\id 1TH - Upper Tanana Athabascan Indian (Tetlin dialect) NT [tau] - USA 2013 (web 2014)
\h 1 Thessalonians
\toc1 Paul Dinahtł’aa Ch’ittheh Thessalonica Key’ Koht’iin ts’ą’ Neetł’atI
\toc2 1 Thessalonians
\toc3 1Th
\mt1 Paul Dinahtł’aa Ch’ittheh \it Thessalonica\it* Key’ Koht’iin ts’ą’ Neetł’at
\c 1
\p
\v 1 Neexon, \it Paul\it*, \it Silas \it* eh, Timothy eh, dąą’ ch’ah nts’ineetł’at. \it Thessalonica \it* key’ koht’iin tah ts’anh, doo iin T’oodįht’ay łąy eh huunąy iin, nühts’ą’ nts’ineetł’at. T’oodįht’ay, Neeta’, eh \it Jesus Christ\it*, Doo Neek’ach’ihohłe’, huutsan ahłįį. Tthihąą’ hǫǫtł’at nühts’ihtaanak tł’aan nühdzee’ shiit hǫǫsuu’ ts’ą’ nühtł’aach’ootaa’aał.
\p
\v 2 Nił k’eenoo’ nühxon łahtthagn’ xaah T’oodįht’ay, “Tsen-’įį,” honįh tł’aan ndeeh hithadzelxoo danh nühxaah T’oodįht’ay eh thadzelxoh.
\v 3 T’oodįht’ay, Neeta’, naał dąą’ ch’ah nüh’aanah hets’elnayh. T’oodįht’ay łąy eh uudahnąy xaah, nts’ąą’ niign hiniithan k’eetaat dahdį’, Baa atnah shįį’; dinee iin eh Baa’ahtsiin xaah; tł’aan \it Jesus Christ\it*, Neek’ach’ihohłe’, noo’ udiht’ey łąy eh uudahnįh, łąą’ niign nłiin hee’atnay xaah.
\v 4 \it Christian \it* koht’iin T’oodįht’ay nühxantsiin tł’aan ch’itah daa hahuu’alshay chih, ay ch’ah heets’etnayh.
\v 5 Ndeeh T’oodįht’ay Aaneegn’suu’ eh nühts’ą’ ts’iniideel dą’, heneek eh shįį’k’anühts’ą’ ts’ahdal. T’oot’ey T’oodįht’ay t’ay’ eh Botdeegn’ eh nühts’ą’ ts’iniideeł. Jan chih: ndeeh nühts’ą’ ts’iniideel dą’, Baaneegn’ łąy eh nłiin ay ch’ah łąą’ heets’etnayh. Nts’ąą’ niign hǫǫdįį’ ts’ą’ nüh’eh dzeltth’ii’ dą’, ay ch’ah nee’ee’atnayh. Nühxaah hǫǫsuu’ ts’ą’ uułe’ xaah, hǫǫ’ch’ah dzįįdįį’.
\v 6 Ay tł’aan nts’ąą’ niign ts’el’įh k’eetaat eh Neek’ach’ihohłe’ nts’ąą’ niign hihduudįį’ hiniithan k’eetaat, ch’idą’ hǫǫ’ ch’ah dahdįį’. Hǫǫ’ k’eexaan hǫǫtł’at haniich’ihatdee t’oot’ey nee’aaneegn’ uu’ahnii. Tł’aan T’oodįht’ay Otdeegn’ xaa’ ch’idą’ haasaanayh ahłe’.
\v 7 Ay eh doo iin T’oodįht’ay łąy eh uunąy iin \it Macedonia \it* nan’ k’et ts’anh eh \it Greece \it* nan’ k’et ts’anh ay iin łahtthagn’, “Huuk’eh ts’uudįį’,” hiiniithanh.
\v 8 \it Macedonia \it* nan’ k’et danh eh \it Greece \it* nan’ k’et danh ishiit Neek’ach’ihohłe’Aaneegn’ eh ch’idą’ hahhaa’ tł’aan doo nühdiitth’agn iin heneek nts’ąą’ niign T’oodįht’ay łąy eh uudahnąy Aanah, nił ch’iduugn nan’ k’et danh ch’idą’ hihteedeeł, heneek eh. Ay xaah ch’ale’, ch’ehłaadn’ dinee iin ishiit danh nüh’aanah, ay xaah ch’ah k’ats’ihuuheel.
\v 9 Ndeeh nühts’ą’ ts’iniideel dą’ tł’aan nts’ąą’ nee’aaneegn’ hǫǫsuu’ ts’ą’ uunahnii, \it Macedonia \it* eh \it Greece \it* koht’iin hiixaah thahdelxoh. Jan chih aanah thahdelxoh: k’ałąą’ huułay niign ch’a’ niłts’aadahdał ts’ą’, T’oodįht’ay, Doo hoonąy eh łąą’ nłiin ts’ą’, niinahdeeł, baa atnaa’ xaah.
\v 10 Jan xaah chih: ndeeh Ushye’e dagn nan’ k’et ts’anh nataadaał danh, udoodidhaltth’ih xaah. Ushye’e, \it Jesus\it*, doo hįįłaagn tah ts’anh needihtiin, ay ch’ale’ ndeeh T’oodįht’ay dinee iin huu’otnalshaa danh ch’a’ nee’ihshih.
\c 2
\p
\v 1 \it Christian \it* koht’iin, ndeeh nühts’ą’ ts’iniideeł dą’, k’ashyąą’ nüts’ą’ tsiideel, hǫǫ’ ch’ah łąą’ hee’atnayh.
\v 2 \it Thessalonica \it* key danh nühts’ą’ ts’iniideel ttheh, ch’ehłaadn dinee iin k’aneexaah suunihdih’ay, ay tł’aan ndeeh \it Philippi \it* key dzeltth’ii dą’, ch’ishyon iin chih ts’ahǫǫt’eh neekįą’ daahetdlih. Hǫǫ’ ch’ah chih hee’atnayh. Hǫǫ’ ch’ah neek’įą’ hut-shyaak t’oot’ey nühtah chin k’ats’ineljiidn ts’ą’, T’oodįht’ay t’ay’ xaa’ Baaneegn’ suu’ eh hǫǫ’ nühts’enįh ch’idą’.
\v 3 Nts’ąą’ nühts’enąy ch’idą’, hǫǫ’ ch’ah łąą’ hǫǫt’eh. “Ch’its’ąą’ niign dzuudįį’,” k’ats’iniithan eh hǫǫ’ nühts’enįh ch’idą’ tł’aan k’at’ey nadanühts’inaa’aa ch’idą’. Neexon hu’ T’oodįht’ay, “Shaa huuhuuheeł,” nee’uunįh tł’aan Daaneegn’ suu’ neetł’aa’įįdlah. 
\v 4 Hǫǫ’ k’eexaan, nts’ąą’ niign, “Hǫǫ’ hihdaanįįł,” nee’uunąy, hǫǫ’ k’eetaat ts’enįh. Dinee iin hǫǫsuu’ ts’ą’ nee’aanah huuduunįį’ xaah, hǫǫ’ ch’ah xaah k’ats’ihǫǫhaa’. T’oot’ey ts’ihǫǫhaa’, T’oodįht’ay hǫǫsuu’ ts’ą’ nee’aanah uuduunįį’ xaah. T’oodįht’ay nts’ąą’ niign ts’įįdiin hee’etnayh. Tł’aan dii xaah hǫǫ’ niign ts’įįdiin hee’etnayh.
\v 5 Hǫǫsuu’ ts’ą’ nüh’aanah ts’ihǫǫhee, t’oot’ey k’ałąą’ ts’ida’udidhiht’ay eh k’anühts’enąy hǫǫ’ ch’ah xaah nühxaah k’ats’iniideel ch’idą’. Hǫǫ’ ch’ah hee’atnayh. Jan chih: nühts’an tah ts’anh neetł’aa’ahdlah nühxaah hǫǫtł’at daaniits’etdee, hǫǫ’ ch’ah k’ananiits’etdee. T’oodįht’ay hǫǫ’ ch’ah hee’etnayh.
\v 6 Nühts’ą’ts’iniideel dą’, nühxon eh ch’ishyon iin eh heneek suu’ nee’aanah hihhuuheel xaah, hǫǫ’ xaah ch’ah hǫǫ’ k’ahuudiil.
\v 7 Doo \it Christ \it* Daaneegn’ eh huuteh’a’ iin ts’įįłiin, “Hǫǫdląą niign eh nee’aanah nahihnay’,” hǫǫ’ dzaaniił de’ t’ey, t’oot’ey hǫǫ’ ch’ah k’anühts’enąy. T’oot’ey ch’inąą diits’įįkey’ huuxantsiin eh k’anehtaa’ k’eh t’ey, neets’įįkey’ iin huuxaah ts’įįtsiin k’eh nühxaah ts’įįtsįį’, ndeeh nühtah dzeltth’ii’ dą’.
\v 8 Hǫǫtł’at nühxaah ts’įįts’iin xaah, T’oodįht’ay Aaneegn’ suu’ nühtł’aats’įįdlah tł’aan chih hǫǫdląą niign eh nühts’ehtsaanak,” hǫǫtł’at ts’iiniithanh. Hoohǫhdląą ts’ą’ niign nühts’itsaanagn, hǫǫ’ ch’ah ts’įįdįį’.
\v 9 Hǫǫchaa’ ts’eets’ihoh’ąy eh tits’atnak. \it Christian \it* koht’iin, hǫǫ’ nee’ee’alnayh. Tadn tah eh dziin tah needaataa xaah ts’etnaa’, needaataa t’axoh k’ak’atnahta’ xaah. Tł’aan chih T’oodįht’ay Aaneegn’ suu’ hach’its’uunehtanh, nüh’eh dzeltthii’ eh.
\p
\v 10 Nts’ąą’ niign nühxaah ts’įįdiin, hǫǫ’ ch’ah hee’atnayh tł’aan T’oodįht’ay chih hii’etnayh. Nühxon hu’ doo T’oodįht’ay łąy eh uudahnąy tth’itdee’ay niign eh, hǫǫsuu’ ts’ą’ niign eh hǫǫ’ nühxaah ts’iidįį’. K’at’ey ts’ahǫǫt’eh ts’ą’ nühts’ih’iil.
\v 11 Ch’ita’ diits’įįkey’ xaah hǫǫsuu’ ts’ą’ det-shyaagn k’eetaat, hǫǫ’ ch’ah hǫǫ’ ahdląą ts’ą’ ts’įįdįį’.
\v 12 Uudaldii xaah hǫǫsuu’ ts’ą’ niign nühdziinįį’; heneek eh nühts’ą’ thadzalxüü, ay ch’ah nühxaah naniitaanak; tł’aan datdįhtay eh dąą’ nühdziinįį’, “Dinee iin T’oodįht’ay hǫǫsuu’ ts’ą’ daadąy’ eh hiishyüüt tth’itdee’ah, ay koht’iin ch’ah tahłeel. Ay ch’ale’ ch’itah haanüh’įįdla, ndeeh k’ach’ihohłe’ danh tł’aan ndeeh Uudiichaa hǫǫłiin danh ishiit beh łehchinh tahdał xaah.
\p
\v 13 Jan xaah chih noo’ uudiht’ey T’oodįht’ay, “Tsen-’įį,” ets’enįh. T’oodįht’ay Aaneegn’ eh nühts’ą’ ts’iniideeł dą’, ay ch’ah dahtth’agn tł’aan ay ch’ah łąą’ uudahnįį. T’oot’ey dinee iin ay Heneek eh nühts’ą’ niiniideeł, ay Heneek T’oodįht’ay Aaneegn’ łąą’ hǫǫłiin, ay ch’ah łąą’ uudahnįį. T’oodįht’ay Aaneegn’ nüh’eh nt’eh. Ay ch’ale’ łąą’ uudahnįh.
\v 14 Sh\it Christian\it*’ koht’iin, T’oodįht’ay chiill’ key’ iin \it Judea \it* nan’ k’et łehchinh heedeel iin nts’ąą’ huu’eh hut-shyaagn, k’eetaat nüh’eh hut-shyaak. Nühxon xaa’ nühkoht’iinn’ eh t’ey dotnahnoh. \it Judea \it* koht’iin xaa’ diikoht’iinn’ eh doodetnoh k’eh hǫǫt’eh.
\v 15 \it Judea \it* koht’iin iin \it Jew \it* mǫǫsii’, doo \it Jesus \it* k’ałąą’ uunąy iin, Neek’ach’ihohłe’, \it Jesus\it*, eh T’oodįht’ay xaah hǫǫhee iin hexąą, tł’aan nee’eh dahohnihnoh. Nts’ąą’ hetdąy eh, T’oodįht’ay hiishyüüt k’at’ey tth’ehdih’ay. Ay koht’iin iin łahtthagn’ dinee iin ithach’ihuudįh’a’.
\v 16 \it Jew \it* koht’iin k’a’iiłay iin heneek nts’ąą’ huhtahshih aanah eh hants’uunehtan eh, ay koht’iin iin uk’ee’e huhtehdzayh ts’ą’ ninehteedlah. Hǫǫ’ ts’ahǫǫt’eh niign nił k’eenoo’ t’ey daadį’. T’oot’ey t’axoh T’oodįht’ay huu’eh ushiit ts’idaahuudiit’eh tł’aan duunoo’ haathał ts’ą’ ts’idaa’uudaat’eeł.
\p
\v 17 \it Christian \it* koht’iin, neexon du’, ndeeh hǫǫtsuul utniithaat nühch’a’ łtaats’iniideel dą’, nühxaah łtaanints’inetdeek. Nüh’eh k’adziltth’ii t’oot’ey tth’ihtah noo’ uudiht’ey nüh’aanah nanints’etdee. Łąy eh “Nanühts’inal’iił,” ch’idą’ nühts’uunįį.
\v 18 “Nühxaah nats’utdeeł,” ch’idą’ nühts’uunįh. Shin hu’, \it Paul\it*, hǫǫdląą danh huutehdzayh ts’ą’ huuts’ą’ natuhshya’ nihthanh t’oot’ey ts’ant’ay \it Satan \it* mǫǫsii’ k’ee’e nee’uuton’.
\v 19 Ndeeh \it Jesus\it*, Neek’ach’ihohłe’, dagn nan’ k’et ts’anh nataadaal, danh doo łąy eh yuunąy iin tahłeel, hǫǫ’ ch’ah heets’etnayh. Ay koht’iin tahłeel xaah, neexaah uutaasuuł tł’aan T’oodįht’ay łąą’ tsen-’įį nühxaah tsaałeeł.
\v 20 K’aaduu’ nühxon huu’ neets’ą’ ahchaa tł’aan nühxon nüh k’eexaan neeshyüüt hǫǫsuu’ tth’itdee’ah.
\c 3
\p
\v 1 Ay eh, neexon nühts’inuh’įį’ kaah hǫǫtł’at daaniits’etdee ts’ą’ t’oot’ey k’anühts’ą’ tsaadal ts’ą’ \it Timothy \it* nühts’ą’ ts’uh’a’. \it Athens \it* key neexon shįį’ dzeltth’ih de’, uutaasuuł.
\v 2 \it Timothy\it*, doo nee\it Christian \it* chiill’ nłiin tł’aan doo nee’eh heneek suu’ \it Christ \it* aanah eh T’oodįht’ay xaah etnaa, ay ch’ale’ ch’idą’ nühts’ą’ tseh’a’. Hǫǫ’ hoodiin, \it Christian \it* niign xaah nüht’ay’ uułe’ xaah nühts’itaandak xaah tł’aan \it Christian \it* niign aanah tay’ hǫǫ’ nühduunii’ xaah.
\v 3 Nüh’eł doodetnoh eh, sǫ’ aat dinee iin xaa’ \it Jesus \it* łąą’ uudahnąy hetdahtsiidn. Neexon łahtthagn’ \it Jesus \it* łąy eh ts’uunąy, nee’eh dotdatnoh. Nühxon xaa’ chih hee’atnayh.
\v 4 Nüh’eł dzeltth’ii’ dą’, “Nühxon iin eh huuts’įhdląą ts’ą’ noo’ niik’uul nee’eh dotdatnoh,” hǫǫ’ nühts’enįh. Hǫǫ’ hut-shyaagn nee’ee’atnayh.
\v 5 Ay eh, nüh’aanah duhtth’agn kaah hǫǫtł’at daanii’ishthiidn, nühts’ą’ tidhak-’a’, datdįhtay eh łąą’ uudahnįh de’ nüh’ee’utnay xaah. Ts’ant’ay \it Jesus \it* łąą’ utdahniil ch’a’ nüh’ihtsiin le’. Nts’ąą’ niign det-shyaagn heets’etnayh tł’aan nühxon dagn taat’eeł k’ats’iiniithan. Hǫǫ’ det-shyaagn de’, shąą’ t’ey T’oodįht’ay Aaneegn’ eh nühtah ts’atnaa’ k’eh uutaat’eeł.
\p
\v 6 “Toot’ey k’aadiidą’ \it Timothy \it* nühts’anh neets’ą’ na’inshyah. Heneek suu’ nüh’aanah eh na’inshyah. Nts’ąą’ niign T’oodįht’ay łąy eh uudahnąy tł’aan nts’ąą’ niign Dii eh dinee iin huuxaa’ahtsįį’ nee’ehnįh. Jan chih: “Nił k’eenoo’ nüh’eh huuxaah hǫǫsuu’ ts’ą’ naniich’ihetdee tł’aan łąy eh nanühts’inul’įį’ hiiniithanh,” nee’ehnįh.
\v 7 Nee’eh hǫǫchaa’ doodetnoh eh hanints’etdee. T’oot’ey, \it Christian \it* koht’iin, hasaanayh nee’ahxąą. Noo’ uudih \it Jesus \it* łąy eh uudahnąy, ay ch’ah eh hasaanayh ts’įįłįį.
\v 8 Datdįhtay eh Neek’ach’ihohłe’ łąy eh uudahnąy xaah, t’axoh huuts’itaanak.
\v 9 K’aaduu’ tay’ t’ey nühxaah T’oodįht’ay łąą’ tsen-’įį tsaałeeł. T’oodįht’ay naał nühxaah haasaanayh ts’įįłįį.
\v 10 Tadn tah eh dziin tah T’oodįht’ay eh łąą’ hithadzelxoh, nühts’onuh’iin xaah tł’aan tay’ t’ey \it Christian \it* niign eh nühts’ehtsaanak xaah.
\p
\v 11 Tthihąą’ T’oodįht’ay, Neeta’, eh \it Jesus\it*, Neek’ach’ihohłe,’ ts’ahǫǫt’eh ts’ą’ neettheh nutdaathal ch’a’ neexaah hohtahtsayh, nühts’ą’ tsuudeel xaah.
\v 12 Tthihąą’ Neek’ach’ihohłe’ nühts’itaanak, dziin eh nił k’eenoo’ t’ey niłxaah tattsįį’ xaah eh łahtthagn’ ch’ishyon iin xaah tahtsįį’ xaah. Hǫǫchaa’ nühxaah ts’įįtsįį’ k’eh t’ey, hǫǫ’ ch’ah eh huuxaah tahtsįį’ ts’iiniithanh.
\v 13 Ay koht’iin ahłįį ts’ą’ tth’itdee’ay niign dahdį’ ts’ą’, Ut’ay’ eh Baa hǫǫ’ tahdiił. Ay de’, ndeeh \it Jesus\it*, Neek’ach’ihohłe’, doo iin łahtthagn’ uts’an yiiłiin iin eh nataadaał danh, “Ch’its’ąą’ niign dahdį’,” doot’ey k’a’ehnąy tł’aan T’oodįht’ay, Neeta’, naał tth’itdee’ay koht’iin tahłeeł.
\c 4
\p
\v 1 \it Christian \it* koht’iin, nts’ąą’ niign tal’iil, T’oodįht’ay nühxon eh Baa uułe’ xaah, hǫǫ’ ch’ah ch’idą’ neets’anh uudaldįį’. Hǫǫ’ k’eetaat al’įh. Ay tł’aan t’axoh dziin eh nił k’eenoo’ t’ey al’įh ts’ą’ T’oodįht’ay nühxon eh Baa uułe’ xaah, hǫǫ’ ch’ah Neek’ach’ihohłe’, \it Jesus\it*, ǫǫsii’ eh hǫǫtł’at daaniits’etdee.
\v 2 Nts’ąą’, “Hǫǫ’ dahdį’,” ch’idą’ honąy, hǫǫ’ ch’ah hee’atnayh. Neek’ach’ihohłe’, \it Jesus\it*, uxaa’ doodįįt’ay eh hǫǫ’ dzįįnii’.
\v 3 T’oodįht’ay tth’itdee’ay koht’iin ahłe’ iniithanh. Dineh eh ts’exeh łąy eh nił eh hetday, ay k’eh koht’iin hǫǫ’ ch’ah tahłeeł.
\v 4 Dineh iin, doot’ey nühtah ts’anh ts’exeh uuniik de’ tah, tth’itdee’ay niign eh dii’aat eh taadaał tł’aan nts’ąą’ baa hǫǫsuu’ ts’ą’ hǫǫłiin dii xaa’ hǫǫ’ ch’ah taadiił.
\v 5 Doo iin T’oodįht’ay k’ałąą’ uunąy iin k’eh k’ataadiil. Ay iin koht’iin ts’exeh eh uhte’ kaah baa hǫǫtł’at daaniihetdee.
\v 6 Ay eh, sǫ’ ch’ishyon dineh u’aat eh ahtiadn. Hǫǫ’ ch’ah niign ts’ahǫǫt’eh nt’eh. Doo Huuhǫhchaah ts’ą’ K’ach’ihohłe’ doo iin ay ch’its’ąą’ niign hihdet-shyaagn iin huu’otnalshyaa. Datdįhtay eh ch’idą’ hǫǫ’ nühdzįįnii’.
\v 7 T’oodįht’ay ch’itah Daa hanee’alshay, tth’itdee’ay koht’iin ts’uułe’ xaah. “Dineh ts’exeh eh ts’ahǫǫtłeek ts’ą’ k’ahuhdiin,” iniithanh.
\v 8 Doo ay hach’uunaktan t’ey k’at’ey shdiitth’agn, ay koht’iin T’oodįht’ay dahthan. T’oodįht’ay, ay ch’ale’ doo iin łąą’ yuunąy iin Dotdeegn’ huutł’aadįįtąą.
\p
\v 9 \it Christian \it* koht’iin, t’axo ay nts’ąą’ niign niłxaah taatsįį’ nühxaah jindhihtł’at. Nts’ąą’ niign niłxaah tattsįį’ T’oodįht’ay ts’anh ch’idą’ hǫǫ’ uudaldįį’.
\v 10 Łahtthagn’ \it Christian \it* chiill’ key’ iin \it Macedonia \it* nan’ k’et tagn’ hihdeltth’ii iin xaah, hǫǫ’ niign ch’idą’ dahdįį’. T’axoh dziin eh nił k’eenoo’ t’ey tahdiił ts’iiniithanh.
\v 11 Dinee iin eh hoknoo kaah sǫ’ ts’eehah’iin. Nühxon xaa’ k’ahalthat ts’ą’ tahdiił. Dii nühdaatah xaah tatnaał. Ay koht’iin tahłeeł, ch’idą’ hǫǫ’ nühdzįįnii’ keetaat.
\v 12 Ay koht’iin ahłįį de’ t’ey, doo iin T’oodįht’ay łąy eh k’ahuunąy iin łahnühhuudaaniił. Tł’aan chih, t’axo’ay dinee iin nühdaatah xaah k’anühhihnah’iil.
\p
\v 13 \it Christian \it* koht’iin, łąą’ niign įįłaagn iin aanah hee’atnay ts’iiniithanh. Hǫǫ’ ch’ah hee’atnayh de’ t’ey, doo \it Jesus \it* k’ałąą’ yuunąy iin ts’ehoohǫhdąy k’eh k’ahǫǫ’ ts’uutahdąy.
\v 14 \it Jesus \it* ehtįį. Ay tł’aan įįłaagn tah ts’anh haa’inshyah tł’aan nahotnayh. Hǫǫ’ k’eexaan, T’oodįht’ay doo iin \it Jesus \it* łąy eh huunąy įįłaagn iin \it Jesus \it* eh nahuutalsheeł. Hǫǫ’ ch’ah łąą’ ts’uunąy.
\p
\v 15 Neek’ach’ihohłe’ nts’ąą’ hach’uunehtan, hǫǫ’ ch’a dąą’ nühts’enįh. Shiit dziinn’ ndeeh Doo Huuhǫhchaah ts’ą’ K’ach’ihohłe’ nataadaał danh, ch’ittheh įįłaagn iin daa niidadelshyah. Ay tł’aan doo honąy iin daa niidadelshyah.
\v 16 Ishiit danh \it Jesus \it* Doo Huuhǫhchaah ts’ą’ K’ach’ihohłe’ datdįhtay eh uutaaheeł. Ishiit danh chih, T’oodįht’ay Aaneegn’ nadatdełeegn haske’ uutaaheeł tł’aan T’oodįht’ay \it trumpe\it*dn’ eh haashataa’aał. Doo iin \it Jesus \it* ch’idą’ łąy eh huunąy įįłaagn iin, ay iin ch’ittheh nihtatdał tł’aan nahohtatnayh.
\v 17 Ay tł’aan doo iin \it Jesus \it* łąy eh uunąy iin doo tth’ihtah honąy iin, ay iin ch’ale’ dagn’ k’oh ishiit danh Beh dagn’ nahtatdał, \it Jesus \it* dzuut’e’ eh xaah. Ay tł’aan dagn nan’ k’et Doo Huuhǫhchah ts’ą’ K’ach’ihohłe’ eh duunoo’ hǫhchaah ts’ą’ dzaltth’iił.
\v 18 Ay eh, ay heneegn suu’ eh niłts’itatnayh, haasaandayh tahłeel xaah.
\c 5
\p
\v 1 \it Christian \it* koht’iin, ndeeh nataadaal uutaałeel danh tł’aan nts’ąą’ nataadaal ttheh uutaadiil, hǫǫ’ ch’ah aanah t’axoh hǫǫ’ nühxaah jindhihtł’at.
\v 2 Dziin ndeeh Doo Huuhǫhchaah ts’ą’ K’ach’ihohłe’ nataadaal danh nuuniithat danh, ndeeh ch’ine’iin dine’ tadn tah niishay danh k’eh uutaałeeł tłaan nts’ąą’ huutaadiił ts’ą’ t’ey hets’atniign. Nühxon xaa’ hǫǫ’ ch’ah łąą’ hee’atnayh.
\v 3 Ndeeh dinee iin, “K’atdatjetgüü danh shiit danh nts’ąą’ t’ey ts’ahǫǫt’eh ts’ą’ k’aneexaah nutdahtał,” henąy danh, ay ch’ale’ ishiit danh hantey’ t’ey hutdaanutdaathał. Ay iin k’at’ey ay ch’a’ łtaatiltthal. Dii ts’exeh uts’eeninn’ uuteełe’, hantey’ t’ey ehts’iik. Ay ch’ah ehts’iign eh k’eh t’ey, hantey’ t’ey ay dinee iin eh hutdaanutdaathał.
\v 4 T’oot’ey \it Christian \it* koht’iin, nühxon hu’ nattł’adn shiit k’adaltth’ii. Ay eh ndeeh ay dziin nuuniithat danh, ch’ine’iin dine’ tadn ta niishay hut-shyaagn k’eh nüh’eh k’a’uutaadiil.
\v 5 Nühxon łahtthagn’ kün’ neldzeegn koht’iin ahłįį ts’ą’, dziin koht’iin ahłįį. Ay koht’iin T’oodįht’ay k’eetaat tsaadiił hiiniithanh. Neexon hu’, \it Christian \it* koht’iin ts’įįłįį ts’ą’, tadn koht’iin k’ats’iiłay tł’aan chih nattł’at koht’iin k’ats’iiłay. Ay koht’iin T’oodįht’ay k’eetaat tsaadiił k’ahiiniithan.
\v 6 Ay eh, ch’ehłaadn’ iin ndeeh nataadaał danh k’ałahhiiyuudiinay. Hehtiadn k’eh hǫǫt’eh. Ay kohtįin k’atsaałeel. Koł ts’ihotndayh k’eh tsaat’eeł tł’aan ndeeh nataadaal danh kaah suudzalniił.
\v 7 Tadn tah dinee iin hehtiat tł’aan chih tadn tah dinee iin ch’ihetnnąą.
\v 8 T’oot’ey neexon du’ dziin koht’iin ts’įįłįį tł’aan ndeeh nataadaal danh kaah suudzalniił. Bahdeh’ąy dine’ naabaa xaah suudelshyaak de’ t’ey, ch’iitsay diidzehchiit eh’ąą tł’aan ch’iitsay tthiishoo chinaadel’ąą, ts’itdaayuudiht’ay iin ts’anh botdaanagn ch’a’. Bahdeh’ąy dine’ k’eh t’ay ts’itdaanee’uudih iin xaah suudzelshyaak k’eh t’ey tsaat’eeł. T’oodįht’ay łąy eh ts’utdaaniił tł’aan chih ay eh dinee iin xaah tsaatsįį’. Hǫǫ’ hotdąy ch’ah ts’ahǫǫt’eh niign ch’a’ neets’iniiniik. Hǫǫ’ ts’etdį’ ts’ą’ ndeeh bahdeh’ąy dine’ ch’iitsay diidzehchiit eh’ąą, ts’itdaayuudiht’ay iin xaah suudelshyaak, hǫǫ’ k’eh t’ey nt’eh. Jan chih: neetahshih łąą’ heetsatnayh. Hǫǫ’ hotdąy ch’ah ts’ahǫǫt’eh niign ch’a’ neets’iniiniik. Hǫǫ’ ts’etdį’ ts’ą’ ndeeh bahdeh’ay dine’ ch’iitsay tthiishoo natdel’ąą, ts’itdaayuudiht’ay iin xaah suudelshyaak, hǫǫ’ k’e t’ey nt’eh.
\v 9 T’oodįht’ay ch’ita daa haanee’įįdla. Hǫǫ’ ch’ah det-shyaak, Neek’ach’ihohłe’, \it Jesus Christ \it* nee’uhshih xaah. Hǫǫ’ ch’ah det-shyaak, neets’ant’ay’ xaah Baa ts’ą’ hǫǫłiin eh nee’aach’otdaathal ch’a’.
\v 10 \it Christ \it* nee ts’ant’ay xaah ehtįį, łahtthagn’ beh dzaltth’iil xaah. Hǫǫ’ ch’ah iniithanh, ts’ootaanayh de’ t’ey tł’aan ts’įįłaagn de’ t’ey, ndeeh nataadaał danh.
\v 11 Hǫǫ’ k’eexaan, t’axoh nts’ąą’ hǫǫsuu’ ts’ą’ niign dahdį’, hǫǫ’ ch’ah k’eh noo’uudih heeneek eh dąy eh niłts’itatnak.
\p
\v 12 \it Christian \it* koht’iin, doo iin T’oodįht’ay xaah nühtah hetnaa iin łahhuu’utdahniił ts’iiniithanh. Doo Huuhǫhcha ts’ą’ K’ach’ihohłe’ ay iin ch’itah haahuu’įįdlah, hǫǫ’ hǫǫłiin nüh’ehnįh niign xaah tł’aan utadaldii xaah hach’ihuhnehtan xaah.
\v 13 Dii t’ey T’oodįht’ay xaah hetnaa, hǫǫ’ ch’ah xaah hǫǫtł’at łahhuu’utdahniił tł’aan huuxaah tahtsįį’. Nühxon xaa’ hotnoo’ ch’a’ an’ heedzeldah k’eh taht’eeł.
\p
\v 14 \it Christian \it* koht’iin, dąą’ ch’ah tahdiił ts’iiniithanh: doo iin k’atsatnaal hiiniithan iin, ch’its’ąą’ niign dahdį’ hǫǫ’ idahnįh; doo diłtaaniich’inelthiit ushiit ts’idaahuudiit’ay iin, heneek eh huuts’itahnak; doo \it Christian \it* ut’ay’ kol iin, hǫǫt’ay’ iin ch’ah huuts’itahnak. Łahtthagn’ dinee iin huuts’inahniign eh, hantey’ t’ey k’at’ey hitidhahtsal.
\v 15 Huu’uudatnįh. Doo ch’its’ąą’ niign nüh’iiłaagn, sǫ’ ch’its’ąą’ udihnah ts’ą’ dahłee. T’oot’ey łahtthagn’ dinee iin eh nił eh hǫǫsuu’ ts’ą’ tsaadiił nił k’eenoo’ nahthiił.
\p
\v 16 Hasaanayh noo’ hǫhchaah ts’ą’ tahłeeł.
\v 17 Haniichat-that shįį’ taht’eeł.
\v 18 Nts’ąą’ t’ey nüh’eh hut-shyaagn xaah T’oodįht’ay tsen-’įį tahłeeł. Hǫǫ’ ch’ah niign tahdiił, \it Christ Jesus \it* xaah al’ąy eh, T’oodįht’ay hǫǫ’ ch’ah tahdiił iniithan xaah.
\p
\v 19 Sǫ’ T’oodįht’ay Otdeegn’ uk’ee’e ahton’.
\v 20 Doo T’oodįht’ay xaah hǫǫhee de’, shyąą’ t’ey hǫǫhee sǫ’ inahthiin.
\v 21 Huu’įhdląą ts’ą’ tthee’ k’ahahnayh. Ay tł’aan, diit’ey ayt’oo nsǫǫ de’ t’ey, hǫǫ’ k’eetaat tahdiił.
\v 22 Tł’aan diit’ey ts’ahǫǫt’ay niign, ay ch’a’ daltth’iił.
\p
\v 23 T’oodįht’ay, doo neeshyüüt hǫǫsuu’ ts’ą’ neetł’aa’įį’aan, tthihąą ’ut’ay’ xaa’ Baa shįį’ tal’iił. Tthihąą’ T’oodįht’ay k’aaduu’ ts’anh noo’ ndeeh Neek’ach’ihohłe’, \it Jesus Christ\it*, nataadaal danh, nühts’itaanak, ch’its’ąą’ niign ch’a’ an’hetdalshyah xaah. Tthihąą’ nühshinh t’ey eh nühshyüüt t’ey eh nüh’otdeegn’ t’ey ch’its’ąą’ niign ch’a’ an’hetdalshyah.
\v 24 Doo ch’itah daa haanüh’įįdlay, łąą’ t’ey nłįį. Nts’ąą’ nąy k’eetaat hǫǫ’ ch’ah taadiił.
\p
\v 25 \it Christian \it* koht’iiin, neexaah hithatdalxoh.
\p
\v 26 Doo iin \it Christian \it* koht’iin łahtthagn’, shaa nahuunalts’uu’.
\p
\v 27 Doo Huuhǫhchaah ts’ą’ K’ach’ihohłe’ ǫǫsii’ eh datdįhtay eh dąą’ nühdihnįh: \it Christian \it* koht’iin łahtthagn’ eh jah dinahtł’aa uutahsiił nihthanh.
\v 28 Tthihąą’ Neek’ach’ihohłe’, \it Jesus Christ\it*, hǫǫtł’at nühts’itaanak.