\id JAS - Upper Tanana Athabascan Indian (Tetlin dialect) NT [tau] - USA 2013 (web 2014)
\h James
\toc1 James ts’anh Dinahtł’aa Netł’adn
\toc2 James
\toc3 Jas
\mt1 \it James\it* ts’anh Dinahtł’aa Netł’adn
\c 1
\p
\v 1 Shin ch’ah \it James \it* doo T’oodįht’ay eh Doo Huuhǫhchaah ts’ą K’ach’ihohłe’, \it Jesus Christ\it*, huuts’an ihłiin tł’aan doo huuxaah ishnaa, dąą’ ch’ah jindhihtł’at: lahtthagn’ T’oodįht’ay chiil’key’ iin ch’idanh danh nan’ k’et họhchaah ts’ą’ tagn’ daltth’ii iin nühts’ą’ nidajinih’ąą.
\v 2 Sh\it Christian \it* koht’iin, ndeeh nił yahch’įą’ haltsiił ts’ą’ nüh’eh doodetnoh doodiiłiin danh, ishiit danh nüh’aaniijelnąy danh daanah naaniich’atthat.
\v 3 Hǫǫ’ ch’ah nühdihnįh, dąą’ hee’atnay xaah: ndeeh T’oodįht’ay łąįy eh uudahnąy xaa’, nüh’eh doodetnoh doodiiłiin ch’idhaht’üh danh, ay tł’aan nił k’eenoo’ dįhtayh ts’ą’ na’ahdee koht’iin tahłeeł.
\v 4 Hǫǫ’ koht’iin ch’ah noo’ nan’ k’abatnihthat ts’ą’ tahłeeł. Ay tł’aan \it Christian \it* honayh niign eh niidhahshaan eh hidaltayh tł’aan dii nühdaatah \it Christian \it* honayh niign ts’an hal’įį’ xaah noo’ nühniidlah.
\v 5 T’oot’ey ndeeh doot’ey nühtah ts’anh beh doodetnoh doodiiłiin shiit nts’ąą’ duudiin niign hits’ehniign danh, ay koht’iin T’oodįht’ay ts’ą’ hotnuudee ch’ah. Ay koht’iin nts’ąą’duudiin niign heetatnayh xaah, T’oodįht’ay yits’itaanak. T’oodįht’ay, ay ch’ale’ łahtthagn’ dinee iin hǫǫtł’at ts’iniiniik tł’aan doodetnoh huu’eh doodiiłiin shiit nts’ąą hihduudiin niign hits’ihetniign ts’ą’, hǫǫ’ xaah ch’ah huu’eh k’ats’anii’ilt’ay.
\v 6 T’oot’ey ndeeh T’oodįht’ay ts’ą’ hotnahdee danh nühts’itaanak xaah, dąą’ ch’ah ląy eh utdahniił, “Hǫǫ’ hotnakdee k’eetaat taadiil,” Doot’ey, “Hǫǫ’ k’ataadiil le’,” hiniithan, ay ch’ale’ łaakey mįįnii’ elt’eh. Taa’ehts’ayh k’eh t’ey nt’eh.
\v 7-8 Ay koht’iin huu’įhdląą ts’ą’ dąy aanah łaakey mįįnį’ elt’eh tł’aan T’oodįht’ay k’ahǫǫ’ taadiil le’iniithanh. Hǫǫ’ nt’eh de’, ay koht’iin T’oodįht’ay shtł’aataałeel k’a’itnahthiil.
\p
\v 9 Doo \it Christian \it* koht’iin nasaadiht’ay nłiin, ay ch’ah T’oodįht’ay yits’iniiniign eh ndeeh Toodįht’ay yitł’ootaałeel danh, ishiit danh tsen-‘įį taałeel.
\v 10 Tł’aan doo \it Christian \it* koht’iin ch’ii’etdąy nłiin, ay ch’ah T’oodįht’ay yits’iniiniign eh, ndeeh ch’ii’etdąy ehłaadn’ T’oodįht’ay ich’a’ łtaaniidlah danh, ishiit danh tsen-‘įį taałeeł. Hǫǫ’ch’ah k’at’ey huuniil de’, nts’ąą’ ch’ii’etdąy k’oht’iin eh hut-shyaagn k’eh t’ey taadiił. Ay ch’ii’etdąy dine’ nan’ k’et nsoon neshyee uuniik’uul danh honayh ts’ą’ tł’aan ehtiin k’eh nt’eh. Ay dineh uuniik’uul danh uutaanayh tł’aan tahteeł.
\v 11 Saa niit’ay bidįh’aan eh ay neshyee dat-tsat. Ay tł’aan nan’ k’et nsoon neshyee uk’et haayįįdeek tł’aan k’at’ey t’axoh iisuy. Hǫǫ’ k’eh ch’ii’etdąy dine’ ehtįį, hǫǫ’ dį’ ts’ą’ t’ey.
\p
\v 12 Doo dine’ beh doodetnoh doodiiłiin t’oot’ey T’oodįht’ey noo’ uudih ląy eh uunąy, ay xaah uutaasuuł. Hǫǫ’ ch’ah jan xaah. Ay dineh hǫǫ’ k’a’ehnayh ts’ą’ ayt’oo nsǫǫ de’ t’ey, T’oodįht’ay uts’iniiniik, duunoo’ hǫhchaah ts’ą’ uutaanayh xaah. Ay ch’ǫǫt’üü, T’oodįht’ay, “Ay ch’ale’doo shaantsiin iin huutł’aatih’aał,” hǫǫ’ nįh.
\v 13 Doo dine’ beh doodetnoh doodiiłiin eh, “Ch’its’ąą’ niign tihdiił,” naniich’ithat de’, ishiit danh dąą’ k’adaaniil, “T’oodįht’ay ch’its’ąą’ niign duhdįį’ shtehtsįį.” Ts’ahǫǫt’eh ts’ą’ niign ay ch’ah T’oodįht’ay ch’its’ąą’ duudiin niign xaah k’ahuhtsiil. Tł’aan naxan hu’ doot’ey ch’its’ąą’ duudiin niign xaah k’ahuhtsiil.
\v 14 T’oot’ey ndeeh dineh hǫǫchaa’ ts’ahǫǫt’eh ts’ą’ kaah daanii’etthiidn xaa’ ts’ant’ay eel’ el’eeł danh, hǫǫ’ xaahch’ale’ch’its’ąą’ niign dį’.
\v 15 Ndeeh ts’ahǫǫt’eh ts’ą’ kaah họọtł’at daanii’etthiidn xaa’ ch’its’ąą’ niign dąy, ishiit danh uts’ant’ay’ hǫǫłįį. Ay tł’aan noo’ haathał danh ndeeh uts’antay’ niign t’axoh ch’ale’ shiit nuuniithat danh, ay xaa’ ch’ale’ dineh tahteeł.
\v 16 Sh\it Christian \it* koht’iin iin nühxaah ihtsiin, sǫ’ hǫǫ’ aanah na’itnat-‘aa.
\v 17 Nan’ k’et dii altsiił ts’ą’ hǫǫsuu’ ts’ą’ nłiin tł’aan łahtthagn’ neetł’aahǫǫdlay dagn nan’ k’et ts’anh nłįį. T’oodįht’ay ts’anh dǫ́ǫ́ niniidlah. Ay ch’ale’ saa eh ch’aldzeegn eh san’ eh ehtsįį. Ay ch’ale’ łąą’ niign nłįį ts’ą’ k’at’ey ch’iduugn niign taałeel. Hǫǫ’ xaah ch’ah, Uneldzeegn’ dįhtayh shįį’ t’ey nt’eh.
\v 18 T’oodįht’ay łąą’ Heneegn’ diits’an nłiin xaa’ nee’ihuułe’ xaah nee’ehtsįį’, hǫǫ’ niign niithan xaah. Dinee koht’iin iin dii huuhįhdląą ts’ą’ ehtsiin ch’ahnoo’ hihtaałeel xaah, hǫǫ’ xaah ch’ah hǫǫ’ det-shyaak.
\p
\v 19 Sh\it Christian \it* koht’iin iin, nühxaah ihtsiin, dąą’ ch’ah heetalnayh. Nuhxon łahtthagn’ dąą’ ch’ah koht’iin tahłeeł: hantee’ t’ey dahtth’ak t’oot’ey hantee’ t’ey k’a’utdahheel tł’aan hantee’ t’ey k’ats’aniitalt’eel.
\v 20 Doot’ey ts’anii’elt’ay de’, ay ch’ale’ hǫǫ’ niign eh T’oodįht’ay hǫǫsuu’ ts’ą’ niign’ yaa k’at’ey taadiil.
\v 21 Nts’ąą’ ch’its’ąą’ niign hǫǫ’ tihdiił nahthiign tł’aannts’ąą’ ts’ahǫǫt’eh ts’ą’ niign dahdąy, ay ena’! Nühxon xaa’ huu’įhchaah ts’ą’ T’oodįht’aytł’aa’idalshee tł’aan Daaneegn’ nühdzee’ shiit įįdlay hǫǫsuu’ k’anahtaa’! Ay Heneek ch’ale’nühtahshih.
\p
\v 22 Sǫ’ naa’itnat-‘aa, T’oodįht’ay Aaneegn’ shyąą’ t’ey dahtth’agn eh. Maaneegn’ dahtth’ak tł’aan uk’eetaat tahdiił.
\v 23-24 Doot’ey maaneegn’ diitth’ak t’oot’ey k’at’ey ik’eetaatel’ąy, ay ch’ale’ dineh dzinal’iin shiit na’itnel’ąy k’eh nt’eh. Diixaa’ dzinal‘iin shiit na’itnel’ąyay tł’aan łtaa’inshyah ich’a’ ts’ą’, hantee’ t’ey nts’ąą’ eltsiin hi’elnah.
\v 25 T’oot’ey dąą’ ch’ahheetalnayh: T’oodįht’ay nach’udah’iin niign łanelt’eh ts’ą’ t’ey nt’eh tł’aan uxaa’ dinee iin huuts’ą’ tet-‘ąą. Doo dine’ łąą’ huu’uudetnįh ts’ą’ uudeldii, tł’aan ik’eetaat nił k’eenoo’ tihdiił niithan, tł’aan idiitth’ak ts’ą’ k’at’ey yi’ilnaa t’oot’ey ik’eetaat el’ąy, T’oodįht’ay ay dineh ts’itaanak, dii ch’adąy eh.
\p
\v 26 Doo dine’ nühtah ts’anh, “T’oodįht’ay haa’ihtsįį’,” nąy le’. Ay dineh, nts’ąą’ diitthuull’ eh nąy k’ak’anehtaa’ de’, shyąą’ t’ey hǫǫ’ nįh. Tł’aan naa’itnat-‘aak.
\v 27 Doo dine’ łąą’ T’oodįht’ay xantsiin de’, T’oodįht’ay, Neeta’, ay dineh dąą’ ch’ah taadiił iniithanh: bidooniiłaagn iin ehts’exeh ukąy’ uch’a’ ehtiin iin huu’eh huuthay doodee’aan shiit huuk’atnahta’ tł’aan dii diixaa’k’atnalta’, jan nan’ thidaitdahdal ch’a’.
\c 2
\p
\v 1 Sh\it Christian \it* koht’iin iin, Neek’ach’ihohłe’, \it Jesus Christ\it*, tth’idee’ay niign eh łah’uunąy eh huuhǫhchaah ts’ą’ k’ach’ihohłe’. Nühxon doo łąy eh yuunąy iin koht’iin ahłįį ts’ą’, nił yahch’įą’ koht’iin iin xaah ch’iduugn niign k’at’ey hihtal’iil, ntsąą’ nił ch’its’ąą’ heltsiin k’eexaan.
\v 2 Ndeeh łehchinh idhahdeeł danh, łaakey dinee iin nił ch’its’ąą’ heltsiin iin dahniideeł de’, ts’ehłagn helt’eh ts’ą’, nts’ąą’ huutah’iił? Ts’ehłagn dineh ch’ii’etdąy nłįį ts’ą’, u\it Gold \it* lesüü laath’aa’ hǫǫłįį tł’aan chiil łąą’ nsoon nadelshyah. Ch’ishyon dineh nasaadiht’ay nłįį ts’ą’, uchiill’ łahtthagn’ eekaałjelkąą’.
\v 3 Ch’ii’etdąy dine’ nasaadiht’ay dine’ ch’ahnoo’ k’ałah’uudahnįh de’ tł’aan ch’ii’etdąy dine’ dąą’ dahnįh de’, “Uxaa’ uudįįt’eh danh ahk’eedn’ daadhįįdah;” t’oot’ey nasaadiht’ay dine’ dąą’ dahnįh de’, “Naa’iithat tł’aan sht’aadhįįdah,”
\v 4 hǫǫ’ dahdį’ ts’ą’, ch’its’ąą’ niign dahdį’. Nühtah ts’anh dineh nah’aat dineh ch’ishuuy ch’ahnoo’ nsoon nahthanh. Hǫǫ’ dahdį’, ts’ahǫǫt’eh nahthanh k’eexaan.
\p
\v 5 Sh\it Christian \it* koht’iin iin, nühxaa’ihtsiin, shdhahtth’ak! T’oodįht’ay nasaadiht’ay iin jan nan’ k’et hǫhchaah ts’ą’ shiit, Daa ch’itah haahuu’įįdlah, hǫǫchaa’ łąą’ huunąy hǫǫłįį xaah tł’aan ndeeh k’ach’ihohłe’ danh hihtaadał xaah. Ay danh ch’ale’, “Doo Shaa’įįtsiin iin huutł’aa’uutih’aał,” hǫǫ’ nąy.
\v 6 Nühxon du’, nasaadiht’ay iin k’ałah’uudahnąy! Doo iin nüh’edajihdehkay iin tl’aan huu’edajahkay iin naał nühhuuniign huu’ii’atnáyh? Ch’ii’etdąy koht’iin, ay iin ch’ale’ nüh’eh hǫǫ’ dąy.
\v 7 Ay iin ch’ale’ nüh’ǫǫsii’ suu’ T’oodįht’ay nühtł’aa’įį’aan ts’ahǫǫt’eh ts’ą’ eh k’įą’ huuhǫǫhee.
\p
\v 8 Ndeeh T’oodįht’ay k’ach’ihohłe’ danh nach’uudah’iinn’, T’oodįht’ay Aaneegn’ utnetł’adn ts’anh, ay ch’ah iik’oohahdee de’, hǫǫsuu’ ts’ą’ niign dahdį’. Dąą’ nįh, “Nühk’eh daa’intsiin k’eh nk’üü koht’iin nłiin ay haa’įįtsįį’.”
\v 9 T’oot’ey dinee iin xaah dahdį’ de’, nts’ąą’ heltsiin k’eexaan, nühts’ant’ay’ hǫǫłįį tł’aan nach’uudah’iin hǫǫ’ ch’ah ich’ooneh’įh, uk’eetaat k’adahdąy xaah.
\v 10 Doo Toodįht’ay nts’ąą’ koht’iin ahłįį hǫǫ’nąy ts’ehłagn k’įą’ el’ąy, hǫǫ’ det-shyaagn eh łahtthagn’ k’įą’ el’ąy k’eh hǫǫt’eh.
\v 11 Doo dąą’ nąy, “Sǫ’ ts’exeh k’an’aat iiłay eh ǫǫda’,” ay ch’ale’ daa’ chih nąy, “Sǫ’dineh dhọhxay.” Ts’exeh k’an’aat iiłay eh k’adhįhday le’ t’oot’ey dineh įhxąą de’, ay tł’aan T’oodįht’ay nachuudah’iinn’ k’įą’ įl’įį’.
\v 12 Doo iin nach’uudah’iinn’ xaa’ huu’edajatkay iin k’eh uutahheeł tł’aan ay iin k’eh tahdiił. Ay nach’uudah’iin nts’ąą’ koht’iin ahłįį honąy, ay xaan nühts’ą’ tet-‘ąą.
\v 13 Doot’ey teejuh k’ayuudįįnay, ay dineh eh T’oodįht’ay teejuh k’ayutdahniil, ndeeh yidatjehkayh danh. T’oot’ey ay dineh teejuh yuudiinąy, ndeeh T’oodįht’ay yidatjahkayh danh, teejuh yutdaaniił.
\p
\v 14 Sh\it Christian \it* koht’iin iin, dineh, “T’oodįht’ay łąy eh uudihnįh,” dąą’ nąy de’, t’oot’ey nts’ąą’ nąy k’eetaat k’ahǫǫ’ dąy, nts’ąą’ hǫǫ’ ch’ah niign uutaasuuł? Hǫǫ’ k’eh łąy eh uunąy de’ k’ayiitahshii.
\v 15 Ch’ehłaadn’ \it Christian \it* koht’iin iin huuchiil’ kol de’ tł’aan dii hiiyet-aal kol de’, nts’ąą’ niign tahdiił?
\v 16 Dii huudaatah k’ahuutł’aa’ahdlah de’, ay tł’aan dąą’ huudahnįh de’, “Thihąą’ T’oodįht’ay nüh’eh taat’eeł! Thihąą’ nelkün’ tahłeeł tł’aan dii at-‘aal uutaałeeł,” nts’ąą’ hǫǫ’ ch’ah niign taasuuł?
\v 17 T’oodįht’ay łąy eh ts’uunąy niign jan k’eh nt’eh: T’oodįht’ay łąy eh ts’uunįh shįį’ de’ t’oot’ey nts’ąą’ neediinąy k’eetaat k’ahotdąy de’, T’oodįht’ay shyąą’ t’ey łąy eh ts’uunįh. Hǫǫ’ ch’ah niign iiłaagn iin k’eh tsįįłįį. Ay de’, T’oodįht’ay łąy eh k’ats’utdaaniil.
\p
\v 18 T’oot’ey doot’ey nühtah ts’anh dąą’ nįh le’, “Nan hu’, T’oodįht’ay łąy eh uudįįnąy, t’oot’ey shin hu’, nts’ąą’ nąy k’eetaat dihdį’.” Ay dineh dąą’ uudihnįh, “T’oodįht’ay łąy eh utdįįniił de’ tł’aan uk’eetaat k’atįįdiil de’, ay eh, T’oodįht’ay łąą’ uudįįnąy niign shiich’otnih’iił laa? T’oodįht’ay k’eetaat dihdąy xaa’, łąą’ uudihnąy niign niich’otnak-‘iił.
\v 19 Ts’ehłagn T’oodįht’ay hǫǫłiin, hǫǫ’ ch’ah niign łąą’ uudįįnįh. Hǫǫ’ ch’ah nsǫǫ. T’oot’ey ts’ant’ay otdeegn’ iin chih hǫǫ’ ch’ah łąą’ huunąy tł’aan hihniljiit ts’ą’ hihdetniik.
\v 20 Nan hu’ ts’ooniiniik! T’oodįht’ay łąy eh uudįįnąy ts’ą’ t’oot’ey T’oodįht’ay K’aanii’ k’eetaat k’adįįdąy ts’ą’, hǫǫ’ ch’ah niign shyąą’ t’ey nt’ay heetishnayh niithánh?
\v 21 Neetthaay, \it Abraham\it*, ntsąą’ niign T’oodįht’ay xaah tth’idee’ay eltsiin? Nts’ąą’ det-shyaagn xaa’, ndeeh diishye’e, \it Isaac\it*, hach’ełeegn ahk’eedn’ k’et niinihtįį dą’, ishiit danh T’oodįht’ay xaah tth’idee’ay eltsįį’.
\v 22 Hǫǫ’ k’ee’ilníík? Nts’ąą’ niign T’oodįht’ay łąy eh uunąy tł’aan Ik’eetaat det-shyaagn, ay nił eh hetnah. Nts’ąą’det-shyaagn xaa’ T’oodįht’ay łąy eh łąą’ uunąy.
\v 23 Ay eh T’oodįht’ay Aaneegn’ utnetł’adn k’eetaat hut-shyaagn dąą’ nįh: “‘\it Abraham \it* T’oodįht’ay łąy eh uunąy. Ay eh ay xaah ch’ale’ doot’ey tth’idee’ay niign det-shyaagn nłiin yaa naniichithat.’ Tł’aan T’oodįht’ay yaanah dąą’ nįh: 2 T’oodįht’ay ‘\it Abraham \it* shtłąą nt’eh.’
\v 24 Ay eh ay ts’anh dąą’ heetinnayh: ‘Dineh T’oodįht’ay ‘xaah tth’idee’ay eltsįį, nts’ąą’ det-shyaak xaa’ tł’aan k’ashįį’ T’oodįht’ay łąy eh xaa’.’”
\p
\v 25 Hǫǫ’ niign k’eh hut-shyaagn, \it Rahab \it* eh, ts’exeh lesüü diht’ah dineh eh eteegn. Ay ts’exeh T’oodįht’ay xaah tth’idee’ay eltsįį, nts’ąą’ Yaa det-shyaagn xaa’. Niithoo’ dą’ \it Joshua \it* dine’ nach’inel-’įį iin huuts’iniiniik. Ay ts’exeh ay dinee iin nts’ąą’ ch’iduugn tąy natahdał tahshih hǫǫ’ huu’ehnįh. 
\v 26 Ch’ishinh dotdeegn’ kol de’, ay ch’ishinh ehtiin. Hǫǫ’ niign k’eh, doo T’oodįht’ay łąy eh uunąy t’oot’ey T’oodįht’ay k’aanii’ k’eetaat k’a’el’ąy, ay ch’ale’ dineh ehtiin k’eh nt’eh. T’oodįht’ay łąy eh k’ayutdaaniil.
\c 3
\p
\v 1 Sh\it Christian \it* koht’iin iin, nühtah ts’anh ndlaan iin \it Christian \it* niign aanah hutdaldii xaah hahuuts’utnahtanh k’ahuhdaaniil. Ay ch’ah jan xaah. Neexon hu’ doo iin hutdaldii xaah hants’unehtan, ch’ishyon iin nts’ąą’ hihduudiin ts’enąy k’eetaat hǫǫ’ ch’ah tsaadiił. T’oodįht’ay hǫǫ’ ch’ah hihtaadiił iniithanh ts’ą’, ay xaah noo’ haathał danh nee’edatjatkayh.
\v 2 Neexon łahtthagn’ hǫǫdląą danh ch’its’ąą’ niign hotdąy. Doo dine’ daaneegn’ eh k’atdatnetniil, ay ch’ale’ łanelt’eh ts’ą’ t’ey nt’eh. Ay ch’ale’ łahtthagn’ huu’įhchaah ts’ą’ t’ey hǫǫsǫǫ idiltsįį.
\v 3 Noon \it horse \it* mǫǫsii’, ch’iitsay gaay uthaat ts’įį’ąą, nts’ąą’ hǫǫ’ taadiił ts’iiniithan taadiił xaah. Ay tł’aan uk’et dats’eeday eh, ay xaa’ nuugn tuushya’ ts’iiniithan niign teeshyah.
\v 4 Jan chih: ts’ayh chóh uk’et nach’eebal du’? Ehts’ayh choh eh naats’aihtettiik, t’oot’ey utaat’oo’ gaay eh naatthiit neh’aak. Ay tł’aan nts’ąą’ hinehthat niign aałał.
\v 5 Dineh tthuul’ k’eh t’ey nt’eh. Dineh tthuull’ ntsuul nt’eh t’oot’ey hǫǫdląą niign xaah hǫǫchaa’ hǫǫhee.
\p Jan chih: ts’oo ch’inuu eh’aan choh kün’ gááy eh diik’aan hee’atnayh.
\v 6 Tł’aan dineh tthuull’ kün’ k’eh nt’eh. Jan nan’ k’et họhchaah ts’ą’ ts’anh dii ts’ahǫǫt’eh ts’ą’ t’ey, dineh diitthuull’ xaa’ hǫǫ’ ch’ah hǫǫhee le’. Utthuull’ ts’ehłagn ch’danh ushinh shiit ee’ąą t’oot’ey huu’įhchaah ts’ą’ ushinh ts’ahǫǫt’eh ts’ą’ taltsayh. Ts’oo chinuu eh’aan choh kün’ gááy eh diik’aan, ay k’eh t’ey dineh dii huu’įhdląą ts’ą’ t’ey detshyaagn, ay ch’ah ts’ahǫǫt’eh ts’ą’ hohtsayh, diitthuull’ eh. Ts’ant’ay t’ay’ eh hǫǫ’ ch’ah hohtsayh.
\v 7 Dineh noon ch’altsiił ts’ą’ eh nts’ąą’ niign taadiił hee’etnayh. Noon eh ts’eht’uudn eh nan’ k’et gǫǫ ts’eegn natnetduugn eh luugn eh, łahtthagn’ ts’ą’ dineh hǫǫ’ huu’ehnąy niign xaa’ hiik’eh alniik.
\v 8 T’oot’ey doot’ey ch’its’ąą’ niign diitthuull’ eh hǫǫhee ch’a’ huu’įhdląą ts’ą’ danh k’ataałeel, utthuull’ ts’ahǫǫt’eh ts’ą’ nt’ay k’eh hǫǫt’eh xaah, tł’aan ntsąą’ nsoon shtthuul’ hǫǫ’ daaniił niithan, hǫǫ’ ch’ah nąy k’adii xaa’ hohtsay xaah. Ch’oonayh niit’ay ts’antłeegn k’eh t’ey k’eh hǫǫt’eh.
\v 9 Neetthuull’ eh T’oodįht’ay, Neeta’ eh Neek’ach’ihohłe’, tsen-‘įį ts’enįh. Ay tł’aan neetthuull’ eh dinee iin ts’ahǫǫt’eh ts’ą’ dzehtsih, doo iin T’oodįht’ay xaa’ dineh eltsįį tł’aan hiik’eh t’ey nt’eh.
\v 10 Ts’ehłagn dineh diithaat ts’anh heneek suu’ eh hǫǫhee, T’oodįht’ay tsen-’įį nąy, ay tł’aan heneek ts’ant’ay eh hǫǫhee, dinee iin ts’ahǫǫt’eh ts’ą’ dehtsii. Sh\it Christian \it* koht’iin iin, hǫǫ’ ch’ah koht’iin k’atsaałeel.
\v 11 Taak’at hatdįh’ah tuu ts’antłeegn nił eh t’ey k’ahatdah’aal.
\v 12 Sh\it Christian \it* koht’iin iin, ts’oo \it fig \it* mǫǫsii’ uk’et ts’anh elkąy et-‘aal \it Olive \it* mǫǫsii’ k’a’uunagn. Neshyee \it grape \it* mǫǫsii’ uk’et ts’anh elkąy et-‘aal \it fig \it* mǫǫsii’ k’a’uunagn. Jan chih: yaa tu’ ts’anh tuu suu’ k’at’ey uutidhahnagn. Yaa tu’ \it salt \it* tu’ shįį’ ehtsayh.
\p
\v 13 Doo dine’ T’oodįht’ay aanah hee’etnay tł’aan hǫǫshyaan nühtah ts’anh eeday de’, ay dineh hǫǫsuu’ ts’ą’ niign el’ąy eh dii koht’iin nłiin huu’uchotnah’iił. Hǫǫsuu’ ts’ą’ niign dį’ xaa’, hǫǫ’ ch’ah huu’ich’otnah’iił, k’at’ey ihchaah niithan ts’ą’ tł’aan hǫǫshyąą ts’ą’.
\v 14 T’oot’ey nühdzee’shiit ts’anh huu’ahtsįį de’, tł’aan tsidahuudaht’ay xaah ts’ahǫǫt’eh ts’ą’ huuxaah naniich’ahthat de’, tł’aan shin xaa’ diits’ą’ k’ahognthat shįį’ niign nahthanh de’, ay tł’aan k’ahahshay. Ts’oonahniign. Sǫ’ ihchaah nahthan tł’aan sǫ’ łąą’ niign kįą’ alshyak ts’ą’ hahheel.
\v 15 Hǫǫ’ ch’ah ts’oonahniign niign, hǫǫ’ ch’ale’ T’oodįht’ay ts’anh k’abehuułay nt’eh. Jan nan’ k’et ts’anh behǫǫłiin nt’eh. Ts’ant’ay ts’anh behǫǫłiin nt’eh ts’ą’, T’oodįht’ay Otdeegn’ ts’anh k’abehuułay nt’eh.
\v 16 Dinee iin nił hultsiin iin tł’aan shin xaa’ diits’ą’ k’ahognthat shįį’ niign hiiniithan, ay iin tah ts’anh hotnoh niign huu’eh hutdaa’aał tl’aan nił tah ts’ą’ts’ahǫǫtłeek ts’ą’ chaltsiił niign.
\v 17 T’oot’ey doo T’oodįht’ay ts’anh hǫǫshyaan nłiin, ay ch’ale’ tthee’ ushyüüt hǫǫsoon tth’idee’ah. Ay tł’aan jan k’eh koht’iin chih nłiin: k’ats’ahǫǫt’eh ts’ą’ hohtsay; aat koht’iin iin nts’ąą’ hiiniithan aanah naniich’ithat; shin xaa’ diits’ą’ k’ahognthat shįį’ niign k’ayiniithan ts’ą’, chishyon iin nts’ąą’ họọ’ henąy itdaatth’ak; teejuh utdaaniił tł’aan ch’shyon iin xaah họọsuu’ ts’ą’ taadiił; łąą’ niign xaah shįį’ nataathat; tł’aan ch’ishyon xaah shyąą’ t’ey ts’ą’ t’ey k’adeh’ąy.
\v 18 Doo iin ts’ahọọt’eh ts’ą’ hohtsay k’ahiiłay iin, ch’ishyon iin eh k’ats’ahǫǫt’eh ts’ą’ hohtsay eh, nts’ąą’ daadąy xaa’ tthidee’ah niign uutaałeeł.
\c 4
\p
\v 1 Nühxon hu’ dii xaah nühtah nił k’eek’et noo’ nił eh dotdalnoo tł’aan heneek eh łidadatxaan hee’atnayh? Hǫǫ’ ch’ah niign dahdąy, jan xaah: dii nił yahch’įą’ nühdzee’ shiit łihdatdexaan, ay iin kaah hǫǫtł’at daanii’atdee.
\v 2 Ch’its’an nahthan ts’ą’ t’oot’ey ch’ishyon ts’an xaah, uts’an xaah t’ey ts’idhuhxay nahthanh. Ch’its’an kaah hǫǫtł’at daanii’atdee ts’ą’ t’oot’ey k’a’uu’ahnii ts’ą’, heneek eh lidadatxąą tł’aan łidadatxąą, ts’uunii xaah. Nühxon hu’ T’oodįht’ay eh k’ahithadalxoo, dii daatah nühtł’aahuułeel xaah. Hǫǫ’ xaah ch’ale’ dii daatah k’anühtł’aahuu-łeel.
\v 3 Jan xaah chih dii daatah k’anühtł’aahuułeel: ndeeh T’oodįht’ay eh hǫǫ’ aanah hithadalxoo danh, hǫǫ’ shtł’aataałeel xaah ch’its’ąą’niign inahthan eh, k’at’ey nühtł’aachaałeel. Dąą’ nüh’ee’etnayh: hasaanayh tsaałeel xaah, ay shįį’ xaah hǫǫ’ xaah hǫǫ’ shtł’aitaałeel inahthanh.
\v 4 Nühxon hu’ T’oodįht’ay łąą’ niign k’eetaat k’a’al’ąy, dąą’ ch’ah hee’atnayh: jan nan’ k’et niign k’eetaat tsaadiił inahthan ahłiin eh, T’oodįht’ay itsidal’ay ahłįį. Doo jan nan’ k’et niign k’eetaat tihdiił iniithan, ay ch’ah T’oodįht’ay itsidel’ay idiltsįį.
\v 5 T’oodįht’ay Aaneegn’ Utnetł’adn dąą’ nįh, “Nee’otdeegn’ T’oodįht’ay łahtth’agn’ neeshyinh shiiyįhtiin ndeeh nee’ihtsiin danh, hǫǫ’ įhdląą dii nił yahch’įą’ altsiił kaah hǫǫtł’at daanii’et-thiit.” Ay Utnetł’adn shyąą’ t’ey hǫǫ’ nay.
\v 6 T’oodįht’ay họọtł’at neets’iniiniik ts’ą’, ay ch’ah nee’otdeegn’ họọdląą dii nił yahch’įą’ altsiił kaah họọtł’at daanii’et-thiidn ch’ahnoo’ dįhtayh. T’oodįht’ay Aaneegn’ Utnetł’adn chih dąą’ nįh: “T’oodįht’ay doo ihcaah niithan koht’iin iin ithach’ihuudįh’a’ t’oot’ey doo k’at’ey ihchaah niithan koht’iin iin hǫǫtł’at ts’iniiniik.”
\v 7 Ay eh T’oodįht’ay tł’aa’idalshee t’oot’ey ts’ant’ay k’įą’ al’įh, ay tł’aan nühch’a’ łtaa’iltthat.
\v 8 T’oodįht’ay k’üü tahdał, tł’aan nühk’üü taadał. Nühxon ts’ant’ay niign dahdąy iin hǫǫsoon niign ninatdeeł. Hǫǫ’ dat-shyaagn eh, nühła’ küh kol ts’ą’ dahtanh k’eh t’ey nt’eh. Nühxon nts’ąą’ hǫǫ’ dahnąy k’eetaat k’adahdąy, nühxon hǫǫsoon niign niinatdeeł.
\v 9 Ts’ant’ay niign dahdąy xaah ts’ootahdąy. Ahdloo iin, tsaadalxoh daa. Hasaanayh ahłiin iin, daa ch’its’ąą’ naniichahdee. Nühts’ant’ay’ xaah, hǫǫ’ ch’ah dahdį’.
\v 10 T’oodįht’ay naał nühxon xaa’ itdalteeł k’e’itdalthiił tł’aan ninühdahteeł.
\p
\v 11 Sh\it Christian\it*’ koht’iin iin, sǫ’ nił k’įą’ ts’idahuudalt’e’. Doo \it Christian \it* koht’iin k’įą’ hǫǫhee, hǫǫ’ dį’ de’, T’oodįht’ay nts’ąą’ họọ’ nąy k’įą’ el’įh. Doo \it Christian \it* koht’iin edatjahkayh k’eh dį’, hǫǫ’dąy xaa’ T’oodįht’ay nts’ąą’ hǫǫ’ nąy edatjehkayh k’eh dį’. T’oodįht’ay nts’ąą’ hǫǫ’ nąy edatjehkayh k’eh dįįdį’ de’, ay tł’aan T’oodįht’ay nts’ąą’ hǫǫ’ nąy ik’ahohthadn noo’ uudih k’a’iiłay. T’oot’ey T’oodįht’ay hǫǫ’ nąy etdatjehkay tįįłeeł. Hǫǫ’ ch’ah hǫǫ’ t’ey k’a’iiłay.
\v 12 T’oot’ey T’oodįht’ay ay ch’ale’ diinach’udah’iin utł’aahǫǫ’ąą tł’aan Dishįį’ Diinach’uudah’įįn eh huu’etdatjahkayh. Diishįį’ dąą’ daaniił, “Ay dineh duunoo’ hǫhchaah ts’ą’ ch’oonelshaa danh ch’a’ talshih tł’aan ay ch’ishyon dineh ndeeh duunoo’ hǫhchaah ts’ą taahaał.” Ay eh dii xaah koht’iin idatjokkay inahthanh?
\p
\v 13 Doo iin nühtah ts’anh dąą’ henąy iin: “Dziin eh k’ahdąą nts’ąą’ tsaadiił heets’etnayh. Ay key ts’ą’ tsaadał tł’aan ishiit danh ts’ehłagn xay’ dzaltth’iił. Neexon xaa’ dii’eh tsootaltsayh. Lesüü nchaa tsahtsayh.” Nühxon t’ey nts’ąą’ nühdihnįh ts’ą’ shdahtth’ak.
\v 14 Hǫǫ’ ch’ah k’atdahniil, ntsąą’ k’ahdąą’ de’ nüh’eh uutaałeel hits’atniign xaah. K’ahdąą de’ k’a’uutahnay le’. Ch’its’ał gaay hǫǫtsuul utniithat įį’aan ay tł’aan hantee’ t’ey ch’ikol, ay k’eh hǫǫtsuul utniithat uu’ahnayh tł’aan ahłaa.
\v 15 Ay eh dąą’ch’ah dahniił, “Doo huuhǫhchaah ts’ą’ K’ach’hohłe’ hǫǫ’ niign niithanh de’, ts’ihonayh ts’ą’ noo’ haathał de’ hǫǫ’ ch’ah tsaadiił.”
\v 16 T’oot’ey k’aaduu’, “Shin ch’ich’ahnoo’ dihchaah,” di’uudatnįh. Hǫǫ’ daanah uunahdee. Hǫǫ’ k’ahuusuuy ts’ą’ ch’ah dahnąy.
\v 17 Ay eh, doo hǫǫsuu’ ts’ą’ niign tihdiił hee’etnay k’eetaat k’adiidiil, ay ch’ale’ ts’ant’ay niign det-shyaak.
\c 5
\p
\v 1 Nüxon doo iin ch’ii’etdąy iin ahłiin, k’aaduu’ shdahtth’ak. Dii ts’ihahdąy nühttheh utdaa’aal xaah tahtsah tł’aan daa ts’ootahdąy.
\v 2 Nühts’anh įhjiidn eltsįį tł’aan nühch’iill’ łahtthagn’ ts’ą’ gǫǫ gaay natnetdagn yaa eldeel tthidaidįhthat.
\v 3 Nüh\it Gold \it* elsüü’ delt’al eh nüh\it silver \it* elsüü’ ch’ookol taltsayh. Hǫǫ’ hut-shyaak ts’ą’, hǫǫ’ nüh’elsüü’ eh ch’its’ąą’ niign dahdiin hitnah’iił. Tł’aan ch’iitay nüh’elsüü’ hǫǫłiin eh nts’ąą’ uutahnayh niign tthidoodahthat. Nühtthįį’ deek’an’ k’eh nt’eh. Jan nan’ łaadalnąy ch’iitay nühdaatah eh nüh’elsüü’ hǫǫłįį.
\v 4 Doo nühxaah etnay iin xaah ch’inah’įį, k’ahǫǫchaa’ huu’ihahkeedn xaah. Ch’its’ąą’ niign dahday aanah nts’ąą’ thahdelxoo hǫǫ’ ch’ah ich’itdahtth’ak. T’oodįht’ay, Doo dagn nan’ k’et ts’anh huuhǫhchaah ts’ą’ k’ach’hohłe’, nts’ąą’ thahdelxoo, hesal eh, idiitth’ak.
\v 5 Jan nan’ k’et hahnay eh ch’iitay nühts’an hǫǫłįį. Nühxon shįį’ diinaniich’althat. Diixoh k’eet kaah shįį’. Noon uunah’įh. elk’aa eltsiin et-’aal xaah tidhalxay danh xaah, ay k’eh nt’eh, ch’its’ąą’ niign dahdąy eh. Noo’ haathał danh ndeeh T’oodįht’ay niign xaah nüh’edatjahkay danh suudahthiit.
\v 6 Doo nühk’eh ch’its’ąą’ niign k’adehdąy, ay ena’ k’anüh’ehnąy ts’ą’, boonahshaa tł’aan dhahxįį.
\p
\v 7 Ay eh, sh\it Christian \it* koht’iin iin, k’aaduu’ts’anh noo’ ndeeh Doo Huuhọhchaah ts’ą’ K’ach’hohłe’ nataadaał danh, sǫ’ hee’altay’ shiit k’eh t’ey udootidhaltth’ih. Jah noonagn ch’ah dahtth’ak. Dineh neshyee t’aa’ełee diinann’ k’et diitł’adn taltsay k’eh k’ahee’eltay’ ts’ą’ t’ey idootaadaał. Saanįą chąą eh nọọłuut chąą xaah k’ahee’eltay’ ts’ą’ t’ey idootaadaał.
\v 8 Nühxon t’ah, sǫ’ hee’altay’ ts’ą’ udootidhaltth’ih. Noo’ uudih łąy eh utdaaniił tł’aan datdįhtayh ts’ą’ na’ahdee, ndeeh Doo Huuhǫhchaah ts’ą’ K’ach’ihohłe’ nataadaał danh uuniik’uul danh hǫǫt’eh.
\v 9 \it Christian \it* koht’iin iin, sǫ’ nił xaah hahheel, T’oodįht’ay yaa k’anühedatjatkay xaah. Hǫǫchaa’ nüh’edatjatkay jah t’ey nühxaah huu’ąą, nts’ąą dahdiin xaah nüh’edatjatkay xaah.
\v 10 \it Christian \it* koht’iin iin, T’oodįht’ay xaah hǫǫhee iin doo iin Doo Huuhǫhchaah ts’ą’ K’ach’ihohłe’ Ǫǫsii’ eh hihhįįhaa’ ch’idą’, nts’ąą’ niign hihdiidiin hee’alnayh. Huu’ach’oodeedeegn eh, k’aheeheltay’ ts’ą’ t’ey hihdeltth’ih. Huuk’eh, sǫ’ hee’altay’ ts’ą’ idootidhaltth’ih.
\v 11 Hǫǫ’ ch’ah hihdet-shyaagn k’aheeheltay’ ts’ą’ t’ey hihdeltth’ii eh, T’oodįht’ay huu’eh nt’ay heets’etnayh. Nts’ąą’ niign \it Job \it* k’ahee’altay’ ts’ą’ eeday el’ąy, hǫǫ’ ch’ah aanah hejahtth’ak. Tł’aan nts’ąą’ Doo Huhǫhchaah ts’ą’ K’ach’ihohłe’ saan tah ik’anehtaa’, hǫǫ’ hee’atnayh. Ay eh T’oodįht’ay koht’iin iin ts’ą’ łąy eh ninsoon tł’aan teejuh huu’uunay heets’etnayh.
\p
\v 12 Sh\it Christian \it* koht’iin iin, nts’ąą’ dąą’ nühdihnįh, ch’idą’ hǫǫ’ nühdihnay ch’ich’ahnoo’ nłįį. Dineh hǫǫ’ tihdiił udahnąy de’, sǫ’ nühła’ it’aa’ahtthee eh sǫ’ hǫǫ’ dahnįį’. Sǫ’ nühła’ it’aa’ahtthee, ch’ǫǫsii’ eh dagn nan’ k’et ts’anh eh, jan nan’ k’et ts’anh eh, jan nan’ k’et hǫhchaah ts’ą’ ts’anh eh. Ndeeh, “Ąą’,” hǫǫ’ dahnįh danh, łąy eh dahniił. Sǫ’ shyąą’ t’ey dahnįį’. Ndeeh ch’ikol tł’aan ena’ hǫǫ’ dahnįh danh, łąy eh dahniił. Sǫ’ shyąą’ t’ey hǫǫ’ dahnįį’. Alshyak ts’ą’ shyąą’ t’ey hǫǫ’ dahnįh de’, T’oodįht’ay nüh’edatjatkayh.
\p
\v 13 Doo dine’ nühtah huuthay huu’aan, ay ch’ale’ hotnaadee. Doo dine’ hasaanayh nłiin, ay ch’ale’ saanayh eh jah’aał.
\v 14 Doo dine’ nütah ts’anh ehts’iign nłiin, ay ch’ale’ \it Christian\it*ch’indadn’ iin doo ch’ittheh hǫǫsuu’ tatdaadal daa dahuudelshyah. Baa hithahdalxoh ts’ą’ tł’aan Doo Huuhǫhchaah ts’ą’ K’ach’ihohłe’ Ǫǫsii’ eh hiik’et xey nahiidiinał.
\v 15 Hithahdelxoh ts’ą’ T’oodįht’ay ts’ą’ T’oodįht’ay łąy eh huunąy eh, ehts’iign dineh natat-suuł. Doo Huuhǫhchaah ts’ą’ K’ach’ihohłe’ hǫǫsuu’ ushyüüt duu’a’ kaah neetahteeł tł’aan ay dindeh ts’ant’ay’ its’ą’ utaa’aał.
\v 16 Ay eh nühts’ant’ay’ nił k’įą’ dahdąy eh ch’ah hǫǫ’ nił datniił tł’aan łaahithdalxoh, nühxon natat-suuł xaah. Ndeeh tth’idee’ay dine’ hotniidee danh beh nahǫǫ’ay hǫǫłįį.
\v 17 \it Elijah \it* dineh nłiin, dineh iin ts’iiłiin k’eh. K’atahchaan xaah łąy eh hotniidee ay tł’aan taagn xay’ ch’ixąą’noodeethat danh k’eh t’ey ehchaan.
\v 18 Ay tł’aan tay’ t’ey hotniidee tł’aan yaa dǫ́ǫ́ ts’anh hǫǫchaa’ ehchąą’ tł’aan nan’ ts’anh neshyee haanihshąą tł’aan neshyee.
\p
\v 19 Sh\it Christian \it* koht’iin iin, ts’ehłagn nühtah ts’anh łąą’ niign ch’a’ niłtaaniishyah de’ tł’aan ch’ishyon łąą’ niign xaah niidaitnihtiin de’,
\v 20 dąą’ heetalnayh: doo ts’ant’ay dine’ ts’ahǫǫt’eh ts’ą’niign ch’a’ łts’aadeeshyah yehtsiin, ay ch’ale’ ts’ant’ay dine’ shyüüt ndeeh duunoo’ hǫhchaah ts’ą’ ch’otnalshaa danh ch’a’ yitahshih tł’aan ay dineh ts’ant’ay hǫǫłiin uts’ą’ uutat-‘aał.