\id LUK
\ide UTF8
\h LUCAS
\toc1 LUCAS
\mt1 JU CHIVINTI IXLACATA JU CRISTO JU TSꞌOKLH JU LUCAS
\c 1
\s1 Ju Lucas najun tajuch ni va xatsꞌokꞌulai ju ani alhiqui
\p
\v 1 Na lhu lapanacni tatsꞌokꞌulata tijtamin taxtokni ju cꞌatsacan ni vasalh tapasata junta tꞌonau ju quijnanꞌan ju lhilacaꞌantauch ju Jesús.
\v 2 Chai ju yuꞌunch chai ju quitꞌin ictsꞌokꞌulatauch tachi ju quintajunin ju yuꞌunch ju talaktsꞌilh tuchi tapasalh chai ju yuꞌunch ju tamasulh ju chivinti ixlacata ju Jesús.
\v 3 Pus vachuꞌ na kꞌox iclhiula ju quitꞌin ni acꞌatsꞌoknunin ju uxintꞌi ji xakꞌai Teófilo chai sok acjunin ta yu xalhiꞌucxꞌanch. Para pꞌulan kꞌox icmachakxa tachi chun ju taxtokni ju tapasalh tus laꞌixputaiꞌulacan.
\v 4 Ju chunch lai palai apꞌumispꞌayaꞌ ni stavasalanti ju chivinti ju masunicꞌantꞌa.
\s1 Noncan ni catsucuyaꞌ ju Xivan
\p
\v 5 Acsni gobernador ixjunita ju Herodes ju laxaꞌestado Judea pus ixtꞌajun pumatam pali ju Zacarías ixjuncan. Ju yuchi makyuꞌunch ixjunita ju ixlapanacni ju Abías. Chai quilhmaktamin ju yuꞌunch ixtachꞌalhcatnan lacpujitat tachi ixꞌalhcanican. Chai ixꞌalin ju ixꞌamachakaꞌ ju ixpapanti ixjunita ju pꞌulhnan xakꞌai pali ju Aarón ixjuncan. Chai ju yuchi Elisabet ixjuncan.
\v 6 Chai ixtꞌiyunꞌan na lackꞌoxin lapanacni ixtajunita laꞌixmacni Dios. Si ixtaquiclacaꞌikꞌojui tachi ju najun laꞌixlhamapꞌaksin chai laꞌixchivinti Dios chai jantu xamatiꞌ lai ixꞌamucꞌani tuꞌuꞌ ixtalakꞌalhinꞌan.
\v 7 Para matiꞌ ixjunita ju isꞌaskꞌatꞌaꞌan ni va jantu lai ixꞌalin ju isꞌaskꞌatꞌa ju Elisabet chai ju acsnich na papanin ixtajunita.
\p
\v 8 Para lakatam avilhchan acsni ixtachꞌalhcatnan ixlapanacni ju Abías junta ixlakꞌayacan ju Dios pus vachuꞌ ixchꞌalhcatnan ju Zacarías.
\v 9 Chai tachi ju aktsꞌiya ixtalhilanita ju ixlhipaliꞌan pus istasacxtui pumatam pali ju catanuyaꞌ pulacni laꞌixpujitatꞌan ju istꞌaꞌisraelitanin chai anch ju caxavayach ju pum. Pus ju acsnich avilhchan yuchi ju Zacarías ju isacxtucanta ni caxavayach ju pum. Pus ju yuchi tanulh laꞌixpujitatꞌan.
\v 10 Chai acsni ixtꞌajun xavanaꞌ ju pum ju Zacarías pus ixtalhavatꞌan lapanacni ixtatꞌajun tꞌachivinin ju Dios makspaꞌ.
\v 11 Pus talacasunilh ixꞌanquilh Dios ju Zacarías. Tayachilh laꞌixlhicana ju mixa junta xavacan ju pum.
\v 12 Pus ju Zacarías acsni laktsꞌilh ju anquilh lana na lhamakꞌaninilh chai na talhanalh.
\v 13 Para ju anquilh chani junilh:
\p ―Jantu atꞌalhan ji Zacarías. Ju Dios kꞌasmatnin ju tuchꞌi sasqꞌuini chai ju miꞌamachakaꞌ camaklokꞌoniyan lakatam istsꞌalh chai alhimapꞌakꞌaꞌuyaꞌich Xivan.
\v 14 Chai alhikꞌachꞌanaꞌitꞌit chai na kꞌox alhiulayaꞌitꞌit. Chai vachuꞌ na lhu ju aliꞌin lapanacni catalhikꞌachanaꞌ acsni calokꞌonaꞌ.
\v 15 Chai ju yuchi xakꞌai cajunaꞌ laꞌixmacni Dios. Chai jantu cakꞌotꞌaꞌ ju vino nin tuꞌuꞌ atumpa pinquin. Chai ju Spiritu Santu calhinonkꞌoyaꞌ laꞌisꞌatsucunti tus acsni camaklokꞌoncanach.
\v 16 Chai ju yuchi caꞌamalhilacaꞌanichokoyaꞌ ju ixꞌucxtinꞌan Dios na lhu ju istꞌaꞌisraelitanin.
\v 17 Chai ju mintsꞌalh capꞌulhniyaꞌ ju Dios ju astan catalacasuyaꞌ. Chai chunch cajunaꞌ ju isꞌatsucunti chai ixtachaput tachi ju ixjunita ju makꞌaniya ixlapanac Dios ju Elías ixjuncan. Chai ju yuchi tamch caꞌamalacaꞌiniyaꞌ ixꞌalhunutꞌan ju xalacpaꞌitnich ni catamapainiyaꞌ ju isꞌaskꞌatꞌanꞌan. Chai ju israelitanin ju jantu lai talacaꞌini ixchivinti Dios pus ju yuchi tamch caꞌamalacaꞌiniyaꞌ ju ixꞌalhunutꞌan ni kꞌox cajunaꞌ ixtacꞌatsanꞌan tachi ju ixjunita ixtacꞌatsanꞌan ju makꞌaniya lapanacni ju soknicꞌa ixtajunita. Chai ni chunch ju canaviyaꞌ ju mintsꞌalh pus kꞌox cajunaꞌ ixꞌalhunutꞌan ju lapanacni chai cataꞌamaklhtayananaꞌ ju Dios acsni tavanan caminaꞌ. ―Chunch ju junilh ju anquilh.
\p
\v 18 Chai ju Zacarías chani akꞌalhtayanalh.
\p ―Tas acpucꞌatsayaꞌ ni vasalh chunch catapasayaꞌ tachi ju xaqꞌuiꞌuni. Pus ju quitꞌin ni na icpapach chai ju quiꞌamachakaꞌ na tꞌacuch.
\p
\v 19 Chai ju anquilh akꞌalhtayanalh. Junich:
\p ―Ju quitꞌin icGabriel chai icnavini ixlhichꞌalhcat ju Dios. Chai yuchi ju quimalakachachilh ni actꞌachivininch chai acjunin ju ani kꞌox chivinti.
\v 20 Para ju uxintꞌi anunulayaꞌ. Jantu lai atꞌichꞌivin tus acsni jantu chin ju avilhchan acsni caꞌuctaxtuyaꞌ ju ani taxtokni. Chunch aꞌunaꞌ ni va jantu xalacꞌaꞌi ju quinchivinti mas caꞌuctaxtuyaꞌ ju tuchi xacjunan acsni cachinaꞌ ju avilhchan ju lhilhcata ju Dios. ―Chunch ju junilh ju anquilh.
\p
\v 21 Pus ju ixtalhavat lapanacni ju ixtayanancha makspaꞌ ixtapacxan ju Zacarías chai na ixtalhamakꞌanininch ni jantu sai ixtaxtui lacpujitat.
\v 22 Para acsni tavanan taxtulh ju Zacarías pus jantuch lai axakꞌala ju lapanacni tachi ju aktsꞌiya ixtalai ju palijni. Alai va atamacyonilh ni jantu lai lana ixchivinin. Pus ju lapanacni tapumachakxa ni ca va tuꞌuꞌ xalaktsꞌin ju lacpujitat.
\p
\v 23 Pus acsni muctaxtukꞌo tachi chun ju avilhchan ju ilhcaꞌulanicanta ni cachꞌalhcatnalh lacpujitat pus ju Zacarías anchokolh laꞌixchakaꞌ.
\v 24 Chai acsni tapasalh lakatam lakatꞌui avilhchan pus ju Elisabet ju ixꞌamachakaꞌ ixjunita ju Zacarías pacxalh ju isꞌaskꞌatꞌa. Chai ju yuchi tatankꞌanu laꞌixchakaꞌ lakaquis malhquiyuꞌ. Va ixnajun:
\v 25 “Chunchach ju xaquinavini ju Dios ju chavai avilhchan ni xaquilaktsꞌin ta yu xacjunita. Va quimakꞌosunilh ju quimaxanti laꞌixꞌucxlacapuꞌan ju lapanacni ni jantu lai ixꞌalin ju quiꞌaskꞌatꞌa”. ―Chunch ju ixnajun ju Elisabet.
\s1 Pumatam anquilh naulh ni catsucuyaꞌ ju Jesús
\p
\v 26 Pus ju ixlhilakachaxan malhquiyuꞌ ju Dios malakachachokopa ju anuꞌ anquilh ju Gabriel juncan alakatam lakꞌachakꞌan junta Nazaret juncan. Ju yuchi anch vi ju xaꞌestado Galilea.
\v 27 Pus ju anquilh lakꞌalh pumatam atsiꞌ ju Malia ixjuncan. Ju yuchi isꞌasqꞌuininti ixjunita pumatam tsꞌalh ju José ixjuncan. Chai ju yuchi makꞌaniya ixpapanti ixjunita ju kꞌai ucxtin David.
\v 28 Chai acsni tanucha ju anquilh junta ixvi ju Malia pus chanich xajuni:
\p ―Xanchi. Slivasalh na kꞌai lamapainin ju xanaviniyan ju Dios ju tꞌavilan. ―Chunch xajuni ju anquilh.
\p
\v 29 Para ju Malia acsni laktsꞌilh pus na lhamakꞌaninilh ju ixchivinti chai pastaclich tuchi canomputulh ju chunch amacꞌaminti.
\v 30 Pus ju acsnich ju anquilh chani juni:
\p ―Jantu atꞌalhan ji Malia ni na kꞌai lamapainin ju tanavinitan ju Dios.
\v 31 Pus ju uxintꞌi apꞌacxanaꞌ ju miꞌaskꞌatꞌa. Chai amaklokꞌonaꞌ pumatam mintsꞌalh. Chai alhimapꞌakꞌaꞌuyaꞌich Jesús.
\v 32 Chai ju yuchi xakꞌai cajunaꞌ. Chai calhimispacanach ni istsꞌalh Dios junita. Chai ju Dios caxtakniyaꞌ ju ixpuꞌucxtin ixjunita ju makꞌaniya kꞌai ucxtin ju David ixjuncan. Caxtaknicanaꞌ ju miꞌaskꞌatꞌa ni ixpapanti cajunaꞌ ju yuchi.
\v 33 Chai ju yuchi kꞌai miꞌucxtinꞌan cajunaꞌ ju uxijnan ju israelitanin untꞌatꞌit. Jantu tavanan caꞌaclayaꞌ ju ixpuꞌucxtin ju yuchi. ―Chunch ju junilh ju anquilh.
\p
\v 34 Pus ju acsnich ju Malia chani junilh ju anquilh:
\p ―Pus tas calhiꞌalinach ju quiꞌaskꞌatꞌa ni matiꞌcaꞌ ju quimpapa.
\p
\v 35 Chai ju anquilh junich:
\p ―Yuchi ju Spiritu Santu ju calakminan chai laꞌixtachaput Dios ju anavicꞌanaꞌ chunch. Pus ixlhiyuchi ju askꞌatꞌa ju calokꞌonaꞌ salaka cajunaꞌ. Chai ni chunch junita pus jantu catinavilh ju alactuꞌunti. Chai calhimispacanaꞌ ni istsꞌalh Dios.
\v 36 Chai vachuꞌ ju milhilakꞌau Elisabet pacxanta ju isꞌaskꞌatꞌa mas na tꞌacuch. Chai mas ixlhimispacan ni jantu lai ixꞌalin isꞌaskꞌatꞌa para ju chavai lakachaxan malhquiyuꞌ junita ju xapacxanta ju isꞌaskꞌatꞌa.
\v 37 Pus matiꞌ tuꞌuꞌ ju xcai calhiula ju Dios. ―Chunch ju junilh ju anquilh.
\p
\v 38 Pus ju acsnich ju Malia chani junilh:
\p ―Pus ixlapanac Dios icjunita. Chach quinavi tachi ju ani xaqꞌuiꞌuni. ―Chunch ju naulh ju Malia.
\p Chai ju acsnich lana taxtulh ju anquilh junta ixvi ju Malia.
\s1 Ju Malia alh laktsꞌiniꞌ ju Elisabet
\p
\v 39 Pus acsni tapasalh lacatsꞌunin avilhchan pus ju Malia taxtulh. Lana soko alh ju xalacatalhpan laxaꞌestado Judea tus chaꞌalh junta ixvi lakatam lakꞌachakꞌan.
\v 40 Chai tanucha laꞌixchakaꞌ ju Zacarías chai macꞌamilh ju Elisabet.
\v 41 Chai acsni tavanan kꞌasmatlh ju Elisabet ju ixꞌamacꞌaminti ju Malia pus lana na lucunulh ju askꞌatꞌa laꞌixpajan. Chai ju Spiritu Santu lana lhinonkꞌo laꞌisꞌatsucunti ju Elisabet chai mapastꞌacꞌani tuchi canaulh.
\v 42 Pus na pꞌas ju chivinilh chai chani ju junilh ju Malia:
\p ―Palai kꞌox atsucunti ju xaxtakniyan ju uxintꞌi ju Dios. Palai jantu tachi chun ju mintꞌaꞌatsiꞌin. Chai vana na kꞌox atsucunti ju xaxtakni ju miꞌaskꞌatꞌa.
\v 43 Chai tis quintalakxtu ni laich xaquilakmin ju quitꞌin ju ixnati ju quiꞌucxtin.
\v 44 Pus acsni tavanan ickꞌasmatnin ju miꞌamacꞌaminti pus lana lucunulh ju askꞌatꞌa laquimpajan ni na ixkꞌachanch.
\v 45 Chai na paxcatꞌat ju uxintꞌi ni xalacꞌaꞌi ju chivinti ju ixꞌuncꞌan. Chai caꞌuctaxtuyach ju tuchi xajunan ju Dios. ―Chunch ju naulh ju Elisabet.
\q1
\v 46 Chai ju acsnich ju Malia chani naulh:
\q1 ―Slivasalh na iclakꞌayai ju Dios laquintacꞌatsan.
\q1
\v 47 Chai na iclhikꞌachanch ju Dios ju quiꞌamakꞌalhtaxtunuꞌ junita.
\q1
\v 48 Quimapainilh mas jantu tuꞌuꞌ quintapalhni ixjunita. Quitꞌin ju ixlapanac icjunita.
\q1 Chai tus chavai tachi chun ju lapanacni aquintajunach ni slivasalh na paxcat ju quitꞌin.
\q1
\v 49 Pus ju Dios na tachapun chai yuchi ju xaquinavini na kꞌai lhamakꞌan. Chai ju yuchi na salaka.
\q1
\v 50 Chai ju yuchi aꞌaktaijunun lacaꞌamapaininti tachi chun ju tatalhoni ju yuchi mas va tavananch ju catatsuculh.
\q1
\v 51 Chai ju tuchi navi ju yuchi putasui ni na tachapun ju yuchi.
\q1 Jantu tuꞌuꞌ ixtapalhni anavi ju yuꞌunch ju na ixtalhitakꞌayai ixꞌatalanintiꞌan laꞌixꞌalhunutꞌan.
\q1
\v 52 Amakꞌosu ju laꞌixpuꞌucxtinꞌan ju xalackꞌajin.
\q1 Chai alakꞌayalh ju jantu tuꞌuꞌ ixtapalhniꞌan ixꞌalaktsꞌincan.
\q1
\v 53 Chai ju na tacꞌatsai ni alin ixmaktasqꞌuinitꞌan ni salaka catava pus ju Dios axtaknilh.
\q1 Chai ju na va kꞌai tacꞌatsai ju laꞌisꞌatsucuntiꞌan pus ju Dios jantu tuꞌuꞌ axtaknilh ju yuꞌunch.
\q1
\v 54 Ju yuchi quintaꞌaktaijun ju quijnanꞌan ju israelitanin juntau ju ixlapanacni juntau.
\q1 Chai lhinavilh chunch ni cacꞌatsayau ni jantu ixcapta ju anuꞌ lamapainin ju ixnajunta ni canaviyaꞌ.
\q1
\v 55 Chunch tachi ju ajuni ju makꞌaniya quilacpaiꞌan acsni ajuni ni capastꞌacꞌaꞌ ju lamapainin ju kꞌalhtasunilh ju Abraham chai ixꞌamaskꞌatꞌanti.
\q1 Chai ju anuꞌ lamapainin ju aquintanaviniyan aquintapuꞌaktaijukꞌalhiyan. ―Chunch ju naulh ju Malia.
\p
\v 56 Pus ju Malia tꞌatolhcha ju Elisabet tachi lakatꞌutu malhquiyuꞌ. Astan anchokolh laꞌixchakaꞌ.
\s1 Tsuculh ju Xivan
\p
\v 57 Pus ju Elisabet acsni chaꞌalh ju ixpulakꞌauch pus maklakꞌaulh pumatam istsꞌalh.
\v 58 Pus acsni takꞌasmatlh ju ixtꞌatolhnin chai ju ixlhiꞌalakꞌavin ni Dios ju xaꞌaktaijui lacakꞌai amapaininti pus na tatꞌakꞌachalh ju yuchi.
\v 59 Chai acsni chaꞌalh ju ixlhilakatsajin avilhchan pus tamilh chꞌucꞌunin ju ixꞌaxtꞌakꞌa ju anuꞌ tsꞌalh tachi ju ixtalhilanita ju israelitanin. Chai ixtalhixakꞌalaputun Zacarías ni va ixtucai ixtaꞌulaniputun ju ixpai.
\v 60 Para ju ixnati ju askꞌatꞌa lana ajuni:
\p ―Jantu chun cajuncanaꞌ. Ma Xivan cajuncanaꞌ.
\p
\v 61 Chai ju yuꞌunch tajuni:
\p ―Tajuch. Jantu xamatiꞌ ju milhiꞌalakꞌavin ju chunch juncan.
\p
\v 62 Pus ju acsnich taxakꞌala ju ixpai. Va ixtatamacyonich acsni istasacmiputun tis cajuncanach ju istsꞌalh.
\v 63 Chai ju yuchi sqꞌuinlh ju tuꞌuꞌ junta lai caꞌatsꞌoknulh tuchi cajuncanaꞌ ju istsꞌalh. Chai tsꞌokꞌulalh ni Xivan cajuncanaꞌ. Pus ixchuxꞌan ju anch ixtavilanalh va talhamakꞌaninilh.
\v 64 Pus lana takꞌoxinilh ju ixquilhni ju Zacarías chai ju yuchi tsuculh chiviniꞌ chai lakꞌayalh ju Dios.
\v 65 Pus na tatalhanalh ju ixtꞌatolhnin. Chai tachi chun ju lapanacni ju ixtatꞌajun ju xalacatalhpan ju xaꞌestado Judea tacꞌatsakꞌo tachi chun ju ani taxtokni.
\v 66 Chai tachi chun ju takꞌasmatlh ju ani taxtokni va tachi ixtapastactꞌajun laꞌixꞌalhunutꞌan. Chai ixtalaclajuni:
\p ―Tis atsucunti nuꞌ ju capacxanaꞌ ju anuꞌ askꞌatꞌa.
\p Chunch ju ixtalaclajuni ju lapanacni ni na ixꞌaktaijui ju anuꞌ askꞌatꞌa ju Dios.
\s1 Ju Zacarías lakꞌaya ju Dios
\p
\v 67 Pus ju Spiritu Santu lhinaulh laꞌisꞌatsucunti ju Zacarías ju ixpai Xivan ixjunita. Chai ju yuchi tsuculh nonaꞌ ixchivinti Dios. Pus chani naulh:
\q1
\v 68 ―Chach lakꞌayacalh ju quiDiosꞌan ju israelitanin juntau ni quintaquilaktsꞌinchinch chai quintaquimalakxtuchinch ju quijnanꞌan ju ixlapanacni juntau.
\q1
\v 69 Ju yuchi quintaxtaknitan pumatam amakꞌalhtaxtunuꞌ ju na tachapun junita.
\q1 Chai ju yuchi ixpapanti junita ju David ju ixlapanac Dios ixjunita.
\q1
\v 70 Ju Dios naulh ni chunch ju catapasayaꞌ. Naulich laꞌixchivintiꞌan ju ixlapanacni ju isꞌasacxtuta ni catanonaꞌ ixchivinti tus makꞌanchich.
\q1
\v 71 Ju yuchi naulh ni aquintamakꞌalhtaxtuyan laꞌixmacaꞌan ju quintꞌalaxcaiꞌan chai tachi chun ju jantu quintalaktsꞌimputunan.
\q1
\v 72 Ju chunch ju Dios amuctaxtuni ju anuꞌ chivinti ju akꞌalhtasunilh ju makꞌaniya quilacpaiꞌan acsni ajuni ni caꞌaꞌaktaijuyach lacaꞌamapaininti.
\q1 Chai putasui ni jantu xacꞌapꞌa ju chivinti ju xaꞌatꞌatakꞌoxi ju yuꞌunch.
\q1
\v 73 Yuchach ju anuꞌ chivinti ju ixjunita ju makꞌaniya quimpaiꞌan Abraham chai mavasalanilh ni vasalh canaviyaꞌ.
\q1
\v 74 Ju yuchi naulh ni aquintamakꞌalhtaxtuyan laꞌixmacaꞌan ju quintꞌalaxcaiꞌan.
\q1 Ju chunch ni laich cachꞌalhcatnaniyau ju yuchi chai jantu catalhananau.
\q1
\v 75 Chai jantu caꞌalactuꞌununau para va tachi canaviyau ju soknicꞌa.
\q1 Chai va tachi chunch ju catsucuyau chux avilhchan acsni tꞌonau ju ani.
\q1
\v 76 Chai ju uxintꞌi ji quintsꞌalh alhimispꞌacꞌanaꞌ ni ixlapanac Dios unitꞌa chai anonaꞌ ixchivinti.
\q1 Chunch ju alhimispꞌacꞌanaꞌ ni uxintꞌi ju aꞌunaꞌ ju lapanacni ni catalakꞌoxilh ixꞌatalacpastꞌacꞌatꞌan ni caminaꞌ ju ixꞌucxtinꞌan. Chunch ju alayaꞌ acsni tucaꞌ min ju yuchi.
\q1
\v 77 Chai uxintꞌi ju amamachꞌakxaniyaꞌ ju lapanacni ni catatakꞌalhtaxtuyaꞌ acsni caꞌamacꞌacxanicanaꞌ ju ixꞌalactuꞌuntiꞌan.
\q1
\v 78 Chai chunchach ju lai caꞌanavicanaꞌ ni quintanavinitan lamapainin ju Dios ni quintamacaminin ju aktsꞌiya ixnoncan ni camalakachatachilh.
\q1
\v 79 Chai ju yuchi camapulhcuniyaꞌ laꞌixꞌatalacpastꞌacꞌatꞌan ju yuꞌunch ju tatꞌajuncaꞌ tachi ju va lacaꞌatatsꞌisni chai na taꞌamakꞌaninin ni na tatalhoni ju aninti.
\q1 Chai ju yuchi vachuꞌ aquintamalhtanayan ju laxati junta alin ju akꞌoxamixnit laꞌixmacni Dios. ―Pus chunch ju naulh ju Zacarías.
\p
\v 80 Pus ju askꞌatꞌa Xivan takꞌaya. Chai ixlhichux ixꞌalhunut ixlhilaksi ju Dios. Chai anch ju ixtꞌajun junta jantu xamatiꞌ ixtꞌajun tus acsni atalacasunilh ju istꞌaꞌisraelitanin ni ixlapanac Dios ixjunita.
\c 2
\s1 Tsuculh ju Jesús
\p
\v 1 Pus ju acsnich ju kꞌai ucxtin Augusto lhinaulh isꞌatsꞌokꞌulaca chux ju lapanacni ixlhilacaputsꞌun ju lacamunutpaꞌ.
\v 2 Chai ju ani yuchi ju xapꞌulhnan atsꞌokꞌulanti ixjunita ju ixtalhavat lapanacni. Chai ju acsnich Cirenio xagobernador ixjunita ju xaꞌestado Siria.
\v 3 Chai chux ju lapanacni anch ju ixtaꞌanchokoi istsꞌokꞌulacaꞌan junta aktsꞌiya ixtꞌunchꞌan ixjunita ju pumatamin.
\v 4 Pus ju José vachuꞌ taxtulh ju lakꞌachakꞌan Nazaret laxaꞌestado Galilea. Alh ju lakꞌachakꞌan Belén laxaꞌestado Judea. Pus ju Belén ixtꞌun ixjunita ju makꞌaniya lapanac ju David ixjuncan. Chai ju José makꞌaniya ixpapanti ixjunita ju David chai yuchi lhiꞌalh ju anch.
\v 5 Chai acsni alh tatsꞌoknuꞌ ju José pus tꞌaꞌalh ju Malia ju ixꞌamachakaꞌ ixjunita. Para tachi ju va isꞌasqꞌuininticaꞌ ju ixlaktsꞌin. Pus tꞌaꞌalh ju Malia chai ju yuchi ixꞌakꞌainanta.
\v 6 Chai acsni ixtavilanancha anch pus chaꞌalh ju avilhchan acsni ixlokꞌomputunch.
\v 7 Chai maklakꞌaulich lakatami istsꞌalh. Chai pachꞌilh lacapumpuꞌ chai mujulh junta ixtavajin ju caballo. Anchach ju satsucui ju Jesús ni va jantuch lai ixtalhijun ju lacachakaꞌ junta laich catatavi.
\s1 Ju ixlhistacnin borregojni talaktsꞌilh ju anquilhnin
\p
\v 8 Chai ixtaꞌalin ju ixlhistacnin borregojni vanin ju lakꞌachakꞌan Belén. Chai ju yuꞌunch ixtatꞌajun lhistacnin ju ixborregoꞌan ju anuꞌ atatsꞌisni acsni tsuculh ju Jesús.
\v 9 Chai acsni talhicꞌatsanalh chincha ju ixꞌanquilh Dios junta ixtavilanalh. Chai na xlapꞌapꞌa ixmaktajita junta ixtavilanalh ju ixlhistacnin borregojni. Pus lana na tatalhanalh.
\v 10 Para ju anquilh chani ajuni:
\p ―Jantu atꞌalhanantꞌit ni va iclajumputunau lakatam chivinti ju kꞌox alhiulayaꞌitꞌit. Chai ixlacata yuchi slivasalh akꞌachꞌanaꞌitꞌit ju uxijnan chai tachi chun ju lapanacni.
\v 11 Pus chavai tsuculh ju miꞌamakꞌalhtaxtunuꞌan ju ani laꞌixlakꞌachakꞌan David. Yuchi ju ixnoncan camalakachatachilh ju Dios. Yuchi ju miꞌucxtinꞌan.
\v 12 Chai chani ju apꞌumispꞌayaꞌitꞌit. Pus alhitꞌaꞌuyaꞌitꞌit ju askꞌatꞌa ni pachꞌicanta lacapumpuꞌ chai mucanta junta vajin ju caballo. ―Chunch ju ajunilh ju anquilh.
\p
\v 13 Chai lana va tam pantsꞌiquis na lhu xatatꞌatalacasui ju ixtꞌaꞌanquilhnin. Chai ixtalakꞌayai ju Dios chai chani ixtanajun:
\q1
\v 14 ―Chach lakꞌayacalh ju Dios ju vilhcha talaclhman.
\q1 Chai ju ani lacatꞌun caꞌalinaꞌ ju akꞌoxamixnit ixlacataꞌan ju xaꞌanavini lamapainin ju Dios ―chunch ju tanaulh ju ixtalhavat anquilhnin.
\p
\v 15 Chai astan ju anquilhnin taꞌanchokolh ju lactꞌiyan. Pus ju acsnich ju ixlhistacnin borregojni talaclajunich ju sia yuꞌunch:
\p ―Caꞌauch ju chavai ju lakꞌachakꞌan Belén. Caꞌau laktsꞌinin ju tuchi alinch. Ju tuchi xaquintamacꞌatsaniyan ju Dios.
\p
\v 16 Pus lana vatsꞌalhti taꞌalh. Chai talhitajulh ju Malia chai ju José chai ju askꞌatꞌa ni ixtꞌajunch junta vajin ju caballo.
\v 17 Chai acsni talaktsꞌilh pus tamacꞌatsanilh ju lapanacni ju tuchi ixꞌajuncanta ixlacata ju anuꞌ askꞌatꞌa.
\v 18 Chai tachi chun ju ixtakꞌasmatꞌa va talhamakꞌaninilh tuchi ixtanajunch ju ixlhistacnin borregojni.
\v 19 Para ju Malia va ixmakꞌakꞌojuich tachi chun ju ani taxtokni laꞌixꞌalhunut. Va laꞌisꞌakstu ispastactꞌajun.
\v 20 Chai ju ixlhistacnin borregojni taꞌanchokolh laꞌixlhichꞌalhcatꞌan. Chai ixtalakꞌayai ju Dios chai ixtajuni lakꞌailaktsꞌiuch ixlacata tachi chun ju ani taxtokni ju ixtakꞌasmatꞌa chai ju ixtalaktsꞌinta. Pus chunch lana uctaxtukꞌo tachi ju ixꞌajuncanta.
\s1 Makꞌaxtaknicalh ju askꞌatꞌa ju Dios
\p
\v 21 Chai acsni chaꞌalh ju ixlhilakatsajin avilhchan pus tachꞌucꞌunilh ju ixꞌaxtꞌakꞌa ju askꞌatꞌa chai lhimapakaꞌucalh Jesús ni chunchach ju ixnajunta ju anquilh mas tucaꞌ ixpacxan ju ixnati.
\p
\v 22 Ju laꞌixlhamapꞌaksin ju Moisés ilhcaꞌulani tam chakoꞌulh ju avilhchan acsni calaktsꞌincalh ni tachi ju va lhquiliqui acsni istsucui tam isꞌaskꞌatꞌa. Pus acsni tavanan taꞌaktsa ju anuꞌ avilhchan ixlacata ju Malia pus talhiꞌalh ju askꞌatꞌa Jesús lacakꞌai ixpujitatꞌan ju istꞌaꞌisraelitanin ju lakꞌachakꞌan Jerusalén. Anch ju tamakꞌaxtaknilh ju Dios ju askꞌatꞌa Jesús.
\v 23 Pus chunchach ju tanavi ni chunchach ju najun laꞌixlhamapꞌaksin ju Moisés. Pus chani najun: “Tachi chun ju xapꞌulhnan askꞌatꞌa ju catsucuyaꞌ ni tsꞌalh pus camispacanach ni ixꞌanuꞌ ju Dios”. Chunch ju najun laꞌixlhamapꞌaksin Moisés.
\v 24 Chai vachuꞌ najun laꞌixlhamapꞌaksin Moisés ni caxtakniyaꞌ tuꞌuꞌ atapacxat ju Dios ni salaka calaktsꞌinchokocalh tam chakoꞌulh. Pus ju va quilhpatinin laich cataxtꞌakꞌaꞌ lakatꞌui lakꞌaxkꞌavan. U ni jantu pus lakatꞌui palumax. Chai yuchach ju taxtaklh ju Malia chai ju José.
\p
\v 25 Chai ju lakꞌachakꞌan Jerusalén ixꞌalin pumatam lapanac ju Simeón ixjuncan. Chai ju yuchi na soknicꞌa ixjunita laꞌixmacni Dios chai na ixtalhoni ju Dios. Chai ju yuchi ixpacxantajich ju anuꞌ ju ixnoncan camalakachatachilh ju Dios ni caꞌamakꞌalhtaxtuyaꞌ ju israelitanin. Chai ju Spiritu Santu ixlhinajun laꞌisꞌatsucunti.
\v 26 Chai ju Spiritu Santu ixmacꞌatsanita ju Simeón ni jantu catini tus acsni jantucaꞌ laktsꞌin ju yuchi ju camalakachatachilh ju Dios.
\v 27 Chai ju Spiritu Santu macꞌatsani ni caꞌalh ju acsnich ju lacpujitat. Chai lana acsnich ju tatꞌaquilalh lacpujitat ju askꞌatꞌa Jesús ju José chai ju Malia. Va ixtamakꞌaxtakniputun ju askꞌatꞌa ju Dios tachi ju talhilanita lacalhamapꞌaksin.
\v 28 Pus ju Simeón cꞌatsalh ni yuchi junita ju Jesús ju anuꞌ ju ixnoncan camalakachatachilh ju Dios. Chai ju Simeón lana chꞌixlh ju askꞌatꞌa. Chai lakꞌaya ju Dios. Chai chani naulh:
\q1
\v 29 ―Ju chavai ji Dios laich alakꞌaꞌitꞌi ni acniyaꞌ ju quitꞌin ju milapanac icjunita ni matiꞌ tuꞌuꞌ ju chavai ju aclhamakꞌanininaꞌ.
\q1 Laich acniyaꞌ ju chavai ni iclaktsꞌinta ju yuchi ju qꞌuinkꞌalhtꞌasunitꞌa ni aclaktsꞌinaꞌ acsni tucaꞌ icni.
\q1
\v 30 Pus lai lhikꞌach acnilh ju chavai ni iclaktsꞌinta ju yuchi ju xamalakꞌachꞌayachꞌitꞌa ni amakꞌalhtaxtunuꞌ junita.
\q1
\v 31 Chai macꞌatꞌantꞌa ju yuchi ni laich catamispayaꞌ tachi chun ju lapanacni.
\q1
\v 32 Ju yuchi chunch cajunaꞌ tachi ju tuꞌuꞌ maclhcu ni camapulhcuniyaꞌ ju ixtacꞌatsanꞌan ju jantu israelitanin tajunita.
\q1 Chai ixlacata yuchi aclakꞌayacanau ju quijnan ju israelitanin icjuntau ju milapanacni icjuntau ―chunch ju naulh ju Simeón.
\p
\v 33 Chai ju José chai ju ixnati ju Jesús na talhamakꞌaninilh ju taxtokni ju ixnoncan ixlacata ju askꞌatꞌa Jesús.
\v 34 Chai ju Simeón sqꞌuinilh ju Dios ni kꞌox catatsucuyaꞌ chai chani ju junilh ju Malia ixnati ju askꞌatꞌa:
\p ―Ju ani askꞌatꞌa lhcaꞌulacanta ni catapukꞌalhkꞌosaꞌ na lhu ju quintꞌaꞌisraelitaninꞌan chai vachuꞌ na lhu catapukꞌostayayaꞌ. Chai ixlacata yuchi ju lapanacni catapucꞌatsayaꞌ ni laich catakꞌalhtaxtucanaꞌ. Para na lhu ju jantu kꞌox catalhiulayaꞌ.
\v 35 Chai ni chunch ju catalayaꞌ ju lapanacni pus camalacasucanach ju ixꞌatalacpastꞌacꞌatꞌan ju alin laꞌixꞌalhunutꞌan na lhu lapanacni. Chai ju uxintꞌi ji ixnati slivasalh na amakꞌalhkꞌajnanaꞌ ixlacata tachi chun ju ani taxtokni ju catapasayaꞌ. ―Chunch ju naulh ju Simeón.
\p
\v 36 Chai vachuꞌ ixtꞌajun ju acsnich pumatam chakoꞌulh ju ixnajun ixchivinti Dios. Ju yuchi Ana ixjuncan. Istsiꞌ ixjunita ju Fanuel chai ixpapanti ju Aser. Chai ju yuchi na tꞌacuch ixjunita. Pus acsni tavanan ixꞌicanta pus va lakatujun cꞌata ju tꞌatsuculh ju ixpapa.
\v 37 Chai acsni tavanan nimacontilacalh pus va isꞌakstu ju tsuculh ochenta y cuatro cꞌata. Pus ju yuchi jantu tavanan ixtaxtui ju lacpujitat. Para chux tokꞌoxai chai chux tuncujun ixlakꞌayai ju Dios. Istascajai chai ixtꞌachivinin ju Dios.
\v 38 Pus ju yuchi vachuꞌ acsnich ju alakmilh ju José chai ju Malia. Chai vachuꞌ junilh lakꞌailaktsꞌiuch ju Dios ixlacata ju askꞌatꞌa. Chai astan ixꞌalacjuni ixlacata ju Jesús tachi chun ju amachakꞌan Jerusalén ju ixtapacxantaji ju ixputakꞌalhtaxtunꞌan.
\s1 Taꞌanchokolh ju lakꞌachakꞌan Nazaret
\p
\v 39 Chai acsni tamuctaxtukꞌo tachi chun ju taxtokni tachi ju ixnajun laꞌixlhamapꞌaksin ju Dios pus taꞌanchokolh laxaꞌestado Galilea. Laꞌixlakꞌachakꞌanꞌan junta Nazaret ixjuncan.
\v 40 Pus ju askꞌatꞌa Jesús takꞌaya chai palai tachapun va. Chai palai acꞌatsanalh. Chai va tachi ixnavini lamapainin ju Dios.
\s1 Ju Jesús lacpujitat
\p
\v 41 Ju José chai ju Malia ixtaꞌanch chux cꞌata ju lakꞌachakꞌan Jerusalén acsni ixꞌalinacha ju anuꞌ cꞌatan ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
\v 42 Chai ju Jesús acsni pacxalh lakacautꞌui cꞌata pus vachuꞌ alactꞌaꞌalh ju yuꞌunch ju lakꞌachakꞌan Jerusalén tachi ju aktsꞌiya ixtalai acsni ixꞌalinacha ju cꞌatan.
\v 43 Chai acsni lakꞌolh ju cꞌatan pus ju José chai ju Malia tataxtuchokolh ju lakꞌachakꞌan. Ixtaꞌanchokoputun laꞌixchakaꞌan. Para ju askꞌatꞌa Jesús ixtamacontacha ju lakꞌachakꞌan Jerusalén para jantu istacꞌatsai ju José nin ixnati.
\v 44 Va ixtanajun ni ca anch ixmakꞌanta lacatalhavat. Pus taꞌalhtanalh tam vilhchan. Chai astan tasacmi ju ixlhiꞌalakꞌavin chai ju ixtꞌalamispanchꞌan ni ixtalaktsꞌinta ju Jesús.
\v 45 Chai acsni jantu talhitaju pus taꞌanchokopa ju lakꞌachakꞌan Jerusalén. Va tapuxcolhiꞌalh.
\p
\v 46 Pus lhitajucalh ixlhilakatꞌutuch avilhchan ju laꞌixpujitatꞌan ju istꞌaꞌisraelitanin. Anch ixmakvi junta ixtavilanalh ju yuꞌunch ju ixtamasui tuchi ixnomputun ju lhamapꞌaksin. Pus ju Jesús ixtꞌajun akꞌasmatniniꞌ tuchi ixtanajun chai isꞌasacmininch vachuꞌ.
\v 47 Chai tachi chun ju ixtakꞌasmatnich va ixtalhamakꞌaninin ju ixꞌacꞌatsanti ju anuꞌ askꞌatꞌa ni na sok ixꞌakꞌalhtayanan.
\v 48 Para ju José chai ixnati ni talaktsꞌilh na talhamakꞌaninilh. Chai ju ixnati chani juni:
\p ―Tajuch ji quintsꞌalh ni va chunch xaquilaꞌulhtuyau. Ju ani mimpai chai ju quitꞌin na iclalhamakꞌanininau ni iclapuxcolhitꞌonauch.
\p
\v 49 Para ju Jesús chani ajuni:
\p ―Tajuch ni jantu iscꞌatsꞌayatꞌit taꞌanchach ju icvi. Ja va jantu cꞌatsꞌayatꞌit ni tasqꞌuini ni acnavinilh ju ixlhichꞌalhcat ju quimpai.
\p
\v 50 Para ju yuꞌunch jantu lai tamachakxanilh ixchivinti tuchi ju lhakꞌalhtayanalh.
\p
\v 51 Pus ju Jesús lana alactꞌamincha. Taminchokolh laꞌixchakaꞌan ju lakꞌachakꞌan Nazaret. Chai ju yuchi aquiclacaꞌinilh ju José chai ju Malia. Pus ju ixnati va ixmakꞌai tachi chun ju ani taxtokni laꞌixꞌalhunut.
\v 52 Chai ju Jesús palai ixtꞌajun lhitaꞌokslanaꞌ ju ixtacꞌatsanti chai ju ixtakꞌayanti. Chai ju Dios ismasuni ixꞌamapaininti ju askꞌatꞌa Jesús. Chai ju lapanacni vachuꞌ na kꞌox talhiula ju askꞌatꞌa.
\c 3
\s1 Ju Xivan amalani ju lapanacni
\p
\v 1 Acsni ixtailhiꞌanta ju lakacauquisi cꞌata laꞌixpuꞌucxtin ju Tiberio ju xakꞌai tucan ixjunita pus Poncio Pilato gobernador ixjuntacha ju xaꞌestado Judea. Chai ju Herodes ixlhinajun ju xaꞌestado Galilea. Chai ixlakꞌau ju Herodes ju Pilipe ixjuncan yuchi ju gobernador ixjuntacha ju xalacatꞌun Iturea chai ju lacatꞌun Traconite. Chai ju Lisanias gobernador ixjuntacha ju xalacatꞌun Abilinia.
\v 2 Chai ju Anás chai ju Caifás yuꞌunch ju xalackꞌajin palijni ixtajunita. Pus acsni ixtatꞌajun ju ani xalackꞌajin chai ju ani palijni pus acsnich ju xakꞌala ju Dios ju Xivan junta ixvilhcha junta va aseknicꞌa. Yuchi ju Xivan ju istsꞌalh Zacarías ixjunita.
\v 3 Pus ju yuchi ucsuntsuculh chux ju xalacatꞌun laꞌixquilhtuꞌ ju kꞌai xcan Jordán. Ixꞌajuni ju lapanacni ni catamacaulh ju ixꞌalactuꞌuntiꞌan chai cataꞌakpaxlh. Chai ju chunch ju Dios caꞌamacꞌacxaniyaꞌ ixꞌalactuꞌuntiꞌan.
\v 4 Chai acsni chunch ju lalh ju Xivan pus uctaxtulh ju ixchivinti ju Isaías ju makꞌaniya lapanacni ixjunita. Pus ju yuchi ixnajun ixchivinti Dios chai chani ju xatsꞌokꞌulai:
\q1 Pꞌas chivinin pumatam junta aseknicꞌa junita. Chai chani najun:
\q1 “Alakꞌoxitꞌit ju miꞌalhunutꞌan ni caminaꞌ ju ucxtin.
\q1 Alasoknicꞌatꞌit ju miꞌatsucuntiꞌan junta jantu sok junita.
\q1
\v 5 Tachi chun ju tacꞌacxniyan laꞌixmacni Dios ma axtꞌaknicꞌanaꞌitꞌit.
\q1 Chai tachi chun ju tuꞌuꞌ kꞌai u ju tuꞌuꞌ mas va lacatꞌicstꞌi ju tasastucniyan lamiꞌatsucuntiꞌan ma amakꞌosunicꞌanaꞌitꞌit.
\q1 Chai tachi chun ju jantu soknicꞌa lamiꞌatsucuntiꞌan ma alasoknicꞌanaꞌitꞌit.
\q1 Chai tachi chun ju macxcai ju alincaꞌ laꞌisꞌatsucuntiꞌan ju talhilacaꞌanta ju Jesús ma camakꞌosunicanaꞌ.
\q1
\v 6 Chai tachi chun ju lapanacni ma catalaktsꞌinaꞌ ju macaminta ju Dios ni laich catatakꞌalhtaxtuyaꞌ ju yuꞌunch”.
\m Chunch ju naulh ju makꞌaniya lapanac ju Isaías ixjuncan.
\p
\v 7 Pus ju Xivan chani ixꞌajuni ju lapanacni ju ixtalakmin ni va ixtaꞌakpaxputun laꞌixmacni ju yuchi:
\p ―Chunch ju lapꞌutꞌunatꞌit tachi ju tuꞌuꞌ lu. Ju yuchi va acsnich ju atsꞌalai acsni xavacan ju achꞌitin junta tꞌajun. Pus vachuꞌ chun ju lapꞌutꞌunatꞌit ju uxijnan. Va acsnich ju tamch pꞌastꞌacpꞌutꞌunatꞌit ni xakꞌasmatꞌatꞌit ni catamamakꞌalhkꞌajniyan ju Dios. Tis chavaich ju xatajunan ni anaviyaꞌitꞌit tuꞌuꞌ ni jantu catamamakꞌalhkꞌajniyan ju Dios acsni cachinaꞌ ju anuꞌ avilhchan.
\v 8 Pus ni vasalh tꞌakꞌalhtꞌaxtꞌupꞌutꞌunatꞌit pus amalacꞌasutꞌit lamiꞌatsucuntiꞌan ni macꞌontꞌatꞌit ju miꞌalactuꞌuntiꞌan. Chai jantuch va kꞌaya anaꞌuntꞌit ju lamiꞌalhunutꞌan ni laich atꞌakꞌalhtꞌaxtꞌuyaꞌitꞌit va ixlacaꞌatalh ni makꞌaniya ixꞌapapanatnich Abraham untꞌatꞌit. Jantu chun anaꞌuntꞌit ni iclajunau ni va ixlacasqꞌuilh ju Dios ni lhu caꞌalilh ixꞌapapanatnich ju Abraham pus laich caꞌixmalokꞌoni ju ani ma chiux ni caꞌixtava ixꞌapapanatnich ju Abraham.
\v 9 Chai mas chavai va lacatsꞌunin ticꞌacx tus caꞌamamakꞌalhkꞌajniyaꞌ ju lapanacni ju Dios. Chai tachi chun ju lapanacni ju jantu tasui laꞌisꞌatsucuntiꞌan ni vasalh tamacajunta ju ixꞌalactuꞌuntiꞌan pus caꞌamamakꞌalhkꞌajnicanaꞌ.
\p
\v 10 Pus ju acsnich ju lapanacni tasacmi. Chani tajuni:
\p ―Ni vasalh tachi ju quilajunau pus tijuch ju acnaviyau.
\p
\v 11 Chai ju Xivan akꞌalhtailh. Chani ajuni:
\p ―Pus ju alin kꞌalhtꞌui ixpumpuꞌ chach xtaknilh ju matiꞌ ixpumpuꞌ. Chai ju alin ixvaiti pus vana caxtaknilh lacatsꞌunin ju matiꞌ tuꞌuꞌ ju caꞌulh.
\p
\v 12 Pus vachuꞌ talakmilh ju Xivan ju achꞌinin. Vachuꞌ va ixtaꞌakpaxputun. Chai tajuni:
\p ―Amamakaꞌunuꞌ tijuch ju acnaviyau ju quijnan ni jantu acmamakꞌalhkꞌajnicanau.
\p
\v 13 Chai ju Xivan ajuni:
\p ―Jantu na laklhu achꞌinintꞌit tachi ju jantu lhijun ju lacalhamapꞌaksin.
\p
\v 14 Chai taꞌasacminin vachuꞌ ju taropajni. Tajuni:
\p ―Chai ju quijnan tijuch ju acnaviyau.
\p Chai ju Xivan ajuni:
\p ―Jantu xamatiꞌ alhimacchꞌapꞌutꞌit va ixmaxtunica ju ixtumin. Nin yuchi ni va kꞌaya amucꞌanitꞌit ixtalakꞌalhin tam xamatiꞌ ni va maxtꞌupꞌutꞌunatꞌit ixtumin. Alhikꞌachꞌantꞌit tachi ju mapꞌalhcꞌantꞌit.
\p
\v 15 Pus ju lapanacni na ixtamakpacxan ju ixnoncan camalakachatachilh ju Dios. Chai ixtanajun laꞌixꞌalhunutꞌan: “Tsꞌa ma yuchi ju Cristo ju Xivan. Yuchach ju caminaꞌ noncan”.
\v 16 Para ju Xivan ajuni:
\p ―Ju quitꞌin islivasalh ni va lacaxcan ju iclamakpaxayau ni catacꞌatsayaꞌ ju lapanacni ni macꞌontꞌatꞌit ju macxcai. Para mintachalhcaꞌ ju palai xakꞌai. Palai jantu ju quitꞌin. Pus ju quitꞌin jantu tuꞌuꞌ ju quintapalhni. Jantu lai actichꞌanxkꞌotlh nin mas va yuchi ju samusni ixchꞌanxtꞌakꞌan. Pus ju yuchi acsni cachinaꞌ cataxtakniyan ju stavasalanti amakpaxanti. Yuchi ju Spiritu Santu ju catanuyaꞌ lamiꞌalhunutꞌan chai cataxacaniyan chux ju macxcai chai salaka catanaviyan tachi ju lai ju tuꞌuꞌ jipi ni xavakꞌojui tachi chun ju amacxtalh.
\v 17 Chai ju anuꞌ ju caminaꞌ chunch ju caꞌulhtuyaꞌ ju lapanacni tachi ju lai tam lapanac ju lacsunui ju iscebada. Ju yuchi chꞌapai ju ixpalacsunun laꞌixmacaꞌ chai acsni patajui ju cebada pus ju xaꞌamacxtalh lacatamch tamai. Chai astan ju amanavin makꞌai ju xacebada laꞌixpacꞌatsꞌa para alacxavai ju xaꞌamacxtalh. Chai ju chunch salaka jun ju ixchakaꞌ. Pus vana va chun calayaꞌ ju anuꞌ ju caminaꞌ. Camakꞌalhtaxtuyaꞌ ju lapanacni ju vasalh talhilacaꞌanta ju yuchi. Para ju jantu pus camacaꞌancanaꞌ lacajipi junta jantu tavanan lai mamixican.
\p
\v 18 Para jantu va yuchi ni xalakꞌakꞌaimai ju lapanacni ju Xivan. Para vachuꞌ na tijlhu amapꞌaksinti ju xaꞌaxtakni ju lapanacni chai alacjuni ju yuꞌunch ta yu laich cataputakꞌalhtaxtuyaꞌ.
\v 19 Chai vachuꞌ lakꞌakꞌaima ju gobernador ju Herodes ixjuncan. Kꞌailh ni ixꞌamachakach navichokolh ju ixꞌamachakaꞌ ixjunita ju ispꞌisekꞌe ju Pilipe ixjuncan. Pus ju anuꞌ chakoꞌulh Herodías ixjuncan. Vachuꞌ lhikꞌailh ixlacata tachi chun aliꞌ talakꞌalhin ju ixnavita ju Herodes.
\v 20 Chai ju Herodes palai lalhava ju ixtalakꞌalhin acsni tꞌalhnu ju Xivan.
\s1 Makpaxacalh ju Jesús
\p
\v 21 Pus acsni ixꞌamakpaxai ju lapanacni ju Xivan pus vachuꞌ ju Jesús akpaxlh. Chai acsni ixtꞌachivinin ju Dios ju Jesús pus lana talhtꞌekꞌa ju lactꞌiyan.
\v 22 Chai lana lakmilh ju Spiritu Santu tachi ju tuꞌuꞌ lakꞌaxkꞌavan. Chai lana chivincancha ju lactꞌiyan chai kꞌasmatcalh ju lacatꞌun junta chani junicalh ju Jesús:
\p ―Ju uxintꞌi quintsꞌalhꞌat. Chai na icmapainiyan. Na iclhikꞌachan ju uxintꞌi.
\s1 Ju makꞌaniya ixlacpai ju Jesús
\p
\v 23 Ju Jesús acsni tavanan taiꞌula ju ixlhichꞌalhcat ixpacxanta tachi lakapꞌuxamcau cꞌata. Chai ixtalhimispaich tachi ju va istsꞌalh ixjunita ju José. Pus ju José istsꞌalh ixjunita ju Elí.
\v 24 Chai ju ixpai ju Elí ixjuncan Matat. Chai ju ixpai Matat ixjuncan Leví. Chai ixpai ju Leví ixjuncan Melqui. Chai ju ixpai ju Melqui ixjuncan Jana. Chai ju ixpai ju Jana ixjuncan José.
\v 25 Chai ixpai ju José ixjuncan Matatías. Chai ixpai ju Matatías ixjuncan Amós. Chai ixpai ju Amós ixjuncan Nahum. Chai ixpai ju Nahun ixjuncan Esli. Chai ixpai ju Esli ixjuncan Nagai.
\v 26 Chai ixpai ju Nagai ixjuncan Maat. Chai ixpai ju Maat ixjuncan Matatías. Chai ixpai ju Matatías ixjuncan Semei. Chai ixpai ju Semei ixjuncan José. Chai ixpai ju José ixjuncan Judá.
\v 27 Chai ixpai ju Judá ixjuncan Joana. Chai ixpai ju Joana ixjuncan Resa. Chai ixpai ju Resa ixjuncan Zorobabel. Chai ixpai ju Zorobabel ixjuncan Salatiel. Chai ju ixpai ju Salatiel ixjuncan Neri.
\v 28 Chai ixpai ju Neri ixjuncan Melqui. Chai ixpai ju Melqui ixjuncan Adi. Chai ixpai ju Adi ixjuncan Cosam. Chai ju ixpai ju Cosam ixjuncan Elmodam. Chai ixpai ju Elmodam ixjuncan Er.
\v 29 Chai ixpai ju Er ixjuncan Josué. Chai ixpai ju Josué ixjuncan Eliezer. Chai ixpai ju Eliezer ixjuncan Jorim. Chai ixpai ju Jorim ixjuncan Matat.
\v 30 Chai ixpai ju Matat ixjuncan Leví. Chai ixpai ju Leví ixjuncan Simeón. Chai ixpai ju Simeón ixjuncan Judá. Chai ixpai ju Judá ixjuncan José. Chai ixpai ju José ixjuncan Jonán. Chai ixpai ju Jonán ixjuncan Eliaquim.
\v 31 Chai ixpai ju Eliaquim ixjuncan Melea. Chai ixpai ju Melea ixjuncan Mainán. Chai ixpai ju Mainán ixjuncan Matata. Chai ixpai ju Matata ixjuncan Natán.
\v 32 Chai ixpai ju Natán ixjuncan David. Chai ixpai ju David ixjuncan Isaí. Chai ixpai ju Isaí ixjuncan Obed. Chai ixpai ju Obed ixjuncan Booz. Chai ixpai ju Booz ixjuncan Salmón. Chai ixpai ju Salmón ixjuncan Naasón.
\v 33 Chai ixpai ju Naasón ixjuncan Aminadab. Chai ixpai ju Aminadab ixjuncan Aram. Chai ixpai ju Aram ixjuncan Esrom. Chai ixpai ju Esrom ixjuncan Fares. Chai ixpai ju Fares ixjuncan Judá.
\v 34 Chai ixpai ju Judá ixjuncan Jacob. Chai ju ixpai ju Jacob ixjuncan Isaac. Chai ixpai ju Isaac ixjuncan Abraham. Chai ixpai ju Abraham ixjuncan Taré. Chai ju ixpai ju Taré ixjuncan Nacor.
\v 35 Chai ixpai ju Nacor ixjuncan Serug. Chai ixpai ju Serug ixjuncan Ragau. Chai ixpai ju Ragau ixjuncan Peleg. Chai ixpai ju Peleg ixjuncan Heber. Chai ixpai ju Heber ixjuncan Sala.
\v 36 Chai ixpai ju Sala ixjuncan Cainán. Chai ixpai ju Cainán ixjuncan Arfaxad. Chai ixpai ju Arfaxad ixjuncan Sem. Chai ixpai ju Sem ixjuncan Noé. Chai ixpai ju Noé ixjuncan Lamec.
\v 37 Chai ixpai ju Lamec ixjuncan Matusalén. Chai ixpai ju Matusalén ixjuncan Enoc. Chai ixpai ju Enoc ixjuncan Jared. Chai ixpai ju Jared ixjuncan Mahalaleel. Chai ixpai ju Mahalaleel ixjuncan Cainán.
\v 38 Chai ixpai ju Cainán ixjuncan Enós. Chai ixpai ju Enós ixjuncan Set. Chai ixpai ju Set ixjuncan Adán. Chai ju Adán yuchi ju Dios ixpai junita.
\c 4
\s1 Ju lhacaticuru ixlacasqꞌuin ni caꞌixꞌalactuꞌunulh ju Jesús
\p
\v 1 Ju Spiritu Santu ixlhinonkꞌojui laꞌisꞌatsucunti ju Jesús. Chai acsni mincha ju xakꞌai xcan Jordán ju Jesús pus ju Spiritu Santu juni ta anchach ju caꞌalhtanaꞌalh junta va aseknicꞌa.
\v 2 Pus tꞌupꞌuxam avilhchan ju ixvilhcha junta aseknicꞌa chai ju lhacaticuru navilh talacmaskꞌatꞌinti ni tsꞌa ma laich caꞌixmalactuꞌuni ju Jesús. Chai ju Jesús jantu vailh ju acs avilhchan tus acsni uctaxtulh ju tꞌupꞌuxam avilhchan. Chai astan na ixchavanita.
\v 3 Pus ju acsnich ju lhacaticuru junilh:
\p ―Ni sala vasalh istsꞌalh Diosꞌat pus anauch ni chach junch xkapavati junima chiux.
\p
\v 4 Para ju Jesús kꞌalhtailh. Junich:
\p ―Jantu lai chun actinavi ni tsꞌokcanta laꞌixchivinti Dios ni jantu va yuchi ju xkapavati ju canaviyaꞌ cuenta ju tam lapanac. Alai canaviyaꞌ cuenta tachi chun ju ixchivinti Dios.
\p
\v 5 Chai astan ju lhacaticuru alhiꞌananalh laꞌixꞌucxni lakatam talhpa ju na putankꞌai ixjunita. Lhiꞌancalh ju Jesús. Chai anch ju malacasunikꞌo va tam pantsꞌiquis tachi chun ju xalacpuꞌucxtin ju ani lacamunutpaꞌ.
\v 6 Chai ju lhacaticuru chani ju junilh ju Jesús:
\p ―Uxintꞌich ju acxtaknikꞌoyan chux ju ani tachaput chai vasalh xakꞌai aꞌunaꞌ. Lai acxtakniyan ni quitꞌin ju icmakꞌaxtaknikꞌocanta chai va tichi chavaich ju icxtakniputun lai icxtaknich.
\v 7 Pus sich miꞌanuꞌ cajunaꞌ va yuchi ni aqꞌuintꞌaꞌaktsꞌokꞌotꞌaniyaꞌich ju laquiꞌucxlacapuꞌ.
\p
\v 8 Para ju Jesús akꞌalhtayanalh. Junich:
\p ―Apꞌinchich ji Satanás ni tsꞌokcanta laꞌixchivinti Dios ni yuchi ju Dios ju calakꞌayacalh chai va yuchi ju caquiclacaꞌicalh.
\p
\v 9 Chai astan ju lhacaticuru alhiꞌanananchokolh. Lhiꞌalh ju Jesús ju lakꞌachakꞌan Jerusalén chai anch ju yajucalh ju Jesús junta palai akstiꞌ putankꞌai junita ju ixpujitatꞌan ju israelitanin. Chai junich:
\p ―Ni sala vasalh istsꞌalhꞌat Dios pus amakꞌanlhtꞌujnuch ju ani.
\v 10 Lai chunch alatꞌi ni chani ju tsꞌokcanta laꞌixchivinti Dios:
\q1 Ju Dios ma camapꞌaksiyaꞌ ju ixꞌanquilhnin ni catalhistꞌacꞌan.
\q1
\v 11 Chai laꞌixmacaꞌan ju catachꞌixanch
\q1 ni jantu cachꞌanꞌuyan ju tuꞌuꞌ chiux.
\p
\v 12 Para ju Jesús chani lhikꞌalhtayanalh:
\p ―Vachuꞌ tsꞌokcanta ju anch ni jantu alaktsꞌintꞌanutꞌi ju Dios ni camuctaxtuyaꞌ ju ixchivinti u jantu.
\p
\v 13 Pus acsni maskꞌatikꞌo tijpachux alactuꞌunti ju ixmanaviniputun ju Jesús pus ju lhacaticuru macoyaulh tus alakatam avilhchan.
\s1 Ju Jesús chꞌalhcatnalh ju xaꞌestado Galilea
\p
\v 14 Pus ju Jesús anchokopa ju xaꞌestado Galilea chai laꞌixtachaput ju Spiritu Santu ju xachꞌalhcatnan. Chai laccꞌatsakꞌocalh ixlacata yuchi tachi ixlhilacaputsꞌun ju lacatꞌun anch.
\v 15 Chai ixꞌamalanininch laꞌixlacpujitatꞌan ju istꞌaꞌisraelitanin ju anch. Chai ixchuxꞌan na ixtalakꞌayai ju yuchi.
\s1 Jesús ixvi ju lakꞌachakꞌan Nazaret
\p
\v 16 Ju Jesús minchokopa ju lakꞌachakꞌan Nazaret junta ixtakꞌayata. Chai acsni chaꞌalh ju avilhchan paꞌastacni pus ju yuchi tanucha laꞌixpujitatꞌan ju istꞌaꞌisraelitanin tachi ju ixlhilanitach. Chai taya ni catacꞌatsayaꞌ ju lapanacni ni ixꞌamakꞌasmatniputun ju ixchivinti Dios.
\v 17 Chai xtaknicalh ju alhiqui ju istsꞌokta ju makꞌaniya lapanac ju ixnajun ixchivinti Dios. Yuchi ju Isaías ixjuncan. Pus ju Jesús acsni puxkꞌotlh ju alhiqui lhitajulh junta chani istsꞌokcanta:
\q1
\v 18 Ju Spiritu Santu tꞌajun laquiꞌalhunut
\q1 ni quilhisacxtuta ni acꞌajunach ju quilhpatinin ta yu laich cataputakꞌalhtaxtuyaꞌ.
\q1 Chai quimacaminta ni acꞌamakꞌankꞌacha ju na taꞌamakꞌaninin.
\q1 Chai ni acꞌajunach ju tachꞌinin ni laich catataxtulh junta atꞌalhnucanta.
\q1 Chai ni acꞌamalacꞌavaniyaꞌ ju alakꞌachꞌixnin.
\q1 Chai ni acꞌaxkꞌotꞌach ju va alhimakchapucan.
\q1
\v 19 Chai ni acnonaꞌ ni chilh ju avilhchan acsni caꞌanaviniyaꞌ lamapainin ju Dios ju lapanacni.
\m Pus chunch ju ajuni ju lapanacni ju Jesús.
\p
\v 20 Chai astan mapuxtokchokolh ju alhiqui. Chai xtaknichokolh ju alhistacnaꞌ chai tavi ni caꞌamalanininaꞌ. Chai tachi chun ju ixtavilanalh ju lacpujitat va taskꞌotutulh.
\v 21 Pus ju yuchi tsuculh ajuniniꞌ:
\p ―Chavai avilhchan uctaxtulh junima chivinti tachi ju tsꞌokcanta laꞌixchivinti Dios. Uctaxtulh acsni xaquilakꞌasmatniyau ju chivinti ju xaclajunau. ―Chunch ju ajunilh ju lapanacni ju Jesús.
\p
\v 22 Chai ixchuxꞌan tanaulh ni vasalh na lai ixꞌamalaninin. Chai na ixtalhamakꞌaninin ni na kꞌox ixjunita ju ixchivinti ju tuchi ixꞌajuni. Para ixtanajun:
\p ―Ja jantiyuꞌ ju ani istsꞌalh ju José.
\p
\v 23 Chai ju Jesús ajunchokopa:
\p ―Ju uxijnan ca va quilajumputunau ju chivinti ju noncan: “Acꞌuchꞌunuꞌ acꞌuchꞌuchꞌokꞌocꞌach miꞌakstu. Ju chunch pucꞌatsacan ni vasalh lai acꞌuchꞌunun”. Chai ca va quilajumputunau ni vasalh Cristo icjunita pus tasqꞌuini ni pꞌulhnan acnaviyaꞌ ju ani laquintꞌunꞌan ju tuchi ixnoncan ni xacnaviyacha ju lakꞌachakꞌan Capernaum chai ju chunch laich apꞌucꞌatsꞌayaꞌitꞌit ta yu aquilapulhilaksiyau.
\p
\v 24 Chai tailhiꞌalh ixchivinti. Ajuni:
\p ―Slivasalh ju iclajunau. Jantu xamatiꞌ ju najun ixchivinti Dios ju lai tuꞌuꞌ calhiulacalh ju laꞌixtꞌun.
\v 25 Alaktsꞌintꞌit ta yu tapasalh laꞌisꞌatsucunti ju Elías. Acsni ixtꞌajuncaꞌ ju yuchi pus jantu lalh ju xcan lakatꞌutu cꞌata a lakachaxan malhquiyuꞌ. Chai alilh ju kꞌai chavan ixlhilacaputsꞌun ju lacamunutpaꞌ. Chai slivasalh ni na lhu ixtaꞌalin ju chakolun ju va ixꞌanimacontilacanta ju sia istꞌaꞌisraelitanin.
\v 26 Para jantu xamatiꞌ ju sia yuꞌunch ju malakachanicalh ju Elías. Alai malakachanicalh pumatam chakoꞌulh ju ixnimacontilacanta amachakaꞌ Sarepta laxatꞌun Sidón.
\v 27 Chai acsni ixtꞌajun ju Eliseo ju ixnajun ixchivinti Dios pus na pumalhu istꞌaꞌisraelitanin ixtapacxanta ju na macxcai tsꞌitsꞌi ju puchꞌiꞌan. Para jantu xamatiꞌ ju sia lhiyuꞌunch ju lai palai canavicalh. Va yuchi ju ixjuncan Naamán amachakaꞌ xalacatꞌun Siria.
\p Chunch ju ajuni ju lapanacni ju Jesús. Chai yuchi alhijunilh chunch ni va ixꞌamamachakxaniputun ni jantu tuꞌuꞌ ixtalhiulai ju ixtꞌaꞌamachakꞌan ju makꞌaniya lapanacni vachuꞌ. Para ju amachakꞌan alacatam yuꞌunch ju talhilaksilh.
\p
\v 28 Pus ju acsnich tachi chun ju ixtavilanancha lacpujitat lana na tatalhkꞌamalh acsni takꞌasmatnilh ju ixchivinti.
\v 29 Chai tataya. Tatixcoxtulh ju Jesús ju lakꞌachakꞌan. Chai talhiꞌalh akstijun junta va kꞌankꞌapukꞌaitajunta junta vanin ixtꞌavi ju ixlakꞌachakꞌanꞌan. Anchach ju ixtamacaꞌamputun ju Jesús.
\v 30 Para ju Jesús tapasalh laꞌixlacaitat junta ixtayanalh ju yuꞌunch. Chai alh.
\s1 Ju lhacaticuru ixchꞌapanita ixtanquilhacni pumatam
\p
\v 31 Ju Jesús alh ju lakꞌachakꞌan Capernaum laxaꞌestado Galilea. Chai ju savat tsuculh amalaninin ju lapanacni ju lacpujitat.
\v 32 Pus chux ju lapanacni na ixtalhamakꞌaninin ta yu ixꞌamalaninin ni istasui laꞌixchivinti ni vasalh ismispai ju atalaninti.
\p
\v 33 Chai ixtanumacha lacpujitat pumatam lapanac ju ixpacxanta ju lhacaticuru laꞌixtanquilhacni. Chai ju anuꞌ lhacaticuru lana tsꞌau tꞌasalh. Puchivinilh ixquilhni ju anuꞌ lapanac. Junich ju Jesús:
\p
\v 34 ―Ai. Tijuch ju quilamintau lhilaktsꞌinin ji Jesús amachakaꞌ Nazaret. Ja va quilamintau mamakꞌalhkꞌajninin ju quijnan. Pus iclamispayau tichi chavaichꞌat. Pus ju uxintꞌi salaka ixlapanac Diosꞌat.
\p
\v 35 Para ju Jesús kꞌailh ju lhacaticuru. Junich:
\p ―Va sekch. Atꞌaxtꞌuch ju laꞌixlacatuna ju ani lapanac.
\p Pus ju acsnich ju lhacaticuru tin samakꞌalh ju lapanac junta ixtayanalh ixtalhavat lapanacni. Chai lana taxtulh laꞌixlacatuna. Para jantu xamacꞌatsani.
\v 36 Chai lana na talhamakꞌaninilh ju lapanacni. Chai ixtalaclajuni ju sia lhiyuꞌunch:
\p ―Tis chivinti nuꞌ ju ani. Pus ju yuchi slivasalh lai lhinajun chai lacatachaput ju ajuni ju lhacaticurulhni ni catataxtulh chai tataxtui.
\p
\v 37 Pus ixtacꞌatsakꞌojui ju ixlacata yuchi vanta lhiꞌanchach junta vanin ixlhiꞌalin ju lakꞌachakꞌan.
\s1 Palaich navicalh ixputꞌichakoꞌulh ju Pitaluꞌ
\p
\v 38 Pus ju Jesús taxtulh ju lacpujitat chai alh laꞌixchakaꞌ ju Simón. Pus ju ixputꞌichakoꞌulh ju Simón na ixchꞌapata ju iscacat. Pus tapaininicalh ju Jesús ixlacata ju anuꞌ takꞌankꞌan.
\v 39 Pus ju yuchi taya vanin junta ixma ju takꞌankꞌan. Chai kꞌailh ju scacat. Pus lana macaulh ju iscacat ju takꞌankꞌan. Chai kꞌostavi chai tsuculh alacmavanaꞌ ju Jesús chai ixꞌamamakaꞌui.
\s1 Palaich anavicalh lhu takꞌankꞌanin
\p
\v 40 Chai acsni anchalh ju avilhchan pus ixꞌalhiminicanch ju Jesús tachi chun ju takꞌankꞌanin ju na tijlhu takꞌankꞌat ixtachꞌapata. Chai ju Jesús ixꞌamokslanich ju ixmacaꞌ laꞌixlacatunaꞌan ju pumatamin takꞌankꞌanin chai palaich ixꞌanavi.
\v 41 Chai vachuꞌ na lhu lhacaticurulhni ixtataxtui laꞌixlacatunaꞌan ju lapanacni. Chai pꞌas ixtajuni ju Jesús:
\p ―Vasalh istsꞌalh Diosꞌat.
\p Para ju Jesús ixꞌalackꞌaji. Chai jantu ixꞌalacasqꞌuini ni catachivinilh ni ixtacꞌatsai ni yuchach ju Cristo ju ixnoncan camalakachatachilh ju Dios.
\s1 Ju Jesús amalaninin lhiGalilea
\p
\v 42 Chai acsni tuncunchokolh pus ju Jesús lana taxtuchokochalhch. Alh junta va aseknicꞌa. Para ju lapanacni na ixtapuxcajui. Chai tachincha junta ixvilhcha. Chai na ixtachꞌapaꞌulaputun ni jantu caꞌalacmacaulh ju yuꞌunch.
\v 43 Para ju yuchi ajuni:
\p ―Para tasqꞌuini ni vachuꞌ acꞌalh ju aliꞌ lakꞌachakꞌanixni. Acꞌalh ajuniniꞌ ju lapanacni ni Dios lhinomputun laꞌisꞌatsucuntiꞌan. Tasqꞌuini ni chunch aclayaꞌ ni yuchi iclhimalakachacantachilh.
\p
\v 44 Pus ju Jesús ixꞌamalani ju lapanacni laxalacpujitat ju laxaꞌestado Judea.
\c 5
\s1 Na lhu tachꞌapalh ju pamata
\p
\v 1 Pus ju Jesús ixyacha vanin laꞌixquilhtuꞌ ju atantsꞌin Genesaret. Chai ju lapanacni ni na ilhuꞌan ixtajunita pus na istasamakꞌamputun ju Jesús ni vanin ixtatayaputun ni laich catakꞌasmatnilh ixchivinti Dios ju ixꞌajuni.
\v 2 Pus ju Jesús laktsꞌilh lakatꞌui barco ju vanin ixlacvi laꞌixquilhtuꞌ atantsꞌin. Para ju ixchꞌapanin pamata ixtatacutꞌach ni ixtatꞌajun chakꞌanin ixchꞌokxniꞌan.
\v 3 Chai ju Jesús putaju lakatam barco ju anchach ixlacvi. Chai ju yuchi ixꞌanuꞌ Simón ixjunita. Chai ju Jesús tapaininilh ju Simón ni cha taju lacatsꞌunin ju lacxcan ju ixbarco. Chai acsni chunch ju navilh ju Simón pus ju Jesús tsuculh amalaniniꞌ ju lapanacni.
\v 4 Chai acsni chivinkꞌolh pus junich ju Simón:
\p ―Alhipꞌich ju mimbarco junta palai talaclhman chai amuꞌutꞌich ju minchꞌokxniꞌan ni lai achꞌapꞌayaꞌitꞌit ju pamata.
\p
\v 5 Para ju Simón akꞌalhtayanalh chai juni:
\p ―Amamakaꞌunuꞌ tonta tsꞌisni ju xacmujuyau ju quinchꞌokxni quincꞌan. Para jantu tuꞌuꞌ icchꞌapatau. Para ni chunch ju naꞌun pus acmujuchokoyach ju quinchꞌokxni.
\p
\v 6 Pus acsni tamujulh ju ixchꞌokxniꞌan ju Simón chai ixtꞌachꞌalhcatnaꞌ pus na lhuch lana tanucha ju pamata. Chai ixtakꞌexputun ju ixchꞌokxniꞌan.
\v 7 Pus tatamacyonilh ju ixtꞌachꞌalhcatnin ju ixtatajumanalh lacalakatam barco. Tajuni ni catamilh aꞌaktaijunin. Pus tamilh chai talaktsama chux lakatꞌui barco. Chai ixtaquitaꞌacnuputun ju lakatꞌui barco.
\v 8 Pus ju Simón Pitaluꞌ acsni laktsꞌilh ni na lhu ixjunita ju pamata pus lana taꞌaktsokotanilh laꞌixꞌucxlacapuꞌ ju Jesús chai juni:
\p ―Akꞌostꞌich ju laquiꞌucxlacapuꞌ ji quiꞌucxtin ni na icꞌalactuꞌunuꞌ lapanac ju quitꞌin.
\p
\v 9 Chunch ju naulh ju Pitaluꞌ ni na ixlhamakꞌaninin ju yuchi chai tachi chun ju ixꞌalactꞌatajun lacabarco. Talhamakꞌaninilh ni na lhu ixtachꞌapata ju pamata.
\v 10 Chai vachuꞌ na ixtalhamakꞌaninin ju Jacobo chai ju Xivan istsꞌalan ju Zebedeo. Pus ju yuꞌunch ixtꞌalamaktainin ju Simón ixtajunita. Pus ju Jesús junilh ju Simón:
\p ―Jantu atꞌalhan. Tus chavai amakꞌaixtꞌokꞌaꞌitꞌit ju lapanacni ju aquintalhilacaꞌanaꞌ tachi acsni ixmakꞌaixtꞌokꞌatꞌit ju pamata.
\p
\v 11 Pus ju acsnich tamacutulh ju ixbarcoꞌan. Tamaconkꞌolh chux chai tachꞌakꞌokꞌalh ju Jesús.
\s1 Palaich navicalh pumatam ju ixꞌalin istsꞌitsꞌi
\p
\v 12 Acsni ixvi ju Jesús lacalakatam lakꞌachakꞌan pus lakmilh pumatam lapanac ju ixpacxanta ju macxcai istsꞌitsꞌi ju ixpuchꞌiꞌan. Chai ju yuchi lana taquilhputanilh ju lacatꞌun laꞌixꞌucxlacapuꞌ ju Jesús. Chai tapaininilh. Junich:
\p ―Quiꞌucxtin ni va xaqꞌuincꞌuchꞌupꞌutꞌuch cava pus laich xaqꞌuincꞌuchꞌutꞌi.
\p
\v 13 Pus ju acsnich ju Jesús mokslanilh ixmacaꞌ laꞌixlacatuna chai juni:
\p ―Iclacasqꞌuin. Palaichꞌat.
\p Chai acsni naulh ju chunch ju Jesús pus lana macaxnilh ju istsꞌitsꞌi ju anuꞌ lapanac.
\v 14 Chai ju Jesús lhimapꞌaksilh ju anuꞌ lapanac ni jantu xamatiꞌ cajunilh tuꞌuꞌ. Chani ju juni:
\p ―Aꞌinchich tꞌalacꞌasuniniꞌ ju pali. Axtꞌakchich ju milhakꞌailaktsꞌin ni cacꞌatsacanaꞌ ni salaka ju milacatuna tachi ju najun laꞌixlhamapꞌaksin ju Moisés.
\p
\v 15 Para jantu sek va ju anuꞌ lapanac chai palai lhu tacꞌatsa ixlacata ju Jesús. Chai na lhu ju ixtalhitakꞌaixtꞌokꞌa ni va ixtakꞌasmatniputun ju ixchivinti ju Jesús chai palaich ixtajumputun ju va ixtalactakꞌankꞌaich.
\v 16 Para ju Jesús ixꞌan junta aseknicꞌa. Ixꞌan tꞌachiviniꞌ ju Dios.
\s1 Palai navicalh pumatam ju va ixlacalhtuculunta
\p
\v 17 Chai milh avilhchan acsni ixtꞌajun amalaniniꞌ ju Jesús lacachakaꞌ. Chai vachuꞌ anch ixtavilanalh ju fariseonin chai ju na ixtalhatalanininta ju ixlhamapꞌaksinꞌan ju istꞌaꞌisraelitanin. Ju yuꞌunch ixtamintacha ixlhilacaputsꞌun ju xalakꞌachakꞌanixni ju xaꞌestado Galilea chai ju xaꞌestado Judea chai ju lakꞌachakꞌan Jerusalén. Chai ju Dios ixtaknita ju Jesús ixtachaput ni laich palai caꞌanavi ju takꞌankꞌanin.
\v 18 Chai ju aliꞌin lapanacni talhimincha pumatam lapanac lacalona. Ju yuchi va ixlacalhtuculunta. Chai ju yuꞌunch ixtapuxcajui ta anchach ju laich catapumanu lacachakaꞌ ni laich catamamanilh laꞌixꞌucxlacapuꞌ ju Jesús.
\v 19 Para jantu jintaꞌ talhitaju junta laich catapumanu ni na isꞌaktsamcanta lacachakaꞌ. Pus tamucꞌalh laꞌixꞌucxni chakaꞌ. Taꞌucxmakꞌalh chai anch ju tapumakꞌalhtaju lacalona ju anuꞌ takꞌankꞌan. Tamama vanin junta ixvi ju Jesús.
\v 20 Chai ju Jesús acsni alaktsꞌilh ni na ixtalhilacaꞌan ju yuchi pus junich ju takꞌankꞌan:
\p ―Ji lapanac ju miꞌalactuꞌunti macꞌacxanicanta.
\p
\v 21 Pus ju acsnich ju fariseonin chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin tanaulh laꞌixꞌalhunutꞌan: “Tis chavaich nuꞌ ju ani lapanac ni va macxcai ju najun ni tachi ju Dios ju jumputun. Tis chavaich apumatam ju lai macꞌacxai ju alactuꞌunti. Ni va yuchi jumpalaꞌ ju Dios”.
\p
\v 22 Para ju acsnich ju Jesús amachakxanilh tuchi ixtapastꞌacꞌach ju yuꞌunch chai axakꞌala. Ajunich:
\p ―Tajuch ni va chunch ju pꞌastꞌacꞌatꞌit ju lamiꞌalhunutꞌan.
\v 23 Ni acjunilh ni macꞌacxanicalh ju ixꞌalactuꞌunti pus jantu lai pꞌucꞌatsꞌayatꞌit ni vasalh alin ju quintachaput u jantu. Para ni acjunilh ni cakꞌostavi chai caꞌalhtanalh pus ju chunch lai apꞌucꞌatsꞌayaꞌitꞌit ni alin ju quintachaput u jantu.
\v 24 Pus ju chavai aclamasuniyau ni alin ju quintachaput ju ani lacamunutpaꞌ ni lai icmacꞌacxai ju alactuꞌunti. Quitꞌin ju quimalakachatachilh ju Dios ni lapanac actsucuyaꞌ ju ani.
\p Pus ju acsnich ju Jesús junilh ju anuꞌ ju ixlacalhtuculunta:
\p ―Uxintꞌi ju icjunan. Akꞌostꞌaꞌulhch. Asactꞌich ju mimputaman. Aꞌinchich ju laminchakaꞌ.
\p
\v 25 Chai lana taya ju anuꞌ lapanac laꞌixꞌalacꞌavantiꞌan ju yuꞌunch. Chai saclh ju ixputaman. Chai alh laꞌixchakaꞌ. Chai na ixlakꞌayaꞌanta ju Dios ju lacati.
\v 26 Chai lana na talhamakꞌaninilh ixchuxꞌan. Chai talakꞌaya ju Dios. Chai na tatalhanalh. Tanaulh:
\p ―Iclaktsꞌiu lakatam lhamakꞌan ju chavai.
\s1 Ju Jesús tꞌasanilh ju Leví
\p
\v 27 Chai astan acsni tapasalh ju ani taxtokni pus ju Jesús taxtulh. Chai laktsꞌilh pumatam achꞌiniꞌ ju Leví ixjuncan. Ju yuchi ixvi junta ixꞌachꞌinin ixlacata ju tuꞌuꞌ ju ixlhimincanta ju anuꞌ lakꞌachakꞌan. Pus ju Jesús juni:
\p ―Aqꞌuinchꞌakꞌokꞌach.
\p
\v 28 Pus ju anuꞌ achꞌiniꞌ lana taya chai macaulh ju ixlhichꞌalhcat chai tꞌaꞌalh ju Jesús.
\p
\v 29 Chai astan ju Leví navinilh ju Jesús lakatam lacvaiti ju laꞌixchakaꞌ. Chai na lhu ixtamakvilanalh lacamixa ju ixtꞌaꞌachꞌinin ju Leví chai vachuꞌ na lhu aliꞌin lapanacni.
\v 30 Para ju fariseonin chai ju na ixtalhatalanininta ju lhamapꞌaksin ju vachuꞌ fariseonin ixtajunita va ixtaꞌalhichivinin ju ixꞌamamakaꞌui ju Jesús. Talacjuni:
\p ―Tꞌas ni va alactꞌavainatꞌit chai alactꞌakꞌotꞌatꞌit ju vino ju achꞌinin chai ju alactuꞌunin.
\p
\v 31 Chai akꞌalhtayanalh ju Jesús. Ajunich:
\p ―Ju lactachapunin jantu tamaktasqꞌuini ju acꞌuchꞌunuꞌ. Va yuꞌunch ju takꞌankꞌanin.
\v 32 Jantiyuꞌ iclhiminta ni acꞌalactꞌasanilh ju tanajun ni na lackꞌoxin lapanacni tajunita. Alai icminta alactꞌasaniniꞌ ju alactuꞌunin ni catamacaulh ju ixꞌalactuꞌuntiꞌan.
\s1 Ju Jesús sacmicanta ixlacata ju tascajat
\p
\v 33 Pus ju fariseonin chai ju na ixtalhatalanininta ju lhamapꞌaksin ju vachuꞌ fariseonin ixtajunita tajunilh ju Jesús:
\p ―Tajuch ni na paklhu ju tatascajai chai tatꞌachivinin ju Dios ju ixtamamakaꞌun ju Xivan. Chai ju quilapanacni quincꞌan ju fariseonin icjuntau vachuꞌ chunch talai. Para ju mintamamakaꞌun ju uxintꞌi jantu chunch talai. Ju yuꞌunch tavajin chai takꞌotꞌa ju vino.
\p
\v 34 Chai ju Jesús ajunich:
\p ―Jantu lai amatꞌascꞌaꞌayaꞌitꞌit ju tamakvilanalh junta catamakꞌaxtokcanaꞌ acsni makvilhcaꞌ ju anuꞌ tsꞌalh ju catamakꞌaxtꞌokꞌaꞌ.
\v 35 Pus vana va chunch ju quintamamakaꞌun. Ju chavai jantu tatascajai ni icꞌalactꞌavilhcaꞌ. Para cachinaꞌ avilhchan acsni acmakꞌosucanaꞌ ju ani lacamunutpaꞌ. Chai acsnich ju catatascajayaꞌ ni aquintalhamakꞌanininach.
\p
\v 36 Chai vachuꞌ ajunilh lakatam chivinti ju ixꞌapumavasalaniputun tuꞌuꞌ. Ajuni:
\p ―Jantu lai xamatiꞌ kꞌexꞌi ju lacasastꞌi ixcujuꞌ chai calhilakyaulh ju lacakꞌatꞌili ixcujuꞌ. Ni va chunch calalh pus lakꞌalhi ju sastꞌi ixcujuꞌ chai va na jantu kꞌox jun ju kꞌatꞌilh ni jantu ixtꞌachunch junita ju pumpuꞌ ju xalhilakyajui.
\v 37 Chai jantu lai xamatiꞌ pumujui ju sastꞌi vino lacakꞌatꞌili axtꞌakꞌan ni na kꞌalhpꞌasnicaꞌ. Ni chunch canavi pus ju sastꞌi vino cakꞌexlh ju axtꞌakꞌan chai ju vino capukꞌankꞌolh. Chai ju axtꞌakꞌan catsꞌankꞌalh.
\v 38 Alai pumucan ju sastꞌi vino lacasastꞌi axtꞌakꞌan. Ju chunch lai pumakꞌacan ju sastꞌi vino ju axtꞌakꞌan.
\v 39 Chai jantu xamatiꞌ ju kꞌotꞌa ju makꞌaniya vino ju lai cakꞌotputulh ju sastꞌi. Va najun ni palai can ju makꞌaniya vino.
\p Chunch ju ajuni ju lapanacni ju Jesús. Va ixꞌamamachakxaniputun ni jantu lai catilhiyaulh ju makꞌaniya ixlhamapꞌaksin ju Moisés ju sastꞌi ixlhamapꞌaksin ju yuchi. Chai ju na lanita ju makꞌaniya lhamapꞌaksin na xcai macomputun ni laich caꞌamaklhtayanalh ju sastꞌi lhamapꞌaksin.
\c 6
\s1 Ju ixꞌamamakaꞌui Jesús taꞌi ju trigo ju avilhchan paꞌastacni
\p
\v 1 Lakatam avilhchan paꞌastacni ju Jesús ixtꞌajun tapasanaꞌ junta ixchꞌancanta ju trigo. Chai ju ixꞌamamakaꞌui ju ixtatꞌaꞌanta ixtaꞌich ju xatrigo chai ixtaꞌui. Va ixtakꞌaipꞌasꞌulhiꞌanta ju laꞌixmacaꞌan.
\v 2 Para ju aliꞌin fariseonin chani tajuni:
\p ―Tajuch ni va naviyatꞌit ju chunch ni jantu lai chꞌalhcatnancan ju chavai ni avilhchan paꞌastacni.
\p
\v 3 Chai ju Jesús akꞌalhtayanalh. Ajunich:
\p ―Ja lana jantu pꞌastꞌacꞌatꞌit tuchi navilh ju David acsni chavanilh ju yuchi chai ju ixtatꞌaꞌanta.
\v 4 Ja jantu pꞌastꞌacꞌatꞌit ni lai tanu junta ixlakꞌayacan ju Dios chai chꞌapalh ju xkapavati ju ismokslanicanta ju Dios. Chai ulh chai axtaknilh vachuꞌ ju ixtatꞌaꞌanta. Chai ju anuꞌ xkapavati jantu lai va kꞌaya ixꞌucan. Va yuꞌunch ju palijni ju lai ixtaꞌui.
\p
\v 5 Chai vachuꞌ chani ajuni:
\p ―Ju Dios quimalakachatachilh ni lapanac actsucuyaꞌ ju ani. Chai quitꞌin ju lai icnajun tuchi lai navican ju avilhchan paꞌastacni.
\s1 Pumatam va ixixnita ju ixmacaꞌ
\p
\v 6 Chai alakatam avilhchan paꞌastacni ju Jesús tanulh laꞌixpujitatꞌan ju istꞌaꞌisraelitanin chai tsuculh amalaniniꞌ. Chai ju anch ixtanumacha pumatam lapanac ju va ixixnita ju ixmacaꞌ laꞌixlhicana.
\v 7 Chai ju fariseonin chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin va ixtalhistactꞌajun ju Jesús. Va ixtalaktsꞌimputun ni lai caꞌacꞌuchꞌunulh ju avilhchan paꞌastacni. Va ixtapuxconi ta yu laich catapumucꞌanilh ixtalakꞌalhin.
\v 8 Para ju Jesús iscꞌatsai tuchi ixtapastꞌacꞌa. Chai junich ju anuꞌ lapanac ju ixixnita ju ixmacaꞌ:
\p ―Akꞌostꞌaꞌulh. Atꞌaich ju ani junta laich catalaktsꞌinan ju lapanacni.
\p Pus ju yuchi kꞌostaya chai tayalh ju anch.
\v 9 Pus ju acsnich ju Jesús ajunich ju lapanacni:
\p ―Tꞌas nonatꞌit. Ja lhijun ju lhamapꞌaksin ni canavicalh ju kꞌox ju avilhchan paꞌastacni u canavicalh ju talakꞌalhin ni jantu caꞌaktaiju tam xamatiꞌ. Ja lhijun ni acmakꞌalhtaxtulh ju atsucunti ju avilhchan paꞌastacni u aclaktsꞌimakni.
\p
\v 10 Pus ju acsnich ju Jesús alaktsꞌinkꞌo ju ixtayanalh ixlhitalakachoko chai chani ju juni ju anuꞌ lapanac:
\p ―Alhitꞌach ju mimacaꞌ.
\p Chai chunch ju navilh ju lapanac chai lana tachapun va ju ixmacaꞌ.
\v 11 Para ju fariseonin chai ju aliꞌin na kꞌox talakachapulh laꞌixtalhkꞌamtiꞌan. Chai ixtalaclajunich ju sia lhiyuꞌunch ta yu catatꞌalayaꞌ ju Jesús.
\s1 Asacxtucalh ju ixpumacautꞌuiꞌan
\p
\v 12 Pus ju acsnich ju Jesús alh junta ixvilhcha lakatam akstijun. Alh tꞌachiviniꞌ ju Dios. Chai tontatsꞌis ju tꞌachivinilh ju Dios.
\v 13 Chai acsni tuncunchokolh atꞌasanilh ju ixꞌamamakaꞌui chai asacxtulh ixpumacautꞌuiꞌan. Chai alaclhilhcaꞌula ixtamalakachan.
\v 14 Pus sacxtulh ju Simón ju lhimapakaꞌulh vachuꞌ Pitaluꞌ chai ju Tilix ixlakꞌau. Chai ju Jacobo. Chai ju Xivan. Chai ju Pilipe. Chai ju Bartolomé.
\v 15 Chai ju Mateo. Chai ju Tumax. Chai apumatam Jacobo ju istsꞌalh Alfeo ixjunita. Chai apumatam Simón ju makyuꞌunch ixjunita ju cananistanin.
\v 16 Chai ju Judas ixlakꞌau ju Jacobo. Chai ju Judas Iscariote ju astan amakꞌaxtaknalh.
\s1 Amalanicalh ixtalhavat lapanacni
\p
\v 17 Chai ju Jesús alactꞌamilh ixpumacautꞌuiꞌan chai alactꞌataya junta na acpujun. Chai vachuꞌ ixtayanalh anch na lhu aliꞌin ixꞌamamakaꞌui chai na lhu amachakꞌan ju xaꞌestado Judea chai ju amachakꞌan lakꞌachakꞌan Jerusalén chai ju lakꞌachakꞌanixni Tiro chai Sidón ju ixvilhcha laꞌixquilhtuꞌ alama. Ju yuꞌunch va ixtaminta kꞌasmatnin ixchivinti ju Jesús. Vachuꞌ palai ixtajumputun ju ixtalactakꞌankꞌai.
\v 18 Chai ju na ixtamakꞌalhkꞌajnan ni ixtapacxanta ju lhacaticuru vachuꞌ palai anavi ju Jesús.
\v 19 Pus na lhu lana ixjunita ju takꞌankꞌanin chai tachi chun ju yuꞌunch ixtalacachꞌapaputun ju Jesús ni ixꞌalin ju ixtachaput chai palai ixtapujun ju chunch.
\s1 Ju aliꞌin takꞌachani. Ju aliꞌin jantu
\p
\v 20 Pus ju acsnich ju Jesús laktsꞌilh ju ixꞌamamakaꞌui chai ajuni:
\p ―Va paxcat untꞌatꞌit ju uxijnan acsni cꞌatsꞌayatꞌit ni na maktꞌasqꞌuiniyatꞌit ju Dios. Pus apꞌinaꞌitꞌit ju lactꞌiyan junta lhinajun ju Dios.
\p
\v 21 Va paxcat untꞌatꞌit ju uxijnan ju na lacꞌasqꞌuinatꞌit ju soknicꞌa atsucunti. Pus chunch cajunaꞌ ju miꞌatsucuntiꞌan.
\p Va paxcat untꞌatꞌit ju uxijnan ju na taꞌamakꞌaninin. Pus ju Dios catamakꞌankꞌachayan.
\p
\v 22 Va paxcat untꞌatꞌit ju uxijnan acsni cataxcayan ju lapanacni chai acsni jantu catatꞌaꞌalhtanamputunan chai acsni catajunan macxcai chivinti chai acsni catanonaꞌ ni jantu lackꞌoxin lapanacni untꞌatꞌit va ixlacaꞌatalh ni quilalhilaksiyau ju quitꞌin ju quimalakachatachilh ju Dios ni lapanac actsucuyaꞌ ju ani.
\v 23 Pus alhikꞌachꞌantꞌit acsni chunch cataꞌulhtuyan. Slivasalh na kꞌox alhiulatꞌit. Pus chunch alatꞌit ni slivasalh na kꞌox ju axtꞌaknicꞌanaꞌitꞌit ju lactꞌiyan. Pus ju makꞌaniya ixlacpaꞌitniꞌan ju lapanacni ju chunch taꞌulhtuyan vana va chun ixtaꞌulhtui ju makꞌaniya ixlapanacni Dios.
\p
\v 24 Para painiꞌitnich ju uxijnan ju nonatꞌit ni jantu maktꞌasqꞌuiniyatꞌit ju Dios. Pus va ani lacamunutpaꞌ ju caꞌalinaꞌ ju minkꞌachatꞌan. Ju astan jantu.
\p
\v 25 Painiꞌitnich ju uxijnan ju nonatꞌit ni na kꞌox ju chavai ju miꞌatsucuntiꞌan. Pus ju astan acꞌatsꞌayaꞌitꞌit ni makꞌancꞌacxnitan ju ixtakꞌoxinti ju miꞌatsucuntiꞌan.
\p Painiꞌitnich ju uxijnan ju na kꞌachꞌanatꞌit ju chavai. Ju astan na akꞌalhunaꞌitꞌit chai amakꞌanininaꞌitꞌit.
\p
\v 26 Painiꞌitnich ju uxijnan acsni chux ju lapanacni catanonaꞌ ni na lackꞌoxin lapanacni untꞌatꞌit. Pus ju makꞌaniya ixlacpaꞌitniꞌan ju lapanacni ju chunch tajunan vana va chun ixtajuni ju makꞌaniya lapanacni ju ixtalhitalacasui tachi ju ixlapanacni Dios mas jantu. Pus ni vana va chun tajunan ju uxijnan pus tasui ni jantu slivasalh ixlapanacni Dios untꞌatꞌit vachuꞌ.
\s1 Ajuncan ni catamapaini ju ixtꞌalaxcaiꞌan
\p
\v 27 Para ju uxijnan ju quilakꞌasmatniyau iclajunau ni amapꞌainitꞌit ju mintꞌalaxcaiꞌan. Chai anavinitꞌit kꞌox ju na taxcayan.
\v 28 Asqꞌuintꞌit ju kꞌox isꞌatsucuntiꞌan ju macxcai tajunan. Chai atꞌapꞌaininitꞌit ju Dios ixlacataꞌan ju talhimacchapuyan.
\v 29 Acsni xamatiꞌ cataꞌulaniyan ju lamilakxtanꞌan axtꞌaknichꞌokꞌotꞌit ju mintalakxtantamꞌan. Chai ni xamatiꞌ catachivimakꞌanan chai catataiꞌiniyan ju mincutunꞌan pus vachuꞌ jantu alhikꞌaꞌitꞌit ju mimpumpuꞌan.
\v 30 Ni xamatiꞌ catasqꞌuiniyan ju tuꞌuꞌ pus jantiyuꞌ ju jantu axtꞌaknipꞌutꞌutꞌit ni va makꞌapꞌutꞌunatꞌit miꞌakstuꞌan. Chai ju catalhiꞌaniyan ju tuꞌuꞌ ju miꞌanuꞌan junita pus jantu va tachi asqꞌuinichꞌokꞌotꞌit.
\v 31 Pus ni lacꞌasqꞌuinatꞌit ni kꞌox cataꞌulhtuyan ju mintꞌalapanacni pus vachuꞌ kꞌox aꞌulhtꞌutꞌit ju yuꞌunch.
\p
\v 32 Pus ni va yuꞌunch ju amapꞌainiyaꞌitꞌit ju tamapainiyan pus ja navitꞌatꞌit tuꞌuꞌ ju kꞌox. Pus mas yuꞌunch ju na taꞌalactuꞌunun vachuꞌ tamapaini ixꞌamigojniꞌan.
\v 33 Chai ni va yuꞌunch ju anavinitꞌit kꞌox ju tanaviniyan kꞌox pus ja navitꞌatꞌit tuꞌuꞌ kꞌox. Pus mas yuꞌunch ju alactuꞌunin vana va chun tanavi.
\v 34 Chai ni va yuchi ju alhimachꞌixtꞌaktꞌit ju mintuminꞌan ni va apꞌulhaꞌatꞌit pus ja kꞌox calhiulayaꞌ ju Dios ju chunch. Pus mas yuꞌunch ju alactuꞌunin tamachꞌixtakni ju ixtuminꞌan ju ixtꞌaꞌalactuꞌunin ni va tapulhajaputun.
\v 35 Alai amapꞌainitꞌit ju mintꞌalaxcaiꞌan. Anavinitꞌit ju kꞌox chai amachꞌixtꞌaknitꞌit ju mintuminꞌan chai jantu alhamakꞌaninintꞌit u ni axtꞌaknichꞌokꞌocꞌanaꞌitꞌit u jantu. Chai ni chunch ju anaviyaꞌitꞌit pus na lhu cajunaꞌ ju mintalhajaꞌan chai catasuyaꞌ ni vasalh isꞌaskꞌatꞌan Dios untꞌatꞌit. Pus ju yuchi anavini ju kꞌox ju jantu tavanan tajuni lakꞌailaktsꞌiuch chai ju na kꞌai tajunita.
\v 36 Pus anavitꞌit ju lamapainin tachi ju mimpaiꞌan Dios ni vachuꞌ navi ju lamapainin.
\s1 Jantu aꞌulaniyaꞌitꞌit ixtalakꞌalhin ju akꞌantam
\p
\v 37 Jantu anaꞌuntꞌit ni talakꞌalhin ju xanavi ju akꞌantam. Ni chunch ju alatꞌit pus ju Dios canonaꞌ ni vachuꞌ navitꞌatꞌit talakꞌalhin ju uxijnan. Jantu aꞌulanitꞌit ixtalakꞌalhin ju akꞌantam chai ju chunch jantu vachuꞌ aꞌulanicꞌanaꞌitꞌit ju mintalakꞌalhinꞌan. Amacꞌacxanitꞌit ju akꞌantam chai vachuꞌ ju Dios catamacꞌacxaniyan ju uxijnan.
\v 38 Axtꞌaknitꞌit ju tamaktasqꞌuini ju tuꞌuꞌ chai ju Dios vachuꞌ cataxtakniyan ju uxijnan. Chai lacakꞌox alhcanti ju axtꞌaknicꞌanaꞌitꞌit chai kꞌox casajucanaꞌ chai cacꞌalhajucanaꞌ chai caꞌalhpaxach. Pus tuchꞌi anaviyaꞌitꞌit ju akꞌantam pus vana va chun ju anavicꞌanaꞌitꞌit.
\p
\v 39 Chai ju Jesús ajuni alakatam chivinti ju ixtꞌalaktsꞌipaxcavaich ju tuꞌuꞌ. Chani ju ajuni:
\p ―Ju tam alakꞌachꞌix jantu lai catipꞌulhni ju ixtꞌaꞌalakꞌachꞌix. Ni chunch canavi pus va kꞌaixtam catintꞌaꞌalh junta puculhucnicꞌa.
\v 40 Ju tam amamakaꞌunti jantiyuꞌ ju palai kꞌai. Yuchi ju palai kꞌai ju tam amamakaꞌunuꞌ. Para va tichi chavaich ju na kꞌox masunicanta pus va ixtꞌachunchach cajunaꞌ tachi ju ixꞌamamakaꞌunuꞌ.
\p
\v 41 Tajuch ni na naviyatꞌit cuenta ju tuꞌuꞌ lacatꞌicstꞌi talakꞌalhin ju navi pumatam milhilakꞌau para lana jantu naviyatꞌit cuenta ju kꞌai talakꞌalhin ju naviyatꞌit miꞌakstuꞌan. Ni chunch ju layatꞌit pus ixtꞌachunch untꞌatꞌit tachi tam lapanac ju cajunilh akꞌantam ni tanun ju lacatꞌicstꞌi amacxtalh laꞌixlakchulh mas tanun ju palai kꞌai amacxtalh laꞌixlakchulh isꞌakstu.
\v 42 Chai tas laich aꞌunitꞌit ju tam milhilakꞌau: “Alakꞌaꞌitꞌich ni acꞌaktaijuyan ni amaconaꞌ ju talakꞌalhin ju navi”. Tas laich chunch aꞌunitꞌit ni jantu naviyatꞌit cuenta ju kꞌai talakꞌalhin ju naviyatꞌit ju uxijnan. Pus acsni chunch ju layatꞌit pus ixtꞌachunch untꞌatꞌit tachi tam lapanac ju cajunilh akꞌantam: “Acmaxtuniyanch ju lacatꞌicstꞌi amacxtalh ju tanun lamilakchulh”. Laich chunch juni mas palai kꞌai amacxtalh ju tanun laꞌixlakchulh isꞌakstu. Para ju uxijnan acsni chunch ju layatꞌit pus va acxpꞌutꞌiyununatꞌit. Pus pꞌulhnan amacꞌaꞌuntꞌit ju kꞌai talakꞌalhin ju naviyatꞌit. Chai ju chunch lai aꞌaktꞌaiꞌuyaꞌitꞌit ju milakꞌauꞌan ni camacaulh ju lacatꞌicstꞌi talakꞌalhin ju navi ju yuchi.
\s1 Laxatocꞌat pumispacan tuꞌuꞌ qꞌuiu
\p
\v 43 Ju tuꞌuꞌ kꞌoxi qꞌuiu jantu lai catixtaklh ju xalhiꞌut ju jantu kꞌox. Chai ju tuꞌuꞌ qꞌuiu ju jantu kꞌox jantu lai catixtaklh ju kꞌoxi xalhiꞌut.
\v 44 Pus tachi chun ju qꞌuiu lhimispacan ju xalhiꞌut. Jantu lai tocꞌai ju capen lacaꞌalhtucunan. Nin lai catitocꞌalh ju uvas lacaꞌachꞌitinan.
\v 45 Pus vana va chun tam lapanac. Laꞌixchivinti putasui tichi lapanac junita. Pus tam xamatiꞌ ju na kꞌox lapanac junita na kꞌox cachivinaꞌ ni yuchi ju kꞌox ju alin laꞌixꞌalhunut. Para tam lapanac ju na kꞌai junita pus na macxcai cachivinaꞌ ni va yuchi ju jantu kꞌox ju alin laꞌixꞌalhunut. Pus tuchi alin laꞌixꞌalhunut ju pumatamin pus chunchach ju chivinin.
\s1 Yocalh lakatꞌui chakaꞌ
\p
\v 46 Tajuch ni va quilalhixakꞌalayau ucxtin para jantu naviyatꞌit tuchi iclalhijunau.
\v 47 Pus tachi chun ju quintalakmin chai quintakꞌasmatni ju quinchivinti chai tanavi tachi ju icnajun pus chani tajunita.
\v 48 Pus va ixtꞌachunchach tajunita tachi ju tam lapanac ju yaulh ixchakaꞌ. Pus talhman lana ju pucutulh tus lhitajulh ju chiux chai laꞌixꞌucxni ju anuꞌ chiux ju yaulh ju xatantun ixchakaꞌ. Chai acsni navikꞌolh ju ixchakaꞌ pus astan milh lakatam akmuxtut. Chai na pꞌas ju neklh ju ani chakaꞌ. Para jantu lai lacchiquixlh ni laꞌixꞌucxni chiux ixchꞌantai.
\v 49 Para va tichi chavaich ju kꞌasmatꞌa ju quinchivinti para jantu muctaxtui pus ju yuchi chunch junita tachi ju apumatam lapanac ju vachuꞌ yaulh ixchakaꞌ. Para ju yuchi jantu talhman pucutulh junta xayajui ju xatantun ixchakaꞌ. Pus acsni na pꞌas neklh ju xcan pus lana maktalh. Lana takꞌalhikꞌo ju anuꞌ chakaꞌ.
\c 7
\s1 Palaich navicalh ixlapanac pumatam xakꞌai
\p
\v 1 Chai acsni ajunkꞌo ju ixchivinti ju lapanacni pus ju Jesús tanulh ju lakꞌachakꞌan Capernaum.
\v 2 Chai ju anch ixvi pumatam capitán ju romano ixjunita. Chai ju yuchi ixꞌalin pumatam ixlapanac ju na ixmapaini. Para na ixtakꞌankꞌai chai na ixniputun.
\v 3 Pus ju anuꞌ capitán acsni kꞌasmatli ixlacata ju Jesús pus amalakachalh ju xapapanin israelitanin ni cataꞌalh tapaininin ju Jesús ni camilh cꞌuchꞌunuꞌ ju ixlapanac.
\v 4 Pus ju yuꞌunch talakꞌalh ju Jesús chai slivasalh tatapaininilh. Tajunich:
\p ―Ju yuchi na kꞌox lapanac junita. Lhijunch ni anaviniyaꞌ ju ani lamapainin.
\v 5 Ju yuchi na tuꞌuꞌ quintalhiulayan ju quijnanꞌan ju israelitanin juntau. Chai vachuꞌ isꞌakstu lhinaulh ixyajuca quimpujitat quincꞌan.
\p
\v 6 Pus ju Jesús alactꞌaꞌalh ju yuꞌunch. Para acsni vanin ixꞌalactꞌachaꞌamputun laꞌixchakaꞌ ju anuꞌ capitán pus ju yuchi amalakachalh ju ixꞌamigojni. Chai acsni talakchilh ju Jesús chani tajuni:
\p ―Ji ucxtin ma va jantu jeks mavaputunan ju yuchi ju quintamalakachatachin. Pus ju yuchi ma jantu tuꞌuꞌ ixtapalhni ni ma laich atꞌitꞌanuchiꞌ laꞌixchakaꞌ.
\v 7 Pus ma yuchi jantu xalhimimputunan tꞌasaninin isꞌakstu ni ma va jantu tuꞌuꞌ lhiulachokocan isꞌakstu. Para ma mas va anauch ju chivinti chai palai cajunaꞌ ju ixlapanac.
\v 8 Pus ju yuchi ma cꞌatsai ni lai chunch catapasayaꞌ ni vachuꞌ alin ju talhijuni. Chai ma vachuꞌ na lhu alin ju ixtaropajni ju alhijuni ju yuchi. Chai acsni ma junich ju pumatam: Aꞌinchich. Pus ma an. Chai ni ma juni apumatam: Atꞌatꞌi. Pus ma minch. Chai acsni ma juni ju ixlapanac: Anavitꞌich ju ani. Pus ma navich.
\p Pus ju anuꞌ capitán ixꞌalhijunita ju ixꞌamigojni ni chunch ju catanaulh ni iscꞌatsai ni taquiclacaꞌini ju Jesús tachi chun ju taxtokni ni yuchi ju xakꞌai tucan junita.
\v 9 Chai ju Jesús acsni akꞌasmatnilh ju ixchivintiꞌan na lhamakꞌaninilh. Chai alaktsꞌilh ju lapanacni ju ixtachꞌakꞌokꞌata chai ajuni:
\p ―Slivasalh ju iclajunau. Jantu iclhitajuta nin pumatam quintꞌaꞌisraelita ju aquilhilaktsꞌilh tachi ju lai ju ani lapanac.
\p
\v 10 Pus ju yuꞌunch ju ixꞌamalakachacanta taꞌanchokolh laꞌixchakaꞌ ju capitán. Chai acsni tachaꞌanchokolh talaktsꞌilh ju takꞌankꞌan ni tachapunch junchokota.
\s1 Ju Jesús malokꞌonichokolh pumatam tsꞌalh ju ixnita
\p
\v 11 Chai acsni tapasalh lakatam lakatꞌui avilhchan pus ju Jesús ixꞌamputun ju lakꞌachakꞌan Naín. Ixtatꞌaꞌanta na lhu ixꞌamamakaꞌui chai na lhu aliꞌin lapanacni.
\v 12 Chai acsni ixchaꞌamputun vanin junta putanucanacha ju lakꞌachakꞌan pus apakxtoklh lhu lapanacni. Va ixlhiꞌancanta campusantu pumatam alasanin. Yuchi ju lakatami istsꞌalh ixjunita ju ixnati chai ju yuchi ixnimacontilacanta. Pus na lhu ixtatꞌaꞌanta ju chakoꞌulh ju ixtꞌaꞌamachakꞌanch.
\v 13 Pus ju ucxtin Jesús acsni laktsꞌilh ju anuꞌ chakoꞌulh na mapaini chai junich:
\p ―Jantu akꞌalhu.
\p
\v 14 Chai ju Jesús stalh lakꞌalh ju ixpꞌaklat ju tsꞌalh chai ucxchꞌapalh. Pus tamastꞌacꞌa ju ixꞌakxkꞌokꞌanin. Chai ju Jesús junilh ju alasanin:
\p ―Tsꞌalh uxintꞌi ju icjunan. Akꞌostꞌaꞌulh.
\p
\v 15 Chai lana kꞌostavilh ju anuꞌ ixnita. Chai tsuculh chiviniꞌ. Pus ju Jesús xtaknichokolh ju ixnati.
\v 16 Pus slivasalh na tatalhanalh ixchuxꞌan ju lapanacni. Chai talakꞌayalh ju Dios. Chai ixtanajun:
\p ―Talacasulh laquilhiquijnanꞌan pumatam kꞌai lapanac ju najun ixchivinti Dios.
\p Vachuꞌ ixtanajun ni Dios xalakmin ju ixlapanacni.
\p
\v 17 Pus laccꞌatsakꞌocalh ixlhilacaputsꞌun ju xaꞌestado Judea chai ixlhilacaputsꞌun ju xalacatꞌun ju ixtꞌalachꞌapata.
\s1 Ju Xivan amalakachalh ju ixꞌamamakaꞌui
\p
\v 18 Chai junta ixtꞌalhnucanta ju Xivan pus ixtamamakaꞌun talhichaꞌanilh chivinti ixlacata tachi chun ju ani taxtokni ju ixnavi ju Jesús. Pus ju Xivan atꞌasanilh pumatꞌui ixtamamakaꞌunti.
\v 19 Chai amalakachanilh ju Jesús. Chai ajuni:
\p ―Chanich aꞌunaꞌitꞌit: Ja ma uxintꞌi ju noncan ni caminaꞌ. U ma acpacxanchokoyau apumatam.
\p
\v 20 Pus ju anuꞌ lapanacni talakmilh ju Jesús chai tajunilh tachi ju ixꞌajuncan. Tajunilh ju Jesús:
\p ―Quintamalakachachin ju Xivan ju amakpaxanaꞌ ni ma aclamiu sacminin ju uxintꞌi. Ja ma uxintꞌi ju caminach noncan u ma acpacxanchokoyau apumatam.
\p
\v 21 Pus ju anuch pantsꞌiquis na lhu ju palai anavi ju Jesús ju ixtalactakꞌankꞌai chai ju na ixtamakꞌalhkꞌajnan. Chai axcoxtulh ju lhacaticurulhni ju ixtatanun laꞌixlacatunaꞌan ju aliꞌin lapanacni. Chai alacmalacꞌavani na lhu ju alakꞌachꞌixnin ixtajunita.
\v 22 Tus acsnicaꞌ ju akꞌalhtayanalh ju Jesús. Ajunilh ju ixtamalakachan ju Xivan:
\p ―Aꞌinchꞌokꞌochitꞌitch juninin ju Xivan tuchꞌi ju xalaktsꞌinatꞌit chai ju tuchꞌi xakꞌasmatꞌatꞌit. Aꞌunaꞌitꞌit ni taꞌalacꞌavanan ju alakꞌachꞌixnin ixtajunita. Chai ju va ixtakꞌalhinita ixchꞌajaꞌan sok taꞌalhtanan. Chai ju va ixtapacxanta ju tsꞌitsꞌi ju na puchꞌiꞌan talaclacamacaxlich. Chai ju kꞌatapa ixtajunita laich takꞌasmatꞌa. Chai ju tanita amalokꞌonichokocalh. Chai ju quilhpatinin ajunicalh ta yu laich cataputakꞌalhtaxtulh.
\v 23 Vachuꞌ aꞌunitꞌit ni lhikꞌach tꞌajun ju tam lapanac ju jantu astan najun ni jantu quinchꞌakꞌokꞌaputun. ―Chunch ju ajunicalh ju ixꞌamamakaꞌui ju Xivan.
\p
\v 24 Chai acsni taꞌanchokolh ju ixꞌalhtanin ju Xivan pus ju Jesús lana tsuculh alacsacminiꞌ ju lapanacni ixlacata ju Xivan. Ajunich:
\p ―Tis chavaich ju ixlaktsꞌimpꞌutꞌunatꞌit junta qꞌuilatꞌit lacamacni. Cꞌatsꞌayatꞌit ni jantiyuꞌ qꞌuilatꞌit ju anch ni va alaktsꞌimpꞌutꞌutꞌit tam lapanac ju va tam tam najun tachi ju lai ju tuꞌuꞌ xaxkꞌoi actiyac acsni lacatam lacatam sun lhiꞌan ju un.
\v 25 Pus tis chavaich ju ixlaktsꞌimpꞌutꞌunatꞌit junta qꞌuilatꞌit. Cꞌatsꞌayatꞌit ni jantiyuꞌ ju lhiqꞌuilatꞌit ju anch ni va alaktsꞌimpꞌutꞌutꞌit tam lapanac ju na va kꞌox camalakchꞌinilh. Pus ju na kꞌox tamalakchꞌininta chai ju jantu tuꞌuꞌ cꞌacxni tatanumanalh laꞌixchakaꞌan ju xalackꞌajin ucxtinin.
\v 26 Pus tis chavaich ju ixlaktsꞌimpꞌutꞌunatꞌit junta qꞌuilatꞌit. Cꞌatsꞌayatꞌit ni va ixlaktsꞌimpꞌutꞌunatꞌit ju lapanac ju najun ixchivinti Dios. Chai iclajunau ni vasalh chunch junita ju Xivan. Para palai kꞌai lhichꞌalhcat ju xtaknicanta ju yuchi. Palai jantu va tichi lapanac ju najun ixchivinti Dios.
\v 27 Ju Xivan yuchi ju pastaccan acsni chani xatsꞌokꞌulacan laꞌixchivinti Dios junta chani najun:
\q1 Acmalakachayaꞌ ju quilapanac ju pꞌulhnan caꞌanaꞌ. Astan ju uxintꞌi.
\q1 Yuchach ju caꞌalakꞌoxiniyaꞌ ixꞌalhunutꞌan ju lapanacni ni cataꞌamaklhtayananan acsni achꞌipꞌinaꞌ.
\m
\v 28 Para iclajunau ni tus chavai jantu alinta tam xamatiꞌ ju palai xakꞌai cava. Va yuchi ju Xivan ju amakpaxanaꞌ. Para va tichi chavaich ju jantu tuꞌuꞌ lhiulacan laꞌixmacniꞌan ixtꞌalapanacni yuchach ju palai kꞌai cajunaꞌ ju lactꞌiyan junta lhinajun ju Dios. Palai jantu na chun junita ju Xivan ju chavai.
\p
\v 29 Pus tachi chun ju lapanacni chai ju achꞌinin acsni takꞌasmatnilh ixchivinti ju Xivan taꞌakpaxlh. Pus chunch ju taputalacasulh ni sok ixtalhiulai tachi ju ixnavi ju Dios acsni ixnajun ni catamacaulh ixꞌalactuꞌuntiꞌan chai cataꞌakpaxlh.
\v 30 Para ju fariseonin chai ju na ixtalhatalaninin ju ixlhamapꞌaksinꞌan ju istꞌaꞌisraelitanin jantu ixtalacasqꞌuin ni caꞌamakpaxalh ju Xivan. Pus ju chunch tasamakꞌalh tuchi ispastacta ju Dios ixlacata ju yuꞌunch.
\v 31 Pus ju Jesús ajuni ju lapanacni:
\p ―Tis chavaich nuꞌ ju va ixtꞌachunch lai aclanaviniyau ju uxijnan ju tꞌonatꞌit ju chavai. Tijuch nuꞌ ju va mintꞌachunch cava.
\v 32 Pus ca laich acnaulh ni ixtꞌachunch untꞌatꞌit tachi ju askꞌatꞌan ju takꞌamanan laclhitamau. Pus ju quilhmactam chani talajuni ju aquilhmactam: “Ju quijnan xacskꞌolau para jantu xaꞌatꞌininatꞌit ju uxijnan. Chai icmilhpauch ju amakꞌaniti para sin chunch jantu xakꞌachꞌaniyatꞌit ni jantu xalackꞌalhunatꞌit”. Chunch talaclajuni ju askꞌatꞌan. Chai vana va chun ju layatꞌit ju uxijnan ju tꞌonatꞌit ju chavai.
\v 33 Pus acsni tavanan milh ju Xivan ju amakpaxanaꞌ pus ju yuchi jantu ixvajin tachi ju venatꞌit chai jantu ixkꞌotꞌa ju vino. Chai ju uxijnan ixnonatꞌit ni va ixpacxanta ju lhacaticuru.
\v 34 Chai icminta ju quitꞌin ju quimalakachatachilh ju Dios ni lapanac actsucuyaꞌ ju ani. Chai ju quitꞌin icvajin tachi ju venatꞌit chai ickꞌotꞌa ju vino chai ju uxijnan nonatꞌit ni va chavani lapanac chai va akꞌotnu lapanac icjunita. Nonatꞌit ni va ixꞌamigo ju achꞌinin chai ju alactuꞌunin icjunita.
\v 35 Para ju vasalh taꞌacꞌatsananta tanajun ni aktsꞌiya kꞌox tuchi navi ju Dios.
\s1 Ju Jesús ixvi laꞌixchakaꞌ pumatam fariseo
\p
\v 36 Pus pumatam fariseo tapaininilh ju Jesús ni catꞌavailh. Chai ju Jesús tꞌatanulh laꞌixchakaꞌ chai tꞌatapakstitama ni chunch ju ixtalhilanitach acsni ixtavajin.
\v 37 Chai ixꞌalin ju anuꞌ lakꞌachakꞌan pumatam chakoꞌulh ju na ixꞌalactuꞌunun. Pus ju yuchi acsni cꞌatsa ni anchach ixtapakstitamai ju Jesús laꞌixchakaꞌ ju anuꞌ fariseo pus vachuꞌ tanucha lacachakaꞌ. Chai lhimilh lakatam lumeti ju ixlhinavicanta chiux ju ixputajun ju cꞌuchꞌu ju na cꞌus acamin.
\v 38 Chai taya laꞌixpulacan ju Jesús junta ixchꞌanꞌanta. Chai tsuculh kꞌalhunuꞌ. Chai ju ixlakpukꞌalhut ixtocꞌaniyacha laꞌixchꞌajaꞌ ju Jesús. Chai ixpuchꞌanxacai ju ixꞌai. Chai ixchꞌanchꞌuchꞌui chai ixchꞌanmucꞌai ju ixcꞌuchꞌu ju na cꞌus acamin.
\v 39 Para acsni laktsꞌilh ju anuꞌ fariseo ju ixkꞌailhiminta ju Jesús laꞌixchakaꞌ pus chani ju pastaclh laꞌixꞌalhunut: “Ju ani ni vasalh cava ju lapanac ju najun ixchivinti Dios pus caꞌismispa tichi chavaich chai ta junita ju isꞌatsucunti ju anuꞌ chakoꞌulh ju tꞌajun lacachꞌapanaꞌ. Caꞌiscꞌatsa ni va alactuꞌunuꞌ junita”.
\v 40 Pus ju acsnich ju Jesús chani junilh ju anuꞌ fariseo:
\p ―Simón va icjumputunan lakatam chivinti.
\p Chai ju anuꞌ fariseo junich:
\p ―Aqꞌuinꞌunch ji amamakaꞌunuꞌ.
\p
\v 41 Chai ju Jesús juni:
\p ―Pumatam lapanac ju ixmachꞌixtꞌakꞌa tumin ixꞌamachꞌixtaknita pumatꞌui lapanacni. Ju pumatam ixlhiꞌani lakaquis cientos. Chai ju pumatam ixlhiꞌani cincuenta pexu.
\v 42 Para ni jantu tuꞌuꞌ ixtamakꞌata ju lai catalhimapalhnichokolh pus ju ixꞌamachꞌixtaknita ju tumin va amacꞌacxanilh ju ixtꞌiyunꞌan. Pus aqꞌuinꞌunch. Tis chavaich ju palai camapainiyaꞌ ju ixtꞌiyunꞌan ju anuꞌ xamachꞌixtakni ixtumin.
\p
\v 43 Chai ju Simón juni:
\p ―Pus ca yuchi ju palai laklhu ixlhiꞌani.
\p Chai ju Jesús juni:
\p ―Stavasalanti ju xakꞌalhtꞌayanan.
\p
\v 44 Ju acsnich ju Jesús laktsꞌilh ju chakoꞌulh chai junich ju Simón:
\p ―Alaktsꞌich ju ani chakoꞌulh. Uxintꞌi ju xaqꞌuinkꞌailhitꞌantꞌa ju ani laminchakaꞌ para jantu xaqꞌuixtꞌakni ju xcan ju xaclhichꞌanchakꞌalh. Para ju ani chakoꞌulh quinchꞌanchakꞌalh laꞌixlakpukꞌalhut chai quinchꞌanxacalh ju laꞌixꞌai.
\v 45 Chai ju uxintꞌi jantu xaqꞌuimacchꞌuchꞌui. Para ju yuchi tus acsni xactanuyacha laminchakaꞌ va tachi quinchꞌanchꞌuchꞌuich.
\v 46 Ju uxintꞌi jantu xaqꞌuilacpamucꞌai ju aceite. Para ju yuchi quinchꞌanmucꞌalh ju cꞌuchꞌu ju na cꞌus acamin.
\v 47 Pus yuchi iclhijunan ni slivasalh na quimapaini ju yuchi ni icmacꞌacxanilh ju ixꞌalactuꞌunti mas na lhu ixjunita. Para na lacatsꞌunin amapaininin ju va lacatsꞌunin macꞌacxanicanta.
\p
\v 48 Pus ju acsnich ju Jesús chani junilh ju chakoꞌulh:
\p ―Icmacꞌacxanin ju miꞌalactuꞌunti ju ixnavitꞌa.
\p
\v 49 Pus ju acsnich ju va kꞌaixtam ixꞌalactꞌavajin ju Jesús tanaulh laꞌixꞌalhunutꞌan:
\p ―Tis chavaich nuꞌ ju ani ni vachuꞌ lai macꞌacxai ju alactuꞌunti.
\p
\v 50 Para ju Jesús junilh ju chakoꞌulh:
\p ―Ni xaqꞌuilhilaksi pus chavai tꞌakꞌalhtꞌaxtꞌutꞌach. Inchich chai lhikꞌach atsꞌucꞌu.
\c 8
\s1 Ixꞌalin ju chakolun ju ixtaꞌaktaijui ju Jesús
\p
\v 1 Chai astan ju Jesús ucsuntsuculh chux ju kꞌai lakꞌachakꞌanixni chai ju lactꞌicstꞌi lakꞌachakꞌanixni. Ixꞌamalaninin chai ixꞌajuni ju lapanacni ni ixlhinomputun ju Dios laꞌixꞌalhunutꞌan. Chai ju ixpumacautꞌuiꞌan ixꞌamamakaꞌui ixtatꞌaꞌanta.
\v 2 Chai vachuꞌ ixꞌalactꞌaꞌanta ju aliꞌin chakolun ju ixꞌacꞌuchꞌuta acsni ixtalactakꞌankꞌai chai ju aliꞌin axcoxtunicalh ju lhacaticurulhni ju ixtatanun laꞌixlacatunaꞌan. Pus sia yuꞌunch ju ixtatꞌaꞌan ju Jesús yuchi ju Malia amachakaꞌ Magdala. Yuchi ju maxtunicalh pumatujun lhacaticurulhni laꞌixlacatuna.
\v 3 Vachuꞌ ixtꞌaꞌanta ju Juana ixꞌamachakaꞌ ju Chuza ju ixlapanac ixjunita ju Herodes ju gobernador ixjunita. Vachuꞌ tꞌaꞌalh ju Susana chai na pumalhu aliꞌin chakolun ju ixtalhiꞌaktaijui ixꞌalintaꞌan laꞌixmaktasqꞌuinitꞌan ju Jesús chai ixꞌamamakaꞌui.
\s1 Pumatam achꞌananaꞌ
\p
\v 4 Pus na lhu lapanacni ixtalakmin ju Jesús ju ixtamintacha lakatamin lakꞌachakꞌan. Chai acsni na lhu ixtatakꞌaixtokta pus ju Jesús ajuni lakatam chivinti ju ixꞌalaktsꞌipaxcavaich ju tuꞌuꞌ. Pus chani ju ajuni:
\p
\v 5 ―Pumatam achꞌananaꞌ alh lhavanaꞌ ju ixꞌachꞌananti. Chai acsni lhavanalh ju ixꞌachꞌananti pus ju aliꞌ ju xatꞌin va laꞌixquilhtuꞌ ti tama. Chai ju aliꞌ putayacalh chai ju aliꞌ tasacꞌulh ju tsꞌokꞌo.
\v 6 Chai ju aliꞌ ju xatꞌin tamacha laꞌixꞌucxni chiux junta va lacatsꞌunin ixꞌalin ju tꞌun. Pus acsni pꞌunlh pus lana xixlh ni jantu ixkꞌajuta ju tꞌun ju anch.
\v 7 Chai ju aliꞌ ju xatꞌin tamacha junta vachuꞌ ixma ju xatꞌin alhtucunuꞌ. Pus pꞌulhnan takꞌaya ju alhtucunuꞌ chai akxtakma ju anuꞌ achꞌananti.
\v 8 Chai ju aliꞌ ju xatꞌin tamacha lacakꞌoxi tꞌun. Pꞌunlh. Chai acsni takꞌaya pus na kꞌoxich xtaklh ju xatocꞌat. Chai tachi ju chꞌancalh pus talhava tam cientos.
\p Pus acsni nonkꞌo ju ani chivinti pus ju Jesús na pꞌas chivinilh. Ajuni ju lapanacni:
\p ―Tichi chavaich ju alin ixpakꞌasmatni cakꞌasmatlh.
\s1 Ju Jesús jantu vas xaꞌajuni ju lapanacni ju tuꞌuꞌ
\p
\v 9 Pus ju acsnich ju ixꞌamamakaꞌui tasacmilh ju Jesús. Tajuni:
\p ―Tijuch ju nomputun ju chivinti ju xanaꞌun.
\p
\v 10 Chai ju Jesús alacjuni:
\p ―Ju Dios lakꞌaꞌi ni amachꞌakxayaꞌitꞌit ju chivinti ju najun ni lhinomputun ju Dios laꞌisꞌatsucuntiꞌan ju lapanacni. Para ju aliꞌin icꞌalhixakꞌalai lacatuꞌuꞌ chivinti ju ixtꞌalaktsꞌipaxcavaich ju tuꞌuꞌ. Chunch iclai ni jantu catitamispa tuchi nomputun mas talaktsꞌin tuchi icnavi. Chai jantu catitamachakxa mas takꞌasmatꞌa ju quinchivinti.
\s1 Ju Jesús mavasalai ju chivinti ixlacata ju achꞌananaꞌ
\p
\v 11 Pus ju chivinti ju xacnajun chani ju nomputun. Ju xatꞌin yuchi ju ixchivinti Dios.
\v 12 Chai ju tꞌin ju tamacha lacati yuꞌunch ju takꞌasmatꞌa ju ixchivinti Dios para lana min ju lhacaticuru chai amacꞌapꞌani ju chivinti ju ixꞌachꞌananicanta laꞌixꞌalhunutꞌan ni jantu catalacaꞌiyaꞌ chai jantu catatakꞌalhtaxtuyaꞌ.
\v 13 Chai ju tꞌin ju tamacha laꞌixꞌucxni chiux yuꞌunch ju takꞌasmatꞌa ixchivinti Dios chai lana soko takꞌachani. Para chunch tajunita tachi ju anuꞌ xapꞌun laꞌixꞌucxni chiux. Jantu laꞌixlhichux ixꞌalhunutꞌan ju taꞌamaklhtayanan. Va pantsꞌiquis ju talacaꞌi. Para acsni tamakꞌalhkꞌajnan ixlacata ju chivinti pus lana tamacajun ixti Dios.
\v 14 Chai ju tꞌin ju tamacha junta ixꞌalin ju xatꞌin alhtucunuꞌ pus yuꞌunch ju takꞌasmatꞌa ju ixchivinti Dios. Para lacsni lacsni tacꞌapꞌa va ixlacaꞌatalh ni na lhu alin ju xataxtokni ju ani lacamunutpaꞌ ju talhamakꞌaninin. Chai na takꞌachani ju ixmakꞌalitꞌan chai na kꞌox talhiulai ju ixkꞌachat ju ani lacamunutpaꞌ. Pus jantu tavanan vasalh tasui ixtachaput ju Dios laꞌisꞌatsucuntiꞌan.
\v 15 Para ju tꞌin ju tamacha lacakꞌoxi tꞌun yuꞌunch ju takꞌasmatꞌa ju ixchivinti Dios chai ixlhichux ixꞌalhunutꞌan talacaꞌikꞌalhi. Chunch talai ni na kꞌox ju ixꞌalhunutꞌan tachi ju kꞌachani ju Dios. Chai tachꞌixa va tuchi min laꞌisꞌatsucuntiꞌan chai slivasalh tasui ixtachaput ju Dios laꞌisꞌatsucuntiꞌan.
\s1 Ju chivinti ixlacata ju tuꞌuꞌ maclhcu
\p
\v 16 Acsni xamatiꞌ xavai ju ixmaclhcu jantu va puꞌakxtakꞌulai tuꞌuꞌ xalu. Nin yuchi ni lai caꞌula laꞌixtankꞌapuꞌ putaman. Alai anch ju mucꞌai junta aktsꞌiya mucꞌacan ju maclhcu. Chai ju chunch tachi chun ju catatanuyach cataꞌalacꞌavananaꞌ.
\v 17 Pus chunchach vachuꞌ ju quinchivinti. Mas va miꞌakstuꞌan xaclamavasalaniyau ju chivinti para astan amacꞌatsꞌaniyaꞌitꞌit ju lapanacni. Chai ju tuchi chivinti ju jantu amamachakxanican ju ixtalhavatꞌan lapanacni pus uxijnan ju amacꞌatsꞌaniyaꞌitꞌit chai catamachakxayaꞌ. Chai ni chunch ju alayaꞌitꞌit pus tachi ju va calhcuyaꞌ ju maclhcu laꞌixꞌalhunutꞌan ni laich catamachakxayaꞌ ixchivinti Dios.
\p
\v 18 Para ni lai chunch ju alayaꞌitꞌit astan pus tasqꞌuini ni pꞌulhnan kꞌoxich akꞌasmatꞌaꞌitꞌit. Pus va tichi chavaich ju kꞌasmatꞌa chai navi tachi ju najun laꞌixchivinti Dios pus palai lhu camamachakxanicanaꞌ. Para va tichi chavaich ju cakꞌasmattsuculh para ni jantu canaviyaꞌ ju tuchi najun laꞌixchivinti Dios pus camacꞌapꞌanikꞌoyach tuchi na mispaich najun.
\s1 Talakmilh ju Jesús ixnati chai ixꞌapꞌisekꞌen
\p
\v 19 Pus astan talakmilh ju Jesús ju ixnati chai ixꞌapꞌisekꞌen. Para jantu lai stalh ixtalakꞌan ni na lhu ixjunita ju lapanacni.
\v 20 Chai pumatam chani juni ju Jesús:
\p ―Ju minati chai ju miꞌapꞌisekꞌen tayanancha makspaꞌ. Va talaktsꞌimputunan.
\p
\v 21 Para ju Jesús alacjuni:
\p ―Ju vasalh quinati tajunita chai vasalh quiꞌapꞌisekꞌen tajunita yuꞌunch ju takꞌasmatꞌa ju ixchivinti Dios chai tamuctaxtui tachi ju najun ju anch.
\s1 Ju Jesús kꞌailh ju un chai ju xcan
\p
\v 22 Chai milh avilhchan acsni tatꞌataju ju Jesús ju ixꞌamamakaꞌui lacabarco. Chai ju yuchi ajuni:
\p ―Catapasauch ju lhimakꞌantacutni atantsꞌin.
\p Chai taꞌalh.
\v 23 Para acsni ixtaꞌantacaꞌ ju lacxcan pus ju Jesús lana lhtatalh. Chai kꞌostaya ju kꞌai un chai na pꞌas tanekꞌalh ju xcan chai ixquiꞌakpaxputun ju barco. Chai na ixtamuxtuputunch.
\v 24 Pus ju ixꞌamamakaꞌui talakꞌalh ju Jesús chai tamaklokꞌo. Tajunich:
\p ―Amamakaꞌunuꞌ na muxtuputunauch.
\p Pus ju Jesús kꞌostavi. Kꞌailh ju un chai ju xcan. Chai lana va sek tavi ju xcan chai na sekch avanalh.
\v 25 Chai ju Jesús ajunich ju ixꞌamamakaꞌui:
\p ―Tajuch ni jantu quilalhilacaꞌanau.
\p Para ju yuꞌunch na ixtatalhanan chai na ixtalhamakꞌaninin. Chai talaclajunich ju sia yuꞌunch:
\p ―Tis chavaich nuꞌ ju ani. Mas yuchi ju un chai ju xcan ni akꞌaji si taquiclacaꞌi.
\s1 Pumatam ixpacxanta ju lhacaticuru
\p
\v 26 Ju Jesús chai ixꞌamamakaꞌui tatacutcha laꞌixtꞌunꞌan ju amachakꞌan Gadara. Ju anch ixtꞌalalacaꞌanita ju xaꞌestado Galilea ju lhilakꞌantacutni lacaꞌatantsꞌin.
\v 27 Chai acsni tayacha ju lacatꞌun ju Jesús pus lana quipakxtokchilh pumatam amachakaꞌ ju anuꞌ lakꞌachakꞌan. Ju yuchi ixpacxanta ju lhacaticurulhni. Chai na makꞌan jantu ixmalakchꞌininta. Chai jantu ixvi laꞌixchakaꞌ. Va campusantu ixꞌucxuntꞌajun.
\v 28 Pus ju yuchi acsni laktsꞌilh ju Jesús tsꞌau tꞌasalh. Chai lana taquilhputanilh ju laꞌixꞌucxlacapuꞌ. Chai ju lhacaticurulhni na pꞌas tachivinilh laꞌixquilhni ju anuꞌ lapanac acsni chani tajuni ju Jesús:
\p ―Tijuch ju quilamintau lhilaktsꞌinin ju uxintꞌi ji Jesús. Ju uxintꞌi istsꞌalhꞌat Dios ju vilhcha lactꞌiyan. Iclatapaininiyau ni jantu aquilamamakꞌalhkꞌajniu.
\p
\v 29 Pus chunch ju tanaulh ju lhacaticurulhni ni ixꞌalackꞌaimatach ju Jesús. Ixꞌajunita ju yuꞌunch ni catataxtulh laꞌixlacatuna ju lapanac. Pus acsni tucaꞌ ixꞌakꞌajita ju Jesús ju lhacaticurulhni pus na paklhu ixtachꞌapata ju anuꞌ lapanac. Chai mas ixlacachꞌimacanta lacacadena chai ixchꞌantꞌalhmacanta para acsni ixtatanui ju lhacaticurulhni laꞌixlacatuna pus ixlackꞌexꞌulakꞌojui ju ixpulacachꞌimacan. Chai ju lhacaticurulhni ixtakꞌailhiꞌan junta va aseknicꞌa junita.
\v 30 Pus ju Jesús sacmilh ju anuꞌ lapanac. Junich:
\p ―Tꞌis uncꞌanch.
\p Chai ju yuchi juni:
\p ―Legión icjuncan.
\p Pus lhinaulh chunch ni na lhu ixpacxanta ju lhacaticurulhni chai ju Legión ixtapakaꞌut junita lhu ju taropajni.
\v 31 Pus ju lhacaticurulhni tatapaininilh ju Jesús ni jantu caꞌamacaꞌalh ju lacajipi.
\v 32 Pus ju anuch akstijun ixtayanalh ixtalhavat pꞌaxnin ju ixtatꞌajun kꞌexvenin. Chai ju lhacaticurulhni talhitapaininilh ju Jesús ni laich catatanu laꞌixlacatunaꞌan ju pꞌaxnin. Chai ju yuchi yauch ajunilh.
\v 33 Pus ju lhacaticurulhni tataxtulh laꞌixlacatuna ju anuꞌ lapanac chai lana tatanu laꞌixlacatunaꞌan ju pꞌaxnin. Chai ixtalhavat pꞌaxnin pꞌas taꞌatsꞌalaꞌalh junta vak anta. Chai tatajucha lacaꞌatantsꞌin. Chai anch ju tanitajukꞌo.
\p
\v 34 Pus ju xaꞌalhistacnin pꞌaxnin acsni talaktsꞌilh tuchi tapasalh pus tatalhanalh chai taꞌatsꞌalaꞌalh. Taꞌalh nonin ju anuꞌ lakꞌachakꞌan chai ju lacacuxtun tuchi ixtapasata.
\v 35 Pus ju lapanacni lana taꞌatsꞌalamilh laktsꞌinin tuchi ixtapasata. Chai talakmilh ju Jesús chai talhitajulh ju anuꞌ lapanac ju ixtaxtunitach ju lhacaticurulhni laꞌixlacatuna. Pus ju yuchi vanin ixvi junta ixya ju Jesús chai ixmalakchꞌininta chai ixtakꞌoxita ju isꞌaktsulh. Pus ju yuꞌunch acsni talaktsꞌilh na tatalhanalh.
\v 36 Chai tachi chun ju lapanacni ju ixtalaktsꞌinta tuchi tapasalh tanonkꞌo ta yu palaich puva ju anuꞌ lapanac ju ixpacxanta ju lhacaticurulhni.
\v 37 Pus ju acsnich tachi chun ju ixtalhavat lapanacni ju amachakꞌan xalacatꞌun ju ixtalakachoko ju lakꞌachakꞌan Gadara tatapaininilh ju Jesús ni cataxtulh laꞌixtꞌunꞌan. Chunch ju tanavi ni na va ixtatalhananch. Pus ju Jesús tajuchokopa lacabarco. Chai minchokocha.
\v 38 Para acsni tucaꞌ ixtaxtui ju Jesús pus ju anuꞌ lapanac ju ixꞌamaxtunicanta ju lhacaticurulhni tapaininilh ju Jesús ni caꞌixtꞌaꞌalh ju yuchi. Para ju Jesús va malakacha laꞌixchakaꞌ. Junich:
\p
\v 39 ―Apꞌinchꞌokꞌochich ju laminchakaꞌ chai aꞌunch ju lapanacni tuchi kꞌai lhamakꞌan ju xanaviniyan ju Dios.
\p Pus ju anuꞌ lapanac alh chai quilhuntsuculh ixlhilacaputsꞌun ju lakꞌachakꞌan tuchi kꞌai lhamakꞌan ju ixnavinita ju Jesús ju ixlacata.
\s1 Palaich anavicalh pumatam atsiꞌ chai pumatam chakoꞌulh
\p
\v 40 Pus acsni minchokolh ju Jesús junta ixtaxtutacha pus ju ixtalhavat lapanacni lhikꞌach taꞌamaklhtayanalh ni ixchuxꞌan ixtapacxantaji.
\v 41 Chai lakmilh pumatam lapanac ju ixjuncan Jairo. Pus ju yuchi pumatam xakꞌai ixjunita sia yuꞌunch ju ixtachꞌalhcatnan laꞌixpujitatꞌan ju istꞌaꞌisraelitanin. Pus ju yuchi taquilhputanilh ju lacatꞌun vanin laꞌixchꞌajaꞌ ju Jesús. Tapaininilh ni catꞌaꞌalh laꞌixchakaꞌ.
\v 42 Pus ixꞌalin lakatami istsiꞌ ju ixpacxanta tachi lakacautꞌui cꞌata. Chai ju yuchi ixtꞌajun niniꞌ. Pus ju Jesús tꞌaꞌalh. Para acsni ixꞌanta ju lacati pus va ixtalatankꞌasiꞌanta ju ixtalhavat lapanacni.
\p
\v 43 Chai vachuꞌ ixmakꞌanta pumatam chakoꞌulh ju na makꞌanch jantu ixlakxixta. Pus lakacautꞌui cꞌata ju ixpacxanta ju ixtakꞌankꞌat chai ixꞌaxtaknikꞌojutach ju acꞌuchꞌunin chux ju ixꞌalinta para nin chun jantu xamatiꞌ lai palai xanavi.
\v 44 Pus ju yuchi chincha laꞌixlhipulacan ju Jesús chai lakchaꞌanilh ixquilhtuꞌ ixpumpuꞌ. Chai lana astacnanilh ju ixtakꞌankꞌat.
\p
\v 45 Pus ju acsnich ju Jesús naulh:
\p ―Tis chavaich ju xaquilakchaꞌan.
\p Chai vaklhtam chun ixtanajun ju ixtalhavatꞌan ni jantu yuꞌunch. Pus ju acsnich ju Pitaluꞌ chai ju ixꞌalactꞌaꞌanta tajunilh ju Jesús:
\p ―Amamakaꞌunuꞌ tꞌas laich sacmitꞌi tis chavaich ju xalakchaꞌanan ni na tatankꞌasiyan chai tapalhitꞌanch ju lapanacni.
\p
\v 46 Para ju Jesús naulh:
\p ―Aktsꞌiya quilakchaꞌalh xamatiꞌ ni iccꞌatsalh ni iccꞌuchꞌulh pumatam.
\p
\v 47 Pus ju anuꞌ chakoꞌulh acsni cꞌatsalh ni jantu lai va sek xanavi pus vanin lakꞌanchokolh ju Jesús. Na ixꞌaxqꞌuipꞌipꞌitninta. Chai taquilhputanilh ju lacatꞌun laꞌixꞌucxlacapuꞌ chai junilh ju stavasalanti laꞌixꞌucxlacapuꞌan ju lapanacni tuchi ixlacaꞌatalh ju lhilakchaꞌalh chai ni vatsꞌalhti palaich va.
\v 48 Pus ju Jesús junich:
\p ―Quintsiꞌ ni qꞌuilhilacꞌapꞌinch pus yuchi palaich xalhiꞌun. Aꞌinchich. Cakꞌachanach ju miꞌalhunut.
\p
\v 49 Chai acsni ixtꞌajuncaꞌ tꞌachiviniꞌ ju chakoꞌulh ju Jesús ju lacati pus minchalh pumatam lapanac ju ixtaxtutacha laꞌixchakaꞌ ju anuꞌ xakꞌai chai junicalh ju Jairo:
\p ―Ju mintsiꞌ nitach. Jantu palai jeks amavatꞌi ju amamakaꞌunuꞌ.
\p
\v 50 Para acsni kꞌasmatlh ju Jesús pus junilh ju lapanac:
\p ―Jantu atꞌalhan. Va aqꞌuilhilacꞌapꞌich. Chai palaich cajunaꞌ ju mintsiꞌ.
\p
\v 51 Chai acsni tanucha lacachakaꞌ ju Jesús pus jantu lacasqꞌuinilh ni xamatiꞌ catꞌatanu ju pulactam junta ixma ju lijunto askꞌatꞌa. Va yuchi ju Pitaluꞌ ju tꞌatanu chai ju Jacobo chai ju Xivan chai ju ixpaich chai ixnatich ju anuꞌ atsiꞌ.
\v 52 Pus chux ju lapanacni na ixtalackꞌalhun chai na pꞌas ixtalactꞌasai. Para ju Jesús alacjunich:
\p ―Jantu akꞌalhuntꞌit. Jantu nita ju atsiꞌ. Va lhtataich.
\p
\v 53 Para ju yuꞌunch va talhitsꞌiꞌilh ju Jesús ni ixtacꞌatsaich ni vasalh ixnita ju atsiꞌ.
\v 54 Para ju Jesús chꞌapanilh ixmacaꞌ ju atsiꞌ chai pꞌas xakꞌalalh. Junich:
\p ―Akꞌostꞌaꞌulhch ji atsiꞌ.
\p
\v 55 Pus lana minchokolh ixtacuvin laꞌixlacatuna chai lana kꞌostavi. Chai ju Jesús naulh ni caxtaknicalh ju ixvaiti.
\v 56 Pus ju ixpai chai ixnati ju atsiꞌ na talhamakꞌaninilh. Para ju Jesús alaclhimapꞌaksi ni jantu xamatiꞌ catajunilh tuchi ixtapasata.
\c 9
\s1 Ju Jesús amalakacha ixpumacautꞌuiꞌan
\p
\v 1 Ju Jesús amakꞌaixtoklich ju ixpumacautꞌuiꞌan ixꞌamamakaꞌui chai axtaknilh ixtachaputꞌan chai ju ixpukꞌaiꞌan ni laich cataxcoxtuyaꞌ ju lhacaticurulhni laꞌixlacatunaꞌan ju lapanacni chai lai palaich catanaviyaꞌ tachi chun ju takꞌankꞌanin.
\v 2 Chai amalakacha ni cataꞌalh ajuninin ju lapanacni ni lhinomputun ju Dios laꞌisꞌatsucuntiꞌan chai ni palaich catanaviyaꞌ ju takꞌankꞌanin.
\v 3 Chai ajuni:
\p ―Jantu tuꞌuꞌ alhipꞌitꞌit ju ixlacata ju lacati. Nin mimpalicꞌan nin mimpastiꞌan nin miniꞌan nin tumin nin yuchi ni lai alhipꞌitꞌit kꞌalhtꞌui ju mimpumpuꞌan.
\v 4 Chai va tuchi chakach junta astꞌacnanaꞌitꞌit pus anch ju atꞌolhkꞌalhiyaꞌitꞌit tus acsni atꞌaxtꞌuchꞌokꞌoyaꞌitꞌit ju anuꞌ lakꞌachakꞌan.
\v 5 Chai va tuchi lakꞌachakꞌan ju jantu cataꞌamaklhtayananan pus acsni atꞌaxtꞌuchꞌokꞌoyaꞌitꞌit ju anch achꞌancꞌalhapꞌuxcꞌantꞌit ju pokxni laminchꞌanxtꞌakꞌanꞌan ni catapucꞌatsayaꞌ ni jantu kꞌox tanavita.
\p
\v 6 Pus tataxtulh ju yuꞌunch chai taꞌalh chux ju lakꞌachakꞌanixni. Chai ixlhilacaputsꞌun ju anuꞌ lacatꞌun ixtajuni ju lapanacni ta yu laich catatakꞌalhtaxtulh. Chai palaich ixtanavi ju takꞌankꞌanin.
\s1 Maknicalh ju Xivan ju amakpaxanaꞌ
\p
\v 7 Pus ju gobernador Herodes kꞌasmatlh tachi chun ju taxtokni ju ixnavi ju Jesús. Chai ju yuchi na ixlhamakꞌaninin ni ixtanajun ju aliꞌin ni va lokꞌonchokolh ju Xivan laꞌixꞌaninti.
\v 8 Chai ju aliꞌ ixtanajun ni va minchokolh ju makꞌaniya ixlapanac Dios ju Elías ixjuncan. Chai ju aliꞌin ixtanajun ni va lokꞌonchokolh apumatam makꞌaniya lapanac ju ixnajun ixchivinti Dios.
\v 9 Para ju Herodes naulh:
\p ―Quitꞌin quiꞌakstu iclhinaulh ixꞌacchꞌucꞌuca ju Xivan. Pus ju ani tis chavaich nuꞌ ju lhichivinincan na lhu taxtokni.
\p Chai ju Herodes na ixlaktsꞌimputun ju Jesús.
\s1 Ju Jesús amava lhu lapanacni
\p
\v 10 Pus acsni tataspꞌitchokocha ju ixꞌalacmalakachata ju Jesús ni cataꞌalh pumatꞌiyun pumatꞌiyun amalaninin ju lapanacni pus talakminchokolh ju Jesús chai tajunkꞌo tachi chun ju taxtokni ju tanavichalhch. Chai ju Jesús akꞌailhiꞌalh alacatam junta aseknicꞌa ixjunita. Junta vanin ixjunita ju lakꞌachakꞌan Betsaida.
\v 11 Para acsni tacꞌatsa ju lapanacni pus lana taꞌachꞌakꞌokꞌanalh. Chai ju Jesús lhikꞌach amaklhtayanalh. Chai tsuculh alacjuniniꞌ ni lhinomputun ju Dios laꞌisꞌatsucuntiꞌan. Vachuꞌ acꞌuchꞌu ju takꞌankꞌanin.
\p
\v 12 Chai acsni ixtokꞌoxaputun pus ju ixpumacautꞌuiꞌan talakꞌalh ju Jesús chai tajuni:
\p ―Amalakꞌachꞌatꞌi ju lapanacni. Chach taꞌancha lakꞌachakꞌanixni junta vanin tasui chai chux ju lacchakaꞌ ju lacacuxtu tasui. Chach taꞌancha sqꞌuininin ju chakaꞌ junta laich catalakacujlh chai junta laich catavailh. Pus junta vilau ni matiꞌ tuꞌuꞌ.
\p
\v 13 Para ju Jesús alacjuni:
\p ―Amavatꞌitch ju uxijnan.
\p Chai ju yuꞌunch tajuni:
\p ―Para va akxquisich vati ju xaclhitajuyau chai lakatꞌui lactꞌicstꞌi pamata. U ni jantu pus ca acꞌanauch tamonin ju vaiti ixlacata chux ju ani lapanacni.
\p
\v 14 Pus ixchaꞌanta tachi lakaquis milh jokꞌatni. Pus ju acsnich ju Jesús alacjunilh ju ixꞌamamakaꞌui:
\p ―Chach tatolhcha chai alhcꞌaꞌulachich cincuenta ju quilhmaktamin.
\p
\v 15 Pus chunch ju tanavi. Chai tatolhcha ixchuxꞌan.
\v 16 Pus ju acsnich ju Jesús chꞌapalh ju akxquis vati chai ju lakatꞌui pamata chai talakstꞌalh ju lactꞌiyan. Xtaklh lhakꞌailaktsꞌin chai chꞌekꞌelh chai axtaknilh ju ixꞌamamakaꞌui ni cataxtaknilh ju ixtalhavat lapanacni.
\v 17 Pus taꞌokꞌo ixchuxꞌan chai talhilalh. Chai tasacchokolh ju tamaxajnicha chai talaktsama lakacautꞌui tankꞌalin.
\s1 Ju Pitaluꞌ naulh tichi chavaich ju Jesús
\p
\v 18 Lakatam avilhchan acsni va isꞌakstu ixvi ju Jesús pus tsuculh tꞌachiviniꞌ ju Dios. Va yuꞌunch ju ixꞌamamakaꞌunti ju ixꞌalactꞌavi. Chai acsni tꞌachivinkꞌo pus alacsacmilh ju ixꞌamamakaꞌui. Ajunich:
\p ―Tas tanajun ju lapanacni. Tis chavaich quintalhiulai ju quitꞌin.
\p
\v 19 Chai ju yuꞌunch takꞌalhtayanalh. Tajuni:
\p ―Ju aliꞌin tanajun ni ma Xivanꞌat ju amakpaxanaꞌ. Chai ju aliꞌin tanajun ni ma Elíasꞌat. Chai ju aliꞌin tanajun ni ma uxintꞌich pumatam makꞌaniya lapanac ju ixnajun ixchivinti Dios. Ma va lokꞌonchꞌokꞌoch.
\p
\v 20 Chai ju Jesús ajuni:
\p ―Chai ju uxijnan tis chavaich quilalhiulayau ju quitꞌin.
\p Chai ju Pitaluꞌ junich:
\p ―Uxintꞌich ju Cristoꞌat ju ixnoncan camalakachatachilh ju Dios.
\s1 Ju Jesús naulh ni camaknicanaꞌ
\p
\v 21 Pus ju Jesús slivasalh alhimapꞌaksi ju ixꞌamamakaꞌui ni jantu xamatiꞌ catajunilh ni Cristo junita.
\v 22 Chai ajuni:
\p ―Aktsꞌiya tasqꞌuini ni aclhimakꞌalhkꞌajnalh na lhu taxtokni ju quitꞌin ju quimalakachatachilh ju Dios ni lapanac actsucuyaꞌ ju ani. Chai jantu tuꞌuꞌ aquintalhiulayaꞌ ju xapapanin ju quintꞌaꞌisraelitaninꞌan chai ju xalackꞌajin palijni chai ju yuꞌunch ju na talhatalanininta ju milhamapꞌaksinꞌan. Chai aquintamakniyaꞌ. Para aclokꞌonchokoyaꞌ ju ixlhilakatꞌutu avilhchan.
\p
\v 23 Chai astan ju Jesús ajuni ixchuxꞌan ju anch ixtavilanalh:
\p ―Ni xamatiꞌ quilapanac jumputun pus jantu lai catinavi ixkꞌachat isꞌakstu. Chai chux tuncujun cachꞌixlh ju makꞌalhkꞌajnat ju caꞌalinaꞌ va ixlacaꞌatalh ni quilhilacaꞌanta ju quitꞌin. Chai va tachi aquinchꞌakꞌokꞌalh.
\v 24 Pus va tichi chavaich ju najun ni jantu quinchꞌakꞌokꞌaputun va ixlacaꞌatalh ni va lai maknicalh pus ju yuchi camakꞌatsꞌankꞌayaꞌ ju saꞌatsucunti ju lactꞌiyan. Para va tichi chavaich ju camakꞌatsꞌankꞌayaꞌ ju isꞌatsucunti va ixlacaꞌatalh ni quinchꞌakꞌokꞌai ju quitꞌin pus caꞌalinaꞌ ju isꞌatsucunti ju lactꞌiyan.
\v 25 Pus jantu tuꞌuꞌ lhajai tam lapanac mas calhajakꞌo chux ju xataxtokni ju ani lacamunutpaꞌ ni va calhimakꞌatsꞌankꞌa ju isꞌatsucunti chai jantu lai catiꞌalh ju lactꞌiyan.
\v 26 Pus va tichi chavaich ju aquintꞌamaxananaꞌ ju quitꞌin chai catꞌamaxananaꞌ ju quinchivinti pus vachuꞌ ju quitꞌin actꞌamaxananaꞌ ju yuchi. Quitꞌin ju quimalakachatachilh ju Dios ni lapanac actsucuyaꞌ ju ani. Actꞌamaxananaꞌ ju yuchi acsni acminchokoyaꞌ chai kꞌai ucxtin acjunaꞌ. Acminaꞌ laꞌixtachaput ju quimpai chai laꞌixtachaputꞌan ju anquilhnin ju tavilanancha lactꞌiyan.
\v 27 Chai iclajunau ju stavasalanti. Alin ju lamilhiꞌuxijnan ju vilatꞌit ju ani ju jantu cataniyaꞌ tus acsni catalaktsꞌinaꞌ ta yu tasui acsni vi ju Dios laꞌixpuꞌucxtin.
\s1 Ju Jesús tam atalacasunilh ju ixꞌamamakaꞌui
\p
\v 28 Pus tachi ixlhilakatsajin avilhchan ixtapasata acsni ixꞌajunita ju lapanacni ju ani chivinti. Pus ju acsnich ju Jesús alactꞌasanilh ju Pitaluꞌ chai ju Xivan chai ju Jacobo. Chai alactꞌaꞌalhꞌ ju lakatam kꞌai talhpa. Alh tꞌachiviniꞌ ju Dios.
\v 29 Chai acsni ixtꞌajun tꞌachiviniꞌ ju Dios pus lana tapaxalh ju ixꞌucxpuꞌ ju Jesús. Chai ju ixpumpuꞌ lana na xlapꞌapꞌa ixmaktajita chai na xnapapa ixjunita.
\v 30 Chai vachuꞌ tatalacasucha ixpumatꞌuiꞌan lapanacni ju ixtatꞌachivinin ju Jesús. Yuꞌunch ju Moisés chai ju Elías ju makꞌanch ixtatꞌajun.
\v 31 Chai ju yuꞌunch vachuꞌ tatalacasulh laꞌixꞌamatuncunit ju Dios. Chai ixtalhichivinin ju ixꞌaninti ju Jesús ju catapasayaꞌ ju lakꞌachakꞌan Jerusalén.
\v 32 Para ju Pitaluꞌ chai ju ixꞌalactꞌavi slivasalh na ixtalaclhtatai. Chai acsni xcaya tacujlh pus talaktsꞌilh ni xlapꞌapꞌa ixmaktajita ju anch. Vachuꞌ talaktsꞌilh ju ixtꞌiyunꞌan lapanacni ju ixꞌalactꞌaya ju Jesús.
\v 33 Chai acsni tatsꞌankꞌa laꞌixꞌalacꞌavantiꞌan ju anuꞌ ixtꞌiyunꞌan pus ju Pitaluꞌ junich ju Jesús:
\p ―Amamakaꞌunuꞌ na kꞌoxich iclhiulayau ni anich icvilau. Acnaviyauch akꞌatꞌutu pacꞌatsꞌa. Akꞌatamch ju miꞌanuꞌ. Chai akꞌatamch ju ixꞌanuꞌ ju Moisés. Chai ju akꞌatamch ixꞌanuꞌ ju Elías.
\p Chunch ju naulh ju Pitaluꞌ para jantu iscꞌatsai tuchi ixnajunch.
\v 34 Pus acsni ixtꞌajun nonaꞌ ju ani pus milh lakatam ataputsꞌi chai aꞌakxtakmakꞌo. Chai ju yuꞌunch lana na tatalhanalh acsni tatanulh ju lacaꞌataputsꞌi.
\v 35 Chai takꞌasmatlh lakatam chivinti ju xaminacha lacaꞌataputsꞌi chai ixnajun:
\p ―Ju ani yuchi ju quintsꞌalh chai na icmapaini. Yuchach ju akꞌasmatnitꞌit.
\p
\v 36 Chai acsni chivinkꞌo pus ju ixtamamakaꞌun ju Jesús talaktsꞌilh ni va isꞌakstu ixya ju Jesús. Para astan jantu xamatiꞌ tuꞌuꞌ tajuni tuchi ju ixtalaktsꞌinta.
\s1 Ju Jesús palai navi pumatam tsꞌalh
\p
\v 37 Acsni tuncunchokopa pus ju Jesús chai ixpumatꞌutuꞌan ixtamamakaꞌui taminchokocha ju anuꞌ lactalhpa. Chai na lhu lapanacni ju taquiꞌapakxtoknulh.
\v 38 Chai pumatam lapanac ju ixmakminta lana xakꞌala ju Jesús. Chai na pꞌas ju chivinilh acsni chani juni:
\p ―Amamakaꞌunuꞌ ictapaininiyan ni aꞌaktꞌaiꞌutꞌich ju quintsꞌalh ni va lakatamch.
\v 39 Pus va tanui ju lhacaticuru laꞌixlacatuna chai lana va tam pantsꞌiquis tsꞌau tꞌasai. Chai tin lhinek chai na akpupui. Chai acsni xcaya macajunch pus na talacacꞌatsanita ju yuchi.
\v 40 Chai ictapaininilh ju mintamamakaꞌun ni cataxcoxtulh ju lhacaticuru para jantu lai ixtaxcoxtui.
\p
\v 41 Pus ju acsnich ju Jesús ajunich:
\p ―Tis va yuchach ji lapanacni ni lana jantu lai lacꞌaꞌiyatꞌit. Ja tasqꞌuini ni lana na makꞌan aclatꞌatolau chai aclachꞌixniu tus acsni alacꞌaꞌiyaꞌitꞌit. Alhitꞌach ju mintsꞌalh.
\p
\v 42 Para acsni ixminta ju anuꞌ askꞌatꞌa pus ju lhacaticuru lana tin lhinekchokolh chai lhtucu lhtucu ucxuntama. Para ju Jesús kꞌailh ju lhacaticuru chai junilh ni cataxtulh laꞌixlacatuna ju anuꞌ askꞌatꞌa. Chai lana palaich va ju anuꞌ tsꞌalh. Chai makꞌaxtaknichokolh ju ixpai.
\v 43 Chai chux ju lapanacni na ixtalhamakꞌanininch ixtachaput ju Dios.
\s1 Ju Jesús nonchokopalai ni camaknicanaꞌ
\p Chai acsni ixtalhamakꞌaninin ixchuxꞌan tachi chun ju taxtokni ju ixnavich ju Jesús pus ju yuchi ajunilh ju ixꞌamamakaꞌui:
\p
\v 44 ―Anavitꞌit cuenta ju ani ju iclajunau chai jantu tavanan acꞌapꞌaꞌitꞌit. Ju quitꞌin acmakꞌaxtakcanaꞌ laꞌixmacaꞌan ju lapanacni. Quitꞌin ju quimalakachatachilh ju Dios ni lapanac actsucuyaꞌ ju ani. ―Chunch ju ajunilh ju Jesús.
\p
\v 45 Para ju ixꞌamamakaꞌui jantu lai ixtamachakxai tuchi ixnomputun junima chivinti chai jantu ixꞌalakꞌaꞌinican ni laich catamachakxa ju acsnich. Chai ju yuꞌunch ni va ixtatalhoni ju Jesús pus jantu istasacmiputun tuchi ixnomputun.
\s1 Tis chavaich ju palai xakꞌai
\p
\v 46 Pus ju ixꞌamamakaꞌui ju Jesús tatsuculh lhilakꞌainin tichi chavaich ju palai xakꞌai ixjunita.
\v 47 Para ju Jesús acsni cꞌatsalh tuchi ixtapastꞌacꞌa laꞌixꞌalhunutꞌan pus xakꞌatailh pumatam askꞌatꞌa chai yaulh vanin junta ixvi ju yuchi.
\v 48 Chai ajuni ju ixꞌamamakaꞌui:
\p ―Va tichi chavaich ju caꞌamaklhtayananaꞌ tam askꞌatꞌa tachi ju ani ya va ixlacata ni quilhilacaꞌanta ju quitꞌin pus tachi ju va jun quitꞌin ju quiꞌamaklhtayanan. Chai va tichi chavaich ju quiꞌamaklhtayanan ju quitꞌin pus vachuꞌ amaklhtayanan ju quimpai ju quimacaminta. Pus va tichi chavaich ju lamilhiꞌuxijnan ju jantu tuꞌuꞌ calhitakꞌaya yuchach ju palai xakꞌai.
\s1 Ju jantu quintꞌalaxcaiꞌan pus quilakꞌauꞌan
\p
\v 49 Pus ju acsnich ju Xivan junilh ju Jesús:
\p ―Amamakaꞌunuꞌ iclaktsꞌiu pumatam ju ixcoxtui ju lhacaticuru laꞌixlacatunaꞌan ju lapanacni lamintapakaꞌut. Chai ickꞌajiuch ni jantu chꞌakꞌokꞌayan tachi ju quijnan.
\p
\v 50 Para ju Jesús ajunilhch:
\p ―Jantu akꞌaꞌitꞌit. Pus ju jantu quintꞌalaxcaiꞌan quilakꞌauchꞌan.
\s1 Akꞌaicalh ju Jacobo chai ju Xivan
\p
\v 51 Chai acsni ixchimputun ju avilhchan acsni caꞌamaklhtayananchokocanaꞌ ju Jesús ju lactꞌiyan pus ju yuchi naulh ni jantu tuꞌuꞌ catisastuclh ni caꞌanaꞌ ju Jerusalén.
\v 52 Pus acsni tucaꞌ ixchaꞌan pus ju Jesús amalakacha ju ixlapanacni ni cataꞌalh ju alakatam lakꞌachakꞌan puxconin ju vaiti chai ju chakaꞌ junta lai cataꞌastacnalh. Pus ju yuꞌunch taꞌalh chai tatanuchalh laꞌixlakꞌachakꞌanꞌan ju samaritanonin.
\v 53 Para ju amachakꞌan anch jantu taꞌamaklhtayanamputulh ju Jesús ni ixtacꞌatsai ni ixꞌamputun ju lakꞌachakꞌan Jerusalén chai ju yuꞌunch lana jantu ixtalaktsꞌimputun ju amachakꞌan Jerusalén.
\v 54 Pus ixtꞌiyunꞌan ju ixꞌamamakaꞌui ju Jesús yuꞌunch ju Jacobo chai ju Xivan acsni talaktsꞌilh ju ani pus tajunilh ju Jesús:
\p ―Quiꞌucxtin ja lacꞌasqꞌuin ni acsqꞌuinvich ju jipi ju camilh lactꞌiyan tachi ju navilh ju makꞌaniya milapanac ju Elías ixjuncan. Chach lacxavakꞌo ju ani amachakꞌan.
\p
\v 55 Para ju Jesús talakaspꞌitlh chai akꞌailh. Ajunich:
\p ―Ju uxijnan lana jantu machꞌakxayatꞌit ta yu junita ju ixlhamapꞌaksin ju Spiritu Santu ju tꞌajun lamiꞌalhunutꞌan.
\v 56 Pus ju quitꞌin jantiyuꞌ ju iclhiminta ni va acmilh makꞌatsꞌankꞌanaꞌ ju isꞌatsucuntiꞌan ju lapanacni. Va icminta amakꞌalhtaxtunuꞌ.
\p Pus ju acsnich taꞌalh alakatam lakꞌachakꞌan.
\s1 Ixꞌalin ju ixtachꞌakꞌokꞌaputun ju Jesús
\p
\v 57 Chai acsni ixtaꞌanta ju lacati pus pumatam lapanac junilh ju Jesús:
\p ―Quiꞌucxtin acchꞌakꞌokꞌayan vanta anchach ju apꞌinaꞌ.
\p
\v 58 Para ju Jesús junich:
\p ―Ju zorra alin junta tanui. Chai ju tsꞌokꞌo alin junta tatocꞌai. Para ju quitꞌin matiꞌ ju quinchakaꞌ junta lai acꞌastacnalh. Quitꞌin ju quimalakachatachilh ju Dios ni lapanac actsucuyaꞌ ju ani.
\p
\v 59 Chai ju Jesús junilh apumatam:
\p ―Aqꞌuinchꞌakꞌokꞌach.
\p Para ju yuchi juni:
\p ―Quiꞌucxtin yauch aqꞌuiꞌun ni actꞌatꞌolacaꞌ ju quimpai. Ni caniyaꞌ ju yuchi pus acmacnuyaꞌ chai acsnich ju acchꞌakꞌokꞌayan.
\p
\v 60 Para ju Jesús junich:
\p ―Chach tamacnu ju mimpai ju yuꞌunch ju taꞌamacnunun ju tanita. Para ju uxintꞌi aꞌinchich ajuniniꞌ ju lapanacni ni Dios lhinomputun laꞌisꞌatsucuntiꞌan.
\p
\v 61 Pus ju acsnich apumatam xakꞌalachokopa ju Jesús. Juni:
\p ―Acchꞌakꞌokꞌayan para chach ictiquiꞌamacꞌami ju tavilanancha laquinchakaꞌ.
\p
\v 62 Para ju Jesús junich:
\p ―Tachi chun ju lapanacni ju catachꞌapayaꞌ ju ixtiqꞌuiu ju pucuxtu para jantu vasalh catanaviyaꞌ cuenta para catalacaꞌanchokoyaꞌ laꞌixlhipulacanꞌan pus jantu sok catalhoknunaꞌ. Pus vana va chun ju lakatꞌui junita ju ixꞌatalacpastꞌacꞌat. Ju yuchi jantu lai kꞌox caꞌamalaniyaꞌ ju lapanacni ixlacata ju Dios ni jantu va yuchi ju navi cuenta.
\c 10
\s1 Amalakachacalh ju amamakaꞌun
\p
\v 1 Astan ju Jesús asacxtulh setenta ixꞌamamakaꞌui chai amalakachalh pumatꞌiyun pumatꞌiyun. Chai ju yuꞌunch taꞌalh tachi chun ju lakꞌachakꞌanixni junta caꞌanach isꞌakstu ju Jesús astan.
\v 2 Chai ajunich ju ixꞌamamakaꞌui:
\p ―Acsni na cꞌatꞌata ju tuꞌuꞌ xatocꞌat slivasalh na lhu chꞌalhcatnin ju maktasqꞌuinican ni laich soko camakꞌaixtokcalh. Pus vana va chun ju lapanacni. Slivasalh na lhu ju aquintalhilaksi ni xamatiꞌ caꞌajunilh. Para jantu lhu alin ju taꞌamputun ajuninin. Pus yuchi alhitꞌapꞌaininitꞌit ju Dios ju lhinajun laꞌixlhichꞌalhcat ni camacaꞌalh aliꞌ ju ixlapanacni laꞌixlhichꞌalhcat.
\v 3 Pus aꞌinchitꞌit. Iclamalakachayau tachi ju va borregojni junta na alin ju maktilin.
\v 4 Jantu alhiꞌitꞌit ju mintuminꞌan nin mimpastiꞌan nin alakatam ju minchꞌanxtakꞌanꞌan. Chai jantu xamatiꞌ panicni atꞌachꞌivinintꞌit acsni amacꞌamiyaꞌitꞌit ju lacati.
\v 5 Chai va tuchi chakaꞌ junta astꞌacnanaꞌitꞌit pus acsni atꞌanuyaꞌitꞌit pꞌulhnan ma chani anaꞌuntꞌit: “Lhikꞌach atsꞌucꞌuyaꞌitꞌit ju uxijnan ju tꞌanuyatꞌit ju ani lacachakaꞌ”.
\v 6 Chai ni tꞌajun ju anch pumatam ju caꞌamaklhtayanamputulh ju kꞌox atsucunti ju xtꞌakꞌa ju Dios pus vasalh chunch cajunaꞌ tachi ju xasqꞌuin ixlacata. Para ni matiꞌ xamatiꞌ ju chunch ju anch lacachakaꞌ pus jantu tuꞌuꞌ ixtapalhni cajunaꞌ ju minchivintiꞌan.
\v 7 Chai va lakatam chakaꞌ ju atꞌolaꞌitꞌit. Chai aꞌuyaꞌitꞌit va tuchi cataxtakniyanch. Chunch ju alatꞌit ni lhijunch ni caxtaknicalh ju ixtalhaja ju makchꞌalhcatnaꞌ. Jantu lakatam lakatam chakaꞌ atꞌanuyaꞌitꞌit.
\v 8 Chai va tuchi lakꞌachakꞌan junta apꞌinaꞌitꞌit chai ni cataꞌamaklhtayananan pus aꞌuyaꞌitꞌit va tuchi ju cataxtakniyan.
\v 9 Acꞌuchꞌutꞌit ju takꞌankꞌanin ju anch tatꞌajun. Chai aꞌunaꞌitꞌit ni chavaich laich calhinaulh ju Dios laꞌisꞌatsucuntiꞌan ni va catalacasqꞌuilh ju yuꞌunch.
\v 10 Para vanta lhiꞌanchach lakꞌachakꞌan junta atꞌanuyaꞌitꞌit chai ni jantu cataꞌamaklhtayananan pus atꞌayatꞌit ju lacati chai chanich anaꞌuntꞌit:
\v 11 “Mas yuchi ju xapokxni ju milakꞌachakꞌanꞌan ju quintachꞌanjucan laquinchꞌajaꞌ quincꞌan icchꞌancꞌalhapꞌuxcanau ni jantu xaquilaꞌamaklhtayananau. Chai ju chunch apꞌucꞌatsꞌayaꞌitꞌit ni talakꞌalhin ju xanaviyatꞌit. Chai mas jantu xaquilaꞌamaklhtayananau para acꞌatsꞌatꞌit ni chavai avilhchan laich ixlhinaulh ju Dios lamiꞌatsucuntiꞌan ni va ixlacꞌasqꞌuintꞌit cava”. Chunch ju aꞌunaꞌitꞌit ju amachakꞌan anch.
\v 12 Pus iclajunau ni palai na caꞌalinaꞌ ju ixmakꞌalhkꞌajnatꞌan ju amachakꞌan ju anuꞌ lakꞌachakꞌan ju anuꞌ avilhchan acsni camakꞌosaspitcanach ju lapanacni. Palai jantu ju amachakꞌan Sodoma mas na alactuꞌunin ixtajunita ju yuꞌunch.
\s1 Ju aliꞌin jantu taꞌalacaꞌinimputun
\p Ju Jesús tailhiꞌalh ju ixchivinti chai chani ju ajuni ju lapanacni:
\p
\v 13 ―Painiꞌitnich ju uxijnan ji amachakꞌan Corazín. Painiꞌitnich ju uxijnan ji amachakꞌan Betsaida. Pus ni caꞌixnavicancha ju lakꞌachakꞌan Tiro chai ju lakꞌachakꞌan Sidón ju lhamakꞌan ju ixnavinicꞌantꞌatꞌit pus makꞌanch ixtamacaulh ixꞌalactuꞌuntiꞌan chai ixtalakchꞌilh ju smalaka ixpumpuꞌan chai ixtatavi lacalhcꞌacꞌa ni cacꞌatsacalh ni vasalh ixtamacomputun ixꞌalactuꞌuntiꞌan.
\v 14 Pus ixlhiyuchach acsni camucꞌanicanaꞌ ju ixtalakꞌalhinꞌan ju lapanacni pus ju amachakꞌan Tiro chai ju amachakꞌan Sidón palai jantu lhu caꞌalinaꞌ ju ixmakꞌalhkꞌajnatꞌan. Palai lhu ju amamakꞌalhkꞌajnicꞌanaꞌitꞌit ju uxijnan.
\v 15 Chai ju uxijnan ji quintꞌaꞌamachakꞌan ju lakꞌachakꞌan Capernaum na va tꞌakꞌayayatꞌit. Para amamaxanicꞌanaꞌitꞌit.
\p
\v 16 Chai tailhiꞌalh ju chivinti ju ixtꞌajun ajuniniꞌ ju ixꞌamamakaꞌunti. Ajuni:
\p ―Ju catakꞌasmatniyan ju uxijnan pus tachi ju va jun quitꞌin ju quintakꞌasmatni. Chai ju jantu tuꞌuꞌ catalhiulayan ju uxijnan pus tachi ju va jun quitꞌin ju jantu tuꞌuꞌ quintalhiulai. Chai ju jantu tuꞌuꞌ quilhiulai pus va nomputun ni jantu tuꞌuꞌ talhiulai ju quimpai ju quimacaminta.
\s1 Taminchokota ju isetentaꞌan
\p
\v 17 Acsni tataspꞌitcha ju isetentaꞌan ixꞌamamakaꞌui ju Jesús pus na ixtakꞌachan. Tajunilh ju Jesús:
\p ―Quiꞌucxtin mas yuꞌunch ju lhacaticurulhni xaquintaquiclacaꞌiyan acsni xackꞌayau lamintapakaꞌut.
\p
\v 18 Chai ju Jesús ajuni:
\p ―Chunchach ni iclaktsꞌilh ju Satanás ni xacaxtucalh ju lactꞌiyan chai vatsꞌalhti patajulh tus lacatꞌun tachi ju tuꞌuꞌ makꞌalipniꞌ.
\v 19 Chai iclaxtaknitau ju tachaput ni laich apꞌutꞌayayaꞌitꞌit ju lu chai ju statsucu chai laich atꞌalalhaꞌayaꞌitꞌit tachi chun ju ixtachaput ju lhacaticuru chai jantu tuꞌuꞌ catanaviniyan macxcai.
\v 20 Para jantiyuꞌ ju alhikꞌachꞌantꞌit ni laich taquiclacaꞌiyan ju lhacaticuru. Alai yuchi ju alhikꞌachꞌantꞌit ni tsꞌokꞌulacantacha lactꞌiyan ju mintapakaꞌutꞌan.
\s1 Na kꞌachalh ju Jesús
\p
\v 21 Pus ju acsni pantsꞌiquis ju Spiritu Santu xtaknilh ju Jesús lhu ju ixkꞌachat. Chai ju Jesús chani junilh ju ixpai:
\p ―Ju uxintꞌi ji quimpai xaꞌucxtinꞌat ju lactꞌiyan chai ju lacatꞌun. Chai icjunan lakꞌailaktsꞌiuch ni jantu amavasalanitꞌa ju ani taxtokni ju na talhilaksi ixtacꞌatsanꞌan chai ixꞌatalanintiꞌan isꞌakstuꞌan. Alai amavasalanitꞌa ju yuꞌunch ju talhilaksiyan tachi ju lai tam askꞌatꞌa ju lhilaksi ixꞌamamakaꞌunuꞌ ni yuchi ju camalaniyaꞌ tuꞌuꞌ. Pus chunchach ji quimpai. Chunchach ju kꞌox xalhiulai ju uxintꞌi.
\p Chai ju acsnich ju Jesús chani ajuni ju lapanacni:
\p
\v 22 ―Ju quimpai quixtaknikꞌota tachi chun ju taxtokni. Chai jantu xamatiꞌ vasalh quimispai. Va yuchi ju quimpai. Chai jantu xamatiꞌ vasalh mispai ju quimpai. Va quitꞌin ju istsꞌalh icjunita chai tachi chun ju iclacasqꞌuin ni catamispa.
\p
\v 23 Chai ju acsnich ju Jesús lacaꞌanchokopa junta ixtavilanancha ju ixꞌamamakaꞌunti chai va yuꞌunchach ju axakꞌala. Ajuni:
\p ―Slivasalh na lhikꞌach ju miꞌatsucuntiꞌan ju uxijnan ni laktsꞌinatꞌit tachi chun ju ani taxtokni ju tꞌajun tapasanaꞌ.
\v 24 Pus iclapujunau chunch ni na lhu ju lapanacni ju ixtanajun ixchivinti Dios chai ju ucxtinin ju makꞌanchich ixtatꞌajun na ixtalaktsꞌimputun ju tuchꞌi laktsꞌinatꞌit ju uxijnan. Para jantu talaktsꞌilh. Chai na ixtakꞌasmatputun tuchꞌi kꞌasmatꞌatꞌit. Para jantu tavanan takꞌasmatlh.
\s1 Na kꞌox lalh pumatam
\p
\v 25 Chai pumatam ju na ixlhatalanininta ju ixlhamapꞌaksinꞌan ju istꞌaꞌisraelitanin taya. Va ixlaktsꞌintanuputun ju Jesús. Chai chani ju junilh:
\p ―Amamakaꞌunuꞌ tijuch ju acnavilh ni laich caꞌalilh ju quiꞌatsucunti ju cajonkꞌalhi.
\p
\v 26 Chai ju Jesús juni:
\p ―Pus tas tsꞌokcanta ju lamilhamapꞌaksin. Tas lhimachꞌakxaich.
\p
\v 27 Chai ju yuchi akꞌalhtayanalh. Junich:
\p ―Pus ju lhamapꞌaksin najun ni ma acmapaini ju quiꞌucxtin Dios ixlhichux quiꞌalhunut chai ixlhichux ju quintacꞌatsan chai ixlhichux ju quintachaput chai ixlhichux ju quiꞌatalacpastꞌacꞌat. Chai vachuꞌ najun ni ma acmapaini ju quintꞌalapanac tachi ju va jun quiꞌakstu.
\p
\v 28 Pus ju acsnich ju Jesús junich:
\p ―Kꞌoxich ju xaqꞌuilhikꞌalhtꞌaich. Anavitꞌi ju chunch chai caꞌalinaꞌ ju miꞌatsucunti ju conkꞌalhiyaꞌ.
\p
\v 29 Para ju yuchi ni jantu ixlacasqꞌuin ni camucꞌanicalh ixtalakꞌalhin pus junilh ju Jesús:
\p ―Para tis quintꞌalapanac ju acmapainiyaꞌ.
\p
\v 30 Pus ju acsnich ju Jesús chani juni:
\p ―Pumatam israelita ixtaxtutacha ju lakꞌachakꞌan Jerusalén. Ixꞌamputun ju lakꞌachakꞌan Jericó. Para tachꞌapayaulh ju akꞌalhonin. Chai ju yuꞌunch talhiꞌanilh ju ixpumpuꞌ chai talakanekma. Chai paitat xanin tamacoma. Chai taꞌalh.
\v 31 Chai chanich ju tapasalh. Pus pumatam quimpaliꞌan ju israelitanin juntau ixꞌanta ju anuꞌ lacati. Chai acsni laktsꞌilh ju anuꞌ probe lapanac pus na makat puꞌinilh.
\v 32 Chai vachuꞌ pumatam lapanac ju ixchꞌalhcatnan lacpujitat ixꞌanta ju anuꞌ lacati. Chai acsni ixchaꞌamputun vanin junta ixma ju anuꞌ lapanac pus laktsꞌilh para vachuꞌ na makat ju puꞌinilh.
\v 33 Para pumatam amachakaꞌ ju xaꞌestado Samaria vachuꞌ ixꞌanta ju lacati. Chai vanin milh junta ixma ju anuꞌ lapanac. Chai acsni laktsꞌilh pus na mapaini.
\v 34 Chai lakꞌalh. Chai tsuculh lacchꞌininiꞌ junta ixlacacꞌatsani. Mucꞌanilh ju aceite chai ju vino. Chai chꞌixmucꞌalh laꞌixpuru. Chai lhiꞌalh junta machꞌixtakcan chakaꞌ. Chai lhistaclh ju yuchi.
\v 35 Chai acsni tuncunchokopa chai ixꞌanchokoputun ju lacati ju anuꞌ amachakaꞌ Samaria pus maxtulh lakatꞌui denarius tumin. Chai xtaknilh ju amachakaꞌ chai junilh: “Alhistꞌactꞌi ju anuꞌ lapanac. Chai ni tuꞌuꞌ aliꞌ ju amacꞌapꞌinaꞌ ju mintumin pus acmapalhniyanch acsni actaspꞌitchokoyanta”.
\v 36 Pus tꞌas naꞌunch. Tis chavaich ju ixpumatꞌutuꞌan ju talacasulh ni vasalh mapainilh ju anuꞌ tachꞌapayaulh ju akꞌalhonin.
\p
\v 37 Chai ju anuꞌ ju na ixlhatalanininta ju ixlhamapꞌaksinꞌan ju istꞌaꞌisraelitanin naulh:
\p ―Pus yuchi ju navilh lamapainin.
\p Pus ju acsnich ju Jesús junilh:
\p ―Aꞌinchich chai chunchach vachuꞌ ju anavitꞌi.
\s1 Ju Jesús astacnan laꞌixchakaꞌ ju chakolun
\p
\v 38 Pus ju Jesús alhtanampa ju lacati chai tanuchalh lakatam lakꞌachakꞌan. Chai pumatam chakoꞌulh ju Marta ixjuncan amaklhtayanalh laꞌixchakaꞌ.
\v 39 Chai ixꞌalin pumatam ispꞌisekꞌe ju Marta ju Malia ixjuncan. Pus ju yuchi tavi vanin laꞌixchꞌajaꞌ ju Jesús ni va ixkꞌasmatniputun ju ixchivinti.
\v 40 Para ju Marta na ixlhamakꞌaninin ju ixlhichꞌalhcat ni ixtꞌajun lakꞌoxiniꞌ ju vaiti. Pus lakꞌalh ju Jesús chai juni:
\p ―Amamakaꞌunuꞌ ja va jantu qꞌuilaktsꞌin ni va quiꞌakstu quimacaunuta ju quimpꞌisekꞌe ju lacalhichꞌalhcat. Aꞌunch ni chach quimilh aktaijunuꞌ.
\p
\v 41 Para ju Jesús juni:
\p ―Marta slivasalh na lhu alin ju miꞌatalacpastꞌacꞌat ju navipꞌutꞌun.
\v 42 Para va lakatam taxtokni ju maktasqꞌuinican. Chai ju Malia sacxtuta ju taxtokni ju palai kꞌox chai jantu lai xamatiꞌ catitaiꞌinilh.
\c 11
\s1 Acsni tꞌachivincan ju Dios chani noncan
\p
\v 1 Pus ju aktam ju Jesús ixtꞌajun tꞌachiviniꞌ ju Dios. Chai acsni tꞌachivinkꞌo pus pumatam ju ixtamamakaꞌun junich:
\p ―Quiꞌucxtin aquilamasuniuch ju ixtꞌachivininca ju Dios tachi ju lalh ju Xivan ni amasunilh ju ixꞌamamakaꞌui:
\p
\v 2 Chai ju Jesús ajuni:
\p ―Pus acsni atꞌachꞌivinaꞌitꞌit ju Dios chanich anonaꞌitꞌit:
\q1 Quimpai ju vilhchiꞌ lactꞌiyan
\q1 Chach tacꞌatsa ju lapanacni ni na salakaꞌat.
\q1 Chach chilh ju avilhchan acsni alhinonaꞌ ju uxintꞌi.
\q1 Chach navicalh ju minkꞌachat ju ani lacatꞌun tachi ju navicantacha ju lactꞌiyan.
\q1
\v 3 Tuncujun tuncujun aquilaxtakniu ju quivaiti quincꞌan.
\q1
\v 4 Aquilamacꞌacxaniuch ju quiꞌalactuꞌunti quincꞌan. Pus vachuꞌ ju quijnan icꞌamacꞌacxaniyau ju quintanavitan tuꞌuꞌ macxcai.
\q1 Jantu aquilalhiꞌau junta acmapastꞌacꞌanicau ju tuꞌuꞌ macxcai. Alai aquilamakꞌosuniu ju macxcai.
\p
\v 5 Pus ju Jesús tailhiꞌalh ixchivinti chai ajuni:
\p ―Jantu xcai ni chani ju catapasalh laꞌisꞌatsucunti ju pumatam ju milhiꞌuxijnan. Jantu xcai ni caꞌalilh ju miꞌamigo ju alakpꞌitꞌi ju paitat tsꞌis chai aꞌunaꞌ: “Quiꞌamigo qꞌuimachꞌixtꞌaknin akxtꞌutu ju miniꞌ.
\v 6 Pus chilh pumatam quiꞌamigo ju makat xaminacha para matich tuꞌuꞌ ju lai acxtaknilh”.
\v 7 Chai jantu xcai ni tus pulacni caꞌakꞌalhtayanancha ju anuꞌ amachakaꞌ chai chani cajunin: “Jantu jeks aqꞌuimavatꞌi. Pus icmalacchajuta ju quimalhtich chai icꞌalactꞌalhtataich ju quiꞌaskꞌatꞌan. Jantu lai actikꞌostavi ni laich tuꞌuꞌ acxtaknin”.
\v 8 Pus mas jantu cakꞌostolaꞌ chai caxtakniyaꞌ tuꞌuꞌ va ixlacaꞌatalh ni ixꞌamigo junita para iclajunau ni aktsꞌiya cakꞌostolaꞌ chai caxtakniyach tachi tantsꞌun ju maktasqꞌuini va ixlacaꞌatalh ni jantu lai maxanan ju anuꞌ ju tꞌajun jeks mavanaꞌ.
\v 9 Chai ju quitꞌin iclajunau: Asqꞌuinitꞌit ju Dios chai ju yuchi cataxtakniyan. Apꞌuxcꞌaꞌutꞌit laꞌixmacni Dios ju tuchꞌi maktꞌasqꞌuiniyatꞌit chai alhitꞌaꞌuyaꞌitꞌit. Va tsa tsa asqꞌuinitꞌit ju Dios tachi acsni va tsa tsa sacan lacatuꞌuꞌ malhtich. Chai ju Dios cataxtakniyan.
\v 10 Chunch ju alatꞌit ni amaklhtayanan ju lapanac ju sqꞌuin. Chai ju puxcajui tuꞌuꞌ lhitajui. Chai ju sai ju malhtich malhtekꞌanican.
\p
\v 11 Jantu xamatiꞌ ju milhiꞌuxijnan ju laich caxtaknilh tam isꞌaskꞌatꞌa lakatam chiux acsni casqꞌuinilh ju xkapavati. U ni casqꞌuinilh ju pamata jantu xamatiꞌ milhiꞌuxijnan ju laich caxtaknilh lakatam lu.
\v 12 U ni casqꞌuinilh tuꞌuꞌ akꞌaxvati jantu xamatiꞌ milhiꞌuxijnan ju laich caxtaknilh lakatam statsucu.
\v 13 Pus ju uxijnan mas na kꞌai untꞌatꞌit lai xtꞌakniyatꞌit ju kꞌox ju miꞌaskꞌatꞌanꞌan. Pus ja va a ti yuchach ju quimpaiꞌan Dios ju vilhcha lactꞌiyan jantu catiꞌaxtaknilh ju Spiritu Santu ju yuꞌunch ju catasqꞌuiniyach.
\s1 Tajuni ju Jesús ni chꞌalhcatnan laꞌixtachaput ju lhacaticuru
\p
\v 14 Pus ju Jesús xcoxtulh ju lhacaticuru laꞌixlacatuna pumatam lapanac. Pus ju anuꞌ lapanac jantu lai ixchivinin acsni ixtanun ju lhacaticuru laꞌixlacatuna. Para acsni taxtulh ju anuꞌ lhacaticuru pus ju anuꞌ ju va nunuꞌ ixjunita chivinilh. Pus na talhamakꞌaninilh ju ixtalhavat lapanacni.
\v 15 Para ju aliꞌin ju sia lhiyuꞌunch tanaulh:
\p ―Ju ani ya lapanac va xcoxtui ju lhacaticuru laꞌixlacatunaꞌan ju lapanacni laꞌixtachaput ju Satanás.
\p
\v 16 Chai ju aliꞌin ni va ixtalaktsꞌintanuputun ju Jesús pus tasqꞌuinilh ni canavi tuꞌuꞌ lhamakꞌan ju camincha lactꞌiyan ta yu laich catapucꞌatsayaꞌ ni vasalh Cristo junita.
\v 17 Para ju Jesús ni amispanilh ixꞌatalacpastꞌacꞌatꞌan ju yuꞌunch pus ajunich:
\p ―Tachi chun ju kꞌai lacatꞌun junta lhinajun ju tam kꞌai ucxtin ni quilhmaclhu cajuncalh chai catalaclasayaꞌ ju sia isꞌakstuꞌan pus va caꞌaclayaꞌ. Chai ju tatanumanalh lacachakaꞌ ni catalaclakꞌailh ju sia isꞌakstuꞌan pus catatalhvakaꞌ.
\v 18 Pus vana va chun ju lhacaticuru. Ni catꞌalasachokolh ju ixtꞌalhacaticuru pus tas laich calhilhinonkꞌalhi laꞌixpuꞌucxtin. Pus iclajunau chunch ni va nonatꞌit ni laꞌixtachaput ju Satanás ju ictixcoxtui ju lhacaticurulhni.
\v 19 Ju uxijnan nonatꞌit ni ictixcoxtui ju lhacaticurulhni laꞌixtachaput ju Satanás. Para ju miꞌamamakaꞌunin vachuꞌ tamaktasqꞌuini ni xamatiꞌ caꞌaxtaknilh ixtachaputꞌan ni laich catatixcoxtuyaꞌ ju lhacaticurulhni laꞌixlacatunaꞌan ju lapanacni. Pus yuꞌunch ju catajunan ni jantiyuꞌ ixtachaput ju Satanás ju pumaxtucan ju lhacaticuru laꞌixlacatuna tam xamatiꞌ tachi ju nonatꞌit ju uxijnan.
\v 20 Alai laꞌixtachaput ju Dios ju ictixcoxtui ju lhacaticurulhni chai yuchi lana lhitasui ni yuchi ju Dios ju lhinajun lamilhiꞌuxijnan ju chavai.
\p
\v 21 Ju tam jokꞌat ju na tachapun chai ju alin ju ixpatꞌalan chai lhistꞌacꞌa ju laꞌismakspaꞌ ju ixchakaꞌ pus jantu tuꞌuꞌ lai tsꞌankꞌai ju ixtaxtokni.
\v 22 Para acsni va camilh apumatam ju palai tachapun palai jantu ju yuchi pus catꞌalalhajayaꞌ. Cataiꞌinikꞌoyaꞌ ju ixpatꞌalan ju na jokꞌat ixpunajun chai camakpitsikꞌoyaꞌ chux ju ixtaxtokni.
\p Ju Jesús chunch ju ajuni ju lapanacni ni va ixꞌamamachakxaniputun ni yuchi ju tꞌalalhajalh ju lhacaticuru. Yuchi lai alhixcoxtui ju lhacaticurulhni laꞌixlacatunaꞌan ju lapanacni. Pus tailhiꞌalh ixchivinti chai ajunilh ju lapanacni:
\p
\v 23 ―Pus ju jantu quintꞌaꞌanta yuchi ju quintꞌalaxcai junita. Chai ju jantu quintꞌamakꞌaixtꞌokꞌa ju lapanacni ju aquintalhilacaꞌanach pus va asastucnun.
\s1 Lai tanuchokoi ju lhacaticuru laꞌixlacatuna tam lapanac
\p Ju Jesús tailhiꞌalh ixchivinti chai ajuni ju lapanacni:
\p
\v 24 ―Ju lhacaticuru acsni taxtui laꞌixlacatuna tam lapanac pus vaclhun ucxuntꞌajun junta na axixnita. Va puxcolhitꞌajun ta anchach ju lai catavi. Chai ni jantu lhitajui pus najun: “Acꞌanchokoyaꞌ alai laquinchakaꞌ junta xactaxtuyacha”.
\v 25 Chai acsni minchokoi pus lana tanuchokoi laꞌixlacatuna ju anuꞌ lapanac ni tachi lakatam chakaꞌ junita ju pulacpꞌalhcanta chai maxantilacanta.
\v 26 Pus ju acsnich ju yuchi taxtuchokoi chai an iniꞌ aliꞌin chai akꞌailhimin apumatujun lhacaticurulhni ju palai kꞌai tajunita. Palai jantu na chun ixjunita ju yuchi ju pꞌulhnan ixtanun. Pus ixchuxꞌan tatanui laꞌixlacatuna ju anuꞌ lapanac chai tatsucui ju anch. Pus ju isꞌatsucunti ju anuꞌ lapanac palai takꞌalhilh ju acsni. Palai jantu na chun ixjunita ju pꞌulhnan.
\s1 Alin ju vasalh kꞌachat
\p
\v 27 Pus acsni ixtꞌajun nonaꞌ ju ani chivinti ju Jesús pus pumatam chakoꞌulh ju ixmakya lacatalhavat lana chivincha. Junilh ju Jesús:
\p ―Na lhikꞌach ju isꞌatsucunti ju xamaklokꞌoyan chai ju xamatsꞌiquiyan.
\p
\v 28 Para ju Jesús juni:
\p ―Alai palai takꞌachan ju takꞌasmatꞌa ju ixchivinti Dios chai tamuctaxtui.
\s1 Ju va kꞌai tajunita tasqꞌuin lakatam lhamakꞌan
\p
\v 29 Pus slivasalh na lhu ju tatakꞌaixtoklh ju lapanacni junta ixvi ju Jesús. Chai ju yuchi tsuculh ajuniniꞌ:
\p ―Ju uxijnan ju chavai tꞌonatꞌit na kꞌai untꞌatꞌit. Va lacꞌasqꞌuinatꞌit ju tuꞌuꞌ lhamakꞌan ju apꞌucꞌatsꞌayaꞌitꞌit ni vasalh Cristo icjunita. Yuchi ju ixnoncan camalakachatachilh ju Dios. Para jantu tuꞌuꞌ atumpa ju amasunicꞌanaꞌitꞌit. Va yuchi ni amapꞌastꞌacꞌanicꞌanaꞌitꞌit tuchi ju tapasalh laꞌisꞌatsucunti ju makꞌaniya lapanac ju Jonás ixjuncan. Yuchi ju ixnajun ixchivinti Dios.
\v 30 Pus alin tuchi tapasalh laꞌisꞌatsucunti chai ixlhiyuchi tacꞌatsa ju amachakꞌan Nínive ni vasalh Dios ju xamalakachai ju Jonás ju anch. Chai vana va chun ju quitꞌin. Caꞌalinaꞌ ju tuchi catapasayaꞌ laquiꞌatsucunti chai ixlhiyuchi laich apꞌucꞌatsꞌayaꞌitꞌit ju uxijnan ju chavai tꞌonatꞌit tichi chavaich ju quitꞌin ju quimalakachatachilh ju Dios ni lapanac actsucuyaꞌ ju ani.
\v 31 Acsni camakꞌosaspitcanaꞌ ju lapanacni pus ju anuꞌ makꞌaniya chakoꞌulh ju xaꞌucxtin ixjunita ju ixlhisur ju lacamunutpaꞌ catayayaꞌ chai va ixlacata yuchi pus aꞌulanicꞌanaꞌitꞌit ju miꞌalactuꞌuntiꞌan ju uxijnan ju chavai tꞌonatꞌit. Pus chunch ju aꞌulhtꞌunicꞌanaꞌitꞌit ju uxijnan ni slivasalh na makat ju xaminacha ju yuchi ni ixkꞌasmatniputun ju ixꞌatalaninti ju Salomón. Chai ju ani icya ju palai xakꞌai icjunita. Palai jantu ju Salomón. Para ju uxijnan jantu quilakꞌasmatniputunau ju quinchivinti.
\v 32 Chai ju amachakꞌan ixtajunita ju Nínive catatayayaꞌ acsni camakꞌosaspitcanaꞌ ju lapanacni. Chai ixlacata tuchi tanavilh ju yuꞌunch pus amucꞌanicꞌanaꞌitꞌit ju mintalakꞌalhinꞌan ju uxijnan. Chai chunch ju aꞌulhtꞌunicꞌanaꞌitꞌit va ixlacata ni tamacaulh ixꞌalactuꞌuntiꞌan ju yuꞌunch acsni takꞌasmatnilh ixchivinti ju Jonás. Chai ani icya ju palai xakꞌai icjunita. Palai jantu ju Jonás. Para ju uxijnan jantu macꞌompꞌutꞌunatꞌit ju miꞌalactuꞌuntiꞌan mas kꞌasmatꞌatꞌit ju quinchivinti.
\s1 Ju milakchulhꞌan tachi ju va maclhcu junita
\p Ju Jesús tailhiꞌalh ju ixchivinti chai chani ju ajuni ju lapanacni:
\p
\v 33 ―Jantu xamatiꞌ caxava ju ixmaclhcu chai astan va camatankꞌanu u caꞌakxtakꞌula lacacajon. Alai aktsꞌiya ulai junta mucꞌacan ju maclhcu. Ju chunch va tichi chavaich ju catanuyach laich cataꞌalacꞌavananaꞌ.
\v 34 Pus vana va chun ju milakchulhꞌan. Pus ni na kꞌox ju milakchulhꞌan pus laich alacꞌavananatꞌit. Para ni jantu kꞌox ju milakchulhꞌan pus tachi ju va tꞌonatꞌit lacaꞌatatsꞌisni. Chai vana va chun ju miꞌatalacpastꞌacꞌatꞌan. Ni alacpꞌastꞌacnantꞌit kꞌox pus laich amachꞌakxayaꞌitꞌit ixchivinti Dios. Para ni asamakꞌanaꞌitꞌit ixchivinti Dios pus jantu kꞌox ju miꞌatalacpastꞌacꞌatꞌan. Chai va ixtꞌachunch jun ju miꞌatsucuntiꞌan tachi ju va tꞌonatꞌit lacaꞌatatsꞌisni.
\v 35 Pus alaktsꞌintꞌit ta yu alacpꞌastꞌacnantꞌit. Jantu xcai ni tachi ju va tsꞌista cava lamiꞌatsucuntiꞌan ni va asamakꞌanaꞌitꞌit ju ixchivinti Dios.
\v 36 Pus ni alacꞌaꞌiyaꞌitꞌit chux ixchivinti Dios chai jantu tuꞌuꞌ asamakꞌanatꞌit pus na kꞌoxich lai amachꞌakxayaꞌitꞌit tachi acsni tamapulhcuniyan ju lamintiꞌan ju tuꞌuꞌ maclhcu.
\s1 Ju Jesús amucꞌani ixtalakꞌalhinꞌan ju xalackꞌajin
\p
\v 37 Pus acsni chivinkꞌo ju Jesús pus pumatam fariseo kꞌailhiꞌalh ju Jesús laꞌixchakaꞌ ni caꞌalh tꞌavenaꞌ. Pus ju Jesús tꞌaꞌalh. Tanulh laꞌixchakaꞌ chai tapakstitama lacamixa ni chunch ju ixtalai.
\v 38 Para ju anuꞌ fariseo na lhamakꞌaninilh acsni laktsꞌilh ju Jesús ni jantu pꞌulhnan na paklhu xamakchakꞌai tachi ju aktsꞌiya ixtalhilanita ju israelitanin.
\v 39 Para ju Jesús junich:
\p ―Ju uxijnan ju fariseonin untꞌatꞌit slivasalh na kꞌox chꞌakꞌayatꞌit mas va ixmacan ju tuꞌuꞌ tasa chai ju tuꞌuꞌ cꞌaꞌulh tachi ju lhilanitꞌatꞌit. Para jantu navipꞌalatꞌit cuenta ixpulacni miꞌalhunutꞌan junta na alin ju akꞌalhaꞌunti chai ju amacxcai.
\v 40 Va tontojni untꞌatꞌit. Ju Dios ni navilh ixmacan ju tuꞌuꞌ ja jantu yuchi ju vachuꞌ navilh ju ixpulacni.
\v 41 Pus alhiꞌaktꞌaiꞌutꞌit ju quilhpatinin ju tuchꞌi pꞌacxantꞌatꞌit. Ju chunch salaka cajunaꞌ ju miꞌalhunutꞌan.
\p
\v 42 Painiꞌitnich ju uxijnan ju fariseonin untꞌatꞌit. Ju uxijnan vasalh muctꞌaxtꞌuyatꞌit ju lhamapꞌaksin acsni xtꞌakniyatꞌit ju palijni lactsꞌunin ju alhmujinu chai tachi chun ju aliꞌ achꞌitin ju pulakꞌoxiyatꞌit ju mivaitiꞌan chai ju ruda. Para jantu naviyatꞌit cuenta ni sok ju tsꞌucꞌuyatꞌit u jantu. Chai jantu naviyatꞌit cuenta ni mapꞌainiyatꞌit ju Dios u jantu. Para palai tasqꞌuini ni anavitꞌit ju ani taxtokni mas atꞌailhipꞌitꞌit ju ixtaknica lactsꞌunin ju achꞌitin vachuꞌ.
\p
\v 43 Painiꞌitnich ju uxijnan ju fariseonin untꞌatꞌit. Ju uxijnan kꞌachꞌaniyatꞌit ju putolan ju alin ju lacpujitat junta tatolai ju xalackꞌajin. Chai kꞌachꞌaniyatꞌit ni catamacꞌamin ju lapanacni ju lacati tachi ju tamacꞌami tam xakꞌai.
\p
\v 44 Painiꞌitnich ju uxijnan ju fariseonin untꞌatꞌit. Ju uxijnan na acxpꞌutꞌiyununatꞌit. Pus ju uxijnan chunch untꞌatꞌit tachi ju tuꞌuꞌ panteon ju jantu manicanta chai jantu lai cꞌatsacan ni yuchi cava. Chai ixlhiyuchi ju lapanacni taputayai ju anch. Pus vana va chun ju uxijnan. Ju lapanacni mas tatꞌaꞌucxuntꞌonan chai talaktsꞌinan ni tachi ju na va lackꞌoxin untꞌatꞌit para jantu tacꞌatsai ni na lhquiliqui ju lamimpulacniꞌan.
\p
\v 45 Pus ju acsnich pumatam ju na ixlhatalanininta ju ixlhamapꞌaksinꞌan ju istꞌaꞌisraelitanin xakꞌala ju Jesús chai juni:
\p ―Amamakaꞌunuꞌ acsni naꞌun ju chunch pus vachuꞌ macxcai quilalhichivinau ju quijnan.
\p
\v 46 Para ju Jesús junich:
\p ―Painiꞌitnich vachuꞌ ju uxijnan ju mavasalayatꞌit ju lhamapꞌaksin. Ju uxijnan naviyatꞌit tachi ju tam lapanac ju na tsꞌinqꞌui macꞌucꞌai ju ixpuru. Ju uxijnan na lhu chai na tsꞌinqꞌui lhamapꞌaksin ju amucꞌaniyatꞌit ju lapanacni tachi ju jantu lai catanavi. Para ju uxijnan nin lacatsꞌunin jantu muctꞌaxtꞌupꞌalatꞌit tachi ju najun ju anch.
\p
\v 47 Painiꞌitnich ju uxijnan. Pus ju makꞌaniya milacpaꞌitniꞌan tamaknilh ju lapanacni ju ixtanajun ixchivinti Dios. Chai ju uxijnan ju isꞌaskꞌatꞌan untꞌatꞌit lakꞌoxiniyatꞌit ju ixpanteonꞌan ju xatamakni ju mimpaiꞌan.
\v 48 Chai ni chunch ju naviyatꞌit pus va putasui ni cꞌatsꞌayatꞌit tuchi tanavilh ju milacpaꞌitniꞌan chai kꞌoxich lhiulayatꞌit. Pus ju yuꞌunch taꞌamakninilh chai ju uxijnan lakꞌoxiniyatꞌit ju ixpanteonꞌan ju amaknicanta.
\p
\v 49 Chai ni chunch ju navipꞌalatꞌit pus yuchi chani lhinaulh ju Dios ju na kꞌox acꞌatsananta: “Acꞌamalakachaniyaꞌ ju quilapanacni ju catanonaꞌ ju quinchivinti. Vachuꞌ acꞌamalakachaniyaꞌ ju quiꞌalhtanin. Chai sia yuꞌunch ju acꞌamalakachayaꞌ ju aliꞌin caꞌamaknicanaꞌ. Chai ju aliꞌin caꞌamamakꞌalhkꞌajniyaꞌ ju anuꞌ lapanacni”. Chunch ju ma naulh ju Dios.
\v 50 Pus uxijnan ju tꞌonatꞌit ju chavai ju amapꞌalaꞌitꞌit ixꞌacꞌalhniꞌan tachi chun ju lapanacni ju ixtanajun ixchivinti Dios ju amaknicalh tus laꞌixputaiꞌulacan ju lacamunutpaꞌ.
\v 51 Chux ju yuꞌunch ju amaknicalh tus acsni tavanan maknicancha ju Abel ju pꞌulhnan tucan ju maknicalh tus acsni maknicanchalh ju Zacarías ju tamakni laꞌixputsin pujitat junta ixtꞌalakxtokya junta ixmaknican ju atapacxat ju ixlhakꞌailaktsꞌincan ju Dios. Yuchi ju saꞌastan va tachi chun ju lhitsꞌokcanta laꞌixchivinti Dios mas na lhu aliꞌin ju amaknicalh ju palai astan. Pus uxijnan ju amapꞌalaꞌitꞌit ixꞌacꞌalhniꞌan chux ju yuꞌunch.
\p
\v 52 Painiꞌitnich ju uxijnan ju mavasalayatꞌit ju milhamapꞌaksinꞌan ju israelitanin untꞌatꞌit. Ju uxijnan jantu sok xaꞌamavasalaniyatꞌit ju lapanacni ixchivinti Dios ni laich catacꞌatsayaꞌ ta yu laich catatakꞌalhtaxtulh. Ju uxijnan miꞌakstuꞌan jantu lacꞌaꞌiyatꞌit ju stavasalanti chai asastꞌucꞌatꞌit ju talacaꞌiputun.
\p
\v 53 Pus acsni ixꞌajuni ju ani taxtokni ju Jesús pus ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin chai ju fariseonin slivasalh na tatalhkꞌamalh chai tatsuculh jeks amavanin. Chai ixtaquilhasacmich na lhu taxtokni.
\v 54 Va ixtalhistꞌacꞌa chai ixtapuxconi tuꞌuꞌ chivinti ju canaulh ta yu laich catapuchivimakꞌalh.
\c 12
\s1 Ju Jesús naulh ni jantu kꞌox ni acxputꞌiyununcan
\p
\v 1 Pus na lhu lana ixtatakꞌaixtokta ju lapanacni chai va ixtalaputayaich. Pus ju Jesús tsuculh ajuniniꞌ ju ixꞌamamakaꞌui mas catakꞌasmatlh ju aliꞌin. Ajunich:
\p ―Jantu alacꞌaꞌinitꞌit ju ixchivintiꞌan ju fariseonin ni va taꞌaꞌokxchokꞌonun ju yuꞌunch.
\v 2 Para matiꞌ tuꞌuꞌ ju matankꞌanucanta ju jantu cacꞌatsacalh. Nin yuchi ni lai sek acnavi ju tuꞌuꞌ ju jantu cacꞌatsacanaꞌ.
\v 3 Pus tachi chun ju xanonatꞌit lacaꞌatatsꞌisni cakꞌasmatcanaꞌ lacaꞌatuncunuꞌ. Chai ju tuchi va sekch xanonatꞌit laminchakaꞌan pus sich calaccꞌatsakꞌocanaꞌ.
\s1 Alin ju atꞌalhoniyaꞌitꞌit
\p Ju Jesús tailhiꞌalh ju ixchivinti chai chani ju ajuni ju ixꞌamamakaꞌui:
\p
\v 4 ―Pus chani iclajunau ji quiꞌamigojni. Jantu atꞌalhonitꞌit ju mintꞌalapanacniꞌan ju lai catamaknin para astan jantuch lai tuꞌuꞌ aliꞌ catanaviyan.
\v 5 Para aclajunau tichi chavaich ju atꞌalhonitꞌit. Yuchi ju atꞌalhonitꞌit ju Dios ni yuchi ju lai catamakniyan chai alin ixtachaput ni lai catamacaꞌanan astan ju lacajipi. Pus iclajunau ni yuchach ju atꞌalhonitꞌit.
\p
\v 6 Jantu tasqꞌuini ni atꞌalhonitꞌit ju tam mintꞌalapanacꞌan. Alaktsꞌintꞌit ju lakaquis lactꞌicstꞌi tsꞌokꞌo ni lhistꞌacan lakatꞌui sentau. Para ju Dios jantu lai cꞌapꞌa nin lakatam ju yuꞌunch.
\v 7 Chai mas va miꞌaiꞌan ju uxijnan si putekꞌekꞌocanta. Pus yuchi iclalhijunau ni jantu atꞌalhanantꞌit. Palai laklhu ju mintapalhniꞌan ju uxijnan. Palai jantu ju va tuꞌuꞌ tsꞌokꞌo mas na lhuch catava ju yuꞌunch.
\s1 Alin ju tacꞌatsai tichi chavaich ju Jesús
\p Ju Jesús tailhiꞌalh ju ixchivinti chai ajuni ju ixꞌamamakaꞌui:
\p
\v 8 ―Va tichi chavaich ju canonaꞌ laꞌixꞌucxlacapuꞌan ju lapanacni ni quilhilaksi ju quitꞌin ju quimalakachatachilh ju Dios ni lapanac actsucuyaꞌ ju ani pus vachuꞌ ju quitꞌin acnonaꞌ laꞌixꞌucxlacapuꞌan ju ixꞌanquilhnin ju Dios ni quilapanac junita ju yuchi.
\v 9 Para va tichi chavaich ju canonaꞌ laꞌixꞌucxlacapuꞌan ju lapanacni ni jantu quilhilaksich pus vachuꞌ acnonaꞌ laꞌixꞌucxlacapuꞌan ju ixꞌanquilhnin Dios ni jantu quilapanac junita.
\p
\v 10 Chai tachi chun ju macxcai aquintalhichivinaꞌ ju quitꞌin ju quimalakachatachilh ju Dios ni lapanac actsucuyaꞌ ju ani pus caꞌamacꞌacxanicanaꞌ. Para va tichi chavaich ju macxcai calhichivinaꞌ ju Spiritu Santu pus ju yuchi jantu catimacꞌacxanicalh.
\p
\v 11 Acsni alhipꞌincꞌanaꞌitꞌit laꞌixꞌucxlacapuꞌan ju xalackꞌajin lacpujitat chai laꞌixꞌucxlacapuꞌan ju ucxtinin chai ju aliꞌin ju alin ixtachaputꞌan pus jantu alhamakꞌaninintꞌit ta yu laich alhakꞌalhtꞌayananaꞌitꞌit nin yuchi ju tuchꞌi laich anonaꞌitꞌit.
\v 12 Pus isꞌakstu ju Spiritu Santu ju catamapastꞌacꞌaniyan ju acs pantsꞌiquis tuchꞌi laich anonaꞌitꞌit.
\s1 Na lai pukꞌalhkꞌoscan ju makꞌalit
\p
\v 13 Chai pumatam lapanac ju ixmakminta lacatalhavat junilh ju Jesús:
\p ―Aꞌunch ju quilakꞌau ni chach quilhvaknilh ju icmacontilanicantauch.
\p
\v 14 Para ju Jesús junich:
\p ―Ji lapanac jantu xamatiꞌ quiꞌulata lacatꞌicstꞌi miꞌucxtinꞌan. Nin caꞌalilh ju quintachaput ni lai aclaclhvakaꞌ ju tuꞌuꞌ.
\p
\v 15 Vachuꞌ ajunilh ju lapanacni:
\p ―Alaktsꞌintꞌit chai jantu va yuchi ju anavitꞌit cuenta ju ixmakꞌaixtꞌokꞌa lhu ju miꞌalintaꞌan. Pus mas na lhu caꞌalilh ju ixꞌalinta tam xamatiꞌ para jantu anch ju i ju isꞌatsucunti.
\p
\v 16 Chai ajunilh ju lapanacni lakatam chivinti ju laich capumavasalaniyaꞌ tuchi ixꞌajumputun. Ajunich:
\p ―Ju ixlacatꞌun ju pumatam makꞌaliꞌ lapanac na lhu lana xaxtꞌakꞌa ju xatocꞌat.
\v 17 Chai ju yuchi naulh laꞌixꞌalhunut: “Tas aclayach ju chavai ni jantu jintaꞌ alin junta lai acmakꞌa ju xatocꞌat ju quilacatꞌun”.
\v 18 Chai astan naulh: “Iccꞌatsai tuchi acnaviyaꞌ. Aclaclhvakach ju quimpacꞌatsꞌa chai acyochokoyaꞌ ju palai kꞌai. Chai anchach ju acmakꞌayaꞌ ju xatocꞌat ju quilacatꞌun chai ju quintaxtokni.
\v 19 Chai chani acjunchokocanaꞌ quiꞌakstu: Ju uxintꞌi lapanac na lhuch makꞌata ju miꞌalinta. Cachꞌixach lakalhu cꞌata. Pus astꞌacnach. Avaich. Akꞌotnuch. Akꞌachꞌach”. Chunch ju naulh ju anuꞌ makꞌaliꞌ.
\v 20 Para ju Dios ma junich: “Ju uxintꞌi va tontoꞌat. Lana chavai atatsꞌisni aniyaꞌ. Chai tis ixꞌanuch cꞌuꞌu cajunaꞌ ju anuꞌ xamakꞌai”.
\v 21 Pus chunch ju tapasai laꞌisꞌatsucunti tam lapanac ju lhilaksi ju ixtaxtokni ju makꞌaixtokta ixlacata isꞌakstu para jantu lhilaksi ju makꞌalit ju xtꞌakꞌa ju Dios chai ju jonkꞌalhita lactꞌiyan.
\s1 Ju Dios alhistꞌacꞌa ju isꞌaskꞌatꞌan
\p
\v 22 Astan ju Jesús axakꞌalachokopa ju ixꞌamamakaꞌui chai ajuni:
\p ―Jantu alhamakꞌaninintꞌit ixlacata ju miꞌatsucuntiꞌan ju tuchꞌi aꞌuyaꞌitꞌit. Nin ixlacata ju milacatunaꞌan ju tuchꞌi amalakchꞌininaꞌitꞌit.
\v 23 Pus palai tuꞌuꞌ ju miꞌatsucuntiꞌan ju uxijnan. Palai jantu ju va tuꞌuꞌ vaiti. Chai palai tuꞌuꞌ ju milacatunaꞌan. Palai jantu ju va tuꞌuꞌ malakchꞌinti.
\v 24 Alaktsꞌintꞌit ju tuꞌuꞌ chꞌekni. Ju yuꞌunch jantu taꞌachꞌananan chai jantu taxkꞌaꞌi ju catamakꞌayaꞌ ju xatocꞌat. Chai matiꞌ junta lai catamakꞌa ju tuꞌuꞌ nin caꞌalilh ju ixpacꞌatsꞌaꞌan. Para Dios ju amavai. Chai ju yuchi palai tuꞌuꞌ talhiulayan ju uxijnan. Palai jantu ju va tuꞌuꞌ tsꞌokꞌo.
\v 25 Chai jantu xamatiꞌ ju milhiꞌuxijnan ju lai palai putankꞌai catijunlh mas na lhu capastaclh.
\v 26 Pus ni jantu lai naviyatꞌit mas va yuchach ju anuꞌ pus tajuch ni na va lhamakꞌanininatꞌit ju tuꞌuꞌ aliꞌ.
\p
\v 27 Pus alaktsꞌintꞌit ju xanti. Ju yuchi takꞌayai para jantu chꞌalhcatnan nin caꞌasiunilh. Para iclajunau nin yuchi ju kꞌai ucxtin Salomón jantu xamalakchꞌinin tachi ju tuꞌuꞌ xanti mas na ixꞌalin ju ixmakꞌalit.
\v 28 Pus Dios ju na cꞌus malakchꞌini ju achꞌitin ju alin mas va lacaqꞌuivin. Chai ju yuchi jantu jonkꞌalhi. Ju chavai na stakꞌaucaꞌ. Para ju lhi calacxavacanaꞌ. Pus ja va a ti uxijnan jantu cataxtakniyan ju mimpumpuꞌan. Para ju uxijnan na lacatsꞌunin lhilaksiyatꞌit ju Dios ni vasalh cataxtakniyan ju tuchꞌi maktꞌasqꞌuiniyatꞌit.
\v 29 Pus ni yuchi ju Dios ju cataxtakniyan ju tuchꞌi maktꞌasqꞌuiniyatꞌit pus jantu alhamakꞌaninintꞌit tuchꞌi aꞌuyaꞌitꞌit u tuchꞌi akꞌotꞌaꞌitꞌit.
\v 30 Jantu chun alatꞌit ju uxijnan ni yuchach ju talhamakꞌaninin ju lapanacni ju jantucaꞌ talhilaksita ju Dios. Para alin ju mimpaiꞌan Dios ju cꞌatsai ni maktꞌasqꞌuiniyatꞌit ju ani taxtokni.
\v 31 Alai yuchi ju anavitꞌit cuenta ta yu palai lai calhinonaꞌ ju Dios lamiꞌatsucuntiꞌan chai amaklhtꞌayananaꞌitꞌit tachi chun ju ani taxtokni ju maktꞌasqꞌuiniyatꞌit.
\s1 Alin ju xamakꞌalit ju lactꞌiyan
\p Ju Jesús tailhiꞌalh ixchivinti chai chani ju ajuni ju ixꞌamamakaꞌui:
\p
\v 32 ―Jantu atꞌalhanantꞌit ju uxijnan ju tachi quimborregojni untꞌatꞌit mas jantu milhuꞌan. Pus ju quimpai na kꞌox lhiulai ni atꞌatꞌaꞌucxtꞌiniyaꞌitꞌit ju yuchi astan.
\v 33 Jantu na va amakꞌatꞌit ju miꞌalintaꞌan. Alai apꞌuꞌaktꞌaiꞌutꞌit ju quilhpatinin. Jantu amakꞌatꞌit ju mimakꞌalitꞌan ju ani lacatꞌun junta jantu jonkꞌalhi. Alai anch ju lactꞌiyan ju amakꞌayaꞌitꞌit. Pus ju anch ju mimakꞌalitꞌan jantu tavanan caꞌankꞌoyaꞌ. Chai jantu lai catichaꞌalh ju akꞌalhonaꞌ. Chai matiꞌ tuꞌuꞌ ju saꞌatsꞌacanaꞌ ju lai calakꞌalhiniyan.
\v 34 Iclajunau chunch ni tapastactꞌajun ju ixtaxtokni ju lacamunutpaꞌ ju tamakꞌata ju ixmakꞌalitꞌan ju ani lacatꞌun. Para ju tamakꞌai ju ixmakꞌalitꞌan ju lactꞌiyan pus anchach ju tapastactꞌajun.
\s1 Tasqꞌuini ni alakꞌasitsꞌucꞌuyaꞌitꞌit
\p Ju Jesús tailhiꞌalh ju ixchivinti chai chani ju ajuni ju ixꞌamamakaꞌui:
\p
\v 35 ―Alakꞌasitsꞌucꞌutꞌit chai chunch ju alatꞌit tachi ju lacan acsni pacxantaican xamatiꞌ ju tsꞌis. Va xavacan ju maclhcu ni lai lhikꞌach caꞌamaklhtayanancanaꞌ ju cachinaꞌ.
\v 36 Chai chunchach ju apꞌacxantꞌayaꞌitꞌit ju miꞌucxtinꞌan Dios tachi ju talai ju ixlapanacni tam xakꞌai ju ani lacamunutpaꞌ. Pus ju yuꞌunch talakasivilanalh ni lana soko catamalhtekꞌaniyaꞌ ju malhtich acsni cataspꞌitchokoyanta ju ixꞌucxtinꞌan junta tamakꞌaxtokcan chai casayach ju malhtich.
\v 37 Pus lhikꞌach cajunaꞌ ju isꞌatsucuntiꞌan ju anuꞌ xalapanacni ju caꞌalhitajucanaꞌ ni talakꞌasitꞌajun acsni caminaꞌ ju ixꞌucxtinꞌan. Pus islivasalh ju iclajunau. Ju ixꞌucxtinꞌan ni lakchꞌita ju ixcutun pus calhichꞌicanaꞌ iscinturon chai caꞌalacjunach ni catatavi lacamixa chai isꞌakstu ju caꞌalacxtakniyach ju ixvaitiꞌan.
\v 38 Pus na lhikꞌach ju isꞌatsucuntiꞌan ju anuch xalapanacni ju caꞌalhitajucanaꞌ ni talakꞌasitꞌajun mas camilh ju ixꞌucxtinꞌan ju paitat tsꞌis u mas camilh acsni paktꞌutu tꞌasata ju chilaꞌ.
\v 39 Pus acꞌatsꞌatꞌitch ju ani. Ju amachakaꞌ ni iscꞌatsa cava tuchi hora ixmilh ju akꞌalhonaꞌ pus ixlhistaclh chai jantu ixlacasqꞌuinilh ni ixtamalhtekꞌa chai ixtanu laꞌixchakaꞌ.
\v 40 Pus vachuꞌ alakꞌasitsꞌucꞌutꞌit ju uxijnan ni acsnich ju acminchokoyaꞌ ju quitꞌin acsni nonatꞌit ni ca jantu lai actimilh ju acs pantsꞌiquis. Quitꞌin ju quimalakachatachilh ju Dios ni lapanac actsucuyaꞌ ju ani.
\s1 Tijtꞌui alin ju xalapanacni
\p
\v 41 Pus ju acsnich ju Pitaluꞌ junilh ju Jesús:
\p ―Quiꞌucxtin ja va quijnan ju quilajunau ju ani chivinti ju ixpꞌumavasalapꞌutꞌun ju minchivinti u vachuꞌ ixlacataꞌan chux ju lapanacni.
\p
\v 42 Chai ju Jesús juni:
\p ―Alin ju xakꞌai xalapanac ju lai lhilaksican chai ju na acꞌatsananta chai lai caꞌamalhistacni ju ixꞌucxtin ju aliꞌin ixtꞌaxalapanacni ni laich caꞌalhcaniyaꞌ ju ixvaitiꞌan acsni cachinaꞌ ju hora ni catavenaꞌ.
\v 43 Pus slivasalh lhikꞌach ju isꞌatsucunti ju anuꞌ xalapanac ju calhitajucanaꞌ ni chunchach ju tꞌajun naviniꞌ acsni caminchokoyaꞌ ju ixꞌucxtin.
\v 44 Pus slivasalh ju iclajunau. Ju ixꞌucxtin camalhistacnikꞌoyaꞌ tachi chun ju ixꞌalinta.
\v 45 Para ju anuꞌ xalapanac jantu xcai ni canaulh laꞌixꞌalhunut ni ca jantu sai catiminchokolh ju ixꞌucxtin chai catsucuyaꞌ aꞌulaniniꞌ ju ixtꞌaxalapanacni chai ju maksquitininch. Chai cavenach chai caꞌakꞌotnanach chai catꞌakꞌapꞌayach.
\v 46 Pus ni chunch ju canaviyaꞌ ju anuꞌ xalapanac pus acsnich ju cachinaꞌ ju ixꞌucxtin acsni jantu pacxantajita. Cachinaꞌ ju acs pantsꞌiquis acsni jantu iscꞌatsai ni lai cachilh. Chai slivasalh camamakꞌalhkꞌajniyaꞌ ju anuꞌ xalapanac. Chunch caꞌulhtunicanaꞌ tachi ju caꞌulhtunicanaꞌ ju yuꞌunch ju jantu lai lhilaksican.
\p
\v 47 Pus ju anuꞌ xalapanac ju machakxanilh ixkꞌachat ju ixꞌucxtin para jantu ixlakasivi ni xaminchokoi ju ixꞌucxtin nin canavi ju ixkꞌachat pus ju yuchi na paklhu canekcanaꞌ.
\v 48 Para ju anuꞌ xalapanac ju jantu xamachakxai ju ixkꞌachat ju ixꞌucxtin chai navilh ju tuꞌuꞌ ju lhijunch ni calhinekcalh pus na lacatsꞌunin calakanekmacanaꞌ. Pus va tichi chavaich ju na lhu xtaknicanta pus na lhu casqꞌuinichokocanaꞌ. Chai ju na lhu xtaknicanta ni calhistaclh pus palai lhu casqꞌuinichokocanaꞌ. Palai jantu na chun ju jantu lhu ixtaknicanta ni calhistaclh.
\s1 Ixlacata ju Jesús alin ju lasat
\p Ju Jesús tailhiꞌalh ju ixchivinti chai chani ju ajuni ju ixꞌamamakaꞌui:
\p
\v 49 ―Tachi ju va icminta maquilhnunuꞌ ju jipi ju ani lacatꞌun. Chai slivasalh na kꞌox cava ni lana chavai ju cataiꞌulayaꞌ.
\v 50 Na lhu lana acmakꞌalhkꞌajnanaꞌ chai slivasalh na icꞌamakꞌaninin tus acsni caꞌuctaxtuyach.
\v 51 Jantu anaꞌuntꞌit ni va icminta naviniꞌ ju akꞌoxamixnit ju ani lacatꞌun. Iclajunau ni jantu. Alai va ixlacaꞌatalh ni icminta caꞌalinaꞌ ju lakꞌaiti. Caxcaicanaꞌ ju yuꞌunch ju quintalhilaksi.
\v 52 Pus ju chavai atipuꞌanta junta tatꞌajun pumaquis lapanacni lacalakatam chakaꞌ pus jantu kꞌox catalalhiꞌanaꞌ. Pus ixtꞌutunꞌan cataxcayaꞌ ju pumatꞌuiꞌan. Chai ju ixtꞌiyunꞌan cataxcayaꞌ ju ixtꞌutunꞌan va ixlacata ni quintalhilaksi ju quitꞌin ju aliꞌin chai ju aliꞌin jantu.
\v 53 Ju tam xapai catꞌalaxcayaꞌ ju istsꞌalh. Chai ju tam istsꞌalh catꞌalaxcayaꞌ ju ixpai. Ju tam xanati catꞌalaxcayaꞌ ju istsiꞌ. Chai ju tam istsiꞌ catꞌalaxcayaꞌ ju ixnati. Chai ju tam xaputꞌichakoꞌulh catꞌalaxcayaꞌ ju ixputꞌi. Chai ju tam xaputꞌi catꞌalaxcayaꞌ ju ixputꞌichakoꞌulh ni quilhilaksi ju quitꞌin.
\s1 Tas cajunaꞌ ju alhi
\p
\v 54 Ju Jesús vachuꞌ chani ajuni ju lapanacni:
\p ―Ju uxijnan acsni laktsꞌinatꞌit ju ataputsꞌi acsni min ju lhitsꞌastꞌai pus lana nonatꞌit ni caminach ju xcan ju ani laquintꞌunꞌan. Chai vasalh chunch ju tapasai.
\v 55 Chai acsni min ju un ju lhisur pus nonatꞌit ni lhiꞌich cajunaꞌ ju ani laquintꞌunꞌan. Chai vasalh chunch ju tapasai.
\v 56 Pus ju uxijnan lai machꞌakxayatꞌit ta yu avanan ju lactꞌiyan chai ju lacatꞌun. Para va acxpꞌutꞌiyununatꞌit acsni nonatꞌit ni jantu lai machꞌakxayatꞌit tuchi tꞌajun tapasanaꞌ ju chavai acsni tꞌonatꞌit.
\s1 Atꞌatꞌakꞌoxitꞌi ju mintꞌalaxcai
\p
\v 57 Tajuch ni jantu lai sacxtꞌuyatꞌit miꞌakstuꞌan ju kꞌox.
\v 58 Ni catachivimakꞌanan tam xamatiꞌ chai catakꞌailhiꞌanan lacapuꞌucxtin pus amaskꞌatꞌitꞌitch ju lacati ixtꞌatakꞌoxica ju yuchi. U ni jantu pus jantu xcai ni catalhichaꞌanan lacaꞌucxtin. Chai ju ucxtin catamakꞌaxtakꞌan laꞌixmacaꞌan ju pulasiyajni. Chai ju pulasiyajni cataꞌanan tꞌalhnunun.
\v 59 Chai iclajunau ni jantu atꞌitꞌaxtꞌutꞌit ju anch tus acsni amapꞌalaꞌitꞌit chux lana ju mimulhtaꞌan.
\c 13
\s1 Amacꞌaꞌuntꞌit ju miꞌalactuꞌuntiꞌan
\p
\v 1 Pus ju acs pantsꞌiquis tachinchalh ju aliꞌin ju tamacꞌatsani ju Jesús ixlacataꞌan ju amachakꞌan ju xaꞌestado Galilea ju alhinaulh ixꞌamaknicaꞌan ju gobernador Pilato. Tajuni ni anch ju amakni junta makninican ju atapacxat ju Dios. Pus ju ixꞌacꞌalhniꞌan lhitayalh ju ixꞌacꞌalhni ju atapacxat.
\v 2 Chai ju Jesús ajunich:
\p ―Ja va nonatꞌit ni palai na alactuꞌunin ixtajunita ju anuꞌ amachakꞌan Galilea. Palai jantu ju aliꞌin ixtꞌaꞌamachakꞌan. Chai yuchi alhimaknicalh.
\v 3 Iclajunau ni jantu. Para ni jantu amacꞌonaꞌitꞌit ju miꞌalactuꞌuntiꞌan ju uxijnan pus vachuꞌ atsꞌankꞌayaꞌitꞌit.
\v 4 Chai ju anuꞌ pumacautsajin amachakaꞌan Jerusalén ju atantꞌalhma ju putankꞌai chakaꞌ ju lacSiloé chai tanikꞌo ja va nonatꞌit ni palai na alactuꞌunin ixtajunita ju yuꞌunch. Palai jantu ju aliꞌin ixtꞌaꞌamachakꞌan. Chai yuchi alhimaknicalh.
\v 5 Iclajunau ni jantu. Para ni jantu amacꞌonaꞌitꞌit ju miꞌalactuꞌuntiꞌan ju uxijnan pus vachuꞌ atsꞌankꞌayaꞌitꞌit.
\s1 Lakatam xaqꞌuiu higuera
\p
\v 6 Ju Jesús ajuni ju lapanacni ju ani chivinti ju ixtꞌalaktsꞌipaxcavaich ju tuꞌuꞌ:
\p ―Pumatam lapanac chꞌanlh lakatam qꞌuiu ju higuera juncan. Anch ju xachꞌan laꞌixpuꞌuvas. Chai astan ju yuchi milh puxconiniꞌ ju xalhiꞌut. Para jantu lhitajunilh.
\v 7 Chai junilh ju ixlhistacnaꞌ ju puꞌuvas: “Ju chavai ixlhilakatꞌutu cꞌata icminta puxconaꞌ ju xalhiꞌut ju ani ya higuera chai jantu tuꞌuꞌ iclhitajunita. Atꞌichꞌakxtꞌatꞌi. Va lakꞌaich atankꞌasinin ju ani lacatꞌun”.
\v 8 Para ju anuꞌ alhistacnaꞌ junich ju ixꞌucxtin: “Quiꞌucxtin va yuchi ju chavai cꞌata ju amacꞌoninch. Aclacpujniyaꞌ ju tꞌun ju ixtalakachoko chai acmamayaꞌ ju ixꞌilhtꞌi borrego.
\v 9 Chai ni caꞌalinach ju xalhiꞌut pus kꞌoxich. Para ni jantu pus acsnich ju laich atꞌichꞌakxtꞌayaꞌich”.
\s1 Cꞌuchꞌucalh pumatam chakoꞌulh
\p
\v 10 Lakatam savat ju Jesús ixꞌamalanininch laꞌixpujitatꞌan ju istꞌaꞌisraelitanin.
\v 11 Chai ju anch ixtanun pumatam chakoꞌulh ju ixpacxanta ju lhacaticuru laꞌixlacatuna chai ixlhiyuchi va ixtakꞌankꞌai. Va ixlakatumich. Jantu tavanan lai sok ixtayai. Lakacautsajin cꞌata ju ixtakꞌankꞌai.
\v 12 Chai ju Jesús acsni laktsꞌilh tꞌasanilh chai junich:
\p ―Chakoꞌulh macaxnitan ju mintakꞌankꞌat.
\p
\v 13 Chai mokslanilh ju ixmacaꞌ laꞌixlacatuna chai lana tasoknicꞌa ju ixlacatuna. Chai ju yuchi lakꞌayalh ju Dios.
\v 14 Para ju xaꞌucxtin lacpujitat na lhitalhkꞌamalh ni ixꞌacꞌuchꞌununta ju Jesús ju avilhchan paꞌastacni. Chai ajunich ju ixtalhavat lapanacni ju ixtamakvilanalh:
\p ―Alin lakachaxan avilhchan acsni lai chꞌalhcatnancan. Pus acsnich ju atꞌatꞌit tꞌacꞌuchꞌunin. Para jantu ju avilhchan paꞌastacni.
\p
\v 15 Pus ju acsnich ju Jesús junilh ju anuꞌ xaꞌucxtin lacpujitat:
\p ―Ju uxintꞌi va acxpꞌutꞌiyunun. Ju pumatamin ju milhiꞌuxijnan ja jantu xkꞌotꞌatꞌit ju mivacaxꞌan u mimpuruꞌan ju laꞌixchakaꞌ ju avilhchan paꞌastacni chai pꞌinatꞌit makꞌotꞌunin ju xcan.
\v 16 Pus ju ani chakoꞌulh ixpapanti Abraham junita. Chai lakacautsajin cꞌata ju ixchꞌita ju Satanás. Chai ja jantu lhijun ni acxkꞌotnilh ju yuchi ju avilhchan paꞌastacni.
\p
\v 17 Chai acsni naulh ju ani chivinti ju Jesús pus na tamaxanalh chux ju ixtꞌalaxcai. Chai tachi chun ju lapanacni na ixtalhikꞌachanch tachi chun ju kꞌoxi taxtokni ju ixtꞌajun naviniꞌ ju Jesús.
\s1 Ju xatꞌin mostaza
\p
\v 18 Pus ju acsnich ju Jesús ajuni ju lapanacni:
\p ―Tamalhch nuꞌ ju ixtꞌachunch jumputun tachi acsni lhinajun ju Dios laꞌisꞌatsucuntiꞌan ju lapanacni.
\v 19 Acsni lhinajun ju Dios laꞌixꞌalhunutꞌan ju lapanacni pus na lhu talhilacaꞌan ju Dios. Chunch ju tapasai tachi ju tapasai acsni chꞌancan ju xatꞌin mostaza. Pus tam lapanac ni cachꞌanlh ju yuchi laꞌixlacatꞌun pus ju anuꞌ achꞌananti takꞌayai chai tasui tachi ju lacatꞌicstꞌi qꞌuiu. Chai ju tsꞌokꞌo tamucꞌai ixpamalhiquiꞌan laꞌixꞌacatan.
\s1 Ju Jesús apumalani ju xatꞌin xkapavati
\p
\v 20 Ju Jesús vachuꞌ chani ajuni ju lapanacni:
\p ―Tas malhch nuꞌ ju va ixtꞌachunch acnaviyaꞌ tachi acsni lhinajun ju Dios laꞌisꞌatsucuntiꞌan ju lapanacni.
\v 21 Pus ju anuꞌ lapanacni chunch tajunita tachi ju tuꞌuꞌ xatꞌin xkapavati ju calhiyaulh tam chakoꞌulh ju lakatꞌutu achꞌapanta harina. Pus lhitayakꞌojui chux.
\s1 Ju xamalhtich ju lactꞌiyan
\p
\v 22 Ju Jesús aktam chꞌapachokopa ju xati ju Jerusalén. Chai acsni ixtapasatilai ju kꞌai lakꞌachakꞌanixni u ju lactꞌicstꞌi lakꞌachakꞌanixni pus ixꞌamalani ju lapanacni.
\v 23 Chai pumatam junilh:
\p ―Quiꞌucxtin ja na lacatsꞌunin ju tatakꞌalhtaxtui.
\p Chai ju Jesús junich:
\p
\v 24 ―Laꞌixlhichux miꞌalhunutꞌan anavitꞌit cuenta ni atꞌanuyaꞌitꞌit ju lactꞌiyan ni na acsatꞌicstꞌi ju xamalhtich. Iclajunauch chunch ni astan na pumalhu ju catatanuputunach ju anch para jantu lai catitanu.
\v 25 Jantu lai ni cakꞌostolaꞌ ju amachakaꞌ chai camalacchoyach ju malhtich. Chai astan ju uxijnan atꞌayayaꞌitꞌit makspaꞌ chai atsꞌucꞌuyaꞌitꞌit sanin ju malhtich chai anonaꞌitꞌit: “Ucxtin aquilamalhtekꞌaniuch”. Para ju yuchi catakꞌalhtayan chai catajunanch: “Jantu iclamispayau. Jantu iccꞌatsai ta anchach ju xatꞌanachitꞌit”.
\v 26 Chai ju acsnich ju uxijnan atsꞌucꞌuyaꞌitꞌit nonin: “Pus xaclatꞌavenau ju uxintꞌi chai xaclatꞌakꞌotꞌau. Chai laxalacti ju quilakꞌachakꞌan quincꞌan ju ixꞌamalaninin ju uxintꞌi”.
\v 27 Para ju yuchi catajunanch: “Iclajunau ni jantu iclamispayau. Jantu iccꞌatsai ta anchach ju xatꞌanachitꞌit. Akꞌostꞌit ju laquimacni tachi chun ju uxijnan ju va alactuꞌunin untꞌatꞌit”.
\v 28 Chai ju uxijnan akꞌalhununaꞌitꞌit chai alamatsꞌacꞌayaꞌitꞌit ju mintatsalatꞌan acsni alaktsꞌinaꞌitꞌit ju Abraham chai ju Isaac chai ju Jacob chai tachi chun ju lapanacni ju ixtanajun ixchivinti Dios ni tavilanalh junta lhinonkꞌojui ju Dios ju lactꞌiyan. Para ju uxijnan va xcꞌoxtꞌucꞌantꞌatꞌit.
\v 29 Pus cataminanta ju lapanacni ju lhichꞌatoꞌanta chai ju lhitsꞌastꞌai chai ju lhisur chai ju lhinorte chai catatolanta lacamixa junta lhinajun ju Dios.
\v 30 Chai ju acsnich cataꞌalinanta ju lapanacni ju makꞌanch xaquintalhilaksi. Para jantu lai actinaulh ni va ixlhiyuchi palai kꞌox caꞌalhiulacanaꞌ. Chai vachuꞌ cataꞌalinanta ju lapanacni ju jantucaꞌ makꞌan xaquintalhilaksi. Para jantu lai actinaulh ni va ixlhiyuchi palai jantu kꞌox caꞌalhiulacanaꞌ.
\s1 Ju Jesús lhikꞌalhun ju amachakꞌan Jerusalén
\p
\v 31 Pus ju acsnich avilhchan tachincha ju aliꞌin fariseonin chai tajunich ju Jesús:
\p ―Atꞌaxtꞌuch ju ani. Aꞌinchich. Pus ju Herodes najun ni camakniyan.
\p
\v 32 Para ju Jesús ajunich:
\p ―Aꞌinchꞌokꞌochitꞌit juninin ju anuꞌ aꞌokxchokꞌonu lapanac ni actixcoxtuyaꞌ ju lhacaticuru laꞌixlacatunaꞌan ju lapanacni chai palaich acꞌanaviyaꞌ ju takꞌankꞌanin ju chavai chai ju lhi. Chai ju ixlhilakatꞌutu avilhchan acnavikꞌoyach ju quilhichꞌalhcat. Chunchach ju aꞌunaꞌitꞌit.
\v 33 Para mas jantu ictalhoni ju Herodes aktsꞌiya tasqꞌuini ni acꞌalhtanatsucuyaꞌ ju chavai chai ju lhi chai ju tꞌuxam. Tasqꞌuini ni chunch aclalh ni jantu lhijun ni jantu canichalh ju lakꞌachakꞌan Jerusalén tam lapanac ju najun ixchivinti Dios.
\p
\v 34 Ji amachakꞌan Jerusalén ju uxijnan makniyatꞌit ju lapanacni ju tajunan ixchivinti Dios. Chai alacꞌatꞌalhmatꞌit ju yuꞌunch ju amalakꞌachꞌanicꞌantꞌachitꞌit. Pus na paklhu xaclamakꞌaixtokputunau ju uxijnan tachi ju navi isꞌaskꞌatꞌan ju tuꞌuꞌ chilaꞌ acsni amakatai laꞌixpakꞌachu ni laich caꞌalhistꞌacꞌaꞌ. Vachuꞌ xaclamakꞌaixtokputunau ju uxijnan tachi ju quiꞌaskꞌatꞌan ni laich xaclalhistacvi. Para ju uxijnan jantu xalacꞌasqꞌuinatꞌit.
\v 35 Pus ju chavai Dios macoꞌulata ju milakꞌachakꞌanꞌan. Chai iclajunau ni jantu lai aquintilalaktsꞌinchoko ju chavai. Va acsni ju aquilalaktsꞌinchokoyau acsni cachinaꞌ ju avilhchan ni acminchokoyaꞌ chai chani anonaꞌitꞌit ju quilacata: “Paxcat ju ani ju minta laꞌixtapakaꞌut ju Dios”.
\c 14
\s1 Ju Jesús cꞌuchꞌu pumatam lapanac
\p
\v 1 Pus lakatam avilhchan paꞌastacni ju Jesús alh venaꞌ laꞌixchakaꞌ pumatam xakꞌai fariseo. Chai ju aliꞌin fariseonin na ixtalhistactꞌajun ju Jesús.
\v 2 Chai vachuꞌ anch ixya pumatam lapanac laꞌixꞌucxlacapuꞌ ju Jesús. Chai ju yuchi va ixlacacꞌunta.
\v 3 Pus ju acsnich ju Jesús axakꞌala ju fariseonin chai ju ixtalhatalanininta ju ixlhamapꞌaksinꞌan ju istꞌaꞌisraelitanin. Ajunich:
\p ―Ja lhijunch ni acꞌacꞌuchꞌunulh ju avilhchan paꞌastacni u jantu.
\p
\v 4 Para ju yuꞌunch jantu tuꞌuꞌ taꞌakꞌalhtayanalh. Pus ju acsnich ju Jesús macchꞌapalh ju anuꞌ lapanac chai lana palaich va. Chai astan malakachachokolh laꞌixchakaꞌ.
\v 5 Chai alacjuni ju fariseonin:
\p ―Tis chavaich ju milhiꞌuxijnan ju jantu vatsꞌalhti camacutulh mas avilhchan paꞌastacni ju mimpuru u mivacax ni catinꞌalh junta puculhucnicꞌa.
\p
\v 6 Pus ju yuꞌunch jantu lai tuꞌuꞌ ixtamapuspꞌitni ju ani chivinti.
\s1 Chani alatꞌit acsni kꞌailhipꞌincꞌanaꞌitꞌit junta tamakꞌaxtokcan
\p
\v 7 Pus ju aktam acsni tatsuculh tolhnin lacamixa pus ju Jesús alaktsꞌilh ni ixchuxꞌan ixtatolhputun lacatantsꞌi junta ixtatolai ju xalackꞌajin. Pus yuchi alhijunilh lakatam chivinti ju ixꞌapumavasalaniputun ta yu catalalh. Ajunich ju ixtamakvajin vachuꞌ ju yuchi:
\p
\v 8 ―Acsni xamatiꞌ ju catakꞌailhiꞌanan junta alin ju tamakꞌaxtoknut pus jantu anch ju atꞌolatꞌit junta tatolai ju xalackꞌajin. Pus jantu xcai ni cakꞌailhimincalh pumatam ju palai xakꞌai. Palai jantu ju uxintꞌi.
\v 9 Chai ju xakꞌailhiminan ju uxintꞌi catꞌalakminan ju akꞌantam chai cajunan: “Axtꞌakninch ju mimputolan ju ani ya lapanac”. Pus ju acsnich na amaxananaꞌich chai apꞌinaꞌ tolhnaꞌ junta tatolai ju yuꞌunch ju palai jantu tuꞌuꞌ ixtapalhniꞌan.
\v 10 Alai chani alatꞌit acsni jintaꞌ kꞌailhipꞌincꞌanaꞌitꞌit. Pus anchach ju atꞌolatꞌit junta tatolai ju jantu tuꞌuꞌ ixtapalhniꞌan. Chai ju chunch acsni catalaktsꞌinan ju takꞌailhiꞌantan laich catajunan: “Quiꞌamigo anchach ju atꞌolaꞌ junta tatolai ju xalackꞌajin”. Pus ju acsnich na alakꞌayacꞌanaꞌ laꞌixꞌucxlacapuꞌan ju va kꞌaixtam tatꞌatolan lacamixa.
\v 11 Pus chunchach ju alatꞌit ni calalacatꞌicstꞌicanaꞌ va tichi chavaich ju lakꞌayachokocan isꞌakstu. Para ju tichi tꞌalacatꞌicstꞌi pus calakꞌayacanaꞌ.
\p
\v 12 Vachuꞌ chani juni ju Jesús ju anuꞌ ju xakꞌailhiꞌan laꞌixchakaꞌ:
\p ―Ju uxintꞌi acsni anaviyaꞌ ju tuꞌuꞌ kꞌai lacvaiti pus jantu va yuꞌunch ju atꞌasani ju miꞌamigojni u miꞌalakꞌavin u yuꞌunch ju milhiꞌalakꞌavin u yuꞌunch ju na makꞌalinin ju vanin alactꞌavilhtꞌi. Pus ni chunch ju alatꞌi pus jantu xcai ni catakꞌailhiꞌanchokoyan vachuꞌ ju yuꞌunch chai ju chunch va catamapalhnichokoyan.
\v 13 Para acsni anaviyaꞌ ju tuꞌuꞌ cꞌatan pus alai yuꞌunch ju atꞌasanitꞌi ju quilhpatinin chai ju macmututu chai ju chꞌantakꞌalhita chai ju alakꞌachꞌixnin.
\v 14 Chai ju chunch lhikꞌach atsꞌucꞌuyaꞌ ni jantu lai catamapalhnichokoyan ju yuꞌunch. Para amapꞌalhcꞌanaꞌ acsni catalokꞌonchokoyach ju yuꞌunch ju soknicꞌa alaktsꞌin ju Dios.
\s1 Caꞌalinaꞌ ju vaiti ju lactꞌiyan
\p
\v 15 Pus acsni kꞌasmatlh ju ani chivinti pumatam ju ixmakvi lacamixa pus junilh ju Jesús:
\p ―Slivasalh lhikꞌach ju isꞌatsucunti ju camakvenaꞌ acsni cataiꞌulayaꞌ ixpuꞌucxtin ju Dios.
\p
\v 16 Pus ju acsnich ju Jesús juni:
\p ―Pumatam lapanac navilh lakatam kꞌai tokꞌoxayavaiti. Chai na pumalhu ju alactꞌasanilh.
\v 17 Chai acsni tucanch cavencanaꞌ pus malakachalh pumatam ixlapanac ni caꞌalh atꞌasaniniꞌ ju catamakvenaꞌ. Cajunilh: “Ma inchitꞌit. Ma alinch ju chavai ju vaiti”.
\v 18 Para ixchuxꞌan tatsuculh nonin ni jantu lai catitaꞌalh. Pus ju xapꞌulhnan junilh: “Ictamaulh lakatam kꞌai lacatꞌun chai tasqꞌuini ni acꞌalh laktsꞌiniꞌ. Icsqꞌuiniyan lamapainin. Aqꞌuimacꞌacxanin ni jantu lai actiꞌancha”.
\v 19 Chai ju apumatam junich: “Ictamaulh lakacau vacax chai acꞌanaꞌ alaktsꞌintanunuꞌ. Icsqꞌuiniyan lamapainin. Aqꞌuimacꞌacxaninch ni jantu lai actiꞌancha”.
\v 20 Chai ju apumatam junich: “Ju quitꞌin va ictamakꞌaxtoklicaꞌ chai yuchi jantu lai actilhiꞌalh”.
\v 21 Pus anchokolh ju anuꞌ xalapanac. Alh juniniꞌ ju ixꞌucxtin tuchi ixtanajunch ju lapanacni. Pus ju acsnich na talhkꞌamalh ju amachakaꞌ. Chai junchokolh ju ixlapanac: “Vatsꞌalhti aꞌinchich ju lacakꞌai ti chai lacalactꞌicstꞌi ti ju lakꞌachakꞌan. Akꞌailhitꞌanaꞌich ju quilhpatinin chai ju macmututu chai ju chꞌantakꞌalhita chai ju alakꞌachꞌixnin”.
\v 22 Chai acsni navikꞌolh ju chunch ju xalapanac pus junchokopa ju ixꞌucxtin: “Quiꞌucxtin icnavita tachi ju xaqꞌuiꞌuni para tiꞌalincaꞌ ju tantsꞌi ju lacamixa”.
\v 23 Chai ixꞌucxtin juni ju ixlapanac: “Apꞌinchich ju kꞌai ti ju lacamacni chai ju macatꞌicstꞌi ti ju lacacuxtu. Kꞌasi ajuni ju lapanacni ni catamilh. Chach aktsamalh ju quinchakaꞌ.
\v 24 Chunch ju anaviyaꞌ ni icjunan ni jantu xamatiꞌ ju pꞌulhnan icꞌatꞌasanilh ju caquilhcꞌatsayaꞌ ju quivaiti”.
\s1 Tuchi tamapalai ju tachꞌakꞌokꞌai ju Jesús
\p
\v 25 Pus na lhu lapanacni ixtatꞌaꞌanta ju Jesús. Chai ju yuchi talakaspꞌitlh chai ajunich:
\p
\v 26 ―Ni xamatiꞌ quilakmin chai ni cajumputulh quintamamakaꞌun tasqꞌuini ni palai tuꞌuꞌ aquilhiulayaꞌ ju quitꞌin. Palai jantu ju ixpai, ixnati, chai ixꞌamachakaꞌ chai isꞌaskꞌatꞌan chai ixꞌalakꞌavin tsꞌalan chai ixꞌalakꞌavin atsiꞌin chai mas isꞌatsucunti isꞌakstu. Para ni jantu quimapaini ju chunch pus jantu lai cativa ju quintamamakaꞌun.
\v 27 Chai va tichi chavaich ju najun ni jantu quinchꞌakꞌokꞌaputun va ixlacaꞌatalh ni va lai mamakꞌalhkꞌajnicalh pus jantu lai cativa ju quintamamakaꞌun.
\v 28 Pus pumatam ju milhiꞌuxijnan ni cayoputulh lakatam putankꞌai chakaꞌ aktsꞌiya pꞌulhnan calacalhcaxtulh tas chunchach calhiꞌanaꞌ ju ixtapalh. U ni laich chaꞌan tachi ju maktasqꞌuinich ju capunavikꞌoyach u jantu.
\v 29 Pus ni jantu chun calalh pus jantu xcai ju astan ni taiꞌulata jantu lai navikꞌojui. Camakꞌancꞌacxlh tuꞌuꞌ chai jantu calhiva ju capunavikꞌo. Pus ju acsnich tachi chun ju lapanacni ju catalaktsꞌinach catalhitsꞌiꞌinach.
\v 30 Chai catanaulh: “Ju ani lapanac taiꞌulalh ixnavica ixchakaꞌ para jantu lai xanavikꞌojui”.
\v 31 Chai ju tam kꞌai ucxtin ni caꞌamputunach tꞌalasanaꞌ ju ixtꞌakꞌai ucxtin aktsꞌiya pꞌulhnan capastꞌacꞌaꞌ u ni laich caputꞌalalhajalh ju lhiminta lakapꞌuxam milh taropajni u jantu. Ju yuchi ni va lakacau milh ju ixtaropajni.
\v 32 Chai ni najun ni jantu lai catitꞌalalhajalh pus camalakachanilh pumatam ixlapanac chai casacmiyach tas laich catꞌatakꞌoxi ni jantu catalaclasa. Chunch ju canaviyaꞌ acsni na makatcaꞌ ju mintacha ju ixtꞌakꞌai ucxtin.
\v 33 Pus vana va chun ju uxijnan. Kꞌoxich apꞌastꞌactꞌit u ni lai aꞌunaꞌitꞌit ju quintamamakaꞌun u jantu. Pus va tichi chavaich ju milhiꞌuxijnan ju jantu lacasqꞌuin ni quitꞌin ju aclhinonkꞌoyaꞌ tachi chun ju ixtaxtokni ju pacxanta pus jantu lai cativa ju quintamamakaꞌun.
\s1 Aktamixnin jantu kꞌox ju matsat
\p
\v 34 Na kꞌox ju matsat. Para ju matsat ni jantu skꞌokꞌo cava pus jantu lhitapalai.
\v 35 Pus jantu kꞌox junita ixlacata ju lacatꞌun nin lai abono acpuꞌulhtulh. Alai va camakꞌancanach. Pus ju alin ju ixpakꞌasmatni cakꞌasmatlich.
\c 15
\s1 Ju borrego ju istsꞌankꞌata
\p
\v 1 Pus tachi chun ju achꞌinin chai ju alactuꞌunin talakmilh ju Jesús ni va ixtakꞌasmatniputun ju ixchivinti.
\v 2 Para ju fariseonin chai ju na ixtalhatalanininta ju ixlhamapꞌaksinꞌan ju istꞌaꞌisraelitanin ixtalhichivinin ju Jesús. Ixtanajun:
\p ―Ju yuchi kꞌox alactꞌalalhiꞌan ju alactuꞌunin chai alactꞌavajin ju yuꞌunch.
\p
\v 3 Pus ju acsnich ju Jesús ajunich ju ani chivinti ju ixꞌapumavasalaniputun tuchi ixꞌamalaniputun. Ajunich:
\p
\v 4 ―Ju pumatam milhiꞌuxijnan ni capacxalh tam cientos ixborregojni chai ni camakꞌatsꞌankꞌa lakatam ja jantu calacmacoyoyaꞌ ju noventa y nueve junta tatꞌajun venin chai caꞌalh puxconaꞌ ju istsꞌankꞌata tus calhitajuyaꞌ.
\v 5 Chai acsni calhitajuyach pus camucꞌayaꞌ laꞌixꞌakxpꞌun chai calhiminaꞌ chai na cakꞌachanach.
\v 6 Chai acsni cachinach laꞌixchakaꞌ pus caꞌalactꞌasaniyaꞌ ju ixꞌamigojni chai ixtꞌatolhnin chai caꞌalacjunach: “Quilatꞌakꞌachauch ni iclhitajulh ju quimborrego ju xacmakꞌatsꞌankꞌata”.
\v 7 Pus iclajunau ni vana va chun ju lactꞌiyan. Palai calhikꞌachancanaꞌ ju tam alactuꞌunuꞌ acsni macajun ju ixꞌalactuꞌunti. Palai jantu calhikꞌachancanaꞌ ju noventa y nueve lapanacni ju tanajun ni na soknicꞌa junita ju isꞌatsucuntiꞌan chai ixlhiyuchi jantu tasqꞌuini ni catamacaulh ju ixꞌalactuꞌuntiꞌan.
\s1 Ju tumin ju ixmakꞌatsꞌankꞌata
\p
\v 8 Ju tam chakoꞌulh ju capacxalh lakacau tumin ni camakꞌatsꞌankꞌa ju lakatam ja jantu caxavayaꞌ ju ixmaclhcu chai caꞌapꞌalhnanach laꞌixchakaꞌ. Lacsni lacsni capuxcoyaꞌ tus calhitajuyaꞌ.
\v 9 Chai acsni calhitajuyach caꞌalactꞌasaniyaꞌ ju ixꞌamigojni chai ju vanin alactꞌavi chai caꞌalacjunach: “Aquilatꞌakꞌachauch ni iclhitajulh ju quintumin ju xacmakꞌatsꞌankꞌata”.
\v 10 Pus iclajunau ni vana va chun talhikꞌachan ju ixꞌanquilhnin ju Dios acsni camaconach ixꞌalactuꞌunti ju tam alactuꞌunuꞌ.
\s1 Ju alactuꞌunu tsꞌalh
\p
\v 11 Chai ju Jesús axakꞌalachokopa ju lapanacni. Ajunich:
\p ―Pumatam lapanac ixꞌalin ixtꞌiyunꞌan istsꞌalan.
\v 12 Chai ju salacatꞌicstꞌi istsꞌalh junilh ju ixpai: “Quimpai aqꞌuilhvakninch ju miꞌalinta ju quiꞌanuch cajunach”. Pus ju ixpai alaclhvaknilh.
\v 13 Chai jantu makꞌan va ju salacatꞌicstꞌi istsꞌalh makꞌaixtoklich ju ixꞌalinta. Alh makat alacatam lacatꞌun. Chai ju anch quilhakꞌamanankꞌo lacaꞌalactuꞌunti tachi chun ju ixtaknicanta.
\v 14 Chai acsni lhakꞌamanankꞌo pus milh lakatam kꞌai chavan ju anuꞌ lakꞌachakꞌan chai ju yuchi tsuculh makꞌalhkꞌajnaꞌ.
\v 15 Chai lakxcavatailich pumatam amachakaꞌ anch. Chai ju yuchi malakacha laꞌixpotrero ni va caꞌalh alhistacnaꞌ ju ixpꞌaxnin.
\v 16 Chai ju yuchi na ixꞌuputun mas yuchi ju ixtaꞌui ju pꞌaxnin. Yuchi ju xatocꞌat lakatam qꞌuiu. Para jantu xamatiꞌ xaxtakni tuꞌuꞌ nin yuchi ju anuꞌ xalhiꞌut.
\v 17 Para acsni takꞌoxinilh ju ixꞌatalacpastꞌacꞌat pus naulh: “Na lhu alin ju makchꞌalhcatnin ju laꞌixchakaꞌ ju quimpai chai ju yuꞌunch slivasalh na kꞌox tavajin. Chai ju quitꞌin na icmakꞌalhkꞌajnan ju quinchavanti ju ani.
\v 18 Alai actaxtuyach ju ani. Aclakꞌanchokoyach ju quimpai chai acjunach: Quimpai iclactuꞌu ju Dios chai iclactuꞌun ju uxintꞌi.
\v 19 Pus jantu lhijun ni vanach aqꞌuilhimispꞌatꞌi ni mintsꞌalh. Va aqꞌuilaktsꞌich tachi ju va milapanac”.
\v 20 Pus taxtucha chai lakꞌalh ju ixpai.
\p Para acsni laktsꞌistucli ixlhimakat ju ixpai pus lana na mapaini. Pus atsꞌalalakꞌalh. Lakatanu chai puquilhchꞌuchꞌulh.
\v 21 Para ju istsꞌalh junich: “Quimpai iclactuꞌu ju Dios chai iclactuꞌun ju uxintꞌi. Chai jantu lhijun ni vanach aqꞌuilhimispꞌatꞌi ni mintsꞌalh ju quitꞌin”.
\v 22 Para ju ixpai ajunilh ju ixlapanacni: “Vatsꞌalhti amacꞌutꞌuchitꞌit ju palai kꞌoxi pumpuꞌ chai amalakchꞌinitꞌit. Chai amamactꞌanutꞌit lakatam mactanut. Chai amachꞌantꞌanutꞌit ju ixchꞌanxtꞌakꞌan.
\v 23 Chai aꞌinchitꞌit inin ju askꞌatꞌa vacax ju na kꞌonta. Amaknitꞌitch chai calacꞌuyau chai canaviyau ju cꞌatan.
\v 24 Chunch canaviyau ni tachi ju va ixnita ju ani quintsꞌalh para ju chavai tachi ju va lokꞌonchokolh. Istsꞌankꞌata para ju chavai lhitajuchokocalh”. Pus tatsuculh lhicꞌataninin.
\p
\v 25 Para ju xakꞌai istsꞌalh ixtꞌonachalhcaꞌ chꞌalhcatnaꞌ lacacuxtu. Chai acsni taspꞌitcha chai chincha vanin laꞌixchakaꞌ pus kꞌasmatlich ni na asanancanch chai ni tꞌoncan lacatꞌininca.
\v 26 Chai tꞌasanilh pumatam ixlapanac chai sacmi tuchi ju alin.
\v 27 Chai ju yuchi junich: “Pus minchokolhch ju mimpꞌisekꞌe chai ju mimpai lhinaulh ixmaknica ju askꞌatꞌa vacax ju na ixkꞌonta. Chunch ju navilh ni xaminchokoi ju istsꞌalh chai jantu tuꞌuꞌ xatapasayacha chai ni kꞌox tꞌajun”.
\v 28 Pus ju acsnich lana na talhkꞌamalh ju xakꞌai istsꞌalh chai jantu ixtanuputun laꞌixchakaꞌ. Pus taxtulh ju ixpai chai tapaininilh ni catanu.
\v 29 Para ju yuchi akꞌalhtayanalh. Junich ju ixpai: “Ju quitꞌin va ta lakachux cꞌata ictꞌonan aktaijunun. Chai jantu tavanan ju jantu acnavi tuchꞌi qꞌuiꞌuni. Para jantu tavanan qꞌuixtꞌaknitꞌa mas va minchivoch ni laich acꞌatꞌacꞌatanilh ju quiꞌamigojni.
\v 30 Para acsni xaminchokoich ju ani mintsꞌalh ju xaquimacaꞌankꞌojui tuchi ju ixtꞌaknitꞌa va ixlacata ni ixtꞌaꞌucxuntꞌajun ju alactuꞌunin chakolun pus lana lhimakninin miꞌaskꞌatꞌa vacax ju na ixkꞌonta”.
\v 31 Para ju ixpai junich: “Quintsꞌalh ju uxintꞌi aktsꞌiya tꞌaꞌun laquimacni chai tachi chun ju quiꞌalinta sich miꞌanuꞌ.
\v 32 Para aktsꞌiya istasqꞌuini ni acmacꞌatanilh chai caꞌalilh lackꞌachat. Pus ju ani mimpꞌisekꞌe tachi ju va ixnita chai tachi ju va lokꞌonchokolh. Va istsꞌankꞌata para lhitajuchokocalh”.
\c 16
\s1 Ju alhistacnaꞌ laꞌixchakaꞌ ju ixꞌucxtin
\p
\v 1 Chai ju Jesús vachuꞌ chani ajuni ju ixꞌamamakaꞌui:
\p ―Ixꞌalin pumatam lapanac ju na makꞌaliꞌ ixjunita. Chai ju yuchi ixꞌalin pumatam ju ixlhistacni ju ixꞌalinta ju ixꞌucxtin. Chai ju ani chivimakꞌancalh laꞌixꞌucxlacapuꞌ ju ixꞌucxtin. Va juni ni va ixlhakꞌamanani ju ixtumin ju ixꞌucxtin.
\v 2 Pus ju yuchi tꞌasanilh ju ixlapanac chai junich: “Tijuch ju ani ju ickꞌasmatꞌa ju milacata. Aqꞌuiꞌunch tas junitach ju chavai ju quiꞌalinta ni jantu vana lai atꞌilhistꞌactꞌi”.
\v 3 Pus ju anuꞌ alhistacnaꞌ chani pastaclh laꞌixꞌalhunut. “Tas aclayach ju chavai ni va quintaiꞌini ju ixlhistꞌacꞌa ju ixchakaꞌ ju quiꞌucxtin. Pus matiꞌ ju quintachaput ni lai actiꞌalacpucutunulh. Chai na lhimaxan ni acꞌalacapusacnalh.
\v 4 Iccꞌatsai tuchi aclayaꞌ ni aquintaꞌamaklhtayananaꞌ pantsꞌiquis laꞌixchakaꞌan ju lapanacni acsni actaiꞌinicanaꞌ ju quilhichꞌalhcat”.
\v 5 Pus tꞌasanilh pumatamin ju ixtalhiꞌani ju ixꞌucxtin chai junilh ju xapꞌulhnan: “Tas chunchach ju lhipꞌini ju quiꞌucxtin”.
\v 6 Chai ju yuchi junich: “Tam cientos alhcanti ju aceite”. Pus ju anuꞌ alhistacnaꞌ ixjunita junilh: “Anich ma ju xaꞌalhiqui. Va tsꞌalhti atꞌaꞌulhch chai atsꞌokꞌulatꞌi ju sastꞌi junta najun ni va tꞌupꞌuxamcau alhcanti ju lhipꞌini”.
\v 7 Astan ju anuꞌ alhistacnaꞌ junilh ju akꞌantam: “Ju uxintꞌi tas chunchach ju lhipꞌini”. Chai ju yuchi junilh: “Tam cientos alhcanti ju trigo iclhiꞌani”. Chai ju xalapanac juni: “Anich ma ju xaꞌalhiqui. Anavitꞌi ju sastꞌi junta najun ni va ochenta alhcanti ju lhipꞌini”.
\v 8 Pus ju xaꞌucxtin naulh ni aktsꞌiya na ixꞌacꞌatsananta ju anuꞌ aꞌokxchokꞌonuꞌ xalapanac ni cꞌatsalh ta yu capuꞌaktaijucanaꞌ astan mas jantu sok tachi ju xanavi.
\p Pus chunch ju xaꞌajuni ju lapanacni ju Jesús chai astan nonchokopa:
\p ―Ju lapanacni ju jantu quilhilaksi aktsꞌiya palai tacꞌatsai ta yu lai tatꞌanavi tuꞌuꞌ ju ixtꞌalapanacni. Palai jantu na chun talai ju yuꞌunch ju tamispai ixchivinti Dios.
\p
\v 9 Pus ju quitꞌin iclajunau ni apꞌuꞌaktꞌaiꞌutꞌit ju aliꞌin ju mintuminꞌan. Pus ju chunch caꞌalinaꞌ ju miꞌamigojniꞌan va ixlacata ju xatumin ju ani lacamunutpaꞌ ju xapꞌuchꞌalhcꞌatnanatꞌit ju uxijnan mas na tapuꞌalactuꞌunun ju aliꞌin. Ju chunch acsni tavanan aniyaꞌitꞌit pus ju yuꞌunch lhikꞌach cataꞌamaklhtayanananch lacachakaꞌ lactꞌiyan junta jonkꞌalhita.
\p
\v 10 Pus ju jantu aꞌokxchokꞌonun ixlacata ju tuꞌuꞌ mas va lacatsꞌunin pus vachuꞌ jantu aꞌokxchokꞌonun ixlacata ju tuꞌuꞌ lhu. Chai ju aꞌokxchokꞌonun ixlacata ju tuꞌuꞌ lacatsꞌunin pus vachuꞌ aꞌokxchokꞌonun ixlacata ju na lhu.
\v 11 Pus ni na ixꞌaꞌokxchꞌokꞌonun ixlacata ju xamakꞌalit ju ani lacamunutpaꞌ pus tis chavaich ju catalhilaksiyan chai cataxtakniyan ju vasalh makꞌalit. Yuchi ni lai anaviyaꞌitꞌit ju ixlhichꞌalhcat ju Dios.
\v 12 Pus ju mintuminꞌan ju ani lacamunutpaꞌ va tamachꞌixtaknitan ju Dios. Jantu miꞌanuꞌan. Chai ni ixpꞌuꞌaꞌokxchꞌokꞌonunatꞌit ju anuꞌ tumin mas jantu miꞌanuꞌan pus ju Dios jantu catitaxtaknin ju palai kꞌai ixmakꞌalit ju miꞌanuꞌan caꞌixva ju ixjonkꞌalhi lactꞌiyan.
\p
\v 13 Ju tam xalapanac jantu lai pumatꞌui cativa ju ixꞌucxtin ju vaktam. Pus aktsꞌiya camapainiyaꞌ ju pumatam chai jantu tuꞌuꞌ calhiulayaꞌ ju akꞌantam. U ni jantu para aktsꞌiya calhilaksiyaꞌ ju pumatam chai jantu tuꞌuꞌ canaviyaꞌ cuenta ju apumatam. Pus vana va chun ju uxijnan. Jantu lai atꞌimapꞌainitꞌit ju Dios chai vana amapꞌainitꞌit ju tumin.
\p
\v 14 Pus ju fariseonin na ixtamapaini ju tumin. Chai acsni takꞌasmatlh tachi chun ju ani chivinti pus va ixtalhitsꞌiꞌinch ju Jesús.
\v 15 Para ju yuchi ajunich:
\p ―Ju uxijnan tꞌalacꞌasuyatꞌit laꞌixꞌucxlacapuꞌan ju lapanacni tachi ju na va soknicꞌa untꞌatꞌit. Para ju tuꞌuꞌ lamiꞌatsucuntiꞌan ju kꞌox talhiulai ju mintꞌalapanacniꞌan ju Dios va lhitsꞌisi ni tamispaniyan ju miꞌalhunutꞌan ju yuchi.
\s1 Ju makꞌaniya lhamapꞌaksin chai ju sastꞌi
\p
\v 16 Acsni tucaꞌ ixtꞌajun ju Xivan ju ixꞌamakpaxanaꞌ pus ju lapanacni ixtaquiclacaꞌi ju ixlhamapꞌaksin ju Moisés chai ixchivintiꞌan ju lapanacni ju ixtanajun ixchivinti Dios. Para tus acsni milh ju Xivan tus chavai pus ju lapanacni ajuncan ni jantu anch lacalhamapꞌaksin ju alin ju atsucunti jonkꞌalhita. Alai va lhinomputun ju Dios laꞌisꞌatsucuntiꞌan ju lapanacni. Chai ni takꞌasmatꞌa ju chunch chivinti pus pumalhu slivasalh tanavi cuenta ixlhichux ixꞌalhunutꞌan ni calhinaulh ju Dios laꞌisꞌatsucuntiꞌan.
\p
\v 17 Para mas tamch ju ajuncan ju lapanacni ju chavai para aktsꞌiya jonkꞌalhita ju makꞌaniya ixchivinti Dios. Pus palai jantu xcai ni catsꞌankꞌa ju lactꞌiyan chai ju lacatꞌun. Palai xcai ni jantu lhitapalai cava ju tuꞌuꞌ laꞌixlhamapꞌaksin Dios mas va lacatsꞌunin cava.
\s1 Ju Jesús amalaninin ixlacata ju alamaconanti
\p
\v 18 Va tichi chavaich ju camaconaꞌ ju ixꞌamachakaꞌ chai catꞌatsucuchokoyaꞌ akꞌantam pus alactuꞌununta. Chai ju catꞌatsucuchokoyaꞌ ju va maconcanta pus vachuꞌ alactuꞌununta.
\s1 Ju makꞌaliꞌ chai ju Lázaro
\p
\v 19 Pus ixꞌalin pumatam jokꞌat ju na makꞌaliꞌ ixjunita. Chai ju yuchi ixlakchꞌi ju smumu ixpumpuꞌ tachi ixtalakchꞌi ju ucxtinin. Vachuꞌ ixlakchꞌi ju lackꞌox ixpumpuꞌ ju lino ixjuncan. Chai chux avilhchan ixnavi ju kꞌai lacvaiti.
\v 20 Chai vachuꞌ ixꞌalin pumatam quilhpatiniꞌ ju Lázaro ixjuncan. Chai ju yuchi na ixlacatsꞌitsꞌita. Pus ixmamacan vanin laꞌixquilhtalacxtutu ju anuꞌ makꞌaliꞌ.
\v 21 Chai na ixꞌuputun mas va yuchi ju xaꞌatanxajnaꞌ ju ixniꞌ ju anuꞌ makꞌaliꞌ. Chai vachuꞌ ju xkꞌoyun ixtalakmin chai istasnaunich ju ixlacatsꞌitsꞌi.
\v 22 Pus chilh avilhchan acsni nilh ju anuꞌ quilhpatiniꞌ chai talhiꞌalh ju anquilhnin ju lactꞌiyan junta vachuꞌ vilhcha ju Abraham. Chai vachuꞌ nilh ju anuꞌ makꞌaliꞌ. Chai macnucalh.
\v 23 Pus ju anuꞌ makꞌaliꞌ na ixmakꞌalhkꞌajnan junta taꞌan ju tanita ju jantu talhilacaꞌanta ju Jesús. Chai alacꞌavanalh chai laktsꞌilh ju Abraham ixlhimakat chai ju Lázaro ni anch ixvi vachuꞌ.
\v 24 Pus ju acsnich ju yuchi pꞌas chivinilh. Junich ju Abraham: “Quimpai Abraham lamapainin aqꞌuiꞌaktꞌaiꞌutꞌich ju quitꞌin. Amalakꞌachꞌachitꞌich ju Lázaro. Chach quimilh kꞌavaniniꞌ lacaxcan ju quisimakꞌat mas va laꞌixkꞌelili ixmacaꞌ ni aquimatsꞌucꞌuncꞌulhch ni na ictꞌajun makꞌalhkꞌajnanch ju ani lacajipi”.
\v 25 Para ju Abraham junich: “Quintsꞌalh apꞌastꞌactꞌich ni amaklhtꞌayanantꞌa chux ju kꞌox mintaxtokni acsni ixtꞌaꞌuncaꞌ. Para ju Lázaro na ixmakꞌalhkꞌajnan. Para ju chavai ju yuchi alin ju ixkꞌachat ju ani chai ju uxintꞌi makꞌalhkꞌajnan.
\v 26 Chai jantu va yuchi. Para vachuꞌ junta vilatꞌit ju uxijnan quilhpamacatutam junta pucutucanta. Ju chunch ju tataxtuputun ju ani ni va cataꞌamputulh ju anch jantu lai. Nin lai cataxtucha xamatiꞌ ju camimputunach ju ani”.
\v 27 Pus ju acsnich ju anuꞌ makꞌaliꞌ junich: “Pus na ictapaininiyan ji quimpai. Amalakꞌachꞌatꞌich ju Lázaro laꞌixchakaꞌ ju quimpai.
\v 28 Tatꞌajuncaꞌ ixpumaquisiꞌan ju quiꞌalakꞌavin. Chach ancha ju yuchi ajuniniꞌ ju ixchivinti Dios ni jantu catamilh ju yuꞌunch vachuꞌ ju ani junta icmakꞌalhkꞌajnan”.
\v 29 Para ju Abraham junich: “Ju yuꞌunch tapacxanta ju ixchivinti ju Moisés chai ixchivintiꞌan ju lapanacni ju ixtanajun ixchivinti Dios. Chach takꞌasmatniyanta ju yuꞌunch”.
\v 30 Para ju makꞌaliꞌ junich: “Janti quimpai Abraham. Para ni xamatiꞌ ju nita calokꞌonchokolh chai caꞌalakꞌalh pus catamaconaꞌ ju ixꞌalactuꞌuntiꞌan”.
\v 31 Para ju Abraham junich: “Ni jantu takꞌasmatputun ixchivinti ju Moisés chai ju lapanacni ju ixtanajun ixchivinti Dios pus vana jantu camalacaꞌinicalh mas va calokꞌonchokolh tam xamatiꞌ ju nita chai calakꞌalh”.
\c 17
\s1 Alin ju lai pukꞌalhkꞌoscan
\p
\v 1 Ju Jesús ajunich ju ixꞌamamakaꞌui:
\p ―Jantu tavanan ju jantu caꞌalilh ju pukꞌalhkꞌoscan. Para painich ju anuꞌ lapanac ju amakꞌalhkꞌosnun.
\v 2 Palai kꞌox caꞌixva ju ixlacata ni caꞌixpixtuchꞌimucꞌacalh ju tsasnatpuchꞌipi chai caꞌixmacaꞌancalh lacaꞌalama acsni tucaꞌ ixmakꞌalhkꞌosui tam xamatiꞌ. Palai na macxcai cava ni camakꞌalhkꞌosu tam xamatiꞌ ju jantucaꞌ kꞌox quilhilacaꞌanta.
\v 3 Alhistꞌacchꞌokꞌocꞌantꞌit miꞌakstuꞌan.
\p Chai ni calactuꞌuyan tam milakꞌau pus akꞌaich. Chai ni lhilatolai ni alactuꞌunulh chai najun ni jantu catailhiꞌanaꞌ pus amacꞌacxaninch.
\v 4 Mas paktujun calactuꞌun ju tam vilhchan chai paktujun ju calakmin ju tam vilhchan chai cajunin ni alactuꞌun chai catapaininiyan ni amacꞌacxaninch chai najun ni jantu canavichokoyaꞌ pus amacꞌacxaninch.
\s1 Lai na lhu navican acsni lhilaksican ju Dios
\p
\v 5 Chai ju ixtamalakachan ju Jesús tajuni:
\p ―Aquilaꞌaktaijuyau ni lai palai aclalhilaksiyau.
\p
\v 6 Para ju Jesús ajuni:
\p ―Ju satalhtsꞌi mostaza na lacatꞌicstꞌi para lakꞌajunta chai astan kꞌai qꞌuiu jun. Pus vana va chun ju uxijnan. Mas va lacatsꞌunincaꞌ ju quilalhilaksiyau para ni vasalh quilalhilaksiyau pus laich aꞌunaꞌitꞌit ju ani makakꞌai qꞌuiu ni catatipꞌulhulhch. Caꞌalh lacaꞌalama. Chai catalacaꞌiniyanch.
\s1 Chani calalh ju tam lapanac
\p
\v 7 Ju pumatam milhiꞌuxijnan laich caꞌalilh ju ixlapanac ju caꞌalhoknulh u camalhistacni ju ixborregojni. Pus ju yuchi acsni caminchalh laꞌixlhichꞌalhcat ja laich aꞌun ni soko catavi lacamixa chai cavailh.
\v 8 Ca jantu. Alai aꞌunaꞌich ni calakꞌoxiniyan ju mivaiti. Pus ju yuchi calakꞌoxiyaꞌ ju ixpumpuꞌ chai caꞌiniyanch ju mivaiti tus acsni alhilayaꞌich. Tus acsnich aꞌunaꞌich ni cavenaꞌ ju yuchi.
\v 9 Chai astan acsni navikꞌota chux tuchi ixlhiꞌunich pus ju uxintꞌi jantu uni lakꞌailaktsꞌiuch.
\v 10 Pus vana va chun lamiꞌatsucuntiꞌan ju uxijnan. Acsni navikꞌotꞌatꞌit tachi chun ju ixtalhijuntan ju Dios pus va anaꞌuntꞌit ni jantu kꞌox xalapanacni untꞌatꞌit ni jantu tuꞌuꞌ atumpa ju xanaviyatꞌit. Va yuchi ju ixlhiꞌuncꞌantꞌatꞌit ixnavica.
\s1 Ju Jesús acꞌuchꞌu pumacau lapanacni
\p
\v 11 Pus ju Jesús acsni ixꞌanta ju lakꞌachakꞌan Jerusalén pus puꞌalh junta mactai ju xaꞌestado Samaria chai ju xaꞌestado Galilea.
\v 12 Pus acsni tanucha lakatam lakꞌachakꞌan pus tamilh pakxtoknin pumacau lapanacni ju na ixtalacatsꞌitsꞌita chai ju istsꞌitsꞌiꞌan va ixtapuchꞌiꞌan. Para ju yuꞌunch ixlhimakat tataya.
\v 13 Chai pꞌas tachivinilh. Tajuni ju Jesús:
\p ―Jesús amamakaꞌunuꞌ. Lamapainin aquilaꞌaktaiju ju quijnan.
\p
\v 14 Chai ju Jesús acsni alaktsꞌilh pus ajunich:
\p ―Apꞌinchitꞌit talacasuninin ju palijni.
\p Pus chunch ixtalhilanita ju lapanacni acsni ixtalacatsꞌitsꞌita chai astan palaich ixtajun. Pus ju anuꞌ ixpumacauꞌan taꞌalh. Chai acsni ixtaꞌanta pus lana palaich tava.
\v 15 Pus ju pumatam sia lhiyuꞌunch acsni laktsꞌilh ni palaich ixjunita pus taspꞌitchokolh. Minchokolh junta ixya ju Jesús. Chai na pꞌas ixchivinin acsni lakꞌayalh ju Dios.
\v 16 Chai lana taquilhputanilh ju lacatꞌun junta ixchꞌantaiti ju Jesús chai junilh lakꞌailaktsꞌiuch. Chai ju yuchi amachakaꞌ ju xaꞌestado Samaria ixjunita.
\v 17 Pus ju acsnich ju Jesús naulh:
\p ―Ja jantu pumacau ju palai xatajun. Tas anchach ju xataꞌan ju ixpumanajatsiꞌan.
\v 18 Ja jantu xamatiꞌ ju xataspꞌitacha ni laich catalakꞌaya ju Dios. Ja va yuchi ju ani ju jantu quintꞌaꞌamachakꞌan junita.
\p
\v 19 Pus ju acsnich ju Jesús chani xajuni ju anuꞌ ju palaich xajun:
\p ―Atꞌaich. Aꞌinchich. Palaich xaꞌun ni vasalh xaqꞌuilhilaksi.
\s1 Acsni lhinajun ju Dios laquiꞌatsucuntiꞌan
\p
\v 20 Chai ju fariseonin tasacmi tavananch ju cachinaꞌ ju avilhchan acsni calhinonaꞌ ju Dios. Chai ju Jesús ajunich:
\p ―Jantu lai laktsꞌincan acsni chin ju avilhchan acsni calhinonaꞌ ju Dios.
\v 21 Nin yuchi ni lai catanaulh: “Alaktsꞌich. Ani ya”. U “Alaktsꞌich. Anuꞌ vilhcha”. Jantu lai chun canoncalh ni laꞌisꞌatsucuntiꞌan ju lapanacni ju lhinajun ju Dios.
\p
\v 22 Chai ajuni ju ixꞌamamakaꞌui:
\p ―Caminaꞌ avilhchan acsni alaktsꞌimpꞌutꞌunaꞌitꞌit ju anuꞌ pantsꞌiquis acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani. Para jantu acs ju alaktsꞌinaꞌitꞌit.
\v 23 Pus ju aliꞌin catajunan: “Alaktsꞌintꞌit ju ani. Ca va nomputun ni caminchokoyaꞌ”. U catajunan: “Alaktsꞌintꞌit ju anuꞌ ju tꞌajun tapasanaꞌ”. Para jantu apꞌitꞌit nin yuchi ni lai achꞌakꞌokꞌatꞌit.
\v 24 Pus ju tuꞌuꞌ makꞌalipniꞌ va tam pantsꞌiquis mapulhcukꞌojui ju ixlhilacaputsꞌun ju lactꞌiyan chai makat laktsꞌincan. Pus vana va chun cajunaꞌ acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani. Va tam pantsꞌiquis acchinaꞌ chai chux aquintalaktsꞌinaꞌ.
\v 25 Para jantu chavai lana ju catapasayaꞌ ju chunch. Alai tasqꞌuini ni pꞌulhnan aclhimakꞌalhkꞌajnanaꞌ lhu taxtokni. Chai ju lapanacni ju tatꞌajun ju chavai jantu aquintalhilaksiyaꞌ.
\v 26 Tachi ju ixtatꞌajun ju lapanacni acsni ixtꞌajun ju Noé pus vana va chunch catajunaꞌ acsni acminchokoyaꞌ ju quitꞌin ju quimalakachatachilh Dios ni lapanac actsucuyaꞌ ju ani.
\v 27 Pus va chunch ju tatailhiꞌalh tachi aktsꞌiya ixtalai. Ixtalacvajin. Ixtaꞌakꞌotnun. Ixtatamakꞌaxtꞌokꞌach chai ju chakolun ixꞌaꞌican. Chai chunch ju talalh tus acsni chilh ju avilhchan ni tanu ju Noé ju laꞌixbarco. Chai milh ju akmuxtut chai amamuxtukꞌo tachi chun ju yuꞌunch.
\v 28 Chai chunch vachuꞌ talalh ju lapanacni ju ixtatꞌajun acsni ixtꞌajun ju Lot. Tatailhiꞌalh isꞌatsucuntiꞌan tachi aktsꞌiya ixtalai. Ixtavajin chai ixtaꞌakꞌotnun chai ixꞌatamonan chai istaꞌastꞌanan chai ixtaꞌachꞌananan chai ixtayajui ixchakaꞌan.
\v 29 Para ju avilhchan acsni taxtucha ju Lot ju lakꞌachakꞌan Sodoma pus lana mintacha lactꞌiyan ju jipi chai ju azufre. Chai lana amaknikꞌo ixchuxꞌan ju amachakꞌan anch.
\v 30 Pus vana va chun catapasayaꞌ acsni actalacasuchokoyach ju quitꞌin ju quimalakachatachilh Dios ni lapanac actsucuyaꞌ ju ani.
\p
\v 31 Pus ju acsnich ju vilhcha laꞌisꞌakstiꞌ ixchakaꞌ jantu catitakꞌalhtaju chai catanu laꞌixchakaꞌ ni va caꞌiputulh ju ixtaxtokni. Vana va chun ju tꞌajun chꞌalhcatnaꞌ lacacuxtu. Jantu catiminchokolh laꞌixchakaꞌ iniꞌ tuꞌuꞌ.
\v 32 Apꞌastꞌactꞌit ni matsat xatapalai ixꞌamachakaꞌ ju Lot acsni talakꞌaspꞌitlh.
\v 33 Pus va tichi chavaich ju va yuchi canavi cuenta ju ixmaktasqꞌuinit ju isꞌatsucunti pus jantu catiꞌalilh ju isꞌatsucunti jonkꞌalhita ju lactꞌiyan. Para va tichi chavaich ju jantu va yuchi canaviyaꞌ cuenta ju tuchi maktasqꞌuini laꞌisꞌatsucunti para alai canaviyaꞌ cuenta ixtaxtokni Dios pus ju yuchi caꞌalinaꞌ isꞌatsucunti ju jonkꞌalhita ju lactꞌiyan.
\p
\v 34 Acsni acminchokoyaꞌ ju quitꞌin pus cataꞌalinaꞌ ixtꞌiyunꞌan ju kꞌaixtam tamanalh lacaputaman ju anuꞌ atatsꞌisni. Ju pumatam calhiꞌancanaꞌ ju lactꞌiyan chai ju pumatam catamaconach.
\v 35 Chai ixtꞌiyunꞌan tꞌacunin ixlhiꞌacsni catatꞌonaꞌ squitinin. Ju pumatam calhiꞌancanaꞌ. Ju pumatam catamaconach.
\v 36 Ixtꞌiyunꞌan lapanacni catachꞌalhcatnanaꞌ ju lacacuxtu. Ju pumatam calhiꞌancanaꞌ. Chai ju pumatam catamaconach.
\p
\v 37 Pus ju ixꞌamamakaꞌui tajunich:
\p ―Tas anchach ji ucxtin ju catapasayaꞌ ju chunch.
\p Chai ju yuchi ajuni lakatam chivinti ju ixnoncan ju acsni:
\p ―Vanta anchach ju catamayach ju lacatuna pus anchach ju catatakꞌaixtꞌokꞌaꞌ ju chꞌunin.
\p Ju chunch va nomputun ni aktsꞌiya caꞌamamakꞌalhkꞌajnicanaꞌ ju tachi ju va tanita tajunita laꞌixmacni Dios ni jantu talhilaksi ju yuchi.
\c 18
\s1 Ixꞌalin ju ixlhamakꞌan pumatam chakoꞌulh ju ixnimacontilacanta
\p
\v 1 Ju Jesús alacjuni ju ixꞌamamakaꞌui lakatam chivinti ju apumavasalanilh ni va tachi catatꞌachivinilh ju Dios chai jantu tavanan catanaulh ni jantu lhitapalai ni catatꞌachivinilh ju yuchi.
\v 2 Pus ajunich:
\p ―Ju lakatam lakꞌachakꞌan ixꞌalin pumatam lacatꞌicstꞌi ucxtin. Chai ju yuchi jantu ixtalhoni ju Dios chai jantu ixꞌatalhoni ju ixtꞌalapanacni.
\v 3 Chai vachuꞌ ixꞌalin ju anch pumatam chakoꞌulh ju va ixnimacontilacanta. Pus ju yuchi va tsa ixlakꞌan ju anuꞌ ucxtin. Ixjuni: “Aqꞌuilakꞌoxininch ju quilhamakꞌan ixlacata ju quintꞌalasan”.
\v 4 Pus ju anuꞌ ucxtin na lakalhu avilhchan jantu ixnavini ju tuchi isqꞌuini ju anuꞌ chakoꞌulh. Para astan pus naulh laꞌixꞌalhunut: “Ju quitꞌin jantu ictalhoni ju Dios nin tuꞌuꞌ iclhiulai ju quintꞌalapanacni.
\v 5 Para va ixlacaꞌatalh ni na jeks quimavai ju ani chakoꞌulh yuchi aclhilakꞌoxiniyaꞌ ju ixlhamakꞌan. Ni jantu pus ca na jeks aquimavakꞌalhiyaꞌ”.
\p
\v 6 Chai ju Jesús ajunich ju ixꞌamamakaꞌui:
\p ―Anavitꞌit cuenta tuchi naulh ju anuꞌ lacatꞌicstꞌi ucxtin ju jantu sok ixlakꞌoxi ju tuꞌuꞌ lhamakꞌan.
\v 7 Chai ja va a ti yuchach ju Dios jantu caꞌalakꞌoxiniyaꞌ ju ixlhamakꞌanꞌan ju ixlapanacni ju asacxtuta ju yuchi acsni tatapainini chux tuncujun chai chux atatsꞌisni. Tꞌas anonaꞌitꞌit. Ja jantu sai catiꞌalakꞌoxinilh ju ixlhamakꞌanꞌan.
\v 8 Iclajunau ni vatsꞌalhti caꞌaꞌaktaijuyaꞌ. Pus mas chunch ju canaviyaꞌ ju Dios para ja acꞌalhitajuyaꞌ ju yuꞌunch ju vasalh quintalhilaksi acsni acminchokoyaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.
\s1 Ju fariseo chai ju achꞌiniꞌ
\p
\v 9 Ju Jesús ajuni ju ani chivinti ixlacata ju yuꞌunch ju ixtanajun ni lackꞌoxin lapanacni ixtajunita chai jantu tuꞌu ixtalhiulai ju aliꞌin. Naulhch:
\p
\v 10 ―Pumatꞌuiꞌan lapanacni taꞌalh lacpujitat tꞌachivinin ju Dios. Ju pumatam fariseo ixjunita chai ju pumatam achꞌiniꞌ ixjunita.
\v 11 Pus ju anuꞌ fariseo taya chai tsuculh juniniꞌ ju Dios ta yu ixjunita. Naulh: “Icjunan lakꞌailaktsꞌiuch ji Dios ni jantu chun icjunita tachi ju aliꞌin lapanacni. Pus ju yuꞌunch va akꞌalhonin tajunita chai aꞌokxchokꞌonin chai va tatꞌatsucui ju jantu ixꞌamachakaꞌan. Nin chunch icjunita tachi ju ani ya achꞌiniꞌ.
\v 12 Ju quitꞌin ictascajai paktꞌui ju tamin semana. Chai icxtꞌakꞌa ju lacpujitat lactsꞌunin tachi chun ju iclhajai”.
\v 13 Chunch ju naulh ju anuꞌ fariseo. Para ju achꞌiniꞌ makat ixyacha. Chai ju yuchi jantu lana ixlacaꞌamputun ju lactꞌiyan. Va ixtanquilhacsacan ni chunch ju ixlacan ju acsni ni tuꞌuꞌ ixlhixcani ixꞌalhunutꞌan. Chai ju yuchi ixnajun: “Ji Dios lamapainin aqꞌuiꞌaktꞌaiꞌutꞌich ni na icꞌalactuꞌunuꞌ”.
\v 14 Pus iclajunau ni Dios laktsꞌilh ni soknicꞌa ju anuꞌ achꞌiniꞌ acsni anchokolh laꞌixchakaꞌ. Ju fariseo jantu. Pus chunch ju pulaktsꞌincalh ju anuꞌ achꞌiniꞌ ni calalacatꞌicstꞌicanaꞌ va tichi chavaich ju lakꞌayachokocan isꞌakstu. Para va tichi chavaich ju calalacatꞌicstꞌichokocalh isꞌakstu pus ju yuchi calakꞌayacanaꞌ.
\s1 Ju Jesús sqꞌuinlh ixlacataꞌan ju askꞌatꞌan
\p
\v 15 Chai alhiminicalh ju askꞌatꞌan ju Jesús ni caꞌamokslanilh ixmacaꞌ laꞌixlacatunaꞌan chai catapaininilh ju Dios ixlacataꞌan ni kꞌox catatsuculh. Para acsni taꞌalaktsꞌinilh ju ixꞌamamakaꞌui pus taꞌalackꞌaima ju ixtalhichaꞌan ju isꞌaskꞌatꞌan.
\v 16 Para ju Jesús atꞌasanilh ju askꞌatꞌan chai chani ajuni ju ixꞌamamakaꞌui:
\p ―Amacꞌaꞌuntꞌit ju askꞌatꞌan. Chach quintalakmilh. Jantu asaspꞌitꞌit ni quintalhilaksich juyuꞌunch. Chai va tichi chavaich ju aquilhilaksiyaꞌ tachi ju quintalhilaksi ju ani tayanalh askꞌatꞌan yuchi ju lai catanuyanta ju lactꞌiyan.
\v 17 Pus slivasalh ju iclajunau. Tachi chun ju lapanacni ju jantu quilhilaksi ju quitꞌin tachi ju tam askꞌatꞌa lhilaksi ju ixpai pus jantu tavanan lai catitanu junta lhinajun ju Dios ju lactꞌiyan.
\s1 Tam makꞌaliꞌ tꞌachivinilh ju Jesús
\p
\v 18 Chai pumatam xakꞌai sacmilh ju Jesús. Junich:
\p ―Amamakaꞌunuꞌ ju uxintꞌi na kꞌox lapanacꞌat. Tijuch ju lai acnavi ni caꞌalilh ju quiꞌatsucunti ju jonkꞌalhita.
\p
\v 19 Chai ju Jesús junich:
\p ―Ju uxintꞌi ni naꞌun ni va iclapanac pus tajuch ni va qꞌuiꞌuni ni ickꞌox. Jantu xamatiꞌ ju kꞌox. Va yuchi ju Dios.
\v 20 Ju uxintꞌi cꞌatsꞌaich tuchi najun lamilhamapꞌaksinꞌan. Najun ni jantu atꞌatsꞌucꞌu ju jantu miꞌamachakaꞌ. Jantu amaknitꞌi xamatiꞌ. Jantu akꞌalhonan. Jantu anauch taꞌaklhtamat chivinti ixlacata akꞌantam. Atꞌalhoninch ju mimpai chai ju minatich.
\p
\v 21 Pus ju anuꞌ xakꞌai junich:
\p ―Tachi chun ju ani taxtokni icmuctaxtukꞌota tus quilhitalacatꞌicstꞌin.
\p
\v 22 Pus ju Jesús acsni kꞌasmatnilh ju ixchivinti junich:
\p ―Va lakatam taxtokni ju tꞌimakꞌancꞌacxniyan. Astꞌakꞌochiꞌ chux ju miꞌalinta chai ju tumin ju amaxtꞌuyaꞌ axtꞌaknin ju quilhpatinin. Ju chunch ni caꞌalinach ju mimakꞌalit ju lactꞌiyan. Chai acsni anavikꞌoyaꞌ chux ju ani pus atꞌatꞌich. Aqꞌuinchꞌakꞌokꞌach.
\p
\v 23 Para ju yuchi acsni kꞌasmatnilh ixchivinti Jesús pus slivasalh na amakꞌaninilh ni na kꞌox makꞌaliꞌ ixjunita.
\v 24 Chai acsni laktsꞌilh ju Jesús ni na ixꞌamakꞌanininta pus naulh:
\p ―Slivasalh na lhixcai ni lai catanu lactꞌiyan tam makꞌaliꞌ.
\v 25 Tachi ju tuꞌuꞌ camello ni jantu lai catitapasalh junta tilhucucu ju macscat pus vana va chun tam makꞌaliꞌ. Ju yuchi jantu lai catiꞌalh tus lactꞌiyan.
\p
\v 26 Pus ju ixtakꞌasmatꞌa ju ixchivinti tajunich:
\p ―Ni na xcai tatakꞌalhtaxtui ju makꞌalinin pus tis chavaich ju lai catakꞌalhtaxtulh.
\p
\v 27 Para ju Jesús ajunich:
\p ―Ju va lapanac aktsꞌiya palai tuꞌuꞌ lhiulai ju tuꞌuꞌ makꞌalit. Palai jantu ixtaxtokni Dios. Para ju Dios lai mapaxani ixꞌatalacpastꞌacꞌat.
\p
\v 28 Pus ju acsnich ju Pitaluꞌ junilh ju Jesús:
\p ―Pus ju quijnan icmaconkꞌotauch chux quintaxtokni quincꞌan chai iclachꞌakꞌokꞌatauch ju uxintꞌi.
\p
\v 29-30 Chai ju Jesús ajuni:
\p ―Pus slivasalh ju iclajunau. Va tichi chavaich ju tamacajunta ixchakaꞌ u ixpai u ixnati u ixꞌalakꞌavin u ixꞌamachakaꞌ u isꞌaskꞌatꞌan va ixlacaꞌatalh ni lhinajun ju Dios laꞌisꞌatsucunti chai chunch ju xalacasqꞌuin ju yuchi pus palai na lhu ju caꞌamaklhtayananaꞌ ju chavai acsni tꞌajuncaꞌ ju ani chai ju astan caꞌamaklhtayananaꞌ ju isꞌatsucunti jonkꞌalhita.
\s1 Ju Jesús najun ni caniyaꞌ
\p
\v 31 Ju Jesús alacatam alhiꞌalh ju ixpumacautꞌuiꞌan chai ajunich:
\p ―Ju chavai caꞌanauch ju lakꞌachakꞌan Jerusalén. Chai caꞌuctaxtuyanta tachi chun ju taxtokni ju tatsꞌokꞌula ju makꞌaniya lapanacni ju ixtanajun ixchivinti Dios. Caꞌuctaxtuyaꞌ tachi chun ju taꞌatsꞌoknulh ju quilacata quitꞌin ju quimalakachatachilh ju Dios ni lapanac actsucuyaꞌ ju ani.
\v 32 Pus acmakꞌaxtakcananta laꞌixmacaꞌan ju yuꞌunch ju jantu quintꞌaꞌisraelitanin tajunita. Chai aquintalhitsꞌiꞌinach. Chai aquintajunach macxcai chivinti. Chai aquintalakachujvayach.
\v 33 Chai astan acsni aquintalakanekmakꞌoyach pus aquintamakniyach. Para ju ixlhilakatꞌutu avilhchan aclokꞌonchokoyaꞌ.
\p
\v 34 Para ju ixꞌamamakaꞌui ju Jesús lana jantu ixtamachakxai ju ani chivinti. Lana jantu ixtacꞌatsai tuchi ixnajun ju Jesús. Jantu lai ixtapastꞌacꞌa tuchi canomputulh ju chivinti ju xaꞌalacjuni ju Jesús.
\s1 Palaich navicalh pumatam alakꞌachꞌix
\p
\v 35 Pus acsni vanin ixchaꞌamputun ju Jesús ju lakꞌachakꞌan Jericó pus pumatam alakꞌachꞌix ixvi laꞌixquilhtuꞌ ti. Isqꞌuinch ju tumin.
\v 36 Chai ju yuchi acsni kꞌasmatlich ni ixtatꞌajun tapasanin na lhu lapanacni pus asacminilh tichi chavaich.
\v 37 Pus tajuni ni ixtꞌajun tapasanaꞌ ju Jesús amachakaꞌ Nazaret.
\v 38 Pus ju acsnich na pꞌas ju chivinilh ju anuꞌ alakꞌachꞌix chai junilh ju Jesús:
\p ―Jesús istsꞌalhꞌat ju kꞌai ucxtin David. Lamapainin aqꞌuiꞌaktꞌaiꞌutꞌich.
\p
\v 39 Para ju ixtaꞌapꞌulananta takꞌailich. Tajuni ni va sek catavi. Para va apalai pꞌas ju ixchivinin. Ixnajun:
\p ―Ji istsꞌalh David lamapainin aqꞌuiꞌaktꞌaiꞌutꞌich.
\p
\v 40 Pus ju acsnich ju Jesús lana taya. Chai lhinaulh ixꞌica. Chai acsni lakchaꞌalh pus sacmilh. Junich:
\p
\v 41 ―Tijuch ju acnaviniyan.
\p Chai ju yuchi junich:
\p ―Quiꞌucxtin va icꞌalacꞌavamputun.
\p
\v 42 Chai ju Jesús junich:
\p ―Alacꞌavanch. Pus laich alacꞌavanan va ixlacaꞌatalh ni xaqꞌuilhilaksich.
\p
\v 43 Pus lana alacꞌavanalh chai chꞌakꞌokꞌalh ju Jesús. Ixlakꞌayaꞌanta ju Dios ju lacati. Chai chux ju lapanacni vachuꞌ talakꞌayalh ju Dios acsni talaktsꞌilh.
\c 19
\s1 Ju Jesús chai ju Zaqueo
\p
\v 1 Ju Jesús tanucha ju lakꞌachakꞌan Jericó chai ixtapasatilaputun.
\v 2 Para ixvi ju anch pumatam lapanac ju Zaqueo ixjuncan. Ju yuchi xakꞌai achꞌiniꞌ ixjunita chai slivasalh na makꞌaliꞌ ixjunita.
\v 3 Chai ju yuchi ismispaputun ju Jesús tichi chavaich. Para jantu lai islaktsꞌin va ixlacaꞌatalh ixtalhavat lapanacni ju ixtalakꞌanta ju Jesús chai na putantꞌicstꞌi ixjunita ju Zaqueo.
\v 4 Pus atsꞌalaꞌalh junta capuꞌanach ju Jesús. Chai tocꞌacha laꞌixꞌacatan lakatam kꞌai qꞌuiu ni laich calaktsꞌinaꞌ ju Jesús acsni catapasayach ju anch.
\v 5 Pus acsni chaꞌalh ju Jesús ju anch pus talakstꞌalh chai laktsꞌilh chai junich:
\p ―Zaqueo vatsꞌalhtich atꞌakꞌalhtꞌaꞌutꞌich. Tasqꞌuini ni acꞌastacnalh lacatsꞌunin ju laminchakaꞌ ju chavai.
\p
\v 6 Pus ju Zaqueo vatsꞌalhti takꞌalhtajulh lacaqꞌuiu chai lhikꞌach amaklhtayanalh ju Jesús laꞌixchakaꞌ.
\v 7 Para acsni talaktsꞌilh ju lapanacni pus ixchuxꞌan talhichivinilh ju Jesús. Tanaulh ni laich xatanuyacha laꞌixchakaꞌ ju anuꞌ lapanac ju na alactuꞌunuꞌ ixjunita.
\v 8 Pus ju acsnich ju Zaqueo taya chai junilh ju Jesús:
\p ―Ju chavai ji quiꞌucxtin aclhtam ju quimakꞌalit acꞌaxtakniyach ju quilhpatinin. Chai ju iclhiꞌokxchokꞌomaxtulh tuꞌuꞌ pus paktꞌatꞌi acꞌaxtaknichokoyach ju ixtumin.
\p
\v 9 Chai ju Jesús junich:
\p ―Chavai xatꞌakꞌalhtꞌaxtꞌuyatꞌit ju uxintꞌi chai tachi chun ju tatanumanalh laminchakaꞌ. Ju chavai vasalh ixpapanti Abraham untꞌatꞌit ni quilalhilaksiyauch tachi ju lalh ju Abraham.
\v 10 Pus yuchi iclhiminta ju quitꞌin ju quimalakachatachilh ju Dios ni lapanac actsucuyaꞌ ju ani. Icmilh puxconaꞌ ju tsꞌankꞌata ni laich acꞌamakꞌalhtaxtuyaꞌ.
\s1 Ju lakcau tumin
\p
\v 11 Ni ixtatꞌajun kꞌasmatnin ju Jesús pus ju yuchi tailhiꞌalh ixchivinti chai ajunilh alakatam chivinti ju caꞌapumavasalaniyaꞌ tuchi nomputun acsni najun ni calhinonaꞌ ju Dios. Chai apujunilh chunch ni vanin ixchaꞌamputun ju Jerusalén chai ju ixtatꞌaꞌanta lacati ixtalhiulai ni lana ucxtin cajunaꞌ ju Jesús.
\v 12 Pus chani ajuni:
\p ―Pumatam xakꞌai lapanac taxtulh laꞌixlakꞌachakꞌan chai alh makat. Va alh amaklhtayanaꞌ ju ixpuꞌucxtin chai naulh ni caminchokoyach acsni caꞌamaklhtayananach.
\v 13 Para acsni tucaꞌ ixꞌan pus atꞌasanilh pumacau ixlapanacni chai axtaknilh lakcavin tumin chai ajunich: “Apꞌuchꞌalhcꞌatnantꞌit tus acsni actaspꞌitꞌanta”.
\v 14 Para ju ixtꞌaꞌamachakꞌan talhixcailich chai amalakachacha ju alhtanin ni cataꞌalh taimayonin ju anuꞌ lapanac. Chai acsni talakchilh tajunich: “Jantu iclacasqꞌuinau ni uxintꞌi ju quiꞌucxtin quincꞌan aꞌuntꞌi”.
\v 15 Para ju yuchi aktsꞌiya amaklhtayanalh ju ixpuꞌucxtin. Chai acsni taspꞌitchokocha pus lhinaulh ixꞌatꞌasanica ju anuꞌ ixlapanacni ju ixꞌaxtaknita ixtumin. Va iscꞌatsaputun tijuch ju punavilh kꞌantam kꞌantam.
\v 16 Chai milh ju xapꞌulhnan chai junich: “Quiꞌucxtin ju mintumin lhajachokolh alakcau”.
\v 17 Chai ju ucxtin junich: “Kꞌoxich. Na kꞌox xalapanacꞌat. Pus ni laich xamuctꞌaxtꞌui ixlacata ju va lacatsꞌunin pus alhinonaꞌich ju lakacau lakꞌachakꞌan”.
\v 18 Chai milh ju apumatam. Junich: “Quiꞌucxtin ju mintumin lhajachokolh alakquis”.
\v 19 Chai vana va chunch ju junilh ju ixꞌucxtin tachi ju junilh ju xapꞌulhnan. Junich: “Ju uxintꞌi laich alhinonaꞌ lakaquis lakꞌachakꞌan”.
\v 20 Chai astan mimpa apumatam chai ju yuchi juni: “Quiꞌucxtin anich iclhiminitan ju mintumin. Va xacpachꞌimakꞌata lacapayu.
\v 21 Pus va xactalhoniyan ju uxintꞌi ni iccꞌatsaich ni na pꞌas ju miꞌalhunut ju uxintꞌi. Pus alakꞌach. Yuꞌunch ju milapanacni ju talacsununiyan ju micebada ni laich lhu amakꞌaixtꞌokꞌaꞌ ju uxintꞌi mas jantu tuꞌuꞌ tapulhajai ju yuꞌunch. Pus yuꞌunch ju tachꞌalhcatnan ni laich na lhu cajunaꞌ ju micebada ju uxintꞌi”.
\v 22 Pus ju acsnich ju ixꞌucxtin junich: “Na kꞌai unitꞌa ji xalapanac. Pus va ixlacata ju minchivinti miꞌakstu ju acmucꞌaniyan ju mintalakꞌalhin. Pus ju uxintꞌi nauch ni cꞌatsꞌaich ni na pꞌas ju quiꞌalhunut. Chai yuꞌunch ju quilapanacni ju tachꞌalhcatnan chai talacsunui ju quicebada ni lai na lhu acmakꞌaixtꞌokꞌaꞌ ju quitꞌin.
\v 23 Pus ni sala chunch icjunita pus tajuch ni jantu xamakꞌai ju quintumin junta makꞌacan ju tumin. Ju chunch acsni xacminchokota pus xacꞌamaklhtayananchokolh ju quintumin chai chux ju isꞌaskꞌatꞌa”.
\v 24 Pus ju acsnich ju xaꞌucxtin ajunich ju vanin ixtayanalh: “Atꞌaiꞌinitꞌit ju tumin chai axtꞌaknitꞌit ju ixpacxanta ju lakcau”.
\v 25 Para ju yuꞌunch tajuni: “Para ji quiꞌucxtin ju yuchi alin lakcau”.
\v 26 Para ju xaꞌucxtin ajuni: “Pus islivasalh ju iclajunau. Va tichi chavaich ju pacxanta tuꞌuꞌ pus palai lhu caxtaknicanaꞌ. Para ju matich tuꞌuꞌ pus cataiꞌinicanaꞌ ju tuchi lacatsꞌunin ixꞌalinta.
\v 27 Chai ju anuꞌ quintꞌalaxcainin ju jantu ixtalacasqꞌuin ni laich acꞌalhijunilh pus aquilalhiminiuch ju ani chai amaknitꞌit laquiꞌucxlacapuꞌ”.
\s1 Ju Jesús tanulh ju lakꞌachakꞌan Jerusalén
\p
\v 28 Acsni nonkꞌo ju ani ju Jesús pus alhtananchokopa laxati ju Jerusalén.
\v 29 Chai chaꞌalh ju akstijun junta na lhu ixya ju xaqꞌuiu ju olivo juncan. Vanin ju lakꞌachakꞌanixni Betfagé chai Betania. Pus ju acsnich ju Jesús amalakacha ixtꞌiyunꞌan ixtamamakaꞌun.
\v 30 Ajunich:
\p ―Aꞌinchitꞌit ju anuꞌ tasui lakꞌachakꞌan chai acsni atꞌanutꞌachitꞌit pus alhitꞌaꞌuyaꞌitꞌit lakatam sastꞌi puru chꞌiyocanta. Tucaꞌ xamatiꞌ putocꞌata tavanan. Pus axkꞌotꞌayaꞌitꞌit chai aquilalhiminiyau.
\v 31 Chai ni xamatiꞌ catasacmiyan tajuch ni va xkꞌotꞌayatꞌit pus va aꞌunaꞌitꞌit ni maktasqꞌuini ju miꞌucxtinꞌan.
\p
\v 32 Pus taꞌalh ju anuch ixꞌamalakachacan chai chunch ju talhitajulh tachi ixꞌajuncanta.
\v 33 Chai acsni ixtatꞌajun xkꞌotainin ju puru pus ju amanavinin tajunich:
\p ―Tajuch ni va xkꞌotꞌayatꞌit ju quimpuru quincꞌan.
\p
\v 34 Chai ju yuꞌunch tajunich:
\p ―Ni va maktasqꞌuini ju quiꞌucxtin quincꞌan.
\p
\v 35 Pus yau ajunilh chai talhiminilh ju Jesús. Chai taꞌakxchꞌamucꞌalh ixcutunꞌan ju puru. Chai tamucꞌalh ju Jesús.
\v 36 Chai acsni alhtanalh ju Jesús ju laxati Jerusalén pus ju ixtalhavat lapanacni ixtamamalhiꞌanta ixcutunꞌan ju lacati.
\v 37 Chai acsni vanin ixtachaꞌamputun junta lhiꞌatajuntinicꞌach ju anuꞌ akstijun junta lacya ju xaqꞌuiu olivo pus chux ju ixtalhavat ju ixꞌamamakaꞌui na ixtakꞌachanch. Na pꞌas ixtachivinin acsni tatsuculh lakꞌayanin ju Dios. Ixtalakꞌayai ixlacata tachi chun ju lhamakꞌan ju ixtalaktsꞌinta.
\v 38 Ixtanajun:
\p ―Paxcat ju ani xakꞌai ucxtin ju minta laꞌixtapakaꞌut ju Dios. Ju chavai alin ju akꞌoxamixnit ju lactꞌiyan. Chach lakꞌayacalh ju Dios.
\p
\v 39 Para ju acsnich ju aliꞌin fariseonin ju ixtamakminta tajunich ju Jesús:
\p ―Amamakaꞌunuꞌ akꞌaich ju miꞌamamakaꞌunin.
\p
\v 40 Para ju Jesús ajunich:
\p ―Iclajunau ni va sek catalactavi ju ani minta lapanacni pus catalactꞌasalh ju chiux chai aquintalakꞌaya.
\p
\v 41 Chai acsni vanin chaꞌalh ju Jesús chai laktsꞌilh ju lakꞌachakꞌan Jerusalén pus na lhikꞌalhulh.
\v 42 Naulh:
\p ―Na kꞌox ixva ni ixmachꞌakxatꞌit ju chavai acsni iclatꞌavilau ni quilacata lai aꞌunchꞌokꞌotꞌit ixꞌamigojni ju Dios. Para ni jantu chun xalayatꞌit pus ju chavai jantu alakꞌaꞌinicꞌanaꞌitꞌit ni laich amachꞌakxayaꞌitꞌit.
\v 43 Na kꞌox ixva ni ixmachꞌakxatꞌit ni cachinaꞌ ju avilhchan acsni kꞌalhtankꞌai catamucꞌayaꞌ ju tꞌun ju mintꞌalaxcaiꞌan laꞌixtalakachoko ju milakꞌachakꞌanꞌan chai catalakꞌaxkꞌavitnuyan chai jantu jintaꞌ lai atꞌipꞌutꞌaxtꞌutꞌit.
\v 44 Chai catamaktakꞌoyach ju milakꞌachakꞌanꞌan. Chai catamaknikꞌoyan chux ju uxijnan ju tꞌonatꞌit anch. Jantu catamaconaꞌ ju tuꞌuꞌ chiux ju va calaꞌucxtocꞌalh ju ixtꞌachiux ju lakꞌachakꞌan. Pus chunch catanaviniyan ni jantu quilamispayau ju quitꞌin ju icDios ju chavai avilhchan acsni iclalakmintauch.
\s1 Axcauxtucalh ju lapanacni ju lacpujitat
\p
\v 45 Ju acsnich ju Jesús tanuchalh laꞌixpujitatꞌan ju istꞌaꞌisraelitanin chai tsuculh alactixcoxtunuꞌ tachi chun ju ixtaꞌulata ixlhistꞌatꞌan chai ju ixtaꞌatamonanch ju anch.
\v 46 Ixꞌajuni:
\p ―Laꞌixchivinti Dios tsꞌokcanta junta chani najun: “Ju quinchakaꞌ xachakaꞌ junita junta tꞌachivincan ju Dios”. Chunch ju najun lacaꞌatsꞌoknut. Para ju uxijnan va tachi ixchakaꞌ ju akꞌalhaunin lhimalacxtꞌuyatꞌit.
\p
\v 47 Pus chux avilhchan ixꞌamalaninin ju Jesús ju lacpujitat. Para ju xalackꞌajin palijni chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin chai ju xalackꞌajin ju lakꞌachakꞌan Jerusalén va ixtamakniputun.
\v 48 Para jantu lai ixtalhitajuni ta yu laich tuꞌuꞌ catanavi ni chux ju lapanacni va tachi ixtalakmin ni ixtakꞌasmatniputun ixchivinti.
\c 20
\s1 Alin ixtachaput ju Jesús
\p
\v 1 Lakatam avilhchan ixtꞌajun amalaniniꞌ ju lapanacni ju Jesús lacakꞌai ixpujitatꞌan ju istꞌaꞌisraelitanin chai ajuni ta yu laich cataputakꞌalhtaxtulh. Pus tachincha ju xalackꞌajin palijni chai ju papaninch chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin.
\v 2 Chai taxakꞌala ju Jesús. Tajunich:
\p ―Tis chavaich ju xajunan ni laich anaviyaꞌ tachi chun ju ani taxtokni.
\p
\v 3 Chai ju Jesús ajunich:
\p ―Vachuꞌ aclasacmiyau lakatam chivinti. Aquilajunauch.
\v 4 Tis chavaich ju xamalakachayachilh ju Xivan ni caꞌamakpaxanalh. Ja yuchi ju Dios u va lapanacni.
\p
\v 5 Pus ju yuꞌunch talacchivinilh ixlhiꞌakstuꞌan. Ixtalaclajuni:
\p ―Ni calhiquilhꞌaniu ni Dios ju xamalakachayachilh pus aquintajunin tajuch ni jantu xalacaꞌiniyau.
\v 6 Chai ni canaju ni va lapanacni ju xatamalakachayachilh pus chux ju lapanacni aquintalacatꞌalhman ni na talacaꞌita ni ixlapanac Dios ixjunita ju Xivan.
\p
\v 7 Pus taꞌakꞌalhtayanalh ni jantu ixtacꞌatsai tichi chavaich ju xamalakachayachilh ju Xivan.
\v 8 Pus ju acsnich ju Jesús ajunich:
\p ―Pus nin quitꞌin jantu actilajuniu tichi chavaich ju xaquimalakachayachilh ni acnaviyaꞌ ju ani taxtokni.
\s1 Ju makchꞌalhcatni lapanacni na taꞌalactuꞌunulh
\p
\v 9 Pus ju acsnich ju Jesús tsuculh ajuniniꞌ ju lapanacni ju chivinti ju ixtꞌalaktsꞌipaxcavaich ju tuꞌuꞌ. Ajuni:
\p ―Pumatam lapanac chꞌanlh ju xaqꞌuiu uvas laꞌixlacatꞌun chai amachꞌixtaknilh ju makchꞌalhcatnin. Chai ju yuchi na makꞌan alh alacatam lacatꞌun.
\v 10 Chai acsni chilh ju avilhchan acsni alilh ju xaꞌuvas pus amalakachanichilh pumatam ixlapanac ju anuꞌ chꞌalhcatnin ni caꞌixtaxtaknilh ju xalhiꞌut tachi ixꞌalhitꞌatakꞌoxitach. Para ju anuꞌ makchꞌalhcatnin talhilakanekma. Va talhixcavatsꞌala. Chai jantu tuꞌuꞌ taxtaknilh.
\v 11 Chai malakachachokochilh apumatam ixlapanac. Chai vana va chun tanavipa. Talhilakanekma chai tamamaxanilh. Va chunch taxcavatsꞌalachokolh. Chai jantu tuꞌuꞌ taxtaknilh.
\v 12 Chai ju amatꞌun malakachachokopa ixlhipumatꞌutu ixlapanac. Pus ju yuꞌunch vana va chun tanavichokopa. Tamacꞌatsani chai tamaxtulh lacapuꞌuvas.
\p
\v 13 Pus ju acsnich ju amanavin ju anuꞌ puꞌuvas naulh: “Tas nuꞌ aclayach ju chavai. Acmalakachayach ju quintsꞌalh ju na icmapaini. Ca laich cava ni catatalhonilh ju yuchi acsni catalaktsꞌinaꞌ”.
\v 14 Chai chunch ju navi. Para ju anuꞌ makchꞌalhcatnin acsni talaktsꞌilh talaclajunilh sia yuꞌunch: “Yuchach ju anuꞌ ju amanavinch cajunaꞌ acsni caniyaꞌ ju ixpai. Pus asokꞌotꞌitch. Camakniuch. Chai quiꞌanuchꞌan cajunaꞌ ju ani puꞌachꞌananti”.
\v 15 Pus chunchach ju tanavi. Tatamacxtulh lacapuꞌuvas chai tamakni.
\p Pus acsni nonkꞌo ju ani chivinti ju Jesús pus asacmilh ju lapanacni. Ajunich:
\p ―Tꞌas nonatꞌit. Tas caꞌulhtuyach ju amatꞌun ju anuch chꞌalhcatnin.
\v 16 Pus caminach chai camaknikꞌoyach ju anuꞌ chꞌalhcatnin chai aliꞌin ju caꞌamachꞌixtaknichokoyach ju ixpuꞌuvas.
\p Pus ju lapanacni acsni takꞌasmatlh tuchi ixnajun ju Jesús tanaulh:
\p ―Jantu calacasqꞌuinaꞌ ju Dios ni chunch ju catapasalh.
\p
\v 17 Para ju Jesús alaktsꞌilh ju lapanacni chai alhikꞌalhtailh:
\p ―Pus ni jantu chunch ju catapasayaꞌ pus tijuch ju nomputun ju chivinti ju tsꞌokcanta laꞌixchivinti Dios junta chani najun:
\q1 Ju chiux ju tasacmakꞌalh ju anuꞌ ixyonin chakaꞌ
\q1 yuchach ju valhch ju chiux ju makꞌastumucꞌacanta chakaꞌ junta tsꞌokcanta tuchi cꞌata ju yocanta.
\m
\v 18 Pus acsni quintasamakꞌan ju lapanacni pus va ixtꞌachunch junita tachi acsni pukꞌalhkꞌoscan ju tuꞌuꞌ chiux chai tacꞌatsanican. Chai acsni icꞌaꞌulani ju lapanacni ju ixtalakꞌalhinꞌan pus va ixtꞌachunch junita tachi acsni catantꞌalhma ju tuꞌuꞌ kꞌai chiux chai jantu tavanan lai kꞌostolai.
\s1 Sacmican ixlacata ju amapalanti
\p
\v 19 Pus ju xalackꞌajin palijni chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin na ixtapuxcajui ta yu laich catapuchꞌapalh ju Jesús ju anuꞌ pantsꞌiquis. Para na ixtatalhonita ju lapanacni. Pus ni ixtamachakxata ixchivinti ju Jesús chai ixtacꞌatsai ni ixlhichivinin ju yuꞌunch acsni tavanan naulh ju chivinti ixlacata ju puꞌuvas pus yuchi ixtalhichꞌapaputun.
\v 20 Pus talhistacli chai amalakachacalh ju lapanacni ju catatankꞌajlaktsꞌilh. Chai ju yuꞌunch talhitalacasulh tachi ju lapanacni ju soknicꞌa ixjunita ju ixꞌatalacpastꞌacꞌatꞌan. Va ixtapuxcolakxtuniputun ju chivinti ni laich catalhimakꞌaxtaknilh ju gobernador.
\v 21 Pus yuchi taquilhisacmi:
\p ―Amamakaꞌunuꞌ iccꞌatsayau ni naꞌun chai amalanininch ju stavasalanti. Chai vaklhtam chun alaktsꞌin ju lapanacni. Chai sok amalaninin ixlhamapꞌaksin ju Dios.
\v 22 Pus tꞌas naꞌunch. Ja lhijun ni acꞌamapalanauch ju laꞌixpuꞌucxtin ju romanonin u jantu.
\p
\v 23 Para ju Jesús lana amachakxanilh ni va ixtaꞌokxchokꞌoputun chai ajuni:
\p ―Tajuch ni va quilapuxconiputunau ju quintalakꞌalhin.
\v 24 Aquilamasuniuch ju tumin ju lhiꞌamapꞌalananatꞌit. Tis ixꞌucxpuꞌ ju ani okslai. Tis ixtapakaꞌut ju tsꞌokcanta ju ani.
\p Pus taꞌakꞌalhtayanalh. Tajunich:
\p ―Ixꞌanuꞌ ju César ixꞌucxtinꞌan ju romanonin.
\p
\v 25 Pus ju acsnich ju Jesús ajunich:
\p ―Pus axtꞌaknitꞌit ju César ju ixꞌanuch. Chai axtꞌaknitꞌit ju Dios ju ixꞌanuch.
\p
\v 26 Pus jantu lai talhitajunilh tuꞌuꞌ talakꞌalhin laꞌixchivinti ju xanajun laꞌixꞌucxlacapuꞌ ju lapanacni. Alai va talhamakꞌaninilh ni na kꞌox xalhakꞌalhtayanan. Chai va sek tataya.
\s1 Acsni catalokꞌonchokoyach ju tanita
\p
\v 27 Ju acsnich tachincha ju aliꞌin saduceonin ju jantu ixtalacaꞌi ni laich calokꞌonchokolh tam xamatiꞌ ju ixnita. Talakmilh ju Jesús chai tasacmi:
\p
\v 28 ―Amamakaꞌunuꞌ ju Moisés quintaꞌatsꞌoknunin laꞌixlhamapꞌaksin ni canilh tam lapanac chai ma camacontilalh ixꞌamachakaꞌ para jantu tuꞌuꞌ catꞌamacontilalh ju isꞌaskꞌatꞌan pus ju ispꞌisekꞌe calhitsucuchokolh ju ixꞌamachakach ixjunita ju xani. Chai camaꞌalini ju isꞌaskꞌatꞌa chai ju yuchi ni tsꞌalh pus ma casacnilh ixtapakaꞌut ju lijunto ixlakꞌau.
\v 29 Pus ixꞌalin pumatujun lhiꞌalakꞌavin. Chai ju xakꞌai alilh ixꞌamachakaꞌ. Para astan nilh chai jantu tuꞌuꞌ macontilanilh ju isꞌaskꞌatꞌa.
\v 30 Chai ju ixlhipumatꞌui tꞌatsucuchokopa ju ixꞌamachakach ixjunita. Chai astan vachuꞌ nipa. Jantu tuꞌuꞌ macontilalh ju isꞌaskꞌatꞌa.
\v 31 Chai ju ixlhipumatꞌutu tꞌatsucuchokopa. Chai vana va chun talakꞌo ixchuxꞌan ixpumatujunꞌan. Tus tanikꞌo. Chai jantu xamatiꞌ macontilanilh ju isꞌaskꞌatꞌa.
\v 32 Chai ju astan pus vachuꞌ nilh ju anuꞌ chakoꞌulh.
\v 33 Pus acsni calokꞌonchokocanaꞌ pus tis ixꞌamachakach cajunaꞌ ni tatꞌatsucukꞌo ixpumatujunꞌan lhiꞌalakꞌavin.
\p
\v 34 Ju acsnich ju Jesús akꞌalhtayanalh. Ajunich:
\p ―Ju lapanacni ju ani lacamunutpaꞌ tatamakꞌaxtꞌokꞌa chai talaꞌi.
\v 35 Para alin lapanacni ju kꞌox alhiulai ju Dios ni catalokꞌonchokoyach chai cataꞌanach ju lactꞌiyan. Chai ju anch jantu tamakꞌaxtokcan chai jantu laꞌican.
\v 36 Jantu tasqꞌuini ni catamakꞌaxtokcha ju anch ni jantu catitanichokolh ju anch. Alai va ixtꞌachunchach catatsucuyanta tachi ju anquilhnin. Chai isꞌaskꞌatꞌan Dios tajunita ni talokꞌonchokota.
\v 37 Mas isꞌakstu ju Moisés mavasala ni catalokꞌonchokoyach ju tanita acsni atalacasunilh ju Dios ju lacaꞌachꞌitin ju jantu tavanan lai lhcukꞌo. Pus ju Moisés acsni tsꞌokꞌula tuchi tapasalh ju anch pus naulh ni Dios juni ni isDiosꞌan junita ju makꞌaniya lapanacni ju Abraham chai ju Isaac chai ju Jacob ixꞌajuncan.
\v 38 Pus ju Dios ni najun ni isDios junita ju anuch lapanacni pus va pumavasalai ni tatꞌajun ju yuꞌunch. Pus mas nonau ni va nita tam xamatiꞌ para ju Dios alhilaktsꞌin tachi ju tatꞌajun.
\p
\v 39 Pus ju acsnich ju aliꞌin sia yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin tajunich ju Jesús:
\p ―Amamakaꞌunuꞌ na kꞌox xanaꞌun.
\p
\v 40 Pus tus acsnich jantu lai tuꞌuꞌ aliꞌ talhisacmichokoputulh.
\s1 Tis istsꞌalh ju Cristo
\p
\v 41 Ju Jesús ajunich ju aliꞌin fariseonin:
\p ―Tꞌas nonatꞌit. Tas laich talhinajun ju lapanacni ni istsꞌalh David ju Cristo ju ixnoncan camalakachatachilh ju Dios.
\v 42 Pus isꞌakstu ju David chani naulh ju laxaꞌalhiqui ju Salmos juncan:
\q1 Ju ucxtin Dios junilh ju quiꞌucxtin:
\q1 “Vanin atꞌaꞌulh junta icvi.
\q1
\v 43 Tus acsni actꞌalalhajayaꞌ ju mintꞌalaxcai”.
\m
\v 44 Pus ni isꞌakstu David naulh ni ixꞌucxtin junita pus ju chunch va nomputun ni jantu va istsꞌalh junita.
\s1 Ju Jesús aꞌulani ju talakꞌalhin
\p
\v 45 Pus tachi chun ju lapanacni takꞌasmatlh acsni chani ajuni ixꞌamamakaꞌui ju Jesús:
\p
\v 46 ―Alhistꞌaccꞌantꞌit ni jantu cataꞌokxchokꞌon ju yuꞌunch ju na talhatalanininta ju milhamapꞌaksinꞌan. Pus ju yuꞌunch na takꞌachani ju laclhman ixpumpuꞌan tachi ju tam xakꞌai. Chai na kꞌox talhiulai acsni amacꞌamican ju laꞌixtalhavat lapanacni. Chai na takꞌachani ni tatolai laꞌixputolanꞌan ju xalackꞌajin ju lacpujitat chai lacapuvai.
\v 47 Va taꞌokxchokꞌotaiꞌini ixlacchakaꞌan ju chakolun ju va animacontilacanta. Chai astan talapalai tachi ju na va kꞌox panicni ju tatꞌachivinin ju Dios ni lai catapuꞌokxchokꞌolh ju lapanacni ni catanaulh ni na tatalhoni ju Dios. Para ju yuꞌunch cataꞌamaklhtayananaꞌ palai lhu ju ixmakꞌalhkꞌajnatꞌan. Palai jantu ju aliꞌin lapanacni.
\c 21
\s1 Pumatam quilhpatiniꞌ chakoꞌulh
\p
\v 1 Junta ixvi ju Jesús ju laꞌixpujitatꞌan ju istꞌaꞌisraelitanin pus tasoknicꞌa taya chai alaktsꞌilh ju makꞌalinin ni ixtamujui ixlhakꞌailaktsꞌinꞌan lacalactꞌicstꞌi pꞌaklat junta ixpumucan tumin ju laꞌixpujitatꞌan.
\v 2 Chai vachuꞌ laktsꞌilh pumatam chakoꞌulh ju va ixnimacontilacanta chai na quilhpatiniꞌ ixjunita. Chai ju yuchi mujulh lakatꞌui lactꞌicstꞌi tumin.
\v 3 Pus ju Jesús naulh:
\p ―Slivasalh ju iclajunau. Palai lhu xaxtꞌakꞌa ju ani quilhpatiniꞌ chakoꞌulh ju va nimacontilacanta. Palai jantu tachi chun ju aliꞌin.
\v 4 Pus tachi chun ju yuꞌunch talhikꞌailaktsꞌinch ju Dios ju va xajnichokotachalhch. Para ju ani mas va quilhpatiniꞌ para xtakkꞌolh chux ju ixtimakꞌata.
\s1 Calakꞌalhikꞌocanaꞌ ju kꞌai pujitat
\p
\v 5 Chai ju aliꞌin ju ixtavilanalh anch talhichivinilh ju pujitat. Ixtanajun ni na kꞌoxich ixmaxantilacanta lacacꞌusi chiux chai ju lapanacni ixtaxtakta na lhu taxtokni ju na laccꞌus ixjunita ni na kꞌox catasu ju pujitat. Para ju Jesús ajuni:
\p
\v 6 ―Aclajunau ixlacata ju ani taxtokni ju laktsꞌinatꞌit ju chavai. Pus caminaꞌ avilhchan acsni jantu tuꞌuꞌ catilaꞌucxtavi ju chiux ju ixtꞌachiux. Chux lana calakꞌalhikꞌocanaꞌ.
\s1 Chani lai pucꞌatsacan ni caꞌaclayaꞌ ju lacamunutpaꞌ
\p
\v 7 Chai tasacmich. Tajuni:
\p ―Amamakaꞌunuꞌ tas vananch ju caꞌuctaxtuyaꞌ ju ani minchivinti. Tijuch ju catasuyach ju lai acpucꞌatsayau ni jantu makꞌan cativa tus catapasayaꞌ ju ani taxtokni.
\p
\v 8 Chai ju Jesús ajuni:
\p ―Alaktsꞌintꞌit ni jantu xamatiꞌ cataꞌokxchokꞌon. Pus na lhu lapanacni cataminaꞌ laquintapakaꞌut. Chai chanich catanonach: “Quitꞌin ju icCristo”. Chai vachuꞌ catanonaꞌ ni vaninch minta ju avilhchan acsni acminchokoyaꞌ. Para tun tꞌichꞌakꞌokꞌatꞌit ju yuꞌunch.
\v 9 Chai acsni akꞌasmatꞌaꞌitꞌit ni alin ju lhilucut chai ni tamacxtuputun ju ixꞌucxtinꞌan ju aliꞌin lapanacni pus tun tꞌitꞌalhanantꞌit. Pus tasqꞌuini ni pꞌulhnan catapasayaꞌ ju ani taxtokni. Para jantu lana acsnich ju ixꞌaclanti ju lacamunutpaꞌ.
\p
\v 10 Pus tailhiꞌalh ixchivinti ju Jesús. Ajuni:
\p ―Ju amachakꞌan ju lakatam kꞌai lacatꞌun catatꞌalasayaꞌ ju amachakꞌan alakatam kꞌai lacatꞌun. Chai ju lapanacni ju tachꞌakꞌokꞌai tam ucxtin catatꞌalasayaꞌ ju ixlapanacni ju apumatam ucxtin.
\v 11 Chai na lacalhu caꞌalinach junta catataclhaꞌ ju lacatꞌun chai junta caꞌalinach ju chavanti chai junta lhu alin ju takꞌankꞌat. Chai catalacasuyaꞌ ju kꞌai lhitalhan ju lactꞌiyan. Chai ju lapanacni acsni catalaktsꞌinaꞌ na catatalhananaꞌ chai catapucꞌatsayaꞌ ni vanin ixꞌaclanti ju lacamunutpaꞌ.
\p
\v 12 Para pꞌulhnan acsni tucaꞌ tapasai ju ani taxtokni pus catachꞌapayan chai catamamakꞌalhkꞌajniyan. Chai amakꞌaxtꞌakcꞌanaꞌitꞌit laꞌixmacaꞌan ju xalackꞌajin lacpujitatnin. Chai atꞌalhnucꞌanaꞌitꞌit. Chai alhipꞌinicꞌanaꞌitꞌit ju xalackꞌajin chai ju aliꞌin ucxtinin. Chai chux ju ani cataꞌulhtuyan va ixlacaꞌatalh ni quilachꞌakꞌokꞌayau ju quitꞌin.
\v 13 Para ni chunch ju cataꞌulhtuyan pus laich aꞌunaꞌitꞌit ju yuꞌunch ju quilacata.
\v 14 Pus pꞌas anaꞌuntꞌit lamiꞌalhunutꞌan ni jantu apꞌastꞌacꞌaꞌitꞌit pꞌulhnan ta yu laich akꞌalhtꞌayananaꞌitꞌit acsni catamucꞌaniyan ju mintalakꞌalhinꞌan.
\v 15 Chunch ju alatꞌit ni quitꞌin quiꞌakstu ju aclaxtakniyau ju chivinti chai ju acꞌatsanti. Chai tachi chun ju mintꞌalaxcaiꞌan jantu lai ta catapukꞌalhtayanananch nin lai catanaulh ni jantu slivasalh tuchꞌi nonatꞌit.
\v 16 Chai mas mimpaiꞌan u minatiꞌan catamakꞌaxtꞌakꞌan. Chai ju miꞌalakꞌavinꞌan chai ju milhiꞌalakꞌavinꞌan chai ju miꞌamigojniꞌan catamakꞌaxtꞌakꞌan. Chai ju aliꞌin lamilhiꞌuxijnan catamakniyan.
\v 17 Chai chux ju lapanacni catalhixcayan va ixlacata ni quilachꞌakꞌokꞌayau ju quitꞌin.
\v 18 Para mas va tuchi catapasayaꞌ aktsꞌiya talhistꞌacꞌan ju Dios chai jantu catitsꞌankꞌa ju miꞌatsucuntiꞌan jonkꞌalhita.
\v 19 Pus ni va tachi aquilalhilacaꞌanau pus caꞌalinaꞌ ju miꞌatsucuntiꞌan jonkꞌalhita.
\p
\v 20 Acsni alaktsꞌinaꞌitꞌit ju lakꞌachakꞌan Jerusalén ni catalakachokoputunach ju taropajni pus ju acsnich apꞌucꞌatsꞌayaꞌitꞌit ni chaꞌalh ju ixpumaclacan.
\v 21 Ju acsnich ju tatꞌonacha ju xaꞌestado Judea chach taꞌatsꞌalaꞌalh ju xalacatalhpan. Chai ju tavilanancha ju lakꞌachakꞌan Jerusalén chach tataxtulh. Chai ju va tatꞌonacha laꞌixcuxtuꞌan chach taꞌatsꞌalalh. Jantu catatanu ju lakꞌachakꞌan.
\v 22 Pus ju anuch avilhchan va ixpumapalhcan ju talakꞌalhin cajunaꞌ. Chai acsni catapasayaꞌ ju chunch pus capuꞌuctaxtuyach tachi chun ju taxtokni ju tsꞌokcanta laꞌixchivinti Dios ixlacata yuchi.
\v 23 Para painiꞌitnich ju taꞌakꞌainanta chai ju alin lacatꞌicstꞌi isꞌaskꞌatꞌa ju acsni avilhchan. Pus slivasalh kꞌai makꞌalhkꞌajnat ju caꞌalinaꞌ laꞌixlacatꞌunꞌan ju quintꞌaꞌisraelitanin chai ju yuꞌunch catalaktsꞌinaꞌ ixtalhkꞌamti ju Dios.
\v 24 Pus ju aliꞌin camaknicanaꞌ lacalhilucut. Chai ju aliꞌin tachꞌinin canavicanaꞌ chai calhiꞌancanach vanta lhiꞌanchach ju alin ju lakꞌachakꞌanixni. Chai ju jantu israelitanin tajunita yuꞌunch ju catatsucuyaꞌ ju lakꞌachakꞌan Jerusalén tus acsni cataꞌaktsayach ju avilhchan ju alhcanicanta ju yuꞌunch.
\s1 Acsni caminchokoyaꞌ ju Cristo chanich catasuyaꞌ
\p
\v 25 Chai tamch catasuyaꞌ ju avilhchan chai ju malhquiyuꞌ chai ju stꞌacu. Chai ju ani lacatꞌun na catamakꞌalhkꞌajnanaꞌ ju lapanacni. Chai lana jantu catacꞌatsayaꞌ tuchi catalayaꞌ ni na catꞌasayaꞌ ju alama chai na calucununach ju xcan.
\v 26 Pus vak caꞌanaꞌ ju ixꞌalacꞌavantiꞌan ju lapanacni va ixlacata ixtalhantichꞌan acsni tapastꞌacꞌa tuchi catapasayaꞌ ju ani lacatꞌun. Pus mas yuchi ju avilhchan chai ju malhquiyuꞌ chai ju stꞌacu catalucununach.
\v 27 Pus acsnich ju aquintalaktsꞌinaꞌ ju quitꞌin ju quimalakachatachilh ju Dios ni lapanac actsucuyaꞌ ju ani. Acminaꞌ lacaꞌataputsꞌi chai catacꞌatsayaꞌ ju lapanacni ni na alin ju quintachaput chai ni icxakꞌai.
\v 28 Pus acsni cataiꞌulayach ju ani taxtokni pus asaꞌulatꞌit ju miꞌaktsulhꞌan chai akꞌachꞌanaꞌitꞌit ni vaninch minta ju avilhchan acsni amakꞌalhtꞌaxtꞌucꞌanaꞌitꞌit.
\p
\v 29 Vachuꞌ ajunilh lakatam chivinti ju ixꞌapumavasalaniputun ju tuchi ixꞌamalaniputun. Pus ajuni:
\p ―Alaktsꞌintꞌit ju xaqꞌuiu higuera chai tachi chun ju aliꞌ qꞌuiu.
\v 30 Acsni catsucutachilh xajnichiniꞌ ju sastꞌi xaxkꞌoi pus ju uxijnan pꞌucꞌatsꞌayatꞌit ni vaninch minta ju lacapꞌasni.
\v 31 Pus vana va chun ju ani. Acsni alaktsꞌinaꞌitꞌit ni tꞌajun uctaxtunuꞌ ju ani taxtokni pus acꞌatsꞌayaꞌitꞌit ni vaninch minta ju avilhchan acsni calhinonkꞌoyaꞌ ju Dios.
\p
\v 32 Slivasalh ju iclajunau. Jantu catitani ju chavai tatꞌajun lapanacni tus acsni jantu uctaxtukꞌojui chux ju ani.
\v 33 Ju lactꞌiyan chai ju lacatꞌun calaclayaꞌ. Para aktsꞌiya caꞌuctaxtuyaꞌ ju quinchivinti.
\p
\v 34 Pus alaktsꞌinchꞌokꞌocꞌantꞌit miꞌakstuꞌan ju uxijnan. Jantu xcai ni na lhu caꞌalilh ju macxcai lamiꞌalhunutꞌan chai atꞌakꞌapꞌayaꞌitꞌit u na lhu ju alhamakꞌaninitꞌit ju xataxtokni ju saꞌatsucunti ju ani lacamunutpaꞌ. Chai ni chunch ju alatꞌit pus laich cachilh ju anuꞌ avilhchan acsni jantu cꞌatsꞌayaꞌitꞌit ni laich camilh.
\v 35 Pus ju anuꞌ avilhchan acsni cachinaꞌ chunch catapasayaꞌ tachi ju tapasai acsni tuꞌuꞌ chꞌapacanta lacaskꞌapa. Pus va tam pantsꞌiquis cachinaꞌ chai astan jantu xamatiꞌ ixlhilacaputsꞌun ju ani lacamunutpaꞌ laich tamch catapastꞌacꞌaꞌ.
\v 36 Pus va tachi skꞌala atsꞌucꞌutꞌit. Chai va tachi asqꞌuinitꞌit ju Dios ni kꞌox catalhiulayan chai ixlhiyuchi lai apꞌutꞌakꞌalhtꞌaxtꞌuyaꞌitꞌit tachi chun ju ani taxtokni ju caminaꞌ. Chai vachuꞌ lai atꞌayayaꞌitꞌit laquiꞌucxlacapuꞌ ju quitꞌin ju quimalakachatachilh ju Dios ni lapanac actsucuyaꞌ ju ani. Laich atꞌayayaꞌitꞌit laquiꞌucxlacapuꞌ ni matiꞌ ju miꞌalactuꞌuntiꞌan.
\p
\v 37 Pus ju Jesús ixꞌamalaninin ju laꞌixpujitatꞌan ju istꞌaꞌisraelitanin ju tuncuj. Para ju tsꞌis ixtaxtui ju lakꞌachakꞌan. Ixꞌan ju anuꞌ akstijun junta puꞌolivonin ixjuncan.
\v 38 Chai tachi chun ju lapanacni na vatsꞌisin ixtalakꞌan ju lacpujitat ni va ixtakꞌasmatniputun ixchivinti.
\c 22
\s1 Talhichivinin ixchꞌapaca ju Jesús
\p
\v 1 Pus vanin ixchimputun ju anuꞌ cꞌatan acsni ixtanavi ju xkapavati ju jantu ixlhiyocan ju xatꞌin. Chai ju cꞌatan ju ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
\v 2 Chai ju xalackꞌajin palijni chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin ixtapuxconi ta yu laich catapumakniyaꞌ ju Jesús. Para na xcai talhiula ni na ixtatalhoni ju lapanacni.
\p
\v 3 Pus pumatam ju ixpumacautꞌuiꞌan Judas Iscariote ixjuncan. Pus ju lhacaticuru chꞌapanilh ixꞌatalacpastꞌacꞌat.
\v 4 Chai ju yuchi alh alactꞌachiviniꞌ ju xalackꞌajin palijni chai ju xaꞌucxtinin ju taropajnich ju ixtavilanancha lacpujitat. Ju Judas va alh ajuniniꞌ ni laich caꞌamakꞌaxtakniyach ju Jesús.
\v 5 Pus ju yuꞌunch na talhikꞌachalh chai tajunilh ni catamapalaꞌ.
\v 6 Pus ju Judas amachꞌanu chai puxcaulich ta yu laich capumakꞌaxtakniyach ju yuꞌunch acsni matiꞌ lhu cava ju lapanacni.
\s1 Ju Jesús alactꞌavailh ju ixpumacautꞌuiꞌan
\p
\v 7 Pus chilh ju avilhchan acsni cataꞌuyaꞌ ju xkapavati ju jantu lhiyalh ju xatꞌin. Vachuꞌ acsni istasqꞌuini ni catamakniyaꞌ ju ixborregoꞌan ixlacata ju anuꞌ cꞌatan.
\v 8 Pus ju Jesús amalakachalh ju Pitaluꞌ chai ju Xivan. Ajunich:
\p ―Inchitꞌit lakꞌoxinin ju vaiti ixlacata ju chavai cꞌatan ni laich caꞌuyau.
\p
\v 9 Chai ju yuꞌunch tajunich:
\p ―Tas anchach ju lacꞌasqꞌuin ju aclakꞌoxiyau.
\p
\v 10 Chai ju yuchi ajuni:
\p ―Acsni achꞌipꞌinaꞌitꞌit ju lakꞌachakꞌan pus apꞌakxtꞌokꞌaꞌitꞌit pumatam lapanac ju lhiꞌanta xcan laꞌixalu. Pus atꞌaimayaꞌitꞌit ju yuchi tus catanuyanta ju lacachakaꞌ.
\v 11 Chai aꞌunaꞌitꞌit ju amachakaꞌ: “Ju amamakaꞌunuꞌ macaminiyan chivinti. Tas ma anchach ju lai catꞌavenaꞌ ju ixꞌamamakaꞌunin ju chavai cꞌatan”.
\v 12 Chunchach ju aꞌunaꞌitꞌit. Chai ju yuchi catalhiꞌanan ju lhitantalactꞌui ixchakaꞌ. Chai catamasuniyan ju kꞌai chakaꞌ junta kꞌox lakꞌoxicanta. Anchach ju alakꞌoxiyaꞌitꞌit ju vaiti.
\p
\v 13 Pus taꞌalh chai talhitajulh tachi ju ajunicalh. Chai anch ju talakꞌoxilh ju vaiti.
\p
\v 14 Pus astan tamilh ju Jesús chai ju aliꞌin. Chai acsni chaꞌalh ju hora pus ju Jesús tapakstitꞌatama ju ixpumacautꞌuiꞌan ixtamalakachanꞌan.
\v 15 Chai ju Jesús ajuni:
\p ―Slivasalh ixlhichux quiꞌalhunut na xaclacasqꞌuin ni laich aclatꞌavenau ju uxijnan ju xavaiti ju chavai cꞌatan acsni tucaꞌ icmaknican.
\v 16 Pus jantu aktam actiꞌuchokolh ju xavaiti ju ani cꞌatan tus acsni caꞌuctaxtukꞌoyaꞌ chux tuchi nomputun ju ani cꞌatan. Tus caꞌuctaxtuyanta ju lactꞌiyan junta lhinajun ju Dios. Tus acsnich ju lai acꞌuchokoyaꞌ chai yuchi xaclhilacasqꞌuin ni aclatꞌaꞌuyau ju chavai.
\p
\v 17 Pus ju acsnich ju Jesús chꞌapalh ju vaso chai junilh lakꞌailaktsꞌiuch ju Dios chai naulh:
\p ―Achꞌapꞌatꞌit ju ani vaso. Alatꞌakꞌotꞌit ju milhiꞌuxijnan.
\v 18 Akꞌotꞌit ju uxijnan ni iclajunau ni jantuch actikꞌotchokolh ju vino tus acsni vasalh calhinonkꞌoyaꞌ ju Dios.
\p
\v 19 Astan ju Jesús chꞌapalh ju xkapavati chai junilh lakꞌailaktsꞌiuch ju Dios. Chai chꞌekꞌelh. Chai axtaknilh ju yuꞌunch. Ajunich:
\p ―Yuchach ju ani ju quilacatuna ju xtakcanta ju milacataꞌan. Va tsa chani alatꞌit ni laich apꞌupꞌastꞌacꞌaꞌitꞌit ju quiꞌaninti ju milacataꞌan.
\p
\v 20 Chai acsni ixtavenkꞌota pus vana va chun navichokopa. Chꞌapachokolh ju vaso chai naulh:
\p ―Ju ani lhikꞌotꞌat yuchi ju pumavasalacan ju sastꞌi chivinti ju iclatꞌatakꞌoxitauch. Chai acpumavasalayaꞌ ju anuꞌ chivinti ju quiꞌacꞌalhni ju cataxtuyaꞌ ju milacataꞌan.
\p
\v 21 Para ju aquimakꞌaxtꞌakꞌach quintꞌavi ju chavai lacamixa.
\v 22 Pus aktsꞌiya acniyaꞌ tachi ju iclhilhcanicanta. Quitꞌin ju quimalakachatachilh ju Dios ni lapanac actsucuyaꞌ ju ani. Para painich ju anuꞌ lapanac ju aquimakꞌaxtꞌakꞌaꞌ.
\p
\v 23 Pus ju acsnich ju ixꞌamamakaꞌui tatsuculh lasacminin sia lhiyuꞌunch tis nuꞌ chavaich ju sia lhiyuꞌunch ju canaviyaꞌ ju chunch.
\s1 Talaclajuni tichi chavaich ju palai xakꞌaich
\p
\v 24 Pus ju acsnich alilh lakatam laklakꞌaiti ju sia lhiyuꞌunch ju ixꞌamamakaꞌui ju Jesús. Va ixtalhilakꞌaji tichi chavaich ju sia yuꞌunch ju kꞌox calhiulacalh ni yuchi ju xakꞌai canavicalh.
\v 25 Para ju Jesús ajuni:
\p ―Ju lapanacni ju jantu quintꞌaꞌisraelitanin tajunita alin ixꞌucxtinꞌan ju talhinajun. Chai yuꞌunch ju talhinajun na va talhitakꞌayachokocan isꞌakstuꞌan tus talacasqꞌuin ni calhimispacalh ni yuꞌunch ju palai aꞌaktaijunun. Mas jantu.
\v 26 Para jantu chun anavitꞌit ju uxijnan. Alai yuchi ju takꞌayaputun lamilhiꞌuxijnan capumavasalayaꞌ ni vasalh xakꞌai acsni va lacatꞌicstꞌi catalacasu chai ni jantu lacasqꞌuin ni calakꞌayacalh. Chai yuchi ju lhinajun lamilhiꞌuxijnan capumalacasuyaꞌ ni vasalh xakꞌai acsni cachꞌalhcatnaniyaꞌ ju aliꞌin. Jantiyuꞌ ni va cachꞌalhcatnanicalh.
\v 27 Pus tꞌas nonatꞌit ju uxijnan. Tis chavaich ju palai xakꞌai. Ja yuchi ju tolai lacamixa chai vajin. U yuchi ju ini ju ixvaiti. Ja jantiyuꞌ ju tolai lacamixa. Para ju quitꞌin chun icjunita tachi ju va milapanacꞌan.
\p
\v 28 Uxijnan ju jantu quilamacaju acsni na xacmakꞌalhkꞌajnan chai ixlacata ju quimakꞌalhkꞌajnat chilh ju quiꞌatalacpastꞌacꞌat ni xacmacaulh ju quilhichꞌalhcat.
\v 29 Chai ni jantu xaquilamaconau ju acsnich pus yuchi iclalhilhcaꞌulatau ni ucxtinin aꞌunaꞌitꞌit tachi ju quimpai ni quilhcaꞌulanilh ju quitꞌin.
\v 30 Ju chunch lai aꞌuyaꞌitꞌit chai akꞌotꞌaꞌitꞌit laquimixa acsni kꞌai ucxtin acjunach. Chai alhinonaꞌitꞌit chux ju ixꞌapapanatnich ju ixpumacautꞌuiꞌan istsꞌalan ju Israel.
\s1 Pitaluꞌ canonaꞌ ni jantu mispai ju Jesús
\p
\v 31 Chai ju Jesús vachuꞌ chani junilh ju Pitaluꞌ:
\p ―Simón ju lhacaticuru tasqꞌuinitanch ni laich cataꞌulhtuyan tachi ju ulhtucan ju tuꞌuꞌ trigo acsni cꞌalhacan. Pus va yuchi ju xaꞌamacxtalh ju sun lhiꞌan ju un. Para ju xatrigo jantu. Pus ju lhacaticuru talaktsꞌintanuputunan ni aquilacꞌapꞌauch u aquilalhilaksikꞌalhiyau.
\v 32 Para ju quitꞌin ictapaininita ju Dios ju milacataꞌan ni jantu lana aquilacꞌapꞌauch. Chai acsni aqꞌuinchꞌakꞌokꞌachꞌokꞌoyaꞌich ju uxintꞌi pus aꞌaktꞌaiꞌutꞌich ju milhiꞌalakꞌavin ni vachuꞌ ixlhichux ixꞌalhunutꞌan aquintalhilaksichokoyaꞌ.
\p
\v 33 Para ju Pitaluꞌ junich:
\p ―Quiꞌucxtin ju quitꞌin aclhilakꞌaꞌiyach mas actꞌatꞌalhnucanch. U mas actꞌaniyanch.
\p
\v 34 Para ju Jesús junich:
\p ―Pitaluꞌ icjunan ni chavai atatsꞌisni acsni tucaꞌ tꞌasai ju puyux pus paktꞌutu ju naꞌuntꞌa ni jantu qꞌuimispꞌai.
\s1 Calaktsꞌintanucanach ju Jesús
\p
\v 35 Chai ju Jesús ajunich ju ixꞌamamakaꞌui:
\p ―Acsni tavanan iclamalakachau chai jantu ixlhipꞌintꞌatꞌit ju mintuminꞌan nin mimpastiꞌan nin lakatꞌui minchꞌanxtꞌakꞌanꞌan ja tuꞌuꞌ xatacꞌacxniyan.
\p Chai ju yuꞌunch tajunilh ni jantu.
\v 36 Pus ju acsnich ju Jesús ajuni:
\p ―Kꞌoxich. Para ju chavai tasqꞌuini ni atsꞌucꞌuyaꞌitꞌit tachi tam taropa ju an junta alin ju ixtꞌalaxcai. Ju chavai ju alin ju ixtumin calhiꞌalh. Vachuꞌ ju ispasti. Chai ju matiꞌ ixmachita pus castꞌalh ju ixpumpuꞌ chai calhitamaulh lakatam.
\v 37 Pus chunch ju aꞌulhtꞌutꞌit ni iclajunau ni tasqꞌuini ni caꞌuctaxtuyaꞌ ju quilacata ju anuꞌ ju tsꞌokcanta laꞌixchivinti Dios junta chani najun: “Ju yuchi laktsꞌincalh tachi ju va alactuꞌunuꞌ”. Chunch ju najun chai tꞌajun uctaxtunuꞌ ju chavai.
\p
\v 38 Chai ju ixꞌamamakaꞌui tajunich:
\p ―Quiꞌucxtin alin lakatꞌui quimachitaꞌan.
\p Chai ju yuchi ajunich:
\p ―Chach va anch lhitamactalh.
\p Pus va naulh ju chunch ni jantu ixtamachakxani tuchi ju ixꞌajumputun.
\s1 Ju Jesús tꞌachivinilh ju Dios
\p
\v 39 Ju Jesús taxtulh lacachakaꞌ chai alh ju anuꞌ akstijun junta puꞌolivonin ixjuncan tachi ju aktsꞌiya ixlai. Chai ju ixꞌamamakaꞌui vachuꞌ tachꞌakꞌokꞌalh.
\v 40 Chai acsni tachaꞌalh junta aktsꞌiya ixtaꞌastacnan pus ju Jesús ajuni ju ixꞌamamakaꞌui:
\p ―Atꞌachꞌivinintꞌit ju Dios ni jantu cataꞌokxchokꞌoyan ju lhacaticuru.
\p
\v 41 Chai ju yuchi alh ixlhimakat tachi ju laich macaꞌancan ju chiux. Chai ju anch ju yuchi taꞌaktsokotalh chai tꞌachivinilh ju Dios.
\v 42 Junich:
\p ―Quimpai ni lacꞌasqꞌuinch aqꞌuimakꞌosunin ju ani makꞌalhkꞌajnat. Para jantu iclacasqꞌuin ni anavitꞌi ju quinkꞌachat quitꞌin. Alai yuchi ju anavitꞌi ju minkꞌachat ju uxintꞌi.
\p
\v 43 Chai talacasunilh pumatam anquilh ju mincha lactꞌiyan chai xtaknilh ju ixtachaput.
\v 44 Chai ni na ixmakꞌalhkꞌajnan pus lana ixlhichux ixꞌalhunut ju tapaininilh ju Dios. Chai ju ixtalhtꞌajat valhch tachi ju tuꞌuꞌ acꞌalhni ju kꞌalhtankꞌai lachꞌapata chai ixtamayacha ju lacatꞌun.
\p
\v 45 Pus acsni tꞌachivinkꞌo ju Dios pus taya chai alakminchokolh ju ixꞌamamakaꞌui. Chai alhitajulh ni va ixtalhtatanan ni na ixtaꞌamakꞌaninin.
\v 46 Chai ajunich:
\p ―Tꞌas ni va lhtꞌatꞌapꞌalatꞌit. Akꞌostꞌolatꞌit. Atꞌachꞌivinintꞌit ju Dios ni jantu cataꞌokxchokꞌoyan ju lhacaticuru.
\s1 Tachꞌin lhiꞌancalh ju Jesús
\p
\v 47 Chai acsni ixtꞌajuncaꞌ alactꞌachiviniꞌ ju ixꞌamamakaꞌui ju Jesús pus tachincha ju ixtalhavat lapanacni. Chai ixꞌapꞌulhnita ju anuꞌ ixlhipumacautꞌuiꞌan ju Judas ixjuncan. Chai lakmilh ju Jesús ni camacchꞌuchꞌuyach.
\v 48 Para ju Jesús junich:
\p ―Judas ja lacaꞌamacchꞌuchꞌunti ju aqꞌuimakꞌaxtꞌakꞌaꞌ ju quitꞌin ju quimalakachatachilh ju Dios ni lapanac actsucuyaꞌ ju ani.
\p
\v 49 Pus ju ixꞌamamakaꞌui acsni talaktsꞌilh tuchi catapasayach pus tajunich:
\p ―Quiꞌucxtin ja acmakniyauch lacamachita.
\p
\v 50 Chai pumatam sia lhiyuꞌunchach macꞌatsani ju ixlapanac ju xakꞌai pali. Chakxpꞌuxnilh ju ixꞌakꞌaxkꞌolh ju ixcatucana.
\v 51 Para ju Jesús juni:
\p ―Chach va anch lhitamactalh.
\p Chai ju Jesús chꞌapalh ju ixꞌakꞌaxkꞌolh ju anuꞌ lapanac chai lana catumucꞌachokolh.
\v 52 Pus ju xalackꞌajin palijni chai ju xataropajni lacpujitat chai ju papanin yuꞌunch ju ixtaminta inin ju Jesús. Chai ju Jesús ajunich:
\p ―Tajuch ni va quilanaviyau tachi tam akꞌalhonaꞌ ju chꞌapꞌapꞌutꞌunatꞌit ni lhitꞌantꞌatꞌit ju mimachitaꞌan chai ju minqꞌuiuꞌan.
\v 53 Pus chux tuncujun xaclatꞌavilhchau lamilacpujitatꞌan chai ju anch jantu quilachꞌapauch. Para ju chavai ju Dios talakꞌaꞌiniyan ni chunch ju aquilaꞌulhtuyau. Vachuꞌ lakꞌaꞌinilh ju lhacaticuru ni chunch ju aquiꞌulhtulh.
\s1 Ju Pitaluꞌ naulh ni jantu mispai ju Jesús
\p
\v 54 Pus tachꞌapalh ju Jesús. Talhiꞌalh chai tamanucha laꞌixchakaꞌ ju xakꞌai pali. Pus ju Pitaluꞌ va ixlhimakat chꞌakꞌokꞌalh.
\v 55 Pus ju aliꞌin ixtamalhculatach ixpulacni ta ixlakachakꞌaxnucanta ju ixchakaꞌ ju xakꞌai pali. Chai ixtalacskꞌonvilanalh. Chai vachuꞌ ixmakvi ju Pitaluꞌ.
\v 56 Pus pumatam atsiꞌ acsni laktsꞌilh ni anchach vachuꞌ ixmakskꞌonvi ju Pitaluꞌ pus lana skꞌotutu chai naulh:
\p ―Ju ani vachuꞌ ixmakꞌanta ju yuchi.
\p
\v 57 Para ju yuchi naulh ni jantu. Junich:
\p ―Chakoꞌulh jantu icmispai ju yuchi.
\p
\v 58 Chai ni pantsꞌiquis jumpa pus laktsꞌinchokopa apumatam chai junich:
\p ―Ju uxintꞌi vachuꞌ makyuꞌunch.
\p Para ju Pitaluꞌ junich:
\p ―Jantu quitꞌin.
\p
\v 59 Chai ni tapasalh tachi tam hora pus apumatam pꞌas naulh:
\p ―Slivasalh ni vachuꞌ ixtꞌavilhcha ju yuchi ju ani ya ni vachuch amachakaꞌ xaꞌestado Galilea.
\p
\v 60 Para ju Pitaluꞌ junich:
\p ―Jantu icmachakxai tuchꞌi qꞌuiꞌuni.
\p Chai acsni ixtꞌajuncaꞌ chiviniꞌ pus lana tꞌasalh ju puyux.
\v 61 Pus ju Jesús talakaspꞌitlh chai laktsꞌilh ju Pitaluꞌ. Chai ju Pitaluꞌ lana pastaclh ju ixchivinti tachi ju ixjunita ni paktꞌutu canonaꞌ ni jantu mispai acsni tucaꞌ tꞌasata ju puyux.
\v 62 Pus taxtulh ju Pitaluꞌ chai na pꞌas tsuculh kꞌalhunuꞌ.
\s1 Talhitsꞌiꞌilh ju Jesús
\p
\v 63 Pus ju anuch lapanacni ju ixtalhistꞌacꞌach ju Jesús va ixtalhitsꞌiꞌinch ju yuchi chai ixtalakanekmai.
\v 64 Chai acsni talakpuchꞌilh pus talacpasa chai tajunilhch:
\p ―Anauch tichi chavaich ju xaꞌulaniyan.
\p
\v 65 Chai ixtajuni na lhu macxcai chivinti.
\s1 Ju Jesús alacatam lhiꞌancalh
\p
\v 66 Chai acsni tunculh pus tatakꞌaixtoklh ju xapapanin sia yuꞌunch ju israelitanin chai ju xalackꞌajin ixpalijniꞌan chai ju yuꞌunch ju na ixtalhatalanininta ixlhamapꞌaksinꞌan ju istꞌaꞌisraelitanin. Pus yuꞌunch ju ixtalhinajun sia yuꞌunch ju israelitanin chai anch ju lhimincalh ju Jesús. Chai tajunich:
\p
\v 67 ―Ja uxintꞌich ju Cristoꞌat. Yuchi ju ixnoncan camalakachatachilh ju Dios. Aquilajuniuch.
\p Para ju Jesús ajunich:
\p ―Mas aclajuniu jantu atꞌilacꞌaꞌitꞌit.
\v 68 Chai mas aclasacmiu tuꞌuꞌ ixlacata yuchi jantu tuꞌuꞌ aquintilalhikꞌalhtajiu nin yuchi ni lai aquintilamacaju.
\v 69 Para tus chavai actolach vanin junta vi ju Dios ju na tachapun. Quitꞌin ju quimalakachatachilh ju Dios ni lapanac actsucuyaꞌ ju ani.
\p
\v 70 Pus ju acsnich ixchuxꞌan tajuni:
\p ―Pus ja uxintꞌiꞌas ju istsꞌalh Dios.
\p Chai ju yuchi ajunilh:
\p ―Chunch tachi ju nonatꞌit.
\p
\v 71 Pus ju acsnich ju yuꞌunch talaclajunilh:
\p ―Pus tis alich chivinti ju maktasqꞌuiniyau ni quiꞌakstuchꞌan ju xakꞌasmatniyau tuchi xanajun.
\c 23
\s1 Jesús laꞌixpuꞌucxtin Pilato
\p
\v 1 Pus ju acsnich ixchuxꞌan ju xalackꞌajin sia yuꞌunch ju israelitanin talhiꞌalh ju Jesús laꞌixpuꞌucxtin ju Pilato. Pus ju yuchi ixꞌucxtinꞌan ixjunita ju romanonin.
\v 2 Chai ju lapanacni tatsuculh ulaninin ixtalakꞌalhin ju Jesús. Tajunich ju Pilato:
\p ―Ju ani ya lapanac iclhitaju ni va lakꞌalhiputun ju lakꞌachakꞌan chai kꞌalhtsajui ni amapalanancan laꞌixmacni ju César. Chai ixnajun ni isꞌakstu ju Cristo junita chai kꞌai ucxtin junita.
\p
\v 3 Pus ju acsnich ju Pilato sacmilh ju Jesús. Junich:
\p ―Ja uxintꞌich ju ixꞌucxtinꞌan ju israelitanin.
\p Chai ju Jesús junich:
\p ―Chunch tachi ju naꞌun.
\p
\v 4 Pus ju acsnich ju Pilato ajuni ju xalackꞌajin palijni chai ju ixtalhavat lapanacni:
\p ―Jantu tuꞌuꞌ talakꞌalhin iclhitajuni ju ani lapanac.
\p
\v 5 Para ju yuꞌunch va apalai pꞌas tajuni:
\p ―Para ju yuchi va amalasani ju lapanacni chai amalani ju lapanacni ju ixlhamapꞌaksin tachi ixlhilacaputsꞌun ju xaꞌestado Judea. Pus taiꞌulachalh tus ju xaꞌestado Galilea chai tailhiꞌalh tus chilh ju ani.
\s1 Ju Jesús laꞌixpuꞌucxtin Herodes
\p
\v 6 Pus ju Pilato acsni kꞌasmatlh ju ixchivintiꞌan pus sacmilh ni amachakaꞌ junita ju xaꞌestado Galilea.
\v 7 Chai acsni cꞌatsa ju Pilato ni amachakaꞌ anch ixjunita ju Jesús junta ixlhinajun ju gobernador Herodes pus lana malakachanilh ju yuchi. Chai ni cꞌatan ixjunita ju acsnich pus ju Herodes vachuꞌ anch ixvilhcha ju lakꞌachakꞌan Jerusalén.
\v 8 Chai ju Herodes acsni laktsꞌilh ju Jesús pus na kꞌachalh ni na makꞌan ju ixlaktsꞌimputun. Pus na lhu taxtokni iskꞌasmatꞌa ixlacata yuchi chai na ixlaktsꞌimputun ni tuꞌuch lhamakꞌan canavi.
\v 9 Pus na lhu chivinti ju xasacmi. Para ju Jesús jantu tuꞌuꞌ xalhikꞌalhtaji.
\v 10 Chai vachuꞌ ixtavilanalh ju xalackꞌajin palijni chai ju ixtalhatalanininta ju ixlhamapꞌaksinꞌan ju istꞌaꞌisraelitanin. Chai ju yuꞌunch tapꞌastu ixtachivimakꞌan ju Jesús.
\v 11 Pus ju acsnich ju Herodes chai ju ixtaropajni tatalacasunilh ni jantu tuꞌuꞌ ixtalhiulai ju Jesús. Chai talhimakꞌakꞌamanalh. Tamalakchꞌinilh ju cꞌusi pumpuꞌ tachi ju talakchꞌi ju xalackꞌajin. Chai acsni talhimakꞌakꞌamanankꞌo pus malakachanichokopa ju Pilato.
\v 12 Pus ju acsnich avilhchan talamaꞌamigoxla ju Pilato chai ju Herodes. Pus ju pꞌulhnan va ixtalaxcajich.
\s1 Lhinoncalh ixmaknica ju Jesús
\p
\v 13 Pus ju acsnich ju Pilato atꞌasanichokolh ju xalackꞌajin palijni chai ju xalackꞌajin sia yuꞌunch ju israelitanin chai ixtalhavat lapanacni.
\v 14 Chai ajunich:
\p ―Ju uxijnan quilalhiminitauch ju ani lapanac ni va nonatꞌit ni amalasani lapanac junita. Para ju quitꞌin icquilhasacmita ju yuchi ju lamiꞌucxlacapuꞌan chai jantu tuꞌuꞌ iclhitajuni talakꞌalhin tuchꞌi lhichꞌivimakꞌanatꞌit ju uxijnan.
\v 15 Chai nin yuchi ju Herodes jantu xalhitajuni ju ixtalakꞌalhin. Yuchi quilhimalakachanichokochilh. Pus ju ani lapanac jantu tuꞌuꞌ talakꞌalhin navita ju lai calhimakni.
\v 16 Pus yuchi aclhinonaꞌ ju ixꞌulanica chai acmaconach.
\p
\v 17 Pus ju anuꞌ cꞌatan ju lapanacni aktsꞌiya istasqꞌuini ju gobernador ni caꞌamaconicalh pumatam tachꞌin ni chunch ixtalhilanita.
\v 18 Pus ju ixtalhavatꞌan lapanacni va kꞌaixtam pꞌas tanaulh:
\p ―Jantu amacꞌau ju ani ya lapanac. Alai yuchi ju alhinauch ixlhiꞌanca. Yuchi ju Barrabás ju iclacasqꞌuinau ni aquilamaconiuch.
\p
\v 19 Pus ju anuꞌ Barrabás ixlhitꞌalhnucanta ni va ixꞌamalasani ju amachakꞌan anch chai va ixꞌamakninin.
\v 20 Para ju Pilato ni va ixmacomputun ju Jesús pus aktam axakꞌalachokopa ju ixtalhavatꞌan lapanacni.
\v 21 Para ju yuꞌunch na pꞌas ixtanonchokopalai:
\p ―Amaqꞌuilhtꞌatꞌich ju lacacurus.
\p
\v 22 Chai ajunchokopa ju ixlhipaktꞌutu:
\p ―Para tajuch. Tis talakꞌalhin ju navita ju yuchi. Ju quitꞌin jantu tuꞌuꞌ talakꞌalhin ju iclhitajuni ju lai aclhinaulh ixmaknica. Alai va aclhinonach ixꞌulanica chai acmaconach.
\p
\v 23 Para ju yuꞌunch na pꞌas ixtanajun acsni istasqꞌuinch ni camaquilhtacalh ju lacacurus. Pus ju laꞌixchivintiꞌan ju yuꞌunch chai laꞌixchivintiꞌan ju xalackꞌajin palijni tatꞌalalhajalh.
\v 24 Chai ju Pilato lhinaulh ni chach navicalh tachi istasqꞌuinta ju ixtalhavatꞌan lapanacni.
\v 25 Chai amaconilh ju anuꞌ lapanac ju ixlhitꞌalhnucanta ni va ixꞌamalasani ju lapanacni chai ni va amakniniꞌ ixjunita. Yuchach ju istasqꞌuinita ju lapanacni. Chai makꞌaxtaklich ju Jesús ju laꞌixkꞌachatꞌan ju yuꞌunch.
\s1 Maknicalh ju Jesús
\p
\v 26 Chai acsni talhiꞌalh ju Jesús pus tachꞌapayaulh pumatam lapanac ju Simón ixjuncan. Amachakaꞌ xalacatꞌun Cirene. Ju yuchi va ixmintacha lacacuxtu. Pus tamakxkꞌokꞌalh ju curus chai ju yuchi tamalhiꞌanilh junta ixpꞌulai ju Jesús.
\p
\v 27 Chai na lhu lapanacni ixtachꞌakꞌokꞌata ju Jesús. Chai na lhu chakolun ixtamakꞌanta vachuꞌ chai na ixtalackꞌalhun chai na pꞌas ixtalactꞌasai.
\v 28 Para ju Jesús atalakaspꞌitnilh chai alacjunich:
\p ―Chakolun amachakꞌan Jerusalén jantu aquilalhikꞌalhu ju quitꞌin. Alai miꞌakstuꞌan alhikꞌalhunchꞌokꞌocꞌantꞌit. Chai alhikꞌalhuntꞌit ju miꞌaskꞌatꞌan.
\v 29 Chunch ju alatꞌit ni caminaꞌ ju avilhchan acsni chani catanonach ju lapanacni: “Na kꞌox ju isꞌatsucuntiꞌan ju chakolun ju jantu lai ixꞌalin ju isꞌaskꞌatꞌa chai ju jantu tavanan taꞌakꞌainalh chai ju jantu tavanan taꞌamatsꞌiquinilh ju tam askꞌatꞌa”.
\v 30 Pus ju acsnich avilhchan ju lapanacni catanonaꞌ ni palai kꞌox cava ni va capukꞌaitajunulh ju tuꞌuꞌ talhpa chai caꞌamakni. U ni va caꞌakxtakma ju tuꞌuꞌ lacatꞌicstꞌi talhpa.
\v 31 Chunch catanonaꞌ ni caꞌalinaꞌ ju kꞌai makꞌalhkꞌajnat ju acsni. Pus ju tuꞌuꞌ lhtacni qꞌuiu jantu xavacan. Pus vana va chun ju quitꞌin. Jantu lhijun ni acmaknicalh ni matiꞌ ju quintalakꞌalhin ju quitꞌin. Para ju uxijnan chunch untꞌatꞌit tachi ju tuꞌuꞌ xaxixni qꞌuiu ju xavacan. Pus ju alin ixtalakꞌalhin mamakꞌalhkꞌajnican. Chai ixlhiyuchi amamakꞌalhkꞌajnicꞌanaꞌitꞌit ju uxijnan.
\p
\v 32 Chai talhiꞌalh vachuꞌ apumatꞌui tachꞌinin ju catꞌamaknicananta ju Jesús. Para ju yuꞌunch aktsꞌiya ixtanavita tuꞌuꞌ talakꞌalhin.
\v 33 Chai acsni tachaꞌalh ju anuꞌ akstijun junta saꞌaktsulh juncan pus anchach ju tamaquilhta ju Jesús chai ixtꞌiyunꞌan alactuꞌunin. Ju pumatam tamaquilhta laꞌixlhicana iscurus ju Jesús. Chai ju akꞌantam laꞌixlhimacx.
\v 34 Chai ju Jesús naulh:
\p ―Quimpai amacꞌacxaninch ju ani tayanalh lapanacni ni jantu tacꞌatsai tuchi tanavi.
\p Chai talalhvaknilh ixpumpuꞌ ju Jesús. Chai talhilaslajlich ni catacꞌatsayaꞌ tis ixꞌanuch cajunaꞌ ju lakatam cꞌus ixpumpuꞌ.
\v 35 Chai ju ixtalhavat lapanacni va taskꞌotutulh. Chai mas yuꞌunch ju xalackꞌajin ixtalhitsꞌiꞌinch ju Jesús. Ixtanajun:
\p ―Ju yuchi amakꞌalhtaxtulh ju aliꞌin. Pus chach makꞌalhtaxtucalh isꞌakstu ni sala yuchi ju Cristo ju sacxtuta ju Dios.
\p
\v 36 Chai vachuꞌ ju taropajni talhitsꞌiꞌilh. Talakchaꞌalh ni va ixtaxtakniputun ju pinquin ju jantu can ixjunita.
\v 37 Chai tajunich:
\p ―Ni sala ixꞌucxtinꞌat ju mintꞌaꞌisraelitanin pus amakꞌalhtꞌaxtꞌucꞌach miꞌakstu.
\p
\v 38 Chai istsꞌokcanta laꞌisꞌaktsulh iscurus ju chivinti ju chani ixnajun: “Ju ani yuchach ju ixꞌucxtinꞌan ju israelitanin”. Chai istsꞌokcanta lacalhigriego chai lacalhilatin chai lacalhihebreo.
\p
\v 39 Chai pumatam ju anuꞌ alactuꞌunin ju ixꞌatꞌamaquilhtacanta ju Jesús ixlhitsꞌiꞌin vachuꞌ. Chai juni:
\p ―Ju uxintꞌi ni sala Cristoꞌat pus amakꞌalhtꞌaxtꞌuchꞌokꞌocꞌach ju miꞌakstu chai vachuꞌ ju quijnan.
\p
\v 40 Para kꞌailh ju akꞌantam. Junich:
\p ―Ja jantu lana tꞌalhoni ju Dios ni vana va chun ju makꞌalhkꞌajnan ju uxintꞌi tachi ju yuchi.
\v 41 Chai ju quijnanꞌan islivasalh lhijun ni camakꞌalhkꞌajnanauch ni navitauch ju alactuꞌunti. Para ju ani jantu tuꞌuꞌ alactuꞌunti ju navita.
\p
\v 42 Pus ju acsnich ju yuchi junilh ju Jesús:
\p ―Aqꞌuimpꞌastꞌacꞌaꞌich ju quitꞌin acsni ucxtin atꞌanchꞌokꞌoyaꞌ.
\p
\v 43 Chai ju Jesús junich:
\p ―Slivasalh ju icjunan. Chavai avilhchan ju aqꞌuintꞌatꞌolaꞌ ju lactꞌiyan.
\s1 Nilh ju Jesús
\p
\v 44 Acsni chaꞌalh tachi kꞌatuncu pus na tsꞌis va ixlhilacaputsꞌun ju anuꞌ lacatꞌun. Chai chunchach va tus lakatꞌutu hora atokꞌoxanaꞌ.
\v 45 Va tsꞌankꞌalh ju avilhchan. Chai ju lacpujitat ixꞌalin lakatam kꞌai pumpuꞌ ju ixyocanta ni pulactꞌui ixpunavicanta. Pus ju acs pantsꞌiquis pus lana lhtꞌit takꞌexlh ju anuꞌ pumpuꞌ laꞌixlacaitat.
\v 46 Chai ju Jesús tsꞌau tꞌasalh. Chai naulh:
\p ―Quimpai lamimacaꞌ icmakꞌaxtakniyan ju quintacuvin.
\p Chai acsni naulh ju chunch pus lana nilh.
\p
\v 47 Chai ju xacapitán ixtaropajni ju romanonin acsni laktsꞌilh tuchi tapasalh pus lakꞌaya ju Dios acsni naulh:
\p ―Ju ani lapanac slivasalh na soknicꞌa ixjunita.
\p
\v 48 Pus na lhu lapanacni ixtayanalh ni va ixtalaktsꞌimputun ju ani lhamakꞌan. Chai ixchuxꞌan acsni talaktsꞌilh tuchi tapasalh pus alactanquilhacsacalh ni chunch ixtanavi ju acsnich ni na ixtaꞌamakꞌaninin. Chai taꞌanchokolh laꞌixchakaꞌan.
\v 49 Para chux ju ixtꞌalamispan ju Jesús chai ju chakolun ju ixtachꞌakꞌokꞌata ju ixtatꞌamintacha ju xaꞌestado Galilea pus va makat ixtayanalh. Ixtalaktsꞌin tuchi tapasalh.
\s1 Macnucalh ju Jesús
\p
\v 50 Chai ixꞌalin pumatam lapanac ju José ixjuncan. Amachakaꞌ Arimatea. Chai ju yuchi makyuꞌunch ixjunita ju xalackꞌajin sia yuꞌunch ju israelitanin. Chai ju yuchi na kꞌox lapanac ixjunita chai na soknicꞌa.
\v 51 Ju yuchi vachuꞌ ixpacxantaji ju avilhchan acsni kꞌai ucxtin cajunaꞌ ju Dios. Chai jantu kꞌox xalhiulai ju yuchi tachi ixtalhichivinin ju Jesús ju ixtꞌaxalackꞌajin nin tachi ju xatanavi.
\v 52 Pus ju yuchi lakꞌalh ju Pilato chai quisqꞌuinilh ju ixlacatuna ju lijunto Jesús.
\v 53 Chai ni lakꞌaꞌinilh ju Pilato pus ju yuchi alh chai pꞌuxlich. Chai pachꞌi lacalhman pumpuꞌ. Chai quimacnucalh ju lacalhucucu talhpa. Chai ju anch jantucaꞌ xamatiꞌ ixmacnucanta.
\v 54 Chai ju acsnich xamisparas ixjunita ju avilhchan paꞌastacni acsni jantu lai ixtachꞌalhcatnan.
\p
\v 55 Chai ju chakolun ju ixtatꞌamintacha ju Jesús ju xaꞌestado Galilea tachꞌakꞌokꞌalh ju José. Talaktsꞌilh junta macnucalh ju lijunto Jesús chai ta yu xamamacan ju ixlacatuna.
\v 56 Chai ju chakolun taꞌanchokolh laꞌixchakaꞌan. Talakꞌoxilh ju achꞌitin chai ju cꞌuchꞌu ju na cꞌus acamin. Chai taꞌastacnalh ju avilhchan paꞌastacni tachi ju ixnajun lacalhamapꞌaksin.
\c 24
\s1 Lokꞌonchokolh ju Jesús
\p
\v 1 Pus va spalala tsuculh atuncunuꞌ ju lhitumincu acsni taꞌalh ju chakolun junta ixmacnucanta ju lijunto Jesús. Talhiꞌalh ju achꞌitin ju na cꞌus acamin ju ixtalakꞌoxita. Chai vachuꞌ ixtamakꞌanta ju aliꞌin tꞌacunin.
\v 2 Chai talhitajulh ju chiux ni makꞌosucanta. Yuchi ju xamalhtich ixjunita junta ixmacnucanta ju Jesús.
\v 3 Chai acsni tatanu pus jantu talhitaju ju ixlacatuna ju Jesús.
\v 4 Para acsni na ixtalhamakꞌaninin ni matiꞌ tuꞌuꞌ ixma ju anch pus lana anch tatayacha ixpumatꞌuiꞌan lapanacni ju ixtalakchꞌita lakslipnicꞌa ixpumpuꞌan.
\v 5 Pus lana na tatalhanalh ju chakolun chai tatakꞌentalh. Para ju anuch lapanacni tajunich:
\p ―Tajuch ni va pꞌuxcꞌoyatꞌit ju tꞌajun junta amacnucan ju tanita.
\v 6 Ju yuchi jantu ani ma. Lokꞌonchokota. Apꞌastꞌactꞌit tuchi xatajunan acsni ixvilhchalhcaꞌ ju xaꞌestado Galilea.
\v 7 Xatajunan ni aktsꞌiya istasqꞌuini ni camakꞌaxtakcanaꞌ laꞌixmacaꞌan ju lapanacni ju na alactuꞌunin tajunita. Yuchi ju malakachatachilh ju Dios ni lapanac catsucuyaꞌ ju ani. Chai camaquilhtacanaꞌ para calokꞌonchokoyach ju ixlhilakatꞌutu avilhchan.
\p
\v 8 Pus acsnicaꞌ ju tapastaclich ju ixchivinti ju Jesús.
\v 9 Pus tataspꞌitchokocha junta ixmacnucanta ju Jesús acsni tucaꞌ ixlokꞌonchokota chai taꞌamacꞌatsani tachi chun ju ani taxtokni ju ixpumacautamꞌan chaich ju aliꞌin.
\v 10 Pus yuꞌunch ju Malia amachakaꞌ Magdala chai ju Xivana chai ju Malia ixnati ju Jacobo chai ju aliꞌin chakolun ju tajunilh ju ixtamalakachan ju Jesús tachi chun ju ani taxtokni.
\v 11 Para ju yuꞌunch ixtanajun ni va kꞌaya ixtanajun ju tꞌacunin. Lana jantu taꞌalacaꞌinilh.
\p
\v 12 Para ju Pitaluꞌ lana taya. Atsꞌalaꞌalh junta ixmacnucanta ju Jesús acsni tucaꞌ ixlokꞌonchokota. Chai acsni lhan quitalacnu pus laktsꞌilh ni va yuchi ju ixma ju pumpuꞌ. Pus anchokolh laꞌixchakaꞌ. Alhamakꞌaniniꞌalh tuchi xatapasai.
\s1 Tuchi tapasalh laxati ju Emaús
\p
\v 13 Pus ju acsnich avilhchan pumatꞌui sia yuꞌunch ixtaꞌanta ju lakꞌachakꞌan Emaús. Vanin ixtꞌavi ju lakꞌachakꞌan Jerusalén. Tachi ju xaꞌalhtanta lakatꞌui hora.
\v 14 Chai ixtalhichiviꞌanta tachi chun ju taxtokni ju ixtapasata.
\v 15 Chai acsni ixtalacchiviꞌanta pus lana chincha isꞌakstu ju Jesús chai kꞌaixtam atꞌaꞌalh.
\v 16 Para ju ixꞌalacꞌavantiꞌan va lataminicalh ni jantuch catamispa ju Jesús.
\v 17 Pus ju yuchi ajunich:
\p ―Tijuch ju lacnonatꞌit ju uxijnan junta alhtꞌananatꞌit. Chai tajuch ni na va amakꞌanininatꞌit.
\p
\v 18 Chai akꞌalhtayanalh pumatam ju ixtꞌiyunꞌan ju Cleofas ixjuncan. Junich:
\p ―Tachi chun ju lapanacni ju ixtatꞌonacha ju lakꞌachakꞌan Jerusalén ca va uxintꞌi ju jantu cꞌatsꞌai tuchi xatapasai ju anch ju chavai.
\p
\v 19 Chai ju yuchi ajunich:
\p ―Tis talakxtuch.
\p Chai ju yuꞌunch tajunich:
\p ―Ixlacata ju Jesús amachakaꞌ Nazaret. Pus laꞌixꞌucxlacapuꞌ ju Dios chai laꞌixꞌucxlacapuꞌan ju lapanacni ju yuchi malacasulh ni vasalh ixlapanac Dios ixjunita. Chai na lai ixnavi ju tuꞌuꞌ lhamakꞌan chai na lai ixꞌamalaninin ixchivinti Dios.
\v 20 Para ju xalackꞌajin palijni chai ju xalackꞌajin quiꞌucxtin quincꞌan tamakꞌaxtaklh ju Jesús chai tamaknilh ju lacacurus.
\v 21 Para ju quijnan xacnonau ni yuchi ixjunita ju xaquintamakꞌalhtaxtun ju quijnanꞌan ju israelitanin juntau. Chai jantu va yuchi. Para chavai ixlhilakatꞌutu avilhchan ju xatapasai ju ani taxtokni.
\v 22 Chai vachuꞌ na iclhamakꞌanininau tuchi talaktsꞌilh ju aliꞌin chakolun ju sia quijnan. Ju yuꞌunch ma na vatsꞌisin taquilacaꞌalh junta ixꞌacnui ju Jesús.
\v 23 Para ma jantu talhitajunilh ju ixlacatuna. Alai tataspꞌitcha chai tanaulh ni ma ixtalaktsꞌinta vachuꞌ ju anquilhnin. Chai ju yuꞌunch ma tanaulh ni ma tꞌajun ju Jesús.
\v 24 Chai ju aliꞌinch sia quijnan vachuꞌ taquilalh junta ixꞌacnui chai chunch ju talhitajulh tachi ju ixtanajunta ju chakolun. Para ju Jesús ma jantu talaktsꞌilh.
\p
\v 25 Pus ju acsnich ju Jesús ajunich:
\p ―Na tsꞌinqꞌui ju mintacꞌatsanꞌan ju uxijnan. Na xcaich lacꞌaꞌiyatꞌit tachi chun ixchivinti ju lapanacni ju ixtanajun ixchivinti Dios.
\v 26 Na istasqꞌuini ni calhimakꞌalhkꞌajnalh ju ani taxtokni ju Cristo. Ju chunch ni laich calakꞌayacalh.
\p
\v 27 Pus ju acsnich ju Jesús tsuculh amavasalaniniꞌ tachi chun ju chivinti ju istsꞌokꞌulacanta laꞌixchivinti Dios junta ixlhichivinin ju yuchi. Pus taiꞌula ta istsꞌokta ju Moisés chai tailhiꞌalh tus chaꞌalh ta istatsꞌokta tachi chun ju makꞌaniya lapanacni ju ixtanajun ixchivinti Dios.
\p
\v 28 Pus acsni tachaꞌalh ju anuꞌ lakꞌachakꞌan junta ixtaꞌanta pus ju Jesús lalh tachi ju va ixꞌamputun palai makat.
\v 29 Para ju yuꞌunch tapꞌastu tachꞌapayaulh. Tajunich:
\p ―Aquilatꞌatolauch ni na tokꞌoxalh. Anchalh ju avilhchan.
\p Pus alactꞌatanu ju yuꞌunch ni ixnajun ni caꞌalactꞌatolaꞌ.
\v 30 Chai acsni alactꞌatavi ju lacamixa pus chꞌapalh ju xkapavati. Junilh lakꞌailaktsꞌiuch ju Dios chai chꞌekꞌelh chai axtaknilh.
\v 31 Pus lana takꞌoxichokolh ju ixlakchulhꞌan ju yuꞌunch chai tamispalh. Para ju yuchi lana lakmixlh. Jantu talaktsꞌilh.
\v 32 Chai talajunilh sia yuꞌunch:
\p ―Slivasalh na xackꞌachanau acsni xaquintatꞌachivimintan ju lacati. Chai acsni xaquintamavasalanitan tuchi nomputun ixchivinti Dios ju tsꞌokcanta.
\p
\v 33 Pus lana talakasitaya ju acs pantsꞌiquis. Taꞌanchokolh ju lakꞌachakꞌan Jerusalén. Chai talhitajucha ju ixpumacautamꞌan chai ju aliꞌin ju ixꞌalactꞌavi. Va lakputam ixtavilanalh.
\v 34 Chai ju ixchuxꞌan ju yuꞌunch tajunilh ixtꞌiyunꞌan:
\p ―Slivasalh ni lokꞌonchokolh ju quiꞌucxtinꞌan. Pus talacasunilh ju Simón.
\p
\v 35 Chai vachuꞌ ixtꞌiyunꞌan tajunilh ju ixtalhavatꞌan tuchi tapasalh ju lacati chai ni tamispalh ni yuchach acsni chꞌekꞌelh ju xkapavati.
\s1 Ju Jesús atalacasunilh ju ixꞌamamakaꞌui
\p
\v 36 Chai acsni ixtatꞌajun nonin ju ani taxtokni pus ju Jesús lana tayacha laꞌixlacaitatꞌan chai ajunich:
\p ―Akꞌachꞌantꞌit ju uxijnan.
\p
\v 37 Para ju yuꞌunch na tatalhanalh. Na amakꞌesvacalh. Va ixtanajun ni ca ixtalaktsꞌin ju alasanin.
\v 38 Para ju yuchi ajunich:
\p ―Tajuch ni va tꞌalhanantꞌit. Tajuch ni va chunch ju pꞌastꞌacꞌatꞌit lamiꞌalhunutꞌan.
\v 39 Alaktsꞌintꞌit ju quimacaꞌ chai ju quinchꞌajaꞌ ni quitꞌinch. Aquilalacachꞌapauch chai aquilalakalaktsꞌiuch. Ni va alasanin xacva pus jantu ixꞌalilh ju quiꞌacanit nin quiꞌalucutni. Para ju uxijnan laktsꞌinatꞌit ni alin ju quiꞌacanit chai quiꞌalucutni.
\p
\v 40 Chai acsni naulh ju chunch pus alacmalacasunilh ju ixmacaꞌ chai ixchꞌajaꞌ.
\v 41 Para ju yuꞌunch jantucaꞌ lai ixtalacaꞌi ni va ixtalhikꞌachanch ni aktsꞌiya talaktsꞌinchokolh chai ni va ixtalhamakꞌanininta. Pus yuchi alhijunich:
\p ―Ja alin lacatsꞌunin ju mivaitiꞌan.
\p
\v 42 Pus taxtaknilh lacatsꞌunin axpꞌupꞌunti pamata chai lacatsꞌunin tꞌaxcat.
\v 43 Chai ju Jesús amaklhtayanalh chai tsuculh unaꞌ laꞌixꞌalacꞌavantiꞌan ju yuꞌunch.
\v 44 Chai ajuni:
\p ―Yuchach ju chivinti ju xaclajunau acsni xaclatꞌavilaucaꞌ ju uxijnan. Iclajuniu ni istasqꞌuini ni caꞌuctaxtulh tachi chun ju istsꞌokcanta ju quilacata laꞌixlhamapꞌaksin ju Moisés chai laꞌixchivintiꞌan ju lapanacni ju ixtanajun ixchivinti Dios chai lacasalmos.
\p
\v 45 Pus ju acsnich ju Jesús alakꞌoxinilh ixtacꞌatsanꞌan ni laich catamachakxayaꞌ tuchi nomputun ixchivinti Dios ju tsꞌokcanta.
\v 46 Chai ajunich:
\p ―Tsꞌokcanta laꞌixchivinti Dios ni istasqꞌuini ni camakꞌalhkꞌajnalh ju Cristo chai calokꞌonchokolh laꞌixꞌaninti ixlhilakatꞌutu avilhchan.
\v 47 Vachuꞌ tsꞌokcanta ni caꞌajunicalh ju lapanacni ni laich caꞌamacꞌacxanicanach ju ixꞌalactuꞌuntiꞌan va tichi chavaich ju calacaꞌilh ni Cristo yuchi ju ixnoncan camalakachatachilh ju Dios chai camacaulich ixꞌalactuꞌuntiꞌan. Caꞌajunicalh ju ani chivinti tachi chun ju amachakꞌan ju kꞌai lakꞌachakꞌanixni. Chai cataiꞌulacanach ju ani lakꞌachakꞌan Jerusalén.
\v 48 Chai uxijnan ju anonaꞌitꞌit ni laktsꞌintꞌatꞌit ju ani taxtokni.
\v 49 Chai aclamalakachanitachauch ju tuchi kꞌalhtasuta ju quimpai ni cataxtakniyan. Para atꞌolatꞌitcaꞌ ju ani lakꞌachakꞌan Jerusalén tus acsni axtꞌaknicꞌanaꞌitꞌit ju tachaput ju caminanta talaclhman.
\s1 Ju Jesús anchokolh ju lactꞌiyan
\p
\v 50 Ju Jesús atꞌataxtulh ju ixꞌamamakaꞌui ju lakꞌachakꞌan Jerusalén. Chai akꞌailhiꞌalh ju lakꞌachakꞌan Betania. Chai chꞌixlh ju ixmacaꞌ chai asqꞌuininilh ju Dios ju kꞌox isꞌatsucuntiꞌan ju yuꞌunch.
\v 51 Chai acsni ixtꞌajuncaꞌ sqꞌuinininiꞌ ju Dios ju kꞌox isꞌatsucuntiꞌan pus lana alacmacaulich. Lhiꞌancalh ju lactꞌiyan.
\v 52 Chai ju ixꞌamamakaꞌui talakꞌayalh. Chai astan taꞌanchokolh ju lakꞌachakꞌan Jerusalén chai slivasalh na ixtakꞌachanch.
\v 53 Chai va tachi ixtatanumanalh ju lacpujitat. Ixtajuni lakꞌailaktsꞌiuch ju Dios chai ixtalakꞌayai ju yuchi.