\id TIT - Upper Tanana Athabascan Indian (Tetlin dialect) NT [tau] - USA 2013 (web 2014)
\h Titus
\toc1 Paul Dinahtł’aa’ Titus ts’ą’ Neetł’at
\toc2 Titus
\toc3 Tit
\mt1 \it Paul\it* Dinahtł’aa’ \it Titus\it* ts’ą’ Neetł’at
\c 1
\p
\v 1 Shin ch’ah \it Paul \it* doo T’oodįht’ay xaah alnaa diht’ay; dąą’ jindhihtł’at. T’oodįht’ay Daaneegn’ \it Jesus Christ \it* aanah eh shteh’a’. Doo T’oodįht’ay Daa ch’itah haayįhtiin iin łąą’ huunąy xaah tł’aan łąą’ niign T’oodįht’ay niign aanah łąy eh heehutnayh xaah, ay iin xaah ch’ale’ shteh’a’.
\v 2 Ay łąą’ niign ts’anh dinee iin nts’ąą’ duunoo’ hǫhchaah ts’ą’ hohtaanayh heehutnayh. T’oodįht’ay, Doo k’a’elshyagn, ch’ittheh nan’ teltsiin dą’ ts’anh t’ey, hǫǫ’ ch’ah huu’uunįh.
\v 3 Ay tł’aan shiit danh nsoon t’ey huuxaah niinihshah ts’ą’, T’oodįht’ay Nee’ehshii nts’ąą’ nąy k’eetaat, Baaneegn’ eh hach’uunaktanh, heehutnayh xaah.
\v 4 \it Titus\it*, sts’eeninn’ k’eh łąy eh dįįt’eh, shaaneegn’ eh \it Jesus \it* łąy eh uudįįnąy xaah. Łehchinh neexon hu’ \it Jesus \it* łąy eh ts’uunįh ts’ą’. Nts’ą’ dąą’ ch’ah jindhihtł’at.
\p Tthihąą’ T’oodįht’ay, Neeta’, eh \it Christ Jesus\it*, Nee’ehshii, hǫǫtł’at nits’ihtaanak tł’aan ndzee’ shiit hǫǫsuu’ ts’ą’ ntł’aahiitaa’aał.
\p
\v 5 \it Crete \it* nan’ k’et nk’ehtł’üüdn dhihdah, k’at’ey ts’eets’ihoh’ąy k’at’ey sits’oodiiłiil shaa k’atnihta’ xaah tł’aan nił ch’iduugn key huudlah danh \it Christian \it* ch’indadn’ doo ch’ittheh tatdaadal iin ch’itah haahuu’ǫǫłee xaah. Jan nts’ąą’ dąą’ ndihnąy, sǫ’ hee’ǫlnaa.
\v 6 \it Christian \it* ch’indadn’ jan k’eh koht’iin taałeeł: ch’its’ąą’ niign k’at’ey hihtaadiil; u’aat hihtaałeeł tł’aan diits’įįkey’ iin \it Jesus \it* łąą’ ts’ehłagn shįį’ hiiyutdaaniił. Jan chih: doo iin k’at’ey hiik’ahohdee tł’aan huu’ethihhǫhshąą, uts’įįkey’ iin ay ch’ah koht’iin k’at’ey hihtaałeel.
\v 7 Doo gįįhee nłiin T’oodįht’ay xaah etnah. Ay eh ch’its’ąą’ niign k’at’ey taadiil. Jan k’eh chih koht’iin taałeeł: shin xaa’ diits’ą’ k’ahognthat shįį’ niign k’ataadiil; hantey’ t’ey k’ats’aniitalt’eel; ch’etnąą dine’ k’ataałeel; łi’ushxąą’ t’ey k’a’itnahthiil; lesüü kaah k’at’ey hǫǫtł’at daaniitat-thiidn;
\v 8 t’oot’ey haltthaan iin hǫǫsǫǫ k’atnahta’; hǫǫsoon niign daaniitat-thiidn; mįįnįį’ taasuuł; tth’utdee’ay niign kaah hǫǫtł’at taadiił; T’oodįht’ay tł’aa’idaltiin taałeeł; diishyinh hǫǫsuu’ ts ą’ k’atnahta’;
\v 9 łąą’ heneegn’ eh uuduldii xaah hach’uhnehtan k’eetaat, hǫǫ’ ch’ah noo’ uudiht’ey hǫǫ’ taadiił. Hǫǫ’ ch’ah diidį’ ts’ą’, łąą’ niign eh, ch’ishyon iin huuxaah uutaasuuł, huuk’anehtaa’ xaah; tł’aan doo iin łąą’ niign k’įą’ daadetdlii iin, ch’its’ąą’ niign hihdet-shyaagn huhnah’iił.
\p
\v 10 Hǫǫ ch’ah ndihnįh, jan xaah. Ndlaan iin łąą’ niign k’at’ey hiiniithan tł’aan k’at’ey hiik’ahohdee: shyąą’ t’ey thahdelxoh ts’ą’ tł’aan ch’ishyon iin nadaahuuts’inuu’aa hiiniithanh. Ay ch’ishyon iin tah ts’anh ndlaan iin doo iin \it Jew \it* k’aanii’ łąy eh huunąy ch’a’ łtahniideel iin hįįłįį.
\v 11 Thaat-’ehdanh k’adatjetgüh ts’ą’ huut’e’. Ch’its’ąą’ niign eh hach’uhnehtan eh, diits’įįkey’ iin eh huuhįhdląą ts’ą’ łąą’ niign ch’a’ łtahniideeł huu’ihtsįį. Lesüü hihdultsay xaah hǫǫ’ch’ah hahuu’uhnehtanh. Hǫǫ’ xaah ch’ale’ thaat-’ehdanh k’adatjetgüh ts’ą’ huut’e’.
\v 12 Ay koht’iin iin nts’ąą’ ts’ehłagn \it Crete \it* nan’ k’et t’iinn’ dąą’ hach’uunehtan k’eh hįįt’eh: dąą’ nįh, “\it Crete \it* nan’ k’et t’iinn’ helshyak shįį’. Ts’ahǫǫt’eh ts’ą’ koht’iin hįįłįį tł’aan nts’uu’aał shįį’ hiiniithanh ts’ą’, ts’ohdetniik.”
\v 13 Ay dineh łąy eh hǫǫhee. Ay k’eexaan ch’ale’ datdįhtay eh nts’ąą’ ch’its’ąą’ niign hihdet-shyaak, hǫǫ’ ch’ah hutdįįnįįł, łąą’ niign łąy eh hitnaathiil xaah.
\v 14 Ay tł’aan \it Jew \it* noonak k’eet k’ałąą’ uułay k’ahitdaatth’agn tł’aan dinee iin doo iin łąą’ niign ch’a’ łtahniideel iin nts’ąą’ hǫǫ’ dahdį’ huuhenąy k’eetaat k’ahǫǫ’ th’ihtah hihtaadiil.
\v 15 Doo iin łąą’ niign ch’a’ łtahniideel iin, ay koht’iin iin ch’its’ąą’ niign hel’įh ts’ą’ tł’aan \it Jesus \it* k’ałąą’ huunąy ts’ą’, hǫǫ’ch’ah łahtthagn’ hihdįįdiin k’ahuusuuy niign. Ay koht’iin huu’įįnįį’ eh huudzee’ k’atth’itdee’ay. T’oot’ey hǫǫsuu’ ts’ą’ daadąy iin hǫǫ’ ch’ah łahtthagn’ hihdįįdiin hǫǫsuu’ ts’ą’ hǫǫłįį, tł’aan huudzee’ t’ey tth’itdee’ay.
\v 16 T’oot’ey doo iin łąą’ niign ch’a’ łtahniideel iin “T’oodįht’ay its’etnayh,” hǫǫ’ henįh t’oot’ey Uk’įą’ hel’ąy eh ch’its’ąą’ koht’iin hįįłįį. Huuchaaniihįįdeegn eh k’ahiik’ahohdee eh, hǫǫsuu’ niign t’ey k’ahihtaadiil.
\c 2
\p
\v 1 T’oot’ey nanhu’, łąą’ niign hohduldii xaah hach’uuneltan k’eetaat dąą’ utdįįdiił.
\v 2 Ch’itay iin jan k’eh koht’iin hihtaałeeł: ch’its’ąą’ niign k’at’ey hihtaadiil; diishinh hǫǫsuu’ ts’ą’ hiik’atnahta’; łąą’ łąy eh hiiyutdaaniił; dinee iin łąą’ huuxaah hihtaatsįį’; łąą’ hantey’ k’ahehdaatsal.
\v 3 Ts’ist’e’ iin jan k’eh koht’iin hihtaałeeł: T’oodįht’ay tł’aa’idalshay iin hihtaałeeł; T’oodįht’ay eh dinee iin k’įą’ ts’ahǫǫt’eh ts’ą’ k’ahuhtaaheel; ch’etnąą kaah hǫǫtł’at k’adaanihtatdee; hǫǫsǫǫ niign hohduldii xaah hutdaaniił.
\v 4 Ts’exee iin hohduldii xaah hǫǫ’ huu’etdaaniił, jan k’eh koht’iin hihtaałeeł xaah; diikąy’ eh diits’įįkey’ iin xaah hihtaatsįį’;
\v 5 huu’įįnįį’ taasuuł; ts’exee besehǫht’ay; diishyah k’atnahta’; hǫǫsǫǫ niign hihtaadiił; diikąy’ xaah hihtaatsįį’. Ay ch’ah koht’iin hihtaałeeł, dinee iin T’oodįht’ay Aaneegn’ k’įą’ ts’aht’eh ts’ą’ k’ahuhtaaheel xaah.
\v 6 Dineh iin chih huu’įįnįį’ taasuuł hǫǫ’ hutdįįdiił.
\v 7 Nts’ąą’ huu’įhdląą ts’ą’ dįįdąy eh, hǫǫsuu’ ts’ą’ tinnaał. Hǫǫ’ ch’ah ts’anh hǫǫsǫǫ niign dįįdąy hitnah’iił. Hohduldii xaah hach’uunihtan eh, jan k’eh koht’iin tįįłeeł; łąy eh dine’ tįįłeeł; ch’its’ąą’ niign k’atįįdiil;
\v 8 heneek łąą’ nłiin, ay ch’ah ch’its’ąą’ hǫǫt’ay k’ahitdaaniil, ay ch’ah eh hutdįįniił. Ay ch’ah koht’iin įįłįį ts’ą’, doo neek’įą’ datdelshyaagn ch’its’ąą’ neexaah k’atdaaniil eh, utnat-shyaał.
\p
\v 9 Doo iin alnaa hįįłiin iin jan k’eh koht’iin hihtaałeeł: nts’ąą’ huu’įhdląą ts’ą’ hihdet-shyaagn eh, dineh huuts’ą’ k’aholthadn iin k’ahohtahdee; alnaa iin hǫǫsuu’ ts’ą’ hihtatnaał, dineh huuts’ą’ k’aholthadn iin huuxaah shiit uutaasuuł xaah; k’at’ey huudąą’ hatdaach’ihnaashiil;
\v 10 huuts’anh k’ach’ihnaa’įį, t’oot’ey tth’iinoo’ hihtaałeeł tł’aan t’anihdaht’eeł. Ay ch’ah koht’iin hįįłįį ts’ą’ nts’ąą’ huu’įhdląą ts’ą’ hihdet-shyaagn eh, ch’ishyon iin T’oodįht’ay Nee’ehshii aanah hach’uuneltan xaah łahhiiyutdaanił.
\p
\v 11 T’oodįht’ay łahtthagn’ dinee iin hǫǫtł’at ts’iniiniik, huu’uhshih xaah.
\v 12 Hǫǫ’ ch’ah hut-shyaagn eh dąą’ uudzaldii: T’oodįht’ay k’įą’ niign ch’a’ łtaatsaadał tł’aan jan nan’ k’et bihǫǫłiin kaah hǫǫtł’at k’adaanintsatdee. T’axoh jah nan’ k’et ch’įįnįį’ suu’ eh tth’utdee’ay niign eh T’oodįh’ay niign k’eetaat tsal’iił.
\v 13 Hǫǫ’ ch’ah tsal’iił, noo’ haathał diichaah dziinn’ aanah naniints’etdee eh. Shiit dziinn’ aanah naniints’etdee eh, shiit dziinn’ taat’eel heets’etnayh. Ishiit danh neeT’oodįht’ay’, \it Jesus Christ\it*, Doo diichaah nłiin eh Nee’ehshii, huhnah’iił.
\v 14 Huu’įhdląą ts’ą’ ts’ahǫǫt’eh niign ch’a’ neetahshih xaah, huutł’aa’idaltįį. Ay tł’aan shyüüt hǫǫsoon tth’itdee’ay koht’iin Uts’an shįį’ tsaałeeł tł’aan doo iin hǫǫsoon niign shįį’ łąą’ het-shyaagn ay ch’ale’ tsaałeeł.
\v 15 Hǫǫ’ ch’ah huu’įhdląą ts’ą’ hohduldii xaah hach’utnįhtan. Nts’ąą’ niign hihtaadiil tł’aan nts’ąą’ ch’its’ąą’ niign het-shyaagn, uha’ doodįįtay eh hǫǫ’ ch’ah hutdįįniił. Doot’ey k’ałahni’utdaaniił.
\c 3
\p
\v 1 Jan k’eh koht’iin hihtaałeel tay’ t’ey hǫǫ’ nahutdiniił. Doo iin jah nan’ k’et k’ach’ihohłe’ iin tł’aan huuxaah ch’idadiiłiin iin, łahhuunįh. Huuk’ahohtahdee tł’aan huu’įhdłąą ts’ą’ hǫǫsoon niign tsaadiił hiiyutdaaniił.
\v 2 Doot’ey xaah ts’ahǫǫt’eh ts’ą’ eh k’ahuhtaaheel. Łi’ushxąą’ t’ey k’ahitnahthiil. Huu’ach’ihdoodehthiił de’ t’ey, hǫǫsuu’ ts’ą’ koht’iin hihtaałeeł tł’aan huudzee’ shiit łahtthagn’ dinee iin xaah hǫǫsuu’ ts’ą’ taat’eeł.
\v 3 Neexon du’ hittheh dą’ jan k’eh, koht’iin ts’įįłe’: ts’ets’ooniindiign; k’a’uk’ats’ihohdee; ch’its’ąą’ niign tthidats’įįdeeł; huu’įhdląą ts’ą’ ts’ahǫǫt’eh ts’ą’ eh neexon diinaniints’elthat shįį’ kaah hǫǫtł’at daaniits’etdee; ts’ahǫǫt’eh ts’ą’ niign eh ch’uuts’iin niign k’eetaat ts’al’įį’; chishyon iin ts’idaneehuhdiht’e’ tł’aan ts’idahuuts’uhdiht’e’.
\v 4 Ay ch’ah koht’iin ts’įįłe’ t’oot’eyT’oodįht’ay, Nee’ehshii, dinee iin teejuh iniithanh tł’aan huuxantsįį’ hǫǫ’ ch’a nee’ich’ooneh’įį’.
\v 5 Ay tł’aan nee’ihshih. Dii t’ey tth’itdee’ay niign hǫǫ’ hut-shyaagn, hǫǫ’ k’eexaan ch’ale’ k’a’iiłay xaah, nee’ihshih. T’oot’ey teejuh nee’uunąy eh nee’ihshih. T’oodįht’ay Otdeegn’ Ay ch’ale’ nanee’iich’ot, neets’ant’ay’ it’aa’ii’aan eh. Uxaa’ tay’ t’ey nee’eehat-łįį tł’aan ch’its’ąą’ niign ch’a’ ch’iduugn niign Uxaa’ hǫǫsuu’ niign neets’ineeł.
\v 6 T’oodįht’ay Dotdeegn’ \it Jesus Christ \it* xaa’ neetł’aayįį’ąą, hǫǫsoon niign huu’įhdląą ts’ą’ tsaadiił xaah.
\v 7 Hǫǫ’ ch’ah det-shyaagn, hǫǫtł’at neets’iniiniign xaa’ jan k’eh koht’iin tsaałeel xaah: doo iin T’oodįht’ay tth’itdee’ay koht’iin huhtsiin iin tł’aan doo iin duunoo’ hǫhchaah ts’ą’ huhtaanay heehetnayh iin.
\p
\v 8 Hǫǫ’ łąy eh hǫǫ’ nąy hǫǫt’eh. Hǫǫ’ ch’ah ndihnąy łąą’ hee’innayh ts’ą’, datdįhtay eh hǫǫ’ aanah huuheeł nuudihnįh. Hǫǫ’ ch’ah uuniihee ts’ą’, doo iin T’oodįht’ay łąy eh huunąy iin nts’ąą’ hǫǫsuu’ ts’ą’ niign noo’ uudih hihtaadiil łąą’ naniich’ihtatdee. 
\p Hǫǫ’ ch’ah ndihnąy nsǫǫ tł’aan dinee iin xaah uutaasuuł.
\v 9 T’oot’ey dinee ts’ooniiniign iin shyąą’ t’ey kaah nuhdehkat de’, sǫ’ huuts’ą’ hǫǫheel. \it Jew \it* noonagn k’eet huutthaay’ iin ǫǫsii’ neetł’adn aanah, sǫ’ udǫǫtth’agn. Doo iin \it Moses \it* nach’uudah’iin niign aanah tł’aan heneek eh, łidahdetxaan iin ch’a’ an’ hetdildah. Ay iin nts’ąą’ hihdet-shyaagn hǫǫ’ ch’ah k’ahuusuiy tł’aan shyąą’ k’eh t’ey hǫǫt’eh.
\v 10 Doo dine’ dinee iin łitsihdel’ay huu’ihtsiin, łaakey danh, “Ch’its’ąą’ niign dinshyaagn,” hǫǫ’ udįįnįh danh, ishiit danh ts’anh uch’a’ an’ hetdildah.
\v 11 Ch’its’ąą’ niign det-shyaagn bi’innaih ts’ą’ hǫǫ’ ch’ah tįįdiił. Uts’ant’ay’ ch’its’ąą’ koht’iin nłiin huu’iich’ooneh’įh.
\p
\v 12 \it Artemas \it* le’ tłaan \it Tychicus \it* le’ nts’ą’ utidhak-’a’ eh, hantey’ t’ey \it Nicopolis \it* key shiit shaa niiniihay. Ishiit danh xay tihthał.
\v 13 \it Zenas\it*, doo nach’uudah’iin dine’ nłiin, tł’aan \it Apollos\it*, ay iin hantey’ t’ey tthiihuunih’ay tł’aan łahtthagn’ diits’an hiital’iil eh uk’atnihta’.
\v 14 Nee\it Christian \it* chiill’ key’ iin shyąą’ t’ey k’ahihtal’iił tł’aan dąą’ hohduldii: hǫǫsoon niign noo’ uudiht’ey hihtaadiił tł’aan dinee iin łahtthagn’ diits’an hiital’iil uk’ahnahta’.
\v 15 Łahtthagn’ sh’eh hihdeltth’ii iin nts’ą’ niidach’ihnii’ąą. Neetłąą iin doo neexantsįį’ iin tł’aan \it Jesus \it* łąy eh uunąy iin, huuts’ą’ niidajinih’ąą. 
\p T’oodįht’ay łahtthagn’ ishiit danh daltth’ii iin hǫǫtł’at nühts’itaanak.