\id 2PE - Upper Tanana Athabascan Indian (Tetlin dialect) NT [tau] - USA 2013 (web 2014)
\h 2 Peter
\toc1 Dinahtł’aa Łaakey Danh Peter ts’anh Netł’adn
\toc2 2 Peter
\toc3 2Pe
\mt1 Dinahtł’aa Łaakey Danh \it Peter\it* ts’anh Netł’adn
\c 1
\p
\v 1 Shin ch’ah \it Simon Peter \it* dąą’ jindhihtł’at. \it Jesus Christ \it* xaah alnaa diht’eh tł’aan Daaneegn’ eh shteh’a’. \it Jesus Christ \it* T’oodįht’ay eh Nee’ehshii nłiin tth’idee’ay nłiin xaa’, nühxon T’oodįht’ay łąą’ inahthanh ts’ą’, nühts’ą’ jindhihtł’at. Neexon hu’ T’oodįht’ay łąą’ ts’uunąy diitł’adn k’eh, nühxon hu’ T’oodįht’ay łąą’ uudahnąy chih diitł’at.
\p
\v 2 T’oodįht’ay eh \it Jesus \it* Neek’ach’ihohłe’ hee’atnay xaa’, tthihąą’ hǫǫtł’át nühts’itaanak tł’aan nühshyüüt hǫǫsuu’ ts’ą’ t’ey tahłeeł.
\v 3 Dii huuhįhdląą ts’ą’ needaatah T’oodįht’ay niign k’eetaat tsaadiil xaah t’ey T’oodįht’ay diit’ay’ xaa’ neetł’aa’įįdlah. Diichaah beh tsaałeel xaahtł’aan hǫǫsuu’ ts’ą’ koht’iin beh tsaałeel xaah, “Aan,” neediinįį’. Ay ch’ah bits’etnay xaa’ T’oodįht’ay niign k’eetaat tsaadiił.
\v 4 Hǫǫ’ neetł’aa’įįdlay eh, diitł’adn t’ey eh łąą’ nchaah t’ey nühxaah tihdiił họọ’ neediinįį’. Họọ’ det-shyaak, ntsąą’ nee’ehnąy k’eetaat hodąy xaa’, neets’itaanagn xaah. Nts’ąą’ nühxaah tihdiił iniithan xaa’, jah nan’ k’et koht’iin ts’ahǫǫt’eh ts’ą’ niign kaah họọtł’át daaniihetdee uts’anh haatahdał tł’aan T’oodįht’ay honayh ts’ą’ nühtł’aahǫǫdlay koht’iin tahłeeł.
\v 5 Họọ’ k’eexaan dąą’ ch’ah łąy eh tihdiił utdahniił: T’oodįht’ay łąą’ uudahnįh ts’ą’, hǫǫ’ ch’ah k’et hǫǫsuu’ ts’ą’ koht’iin tahłeeł; hǫǫsuu’ ts’ą’ koht’iin ahłiin ts’ą’, hǫǫ’ ch’ah k’et T’oodįht’ay niign heetatnayh;
\v 6 T’oodįht’ay niign heetatnayh ts’ą’, hǫǫ’ ch’ah k’et nühxon xaa’ dii’atnaay xaa’ nts’ąą’duhdiin nahthan hǫǫ’ heetatnayh; nühxon xaa’ dii’atnay xaa’ nts’ąą’ duhdiin nahthan hǫǫ’ hee’atnayh ts’ą’, hǫǫ’ ch’ah k’et hantee’ t’ey k’at’ey hitidhahtsal niign t’ey heetatnayh; hantee’ k’at’ey hitidhahtsal niign hee’atnayh ts’ą’, hǫǫ’ ch’ah k’et T’oodįht’ay niign łąą’ tahdiił;
\v 7 T’oodįht’ay niign łąą’ dahdį’ ts’ą’, hǫǫ’ ch’ah k’et \it Christian \it* koht’iin xaa’ahtsįį’; \it Christian \it* koht’iin xaa’ahtsiin ts’ą’, hǫǫ’ch’ah k’et huuhįhdląą ts’ą’ t’ey xaatahtsįį’.
\v 8 Hǫǫ’ ch’ah niignłahtthagn’ ts’an al’įh. Hǫǫ’ ch’ah niign k’eetaat hǫǫchaa’ dahdį’ de’, ay tł’aan Neek’ach’ihohłe’, \it Jesus Christ\it*, łąą’ bitatnayh. Ay de’ \it Christian \it* honayh niign ts’ą’ k’ashyąą’ t’ey al’ąy tł’aan hǫǫ’ dahdį’ ts’ą’ T’oodįht’ay nüh’eh hasaanayh nłįį.
\v 9 T’oot’ey doot’ey hǫǫ’ch’ah niign k’eetaat k’adąy, k’ahjiil unaagn’ kol k’eh hǫǫt’eh tł’aan ha’gaay noo’ danh shįį’ neh’įh. Diits’ant’ay’ ch’idą’ det-shyaagn its’ą’ tet-‘aan tł’aan udzee’ na’įįch’odn heedhildah.
\v 10 Ay eh, sh\it Christian \it* koht’iin iin, nts’ąą’ dahdįį’ xaa’ T’oodįht’ay, “Aan,” nühdiinįį’ tł’aan ch’itah haanüh’įįdlay łąą’ huu’ich’otnah’iil. Hǫǫ’ ch’ah niign dahdį’ de’, k’at’ey t’aaketidhalthagn.
\v 11 Hǫǫ’ ch’ah dahdąy eh, noo’ haathał ndeeh duunoo’ hǫhchaah ts’ą’ Neek’ach’ihohłe’ tł’aan Nee’ehshii, \it Jesus Christ\it*, k’achihohłe’ danh daanahdeeł danh hǫǫchaa’ t’ey nühxaah hǫǫtiił.
\p
\v 12 Hǫǫ’ k’eexaan, hǫǫ’ aanah nił k’eenoo’ nüh’eh uutihheeł t’oot’ey hǫǫ’ aanah hee’atnay hee’ishnayh. Łąą’ heneek uu’ahniign eh, dadįhtay na’ahdee hee’ishnayh.
\v 13 T’oot’ey tth’ihtah huhnay eh hǫǫ’ aanah nüh’ehhuhhee kaah ayt’oo nsoon nihthanh. Hǫǫ’ nühdihnąy xaa’ hee’alnay xaah nühdhaktsayh, hǫǫ’ k’eetaat tahdiil xaah.
\v 14 Nts’ąą’ Neek’ach’ihohłe’, \it Jesus Christ\it*, hǫǫ’ shdiinįį’ k’eetaat ha’gaay niithoo’ tihteel hee’ishnayh.
\v 15 Ay eh, (hǫǫchaa’ T’oodįht’ay t’ay’ eh) ay łąą’ heneek nühtł’ootihłeeł, noo’ takteeł danh nił k’eenoo’ hǫǫ’ aanah heetalnay xaah.
\p
\v 16 Neek’ach’ihohłe’, \it Jesus Christ\it*, dadįhtay eh niishay aanah nüh’eh ts’ihǫǫhaa’ eh, nts’ąą’hut-shyaagn aanah k’ałąą’ noonagn eh nüh’eh k’ats’ihuuheel. Diinaagn’ eh nchaah ehutnay ts’ineh’įį’.
\v 17 Ndeeh T’oodįht’ay, Uta’, maanah doodįhsoon idiinįį’ tł’aan diichaah ehtsiin dą’, ishiit dzaltth’ii’. Ishiit dą’ T’oodįht’ay ch’ich’ahnoo’ diichaa nłiin dąą’ Yehnįh, “Jan ch’ah Sts’eeniinn’ nt’eh. Baa’ihtssįį’. Nts’ąą’ dį’ eh łąą’ Shaahǫǫsǫǫ.”
\v 18 Dagn nan’ k’et ts’anh ch’idą’ hǫǫhaa’ dziitth’ak, \it Jesus \it* eh ch’otnel-’iin ddhaall’ k’et hihdeltth’ii eh.
\p
\v 19 Ay eh, hǫǫ’ k’eexaan T’oodįht’ay xaah hǫǫhee iin aaneegn’ łąą’ t’ey nłiin łąy eh heets’etnayh. Huu’aaneegn’ k’eetaat nühdzee’ eh al’įh de’, hǫǫ’ hǫǫsǫǫ. Kün’ neldzeegn uunatł’adn danh shiit nildzee k’eh hǫǫt’eh. Ay kün’ neldzeegn shiit họọ’ hachaa’aal eh k’ahmann’ sann’ naldzee danh nildzee. Ay ch’ah jan k’eh nt’eh. Ndeeh \it Christ \it* nataadaal danh, ishiit diineldzeegn’ nühdzee’ shiit naldzee.
\v 20 T’oot’ey dąą’ hee’alnah ts’ą’ ch’ich’ahnoo’ nt’eh: T’oodįht’ay Aaneegn’ T’oodįht’ay xaah hǫǫhee iin xaa’ utnetł’adn, doot’ey diixaa’ k’at’ey nts’ąą’ nąy daaniil.
\v 21 Hǫǫ’ ch’ah hǫǫt’eh, T’oodįht’ay xaah hǫǫhee iin aaneegn’ dinee iin shįį’ ts’anh k’a’iiłay xaah. T’oot’ey dineh iin heneek T’oodįht’ay ts’anh eh hoohǫǫhaa’. Nts’ąą’ T’oodįht’ay Otdeegn’ họọ’ hitdaaniił iniithan k’eetaat hoohǫǫhaa’.
\c 2
\p
\v 1 T’oodįht’ay xaah hǫǫhee k’ałąą’ hiiłay iin tah ch’idą’ huu’ehǫǫłįį. Hǫǫ’ k’eh doo iin ch’its’ąą’ niign eh hach’uunehtan nühtah huutaałeeł. Tsiniishiign eh k’ałąą’ niign hach’uunehtanhts’ą’, łoodelnąy niign hach’uunehtanh tł’aan doo huuts’ą’ k’aholthadn huuxaah ch’idą’ hǫǫkeedn du’, “Uts’an k’ats’iiłay,” dąą’ hitdaaniił. Hǫǫ’ hihtaadiil eh diihiixaa’ t’ey cheldak k’eh t’ey det-shyaak łahdalnąy.
\v 2 T’oot’ey hǫǫcháá’ diishinh eh ts’exee iin ts’ahǫǫt’eh ts’ą’ ts’inuhshey kaah daaniihetdee ts’ą’, hǫǫ’ ch’ah haadal niign ndlaaniin huuk’eh taadał. Huuk’eh ts’ahǫǫt’eh ts’ą’ niign tsaadiil kaah hǫǫtł’at daaniihetdee. Tł’aan nts’ąą’ hedąy xaah, dineh iin łąą’niign t’ey aanah ts’ahǫǫt’eh ts’ą’ eh huutaaheeł.
\v 3 Lesüü kaah hǫǫtł’át daaniihetdee eh, ay ch’its’ąą’ niign hach’uunehtan iin k’ałąą’ noonagn eh nüh’eh hoohǫǫhee eh lesüü hitdaltsay. Niithaadn dą’ ts’anh huu’edatjahkay huuxaah suudelshyaak. Tł’aan doo huu’eh łotdahnąy k’a’eetiin.
\p
\v 4 \it angels\it*, T’oodįht’ay Aaneegn’ nadadełeegn iin ts’ant’ay hedąy iin t’ey, T’oodįht’ay nts’ąą’ hedąy hee’etnayh tł’aan huu’oonehshaa. Shign’ ts’ant’ay ts’ą’ k’eh huu’įįdlah. Ishiit danh uunatł’adn shiit daahuunehtł’ǫǫ, huu’edatjahkay dziinn’ doohihdeltth’ii eh.
\v 5 Niitháádn dą’ nan’ k’et hǫhchaah ts’ą’ T’oodįht’ay ch’oonehshaa. Etuuniithan eh nan’ k’et ts’ahǫǫt’eh ts’ą’ koht’iin ch’idą’ huu’oonehshaa. \it Noah \it* tth’idee’ay niign eh ha’uunehtan eh ahts’ąy uk’et łaakey ch’shyon dinee iin shįį’ huu’ehshih.
\v 6 T’oodįht’ay \it Sodom \it* key eh \it Gomorrah \it* key huu’eh oonehshaa, huudihk’aan eh łoodelnąy xaa’. Nts’ąą’ hut-shyaagn eh, ts’ahǫǫt’eh ts’ą’ koht’iin nts’ąą’ deh uutaałeel hitnah’iił.
\v 7 T’oodįht’ay dineh \it Lot \it* mǫǫsii’ ehshih. Ay ch’ah dineh suu’ nt’ay, nach’uudah’iin k’įą’ dinee iin hǫǫchaa’ diishinh eh ts’exee iin eh dineh iin eh ts’ahǫǫt’eh ts’ą’ eh ts’inuhshey kaah daniihetdee ts’ą’ hedąy xaah ay shįį’ naniich’ehthat.
\v 8 Ay dineh suu’ dziin eh nił k’eenoo’ ts’ahǫǫt’eh ts’ą’ niign hedąy ineh’ąy eh tł’aan idiitth’agn eh, diishyüüt beh tth’idee’ay hutnoo hultsįį.
\v 9 Neek’ach’hohłe’ nts’ąą’ niign dineh T’oodįht’ay iniithan iin huu’ach’oodeedee ch’a’ huutakshih hee’etnayh. Tł’aan noo’ haathał huu’edatjahkay dziinn’ danh nts’ąą’ niign ts’ahǫǫt’eh ts’ą’ koht’iin hee’etnayh.
\v 10 Doo iin ts’ahǫǫt’eh niign kaah hǫǫtł’at daaniihetdee k’eetaat hel’ąy tł’aan T’oodįht’ay behnahǫǫ’ay k’ałahhuudiinąy iin, ay iin eh nts’ąą’ tihdiił łąą’ hee’etnayh.
\p Ay ch’its’ąą’ niign hach’uunehtan iin k’at’ey doot’ey k’a’its’iniljiidn k’eh t’ey ihdilthan tł’aan diixa’ diits’ą’ k’aholthat niign shįį’ hedį’. Dagn nan’ k’et koht’iin diichaah nłiin iin k’ałahhuhdiinąy t’oot’ey huukįą ts’ahǫǫt’eh ts’ą’ hoohǫǫhee.
\p
\v 11 \it Angels\it*, T’oodįht’ay nadadełeegn iin ay ch’its’ąą’ niign hach’uunehtan iin ch’ahnoo’ dįhtayh tł’aan ch’ahnoo’ huu’ehnahǫǫ’ah. T’oot’ey ay nadadełeegn iin t’ey Doo Huuhǫhchaah ts’ą’ K’ach’hǫhłe’ naał dadįhtayh ts’ą’ k’ahidahdehtsiidn.
\v 12 Nts’ąą’ hodąy aanah k’ananiich’ihetdee ts’ą’, tsaadiił ihiiniithanh k’eetaat hedį’. Noon huuhuuniign xaah tł’aan huhdhahxaan xaah eehǫǫłiin k’eh hįįt’eh. Dii k’at’ey hiik’enii’įįdee k’įą’ ts’ahǫǫt’eh ts’ą’ hoohǫǫhee. Hǫǫ’ hedąy eh, ay iin noon k’eh chih łotdalnay.
\v 13 Ay iin ch’ishyon iin huu’ach’ihohnihdee xaah, huu’ach’oodeedeegn eh nahuutaakeet. Diishyinh xaa’ diit’ey ts’ahǫǫt’eh ts’ą’ niign kaah hǫǫtł’at daaniihetdee k’eetaat dziin hedį’. Hǫǫ’ hedąy eh haasaanayh hįįłįį. Nüh’eh nach’ihe’aał t’oot’ey uushyąą nühhihtsįį tł’aan hǫǫ’ hedąy eh dinee iin k’ahǫǫsuu’ k’ahuuxaan naniich’ihetdee, nadanaa’aa niign hedąy niign ch’ah łąą’ ehiiniithan xaah.
\v 14 Nił k’eek’et noo’ ch’its’ąą’ ts’exee’ tah ts’inuh’įį’ ehiiniithanh. Ts’ant’ay kaah hǫǫtł’at daaniihetdee łanelt’eh ts’ą’ t’ey k’a’iit’ay. Dinee dadįht’ay k’anaa’ethadn koht’iin iin eeł shiit huuhełee. Hiidzee’shiit ts’anh dii nił k’eenoo’ tay’ t’ey kaah daaniitsatdee uudildii ch’idą’. Łąy eh T’oodįht’ay huu’otnahshaa.
\v 15 Tth’idee’ay niign ch’a’ łtahniideeł tł’aan nuugn hihtaadał niign hehoohuhshyaak. \it Balaam\it*, \it Bosor \it* ushye’e, nuugn teeshay k’eh hihteedeeł. Ch’its’ąą’ taadiil niign xaah lesüü utł’aahiitaałeel kaah hǫǫtł’át daanii’et-thiit.
\v 16 Tł’aan ch’its’ąą’ niign dąy xaah, “Ts’ahǫǫt’eh ts’ą’ dįįdąy hedįįtsiit,” yidiinįį’. Ts’ooniiniign noon \it donkey \it* mǫǫsii’ yeh dineh k’eh hǫǫhee eh, ay T‘oodįht’ay xaah hǫǫhee nexal dine’ k’eh dąy heditsat.
\p
\v 17 Ay ch’its’ąą’ niign hach’uunehtan iin taak’et haadįh’ąą’ et-süü k’eh hįįłįį. K’oh ehts’ayhchoh eh ts’ayh yaałeeł k’eh hįįłįį. T’oodįht’ay uunat-tł’at hǫǫchaa’ huhhuuxaah hohtsįį.
\v 18 Nchaa hoohǫǫhee tł’aan ts’ooniiniign hoohǫǫhee. Hǫǫchaa’ diishyinh eh ts’exee iin ts’ahǫǫt’ehts’ą’ eh ts’inuhshey kaah daaniihetdee eh, ch’ishyon iin huuhih’eel. Ay ch’ishyon iin doo iin ch’its’ąą’ niign hedąy ch’a’ an’ hedeldah itdilthanh t’oot’ey ch’idą́ą́’ k’e’ehay.
\v 19 Ch’its’ąą’ niign hach’uunehtan iin, “Nühts’ą’ tat-aał, nts’ąą’ inahthan tahdiił xaah,” ay ch’ishyon iin hǫǫ’ huuhenįh. T’oot’ey naxan iin hu’ ts’ahǫǫt’eh ts’ą’ niign xaah alnaa iin k’eh hįįłįį ts’ą’, ts’ahǫǫt’eh ts’ą’ niign huu’eh łotdalnay noo’ uudih hǫǫ’ hedį’. Dii t’ey dineh ch’ǫt’üh, ay dineh ay ch’ah xaah alnaa.
\v 20 Doo iin dinee iin jah nan’ k’et ts’ahǫǫt’eh ts’ą’ niign ch’a’ hihdelshih, Neek’achihohłe’ tł’aan Nee’ehshii, \it Jesus Christ\it*, hii’etnay xaa’, ay tł’aan jah nan’ k’et t’ay’ tay’ t’ey huutł’aadet-that de’ tł’aan huu’uut’üü kaah na’ehnay de’, hǫǫ’ch’ah niign k’ahuusuy. T’axoh hįįłiin hetsihuuthadn dą’ ch’ahnoo’ k’ahuusuy.
\v 21 Doo iin tth’idee’ay niign heehetnay ay tł’aan uuch’a’ łtsaadeedeel iin, ay iin du’, k’at’ey tth’idee’ay niign heehetnay ch’ida’ ch’ahnoo’ łąą’nsǫǫ. T’oodįht’ay nts’ąą’ koht’iin ahłįį nąy t’ey huutł’aa’įįdlay ch’a’ łts’aadeedeeł.
\v 22 Nts’ąą’ huu’eh hut-shyaagn dąą’ nąy łąy eh nłįį ich’ooneh’įh: “Łii na’etkuy thaayitaldał. Tł’aan noon \it pig \it* mǫǫsii’ na’įįch’odn t’ey łeech’ak shiit talmǫǫ xaah natatdaał.”
\c 3
\p
\v 1 Nühxaa’ihtsiin, jan ch’ah łaakey danh dinahtł’aa nühts’ą’ utnidhihtł’at. Łaakey danh dinahtł’aa nühts’ą’ utnidhihtł’adn eh, nts’ąą’ hee’atnay eh nühts’ą’ utnidhihtł’adn eh, nüh’įįnį’ shiit hǫǫsoon tthidee’ay naniichahdee inihthanh.
\p
\v 2 T’oodįht’ay xaah hǫǫhee suu’ iin heneek hoohǫǫhaa’, nts’ąą’ henąy heetalnayh inihthanh. Doo Huuhǫhchaah ts’ą’ K’ach’ihohłe’ eh Huu’ehshii nts’ąą’ koht’iin ahłįį hǫǫ’ nąy hǫǫ’ nüh’ehnąy, doo iin Daneegn’ eh huuteh’a’ iin xaa’, hǫǫ’ ch’ah nüh’ehnąy heetalnayh inihthanh.
\v 3 Ch’ittheh dąą’ ch’ah k’eniitahdee: t’aa’ay dziiinn’ danh dinee iin ts’ahǫǫt’eh niign kaah hǫǫtł’at daaniihetdee k’eetaat huu’įhdląą hihdiidį’ iin uutaałeeł. Ay iin nühtsahuudlii eh dąą’ hitdaaniił,
\v 4 “‘Naatihdaał,’ hǫǫ’ nąy t’oot’ey ay ch’ah ndáy? Neetthaay ch’idą’ įįłaak t’oot’ey nan’ eltsiin dą’ ts’anh noo’uudih nił k’eh t’ey huut’eh.”
\v 5 Ay iin dąą’ ch’ah heetsatnayh k’a’ehiiniithan. Niithaadn dą’ T’oodįht’ay hǫǫhee xaa’, yaa eh jah nan’ k’et ehtsįį. Jah nan’ k’et tuu ts’anh ehtsįį tł’aan tuu xaa’ ehtsįį.
\v 6 Tł’aan niithaadn dą’, jah nan’ k’et łoodelnąy, tuu niihaan xaa’.
\v 7 T’oot’ey k’aaduu’ jah nan’ k’et eh yaa, T’oodįht’ay Daaneegn’ xaa’ łotdalnąy ch’a’ uuk’anehtaa’, noo’ haathal danh kün’ deek’an’eh łotdalnąy xaah. Noo’ haathał dziinn’ ndeeh ts’ahǫǫt’eh ts’ą’ koht’iin edatjahkay xaah tł’aan otdalnąy xaah łotdalnąy ch’a’ uuk’anehtaa’.
\p
\v 8 Nühxaa’ihtsiin, t’oot’ey sǫ’ dąą’ hee’alnaa. Ts’ehłagn dziinn’ ts’ehłagn deetaan deetaan deetaan xay’ k’eh nt’ay T’oodįht’ay hǫǫ’ niithanh. Tł’aan ts’ehłagn deetaan deetaan deetaan xay’ ts’ehłagn dziinn’k’eh ntay T’oodįht’ay hǫǫ’ niithanh. Nił k’eh t’ey huut’eh, T’oodįht’ay eh.
\v 9 Doo Huuhǫhchaah ts’ą’ K’ach’ihohłe’ Daaneegn’ k’eetaat k’at’ey nde’ uudetton’ hǫǫ’ taadiił. Ay ch’ale’teejuh nüh’uudiinąy hantee’ t’ey k’at’ey hedahtsiidn, k’ałohdulnąy k’a’iniithan xaah. Huuhįhdląą ts’ą’ huuts’ant’ay’ niign ch’a’ łts’ahdaadał iniithanh.
\p
\v 10 Doo Huuhǫhchaah ts’ą’ K’ach’ihohłe’ Dziinn’ noo’ haathał, ch’ine’iin dineh niishay k’eh t’ey. Ndeeh de’ hǫǫ’ uutaałeeł ts’ą’ hints’etniign. Ishiit dziin yaa nahtan k’eh t’ey doonay eh teenii k’eh t’ey taadiił. Dii yaa shiit t’ey kün’ deek’an’ eh łotdalnay. Tł’aan jan nan’ k’et eh huu’įhdląą ts’ą’ uk’et k’at’ey utdahłeel.
\v 11 Ay ch’ah huu’įhdląą ts’ą’ łotdalnąy eh, nts’ąą’ koht’iin taahłeeł? Ts’ahọọt’eh ts’ą’ kol koht’iin tahłeeł tł’aan T’oodįht’ay itł’aa’idalshay koht’iin tahłeeł.
\v 12 Ay ch’ah koht’iin tahłeeł, T’oodįht’ay Dziinn’ utdoodaltth’ii eh tł’aan hantee’ t’ey ch’ahnoo’ haathał xaah tahdiił eh. Ishiit dziin yaa uudiik’aan eh łotdalnay. Tł’aan saa eh ch’aldzeegn eh san’ eh kün’ eh uunelkün’ eh na’elxįį.
\v 13 T’oot’ey T’oodįht’ay, “K’ahdu’u yaa tł’aan k’ahdu’u nan’ k’et uutaktsayh,” hǫǫ’ nįh. Ishiit tth’itdee’ay niign uutaałeeł. Ay ch’ah xaah utdoodzeltth’ih.
\p
\v 14 Tł’aan ay eh, nühxaa’ihtsiin, ay dziin utdoodaltth’ii eh, sdzee’ shiit na’itdishch’ot łąy eh inahthanh tł’aan ch’its’ąą’ niign k’atihdiil łąy eh inahthanh tł’aan sdzee’ shiit hǫǫsuu’ ts’ą’ taałeeł łąy eh inahthanh. Ay ch’ah koht’iin tahłeeł iniithanh.
\v 15 Neek’ach’ihohłe’ tay’ dinee iin huutalshii xaah teejuh nüh’uudįįnąy hantee’ t’ey k’at’ey hedahtsiidn. Hǫǫ’ ch’ah Maanah nahthiił. Nee\it Christian\it*’ koht’iin, \it Paul\it*, bats’įįtsiin, huushyąą’ niign T’oodįht’ay hitł’aahoh’aan eh nühts’ą’ utnetł’adn k’eh hǫǫt’eh.
\v 16 Hǫǫ’ aanah dinahtł’aa eh utnetł’adn eh, hǫǫ’ ch’ah niign utnetł’at. Ch’ehładn’ niign dinahtł’aa utnettł’adn ts’anh hehǫǫtsüü k’enii’eedeek. Dinee ts’otneldąy iin tł’aan mįįnį’ nił ch’itah ts’ą’ naniich’ehthadn koht’iin iin nts’ąą’ t’ey nąy k’ałąą’niign eh hihdehnįh. T’oodįht’ay Aaneegn’ utnetł’adn ehłaadn’ ch’danh eh hedąy k’eh hǫǫt’eh. Hǫǫ’ het-shyaagn eh deh łotdalnąy ihdeltsayh.
\p
\v 17 T’oot’ey, nühxaa’ihtsiin, hǫǫ’ niign ch’idą’ ts’anh hee’atnayh. Ay eh huu’udatnįh, nach’uudah’iin k’įą’ koht’iin ch’its’ąą’ niign ha’uhnehtan xaa’ k’at’ey ts’ahǫǫt’eh ts’ą’ niign ninühhihtahteel xaah tł’aan dadįhtayh ts’ą’ na’atdee k’at’ey hetidhahtsal xaah.
\v 18 T’oot’ey Nühxon hu’ T’oodįht’ay nił k’eenoo’tay’ hǫǫtł’at nühts’iniiniign uu’uhniik noo’ uudih nahthanh, tł’aan Neek’ach’ihohłe’ tł’aan Nee’ehshii \it Jesus Christ \it* aanah nił k’eenoo’ tay’ Bitishnayh noo’ uudih nahthanh. Ay ch’ale’ k’aaduu’ diichaah nłiin tł’aan duunoo’ hǫhchaah taałeeł. Hǫǫ’ huułe’.