\id 1PE - Upper Tanana Athabascan Indian (Tetlin dialect) NT [tau] - USA 2013 (web 2014)
\h 1 Peter
\toc1 Dinahtł’aa Ch’ittheh Danh Peter ts’anh Netł’adn
\toc2 1 Peter
\toc3 1Pe
\mt1 Dinahtł’aa Ch’ittheh Danh \it Peter\it* ts’anh Netł’adn
\c 1
\p
\v 1 Shin ch’ah \it Peter \it* dąą’ jindhihtłat: \it Jesus Christ \it* daaneegn’ eh shtel’a’. Nühxon T’oodįht’ay ch’itah haanüh’įįdlah ts’ą’, \it Pontus \it* nan’ k’et, \it Galatia \it* nan’ k’et, \it Cappadocia \it* nan’ k’et, \it Asia \it* nan’ k’et, \it Bithynia \it* nan’ k’et nił ch’idanh danh daltth’ii iin, nühts’ą’ dąą’ jindhihtł’at.
\v 2 T’oodįht’ay diixaah nüh’iniithan eh, ch’itah haanüh’įįdlah, Botdeegn’ xaa’ tth’idee’ay koht’iin tahłeeł xaah tł’aan \it Jesus Christ \it* ik’ootahdee xaah tł’aan udall’ xaa’ nühts’ant’ay ch’a’ nanühtaach’ot xaah. Tthihąą’ łąą’ hǫǫtł’at nühts’itaanak tł’aan łąą’ nühdzee’ shiit hǫǫsuu’ ts’ą’ nühtł’aach’ootaa’aał.
\p
\v 3 T’oodįht’ay, Neek’ach’ihohłe’ \it Jesus Christ \it* Uta’ tsen-‘įį utdzaaniił. T’oodįhtay hǫǫchaa’ teejuh nee’uunąy eh, \it Jesus Christ \it* įįłaagn iin tah tsanh niidit-that tł’aan nahotnayh ehtsiin xaa’, k’aadu’u ts’ihonayh ts’ą’ neetł’aahǫǫdlah. Duunoo’ hǫhchaah ts’ą’ ts’ihonay heets’etnayh. Hǫǫ’ k’eexaan nts’ąą’ noo’ haathał de’ uutaałeel aanah needzee’ shiit hǫǫsuu’ ts’ą’ hǫǫłįį.
\v 4 Ay eh noo’ haathaał danh ndeeh T’oodįht’ay dii ch’ii’etdąy t’ey diichiil’ key’ iin xaah shign’ uudla’ huhtsiin ts’uutaanagn xaah ts’oonįh’įh. Ay ch’ah dagn nan’ k’et nühxaah eedlay huhtsiin. Ishiit danh ay ch’ah k’ałootdalnąy tł’aan ay ch’ah k’atthidadaaddhal tł’aan ay ch’ah k’at’ey k’otdatnagn.
\v 5 Łahtthagn’ ay ch’ah nühts’an hǫǫłįį, nühxon hu’ T’oodįht’ay łąą’ uudahnąy xaah. Diit’ay’ xaa’ nühk’anehtaa’, diixaah nühdahtth’iil xaah. Hǫǫ’ det-shyaagn, nuutaathal t’ey ishiit nühtahshii suudelshyaagn hinah’iil danh xaah, uudoodaltth’iil eh.
\p
\v 6 Hǫǫ’ xaah ch’ah hasaanayh tahłeeł t’oot’ey t’axoh hǫǫdląą niign t’ey hǫǫtsuul utniithat nüh’ach’otdeedee xaah, daa ts’ihaldąy le’.
\v 7 Hǫǫ’ ch’ah nüh’ach’otdeedee de’ t’ey, T’oodįht’ay łąy eh łąą’ uudahnąy hehtatnayh. Ch’iitsay \it Gold \it* mǫǫsi’ t’ey, ay ch’ah łotdalnąy, dinee iin ay eh kün’ deek’an’ eh hedį’, łąą’ nłiin de’ hitnah’iił xaah. Hǫǫ’ k’eh T’oodįht’ay łąą’ uudahnįh ts’ą’ t’ey, \it Gold \it* ch’ich’ahnoo’ diitł’adn, tthee’ k’a’ahnayh chih, łąą’ nłiin de’ kaah. Hǫǫ’ hut-shyaak ay tł’aan noo’ haathał dziinn’ndeeh \it Jesus Christ \it* nataadaał tł’aan nahitnal’iił danh, nühxaah tsen-‘įį hihdaaniił tł’aan nüh’aanah hǫǫsuu’ ts’ą’ hihdaaniił tł’aan nüh’aanah doodįhsoon hihdaaniił.
\v 8-9 \it Jesus Christ \it* k’at’ey unah’ąy t’oot’ey baa’ahtsįį’. Ay ch’ale’ k’aaduu’ k’anah’ąy t’oot’ey łąą’ uudahnįh. Nühshyüüt talshii eh łąą’ uudahnąy xaah, hǫǫcháá’ hasaanayh ahłįį. Hǫǫcháá’ hasaanayh ahłiin eh, hǫǫ’ ch’ah aanah eh k’at’ey thatdalxoo.
\p
\v 10 T’oodįht’ay xaah hǫǫhee iin dinee iin italshih ts’ą’ t’ey aanah hǫǫsuu’ ts’ą’ uukotnehtaa’ tł’aan łąą’ huu’uudetnįh ts’ą’ uhdeldii. Tł’aan uuniithaadn dą’ nts’ąą’ T’oodįht’ay hǫǫtł’át nühts’itaanagn hoohǫǫhaa’.
\v 11 Ndeeh danh hǫǫ’ ch’ah uutaałeel tł’aan nts’ąą’ hǫǫ’ ch’ah uutaałeel huutehdzayh ts’ą’ huudeh’ąą. Hǫǫ’ hihdet-shyaak, \it Christ \it* Botdeegn’ huushiit įį’ąy, \it Christ \it* ach’otdaathal ay tł’aan hii’aanah doodįhsoon utthiiłatdahdal huu’ich’ooneh’iin eh.
\v 12 T’oodįht’ay ay baa hǫǫhee iin dąą’ huu’ich’ooneh’įį’: hihdet-shyaagn, diihiishįį’ xaah k’adąy t’oot’ey nühxaah dąą’ het-shyaak. Łąą’ niign t’axoh dahtth’agn aanah hoohǫǫhaa’. Jah nan’ k’et T’oodįht’ay Aaneegn’ suu’ nadadełeegn iin, doo iin Botdeegn’ dagn nan’ k’et ts’anh iteh’a’ ut’ay’ xaa’ hoohǫǫhaa’, ay łąą’ niign eh nühts’ą’ hoohǫǫhaa’. \it angels\it*, T’oodįht’ay Aaneegn’ nadadełeegn iin t’ey, ay łąą’ niign uuk’eeniitsaadaa hiiniithanh.
\p
\v 13 Ay eh nühįįnį’ hǫǫsuu’ nitnah’aay, hǫǫsuu’ ts’ą’ niign tahdiił xaah. Noo’ uudih suudaldee k’eh daht’eh, tł’aan T’oodįht’ay hǫǫchaa’ nühts’itaanak ndeeh \it Jesus \it* nataadaal tł’aan nahitnal’iil danh hee’atnayh ts’ą’, nts’ąą’ noo’ haathał de’ uutaałeeł aanah nühdzee’ shiit hǫǫsuu’ ts’ą’ uutaałeel.
\v 14 T’oodįht’ay k’ootahdee’. Łąą’ niign hee’atnayh ttheh, ch’its’ąą’ niign kaah daanii’atdee k’eetaat dahdįį’. T’axoh sǫ’ hǫǫ’ k’eetaat dahdiin, tay’ t’ey ch’its’ąą’ niign koht’iin nühtaltsay xaah.
\v 15 T’oot’ey diit’ey huu’įhdląą ts’ą’ dahdąy eh, ts’ahǫǫt’eh ts’ą’ kol koht’iin tahłeeł, T’oodįht’ay ch’itah haanüh’įįdlay ts’ahǫǫt’eh ts’ą’ kol koht’iin nłiin k’eh t’ey.
\v 16 Hǫǫ’ ch’ah jan xaah: “Ts’ahǫǫt’eh ts’ą’ kol koht’iin tahłeeł, ts’ahǫǫt’eh ts’ą’ kol koht’iin ihłiin xaah,” T’oodįht’ay Aaneegn’ utnetł’adn hǫǫ’ nįh.
\p
\v 17 Ndeeh T’oodįht’ay ts’ą’ hithadalxoo danh, “Shta’,” dahniik. Ay ch’ah huuhįhdląą ts’ą’ dinee iin nił k’eh t’ey huu’etdatjahkayh, nts’ąą’ ts’ehłagn hįįłiin hǫǫ’ dąy xaah. Ay eh nühxon hu’ k’aaduu’ ts’anh noo’ jah nan’ k’et uutahnay eh, łah’utdahniił.
\v 18 Ay ch’ah jan xaah. Ts’hǫǫtłeek ts’ą’ niign ch’idą’ dahdiin, nühtthaay iin (\it Adam \it* eh \it Eve\it*) ts’anh uudaldiin t’ey, ay niign ch’a’ nühts’ą’ tat-aał xaah nts’ąą’ hutkeedn hee’atnayh. \it Christ \it* nühxon ehtiin xaa’, ay ts’ahǫǫtłeek niign ch’a’ tet-‘ąą. \it Christ \it* nühts’ą’ ehtįį ts’ą’ eh diitł’adn t’ey utkeet, nühts’ą’ tat-‘aał xaah. Dibee gaay ushinh nts’ąą’ t’ey k’adiit’ay k’eh nt’eh.
\v 19 Nühts’ą’ tet-‘ąą t’oot’ey \it silver \it* eh \it Gold \it* xaa’ k’ahǫǫ’ hut-shyaagn. Tthidatdaathał tł’aan shyąą’ k’eh t’ey bootaashyah.
\v 20 Nan’ teltsiin dą’ ttheh, T’oodįht’ay \it Christ \it* ch’itah haayįhtįį, dinee iin tahsii xaah. Tł’aan ay dziin heehuuthat danh nühxaah ich’oonih’įį’, Bi’atnay xaah.
\v 21 \it Christ \it* xaa’ T’oodįht’ay łąą’ uudahnįh. T’oodįht’ay xaa’ įįłaagn iin tah ts’anh ay niidit-that tł’aan dinee iin hii’aanah doodįhsoon dįįnįį’. Hǫǫ’ k’eexaan T’oodįht’ay łąą’ uudahnįh. Tł’aan łąą’ nłiin Bi’atnay eh, nühdzee’ shiit hǫǫsuu’ ts’ą’ hǫǫłįį.
\p
\v 22 T’axoh łąą’ heneek ik’oo’ahdee xaa’ nühdzee’ shiit nahahch’odn xaah tł’aan nüh\it Christian\it*’ koht’iin iin xaa’ahtsiin łąą’ t’ey nłiin xaah, łąą’ niłxaah tat-tsįį’, nühdzee’ hǫhchaah ts’ą’ eh.
\v 23 Ay ch’ah jan xaah: T’oodįht’ay Aaneegn’ hoonayh hohtsayh tł’aan duunoo’ hǫhchaah ts’ą’ taałeeł. Ay heneek xaa’ tay’ t’ey nüh’eehat-łįį. T’oodįht’ay, nühta’ k’at’ey tahteel xaa’, nüh’eehat-łįį. Nühta’ tahteel xaa’ k’anüh’ehat-łiin.
\v 24 T’oodįht’ay aaneegn’ utnetł’adn dąą’ nįh k’eetaat hǫǫt’eh:
\q “Dinee huuhįhdląą ts’ą’ iin tł’oh k’eh hįįt’eh. Tł’aan dineh nchaah ehutnay tł’oh k’et nsooneshee k’eh nt’eh. Ay tł’oh ehtįį tł’aan ik’et nsooneshee ik’et tsanh nadalnąy.
\v 25 T’oot’ey Neek’ach’ihohłe’ Aaneegn’ duunoo’ hǫhchaah ts’ą’ taałeeł.”
\m Ay heneek dahtthak, T’oodįht’ay Aaneegn’ suu’ eh hanüh’uunehtaan eh.
\c 2
\p
\v 1 Ay eh, ts’ahǫǫt’eh ts’ą’ niign dahdąy hedahtsiit. Elshyagn hedahtsiit! Nühdzee’ ts’anh thadalxoh ts’ą’ sǫ’ nühthaat ts’anh shįį’ thahdalxoo! Sǫ’ nił uu’alts’iin! Sǫ’ ts’ahǫǫt’eh ts’ą’ eh nił k’įą’ ts’idałhuudalt’e’!
\v 2 K’aadu’u ts’eeniin beehǫǫłiin t’uu kaah udatniigąy k’eh t’ey, dii nüh’otdeegn xaah łąą’ t’ey nłiin kaah daaniitatdee. Hǫǫ’ ch’ah koht’iin taht’iin taht’eeł, nts’ąą’ T’oodįht’ay nüh’uunąy k’eetaat koht’iin taaht’eeł xaah nahshee xaah. Hǫǫ’ ch’ah xaah nüh’ehshih.
\v 3 Hǫǫ’ nühdihnįh, Neek’ach’ihoh łe’ teejuh nüh’uunąy hee’atnay eh. Shi’ suu’ ahnay eh binühdehtłaan k’eh nt’eh.
\p
\v 4 Doo iin Doo Huuhǫhchaah ts’ą’ K’ach’ihohłe’ xaah nihniideel ahłįį. Ay ch’ah tthee choh hoonayh ts’ą’ nłiin, dinee iin k’ahiiniithan t’oot’ey ay ch’ah tthee choh diitł’adn nłiin, T’oodįht’ay ch’itah haayįhtįį.
\v 5 Nühxon tah ts’anh tthee choh honay ts’ą’ k’eh ahłįį ts’ą’, ay tthee choh eh T’oodįht’ay shyah Dotdeegn’ xaa’ holtsayh, hach’ełeegn ts’ahǫǫt’eh ts’ą’ kol koht’iin iin kaah. \it Jesus Christ \it* xaa’ T’oodįht’ay xaah hachahłee. Ay hachahłee ts’ą’ t’ey T’oodįht’ay dii iiniithan nłįį tł’aan nüh’otdeegn’ ts’anh nłįį.
\v 6 T’oodįht’ay Aaneegn’ utnetł’adn dąą’ nįh: 
\q “Tthee choh diitł’adn ch’itah haa’ih’aan, ay ch’ah t’axoh \it ZION \it* koht’iin xaah shyah k’eetł’aat tthee’ k’eh shiit niinihtįį. Tł’aan doot’ey łąą’ yuunąy, hǫǫ’ dąy xaah k’a’utnat-shaał.”
\m
\v 7 Nühxon łąą’ uudahnąy xaah ay tthee choh diitł’at. T’oot’ey doo k’ałąą’ yuunąy iin xaah ay tthee choh k’a’iisuuy hiiyuunįh. Hǫǫ’ aanah T’oodįht’ay aaneegn’ utnetł’adn dąą’ nįh: 
\q “Tthee choh shyah hohxaan iin shyah behhultsay xaah k’a’iisuuy yuunąy, ay tthee choh ch’ich’ahnoo’ ts’ą’ bihuudaa’aał.”
\m
\v 8 Tł’aan ch’idanh ts’anh dąą’ nįh: 
\q “Dinee iin tthee choh eh t’akehdalthagn ch’ale’ ay. 
\q Tthee choh eh nahdalnąy ch’ale’ ay.” 
\m T’oodįht’ay Aaneegn’ k’ałąą’ hiiyuunąy xaah t’akehdalthak. T’oodįht’ay nts’ąą’ huu’eh hut-shyaagn huuxaah iniithanh.
\p
\v 9 T’oot’ey nühxon huu’ T’oodįht’ay łąą’ uudahnąy iin T’oodįht’ay ch’itah hanüh’įįdlay koht’iin ahłįį. Diichaa’ hach’ełeegn’ iin ahłįį. Dinee iin nił ch’įą’ altsiił ts’ą’ ts’ahǫǫt’eh kol koht’iin ahłįį. Dinee iin T’oodįht’ay ts’an koht’iin ahłįį. T’oodįht’ay ch’itah hanüh’įįdlah, hǫǫsuu’ ts’ą’ niign dąy aanah ch’ishyon iin eh uutahheeł xaah. Ay ch’ale’ uunat-tł’adn niign ch’a’, “Aan,” nüh’ehnįh, hǫǫtł’at neldzeegn niign ahdał ts’ą’, uk’eetaat tahdiił xaah.
\v 10 Ch’idą’ T’oodįht’ay chiill’ key’ iin k’a’ahłay t’oot’ey t’axoh uchiil’ key’ iin ahłįį. T’oodįht’ay teejuh nüh’uudiinįį’ ch’idą’hits’atniign t’oot’ey teejuh nüh’uunąy t’axoh hee’atnayh.
\p
\v 11 Nühxaa’ihtsiin, haltthaan iin tł’aan diikoht’iin ch’a’ na’ogn deltth’ii iin ahłiin jan nan’ k’et daltth’ih ts’ą’, jan heneegn eh nühts’itihnak nihthanh. Ts’ahǫǫt’eh ts’ą’ niign nühshinh ts’anh kaah hǫǫtł’at daanii’atdee nühshyüüt k’įą’ thaaheh’ąy ts’ą’, sǫ’ hǫǫ’ k’eetaat dahdiin!
\v 12 Doo iin T’oodįht’ay k’ałąą’ hiiyuunąy iin tah hǫǫsuu’ ts’ą’ niign tahdiił. Ay de’, “Ts’ahǫǫt’eh ts’ą’ dahdį’,” dąą’ hidaaniił de’, hǫǫsuu’ ts’ą’ niign dahdį’ hinah’iił tł’aan ndeeh \it Christ \it* nüh’eh nt’eh danh, T’oodįht’ay tsen-‘įį hitdaaniił.
\v 13 Neek’ach’ihohłe’ kaah jah nan’ ch’dadiiłiin huuhįhdląą ts’ą’ nts’ąą’ nüh’ehnąy k’eetaat tahdiił. Haskeh choh, doo ch’ich’ahnoo’ nłiin, ch’idadiiłiin uk’eetaat tahdiił.
\v 14 Haskeh choh ts’anh ch’inłiin iin, \it Governor \it* mǫǫsii’, huuk’eetaat chih tahdiił. Haskeh choh huuteh’a’, doo iin ch’its’ąą’ niign daadąy iin huu’otnalshaa xaah tł’aan doo iin hǫǫsuu’ ts’ą’ niign daadąy iin aanah heneek suu’ eh thatdalxoo xaah.
\v 15 Dąą’ ch’ah T’oodįht’ay dąą’ tahdiił iniithan: ts’ooniiniign iin diixaah thahdelxoh ts’ą’ t’ey hits’ihetniign eh nüh’aanah henąy, hǫǫsuu’ ts’ą’ dahdąy eh, thaat-‘ehdanh k’adatjetküü danh huutahtsayh.
\v 16 Nühxon hu’ dinee iin huuts’ą’ tet-‘aan k’eh taht’eeł. T’oot’ey nts’ąą’ ts’ahǫǫt’eh ts’ą’ niign dahdąy ts’ihuutsah hahtsay xaah, sǫ’ hǫǫ’ daht’e’. T’oodįht’ay xaah alnaa koht’iin iin k’eh that’eeł.
\v 17 Łahtthagn’ dinee iin łah’utdahniił. Doo nüh’eh T’oodįht’ay łąą’ huunąy iin huuxaatahtsįį’. T’oodįht’ay inaljiit. Haskeh choh łah’utdahniił.
\p
\v 18 Nühtah ts’anh doo iin alnaa koht’iin hįįłiin, dineh huuts’ą’ k’aholthadn iin nts’ąą’ tahdiił dąą’nühhenąy k’eetaat tahdiił. Łąą’ łahhuu’utdahniił. Dąą’ ch’ah tahdiił, doo hǫǫsuu’ ts’ą’ nüh’ehnąy iin eh tł’aan doo ts’ahǫǫt’eh ts’ą’ nüh’ehnąy iin chih eh.
\v 19 Hǫǫ’ ch’ah dahdąy xaah, T’oodįht’ay nühts’itaanak. Hǫǫ’ ch’ah taadiił, nühxon nts’ąą’ T’oodįht’ay iniithan k’eetaat dahdį’ hee’atnayh de’, ch’its’ąą’ niign k’adahdąy xaah sǫ’ hee’altay’ nüh’ach’oodeethiidn eh.
\v 20 Ch’its’ąą’ niign dahdąy xaah nüh’įhtsüü tł’aan sǫ’hee’altay’ nüh’ach’oodeethiit de’, t’axoh ay ihchaa nahthanh. T’oot’ey hǫǫsuu’ ts’ą’ niign dahdąy xaah, sǫ’ hee’altay’ nüh’ach’oodeethiit de’, T’oodįht’ay hǫǫ’ xaah nühts’itaanak.
\v 21 T’oodįht’ay, “Aan,” Nühdiinįį’, nühxon hu’ hǫǫ’ ch’ah tahdiił xaah. \it Christ \it* huu’ nühxaah bach’otniithat tł’aan ay eh nts’ąą’ niign tahdiił nüh’ich’ooneh’įį’, nts’ąą’ dąy k’eetaat tahdiił xaah.
\v 22 \it Christ \it* ts’ant’ay k’at’ey dąy tł’aan ithaat eh k’at’ey elshyagn.
\v 23 Ndeeh hiidehtsii danh k’ahuudehtsii. Ndeeh hii’ach’otnithadn danh k’enühtagn-‘iił k’ahuu’ehnąy t’oot’ey T’oodǫht’ay hǫǫsuu’ ts’ą’ dąy łąą’ yuunąy, th’idee’ay eh huu’etdatjahkay xaah.
\v 24 Ndeeh \it Christ \it* jiliis k’et nihiinihtiin danh, neets’ant’ay’ diik’et da’elshyah, ts’ant’ay ts’ą’ ts’įįłaak ts’ą’ tth’idee’ay niign ts’ą’ ts’ootaanay xaah. Ukaak’eet hǫǫłiin xaa’ na’et-sǫǫ.
\v 25 Nühxon huu’ dibee ehuushyaagn k’eh ch’idą’ daht’eh. T’oot’ey t’axoh nanühniidlah, dibee k’anehtaa’ k’eh tahdał xaah. Ay ch’ale’ nühshyüüt k’anehtaa’.
\c 3
\p
\v 1 Nühtah ts’anh ch’i’aat iin hǫǫ’ k’eh tahdiił chih. Nühkąy’ nts’ąą’ nühhenąy k’eetaat tahdiił. Ay de’ doo iin huutah ts’anh T’oodįht’ay aaneegn’ k’ałąą’ hiiyuunąy iin, nts’ąą’ dahdąy xaa’ nts’ąą’ dahdąy xaa’ k’a’uu’ahheel t’ey eh, diihiit’ah łąą’ hitnahthiił.
\v 2 Łahhuudahnąy eh tł’aan ts’ahǫǫt’eh ts’ą’ niign k’adahdąy eh, hǫǫsuu’ ts’ą’ niign łąą’ dahdį’ hitnah’iił.
\v 3 Nts’ąą’ niign nühtthii’ xaa’ naa’ahts’iign tł’aan dii nsoon eh na’itdattł’uugn tł’aan chiil’ na’itdattł’uugn, ay xaa’ tsuusu’ kaah sǫ’ idal’iin.
\v 4 T’oot’ey ts’uusu’ kaah idal’iin nühshiit ii’ay ts’anh taałeeł. Nühdzee’ shiit dinee iin xaah hǫǫsuu’ ts’ą’ daht’eh ts’ą’ tł’aan thaat-‘ehdanh k’adetjetküü danh daht’eh ts’ą’, ay koht’iin daht’eh ts’ą’ duunoo’ hǫhchaah ts’ą’ ts’uusu’ kaah idal’iił. Ay koht’iin daht’eh ts’ą’ T’oodįht’ay xaah ch’ich’ahnoo’ nłįį.
\v 5 Ay ch’ah niign xaa’ ts’exee iin niithaadn dą’huuhonąy eh T’oodįht’ay xaah hįįtsiin, ts’uusu’ kaah ihdal’įį’. T’oodįht’ay łąą’ t’ey nłiin heehetnayh ts’ą’ łąą’ hiiyuudiinąy. Ay eh diikąy’ nts’ąą’ huuhenąy k’eetaat hihdiidįį’.
\v 6 \it Sarah \it* ay ch’ah koht’iin nłįį. \it Abraham\it*, diikąy’, ik’ahohthat tł’aan, “Shk’ach’ihohłe’,” hǫǫ’ yehnįh. Uyaats’e’e iin aahłįį, hǫǫsuu’ ts’ą’ niign dahdąy de’ tł’aan huu’įhdląą xaah k’analjiidn de’.
\p
\v 7 Nühtah ts’anh ch’ikąy’ iin ahłiin, nühxont’ah, nüh’aat iin eh daltth’ii eh, ch’i’aat ch’ahnoo’ ch’ik’ąy’ ut’ay’ hǫǫłiin heetatnayh. Ay eh łahhuu’uudahnąy eh huuxaah hǫǫsuu’ ts’ą’ tahdiił, T’oodįhtay nił eh hoonayh ts’ą’ nühtł’aataa’aał xaah. Nüh’aat xaah hǫǫ’ch’ah tahdiił, nił’eh hithatdalxoo k’a’ann’ hedaltth’iil xaah.
\p
\v 8 Jan t’aa’ay heneek nühts’ą’ jindhihtł’at. Dąą’ ch’ah koht’iin tahłeeł: ts’ehłagn mįįnii’ k’eh tahłeeł; nühshyüüt shiit hǫǫsuu’ ts’ą’ nił xaah tahtiił; \it Christian \it* kot’iin iin ahłiin eh, niłxaatattsįį’; nił’eh teejuh nahthiił; nił naał nühxon xaa’ noo’ itdalteeł k’e’itdalthiił;
\v 9 doot’ey ts’ahǫǫt’eh ts’ą’ nühxaah dąy de’, sǫ’ ts’ahǫǫt’eh ts’ą’ dah’iin; doot’ey nühdehtsii de’, udihnah sǫ’ nadahtsii, t’oot’ey ay koht’iin huutsinahniign eh nahuu’atkeet. Hǫǫ’ ch’ah tahdiił, ndeeh T’oodįht’ay, “Aan,” nühdiinįį’ dą’ xaah, “Nühts’itihnak,” hǫǫ’ nühdiinįį’.
\v 10 T’odįht’ay Aaneegn’ utnetł’adn dąą’ nįh k’eh nt’eh: 
\q “Doot’ey hoonay eh shaa’uutaasuuł tł’aan dziin hasaanayh tihłeeł iniithan, ay dine’ ts’ahǫǫt’eh ts’ą’ nąy hetdaatsal taałeeł tł’aan elshyagn hetdaatsal taałeel.
\q
\v 11 Ay dine’ ts’ahǫǫt’eh ts’ą’ niign ch’a’ łts’aadǫǫhaa daa tł’aan hǫǫsuu’ ts’ą’ niign taadiił. 
\q Ay dine’ diidzee’ shiit hǫǫsuu’ ts’ą’ hǫǫłiin kaah itnah‘iił tł’aan yehts’itaahaał.
\q
\v 12 Doo huuhǫhchaah ts’ą’ K’ach’ihohłe’ tth’idee’ay koht’iin iin huuk’anehtaa’ tł’aan ndeeh hithahdelxoo danh huudiitth’ak. 
\q T’oot’ey doo iin ts’ahǫǫt’eh ts’ą’ hedąy k’įą’ łtsaadeeshyah.”
\m
\v 13 Hǫǫsuu’ ts’ą’ niign duhdįį’ kaah hǫǫtł’at daanii’atdee de’, doo bach’otdakthiit nüh’utdaaniił laah?
\v 14 T’oot’ey hǫǫsuu’ ts’ą’ niign dahdąy xaah nüh’ach’otdeedee de’ t’ey, hǫǫ’ ch’ah nühxaah hǫǫsǫǫ! Dinee iin xaah sǫ’ naljiidn! Tł’aan sǫ’ łooni’atdaa!
\v 15 Nühdzee’ shiit \it Christ \it* itł’aadalshah tł’aan nühk’ach’ihohłe’ nühxaah itdaltsayh. Ndeeh doot’ey nts’ąą’ xaa’ T’oodįht’ay Daaneegn’ k’eetaat taadiił hee’atnay aanah nühhuudehkadn danh, nts’ąą’ xaa’ hǫǫ’ ch’ah hee’atnay aanah beh utnahheel xaah sutdalnee.
\v 16 T’oot’ey ndeehh hǫǫ’ aanah beh utnahheel danh, hǫǫsuu’ ts’ą’ niign hotdąy hee’etnayh ts’ą’, k’at’ey uts’anii’alt’eh ts’ą’ ahłay eh łah’uudahnąy eh uts’ą’ utnahheel. Hǫǫ’ xaa’, doo iin hǫǫsuu’ ts’ą’ niign \it Christ \it* niign k’eetaat dahdąy xaah ts’a’ahǫǫt’eh ts’ą’ nühk’įą’ hoohǫǫhee iin, ndeeh hǫǫ’ hoohǫǫhee danh, nts’ąą’ henąy xaah hunat-shaał.
\v 17 Ay xaah, hǫǫsuu’ ts’ą’ niign hotdąy xaah nee’ach’otdeedee ts’ą’, T’oodįht’ay hǫǫ’ ch’ah nee’uunįh de’, hǫǫ’ ch’ah niign ch’its’ąą’ niign hotdį’ xaah nee’ach’otdeedee ch’ahnoo’ nsǫǫ.
\v 18 \it Christ \it* hu’ nühxaah ehtįį. Ts’ehłagn danh noo’ haathał ts’ą’ łahtthagn’ ts’ą’ dinee iin huuts’ant’ay’ xaah ehtįį. Dineh suu’ nłiin dinee iin ts’ahǫǫt’eh ts’ą’ dąy iin xaah ehtįį, T’oodįht’ay xaah noo’ danühduułeel xaah. \it Jesus \it* shinh hiidhehxįį t’oot’ey Botdeegn’ nahotniik.
\v 19 Ch’otdeegn’ nłįį ts’ą’huutah ts’anh huuniign xaah niiniishyah tł’aan hahuu’uunehtanh.
\v 20 Ay ch’otdeegn’ iin dąą’ ch’ah hįįt’eh: ch’idą’ ndeehh \it Noah \it* ts’ayh chóó hohtsiin danh T’oodįht’ay dinee iin ch’its’ąą’ hǫǫsuu’ niign dįįnįį’ diniidlay xaah sǫ’ k’ahee’eltay’ utdoohohthadn eh, ay ch’otdeegn’ T’oodįht’ay k’ak’ahohdee. Ishiit dą’ dinee iin ntsiin ts’ayh chóó shiit deltth’ih. Tuu xaa’ ay łk’eedan iin ishiit ihshih ch’idą’.
\v 21 Tuu xaa’ huu’ehshih ts’ą’, tuu ch’exaan ay tuu k’eh nt’eh. \it Jesus Christ \it* įįłaagn iin tah ts’anh niidihtįį tł’aan nahatniik. Hǫǫ’ hut-shyaagn xaa’ nee’ehshih ts’ą’, tuu ch’exaan hǫǫ’ ch’ah huu’ich’oonih’įh. Tuu nee’ehxaan eh, nts’ąą’ T’oodįht’ay tahdiił nüh’uunąy k’eetaat hotdąy heets’etnayh. T’oot’ey tuu nee’ehxaan tu’ needzee’ shiit k’at’ey nataach’odn.
\v 22 Ch’idą’ \it Christ \it* dagn nan’ k’et niiniishyah tł’aan t’axoh T’oodįht’ay hǫǫsǫǫ ts’ąy danh eedah. T’oodįht’ay Aaneegn’ nadadełeegn iin eh dagn nan’ k’et ch’idadiiłiin eh dagn nan’ k’et huut’ay’ hǫǫłiin iin eh huk’ach’ihohłe’.
\c 4
\p
\v 1 Ay eh \it Christ \it* ushinh ach’oodeethiidn eh, nühxon du’ nts’ąą’ naniich’ithadn k’eh naniich’atdee xaa’ dįhtayh ts’ą’ itdaltsayh, nüh’ach’oodeedeegn eh. Doot’ey ushinh ach’oodeethiidn hu’ ts’ant’ay dąy hedahtsiit.
\v 2 Jah ts’anh noo’ tahteel danh nts’ąą’ T’oodiht’ay hǫǫ’ tįįdiił iniithan k’eetaat taadiił. Ts’ahǫǫt’eh ts’ą’ kaah hǫǫtł’at daanii’et-thiidn ik’eetaat k’ataadiil.
\v 3 Doo doo iin T’oodįht’ay k’ahiiniithan niign k’eetaat dąy, nühxon hu’ ay ch’ah koht’iin ch’idą’ ahłe’. Ishiit dą’ dąą’ ch’ah koht’iin ahłe’: ch’iitay ts’ahǫǫt’eh ts’ą’ hetdąy xaah hetdąy xaah dineh eh ts’exeh eh kaah daanii’atdee; łahtthagn’ ch’altsiił ts’ą’ ts’ahǫǫt’eh ts’ą’ niign kaah hǫǫtł’at daanii’atdee; ch’etnąą dinee’ iin ahłe’; ch’i’atnaan eh, ethiihahshąą; ch’ihetnaan uudhahtsiin; tł’aan nach’uudah’iin k’įą’ dahdąy eh, t’oodįht’ay iin shyąą’ hįįłiin dineh xaa’ ehtsiin łah’uudahnąy eh dahdąy tł’aan huuts’ą’ ch’idą’ hithadalxuu.
\v 4 Ay eh, t’axoh doo iin T’oodįht’ay k’a’ehiiniithan iin, huu’eh k’adahdąy eh tł’aan ethihuuhǫhshaan huuk’eh k’adahdąy eh, dii xaah lay hįįt’ay hiiniithanh. Hǫǫ’ xaah ch’ah nüh’aanah ts’ahǫǫt’eh ts’ą’ eh hoohǫǫhee.
\v 5 T’oot’ey noo’ haathał danh T’oodįht’ay naał nahtatdee tł’aan hǫǫ’ hotdąy dąą’ hidaaniił. Ay ch’ale’ suudelshyaak, hoohǫǫnąy iin tł’aan įįłaagn iin edatjahkay xaah.
\v 6 Ay eh, T’oodįht’ay Aaneegn’ suu’ dinee iin įįłaa ttheh yeh hahuu’uunehtaan, ay ch’ale’ dąą’ xaah hǫǫt’eh: huu’edatjehkayh ts’ą’ du’, ay heneek suu’ eh hahuu’uunehtąą, T’oodįht’ay huu’edatjatkay xaah. Ay ch’ah nts’ąą’ niign hedąy hoohǫǫnąy eh k’eetaat huu’edatjehkayh. Hoohǫǫnąy du’, ay heneek suu’ eh hahuu’uunehtąą, T’oodįht’ay nts’ąą’ iniithan niign k’eetaat. Botdeegn’ xaa’ huhtaanay xaah.
\p
\v 7 Huu’įhdląą ts’ą’ utnal’aal danh k’eh k’ahjiil nuuniithat. Nühxon xaa’ dii’atnay xaa’ nts’ąą’ duhdiin nahthan hǫǫ’ tahdiił tł’aan hǫǫsuu’ ts’ą’ huu’uudatnįh ts’ą’ hach’uudal’įį’, hithadalxuu xaah.
\v 8 Hǫǫchaa’ niłxaatatsiin ch’ich’ahnoo’ nt’eh, niłxaa’attsiin eh ts’ant’ay ndlaan nühttheh uudeedlay xaah.
\v 9 Nühxon xaa’ nühshyah niłxaah hǫǫsuu’ ts’ą’ k’atnahta’, k’at’ey nts’ąą’ łtiidhatniil eh.
\v 10 T’oodhit’ay ts’anh hǫǫsuu’ ts’ą’ T’oodįht’ay ts’an hǫǫłiin huu’ahdląą ts’ą’ nühtł’aa’įį’ąą. Ay eh, huu’ahdląą ts’ą’ nts’ąą’ niign hǫǫsuu’ ts’ą’ niign ay T’oodįht’ay ts’an hǫǫłiin eh nts’ąą’ niłxaah tsaadiil heetatnayh.
\v 11 Doot’ey hach’uunehtan nłiin, T’oodįht’ay Aaneegn’eh hach’utnahtanh. Doot’ey dinee iin ts’iniiniign T’oodįht’ay t’ay’ eh huuts’itaanak. Ay eh nts’ąą’ huu’įhdląą ts’ą’ hut-shyaagn eh, \it Christ Jesus \it* xaah T’oodįht’ay tsen-‘įį hitdaaniił. Ay ch’ale’ dinee iin hii’aanah doodįhsoon duunoo’ hǫhchaah ts’ą’ utthiłatdahdał tł’aan doonoo’ hǫhchaah ts’ą’ taałeeł. Hǫǫ’ huułe’.
\p
\v 12 Nühxaa’ihtsiin, hǫǫchaa’ nüh’ach’oodeedee k’atahnay xaah. Hǫǫ’ hut-shyaagn eh baa ch’aa’ k’atahteel. Doo \it Jesus \it* łąy eh uunąy iin eh noo’ uudih hǫǫ’ hut-shyaak.
\v 13 T’oot’ey tsen-‘įį tahteeł, \it Christ \it* ach’oodeethiit k’eh nüh’ach’oodeedee xaah. Ay eh noo’ nataadaal tł’aan Diichaa nłiin hinah’iił danh, hǫǫchaa’ tsen-‘įį tahłeeł.
\v 14 Nühk’įą’ dahdetdlih ts’ą’ nüh’etsidel’ay nüh’eh \it Christ \it* ǫǫsi’ xaah hut-shyaagn de’, hasaanayh ahłįį. Hǫǫ’ hut-shyaagn eh, T’oodįht’ay Otdeegn’, Diichaah nłiin, dǫ́ǫ́ ts’anh nühts’ą’ niishyah tł’aan nüh’eh nt’eh.
\v 15 Nühtah ts’anh doot’ey bach’oodeethiit de’, \it Christ \it* Ǫǫsii’ xaah bach’otdaathał. Dąą’ ch’ah dį’ de’, ch’its’ąą’ niign dį’: dineh dehxįį de’, ch’ineh’įį de’, ts’ahǫǫt’eh ts’ą’ niign dį’ de’, ch’ishyon iin k’adoodognthadn niithanh de’, ch’its’ąą’ niign dį’. Nühxon hu’, ay k’eh koht’iin ahłįį de’, \it Christ \it* Ǫǫsii’ xaah k’at’ey nüh’ach’oodaadaa.
\v 16 T’oot’ey \it Christian \it* niign k’eetaat dahdąy xaah nüh’ach’oodeedee de’, hǫǫ’ xaah ch’ah sǫ’ uunat-shya’. T’oot’ey T’oodįht’ay Ǫǫsii’ xaah dahdąy xaah, Baa tsen-įį tahłeeł.
\p
\v 17 Ishiit t’axoh nuuniithat huu’etdatjahkayh ts’ą’ teełe’. Tł’aan T’oodįht’ay chiil’ key’ iin ch’ittheh huu’etdatjahkayh. Neexon hu’, T’oodįht’ay chiil’ key’ iin ts’įįłiin, ch’ittheh nee’edatjahkayh de’, doo iin T’oodįht’ay Aaneegn’ suu’ k’ałąą’ hiiniithan iin eh nts’ąą’ noo’ uutaałeeł?
\v 18 T’oodįht’ay aaneegn’ utnetł’adn dąą’ nįh k’eh hǫǫt’eh:
\q “Dineh suu’ hehǫǫtsüü hihtalshih. Ay eh, dinee iin T’oodįht’ay k’a’ehiiniithan iin “tł’aan ch’shuuy dinee huuts’ant’ay’ hǫǫłįį iin, ay iin du’ nts’ąą’ huu’eh uutaałeeł?”
\m
\v 19 Ay eh, doo iin nts’ąą’ huuxaah iniithan k’eetaat huu’ach’oodeedee iin, ay iin hǫǫsuu’ ts’ą’ niign hedąy eh, nts’ąą’ T’oodįht’ay huuxaah taadiil xaah łąy eh łąą’ hiiyutdaaniił. T’oodįht’ay huu’ehtsiin, nts’ąą’ nąy k’eetaat nił k’eenoo’ dį’.
\c 5
\p
\v 1 Ay eh, nühtah ts’anh doo iin \it Christian \it* ch’indadn’ doo ch’ittheh hǫǫsuu’ tadaadal iin, jan heneegn eh nühts’itihnak nihthanh. Shin t’ah nüh’eh \it Christian \it* ch’indadn’ ihłįį. \it Christ \it* ach’oodeethiit nak-‘įį’ tł’aan ndeeh noo’ nataadaał tł’aan diichaah nłiin hitnah’iił danh Beh tihłeeł.
\v 2 T’oodįht’ay diidibee nühtł’aadiidlay iin huuk’atnahta’ xaah, huuk’atnahta’. Huu’ahdląą ts’ą’ nts’ąą’ T’oodįht’ay iniithan k’eetaat k’atnakta’ nahthiił. Doo shdibee’ k’ałah’uudiinąy iin ay ch’ah koht’iin sǫ’ ahłay. Lesüü dogntsay xaah, ay xaah shįį’ sǫ’ huuk’anahtaa’. Łąy eh huuk’atnakta’ nahthan xaah, ay xaah ch’ah huuk’atnahta’.
\v 3 Doo huuk’atnahta’ xaah nühtł’aa’įįdlay iin huuk’ach’ootakłe’ k’atnahthiil. T’oot’ey nts’ąą’ dahdąy eh hǫǫsuu’ ts’ą’ niign huu’ich’otnah’iił.
\v 4 Tł’aan ndeeh Dibee K’anehtaa’ Haske’ hinah’iil danh, tthiishoo suu’ \it crown \it* mǫǫsii’ noo’ uudih neldzeegn k’eh taat’eel nühtł’aatat-‘aał.
\p
\v 5 Nts’ąą’ ch’idą’ nühdihnąy k’eetaat, t’axoh tay’ t’ey dąą’ nühdihnįh: “Dineh iin nühtah ts’anh hu’ ch’itay iin k’eetaat tahdiił. Tł’aan nühxon łahtthagn’ k’e’idelthiit eh nüh’įįnį’ suudaldee, niłxaah tatnaal xaah, T’oodįht’ay aaneegn’ utnetł’adn dąą’ nąy xaah: 
\q “T’oodįht’ay doo ihchaah niithan koht’iin iin ithach’ihuudįhh’a’ t’oot’ey doo k’at’ey ihchaah niithan koht’iin hǫǫtł’at ts’iniiniik.”
\m
\v 6 Ay eh, T’oodįt’ay Uła’ dįht’ay nühnaadaagn hǫǫłiin eh, nühxon xaa’ noo’ itdalteeł k’e’itdalthiił. Ay tł’aan noo’ hǫǫ’t’ey nühxaah haathal ishiit nuuniithat danh niinühdahteeł, hǫǫsuu’ ts’ą’ nüh’aanah huutahheel xaah.
\p
\v 7 Łahtthagn’ dii baa łonii’atdaa t’ey uk’et daataałeeł, ay nühxeel’ nühxaah tihteeł iniithan xaah.
\v 8 Hǫǫsuu’ ts’ą’ huu’uudatnįh! Ts’ant’ay, nüh’its’idel’ay, huu’uhniik nüh’uunįh. Noon \it lion \it* mǫǫsii’ k’eh nt’ay thaat tsach’ushshiil kaah uneh’įh, nach’utnexon natetdaagn eh.
\v 9 Nüh\it Christian \it* koht’iin iin jah nan’ k’et hǫhchaah ts’ą’ ts’anh nüxon k’eh huu’ach’oodeedee. Hǫǫ’ ch’ah hee’atnay eh, datdįhtay eh natahdee T’oodįht’ay łąą’ uudahnąy eh tł’aan \it Satan \it* ithach’utdah’aal eh.
\v 10 T’oot’ey ha’gaay niithoo’ nüh’ach’oodeedee eh, T’oodįht’ay, huu’įhdląą ts’ą’ niign eh hǫǫtł’at huutsiniiniign, nts’ąą’ tahłeel diixaa’ nühtahtsayh. Ay ch’ale’ duunoo’ hǫhchaah ts’ą’ diichaah nłiin, diichaah Beh tahłeeł xaah, “Aan,” nühdiinįį’. Nühxon ts’ehłagn \it Christ \it* eh ahłiin xaa’, hǫǫ’ ch’ah det-shyaak. Uxaa’ datdįhtayh ts’ą’ naatahdee. Uxaa’ datdįhtayh ts’ą’ taht’eeł. Uxaa’ ttheeniideltth’at k’eh taht’eeł.
\v 11 Ay ch’ale’ ut’ay’ duunoo’ hǫhchaah ts’ą’ taałeeł. Hǫǫ’ huułe’.
\p
\v 12 Jah dinahtł’aa ntsuul \it Silvanus \it* sts’iniiniign eh nühts’ą’ jindhihł’at. Ay dine’ \it Christian \it* koht’iin łąą’ nłiin hǫǫ’ nihthanh. T’oodįht’ay łąy eh hǫǫtł’at ts’iniiniign aanah shaaneegn’ eh nühts’itihnak nihthanh. T’oodįht’ay łąy eh hǫǫtł’at ts’iniiniign eh nühts’ą’ uhhee. Nühts’iniiniign xaa’ łąą’ natahdee.
\v 13 Doo iin \it Jesus \it* łąą’ hiiniithan \it Babylon \it* key hihdeltth’ii iin T’oodįht’ay ch’itah haahuu’įįdlah chih. Ay iin eh \it Mark \it* doo shye’e k’eh nłiin eh nidahjinii’ąą.
\v 14 \it Christian \it* xantsiin eh nił’eh nanalts’uu’ eh, niłts’ą’ nidajinah’ąą. Nühxon \it Christ \it* ts’an ahłiin łahtthagn’ t’ey, tthihąą’ nühshyüüt shiit hǫǫsuu’ ts’ą’ taałeeł.