\id 2TH - Upper Tanana Athabascan Indian (Tetlin dialect) NT [tau] - USA 2013 (web 2014)
\h 2 Thessalonians
\toc1 Paul Dinahtł’aa Łaakey Danh Thessalonica Key’ Koht’iin ts’ą’ Neetł’at
\toc2 2 Thessalonians
\toc3 2Th
\mt1 Paul Dinahtł’aa Łaakey Danh \it Thessalonica\it* Key’ Koht’iin ts’ą’ Neetł’at
\c 1
\p
\v 1 Neexon, \it Paul\it*, \it Silas \it* eh, \it Timothy \it* eh, dąą’ ch’ah dzineetł’at. \it Thessalonica \it* key’ koht’iin tah ts’anh, doo iin T’oodįht’ay łąy eh huunąy iin, nühts’ą’ dzineetł’at. T’oodįht’ay, Neeta’, eh \it Jesus Christ\it*, Doo Neek’ach’ihohłe’, huuts’an ahłįį.
\v 2 Tthihąą’ hǫǫtł’at nühts’ihtaanak tł’aan nühdzee’ shiit hǫǫsuu’ ts’ą’ nühtł’aach’ootaa’aał.
\p
\v 3 \it Christian \it* koht’iin, nił k’eenoo’ nühxon xaah T’oodįht’ay, “Tsen-’įį,” honįh. Nts’ąą’ al’ąy xaah, hǫǫ’ ch’ah ts’et-shyaagn nsǫǫ. T’oodįht’ay łąy eh uudahnįh ts’ą’, dziin eh nił k’eenoo’ tay’ uk’ahahdee, tł’aan dziin eh nił k’eenoo’ tay’ niłxaah attsįį’.
\v 4 Hǫǫsuu’ ts’ą’ niign dahdąy xaah, ch’ishyon iin ch’idanh danh doo iin T’oodįht’ay łąy eh huunąy, ndeeh łehchinh heedeeł danh, nüh’aanah hǫǫ’ huuts’enįh. Nüh’eh doodetnoh tł’aan haniich’atdee t’oot’ey noo’ uudih T’oodįht’ay łąy eh uudahnįh tł’aan k’at’ey hedidhahtsal. Hǫǫ’ ch’ah nüh’aanah huuts’enįh.
\p
\v 5 Nts’ąą’ nüh’eh hut-shyaagn eh, T’oodįht’ay tth’itdee’ay niign eh dinee iin xaah k’aholthadn iin shįį’ huu’etdatjahkay huu’ich’ooneh’įh. Ndeeh T’oodįht’ay k’ach’ihohłe’ danh, ay ch’ah xaah nüh’aach’otdeethiit. Ay t’oot’ey dziin eh nił k’eenoo’ tay’ hǫǫsuu’ ts’ą’ koht’iin ahłįį.
\v 6 T’oodįht’ay hǫǫsuu’ ts’ą’ niign dąy eh, doo xaa’ nüh’ach’otdeedee iin, ay ch’ale’ T’oodįht’ay huu’ach’otdeedee huutahtsayh.
\v 7 Nühxon ach’otdeedee, ch’ah nühts’itaanak tł’aan neexont’ah neets’itaanak. T’oodįht’ay hǫǫ’ ch’ah taadiił, ndeeh Neek’ach’ihohłe’ dagn nan’ k’et ts’anh T’oodįht’ay Aaneegn’ nadatdełeegn dįhtay iin eh nataadaal hitnah’iil danh.
\v 8 Ay iin kün’ deek’an’ eh dǫ́ǫ́ haadał. Doo T’oodįht’ay its’etniign iin eh doo heneek suu’ Neek’ach’ihohłe’ \it Jesus \it* aanah k’ak’ahohthadn iin, ay iin ch’ale’ \it Jesus \it* ts’anh u’otnalshaa.
\v 9 Ay dinee iin duunóó’ hǫhchaah ts’ą’ huu’otnahshaa tł’aan Neek’ach’ihohłe’ eh hǫǫchaa’ t’ay’ ch’a’ ch’ishuy danh hihdaltth’iił.
\v 10 Ay dziin ndeeh nataadaal nuuniithat danh hǫǫ’ ch’ah uutaadiił. Ishiit dziin nataadaał, doo łąy eh yuunąy iin łahtthagn’ iin Yaa tsenaa’įį eh hii’aanah doodįhsoon daaniil xaah. Nühxon chih huutah daltth’iił, nee’aaneegn’ eh nüh’eh ch’idą’ thadzelxüü łąy eh uudahnįį xaah.
\p
\v 11 Hǫǫ’ k’eexaan, nił k’eenoo’ nühxaah hithadzelxoh. T’oodįht’ay k’eetaat tahdiił xaah, nühts’itaanak ts’iiniithanh. Tthihąą diit’ay’ xaa’ nühts’itaanak, łahtthagn’ hǫǫsǫǫ niign tahdiil, hǫǫ’ ch’ah tahdiil xaah tł’aan łąy eh uudahnąy eh, noo’ uudih baa tatnaał xaah.
\v 12 Hǫǫ’ ch’ah hut-shyaagn de’, Neek’ach’ihohłe’ \it Jesus \it* Ǫǫsii’ aanah doodįhsoon dahniił tł’aan nüh’aanah doodįhsoon daaniił. Jah huu’įhdląą ts’ą’ uutaadiił, neeT’oodįht’ay’ eh Neek’ach’ihohłe’, \it Jesus Christ\it*, hǫǫtł’at neets’ihtaanak xaa’.
\c 2
\p
\v 1 Ndeeh Neek’ach’ihohłe’, \it Jesus Christ\it*, nataadaał danh tł’aan Beh łehchinh tsaadal, hǫǫ’ ch’ah aanah dąą’ nühdihnįh. \it Christian \it* koht’iin, datdįhtay eh dąą’ nühdihnįh:
\v 2 nüh’įįnii’ sǫ’ hantey’ t’ey nił ch’itah ts’ą’ naniich’ahdee tł’aan doot’ey Doo Huuhǫhchaah ts’ą’ K’ach’ihohłe’ Dziinn’ ishiit nuuniithadn dą’ hǫǫ’ nąy, ay xaa’ ch’ale’ sǫ’ baa taniinat-thiidn. Doo nts’ąą’ noo’ uutaałeeł aanah hǫǫhee hǫǫ’ nąy huule’. Doo hǫǫ’ hach’uunehtan hǫǫ’ nąy huule’. Doo dinahtł’aa k’et nühts’ą’ ch’ihneetł’adn hǫǫ’ nąy huule’.
\v 3 Sǫ’ doot’ey nanühnuu’aa. Dąą’ ch’ah niign uutaałeeł: tthee’, noo’ haathał danh dinee iin T’oodįht’ay ch’a’ łts’ahdaadał. Ishiit nuuniithat danh doo nach’uudah’iin k’įą’ el’ąy hitnah’iił tł’aan yik’etalnak. Ay ch’ale’ T’oodįht’ay ndeeh duunoo’ hǫhchaah ts’ą’ ch’otnalshaa danh niitahteeł.
\v 4 Huu’įhdląą ts’ą’ diit’ey dinee iin łahhiiyuunąy tł’aan dii nahtaa’ hiiniithan, ay ch’ah k’įą’ tal’iił. Diit’ey dinee iin, “Jah shT’oodįht’ay nt’ay,” henąy, ay ch’ah chih k’įą’ tal’iił. Diixaa’ diichaa’ taltsayh noo’ haathał ts’ą’. T’oodįht’ay hithahdelxoo shyah choh t’ey daataahaał. Ishiit taadaał tł’aan, “T’oodįht’ay diht’eh,” dąą’ daaniił.
\p
\v 5 Ndeeh nüh’eh ihdaa’ dą’, hǫǫ’ huuhǫhdląą ts’ą’ hǫǫ’ nühdihnįį’. Hee’alnáyh?
\v 6 T’oot’ey k’aaduu’, dii ay ch’ah ehtsayh, ay ch’ah k’at’ey hitnah’iil xaah tł’aan k’at’ey yik’etalnagn xaah. Dii nłįį ts’ą’ hee’atnayh. Duunoo’ hǫǫ’ t’ey haathał ishiit nuuniithat danh doo nach’uudah’iin k’įą’ el’ąy hitnah’iił tł’aan yik’etalnak.
\v 7 Dinee iin dziin nił k’eenoo’ tay’ nach’uudah’iin k’įą’ hal’įį’ ch’idą’. T’oot’ey dii hǫǫ’ huu’ihtsiin ts’ą’ t’ey hits’ihetniik. K’aaduu’ T’oodįht’ay nts’ąą’ xaa’ nde’ehuudel’ah, nach’uudah’iin k’įą’ noo’ k’ahul’iin xaah. Duunoo’ hǫǫ’ t’ey haathał ishiit nuuniithat danh, T’oodįht’ay nts’ąą’ xaa’ tay’ k’at’ey nde’ehuu’etdal’aal.
\v 8 Ay tł’aan doo nach’uudah’iin k’įą’ el’ąy hitnah’iił tł’aan yik’etalnak. Doo Huuhǫhchaah ts’ą’ K’ach’ihohłe’, \it Jesus\it*, ndeeh hǫǫtł’at kün’ neldzeegn shiit nataadaal danh, ishiit danh yit’ay’ yich’a’ łtaataałeeł tł’aan yitidhalxeh xaah uutaaheeł.
\v 9 Doo nach’uudah’iin k’įą’ el’ąy ts’ant’ay t’ay’ eh taadaał. Huu’įhdląą ts’ą’ nahootahdaa, hech’ihohnah’iił xaah tł’aan ch’its’ąą’ ch’aa’ hol’įh chih ts’ą’ taadiił.
\v 10 Doo duunoo’ hǫhchaah ts’ą’ mǫǫtaashaa iin, ay ch’ale’ nadahutnaa’aa, huu’įhdląą ts’ą’ ts’ahǫǫt’eh niign dąy xaa’. Łąą’ niign hǫǫ’ ch’ah xaa’ hihtat-shih t’oot’ey hǫǫ’ ch’ah niign k’at’ey daanihtatdee. Ay tł’aan hǫǫ’ ch’ah niign k’eetaat k’at’ey hihtaadiil. Hǫǫ’ k’eexaan duunoo’ hǫhchaah ts’ą’ huu’ootaashaa.
\v 11 Ay eh, T’oodįht’ay ch’its’ąą’ niign t’ay’ huuts’ą’ niitaa’aał ts’ą’, ay xaa’ elshyak niign noo’ uudih łąą’ huuhuhdaaniił.
\v 12 Ay eh, łahtthagn’ doo iin łąą’ niign k’ałąą’ hiiniithan t’oot’ey ts’ahǫǫt’eh niign kaah daniihetdee, ts’ahǫǫtłeek niign huuxaah hǫǫsǫǫ nasaanayh huu’eh uułe’ xaah, ay iin ch’ale’ huu’otnalshaa.
\p
\v 13 \it Christian \it* koht’iin, nühxon huu’ doo iin Neek’ach’ihohłe’ xantsiin, nühxaah ch’ale’ nił k’eenoo’ T’oodįht’ay tsen-’įį ts’enįh. Nühxaah noo’ uudih T’oodįht’ay tsen-’įį edzaaniił. T’oodįht’ay doo iin huutakshih niithan iin tah ts’anh ch’idą’ ch’itah xaah nüh’įįdlah, uchiill’ key’ iin tahłeeł xaah. Dotdeegn’ t’ay’ xaa’ tł’aan łąą’ niign łąy eh uudahnįh xaa’, hǫǫ’ ch’ah det-shyaagn.
\v 14 T’oodįht’ay Aaneegn’ suu’ eh hanühnts’uunehtaan, ay aaneegn’ xaa’ diixaah, “Aan,” nüh’ehnįh. Dinee iin Neek’ach’ihohłe’, \it Jesus Christ\it*, hii’aanah duunoo’ hǫhchaah ts’ą’ utthiiłatdahdal, hǫǫ’ ch’ah Beh łehchinh ahdał xaah, hǫǫ’ ch’ah det-shyaak.
\v 15 Ay eh, \it Christian \it* koht’iin, dįhtayh ts’ą’ na’ahdee tł’aan łąą’ niign hanühnts’uunehtaan hǫǫ’ ch’ah daahuutat-ton’. Hanühnts’uunehtaan eh tł’aan needinahtł’aa’ eh łąą’ niign uudaldii xaah nühdzenįį’.
\v 16-17 Tthihąą’ Neek’ach’ihohłe’, \it Jesus Christ\it*, eh T’oodįht’ay, Neeta’, hǫǫsuu’ ts’ą’ daht’ay nühtł’aach’ootaa’aał tł’aan dahtay nühtahtsayh, huuhįhdląą ts’ą’ hǫǫsuu’ ts’ą’ niign dahniił xaah tł’aan huuhǫhchaah ts’ą’ hǫǫ’ ch’ah tahdiił xaah. T’oodįht’ay neexantsįį’ tł’aan hǫǫtł’at neets’iniiniign xaa’ suunayh neetł’aa’įį’aan hǫǫt’ey nee’eh taat’eeł neetł’aach’oo’įį’ąą tł’aan nts’ąą’ noo’ haathał ts’ą’ uutaashaal aanah neeshyüüt hǫǫsuu’ ts’ą’ neetł’aach’įį’ąą.
\c 3
\p
\v 1 Ch’ik’eetł’üüdn hǫǫ’ duhnįį’ nihthan, hǫǫt’eh. “\it Christian \it* koht’iin, neexaah hithatdalxoh. Neek’ach’ihohłe’ Aaneegn’ ch’ishyon iin xaah hantey’ t’ey noo’ uudih hǫǫ’ taadiił tł’aan łahhiiyuunąy eh hiiyuuniik ts’ą’, nühtah hut-shyaagn k’eetaat, hǫǫ’ ch’ah ts’iiniithanh. Hǫǫ’ xaah ch’ah hithatdalxoh.
\v 2 Ch’ehłaadn’ iin Baaneegn’ k’ałąą’ huudiinąy xaah, neexaah dąą’ch’ah hithatdalxoh: doo iin ts’ahǫǫt’eh hįįłiin tł’aan ch’its’ąą’ tsaadiił nee’eh, hiinįhthan, ay iin ch’a’ tahshih xaah, T’oodįht’ay eh hithatdalxoh.
\p
\v 3 T’oot’ey Doo Huuhǫhchaah ts’ą’ K’ach’ihohłe’ Daaneegn’ k’eetaat det-shyaak. Dįhtayh ts’ą’ nühtł’aach’įį’ąą tł’aan doo ts’ahǫǫt’eh nłiin ch’a’ nühtahshih.
\v 4 Tł’aan nüh’aanah Neek’ach’ihohłe ’łąy eh ts’iiniithanh ts’ą’, nts’ą’ hǫǫ’ tahdiił nühts’enąy hǫǫ’ k’eetaat t’axoh dahdį’ ts’ą’ heets’etnayh. Tł’aan nts’ąą’ hǫǫ’ tahdiił nühts’enąy hǫǫ’ k’eetaat noo’ uudiht’ey tahdiil heets’etnayh.
\p
\v 5 Tthihąą’ Neek’ach’ihohłe’ ndeeh T’oodįht’ay hǫǫtł’at nühxantsiin hee’atnay danh ishiit łąy eh danh t’ey nüh’eh nuutaa’aał. Jan chih: tthihąą’ ndeeh \it Christ \it* t’ay’ xaa’ nił k’eenoo’ uudahnąy tł’aan k’ahedahtsiidn danh ishiit danh t’ey nüh’eh nuutaa’aał.
\p
\v 6 \it Christian \it* koht’iin, Neek’ach’ihohłe’, \it Jesus Christ\it*, Ǫǫsii’ eh datdįhtay eh dąą’ ch’ah nühts’enįh: “Huuhįhdląą ts’ą’ \it Christian \it* koht’iin doo iin nts’ąą’ hants’uunehtan k’eetaat k’ahel’ąy ts’ą’, ts’ohdetniign koht’iin hįįłiin, huuch’a’ an’ hetdaltth’ih.
\v 7 Nts’ąą’ niign ts’įįdiin ndeeh nüh’eh dzeltthii’ dą’ hǫǫ’ ch’ah tahdiil nühxon huu’ hee’atnayh. Ishiit dą’ ts’ohdetniign koht’iin k’ats’iiłay.
\v 8 Ndeeh doot’ey needaatah neetł’aa’įįdlah dą’, ay xaah ch’ah bits’ihuukeet. Tł’aan hǫǫchaa’ ts’atnaa’ ch’idą’ tł’aan neexon xaah needaatah hǫǫsuu’ k’ats’inehtaa’. Dziin tah eh tadn tah noo’ uudih ts’atnaa’, doot’ey k’aneexaah uk’atnahta’ xaah.
\v 9 Hǫǫ’ ch’ah ts’al’įį’, nts’ąą’ niign tsaadiil neets’anh uudaldii xaah. Hǫǫ’ ch’ah ts’al’įį’ t’oot’ey T’oodįht’ay xaah hetnah koht’iin ts’įįłiin eh ayt’oo hǫǫłįį, neets’itahnak xaah nühnts’uunehkat de’ t’ey.
\v 10 Ndeeh nüh’eh dzeltth’ii’ dą’, dąą’ ch’ah nühdziinįį’: “Doo ch’uh’aał iniithan, ay ch’ale’ diishii’ kaah tatnaał.”
\p
\v 11 Ch’ehłaadn’ iin nühtah ts’anh ts’ohdetniign koht’iin hįįłiin, nah’aat dinee iin hǫǫ’ duudiin shįį’ hiiniithanh. Hǫǫ’ ch’ah ndziitth’agn. Hǫǫ’ k’eexaan, k’aaduu’ łahtthagn’ hǫǫ’ niign nühts’enįh.
\v 12 Neek’ach’ihohłe’, \it Jesus Christ\it*, Ǫǫsii’ eh, ay koht’iin ts’ą’ datdįhtay eh dąą’ ch’ah ts’enįh, “Nah’aat dinee iin ach’otnihthiidn koht’iin k’atidhahłeel tł’aan diishii’ ah’aal, ay xaah ch’ah tatnaał.”
\p
\v 13 T’oot’ey nühxon hu’, \it Christian \it* koht’iin, sǫ’ hǫǫsuu’ ts’ą’ niign dahdąy xaah tii’atnee.
\v 14 Jah dinahtł’aa aaneegn’ nühtł’aats’įįdlay, ch’ehłaadn’ nühtah ts’anh k’a’ik’ahootahthadn le’. Ay koht’iin nühtah eedah de’, utnat-shaał, xaah doo jant’ay heetalnayh tł’aan k’at’ey beh łootidhahhaal.
\v 15 T’oot’ey nüh’itsidel’ay sǫ’ naniich’ahdee. Ay dineh \it Christian \it* koht’iin nłįį ts’ą’, heneek eh uts’itahnak, hǫǫsuu’ ts’ą’ niign taadiił xaah.
\p
\v 16 Doo Huuhǫhchaah ts’ą’ K’ach’ihohłe’, Doo neeshyüüt hǫǫsuu’ ts’ą’ neetł’aa’įį’aan, tthihąą’ ay ch’ale’ noo’ uudiht’ey nühshyüüt hǫǫsuu’ ts’ą’ nühtł’aach’ootaa’aał, huu’įhdląą ts’ą’ nił yahch’įą’ niign xaa’. Tthihąą’ Doo Huuhǫhchaah ts’ą’ K’ach’ihohłe’ łąhtthagn’ nüh’eh taat’eeł.
\p
\v 17 Shin xaa’ shįįła’ eh dąą’ jindhihtł’at: “\it Paul \it* nühts’ą’ niidachįnii’ąą.” Nił ch’idanh dinahtł’aa nihtł’adn xaah jant’ay shǫǫsii’ aktsayh.
\p
\v 18 Tthihąą’ Huuhǫhchaah ts’ą’ K’ach’ihohłe’, \it Jesus Christ\it*, łahtth’agn’ hǫǫtł’at nühts’itaanak.