\id JHN
\ide UTF8
\h XIVAN
\toc1 XIVAN
\mt1 JU CHIVINTI IXLACATA JU CRISTO JU TSꞌOKLH JU XIVAN
\c 1
\s1 Ju juncan Chivinti tapala lapanac
\p
\v 1 Ju yuchi ju Chivinti juncan ixtꞌajunch acsni maticaꞌ tuꞌuꞌ ixjunita. Chai ju yuchi va lakputam ixtꞌatꞌajun ju Dios. Chai isꞌakstu ju Dios ixjunita.
\v 2 Ju Dios va lakputam ixtꞌatꞌajun ju yuchi tus acsni maticaꞌ tuꞌuꞌ ixjunita.
\v 3 Tachi chun ju taxtokni si laꞌixmacni ju navikꞌojuta. Ni jantu cava ju yuchi pus matiꞌ cava ju lacamunutpaꞌ nin yuchi ju taxtokni.
\v 4 Ju atsucunti laꞌixmacni yuchi ju ixtꞌajun. Chai yuchi ju malacpucujui ju laꞌixtacꞌatsanꞌan ju lapanacni.
\v 5 Ju yuchi ju malacpucujui laꞌixtacꞌatsanꞌan ju lapanacni chunch junita tachi ju tuꞌuꞌ maclhcu ju mapulhcui junta na tsꞌista. Para ju anuꞌ ju alhtanan junta putsꞌista jantu lai alhajanalh.
\p
\v 6 Pus alilh pumatam lapanac ju malakachachilh ju Dios. Ju yuchi ixjuncan Xivan.
\v 7 Yuchi lhimilh ni canonach ju tuchi cꞌatsaich. Yuchi ju calhichivinach ju yuchi ju lai malacpucujui ju laꞌixtacꞌatsanꞌan ju lapanacni. Ju chunch chux ju lapanacni laich catalhilacaꞌanaꞌ tichi chavaich ju lhichivinin ju Xivan.
\v 8 Para jantiyuꞌ ixjunita ju Xivan ju anuꞌ ju lai malacpucujui ju laꞌixtacꞌatsanꞌan ju lapanacni. Ju yuchi va ixmalakachacantachilh ni caxtꞌakꞌach ju chivinti ixlacata ju anuꞌ ju lai malacpucujui ju laꞌixtacꞌatsanꞌan ju lapanacni.
\v 9 Ju anuꞌ ju istavasalanti amalacpucujunun quilachilh ju ani lacamunutpaꞌ. Ju yuchi amalacpucujuni laꞌixtacꞌatsanꞌan tachi chun ju lapanacni.
\p
\v 10 Ju yuchi ixtꞌajun ju ani lacamunutpaꞌ. Chai ju lacamunutpaꞌ laꞌixmacni ju alinta. Para ju amachakꞌan ju ani lacamunutpaꞌ jantu tamispa.
\v 11 Quilakquilachilh ju ixlacatꞌun. Para ju ixtꞌaꞌamachivinti ixtajunita acsni ixtꞌajun ju ani lacamunutpaꞌ jantu tuꞌuꞌ talhiula.
\v 12 Para ju yuchi axtaknilh ixtachaputꞌan ni catavalhch isꞌaskꞌatꞌan Dios tachi chun ju lhikꞌach taꞌamaklhtayanalh chai talhilaksi.
\v 13 Ju isꞌaskꞌatꞌan Dios jantu tapujunita chun tachi ju tapujunita ju isꞌaskꞌatꞌan tam xamatiꞌ ju ani lacamunutpaꞌ. Alai va si laꞌixkꞌachat Dios tapujunita isꞌaskꞌatꞌan.
\p
\v 14 Chai ju anuꞌ ju Chivinti juncan lapanac quitsucuchilh ju ani. Chai quintaquitꞌaꞌalhtananchin pantsꞌiquis. Chai ju yuchi na lhu ixnavi ju lamapainin. Chai stavasalanti ju ixnajun. Chai iclaktsꞌiuch ni vasalh xakꞌai junita tachi ju junita ju ixpai Dios. Chai ni lakatami istsꞌalh Dios junita pus yuchi xakꞌai lhijunita.
\v 15 Ju Xivan naulh tuchi iscꞌatsai ixlacata ju anuꞌ ju chivinti juncan. Chai acsni tavanan ixlhaktꞌasajunun pus pꞌas ju ixchivinin. Chanich ixnajun:
\p ―Ju mintacha astan yuchi ju xakꞌai. Jantu quitꞌin. Yuchach ju xaclalhaktꞌasajuyau ju uxijnan.
\p
\v 16 Chai ni na lhu ju ixꞌamapaininti pus yuchi ju puꞌamaklhtayananauch quinchuxꞌan na lhu lamapainin ju quintanavinitan.
\v 17 Ju lhamapꞌaksin ixlacata ixtaxtokni Dios yuchi ju ixtakta ju ixjuncan Moisés. Para ju lamapainin ju quintanavinitan chai ju stavasalanti laꞌixmacni Jesucristo ju tasukꞌo.
\v 18 Ju Dios jantu xamatiꞌ laktsꞌinta tavanan. Ju lakatami istsꞌalh Dios slivasalh ixmapaini. Yuchach ju putalacasulh ta junitach ju Dios.
\s1 Chani ju chivinilh ju Xivan ju amakpaxanaꞌ
\p
\v 19 Ju xalackꞌajin israelitanin tamalakachalh ju xapalijni. Chai alactꞌamalakachacalh ju levitanin junta ixvilhcha ju Xivan. Lakꞌachakꞌan Jerusalén ju ixtamintacha. Chai kꞌalhtayanalh ju Xivan acsni sacmicalh tichi chavaich ju yuchi.
\v 20 Pus ju yuchi lhilatavi ju stavasalanti. Lana amavasalanilh ni jantiyuꞌ ju Cristo ju noncan camalakachatachilh ju Dios.
\v 21 Chai aktam tasacmichokopa:
\p ―Pus tis chavaichꞌat. Ja uxintꞌi ju Elíasꞌat.
\p Pus naulh ju yuchi ni jantiyuꞌ.
\p ―Ja uxintꞌi ju anuꞌ lapanacꞌat ju canonach ixchivinti Dios.
\p Pus akꞌalhtayanalh. Naulh ni jantiyuꞌ.
\v 22 Pus aktam tasacmichokopa:
\p ―Pus tis chavaichꞌat. Aquilajuniuch ni lai acmacꞌatsanitachau ju xaquintamalakachayachin tichi chavaichꞌat ju uxintꞌi.
\p
\v 23 Pus naulh ju Xivan:
\p ―Ju quitꞌin va yuchi ni na pꞌas ju icchivinin junta aseknicꞌa. Va iclajunau ni alakꞌoxinitꞌit ju miꞌalhunutꞌan ju miꞌucxtinꞌan Cristo ni caminach. Tachi ju naulh ju anuꞌ lapanac ju Isaías ixjuncan ju ixchivinin ixchivinti Dios.
\p
\v 24 Pus ju anuꞌ lapanacni ju ixꞌamalakachacanta sia lhifariseonin ixtajunita.
\v 25 Chai tajunich ni tasacmi ju Xivan:
\p ―Tajuch ni amakpꞌaxananch ni jantu uxintꞌi ju Cristoꞌat nin Elíasꞌat nin uxintꞌi ju lapanacꞌat ju canonach ixchivinti Dios.
\p
\v 26 Pus ju Xivan acsni alackꞌalhtailh alacjunich:
\p ―Ju quitꞌin va lacaxcan ju icꞌamakpaxanan. Para junta tꞌonatꞌit tꞌajun pumatam ju jantu mispꞌayatꞌit.
\v 27 Ju yuchi astan caminaꞌ. Para yuchi ju xakꞌai. Jantu quitꞌin. Pus ju quitꞌin jantu tuꞌuꞌ ju quintapalhni. Jantu lai actichꞌanxkꞌotlh nin mas va yuchi ju samusni ixchꞌanxtꞌakꞌan.
\p
\v 28 Lhimakꞌantacutni xakꞌai xcan Jordán ixꞌalin ju lakꞌachakꞌan ju ixjuncan Betábara. Anchach ju tapasacha ju ani taxtokni. Anch ju ixꞌamakpaxanan ju Xivan.
\s1 Alin pumatam lapanac ju tachi ixborrego Dios cajunaꞌ
\p
\v 29 Ni tuncunchokopa acsnich ju laktsꞌilhch ju Xivan ju Jesús ni ixlakmintach. Chai ajunich ju lapanacni:
\p ―Alaktsꞌintꞌitch ju anuꞌ mintacha lapanac. Tachi ixborrego Dios cajunaꞌ. Yuchach ju camapalaꞌ ju alactuꞌunti lhichux.
\v 30 Yuchach ju xaclhichivinin acsni xaclajunau ni astan caminaꞌ pumatam lapanac. Yuchach ju xakꞌai. Jantu quitꞌin ni yuchi ju pꞌulhnan ixtꞌajun. Jantu quitꞌin.
\v 31 Nin quitꞌin jantu xacmispai. Para yuchi iclhimilhch amakpaxanaꞌ ju lacaxcan ni chunchach ju catapumispayach ju quintꞌaꞌisraelitanin ju yuchi.
\p
\v 32 Xivan ju xtaklh ju chivinti. Chanich ixnajun:
\p ―Iclaktsꞌilh ju Spiritu Santu acsni mincha ju lactꞌiyan tachi ju tuꞌuꞌ lakꞌaxkꞌavan acsni tavi laꞌixlacatuna ju Jesús.
\v 33 Pus ju quitꞌin jantu xacmispai. Para xaquijunitach ju anuꞌ quimalakachachilh ni acꞌamakpaxananaꞌ lacaxcan ni ma xamatiꞌ aclaktsꞌinaꞌ ni calakꞌanaꞌ ju Spiritu Santu chai ni ma catocꞌaniyach laꞌixlacatuna ma yuchach ju caꞌamakpaxananaꞌ lacaSpiritu Santu.
\v 34 Chai quitꞌin ju iclaktsꞌilh ju tuchi tapasalh. Chai iclajunauch ni yuchach ju ani ju istsꞌalh ju Dios.
\s1 Ju xapꞌulhnan ju tachꞌakꞌokꞌalh ju Jesús
\p
\v 35 Acsni tuncunchokopa pus aktamch ixꞌalactꞌayapa ju ixtꞌiyunꞌan ixlapanacni ju Xivan.
\v 36 Chai ju yuchi laktsꞌimpa ju Jesús junta ixꞌanta. Chai ajunich ju ixlapanacni:
\p ―Alaktsꞌintꞌitch ju anuꞌ lapanac ju tachi ixborrego Dios cajunaꞌ.
\p
\v 37 Chai ju anuꞌ ixtꞌiyunꞌan ixlapanacni ju Xivan acsni takꞌasmatlh ju tuchi ixnajunch pus lana tachꞌakꞌokꞌalh ju Jesús.
\v 38 Chai acsni talakaspꞌitlh ju Jesús alaktsꞌilh ju ixtachꞌakꞌokꞌata. Ajunich:
\p ―Tijuch ju pꞌuxcꞌoyatꞌit.
\p Chai tajunilh:
\p ―Amamakaꞌunuꞌ tas anchach ju tꞌaꞌun.
\p
\v 39 Pus ajunich:
\p ―Asokꞌotꞌitch. Alaktsꞌinaꞌitꞌitch junta ictꞌajun.
\p Chai tatꞌaꞌalh. Talaktsꞌilh junta ixtꞌajun. Pus ju acsni avilhchan tatꞌatolhcha ni tachi lakatꞌatꞌi hora atokꞌoxanaꞌ ixjunita.
\p
\v 40 Chai ju anuꞌ ixtꞌiyunꞌan ju ixtakꞌasmatꞌach ixchivinti ju Xivan ju tachꞌakꞌokꞌalh ju Jesús pus pumatam ixjuncan Tilix. Yuchi ju ispꞌisekꞌe Pitaluꞌ Simón ixjunita.
\v 41 Pus ju Tilix lana lhitaju ju ixlakꞌau tucan ju ixjuncan Simón. Chai junich ju ixlakꞌau:
\p ―Iclhitajuch ju Mesías.
\p Ju chunch va nomputun: “Iclhitajuch ju Cristo ju noncan ni camalakachatachilh ju Dios”.
\p
\v 42 Chai ju Tilix lana lhiꞌalh ju Simón junta ixvi ju Jesús. Acsni alaktsꞌilh ju Jesús junich ju Simón:
\p ―Ju uxintꞌi Simónꞌat. Istsꞌalhꞌat ju Jonás. Ju uxintꞌi aꞌuncꞌanaꞌ Cefas.
\p Pus ju alhimapakaꞌucan Cefas va Pitaluꞌ nomputun laꞌixchivintiꞌan ju anuch lapanacni.
\s1 Ju Jesús tꞌasanilh ju Pilipe chaich ju Natanael
\p
\v 43 Chai ni tuncunchokopa ju Jesús naulicaꞌ ni caꞌanach ju xaꞌestado Galilea. Chai anch ju lhitajucha ju ixjuncan Pilipe. Chai junich ni cachꞌakꞌokꞌalh.
\v 44 Ju Pilipe amachakaꞌ Betsaida ixjunita. Laꞌixtꞌunꞌan ju Tilix chaich ju Pitaluꞌ.
\v 45 Ju Pilipe acsni lhitaju ju ixjuncan Natanael chanich juni:
\p ―Iclhitajuch ju Jesús. Istsꞌalh ju José. Amachakaꞌ Nazaret. Yuchach ju ixlhatsꞌoknunta ju Moisés acsni atsꞌoknulh ixchivinti Dios. Chai vana chun ixtalhatsꞌoknunta ju anuꞌ lapanacni ju ixtanajun ixchivinti Dios.
\p
\v 46 Chai chani naulh ju Natanael ni akꞌalhtayanalh:
\p ―Ja laich cataxtucha ju lakꞌachakꞌan Nazaret tuꞌuꞌ kꞌox.
\p Pus ju Pilipe junich:
\p ―Pus asokꞌoch. Anchach ju alaktsꞌintꞌachich.
\p
\v 47 Chai ju Jesús chanich naulh acsni laktsꞌistuclh ju Natanael junta ixmintacha. Ajunich ju lapanacni:
\p ―Alaktsꞌintꞌitch. Ani minta pumatam ju vasalh israelita. Ju yuchi jantu lai aꞌokxchokꞌonun.
\p
\v 48 Chai ju Natanael lana akꞌalhtayanalh. Naulh:
\p ―Tꞌas qꞌuilhimispꞌaich.
\p Pus ju Jesús chani lhikꞌalhtailh. Junich:
\p ―Iclaktsꞌinch acsni ixyachiꞌ ixtankꞌapuꞌ kꞌai qꞌuiu ju higuera juncan. Acsni tucaꞌ istꞌasaniyan ju Pilipe.
\p
\v 49 Chai akꞌalhtayanalh ju Natanael. Junich:
\p ―Amamakaꞌunuꞌ ju uxintꞌi istsꞌalh Diosꞌat. Uxintꞌi ju quiꞌucxtin quincꞌan aꞌunaꞌ ju quijnanꞌan ju israelitanin juntau.
\p
\v 50 Chai acsni akꞌalhtayanalh ju Jesús chanich juni:
\p ―Ja yuchi xaqꞌuilhilhilaksich ni va xacjunanch ni iclaktsꞌintanch acsni ixyachiꞌ ixtankꞌapuꞌ kꞌai qꞌuiu ju higuera juncan. Pus palai kꞌai lhamakꞌan ju alaktsꞌinaꞌ astan.
\p
\v 51 Pus chanich ajuncan ju lapanacni:
\p ―Slivasalh ju iclajunau. Ju caꞌanach avilhchan alaktsꞌinaꞌitꞌitch ju lactꞌiyan ni catalhtekꞌayach. Chai alaktsꞌinaꞌitꞌitch ju ixꞌanquilhnin Dios ni catataꞌakstꞌayaꞌ chai catatakꞌalhtajuyach acsni aquintalakminach ju quitꞌin ju quimalakachatachilh ju Dios ni lapanac actsucuyaꞌ ju ani.
\c 2
\s1 Alilh lakatam lacvaiti ju lakꞌachakꞌan Caná
\p
\v 1 Chai ixlhilakatꞌutu avilhchan ixtailhiꞌanta. Acsnich ju alilhch tamakꞌaxtꞌokꞌat ju lakꞌachakꞌan Caná laxaꞌestado Galilea. Anchach ju ixvilhcha ju ixnati ju Jesús.
\v 2 Chai vachuꞌ alactꞌatꞌasanicalh ju Jesús ju ixꞌamamakaꞌui junta tamakꞌaxtokcalhch.
\v 3 Acsni cꞌacxtaya ju vino pus ju ixnati ju Jesús chanich juni ju istsꞌalh:
\p ―Matich ju vino.
\p
\v 4 Chai ju Jesús chani lhikꞌalhtailh. Junich:
\p ―Apꞌacxacaꞌ ji quinati. Iccꞌatsaich tuchi acnaviyaꞌ. Tucaꞌ chin ju pantsꞌiquis ni lai tuꞌuꞌ acnavi.
\p
\v 5 Pus ju ixnati chanich ajuni ju ixtamakchꞌalhcatnan anch:
\p ―Anaviniyaꞌitꞌitch tachi chun ju catajunanch ju yuchi.
\p
\v 6 Chai ixlacvi lakachaxan lackꞌai akchoko lhinavicanta chiux. Anchach ju ixtamujuich ju xcan ju ixtalhilacchꞌakꞌai ixlaccꞌaꞌulhꞌan chai ju ixtalhimacchꞌakꞌaich ju israelitanin ni chunch ixtalhilanitach. Va ixtanajun ni salaka catajunlh ju chunch. Chai ju lakatamin akchoko ixmujui tam cientos litros.
\v 7 Ju Jesús chanich alacjuni:
\p ―Alaktsꞌamatꞌitch ju xcan ju ani lacvi akchoko.
\p Chai ju xalapanacni tanavilh ju alhijunicalh.
\v 8 Pus lana ajunchokolh ju Jesús:
\p ―Amacꞌutꞌuchꞌokꞌotꞌitch ju xcan. Alhipꞌinichitꞌitch ju tꞌajun xtaknaꞌ ju vaiti.
\p Chai taquixtaknilh.
\v 9 Pus ju anuch ixtꞌajun xtaknaꞌ ju vaiti acsni quilhcꞌatsalh ju anuꞌ xcan ju tapala vino canch lhiula. Para jantu iscꞌatsai taꞌanchach ju lhimincancha. Va yuꞌunch ju ixtacꞌatsai ju ixtamakchꞌalhcatnanch anch ni yuꞌunchach ju ixtamacutui ju xcan. Pus ju anuꞌ ixtꞌajun xtaknaꞌ ju vaiti lhinaulh istꞌasanica ju anuꞌ tsꞌalh ju tamakꞌaxtoklh.
\v 10 Chanich juni:
\p ―Tachi chun ju jokꞌatni pꞌulhnan cataxtꞌakꞌaꞌ ju kꞌox vino. Chai acsni lhilacanch cataxtꞌakꞌach ju palai jantuch can. Para ju uxintꞌi makꞌatꞌa ju kꞌox vino tus chavai.
\p
\v 11 Ju ani lhamakꞌan navilh ju Jesús ju lakꞌachakꞌan Caná ju laxaꞌestado Galilea. Yuchach ju pꞌulhnan lhamakꞌan ju navilh ju Jesús. Chunchach ju apumalacasunilh ju lapanacni ju ixtachaput. Pus acsnich ju palai talhilacaꞌalh ju Jesús ju anuch ixꞌamamakaꞌui.
\p
\v 12 Chai ju Jesús astan alhch ju lakꞌachakꞌan Capernaum. Yuchach chai ju ixnati chai ju isꞌapꞌisekꞌen chai ju ixꞌamamakaꞌui. Chai ju anch tatolhcha lakatam lakatꞌui avilhchan.
\s1 Ju Jesús pulacpꞌalh ju pujitat
\p
\v 13 Chai vanin ixjunita ju ixcꞌatanꞌan ju israelitanin acsni alh ju Jesús ju lakꞌachakꞌan Jerusalén. Yuchach ju anuꞌ cꞌatan ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
\v 14 Chai anchach ju ixya ju kꞌai ixpujitatꞌan ju israelitanin. Chai anchach ju alhitajulhch ju Jesús ju lapanacni ju istastꞌai vacax borrego chai lakꞌaxkꞌavan. Chai ixtavilanalh vachuꞌ ju ixmapaxanin tumin.
\v 15 Chai ju acsnich ju Jesús navilh lakatam ixpanekni lasu. Pus lana tsuculh alactixcoxtunuꞌ tachi chun ju istaꞌastꞌananch ju anuꞌ laꞌixpujitatꞌan ju israelitanin. Chai tachi chun ju borregojni chai vacax atixcoxtukꞌo. Vachuꞌ alacpumakꞌanikꞌo ju ixtuminꞌan ju amapaxanin. Chai alacmaktakꞌo ju ixmixaꞌan.
\v 16 Chai alacjunich ju istastꞌaich lakꞌaxkꞌavan:
\p ―Alhipꞌinchitꞌitch ju ani lacvi. Ju ixchakaꞌ quimpai jantu anavitꞌit va xachakaꞌ paꞌastꞌan.
\p
\v 17 Pus ju anuch ixꞌamamakaꞌui acsnicaꞌ ju tapastacli ni chunchach vasalh ju tsꞌokcanta junta najun: “Lana na quixcani ji quimpai ni jantu kꞌox tachi ju talai ni ani ju lakꞌayacꞌan”.
\p
\v 18 Pus ju acsnich ju israelitanin chanich tanaulh ni tasacmich ju Jesús:
\p ―Tijuch ju aquilamasuniyau ju acpucꞌatsayauch ni xakꞌaichꞌat ju uxintꞌi ni laich xanavi ju ani taxtokni.
\p
\v 19 Pus ju Jesús chanich alaclhikꞌalhtailh. Ajunich:
\p ―Amaktꞌatꞌit ju ani ya kꞌai pujitat. Chai ju quitꞌin va lakatꞌutu avilhchan ju acpulakꞌoxichokoyaꞌ.
\p
\v 20 Ju acsnich taꞌakꞌalhtayanalh ju israelitanin. Chani tanaulh:
\p ―Ju ani kꞌai pujitat tꞌupꞌuxamchaxan cꞌata ju punavikꞌocalh. Chai ju uxintꞌi ja va lakatꞌutu avilhchan ju lai apꞌunavichꞌokꞌo.
\p
\v 21 Para ju Cristo ixlhichivinchokoi ju ixlacatuna isꞌakstu ni pujitat ixjunita.
\v 22 Chai acsni tavanan taꞌacxtuchokolh ju Jesús junta ixmacnucanta pus acsnich ju tapastaclich ju ixꞌamamakaꞌui ni ixnajuntach ju ani chivinti. Pus acsnich ju talacaꞌinilh ju anuꞌ atsꞌoknut chaich ju ixchivintich ju Jesús tuchi ixnajuntach.
\s1 Ju Jesús amispanikꞌojui ixꞌatalacpastꞌacꞌatꞌan tachi chun ju lapanacni
\p
\v 23 Na lhu ju talhilacaꞌalh laꞌixtapakaꞌut ju Jesús acsni ixvilhchalhch ju lakꞌachakꞌan Jerusalén ju anuch cꞌatan ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin. Talhilacaꞌalh ju Jesús ni ixtalaktsꞌinch ju lhamakꞌan ju ixnavich.
\v 24 Para ju Jesús jantu ixꞌalhilaksi ju lapanacni ni ixꞌamispanich ju ixꞌatalacpastꞌacꞌatꞌan ju va lapanacni.
\v 25 Ju va ixlacata apumatam jantu ixmaktasqꞌuini ni xamatiꞌ caꞌalh chivintanuniniꞌ tuꞌuꞌ ni isꞌakstu iscꞌatsai ta yu junita ixꞌalhunutꞌan ju pumatamin lapanacni.
\c 3
\s1 Ju Jesús chaich ju Nicodemo
\p
\v 1 Ju pumatam lapanac Nicodemo ixjuncan. Chai ju yuchi xaꞌucxtin israelitanin ixjunita. Chai na ixlacaꞌi vachuꞌ ju ixlhamapꞌaksinꞌan ju fariseonin.
\v 2 Ju yuchi tsꞌis ju quilaktsꞌilh ju Jesús. Chaich chani juni acsni lakchaꞌalh:
\p ―Amamakaꞌunuꞌ iccꞌatsayauch ni laꞌixmacni Dios ju tꞌantꞌa amamakaꞌunuꞌ. Va icpucꞌatsayauch chunch ni jantu xamatiꞌ ju lai canavi ju ani lhamakꞌan ju tuchꞌi navich ju uxintꞌi ni jantu cava Dios ju aktaijuyan.
\p
\v 3 Chai akꞌalhtayanalh ju Jesús. Junich:
\p ―Slivasalh ju icjunan. Ju jantu catsucuchokoyaꞌ aktam jantu lai catiꞌalh junta lhinajun ju Dios.
\p
\v 4 Ju Nicodemo naulh:
\p ―Tas calhitalacatꞌicstꞌichokolh ju na papach chai catsucuchokolh. Ja laich catanuchokolh ju laꞌixpulacni ixnati chai calokꞌonchokolhch.
\p
\v 5 Pus akꞌalhtayanalh ju Jesús. Junich:
\p ―Slivasalh ju icjunan. Ju tam lapanac ju akpaxta va ixlacaꞌatalh ni tam xajun ju isꞌatsucunti pus tachi ju va tsucuchokolhcaꞌ. Chai acsni tanui ju Spiritu Santu laꞌisꞌatsucunti tam xamatiꞌ pus vana tachi ju va tsucuchokolhcaꞌ. Para ju lapanacni ju jantu tam junita ju isꞌatsucuntiꞌan chai ju jantu tapacxanta ju Spiritu Santu laꞌixꞌalhunutꞌan pus jantu lai catitatanu junta lhinajun ju Dios.
\v 6 Ju uxijnan maklokꞌoncꞌantꞌatꞌit ju ani laꞌixtachaput ju mimpaiꞌan minatiꞌan. Para puꞌamaklhtayanancan ju sastꞌi miꞌatsucuntiꞌan laꞌixtachaput ju Spiritu Santu.
\v 7 Jantu alhamakꞌanin ni xacjunan ni aktsꞌiya tasqꞌuini ni atsꞌucꞌuchꞌokꞌoyaꞌ.
\v 8 Ju un vanta anchach ju lai. Chai kꞌasmatcan ju istꞌasat. Para jantu cꞌatsacan ta anchach ju minacha nin lai cacꞌatsacalh ta anchach ju anta. Vana va chun ju tam lapanac ju alin sastꞌi isꞌatsucunti ju xaxtakni ju Spiritu Santu. Ju akꞌantam ju jantucaꞌ lhilaksi ju Dios jantucaꞌ cꞌatsai tuchi ju xapuꞌalinch ju chunch sastꞌi atsucunti.
\p
\v 9 Ju Nicodemo chanich juni:
\p ―Pus tas lhiꞌucxꞌantach ju ani.
\p
\v 10 Chai chanich lhikꞌalhtailh ju Jesús ju Nicodemo. Junich:
\p ―Ja jantu uxintꞌich pumatam ju amamakaꞌui ju mintꞌaꞌisraelitanin chai ixlaquilhtu jantu lai machꞌakxai ju ani.
\v 11 Slivasalh ju icjunan. Ju tuchi icmispayauch icnonauch. Ju tuchi iclaktsꞌintau icmavasalayauch. Para ju uxijnan jantu lai quilalacaꞌiniyau ju tuchi icnonauch.
\v 12 Ni icjuntan ju va ixlacata saꞌatsucunti ju ani lacamunutpaꞌ chai jantu lacꞌaꞌi ju quinchivinti tas alhilacꞌaꞌiyaꞌich ni acjunin ixlacata ju atsucunti ju xtꞌakꞌa ju Dios ju vilhcha lactꞌiyan.
\p
\v 13 Jantu xamatiꞌ ju quilata ju lactꞌiyan ni laich cacꞌatsa ta yu junitach ju anch. Va quitꞌin ju iccꞌatsai ta yu junitach ju anch ni anch ju xacminacha ju lactꞌiyan. Chai anch ictꞌajun ju lactꞌiyan. Quitꞌin ju quimalakachatachilh ju Dios ni lapanac actsucuyaꞌ ju ani.
\v 14 Tachi ju Moisés ni maquilhta ju lu junta aseknicꞌa pus chunchach vachuꞌ tasqꞌuini ni aquimaquilhtacalh ju quitꞌin ju quimalakachatachilh ju Dios ni lapanac actsucuyaꞌ ju ani.
\v 15 Acsni chunch acnavicanach pus tachi chun ju aquilhilacaꞌanach jantu catsꞌankꞌayaꞌ. Alinch isꞌatsucunti ju conkꞌalhiyanta ju lactꞌiyan.
\s1 Na amapaini ju Dios ju lapanacni ju ani lacamunutpaꞌ
\p Ju Jesús tailhiꞌalh ju ixchivinti chai juni ju Nicodemo:
\p
\v 16 ―Ju Dios chunchach ju apumapaini ju lapanacni ju ani lacamunutpaꞌ ni quilhitapꞌuxlh ju quitꞌin ju lakatami istsꞌalh icjunita. Ju chunch tachi chun ju aquintalhilacaꞌanach jantu catsꞌankꞌayaꞌ. Alin isꞌatsucuntiꞌan ju conkꞌalhiyanta lactꞌiyan.
\v 17 Ju Dios jantiyuꞌ quilhimacamilh ju ani lacamunutpaꞌ ni va acꞌulanilh ixtalakꞌalhinꞌan ju lapanacni. Para alai va quilhimacamilh ni laquimacni cataputakꞌalhtaxtuyach ju lapanacni.
\p
\v 18 Ju quilhilacaꞌan pus tus ani jantuch mucꞌanican ju ixtalakꞌalhin. Para ju jantu quilhilacaꞌan pus tus ani mucꞌanicanta ju ixtalakꞌalhin va ixlacata ni jantu quilhilacaꞌanta ju laquintapakaꞌut ju lakatami istsꞌalh Dios icjunita.
\v 19 Icminta ju ani lacamunutpaꞌ ju quitꞌin ju tachi maclhcu icjunita ni icꞌamalacpucujunuꞌ. Para ju lapanacni jantu tuꞌuꞌ quintalhiula. Va palai kꞌox talhiula ni tachi ju va lacaꞌatatsꞌisni catatsuculh mas tuncujuntach. Tachi ju va lacaꞌatatsꞌisni ju tatꞌajun ni va tanaviputun ju macxcai. Chai yuchi alhimucꞌanicanta ixtalakꞌalhinꞌan.
\v 20 Chai tachi chun ju tanavitꞌajun ju jantu kꞌox pus jantu kꞌox quintalhiulai ju quitꞌin ju tachi maclhcu icjunita ni icꞌamalacpucujunuꞌ. Chai jantu quintalakmin ju laquimacni va ixlacata ni jantu catasu tuchi tanavich.
\v 21 Para ju navi ju stavasalanti quilakmin ju quitꞌin ju tachi maclhcu icjunita ni icꞌamalacpucujunuꞌ. Ju chunch laich calaktsꞌincanaꞌ tuchi navich ni laꞌixtachaput Dios ju navi.
\s1 Ixꞌamigo ju tamakꞌaxtꞌokꞌa
\p
\v 22 Acsni tapasakꞌolhch ju ani taxtokni pus astan ju Jesús alactꞌamilh ju ixꞌamamakaꞌui laxaꞌestado Judea. Chai acsni ixꞌalactꞌavilhcha ju anch pus ixtaꞌamakpaxananch ju ixꞌamamakaꞌui.
\v 23 Ju Xivan vachuꞌ ixꞌamakpaxanan ju lakꞌachakꞌan Enón ju vanin ixtꞌavi ju lakꞌachakꞌan Salim. Chai ju ixtachꞌakꞌokꞌaich ju yuchi anch ju ixꞌamakpaxaich ni na lhu ixꞌalin ju xcan ju anch.
\v 24 Ju Xivan tucaꞌ ixtꞌalhnucanta.
\p
\v 25 Pus ju israelitanin ixtalhilanita ni na paklhu ixtalacchꞌakꞌai ixlaccꞌaꞌulhꞌan chai na paklhu ixtakꞌaichꞌakꞌai ni ma chunch salaka caꞌalaktsꞌilh ju Dios. Pus ju ixꞌamamakaꞌui ju Xivan ni jantu chun ixtanavi tachi ju ixtalhilanitach ju istꞌaꞌisraelitanin pus atꞌalakꞌajicalh ju ixlapanacni ju Xivan.
\v 26 Chai ju ixꞌamamakaꞌui ju Xivan talakmilh ju ixꞌamamakaꞌunuꞌan. Tajunich:
\p ―Amamakaꞌunuꞌ ju anuꞌ lapanac ju ixtꞌavilhchan lhimakꞌantacutni xaxcan Jordán ju chavai amakpaxananch chai na lhu ju talakxcavataji ju yuchi. Yuchi ju anuꞌ ju lhichꞌivin.
\p
\v 27 Chai akꞌalhtayanalh ju Xivan. Ajunich:
\p ―Jantu lai xamatiꞌ amaklhtayanan tuꞌuꞌ tachaput ni jantu lactꞌiyan ju caxtaknicancha.
\v 28 Miꞌakstuꞌan uxijnan ju kꞌasmatꞌatꞌit acsni icnaulhch ni jantu quitꞌin ju icCristo ju noncan camalakachatachilh ju Dios. Ju quitꞌin va pꞌulhnan icmalakachacantachilh. Astan mintacha ju yuchi.
\v 29 Junta tamakꞌaxtꞌokꞌa tam tsꞌalh pus anchach vachuꞌ ya ju ixꞌamigo chai ni kꞌasmatꞌa ixchivinti ju anuꞌ ixꞌamigo acsni tꞌachivinin ju isꞌasqꞌuininti pus na kꞌachanch. Pus vana va chun ju quitꞌin. Na ickꞌachan acsni takꞌasmatni ixchivinti ju Cristo ju lapanacni.
\v 30 Tasqꞌuini ni cacꞌatsacalh ni yuchi ju xakꞌai. Para tasqꞌuini ni jantu tuꞌuꞌ quintapalhni cava ju quitꞌin.
\s1 Ju lapanac ju mintachalh lactꞌiyan
\p
\v 31 Ju lactꞌiyan mintachalh yuchach ju palai xakꞌai. Ju va lhilapanac tsucuta pus va lhilapanac tꞌajun chai va ixtaxtokni lacamunutpaꞌ ju lhichivinin. Para ju lactꞌiyan mintacha yuchi ju palai xakꞌai.
\v 32 Ju tuchi laktsꞌinta ju yuchi chai kꞌasmatꞌach pus yuchach ju najun. Para jantu xamatiꞌ lacaꞌini ju ixchivinti.
\v 33 Ju lacaꞌini ju ixchivinti mavasalai ni vas najun ju Dios.
\v 34 Ju macaminta ju Dios pus chivinin ixchivinti Dios. Chunchach chivinin ni jantu va lhcaxtꞌakꞌa ju Dios ju Spiritu Santu.
\v 35 Ju xapai Dios mapaini ju istsꞌalh. Chai xtaknikꞌota ixtachaput ju istsꞌalh.
\v 36 Ju lhilacaꞌanch ju istsꞌalh Dios alin isꞌatsucunti ju conkꞌalhiyanta tus lactꞌiyan. Ju jantu tuꞌuꞌ lhiulani ju istsꞌalh Dios jantu catiꞌalilh ju isꞌatsucunti ju conkꞌalhiyanta lactꞌiyan ni va ulanich ixtalhkꞌamti ju Dios ju anuꞌ lapanac.
\c 4
\s1 Jesús tꞌachivinilh ju chakoꞌulh amachakaꞌ Samaria
\p
\v 1 Ju Jesús machakxa ni ixtamackꞌalhakꞌasmatnantach ju fariseonin ni ixlacnoncanch ni palai lhu ixlapanacni ju Jesús chai palai lhu ixꞌamakpaxanan ju yuchi. Palai jantu ju Xivan.
\v 2 Mas jantu xaꞌamakpaxanan ju Jesús. Va yuꞌunch ju ixtaꞌamakpaxanan ju ixꞌamamakaꞌui.
\v 3 Pus ju Jesús acsni cꞌatsalh ni chunch ixtakꞌasmatꞌa ju fariseonin pus taxtulh ju xaꞌestado Judea. Va ixꞌanchokoputun ju xaꞌestado Galilea.
\v 4 Chai yuchi lhitapasatilalh ju xaꞌestado Samaria.
\p
\v 5 Ju yuchi milh ju lakꞌachakꞌan junta ixjuncan Sicar laxaꞌestado Samaria. Vanin tꞌalachꞌapata ju ixtꞌun ju anuꞌ makꞌaniya israelita ju ixjuncan Jacob. Anch junta lhikꞌailaktsꞌinta ju istsꞌalh ju ixjuncan José.
\v 6 Chai ju anch ixvi ju pos ju ixꞌanuch ixjunita ju Jacob ju makꞌanchich. Pus anchach ju astacnalh ju Jesús ni na ixkꞌoptach ni na makat ju ixꞌalhtananta. Chai ixtꞌajunch kꞌatuncunuꞌ.
\v 7 Chai chaꞌalh pumatam chakoꞌulh amachakaꞌ Samaria. Va ixꞌiputun ju xcan. Pus ju Jesús junich:
\p ―Aqꞌuintꞌakꞌotꞌich lacatsꞌunin ju mixcan.
\p
\v 8 Pus ju ixꞌamamakaꞌui ju Jesús ixtaꞌanta ju lakꞌachakꞌan tamonin ju vaiti.
\v 9 Pus ju anuꞌ chakoꞌulh ju amachakaꞌ Samaria ixjunita chanich lhikꞌalhtayanalh:
\p ―Ju uxintꞌi ni va israelitaꞌat tajuch ni va qꞌuisqꞌuinipꞌalai ju xcan. Ju quitꞌin ni icꞌamachakaꞌ Samaria. Ju israelitanin jantu lai tatꞌalaxakꞌalai ju amachakꞌan Samaria.
\p
\v 10 Chai akꞌalhtayanalh ju Jesús. Junich:
\p ―Ju uxintꞌi jantu mispꞌai ju ixlhakꞌailaktsꞌin Dios. Chai jantu qꞌuimispꞌai tichi chavaich ju quitꞌin ju icjunan ni aqꞌuintꞌakꞌotꞌich ju mixcan. Ni xaqꞌuimispꞌatꞌi cava pus alai uxintꞌi xaqꞌuisqꞌuinin chai xacxtaknin ju xcan ju xtꞌakꞌa ju atsucunti.
\p
\v 11 Pus ju chakoꞌulh chani lhikꞌalhtayanalh:
\p ―Ji compari matiꞌ ju apꞌuꞌitꞌi ju xcan. Ju pos ni na putalhman. Tas anchach ju lai aꞌiyaꞌ ju mixcan ju xtꞌakꞌa ju atsucunti.
\v 12 Ju uxintꞌi ja xakꞌaiꞌat. Ja palai jantu ju makꞌaniya quimpaiꞌan Jacob ju quintaxtaknitan ju ani pos. Anich ju kꞌotlh ju yuchi chai ju isꞌaskꞌatꞌan chaich ju ixꞌatapacxat.
\p
\v 13 Ju Jesús chani lhikꞌalhtayanalh:
\p ―Va tichi chavaich ju cakꞌotꞌaꞌ junima xcan caquicxixchokoyaꞌ.
\v 14 Para va tichi chavaich ju cakꞌotꞌaꞌ ju xcan ju acxtakniyaꞌ quitꞌin jantu tavanan catiquicxixchokolh. Ju anuꞌ xcan ju acxtakniyaꞌ quitꞌin tachi kꞌai pos cajunaꞌ laꞌixꞌalhunut ju jantu tavanan caxixaꞌ. Chai yuchi ju capuꞌalinach isꞌatsucunti ju conkꞌalhiyanta tus lactꞌiyan.
\p
\v 15 Pus ju chakoꞌulh chanich juni:
\p ―Pus ji compari aqꞌuixtꞌakninch ju anuꞌ xcan. Ju chunch jantuch acquicxixchokoyaꞌ. Chai jantu acminaꞌ iniꞌ ju ani.
\p
\v 16 Chai ju Jesús chanich juni ju anuꞌ chakoꞌulh:
\p ―Aꞌinchich tꞌasaniniꞌ ju mimpapa. Kꞌaixtamch atꞌatꞌanaꞌ.
\p
\v 17 Chai ju chakoꞌulh chani lhikꞌalhtayanalh:
\p ―Matiꞌ ju quimpapa ju quitꞌin.
\p Chai ju Jesús chani juni:
\p ―Stavasalantich ju naꞌun ni matiꞌ ju mimpapa.
\v 18 Pumaquisich lapanacni ju tꞌatsꞌucꞌumakꞌantꞌa. Chai ju chavai tꞌatꞌaꞌun jantuch yuꞌ ju mimpapa. Stavasalantich ju naꞌun.
\p
\v 19 Pus ju chakoꞌulh chani lhikꞌalhtailh:
\p ―Compari iccꞌatsaich ni laich vachuꞌ naꞌun ixchivinti Dios.
\v 20 Ju quilacpai quincꞌan anch ju anuꞌ lactalhpa ju ixtaꞌan lakꞌayanin ju Dios. Para ju uxijnan ju israelitanin untꞌatꞌit nonatꞌit ni va anch ju lakꞌachakꞌan Jerusalén ju lai acꞌalh lakꞌayanaꞌ ju Dios.
\p
\v 21 Pus ju Jesús chani lhikꞌalhtailh:
\p ―Chakoꞌulh aqꞌuilacꞌaꞌininch ju acjunan. Caminaꞌ avilhchan ni jantu atꞌilakꞌayatꞌit ju xapai Dios nin yuchi ju ani lactalhpa nin anch ju lakꞌachakꞌan Jerusalén.
\v 22 Ju uxijnan jantu cꞌatsꞌayatꞌit tuchꞌi ju lakꞌayayatꞌit. Ju quijnan iccꞌatsayau tuchi ju iclakꞌayayau ni laquilhiquijnan ju israelitanin icjuntau ju caꞌalinaꞌ ju amakꞌalhtaxtunuꞌ.
\v 23 Cachinach ju avilhchan ju vasalh nomputun ni xakꞌai ju xapai Dios catanonach laꞌixlhichux ixꞌalhunutꞌan chai calakꞌayayaꞌ tachi ju kꞌachani ju yuchi. Chai mas chavaich chunch catalalh. Pus ju xapai Dios lacasqꞌuin ni cataꞌalilh ju lapanacni ju chunch catalakꞌaya.
\v 24 Ju Dios matiꞌ ixlacatuna. Ju talakꞌayaich ju yuchi tasqꞌuini ni catalakꞌaya laꞌixꞌalhunutꞌan chai tachi ju kꞌachani ju yuchi.
\p
\v 25 Ju chakoꞌulh chani juni:
\p ―Iccꞌatsaich ni caminaꞌ ju noncan camalakachatachilh ju Dios. Yuchi ju talhimapakaꞌui Cristo. Chai acsni caminaꞌ ju yuchi aquintamavasalanikꞌoyan chux ju taxtokni.
\p
\v 26 Akꞌalhtayanalh ju Jesús:
\p ―Quitꞌinch ju icCristo ju ictꞌachivinan.
\p
\v 27 Acsnich ju tachincha ju ixꞌamamakaꞌui ju Jesús. Pus na talhamakꞌaninilh ni va ixtꞌajunch tꞌachiviniꞌ ju anuꞌ chakoꞌulh ju Jesús. Para jantu xamatiꞌ ju lai casacminilh ju laich cajunilh: “Tijuch ju sasacmi” U “Tijuch ju xalhitꞌachꞌivinin ju chakoꞌulh”.
\v 28 Pus ju chakoꞌulh macauꞌula ju ixꞌakxau chai anchokolh ju lakꞌachakꞌan. Alh alacjuniniꞌ ju amachakꞌan anch. Ajunich:
\p
\v 29 ―Caꞌauch laktsꞌinin ju anuꞌ lapanac ju xaquijuni tachi chun ju icnavitach. Ja jantiyuꞌ nuꞌ ju Cristo ju noncan camalakachatachilh ju Dios.
\p
\v 30 Pus ju acsnich lana tataxtucha ju lapanacni ju lakꞌachakꞌan chai talakmilh ju Jesús.
\v 31 Acsni tucaꞌ ixtachaꞌan ju lapanacni pus ju ixꞌamamakaꞌui ju Jesús takꞌasilhijunich ju vaiti. Tajuni:
\p ―Amamakaꞌunuꞌ avaich.
\p
\v 32 Para ju yuchi chani alhikꞌalhtailh:
\p ―Ju quitꞌin alin ju tuchi icꞌui. Para ju uxijnan jantu cꞌatsꞌayatꞌit tis talakxtuch.
\p
\v 33 Ju acsnich ju ixꞌamamakaꞌui ju Jesús talaxakꞌalalh ju ixlhiꞌakstuꞌan. Talajunich:
\p ―Ja xamatiꞌ nuꞌ ju xalhimini ju ixvaiti.
\p
\v 34 Ju Jesús ajunich:
\p ―Tachi ju uxijnan ni tachapun jun ju milacatunaꞌan acsni venatꞌit pus vana va chun ju quitꞌin. Tachapun jun ju quintacꞌatsan acsni icnavini ju ixkꞌachat ju quimacaminta chai ni acnavinikꞌo ju ixlhichꞌalhcat.
\v 35 Chai jantu anaꞌuntꞌit ju uxijnan ni ticꞌacxacaꞌ lakatꞌatꞌi malhquiyuꞌ tus acsni cachinaꞌ ju paꞌaxkꞌan. Iclajunau: Alacꞌavanantꞌit. Alacꞌapꞌitꞌit ju lacacuxtun. Na lacxixtach. Laich acꞌaxkꞌanalh. Pus vana va chun ju ani taminta lapanacni. Na lhu ju takꞌasmatputun ixchivinti Dios chai catalacaꞌiyach.
\v 36 Pus ju camavasalayach ju quilacata alin ju ixtalhaja chai aꞌaktaijui lhu lapanacni ni laich catalacaꞌiyach chai caꞌalinaꞌ isꞌatsucuntiꞌan ju conkꞌalhiyaꞌ tus lactꞌiyan. Ju pꞌulhnan canonaꞌ ju chivinti cakꞌachanach. Chai ju xamavasalanaꞌ ju tuchi catalacaꞌiyaꞌ vachuꞌ cakꞌachanaꞌ.
\v 37 Ju ani chivinti mavasalai ni stavasalanti tachi ju noncan: “Pumatam ju achꞌananan. Chai apumatam ju caꞌaxkꞌananaꞌ”.
\v 38 Quitꞌin ju xaclamalakachayau ju axkꞌanti junta jantu uxijnan chꞌantꞌatꞌit. Ju chunch nomputun ni aliꞌin ju pꞌulhnan tanajunta ju chivinti ju quilacata chai uxijnan ju xaꞌamavasalanin ju chivinti untꞌatꞌit chai quintalhilaksilh lhu ju lapanacni.
\p
\v 39 Na lhu ju amachakꞌan Samaria talhilacaꞌalh ju Jesús va ixlacaꞌatalh ju ixchivinti ju anuꞌ chakoꞌulh acsni ajunilh: “Ju yuchi quijonkꞌoch chux tuchi icnavitach”.
\v 40 Pus ju amachakꞌan Samaria acsni talakꞌalh junta ixvilhcha ju Jesús tatapaininilh ni caꞌalh tsucunuꞌ pantsꞌiquis ju laꞌixlakꞌachakꞌanꞌan. Pus ju Jesús anch tolhcha lakatꞌui avilhchan.
\v 41 Pus acsnich ju palai lhu talhilacaꞌalh ju Jesús ni takꞌasmatnilh isꞌakstuꞌan ju ixchivinti.
\v 42 Chanich tajuni ju chakoꞌulh:
\p ―Ju chavai jantuch va laminchivinti ju iclacaꞌiyauch. Ju chavai quiꞌakstu quincꞌan xackꞌasmatꞌau ju ixchivinti ju ani ya lapanac chai iccꞌatsayau ni slivasalh ni yuchach ju Cristo ju ani ya ju noncan ni camalakachatachilh ju Dios. Yuchi ju caꞌamakꞌalhtaxtuyaꞌ ju lapanacni ju ani lacamunutpaꞌ.
\s1 Ju Jesús cꞌuchꞌu ju istsꞌalh ju xakꞌai
\p
\v 43 Ju ixlhilakatꞌutu avilhchan taxtulh ju Jesús ju anch lakꞌachakꞌan. Alhch ju laxaꞌestado Galilea.
\v 44 Va isꞌakstu ju Jesús chani ixnajunta:
\p ―Ju tam lapanac ju najun ixchivinti Dios jantu tuꞌuꞌ lhiulacan ju laꞌixtꞌun.
\p
\v 45 Acsni chaꞌalh ju xaꞌestado Galilea pus ju amachakꞌan anch va lhikꞌachach taꞌamaklhtayanalh ju Jesús ni ixtalaktsꞌintach tachi chun ju lhamakꞌan ju ixnavitacha ju lakꞌachakꞌan Jerusalén acsni cꞌatanicanchalh ju anch. Ju amachakꞌan Galilea vachuch ixtamakquilata junta alilh cꞌatan.
\p
\v 46 Chai aktam anchokopa ju Jesús ju lakꞌachakꞌan Caná lhiGalilea junta ixlakꞌoxitacha ju xcan ju lapala vino. Chai ju istsꞌalh ju pumatam xakꞌai ixmacha lakꞌachakꞌan Capernaum. Va ixtakꞌankꞌai.
\v 47 Pus ju anuꞌ lapanac kꞌasmatlh ni taxtutachalh ju Jesús ju xaꞌestado Judea. Chai cꞌatsalh ni cachinach ju xaꞌestado Galilea. Pus ju anuꞌ lapanac lakꞌalh ju Jesús. Tapaininilh ni caꞌalh chai palaich canavi ju istsꞌalh ni va ixtꞌajunch niniꞌ.
\v 48 Ju acsnich ju Jesús juni:
\p ―Jantu tavanan lai lacꞌaꞌiyatꞌit ni jantu laktsꞌinatꞌit tuꞌuꞌ ixpulacaꞌican chai ju tuꞌuꞌ lhamakꞌan.
\p
\v 49 Chai ju anuꞌ xakꞌai junich ju Jesús:
\p ―Quiꞌamigo apꞌitꞌich laktsꞌiniꞌ ju quintsꞌalh ni tucaꞌ ni.
\p
\v 50 Pus ju Jesús junich:
\p ―Aꞌinchich. Palaich junita ju mintsꞌalh.
\p Pus ju anuꞌ lapanac lacaꞌinilh ju ixchivinti ju Jesús ju tuchi junilh chai anchokolh laꞌixchakaꞌ.
\v 51 Chai acsni ixꞌanta ju lacati pus taquipakxtokchilh ju ixlapanacni. Taquimacꞌatsanichilhch ni palaich ju istsꞌalh.
\v 52 Chai ju anuꞌ xapai takꞌankꞌan asacmich ju ixlapanacni tuchi horach ju palai xajun ju istsꞌalh. Chai ju xalapanacni tajunich:
\p ―Cutanch. Lakatam hora atokꞌoxanaꞌ ju macaulh ju scacat.
\p
\v 53 Pus ju xapai takꞌankꞌan lana machakxa ni acsnich hora ju naulh ju Jesús ni palaich ju isꞌaskꞌatꞌa. Pus ju anuꞌ lapanac chai chux ju ixtatanumanalh laꞌixchakaꞌ lana talhilacaꞌalh ju Jesús.
\p
\v 54 Acsni taxtucha ju laxaꞌestado Judea ju Jesús pus chaꞌanchokolh ju laxaꞌestado Galilea. Chai yuchach ju ani ju ixlhilakatꞌuich ixpulacaꞌican ju navi ju Jesús ju laxaꞌestado Galilea.
\c 5
\s1 Junta ixvi xcan anch ixma ju va ixlakatumi
\p
\v 1 Acsni tapasalh ju ani taxtokni pus ju Jesús alh ju lakꞌachakꞌan Jerusalén chai ju acsni ixcꞌatanꞌan ixjunita ju israelitanin.
\v 2 Ju lakꞌachakꞌan Jerusalén ixꞌalin lakatam malhtich junta ixꞌapumanucan ju borregojni. Chai anch ixvi lakatam tanque ju ixjuncan lacalhihebreo Betesda. Chai ixꞌalin lakaquis samakspaꞌ.
\v 3 Ju anch na lhu ixꞌamamacanta ju takꞌankꞌanin. Ju aliꞌin va alakꞌachꞌix ixtajunita. Ju aliꞌin va ixchꞌantakꞌalhita. Ju aliꞌ va ixtaxixta laꞌixlacatunaꞌan. Sich yuꞌunch ju ixtapacxanch ni calucunulh ju xcan.
\v 4 Aktamixnin pumatam anquilh ixmalucuni ju anuꞌ xcan. Chai ju pꞌulhnan catajuyaꞌ ju lacatanque acsni lucununtach ju xcan pus palai ixjun mas va tuchi takꞌankꞌat cachꞌapalh.
\v 5 Chai ixma pumatam lapanac ju ixpacxanta ixtakꞌankꞌat lakapꞌuxamcautsajin cꞌata.
\v 6 Ju Jesús laktsꞌilh junta ixma. Chai cꞌatsalh ni na makꞌaniya takꞌankꞌat ju ixchꞌapata. Pus junich:
\p ―Ja lacꞌasqꞌuin ni palai aꞌuntꞌi.
\p
\v 7 Pus akꞌalhtayanalh ju anuꞌ takꞌankꞌan. Junich:
\p ―Quiꞌamigo matiꞌ xamatiꞌ ju lai aquimuju ju lacxcan acsni tꞌajun lucunuꞌ. Acsni ictajuputun ju quitꞌin akꞌantamch tajumapa.
\p
\v 8 Ju Jesús junich:
\p ―Akꞌostꞌaꞌulhch. Asactꞌich ju mimputaman chai alhtꞌanch.
\p
\v 9 Ju acsnich lana palai va ju lapanac. Saclh ju ixputaman chai alhtanalh. Ju acsnich avilhchan paꞌastacni ixjunita.
\v 10 Ju acsnich ju xalackꞌajin israelitanin chani tajuni ju anuꞌ takꞌankꞌan ixjunita:
\p ―Ju chavai avilhchan paꞌastacni junita. Jantu lhijun lacalhamapꞌaksin ni lai acꞌucꞌa ju mimputaman.
\p
\v 11 Pus ju takꞌankꞌan ixjunita alackꞌalhtailich. Ajunich:
\p ―Ju palai xaquinavi isꞌakstu ju xaquijuni ni acsaclh ju quimputaman chai acꞌalhtanalh.
\p
\v 12 Pus palai taquilhasacmi. Tajuni:
\p ―Tis chavaich ju xajunan ni asactꞌich ju mimputaman chai alhtꞌanch.
\p
\v 13 Pus ju anuꞌ ju palai ixnavicanta jantu ismispai tichi chavaich ju palai ixnavita. Ju Jesús ixmakpulacnatꞌajun laꞌixtalhavat lapanacni ju ixtayanalh anch.
\v 14 Chai ju astan lacpujitat ju tꞌalapakxtoklh ju Jesús ju anuꞌ ixcꞌuchꞌuta. Chai junich:
\p ―Alaktsꞌich. Palaich unitꞌa. Tun alactꞌuꞌunumpꞌalh. Tun palai macxcai camilh ju mimakꞌalhkꞌajnat.
\p
\v 15 Ju anuꞌ lapanac alh ajuniniꞌ ju xalackꞌajin israelitanin ni yuchach ju Jesús ju palai ixnavita.
\v 16 Pus ixlhiyuchach talhixcailich ju Jesús ju xalackꞌajin israelitanin. Chai ixtalhimakniputunch ni ixnavich ju ani taxtokni ju va avilhchan paꞌastacni.
\v 17 Ju Jesús akꞌalhtayanalh:
\p ―Ju quimpai tus chavai ju chꞌalhcatnan. Chai vachuꞌ ju quitꞌin icchꞌalhcatnan.
\p
\v 18 Pus acsnich ju palai ixtalhimakniputun ju israelitanin ju Jesús. Para jantu va yuchi ju ixtalhimakniputun ni va chꞌalhcatnalh ju anuꞌ avilhchan paꞌastacni para vachuꞌ ixlacaꞌatalh ni va ixnajunch ni Dios ju ixpai. Ju chunch ixnomputun ni va ixtꞌachunchach ixjunita ju Dios.
\s1 Ixpuꞌucxtin istsꞌalh Dios
\p
\v 19 Chai akꞌalhtayanalh ju Jesús. Ajunich:
\p ―Slivasalh ju iclajunau. Ju quitꞌin ni va icsaꞌaskꞌatꞌa pus jantu lai icnavi tuꞌuꞌ ju va laquiꞌakstu. Yuchi ju icnavich ju icmaklaktsꞌinch ju quimpai. Ju chunch tachi chun ju navi ju quimpai vachuch yuchi ju icnavi ni istsꞌalh ju quitꞌin.
\v 20 Ju quimpai na quimapaini ni istsꞌalh ju quitꞌin. Chai quimalacasunikꞌojuta tachi chun ju taxtokni ju navi ju yuchi. Chai aquimalacasuniyaꞌ palai kꞌai lhamakꞌan ni laich alhamakꞌanininaꞌitꞌit.
\v 21 Tachi ju quimpai ni lai malokꞌoni ju nitach chai xtaknichokoi ju isꞌatsucunti pus chunchach vachuꞌ ju quitꞌin ni istsꞌalh icjunita. Vachuꞌ lai acxtakniyaꞌ ju isꞌatsucunti va tichi chavaich ju acxtakniputunach.
\v 22 Ju quimpai jantu laktsꞌintanui xamatiꞌ. Para quixtaknita quimpuxakꞌai ni lai acꞌalaktsꞌintanu ju lapanacni.
\v 23 Pus yuchi aquintalhilakꞌayayach tachi chun ju lapanacni tachi ju talakꞌayaich ju quimpai. Ju jantu quilakꞌayai ju quitꞌin ni istsꞌalh icjunita pus sin quimpai jantu lakꞌayai ni yuchi ju quimalakachatachilh.
\p
\v 24 Slivasalh ju iclajunau. Ju cakꞌasmatꞌaꞌ ju quinchivinti chai ju calhilacaꞌanach tichi chavaich ju quimalakachatachilh pus alinch isꞌatsucunti jonkꞌalhita lactꞌiyan. Ju yuchi jantuch calaktsꞌintanucanaꞌ ixlacata ixtalakꞌalhin. Chai jantu catiꞌalh junta jonkꞌalhita makꞌalhkꞌajnat. Alai tus chavai lana alinch isꞌatsucunti ju conkꞌalhiyanta tus lactꞌiyan.
\v 25 Slivasalh ju iclajunau. Ju atipuꞌanta u mas chavai ju jantucaꞌ talhilaksi ju Dios aquintakꞌasmatniyach ju quinchivinti ni istsꞌalh ju Dios ju quitꞌin. Chai tachi chun ju aquintakꞌasmatniyach catatsucuchokoyach.
\v 26 Tachi ju quimpai ni lai axtakni ju isꞌatsucuntiꞌan ju lapanacni pus chunchach vachuꞌ ju quitꞌin ni istsꞌalh icjunita. Ju yuchi quixtaknita ju quintachaput ni lai acꞌaxtakniyaꞌ isꞌatsucuntiꞌan ju lapanacni.
\v 27 Pus vachuch quixtaknilh ju quimpokꞌai ni laich icꞌalaktsꞌintanui ju lapanacni ni quitꞌinch ju quimalakachatachilh ju Dios ni lapanac actsucuyaꞌ ju ani.
\v 28 Jantu alhamakꞌaninintꞌit ju ani. Caminaꞌ ju avilhchan acsni catakꞌasmatꞌach ju quinchivinti tachi chun ju taꞌacnununta.
\v 29 Chai catataꞌacxtuyach. Ju tanavita kꞌox caꞌaxtaknicanach isꞌatsucuntiꞌan jonkꞌalhita lactꞌiyan. Ju tanavita ju talakꞌalhin caꞌaxtaknicanach ixmakꞌalhkꞌajnatꞌan junta jonkꞌalhita.
\s1 Ixnonin ixlacata ju Cristo
\p Ju Jesús tailhiꞌalh ju ixchivinti chai chani ajunilh ju istꞌaꞌisraelitanin:
\p
\v 30 ―Jantu lai icnavi tuꞌuꞌ ju va quiꞌakstu. Tachi ju icjuncanch chunchach ju icmucꞌai ju talakꞌalhin. Chai mas icmucꞌai ju talakꞌalhin ju quitꞌin para soknicꞌa ju icnavi ni jantu va quinkꞌachat quiꞌakstu icpuxcajui. Va yuchi ju quimpai icnaviniputun ju ixkꞌachat ni yuchi ju quimacaminta.
\v 31 Pus ni va quiꞌakstu cava ju icnajun ni icxakꞌai pus ju quinchivinti jantu caꞌixlhitapalalh.
\v 32 Para alin pumatam ju xtꞌakꞌa ju chivinti ju quilacata. Chai iccꞌatsai ni stavasalanti ju tuchi najun.
\v 33 Chai uxijnan miꞌakstuꞌan ju malakꞌachꞌanitꞌit pumatam ju Xivan ju amakpaxanaꞌ ni caquilhasacmi ta lhijunitach. Chai ju yuchi tajunin ju istavasalanti.
\v 34 Pus ju quitꞌin jantu tuꞌuꞌ iclhiulai ju va ixchivinti lapanac. Ju iclapujunauch ju ani tsꞌa ma laich atꞌakꞌalhtꞌaxtꞌutꞌit ju uxijnan.
\v 35 Ju Xivan tachi maclhcu ixjunita ju maktaji chai mapulhcui. Ju uxijnan lhikꞌachꞌantꞌit pantsꞌiquis ni ixtamapulhcuniyan lamintacꞌatsanꞌan.
\v 36 Para ju lhamakꞌan ju icnavi putasui tichi chavaich ju quitꞌin. Ju yuchi palai lhitapalai. Palai jantu ju tuchi quilhichivinilh ju Xivan. Ju quimpai quixtaknilh ju ixlhichꞌalhcat ni acnavinikꞌo. Chai ju anuꞌ lhichꞌalhcat ju icnavi yuchach ju putasui tichi chavaich ju quitꞌin ni quimpai ju quimalakachatachilh.
\v 37 Chai quimpai ju xaquimalakachayachilh yuchi ju xtakta ju chivinti ju quilacata. Ju uxijnan jantu tavanan kꞌasmatꞌatꞌit ju ixchivinti nin alaktsꞌintꞌit ta yu junitach.
\v 38 Ju uxijnan jantu pꞌacxantꞌatꞌit ju ixchivinti lamiꞌalhunutꞌan va ixlacata ni jantu quilaquiclacaꞌiyau mas yuchi ju quimalakachatachilh.
\v 39 Tasqꞌuini ni alhitꞌamakꞌaꞌutꞌit kꞌox ju ixchivinti Dios ni nonatꞌitch ni anch ju alhitꞌaꞌuyaꞌitꞌit ju atsucunti ju conkꞌalhiyanta tus lactꞌiyan. Chai alhitꞌaꞌuyaꞌitꞌit ni vana anch quilhichivinin quilacata.
\v 40 Para ju uxijnan jantu tꞌampꞌutꞌunatꞌit ju laquimacni ni laich apꞌacxantꞌit ju miꞌatsucuntiꞌan ju jonkꞌalhita.
\p
\v 41 Ju quitꞌin jantu iclacasqꞌuin ni canaulh ju va tam lapanac ni icxakꞌai.
\v 42 Iccꞌatsai ni jantu mapꞌainiyatꞌit ju Dios lamiꞌalhunutꞌan ju uxijnan.
\v 43 Ju quitꞌin laꞌixtapakaꞌut ju quimpai icminta. Chai jantu tuꞌuꞌ quilalhiulayau. Para ni apumatam camilh laꞌixtapakaꞌut isꞌakstu pus ju yuchi na tuꞌuꞌ alhiulayaꞌitꞌit.
\v 44 Tas laich aquilalhilacaꞌiniyau ju quitꞌin ni va lamilhiꞌakstuꞌan ju laꞌunatꞌit ni na xalackꞌajin untꞌatꞌit. Jantu lacꞌasqꞌuinatꞌit ni Dios ju canaulh ni xalackꞌajin untꞌatꞌit.
\v 45 Tun va anaꞌuntꞌit ni quitꞌin ju iclachivimakꞌanau ju laꞌixꞌucxlacapuꞌ ju quimpai. Alin tichi chavaich ju tachivimakꞌanan. Yuchi ju ixjuncan Moisés mas yuchi ju lhilacꞌapꞌinatꞌit ju uxijnan.
\v 46 Ju uxijnan ni vasalh cava ixlacꞌaꞌinitꞌit ju Moisés pus vachuꞌ xaquilalacaꞌiniuch ju quitꞌin ni quilhiꞌatsꞌoknunta quilacata ju yuchi.
\v 47 Para ni jantu lacꞌaꞌiyatꞌit ju isꞌatsꞌoknut ju Moisés tas alhilacꞌaꞌiyaꞌitꞌitch ju quinchivinti.
\c 6
\s1 Lakaquis milh ju amava ju Jesús
\p
\v 1 Astan ju Jesús alh ju lhimakꞌantacutni ju atantsꞌin Galilea junta vachuꞌ juncan Tiberias.
\v 2 Na lhu lapanacni tachꞌakꞌokꞌalh ju Jesús ni ixtalaktsꞌinch ju lhamakꞌan ju ixꞌanavini ju takꞌankꞌanin.
\v 3 Pus ju Jesús alh ju lactalhpa chai anch alactꞌatolhcha ju ixꞌamamakaꞌui.
\v 4 Quilhpaminta ixcꞌatanꞌan ixjunita ju istꞌaꞌisraelitanin acsni ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin.
\v 5 Acsni lacaꞌanchokolh ju Jesús junta pumilh pus laktsꞌilh ni na lhu ixtaminta ju lapanacni. Pus ju Jesús junich ju Pilipe:
\p ―Tas anchach ju lai catamaꞌu ju vaiti ni camavauch ju lapanacni.
\p
\v 6 Para ju chunch punaulh ju Jesús va ixpulaktsꞌintanuputun ju Pilipe. Ju Jesús isꞌakstu iscꞌatsai tuchi ju canaviyaꞌ.
\v 7 Pus akꞌalhtayanalh ju Pilipe. Najunch:
\p ―Mas aclhitamaulh ju vaiti xatalhaja lakatꞌui cientos avilhchan ca jantu catitalhilalh mas va lactsꞌunin ju acꞌaxtaknilh ju lapanacni.
\p
\v 8 Pus ju pumatam ixtamamakaꞌun ispꞌisekꞌe ju Simón Pitaluꞌ ixjunita. Ju yuchi ixjuncan Tilix. Ju yuchi junilh ju Jesús:
\p
\v 9 ―Ani ya pumatam tsꞌalh ju chꞌapata aksquis xavati cebada chai lakatꞌui pamata. Va yuchi ni va lacatsꞌunin. Ju lapanacni na ilhuꞌan.
\p
\v 10 Ju acsnich ju Jesús ajunich ju ixꞌamamakaꞌui:
\p ―Aꞌunitꞌitch ju lapanacni ni catatavilhch.
\p Pus na ixma atsꞌin junta tatavilhch ju lapanacni. Ixtachaꞌanta lakaquis milh jokꞌatni.
\v 11 Ju Jesús acsni chꞌapalh ju anuꞌ vati pus xtaknilh lhakꞌailaktsꞌiuch ju Dios. Astan ju axtaknilh ju ixꞌamamakaꞌui. Pus ju anuch ixꞌamamakaꞌui tamakpitsilh laꞌixtalhavat lapanacni ju ixtavilanalhch lacatsꞌinan. Vana va chun navicalh ju pamata. Chai taꞌulhch tachi ju talacasqꞌuilhch.
\v 12 Acsni talhilalhch pus ju Jesús ajunich ju ixꞌamamakaꞌui:
\p ―Asactꞌitch ju vaiti ju xajacha. Ju chunch jantu tuꞌuꞌ catsꞌankꞌayaꞌ.
\p
\v 13 Pus acsni tasaclh chaꞌalh lakacautꞌui tankꞌalin ju xajchalh ju anuꞌ aksquis xavati cebada. Yuchi ju tamaxajnichalh ju taꞌulh ju ixtalhavat lapanacni.
\v 14 Ju anuch lapanacni acsni talaktsꞌilh ju anuꞌ lhamakꞌan ju navilh ju Jesús pus tanaulh:
\p ―Ju ani slivasalh ca yuchach ju anuꞌ lapanac ju caminach nonaꞌ ixchivinti Dios ju ani lacamunutpaꞌ.
\p
\v 15 Ju Jesús acsni machakxalh ni va tapꞌastu ixtanaviputun kꞌai ucxtin pus alackꞌosmakꞌalh ju lapanacni. Alh tolhnaꞌ lactalhpa.
\s1 Ju Jesús alhtanalh laꞌixꞌucxni xcan
\p
\v 16 Acsni ixtꞌajunch tokꞌoxanaꞌ pus taꞌalh ju lacaꞌatantsꞌin ju ixꞌamamakaꞌui ju Jesús.
\v 17 Chai tataju ju lacabarco. Va ixtaꞌamputunch lhimakꞌantacutni ju atantsꞌin junta ixvilhcha ju lakꞌachakꞌan Capernaum. Pus tamaklhtatsꞌislich ju lacaꞌatantsꞌin chai ju Jesús ju acsni tucaꞌ sip ixlai.
\v 18 Pus ju xcan na pꞌas ixtꞌajun lucunuꞌ ni na pꞌas ixlai ju kꞌai un.
\v 19 Acsni taꞌalhtanalh tachi lakaquis u lakachaxan kilometro pus talaktsꞌistuclich ju Jesús ni ixꞌalhtanamintach laꞌixꞌucxni xcan. Vaninch ixminta ju lacabarco. Pus lana na tatalhanalh.
\v 20 Para ju Jesús ajunich:
\p ―Quitꞌin. Jantu aquilatalhoniu.
\p
\v 21 Ju acsnich va lhikꞌach taꞌamaklhtayanalh ju lacabarco. Pus lana va tsꞌalhti tacutcha ju barco. Tachaꞌalh ju anuꞌ lacatꞌun junta ixtaꞌanta.
\s1 Ju lapanacni na ixtapuxcajui ju Jesús
\p
\v 22 Ni tuncunchokopa ju anuꞌ lapanacni ju tatamacontolhcha ixlhilakꞌantacutni ju atantsꞌin tapastaclich ni va lakatam ixjunita ju barco. Chai ixtalaktsꞌinch ju Jesús ni jantu alactꞌaꞌalh ju ixꞌamamakaꞌui acsni taꞌalh ju lacabarco. Para va isꞌakstuꞌan ju taꞌalh.
\v 23 Para ju aliꞌ barco tamincha ju lakꞌachakꞌan Tiberias. Taꞌastacnalh vanin junta ixtakta lakꞌailaktsꞌiuch ju Dios ju Jesús junta amavalh ju lapanacni.
\v 24 Pus ju lapanacni acsni talaktsꞌilh ni jantu anch ixvi ju Jesús nin yuꞌunch ju ixꞌamamakaꞌui pus vachuꞌ tatajulh ju yuꞌunch ju lacabarco. Taminchokolh ju lakꞌachakꞌan Capernaum. Va ixtapuxcajui ju Jesús.
\s1 Ju Jesús tachi xavaiti atsucunti junita
\p
\v 25 Acsni talhitaju ju Jesús ju lhimakꞌantacutni ju atantsꞌin tajuni:
\p ―Amamakaꞌunuꞌ tas vananch ju xachꞌitꞌan ju ani.
\p
\v 26 Chai akꞌalhtayanalh ju Jesús. Ajunich:
\p ―Slivasalh ju iclajunau. Ju uxijnan quilalhipuxcoyau ni utꞌit ju vati chai lhilatꞌit. Jantiyuꞌ quilalhichꞌakꞌokꞌayau ni laktsꞌintꞌatꞌit ju lhamakꞌan.
\v 27 Tun tꞌichꞌalhcꞌatnantꞌit va ixlacata ju vaiti ju va takꞌalhi. Para achꞌalhcꞌatnantꞌit ixlacata ju tumpa vaiti ju xtꞌakꞌa ju atsucunti jonkꞌalhi. Yuchach ju aclaxtakniyau ju quitꞌin ju quimalakachatachilh ju Dios ni lapanac actsucuyaꞌ ju ani. Chai quimpai Dios ju xaquixtakni ju quintachaput ni laich acxtaklh ju anuꞌ vaiti.
\p
\v 28 Pus tajunich ju Jesús:
\p ―Tijuch ju acnaviyau ni laich acnaviu ju ixlhichꞌalhcat ju Dios.
\p
\v 29 Akꞌalhtayanalh ju Jesús. Ajunich:
\p ―Yuchach ju ani ju ixlhichꞌalhcat ju Dios ni aquilalhilacaꞌau ju quitꞌin ju quimacaminta ju Dios.
\p
\v 30 Ju acsnich tajunich:
\p ―Pus tijuch ju lai aquilamalacasuniyau chai laich aclaktsꞌinau chai laich aclapulacaꞌiniyauch ju uxintꞌi. Tijuch ju lai navi ju uxintꞌi.
\v 31 Ju quilacpaiꞌan ju makꞌanch ixtatꞌajun taꞌulh ju anuꞌ ju ixjuncan mana junta aseknicꞌa. Chunch ju tapasalh tachi ju tsꞌokcanta junta najun: “Lactꞌiyan ju amacaminicancha ju vati. Chai taꞌulh”.
\p
\v 32 Pus ju Jesús ajunich:
\p ―Slivasalh ju iclajunau. Jantiyuꞌ ju Moisés ju xataxtakniyan ju xavati ju lactꞌiyan. Va yuchi ju quimpai ju taxtakniyan ju anuꞌ tachi vati ju xaminacha lactꞌiyan ju xtꞌakꞌa ju stavasalanti atsucunti.
\v 33 Ju vati ju xtꞌakꞌa ju Dios yuchi ju anuꞌ ju mincha lactꞌiyan chai axtakni isꞌatsucuntiꞌan ju lapanacni.
\p
\v 34 Tajunich:
\p ―Quiꞌamigo pus va tachi aquilaxtakniyauch ju ani vati.
\p
\v 35 Pus ju Jesús ajunich:
\p ―Quitꞌinch ju xavati ju xtꞌakꞌa atsucunti jonkꞌalhi. Ju minta laquimacni jantuch tavanan cachavanaꞌ laꞌixtacꞌatsan. Ju quilhilacaꞌantach quitꞌin jantuch tavanan caquicxixchokoyaꞌ ju laꞌisꞌatsucunti.
\v 36 Pus anich iclajunau. Mas quilalaktsꞌinauch jantu lacꞌaꞌiyatꞌit.
\v 37 Tachi chun ju lapanacni ju quixtaknita ju quimpai aquilakminach ju quitꞌin. Chai ju minta laquimacni jantu tavanan actixcomakꞌalh.
\v 38 Yuchi iclhitaxtucha ju lactꞌiyan ni acnaviniyach ixkꞌachat ju quimacaminta. Jantiyuꞌ ni acnavilh ju quinkꞌachat quiꞌakstu.
\v 39 Yuchach ju ani ju ixkꞌachat ju quimacaminta. Tachi chun ju lapanacni ju quixtaknita ju yuchi jantu actimakꞌatsꞌankꞌa xamatiꞌ. Para acꞌamalokꞌonichokoyaꞌ ju laꞌixꞌaclanti ju lacamunutpaꞌ.
\v 40 Yuchach ju ani ju ixkꞌachat ju quimpai. Tachi chun ju quilaktsꞌin ni istsꞌalh Dios ju quitꞌin chai quilhilacaꞌanch pus caꞌalinaꞌ ju isꞌatsucunti jonkꞌalhita. Chai quitꞌinch ju acmacxtuchokoyaꞌ laꞌixꞌaninti ju laꞌixꞌaclanti ju lacamunutpaꞌ.
\p
\v 41 Ju acsnich ju israelitanin macxcai chivinti talhichivinilh ju Jesús ixlacata tuchi ixnajun acsni tavanan naulh ni yuchach ju xavati ju xamincha lactꞌiyan.
\v 42 Ixtanajunch:
\p ―Ju ani ja jantiyuꞌ ju Jesús ju istsꞌalh José. Ju ixpai chai ixnati mispayau ju quijnanꞌan. Tas laich lhinajun: “Ju quitꞌin lactꞌiyan xacminacha”.
\p
\v 43 Pus ju Jesús akꞌalhtayanalh. Ajunich:
\p ―Jantu anaꞌuntꞌit macxcai chivinti ju uxijnan.
\v 44 Jantu xamatiꞌ lai quilakmin ju quitꞌin ni jantu cakꞌailhimilh laquimacni ju quimpai ju quimacaminta. Chai acmalokꞌonichokoyaꞌ laꞌixꞌaclanti ju lacamunutpaꞌ.
\v 45 Chani tatsꞌokꞌula ju makꞌaniya lapanacni ju ixtanajun ju ixchivinti Dios. Tanaulh: “Dios ju camalanikꞌoyaꞌ tachi chun ju lapanacni”. Pus ju quitꞌin icnajun ni tachi chun ju takꞌasmatni ixchivinti ju quimpai chai talani tuchi malani ju yuchi pus cataminach laquimacni.
\p
\v 46 Jantu icnomputun ni xamatiꞌ laktsꞌinta ju quimpai. Va quitꞌin ju iclaktsꞌinta ni laꞌixmacni yuchi ju xactaxtuyacha. Quitꞌinch ju iclaktsꞌinta ju quimpai.
\v 47 Slivasalh ju iclajunau. Ju quilhilacaꞌanch quitꞌin alinch isꞌatsucunti jonkꞌalhita lactꞌiyan.
\v 48 Quitꞌinch ju xavati ju xtꞌakꞌa ju atsucunti jonkꞌalhita.
\v 49 Ju makꞌaniya milacpaiꞌan mas taꞌulh ju anuꞌ ju mana ixjuncan junta aseknicꞌa para tanilh.
\v 50 Quitꞌinch ju icxavati ju xacminacha lactꞌiyan. Chai ni xamatiꞌ caꞌamaklhtayananaꞌ ju quiꞌacanit tachi acsni amaklhtayanancan ju tuꞌuꞌ vaiti pus jantu catiꞌalh junta maktaikꞌalhita ju jipi. Yuchi iclhimilh ju quitꞌin ju ani.
\v 51 Quitꞌin ju icxavati ju xtꞌakꞌa atsucunti chai xacminacha lactꞌiyan. Ni xamatiꞌ caꞌamaklhtayananaꞌ ju quiꞌacanit tachi acsni amaklhtayanancan ju tuꞌuꞌ vaiti pus caꞌalinanta isꞌatsucunti jonkꞌalhita lactꞌiyan. Chai ju anuꞌ vati ju acxtꞌakꞌaꞌ yuchi ju quilacatuna ju acxtꞌakꞌaꞌ. Yuchi ju laich capuꞌalinaꞌ isꞌatsucuntiꞌan ju lapanacni ju lactꞌiyan.
\p
\v 52 Pus ju acsni ju israelitanin ixtalaclakꞌaji ju sia yuꞌunch. Ixtanajun:
\p ―Tas laich aquintalhixtakniyan ju ixꞌacanit tachi acsni xtakcan tuꞌuꞌ vaiti.
\p
\v 53 Pus ju Jesús ajunich:
\p ―Slivasalh ju iclajunau. Ni jantu amaklhtꞌayananaꞌitꞌit ju quiꞌacanit tachi acsni amaklhtayanancan tuꞌuꞌ vaiti chai ni jantu amaklhtꞌayananaꞌitꞌit ju quiꞌacꞌalhni tachi acsni amaklhtayanancan tuꞌuꞌ xcan pus jantu pꞌacxanatꞌit miꞌatsucuntiꞌan jonkꞌalhita ju lactꞌiyan.
\v 54 Pus ju amaklhtayanan ju quiꞌacanit tachi tuꞌuꞌ vaiti chai ju amaklhtayanan ju quiꞌacꞌalhni tachi ju tuꞌuꞌ xcan pus alinch ju isꞌatsucunti jonkꞌalhita. Chai quitꞌinch ju acmacxtuchokoyaꞌ laꞌixꞌaninti acsni caꞌaclayach ju lacamunutpaꞌ.
\v 55 Ju caꞌamaklhtayananaꞌ ju quiꞌacanit tachi ju tuꞌuꞌ vaiti chai caꞌamaklhtayananaꞌ ju quiꞌacꞌalhni tachi ju tuꞌuꞌ xcan pus capuꞌalinach ju istavasalanti isꞌatsucunti.
\v 56 Pus ju caꞌamaklhtayananaꞌ ju quiꞌacanit tachi ju tuꞌuꞌ vaiti chai caꞌamaklhtayananaꞌ ju quiꞌacꞌalhni tachi ju tuꞌuꞌ xcan pus tꞌajunch ju laquimacni. Chai ju quitꞌin laꞌixꞌalhunut yuchi ju ictꞌajunch.
\v 57 Tachi ju quimpai ju lakꞌajunta ni quimacamilh chai yuchi ju quixtaknita ju quiꞌatsucunti pus vanach va ixtꞌachunch ju ani. Ju aquiꞌamaklhtayananaꞌ tachi ju tuꞌuꞌ vaiti pus puꞌamaklhtayanan ju isꞌatsucunti ju jonkꞌalhita.
\v 58 Quitꞌin ju icxavati ju xacmincha lactꞌiyan. Jantu chun tachi ju anuꞌ ju taꞌulh ju makꞌaniya milacpaiꞌan. Ju yuꞌunch mas taꞌulh ju anuꞌ vati ju mana ixjuncan jantu anch ju tapulhitaju isꞌatsucuntiꞌan ju jonkꞌalhita tus lactꞌiyan. Para ju aquiꞌamaklhtayananaꞌ tachi ju amaklhtayanancan tuꞌuꞌ vaiti pus caꞌalinaꞌ isꞌatsucunti jonkꞌalhita.
\p
\v 59 Ju Jesús noncha ju ani taxtokni laxapujitat lakꞌachakꞌan Capernaum acsni ixtꞌajun amalaniniꞌ ixlacata Dios.
\s1 Lhichivincan ju atsucunti jonkꞌalhita
\p
\v 60 Pus ju aliꞌin ixꞌamamakaꞌui ju Jesús acsni takꞌasmatlh ju ani chivinti tanaulh:
\p ―Na tsꞌinqꞌui ju ani chivinti. Tis chavaich ju laich camuctaxtu ju chunch chivinti.
\p
\v 61 Pus ju Jesús ni cꞌatsa ju laꞌixꞌalhunut ni jantu kꞌox ixtalhiulai ju ani chivinti ju ixꞌamamakaꞌui pus ajunich:
\p ―Ja jantu lai chꞌixatꞌit ju ani chivinti.
\v 62 Tꞌas anonaꞌitꞌit ni aquilalaktsꞌinau ni actaꞌakstꞌachokoyaꞌ junta xacvilhcha pꞌulhnan.
\v 63 Pus ju Spiritu Santu yuchi ju xtꞌakꞌa ju atsucunti jonkꞌalhita. Ju tuꞌuꞌ ixlacata ju quilacatunaꞌan jantu lai xtꞌakꞌa ju atsucunti jonkꞌalhi tus lactꞌiyan. Ju chivinti ju iclamavasalaniyau pus ixlacata ju miꞌalhunutꞌan junita chai yuchach ju xtꞌakꞌa ju atsucunti jonkꞌalhita.
\v 64 Para alin ju milhiꞌuxijnanꞌan ju jantu talacaꞌi.
\p Pus ju Jesús iscꞌatsai tus laꞌixputaiꞌulacan tichi chavaich ju jantu catalacaꞌiyaꞌ chai tichi chavaich ju camakꞌaxtaknanaꞌ.
\v 65 Pus najunch:
\p ―Yuchi iclalhijunau ni jantu lai xamatiꞌ quilakmin ni jantu xtaknita ju chun atalacpastꞌacꞌat ju quimpai.
\p
\v 66 Ju acsnich na lhu ju ixꞌamamakaꞌui ju Jesús jantu tachꞌakꞌokꞌakꞌalhiputulh. Lana tamacoyaulh ju yuchi.
\v 67 Ju acsnich ju Jesús alacjunich ju ixpumacautꞌuiꞌan:
\p ―Ja vachuꞌ pꞌimpꞌutꞌunatꞌit ju uxijnan.
\p
\v 68 Akꞌalhtayanalh ju Pitaluꞌ ju ixjuncan Simón. Junich:
\p ―Quiꞌucxtin tis chavaich ju lai aclakꞌanauch ni uxintꞌi ju pꞌacxantꞌa ju chivinti ju xtꞌakꞌa ju atsucunti jonkꞌalhita.
\v 69 Ju quijnan iclacaꞌiyauch chai iclamispayauch ni uxintꞌich ju Cristoꞌat. Istsꞌalhꞌat Dios ju lakꞌajunta.
\p
\v 70 Pus ju Jesús alackꞌalhtailh:
\p ―Ja jantu quitꞌin ju iclalhcaꞌulatau ju mimpumacautꞌuiꞌan. Chai pumatam ju milhiꞌuxijnanꞌan valhch ixlapanac ju lhacaticuru.
\p
\v 71 Yuchach ju ixlhichivincan ju Judas istsꞌalh ju Simón Iscariote ni yuchach ju camakꞌaxtaknanaꞌ. Yuchi ju pumatam ju ixlhipumacautꞌuiꞌan ixjunita.
\c 7
\s1 Jantu tavanan lai talacaꞌi ju isꞌapꞌisekꞌen ju Jesús
\p
\v 1 Acsni tapasalhch ju ani taxtokni pus ju Jesús lacꞌantsuculhch junta lacvi lakꞌachakꞌanixni ju laxaꞌestado Galilea. Jantu ixꞌamputun amalaniniꞌ ju laxaꞌestado Judea ni va ixtamakniputun ju istꞌaꞌisraelitanin.
\v 2 Chai vaninch ixjunita ju ixcꞌatanꞌan ju israelitanin acsni ixtatꞌajun va laꞌixpacꞌatsꞌaꞌan.
\v 3 Pus ju isꞌapꞌisekꞌen ju Jesús chanich tajuni:
\p ―Atꞌaxtꞌuch ju ani. Apꞌinchich ju laxaꞌestado Judea. Ju chunch ni laich catalaktsꞌinanta ju miꞌamamakaꞌunti amachakꞌan anch ju tuchꞌi laich navi.
\v 4 Ju tam lapanac ni jumputunch tachi tam xakꞌai pus jantu va catatankꞌanu. Pus ni laich navi ju ani taxtokni amalacꞌasunikꞌoch tachi chun ju lakꞌachakꞌanixni.
\p
\v 5 Nin yuꞌunch ju isꞌapꞌisekꞌen jantu ixtalhilacaꞌan ju Jesús.
\v 6 Pus ajunich ju Jesús:
\p ―Tucaꞌ chin ju avilhchan ju iclhcanicanta. Para ju uxijnan va tuchi horach lai naviyatꞌit ju pꞌastꞌacꞌatꞌit.
\v 7 Ju lapanacni ju ani lacamunutpaꞌ jantu lai talhitsꞌiꞌinan ju uxijnan. Para ju quitꞌin yuchi jantu quintalhilaktsꞌimputun ni icꞌajuni ni na macxcai ju tanavi.
\v 8 Ju uxijnan apꞌinchitꞌitch junta lai cꞌatan. Ju quitꞌin tucaꞌ lai actiꞌalh ju anch ni jantucaꞌ chin ju avilhchan ju iclhcanicanta.
\p
\v 9 Acsni ajunilh ju ani chivinti pus tavilhcaꞌ ju Jesús ju xaꞌestado Galilea.
\s1 Ju Jesús ixꞌucxuntꞌajun ju laxacꞌatan acsni ixtatꞌajun laꞌixlacpacꞌatsꞌaꞌan
\p
\v 10 Acsni taꞌalh ju isꞌapꞌisekꞌen pus astan alh ju Jesús junta lai cꞌatan. Jantu lacatalhavat ju alh. Tachi ju va jantu ixlacasqꞌuin ni xamatiꞌ cacꞌatsa.
\v 11 Pus ju israelitanin ixtapuxcajuich ju Jesús junta lai cꞌatan. Ixtanajunch:
\p ―Ta xaꞌanch nuꞌ ju anuꞌ lapanac.
\p
\v 12 Ju ixlacata ju Jesús na lhu ixꞌalin ju chivinti ju va sek ixtanajun ju lapanacni. Ju aliꞌin ixtanajunch ni na kꞌox lapanac ju yuchi.
\p Ju aliꞌin ixtanajun:
\p ―Jantu vasalh kꞌox lapanac. Va aꞌokxchokꞌoi ju lapanacni.
\p
\v 13 Pus ju anuch lapanacni ni va ixtatalhonich ju xaꞌucxtinin ju israelitanin pus va sek ixtalhichivinin ixlacata ju Jesús.
\p
\v 14 Acsni chaꞌalh paitat cꞌatan ju Jesús alh ju laꞌixpujitatꞌan ju istꞌaꞌisraelitanin chai tsuculh amalaniniꞌ.
\v 15 Pus va ixtalhamakꞌaninin ju istꞌaꞌisraelitanin. Ixtanajunch:
\p ―Ju ani tas lhimispaich ju atalaninti ni jantu xamatiꞌ xamalani.
\p
\v 16 Chai akꞌalhtayanalh ju Jesús. Alacjuni:
\p ―Ju tuchi icꞌamalaninin jantu quiꞌanuꞌ. Ixꞌanuꞌ ju xaquimacamin.
\v 17 Ni xamatiꞌ naviputun ixkꞌachat ju Dios pus cacꞌatsayach ta anchach ju xaminacha ju ani atalaninti. U Dios ju xaquixtakni u va laquiꞌakstu ju icnajun.
\v 18 Ju va laꞌisꞌakstu najun ju tuꞌuꞌ va lacasqꞌuin ni catanaulh ju lapanacni ni xakꞌai ju yuchi. Para ju lacasqꞌuin ni catanaulh ju lapanacni ni yuchi ju xakꞌai ju tichi macaminta pus yuchi ju najun ju stavasalanti. Matich ju aꞌokxchokꞌonti laꞌixmacni ju yuchi.
\p
\v 19 Vasalh ni taxtaknitan ju lhamapꞌaksin ju Moisés. Para nin tachi pumatam ju milhiꞌuxijnan ju lai stunin camuctaxtukꞌo ju anuꞌ lhamapꞌaksin. Tajuch ni va quilamakniputunauch ju quitꞌin.
\p
\v 20 Chai taꞌakꞌalhtayanalh ju lapanacni. Tajunich:
\p ―Va pꞌacxantꞌa lhacaticuru. Tis chavaich ju makniputunan.
\p
\v 21 Pus ju Jesús akꞌalhtailh:
\p ―Va lakatam lhamakꞌan xacnavi. Chai minchuxꞌan va lhamakꞌanininatꞌit.
\v 22 Slivasalh ni Moisés ju xtakta ju lhamapꞌaksin ixlacata ju achꞌucꞌunti. Chai ju avilhchan paꞌastacni vana acsni ju chꞌucꞌuniyatꞌit ixꞌaxtꞌakꞌa ju tam tsꞌalh. Jantiyuꞌ ju Moisés ju pꞌulhnan naulh ni cachꞌucꞌucalh ju tam tsꞌalh. Yuꞌunch ju makꞌaniya lapanacni ju pꞌulhnanch tanavilh ju chunch.
\v 23 Mas avilhchan paꞌastacni chꞌucꞌucanch ju tam tsꞌalh va ixlacata ni acsni ju uctaxtui tachi ju lhcaꞌulai ju laꞌixlhamapꞌaksin ju Moisés. Ni naviyatꞌit chunch tajuch ni va quilalhixcayauch ni palaich xacnavi ju anuꞌ lapanac ju acs avilhchan paꞌastacni.
\v 24 Jantu aꞌulanitꞌit ixtalakꞌalhin tam xamatiꞌ ni jantu pꞌulhnan kꞌox cꞌatsꞌayatꞌit tuchi navita.
\s1 Ja yuchi ju ani ju Cristo
\p
\v 25 Ju aliꞌin amachakꞌan Jerusalén ixtanajunch:
\p ―Ja jantiyuꞌ ju ani ju puxcocan ju tamakniputun.
\v 26 Ju chavai ni tꞌompalai chiviniꞌ laꞌixꞌucxlacapuꞌan ju lapanacni. Chai ju yuꞌunch ni jantu tuꞌuꞌ tajumpalai. Ju ucxtinin ja tacꞌatsai nuꞌ ni yuchi ju Cristo.
\v 27 Para ju ani mispayauch tas amachakꞌach. Acsni caminaꞌ ju Cristo jantu xamatiꞌ catimispa ta anchach ju caminanta.
\p
\v 28 Pus ju Jesús pꞌas chivinilh acsni ixtꞌajun amalaniniꞌ laꞌixpujitatꞌan ju istꞌaꞌisraelitanin. Ixꞌajunich:
\p ―Quilamispayau ju quitꞌin. Chai cꞌatsꞌayatꞌit ta anchach ju icmintacha. Para jantu va laquiꞌakstu icminta. Ju quimacaminta yuchi ju najun ju stavasalanti chai ju yuchi jantu mispꞌayatꞌit ju uxijnan.
\v 29 Ju quitꞌin icmispai ju yuchi ni anch ju xacminacha. Chai yuchi ju xaquimacamin.
\p
\v 30 Ju acsnich lana tapastaclich ixchꞌapaca. Para jantu xamatiꞌ lai chꞌapalh ni tucaꞌ ixchin ju ixꞌavilhchan.
\v 31 Na lhu lapanacni talhilacaꞌalh ju yuchi. Ixtanajunch:
\p ―Ju Cristo acsni caminaꞌ ja palai lhu ixpulacaꞌican canaviyaꞌ. Ja palai jantu ju ani.
\s1 Ju fariseonin tamalakacha ju ixpulasiyajni ni caꞌixtachꞌapalh ju Jesús
\p
\v 32 Ju fariseonin ixtakꞌasmatꞌach ni na ixtalhilacchivininch ju Jesús ju lapanacni. Pus ju xalackꞌajin palijni chai ju fariseonin tamalakachalh ju pulasiyajni ni cataꞌalh chꞌapanin ju Jesús.
\v 33 Ju Jesús naulh:
\p ―Va pantsꞌiquis ju ictilatꞌaꞌucxuntꞌonau. Ju astan aclakꞌanchokoyach ju quimalakachatachilh.
\v 34 Ju uxijnan aquilapuxcoyau. Para jantu lai aquilalhitajuyau. Junta acꞌanaꞌ ju uxijnan jantu lai aquintilachꞌakꞌokꞌau.
\p
\v 35 Pus ju istꞌaꞌisraelitanin tanaulh va laꞌisꞌakstuꞌan:
\p ―Tas anchach ju cachaꞌanaꞌ ju yuchi junta jantuch lai calhitajuyau. Ja va calakꞌanach ju istꞌaꞌisraelitanin ju amakpitsicanta laꞌixtꞌunꞌan ju griegonin. Ja va caꞌanaꞌ amalaniniꞌ ju griegonin.
\v 36 Tijuch ju nomputun ju ixchivinti ni najun: “Ju uxijnan aquilapuxcoyau para jantu aquilalhitajuyau”. Ni va nompalai. Chai ni najun: “Junta acꞌanaꞌ ju uxijnan jantu lai aquintilachꞌakꞌokꞌau”.
\s1 Ju ani tachi kꞌai xcan ju xtꞌakꞌa atsucunti
\p
\v 37 Acsni ixlakꞌoputunch ju cꞌatan chai acsni na kꞌai cꞌatan ixjunita pus ju Jesús taya chai na pꞌas chivinilh. Naulh:
\p ―Ni alin xamatiꞌ ju quicxixa laꞌixꞌalhunut chach quilakmilh ju quitꞌin. Chach kꞌotlh ju xcan ju icxtꞌakꞌa.
\v 38 Ju quilhilacaꞌanta quitꞌin pus cataxtuyaꞌ ju laꞌixꞌalhunut tachi kꞌai xcan ju lakꞌajunta. Tachi ju najunch lacaꞌatsꞌoknut.
\p
\v 39 Ju Jesús ixlhichivinin ju Spiritu Santu. Yuchi ju cataꞌamaklhtayananach ju talhilacaꞌanta ju Jesús. Tucaꞌ lai ixmin ju Spiritu Santu ni tucaꞌ ixꞌanchokota ju lactꞌiyan ju Jesús.
\s1 Quilhmactꞌui tava ju lapanacni
\p
\v 40 Acsni takꞌasmatlh ju ani chivinti pus ju aliꞌin laꞌixtalhavat lapanacni ixtanajunch:
\p ―Slivasalh ni yuchi ju ani ju lapanac ju najun ixchivinti Dios.
\p
\v 41 Ju aliꞌin ixtanajun:
\p ―Ju ani yuchi ju Cristo ju noncan camalakachatachilh Dios.
\p Ju aliꞌin ixtanajun:
\p ―Para ja laxaꞌestado Galilea ju caminanta ju Cristo.
\v 42 Ja jantu najun lacaꞌatsꞌoknut ni makꞌaniya isꞌaskꞌatꞌa David cajunaꞌ ju Cristo. Chai anch catsucuyanta ju lakꞌachakꞌan Belén laꞌixtꞌun ju makꞌaniya quimpaiꞌan David.
\p
\v 43 Pus chunchach quilhmactꞌui va ixtalhavat lapanacni va ixlacata ju Jesús.
\v 44 Ju aliꞌin ixtachꞌapaputunch. Para jantu xamatiꞌ lai chꞌapalh.
\s1 Jantu tavanan xamatiꞌ chunch cachivinilh tachi ju ani lapanac
\p
\v 45 Pus ju pulasiyajni taꞌanchokolh juninin ju xalackꞌajin palijni chai ju fariseonin. Chai ju yuꞌunch taꞌasacminilh:
\p ―Tajuch ni jantu xalhitꞌanatꞌit.
\p
\v 46 Pus ju pulasiyajni taꞌakꞌalhtayanalh:
\p ―Jantu xamatiꞌ ju chunch chivinin tachi ju ani lapanac.
\p
\v 47 Ju acsnich ju fariseonin taꞌakꞌalhtayanalh:
\p ―Ja vachuꞌ va okxchꞌokꞌocꞌantꞌatꞌit ju uxijnan.
\v 48 Ju sia yuꞌunch ju xalackꞌajin ja xamatiꞌ cꞌuꞌu lacaꞌita. U sia yuꞌunch ju fariseonin ja xamatiꞌ cꞌuꞌu ju lacaꞌita.
\v 49 Para ju ani tontojni lapanacni ju jantu tamispai ju ixlhamapꞌaksin ju Moisés catamakꞌalhkꞌajnanaꞌ.
\p
\v 50 Pus ju Nicodemo ju quilalh tsꞌis junta ixvi ju Jesús vachuꞌ makfariseo ixjunita. Ju yuchi ajunich:
\p
\v 51 ―Ja lhijun ju quilhamapꞌaksinꞌan ni acꞌulanilh ju ixtalakꞌalhin tam xamatiꞌ ju jantucaꞌ tuꞌuꞌ kꞌasmatnican chai ju jantucaꞌ cꞌatsanican ni caꞌalilh ju ixtalakꞌalhin.
\p
\v 52 Taꞌakꞌalhtayanalh. Tajuni ju Nicodemo:
\p ―Ja vachuꞌas amachakaꞌat Galilea. Alacꞌavanch. Alaktsꞌinaꞌ ni jantu xamatiꞌ tꞌajun kꞌostayanaꞌ ju laxaꞌestado Galilea ju najun ixchivinti Dios.
\p
\v 53 Pus tataxtulh ju lacapuꞌucxtin chai pumatamin taꞌalhch ju laꞌixlacchakaꞌan.
\c 8
\s1 Pumatam alactuꞌunu chakoꞌulh
\p
\v 1 Ju Jesús alh ju akstijun junta ixmacha ju lacapuꞌolivos.
\v 2 Chai acsni tuncunchokopa vatsꞌisin anchokolh ju Jesús ju laꞌixpujitatꞌan ju istꞌaꞌisraelitanin. Chai chux ju lapanacni talakꞌalh ju Jesús. Chai ju yuchi tavi chai tsuculh amalaniniꞌ.
\v 3 Ju acsnich ju ixtalhatalanininta ju ixlhamapꞌaksinꞌan ju istꞌaꞌisraelitanin chaich ju fariseonin talhiminilh pumatam chakoꞌulh ju lhitajucalh ni ixtꞌaꞌalactuꞌunun pumatam jokꞌat. Taꞌulalh laꞌixlacaitat junta ixvi ju Jesús.
\v 4 Tajunich:
\p ―Amamakaꞌunuꞌ ju ani chakoꞌulh lhitajucalh ni ixtꞌajun tꞌaꞌalactuꞌunuꞌ pumatam jokꞌat.
\v 5 Pus ju Moisés ju laꞌixlhamapꞌaksin quintajunan ni aclacatꞌalhmauch ju chunchach talai. Para ju uxintꞌi tꞌas naꞌunch.
\p
\v 6 Ju tapusacmi chunch va ixtalaktsꞌintanuputunch ju Jesús. Tsꞌa ma laich ixtalhitajunilh tuꞌuꞌ ju laich catalhichivimakꞌalh. Para ju Jesús lana takꞌentalh. Tsuculh atsꞌoknuꞌ laꞌixkꞌelilimacaꞌ ju lacatꞌun.
\v 7 Para ni va kꞌasi kꞌasi tasacmich pus takꞌoxitolhchokolh chai ajunich:
\p ―Pus ni alin xamatiꞌ milhiꞌuxijnan ju jantu caꞌalactuꞌunulh yuchach ju pꞌulhnanch caꞌalacatꞌalhmanalh.
\p
\v 8 Aktam takꞌentachokopa chai tsucuchokopa atsꞌoknuꞌ ju lacatꞌun laꞌixkꞌelilimacaꞌ.
\v 9 Acsni takꞌasmatlh ju naulh ju Jesús pus ju achivimakꞌanin taxcanilh ju ixꞌalhunutꞌan. Pumatamin pumatamin tatsuculh taxtunin. Pꞌulhnan tataxtulh ju xapapanin. Chai astan taꞌalh ju paitat lapanacni. Pus va isꞌakstuch tavilh ju Jesús. Tꞌatamacaulh ju chakoꞌulh ju ixya laꞌixlacaitat junta ixvi ju Jesús.
\v 10 Acsni takꞌoxitolhchokolh ju Jesús jantu xamatiꞌ laktsꞌilh ju achivimakꞌanin. Va isꞌakstu ju ixya ju chakoꞌulh. Pus junich:
\p ―Chakoꞌulh tas xataꞌanch ju ixtachivimakꞌanan. Ja jantu xamatiꞌ xaꞌulaniyan ju mintalakꞌalhin.
\p
\v 11 Pus ju chakoꞌulh akꞌalhtayanalh. Naulh:
\p ―Jantu xamatiꞌ ji quiꞌucxtin.
\p Pus ju Jesús junich:
\p ―Nin quitꞌin jantu actiꞌulanin ju mintalakꞌalhin. Aꞌinchich chai jantuch aliꞌ alactꞌuꞌunchꞌokꞌo.
\s1 Jesús ju lai amalacpucujui laꞌixtacꞌatsanꞌan ju lapanacni
\p
\v 12 Ju Jesús aktam chivinchokopa. Chai ajunich ju lapanacni:
\p ―Quitꞌin icjunita tachi ju tuꞌuꞌ maclhcu ni icmalacpucujui laꞌixtacꞌatsanꞌan ju lapanacni. Ju aquinchꞌakꞌokꞌayaꞌ jantu tsꞌis cajunaꞌ ixtacꞌatsan. Acmalacpucujuniyaꞌ ju ixtacꞌatsan ni laich caꞌalilh ju isꞌatsucunti jonkꞌalhita.
\p
\v 13 Pus ju acsnich ju fariseonin tajunich:
\p ―Va laminchivinti miꞌakstu naꞌun ni xakꞌaiꞌat. Ju minchivinti jantu slivasalh.
\p
\v 14 Akꞌalhtayanalh ju Jesús. Ajunich:
\p ―Mas ca va laquinchivinti ju icnajun ni icxakꞌai para ju quinchivinti stavasalanti ni iccꞌatsai ta anchach ju icmintacha chai ta anchach ju acꞌanchokoyaꞌ. Para ju uxijnan jantu cꞌatsꞌayatꞌit ta anchach ju icmintacha nin ta anchach ju acꞌanchokoyaꞌ.
\v 15 Ju uxijnan quilaꞌulaniyau ju quintalakꞌalhin tachi ju talai ju va lhilapanac. Ju quitꞌin jantu xamatiꞌ icꞌulani ixtalakꞌalhin.
\v 16 Chai mas icꞌulani ju ixtalakꞌalhin apumatam para stavasalanti ju tuchi acnonaꞌ ni jantu va quiꞌakstu quitꞌin ju icꞌulai talakꞌalhin. Yuchi ju ictꞌamucꞌai talakꞌalhin ju quimpai ju quimacaminta.
\v 17 Ju lamilhamapꞌaksinꞌan najun acsni va lakatamch chivinti catanaulh ixpumatꞌuiꞌan lapanacni pus soknicꞌach ju tuchi tanajun.
\v 18 Pus quitꞌin quiꞌakstu icnajun tichi chavaich ju quitꞌin. Chai ju quimpai ju quimacaminta vachuꞌ najun tichi chavaich ju quitꞌin.
\p
\v 19 Tajunich chavai:
\p ―Tas anchach ju ya ju mimpai.
\p Akꞌalhtayanalh ju Jesús:
\p ―Nin quitꞌin jantu quilamispayau. Ja va a ti quimpaich lai amispꞌatꞌit. Pus ni xaquilamispau ju quitꞌin pus vachuch ju quimpai caꞌismispꞌatꞌit.
\p
\v 20 Ju ani chivinti ju Jesús naulh acsni ixtꞌajun amalaniniꞌ ju laꞌixlacpujitatꞌan ju istꞌaꞌisraelitanin junta ixtaxtꞌakꞌa ixtuminꞌan. Para jantu xamatiꞌ lai lacachꞌapalh ju acsnich ni jantucaꞌ ixchin ju ixꞌavilhchan.
\s1 Junta acꞌanaꞌ ju uxijnan jantu lai atꞌipꞌitꞌit
\p
\v 21 Ju Jesús ajunchokopa:
\p ―Ju quitꞌin acꞌanach. Chai aquilapuxcoyauch. Para junta acꞌanaꞌ ju uxijnan jantu lai atꞌipꞌitꞌit. Ju uxijnan acsni aniyaꞌitꞌit jantu makꞌotꞌinicꞌantꞌatꞌit ju miꞌalactuꞌuntiꞌan.
\p
\v 22 Ju acsnich talaclajunich ju istꞌaꞌisraelitanin:
\p ―Ja va isꞌakstu nuꞌ ju maknichokoputuncan ni najunch ni jantu lai caꞌanau junta caꞌanaꞌ.
\p
\v 23 Ju Jesús ajunich:
\p ―Ju uxijnan xanavin untꞌatꞌit ju ani lacamunutpaꞌ. Ju quitꞌin lactꞌiyan icmintacha. Ju uxijnan va amachakꞌan lacamunutpaꞌ untꞌatꞌit. Ju quitꞌin jantu icꞌamachakaꞌ ju ani lacamunutpaꞌ.
\v 24 Pus iclajunauch ni aniyaꞌitꞌit ju lamiꞌalactuꞌuntiꞌan. Pus ni jantu lacꞌaꞌiyatꞌit ni chun icjunita tachi ju iclajunau pus aniyaꞌitꞌit ju lamiꞌalactuꞌuntiꞌan.
\p
\v 25 Tajunich:
\p ―Tis chavaichꞌat ju uxintꞌi.
\p Pus ju acsnich ajunich ju Jesús:
\p ―Acsni ictaiꞌula ju quiꞌamalaninti va tachi iclajuntauch tichi chavaich ju quitꞌin.
\v 26 Na lhu taxtokni ju iclhichivimputun ju milacataꞌan chai lai aclaꞌulaniyau ju mintalakꞌalhinꞌan. Para ju quimalakachatachilh yuchi ju najun ju stavasalanti. Chai tuchi ju ickꞌasmatnita laꞌixmacni pus yuchach ju icnajun ju ani lacamunutpaꞌ.
\p
\v 27 Para ju yuꞌunch jantu tamachakxanilh ni ixpai Dios ju ixlhichivinin.
\v 28 Ajunich chavai ju Jesús:
\p ―Acsni tavanan aquilaxtucmucꞌayau talaclhman ju quitꞌin ju quimalakachatachilh ju Dios ni lapanac actsucuyaꞌ ju ani pus acsnich ju amachꞌakxayaꞌitꞌit tichi chavaich ju quitꞌin. Vachuꞌ amachꞌakxayaꞌitꞌit ni jantu tuꞌuꞌ icnavi ju va laquiꞌakstu. Yuchi ju icchivinin tachi ju quimasunitach ju quimpai Dios.
\v 29 Chai ju quimacaminta quintꞌaꞌalhtanan. Chai ni aktsꞌiya icnavich tuchi ju kꞌoxich lhiulai ju yuchi pus yuchi jantu tavanan quilhimacajun.
\p
\v 30 Acsni naulh ju chunch ju Jesús pus na lhu talhilacaꞌalh ju yuchi.
\s1 Ju Dios catanaviyan ni jantu tachi ju va xalapanac aꞌunaꞌitꞌit
\p
\v 31 Ju Jesús ajunich ju anuch istꞌaꞌisraelitanin ju ixtalhilacaꞌantach ju yuchi:
\p ―Pus ju uxijnan ni va tachi alacꞌaꞌitꞌit ju quinchivinti pus slivasalh ni quiꞌamamakaꞌunti aꞌunaꞌitꞌit.
\v 32 Chai amispꞌayaꞌitꞌitch ju istavasalanti. Chai acsni amispꞌayaꞌitꞌit ju istavasalanti pus amaxtꞌucꞌanaꞌitꞌit ju mimpuxalapanacniꞌan.
\p
\v 33 Ju acsni taꞌakꞌalhtayanalhch ju aliꞌin lapanacni:
\p ―Ju quijnan makꞌaniya ixꞌapapanatnich Abraham icjuntau. Chai jantu tavanan ju va xalapanacni quintanavitan xamatiꞌ. Tajuch ni va naꞌunch ju uxintꞌi ni acmaxtucanau ju quimpuxalapanacni quincꞌan.
\p
\v 34 Ju Jesús akꞌalhtailh:
\p ―Slivasalh ju iclajunau. Tachi chun ju tanavi alactuꞌunti pus yuchi ju ixꞌucxtinꞌan tanavita ju alactuꞌunti.
\v 35 Ju va xalapanac jantu lai tsucukꞌalhi ju laꞌixchakaꞌ ju tam ixꞌucxtin. Para ju aktsꞌiya istsꞌalh ju amachakaꞌ catsucukꞌalhiyaꞌ anch.
\v 36 Pus ju quitꞌin ju istsꞌalh Dios icjunita ni aclamaxtuyau ju lamimpuxalapanacniꞌan pus slivasalhch jantu va xalapanacni aꞌunaꞌitꞌit.
\v 37 Iccꞌatsai ni isꞌaskꞌatꞌan ju makꞌaniya Abraham untꞌatꞌit. Para ni va quilamakniputumpalau ni jantu lacꞌaꞌipꞌutꞌunatꞌit ju quinchivinti ju iclajuntau.
\v 38 Ju quitꞌin yuchi ju icnajun ju iclaktsꞌintach laꞌixmacni ju quimpai. Tachi ju uxijnan ni naviyatꞌitch ju kꞌasmatꞌatꞌit laꞌixmacni ju mimpaiꞌan.
\p
\v 39 Chai ju lapanacni taꞌakꞌalhtayanalh. Tajunich:
\p ―Pus ju makꞌaniya quimpai quincꞌan yuchi ju Abraham.
\p Chai ajunich ju Jesús:
\p ―Ni vasalh ixꞌapapanatnich caꞌixꞌuntꞌit ju Abraham ju makꞌanch ixtꞌajun pus ixnavitꞌit tachi ju navilh ju Abraham.
\v 40 Para ju chavai ni va quilamakniputumpalau. Ju quitꞌin ni va iclajumpalau ju stavasalanti ju ickꞌasmatꞌach laꞌixmacni ju quimpai Dios. Ju Abraham jantu chunch ixnavi.
\v 41 Ju uxijnan va ixlhichꞌalhcat ju mimpaiꞌan ju naviyatꞌit.
\p Pus tajunich:
\p ―Jantu akchunan icjuntau. Va pumatam ju quimpai quincꞌan. Yuchi ju Dios.
\p
\v 42 Pus ju Jesús ajunich:
\p ―Ni mimpaiꞌan cava ju Dios ca xaquilamapainiu ju quitꞌin ni laꞌixmacni Dios ju icminta ju ani. Chai mas icminta ju ani jantu va laquiꞌakstu ju icminta. Isꞌakstu ju Dios ju xaquimacaminchokoi.
\v 43 Tajuch ni jantu lai machꞌakxayatꞌit ju tuchi iclajunau. Ca ixlhiyuchi ni jantu quilakꞌasmatniputunau ju tuchi iclajunau.
\v 44 Ju mimpaiꞌan ju uxijnan yuchi ju lhacaticuru. Chai va ixkꞌachat yuchi ju navipꞌutꞌunatꞌit. Ju yuchi amakniniꞌ junita tus laꞌixputaiꞌulacan ju lacamunutpaꞌ. Jantu tavanan najunta ju stavasalanti ni lana jantu mispai tuchi ixtalakxtuch ju stavasalanti. Acsni najun ju taꞌaklhtamat va najun tuchi alin ju laꞌixꞌalhunut ni va taꞌaklhtaman junita. Chai xapai ju taꞌaklhtamat junita.
\v 45 Yuchi jantu quilalhilacaꞌiniyau ju quitꞌin ni icnajun ju istavasalanti.
\v 46 Tis chavaich ju milhiꞌuxijnan ju lai aquiꞌulanilh ju quintalakꞌalhin. Ni icnajun ju stavasalanti pus tajuch ni jantu quilalacaꞌiniyau ju uxijnan.
\v 47 Ju isꞌaskꞌatꞌa Dios kꞌasmatni ju ixchivinti. Ju uxijnan jantu kꞌasmatpꞌutꞌunatꞌit ni jantu isꞌaskꞌatꞌan Dios untꞌatꞌit.
\s1 Ju Cristo aktsꞌiya ixtꞌajunch
\p
\v 48 Ju acsnich ju istꞌaꞌisraelitanin taꞌakꞌalhtayanalh. Tajuni ju Jesús:
\p ―Ja jantu cꞌuꞌu slivasalh tachi ju iclajunau ni va amachakaꞌat Samaria chai va pꞌacxantꞌa ju lhacaticuru.
\p
\v 49 Chai akꞌalhtayanalh ju Jesús. Ajuni ju lapanacni:
\p ―Ju quitꞌin jantu icpacxanta ju lhacaticuru. Alai va iclajumputunau ni yuchi ju xakꞌai ju quimpai Dios. Chai ju uxijnan jantu tuꞌuꞌ quilalhiulayau.
\v 50 Jantu va quiꞌakstu ju iclacasqꞌuin ni catanaulh ju lapanacni ni icxakꞌai. Alin tichi chavaich ju lacasqꞌuin ni catanaulh ju lapanacni ni icxakꞌai. Chai yuchi ju alaktsꞌintanunuꞌ.
\v 51 Slivasalh ju iclajunau. Ju camuctaxtuyaꞌ ju quinchivinti jantu catini.
\p
\v 52 Ju acsnich ju istꞌaꞌisraelitanin tajunich:
\p ―Ju chavai iccꞌatsayauch ni va pꞌacxantꞌa ju lhacaticuru. Ju Abraham ni nipa. Chai ju lapanacni ju ixtanajun ju ixchivinti Dios vachuꞌ tani. Chai ju uxintꞌi ni va nompꞌalai ni jantu catini ju camuctaxtuyaꞌ ju minchivinti.
\v 53 Ju uxintꞌi ja palai xakꞌaiꞌat. Ja palai jantu ju makꞌaniya quimpai quincꞌan Abraham. Ju yuchi ni nipa. Chai vachuꞌ tanita ju lapanacni ju ixtanajunch ixchivinti Dios. Pus ju uxintꞌi tis chavaichꞌat navichꞌokꞌocꞌan miꞌakstu.
\p
\v 54 Chai akꞌalhtayanalh ju Jesús. Ajunich ju lapanacni:
\p ―Ni va quiꞌakstu cava ju iclacasqꞌuin ni catanaulh ju lapanacni ni icxakꞌai pus jantu catilhitapalalh mas chunch catanaulh. Yuchi ju quimpai ju najun ni icxakꞌai. Chai ju uxijnan ni va nompꞌalatꞌit ni yuchi ju miDiosꞌan.
\v 55 Ju uxijnan jantu mispꞌayatꞌit ju yuchi. Para ju quitꞌin icmispai ju yuchi. Ni acnaulh ni jantu icmispai ju yuchi pus vachuꞌ va ixnonaꞌ taꞌaklhtamat acva tachi ju uxijnan. Para ju quitꞌin icmispai ju yuchi. Chai icmuctaxtuich tuchi najuntach ju yuchi.
\v 56 Ju makꞌaniya mimpaiꞌan Abraham lhikꞌachalh ni ixlacaꞌita ni calaktsꞌinaꞌ ni acminaꞌ. Chai laktsꞌilh. Chai lhikꞌachalh.
\p
\v 57 Pus ju acsnich ju istꞌaꞌisraelitanin tajunich:
\p ―Ju uxintꞌi jantucaꞌ pꞌacxantꞌa cincuenta cꞌata. Tꞌas laich lhinaꞌun ni laktsꞌinch ju Abraham.
\p
\v 58 Ajunich chavai ju lapanacni ju Jesús:
\p ―Slivasalh ju iclajunau. Acsni tucaꞌ istsucui ju Abraham xactꞌajunch.
\p
\v 59 Chai tasaclich chavai ju chiux ju ixtaputꞌalhputunch. Para ju Jesús lana apakꞌosnulh ju lapanacni chai taxtulh ju laꞌixpujitatꞌan ju istꞌaꞌisraelitanin. Laꞌixlacaitat ixtalhavat lapanacni ju putapasatilalh acsni tavanan alh.
\c 9
\s1 Malacꞌavani ju Jesús ju alakꞌachꞌix
\p
\v 1 Ju Jesús acsni tapasalh ju lacati laktsꞌilh pumatam lapanac. Alakꞌachꞌix ixjunita tus acsni tsuculh.
\v 2 Pus ju ixꞌamamakaꞌui tasacmilh ju Jesús. Tajunich:
\p ―Amamakaꞌunuꞌ tis chavaich ju alactuꞌunulh ni laich xalakꞌajun ju va alakꞌachꞌix. Ja yuchi isꞌakstu u ixpai u ixnati.
\p
\v 3 Chai akꞌalhtayanalh ju Jesús:
\p ―Jantu alakꞌachꞌix xalakꞌajun va ixlacaꞌatalh ni caꞌalactuꞌunulh ju yuchi nin ixpai nin ixnati. Va alakꞌachꞌix xalakꞌajun ni laich caputalacasuyaꞌ ju ixlhichꞌalhcat ju Dios laꞌisꞌatsucunti ju yuchi.
\v 4 Tasqꞌuini ni acnavi ju ixlhichꞌalhcat ju quimacaminta ni ictitꞌajuncaꞌ tachi acsni vilhcaꞌ ju avilhchan. Cachinaꞌ avilhchan acsni acniyaꞌ. Ju acsnich tachi ju na va tsꞌista cajunaꞌ acsni jantu lai xamatiꞌ chꞌalhcatnan.
\v 5 Ni ictitꞌajuncaꞌ ju ani lacamunutpaꞌ pus tachi maclhcu icjunita ni icmapulhcui laꞌixtacꞌatsanꞌan ju lapanacni.
\p
\v 6 Ju Jesús acsni naulh ju chunch pus akchujlh ju lacatꞌun. Navilh ju pulhkꞌom laꞌixchuꞌut. Pus lhquilin lacpumucꞌalh ju laꞌixlakchulh ju anuꞌ alakꞌachꞌix.
\v 7 Junich:
\p ―Aꞌinchich lakpꞌuchꞌakꞌanaꞌ laxapos ju Siloé.
\p Ju ixtapakaꞌut ju anuꞌ pos nomputun Malakachacanta. Pus ju anuꞌ lapanac alh lakpuchꞌakꞌanaꞌ. Chai acsni taspꞌitcha lai ixꞌalacꞌavanan.
\v 8 Ju ixtꞌatolhnin chai ju aliꞌinch lapanacni aktsꞌiya ixtalaktsꞌintach ni va isqꞌuin tumin ju anuꞌ lapanac. Pus acsni cꞌuchꞌucalh tanaulich:
\p ―Ja jantiyuꞌ ju ani ju ixtolai lacati chai va isqꞌuin tumin.
\p
\v 9 Ju aliꞌin lapanacni ixtanajunch ni yuchi. Ju aliꞌin ixtanajun:
\p ―Jantiyuꞌ. Va ixtꞌachunch.
\p Para ju alakꞌachꞌix ixjunita ixmavasalai ni yuchi.
\p
\v 10 Tajunich chavai:
\p ―Pus tꞌas xalhiꞌalacꞌavananch.
\p
\v 11 Ju alakꞌachꞌix ixjunita akꞌalhtayanalh. Ajunich:
\p ―Yuchi ju anuꞌ jokꞌat ju juncan Jesús navilh pulhkꞌom. Quilacpumucꞌalh laquilakchulh chai quijunilh: “Apꞌinchich lakpꞌuchꞌakꞌanaꞌ ju lacaSiloé”. Pus icꞌalh. Iclakpuchꞌakꞌalh. Chai icꞌalacꞌavanalh.
\p
\v 12 Chai ju alakꞌachꞌix ixjunita talhisacmichokopa ju Jesús. Tajunich:
\p ―Tas anchach ju xaꞌan ju anuꞌ lapanac.
\p Chai ju alakꞌachꞌix ixjunita lhakꞌalhtayanalh. Ajunich:
\p ―Jantu iccꞌatsai.
\s1 Ju fariseonin taquilhasacmi ju alakꞌachꞌix ixjunita
\p
\v 13 Chai alhiꞌanicalh ju fariseonin ju anuꞌ alakꞌachꞌix ixjunita.
\v 14 Pus avilhchan paꞌastacni ixjunita acsni tavanan navilh ju pulhkꞌom ju Jesús chai acsni amalacꞌavanilh ju alakꞌachꞌix.
\v 15 Pus ju fariseonin aktam tasacmichokopa ju alakꞌachꞌix ixjunita. Tajunich:
\p ―Tꞌas xalhiꞌalacꞌavananch.
\p Ju anuꞌ alakꞌachꞌix ixjunita chani ajuni:
\p ―Va quimucꞌanilh pulhkꞌom ju laquilakchulh chai iclakpuchꞌakꞌalh. Chai icꞌalacꞌavanalhch.
\p
\v 16 Pus ju acsnich ju aliꞌin fariseonin tanaulh:
\p ―Ju ani lapanac jantu laꞌixmacni Dios ju xaminacha ni jantu maklacaꞌani ju avilhchan paꞌastacni.
\p Ju aliꞌin ixtanajunch:
\p ―Para tas calhinavilhch ju ani lhamakꞌan ju va alactuꞌunu lapanac.
\p Pus ju fariseonin jantu va lakatam ixtanavi ixchivintiꞌan.
\v 17 Tasacmichokopa aktam ju anuꞌ alakꞌachꞌix ixjunita. Tajunich:
\p ―Ju uxintꞌi tis chavaich lhiulai ju xalakpulakꞌoxiyan lamilakchulh.
\p Pus ju anuꞌ alakꞌachꞌix ixjunita naulh:
\p ―Yuchi ju lapanac ju najun ixchivinti Dios.
\p
\v 18 Pus ju xalackꞌajin israelitanin jantuch ixtalacaꞌi ni yuchi cava ju alakꞌachꞌix ixjunita. Chai jantu ixtalacaꞌi ni va calakꞌoxinicalh ju ixlakchulh. Tus acsni ju talacaꞌi acsni atꞌasanicalh ju ixpai ixnati ju anuꞌ alakꞌachꞌix ixjunita.
\v 19 Chai asacmicalh ju xapai xanati. Ajuncanch:
\p ―Ju ani ja yuchi ju mintsꞌalhꞌan ju nonatꞌit ni va alakꞌachꞌix ixjunita acsni lakꞌaulh. Pus ju chavai tas xalhiꞌalacꞌavananch.
\p
\v 20 Taꞌakꞌalhtayanalh ju ixpai chai ixnati. Tanaulh:
\p ―Iccꞌatsayau ni yuchi ju ani ju quintsꞌalh quincꞌan. Yuchi ju alakꞌachꞌix ixjunita acsni tavanan tsuculh.
\v 21 Para jantu iccꞌatsayau ta xalhiꞌalacꞌavananch ju chavai. Chai jantu iccꞌatsayau tichi chavaich ju xalakpulakꞌoxi. Pus ju yuchi kꞌaich. Yuchi ju asacmitꞌitch. Isꞌakstuch canonaꞌ.
\p
\v 22 Chunchach ju talhakꞌalhtayanalh ju ixpai chai ixnati ni va ixtatalhonich ju xalackꞌajin istꞌaꞌisraelitanin. Ju yuꞌunch ixtanajuntach ni xamatiꞌ canonaꞌ ni yuchi ju Cristo ju Jesús ju anuꞌ noncanch camalakachatachilh ju Dios pus jantu calacasqꞌuinicanaꞌ ni lai catanu ju laꞌixpujitatꞌan ju israelitanin.
\v 23 Pus yuchach talhinaulh chunch ju ixpai chai ixnati acsni tavanan tanaulh ni kꞌaich ju istsꞌalhꞌan. Yuchach ju casacmicalh.
\p
\v 24 Pus lhinonchokocalh istꞌasanica ju anuꞌ lapanac ju va alakꞌachꞌix ixjunita. Tajunich:
\p ―Anauch ni va yuchi ju xakꞌai ju Dios. Ju quijnan iccꞌatsayau ni va alactuꞌunuꞌ ju anuꞌ lapanac ju xalakpulakꞌoxiyan.
\p
\v 25 Ju acsnich ju anuꞌ alakꞌachꞌix ixjunita akꞌalhtayanalh. Najunch:
\p ―Ni alactuꞌunuꞌ u jantu ju quitꞌin jantu iccꞌatsai. Va lakatam taxtokni ju iccꞌatsai. Va alakꞌachꞌix xacjunita. Para ju chavai laich icꞌalacꞌavanan.
\p
\v 26 Chai tasacmichokopa ju anuꞌ alakꞌachꞌix ixjunita. Tajunich:
\p ―Tas xanaviyanch. Tas xalhimalacꞌavaniyanch.
\p
\v 27 Chai akꞌalhtayanalh ju anuꞌ alakꞌachꞌix ixjunita. Ajuni:
\p ―Ni iclajumpalauch chai jantu xaquilakꞌasmatnipalau. Tajuch ni va kꞌasmatchꞌokꞌopꞌutꞌunatꞌitch aktam. Ja vachuꞌ va umpꞌutꞌunatꞌit ju uxijnan ixtamamakaꞌunti.
\p
\v 28 Pus talhitalhkꞌamalh ju xalackꞌajin israelitanin. Tajunich ju anuꞌ alakꞌachꞌix ixjunita:
\p ―Ju uxintꞌi ixtamamakaꞌunchꞌat. Para ju quijnan ixtamamakaꞌunti Moisés icjuntau.
\v 29 Ju quijnan iccꞌatsayau ni Dios ju xakꞌala ju Moisés. Para ju ani lapanac jantu iccꞌatsayau ta anchach ju xaminacha.
\p
\v 30 Chai akꞌalhtayanalh ju anuꞌ alakꞌachꞌix ixjunita. Ajunich ju xalackꞌajin istꞌaꞌisraelitanin:
\p ―Slivasalh kꞌai lhamakꞌan ju ani. Ju uxijnan jantu cꞌatsꞌayatꞌit ta anchach ju mintacha ju yuchi para ju quitꞌin quimalacꞌavanilh.
\v 31 Cꞌatsayauch ni jantu kꞌasmatni ju va alactuꞌunuꞌ ju Dios. Para ni alin xamatiꞌ ju talhoni ju Dios chai navini ju ixkꞌachat pus yuchi ju kꞌasmatni.
\v 32 Tus laꞌixputaiꞌulacan ju lacamunutpaꞌ jantu tavanan kꞌasmatcanta ni caꞌalilh xamatiꞌ ju lai camalacꞌavani ju va alakꞌachꞌix lakꞌajunta.
\v 33 Pus ju anuꞌ lapanac ni jantu cava laꞌixmacni Dios ju minta ca jantu lai tuꞌuꞌ catinavi.
\p
\v 34 Chai taꞌakꞌalhtayanalh ju xalackꞌajin israelitanin. Tajunich ju anuꞌ alakꞌachꞌix ixjunita:
\p ―Ju uxintꞌi istsꞌalhꞌat ju va alactuꞌunu lapanacni. Ja va quilamalaniputunauch ju quijnan.
\p Pus lana xcoxtucalh junta ixtanun.
\s1 Ju aliꞌin jantu tamachakxaputun ixchivinti Dios
\p
\v 35 Chai kꞌasmatlh ju Jesús ni tixcoxtucalh ju anuꞌ alakꞌachꞌix ixjunita. Chai acsni pakxtokchokolh junich:
\p ―Ju uxintꞌi ja lhilaksi ju istsꞌalh Dios. ―Juncanch ju alakꞌachꞌix ixjunita.
\p
\v 36 Chai ju alakꞌachꞌix ixjunita kꞌalhtailh ju Jesús. Junich:
\p ―Tis chavaich ju anuꞌ lhichꞌivinin ji quiꞌamigo. Aqꞌuiꞌunch ni laich aclhilaksi ju yuchi.
\p
\v 37 Chai ju Jesús acsni kꞌalhtailh ju anuꞌ alakꞌachꞌix ixjunita junich:
\p ―Laktsꞌintꞌach. Chai yuchach ju tꞌonan tꞌachivinin.
\p
\v 38 Chai ju anuꞌ alakꞌachꞌix ixjunita junich ju Jesús:
\p ―Iclhilaksiyanch ji quiꞌucxtin.
\p Chai lana taꞌaktsokotanilh. Tsuculh nonaꞌ ni yuchach ju Dios.
\p
\v 39 Chai naulh ju Jesús:
\p ―Ju quitꞌin iclhiminta ju ani lacamunutpaꞌ ni laich caputasuyaꞌ ixtalakꞌalhinꞌan ju lapanacni. Ju chunch ju tachi ju va alakꞌachꞌixnin tajunita ni va jantu amachakxanan catamachakxayaꞌ ju stavasalanti. Chai ju tanajun ni tamachakxai ju stavasalanti pus tachi alakꞌachꞌixnin catajunaꞌ ni jantu cataꞌamachakxananaꞌ.
\p
\v 40 Ju aliꞌin fariseonin ju ixtamakvilanalh junta ixvi ju Jesús acsni takꞌasmatnilh ju ani chivinti tajunich ju Jesús:
\p ―Ja vachuꞌas tachi ju va alakꞌachꞌixnin icjuntau ni jantu lai icꞌamachakxananau.
\p
\v 41 Pus ju Jesús ajunich ju fariseonin:
\p ―Ni tachi ju va alakꞌachꞌixnin cava untꞌatꞌit ni va jantu amachꞌakxananatꞌit cava pus jantu ixꞌulanicꞌantꞌatꞌit ju miꞌalactuꞌuntiꞌan. Para ni nonatꞌit ni machꞌakxayatꞌit ju stavasalanti pus yuchi na lhiꞌalin ju miꞌalactuꞌuntiꞌan ni jantu naviyatꞌit.
\c 10
\s1 Ixcorral ju borregojni
\p
\v 1 Ju Jesús tailhiꞌalh ju chivinti ju ixtꞌajun ajuniniꞌ ju fariseonin chai naulh:
\p ―Slivasalh ju iclajunau. Ju jantu caputanuyaꞌ laxamalhtich ju laꞌixcorral ju borregojni ni va alacatam ju capuꞌanaꞌ pus ju yuchi va akꞌalhonaꞌ chai va lacatapꞌastu ju taiꞌi ju jantu ixꞌanuꞌ.
\v 2 Para ju caputanuyaꞌ laxamalhtich yuchach ju ixlhistacnaꞌ borregojni.
\v 3 Ju ixlhistacnaꞌ malhtich malhtekꞌani ju vasalh ixlhitacnaꞌ borregojni. Ju ixborregojni takꞌasmatni ju ixchivinti. Chai ju yuchi atꞌasani ju ixborregojni laꞌixtapakaꞌutꞌan chai alacmaxtui.
\v 4 Acsni amaxtukꞌojui ju ixꞌanuch pus apꞌulhnich. Chai ju ixborregojni tachꞌakꞌokꞌaich ni tamispanich ju ixchivinti ju ixꞌucxtinꞌan.
\v 5 Para ju va akꞌantam ni jantu tamispai pus jantu tachꞌakꞌokꞌai. Alai va taꞌatsꞌalhni va ixlacata ni tamispanich ju ixchivinti ni jantuch ixꞌucxtinꞌan.
\p
\v 6 Pus ju Jesús acsni naulh ju chunch chivinti va ixꞌapumavasalaniputun tuꞌuꞌ ju fariseonin. Para ju yuꞌunch jantu lai tamachakxa tuchi ju ixꞌamalanicanch.
\s1 Jesús ju kꞌox ixlhistacnaꞌ ju lapanacni ju tachi borregojni tajunita
\p
\v 7 Pus aktam ajunchokopa ju Jesús ju fariseonin:
\p ―Slivasalh ju iclajunau. Ju quitꞌin chunch icjunita tachi ju xamalhtich ju ixcorral ju borregojni.
\v 8 Tachi chun ju alhistacnin ju pꞌulhnan ixtatꞌajun acsni tucaꞌ xacmin va akꞌalhonin ixtajunita. Chai va lacatapꞌastu ixtataiꞌiputun ju jantu ixꞌanuꞌan. Para ju lapanacni ju tachi borregojni tajunita jantu takꞌasmatnilh ju ixchivintiꞌan.
\v 9 Ju quitꞌin chunch icjunita tachi ju xamalhtich ju corral. Ju laquimacni catanuyaꞌ catakꞌalhtaxtuyaꞌ. Chai ju laquimacni caꞌamaklhtayanankꞌoyaꞌ tachi chun ju ixmaktasqꞌuinit.
\p
\v 10 Ju akꞌalhonaꞌ yuchi lhiminch ni va akꞌalhonamputun chai lakmakniputun chai lakꞌalhiputun. Ju quitꞌin iclhiminta ni caꞌalilh ju isꞌatsucuntiꞌan ju lapanacni ju conkꞌalhiyanta lactꞌiyan. Chai slivasalh kꞌox cajunaꞌ ju anuꞌ atsucunti.
\v 11 Quitꞌin ju kꞌox xaꞌalhistacnaꞌ ju lapanacni ju tachi borregojni tajunita. Ju kꞌox xaꞌalhistacnaꞌ borregojni lhitapꞌux ju isꞌatsucunti va ixlacaꞌatalh ixborregojni.
\v 12 Ju va xalapanac junita jantu chun navi ni jantiyuꞌ ju amanavin. Pus ju yuchi acsni laktsꞌin ju maktiliꞌ ni mintach pus va lacmacoyojuich ju borregojni. Chai atsꞌalaich. Pus ju maktiliꞌ tapꞌastu alacchꞌapai chai amakpitsich ju borregojni.
\v 13 Pus ju jantu tucan yuꞌ ju xaꞌalhistacnaꞌ yuchach lhiꞌatsꞌalai ni va xalapanac junita. Jantu tuꞌuꞌ lhiulai ju borregojni.
\p
\v 14 Quitꞌin ju kꞌox ixlhistacnaꞌ ju lapanacni ju tachi borregojni tajunita. Ju quitꞌin icꞌamispakꞌojui ju quilapanacni. Chai ju quiꞌanuꞌ quintamispai.
\v 15 Chunch vachuꞌ ju quimpai quimispai. Pus vachuꞌ ju quitꞌin icmispai ju quimpai. Chai ju quitꞌin acxtꞌakꞌaꞌ ju quiꞌatsucunti ni catatsuculh ju quilapanacni. Chun tachi tam alhistacnaꞌ ni lhixtꞌakꞌa ju isꞌatsucunti ixlacata ixborregojni.
\v 16 Vachuꞌ icpacxanta aliꞌ lapanacni ju tachi borregojni tajunita ju jantucaꞌ quintachꞌakꞌokꞌai. Tasqꞌuini ni acꞌalhimilh. Chai ju yuꞌunch catakꞌasmatꞌaꞌ ju quinchivinti. Va chꞌanxtamch catajunaꞌ. Chai va pumatamch cajunaꞌ ju alhistacnaꞌ.
\p
\v 17 Ju quitꞌin mas acxtꞌakꞌach ju quiꞌatsucunti laich acꞌamaklhtayananchokoyaꞌ. Yuchi quilhimapaini ju quimpai.
\v 18 Jantu lai xamatiꞌ aquintitaiꞌinilh ju quiꞌatsucunti ju va laꞌixkꞌachat isꞌakstu. Quiꞌakstu ju acxtꞌakꞌaꞌ. Alin ju quintachaput ni lai acxtꞌakꞌaꞌ. Chai alin ju quintachaput ta yu lai acpuꞌamaklhtayananchokoyaꞌ. Junima lhamapꞌaksin quimpai ju quixtaknita.
\p
\v 19 Aktam alinchokopa ju ixlaklakꞌaitiꞌan ju israelitanin va ixlacaꞌatalh junima chivinti.
\v 20 Na lhu ju israelitanin ju ixtanajun:
\p ―Ju yuchi va pacxanta lhacaticuru. Jantu acꞌatsananta. Tajuch ni kꞌasmatniyatꞌit ju ixchivinti.
\p
\v 21 Ju aliꞌin ixtanajun:
\p ―Junima chivinti jantu ixchivinti ju tam xamatiꞌ ju va pacxanta lhacaticuru. Ju lhacaticuru ja lai camalacꞌavani ju tam alakꞌachꞌix.
\s1 Ju israelitanin jantu tuꞌuꞌ talhiula ju Jesús
\p
\v 22 Ju amachakꞌan Jerusalén ixtatꞌajun macꞌataninin ju ixpujitatꞌan. Lacalhicꞌasnin ixjunita.
\v 23 Ju Jesús ixꞌalhtanatꞌajun laꞌismakspaꞌ laꞌixpujitatꞌan ju istꞌaꞌisraelitanin junta juncan ixꞌanuꞌ ju Salomón.
\v 24 Pus ju istꞌaꞌisraelitanin lana talacaxcꞌavitnu ju Jesús. Chai tajunich:
\p ―Tas vananch ju aquilamavasalaniyau ju stavasalanti. Ni uxintꞌich ju Cristoꞌat pus vasch aquilajuniu.
\p
\v 25 Chai akꞌalhtayanalh ju Jesús. Ajunich:
\p ―Ni iclajumpalauch. Ni va jantu lacꞌaꞌipꞌalatꞌit. Ju tuchi icnavi laꞌixtapakaꞌut ju quimpai Dios yuchach ju capucꞌatsacanaꞌ tichi chavaich ju quitꞌin.
\v 26 Para ju uxijnan jantu lacꞌaꞌiyatꞌit ni jantu quimborregojni untꞌatꞌit tachi ju iclajuntauch.
\v 27 Ju lapanacni ju tachi quimborregojni tajunita quintakꞌasmatnich ju quinchivinti. Chai icꞌamispaich. Chai quintachꞌakꞌokꞌaich.
\v 28 Quitꞌin ju icꞌaxtakni ju isꞌatsucuntiꞌan jonkꞌalhita. Chai jantu tavanan catanikꞌalhiyaꞌ. Nin xamatiꞌ lai caꞌamakꞌosu ju laquimacni.
\v 29 Yuchi ju quimpai ju xaquiꞌaxtakni. Chai yuchi ju palai xakꞌai tachi chun ju lapanacni. Jantu lai xamatiꞌ catiꞌamakꞌosu ju laꞌixmacni ju quimpai.
\v 30 Ju quitꞌin chai ju quimpai va lakatamch icjuntau.
\p
\v 31 Aktam tasacchokopa ju chiux ju istꞌaꞌisraelitanin. Va ixtaputꞌalhputunch ju Jesús.
\v 32 Pus ju Jesús ajunich:
\p ―Na lhu lhamakꞌan ju xaclamalacasuniyau laꞌixmacni ju quimpai. Tasmalhch ju quilalhilacatꞌalhmaputunau.
\p
\v 33 Taꞌakꞌalhtayanalh ju istꞌaꞌisraelitanin. Tajunich:
\p ―Jantu iclalacatꞌalhmaputunau ixlacata ju kꞌoxi lhichꞌalhcat ju navitꞌa. Para va ixlacaꞌatalh ju macxcai chivinti ju naꞌun ni naꞌun ni Diosꞌat. Para ni va lapanac umpꞌalatꞌa.
\p
\v 34 Akꞌalhtayanalh ju Jesús:
\p ―Ja jantu pꞌastꞌacꞌatꞌit ni tsꞌokcanta ju lamilhamapꞌaksinꞌan ni ma chani naulh ju Dios: “Icnaulh ni diosnin untꞌatꞌit ju uxijnan”.
\v 35 Pus diosnin alhixakꞌalacalh ju yuꞌunch ju axtaknicalh ixlhichꞌalhcat ju Dios. Chai ju tuchi tsꞌokcanta lacalhamapꞌaksin jantu lai catimapaxacalh.
\v 36 Ja jantu vana va chun ju quitꞌin ni quisacxtutach ju quimpai Dios chai quimalakachachilh ju ani lacamunutpaꞌ. Tajuch ni va quilajunau ni macxcai ju icchivinin acsni icnajun ni istsꞌalh Dios ju icjunita.
\v 37 Pus ni jantu ixlhichꞌalhcat ju quimpai ju icnavi pus jantu aquilalacaꞌiniu.
\v 38 Para ni icnavi ju ixlhichꞌalhcat ju Dios pus apꞌulacꞌaꞌitꞌitch ju icnavi mas jantu lai lacꞌaꞌiyatꞌit ju tuchi iclajunau. Ju chunch lai amispꞌayaꞌitꞌitch ni va lakatam Dios icjuntau ju quimpai chai ju quitꞌin.
\p
\v 39 Aktam ixtachꞌapaputumpalai ju Jesús. Para lana taxtulh ju yuchi junta ixtavilanalhch ju fariseonin.
\p
\v 40 Aktam anchokopa ju makꞌantacutni lacxcan Jordán junta pꞌulhnan ixꞌamakpaxanan ju Xivan. Anchach ju tolhcha.
\v 41 Na lhu lapanacni ju ixtalakminch ju Jesús chai chani ixtanajunch:
\p ―Ju Xivan jantu tuꞌuꞌ lhamakꞌan navita. Para tachi chun ju naulh ju Xivan ixlacata ju ani lapanac islivasalh.
\p
\v 42 Chai na lhu talhilacaꞌalh ju Jesús.
\c 11
\s1 Ixꞌaninti ju Lázaro
\p
\v 1 Ju acsnich ixtakꞌankꞌai pumatam lapanac ju ixjuncan Lázaro. Chai ju yuchi ixꞌalin ju ixꞌalakꞌavin. Ju pumatam ixjuncan Malia. Chai ju pumatam ixjuncan Marta. Va lakputam ixtatꞌajun junta juncan Betania.
\v 2 Ju Malia ispꞌisekꞌe ixjunita ju Lázaro ju anuꞌ ixtakꞌankꞌai. Yuchach ju Malia ju lacamucꞌalh ju ixcꞌuchꞌu ju quiꞌucxtinꞌan Jesús. Chai ju anuꞌ cꞌuchꞌu na saksi ixꞌacamin. Chai ju Malia achꞌanxacꞌanalh laꞌixꞌai.
\v 3 Pus ju anuꞌ atsiꞌin ju ixꞌalakꞌavin ixtajunita ju Lázaro tamalakacha ju ixlapanacniꞌan junta ixvilhcha ju Jesús. Chai ju yuꞌunch tajunilh ju Jesús:
\p ―Ucxtin ju lapanac ju na mapꞌaini na takꞌankꞌai.
\p
\v 4 Acsni kꞌasmatlh ju Jesús ju chunch pus ajunilh ju anuꞌ lapanacni:
\p ―Jantiyuꞌ xalhixtaknican ju ani takꞌankꞌat ni va caniyaꞌ. Yuchi xalhixtaknican ju ani takꞌankꞌat ni catanonaꞌ ju lapanacni ni na tachapun ju Dios. Chunch ju acpumispacanaꞌ ni icxakꞌaich ju quitꞌin ju istsꞌalh Dios icjunita.
\p
\v 5 Ju Jesús na ixtꞌalamapaini ju Marta chaich ju ispꞌisekꞌe chaich ju Lázaro.
\v 6 Para ju Jesús acsni kꞌasmatlh ni ixtakꞌankꞌai ju Lázaro pus titolhcha lakatꞌui vilhchan junta ixvilhcha.
\v 7 Ju astan ajunilh ju ixꞌamamakaꞌui:
\p ―Caꞌanchokoch ju xaꞌestado Judea.
\p
\v 8 Ju ixꞌamamakaꞌui tajunich:
\p ―Amamakaꞌunuꞌ tucaꞌ makꞌan ixtalacatꞌalhmapu- tumpalachan ju quintꞌaꞌisraelitaninꞌan. Chai ja va pꞌinchꞌokꞌopꞌutꞌunch ju anch.
\p
\v 9 Akꞌalhtayanalh ju Jesús:
\p ―Ja jantu pacxanta lakacautꞌui hora ju tam avilhchan. Pus ju caꞌalhtananaꞌ ju tuncu jantu tuꞌuꞌ pukꞌalhkꞌosa ni laktsꞌin ju xaꞌatuncunuꞌ ju ani lacamunutpaꞌ.
\v 10 Para ju va tsꞌista laꞌixtacꞌatsan cakꞌalhkꞌosaꞌ ni matiꞌ ju atuncunuꞌ ju laꞌixꞌalhunut.
\p
\v 11 Acsni naulh ju ani pus astan ajunich:
\p ―Ju quiꞌamigoꞌan Lázaro lhtataich. Para acꞌanaꞌ macujunuꞌ ju laꞌilhtatat.
\p
\v 12 Ju acsnich ju ixꞌamamakaꞌui tanaulhch:
\p ―Quiꞌucxtin ni va lhtatai pus palai cajunaꞌ.
\p
\v 13 Ju Jesús va ixꞌajumputunch ni nitach vasalh. Para ju yuꞌunch va ixtalhimachakxai ni ca vasalh va lhtatai ju Lázaro.
\v 14 Lana acsnich ju vas ajunilh ju Jesús ni nilhch ju Lázaro.
\v 15 Chai ajunich:
\p ―Na iclhikꞌachan ju milacataꞌan ni jantu anch xacvilhcha acsni tavanan xani ju Lázaro. Ju chunch ni laich palai aquilapulhilaksiyau. Para ju chavai caꞌauch laktsꞌinin.
\p
\v 16 Ju acsnich ju Tumax ju ixjuncan Cuate ajunich ju ixꞌalactꞌatamakaꞌui:
\p ―Caꞌauch vachuꞌ ju quijnanꞌan ni laich kꞌaixtam catꞌanitachau ju Jesús.
\s1 Jesús ju lai amacxtui ju tanitach chai axtaknichokoi isꞌatsucuntiꞌan
\p
\v 17 Acsni chaꞌalh ju Jesús ju laꞌixchakaꞌ ju lijunto macꞌatsanicalh ni lakatꞌatꞌich avilhchan ixꞌacnui ju Lázaro.
\v 18 Ju lakꞌachakꞌan Betania vanin ixtꞌalachꞌapata ju lakꞌachakꞌan Jerusalén. Tachi lakatꞌutu kilómetro ixlhimakat.
\v 19 Pus yuchi lai ixtalhilakminta ju Marta chaich ju Maliach na lhu ju istꞌaꞌisraelitanin. Va ixtamatankꞌoxaxkꞌayai ni jantu na cataꞌamakꞌaninilh ju ixlacata ju lijunto ispꞌisekꞌeꞌan Lázaro.
\v 20 Ju Marta acsni kꞌasmatlh ni vaninch minta ju Jesús pus alh pakxtoknuꞌ. Para ju Malia tavilhcaꞌ lacachakaꞌ.
\v 21 Pus ju Marta junich ju Jesús:
\p ―Quiꞌucxtin ni cꞌaꞌixvilhtꞌi ju ani pus jantu ixtini ju quimpꞌisekꞌe.
\v 22 Para iccꞌatsai mas chavai tachi chun ju asqꞌuiniyaꞌ ju Dios caxtakniyan. ―Najunch ju Marta.
\p
\v 23 Ju Jesús junich ju Marta ni kꞌalhtailh:
\p ―Calokꞌonchokoyaꞌ ju mimpꞌisekꞌe.
\p
\v 24 Chai ju Marta junich ju Jesús:
\p ―Iccꞌatsai ni calokꞌonchokoyaꞌ ju quimpꞌisekꞌe laꞌixꞌaclanti ju lacamunutpaꞌ acsni catalokꞌonchokoyaꞌ ju tanitach.
\p
\v 25 Chai ju Jesús junich:
\p ―Quitꞌin ju icꞌamalokꞌonininchokoi. Chai quitꞌinch ju icxtꞌakꞌa ju atsucunti jonkꞌalhita. Ju quilhilacaꞌanch mas caniyaꞌ ju ixlacatuna para catsucuyanta ju ixtacuvin ju lactꞌiyan.
\v 26 Chai tachi chun ju alin isꞌatsucuntiꞌan ju jonkꞌalhita va ixlacaꞌatalh ni quintalhilacaꞌanch pus catatsucukꞌalhiyanta ju lactꞌiyan. Ja lacꞌaꞌi ju ani.
\p
\v 27 Ju Marta junich:
\p ―Chunch ji quiꞌucxtin. Iclacaꞌich ni uxintꞌi ju Cristoꞌat. Istsꞌalhꞌat Dios ju noncanch ni caminaꞌ ju ani lacamunutpaꞌ.
\s1 Ju Jesús kꞌalhun junta ixꞌacnui ju Lázaro
\p
\v 28 Acsni naulh ju chunch ju Marta pus lana anchokolh laꞌixchakaꞌ. Chai lana va sek tꞌasanilh ju ispꞌisekꞌe ju Malia ixjuncan. Junich:
\p ―Ju amamakaꞌunuꞌ anuꞌ yacha chai tꞌasaniyanch.
\p
\v 29 Chai ju Malia acsni kꞌasmatlh ju anuꞌ chivinti pus lana vatsꞌalhti taya. Lakꞌalh junta ixvilhcha ju Jesús.
\v 30 Pus tucaꞌ ixchaꞌan ju Jesús ju lakꞌachakꞌan Betania. Va anchcaꞌ ixvi junta tꞌalapakxtoklh ju Marta.
\v 31 Pus ju Malia vatsꞌalhti taya junta ixvi chai taxtulh. Pus ju ixtavilanalh laꞌixchakaꞌ ju Malia acsni talaktsꞌilh ni taxtulh pus tachꞌakꞌokꞌalh. Talaclajunich:
\p ―Ca anch ju xaꞌan kꞌalhutolhnaꞌ junta makꞌacanta ju ixlacatuna ju lijunto ispꞌisekꞌe.
\p
\v 32 Ju Malia acsni chaꞌalh junta ixvi ju Jesús pus lana taꞌaktsokotalh vanin junta ixya. Junich:
\p ―Quiꞌucxtin ni cꞌaꞌixvilhtꞌi ju ani pus jantu ixtini ju quimpꞌisekꞌe.
\p
\v 33 Ju Jesús acsni laktsꞌilh ju Malia ni na ixkꞌalhunch chaich ju istꞌaꞌisraelitanin ju ixꞌalactꞌamintach kꞌaixtam ni vachuꞌ ixtalackꞌalhun pus xcanilhch ju ixꞌalhunut ju Jesús. Amakꞌaninilh.
\v 34 Ajunich ju Malia chai Marta:
\p ―Tas anchach ju makꞌatꞌatꞌit ju ixlacatuna ju lijunto Lázaro.
\p Tanajunch ju Malia chai ju Marta:
\p ―Asokꞌoch ji quiꞌucxtin. Alaktsꞌintꞌachich.
\p
\v 35 Ju Jesús lana tsuculh kꞌalhunuꞌ.
\v 36 Ju acsnich ju istꞌaꞌisraelitanin tanaulhch:
\p ―Alaktsꞌintꞌitch. Slivasalh na ixtꞌalamapaini ju Lázaro.
\p
\v 37 Para ju aliꞌin tanaulh:
\p ―Ju ani lapanac lai malacꞌavani ju alakꞌachꞌix. Tajuch ni jantu lai xacꞌuchꞌupalai ni jantu cꞌaꞌixnilh ju Lázaro.
\s1 Taꞌacxtuchokolh ju Lázaro junta ixmacnucanta
\p
\v 38 Ju Jesús aktam xcanichokopa ju ixꞌalhunut. Alh junta ixmakꞌacanta ju ixlacatuna ju lijunto Lázaro. Anch junta pulhucucu talhpa ixjunita. Chai ixyonicanta lhtꞌakꞌalh chiux ju laxamalhtich.
\v 39 Ajunich ju Jesús ju lapanacni:
\p ―Amakꞌosutꞌit ju chiux.
\p Para ju Marta ju ixlakꞌauch ju lijunto naulhch:
\p ―Quiꞌucxtin para na ca acaminch ju chavai ni lakatꞌatꞌich avilhchan ju xatamai ju ani.
\p
\v 40 Ju Jesús junich:
\p ―Ja jantu icjunan ni chavai ju alaktsꞌinaꞌ ju ixtachaput ju Dios ni vasalh alacꞌaꞌitꞌi.
\p
\v 41 Ju acsnich tamakꞌosulhch ju chiux. Chai ju Jesús talakstꞌalh ju lactꞌiyan. Naulh:
\p ―Quimpai icxtakniyan lhakꞌailaktsꞌin ni quinkꞌasmatnitach ju tuchi xacsqꞌuiniyan.
\v 42 Ju quitꞌin iccꞌatsai ni aktsꞌiya quinkꞌasmatnich. Para va ixlacaꞌatalhꞌan ju ixtalhavat lapanacni ju ani tavilanalh icsqꞌuiniyanch chunch ni laich catalacaꞌiyaꞌ ni uxintꞌi ju qꞌuimacꞌatꞌantꞌa ju ani lacamunutpaꞌ.
\p
\v 43 Acsni nonkꞌo junima chivinti ju Jesús pus lana pꞌas chivinilh acsni junilh ju lijunto Lázaro:
\p ―Lázaro atꞌaxtꞌuch makspaꞌ.
\p
\v 44 Pus ju Lázaro taxtulh junta ixmacnucanta. Ixchꞌanchꞌicantacaꞌ chai ixmakchꞌicantacaꞌ lacapumpuꞌ acsni taxtulh. Chai ju ixꞌucxpuꞌ ixlacapachꞌicantacaꞌ lacapayu. Ajunich ju Jesús ju lapanacni:
\p ―Alacxkꞌotnitꞌitch junta lacchꞌinicanta. Chach ancha laꞌixchakaꞌ.
\s1 Lhilacchivinincalh ni camaknicanach ju Jesús
\p
\v 45 Ju acsnich na lhu ju istꞌaꞌisraelitanin ju ixtalakminta ju Malia talhilacaꞌalh ju Jesús ni talaktsꞌilh tuchi navilhch ju yuchi.
\v 46 Para ju aliꞌin taꞌalh laktsꞌinin ju fariseonin. Taꞌalh juninin tuchi navilhch ju Jesús.
\v 47 Ju acsnich ju xalackꞌajin palijni chaich ju fariseonin tamakꞌaixtoklh ju ixtꞌaxalackꞌajin. Ixtalajunich:
\p ―Tas calayauch ju chavai. Ju ani lapanac na lhu lhamakꞌan ju malacasui.
\v 48 Ni va calhilakꞌaꞌiyau pus chux ju quintꞌaꞌisraelitaninꞌan catalhilacaꞌankꞌoyach ni ixꞌucxtinꞌan junita. Chai cataminach ju romanonin ju talhinajun ju ani lacatꞌun chai catalakꞌalhiyaꞌ ju quimpujitatꞌan chai aquintamaknikꞌoyan.
\p
\v 49 Para pumatam lhiyuꞌunch ixjuncan Caifás. Ju yuchi xakꞌai pali ixjunita ju anuꞌ cꞌata. Ju yuchi ajunich ju ixtꞌaxalackꞌajin:
\p ―Ju uxijnan jantu tuꞌuꞌ mispꞌayatꞌit.
\v 50 Jantu machꞌakxayatꞌit ni palai kꞌox ju quilacataꞌan ni canilh pumatam lapanac. Jantu camaknikꞌocau ju quijnanꞌan ju israelitanin juntau.
\p
\v 51 Ju Caifás jantu va laꞌisꞌakstu pastaclh ju ani chivinti. Para ni xakꞌai pali ixjunita ju anuch cꞌata pus yuchi lhinaulh ni caniyaꞌ ju Jesús ixꞌokxtapalhni ju istꞌaꞌisraelitanin.
\v 52 Chai jantu va yuchi ni canilh ixꞌokxtapalhni ju istꞌaꞌisraelitanin. Para vachuꞌ laꞌixꞌaninti va lakatam ixꞌanavikꞌoputun ju isꞌaskꞌatꞌan Dios ju tatꞌajun ixlhilacaputsꞌun ju lacamunutpaꞌ.
\v 53 Pus tus acsnich avilhchan ju tapastaclh ta yu laich catapumakniyaꞌ ju Jesús.
\p
\v 54 Ixlhiyuchach ju Jesús jantu ixꞌalhtanamputun laꞌixꞌucxlacapuꞌan ju istꞌaꞌisraelitanin. Va alh laxalacatꞌun junta vanin ixtꞌalachꞌapata ju anuꞌ xalacatꞌun junta matiꞌ tuꞌuꞌ ixjunita. Alh ju lakꞌachakꞌan ju ixjuncan Efraín. Anch ju alactꞌatolhcha ju ixꞌamamakaꞌui.
\p
\v 55 Ju ixcꞌatanꞌan ju israelitanin vanin ixjunita. Ju cꞌatan ju ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin. Pus acsni tucaꞌ ixchin ju anuꞌ cꞌatan pus na lhu lapanacni ixtachaꞌanta ju lakꞌachakꞌan Jerusalén. Ixtataxtutacha laꞌixtꞌunꞌan. Va ixtaꞌan navinin tachi ju ixnajunch laꞌixlhamapꞌaksin ju Moisés ni laich cataꞌulh ju ixborregoꞌan.
\v 56 Chai ixtapuxcajuich ju Jesús. Chai ixtalajunich ju sia yuꞌunch acsni ixtayanalh lacakꞌai ixpujitatꞌan:
\p ―Tꞌas nonatꞌit ju uxijnan. Ja caminaꞌ nuꞌ ju chavai cꞌatan ju anuch ju juncan Cristo u jantu.
\p
\v 57 Ju xalackꞌajin palijni chaich ju fariseonin ixtaxtaktach ju lhamapꞌaksin ni tam xamatiꞌ cacꞌatsayaꞌ ta anchach ju catsucucha ju anuch Jesús pus lana canonach. Ju chunch laich cataꞌanaꞌ chꞌapanin.
\c 12
\s1 Ju Jesús lacamucꞌacalh ju cꞌuchꞌu ju na cꞌus ixꞌacamin
\p
\v 1 Acsni chinchokocha ju Jesús ju lakꞌachakꞌan Betania pus lakachaxancaꞌ avilhchan ixticꞌacxacaꞌ acsni cajunach ju anuꞌ cꞌatan ju lakꞌachakꞌan Jerusalén. Ju Betania ixlakꞌachakꞌan ixjunita ju anuꞌ Lázaro ju ixnita chai ixlokꞌonchokota laꞌixtachaput ju Jesús.
\v 2 Anch ju tanavinilh lakatam lacvaiti ju Jesús. Chai ju Marta ixtꞌakꞌa vaiti. Chai ju Lázaro ixmaktapakstitama junta ixtaꞌakstitamanalh ju Jesús junta ixtatꞌajun venin ni chunchach ixtalhilanita.
\v 3 Ju acsnich ju Malia chꞌapalh paitat kilo ju na saksi cꞌuchꞌu ju va achꞌitin ixnavicanta chai na laklhu ixtapalh ixjunita. Chai ju yuchi chꞌanmucꞌalh laꞌixchꞌanchꞌajaꞌ ju Jesús chai lhichꞌanxaca laꞌixꞌai. Pus ju chakaꞌ na cꞌus pulacꞌacamilh ju lacacꞌuchꞌu.
\v 4 Para pumatam ixtamamakaꞌun ju Jesús jantu kꞌox lhiula. Ju yuchi Judas Iscariote ixjuncan. Istsꞌalh Simón. Yuchi ju anuꞌ camakꞌaxtꞌakꞌaꞌ ju Jesús. Pus ju yuchi naulh:
\p
\v 5 ―Tajuch ni jantu lakatꞌutu cientos xalhistꞌai ju ixcꞌuchꞌu chai caꞌixꞌaxtaknilh ju quilhpatinin.
\p
\v 6 Mas chunch ju naulich para jantu slivasalh ni va camapaini ju quilhpatinin. Alai punaulh ni va akꞌalhonaꞌ ixjunita. Chai yuchi ju ixmakꞌatach ju ixtumin ju Jesús chaich ixtuminꞌan ju ixꞌatꞌamamakaꞌuich. Chai anch ju ixkꞌalhomacutuich ju tumin.
\v 7 Ju acsnich ju Jesús junich:
\p ―Amacꞌauch. Ju yuchi ixmakꞌata ju ani cꞌuchꞌu. Chai ju chavai quixtꞌekꞌemucꞌanilh ni camakꞌacanaꞌ ju quilacatuna. Chunch ju xanavich tachi ju lhilanitauch ni nican.
\v 8 Ju quilhpatinin aktsꞌiya catatꞌaꞌalhtananan. Para ju quitꞌin jantu lai actilatꞌaꞌalhtanankꞌalhiu.
\s1 Acsni lhilacchivinincalh ixlacata ju Lázaro
\p
\v 9 Na lhu ju israelitanin tacꞌatsa ni anch ixvi ju Jesús laꞌixchakaꞌ ju Malia. Para jantu va yuchi ixtalhiminta ni va caꞌixtalaktsꞌimputulh ju Jesús. Para vachuꞌ ixtalaktsꞌimputunch ju Lázaro ju ixlokꞌonchokotach laꞌixtachaput ju Cristo acsni ixnita.
\v 10 Ju xalackꞌajin palijni ixtalajunich ju sia yuꞌunch ni camaknicanach vachuꞌ ju Lázaro.
\v 11 Pus va ixlacaꞌatalh ni malokꞌonichokocalh ju Lázaro na lhu ju israelitanin tapumacaulh ju ixpalijniꞌan chai talhilacaꞌalh ju Jesús. Yuchi ixtalhipastꞌacꞌach ni camaknicalh ju Lázaro.
\s1 Ju Jesús tanucha ju lakꞌachakꞌan Jerusalén
\p
\v 12 Acsni tuncunchokopa ju ixtalhavat lapanacni ju ixtachinta junta ixlai ju anuꞌ cꞌatan takꞌasmatlh ni mintach ju Jesús ju lakꞌachakꞌan Jerusalén.
\v 13 Pus tachakxꞌilh ju ixꞌaxtacnaꞌan chai tachꞌapalhch chai taꞌalh pakxtoknin ju Jesús. Ixtanajunch:
\p ―Calakꞌayacalh ju Dios. Paxcat ju ixꞌucxtinꞌan ju israelitanin ju minta laꞌixtapakaꞌut ju Dios.
\p
\v 14 Ju Jesús lhitaju lakatam puru chai putocꞌalh. Tachi ju tsꞌokcanta junta najun:
\q1
\v 15 Jantu atꞌalhan ji amachakꞌan Jerusalén.
\q1 Anich minta ju miꞌucxtinꞌan. Pujucalh ju puru.
\p
\v 16 Ju acsni jantu tamachakxa ju ani taxtokni ju ixꞌamamakaꞌui ju Jesús. Para acsni anchokolh lactꞌiyan ju Jesús acsnicaꞌ ju tapastaclh ju ani taxtokni ni chunchach istsꞌokcanta ixlacata yuchi chai ni chunchach ju tamuctaxtulh ju lapanacni.
\p
\v 17 Tachi chun ju lapanacni ju ixtalaktsꞌinch ju Jesús acsni malokꞌonichokolh ju Lázaro acsni junilh ni cataxtulh junta ixmacnucanta pus yuꞌunch ju ixtanajunch ni vasalh chunch ju navilh ju Jesús.
\v 18 Ju lapanacni ni ixtakꞌasmatꞌach tuchi lhamakꞌan ixnavita pus yuchi taquilhipakxtoklh ju Jesús.
\v 19 Pus ju fariseonin ixtalaclajunich ju sia yuꞌunch:
\p ―Alaktsꞌintꞌit. Ju quijnanꞌan jantu quiclacaꞌicanau. Chux ju lapanacni catachꞌakꞌokꞌayach ju anuꞌ lapanac ju Jesús juncan.
\s1 Ju lapanacni ju ixꞌajuncan griegonin ixtalaktsꞌimputun ju Jesús
\p
\v 20 Vachu na lhu ixtamakꞌanta ju griegonin junta ixtaꞌanta ju israelitanin ju ixtamaknajun ni Cristo yuchi ju xakꞌai. Chunch ixtanajun junta lai cꞌatan.
\v 21 Ju yuꞌunch talakꞌalh ju Pilipe ju amachakaꞌ Betsaida lhiGalilea. Tatapaininilh. Tajunich:
\p ―Quiꞌamigo. Iclaktsꞌimputunau ju Jesús.
\p
\v 22 Pus ju Pilipe alhch juniniꞌ ju Tilix. Chai ju Tilix tꞌaꞌalhch ju Pilipe. Taꞌalhch juninin ju Jesús.
\v 23 Ju acsnich ju Jesús alackꞌalhtailh. Ajunich:
\p ―Vaninch chinch ju avilhchan acsni catacꞌatsayach ju lapanacni ni icxakꞌai. Quitꞌinch ju quimalakachatachilh ju Dios ni lapanac actsucuyaꞌ ju ani.
\v 24 Slivasalh ju iclajunau. Ju satalhtsꞌi trigo ni jantu capuchꞌilh ju ixꞌaxtꞌakꞌa junta chꞌancanta lacatꞌun pus jantu lai tuꞌuꞌ catixtaklh ju xalhiꞌut. Para ni capuchꞌiyaꞌ pus capꞌunaꞌ chai caxajtachilh chai na lhu caxtꞌakꞌaꞌ ju xalhiꞌut. Pus tachi ju tapasai lasatalhtsꞌi trigo pus chunchach vachuꞌ ju catapasayaꞌ ju laquiꞌatsucuntiꞌan.
\v 25 Ju na mapaini isꞌatsucunti ju ani lacamunutpaꞌ catsꞌankꞌayanta ju saꞌatsucunti ju lactꞌiyan. Para ju jantu tuꞌuꞌ lhiulai ju isꞌatsucunti ju ani lacamunutpaꞌ pus pulhajai ju isꞌatsucunti jonkꞌalhita lactꞌiyan.
\v 26 Ni xamatiꞌ quinchꞌalhcatnaniputun pus aquinchꞌakꞌokꞌalh. Chai vanta anchach ju actsucuyaꞌ ju quitꞌin pus anchach vachuꞌ catsucuyaꞌ ju quilapanac. Ni xamatiꞌ quinchꞌalhcatnaniputun pus camispacanaꞌ ni xakꞌai laꞌixmacni ju quimpai.
\s1 Ju Jesús alacjuni ni caniyaꞌ
\p Ju Jesús tailhiꞌalh ju ixchivinti chai chani naulh:
\p
\v 27 ―Ju chavai quixcani ju quiꞌalhunut. Tijuch ju acnonaꞌ. Ja acnonach: “Quimpai aquimakꞌalhtꞌaxtꞌuch ju anuꞌ minta pantsꞌiquis”. Jantu lai actinaulh ju chunch ni yuchi iclhitsucuta ju ani lacamunutpaꞌ.
\v 28 Alai acnonaꞌ: “Quimpai chach tacꞌatsa ju lapanacni ni xakꞌaichꞌat”.
\p Chai acsni naulh ju chunch ju Jesús pus lana mincha lakatam chivinti ju lactꞌiyan ju naulh:
\p ―Tacꞌatsalh ju lapanacni ni icxakꞌai chai aktam camasunichokocanaꞌ.
\p
\v 29 Ju anuꞌ lapanacni ju vanin ixtayanalh takꞌasmatlich ju anuꞌ chivinti. Chai ixtanajunch ni va tꞌasalh tꞌajin. Chai ju aliꞌinch ixtanajunch ni anquilh ju xaxakꞌalai.
\v 30 Akꞌalhtayanalh ju Jesús. Ajunich:
\p ―Jantu quilacata ju xalhimin junima chivinti. Para milacataꞌan.
\v 31 Ju chavai amucꞌanicalhch ixtalakꞌalhinꞌan ju lapanacni. Chai ju xaꞌucxtin ju aꞌokxchokꞌoi chux ju lacamunutpaꞌ jantuch lai catilhinonkꞌo.
\v 32 Ju quitꞌin ni acxtucmucꞌacanaꞌ ju lacacurus pus acꞌatꞌasanikꞌoyach ju laquimacni tachi chun ju lapanacni.
\p
\v 33 Ju punaulich ju chunch ju Jesús va ixꞌamamachakxaninimputunch ta yu capuniyach.
\v 34 Taꞌakꞌalhtayanalh ju ixtalhavat lapanacni:
\p ―Ju quijnan ickꞌasmatꞌauch ni najun ju lacalhamapꞌaksin ni catsucukꞌalhiyaꞌ ju Cristo ju noncan camalakachatachilh ju Dios. Para ju uxintꞌi naꞌun ni tasqꞌuini ni caxtucmucꞌacalh lacacurus ju malakachatachilh ju Dios ni lapanac catsucuyaꞌ ju ani. Tis chavaich ju ani ju malakachatachilh ju Dios ni lapanac catsucuyaꞌ ju ani. Ja yuchi ju Cristo juncan.
\p
\v 35 Ju acsnich ju Jesús ajunich:
\p ―Pus va pantsꞌiquisch ju tiꞌalin ju atuncunuꞌ ju lamilhiꞌuxijnan. Alacꞌasqꞌuintꞌit ni chach tamapulhcunin ju lamiꞌalhunutꞌan ni alincaꞌ ju tachi atuncunuꞌ lamilhiꞌuxijnan. Ni jantu lakꞌaꞌiyatꞌit pus jantu xcai ni catakꞌalhi ju miꞌatsucuntiꞌan. Chunch aꞌunaꞌitꞌit tachi tam xamatiꞌ ju alhtanan lacaꞌatatsꞌisni. Ju yuchi jantu cꞌatsai taꞌanchach ju puꞌan.
\v 36 Ju quitꞌin tachi ju atuncunuꞌ icjunita. Pus ni ictilatꞌavilau pus tus chavai aquilalhilacaꞌau. Ju chunch atsꞌucꞌuyaꞌitꞌit tachi ju lapanacni ju tatꞌajun laquiꞌatuncunuꞌ.
\p Ju ani chivinti acsni naulh ju Jesús pus lana alh. Alackꞌosmakꞌalh ju lapanacni.
\s1 Ju israelitanin jantu tavanan talacaꞌi ju ixchivinti Cristo
\p
\v 37 Ju Jesús mas navilhch ju laꞌixꞌucxlacapuꞌan ju lapanacni na lhu lhamakꞌan nin chunch jantu ixtalhilacaꞌan.
\v 38 Ni chunchach talalh pus uctaxtulh ju ixchivinti ju makꞌaniya lapanac ju Isaías ixjuncan. Ju yuchi ixnajun ixchivinti Dios chai chani ju junilh ju Dios:
\q1 Tis chavaich ji quiꞌucxtin ju lacaꞌita ju quinchivintiꞌan.
\q1 Tis chavaich ju ismasunicanta ni na tachapunꞌat ji quiꞌucxtin Dios.
\m
\v 39 Chunch ju naulh ju Isaías. Chai ni jantu lai ixtalacaꞌi pus uctaxtulh ixchivinti ju Isaías junta chani nonchokoi lacaꞌalacatam atsꞌoknut:
\q1
\v 40 Dios ju anavilh ni alakꞌachꞌixnin catava laꞌixtacꞌatsanꞌan ju lapanacni.
\q1 Chai na pꞌas anavinilh ixꞌalhunutꞌan.
\q1 Ju chunch jantuch lai catapamachakxananaꞌ ju ixtacꞌatsanꞌan.
\q1 Chai jantu lai catalacaꞌiyaꞌ tuꞌuꞌ laꞌixꞌalhunutꞌan.
\q1 Chai jantu lai tam catapastꞌacꞌaꞌ laꞌixꞌalhunutꞌan ni laich tam acꞌanavinilh ixꞌalhunutꞌan.
\m
\v 41 Yuchach ju ani ju naulh ju Isaías acsni masunilh ju Dios ni yuchach ju Dios ju xakꞌai tucan. Chai chunch ju lhichivinilh.
\p
\v 42 Aktsꞌiya na lhu ju xalackꞌajin talhilacaꞌalh ju Jesús. Para va ixlacaꞌatalhꞌan ju fariseonin jantu ixtapunomputun ju anuch xalackꞌajin ni ixtalhilacaꞌanta ju Jesús. Va ixtanajunch ni jantu caꞌaxcoxtucalh laꞌixpujitatꞌan ju istꞌaꞌisraelitanin ni jantu xamatiꞌ cacꞌatsa ni talhilacaꞌanta ju Jesús.
\v 43 Chunch ju talalh ni va palai kꞌox ixtalhiulai ni catanaulhch ju ixtꞌalapanacni ni xalackꞌajin tajunita. Palai jantu tuꞌuꞌ talhiula ni Dios ju canaulh ni xalackꞌajinch catava.
\s1 Ju laꞌixchivinti Jesús caputasuyach ju ixtalakꞌalhinꞌan ju lapanacni
\p
\v 44 Ju Jesús pꞌas naulh:
\p ―Ju quilhilacaꞌantach jantu va quitꞌin ju quilhilacaꞌanta. Para vachuꞌ yuchi ju lhilacaꞌan ju quimacaminta.
\v 45 Chai va tichi chavaich ju quilaktsꞌin pus tachi ju va laktsꞌin ju quimacaminta.
\v 46 Ju quitꞌin icminta ju ani lacamunutpaꞌ tachi ju tuꞌuꞌ maclhcu ni laich acꞌamalacpucujuyaꞌ ju lapanacni. Ju chunch tachi chun ju quintalhilacaꞌanch quitꞌin jantu va tachi tsꞌista cajunaꞌ ju laꞌixtacꞌatsanꞌan.
\v 47 Ju cakꞌasmatꞌaꞌ ju quinchivinti para ni jantu tuꞌuꞌ calhiulayaꞌ pus jantu quitꞌin ju icꞌulani ixtalakꞌalhin. Jantiyuꞌ iclhiminta ju quitꞌin ni va acꞌaꞌulanilh ixtalakꞌalhinꞌan ju lapanacni. Va icminta amakꞌalhtaxtunuꞌ ju lapanacni.
\v 48 Alin tuchi ixtalakxtuch ju ulani ixtalakꞌalhin ju jantu tuꞌuꞌ quilhiulai chai ju jantu lacaꞌi ju quinchivinti. Ju chivinti ju icnajunta anch ju caputasuyach ixtalakꞌalhinꞌan acsni cachinaꞌ ju avilhchan ju ixꞌaclanti lacamunutpaꞌ.
\v 49 Chai jantu va quiꞌakstu ju icchivinin. Para yuchi ju icnajun tuchi quijuni ju quimpai ju quimacaminta. Chai yuchi ju quimavasalanilh ta yu laich acnonaꞌ.
\v 50 Chai iccꞌatsaich ni alin ju atsucunti jonkꞌalhita acsni muctaxtucan ju laꞌixlhamapꞌaksin ju quimpai Dios. Pus yuchi ju icnajunch tachi ju quijunitach ju quimpai Dios.
\c 13
\s1 Ju Jesús achꞌanchꞌakꞌa ju ixꞌamamakaꞌui
\p
\v 1 Tucaꞌ cꞌatan ixjun. Ju anuꞌ cꞌatan acsni ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya israelitanin. Pus ju Jesús cꞌatsalh ni chintach ju ixꞌavilhchan ni camaconach ju ani lacamunutpaꞌ. Canach lactꞌiyan junta vi ju ixpai. Pus ju yuchi aktsꞌiya ixꞌamapainich ju ixlapanacni acsni ixꞌalactꞌavi ju ani lacamunutpaꞌ. Para ju chavai ni caꞌanach pus amasunilh ni vasalh na amapaini.
\p
\v 2 Acsni tapakstitama ju lacamixa pus ju lhacaticuru ixlhitanunch laꞌixꞌalhunut ju Judas Iscariote ju istsꞌalh Simón. Yuchach ju mapastꞌacꞌani ni laich camakꞌaxtaklh ju Jesús.
\v 3 Ju Jesús aktsꞌiya iscꞌatsaich ni ixtaknikꞌojutach ju ixpai tachi chun ju taxtokni laꞌixmacaꞌ. Chai iscꞌatsaich ni laꞌixmacni Dios ju taxtutacha chai laꞌixmacni Dios ju caꞌanchokoyaꞌ.
\v 4 Pus acsni tavenkꞌolh pus ju Jesús taya lacamixa. Chai maxtulh lakatam ixpumpuꞌ. Chꞌapalh alakatam pumpuꞌ chai musatocꞌalh.
\v 5 Ju acsnich ju yuchi mujulh ju xcan lacakꞌax chai tsuculh alakchꞌakꞌaniniꞌ ixchꞌajaꞌan ju ixꞌamamakaꞌui. Chai ixꞌachꞌanxacaich lacapumpuꞌ ju ismusajucꞌalh.
\p
\v 6 Para acsni lakꞌalh ju Simón Pitaluꞌ pus ju yuchi junich:
\p ―Quiꞌucxtin ja aqꞌuinchꞌakꞌaniyaꞌiꞌan vachuꞌ ju laquinchꞌajaꞌ ju quitꞌin.
\p
\v 7 Chai ju Jesús junich:
\p ―Ju tuchi icnavi ju uxintꞌi jantu machꞌakxai ju chavai. Para amachꞌakxayaꞌ astan.
\p
\v 8 Pus ju Pitaluꞌ juni:
\p ―Jantu tavanan aqꞌuintꞌichꞌanchꞌakꞌatꞌi.
\p Chai ju Jesús junich:
\p ―Ni jantu acchꞌanchꞌakꞌayan pus jantu quilakꞌauꞌat.
\p
\v 9 Chai junich ju Simón Pitaluꞌ ju Jesús:
\p ―Quiꞌucxtin pus jantu va yuchi ju quinchꞌajaꞌ ju aqꞌuinchꞌakꞌanin. Para vachuꞌ ju quimacaꞌ chaich ju quiꞌaktsulhch.
\p
\v 10 Chai junich ju Jesús:
\p ―Ni lhiyaxch ju xapꞌax pus jantu tasqꞌuini ni acchꞌakꞌanikꞌojun ju milacatuna. Va minchꞌajaꞌ ju acchꞌakꞌaniyan. Ju aliꞌ milacatuna chꞌakꞌakꞌocantach. Chai ju uxijnan chꞌakꞌanicꞌantꞌatꞌitch ju lamiꞌalhunutꞌan vachuꞌ. Para jantu minchuxꞌan.
\p
\v 11 Ju Jesús iscꞌatsaich tichi chavaich ju camakꞌaxtꞌakꞌaꞌ. Yuchi lhinaulh ni jantu si achꞌakꞌanikꞌocanta ju ixꞌalhunutꞌan.
\p
\v 12 Ju astan acsni achꞌanchꞌakꞌakꞌolhch pus lakchꞌichokolh ju ixpumpuꞌ. Tapakstitamachokolh ju lacamixa. Ajunich ju ixꞌamamakaꞌui:
\p ―Ja machꞌakxayatꞌit ju tuchi xaclanaviniyau.
\v 13 Ju uxijnan acsni quilalhichivinau nonatꞌit ni icꞌamamakaꞌunuꞌ chai icꞌucxtin. Vas nonatꞌit ni chunch icjunita ju quitꞌin.
\v 14 Pus ju quitꞌin ni miꞌucxtinꞌan chai miꞌamamakaꞌunuꞌan icjunita ni iclachꞌakꞌaniuch ju minchꞌajaꞌan pus tasqꞌuini ni alachꞌanchꞌakꞌayaꞌitꞌitch vachuꞌ ju milhiꞌuxijnan.
\v 15 Iclaxtakniuch ju lhilaktsꞌintaiti. Ju uxijnan vachuꞌ chunch anaviyaꞌitꞌit tachi ju xaclanaviyauch.
\v 16 Slivasalh ju iclajunau. Ju va xalapanac jantiyuꞌ ju xakꞌai. Yuchi ju xakꞌai ju xaꞌucxtin. Nin yuchi ju va malakachacanta jantiyuꞌ ju xakꞌai. Yuchi ju xakꞌai ju amalakachanan. Pus chunch ju quilatꞌajuntau ju uxijnan.
\v 17 Ni mispꞌayatꞌit ju ani taxtokni lhikꞌach ju atsꞌucꞌuyaꞌitꞌit acsni anaviyaꞌitꞌit ju chunch.
\p
\v 18 Jantu iclhichivinin ju milhichuxꞌan. Iccꞌatsai tichi chavaich ju icsacxtutach. Para chunchach ju capuꞌuctaxtuyach ju atsꞌoknut junta chani najun: “Ju kꞌaixtam xaquintꞌavajin va quintꞌalaxcai xajun”.
\v 19 Chavai ju iclajunau ni tucaꞌ tapasai ju anuꞌ lhamakꞌan ju iclajuntau. Ju chunch acsni caꞌuctaxtuyach alacꞌaꞌiyaꞌitꞌit ni chunch icjunita tachi ju iclajuntauch.
\v 20 Slivasalh ju iclajunau. Ju amaklhtayanan ju icmalakachatachilhch pus tachi ju va jun quitꞌin ju quiꞌamaklhtayanan. Chai ju quiꞌamaklhtayanan pus tachi ju va jun amaklhtayanan ju quimacaminta.
\s1 Ju Jesús naulh ni camakꞌaxtaknanaꞌ ju Judas
\p
\v 21 Acsni naulh ju Jesús ju chunch lana amakꞌaninilh laꞌixꞌalhunut. Chai naulich:
\p ―Slivasalh ju iclajunau. Pumatam milhiꞌuxijnan ju aquimakꞌaxtꞌakꞌaꞌ.
\p
\v 22 Ju acsnich ju ixꞌamamakaꞌui va kꞌantam kꞌantam talalaktsꞌilh. Jantu ixtacꞌatsai tichi chavaich ju ixlhichivincan.
\v 23 Pus vanin ixtꞌatapakstitama ju Jesús pumatam ixtamamakaꞌun ju na ixmapaini.
\v 24 Pus ju Simón Pitaluꞌ tamacyonilh ju yuchi ni casacmilh tichi chavaich ju lhichivincan.
\v 25 Pus ju yuchi vanin cꞌatuꞌanilh ju Jesús. Chai junilh:
\p ―Quiꞌucxtin tis chavaich ju camakꞌaxtꞌakꞌan.
\p
\v 26 Ju Jesús akꞌalhtayanalh:
\p ―Yuchach ju anuꞌ ju acmatajuniyaꞌ ju ixniꞌ laxaxcan quivaiti chai acxtakniyach.
\p Chai acsni matajunilh pus xtaknicalh ju Judas Iscariote. Istsꞌalh ixjunita ju Simón.
\v 27 Pus ju Judas acsni amaklhtayanalh ju vati aktsꞌiya ixlhipastactach laꞌixꞌalhunut tuchi ixnaviputunch. Pus ju acsnich pantsꞌiquis lana tanulh ju lhacaticuru laꞌixꞌalhunut ju Judas. Chai ju Jesús junich:
\p ―Ju tuchꞌi navipꞌutꞌun vatsꞌalhch anavitꞌi.
\p
\v 28 Para tachi chun ju aliꞌin ju ixtapakstitamai lacamixa jantu xamatiꞌ xamachakxai tajuch ni va chunch xajuncan ju Judas.
\v 29 Ju Judas ni ixmamakꞌanicanta ju tumin pus ju aliꞌin va tamachakxa tachi ju va cajunilh ju Jesús: “Atꞌamochich ju tuchi camaktasqꞌuiniyau ixlacata ju cꞌatan”. U tachi ju va cajunilhch: “Axtꞌakninch lacatsꞌunin ju quilhpatinin”.
\v 30 Acsni amaklhtayanalh ju vati ju Judas ju xtaknilh ju Jesús pus lana taxtulh. Chai na istsꞌistach.
\s1 Ju Jesús xtaklh ju sastꞌi lhamapꞌaksin
\p
\v 31 Acsni taxtulh ju yuchi pus najunch ju Jesús:
\p ―Ju chavai chinta ju avilhchan acsni aclakꞌayacanaꞌ. Quitꞌin ju quimalakachatachilh ju Dios ni lapanac actsucuyaꞌ ju ani. Chai vachuꞌ calakꞌayacanaꞌ ju Dios ju quilacata quitꞌin.
\v 32 Chai ni catacꞌatsayaꞌ ju lapanacni ni yuchi ju xakꞌai ju Dios ju va quilacata pus ju Dios camacꞌatsaniyaꞌ ju lapanacni ni icxakꞌai vachuꞌ. Chai vatsꞌalhti canaviyaꞌ chunch.
\v 33 Quiꞌaskꞌatꞌan va pantsꞌiquis ju iclatꞌavilau ju uxijnan. Aquilapuxcoyauch. Chai tachi ju icꞌajunilh ju quintꞌaꞌisraelitaninꞌan pus vachuꞌ chunch iclajunau ju uxijnan. Junta acꞌanaꞌ ju uxijnan jantu lai atꞌipꞌitꞌit.
\v 34 Lakatam sastꞌi lhamapꞌaksin ju iclaxtakniyau. Yuchi ni alamapꞌainitꞌit ju milhiꞌuxijnanꞌan. Tachi ju iclamapainiyauch pus vachuꞌ chunch alamapꞌainitꞌit ju milhiꞌuxijnanꞌan.
\v 35 Ju chunch tachi chun ju lapanacni catapucꞌatsayaꞌ ni quiꞌamamakaꞌunti untꞌatꞌit ni alamapꞌainitꞌitch ju milhiꞌuxijnanꞌan.
\s1 Ju Jesús naulh ni canonaꞌ ju Pitaluꞌ ni jantu mispai
\p
\v 36 Ju Simón Pitaluꞌ junich:
\p ―Quiꞌucxtin ta anchach ju apꞌinaꞌ.
\p Akꞌalhtayanalh ju Jesús:
\p ―Junta acꞌanaꞌ ju quitꞌin jantu lai aqꞌuintꞌichꞌakꞌokꞌa ju chavai. Para astan aqꞌuinchꞌakꞌokꞌayaꞌ.
\p
\v 37 Ju Pitaluꞌ junich:
\p ―Quiꞌucxtin tajuch ni jantu lai actichꞌakꞌokꞌan ju chavai. Acxtꞌakꞌach ju quiꞌatsucunti ju milacata.
\p
\v 38 Akꞌalhtayanalh ju Jesús:
\p ―Ja vasalh lai axtꞌaktꞌi ju miꞌatsucunti ju quilacata. Slivasalh ju icjunan. Acsni jantucaꞌ tꞌasai ju puyux pus paktꞌutuch ju naꞌuntꞌa ni jantu qꞌuimispꞌai.
\c 14
\s1 Jesús ju xati junta vi ju ixpai
\p
\v 1 Ju Jesús tailhiꞌalh ju ixchivinti ju ixtꞌajun ajuniniꞌ ju ixꞌamamakaꞌui chai naulh:
\p ―Jantu caꞌamakꞌaninilh ju miꞌalhunutꞌan. Ju uxijnan ni lhilacꞌapꞌinatꞌit ju Dios pus vachuch aquilalhilacaꞌanau ju quitꞌin.
\v 2 Junta vilhcha ju quimpai na lhu alin ju chakaꞌ. Ni jantu cava chunch ju lactꞌiyan pus xaclajuniuch ni jantu chun junita. Acꞌanach lakꞌoxiniꞌ ju milacchakaꞌan cunaꞌ ju uxijnan.
\v 3 Chai ni acꞌanaꞌ lakꞌoxiniꞌ ju anuꞌ lakꞌachakꞌan ju milacataꞌan pus acminchokopalaꞌ aktam. Chai quitꞌinch ju aclalhiꞌanau ju lactꞌiyan. Ju chunch junta actsucuyanta pus vachuch anch ju atsꞌucꞌuyaꞌitꞌit ju uxijnan.
\v 4 Cꞌatsꞌayatꞌitch ta anchach ju acꞌanaꞌ chai mispꞌayatꞌitch junta puꞌancan.
\p
\v 5 Ju Tumax junich ju Jesús:
\p ―Quiꞌucxtin jantu iccꞌatsayau ta anchach ju apꞌinaꞌ. Tas aclhimispayauch ju ti.
\p
\v 6 Ju Jesús junich ju Tumax:
\p ―Quitꞌin ju icxati. Laquimacni ju pucꞌatsacan ju stavasalanti. Chai quitꞌin ju icxtꞌakꞌa ju atsucunti jonkꞌalhi. Jantu lai xamatiꞌ lakꞌan ju quimpai ju jantu quilhilaksich.
\v 7 Ni xaquilamispau tichi chavaich ju quitꞌin pus vachuꞌ ismispꞌatꞌit ju quimpai. Pus ju chavai ni quilamispayauch tichi chavaich ju quitꞌin pus tachi ju va mispꞌayatꞌitch ju quimpai. Chai tachi ju va laktsꞌinatꞌit ju quimpai.
\p
\v 8 Chai ju Pilipe junich:
\p ―Quiꞌucxtin aquilamalacasuniuch ju mimpai. Aclhikꞌachanauch.
\p
\v 9 Pus ju Jesús alackꞌalhtailh:
\p ―Na makꞌanchich ju xaclatꞌaꞌalhtanatsucuyau ju uxijnan. Ja vanach jantu qꞌuimispꞌai ji Pilipe. Ju quilaktsꞌintach quitꞌin tachi ju va laktsꞌintach ju quimpai. Tꞌas ni va nompꞌalai ju uxintꞌi ni acmalacasuniyan ju quimpai.
\v 10 Ja jantu lacꞌaꞌi ni va lakatam Dios icjuntau ju quitꞌin chai ju quimpai. Ju chivinti ju tuchi iclajunau jantu va laquiꞌakstu ju icchivinin. Para ju quimpai ni va lakatam Dios quintꞌajunita pus yuchach ju navi ju lhichꞌalhcat ju laquimacni.
\v 11 Alacꞌaꞌitꞌitch ni va lakatamch Dios ictꞌajunita ju quimpai. U ni jantu lai pꞌulacꞌaꞌiyatꞌit ju va quinchivinti pus aquilapulhilacaꞌauch ju tuchi icnavita.
\v 12 Slivasalh ju iclajunau. Ju lhichꞌalhcat ju icnavi quitꞌin pus vachuꞌ chunch canaviyaꞌ ju quilhilacaꞌantach ju quitꞌin. Chai palai kꞌai lhichꞌalhcat ju canaviyaꞌ ju yuchi va ixlacaꞌatalh ni aclakꞌanach ju quimpai junta vilhcha.
\v 13 Tachi chun ju asqꞌuiniyaꞌitꞌit ju quimpai ju laquintapakaꞌut pus aclanaviniyauch. Chunch ju catapucꞌatsayach ju lapanacni ni xakꞌai ju quimpai ju va quilacata ni istsꞌalh icjunita.
\v 14 Ni tuꞌuꞌ asqꞌuinaꞌitꞌit ju laquintapakaꞌut pus quitꞌin ju aclanaviniyau.
\s1 Ajuncanch ni caxtaknicanaꞌ ju Spiritu Santu
\p
\v 15 Ni quilamapainiyau ju quitꞌin pus amuctꞌaxtꞌutꞌit ju quilhamapꞌaksin.
\v 16 Quitꞌinch ju actapaininiyaꞌ ju quimpai chai cataxtakniyanch apumatam ju cataꞌaktaijuyan. Ju yuchi catatꞌatolhkꞌalhiyanch.
\v 17 Yuchi ju Spiritu Santu ju najun ju stavasalanti. Ju jantu quintalhilacaꞌan pus jantu lai cataꞌamaklhtayananaꞌ ni va jantu talaktsꞌin nin catamispa ju yuchi. Para ju uxijnan mispꞌayatꞌit ni tatꞌavilanch. Chai catanuyaꞌ lamiꞌalhunutꞌan.
\v 18 Jantu va miꞌakstuꞌan ju actilamacaju. Aclalakminchokoyau ju uxijnan.
\v 19 Jantuch makꞌan aquintitalaktsꞌilh ju jantu quintalhilacaꞌanta. Ju yuꞌunch jantu aquintitalaktsꞌinchokolh tavanan. Para ju uxijnan aquilalaktsꞌinchokoyau. Chai ni ictꞌajun ju quitꞌin pus vachuꞌ atsꞌucꞌutꞌachitꞌit ju uxijnan ju lactꞌiyan.
\v 20 Acsnich avilhchan ju acꞌatsꞌayaꞌitꞌit ni va lakatamch Dios ictꞌajunita ju quimpai. Chai acꞌatsꞌayaꞌitꞌit ni laquimacni ju tꞌonatꞌit ju uxijnan chai ju quitꞌin ictꞌajun lamiꞌalhunutꞌan.
\v 21 Ju quilacaꞌinich ju quilhamapꞌaksin chai muctaxtuich tachi ju najunch ju laquilhamapꞌaksin pus yuchach ju quimapaini. Chai ju quimapaini pus vachuꞌ camapainicanaꞌ. Yuchi ju quimpai ju camapainiyaꞌ. Chai ju quitꞌin vachuꞌ acmapainiyaꞌ ju quilapanac. Chai cacꞌatsayach ni laꞌixꞌalhunutch ju ictꞌajun. ―Chunch ju ajunilh ju ixꞌamamakaꞌui ju Jesús.
\p
\v 22 Pus pumatam ju ixꞌamamakaꞌui ju Jesús ixjuncan Judas. Jantiyuꞌ ju Judas Iscariote. Pus ju yuchi chani juni ju Jesús:
\p ―Quiꞌucxtin tas aquilapumalacasuniyau ju quijnan chai jantuch atꞌalacꞌasuniyaꞌ ju jantu talhilacaꞌantan.
\p
\v 23 Akꞌalhtayanalh ju Jesús. Junich:
\p ―Ni xamatiꞌ quimapaini pus camuctaxtuyaꞌ ju laquinchivinti. Chai ju quimpai camapainiyaꞌ. Chai ju quimpai chai ju quitꞌin aclakminauch ju quilacaꞌinich ju quinchivinti. Chai actsucuyauch laꞌixꞌalhunut ju yuchi.
\v 24 Ju jantu quimapaini pus jantu tuꞌuꞌ lhiulai ju quinchivinti. Ju chivinti ju kꞌasmatꞌatꞌit jantu quiꞌanuꞌ para ixꞌanuꞌ ju quimpai ju quimacaminta.
\p
\v 25 Pus iclajunau ju ani taxtokni ni iclatꞌavilaucaꞌ ju uxijnan.
\v 26 Yuchi ju Spiritu Santu ju aꞌaktaijunuꞌ. Chai yuchi ju camacaminiyaꞌ ju quimpai laquintapakaꞌut. Yuchi ju catamasuniyan tachi chun ju taxtokni ju iclajuntau.
\p
\v 27 Ju quitꞌin aclaꞌaktaijuyau ni jantu calacꞌanaꞌ ju miꞌalhunutꞌan. Tachi ju quitꞌin ni jantu lacꞌan ju quiꞌalhunut. Para ju aꞌaktaijunti ju aclanaviniyau jantu chun tachi ju va ixꞌaꞌaktaijunti tam lapanac. Jantu calacꞌalh ju miꞌalhunutꞌan nin yuchi ni atꞌalhanantꞌit.
\v 28 Kꞌasmatꞌatꞌitch acsni xaclajunau ni acꞌanach junta vilhcha ju quimpai chai aclalakminchokoyauch ju uxijnan. Pus ni xaquilamapainiu cava pus ixkꞌachꞌantꞌitch acsni iclajuniu ni aclakꞌanach ju quimpai ni yuchi ju palai xakꞌai. Jantu quitꞌin.
\v 29 Ju chavai ictilajunau ni jantucaꞌ icꞌan ju lactꞌiyan. Ju chunch acsni acꞌanach pus acsnich ju alacꞌaꞌiyaꞌitꞌitch ju tuchi iclajuntauch.
\p
\v 30 Ju chavai jantuch makꞌan ju actilatꞌachiviniu ju uxijnan ni caminach ju xakꞌai ju okxchokꞌoi chux ju lacamunutpaꞌ. Ju yuchi matiꞌ ju ixtachaput ni lai tuꞌuꞌ aquinavi.
\v 31 Para icnavi tachi ju quijuni ju quimpai ni laich catapumispayaꞌ ju lapanacni ni icmapaini ju quimpai chai icnavi tachi ju quijuni ju yuchi. Akꞌostꞌolatꞌitch. Caꞌauch.
\c 15
\s1 Jesús tachi xaqꞌuiu uvas
\p
\v 1 Vachuꞌ chani ju ajuni ju ixꞌamamakaꞌui ju Jesús:
\p ―Ju quitꞌin chunch icjunita tachi ju tuꞌuꞌ xaqꞌuiu uvas. Chai ju quimpai chunch junita tachi ju xaꞌalaxtunuꞌ.
\v 2 Tachi chun ju lapanacni ju quintalhilacaꞌanta pus chunch tajunita tachi ju xamackꞌatapꞌu. Pus ju jantu tasui ju quintachaput laꞌisꞌatsucunti tachi ju va jantu xtꞌakꞌa ju xatocꞌat. Pus amakꞌosucan ju yuchi tachi acsni achakxmakꞌan ju tuꞌuꞌ xamackꞌatapꞌu ju jantuch xtꞌakꞌa ju xatocꞌat. Chai tachi chun ju lapanacni ju tasui ju quintachaput laꞌisꞌatsucunti pus tachi ju va taxtꞌakꞌa ju xatocꞌat. Pus tachi ju tuꞌuꞌ qꞌuiu ni calakachakxtucanch ni laich palai lhu catocꞌayaꞌ ju xatocꞌat pus vana va chun navican laꞌisꞌatsucunti ju anuꞌ lapanac. Makꞌosunikꞌocan tachi chun ju alin laꞌisꞌatsucunti ju sastꞌucꞌa ni jantu tasui ixtachaput ju Dios laꞌisꞌatsucunti.
\v 3 Ju uxijnan chꞌakꞌanicꞌantꞌatꞌitch ju lamiꞌalhunutꞌan lacachivinti ju xaclajunau.
\v 4 Atsꞌucꞌutꞌit ju laquimacni. Chai ju quitꞌin actsucuyaꞌ ju lamiꞌalhunutꞌan. Ju tuꞌuꞌ ixmakpꞌu ju xaqꞌuiu uvas jantu lai catitocꞌalh ju xatocꞌat ju va laꞌisꞌakstu. Tasqꞌuini ni anch ju camackꞌatꞌapꞌunchokolh ju laꞌistisivic. Pus chunchach vachuꞌ ju uxijnan. Jantu lai catitasu ixtachaput ju Dios ju lamiꞌatsucuntiꞌan ni jantu laquimacni ju tsꞌucꞌuyatꞌit.
\p
\v 5 Ju quitꞌin icjunita tachi ju tuꞌuꞌ xaqꞌuiu uvas. Ju uxijnan tachi ju xamackꞌatapꞌu untꞌatꞌit. Chai ju tꞌajunch laquimacni chai ni laꞌixꞌalhunut ju ictꞌajun pus yuchach ju xtꞌakꞌa lhu xatocꞌat ju laꞌisꞌatsucunti. Pus ni jantu tꞌonatꞌit ju laquimacni pus jantu tuꞌuꞌ lai naviyatꞌit ju kꞌox calhiula ju quimpai Dios.
\v 6 Ju jantu laquimacni tꞌajun camakꞌancanaꞌ tachi ju tuꞌuꞌ xamackꞌatapꞌu ju jantu kꞌox. Ni chakxmakꞌancanta pus caxixach. Chai camakꞌaixtokcanaꞌ. Chai lacxavacanch.
\p
\v 7 Ni tꞌonatꞌitch ju laquimacni chai ni lacꞌaꞌitꞌatꞌitch ju lamiꞌalhunutꞌan ju quinchivinti pus laich aquilasqꞌuiniyau va tuchꞌi ju lacꞌasqꞌuinatꞌitch chai sich axtꞌaknikꞌocꞌanaꞌitꞌit.
\v 8 Chai putasui ni yuchi ju xakꞌai ju quimpai acsni salaka ju atsꞌucꞌuyaꞌitꞌit. Chai acsnich ju atꞌalacꞌasuyaꞌitꞌit ni vasalhch quilapanacni untꞌatꞌit.
\v 9 Tachi ju quimpai ni na quimapaini pus chunchach vachuꞌ ju quitꞌin iclamapainiyau ju uxijnan. Pus va tachi atsꞌucꞌutꞌit ta yu laich aclapumasuniyau ni iclamapainiyau.
\v 10 Tachi ju quitꞌin ni icmuctaxtunilh ju ixlhamapꞌaksin ju quimpai chai quimapaini pus chunchach vachuꞌ ju uxijnan. Va tachi aclamapainiyau ni amuctꞌaxtꞌuyaꞌitꞌit ju quilhamapꞌaksin.
\p
\v 11 Iclapujunau ju ani taxtokni va ixlacata ni chach alilh ju quinkꞌachat ju lamiꞌalhunutꞌan. Chai chach vasalh akꞌachꞌanaꞌitꞌit.
\v 12 Yuchi ju ani ju quilhamapꞌaksin ni alamapꞌainitꞌit ju milhiꞌuxijnanꞌan tachi ju quitꞌin ni iclamapainiyau.
\v 13 Ju palai kꞌai amapaininti yuchi ju ani. Acsni tam xamatiꞌ ju calhitapꞌuxlh ju isꞌatsucunti ixlacata tam ixꞌamigo.
\v 14 Ju uxijnan quiꞌamigojni aꞌunaꞌitꞌit ni anaviyaꞌitꞌit tuchi ju iclalhijunauch.
\v 15 Ju chavai jantu va na va xalapanacni aclalhimispayau. Ju va xalapanac jantu lai mispakꞌojui tuchi navich ju tam ixꞌucxtin. Para ju quitꞌin iclamacꞌatsanikꞌotau ju uxijnan tachi chun ju ickꞌasmatꞌach ju laꞌixmacni ju quimpai. Yuchi iclalhijunau ju chavai ni quiꞌamigojni untꞌatꞌit.
\v 16 Jantu uxijnan ju quilasacxtu. Para quitꞌin ju iclasacxtu ju uxijnan. Chai iclalhilhcaꞌulatau ni laich alhipꞌitꞌit ju ani chivinti chai catasu ju quintachaput ju lamiꞌatsucuntiꞌan chai lai va tachi chunchach catasu ju lamiꞌatsucuntiꞌan. Ju chunch tachi chun ju asqꞌuiniyaꞌitꞌit ju quimpai ni laquintapakaꞌutch pus ju yuchi cataxtakniyan.
\v 17 Iclalhimapꞌaksiyau ni alamapꞌainitꞌitch pumatamin ju milhiꞌuxijnan.
\s1 Ju jantu talhilacaꞌanta ju Cristo cataꞌaxcayananaꞌ
\p Ju Jesús tailhiꞌalh ju ixchivinti chai chani ju ajuni ju ixꞌamamakaꞌui:
\p
\v 18 ―Ni va taxcayan ju jantu quintalhilacaꞌan pus acꞌatsꞌatꞌit ni quitꞌin ju pꞌulhnan xaquintaxcaji.
\v 19 Ni ixtꞌatꞌui cava untꞌatꞌit ju jantu quintalhilacaꞌan pus ju jantu quintalhilacaꞌan ca catamapainin. Para ni quitꞌin ju iclasacxtutauch ju laꞌixlhiyuꞌunchꞌan ju jantu quintalhilacaꞌan pus ixlhiyuchach jantu talhilaktsꞌinan ni ixtꞌatꞌui untꞌatꞌit. Yuchi va talhixcayanch ju jantu quintalhilacaꞌanta.
\v 20 Apꞌastꞌactꞌitch ni iclajuntau ni jantiyuꞌ ju xakꞌai ju va tam xalapanac. Para yuchi ju palai xakꞌai ju ixꞌucxtin. Pus ju quitꞌin ni quintamamakꞌalhkꞌajni pus vachuꞌ catamamakꞌalhkꞌajniyan ju uxijnan. Ni quintalacaꞌinilhch ju quinchivinti pus vachuꞌ catalacaꞌiniyan ju minchivintiꞌan.
\v 21 Chunch ju catapunaviyan va ixlacaꞌatalh ni quilalhilacaꞌanauch ju quitꞌin chai ju yuꞌunch jantu tamispai ju quimacaminta.
\p
\v 22 Ni jantu xacmilh chai jantu xacꞌamalani pus jantu ixꞌaꞌulanicalh ju ixtalakꞌalhinꞌan. Para ju chavai jantu lai tanajun ni matiꞌ ju ixtalakꞌalhinꞌan.
\v 23 Ju quixcaji pus quimpai ju quintꞌaxcaji.
\v 24 Ni jantu cava xacnavi tuꞌuꞌ lhichꞌalhcat ju laꞌixlhiyuꞌunchꞌan tachi ju jantuch lai navi ju va tam xamatiꞌ pus jantu ixꞌaꞌulanicalh ju ixtalakꞌalhinꞌan. Para ju chavai quintalaktsꞌintach ju quitꞌin chai ju quimpai chai quintalhixcailich ju quitꞌin chai ju quimpai. Yuchi alhiꞌulanicanta ju ixtalakꞌalhinꞌan.
\v 25 Ni chunch talai pus uctaxtui ju chivinti ju tsꞌokcanta laꞌixlhamapꞌaksinꞌan junta najun: “Quintalhixcailh mas jantu tuꞌuꞌ talakꞌalhin xacnavi”. Chunch najun laꞌixlhamapꞌaksinꞌan.
\p
\v 26 Pus ju quitꞌin aclamacaminiyauch ju cataꞌaktaijuyan. Ju yuchi cataxtuyanta laꞌixmacni ju quimpai. Yuchi ju Spiritu Santu ju najun ju stavasalanti. Yuchach ju cataxtuyanta laꞌixmacni ju quimpai. Chai acsni caminaꞌ ju yuchi pus caxtꞌakꞌaꞌ ju chivinti ju quilacata.
\v 27 Chai vachuch ju uxijnan anonaꞌitꞌit ju tuchꞌi laktsꞌintꞌatꞌit ju icnavita ni quilachꞌakꞌokꞌatauch tus acsni ictaiꞌulacha ju amalaninti.
\c 16
\p
\v 1 Iclajuntauch junima taxtokni ni jantuch lai tam atꞌinompꞌalatꞌit astan.
\v 2 Cataxcoxtuyan ju laꞌixpujitatꞌan ju quintꞌaꞌisraelitaninꞌan. Cachinaꞌ avilhchan va tichi chavaich ju catamakniyan catanonach ni chunchach ju na kꞌox lhiulai ju Dios.
\v 3 Chux ju ani taxtokni chunch catanaviyaꞌ ni va jantu tamispai ju quimpai nin quitꞌin.
\v 4 Yuchi iclalhijunauch ju ani taxtokni ni laich apꞌastꞌacꞌaꞌitꞌit acsni tavanan chunch atꞌapꞌasayaꞌitꞌit. Laich anonaꞌitꞌit ni chunchach ju xaclajunau.
\s1 Ju ani ixlhichꞌalhcat ju Spiritu Santu junita
\p Jantu xaclajuntau ju ani taxtokni ju pꞌulhnan ni xaclatꞌavilaucaꞌ. Chai jantucaꞌ lai tuꞌuꞌ ixtapasai ju lamiꞌatsucuntiꞌan.
\v 5 Para ju chavai aclakꞌanchokoyach ju quimalakachatachilh. Para jantu xamatiꞌ ju milhiꞌuxijnan ju laich aquisacmiputulhch tas anchach ju acꞌanaꞌ.
\v 6 Va yuchi ni na alakꞌamakꞌanininatꞌitch ju ixlacata junima taxtokni ju iclajuntau.
\v 7 Para ju quitꞌin iclajunau ju stavasalanti. Aktsꞌiya palai kꞌox ju milacataꞌan ni acꞌanchokolh ju lactꞌiyan. Acsni va jantu acꞌanchokolh pus ju aꞌaktaijunuꞌ jantu catitalakmin ju uxijnan. Para ni acꞌanaꞌ pus acmalakachatachilhch.
\v 8 Chai ju yuchi acsni caminaꞌ caꞌamalacasuniyaꞌ ju lapanacni ixtalakꞌalhinꞌan. Chai caꞌamalacasuniyaꞌ ju soknicꞌa atsucunti. Chai caꞌamalacasuniyaꞌ ixꞌulanica ixtalakꞌalhinꞌan ju lapanacni.
\v 9 Ju yuchi caꞌamalacasuniyach ju lapanacni ni alin ixtalakꞌalhinꞌan ni jantu quintalhilacaꞌan ju quitꞌin.
\v 10 Ju yuchi camalacasuyaꞌ ju soknicꞌa atsucunti. Chai putasui ni soknicꞌa ju quiꞌatsucunti ni aclakꞌanchokoyach ju quimpai chai jantuch vana aquintilalaktsꞌiu.
\v 11 Ju yuchi camalacasuniyaꞌ ju lapanacni ni ulai talakꞌalhin ju Dios ni mucꞌanicantach ju ixtalakꞌalhin ju anuꞌ xakꞌai ju aꞌokxchokꞌoi tachi chun ju lapanacni ju ani lacamunutpaꞌ.
\p
\v 12 Na lhu taxtokni ju iclajumputunau. Para ju chavai jantuch lai atꞌitꞌastꞌucnitꞌit.
\v 13 Para acsni cachinaꞌ ju Spiritu Santu ju najun ju stavasalanti pus yuchi ju catamasuniyan tachi chun ju stavasalanti. Chunch ju canaviyaꞌ ni jantu va ixchivinti isꞌakstu ju canonaꞌ. Para tachi chun ju kꞌasmatni ju Dios yuchach ju canonaꞌ. Chai catamacꞌatsanikꞌoyanch tachi chun ju taxtokni ju caminaꞌ.
\v 14 Ju yuchi ni caꞌamalanininaꞌ ju quinchivinti chai catamamachakxaniyanch ju lamintacꞌatsanꞌan pus capumalacasuyaꞌ ni icxakꞌai.
\v 15 Tachi chun ju ixꞌanuꞌ junita ju quimpai sich quiꞌanuꞌ vachuꞌ. Yuchi iclhinajunch ju chavai ni caꞌamalanininaꞌ ju Spiritu Santu ju quinchivinti chai catamamachakxaniyan lamintacꞌatsanꞌan.
\s1 Ju amakꞌanit cajunaꞌ kꞌachat
\p Vachuꞌ chani ju ajuni ju ixꞌamamakaꞌun ju Jesús:
\p
\v 16 ―Vaninch minta ju avilhchan acsni jantuch aquilalaktsꞌinau. Chai acsni catapasayaꞌ lakatam lakatꞌui avilhchanch aquilalaktsꞌinchokoyauch. Chai astan aclakꞌanach ju quimpai.
\p
\v 17 Ju acsnich ju aliꞌin ju ixꞌamamakaꞌui ixtalajunich ju sia yuꞌunch:
\p ―Tijuch nuꞌ ju ani ju quintajumputunan ni najun: “Vaninch minta ju avilhchan acsni jantu aquilalaktsꞌinau”. Chai ni nompalai: “Acsni catapasayaꞌ lakatam lakatꞌui avilhchan aquilalaktsꞌinchokoyauch”. Chai ni najun: “Aclakꞌanach ju quimpai”.
\p
\v 18 Ixtanajunch:
\p ―Tijuch nuꞌ ju nomputun ni va najun ni vanin minta ju avilhchan. Jantu machakxayau tuchi ju najunch.
\p
\v 19 Pus ju Jesús amachakxanilh ni va istasacmiputunch. Pus ajunich:
\p ―Ja lasacmiyatꞌit ju va milhiꞌakstuꞌan ju tuchi xaclajunau acsni xacnajun ni vaninch minta ju avilhchan acsni jantu aquilalaktsꞌinau. Chai ni xacnajun ni acsni catapasayaꞌ lakatam lakatꞌui avilhchan aquilalaktsꞌinchokoyau.
\v 20 Slivasalh ju iclajunau. Ju uxijnan akꞌalhununaꞌitꞌit. Chai amakꞌanininaꞌitꞌit. Para ju lapanacni ju jantu quintalhilacaꞌan catakꞌachanach. Ju uxijnan mas amakꞌanininaꞌitꞌit para ju astan acꞌapkꞌoyaꞌitꞌit ju miꞌamakꞌanitꞌan. Akꞌachꞌanaꞌitꞌit.
\v 21 Ju tam chakoꞌulh acsni calokꞌomputunach na makꞌalhkꞌajnan ni chintach ju ixꞌavilhchan. Para acsni catapasaniyach ju ixꞌamaklakꞌavanti pus jantuch pastacpalai ju ixmakꞌalhkꞌajnat. Va lhikꞌachanch ni maklakꞌajuntach pumatam lapanac.
\v 22 Pus chunchach vachuꞌ ju uxijnan. Ju chavai slivasalh ni na amakꞌanininatꞌit. Para acsni aclalaktsꞌinchokoyauch pus na akꞌachꞌanchꞌokꞌoyaꞌitꞌit ju lamiꞌalhunutꞌan. Chai jantu lai xamatiꞌ catitataiꞌinin ju minkꞌachatꞌan.
\p
\v 23 Ju acsni avilhchan jantuch tuꞌuꞌ aquilasqꞌuiniyau ju quitꞌin. Slivasalh ju iclajunau. Tachi chun ju asqꞌuiniyaꞌitꞌit ju quimpai ju laquintapakaꞌutch cataxtakniyan.
\v 24 Tus chavai jantu tuꞌuꞌ sqꞌuintꞌatꞌit ju laquintapakaꞌut. Asqꞌuintꞌit chai amaklhtꞌayananaꞌitꞌit. Ju chunch slivasalh alhikꞌachꞌanaꞌitꞌit ju lamiꞌalhunutꞌan.
\s1 Ju quitꞌin ictaiꞌinita ju ixtachaput ju lhinajun ju ani lacamunutpaꞌ
\p
\v 25 Junima taxtokni iclalhixakꞌalatau ju ispꞌumispꞌatꞌit ju stavasalanti. Para jantu lai xaquilamachakxaniyau. Para cachinaꞌ ju avilhchan acsni jantuch aclalhixakꞌalayau ju va apꞌumispꞌayaꞌitꞌit ju stavasalanti. Ju acsnich lana vas aclajunau ixlacata ju quimpai.
\v 26 Ju acsni avilhchan asqꞌuinaꞌitꞌit ju laquintapakaꞌut chai jantu iclajunau ni quitꞌinch ju actapaininiyaꞌ ju quimpai ju milacataꞌan.
\v 27 Jantu tasqꞌuini ni chun aclalh ni isꞌakstu ju quimpai ju tamapainiyan va ixlacaꞌatalh ni quilamapainiyauch ju uxijnan chai lacꞌaꞌitꞌatꞌitch ni laꞌixmacni Dios ju icmintacha.
\v 28 Laꞌixmacni quimpai ju xactaxtuyacha. Icminta ju ani lacamunutpaꞌ. Aktam acmaconchokopalaꞌ ju lacamunutpaꞌ chai aclakꞌanchokoyach ju quimpai.
\p
\v 29 Ju ixꞌamamakaꞌui ju Jesús tajunich:
\p ―Ju chavai vasch quilajunau. Jantu va lacatuꞌuꞌ ju quilapumamachakxaniyau ju stavasalanti.
\v 30 Ju chavai iccꞌatsayauch ni mispꞌaich tachi chun ju taxtokni. Jantu tasqꞌuini ni xamatiꞌ casacmin tuꞌuꞌ ni mispꞌakꞌoꞌui ju quiꞌatalacpastꞌacꞌat quincꞌan. Yuchi ju icpulacaꞌiyauch ni laꞌixmacni Dios ju tꞌantꞌa.
\p
\v 31 Ajunich ju Jesús:
\p ―Ja lacꞌaꞌiyatꞌitch ju chavai.
\v 32 Cachinach ju avilhchan chai mas chavaich acsni amakpꞌitsꞌicꞌanaꞌitꞌit. Ju pumatamin caꞌanaꞌ laꞌixlakchakaꞌan. Aquilamacoyoyauch. Para jantu va quiꞌakstu ju actitamacaulh ni quimpai ju quintꞌavi.
\v 33 Chai iclajunauch ju ani taxtokni ni jantu calacꞌalh ju miꞌalhunutꞌan. Jantu catilacꞌalh ju miꞌalhunutꞌan ni quilalhilacaꞌanau ju quitꞌin. Ju ani lacamunutpaꞌ na amakꞌalhkꞌajnanaꞌitꞌit. Para jantu atꞌalhanantꞌit. Ju quitꞌin ictaiꞌinitach ju ixtachaput ju lhinajun ju ani lacamunutpaꞌ.
\c 17
\s1 Ju Jesús sqꞌuinch lamapainin ixlacata ixlapanacni
\p
\v 1 Acsni nonkꞌolhch ju Jesús ju ani taxtokni pus lacaꞌalh ju lactꞌiyan chai naulh:
\p ―Quimpai chilhch ju quiꞌavilhchan. Amalacꞌasuninch ju lapanacni ni icxakꞌaich ju quitꞌin ni mintsꞌalh. Ju chunch laich vachuꞌ acꞌamalacasuniyach ju lapanacni ni xakꞌaichꞌat ju uxintꞌi.
\v 2 Chai uxintꞌi ju qꞌuixtꞌaknitꞌa ju quimpuxaꞌucxtin ni laich acꞌalhijunaꞌ tachi chun ju lapanacni. Ju chunch lai acꞌaxtakniyaꞌ ju isꞌatsucuntiꞌan jonkꞌalhita tachi chun ju qꞌuimakꞌaxtꞌaknitꞌach ju uxintꞌi.
\v 3 Caꞌalinach ju isꞌatsucuntiꞌan jonkꞌalhita acsni catalhilaksiyanch ni va uxintꞌi ju istavasalanti Diosꞌat. Chai aquintalhilaksiyach ju quitꞌin ni icJesucristo chai ni uxintꞌi ju xaqꞌuimalakꞌachꞌayachitꞌa.
\p
\v 4 Ju quitꞌin icꞌamalacasunilhch ju lapanacni ni xakꞌaichꞌat. Icnavikꞌolhch ju lhichꞌalhcat ju xaqꞌuilhiꞌunich ixnavica.
\v 5 Pus ju chavai ji quimpai aqꞌuixtꞌaknichꞌokꞌoch ju quimpuxakꞌai ju lamimacni tachi ju xacjunita acsni vanincaꞌ xactꞌavilhchan. Acsni tucaꞌ ixꞌalin ju lacamunutpaꞌ.
\p
\v 6 Uxintꞌi ju saꞌasacxtꞌui ju ani tavilanalh lapanacni ju quintatꞌaꞌalhtanan. Asacxtꞌuch laꞌixlhiyuꞌunch ju jantucaꞌ quintalhilaksi chai qꞌuiꞌamakꞌaxtꞌaknitꞌach. Pus ju quitꞌin icꞌamamachakxanilh ta yu unitꞌa. Ju yuꞌunch miꞌanuꞌ ixtajunita chai qꞌuiꞌamakꞌaxtꞌaknitꞌa. Chai ju yuꞌunch tamuctaxtulh ju ixlhinaꞌuntꞌa ixnavica.
\v 7 Ju chavai tamispaich ni sich miꞌanuꞌ junita tachi chun ju taxtokni ju xaqꞌuixtꞌakni.
\v 8 Ju tuchꞌi xaqꞌuiꞌunich icꞌajunilh ju yuꞌunch. Chai taꞌamaklhtayanalh. Talacaꞌilhch ni vasalh lamimacni ju ictaxtuta. Chai talacaꞌitach ni uxintꞌi ju xaqꞌuimalakꞌachꞌayachitꞌa.
\p
\v 9 Iclhitapaininiyan ji quimpai ju ixlacataꞌan ju yuꞌunch. Jantiyuꞌ ji quimpai ju iclhitapaininiyan ju ixlacataꞌan ju aliꞌin lapanacni ju jantu quintalhilacaꞌan. Para va yuꞌunch ju iclhitapaininiyan ju ani tavilanalh ju xaqꞌuiꞌaxtꞌaknich ni miꞌanuꞌ tajunita vachuꞌ.
\v 10 Tachi chun ju quilapanacni sich miꞌanuꞌ. Chai ju milapanacni sich quiꞌanuꞌ. Chai laꞌisꞌatsucuntiꞌan ju yuꞌunch putasui ni icxakꞌai.
\p
\v 11 Ju quitꞌin va lacatsꞌunin cꞌacx tus actaxtuyach ju ani lacamunutpaꞌ. Aclakꞌanchokoyan ji quimpai ju na salakaꞌat. Para ju yuꞌunch catitatsucuyaꞌ ju ani lacamunutpaꞌ. Pus alhistꞌactꞌich ji quimpai ju yuꞌunch ju xaqꞌuixtꞌakni ni na tachapunꞌat ju uxintꞌi. Alhistꞌactꞌich ni va lakatamch catava tachi ju quijnanchꞌan ni va lakatamch juntau.
\v 12 Acsni xacꞌalactꞌavilhcaꞌ ju yuꞌunch ju ani lacamunutpaꞌ pus quitꞌin ju xacꞌalhistꞌacꞌa lamintachaput. Yuꞌunch ju xaqꞌuiꞌaxtꞌakni quitꞌin ju xacꞌalhistꞌacꞌa. Jantu xamatiꞌ xatsꞌankꞌai sia yuꞌunch. Va yuchi ju anuꞌ lapanac ju aktsꞌiya ixlhilhcaꞌulacanta ni catsꞌankꞌayach. Yuchi ju xatsꞌankꞌakꞌalhich. Va puꞌuctaxtulh tachi ju tsꞌokcantach.
\p
\v 13 Pus ju chavai ji quimpai iclakmintan ju uxintꞌi. Icnajun ju ani chivinti acsni icvilhcaꞌ ju ani lacamunutpaꞌ. Ju chunch ju quilapanacni catakꞌasmatꞌaꞌ ju tuchi ictapaininiyan ju ixlacataꞌan chai slivasalh capuꞌalinaꞌ ju ixkꞌachatꞌan laꞌixꞌalhunutꞌan tachi ju ickꞌachanch ju quitꞌin.
\v 14 Ju quitꞌin icꞌajunita ju minchivinti ju quilapanacni. Chai ju ixtꞌalapanacniꞌan ju ani lacamunutpaꞌ talhixcailh ju quilapanacni ni jantu amachakꞌan lacamunutpaꞌ tajunita ju chavai. Tachi ju quitꞌin ni vachuꞌ jantu icꞌamachakaꞌ ju ani lacamunutpaꞌ.
\v 15 Jantu iclhitapaininiyan ni va amakꞌosutꞌi ju ani lacamunutpaꞌ ju quilapanacni. Va iclhitapaininiyan ni alhistꞌacꞌaꞌ ni jantuch caꞌokxchokꞌoyaꞌ ju ixnavini macxcai.
\v 16 Ju yuꞌunch jantu amachakꞌan lacamunutpaꞌ tajunita ju chavai. Tachi ju quitꞌin ni vachuꞌ jantu icꞌamachakaꞌ ju ani lacamunutpaꞌ.
\v 17 Ju minchivinti stavasalanti. Pus salaka anavitꞌi ju yuꞌunch acsni catalhitamakaꞌuyaꞌ ju minchivinti.
\v 18 Tachi ju uxintꞌi ni qꞌuimalakꞌachꞌachitꞌa ni acmilh nonaꞌ ju minchivinti ju ani lacamunutpaꞌ pus vachuꞌ ju quitꞌin icꞌamalakachalh ju ani quilapanacni ni cataꞌalh nonin ju minchivinti ju ani lacamunutpaꞌ.
\v 19 Chai ixlacaꞌatalhꞌan yuꞌunch ju icpumakꞌaxtakchokocan quiꞌakstu. Ju chunch vachuch ju yuꞌunch aquintamakꞌaxtakniyach ju isꞌatsucuntiꞌan ni tamispai ju minchivinti. Chai yuchach ju stavasalanti.
\p
\v 20 Jantu iclhitapaininiyan ju va ixlacaꞌatalhꞌan ju aktsꞌiya quilapanacnich. Para vachuꞌ iclhitapaininiyan ixlacataꞌan ju catalacaꞌiyach ixchivintiꞌan ju quilacata.
\v 21 Ictapaininiyan ni va lakatamch catava ixchuxꞌan. Tachi ju uxintꞌi chai ju quitꞌin ni va lakatam Dios juntau ji quimpai. Pus vachuꞌ chunch ju yuꞌunch va lakatamch aquintatꞌajunan ju laquimacniꞌan. Chai ju lapanacni ju jantu quintalhilacaꞌan acsni catalaktsꞌinaꞌ ni va lakatam junkꞌotauch pus catalacaꞌiyach ni uxintꞌich ju qꞌuimalakꞌachꞌatꞌachitꞌa.
\v 22 Ju quitꞌin icꞌalakꞌayata ju yuꞌunch tachi ju uxintꞌi ni qꞌuilakꞌayatꞌa. Chai ni vaklhtam chun alakꞌayacanta pus va lakatamch catajunaꞌ ju yuꞌunch tachi ju quijnanꞌan ni va lakatamch juntau.
\v 23 Ju quitꞌin laꞌixꞌalhunutꞌan ju yuꞌunch actsucuyaꞌ. Chai ju uxintꞌi ni va lakatam qꞌuintꞌaꞌunitꞌa pus va lakatamch cajunkꞌoyauch. Chai ju lapanacni ju jantu quintalhilacaꞌan acsni catalaktsꞌinaꞌ ni va lakatamch jonkꞌotauch pus catalacaꞌiyaꞌ ni uxintꞌi ju xaqꞌuimalakꞌachꞌayachitꞌa. Chai chunch ju catapucꞌatsayach ni amapꞌainitꞌach ju quilapanacni tachi ju qꞌuimapꞌaini ju quitꞌin.
\p
\v 24 Quimpai ju yuꞌunch ju quiꞌaxtꞌaknitꞌa iclacasqꞌuinch ni vachuch anch catatsucuyanta junta actsucuyaꞌ ju quitꞌin. Ju chunch ni laich catalaktsꞌinaꞌ ju quimpuxakꞌaich ju xaqꞌuixtꞌaknich. Tus acsni maticaꞌ ixjunita ju lacamunutpaꞌ xaqꞌuixtꞌaknitꞌach ju quimpuxakꞌai ni na qꞌuimapꞌaini.
\v 25 Ji quimpai soknicꞌa ju navi ju uxintꞌi. Ju lapanacni ju jantu quintalhilacaꞌanta jantu tamispayan. Para ju quitꞌin icmispayan. Chai ju quilapanacni tamispaich ni uxintꞌi ju xaqꞌuimalakꞌachꞌayachitꞌa.
\v 26 Icꞌamamispanilhch ta yu unitꞌa. Chai acꞌamamispanichokoyach ni iclacasqꞌuin ni catalamapaini tachi ju uxintꞌi ni qꞌuimapꞌainich ju quitꞌin. Chai ju quitꞌin actsucuyach laꞌixꞌalhunutꞌan ju quilapanacni.
\c 18
\s1 Chꞌapacalh ju Jesús
\p
\v 1 Ju Jesús acsni nonkꞌo ju ani chivinti alactꞌataxtulh ju ixꞌamamakaꞌui. Alactꞌaꞌalh ju lhimakꞌantacutni ju xaxkꞌati Cedrón junta ixchꞌancan xaqꞌuiu ju olivo. Anch ju alactꞌatanuchalhch ju Jesús ju ixꞌamamakaꞌui.
\v 2 Chai vachuꞌ ju anuꞌ lapanac ju Judas ixjuncan ismispaich ju anuꞌ puꞌolivos. Yuchi ju Judas ju camakꞌaxtꞌakꞌach ju ixꞌucxtin. Pus ni na paklhu ju ixꞌalactꞌaquilata ju anch ju Jesús ju ixꞌamamakaꞌui pus yuchi ixlhimispaich ju Judas ju anuꞌ puꞌolivos.
\v 3 Judas ju apꞌulhnilh ju ixtaropajni ju kꞌai ucxtin chai ixtaropajni ju xalackꞌajinch palijnich chai ju fariseonin. Pus ju yuꞌunch ixtalhiꞌanta ixlacmaclhcuꞌan chai ixkꞌaꞌichiꞌan chai ixmachitaꞌan.
\v 4 Ju Jesús ni iscꞌatsakꞌojuich tachi chun ju taxtokni ju catapasayach laꞌisꞌatsucunti pus va kꞌoxiya quiꞌapakxtoklh. Ajunich:
\p ―Tis chavaich ju pꞌuxcꞌoyatꞌit.
\p
\v 5 Chai tajunich:
\p ―Yuchi icpuxcoyau ju Jesús ju amachakaꞌ Nazaret.
\p Chai ju Jesús ajunich:
\p ―Pus quitꞌinch ju quilapuxcoyau.
\p Ju Judas ju xaꞌamakꞌaxtaknaꞌ ixꞌalactꞌamintach.
\v 6 Chai acsni naulh ju Jesús ni yuchach pus lana tin tapuꞌalh ixpulacanꞌan chai lana tatamakꞌocha.
\v 7 Aktam asacmichokopa ju Jesús. Ajunich:
\p ―Tis chavaich ju pꞌuxcꞌoyatꞌit.
\p Tanonchokopa ju taropajni:
\p ―Yuchi ju Jesús amachakaꞌ Nazaret.
\p
\v 8 Chai aktam ajunchokopa ju Jesús:
\p ―Ni iclajumpalauch ni quitꞌinch. Pus ni quitꞌinch ju quilapuxcoyau pus chach taꞌancha ju ani tayanalh.
\p
\v 9 Chunch ju puꞌuctaxtulh ju chivinti ju ixnajunta ju Jesús acsni chani naulh: “Ju yuꞌunch ju qꞌuixtꞌaknitꞌach jantu xamatiꞌ icmakꞌatsꞌankꞌata”.
\v 10 Ju acsnich ju Simón Pitaluꞌ ni ixchꞌapata ju ixmachita pus lana xakꞌaxtulh laxaꞌaxtꞌakꞌan. Lana catuchakxlh ju ixlapanac ju xakꞌai pali. Pꞌuxnilh ju ixꞌakꞌaxkꞌolh laꞌixcatucana. Chai ju yuchi ixlapanac ixjunita ju xakꞌai pali ju Malco ixjuncan.
\v 11 Ju acsnich ju Jesús junilhch ju Pitaluꞌ:
\p ―Amakꞌachꞌokꞌoch ju mimachita laxaꞌaxtꞌakꞌan. Ju anuꞌ na tsꞌinqꞌui makꞌalhkꞌajnat ju quilhilhcatach ju quimpai ja va naꞌun ni jantu acmuctaxtuyaꞌ.
\s1 Ju Jesús lhiꞌancalh laꞌixꞌucxlacapuꞌ ju xakꞌai pali
\p
\v 12 Ju acsnich ju taropajni chai ju xacomandante chai ju xataropajnich ju israelitanin lana tachꞌapalh ju Jesús. Tachꞌin tanavi.
\v 13 Pꞌulhnan talhiꞌanilh laꞌixpuꞌucxtin ju Anás. Ju yuchi ixputꞌijokꞌat ixjunita ju Caifás. Yuchi ju xakꞌai pali ixjunita ju acsni cꞌata.
\v 14 Ju ixjuncan Caifás yuchi ju ixꞌamapꞌaksi ju istꞌaꞌisraelitanin. Ixꞌajunich ni aktsꞌiya istasqꞌuini ni canilh pumatam jokꞌat ixlacataꞌan ju lapanacni.
\s1 Ju Pitaluꞌ naulh ni jantu mispai ju Jesús
\p
\v 15 Ju Simón Pitaluꞌ chai ju apumatamch ixtꞌatamakaꞌun yuꞌunchach ju ixtachꞌakꞌokꞌata ju Jesús acsni lhiꞌancalh tachꞌin. Chai ju xakꞌai pali na ixtꞌalamispaich ju anuꞌ pumatam chai yuchi lhitꞌamapasacalh ju Jesús ju yuchi laꞌixpulacni junta ixlakachakꞌaxnucanta ju ixchakaꞌ ju xakꞌai pali.
\v 16 Para ju Pitaluꞌ va makspaꞌ taya laxamalhtich. Pus taxtuchilh ju anuꞌ ixtꞌatamamakaꞌun. Ju yuchi ni na ixtꞌalamispaich ju xakꞌai pali pus tapaininilh ju anuꞌ atsiꞌ ju ixlhistacnaꞌ ju malhtich. Chai acsnicaꞌ ju tanulh ju Pitaluꞌ.
\v 17 Ju acsnich ju anuꞌ atsiꞌ ju ixlhistacnaꞌ ju malhtich junich ju Pitaluꞌ:
\p ―Ju uxintꞌi ja jantu vachuꞌ ixlapanacꞌat ju anuꞌ jokꞌat.
\p Pus ju Pitaluꞌ naulh ni jantu.
\p
\v 18 Chai ixtayanalh ju xalapanacnich anch chai ju ixtaropajni ju xalackꞌajin palijni. Chai ixtamalhculata ni na lhicꞌasnin ixjunita. Va ixtalacskꞌonvilanalh. Chai ju Pitaluꞌ vachuch anch maktaya ni va iskꞌomputunch.
\s1 Ju Anás makꞌosaspitlh ju Jesús
\p
\v 19 Ju xakꞌai pali sacmilh ju Jesús ixlacata ju ixꞌamamakaꞌui chai tuchi ju ixꞌalhimalanich ju lapanacni.
\v 20 Ju Jesús akꞌalhtayanalh:
\p ―Ju quitꞌin xacchivinin laꞌixꞌucxlacapuꞌan ju ixtalhavat lapanacni. Chai lamilacpujitatꞌan chai lacakꞌai mimpujitatꞌan xacꞌamalani ju ixchivinti Dios junta aktsꞌiya ixtatakꞌaixtꞌokꞌach ju quintꞌaꞌisraelitaninꞌan. Jantu tuꞌuꞌ ju va sek xacnajun.
\v 21 Tajuch ni va qꞌuisacmipꞌalai. Asacmitꞌich ju lapanacni ju takꞌasmatꞌach ju tuchi xacꞌajunich. Ju yuꞌunch tacꞌatsaich tuchi ju xacꞌajunich.
\p
\v 22 Acsni naulh ju chunch ju Jesús pus ju pumatam taropa ju ixmakyalh anch lanach paknisalh ju Jesús. Junich:
\p ―Ja chunchach ju alhikꞌalhtꞌayaꞌ ju xakꞌai pali.
\p
\v 23 Chai akꞌalhtayanalh ju Jesús:
\p ―Ni jantu sok ju xacnajun pus anauch tas anchach ju jantu soknicꞌa. Para ni soknicꞌa ju xacnajun tꞌas ni va xaqꞌuiꞌulanich.
\p
\v 24 Ju acsnich ju Anás tachꞌin malakachachokopa ju Jesús junta ixvilhcha ju Caifás ju xakꞌai pali.
\s1 Ju Pitaluꞌ nonchokopa ni jantu mispai ju Jesús
\p
\v 25 Pus ju Simón Pitaluꞌ anch ixyakꞌalhi junta ixtꞌajun skꞌonuꞌ. Tajunich:
\p ―Ja jantu vachuꞌ uxintꞌi ju ixtamamakaꞌunꞌat ju anuꞌ lapanac.
\p Para ju Pitaluꞌ naulh ni jantu.
\v 26 Chai ju pumatam ixlapanac ju xakꞌai pali ixlhilakꞌau ixjunita ju anuch ju catuchakxpꞌuxlh ju Pitaluꞌ. Yuchach ju sacmichokopa ju Pitaluꞌ. Junich:
\p ―Ja jantu iclaktsꞌinchan ju lacapuꞌolivos junta ixvilhcha ju anuꞌ lapanac.
\p
\v 27 Pus ju Pitaluꞌ aktam nonchokopa ni jantu mispai. Chai lanach tꞌasalh ju puyux.
\s1 Ju Jesús laꞌixpuꞌucxtin Pilato
\p
\v 28 Chai lana maxtucalh ju Jesús ju laꞌixchakaꞌ ju Caifás. Talhiꞌalhch laꞌixpuꞌucxtin ju xagobernador Roma. Vatsꞌisincaꞌ ixjunita. Para ju israelitanin jantu tatanulh ju lacapuꞌucxtin ni jantu ixlhijun ju laꞌixlhamapꞌaksinꞌan ni lai catatanu ni jantu ixlakꞌoxicanta ju anuꞌ puꞌucxtin. Ni jantu catatanuyaꞌ ju lacapuꞌucxtin pus laich catalhicꞌataniyaꞌ ju ixborregoꞌan ni catuncunchokoyaꞌ chai laich cataꞌuyach.
\v 29 Pus ju gobernador Pilato acsni taxtuchilh ju laꞌixpuꞌucxtin ajunich ju lapanacni:
\p ―Tijuch ju lhichꞌivimakꞌanatꞌit ju ani ya jokꞌat.
\p
\v 30 Chai taꞌakꞌalhtayanalh ju lapanacni. Tanajunch:
\p ―Ni jantu cava alin ixtalakꞌalhin pus jantu cava xaclamakꞌaxtakniu.
\p
\v 31 Pus ju Pilato chanich ajunich acsni akꞌalhtailh ju lapanacni:
\p ―Alaich alhipꞌinchitꞌit miꞌakstuꞌan. Alaktsꞌintꞌitch ta yu najunch lamilhamapꞌaksinꞌan.
\p Para ju israelitanin tanaulh:
\p ―Jantu lhijun ju lhamapꞌaksin ni acmakniu tam xamatiꞌ ju quijnan ju israelitanin icjuntau.
\p
\v 32 Acsni naulh ju chunch pus uctaxtulh ju tuchi ixnajuntach ju Jesús ixlacata tuchi anintich ju capuniyaꞌ.
\v 33 Ju acsnich ju gobernador Pilato tanuchokopa ju laꞌixpuꞌucxtin. Tꞌasanilh ju Jesús. Junich:
\p ―Ja uxintꞌich ju xaꞌucxtinꞌat ju israelitanin.
\p
\v 34 Ju acsnich ju Jesús kꞌalhtailh. Junilh ju Pilato:
\p ―Ja va miꞌakstu xapꞌastꞌacꞌa ju ani xaqꞌuiꞌuni u va xamatiꞌ juntan.
\p
\v 35 Ju Pilato lhikꞌalhtailh:
\p ―Ja icꞌisraelita ni laich acnaulh ni xakꞌaichꞌat. Yuꞌunch ju mintꞌaꞌamachakꞌan chai ju xalackꞌajin palijni ju xatamakꞌaxtꞌakꞌan ju laquimacni. Tijuch ju xaꞌanavini.
\p
\v 36 Akꞌalhtayanalh ju Jesús:
\p ―Ju quimpuꞌucxtin jantu xanavin ju ani lacamunutpaꞌ. Ni ani lacamunutpaꞌ cava ju quimpuꞌucxtin pus caꞌixtalasa ju quilapanacni. Ju chunch jantu lai caꞌixquintitachꞌapalh ju quintꞌaꞌisraelitanin. Para jantu ani ju quimpuꞌucxtin.
\p
\v 37 Ju acsnich ju Pilato junich:
\p ―Ja vasalhꞌas ni ucxtinꞌat.
\p Chai akꞌalhtayanalh ju Jesús:
\p ―Vas ju naꞌun ni icꞌucxtin. Yuchi xaclhilakꞌajunch ju ani lacamunutpaꞌ. Chai iclhimilhch ju ani lacamunutpaꞌ ni laich acꞌajunaꞌ ju lapanacni ju stavasalanti. Tachi chun ju takꞌachani ju stavasalanti takꞌasmatꞌa ju quinchivinti.
\p
\v 38 Chai ju Pilato asacmininch:
\p ―Tijuch ju stavasalanti. ―Juncanch ju Jesús.
\s1 Ju Jesús makꞌaxtakcalh laꞌixꞌaninti
\p Acsni naulh ju ani pus alakꞌanchokopa ju israelitanin ju gobernador Pilato. Ajunich ju yuꞌunch:
\p ―Jantu tuꞌuꞌ iclhitajuni ixtalakꞌalhin ju ani lapanac.
\v 39 Pus aquilajuniuch tichi tachꞌinch ju aclhinonaꞌ ixmaxtuca ju lacapulachꞌin tachi ju aktsꞌiya lhilanitꞌatꞌit acsni uyatꞌit ju mimborregoꞌan tachi ju chavaich cꞌatan. Ja lacꞌasqꞌuinatꞌit ni yuchi ju acmaxtulh ju miꞌucxtinꞌan ju uxijnan ji israelitanin.
\p
\v 40 Ju acsnich ixchuxꞌan pꞌas talacchivinchokopa. Tajunich ju kꞌai ucxtin:
\p ―Jantiyuꞌ ju iclacasqꞌuinau. Yuchi ju calacamaconcanaꞌ ju Barrabás.
\p Pus ju Barrabás va akꞌalhonaꞌ ixjunita.
\c 19
\p
\v 1 Ju acsnich ju gobernador Pilato lana lhinaulh ixmaxtuca ju Jesús chai lhinaulh ixlakanekmaca.
\v 2 Ju ixtaropajni ju gobernador tanavinilh ixcorona ju Jesús si alhtucunuꞌ. Chai tamalacpatanulhch. Chai tamalakchꞌinilhch smumu pumpuꞌ tachi ixtalakchꞌi ju xalackꞌajin ucxtinin.
\v 3 Lacatsꞌiꞌit ixtajunich ju Jesús:
\p ―Atsꞌucꞌukꞌalhitꞌi ji xaꞌucxtin israelitanin.
\p Chai slivasalh ixtalacasamai.
\p
\v 4 Ju acsnich ju gobernador Pilato taxtuchokopa ju makspaꞌ. Ajunich ju lapanacni:
\p ―Anich iclalhiminitau ni laich apꞌucꞌatsꞌayaꞌitꞌit ni jantu tuꞌuꞌ talakꞌalhin xaclhitajuni ju ani ya lapanac.
\p
\v 5 Pus ju Jesús lana taxtulh ju makspaꞌ. Ixlacpatanunch ju ixcorona ju si alhtucunuꞌ. Chai ixlakchꞌitach ju smumu pumpuꞌ. Chai ju gobernador Pilato ajunich:
\p ―Alaktsꞌintꞌitch ju ani ya lapanac.
\p
\v 6 Acsni talaktsꞌilh ju xalackꞌajin palijni chai ju ixtaropajni pus pꞌas talacnaulh:
\p ―Amaqꞌuilhtꞌatꞌich ju lacacurus ju anuꞌ lapanac.
\p Para ju Pilato ajuni:
\p ―Alai uxijnan alhipꞌinchitꞌitch. Amaqꞌuilhtꞌachitꞌitch uxijnan. Ju quitꞌin jantu tuꞌuꞌ xaclhitajuni ju ixtalakꞌalhin.
\p
\v 7 Chai taꞌakꞌalhtayanalh ju israelitanin:
\p ―Ju quijnan alin ju quilhamapꞌaksin quincꞌan. Chai ju laquilhamapꞌaksin quincꞌan najun ni tasqꞌuini ni canilh ju ani ya ni va ixnajun ni istsꞌalh Dios junita.
\p
\v 8 Pus ju Pilato acsni kꞌasmatlh ju ani chivinti palai na talhanalh.
\v 9 Tanuchokopa aktam ju laꞌixpuꞌucxtin chai sacmichokopa ju Jesús ni ixtanumachokolhch ju yuchi:
\p ―Tꞌas anchach ju xatꞌanachiꞌ.
\p Para ju Jesús jantu tuꞌuꞌ lhakꞌalhtayanalh.
\p
\v 10 Ju acsnich ju gobernador Pilato junich:
\p ―Ja jantu tuꞌuꞌ aqꞌuinlhikꞌalhtꞌayaꞌ. Ja jantu cꞌatsꞌai ni alin ju quintachaput ni lai aclhinaulh ju mimaquilhtaca ju lacacurus. Chai alin ju quintachaput ni laich acmakꞌalhtaxtun.
\p
\v 11 Chai akꞌalhtayanalh ju Jesús:
\p ―Jantu lai tuꞌuꞌ xaqꞌuintꞌinavitꞌi ni jantu cava Dios ju xalakꞌaꞌi ni aqꞌuimamakꞌalhkꞌajniyaꞌich. Chai ju quitꞌin yuchi iclhijunan ni palai kꞌai talakꞌalhin ju lhiꞌan ju xaquimakꞌaxtꞌakꞌa ju lamimacni. Palai jantu ju uxintꞌi.
\p
\v 12 Pus ju acsnich ixnajunch ju gobernador Pilato ni lai caꞌixmakꞌalhtaxtulh ju Jesús. Para ju israelitanin pꞌas ixtajuni ju Pilato:
\p ―Ni amakꞌalhtꞌaxtꞌuyaꞌ ju ani ya lapanac pus jantu ixꞌamigoꞌat ju César ju xakꞌai tucan lamilhiꞌuxijnan ju romanonin untꞌatꞌit. Ju va kꞌaya kꞌostayai chai cajumputulh kꞌai ucxtin chux ju lacatꞌun pus ixtꞌalaxcaich junita ju César.
\p
\v 13 Chai ju gobernador Pilato acsni kꞌasmatlh junima chivinti pus maxtuchokopa makspaꞌ ju Jesús. Tavi lacapuꞌucxtin junta ixmamacanta cemento. Lacalhihebreo ju anch ixjuncan Gabata.
\v 14 Pus ju ixlhicutanch ixtapasata ju ixlaccꞌatanitꞌan ju israelitanin acsni taꞌulh ju ixborregoꞌan. Chai acsni tuncunchokolh acsnich ju makꞌosaspitlh ju Jesús ju Pilato. Chai ju israelitanin vachuꞌ acsnich ju ixtalakasilakꞌoxiꞌulai ju ixvaitiꞌan ni paꞌastacni cajunaꞌ ni catuncunchokoyaꞌ. Pus vatsꞌisin tsucucalh makꞌosaspitca ju Jesús. Chai ju Pilato chani ajuni ju israelitanin:
\p ―Alaktsꞌintꞌitch ju xakꞌai miꞌucxtinꞌan.
\p
\v 15 Para ju yuꞌunch pꞌas tanaulh:
\p ―Amakꞌosutꞌich. Amaqꞌuilhtꞌatꞌich ju lacacurus.
\p Chai ju Pilato ajunich ju lapanacni:
\p ―Ja acmaquilhtayaꞌ ju miꞌucxtinꞌan ju lacacurus.
\p Taꞌakꞌalhtayanalh ju xalackꞌajin palijni:
\p ―Matiꞌ apumatam quiꞌucxtin quincꞌan. Va yuchi ju César.
\p
\v 16 Pus ju Pilato acsnich ju makꞌaxtaklh ju Jesús laꞌixmacaꞌan ju lapanacni ni catamaknilh ju Jesús. Taꞌamaklhtayanalh ju Jesús. Talhiꞌalhch.
\s1 Tamaquilhta ju laꞌiscurus chai tamakni ju Jesús
\p
\v 17 Chai tamakxkꞌokꞌalh ju iscurus ju Jesús. Talhiꞌalhch junta ixjuncan Aktsulh. Ju lacalhihebreo ixjuncan Gólgota.
\v 18 Anchach ju tamaquilhtachalhch ju Jesús chai ju aliꞌinch ixtꞌiyunꞌan. Ju pumatam laꞌixlhicana ju maquilhtacalh laꞌiscurus chai ju apumatam laꞌixlhimacx ju maquilhtacalh ju laꞌiscurus. Chai ju Jesús tamaquilhta laꞌixlacaitati.
\v 19 Ju gobernador Pilato tsꞌoklh lakatam chivinti. Lhinaulh ixmucꞌanica laꞌisꞌaktsulh ju iscurus ju Jesús. Ju anuꞌ atsꞌoknut ixnajun: “Yuchi ju Jesús amachakaꞌ Nazaret. Yuchi ju kꞌai ixꞌucxtinꞌan ju israelitanin”.
\v 20 Na lhu israelitanin ju ixtalaktsꞌin junima chivinti ni vanin ixvi ju lakꞌachakꞌan junta ixquilhtai ju Jesús. Ju anuꞌ chivinti istsꞌokcanta lacalhihebreo chai lacalhigriego chai lacalhilatin.
\v 21 Ju xalackꞌajin ixpalijni ju israelitanin tajunich ju gobernador Pilato:
\p ―Jantu atsꞌoktꞌi ni yuchi ju ixꞌucxtinꞌan ju israelitanin. Palai kꞌox ni canaulh: “Ju ani ya ixnajun ni xaꞌucxtin israelitanin ixjunita”.
\p
\v 22 Chai akꞌalhtayanalh ju Pilato. Ajunich:
\p ―Ju tuchi xacꞌatsꞌoknun yuchach.
\p
\v 23 Ju taropajni acsni tamaquilhta ju laꞌiscurus ju Jesús tasacnilh ju ixlacpumpuꞌ ju Jesús junta ixmamanicanta. Chai ni lakatꞌatꞌi ixjunita ju ixpumpuꞌ pus lakatamin talhiꞌalh ju pumatamin taropajni. Chai vachuꞌ ixꞌalin lakatam ju ixpumpuꞌ ju Jesús ju jantu isputsꞌapancanta. Lana va chunch ixlhinavicanta. Tachi ju va ixmakꞌanchꞌich.
\v 24 Chai talaclajunich ju sia yuꞌunch ju anuch taropajni:
\p ―Jantu catipukꞌexvi ju ani pumpuꞌ. Alai va calhilaslajvi. Catasuyach tichi chavaich ixꞌanuch cajunaꞌ.
\p Ni chunch ju tanaulh pus uctaxtulh ju atsꞌoknut junta chani najun: “Pumatamin lhiꞌalh ju quimpumpuꞌ. Chai ju lakatam quimpumpuꞌ talhilaslajlh”. Pus chunchach talalh ju taropajni.
\p
\v 25 Ju ixnatich ju Jesús chai ju ixlakꞌauch ju ixnati ju ixtalakasilakꞌoxiꞌulai ju ixvaitiꞌan ni paꞌastacni cajunaꞌ ni Cleofas chai ju Malia amachakaꞌ Magdala vanin ixtayanalh junta ixmucꞌacanta laꞌiscurus ju Jesús.
\v 26 Ju Jesús acsni laktsꞌilh ju ixnati chai ju ixtamamakaꞌun ju na ixmapaini ni vanin ixtayanalh pus junich ju ixnati:
\p ―Quinati yuchach ju ani ju mintsꞌalh ju chavai.
\p
\v 27 Astan junich ju ixtamamakaꞌun:
\p ―Yuchach ju ani ju minati ju chavai.
\p Pus tus acsni avilhchan ju anuꞌ ixtamamakaꞌun ju Jesús malhistacnilh ju ixnati ju Jesús.
\s1 Nilh ju Jesús
\p
\v 28 Chai acsnich ju cꞌatsalhch ju Jesús ni ixnavikꞌota tachi chun ju lhichꞌalhcat ju ilhcanita ju ixpai pus naulh:
\p ―Na icquicxixtach.
\p Chunchach ju naulh ni capuꞌuctaxtulhch ju atsꞌoknut.
\p
\v 29 Pus ju taropajni ixtaꞌulata tam xalu ju tuꞌuꞌ tachi ju axvicnit. Pus ju acsnich lana tacatanchꞌimucalh laꞌixquincatiꞌ achꞌitin ju hisopo juncan ju tuꞌuꞌ tachi pꞌulhulh panimac. Chai tamalaktanunilh ju axvicnit. Chai talhiꞌanilh laꞌixquilhni ju Jesús.
\v 30 Ju Jesús acsni quilhcꞌatsalhch ju anuꞌ tachi axvicnit naulh:
\p ―Uctaxtukꞌolh ju chavai.
\p Lana lilek navilh ju isꞌaktsulh chai acsnich ju nilh.
\s1 Laꞌixlhipakꞌaxtiꞌ ilhtokꞌonicanta ju Jesús
\p
\v 31 Ju acsnich ixlakasiꞌulacan ju ixtaxtokniꞌan ju israelitanin ixlacata ju avilhchan paꞌastacni. Pus ju yuꞌunch jantu talacasqꞌuilh ni va catamakatunculh ju lacacurus ju ixpumatꞌutuꞌan ni paꞌastacni cajunaꞌ ni catuncunaꞌ. Chai ju anuꞌ avilhchan paꞌastacni kꞌai cꞌatan cajunaꞌ. Pus talhitapaininilh ju gobernador Pilato ni calaktekꞌenicalh ju ixchꞌajaꞌan ju anuꞌ ixpumatꞌutuꞌan lapanacni ju ixtaquilhtananch ju lacacurus. Ju chunch lai palai vatsꞌalhti kꞌox cataniyaꞌ chai ni lai caꞌapꞌuxcalh.
\v 32 Pus ju taropajni acsni tachaꞌalh junta taquilhtananch ju anuꞌ lapanacni pus pꞌulhnan tatekꞌenilh ju ixchꞌajaꞌ ju pumatam. Vana chunch tanavipa ju apumatam ju anuꞌ ju ixꞌatꞌamaquilhtacanta ju Jesús.
\v 33 Para acsni talakꞌalh ju Jesús junta ixquilhtai talaktsꞌilh ni ixnitach ju yuchi. Pus jantu tachꞌantekꞌelh ju yuchi.
\p
\v 34 Para ju pumatam taropa lana lhtokꞌonilh laꞌixpakꞌaxtiꞌ ju Jesús laꞌislansa. Pus lana taxtunilh ju ixꞌacꞌalhni. Va lhiya ju xcan.
\v 35 Pus ju quitꞌin iclaktsꞌilhch chai quitꞌin icnajun tuchi tapasalhch. Chai ju tuchi icnajun stavasalanti. Chai ju quitꞌin kꞌoxich iccꞌatsai. Chai iclajunau ju stavasalanti ni lai apꞌulacꞌaꞌiyaꞌitꞌit vachuꞌ ju uxijnan.
\v 36 Junima taxtokni chunchach ju navicalh ni chunchach ju capuꞌuctaxtuyaꞌ ju atsꞌoknut junta chani najun: “Ju yuchi jantu catitekꞌenicalh ju ixꞌalucutni”.
\v 37 Vachuꞌ chani najun ju alakatam atsꞌoknut: “Catalaktsꞌinach ju xatalhtokꞌoich”.
\s1 Ju Jesús macnucalh
\p
\v 38 Pus ju José amachakaꞌ Arimatea ixtamamakaꞌun ixjunita ju Jesús. Para va jantu ixlacasqꞌuin ni cacꞌatsacalh ni va ixꞌatalhoni ju xalackꞌajin istꞌaꞌisraelitanin. Para acsni tapasakꞌolhch ju ani taxtokni pus ju yuchi alh tapainininiꞌ ju gobernador Pilato ni laich capꞌuxlh ju ixlacatuna ju lijunto Jesús. Chai ju Pilato lacasqꞌuinilh. Chai ju José lana alh pꞌuxnuꞌ ju ixlacatuna ju lijunto Jesús.
\v 39 Chai vachuꞌ makachꞌakꞌokꞌanalh ju Nicodemo. Yuchi ju quitꞌachivinilh tsꞌis ju Jesús. Ixlhiꞌantach ju pokxni ju na cꞌus ixꞌacamin. Ixlhinavicanta ju xaqꞌuiu mira chai ixlhiya ixkꞌalhchat ju xaqꞌuiu aloes. Tachi lakapꞌuxamcau kilo istatsꞌinqꞌuita.
\v 40 Pus tapꞌuxlich ixlacatuna ju lijunto Jesús. Chai acsni ixtatꞌajun lakapachꞌinin ju lacalhman pumpuꞌ pus ixtalacamucꞌaꞌantach ju anuꞌ alakꞌoxinti pokxni ni chunchach ju ixtalhilanitach ju israelitanin acsni ixtalamacnuich.
\v 41 Junta ixmaquilhtacantach ju Jesús ixꞌalin lakatam puꞌolivos. Chai ju anch lacapuꞌolivos ixꞌalin junta va lhucucu ixjunita lactalhpa. Ju anch jantucaꞌ tavanan ixmamacanta ixlacatuna xamatiꞌ.
\v 42 Pus anch ju makꞌacalh ixlacatuna ju lijunto Jesús ni vanin ixvi ju anuꞌ junta lhucucu lactalhpa ixjunita. Va istasokꞌoi ni ixchimputun ju hora acsni jantu lai ixtachꞌalhcatnan ju israelitanin ni paꞌastacni cajunaꞌ.
\c 20
\s1 Lokꞌonchokolh ju Jesús
\p
\v 1 Pus ju lacalhitumincu ju Malia amachakaꞌ Magdala taxtulh ju lakꞌachakꞌan. Na vatsꞌisin ixjunita. Istsꞌistacaꞌ lacatsꞌunin acsni chaꞌalh junta ixmamacanta ixlacatuna ju lijunto Jesús. Pus laktsꞌilh ju chiux ni ixmakꞌosucantach.
\v 2 Pus ju yuchi lana atsꞌalaminchokolh lakꞌachakꞌan. Quilaktsꞌilh ju Simón Pitaluꞌ chai ju akꞌantam ixtamamakaꞌun ju Jesús ju na ixmapaini. Chai ajunich:
\p ―Makꞌosucantach ju ixlacatuna ju lijunto quiꞌucxtinꞌan junta ixmakꞌacanta. Jantu iccꞌatsayau ta anchach ju xalhiꞌancan.
\p
\v 3 Chai lana tꞌataxtulhch ju Pitaluꞌ ju ixtꞌatamakaꞌun. Taꞌalh laktsꞌinin junta ixmakꞌacanta ju ixlacatuna ju lijunto Jesús.
\v 4 Chai lana pꞌas ixtaꞌatsꞌalaꞌanta. Para ju anuꞌ pumatam ixtamamakaꞌun ju Jesús palai vatsꞌalhti chaꞌalh. Astan chaꞌalh ju Pitaluꞌ.
\v 5 Pus ju pꞌulhnan chaꞌalh ni lhan tantama talacnu pus va yuchi ju laktsꞌilhch ju ixpulakapachꞌicanta ju Jesús ni va yuchi ju ixma. Para ju yuchi jantu tanulh.
\v 6 Chai chinchalh chavai ju Simón Pitaluꞌ ni yuchi ju ixtꞌalataimatach ju pꞌulhnan chaꞌalh. Pus ju yuchi lana tanu junta ixmamacanta ju ixlacatuna ju lijunto Jesús. Vana va yuꞌ ju laktsꞌimpa ju ixpulakapachꞌicanta ju Jesús ni va yuchi ju ixma.
\v 7 Vachuꞌ laktsꞌilh ju pumpuꞌ ju ixpulakapachꞌinicanta isꞌaktsulh ju Jesús. Ju yuchi jantu vanin ixtꞌama ju lhman pumpuꞌ. Lacatam ixpachꞌiꞌulacanta.
\v 8 Acsnicaꞌ ju tanulh ju anuꞌ pumatam ixtamamakaꞌun ju Jesús ju pꞌulhnan ixchaꞌanta. Chai acsni laktsꞌilhch ju yuchi pus lana lacaꞌi ni vasalh ixlokꞌonchokota ju Jesús.
\v 9 Va jantucaꞌ kꞌox ixtamachakxai ju atsꞌoknut junta najunch ni tasqꞌuini ni cataꞌacxtuchokoyaꞌ ju Jesús junta ixmakꞌacanta ixlacatuna.
\v 10 Ju acsnich ju ixꞌalacmamakaꞌui ju Jesús lana taꞌanchokolh laꞌixlacchakaꞌan.
\s1 Ju Jesús talacasunilh ju Malia amachakaꞌ Magdala
\p
\v 11 Pus ju yuchi ju Malia va makspaꞌ ixya. Vanin junta ixmakꞌacanta ju ixlacatuna ju lijunto Jesús. Va ixkꞌalhuyalhch. Chai acsni ixtꞌajun kꞌalhunuꞌ pus talacnu ju pulacni junta lhucucu lactalhpa.
\v 12 Chai laktsꞌilh pumatꞌui anquilhnin ju ixtavilanalh. Ixtalakchꞌita lacxnapapa ixpumpuꞌan. Ju pumatam ixvi junta ixlacpatai ju lijunto Jesús. Chai ju pumatam ixvi junta ixchꞌanꞌanta ju Jesús.
\v 13 Tajunich ju Malia:
\p ―Chakoꞌulh tꞌas ni va kꞌalhumpꞌalai.
\p Ju Malia ajunich acsni akꞌalhtailh ju anquilhnin:
\p ―Pus va talhiꞌalhch ju lijunto quiꞌucxtin chai jantu iccꞌatsai ta anchach ju xatalhiꞌan.
\p
\v 14 Acsni alactꞌachivinkꞌolh ju anuch anquilhnin ju Malia pus talakaspꞌitlich chai laktsꞌilh ni vanin ixya ju Jesús. Para jantu ismispai ni yuchi cava.
\v 15 Ju Jesús junich ju Malia:
\p ―Chakoꞌulh tꞌas ni va kꞌalhumpꞌalai. Tis chavaich ju pꞌuxcꞌaꞌui.
\p Pus ju Malia va naulh laꞌixꞌalhunut ni ca va islhistacnaꞌ ju anuꞌ puꞌolivos. Chai junich:
\p ―Cumpari ni uxintꞌi ju xalhipꞌin aqꞌuiꞌunch tas anchach ju xalhichꞌipꞌin ju ixlacatuna ju lijunto Jesús. Aclhiꞌanach.
\p
\v 16 Ju Jesús junich:
\p ―Malia.
\p Pus ju Malia ni talakaspꞌitchokolh xakꞌala lacalhihebreo chai juni:
\p ―Raboni.
\p Ju chunch nomputunch: “Quiꞌamamakaꞌunuꞌ”.
\p
\v 17 Ju Jesús junich:
\p ―Tun aqꞌuilacꞌachꞌapꞌa ni jantucaꞌ icꞌan laktsꞌiniꞌ ju quimpai. Para apꞌinchich alaktsꞌiniꞌ ju quilhiꞌalakꞌavin. Aꞌunchich ni acꞌanaꞌ laktsꞌiniꞌ ju quimpai chai ju mimpaiꞌan Dios. Acꞌanaꞌ laktsꞌiniꞌ ju quiDios chaich ju miDiosꞌan.
\p
\v 18 Pus lana anchokolh ju lakꞌachakꞌan ju Malia amachakaꞌ Magdala. Chai acsni chaꞌalh chani alacjunich ju ixꞌalactꞌatamakaꞌui:
\p ―Iclaktsꞌilhch ju quiꞌucxtinꞌan. Chai yuchi ju xaquijuni ni aclajunau ju ani chivinti.
\s1 Ju Jesús atalacasunilh ju ixꞌamamakaꞌui
\p
\v 19 Ju acsnich lhitumincu ixjunita. Chai acsni tokꞌoxalhch ju anuꞌ avilhchan pus ixtamalacchokꞌotach junta ixtatanumanalh ju ixꞌamamakaꞌui ju Jesús ni va ixtatalhonich ju xalackꞌajin istꞌaꞌisraelitanin. Chai acsni chincha ju Jesús jantu maklhtꞌekꞌa ju lacamalhtich. Para ni talhicꞌatsanalh yalhch laꞌixlacaitat junta ixtavilanalhch ju ixꞌamamakaꞌui. Chai ajunich:
\p ―Jantu calacꞌalh ju miꞌalhunutꞌan ju uxijnan.
\p
\v 20 Acsni naulh ju ani pus alacmalacasunilh ju ixmacaꞌ chai laꞌixpakꞌaxtiꞌ junta ixlaccꞌatsanich. Chai ju ixꞌamamakaꞌui na talackꞌachalhch acsni talaktsꞌinchokolh ju ixꞌucxtinꞌan Jesús.
\v 21 Aktam ajunchokopa ju Jesús:
\p ―Jantuch calacꞌalh ju miꞌalhunutꞌan. Tachi ni quimalakachachilh ju quimpai pus vachuꞌ chunch ju quitꞌin iclamalakachayauch ju uxijnan ju laquilhichꞌalhcat.
\p
\v 22 Acsni naulh ju chunch pus lana asunulh. Ajunich:
\p ―Amaklhtꞌayanantꞌitch ju Spiritu Santu.
\v 23 Ni xamatiꞌ amacꞌacxaniyaꞌitꞌit ju ixtalakꞌalhin pus macꞌacxanicantach. Ju jantu amacꞌacxaniyaꞌitꞌit uxijnan pus jonkꞌalhitach ju ixtalakꞌalhin.
\s1 Ju Tumax jantu ixlacaꞌi
\p
\v 24 Para ju Tumax ju ixjuncan Cuate ju ixlhipumacautꞌuich ixjunita jantu ixmakvi acsni quilalh ju Jesús.
\v 25 Ju aliꞌin ixtamamakaꞌunti ju Jesús tajunich ju Tumax:
\p ―Iclaktsꞌiuch ju quiꞌucxtinꞌan.
\p Para ju yuchi alhikꞌalhtailh:
\p ―Ni jantu iclaktsꞌini ju laꞌixlacmacaꞌ junta ixlactanumanilh ju cravos chai ni jantu icmanuni ju quinkꞌelilimacaꞌ junta ixlactanumanilh ju cravos chai ni jantu laquimacaꞌ quiꞌakstu ju acchꞌapanichokolh junta ilhtokꞌonicanta ju laꞌixpakꞌaxtiꞌ pus jantu iclacaꞌi.
\p
\v 26 Ju ixlhimixtujunch junchokolh aktam va lakputam ixtavilanampa ju lacachakaꞌ ju ixꞌamamakaꞌuich ju Jesús. Chai ju Tumax ixvilhch vachuꞌ anch. Chai ixtamalacchajuta. Chai chinchokopa ju Jesús chai vana va chun navichokopa. Jantu maklhteka ju lacamalhtich. Para ni talhicꞌatsanalh yachokopalhch laꞌixlacaitat junta ixtavilanalh. Ajunich:
\p ―Jantuch calacꞌalh ju miꞌalhunutꞌan.
\p
\v 27 Chai lanach juncan ju Tumax:
\p ―Amanutꞌich ju minkꞌelilimacaꞌ ju laquilacmacaꞌ junta ixtanun ju cravos. Alaktsꞌinaꞌich. Chai amakpꞌitꞌich ju lhiꞌani. Atꞌamacnutꞌich ju lhilaquimpakꞌaxtiꞌ junta iclhtokꞌonicanta. Jantu na pꞌas anavitꞌi ju miꞌalhunut. Alacꞌaꞌitꞌi ju tuchꞌi uncꞌan.
\p
\v 28 Ju acsnich ju Tumax akꞌalhtayanalh. Junich ju Jesús:
\p ―Quiꞌucxtinꞌat chai quiDiosꞌat.
\p
\v 29 Ju Jesús junich:
\p ―Ju uxintꞌi ji Tumax va acsnicaꞌ ju lai lacꞌaꞌi ni xaqꞌuilakꞌalaktsꞌinch. Para palai takꞌachan ju yuꞌunch mas jantu quintalakꞌalaktsꞌinta para talacaꞌich. ―Juncanch ju Tumax.
\s1 Yuchi lhitsꞌokcanta ju ani chivinti ni laich calacaꞌicalh
\p
\v 30 Pus slivasalh na lhu ixpulacaꞌican navilh ju Jesús laꞌixꞌucxlacapuꞌan ju ixꞌamamakaꞌui. Para jantu si tsꞌokkꞌocanta ju ani lacaꞌalhiqui.
\v 31 Para ictsꞌokꞌulata ju ani ni apꞌulacꞌaꞌiyaꞌitꞌitch ni Jesús yuchi ju Cristo ju ixnoncan camalakachatachilh ju Dios. Chai apꞌulacꞌaꞌiyaꞌitꞌit ni yuchi istsꞌalh Dios junita. Chai caꞌalinach ju miꞌatsucuntiꞌan jonkꞌalhita ni alhilacꞌapꞌinaꞌitꞌit ju yuchi.
\c 21
\s1 Ju Jesús atalacasunilh ixpumatujunꞌan ixꞌamamakaꞌuta
\p
\v 1 Astan acsni atalacasunichokolh ju Jesús ju ixꞌamamakaꞌui ju laxaꞌatantsꞌin Tiberias pus chanich lhiꞌucxꞌalh.
\v 2 Kꞌaixtam ixtavilanankꞌo ju Simón Pitaluꞌ chaich ju Tumax ju ixjuncan Cuate chaich ju Natanael amachakaꞌ Caná lhiGalilea chai ixtꞌiyunꞌan istsꞌalan ju Zebedeo chaich ju aliꞌin ixtꞌiyunꞌan ixꞌamamakaꞌui ju Jesús.
\v 3 Ju Simón ajunich:
\p ―Acꞌanaꞌ chꞌapanaꞌ ju pamata.
\p Chai ju aliꞌin tanaulhch:
\p ―Aclatꞌaꞌanau vachuꞌ ju quijnan.
\p Pus talatꞌaꞌankꞌo. Tatajulh lacabarco. Para ju anuꞌ atatsꞌisni jantu tuꞌuꞌ tachꞌapalh.
\v 4 Acsni ixtꞌajun tuncuntilanaꞌ pus ju Jesús tayacha laꞌixquilhtuꞌ ju atantsꞌin. Para ju ixꞌamamakaꞌui jantu ixtamispai ni yuchi cava ju Jesús.
\v 5 Ju Jesús ajunich:
\p ―Tsꞌalan ja chꞌapꞌatꞌitch lacatsꞌunin ju pamata.
\p Taꞌakꞌalhtayanalh ni matiꞌ.
\v 6 Pus ju yuchi ajunilh:
\p ―Amacꞌapꞌitꞌitch ju minchꞌokxniꞌan laxalhicana ju mimbarcoꞌan. Anch ju lai alhitꞌaꞌuyaꞌitꞌit ju pamata.
\p Pus tamacaꞌalh ju ixchꞌokxniꞌan chai jantu lana lai ixtamacutui ju chꞌokxni ju lacxcan ni na va ixtatsꞌinqꞌuitach ju pamata.
\v 7 Ju acsnich ju anuꞌ ixtamamakaꞌun ju Jesús ju na ixmapaini junich ju Pitaluꞌ:
\p ―Yuchi ju quiꞌucxtinꞌan.
\p Pus ju Simón Pitaluꞌ acsni kꞌasmatlh ni najuncalh ni ixꞌucxtinꞌan pus lana lakchꞌichokolh ju ixpumpuꞌ ni va ixmaxtutach ju lakatam ixpumpuꞌ. Lana taju lacxcan. Makꞌanxqꞌuivitnitacutlh.
\v 8 Junta mactai amacontilalh ju ixtꞌaꞌalhtanin jantuch makat ixjunita ju lakꞌakxixni. Va tachi tam cientos metro. Pus ju aliꞌin ixtꞌaꞌalhtanin ju Pitaluꞌ tapumilh ju ixbarcoꞌan ni va ixtapuxakꞌamalhimintach ju ixchꞌokxniꞌan ni na lhuch ixtanun ju pamata.
\v 9 Chai acsni tavanan tatacutcha ju laꞌixquilhtuꞌ atantsꞌin pus talaktsꞌilhch ju lacaꞌayakꞌanaꞌ ni tampꞌutꞌach kꞌantam pamata. Vachuꞌ talaktsꞌilh ju vati.
\v 10 Chai ju Jesús ajunich:
\p ―Alhitꞌatꞌitch ju aliꞌ pamata ju xachꞌapꞌayatꞌit chavai.
\p
\v 11 Pus lana taju ju Simón Pitaluꞌ ju lacabarco chai taxakꞌamacutulh ju ixchꞌokxniꞌan. Na lhu ixtanun ju lackꞌai pamata. Ixchaꞌanta tam cientos a cincuenta y tres pamata. Para mas na lhu ju ixtanun ju pamata jantu talackꞌexlh ju chꞌokxni.
\v 12 Ju Jesús ajunich ju ixꞌamamakaꞌui:
\p ―Asokꞌotꞌitch. Caꞌuch.
\p Pus jantu xamatiꞌ ju laich cajunilh: “Tis chavaichꞌat” ni ixtacꞌatsaich ni ixꞌucxtinꞌan ixjunita.
\v 13 Chai ju Jesús milh junta tꞌampꞌucanta ju pamata. Macutulh ju vati chai axtaknilh. Vachuꞌ axtaknilh ju pamata.
\p
\v 14 Pus ju ani ixlhikꞌalhpaktꞌutuch ju atalacasunilh ju Jesús ju ixꞌamamakaꞌui acsni ixtaꞌacxtuchokotach junta ixmacnucanta.
\s1 Alhistꞌactꞌich ju quilapanacni ju tachi borregojni tajunita
\p
\v 15 Acsni tavailh pus ju Jesús junich ju Simón Pitaluꞌ:
\p ―Simón istsꞌalh Jonás ja palai qꞌuimapꞌaini ju uxintꞌi. Ja palai jantu ju ani tavilanalh.
\p Ju Pitaluꞌ junich ju ixꞌucxtin:
\p ―A. Kꞌoxich cꞌatsꞌai ni icmapainiyan ji quiꞌucxtin.
\p Chai juncanch ju Pitaluꞌ:
\p ―Amalanitꞌich ju quinchivinti ju lapanacni ju quintalhilacaꞌan. Ju yuꞌunch chunch tajunita tachi ju tuꞌuꞌ askꞌatꞌa borregojni. Na tamaktasqꞌuini ni xamatiꞌ caꞌamasunilh ju kꞌox atsucunti.
\p
\v 16 Junchokopa ju ixlhipaktꞌuich:
\p ―Simón istsꞌalh Jonás ja qꞌuimapꞌaini.
\p Pus ju Pitaluꞌ jumpa ju ixꞌucxtin:
\p ―Ju uxintꞌi kꞌoxich cꞌatsꞌai ni icmapainiyan ji quiꞌucxtin.
\p Junchokopa:
\p ―Pus alhistꞌactꞌich ju lapanacni ju quintalhilacaꞌan. Ju yuꞌunch chunch tajunita tachi ju tuꞌuꞌ borregojni ju tamaktasqꞌuini ni xamatiꞌ caꞌalhistaclh.
\p
\v 17 Junchokopa ju ixlhipaktꞌutu:
\p ―Simón istsꞌalh Jonás ja qꞌuimapꞌaini.
\p Pus ju acsnich na amakꞌaninilh ju Pitaluꞌ ju ixlhipaktꞌutuch acsni quilhasacmi ju Jesús ni ixmapaini. Chai junich:
\p ―Ju uxintꞌi ji quiꞌucxtin cꞌatsꞌakꞌoꞌui tachi chun ju taxtokni. Kꞌoxich cꞌatsꞌai ni icmapainiyan.
\p Pus junich ju Jesús:
\p ―Amalanitꞌich ju quinchivinti ju lapanacni ju quintalhilacaꞌan. Ju yuꞌunch tachi quimborregojni tajunita.
\v 18 Slivasalh ju icjunan. Acsni palaicaꞌ askꞌatꞌa ixꞌunitꞌa pus va miꞌakstu ixlakchꞌi ju mimpumpuꞌ. Chai mas vanta anch ju ixpꞌimpꞌutꞌunch ixpꞌinch. Para acsni papaꞌ aꞌunaꞌ achꞌixaꞌ ju mimacaꞌ chai akꞌantam camalakchꞌiniyan chai calhiꞌanan junta jantu pꞌimpꞌutꞌun.
\p
\v 19 Pujunicalh chunch ju Pitaluꞌ ni va ixmamachakxanicanch tuchi aninti ju capumalacasuyaꞌ ju Pitaluꞌ ni Dios ju xakꞌai. Chai acsni nonkꞌo ju Jesús ju ani pus junich ju Pitaluꞌ:
\p ―Aqꞌuinchꞌakꞌokꞌach.
\s1 Na ixmapainicanta ju ixꞌamamakaꞌunti ju Jesús
\p
\v 20 Ni talakaspꞌitlh ju Pitaluꞌ laktsꞌilhch ju ixtꞌatamamakaꞌun ju na ixmapainich ju Jesús ni ixꞌachꞌakꞌokꞌanantach vachuꞌ. Yuchi ju anuꞌ ju vanin ixtꞌatapakstitama ju Jesús acsni tavailh. Chai yuchi ju quilhasacmi acsni tavanan junilh: “Quiꞌucxtin tis chavaich ju camakꞌaxtꞌakꞌan”.
\v 21 Ju Pitaluꞌ acsni laktsꞌilh ju ixꞌachꞌakꞌokꞌanan pus junich ju Jesús:
\p ―Quiꞌucxtin ju ani minta tijuch ju canaviyaꞌ.
\p
\v 22 Ju Jesús lhakꞌalhtayanalh:
\p ―Pus ni va aclacasqꞌuilh ni catamacaulh ju yuchi tus acsni acminchokoyaꞌ pus ju anch jantu mincuenta. Ju uxintꞌi va aqꞌuinchꞌakꞌokꞌach.
\p
\v 23 Yuchi lhiꞌalilh ju chivinti ju sia lhiꞌalakꞌavin ni ca jantu catini ju anuꞌ pumatam ixtꞌatamamakaꞌunꞌan. Para ju Jesús jantu chun naulh ni va jantu catini. Va naulh: “Ni va aclacasqꞌuilh ni catamacaulh ju yuchi tus acsni acminchokoyach pus ju anch jantu mincuenta”.
\p
\v 24 Quitꞌinch ju anuꞌ amamakaꞌunti ju ixnoncanch tachi ju va jantu actini. Chai quitꞌin ju icnajun ni stavasalanti junima taxtokni. Chai quitꞌin ju icꞌatsꞌoknunkꞌo tachi chun ju ani taxtokni. Chai iccꞌatsayauch ni stavasalanti tachi chun ju icnajunta.
\p
\v 25 Na lhu alin ju aliꞌ taxtokni ju navilh ju Jesús. Ni stunin xactsꞌokꞌulakꞌota tachi chun ju taxtokni pus ca jantu lai ixtilhiva ju ani lacamunutpaꞌ ju atsꞌoknut junta ixlhaꞌatsꞌoknuncalhch ju tuchi navitach ju Jesús.