\id 2TI - Upper Tanana Athabascan Indian (Tetlin dialect) NT [tau] - USA 2013 (web 2014)
\h 2 Timothy
\toc1 Paul Dinahtł’aa Łaakey Danh Timothy ts’ą’ Neetł’at
\toc2 2 Timothy
\toc3 2Ti
\mt1 \it Paul\it* Dinahtł’aa Łaakey Danh \it Timothy\it* ts’ą’ Neetł’at
\c 1
\p
\v 1 Shin ch’ah \it Paul \it* dąą’ jinddhihtł’at. T’oodįht’ay Daandeegn’ \it Christ Jesus \it* aanah eh shteh’a’. Nts’ąą’ hǫǫ’ ehnąy k’eetaat, \it Christ Jesus \it* eh ts’ehłagn ts’įįłiin k’eh hǫǫt’ay eh, uxaa’ ts’ihonayh. Hǫǫ’ ch’ah aanah huuheeł shuunįh.
\p
\v 2 \it Timothy\it*, nts’ą’ dąą’ ch’ah jindhihtł’at. Sts’eeninn’ k’eh dįįt’eh tł’aan naa’ihtsįį’, shaaneegn’ eh \it Jesus \it* łąy eh uudįįnąy xaah. Tthihąą’ T’oodįht’ay, Neeta’, eh \it Christ Jesus\it*, Neek’ach’ihoǫhłe’, hǫǫtł’at nits’ihtaanak tł’aan teejuh nihuhdaaniił tł’aan ndzee’ shiit hǫǫsuu’ ts’ą’ ntł’aahiitaa’aał.
\p
\v 3 T’oodįht’ay, Doo shįįnįį’ suu’ eh Baa ishnah, shtthaay’ iin Baa hetna’ k’eetaat, “Tsen-’įį Udihnįh.” Ndeeh hotnihdee danh, “T’oodįht’ay, \it Timothy \it* xaah tsen-’įį,” dihniik, dziin tah tł’aan tadn tah t’ey.
\v 4 Shaa įįtsaa, hǫǫ’ ch’ah aanah naniich’ihthadn eh, nnok-’įį’ iinihthanh xaah nts’ą’ tuhshya’ kaah daanii’ishthiit. Nnok-’įį’ de’ t’ey, hǫǫchaa’ shaa uutaasuuł.
\v 5 Łąą’ T’oodįht’ay łąy eh uudįįnąy. Hǫǫ’ ch’ah naanah naniich’ihthat. Nttheh ntsǫǫ, \it Lois \it* mǫǫsii’, łąą’ T’oodįht’ay łąy eh uunąy, ay tł’aan nnąą, \it Eunice \it* mǫǫsii’, chih. T’axoh łąą’ T’oodįht’ay łąy eh uudįįnąy chih; hǫǫ’ ch’ah hee’ishnayh.
\v 6 Hǫǫ’ k’eexaan tay’ t’ey dąą’ ndihnįh: “T’oodįht’ay Baa ǫǫna’ xaah ntł’aa’įįdlah. Dootdeegn’ ntł’aa’įįtaan, Ay xaa’ ch’ale’ Baa tinnaał. Ndeeh shła’ nk’et daadhihdlah dą’, ishiit danh ay ch’ah ntł’aa’įįtąą.
\v 7 T’oodįht’ay Dotdeegn’ neetł’aadįįtąą. Ay xaa’ ch’ale’ sǫ’ ts’inuljiidn eh sǫ’ ts’uunut-shya’. T’oot’ey ay xaa’ ch’ale’ neet’ay’ uutaałeeł tł’aan dinee iin haats’uutsįį’ tł’aan nee’įįnįį’ hǫǫsuu’ ts’ą’ uutaałeeł.
\v 8 Ay eh Neek’ach’ihohłe’ xaah uuniihee de’, sǫ’ uunǫnshya’. Jan chih: shyah holsąy Baa dhihdah t’oot’ey sǫ’ shaa uunǫnshya’. T’oot’ey T’oodįht’ay Aaneegn’ suu’ xaah ut’ay’ eh nach’oodaathał.
\v 9 T’oodįht’ay nee’ehshih tł’aan uchiil’ key’ iin ts’uułe’ xaah ch’itah haanee’įįdlah. Hǫǫtł’at huuts’itihnak nee’uunįh xaah, hǫǫ’ ch’ah det’shyaak. Nts’ąą’ ts’įįdiin, hǫǫ’ xaah ch’ah k’ahuut’ay, hǫǫ’ ch’ah det-shyaak. Niithóó’ hetsihuuthat ttheh dą’, \it Christ Jesus \it* xaa’ duunoo’ haathał ts’ą’ huuts’itihnak nee’uunįh.
\v 10 T’oot’ey t’axoh ishiit nuuniithat danh \it Christ Jesus \it* huutakshih xaah neexaah niishay eh, heneek nts’ąą’ niign T’oodįht’ay hǫǫtł’at neets’iniiniik aanah, ch’ah t’axoh ndziitth’ak. Doo iin įįłaagn iin \it Christ \it* t’ay’ xaa’ nahuhtatnayh. Tł’aan dinee iin nts’ąą’ duunoo’ hǫhchaah ts’ą’ hootaanayh xaah Daandeegn’ suu’ eh huuhǫǫhee.
\p
\v 11 T’oodįht’ay Daaneegn’ suu’ eh shtuh’a’ xaah ch’ita haashįhtiin. Tł’aan hach’uunoktan xaah eh hohduldii xaah hahuu’uunoktan xaah Daaneegn’ suu’ eh, ch’itah haashįhtiin.
\v 12 Ay xaah chale’, k’ahduu’ shach’oodeethiit. T’oot’ey Baa shach’oodeethiit xaah k’abaa’uunishshay. Doo łąy eh uudihnąy Bii’ishnayh. Tł’aan doo iin hach’uunaktan xaa’ T’oodįht’ay łąy eh huunąy iin, k’ahduu’ ts’anh noo’ nataadaał danh, nahutdah’įį’ t’ey hǫǫ’ ch’ah łąą’ hee’ishnayh.
\v 13 Nts’ąą’ niign dǫǫdiin łąą’ heneek eh ndihnąy, hǫǫ’ ch’ah k’eetaat dǫǫdįį’. Hǫǫ’ dįįdąy eh noo’ uudih \it Jesus \it* łąą’ utdįįdiił tł’aan dinee iin haa’ǫǫtsįį’. Ay koht’iin ǫǫłe’, \it Christ Jesus \it* eh ts’ehłagn ts’įįłįį xaah.
\v 14 Łąą’ heneegn’ dii ch’ah ndihnąy hǫǫ’ ch’ah k’atnihta’. T’oodįht’ay Otdeegn’ Doo neeshiit įį’ay, ut’ay’ xaa’ hǫǫ’ k’atnihta’.
\p
\v 15 Łahtthagn’ dinee iin \it Asia \it* nan’ k’et ts’anh shch’a’ łtahniideeł. Ay eh shin shįį’ jah shiit dhihdah. \it Phygelus \it* tł’aan \it Hermogenes \it* huu’eh shch’a’ łtahniideeł. Hǫǫ’ ch’ah hee’innayh.
\v 16 Tthihąą’ Doo Huuhǫhchaah ts’ą’ K’achihohłe’ \it Onesiphorus \it* iin teechuh huu’utdaaniił. Ay dineh hǫǫdląą danh shyüüt hǫǫsuu’ tth’iduu’a’ xaah naa’ehnayh. Shyah holsąy dhihdah, t’oot’ey k’ashaa uunet-shyay.
\v 17 Jah \it Rome \it* key niiniishyah dą’, hantey’ t’ey shuukaa uneh’įh. Ay tł’aan shuudih’ąą.
\v 18 Doo Huuhǫhchaah ts’ą’ K’ach’ihohłe’ naataadaał danh, tthihąą’ ishiit dziinn’ teejuh yutdaaniił. Nts’ąą’ ndląą niign \it Ephesus \it* key danh hǫǫsuu’ ts’ą’ shaa det-shyaak, hǫǫ’ ch’ah hee’innayh.
\c 2
\p
\v 1 Sts’eeninn’, neexon ts’ehłagn \it Christ Jesus \it* eh ts’įįłiin eh, T’oodįht’ay hǫǫtł’at neets’iniiniik. Hǫǫ’ xaa’ ch’ale’ nan hu’ nt’ay’ uutaałeel.
\v 2 Heneek dinee ndlaan iin hahuu’uunehtan eh idįįtth’agn, ay heneek tth’itdee’ay dinee’ iin huutł’aa’įįdlah. Dinee iin doo iin ch’ishyon iin chih hohduldii xaah hahuu’uhnuhtan, ay koh’tiin hihtaałeeł.
\p
\v 3 \it Jesus Christ \it* xaah łąą’ naabaadeh’ąy dįįt’ay, ay eh nant’ah nach’oodaathał.
\v 4 Naabaadeh’ąy dine’ naabaa ts’ą’ teeshyah de’, nts’ąą’ naabaadeh’ąy naatthii’, “Hǫǫ’ ch’ah dįįdį’,” nąy, k’eetaat t’ey taadiił. Doo iin naabaa ch’a’ uk’eh tł’üüdn key’ hihdeltth’ii iin nts’ąą’ hihdet-shyaagn k’at’ey huuk’eh hǫǫ’ taadiil. Ay naabaadeh’ąy dine’ baanaatthii’ nts’ąą’ nąy k’eetaat shįį’ taadiił.
\v 5 Doo nts’ąą’ ch’ǫǫt’üü haateltthadn, haltthal nach’uudah’iin k’eetaat eltthat de’ shįį’, dii eet’üü hiitł’aataa’aał.
\v 6 Dineh neshyee tenagn neshee nuushyee xaah etnah shįį’. Ay xaah ch’ale’ neshyee t’axoh tat-aal k’e niinihshąą danh, doo iin ay ts’anh yuundign iin tah ts’anh, ay dineh ch’ittheh taałeeł.
\v 7 Ay noonagn aanah naniichįįthat, ay xaa’ t’ey utdįldii xaah. Doo Huuhǫhchaah ts’ą’ K’ach’ihohłe’ nts’ąą’ hǫhdląą ndihnąy hee’ǫnnay xaah nts’itaanak.
\p
\v 8 Sǫ’ \it Jesus Christ \it* aanah hee’olnaa. T’oodįht’ay Aaneegn’ suu’ eh hach’uunaktan k’eetaat, ay ch’ale’ \it David \it* ts’anh natdethadn tł’aan įįłaagn iin tah ts’anh niiditthat tł’aan nahotnayh.
\v 9 T’oodįht’ay Aandeegn’ suu’ eh hach’uunaktan. Hǫǫ’ k’eexaan k’ahduu’ shach’oodeethiit tł’aan dineh bits’ahǫht’ay k’eh \it Chain \it* eh sheh jineldlį’ k’eh t’ey diht’eh. T’oot’ey T’oodįht’ay Aaneegn’ ay duu’ k’at’ey neldlį’ k’eh diit’ay. Ay eh doot’ey hach’uunaktan uk’ee’e k’anishtahteel.
\v 10 Ay eh doo iin T’oodįht’ay diixaa’ ch’itah haahuu’įįdlay xaah shach’oodeethiit. Hǫǫ’ ch’ah dihdį’ jan xaah: ay dinee iin chih \it Christ Jesus \it* xaa’ huutahshih xaah tł’aan duunoo’ hǫhchaah ts’ą’ huuts’itaanak xaah.
\v 11 Dąą’ łąy eh hǫǫ’ nąy hǫǫt’eh: 
\q \it Jesus \it* neets’ant’ay’ xaah ehtįį. 
\q Ehtįį danh ishiit nuuniithat dą’, ts’įįłaak chih k’eh hǫǫt’eh. 
\q Ay tł’aan hǫǫ’ k’eexaan Beh ts’ihonayh.
\q
\v 12 Neexon Baa nee’ach’oodeethiik de’ t’ey, ay tł’aan Beh uk’ants’ootahłe’. 
\q Neexon, “Mints’etniign,” ts’enįh de’ t’ey, ay tł’aan “Huuts’ishniign,” neetdaaniił.
\q
\v 13 Neexon, T’oodįht’ay niign k’eetaat hets’iitsat de’ t’ey, t’ oot’ey k’at’ey diixaa’ daa’an’ na’utdatniil, tth’utdee’ah koht’iin nłiin k’eexaan.
\p
\v 14 Nchiill’ key’ iin hǫǫ’ ch’ah hutdįįdiił. Jan chih T’oodįht’ay naał dąą’ hutdįįdiił: “Sǫ’ heneek eh łidahdetxaan k’eh sǫ’ dahnįį’. Hǫǫ’ ch’ah niign k’ahuusuy. Doo hǫǫ’ diitth’agn iin huuxaah k’ahuusuy.”
\v 15 Doo T’oodįht’ay nts’ąą’ niign, “Hǫǫ’ dahdį’,” niithan k’eetaat diidį’, ay ch’ah uk’eh koht’iin tįįłeeł xaah tinnaał shįį’. Hǫǫ’ ch’ah dinshyaagn eh, nts’ąą’ niign innaa k’a’utninshaal. Doo T’oodįht’ay łąą’ Aaneegn’ eh hach’uunehtan, ay ch’ah koht’iin tįįłeeł.
\v 16 Ndeeh dinee iin shyąą’ t’ey T’oodįht’ay tł’aan ch’ishuy iin xaah thahdelxoo danh, sǫ’ huu’eh ǫǫda’. Hǫǫ’ ch’ah thahdelxoo ts’anh, dinee iin T’oodįht’ay ch’a’ niithaadn tah nihniideeł.
\v 17 Huu’aaneegn’ dineh tthįį’ łataa’utnek’aay k’eh hǫǫt’eh. Ay tthįį’ łataa’utnek’aay hǫǫchaa’ t’ey nił k’įą’ tah utdaak’aał k’eh t’ey taat’eeł. Hǫǫ’ k’eh huu’aaneegn’ nił k’eenoo’ ts’antłeek taltsayh. Ay k’eh heneek dinee iin T’oodįht’ay k’at’ey yiixaa’ łąy eh hiitnaathiil. Doo iin hǫǫ’ ch’ah thahdelxoo, ay ch’ah koht’iin \it Hymenaeus \it* tł’aan \it Philetus \it* hįįt’eh.
\v 18 Łąą’ niign ch’a’ łtahniideeł tł’aan, “Doo iin įįłaagn iin ch’itdą’ nii’etdeeł tł’aan nahoohotnayh,” henąy eh ch’ehłaadn’ dinee iin łąy eh hiiniithan hehdįįtsat.
\v 19 T’oot’ey T’oodįht’ay łąą’ niign’ ch’ishuy k’at’ey taltsay. Shyah choh t’aa uudįhtayh ts’ą’ tthee eh hultsiin k’at’ey tatxol. Ay k’eh Ułąą’ niign’ hǫǫt’eh. Dąą’ nįh, “Doo iin Doo Huuhǫhchaah ts’ą’ K’ach’ihohłe’ ts’an hįįłiin huu’ii’etnayh.” Jan chih dąą’ nįh, “Doo dine’, ‘Doo Huuhǫhchaah ts’a’ K’ach’ihohłe’ ts’an ihłįį,’ nąy, ay ch’ale’ ts’ahǫǫt’eh ts’ą’ niign ch’a’ łts’atdaahaał.”
\p
\v 20 Shyah choh shiit ndeeh eedah danh łahtthagn’ ut’aadat-t’ay eedlah. Ch’ehłaadn’ ch’iitsay \it Gold \it* tł’aan \it silver \it* mǫǫsii’ eh eltsiin diitłat. Ay iin dziin choh ch’idanh danh shįį’ diits’an niital’iił. Chehłaadn’ dichinh tł’aan nan’ eh eltsiin diitłoogn. Ay iin nił k’eenoo’ dziinn’ diits’an niital’iił.
\v 21 Ay noonagn ts’an dąą’ ch’ah utdįldii: doo dine’ ts’ahǫǫt’eh ts’ą’ niign ch’a’ łts’aadeeshyah, ay ch’ale’ dinee iin łahhiiyutdaaniił tł’aan T’oodįht’ay yeh Baahǫǫsǫǫ. Ay tł’aan T’oodįht’ay hits’itaanak, hǫǫsoon niign huu’aanah taadiił xaah. Ay koht’iin \it Gold \it* tł’aan \it silver \it* diitł’adn shyah shiit eedlah k’eh nt’eh.
\v 22 Chiił eh t’adii iin dii ts’ahǫǫt’eh ts’ą’ kaah hǫǫtł’at daaniihetdee, ay ch’a’ łtaatiltthał t’ey. T’oot’ey hǫǫsoon neh’ąy shiit jan niitįįhaal: tth’utdee’ay niign, łąy eh hiniithan niign, xantsįį’ niign, tł’aan hǫǫsuu’ ts’ą’ łisuudalt’eh niign. Doo iin, “Ts’ahǫǫt’eh ts’ą’ niign ch’a’ łts’aatsuudeeł,” hiiniithan iin, T’oodįht’ay, “Nee’eh ǫǫłe’,” henąy, ay iin eh hǫǫsoon neh’ąy shiit danh niitįįhaal.
\v 23 T’oot’ey dinee ts’ooniiniign iin shyąą’ t’ey kaah nuhdehk’at de’, sǫ’ huuts’ą’ uuniiheel. Hǫǫ’ ch’ah hihdet-shyaak ts’ą’, “Łitdatdzatxąą,” hiiniithanh shįį’.
\v 24 Doo Doo Huuhǫhchaah ts’ą’ K’ach’ihohłe’ dine’ nłiin, k’at’ey łitdatdatxaan. Łahtthagn’ dinee iin ts’ą’ hǫǫsuu’ ts’ą’ taałeeł. Hǫǫsuu’ ts’ą’ hohduldii xaah, hach’uunehtan taałeeł. Tł’aan hǫǫ’ det-shyaagn eh, hantey’ t’ey k’at’ey hitdaatsal.
\v 25 Ay dineh doo iin uk’įą’ hel’ąy iin nts’ąą’ niign hihtaadiil huuts’ą’ hǫǫhee eh k’at’ey ts’anii’elt’eh ts’ą’ uułay. Ay eh T’oodįht’ay nts’ąą’ huu’įįnii’ hǫǫsuu’ ts’ą’ nihdaałeeł danh huu’ich’ooneh’įh. Hǫǫ’ ch’ah k’enihtalnak le’, ay tł’aan łąą’ niign łąą’ hehtatnayh.
\v 26 Ay tł’aan tay’ t’ey hǫǫsoon niign natsaadiił hiiniithanh tł’aan \it Satan \it* eell’ shiit ts’anh haahhatdeeł. Ay ch’ale’ huu’ih’eel tł’aan nts’ąą’ hihtaadiił niithan, hǫǫ’ ch’ah hihtaadiil heltsįį.
\c 3
\p
\v 1 Dąą’ hee’olnayh: ndeeh \it Jesus \it* nan’ k’et nataadaał danh, ishiit danh ttheh dinee iin eh, huuthay huu’ąą.
\v 2 Ishiit danh dinee iin diihiishįį’ diinaniich’ihtaldee; lesüü kaah hǫǫtł’at daanihtatdee; “Shin ch’ich’ahnoo’ dihchaa,” di’uhdatniił; “Shin ch’ich’ahnoo’ dihchaa,” diidzee’ shiit ts’anh hǫǫ’ di’uhdatniił; T’oodįht’ay eh dinee iin k’įą’ ts’ahǫǫt’eh ts’ą’ huhtaaheeł; diita’ eh diinąą k’at’ey iik’ahohtahdee; “Tsen-’įį,” k’ahiiyuudaaniil; “Hǫǫsoon niign tsaadiił,” k’ahitnaathiil;
\v 3 ch’ita’ eh ch’inąą uts’įįkey eh k’at’ey łahliihuhdatniil, dii’itsidel’ay iin xaah noo’ uudiht’ey huushyüüt k’ahǫǫsuu’ diit’ay; helshyak eh dinee iin k’įą’ huhtaaheeł; huut’ay’ koł ts’ą’ ts’ahǫǫt’eh ts’ą’ kaah hǫǫtł’at daaniihetthiidn dagn k’ahihtaałeel; nts’ąą’ dinee łiign’ ts’anii’elt’ay k’eh t’ey daadį’; hǫǫsoon niign eh dinee suu’ iin ts’idahuhdiht’eh;
\v 4 diitłąą k’įą’ ts’ich’ihtaałeeł; “Chits’ąą’ niign k’ats’etdąy,” hiiniithan eh ch’its’ąą’ niign hihtaadiił t’ey; “Shin ch’ich’ahnoo’ dihchaa,” di’uhdatniil eh huu’eh datjelchaa; diixoh k’eet xaah shįį’ uts’an hǫǫłįį T’oodįht’ay ch’ahnoo’ naniich’ihtaadee;
\v 5 tł’aan “Ay iin T’oodįht’ay hǫǫtł’at Baa ihtsįį’ dinee iin nee’aanah hǫǫ’ ch’ah hitdaaniił,” hitnaathiił, t’oot’ey T’oodįht’ay t’ay’ łąą’ k’a’ihiiniithan. Ay ch’ah koht’iin hihtaałeeł, ndeeh \it Jesus \it* nan’ k’et nataadaał danh ttheh. Huuch’a’ niłts’aadįįhaa.
\v 6 Ay koht’iin tah ts’anh ch’ehłaadn’ shyah shiit dahniideeł tł’aan ts’exee ts’ooniiniign iin ch’its’ąą’ niign huu’atdinįh. Ay ts’exee iin dąą’ koht’iin hįįłįį: huuts’ant’ay’ hǫǫchaa’ hǫǫłįį tł’aan hǫǫdląą ts’ahǫǫt’eh niign koht’iin huułe’ kaah hǫǫtł’at daaniihet-thiidn.
\v 7 “Uudzuldii,” kaah nahehnay t’oot’ey łąą’ niign hǫǫłįį niign k’at’ey heehitnay.
\v 8 Nts’ąą’ \it Jannes \it* eh \it Jambres Moses\it*k’įą’ hihdel-shyaagn k’eh, ay koht’iin iin chih łąą’ niign k’įą’ hel’įh. Huuhǫǫshyaan k’ehoodatniik tł’aan k’ałąy eh hiiniithan.
\v 9 T’oot’ey nts’ąą’ hǫǫ’ hihdiidąy eh, uuniik’uul k’eh shįį’ nihtaadał, dinee iin huuhįhdląą ts’ą’ ay koht’iin ts’ooniiniign hįįłiin huuhuunah’iił xaah. Hǫǫ’ k’eetaat \it Jannes \it* eh \it Jambres \it* eh hut-shyaagn.
\p
\v 10 Nts’ąą’ koht’iin diht’ay, hǫǫsuu’ ts’ą’ hǫǫ’ ch’ah hee’innayh. Nts’ąą’ niign hohduldii xaah hach’uunaktanh tł’aan nts’ąą’ niign dihdį’ tł’aan nts’ąą’ niign duhdįį’ nihthan, hǫǫ’ ch’ah hee’innayh. Nts’ąą’ łąy eh uudihnąy tł’aan dii dihdąy eh hantey’ t’ey k’at’ey hididhihtsal tł’aan T’oodįht’ay eh dinee iin huuxaa’ihtsiin hǫǫ’ ch’ah hee’innayh. Shach’ihdoodehthiit de’ t’ey, k’ahuuts’anii’agnt’ay ts’ą’, hǫǫsuu’ ts’ą’ koht’iin ihłiin
\v 11 tł’aan sh’eh huuthay doodee’aan dinee iin ts’anh tł’aan hǫǫtł’at shach’oodeethiidn, hǫǫ’ ch’ah hee’innayh chih. \it Antioch \it* key tł’aan \it Iconium \it* key tł’aan \it Lystra \it* key nił ch’iduugn ishiit danh sh’eh hǫǫ’ ch’ah hut-shyaagn hee’innayh. Hǫǫ’ hut-shyaagn t’oot’ey Doo Huuhǫhchaah ts’ą’ K’ach’ihohłe’ sh’eh nt’e’ tł’aan huu’įhdląą ts’ą’ ch’a’ łtaashinihtįį.
\v 12 Doo łahtthagn’ iin \it Christ Jesus \it* eh ts’ehłagn hįįłiin k’e hįįt’eh iin, T’oodįht’ay niign k’eetaat ogn-‘ąy hiiniithan eh, huu’eh huuthay doodee’aan dinee iin ts’anh.
\v 13 T’oot’ey ts’ahǫǫt’eh ts’ą’ dine’ iin tł’aan doo iin ch’its’ąą’ niign hach’uhnehtan iin nił k’eenoo’ ts’ahǫǫtłeek hihtaałeeł. Daa’ihnet-’aa tł’aan ch’ishyon iin nadahuhne’aa.
\v 14-15 Nan du’ dii łąą’ niign nt’ay hee’innayh eh ch’itdą’ udildiin k’eetaat shįį’ dįįdį’. Doo ts’anh hǫǫ’ udildiin bii’innayh tł’aan įįtsuul dą’ ts’anh T’oodįht’ay Aaneegn’ utnettł’adn hee’innayh. Hǫǫ’ k’eexaan hǫǫ’ ch’ah niign tįįdiil. Baaneegn’ ts’anh hǫǫshyaan dhįltsįį, T’oodįht’ay nuhshih xaah \it Christ Jesus \it* łąy eh uudįįnąy xaa’.
\v 16 T’oodįht’ay Aaneegn’ utnettł’adn neetł’aa’įį’ąą. Ndeeh dinee iin hotniitl’at dą’, T’oodįht’ay huu’eh nt’eh, Baaneegn’ hǫǫsuu’ ts’ą’ hihnuutł’adn xaah. Daaneegn’ neetł’aa’įįdlay, ay ch’ale’ łahtthagn’ neexaah hǫǫsǫǫ. Neexaah hǫǫsuu’ ts’ą’ nuuniidlah, łąą’ niign eh hants’uunuhtanh xaah. Ay xaa’ ch’ale’, dinee iin nts’ąą’ ch’its’ąą’ niign hihdet-shyaagn, hǫǫ’ ch’ah hee’ihtatnayh. Ay xaa’ ch’ale’, nts’ąą’ ch’iduugn niign hihduudiin hǫǫ’ ch’ah hee’ihtatnayh. Ay xaa’ ch’ale’, nts’ąą’tth’utdee’ay niign hihduudiin hǫǫ’ ch’ah hee’ihtatndayh.
\v 17 Hǫǫ’ k’eexaan, doo T’oodįht’ay dine’ nłiin dii hǫǫsuu’ ts’ą’ Baa ushna’ xaah niithan łahtthagn’ shiit eedlah.
\c 4
\p
\v 1 \it Christ Jesus\it*, ay ch’ale’ doo honayh iin eh doo įįłaagn iin doo huuxaah k’aholthadn iin shįį’ ch’ah huu’etdatjahkay taałeeł. Ay ch’ale’ tay’ t’ey nahitnal’iil tł’aan nan’ k’et haskeh choh taałeeł. Hǫǫ’ k’eexaan \it Jesus Christ \it* eh T’oodįht’ay naał datdįhtay eh dąą’ ndihnįh:
\v 2 T’oodįht’ay Aaneegn’ suu’ eh hach’utnihtanh. Ndeeh hǫǫsuu’ ts’ą’ danh ndeeh dinee iin dzuutth’agn hiiniithan danh ishiit danh beh hach’utnihtanh. Tł’aan ndeeh hehǫǫtsüü danh ndeeh dinee iin k’adzuutth’agn hiiniithan ishiit danh chih beh hach’utnihtanh. Dinee iin nts’ąą’ ch’its’ąą’ niign hihdet-shyaak nts’ąą’ hǫǫ’ hee’ihtatnayh hǫǫ’ ch’ah Baaneegn’ eh huu’iich’otnih’iił. Nts’ąą’ ch’its’ąą’ niign hihdet-shyaak hǫǫ’ ch’ah beh huu’iich’otnih’iił. Nts’ąą’ hǫǫsuu’ ts’ą’ niign hihtaadiił hǫǫ’ ch’ah beh huu’iich’otnih’iił. Hach’uunihtan eh, sǫ’ hantey’ t’ey hedǫǫtsiidn.
\v 3 Noo’ haathał danh ndeeh dinee iin łąą’ niign hach’uunehtan k’andzuutth’agn hiiniithan danh ishiit nuuniithat de’. Ay koht’iin iin nts’ąą’ tsaadiił hiiniithan k’eetaat hihtaadiił.
\v 4 Łąą’ niign ch’ihdiitth’ak ts’ą’ ch’a’ łts’ahdaadał tł’aan naholdaa ch’aanii kaah shįį’ ch’ihdaatth’ak.
\v 5 Nts’ąą’ dinshyaagn eh tth’utdee’ay niign dǫǫdįį’ shįį’ xaah hach’uudol’įį’. T’oodįht’ay xaah nach’oodeethiidn eh, sǫ’ łąy eh uudįįnąy hedǫǫtsiidn. T’oodįht’ay Aaneegn’ suu’ eh hach’uunihtan, hǫǫ’ ch’ah tinaał. Baa inaa eh, nts’ąą’ hǫǫ’ duudiiin niithan niign huu’įhdląą ts’ą’ ch’ah dǫǫdįį’.
\p
\v 6 Shin du’, k’aaduu’ ishiit nuuniithat danh ndeeh T’oodįht’ay xaah ch’ah takteel.
\v 7 Nts’ąą’ dihdįį’ niign ch’ǫǫ’tüü xaah kąąhalsheeł k’eh t’ey hǫǫt’eh. Hǫǫchaa’ t’ey tidhagntthat k’eh t’ey, hǫǫ’ ch’ah agn-‘įį’. T’axoh ch’ale’ shiit ninagnthat. Tł’aan noo’ uudih łąy eh uudihnįį’.
\v 8 K’aaduu’ ch’ǫǫt’üü shaa suuhohdiiłaak. Tthiishoo \it crown \it* mǫǫsii’ ay ch’ah tiht’üh. Ay ch’ale’ doo iin łahtthagn’ T’oodįht’ay tth’utdee’ay niign huhtsiin iin, ay iin xaah hǫǫłįį. Tł’aan ay ch’ah Doo Huuhǫhchaah ts’ą’ K’ach’ihohłe’ diichaah dziinn’ danh shtł’aitaa’aał. Doo huuxaah k’aholthadn iin shįį’, ch’ah hǫǫsuu’ ts’ą’ huu’etdatjahkay, ay ch’ah nłįį. Ay eh, shin shįį’ k’ashtł’aitaa’aałt’oot’ey doo iin nataadaal kaah hǫǫtł’at daaniihetthiidn iin łahtthagn’ chih huutł’aitaa’aał.
\p
\v 9 Hantey’ t’ey uniik’uul danh eh shaa nii’ǫǫshya’.
\v 10 Hǫǫ’ ch’ah dihnįh, dąą’ xaah: \it Demas \it* jah nan’ k’et bihǫǫłiin hǫǫtł’at daaniitet-thiidn. Ay tł’aan shch’a’ łtaaniishyah ts’ą’ \it Thessalonica \it* key ts’ą’ teeshyah. \it Crescens Galatia \it* nan’ k’et ts’ą’ teeshyah tł’aan \it Titus Dalmatia \it* nan’ k’et ts’ą’ teeshyah.
\v 11 \it Luke \it* du’, ay dineh shįį’ sh’eh eedah. \it Mark \it* xaah niiniihay tł’aan beh shaa niiniihay, sh’eh utna’ xaah.
\v 12 \it Tychicus \it* du’, \it Ephesus \it* key ts’ą’ utidhak-’a’.
\v 13 Niishay eh, sh’eegn’ shaa nii’ohnii. Ay ch’ah \it Troas \it* key \it Carpus \it* eh niinatniik. Shdinahtł’aa’ chih shaa nii’ǫǫ’aay. Shdibe thüü’ uk’et jindettł’adn, ay ch’ah hǫǫtl’at eenihthanh.
\p
\v 14 \it Alexander\it*, \it copper \it* ch’iitsay eh etnaa dine’, hǫǫchaa’ dotnihnoh shaa det-shyaak. Ay ch’ale’, nts’ąą’ hǫǫ’ ch’ah shaa det-shyaagn xaah, Doo Huuhǫhchaah ts’ą’ K’ach’ihohłe’ yeeyuutaakeet.
\v 15 Baa hu’ uudǫǫnįį’. Nee’aaneegn’ łąy eh tsidaa’utdiht’eh.
\p
\v 16 Taaniah shiit ch’ittheh danh shin xaa’ daa uunihdee dą’, shtłąą iin ukets’inuhtsiidn t’ey k’ashihuudiinąy. Huuhįhdląą ts’ą’ shch’a’ łtahniideeł tł’aan shin shįį’ niinagntth’at. Tthihąą’ nts’ąą’ hihdet-shyaagn doot’ey hǫǫ’ ch’ah huuk’įą’ k’ahitalnąy.
\v 17 T’oot’ey Doo Huuhǫhchaah ts’ą’K’ach’ihohłe’ sheh nt’ay tł’aan diit’ay’ shtł’aa’įį’ąą. Hǫǫ’ k’eexaan T’oodįht’ay aanah heneek eh hach’uunaktan, doo iin \it Jew \it* koht’iin k’ahiiłay łahtthagn’iin hihduutth’agn xaah. Ay tł’aan ch’ehłaadn’ iin bits’oonuhshaa shihuunįh. T’oot’ey nts’ąą’ hut-shyaagn ch’a’ T’oodįht’ay sheh nt’eh ts’ą’ bah’an’ dhihshih. Hǫǫ’ ch’ah Noon \it lion \it* mǫǫsii’ nashtee’aal k’eh t’ey nt’e’.
\v 18 Hǫǫ’ ch’ah k’eh, Doo Huuhǫhchaah ts’ą’ K’ach’ihohle’ ts’ahǫht’eh ts’ą’ ch’ehłaadn’ iin shk’įą’ hetnaa huu’įhdląą ts’ą’ ch’a’ shtahshih. Ay eh, shk’anehtaa’ ts’ą’, dagn nan’ k’et ndeeh k’ach’ihohłe’ danh ts’ą’ nishtahteeł. Tthiihąą’ dinee iin hii’aanah doodįhsoon duunoo’ hǫhchaah ts’ą’ utthiiłatdahdał. Hǫǫ’ huule’.
\p
\v 19 \it Prisca \it* eh \it Aquilla \it* huuts’ą’ niidach’inih’ąą tł’aan \it Onesiphorus \it* iin chih.
\v 20 \it Erastus Corinth \it* key eedah tł’aan \it Trophimus Miletus \it* key uk’ehtł’üüdn dhihdah, ehts’iign xaah.
\p
\v 21 Xay uutaałeel ttheh shaa niiniihay. \it Eubulus \it* eh \it Pudens \it* eh \it Linus \it* eh \it Claudia \it* nts’ą’ niidach’ihnii’ąą; ch’ishyon iin \it Christian \it* koht’iin iin chih.
\p
\v 22 Tthihąą’ Doo Huuhǫhchaah ts’ą’ K’ach’ihohłe’ nshyüüt eh taałeeł. Tthihąą’ T’oodįht’ay łahtthagn’ ishiit danh daltth’ii iin hǫǫtł’at nühts’itaanak.