\id 1JN - Upper Tanana Athabascan Indian (Tetlin dialect) NT [tau] - USA 2013 (web 2014)
\h 1 John
\toc1 Dinahtł’aa Ch’ittheh Danh John ts’anh Netł’adn
\toc2 1 John
\toc3 1Jn
\mt1 Dinahtł’aa Ch’ittheh Danh \it John\it* ts’anh Netł’adn
\c 1
\p
\v 1 Heneek koht’iin honay ehtsiin aanah neexon nühts’ą’ ndzineetł’at. Ay ch’ale’ hetsihuuthadn ts’anh nłįį. Ay ch’ale’ idziitth’agn ch’dą’. Ay ch’ale’ neenaagn’ eh ts’inih’įį’. Ay ch’ale’ hǫǫsuu’ ts’ą’ ts’inih’įį’. Ay ch’ale’ neeła’ eh ch’idą’ bidzeltsat.
\v 2 Tł’aan T’oodįht’ayay duunoo’ hǫhchaah ts’ą’ honay huu’iich’ooneh’iin eh, neexon ay ch’ah ts’inih’įį’. Ay ch’ah aanah ts’ihǫǫhee tł’aan ay koht’iin honay ehtsiin, Doo T’oodįht’ay, Neeta’, eh įda’, ay tł’aan T’oodįht’ay Ay nee’iich’ooneh’iin. Ay ch’ah aanah nüh’eh ts’ihǫǫhee.
\v 3 Dii ts’inih’iin tł’aan dii idziitth’agn ch’idą’ hǫǫ’ aanah nüh’eh ts’ihǫǫhee. Hǫǫ’ hotdį’, hǫǫ’ hee’atnayh eh, T’oodįht’ay, Neeta’, eh \it Jesus Christ\it*, Ushye’e, eh ts’ehłagn įįnįį’ k’eh daht’e’ xaah, Huu’eh ts’ehłagn įįnįį’ k’eh neexon hǫǫt’eh k’eh t’ey.
\v 4 Hǫǫ’ ch’ah ndzineetł’at, nee’eh hǫǫchaa’ haasaanayh tahłeeł chih xaah.
\p
\v 5 “T’oodįht’ay neldzeegn niign nłįį. Tł’üh k’at’ey ushiit įį’ay,” T’oodįht’ay Ushye’e hǫǫ’ nee’ehnąy tł’aan k’aaduu’ hǫǫ’ nühts’enįh.
\v 6 Ay eh, “T’oodįht’ay eh ts’ehłagn įįnįį’ k’eh ts’įįłiin,” ts’enįh de’ t’oot’ey tł’üh shiit nats’etdagn de’, elshyagn koht’iin ts’įįłįį tł’aan łąą’ niignk’eetaat k’ahotdąy.
\v 7 T’oot’ey neldzeegn shiit nats’etdagn de’, T’oodįht’ay neldeegn shiit nłiin k’eh, łahtthagn nił k’eh ts’ehłagn įįnįį’ k’eh ts’įįł įį tł’aan T’oodįht’ay Ushye’e, \it Jesus\it*, dall’ neech’a’ neets’ant’ay’ nanii’iich’ot.
\p
\v 8 Neetah ts’anh doot’ey, “Sts’ant’ay’ kol,” nąy de’, ay ch’ah diihaa’ na’itnat-‘aa tł’aan łąą’ niign k’eetaat k’adehnąy.
\v 9 T’oot’ey neetah ts’anh doot’ey, “Łąą’ ts’ant’ay dihdįį’,” T’oodįht’ay ehnįh de’, its’ant’ay’ its’ą’ uutaa’aał tł’aan its’ahǫǫt’ay’ ch’a’ naitaach’ot. T’oodįht’ay hǫǫ’ dit-shyaagn, tth’idee’ay nłiin xaah tł’aan nts’ąą’ nąy k’eetaat dį’ xaah.
\v 10 Neetahts’anh doot’ey, “Sts’ant’ay’ kol,” nąy de’, ay ch’ah T’oodįht’ay nts’ąą’ nąy k’įą’ hǫǫhee tł’aanT’oodįht’ay Aaneegn’ udzee’ shiit k’a’ii’ay ts’ą’ k’at’ey k’ahohthadn.
\c 2
\p
\v 1 Nühxon hu’ sts’įįkey iin k’eh daht’eh. Ay eh nühts’ą’ hǫǫ’ jindhihtł’at, ts’ant’ay niign k’atahdiil xaah. T’oot’ey doot’ey ts’ant’ay dį’ de’, Neets’iniiniign T’oodįht’ay, Neeta’, naał neexaah hǫǫhee. \it Jesus Christ \it* Doo tth’idee’ay, ch’ale’ ay.
\v 2 Neexaah hǫǫ’ det-shyaak, Uxaa’ neets’ant’ay’ neets’ą’ uutet-‘aan xaah. Neexaah hǫǫ’ det-shyaagn tł’aan Uxaa’ jah nan’ k’et koht’iin iin łahtthagn’ ts’ant’ay’ huuts’ą’ chih uutat-‘aał.
\p
\v 3 Nts’ąą’ \it Christ \it* nee’ehnąy k’eetaat hotdąy eh, Bints’etnay heets’etnay.
\v 4 Doot’ey, “Bi’ishnayh,” dąą’ nįh de’, t’oot’ey nts’ąą’ nąy k’eetaat k’adąy, ay dineh elshyak tł’aan łąą’niign k’eetaat k’adąy.
\v 5 Ay tł’aan doot’ey nts’ąą’ nąy k’eetaat dąy, ay ch’ale’ łąy eh hǫǫchaa’ T’oodįht’ay xantsįį’. Hǫǫ’ xaa’ T’oodįht’ay eh ts’ehłagn k’eh ts’įįłiin łąy eh heets’etnayh, jan ch’ah xaa’.
\v 6 Doot’ey, “T’oodįht’ay eh ts’ehłagn k’eh dihdį’,” hǫǫ nąy, ay dineh \it Jesus \it* dąy k’eetaat taadiił.
\p
\v 7 Nühxaa’ihtsiin, nts’ąą’ koht’iin tahteel aanah nühts’ą’ jindhihtł’adn, ay ch’ah k’aadu’u k’a’iiłay. Nts’ąą’ koht’iin tahłeel niithaadn dą’ dahtth’agn, ndeehh T’oodįht’ay Aaneegn’ ch’ittheh łąą’ utdahnay dą’, ay ch’ah aanah nühts’ą’ jindhihtł’at shįį’.
\v 8 T’oot’ey tay’ t’ey nts’ąą’ koht’iin tahłeel k’aadu’u na’et-łįį, t’axoh maanah nühts’ą’ jindhihtł’and xaah. Ay nts’ąą’ koht’iin tahłeel k’aadu’u k’eetaat \it Christ \it* k’ashyąą’ t’ey dinee iin xantsiin tl’aan nühxon hu’ k’ashyąą’ t’ey \it Christ \it* xaa’ dinee iin xaa’ahtsįį’. Hǫǫ’ k’eexaan neldzeegn eh nat-tł’adn k’odatniik tł’aan łąą’ neldzeegn nildzeek.
\p
\v 9 Doot’ey, “Neldzeegn niign k’eetaat koht’iin ihłii,” hǫǫ’ nąy t’oot’ey dii\it Christian \it* koht’iin ts’ida’uudiht’ay, ay ch’ale’ tth’ihtah na-tł’adn niign k’eetaat koht’iin nłįį.
\v 10 Doot’ey niłk’eetaat noo’dii\it Christian \it* koht’iin xantsiin, ay ch’ale’ neldzeegn niign k’eetaat łąą’ eh koht’iin nłįį tł’aan diit’ey k’a’uttheh diitay t’aak’et dalthagn.
\v 11 T’oot’ey doo dii\it Christian \it* koht’iin ts’ida’uudiht’ay, ay ch’ale’ nat-tł’adn niign k’eetaat koht’iin nłįį tł’aan nat-tł’adn natetdaak. Nuugn tidhihshay hits’etniik, nat-tł’adn eh unaagn’ kol eh.
\p
\v 12 Nühxon ts’įįkey gaay daht’ay iin nühts’ą’ jindhihtł’at, \it Jesus \it* Ǫǫsii’ xaa’ nühts’ant’ay’nühts’ą’ uutet-’aan xaah.
\v 13 Nühxon ch’itay daht’ay iin nühts’ą’ jindhihtł’at, T’oodįht’ay Ushye’e Doo ch’ittheh hetsihuuthadn dą’ ts’anh nłiin bi’atnay xaah. Dineh iin chiił nłiin iin nühts’ą’ jindhihtł’at, ts’ant’ay, doo ts’ahǫǫt’ay nłiin, ch’idhaht’üü xaah.
\v 14 Nühxon ts’įįkey gaay daht’ay iin nühts’ą’ jindhihtł’at, Neeta’, T’oodįht’ay, Bi’atnay xaah. Nühxon ch’itay daht’ay iin nühts’ą’ jindhihtł’at, T’oodįht’ay Ushye’e doo ch’ittheh hetsihuuthadn dą’ ts’anh nłiin bi’atnay xaah. Dineh iin chiił nłiin iin nühts’ą’ jindhihtł’at, dahtay xaah. T’oodįht’ay Aaneegn’ nühdzee’ shiit eedlah tł’aan doo ts’ahǫǫt’ay nłiin ch’idhaht’üü.
\p
\v 15 Jah nan’k’et bihǫǫłiin eh jah nan’ k’et ts’an kaah k’adaaniitatdee. Doot’ey jah nan’ k’et bihǫǫłiin kaah daaniitatdee de’, k’at’ey T’oodįht’ay, Neeta’, haa’iitsiin.
\v 16 Dinee iin shiit ts’anh ts’ahǫǫt’eh ts’ą’ kaah daaniihetdeee eh, dinee iin nts’ąą’ hiineh’ąy tł’aan hiiniithan kaah daaniihetdee eh, dinee iin huuts’an xaah, “Ihchaa,” nahetdee eh, łahtthagn’ jah nan’k’et ts’an hǫǫłįį tł’aan jah nan’k’et bihǫǫłįį. T’oodįht’ay Neeta’, ts’anh k’abihuułay.
\v 17 Jah nan’ k’et tł’aan, dinee iin dii huuįhdląą ts’ą’ kaah daaniihetdee, łahtthagn’ bootahkol. T’oot’ey doo dine’ nts’ąą’ T’oodįht’ay niithan k’eetaat dąy, ay ch’ale’ duunoo’ hǫhchaah ts’ą’ hoonayh.
\p
\v 18 Nühxon ts’įįkey gaay daht’ay iin “Utnal-’aal k’eh nuuniithat,” nühdihnįh. “Doo \it Christ \it* itsidel-‘ay taahaał,” hǫǫ’ nühhenay ch’idą’. Tł’aan t’axo ndlaan iin \it Christ \it* itsihdel-‘ah. Ay eh utnal-‘aal k’ahjiil nuuniithadn heets’etnayh.
\v 19 Ay iin neetah ts’anh łąą’ k’ahiiłay eh, neech’a’ łtahteedeeł. Neetah ts’anh hįįłiin de’, noo’ uudih nee’eh hihdeltthii de’. T’oot’ey neech’a’ łtahteedeeł, łahtthagn’ iin neetah ts’anh k’ahiiłay, huu’iich’otnah’iil xaah.
\p
\v 20 T’oot’ey \it Jesus\it*, ts’ant’ay kol koht’iin nłiin, T’oodįht’ay Otdeegn’ nühtł’aa’įį’ąą. Ay xaa’ łahtthagn’ nühxon hu’ łąą’ niign hee’atnayh.
\v 21 Ay eh nühts’ą’ jindhihtł’at, łąą’ niign hee’atnay k’eexaan. Łąą’ niign hits’atniign ts’ą’ t’ey, hǫǫ’ xaah k’anühts’ą’ jindhihtł’andn. Ts’ehłagn elshyak ts’ą’ t’ey łąą’ niign ts’anh k’a’iiłay hee’atnayh chih.
\p
\v 22 Doo t’ey, “\it Jesus \it* ay \it Christ \it* k’a’iiłay,” hǫǫ’ nąy, ay ch’ale’ elshyak dine’ nłįį. Ay ch’ale’ \it Christ \it* itsidelay. Ay dine’ T’oodįht’ay, Neeta’, eh Ushye’e ena’ ihtsiin.
\v 23 Doot’ey T’oodįht’ay Ushye’e ena’ ihtsiin, ay ch’ah Neeta’, T’oodįht’ay, chih ena’ ihtsiin. Doot’ey T’oodįht’ay Ushye’e iniithanh, ay ch’ah Neeta’, T’oodįht’ay, chih iniithanh.
\p
\v 24 Heneek T’oodįht’ay Aaneegn’ ch’ittheh łąą’ utdahnay dą’ ts’anh idahtth’agn, noo’ uudih łąą’ utdahniił. Ay heneek noo’ uudih nühdzee’ shiit eedlay de’, T’oodįht’ay Ushye’e eh Neeta’, T’oodįht’ay, eh ts’ehłagn k’eh tahdił.
\v 25 Jan heneek suu’ neetł’aahǫǫdlah tł’aan łąy eh dąą’ nee’ehnąy, “Duunoo’ hǫhchaah ts’ą’uutahnayh.”
\p
\v 26 Doo iin nadahuuts’inuu’aa nühhuunay aanah hǫǫ’ jindhihtł’at.
\v 27 T’oot’ey nühxon du’, \it Christ \it* T’oodįht’ay Otdeegn’ nühtł’aa’įį’aan, nühshiit noo’ uudih eedah, ch’ishyon t’axoh ay utdaldii xaah hanüh’utnahtanh xaah. T’oodįht’ay Otdeegn’ huu’įhdląą ts’ą’ aanah utdaldii xaah hanüh’uunehtanh tł’aan łąą’ niign nłįį tł’aan elshyak ts’ą’ k’a’iiłay. Tł’aan nts’ąą’ \it Christ \it* utdaldii xaah hanüh’uunehtąą k’eetaat, noo’ uudih beh ts’ehlagn k’eh tahdiił.
\p
\v 28 Ay eh t’axoh, nühxon ts’eeniin daht’ay iin, noo’uudih beh ts’ehłagn k’eh tahdiił. Ay de’, ndeeh \it Jesus \it* nataadaal tł’aan hutnah’iil danh neexon nats’elsee k’eh t’ey hǫǫt’eh tł’aan unaał k’ats’utnat-shaal.
\v 29 \it Christ \it* tth’idee’ay nłiin bi’atnay eh, doo tth’idee’ay niign dąy iin T’oodįht’ay ts’eeniinn’ hįįłiin hee’atnayh chih.
\c 3
\p
\v 1 Shdahtth’ak! Neexon hu’ T’oodįht’ay, Neeta’, hǫǫchaa’ neexantsiin eh, T’oodįht’ay Ts’eeniinn’ nee’itnii’ąą. Tł’aan Uts’eeniinn’ iin łąą’ ts’įįłii. Hǫǫ’ k’eexaan, jah nan’ k’et koht’iin nee’its’ihetniik. T’oot’ey T’oodįht’ay t’ey Bits’ihetniik.
\v 2 Nühxaa’ihtsiin, t’axoh T’oodįht’ay Ts’eeniinn’ tsįįłįį t’oot’ey noo’ haathał danh nts’ąą’ neetah tth’ihtah k’anee’ich’ooneh’ąy. Dąą’ heets’etnayh: Ndeeh \it Christ \it* hitnah’iil danh, \it Christ \it* k’eh neetahtsay, nts’ąą’ łąą’ nłiin ts’itnah’iił xaah.
\v 3 Huuhįhdląą ts’ą’ dąą’ uutaałeel heehetnay iin ts’ant’ay hotdąy an’ hihdeltth’ih, \it Christ \it* ts’ant’ay dąy an’ hetdeldah k’eetaat.
\p
\v 4 Doot’ey ts’ant’ay niign dąy, ch’ale’ T’oodįht’ay Aaneegn’ k’a’ik’ahohthadn. Doot’ey ts’ant’ay niign dąy, T’oodįht’ay Aaneegn’ k’a’ik’ahohthadn eh, ay ch’ale’ ts’ant’ay ii’etdąy.
\v 5 \it Christ \it* dinee iin ts’ant’ay’ łtaa’uułee niishyah. Hoo’ hee’atnayh. T’oot’ey ts’ehłagn ts’ant’ay t’ey \it Christ \it* k’a’ushiit įį’ay.
\v 6 Ay eh huuhįhdląą ts’ą’ \it Christ \it* eh ts’ehłagn k’eh dąy, noo’ uudih ts’ant’ay k’adąy. T’oot’ey doot’ey noo’ uudih ts’ant’ay niign dąy, ay ch’ale’ ch’idą’ ts’anh kat’ey ineh’ąy tł’aan k’at’ey ii’itnąy. 
\p
\v 7 Nühxon ts’eeniin daht’ay, sǫ’ nadanühnuu’aa! Doot’ey tth’idee’ay niign dąy tth’idee’ay koht’iin nłįį, \it Christ \it* tth’idee’ay nłiin k’eh.
\v 8 Doot’ey noo’ uudih ts’ant’ay niign dąy, ts’ant’ay ts’anh bihǫǫłįį. Ts’ant’ay ch’ittheh T’oodįht’ay k’įą’ ts’ant’ay niign det-shyaagn dą’ ts’anh ts’ant’ay niign dį’. Hǫǫ’ xaah ch’ale’ T’oodįht’ay Ushye’e niishyah, nts’ąą’ ts’ant’ay dąy łootdalnąy xaah.
\p
\v 9 Doot’ey T’oodįht’ay ts’eeniinn’ nłiin, ay ch’ale’ noo’ uudih ts’ant’ay k’adet-shyaagn, T’oodįht’ay honayh ts’ą’ ushiit įį’ay xaah. T’oodįht’ay uta’ nłiin eh, noo’ uudih ts’uuts’ąą’ ts’ant’ay k’ataadiil.
\v 10 Dąą’ xaa’ doo iin T’oodįht’ay ts’eeniinn’ hįįłiin tł’aan doo iin ts’ant’ay ts’eeniinn’ hįįłiin hitnah’iił: huuhįhdląą ts’ą’ tth’idee’ay niign k’adąy eh k’at’ey dii\it Christian \it* koht’iin xantsiin, ay ch’ale’ T’oodįht’ay ts’eeniinn’ k’a’iiłay.
\p
\v 11 Jan heneek ch’ittheh T’oodįht’ay Aneegn’ łąą’ uudahnąy dą’ ts’anh idahtth’ak: “Niłxaah tat-tsįį’.”
\v 12 Dineh \it Cain \it* mǫǫsįį’ t’ey k’eh k’atsaałeel. Ay dineh doo ts’ahǫǫt’ay nłiin ts’an nłįį tł’aan diichiil dhehxįį. Dii xaah idhehxįį? Hǫǫ’hut-shyaagn, nts’ąą’ dąy ch’its’ąą’ niign nłiin xaah, tł’aan nts’ąą’ uchiil dąy’ hǫǫsu’ ts’ą’ nłiin xaah.
\p
\v 13 Ay eh, sh\it Christian \it* koht’iin iin, jan nan’ k’et koht’iin iin ts’idanühdiht’eh de’, sǫ’ ch’aa’ uu’alshyaagn.
\v 14 Ehtįį ts’ą’ niign ch’a’ łtaatseedeel tł’aan honayh ts’ą’ niign xaah niits’niideel heets’etnayh, \it Christian \it* koht’iin iin xaah ts’įįtsiin xaah. Doot’ey k’ahuuxantsiin tth’ihtah ehtįį ts’ą’ niign natetdaak.
\v 15 Doot’ey dii\it Christian \it* koht’iin ts’ida’uudiht’ay, ay ch’ale’ dineh dhehxeegn dine’ nłįį. Tł’aan dineh dhehxeegn dine’ duunoo’ hǫhchaah ts’ą’ k’ahuunay hee’atnayh.
\v 16 Jan xaa’ xantsiin niign aanah heets’etnayh: \it Jesus \it* tł’aa’idiltįį, neexaah uhte’ xaah. Neexon chih tł’aa’idzaltįį, \it Christian \it* koht’iin xaah ts’uhte’ xaah.
\v 17 Dineh uts’an hǫǫłiin de’ tł’aan dii\it Christian \it* koht’iin nił k’eenoo’ nasaaįht’ay ineh’įh de’, t’oot’ey teechuh k’a’iniithan de’, “T’oodįht’ay xaa’ihtsįį’,” hǫǫ’ nąy eh, shyąą’ t’ey hǫǫhee.
\v 18 Nühxon ts’eeniin daht’ay, sǫ’ heneegn xaa’ shįį’ niłxaa’at-tsiin t’oot’ey nts’ąą’ dahdį’ xaa’. Sǫ’ nühtthuul’ eh shyąą’ t’ey uunahhee xaa’ niłxaa’at-tsiin t’oot’ey łąą’ niigndahdį xaa’.
\p
\v 19 Ay eh, hǫǫ’ k’eetaat niłxaats’et-tsiin eh, T’oodįht’ay ts’an ts’įįłiin heets’etnayh. T’oodįht’ay łąą’ niign nłįį. Ay xaah neexon T’oodįht’ay naa needzee’ shiit hǫǫsu’ ts’ą’ taałeeł.
\v 20 Needzee’ neets’ą’ hidadehtsiidn de’ t’ey, T’oodįht’ay t’ay’ neet’ay’ ch’ahnoo’ nłiin heets’etnayh. Needzee’ nee’etnayh ch’ahnoo’ T’oodįht’ay nee’etnayh. T’oodįht’ay huu’įhdląą ts’ą’ hee’etnayh.
\v 21 Ay eh, nühxaa’ihtsiin, needzee’ neets’ą’ k’ahidadehtsiidn de’ t’ey, T’oodįht’ay naał nats’elsee k’eh t’ey hǫǫt’eh.
\v 22 Diit’ey xaah T’oodįht’ay uudzehkadn neetł’aa’įį’ąą, nts’ąą’ koht’iin tahłeeł hǫǫ’ nee’ehnąy k’eetaat ik’ats’ihohdee xaah tł’aan nts’ąą’ Baahǫǫsoon ehtsayh k’eetaat hotdį’ xaah.
\v 23 Nts’ąą’ koht’iin tahłeeł T’oodįht’ay nee’uudįįnąy dąą’ ch’ah nt’eh: Ushye’e Ǫǫsii’, \it Jesus Christ \it* łąą’ utdahniił tł’aan niłxaatat-tsįį’, nts’ąą’ koht’iin tahłeeł \it Christ \it* hǫǫ’nee’ehnąy k’eetaat.
\v 24 Doo iin t’ey nts’ąą’ koht’iin tahłeeł T’oodįht’ay uudįįnąy noo’ uudih ik’ahohdee iin T’oodįht’ay eh ts’ehłagn k’eh hel’įh tł’aan noo’ uudih huushiit įį’ay. Dotdeegn’ neetł’aa’įį’ąą xaa’ T’oodįht’ay neeshiit įį’ay heets’etnayh.
\c 4
\p
\v 1 Nühxaa’ihtsiin, sǫ’ huuhįhdląą ts’ą’, “T’oodįht’ay Otdeegn’ shiit įį’ay,” hǫǫ’ nąy łąą’ uudahnąy! T’oot’ey ay tthee’ k’ahahnayh, T’oodįht’ay Otdeegn’ ushiit įį’ay de’ utdaldii xaah. Hǫǫ’ ch’ah tahdiił, dąą’ xaah: ndlaan iin holshyak niign otdeegn’ huushiit įį’ay iin, Toodįht’ay xaah hǫǫhee iin k’eh hii’ihdeltsįį tł’aan nił ch’idanh danh key nahtetdak.
\v 2 Dąą’ ch’ah eh T’oodįht’ay Otdeegn’huushiit įį’ay de’ heetatnayh: ay iin tah ts’anh huuhįhdląą ts’ą’, “\it Jesus Christ \it* jan nan’ k’et dineh beehǫǫłįį,” hǫǫ’ nąy, ay ch’ale’ T’oodįht’ay Otdeegn’ ushiit įį’ay.
\v 3 T’oot’ey doot’ey \it Jesus \it* aanah k’ałąą’ hǫǫ’ nąy, ay ch’ale’ T’oodįht’ay Otdeegn’ k’a’ushiit įį’ay. Ay holshyak niign otdeegn’ \it Christ \it* itsidel’ay ts’anh niishyah. \it Christ \it* itsidel’ay taahaał idahtth’agn ch’idą’ tł’aan t’axo jah nan’ k’et shiit eedah.
\p
\v 4 Sts’įįkey k’eh daht’ay iin, T’oodįht’ay ts’an ahłįį tł’aan holshyak niign otdeegn’ iin ch’idhaht’üh. T’oodįht’ay Otdeegn’ nühshiit įį’ay ut’ay’, ay ch’ah ch’otdeegn’ jah nan’ k’et koht’iin shiit įį’ay ch’ahnoo’ nłįį.
\v 5 Ay holshyak niign otdeegn’ iin jah nan’ k’et ts’anh beehǫǫłįį tł’aan jah nan’ k’et aanah hihhǫǫhee tł’aan jah nan’ k’et koht’iin ay iin huhdiitth’ak.
\v 6 T’oot’ey T’oodįht’ay ts’anh nee’ehǫǫłįį. Doot’ey bi’etnay neediitth’ak. Doot’ey T’oodįht’ay ts’anh k’abehuułeel k’aneediittth’agn. Ay eh hǫǫ’ xaa’ łąą’ t’ey Otdeegn’ tł’aan holshyak niign otdeegn’ iits’etnayh. Nts’ąą’ niign ch’its’ąą’ łits’et nayh.
\p
\v 7 Nühxaa’ihtsiin, niłxaatsat-tsįį’, xantsiin niign T’oodįht’ay ts’anh beehǫǫłiin xaah. Doo dinee iin xantsiin T’oodįht’ay ts’eeniinn’ nłįį tł’aan T’oodįt’ay ii’etnayh.
\v 8 Doo dinee iin k’ayaa’iitsiin, ay ch’ah T’oodįht’ay k’a’ii’itnay, T’oodįht’ay xantsiin niign nłįį xaah.
\v 9 Dąą’ ch’ah eh T’oodįht’ay neexantsiin nee’iich’ooneh’įį’: T’oodįht’ay Diishye’e t’aa’ay jah nan’ k’et tuushya’ xaah iteh’a’, Ushye’e xaa’ uutsaanayh xaah.
\v 10 Xantsiin t’ey jan k’eh nt’eh: T’oodįht’ay neexantsįį’ tł’aan Diishye’e iteh’a’, uxaa’ neets’ant’ay’ neets’ą’ uutat-‘aał xaah. K’at’ey T’oodįht’ay xaah ts’įįtsiin t’oot’ey neexantsįį’.
\p
\v 11 Nühxaa’ihtsiin, T’oodįht’ay hǫǫ’ ch’ah neexantsiin eh, ay tł’aan niłxaatat-tsįį’.
\v 12 Doot’eych’idą’ ts’anh k’at’ey T’oodįht’ay ineh’ąy. Niłxaats’it-tsįį’ de’, T’oodįht’ay neeshiit įį’ay tł’aan nts’ąą’ niign neexantsiin k’eh uxaa’ ts’įįtsįį’.
\p
\v 13 Dąą’ ch’ah eh T’oodįht’ay eh ts’ehłagn k’eh ts’el’įh tł’aan neeshiit įį’ay łąą’ heets’etnayh: T’oodįht’ay Dotdeegn’ neetł’aadih’ąą.
\v 14 Tł’aan \it Jesus \it* ts’ineh’įį’ tł’aan, “T’oodįht’ay Diishye’e jan nan’ k’et koht’iin huutahshih xaah iteh’a’,” ch’ishyon iin hǫǫ’ tsenih.
\v 15 Doot’ey, “\it Jesus \it* T’oodįht’ay Ushye’e nłįį,” hǫǫ’ nay, T’oodįht’ay ay shiit įį’ay tł’aan ay ch’ale’ T’oodįht’ay eh ts’ehłagn k’eh el’įh.
\v 16 Neexon hu’ nts’ąą’ niign neexaah det-shyaagn eh, neexantsiin heets’etnayh. Hǫǫ’ det-shyaagn eh, chih neexantsiin łąą’ uts’uunįh.
\p T’oodįht’ay xantsiin niign nłįį tł’aan doo T’oodįht’ay xantsiin k’eh noo’uudih xantsiin, ay ch’ale’ T’oodįht’ay eh ts’ehłagn k’eh nt’eh tł’aan T’oodįht’ay ay shiit įį’ay.
\v 17 Hǫǫ’ ch’ah eh T’oodįht’ay xantsiin niign nee’eh łanelt’eh nt’eh, noo’ haathał danh ndeeh nts’ąą’ hotdąy xaah nee’etdatjahkay danh ts’uutaaheel xaah k’ats’utnat-shaal xaah. \it Christ \it* Diita’ xantsiin eh t’axoh dagn nan’ k’et yeh ts’ehłagn nłiin k’eh, jah nan’ k’et T’oodįht’ay eh ts’ehłagn k’eh hotdąy.
\v 18 Dinee iin du’ hǫǫ’ helt’eh ts’ą’ T’oodįht’ay xantsiin niign k’eetaat hetdąy, ay iin ch’ale’ k’ahniljiidn. Łanelt’eh ts’ą’ xantsiin niign hǫǫłiin eh, uuneljiit niign k’odatniik. Nił’eh k’a’it-łay. Ay ch’ah jan xaah: uuneljiit niign ch’oonelshaa danh niiniishyah. Tł’aan doot’ey neljiidn, ay ch’ale’ T’oodįht’ay niign xantsiin eh łanelt’eh ts’ą’ k’a’iiłay.
\p
\v 19 T’oodįht’ay ch’ittheh neexantsiin eh ch’ishyon iin xaats’įįtsįį’.
\v 20 Doot’ey, “T’oodįht’ay xaa’ihtsįį’,” hǫǫ’ nįh de’, t’oot’ey dii\it Christian \it* koht’iin ts’idayuudiht’ay, ay ch’ale’ elshyak dine’ nłįį. Ay ch’ah k’at’ey T’oodįht’ay, Doo k’a’ineh’ąy, xaa’iitsiin, k’at’ey dii\it Christian \it* koht’iin, doo ineh’iin, xantsiin de’ t’ey.
\v 21 Ay eh T’oodįht’ay nts’ąą’ koht’iin tahłeeł hǫǫ’ehnąy dąą’ ch’ah nt’eh: doo T’oodįht’ay xantsiin dii\it Christian \it* koht’iin xantsįį’ chih.
\c 5
\p
\v 1 \it Jesus\it*, Doo T’oodįht’ay ch’itah haa’įįtiin, huutahshii xaah, \it Christ \it* nłįį. Doot’ey ay ch’ah łąą’ uunąy, ay ch’ale’ T’oodįht’ay ts’anh eehǫǫłįį. Doot’ey Neeta’, T’oodįht’ay, xantsiin T’oodįht’ay ts’eeniinn’ iin chih xantsįį’.
\v 2 T’oodįht’ay ts’eeniinn’ iin xaats’įįtsiin heetsetnayh, T’oodįht’ay xaats’įįtsįį’ de’ tł’aan nts’ąą’ koht’iin ahłįį hǫǫ’ nąy k’eetaat hotdąy de’.
\v 3 Łąy eh T’oodįht’ay xaats’įįtsįį’ de’, nts’ąą’ koht’iin ahłįį hǫǫ’ nąy k’eetaat hotdąy. Tł’aan nts’ąą’ koht’iin ahłįį hǫǫ’ nee’ehnąy, xeeł ndüü tsaaxeeł k’eh k’ahuut’ay.
\v 4 Ay ch’ah jan xaah. Diit’ey T’oodįht’ay ts’anh eehǫǫłiin jan nan’ k’et chaat’üh. T’oodįht’ay łąą’ ts’iiniithan xaa’ jan nan’ k’et ntsaat’üh.
\v 5 Tł’aan doo jan nan’ k’et chaat’ǘh? Doo Jesus T’oodįht’ay Ushye’e nłiin łąą’ uunąy, ay ch’ah jan nan’ k’et chaat’üh.
\p
\v 6 \it Jesus Christ\it*, Ay ch’ale’ niishay xaah, tuu eh tuu yehtsįį tł’aan dał eh ehtįį. Tuu xaa’ shįį’ k’aniishay t’oot’ey tuu xaa’ eh dał xaa’ niishyah. Tł’aan Toodįht’ay Otdeegn’ hu’ hǫǫ’ ch’ah niign łąą’ niign nłiin huu’ich’ooneh’įh. Botdeegn’, ay xaa’ ch’ah dinee iin łąą’ niign hehtatnayh.
\v 7 Taagn t’ey hǫǫch’ah łąą’ niign nłiin huu’ich’ooneh’įh.
\v 8 Jan ch’ah hįįt’eh: T’oodįht’ay Otdeegn’ eh ay tuu eh ay dał. Łahtthagn’ taagn t’ey nił k’eetaat huu’ich’ooneh’įh.
\v 9 T’oodįht’ay hǫǫ’ ch’ah łąą’ niign Diishye’e aanah nłiin huu’ich’ooneh’įh. Dinee iin du’ dii łąą’ niign nłiin nee’ich’ohneh’ąy łąą’ ts’uunįh t’oot’ey T’oodįht’ay łąą’ niign nłiin nee’ich’ooneh’ąy eh ch’ahnoo’ nt’eh.
\v 10 Doo T’oodįht’ay Ushye’e łąą’ uunąy, ay ch’ale’ dii hi’ich’ooneh’ąy uuniik. T’oot’ey doo T’oodįht’ay k’ałąą’ uunąy, T’oodįht’ay elshyak ts’ą’ k’eh yehtsįį, łąą’ niign Diishye’e aanah hich’ooneh’ąy k’ałąą’ uunąy xaah.
\v 11 Ay eh łąą’ niign nłiin nee’ich’ooneh’ąy dąą’ ch’ah nt’eh: duunoo’ hǫhchaah ts’ą’ huuhonayh ts’ą’ neetł’aa’įį’ąą. Shye’e xaa’ duunoo’ hǫhchaah ts’ą’ ts’oonayh.
\v 12 Doo Ushye’e uuniign, ay ch’ale’ ay honayh ts’ą’ uts’an hǫǫłįį. Doo T’oodįht’ay Ushye’e k’auuniign, ay ch’ale’ ay honayh ts’ą’ k’a’uts’an huułay.
\p
\v 13 Hǫǫ’ ch’ah nühjindhihtł’at, duunoo’ hǫhchaah ts’ą’ huhnayh heetatnay xaah. Nühxon hu’ T’oodįht’ay Ushye’e Ǫǫsii’ łąą’ uudahnąy nühjindhihtł’at.
\v 14 Hǫǫ’ k’eexaan T’oodįht’ay xaah hithadzelxoo k’ats’ineljiidn. Ndeeh hithadzelxoo danh nts’ąą’ ts’iiniithanh de’, nts’ąą’ niithan niign k’eetaat nłiin, neediitth’agn heets’etnayh.
\v 15 Ndeeh t’ey uts’ą’ hithadzelxoo danh, neediitth’ak. Hǫǫ’ ch’ah łąą’ niign nłiin heets’etnay eh, diit’ey xaah hithadaelxoo neetł’aa’įį’aan heets’etnayh chih.
\p
\v 16 Doot’ey dii\it Christian \it* koht’iin ts’ant’ay dąy ehtįį ts’ą’ k’a’ideltsay ineh’įh de’, yaa hotnaadee tł’aan T’oodįht’ay honayh ts’ą’ yitł’aataa’aał. Łahtthagn’ ay koht’iin iin xaah hǫǫ’ ch’ah uutaałeeł. T’oot’ey ts’ant’ay dąy ehtįį ts’ą’ ideltsay nłįį. Ay aanah hotnahdee k’ahǫǫ’ nühdihnąy.
\v 17 Huu’įhdląą ts’ą’ ts’ahǫǫt’eh ts’ą’ niign ts’ant’ay nłįį. Tl’aan ts’ant’ay dąy ehtįį ts’ą’ k’a’ideltsay nłii.
\p
\v 18 Huuhįhdląą ts’ą’ T’oodįht’ay ts’anh eehǫǫłiin noo’ uudih ts’ant’ay k’adąy heets’etnayh. T’oot’ey Ushye’e ay hǫǫsu’ ts’ą’ ik’anehtaa’, doo ts’ahǫǫt’ay nłiin k’at’ey uutaanagn xaah.
\p
\v 19 T’oodįht’ay ts’an ts’įįłiin heets’etnayh tł’aan doo ts’ahǫǫt’ay nłiin jan nan’ k’et hǫhchaah ts’ą’ k’ach’ihohłe’ heets’etnayh.
\p
\v 20 Tł’aan T’oodįht’ay Ushye’e niishay heets’etnayh tł’aan Uxaa’ uuk’eenits’įįdeek ts’ą’ heets’etnayh, Doo łąą’ T’oodįht’ay nłiin heets’etnay xaah. Tł’aan T’oodįht’ay eh ts’ehłagn ts’įįłįį tł’aan Ushye’e, \it Jesus Christ\it*, eh ts’ehłagn ts’įįłįį. Łąą’ T’oodįht’ay eh duunoo’ hǫhchaah ts’ą’ honayh ts’ą’ hįįłįį.
\v 21 Sts’įįkey k’eh daht’ay iin, huu’uudatnnih, shyąą’ t’ey t’oodįht’ay hįįłiin k’ąłąą’ utdahniil xaah.