagótami níili; ayénachó Riosi Onorúami auché siné echirigá anili mapalí Jesucristo chapirúami níili mapurigá Binói wabé léntaga mi'lirúami níima echo'ná kúrsichi. Echirigá baisá chokéami achigórigá ne bichíwali nawésarami níili jeanigá mapu Jesucristo bilepi ju Riosi Ranala.
\v 9 Alí tamujeta sinibí galá bichíi mapalí auché jaré pagótami bichíwaga aní mapu bilé namuti ne bichíwali ju, echijiti waminabi 'wérali ju máputa galá bichíibo echi mapu Riosi ne bichíwaga aní, mapujiti Riosi bichíwaga aní mapu Jesucristo bilepi ju Binói Ranala.
\v 10 Si'néami echi jaré mapu ikí bichíiko echi bilepi Riosi Ranala, abóniko galá machí, ne sulachí niráa, mapu Jesucristo ne bichíwali bilepi Riosi Ranala ju. Alí echi auché jaré mapu ikí ketasi bichíi Riosi, abóniko chopi wabé 'yékami niráa Riosi, mapujiti aboni ketásirapé bichíi mapurigá Riosi ne bichíwaga anili, Binói Ranala jiti rugá.
\v 11 Alí Riosi ma je'ná jerigá anigá nawésali echi bilepi Binói Ranala jiti rugá: Mapu Riosi ma nijali máputa ne sinibí niráa pirélabo, ayénachó mapu echi bilepi Riosi Ranala ju mapu tamujé tamí 'ya je'ná sinibí pirélawami.
\v 12 Ne si'néami mapu ikí ma galá bichíiga níwako echi bilepi Riosi Ranala echo'ná aboni sulálachi niráa, abóniko ayénachó ma níwa je'ná sinibí pirélawami. Chopi echi auché jaré mapu ikí ke níwako echi bilepi Riosi Ranala echo'ná aboni sulálachi niráa, abóniko ketasi níwa echi sinibí pirélawami.
\s Ne jubáami echi Juani galá ruyé echi jaré bichíyami
\p
\v 13 Nijeni 'yemi mi je'ná jerigá osé, 'yemi máputamo ma galá bichíi echi bilepi Riosi Ranala niráa, mapurigátamo ne bichíwali machiboa máputamo ma sinibí piréami ju.
\p
\v 14 Alí tamujeta echirigá ne galá bichíi Riosi, ayénachóta ne bichíwali mayé mapu ayénata tánsagá mapurigá Riosi olama bilé namuti, mapurigá Binói chopi nakí olánala, echalí Riosi galá kipukú mapurigata tániga ra'ícha.
\v 15 Alí echirigá mapurigata galá machí mapu Riosi galá kipukú mapalita tániga ra'ícha Binói yuwa, ayénachóta galá machí mapu mata 'yárami ju echi jaré namuti mapu ikita tánali.
\p
\v 16 Alí a bilé rijimala riwisáagá mapu auché bilé rijimala we olá echi chati sitíi oluwáwami, chopi binói ketasi olá echi wabé simírami chati sitíi oluwáwami mapu arigá ke sayiná, we yáa mukuwáami ju, echalí galá níima mapu echi bacháala rijimala tániga ra'ichása Riosi yuwa, mapurigá Riosi ku wikáwama echi auché bilé rijimala mapu chati sitíi olali. Chopi jaré arigá ne wabé simírami chati sitíi olá, alí aboni echijiti ke sayiná, we yáa suwimea. Nijeni ketasi aní mapu galá níima máputamo tánabo Riosi mapu echiyiri ku wikawárami níima.
\v 17 Ne suwaba echi pagótami chati sitíi olalila ne wabé chati sitíi oluwáwami ju, chopi jaré chati sitíi oluwáwami ketasi we yáa, ke sayiná mukuwáami ju.
\p
\v 18 Galata machí mapu si'néami echi jaré mapu ikí ma Riosi kúchuwala juko, ma ketasi chati sitíi ologá piré, mapujiti echi Walubela Riosi Ranala tibuta aboni, alí echi riablo ketasi omérama olayá mapurigá aboni arigá chati sitíi olama.
\p
\v 19 Galata machí mapu tamujeta Riosi níwala ju, chopi ne si'néami echi auché jaré jena'í wichimóbachi piréami mapu ikí ke bichíyami juko, abóniko arigá waminá omératami ju echi riablo jiti.
\p
\v 20 Alí bicheta ayénachó galá machí mapu echi Walubela Riosi Ranala ma nawali jena'í wichimóbachi. Alí Binói ma tamujé tamí 'yali mapurigata galá machiboa echi ne Bichíwali Walubela Riosi. Alí tamujeta napawika piré echi yuwa mapu ne Bichíwali ju. Echirigá aniwáami ju máputa napawika piré echi bilepi Riosi Ranala yuwa, echi mapu echi Walubela Jesucristo ju. Échiko echi ne Bichíwali Riosi ju, ayénachó Binói nijá mapurigá echi pagótami ne sinibí niráa pirélama.
\v 21 'Yemi keni kúchuwa, a aboni niráa ne galá tibútasi mapurigátamo ketasi bichíibo echi jaré amachíkalawami namuti mapu ketasi ne bichíwali Riosi ju. ¡Echirigá níima!