\id MRK
\ide UTF8
\h MARCOS
\toc1 MARCOS
\mt1 JU CHIVINTI IXLACATA JU CRISTO JU TSꞌOKLH JU MARCOS
\c 1
\s1 Ju Xivan ju amakpaxanaꞌ ixꞌamalani ju lapanacni ju lacamacni
\p
\v 1 Chani ju xataiꞌulai ju amalaninti ixlacata ju Jesucristo istsꞌalh Dios.
\m
\v 2 Pus ju Isaías ju anuꞌ makꞌaniya lapanac ju ixnajun ixchivinti Dios chani ju tsꞌoklh ixlacata ju Jesús:
\q1 Ju Dios ma najun ni acsni tucaꞌ min ju yuchi ju ani lacamunutpaꞌ pus isꞌakstu ju Dios ma camalakachatachilh ju ixlapanac.
\q1 Chai ju yuchi ma caꞌalacjunach ju lapanacni ni catalakꞌoxilh ju ixꞌatalacpastꞌacꞌatꞌan ni caminaꞌ ju ixꞌucxtinꞌan.
\q1
\v 3 Chai ju anuꞌ ixlapanac ma pꞌas cachivinaꞌ ju makat lacamacni.
\q1 Ma caꞌalacjunaꞌ ju lapanacni ni catalakꞌoxilh ju ixꞌatalacpastꞌacꞌatꞌan ni caminaꞌ ju ixꞌucxtinꞌan.
\q1 Ma chach salaka va ju ixꞌalhunutꞌan.
\m
\v 4 Pus yuchi lhimilh ju Xivan. Yuchi ju anuꞌ ixlapanac Dios ju lhichivinilh ju Isaías. Chai ju yuchi ixꞌamakpaxanan ju lacamacni chai ixꞌalacjuni ju lapanacni:
\p ―Amacꞌaꞌuntꞌit ju miꞌalactuꞌuntiꞌan chai aꞌakpꞌaxtꞌit. Ju chunch catamacꞌacxaniyan ju miꞌalactuꞌuntiꞌan ju Dios. ―Chunch ixꞌajuni ju lapanacni.
\p
\v 5 Pus ju amachakꞌan ju xaꞌestado Judea chai ju amachakꞌan ju lakꞌachakꞌan Jerusalén ixtalakꞌan ju Xivan ni ixtakꞌasmatniputun ju ixchivinti. Chai ju Xivan amakpaxakꞌo ju anuch kꞌai xcan Jordán acsni ixtanajun ni catamaconaꞌ ju ixꞌalactuꞌuntiꞌan.
\p
\v 6 Ju ixpumpuꞌ ju Xivan ispaksiucanta ixꞌapamat camello. Chai lakatam takꞌaixtꞌakꞌan ixtankꞌaijucalh. Chai ixꞌui ju tuꞌuꞌ tachi ju silek chai ju xatꞌaxcat lacaqꞌuivin.
\v 7 Ju yuchi chani ixꞌalacjuni ju lapanacni:
\p ―Mintacha astan ju palai xakꞌai. Palai jantu ju quitꞌin. Ju quitꞌin jantu tuꞌuꞌ ju quintapalhni. Jantu laich actichꞌanxkꞌotlh nin mas va yuchi ju samusni ixchꞌanxtꞌakꞌan.
\v 8 Pus ju quitꞌin lacaxcan ju iclamakpaxau. Para ju yuchi cataxtakniyan ju Spiritu Santu ju catsucuyach lamiꞌalhunutꞌan.
\s1 Ju Jesús makpaxacalh
\p
\v 9 Pus ju acsnich ju Jesús mincha lakꞌachakꞌan Nazaret laxaꞌestado Galilea chai ju Xivan vachuꞌ makpaxa ju yuchi lacakꞌai xcan Jordán.
\v 10 Chai ju Jesús acsni tacutlh ju lacxcan lana laktsꞌilh ju lactꞌiyan ni talhtekꞌa. Chai laktsꞌilh ni milh ju Spiritu Santu tachi ju tuꞌuꞌ lakꞌaxkꞌavan. Chai lakmilh ju yuchi.
\v 11 Chai lana chivincancha ju lactꞌiyan chai kꞌasmatcalh ju lacatꞌun junta ixya ju Jesús. Chai chani junicalh ju Jesús:
\p ―Ju uxintꞌi quintsꞌalhꞌat. Slivasalh na icmapainiyan. Na iclhikꞌachananch.
\s1 Ju lhacaticuru ixꞌamalactuꞌuniputun ju Jesús
\p
\v 12 Pus ju Spiritu Santu lana kꞌai lhiꞌalh ju Jesús lacamacni.
\v 13 Tꞌupꞌuxam avilhchan tolhcha lacamacni ju Jesús. Chai ju anch na ixꞌalin ju maktilin. Chai ju lhacaticuru navilh ju talacmaskꞌatinti ni tsꞌa ma laich caꞌixmalactuꞌuni ju Jesús. Chai ju astan ju anquilhnin talhiminilh ju ixvaiti ju Jesús.
\s1 Ju Jesús taiꞌula ixlhichꞌalhcat ju xaꞌestado Galilea
\p
\v 14 Acsni tꞌalhnucalh ju Xivan pus astan ju Jesús alh ju xaꞌestado Galilea. Ixꞌalacjuni ju lapanacni ni lhinomputun ju Dios laꞌisꞌatsucuntiꞌan.
\v 15 Chani ixꞌalacjuni:
\p ―Vaninch minta ju avilhchan acsni calhinonaꞌ ju Dios. Tamch alacpꞌastꞌactꞌit lamiꞌalhunutꞌan chai alacꞌaꞌitꞌit ju chivinti junta najun ta yu laich apꞌutꞌakꞌalhtꞌaxtꞌuyaꞌitꞌit. ―Chunch ixꞌalacjuni.
\s1 Ju Jesús atꞌasanilh ixpumatꞌatꞌiꞌan ju ixchꞌapanin pamata ixtajunita
\p
\v 16 Chai ju Jesús ixꞌalhtanan laꞌixquilhtuꞌ ju xaꞌatantsꞌin Galilea acsni alaktsꞌilh ju Simón ju vachuꞌ ixjuncan Pitaluꞌ chai ispꞌisekꞌe ju Tilix ixjuncan. Va ixtatꞌajun munin ixchꞌokxniꞌan lacaꞌatantsꞌin ni ixchꞌapanin pamata ixtajunita.
\v 17 Chai ju Jesús alacjuni:
\p ―Aquilachꞌakꞌokꞌauch. Chai tachi ju ixmakꞌaixtꞌokꞌatꞌit ju pamata pus vana va chun aclaxtakniyau ju lhichꞌalhcat ni amakꞌaixtꞌokꞌaꞌitꞌit ju lapanacni ju aquintalhilacaꞌanaꞌ. ―Chunch ju alacjuni.
\p
\v 18 Pus lana tamacaulh ixchꞌokxniꞌan chai tachꞌakꞌokꞌalh ju yuchi.
\p
\v 19 Chai ni alhtanampa alacatsꞌunin ju Jesús pus alaktsꞌilh ju Jacobo chai ispꞌisekꞌe ju Xivan ixjuncan. Istsꞌalan ju Zebedeo. Ju yuꞌunch ixtatajumanalh laꞌixbarcoꞌan. Va ixtatꞌajun lacyonin ixchꞌokxniꞌan.
\v 20 Pus lana alactꞌasanilh ju Jesús. Chai ju yuꞌunch tamacaulh ju ixpaiꞌan ju Zebedeo ixjuncan. Tatꞌamacaulh ju ixlapanacni ju lacabarco. Chai ju Jacobo chai ju Xivan tachꞌakꞌokꞌalh ju Jesús.
\s1 Ju lhacaticuru ixtanun laꞌixlacatuna pumatam lapanac
\p
\v 21 Astan ju Jesús chai ju ixlapanacni tatanucha ju lakꞌachakꞌan Capernaum. Chai chaꞌalh ju avilhchan paꞌastacni acsni lhikꞌalhtsꞌaulh ju lhamapꞌaksin ni catachꞌalhcatnalh ju lapanacni. Pus ju acsnich ju Jesús alh laꞌixpujitatꞌan ju istꞌaꞌisraelitanin. Alh amamakaꞌunuꞌ.
\v 22 Pus ju lapanacni ju ixtavilanalh va talhamakꞌaninilh ta yu xaꞌamalaninin ni ixꞌalacmapꞌaksinin tachi tam xakꞌai. Jantu chun tachi ju ixtaꞌamalaninin ju yuꞌunch ju na ixtalhatalanininta ju ixlhamapꞌaksinꞌan.
\v 23 Pus ju anuꞌ laꞌixpujitatꞌan ixꞌalin pumatam lapanac ju ixtanun ju lhacaticuru laꞌixlacatuna. Pus ju anuꞌ lapanac lana tsꞌau tꞌasalh acsni laktsꞌilh ju Jesús.
\v 24 Chai ju lhacaticuru puchivinilh ixquilhni ju lapanac acsni chani naulh:
\p ―Tijuch ju quilamintau lhilaktsꞌinin ji Jesús amachakaꞌ Nazaret. Ja va quilamintauch macaꞌanin lacajipi. Iccꞌatsai tichi chavaichꞌat. Ju uxintꞌi salaka istsꞌalh Diosꞌat chai yuchi ju malakachachan ju ani.
\p
\v 25 Pus ju Jesús kꞌailh ju lhacaticuru. Junich:
\p ―Va sekch ju uxintꞌi. Atꞌaxtꞌuch ju laꞌixlacatuna ju lapanac. ―Chunch ju juni.
\p
\v 26 Chai ju anuꞌ lhacaticuru lana tin lhineklh ju lapanac. Lhtucu lhtucu ucxuntama. Tsꞌau tꞌasalh chai taxtulh lana.
\v 27 Pus tachi chun ju lapanacni va talhamakꞌaninilh chai talasacmilh sia yuꞌunch. Talaclajunich:
\p ―Tijuch nuꞌ ju ani. Tis sastꞌi atalaninti nuꞌ ju ani. Ju ani ya lapanac alin ixtachaput ni lai lhijuni ju lhacaticurulhni chai taquiclacaꞌi. ―Chunch ju talaclajuni.
\p
\v 28 Pus lana cꞌatsakꞌocalh ixlacata ju Jesús tachi chun ju lakꞌachakꞌanixni ju alin ju xaꞌestado Galilea.
\s1 Ju Jesús cꞌuchꞌu ixputꞌichakoꞌulh ju Pitaluꞌ
\p
\v 29 Pus ju Jesús chai ju ixꞌamamakaꞌui tataxtucha ju laꞌixpujitatꞌan ju istꞌaꞌisraelitanin. Tachaꞌalh laꞌixchakaꞌan ju Simón chai Tilix. Ixtaꞌankꞌota vachuꞌ ju Tiyacu chai ju Xivan.
\v 30 Pus ixputꞌichakoꞌulh ju Simón ixma laꞌixputaman. Na ixchꞌapata ju iscacat. Pus lana tajunilh ju Jesús ni na ixtakꞌankꞌai.
\v 31 Pus ju Jesús lana lakꞌalh junta ixma ju takꞌankꞌan. Chꞌapanilh ju ixmacaꞌ chai makꞌostola. Lana macaulh ju iscacat chai lana taya chai tsuculh alacmavanaꞌ ju Jesús chai ixꞌamamakaꞌui.
\s1 Na lhu lapanacni palaich anavi ju Jesús
\p
\v 32 Chai acsni tokꞌoxalhch lacatsꞌunin acsni ancha ju avilhchan pus tachi chun ju takꞌankꞌanin alhimincalh junta ixvi ju Jesús. Vachuꞌ alhiminicalh tachi chun ju ixtanun ju lhacaticuru laꞌixlacatunaꞌan.
\v 33 Pus tachi chun ju lapanacni tatakꞌaixtoktayakꞌo laxamalhtich ju ixchakaꞌ ju Simón.
\v 34 Chai ju Jesús na lhu palaich anavi ju takꞌankꞌanin mas na tijlhu takꞌankꞌat ixtapacxanta. Vachuꞌ akꞌailh ju lhacaticurulhni. Ajunilh ni catataxtulh laꞌixlacatunaꞌan lhu ju lapanacni. Chai tataxtulh. Para ju Jesús jantu xaꞌalacasqꞌuini ni catachivinilh ju lhacaticurulhni va ixlacata ni istamispai ju Jesús. Chai ju yuchi va jantu ixlacasqꞌuin ni catajunilh ju lapanacni tichi chavaich ju yuchi.
\s1 Ju Jesús amalaninilh ju xaꞌestado Galilea
\p
\v 35 Na vatsꞌisin kꞌostavi ju Jesús. Istsꞌistacaꞌ acsni taxtulh va isꞌakstu. Alh ju lacamacni. Anch ju tꞌachivincha ju Dios.
\v 36 Pus ni tunculh ju Simón chaich ju aliꞌin taꞌalh puxconin.
\v 37 Chai acsni talhitajucha ju Jesús tajuni:
\p ―Chux ju lapanacni tapuxcoyan.
\p
\v 38 Para ju Jesús alacjuni:
\p ―Caꞌauch ju lakꞌachakꞌanixni ju vanin vi ni laich camasunitachau vachuꞌ ixchivinti Dios ni yuchi ju iclhiminta ju quitꞌin.
\p
\v 39 Pus ju Jesús ixlacꞌaktanutꞌajun ixlhilakapokꞌai ju xaꞌestado Galilea. Ixꞌamalaninin laꞌixlacpujitatꞌan ju xalapanacni anch. Chai ixꞌalacxcoxtuni ju lhacaticurulhni laꞌixlacatunaꞌan lhu ju lapanacni.
\s1 Ju Jesús cꞌuchꞌu pumatam lapanac ju ixpacxanta ju jantu kꞌoxiya tsꞌitsꞌi
\p
\v 40 Pus pumatam lapanac ixpacxanta ju macxcai tsꞌitsꞌi ju ixpuchꞌiꞌan. Chai ju yuchi lakmilh ju Jesús. Taꞌaktsokotanilh. Juni:
\p ―Ni va xaqꞌuincꞌuchꞌupꞌutꞌuch cava pus laich xaqꞌuincꞌuchꞌutꞌi.
\p
\v 41 Pus ju Jesús na mapainilh ju takꞌankꞌan. Lana mokslanilh ixmacaꞌ laꞌixlacatuna ju takꞌankꞌan chai junilh:
\p ―Iclacasqꞌuinch. Palaichꞌat ju chavai.
\p
\v 42 Chai acsni naulh ju chunch ju Jesús pus lana vatsꞌalhti lacmacaxnilh ju istsꞌitsꞌi ju anuꞌ lapanac.
\v 43 Chai ju Jesús na mapꞌaksi chai malakachalhch laꞌixlacpujitatꞌan ju istꞌaꞌisraelitanin. Junich:
\p
\v 44 ―Akꞌasmatꞌich ju icjunan. Tun xamatiꞌ tꞌiꞌun tuꞌuꞌ. Inchich talacasuniniꞌ ju pali. Chai axtꞌakchich ju milhakꞌailaktsꞌin tachi ju najunta ju Moisés lacalhamapꞌaksin. Ju chunch catacꞌatsayach ju lapanacni ni salaka ju milacatuna. ―Chunch ju junicalh ju takꞌankꞌan ixjunita.
\p
\v 45 Para ju anuꞌ takꞌankꞌan ixjunita acsni taxtucha ju laꞌixꞌucxlacapuꞌ ju Jesús lana lacquilhuntsuculh tuchi ixtapasata. Chai ni xatacꞌatsakꞌojui ju lapanacni pus ju Jesús jantu lai ixtanui ju tuꞌuꞌ lakꞌachakꞌan va laꞌixꞌucxlacapuꞌan ju lapanacni. Va lacamacni ixtolacha. Chai ju anch na lhu lapanacni ixtalakchaꞌan ju vaklhun ixtamintacha.
\c 2
\s1 Ju Jesús cꞌuchꞌu pumatam ju va ixlacalhtuculunta
\p
\v 1 Astan acsni tapasalh lakatam lakatꞌui avilhchan pus ju Jesús anchokopa ju lakꞌachakꞌan Capernaum. Chai tacꞌatsapa ju lapanacni ni anch vilhchokochalhch ju Jesús laꞌixchakaꞌ.
\v 2 Pus lana talhitakꞌaixtokpa ju lapanacni ju laꞌixchakaꞌ ju Jesús. Chai ni na va ilhuꞌan ixtajunita pus jantuch lai ixtalhijun ju lacachakaꞌ. Pus ixchaꞌantach ju lapanacni lacamalhtich acsni ixꞌalacmasuni ju ixchivinti Dios ju Jesús.
\v 3 Pus lhimincancha pumatam takꞌankꞌan ju va ixlacalhtuculunta. Ixlhipumatꞌatꞌiꞌan lapanacni tachꞌixlhichaꞌalh ju lacachakaꞌ junta ixvi ju Jesús.
\v 4 Para jantu jintaꞌ talhitaju junta laich catapumanu lacachakaꞌ junta ixvi ju Jesús ni na isꞌaktsamcanta. Pus tatocꞌalh laꞌixꞌucxni chakaꞌ chai taꞌucxmakꞌalh junta ixlhivi ju Jesús. Chai anch ju tapumakꞌalhtaju lacalona ju anuꞌ takꞌankꞌan.
\v 5 Chai ju Jesús ni cꞌatsa ni na ixtalhilacaꞌanta ju yuchi ju anuch ixpumatꞌatꞌiꞌan lapanacni pus junich ju takꞌankꞌan:
\p ―Quintsꞌalh macꞌacxanikꞌocantach ju mintalakꞌalhin.
\p
\v 6 Pus ixtavilanalh vachuꞌ ju na ixtalhatalanininta ju ixlhamapꞌaksinꞌan ju istꞌaꞌisraelitanin. Chai ju yuꞌunch chani istapastacta laꞌixꞌalhunutꞌan:
\v 7 “Tas ni va ta chivimpalai ju ani ya lapanac. Na macxcai chivinti ju najun ni tachi ju va Dios ju jumputun. Jantu xamatiꞌ lai macꞌacxai ju talakꞌalhin. Va yuchi ju Dios”.
\v 8 Para ju Jesús lana cꞌatsa tuchi istapastꞌacꞌa ju anuch lapanacni. Chai alacjuni:
\p ―Tajuch ni va chunch ju pꞌastꞌacꞌatꞌit lamiꞌalhunutꞌan.
\v 9 Ni acjunilh ni macꞌacxanicalh ju ixꞌalactuꞌunti pus jantu lai apꞌucꞌatsꞌayaꞌitꞌit ni vasalh alin ju quintachaput u jantu. Para ni acjunilh ni cakꞌostavi chai caꞌalhtanalh pus ju chunch lai apꞌucꞌatsꞌayaꞌitꞌit ni alin ju quintachaput.
\v 10 Pus alaktsꞌintꞌit ju ani ju acnaviyaꞌ chai laich apꞌucꞌatsꞌayaꞌitꞌit ni alinch ju quintachaput ju ani lacamunutpaꞌ ni lai icmacꞌacxani ju talakꞌalhin. Quitꞌin ju quimalakachatachilh Dios ni lapanac actsucuyaꞌ ju ani.
\p Chai ju acsnich ju Jesús junich ju takꞌankꞌan:
\p
\v 11 ―Uxintꞌi ju icjunan. Akꞌostꞌaꞌulh. Asactꞌich ju mimputaman. Aꞌinchich ju laminchakaꞌ.
\p
\v 12 Pus ju anuꞌ takꞌankꞌan ixjunita taya. Saclh ju ixputaman. Chai taxtulh laꞌixꞌalacꞌavantiꞌan chux ju lapanacni. Chai ju yuꞌunch na talhamakꞌaninilh. Talakꞌaya ju Dios. Chai talaclajuni:
\p ―Jantu tavanan laktsꞌintau tuꞌuꞌ ju chunch.
\s1 Ju Jesús tꞌasani ju Leví
\p
\v 13 Pus aktam taxtuchokopa ju Jesús. Alh laꞌixquilhtuꞌ ju atantsꞌin. Pus chux ju lapanacni talakchaꞌankꞌochokopa chai ju yuchi ixꞌalacmalani.
\v 14 Chai acsni tavanan anchokolh ju Jesús ju lakꞌachakꞌan pus laktsꞌilh pumatam achꞌiniꞌ ju Leví ixjuncan. Istsꞌalh ju Alfeo. Ju yuchi ixvi junta amapalanancan. Chai ju Jesús juni:
\p ―Aqꞌuinchꞌakꞌokꞌach.
\p Pus lana taya ju Leví. Chꞌakꞌokꞌalh ju Jesús.
\p
\v 15 Pus ju aktam ju Jesús ixtꞌajun venaꞌ laꞌixchakaꞌ ju Leví. Chai vachuꞌ na lhu tachaꞌalh ju achꞌinin chai vachuꞌ ju aliꞌin alactuꞌunu lapanacni. Chai va kꞌaixtam tatꞌatavi ju Jesús chai ju ixꞌalacmamakaꞌuich lacamixa ni na lhu ixtachꞌakꞌokꞌai ju Jesús.
\v 16 Pus ju na ixtalhatalaninintach ju ixlhamapꞌaksin ju istꞌaꞌisraelitanin chaich ju ixtalhilacaꞌan ju ixlhamapꞌaksinꞌan ju fariseonin talaktsꞌilh ju Jesús ni ixꞌalactꞌavajin ju taꞌachꞌinin chai ju alactuꞌunin. Pus ju yuꞌunch tajunilh ju ixꞌalacmamakaꞌui ju Jesús:
\p ―Ju miꞌamamakaꞌunuꞌan tajuch ni va kꞌaixtam alactꞌavajin ju achꞌinin chai ju alactuꞌunin.
\p
\v 17 Pus ju Jesús acsni kꞌasmatlh ju tuchi ixtanajun chani alacjuni:
\p ―Ju kꞌox tatꞌajun jantu tamaktasqꞌuini ju acꞌuchꞌunuꞌ. Va yuꞌunch ju talactakꞌankꞌai ju tamaktasqꞌuini ju acꞌuchꞌunuꞌ. Pus ju quitꞌin jantiyuꞌ iclhiminta ni acꞌalactꞌasanilh ju laquimacni ju tanajun ni na soknicꞌa ju isꞌatsucuntiꞌan. Alai icminta alactꞌasaniniꞌ ju alactuꞌunin.
\s1 Sacmican ju Jesús ixlacata ju tascajat
\p
\v 18 Pus ju ixꞌalacmamakaꞌui ju Xivan chai ju fariseonin jantu ixtavajin ju anuꞌ avilhchan ni chunch ju ixtalhilanita. Pus ju acsnich ju aliꞌin lapanacni talakmilh ju Jesús chai tajuni:
\p ―Tajuch ni va tatascajai ju ixꞌalacmamakaꞌui ju Xivan chai ixꞌalacmamakaꞌui ju fariseonin. Para ju mintamamakaꞌun ju uxintꞌi jantu tatascajai.
\p
\v 19 Pus ju Jesús alackꞌalhtailh. Alacjuni:
\p ―Tachi chun ju tamakꞌachꞌakꞌokꞌanan junta alin ju tamakꞌaxtꞌokꞌat ja lai jantu catavailh ni alinch ju kꞌachat ni vilhcaꞌ ju anuꞌ tsꞌalh ju catamakꞌaxtꞌokꞌaꞌ. Acsni vilhcaꞌ ju anuꞌ tsꞌalh ju catamakꞌaxtꞌokꞌaꞌ pus jantu lai tatascajai ju ixꞌamigojni.
\v 20 Pus vana va chun ju quintamamakaꞌun. Jantu tatascajai ju chavai ni icꞌalactꞌavi. Para cachinaꞌ avilhchan acsni acmakꞌosucanaꞌ ju ani lacamunutpaꞌ. Chai acsnich ju catatascajayaꞌ ni na aquintalhamakꞌanininach.
\p
\v 21 Jantu xamatiꞌ lai lhalakyavanan ju pumpuꞌ ju jantu amakpanti chai lai va chunch camucꞌalh ju lacakꞌatꞌili pumpuꞌ. Pus ni chunch ju calalh pus va palai makat cakꞌexlh acsni talakatumi ju sastꞌi pumpuꞌ.
\v 22 Nin yuchi ni lai acpumuju ju sastꞌi vino lacakꞌatꞌili axtꞌakꞌan ni na kꞌalhpꞌasnicaꞌ. Ni chunch ju acnavi pus va cakꞌexlh ju axtꞌakꞌan chai capuꞌankꞌo ju vino chai ju axtꞌakꞌan catsꞌankꞌalh. Alai pumucan ju sastꞌi vino lacasastꞌi axtꞌakꞌan.
\p Chunch ju ajuni ju Jesús ju lapanacni ni va ixꞌamamachakxaniputun ni jantu lai catilhiyaulh ju makꞌaniya ixlhamapꞌaksin ju Moisés ju ixlhamapꞌaksin ju yuchi.
\s1 Ju ixꞌalacmamakaꞌui ju Jesús tapꞌuxlh ju xatocꞌat trigo
\p
\v 23 Lakatam avilhchan paꞌastacni ju Jesús tapasalh junta ixchꞌancanta ju trigo. Chai ixꞌalacmamakaꞌui ixtapꞌuxlhiꞌanta ju trigo chai ixtaꞌuich.
\v 24 Pus ju acsnich ju fariseonin tajunich ju Jesús:
\p ―Alaktsꞌich. Tajuch ni va chunch tanavi ju miꞌamamakaꞌui ni jantu lai chꞌalhcatnancan ju chavai ni avilhchan paꞌastacni.
\p
\v 25 Para ju Jesús alacjuni:
\p ―Ja lana jantu pꞌastꞌacꞌatꞌit tuchi navilh ju David acsni ixꞌalin ixmaktasqꞌuinit chai acsni chavanilh ju yuchi chai ju ixtatꞌaꞌanta.
\v 26 Ja lana jantu pꞌastꞌacꞌatꞌit ni tanulh ju yuchi junta ixlakꞌayacan ju Dios acsni xakꞌai pali ixjunita ju Abiatar. Chai ulh ju xkapavati ju ismokslanicanta ju Dios. Pus ju anuꞌ xkapavati jantu lai va kꞌaya ixꞌucan. Va yuꞌunch ju palijnin ju lai ixtaꞌui. Para ju David ni upa chai vachuꞌ alacxtaknipa ju ixꞌalactꞌaꞌanta.
\p
\v 27 Ju Jesús vachuꞌ alacjuni:
\p ―Ju Dios lhcaꞌula ju avilhchan paꞌastacni ixlacata ju lapanacni. Jantiyuꞌ lhinavilh ju lapanacni ni va catamuctaxtulh ju lhamapꞌaksin ju navilh ju Dios ixlacata ju anuꞌ avilhchan.
\v 28 Pus quitꞌin ju lai icnajun tuchi lai navican ju avilhchan paꞌastacni. Quitꞌin ju quimalakachatachilh Dios ni lapanac actsucuyaꞌ ju ani.
\c 3
\s1 Pumatam lapanac ixꞌalin ixmacaꞌ ju va ixixnita
\p
\v 1 Ju Jesús aktam tanuchokopa laꞌixpujitatꞌan ju istꞌaꞌisraelitanin. Chai ixtanumacha pumatam lapanac ju va ixixnita lakatam ixmacaꞌ.
\v 2 Chai vachuꞌ ixꞌalin ju anch ju lapanacni ju ixtalhistactꞌajun ju Jesús. Va ixtalaktsꞌimputun ni caꞌacꞌuchꞌunulh ju avilhchan paꞌastacni u jantu. Va ixtapuxconi ta yu laich catapumucꞌani ixtalakꞌalhin.
\v 3 Pus ju Jesús junilh ju anuꞌ lapanac ju va ixixnita ju ixmacaꞌ:
\p ―Akꞌostꞌaꞌulh. Atꞌaich ju ani junta laich catalaktsꞌinan ju lapanacni.
\p
\v 4 Chai alacjunich ju lapanacni:
\p ―Tꞌas nonatꞌit. Ja lhijun ni acnavi ju kꞌox ju avilhchan paꞌastacni u acnavi ju talakꞌalhin ni jantu acꞌaktaiju tam xamatiꞌ. Ja lhijun ni acmakꞌalhtaxtulh ju atsucunti ju avilhchan paꞌastacni u aclaktsꞌimakni.
\p Pus ju lapanacni va sekch tataya.
\v 5 Pus ju acsnich ju Jesús alaktsꞌilh ju lapanacni ju ixtalakachoko. Talhkꞌamalh. Chai na amakꞌaninilh ni na pꞌas ixjunita ixꞌalhunutꞌan. Pus junich ju takꞌankꞌan:
\p ―Alhitꞌach ju mimacaꞌ.
\p Pus ju anuꞌ lapanac xtaknilh ju ixmacaꞌ. Chai lana tachapunch va.
\v 6 Pus lana tataxtucha ju fariseonin. Taꞌalh junta ixtavilanancha ju ixtachꞌakꞌokꞌai ju gobernador Herodes. Taꞌalh machꞌanxtaminin ju chivinti ixlacata ju Jesús ta yu laich catapumakniyaꞌ.
\s1 Tatakꞌaixtoklh lhu ju lapanacni laꞌixquilhtuꞌ atantsꞌin
\p
\v 7 Pus ju Jesús alh laꞌixquilhtuꞌ atantsꞌin. Alactꞌaꞌalh ju ixꞌalacmamakaꞌui. Chai na lhu tachꞌakꞌokꞌalh ju amachakꞌan xaꞌestado Galilea chai ju amachakꞌan ju xaꞌestado Judea.
\v 8 Vachuꞌ ju amachakꞌan lakꞌachakꞌan Jerusalén chai ju amachakꞌan ju xalacatꞌun Idumea. Chai ju lapanacni ju ixtatꞌajun lhimakꞌantacutni lacxcan Jordán chai ixtalakachoko ju lakꞌachakꞌanixni Tiro chai Sidón. Na lhu lapanacni takꞌasmatlh ni na kꞌai lhamakꞌan xanavi ju Jesús chai talakmilh ju yuchi.
\v 9 Pus ju Jesús alacjuni ju ixꞌalacmamakaꞌui ni catalakasipuxcaulh lacatꞌicstꞌi barco ni laich cataju anch ni na ixtatankꞌasi ju lapanacni ni na ilhuꞌan.
\v 10 Pus ni na lhu ixꞌacꞌuchꞌui ju lapanacni ju Jesús pus ju aliꞌin ju ixtapacxanta ixtakꞌankꞌatꞌan va kꞌasi kꞌasi ixtalakꞌan ju Jesús.
\v 11 Chai vachuꞌ ixꞌalin ju lapanacni ju ixtanun ju lhacaticurulhni laꞌixlacatunaꞌan. Chai ju anuꞌ lhacaticurulhni ixtamispai ju Jesús. Pus ju lapanacni ju ixtapacxanta ju lhacaticurulhni taꞌaktsokotanilh laꞌixꞌucxlacapuꞌ ju Jesús chai ju lhacaticurulhni tapuchivinilh ixquilhniꞌan ju anuch lapanacni. Na pꞌas tachivinilh. Tajunich ju Jesús:
\p ―Ju uxintꞌi istsꞌalhꞌat Dios.
\p
\v 12 Para ju Jesús pꞌas alhimapꞌaksi ni jantu catajunilh ju lapanacni tichi lapanac ju yuchi.
\s1 Ju Jesús asacxtulh ju ixpumacautꞌuiꞌan ixlapanacni
\p
\v 13 Chai ju Jesús ampa junta ixvilhcha lakatam akstijun chai alactꞌasanilh ju isꞌasacxtuputun. Chai ju yuꞌunch talakmilh.
\v 14 Pus asacxtulh pumacautꞌui ixꞌalacmamakaꞌui ni laich caꞌalactꞌaꞌalhtanatsuculh ju yuchi chai ni laich caꞌalacmalakachayaꞌ ixnajunca ju ixchivinti Dios.
\v 15 Vachuꞌ axtaknilh ixtachaputꞌan ni laich palai catanavi ju lapanacni ju ixtachꞌapata ixtakꞌankꞌatꞌan. Chai laich vachuꞌ cataxcoxtuniyaꞌ ju lhacaticurulhni laꞌixlacatunaꞌan ju lapanacni.
\v 16 Pus sacxtucalh ju Simón. Chai ju yuchi xtaknichokocalh alakatam ixtapakaꞌut. Lhimapakaꞌucalh Pitaluꞌ.
\v 17 Chai sacxtucalh ju Jacobo chai ju Xivan. Pus ju Xivan ispꞌisekꞌe ixjunita ju Jacobo. Chai ju yuꞌunch istsꞌalan ju Zebedeo ixtajunita. Axtaknilh ixlhilakatꞌui ixtapakaꞌutꞌan. Alaclhixakꞌalacalh Boanerges. Ju chunch va nomputun ni na pꞌas ixtachivinin tachi acsni tꞌasai ju tꞌajin.
\v 18 Chai sacxtucalh ju Tilix chai ju Pilipe chai ju Bartolomé chai ju Mateo chai ju Tumax chai apumatam Jacobo ju istsꞌalh Alfeo ixjunita. Chai sacxtulh ju Tadeo chai apumatam Simón ju makyuꞌunch ixjunita ju cananistanin.
\v 19 Vachuꞌ sacxtucalh ju Judas Iscariote ju astan makꞌaxtaklh ju Jesús.
\s1 Tajuni ju Jesús ni laꞌixtachaput ju lhacaticuru ju chꞌalhcatnan
\p Astan ju Jesús alactꞌaꞌalh ju ixꞌamamakaꞌui lacachakaꞌ.
\v 20 Chai aktam tatakꞌaixtokpa ju lapanacni. Chai ixlhiyuchi matiꞌ ixjunita ju ispantsꞌiquisꞌan ju Jesús chai ixꞌamamakaꞌui ni laich catavailh.
\v 21 Pus acsni takꞌalhakꞌasmatlh ju ixlhiꞌalakꞌavin ju Jesús ni chunch ixlai pus tamilh inin. Va ixtanajun ni jantu isꞌacꞌatsananta ju Jesús.
\p
\v 22 Vachuꞌ ixtaꞌalin ju lapanacni ju ixtalhatalanininta ju ixlhamapꞌaksin ju istꞌaꞌisraelitanin. Ju yuꞌunch ixtamintacha ju lakꞌachakꞌan Jerusalén. Pus ju yuꞌunch ixtanajun ni va ixtanun ju Satanás laꞌixlacatuna ju Jesús. Chai laꞌixtachaput yuchi ju ixtixcoxtui ju lhacaticurulhni laꞌixlacatunaꞌan ju lapanacni.
\v 23 Pus ju acsnich ju Jesús alactꞌasanilh ju anuch lapanacni chai alacjuni ju chivinti ju ixꞌapumavasalaniputun tuꞌuꞌ. Chani ju ajuni:
\p ―Ju Satanás jantu lai catixcoxtulh ixtꞌalhacaticurulhni.
\v 24 Tachi chun ju kꞌai lacatꞌun junta lhinajun ju tam kꞌai ucxtin ni quilhmaclhu cajuncalh chai catalaclasayaꞌ ju sia isꞌakstuꞌan pus va caꞌaclayaꞌ.
\v 25 Chai ju tatanumanalh lacachakaꞌ ni va catalasachokolh ixlhiꞌakstuꞌan pus jantu lai vana lakputam catatsuculh.
\v 26 Chai vana va chun ju lhacaticuru. Ni caꞌatixcoxtulh ju aliꞌin ixtꞌalhacaticurulhni pus tulai tailhiꞌan laꞌixpuꞌucxtin. Alin ixꞌaclanti ju ixtachaput.
\p
\v 27 Ni xamatiꞌ catanuputulh laꞌixchakaꞌ pumatam jokꞌat ju na tachapun chai camaxtuniputulh ju ixtaxtokni tasqꞌuini ni pꞌulhnan camakchꞌimalh ju anuꞌ jokꞌat. Acsnicaꞌ ju lai camaxtunilh ju ixtaxtokni ni va jantu lai tamacyajui.
\p Pus chunch ju ajuni ju lapanacni ju Jesús ni ixꞌamamachakxaniputun ni yuchi ju tꞌalalhajalh ju lhacaticuru. Yuchi lai lhixcoxtui ju lhacaticurulhni laꞌixlacatunaꞌan ju lapanacni. Chai tailhiꞌalh ixchivinti. Ajuni:
\p
\v 28 ―Slivasalh ju iclajunau. Tachi chun ju talakꞌalhin chai va tuchi macxcai chivinti ju tanajun ju lapanacni laich camacꞌacxanicanaꞌ.
\v 29 Para va tichi chavaich ju macxcai chivinti calhichivinilh ju Spiritu Santu jantu tavanan lai catimacꞌacxanicalh ju anuꞌ alactuꞌunti. Va camucꞌanikꞌalhicanaꞌ ju ixtalakꞌalhin.
\p
\v 30 Ju Jesús chunch ju ajuni ju lapanacni va ixlacaꞌatalh ni ixtanajunta ni lhacaticuru ju ixpuchꞌalhcatnan ju Jesús.
\s1 Ixnati chai isꞌapꞌisekꞌench talakmin ju Jesús
\p
\v 31 Astan tachincha ju isꞌapꞌisekꞌen ju Jesús chaich ju ixnati. Tataya makspaꞌ chai talhinaulh istꞌasanica ju Jesús.
\v 32 Pus ju lapanacni ju ixtalakavilanalh ixtalakachokoch ju Jesús tajuni:
\p ―Ju minati chai ju miꞌapꞌisekꞌen tapuxcoyan makspaꞌ.
\p
\v 33 Para ju Jesús alackꞌalhtailh. Alacjuni:
\p ―Tis chavaich ju quinati chai quiꞌapꞌisekꞌen.
\p
\v 34 Chai acsni naulh ju chunch pus ju Jesús alaktsꞌilh ju ixtalakavilanalh ixtalakachoko ju yuchi chai naulh:
\p ―Ju anich tavilanalh yuꞌunch ju quinati chai quiꞌapꞌisekꞌench.
\v 35 Va tichi chavaich ju canaviniyaꞌ ju ixkꞌachat ju Dios yuchi ju vasalh quimpꞌisekꞌe chai vasalh quinati.
\c 4
\s1 Ju Jesús apumalaninin ju chivinti ixlacata ju achꞌananaꞌ
\p
\v 1 Ju Jesús aktam taiꞌulachokopa ixꞌamalaninti laꞌixquilhtuꞌ atantsꞌin. Chai ni na lhu tatakꞌaixtokpa ju lapanacni junta ixvi pus ju Jesús taju lacabarco ju ixvi laꞌixquilhtuꞌ atantsꞌin chai tavi ni laich caꞌamalanikꞌolh ixchuxꞌan. Chai tachi chun ju lapanacni lacatꞌun ixtayanalh laꞌixquilhtuꞌ atantsꞌin.
\v 2 Chai ju Jesús na lhu taxtokni xaꞌamalani ju lapanacni lacachivinti ju ixtꞌalaktsꞌipaxcavaich ju tuꞌuꞌ. Chai acsni xaꞌalacmalani chani alacjuni:
\p
\v 3 ―Akꞌasmatꞌitch ju aclajunau. Pumatam achꞌananaꞌ alh lhavanaꞌ ju ixꞌachꞌananti.
\v 4 Chai acsni ixtꞌajun lhavanaꞌ ju ixꞌachꞌananti pus ju aliꞌ xatꞌin tama laꞌixquilhtuꞌ ti. Chai lana tamilh ju tsꞌokꞌo chai tasacꞌulh.
\v 5 Chai ju alacatsꞌunin ju xatꞌin tamacha junta va lacatsꞌunin ixꞌalin ju tꞌun laꞌixꞌucxni ju chiux. Pus vatsꞌalhti pꞌunlh ju tꞌin ni jantu lhu ixꞌalin ju tꞌun.
\v 6 Para acsni na lhiꞌichich va pus lana lacxixlh ni va jantu makat ixtinui istisivic.
\v 7 Chai ju alacatsꞌunin ju xatꞌin tamacha junta vachuꞌ ixma ju xatꞌin alhtucunuꞌ. Pus pꞌulhnan takꞌaya ju alhtucunuꞌ chai akxtakma ju anuꞌ achꞌananti chai jantu tuꞌuꞌ xtaklh ju xatocꞌat.
\v 8 Ju alacatsꞌunin xatꞌin tamacha lacakꞌoxi tꞌun. Pꞌunlh. Takꞌaya. Chai tocꞌalh ju xalhiꞌut. Pus talhava ju akatamin achꞌananti. Ju aliꞌ tocꞌalh lakapꞌuxamcau ju xalhiꞌut. Ju aliꞌ achꞌananti tocꞌalh sesenta ju xalhiꞌut. Ju aliꞌ achꞌananti tocꞌalh tam cientos ju xalhiꞌut.
\p
\v 9 Ju acsnich ju Jesús alacjuni ju lapanacni:
\p ―Va tichi chavaich ju alin ixpakꞌasmatni pus cakꞌasmatlh.
\s1 Ju Jesús alacmavasalani ju ixpumacautꞌuiꞌan tajuch ni va chunch xaꞌalacjuni ju lapanacni
\p
\v 10 Astan acsni taꞌanchokolh laꞌixchakaꞌan ju ixtalhavat lapanacni pus ju ixpumacautꞌuiꞌan chai ju aliꞌin ixꞌalacmamakaꞌui ju ixtatꞌavilanalhcaꞌ ju Jesús tatsuculh sacminin tuchi ixnomputun ju chivinti ju xanajun.
\v 11 Chai ju Jesús alacjuni:
\p ―Ju uxijnan lacꞌasqꞌuinicꞌantꞌatꞌit ni amachꞌakxayatꞌit ju chivinti ju najun ni lhinomputun ju Dios laꞌisꞌatsucuntiꞌan ju lapanacni. Para ju aliꞌin lapanacni ju jantu quintalhilaksiputun va amasunican ixtaxtokni Dios laca tuꞌuꞌ chivinti ju ixtꞌalaktsꞌipaxcavaich ju tuꞌuꞌ.
\v 12 Ju chunch ju yuꞌunch mas va tachi talaktsꞌin tuchi icnavi para jantu catitamispa tuchi nomputun. Chai mas va tachi tatꞌajun kꞌasmatnin ju quinchivinti para jantu tavanan catitamachakxa. Ju chunch jantu lai tam cativa ju isꞌatsucuntiꞌan. Chai jantu tavanan camacꞌacxanicanaꞌ ju ixꞌalactuꞌuntiꞌan.
\s1 Ju Jesús mavasalai ju chivinti ixlacata ju achꞌananaꞌ
\p
\v 13 Chai ju Jesús chani alacjuni ju ixꞌamamakaꞌui:
\p ―Ni jantu lai machꞌakxayatꞌit ixlacata ju achꞌananaꞌ ju ixtꞌalaktsꞌipaxcavaich ju tuꞌuꞌ pus tꞌas alhimachꞌakxayaꞌitꞌit ju aliꞌ chivinti ju tꞌalaktsꞌipaxcavaich tuꞌuꞌ.
\v 14 Pus chani ju nomputun. Ju achꞌananaꞌ yuchi ju najun ixchivinti Dios. Tachi ju va chꞌan ju chivinti laꞌixꞌalhunutꞌan ju lapanacni.
\v 15 Chai ju xatꞌin ju tamacha vanin laꞌixquilhtuꞌ ti yuꞌunch ju takꞌasmatꞌa ixchivinti Dios para astan min ju lhacaticuru chai macꞌapꞌani ju chivinti ju ixꞌachꞌananicanta laꞌixꞌalhunutꞌan.
\v 16 Chai ju xatꞌin ju tamacha laꞌixꞌucxni chiux yuꞌunch ju takꞌasmatlh ixchivinti Dios chai lana lhikꞌach talacaꞌi.
\v 17 Para chunch tajunita tachi ju anuꞌ xapꞌun laꞌixꞌucxni chiux. Ju yuꞌunch jantu vasalh laꞌixlhichux ixꞌalhunutꞌan ju takꞌachani. Va pantsꞌiquis kꞌox talhiulai. Para acsni min ju tuꞌuꞌ makꞌalhkꞌajnat u tuꞌuꞌ axcayanti va ixlacata ni talacaꞌinita ju ixchivinti Dios pus lana tamacajun ixti Dios.
\v 18 Chai ju xatꞌin ju tamacha junta ixꞌalin ju xatꞌin alhtucunuꞌ pus yuꞌunch ju takꞌasmatꞌa ixchivinti Dios.
\v 19 Para va tachi talhamakꞌaninin ju xataxtokni ju alin ju ani lacamunutpaꞌ. Chai va taputaꞌokxchokꞌoi ju tumin. Chai na lhu taxtokni ju tatamoputun. Pus tachi chun ju ani taxtokni va amacꞌapꞌani ju ixchivinti Dios ju ixꞌachꞌananicanta laꞌixꞌalhunutꞌan. Chai jantu tavanan tasui ixtachaput Dios laꞌisꞌatsucuntiꞌan.
\v 20 Para ju xatꞌin ju tamacha lacakꞌoxi tꞌun yuꞌunch ju takꞌasmatꞌa ju ixchivinti Dios chai lana talacaꞌi. Chai lana tasui ixtachaput ju Dios laꞌisꞌatsucuntiꞌan. Ju aliꞌin va lacatsꞌunin tasui ju ixtachaput ju Dios laꞌisꞌatsucuntiꞌan. Ju aliꞌin lapanacni palai lhu tasui ixtachaput Dios laꞌisꞌatsucuntiꞌan. Chai ju aliꞌin lapanacni na lhu lana tasui ixtachaput Dios laꞌisꞌatsucuntiꞌan.
\s1 Ju Jesús apumalaninin ju chivinti ixlacata ju tuꞌuꞌ maclhcu
\p
\v 21 Ju Jesús vachuꞌ alacjuni ju lapanacni:
\p ―Acsni lhimincan ju tuꞌuꞌ maclhcu ju lacachakaꞌ jantu va akxtakꞌulacan laca tuꞌuꞌ valhtila nin laxtankꞌapuꞌ acapuꞌ caꞌula. Alai va mucꞌacan talaclhman junta mucꞌacan ju maclhcu.
\v 22 Chai vana va chun ju quinchivinti. Mas va miꞌakstuꞌan xaclamavasalaniyau ju chivinti para astan amacꞌatsꞌaniyaꞌitꞌit ju lapanacni. Chai tuchi chivinti ju jantu amamachakxanican ju ixtalhavatꞌan lapanacni pus uxijnan ju amacꞌatsꞌaniyaꞌitꞌit.
\v 23 Pus ju alin ixpakꞌasmatni pus cakꞌasmatlh.
\p
\v 24 Vachuꞌ chani alacjuni ju lapanacni:
\p ―Anavitꞌit cuenta ju tuchꞌi kꞌasmatꞌatꞌit. Ni anaviyaꞌitꞌit cuenta ju tuchi iclajunau pus palai lhu catamakꞌasmatniyan ju Dios. Chai palai lhu amachꞌakxayaꞌitꞌit ju uxijnan ni vasalh anaviyaꞌitꞌit cuenta ju quinchivinti.
\v 25 Pus ju navi cuenta ju tuchi kꞌasmatꞌa pus palai lhu camakꞌasmatnicanaꞌ. Para ju jantu tuꞌuꞌ navi cuenta ju tuchi kꞌasmatꞌa pus camacꞌapꞌanicanaꞌ ju lacatsꞌunin ju makꞌata laꞌixꞌalhunut.
\s1 Ju Jesús apumalaninin ju chivinti ixlacata ju tuꞌuꞌ tꞌin ju takꞌayai
\p
\v 26 Ju Jesús vachuꞌ chani alacjuni ju lapanacni:
\p ―Acsni lhinajun ju Dios laꞌixꞌalhunutꞌan ju lapanacni chunch ju tapasai tachi ju tapasai acsni achꞌananan tam jokꞌat.
\v 27 Pus ju yuchi lhtatai ju tsꞌis. Chai vatsꞌisin kꞌostolai. Para va isꞌakstu pꞌun ju ixꞌachꞌananti. Takꞌayai. Para ju anuꞌ achꞌananaꞌ jantu machakxai tas lhipꞌunch.
\v 28 Pus va lacatꞌun ju pꞌun. Pꞌulhnan ju xaxkꞌoi ju pꞌun. Astan alinch ju xaxivic. Chai ju astan xacuxich ju tocꞌai.
\v 29 Chai acsni cꞌatꞌatach ju xatocꞌat pus lana caꞌaxkꞌanancanach ni kꞌoxich cꞌatꞌatach.
\s1 Ju Jesús apumalani ju lapanacni ju xatꞌin mostaza
\p
\v 30 Ju Jesús vachuꞌ chani alacjuni ju lapanacni:
\p ―Tijuch nuꞌ ju ixtꞌachunch jumputun tachi acsni lhinajun ju Dios laꞌisꞌatsucuntiꞌan ju lapanacni.
\v 31 Pus acsni lhinajun ju Dios laꞌisꞌatsucuntiꞌan ju lapanacni pus na lhu talhilacaꞌan ju Dios. Chunch ju tapasai tachi ju tapasai acsni chꞌancan ju xatꞌin mostaza ju lacatꞌun. Pus ju anuꞌ tꞌin yuchi ju palai lactꞌicstꞌi tachi chun ju tꞌin ju alin ju ani lacamunutpaꞌ.
\v 32 Para acsni chꞌancan takꞌayai. Chai palai katakꞌaich jun tachi chun aliꞌ achꞌitin. Chai ju tsꞌokꞌo lai taꞌastacnan laꞌixmakpu ju anuꞌ achꞌananti.
\s1 Ju Jesús jantu vas xaꞌamalani ju lapanacni
\p
\v 33 Ju Jesús na tijlhu chivinti ju ixꞌajuni ju lapanacni ju ixtꞌalaktsꞌipaxcavai ju tuꞌuꞌ. Para va yuchi ixꞌajuni ju laich ixtamachakxai.
\v 34 Chai va tapakchux ju ixꞌamalani ju lapanacni aktsꞌiya ixpuxcajui ju chivinti ju lai ixtꞌalaktsꞌipaxcavai ju tuꞌuꞌ. Para acsni va isꞌakstu ixꞌalactꞌatolai ju ixꞌalacmamakaꞌui pus lana vas ixꞌalacmavasalanikꞌojui chux ju chivinti ju ixꞌajunita ixtalhavat lapanacni.
\s1 Ju Jesús amalacaꞌini ju un chai ju xcan
\p
\v 35 Chai ju anuꞌ avilhchan acsni tokꞌoxalhch pus ju Jesús alacjuni ju ixꞌalacmamakaꞌui:
\p ―Catapasauch ju lhimakꞌantacutni atantsꞌin.
\p
\v 36 Pus talacmacaulh ju ixtalhavat lapanacni chai talhiꞌalh ju Jesús lacabarco junta ixvi acsni ixꞌamalani ju lapanacni. Chai ixꞌalin vachuꞌ ju aliꞌin lapanacni ju ixtatꞌaꞌan lacalacatꞌicstꞌi ixbarcoꞌan vachuꞌ.
\v 37 Pus kꞌostaya ju kꞌai un chai na pꞌas tanekꞌelh ju xcan. Chai ixquitanuich lacabarco. Pus ju barco va isꞌaktsamputun ju xcan.
\v 38 Para ju Jesús va ilhtatai laꞌixtimusni ju barco. Laꞌisꞌaktsꞌi ixlacpatai. Pus ju ixꞌalacmamakaꞌui tamaklokꞌo ju Jesús chai tajuni:
\p ―Amamakaꞌunuꞌ ju uxintꞌi ja jantu tuꞌuꞌ xcaniyan ni tꞌonau ninin lacxcan.
\p
\v 39 Pus ju Jesús kꞌostavi. Kꞌailh ju un. Chai juni ju xcan:
\p ―Va sekch atꞌaꞌulh.
\p Pus lana va sek avanalh chai jantu lucunulh ju xcan.
\v 40 Chai ju Jesús alacsacmi ju ixꞌamamakaꞌui:
\p ―Tajuch ni va tꞌalhananatꞌit. Ja jantu lana quilalhilacaꞌanau.
\p
\v 41 Pus ju ixꞌalacmamakaꞌui lana na talhamakꞌaninilh. Talaclajunich sia yuꞌunch:
\p ―Tis chavaich nuꞌ ju ani ni laich taquiclacaꞌi ju un chai ju xcan.
\c 5
\s1 Ixtanun ju lhacaticurulhni laꞌixlacatuna pumatam amachakaꞌ Gadara
\p
\v 1 Pus ju Jesús chai ixꞌamamakaꞌui tachaꞌalh ju lhimakꞌantacutni atantsꞌin junta ixtꞌunꞌan ixjunita ju amachakꞌan Gadara.
\v 2 Chai acsni tacutlh ju lacabarco ju Jesús pus lana xajchilh ju campusantu pumatam lapanac ju ixpacxanta ju lhacaticurulhni. Chai ju yuchi lana lakꞌalh ju Jesús.
\v 3 Pus ju anuch lapanac ixꞌamachakꞌananta ju campusantu. Chai nin lacacadena jantu xamatiꞌ lai ixmakchꞌi.
\v 4 Va ta pakchux ixtachꞌanchꞌi chai ixtamakchꞌi lacacadena pus ju yuchi va ixꞌalackꞌexkꞌojui ju cadena. Pus jantu xamatiꞌ lai ta ixnavi.
\v 5 Chai ju tuncuj chai ju tsꞌis va tachi istꞌasatꞌajun lacatalhpan chai ju campusantu. Ixlacamacꞌatsanikꞌocantach isꞌakstu ju lacachiux.
\v 6 Pus ju anuch lapanac acsni laktsꞌilh ju Jesús ixlhimakat lana atsꞌalalakꞌalh. Taꞌaktsokotanilh.
\v 7 Chai ju lhacaticurulhni tapuchivinilh ixquilhni ju anuꞌ lapanac. Chai na pꞌas ju tachivinilh acsni taxakꞌala ju Jesús. Tajunich:
\p ―Tijuch ju quilamintau lhilaktsꞌinin ju uxintꞌi. Pus ju uxintꞌi istsꞌalhꞌat Dios ju vilhcha lactꞌiyan. Laꞌixtapakaꞌut ju Dios iclatapaininiyau. Jantu aquilamamakꞌalhkꞌajniu.
\p
\v 8 Pus ju lhacaticurulhni tapunaulh chunch ni Jesús ixꞌajunita ni catataxtulh laꞌixlacatuna ju anuꞌ lapanac.
\v 9 Chai ju Jesús sacmilh ju lapanac tuchi juncan. Chai ju yuchi akꞌalhtayanalh:
\p ―Legión icjuncan ni na quilhu quincꞌan.
\p Pus ju Legión ixtapakaꞌut junita lhu taropajni.
\v 10 Chai ju anuꞌ lhacaticurulhni na pꞌas tasqꞌuinilh lamapainin ju Jesús ni jantu caꞌaxcoxtulh ju anch lacatꞌun.
\v 11 Pus vanin ju anuꞌ akstijun na lhu ixtatꞌajun ju pꞌaxnin. Va ixtatꞌajun kꞌexvenin.
\v 12 Chai ixchuxꞌan ju anuꞌ lhacaticurulhni kꞌasi tasqꞌuinilh lamapainin ju Jesús. Tajunich:
\p ―Aquilamacaꞌauch laꞌixlacatunaꞌan ju pꞌaxnin. Chach ictanuyau ju anch.
\p
\v 13 Pus ju Jesús alakꞌaꞌinilh. Chai ju anuch lhacaticurulhni acsni tataxtulh laꞌixlacatuna ju anuꞌ lapanac pus lana tatanu laꞌixlacatunaꞌan ju pꞌaxnin. Chai ju ixtalhavat pꞌaxnin lana tin taꞌalh junta vak anta. Tatajucha lacaꞌatantsꞌin chai anch ju tanitajukꞌo lacxcan. Pus ju anuch pꞌaxnin ixtachaꞌanta lakatꞌui milh.
\p
\v 14 Pus ju ixtalhistꞌacꞌa ju pꞌaxnin na tatalhanalh chai taꞌatsꞌalalh. Taꞌalh nonin ju lakꞌachakꞌan chai ju lacacuxtun tuchi ixtapasata. Chai tataxtulh ju lapanacni amachakꞌan anch. Taꞌalh laktsꞌinin tuchi ixtapasata.
\v 15 Talakmilh ju Jesús. Chai talaktsꞌilh ju anuꞌ lapanac ju ixpacxanta lhu ju lhacaticurulhni. Para ju chavai ixmalakchꞌininta junta ixvi. Chai ixtakꞌoxinita ju isꞌaktsulh. Pus na tatalhanalh ju lapanacni.
\v 16 Chai ju lapanacni ju talaktsꞌilh ju tuchi ixtapasata ixlacata ju anuꞌ lapanac chai ixlacata ju pꞌaxnin tanonkꞌo.
\v 17 Pus tachi chun ju lapanacni tatapaininilh ju Jesús ni cataxtulh laꞌixtꞌunꞌan.
\p
\v 18 Chai acsni tanulh ju Jesús lacabarco pus ju anuꞌ lapanac ju ixtaxtunita ju lhacaticurulhni laꞌixlacatuna tapꞌastu ixchꞌakꞌokꞌaputun.
\v 19 Para ju Jesús jantu lacasqꞌuinilh. Va junich:
\p ―Alai apꞌinchich ju laminchakaꞌ. Aꞌunchich ju mintꞌaꞌamachakꞌan ni na kꞌai lhamakꞌan ju xanaviniyan ju Dios lamilacatuna chai ni na xaꞌaktaijuyan lacaꞌamapaininti.
\p
\v 20 Pus ju anuꞌ lapanac alh. Lacquilhuntsuculh ixlhilacaputsꞌun ju lacatꞌun junta ixꞌalin lakacau lakꞌachakꞌanixni. Ajuni ju lapanacni ni na kꞌai lhamakꞌan ju navilh ju Jesús laꞌixlacata. Pus va talhamakꞌaninilh chux ju lapanacni.
\s1 Nilh ju istsiꞌ pumatam ju Jairo ixjuncan
\p
\v 21 Pus ju Jesús putapasachokopa aktam lacabarco laꞌixlhimakꞌantacutni ju atantsꞌin. Pus talhitakꞌaixtokpa lhu ju lapanacni. Chai ju Jesús taya laꞌixquilhtuꞌ ju atantsꞌin.
\v 22 Pus ju acsnich chincha pumatam lapanac ju Jairo ixjuncan. Ju yuchi pumatam xakꞌai ixjunita sia yuꞌunch ju ixtachꞌalhcatnan laꞌixpujitatꞌan ju istꞌaꞌisraelitanin. Chai acsni lakchilh ju Jesús pus lana taquilhputanilh ju lacatꞌun vanin laꞌixchꞌajaꞌ.
\v 23 Tapaininilh ju Jesús chai juni:
\p ―Ju quintsiꞌ tꞌajun niniꞌ. Aqꞌuintꞌapꞌitꞌi kꞌai lamapainin. Amokslanitꞌachiꞌ ju mimacaꞌ laꞌixlacatuna ju yuchi ni palaich cajunaꞌ. Jantu caniyaꞌ.
\p
\v 24 Pus ju Jesús tꞌaꞌalh ju Jairo. Chai ixtalhavat lapanacni tachꞌakꞌokꞌalh. Na ixtalatankꞌasiꞌanta.
\v 25 Chai pumatam chakoꞌulh ixmakꞌanta. Chai ju yuchi lakacautꞌui cꞌata jantu ixlakxixta.
\v 26 Na lhu ixmakꞌalhkꞌajnanta acsni ixtacꞌuchꞌui ju acꞌuchꞌunin. Chai ixmacaꞌankꞌotach tachi chun ju ixꞌalinta para jantu tuꞌuꞌ ixlhitapalai. Va apalai ixlhitapꞌasni.
\v 27 Pus ju anuꞌ chakoꞌulh acsni kꞌasmatlh ni na lai ixꞌacꞌuchꞌunun ju Jesús pus lana puchincha laꞌixpulacan ju Jesús junta ixꞌalactꞌaꞌanta ixtalhavat lapanacni. Chai lakchaꞌanilh ixpumpuꞌ ju Jesús.
\v 28 Va ixnajun laꞌixꞌalhunut ni mas va yuchi ni calakchaꞌanilh lacatsꞌunin ixpumpuꞌ pus palaich cajunaꞌ.
\v 29 Pus vasalh. Acsni lakchaꞌanilh ixpumpuꞌ ju Jesús pus lana vatsꞌalhti vak tamactalh ju ixtakꞌankꞌat. Chai lana ucsacꞌatsa laꞌixlacatuna ni palaich xajun.
\v 30 Pus ju Jesús lana cꞌatsa ni ixcꞌuchꞌuta xamatiꞌ. Chai talakaspꞌitlh junta ixꞌanta laꞌixtalhavat lapanacni chai alacjuni:
\p ―Tis chavaich ju xaquilakchaꞌani ju quimpumpuꞌ.
\p
\v 31 Para ju ixꞌalacmamakaꞌui tajunich:
\p ―Laktsꞌinch ni na lhu lapanacni ju tatankꞌasiyan ni tꞌisacminimpꞌalai tis chavaich ju xalakchaꞌaniyan ju mimpumpuꞌ.
\p
\v 32 Para ju Jesús alacꞌavanalh laꞌixtalhavat lapanacni ni va ixlaktsꞌimputun tichi chavaich ju ixlakchaꞌanita ju ixpumpuꞌ.
\v 33 Pus ju anuꞌ chakoꞌulh na ixꞌaxqꞌuipꞌipꞌitninta ni na ixtalhananta. Para ni cꞌatsa tuchi ixtapasata laꞌixlacatuna pus lakꞌalh ju Jesús chai taꞌaktsokotalh laꞌixꞌucxlacapuꞌ chai jonkꞌo tuchi ixlacaꞌatalh ju lhilakchaꞌalh chai ni palaich va.
\v 34 Chai ju Jesús juni:
\p ―Quintsiꞌ ni xaqꞌuilhilacꞌapꞌinch pus yuchi palai xalhiꞌun. Lhikꞌach apꞌitꞌi. Jantuch aktam apꞌacxanaꞌ ju ani mintakꞌankꞌat.
\p
\v 35 Pus acsni ixtꞌajuncaꞌ tꞌachiviniꞌ ju chakoꞌulh ju Jesús pus tachincha ju lapanacni ju ixtataxtutachalh ju ixchakaꞌ ju anuꞌ xakꞌai. Tajunich ju yuchi:
\p ―Ju mintsiꞌ nitach. Tajuch ni va jeks amavapꞌalaꞌ ju amamakaꞌunuꞌ.
\p
\v 36 Para ju Jesús acsni kꞌasmatlh ju ixchivintiꞌan lana junilh ju anuꞌ xakꞌai:
\p ―Jantu atꞌalhan. Va aqꞌuilhilacꞌapꞌich.
\p
\v 37 Pus ju Jesús jantu lacasqꞌuilh ni xamatiꞌ cachꞌakꞌokꞌalh. Va yuꞌunch ju Pitaluꞌ chai ju Jacobo chai ju Xivan ispꞌisekꞌe ju Jacobo.
\v 38 Tamilh laꞌixchakaꞌ ju anuꞌ xakꞌai chai ju Jesús alaktsꞌilh ixtalhavat lapanacni ni na ixtalackꞌalhun. Na pꞌas ixtalactꞌasai.
\v 39 Chai acsni tanucha ju Jesús lacachakaꞌ pus alacjuni ju lapanacni:
\p ―Tajuch ni na va lhilactꞌasayapꞌalatꞌit chai na lhikꞌalhumpꞌalatꞌit. Ju ani atsiꞌ jantu nita. Va lhtatai.
\p
\v 40 Para ju lapanacni va talhitsꞌiꞌilh ju Jesús. Pus ju acsnich ju Jesús alacxcoxtokꞌo ixchuxꞌan. Va yuchi ixpaich ju anuꞌ atsiꞌ ju lhiꞌalh chai ixnatich chai ju ixꞌalactꞌaminta. Va yuꞌunch ju tatꞌatanu junta ixma ju atsiꞌ.
\v 41 Chai ju Jesús chꞌapanilh ixmacaꞌ ju atsiꞌ chai juni:
\p ―Talita, cumi.
\p Ju chunch va nomputun: Atsiꞌ uxintꞌi ju icjunan. Akꞌostꞌaꞌulhch.
\v 42 Pus ju atsiꞌ lana kꞌostavi. Alhtanalh. Ju yuchi lakacautꞌui cꞌata ixpacxanta. Pus slivasalh na talhamakꞌaninilh ju lapanacni ju anch ixtavilanalh.
\v 43 Para ju Jesús slivasalh alaclhimapꞌaksi ju ixnati chai ixpai ju atsiꞌ ni jantu xamatiꞌ catamacꞌatsani ju tuchi ixtapasata. Chai lana lhinaulh ixmavaca ju atsiꞌ.
\c 6
\s1 Ju Jesús amalaninin ju lakꞌachakꞌan Nazaret
\p
\v 1 Ju Jesús taxtuchokopalhcha ju anch. Milh laꞌixtꞌun. Chai vachuꞌ tatꞌamilh ju ixꞌalacmamakaꞌui.
\v 2 Chai acsni chaꞌalh ju avilhchan paꞌastacni pus ju Jesús alh laꞌixpujitatꞌan ju istꞌaꞌisraelitanin chai tsuculh amalaninin. Pus na lhu ju takꞌasmatlh na talhamakꞌaninilh ixꞌatalaninti. Ixtalaclajuni:
\p ―Tas anchach nuꞌ ju xalani ju ani chivinti ju ani ya lapanac. Tis atalaninti ju najun ju yuchi. Chai tas lai lhinavipalai ju kꞌai lhamakꞌan.
\v 3 Ni yuchi jumpalata ju axpitniꞌ. Istsꞌalh ju Malia. Ixlakꞌau ju Jacobo chai ju José chai ju Judas chai ju Simón. Chai vachuꞌ ani tatꞌajun ju ixꞌapꞌisekꞌench atsiꞌin.
\p Pus na taxcailich ju Jesús.
\v 4 Para ju Jesús alacjuni:
\p ―Ju lapanac ju najun ixchivinti Dios aktsꞌiya tuꞌuꞌ lhiulacan vanta anchach ju an. Va ixtꞌaꞌamachakꞌan chai ju ixtꞌaꞌamachivinti chai ixlhiꞌalakꞌavin ju jantu tuꞌuꞌ talhiulai.
\p
\v 5 Pus ju Jesús jantu lai tuꞌuꞌ xanavi kꞌai lhamakꞌan ju anch laꞌixtꞌun. Va yuchi ni mama ixmacaꞌ laꞌixlacatunaꞌan ju takꞌankꞌanin chai acꞌuchꞌu. Para jantu ilhuꞌan.
\v 6 Pus ju Jesús na ixꞌalaklhamakꞌaninin ju lapanacni ni jantu ixtalhilaksi ju yuchi. Pus astan ixꞌucxuꞌan lakꞌachakꞌanixni ju vanin ixlacvi. Ixꞌamasuni ju lapanacni ixchivinti Dios.
\s1 Ju Jesús amalakachalh ixpumacautꞌuiꞌan
\p
\v 7 Pus alactꞌasanilh ju ixpumacautꞌuiꞌan chai tsuculh alaclhcaꞌulanaꞌ pumatꞌiyun. Alacmalakacha ni cataꞌalh nonin ju ixchivinti Dios. Chai axtaknilh ixtachaputꞌan ni laich cataxcomakꞌalh ju lhacaticurulhni laꞌixlacatunaꞌan ju lapanacni.
\v 8 Chai alacjuni ni jantu tuꞌuꞌ catalhiꞌalh ju ixlacata ju lacati. Va yuchi ixpalicꞌan. Jantu catalhiꞌalh ispastiꞌan nin ixniꞌan nin ixtuminꞌan.
\v 9 Catachꞌantanu ju ixchꞌanxtꞌakꞌanꞌan para jantu kꞌalhtꞌui catalhiꞌalh ju ixpumpuꞌan.
\v 10 Alacjuni:
\p ―Ni xamatiꞌ catajunan ni lai alakꞌacꞌujtꞌit chai lai avenatꞌit laꞌixchakaꞌ pus anchach ju atꞌolhtꞌachitꞌit tus acsni atꞌaxtꞌuchꞌokꞌoyaꞌitꞌit ju anuꞌ lakꞌachakꞌan.
\v 11 Para tachi chun ju jantu kꞌox cataꞌamaklhtayananan nin yuchi ni catakꞌasmatniputunan ju minchivintiꞌan pus acsni atꞌaxtꞌuyaꞌitꞌit ju anuꞌ lakꞌachakꞌan achꞌancꞌalhapꞌuxcꞌantꞌit ju pokxni laminchꞌanxtꞌakꞌan. Ju chunch catapucꞌatsayaꞌ ni talakꞌalhin ju tanavita. Slivasalh ju iclajunau. Ju anuꞌ avilhchan acsni caꞌamakꞌosaspitcanaꞌ ju lapanacni palai macxcai catamakꞌalhkꞌajnanaꞌ ju anuꞌ amachakꞌan ju jantu catakꞌasmatꞌaꞌ ju minchivintiꞌan. Palai jantu ju amachakꞌanixni ju makꞌaniya lakꞌachakꞌanixni Sodoma chai Gomorra. ―Chunch ju ajuni ju ixpumacautꞌuiꞌan ju Jesús.
\p
\v 12 Pus ju yuꞌunch tataxtucha chai ajuni ju lapanacni ni catamacaulh ixꞌalactuꞌuntiꞌan.
\v 13 Vachuꞌ ixtaxcoxtui lhu ju lhacaticurulhni laꞌixlacatunaꞌan ju lapanacni. Chai ixtalacamucꞌai ju aceite lhu ju takꞌankꞌanin chai palaich ixtajun.
\s1 Maknicalh ju Xivan amakpaxanaꞌ
\p
\v 14 Pus ju gobernador Herodes kꞌasmatlh tuchi ixnavi ju Jesús ni vanta anchach ispastaccanta. Chai naulh:
\p ―Ju anuꞌ ju Jesús tajuni ca yuchi ju Xivan ju amakpaxanaꞌ. Ca va taꞌacxtuchokolh laꞌixꞌaninti. Yuchi kꞌai lhamakꞌan lhinavi.
\p
\v 15 Para ju aliꞌin lapanacni ixtanajun:
\p ―Jantiyuꞌ. Alai ca yuchi ju Elías ju caminaꞌ acsni tucaꞌ min ju najunta Dios ni camalakachatachilh.
\p Chai ju aliꞌin ixtanajun:
\p ―Jantiyuꞌ. Alai ca yuchi ju lapanac ju najun ixchivinti Dios tachi ju ixtalai ju makꞌaniya lapanacni.
\p
\v 16 Para ju gobernador Herodes acsni kꞌasmatlh tuchi ixnavi ju Jesús naulh:
\p ―Ju ani yuchi ju Xivan ju iclhinaulh ixꞌacchꞌucꞌuca. Ca va taꞌacxtuchokolh junta ixmacnucanta.
\p
\v 17 Pus acsni tucaꞌ ixmaknicanta ju Xivan pus ju Herodes ixlhinajunta ixchꞌapꞌaca ju yuchi. Chai lhinaulh ixmakchꞌica acsni tꞌalhnucalh. Chunch ju navilh ju gobernador ni ixnaviniputun ixkꞌachat ju Herodías. Pus ju Herodías ixꞌamachakaꞌ ixjunita ju Pilipe. Ispꞌisekꞌe ju Herodes. Para ixmacajunta ju Pilipe chai ju Herodes ixtꞌatꞌajun.
\v 18 Chai ju Xivan chani ixjunita ju Herodes:
\p ―Jantuch lhijun ju lhamapꞌaksin ni va miꞌamachakaꞌ xanavi ju ixꞌamachakaꞌ ixjunita ju mimpꞌisekꞌe.
\p
\v 19 Pus ju Herodías lhitꞌalaxcailh ju Xivan ixlacata ju ixchivinti. Chai ixlhinomputun ixmaknica. Para jantu lai ixnavi.
\v 20 Pus ju Herodes na ixtalhoni ju Xivan ni iscꞌatsai ni soknicꞌa ixjunita isꞌatsucunti chai ixlapanac Dios ixjunita. Pus yuchi jantu xalhilakꞌaꞌini ju Herodías ni tuꞌuꞌ macxcai canavi. Para ju Herodes mas va tam tam ixnajun acsni ixkꞌasmatni ju ixchivinti para ixlaquilhtu na ixkꞌasmatniputun ju Xivan.
\v 21 Pus lakatam avilhchan chilh ju pantsꞌiquis ju ixpacxan ju Herodías. Pus ixcꞌatan ixjunita ju Herodes. Chai ju yuchi anavinilh kꞌai lacvaiti ixtꞌaxalackꞌajin chai ju comandantenin chai ju xamakꞌalinin ju xaꞌestado Galilea.
\v 22 Chai tanucha ju istsiꞌ ju Herodías junta ixtatꞌajun venin chai tsuculh atꞌiniꞌ. Pus lana kꞌachanilh ju ixꞌatꞌinti ju Herodes chai ju ixꞌalactꞌavi lacamixa. Chai ju Herodes junilh ju atsiꞌ:
\p ―Aqꞌuisqꞌuininch va tuchi ixtalakxtuch ju lacꞌasqꞌuinch. Ju quitꞌin acxtakniyan.
\p
\v 23 Pus ju Herodes lhipastacnilh Dios chai junilh ju atsiꞌ:
\p ―Va tuchi ixtalakxtuch ju aqꞌuisqꞌuiniyaꞌ acxtakniyan mas aqꞌuisqꞌuiniyaꞌ ni alhinonaꞌ ju aliꞌ lakꞌachakꞌan junta iclhinajun ju chavai.
\p
\v 24 Pus ju atsiꞌ lana taxtucha. Alh sacminiꞌ ju ixnati. Junich:
\p ―Tijuch ju acsqꞌuiniyaꞌ.
\p Pus ju ixnati junilh ni casqꞌuinilh ju isꞌaktsulh ju Xivan ju amakpaxanaꞌ.
\v 25 Pus ju atsiꞌ lana tanuchokocha junta ixvi ju Herodes chai junilh:
\p ―Iclacasqꞌuin ni chavai lana aqꞌuixtꞌaknin lacatuꞌuꞌ casavila isꞌaktsulh ju Xivan ju amakpaxanaꞌ.
\p
\v 26 Pus ju acsnich ju gobernador lana na amakꞌaninilh. Para va ixlacaꞌatalh ni ixlhipastactach ju Dios acsni junilh ju atsiꞌ ni caxtakniyach va tuchi casqꞌuiniyach chai ni takꞌasmatlh ju ixꞌalactꞌavi lacamixa pus jantu lai naulh ni jantu.
\v 27 Pus ju gobernador lana malakachalh pumatam ixtaropa. Junilhch:
\p ―Aqꞌuilhitꞌanin ju isꞌaktsulh ju Xivan.
\p
\v 28 Pus ju taropa alh acchꞌucꞌunuꞌ ju Xivan lacapulachꞌin. Chai lhiminilh ju aktsulh lacatuꞌuꞌ casavila chai xtaknilh ju atsiꞌ. Pus ju atsiꞌ quixtaknilh ju ixnati.
\p
\v 29 Chai acsni tacꞌatsa ju ixꞌalacmamakaꞌui ju Xivan pus taꞌalh. Tasaclh ju ixlacatuna. Taquimacnu.
\s1 Ju Jesús amava lakaquis milh jokꞌatni
\p
\v 30 Pus tataspꞌitchokocha ju ixꞌalacmalakachata ju Jesús ni cataꞌalh pumatꞌiyun amalaninin ju lapanacni. Chai talakminchokolh ju Jesús chai tajunkꞌo chux tuchi ixtanavi chai tuchi ixtamasunita ju lapanacni.
\v 31 Pus ju Jesús alacjuni:
\p ―Atꞌatꞌitch ju uxijnan lacamacni junta lai catolauch va quiꞌakstuꞌan. Junta lai caꞌastacnanau pantsꞌiquis.
\p Ju Jesús alhijunilh chunch ni na lhu lapanacni ixtamin ixtaꞌan junta ixꞌalactꞌavi ju Jesús ju ixꞌamamakaꞌui. Pus lana matiꞌ ixjunita ispantsꞌiquisꞌan ni lai catavailh.
\v 32 Pus tatajulh isꞌakstuꞌan lacabarco. Taꞌalh lhimakꞌantacutni atantsꞌin junta jantu xamatiꞌ ixtꞌajun.
\v 33 Para na pumalhu lapanacni talaktsꞌilh ju Jesús acsni alh. Chai tamispa. Chai ju amachakꞌan lakatamin lakꞌachakꞌan taꞌatsꞌalaꞌalh junta ixtaꞌamputun ju Jesús chai ixꞌamamakaꞌui. Va tachꞌajaxꞌalh. Chai pꞌulhnan tachaꞌalh ju va ixtachꞌajaxꞌanta. Astan tachaꞌalh ju Jesús chai ixꞌamamakaꞌui.
\v 34 Pus acsni tacutlh ju Jesús ju lacabarco pus alaktsꞌilh ju lapanacni ni na lhu ixtatakꞌaixtokta. Pus na alacmapaini ju yuꞌunch ni tachi ju tuꞌuꞌ borregojni ixtajunita ju matiꞌ ixꞌalhistacnaꞌ. Pus ju yuꞌunch vachuꞌ matiꞌ ixjunita xamatiꞌ ju ixꞌamasuni ju soknicꞌa ti. Pus lana tsuculh alacmasuniniꞌ chai na tijlhu chivinti ju xaꞌajuni.
\v 35 Para acsni tokꞌoxalh pus ju ixꞌalacmamakaꞌui talakꞌalh ju Jesús chai tajuni:
\p ―Jantu xamatiꞌ tꞌajun ju ani chai ju chavai na tokꞌoxatach.
\v 36 Amalakꞌachꞌatꞌich ju lapanacni ni cataꞌalh lacacuxtu junta lacyacha chakaꞌ chai ju lakꞌachakꞌanixni ju vanin lacvi. Chach taꞌancha tamonin ju tuchi cataꞌuyach ni matiꞌ tuchi cataꞌulh ju ani.
\p
\v 37 Para ju Jesús akꞌalhtayanalh. Alacjuni:
\p ―Amavatꞌit ju uxijnan.
\p Para ju ixꞌamamakaꞌui taꞌakꞌalhtayanalh:
\p ―Pus ja lai acꞌanauch tamonin lakatꞌui cientos tumin ju vati ni camavayauch.
\p
\v 38 Para ju Jesús alacjuni:
\p ―Tas akxchux vati ju alin. Inchitꞌit laktsꞌinin.
\p Chai acsni tacꞌatsa tajuni:
\p ―Alin akxquis vati chai lakatꞌui pamata.
\p
\v 39 Chai ju Jesús alacjuni:
\p ―Alaclhcꞌaꞌulachitꞌit ju lapanacni ju quilhmactamin quilhmactamin. Chach tatavi lacaꞌatsꞌinan.
\p
\v 40 Pus alhvakpitsicalh chai tatavi ju lapanacni. Ju quilhmactamin tamin cientos alhcaꞌulacalh. Chai ju aquilhmactamin cincuenta alhcaꞌulacalh.
\v 41 Ju acsnich ju Jesús chꞌapalh ju akxquis vati chai ju lakatꞌuich pamata. Talakstꞌalh ju lactꞌiyan chai xtaknilh lhakꞌailaktsꞌinti ju Dios. Chꞌekꞌelh ju vati. Chai axtaknilh ju ixꞌalacmamakaꞌui ni cataꞌaxtakniyach ju ixtalhavat lapanacni. Vachuꞌ lhvakpitsikꞌo ju lakatꞌui pamata.
\v 42 Pus chux ju lapanacni tavailh chai talhilakꞌo.
\v 43 Chai ju ixꞌamamakaꞌui ju Jesús tasacchokolh ju vati chai ju pamata ju tamaxajnicha ju jantu taꞌokꞌo. Lakacautꞌui tankꞌalin aktsamkꞌo.
\v 44 Pus sia yuꞌunch ju tavailh ixchaꞌanta lakaquis milh jokꞌatni.
\s1 Ju Jesús alhtanalh laꞌixꞌucxni ju xcan
\p
\v 45 Pus ju Jesús lana pꞌas ajuni ju ixꞌalacmamakaꞌui ni catatajuchokolh laꞌixbarcoꞌan. Catapꞌulhꞌalh ju lakꞌantacutni atantsꞌin junta vilhcha ju lakꞌachakꞌan Betsaida. Ju yuchi tavilhcaꞌ ju anch ni laich caꞌalacmalakachachokoyaꞌ laꞌixchakaꞌan ju ixtalhavat lapanacni.
\v 46 Chai ju Jesús acsni alacmalakachakꞌo ju lapanacni pus alh ju akstijun. Alh tꞌachiviniꞌ ju Dios.
\v 47 Chai acsni tatsꞌisi pus ju ixꞌamamakaꞌui va laꞌixlacaitatcaꞌ atantsꞌin ixtaꞌanta lacabarco. Para ju Jesús va isꞌakstu ixvilhchacaꞌ ju lacatꞌun.
\v 48 Chai ju yuchi alaktsꞌilh ju ixꞌamamakaꞌui ni na ixtaxkꞌoptach ni ixtaxakataiꞌanta ju ixbarcoꞌan. Para ni na pꞌas ixlai ju un chai na ixnekꞌespꞌitꞌa ju xcan pus jantu lai ixtamalhtanai ju barco. Pus tachi lakatꞌutu hora vatsꞌisin alakmilh ju ixꞌamamakaꞌui ju Jesús. Ixtachꞌantaꞌanta laꞌismusan ju xcan chai va ixꞌapuꞌiniputun ju yuꞌunch.
\v 49 Para ju yuꞌunch acsni talaktsꞌilh ni va alhtanaminta laꞌismusan xcan pus tapastaclh ni ca yuchi ju macxcai un ju minta. Chai lana tsꞌau talactꞌasalh.
\v 50 Pus ixchuxꞌan talaktsꞌilh chai slivasalh na tatalhanalh. Para ju Jesús lana soko axakꞌala. Ajuni:
\p ―Kꞌai anavitꞌit ju miꞌalhunutꞌan. Quitꞌin. Jantu atꞌalhanantꞌit.
\p
\v 51 Chai ju Jesús alactꞌataju ju lacabarco. Chai lana sek va ju un. Chai ju yuꞌunch na tatalhanalh chai na talhamakꞌaninilh.
\v 52 Pus ju yuꞌunch lana jantu ixtamachakxai tichi lapanac ixlhitalacasui acsni amava ju akxquis vati ju lapanacni. Na va pꞌas ixjunita ju ixꞌalhunutꞌan.
\s1 Ju Jesús acꞌuchꞌu ju takꞌankꞌanin ju xalacatꞌun Genesaret
\p
\v 53 Acsni tachaꞌalh ju lhimakꞌantacutni ju atantsꞌin ju Jesús chai ixꞌamamakaꞌui pus tachaꞌalh ju xalacatꞌun Genesaret. Anch ju tachꞌiꞌula ju ixbarcoꞌan.
\v 54 Chai acsni tatacutlh ju yuꞌunch ju lacabarco pus lana tamispalhch ju Jesús ju lapanacni.
\v 55 Va ani ani taꞌatsꞌalaꞌalh tachi chun ju lakꞌachakꞌanixni ju vanin ixlacvi. Tatsuculh lhiminin lacalona ju takꞌankꞌanin junta ixnoncan ixvi ju Jesús.
\v 56 Chai vanta anch ixꞌan ju Jesús u lacatꞌicstꞌi lakꞌachakꞌan u lackꞌai lakꞌachakꞌan u lacacuxtu pus ixꞌamamacan ju takꞌankꞌanin ju lacati. Ixtatapaininich ju Jesús ni laich catalakchaꞌanilh mas va lacatsꞌunin ixquilhtuꞌ ixpumpuꞌ. Pus ju Jesús alakꞌaꞌinilh chai tachi chun ju ixtalakchaꞌani ixpumpuꞌ palaich tava.
\c 7
\s1 Alin ju taxtokni ju malhquiliqui ju lapanacni
\p
\v 1 Lakatam avilhchan ju fariseonin chai ju aliꞌin ju na ixtalhatalanininta ixlhamapꞌaksinꞌan ju istꞌaꞌisraelitanin ju ixtamintacha ju Jerusalén tatakꞌaixtoklh junta ixvi ju Jesús.
\v 2 Chai ju yuꞌunch talaktsꞌilh ju aliꞌin ixꞌamamakaꞌui ju Jesús ni jantu chun ixtamakchꞌakꞌai acsni ixtavajin tachi ju ixtalhilanita ju istꞌaꞌisraelitanin. Pus ixlhiyuchach tanaulh ni jantu kꞌox tachi ju ixtalai ju ixꞌamamakaꞌui ju Jesús.
\v 3 Pus ju fariseonin chai ixchuxꞌan ju aliꞌin israelitanin jantu ixtavajin ni jantu pꞌulhnan na paklhu catamakchꞌakꞌa. Pus chunch ixjunita ju iscostumbreꞌan ju ixꞌamacontilanita ju makꞌaniya ixlacpaꞌitniꞌan.
\v 4 Chai acsni ixtataspꞌittacha ju laclhitamau pus jantu catavenaꞌ ni jantu catapaxaꞌ pꞌulhnan tachi ju ixtalhilanita. Chai na lhu aliꞌ costumbre ju ixtanavi tachi ju ixtanavi ju makꞌaniya ixlacpaꞌitniꞌan. Tachi acsni talakꞌataxtꞌumakꞌan chai na paklhu ju talakchꞌakꞌai ju vaso chai ju xalu chai ju tsasnat xalu tachi ju aktsꞌiya ixtalhilanita.
\v 5 Pus ju fariseonin chai ju ixtalhatalanininta ju lhamapꞌaksin tasacmilh ju Jesús. Tajunich:
\p ―Ju mintamamakaꞌun tajuch ni jantu tanavi tachi ju aktsꞌiya iclhilanitauch ju quijnan. Ju yuꞌunch ni lai tavajin mas jantu tamakchꞌakꞌata tachi ju iclhilanitauch ju quijnan.
\p
\v 6 Pus ju Jesús alacmapuspitnilh ju chivinti chai alacjuni:
\p ―Ju uxijnan na acxpꞌutꞌiyununatꞌit. Slivasalh uctaxtulh tachi ju naulh ju makꞌaniya lapanac ju Isaías ixjuncan. Ju yuchi naulh ni caꞌalinaꞌ ju lapanacni ju chunch catalayaꞌ tachi ju layatꞌit ju uxijnan. Ju yuchi tsꞌokꞌula ni ma chani naulh ju Dios:
\q1 Ma yuchi ju Dios. Para ju ani lapanacni ma va laꞌixquilhniꞌan ju tapunajun ni xakꞌai ju yuchi.
\q1 Para ju laꞌixꞌalhunutꞌan ma lana jantu tuꞌuꞌ talhiulai.
\q1
\v 7 Ma jantu tuꞌuꞌ nomputun ni tanajun ni yuchi ju xakꞌai ju Dios.
\q1 Ju yuꞌunch ma taꞌamalaninin ju tuꞌuꞌ tachi ju vasalh ixlhamapꞌaksin Dios mas va ixlhamapꞌaksin ixtꞌalapanacꞌan.
\m Ju Isaías naulh ni ma chunch ju naulh ju Dios.
\v 8 Chai ju quitꞌin iclajunauch ni vasalh chunch ju layatꞌit tachi ixnajun ju Isaías ni vachuꞌ macꞌaꞌuntꞌit ju uxijnan ju ixlhamapꞌaksin Dios. Va yuchi ju lacꞌaꞌiyatꞌit ixlhamapꞌaksinꞌan ju mintꞌalapanacniꞌan. Tachi acsni lakꞌatꞌaxtꞌumakꞌanatꞌit chai na paklhu ju chꞌakꞌayatꞌit ju tuꞌuꞌ xalu chai ju tuꞌuꞌ vaso. Chai vachuꞌ alin palai lhu taxtokni va ixtꞌachun ju naviyatꞌit.
\p
\v 9 Chai ju Jesús ixꞌalacjuni vachuꞌ:
\p ―Ju uxijnan samakꞌantꞌatꞌit ju ixlhamapꞌaksin Dios va ixlacaꞌatalh ni navipꞌutꞌunatꞌit ju miꞌatalanintiꞌan miꞌakstuꞌan.
\v 10 Pus ju makꞌaniya lapanac ju Moisés ixjuncan chani naulh: “Atꞌalhonin ju mimpai chai ju minatich. Chai amakniyaꞌitꞌit va tichi chavaich ju va taxtokni cajunilh ju tam ixpai u tam ixnati”.
\v 11 Pus mas chunch ju nonatꞌit para lakꞌaꞌiyatꞌit ni chani cajunilh ju ixpai u ixnati ju tam lapanac: “Ju quitꞌin jantu lai actilaꞌaktaiju va ixlacaꞌatalh ni iclhikꞌailaktsꞌilh Dios ju anuꞌ tumin ju xaclapuꞌaktaiju”.
\v 12 Chai ju uxijnan nonatꞌit ni ma jantu tasqꞌuini ni caꞌaktaiju ju ixpai u ixnati ni va chunch ju canaulh tam lapanac.
\v 13 Para ni chunch ju layatꞌit pus va samakꞌanatꞌit ixchivinti Dios ni va navipꞌutꞌunatꞌit ju makꞌaniya miꞌatalanintiꞌan miꞌakstuꞌan. Chai palai lhu taxtokni ju naviyatꞌit ju va ixtꞌachunch. Chai vachuꞌ chun ju lacmasuniyatꞌit ju miꞌaskꞌatꞌanꞌan. ―Chunch ju alacjuni ju lapanacni ju Jesús.
\p
\v 14 Chai aktam ju Jesús alactꞌasanilh ju ixtalhavat lapanacni chai alacjuni:
\p ―Aquilakꞌasmatniuch minchuxꞌan chai amachꞌakxatꞌit ju tuchi aclajunau.
\v 15 Jantiyuꞌ ju ui tam lapanac ju lai malhquiliquini isꞌatsucunti. Alai yuchi ju chivinti ju taxtui laꞌixꞌalhunut. Yuchi ju malhquiliquini isꞌatsucunti tam lapanac.
\v 16 Ju uxijnan ju alin ju mimpakꞌasmatniꞌan pus akꞌasmatꞌit.
\p
\v 17 Pus ju acsnich ju Jesús taxtulh lacatalhavat. Alhtanalh. Chai acsni tanucha ju lacachakaꞌ pus ju ixꞌalacmamakaꞌui tasacmi tuchi ixnomputun ju anuꞌ chivinti ju ixꞌajunita ju lapanacni.
\v 18 Chai ju Jesús alacjuni:
\p ―Ja vachuꞌ jantu lai amachꞌakxananatꞌit ju uxijnan. Ja va jantu machꞌakxayatꞌit ni jantu lai malhquiliquini isꞌatsucunti tam lapanac ju tuchi ui.
\v 19 Ju tuchi ui jantu tanun laꞌixꞌalhunut ju tam lapanac. Alai va laꞌixpajan ju tajui chai astan va makꞌancanch.
\p Pus ni catacꞌatsa ni si lai okꞌocan yuchi xaꞌalaclhijuni chunch ju Jesús.
\v 20 Chai vachuꞌ alacjuni:
\p ―Tachi chun ju macxcai chivinti ju quilhtaxtui tam lapanac yuchi ju malhquiliquini ju isꞌatsucunti.
\v 21 Pus laꞌixꞌalhunutꞌan ju lapanacni minacha ju jantu kꞌox atalacpastꞌacꞌat. Chai ixpuxcajuca apumatam chakoꞌulh u apumatam jokꞌat. Vachuꞌ lacaꞌalhunut minacha ju ixkꞌachanica ni va lacati tsucucan. Chai ju amakninti.
\v 22 Chai ju akꞌalhaꞌunti. Chai ju ixmakkꞌachanica ju jantu ixꞌanuꞌ. Chai ixnavicach tachi chun ju aliꞌ alactuꞌuntich. Chai ju aꞌokxchokꞌonti. Chai acsni matiꞌ ju maxanti. Chai ju alhacchaꞌanti. Chai ixnajunca ju macxcai ixlacata apumatam. Chai ju alhitakꞌayanti. Chai ixkꞌachanica ju va lhilakachaput.
\v 23 Pus tachi chun ju ani alactuꞌunti pulacni ixꞌalhunut ju lapanac ju minacha. Chai yuchach ju malhquiliquini isꞌatsucunti.
\s1 Pumatam chakoꞌulh lhilaksilh ju Jesús
\p
\v 24 Ju Jesús taxtulh ju anuꞌ lakꞌachakꞌan chai chaꞌalh ju xalacatꞌun junta ixꞌalin ju lakꞌachakꞌanixni Tiro chai Sidón. Chai ju Jesús anch ixtꞌajun laꞌixchakaꞌ pumatam amachakꞌan anch. Para jantu ixlacasqꞌuin ni xamatiꞌ cacꞌatsa. Para jantu lai tatankꞌanu.
\v 25 Pus pumatam chakoꞌulh ixꞌalin istsiꞌ ju ixtanun ju lhacaticuru laꞌixlacatuna. Chai acsni kꞌalhakꞌasmatlh ni ixvi ju Jesús pus lana lakmilh. Taꞌaktsokotanilh vanin laꞌixchꞌajaꞌ.
\v 26 Pus ju anuꞌ chakoꞌulh ixchivinin ju lhigriego chai amachakaꞌ Sirofenicia ixjunita. Pus ju yuchi tapaininilh ju Jesús ni caxcoxtunilh ju lhacaticuru laꞌixlacatuna ju istsiꞌ.
\v 27 Para ju Jesús chani juni:
\p ―Chach pꞌulhnan actiꞌaktaiju ju quintꞌaꞌamachivinti. Ni jantu chun aclalh pus ixtꞌachunch cava tachi ju va acꞌaquictaiꞌinilh ixniꞌan ju askꞌatꞌan chai acxtaknilh ju scꞌuyun.
\p
\v 28 Para ju anuꞌ chakoꞌulh akꞌalhtayanalh. Junich:
\p ―Vasalh ji quiꞌucxtin. Para mas yuꞌunch ju scꞌuyun ju tavilanalh ixtankꞌapuꞌ mixa talacsacꞌui ju xataquicpuchin ju talacamacajun ju askꞌatꞌan.
\p
\v 29 Pus ju acsnich ju Jesús junich:
\p ―Slivasalh na kꞌox xaquinkꞌalhtꞌaꞌi. Pus apꞌinchꞌokꞌochitꞌich ju laminchakaꞌ. Ju lhacaticuru taxtuta laꞌixlacatuna ju mintsiꞌ.
\p
\v 30 Pus ju chakoꞌulh alh. Chai acsni chaꞌalh laꞌixchakaꞌ pus laktsꞌilh ju istsiꞌ ni ixtaxtutach ju lhacaticuru laꞌixlacatuna chai va ixmalhch laꞌixputaman.
\s1 Ju Jesús palai navi pumatam ju jantu lai kꞌox ixchivinin chai kꞌatapa
\p
\v 31 Ju Jesús taxtuchokocha junta ixvi vanin ju lakꞌachakꞌan Tiro. Pumilh ju lakꞌachakꞌan Sidón chai ju lacatꞌun junta ixꞌalin lakacau lakꞌachakꞌanixni. Chaꞌalh tus ju xaꞌatantsꞌin Galilea.
\v 32 Pus lhiminicalh ju Jesús pumatam lapanac ju kꞌatapa ixjunita chai ju jantu lai kꞌox ixchivinin. Chai ju lapanacni tatapaininilh ju Jesús ni camamanilh ixmacaꞌ laꞌixlacatuna ju anuꞌ takꞌankꞌan ni palaich cajunaꞌ.
\v 33 Pus ju Jesús malakxtinu ju takꞌankꞌan. Lhiꞌalh alacatam. Chai manunilh ixmacaꞌ laꞌixꞌakꞌaxkꞌolh. Quicchujva. Tsamalh ju isimakꞌat ju anuꞌ takꞌankꞌan.
\v 34 Chai ju Jesús talakstꞌalh ju lactꞌiyan. Amakꞌaninilh. Chai junilh ju takꞌankꞌan:
\p ―Epata.
\p Ju chunch va nomputun: Akꞌasmatꞌich.
\v 35 Pus lana laich akꞌasmatnalh. Chai na kꞌoxich ixchivinin.
\v 36 Pus ju Jesús alaclhimapꞌaksilh ju lapanacni ni jantu xamatiꞌ catamacꞌatsani tuchi ixnavita. Para mas va ta pakchux ixꞌajuni ju lapanacni va xaꞌapalaich ixtanajun tuchi ixnavich.
\v 37 Slivasalh ixtalhamakꞌaninin. Ixtanajun:
\p ―Tachi chun si kꞌox ju navikꞌojui. Ju kꞌatapa lai lakꞌoxini ixꞌakꞌaxkꞌolh. Chai laich makꞌasmatꞌai. Chai ju jantu lai tachivinin lai machivini kꞌox.
\c 8
\s1 Ju Jesús amava lakatꞌatꞌi milh jokꞌatni
\p
\v 1 Ju acsnich na lhu ixtatakꞌaixtokta ju lapanacni. Chai matiꞌ ixjunita tuchi cataꞌulh. Pus ju Jesús alactꞌasanilh ju ixꞌalacmamakaꞌui chai alacjuni:
\p
\v 2 ―Painiꞌitnich ju ani tayanalh lapanacni ni lakatꞌutu avilhchan xaquintatꞌatolan chai ju chavai matiꞌ tuchi cataꞌulh.
\v 3 Ni aclacmalakachachokolh laꞌixlacchakaꞌan nin tucaꞌ tavajin jantu xcai ni catataꞌaktalh ju lacati ixchavanꞌan. Ju aliꞌin na makat tamintacha.
\p
\v 4 Pus ju ixꞌalacmamakaꞌui takꞌalhtailh ju Jesús. Tajuni:
\p ―Para tas anchach ju lai camalhilaniyau tachi tantsꞌun ju lapanacni ju ani junta jantu xamatiꞌ tꞌajun.
\p
\v 5 Chai ju Jesús asacmipa:
\p ―Tas akxchux vati ju chꞌapꞌatꞌatꞌit.
\p Chai ju yuꞌunch tajunilh ni akxtujun.
\v 6 Pus ju Jesús alacjuni ju ixtalhavat lapanacni ni catatavi lacaꞌatsꞌinan. Chai ju yuchi chꞌapalh ju akxtujun vati. Pꞌulhnan xtaknilh lhakꞌailaktsꞌinti ju Dios chai astan chꞌekꞌelh ju vati. Xtaknilh ju ixꞌalacmamakaꞌui. Chai ju yuꞌunch taꞌalhilaktsakꞌo ju ixtalhavat.
\v 7 Vachuꞌ ixtachꞌapata lacatsꞌunin pamata. Pus ju Jesús xtaknilh lhakꞌailaktsꞌinti ju Dios chai ajunich ju ixꞌamamakaꞌui ni cataꞌaxtaknilh vachuꞌ ju ixtalhavat lapanacni.
\v 8 Pus taxtaknilh. Taꞌulh chai talhilalhch. Chai astan ju ixꞌamamakaꞌui ju Jesús tasacchokolh ju tamaxajnicha. Talaktsama lakatujun tankꞌalin.
\v 9 Pus ju lapanacni ju tavailh ixchaꞌanta lakatꞌatꞌi milh jokꞌatni. Pus ju Jesús alacmacꞌami.
\v 10 Chai lana alactꞌatajuchokolh lacabarco ju ixꞌalacmamakaꞌui. Taꞌalh ju xalacatꞌun Dalmanuta.
\s1 Ju fariseonin tatapaini ju Jesús ni canavi lakatam lhamakꞌan
\p
\v 11 Pus ju acsnich talakmilh ju Jesús ju fariseonin. Tatsuculh tꞌalakꞌainin ju yuchi. Pꞌas istasqꞌuini ni canavilh ju tuꞌuꞌ ju catapucꞌatsayaꞌ ni vasalh yuchi ju ixnoncan camalakachatachilh ju Dios. Para va ixtalaktsꞌintanuputun.
\v 12 Pus ju Jesús amakꞌaninilh chai alacjuni:
\p ―Ju uxijnan ju chavai tꞌonatꞌit tajuch ni va quilamakpuxcoyau tuchi laich icnavi ni nonatꞌit ni chunch laich apꞌucꞌatsꞌayaꞌitꞌit ni vasalh icCristo. Slivasalh ju iclajunau. Jantu tuꞌuꞌ amasunicꞌanaꞌitꞌit ju uxijnan ju chavai tꞌonatꞌit.
\p
\v 13 Chai ju acsnich ju Jesús lana alacmacoyaulh ju fariseonin. Tajuchokolh lacabarco. Anchokolh makꞌantacutni ju atantsꞌin.
\s1 Ixlevaduraꞌan ju fariseonin
\p
\v 14 Pus ju ixꞌamamakaꞌui ju Jesús ixtacaptach ixlhiꞌanca ju tuꞌuꞌ xkapavati. Lacanix va lakatam xkapavati ixlhiꞌanta pumatam lacabarco.
\v 15 Pus ju Jesús alacjuni:
\p ―Alaccꞌatsꞌanantꞌit ixlacata ixlevaduraꞌan ju fariseonin chai ju ixlevadura ju Herodes.
\p
\v 16 Chai ju ixꞌalacmamakaꞌui ju Jesús talaclajunich sia yuꞌunch:
\p ―Ni jantu iclhimintau tuꞌuꞌ xkapavati ca yuchi quintalhijunan chunch.
\p
\v 17 Pus ju Jesús lana cꞌatsa tuchi ixtalaclajuni sia yuꞌunch. Chai alacjuni:
\p ―Tajuch ni va lhamakꞌanininatꞌit ni jantu lhitꞌantꞌatꞌit tuꞌuꞌ xkapavati. Ja va jantucaꞌ machꞌakxayatꞌit ju uxijnan tuchi ju nomputun ju lhamakꞌan ju icnavita. Ja lana na va oktanpꞌas untꞌatꞌit.
\v 18 Alinch ju milakchulhꞌan. Ja va jantu laktsꞌinatꞌit tuꞌuꞌ. Alin ju miꞌakꞌaxkꞌolhꞌan. Ja jantu lai pꞌakꞌasmatnanatꞌit. Ja jantu lai pꞌastꞌacꞌatꞌit tuꞌuꞌ.
\v 19 Ja lana jantu pꞌastꞌacꞌatꞌit acsni tavanan icchꞌekꞌelh akxquis vati chai talhilakꞌo lakaquis milh jokꞌatni. Apꞌastꞌactꞌit. Tas lakachux tankꞌalin ju xalaktsꞌamayatꞌit ju xasacchꞌokꞌoyatꞌit ju vati.
\p Pus ju yuꞌunch tajunilh ni lakacautꞌui.
\v 20 Chai aktam ajunichokopa ju Jesús:
\p ―Chai acsni icchꞌekꞌelh ju akxtujun vati chai tavailh lakatꞌatꞌi milh lapanacni tas lakachux tankꞌalin ju xalaktsꞌamayatꞌit ju xasacchꞌokꞌoyatꞌit ju xajcha.
\p Chai takꞌalhtayanalh ni lakatujun.
\v 21 Chai ju Jesús alacjunich ju chavai:
\p ―Ja ixlaquilhtu jantu lai machꞌakxayatꞌit.
\s1 Ju Jesús palai navi pumatam alakꞌachꞌix
\p
\v 22 Ju astan ju Jesús chai ixꞌamamakaꞌui tamilh ju lakꞌachakꞌan Betsaida. Chai ju lapanacni talhiminilh ju yuchi pumatam alakꞌachꞌix. Chai tatapaininilh ni calaktsꞌilh.
\v 23 Pus ju Jesús lana makchꞌapalh ju anuꞌ alakꞌachꞌix. Maxtulh ju takꞌankꞌan. Lhiꞌalh tus lacamacni. Chai lakpuchujva laꞌixlakchulh. Chai mokslanilh ixmacaꞌ laꞌixꞌucxni ixlakchulh chai sacmi:
\p ―Ja laich alacꞌavanan lacatsꞌunin.
\p
\v 24 Chai ju anuꞌ alakꞌachꞌix ixjunita ni alacꞌavanalh naulh:
\p ―Pus ju lapanacni icꞌalaktsꞌin ni taꞌalhtanan. Para jantu kꞌox icꞌalaktsꞌin. Tachi ju va qꞌuiu icꞌalaktsꞌin.
\p
\v 25 Pus ju Jesús lana mokslanichokolh ixmacaꞌ laꞌixꞌucxni ixlakchulh ju anuꞌ alakꞌachꞌix chai ju yuchi alacꞌavananchokolh. Pus takꞌoxinikꞌo ixlakchulh. Kꞌox alacꞌavanalh.
\v 26 Pus ju acsnich ju Jesús malakachachokolh laꞌixchakaꞌ ju va lacamacni ixyacha. Chai juni:
\p ―Tun tꞌitꞌanutꞌicaꞌ ju lakꞌachakꞌan. Chai tun tꞌiꞌaꞌun tuꞌuꞌ ju amachakꞌan anch.
\s1 Ju Pitaluꞌ naulh ni yuchi ju Cristo ju Jesús
\p
\v 27 Astan ju Jesús alactꞌataxtulh ju ixꞌalacmamakaꞌui. Va ixtaꞌamputun ju lakꞌachakꞌanixni ju ixtalhilacaꞌanita ju lakꞌachakꞌan Cesarea Filipo. Chai ju lacati ju Jesús asacmilh ju ixꞌalacmamakaꞌui. Alacjuni:
\p ―Tis chavaich ju quintalhiulai ju quitꞌin ju lapanacni.
\p
\v 28 Pus ju yuꞌunch takꞌalhtayanalh. Tajuni:
\p ―Pus ju aliꞌin lapanacni tanajun ni ma uxintꞌich ju Xivanꞌat ju ixꞌamakpaxanan. Ju aliꞌin tanajun ni ma Elíasꞌat. Ju aliꞌin tanajun ni ma uxintꞌich pumatam makꞌaniya lapanac ju ixnajun ixchivinti Dios.
\p
\v 29 Pus ju acsnich ju Jesús alacsacmipa ju yuꞌunch. Ajuni:
\p ―Para ju uxijnan tis chavaich ju quilalhiulayau ju quitꞌin.
\p Chai akꞌalhtayanalh ju Pitaluꞌ. Juni:
\p ―Uxintꞌi ju Cristoꞌat ju ixnoncan camalakachatachilh ju Dios.
\p
\v 30 Pus ju Jesús lana alaclhimapꞌaksi ni jantu xamatiꞌ catamacꞌatsani tichi chavaich ju yuchi.
\s1 Ju Jesús alacjuni ju ixꞌamamakaꞌui ni camaknicanaꞌ
\p
\v 31 Ju acsnich ju Jesús tsuculh alacmalaniniꞌ ju ixꞌalacmamakaꞌui. Ajuni:
\p ―Aktsꞌiya tasqꞌuini ni na lhu acmakꞌalhkꞌajnanaꞌ ju quitꞌin ju quimalakachatachilh Dios ni lapanac actsucuyaꞌ ju ani. Chai ju xalackꞌajin lapanacni chai ju xalackꞌajin palijni chai ju na talhatalanininta ju milhamapꞌaksinꞌan jantu tuꞌuꞌ aquintalhiulayaꞌ. Chai aquintamakniyaꞌ. Para actaꞌacxtuchokoyaꞌ junta acmacnucanaꞌ ixlhilakatꞌutu avilhchan.
\p
\v 32 Ju Jesús lana vas ajuni ju ani chivinti. Chai ju acsnich ju Pitaluꞌ lhiꞌalh alacatam ju Jesús chai tsuculh amapꞌaksiniꞌ.
\v 33 Para ju Jesús talakaspꞌitlh. Alaktsꞌilh ju aliꞌin ixꞌalacmamakaꞌui. Chai kꞌailh ju Pitaluꞌ. Junich:
\p ―Akꞌostꞌi ju laquiꞌucxlacapuꞌ ji Satanás. Ju uxintꞌi jantu alacpꞌastꞌacnan tachi ju alacpastacnan ju Dios. Ju uxintꞌi va alacpꞌastꞌacnan tachi ju taꞌalacpastacnan ju lapanacni.
\p
\v 34 Ju acsnich ju Jesús alactꞌasanikꞌo ju ixꞌalacmamakaꞌui chai chux ju lapanacni. Alacjuni:
\p ―Va tichi chavaich ju aquinchꞌakꞌokꞌaputulh ju quitꞌin pus jantu lai catinavi ixkꞌachat isꞌakstu. Chai cachꞌixaꞌ ju ixmakꞌalhkꞌajnat ju caꞌalinaꞌ va ixlacaꞌatalh ni quinchꞌakꞌokꞌai ju quitꞌin. Chai aquinchꞌakꞌokꞌakꞌalhi.
\v 35 Pus va tichi chavaich ju najun ni jantu quinchꞌakꞌokꞌaputun va ixlacaꞌatalh ni va lai maknicalh pus camakꞌatsꞌankꞌayaꞌ ju isꞌatsucunti ju caꞌixꞌalilh ju lactꞌiyan. Para va tichi chavaich ju camakꞌatsꞌankꞌayaꞌ ju isꞌatsucunti va ixlacaꞌatalh ni quinchꞌakꞌokꞌai ju quitꞌin chai va ixlacata ni lacaꞌita ju chivinti ju najun ta yu lai takꞌalhtaxtucan pus caꞌalinaꞌ isꞌatsucunti ju lactꞌiyan.
\v 36 Pus jantu tuꞌuꞌ lhajai tam lapanac mas calhajakꞌo chux ju xataxtokni ju alin ju ani lacamunutpaꞌ ni va calhimakꞌatsꞌankꞌa ju isꞌatsucunti ju caꞌixꞌalilh ju lactꞌiyan.
\v 37 Chai ni va chunch ju calalh pus jantu laich catiꞌalh ju anch mas camapalalh lacatumin.
\v 38 Ju lapanacni ju tatꞌajun ju chavai na tamacajunta ju Dios chai na taꞌalactuꞌunun. Pus ni xamatiꞌ aquintꞌamaxanalh chai catꞌamaxanalh ju quinchivinti laꞌixꞌucxlacapuꞌan ju yuꞌunch pus vachuꞌ actꞌamaxananaꞌ ju yuchi acsni acminchokoyaꞌ laꞌixtachaput ju quimpai acsni acꞌalactꞌaminaꞌ ju ixꞌanquilhnin.
\c 9
\p
\v 1 Vachuꞌ ajunilh ju lapanacni ju Jesús:
\p ―Slivasalh ju iclajunau. Alin ju lamilhiꞌuxijnan ju ani vilatꞌit ju jantu cataniyaꞌ tus acsni catalaktsꞌinaꞌ ta yu tasui acsni vi ju Dios laꞌixpuꞌucxtin. Chai catasuyaꞌ ni vasalh na tachapun ju yuchi.
\s1 Ju Jesús tamch atalacasunilh ju ixlapanacni
\p
\v 2 Pus ju ixlhilakachaxan avilhchan astan ju Jesús alactꞌasanilh ju Pitaluꞌ chai ju Jacobo chai ju Xivan. Alhiꞌalh va isꞌakstuꞌan ju lactalhpa junta na putankꞌai ixjunita. Chai ju Jesús na tamch ju atalacasunilh ju yuꞌunch.
\v 3 Ju ixpumpuꞌ ju Jesús lana va lamnicꞌa va. Lana na xnapapa va tachi ju tuꞌuꞌ miqui. Pus tachi chun ju amakpanin ju ani lacatꞌun jantu lai xamatiꞌ chunch snakꞌankꞌa catinavi.
\v 4 Chai vachuꞌ talacasuch ju Elías chai ju Moisés ju makꞌanchich ixtatꞌajun. Va ixtatꞌachivinin ju Jesús.
\v 5 Pus ju acsnich ju Pitaluꞌ junilh ju Jesús:
\p ―Quiꞌamamakaꞌunuꞌ na kꞌoxich ni ani vilau. Acyoyau akꞌatꞌutu pacꞌatsꞌa. Akꞌatamch ju miꞌanuꞌ. Akꞌatam ixꞌanuꞌ ju Moisés. Chai ju akꞌatamch ixꞌanuꞌ ju Elías.
\p
\v 6 Pus ju Pitaluꞌ jantu iscꞌatsai tuchi ixnajun ni na ixtalhanan. Ixchuxꞌan na ixtatalhanan.
\v 7 Pus lana tamacatalh ju ataputsꞌi. Aꞌakxtakmakꞌo ju yuꞌunch. Chai takꞌasmatlh lakatam chivinti ju xaminacha lacaꞌataputsꞌi. Chai chani ixnajun:
\p ―Ju ani ya yuchi ju quintsꞌalh chai na icmapaini. Yuchach ju akꞌasmatnitꞌit.
\p
\v 8 Chai lana taꞌalacꞌavanalh para jantu xamatiꞌ talaktsꞌilh. Va yuchi ju Jesús.
\p
\v 9 Chai acsni ixtatꞌajun takꞌalhtajunin ju anuꞌ lactalhpa pus ju Jesús alaclhimapꞌaksi ju ixpumatꞌutuꞌan ixꞌamamakaꞌui. Ajuni:
\p ―Tun xamatiꞌ tꞌiꞌunitꞌit ju tuchꞌi xalaktsꞌinatꞌit. Va acsnich ju lai anonaꞌitꞌit acsni va actaꞌacxtuchokotachilh junta acmacnucanaꞌ ju quitꞌin ju quimalakachatachilh Dios ni lapanac actsucuyaꞌ ju ani.
\p
\v 10 Pus jantu xamatiꞌ tajunilh. Para ixtalasacmi sia yuꞌunch. Ixtanajun:
\p ―Tijuch nuꞌ ju nomputun ju yuchi ni va nompalai ni cataꞌacxtuchokoyaꞌ junta camacnucanaꞌ.
\p
\v 11 Pus ju acsnich tasacmilh ju Jesús. Tajunich:
\p ―Tajuch ni va tanajun ju na talhatalanininta ju quilhamapꞌaksinꞌan ni tasqꞌuini ni pꞌulhnan camilh ju Elías. Astan ju yuchi ju noncan camalakachatachilh ju Dios.
\p
\v 12 Chai ju Jesús akꞌalhtailh. Ajuni:
\p ―Slivasalh ni pꞌulhnan caminaꞌ ju Elías. Chai calakꞌoxikꞌoyaꞌ tachi chun ju taxtokni. Chai vachuꞌ laꞌixchivinti Dios ju tsꞌokcanta najun tuchi actapasayach ju quitꞌin ju quimalakachatachilh Dios ni lapanac actsucuyaꞌ ju ani. Ju anch najun ni na lhu acmakꞌalhkꞌajnanaꞌ chai jantu tuꞌuꞌ aclhiulacanaꞌ.
\v 13 Para iclajunau ni quilachilh ju Elías chai ju lapanacni tanavilh chux tachi ju talacasqꞌuilh. Chai ni chunch ju talalh pus uctaxtulh tachi ju lhitsꞌokcanta ju yuchi.
\s1 Ju Jesús cꞌuchꞌu pumatam tsꞌalh ju ixtanun ju lhacaticuru laꞌixlacatuna
\p
\v 14 Ju astan ju Jesús atꞌaminchokolh ju ixpumatꞌutuꞌan junta ixtayanalh ju aliꞌin ixꞌalacmamakaꞌui. Chai alaktsꞌilh ni na lhu lapanacni ixkꞌaixtokcan ixtalakachokoꞌan ju yuꞌunch. Chai ju lapanacni ju na ixtalhatalanininta ju ixlhamapꞌaksin ju istꞌaꞌisraelitanin ixtatꞌajun tꞌalakꞌainin ju ixꞌamamakaꞌui ju Jesús.
\v 15 Para ju lapanacni acsni talaktsꞌistuclh ju Jesús pus ixchuxꞌan lana na talhamakꞌaninilh. Taꞌatsꞌalaꞌalh pakxtoknin. Tamacꞌami.
\v 16 Chai ju Jesús asacmi:
\p ―Tijuch ju laꞌunatꞌit.
\p
\v 17 Pus akꞌalhtayanalh pumatam ju ixmakminta. Junich:
\p ―Amamakaꞌunuꞌ. Iclhiminin ju quintsꞌalh. Va tanun ju lhacaticuru laꞌixlacatuna chai ixlhiyuchi jantu lai chivinin.
\v 18 Chai vanta anchach ju chꞌapai ju lhacaticuru pus tin lhinek. Akpupuich. Va latantsꞌacai ju istatsalat. Pus va tꞌajun xixniꞌ. Chai icꞌatapaininilh ju miꞌamamakaꞌui ni cataxcoxtulh ju lhacaticuru laꞌixlacatuna para jantu lai tanavi.
\p
\v 19 Chai akꞌalhtayanalh ju Jesús. Alacjuni:
\p ―Tis va yuchach ji lapanacni ni lana jantu lai lacꞌaꞌiyatꞌit. Ja tasqꞌuini ni lana na makꞌan aclatꞌatolau tus acsni laich amachꞌakxayaꞌitꞌit. Ja tasqꞌuini ni lana na makꞌan aclachꞌixniu tus acsni alacꞌaꞌiyaꞌitꞌit. Aquilalhiminiuch ju anuꞌ tsꞌalh.
\p
\v 20 Pus lhiminicalh ju Jesús chai ju lhacaticuru acsni laktsꞌilh ju Jesús pus lana tin lhineklh ju anuꞌ tsꞌalh. Tin taꞌaktalh. Pꞌiliclh pꞌiliclh ucxuntama lacatꞌun. Akpuputamalhch.
\v 21 Pus ju acsnich ju Jesús sacmi ju ixpai ju anuꞌ takꞌankꞌan. Junich:
\p ―Ja makꞌanch xaꞌaktaji ju ixtakꞌankꞌat.
\p Chai ju xapai junilh ju Jesús:
\p ―Tus ixlhitalacatꞌicstꞌin.
\v 22 Chai ju lhacaticuru na paklhu ju macaꞌanta ju lacajipi chai lacxcan ni va makniputun. Pus ni laich navi tuꞌuꞌ ju uxintꞌi aquilaꞌaktaijuch. Aquilamapainiuch ju quijnan.
\p
\v 23 Chai ju Jesús junich:
\p ―Ni laich lhilacꞌapꞌin ju Dios pus sich lai canavinikꞌocanaꞌ ju lhilacaꞌan yuchi.
\p
\v 24 Pus ju acsnich ju ixpai ju tsꞌalh lana pꞌas chivinilh acsni chani ju junilh ju Jesús:
\p ―Iclhilacaꞌan ju Dios. Para ni quincꞌacxni lacatsꞌunin pus aqꞌuiꞌaktꞌaiꞌutꞌich.
\p
\v 25 Pus ju Jesús acsni alaktsꞌilh ju ixtalhavat lapanacni ni ixtalacꞌatsꞌalaminta pus kꞌailh ju lhacaticuru. Junich:
\p ―Ji lhacaticuru ju jantu lakꞌaꞌi ni cachivinilh nin cakꞌasmatlh ju ani ya tsꞌalh quitꞌin ju icjunan ni atꞌaxtꞌuch laꞌixlacatuna chai jantuch tavanan atꞌanuchꞌokꞌoyaꞌ.
\p
\v 26 Pus ju acsnich ju lhacaticuru tsꞌau tꞌasalh. Aktam tin lhineklh ju tsꞌalh. Chai lana taxtulh laꞌixlacatuna. Pus ju tsꞌalh lhtucu tama tachi ju va xaninch. Chai aktsꞌiya na lhu lapanacni ixtanajun ni va nitach.
\v 27 Para ju Jesús lana chꞌapanilh ixmacaꞌ ju tsꞌalh. Saꞌula. Chai ju yuchi taya.
\p
\v 28 Pus ju acsnich ju Jesús tanucha lacachakaꞌ. Chai ju ixꞌamamakaꞌui acsni va isꞌakstuꞌan ixtatꞌavilanalh ju Jesús tasacmilh:
\p ―Tajuch ni jantu lai xacxcoxtuyau ju lhacaticuru laꞌixlacatuna ju anuꞌ tsꞌalh.
\p
\v 29 Pus ju Jesús alacjuni:
\p ―Ju lhacaticurulhni tachi ju anuꞌ ixtanun laꞌixlacatuna ju anuꞌ tsꞌalh va acsnich ju catataxtuyaꞌ acsni atꞌapꞌaininiyaꞌitꞌit ju Dios ju ixlacata chai atꞌascꞌaꞌayaꞌitꞌit.
\s1 Ju Jesús aktam ajunchokopa ni camaknicanaꞌ
\p
\v 30 Ju Jesús chai ju ixꞌamamakaꞌui acsni tataxtucha ju anch taputapasalh ju xaꞌestado Galilea. Chai ju Jesús jantu ixlacasqꞌuin ni xamatiꞌ cacꞌatsa ni anch ixvi.
\v 31 Va isꞌakstu ixꞌatꞌatolhputun ju ixꞌalacmamakaꞌui ni ixꞌalacmalaniputun tuꞌuꞌ. Ixꞌalacjuni:
\p ―Ju quitꞌin acmakꞌaxtakcanach laꞌixmacaꞌan ju lapanacni chai aquintamakniyach. Quitꞌin ju quimalakachatachilh Dios ni lapanac actsucuyaꞌ ju ani. Para mas acniyach actaꞌacxtuchokoyaꞌ junta acmacnucanaꞌ ixlhilakatꞌutu avilhchan.
\p
\v 32 Para mas chunch ixꞌajuni ixlaquilhtu jantu lai ixtamachakxai ju yuꞌunch tuchi ixꞌajumputun. Chai na ixtatalhoni. Jantu istasacmiputun.
\s1 Ju Jesús najun tichi chavaich ju palai xakꞌai
\p
\v 33 Pus ju Jesús chai ju ixꞌalacmamakaꞌui tachaꞌalh ju lakꞌachakꞌan Capernaum. Chai acsni ixtavilanalh lacachakaꞌ pus ju Jesús alacsacmi ju ixꞌamamakaꞌui. Ajunich:
\p ―Tijuch ju ixlacqꞌuilhuntꞌonatꞌit ju uxijnan acsni xaminauch ju lacati.
\p
\v 34 Pus ju yuꞌunch va sek tatavi ni vasalh va ixtalaklakꞌaiminta ju lacati tichi chavaich ju palai xakꞌai.
\v 35 Pus ju Jesús tavi chai alactꞌasanilh ixpumacautꞌuiꞌan. Alacjuni:
\p ―Ni alin pumatam ju jumputun xakꞌai tasqꞌuini ni yuchi ju palai salacatꞌicstꞌi catalacasu tachi chun. Chai caꞌalacchꞌalhcatnanilh tachi chun ju aliꞌin.
\p
\v 36 Chai ju Jesús macchꞌapaxakꞌatailh pumatam askꞌatꞌa. Yaulh laꞌixlacaitat ju ixlacmamakaꞌui. Astan chꞌixlh ju askꞌatꞌa chai chani alacjunich ju yuꞌunch:
\p
\v 37 ―Ju caꞌamaklhtayananaꞌ tam quilapanac ju jantu tuꞌuꞌ lhitꞌakꞌayai tachi ju lai ju ani vi askꞌatꞌa pus tachi ju va jun quitꞌin ju quiꞌamaklhtayanan. Chai ju quiꞌamaklhtayanan ju quitꞌin pus jantu quiꞌakstu ju quiꞌamaklhtayanan. Para tachi ju va jun amaklhtayanan vachuꞌ ju Dios ju quimacaminta.
\s1 Ju jantu quintatꞌalasayan quijnanchꞌan
\p
\v 38 Ju acsnich ju Xivan chani junilh ju Jesús:
\p ―Quiꞌamamakaꞌunuꞌ iclaktsꞌiuch pumatam ju lamintapakaꞌut ixꞌalacxcoxtui ju lhacaticuru laꞌixlacatunaꞌan ju lapanacni. Para ickꞌajiuch ni jantu lhiquijnanꞌan.
\p
\v 39 Para ju Jesús junich:
\p ―Jantu ixkꞌaꞌitꞌit ni jantu quintꞌalaxcaiꞌan junita ju yuchi. Pus ju lai navi ju kꞌai lhamakꞌan laquintapakaꞌut pus quiꞌamigoch junita. Chai ju yuchi jantu lai astan macxcai aquilhichivinaꞌ.
\v 40 Ju jantu quintꞌalaxcaichꞌan pus quijnanchꞌan.
\v 41 Slivasalh ju iclajunau. Va tichi chavaich ju cataxtakniyan mas va tam vaso ju xcan va ixlacaꞌatalh ni quilapanacni untꞌatꞌit pus Dios ju camapalhniyaꞌ.
\s1 Jantu xcai ni alactuꞌununcan
\p Ju Jesús tailhiꞌalh ju ixchivinti chai chani naulh:
\p
\v 42 ―Va tichi chavaich ju camakꞌalhkꞌosuyaꞌ tam xamatiꞌ ju jantucaꞌ kꞌox quilhilacaꞌanta quitꞌin pus palai kꞌox caꞌixva ni caꞌixpixtuchꞌimucꞌacalh ju xvati chai caꞌixmacaꞌancalh lacaꞌalama acsni tucaꞌ ixmakꞌalhkꞌosui tam xamatiꞌ.
\v 43 Pus ni pꞌuꞌalactꞌuꞌununatꞌit ju mimacaꞌan pus jantu anavitꞌit. Alai alatꞌit tachi ju va chꞌakxpꞌuxcantach ju mimacaꞌan. Palai kꞌox cava ni atꞌanuyaꞌitꞌit ju lactꞌiyan mas va lakatamch ju mimacaꞌan. Palai jantu kꞌox cava ni apꞌacxantꞌit chux lakatꞌui ju mimacaꞌan para va apꞌumacꞌapꞌincꞌantꞌit ju lacajipi junta jantu tavanan mixta.
\v 44 Junta alin ju tsapu ju jantu tavanan ni chai junta alin ju jipi ju jantu tavanan mixa.
\v 45 Pus ni pꞌimpꞌutꞌunatꞌit junta akꞌalhkꞌosaꞌitꞌit pus jantu apꞌitꞌit ju anch. Alai alatꞌit tachi ju va chꞌakxpꞌuxcantach ju minchꞌajaꞌan. Pus palai kꞌox cava ni atꞌanuyaꞌitꞌit ju lactꞌiyan mas va lakatamch ju minchꞌajaꞌan. Palai jantu kꞌox cava ni apꞌacxantꞌit chux lakatꞌui ju minchꞌajaꞌan para va apꞌumacꞌapꞌincꞌantꞌit ju lacajipi junta jantu tavanan mixta.
\v 46 Junta alin ju tsapu ju jantu tavanan ni. Chai junta alin ju jipi ju jantu tavanan mixa.
\v 47 Chai ni yuchi ju laktsꞌimpꞌutꞌunatꞌit ju tamalactuꞌuniyan pus jantu alaktsꞌintꞌit. Alai alatꞌit tachi ju va maxtꞌutꞌatꞌit chai makꞌantꞌatꞌit ju milakchulhꞌan. Pus palai kꞌox cava ni atꞌanuyaꞌitꞌit junta lhinajun ju Dios. Palai jantu kꞌox ni apꞌacxantꞌit chux lakatꞌui ju milakchulhꞌan para va apꞌumacꞌapꞌincꞌantꞌit ju lacajipi junta jantu tavanan mixta.
\v 48 Junta alin ju tsapu ju jantu tavanan ni. Chai junta alin ju jipi ju jantu tavanan mixa.
\p
\v 49 Ju tuꞌuꞌ jipi lhcukꞌojui ju amacxtalh. Chai ni acmucꞌalh ju matsat lacatuꞌuꞌ lhivai pus jantu catitakꞌalhi. Pus vana va chun lamiꞌatsucuntiꞌan. Acsni makꞌalhkꞌajnanatꞌit pus palai macꞌonatꞌit ju amacxcai ju alin lamiꞌatsucuntiꞌan chai palai tꞌailhipꞌinatꞌit ju kꞌox ju aktsꞌiya naviyatꞌit.
\v 50 Na kꞌox ju matsat. Para ni jantu skꞌokꞌo cava pus jantu lhitapalai. Pus vana va chun ju uxijnan. Lhitapalai ju miꞌatsucuntiꞌan acsni vasalh tasui ni quilalhilaksiyau. Chai vachuꞌ iclajunau ni jantu atꞌalasatꞌit ju uxijnan.
\c 10
\s1 Ju Jesús alacjuni ju lapanacni ixlacata ju alamaconanta
\p
\v 1 Ju Jesús taxtulh ju lakꞌachakꞌan Capernaum. Milh ju xaꞌestado Judea lhimakꞌantacutni ju kꞌai xcan Jordán. Chai aktam takꞌaixtokchokopa ju lapanacni junta ixvi ju Jesús. Chai aktam alacmalani tachi ju aktsꞌiya ixlai.
\v 2 Chai tachincha ju aliꞌin fariseonin. Va ixtapuxconiputun ixtalakꞌalhin ju Jesús. Chai tajuni:
\p ―Ja lhijun ju lhamapꞌaksin ni camacaulh ju ixꞌamachakaꞌ ju tam jokꞌat.
\p
\v 3 Pus ju Jesús akꞌalhtayanalh. Alacjuni:
\p ―Tijuch ju naulh ju Moisés laꞌixlhamapꞌaksin.
\p
\v 4 Chai ju yuꞌunch taꞌakꞌalhtayanalh. Tajuni:
\p ―Pus ju Moisés ixlakꞌaꞌi ni actsꞌoklh lakatam alhiqui ju pulamacau chai acmacaulh.
\p
\v 5 Para ju Jesús alackꞌalhtailh. Alacjuni:
\p ―Va ixlacaꞌatalh ni na pꞌas ju miꞌalhunutꞌan yuchi xalhiꞌatsꞌoknun junima lhamapꞌaksin ju Moisés.
\v 6 Para acsni tavanan navitacha ju Dios ju lacamunutpaꞌ ju yuchi navilh pumatam tsꞌalh chai pumatam atsiꞌ.
\v 7 Pus ixlhiyuchi ju tam tsꞌalh camaconach ju ixpai chai ixnati chai catꞌatsucuyaꞌ ju ixꞌamachakaꞌ.
\v 8 Pus ju anuꞌ ixpumatꞌuiꞌan tachi ju va pumatam catajunaꞌ. Pus ju chunch jantuch vana pumatꞌui tajunita. Alai tachi va pumatam lapanac tajunita.
\v 9 Pus ju malakxtokta ju Dios jantu catitalhvaklh ju lapanacni.
\p
\v 10 Chai acsni tanuchokolh lacachakaꞌ ju Jesús pus ju ixꞌamamakaꞌui aktam tasacmichokopa ixlacata ju anuꞌ chivinti ju ixꞌajunita ju lapanacni.
\v 11 Pus ju Jesús alacjuni:
\p ―Va tichi chavaich ju camaconaꞌ ju ixꞌamachakaꞌ chai catꞌatsucuchokolh apumatam navi talakꞌalhin laꞌixmacni ixꞌamachakaꞌ ixjunita.
\v 12 Chai ju chakoꞌulh ni camacaulh ju ixpapa chai catꞌatsucuchokolh akꞌantam pus talakꞌalhin ju navi vachuꞌ.
\s1 Ju Jesús sqꞌuinlh kꞌox isꞌatsucuntiꞌan ju askꞌatꞌan
\p
\v 13 Ju acsnich alhichaꞌanicalh ju Jesús ju askꞌatꞌan ni caꞌamokslanilh ixmacaꞌ laꞌixlacatunaꞌan ju yuꞌunch chai catapaininilh ju Dios ni kꞌox catatsuculh. Para ju ixꞌalacmamakaꞌui taꞌalackꞌaima ju ixtalhichaꞌan ju isꞌaskꞌatꞌan.
\v 14 Para acsni laktsꞌilh ju Jesús tuchi ixtanavi ju ixꞌalacmamakaꞌui pus talhkꞌamalh. Alacjuni:
\p ―Amacꞌaꞌuntꞌit ju askꞌatꞌan. Chach quintalakmilh. Jantu asaspꞌitꞌit ni quintalhilaksich ju yuꞌunch. Chai va tichi chavaich ju aquilhilaksiyaꞌ tachi ju quintalhilaksi ju ani tayanalh askꞌatꞌan yuchi ju laich catanuyanta ju lactꞌiyan.
\v 15 Slivasalh ju iclajunau. Tachi chun ju lapanacni ju jantu quilhilaksi ju quitꞌin tachi ju tam askꞌatꞌa lhilaksi ju ixpai pus jantu tavanan lai catitanu junta lhinajun ju Dios.
\p
\v 16 Pus ju acsnich ju Jesús alacchꞌixlh ju askꞌatꞌan. Alacmucꞌanilh ixmacaꞌ laꞌixꞌucxni ixlacatunaꞌan chai sqꞌuinlh ju kꞌox isꞌatsucuntiꞌan.
\s1 Pumatam makꞌaliꞌ tꞌachivinilh ju Jesús
\p
\v 17 Ju Jesús taxtuchokopa ju anch. Chai acsni ixꞌamputun ju lacati pus atsꞌalamilh pumatam tsꞌalh chai taꞌaktsokotanilh ju yuchi. Chai sacmilh:
\p ―Amamakaꞌunuꞌ ju uxintꞌi na kꞌox lapanacꞌat. Tijuch ju acnaviyaꞌ ni caꞌalilh ju quiꞌatsucunti ju conkꞌalhiyanta ju lactꞌiyan.
\p
\v 18 Pus ju Jesús juni:
\p ―Ju uxintꞌi ni naꞌun ni va iclapanac pus tajuch ni va qꞌuiꞌunich ni ickꞌox. Jantu xamatiꞌ ju kꞌox. Va pumatam. Yuchi ju Dios.
\v 19 Ju uxintꞌi mispꞌaich junta chani najun lamilhamapꞌaksinꞌan: “Jantu atꞌatsꞌucꞌu ju jantu miꞌamachakaꞌ. Jantu amaknitꞌi xamatiꞌ. Jantu akꞌalhaun. Jantu anau taꞌaklhtamat chivinti ixlacata apumatam. Jantu aꞌokxchꞌokꞌotꞌaiꞌinitꞌi tuꞌuꞌ xamatiꞌ. Atꞌalhonin ju mimpai chai ju minatich”.
\p
\v 20 Pus ju anuꞌ tsꞌalh akꞌalhtayanalh. Junich ju Jesús:
\p ―Amamakaꞌunuꞌ. Chux ju ani icmuctaxtukꞌota tus quilhitalacatꞌicstꞌin.
\p
\v 21 Ju acsnich ju Jesús laktsꞌilh ju anuꞌ tsꞌalh chai na mapaini. Junich:
\p ―Tiꞌalin lakatam taxtokni ju tasqꞌuini ni anavitꞌi. Inchich. Astꞌachich tachi chun ju miꞌalinta chai axtꞌaknin ju tumin ju amakꞌaixtꞌokꞌaꞌ ju quilhpatinin. Ju chunch caꞌalinaꞌ ju mimakꞌalit ju lactꞌiyan. Chai astan aqꞌuinchꞌakꞌokꞌach. Chai achꞌixtꞌich ju makꞌalhkꞌajnat ju caꞌalinaꞌ va ixlacaꞌatalh ni aquilhilaksiyaꞌ ju quitꞌin.
\p
\v 22 Para ju anuꞌ tsꞌalh acsni kꞌasmatlh junima chivinti lana na amakꞌaninilh. Na amakꞌaniniꞌalh ni na makꞌaliꞌ ixjunita.
\p
\v 23 Ju acsnich ju Jesús alaktsꞌilh ju lapanacni ju ixtayanalh ixtalakachoko chai alacjuni ju ixꞌalacmamakaꞌui:
\p ―Na lhixcai ni lai catanu ju lactꞌiyan junta lhinajun ju Dios tam makꞌaliꞌ.
\p
\v 24 Pus ju ixꞌalacmamakaꞌui Jesús na talhamakꞌaninilh ju ixchivinti. Para ju Jesús alacjunchokopa:
\p ―Quintsꞌalan na lhixcai ni lai catatanu ju lactꞌiyan junta lhinajun ju Dios ju yuꞌunch ju na talhilaksi ju ixmakꞌalitꞌan.
\v 25 Ju tuꞌuꞌ camello jantu lai catitapasalh junta tilhucucu ju macscat. Pus vana va chun tam makꞌaliꞌ. Ju yuchi jantu lai catitanun ju lactꞌiyan junta lhinajun ju Dios.
\p
\v 26 Pus ju ixꞌamamakaꞌui acsni takꞌasmatlh ju ani chivinti va palai talhamakꞌaninilh. Chai talaclajuni sia yuꞌunch.
\p ―Pus tis chavaich ju lai camakꞌalhtaxtucanaꞌ.
\p
\v 27 Para ju Jesús alaktsꞌilh. Ajuni:
\p ―Ju va lapanac aktsꞌiya palai tuꞌuꞌ lhiulai ju ixmakꞌalit. Palai jantu ixtaxtokni Dios. Para ju Dios lai amapaxani ixꞌatalacpastꞌacꞌat tam lapanac. Pus tachi chun ju taxtokni si lai navikꞌojui ju Dios.
\p
\v 28 Ju acsnich ju Pitaluꞌ junich:
\p ―Ju quijnan icmaconkꞌotauch chux quintaxtokni quincꞌan chai iclachꞌakꞌokꞌatauch.
\p
\v 29 Chai ju Jesús akꞌalhtayanalh. Junich:
\p ―Slivasalh ju iclajunau. Va tichi chavaich ju calhimacaulh ju ixchakaꞌ u tam ixlakꞌau tsꞌalh u tam ixlakꞌau atsiꞌ u ixpai u ixnati u ixꞌamachakaꞌ u isꞌaskꞌatꞌan u ixlacatꞌun va ixlacaꞌatalh ni quinchꞌakꞌokꞌai ju quitꞌin chai va ixlacata ni laich caꞌajunilh ju lapanacni ta yu laich catatakꞌalhtaxtulh pus palai lhu caxtaknicanaꞌ.
\v 30 Ju chunch calalh pus caꞌalinaꞌ lhu chakaꞌ junta laich cachaꞌanaꞌ tachi ju va laꞌixchakaꞌ junita. Chai caꞌalinaꞌ lhu lapanacni ju tachi vasalh ixꞌalakꞌavin catajunaꞌ mas jantu. Chai caꞌalinaꞌ ju tachi vasalh ixlacnatiꞌan tajunita chai tachi ixlacꞌaskꞌatꞌan catajunaꞌ. Chai caꞌalinaꞌ lhu ju lacatꞌun junta lai camachꞌixtaknicanaꞌ ni laich cachꞌalhcatnanaꞌ tachi ju va ixꞌanuꞌ. Caꞌalinaꞌ tachi chun ju ani para vachuꞌ catamakꞌalhkꞌajnanaꞌ ni vachuꞌ caꞌaxcaicanaꞌ. Chai astan caꞌalinaꞌ isꞌatsucuntiꞌan ju conkꞌalhiyanta lactꞌiyan.
\v 31 Para ju lactꞌiyan caꞌalinaꞌ lapanacni ju makꞌanch xaquintalhilaksi. Para jantu lai actinaulh ni va ixlhiyuchi palai kꞌox caꞌalhilhiulacalh. Palai jantu ju aliꞌin. Chai cataꞌalinaꞌ lapanacni ju jantucaꞌ makꞌan xaquintalhilaksi. Para jantu lai actinaulh ni ixlhiyuchi palai jantu kꞌox caꞌalhilhiulacalh. Palai kꞌox caꞌalhiulacalh ju aliꞌin.
\s1 Aktam ju Jesús alacjuni ju ixlapanacni ni caniyaꞌ
\p
\v 32 Pus ju Jesús chai ju aliꞌin ixtaꞌalhtanaꞌanta laxati ju Jerusalén. Chai ju Jesús ixꞌapꞌulhnita ju aliꞌin. Chai ju ixꞌamamakaꞌui ni va ixtalhamakꞌaninin ju Jesús pus ixtatakꞌaixui. Chai na ixtatalhanan. Pus ju acsnich ju Jesús alactꞌasanilh ixpumacautꞌuiꞌan chai va isꞌakstuꞌan alactꞌaꞌalhtanalh ju lacati. Chai ju yuchi tsuculh ajuniniꞌ ju taxtokni ju catapasayaꞌ laꞌisꞌatsucunti ju yuchi.
\v 33 Alacjuni:
\p ―Alaktsꞌintꞌit. Ju chavai cachaꞌanau ju Jerusalén. Chai ju quitꞌin acmakꞌaxtakcanaꞌ laꞌixmacaꞌan ju xalackꞌajin palijni chai ju na talhatalanininta ju milhamapꞌaksinꞌan. Quitꞌin ju quimalakachatachilh Dios ni lapanac actsucuyaꞌ ju ani. Chai ju yuꞌunch aquintalhinonaꞌ ju quimaknica. Chai aquintamakꞌaxtꞌakꞌaꞌ laꞌixmacaꞌan ju jantu quintꞌaꞌisraelitaninꞌan.
\v 34 Chai ju yuꞌunch aquintalhitsꞌiꞌinaꞌ. Chai aquintakꞌainekmayaꞌ. Chai aquintaꞌacxpuchujvayaꞌ. Chai aquintamakniyaꞌ. Para ju ixlhilakatꞌutu avilhchan actaꞌacxtuchokoyaꞌ junta acmacnucanaꞌ.
\s1 Ju Jacobo chai ju Xivan tatapainini ju Jesús
\p
\v 35 Ju acsnich ju Jacobo chai ju Xivan istsꞌalan ju Zebedeo talakꞌalh ju Jesús chai tajunich:
\p ―Amamakaꞌunuꞌ iclacasqꞌuinau ni aquilanaviniu ju tuchi aclasqꞌuiniyau.
\p
\v 36 Chai ju Jesús alacjuni:
\p ―Tijuch ju lacꞌasqꞌuinatꞌit ju aclanaviniu.
\p
\v 37 Chai ju yuꞌunch tajunich:
\p ―Va iclacasqꞌuinau ni alakꞌaꞌiyaꞌ ju uxintꞌi ni anch actolauch ju pumatam lamilhicana chai ju pumatam lamilhimacx acsni xakꞌai aꞌunaꞌ.
\p
\v 38 Pus ju acsnich ju Jesús alacjuni:
\p ―Ju uxijnan jantu cꞌatsꞌayatꞌit tuchꞌi sqꞌuinatꞌit. Ja lai amakꞌalhkꞌajnanaꞌitꞌit tachi ju acmakꞌalhkꞌajnanaꞌ ju quitꞌin.
\p
\v 39 Ju yuꞌunch taꞌakꞌalhtayanalh. Tajunich ni calayach. Chai ju Jesús alacjuni:
\p ―Slivasalh chunch ju amakꞌalhkꞌajnanaꞌitꞌit tachi ju acmakꞌalhkꞌajnanaꞌ ju quitꞌin.
\v 40 Para jantu quitꞌin ju acnonaꞌ tichi chavaich ju catolaꞌ laquilhicana chai laquilhimacx. Yuꞌunch ju catatolach anch ju asacxtuta.
\p
\v 41 Pus ju ixpumacauꞌan ixꞌamamakaꞌui ju Jesús acsni takꞌasmatlh tuchi ixtanajunta ju Jacobo chai ju Xivan na talhitalhkꞌamalh.
\v 42 Para ju Jesús alactꞌasanilh ixchuxꞌan chai alacjunich:
\p ―Ju uxijnan cꞌatsꞌayatꞌit ni slivasalh na pꞌas talhinajun ju xaꞌucxtin lakatam kꞌai lacatꞌun. Chai na alhimacchapui ju lapanacni ju salactꞌicstꞌi ucxtinin ju amalakachacan.
\v 43 Para jantu chun ju alatꞌit ju uxijnan. Alai va tichi chavaich ju lamilhiꞌuxijnan ju palai xakꞌai jumputun tasqꞌuini ni calhitalacasu tachi ju tam xalapanac.
\v 44 Chai va tichi chavaich ju milhiꞌuxijnan ju xakꞌai jumputun tasqꞌuini ni cacaplich ju chunch. Alai va cajunlh tachi ju va tam xalapanac.
\v 45 Chunch ju alatꞌit tachi ju iclai ju quitꞌin ju quimalakachatachilh ju Dios ni lapanac actsucuyaꞌ ju ani. Pus ju quitꞌin jantiyuꞌ iclhiminta ni va aquintachꞌalhcatnanilh ju lapanacni. Alai iclhiminta ni acꞌalacchꞌalhcatnaniyaꞌ ju lapanacni chai acxtꞌakꞌaꞌ ju quiꞌatsucunti va ixꞌamalakxtuca lhu ju lapanacni.
\s1 Ju Jesús malacꞌavani pumatam alakꞌachꞌix
\p
\v 46 Ju Jesús chai ju ixꞌamamakaꞌui chai lhu lapanacni tamilh ju lakꞌachakꞌan Jericó. Chai acsni tataxtuchokolh ju anch pus ixvi laꞌixquilhtuꞌ ti ju Bartimeo. Istsꞌalh ju Timeo. Ju yuchi va alakꞌachꞌix ixjunita chai ispusacꞌa ju tumin.
\v 47 Chai ju yuchi acsni kꞌasmatlh ni minta ju Jesús amachakaꞌ Nazaret pus tsuculh tꞌasaniniꞌ. Junich:
\p ―Jesús. Istsꞌalhꞌat ju kꞌai ucxtin David. Aqꞌuinavininch lamapainin.
\p
\v 48 Para na lhu lapanacni ju ixtatꞌaminta ju Jesús ju lacati ixtalakꞌakꞌaimai. Tajuni ni va sekch catavi. Para ju yuchi va apalai pꞌas ixchivinin. Ixnajun:
\p ―Ji istsꞌalh ju kꞌai ucxtin David aqꞌuinavinin lamapainin ju quitꞌin.
\p
\v 49 Pus ju acsnich ju Jesús lana taya. Lhinaulh istꞌasanica ju Bartimeo. Pus taꞌalh tꞌasaninin ju alakꞌachꞌix chai tajunich:
\p ―Akꞌachꞌach. Atꞌaich. Tꞌasaniyan ju yuchi.
\p
\v 50 Pus ju yuchi macoma ju ixcutun. Alhtujnutaya chai lakꞌalh ju Jesús.
\v 51 Chai ju Jesús junich:
\p ―Tijuch ju acnaviniyan.
\p Chai ju alakꞌachꞌix juni:
\p ―Amamakaꞌunuꞌ icꞌalacꞌavamputun.
\p
\v 52 Pus ju Jesús juni:
\p ―Pus laich apꞌinaꞌ. Ni xaqꞌuilhilacꞌapꞌinch pus laich alacꞌavananaꞌ.
\p Pus lana alacꞌavanalh ju anuꞌ alakꞌachꞌix ixjunita. Chai tꞌaꞌalh ju Jesús ju lacati.
\c 11
\s1 Ju Jesús tanucha ju lakꞌachakꞌan Jerusalén
\p
\v 1 Ju vanin ju lakꞌachakꞌan Jerusalén ixtaꞌalin lakatꞌui lactꞌicstꞌi lakꞌachakꞌanixni. Ju lakatam ixjuncan Betfagé chai ju lakatam ixjuncan Betania. Chai vanin ju anuꞌ lakꞌachakꞌanixni ixꞌalin ju akstijun junta ixchꞌancanta ju xaqꞌuiu ju olivos ixjuncan. Pus ju Jesús acsni alactꞌachaꞌalh ju anch ju ixtalhavat lapanacni pus amalakacha pumatꞌui ixꞌalacmamakaꞌui.
\v 2 Alacjunich:
\p ―Aꞌinchitꞌit ju anuꞌ tasui lakꞌachakꞌan. Chai acsni atꞌanutꞌachitꞌit alhitꞌaꞌuyaꞌitꞌit lakatam sastꞌi puru chꞌiyocanta. Tucaꞌ xamatiꞌ putocꞌai. Axkꞌotꞌayaꞌitꞌit. Alhitꞌanaꞌitꞌit.
\v 3 Chai ni xamatiꞌ catajunan: “Tajuch ni va chun ju lapꞌalatꞌit”, pus va aꞌunaꞌitꞌit ni ma maktasqꞌuini ju miꞌucxtinꞌan chai ma vatsꞌalhti camalakachachokotachilh.
\p
\v 4 Pus taꞌalh. Chai talhitajucha ju puru junta ixchꞌiyocanta lacati vanin lacamalhtich. Chai taxkꞌotailh.
\v 5 Pus ju ixtayanalh anch tajuni:
\p ―Tijuch ju naviyatꞌit ni va xkꞌotꞌayatꞌit ju puru.
\p
\v 6 Chai ju ixꞌamalakachan ju Jesús tajunilh tachi ixꞌajuncanta. Chai ju acsnich yau ajunicalh ni catalhiꞌalh ju puru.
\v 7 Chai talhimilh ju puru junta ixvi ju Jesús. Taꞌakxchꞌamucꞌalh ixcutunꞌan chai ju Jesús putocꞌalh.
\v 8 Pus na lhu lapanacni ixtamamalhiꞌanta ixcutunꞌan ju lacati junta capuminaꞌ ju Jesús. Ju aliꞌin ixtachakxꞌi ju ixꞌacatan qꞌuiu chai ixtamamalhiꞌanta ju lacati.
\p
\v 9 Chai ju ixtaꞌapꞌulanan chai ju ixtakꞌaixunun ixtalactꞌasaꞌanta ju lacati. Ixtanajun:
\p ―Chach lakꞌayacalh ju ani minta. Paxcat ju ani ju minta ju malakachatachilh ju Dios.
\v 10 Na kꞌox cajunaꞌ ju ixpuꞌucxtin ju caꞌalinaꞌ. Chunch ju cajunaꞌ tachi ixjunita ixpuꞌucxtin ju makꞌaniya quimpaiꞌan David. Chach lakꞌayacalh ju Dios.
\p
\v 11 Pus ju Jesús acsni tanu ju lakꞌachakꞌan Jerusalén alh ju lacakꞌai ixpujitatꞌan ju istꞌaꞌisraelitanin. Chai acsni islaktsꞌinkꞌotach tachi chun ju taxtokni ju anch pus alactꞌataxtuchokolh ju ixpumacautꞌuiꞌan. Chai ni na ixtokꞌoxatach pus alactꞌaꞌalh ju lakꞌachakꞌan Betania.
\s1 Ju Jesús kꞌailh akꞌatam xaqꞌuiu higo
\p
\v 12 Chai acsni tuncunchokopa pus ju Jesús chai ju ixꞌamamakaꞌui tataxtuchokocha ju Betania chai ju Jesús chavanilh.
\v 13 Chai acsni laktsꞌilh ju ixlhimakat akꞌatam xaqꞌuiu higo ju na xkꞌoyu ixlatach pus lakꞌalh. Tsꞌa ma laich calhitaju tuꞌuꞌ xalhiꞌut. Para acsni quilaktsꞌilh jantu tuꞌuꞌ lhitaju. Va si xaxkꞌoi. Va tsꞌalhti ixlakapꞌunta mas tucaꞌ ixchaꞌanta ju avilhchan acsni caꞌalilh ju xatocꞌat.
\v 14 Pus ju acsnich ju Jesús junilh ju anuꞌ xaqꞌuiu higo:
\p ―Jantu tavanan catiꞌalinchokolh ju miꞌatocꞌat ju lai cataꞌulh ju lapanacni.
\p Pus takꞌasmatlh ju ixꞌalacmamakaꞌui tuchi juni ju Jesús ju anuꞌ xaqꞌuiu higo.
\s1 Ju Jesús alacxcauxtulh ju astꞌanin lacpujitat
\p
\v 15 Astan ju Jesús chai ju ixꞌalacmamakaꞌui tamilh ju Jerusalén. Chai acsni tanulh ju Jesús ju lacakꞌai ixpujitatꞌan ju istꞌaꞌisraelitanin pus tsuculh alactixcoxtunuꞌ ju lapanacni ju ixtaꞌastꞌanan chai ju ixtaꞌatamonan ju anch. Alakmakspuspꞌitnikꞌo ju ixmixaꞌan ju ixmapaxanin tumin chai ixputolanꞌan ju istꞌanin lakꞌaxkꞌavan.
\v 16 Chai jantu xalacasqꞌuin ni xamatiꞌ cacꞌucꞌalhiꞌalh tuꞌuꞌ ju laꞌismakspaꞌ kꞌai ixpujitatꞌan ju istꞌaꞌisraelitanin ni tachi ju va lacati cataꞌulhtulh.
\v 17 Chai ixꞌalacmasuni ju lapanacni chai alacjuni:
\p ―Tsꞌokcanta laꞌixchivinti Dios junta najun ni ixchakaꞌ ma calhimispacanaꞌ ni anch ju lai catꞌachivinaꞌ ju Dios va tichi chavaich. Chunch ju tsꞌokcanta para ju uxijnan ni va lhimalacxtꞌutꞌatꞌit ju tuꞌuꞌ lhucucu talhpa junta tatankꞌanui ju akꞌalhonin.
\p
\v 18 Pus ju na ixtalhatalanininta ju ixlhamapꞌaksinꞌan ju istꞌaꞌisraelitanin chai ju xalackꞌajin palijni takꞌasmatlh ju tuchi ixnajunta ju Jesús. Chai ju acsnich tatsuculh puxconin ta yu laich catapumakniyaꞌ. Para va ixtatalhoni ju Jesús ni chux ju lapanacni na ixtalhamakꞌaninin ju ixꞌatalaninti.
\v 19 Para acsni tokꞌoxapa pus ju Jesús taxtuchokolh ju anch lakꞌachakꞌan.
\s1 Xixlh ju xaqꞌuiu higo
\p
\v 20 Chai acsni tuncunchokolh pus ju Jesús chai ixꞌalacmamakaꞌui taꞌalhtanampa ju lacati. Chai talaktsꞌilh ju xaqꞌuiu higo ni ixixtach tus laꞌistisivic.
\v 21 Ju acsnich ju Pitaluꞌ pastaclich tuchi ixtapasata chai junich ju Jesús:
\p ―Amamakaꞌunuꞌ alaktsꞌich ju xaqꞌuiu higo ju lakꞌakꞌaimatꞌi. Na xixtach ju chavai.
\p
\v 22 Chai ju Jesús akꞌalhtayanalh. Alacjuni:
\p ―Alhilaksitꞌit ju Dios.
\v 23 Slivasalh ju iclajunau. Va tichi chavaich ju cajunilh ju ani talhpa: “Akꞌostꞌich. Atꞌaꞌuchich ju lacaꞌalama”, pus canavinicanaꞌ. Para tasqꞌuini ni jantu va tam tam canonaꞌ laꞌixꞌalhunut. Alai calacaꞌiyaꞌ ni calhixajanta tuchi canonaꞌ.
\v 24 Yuchi iclalhijunau ni tachi chun ju asqꞌuinaꞌitꞌit acsni atꞌachꞌivininaꞌitꞌit ju Dios alacꞌaꞌitꞌit ni amaklhtꞌayananaꞌitꞌit chai axtꞌaknicꞌanaꞌitꞌit.
\v 25 Chai acsni atsꞌucꞌuyaꞌitꞌit tꞌachꞌivinin ju Dios amacꞌacxanin ni alin xamatiꞌ ju tꞌalakꞌaitan. Ju chunch ju mimpaiꞌan ju vilhcha lactꞌiyan catamacꞌacxaniyanch vachuꞌ ju uxijnan ju mintalakꞌalhinꞌan.
\v 26 Para ju uxijnan ni jantu amacꞌacxaniyaꞌitꞌit ju mintꞌalaxcaiꞌan pus nin yuchi ju mimpaiꞌan ju vilhcha lactꞌiyan jantu catitamacꞌacxanin ju mintalakꞌalhinꞌan.
\s1 Ixtachaput ju Jesús
\p
\v 27 Ju acsnich ju Jesús chai ju ixꞌamamakaꞌui taꞌanchokopa ju lakꞌachakꞌan Jerusalén. Chai ju Jesús ixꞌalhtanatꞌajun lacakꞌai ixpujitatꞌan ju istꞌaꞌisraelitanin. Pus talakmilh ju yuchi ju xalackꞌajin palijni chai ju papaninch chai ju na ixtalhatalaninintach ju ixlhamapꞌaksinꞌan ju istꞌaꞌisraelitanin.
\v 28 Tajunich:
\p ―Tis chavaich ju xajunan ni laich anaviyaꞌ ju ani taxtokni.
\p
\v 29 Pus ju Jesús alackꞌalhtailh. Alacjunich:
\p ―Vachuꞌ aclasacmiyau ju uxijnan lakatam chivinti. Ni aquilajuniuch pus vachuꞌ aclajunau tichi chavaich ju xaquijuni ni acnavi junima taxtokni.
\v 30 Pus tis chavaich ju xamalakachayachilh ju Xivan amakpaxanaꞌ. Ja yuchi ju Dios u yuꞌunch ju lapanacni. Aquilajuniuch.
\p
\v 31 Pus ju acsnich ju yuꞌunch talaclajunilh ixlhiꞌakstuꞌan:
\p ―Ni canaju ni Dios xamalakachayachilh pus ju yuchi laich aquintajunan tajuch ni jantu xalacaꞌiniyau.
\v 32 Chai vana jantu lai catinaju ni ixtꞌalapanac ju xamalakachayachilh amakpaxanaꞌ.
\p Chunch ixtalaclajuni ni na ixtatalhoni ju lapanacni. Ju lapanacni si ixtanonkꞌojui ni slivasalh ni ixnajun ixchivinti Dios ju Xivan.
\v 33 Pus taꞌakꞌalhtayanalh chai tajunilh ju Jesús:
\p ―Jantu iccꞌatsayau.
\p Pus ju acsnich ju Jesús alackꞌalhtailh. Alacjuni:
\p ―Nin quitꞌin jantu actilajuniu tichi chavaich ju xaquijuni ni acnaviyaꞌ junima taxtokni.
\c 12
\s1 Ju Jesús puꞌamalani ju lapanacni ju makchꞌalhcatni lapanacni
\p
\v 1 Ju acsnich ju Jesús tsuculh ajuniniꞌ ju lapanacni ju chivinti ju ixtꞌalaktsꞌipaxcavaich ju tuꞌuꞌ. Alacjuni:
\p ―Pumatam lapanac chakxchꞌanlh ju xaqꞌuiu uvas laꞌixlacatꞌun. Coralhnu lacakꞌex. Pokꞌajꞌula junta catamaxtuyaꞌ ju xaxcan uvas. Yaulh ju chakaꞌ ju na putankꞌai ni laich capulhistaccalh ju ixpuꞌuvas.
\p Chai acsni navikꞌo pus amachꞌixtaknilh ixpuꞌuvas ju lapanacni ju makchꞌalhcatnin. Chai ju amatꞌun alh makat.
\v 2 Chai acsni chaꞌalh ju avilhchan ni chalh ju uvas pus ju amatꞌun malakachanilh pumatam ixlapanac ju anuꞌ makchꞌalhcatnin ni caꞌalh amaklhtayanaꞌ ju xalhiꞌut tachi ju ixꞌalhitꞌatakꞌoxitach.
\v 3 Para ju anuch makchꞌalhcatnin tachꞌapalh ju ixlapanac ju amatꞌun. Talakꞌanekma. Talhixcavatsꞌala chai va chunch tamalakachachokolh.
\v 4 Pus ju amatꞌun amalakachanichokolh apumatam ixlapanac. Para ju anuꞌ lapanacni va talacatꞌalhma. Tamacꞌatsani laꞌisꞌaktsulh. Chai tanavi tachi ju jantu chun.
\v 5 Pus ju amatꞌun aktam amalakachanichokolh apumatam. Chai ju yuchi tamakni. Ju astan na lhu amalakachanicalh. Ju aliꞌ tamacꞌatsani. Ju aliꞌ talamakni.
\p
\v 6 Pus ixtiꞌalin pumatam ju ixtꞌavi ju anuꞌ amatꞌun. Yuchi ju istsꞌalh ju na ixmapaini. Pus malakacha ju yuchi vachuꞌ ju saꞌastan. Ixnajun: “Catatalhoniyaꞌ ju quintsꞌalh”.
\v 7 Para ju anuch makchꞌalhcatnin talaclajunich sia yuꞌunch: “Yuchi ju ani ju amanavin cajunaꞌ acsni caniyaꞌ ju ixpai. Asokꞌotꞌitch. Camakniuch. Ju chunch ju ani lacatꞌun ju xtakniputuncan ju yuchi quiꞌanuchꞌan cajunaꞌ”.
\v 8 Pus lana tachꞌapalh. Tamaknilh. Chai tatantamacxtunilh ixlacatuna lacapuꞌuvas.
\p
\v 9 Pus tas canaviyach ju chavai ju amanavin puꞌuvas. Pus caminach isꞌakstu ju yuchi chai camaknikꞌoyaꞌ ju ixchuxꞌan ju ixtachꞌalhcatnan ju anch. Chai aliꞌin ju caꞌamachꞌixtakniyaꞌ ju ixpuꞌuvas.
\p
\v 10 Ja va jantu tavanan laktsꞌintꞌatꞌit ixchivinti Dios ju tsꞌokcanta junta ma chani najun:
\q1 Ju chiux ju tasacmackꞌalh ju ixyonin chakaꞌ yuchach ju valhch ju chiux ju makꞌastumucꞌacanta chakaꞌ junta tsꞌokcanta tuchi cꞌata ju yocanta.
\q1
\v 11 Yuchi ju Dios ju navilh ju ani. Chai acsni iclaktsꞌinau pus na kꞌai lhamakꞌan iclhiulayau.
\p
\v 12 Pus ju acsnich ju ixtatꞌajun kꞌasmatnin ju ixchivinti ju Jesús na ixtachꞌapaputun ni ixtamachakxai ni yuꞌunch ju ixꞌalhichivinin ju Jesús acsni xanajun ju anuꞌ chivinti ixlacata ju puꞌuvas. Para aktsꞌiya va ixtatalhoni ju ixtalhavat lapanacni. Pus tamacaulh. Taꞌalh.
\s1 Ju Jesús sacmican ni lhijun ni cataꞌamapalanalh u jantu
\p
\v 13 Ju astan amalakachacalh ju aliꞌin fariseonin chai ju aliꞌin ju ixtachꞌakꞌokꞌai ju gobernador Herodes. Pus ju yuꞌunch talakmilh ju Jesús para va ixtapuxcolakxtuniputun ju tuꞌuꞌ chivinti ju laich catalhimucꞌanilh ixtalakꞌalhin.
\v 14 Pus talakꞌalh chai tajunich:
\p ―Amamakaꞌunuꞌ iccꞌatsayau ni naꞌun ju stavasalanti ju uxintꞌi. Chai jantu xamatiꞌ ju tꞌalhoni ni vaklhtam chun ju alaktsꞌin ju lapanacni. Chai ju uxintꞌi aktsꞌiya sok masui ju ixti ju Dios. Pus ja lhijun ni acꞌamapalanau laꞌixmacni ju xaꞌucxtin ju romanonin u jantu.
\p
\v 15 Para ju Jesús ixmachakxani ni va ixtaꞌacxputꞌiyunun ju yuꞌunch chai alacjuni:
\p ―Tajuch ni va quilapuxconiputunau ju quintalakꞌalhin. Aquilalhiminiuch ju tumin ju lhiꞌamapꞌalananatꞌit ni aclaktsꞌinach.
\p
\v 16 Pus ju yuꞌunch talhiminilh ju tumin. Chai ju Jesús acsni laktsꞌilh alacjunich:
\p ―Tis ixꞌucxpuꞌ ju ani okslai. Tis ixtapakaꞌut ju tsꞌokcanta ju ani.
\p Pus ju yuꞌunch tajuni ni ixꞌanuꞌ ju César ixꞌucxtinꞌan ju romanonin.
\v 17 Chai alackꞌalhtailh ju Jesús. Alacjuni:
\p ―Pus axtꞌaknitꞌit ju César ju ixꞌanuch. Chai axtꞌaknitꞌit ju Dios ju ixꞌanuch.
\p Pus ju lapanacni acsni takꞌasmatlh tachi ju lhikꞌalhtayanalh ju Jesús na talhamakꞌaninilh ni na kꞌox xanajun.
\s1 Ju Jesús sacmican ta yu cajunaꞌ acsni catalokꞌonchokoyaꞌ ju lapanacni
\p
\v 18 Pus ju saduceonin ixtanajun ni jantu lai lokꞌonchokocan acsni va nicanch. Pus ju aliꞌin sia yuꞌunch talakmilh ju Jesús chai tajuni:
\p
\v 19 ―Amamakaꞌunuꞌ ju makꞌaniya ixlapanac Dios ju Moisés ixjuncan chani quintaꞌatsꞌoknunilh: “Ju tam lapanac ni canilh chai ma camacontilalh ixꞌamachakaꞌ para ma jantu tuꞌuꞌ catꞌamacontilalh isꞌaskꞌatꞌa pus ju ispꞌisekꞌe ma calhitsucuchokolh ju ixꞌamachakach ixjunita ju xani ni laich caꞌalilh ju istsꞌalh. Chai ju anuꞌ tsꞌalh ma casacnilh ju ixtapakaꞌut ju lijunto ixlakꞌau”.
\v 20 Pus ixꞌalin pumatujun lhiꞌalakꞌavin. Chai ju xakꞌai tamakꞌaxtoklh. Chai acsni nilh jantu tuꞌuꞌ macontilalh ju isꞌaskꞌatꞌa.
\v 21 Pus ju ixlhipumatꞌuich lhiꞌalakꞌavin tꞌatsucuchokolh ju ixꞌamachakach ixjunita ju lijunto ixlakꞌau. Chai astan nipa ju yuchi sin tuꞌuꞌ camacontilalh ju isꞌaskꞌatꞌa. Chai ju ixlhipumatꞌutu lhiꞌalakꞌavin vana va chun tapasapa.
\v 22 Pus ju anuꞌ chakoꞌulh tꞌatsucukꞌo ju ixpumatujunꞌan lhiꞌalakꞌavin chai pumatam pumatam tani. Para jantu xamatiꞌ macontilanilh isꞌaskꞌatꞌa. Chai acsni ixtanikꞌota ju yuꞌunch pus astan vachuꞌ nilh ju anuꞌ chakoꞌulh.
\v 23 Pus acsni cataꞌacxtuchokoyaꞌ ju tanita tis ixꞌamachakaꞌ cajunaꞌ ni ixpumatujunꞌan atꞌatsucukꞌo ju anuꞌ chakoꞌulh.
\p
\v 24 Pus ju acsnich ju Jesús akꞌalhtailh. Alacjuni:
\p ―Ju uxijnan jantu sok alacpꞌastꞌacnanatꞌit ni jantu machꞌakxayatꞌit ni na lacalhu ju tsꞌokcanta laꞌixchivinti Dios junta najun ni catalokꞌonchokoyaꞌ ju tanita. Vachuꞌ jantu mispꞌayatꞌit tuchi lai navi ju Dios.
\v 25 Pus acsni cataꞌacxtuchokoyaꞌ ju tanita jantu catamakꞌaxtokcanaꞌ nin calaꞌicalh. Va ixtꞌachunchach catatsucuyaꞌ tachi ju anquilhnin ju tavilanancha lactꞌiyan.
\v 26 Chai ni va asacmininatꞌit ni lai cataꞌacxtuchokoyaꞌ ju tanita u jantu pus ja lana jantu laktsꞌintꞌatꞌit junta tsꞌoklh ju Moisés junta najun ni laktsꞌilh ju achꞌitin ju ixmaktajita. Chai ni lakꞌalh pus ju Dios xakꞌala chai juni ni isDiosꞌan junita ju Abraham chai ju Isaac chai ju Jacob.
\v 27 Pus ju Dios ni isDios junita ju lapanacni ju tatꞌajun pus nomputun ni tatꞌajun ju anuch lapanacni mas noncan ni makꞌanch tanita. Pus ju uxijnan na lhu makꞌatsꞌankꞌayatꞌit ju miꞌatalacpastꞌacꞌatꞌan.
\s1 Ju lhamapꞌaksin ju palai tasqꞌuini ni canavicalh
\p
\v 28 Chai pumatam ju na ixlhatalanininta ju ixlhamapꞌaksinꞌan ju istꞌaꞌisraelitanin vachuꞌ lakmilh ju Jesús. Ju yuchi iskꞌasmatach tachi ju ixtajuni ju Jesús ju saduceonin. Chai ju yuchi machakxa ni na kꞌoxich ju xalhakꞌalhtayanan ju Jesús. Pus vachuꞌ sacmilh ju Jesús. Junich:
\p ―Tachi chun ju ixlhamapꞌaksin ju Moisés tasmalhch ju palai tasqꞌuini ni canavicalh.
\p
\v 29 Pus ju Jesús kꞌalhtailh. Junich:
\p ―Ju lhamapꞌaksin ju palai tasqꞌuini ni anavitꞌi yuchi ju ani: “Akꞌasmatꞌit ji israelitanin. Ju miꞌucxtinꞌan Dios va pumatam.
\v 30 Pus amapꞌainitꞌit ju miꞌucxtinꞌan Dios laꞌixlhichux miꞌalhunutꞌan chai laꞌixlhichux miꞌatsucuntiꞌan chai laꞌixlhichux mintacꞌatsanꞌan. Amapꞌainitꞌit istavasalanti”. Yuchach ju ani ju lhamapꞌaksin ju palai tasqꞌuini ni anavitꞌi.
\v 31 Chai ju ixlhilakatꞌui va ixtꞌachunch junita. Ju yuchi najun ni amapꞌainitꞌi ju vanin alactꞌavilhtꞌi tachi ju va jun miꞌakstu ju mapꞌainichꞌokꞌocꞌan. Matiꞌ alakatam lhamapꞌaksin ju va palai tasqꞌuini ni anavitꞌi.
\p
\v 32 Pus ju acsnich ju anuꞌ lapanac ju na ixlhatalanininta ju ixlhamapꞌaksinꞌan ju istꞌaꞌisraelitanin junilh ju Jesús:
\p ―Vasalh ji amamakaꞌunuꞌ. Stavasalanti tachi ju naꞌun ni va pumatam ju Dios. Matiꞌ akꞌantam.
\v 33 Chai vasalh tasqꞌuini ni acmapaini ju Dios laꞌixlhichux ju quiꞌalhunut chai laꞌixlhichux ju quintacꞌatsan chai laꞌixlhichux ju quiꞌatsucunti. Acmapaini istavasalanti. Chai tasqꞌuini ni acmapaini ju vanin quintꞌavi tachi ju va jun quiꞌakstu ju icmapainichokocan. Vasalh palai lhitapalai ni acnavi chux ju ani. Palai jantu ni va tuꞌuch acmakninilh ju Dios u ni acxavanilh ju Dios tuꞌuꞌ lhakꞌailaktsꞌinti.
\p
\v 34 Pus ju Jesús acsni kꞌasmatlh ni aktsꞌiya na kꞌox ju xalhikꞌalhtaji ju anuꞌ lapanac pus junich:
\p ―Ju uxintꞌi vasalh machꞌakxai tuchi lacasqꞌuin ju Dios. Ju chavai va yuchi ju cꞌacxniyan ni alakꞌaꞌitꞌi ni calhinonkꞌo ju Dios lamiꞌatsucunti.
\p Pus ju acsnich tachi chun ju lapanacni na ixtatalhoni ju Jesús. Jantu ixtaquilhasacmiputun tuꞌuꞌ aliꞌ.
\s1 Tis istsꞌalh ju Cristo
\p
\v 35 Ju Jesús ixꞌalacmasuni ju lapanacni ju lacakꞌai ixpujitatꞌan ju istꞌaꞌisraelitanin. Chai ajuni:
\p ―Ju na talhatalanininta ju milhamapꞌaksinꞌan tas laich talhinajun ni istsꞌalh David ju Cristo ju ixnoncan camalakachatachilh ju Dios.
\v 36 Tas laich tanajun ju chunch ni mapastꞌacꞌani ju Spiritu Santu ni chani canaulh ju David:
\q1 Ju ucxtin Dios junilh ju quiꞌucxtin:
\q1 “Vanin atꞌaꞌulh junta icvi tus acsni actꞌalalhajayaꞌ ju mintꞌalaxcai”.
\m
\v 37 Pus ni isꞌakstu ju naulh ju David ni ixꞌucxtin junita pus ju chunch va nomputun ni jantu va istsꞌalh junita.
\p Pus ixtalhavat lapanacni va lhikꞌach ixtakꞌasmatni ju ixchivinti ju Jesús.
\s1 Ju Jesús amucꞌanilh ixtalakꞌalhinꞌan ju xalackꞌajin
\p
\v 38 Chai ju Jesús chani alacjuni ju lapanacni acsni ixꞌamalaninin:
\p ―Jantu alacꞌaꞌinikꞌotꞌit tuchi tanajun ju yuꞌunch ju na talhatalanininta ju milhamapꞌaksinꞌan. Ju yuꞌunch na tapuꞌalhtanamputun lacalhman ixpumpuꞌan ni xalackꞌajinch tatalacasuputun. Chai na kꞌoxich talhiulai acsni tamacꞌami ju lapanacni ju laclhitamau junta chux catakꞌasmatꞌaꞌ.
\v 39 Chai na tatolhputun junta tatolai ju xalackꞌajin ju lacpujitat chai lacapuvai.
\v 40 Va tataiꞌini ixlacchakaꞌan ju chakolun ju va animacontilacanta. Chai ni va talacasuputun tachi ju na va soknicꞌa ju isꞌatsucuntiꞌan pus talapalai tachi ju na panicni ju tatꞌachivinin ju Dios. Pus ni chunch ju talai palai camamakꞌalhkꞌajnicanaꞌ ju yuꞌunch. Palai jantu ju aliꞌin lapanacni.
\s1 Pumatam chakoꞌulh lhikꞌailaktsꞌilh ju Dios ixtumin
\p
\v 41 Ju aktam ju Jesús ixvi laꞌixpujitatꞌan ju istꞌaꞌisraelitanin. Anch ixvi laꞌixꞌucxlacapuꞌ ju lacatꞌicstꞌi pꞌaklat junta ixtamujui ju tumin ju ixtalhakꞌailaktsꞌin ju Dios ju lapanacni. Pus ju yuchi ixꞌalaktsꞌin ju lapanacni acsni ixtamujui ju ixtuminꞌan ju lacapꞌaklat. Pus na lhu makꞌalinin na laklhu ixtamujui.
\v 42 Chai milh pumatam chakoꞌulh ju va ixnimacontilacanta. Na quilhpatiniꞌ ixjunita. Pus ju yuchi muju lakatꞌui lactꞌicstꞌi tumin ju lana jantu laklhu ixtapalh ixjunita.
\v 43 Pus ju acsnich ju Jesús alactꞌasanilh ju ixꞌamamakaꞌui chai alacjuni:
\p ―Slivasalh ju iclajunau. Na kꞌox xalhiulai ju Dios ju tuchi xamujui ju ani ya chakoꞌulh ju va nimacontilacanta chai ju na quilhpatiniꞌ. Palai jantu chun ju aliꞌin ju tamujui ju ixtuminꞌan ju lacapꞌaklat.
\v 44 Ju yuꞌunch va tamujui ju va xatanxajni ixtuminꞌan. Para ju ani quilhpatiniꞌ mukꞌo tachi chun ju ixpacxanta. Chux ju caꞌixlhitamaꞌuta ju ixvaiti.
\c 13
\s1 Ju Jesús naulh ni calaclakꞌoyaꞌ ju ixpujitatꞌan ju israelitanin
\p
\v 1 Ju Jesús taxtulh ju lacakꞌai ixpujitatꞌan ju istꞌaꞌisraelitanin. Chai pumatam ixꞌamamakaꞌui junich:
\p ―Quiꞌamamakaꞌunuꞌ alaktsꞌich ju ani chiux ni na laccꞌus chai ju lacchakaꞌ ni na lackꞌox.
\p
\v 2 Para akꞌalhtayanalh ju Jesús. Junich:
\p ―Alaktsꞌintꞌit ju ani lackꞌai kꞌexichakaꞌ. Pus caminaꞌ avilhchan acsni jantu tuꞌuꞌ catilaꞌucxtavi ju chiux ju ixtꞌachiux. Chux lana calakꞌalhikꞌocanaꞌ.
\s1 Ju Jesús naulh ta yu cajunaꞌ acsni vanin minta ju ixꞌaclanti
\p
\v 3 Pus ju Jesús chai ju ixꞌamamakaꞌui taꞌalh ju akstijun junta ixchꞌancanta ju xaqꞌuiu ju olivos juncan. Chai ju anch ixtꞌalalacaꞌanita lacakꞌai ixpujitatꞌan ju israelitanin. Chai acsni tavi ju Jesús pus ju Pitaluꞌ chai ju Jacobo chai ju Xivan chai ju Tilix va isꞌakstuꞌan taquilhasacmi. Tajuni:
\p
\v 4 ―Aquilajuniuch. Tas vananch ju catapasayaꞌ ju anuꞌ taxtokni ju xaquilajunau. Tas acpucꞌatsayau ni chinta ju avilhchan acsni cataꞌuctaxtuyaꞌ chux ju ani taxtokni.
\p
\v 5 Pus ju Jesús alackꞌalhtailh. Ajuni:
\p ―Alhistꞌaccꞌantꞌit ni jantu xamatiꞌ cataꞌokxchokꞌon.
\v 6 Pus na lhu cataminaꞌ chai catanonach ni yuꞌunchach ju Cristo ju ixnoncan camalakachatachilh ju Dios. Chai na lhu cataꞌokxchokꞌoyaꞌ.
\p
\v 7 Para acsni akꞌasmatꞌaꞌitꞌit ni alin ju lhilucut chai ni cakꞌostayachokochalh aliꞌ lhilucut alacatam pus jantu atꞌalhananaꞌitꞌit. Aktsꞌiya tasqꞌuini ni chunch ju catapasayaꞌ. Para jantiyuꞌ ju ixpuꞌaclanti ju lacamunutpaꞌ.
\v 8 Pus ju amachakꞌan ju kꞌai lakꞌachakꞌan catꞌalasayaꞌ ju amachakꞌan alakatam kꞌai lakꞌachakꞌan. Chai ju lapanacni ju tachꞌakꞌokꞌai tam kꞌai ucxtin catatꞌalasayaꞌ ju ixlapanacni ju apumatam kꞌai ucxtin. Catataclhaꞌ ju lacatꞌun ju vaklhun. Chai caꞌalinaꞌ ju kꞌai chavan chai makꞌalhkꞌajnat. Pus ju ani va ixputaiꞌulacan ju makꞌalhkꞌajnat.
\p
\v 9 Para ju uxijnan alhistꞌaccꞌantꞌit miꞌakstuꞌan ni alhipꞌincꞌanaꞌitꞌit lacapuꞌucxtin. Chai ju laꞌixpujitatꞌan ju mintꞌaꞌisraelitanin akꞌainekmacꞌanaꞌitꞌit. Chai alhipꞌincꞌanaꞌitꞌit laꞌixꞌucxlacapuꞌan ju ucxtinin chai ju lacalackꞌai ucxtinin va ixlacata ni quilalhilacaꞌanau ju quitꞌin. Pus ju chunch laich aꞌunaꞌitꞌit ju yuꞌunch ju quilacata.
\v 10 Chai ni tucaꞌ chin ju ixꞌaclanti ju lacamunutpaꞌ pus tasqꞌuini ni pꞌulhnan caꞌalacjunkꞌocanaꞌ chux ju lapanacni ta yu lai puꞌancan ju lactꞌiyan.
\v 11 Chai acsni alhipꞌincꞌanaꞌitꞌit junta makꞌaxtꞌakcꞌanaꞌitꞌit lacapuꞌucxtin pus jantu alhamakꞌanininaꞌitꞌit tuchꞌi ju anonaꞌitꞌit ni jantucaꞌ chꞌipꞌinatꞌit. Nin yuchi ni apꞌastꞌactꞌit tuchꞌi anonaꞌitꞌit. Para va tuchi cataxtakniyan ju Dios ju lamiꞌalhunutꞌan ju acsnich pantsꞌiquis pus yuchach ju anonaꞌitꞌit. Chunch ju anonaꞌitꞌit ni jantu uxijnan ju achꞌivinaꞌitꞌit para isꞌakstu ju Spiritu Santu.
\v 12 Chai ju lapanacni catalamakꞌaxtꞌakꞌaꞌ va ixlacaꞌatalh ni axcaican ju quintalhilacaꞌanta quitꞌin. Pus ju lapanacni catamakꞌaxtꞌakꞌaꞌ ju tam ixlakꞌauꞌan laꞌixꞌaninti. Chai ju xalacpaꞌitni catamakꞌaxtꞌakꞌaꞌ ju isꞌaskꞌatꞌan laꞌixꞌanintiꞌan. Chai ju saꞌaskꞌatꞌan catatꞌalasayaꞌ ju ixpaiꞌan chai ixnatichꞌan chai catalhinonaꞌ ixmaknicaꞌan.
\v 13 Pus chux ju lapanacni slivasalh catalhixcayan va ixlacata ni quilalhilacaꞌanau. Para ju aquilhilaksiyaꞌ tus laꞌixꞌaclanti ju isꞌatsucunti yuchi ju catakꞌalhtaxtuyaꞌ chai laich caꞌanaꞌ ju lactꞌiyan.
\p
\v 14 Ju makꞌaniya lapanac ju Daniel ixjuncan ixnajun ixchivinti Dios. Chai ju yuchi tsꞌokꞌula junta naulh ni ma caꞌalinaꞌ lamimpujitatꞌan ju tuꞌuꞌ ju na lhitsꞌisi ju Dios. Chai ixlhiyuchi jantu xamatiꞌ ju milhiꞌuxijnan catanuyaꞌ ju anch. Pus ju laktsꞌin ju ani chivinti chach machakxa tuchi ju nomputun. Chai acsni alaktsꞌinaꞌitꞌit ni uctaxtulh ju anuꞌ ju lhichivinilh ju Daniel pus tachi chun ju tavilanalh laxaꞌestado Judea chach taꞌatsꞌalalh. Cataꞌalh ju lactalhpa.
\v 15 Chai ju caꞌakstitavi lacasotea chakaꞌ va tsꞌalhti catakꞌalhtaju chai caꞌatsꞌalalh. Para jantu catiꞌalilh ispantsꞌiquis ni lai catanu ju laꞌixchakaꞌ ni va caꞌalh maxtunuꞌ tuꞌuꞌ ju ixtaxtokni.
\v 16 Chai ju chꞌalhcatnan laꞌixcuxtu vachuꞌ caꞌatsꞌalalh. Chai jantu cataspꞌitchokolh laꞌixchakaꞌ ni va caꞌalh iniꞌ ju ixcutun.
\v 17 Painiꞌitnich ju yuꞌunch ju jantu lacakꞌox chai ju va tatꞌajun matsꞌiquinin isꞌaskꞌatꞌan ju acsnich avilhchan.
\v 18 Atꞌapꞌaininitꞌit ju Dios ni jantu tasqꞌuini ni atsꞌalayaꞌitꞌit lacalhicꞌasnin.
\v 19 Chunch alhisqꞌuinitꞌit ni na lhu catamakꞌalhkꞌajnanaꞌ ju lapanacni ju acs avilhchan. Catamakꞌalhkꞌajnanaꞌ tachi ju jantu tavanan makꞌalhkꞌajnancanta tus acsni tavanan navicantacha ju Dios ju lacamunutpaꞌ. Chai jantu aktam chun catamakꞌalhkꞌajnanchokoyaꞌ tavanan.
\v 20 Pus ju quiꞌucxtinꞌan Dios ni jantu caꞌixnaulh ni palai va lacatsꞌunin caꞌixnavi ju anuch avilhchan pus jantu xamatiꞌ caꞌixtakꞌalhtaxtulh. Ixtanikꞌota. Para ni na amapaini ju lapanacni ju ixꞌalacsacxtuta pus yuchi va lacatsꞌunin lhinavilh ju anuꞌ avilhchan.
\p
\v 21 Pus ju acsnich jantu xcai ni xamatiꞌ chani catajunan: “Alaktsꞌich. Ani ya ju Cristo ju ixnoncan camalakachatachilh ju Dios”. U chani catajunan: “Alaktsꞌich anuꞌ ya”. Pus ni chunch ju catajunan xamatiꞌ jantu alacꞌaꞌitꞌit.
\v 22 Pus ju acsnich caꞌalinaꞌ ju lapanacni ju catanonaꞌ ni yuꞌunch ju Cristo ju ixnoncan camalakachatachilh ju Dios mas jantu. Chai caꞌalinaꞌ ju lapanacni ju catanonaꞌ ju taꞌaklhtamat chivinti. Para chunch catachivinaꞌ tachi ju vasalh tatꞌajun nonin ju ixchivinti Dios. Chai na lhu catanaviyaꞌ ju taxtokni ju catapumavasalaputunach ni vasalh ixlapanacni Dios tajunita mas jantu. Chai catanaviyaꞌ ju lhamakꞌan ni va laich catapuꞌokxchokꞌolh ju lapanacni ju asacxtuta ju Dios.
\v 23 Para ju uxijnan alhistꞌaccꞌantꞌit. Iclajuntauch chux ju ani mas tucaꞌ tapasai ni laich acꞌatsꞌayaꞌitꞌit ni chunch ju catapasayaꞌ.
\s1 Chani cajunaꞌ acsni caminchokoyaꞌ ju Cristo
\p Ju Jesús tailhiꞌalh ixchivinti chai ajuni ju ixꞌamamakaꞌui:
\p
\v 24 ―Ju acsni avilhchan acsni catapasayaꞌ ju anuꞌ makꞌalhkꞌajnat pus catsꞌisaꞌ ju avilhchan. Chai ju malhquiyuꞌ jantu camapulhcuyaꞌ.
\v 25 Chai catapatajuyaꞌ ju stꞌacu. Chai tachi chun ju ani catataclhaꞌ.
\v 26 Pus ju acsnich ju lapanacni aquintalaktsꞌinach ju quitꞌin ju quimalakachatachilh Dios ni lapanac actsucuyaꞌ ju ani. Aquintalaktsꞌinach acsni acminach lacaꞌataputsꞌi. Chai catacꞌatsayaꞌ ni na alin ju quintachaput chai xakꞌai icjunita.
\v 27 Chai ju acsnich acmalakachatachilh ju quiꞌanquilhnin. Chai ju yuꞌunch catamakꞌaixtꞌokꞌach ju lapanacni ju icꞌasacxtuta. Chai ju anuꞌ lapanacni cataminanta ju ixlhilacaputsꞌun ju lacamunutpaꞌ mas palai makat cava ju ani lacatꞌun u ju lactꞌiyan.
\p
\v 28 Alaktsꞌintꞌit tachi ju takꞌayai ju tuꞌuꞌ xaqꞌuiu higo. Acsni catsucuyaꞌ xajchiniꞌ ju sastꞌi xaxkꞌoi pus pꞌucꞌatsꞌayatꞌit ni vaninch minta ju lacapꞌasni.
\v 29 Pus vana va chun ju ani. Acsni alaktsꞌinaꞌitꞌit ni catapasayaꞌ ju ani taxtokni pus apꞌucꞌatsꞌayaꞌitꞌit ni slivasalh jantu makꞌan ticꞌacx tus caꞌaclayaꞌ ju lacamunutpaꞌ.
\v 30 Slivasalh ju iclajunau. Jantu catanikꞌoyaꞌ ju lapanacni ju chavai tatꞌajun tus cataꞌaktsakꞌoyaꞌ tachi chun junima taxtokni.
\v 31 Ju tꞌiyan chai ju lacatꞌun catsꞌankꞌakꞌoyaꞌ. Para ju quinchivinti aktsꞌiya caꞌuctaxtuyaꞌ.
\p
\v 32 Para jantu xamatiꞌ cꞌatsai tis avilhchan chai tuchi hora ju acminaꞌ ju quitꞌin. Nin yuꞌunch ju anquilhnin ju tavilanancha lactꞌiyan nin quitꞌin mas istsꞌalh Dios icjunita. Va isꞌakstu ju quimpai ju cꞌatsai.
\p
\v 33 Pus skꞌalalhch atsꞌucꞌutꞌit. Alhistꞌaccꞌantꞌit. Atꞌachꞌivinintꞌit ju Dios ni jantu cꞌatsꞌayatꞌit tavananch ju acminaꞌ.
\v 34 Pus ju acsnich chunch cajunaꞌ tachi acsni an makat tam jokꞌat. Ni tucaꞌ an pus ajuni ju ixlapanacni ni catalhistaclh ju ixchakaꞌ. Chai pumatamin axtakni ixlhichꞌalhcat ju catanaviyaꞌ. Chai juncanch ju ixlhistꞌacꞌa malhtich ni calhistaclich.
\v 35 Pus vana va chun ju uxijnan. Alhistꞌaccꞌantꞌit ni vachuꞌ jantu cꞌatsꞌayatꞌit tavananch ju acminaꞌ quitꞌin ju miꞌucxtinꞌan icjunita. U tokꞌoxai. U paitat tsꞌis. U acsni paktꞌutu tꞌasata ju chilaꞌ. U acsni catuncuntilayach.
\v 36 Jantu xcai ni va tam pantsꞌiquis acmilh chai aclalhitajuyau ni tachi ju va lhtꞌatꞌayatꞌit lamiꞌatsucuntiꞌan.
\v 37 Ju tuchi iclajunau ju uxijnan icꞌalacjuni tachi chun ju lapanacni. Alhistꞌaccꞌantꞌit.
\c 14
\s1 Talacchivinilh ta yu laich catapuchꞌapayaꞌ ju Jesús
\p
\v 1 Pus va lakatꞌui avilhchan ixcꞌacx tus caꞌalinaꞌ ju cꞌatan ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin. Chai vachuꞌ acs ixꞌalin alakatam cꞌatan acsni ixtaꞌui ju xkapavati ju jantu ixtamacaꞌanita ju xatꞌin. Pus ju xalackꞌajin palijni chai ju lapanacni ju na ixtalhatalanininta ju ixlhamapꞌaksinꞌan ju istꞌaꞌisraelitanin tapuxcaulh ta yu laich caꞌixtapuꞌokxchokꞌochꞌapalh laꞌixchivinti ju Jesús ni laich catalhinonaꞌ ixmaknica.
\v 2 Para ixtanajun:
\p ―Jantu cachꞌapayau acsni va alin ju cꞌatan ni na aktsamcanta ju acsnich. Va laich catatalhkꞌamalh ju lapanacni.
\s1 Pumatam chakoꞌulh lakxtixtꞌekꞌemucꞌalh ju Jesús ju na saksi acamin
\p
\v 3 Pus ju Jesús ixvilhcha lakꞌachakꞌan Betania laꞌixchakaꞌ ju Simón ju na ixpacxanta istsꞌitsꞌi para palaich ixnavita ju Jesús. Chai acsni ixvi ju lacamixa pus milh pumatam chakoꞌulh ju ixlhiminta lakatam lumeti ju chiux ixlhinavicanta. Para na stacꞌacꞌa ixjunita. Chai ju anuꞌ chiux alabastro juncan. Pus ju anuꞌ lumeti ixputajun ju tuꞌuꞌ ju na saksi ixꞌacamin. Chai ju yuchi nardo ixjuncan chai na laklhu ixtapalh ixjunita. Pus ju anuꞌ chakoꞌulh kekpꞌakxlh ju lumeti chai tsuculh lakxtixtꞌekꞌemucꞌanaꞌ ju Jesús ju ixtajun.
\v 4 Pus ju aliꞌin ju ixtavilanalh ju anch talhitalhkꞌamalh. Chai talaclajunilh sia isꞌakstuꞌan:
\p ―Tajuch ni va xalhakꞌamanan ju ani saksi acamin.
\v 5 Ju yuchi jantu va lakatꞌutu cientos tumin ixtapalh junita. Ni caꞌistꞌacalh pus lai caꞌixtaknicalh ju quilhpatinin ju ixtapalh.
\p Pus lana jantu kꞌox xatalhiulai tuchi navilh ju anuꞌ chakoꞌulh.
\p
\v 6 Para ju Jesús alacjuni:
\p ―Amacꞌaꞌuntꞌit. Tajuch ni va lhixcꞌayatꞌit. Na kꞌox ju tuchi xaquinavinich.
\v 7 Aktsꞌiya alin ju quilhpatinin junta vilatꞌit. Chai acsni alacꞌasqꞌuinaꞌitꞌit laich anaviniyaꞌitꞌit ju kꞌox. Para ju quitꞌin jantu actilatꞌaꞌalhtanankꞌalhiu.
\v 8 Ju ani ya chakoꞌulh navilh tachi ju lai xanavi. Mas tucaꞌ icmacnucanta para ju yuchi acsni quilacamucꞌalh ju cꞌuchꞌu pus tachi ju va jun quimucꞌalh ixlacata quiꞌaninti ni chunch ju lhilanicantauch ni xamatiꞌ taꞌacnui.
\v 9 Slivasalh ju iclajunau. Vanta anchach ju lacamunutpaꞌ junta canoncanaꞌ ta yu lai takꞌalhtaxtucan pus vachuꞌ canoncanaꞌ tuchi ju xanavi ju ani ya chakoꞌulh. Ju chunch jantuch cacapcanaꞌ ju yuchi.
\s1 Ju Judas makꞌaxtaklh ju Jesús
\p
\v 10 Ju Judas Iscariote pumatam ixlhipumacautꞌuiꞌan ixjunita. Pus ju acsnich ju yuchi alakꞌalh ju xalackꞌajin palijni. Alh atꞌatakꞌoxiniꞌ ta yu laich capumakꞌaxtꞌakꞌaꞌ ju Jesús.
\v 11 Chai ju yuꞌunch acsni takꞌasmatlh ju ixchivinti ju Judas na talackꞌachalh. Tamachꞌanulh. Tajunilh ju Judas ni cataxtakniyaꞌ ju tumin. Pus ju Judas tus acsnich na ixpuxcajui ta yu laich capumakꞌaxtꞌakꞌaꞌ ju Jesús.
\s1 Ju Jesús alactꞌavailh ju ixpumacautꞌuiꞌan
\p
\v 12 Pus ju xapꞌulhnan avilhchan ixjunita ju anuꞌ cꞌatan acsni ixtaꞌui ju xkapavati ju jantu ixtamacaꞌanita ju xatꞌin chai acsni ixtamakni ixborregoꞌan ju ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin. Pus ju acsnich ju ixꞌalacmamakaꞌui ju Jesús tajunich:
\p ―Tas anchach ju kꞌoxich lhiulai ju uxintꞌi ju acꞌanau lakꞌoxinin junta laich caꞌu ju borrego.
\p
\v 13 Pus ju Jesús amalakachalh ixtꞌiyunꞌan ixꞌalacmamakaꞌui. Chai alacjunich:
\p ―Apꞌinchitꞌit ju lakꞌachakꞌan. Chai ju anch apꞌakxtꞌokꞌaꞌitꞌit pumatam jokꞌat ju lhiꞌanta xcan lacaxalu. Pus atꞌaimalhipꞌinaꞌitꞌit ju yuchi.
\v 14 Chai junta catanuyaꞌ ju yuchi pus vachuꞌ atꞌanuyaꞌitꞌit. Chai chani ju aꞌunaꞌitꞌit ju amachakaꞌ: “Ju amamakaꞌunuꞌ ma najun ni ta ma anchach ju alin ju cuarto junta lai catꞌaꞌuyaꞌ ju borrego ju ixꞌalacmamakaꞌui”.
\v 15 Chai ju anuꞌ amachakaꞌ catamasuniyanch ixlhitantalaktꞌui junta kꞌaich ixchakaꞌ. Ju anch lakasilakꞌoxinincantach. Pus anchach ju alakꞌoxiniyaꞌitꞌit ju vaiti quilacatachꞌan quijnanꞌan.
\p
\v 16 Pus ju ixꞌamamakaꞌui taꞌalh ju lakꞌachakꞌan chai vasalh talhitajulh tachi ju ixꞌajuncantach. Chai anchach ju talakꞌoxinilh ju vaiti ixlacata ju cꞌatan.
\p
\v 17 Chai acsni tokꞌoxa pus ju Jesús anch ju alactꞌaꞌalh ju ixpumacautꞌuiꞌan ixꞌamamakaꞌui.
\v 18 Chai acsni tatavilh lacamixa chai tatsuculh venin pus ju Jesús alacjuni:
\p ―Slivasalh ju iclajunau. Pumatam ju milhiꞌuxijnan ju quilatꞌavenau aquimakꞌaxtꞌakꞌaꞌ.
\p
\v 19 Pus ju acsnich ju yuꞌunch na taꞌamakꞌaninilh. Kꞌantam kꞌantam tajunich:
\p ―Para ja quitꞌin.
\p Chai apumatam ixnajun:
\p ―Para ja quitꞌin.
\p
\v 20 Chai ju Jesús alackꞌalhtailh. Alacjunich:
\p ―Yuchi ju pumatam ju sia uxijnan ju mimpumacautꞌuiꞌan ju lakputam quintꞌatamajkꞌoi laquincꞌaꞌulh.
\v 21 Slivasalh ni acꞌanaꞌ laquiꞌaninti tachi ju iclhitsꞌokcanta. Quitꞌin ju quimalakachatachilh Dios ni lapanac actsucuyaꞌ ju ani. Para painich ju anuꞌ lapanac ju aquimakꞌaxtꞌakꞌaꞌ. Palai kꞌox ixva ni jantu tavanan istsuculh ju anuꞌ lapanac.
\p
\v 22 Chai acsni ixtatꞌajun venin pus ju Jesús chꞌapalh ju xkapavati. Xtaknilh lhakꞌailaktsꞌiuch ju Dios. Acsnicaꞌ ju chꞌekꞌelh. Alacxtaknilh ju ixꞌamamakaꞌui chai alacjunich:
\p ―Aꞌutꞌitch. Ju ani quilacatuna junita.
\p
\v 23 Vachuꞌ xakatailh ju tasa ju ixputajun ju vino. Xtaknilh lhakꞌailaktsꞌiuch ju Dios chai axtaknilh ju ixꞌamamakaꞌui. Chai ju yuꞌunch takꞌotkꞌo ixchuxꞌan.
\v 24 Ju acsnich ju Jesús alacjunich:
\p ―Ju yuchi quiꞌacꞌalhni. Chai acsni cataxtuyaꞌ ju yuchi pus camavasalayaꞌ ju sastꞌi chivinti ju caꞌalaclhitꞌatakꞌoxiyaꞌ ju Dios ju lapanacni ni laich caꞌamacꞌacxaniyaꞌ ixꞌalactuꞌuntiꞌan lhu lapanacni.
\v 25 Slivasalh ju iclajunau. Jantuch tavanan actikꞌotchokolh ju vino tus acsnich avilhchan acsni ackꞌotꞌach ju sastꞌi vino junta lhinonacha ju Dios.
\s1 Ju Jesús junilh ju Pitaluꞌ ni canonaꞌ ni jantu mispai ju yuchi
\p
\v 26 Pus acsni talakꞌaya ju Dios lacamilhpat pus tataxtulh ju lacachakaꞌ. Taꞌalh ju anuꞌ akstijun junta chꞌancanta ju xaqꞌuiu olivos.
\v 27 Chai acsni tachaꞌalh ju anch pus ju Jesús alacjunich:
\p ―Minchuxꞌan aquilamacoyokꞌoyau ju chavai atatsꞌisni. Iccꞌatsai ni chunch ju alayaꞌitꞌit ni chani najun ju Dios laꞌixchivinti ju tsꞌokcanta: “Acmakniyaꞌ ju xaꞌalhistacnaꞌ. Chai ju ixborregojni catataꞌakpitsiyaꞌ”. Chunch ma naulh ju Dios.
\v 28 Para ju astanch acsni actaꞌacxtuchokoyaꞌ junta acmacnucanaꞌ pus acpꞌulhꞌanaꞌ ju xaꞌestado Galilea. Astan achꞌipꞌinaꞌitꞌit ju anch ju uxijnan.
\p
\v 29 Pus ju acsnich ju Pitaluꞌ junilh:
\p ―Mas cataꞌatsꞌalhkꞌo ju aliꞌin para ju quitꞌin jantu tavanan actimacoyaꞌun.
\p
\v 30 Para ju Jesús junilh ju Pitaluꞌ:
\p ―Slivasalh ju icjunan. Ju chavai atatsꞌisni acsni tucaꞌ tꞌasai paktꞌui ju chilaꞌ ju uxintꞌi paktꞌutu naꞌuntꞌa ni jantu qꞌuimispꞌai.
\p
\v 31 Para ju Pitaluꞌ na pꞌas ixnajun ni jantu tavanan catinaulh ni jantu mispai mas tus catꞌamaknicalh. Chai si chun ixtanajun ju aliꞌin ixꞌalacmamakaꞌui ju Jesús.
\s1 Ju Jesús tꞌachivinilh ju ixpai
\p
\v 32 Pus ju astan ju Jesús chai ju ixꞌalacmamakaꞌui tachaꞌalh junta ixjuncan Getsemaní. Chai acsni tachaꞌalh ju anch pus ju Jesús alacjuni ju ixꞌalacmamakaꞌui:
\p ―Anich atꞌolatꞌitcaꞌ pantsꞌiquis. Chactiquitꞌachiviniꞌ ju Dios.
\p
\v 33 Pus ju Jesús alackꞌailhiꞌalh ju Pitaluꞌ chai ju Jacobo chai ju Xivan. Taꞌalh palai avinti lacatsꞌunin chai ju Jesús na talhanalh. Chai tsuculh amakꞌaninin.
\v 34 Chai alacjunich:
\p ―Slivasalh na icꞌamakꞌaninin. Tachi ju va aquimakniyaꞌ ju quiꞌamakꞌanit. Aquilapacxauch ju ani. Jantu alhtꞌatꞌatꞌit.
\p
\v 35 Ju acsnich ju Jesús palai makat alh lacatsꞌunin chai taꞌaktsokotavi chai taquilhputalh ju lacatꞌun. Tꞌachivinilh ju Dios. Sqꞌuinilh ni va laich cava jantu vana canaulh ju ixpai ni tasqꞌuini ni camaknicalh tachi ju aktsꞌiya ilhcata.
\v 36 Chanich ju juni:
\p ―Quimpai ju uxintꞌi lai navikꞌoꞌui tachi chun ju taxtokni. Aqꞌuimakꞌosunin ju ani makꞌalhkꞌajnat ju slivasalh na tsꞌinqꞌui. Para jantu anavitꞌi tachi ju iclacasqꞌuin ju quitꞌin. Va yuchi ju anavitꞌi tachi ju anonaꞌ ju uxintꞌi.
\p
\v 37 Chai acsni taspꞌitcha ju Jesús alaclhitajulh ju ixtꞌutunꞌan ni va ixtalhtatavilanalh. Chai ju yuchi junilh ju Pitaluꞌ:
\p ―Simón ja va lhtꞌatꞌaich. Ja lana jantu lai ixkꞌalhcꞌujtꞌi va pantsꞌiquis.
\v 38 Akꞌalhcꞌujtꞌit. Atꞌachꞌivinintꞌit ju Dios. Ju chunch jantu cataꞌokxchokꞌoyan ju lhacaticuru. Pus ju lamiꞌalhunutꞌan vasalh navipꞌutꞌunatꞌit ju kꞌox. Para ju va lamiꞌakstuꞌan jantu lai naviyatꞌit.
\p
\v 39 Pus aktam anchokopa ju Jesús tꞌachiviniꞌ ju Dios. Chai vana va chun ju nonchokopa.
\v 40 Chai acsni taspꞌitcha aktam alaclhitajuchokopa ixpumatꞌutuꞌan ixꞌalacmamakaꞌui ni aktam ixtalhtatananchokopalai. Pus na tsꞌinqꞌui ixjunita ixlakchulhꞌan ni na ixtalaclhtataputun. Chai ju yuꞌunch jantu ixtacꞌatsai tuchi lai catajunilh ju Jesús.
\v 41 Pus ampa tꞌachiviniꞌ ju Dios chai acsni minchokolh ixlhipaktꞌutuch pus alacjunich:
\p ―Ja lana va alhtꞌatꞌakꞌalhiyaꞌitꞌit chai astꞌacnankꞌalhiyaꞌitꞌit. Kꞌoxich ju chavai. Chilh ju hora acsni acmakꞌaxtakcanach laꞌixmacaꞌan ju alactuꞌunin. Quitꞌin ju quimalakachatachilh Dios ni lapanac actsucuyaꞌ ju ani.
\v 42 Akꞌostꞌolatꞌit. Caꞌauch apakxtoknin. Va anich minta ju aquimakꞌaxtꞌakꞌach.
\s1 Tachꞌin lhiꞌancalh ju Jesús
\p
\v 43 Pus lana chincha ju Judas acsni ixtꞌajuncaꞌ chiviniꞌ ju Jesús. Yuchi ju Judas ju ixlhipumacautꞌui ixjunita ixꞌalacmamakaꞌui. Ju yuchi ixꞌakꞌailhiminta lhu ju lapanacni. Ixlapanacnich ixtajunita ju xalackꞌajin palijni chai ju papanin chai ju na ixtalhatalanininta ju ixlhamapꞌaksinꞌan ju istꞌaꞌisraelitanin. Ju aliꞌin ixtalhiminta ju ixmachitaꞌan chai aliꞌin ixtalhiminta ju tuꞌuꞌ qꞌuiu.
\v 44 Pus ju anuꞌ ju camakꞌaxtaknanach ixꞌalaclhijunitach ju ixtalhavat lapanacni ta yu capumakꞌaxtꞌakꞌach. Chani ixꞌalacjunita:
\p ―Ju acmacchꞌuchꞌuyaꞌ yuchach. Achꞌapꞌayaꞌitꞌit. Alhipꞌinaꞌitꞌit. Kꞌox alhistꞌacꞌaꞌitꞌit.
\p
\v 45 Pus acsni chaꞌalh ju Judas lana lakꞌalh junta ixya ju Jesús. Junich:
\p ―Amamakaꞌunuꞌ.
\p Chai lana macchꞌuchꞌulh.
\v 46 Pus lana soko tachꞌapalh ju aliꞌin. Tachꞌin tanavi.
\p
\v 47 Para ju pumatam ju ixtꞌavi ju Jesús lana soko maxtulh ixmachita. Chai ulanilh ixlapanac ju xakꞌai pali. Lana chakxpꞌuxnilh ju ixꞌakꞌaxkꞌolh.
\v 48 Pus ju Jesús alacjuni ju ixtalhavat lapanacni:
\p ―Tajuch ni va quilanaviyau tachi ju tam akꞌalhonaꞌ ju chꞌapꞌapꞌutꞌunatꞌit ni va lhitꞌantꞌatꞌit ju mimachitaꞌan chai ju qꞌuiu.
\v 49 Chux avilhchan xaclatꞌatanuyau lacakꞌai mimpujitatꞌan ju uxijnan. Chai xaclamalaniyau. Para jantu xaquilachꞌapayauch ju acsnich. Para chunchach ju tꞌajun tapasanaꞌ ni caꞌuctaxtuyaꞌ tachi chun ju tsꞌokcanta laꞌixchivinti Dios ju quilacata.
\p
\v 50 Ju acsnich tachi chun ju ixꞌalacmamakaꞌui ju Jesús tamacoyaulh. Taꞌatsꞌalhkꞌo ixchuxꞌan.
\s1 Pumatam tsꞌalh atsꞌalalh
\p
\v 51 Chai pumatam tsꞌalh ixchꞌakꞌokꞌai ju Jesús. Chai ju yuchi va ixmacajucalh lakatam kꞌai pumpuꞌ. Va yuchach ju ixlakchꞌita. Pus ju ixtalhavat lapanacni tachꞌapalh vachuꞌ ju yuchi.
\v 52 Para ju yuchi macontilalh ju kꞌai ixpumpuꞌ. Va kꞌai tsasau atsꞌalaꞌalh.
\s1 Ju Jesús lhiꞌancalh laꞌixpuꞌucxtinꞌan ju israelitanin
\p
\v 53 Pus ixtalhavat lapanacni talhiꞌalh ju Jesús laꞌixchakaꞌ ju xakꞌai pali. Chai ju anch talhitakꞌaixtoklh chux ju xalackꞌajin palijni chai ju papaninch chai ju na ixtalhatalanininta ju ixlhamapꞌaksin ju istꞌaꞌisraelitanin.
\v 54 Pus ju Pitaluꞌ va ixlhimakat ixchꞌakꞌokꞌata ju Jesús tus tanu vachuꞌ pulacni ta ixlakachakꞌaxnucanta ju ixchakaꞌ ju xakꞌai pali. Chai ju anch alactꞌatavi ju pulasiyajni. Ju yuꞌunch ixtalacskꞌonvilanalh.
\p
\v 55 Pus ju xalackꞌajinch palijni chai ixchuxꞌan ju ucxtinin ixtapuxconich tichi chavaich ju lai catanaulh tuꞌuꞌ taꞌaklhtamat chivinti ni laich catalhinaulh ixmaknica ju Jesús. Para jantu tavanan talhitajunilh tuꞌuꞌ talakꞌalhin.
\v 56 Na lhu lapanacni ixtanajun taꞌaklhtamat chivinti ixlacata ju Jesús. Para jantu va lakatam ixtanavi ixchivintiꞌan.
\v 57 Ju aliꞌin lapanacni tataya. Tanaulh taꞌaklhtamat chivinti ixlacata ju yuchi. Ixtanajun:
\p
\v 58 ―Ju quijnan ickꞌasmatnitau acsni naulh ni ma calaclhmokaꞌ ju kꞌai pujitat ju yocanta laꞌixmacaꞌ lapanacni. Chai ixlhilakatꞌutu avilhchan ma cayochokoyaꞌ alakatam. Para ma jantu lapanacni ju catayoyaꞌ.
\p
\v 59 Para nin chunch jantu lai va lakatam ixtanavi ixchivintiꞌan.
\p
\v 60 Pus ju acsnich ju xakꞌai pali taya laꞌixꞌucxlacapuꞌan ixtalhavat lapanacni. Sacmilh ju Jesús. Junich:
\p ―Ja jantu tuꞌuꞌ akꞌalhtꞌayananaꞌ. Tijuch ju talhichivimakꞌanan ju ani tayanalh.
\p
\v 61 Para ju Jesús va sek taya. Jantu tuꞌuꞌ xaꞌakꞌalhtayanan. Chai ju xakꞌai pali aktam sacmichokopa. Junich:
\p ―Ja uxintꞌi ju Cristoꞌat ju ixnoncan camalakachatachilh ju Dios. Ja istsꞌalhꞌat ju Dios ju lakꞌayacan.
\p
\v 62 Chai ju acsnich ju Jesús akꞌalhtayanalh:
\p ―Quitꞌinch. Chai astan aquilalaktsꞌinau acsni actolaꞌ vanin junta vi ju Dios ju na tachapun. Chai aquilalaktsꞌinau acsni acminaꞌ laxaꞌataputsꞌi ju lactꞌiyan. Quitꞌin ju quimalakachatachilh Dios ni lapanac actsucuyaꞌ ju ani.
\p
\v 63 Pus ju acsnich ju xakꞌai pali lana lhtꞌit kꞌexlh ju ixpumpuꞌ ju va ixtalhkꞌamtich. Chai naulh:
\p ―Tis aliꞌ chivinti maktasqꞌuiniyau.
\v 64 Kꞌasmatꞌatꞌit ju macxcai chivinti ju xanajun ni tachi ju Dios ju jumputun. Tas nonatꞌit ju chavai.
\p Pus ju yuꞌunch tsꞌan tanonkꞌo ni lhijunch ni camaknicalh.
\p
\v 65 Pus ju acsnich ju aliꞌin tatsuculh lakpuchujvanin ju Jesús. Talakpuchꞌilh chai taꞌulanilh chai tajunich:
\p ―Anauch tichi chavaich ju xaꞌulaniyan.
\p Chai astan ju pulasiyajni taquincatisamalh.
\s1 Ju Pitaluꞌ naulh ni jantu mispai ju Jesús
\p
\v 66 Pus ju Pitaluꞌ makspaꞌ ixvi laꞌixpulacni kꞌex. Chai xajchilh pumatam isquitiꞌ ju xakꞌai pali.
\v 67 Chai acsni laktsꞌilh ju Pitaluꞌ junta ismakskꞌonvi skotutu. Junich:
\p ―Ju uxintꞌi vachuꞌ ixtꞌaꞌucxuntꞌaꞌun ju Jesús amachakaꞌ Nazaret.
\p
\v 68 Para ju Pitaluꞌ junilh:
\p ―Jantu icmispai chai jantu icmachakxai tuchꞌi qꞌuiꞌumpꞌutꞌun.
\p Chai lana taxtulh ju Pitaluꞌ. Talacxtutaya. Chai lana tꞌasalh ju puyux.
\v 69 Pus ju anuch squitiꞌ ni laktsꞌinchokopa aktam ju Pitaluꞌ pus alacjunchokopa ju anuch ixtavilanalh:
\p ―Ju ani vachuꞌ makyuchi.
\p
\v 70 Para aktam nonchokopa ju Pitaluꞌ ni jantu slivasalh. Chai ni pantsꞌiquis jumpa pus yuꞌunch ju ixtavilanalh tajunchokopa ju Pitaluꞌ:
\p ―Slivasalh ni vachuꞌ makyuchꞌat ni vachuꞌ amachakaꞌat Galilea ni vachuch chun ju chꞌivinin tachi ju tachivinin ju yuꞌunch.
\p
\v 71 Para ju Pitaluꞌ naulh:
\p ―Chach quimamakꞌalhkꞌajni ju Dios ni jantu slivasalh ju tuchi iclajunau. Dios cꞌatsai ni jantu icmispai ju anuꞌ lapanac tichi lhasacmininatꞌit.
\p
\v 72 Chai ju puyux lana tꞌasalh ixlhipaktꞌuich. Chai ju Pitaluꞌ lana pastaclh ju ixchivinti ju Jesús ju ixjunita acsni junich ni paktꞌutu canonaꞌ ni jantu mispai acsni tucaꞌ paktꞌui tꞌasata ju puyux. Pus ju Pitaluꞌ acsni pastaclh ju chunch lana tsuculh kꞌalhunuꞌ.
\c 15
\s1 Ju Jesús lhiꞌancalh laꞌixꞌucxlacapuꞌ ju gobernador Pilato
\p
\v 1 Acsni tunculh talacchivinilh ju xalackꞌajin palijni chai ju papanin chai ju na ixtalhatalanininta ju ixlhamapꞌaksinꞌan ju istꞌaꞌisraelitanin chai ju aliꞌin ixꞌucxtinin ju israelitanin. Chai talhiꞌalh ju Jesús tachꞌin. Taquimakꞌaxtaknilh ju ixgobernadorꞌan ju romanonin. Yuchi ju Pilato ixjuncan.
\v 2 Chai ju Pilato sacmilh ju Jesús. Junich:
\p ―Ja vasalh uxintꞌi ju xaꞌucxtinꞌat ju israelitanin.
\p Chai ju Jesús akꞌalhtayanalh. Junich:
\p ―Chunch tachi ju naꞌun.
\p
\v 3 Pus ju xalackꞌajin palijni na lhu talakꞌalhin tamucꞌanilh ju Jesús para ju Jesús jantu tuꞌuꞌ akꞌalhtayanalh.
\v 4 Chai ju Pilato aktam sacmichokopa ju Jesús. Junich:
\p ―Ja jantu tuꞌuꞌ akꞌalhtꞌayananaꞌ. Na lhu talakꞌalhin tamucꞌaniyan.
\p
\v 5 Para ju Jesús jantu tavanan akꞌalhtayanalh tuꞌuꞌ. Chai ju Pilato na lhamakꞌaninilh ni jantu tuꞌuꞌ xanajun ju Jesús.
\s1 Jesús makꞌaxtakcalh laꞌixꞌaninti
\p
\v 6 Chux cꞌata ju gobernador Pilato ixꞌamasmanita ju lapanacni ni ixmaxtui lacapulachꞌin pumatam tachꞌin ju acs cꞌatan. Ixmaxtui va tichi chavaich ju tasqꞌuinlich ju lapanacni.
\v 7 Chai ju acsnich cꞌata ixꞌalin pumatam tachꞌin ju ixjuncan Barrabás. Ju yuchi ixꞌalactꞌatꞌalhnucanta ju ixtꞌaꞌamakninin. Ju yuꞌunch ixtamaknita ju lapanacni acsni tatꞌalasalh ju kꞌai ucxtin.
\v 8 Pus ju ixtalhavat lapanacni talakꞌalh ju Pilato. Tatsuculh tapaininin ni chunchach caꞌanavinicalh tachi akchux ixtacꞌatanich.
\v 9 Pus ju Pilato ixꞌanaviniputun ixkꞌachatꞌan ju yuꞌunch chai yuchi chani alaclhijunich ju israelitanin:
\p ―Ja lacꞌasqꞌuinatꞌit ni acmacaulh ju ani ya miꞌucxtinꞌan ji israelitanin.
\p
\v 10 Ju Pilato yuchi chunch alaclhijuni ni ixmachakxai ni va ixꞌaxcayantichꞌan ju ixtapumakꞌaxtakta ju Jesús ju xalackꞌajin palijni.
\v 11 Chai ju xalackꞌajin palijni talacmalacaꞌinilh ixtalhavat lapanacni ni catasqꞌuinlh ni alai camacajuncalh ju Barrabás.
\v 12 Pus ju acsnich ju Pilato akꞌalhtayanalh chai alacjunchokopa ju israelitanin:
\p ―Para tijuch ju lacꞌasqꞌuinatꞌit ju acnavi ju unatꞌit miꞌucxtinꞌan.
\p
\v 13 Pus ju ixtalhavat lapanacni pꞌas tanaulh ni lacacurus camaquilhtacalh.
\v 14 Para ju Pilato alacjuni:
\p ―Tajuch. Tis talakꞌalhin ju navita.
\p Para ju ixtalhavat lapanacni palai pꞌas ixtalacnajun:
\p ―Amaqꞌuilhtꞌatꞌich ju lacacurus.
\p
\v 15 Pus ju acsnich ju Pilato anavinilh ju ixkꞌachatꞌan ju lapanacni. Pus maxtulh lacapulachꞌin ju Barrabás. Chai lhinaulh ixlakanekmaca ju Jesús. Astan makꞌaxtaknilh ju taropajni ni camaquilhtacalh ju lacacurus.
\p
\v 16 Pus ju acsnich ju ixtaropajni ju Pilato talhiꞌalh ju Jesús ixpulacni junta lakachakꞌaxnucanta lacapuꞌucxtin. Chai acsni tachaꞌalh alactꞌasanikꞌocalh chux ju ixtꞌataropajni.
\v 17 Tamalakchꞌinilh ju Jesús smumu pumpuꞌ tachi ixtalakchꞌi ju xalackꞌajin. Chai tanavinilh ju corona si alhtucunuꞌ chai tamalacpatanulh.
\v 18 Chai kꞌantam kꞌantam ixtamacꞌami tachi ju macꞌamican tam xakꞌai. Na ixtamamaxani acsni ixtajuni:
\p ―Atsꞌucꞌukꞌalhitꞌi ji ixꞌucxtin ju israelitanin.
\p
\v 19 Chai lacasnivenkꞌe qꞌuiu tatsuculh lakpanekmanin. Chai talakachujva ju Jesús. Chai tamalacasunilh tachi ju vasalh va ixtalakꞌayaputun mas jantu.
\v 20 Chai acsni tamamaxanikꞌo pus tamaxtunilh ju smumu pumpuꞌ chai tamalakchꞌinichokolh ju aktsꞌiya ixpumpuch. Tamaxtulh ju anch. Talhiꞌalh junta catamaquilhtayaꞌ ju lacacurus.
\s1 Maquilhtacalh lacacurus ju Jesús
\p
\v 21 Pus ixtꞌajun tapasanaꞌ pumatam lapanac ju Simón ixjuncan. Ju yuchi amachakaꞌ Cirene ixjunita. Ixpai ju Alejandro chai Rufo. Ju yuchi va ixmintacha lacacuxtu. Pus ju taropajni tamakxkꞌokꞌa ju Simón ju iscurus ju Jesús.
\p
\v 22 Takꞌailhiꞌalh ju Jesús junta Gólgota ixjuncan. Ju anch va lhitapacutui chunch ni tachi ju va aktsulh istasui ju anuꞌ talhpa.
\v 23 Ixtamakꞌotꞌuputun ju vino ju ixlhiya ju achꞌitin ju mirra juncan ni va catalhimatontolanilh ju ixlacatuna. Para ju Jesús jantu kꞌotlh.
\v 24 Pus taxtucmucꞌalh ju lacacurus. Chai ju taropajni talhilaslajlh ixpumpuꞌ ju Jesús tamalhch ju calhiꞌanaꞌ kꞌantam kꞌantam. Chunch ju talalhvakpitsilh ju ixpumpuꞌ ju Jesús.
\p
\v 25 Acsni tavanan tamaquilhta lacacurus ju Jesús pus lakanajatsi hora vatsꞌisin ixjunita.
\v 26 Chai taꞌulanilh ju chivinti ju laꞌisꞌaktsulh iscurus ju Jesús junta naulh tuchi talakꞌalhin ixmucꞌanicanta. Pus ju anuꞌ chivinti chani naulh: “Ixꞌucxtinꞌan ju israelitanin”.
\v 27 Chai tatꞌamaquilhta pumatꞌui akꞌalhonin. Ju pumatam laꞌixlhicana ju Jesús ju taquilhta. Ju pumatam laꞌixlhimacx.
\v 28 Pus ni chunch ju ulhtucalh ju Jesús va uctaxtulh tachi ju istsꞌokcanta junta najun: “Ju yuchi mispacalh ni tachi ju vachuꞌ va alactuꞌunuꞌ ixjunita”.
\p
\v 29 Chai tachi chun ju ixtatapasai ju anch ixtamamaxani ju Jesús. Ixtalhitsꞌiꞌin chai ixtajunich:
\p ―Ju uxintꞌi naꞌun ni lai lakꞌalhi ju kꞌai pujitat chai ixlhilakatꞌutu avilhchan laich anavichꞌokꞌoyaꞌ.
\v 30 Pus ni vasalh tachapunꞌat amakꞌalhtꞌaxtꞌuchꞌokꞌocꞌach miꞌakstu. Atꞌakꞌalhtꞌaꞌutꞌich ju lacacurus. ―Chunch ju tajuni.
\p
\v 31 Chai vana va chun ixtamamaxani ju xalackꞌajin palijni chai ju na ixtalhatalanininta ju ixlhamapꞌaksinꞌan ju istꞌaꞌisraelitanin. Ixtalajunich sia yuꞌunch:
\p ―Ju yuchi lai ixmakꞌalhtaxtui ju akꞌantam. Para ju va isꞌakstu jantu lai makꞌalhtaxtuchokocan.
\v 32 Ju yuchi ni vasalh Cristo junita ju noncan camalakachatachilh ju Dios chai ni vasalh ixꞌucxtinꞌan ju israelitanin pus chach takꞌalhtaju ju lacacurus ju chavai. Ju chunch aclaktsꞌinau quiꞌakstuꞌan chai acsnich ju aclhilacaꞌanauch vachuꞌ.
\p Chunch ixtanajun sia isꞌakstuꞌan. Para va ixtalhitsꞌiꞌin. Chai mas yuꞌunch ju ixꞌalactꞌajucalh lacacurus ixtajuni macxcai chivinti.
\s1 Nilh ju Jesús
\p
\v 33 Acsni kꞌatunculh pus tsꞌislich ju ixlhilacaputsꞌun ju lacamunutpaꞌ tus lakatꞌutu hora atokꞌoxanaꞌ.
\v 34 Chai acsni chaꞌalh ju lakatꞌutu hora pus ju Jesús tsꞌau tꞌasalh. Naulh:
\p ―Eloi, Eloi, lama sabactani.
\p Ju chunch va nomputun: QuiDios. Tajuch ni va quiꞌakstu xaqꞌuimacꞌaꞌun.
\v 35 Chai takꞌasmatlh ju aliꞌin ju ixtayanalh anch. Chai talaclajunilh:
\p ―Akꞌasmatꞌit. Tꞌasani Elías ju makꞌaniya ixlapanac Dios.
\p
\v 36 Pus atsꞌalalh pumatam. Quikꞌavanilh ju tuꞌuꞌ tachi kꞌai pulhulh panimac laca tuꞌuꞌ tachi ju axvicnit. Lhiꞌanilh laꞌixquilhni ju Jesús lacalhman snivenkꞌa qꞌuiu. Va ixmakꞌotꞌuputunch. Chai alacjuni ju aliꞌin lapanacni ju anch ixtayanalh:
\p ―Capacxauch. Calaktsꞌinauch ni va camilh ju Elías pꞌuxnuꞌ ju lacacurus.
\p
\v 37 Pus ju acsnich tsꞌau tꞌasachokopa ju Jesús. Chai lana nilh.
\v 38 Ju acsnich lana lhtꞌit kꞌexlh laꞌixlacaitat ju kꞌai pumpuꞌ ju ixyocanta lacpujitat ni pulactꞌui ixpunavicanta. Tsuculh kꞌexniꞌ ju talaclhman tus lacatꞌun.
\v 39 Pus ju xacapitán taropajni ju ixya laꞌixꞌucxlacapuꞌ ju Jesús laktsꞌilh acsni tꞌasalh ju yuchi chai nilhch. Chai ju acsnich ju anuꞌ capitán naulh:
\p ―Ju ani lapanac slivasalh istsꞌalh Dios ixjunita.
\p
\v 40 Pus vachuꞌ ixtayanalh ju anch ju chakolun. Va ixtalaktsꞌinch ju Jesús ixlhimakat. Vachuꞌ ixtamakyanalh ju Malia amachakaꞌ Magdala chai ju Salomé chaich ju Malia ixnatiꞌan ju José chai ju putantꞌicstꞌi Jacobo.
\v 41 Ju anuch chakolun aktsꞌiya ixtachꞌakꞌokꞌata ju Jesús. Chai ixtalhichꞌalhcatnani acsni ixvilhcha ju xaꞌestado Galilea. Vachuꞌ ixtamakyanalh ju aliꞌin na ilhuꞌan chakolun ju ixtatꞌaminta kꞌaixtam ju Jesús ju lakꞌachakꞌan Jerusalén.
\s1 Macnucalh ju Jesús
\p
\v 42 Ju acsnich va xavísperas cꞌatan ixjunita. Chai acsni tokꞌoxalh pus ju lapanacni talaklakasilackꞌoxilh ju ixvaitiꞌan ju cataꞌuyaꞌ ni catuncunchokoyaꞌ ni avilhchan paꞌastacni cajunaꞌ ju acsni.
\v 43 Chai acsni tatsꞌisi pus ju José amachakaꞌ Arimatea caplich ju ixtalhanti chai lakꞌalh ju Pilato chai sqꞌuinlh ju ixlacatuna ju lijunto Jesús. Pus ju José makyuꞌunch ixjunita ju xalackꞌajin sia yuꞌunch ju israelitanin. Chai chux ju lapanacni ixtalhilaksi ju yuchi. Vachuꞌ ixpacxan ju anuꞌ avilhchan acsni calhinonkꞌoyaꞌ ju Dios ju ani lacatꞌun.
\v 44 Pus ju Pilato va lhamakꞌaninilh ni laich vatsꞌalhti canilh ju Jesús. Chai tꞌasanilh ju xacapitán chai sacmilh ni vasalh nita ju Jesús.
\v 45 Pus ju xacapitán ni naulh ni vasalh nita ju Jesús pus ju acsnich ju Pilato yau junilh ju José ni laich calhiꞌalh ixlacatuna ju lijunto.
\v 46 Pus ju José tamaulh lakatam lhman pumpuꞌ ju na kꞌox ixjunita. Chai acsni pꞌuxcalh ju ixlacatuna ju Jesús pus pupachꞌicalh lacalhman pumpuꞌ. Quimacnulh junta ixpulhucucucanta ju lactalhpa. Lhimalacchꞌaulh lacalakatam kꞌai lhkꞌajana chiux junta tamacnu.
\v 47 Pus ju Malia amachakaꞌ Magdala chai ju Malia ixnatich ju José talaktsꞌilh junta macnucalh ju lijunto Jesús.
\c 16
\s1 Ju Jesús taꞌacxtuchokolh
\p
\v 1 Acsni tapasalh ju avilhchan paꞌastacni pus ju Malia amachakaꞌ Magdala chai ju Salomé chai ju Malia ixnati ju Jacobo tatamaulh ju tuꞌuꞌ achꞌitin ju na cꞌus acamin. Va ixtalacamucꞌaputun ju ixlacatuna ju lijunto Jesús ni chunch ixtalhilanita.
\v 2 Pus vatsꞌisin ju lhitumincu acsni ixtꞌonachilh xajchiniꞌ ju avilhchan ju yuꞌunch tachaꞌalh junta ixmacnucanta ju lijunto Jesús.
\v 3 Ixtalaclajuni ixlhiꞌakstuꞌan acsni ixtaminta ju lacati:
\p ―Tis chavaich ju aquintamakꞌosunin ju kꞌai chiux ju quicyocanta junta acnui ju lijunto.
\p
\v 4 Para acsni talacaꞌalh talaktsꞌilh ju chiux ni makꞌosucanta. Chai ju anuꞌ chiux na kꞌai ixjunita.
\v 5 Chai acsni tatanu junta ixmacnucanta ju ixlacatuna ju Jesús pus talaktsꞌilh pumatam tsꞌalh. Ju yuchi ixvi laꞌixlhicanaꞌan junta ixtayanalh ju chakolun. Chai ixmakꞌanchꞌita lhman pumpuꞌ ju na xnapapa ixjunita. Pus ju chakolun na tatalhonilh.
\v 6 Para ju yuchi alacjuni:
\p ―Jantu atꞌalhanantꞌit. Ju uxijnan pꞌuxcꞌoyatꞌit ju Jesús amachakaꞌ Nazaret ju maquilhtacalh lacacurus. Pus taꞌacxtuchokolh. Jantu ani vi. Alaktsꞌintꞌit junta ixmamacanta ju ixlacatuna.
\v 7 Pus aꞌinchꞌokꞌochitꞌit. Aꞌunaꞌitꞌit ju Pitaluꞌ chai ju aliꞌin ixꞌalacmamakaꞌui ju Jesús ni capꞌulhꞌanach ju Jesús ju laxaꞌestado Galilea. Astan apꞌinaꞌitꞌit ju uxijnan chai anchach ju alaktsꞌintꞌachitꞌit tachi ju xatajunan acsni tucaꞌ ixmaknican.
\p
\v 8 Pus ju yuꞌunch taꞌatsꞌalataxtulh junta ixmacnucanta ixlacatuna ju Jesús acsni tucaꞌ ixlokꞌonchokota. Na ixtaꞌaxqꞌuipꞌipꞌitnintach ni na ixtatalhanan. Chai jantu tuꞌuꞌ xatajuni xamatiꞌ ni va ixtatalhananch.
\s1 Ju Jesús talacasunilh ju Malia amachakaꞌ Magdala
\p
\v 9 Pus ju Jesús na vatsꞌisin lhitumincu ju taꞌacxtuchokolh junta ixmakꞌacanta. Pus talacasunilh pꞌulhnan ju Malia amachakaꞌ Magdala. Yuchi ju ixmaxtunicanta pumatujun lhacaticurulhni laꞌixlacatuna.
\v 10 Chai ju yuchi alh amacꞌatsaniniꞌ ju ixꞌalactꞌaꞌucxuntꞌajun ju Jesús acsni tucaꞌ ixmaknican. Pus ju yuꞌunch na va ixtalacꞌamakꞌaninin chai na ixtalackꞌalhuvilanalh.
\v 11 Para mas takꞌasmatlh ni taꞌacxtuchokolh ju Jesús chai tꞌajun ju chavai chai ni ixlaktsꞌintach ju yuchi ju Malia para jantu lai ixtalacaꞌi.
\s1 Ju Jesús atalacasunilh ixpumatꞌuiꞌan ixꞌalacmamakaꞌui
\p
\v 12 Ju astanch ju Jesús atalacasunilh ixtꞌiyunꞌan lapanacni acsni ixtaꞌalhtanaꞌanta ju lacati. Para jantu chun ju atalacasunilh ju yuꞌunch tachi ju talacasunilh ju Malia.
\v 13 Pus ju yuꞌunch taꞌanchokolh amacꞌatsaninin ju aliꞌin ixtꞌatamakaꞌui ju Jesús. Para nin yuꞌunch jantu aquiclacaꞌicalh.
\s1 Ju Jesús amalakachalh ju ixꞌalacmamakaꞌui
\p
\v 14 Astan ju Jesús alactalacasunilh ixpumacautamꞌan acsni ixtatꞌajun venin. Pus alhilakꞌakꞌaima ni na pꞌas ixjunita ixꞌalhunutꞌan chai lana jantu lai ixtalhilaksita ju ixchivinti ju ixꞌajunita acsni tucaꞌ ixmaknicanta. Vachuꞌ alhilakꞌakꞌaima ni jantu tavanan ixtaquiclacaꞌita ju yuꞌunch ju ixtalaktsꞌinta ju Jesús acsni ixtaꞌacxtuchokota junta ixmacnucanta.
\v 15 Vachuꞌ alacjunich:
\p ―Apꞌinchitꞌit ixlhilacaputsꞌun ju lacamunutpaꞌ. Aꞌunaꞌitꞌit chux ju lapanacni ta yu lai putakꞌalhtaxtucan ni jantu ancan ju lacajipi.
\v 16 Ju calacaꞌiyaꞌ chai caꞌakpaxach catakꞌalhtaxtuyaꞌ. Para ju jantu calacaꞌiyaꞌ camucꞌanikꞌalhicanaꞌ ju ixtalakꞌalhin.
\v 17 Chai ju catalacaꞌiyaꞌ laich catanaviyaꞌ ju ani taxtokni ju capucꞌatsacanaꞌ ni vasalh quilapanacni tajunita. Laquintapakaꞌut cataxcomaxtuyach ju lhacaticuru laꞌixlacatunaꞌan ju lapanacni. Chai catachivinaꞌ ju tumpa chivinti ju jantu aktam tachivininta.
\v 18 Chai ni cataꞌokspꞌalalacachꞌapalh ju lu u ni catakꞌotꞌaꞌ ju taxtokni ju va lhinican jantu tuꞌuꞌ catitapasayaꞌ. Chai catamucꞌayaꞌ ixmacaꞌan laꞌixlacatunaꞌan ju takꞌankꞌanin chai palaich catanaviyaꞌ.
\s1 Ju Jesús alh lactꞌiyan
\p
\v 19 Astan acsni alactꞌachivinkꞌo ju ixꞌalacmamakaꞌui pus ju kꞌai ixꞌucxtinꞌan Jesús lana lhiꞌancalh tus lactꞌiyan chai tavi vanin junta vi ju Dios.
\v 20 Pus ju ixꞌalacmamakaꞌui taꞌalh vanta anchach nonin ta yu laich putakꞌalhtaxtucan. Chai isꞌakstu ixꞌucxtinꞌan Jesús ixꞌalactꞌachꞌalhcatnan. Ju yuchi ixmavasalai ju chivinti ju ixtanajun ju ixꞌalacmamakaꞌui. Ixpumavasalai lacakꞌai lhamakꞌan ju ixtanavi ju ixꞌalacmamakaꞌui. Chunch vasalh ixlai.