\id GAL - Upper Tanana Athabascan Indian (Tetlin dialect) NT [tau] - USA 2013 (web 2014)
\h Galatians
\toc1 Paul Dinahtł’aa Galatia Nan’ K’et Koht’iin Netł’adn
\toc2 Galatians
\toc3 Gal
\mt1 Paul Dinahtł’aa \it Galatia\it* Nan’ K’et Koht’iin Netł’adn
\c 1
\p
\v 1 Shin ch’ah \it Paul \it* dąą’ jindhihtł’at. \it Jesus Christ \it* eh T’odįht’ay, Neeta’, \it Jesus \it* įįłaagn iin tah ts’anh needihtiin, Ay iin ch’ah ch’itah haashihįhtįį tł’aan Ay iin Daaneegn’ eh nan’ k’et koht’iin iin xaah shihteh’a’. Shyąą’ dineh k’ach’itah haashihteel tł’aan T’oodįht’ay Aaneegn’ eh k’ashtih’aal. T’oodįht’ay ay ch’ale’ shteh’a’.
\v 2 \it Christian \it* koht’iin ts’ehłah hihdeltth’ii iin, lahtthagn’ \it Galatia \it* nan’ k’et nił ch’idanh huudlay \it Christian \it* koht’iin łehchinh heedel iin huuts’ą’ niidajihniidlah.
\p
\v 3 Tthihąą’ T’oodįht’ay, Neeta’, eh \it Jesus Christ\it*, Neek’ach’ihohłe’, hǫǫtł’at nühts’itaanak tł’aan nühdzee’ shiit hǫǫsuu’ ts’ą’ nühtł’aach’ohtaa’aał.
\p
\v 4 \it Christ \it* huuts’ant’ay’ ch’a’ huu’okshii xaah neexaah huutł’aa’idaltįį. Hǫǫ’ det-shyaak, ts’ahǫǫt’eh ts’ą’ k’aaduu’ neetagn’ hǫǫłiin neets’ą’ utee’ąą ts’ą’ haagüh kol ts’ą’ ts’uudaa’ xaah. Hǫǫ’ ch’ah T’oodįht’ay, Neeta’, duudįį’ yuunįh.
\v 5 Dinee iin T’oodįht’ay aanah doodįhsoon duunoo’ hǫhchaah ts’ą’ utthiiłatdahdał. Hǫǫ’ huułe’.
\p
\v 6 Nühxon hu’ nts’ąą’ hut-shyaagn eh dii xaah inihthanh. T’oodįht’ay hǫǫtł’at nühts’iniiniign eh, “Aan!” Nüh’ehnąy, uts’ą’ nahdeeł ch’idą’. T’oot’ey k’aaduu’ hantee’ t’ey Uch’a’ ts’uudeeł nahthanh. Maaneegn’ suu’ ch’a’ ts’uudeel nahthanh tł’aan ch’ishyon iin aanegn’ k’eh ts’uudeeł nahthanh.
\v 7 Ay iin, “Nee’aaneegn’ hǫǫsǫǫ,” henįh t’oot’ey łąy eh ch’ishuuy heneek suu’ k’adiit’ay. \it Christ \it* Aaneegn’ suu’, ay ch’ah shįį’ heneek suu’ nt’eh. T’oot’ey ch’ishyon iin huu’įįnįį’ nił tatdalnąy nühhuunįh ts’ą’, ch’its’ąą’ niign nühhenįh tł’aan \it Christ \it* Aaneegn’ suu’ ch’its’ąą’ ts’uhtsay hiiniithanh.
\v 8 Heneek suu’ eh ch’idą’ hannühts’uunehtan, ay ch’ah łąą’ niign nt’eh. Neexon du’ ay ch’ah k’eh ch’its’ąą’ hats’uunehtan de’, tł’aan heneek nadadełeegn dagn nan’ k’et ts’anh ay ch’ah k’eh ch’its’ąą’ hahuu’uunehtan de’, doot’ey hǫǫ’ ch’ah taadiil, tthihąą’ T’oodįht’ay botnalshaa.
\v 9 Hǫǫ’ nühdihnąy t’oot’ey k’aaduu’ tay’ t’ey dąą’ nühdihnįh, “Doot’ey heneek shaaneegn’ nts’ann’ nłiin k’eh ch’its’ąą’ hach’uunehtan de’, ay ch’ale’ botnalshaa.”
\p
\v 10 Hǫǫ’ nühdihnąy eh, shyąą’ dinee iin, “Ay dineh łąą’ dįįnįh,” hitnaathiil xaah hǫǫ’ nühdihnąy inahthánh? Ena! T’oodįht’ay ayt’oo shuunąy de’, hǫǫ’ ch’ah heenihthanh. Shyąą’ dinee iin łąą’ dįįnąy shihutdaaniił inahthan de’, doo \it Christ \it* łąą’k’ahohthadn k’a’ihłay.
\p
\v 11 Sh\it Christian Koht\it*’\it iin \it* iin, dąą’ ch’ah łąy eh heetatnayh inihthanh: heneek suu’ eh hanüh’uunaktan T’oodįht’ay ts’anh bidoodiiłįį.
\v 12 Ay ch’ah T’oodįht’ay nühxaah shtł’aadadįįdlah. Shyąą’ dine’ k’anühxaah shtł’aadadįįłeel tł’aan shyąą’ dine’ uudogndii xaah k’at’ey yeh hashuunehtiil. \it Jesus Christ \it* ts’anh shįį’ heneek shtł’aadiidlah tł’aan Uxaa’ shįį’ k’eniich’akthat.
\p
\v 13 Neexon hu’ \it Jew \it* koht’iin ts’iiłiin nts’ąą’ oots’ee’ niign ts’įįdąy, ch’idą’ hǫǫ’ ch’ah dihdįį’. Nts’ąą’ niign ch’idą’ dihdiin, ch’idą’ hǫǫ’ nühdihnįį’. Dąą’ ch’ah dihdįį’: doo iin \it Jesus \it* łąy eh uunąy iin huu’eh datch’ihdakkay eh, ay iin nił ch’iduugn niłtaaheedeeł. Tł’aan \it Christian \it* oots’ee’ niign tthidoodaktthiidn kaana’aknay’.
\v 14 Nts’ąą’ \it Jew \it* oots’ee’ niign ts’įįdąy iin, neexon tah ts’anh shin hu’ shk’eh bihahthal iin ch’ahnoo’ dihdįį’. Neexon du’, \it Jew \it* ts’įįłiin iin du’, neetthay iin nts’ąą’ niign hetdąy, hǫǫ’ k’eetaat huuch’ahnoo’ dihdįį’.
\p
\v 15 T’oot’ey shihǫǫłįį dą’ T’oodįht’ay ch’ita haashįhtįį’. Ay tł’aan, “Aan, Shaa innah,” hǫǫ’ shdįįnįį’. Hǫǫ’ det-shyaak, hǫǫtł’at sts’iniiniign xaa’.
\v 16 Łąą’ ishiit nuuniithat dą’, T’oodįht’ay Shye’e \it Paul \it* ich’inak-iił diitthii’ eh naniich’ithat. Hǫǫ’ det-shyaak, dinee iin \it Jew \it* k’ahiiłay heneek suu’ Ushye’e aanah eh hahuu’utnaktanh xaah. Ishiit nuuniithat dą’, doot’ey ts’ą’ k’atihhaal, heneek eh sts’idaanagn xaah.
\v 17 Tł’aan doo iin T’oodįht’ay Daaneegn’ eh shttheh huuteh’a’ iin \it Jerusalem \it* key hihdeltth’ii iin ts’ą’ k’atihhaal. T’oot’ey ch’ittheh \it Arabia \it* nan’ k’et nihshyah. Ay tł’aan \it Damascus \it* key nanishshyah.
\v 18 Taagn xay noodeethat \it Jerusalem \it* key nihshyah, \it Peter \it* eh nats’iholnagn xaah. Ishiit nuuniithat dą’ ts’ehłagn deetaan dan uk’edn k’eh beh ihdaa’.
\v 19 Ishiit nuuniithat dą’ doo T’oodįht’ay Daaneegn’ eh huuteh’a’ iin tah ts’anh ts’ehłagn shįį’ nak-‘įį’. Ay ch’ah \it James\it*, Neek’ach’ihohłe’ uchiil, nak-‘įį’.
\p
\v 20 K’aaduu’ łąy eh nühts’ą’ jinihtł’at. T’oodįht’ay naał nühts’ą’ k’a’agnshyagn.
\p
\v 21 \it Jerusalem \it* nihshay eh, \it Syria \it* nan’ k’et eh \it Cilicia \it* nan’ k’et nił ch’idanh key nihshyah.
\v 22 Hǫǫ’ hutshyaagn eh, \it Christian \it* koht’iin \it Judea \it* nan’ k’et hihdeltth’ii iin, doo nt’eh ts’ą’ t’ey shits’ihetniik.
\v 23 Nts’ąą’ ch’ishyon iin shaanah huuhǫǫhee shįį’ heehetnayh. “Doo dine’ ch’idą’ nee’eh datch’idehkay, mįįnįį’ hǫǫsuu’ nitnii’ąą. \it Christian \it* oots’ee’ niign tthidoodaktthiidn kaana’ehnay’ ch’idą’. T’oot’ey k’aaduu’ \it Christian \it* oots’ee’ niign xaah hach’uunehtanh,” ch’ishyon henįh.
\v 24 Hǫǫ’ sheh hut-shyaagn eh, “T’oodįht’ay, tsen-‘įį,” hiiyehnįh.
\c 2
\p
\v 1 Ts’ehłagn deetaan dan uk’edn noodeethadn tł’aan eh, \it Jerusalem \it* key dineh \it Barnabas \it* mǫǫsii’ eh natidhishshyah. Dineh \it Titus \it* mǫǫsįį’ deh tidhagntįį.
\v 2 Ishiit nuuniithat dą’ nts’ąą’ T’oodįht’ay hee’ushnay shehtsiin k’eetaat, \it Jerusalem \it* ts’ą’ nihshyah. Ishiit dą’ \it Jew \it* ch’inłiin iin shįį’ sheh łehchinh heedeeł. \it Jew \it* k’a’iiłay iin T’oodįht’ay Aaneegn’ suu’ eh hahuu’uunaktan dąą’ ch’ah thadzelxoh. Hǫǫ’ ch’ah dihdįį’, nts’ąą’ niign T’oodįht’ay xaah ch’idą’ ishna’ tł’aannts’ąą’niign k’aaduu’ Baa ishnaa, łahtthagn’ k’ashyąą’ uułe’ nihthan xaah.
\v 3 Titus, sheh natetdaagn, \it Jew \it* k’aa’iiłay; t’oot’ey ay \it Jew \it* ch’inłiin iin, “Nthüh haa’ult’üüdn,” k’ahiidįįdiil \it Moses \it* huhtsiin niign k’eetaat.
\v 4 Ch’ehlaadn’ iin \it Christian \it* dach’inel’ąy iin neetah daaniideel iin, \it Moses \it* huhtsiin niign k’eetaat \it Titus \it* hiithüh haataat’üüt, hǫǫ’ hiiyuułee henįh. Ay iin, nach’ihnel’iign hįįłįį ts’ą’, nach’oonii’ay dahniideeł, nts’ąą’ honay huudzuutth’agn xaah. Neexon hu’ \it Christ Jesus \it* eh ts’ehłagn ts’įįłįį ts’ą’, \it Moses \it* Huhtsįį Niign k’etatsal’iił thiineeniidlah. Ay xaah \it Moses \it* Huhtsiin Niign k’eetat k’atsal’iil.
\v 5 Nts’ąą’ hǫǫ’ huudįį’ neehuunąy k’eetaat k’ats’įįdiil, T’oodįht’ay Aaneegn’ suu’ łąy eh duunoo’ uułe’ xaah. Hǫǫ’ ch’ah dzįįdįį’, hanühts’uunuhtan ts’iiniithan xaah.
\v 6 T’oot’ey ch’inłiin choh iin sheh łehchinh heedeel iin, nts’ąą’ niign eh hach’uunaktan shk’eniich’ehnihdeek. Ay iin tah ts’anh, “Ch’its’ąą’ niign eh hach’uunaktan dįįdąy,” k’ashihenąy. (Ay iin ch’inłiin choh hįįłįį ts’ ą’ łąą’ k’ashaahiiłay, hoohǫhchaah ts’ą’ dinee iin nił k’eh het-t’eh koht’iin hįįłiin, T’oodįht’ay huu’uunąy xaah.) Ay iin shaaneegn’ hach’uunaktan k’et k’ahenay.
\v 7 “Chits’ąą’ dǫǫdįį’,” k’ashihenąy. \it Jew \it* k’a’iiłay iin ts’ą’ T’oodįht’ay Aaneegn’ suu’ eh hahuu’uunaktan t’ey, ay ch’ale’ T’oodįht’ay shtl’aahǫǫdlah, uk’anokta’ xaah. Ch’inłiin iin shaa hik’eniich’inihdeek. Jan chih: \it Jew \it* koht’iin iin ts’ą’ \it Peter \it* T’oodįht’ay Aanegn’ suu’ eh hahuu’uunehtan, hǫǫ’ ch’ah T’oodįht’ay yįįtł’aahǫǫdlah, ay k’anuhta’ xaah. Ch’inłiin iin hiixaah hik’eniich’inihdeek.
\v 8 T’oodįht’ay Diit’ay’ eh Daaneegn’ eh \it Jew \it* k’aiiłay iin ts’ą’ shteh’a’. Jan chih: Diit’ay’ eh Daaneegn’ eh \it Jew \it* koht’iin ts’ą’ \it Peter \it* chih teh’a’.
\v 9 Ay ch’inłiin iin łehchinh heedeel iin tah ts’anh, \it James \it* eh \it Peter \it* eh \it John \it* eh huunaatthii’ hįįłįį. T’oodįht’ay Shaa utna’ shuunąy shaa hik’eniich’inihdeek. Ay eh ay taagn dineh iin sheh \it Barnabas \it* eh neełaa’ nahuuniik. Łahtthagn’ niłtłąą tsįįłiin, dąą’ ch’ah nił k’eh t’ey naanints’etdee: “Doo iin \it Jew \it* k’a’iiłay iin ts’ą’ T’oodįht’ay Aaneegn’ suu’ eh ahdał tł’aan \it Jew \it* koht’iin iin ts’ą’ Maaneegn’ suu’ eh tsaadał.
\v 10 Dąą’ ts’ehłagn niign shįį’ neexaah tahdiił. Neets’ą’ na’ahnįį’, nühxon hu’ eh nühkoht’iin iin ch’ah neetah nasaadiht’ay iin k’ats’inuhta’ xaah,” neehenįh. Nasaadiht’ay iin k’anakta’ du’, łąą’ hǫǫ’ duhdįį’ nihthanh.
\p
\v 11 Haa’ uuteethat \it Peter Antioch \it* key ts’ą’ teeshay eh, baa ninihshyah tł’aan ch’its’ąą’ det-shyaagn niign unak-‘įį’. “Ch’its’ąą’ niign dinshyaak,” udihnay, ch’its’ąą’ det-shyaagn xaah.
\v 12 \it Peter Christian \it* koht’iin \it Jew \it* k’a’iiłay iin eh nił k’eenoo’ nach’e’aał. T’oot’ey ishiit nuuniithat, ndeeh \it Peter \it* noo’ uudih k’ahuu’eh nach’ih’aal huule’ k’aaduu’ yaanah naniich’ethat danh. K’aaduu’ yaanah naniich’ethat, \it Jew \it* iin \it Jerusalem \it* ts’anh \it James \it* huuteh’a’ iin dahniideel eh. Ay tł’aan jah ts’anh noo’ k’ahuu’eh nach’ih’aal diitthii’ eh naniich’ethat. Hǫǫ’ ch’ah det-shyaak, \it Christian \it* k’oht’iin tah ts’anh \it Moses \it* huhtsiin niign k’etatsal’iił hiiniithhanh iin xaah niljiidn xaah. Ay iin \it Jew \it* k’a’iiłay iin huutaat’üüt hiiniithanh ts’ą’, k’ahuułay niign k’ashihdaaniil tey.
\v 13 Ishiit ch’ehłaadn \it Christian \it* koht’iin \it Jew \it* hįįłiin, \it Peter \it* k’eh t’ey ch’its’ąą’ niign k’aaduu’ naniich’ihetdee. Ay eh \it Barnabas \it* chih \it Peter \it* k’eh t’ey ch’its’ąą’ niign k’aaduu’ naniich’ethat.
\v 14 Ay łahtthagn’ iin T’oodįht’ay Aaneegn’ suu’ łąą’ nłiin k’eh tth’udee’ah niign k’ahiidiil ts’ą’, ndeeh nts’ąą’ hetdąy huuk’eh niich’inakthat danh, huuhįhdląą ts’ą’ naał peter dąą’ nįh, “\it Jew \it* koht’iin įįłįį t’oot’ey doo \it Jew \it* k’a’iiłay k’eh t’ey dinshyaak. Hǫǫ’ dinshyaagn eh, dii xaah doo \it Jew \it* k’a’iiłay iin \it Jew \it* koht’iin k’eetaat hihduudįį’ huu’uudįįnįh?”
\p
\v 15 \it Jew \it* koht’iin nee’ihǫǫłįį tł’aan ts’antay koht’iin \it Jew \it* k’a’iiłay iin tah ts’anh k’ats’iiłay.
\v 16 T’oot’ey \it Moses \it* Huhtsiin Niign k’eetaat det-shyaagn xaa’, T’oodįhtay dineh Diits’ą’ tth’idee’ay k’ayihtsiin. \it Christ Jesus \it* łąy eh uunay xaa’ shįį’, T’oodįht’ay dineh Diits’ą’ tth’idee’ay yihtsįį’. Hǫǫ’ ch’ah heets’etnayh. Neexon hu’ \it Christ Jesus \it* łąy eh ts’uunąy. Ay eh hǫǫ’ k’eexaan T’oodįht’ay neexon Diits’ą’ tthidee’ay exąą. Ay xaah jan ch’ah: \it Moses \it* Huhtsiin Niign xaa’, T’oodįht’ay bookol dine’ Diits’ą’ tthidee’ay yihtsįį’.
\v 17 Ay eh, T’oodįht’ay \it Christ \it* xaa’ Diits’ą’ tth’idee’ay nee’uhtee ts’iiniithan koht’iin tsįįłiin eh, ch’ehłaadn iin T’oodįht’ay k’įą’ hel’ąy koht’iin neehuunįh. Ch’its’ąą’ niign neehuunįh. Hǫǫ’ huunąy eh, \it Christ \it* T’oodįht’ay k’įą’ el’ąy xaah etnaa ihuunįh. Ch’idą’ danh ts’anh noo’ haathał danh k’ahǫǫ’ diidiil!”
\v 18 Shin du’, dii ch’idą’ tthidoodoktthiidn kaana’aknay’, ay ch’ah k’aduu’ uts’ą’ na’uhnį’ kaana’aknay’. Hǫǫ’ ch’ah dishshyaagn eh, doo \it Moses \it* huhtsiin niign ch’a’ łtaa’inshay k’eh dhagntsįį.
\v 19 \it Moses \it* Huhtsiin Niign T’oodįht’ay ts’ą’ tth’idee’ay k’ashihtsiil hee’ishnay eh, \it Moses \it* Huhtsiin Niign aanah t’axoh uts’ą’ k’ayuutak-‘iil. Dineh ehtiin k’eh t’ey \it Moses \it* Huhtsiin Niign ts’ą’ diht’eh, nts’ąą’ niign T’oodįht’ay duudiin shuunąy k’eetaat tagn’iił xaah.
\v 20 Ndeeh \it Christ \it* jiliis k’et ch’idą’ hetthihitnihttheedn tł’aan ehtiin danh, Beh dhaktiin k’eh hǫǫt’eh. Nts’ąą’ niign k’aaduu’ huhnay, k’ahǫǫ’ k’oothagnthadn. \it Christ \it* ay ch’ale’ shaa k’aaholthat, huhnay eh. Jah nan’ k’et huhnay eh, T’oodįht’ay Ushye’e łąy eh uudihnąy xaa’ hǫǫ’ k’eetaat agn’įh. Ay ch’ale’ shaantsįį’ tł’aan shaa ehtįį.
\v 21 Nts’ąą’ dishshyaagn eh, T’oodįht’ay hǫǫtł’at neets’iniiniign t’ey an’ hahk’üh k’anii’ihłeel. T’oodįht’ay dinee iin \it Moses \it* Huhtsiin Niign xaa’ Diits’ą’ tthidee’ay huutahtsay de’t’ey, \it Christ \it* shyąą’ t’ey eht’iin k’eh hǫǫt’eh. T’oot’ey hǫǫ’ niign T’oodįht’ay k’adįįdiil.
\c 3
\p
\v 1 \it Galatia \it* nan’ k’et koht’iin hu’ nühtthii’ kol k’eh t’ey dahdį’. Nts’ąą’ \it Jesus Christ \it* jiliis k’et ch’dą’ hetthihitnihttheet tł’aan ehtįį hǫǫ’ nühdihnay aanah hǫǫsuu’ ch’idą’ k’eniich’inahdeek. Doo nadanühnaa’aa, t’axoh łąą’ niign k’eetaat k’adahdiin xaah?
\v 2-3 Dąą’ nühts’anh hee’ushnay inihthanh: “\it Moses \it* Huhtsiin Niign k’eetaat dahdąy eh, T’oodįht’ay Otdeegn’uu’ahndíí? Łąą’ eh ena’! T’oodįht’ay Aaneegn’ suu’ łąy eh uudahnąy eh, T’oodįht’ay T’oot’ey k’aaduu’ nühxon xaa’ nüht’ay’ xaa’ shįį dzaadał nahthanh, ay shįį’ t’axoh inahthan eh. Hǫǫ’ inahthan eh, łąą’ ts’oonahniign.
\v 4 Ch’idą’ ts’anh shiinuuniithat k’aaduu’ hǫǫ’ hǫhdląą ts’ą’ nüh’eh hut-shyaagn, hǫǫ’ ch’ah shyąą’ t’ey hut-shyáák? Łąą’ eh ena’!
\v 5 T’oodįht’ay Dotdeegn’ nühtł’aa’įį’ąą tł’aan ay ch’ah nühtah nahohdaa huhtsįį, Maaneegn’ suu’ łąy eh uudahnąy xaah. \it Moses \it* Huhtsiin Niign k’eetaat dahdąy, k’ahǫǫ’ k’eexaan hǫǫ’ ch’ah T’oodįht’ay nühxaah diidįį’.
\p
\v 6 T’oodįht’ay Aaneegn’ utnettł’adn \it Abraham \it* aanah honay k’eetaat hǫǫt’eh. Dąą’ nįh, “T’oodįht’ay łąy eh uunąy eh, T’oodįht’ay doo diits’ą’ tth’idee’ay ehtsiin nłiin uunii.
\v 7 Ay eh, T’oodįht’ay łąy eh huunąy koht’iin, \it Abraham \it* huutah ts’anh ch’ittheh nłįį. K’eniich’inahthiit ch’ah.
\v 8 T’oodįht’ay Aaneegn’ niithaat dą’ ts’anh utnettł’adn, dąą’ nįh, “Doo \it Jew \it* k’a’iiłay iin T’oodįht’ay łąy eh huunąy eh, Diits’ą’ tth’idee’ay huutahtsayh.” K’aaduu’ shiinuuniithat hǫǫ’ ch’ah hut-shyaak. Jan heneek suu’ chih \it Abraham \it* dąą’ ehnįh, “\it Abraham\it*, nan xaa’ dinee iin nił yahch’įą’ altsiił ts’ą’ T’oodįht’ay huuts’itaanak.”
\v 9 Ay eh, doo T’oodįht’ay łąy eh uunąy iin ay iin eh \it Abraham \it* doo ch’ittheh T’oodįht’ay łąy eh uunąy nił eh T’oodįht’ay huuts’iniiniik.
\p
\v 10 Doo iin, “\it Moses \it* huhtsiin niign k’eetaat ts’el’įh de’ t’ey, ay ch’ah eh, T’oodįht’ay Diits’ą’ tth’idee’ay neetahtsayh,” hiiniithanh iin huu’otnalshah. Ay ch’ah jan xaah. T’oodįht’ay Aaneegn’ utnettł’adn dąą’ nįh, “Doot’ey \it Moses \it* Huhtsiin Niign dinahtł’aa’ k’et k’eetaat nił k’eenoo’ k’a’el’ąy, ay ch’ale’ T’oodįht’ay botnalshah.”
\v 11 T’oodįht’ay du’ ts’ehłagn dineh t’ey Diits’ą’ tth’idee’ay k’ayihtsiil, \it Moses \it* Huhtsiin Niign k’eetaat el’ąy xaa’. Hǫǫ’ ch’ah hǫǫsuu’ its’etnayh. Ay ch’ah jan xaah: T’oodįht’ay Aaneegn’ utnettł’adn dąą’ nįh, “Doo T’oodįht’ay Diits’ą’tth’idee’ay yihtsiin, ay ch’ale’ łąą’ utaanayh, T’oodįht’ay łąy eh uunąy xaah.”
\v 12 Dineh \it Moses \it* Huhtsiin Niign k’eetaat el’ąy shįį’ koht’iin nłįį de’ t’ey, ay tł’aan T’oodįht’ay łąy eh uunąy koht’iin k’a’iiłay. T’oot’ey doot’ey \it Moses \it* Huhtsiin Niign k’eetaat el’ąy, T’oodįht’ay łąy eh uunąy eh, ay ch’ah koht’iin ay niign k’eetaat uutaanayh.
\p
\v 13 \it Moses \it* Huhtsiin Niign k’eetaat nee’otnalshaa koht’iin ts’įįłiin, \it Christ \it* ay ch’a’ tthiineeniidlah, jiliis k’et ehtiin eh. Hǫǫ’ ch’ah ehtiin eh, T’oodįht’ay \it Christ Jesus \it* otnalshah, łąy eh yuunąy iin ts’įįłiin iin k’anee’otnalshaa xaah. Hǫǫ’ ch’ah hut-shyaak T’oodįht’ay Aaneegn’ utnettł’adn k’eetaat. Dąą’ nįh, “Nił ch’idanh dineh diits’eegn choh k’et dahiiyihtiin t’ey, T’oodįht’ay ay ch’ah botnalshaa koht’iin nt’eh.”
\v 14 \it Christ \it* hǫǫ’ det-shyaak, Diixaa’ heneek \it Abraham \it* tł’aadadįįdlay k’eetaat uutaałeel xaah. “\it Abraham\it*, nanxaa’ dinee iin nił yahch’įą’ altsiił ts’ą’ T’oodįht’ay huuts’itaanak,” yehnįh. Hǫǫ’ hut-shyaak, neexon hu’ \it Christ Jesus \it* łąy eh ts’uunąy xaa’, T’oodįht’ay Otdeegn’ ts’uutaanak xaah.
\p
\v 15 \it Christian \it* koht’iin iin, ay heneek nühts’ą’ uunihhee, hǫǫsuu’ hik’eniich’inahdee. Ay eh, noonak k’eet eh dąą’ nühdihnįh, “Dineh, ‘Ndeeh dhaktįį danh sts’ann’ taa’alshye’ ts’ehłagn alt’eh hǫǫ’ ahdląą ts’ą’, diits’įįkey iin ehnąy de’ t’ey, hǫǫ’ huu’ehnąy k’eetaat uutaałeeł. Nts’ąą’ huu’ehnąy doot’ey k’a’an’ hahk’üh niitaałeeł tł’aan nts’ąą’ huu’ehnąy doot’ey ch’its’ąą’ k’anadaitdahtsay.
\v 16 T’oodįht’ay du’, nts’ąą’ nühttheh noo’ haathał danh nühxaah tihdiił aanah \it Abraham \it* eh uts’anh nadethadn eh huuhǫǫhee. \it Abraham \it* ts’anh nadethadn du’, ndlaan uts’anh nadethadn iin eh k’ahuuhuuheel t’oot’ey huutah ts’anh ts’ehłagn shįį’. Ay ch’ale’ \it Christ \it* nłįį.
\v 17 T’oodįht’ay, sts’ann’ ts’anh uutįįnak aanah \it Abraham \it* eh hǫǫhee tł’aan, “Łąy eh ntł’aatihłeeł,” yehnįh. 430 xay noodeethat danh k’ek noo’, T’oodįht’ay Diihuhtsiin niign dinee iin xaah tł’aahǫǫdlah, \it Moses \it* xaa’. \it Moses \it* Huhtsiin Niign nts’ąą’ niign T’oodįht’ay utł’aahǫǫdlay hǫǫ’ ch’ah k’ałtootaałeel, tł’aan heneek T’oodįht’ay \it Moses \it* utł’aahǫǫdlay k’ashyąą’ hǫǫt’ay.
\p
\v 18 T’oodįht’ay utł’aahǫǫdlah niign uunii \it Moses \it* Huhtsiin Niign k’eetaat el’ąy de’ shįį’, nts’ąą’ T’oodįht’ay \it Abraham \it* hǫǫ’ nąy k’eetaat k’ahuunagn. T’oot’ey T’oodįht’ay nts’ąą’ \it Abraham \it* hǫǫ’ ehnąy k’eetaat ch’idą’ hǫǫsuu’ itł’aaahǫǫdlah.
\p
\v 19 Ay eh, dii xaah T’oodįht’ay \it Moses \it* xaa’ Huhtsiin Niign dinee iin tł’aahǫǫdlah? Hǫǫ’ ch’ah det-shyaak, nts’ąą’ niign T’oodįht’ay k’įą’ hodąy heehutnay xaah. Hǫǫ’ ch’ah niign hut-shyaak, Huhtsiin Niign \it Moses \it* tł’aahǫǫdlay dą’ ts’anh noo’ \it Christ \it* niishay danh k’eh. \it Christ Abraham \it* ts’anh nadethadn nłiin, ay ch’ah niishyah, T’oodįht’ay \it Abraham \it* hǫǫ’ ehnąy niign keetaat. \it Moses \it* du’ T’oodįht’ay Maaneegn’ nadadełeegn iin xaa’ huhtsiin niign \it Moses \it* tł’aahǫǫdlah. Ay tł’aan \it Moses \it* diichiil key’ iin tł’aahǫǫdlah.
\v 20 T’oot’ey T’oodįht’ay heneek nts’ąą’ \it Abraham \it* xaah tihdiił aanah utł’aahǫǫdlay danh, dii xaa’ beh hǫǫhee. T’oodįht’ay Aaneegn’ nadadełeegn iin xaa’ beh k’ahuuheel, T’oodįht’ay daatagn łnatdatjaałeel t‘axoh ay nłiin xaah.
\p
\v 21 \it Moses \it* Huhtsiin Niign du’, heneek T’oodįht’ay nts’ąą’ \it Abraham \it* xaah tihdiił aanah ik’įą’ nłíí? Łąą’ eh ena’! Ch’idą’ ts’anh noo’ haathał danh k’ahǫǫ’ hut-shyaagn! Huhtsiin Niign dinee iin tł’aahǫǫdlay, Ay xaa’ łąą’ huuhǫnayh de’ t’ey, T’oodįht’ay dąą’ huuxaah det-shyaak. Diits’ą’ tth’idee’ay huu’ihtsayh, huhtsiin niign k’eetaat hel’ąy xaah.
\v 22 T’oot’ey hǫǫ’ ch’ah niign k’ahut-shyaagn. Dąą’ ch’ah łąą’ hut-shyaak. T’oodįht’ay Aaneegn’ utnet-tł’adn k’eetaat, nan’ k’et hǫhchah ts’ą’ koht’iin, huuts’ant’ay, huuts’ą’ niit’ay huu’aałeeł. Hǫǫ’ k’eexaan, T’oodįht’ay nts’ąą’ nühtł’aataałeeł hǫǫ’ ehnąy, ay ch’ah doo iin \it Jesus Christ \it* łąy eh huunąy iin tł’aataałeeł. Ay ch’ah \it Jesus Christ \it* łąiy eh huunąy eh shįį’ huutł’aahǫǫdlah.
\p
\v 23 Neexon du’, \it Jesus Christ \it* łąy eh uunąy niign hetsihuuthat ttheh, nee’elshyaagn k’eh hǫǫt’eh \it Moses \it* Huhtsiin Niign xaa’ neekaah hach’uudah’įį. Ishiit danh noo’ \it Jesus Christ \it* łąy eh uunąy niign hetsuutaathał danh k’eh ts’ootahthak.
\v 24 Ishiit dą’ ts’anh noo’ \it Christ \it* niishay danh k’eh, \it Moses \it* Huhtsiin Niign neets’ą’ k’aaholthadn hǫǫt’eh, uudzuldii xaah. Hǫǫ’ ch’ah hut-shyaak, \it Christ \it* łąy eh tsuunąy eh, T’oodįht’ay Diits’ą’ tth’idee’ay neetahtsay xaah.
\v 25 \it Jesus Christ \it* łąy eh uuunąy niign hetsihuuthadn eh, \it Moses \it* Huhtsiin Niign neets’ą’ k’aaholthadn tth’ihtah t’axoh ay k’a’iiłay.
\p
\v 26 Nühxon du’, łahtthagn’ \it Christ Jesus \it* łąy eh uudahnąy xaa’ T’oodįht’ay Ushye’e iin ahłįį.
\v 27 Ay ch’ah jan xaah. \it baptized \it* ahłįį ts’ą’ \it Christ \it* łąy eh uudahnąy xaah, T’oodįht’ay Beh ts’ehłagn nüh’ihtsįį tł’aan T’oodįht’ay Diishye’e iin nüh’ihtsįį.
\v 28 Hoo’ k’eexaan, nühxon łahtthagn’ nił eh ts’ehłagn ahłįį, \it Christ \it* xaa’. \it Jew \it* eh \it Jew \it* k’a’iiłay eh ts’ehłagn koht’iin hįįłįį. Alnaa dine’ eh alnaa dine’ k’a’iiłay eh ts’ehłagn koht’iin hįįłįį. Dineh eh ts’exeh eh ts’ehłagn koht’iin hįįłįį. T’oodįht’ay łahtthagn’ ts’ehłagn koht’iin hįįłįį nühxaah naniich’ethat.
\v 29 Ay eh \it Christ Abraham \it* ts’anh nadethedn nłiin, nühxon chih \it Abraham \it* nadethadn iin ahłįį tł’aan nühxon hu’ nts’ąą’ T’oodįht’ay \it Abraham \it* eh uts’anh nadethadn eh ehnąy k’eetaat uuahnii ahłįį.
\c 4
\p
\v 1 Jan noonagn k’eet nanich’ahdee. Ushye’e diita’ ehtiin eh iits’ann’ uuniign huu’įhdląą ts’ą’ uts’ann hǫǫłįį. T’oot’ey tth’ihtah chiił nłiin eh, alnaa dine’ k’eh ch’ishyon uts’ą’ k’aholthat.
\v 2 Ntsuul dą’ ts’anh noo’ uta’ hǫǫ’ehnąy k’eetaat danh k’eh, ch’ishyon ik’anehtaa’ tł’aan nts’ąą’taadiił niign yaa k’aaholthat.
\v 3 Ay k’eh, neexon hu’ tsįįtsuul dą’ ts’anh noo’, \it Jesus Christ \it* łąy eh ts’uunąy noo’ ch’ishyon neets’ą’ k’aholthat. \it Moses \it* Huhtsiin Niign hach’uuneetann’ niign uuniit’ay eh, baa alnaa iin k’eh ts’uułe’ xaah.
\v 4 T’oot’ey ts’ehłagn dziinn’ T’oodįht’ay haadįįtaan nuuniithat danh, Diishye’e jan nan’ k’et ts’ą’ iteh’a’. Ay ch’ah jan nan’ k’et ts’exeh ts’anh ushyüü ihǫǫłįį. Jan nan’ k’et honay eh, \it Moses \it* Huhtsiin Niign daitdaałeeł.
\v 5 Hǫǫ’ ch’ah hut-shyaak, doo iin \it Moses \it* Huhtsiin Niign dahuułeel iin tthiitaałeel xaah. Hǫǫ’ ch’ah hut-shyaak tł’aan T’oodįht’ay Diishye’e nehshaan iin neetahtsay xaah.
\p
\v 6 Nühxon du’, T’oodįht’ay Ushye’e iin daht’ay xaah, T’oodįht’ay Diishye’e Otdeegn’ nühdzee’ shiit ii’ąą. Ay ch’ale’ uniit’ayh ts’ą’ t’ey udzee’ shiit udee’aan eh dąą’ nįh, “Ta’, Shta’.”
\v 7 Ay eh nühxon du’, nił ch’itah ts’ehłagn ahłįį ts’ą’ dąą nühdihnįh, “Alnaa dine’ nühxaah k’aaholthat iin k’eh t’ey tth’ihtah k’adaht’ay. Ena’! T’oodįht’ay Ushye’e iin daht’eh. Ushye’e iin daht’ay eh, T’oodįht’ay dii Diishye’e tł’aahǫǫdlay ts’anh ch’uutaanagn iin Diixaa’ nüh’ihtsįį.”
\p
\v 8 T’oodįht’ay łąą’ nłiin ch’dą’ k’abi’atnay. Ishiit dą’ alnaa iin k’eh t’oodįht’ay k’a’iiłay iin xaa’ danühdaałeel.
\v 9 T’oot’ey T’oodįht’ay t’axoh ee’atnayh. T’oodįht’ay ch’ittheh nüh’ee’etnayh, hǫǫ’ ch’ah łąą’ hut-shyaak. Ay eh, dii xaah ch’its’ąą ǫǫts’ee’ ch’idą’ hodįį’ niign haats’inutdeeł nahthanh? Ay ch’ah niign du’, huut’ay eh k’anühk’otnalta’ tł’aan uxaa’ k’ałąą’ hahnay. Dii xaah alnaa dine’ ahłiin k’eh ay niign ch’a neexaah k’ahulthadn nahthan?
\v 10 Ay niign ch’ah nühxaah k’aholthadn eh, \it Jew \it* dziinn’ choh łahts’uuduunįį’ nahthanh tł’aan \it Jew \it* saa choh nuuniithat danh łahts’uuduunįį’ nahthanh tł’aan \it Jew \it* łehchinh nahetdak danh choh łahts’uuduunįį’ nahthanh tł’aan \it Jew \it* xay choh łahts’uunįį’ nahthanh.
\v 11 Nts’ąą’ dat-shyaagn eh, “Shyąą’ t’ey huutah naa’aknay’ le’,” nüh’uudihnįh.
\p
\v 12 Sh\it Christian \it* koht’iin iin, nts’ąą’ nühdihnąy niign aanah nts’ąą’ maanah nihthan niign hǫǫ’ ch’ah naniich’ahdee. Hǫǫ’ ch’ah kaah hǫǫtł’at daanii’ishthiit. Hǫǫ’ ch’ah nühdihnįh, shin hu’ tth’ihtah k’a’uuhaa’ dashdahteel ts’ą’, nts’ąą’ ch’idą’ daht’ay k’eh t’ey t’axoh diht’ay xaah. Ch’idą’ hetsihuuthat hanühndhaktaan eh, hǫǫ’ shaaneegn’ k’eh t’ey naniich’ahdee.
\v 13 Nts’ąą’ niign hut-shyaagn hee’alnayh. Dhakts’iign xaah, nühtah dhihdaa’. Ishiit dą’ T’oodįht’ay Aaneegn’ suu’ eh hanühndhaktąą.
\v 14 Dhakts’iign eh, łahtthagn’ shinh ayaa k’eh eltsįį. Ay eh shnah’įį’ ts’ą’ t’ey nühxaah heehǫǫtsüü, t’oot’ey daa’an’ ts’ą’ k’ashch’a’ łtaa’ahdal. Sts’ą’ łąy eh nii’ahsǫǫ. T’oodįht’ay Aaneegn’ nadadełeegn dagn nan’ k’et ts’anh diht’ay eh shuudhahnii. Hǫǫ’ ch’ah niign ch’ahnoo’ hǫǫsoon, \it Christ Jesus \it* k’eh diht’ay eh shuudhahnii.
\p
\v 15 Ndeeh nühtah ihdaa’ dą’, nił eh hasaanayh ts’įįłe’. Hǫǫ’ ch’ah nday t’axoh? Sts’ą’ łąy eh nii’ahsoon xaah, ch’shyon iin nüh’aanah dąą’ dihnįh, “Dąą’ hut-shyagn de’ t’ey, diixaa’ diinaagn’ haa’uu’aay shtł’ahtaa’aał.”
\v 16 K’aaduu’, “Ts’idaanee’uudiht’ay koht’iin uułe’,” shuudahnįh huule’. Hǫǫ’ shuudahnįh, łąą’ niign eh nüh’eh huhhaa’ xaah.
\p
\v 17-18 Shyak ts’ą’ hach’uunehtan iin du’, nts’ąą’ daht’e’ nühhuunihniign k’ahuusuuy. Ay koht’iin iin neeshiit ts’idaahuuduut’e’ kaah neexaah nahehnay’. Hǫǫ hetdį’, huu’aaneegn’ k’eetaat koht’iin tahłeeł xaah. Hǫǫsuu’ ts’ą’ niign kaah hǫǫtł’at daaniihetdee koht’iin ahłįį de’, hǫǫ’ ch’ah hǫǫsǫǫ. Noo’ hǫhchaah ts’ą’ ay ch’ah koht’iin tahłeeł, nüh’eh ihdaa’ danh shįį’ k’ahǫǫ’ that’eel.
\v 19 Sts’įįkey’ iin, nühxon hu’ xaah tay’ t’ey haniich’ishthat. Ch’inąą diits’eeniinn’ uuteełe’ xaah haniich’ethat k’eh t’ee hǫǫt’eh. K’aaduu’ ts’anh noo’ haathał de’, ndeeh \it Christ \it* neeshiit eeday, neets’ą’ k’ootalthat, hutdaaniił nüh’ii’ishnayh de’, noo’ uudih deł taaniich’indhagnthiit.
\v 20 Tthihąą’ k’aaduu’ t’ey nüh’eh uhłe’. Ay de’, k’ahǫǫ’ nühts’ą’ jindhihtł’adn. Nühxaah shiit ts’idaahuudiit’eh.
\p
\v 21 Nühxon \it Moses \it* Huhtsiin Niign daneedaałeeł uudahnąy iin, nts’ąą’ \it Moses \it* utnet-tł’adn hee’atnáyh?
\v 22 T’oodįht’ay Aaneegn’ utnet-tł’adn \it Moses \it* xaa’ k’eetaat dąą’ ch’ah hut-shyaak: \it Abraham \it* łaakey shye’e hǫǫłįį. Ts’ehłagn ay alnaa ts’exe’ naidihtįį tł’aan ts’ehłagn ay ts’exeh alnaa k’a’iiłay naidihtįį
\v 23 Ay ushye’e alnaa ts’exe’ naidihtiin ts’įįkey ehǫǫłiin k’eh ch’idą’ bihǫǫłįį. Ay shye’e ts’exeh alnaa k’a’iiłay naidihtiin heneek T’oodįht’ay nts’ąą’ \it Abraham \it* xaah tihdiił aanah k’eetaat det-shyaagn xaah bihǫǫłįį.
\v 24 Nts’ąą’ ay ts’exee iin eh hut-shyaagn eh dąą’ ch’ah ts’ooduldii: łaakey ch’idanh danh T’oodįht’ay Daaneegn’ nts’ąą’ tihdiił aanah dineh tł’aadaidiidlah. Ay ts’exee iin łaakey ch’idanh ishiit nuuniithat dą’ nts’ąą’ hut-shyaagn k’eh hįįłįį. Heneek T’oodįht’ay ddhał \it Sinai \it* hǫǫsii’ k’et \it Moses \it* tł’aayįįdlay, alnaa ts’exe’, \it Hagar \it* mǫǫsii’, k’eh nt’eh. Ay ch’ah ts’exeh diits’eeniinn’ iin alnaa koht’iin huu’ehǫǫłįį.
\v 25 Ay ddhał \it Sinai \it* hǫǫsii’ \it Arabia \it* nan’ k’et \it Hagar \it* chih hǫǫsii’. Ay ts’exeh jah nan’ k’et key \it Jerusalem \it* hǫǫsii’ k’eh chih hǫǫt’eh. \it Jerusalem \it* koht’iin du’, \it Moses \it* Huhtsiin Niign huuts’ą’k’aaholthat. Ay iin \it Moses \it* Huhtsiin Niign xaah halnaa hįįłiin eh, jan k’eh nt’eh: ts’exeh \it Hagar \it* mǫǫsii’ eh uts’anh nadethadn iin eh alnaa koht’iin huuts’ą’ k’aaholthadn xaah hįįłįį.
\v 26 T’oot’ey ay ts’exeh alnaa k’a’iiłay naidihtiin ch’ishuiy \it Jerusalem \it* key nt’eh. Ay key dagn huu’ąą tł’aan doot’ey koht’iinn’ ts’ą’ k’at’ey k’ootalthadn. \it Christ \it* łąy eh ts’uunąy ay key k’oht’iin ts’įįłįį. Ay key neenąą k’eh hǫǫt’eh.
\v 27 T’oodįht’ay Aaneegn’ utnet-tł’adn dąą’ nįh: 
\q “Ts’exeh nts’eeniinn’ k’ahuułay, hasaanayh tįįłeeł. 
\q Nts’eeniinn’ k’ahuułay eh k’a’ihts’iign, hǫǫchaa’ tsen’įį hasaanayh tįįłeeł! 
\q Ay ch’ah jan xaah. 
\q Ay ts’exeh ch’a’ haa’uuteethat eh natet-shyah ch’idą’, t’axoh uts’įįkey iin hǫǫłįį!
\q Ch’et-tthay ch’ah jah shiit uts’įįkey’ iin hǫǫłįį.”
\m
\v 28 Sh\it Christian\it*’ koht’iin iin, nuhxon du’, ts’exeh alnaa k’a’iiła naidihtiin \it Isaac \it* mǫǫsii’ k’eh daht’eh. T’oodįht’ay nts’ąą’ hǫǫ’ nąy k’eetaat \it Isaac \it* ehǫǫłįį. T’oodįht’ay nts’ąą’hǫǫ’ nąy k’eetaat nühxont’ah T’oodįht’ay ts’įįkey’ iin ahłįį.
\p
\v 29 Niithaadn dą’ dąą’ huu-shyaak: ay ushy’e’ ts’įįkey ehǫǫłiin k’eh t’ey ch’idą’ bihǫǫłiin, ay ch’ale’ ch’idą’ ay ushye’e T’oodįht’ay Otdeegn’ t’ay’ xaa’ ehǫǫłiin yaach’oodehnii. T’oot’ey k’aaduu’ hǫǫ’ k’eh nt’eh, hǫǫ’ k’eh nee’eh chih hut-shyaagn xaah.
\v 30 Ay yaach’oodehnii du’, T’oodįht’ay Aaneegn’ utnet-tł’adn dąą’ nįh: “Alnaa ts’exe’ eh ushyüü eh an’ łtaanįh’aay. Ay ts’exeh ushyüü diita’ ts’ann’ ts’anh łąą’ k’a’uutanagn. T’oot’ey ts’exeh alnaa k’a’iiłay ushyüü shįį’ diita’ ts’ann’ ts’anh uutaanak.”
\v 31 Ay eh, sh\it Christian\it*’ koht’iin iin, hǫǫ’ ch’ah łahtthagn’ eh dąą’ heets’etnayh: alnaa ts’exe’ ts’įįkey’ iin k’eh k’ats’įįłay, t’oot’ey ts’exeh alnaa k’a’iiłay ts’įįkey’ iin k’eh ts’įįłįį.
\c 5
\p
\v 1 \it Christ Moses \it* Huhtsiin Niign ch’a’ tthiineeniidlah, łąą’ tthiiineeniidlay koht’iin tsaałeeł xaah. Hǫǫ’ k’eexaan, tthiinühniidlay koht’iin noo’ uudidih tahłeeł. Tthiihąą’ \it Moses \it* Huhtsiin Niign tay’ t’ey nühts’ą’ k’at’ey k’ootalthadn.
\p
\v 2 Shdahtth’ak! \it Paul \it* ihłiin dąą’ nühdihnįh: “\it Moses \it* Huhtsiin Niign k’eetaat neethüh haahįįt’üüdn koht’iin ts’įįłiin ts’ą’ yuuteedah’įį de’, T’oodįht’ay Diits’ą’ tth’idee’ay xaah, nts’ąą’ \it Christ \it* nühxaah det-shyaagn shyąą’ t’ey hǫǫłįį.”
\v 3 Doot’ey \it Moses \it* Huhtsiin Niign k’eetaat uthüh haayįįt’üüdn koht’iin nłiin ts’ą’ yuuteedeh’iin, T’oodįht’ay Diits’ą’ tth’idee’ay itahtsay xaah, ay ch’ah koht’iin datdįhtayh ts’ą’ dąą’ ndihnįh, “Nkoht’iinn’ hǫhdląą ts’ą’ \it Moses \it* Huhtsiin Niign k’ootįhthat. Hǫhdląą ts’ą’ k’eetaat tįįdiił.”
\v 4 \it Moses \it* Huhtsiin Niign ts’ą’ yuuteedįh’iin koht’iin ahįį, T’oodįht’ay Diits’ą’ tthidee’ay nühtahtsay xaah. Hǫǫ’ k’eexaan, \it Christ \it* k’įą’ ahłįį. Ay eh nts’ąą’ T’oodįht’ay, “Dziin nił k’eenoo’ hǫǫtł’at uts’itihnak,” nüh’uunįh, hǫǫ’ ch’ah k’a’uutahnagn.
\v 5 Neexon du’, ndeeh T’oodįht’ay Diits’ą’ tth’idee’ay neetahtsayh danh k’eh hǫǫchaa’ ts’ihohthak. Botdeegn’ xaa’ hǫǫ’ ch’ah uutaałeeł, \it Christ \it* łąy eh ts’uunąy xaah heets’etnayh.
\v 6 \it Christ Jesus \it* eh ts’ehłagn ts’įįłiin eh, nts’ąą’ dąą’ niign neexaah łąą’ hǫǫłįį laa? \it Moses \it* Huhtsiin Niign k’eetaat neethüh haahįįt’üüt láá? Ena’! \it Moses \it* Huhtsiin Niign k’eetaat neethüh k’at’ey haahįįt’üüt láá? Ena’! Dąą’ ch’ah neexaah łąą’ hǫǫłįį. \it Christ Jesus \it* łąy eh ts’uunąy ch’ishyon dinee iin haahįįtsiin koht’iin tsįįłįį.
\p
\v 7 Ch’dą’ T’oodįht’ay xaah łąą’ hǫǫsuu’ ts’ą’ dahdąy hetsidoodah’ąą. Łąą’ niign xaa’ T’oodįht’ay nts’ąą’ iniithan niign k’eetaat noo’ tahdiił. K’aaduu’ doot’ey nde’ nüh’uutaaton’, hǫǫ’ tahdiil ch’a’, doo ch’ant’ay?
\v 8 Doot’ey nde’ nühuutaaton’, ay ch’ah T’oodįht’ay Daa ch’itah haanüh’įįdlay k’a’iiłay.
\v 9 “Łeedon’ beh nilshogn ntsíín łeedon’ hǫǫchaa’ ilshuul tahtsayh,” henįh. Ay k’eh dąą’ ch’ah hut-shyaak: shyak ts’ą’ ha’uuunehtan ntsíín nił k’eenoo’ shyak ts’ą’ ha’uunehtan uutaałeel.
\v 10 Shin du’, nüh’aanah inihthanh, “Ay iin eh shin eh, Neek’ach’ihohłe’ ts’ehłagn eh ts’įįłiin, nts’ąą’ niign naniich’ihthadn ch’iduugn niign k’ananiich’ihtaadee. Tł’aan doo dine’ huuxaah ch’oodehnii, ay ch’ah botnalshaa.”
\p
\v 11 Sh\it Christian\it*’ koht’iin iin, ch’ehładn’ hanüh’uunehtan eh dąą’ nįh, “\it Moses \it* Huhtsiin Niign niign k’eetaat nühthüh haataat’üh, T’oodįht’ay diits’ą’ tth’idee’ay nühtahtsay xaah.” Ay ch’ah koht’iin diht’eh de’, k’at’ey sheh dahohnihnoh. Ay de’, jan chih. \it Christ \it* jiliis k’et ehtiin eh hach’uunak tanh de’, sts’ą’ k’ats’anihtaltay.
\v 12 Doo iin shyak ts’ą’ hanüh’uunehtan eh nüh’įįnii’ niłtatdelnay iin, ay iin du’, tthiihąą’ tay’ t’ey nüh’eh łehchinh k’ahtaadal. Ay de’, tł’aan shyak ts’ą’ nił k’eenoo’ k’anüh’uhnahtan,
\p
\v 13 Sh\it Christian\it*’ k’oht’iin iin, nühxon du’, \it Moses \it* Huhtsiin Niign ch’a’ tthiinühdlay xaah T’oodįht’ay daa ch’itah haanüh’įįdlah. T’oot’ey tthiinühniidlay eh, ch’ts’ąą’ niign kaah hǫǫtł’at daanii’atdee ts’ą’, ay ch’ah neexaah k’aholthat nahthan de’, sǫ’ ay ch’ah nühxaah k’aahulthadn ah’iin! T’oot’ey dąą’ ch’iduugn niign tahdiił: nił haa’at-tsiin xaa’ niłts’ą’ na’ahnį’.
\v 14 Ay ch’ah jan xaah. T’oodįht’ay nts’ąą’ hǫǫ’ hihtaadiił nee’uunąy, hǫǫ’ łahtthagn’ dąą’ nt’eh: nduhk’eh daa’intsiin k’eh, hǫhchah ts’ą’ koht’iin nłiin ay haa’įįtsįį’.
\v 15 T’oot’ey noon k’eh łehthach’uudal-‘ah eh łaaniłdalnąy de ’, nts’ąą’ dahdiin kaah huu’uudatnih. K’ahuu’uudatnay de’, łąą’ łaaniłdalnąy le’.
\p
\v 16 Hǫǫ’ aanah dąą’ dihnįh. T’oodįht’ay Otdeegn’, “Neexaah k’ootalthat,” utdahniił. Ay de’, ch’its’ąą’ niign kaah hǫǫtł’at daanii’atdee. k’eetaat k’at’ey tahdiił.
\v 17 Doot’ey \it Christian \it* nłiin shiit dąą’ ch’ah hut-shyaak. Ay ch’ah ch’ehłaadn’ ch’its’ąą’ niign kaah hǫǫtł’at daanii’et-thiit t’oot’ey T’oodįht’ay Otdeegn’ ch’ishuuy kaah hǫǫtł’at kaah daanii’et-thiit. Ay eh T’oodįht’ay Otdeegn’ eh neeshyinh eh nił yahch’įą’ hehin’ah. Hǫǫ’ k’eexaan, nts’ąą’ niign ts’iniithan k’eetaat k’atahdiil.
\v 18 Ay eh T’oodįht’ay Otdeegn’ t’ay’ xaa’ al-’įh de’, ay tł’aan \it Moses \it* nach’uudah’iin nühxaah k’ak’ooholthadn.
\p
\v 19 Nts’ąą’ ch’its’ąą’ niign koht’iin iin hetdąy, maanah heets’etnayh. Huutah ts’anh dąą’ ch’ah hetdąy: dineh eh ts’exeh k’ałihutnagn t’ey nił’eh hetdah; dinee iin ts’ahǫǫt’eh ts’ą’ niign nił’eh hetdį’; łahtthagn’ ch’altsiił ts’ą’ ts’ahǫǫt’eh ts’ą’ niign kaah hǫǫtł’at daaniihetdee;
\v 20 dii hehtsiin shyąą’ t’oodįht’ay nt’ay, ay ts’ą’ hithahdelxoh tł’aan łahhiiyuunay eh hihdiidį’; het-shin; ch’ishyon iin ts’idahuhdiht’eh; heneek eh łidahdetxąą; nił hults’įį; ch’ishyon iin ts’ą’ ts’aniihelt’eh; nts’ąą’ ch’ishyon iin hiiniithan k’ahuuhuunayh ts’ą’, doots’ee niign shįį’ ts’uudiin hiiniithanh; neekoht’iinn’ shįį’ hǫǫsuu’ ts’ą’ niign hihdiidąy eh naniich’ihetdee; dii koht’iin neexon k’eh hetdąy eh shįį’ dzeltth’ii hiiniithanh;
\v 21 ch’ishyon iin xaah huhtsiin eh, huuts’an ts’ootaanak huuhuunįh; ch’ihetnnąą; ch’hetnaan hohtsayh; łahtthagn’ ch’altsiił ts’ahǫǫt’eh ts’ą’ niign hǫǫ’ ch’ah yahch’įą’ chih hihdiidį’. Ch’idą’ hǫǫ’ nühdihnąy k’eh, k’aaduu’ dadįhtay eh dąą’ nühdihnįh, “Doo iin ay ts’ahǫǫt’eh ts’ą’ niign noo’ uudih hihdiidąy, ay iin ndeeh T’oodįht’ay k’ach’ihohłe’ danh k’a’uhtaanagn.”
\p
\v 22 T’oot’ey ndeeh T’oodįht’ay Otdeegn’ neexaah k’ooholthadn danh dąą’ ch’ah koht’iin ts’įįłįį: ch’ishyon iin haats’įįtsįį’; łąą’ haasaanayh ts’įįłįį; needzee’ shiit hǫǫsuu’ ts’ą’ hǫǫłįį; hantee’ t’ey ch’ishyon iin ts’ą’ k’ats’anii’elt’ay; ch’ishyon iin ts’ą’ łąy eh niits’įįsǫǫ; ch’shyon iin xaah hǫǫsuu’ ts’ą’ hotdį’; ch’ishyon iin neehuuteh’įį;
\v 23 chishyon iin uudaatah aanah naniints’etdee, nee’aaanah k’ananiints’etdee shįį’; ch’its’ąą’ niign tsaadiił ts’iiniithan le’, hǫǫ’ ch’ah k’ahotdąy. Dii nts’ąą’ koht’iin ahłiin nąy, dąą’ k’anee’ehnąy, “Ena’! Sǫ’ łahtthagn’ ay hǫǫsuu’ ts’ą’ Niign dahdiin.” Ay ch’ah huhtsiin niign k’a’iiłay.
\v 24 Ndeeh bahdeh’ąy iin \it Christ Jesus \it* jiliis etthihitnihttheedn dą’, doo iin \it Christ Jesus \it* ts’an hįįłiin, huushyinh jiliis beh etthihnihtthiidn k’eh nt’eh. Ay iin du’, t’axoh ay diihuushyinh huuxaah k’ooholthat, ts’ahǫǫt’eh ts’ą’ niign hihtsaadiił xaah.
\v 25 Neexon du’, T’oodįht’ay Otdeegn’ xaa’ k’aadu’u ts’ihonay eh, neexaah k’ootalthat ts’uunįh, nts’ąą’ tahdiił nee’uunąy k’eetaat tsaadiił xaah.
\v 26 Ay de’, t’axoh ay ts’įįchaa ts’iiniithanh tł’aan niłhaach’oodzelndii tł’aan niłhults’įį.
\c 6
\p
\v 1 Sh\it Christian\it*’ koht’iin iin, ts’ehłagn dineh nühtah ts’anh ch’its’ąą’ niign det-shyaagn eh, ay ch’ah yuudih’ąą de’, ch’ehłaadn’ iin nühtah ts’anh T’oodįht’ay Otdeegn’ ay iin ts’ą’ k’aaholthadn, ay iin ay dineh hǫǫsu’ ts’ą’ niign natdatshyaal xaah uts’ą’nahuunį’. Hǫǫ’ch’ah hihdet-shyaagn eh, hiits’ą’ łąy eh nii’įįsǫǫ tł’aan huu’uuhdatnnįh, ch’its’ąą’ niign uhtaałeel xaah diihuuhaa’ itdeltsayh.
\v 2 Hehǫǫtsüü nüh’eh dotdaałeel de’, niłts’ą na’atnnį’. Hǫǫ’ dat-shyaagn eh, nts’ąą’ \it Christ \it* hǫǫ’ tahdiił nąy k’eetaat tahdiił.
\v 3 Doot’ey ihchaa niithan de’, na’itnit-‘aa, hǫǫ’ baa k’ałąą’ huułay xaah.
\v 4 Nił ch’itah ts’ehłagn įįłįį nts’ąą’ dąy xaah diixaa’ itdatjalkayh. Hǫǫsuu’ ts’ą’ niign det-shyaagn de’, daahǫǫsǫǫ de’, ayt’oo nłįį. Nts’ąą’ niign ch’ishyon iin hetdąy, t’axoh ay hǫǫ’ naniich’ethat.
\v 5 Nił ch’itah ts’ehłagn įįłįį ts’ą’ shinxaa’ hǫǫsu’ k’atnagntaa’ utdaaniił. Nts’ąą’ dąy k’atnahtaa’.
\p
\v 6 Doo iin T’oodįht’ay Aaneegn’ eh hach’uunehtan, ay iin doo hǫǫsu’ ts’ą’ niign hach’uunehtan eh ts’ehłagn įįnįį’ eh hihtaałeeł.
\v 7 Doo shyak ts’ą’ hach’uunehtan, sǫ’ tthidaanüh’uułee. Doot’ey T’oodįht’ay ts’ą’ shyak ts’ą’ k’atahtsay. Dąą’ ch’ah łąy eh hǫǫt’eh: “Dii neshyee dineh tenak, ay k’eh tatnetthak tł’aan łehchinh niich’iłeek,” henįh.
\v 8 Hǫǫ’ k’eh dąą’ nt’eh. Doot’ey shyinh k’ootalthat iniithan, nts’ąą’ diishyinh iniithan k’eetaat dąy xaa’ tahteeł. Doot’ey T’oodįht’ay Otdeegn’ sts’ą’ k’ootalthat iniithan, T’oodįht’ay Otdeegn’ xaa’ duunoo’ hǫhchaah ts’ą’uutaanayh.
\v 9 Ay eh, neexon du’, hǫǫsuu’ ts’ą’niign hotdąy hitsaatsal k’ats’iiniithan. Duunoo’ haathał ishiit nuuniithat danh, T’oodįht’ay ch’ǫǫt’üü neetł’aataałeeł, hǫǫsuu’ ts’ą’ niign xaah k’atiits’etnagn xaah.
\v 10 Hǫǫ’ k’eexaan, nił ch’idan łahtthagn’ koht’iin iin xaah hǫǫsuu’ ts’ą’ niign tsaadiil. \it Christian \it* koht’iin iin hu’ ay łąą’ ch’ale’ xaah hǫǫsu’ niign xaah tsaadiił.
\p
\v 11 Ay nił ch’itah ts’ą’ nchaah ts’ą’ nühts’ą’ ch’indhihtł’adn shłaa’ eh, huunah’įh.
\v 12 Ay hach’uunehtan iin dii \it Jew\it*’ koht’iin iin neexaah hǫǫsu’ ts’ą’ hudaaniił huuhuunąy, nühxon du’, “\it Moses \it* Huhtsiin Niign k’eetaat huuthüh haahįįt’üüt,” nühhuunįh. Hǫǫ’ ch’ah hihdet-shyaak, ch’ishyon iin k’at’ey huu’eh dahohnahnoo xaah. Ay hach’uunehtan iin \it Jesus \it* jiliis k’et ehtiin eh hats’uunehtan de’, nee’eh dahohnahnoo heehetnayh ts’ą’, hihneljiit.
\v 13 Doo iin \it Moses \it* Huhtsiin Niign k’eetaat huuthüh haahįįt’üüdn iin, huutah ts’anh ch’ehłaadn’ iin \it Moses \it* Huhtsiin Niign hǫǫ’ hǫhdląą ts’ą’ k’eetaat k’ahihdiidiin. T’oot’ey nühxon hu’, “Huuthüh hahtaat’üh,” nühhuunįh, nüh’aanah heneek nchaa eh huutaaheeł xaah. “Nts’ąą’ huuts’enąy k’eetaat \it Moses \it* Huhtsiin Niign huuthüh hahįįt’üüt,” hihdaniił.
\v 14 Shin hu’, tthihąą’ heneek nchaa ts’ehłagn niign shįį’ aanah dąą’ dihniił, “\it Jesus Christ\it*, Neek’ach’hohłe’, jiliis k’et neexaah ehtįį.” Shaa ehtiin xaah, jah nan’ k’et niign niit’ay Shaa łdagn hǫǫłiin k’eh k’ahuut’ay tł’aan jah nan’ k’et niign ts’ą’ ehtiin k’eh diht’eh.
\v 15 Dineh \it Moses \it* Huutsiin Niign k’eetaat ithüh ha’įįt’üüt de’, hǫǫ’ baa k’ałąą’ huułay. Dineh \it Moses \it* Huhtsiin Niign k’eetaat ithüh k’ahaa’įįt’üüdn de’, hǫǫ’ baa k’ałąą’ huułay. T’oodįht’ay ay dineh ehshih, k’aadu’u honay niign itł’aahǫǫ’ąą ts’ą’, ay ch’ah łąy eh hǫǫ’ baa łąą’ hǫǫłįį.
\v 16 Doo iin nts’ąą’ hahuu’uunaktan k’eetaat hetdąy iin du’, tthiihąą’ T’oodįht’ay huudzee’ shiit hǫǫsuu’ ts’ą’ hǫǫłiin huutł’aataa’aał tł’aan teejuh hutdaaniił. Tthiihąą’ łahtthagn’ \it Israel \it* koht’iin T’oodįht’ay łąy eh uunąy iin chih xaah hǫǫ’ ch’ah uutaałeeł.
\p
\v 17 Tthiihąą’ jah ts’anh ndoo’ doot’ey tay’ t’ey k’ashaach’otdahndii. Hǫǫ’ dihnąy, shidn’ t’ey \it Jesus \it* ts’an łąą’ diht’ay tł’aan baa aldaa diht’ay huu’ich’ohneh’iin xaah.
\v 18 Sh\it Christian\it*’ koht’iin iin, tthiihąą’ \it Jesus Christ\it*, Neek’ach’ihohłe’, nüh’otdeegn’ hǫǫtł’at nühts’itaanak.