\id 2JN
\h 2 Juan
\mt2 Osá osirúami mapurigá
\mt SAN JUANI
\mt2 osali
\c 1
\s Juani osá echi ne Bichíwali jiti rugá, echi galelíwami jiti ayénachó
\p
\v 1 Nijé mápuni ma ochérami ju, 'yemi mi osé 'yemi napawika bichíyami máputamo Riosi jiti chapirúami níili, ayénachóni osé si'néami echi auché jaré mapu ikí ma bichíili 'yemi nawésawala, mapujiti aboni mapurigá 'yemi kúchuwala niráa ju, mapu nijeni ne bichíwali wabé galé mapujiti si'néamita ma galá bichíili echi ne Bichíwali. Alí ne si'néami echi auché jaré ritémtami mapu ikí ma galá machili echi ne Bichíwali ayénachó 'yemi mi ne wabé galé.
\v 2 Nijeni 'yemi mi ne wabé galé mapujiti a'nawita galá bichíili echi ne Bichíwali, ne sulachí niráa. Alí je'ná ne Bichíwali ne sinibí niráa tamujé tamí yuwa níima.
\v 3 Alí Riosi Onorúami, echi Walubela Jesucristo ayénachó, echi mapu bilepi ju Riosi Onorúami Ranala, sinibí 'yemi mi wabé ku'wírama, ayénachó 'yemi mi ne wabé natimaga 'yama máputamo galá kilíi ologá pirélabo, ayénachó máputamo galá bichíibo echi ne Bichíwali, ayénachó máputamo ne wabé galéami níibo.
\p
\v 4 Nijeni ne wabé kaníili mapujítini riwali mapu jaré 'yemi napawika bichíyami galabé ologá piré mapurigá Riosi Onorúami tamujé tamí nuleli, mapurigá osirúami ju echo'ná Riosi Ra'íchala oselíwalachi, echi mapu ne Bichíwali ju.
\v 5 Jipi, 'yemi ritémtami ne wabé galérami, nijeni 'yemi mi wabé táni mapu ne si'néami tamujé bichíyami a'nagupi ne wabé galebo. Alí je'ná jerigá mapu nijeni 'yemi mi nulegá osé, ketasi mapurigá auché bilé si'nú bukulíwami nulalíwami ju, mapujítita achigórigá nulérami níili chabé ne chokichí jonsa.
\v 6 Alí ayénata galésagá Riosi, echalita galá nijéwaga olabo mapurigá Binói tamujé tamí nuleli. Alí 'yémitamo ma námali chabé chokichí jonsa mapurigá Riosi tamujé tamí nuleli máputa a'nagupi ne wabé galebo.
\s Echi jaré wabé 'yékami pagótami
\p
\v 7 Jipi jena'í wichimóbachi 'yena wikabé wabé 'yékami pagótami mapu ketasi bichíiga nawesa mapu Jesucristo bilepi ju Riosi Ranala, ayénachó aboni ketasi bichíiga nawesa mapu echi bilepi Riosi Ranala arigá nawali jena'í wichimóbachi mapurigá bilé Rijói niráa. Si'néami echiyiri pagótami wabé 'yékami ju, ayénachó aboni ne wabé sayérami ju echi Walubela Jesucristo.
\v 8 Chopi 'yemi bichíyami a aboni niráa ne galá tibútasi mapurigátamo sinibí niráa waminabi galá bichíisabotamo, mapurigátamo echirigá ologá ne sébali ku natétarami níibo echalí ne jubá rawé, suwaba máputamo galá bichíiga olali, echi Walubela Jesucristo nóchala olayá.
\p
\v 9 Alí mapuyíripi bichíisamiko auché si'nú nawisálawami mapu ketasi achigó yiri ju mapurigá Jesucristo tamujé tamí binérali, abóniko ketasi níwa Riosi. Chopi si'néami echi jaré mapu ikí bichíisamiko mapurigá Jesucristo tamujé tamí binérali, abóniko ayena níwa echi Onorúami, ayénachó aboni níwa echi Walubela Riosi Ranala.
\v 10 Alí a bilé nawásagá echo'ná 'yemi pirélachi mapu ketasi achigórigá je'ná jerigá nawésami ju, ketasi nakiísi mapu binói 'yemi mi binérama, nibilé cho naripasi echiyiri.
\v 11 Mapujiti si'néami mapu ikí narépago echiyiri nawésami, abóniko echirigá ologá achigórigá chati sitíi oláami nílama, mapurigá echi 'yékaka nawésami niráa.
\s Juani nakili 'nénala echi jaré napawika bichíyami
\p
\v 12 Abijí nirú wikabé ra'íchali mapu nijeni omérama 'yemi mi ruyée, chópini ketasi nakí mápuni oselichi chopi osogá echirigá ruyema, mapujiti nijeni nakí mápuni echo'ná 'yémichi simea, mapurigani ne binói niráa 'yemi mi ra'íchama, mapurigá si'néamita a'nawí echirigá ne sébali kanílabo.
\p
\v 13 Jena'í piréami napawika bichíyami, mapu Riosi ayénachó chapili mapurigá Binói níwala niráa, si'néami 'yemi mi walú ripora. ¡Echirigá níima!