\id 3JN
\h 3 Juan
\mt2 Baisá osirúami mapurigá
\mt SAN JUANI
\mt2 osali
\c 1
\s Echi Juani galabé ané echi Kayo
\p
\v 1 Nijé mápuni ma ochérami ju, nimí je'ná jerigá osé, mujé Kayo riwéami, mápumi ne wabé galabé nijé amígowala ju, mapu nijeni ne bichíwali mi ne wabé galé.
\p
\v 2 Mujé ne wabé galérami rijimala, nijeni sinibí táni Riosi mapurigá Binói mi 'yama mapurigami sinibí ne suwaba jiti wabé galabé ologá bitélasama, ayénachó mapurigami sinibí waminabi kanílasama, achigórigá mapurigami sinibí waminabi galá bichíisimi Jesucristo niráa.
\v 3 Máani ne wabé kaníili mapujiti jaré ritémtami echo'ná jonsa simíbami ma tamí ruyeli mapurigá mujemi sinibí galá bichíi, mapujítimi sinibí ne galabé ologá bité, achigórigá mapurigami nawésarami níili echi ne Bichíwali Riosi Ra'íchala.
\v 4 Alí nijeni sinibí echirigá ne wabé simírami kanila mapalini nami mapurigá echi jaré nijé kúchuwala ne wabé galabé ologá pirélasimi, mapurigá aboni nawésarami níili echi ne Bichíwali Riosi Ra'íchala.
\p
\v 5 Mujé ne wabé galérami rijimala, mujemi wabé galabé olá ne suwaba mapu ikimi olá, echi auché jaré ritémtami ku'wíriya. Alí ne bachá niráa mujemi sinibí ne wabé ku'wira echi jaré ritémtami, auché jaréana okuá simíbami.
\v 6 Alí aboni ma galá nawésaga anili bacháami si'néami echi auché jaré napawika bichíyamichi yuwa, mapurigá mujemi echirigá ne wabé galigá olali. Galá níima mápumi echirigá ku'wírama echi auché jaré ritémtami, mikabé jonsa simíbami, mapurigá aboni wabé kaníliga ku simama echo'ná mapo'ná aboni nakí simánala, mapujiti Riosi Binói nakí mápumi echirigá ku'wírama.
\v 7 Mapujiti aboni chopi 'yénali Jesucristo nóchala olayá. Alí aboni ketasi biyiri nareli mapu echi auché jaré pagótami nakili 'yánala, si'néami mapu ikí ketasi cho bichíi Riosi.
\v 8 Echijiti arigá 'wérali ju mapu tamujeta ku'wírabo echi jaré nawésami, mapurigá aboni kaníliga 'yénama echi ne Bichíwali Riosi Ra'íchala nawésiya.
\s Echi Riótreje wabé sayérali echi Juani
\p
\v 9 Chabénala nijeni oseli echi jaré napawika bichíyami, chopi echi Riótreje riwéami rijói ketasi nakili tamí nijéwanala. Échiko chopi nakí mapurigá walula niráa nílanala echi auché jaré ritémtami yuwa.
\v 10 Je'ná jiti mapalini echo'ná simea, nijeni galá ruyema ne si'néami mapurigá echi Riótreje wabé 'yékaka, sitíragá ruyé auché jaré tamí sayéraga, ayénachó binói waminabi chati sitíi olá, mapujiti binói ketasi risensia 'ya mapu echo'ná binói bitélachi chi'libama echi auché jaré mikabé jonsa simíbami nawésami. Alí mapalí auché jaré ritémtami echo'ná piréami arigá nakí mapu echi jaré mikabé jonsa simíbami nawésami echo'ná aboni pirélachi chi'libama, echalí echi Riótreje ané mapu ketasi risensia ju, ayénachó ané mapu átamo arigá narésagá echi auché jaré mikabé jonsa simíbami nawésami echo'ná 'yemi pirélachi, echalí ma ketasi risensia níibotamo waminabi napawiya echi auché jaré napawika bichíyami yuwa.
\p
\v 11 Mujé wabé galérami rijimala, Kayo riwéami, ketasi olá mapurigá echi Riótreje chati sitíi olá, chopi sinibí galabé olá mapurigá echi auché jaré galabé oláami niráa, mapujiti echi jaré mapu ikí galabé olako, abóniko Riosi níwala ju, chopi echi auché jaré mapu we chati sitíi olako, abóniko ke siné cho bichíili Riosi.
\s Echi Rimétrio galabé oláami níili
\p
\v 12 Alí ne si'néami echi auché jaré ritémtami aní mapu echi Rimétrio wabé galabé oláami ju, ayénachó ne bichíwali ju mapu binói galabé olá. Nijeni ayénachó bichíwaga aní mapu échiko galabé oláami ju, alí biché 'yémitamo galá machí mapu nijeni sinibí ne bichíwaga aní.
\s Juani ripóraga osé echi Kayo
\p
\v 13 Nijeni níwa auché jaré wikabé ra'íchali, mapu nijeni nakí mi ruyénala, chopi ketásini nakí oselichi chopi osogá mi ruyénala,
\v 14 mapujiti nijeni mayé mapu ke 'me ayó nijeni mi 'nema. Echalita a'nagupi ra'ichábo.
\p
\v 15 Sinibí galá kilí ologá biteli. Echi jaré tamujé amígowala jena'í piréami walú ripóraga nawala. Perikó, ibili niráa galá ripora echi jaré nijé amígowala echo'ná piréami.