\id 1TI - Upper Tanana Athabascan Indian (Tetlin dialect) NT [tau] - USA 2013 (web 2014)
\h 1 Timothy
\toc1 Paul Dinahtł’aa Ch’itheh Danh Timothy ts’ą’ Neetł’at
\toc2 1 Timothy
\toc3 1Ti
\mt1 \it Paul\it* Dinahtł’aa Ch’itheh Danh \it Timothy\it* ts’ą’ Neetł’at
\c 1
\p
\v 1 Shin ch’ah \it Paul \it* dąą’ jindhihtł’at. T’oodįht’ay Daaneegn’ \it Christ Jesus \it* aanah eh shteh’a’. T’oodįht’ay, Doo nee’ehshii, eh \it Christ Jesus\it*, Doo neexaah nataadaal, nts’ąą’ niign hǫǫ’ shihdiinįį’ k’eetaat jindhihtł’at.
\v 2 \it Timothy\it*, nts’ą’ dąą’ ch’ah jindhihtł’at. Łąy eh sts’eeninn’ k’eh dįįt’ay, shaaneegn’ eh \it Jesus \it* łąy eh uudįįnąy xaah. Tthihąą’ T’oodįht’ay, Neeta’, eh \it Christ Jesus\it*, Doo Neek’ach’ihohłe’, hǫǫtł’át nits’ihtaanak tł’aan teejuh nihuhdaaniiłtł’aan ndzee’ shiit hǫǫsuu’ ts’ą’ ntł’aahiitaa’aał.
\p
\v 3 \it Ephesus \it* key danh ǫǫda’ yinihthanh, \it Macedonia \it* nan’ k’et ts’ą’ tidhihshay k’eh dą’ hǫǫ’ ndihnįį’ k’eh. Ishiit key ch’its’ąą’ hach’ihuhnehtan iin, “Ena’,” huudįįnįh.
\v 4 Ay iin dąą’ chih huudįįnįh: “\it Jew \it* noonak k’eet k’ałąą’ uułay sǫ’ udahtth’agn. \it Jew \it* noonak k’eet huutthaay’ iin ǫǫsii’ nettł’adn aanah, ay chih sǫ’ udahtth’agn. Ay noonagn ts’anh dinee iin łitdatdzutxąą’ hiiniithanh. Ay noonagn neexaah k’ahuułay, T’oodįht’ay hǫǫ’ nahooholnagn k’at’ey Baahuusuuy xaah. Nts’ąą’ koht’iin T’oodįht’ay ahłe’ niithan, ay ch’ah łąy eh uudahnąy xaa’ hee’iitatnayh.”
\v 5 T’oot’ey hǫǫ’ huudįįnįh ndihnąy, nił xaah hihtattsįį’ xaah. Huushyüüt hǫǫsuu’ ts’ą’ hǫǫłįį de’ t’ey tł’aan huu’įįnįį’ k’adii ts’ą’ hedadaltsal de’ t’ey, tł’aan łąą’ \it Jesus \it* łąy eh hiiniithanh de’ t’ey, ay xaa’ ch’ale’ nił xaah hihtattsįį’.
\v 6 Ch’ehłaadn’ iin duunoo’ hǫǫsǫǫ niign ch’a’ ch’iduugn thadelxoh niign tah haadał. Shyąą’ hohhǫǫhee niign.
\v 7 Jan iin T’oodįht’ay nach’uudah’iin xaah hants’uunuhtan xaah henįh t’oot’ey daaneegn’ t’ey its’ihetniign tł’aan dii hǫǫchaa’ hiixaah thahdelxoh t’ey its’ihetniign.
\p
\v 8 T’oodįht’ay nach’uudah’iin niign ch’ah hǫǫsoon hach’uuneltan de’, ch’ah dinee xaah utaasuul hits’etnayh.
\v 9 T’oodįht’ay nach’uudah’iin niign dinee suu’ iin xaah k’ahuut’ay, t’oot’ey dinee ts’antłeegn iin xaah shįį’ ch’ah hǫǫt’ay hits’etnayh. Dąą’ xaah hǫǫt’ay: doo iin nach’uudal’iin niign k’eetaat k’ahel’ąy iin eh k’at’ey ch’ik’ahohdee iin xaah; tł’aan doo iin T’oodįht’ay k’įą’ hel’ąy iin eh doo iin huuts’ant’ay’ hǫǫłiin iin xaah; tł’aan doo iin hǫǫsǫǫ niign k’ahel’ąy iin eh doo iin T’oodįht’ay k’eetaat k’ahel’ąy iin xaah; tł’aan doo iin diita’ dhehxeegn iin eh doo iin diinąą dhehxeegn iin xaah; tł’aan doo iin dineh dhehxeegn iin xaah.
\v 10 Dąą’ xaah chih hǫǫt’ay: doo iin ts’exeh k’ayuunagn eh eeday iin xaah; dineh łaakey iin nił eh heltiat, nił ts’ahǫǫtłeek ts’ą hul’iin xaah; ay iin ch’ah xaah; tł’aan doo iin dineh ch’ine’iin iin xaah; tł’aan elshyagn dinee iin xaah; tł’aan doo iin shyąą’ t’ey ch’iniidohdii’aadn iin xaah; tl’aan doo iin łąy eh nach’uuneltan ch’a’ hel’ąy iin xaah. Hǫǫ’ ch’ale’ nach’uudal’iin hǫǫt’ay.
\v 11 T’oodįht’ayłąy eh niign hach’uunehtan shtł’aahǫǫdlay k’eetaat hǫǫ’ ch’ah hach’uuneltan. Ay ch’ale’ uxaa’ uudįįt’ay tł’aan Doo Daaneegn’ xaa’ dinee ts’iniiniik.
\p
\v 12 Tsen-’įį \it Christ Jesus\it*, Neek’ach’ihohłe’, xaah ihłįį, ishnay xaah sht’ay’ huh’įh. Dii ch’ale’ ayt’oo shuunąy tł’aan Dii ch’ah ch’itah haashįhtiin, Baa ishnay xaah.
\v 13 Hitthééh dą’ ts’ahǫǫt’eh ts’ą’ t’ey Baa huhhee. Ay tł’aan Uchiill’ key’ iin ts’ą’ ts’anii’agnt’eh t’oot’ey dąą’ ch’ale’ shiiłaagn. Uk’įą’ chih ch’ale’ daadihdlih. Ay t’oot’ey ch’ale’ T’oodįht’ay teejuh shuunąy. Hittheeh dą’ k’at’ey łąy eh uudihnąy eh, nts’ąą’ dihdįį’ ts’ą’ hits’ishniign. Xaah ch’ah hǫǫ’ dihdįį’.
\v 14 Ay tł’aan Neek’ach’ihohłe’ łąy eh uk’ahokthadn eh dineh iin haa’uhtsįį’ xaah, hǫǫtł’at sts’iniiniik. \it Christ Jesus \it* eh łehchinh ts’eedeel eh, jan ch’ale’ T’oodįht’ay neetł’aa’įįdlay.
\v 15 Dąą’ łąy eh hǫǫ’ nąy hǫǫt’eh. Ch’ale’ hich’ihdahtth’ak tł’aan łąy eh ch’ale’ hiiyutaaniił. \it Christ Jesus \it* doo iin huuts’ant’ay’ hǫǫłiin iin uhshih xaah, ch’ale’ jan nan’ k’et niishyah.
\v 16 Huutah ts’anh hǫǫcháá’ t’ey ts’a’ihtłeek. Ay xaah ch’ale’ T’oodįht’ay hǫǫcháá’ teejuh shuunįh. Hǫǫ’ xaa’ t’ey ch’ale’ ch’ehłaadn’ iin nts’ąą’ shaa det-shyaak xaa’, ch’ale’ łąy eh hiiyutdaaniił tł’aan duunoo’ hǫhchaah ts’ą’ hohtaanayh.
\v 17 Ay eh T’oodįht’ay, duunoo’ hǫhchaah ts’ą’ t’ey haskeh nłiin, k’at’ey tahteel, k’at’ey doot’ey hitnah’iil, diishįį’ ch’ale’ T’oodįht’ay nłiin, Ay ch’ale’ dinee iin hii’aanah doodįhsoon shįį’ duunoo’ hǫhchaah ts’ą’ utthiiłatdahdał. Hǫǫ’ huułe’.
\p
\v 18 \it Timothy\it*, sts’eeninn’, jah heneek huu’įhdląą ts’ą’ ntł’aadatdihdlah, T’oodįht’ay xaah hǫǫhee naa hǫǫ’ dįįnįį’ k’eetaat chidą’. Jah heneek ch’ale’ beh ts’ant’ay oots’ee’ ts’ą’ naabaa tįh’iil hǫǫsǫǫ niign.
\v 19 Nan ch’ale’ łąy eh utdiiniign dįįt’ay tł’aan nįįnįį’ suu’ hǫǫłiin. Ch’ehłaadn’ iin dįįnįį’ suu’ k’eetaat k’ahel’ąy. Hǫǫ’ hetdąy eh ch’ah hǫǫsǫǫ hach’uuneltan k’at’ey k’ahiihohthadn. Hǫǫ’ ch’ah niign hich’ihuhneh’ąy ts’ą’ hǫǫsuu’ hach’uuneltan ch’a’ ch’itduugn tah hihteedeeł.
\v 20 \it Hymenaeus \it* eh \it Alexander \it* ay koht’iin ch’ale’ hįįłiin. Jan iin ch’ale’ \it Satan \it* tł’aahuu’ihdlay, nts’ąą’ huu’ok-’įį’ niithan ts’ą’ huu’uh’įį’ xaah. Dąą’ huu’oonelshaa, hiixaa’ uduldii xaah, T’oodįht’ay k’įą’ ts’ahǫǫt’eh ts’ą’ k’anahoohuudeel xaah.
\c 2
\p
\v 1 Tthee’ nts’ąą’ hithadzulxoh niign aanah huhhee. T’oodįht’ay ts’ą’ dinee iin huuhįhdląą ts’ą’ xaah hithadzulxoh. Huuxaah hithadzulxoh, T’oodįht’ay dii ihiiniithan eh uts’itaanak xaah. Ndeeh ithadzelxoh danh, T’oodįht’ay neets’iniiniign xaah, “Tsen-’įį,” udzuunįį’.
\v 2 Haskeh choh iin tł’aan ch’ehłaadn’ ch’inłiin huuhįhdląą ts’ą’ xaah hithadzulxoh. Ay iin xaah hithadzulxoh, T’oodįht’ay xaah łąy eh ts’ul’įį’ xaah tł’aan hǫǫsǫǫ niign ts’uudįį’ xaah. Ay eh ch’ehłaadn’ k’ants’ą’ neehdaaniil tł’aan k’ahuuts’ą’ huudzaaniil. Hǫǫ’ ch’ah hǫǫsǫǫ.
\v 3 Hǫǫ’ ch’ah eh, T’oodįht’ay, Nee’ehshii, Baahǫǫsǫǫ.
\v 4 Ay ch’ale’ dinee iin huuhįhdląą ts’ą’ huu’uhshih xaah łąą’ niign heehutnayh iniithanh.
\v 5 Ay ch’ah jan xaah: ts’ehłagn T’oodįht’ay nłįį tł’aanTs’ehłagn Doo dinee iin eh T’oodįht’ay daatagn łnatdatjaałeel. Ay ch’ale’ ay Dineh, \it Christ Jesus \it* nłįį.
\v 6 Ay ch’ah ehtįį, dinee iin huuhįhdląą ts’ą’ ts’ahǫǫt’eh niign ch’a’ uhshii xaah. Ishiit danh T’oodįht’ay dinee huuhįhdląą ts’ą’ huu’uhshii iniithan huu’iich’ooneh’įh.
\v 7 Ay heneegn’ suu’ xaah, T’oodįht’ay haashįhtįį, shuh’a’ xaah tł’aan dinee iin \it Jew \it* k’a’iiłay iin hach’uunoktan xaah. T’oodįht’ay haashįhtįį, nts’ąą’ łąy eh huunąy aanah tł’aan łąą’ niign eh huhhee xaah. K’a’agnshyagn. Łąy eh ndihnįh.
\p
\v 8 Dineh iin nił chidanh iin hithahdulxoh nihthanh. Ay dineh iin T’oodįht’ay itł’aa’idalshay iin huułe’ tł’aan hithahdelxoh danh, ts’aniihelt’eh tł’aan łitdahdetxaan koht’iin t’ey k’ahuułe’.
\p
\v 9-10 Ts’exee iin hǫǫsuu’ ts’ą’ huudiin huudįįnįh nihthanh. Dinee iin nts’ąą’ niign hel’ąy xaa’ \it Jesus \it* łąy eh huunąy kohtįin hįįłiin huu’ehtatnayh. Ay eh hǫǫ’ hǫǫsǫǫ. Ts’exee iin dąą’ hahuu’uunaktanh: “Hǫǫsuu’ ts’ą’ at-tł’uu’ ch’ah daht’ay. Ch’iill’ diitł’adn eh na’itdat-tł’uuk de’ t’ey tł’aan nühtthii’ xaa’ hǫǫsuu’ ts’ą’ naa’ahtsiik de’ t’ey, sǫ’ hǫǫ’ dahdiin, dinee iin shįį’ nühhihnah’iil xaah.
\v 11 Thaat-’ehdanh k’adatjetküü danh dineh iin ts’anh utdaldii, nühnaatthii’ hįįłiin xaah.
\v 12 Dineh iin sǫ’ hats’uunuhtan nahthiin eh huunaatthii’ sǫ’ ts’uułe’ nahthiin. Thaat-’ehdanh k’adatjetküü danh utdaldii.”
\v 13 Ay ch’ah, jan xaah ch’ale’: T’oodįht’ay dineh \it Adam \it* mǫǫsii’ ch’ittheh ehtsįį. Ay tł’aan ts’exeh \it Eve \it* mǫǫsiį’ ehtsįi.
\v 14 Jan chih. \it Satan Adam \it* k’ananii’aagn. T’oot’ey ts’exeh nanii’aak tł’aan ch’its’ąą’ niign det-shyaak.
\v 15 \it Eve \it* ch’its’ąą’ niign det-shyaak. T’oot’ey Doo teethadn eh Bihǫǫłiin, Ay ch’ah yihshih. Ay k’eh T’oodįht’ay ts’exee iin łahtthagn’ huutahshih, łąy eh hiiyuuąy de’ tł’aan hiixantsįį’ de’ tł’aan Iik’eetaat niign hihtaadiił de’ tł’aan huu’įįnįį’ taasuuł de’.
\c 3
\p
\v 1 Dąą’ łąy eh hǫǫ’ nąy hǫǫt’eh. Doo dine’ gįįhee doo iin \it Jesus \it* łąy eh huunąy k’anehtaa’ uhłe’ niithanh de’, ay ch’ah hǫǫsǫǫ niign iniithanh.
\v 2 Ay dineh ch’its’ąą’ niign k’at’ey det-shyaagn. Jan k’eh koht’iin taałeeł: ts’ehłagn shįį’ u’aat taałeeł; mįįnįį’ taasuuł; diishinh hǫǫsuu’ ts’ą’ k’atnahta’; hǫǫsǫǫ niign taadiił; haltthaan iin hǫǫsǫǫ katnahta’; utdaldii xaah hach’uunehtan suu’ taałeel;
\v 3 ch’etnąą dine’ k’ataałeel; łi’ushxąą’ t’ey k’a’itnahthiil; t’oot’ey hii’ach’idoodehthiit de’ t’ey, hǫǫsuu’ ts’ą’ koht’iin taałeeł; łitdatdushxąą t’ey k’a’itnahthiil; lesüü kaah k’at’ey daaniitat-thiidn;
\v 4 dii’aat eh diits’įįkey’ iin nts’ąą’ hǫǫsuu’ k’anehtaa’ heetatnayh, ay eh diits’įįkey’ iin łahhiiyuunąy eh hiik’ahohdee.
\v 5 Hǫǫ’ ch’ah uułe’ dąą’ xaah. Doo dine’ dii’aat eh diits’įįkey’ iin nts’ąą’ hǫǫsuu’ k’anehtaa’ hits’etniign de’, doo iin T’oodįht’ay łąy eh uunąy iin nts’ąą’ hǫǫsuu’ ts’ą’ k’anehtaa’ hitsatniign.
\v 6 Dineh T’oodįht’ay k’adiide’ shįį’ ts’anh łąy eh uunąy k’ataałeel. K’adiide’ shįį’ ts’anh łąy eh uunąy de’, ay ch’ale’, “Ihchaa,” naathiił tł’aan hǫǫ’ ch’ah xaah bootnalshaa. \it Satan\it*, “Ihchaa,” niithanh ts’anh hǫǫ’ ch’ah hut-shyaak.
\v 7 Ay tł’aan ay gįįhee jan chih k’eh koht’iin taałeeł: doo iin T’oodįht’ay k’ałąą’ huunąy iin ay iin t’ey łahhiiyuudaaniił. Ay de’, tł’aan nts’ąą’ det-shyaagn xaah k’a’utnat-shyaal tł’aan ishiit de’ \it Satan \it* eell’ shiit k’ataltth’al.
\p
\v 8 Dineh iin doo \it Jesus \it* łąy eh uunąy iin aanah nahuhnay’ xaah ch’ita haahuu’įįdlah iin hįįłiin, \it deacons \it* mǫǫsii’, ay iin chih ch’its’ąą’ niign k’at’ey hihtaadiił. Jan k’eh koht’iin hihtaałeeł: sǫ’ huuthaat łaakey hult’e’; ch’etnąą dine’ k’ahtahłeel; lesüü kaah k’adaanihtatdee;
\v 9 ay iin T’oodįht’ay Aaneegn’ łąy eh hiiyuudaaniił, dįįnįį’ suu’ eh. Ay łąą’ niign T’oodįht’ay Daaneegn’ ts’anh nee’iich’ooneh’įh.
\v 10 Ay iin tthee’ k’ahahnayh. Ay iin ayt’oo nsǫǫ de’ t’ey, ay tł’aan \it Jesus \it* łąy eh uunąy iin aanah nahuhnay’ xaah ch’itah haahuhtaałeeł.
\v 11 Ay iin huu’aat iin chih ch’its’ąą’ niign k’at’ey hihtaadiił. K’ach’aahuhtaaheel. Ay iin huu’įįnįį’ hǫǫsǫǫ hihtaałeeł tł’aan ay iin t’anihdaht’eeł.
\v 12 Doo iin \it deacon \it* iin hįįłiin, jan k’eh chih koht’iin hihtaałeeł: ay iin chih huu’aat ts’ehłagn shįį’ taałeeł tł’aan dii’aat eh diits’įįkey’ iin nts’ąą’ hǫǫsuu’ k’anehtaa’ heehtatndayh.
\v 13 Doo iin hǫǫsuu’ ts’ą’ hetnah iin łahhuunąy iin hihtaałeeł tl’aan nts’ąą’ \it Christ Jesus \it* łąy eh huunąy aanah k’ahihnaljiidn ts’ą’ \it Jesus \it* xaah huhtaaheeł.
\p
\v 14 Nts’ąą’ jindhihtł’adn eh hantey’ nts’ą’ tuhshya’ nihthanh.
\v 15 T’oot’ey shookol de’, jan dinahtł’aa nts’ąą’ nił ts’ą’ ts’uudįį’ hǫǫ’ nįh. Neexon T’oodįht’ay łąą’ ts’iniithan iin T’oodįht’ay honayh ts’ą’ ts’įįkey iin ts’įįłįį. Neexon huu’ T’oodįht’ay łąą’ niign k’eetaat hotdį’ tł’aan ay łąą’ niign aanah ch’ehłaadn’ hǫǫ’ huuts’enįh.
\v 16 Nts’ąą’ \it Jesus \it* aanah łąy eh ts’uunąy ch’aa’ hulshyaagn nt’ay. Ay ch’ah hǫǫtł’at łąą’ niign nt’eh! Dąą’ \it Jesus \it* aanah łąy eh ts’uunąy: 
\li Koht’iin k’eh dishoodelt’įį. 
\li \it Holy Spirit \it* xaa’ tth’utdee’ay niign diidįį’. 
\li T’oodįht’ay Aaneegn’ nadatdełeegn iin (\it angels\it*) hiinih’įį’. 
\li Doo iin \it Jew \it* k’a’iiłay iin tah Maanah hach’uhnehtanh. 
\li Dinee iin nan’ k’et huuhǫhchaah ts’ą’ ch’idanh ts’anh łąą’ hiiyuunįh.
\li Tł’aan dagn nan’ k’et niidiltįį.
\c 4
\p
\v 1 \it Holy Spirit \it* Heneek hǫǫhee eh, dąą’ nįh, “Ndeeh noo’ danh ch’ehłaadn’ dinee iin nts’ąą’ \it Jesus \it* aanah łąy eh huunąy ch’a’ łtahtaadał.” Ay ch’ah dinee iin dąą’ uhtaałeeł: ay iin gǫǫ shyüüt elshyak ts’ą’ eh nts’ąą’hach’ihuunehtan t’ey iik’ahohtahdee.
\v 2 Helshyagn dine’ iin hįįt’ay, chehłaadn iin nanduuhihnaa’aa. Ay iin ts’anh ch’ale’ ay ch’its’ąą’ niign hach’ihuunehtan hǫǫłįį. Huu’įįnįį’ ch’iitsay nelkün’ eh heet’eh de’ k’eh, huu’įįnįį’ k’otdatniik. Hǫǫ’ k’eexaan T’oodįht’ay k’at’ey k’ahoohohdee.
\v 3 Ay iin ch’its’ąą’ niign hach’uhnehtanh. Dąą’ henįh, “Sǫ’ huu’ahnii! Sǫ’ ch’ehłaadn’ shii’ ah’aal!” Hǫǫ’ hach’uhnehtanh t’oot’ey T’oodįht’ay ay shii’ ihxąą, hiiyuldeel xaah. Doo iin \it Jesus \it* łąy eh huunąy tł’aan łąą’ niign heehetnay iin, tthee’ T’oodįht’ay, “Tsen-’įį,” ihdaaniił tł’aan ay shii’ nahtaa’aał.
\v 4 Diit’ey huu’įhdląą ts’ą’ T’oodįht’ay ehtsįį. Ay ch’ah huu’įhdląą ts’ą’ nsǫǫ. Huu’įhdląą ts’ą’ neexaah nt’eh tł’aan ay xaah tsen-’įį eh hithadzulxoh.
\v 5 T’oodįht’ay Aaneegn k’eetaat ts’el’įh de’ eh tsen-’įį eh hithadzelxoh de’, tł’aan ayt’oo ay natsaa’aał.
\p
\v 6 \it Timothy\it*, \it Christian \it* koht’iin hǫǫ’ ch’ah huudiiniił de’, dineh \it Christ Jesus \it* xaah etnah suu’ tįįłeeł. Heneek \it Jesus \it* łąy eh uunąy aanah tł’aan heneek łąą’ niign hach’uunehtan aanah k’eetaat dįįdį’. Hǫǫ’ xaah ch’ah T’oodįht’ay diit’ay’ Baa ǫǫna’ xaah ntł’aa’įį’ąą. Ay heneek k’eetaat dįįdįį’.
\v 7 T’oot’ey T’oodįht’ay uk’įą’ noonagn ch’a’ łtaa’ǫǫshya’. Ay ch’ah shyąą’ naholnak. T’oodįht’ay k’eetaat niign dǫǫdįį’ xaah, ay ch’ah udǫldii.
\v 8 Hetk’įą’ niign hǫǫsǫǫ t’oot’ey T’oodįht’ay k’eetaat niign duudįį’ xaah udeldii ay ch’ahnoo’ hǫǫsǫǫ. Doo T’oodįht’ay k’eetaat niign diidiin, ay ch’ale’ k’aaduu’ hǫǫsuu’ ts’ą’ beh huu’ąą tł’aan duunoo’ hǫhchaah ts’ą’ utaanayh.
\v 9 Nts’ąą’ ndihnįį’ niign łąy eh ch’ale’ hǫǫt’ay. Ch’ale’ itjahtth’ak tł’aan łąy eh ch’ale’ utdahniil.
\v 10 Dinee iin \it Jesus \it* łąy eh huunąy xaah, ay ch’ah aanah ts’etnah shįį’ tł’aan T’oodįht’ay łąy eh ts’uunįh t’oot’ey neek’įą’ dahdetdlih ts’ą’ nee’etsihdel’ah. Hǫǫ’ ch’ah ts’įįdį’, T’oodįht’ay honayh ts’ą’ łąy eh ts’uunįh xaah. Ay ch’ale’ diinee iin huuhįhdląą ts’ą’ huu’okshih niithanh. T’oot’ey doo iin łąy eh yuunąy iin shįį’ huu’ehshih.
\p
\v 11 Hǫǫ’ ch’ah hohduldii xaah dąą’ huudǫǫnįį’ tł’aan datdįhtay eh huudǫǫnįį’.
\v 12 Ch’ehłaadn’ dinee iin k’ałahnihuhdiinąy, chiił įįłin xaah. K’ahǫǫ’ hihtaadiil t’ey. T’oot’ey nts’ąą’koht’iin dadįįłįį eh, nts’ąą’ koht’iin dįįdį’ eh, nts’ąą’ koht’iin baa’įįtsįį’ eh, nts’ąą’ koht’iin łąy eh uudįįnįh eh, nts’ąą’ nshyüüt hǫǫsoon tth’utdee’ay eh, hǫǫ’ ch’ah k’eexaan, uk’eetaat duhdįį’ hiitnaathiił.
\v 13 Ndeeh dinee iin \it Church \it* shyah shiit łehchinh hetdagn danh, T’oodįht’ay Aaneegn’ utnet-tł’adn ǫǫsii’. Hach’uunohtanh tł’aan hohduldii xaah dąą’ huudǫǫnįį’. K’ahduu’ ts’anh nuuniithadn nts’ą’ tihhaał danh ts’ą’, ay niign ch’ale’ ǫǫna’.
\v 14 Dii T’oodįht’ay Baa ǫǫna’ xaah Dootdeegn’ ntł’aa’įįdlah ts’ą’, ay xaa’ ch’ah Baa tinaał. T’oodįht’ay xaah hǫǫhee iin naanah henįh dą’. \it Christian \it* ch’indadn’ iin T’oodįht’ay xaah ǫǫna’ xaah diiła’ nk’et daa’eedlah dą’, Ishiit danh T’oodįht’ay nuuniik, Baa ǫǫna’ xaah.
\v 15 Nts’ąą’ niign hǫǫ’ ndihnąy k’eetaat dǫǫdįį’. Ay de’, dinee iin huuhįhdląą ts’ą’ \it Jesus \it* niign k’eetaat tay’ t’ey noo’ t’ey uk’eh dįįdį’ de’ nich’otnah’iił.
\v 16 Nts’ąą’ dįįdiin niign tł’aan nts’ąą’ hohduldii xaah dąą’ huudįįnąy niign kaah hach’uudįl’įį’. Nts’ąą’ niign hǫǫ’ ndihnąy k’eetaat dǫǫdįį’, noo’ t’ey hǫǫ’ t’ey dǫǫdįį’. Ay de’, doo iin ndiitth’agn iin ch’its’ąą’ niign ts’anh huutįhshih. Nan hu’ chih ch’its’ąą’ niign ts’anh itdįlshih.
\c 5
\p
\v 1 Doo ch’itay nłiin sǫ’ ts’anii’ǫlt’e’ uts’ą’ hǫǫheel, t’oot’ey ayt’oo nta’ ts’ą’ hǫǫsuu’ ts’ą’ udįįnąy niign k’eh, ch’itay hǫǫ’ ch’ah utdįįdiił. Tł’aan nchiill’ iin ts’ą’ hǫǫsuu’ ts’ą’ huudįįnąy niign k’eh, dineh iin hǫǫ’ ch’ah hutdįįdiił.
\v 2 Nnąą ts’ą’ hǫǫsuu’ ts’ą’ udįįnąy niign k’eh, ts’ist’e’ iin hǫǫ’ ch’ah hutdįįdiił. Tł’aan ndia’ ts’ą’ hǫǫsuu’ ts’ą’ udįįnąy niign k’eh, ts’exee iin nshyüüt hǫǫsoon tth’itdee’ay eh hǫǫ’ ch’ah hutdįįdiił.
\p
\v 3 Doo ts’exeh ukąy’ uch’a’ ehtiin iin doo iin huuxaah uk’atnahtaa’ bookol de’, ay ch’ah łahhuu’uudǫǫnįį’.
\v 4 T’oot’ey ts’exeh ukąy’ uch’a’ ehtiin uts’eeninn’ eh uchaay’ iin hǫǫłįį de’, ay iin ch’ale’ huuxaah uk’atnahtaa’. Nts’ąą’ T’oodįht’ay hǫǫ’ huudįį’ niithan, diitsay eh diitsǫǫ eh diita’ eh diinąą xaah, ay iin ch’ale’ tthee’ dąą’ ch’ah hihtaadiil. Ay ch’ah xaa’ k’eehuuhel’įh. Hǫǫ’ ch’ah niign T’oodįht’ay Baahǫǫsǫǫ.
\v 5 Doot’ey ts’exeh ukąy uch’a’ ehtiin łąy eh nłiin, uts’eeninn’ eh uchaay’ iin bookol de’, T’oodįht’ay dagn ts’anh hǫǫchaa’ behǫǫt’eh hee’etnayh. Ay ts’exeh dziin eh tadn tah hotniidee, uts’ootaanak xaah.
\v 6 T’oot’ey doo ts’exeh ukąy’ uch’a’ ehtiin ch’uh’aał tł’aan ch’ushnąą’ shįį’ iniithanh, ay ch’ale’ ts’ooniiniign koht’iin nłįį. Ehtįį k’eh t’oot’ey tth’ihtah honayh.
\v 7 Koht’iin iin, “Dąą’ ch’ah dahdį’,” huudįįnįh, ay de’ doot’ey k’at’ey yaanoo tahdeel.
\v 8 Doo yuudelkan iin k’at’ey huukaah unih’iin de’, łąy eh diitsǫǫ eh haa’ diinąą eh de’ t’ey, ay ch’ale’ T’oodįht’ay Aaneegn’ k’ak’ahohthadn ch’a’ łtaa’inshyah. Ay koht’iin doo k’at’ey \it Jesus \it* łąą’ iniithan ch’ahnoo’ ts’ahǫǫtłeek.
\p
\v 9 Ts’exeh ukąy’ uch’a’ ehtiin iin huu’ǫǫsii’ ch’uukaa’ǫǫ’ay, doo iin \it Jesus \it* łąy eh uunąy iin łahtthagn’ łehchinh heedel iin huuk’ahnuhta’ xaah. T’oot’ey doo ts’exeh ch’ittheh łk’eetaagndeetaan xay’ bihǫǫłe’, ay ch’ale’ sǫ’ mǫǫsii’ ch’uukaa’ǫǫ’ay. Doo ts’exeh mǫǫsii’ ch’uukaa’ee’aan ts’ehłagn danh shįį’ kąy’ xaah taadaał.
\v 10 Doot’ey hǫǫsuu’ ts’ą’ niign diidiin ay ch’ah heehetnayh. Dąą’ k’eh diidįį’: ts’įįkey nihshąą, haltthaan iin hǫǫsuu’ ts’ą’ k’anehtaa’, T’oodįht’ay chiill’ key’iin ke’ na’ech’oot, dinee unoo hǫǫt’ay iin k’anehtaa’, hǫǫdląą hǫǫsǫǫ niign diidįį’.
\p
\v 11-12 T’oot’ey doo ts’exeh ch’ittheh łk’eetaagn deetaan xay’ bihǫǫłe’, ay ch’ale’ sǫ’ u’ǫǫsii’ ch’uukaa’ǫǫ’ay. Ay ts’exeh t’aadii \it Christ \it* dąą’ itdaaniił, “Naa ushna’ xaah k’at’ey nahuutidhihnagn.” Uteethadn eh ch’its’ąą’ naniich’etthadn. Soo’ tth’ihtah daanidel’ay eh, tay’ t’ey nahuhnii iniitthanh. \it Christ \it* hǫǫ’ idiinįį’ t’oot’ey k’a’ik’eetaat koht’iin iiłeel. K’ahuułay ts’ą’ det-shyaak.
\v 13 Jan chih, T’aadii ts’exeh tay’ t’ey k’anahuunagn shyąą’ t’ey diidąy udeldii eh kün’ tah, shyah tah hah’aat chiidaa’ehaak. Dinee iin aanah ch’aa’ineegn shįį’ deldii. Kün’ tah natetdaagn k’ahuusuy ts’ą’, hǫǫhee dotnihnoh.
\v 14 Ay xaah ch’ale’ t’aadii u’ǫǫnii inihthanh. Uts’įįkey’ taałeeł tł’aan diishyah k’atnahta’. Ay de’ neets’ą’ ts’anii’elt’ay iin ts’ahǫǫt’eh ts’ą’ nee’aanah k’ahuutahheel.
\v 15 Ch’ehłaadn’ ts’exee iin ukąy’ uch’a’ ehtiin iin ch’ittheh T’oodįht’ay eh łooniishyah tł’aan k’aaduu’ \it Satan \it* ts’ant’ay mǫǫsiį’ k’ahuhthat, iik’eh aahaał.
\v 16 Doo ts’exeh \it Jesus \it* łay eh niithan, yuudelkan ts’anh ts’ehłagn ts’exeh ukąy’ uch’a’ ehtiin de’, ay ch’ah iik’atnahta’. Ts’exeh ukąy’uch’a’ ehtiin diishįį’ eeday doot’ey iik’anehtaa’ kol de’ t’ey, doo iin \it Jesus \it* łąy eh niithan iin łahtthagn’ łehchinh heedeel iin, ay iin ch’ah hiik’atnahta’.
\p
\v 17 \it Christian \it* ch’indadn’ doo ch’ittheh hǫǫsuu’ tatdaadal iin, ay ch’ale’ hǫǫsǫǫ ts’ą’ daadąy iin nił k’eek’et huu’ihuutatkeet. Doo iin hǫǫchaa’ hetnaa iin hach’ihuhnehtan eh hohduldii xaah hahuu’uunehtan, ay dineh iin łąą’ nił k’eek’et huu’ihuutatkeet.
\v 18 T’oodįht’ay Aaneegn’ utnet-tł’adn dąą’ nįh: “Noon \it ox \it* mǫǫsii’ et-’aal neshyee ts’anh łiat ehxaan iik’et natetdaagn eh, sǫ’ uthaat k’et ch’uudǫhchüü. \it ox \it* ts’eehoh’įh ts’ą’ t’ey, neshyee dinee iin yuu’aal xaah diik’üh ch’inehxoł, ay ts’anh diit’ah ch’uldeel.” T’oodįht’ay Aaneegn’ utnet-tł’adn dąą’ chih nįh: “Doo ts’eehoh’ąy iin ch’ah huu’ihuukeet.”
\v 19 Doo niiniishay \it Christian \it* ch’indadn’ ch’its’ąą’ niign det-shyaagn hǫǫ’ nehnįh de’, sǫ’ dǫǫtth’agn. T’oot’ey dinee iin łaakey eh taagn eh nił eh niihindeeł de’ shįį’, huudǫǫtth’agn.
\v 20 \it Christian \it* ch’indadn’ ch’its’ąą’ niign huhtsiin, ay dineh baa niiniihay ts’ą’ dinee iin naał jah niinihtee. Dinee iin naał nts’ąą’ ch’its’ąą’ niign det-shyaak hǫǫ’ huudǫǫnįį’. Hǫǫ’ dįįdį’ de’, aat ch’ishuy dineh iin ch’its’ąą’ niign huudiin ts’ą’ t’ey ihnaljiit.
\p
\v 21 T’oodįht’ay eh Ushye’e \it Christ Jesus \it* eh T’oodįht’ay Aaneegn’ nadatdełeegn dagn nan’ k’et hihdeltth’ii iin, ay iin dąą’ ndihnąy heehetnayh: “Nts’ąą’ ndihnąy shk’eetaat ǫl’įį’; doo \it Christian \it* ch’indadn’ ch’its’ąą’ niign det-shyaagn iin, niłxaah nshyüüt hǫǫsuu’ ts’ą’ tidhih’ąą; ay dineh iin ts’ehłagn ch’ich’ahshiit ts’ą’, sǫ’ baa’ǫntsiin (Ndlaan t’ey helt’eh ts’ą’ t’ey, ts’ehłagn k’eh t’ey huuxaah tįįsįį’. Ay eh hǫǫsuu’ niign taania nihuutįįłeeł.);
\v 22 nła’ dineh k’et da’ǫǫ’ay de’, T’oodįht’ay xaah ts’eehuh’iin xaah, sǫ’ hantey’ t’ey hǫǫ’ dǫǫdiin; doo dinee iin huu’oots’ee’ ts’ant’ay iin, sǫ’ huu’eh hǫǫ’ dǫǫdiin; Nan xaa’ hǫǫsuu’ ts’ą’ k’aniltaa’, ts’ahǫǫt’eh ts’ą’ k’at’ey dįįdiil xaah.
\p
\v 23 “Sǫ’ tuu shįį’ ǫǫnaan. T’oot’ey nshiit utahts’iik shįį’ t’ey tiit’eeł, jign tu’ tsiin ǫǫnaan, nshiit xaah.”
\p
\v 24 Ch’ehłaadn’ iin nts’ąą’ ts’ahǫǫt’eh ts’ą’ daadąy niign, k’aaduu’ ts’ą’ t’ey dinee iin huu’ihetnayh. Dinee iin ts’ahǫǫt’eh ts’ą’ dahdąy xaah, T’oodįht’ay taania hutdahtth’iił. Hǫǫ’ ch’ah dinee iin huu’ihetnayh. Ch’ehłaadn’ duu’ nts’ąą’ ts’ahǫǫt’eh ts’ą’ daadąy niign, k’aaduu’ ts’ą’ t’ey dinee iin huu’its’ihetniign, t’oot’ey haa’ utdelnąy eh huu’ehtatnayh.
\v 25 Hantey’ t’ey hǫǫsuu’ ts’ą’ koht’iin hįįłiin huu’ihetnayh. Doo iin hǫǫsuu’ ts’ą’ daadąy niign, dinee iin huu’its’ihotniign de’ t’ey, haa’ utdelnąy eh huu’ehtatnayh.
\c 6
\p
\v 1 Doo iin alnaa hįįłiin iin dineh huuts’ą’ k’aholthadn lah’utdaaniił. Ay de’ doot’ey ts’ant’ay aaneegn’ eh k’a’utahheel, T’oodįht’ay Ǫǫsii’ tl’aan nts’ąą’ hants’uunehtanh niign xaah.
\v 2 Ch’ehłaadn’ alnaa iin dineh neets’ą’ k’aholthadn \it Jesus \it* łąy eh uunąy k’at’ey łah’utdzaaniil hiiniithanh. Hǫǫ’ ch’ah ts’ahǫǫtłeek. Ay dineh huuts’ą’ k’aholthadn eh \it Christian \it* koht’iin hįįłįi. Ay xaah ch’ale’ łahhiiyutdaaniił. Alnaa iin ch’ahnoo’ hǫǫsuu’ ts’ą’ t’ey baa hihtatnaał. Doo \it Jesus \it* łąą’ iniithan haahįįtsįi’ eh hiik’anehtaa’. Utdaldii xaah hǫǫ’ hahuu’uutnįhtanh tł’aan hǫǫ’ hach’utnįhtanh.
\v 3-4 Doo ch’its’ąą’ ch’aanii utdaldii xaah ha’uunehtan, ay ch’ale’ łąą’, “Ihchaa,” hiniithanh. Neek’ach’ihohłe’, \it Jesus Christ\it*, aanah heneek eh utdaldii xaah hats’uunehtanh ts’ą’ k’eetaat k’adet-shyaagn. Ay ch’ale’ diit’ey k’a’ee’iitnay. Heneek aanah łidatdetxąą xaah daanii’et-thiidn. Hǫǫ’ ch’ah ts’anh ch’its’ąą’ niign dąą’ hut-shyaagn: dinee iin nił hults’iin k’eh; nił ts’ą’ ts’aniihelt’eh; ts’ahǫǫt’eh ts’ą’ nił xaah thahdelxoh; ts’ahǫǫt’eh ts’ą’ huu’įįnįį’ shiit nił xaah naniich’ihetdee;
\v 5 tł’aan łihdatdetxąą shįį’ t’ey daanįh. Ay koht’iin huu’įįnįį’ k’otdatniik tł’aan hǫǫsuu’ ts’ą’ ch’ah detnįh niign t’ey hehuhshyaak. T’oodįht’ay xaah ts’etnah haa’ch’iitsaadiił hiiniithanh.
\p
\v 6 Dineh T’oodįht’ay niign k’eetaat dąy, hǫǫ’ ch’ah łąą’ baataasuul niign. Tł’aan T’oodįht’ay hǫǫtł’at hits’itaanak. Ay ch’ah ch’iihetdąy ch’ahnoo’ t’ey nsǫǫ.
\v 7 Ndeeh t’ey nee’ehǫǫłįį dą’, jan nan’ k’et diit’ey k’at’ey dii’eh ts’ilsheel. Ndeeh ts’ehtįį danh, diit’ey k’at’ey dii’eh tsalsheel, jan nan’ kaagn ch’a’.
\v 8 Ay de’, ts’e’aal eh ch’iil nats’elshay eh, ay shįį’ ts’an tsal-’iił.
\v 9 T’oot’ey doo iin ch’ii’uhdiin niithan iin eh diixaa’ t’ey ch’its’ąą’ ihdilshyaak. Eeł shiit hįįdeł k’eh t’ey hihtaadiił. Ts’ooniiniign ts’ą’ eh ts’ahǫǫt’eh ts’ą’ shin xaa’ duhdiin hiiniithan, nts’ąą’ daadį’ ts’ą’ t’ey heets’ihetniign. Ts’ahǫǫt’eh niign nił k’eh noo’ t’ey hihtaadiił. Ay koht’iin iin tthitda’ihdaldeek tł’aan T’oodįht’ay huu’otnahshaa.
\v 10 Lesüü kaah daaniihetdee, hǫǫ’ ts’anh ch’ah ts’ahǫǫt’eh ts’ą’ utaałeeł. Ch’ehłaadn dinee iin hǫǫchaa’ lesüü kaah daaniihetdee tł’aan huu’įįnįį’ shiit ts’ahǫǫtłeek ts’ahǫǫt’eh ts’ą’ t’ey, diihiixaa’ hǫǫchaa’ nihohdelshee. Ay tł’aan \it Jesus \it* łąą’ eh hiiniithan niign k’eetaat hehdįįtsat ts’ą’ hetdį’.
\p
\v 11 Nan du’, T’oodįht’ay dine’ dįįt’eh. Ay ts’ahǫǫt’eh niign łahtthagn’ ch’a’ an’ hetdildah. Nts’ąą’ koht’iin T’oodįht’ay uułe’ nuunįh, ay k’eh ch’ah kohtįin tįįłeeł. Tth’itdee’ay niign dǫǫdįį’. T’oodįht’ay k’eetaat niign dǫǫdįį’. \it Jesus \it* łąy eh uudǫǫnįį’ shįį’. T’oodįht’ay eh dinee iin haa’ǫǫtsįį’. Hantey’ t’ey k’at’ey hitidhįįtsal. Tł’aan dinee iin xaah hǫǫsuu’ ts’ą’ koht’iin ǫǫłe’.
\v 12 \it Jesus \it* łąy eh uudįįnįh. Ay eh uunoo’ hǫhchaah ts’ą’ t’ey utįįnayh. Sǫ’ hetdǫǫtsiidn. Nts’ąą’ ch’ǫǫt’üü xaah hǫǫsuu’ ts’ą’ iltthał xaah ch’ah hǫǫ’ tįįdiil de’ k’eh hǫǫt’eh. Ndeeh T’oodįht’ay haanihtįį dą’, uunoo’ hǫhchaah ts’ą’ t’ey utįįnayh hiniithanh. Ishiit \it Jesus \it* łąy eh uudįįnąy danh chih, dinee huuhįhdląą ts’ą’ naał nts’ąą’ \it Jesus \it* łąą’ iniithan hǫǫsuu’ ts’ą’ hǫǫ’ huudįįnįį’.
\v 13 T’oodįht’ay xaa’ diit’ey huu’įhdląą ts’ą’ huuhuunayh. Ay ch’ah eh \it Christ Jesus\it*, Ushye’e, Doo \it Pontius Pilate \it* naał T’oodįht’ay xaah hǫǫsuu’ ts’ą’ hǫǫhaa’, Ay iin ch’ale’ łąy eh dąą’ ndihnąy heehetnayh.
\v 14 Nts’ąą’ T’oodįht’ay dǫǫdįį’ nehnąy, k’ootįhthat. Nts’ąą’ nehnąy hǫǫ’ shįį’ tįįdiił. Ts’ahǫǫt’eh ts’ą’ sǫ’ dǫǫdiin. K’aaduu’ t’ey ts’anh noo’ ndeeh Neek’ach’ihohłe’, \it Jesus Christ\it*, tay’ t’ey nahiitnal’iił danh, hǫǫ’ ch’ah koht’iin tįįłeeł.
\v 15 T’oodįht’ay shįį’ ndeeh \it Jesus \it* tay’ t’ey nahiitnal’iił danh hee’etnayh. Ishiit danh Diishye’e dooniitaatheeł. T’oodįht’ay diit’ey łahtthagn’ nachuudah’iin. Ay shįį’ ch’ale’ ch’ich’ahnoo’ k’ach’ihohłe’ nchaah nłiin tł’aan hǫǫchaa’ tsen-’įį xaah Uts’ą’ hanints’et-that. Ay ch’ale’ ch’ich’ahnoo’ haskeh nchaah nłįį tł’aan Ay ch’ale’ Doo k’ach’ihohłe’ iin huuk’ach’ihohłe’.
\v 16 Ay shįį’ ch’ah honay k’at’ey tahtey. Tł’aan hǫǫchaa’ kün’ neldzeegn shiit eedah. Hǫǫchaa’ neldzeegn eh doot’ey k’ayaa nitahhaal. Doot’ey k’a’iineh’ąy, hets’ihuuthat dą’ ts’anh t’ey. Dinee iin T’oodįht’ay hii’aanah doodįhsoon duunoo’ hǫhchaah ts’ą’ utthiiłatdahdał tł’aan Ut’ay’ nchaah duunoo’ hǫhchaah ts’ą’ taałeeł. Hǫǫ’ huułe’.
\p
\v 17 Dinee iin ch’ii’etdąy iin dąą’ huudįįnįh: “Sǫ’ ts’įįchaa’ hinahthiin! Sǫ’ ch’ii’etdąy t’aniidaht’e’! Ch’ii’etdąy k’at’ey uk’abatniithaadn nt’eh. T’oodįht’ay ch’ah shįį’ t’aniidaht’eeł tł’aan dii nühxaah hǫǫsǫǫ xaah Beenahthan łahtthagn’ t’ey nühtł’aataałeeł,.
\v 18 Hǫǫsuu’ ts’ą’ niign dahdį’. K’ach’aa’ahtsiin ts’ą’, nah’oogn dinee iin tł’aa’alshyeek. Ay koht’iin ahłiin de’, hǫǫdląą ts’ą’, hǫǫsuu’ ts’ą’ niign dahdį’.
\v 19 Hǫǫ’ ch’ah hǫǫsuu’ ts’ą’ koht’iin ahłįį de’, ay xaa’ ndeeh noo’ danh hǫǫsuu’ ts’ą’ suudahłee. Hǫǫ’ ch’ah niign eh T’oodįht’ay xaah hǫǫ’ dahdį’ tł’aan ay ch’ah nühxaah hǫǫsǫǫ. Hǫǫ’ ch’ah ch’ii’ahdąy ch’ahnoo’ nühxaah hǫǫsǫǫ.”
\p
\v 20 \it Timothy\it*, jah heneek łahtthagn’ ntł’aahǫǫdłay hǫǫsuu’ ts’ą’ uk’atnihta’. Doo iin shyąą’ t’ey T’oodįht’ay k’įą’ chaats’ąą’ chinahoohotdeegn, ay iin ch’ii’ishnay hiiniithanh. T’oot’ey diit’ey its’ihetniign. Hǫǫ’ thahdelxoo de’, huuch’a’ an’ hetdildah.
\v 21 Ch’ehłaadn’ iin, “T’oodįht’ay łąy eh uunąy niign aanah ch’iits’etnayh,” henįh t’oot’ey hǫǫ’ ch’ah niign k’eetaat k’ahel’ąy.
\p Tthihąą’ T’oodįht’ay hǫǫtł’at nits’itaanak. T’axoh.