\id PHM - Upper Tanana Athabascan Indian (Tetlin dialect) NT [tau] - USA 2013 (web 2014)
\h Philemon
\toc1 Paul Dinahtł’aa’ Philemon ts’ą’ Neetł’at
\toc2 Philemon
\toc3 Phm
\mt1 \it Paul\it* Dinahtł’aa’ \it Philemon\it* ts’ą’ Neetł’at
\c 1
\p
\v 1 \it Paul\it*, doo shyah holsąy \it Christ Jesus \it* xaah eeday, eh \it Timothy\it*, nee\it Christian \it* uchiill’, dąą’ ch’ah nts’ineetł’at. \it Philemon\it*, nts’ą’ nts’ineetł’at. Neetłąą dįįt’ay tł’aan nee’eh T’oodįht’ay xaah innah.
\v 2 Doo iin \it Christ Jesus \it* łąy eh huunąy nshyah shiit łehchinh heedeel iin, ay iin chih ts’ą’ nts’ineetł’at. \it Apphia\it*, nee\it Christian \it* udia’ eh \it Archippus\it*, doo chih \it Christ Jesus \it* xaah bahdeh’ąy k’eh nt’ay, ay iin chih ts’ą’ nts’ineetł’at.
\v 3 Tthihąą’ T’oodįht’ay, Neeta’, eh Neek’ach’ihohłe’, \it Jesus Christ\it*, hǫǫtł’at nühts’ihtaanak tł’aan nühshyüüt hǫǫsuu’ts’ą’ nühtł’aach’ootaa’aał.
\p
\v 4 T’oodįht’ay eh naanah uunihhee ts’ą’ nił danh hotnihdee eh, naa tsen-’įį udihnįh.
\v 5 Hǫǫ’ dihnįh, jan xaah. Łahtthagn’ T’oodįht’ay uchiill’ key’ iin łąą’ xaa’įįtsiin tł’aan Neek’ach’ihohłe’ \it Jesus \it* łąą’ łąy eh uudįįnąy dihtth’ak. Hǫǫ’ k’eexaan naa tsen-’įį udihnįh.
\v 6 Dąą’ ch’ah hotnihdee: “Neexon \it Christ \it* łąy eh ts’uunąy, ay ch’ah maanah thadzelxoo eh, ay tł’aan nts’ąą’ hǫǫdląą T’oodįht’ay neets’iniiniign tay’ t’ey heetsatnayh, \it Christ \it* łąy eh ts’uunąy k’eexaan.”
\v 7 Sh\it Christian \it* uchiill’, heneek nts’ąą’ dinee iin xaah hǫǫtł’at įįtsiin aanah jihtth’agn, sts’ihniiniik tł’aan haasaanayh shihihtsiin. Hǫǫ’ ch’ah ihłįį, T’oodįht’ay Uchiill’ key’ iin haasaanayh huudhįhtsiin xaah.
\p
\v 8 Ay eh, nts’ąą’ niign tįįdiił, \it Christ \it* Ǫǫsii’ eh datdįhtayh ts’ą’ nduhnįį’ xaah k’anagnjiidn.
\v 9 T’oot’ey naa’ihtsiin xaah, nts’ąą’ niign tįįdiił datdįhtayh ts’ą’ k’at’ey ndihnįįl. Nts’ąą’ dǫǫdįį’ nuudihnįh niign hǫǫ’ ch’ah shįį’ ndihnįh. Shin hu’ \it Paul \it* ch’itay diht’eh. Doo T’oodįht’ay xaah hǫǫhee eh etnaa diht’eh. K’aaduu’ Uk’eexaan shyah holsąy dhihdah.
\v 10 Nts’ąą’ \it Onesimus \it* xaah uudihnąy aanah neh huhheeł nihthanh. Ay dineh sts’eeninn’ k’eh nt’eh, jah shyah holsąy dhihday eh shaaneegn’ eh, \it Jesus \it* łąy eh uunąy xaah.
\v 11 Ay dineh, nalnaa’ nłiin nanxaah k’a’iisuuy koht’iin uułe’ ch’idą’ t’oot’ey k’aaduu’ shin eh nan eh xaah nsǫǫ koht’iin nłiin.
\p
\v 12 T’axoh nts’ą’ na’tidhak-’a’ eh, shin xaa’ nts’ąą’ ni’itnagntiin k’eh t’ey hǫǫt’e’.
\v 13 Shch’a’ łtaanuushya’ k’anihthan. Jah shyah holsąy T’oodįht’ay Aaneegn’ xaah dhihday eh, nts’ąą’ shaa tįįdiil, jah shiit dhįįdah de’, ay ch’ah hǫǫ’ shaa taadiił. Hǫǫ’ det-shyaagn nanxaah etnah ts’ą’ sts’itaanak.
\v 14 T’oot’ey, hǫǫ’ ch’ah niithanh de’ t’ey k’ałąą’ nts’ąą’ niign uts’itihnak shuudįįnąy łąą’hee’ishnay ts’ą’, ay eh nts’ą’ natidhak-’a’. Hǫǫ’ ch’ah eh, nts’ąą’ niign ch’ichahnoo’ nsoon diishįį’ntthii’ shiit naniich’įįthat.
\p
\v 15 Noo’ haathał danh duunoo’ hǫhchaah ts’ą’ neh taadaal xaah, hǫǫ’ xaah ch’ale’ \it Onesimus \it* k’aadiidn nch’a’ eedah, huule’.
\v 16 T’axoh alnaa nłįį ts’ą’, \it Christian \it* koht’iin xaa’ihtsiin nłįį chih. Dii koht’iin nłiin ch’idą’, hǫǫ’ ch’ahnoo’ k’aaduu’ nsǫǫ. Nalnaa’ eh \it Christian \it* koht’iin nłįį ts’ą’ łąą’ shaa hǫǫsoon koht’iin nłįį t’oot’ey noo’ haathał ts’ą’ łąą’ dineh suu’ naataltsayh, dineh eh nchiil Neek’achihohłe’ ts’an nt’ay eh.
\p
\v 17 Ay eh shtłąą nłįį shuudįįnįh de’, nasaanayh tįįłeeł, naa nanishshyah de’ t’ey, hǫǫ’ k’eetaat nasaanayh įįłįį, naa na’inshyah de’.
\v 18 Nts’ąą’ ch’its’ąą’ niign neh ch’idą’ det-shyaagneh nts’ąą’ tth’ihtah nts’ą’ hetjinnayh, aiy ch’ah huuhǫhdląą ts’ą’ sts’ą’ dįhthanh.
\v 19 Jah shiit shła’ dąą’ ch’ah jindhihtł’at: “Shin ch’ah \it Paul \it* neehuutihkeet.” T’oot’ey nts’ąą’ nanhuu’ sts’ą’ hetjįįnayh aanah hee’innayh. Shaaneegn’ xaa’ T’oodįht’ay nehshih, duunoo’ hǫhchaah ts’ą’ uutįįnayh xaah. Shxaa’ \it Christian \it* koht’iin dįįt’eh.
\v 20 Ay eh, sh\it Christian \it* uchiill’, Neek’ach’ihohłe’ xaah sts’itįįnak nihthanh. Nan eh shin \it Christ \it* eh ts’ehłagn k’eh ts’įįłiin, nasaanayh shtįįtsayh.
\p
\v 21 Nts’ą’ jindhihtł’adn eh, łąą’ ni’ishnayh. Nts’ąą’ nihthan k’eetaat til’iił. H’ ch’ahnoo’ tįįdiił t’ey, ni’ishnayh t’ey.
\v 22 Jan chih, shaa dąą’ ch’ah tįįdiił: ndeeh tihdaał danh suudįįłee. Shaa hithadalxoo eh, nühts’ą’ natuhshya’ xaah, T’oodįht’ay hǫǫ’ ch’ah k’eetaat taadiil ts’ihak-’įh.
\p
\v 23 \it Epaphras\it*, doo shyah holsąy sh’eh \it Christ Jesus \it* xaah eeday, ay ch’ale’ nts’ą’ nidajinii’ąą.
\v 24 \it Aristarchus\it*, \it Demas\it*, eh \it Luke\it*, doo iin sheh hetnaa, ay iin chih nts’ą’niidach’ihnii’ąą.
\v 25 Tthihąą’ Neek’ach’ihohłe’, \it Jesus Christ\it*, hǫǫtł’at nühshyüüt ts’itaanak.