\id jud
\h Judas
\mt2 Osirúami mapurigá
\mt1 SAN JÚRASI
\mt2 osali
\c 1
\s San Júrasi osé echi jaré mapu ikí Riosi ma bayeli
\p
\v 1 Nijé, Júrasi, echi Jakobo rijimala juni, ayénachó nijeni Jesucristo piónawala niráa ju. Nijeni 'yemi mi osé je'ná oselí, ne si'néami 'yemi mapu ikí Riosi Onorúami ma bayegá galabérali mapurigátamo Riosi níwala níibo, ayénachótamo Riosi jiti tibútarami níili, mapujítitamo Jesucristo yuwa napabúrami níili.
\v 2 Nijeni nakí mapurigá Riosi 'yemi mi ne wabé simírami natimama, ayénachó mapurigá Binói 'yemi mi ne wabé simírami galema, ayénachó máputamo 'yárami níibo mapurigátamo wabé galá kilí ologá pirélabo.
\s Echi jaré 'yékaka binériami
\r (2 Pedro 2.1-17)
\p
\v 3 'Yemi keni ritémawa wabé galérami, nijeni ne wabé nakili 'yemi mi osénala bilé oselí, mapurigani 'yemi mi waminabi binérama mapu churigá Riosi ma 'yemi mi ku wikáwali, achigórigá mapurigá Binói tamí ku wikáwali. Chopi jipi arigá 'wérali ju mapurigani 'yemi mi osema ruwigá máputamo galá tibupo mapurigá je'ná ne bichíwali bichíilawami ketasi waminá 'yékaka nakulíwarami níima, mapujiti chabé ki'yá jonsa echi jaré Riosi níwala pagótami sinepi niráa 'yárami níili je'ná ne bichíwali bichíilawami mapurigá aboni sinibí niráa je'ná jerigá bichíima.
\v 4 Mapujiti bukulí jonsa jaré pagótami wabé 'yékaka chati sitíi oláami ma 'yemi mi yuwa napawí mapurigá bichíyami niráa, chopi aboni ketasi galá bichíyami ju. A'lí wabé chabé jonsa osirúami níili echo'ná Riosi Ra'íchala oselíwalachi mapurigá Riosi arigá walú kastigo 'yama echiyiri chati sitíi oláami pagótami. Echi jaré aboni ne wabé simírami chati sitíi oláami ju, chopi aboni ne wabé 'yékaka aní mapu galá risensia ju echirigá chati chuwé ologá pirélawa, mapalita ma sinepi bichíili Riosi Ra'íchala. A'lí aboni waminabi aní mapu ata echirigá chati chuwé olásagá, Riosi ketasi tamujé tamí kastigo 'yama. A'lí echirigá 'yékaka nawésaga aboni arigá machira mapu aboni ketasi galá bichíyami ju Riosi, ayénachó mapu aboni ketasi bichíi Jesucristo niráa. Chopi echi Walubela Riosi tamujé Walubélawala ju, ayénachó tamujé bichíyami Binói níwala ju, ayénachó Jesucristo tamujé Walubélawala ju.
\p
\v 5 'Yémitamo ma galá machí je'ná jeyiri, chopi nijeni nakí auchecho siné 'yemi mi ruyénala mapurigá chabé ki'yá mapalí echi Walubela Riosi ku'wíraga machí a'wali echi jaré Isaeli pagótami echo'ná Ejíptochi anilíwachi kawírali jonsa, a'lí pe wakinánala Binói arigá suwaba suwábali echi jaré aboni mapu ikí ketasi bichíiliko.
\v 6 Ayénachó Riosi sinibí niráa echo'ná wabé rokowárali jiero wiya jiti bulugá tibuta si'néami echi jaré Binói kapitánawala mapu ikí chabé ki'yánala wabé chati sitíi ologá waminá ariweli mapurigá Riosi wabé o'wéala niráa jáwali aboni.
\v 7 A'lí echo'ná Sorómachi anilíwachi walúlachi piréami pagótami, ayénachó echo'ná Gomórachi anilíwachi walúlachi piréami, ayénachó echo'ná auché jaréana mulubé o'wéalachi piréami pagótami, si'néami walubé kastigo 'yárami níili chabé ki'yá mapalí aboni suwaba ikósaga suwábarami níili echi sinibí rajáami na'í jiti mapujiti si'néami aboni achigórigá wabé simírami chati chuwé olali, ayénachó mapujiti aboni sinibí wabé nakili echirigá si'winárigá chati sitíi olánala, achigórigá mapurigá echi jaré pe okuá Riosi kapitánawala chati sitíi olali. Echalí echi chati sitíi oláami pagótami echirigá ne walubé kastigo 'yárami níili mapurigá jipi piréami pagótami ne wabé majajáratami níima, ayénachó mapurigá aboni ketasi achigórigá chati chuwé olama.
\p
\v 8 Chopi je'ná jaré jipi piréami chati sitíi oláami rijói arigá ketasi majawá. Aboni ketasi galá machigá, arigá wabé chati chuwé olá, aboni sapálachi niráa. A'lí aboni ketasi nijewa echi Walubela Jesucristo, nibilé cho majáami ju sayéraga ra'íchiya echi riablo níwala o'wéala, mapu wabé simírami omériami ju, ketasi mapurigá aboni.
\v 9 Chopi chabé ki'yánala mapalí echi walula Riosi kapitánawala Migueli riwéami sayéraga ra'íchali echi riablo, mapalí aboni a'nagupi irétaga ra'íchali mapu chigá 'nalí chapimea riwéali echi Moisesi ma mukúami, echalí echi walula Riosi kapitánawala Migueli riwéami ketasi chirigá wabé yóniga wi'nijili echi riablo. Chopi echi Migueli jeaneli: Galá níima mapurigá echi Walubela Jesucristo mi wabé yóniga wi'nijima.
\v 10 Chopi echi jaré jipi piréami chati sitíi oláami rijói ne wabé sitíila ané echi jaré namuti mapu aboni ketasi machí. A'lí aboni wabé chati chuwé olá mapurigá echi jaré jobátami namuti mapu tarapé 'nátami ju, chopi arigá wabé chati chuwé olá. Echijiti je'ná jaré chati sitíi oláami rijói walubé kastigo agá, waminá suwábarami níima.
\p
\v 11 ¡Báaji, echi jaré aboni ne wabé risúu nílama! Aboni chopi chati chuwé olali mapurigá echi Kaíni riwéami rijói olali. A'lí aboni waminá chakena simíbali mapujiti aboni wabé simírami koruli wenomí achigórigá mapurigá echi Balami riwéami rijói wabé koruli. A'lí aboni waminá suwábarami níima achigórigá mapurigá echi Koré riwéami rijói waminá suwábarami níili mapujiti binói wabé sayérali Riosi nulalila.
\v 12 Ne wabé riwéalawami ju mapu echi jaré chati sitíi oláami pagótami 'yemi mi yuwa napawí, mapalítamo napawika wabé kanílaga ko'wá ritémtami niráa, mapujiti aboni chopi wabé ko'wéami ju, ayénachó wabé kaníliga bajíami ju, chopi aboni tarapé o'wikéami ju echi Walubela Jesucristo niráa. A'lí aboni mapurigá bo'wá niséami ju mapu aboni chopi niráa tibútaga, waminá ariwé echi jaré bo'wá. A'lí aboni kanápuromí torúami ju mapurigá echi nolí, iká jiti torúami, mapu ketasi ukúami ju. Ayénachó aboni achigórigá ju mapurigá jaré masana tarapé rakéami niráa, mapu osá niráa mukúami ju, ma galá opórami niráa.
\v 13 Ayénachó aboni achigórigá chuwé oláami ju mapurigá echi walú ba'wí mapalí we aparúami niráa apulaka chiponó echo'ná suwé. Abóniko wabé chuwé, ne wabé simírami riwélawami olá mapurigá echi walú ba'wí we chuwé chipoka, wabé simírami ronena. Ayénachó aboni achigórigá 'wigáami ju mapurigá jaré sopolí mapu waminá rujuní. A'lí aboni ma waminá wi'nijírami ju; echijiti aboni sinibí niráa muchuwárami níima echo'ná ne wabé simírami rokowárali.
\p
\v 14 A'lí echi ki'yánala bitéami Enoka riwéami rijói ayénachó nawésali echi jaré chati sitíi oláami pagótami jiti rugá, mapalí Riosi 'natárali mapu churigá nawisama. A'lí ki'yá chokichí mapalí echi bachá wilíami rijói Arani riwéami bitéali, pe wakinánala bitéali echi Enoka, mapujiti echalí mapalí echi Arani bitéali, echalí jonsa usani 'wéntami simáraga, a'lí ranálati echi Enoka. A'lí echi Enoka nawésali echi jaré chati sitíi oláami pagótami jiti rugá mapalí jeanili: Nijeni riwíralati mapu churigá echi Walubela ku nolínama jena'í wichimóbachi, ne wabé simírami wikabé echi jaré Binói níwala pagótami yuwa,
\v 15 mapurigá Binói justicia olama ne si'néami echi chati sitíi oláami pagótami. Echalí Binói ne wabé walubé kastigo 'yama si'néami echi jaré chati sitíi oláami pagótami, mapujiti aboni ne sébali chati sitíi olali mapalí aboni chati sitíi ologá piréali. Ayénachó Binói walubé kastigo 'yama echi jaré chati sitíi oláami pagótami mapujiti aboni wisabé wabé kichiga ra'íchali Binói sayéraga.
\v 16 Echi jaré chati sitíi oláami pagótami wabé na'áwami ju, a'lí aboni tarapé siné galá kaníla. A'lí aboni ne sinibí olá mapurigá aboni chopi nakí olánala. Ayénachó aboni chopi galabé su'wé anigá ra'ícha echi auché jaré pagótami mapalí aboni echirigá 'yékaka niráa nakí 'yénala aboni níwala namuti.
\s San Júrasi galá ruyé echi jaré galá bichíyami
\p
\v 17 Chopi ne galá ku 'natasi 'yemi ritémtami ne wabé galérami, mapurigá echi jaré ritémtami chabé jonsa 'yemi mi nawésali, si'néami mapu ikí Jesucristo jiti julárami níili nawisánala.
\v 18 Mapujiti aboni 'yemi mi nawésali jeanigá: Echalí ne jubá rawé jena'í wichimóbachi nirúlama jaré chati sitíi oláami pagótami mapu ne wabé sitíila anema echi Galabé Riosi Ra'íchala, ayénachó aboni wabé chati chuwé ologá pirélama mapurigá aboni chopi nakimea chati sitíi olánala.
\v 19 A'lí je'ná jaré chati sitíi oláami pagótami ju mapu 'yemi mi wikanáami rojuana. A'lí aboni ketasi níwa echi Wabé Galabé Riosi Iwigala. Aboni chopi ologá piré mapurigá jena'í wichimóbachi piréami ke bichíyami pagótami olá.
\p
\v 20 Chopi 'yemi ritémtami wabé galérami, waminabi galá bichíisi echi Galabé Bichíilawami. Sinibí Riosi yuwa ra'ichási, mapurigá echi Wabé Galabé Riosi Iwigala 'yemi mi jiwérata.
\v 21 Sinibí galá bichíisi mapurigá Riosi echijiti galá omérama 'yemi mi waminabi galée. Galá bichíiga buwesi echalí rawé yénasí mapalí tamujé Walubélawala Jesucristo wabé natimaga tamujé tamí 'yama mapurigata sinibí piréami níibota.
\p
\v 22 Galá bichíiratasi echi auché jaré mapu ketasi cho galá bichíi.
\v 23 Galá bichíiratasi auché jaré mapurigá aboni ketasi kastigo 'yárami níima, sinibí niráa, echo'ná ri'lé riáblochi walubé rajáachi. Sinibí ne galá natimasi echi auché jaré ke bichíyami pagótami, chopi galá tibutasi 'yemi aboni niráa, mapurigátamo ketasi achigórigá chati sitíi olabo. Sinibí ne wabé chijúnasi suwaba aboni chati sitíi olalila, achigórigá mapurigátamo chijuna bilé napachala ne wabé choliwéami.
\s Ne jubáami niráa, echi Júrasi ne wabé walubéraga ané Riosi
\p
\v 24-25 Echi bilepi suwaba omériami Riosi tamujé tamí Ku'wíimi ju. Échiko ne wabé omériami ju 'yemi mi tibútiya, mapurigátamo ketasi chati sitíi olabo. A'lí echi Walubela Riosi 'yemi mi bayérama Binói yuwa mapo'ná suwaba namuti ne galabé ba'yóami níima. A'lí bichétamo tarapé wi'nijírami níibo, chópitamo ne wabé simírami kanílabo. Galá níima mapu echi Walubela Riosi chopi waminabi walubéraga anérami níima, ayénachó mapu Binói chopi ne wabé Walubela níima, ayénachó mapu Binói Riosi chopi ne sinibí niráa wabé jiwériga nulema si'néami echi jaré pagótami, echi Walubela Jesucristo jiti, mapurigá Riosi sinibí ne Walubela níili, ayénachó mapurigá ne Walubela ju jipi rawé, ayénachó mapurigá ne Walubela níima sinibí niráa, ne sinibí. ¡Echirigá níima!