\id 3JN - Upper Tanana Athabascan Indian (Tetlin dialect) NT [tau] - USA 2013 (web 2014)
\h 3 John
\toc1 Dinahtł’aa Taagn Danh John ts’anh Netł’adn
\toc2 3 John
\toc3 3Jn
\mt1 Dinahtł’aa Taagn Danh \it John\it* ts’anh Netł’adn
\c 1
\p
\v 1 Ch’indadn’ diht’ay \it Gaius \it* doo haa’ihtsiin, nts’ą’ jindhihtł’at. Nan hu’ łąą’ niign łąą’ uunąy iin tah ts’anh įįłiin, naa’ihtsįį’.
\p
\v 2 Naa’ihtsiin, naahotnihdee, hǫǫsuu’ts’ą’ neh uutaałeel xaah tł’aan nshyüüt hǫǫsuu’ ts’ą’ nłiin k’eh, hǫǫsuu’ ts’ą’ tįįt’eeł xaah.
\v 3 Ch’ehłaadn’ \it Christian \it* koht’iin iin naahindel eh, heneek suu’ naanah hǫǫ’ shihenąy eh hǫǫchaa’ shaahǫǫsǫǫ. “Łąą’ niign k’eetaat dąy eh, łąą’ niign koht’iin nłįį,” naanah hǫǫ’ shihenįh.
\v 4 Sts’įįkey iin łąą’ niign k’eetaat hetdąy idihtth’agn, hǫǫ’ ch’ah eh ch’ich’ahnoo’ hasaanayh ihłįį.
\p
\v 5 Naa’ihtsiin, \it Christian \it* koht’iin iin haltthaan iin hįįłiin noo’ uudih ts’inįįniign eh, hǫǫsuu’ ts’ą’ dįįdį’.
\v 6 Ay iin tah tsanh ch’ehłaadn’ \it Jesus \it* łąą’ ts’uunąy łehchinh tseedel danh huuxaah įįtsiin aanah hǫǫ’ neehenąy. Ay koht’iin iin hǫǫ’ huuts’iniiniign eh, niithaadn niign nahtetdak xaah, hǫǫsuu’ ts’ą’ dahdį’.
\v 7 \it Jesus \it* Ǫǫsii’ xaah hihteedeł tł’aan doo \it Jesus \it* k’ałąą’ uunąy iin ts’anh ch’ikol hiiniithanh.
\v 8 Ay koht’iin iin łahtsutdaaniił tł’aan hǫǫ’ hotdąy eh huu’eh łąą’ niign ts’etnah.
\p
\v 9 \it Jesus \it* łąą’ uunąy iin ndeeh dhįhdah danh łehchinh heedel danh huuts’ą’ ch’idą’ jindhihtł’at. T’oot’ey ts’ehłagn huutah ts’anh, \it Diotrephes\it*, huuch’inłiinn’ tihłeeł kaah hǫǫtl’at daanii’et-thiit. Hǫǫ’ k’eexaan nts’ąą’ dihnąy k’ahǫǫ’ iiniithan.
\v 10 Ay eh ndeeh nühxaah tihhaał de’, ts’ahǫǫt’eh ts’ą’ neekįą’ det-shyaagn aanah dąą’ nühdihniił. Neek’įą’ hǫǫhee tł’aan nee’aanah elshyak. Hǫǫ’ ch’its’ąą’ niign ch’ahnoo’ dąy t’ey. \it Christian \it* koht’iin iin uuniithaadn niign nahtetdagn iin k’a’uuniign tł’aan doo iin huuts’ootaanak hiiniithan uk’ee’e huutehdzayh ts’ą’ nihuuteedlah. Ay iin ndeeh łehchinh heedel danh ch’a’ łtaahuutah’aał iiniithanh t’ey.
\p
\v 11 Naa’ihtsiin, dinee iin ts’ahọọtłeek hetdąy niign k’eetaat sǫ’ dǫǫdiin! T’oot’ey dinee iin hǫǫsuu’ ts’ą’ hetdąy niign k’eetaat dįįdį’! Doot’ey hǫǫsuu’ ts’ą’ niign k’eetaat dąy T’oodįht’ay ts’an nłįį. Doot’ey ts’ahǫǫtłeek ts’ą’ niign k’eetaat dąy, k’at’ey noo’ họhchah ts’ą’ T’oodįht’ay ee’itnay.
\p
\v 12 \it Demetrius \it* hu’, nts’ąą’ niign dąy eh, huuhįhdląą ts’ą’ maanah họọsuu’ ts’ą’ hihhǫǫhee. Łąą’ niign dąy eh, hǫǫọsuu’ ts’ą’ niign dąy hiineh’įh. Neexon hu’ chih hǫǫsuu’ ts’ą’ maanah ts’ihǫǫhee tł’aan nts’ąą’ tsihǫǫhee łąą’niign nłiin hee’innayh.
\p
\v 13 Hǫǫdląą t’ey dąą’ ndihniił nihthanh t’oot’ey t’axoo nts’ą’ dąą’ k’ajindhihtł’adn.
\v 14 Hantey’ t’ey nnok-‘įį’ nihthanh, ay tł’aan dąą’ aanah thadzalxoh.
\p
\v 15 Tthihąą’ nshyüüt shiit hǫǫsuu’ ts’ą’ taałeeł.
\p Ntłąą łahtthagn’ iin nts’ą’ nidach’ihnii’ąą. Nan hu’ neetłąą łahtthagn’ iin neexaah huuts’ą’ nidachinįį’ąą.