\id ACT
\ide UTF8
\h IXTAMALAKACHAN JU JESÚS
\toc1 IXTAMALAKACHAN JU JESÚS
\mt1 JU TUCHI TANAVILH JU IXTAMALAKACHAN JU JESÚS
\c 1
\s1 Ajunicalh ni caꞌaxtaknicanaꞌ ju Spiritu Santu
\p
\v 1 Ju anuꞌ alhiqui ju pꞌulhnan icꞌatsꞌoknulh ji Teófilo anch ju icnaulh tachi chun ju taxtokni ju ixnavich chai ju ixꞌamalaninin ju Jesús tus acsni taiꞌulatacha ju ixlhichꞌalhcat.
\v 2 Chai chunch ju tailhiꞌalh tus acsnich avilhchan ju anchokolh ju lactꞌiyan. Ni tucaꞌ ixꞌanchokoi ju lactꞌiyan axtaknilh ju ixlhamapꞌaksin laꞌixtachaput ju Spiritu Santu ju ixtamalakachan ju ixꞌalacsacxtutach.
\v 3 Acsni nilh ju Jesús pus ju astan ju yuchi atalacasunichokolh xalakꞌajun ju ixtamalakachan. Tꞌupꞌuxam avilhchan na paklhu ju talaktsꞌilh. Chai chun ju aputalacasunilh ta yu laich catacꞌatsayaꞌ istavasalanti ni ixtꞌajun ju yuchi. Chai ixꞌajunich ta yu lhinomputun ju Dios laꞌisꞌatsucuntiꞌan ju lapanacni.
\p
\v 4 Pus acsni va kꞌaixtam ixꞌalactꞌatavilhcaꞌ alacmapꞌaksi ni jantuch catataxtulh ju lakꞌachakꞌan Jerusalén para catapacxalh ju Spiritu Santu ju xanajun ju xapai ni caꞌamacaminiyach. Chai vachuꞌ isꞌakstu ju Jesús ixꞌalacjuni ni caꞌaxtaknicanaꞌ ju anuꞌ Spiritu Santu.
\v 5 Amapꞌastꞌacꞌani ju Jesús ni va lacaxcan xaꞌamakpaxanan ju Xivan. Chai ajuni ni jantu lhu avilhchan ju ixticꞌacx tus cataꞌamaklhtayananaꞌ ju yuꞌunch ju Spiritu Santu tachi ju aliꞌin lapanacni ixtaꞌamaklhtayanan ju xcan acsni ixtaꞌakpax.
\s1 Ju Jesús anchokolh ju lactꞌiyan
\p
\v 6 Pus ju yuꞌunch ju ixꞌalactꞌatakꞌaixtokta ju Jesús taquilhasacmich. Chanich tajuni:
\p ―Quiꞌucxtin ja aquilaꞌaktaijuyau ju chavai ni laich calhinonchokopalau quiꞌakstuꞌan ju laquilacatꞌunꞌan ju quijnanꞌan ju israelitanin juntau.
\p
\v 7 Pus chanich alacjuni ju Jesús:
\p ―Pus ju uxijnan jantu milhicꞌatsatꞌan tuchi ju catapasayaꞌ ju tamin cꞌata u tamin malhquiyuꞌ. Va yuchi ju quimpaiꞌan Dios ju canonaꞌ tavananch ju catapasayaꞌ ju tuꞌuꞌ.
\v 8 Para acꞌatsꞌatꞌit ju ani. Catanuyaꞌ ju lamiꞌalhunutꞌan ju uxijnan ju Spiritu Santu chai ju yuchi cataꞌaktaijuyan ni jantu atꞌalhananaꞌitꞌit. Chai uxijnan ju anonaꞌitꞌit ju quilacata ju lakꞌachakꞌan Jerusalén chai chux ju xaꞌestado Judea chai ju xaꞌestado Samaria chai chux ju lacamunutpaꞌ.
\p
\v 9 Acsni nonkꞌo junima chivinti ju Jesús pus talaktsꞌilh ju ixtamalakachan ni lhiꞌancalh lactꞌiyan. Chai acsni tanulh ju lacaꞌataputsꞌi pus jantuch lai talaktsꞌilh aliꞌ.
\v 10 Acsni istaskotutui ju lactꞌiyan ni ixꞌantacaꞌ ju Jesús pus pumatꞌui anquilhnin alactꞌatayalhch ju yuꞌunch. Chai ju anuch ixpumatꞌuiꞌan ixtalakchꞌita xnapapa ixpumpuꞌan.
\v 11 Chai chani tajuni ju ixtamalakachan ju Jesús:
\p ―Ju uxijnan ji lapanacni amachakꞌan Galilea va kꞌaya skꞌotꞌutꞌuyatꞌitch ju lactꞌiyan. Ju Jesús anchokolh junta vilhcha ju ixpai. Para ju ani Jesús ju xaꞌanchokoi lactꞌiyan lamiꞌalacꞌavantiꞌan vana va chunch caminchokopalaꞌ tachi ju xalaktsꞌinatꞌit ni xaꞌan ju lactꞌiyan. ―Chunch ju ajunicalh ju ixtamalakachan ju Jesús.
\s1 Sacxtucalh ju Matías ni ixꞌokxtapalh cava ju Judas
\p
\v 12 Pus ju yuꞌunch lana tatakꞌalhtajulh ju anuꞌ akstijun junta ixchꞌancanta ju qꞌuiu ju olivo juncan. Taꞌanchokolh ju lakꞌachakꞌan Jerusalén. Pus ju anuꞌ akstijun vanin ixlhilaklacaꞌanita ju lakꞌachakꞌan Jerusalén. Ixlhimakat tachi xaꞌalhtanti va tam pantsꞌiquis.
\v 13 Acsni tatanucha ju lakꞌachakꞌan Jerusalén taꞌalh ju lacachakaꞌ chai tatocꞌalh ju ixlhitantalactꞌui junta ixtamatsꞌisqꞌuinta. Ju taꞌalh yuchi ju Pitaluꞌ chai ju Jacobo chai Xivan, Tilix, Pilipe, Tumax, Bartolomé, Mateo, Jacobo istsꞌalh ju Alfeo, Simón ju makyuꞌunch ixjunita ju cananistanin, chai ju Judas ispꞌisekꞌe ju Jacobo.
\v 14 Ixchuxꞌan va lakatam ixjunita ixꞌatalacpastꞌacꞌatꞌan chai va tachi ixtatꞌachivinin ju Dios. Vachuꞌ ixꞌalactꞌavi aliꞌin chakolun chai ju Malia ixnati ju Jesús chai ixꞌapꞌisekꞌen ju Jesús.
\p
\v 15 Ju ixtatakꞌaixtokta ixtachaꞌanta tam cientos a pumapꞌuxam lapanacni. Chai ju aktam acsni ixtatakꞌaixtokta pus ju Pitaluꞌ taya laꞌixlacaitat junta ixtavilanalh ju lhiꞌalakꞌavin chai chani ajuni:
\p
\v 16 ―Quiꞌalakꞌavin aktsꞌiya istasqꞌuini ni caꞌuctaxtulh tachi ju naulh ju Spiritu Santu laꞌixchivinti Dios ju tsꞌokcanta. Ju yuchi juni ju David tuchi cajunaꞌ ixlacata ju Judas. Yuchi ju apꞌulhnilh ju lapanacni ju taquichꞌapalh ju Jesús.
\v 17 Ju Judas ixlhiputekꞌecantau ju quijnan chai kꞌaixtam ixtꞌachꞌalhcatnanau.
\v 18 Para ju yuchi alactuꞌunulh chai laꞌixtalhaja ju ixꞌalactuꞌunti tamocalh lakatam lacatꞌun. Pus ju Judas ankꞌapatajulh. Lana pupaklh ju laꞌixpajan chai tachi chun ixpalu taxtunikꞌo.
\v 19 Pus tacꞌatsakꞌo tachi chun ju amachakꞌan Jerusalén. Chai ju anuch lacatꞌun tamapakaꞌulh laꞌixchivintiꞌan. Tajunich Acéldama ni lhitamaꞌucalh laꞌixtapalh ixꞌacꞌalhni ju Jesús.
\v 20 Pus chanich ju tsꞌokcanta laxaꞌalhiqui ju Salmos junta ma lhichivinincalh ju Judas:
\q1 Chach va isꞌakstu taya ju ixchakaꞌ chai jantu xamatiꞌ catsuculh ju anch.
\m Chunch ma najun. Chai alacatam ma chani najun:
\q1 Chach tanuchokolh apumatam laꞌixlhichꞌalhcat.
\m Chunch ma najun junta tsꞌokcanta.
\p
\v 21 Pus ixlhiyuchi tasqꞌuini ni casacxtuyau pumatam ju ixꞌokxtapalh cajunaꞌ. Casacxtuyau sia yuꞌunch ju kꞌaixtam xaquintatꞌaꞌalhtananan acsni ixtꞌajuncaꞌ ju quiꞌucxtinꞌan Jesús laquilhiquijnanꞌan.
\v 22 Casacxtuyau sia yuꞌunch ju quintatꞌaꞌalhtanantan tus acsni ixꞌamakpaxanan ju Xivan tus acsnich avilhchan acsni amaklhtayananchokocalh ju Jesús ju lactꞌiyan laquiꞌalacꞌavantiꞌan. Ju chunch ju yuchi vachuꞌ aquintatꞌanonan ni lokꞌonchokolh ju Jesús. ―Chunch ju naulh ju Pitaluꞌ.
\p
\v 23 Pus tasacxtulh pumatꞌui. Pumatam ixjuncan José. Ju yuchi vachuꞌ ixjuncan Barsabás chai Justo. Ju apumatam ixjuncan Matías.
\v 24 Chai tatꞌachivinilh ju Dios. Chani tajunich:
\p ―Quiꞌucxtin ju uxintꞌi ni lai laktsꞌinkꞌoꞌui ju lakatamin alhunut pus aquilamasuniuch tamalhch ju sacxtꞌutꞌach ju ani tayanalh pumatꞌui lapanacni.
\v 25 Aquilamasuniuch tamalhch ju sacxtꞌutꞌach ju uxintꞌi ni mintamalakachan cava chai caꞌamaklhtayanalh ju laꞌixlhitai ixjunita ju Judas. Ju Judas ni taxtulh ni va alactuꞌunulh chai ankꞌalhi ju lacajipi junta aktsꞌiya istasqꞌuini ni caꞌalh. ―Chunch ju tajuni ju Dios.
\p
\v 26 Pus taꞌulalh ixtapakaꞌutꞌan lacaꞌalhiqui chai tasacxtulh ju ixtapakaꞌut ju Matías. Pus lhilaktsacalh pumacautꞌui ju ixtamalakachan ju Jesús.
\c 2
\s1 Alakmilh ju lapanacni ju Spiritu Santu
\p
\v 1 Alin ixcꞌatanꞌan ju israelitanin ju Pentecostés juncan. Pus acsni chilh ju anuch cꞌatan va chꞌanxtam ixtavilanalh ixchuxꞌan ju ixtalhilacaꞌanta ju Jesús.
\v 2 Chai acsni talhicꞌatsanalh takꞌasmatlh tachi ju va pꞌas ixminta ju un. Mincha lactꞌiyan chai kꞌasmatcalh chux ju lacachakaꞌ junta ixtavilanalh ju yuꞌunch.
\v 3 Ju acsnich talaktsꞌilh lhu tuꞌuꞌ tachi ju jipi chai lhvakpitsilh chai tavilh laꞌixꞌucxni ixlacatunaꞌan ju pumatamin ixtavilanalh anch.
\v 4 Chunch ju putanulh ju Spiritu Santu laꞌixꞌalhunutꞌan ni calhinonkꞌoyaꞌ laꞌisꞌatsucuntiꞌan. Chai lana laich ixtachivinin ju chivinti tachi ju tachivinin aliꞌin lapanacni. Chunch ju tachivinilh tachi ju ajuni ju Spiritu Santu.
\p
\v 5 Pus ju acsnich ju lakꞌachakꞌan Jerusalén ixtavilanalh ju israelitanin. Ju yuꞌunch na ixtalhilacaꞌanta ju Dios. Ixtataxtutacha tachi chun ju lacatꞌun ju alin ju ani lacamunutpaꞌ.
\v 6 Chai acsni takꞌasmatlich ni na ixlacchivincanch pus tatakꞌaixtoklh lhu ju lapanacni chai na ixtalhamakꞌanininch ni ixtakꞌasmatꞌa ixchivinti pumatamin ju anch ixtavilanalh.
\v 7 Chai va sekch tatavi. Na ixtalhamakꞌaninin. Ixtalaclajuni:
\p ―Ja jantu si amachakꞌan Galilea ju yuꞌunch ju tatꞌajun chivinin.
\v 8 Pus tas laich tanompalai tachi iclanitauch ju quilhitalactꞌicstꞌin quincꞌan.
\v 9 Ju aliꞌin quijnan ni amachakꞌan Partia juntau chaich ju aliꞌin amachakꞌan Media, amachakꞌan Elam, amachakꞌan Mesopotamia, amachakꞌan Judea, amachakꞌan Capadocia, amachakꞌan Ponto, chai amachakꞌan Asia,
\v 10 amachakꞌan Frigia chai amachakꞌan Panfilia chai amachakꞌan Egipto chai amachakꞌan ju xalacatꞌun Africa ju lhiꞌavinti vilhcha ju lakꞌachakꞌan Cirene. Ju aliꞌin quijnan amachakꞌan Roma juntau chai sia quijnanꞌan alin ju quintꞌaꞌisraelitaninꞌan chaich vachuꞌ alin ju talhilacaꞌanta ju Dios tachi ju layau ju quijnanꞌan ju israelitanin juntau mas jantu israelitanin tajunita ju yuꞌunch.
\v 11 Ju aliꞌin amachakꞌan Creta juntau chai amachakꞌan Arabia. Ickꞌasmatꞌauch laquinchivinti quincꞌan ni navita ju Dios ju kꞌai lhamakꞌan. ―Chunch ju talaclajunich.
\p
\v 12 Chai ixchuxꞌan va sekch tatavi. Jantu lai ixtamachakxai tis ixtalakxtuch ixtꞌajun tapasanaꞌ. Ixtalaclajuni sia yuꞌunch:
\p ―Tijuch nuꞌ ju nomputun ju ani.
\p
\v 13 Para ju aliꞌin lapanacni va ixtalhitsꞌiꞌinch. Ixtanajun:
\p ―Ju ani tayanalh lapanacni va talactꞌakꞌapꞌan.
\s1 Ju Pitaluꞌ axakꞌala ju ixtalhavat lapanacni
\p
\v 14 Pus ju acsnich ju Pitaluꞌ alactꞌataya ju ixpumacautamꞌan ixtamalakachan ju Jesús. Chivinilh ju Pitaluꞌ chai chani alacjunich:
\p ―Quintꞌaꞌisraelitanin chai tachi chun ju tꞌonatꞌit ju ani lakꞌachakꞌan Jerusalén aquilakꞌasmatniuch tuchi aclajunau chai amachꞌakxatꞌit.
\v 15 Ju quijnan jantu ni va ictꞌakꞌapꞌatauch tachi ju nonatꞌit ju uxijnan ni va lakanajatsicaꞌ hora ju vatsꞌisin.
\v 16 Para tachi ju tꞌajun tapasanaꞌ ju chavai va uctaxtui tachi ju naulh ju Joel ju makꞌaniya ixlapanac Dios ju ixnajun ju ixchivinti. Ju yuchi ma chani naulh:
\q1
\v 17 Ju Dios ma najun ni ma chanich cajunaꞌ ju avilhchan acsni caꞌaclayach ju lacamunutpaꞌ.
\q1 Ma caꞌaxtakniyaꞌ ju iSpiritu Santu tachi chun ju lapanacni chai ju mintsꞌalan chai ju miꞌatsiꞌin ma catanonach ixchivinti.
\q1 Chaich ju paitat lapanacnich ma tachi ju va laꞌixꞌaklakꞌavantiꞌan catalaktsꞌinaꞌ ju tuchi catapasayaꞌ.
\q1 Chai ju lackꞌajin jokꞌatni ma caꞌaxakꞌalacanaꞌ laꞌixꞌaklakꞌavantiꞌan.
\q1
\v 18 Chai ju ixlapanacni ju Dios chai ju atsiꞌin ju tachꞌalhcatnan laꞌixmacni pus ju anuꞌ avilhchan ma caꞌaxtakniyaꞌ ju iSpiritu Santu chai ma catanonach ju ixchivinti.
\q1
\v 19 Chai ju yuchi ju Dios ma camalacasuyach kꞌai lhamakꞌan ju lactꞌiyan. Chai ju ani lacatꞌun ma caꞌalinaꞌ ju tuꞌuꞌ ju lai catapuꞌalacpastacnalh ju lapanacni.
\q1 Ma caꞌalinaꞌ ju lasat chai na lhu cataxtuyaꞌ ju acꞌalhni.
\q1 Chai ma caꞌalinaꞌ ju kꞌai jipi. Chai ma caꞌalinaꞌ ju jin ju na kꞌalhtankꞌai cajunaꞌ tachi ju va ataputsꞌi.
\q1
\v 20 Chai ju avilhchan ma va smalaka cajunaꞌ. Chai ju malhquiyuꞌ ma catasuyach tachi ju va acꞌalhni ni na lapulh cajunaꞌ.
\q1 Ma chunch cajunaꞌ acsni cachaꞌamputunach ju anuꞌ avilhchan ju lhcaꞌulata ni caminchokoyaꞌ ju kꞌai ucxtin Dios.
\q1 Chai ju acsnich ma na kꞌai avilhchan cajunaꞌ. Chai ma catasuyaꞌ ni yuchach ju avilhchan ju lhcata ju Dios.
\q1
\v 21 Chai ma tachi chun ju catapaininiyaꞌ ju kꞌai ucxtin Dios ma catatakꞌalhtaxtuyach chai ma jantu catitaꞌalh ju lacajipi.
\m Ju Joel ma na makꞌanch ixnajun ni ma chunch ixnajun ju Dios.
\p
\v 22 Chai acsni nonkꞌo ju chunch ju Pitaluꞌ pus tailhiꞌalh ju ixchivinti. Naulh:
\p ―Pus aquilakꞌasmatniuch ji quintꞌaꞌisraelitanin. Ju Dios tamalacasunitan ni laꞌixmacni yuchi xaminacha ju Jesús amachakaꞌ Nazaret. Talhitalacasuninch ni anch ju xaminacha ni isꞌakstu Dios ju xtaknilh ixtachaput ju Jesús ni laich xanavi lamiꞌucxlacapuꞌan ju kꞌai lhamakꞌan chai ju taxtokni ju jantu xamatiꞌ apumatam lai navi chai ixnavi tuꞌuꞌ ju caꞌixtapucꞌatsa ju lapanacni ni vasalh Dios ju xamalakachayachilh. Chai ju uxijnan kꞌoxich cꞌatsꞌayatꞌit tuchi ixnavich.
\v 23 Para ju Dios aktsꞌiya ixlacasqꞌuin chai iscꞌatsai ta yu caꞌulhtucanaꞌ ju Jesús. Pus ju yuchi lakꞌaꞌilh ni makꞌaxtakcalh ju Jesús lamimacaꞌan ju uxijnan. Chai acsni tachꞌin tanavilh ju alactuꞌunin lapanacni pus uxijnan ju xanonatꞌit ni catamakni acsni tamaquilhta ju lacacurus.
\v 24 Para ju Dios macxtuchokolh ju Jesús junta ixmacnucanta. Makꞌostolachokolh acsni xani ni jantu lai catinikꞌalhi ju yuchi.
\v 25 Pus jantu lai xanikꞌalhi ju Jesús ni tsꞌokꞌulacanta tuchi ixnajun ju yuchi. Yuchi ju makꞌaniya ixlapanac Dios ju David ixjuncan ju xatsꞌokꞌulai ixchivinti ju Jesús. Pus ju Jesús ma naulh:
\q1 Iccꞌatsai ni aktsꞌiya quintꞌavi ju quiꞌucxtin Dios.
\q1 Chai ni va tachi quiꞌaktaijui pus jantu tavanan actitalhanalh.
\q1
\v 26 Pus ixlhiyuchi na ickꞌachan. Chai laquinquilhni iclakꞌayai ju Dios.
\q1 Chai ju quilacatuna acsni camacnucanaꞌ lhikꞌach caꞌastacnanaꞌ ni iclhilaksich ju ixchivinti Dios.
\q1
\v 27 Iclhilaksi ju Dios ni jantu tavanan camaconaꞌ ju quintacuvin junta taꞌan ju alasanin nin calacꞌasqꞌuinaꞌ ni capuchꞌilh ju quilacatuna ju quitꞌin ju quimalakachatachilh ju Dios.
\q1
\v 28 Yuchi ju Dios ju aquixtaknichokoyaꞌ ju quiꞌatsucunti.
\q1 Chai slivasalh ackꞌachanaꞌ acsni laꞌixꞌucxlacapuꞌ actꞌatolaꞌ.
\m Chunch ju tsꞌokꞌula ju David ni ma chunch ju xanajun ju Jesús.
\p
\v 29 Pus ji quintꞌalapanacni aktsꞌiya cꞌatsacan ni nilh ju makꞌaniya quimpaiꞌan David chai macnucalh. Chai tus chavai lai laktsꞌinau junta taꞌacnu.
\v 30 Pus ju David ixnajun ixchivinti Dios chai iscꞌatsaich ni Dios ixmavasalanita ixchivinti ni laꞌixꞌamaskꞌatꞌanti caputasuyanta ju anuꞌ ju ixnoncan camalakachatachilh ju Dios. Chai ju yuchi catolaꞌ laꞌixpuꞌucxtin ixjunita ju David.
\v 31 Pus ju David acsni ixtꞌajuncaꞌ ixmacꞌatsanican ni cataꞌacxtuchokotachilh ju anuꞌ ju ixnoncan camalakachatachilh ju Dios. Yuchi lhinaulh ni jantu tavanan camaconaꞌ ju ixtacuvin junta taꞌan ju alasanin nin capuchꞌiyaꞌ ju ixꞌacanit.
\v 32 Pus ju lhichivinilh ju David yuchi ju Jesús ju malokꞌonichokolh ju Dios. Chai chux ju quijnan iclaktsꞌiuch acsni ixmalokꞌonichokocantach.
\v 33 Pus ju Dios lakꞌaya acsni ulalh vanin junta vi yuchi. Chai ju Jesús amaklhtayanalh ju Spiritu Santu tachi ixjunitach ju Dios. Chai quintamalakachanichin ju quijnan. Chai tachi chun ju ani ju laktsꞌinatꞌit ju uxijnan chai tuchꞌi kꞌasmatꞌatꞌit si laꞌixtachaput ju anuꞌ Spiritu Santu ju navicanta.
\v 34 Pus jantiyuꞌ ju David ju alh ju lactꞌiyan laꞌixlacatuna. Para isꞌakstu ju David ma chani naulh:
\q1 Ju ucxtin Dios junilh ju quiꞌucxtin ni catavi vanin junta vi ju yuchi.
\p
\v 35 Anch ju catavi tus acsni catꞌalalhajayaꞌ ju ixtꞌalaxcai.
\m Ma chunch ju naulh ju David.
\p
\v 36 Pus acꞌatsꞌatꞌit ju ani tachi chun ju uxijnan ju quintꞌaꞌisraelitanin untꞌatꞌit. Ju anuꞌ Jesús ju maknitꞌatꞌit lacacurus ju Dios kꞌai ucxtin xanavi. Chai yuchach ju ixnoncan camalakachatachilh ju Dios. ―Pus chunch ju ajuni ju lapanacni ju Pitaluꞌ.
\p
\v 37 Pus ju lapanacni acsni takꞌasmatlh ju ixchivinti ju Pitaluꞌ na xcanilh ixꞌalhunutꞌan. Chani tajuni ju Pitaluꞌ chaich ju aliꞌin ixtamalakachan ju Jesús:
\p ―Quintꞌalapanacni tas calayauch ju chavai.
\p
\v 38 Pus ju Pitaluꞌ chani alacjuni:
\p ―Amacꞌaꞌuntꞌit ju miꞌalactuꞌuntiꞌan pumatamin ju uxijnan chai aꞌakpꞌaxtꞌit laꞌixtapakaꞌut ju Jesús ju ixnoncan camalakachatachilh ju Dios. Ju chunch ju Dios ma catamacꞌacxaniyan ju mintalakꞌalhinꞌan chai ma amaklhtꞌayananaꞌitꞌit ju Spiritu Santu ju cataxtakniyan ju Dios.
\v 39 Pus ni chunch alatꞌit pus aktsꞌiya axtꞌaknicꞌanaꞌitꞌit ju Spiritu Santu. Ju Dios xtakta ju ixchivinti ni ma cataxtakniyan ju uxijnan ju Spiritu Santu. Ma vachuꞌ caꞌaxtakniyaꞌ ju miꞌaskꞌatꞌan chai tachi chun ju lapanacni mas vanta anchach catatsuculh. Ma caꞌaxtakniyaꞌ tachi chun ju caꞌalactꞌasaniyaꞌ ju kꞌai ucxtin Dios. ―Pus ju Pitaluꞌ ajunich ju lapanacni ni ma chunch ju naulh ju Dios.
\p
\v 40 Chai na lhu chivinti ixꞌajuni chai ixꞌalhimapꞌaksich. Chai ixꞌalacjuni:
\p ―Chach tamakꞌalhtaxtuyan ju Dios lacamakꞌalhkꞌajnat ju caꞌaxtaknicanaꞌ ju lapanacni ju tatꞌajun ju chavai ju lana jantu sok ju isꞌatsucuntiꞌan. ―Chunch ju ajuni ju lapanacni ju Pitaluꞌ.
\p
\v 41 Pus tachi chun ju talacaꞌinilh ju ixchivinti ju Pitaluꞌ taꞌakpaxkꞌo. Pus na tatalhavachokolh ju ixtalhilacaꞌanta ju Jesús. Ju acsnich avilhchan tachi lakatꞌutu milh lapanacni talhilacaꞌalh ju Jesús.
\v 42 Pus ju yuꞌunch talacaꞌikꞌo tuchi ixꞌajuni ju ixtamalakachan ju Jesús. Chai sich lhilakꞌau ixtajunita. Chai kꞌaixtam ixtaꞌui ju xkapavati ixpupastaccan ixꞌaninti ju Jesús. Chai ixtatꞌachivinin ju Dios.
\s1 Chani ixjunita ju isꞌatsucuntiꞌan ju lapanacni ju pꞌulhnan talhilacaꞌalh ju Jesús
\p
\v 43 Chai ni na lhu lhamakꞌan ju ixtanavi laꞌixtachaput ju Dios ju ixtamalakachan ju Jesús chai ni ixtanavi ju tuꞌuꞌ ju catapuꞌalacpastacnalh ju lapanacni pus na tatalhanalh tachi chun ju lapanacni.
\v 44 Chai tachi chun ju ixtalhilacaꞌanta ju Jesús slivasalh lhiꞌalakꞌavin ixtajunita. Chai ju ixꞌalintaꞌan ixtamakpitsi sia yuꞌunchach tachi ixmaktasqꞌuini ju kꞌantam kꞌantam.
\v 45 Istastꞌaich ju ixlacatꞌunꞌan chai ixꞌalintaꞌan. Chai ju tumin ju ixtaꞌamaklhtayanan ixtalalhvakꞌach tachi ju ixmaktasqꞌuinich pumatam pumatam.
\v 46 Chai tuncujun tuncujun va chꞌanxtam ixtaꞌan lacakꞌai ixpujitatꞌan ju israelitanin. Chai laꞌixchakaꞌan lhikꞌach ixtaꞌui ju xkapavati ju pupastaccan ju ixꞌaninti ju Jesús. Chai va lakatam ixjunita ixꞌalhunutꞌan.
\v 47 Ixtalakꞌayai ju Dios chai chux ju lapanacni ixtanajunch ni na lackꞌoxin lapanacni ixtajunita ju yuꞌunch. Chai tuncujun tuncujun ju kꞌai ucxtin Dios na lhu ixꞌalalhavai ju ixlapanacni ju vachuꞌ ixtalhilacaꞌanta Jesús.
\c 3
\s1 Palai navicalh pumatam ju va ixchꞌantakꞌalhitach
\p
\v 1 Pus ju lakatam avilhchan ju Pitaluꞌ chai ju Xivan ixtaꞌanta lacakꞌai ixpujitatꞌan ju istꞌaꞌisraelitanin. Lakatꞌutu hora atokꞌoxanaꞌ ixjunita. Acsnich ju ixtaꞌan ju lapanacni tꞌachivinin ju Dios.
\v 2 Chai ixꞌalin pumatam lapanac ju va ixchꞌantakꞌalhita. Chunch ixjunita tus laꞌixpulakꞌau. Chai chux avilhchan ixchꞌixlhiꞌancanta chai ixꞌulacanta laxamalhtich ju anuꞌ pujitat. Pus ju anuꞌ malhtich ju lapanacni ixtanajun ni yuchach ju na cꞌus. Pus taꞌulalh ju takꞌankꞌan anch ni laich casqꞌuiniyach ju tumin tachi chun ju ixtatanuich lacpujitat.
\v 3 Chai ju anuꞌ lapanac acsni alaktsꞌilh ju Pitaluꞌ chai ju Xivan ni ixtatanuputun lacpujitat pus lana asqꞌuinilh lamapainin ni tuꞌuꞌ cataxtaknilh lacatsꞌunin.
\v 4 Pus ju acsnich ju Pitaluꞌ chai ju Xivan lana taskotutulh. Chai ju Pitaluꞌ juni:
\p ―Aquilalaktsꞌiuch.
\p
\v 5 Ju acsnich ju anuch lapanac lana pacxantavi tuchi caxtaknicanach.
\v 6 Para ju Pitaluꞌ chani junich:
\p ―Matich ju quintumin. Para ju tuchi icpacxanta yuchach ju acxtakniyan. Laꞌixtachaput ju Jesucristo amachakaꞌ Nazaret atꞌaich. Alhtꞌanch.
\p
\v 7 Pus ju acsnich ju Pitaluꞌ makchꞌapalh ju anuꞌ lapanac laꞌixlhicana. Makꞌostola. Chai lana takꞌoxinilh ixchꞌajaꞌ chai ixpixtuꞌ ixchꞌajaꞌ.
\v 8 Pus ju yuchi alhtujnutayalhch. Alhtanalhch chai kꞌaixtam alactꞌatanu lacpujitat. Alhtanaꞌanta. Alhtujnuꞌanta. Chai ixlakꞌayai ju Dios.
\v 9 Pus chux ju lapanacni talaktsꞌilh ni alhtanaꞌanta chai takꞌasmatlh ni ixlakꞌayai ju Dios.
\v 10 Chai tamispalh ni yuchi ju ixtolai laxamalhtich ju kꞌai pujitat junta na cꞌus ixjuncan chai isqꞌuin tumin. Pus lana va talhamakꞌaninilh ni talaktsꞌilh tuchi tapasalh ju anuꞌ lapanac.
\s1 Ju Pitaluꞌ axakꞌala ju lapanacni laꞌismakspaꞌ pujitat
\p
\v 11 Pus ju anuꞌ lapanac ju palaich navicalh lana jantu maconiputulh ixmacaꞌan ju Pitaluꞌ chaich ju Xivan. Pus tachi chun ju lapanacni taꞌatsꞌalalakmilh ju yuꞌunch junta ixtayanalh laꞌismakspaꞌ pujitat junta ixꞌanuꞌ Salomón ixjuncan. Va talhamakꞌaninilh.
\v 12 Pus ju Pitaluꞌ ni laktsꞌilh ni ixtaꞌatsꞌalaminta ju lapanacni pus lana chani alacjuni:
\p ―Quintꞌaꞌisraelitanin tajuch ni va lhamakꞌanininatꞌit ju ani. Tajuch ni va quilaskotutuyau ju quijnan. Tachi ju va nonatꞌit ni laquintachaput quincꞌan ju xacmalhtanayau ju ani ya lapanac. U tachi ju va nonatꞌit ni va ixlacaꞌatalh ni ixlhichux ju quiꞌalhunut quincꞌan icchꞌakꞌokꞌayauch ju Dios palaich xacpunaviyau ju ani ya lapanac. Para jantu.
\v 13 Alai Dios ju palai xanavi. Yuchi ju vachuꞌ isDios ixjunita ju makꞌaniya quimpaiꞌan Abraham chaich ju Isaac chai ju Jacob. Chai yuchi ju xakꞌai xanavi ju istsꞌalh ju Jesús juncan. Para ju uxijnan makꞌaxtꞌaknitꞌit ju ucxtinin. Chai ju Pilato mas ixkꞌotputun para ju uxijnan jantu lacꞌasqꞌuintꞌit.
\v 14 Ju Jesús na salaka ixjunita ixꞌalhunut chai na soknicꞌa ixjunita ju isꞌatsucunti. Para ju uxijnan jantu lacꞌasqꞌuintꞌit ju yuchi. Alai yuchi ju sqꞌuintꞌit ni camacajuncalh ju amakniniꞌ.
\v 15 Pus ju uxijnan maknitꞌit ju anuꞌ ju lai xtꞌakꞌa ju atsucunti ju conkꞌalhiyanta lactꞌiyan. Para ju Dios malokꞌonichokolh laꞌixꞌaninti. Chai ju quijnan iclaktsꞌiuch acsni ixmalokꞌonichokotach.
\v 16 Pus ju ani ya lapanac ju laktsꞌinatꞌit chai mispꞌayatꞌit tachapuchokolh va ixlacata ni iclhilaksiyau ju ixtachaput ju Jesús. Ni iclhilacaꞌanau ju Jesús yuchi lhitakꞌoxinilh ixchꞌajaꞌ ju ani ya lapanac lamiꞌalacꞌavantiꞌan minchuxꞌan ju uxijnan.
\p
\v 17 Pus ji quintꞌalapanacni iccꞌatsai ni lana jantu ixmachꞌakxayatꞌit tuchꞌi ixnaviyatꞌit ju uxijnan acsni maknitꞌit ju Jesús. Nin yuꞌunch ju miꞌucxtinin jantu tamachakxa.
\v 18 Para chunch ju uctaxtulh tachi ju ixnajunta ju Dios ju makꞌanch. Ju yuchi ixꞌajuni tachi chun ixlapanacni ju ixtanajun ixchivinti ni catanaulh ni aktsꞌiya camakꞌalhkꞌajnanach ju yuchi ju camalakachacanachilh ju ani lacamunutpaꞌ.
\v 19 Pus ju chavai amacꞌaꞌuntꞌit ju miꞌalactuꞌuntiꞌan. Alhilacꞌapꞌitꞌit ju Dios. Ju chunch ju Dios cataxacaniyanch ju mintalakꞌalhinꞌan chai kꞌox atsucunti cataxtakniyan ju quiꞌucxtin Jesús.
\v 20 Chai ju chunch laich camalakachachokotachilh ju Jesús aktam. Yuchach ju makꞌanchich ixnoncan camalakachatachilh ju ani lacamunutpaꞌ ju quilacataꞌan.
\v 21 Para ju chavai aktsꞌiya tasqꞌuini ni catolhchacaꞌ lactꞌiyan ju Jesús tus acsni cachinaꞌ ju avilhchan acsni catasastꞌikꞌoyaꞌ tachi chun ju taxtokni. Chunch ju naulh ju Dios ju makꞌanchich chai ju ixlapanacni ju na salaka ixjunita ixꞌalhunutꞌan chai ju ixtachivinin ju ixchivinti ajunicalh ni vachuꞌ chunch catanaulh.
\v 22 Chunch ju tanaulh tachi ju naulh ju makꞌaniya lapanac ju Moisés ixjuncan. Ju yuchi ma chani ajuni ju lapanacni ju ixtatꞌajun ju acsnich: “Ju kꞌai ucxtin Dios ma catamalakachanichin pumatam lamilhiꞌuxijnan ju canonach ixchivinti. Ju Dios ma camalakachayach ju yuchi tachi ju quimalakachalh ju quitꞌin. Pus ma akꞌasmatnitꞌit ju yuchi tachi chun ju catajunan.
\v 23 Chai ma tachi chun ju lapanacni ju ma jantu cakꞌasmatniyaꞌ ju tuchi canonaꞌ ju anuꞌ lapanac ju canonaꞌ ixchivinti Dios pus ma jantu ixmakxalapanac Dios cajunaꞌ chai ma camacaꞌancanaꞌ lacamakꞌalhkꞌajnat junta jonkꞌalhita”. Ma chunch ju ajunilh ju lapanacni ju Moisés.
\p
\v 24 Pus iclajunau ni Samuel chai tachi chun ju aliꞌin lapanacni ju ixtanajun ixchivinti Dios ju ixtatꞌajun ju acsnich tus chavai si talhichivinilh ju chavai avilhchan acsni tꞌonau ju quijnanꞌan.
\v 25 Chai tachi chun ju tanaulh ju anuch makꞌaniya lapanacni si milacataꞌan ju chavai. Chai ju anuꞌ chivinti ju alaclhitꞌatakꞌoxilh ju Dios ju makꞌaniya quimpaiꞌan pus ju chavai milacataꞌan junita. Chai ju chavai uxijnan ju amaklhtꞌayananaꞌitꞌit ju tuchi juni ju Dios ju Abraham acsni lhitꞌatakꞌoxilh ju ixchivinti. Ju yuchi ixjunita ju Abraham ni ma kꞌoxich catatsucuyaꞌ tachi chun ju lapanacni ju ani lacamunutpaꞌ ma va ixlacaꞌatalh pumatam ixꞌapapanatnich.
\v 26 Ju Dios acsni malakachachilh ju istsꞌalh ju ani pus quijnanꞌan ju pꞌulhnan quintamalakachanichin. Chai quintamalakachanichin ju quijnanꞌan ni lai lhikꞌach catsucuyau acsni aquintamamaconiyan ju macxcai quiꞌatsucuntiꞌan. ―Chunch ju ajunilh ju lapanacni ju Pitaluꞌ.
\c 4
\s1 Ju Pitaluꞌ chai ju Xivan lacapuꞌucxtin
\p
\v 1 Acsni ixtatꞌachivinin ju lapanacni ju Pitaluꞌ chai ju Xivan pus lana tsꞌanan taminkꞌo ju ixpalijniꞌan ju istꞌaꞌisraelitaninꞌan chai ju saduceonin chai ju ixꞌucxtinꞌan ju taropajni ju ixtachꞌalhcatnan lacakꞌai ixpujitatꞌan.
\v 2 Na ixtatalhkꞌaman ju yuꞌunch ni ixꞌamalanican ju lapanacni chai ixꞌajuncan ni taꞌacxtuchokolh ju Jesús junta ixmacnucanta chai ixlhiyuchi cꞌatsacan ni aktsꞌiya catataꞌacxtuchokotachilh ju tanitach.
\v 3 Pus lana tachꞌapalh ju Pitaluꞌ chai ju Xivan. Chai ni na ixtokꞌoxatach chai jantu lai tuꞌuꞌ tanavilh ju acsnich pus alactꞌalhnucalh. Ixtanajun ni catalhiꞌanaꞌ lacapuꞌucxtin ni catuncunach.
\v 4 Para aktsꞌiya na lhu ju takꞌasmatlh ju chivinti talacaꞌilh. Chai chux ju ixtalhilacaꞌanta ju Jesús chaꞌalh tachi lakaquis milh jokꞌatni. Jantu aputekꞌecalh ju chakolun chai ju askꞌatꞌan.
\p
\v 5 Acsni tuncunchokolh tatakꞌaixtoklh ju lakꞌachakꞌan Jerusalén ixꞌucxtinꞌan ju israelitanin chai ju xalacpaꞌitnich ju israelitanin chai ju na ixtalhitamakaꞌutach ju ixlhamapꞌaksinꞌan ju istꞌaꞌisraelitanin.
\v 6 Vachuꞌ ixvi ju Anás ju xakꞌai pali ixjunita. Chaich ju Caifás, Xivan, Alejandro chai ju aliꞌin ixlhiꞌalakꞌavin ju xakꞌai pali.
\v 7 Chai ju acsnich talhinaulh ixmaxtuca lacapulachꞌin ju Pitaluꞌ chai ju Xivan. Alacyajucalh laꞌixlacaitat ju lapanacni ju anch ixtavilanalh chai alacsacmicalh tichi chavaich ju xaꞌaxtakni ju ixtachaputꞌan ni laich palai xatanavi ju anuꞌ lapanac. Vachuꞌ asacmicalh tichi chavaich ju xaꞌajuni ni chunch catalalh.
\v 8-9 Pus ju acsnich ju Spiritu Santu lana soko xtaknilh ju Pitaluꞌ ju chivinti ju canonaꞌ. Chai chani ju ajuni ju yuchi:
\p ―Xalackꞌajin ju ani lakꞌachakꞌan chai ju lhinonatꞌit sia quijnanꞌan ju israelitanin juntau ju chavai icchivimakꞌancantau va ixlacaꞌatalh ju kꞌox amapaininti ju icnavinitau pumatam takꞌankꞌan. Chai ju uxijnan va cꞌatsꞌapꞌutꞌunatꞌit tijuch ju palai xapujun ju takꞌankꞌan.
\v 10 Pus acꞌatsꞌatꞌitch chux ju uxijnan chai chux ju aliꞌin israelitanin ni laꞌixtachaput ju Jesucristo amachakaꞌ Nazaret palaich xapujun ju ani lapanac ju ya lamiꞌucxlacapuꞌan. Yuchach ju anuꞌ Jesucristo ju maqꞌuilhtꞌatꞌit lacacurus para ju Dios malokꞌoni laꞌixꞌaninti.
\v 11 Ju uxijnan chun untꞌatꞌit tachi ju ixyonin chakaꞌ ju tamakꞌalh ju anuꞌ chiux ju astan valh ju chiux ju makꞌastumucꞌacanta chakaꞌ junta tsꞌokcanta tuchi cꞌatach ju yocanta. Ju uxijnan makꞌantꞌatꞌit ju Jesús mas yuchi ju palai maktasqꞌuinican laquiꞌatsucuntiꞌan.
\v 12 Pus matich apumatam ju lai aquintamakꞌalhtaxtun. Tachi chun ju lapanacni ju ani lacamunutpaꞌ va yuchach ju quintaxtaknitan ju Dios ni lai aquintamakꞌalhtaxtun. ―Chunch ju ajuni ju xalackꞌajin ju Pitaluꞌ.
\p
\v 13 Pus ju xalackꞌajin acsni talaktsꞌilh ju Pitaluꞌ chai ju Xivan ni jantu lana ixtatalhanan chai ixtacꞌatsai ni jantu tuꞌuꞌ ixtapalhniꞌan ixjunita chai jantu tavanan ixtaquilata lacascuela pus na talhamakꞌaninilh. Acsnicaꞌ ju tapastaclh ni ixtatꞌaꞌucxuntꞌajun ju Jesús.
\v 14 Chai ni talaktsꞌilh ni anch ixya ju anuꞌ lapanac ju palaich ixnavicanta pus jantu lai xatamucꞌani tuꞌuꞌ ixtalakꞌalhinꞌan ju Pitaluꞌ chai Xivan.
\v 15 Pus lana alactixcoxtucalh pantsꞌiquis lacapuꞌucxtin. Chai va isꞌakstuꞌan ju xalackꞌajin tatsuculh lacchivinin.
\v 16 Chani ixtalaclajunich:
\p ―Tas catꞌalayauch ju ani lapanacni ni slivasalh kꞌai lhamakꞌan ju tamalacasuta ju yuꞌunch chai jantu lai catinompalau ni jantu tanavita. Tacꞌatsakꞌo ju amachakꞌan ju lakꞌachakꞌan Jerusalén.
\v 17 Para ni jantu palai lhu catacꞌatsayaꞌ ju tuchi xatanavi caꞌajuniu ni jantu xamatiꞌ catajunilh tuꞌuꞌ ixlacata ju Jesús. Chai ni tuꞌuꞌ catajunilh xamatiꞌ pus isꞌakstuꞌan tacꞌatsai.
\p
\v 18 Pus atꞌasanichokocalh. Ajunicalh ni jantuch lai vana catajunilh tam xamatiꞌ nin cataꞌamasuninilh ixlacata ju Jesús.
\v 19 Pus ju acsnich ju Pitaluꞌ chai ju Xivan takꞌalhtailh ju ucxtinin. Chanich tajuni:
\p ―Anaꞌuntꞌitch. Tasmalhch ju palai kꞌox calhiulayaꞌ ju Dios. Ni aclaquiclacaꞌiu ju uxijnan u yuchi ju Dios ju acquiclacaꞌiu.
\v 20 Para ju quijnan jantu tavanan actimacaju ju va jantuch acnaju ju tuchi iclaktsꞌintauch ju navilh ju Jesús chai ju tuchi ickꞌasmatꞌauch ju naulh ju Jesús. ―Chunch tajuni ju Pitaluꞌ chai ju Xivan.
\p
\v 21 Pus ju ucxtinin chani ajuni:
\p ―Va yuchi ni amasunipꞌalatꞌit laꞌixtapakaꞌut ju Jesús.
\p Chai acsni tajuni ju chunch lana amacaulh. Pus ju ucxtinin lana jantu lai xatalhitajui ta yu laich caꞌamamakꞌalhkꞌajni va ixlacaꞌatalh ju lapanacni. Tachi chun ju lapanacni ixtanajun ni yuchach ju xakꞌai ju Dios ni lai palai xanavi ju anuꞌ lapanac.
\v 22 Pus ju anuch lapanac ju navinicanta lhamakꞌan ni palaich ixnavicanta ixtapasatach tꞌupꞌuxam cꞌata.
\s1 Tapaininicalh ju Dios ni caꞌaꞌaktaiju ni jantu catatalhanalh
\p
\v 23 Pus ju Pitaluꞌ chai ju Xivan acsni amacajuncalh lana talakꞌanchokolh ju aliꞌin ju ixtalhilacaꞌanta ju Jesús. Chai tanonkꞌo tuchi ixꞌajuni ju xalackꞌajin palijni chai ju ucxtinin.
\v 24 Chai ju yuꞌunch acsni takꞌasmatlh ju ixchivintiꞌan pus va chꞌanxtam tatꞌachivinilh ju Dios. Chani tajuni:
\p ―Quiꞌucxtin uxintꞌi ju Diosꞌat. Uxintꞌi ju navitꞌa ju lactꞌiyan chai ju lacatꞌun chai ju alama chai tachi chun ju taxtokni ju alin.
\v 25 Ju David makꞌaniya milapanac ixjunita. Pus ju miSpiritu Santu juni ni ma chani catsꞌokꞌulalh lacaꞌalhiqui:
\q1 Ma va kꞌaya talucununch ju lapanacni ju jantu israelitanin tajunita.
\q1 Chai ju israelitanin ma va kꞌaya tapastꞌacꞌa ju taxtokni ju jantu lai tanavi.
\q1
\v 26 Ju xaꞌucxtinin ju ani lacamunutpaꞌ ma va lakatam tava.
\q1 Chai ju xalackꞌajinch ma tatakꞌaixtokta.
\q1 Ma va tatꞌalaxcayan ju uxintꞌi ji ucxtin Dios chai ju noncan amalakꞌachꞌatꞌachꞌitꞌa.
\m Ma chunch ju naulh ju David.
\p
\v 27 Chai ji quimpai Dios slivasalh ni tatakꞌaixtoklh ju ani lakꞌachakꞌan ju Herodes chaich ju Poncio Pilato chaich ju yuꞌunch ju jantu israelitanin chai ju aliꞌin quintꞌaꞌisraelitanin quincꞌan. Va tatꞌalaxcailh ju mintsꞌalh Jesús ju na salaka ixꞌalhunut. Chai yuchi ju sacxtꞌutꞌach ju uxintꞌi.
\v 28 Chai ni chunch ju talalh pus uctaxtulh tachi ju aktsꞌiya ixnaꞌuntꞌa ju uxintꞌi chai tachi ju ispꞌastꞌactꞌa ni catapasayaꞌ.
\v 29 Pus ju chavai ji quiꞌucxtin alaktsꞌich ju tuchi quintajunan ju aquintaꞌulhtuyan. Para ju quijnan ni milapanacni icjuntau pus aquilaꞌaktaijuch ni laich acꞌajunau ju lapanacni ju minchivinti chai jantu actalhananau.
\v 30 Chai aquilaxtakniuch ju mintachaput ni laich palai acnaviyau ju takꞌankꞌanin chai lai acnaviyau ju lhamakꞌan chai ju tuꞌuꞌ ju lai catapucꞌatsayaꞌ ju lapanacni ni vasalh milapanacni icjuntau. Chux ju ani acnaviyau laꞌixtachaput ju mintsꞌalh Jesús ju na salaka ixꞌalhunut. ―Pus chunch ju tatapaininilh ju Dios.
\p
\v 31 Chai acsni tatꞌachivinkꞌolh ju Dios pus tataclh ju anuꞌ chakaꞌ junta ixkꞌaixtokcan chai ixchuxꞌan ju anch ixtavilanalh axtaknikꞌo palai lhu ixtachaput ju Spiritu Santu chai tatailhiꞌalh ixnajunca ixchivinti Dios chai jantu ixtatalhanan.
\s1 Ju lapanacni ju ixtalhilacaꞌanta Jesús talaꞌaktaijulh laꞌismaktasqꞌuinitꞌan
\p
\v 32 Chai tachi chun ju ixtalhilacaꞌanta Jesús va lakatam ixjunita ixꞌalhunutꞌan chai va lakatam ixjunita ixtacꞌatsanꞌan. Chai jantu xamatiꞌ ixnajun:
\p ―Ju quiꞌalinta va quiꞌanuꞌ quiꞌakstu.
\p Para tachi chun ju taxtokni ixtalaxtakni tachi ju ixmaktasqꞌuini pumatam pumatam.
\v 33 Pus ju ixtamalakachan ju Jesús lacakꞌai tachaput tatailhiꞌalh ixꞌajunica ju lapanacni ni vasalh lokꞌonchokolh ju ucxtin Jesús junta ixmacnucanta. Chai ju Dios axtaknilh kꞌox isꞌatsucuntiꞌan ixchuxꞌan.
\v 34 Pus jantu xamatiꞌ ju sia yuꞌunch ju ixmaktasqꞌuini tuꞌuꞌ. Para tachi chun ju ixpacxanta ju ixlacatꞌunꞌan u ixchakaꞌan tastꞌalh chai talhiminkꞌo ju ixtapalh ju isꞌastꞌantiꞌan.
\v 35 Pus yuꞌunch ju ixtamalakachan ju Jesús ju axtaknicalh ju anuꞌ tumin chai ju yuꞌunch taxtaknilh ju ixꞌalin ixmaktasqꞌuinitꞌan.
\v 36 Chunch ixtalai ju lapanacni tachi ju lalh ju José. Ju yuchi vachuꞌ ixlhilacaꞌanta ju Jesús chai ju ixtamalakachan ju Jesús Bernabé ixtalhimapakaꞌuta. Ju chunch va nomputan ni na lai ixmakꞌankꞌachai xamatiꞌ. Pus ju yuchi ixꞌapapanatnich ixjunita ju makꞌaniya lapanac ju Leví ixjuncan. Chai amachakaꞌ Chipre ixjunita.
\v 37 Pus ju yuchi stꞌalh ju ixlacatꞌun chai lhimilh ju ixtapalh. Alacxtaknilh ju ixtamalakachan ju Jesús.
\c 5
\s1 Ju Ananías chai ju Safira taꞌalactuꞌunulh
\p
\v 1 Para ixꞌalin vachuꞌ apumatam lapanac ju Ananías ixjuncan. Chai ju ixꞌamachakaꞌ Safira ixjuncan. Pus ju yuꞌunch tastꞌalh ju ixlacatꞌunꞌan.
\v 2 Chai ju Ananías chꞌapalh lacatsꞌunin ju anuꞌ tumin. Jantu axtaknikꞌo ju ixtamalakachan ju Jesús mas ixmalacasui tachi ju vasalh ixtakkꞌota. Vachuꞌ cꞌatsalh ju ixꞌamachakaꞌ tuchi ixnavich ju ixpapa.
\v 3 Para ju Pitaluꞌ chanich juni ju Ananías:
\p ―Ananías tajuch ni va xalacꞌaꞌitꞌi ni catanu lamintanquilhacni ju lhacaticuru. Yuchach ju xamapastꞌacꞌaniyan ni laich xalhitꞌaꞌaklhtꞌamai ju Spiritu Santu ni laich xamakꞌai lacatsꞌunin ixtapalh ju milacatꞌun.
\v 4 Acsni tucaꞌ istꞌai ju milacatꞌun ja jantu miꞌanuꞌ ixjunita. Ju astan ja jantu lamimacaꞌ ixmamatꞌa ju tumin. Pus tajuch ni va xapꞌastꞌacꞌa lamiꞌalhunut ni laich xanavi ju chunch. Jantu anau ni lapanacni ju xalhitꞌaꞌaklhtꞌamai. Alai Dios ju xalhitꞌaꞌaklhtꞌamai.
\p
\v 5 Pus ju Ananías acsni kꞌasmatlh junima chivinti taꞌaktalh. Lana lhtucu nilh. Chai tachi chun ju takꞌasmatlh ju tuchi ixtapasata na kꞌox talactalhanalh.
\v 6 Pus ju va paitat lapanacni ju anch ixtavilanalh tataya. Tapachꞌilh lacapumpuꞌ ju lijunto. Tamaxtulh lacachakaꞌ. Taquimacnu.
\p
\v 7 Pus ni tapasalh tachi lakatꞌutu hora lana tanucha ixꞌamachakaꞌ ixjunita. Ju yuchi jantucaꞌ iscꞌatsai tuchi ixtapasatach.
\v 8 Pus ju acsnich ju Pitaluꞌ chani juni:
\p ―Aqꞌuiꞌunch. Ja chunch xalhistꞌayatꞌit ju milacatꞌunꞌan.
\p Chai ju anuꞌ chakoꞌulh naulh:
\p ―A. Chunch.
\p
\v 9 Chai ju Pitaluꞌ chani jumpa:
\p ―Jantu kꞌox xalayatꞌit ni va chꞌanxtam ju xapꞌinatꞌit ni va islaktsꞌimpꞌutꞌunatꞌit ni tuꞌuꞌ catanaviyan ju iSpiritu Santu ju kꞌai ucxtin Dios. Vanin lacamalhtich taminchokota ju xataquimacnui ju mimpapa. Chai catamaxtuyanch vachuꞌ ju uxintꞌi.
\p
\v 10 Pus lana tin tamacha junta ixya ju Pitaluꞌ ju anuꞌ chakoꞌulh chai nilh. Chai acsni tatanuchokocha ju ixtaquimacnuta ju ixpapa pus talaktsꞌilh ni nitach chai tamaxtulh. Taquimacnu vanin junta tamama ju ixpapa.
\v 11 Pus tachi chun ju ixtalhilacaꞌanta ju Jesús chai tachi chun ju aliꞌin ju takꞌasmatlh ju tuchi xatapasai lana na talactalhanalh.
\s1 Na lhu lhamakꞌan navicalh chai ju tuꞌuꞌ ju lai catapuꞌalacpastacnalh ju lapanacni
\p
\v 12 Chai ju ixtamalakachan ju Jesús na lhu ixtanavi ju lhamakꞌan chai ju tuꞌuꞌ ju laich caꞌixtapucꞌatsalh ju lapanacni ni vasalh ixlapanacni Jesús ixtajunita. Laꞌixꞌucxlacapuꞌan ju lapanacni ju tanavi. Chai tachi chun ju ixtalhilacaꞌanta Jesús va chꞌanxtam ixtatakꞌaixtꞌokꞌa laꞌixquilhtalacxtuch ju kꞌai ixpujitatꞌan ju israelitanin. Ju anuch ixquilhtalacxtuch ixꞌanuꞌ Salomón ixjuncan.
\v 13 Para ju aliꞌin lapanacni jantu xamatiꞌ ju ixtatalacasuputun ni makyuꞌunch cava ni na ixtatalhoni. Chunch ixtalai mas na kꞌox ixꞌalhichivincan ju yuꞌunch ju ixtalhilacaꞌanta ju Jesús.
\v 14 Para aktsꞌiya na lhu ju chakolun chai ju jokꞌatni talhilacaꞌalh ju ucxtin Jesús.
\v 15 Chai ixtamamai ju takꞌankꞌanin lacatijixni. Laꞌixputamanꞌan u laꞌixtꞌakꞌatꞌan ju ixꞌapumacan. Ixtanajun ju lapanacni ni mas va ixmakꞌantsastꞌilit ju Pitaluꞌ calakchaꞌanilh acsni catapasayach pus palaich catapujunaꞌ.
\v 16 Vachuꞌ tamilh ju amachakꞌan lakꞌachakꞌanixni junta va lhivaninch ju lakꞌachakꞌan Jerusalén. Ixtalhiminch ju takꞌankꞌanin chai ju ixtanun ju lhacaticuru laꞌixtanquilhacniꞌan. Chai tachi chun ju yuꞌunch pektu palai anavicalh.
\s1 Alhimakchꞌapucalh ju Pitaluꞌ chai ju Xivan
\p
\v 17 Pus ju acsnich talhacchaꞌanilh ixtachaputꞌan ju xakꞌai pali chai ju lapanacni ju xaꞌalactꞌavi ju ixtalhilacaꞌanta ju ixlhamapꞌaksinꞌan ju saduceonin.
\v 18 Pus lana lhinaulh ixꞌachꞌapaca ju ixtamalakachan ju Jesús chai lhinaulh ixꞌalactꞌalhnucalh lacapulachꞌin.
\v 19 Para ju anuꞌ atatsꞌisni pumatam ixꞌanquilh ju kꞌai ucxtin Dios malhtekꞌa ju xamalhtich lacapulachꞌin. Amaxtulh ju Pitaluꞌ chai ju Xivan chai chani ajuni:
\p
\v 20 ―Aꞌinchitꞌitch lacakꞌai ixpujitatꞌan ju mintꞌaꞌisraelitaninꞌan. Aꞌunaꞌitꞌitch ju lapanacni chux ju chivinti ixlacata ju ani sastꞌi atsucunti.
\p
\v 21 Pus ju Pitaluꞌ chai ju Xivan acsni takꞌasmatnilh ju ixchivinti ju anquilh talacaꞌi. Na vatsꞌisincaꞌ tatanucha lacpujitat chai tatsuculh amalaninin.
\p Pus vachuꞌ ju acsnich ju xakꞌai pali chai ju ixtamakꞌanta yuchi tamakꞌaixtoklh ju xalacpaꞌitni ju israelitanin. Yuꞌunch ju ixtalhinajun ju anch. Lhinaulh ixꞌatꞌasanica ju ixtamalakachan Jesús lacapulachꞌin.
\v 22 Para ju pulasiyajni acsni tachaꞌalh lacapulachꞌin jantu xamatiꞌ talhitaju. Va chunch tataspꞌitchokocha. Taquijunilh ju ucxtinin.
\v 23 Chani tajuni:
\p ―Acsni icchaꞌauch ju lacapulachꞌin kꞌox ixvilhnilh ju xacandado. Chai ju xaꞌalhistacnin anchach ixtayanankꞌo laxamalhtich. Para acsni tavanan icmalhtekꞌau jantu xamatiꞌ iclhitaju ju pulacni. ―Chunch tajuni ju ucxtinin.
\p
\v 24 Pus acsni takꞌasmatlh ju ani chivinti ju xakꞌai tucan pali chai ju xaꞌucxtin taropajni ju ixtachꞌalhcatnan lacakꞌai ixpujitatꞌan ju israelitanin chai ju aliꞌinch xalackꞌajin palijni va talhamakꞌaninilh. Talaclajuni ju sia yuꞌunch:
\p ―Tijuch nuꞌ ju nomputun ju ani.
\p
\v 25 Pus ju acsnich lana chincha pumatam ju quiꞌamacꞌatsanininchilh tuchi alinch. Chani ajuni ju ucxtinin:
\p ―Ju anuch lapanacni ju xatꞌalhnutꞌatꞌit pus ju chavai tatanumanalh lacakꞌai quimpujitatꞌan. Tatꞌompalai alacmasuninin ju lapanacni.
\p
\v 26 Pus ju acsnich ju xaꞌucxtin taropajni ju ixtachꞌalhcatnan lacakꞌai pujitat alactꞌaꞌalh ju pulasiyajni. Para va lhikꞌox talhimilh ju Pitaluꞌ chaich ju Xivan ni va ixꞌatalhonican ju lapanacni. Ju taropajni ixtanajunta ni jantu va kꞌox ju caꞌixꞌalhimilh pus jantu xcai ni ixtaꞌalacatꞌalhmanalh ju lapanacni.
\v 27 Pus acsni alhimincalh aꞌulacalh junta ixtavilanalh ju ucxtinin. Chai ju acsnich ju xakꞌai pali chani ajuni:
\p
\v 28 ―Ja jantu xaclajunau ni jantuch vana laich amasutꞌitch ixlacata ju Jesús. Para ixlaquilhtu malaniyatꞌit chux ju amachakꞌan Jerusalén ju miꞌatalanintiꞌan ju uxijnan. Chai vachuꞌ quilamucꞌaniputunau ju quijnan quintalakꞌalhin quincꞌan ixlacata ixꞌacꞌalhni ju anuꞌ lapanac.
\p
\v 29 Pus ju acsnich ju Pitaluꞌ chai ju aliꞌin ixtamalakachan Jesús taꞌakꞌalhtayanalh. Chani tajuni:
\p ―Aktsꞌiya tasqꞌuini ni pꞌulhnan acquiclacaꞌiu ju Dios. Jantiyuꞌ ju va quintꞌalapanac.
\v 30 Ju uxijnan maknitꞌit ju Jesús acsni maquilhtꞌatꞌit lacacurus. Para ju Dios ju ixtalhilacaꞌan ju makꞌaniya quilacpaꞌitniꞌan macxtuchokolh junta ixmacnucanta.
\v 31 Chai ju chavai ju yuchi laꞌixtachaput ulalh ju Jesús kꞌai ucxtin chai yuchi ju lai aquintamakꞌalhtaxtuyan laquiꞌalactuꞌuntiꞌan. Ju chunch tachi chun ju quintꞌaꞌisraelitaninꞌan ni catamacaulh ju ixꞌalactuꞌuntiꞌan tachi ju icmacontauch ju quijnan pus vachuꞌ camacꞌacxanicanaꞌ ju ixtalakꞌalhinꞌan ju yuꞌunch.
\v 32 Pus ju quijnan kꞌoxich iclaktsꞌiuch acsni tapasalh ju ani taxtokni chai ju Spiritu Santu ju axtaknican tachi chun ju taquiclacaꞌini ju Dios vachuꞌ amavasalani laꞌixꞌalhunutꞌan ni vasalh chunch ju tapasalh. ―Chunch ju ajunicalh ju ucxtinin.
\p
\v 33 Pus ju ucxtinin acsni takꞌasmatlh ju ani chivinti lana na tatalhkꞌamalh. Na ixꞌamakniputun.
\v 34 Para ixꞌalin sia yuꞌunch ju ucxtinin pumatam lapanac ju Gamaliel ixjuncan. Ju yuchi ixlhilacaꞌani ju ixlhamapꞌaksinꞌan ju fariseonin chai ismasui ju ixlhamapꞌaksin ju Moisés. Chai chux ju lapanacni ixtanajun ni na kꞌox lapanac ixjunita ju yuchi. Pus ju yuchi taya chai naulh ni caꞌamaxtucalh makspaꞌ lacatsꞌunin ju ixtamalakachan ju Jesús.
\v 35 Chai chani alacjuni ju ixtꞌaꞌucxtinin:
\p ―Quintꞌaꞌisraelitanin alaktsꞌintꞌitch ju uxijnan tuchꞌi anavipꞌutꞌunatꞌit ju ani ya lapanacni.
\v 36 Apꞌastꞌactꞌit ni ixꞌalin ju makꞌanchich pumatam lapanac ju Teudas ixjuncan. Ju yuchi ixnajun ni xakꞌai ixjunita. Chai ixtꞌalasaputun ju kꞌai ucxtin. Chai na lhu tava ju ixlapanacni. Tachi lakatꞌatꞌi cientos. Para ju taropajni tamakni ju yuchi. Chai tachi chun ju ixtachꞌakꞌokꞌata ju yuchi chux amakpitsikꞌocalh. Chai anchach ju tamactalh.
\v 37 Chai astan ixꞌalin pumatam amachakaꞌ Galilea ju Judas ixjuncan. Acsni ixtꞌajun ju yuchi pus ixtꞌoncan atsꞌokꞌulanaꞌ ju lapanacni. Pus na lhu lapanacni tachꞌakꞌokꞌalh ju yuchi. Para vachuꞌ maknicalh chai tachi chun ju ixtachꞌakꞌokꞌai amakpitsikꞌocalh.
\v 38 Pus yuchi iclalhijunau ju chavai ni amacꞌaꞌuntꞌit ju ani ya lapanacni. Jantu xtuꞌuꞌ aꞌulhtꞌutꞌit. Pus ju ani ixlhichꞌalhcatꞌan ni va xanavin lapanacni junita pus jantu tuꞌuꞌ calhitapalaꞌ.
\v 39 Para ni ixꞌanuꞌ ju Dios pus jantu lai atꞌilakꞌalhitꞌit. Pus ni va amamactꞌapꞌutꞌunatꞌit jantu xcai ni Dios ju atꞌalasatꞌit. ―Chunch ju ajunicalh ju ucxtinin.
\p
\v 40 Pus ju ixtꞌaꞌucxtinin taquiclacaꞌinilh ju ixchivinti. Alactꞌasanicalh ju ixtamalakachan ju Jesús. Chai talhinaulh ixlakanekmaca. Alhimapꞌaksicalh ni jantu catatailhiꞌalh ixꞌamalanintiꞌan ixlacata ju Jesús. Chai astan amacajuncalh.
\v 41 Pus ju ixtamalakachan ju Jesús acsni tataxtucha lacapuꞌucxtin na talhikꞌachalh ni tuꞌuꞌ xaꞌalhiulai ju Dios ni xalacasqꞌuin ni caꞌamamaxanicalh ixlacata ju Jesús.
\v 42 Chai chux avilhchan lacakꞌai ixpujitatꞌan ju istꞌaꞌisraelitaninꞌan chai lakꞌachakꞌanixni va tachi ixtaꞌamalani ju lapanacni ni Jesús yuchi ju ixnoncan camalakachatachilh ju Dios.
\c 6
\s1 Asacxtucalh ju ixpumatujunꞌan ju caꞌaꞌaktaijununaꞌ ju quilhpatinin
\p
\v 1 Ju acsnich avilhchan na ixtatalhavata ju lapanacni ju ixtalhilacaꞌanta ju Jesús. Pus alilh lakatam laklakꞌaiti ju sia yuꞌunch. Pus ju israelitanin ju ixtachivinin ju lhigriego tatꞌalakꞌailich ju israelitanin ju ixtachivinin ju lhihebreo. Ju yuꞌunch ju ixtachivinin ju lhigriego talhitalhkꞌamalh ta yu aꞌulhtucalh ju tꞌacunin sia yuꞌunch ju ixꞌanimacontilacanta. Ixtanajun ni ma va lacatsꞌunin ixꞌaxtaknican ju vaiti ju ixmakpitsican chux tuncujun.
\v 2 Pus ju acsnich ju ixpumacautꞌuiꞌan ixtamalakachan ju Jesús tamakꞌaixtoklh ju aliꞌin ju ixtalhilacaꞌanta ju Jesús chai chani tajuni:
\p ―Ca jantu kꞌox cativa ni va acmacaju ismasuca ju ixchivinti Dios ju quijnan chai acmakpitsiyau ju vaiti.
\v 3 Pus ji quiꞌalakꞌavin yuchi iclalhijunau ni apꞌuxcꞌaꞌutꞌit pumatujun jokꞌatni ju milhiꞌuxijnan ju kꞌox lapanacni alhiulacanta chai ju makꞌaxtaknikꞌota isꞌatsucuntiꞌan ju Spiritu Santu chai ju na taꞌacꞌatsananta. Yuꞌunchach ju laich catanaviyaꞌ ju anuꞌ lhichꞌalhcat.
\v 4 Chai ju quijnan va tachi actꞌachivininauch ju Dios chai acꞌamalaniniyau ju ixchivinti. ―Chunch ajunicalh ju ixtalhavat lapanacni.
\p
\v 5 Pus ju ixtalhavat lapanacni na kꞌox talhiula ju anuꞌ chivinti chai tasacxtulh ju Stipan. Ju yuchi ixlhilacaꞌanta ju Jesús ixlhichux ixꞌalhunut chai ixmakꞌaxtaknikꞌota ju isꞌatsucunti ju Spiritu Santu. Vachuꞌ tasacxtulh ju Pilipe chaich ju Prócoro chaich ju Nicanor chai ju Timón chai ju Parmenas chai ju Nicolás amachakaꞌ Antioquía. Ju yuchi jantu israelita ixjunita para acsni tucaꞌ ixlhilacaꞌanta ju Jesús ixlhilacaꞌanta ju Dios tachi ju ixtalai ju israelitanin.
\v 6 Pus ju anuꞌ ixpumatujunꞌan akꞌailhiminicalh ju ixtamalakachan ju Jesús. Chai ju yuꞌunch tasqꞌuinilh ju Dios ixlacataꞌan chai tamamanilh ixmacaꞌan laꞌixlacatunaꞌan ju ixpumatujunꞌan.
\p
\v 7 Pus palai ixmakpitsican ju ixchivinti Dios chai na lhu lana va ju ixtalhilacaꞌanta ju Jesús ju lakꞌachakꞌan Jerusalén. Vachuꞌ na ilhuꞌan ju ixpalijni ju israelitanin ju talhilacaꞌalh ju Jesús.
\s1 Tachꞌin navicalh ju Stipan
\p
\v 8 Pus ju Dios na lhu ixꞌaktaijui ju Stipan chai ixtaknita ju ixtachaput. Pus ju yuchi ixnavi kꞌai lhamakꞌan chai ju tuꞌuꞌ ju lai catapuꞌalacpastacnalh ju lapanacni. Ixꞌanavi laꞌixꞌucxlacapuꞌan ju lapanacni.
\v 9 Pus ju acsnich ixꞌalin ju lapanacni ju ixtataxtutach laꞌixpuxalapanacꞌan chai ixtayajuta ixpujitatꞌan. Chai sia yuꞌunch vachuꞌ ixꞌalin ju amachakꞌan Cirene chai amachakꞌan Alejandría. Pus ju yuꞌunch chai ju amachakꞌan xalacatꞌun Cilicia chai ju amachakꞌan ju xalacatꞌun Asia tatꞌalakꞌailh ju Stipan.
\v 10 Para jantu lai tavanan tatꞌalalhajalh ni yuchi ju Spiritu Santu ju xaxtakni ju Stipan ju kꞌox ixtacꞌatsan.
\v 11 Ju acsnich axtaknicalh tumin ju aliꞌin lapanacni ni va catapunaulh taꞌaklhtamat. Catanaulh ni takꞌasmatlh ju Stipan ni ma canaulh macxcai chivinti ixlacata ju Moisés chai ixlacata ju Dios.
\v 12 Pus chunch tapumaktalhkꞌamalh chux ju lapanacni chaich ju xalacpaꞌitni ju israelitanin chai ju yuꞌunch ju na ixtalhatalanininta ju ixlhamapꞌaksinꞌan ju istꞌaꞌisraelitanin. Chai ju yuꞌunch talakꞌalh ju Stipan. Tachꞌapalh chai talhiꞌalh lacapuꞌucxtin.
\v 13 Chai talhiꞌalh vachuꞌ ju lapanacni ju catanonach taꞌaklhtamat. Chanich ixtanajun:
\p ―Ju ani lapanac jantu mamactai ju ixnajunca ju macxcai chivinti ixlacata ju ani ixpujitat Dios chai ixlacata ju quilhamapꞌaksinꞌan.
\v 14 Ickꞌalhakꞌasmatꞌauch ni ixnajun ni ma yuchi ju Jesús amachakaꞌ Nazaret ju ma camaktayaꞌ ju ani kꞌai quimpujitatꞌan chai ma camapaxayaꞌ ju tuchi ixꞌajuni ju Moisés ju makꞌaniya quilacpaꞌitniꞌan ni catanavi chai tus chavai naviyau. ―Chunch ixtanajun ju taꞌaklhtamanin lapanacni.
\p
\v 15 Chai ju acsnich chux ju ucxtinin chai chux ju ixtavilanalh lacapuꞌucxtin va taskotutulh ju Stipan. Talaktsꞌilh ju ixꞌucxpuꞌ ni na ixꞌalin ju atuncunuꞌ tachi ju junita ixꞌucxpuꞌ ju tam anquilh.
\c 7
\s1 Ju Stipan ajuni ju ucxtinin tuchi ixnavita
\p
\v 1 Pus ju acsnich ju xakꞌai ixpali ju israelitanin chani juni ju Stipan:
\p ―Ja vasalh chunch tachi ju tanajun.
\p
\v 2 Chai ju Stipan chani akꞌalhtayanalh:
\p ―Quintꞌalapanacni. Quiꞌalakꞌavin. Xalacpaꞌitnich ju ani lakꞌachakꞌan. Aquilakꞌasmatniuch. Na kꞌaich ju Dios. Chai yuchach ju talacasunilh ju makꞌaniya quimpaiꞌan Abraham acsni ixvilhchacaꞌ ju xalacatꞌun Mesopotamia acsni tucaꞌ ixꞌan tsucunuꞌ ju lakꞌachakꞌan Harán.
\v 3 Chai ma chani junicalh ju Abraham: “Atꞌaxtꞌuch ju lamintꞌun. Amacꞌoꞌulatꞌi ju milhiꞌalakꞌavin. Apꞌinchich ju lacatꞌun junta acmasuniyan ju quitꞌin”. Ma chunch ju juni ju Dios ju Abraham.
\v 4 Pus ju Abraham taxtulh ju xalacatꞌun Caldea. Alh tsucunuꞌ ju lakꞌachakꞌan Harán. Chai acsni nichalh ju ixpai pus ju Abraham taxtuchokolh chai ju Dios kꞌailhimilh ju ani lacatꞌun junta tꞌonau ju chavai.
\v 5 Para ju Dios jantu xtaknilh ju Abraham ju ani lacatꞌun ju acsni. Nin lacatsꞌunin tachi ju lai calhijunlh ixchꞌajaꞌ. Para ju Dios ixjunita ni ma ixꞌanuꞌ cajunaꞌ ju ani lacatꞌun chai ma ixꞌanuchꞌan cajunaꞌ ju isꞌaskꞌatꞌan astan. Ma chunch ju juni ju Dios mas maticaꞌ ixjunita isꞌaskꞌatꞌa ju acsnich.
\v 6 Ju Dios juni ni ma alacatam lacatꞌun catatsucuyanta ju ixꞌapapanatnich chai ma va xalapanacni catajunaꞌ ju yuꞌunch. Chai ma calaclhimakchapucanaꞌ tachi lakatꞌatꞌi cientos cꞌata.
\v 7 Chai ju Dios juni ni ma isꞌakstu ju camamakꞌalhkꞌajniyaꞌ ju amachakꞌan ju anuꞌ lakꞌachakꞌan junta va xalapanacni catajunaꞌ. Chai ju astanch ma catataxtuyaꞌ ju ixꞌapapanatnich ju Abraham chai ma catalakꞌayayaꞌ ju Dios ju ani. Ma chunch ju juni ju Dios ju Abraham.
\v 8 Pus ju Dios lhitꞌatakꞌoxilh lakatam chivinti ju Abraham chai juni ni ma cachꞌucꞌunicalh ju ixꞌaxtꞌakꞌa isꞌakstu ju Abraham chai ixꞌaxtꞌakꞌa tachi chun ju istsꞌalan. Ma va ispupastaccan ni ixlhitꞌatakꞌoxita ju chivinti ju Dios ju Abraham. Pus acsni tavanan tsuculh ju istsꞌalh ju Isaac ixjuncan pus ju Abraham chꞌucꞌunilh ju ixꞌaxtꞌakꞌa ixlhilakatsajin avilhchan. Chai ju Isaac acsni alilh ju istsꞌalh ju Jacob ixjuncan vana chꞌucꞌunilh ixꞌaxtꞌakꞌa ju yuchi. Chai ju Jacob acsni alilh ju isꞌaskꞌatꞌa vachuꞌ chunch anavikꞌo ju ixpumacautꞌuiꞌan istsꞌalan. Pus ju anuꞌ ixpumacautꞌuiꞌan xapaꞌitnich tava ju quilhmaccautꞌui ju quintꞌaꞌisraelitaninꞌan.
\p
\v 9 Pus ju pumatam ixlhipumacautꞌuiꞌan istsꞌalan Jacob José ixjuncan. Chai ju ixꞌalakꞌavin ju José na taxcailich ju yuchi. Tastꞌanilh ju aliꞌin lapanacni ju talhiꞌalh alacatam lacatꞌun junta Egipto juncan. Para Dios ju ixtꞌaꞌanta ju yuchi.
\v 10 Chai astan ju Dios makꞌosunikꞌo tachi chun ju ixmakꞌalhkꞌajnat. Chai ju Dios ni na aktaijulh ju José pus ju xakꞌai ucxtin Egipto ju Faraón ixjuncan na kꞌoxich lapanac lhiula. Chai ni laktsꞌilh ni na kꞌox ixjunita ixꞌatalacpastꞌacꞌat pus ulalh ju José lacatꞌicstꞌi ucxtin ju lakꞌachakꞌan Egipto. Vachuꞌ junilh ni ixꞌucxtinꞌan cajunaꞌ tachi chun ju ixtachꞌalhcatnan laꞌixchakaꞌ.
\p
\v 11 Chai ju acsnich alilh kꞌai chavan chai kꞌai makꞌalhkꞌajnat tachi ixlhilacaputsꞌun ju xatꞌun Egipto chai ju xatꞌun Canaán. Pus ju quilacpaꞌitniꞌan jantuch lai ixtalhitajui ju tuchi cataꞌulh.
\v 12 Para ju Jacob ni kꞌasmatlh ni ixꞌalin ju vaiti ju anch ju Egipto pus alacmalakachalh ju istsꞌalan. Pus ju yuꞌunch makꞌaniya quilacpaꞌitniꞌan tajunita.
\v 13 Chai ju yuꞌunch acsni taquiꞌilh ju vaiti ju ixlhipaktꞌuich pus ju José ajunilh ni ixlakꞌauchꞌan ixjunita. Vachuꞌ ju Faraón alacmispalh ju ixꞌalakꞌavin ju José.
\v 14 Chai ju acsnich ju José alacmalakachachokolh ixꞌalakꞌavin laꞌixtꞌunꞌan. Lhinaulh istꞌasanica ju ixpaiꞌan ju Jacob ixjuncan. Vachuꞌ ajuni ni catalhimilh tachi chun ju ixtatanumanalh laꞌixchakaꞌan. Pus ixtachaꞌanta setenta y cinco lapanacni.
\v 15 Pus yuchi lhiꞌalh tsucunuꞌ ju Jacob ju xalacatꞌun Egipto. Chai anch ju nichalh ju yuchi chai lhu ju makꞌaniya quilacpaꞌitniꞌan.
\v 16 Chai acsni tani alhiꞌancalh lakꞌachakꞌan Siquem. Anch ju amakꞌacalh ju ixlacatunaꞌan junta lhucucu talhpa ixjunita. Anch junta tamaulh ju Abraham. Ju yuchi ixꞌaxtaknita tumin ju istsꞌalan ju Hamor amachakꞌan Siquem ni yuꞌunchach ju tastꞌalh.
\p
\v 17 Para acsni vaninch ixchimputunch ju avilhchan ni caꞌuctaxtuyach ixchivinti Dios ju ixmavasalanicanta ju Abraham pus ju ixꞌapapanatnich ju Israel slivasalh tatalhavalhch ju xalacatꞌun Egipto.
\v 18 Chai astan apumatam tavilh lacapuꞌucxtin ju xalacatꞌun Egipto. Pus ju yuchi jantu iskꞌasmatꞌa ixlacata ju José ni makꞌanchich ixnita ju yuchi.
\v 19 Pus ju anuꞌ kꞌai ucxtin aꞌokxchokꞌolh ju quintꞌaꞌisraelitaninꞌan chai alaclhimakchapulh ju makꞌaniya quilacpaꞌitniꞌan. Amapꞌaksi ni catamacaꞌalh makspaꞌ ju istsꞌalan acsni tavanan catatsuculh. Ju chunch ixnajun ni caꞌixtanikꞌo ju tsꞌalan.
\v 20 Pus ju acsnich lakꞌaulh ju Moisés chai na kꞌoxich lhiula ju Dios. Pus lakatꞌutu malhquiyuꞌ xatakꞌayai laꞌixchakaꞌ ju ixpai.
\v 21 Para astan acsni ixmakꞌancanta ju anuꞌ tsꞌalh pus istsiꞌ ju Faraón ju saclh. Lakꞌayalhch. Laktsꞌilh tachi ju va istsꞌalh.
\v 22 Pus ju Moisés lhaꞌatalaninilh tachi chun ju ixtalhaꞌatalaninintach ju amachakꞌan Egipto. Chai na lai ixchivinin chai na lai ixnavi ju tuꞌuꞌ.
\p
\v 23 Acsni laktsa tꞌupꞌuxam cꞌata ju Moisés pus ju yuchi pastaclich laꞌixꞌalhunut ni caꞌalh laktsꞌiniꞌ ju ixtꞌaꞌamachivinti.
\v 24 Chai ju anch ju yuchi laktsꞌilh pumatam amachakaꞌ Egipto ju ixtꞌajun lhimakchapunuꞌ pumatam istꞌaꞌisraelita. Pus ju Moisés lhikꞌalhtsaulh. Maknilh ju amachakaꞌ Egipto. Ixnajunch ni chunch camalacchoyaꞌ tachi ixꞌulhtui ju anuꞌ lapanac.
\v 25 Pus ju Moisés ixnajunch ni caꞌixtamachakxa ju istꞌaꞌisraelitanin ni Dios ju xamalakachai ni caꞌamaxtuyaꞌ laꞌixmakꞌalhkꞌajnatꞌan. Para ju yuꞌunch jantu tamachakxa.
\v 26 Ni tuncunchokopa aktam anchokopa ju Moisés chai ju acsnich laktsꞌilh ixtꞌiyunꞌan istꞌaꞌisraelitanin ju ixtatꞌajun lasanin. Pus ju Moisés ixꞌalhvakputun chai chani alacjuni: “Quintꞌalapanacni ju uxijnan ni va lhiꞌalakꞌavin umpꞌalhtꞌatꞌit. Tas ni va lalhimakchꞌapꞌupꞌalatꞌit milhiꞌuxijnan”.
\v 27 Pus ju acsnich ju ixtꞌajun tꞌalakꞌainaꞌ ixtꞌatolhnaꞌ pꞌok samakꞌalh ju Moisés chai juni: “Tis chavaich ju xaꞌulatan quiꞌucxtin quincꞌan chai ixlakꞌoxiniꞌ quilhamakꞌan quincꞌan.
\v 28 Ja vachuch va qꞌuimaknipꞌutꞌun tachi ju navitꞌi cutanch ju amachakaꞌ Egipto”.
\v 29 Pus acsni kꞌasmatlich ju ani chivinti ju Moisés atsꞌalalh. Alh tsucunuꞌ alacatam lacatꞌun junta Madián ixjuncan. Chai ju anch tamakꞌaxtokchalhch chai alilh pumatꞌui istsꞌalan.
\p
\v 30 Acsni tapasalh tꞌupꞌuxam cꞌata pus ju Moisés ixvi junta va aseknicꞌa. Anch ixvi vanin ju anuꞌ talhpa ju Sinaí juncan. Chai anchach ju talacasunilh pumatam ixꞌanquilh ju kꞌai ucxtin Dios. Ixtꞌajun lhcunuꞌ lakatam achꞌitin chai anch lacaꞌalapnaꞌ talacasunilh ju anquilh.
\v 31 Pus ju Moisés ni laktsꞌilh va lhamakꞌaninilh chai lakꞌalh. Va islaktsꞌimputun tuchi ixtalakxtuch. Para lana kꞌasmatnilh ju ixchivinti ju kꞌai ucxtin Dios.
\v 32 Chai ju yuchi ma juni ni ma yuchach ju Dios. Ma yuchi ju talhilaksilh ju makꞌaniya ixlacpaꞌitni Moisés ju Abraham chai Isaac chai Jacob ixꞌajuncan. Chunch ma juni ju Dios. Pus ju acsnich ju Moisés lana na alhqꞌuipꞌipꞌitnilh acsni laktsꞌilh. Jantuch lacaꞌamputulhch.
\v 33 Chai ju kꞌai ucxtin Dios ma junchokopa ni ma cachꞌanmaxtulh ju ixchꞌanxtꞌakꞌan ni ma ixya laꞌixꞌucxlacapuꞌ ju Dios chai ma yuchach ju tucan Dios.
\v 34 Ju yuchi ma laktsꞌilh ju ixmakꞌalhkꞌajnat ju ixlapanacni ju ixtavilanancha Egipto. Chai ma kꞌasmatlh ni na ixtalactꞌasai. Ma yuchi ixlhiminta amakꞌalhtaxtunuꞌ. Chai ma juni ni ixmalakachaputun ju Moisés ju Egipto. Ma chunch ju juni ju Dios.
\p
\v 35 Pus ju Dios malakachalh ju Moisés chai ju anuꞌ anquilh ju talacasunilh lacaꞌachꞌitin aktaijulh ni lai xajun ucxtin chai lai xaꞌamakꞌalhtaxtui ju istꞌaꞌisraelitanin ju xalacatꞌun Egipto. Ju Dios amalakachanilh ju Moisés ju istꞌaꞌisraelitanin mas jantu kꞌox ixtalhiulai ju pꞌulhnan. Ma va chani ixtajunich: “Tis chavaich ulatan quiꞌucxtin quincꞌan chai ixlakꞌoxiniꞌ ju quilhamakꞌan quincꞌan”. Ma chun ixtajuni.
\v 36 Pus ju Moisés navilh lhu kꞌai lhamakꞌan chai lhu tuꞌuꞌ ju lai catapucꞌatsalh ju lapanacni ni vasalh Dios ju xamalakachayachilh. Anchach ju laxalacatꞌun Egipto ju xanavi ju lhamakꞌan chai anch ju laxaꞌalama junta slapulh juncan. Vachuꞌ lhu xanavi ju kꞌai lhamakꞌan junta va aseknicꞌa junita. Anch junta ixtalacꞌucxuntꞌajun ju quintꞌaꞌisraelitaninꞌan tꞌupꞌuxam cꞌata.
\v 37 Yuchach ju Moisés ju alacjuni ju quintꞌaꞌisraelitaninꞌan ni ma casacxtuyaꞌ ju kꞌai ucxtin Dios pumatam ju sia yuꞌunch tachi ju sacxtucanta ju yuchi. Chai ju yuchi ni ma canonaꞌ ixchivinti Dios pus ma catakꞌasmatnilh.
\v 38 Yuchach ju Moisés ju ixꞌalactꞌavi ju quintꞌaꞌisraelitaninꞌan junta aseknicꞌa. Chai yuchach ju tꞌachivinilh ju anquilh ju laxatalhpa Sinaí chai astan alacjuni ju makꞌaniya quilacpaꞌitniꞌan ju ixchivinti Dios. Yuchach vachuꞌ ju xtaknicalh ju chivinti ixlacata ju atsucunti lactꞌiyan ni laich vachuꞌ cacꞌatsayau ju quijnanꞌan.
\p
\v 39 Para ju makꞌaniya quilacpaꞌitniꞌan jantu ixtakꞌasmatniputun ju Moisés. Jantu ixtalacasqꞌuin ni ixꞌucxtinꞌan cava ju yuchi. Va ixtaꞌanchokoputun ju xalacatꞌun Egipto.
\v 40 Pus ju Moisés ixvilhchacaꞌ ju laxatalhpa Sinaí acsni tajuni ju Aarón ju quintꞌaꞌisraelitaninꞌan ni ma caꞌanavinilh tuꞌuꞌ ju ma isdiosꞌan cajunaꞌ chai ju ma caꞌapꞌulhniyach ju lacati. Ma jantu ixtacꞌatsai tuchi ixtapasata ju anuꞌ Moisés ju amaxtulh laxalacatꞌun Egipto. Ma chunch tajuni ju Aarón.
\v 41 Pus ju acsnich taxapalaxtulh lakatam askꞌatꞌa vacax chai tamakninilh ju borregojni. Na talhikꞌachalh ju anuꞌ ixtalaktsꞌinta tachi isdiosꞌan ju ixtanavita laꞌixmacaꞌan.
\v 42 Pus yuchi alhimacaulh ju Dios chai lakꞌaꞌilh ni chach talhilacaꞌalh ju xataxtokni ju lactꞌiyan tachi ju avilhchan chai ju malhquiyuꞌ chai ju stꞌacu. Pus tachi ju talalh tsꞌokcanta laꞌixꞌalhiquiꞌan ju lapanacni ju ixtanajun ixchivinti Dios. Ju anch najun ni ma chani naulh ju Dios:
\q1 Ju israelitanin acsni ixtaꞌucxuntꞌajun tꞌupꞌuxam cꞌata junta aseknicꞌa ja ma yuchach cava ju tamakninilh ixborregojniꞌan chai talakxavanilh ju ixvacaxꞌan. Ma jantu.
\q1
\v 43 Alai ma va ixtachꞌixlhiꞌan ju lona chakaꞌ junta ixtamakꞌata ju isdiosꞌan ju Moloc ixjuncan.
\q1 Chai ma ixtalhilacaꞌan ju anuꞌ tachi stꞌacu ju ixtaxapalaxtuta chai ju talhimapakaꞌulh Renfán.
\q1 Ma va yuchi ju talhilacaꞌalh ju ixtanavita isꞌakstuꞌan. Pus ixlhiyuchi ma camamakꞌalhkꞌajniyaꞌ ju Dios.
\q1 Ma isꞌakstu Dios ju ma caꞌamalakachatachilh ju amachakꞌan alacatam lacatꞌun lhiꞌavinti ju xalacatꞌun Babilonia.
\q1 Chai ma catalhiꞌanaꞌ ju anuch lapanacni chai ma xalapanacni catanaviyanta.
\m Ma chunch ju xaꞌatsꞌoknuncan laꞌixꞌalhiquiꞌan ju ixlapanacni Dios.
\p
\v 44 Pus ju makꞌaniya quilacpaꞌitniꞌan acsni ixtaꞌucxuntꞌajun junta aseknicꞌa ixtanavita lakatam lona chakaꞌ junta ixtamakꞌata ju chiux junta istsꞌokcanta ixlhamapꞌaksin ju Dios. Chunch ju tanavilh ju anuꞌ chakaꞌ tachi ju lhinaulh ju Dios. Chun tachi ju masunicalh ju Moisés.
\v 45 Chai astan ju makꞌaniya quilacpaꞌitniꞌan ju ixtatꞌajun acsni kꞌai ucxtin ixjunita ju Josué vachuꞌ tachꞌixlhiꞌalh ju anuꞌ lona chakaꞌ acsni taquitaiꞌinilh ixlacatꞌunꞌan ju jantu istꞌaꞌisraelitaninꞌan ixtajunita. Dios ju axcoxtulh ju amachakꞌan anch. Chai ju anuꞌ lona chakaꞌ ixpujitatꞌan ixtanavita ju makꞌaniya quintꞌaꞌisraelitaninꞌan tus acsni tsuculh ju David.
\v 46 Pus ju Dios na kꞌox xalhiulai ju David chai ju David sqꞌuinilh lamapainin ni laich canavi lakatam kꞌai pujitat. Canavinilh isDios ju vachuꞌ isDios ixjunita ju makꞌaniya lapanac ju Jacob ixjuncan.
\v 47 Para jantu lacasqꞌuinilh ju Dios. Alai yuchi ju istsꞌalh David ju Salomón ixjuncan ju lhinaulh ixyajuca ju kꞌai pujitat.
\v 48 Para ju vilhcha talaclhman jantu anch ju tꞌajun junta va yocantach lacamacaꞌ. Vachuꞌ chunch naulh ju makꞌaniya lapanac ju ixnajun ixchivinti Dios. Ju yuchi chani naulh:
\q1
\v 49 Ju kꞌai ucxtin Dios ma najun ni lactꞌiyan ju lhinajun chai ma vachuꞌ ju ani lacamunutpaꞌ.
\q1 Pus tis ma chakach ju lai catayoniyaꞌ ju va lapanacni. Ju yuchi ma jantu jintaꞌ astacnan.
\q1
\v 50 Ma ja jantu yuchi jumpalata ju navikꞌota tachi chun ju taxtokni.
\m Ma chunch ju najun ju Dios.
\p
\v 51 Para iclajunau ni na kꞌox pꞌas ju miꞌalhunutꞌan ju uxijnan. Ju uxijnan mas malacꞌasupꞌalatꞌit tachi ixlapanacni Dios para lana jantu kꞌasmatpꞌutꞌunatꞌit ju ixchivinti. Lana jantu lacꞌaꞌipꞌutꞌunatꞌit. Ju uxijnan aktsꞌiya sastꞌucꞌatꞌit acsni taxakꞌalayan ju Spiritu Santu. Tachi ju ixtalai ju makꞌaniya milacpaꞌitniꞌan chunchach vachuꞌ ju layatꞌit ju uxijnan.
\v 52 Ju makꞌaniya lapanacni ju ixtanajun ixchivinti Dios si alacmamakꞌalhkꞌajnikꞌocalh. Tamamakꞌalhkꞌajnilh ju milacpaꞌitniꞌan. Chai vachuꞌ alacmaknikꞌo ju pꞌulhnan taquinonchilh ni ma caminach pumatam ju soknicꞌa ju isꞌatsucunti. Chai ju chavai ni quilachilh ju yuchi pus ju uxijnan makꞌaxtꞌaknitꞌit ju ucxtinin chai maknitꞌitch.
\v 53 Mas yuꞌunch ju anquilhnin ju xataxtakniyan ju ixlhamapꞌaksin Dios para ixlaquilhtu jantu navitꞌatꞌit. ―Chunch ju ajuni ju ucxtinin ju Stipan.
\s1 Maknicalh ju Stipan
\p
\v 54 Chai ju ixtavilanalh acsni takꞌasmatlh ju ixchivinti ju Stipan pus lana na tatalhkꞌamalh. Tamalatantsꞌacakꞌo ju istatsalatꞌan ixtalhkꞌamtiꞌan.
\v 55 Para ju Stipan ni ixlhinonkꞌojui ju Spiritu Santu laꞌixꞌalhunut pus skotutulacaꞌalh ju lactꞌiyan. Laktsꞌilh ju Dios chai cꞌatsalh ni yuchach ju lhinonkꞌojui chux. Chai vachuꞌ laktsꞌilh ju Jesús ju ixya laꞌixlhicana ju Dios.
\v 56 Chai chani naulh ju Stipan:
\p ―Alaktsꞌintꞌitch. Talhtekꞌa ju lactꞌiyan chai iclaktsꞌin ju yuchi ju malakachatachilh ju Dios ni lapanac catsucuyaꞌ ju ani. Chai ju yuchi ya vanin junta vi ju Dios.
\p
\v 57 Pus ju acsnich ju ucxtinin tsꞌau tsꞌau talactꞌasalh. Lana alaccꞌatuchꞌapacalh. Chai talakꞌalh ixchuxꞌan.
\v 58 Tatixcauxtulh ju anuꞌ lakꞌachakꞌan. Chai acsni tamaxtulh ixcujuꞌan taxtaknilh pumatam tsꞌalh ju Saulo ixjuncan. Astan talacatꞌalhmalhch ju Stipan.
\v 59 Pus acsni ixtatꞌajun lacatꞌalhmanin ju Stipan pus ju yuchi chani juni ju Dios:
\p ―Quiꞌucxtin Jesús aqꞌuimaklhtꞌaich ju quintacuvin.
\p
\v 60 Acsni nonkꞌo ju chunch pus lana taꞌaktsokotalh. Na pꞌas chivinilh. Chani naulh:
\p ―Quiꞌucxtin Dios tun alhimamakꞌalhkꞌajnitꞌi ju ani ya lapanacni ixlacata ju tuchi quintanavi.
\p Chai acsni naulh ju chunch lana nilh.
\c 8
\s1 Ju Saulo alhimakchꞌapulh ju ixtalhilacaꞌanta ju Jesús
\p
\v 1 Ju Saulo na lhikꞌachalh acsni maknicalh ju Stipan.
\p Chai ju acs avilhchan vachuꞌ na amamakꞌalhkꞌajnicalh ju amachakꞌan Jerusalén ju ixtalhilacaꞌanta ju Jesús. Pus ixlhiyuchi taꞌakpitsikꞌo. Taꞌalh ju xaꞌestado Judea chai ju Samaria. Va yuꞌunch ju ixtamalakachan ju Jesús ju jantu xatataxtui.
\v 2 Pus ju aliꞌin lapanacni ju ixlhichux ixꞌalhunutꞌan ixtalhilacaꞌanta ju Dios taquimacnulh ju Stipan. Chai slivasalh na ixtalhikꞌalhun.
\v 3 Para ju Saulo tailhiꞌalh ixmamakꞌalhkꞌajnica ju ixtalhilacaꞌanta ju Jesús. Ju yuchi ixtanui lakꞌachakꞌanixni chai ixꞌaxakꞌamaxtui ju jokꞌatni chai tꞌacunin chai alacquimakꞌaxtakcalh lacapulachꞌin.
\s1 Ajuncan ju amachakꞌan Samaria ixchivinti Dios
\p
\v 4 Para tachi chun ju taꞌakpitsilh ixtalacquilhuntꞌajun ixchivinti Dios vanta anchach ixtachaꞌan.
\v 5 Pus pumatam sia yuꞌunch Pilipe ixjuncan. Ju yuchi alh lakatam lakꞌachakꞌan laxaꞌestado Samaria chai alacjunich ju amachakꞌan anch ixlacata ju yuchi ju ixnoncan camalakachatachilh Dios.
\v 6 Pus tatakꞌaixtoklh ju lapanacni chai ixlhichux ixꞌalhunutꞌan takꞌasmatnilh ju tuchi ixnajunch ju Pilipe. Vachuꞌ ixtalaktsꞌinch ju lhamakꞌan ju ixnavi.
\v 7 Ju anch na lhu ixꞌalin ju lapanacni ju ixtanun ju lhacaticurulhni laꞌixꞌalhunutꞌan. Chai acsni alackꞌajicalh pus ju lhacaticurulhni tsꞌau ixtalactꞌasai chai ixtataxtui laꞌixlacatunaꞌan ju lapanacni. Chai na lhu palai ixꞌanavicanta ju va ixtalaclhtuculunta chai ju aliꞌin ju jantu lai ixtaꞌalhtanan.
\v 8 Pus yuchi na ixtalhikꞌachan ju amachakꞌan Samaria.
\p
\v 9 Para ixtꞌajun ju anch pumatam lapanac ju ixjuncan Simón. Ju yuchi alhicujnuꞌ ixjunita ju anuch lakꞌachakꞌan tus makꞌanchich. Chai na ixꞌaꞌokxchokꞌoi ju amachakꞌan anch. Ju yuchi ixtalacasui tachi ju tam xakꞌai.
\v 10 Pus tachi chun ju lapanacni na ixtaquiclacaꞌini ju ixchivinti. Mas yuꞌunch ju askꞌatꞌan chai ju palai lackꞌajin. Va ixtanajunch ni Dios ju xaxtakni ju kꞌai ixtachaput.
\v 11 Na ixtaquiclacaꞌitach ni na makꞌanch ju xaꞌalacꞌokxchokꞌolhitꞌajun laꞌixꞌalhicujnut.
\v 12 Para acsni quilacha ju Pilipe chai ajuni ni Dios lhinomputun laꞌisꞌatsucuntiꞌan ju lapanacni chai ajuni ixlacata ju Jesús ju ixnoncan camalakachatachilh ju Dios pus taquiclacaꞌilh ju jokꞌatni chai ju tꞌacunin chai taꞌakpaxlich.
\v 13 Chai vachuꞌ lacaꞌilh ju Simón chai akpaxlh. Chai tꞌaꞌalhtanatsuculh ju Pilipe. Chai na ixlhamakꞌaninin acsni ixlaktsꞌin ju kꞌai lhamakꞌan ju ixnavi ju Pilipe chai acsni ixnavi ju tuꞌuꞌ ju lai catapucꞌatsalh ju lapanacni ni vasalh Dios ju xamalakachayachilh.
\p
\v 14 Pus ju ixtamalakachan ju Jesús ju ixtavilanancha Jerusalén acsni takꞌasmatlh ni ixtaꞌamaklhtayananta ju ixchivinti Dios ju amachakꞌan Samaria pus alacmalakachacancha ju Pitaluꞌ chai ju Xivan.
\v 15 Chai ju yuꞌunch acsni tachaꞌalh tatapaininilh ju Dios ixlacaꞌatalhꞌan ju amachakꞌan anch ni laich catanu vachuꞌ laꞌixꞌalhunutꞌan ju yuꞌunch ju Spiritu Santu.
\v 16 Pus tucaꞌ ixtanui ju Spiritu Santu laꞌixꞌalhunutꞌan ju yuꞌunch. Va yuchi ni ixtaꞌakpaxtach ni ixtanajun ni ixtalhilacaꞌamputun ju ixꞌucxtinꞌan Jesús.
\v 17 Pus ju acsnich ju Pitaluꞌ chai ju Xivan tamokslanilhch ixmacaꞌan laꞌixlacatunaꞌan ju yuꞌunch chai lanach tanu laꞌixꞌalhunutꞌan ju Spiritu Santu.
\p
\v 18 Pus ju Simón acsni amaklaktsꞌilh ju ixtamalakachan ju Jesús ni ixtamokslai ixmacaꞌan laꞌixlacatuna apumatam chai lana tanulh ju Spiritu Santu laꞌixꞌalhunut pus akꞌalhtasunilh ju tumin.
\v 19 Chai chani ajuni:
\p ―Aqꞌuixtꞌakninch vachuꞌ junima tachaput. Ju chunch va tichi chavaich ju acmokslaniyaꞌ ju quimacaꞌ laꞌixlacatuna catanuyaꞌ ju Spiritu Santu laꞌixꞌalhunut.
\p
\v 20 Para ju Pitaluꞌ chanich juni:
\p ―Ju uxintꞌi chai ju mintumin apꞌinaꞌitꞌit lacajipi ni laich naꞌun ni laich tamocan lacatumin ju tuꞌuꞌ ju xtꞌakꞌa ju Dios.
\v 21 Ju uxintꞌi jantu lai atꞌimaknavitꞌi ju ani ixlhichꞌalhcat ju Dios. Chai jantu lhijun ni anavitꞌi ni jantu salaka ju miꞌalhunut laꞌixmacni Dios.
\v 22 Pus ju chavai amacꞌauch ju macxcai miꞌatalacpastꞌacꞌat. Atꞌapꞌaininin ju ucxtin Dios ni camacꞌacxanin ju macxcai miꞌatalacpastꞌacꞌat ju alin lamiꞌalhunut.
\v 23 Ju quitꞌin iccꞌatsai ni na tꞌalasai ju ixtaxtokni Dios ju uxintꞌi. Chai ju miꞌalactuꞌunti tachi ju va tachꞌin navitan. ―Chunch ju junicalh ju Simón.
\p
\v 24 Pus ju acsnich akꞌalhtayanalh ju Simón. Chanich ajuni:
\p ―Asqꞌuinitꞌit ju uxijnan ju quiꞌucxtinꞌan Dios ju quilacata ni jantu chun actapasalh tachi ju quilajunau.
\p
\v 25 Pus ju Pitaluꞌ chai ju Xivan alacjuni ju lapanacni tuchi ixtalaktsꞌin ju ixnavi ju Jesús chai alacjuni ixlacata ju kꞌai ixꞌucxtinꞌan Jesús. Chai acsni tataxtulh ju anch tatapasatilalh lakatamin lakatamin lakꞌachakꞌan tus tachaꞌalh ju lakꞌachakꞌan Jerusalén. Para acsni ixtapasatilai ju lakatamin lakꞌachakꞌan ju alin ju xalacatꞌun Samaria ixꞌajuni ju amachakꞌan anch ta yu laich putakꞌalhtaxtucan ni jantu ancan ju lacajipi.
\s1 Ju Pilipe chai ju amachakaꞌ Etiopía
\p
\v 26 Chai acsni tapasalh ju ani taxtokni pus pumatam ixꞌanquilh ju kꞌai ucxtin Dios xakꞌala ju Pilipe chai chani juni:
\p ―Ju chavai apꞌinchich ju lhisur. Apꞌupꞌitꞌi ju xati lakꞌachakꞌan Gaza ju tachꞌapai ju lapanacni acsni taminacha ju lakꞌachakꞌan Jerusalén. ―Chunch ju juni.
\p Pus ju anuꞌ ti yuchach ju tapasata junta jantu xamatiꞌ tꞌajun.
\v 27 Pus ju Pilipe taxtulh. Alh. Chai anch ju lacati ixtaimai pumatam lapanac amachakaꞌ Etiopía. Pus ju yuchi xakꞌai ixjunita laxalacatꞌun Etiopía junta xaꞌucxtin ixjunita ju chakoꞌulh ju Candace ixjuncan. Chai ju anuꞌ lapanac yuchi ju ixmalhistacni ju ixtumin ju anuꞌ kꞌai ucxtin. Ju yuchi ixquilakꞌayata ju Dios ju lakꞌachakꞌan Jerusalén.
\v 28 Chai ju chavai va ixꞌanchokoputun laꞌixchakaꞌ. Chai acsni ixꞌanta laꞌixcarro ju ixakꞌamai ju caballo pus ixtꞌajun laktsꞌiniꞌ ju alhiqui ju istsꞌokta ju Isaías ju makꞌaniya lapanac ju ixnajun ixchivinti Dios.
\v 29 Pus ju Spiritu Santu chani junilh ju Pilipe:
\p ―Pꞌas apꞌitꞌi. Vanin atꞌaimatꞌi ju anuꞌ carro.
\p
\v 30 Chai ju Pilipe acsni vanin lakꞌalh ju carro pus kꞌasmatlh ni ixtꞌajun nonaꞌ tachi ju istsꞌokta ju Isaías. Chai chani juni:
\p ―Ja machꞌakxaich tuchꞌi laktsꞌin.
\p
\v 31 Pus ju acsnich ju yuchi chani juni:
\p ―Tas aclhimachakxalh ni matiꞌ xamatiꞌ ju aquimavasalanilh.
\p Chai ju acsni tapaininilh ju Pilipe ni catꞌatajulh ju laꞌixcarro.
\p
\v 32 Pus ju lacaꞌatsꞌoknut junta ixtꞌajun laktsꞌiniꞌ chani ixnajun:
\q1 Tachi ju tuꞌuꞌ borrego ni lhiꞌancan junta camaknicanaꞌ pus chunch vachuꞌ caꞌulhtucanaꞌ ju yuchi.
\q1 Chai tachi ju tuꞌuꞌ saꞌaskꞌatꞌa borrego ni jantu tꞌasai mas sitcanch pus chunchach vachuꞌ ju yuchi.
\q1 Lana jantu tuꞌuꞌ canonaꞌ.
\q1
\v 33 Na catamamaxaniyaꞌ chai catamakniyaꞌ mas matiꞌ ju ixtalakꞌalhin.
\q1 Chai tis chavaich ju lai canonaꞌ ni caꞌalinaꞌ ju catachꞌakꞌokꞌayaꞌ ni camakꞌosunicanaꞌ ju isꞌatsucunti ju ani lacatꞌun.
\m Chunch ju najun junta ixtꞌajun laktsꞌiniꞌ ju anuꞌ lapanac.
\p
\v 34 Pus ju anuꞌ xakꞌai sacmilh ju Pilipe:
\p ―Lamapainin aqꞌuiꞌunch. Tis chavaich ju lhichivinin ju lapanac ju ixnajun ixchivinti Dios. Ja isꞌakstu ju lhichivininchokoi u apumatam.
\p
\v 35 Pus ju acsnich ju Pilipe tsuculh amavasalaniniꞌ. Pꞌulhnan amavasalanilh tuchi ixnomputun ju chivinti ju ixtꞌajun laktsꞌiniꞌ chai astan junilh aliꞌ ixlacata ju Jesús.
\v 36 Chai acsni taꞌalh ju lacati pus tachaꞌalh junta ixma ju xcan. Chai ju anuꞌ xakꞌai chani juni ju Pilipe:
\p ―Alaktsꞌich ju xcan. Ja jantu lai acꞌakpaxlh.
\p
\v 37 Pus ju Pilipe chanich juni:
\p ―Ni lacꞌaꞌich ju ixlhichux ju miꞌalhunut pus laich calayaꞌ.
\p Chai akꞌalhtayanalh ju anuꞌ xakꞌai. Chanich juni:
\p ―Iclacaꞌich ni istsꞌalh Dios ju Jesús ju ixnoncan camalakachatachilh Dios.
\p
\v 38 Pus ju acsnich ju anuꞌ xakꞌai lhinaulh ixchꞌapayajuca ju ixcarro. Chai ju yuchi chai ju Pilipe kꞌaixtamch tꞌataju lacxcan chai ju Pilipe makpaxa ju anuꞌ lapanac.
\v 39 Chai acsni tatacutchokolh ju lacxcan pus ju iSpiritu Santu ju quiꞌucxtinꞌan Dios lana lacatam sokꞌo lhiꞌalh ju Pilipe. Chai ju anuꞌ xakꞌai jantu laktsꞌinchokolh tavanan. Para acsni xaꞌanchokoi ju lacati pus na ixkꞌachan.
\v 40 Pus ju Pilipe lhitajucancha ju lakꞌachakꞌan Azoto. Chai acsni taxtulh ju anch tapasatilalh lakatamin lakatamin lakꞌachakꞌan tus chaꞌalh ju lakꞌachakꞌan Cesarea. Para acsni ixtapasatilai ju lakatamin lakꞌachakꞌan pus ixꞌajuni ju lapanacni ta yu laich cataputakꞌalhtaxtulh ni jantu cataꞌalh ju lacajipi.
\c 9
\s1 Ju Saulo lhilacaꞌalh ju Jesús
\p
\v 1 Chai ju acsnich ju Saulo va tachi ispastactꞌajun ixꞌamaknica ju ixtalhilacaꞌanta ju kꞌai ucxtin Jesús. Pus yuchi lhilakꞌalh ju xakꞌai ixpalijni ju istꞌaꞌisraelitanin.
\v 2 Sqꞌuinilh lakatam alhiqui ju laich calhiꞌalh laꞌixpujitatꞌan ju istꞌaꞌisraelitanin ju amachakꞌan Damasco. Ju chunch ni calhitajulh tam jokꞌat u tam chakoꞌulh ju chꞌakꞌokꞌata ju Jesús pus laich calhimilh tachꞌin ju lakꞌachakꞌan Jerusalén.
\v 3 Para acsni ixꞌanta ju lacati chai vanin ixchaꞌamputun ju lakꞌachakꞌan Damasco pus lana mapulhcu junta ixꞌanta ju Saulo. Lactꞌiyan ju xatapulhcuyacha ju anuꞌ maclhcu. Tapulhcukꞌo chux ju lacatꞌun.
\v 4 Pus ju Saulo lana tin taꞌaktalh ju lacatꞌun. Chai kꞌasmatlh lakatam chivinti ju chani juni:
\p ―Saulo. Saulo. Jantu alhimakchꞌapꞌu ju quilapanacni. Acsni chun ju lai tachi ju va jun quitꞌin ju qꞌuilhimakchꞌapꞌui.
\p
\v 5 Chai ju Saulo kꞌalhtailh. Chai juni:
\p ―Tis chavaichꞌat ji ucxtin.
\p Chai ju anuꞌ ixtꞌajun chiviniꞌ kꞌalhtayanalh. Chani juni:
\p ―Quitꞌin ju icJesús ju na qꞌuimamakꞌalhkꞌajni. Para acsni sastꞌucꞌa ju ixtaxtokni Dios alai miꞌakstu ju mamakꞌalhkꞌajnichꞌokꞌocꞌan. ―Chunch ju junilh ju Jesús.
\p
\v 6 Pus ju Saulo lana na alhqꞌuipꞌipꞌitnilh. Na ixtalhanantach. Chai chani juni:
\p ―Quiꞌucxtin tijuch ju lacꞌasqꞌuin ju acnavi.
\p Chai ju ucxtin Jesús chani juni:
\p ―Atꞌaich. Aꞌinchich ju lakꞌachakꞌan. Aꞌuncꞌantꞌachich tuchꞌi ju anaviyaꞌich.
\p
\v 7 Pus ju jokꞌatni ju ixtatꞌaꞌanta ju Saulo va sek talactaya. Takꞌasmatlich vasalh ju chivinti para jantu xamatiꞌ ixtalaktsꞌin.
\v 8 Pus ju Saulo lana kꞌostavi ju lacatꞌun. Para acsni talacpokꞌa jantu lai ixlaktsꞌin tuꞌuꞌ. Pus va macchꞌapalhiꞌancalh ju lakꞌachakꞌan Damasco.
\v 9 Chai lakatꞌutu avilhchan jantu lai ixꞌalacꞌavanan. Chai jantu vailh nin tuꞌuꞌ cakꞌotlh.
\p
\v 10 Pus ju anuch lakꞌachakꞌan Damasco ixtꞌajun pumatam lapanac ju Ananías ixjuncan. Ju yuchi ixlhilacaꞌanta ju Jesús. Pus ju ucxtin Jesús atalacasunilh tachi ju va laꞌixꞌaklakꞌavanti. Chai xakꞌala. Chai ju Ananías akꞌalhtayanalh. Juni:
\p ―Tijuch ji quiꞌucxtin.
\p
\v 11 Pus ju acsnich ju kꞌai ucxtin Jesús chani juni:
\p ―Apꞌinchich ju lacati ju Soknicꞌa juncan. Apꞌuxcꞌochiꞌ laꞌixchakaꞌ Judas pumatam ju Saulo juncan. Ju yuchi amachakaꞌ Tarso junita. Ju yuchi va quintꞌachivinin.
\v 12 Chai ju yuchi laktsꞌintan tachi ju va laꞌixꞌaklakꞌavanti. Laktsꞌinan ni tachi ju va xatꞌanui ju anch chai tachi ju va mucꞌanitꞌa ju mimacaꞌ laꞌixlakchulh ni laich caꞌalacꞌavananaꞌ. ―Chunch ju junicalh ju Ananías.
\p
\v 13 Para ju Ananías acsni kꞌasmatlh ju chunch pus chani juni ju Jesús:
\p ―Para ji quiꞌucxtin na lhu quintajuni ixlacata ju anuꞌ lapanac. Tanajun ni na ixꞌamamakꞌalhkꞌajni ju milapanacni ju tavilanancha ju lakꞌachakꞌan Jerusalén.
\v 14 Chai ju chavai minta ju ani chai ju xalackꞌajin palijni tajuni ni laich aquintachꞌapakꞌoyan chux ju quijnan ju iclalhilacaꞌanau ju uxintꞌi.
\p
\v 15 Para ju kꞌai ucxtin Jesús chani juni:
\p ―Aꞌinchich ni icsacxtutach ju yuchi ni canaviyaꞌ ju quilhichꞌalhcat. Ju yuchi caꞌalacjunaꞌ ju lapanacni ju quilacata. Caꞌalacjunaꞌ ju istꞌaꞌisraelitanin chai ju jantu israelitanin chai ju xalackꞌajin ucxtinin.
\v 16 Chai quitꞌin ju acmalacasuniyaꞌ ni tasqꞌuini ni camakꞌalhkꞌajnanaꞌ ni aquinaviniyaꞌ ju quilhichꞌalhcat. ―Chunch ju junicalh ju Ananías.
\p
\v 17 Pus ju Ananías alh laꞌixchakaꞌ ju Judas junta ixtanun ju Saulo. Chai acsni tanucha mucꞌanilh ixlacmacaꞌ laꞌixꞌucxni ixlakchulh ju Saulo chai chani juni:
\p ―Quilakꞌau Saulo yuchi ju kꞌai quiꞌucxtinꞌan Jesús ju talacasunin ju lacati junta ixtꞌantꞌa. Chai yuchi ju xaquimalakachanitachin ni laich alacꞌavananchꞌokꞌoyaꞌ chai laich calhinonaꞌ ju Spiritu Santu lamiꞌatsucunti.
\p
\v 18 Chai ju acsnich lana makꞌosucalh ju snapapa ataputsꞌi ju ixjucꞌalh laꞌixlakchulh. Acsnich ju lai xaꞌalacꞌavanan. Pus ju acsnich ju Saulo taxtulh. Quimakpaxacalh.
\v 19 Chai astan ju Saulo vailh chai kꞌachanchokolh ju ixlacatuna. Pus lakatꞌui lakatꞌutu avilhchan alactꞌatavi ju amachakꞌan Damasco ju vachuꞌ ixtalhilacaꞌanta ju Jesús.
\s1 Ju Saulo ajuni ju amachakꞌan Damasco ixchivinti Dios
\p
\v 20 Chai lana antsuculh ju Saulo laꞌixpujitatꞌan ju istꞌaꞌisraelitanin. Ixꞌajuni ju lapanacni ni vasalh istsꞌalh Dios ju Jesús.
\v 21 Pus tachi chun ju takꞌasmatlh va ixtalhamakꞌaninin. Ixtalaclajuni:
\p ―Ja jantu yuchi ju ani ju na ixꞌalacmamakꞌalhkꞌajni ju amachakꞌan Jerusalén ju talhilacaꞌanta ju Jesús. Chai ja jantu vachuꞌ yuchi xalhiminch ju ani ni calhiꞌaniyach tachꞌinin ju xalackꞌajin palijni ju amachakꞌan ani ju talhilacaꞌanta ju Jesús.
\p
\v 22 Pus ju Saulo lacsni lacsni palai jantu ixtalhanan acsni ixnajun ixchivinti Dios. Chai acsni lana vas amavasalanilh ju istꞌaꞌisraelitanin amachakꞌan Damasco ni Jesús yuchach ju ixnoncan camalakachatachilh ju Dios pus jantu lai tuꞌuꞌ xatamapuspitni ju chivinti.
\s1 Ju Saulo takꞌalhtaxtulh acsni ixtamakniputun ju istꞌaꞌisraelitanin
\p
\v 23 Para acsni tapasalh na lhu avilhchan pus ju israelitanin tanavilh lakatam chivinti sia yuꞌunch junta ixtanajun ni catamakniyaꞌ ju Saulo.
\v 24 Para mamachakxanicalh ju Saulo ni ixlhiꞌokxchivincan. Pus ju anuch lapanacni tontacuj chai tontatsꞌisni ixtalhistꞌacꞌa ju xamalhtich junta putaxtucan ju anuch lakꞌachakꞌan. Va ixtamakniputunch ju Saulo.
\v 25 Para ju aliꞌin ju ixtalhilacaꞌanta ju Jesús tamakꞌalhtaxtulh ju Saulo. Ixꞌalin ju lacchakaꞌ ju ixtꞌalachꞌapata ju kꞌex ju ixvi ixtalakachoko ju anuꞌ lakꞌachakꞌan. Pus tsꞌis ju taquimujulh ju Saulo lacakꞌai tankꞌalin chai lacaventana tapumaxtulh lhiꞌavinti lacakꞌex. Chai ju yuchi atsꞌalalh.
\s1 Ju Saulo ixvi ju lakꞌachakꞌan Jerusalén
\p
\v 26 Acsni tavanan chaꞌanchokolh ju Jerusalén ju Saulo pus va kꞌaixtam ixꞌalactꞌaꞌamputun ju aliꞌin ju ixtalhilacaꞌanta ju Jesús. Para ixchuxꞌan ju yuꞌunch na ixtatalhoni. Jantu ixtalacaꞌi ni vachuꞌ calhilacaꞌalh ju Jesús ju yuchi.
\v 27 Para ju Bernabé alhiꞌanilh ixtamalakachan ju Jesús. Chai ajunchalh ta yu pulaktsꞌilh ju kꞌai ucxtin Jesús ju Saulo ju lacati chai tꞌachivinilh. Vachuꞌ ajuni ni lana jantu ixtalhanan ju Saulo acsni ixꞌajuni ju amachakꞌan Damasco ixlacata ju Jesús.
\v 28 Pus ju acsnich ju Saulo lai ixꞌalactꞌaꞌalhtanan ju ixtamalakachan ju Jesús. Chai tavilh ju lakꞌachakꞌan Jerusalén.
\v 29 Chai ixꞌajuni ju amachakꞌan anch ixlacata ju kꞌai ucxtin Jesús. Chai ixꞌalactꞌachivinin chai ixꞌalactꞌalalhajai lacachivinti ju istꞌaꞌisraelitanin ju ixtachivinin ju lhigriego. Para ju yuꞌunch va ixtapastꞌacꞌa ixmaknica.
\v 30 Para acsni tacꞌatsa ju ixlhiꞌalakꞌavin laꞌixmacni Jesús pus takꞌailhiꞌalh ju Saulo ju lakꞌachakꞌan Cesarea. Tamalakacha ju lakꞌachakꞌan Tarso.
\p
\v 31 Pus ju acsnich tamamacta ju ixꞌalhixcajicaꞌan tachi chun ju ixtalhilacaꞌanta ju kꞌai ixꞌucxtinꞌan Jesús ju amachakꞌan ju xaꞌestado Judea chai ju xaꞌestado Galilea chai ju xaꞌestado Samaria. Chai ju yuꞌunch lana ixlhichux ixꞌalhunutꞌan talhilacaꞌalh ju kꞌai ixꞌucxtinꞌan Jesús. Na ixtaquiclacaꞌitach ju tuchi ixnajunta ju Dios chai na ixtatalhavai. Yuchach ju Spiritu Santu ju ixꞌaꞌaktaijui.
\s1 Palai navicalh ju Eneas
\p
\v 32 Pus ju Pitaluꞌ lacaputocꞌakꞌo junta ixꞌalin ju ixtalhilacaꞌanta Jesús. Pus vachuꞌ alh alaktsꞌiniꞌ ju ixtalhilacaꞌanta Jesús amachakꞌan Lida.
\v 33 Chai ju anch ju Pitaluꞌ lhitajulh pumatam lapanac ju Eneas ixjuncan. Ju yuchi lakatsajin cꞌata ixma laꞌixputaman. Va ilhtuculuntach.
\v 34 Chai chani junich ju Pitaluꞌ:
\p ―Eneas Jesucristo ju palai canaviyan. Akꞌostꞌaꞌulh. Asactꞌich ju mimputaman.
\p Pus ju Eneas lana kꞌostavi.
\v 35 Pus chux ju amachakꞌan Lida chaich ju amachakꞌan Sarón talaktsꞌilh ju anuꞌ lapanac ni palaich ixnavicanta chai tamacaulh tachi ju aktsꞌiya ixtalhilanita chai talhilacaꞌalh ju kꞌai ucxtin Jesús.
\s1 Malokꞌonichokocalh ju Dorcas acsni ixnita
\p
\v 36 Pus ju acsnich ixtꞌajun ju lakꞌachakꞌan Jope pumatam chakoꞌulh ju vachuꞌ ixlhilacaꞌanta Jesús. Ju yuchi Tabita ixjuncan. Ju lacalhigriego va Dorcas ixjuncan. Pus ju anuꞌ chakoꞌulh va tachi ixnavich ju kꞌox chai ixꞌaꞌaktaijui ju quilhpatinin.
\v 37 Chai acsni ixvilhchacaꞌ ju Lida ju Pitaluꞌ pus ju anuꞌ chakoꞌulh takꞌankꞌa chai nilh. Pus ju lapanacni tapaxa chai talhiꞌalh ixlhitantalaktꞌui lacachakaꞌ. Anchach ju tamama.
\v 38 Chai ju amachakꞌan Jope ju ixtalhilacaꞌanta Jesús ni tacꞌatsa ni ixvilhcha ju Lida ju Pitaluꞌ pus tamalakachanilh pumatꞌui lapanacni. Pus ju lakꞌachakꞌan Lida vanin ixtꞌalajunita ju lakꞌachakꞌan Jope. Pus ju anuch lapanacni tatapaininilh ju Pitaluꞌ ni vatsꞌalhti caꞌalactꞌamilh.
\v 39 Pus ju Pitaluꞌ lana lacataya chai alactꞌaꞌalh ju yuꞌunch. Chai acsni tachaꞌalh ju lacachakaꞌ talhiꞌalh ixlhitantalaktꞌui lacachakaꞌ junta ixma ju lijunto. Pus lhmalanch ixtalhitakꞌaixtokta ju chakolun ju va alacnimacontilacantach. Na ixtalackꞌalhun. Ixtatꞌajun masuninin ju ixlacvestidoꞌan chai ixlacxcujuꞌan ju ixꞌanavinita ju Dorcas acsni ixtꞌajuncaꞌ.
\v 40 Para ju Pitaluꞌ alactixcoxtukꞌo. Chai ju yuchi taꞌaktsokotalh. Tsuculh tꞌachiviniꞌ ju Dios. Chai acsni lhilacaꞌanilh junta ixma ju lijunto chani juni:
\p ―Tabita akꞌostꞌaich.
\p Pus ju yuchi lana talacpokꞌa chai acsni laktsꞌilh ju Pitaluꞌ kꞌostavi.
\v 41 Pus ju Pitaluꞌ xtaknilh ixmacaꞌ. Sayaulh. Ju acsnich alactꞌasanilh ju vachuꞌ ixtalhilacaꞌanta Jesús chai ju anuch chakolun ju ixꞌalacnimacontilacantach. Alacmasunilh ju chakoꞌulh ni ixlokꞌonchokotach.
\v 42 Pus ju ani laccꞌatsakꞌocalh ixlhilacaputsꞌun ju lakꞌachakꞌan Jope. Chai na lhu ju talhilacaꞌalh ju kꞌai ucxtin Jesús.
\v 43 Pus ju Pitaluꞌ na lakalhu avilhchan ixvilhcha ju lakꞌachakꞌan Jope laꞌixchakaꞌ pumatam lapanac ju Simón ixjuncan. Ju yuchi va ixlakꞌoxiniꞌ axtꞌakꞌan ixjunita.
\c 10
\s1 Pitaluꞌ chai Cornelio
\p
\v 1 Pus ixꞌalin pumatam lapanac amachakaꞌ Cesarea ju Cornelio ixjuncan. Ju yuchi xaꞌucxtin tam cientos taropajni ixjunita chai ju anuch taropajni Italiano ixꞌajuncan.
\v 2 Pus ju yuchi chai chux ju ixtatanumanalh laꞌixchakaꞌ ixtalhilacaꞌanta ju Dios chai ixtalakꞌayai. Chai ju yuchi na lhu ixꞌaxtakni ju tumin ju quilhpatinin sia yuꞌunch ju israelitanin mas jantu israelita ixjunita ju yuchi. Chai va tachi ixtꞌachivinin ju Dios.
\v 3 Pus lakatam avilhchan tachi lakatꞌutu hora atokꞌoxanaꞌ ju Cornelio laktsꞌilh pumatam ixꞌanquilh ju Dios. Para tachi ju va laꞌixꞌaklakꞌavanti ju laktsꞌilh. Chai ju anuꞌ anquilh mapakaꞌulh ju Cornelio.
\v 4 Pus ju Cornelio lana va skotutukꞌalhi chai talhanakꞌalhtailh:
\p ―Tijuch ji quiꞌucxtin.
\p Chai chani juncanch ju Cornelio:
\p ―Ju Dios pastacnikꞌo acsni ixtꞌachꞌivinin ju yuchi chai ixlacata ju tumin ju pꞌuꞌaktꞌaiꞌui ju quilhpatinin.
\v 5 Pus ju chavai amalakꞌachꞌatꞌich ju lapanacni lakꞌachakꞌan Jope. Chach taꞌalh tꞌasaniniꞌ pumatam lapanac ju Simón juncan. Ju yuchi vachuꞌ Pitaluꞌ juncan.
\v 6 Ju yuchi tꞌajun laꞌixchakaꞌ pumatam ju vachuꞌ Simón juncan. Yuchi ju alakꞌoxiniꞌ axtꞌakꞌan. Ju yuchi amachakꞌananta vanin laꞌixquilhtuꞌ alama. Pus yuchi ju cajunanch tuchi ju anaviyaꞌich.
\p
\v 7 Pus acsni anchokolh lactꞌiyan ju anuꞌ anquilh ju quitꞌachivininchilh ju Cornelio pus ju yuchi tꞌasanilh pumatꞌui ixlapanacni chai pumatam ixtaropa ju ixnavini ixlhichꞌalhcat. Pus ju anuꞌ taropa vachuꞌ ixlhilacaꞌanta ju Dios.
\v 8 Pus ju Cornelio ajunkꞌo tuchi ixtapasata chai amalakachalh ju lakꞌachakꞌan Jope.
\p
\v 9 Ni tuncunchokopa ixtaꞌanta ju lacati chai acsni ixkꞌatuncumputun pus vanin ixtachaꞌamputun ju lakꞌachakꞌan Jope. Pus lana acsnich ju tocꞌalh lacasotea ju Pitaluꞌ. Va ixtꞌachivimputun ju Dios.
\v 10 Para slivasalh na ixchavanita chai na ixvemputunch. Chai acsni ixtꞌoncan lakꞌoxinica ju ixvaiti pus ju yuchi lana laktsꞌilh tuꞌuꞌ tachi ju va laꞌixꞌaklakꞌavanti.
\v 11 Laktsꞌilh ju lactꞌiyan ni talhtekꞌa chai takꞌalhtajulh tuꞌuꞌ tachi lakatam kꞌai pumpuꞌ. Makꞌastutꞌatꞌi ixchꞌinicanta. Takꞌalhtaju tus lacatꞌun junta ixvi ju Pitaluꞌ.
\v 12 Chai laktsꞌilh ni anch ju ixtatanumanankꞌo tachi chun ju atapacxat ju alhtanan ju ani lacamunutpaꞌ. Vachuꞌ ixtatanumanalh ju lu chaich ju tsꞌokꞌo.
\v 13 Chai ju acsnich ju Pitaluꞌ kꞌasmatlh ixchivinti pumatam ju chani juni:
\p ―Akꞌostꞌaꞌulhch ji Pitaluꞌ. Amaknitꞌich ju ani tayanalh atapacxat. Aꞌuyaꞌich.
\p
\v 14 Para ju Pitaluꞌ chani akꞌalhtayanalh:
\p ―Jantu ji quiꞌucxtin. Ju quitꞌin jantu tavanan icꞌuta tuꞌuꞌ ju jantu lai ucan tachi ju iclhilanitau ju quijnan ju israelitanin icjuntau.
\p
\v 15 Pus xakꞌalachokocalh ju Pitaluꞌ ixlhipaktꞌuich. Chanich ju juni:
\p ―Ju najuntach ju Dios ni lai ucan tun va anau ni jantu lai ucan.
\p
\v 16 Pus paktꞌutu ju junicalh chunch chai astan ju kꞌai pumpuꞌ lhiꞌanchokocalh ju lactꞌiyan.
\v 17 Pus ju Pitaluꞌ ispastacvi laꞌixꞌalhunut tuchi ju canomputulh ju anuꞌ ju laktsꞌilh tachi ju va laꞌixꞌaklakꞌavanti. Pus lana acsnich ju talhasacminilh ju ixchakaꞌ ju Simón ju lapanacni ju ixꞌamalakachanicantachilh ju Cornelio. Ixtachaꞌanta ju laꞌixquilhtalacxtutu ju ixchakaꞌ ju Simón.
\v 18 Tachivinilh. Taꞌasacminilh ni anch catavi ju Simón ju vachuꞌ juncan Pitaluꞌ.
\v 19 Pus ju Pitaluꞌ vana ixtꞌajun pastacnaꞌ ju tuchi ixlaktsꞌinta tachi ju va laꞌixꞌaklakꞌavanti. Pus ju acsnich lana chani junilh ju Spiritu Santu:
\p ―Ixpumatꞌutuꞌan lapanacni tapuxcoyan.
\v 20 Akꞌostꞌaꞌulh. Atꞌakꞌalhtꞌaꞌutꞌich. Atꞌapꞌinchich chai tun va atꞌilhamakꞌanin ni quitꞌin ju icꞌamalakachanitachin.
\p
\v 21 Pus ju acsnich ju Pitaluꞌ alakꞌalh ju ixtamalakachan ju Cornelio chai chani ajuni:
\p ―Quitꞌinch ju quilapuxcoyau. Tijuch ju quilhilalakmintauch.
\p
\v 22 Chai ju yuꞌunch chani tajuni:
\p ―Yuchi ju Cornelio ju quintamalakachanitachin. Ju yuchi xaꞌucxtin tam cientos taropajni junita. Chai ju yuchi na kꞌox lapanac junita chai na lhilacaꞌanta ju Dios. Chai tachi chun ju israelitanin na kꞌox lapanac talhiulai. Pus ju yuchi ma malakachanicanchilh ju ixꞌanquilh Dios chai ju yuchi ma juni ni ma catꞌasaniyan ni ma laich cakꞌasmatnin ju tuchꞌi aꞌunaꞌich. ―Chunch tajuni ju Pitaluꞌ ju anuch lapanacni.
\p
\v 23 Pus ju acsnich ju Pitaluꞌ ajunich ni catatanu pulacni. Chai anch ju talakacujlich. Chai acsni tuncunchokopa pus alactꞌaꞌalh. Vachuꞌ tamakꞌalh aliꞌin amachakꞌan Jope ju vachuꞌ ixtalhilacaꞌanta Jesús.
\p
\v 24 Acsni alakatamch avilhchan jumpa tatanucha ju lakꞌachakꞌan Cesarea. Pus ju Cornelio na ixꞌalacpacxanvi. Ixꞌalactꞌasanitach ju ixlhiꞌalakꞌavin chai ju aliꞌin ju palai kꞌox ixꞌamigojni ixtajunita.
\v 25 Chai acsni chaꞌalh ju Pitaluꞌ pus taxtuchilh ju Cornelio ni camacꞌamiyaꞌ. Taꞌaktsokotanilh vanin laꞌixchꞌajaꞌ. Va ixlakꞌayaputun.
\v 26 Para ju Pitaluꞌ makchꞌapayaulh. Chanich juni:
\p ―Atꞌaich. Ju quitꞌin vachuꞌ va iclapanac.
\p
\v 27 Pus tsuculh tꞌachiviniꞌ chai tꞌatanu laꞌixchakaꞌ. Chai ju anch alhitaju na lhu lapanacni ju ixtatakꞌaixtokta.
\v 28 Chai chani alacjuni:
\p ―Ju uxijnan cꞌatsꞌayatꞌit ni iclhilanitau ju quijnan ju israelitanin icjuntau ni talakꞌalhin cava ni actꞌalaktanu pumatam ju jantu israelita. U mas va actanu laꞌixchakaꞌ. Para ju Dios quimasunita ni jantu xamatiꞌ ju va jantu tuꞌuꞌ ixtapalhni cava. Chai jantu kꞌox ni acnaulh ni jantu ictꞌaꞌalhtanamputun xamatiꞌ.
\v 29 Pus yuchi iclhimilh acsni qꞌuintꞌasanich chai jantu tuꞌuꞌ xacꞌajuni ju xamalakꞌachꞌayachiꞌ. Chai ju chavai iclasacmiyau tuchi ju quilalhitꞌasaniyauch.
\p
\v 30 Pus ju Cornelio junich:
\p ―Lakatꞌatꞌich avilhchan xajun acsni xacvi laquinchakaꞌ. Tachi chavai hora ixjunita. Jantu tuꞌu xacꞌuta chai xactꞌajun tꞌachiviniꞌ ju Dios. Chai iclaktsꞌilh pumatam anquilh ju taya laquiꞌucxlacapuꞌ. Na slamnica ixjunita ju ixpumpuꞌ.
\v 31 Chai quijuni ni ma quinkꞌasmatnitach ju Dios acsni ictꞌachivinilh. Chai ma pastackꞌojui ju lamapainin ju xacꞌanavinita ju quilhpatinin.
\v 32 Chai quijuni ni ma acmalakachalh ju quilapanacni ju cataꞌalh ju lakꞌachakꞌan Jope. Ma chach takꞌailhiminan ju uxintꞌi. Ma anch ju tꞌaꞌun ju laꞌixchakaꞌ akꞌantam Simón ju ixlakꞌoxiniꞌ axtꞌakꞌan. Ju yuchi ma anch amachakꞌananta vanin laꞌixquilhtuꞌ alama. Chai ma acsni atꞌanaꞌ pus ma aqꞌuiꞌunaꞌ ju ixchivinti Dios. Chunch ju quijuni.
\v 33 Pus yuchi vatsꞌalhti iclhimalakachanichan ju quilapanacni. Chai na kꞌoxich ni xatꞌan. Pus ju chavai ju Dios quintalaktsꞌinan tachi chun ju quijnan ju anich icvilau chai ickꞌasmatputunau tachi chun ju chivinti ju xajunan ju Dios.
\s1 Ju Pitaluꞌ axakꞌala ju lapanacni ju ixtavilanalh laꞌixchakaꞌ ju Cornelio
\p
\v 34 Pus ju acsnich ju Pitaluꞌ chani ajuni:
\p ―Ju chavai icmachakxai ni vasalh vaklhtam chun ju alaktsꞌin ju lapanacni ju Dios.
\v 35 Va tichi lapanac cava ju lakꞌayai chai canavi ju soknicꞌa pus yuchi ju kꞌox lhiulai ju Dios. U ni quintꞌaꞌisraelita junita u ni jantu.
\v 36 Ju Dios quintamalakachanichin ju ixchivinti ju quijnan ju israelitanin icjuntau. Quintajunan ni makꞌoxamixican laꞌixꞌalhunut ju Dios acsni lhilacaꞌancan ju Jesús ni yuchach ju ixnoncan camalakachatachilh ju Dios. Yuchi ju xaꞌucxtin lhichux.
\v 37 Ju uxijnan cꞌatsꞌayatꞌitch ni ixꞌamalaninin ju Xivan chai ixꞌamakpaxanan. Chai cꞌatsꞌayatꞌit ni astan tsuculh amalaninin ju Jesús. Ju yuchi taiꞌulacha ju ixꞌamalaninti ju xaꞌestado Galilea chai lacaputocꞌakꞌo chux ju lakꞌachakꞌan junta ixtatꞌajun ju quintꞌaꞌisraelitanin.
\v 38 Ju uxijnan cꞌatsꞌayatꞌit ni Dios ju xtaknilh ju Jesús amachakaꞌ Nazaret ju Spiritu Santu ju xatanui laꞌixꞌalhunut chai ixlhiyuchi na ixꞌalin ju ixtachaput. Cꞌatsꞌayatꞌit ni va tachi ixnavitꞌajun ju kꞌox ju Jesús chai ixꞌacꞌuchꞌukꞌojui chux ju ixmamakꞌalhkꞌajni ju lhacaticuru. Lai chunch xanavi ni yuchi ju Dios ju ixtꞌaꞌalhtanan.
\v 39 Ju quijnan iclaktsꞌiuch tachi chun ju ixnavi ju Jesús ju xalacatꞌun Judea chai ju lakꞌachakꞌan Jerusalén. Para astan ju lapanacni tamakni. Tamaquilhta ju lacacurus.
\v 40 Para ju Dios malokꞌoni ixlhilakatꞌutu avilhchan chai quintamalacasunin ju quijnan.
\v 41 Para jantu chux ju lapanacni ju talaktsꞌilh. Va quijnan ju makꞌanch quintasacxtutanch ju Dios ni acnonauch ju tuchi iclaktsꞌintauch. Pus ju quijnan ictꞌavajiuch ju yuchi acsni tavanan lokꞌonchokolh laꞌixꞌaninti.
\v 42 Chai yuchi ju pꞌas quintajunan ni acꞌajunau tachi chun ju lapanacni ni Dios ju ulata ju Jesús ni yuchi ju calaktsꞌintanuyach ju lapanacni ju titꞌajuncaꞌ chai ju tanitach.
\v 43 Yuchi ju ixtalhichivinin chux ju makꞌaniya lapanacni ju ixtanajun ixchivinti Dios. Ju yuꞌunch ixtanajun ni ma camacꞌacxanicanaꞌ ixtalakꞌalhin va tichi chavaich ju calhilacaꞌanaꞌ ju Jesús. Ju Dios ma camacꞌacxaniyaꞌ va ixlacata ni nilh ju Jesús. ―Chunch ju ajuni ju Pitaluꞌ.
\s1 Ju lapanacni ju jantu israelitanin taꞌamaklhtayanalh ju Spiritu Santu
\p
\v 44 Chai acsni ixtꞌajuncaꞌ chiviniꞌ ju Pitaluꞌ pus lana alakmilh ju Spiritu Santu tachi chun ju ixtatꞌajun kꞌasmatnin ju ixchivinti.
\v 45 Pus ju israelitanin ju ixtalhilacaꞌanta ju Jesús ju ixꞌalactꞌamintach ju Pitaluꞌ na talhamakꞌaninilh ni axtaknicalh vachuꞌ ju Spiritu Santu ju yuꞌunch ju jantu israelitanin ixtajunita.
\v 46 Pus ni ixtachivinin atumpa chivinti ju jantu ixtamispai chai ixtanajun ni yuchach ju xakꞌai ju Dios yuchi ixtalhinajun ju ixꞌalactꞌaminta ju Pitaluꞌ ni taꞌamaklhtayanalh ju Spiritu Santu ju anuch lapanacni.
\v 47 Ju acsnich ju Pitaluꞌ ajunich ju ixꞌalactꞌaminta:
\p ―Jantu lai xamatiꞌ catilhikꞌalhtsꞌaulh ju xcan ni jantu cataꞌakpaxlh ju anich tavilanalh ni vachuꞌ taꞌamaklhtayanalh ju Spiritu Santu tachi ju quijnanꞌan.
\p
\v 48 Pus ju acsnich ju Pitaluꞌ alhinaulh ixꞌamakpaxaca ni ixtalhilacaꞌanta ju kꞌai ucxtin Jesús. Chai astan ju yuꞌunch tatapaininilh ju Pitaluꞌ ni catolhcha lakatꞌui lakatꞌutu avilhchan.
\c 11
\s1 Ju Pitaluꞌ ajuni ju lapanacni amachakꞌan Jerusalén tuchi ixtapasata
\p
\v 1 Pus ju ixtamalakachan ju Jesús chai ju aliꞌin ju vachuꞌ ixtalhilacaꞌanta Jesús ju ixtavilanancha ju xaꞌestado Judea takꞌasmatlh ni vachuꞌ talacaꞌinilh ixchivinti Dios ju yuꞌunch ju jantu israelitanin ixtajunita.
\v 2 Chai acsni tavanan anchokolh ju Jerusalén ju Pitaluꞌ pus ju aliꞌin istꞌaꞌisraelitanin ju vachuꞌ ixtalhilacaꞌanta Jesús tatꞌalakꞌailh.
\v 3 Tajunich:
\p ―Tajuch ni va xalakpꞌinch ju lapanacni ju jantu quintꞌaꞌisraelitaninꞌan tajunita chai laich va lakputam xaꞌalactꞌavaꞌin.
\p
\v 4 Pus ju Pitaluꞌ lana ajunkꞌo tachi chun ju ixtapasatach. Alacjuni:
\p
\v 5 ―Ju quitꞌin xacvilhcha ju lakꞌachakꞌan Jope. Xactꞌajun tꞌachiviniꞌ ju Dios. Chai iclaktsꞌilh tuꞌuꞌ tachi ju va kꞌai pumpuꞌ. Makꞌastutꞌatꞌi ixchꞌinicanta. Chai makꞌalhtajucalh ju lactꞌiyan.
\v 6 Pus ju quitꞌin na icskotutulh chai iclaktsꞌilh ni anch ixtatajumanalh ju atapacxat chai ju maktilin chai ju lu chai ju tsꞌokꞌo.
\v 7 Chai ickꞌasmatlh lakatam chivinti junta quijuni ni ma ackꞌostavi. Ma acꞌamaknilh ju anuꞌ ixtayanalh atapacxat chai ma acꞌulh.
\v 8 Para ju quitꞌin icjunich: “Jantuch ji quiꞌucxtin. Ju quitꞌin jantu tavanan icquilhcꞌatsata ju tuꞌuꞌ ju jantu lai ucan tachi ju iclhilanitauch ju quijnan ju israelitanin icjuntau”. Chunch icjuni.
\v 9 Para aktam quinkꞌalhtaichokocalh tus lactꞌiyan. Chai quijuni ni ma jantu acnaulh ni jantu lai ucan tuꞌu acsni najuntach ju Dios ni lai ucan.
\v 10 Paktꞌutuch xaquijuni ju Dios ju chunch chai astan lhiꞌanchokocalh ju anuꞌ kꞌai pumpuꞌ ju lactꞌiyan.
\v 11 Pus ju acsnich lana tachilh ixpumatꞌutuꞌan lapanacni ju lacachakaꞌ junta xacvi. Amachakꞌan Cesarea ixtajunita. Quiꞌamalakachanicanchilh.
\v 12 Pus ju Spiritu Santu quijunilh ni acꞌalactꞌaꞌalh chai jantu actilhamakꞌaninilh. Pus icꞌalactꞌaꞌalh chai ju ani ixpumachaxanꞌan quiꞌalakꞌavinꞌan quintatꞌaquilalh. Pus ictanuchauch laꞌixchakaꞌ ju anuch lapanac ju xaquintꞌasanita.
\v 13 Chai ju yuchi quintajunin ni ma ixlaktsꞌinta pumatam anquilh laꞌixchakaꞌ. Ma anch ixya chai ma juni ni ma camalakachalh ju ixlapanacni ni ma cataꞌalh ju lakꞌachakꞌan Jope. Ma calhinaulh quintꞌasanica ju quitꞌin.
\v 14 Ma quitꞌin ju acꞌajunach ju chivinti ju lai cataputakꞌalhtaxtuyaꞌ ju yuchi chai chux ju tatanun laꞌixchakaꞌ.
\v 15 Chai acsni ictsuculh chiviniꞌ pus vachuꞌ alakmilh ju Spiritu Santu ju yuꞌunch tachi ju quintalakminch ju quijnanchꞌan ju makꞌanch.
\v 16 Pus ju acsnich icpastaclich ju ixchivinti ju quiꞌucxtinꞌan Jesús acsni quintajunin ni ma slivasalh amakpaxanalh lacaxcan ju Xivan. Para ju quijnan ma acꞌamaklhtayananau ju Spiritu Santu tachi ju aliꞌin taꞌamaklhtayanalh ju xcan acsni taꞌakpaxlh. Ma chunch quintajunin ju Jesús.
\v 17 Pus Dios ju alacxtaknilh vachuꞌ ju Spiritu Santu ju yuꞌunch tachi ju quintaxtaknitan ju quijnanꞌan acsni lhilacaꞌantauch ju quiꞌucxtinꞌan Jesucristo. Chai ni chunch ju xalai pus tis chavaich ju quitꞌin ni lai acsaspitlh ju Dios. ―Chunch ajuni ju lapanacni ju Pitaluꞌ.
\p
\v 18 Pus acsni takꞌasmatlh junima chivinti lana sek tatavi ju ixtamalakachan ju Jesús chaich ju aliꞌin. Tatsuculh lakꞌayanin ju Dios. Chai tanaulh:
\p ―Ni sala chunch ju xatapasai pus ju Dios aktsꞌiya lacasqꞌuin ni vachuꞌ caꞌalilh ju isꞌatsucuntiꞌan ju lactꞌiyan ju yuꞌunch ju jantu israelitanin tajunita acsni va catamacaulh ju ixꞌalactuꞌuntiꞌan.
\s1 Ju lapanacni amachakꞌan Antioquía talhilacaꞌalh ju Jesús
\p
\v 19 Acsni tavanan maknicalh ju Stipan pus tsucucalh mamakꞌalhkꞌajninin ju aliꞌin ju vachuꞌ ixtalhilacaꞌanta ju Cristo chai taꞌatsꞌalalh ju yuꞌunch. Ju aliꞌin sia yuꞌunch taꞌalh tus laxalacatꞌun Fenicia chai ju xalacatꞌun Chipre chai ju lakꞌachakꞌan Antioquía. Pus ju anch jantu xamatiꞌ ixtajuni ju ixchivinti Dios. Va yuꞌunch ju istꞌaꞌisraelitanin.
\v 20 Para ju sia lhiyuꞌunch ixtamakminta vachuꞌ amachakꞌan Chipre chai Cirene. Pus ju yuꞌunch acsni tatanucha ju lakꞌachakꞌan Antioquía vachuꞌ alacjuni ju jantu israelitanin ni laich catatakꞌalhtaxtulh chai jantu cataꞌalh ju lacajipi ni catalhilacaꞌalh ju kꞌai ucxtin Jesús.
\v 21 Pus ju kꞌai ucxtin Jesús na alacꞌaktaijulh chai ixlhiyuchi na pumalhu tamacaulh tachi aktsꞌiya ixtalhilanitach chai talhilacaꞌalh ju kꞌai ixꞌucxtinꞌan Jesús.
\p
\v 22 Pus acsni takꞌasmatcha ju amachakꞌan Jerusalén ju vachuꞌ ixtalhilacaꞌanta Jesús ju tuchi ixtꞌajun tapasanaꞌ ju lakꞌachakꞌan Antioquía pus lana tamalakachalh ju Bernabé ni caꞌalh ju anch.
\v 23 Chai acsni chaꞌalh ju yuchi pus laktsꞌilh ni na lhu ixꞌaꞌaktaijuta ju Dios laꞌixꞌamapaininti chai na lhikꞌachalh. Chai alakmapꞌaksilh ixchuxꞌan ni ixlhichux ixꞌalhunutꞌan catachꞌakꞌokꞌakꞌalhilh ju kꞌai ixꞌucxtinꞌan Jesús.
\v 24 Ju Bernabé na kꞌox lapanac ixjunita chai ju Spiritu Santu ixlhinonkꞌojui laꞌisꞌatsucunti chai ixlhichux ixꞌalhunut ixlhilacaꞌanta ju Jesús. Pus ju lapanacni acsni takꞌasmatnilh ju ixchivinti na lhu talhilacaꞌalh ju kꞌai ucxtin Jesús.
\p
\v 25 Pus ju astanch ju Bernabé taxtulh. Alhch ju lakꞌachakꞌan Tarso. Alh puxconaꞌ ju Saulo. Chai acsni lhitajucha tꞌamilh ju yuchi ju lakꞌachakꞌan Antioquía.
\v 26 Chai tam cꞌata tatꞌatolhcha ju amachakꞌan anch ju ixtalhilacaꞌanta ju Jesús. Chai na lhu lapanacni amalanicalh ixchivinti Dios. Pus ju lakꞌachakꞌan Antioquía anchach ju pꞌulhnan alhimapakaꞌucanchalhch ju ixtalhilacaꞌanta Jesús laꞌixtapakaꞌut ju Cristo.
\p
\v 27 Chai acsni ixvilhcha ju Bernabé ju Antioquía pus tataxtucha ju Jerusalén ju lapanacni ju ixtanajun ixchivinti Dios. Tamilh ju lakꞌachakꞌan Antioquía.
\v 28 Pus ju pumatam sia yuꞌunch Agabo ixjuncan. Chai lakatam avilhchan acsni ixtatakꞌaixtokta ju ixtalhilacaꞌanta Jesús pus ju yuchi taya chai ju Spiritu Santu juni ni caꞌajunilh ju lapanacni ni caꞌalinaꞌ ju kꞌai chavan ixlhilacaputsꞌun ju lacamunutpaꞌ. Chai vasalh chunch ju tapasalh acsni kꞌai ucxtin ixjunita ju Claudio.
\v 29 Pus ju ixtalhilacaꞌanta Jesús ju amachakꞌan Antioquía tanaulh ni catamakꞌaixtꞌokꞌaꞌ ju tumin ju laich caꞌaxtaknicanaꞌ ju amachakꞌan Judea ju vachuꞌ ixtalhilacaꞌanta Jesús. Ixtanajun ni pumatamin pumatamin caxtꞌakꞌaꞌ tachi ju ixmaktasuich.
\v 30 Pus chunch ju tanavi. Chai tamalakachalh ju Bernabé chai ju Saulo ni catalhiꞌalh ju tumin chai cataxtaknilh ju xalackꞌajin ju ixtalhinajun sia yuꞌunch ju ixtalhilacaꞌanta Jesús.
\c 12
\s1 Maknicalh ju Jacobo chai tꞌalhnucalh ju Pitaluꞌ
\p
\v 1 Ju acsnich avilhchan ju kꞌai ucxtin Herodes tsuculh amamakꞌalhkꞌajniniꞌ ju aliꞌin ju ixtalhilacaꞌanta Jesús.
\v 2 Ju yuchi lhinaulh ixmaknica ju Jacobo ixlakꞌau ju Xivan. Maknicalh lacaspada.
\v 3 Chai acsni laktsꞌilh ni na kꞌoxich talhiula ju israelitanin pus vachuꞌ lhinaulh ixchꞌapaca ju Pitaluꞌ. Pus ju acsnich xacꞌatan ixjunita acsni ixtaꞌui ju xkapavati ju jantu ixtalhiyajuta ju xatꞌin.
\v 4 Pus acsni tachꞌin navicalh ju Pitaluꞌ lana tꞌalhnucalh. Chai quilhmaktꞌatꞌi taropajni ju ixtalhistꞌacꞌa. Pumatꞌatꞌin ju xalhcayocanta. Ju kꞌai ucxtin ixnajunta ni astan caꞌixmaxtulh chai laꞌixꞌucxlacapuꞌan ju lapanacni caꞌixmakꞌosaspitlh chai caꞌixlhinaulh ixmaknica. Ixnajunta ni acsnich ju chunch ixlalh acsni ixtapasata ju anuꞌ cꞌatan acsni ixtaꞌui ixborregoꞌan ju israelitanin ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya ixlacpaꞌitniꞌan.
\v 5 Pus ju taropajni na kꞌox ixtalhistꞌacꞌa ju Pitaluꞌ junta ixtꞌalhnucanta. Para ju lapanacni ju ixtalhilacaꞌanta Jesús va tachi ixtatapainini ju Dios ixlacata ju yuchi.
\s1 Ju Dios maxtulh ju Pitaluꞌ lacapulachꞌin
\p
\v 6 Pus ju anuꞌ atatsꞌisni acsni ixnajunta ju Herodes ni camaxtuyaꞌ ju Pitaluꞌ ni catuncunach pus ju Pitaluꞌ ilhtatai. Pictutamin ixtamanalh ju taropajni. Chai ju Pitaluꞌ ixmakchꞌicanta lacalakatꞌui cadena. Chai ju aliꞌin ju ixtalhistꞌacꞌa ixtayanalh laꞌixquilhtalacxtut ju pulachꞌin.
\v 7 Pus lana chincha pumatam ixꞌanquilh ju kꞌai ucxtin Dios chai na putuncujun va ju lacapulachꞌin. Pus ju anquilh piclalh ju Pitaluꞌ laꞌixpakꞌaxtiꞌ. Macuju chai chanich juni:
\p ―Akꞌostꞌaꞌulhch vatsꞌalhti.
\p Pus ju cadena ju ixpumakchꞌicanta lacpatajunilh laꞌixmacaꞌ ju Pitaluꞌ.
\v 8 Chai ju anquilh chani junich ju Pitaluꞌ:
\p ―Alakꞌoxitꞌich ju micinturón. Achꞌantꞌanutꞌich ju minchꞌanxtꞌakꞌan.
\p Chai chunch ju navilh ju Pitaluꞌ. Chai junichokocalh ju Pitaluꞌ:
\p ―Amakꞌanchꞌitꞌich ju mimakatanut. Aqꞌuinchꞌakꞌokꞌach.
\p
\v 9 Pus ju Pitaluꞌ tꞌataxtulh ju anquilh. Chꞌakꞌokꞌalh. Para ju yuchi jantu iscꞌatsai ni vasalh cava ju tuchi ixnavi ju anquilh. Ju yuchi va ixnajunch ni ca va aklakꞌavanalh.
\v 10 Pus tatapasalh junta ixtayanalh ju taropajni ju alhistacnin chaich ju alacatam junta ixtayanalh ju alhistacnin. Chai tachaꞌalh laxamalhtich si tsasnat junta putaxtucan lacapulachꞌin. Puꞌancan ju lakꞌachakꞌan. Chai ju anuꞌ malhtich va isꞌakstu talhtekꞌa chai ju yuꞌunch tataxtulh. Taꞌalhtanalh tus tachaꞌalh junta kꞌankꞌatꞌiyui ti chai ju acsnich ju anquilh lana macaulh ju Pitaluꞌ.
\v 11 Ju acsnich chilh ju ixꞌatalacpastꞌacꞌat ju Pitaluꞌ chai ju yuchi chani naulh:
\p ―Ju chavai icmachakxai ni slivasalhch ni xamalakachayachilh ju ixꞌanquilh ju quiꞌucxtin Dios chai quimakꞌalhtaxtulh laꞌixmacaꞌ ju Herodes chai jantu chunch actitapasayaꞌ ju chavai tachi ju ixtalacasqꞌuin ju aliꞌin quintꞌaꞌisraelitanin.
\p
\v 12 Acsni pastaclh ju chunch ju Pitaluꞌ pus alh laꞌixchakaꞌ ju Malia ixnati ju Xivan ju vachuꞌ ixjuncan Marcos. Ju anch na lhu ixtatakꞌaixtokta. Ixtatꞌajun tꞌachivinin ju Dios.
\v 13 Chai acsni salh ju xamalhtich lacakꞌex ju ixvi lacati pus taxtuchilh pumatam atsiꞌ ju Rode ixjuncan. Va ismispaputun tichi chavaich ju ixya.
\v 14 Chai ju yuchi ni kꞌasmatnilh ixchivinti ju Pitaluꞌ pus lana mispalh ni yuchi. Para ni na ixkꞌachan pus jantu lhimalhtekꞌakꞌo ju malhtich. Lana atsꞌalatanuchokolh lacachakaꞌ. Quixtaklh ju chivinti ni Pitaluꞌ ixya lacamalhtich.
\v 15 Para ju yuꞌunch va ixtajunich:
\p ―Va lakꞌachꞌapꞌui ju uxintꞌi.
\p Para ju yuchi pꞌas ixnajun ni vasalh yuchi. Pus ju acsnich ju yuꞌunch ixtanajunch:
\p ―Ca va yuchi ju anquilh ju lhistꞌacꞌa ju Pitaluꞌ.
\p
\v 16 Pus ju Pitaluꞌ tailhiꞌalh isaca ju malhtich. Chai acsni xcayama tamalhtekꞌanilh talaktsꞌilh chai talhamakꞌaninilh.
\v 17 Para ju yuchi atamacyonilh ni va sekch catataya. Chai tsuculh ajuniniꞌ tachi ju navilh ju kꞌai ixꞌucxtinꞌan Dios acsni maxtulh lacapulachꞌin. Chai alacjuni ni catamacꞌatsanilh ju Jacobo chaich ju aliꞌin ju ixtalhilacaꞌanta Jesús. Chai acsni nonkꞌo ju ani ju Pitaluꞌ pus taxtulh. Ampa lhilacatam.
\p
\v 18 Acsni tunculhch jantuch va ti lacatsꞌunin alilh ju ixtalhantiꞌan sia yuꞌunch ju taropajni tuchi amapasalh ju Pitaluꞌ.
\v 19 Pus ju Herodes lhinaulh ixpuxcajuca ju Pitaluꞌ para jantu talhitaju. Ju acsnich ju Herodes makꞌosaspitlh ju alhistacnin chai ni jantu lai xatajuni tuchi xatapasai pus lhinaulh ixꞌamaknica. Chai astan ju Herodes taxtulh ju xaꞌestado Judea. Alhch ju lakꞌachakꞌan Cesarea. Anch ju tolhcha.
\s1 Nilh ju Herodes
\p
\v 20 Pus ju amachakꞌan Tiro chai Sidón anch ixtaꞌi ju ixvaitiꞌan laꞌixtꞌun ju kꞌai ucxtin Herodes. Para ju acsnich ju Herodes na ixꞌaxcajich. Pus ju yuꞌunch talakmilh ju Herodes chai tanavilh ixꞌamigoꞌan ju Blasto. Ju yuchi xakꞌai ixjunita ju anch laꞌixpuꞌucxtin Herodes. Pus tatꞌatakꞌoxilh ju chivinti ju yuchi ni yuchach ju catapaininilh ju kꞌai ucxtin ni cacaplich ju ixtalhkꞌamti.
\v 21 Pus ju Herodes lhcaꞌula lakatam avilhchan acsni caꞌalactꞌachivinaꞌ. Chai acsni chilh ju anuꞌ avilhchan pus ju Herodes lakchꞌi ju pumpuꞌ tachi ixtalakchꞌi ju ucxtinin. Chai tavi lacakꞌai chakaꞌ. Tsuculh aktꞌasajunuꞌ.
\v 22 Pus ju ixtalhavatꞌan lapanacni pꞌas tachivinilh. Tanajunch:
\p ―Yuchi ju Dios ju chivinin. Jantiyuꞌ va quintꞌalapanacꞌan.
\p
\v 23 Pus ju acsnich pantsꞌiquis pumatam ixꞌanquilh ju kꞌai ucxtin Dios lana xtaknilh ju ixtakꞌankꞌat ju Herodes ni lai xalakꞌaꞌi ni tajunilh ju lapanacni ni Dios ixjunita. Jantu xalakꞌayai ju tucan Dios. Pus na lhu xatanui ju tsapu laꞌixpajan chai yuchach ju xamakni.
\p
\v 24 Para ixchivinti Dios ixmakpitsikꞌocanta chai na lhu ju taquiclacaꞌilh.
\p
\v 25 Pus ju Bernabé chaich ju Saulo tataspꞌitcha ju lakꞌachakꞌan Jerusalén acsni tamakꞌaxtaklh ju tumin ju ixꞌamalhiꞌanican. Tatꞌamilh ju Xivan ju vachuꞌ ixjuncan Marcos.
\c 13
\s1 Ju Bernabé chai ju Saulo taꞌalh ajuninin ju lapanacni ixlacata ju Jesús
\p
\v 1 Sia yuꞌunch amachakꞌan Antioquía ju ixtalhilacaꞌanta Jesús ixꞌalin ju lapanacni ju ixtanajun ixchivinti Dios chai ju aliꞌin amamakaꞌunin ixtajunita. Yuꞌunch ju Bernabé chai ju Simón ju ixjuncan Niger chai ju Lucio amachakaꞌ Cirene chai ju Saulo chai ju Manaén ju ixtꞌatakꞌayanaꞌ ju kꞌai ucxtin Herodes ixjunita.
\v 2 Pus ju lakatam avilhchan acsni ixtatꞌajun lakꞌayanin ju kꞌai ixꞌucxtinꞌan Dios chai ixtatascajai pus ju Spiritu Santu chani alacjuni:
\p ―Amalakꞌachꞌatꞌit ju Bernabé chai ju Saulo lacalhichꞌalhcat ju tuchi icꞌalhitꞌasanitach.
\p
\v 3 Pus ju acsnich tatascajalh aliꞌ chai tatꞌachivinichokolh ju Dios. Chai astan tamokslanilh ixmacaꞌan laꞌisꞌaktsulhꞌan chai amalakachalh lacalhichꞌalhcat.
\s1 Ju ixtamalakachan Jesús tajunilh ju amachakꞌan Chipre ixlacata ju Jesús
\p
\v 4 Pus ju Spiritu Santu alacmalakachalh ju Bernabé chai ju Saulo ju lakꞌachakꞌan Seleucia. Chai ju anch tatajulh lacabarco. Taꞌalh ju xalacatꞌun Chipre. Ju Chipre va lacatꞌicstꞌi lacatꞌun junita lacaꞌalama.
\v 5 Pus acsni tachaꞌalh ju xalacatꞌun Chipre anch ju tatacutlh ju lakꞌachakꞌan Salamina. Chai tatsuculh nonin ixchivinti Dios laꞌixlacpujitatꞌan ju istꞌaꞌisraelitanin. Pus ju Xivan ixꞌalactꞌaꞌanta ju Bernabé chai ju Saulo ni ixꞌaꞌaktaijui ju yuꞌunch.
\v 6 Talacaputocꞌakꞌo ju lakꞌachakꞌan ju alin ixlhilacaputsꞌun ju anuꞌ lacatꞌun tus tachaꞌalh ju lakꞌachakꞌan Pafos. Ju anch talhitaju pumatam lapanac ju alhicujnuꞌ ixjunita. Ju yuchi israelita ixjunita chai ixjuncan Barjesús. Pus ju yuchi va taꞌaklhtamani lapanac ixjunita. Ixꞌajuni ju lapanacni ni yuchach ixchivinti Dios ju ixnajun mas jantu.
\v 7 Pus ju yuchi ixlapanac ixjunita ju kꞌai ucxtin Sergio Paulo. Pus ju anuꞌ kꞌai ucxtin na ixꞌacꞌatsananta. Chai ju yuchi alactꞌasanilh ju Bernabé chaich ju Saulo. Va ixꞌalackꞌasmatniputun ju ixchivinti Dios.
\v 8 Pus ju anuꞌ alhicujnuꞌ ju vachuꞌ Elimas ixjuncan alactꞌalakꞌailh ju Bernabé chaich ju Saulo. Va jantu ixlacasqꞌuin ni calacaꞌilh ixchivinti Dios ju kꞌai ucxtin.
\v 9 Pus ju Saulo vachuꞌ Pablo ixjuncan chai ju Spiritu Santu ixlhinonkꞌojui laꞌisꞌatsucunti ju yuchi. Pus ju Pablo skotutulh ju anuꞌ alhicujnuꞌ.
\v 10 Chai chani juni:
\p ―Tꞌis tꞌiꞌaꞌokxchꞌokꞌonankꞌoꞌuich ju uxintꞌi. Chai navitꞌi tachi chun ju macxcai. Istsꞌalhꞌat ju lhacaticuru. Ixtꞌalaxcaiꞌat tachi chun ju soknicꞌa. Ja jantu amamactꞌayaꞌ ju ixnajunca ni jantu kꞌox ni chꞌakꞌokꞌacan ju kꞌai ucxtin Jesús.
\v 11 Pus ju chavai ju kꞌai quiꞌucxtin Dios camamakꞌalhkꞌajniyan. Jantu lai atꞌilaktsꞌi ju atuncunuꞌ tachi lakatꞌui lakatꞌutu avilhchan.
\p Pus lana soko maklakatsꞌislh chai jantu lai laktsꞌilh tuꞌuꞌ. Chai alhtanatsuculh ixpuxcajuca tichi chavaich ju camakchꞌapalhiꞌalh laꞌixmacaꞌ.
\v 12 Pus ju acsnich ju kꞌai ucxtin acsni laktsꞌilh tuchi tapasalh lhilacaꞌalh ju Jesús. Na lhamakꞌaninilh acsni tajuni ju Bernabé chai ju Pablo ixlacata ju kꞌai ixꞌucxtinꞌan Jesús.
\s1 Ju Pablo chai ju Bernabé ixtavilanancha ju Antioquía xalacatꞌun Pisidia
\p
\v 13 Pus ju astan ju Pablo chai ju ixtꞌaꞌalhtanin tataxtucha ju lakꞌachakꞌan Pafos. Tatajuchokolh lacabarco. Taꞌalh ju lakꞌachakꞌan Perge laxatꞌun Panfilia. Para ju Xivan alactꞌalamacaulh. Ju yuchi anchokolh ju Jerusalén.
\v 14 Ju Pablo chai ju Bernabé tataxtuchokolh ju Perge. Tachaꞌalh tus Antioquía laxalacatꞌun Pisidia. Chai acsni chaꞌalh ju avilhchan paꞌastacni pus ju yuꞌunch tatanucha laꞌixpujitatꞌan ju istꞌaꞌisraelitanin chai tatavi.
\v 15 Chai acsni laktsꞌinkꞌocalh ju ixlhamapꞌaksin Dios chai ju ixchivinti ju makꞌaniya lapanacni ju ixtanajun ixchivinti Dios pus ju xaꞌucxtinin lacpujitat tamalakachalh chivinti junta chani tajuni ju Pablo chaich ju Bernabé:
\p ―Quintꞌalapanacni ni pꞌacxantꞌatꞌit tuꞌuꞌ chivinti ju alhimapꞌaksipꞌutꞌunatꞌit ju lapanacni laich anaꞌuntꞌit ju chavai.
\p
\v 16 Pus ju acsnich ju Pablo taya. Chꞌixlh ixmacaꞌ ni va sek catatavi ju lapanacni chai ajunich:
\p ―Quintꞌaꞌisraelitanin chai tachi chun ju uxijnan ju vachuꞌ tꞌalhoniyatꞌit ju Dios aquilakꞌasmatniuch.
\v 17 Ju quiDiosꞌan ju lakꞌayayau ju quijnanꞌan ju israelitanin juntau yuchach ju sacxtulh ju makꞌaniya quilacpaꞌitniꞌan chai na alalhava tus na lhu tava acsni ixtavilananchacaꞌ ju laxalacatꞌun Egipto mas jantu anch laꞌixtꞌunꞌan ixjunita. Chai astan yuchi ju amaxtulh ju anuch lacatꞌun laꞌixtachaput.
\v 18 Ju Dios va tastucnikꞌo tachi chun ju ixtanavi ju makꞌaniya quintꞌaꞌisraelitaninꞌan acsni ixtaꞌucxuntꞌajun tꞌupꞌuxam cꞌata junta va aseknicꞌa ixjunita.
\v 19 Chai astan malaccꞌacxa ju lapanacni amachakꞌan lakatujun lacatꞌun ju lhiCanaán. Chai ju ixlacatꞌunꞌan ju yuꞌunch axtaknikꞌo ju makꞌaniya quilacpaꞌitniꞌan.
\v 20 Astan tachi lakatꞌatꞌi cientos a tꞌupꞌuxam cꞌata ju Dios axtaknilh ju makꞌaniya quilacpaꞌitniꞌan ju xalactꞌicstꞌi ixꞌucxtinin ju talhinaulh ju sia yuꞌunch. Chunch ju tailhiꞌalh tus acsni ixtꞌajun ju Samuel ju ixnajun ixchivinti Dios.
\v 21 Ju astan tasqꞌuinlh ju kꞌai ixꞌucxtinꞌan. Pus ju Dios axtaknilh ju Saul istsꞌalh Cis. Ju yuchi ixtamaskꞌatꞌanti Benjamín ixjunita. Pus ju Saul tanulh laꞌixpuꞌucxtin tꞌupꞌuxam cꞌata.
\v 22 Chai acsni tavanan makꞌosucalh ju yuchi pus ju Dios axtaknilh ju David ju kꞌai ixꞌucxtinꞌan. Chai isꞌakstu ju Dios ju lhichivinilh ju David istsꞌalh ju Isaí. Ma naulh ni ma chunch ixjunita ju ixꞌatalacpastꞌacꞌat ju David tachi ju ixꞌanuch ju Dios. Chai ju yuchi ma canavikꞌoyach tachi chun ju calacasqꞌuinach ju Dios.
\v 23 Pus ju Dios ixꞌajunita ju makꞌaniya quilacpaꞌitniꞌan ni aquintaxtakniyan ju aquintamakꞌalhtaxtuyan ni jantu caꞌanau ju lacajipi. Yuchach ju Jesús. Chai ju yuchi acsni tavanan quitsucuchilh ju ani pus makꞌaniya ixꞌapapanatnich David va.
\v 24 Para acsni tucaꞌ ixtaiꞌulata ixlhichꞌalhcat ju Jesús pus ju Xivan ixꞌajuni ju quintꞌaꞌisraelitaninꞌan ni catamacaulh ju ixꞌalactuꞌuntiꞌan chai cataꞌakpaxlich.
\v 25 Chai acsni ixnavikꞌoputun ju ixlhichꞌalhcat ju Xivan ma chani alacjuni ju lapanacni: “Ju uxijnan nonatꞌit ni quitꞌinch ju quilapacxanau. Para jantu. Ju astan caminaꞌ pumatam ju xakꞌai chai ju quitꞌin jantu tuꞌuꞌ quintapalhni. Jantu lai actichꞌanxkꞌotlh nin mas va yuchi ju samusni ju ixchꞌanxtꞌakꞌan”. Ma chunch ju naulh ju Xivan.
\p
\v 26 Pus ji quiꞌalakꞌavin ju vachuꞌ ixꞌapapanatnich Abraham untꞌatꞌit chai tachi chun ju uxijnan ju lakꞌayayatꞌit ju Dios pus quijnanꞌan ju xtaknicantauch ju ani chivinti junta najun ta yu lai takꞌalhtaxtucan ni jantu ancan ju lacajipi.
\v 27 Pus ju ixtatꞌonachalhch ju Jerusalén chaich ju xalackꞌajinch jantu istamispaich ju Jesús tichi chavaich ixjunita. Sin catamachakxa ju ixchivintiꞌan ju makꞌaniya lapanacni ju ixtanajun ixchivinti Dios mas takꞌasmatlh acsni ixlaktsꞌincan chux avilhchan paꞌastacni. Para acsni tavanan tasqꞌuinlh ixꞌaninti ju Jesús pus isꞌakstuꞌan tamuctaxtulh tachi ixtanajun ju anuꞌ makꞌaniya lapanacni.
\v 28 Mas jantu tuꞌuꞌ talhitajunilh ixtalakꞌalhin ju tuchi lai catalhimakni para ju lapanacni tasqꞌuinilh ju Pilato ni camaknicalh ju Jesús.
\v 29 Chai acsni tamaknilh pus ju chunch uctaxtukꞌo tachi chun ju taxtokni ju ixꞌalhitsꞌokcanta ju Jesús ju makꞌanchich. Pus ju acsnich tapꞌuxlh ju lacacurus chai taquimacnu.
\v 30 Para ju Dios malokꞌonichokolh laꞌixꞌaninti.
\v 31 Chai na lakalhu avilhchan ju Jesús atalacasunilh ju yuꞌunch ju kꞌaixtam ixꞌalactꞌataxtuta ju laxaꞌestado Galilea chai ixꞌalactꞌaminta ju Jerusalén. Chai ju chavai yuꞌunch ju tajuni ju lapanacni ixlacata ju Jesús.
\p
\v 32 Chai ju quijnan vachuꞌ iclajunau ni muctaxtuta ju Dios ju tuchi ixꞌajunita ju makꞌaniya quilacpaꞌitniꞌan.
\v 33 Pus ju quijnanꞌan isꞌaskꞌatꞌan quilacpaꞌitniꞌan juntau chai laktsꞌiuch ni muctaxtulh ixchivinti Dios acsni malokꞌonichokolh ju Jesús laꞌixꞌaninti. Ju makꞌanchich ju Dios ixlhichivinin ju Jesús. Chai junta tsꞌokcanta lacasalmos capitaluꞌ lakatꞌui ma chani juni: “Quintsꞌalhꞌat ju uxintꞌi chai ju chavai icꞌamasunita ju lapanacni ni vasalh quintsꞌalhꞌat”. Ma juni.
\v 34 Vachuꞌ ju makꞌanchich ju Dios ixnajunta ni camalokꞌonichokoyaꞌ ju Jesús laꞌixꞌaninti chai jantu tavanan catinichokolh. Chunch ju ixnomputun junta ma chani juni ju Jesús ju lacaꞌatsꞌoknut: “Acxtaknikꞌoyan ju uxintꞌi tachi chun ju kꞌox. Acmuctaxtuyaꞌ tachi ju xacjunita ju David”. Ma juni.
\v 35 Vachuꞌ chunch ju nomputun lacaꞌalakatam atsꞌoknut lacasalmos junta va jun isꞌakstu ju Jesús ju chivinin. Ma chanich ju juni ju ixpai: “Ju uxintꞌi jantu alacꞌasqꞌuinaꞌ ni capuchꞌilh ju quilacatuna ju quitꞌin ni mintsꞌalh icjunita chai qꞌuimalakꞌachꞌatꞌachiꞌ ju ani”. Ma juni.
\v 36 Pus ju David chꞌalhcatnanilh ju lapanacni tachi ju junilh ju Dios. Chai astan nilh chai macnucalh tachi ju ixꞌalacmacnucanta ju ixlacpaiꞌan chai puchꞌilh ju ixlacatuna.
\v 37 Para ju ixlacatuna ju Jesús jantu puchꞌilh ni malokꞌonichokolh ju Dios.
\v 38 Pus ji quiꞌalakꞌavin tasqꞌuini ni acꞌatsꞌatꞌit ni va ixlacata ju Jesús lai macꞌacxanican ju quintalakꞌalhinꞌan. Yuchi ju iclajumputunau ju uxijnan.
\v 39 Pus tachi chun ju talhilacaꞌan ju yuchi macꞌacxanican ju ixtalakꞌalhinꞌan. Para ju talhilacaꞌan ju ixlhamapꞌaksin ju Moisés jantu tavanan catimacꞌacxanicalh ju ixtalakꞌalhinꞌan.
\v 40 Pus alaktsꞌintꞌit ju uxijnan. Tun chun atꞌapꞌasatꞌit tachi ju ixtanajuntach ju makꞌaniya lapanacni ju ixtanajun ixchivinti Dios. Ju yuꞌunch chani tanaulh:
\q1
\v 41 Ju Dios ma naulh ni ma canaviyaꞌ lakatam lhamakꞌan acsni tꞌonatꞌit.
\q1 Chai ju uxijnan ma jantu lana alacꞌaꞌiyaꞌitꞌit mas xamatiꞌ catajunin.
\q1 Pus ma alaktsꞌintꞌit ju uxijnan ju jantu tuꞌuꞌ alhiulananatꞌit. Ma alhamakꞌanintꞌit chai anitꞌit.
\m Ju Pablo ajuni ju lapanacni ni ma chunch ju naulh ju Dios ju makꞌanchich.
\p
\v 42 Chai acsni tataxtucha ju lacpujitat pus ju yuꞌunch ju jantu israelitanin ixtajunita pꞌas tasqꞌuinlh lamapainin ni laich catakꞌasmatlh ju anuꞌ chivinti alakatam avilhchan paꞌastacni.
\v 43 Chai acsni taꞌakpitsilh ju ixtaquilata ju lacpujitat pus na lhu ju israelitanin tachꞌakꞌokꞌalh ju Pablo chaich ju Bernabé. Vachuꞌ tamakꞌalh ju aliꞌin ju ixtalakꞌayai ju Dios chai ixtalacaꞌi tachi ju israelitanin mas jantu israelitanin ixtajunita. Pus ju Pablo chaich ju Bernabé ajunich ju yuꞌunch ni ixlhichux ixꞌalhunutꞌan catachꞌakꞌokꞌalh ju Dios.
\p
\v 44 Acsni paꞌastacni xajunchokoi tatakꞌaixtokkꞌo tachi chun ju lapanacni. Ixtakꞌasmatniputun ixchivinti Dios.
\v 45 Para ju israelitanin ju jantu talacaꞌilh na talhacchaꞌanilh ju Pablo acsni talaktsꞌilh ixtalhavat lapanacni ju ixtakꞌasmatniputun ixchivinti. Chai ixtanajunch ni jantu slivasalh tuchi ixnajunch ju Pablo chai ixtajunich macxcai chivinti.
\v 46 Pus ju acsnich ju Pablo chaich ju Bernabé lana jantu tatalhanalh. Alacjuni:
\p ―Aktsꞌiya istasqꞌuini ni pꞌulhnan aꞌuncꞌanaꞌitꞌit ju ixchivinti Dios ju uxijnan ju quintꞌaꞌisraelitanin untꞌatꞌit. Para ni jantu lacꞌaꞌipꞌutꞌunatꞌit chai nonatꞌit ni jantu lacꞌasqꞌuinatꞌit ju miꞌatsucuntiꞌan ju jonkꞌalhita lactꞌiyan pus ju chavai acꞌajunau ixchivinti Dios ju yuꞌunch ju jantu israelitanin tajunita.
\v 47 Chunch ju aclayau ni chunch ju quintamapꞌaksitan ju kꞌai quiꞌucxtin quincꞌan Dios. Ju yuchi ma chani quintajunan:
\q1 Ju quitꞌin icꞌulatan uxintꞌi tachi ju maclhcu ni laich alacmamachꞌakxanitꞌi ju lapanacni ju jantu israelitanin tajunita ixchivinti Dios.
\q1 Chai laich aꞌunaꞌ ju lapanacni ju tatꞌajun ixlhilacaputsꞌun ju lacamunutpaꞌ ta yu laich cataputakꞌalhtaxtulh ni jantu cataꞌalh ju lacajipi.
\m Pus ju Pablo ajuni ju lapanacni ni ma chunch ju juni ju Dios.
\p
\v 48 Pus ju yuꞌunch ju jantu israelitanin ixtajunita acsni takꞌasmatlh ju ixchivinti Pablo na talhikꞌachalh. Ixtanajun ni na kꞌox ju chivinti ixlacata ju kꞌai ucxtin Jesús. Chai talacaꞌi tachi chun ju isacxtuta ju Dios ni laich caꞌalilh ju isꞌatsucuntiꞌan ju lactiyan.
\v 49 Chai ni na lhu ju talacaꞌilh pus ju chivinti ixlacata ju kꞌai ucxtin Jesús ixmakpitsikꞌocanta ixlhilacaputsꞌun ju xalacatꞌun anch.
\v 50 Para ju israelitanin ju jantu talacaꞌilh ixchivinti Dios taꞌamaktalhkꞌamanalh ju aliꞌin chakolun ju na ixtalakꞌayai ju Dios chai ju na lackꞌoxin lapanacni ixtajunita. Vachuꞌ tamaktalhkꞌamalh ju xalackꞌajin ju anuch lakꞌachakꞌan. Pus axcaicalh ju Pablo chai ju Bernabé chai alacxcauxtucalh ju anuch lacatꞌun.
\v 51 Pus ju acsnich ju Pablo chaich ju Bernabé alacchꞌancꞌalhapꞌuxlh ju pokxni laꞌixchꞌajaꞌan. Chai ni chunch ju xatanavi pus va ixꞌajumputun ju lapanacni ni isꞌakstuꞌan catacꞌucꞌayaꞌ ixtalakꞌalhinꞌan. Jantu ixcuentaꞌan ju Pablo chai ju Bernabé. Chai astan ju yuꞌunch taꞌalh ju lakꞌachakꞌan Iconio.
\v 52 Para ju amachakꞌan Antioquía ju ixtalhilacaꞌanta ju Jesús na ixtalackꞌachan chai ju Spiritu Santu ixlhinonkꞌojui laꞌisꞌatsucuntiꞌan.
\c 14
\s1 Ju Pablo chai ju Bernabé ixtavilanancha ju lakꞌachakꞌan Iconio
\p
\v 1 Pus ju Pablo chaich ju Bernabé acsni tachaꞌalh ju lakꞌachakꞌan Iconio pus kꞌaixtam tatanucha laꞌixpujitatꞌan ju istꞌaꞌisraelitanin. Chai ni na kꞌox ju xaꞌamavasalani ju lapanacni ju chivinti ixlacata ju Jesús pus na lhu talhilacaꞌalh ju yuchi. Na lhu ju israelitanin chai ju jantu israelitanin.
\v 2 Pus ju acsnich ju israelitanin ju jantu ixtalacaꞌi taꞌamaktalhkꞌamanalh ju yuꞌunch ju jantu israelitanin ixtajunita. Tatꞌalaxcailich ju ixtalhilacaꞌanta Jesús.
\v 3 Pus ni na lhu xatalhilacaꞌan ju Jesús pus ju Pablo chaich ju Bernabé makꞌanch tatavi ju anch chai ixtamasui ju chivinti ixlacata ju kꞌai ixꞌucxtinꞌan Jesús chai lana jantu ixtatalhanan. Va ixtalhilaksi ju Dios ni yuchi ju caꞌaꞌaktaijuyach. Chai ju Dios axtaknilh ju Pablo chai ju Bernabé ixtachaputꞌan ni lai xatanavi ju tuꞌuꞌ ju laich catapucꞌatsalh ju lapanacni ni vasalh Dios ju xaꞌalacmalakachayachilh chai ixtanavi ju lhamakꞌan. Ju chunch laich catacꞌatsayaꞌ ju lapanacni ni slivasalh tachi ju ixtanajun ju Pablo chaich ju Bernabé acsni alacjuni ni na alacmapaini ju lapanacni ju Dios.
\v 4 Para ju amachakꞌan anch quilhmactꞌui ixtajunita. Ju aliꞌin ixtachꞌakꞌokꞌai ju israelitanin ju jantu ixtalhilacaꞌanta Jesús. Chaich ju aliꞌin ixtachꞌakꞌokꞌai ju ixtamalakachan ju Jesús.
\v 5 Pus ju israelitanin chaich ju yuꞌunch ju jantu israelitanin ixtajunita chaich ju xalackꞌajin ucxtinin kꞌaixtam tataiꞌula ixlacchivintiꞌan ni catamamaxanilh ju Pablo chai Bernabé. Ixtanajun ni caꞌalacatꞌalhmayach.
\v 6 Para acsni tacꞌatsa ju Pablo chaich ju Bernabé pus lana taꞌatsꞌalalh. Taꞌalh ju lakꞌachakꞌan Listra chai ju lakꞌachakꞌan Derbe ju xalacatꞌun Licaonia. Vachuꞌ talacaputocꞌalh ju aliꞌ lakꞌachakꞌanixni ju vanin ixvi.
\v 7 Ju anchach vachuꞌ alacjuni ju lapanacni ni laich catatakꞌalhtaxtulh chai jantu catitaꞌalh ju lacajipi.
\s1 Alacatꞌalhmacalh ju Pablo ju lakꞌachakꞌan Listra
\p
\v 8 Pus anch ju lakꞌachakꞌan Listra ixvi pumatam lapanac ju va ixchꞌantakꞌalhita tus laꞌixpulakꞌau. Jantu tavanan lai ixꞌalhtanan.
\v 9 Pus ju yuchi kꞌasmatnilh ixchivinti ju Pablo chai ju Pablo machakxalh ni ixlacaꞌi ju anuꞌ lapanac ni lai palaich canavi ju Dios.
\v 10 Pus yuchi pꞌas lhixakꞌala. Chanich juni:
\p ―Sokch atꞌai ju laminchꞌajaꞌ.
\p Pus ju anuꞌ lapanac alhtujnutaya chai tsuculh alhtanan.
\v 11 Pus ju acsnich ixtalhavat lapanacni talaktsꞌilh ju tuchi ixnavita ju Pablo chai talactꞌasalh. Pus ju yuꞌunch ixtachivinin ju lhilicaonia. Chai laꞌixchivintiꞌan chani ixtanajun:
\p ―Ju diosnin quintalakmintanch para tatalacasuta tachi ju va lapanacni.
\p
\v 12 Ixtanajun ni ma yuchi ju isdiosꞌan Júpiter ju Bernabé chai ju Pablo ma yuchi ju isdiosꞌan Mercurio ni yuchach ju palai lhu ixchivinin ju Pablo.
\v 13 Pus ju amachakꞌan anch ixtayajuta ju ixpujitatꞌan lacamacni chai anch ixtalakꞌayai ju isdiosꞌan ju Júpiter ixjuncan. Pus ju xapali anch alakmilh ju Pablo chaich ju Bernabé chai lhimilh ju vacax ju ixpixtumucꞌacanta ju xanti. Ju yuchi chaich ju lapanacni va ixtanajunch ni catamakniniyaꞌ ju Pablo chaich ju Bernabé ni ixtanajun ni diosnin ixtajunita.
\v 14 Para acsni tacꞌatsa ju ixtamalakachan ju Jesús yuꞌunch ju Pablo chaich ju Bernabé tuchi ixtanaviputun ju lapanacni pus lana takꞌexlh ixpumpuꞌan. Chunch ixtalai ju israelitanin acsni na macxcai ixtalhiulai ju tuꞌuꞌ. Chai ju Pablo chai ju Bernabé talakꞌalh ju lapanacni chai pꞌas ixꞌaxakꞌalai. Chai chani alacjuni:
\p
\v 15 ―Quintꞌalapanacni tꞌas ni va naviyatꞌit ju ani. Ju quijnan vachuꞌ va lapanacni icjuntau tachi ju uxijnan. Chai yuchi iclhimintau ju ani ni va iclajumputunau ni amacꞌaꞌuntꞌit ju ani taxtokni ju jantu tuꞌuꞌ ixtapalhni chai alhilacꞌapꞌitꞌitch ju Dios ju lakꞌajunta. Yuchi ju navilh ju lactꞌiyan chai ju lacatꞌun chai ju alama chai tachi chun ju alin ju anch.
\v 16 Ju makꞌanchich ju Dios alacaꞌinilh chux ju lapanacni ni catatsuculh tachi ju kꞌachanich kꞌantam kꞌantam.
\v 17 Para aktsꞌiya ixmacamin ju tuꞌuꞌ ju catalhimispalh ju lapanacni ni tꞌajun ju yuchi. Ju yuchi ixꞌanavini kꞌox ju lapanacni. Ju yuchi macamin ju xcan ju minacha lactꞌiyan. Chai quintalalhavaniyan ju quiꞌachꞌanantiꞌan chai va tachi quintaxtakniyan quivaitiꞌan chai quinkꞌachatꞌan laquiꞌalhunutꞌan. ―Chunch ju ajuni ju lapanacni ju Pablo.
\p
\v 18 Para mas ixꞌajuni chunch ju Pablo chaich ju Bernabé na xcayama tamalacaꞌinilh ju lapanacni ni jantuch caꞌamakninicalh ju vacax.
\p
\v 19 Para ju acsnich tamilh ju israelitanin ju jantu ixtalhilacaꞌanta Jesús. Ju yuꞌunch ixtamintacha ju lakꞌachakꞌanixni Antioquía chai ju Iconio. Chai ju yuꞌunch tamaktalhkꞌamalh ju ixtalhavat lapanacni chai talacatꞌalhma ju Pablo. Chai ni ixtanajunta ni nitach pus taxakꞌamaxtulh lacamacni lakꞌachakꞌan.
\v 20 Para ju aliꞌin ju vachuꞌ ixtalhilacaꞌanta Jesús acsni talacaxcꞌavitnu ju Pablo pus ju yuchi kꞌostavi. Chai alactꞌatanuchokolh ju lakꞌachakꞌan. Chai acsni tuncunchokolh pus ju Pablo tꞌaꞌalh ju Bernabé ju lakꞌachakꞌan Derbe.
\p
\v 21 Chai ju anch tajunilh ju lapanacni ni laich catatakꞌalhtaxtulh chai jantu cataꞌalh ju lacajipi ni catalhilacaꞌalh ju Jesús. Chai na pumalhu talhilacaꞌalh ju yuchi. Chai astan ju Pablo chai ju Bernabé taminchokolh ju lakꞌachakꞌan Listra chai ju lakꞌachakꞌan Iconio chai ju Antioquía.
\v 22 Chai ju lakatamin lakatamin lakꞌachakꞌan junta xatatapasatilai ixtaꞌaꞌaktaijui ju lapanacni ni palai lai catalhilacaꞌalh ju Cristo. Chai vachuꞌ ajuni ni jantu tavanan catamacaulh ju ixti Dios. Chai ajuni ni aktsꞌiya tasqꞌuini ni camakꞌalhkꞌajnanau ni tanuputunau junta lhinajun ju Dios.
\v 23 Chai tasacxtulh ju lapanacni ju catalhinonaꞌ laꞌixtalhavat ju talhilacaꞌanta ju Jesús. Chai acsni tatꞌachivinilh ju Dios chai tatascajalh pus tajunilh ju lapanacni ni ixꞌucxtinꞌan Dios ju caꞌalaclhistꞌacꞌaꞌ ni talhilacaꞌanta ju yuchi.
\s1 Ju Pablo chai ju Bernabé taꞌanchokolh ju Antioquía laxatꞌun Siria
\p
\v 24 Pus tataxtulh ju anch ju Pablo chai ju Bernabé chai tatapasatilalh ju xalacatꞌun Pisidia chai taꞌalh ju xalacatꞌun Panfilia.
\v 25 Chai tajunilh ixchivinti Dios ju amachakꞌan Perge chai astan taꞌampa tus tachaꞌalh ju lakꞌachakꞌan Atalia.
\v 26 Anchach ju tajucha lacabarco chai taꞌanchokolh ju lakꞌachakꞌan Antioquía junta ixtataxtuta acsni tataiꞌula ju ixlhichꞌalhcatꞌan. Chai acsni tucaꞌ ixtataiꞌulata pus ju lapanacni ju ixtalhinajun laꞌixpujitatꞌan ju amachakꞌan anch tatapaininilh ju Dios ju na amapaininin ni yuchi ju caꞌaꞌaktaiju laꞌixlhichꞌalhcatꞌan. Pus ju chavai ju Pablo chai ju Bernabé ixtanavikꞌota chai ixtaminchokota.
\v 27 Chai acsni tachaꞌalh ju anch pus tamakꞌaixtokkꞌo chux ju yuꞌunch ju ixtalhilacaꞌanta Jesús chai ju Pablo chaich ju Bernabé alacjuni tachi chun ju taxtokni ju xaꞌalactꞌanavi ju Dios ju yuꞌunch. Vachuꞌ ajuni ni xalakꞌaꞌini ju Dios ni vachuꞌ catalhilacaꞌanilh ju Jesús ju jantu israelitanin tajunita.
\v 28 Pus ju Pablo chaich ju Bernabé na lhu avilhchan alactꞌatavi ju vachuꞌ ixtalhilacaꞌanta Jesús ju amachakꞌan anch.
\c 15
\s1 Tatakꞌaixtoklh ju lakꞌachakꞌan Jerusalén ju xalackꞌajin
\p
\v 1 Pus ju acsnich ju aliꞌin lapanacni taminchalh ju xaꞌestado Judea. Tachilh ju Antioquía. Chai ju yuꞌunch tajuni ju ixtalhilacaꞌanta Jesús amachakꞌan Antioquía ni jantu lai catatitakꞌalhtaxtulh ni jantu caꞌachꞌucꞌunicalh ixꞌaxtꞌakꞌaꞌan ju papanin tachi ju ixꞌamalaninin ju Moisés ju makꞌanchich.
\v 2 Pus ju Pablo chaich ju Bernabé ajuni ni jantu tasqꞌuini ni chunch catalalh. Para jantu lai xaꞌamalacaꞌini ju anuch lapanacni. Chai ni jantu lai xatalakꞌoxi ju kꞌai lhamakꞌan ju anch pus asacxtucalh ju Pablo chaich ju Bernabé chaich ju aliꞌin ni cataꞌalh ju lakꞌachakꞌan Jerusalén chai catatꞌachivinchalh ju ixtamalakachan ju Jesús chai ju lapanacni ju anch.
\p
\v 3 Pus ju ixtalhilacaꞌanta Jesús yuꞌunch ju taꞌalacmalakachalh ju lapanacni ju Jerusalén. Chai ju yuꞌunch tapasatilalh ju xaꞌestado Fenicia chai ju Samaria. Chai lakatamin lakatamin lakꞌachakꞌan junta ixtatapasai pus alacjuni ju ixtalhilacaꞌanta Jesús ni vachuꞌ tamacaulh tachi ju aktsꞌiya ixtalhilanitach ju yuꞌunch ju jantu israelitanin ixtajunita chai talhilacaꞌalh ju Jesús. Pus tachi chun ju ixtalhilacaꞌanta Jesús na ixtalhikꞌachan acsni takꞌasmatlh ju chunch.
\p
\v 4 Chai ju Pablo chai ju Bernabé chaich ju aliꞌin ju ixꞌalactꞌaꞌanta acsni tachaꞌalh ju Jerusalén pus lhikꞌach amaklhtayanancalh. Na talhikꞌachalh ju ixtamalakachan ju Jesús chaich ju aliꞌin ju vachuꞌ ixtalhilacaꞌanta Jesús chaich ju ixtalhinajun laꞌixpujitatꞌan. Chai ju Pablo chaich ju Bernabé alacjuni tachi chun ju taxtokni ju xaꞌalactꞌanavi ju Dios ju yuꞌunch.
\v 5 Para ju aliꞌin fariseonin ju ixtalhilacaꞌanta ju Jesús tataya chai chani tajuni ju lapanacni:
\p ―Ju lapanacni mas jantu quintꞌaꞌisraelitaninꞌan tajunita para ni talhilacaꞌanta Jesús pus aktsꞌiya tasqꞌuini ni vachuꞌ cachꞌucꞌunicalh ju ixꞌaxtꞌakꞌaꞌan ju jokꞌatni chai catanavilh tachi ju najun laꞌixlhamapꞌaksin ju Moisés. ―Chunch ju tanaulh ju fariseonin.
\p
\v 6 Pus ju acsnich tatakꞌaixtoklh ju ixtamalakachan ju Jesús chaich ju ixtalhinajun laꞌixpujitatꞌan. Va ixtacꞌatsaputun ta yu laich catalakꞌoxi ju ani lhamakꞌan.
\v 7 Chai acsni na lhu talacchivinilh pus ju Pitaluꞌ kꞌostaya chai alacjuni:
\p ―Quiꞌalakꞌavin ju uxijnan cꞌatsꞌayatꞌit ni quisacxtulh ju Dios ju makꞌanch ni laich acꞌajuni ju yuꞌunch ju jantu quintꞌaꞌisraelitaninꞌan tajunita ta yu lai cataputakꞌalhtaxtulh chai jantu catitaꞌalh ju lacajipi. Chai ni acꞌajunilh pus vachuꞌ laich catalhilacaꞌalh ju Jesús ju yuꞌunch.
\v 8 Chai Dios ju lai laktsꞌin lakatamin alhunut. Chai yuchach ju mavasalalh ni vachuꞌ ixtalhilacaꞌanta Jesús ju yuꞌunch. Pumavasala ni vachuꞌ axtaknilh ju yuꞌunch ju Spiritu Santu tachi ju quintaxtaknitan ju quijnanꞌan.
\v 9 Ju Dios vachuꞌ amapaini ju yuꞌunch tachi ju quintamapainiyan ju quijnanꞌan. Chai vachuꞌ achꞌakꞌanilh ixꞌalhunutꞌan ju yuꞌunch acsni talhilacaꞌalh ju Jesús.
\v 10 Pus ju chavai tajuch ni jantu kꞌox lhiulayatꞌit tuchi navita ju Dios. Tajuch ni va axtꞌaknipꞌutꞌunatꞌit ju yuꞌunch ju tsꞌinqꞌui lhamapꞌaksin. Ju makꞌaniya quilacpaꞌitniꞌan nin quijnanꞌan jantu lai xanavipalau.
\v 11 Jantu kꞌox cava ni va chunch calau. Ju quijnanꞌan cꞌatsayau ni takꞌalhtaxtuyau acsni lhilacaꞌanau ju quiꞌucxtinꞌan Jesús ju ixnoncan camalakachatachilh Dios. Takꞌalhtaxtuyau ni na kꞌai ju ixꞌamapaininti ju yuchi. Chai ni chunch ju putakꞌalhtaxtuyau ju quijnanꞌan pus vachuꞌ chunch cataputakꞌalhtaxtuyaꞌ ju aliꞌin lapanacni ju jantu israelitanin tajunita. ―Chunch ju ajuni ju Pitaluꞌ.
\p
\v 12 Pus ju acsnich chux ixtalhavat lapanacni va sek taquicva. Takꞌasmatnilh ixchivintiꞌan ju Bernabé chaich ju Pablo acsni tatsuculh nonin ni Dios ju ixꞌaxtaknita ju ixtachaput ni laich xatanavi ju tuꞌuꞌ ju lai catapuꞌalacpastacnalh ju lapanacni chai laich xatanavi ju lhamakꞌan laꞌixꞌucxlacapuꞌan ju yuꞌunch ju jantu israelitanin ixtajunita.
\v 13 Pus acsni tachivinkꞌo ju Bernabé chaich ju Pablo pus ju Jacobo chanich alacjuni ju lapanacni:
\p ―Quiꞌalakꞌavin aquilakꞌasmatniuch.
\v 14 Ju Simón quintajuntan ta yu pꞌulhnan anavinilh lamapainin ju Dios ju yuꞌunch ju jantu quintꞌaꞌisraelitaninꞌan tajunita chai asacxtulh ju aliꞌin sia yuꞌunch ni laich vachuꞌ ixlapanacni catava.
\v 15 Chai ni chunch ju lai ju Dios ju chavai pus va uctaxtui ju ixchivinti ju makꞌaniya lapanac ju ixnajun ixchivinti Dios. Ju yuchi chani ju tsꞌokta:
\q1
\v 16 Ju Dios ma najun ni ma caminchokopalaꞌ astan chai ma calakꞌoxichokoyaꞌ ju ixpuꞌucxtin David ju aclatach.
\q1 Ma chunch calayaꞌ tachi ju lai pumatam lapanac ni lakꞌoxichokoi ixchakaꞌ ju taꞌaktalh.
\q1 Chai ma caꞌalinchokoyaꞌ ju catolaꞌ laꞌixpuꞌucxtin David.
\q1 Ma chunch cajunaꞌ tachi acsni sayochokocan ju tuꞌuꞌ chakaꞌ ju taꞌaktalh.
\q1
\v 17 Ma ju chunch ju yuꞌunch ju jantu israelitanin tajunita ma laich catalhilacaꞌanaꞌ ju yuchi ju kꞌai ixꞌucxtinꞌan junita.
\q1 Ma lacasqꞌuin ju kꞌai ucxtin Dios ni vachuꞌ ixlapanacni catava.
\q1
\v 18 Ma chunch ju ixnajunta ju Dios ju makꞌanchich ni laich camachakxayau ju ani taxtokni ju tꞌajun tapasanaꞌ ju chavai.
\p
\v 19 Pus ni chunch ju najunta ju Dios pus yuchi iclhinajun ju quitꞌin ni jantu calhimakchapu ju yuꞌunch ju jantu quintꞌaꞌisraelitaninꞌan tajunita ju tamacaulh tachi ju aktsꞌiya ixtalhilanita chai tachꞌakꞌokꞌata ju Dios.
\v 20 Va yuchi ni caꞌatsꞌoknuniyau ni jantu cataꞌulh ju tuꞌuꞌ ju lhakꞌailaktsꞌinicanta ju tuꞌuꞌ ju laktsꞌincan tachi dios. Chai jantu catalhitsuculh apumatam ju jantu ixꞌamachakaꞌ u jantu ixpapa. Jantu cataꞌulh ju lhivai ju va pixtuchꞌimaknicanta chai jantu cataꞌulh ju acꞌalhni.
\v 21 Chunch ju calayau ni tus makꞌanchich va tachi alin ju lapanacni ju lakatamin lakatamin lakꞌachakꞌan ju tamalani ixlhamapꞌaksin ju Moisés. Chux avilhchan paꞌastacni laktsꞌincan ju yuchi laꞌixpujitatꞌan ju quintꞌaꞌisraelitaninꞌan. ―Chunch ju ajuni ju lapanacni ju Jacobo.
\p
\v 22 Pus ju acsnich ju ixtamalakachan ju Jesús chai ju ixtalhinajun laꞌixpujitatꞌan chai chux ju aliꞌin ju ixtalhilacaꞌanta Jesús na kꞌoxich talhiula ju ixchivinti. Chai tasacxtulh ju lapanacni sia yuꞌunch ju laich caꞌalactꞌaꞌalh ju Pablo chai ju Bernabé ju lakꞌachakꞌan Antioquía. Pus tasacxtulh ju Silas chai ju Judas ju vachuꞌ ixjuncan Barsabás. Yuꞌunch ju xalackꞌajinch ixtajunita sia yuꞌunch ju ixtalhilacaꞌanta ju Jesús.
\v 23 Chai taꞌatsꞌoknunilh lakatam alhiqui junta chani tajuni ju yuꞌunch ju jantu israelitanin ixtajunita:
\p “Ju quijnan ju ixtamalakachan Jesús icjuntau chai ju quijnan ju iclhinonau laquimpujitat quincꞌan chai chux ju quijnan ju iclhilacaꞌantau ju Jesús iclamacꞌamiyau ju uxijnan ju jantu israelitanin untꞌatꞌit ju vilhchitꞌit ju Antioquía chai ju xalacatꞌun Siria chai Cilicia.
\v 24 Pus ju quijnan icꞌalakꞌalhakꞌasmatꞌauch ni ma tataxtulh ju aliꞌin ju sia quijnan chai ma taquilacha chai ma tamakꞌatsꞌankꞌaniyan ju miꞌatalacpastꞌacꞌatꞌan. Ma va tajunan ni ma tasqꞌuini ni achꞌucꞌunicꞌanatꞌit ju miꞌaxtꞌakꞌaꞌan chai ma anaviyaꞌitꞌit ju ixlhamapꞌaksin ju Moisés. Para jantu quijnan ju xacꞌamalakachayau.
\v 25 Pus yuchi na kꞌoxich xaclhilhiulayau junta xactakꞌaixtꞌokꞌau ni acsacxtuyauch ju lapanacni ju sia quijnan ju caꞌalactꞌaꞌalh ju quilakꞌauꞌan Pablo chaich ju Bernabé ju na amapainiyau. Cataꞌanchan lalaktsꞌinin ju uxijnan.
\v 26 Pus ju Pablo chai ju Bernabé na paklhu taquilata junta ixꞌamakniputuncan va ixlacata ni ixꞌajumputun ju lapanacni ixlacata ju kꞌai quiꞌucxtinꞌan Jesús ju ixnoncan camalakachatachilh ju Dios.
\v 27 Pus icꞌatꞌamalakachatauch ju Judas chai ju Silas. Chai ju yuꞌunch catamavasalaniyan tachi chun ju ani taxtokni.
\v 28 Pus ju Spiritu Santu quintamapastꞌacꞌaniyan ju quijnan ni palai kꞌox cava ni jantu tuꞌuꞌ tsꞌinqꞌui lhamapꞌaksin aclaxtakniyau ju uxijnan. Va yuchi ju ani taxtokni ju aktsꞌiya tasqꞌuini ni anavitꞌit.
\v 29 Va yuchi ni jantu aꞌutꞌit ju tuꞌuꞌ ju va ixlhikꞌailaktsꞌinicanta ju tuꞌuꞌ ju laktsꞌincan tachi dios. Chai jantu aꞌutꞌit ju acꞌalhni nin tuꞌuꞌ ju va pixtuchꞌimaknicalh. Vachuꞌ jantu atꞌatsꞌucꞌutꞌit ju jantu miꞌamachakaꞌan u mimpapaꞌan. Ni amacꞌaꞌuntꞌit ju ani taxtokni pus naviyatꞌit ju kꞌox. Va yuchach”. Chunch ju tatsꞌoklh ju lacaꞌalhiqui.
\p
\v 30 Pus ju anuch lapanacni acsni amalakachacalh pus taꞌalh ju lakꞌachakꞌan Antioquía. Chai acsni tachaꞌalh tamakꞌaixtoklh ju ixtalhavat lapanacni ju ixtalhilacaꞌanta Jesús chai axtaknilh ju anuꞌ alhiqui.
\v 31 Chai acsni talaktsꞌilh ju alhiqui pus na talhikꞌachalh ju anuꞌ chivinti junta ixnajun ni jantu tasqꞌuini ni tuꞌuꞌ atumpa catanavilh.
\v 32 Pus ju Judas chaich ju Silas vachuꞌ laich ixtanajun ixchivinti Dios. Pus na lhu xaꞌalacmapꞌaksi. Chai xaꞌalacjuni ni va lakatamch catanavilh ju ixꞌalhunutꞌan.
\v 33 Pus ju Judas chaich ju Silas tatolhcha lakatꞌui lakatꞌutu avilhchan. Astan tanaulh ni catalakꞌanchokolh ju ixtaꞌamalakachananta. Pus ju ixtalhilacaꞌanta Jesús amachakꞌan anch tamacꞌami chai tajuni ni Dios ju caꞌalhistaclh ju lacati.
\v 34 Para ju Silas tam xanonchokopalai chai jantu xaꞌanchokoi ju Jerusalén. Ju yuchi tolhkꞌalhi ju Antioquía.
\v 35 Vachuꞌ ju Pablo chaich ju Bernabé tatavilh ju Antioquía. Chai ju yuꞌunch chai ju aliꞌin va tachi taꞌalacmalanilh ju lapanacni chai taꞌalacjuni ixlacata ju kꞌai ixꞌucxtinꞌan Jesús.
\s1 Ju Pablo anchokolh ixlaktꞌui ajuniniꞌ ju lapanacni ixlacata ju Jesús
\p
\v 36 Ju astan acsni tapasalh lakatꞌui lakatꞌutu avilhchan pus ju Pablo juni ju Bernabé:
\p ―Caꞌanchokoch alaktsꞌinin ju quilhiꞌalakꞌavinꞌan laꞌixmacni Jesús ju tavilanancha chux ju lakꞌachakꞌanixni junta quijuntau ixlacata ju quiꞌucxtinꞌan Jesús. Ta tsꞌa vanach talhilacaꞌanta ju yuchi.
\p
\v 37 Pus ju Bernabé ixlacasqꞌuinta ni ixꞌalactꞌaꞌalh ju Xivan ju vachuꞌ Marcos ixjuncan.
\v 38 Para ju Pablo jantu kꞌox lhiula ni laich caꞌalactꞌaꞌalh ju yuchi ni va alacmacoꞌulacha lakꞌachakꞌan Panfilia. Jantu xaꞌalacꞌaktaijui aliꞌ laꞌixlhichꞌalhcat Dios.
\v 39 Pus talaclakꞌailh chai talamacaulh. Pus ju Bernabé tꞌaꞌalh ju Marcos. Tataju lacabarco chai taꞌalh ju xalacatꞌun Chipre.
\v 40 Chai ju Pablo sacxtulh ju Silas ni yuchi ju catꞌaꞌalh. Pus ju ixlhiꞌalakꞌavin laꞌixmacni Jesús tatapaininilh ju kꞌai ixꞌucxtinꞌan Dios ju na amapaininin ni yuchi ju caꞌalhistaclh. Chai ju yuꞌunch tataxtulh.
\v 41 Taꞌalh ju xalacatꞌun Siria chai ju Cicilia chai tajuni ju ixlhiꞌalakꞌavin laꞌixmacni Jesús ni jantu tavanan catacaplh ju ixtaxtokni Dios.
\c 16
\s1 Ju Timoteo alactꞌaꞌalh ju Pablo chai ju Silas
\p
\v 1 Astan ju Pablo chai ju Silas tachaꞌalh ju lakꞌachakꞌan Derbe chai astan taꞌalh ju lakꞌachakꞌan Listra. Ju anch talhitajulh pumatam lapanac ju vachuꞌ ixlhilacaꞌanta Jesús chai ju yuchi Timoteo ixjuncan. Istsꞌalh ixjunita pumatam chakoꞌulh israelita ju ixlhilacaꞌanta ju Jesús. Para ju ixpai ixchivinin ju lhigriego.
\v 2 Pus ju lhiꞌalakꞌavin laꞌixmacni Jesús ju ixtavilanalh ju lakꞌachakꞌan Listra chai ju lakꞌachakꞌan Iconio ixtanajun ni na kꞌox lapanac ixjunita ju Timoteo.
\v 3 Pus ju Pablo ixlacasqꞌuin ni caꞌalactꞌaꞌalh ju Timoteo junta cataꞌanaꞌ. Para pꞌulhnan lhinaulh ixchꞌucꞌuca ju ixꞌaxtꞌakꞌa. Pus ju israelitanin amachakꞌan anch ixtacꞌatsakꞌojui ni griego ixjunita ju ixpai chai ixlhiyuchi jantu ixchꞌucꞌucanta. Ju chunch ni jantuch lai ta catitanaulh.
\v 4 Chai acsni ixtachaꞌan ju lakatamin lakatamin lakꞌachakꞌan ixtajuni ju lhiꞌalakꞌavin laꞌixmacni Jesús ju jantu israelitanin ixtajunita ni chunch catalalh tachi ju ixtanajuntach ju ixtamalakachan Jesús chai ju ixtalhinajun laꞌixpujitatꞌan ju ixtavilanancha ju Jerusalén.
\v 5 Pus ju ixtalhilacaꞌanta ju Jesús lana ixlhichux ixꞌalhunut ju ixtalhilacaꞌanta ju yuchi. Chai tuncujun tuncujun ixtatalhavai ju vachuꞌ ixtalhilacaꞌanta Jesús.
\s1 Ju Pablo laktsꞌilh tachi ju va laꞌixꞌaklakꞌavanti pumatam lapanac
\p
\v 6 Pus ju Spiritu Santu jantu xaꞌalacasqꞌuini ju Pablo chai ju ixꞌalactꞌaꞌanta ni cataꞌalh nonin ju ixchivinti Dios ju xalacatꞌun Asia. Pus ixlhiyuchi tatapasacha ju xalacatꞌun Frigia chai ju xalacatꞌun Galacia.
\v 7 Chai acsni tamilh ju xalacatꞌun Misia ixtanajun ni cataꞌanaꞌ ju xalacatꞌun Bitinia. Para ju Spiritu Santu jantu alacasqꞌuinilh.
\v 8 Pus tapasatilalh laxalacatꞌun Misia tus tachaꞌalh ju lakꞌachakꞌan Troas.
\v 9 Pus ju acsnich atatsꞌisni ju Pablo laktsꞌilh tuꞌuꞌ tachi ju va laꞌixꞌaklakꞌavanti. Laktsꞌilh pumatam lapanac amachakaꞌ Macedonia ni anch ixya chai ixtapainini. Ixjuni: “Atꞌatꞌich ju ani Macedonia. Aquilaꞌaktaijuyauch ju quijnan”.
\v 10 Pus ni xalaktsꞌin ju anuꞌ lapanac ju Pablo tachi ju va laꞌixꞌaklakꞌavanti pus lana tapuxcaulh ta yu laich catapuꞌalh ju xalacatꞌun Macedonia. Chai ju quitꞌin icLucas. Icꞌalactꞌaꞌalh. Icꞌauch ju anch ni icmachakxauch ni yuchi ju quiꞌucxtinꞌan Dios ju xaquintatꞌasaniyan ni acꞌauch ajuninin ju amachakꞌan anch ta yu laich cataputakꞌalhtaxtulh chai jantu cataꞌalh ju lacajipi.
\s1 Pablo chai Silas ixtavilanancha ju lakꞌachakꞌan Filipos
\p
\v 11 Pus ictajutauch lacabarco ju lakꞌachakꞌan Troas chai sok icpuꞌau tus icchaꞌauch ju lacatꞌicstꞌi lacatꞌun ju vi lacaꞌalama junta Samotracia juncan. Chai ni tuncunchokolh ictaxtuch chai icchaꞌauch ju lakꞌachakꞌan Neápolis.
\v 12 Ju anch ictacutꞌauch ju lacabarco chai icꞌauch ju lakꞌachakꞌan Filipos junta ixlhinajun ju Roma. Pus ju anuꞌ lakꞌachakꞌan saꞌaktsulh ixjunita tachi chun ju lakꞌachakꞌanixni ju lhiꞌanch xalacatꞌun Macedonia. Pus ju anch ictolhtilau lakatꞌui lakatꞌutu avilhchan.
\v 13 Chai ju lakatam avilhchan paꞌastacni ictaxtuchau ju lakꞌachakꞌan. Icꞌauch ju lacxcan. Anch ixtaꞌanch tꞌachivinin ju Dios ju lapanacni. Pus ictolauch anch chai ni ixtatakꞌaixtokta ju aliꞌin chakolun pus icꞌajuniu ixchivinti Dios.
\v 14 Pus pumatam chakoꞌulh ju quintakꞌasmatnin Lidia ixjuncan. Ju yuchi istꞌai lakslapulh pumpuꞌ chai amachakaꞌ Tiatira ixjunita. Chai ju yuchi na ixlakꞌayai ju Dios. Chai ju kꞌai ucxtin Dios aktaijulh ju Lidia ni laich xamachakxai tuchi ixtꞌajun nonaꞌ ju Pablo.
\v 15 Chai ju yuchi makpaxacalh chai chux ju ixtatanumanalh laꞌixchakaꞌ. Chai astan quintatapaininin. Quintajunanch:
\p ―Ni nonatꞌit ni vasalh iclhilacaꞌan ju quiꞌucxtinꞌan Jesús pus caꞌauch tolhnin laquinchakaꞌ.
\p Chunch ju xaquintajunan chai tapꞌastu xaquintalhiꞌanan.
\p
\v 16 Pus ju aktam acsni icꞌauch junta ixtatꞌachivinin ju Dios ju lapanacni pus icpakxtokvi pumatam atsiꞌ ju ixtanun ju lhacaticuru laꞌixꞌalhunut. Chai ju anuꞌ lhacaticuru ixnajun tuchi catapasayaꞌ mas tucaꞌ tapasai. Chai ixꞌalin ju ixꞌucxtinin ju anuꞌ atsiꞌ chai ju yuꞌunch na lhu ixtapulhajaich laꞌixchivinti ju anuꞌ atsiꞌ.
\v 17 Pus ju yuchi ixchꞌakꞌokꞌai ju Pablo chai ju quijnanch. Na pꞌas ixchivinin chai chani ixnajunch:
\p ―Ju ani lapanacni ixlapanacni tajunita ju Dios ju vilhcha talaclhman. Ju yuꞌunch tajunan ta yu laich apꞌutꞌakꞌalhtꞌaxtꞌuyaꞌitꞌit ni jantu apꞌitꞌit ju lacajipi.
\p
\v 18 Pus na lakalhu avilhchan ju ixquilhuntꞌajun ju chunch. Pus ju Pablo jeks ulh chai talakaspꞌitlh chai juni ju lhacaticuru ju ixtanun laꞌixtanquilhacni ju anuꞌ atsiꞌ:
\p ―Icjunan laꞌixtapakaꞌut ju Jesucristo ni atꞌaxtꞌu laꞌixlacatuna ju atsiꞌ.
\p Pus lana taxtulh ju anuꞌ pantsꞌiquis ju lhacaticuru.
\p
\v 19 Para ju ixꞌucxtinin ju anuꞌ atsiꞌ acsni talaktsꞌilh ni ixtaxtuta ju lhacaticuru chai jantu lai ixtapulhajai aliꞌ laꞌixchivinti ju atsiꞌ pus lana tachꞌapalh ju Pablo chai ju Silas. Alhiꞌancalh lacapuꞌucxtin junta ixtavilanancha ju xalackꞌajin ucxtinin.
\v 20 Chai acsni alacmalacasunicalh ju lackꞌajin ucxtinin pus ju anuꞌ lapanacni chani tajunich:
\p ―Ju ani tayanalh jokꞌatni va israelitanin tajunita chai na tamaktalhkꞌaman ju quintꞌaꞌamachakꞌanꞌan.
\v 21 Ju yuꞌunch tamasui ju ixꞌatalanintiꞌan. Para ju quijnanꞌan ju romanonin juntau jantu lai naviyau tachi ju tanajun ni jantu chun najun laquilhamapꞌaksinꞌan.
\p
\v 22 Pus ju acsnich ju amachakꞌan anch tatꞌalasalh ju Pablo chai ju Silas. Chai astan ju xalackꞌajin ucxtinin talhinaulh ixmaxtunica ixpumpuꞌan ju Pablo chai ju Silas chai talhinaulh ixꞌakꞌainekmacaꞌan lacaqꞌuiu.
\v 23 Chai acsni na paklhu ju xaꞌalackꞌainekmai pus alactꞌalhnucalh lacapulachꞌin. Chai junicalh ju alhistacnan lacapulachꞌin ni kꞌoxich caꞌalhistaclh.
\v 24 Chai ju yuchi ni chunch juncan pus alacmanulh palai pulacni lacapulachꞌin. Chai alacchꞌantꞌalhma.
\p
\v 25 Pus acsni chaꞌalh paitat tsꞌis ju Pablo chai ju Silas ixtatꞌajun tꞌachivinin ju Dios chai ixtatꞌajun milhpanin ju Dios chai ju ixꞌalactꞌatꞌalhnucanta vachuꞌ takꞌasmatnilh.
\v 26 Pus ju acsnich lana na tataclh ju lacatꞌun chai ju xalactantun ju lacapulachꞌin ixtalacchiqꞌuixkꞌojui. Chai ju xamalhtich ju pulachꞌin lana talhtekꞌakꞌo. Chai ju cadena ju ixpuchꞌican ju tachꞌin lana talaklhvakkꞌo.
\v 27 Chai acsni cujcha ju alhistacnan lacapulachꞌin chai laktsꞌilh ni ilhtekꞌakꞌojuich ju pulachꞌin pus maxtulh ju ispada. Ixmaknichokoputuncan isꞌakstu ni ixnajun ni caꞌixtaꞌatsꞌalhkꞌolhch ju tachꞌinin.
\v 28 Para ju Pablo pꞌas xakꞌala. Juni:
\p ―Tun va amaknichꞌokꞌocꞌa. Anich icvilhkꞌoju.
\p
\v 29 Ju acsnich ju anuꞌ alhistacnan lacapulachꞌin sqꞌuinlh ju maclhcu chai vatsꞌalhti tanu pulacni lacapulachꞌin. Na ixꞌaxqꞌuipꞌipꞌitnintach ni na ixtalhananta. Chai va lhikꞌox axakꞌala ju Pablo chai ju Silas.
\v 30 Chai acsni amaxtulh makspaꞌ asacmich. Ajunich:
\p ―Quintꞌalapanacni tijuch ju lai acnavi ni laich actakꞌalhtaxtuyaꞌ chai jantu acꞌalh ju lacajipi.
\p
\v 31 Chai ju yuꞌunch tajunich:
\p ―Alhilacꞌapꞌich ju kꞌai ucxtin Jesús ju ixnoncan camalakachatachilh ju Dios chai amakꞌalhtꞌaxtꞌucꞌanaꞌ ju uxintꞌi chai chux ju tavilanalh laminchakaꞌ.
\p
\v 32 Ju acsnich ju Pablo ajunich ixlacata ju kꞌai ixꞌucxtin Jesús. Ajuni ju alhistacnan lacapulachꞌin chai chux ju ixꞌalactꞌatanui laꞌixchakaꞌ.
\v 33 Chai mas na istsꞌistacaꞌ para ju anuꞌ alhistacnan lacapulachꞌin alacchꞌakꞌanilh ju Pablo chai ju Silas junta ixlacmacꞌatsanicanta. Chai ju yuchi chai chux ju ixꞌalactꞌatanui lacachakaꞌ taꞌakpaxkꞌo.
\v 34 Chai astan alackꞌailhiꞌalh laꞌixchakaꞌ chai amavalh. Pus ju yuchi chai tachi chun ju ixtatanumanalh laꞌixchakaꞌ na ixtalhikꞌachanch ni ixtalhilacaꞌanta ju Jesús.
\p
\v 35 Chai acsni tunculh pus ju ucxtinin amalakachachilh ju ixpulasiyajni. Tajunich ju alhistacnanch lacapulachꞌin ni caꞌalacmaxtulh ju Pablo chai ju Silas. Chach taꞌancha laꞌixchakaꞌan.
\v 36 Pus ju alhistacnan lacapulachꞌin quijunilh ju Pablo ju anuꞌ chivinti. Junich:
\p ―Ju ucxtinin quintajuni ni ma aclamaconauch. Pus ju chavai atꞌaxtꞌutꞌitch. Aꞌinchitꞌitch. Jantu tuꞌuꞌ alhamakꞌaninintꞌit.
\p
\v 37 Para ju Pablo ajunich ju pulasiyajni:
\p ―Ju quijnan ictꞌaputekꞌecantauch ju romanonin. Para ju uxijnan quintalakanekmanch laꞌixꞌucxlacapuꞌan ju lapanacni mas jantucaꞌ xaquintakꞌasmatnin ju ucxtinin u alin ju quintalakꞌalhin quincꞌan u jantu. Va yuchi ni quintatꞌalhnunch lacapulachꞌin. Pus ju chavai ja tanajun ni va sekch aquintamaxtuyan. Ca jantu. Chach taminchokolh isꞌakstuꞌan chai aquintamaxtun.
\p
\v 38 Pus ju pulasiyajni taꞌanchokolh juninin ju xalackꞌajin ucxtinin ju ani chivinti. Pus ju yuꞌunch na tatalhanalhch acsni tacꞌatsalh ni ixꞌalactꞌaputekꞌecanta ju romanonin ju Pablo chaich ju Silas chai ni jantu tuꞌuꞌ alhitajunicalh talakꞌalhin ju alhilakanekmacalh.
\v 39 Pus ju xalackꞌajin ucxtinin tamilh lacapulachꞌin. Tatapaininilh ju Pablo chai ju Silas ni catamacꞌacxanilh. Chai astan tamaxtulh lacapulachꞌin chai ajuni ni catataxtulh ju anuch lakꞌachakꞌan.
\v 40 Pus ju Pablo chai ju Silas tataxtulh lacapulachꞌin. Taꞌalh laꞌixchakaꞌ ju Lidia. Chai ju anch ajuni ju ixlhiꞌalakꞌavinꞌan ni jantu catamacaulh ju Jesús. Chai astan tataxtulh ju anuch lakꞌachakꞌan.
\c 17
\s1 Tatalhkꞌamalh ju amachakꞌan Tesalónica
\p
\v 1 Pus ju Pablo chai ju Silas tatapasacha ju lakꞌachakꞌan Anfípolis chai ju lakꞌachakꞌan Apolonia. Astan tachaꞌalh ju lakꞌachakꞌan Tesalónica. Chai ju anch ixꞌalin ixpujitatꞌan ju istꞌaꞌisraelitanin.
\v 2 Pus ju Pablo tavilh ju anch ju lakꞌachakꞌan lakatꞌutu semana. Chai tachi ju aktsꞌiya ixlai acsni jintaꞌ ixchaꞌan ju yuchi pus alh laꞌixpujitatꞌan chai lakatꞌutu avilhchan paꞌastacni amasunilh ju lapanacni ixchivinti Dios.
\v 3 Chai laꞌixchivinti Dios ju tsꞌokcanta anch ju ixꞌapumavasalanich ju lapanacni ni aktsꞌiya istasqꞌuinich ni camakꞌalhkꞌajnalh ju anuꞌ ju ixnoncan camalakachatachilh Dios. Chai canilh chai astan cataꞌacxtuchokolh junta ixmacnucanta. Chai ixꞌalacjuni:
\p ―Ju anuꞌ Jesús ju iclajunau ju uxijnan yuchach ju ixnoncan camalakachatachilh ju Dios.
\p
\v 4 Pus ju aliꞌin israelitanin talhilacaꞌalh ju Jesús chai tachꞌakꞌokꞌalh ju Pablo chai ju Silas. Vachuꞌ na lhu griegonin ju na ixtalakꞌayai ju Dios talhilacaꞌalh ju Jesús. Chai vachuꞌ na lhu chakolun ju xalackꞌajin ixtajunita talhilacaꞌalh ju yuchi.
\v 5 Para ju israelitanin ju jantu ixtalhilacaꞌanta Jesús talhacchaꞌanilh ju Pablo chai ju Silas ni na lhu ixtachꞌakꞌokꞌai. Chai tamakꞌaixtoklh ju lapanacni ju kꞌai ixtajunita ju jantu ixtachꞌalhcatnan ni va ixtamalhekninch. Pus na lhu tatakꞌaixtoklh chai na ixtalactꞌasai. Pus taꞌalh laꞌixchakaꞌ ju Jasón chai tapꞌastu ixtatanuputun ni va ixtapuxcajui ju Pablo chai ju Silas. Va ixꞌamaxtuputun ni laich ixꞌamakꞌaxtaknilh laꞌixtalhavat lapanacni.
\v 6 Para jantu alhitajucalh ju anch. Pus taxakꞌamalhiꞌalh ju Jasón chai ju aliꞌin ju ixtalhilacaꞌanta Jesús lacapuꞌucxtin. Pꞌas ixtalhichivinin ju Pablo chai ju Silas. Ixtanajun:
\p ―Vanta anchach ju taꞌan ju anuꞌ lapanacni tatꞌajun juninin ju lapanacni ni jantu catachꞌakꞌokꞌalh ju kꞌai quiꞌucxtinꞌan César. Chai ju chavai tamilh ju ani.
\v 7 Chai ju ani Jasón aꞌulata ju yuꞌunch laꞌixchakaꞌ. Pus ju yuꞌunch lana jantu tuꞌuꞌ talhiulai ju ixlhamapꞌaksin ju César ju lhinajun laquilakꞌachakꞌanꞌan. Ju yuꞌunch tanajun ni alai yuchi ju kꞌai ucxtin pumatam ju Jesús juncan.
\p
\v 8 Pus acsni takꞌasmatlh junima chivinti pus ju lapanacni chai ju xalackꞌajin ucxtinin ju anuꞌ lakꞌachakꞌan na tatalhkꞌamalh.
\v 9 Pus ju Jasón chai ju aliꞌin taxtaknilh tumin ju ucxtinin. Chai ju ucxtinin alacjuni ni caꞌaxtaknichokocanaꞌ ju ixtuminꞌan acsni tavanan catataxtulh ju anuꞌ lakꞌachakꞌan ju Pablo chai ju Silas. Pus acsnicaꞌ ju amacajuncalh ju Jasón chai ju aliꞌin.
\s1 Pablo chai Silas ixtavilanancha ju lakꞌachakꞌan Berea
\p
\v 10 Pus ju acsnich atatsꞌisni ju lhiꞌalakꞌavin laꞌixmacni Jesús lana tamalakachalh ju Pablo chai ju Silas ni cataꞌalh ju lakꞌachakꞌan Berea. Chai acsni tavanan tachaꞌalh ju anch taꞌalh laꞌixlacpujitatꞌan ju istꞌaꞌisraelitanin.
\v 11 Pus palai kꞌox ixjunita ju ixꞌalhunutꞌan ju amachakꞌan Berea. Palai jantu ju amachakꞌan Tesalónica. Pus ju amachakꞌan Berea na ixtakꞌasmatputun ju ixchivinti Dios chai chux avilhchan ixtalaktsꞌin ixchivinti Dios ju tsꞌokcanta. Va istacꞌatsaputun u vasalh tachi ju ixtanajun ju Pablo chai ju Silas u jantu.
\v 12 Pus na lhu israelitanin talhilacaꞌalh ju Jesús. Vachuꞌ na lhu ju griegonin talhilacaꞌalh chai sia yuꞌunch ixꞌalin ju chakolun chai ju papanin ju xalackꞌajin ixtajunita ju anuꞌ lakꞌachakꞌan.
\v 13 Para acsni tamachakxalh ju israelitanin amachakꞌan Tesalónica ni ixtꞌonacha vachuꞌ ju lakꞌachakꞌan Berea amalaniniꞌ ixchivinti Dios ju Pablo pus taꞌalh ju anch chai tamaktalhkꞌamalh ju lapanacni.
\v 14 Pus ju acsnich ju ixlhiꞌalakꞌavin laꞌixmacni Jesús lana tamalakachalh ju Pablo ni caꞌalh laꞌixquilhtuꞌ alama. Para ju Silas chai ju Timoteo tatavilhcaꞌ ju lakꞌachakꞌan Berea.
\v 15 Chai ju yuꞌunch ju tatꞌaꞌalh ju Pablo ni catamacuvilayaꞌ ju lacati talhichaꞌalh ju lakꞌachakꞌan Atenas. Chai acsni ixtaminchokoputun ju yuꞌunch pus ju Pablo alacjuni ni catajunantach ju Silas chai ju Timoteo ni vatsꞌalhti catalakꞌalh ju Pablo. Pus taminchalh ju ixtꞌaꞌalhtanin ju Pablo.
\s1 Ju Pablo ixvi ju lakꞌachakꞌan Atenas
\p
\v 16 Pus ju Pablo acsni ixꞌalacpacxan ju Silas chai ju Timoteo ju lakꞌachakꞌan Atenas na amakꞌaninilh acsni laktsꞌilh ni na lhu taxtokni ixꞌalin ju ixtalaktsꞌin tachi ju isdiosnin ju amachakꞌan anch.
\v 17 Pus yuchi va tsa ixlhiꞌan laꞌixpujitatꞌan ju istꞌaꞌisraelitanin chai ixꞌalactꞌachivinin ju yuꞌunch chai ju aliꞌin lapanacni ju vachuꞌ ixtalakꞌayai ju Dios. Vachuꞌ chux tuncujun ixꞌalactꞌachivinin ju lapanacni ju ixꞌalacpakxtꞌokꞌa ju laclhitamau.
\v 18 Chai ju aliꞌin ixꞌamamakaꞌun ju Epicúreo chai ju ixꞌamamakaꞌun ju Estoico ixtatꞌachivinin ju Pablo. Pus ju aliꞌin sia yuꞌunch ixtalaclajuni:
\p ―Va kꞌaya najun ju anuꞌ lapanac ju na lhu chivinin.
\p Chai ju aliꞌin ixtanajun:
\p ―Ju yuchi tachi ju va ixnonach ni alin atumpa dios.
\p Chunch ixtanajun ni va ixꞌajuni ju Pablo ixlacata ju Jesús chai ixꞌajuni ni lai lokꞌonchokocan mas nitach.
\v 19 Pus takꞌailhiꞌalh ju Pablo junta ixtatakꞌaixtꞌokꞌa ju xalackꞌajin junta Areópago ixjuncan. Chai tajuni:
\p ―Iccꞌatsaputunau tis talakxtuch ju ani sastꞌi atalaninti ju naꞌun.
\v 20 Pus ju tuchi quilamakꞌasmatniuch tachi ju va sastꞌi atalaninti iclhiulayau. Chai iccꞌatsaputunau tuchi ju nomputunch ju ani. ―Chunch ju tajuni ju Pablo.
\p
\v 21 Pus tachi chun ju amachakꞌan Atenas chai ju amachakꞌan alacatam lacatꞌun ju anch ixtatꞌajun jantu tuꞌuꞌ atumpa ixtanavi. Va yuchi ni ixtanajun u ixtakꞌasmatꞌa ju tuꞌuꞌ sastꞌi atalaninti.
\p
\v 22 Pus ju acsnich ju Pablo taya laꞌixlacaitat junta ixtatakꞌaixtokta ju xalackꞌajin junta Areópago ixjuncan chai chani ajuni:
\p ―Quintꞌalapanacni amachakꞌan Atenas iclalaktsꞌinau ni slivasalh na tꞌalhoniyatꞌit ju midiosꞌan.
\v 23 Pus ju quitꞌin icquipixiyalhnalh junta alin ju midiosnin chai iclhitajulh lacatam junta mokslayatꞌit ju ixlhakꞌailaktsꞌin ju midiosꞌan chai ju anch chani ju tsꞌokcanta: “Ixꞌanuch ju anuꞌ dios ju jantu icmispayau”. Pus ju anuꞌ ju tꞌalhoniyatꞌit ju uxijnan mas jantu mispꞌayatꞌit yuchach ju iclajunau ju quitꞌin.
\p
\v 24 Yuchach ju navilh ju lacamunutpaꞌ chai tachi chun ju taxtokni ju alinch. Chai yuchach ju xaꞌucxtin lactꞌiyan chai ju ani lacatꞌun. Pus ju yuchi jantu lai tanui ju lacpujitat ju va yajutach lapanac.
\v 25 Ju yuchi jantu tasqꞌuini ni va cachꞌalhcatnanilh ju va tam lapanac tachi ju va camaktasqꞌuinilh tuꞌuꞌ ni yuchach tucan ju quintaxtaknikꞌojun ju quiꞌatsucuntiꞌan chai quiꞌaxanitꞌan chai tachi chun ju taxtokni ju maktasqꞌuiniyau.
\p
\v 26 Ju Dios navilh ju pꞌulhnan lapanac chai si ixꞌapapanatnich juntau tachi chun ju quijnanꞌan ju tꞌonau ju ani lacamunutpaꞌ. Chai Dios ju quintaꞌulatan ju ani lacamunutpaꞌ. Chai yuchi ju quintalhcanitan ju quiꞌatsucuntiꞌan chai yuchach ju najun taꞌanchach ju catsucuyaꞌ pumatamin pumatamin.
\v 27 Chunch ju navilh ju kꞌai ucxtin Dios ni laich catacꞌatsa ju lapanacni ixlacata ju yuchi chai catamispalh. Catalhitaju ni jantu vasalh makat tꞌajun ju yuchi laquiꞌalhunutꞌan.
\v 28 Laꞌixmacni yuchi ju tꞌonau chai alin ju quintacꞌatsanꞌan. Tachi ju tanaulh ju aliꞌin makꞌaniya atalaninin ju mintꞌachivintiꞌan ixtajunita. Ju yuꞌunch tanaulh ni isꞌaskꞌatꞌan Dios juntau.
\v 29 Chai ni isꞌaskꞌatꞌan Dios juntau pus jantu kꞌox ni canonau ni chunch junita ju Dios tachi ju tuꞌuꞌ lhinavicanta oro u plata u chiux tachi ju talacxuclakꞌoxi ju lapanacni laꞌixmacaꞌan chai tachi ju kꞌoxich talhiulai.
\v 30 Pus ju makꞌanchich ju Dios va chꞌixlh ju ixlhitontoꞌan ju lapanacni. Para ju chavai kꞌasi alacjuni tachi chun ju lapanacni ixlhilacaputsꞌun ju lacamunutpaꞌ ni catamacaulh ju ixꞌalactuꞌuntiꞌan.
\v 31 Ni lhcaꞌulata ju yuchi ju avilhchan acsni sok calaktsꞌintanuyach tachi chun ju lapanacni pus yuchi lhinajun ju Dios ni catamacaulh ju ixꞌalactuꞌuntiꞌan. Chai ju yuchi sacxtutach pumatam ju canonaꞌ tichi chavaich ju catakꞌalhtaxtuyaꞌ chai tichi chavaich ju camamakꞌalhkꞌajnicanaꞌ. Chai apumavasalanilh tachi chun ju lapanacni ni chunch ju catapasayaꞌ ni macxtuchokolh ju anuꞌ lapanac junta ixmacnucanta. ―Chunch ju ajuni ju lapanacni ju Pablo.
\p
\v 32 Pus acsni takꞌasmatlh ni lai macxtuchokocan junta macnucan pus ju aliꞌin va talhitsꞌiꞌilh. Chaich ju aliꞌin ixtanajun:
\p ―Aclakꞌasmatnichokopalauch aktam ixlacata ju ani ju naꞌun.
\p
\v 33 Pus ju acsnich ju Pablo taxtulh junta ixtatakꞌaixtokta ju lapanacni.
\v 34 Pus ju aliꞌin ju takꞌasmatnilh ixchivinti ju Pablo talhilacaꞌalh ju Jesús chai tachꞌakꞌokꞌalh ju Pablo. Ju sia yuꞌunch yuchi ju Dionisio ixjuncan. Ju yuchi pumatam xakꞌai ixjunita sia yuꞌunch ju ucxtinin ju ixtatakꞌaixtꞌokꞌa junta Areópago ixjuncan. Vachuꞌ ixꞌalin pumatam chakoꞌulh ju Dámaris ixjuncan chaich ju aliꞌin lapanacni.
\c 18
\s1 Ju Pablo ixvi ju lakꞌachakꞌan Corinto
\p
\v 1 Ju astan ju Pablo taxtulh ju lakꞌachakꞌan Atenas. Alh ju lakꞌachakꞌan Corinto.
\v 2 Pus ju anch ju Pablo lhitajulh pumatam israelita ju Aquila ixjuncan. Amachakaꞌ Ponto ixjunita. Jantucaꞌ makꞌan ixminacha ju laxalacatꞌun Italia. Anchach ixtꞌamintacha ju ixꞌamachakaꞌ ju Priscila ixjuncan. Pus ju kꞌai ucxtin anch ju Claudio ixjuncan ixtakta ju lhamapꞌaksin ni catataxtuchalhch ju lakꞌachakꞌan Roma laxalacatꞌun Italia tachi chun ju israelitanin. Yuchi talhitaxtulh ju yuꞌunch. Pus ju Pablo alakꞌalh ju yuꞌunch.
\v 3 Chai ni vana va chunch ju ixtalhichꞌalhcatnan tachi ju ixlhichꞌalhcatnan ju Pablo pus alactꞌatavi. Alactꞌachꞌalhcatnalh. Pus ju yuꞌunch va ixtanavi ju kꞌai lona chakaꞌ chai istastꞌai.
\v 4 Chai chux avilhchan paꞌastacni ju Pablo ixꞌan laꞌixpujitatꞌan ju istꞌaꞌisraelitanin chai ixmakchivinin ju anch. Ixꞌamalacaꞌiniputun ixchivinti Dios ju istꞌaꞌisraelitanin chai ju yuꞌunch ju jantu israelitanin ixtajunita.
\p
\v 5 Para acsni tavanan tamincha ju lakꞌachakꞌan Macedonia ju Silas chai ju Timoteo pus ju Pablo macaulicaꞌ ju ixlhichꞌalhcat ju ixnavica ju anuꞌ lona chakaꞌ. Jantu tuꞌuꞌ atumpa ixnavi. Va ixꞌalacmalani ju lapanacni ixchivinti Dios. Chai ixꞌalacmavasalani ju istꞌaꞌisraelitanin ni Jesús yuchach ju Cristo ju ixnoncan camalakachatachilh ju Dios.
\v 6 Para ju yuꞌunch talhitalhkꞌamalh chai tajuni macxcai chivinti. Pus ju Pablo alaccꞌalhanilh ixpumpuꞌ ni catapumachakxayaꞌ ni camaconach ni jantu talacaꞌiputun. Chai chani ajuni:
\p ―Jantu quintalakꞌalhin quitꞌin ni apꞌinaꞌitꞌit ju lacajipi. Mintalakꞌalhin miꞌakstuꞌan. Ju chavai aclakꞌanaꞌ ju yuꞌunch ju jantu israelitanin tajunita.
\p
\v 7 Pus lana taxtulh ju lacpujitat chai tanucha laꞌixchakaꞌ pumatam lapanac ju Justo ixjuncan. Ju ixchakaꞌ vanin ixtꞌaya ju pujitat. Pus ju yuchi na ixlakꞌayai ju Dios.
\v 8 Pus vachuꞌ lhilacaꞌalh ju kꞌai ucxtin Jesús ju xaꞌucxtin pujitat ju Crispo ixjuncan. Yuchach chai tachi chun ju ixtatanumanalh laꞌixchakaꞌ. Vachuꞌ na lhu amachakꞌan Corinto acsni takꞌasmatlh ju chivinti talhilacaꞌalh ju Jesús chai amakpaxakꞌo.
\v 9 Pus ju acsnich ju Pablo laktsꞌilh ju kꞌai ixꞌucxtin Jesús tachi ju va laꞌixꞌaklakꞌavanti. Chai chani junicalh ju Pablo:
\p ―Jantu atꞌalhan. Va tachi aꞌun ju lapanacni ju quinchivinti. Jantu va sek aꞌuntꞌi.
\v 10 Quitꞌin ju ictꞌavilan chai jantu xamatiꞌ lai tuꞌuꞌ canaviyan. Atꞌailhipꞌich ju ixnajunca ju quinchivinti ni na lhu alin ju lapanacni ju aquintalhilacaꞌanaꞌ ju ani lakꞌachakꞌan.
\p
\v 11 Pus tam cꞌata a lakachaxan malhquiyuꞌ ixvilhcha ju anch ju Pablo. Chai ixꞌalacmasuni ixchivinti Dios ju lapanacni.
\p
\v 12 Para acsni kꞌai ucxtin ixjunita ju Galión laxalacatꞌun Acaya pus ju israelitanin tatakꞌaixtoklh. Tachꞌapalh ju Pablo. Talhiꞌalh lacapuꞌucxtin.
\v 13 Chai chani tajuni ju kꞌai ucxtin:
\p ―Ju ani ya lapanac va amalacaꞌini ju lapanacni ni catalakꞌaya ju Dios para jantu lhijun ju quilhamapꞌaksin quincꞌan tachi ju najun ju yuchi.
\p
\v 14 Pus ju Pablo ixchivimputun para ju Galión lana ajuni ju israelitanin:
\p ―Ji israelitanin ni tuꞌuꞌ cava navitꞌa kꞌai talakꞌalhin u tuꞌuꞌ macxcai ju canavi ca aktsꞌiya xaclakꞌasmatniu.
\v 15 Para ni va jantu kꞌox lhiulayatꞌit ju tuchi masui ju ani ya lapanac chai jantu kꞌox lhiulayatꞌit tachi ju lhichivinin pumatam lapanac chai tachi ju lhichivinin ju milhamapꞌaksinꞌan pus alaktsꞌintꞌitch miꞌakstuꞌan ju uxijnan. Ju quitꞌin jantu icmaktanuputun ju anch.
\p
\v 16 Chai lana alactixcoxtucalh lacapuꞌucxtin.
\v 17 Pus ju acsnich tachi chun ju griegonin tachꞌapalh ju Sóstenes ju xaꞌucxtin lacpujitat. Tatsuculh lakanekmanin laꞌismakspaꞌ lacapuꞌucxtin. Para ju Galión jantu xanavi cuenta.
\s1 Ju Pablo taxtuchokopa ixlhipaktꞌutu ajuniniꞌ ju lapanacni ixlacata Jesús
\p
\v 18 Ju Pablo na lhu avilhchan titavilhcaꞌ ju anch. Astan alacmacꞌami ixlhiꞌalakꞌavin laꞌixmacni Jesús chai taxtulh. Vachuꞌ tatꞌaꞌalh ju Priscila chaich ju Aquila. Chai acsni tachaꞌalh ju lakꞌachakꞌan Cencrea pus ju Pablo sitcalh ni ixmuctaxtutach ju tuchi ixlhitꞌatakꞌoxitach ju Dios. Astan tataju ju lacabarco ni ixtaꞌamputun ju xalacatꞌun Siria.
\v 19 Chai acsni tachaꞌalh ju lakꞌachakꞌan Efeso pus amacoꞌulacha ju Priscila chaich ju Aquila. Chai ju Pablo alh laꞌixpujitatꞌan ju istꞌaꞌisraelitanin chai alactꞌachivinilh ju yuꞌunch ju ixtatakꞌaixtokta ju anch.
\v 20 Pus ju yuꞌunch tapꞌastu ixtajuni ni ixꞌalactꞌatolhcha makꞌanch para ju Pablo jantu tolhputulh.
\v 21 Ju yuchi alacmacꞌami chai chani alacjuni:
\p ―Aktsꞌiya tasqꞌuini ni aclaktsꞌinanta ju cꞌatan ju caꞌalinanta ju Jerusalén. Para aclalakminchokopalau ni Dios calacasqꞌuinaꞌ.
\p Chai acsni ajuni ju chunch lana taxtulh ju Efeso. Tajulh lacabarco.
\v 22 Chai acsni chaꞌalh ju lakꞌachakꞌan Cesarea tacutlh lacabarco chai alh lakꞌachakꞌan Jerusalén. Alh alacmacꞌaminiꞌ ju yuꞌunch ju vachuꞌ ixtalhilacaꞌanta Jesús amachakꞌan anch. Chai astan alhch ju lakꞌachakꞌan Antioquía.
\v 23 Ju anch tolhcha lakatꞌui lakatꞌutu malhquiyuꞌ. Astan taxtulh chai lacaputocꞌalh junta pumilh ju lakꞌachakꞌanixni ju alin ju laxalacatꞌun Galacia chai ju lakꞌachakꞌanixni ju alin ju xalacatꞌun Frigia. Ixꞌalacjuni ju lapanacni ju ixtalhilacaꞌanta Jesús ni jantu tavanan catacaplh.
\s1 Ju Apolos ajuni ju amachakꞌan Efeso ixlacata ju Jesús
\p
\v 24 Pus ju acsnich chaꞌalh ju lakꞌachakꞌan Efeso pumatam israelita ju Apolos ixjuncan. Amachakaꞌ Alejandría. Ju yuchi na lai ixchivinin chai na ismispai ju ixchivinti Dios ju tsꞌokcanta.
\v 25 Ju yuchi ismasunicanta ixlacata ju kꞌai ixꞌucxtin Jesús chai ixlhichux ixꞌalhunut ixꞌamalaninin ixlacata ju yuchi. Chai ju tuchi ismispai lana vas ixnajun. Va yuchi ni jantu tuꞌuꞌ atumpa ismispai. Va yuchi ju ismispai tachi ju ixnajun ju Xivan acsni ixꞌamakpaxanan.
\v 26 Pus ju yuchi alh laꞌixpujitatꞌan ju istꞌaꞌisraelitanin chai lana jantu ixtalhanan. Chai ajuni ju lapanacni ixchivinti Dios. Para ju Priscila chai Aquila acsni takꞌasmatlh ju ixchivinti pus takꞌailhiꞌalh laꞌixchakaꞌan. Tamavasalanilh ju aliꞌ taxtokni ixlacata ju Jesús ju jantucaꞌ iscꞌatsai ju Apolos.
\v 27 Chai ju Apolos acsni ixꞌamputun ju xalacatꞌun Acaya pus ju ixlhiꞌalakꞌavin laꞌixmacni Jesús taꞌaktaijulh. Tatsꞌoklh lakatam alhiqui ju laich caꞌalhiꞌanilh ju ixtalhilacaꞌanta Jesús amachakꞌan anch. Va alacjuncan ni kꞌox cataꞌamaklhtayanalh ju Apolos acsni cachaꞌanach ju anch. Pus ju yuchi acsni tavanan chaꞌalh na aꞌaktaijulh tachi chun ju ixtalhilacaꞌanta Jesús. Pus ju yuꞌunch talhilacaꞌalh ju Jesús va ixlacaꞌatalh ni anavinilh lamapainin ju Dios.
\v 28 Pus ju Apolos laꞌixtalhavat lapanacni ixnajun ni jantu kꞌox tachi ju ixtalacaꞌi ju istꞌaꞌisraelitanin. Chai ni na vas ixnajun pus ju yuꞌunch jantu lai ixtamapuspꞌitni ju chivinti. Chai laꞌixchivinti Dios ju tsꞌokcanta ixꞌamavasalani ni Jesús yuchach ju Cristo ju ixnoncan camalakachatachilh ju Dios.
\c 19
\s1 Ju Pablo ixvi ju lakꞌachakꞌan Efeso
\p
\v 1 Pus acsni ixvi ju Apolos ju lakꞌachakꞌan Corinto pus ju Pablo puꞌalh lacatalhpan tus chaꞌalh ju lakꞌachakꞌan Efeso. Pus ju anch alhitaju ju aliꞌin ju vachuꞌ ixtalhilacaꞌanta Jesús.
\v 2 Pus ju yuchi alacjuni:
\p ―Ja tanulh ju Spiritu Santu lamiꞌalhunutꞌan acsni xalhilacꞌapꞌinatꞌit ju Jesús.
\p Pus ju yuꞌunch taꞌakꞌalhtayanalh. Tajuni:
\p ―Jantu ickꞌasmatꞌau ni caꞌalilh ju Spiritu Santu.
\p
\v 3 Pus ju acsnich ju Pablo ajunich:
\p ―Pus ja jantu laꞌixlhitapakaꞌut ju Jesús ju akpꞌaxtꞌatꞌit.
\p Chai ju yuꞌunch tajuni:
\p ―Pus tachi ju xaꞌamakpaxanan ju Xivan chunch ju icꞌamakpaxanantauch.
\p
\v 4 Chai ju Pablo ajunich:
\p ―Pus ju Xivan ixmakpaxai tam xamatiꞌ acsni ixmacajun ju macxcai isꞌatsucunti. Para vachuꞌ ixꞌajuni ni catalhilacaꞌalh ju yuchi ju caminaꞌ astan. Ju chunch va nomputun ni catalhilacaꞌalh ju Jesucristo ju ixnoncan camalakachatachilh ju Dios.
\p
\v 5 Pus acsni takꞌasmatlh ju chunch taꞌakpaxchokolh laꞌixtapakaꞌut ju kꞌai ixꞌucxtinꞌan Jesús.
\v 6 Chai acsni alacmucꞌanilh ixmacaꞌ ju Pablo pus tanulh ju Spiritu Santu laꞌixꞌalhunutꞌan chai tachivinilh ju chivinti ju jantu aktam ixtachivininta chai vachuꞌ tanaulh ixchivinti Dios.
\v 7 Pus ixchuxꞌan ixtachaꞌantach pumacautꞌui lapanacni.
\p
\v 8 Pus ju Pablo tachi lakatꞌutu malhquiyuꞌ ju antsuculh laꞌixpujitatꞌan ju istꞌaꞌisraelitanin. Ixꞌamasuni ju lapanacni ixchivinti Dios chai lana jantu ixtalhanan. Ixꞌalacjuni ju lapanacni ni lhinomputun ju Dios laꞌisꞌatsucuntiꞌan. Chai ixꞌamalacaꞌiniputun ju ixchivinti Dios.
\v 9 Para ju aliꞌin na pꞌas ixjunita ju ixꞌalhunutꞌan chai jantu ixtalacaꞌiputun chai na macxcai ixtalhichivinin ju ixti Dios laꞌixꞌucxlacapuꞌ ixtalhavat lapanacni. Pus ju Pablo alacmacoyaulh ju yuꞌunch chai lacatam alackꞌailhiꞌalh ju yuꞌunch ju ixtalhilacaꞌanta Jesús. Alhiꞌalh laꞌixpamamakaꞌun pumatam ju Tiranno ixjuncan. Chai anch ixꞌalacmalani ju lapanacni tuncujun tuncujun.
\v 10 Pus tachi lakatꞌui cꞌata ju ixꞌamalaninin ju chunch. Chai ju chunch tachi chun ju amachakꞌan Asia takꞌasmatlh ju chivinti ixlacata ju kꞌai ucxtin Jesús. Chux ju israelitanin chai ju jantu israelitanin.
\v 11 Chai ju Dios ixtakni ixtachaput ju Pablo ni lai xanavi ju vasalh kꞌai lhamakꞌan.
\v 12 Mas va ixpayu ju Pablo u tuꞌuꞌ pumpuꞌ ju ismusatocꞌai acsni ixchꞌalhcatnan ni ixꞌalhiꞌanicanch ju takꞌankꞌanin pus lana palai xaꞌalacnavi. Chai ju lhacaticurulhni ixtataxtui laꞌixlacatunaꞌan ju lapanacni.
\p
\v 13 Pus ju acsnich ixtaꞌalin ju israelitanin alhicujnin. Ju yuꞌunch va lacatam lacatam ixtaꞌucxuntꞌajun. Chai ju yuꞌunch ixtanajun ni laich vachuꞌ ixmaxtui ju lhacaticurulhni laꞌixlacatunaꞌan ju lapanacni laꞌixꞌalhicujnutꞌan. Para astan ixtanajun ni laich vachuꞌ catamaxtulh ju lhacaticurulhni laꞌixlacatunaꞌan ju lapanacni laꞌixtapakaꞌut ju kꞌai ucxtin Jesús. Chai chani ixꞌajuni ju lhacaticurulhni:
\p ―Iclajunau laꞌixtapakaꞌut ju anuꞌ Jesús ju najun ju Pablo ni catalhilacaꞌalh ju lapanacni. Iclajunau ni atꞌaxtꞌuch laꞌixlacatuna ju lapanac. ―Chunch ixtanajun.
\p
\v 14 Pus ixꞌalin pumatam israelita ju Esceva ixjuncan. Ju yuchi xakꞌai pali ixjunita chai ixꞌalin pumatujun istsꞌalan. Pus ju yuꞌunch vachuꞌ chunch ixtanaviputun.
\v 15 Para acsni chunch tajuni ju lhacaticuru pus ju anuꞌ lhacaticuru chani akꞌalhtayanalh. Ajunich:
\p ―Icmispaich ju Jesús chai iccꞌatsai tichi chavaich ju Pablo juncan. Para ju uxijnan jantu alakꞌamispꞌacꞌanatꞌit.
\p
\v 16 Pus ju acsnich ju anuꞌ lapanac ju ixpacxanta ju lhacaticuru lana alactꞌalasa ju anuꞌ tsꞌalan chai alaclhajakꞌo. Alaclhimakchꞌapulh tus alacmaꞌatsꞌala ju anuch lacachakaꞌ. Va lackꞌaitsasaꞌunch ixtajunita acsni taꞌatsꞌalalh chai slivasalh na alacmacꞌatsanita.
\v 17 Pus ju ani tacꞌatsakꞌo ju israelitanin chai ju jantu israelitanin ju ixtavilanancha ju lakꞌachakꞌan Efeso. Pus lana na tatalhanalh ixchuxꞌan chai na ixtalakꞌayai ju kꞌai ucxtin Jesús.
\p
\v 18 Pus ju acsnich na lhu ju ixtalhilacaꞌanta Jesús tamilh nonin ju talakꞌalhin ju ixtanavita ni na ixtalhilacaꞌantacaꞌ ju alacnavinti.
\v 19 Vachuꞌ na lhu ju ixtaꞌalhicujnun tamakꞌaxtakkꞌo ju ixlacꞌalhiquiꞌan chai alacxavakꞌo laꞌixꞌalacꞌavantiꞌan ixchuxꞌan. Chai acsni aputekꞌecalh ixtapalh ju anuꞌ alhiqui ju alacxavacalh pus chaꞌalh cincuenta milh tumin ju plata ixjunita.
\v 20 Pus ju chunch palai lhu xatalhilacaꞌan ju Jesús. Lana ixlhichux ixꞌalhunutꞌan ju talhilacaꞌalh ju yuchi.
\p
\v 21 Pus acsni tapasakꞌo ju ani taxtokni pus ju Pablo ixnajun ni caꞌanaꞌ alaktsꞌiniꞌ ju ixtalhilacaꞌanta Jesús amachakꞌan Macedonia chai amachakꞌan Acaya chai cachaꞌanaꞌ tus Jerusalén. Vachuꞌ ixnajun ni aktsꞌiya caꞌanaꞌ ju lakꞌachakꞌan Roma acsni cataxtuyanta ju Jerusalén.
\v 22 Pus amalakacha ju Macedonia pumatꞌui ju ixꞌalactꞌachꞌalhcatnan. Yuchi ju Timoteo chaich ju Erasto. Para ju yuchi tolhchacaꞌ lakatꞌui lakatꞌutu malhquiyuꞌ ju xalacatꞌun Asia.
\s1 Tatalhkꞌamalh ju amachakꞌan Efeso
\p
\v 23 Pus ju acsnich alilh lakatam kꞌai laklakꞌaiti va ixlacaꞌatalh ni ixꞌajuncan ju lapanacni ixlacata ju Jesús.
\v 24 Yuchi ju Demetrio ju taiꞌulalh ju lakꞌaiti. Ju yuchi ixmaxtajanaꞌ plata ixjunita chai lacaplata ixlacxapalaxtui lactꞌicstꞌi pujitat tachi ixpujitat isdiosꞌan ju Diana ixjuncan. Pus na lhu lapanacni ju ixtatꞌachꞌalhcatnan chai na lhu ixtapulhajai.
\v 25 Pus ju Demetrio alacmakꞌaixtoklh ju ixlapanacni chai ju aliꞌin lapanacni ju vachuꞌ ixtalacxapalaxtui isdiosnin chai chani alacjuni:
\p ―Quintꞌalapanacni ju uxijnan cꞌatsꞌayatꞌit ni na laklhu pulhajayau ju ani lhichꞌalhcat.
\v 26 Para ju uxijnan laktsꞌintꞌit ju anuꞌ Pablo chai kꞌasmatꞌatꞌit tachi ju chivinin ju yuchi. Ju yuchi va najun ni jantu vasalh dios ju tuchi navicanta lacamacaꞌ. Chai na pumalhu ju xamalacaꞌini. Chai jantu va yuchi ju amachakꞌan ani laquilakꞌachakꞌanꞌan Efeso para vachuꞌ ju amachakꞌan na lakalhu lakꞌachakꞌan laxatꞌun Asia ju xaquimalacaꞌini ju chivinti.
\v 27 Pus ca na lhixcai ni caꞌalinaꞌ ju quivaitiꞌan ni lhu catalacaꞌiyaꞌ tachi ju najun ju Pablo. Chai vachuꞌ jantu xtuꞌuꞌ calhiulacanaꞌ ju kꞌai ixpujitat quidiosꞌan Diana. Ju chavai ni si talhilacaꞌan ju yuchi. Chux ju amachakꞌan Asia chai chux ju lacamunutpaꞌ. Para astan ca jantu catilakꞌayacalh ju yuchi. ―Chunch ajuni ju lapanacni.
\p
\v 28 Chai acsni takꞌasmatlh junima chivinti pus lana tatalhkꞌamalh. Na talactꞌasakꞌo. Ixtanajunch:
\p ―Na kꞌai ju Diana quidiosꞌan ju quijnanꞌan ju amachakꞌan Efeso juntau.
\p
\v 29 Pus ju amachakꞌan anch lana va tꞌilhi tꞌilhi ixtalaich. Pus ixtavilanancha ju Gayo chai ju Aristarco amachakꞌan Macedonia. Ju yuꞌunch ixtatꞌaꞌalhtanan ju Pablo. Pus ju lapanacni tachꞌapalh ju yuꞌunch chai taxakꞌamalhiꞌalh lacakꞌai chakaꞌ junta ixtatakꞌaixtꞌokꞌa ju lapanacni acsni ixꞌalin ju ixjuntaꞌan.
\v 30 Pus ju Pablo ixꞌamputun tanunuꞌ lacatalhavat ni laich ixꞌaxakꞌala ni jantuch va lhu ixtatalhkꞌamalh para ju ixtalhilacaꞌanta Jesús jantu talacasqꞌuinilh.
\v 31 Vachuꞌ ju aliꞌin xalackꞌajin amachakꞌan Asia ni ixꞌamigojni ixtajunita ju Pablo tamalakachanilh chivinti ni jantu caꞌalh talacasunuꞌ laꞌixtalhavat lapanacni.
\v 32 Pus ju ixtalhavat lapanacni va tꞌilhi tꞌilhi ixtalaich. Ju aliꞌin tam ixtanajun. Ju aliꞌin tumpa ixtanajun. Pus na lhu ju lapanacni jantu istacꞌatsai tuchi ixtalhitakꞌaixtꞌokꞌach.
\v 33 Pus ju aliꞌin laꞌixtalhavat lapanacni tamavasalanilh ju lhamakꞌan ju pumatam lapanac ju Alejandro ixjuncan. Chai ju istꞌaꞌisraelitanin tatisalhiꞌalh junta lai caꞌaxakꞌala ju lapanacni. Pus ju yuchi tamacyaulh ni va sekch catava. Va ixꞌajumputun ju lapanacni ni jantu cataxcailich ju israelitanin.
\v 34 Para acsni tamispa ni israelita ixjunita ju Alejandro pus talactꞌasachokopa. Tachi lakatꞌui hora ixtalactꞌasai. Ixtanajun:
\p ―Na kꞌai ju Diana quidiosꞌan ju quijnanꞌan ju amachakꞌan Efeso juntau.
\p
\v 35 Pus ju acsnich ju atsꞌoknuꞌ ju anch lakꞌachakꞌan alacjuni ni va sekch catatava chai chani alacjuni:
\p ―Quintꞌalapanacni amachakꞌan Efeso tis chavaich ju jantu cacꞌatsa ni lhistꞌacꞌau ju ixpujitat ju kꞌai quidiosꞌan Diana. Vachuꞌ lhistꞌacꞌau ju Diana ju patajuta ju lactꞌiyan.
\v 36 Chai ni cꞌatsꞌayatꞌit ni slivasalh ju tuchi xaclajunau pus tasqꞌuini ni va sekch atꞌayatꞌit. Jantu xtuꞌuꞌ anavitꞌit ni jantu pꞌulhnan kꞌox cꞌatsꞌayatꞌit tuchi ju alin.
\v 37 Va kꞌai tachꞌin naviyatꞌit ju ani tayanalh lapanacni. Ju yuꞌunch jantu tuꞌuꞌ takꞌalhaꞌuta ju laquimpujitatꞌan nin macxcai catalhichivinilh ju quidiosꞌan ju quijnanꞌan.
\v 38 Pus ju Demetrio chaich ju ixlapanacni ju tatꞌachꞌalhcatnan ni catatꞌalaxcailh xamatiꞌ yuchi lhitavilanalh ju ucxtinin lacakꞌai chakaꞌ. Laich cataꞌachivimakꞌanalh.
\v 39 Para ni tuꞌuꞌ atumpa ju alhichꞌivimakꞌanatꞌit pus laich anonaꞌitꞌit acsni va catamakꞌaixtꞌokꞌaꞌ ju lapanacni ju ucxtinin.
\v 40 Jantu xcai ni calhichivimakꞌancau ixlacata ju ani lakꞌaiti. Catanaulh ni va tꞌalasayau ju ucxtinin. Ni chunch caꞌulhtucau matich tuꞌuꞌ talakꞌalhin ju laich calhiquilhꞌau ixlacata ju ani lakꞌaiti.
\p
\v 41 Chai acsni naulh ju ani chivinti ajuni ju ixtalhavat lapanacni ni cataꞌalh laꞌixchakaꞌan. Chai taꞌalh.
\c 20
\s1 Ju Pablo alh laxatꞌun Macedonia chai Grecia
\p
\v 1 Pus ju astan acsni sekch va ju lakꞌaiti pus ju Pablo alactꞌasanilh ju lapanacni ju vachuꞌ ixtalhilacaꞌanta Jesús chai alacmapꞌaksilh. Astan talamaklhtantailh. Talamacꞌamilh. Chai ju Pablo taxtulh. Va ixꞌamputun ju xalacatꞌun Macedonia.
\v 2 Ju yuchi alhtanatsuculh chux ju anuꞌ lacatꞌun chai ajuni ju amachakꞌan anch ju vachuꞌ ixtalhilacaꞌanta Jesús ni jantu tavanan catacaplh. Astan ju yuchi alh ju xalacatꞌun Grecia.
\v 3 Ju anch tolhcha lakatꞌutu malhquiyuꞌ. Astan ixtajuputun lacabarco. Ixꞌamputun ju xalacatꞌun Siria. Para acsni cꞌatsalh ni ixtapacxantajitach ju istꞌaꞌisraelitanin pus naulh ni alai alacatamch capuꞌanaꞌ. Chai minchokolh ju Macedonia.
\v 4 Ju tatꞌaꞌalh ju Pablo tus ju xalacatꞌun Asia yuchi ju Sópater amachakaꞌ Berea chai ju Aristarco chai ju Segundo amachakaꞌ Tesalónica chai ju Gayo amachakaꞌ Derbe chai ju Tíquico chai ju Trófimo amachakꞌan Asia chai ju Timoteo.
\v 5 Ju yuꞌunch pꞌulhnan taꞌalh chai tapacxancha ju Pablo ju lakꞌachakꞌan Troas.
\v 6 Pus ju quitꞌin icLucas chai xacvi ju lakꞌachakꞌan Filipos. Chai ju Pablo quilakmilh ju anch. Chai acsni tapasalh ju anuꞌ cꞌatan acsni taꞌui ju xkapavati ju jantu macaꞌanican ju xatꞌin pus ictaxtuchau ju anch. Ictajuch ju lacabarco chai icꞌalhtanantauch lakaquis avilhchan tus icchaꞌauch ju lakꞌachakꞌan Troas junta icꞌalakmiu ju aliꞌin ju pꞌulhnan tachaꞌalh. Chai ju anch ictolhchau lakatujun avilhchan.
\s1 Malokꞌonicalh ju Eutico
\p
\v 7 Chai acsni chaꞌalh ju lhitumincu pus tatakꞌaixtoklh ju ixtalhilacaꞌanta Jesús ni va ixtaꞌui ju anuꞌ xkapavati ju ixpupastaccan ixꞌaninti ju Jesús. Pus ju Pablo alacmapꞌaksi. Chai ni ixnajunch ni cataxtuyach ni catuncunchokoyach pus na panicni ju xachivinin. Ixꞌamalaninin tus paitat tsꞌis.
\v 8 Pus junta tatakꞌaixtoklh ixlhitantalactꞌutu chakaꞌ ixjunita. Chai na lhu ixꞌalin ju maclhcu.
\v 9 Chai pumatam tsꞌalh ju Eutico ixjuncan ixvi lacaventana. Chai ni na panicnich ixchivinin ju Pablo pus ju anuꞌ tsꞌalh lhtatalh. Chai acsni na ilhtatavi pus tatistꞌalh ju laꞌilhtatat. Tin pataju ixlhitantalactꞌutu chakaꞌ. Quisaccalh xanin.
\v 10 Pus ju Pablo soko takꞌalhtaju. Putamalhch ju anuꞌ tsꞌalh chai lakatanu. Astan alacjuni ju lapanacni:
\p ―Tuntꞌi na va amakꞌaninintꞌit. Ju Dios xtaknichokolh ju isꞌatsucunti.
\p
\v 11 Astan ju Pablo tocꞌachokolh ju talaclhman chai vailh. Chai na panicni alactꞌachivintolhchokolh tus ixtꞌajun tuncuntilanaꞌ. Acsnich ju alhch.
\v 12 Pus ju anuꞌ tsꞌalh ju ixmalokꞌonichokocanta laꞌixꞌaninti lhiꞌancalh laꞌixchakaꞌ chai jantu va tilacatsꞌunin takꞌachalh ju lapanacni.
\s1 Ju Pablo taxtulh ju Troas. Alh ju Mileto
\p
\v 13 Pus ju quijnan pꞌulhnan ictaxtuch. Ictajuch ju lacabarco. Icꞌauch ju lakꞌachakꞌan Asón. Ju Pablo xaquintajuntanch ni anchach aquintapakxtꞌokꞌanch. Ju yuchi va chꞌajaxꞌalh.
\v 14 Pus acsni ictꞌalapakxtokchau ju Pablo ju lakꞌachakꞌan Asón pus ju yuchi quintatꞌatajunch ju lacabarco. Icꞌauch ju lakꞌachakꞌan Mitilene.
\v 15 Chai acsni ictaxtuch ju anch ictajuchoko ju lacabarco. Icꞌauch. Chai acsni alakatam avilhchan jumpa icchaꞌauch vanin ju xalacatꞌun Quío. Chai acsni tuncunchokopa icchaꞌauch ju lakꞌachakꞌan Samos. Chai ictapasauch tus icchaꞌauch ju lakꞌachakꞌan Trogilio junta icꞌastacnauch lacatsꞌunin. Chai ictaxtuchokoch. Chai acsni alakatam avilhchan jumpa icchaꞌauch ju lakꞌachakꞌan Mileto.
\v 16 Chunch ju iclauch ni jantu ixꞌamputun ju lakꞌachakꞌan Efeso ju Pablo ni jantu panicni ixtolhputun ju xalacatꞌun Asia. Ju yuchi va isokꞌoi ni ixnajun ni va laich calalh ixmapasaputunacha ju lakꞌachakꞌan Jerusalén ju ixcꞌatanꞌan ju istꞌaꞌisraelitanin ju Pentecostés ixjuncan.
\s1 Ju Pablo alactꞌachivinilh ju xalackꞌajin amachakꞌan Efeso
\p
\v 17 Chai acsni ixvi ju Pablo ju lakꞌachakꞌan Mileto pus malakachalh chivinti ju lakꞌachakꞌan Efeso. Lhinaulh ixꞌatꞌasanica ju yuꞌunch ju ixtalhinajun laꞌixpujitatꞌan ju anch.
\v 18 Chai acsni talakchincha pus chani alacjuni:
\p ―Ju uxijnan cꞌatsꞌayatꞌit ta yu xaclai acsni xaclatꞌavilau tus acsni tucan icchilh ju xalacatꞌun Asia tus chavai.
\v 19 Quilalaktsꞌintauch ni na xacchꞌalhcatnani ju quiꞌucxtinꞌan Jesús ixlhichux quiꞌalhunut chai jantu xaclhitakꞌayai. Chai cꞌatsꞌayatꞌit ni na xackꞌalhun acsni jantu xatalacaꞌiputun ju aliꞌin. Chai cꞌatsꞌayatꞌit ni na xacmakꞌalhkꞌajnan va ixlacaꞌatalh ni na xaquintamamakꞌalhkꞌajniputun ju quintꞌaꞌisraelitaninꞌan.
\v 20 Chai cꞌatsꞌayatꞌit ni iclajunkꞌoju chux tachi ju maktꞌasqꞌuiniyatꞌit ni laich kꞌox atsꞌucꞌuyaꞌitꞌit. Lacatalhavat lapanacni xaclamasuniyau chai lacalakatamin ju minchakaꞌan.
\v 21 Xaclajunau ju uxijnan ju vachuꞌ quintꞌaꞌisraelitanin untꞌatꞌit chai ju yuꞌunch ju jantu israelitanin tajunita ni amacꞌaꞌuntꞌit ju macxcai miꞌatsucuntiꞌan tachi ju lacasqꞌuin ju Dios chai alhilacꞌapꞌitꞌitch ju Jesús.
\v 22 Chai ju chavai ju Spiritu Santu quijunita ni acꞌalh ju lakꞌachakꞌan Jerusalén mas jantu iccꞌatsai tuchi ju actapasayantach ju anch.
\v 23 Va yuchi iccꞌatsai ni actꞌalhnucananta chai acmakꞌalhkꞌajnanantach. Chunch ju quimavasalani ju Spiritu Santu acsni ictapasai ju lakatamin lakatamin lakꞌachakꞌan.
\v 24 Para ju ani taxtokni jantu icnavi cuenta. Nin quiꞌatsucunti jantu tuꞌuꞌ iclhiulai mas aquintamakni. Va yuchi iclacasqꞌuin ni lai acnavikꞌoyach ju quilhichꞌalhcat. Laich acmuctaxtuyach ju lhichꞌalhcat ju quixtaknita ju quiꞌucxtin Jesús. Yuchi ni acꞌajunilh ju lapanacni ni laꞌixꞌamapaininti Dios laich catatakꞌalhtaxtulh chai jantu cataꞌalh ju lacajipi.
\p
\v 25 Ju uxijnan iclajuntau ni lhinomputun ju Dios laquiꞌatsucuntiꞌan. Para ju chavai iccꞌatsai ni jantu xamatiꞌ ju minchuxꞌan ju uxijnan ju aquintilalaktsꞌinchoko tavanan ju ani lacamunutpaꞌ.
\v 26 Pus ju chavai iclajumputunau ni caꞌalilh xamatiꞌ ju jantu lhilacaꞌanta ju Jesús pus jantu quintalakꞌalhin.
\v 27 Jantu tavanan ju va jantu iclajuniu chux ixlhamapꞌaksin Dios.
\v 28 Pus alhistꞌacchꞌokꞌocꞌantꞌit miꞌakstuꞌan. Vachuꞌ alaclhistꞌactꞌit ju vachuꞌ talhilacaꞌanta Jesús. Chunch alatꞌit ni yuchi ju Spiritu Santu ju taꞌulatan ni alhinonaꞌitꞌit sia yuꞌunch. Pus tachi chun ju talhilacaꞌanta Jesús alhitamocanta laꞌixꞌacꞌalhni.
\v 29 Para astan acsni actaxtuyach iccꞌatsaich ni catalakminan ju lapanacni ju catajunan ni jantu kꞌox ni lhilacꞌapꞌinatꞌit ju Jesús. Ju yuꞌunch va tamakpitsiputunan ju uxijnan ju lhilacꞌapꞌinatꞌit ju Jesús. Ju yuꞌunch va talaputun tachi ju tam maktiliꞌ ju na makpitsi ju borregojni acsni alakmin.
\v 30 Chai vachuꞌ lamilhiꞌakstuꞌan catakꞌostayayaꞌ ju lapanacni ju catanonach ju chivinti ju jantu slivasalh. Va cataꞌokxchokꞌoputunan ju uxijnan ju lhilacꞌapꞌinatꞌit ju Jesús ta yu laich apꞌuchꞌakꞌokꞌapꞌutꞌunaꞌitꞌit ju yuꞌunch.
\v 31 Pus alacpꞌucꞌujtꞌitch. Chai apꞌastꞌactꞌitch ni lakatꞌutu cꞌata tsꞌis chai tuncuj va tachi xaclamalaniyau. Chai na xackꞌalhun acsni xaclamapꞌaksiyau.
\p
\v 32 Pus ju chavai ji quiꞌalakꞌavin iclamakꞌaxtakniyau ju Dios. Chai ju laꞌixchivinti najun ni na amapaininin ju yuchi. Pus ju anuꞌ ixchivinti na tachapun chai lai taꞌaktaijuyan ni jantu tavanan acꞌaptꞌit ju ixti ju Dios. Chai ixlacata ju anuꞌ ixchivinti Dios vachuꞌ atꞌakꞌalhtꞌaxtꞌuyaꞌitꞌit tachi ju catatakꞌalhtaxtuyaꞌ tachi chun ju ixlapanacni.
\v 33 Ju quitꞌin jantu iclhacchaꞌanilh ixtumin nin ixpumpuꞌ tam xamatiꞌ.
\v 34 Para ju uxijnan cꞌatsꞌayatꞌit ni laquimacaꞌ quiꞌakstu xacpulhajai ju tuchi xacmaktasqꞌuini ju quitꞌin chai ju ixtamaktasqꞌuinita ju xaquintatꞌaꞌalhtananta.
\v 35 Chunch xaclai ni laich aclaxtakniyau lakatam lhilaktsꞌintaiti ixlacata ju miꞌatsucuntiꞌan. Ju chunch acꞌatsꞌayaꞌitꞌit ni tasqꞌuini ni achꞌalhcꞌatnantꞌit ni laich aꞌaktꞌaiꞌuyaꞌitꞌit ju alin ixmaktasqꞌuinitꞌan. Chai ju chunch lai apꞌastꞌacꞌaꞌitꞌit ixchivinti ju quiꞌucxtinꞌan Jesús acsni ma naulh: “Palai kꞌachan ju tam xamatiꞌ ju caxtakniyaꞌ tuꞌuꞌ apumatam lapanac. Palai jantu ju va amaklhtayanan tuꞌuꞌ”. ―Pus chunch ju ajuni ju lapanacni ju Pablo.
\p
\v 36 Chai acsni nonkꞌo ju ani ju Pablo pus lana taꞌaktsokotalh. Tꞌachivinilh ju Dios ju yuchi chai ixchuxꞌan ju ixtalhinajun laꞌixpujitatꞌan ju amachakꞌan Efeso.
\v 37 Pus ju yuꞌunch slivasalh na takꞌalhulh. Ixtapixtulakatanui ju Pablo. Tamacchꞌuchꞌulh.
\v 38 Slivasalh lhixcanilh ixꞌalhunutꞌan ju anuꞌ chivinti ju naulh ju Pablo acsni ajuni ni jantu tavanan catalaktsꞌinichokoyaꞌ ju ixꞌucxpuꞌ. Pus ju astan taquilaktsꞌimuju ju lacabarco.
\c 21
\s1 Ju Pablo alh ju lakꞌachakꞌan Jerusalén
\p
\v 1 Chai acsni icꞌalacmacaju ju quilhiꞌalakꞌavin laꞌixmacni Jesús pus ictaju lacabarco. Va sok icꞌau tus icchaꞌau ju xalacatꞌun Cos. Ni alakatam avilhchan jumpa icchaꞌau ju xalacatꞌun Rodas. Ictaxtu ju Rodas. Icchaꞌau ju lakꞌachakꞌan Pátara.
\v 2 Ju anch iclhitaju alakatam barco chai ju yuchi ixꞌamputun ju xalacatꞌun Fenicia. Pus ictaju. Icꞌauch.
\v 3 Acsni icchaꞌauch vanin laxalacatꞌun Chipre pus iclhitapasau laꞌixlhicana. Icchaꞌauch ju xalacatꞌun Siria chai anch ju astacnalh ju barco ju lakꞌachakꞌan Tiro ni ixpꞌuxniputuncan ju ixtacꞌucꞌat. Pus ju quijnan ictacutchauch ju anch.
\v 4 Chai ni icꞌalhitaju ju vachuꞌ ixtalhilacaꞌanta Jesús amachakꞌan anch pus icꞌalactꞌatolhchau lakatujun avilhchan. Pus ju Spiritu Santu ixꞌalacmavasalanilh tuchi catapasayaꞌ laꞌisꞌatsucunti ju Pablo acsni tavanan acꞌanau ju lakꞌachakꞌan Jerusalén. Pus yuchi talhitapaininilh ni jantu caꞌalh.
\v 5 Para acsni laktsalh ju lakatujun avilhchan ictaxtuch ju anch. Chai chux ju amachakꞌan anch ju vachuꞌ ixtalhilacaꞌanta Jesús quintaquilaktsꞌimacajun laꞌixquilhtuꞌ alama. Chux ju jokꞌatni chai ixꞌamachakaꞌan chai ju isꞌaskꞌatꞌan. Chai ju anch ictaꞌaktsokotachauch chai ictꞌachiviniuch ju Dios.
\v 6 Iclamacꞌamiuch chai iclalakapujuch chai ictajuch ju lacabarco. Chai ju yuꞌunch taꞌanchokolh laꞌixlakchakaꞌan.
\p
\v 7 Chai ictaxtuch ju Tiro chai icꞌauch ju lakꞌachakꞌan Tolemaida. Tus anch xacpuꞌanau ju barco. Ju anch icꞌamacꞌamichau ju quilhiꞌalakꞌavin laꞌixmacni Jesús chai icꞌatꞌatolhchau ju yuꞌunch tam avilhchan.
\v 8 Ni alakatam avilhchan jumpa ju Pablo chai ju quijnan ju xactꞌaꞌalhtanantauch ictaxtuch chai icmiuch ju lakꞌachakꞌan Cesarea. Chai icchaꞌauch laꞌixchakaꞌ ju Pilipe ju ixnajun ixchivinti Dios. Vachuꞌ ixlhipumatujunch ixjunita ju ixtaꞌaꞌaktaijunun laꞌixtalhavat ju ixtalhilacaꞌanta Jesús. Pus laꞌixchakaꞌ ju yuchi ictolhchauch.
\v 9 Ju yuchi ixꞌalin pumatꞌatꞌi isꞌatsiꞌin. Va isꞌakstucaꞌan ixtajunita. Chai ju yuꞌunch ixtanajun va tuchi chivinti ju ixꞌamamachakxani ju Dios.
\v 10 Chai acsni lakalhu avilhchan icꞌatꞌatolhchau pus mincha laxaꞌestado Judea pumatam lapanac ju Agabo ixjuncan. Ju Dios va tsa ixmamachakxani ju tuchi catapasayaꞌ.
\v 11 Chai acsni quintalakminch ju quijnan pus chꞌapanilh ju iscinturón ju Pablo. Chꞌanchꞌichokocalh laꞌixchꞌajaꞌ isꞌakstu chai makchꞌichokocalh. Chai ajunich ju lapanacni:
\p ―Chani ma najun ju Spiritu Santu. Ju quintꞌaꞌisraelitaninꞌan amachakꞌan Jerusalén ma chunch ju cataꞌulhtuyaꞌ ju amanavin junima cinturón chai ma catamakꞌaxtakniyaꞌ ju yuꞌunch ju jantu israelitanin tajunita.
\p
\v 12 Pus acsni ickꞌasmatvich ju ani chivinti ju quijnan chai ju amachakꞌan anch pus kꞌasi icjuniuch ju Pablo ni jantuch caꞌalh ju lakꞌachakꞌan Jerusalén.
\v 13 Para ju acsnich ju Pablo quintajunan:
\p ―Tajuch ni va lackꞌalhunatꞌitch chai quilamaxcaniniyau ju quiꞌalhunut. Ju quitꞌin jantu tuꞌuꞌ iclhiulai mas tachꞌin aquintanaviyanta ju lakꞌachakꞌan Jerusalén. U mas aquintamakniyanta va ixlacata ni iclhilaksita ju quiꞌucxtinꞌan Jesús. ―Chunch ju quintajunan.
\p
\v 14 Chai ni jantu lai icmalacaꞌiniu pus va sek ictayau. Va xacnonau:
\p ―Chach navi ju quiꞌucxtinꞌan Dios tachi ju lacasqꞌuinch ju yuchi.
\p
\v 15 Chai acsni tapasalh ju anuꞌ avilhchan pus iclacatayauch ixꞌanca ju lakꞌachakꞌan Jerusalén. Chai icꞌauch.
\v 16 Chai quintatꞌaꞌan vachuꞌ ju aliꞌin ju vachuꞌ ixtalhilacaꞌanta Jesús amachakꞌan Cesarea. Pus ju yuꞌunch ixtanajun ni anch actolauch laꞌixchakaꞌ pumatam lapanac ju Mnasón ixjuncan acsni acchaꞌanau ju Jerusalén. Ju yuchi ixmintacha ju xalacatꞌun Chipre. Chai ju yuchi makꞌanch ixlhilacaꞌanta Jesús.
\s1 Ju Pablo alh tꞌachiviniꞌ ju Jacobo
\p
\v 17 Chai acsni icchaꞌauch ju lakꞌachakꞌan Jerusalén pus ju quilhiꞌalakꞌavinꞌan laꞌixmacni Jesús va lhikꞌach quintaꞌamaklhtayanantanch.
\v 18 Chai ni alakatam avilhchan jumpa pus ju Pablo quintatꞌaꞌanch laꞌixchakaꞌ ju Jacobo. Chai chux ju yuꞌunch ju ixtalhinajun laꞌixpujitatꞌan vachuꞌ ixtatakꞌaixtokta ju anch.
\v 19 Pus ju Pablo alacmacꞌami chai astan ajunkꞌo tuchi ixꞌanavinita ju Dios ju yuꞌunch ju jantu israelitanin tajunita acsni tavanan ixꞌajuni ixchivinti Dios ju Pablo.
\v 20 Pus ju yuꞌunch acsni takꞌasmatnilh ixchivinti ju Pablo talakꞌayalh ju Dios. Para astan tajuni:
\p ―Kꞌoxich ji quilakꞌau. Para ju uxintꞌi laktsꞌintꞌa ni na lhu lana ju quintꞌaꞌisraelitaninꞌan ju talhilacaꞌanta Jesús ju chavai. Para ju yuꞌunch tanajuntacaꞌ ni aktsꞌiya tasqꞌuini ni canaviyau tachi ju ixnajun ju Moisés laꞌixlhamapꞌaksin.
\v 21 Pus ju yuꞌunch va taquikꞌalhakꞌasmatninch ju uxintꞌi ni ma va alacmalaninin ju quintꞌaꞌisraelitaninꞌan ju tamakvilanalh junta tatꞌajun ju yuꞌunch ju jantu israelitanin. Chai ma alhamalanininch ni jantuch vana catanavi tachi ju ixnajun ju Moisés. Chai ma va aꞌunich ni ma jantu catiꞌachꞌucꞌucalh ju istsꞌalanꞌan nin yuchi ni ma lai catanavi tachi ju aktsꞌiya lanitau ju quijnanꞌan ju israelitanin juntau.
\v 22 Pus tas calayau. Ju anuch quintꞌaꞌisraelitaninꞌan ju talhilacaꞌanta Jesús catatakꞌaixtꞌokꞌaꞌ acsni catakꞌasmatꞌaꞌ ni tꞌantꞌach ju uxintꞌi.
\v 23 Pus aclajunau tuchꞌi anaviyaꞌ. Alin pumatꞌatꞌi lapanacni ju sia lhiquijnanchꞌan ju tatꞌatakꞌoxita ju chivinti ju Dios.
\v 24 Pus alactꞌapꞌitꞌich ju yuꞌunch. Chai chunch vachuꞌ alatꞌi tachi ju catalayaꞌ ju yuꞌunch ni aktam salaka cajunaꞌ ixꞌalhunutꞌan laꞌixmacni Dios. Chai amapꞌalaꞌ ju uxintꞌi ixtapalh ju tuꞌuꞌ ju catamakniniyaꞌ ju Dios. Chai ju chunch laich caꞌasitcanach. Pus ju chunch catamachakxayach ixchuxꞌan ni jantu slivasalh tuchi takꞌasmatꞌach ju milacata. Chai catalaktsꞌinan ni vachuꞌ muctꞌaxtꞌui laꞌixlhamapꞌaksin Moisés ju uxintꞌi.
\v 25 Pus ju quijnan icꞌatsꞌoknunitauch ju yuꞌunch ju tamaklacaꞌanita ju Jesús ju jantu israelitanin tajunita. Icꞌajuniuch ni jantu tasqꞌuini ni catanavi tachi ju ixnajun ju Moisés. Va yuchi ni jantu cataꞌulh ju taxtokni ju lhikꞌailaktsꞌincanta ju tuꞌuꞌ ju laktsꞌincanta tachi ju dios. Nin yuchi ni cataꞌulh ju acꞌalhni. Nin yuchi ni cataꞌulh ju va pixtuchꞌimaknicanta. Nin yuchi ni va catatꞌatsuculh ju jantu ixpapaꞌan u ixꞌamachakaꞌan.
\s1 Tachꞌin navicalh ju Pablo acsni ixvi laꞌixpujitatꞌan ju istꞌaꞌisraelitanin
\p
\v 26 Pus ju acsnich ju Pablo alactꞌaꞌalh ju anuch pumatꞌatꞌi lapanacni chai ni alakatam avilhchan jumpa alactꞌanavi tachi ju talai ju israelitanin ni salaka cava ju ixꞌalhunutꞌan laꞌixmacni Dios. Chai astan ju Pablo tanu lacakꞌai ixpujitatꞌan ju istꞌaꞌisraelitanin. Va alh ajuniniꞌ ju palijni tavanan calaktsayaꞌ ju avilhchan acsni lai catalhiminaꞌ ju atapacxat ju catamakniniyaꞌ ju Dios.
\p
\v 27 Pus talhcalh lakatujun avilhchan. Chai acsni ixchaꞌamputunch ju ixlhilakatujun avilhchan pus ju aliꞌin israelitanin amachakꞌan Asia talaktsꞌilh ju Pablo lacakꞌai ixpujitatꞌan ju istꞌaꞌisraelitanin. Pus lana tamaktalhkꞌamalh chux ju lapanacni chai tachꞌapalh ju Pablo.
\v 28 Pꞌas ixtalaclatꞌasani ju istꞌaꞌisraelitanin. Ixtanajun:
\p ―Quintꞌaꞌisraelitanin aquilaꞌaktaijuch. Ju ani ya lapanac yuchi ju amasuni ju lapanacni ixlhilacaputsꞌun ju lacamunutpaꞌ. Na macxcai quintalhichivinan ju quijnanꞌan ju israelitanin juntau chai macxcai lhichivinin ju ixlhamapꞌaksin ju Moisés chai ju ani kꞌai quimpujitatꞌan. Chai ixlhitijtꞌui ju yuchi va kꞌaya amanulh ju yuꞌunch ju jantu israelitanin lacpujitat chai va lakꞌalhilh ju ani kꞌai ixpujitat Dios.
\p
\v 29 Va talhinaulh chunch ni ixtalaktsꞌinta ju Trófimo amachakaꞌ Efeso ni ixtꞌaꞌalhtanan ju Pablo chai ju yuchi jantu israelita ixjunita. Chai va ixtanajun ni ca ixtꞌatanun ju Pablo ju lacpujitat mas jantu.
\p
\v 30 Pus tachi chun ju amachakꞌan anch lana tatalhkꞌamalh. Taꞌatsꞌalaminkꞌo chai tachꞌapalh ju Pablo. Tamaxtulh makspaꞌ lacakꞌai pujitat. Chai lana tamalacchaulh ju xamalhtich.
\v 31 Ju yuꞌunch ixtamakniputun ju Pablo para quimacꞌatsanicalh ju comandante ni chux ju lapanacni amachakꞌan anch na ixtalaktalhkꞌamantach.
\v 32 Pus ju anuꞌ comandante lana kꞌailhimilh ju xacapitán chaich ju ixtaropajni. Taꞌatsꞌalalakmilh ju lapanacni. Chai ixtalhavat lapanacni acsni talaktsꞌilh ju comandante chaich ju ixtaropajni pus tamamacta ixkꞌainekmaca ju Pablo.
\v 33 Pus ju comandante lakꞌalh ju Pablo. Lhinaulh ixchꞌapaca chai ixmakchꞌica lacakꞌantꞌui cadena. Chai astan asacmilh ju lapanacni tichi chavaich ju Pablo chai tis talakꞌalhinch ju xanavi.
\v 34 Para ju lapanacni na ixtalactꞌasai chai ju aliꞌin tumpa talakꞌalhin ixtanajun chai ju aliꞌin atumpa. Pus ju comandante jantu lai ixmachakxai ju stavasalanti. Pus alai va lhinaulh ixlhiꞌanca lacacuartel.
\v 35 Para acsni tachaꞌalh junta talactsa talactsa junita lacacuartel pus lana tachꞌixlhiꞌalh ju taropajni va ixlacaꞌatalh ni na kꞌox ixtatalhkꞌamanta ju lapanacni.
\v 36 Pus ju ixtalhavat lapanacni ju ixtachꞌakꞌokꞌata va pꞌas ixtachivinin. Ixtanajun:
\p ―Amaknitꞌitch.
\s1 Ju Pablo ajuni ju ixtalhavat lapanacni tuchi ixnavita
\p
\v 37 Chai acsni ixtamanuputunachalh ju Pablo lacacuartel pus ju yuchi xakꞌala ju comandante lacalhigriego. Junich:
\p ―Lamapainin ictꞌachivimputunan lacatsꞌunin.
\p Chai ju yuchi juni:
\p ―Laiꞌas chꞌivinin ju lhigriego.
\v 38 Ja jantaꞌas uxintꞌi ju anuꞌ lapanac amachakaꞌ Egipto ju ixtꞌalasaputun ju ucxtin. Chai jantucaꞌ makꞌan amakꞌaixtoklh lakatꞌatꞌi milh lapanacni amaknininch chai alhiꞌalh makat junta matiꞌ xamatiꞌ tꞌajun. Ja jantaꞌas uxintꞌi.
\p
\v 39 Pus ju Pablo junich:
\p ―Ju quitꞌin jantiyuꞌ ju anuꞌ lapanac. Ju quitꞌin icꞌisraelita. Icꞌamachakaꞌ Tarso. Lakatam kꞌai lakꞌachakꞌan laxalacatꞌun Cilicia. Va ictapaininiyan ni alacꞌasqꞌuich ni actꞌachivinilh ju ixtalhavat lapanacni.
\p
\v 40 Pus ju anuꞌ comandante lacasqꞌuinilh. Chai ju Pablo taya junta talactsa junita lacacuartel. Chꞌixnilh ju ixmacaꞌ ju ixtalhavat lapanacni ni sekch catataya. Chai acsni sekch tataya pus ju Pablo tsuculh axakꞌalanaꞌ lacalhihebreo. Chani ajuni:
\c 22
\p
\v 1 ―Quiꞌalakꞌavin chai ju uxijnan ju lhinonatꞌit sia quijnanꞌan ju israelitanin juntau. Aquilakꞌasmatniuch. Va iclajumputunau tuchi icnavita.
\p
\v 2 Chai acsni takꞌasmatlh ni ixꞌaxakꞌalacan laꞌixchivintiꞌan lacalhihebreo pus palai sek tatava ju lapanacni. Chai ju Pablo chani alacjuni:
\p
\v 3 ―Ju quitꞌin vachuꞌ icꞌisraelita. Iclokꞌontacha lakꞌachakꞌan Tarso laxatꞌun Cilicia. Para icquitakꞌayachilh ju ani Jerusalén. Ju Gamaliel yuchi ju quiꞌamamakaꞌunuꞌ ixjunita. Chai ju yuchi kꞌox quimalani chux ju ixlhamapꞌaksinꞌan ju makꞌaniya quilacpaꞌitniꞌan. Chai ju quitꞌin ixlhichux quiꞌalhunut xacnavi tachi ju xacmachakxani ju ixkꞌachat ju Dios. Chunch ju xaclai tachi ju uxijnan navipꞌutꞌunatꞌit ju chavai.
\v 4 Ju quitꞌin vachuꞌ na xacꞌalhixcaji ju talhilacaꞌanta Jesús. Chai xacꞌachꞌapai chai xacꞌatꞌalhnui ju jokꞌatni chai ju chakolun chai xaclhinajun ixmaknicaꞌan.
\v 5 Ju xakꞌai pali chai chux ju yuꞌunch ju talhinajun laquilhiquijnanꞌan ju israelitanin juntau laich catajunin ni yuꞌunch ju quintaxtaknilh ju alhiqui ju xacꞌalhiꞌani ju quintꞌaꞌisraelitanin amachakꞌan Damasco. Va xacꞌamputun puxconaꞌ ju talhilacaꞌanta Jesús ni laich tachꞌin acꞌalhimilh ju ani Jerusalén ni laich caꞌamamakꞌalhkꞌajnicalh.
\s1 Ju Pablo ajuni ju lapanacni ta yu lhilacaꞌalh ju Jesús
\p
\v 6 Pus ju quitꞌin icꞌalh. Chai acsni xacꞌanta ju lacati chai xacchaꞌamputun vanin ju lakꞌachakꞌan Damasco pus kꞌatuncu ixjumputun. Chai acsni iclhicꞌatsanalh lactꞌiyan ju xatapulhcuyacha. Tapulhculh junta xacꞌantau. Chai na pꞌas ju xamapulhcui.
\v 7 Chai lana tin ictama lacatꞌun chai ickꞌasmatlh lakatam chivinti junta chani quijuni: “Saulo. Saulo. Jantu alhimakchꞌapꞌu ju quilapanacni. Acsni chꞌun u lai tachi ju va jun quitꞌin ju qꞌuilhimakchꞌapꞌui”.
\v 8 Pus ju quitꞌin ickꞌalhtailh. Icjuni: “Tis chavaichꞌat ji ucxtin”. Chai quijuni: “Ju quitꞌin icJesús amachakaꞌ Nazaret. Quitꞌinch ju qꞌuilhimakchꞌapꞌui”.
\v 9 Pus ju xaquintatꞌaꞌanta ju lacati talaktsꞌilh ju maclhcu chai na kꞌox tatalhanalh. Para jantu xatamachakxai ju ixchivinti tichi chavaich ju xaquintꞌachivinin.
\v 10 Chai icjuni: “Pus tijuch ju acnaviyaꞌ ji quiꞌucxtin”. Chai ju yuchi quijuni: “Akꞌostꞌaꞌulh. Aꞌinchich ju lakꞌachakꞌan Damasco. Anch ju aꞌuncꞌantꞌachich chux tuchi ju iclacasqꞌuin ni anaviyaꞌ”.
\v 11 Pus ju quitꞌin jantu lai xacꞌalacꞌavanan ni va quilakpuchꞌapalh ju anuꞌ maclhcu. Pus ju xaquintatꞌaꞌanta va quintamakchꞌapalhiꞌalh. Quintalhiꞌalh ju lakꞌachakꞌan Damasco.
\p
\v 12 Ju anch ixtꞌajun pumatam lapanac ju Ananías ixjuncan. Ju yuchi ixnavikꞌojui chux tachi ju najun laꞌixlhamapꞌaksin Moisés. Chai chux ju istꞌaꞌisraelitanin amachakꞌan anch na kꞌox lapanac ixtalhiulai.
\v 13 Pus ju yuchi quilakmilh. Chai acsni taya vanin junta xacvi pus chani quijuni: “Quilakꞌau Saulo alacꞌavanch”. Pus ju anuch pantsꞌiquis lana laich icꞌalacꞌavanalh chai iclaktsꞌilh ju yuchi.
\v 14 Chai ju yuchi quijunich ni ma Dios ju quisacxtulh. Ma yuchach ju Dios ju ixtalakꞌayai ju makꞌaniya quilacpaꞌitniꞌan. Chai ju yuchi ma quisacxtulh ni laich acmispanilh tuchi lacasqꞌuin ni acnaviyaꞌ. Chai ma quisacxtulh ni aclaktsꞌinaꞌ ju istsꞌalh ju na salaka ixꞌalhunut. Chai ma ackꞌasmatniyaꞌ ju ixchivinti. Pus iclaktsꞌilh chai ickꞌasmatnilh.
\v 15 Chunch ju xaquinavi ni ma lacasqꞌuin ju yuchi ni acꞌalacjunaꞌ chux ju lapanacni tuchi ju xaclaktsꞌin chai tuchi xackꞌasmatꞌa.
\v 16 Chai astan va quisacmilh tijuch ju icpacxan. Quijuni ni ackꞌostavi chai acꞌakpaxlh. Chai aclhilacaꞌalh ju quiꞌucxtin Jesús. Pus ju chunch ju yuchi aquixacaniyaꞌ ju quiꞌalactuꞌunti. Chunch ju quijuni ju Ananías chai chunch ju icnavilh.
\s1 Dios ju xamalakachai ni caꞌajunilh ixchivinti ju jantu israelitanin tajunita
\p Ju Pablo tailhiꞌalh ju ixchivinti chai chani ajuni ju lapanacni:
\p
\v 17 ―Pus acsni icminchokolh ju ani Jerusalén pus icꞌalh tꞌachiviniꞌ ju Dios lacakꞌai pujitat. Pus ju anch iclaktsꞌilh tuꞌuꞌ tachi ju va laquiꞌaklakꞌavanti.
\v 18 Iclaktsꞌilh ju Jesús chai ju yuchi quijuni ni va tsꞌalhti actaxtulh ju ani Jerusalén. Jantu aquintitalacaꞌiniyach ju quinchivinti ju amachakꞌan ani.
\v 19 Para icjuni: “Quiꞌucxtin ju yuꞌunch tacꞌatsai ni xacꞌan lakatamin lakatamin pujitat chai tachꞌin xacꞌalhiꞌan ju lapanacni ju ixtalhilacaꞌantan ju uxintꞌi chai xacꞌalakanekmai.
\v 20 Chai acsni tamaknilh ju Stipan ju milapanac ixjunita pus vachuꞌ quitꞌin anch xacmakya chai na kꞌoxich xaclhiulai ni tamaknilh. Chai quitꞌin ju iclakmakꞌa ju ixpumpuꞌan ju taꞌamakninilh”. Chunch icjuni ju Jesús.
\v 21 Para ju yuchi quijuni ni acꞌalh. Aquimalakachayach na makat ni laich acꞌalacjunaꞌ ju ixchivinti ju yuꞌunch ju jantu israelitanin tajunita. Chunch ju quijuni ju Jesús.
\s1 Ju comandante lhiꞌalh ju Pablo
\p
\v 22 Pus ju ixtalhavat lapanacni tus acsnich na kꞌox takꞌasmatnilh ixchivinti ju Pablo. Para acsni naulh ju chunch pus ju yuꞌunch na pꞌas ixtalactꞌasai. Ixtanajun:
\p ―Amaknitꞌich ju ani ya jokꞌat. Jantuch lhijun ni vanach catsuculh.
\p
\v 23 Pus va tachi tsꞌau ixtalactꞌasai. Tamaxtulh ju ixcujuꞌan tachi ju va catamakniyach lana chai kꞌom tatantamacstꞌalh ju tꞌun.
\v 24 Pus ju comandante acsni laktsꞌilh ni chunch ixtalai ju lapanacni pus lana ajuni ju ixtaropajni ni catalhiꞌalh ju Pablo pulacni lacacuartel chai cataꞌulanilh. Ju chunch tsꞌa ma cachivinilh. Canaulh tuchi ixtalhixcajich ju lapanacni.
\v 25 Pus talhiꞌalh. Tamakchꞌilh lacaꞌaxtꞌakꞌan ni ixtanajun ni cataꞌulaniyaꞌ. Pus ju acsnich ju Pablo juni ju xacapitán ju vanin ixya:
\p ―Ca jantu lhijun ju lhamapꞌaksin ni lai quilalakanekmau ni vachuꞌ iclatꞌaputekꞌecantauch ju uxijnan ju romanonin untꞌatꞌit chai jantucaꞌ quilaktsꞌinicanta ju quilhamakꞌan u alin ju quintalakꞌalhin u jantu.
\p
\v 26 Pus acsni kꞌasmatlh ju ani ju xacapitán pus ju yuchi alh juniniꞌ ju comandante. Junich:
\p ―Kꞌox apꞌastꞌactꞌi ju tuchꞌi aꞌulhtꞌuyaꞌ ju anuꞌ lapanac. Ju yuchi vachuꞌ quintatꞌaputekꞌecantan ju quijnanꞌan ju romanonin juntau.
\p
\v 27 Pus ju acsnich ju comandante lakꞌalh ju Pablo chai junich:
\p ―Aqꞌuiꞌunch. Ja quilatꞌaputekꞌecantau ju quijnan ju romanonin icjuntau.
\p Chai ju Pablo naulh:
\p ―A.
\p
\v 28 Pus ju comandante kꞌalhtailh. Junich:
\p ―Ju quitꞌin na laklhu icmapalalh ni laich actꞌaputekꞌecalh ju romanonin.
\p Para ju Pablo juni:
\p ―Ju quitꞌin tus acsni tavanan ictsuculh ictꞌaputekꞌecanta ju romanonin ni vachuꞌ chunch ixjunita ju quimpai.
\p
\v 29 Pus ju acsnich lana tamacoꞌulalh ju yuꞌunch ju ixtaꞌulaniputun. Vachuꞌ ju comandante na talhanalh ni machakxalh ni vachuꞌ ixtꞌaputekꞌecanta ju romanonin ju Pablo chai ju yuchi ixlhinajunta ixmakchꞌica ni laich caꞌulanicalh.
\s1 Ju Pablo lhiꞌancalh junta ixtatakꞌaixtokta ju ixꞌucxtinin ju israelitanin
\p
\v 30 Pus ju comandante va iscꞌatsaputun istavasalanti tuchi talakꞌalhin ju ixtalhichivimakꞌan ju israelitanin. Pus ni tuncunchokolh ju yuchi alactꞌasanilh ju xalackꞌajin palijni chai ixchuxꞌan ju ixꞌucxtinin ju israelitanin. Chai lhinaulh ixmakxkꞌotca ju Pablo chai astan takꞌailhimilh junta ixtatakꞌaixtokta ju yuꞌunch.
\c 23
\p
\v 1 Pus ju Pablo alaktsꞌilh ju ucxtinin chai alacjuni:
\p ―Quiꞌalakꞌavin ju quitꞌin jantu icnavita tuꞌuꞌ talakꞌalhin ju laich aclhitalhanalh laꞌixmacni Dios tus chavai.
\p
\v 2 Pus ju acsnich ju xakꞌai pali ju Ananías ixjuncan alacjunich ju lapanacni ju vanin ixꞌalactꞌaya ni catapuquicsalhch.
\v 3 Pus ju acsnich ju Pablo juni:
\p ―Dios ju caꞌulaniyan ju uxintꞌi ni va acxpꞌutꞌiyunun. Ju uxintꞌi yuchi lhivilhtꞌi ni aqꞌuimpꞌuxcꞌonin ju quintalakꞌalhin tachi ju lhijun lacalhamapꞌaksin. Pus tajuch ni va navipꞌalai tachi ju jantu lhijun lacalhamapꞌaksin ni qꞌuilhinauch ju quimpuquicsaca.
\p
\v 4 Pus ju ixꞌalactꞌayalh tajunich:
\p ―Tajuch ni laich uni macxcai chivinti ju xakꞌai ixpali Dios.
\p
\v 5 Pus ju Pablo naulhch:
\p ―Jantu xaccꞌatsai ji quiꞌalakꞌavin ni yuchi cava ju xakꞌai pali. Ni xaccꞌatsa cava pus jantu chun xacjunilh ni laꞌixchivinti Dios ju tsꞌokcanta najun ni jantu macxcai aclhichivinilh tam xakꞌai laquilakꞌachakꞌan.
\p
\v 6 Pus ju Pablo acsni cꞌatsa ni quilhmactam ju ucxtinin ixtalhilacaꞌan ju ixlhamapꞌaksinꞌan ju fariseonin chai ju quilhmactam ixtalhilacaꞌan ju ixlhamapꞌaksinꞌan ju saduceonin pus pꞌas chivinilh lacapuꞌucxtin. Alacjuni:
\p ―Quintꞌalapanacni ju quitꞌin icfariseo. Ju quimpai vachuꞌ fariseo ixjunita. Chai iclhichivimakꞌancanta ni iclacaꞌi ni catataꞌacxtuchokoyaꞌ ju tanitach.
\p
\v 7 Chai acsni naulh ju chunch ju Pablo pus lana tatsuculh laklakꞌainin ju fariseonin chai ju saduceonin. Chai jantu va lakatam tava ju ixꞌatalacpastꞌacꞌatꞌan.
\v 8 Ju saduceonin ixtanajun ni jantu lai taꞌacxtuchokoi ju tanitach chai matiꞌ ju anquilh nin yuchi ju macxcai un. Para ju fariseonin tanajun ni lai taꞌacxtuchokoi ju tanitach chai alin ju anquilhnin chai ju macxcai un.
\v 9 Pus na pꞌas talaxakꞌala. Pus tataya ju aliꞌin ju na ixtalhaꞌatalanininta ju ixlhamapꞌaksinꞌan ju istꞌaꞌisraelitanin ju vachuꞌ fariseonin ixtajunita. Ju yuꞌunch tanaulh:
\p ―Jantu tuꞌuꞌ talakꞌalhin iclhitajuniyau ju ani ya lapanac. Ni tuꞌuꞌ xalaktsꞌin tachi ju va laꞌixꞌaklakꞌavanti u ni caxakꞌala ju tuꞌuꞌ anquilh pus kꞌoxich. Ju quijnan jantu ictꞌalasaputunau ju Dios.
\p
\v 10 Chai ni slivasalh ixtalaclakꞌaji ju sia yuꞌunch pus ju comandante na ixlhimaktalhananch ju Pablo. Ixnajunch ni jantu xcai ni catamacꞌatsani ju Pablo. Pus alacjunich ju ixtaropajni ni cataꞌalh chai catataiꞌi ju Pablo laꞌixtalhavatꞌan chai catalhiꞌalh lacacuartel.
\p
\v 11 Pus acsni tatsꞌisi pus ju kꞌai ucxtin Jesús talacasunilh ju Pablo chai junich:
\p ―Jantu atꞌalhan ji Pablo. Tachi ju xaꞌaꞌuni ju amachakꞌan ani Jerusalén ju quilacata pus tasqꞌuini ni aꞌunaꞌich ju amachakꞌan Roma vachuꞌ.
\s1 Makniputuncan ju Pablo
\p
\v 12 Pus acsni tuncunchokolh ju aliꞌin israelitanin talatꞌatakꞌoxilh ju chivinti ju sia yuꞌunch ta yu laich catamakniyaꞌ ju Pablo. Talaclajuni:
\p ―Jantu cativajiu nin yuchi ni cakꞌotꞌau tuꞌuꞌ tus ni jantu calaktsꞌimakniyau ju Pablo. Chai ni jantu camuctaxtuyau pus chach quintamamakꞌalhkꞌajniyan ju Dios.
\p
\v 13 Istapasata tꞌupꞌuxam lapanacni ju ixtanavita junima lhiꞌokxchivinti.
\v 14 Pus ju yuꞌunch taꞌalh laktsꞌinin ju xalackꞌajin palijni chai ju xalacpaꞌitnich ju sia istꞌaꞌisraelitanin chai tajunich:
\p ―Ju quijnan icnavitauch lakatam lacchivinti. Chai ni jantu acmuctaxtuyau pus chach quintamamakꞌalhkꞌajniyan ju Dios. Pus ju quijnan jantu tavanan tuꞌuꞌ actiꞌu tus ni jantu iclaktsꞌimakniyau ju Pablo.
\v 15 Pus ju uxijnan chai ju xalacpaꞌitnich ju ani lakꞌachakꞌan aꞌunaꞌitꞌit ju comandante ni vatsꞌisin camaxtuyaꞌ ju Pablo. Calhimilh lacapuꞌucxtin. Ju uxijnan chunch alatꞌit tachi ju va kꞌasmatnipꞌutꞌunatꞌit ju tuꞌuꞌ chivinti ju palai stavasalanti cava ixlacata ixlhamakꞌan. Pus ju quijnan iclakasivilauch ni laich acmakniyauch acsni tucaꞌ chaꞌan lacapuꞌucxtin.
\p
\v 16 Pus ju Pablo ixꞌalin pumatam ispꞌisekꞌe atsiꞌ. Chai ju yuchi ixꞌalin ju istsꞌalh. Pus ju anuꞌ tsꞌalh kꞌasmatlh ni apacxantaicanta ju Pablo. Pus alh juniniꞌ. Tanu lacacuartel chai quimacꞌatsanicalh ju Pablo.
\v 17 Chai ju Pablo tꞌasanilh pumatam xacapitán chai juni:
\p ―Lamapainin alhiꞌinchich juniya tsꞌalh junta vilhcha ju miꞌucxtinꞌan ju uxijnan. Ma va alin tuchi ju jumputun.
\p
\v 18 Pus ju capitán kꞌailhiꞌalh ju tsꞌalh junta ixvilhcha ju ixꞌucxtin chai junich:
\p ―Ju anuꞌ tachꞌin ju Pablo juncan quintꞌasanilh chai quintapaininilh ni ma aclhiminin juniya tsꞌalh ni ma va tꞌachivimputunan.
\p
\v 19 Pus ju comandante makchꞌapalh ju anuꞌ tsꞌalh chai tꞌaꞌalh alacatam chai sacmilh. Junich:
\p ―Tijuch ju qꞌuiꞌumpꞌutꞌun.
\p
\v 20 Pus ju yuchi junich:
\p ―Ju quintꞌaꞌisraelitanin talakꞌoxita ju chivinti junta tanajun ni ma catatapaininiyan ju uxintꞌi ni amaxtꞌuyaꞌich ju lhi ju Pablo chai ma alhipꞌinaꞌ lacapuꞌucxtin. Ju yuꞌunch ma va catalayach tachi ju ma va takꞌasmatniputunch tuꞌuꞌ chivinti ju palai stavasalanti cava ixlacata ju ixlhamakꞌan.
\v 21 Para tun aqꞌuiclacꞌaꞌitꞌi. Pus tapasatach tꞌupꞌuxam lapanacni ju tapacxantaji ju Pablo. Ju yuꞌunch tanavita lakatam lacchivinti junta tanajun ni ma jantu catavainaꞌ nin ma catakꞌotꞌaꞌ tuꞌuꞌ tus ni jantu catalaktsꞌimakniyaꞌ ju Pablo. Chai ni jantu catamuctaxtuyaꞌ pus ma chach amamakꞌalhkꞌajni ju Dios. Pus ju chavai ma talakasivilanalh. Ma va tapacxanvilanalh ju minchivinti tuchꞌi anaviyaꞌ.
\p
\v 22 Pus ju acsnich ju comandante junich ju tsꞌalh:
\p ―Tun xamatiꞌ tꞌiꞌun ni uxintꞌi ju xaqꞌuinqꞌuimacꞌatsꞌaniyachiꞌ ju ani chivinti.
\p Pus acsni juni ju chunch pus malakachachokolh laꞌixchakaꞌ.
\s1 Malakachanilh ju gobernador Félix ju Pablo
\p
\v 23 Chai astan ju yuchi atꞌasanilh pumatꞌui capitán chai ajunich:
\p ―Amakꞌaixtꞌoktꞌit ju taropajni ju laich alactꞌapꞌitꞌit ju lakꞌachakꞌan Cesarea tachi lakanajatsi hora chavai tokꞌoxai. Lakatꞌui cientos catachꞌajaxꞌanaꞌ chai setenta lacacaballo cataꞌanaꞌ chai lakatꞌui cientos ju catalhiꞌanaꞌ ju ispadaꞌan.
\v 24 Chai alakꞌasilhipꞌinitꞌit ju caballo ju capuꞌanach ju Pablo chai kꞌox alhipꞌiniyaꞌitꞌit ju gobernador Félix. ―Chunch ju ajuni ju ixlaccapitán.
\p
\v 25 Chai ju comandante atsꞌoknunilh ju Félix lakatam alhiqui ju catalhiꞌaniyaꞌ ju ixcapitán. Chani juni:
\p
\v 26 “Quitꞌin ju icClaudio Lisias chai va icmacꞌamiyan ji señor gobernador Félix.
\v 27 Ju israelitanin ixtachꞌapata ju ani lapanac chai ixtamakniputun. Para ju quitꞌin acsni icmachakxalh ni vachuꞌ quilatꞌaputekꞌecantauch ju quijnanꞌan ju romanonin juntau pus icꞌalactꞌaꞌalh ju quintaropajni chai icmakꞌalhtaxtulh laꞌixmacaꞌan.
\v 28 Chai ju quitꞌin ni va xaccꞌatsaputun tuchi talakꞌalhin ju talhichivimakꞌanch pus iclhimilh junta ixtatakꞌaixtokta ju xalacpaꞌitni ju istꞌaꞌisraelitanin.
\v 29 Pus icmachakxalh ni va jantu kꞌox talhiulai ju yuꞌunch tachi ju lhichivinin ju ixlhamapꞌaksinꞌan ju ani lapanac. Para jantu tuꞌuꞌ talakꞌalhin navita ni laich calhimapalalh ju laꞌixꞌaninti nin yuchi ni lai calhitꞌalhnucalh.
\v 30 Pus icmacꞌatsanicanta ni ixtaꞌapacxantayananch ju istꞌaꞌisraelitanin. Pus yuchi vatsꞌalhti iclhimalakachanichin ju Pablo. Vachuꞌ icꞌajunilh ju yuꞌunch ju taꞌachivimakꞌanan ni catanonantach ju lamiꞌucxlacapuꞌ ju uxintꞌi tuchi talakꞌalhin ju tamucꞌani ju Pablo. Ca va yuchach”.
\p
\v 31 Pus ju taropajni talhiꞌalh ju Pablo tachi ju ixꞌajuncantach. Tsꞌis ju lhiꞌancalh ju lakꞌachakꞌan Antípatris.
\v 32 Chai acsni tuncunchokopa pus va yuꞌunch ju ixtapuꞌanta ju caballo ju tatꞌaꞌalh ju Pablo. Ju aliꞌin taminchokolh laꞌixchakaꞌan.
\v 33 Pus ju yuꞌunch ju ixtatꞌaꞌanta ju Pablo acsni tachaꞌalh ju lakꞌachakꞌan Cesarea taxtaknilh ju alhiqui ju gobernador chai vachuꞌ tamakꞌaxtaknilh ju Pablo.
\v 34 Chai ju gobernador acsni laktsꞌinkꞌo ju alhiqui sacmilh ju Pablo tas amachakach. Tis estado. Pus ju Pablo juni ni amachakaꞌ Cilicia ixjunita.
\v 35 Ju acsnich ju yuchi juni:
\p ―Ackꞌasmatniyanch acsni va cataminach ju tachivimakꞌananch.
\p Pus acsni juni ju chunch lhinaulh ixlhiꞌanca laꞌixchakaꞌ ju kꞌai ucxtin Herodes chai ajuni ju taropajni ni catalhistaclh.
\c 24
\s1 Ju Pablo juni ju Félix tuchi ixnavita
\p
\v 1 Acsni tapasalh lakaquis avilhchan pus ju xakꞌai pali ju Ananías ixjuncan chinchalh ju lakꞌachakꞌan Cesarea. Alactꞌamilh ju aliꞌin xalacpaꞌitnich ju israelitanin chai pumatam lapanac ju cachivinaꞌ lacapuꞌucxtin ixlacataꞌan. Ju yuchi Tértulo ixjuncan. Pus ju yuꞌunch talakꞌalh ju gobernador Félix ni va ixtachivimakꞌanch ju Pablo.
\v 2 Chai acsni lhimincalh ju Pablo pus ju Tértulo tsuculh chivimakꞌanaꞌ ju yuchi. Junich ju gobernador:
\p ―Ju lamilacata ju uxintꞌi ji gobernador jantu alin ju lasat ju chavai chai lamiꞌatalacpastꞌacꞌat na lhu taxtokni ju kꞌox navitꞌa ju ani laquilacatꞌunꞌan.
\v 3 Pus quinchux quincꞌan iclajunau lakꞌailaktsꞌiuch ji gobernador ixlacata tachi chun ju ani taxtokni ju quilanavinitauch.
\v 4 Pus ju quitꞌin jantu panicni icmamaktilaputunan. Va ictapaininiyan ni aqꞌuinkꞌasmatninch lacatsꞌunin ju tuchi icjumputunan.
\v 5 Pus ju ani ya lapanac lana kꞌox kꞌai junita. Chai va alakmaktalhkꞌaman ju quintꞌaꞌisraelitanin quincꞌan ixlhilacaputsꞌun ju lacamunutpaꞌ. Ju yuchi vachuꞌ chꞌakꞌokꞌai ju anuꞌ Jesús amachakaꞌ Nazaret.
\v 6 Ju yuchi malacasulh tachi ju va jantu tuꞌuꞌ lhiulai ju kꞌai quimpujitat quincꞌan ni laich tucan xamanui pumatam ju jantu israelita junita. Chai jantu lhijun ni catanu ju yuchi. Pus ju quijnan icquichꞌapauch. Chai xacmamakꞌalhkꞌajniputunau tachi ju lhijun laquilhamapꞌaksin quincꞌan.
\v 7 Para ju comandante ju Lisias juncan quintalakmin chai quintataiꞌinin ju Pablo va lacatapꞌastu.
\v 8 Chai alacjuni ju yuꞌunch ju ixtaꞌachivimakꞌanan ni catalakminanch ju uxintꞌi. Pus miꞌakstu lai amakꞌosaspꞌitꞌaꞌ chai acꞌatsꞌayaꞌ ni slivasalh tachi ju iclajunau. ―Chunch ju junilh ju gobernador ju Tértulo.
\p
\v 9 Chai chux ju istꞌaꞌisraelitanin ju vachuꞌ anch ixtavilanalh ixtanajun ni slivasalh chunch tachi ju ixnajunta ju Tértulo.
\v 10 Pus ju acsnich ju gobernador tamacyonilh ju Pablo ni laich cachivinilh. Chai ju yuchi juni:
\p ―Ju quitꞌin iccꞌatsai ni na lhu cꞌata ju unitꞌa gobernador ju ani laquintꞌun quincꞌan. Pus yuchi lhikꞌach ju aclhijunan ju stavasalanti tuchi icnavita.
\v 11 Alin lapanacni ju laich catajunin ni va lakacautꞌuicaꞌ avilhchan xajun acsni icꞌalh lakꞌayanaꞌ ju Dios ju lakꞌachakꞌan Jerusalén.
\v 12 Ju quitꞌin jantu xactꞌalakꞌaitꞌajun tam xamatiꞌ sin acꞌamaktalhkꞌamalh ju lapanacni lacakꞌai pujitat nin lacalacatꞌicstꞌi pujitat nin lacati.
\v 13 Ju anich tavilanalh jantu tavanan lai catamavasalaniyan tuchi quintalhichivimakꞌanch ni jantu tuꞌuꞌ icnavita.
\v 14 Para acjunan ni vasalh iclhilacaꞌan ju Dios ju vachuꞌ ixtalhilacaꞌan ju makꞌaniya quilacpaꞌitni quincꞌan. Para ju chavai chunch icnavi tachi ju najun lacasastꞌi atalaninti chai ju yuꞌunch tanajun ni jantu sok ju chunch. Para aktsꞌiya sok ni vachuꞌ iclacaꞌi tachi chun ju tsꞌokcanta laꞌixlhamapꞌaksin ju Moisés chai tachi chun ju tatsꞌokta ju makꞌaniya lapanacni ju ixtanajun ixchivinti Dios.
\v 15 Ju quintꞌaꞌisraelitanin talacaꞌi ni catataꞌacxtuchokotachilh ju tanitach. Catataꞌacxtuchokotachilh ju soknicꞌa isꞌatsucuntiꞌan chai ju jantu soknicꞌa isꞌatsucuntiꞌan. Pus vachuꞌ chunch ju iclacaꞌi ju quitꞌin.
\v 16 Chai ni iclacaꞌi ju chunch pus laꞌixlhichux quiꞌalhunut iclacasqꞌuin ni jantu tavanan tuꞌuꞌ acnavi talakꞌalhin ju laich aclhitalhanalh laꞌixmacni Dios u laꞌixmacni ju quintꞌalapanacni.
\p
\v 17 Na lakalhu cꞌata xacꞌalhtanatꞌajun alakatam lacatꞌun. Para ju chavai icminchokota laquintꞌun. Va xacꞌalhiminita ju tumin ju quintꞌaꞌamachakꞌan ju ixlhikꞌailaktsꞌincanta. Chai vachuꞌ xacxtakniputun lakatam lhakꞌailaktsꞌin ju Dios.
\v 18 Acsni salaka xacnavita ju quiꞌalhunut laꞌixmacni Dios tachi ju iclhilanitauch ju quijnan pus ictanulh lacakꞌai quimpujitat quincꞌan. Va xacxtakniputun ju Dios ju quilhakꞌailaktsꞌin. Chai anchach quintalhitajulh ju quintꞌaꞌisraelitanin amachakꞌan xalacatꞌun Asia. Para jantu xacmakvi laꞌixtalhavat lapanacni nin actꞌalakꞌailh xamatiꞌ.
\v 19 Tasqꞌuini ni yuꞌunchach ixtamilh ju ani lamiꞌucxlacapuꞌ chai ixquintachivimakꞌalh ni tuꞌuꞌ quintalhixcaji.
\v 20 U mas yuꞌunch ju ani tavilanalh chach tanaulh ni quintalhitajunita tuꞌuꞌ quintalakꞌalhin acsni xacmanucancha laꞌixpuꞌucxtinꞌan ju yuꞌunch.
\v 21 Va yuchi ca laich catanaulh ni talakꞌalhin xacnavi acsni xacya laꞌixꞌucxlacapuꞌan ju yuꞌunch chai na pꞌas icchivinilh chai icꞌajuni ni yuchi iclhichivimakꞌancanta ni iclacaꞌi ni catataꞌacxtuchokotachilh ju tanitach.
\p
\v 22 Pus ju Félix aktsꞌiya ismispai tuchi talacaꞌi ju tachꞌakꞌokꞌai ju Jesús chai ajuni ju lapanacni ni jantu lai catilakꞌoxilh ju ixlhamakꞌanꞌan ju acs avilhchan. Va ajuni:
\p ―Acsni va camilh ju comandante ju Lisias juncan pus acsnich ju aclalakꞌoxiniyau ju milhamakꞌanꞌan.
\p
\v 23 Chai junicalh ju xacapitán ni calhiꞌanchokolh ju Pablo laꞌixchakaꞌ ju kꞌai ucxtin Herodes chai calhistaclh para chach navilh va tuchi ixnaviputun ju Pablo. Chai chach talakmilh ju ixꞌamigojni chai chach taxtakni tuꞌuꞌ ju camaktasqꞌuiniyaꞌ ju Pablo.
\p
\v 24 Pus acsni tapasalh lakatꞌui lakatꞌutu avilhchan ju Félix chinchokocha ju lakꞌachakꞌan Cesarea. Tꞌamilh ju ixꞌamachakaꞌ ju Drusila ixjuncan. Ju yuchi israelita ixjunita. Pus ju Félix lhinaulh istꞌasanica ju Pablo ni va ixtakꞌasmatniputun aliꞌ chivinti ta yu lai lhilacaꞌancan ju Jesucristo.
\v 25 Pus ju Pablo ajuni ni lacasqꞌuin ju Dios ni salaka cava ju quiꞌatsucuntiꞌan laꞌixmacni ju yuchi. Chai tasqꞌuini ni cakꞌaichokocau quiꞌakstuꞌan. Vachuꞌ ajuni ni cachinaꞌ avilhchan acsni canonaꞌ ju Dios tichi chavaꞌitnich ju soknicꞌa laꞌixmacni yuchi chai tichi chavaꞌitnich ju jantu. Chai ju Félix acsni kꞌasmatnilh ju ixchivinti ju Pablo na talhanalh chai juni:
\p ―Ju chavai apꞌinchich. Acsni caꞌalinach ju quimpantsꞌiquis aclhinonchokoyach mintꞌasanica.
\p
\v 26 Ju Félix ixnajun ni ca cakꞌalhtasuniyaꞌ tumin ju Pablo ni laich caꞌanchokolh laꞌixchakaꞌ. Pus yuchi va tsa ixlhilhinajunta istꞌasanica chai va tsa ixtꞌachivinin.
\v 27 Acsni tapasalh lakatꞌui cꞌata pus ju Félix taxtulh laꞌixpuꞌucxtin chai tanulh ju Porcio Festo. Pus ju Félix ni ixlacasqꞌuin ni vana ixꞌamigojni catava ju israelitanin pus yuchi lhimacaulh tachꞌin ju Pablo.
\c 25
\s1 Ju Pablo ya laꞌixpuꞌucxtin Festo
\p
\v 1 Ju ixlhilakatꞌutu avilhchan acsni tanulh laꞌixpuꞌucxtin ju Festo pus ju yuchi taxtulh ju lakꞌachakꞌan Cesarea. Alh ju lakꞌachakꞌan Jerusalén.
\v 2 Chai ju anch talakmilh ju xalackꞌajin palijni chai ju xalackꞌajin israelitanin. Va tachivimakꞌalh ju Pablo.
\v 3 Tasqꞌuinilh lamapainin ju gobernador ni calhinaulh istꞌasanica ju Pablo ju lakꞌachakꞌan Jerusalén. Para ju yuꞌunch va ixtalhipuxconi ta yu laich catapukꞌalhaumakni ju lacati.
\v 4 Para ju Festo alacjuni:
\p ―Chach tolhcha ju Pablo junta vilhcha. Ju quitꞌin acꞌananta ju anch ni catapasayaꞌ lakatꞌui lakatꞌutu avilhchan.
\p
\v 5 Vachuꞌ alacjunich:
\p ―Ju aliꞌin ju lamilhiꞌuxijnan ju laich cataꞌanaꞌ chach quintatꞌaꞌalh. Anch ju laich catachivimakꞌanach ju anuꞌ lapanac ni alin tuꞌuꞌ ixtalakꞌalhin.
\p
\v 6 Pus tachi lakatsajin lakacau avilhchan tavilhcaꞌ ju lakꞌachakꞌan Jerusalén ju Festo. Chai ni tuncunchokopa pus lana alhch ju lakꞌachakꞌan Cesarea. Chai acsni alakatam avilhchan jumpa pus alh lacakꞌai chakaꞌ chai lhinaulh ixꞌica ju Pablo.
\v 7 Chai acsni lhichincancha ju Pablo pus lana talactayalh ju israelitanin ju ixtamintachalh ju Jerusalén. Tachivimakꞌalh ju Pablo. Na lhu chai na kꞌai talakꞌalhin ju ixtaꞌulani mas jantu lai ixtamavasalai ni vasalh chunch ju canavi.
\v 8 Pus ju acsnich ju Pablo chivinilh. Junich ju gobernador:
\p ―Ju quitꞌin jantu tuꞌuꞌ icnavita ju jantu lhijun ju quilhamapꞌaksin quincꞌan ju israelitanin icjuntau. Jantu tuꞌuꞌ icnavita ju lacakꞌai quimpujitat quincꞌan ju jantu lhijun ni acnavi. Chai jantu tuꞌuꞌ icnavita ju lhikꞌalhtsꞌajui ju César ju xakꞌai tucan ju ani lacatꞌun Roma.
\p
\v 9 Para ju Festo ni ixꞌamigojni ixꞌanaviputun ju israelitanin pus junich ju Pablo:
\p ―Ja pꞌimpꞌutꞌun ju lakꞌachakꞌan Jerusalén. Anchach ju aclakꞌoxiniyanta ju milhamakꞌan.
\p
\v 10 Para ju Pablo kꞌalhtailh. Junich:
\p ―Icya lamiꞌucxlacapuꞌ ju uxintꞌi ju ixlapanac unitꞌa ju César ju xakꞌai tucan ju ani lacatꞌun Roma. Chai tasqꞌuini ni anich aclakꞌoxinicalh ju quilhamakꞌan. Ju uxintꞌi kꞌoxich cꞌatsꞌai ni jantu icꞌanavinita tuꞌuꞌ talakꞌalhin ju quintꞌaꞌisraelitanin.
\v 11 Pus ni tuꞌuch icnavita ju lai aclhimapalalh ju quiꞌaninti pus jantu icnajun ni jantu actini. Para ni jantu slivasalh tuchi quintalhichivimakꞌan pus jantu xamatiꞌ lai aquintimakꞌaxtaklh laꞌixmacniꞌan ju yuꞌunch. Iclacasqꞌuin ni yuchi ju aquilakꞌoxinilh ju quilhamakꞌan ju César ju xakꞌai tucan ju ani lacatꞌun Roma.
\p
\v 12 Pus ju acsnich ju Festo alactꞌachivinilh ju ixtꞌaꞌucxtinin chai astan junich ju Pablo:
\p ―Ju uxintꞌi naꞌuntꞌa ni lacꞌasqꞌuin ni yuchi ju César ju calakꞌoxiniyan ju milhamakꞌan. Pus kꞌoxich. Acmalakachaniyan ju yuchi.
\s1 Ju Pablo tꞌachivinilh ju kꞌai ucxtin Agripa
\p
\v 13 Pus acsni tapasalh lakatꞌui lakatꞌutu avilhchan apumatam xakꞌai ucxtin ju Agripa ixjuncan tꞌamilh ju ixꞌamachakaꞌ ju Berenice ixjuncan. Tamilh ju lakꞌachakꞌan Cesarea ni va ixtamacꞌamiputun ju Festo.
\v 14 Chai tatolhcha lakatꞌui lakatꞌutu avilhchan. Pus ju Festo chivintanunilh ju ixtꞌaxakꞌai ucxtin ixlacata ju Pablo. Chanich juni:
\p ―Ju Félix acsni tavanan taxtulh laꞌixpuꞌucxtin maconulh lacapulachꞌin pumatam lapanac.
\v 15 Chai acsni icquilalh ju lakꞌachakꞌan Jerusalén pus ju xalackꞌajin ixpalijniꞌan chai ju xalacpaꞌitniꞌan ju israelitanin quintalakchaꞌalh. Tachivimakꞌalh ju anuꞌ lapanac chai va ixtalacasqꞌuin ni aclhinaulh ixmaknica.
\v 16 Para ju quitꞌin icꞌajunilh ni jantu chun ju lacan ju ani xalacatꞌun Roma. Jantu lai makꞌaxtakcan laꞌixꞌaninti pumatam acsni tucaꞌ tꞌalalaktsꞌinta ju taꞌachivimakꞌanan chai acsni tucaꞌ najun ni stavasalanti u jantu ju tuchi lhichivimakꞌancanch.
\v 17 Pus ixlhiyuchi jantu lana icpacxalh acsni tavanan taminchalh ju ixtachivimakꞌan ju anuꞌ lapanac. Ni tuncunchokolh pus lana icmilh lacakꞌai chakaꞌ chai iclhinaulh ixꞌica ju anuꞌ lapanac.
\v 18 Pus ju quitꞌin xacnajunta ni ca na kꞌai talakꞌalhin ju xanavi ju anuꞌ lapanac. Para jantu. Acsni tavanan tatsuculh chivinin ju taꞌachivimakꞌanin jantu tuꞌuꞌ kꞌai talakꞌalhin ju tamucꞌanilh.
\v 19 Va jantu kꞌox talhiulai tachi ju lhichivinilh ju tuchi talhilanitach ju yuꞌunch. Vachuꞌ jantu kꞌox talhiulai ni va najun ju Pablo ni ma va taꞌacxtuchokolh pumatam lapanac ju Jesús ixjuncan acsni ixmaknicanta.
\v 20 Pus ju quitꞌin jantu xaccꞌatsai ta yu laich aclakꞌoxi ju tuꞌuꞌ lhamakꞌan ju chunch. Pus icsacmilh ju Pablo ni jantu caꞌamputulh ju lakꞌachakꞌan Jerusalén. Anch aclakꞌoxinilh ju ixlhamakꞌan.
\v 21 Para ju Pablo sqꞌuinlh ni yuchi ju xakꞌai tucan César ju calakꞌoxinilh ju ixlhamakꞌan. Pus ni chunch ju sasqꞌuin pus iclhinaulh ixlhistꞌacꞌa tus acsni laich acmacaꞌanilh ju yuchi.
\p
\v 22 Pus ju acsnich ju Agripa junich ju Festo:
\p ―Ju quitꞌin vachuꞌ ickꞌasmatniputun ju ixchivinti ju anuꞌ lapanac.
\p Pus ju Festo junich:
\p ―Lhich akꞌasmatniyach.
\p
\v 23 Pus acsni alakatam avilhchan jumpa ju Agripa chai ju Berenice tamilh lacapuꞌucxtin. Salh kꞌox ixtamalakchꞌininta ju yuꞌunch. Chai alactꞌatanucha ju ixꞌucxtinꞌan ju taropajni chai ju xalackꞌajin ju anuch lakꞌachakꞌan. Pus ju Festo lana lhinaulh ixꞌica ju Pablo.
\v 24 Chai acsni chincha ju Pablo pus ju Festo chani ajunilh ju ixtavilanancha:
\p ―Ji kꞌai ucxtin Agripa chai chux ju uxijnan ju quilatꞌavilau ju ani. Anich ya ju lapanac ju iclalhijuniuch. Pus acsni xacvilhcha ju lakꞌachakꞌan Jerusalén chai acsni icminchokolh ju ani na lhu israelitanin quintachivitanunita ixlacata ju yuchi. Pꞌas quintajuni ni jantu lhijun ni vanach catsuculh.
\v 25 Para ju quitꞌin jantu tuꞌuꞌ iclhitajunita ju ixtalakꞌalhin ju lai calhimapalalh laꞌixꞌaninti. Chai ni isꞌakstu ju Pablo ju sqꞌuinlh ni laich calakꞌalh ju César pus yuchi iclhimalakachaniputun.
\v 26 Para jantu tuꞌuꞌ iclhitajunita ju lai aclhiꞌatsꞌoknunilh ju xakꞌai tucan. Yuchi xaclalhimaxtuniyau ju uxijnan. Va iclacasqꞌuin ni uxintꞌi ji kꞌai ucxtin Agripa aqꞌuilhasacmiyaꞌich. Ta tsꞌa jantu catasu ju tuꞌuꞌ ju laich acꞌatsꞌoknunilh ju César.
\v 27 Jantu kꞌox iclhiulai ni lai acmalakacha pumatam tachꞌin chai jantu acjuni ta lhijunitach ixtalakꞌalhin.
\c 26
\s1 Ju Pablo junilh ju kꞌai ucxtin Agripa tuchi ixnavita
\p
\v 1 Ju acsnich ju kꞌai ucxtin Agripa junilh ju Pablo:
\p ―Laich achꞌivin miꞌakstu.
\p Pus ju Pablo chꞌixlh ju ixmacaꞌ chai tsuculh chiviniꞌ. Junich:
\p
\v 2 ―Na iclhikꞌachan ji ucxtin Agripa ni laich acjunan ju uxintꞌi ju stavasalanti ixlacata ju talakꞌalhin ju quintasamucꞌani ju quintꞌaꞌisraelitanin.
\v 3 Yuchi iclhikꞌachan ni iccꞌatsai ni machꞌakxakꞌoꞌui chux tachi ju iclhilanitauch ju quijnan ju israelitanin icjuntau. Chai vachuꞌ machꞌakxaich tuchi iclalhilakꞌayauch. Pus yuchi iclhitapaininiyan ni va lacsni aqꞌuinkꞌasmatninch.
\s1 Ju Pablo juni ta yu ixjunita isꞌatsucunti acsni tucaꞌ ixlhilacaꞌanta Jesús
\p
\v 4 Chux ju quintꞌaꞌisraelitanin tamispai ju quiꞌatsucunti tus quilhitalacatꞌicstꞌinti acsni ictakꞌayacha laquilakꞌachakꞌan chai acsni xacvi ju lakꞌachakꞌan Jerusalén.
\v 5 Ju yuꞌunch makꞌanch quintamispaich chai laich catanaulh ni va catanomputulh ni tus quilhitalacatꞌicstꞌinti makfariseo xacjunita. Chai ju quilhamapꞌaksin quincꞌan ju fariseonin icjuntau yuchi ju palai tsꞌinqꞌui tachi chun ju quilhamapꞌaksin quincꞌan ju israelitanin icjuntau.
\v 6 Chai ju chavai iclhichivimakꞌancantach va ixlacaꞌatalh ni iclacaꞌi ni caꞌamacxtuchokoyaꞌ ju Dios ju tanita ni chunch ju alaclhitꞌatakꞌoxita ju makꞌaniya quilacpaꞌitni quincꞌan.
\v 7 Chux ju quilhmaccautꞌui ju quintꞌaꞌisraelitanin talacaꞌi ni camuctaxtuyaꞌ ju Dios ju tuchi xanajun chai caꞌamacxtuchokoyaꞌ ju tanitach. Chai yuchi iclhilakꞌayayau chai iclhichꞌalhcatnaniyau ju Dios tuncuj chai tsꞌis. Para ji kꞌai ucxtin Agripa yuchi jumpalat ju quintalhichivimakꞌanan ni vachuꞌ chun ju iclacaꞌi ju quitꞌin.
\v 8 Ju uxijnan tajuch ni na va xcaich lhiulayatꞌit ni laich camaxtuchokolh ju Dios ju tanitach.
\s1 Ju Pablo juni ta yu ixlhimakchꞌapui ju lapanacni ju ixtalhilacaꞌanta Jesús
\p
\v 9 Pus ju makꞌanch ju quitꞌin vachuꞌ xacnajun ni na istasqꞌuini ni na acmamakꞌalhkꞌajni ju ixtachꞌakꞌokꞌai ju Jesús amachakaꞌ Nazaret.
\v 10 Chai chunch xacnaviyacha ju lakꞌachakꞌan Jerusalén. Chai ju xalackꞌajin palijni xaquintaxtaknita ju alhiqui junta najun ni laich acꞌatꞌalhnu ju talhilacaꞌanta Jesús. Chai na lhu ju icꞌatꞌalhnu. Chai acsni ixꞌamakniputun pus vachuꞌ quitꞌin xacmaknajun ni lhijun ni chunch caꞌulhtucalh.
\v 11 Chai na paklhu icꞌamamakꞌalhkꞌajni ju ixtatanui laꞌixpujitatꞌan. Tapꞌastu xacꞌajuni ni catalhitsꞌiꞌilh ju Jesús chai catanaulh ni jantu vana catachꞌakꞌokꞌalh. Chunch xacnavi acsni xacꞌan lakatamin lakatamin lakꞌachakꞌan laꞌixpujitatꞌan. Chai ni slivasalh na xacꞌaxcaji pus xacꞌalacchꞌakꞌokꞌaxmai tus alakatam lacatꞌun ni laich acꞌamamakꞌalhkꞌajni.
\s1 Ju Pablo juni ta yu lhilacaꞌalh ju Jesús
\p
\v 12 Chai ni xacꞌamamakꞌalhkꞌajniputun ju aliꞌin pus yuchi xaclhiꞌamputun ju lakꞌachakꞌan Damasco. Chai yuꞌunch ju xalackꞌajin palijni ju xaquintamalakachai chai xaquintaxtaknita ju alhiqui junta najun ni laich tachꞌin acꞌanavi ju talhilacaꞌanta Jesús.
\v 13 Para ji kꞌai ucxtin acsni xacꞌanta ju lacati iclaktsꞌilh lakatam maclhcu ju xatapulhcuyacha ju lactꞌiyan. Kꞌatuncuj ixjunita para palai tachapun ixjunita ju anuꞌ maclhcu. Palai jantu ju avilhchan. Tapulhcuchilh junta xacꞌanta lacati ju quitꞌin chai ju xaquintatꞌaꞌanta.
\v 14 Pus lana tin iclactaꞌaktau ju lacatꞌun quinchux quincꞌan. Chai ickꞌasmatlh lakatam chivinti ju xaminacha lactꞌiyan. Chai ju yuchi xaquijuni laquilhihebreo: “Saulo. Saulo. Jantu alhimakchꞌapꞌu ju quilapanacni. Acsni chꞌun ju lai pus tachi ju va jun quitꞌin ju qꞌuilhimakchꞌapꞌui. Para alai miꞌakstu ju mamakꞌalhkꞌajnichꞌokꞌocꞌan acsni sastꞌucꞌa ju ixtaxtokni Dios”. Chunch xaquijuni.
\v 15 Chai icjunich: “Tis chavaichꞌat ji ucxtin”. Chai ju yuchi quijuni: “Quitꞌin icJesús ju qꞌuilhimakchꞌapꞌuich.
\v 16 Para akꞌostꞌaꞌulh. Atꞌaich. Ju quitꞌin iclhitalacasuniyan ni anaviyaꞌ ju quilhichꞌalhcat chai ni anonaꞌich ni qꞌuilaktsꞌintꞌach ju lacati. Chai vachuꞌ anonaꞌich ju tuchi acmalacasuniyanch astanch.
\v 17 Pus ju chavai acmalakachayan ni alakpꞌinaꞌich ju yuꞌunch ju jantu israelitanin tajunita. Chai acꞌaktaijuyan ni jantu lai catamakniyan ju yuꞌunch nin yuꞌunch ju mintꞌaꞌisraelitanin.
\v 18 Acmalakachayan ni amalakpꞌucꞌuꞌuyaꞌ. Ju chunch acsni catamaconaꞌ ju macxcai ju tamaputsꞌisini ju ixꞌalhunutꞌan chai catalacaꞌiniyaꞌ ixchivinti Dios pus tachi ju va catuncunach laꞌistacꞌatsanꞌan. Chai vachuꞌ laich catatakꞌalhtaxtuyaꞌ laꞌixtachaput ju lhacaticuru chai catachꞌakꞌokꞌayaꞌ ju Dios. Vachuꞌ aquintalhilacaꞌanch ju quitꞌin chai ju chunch camacꞌacxanicanaꞌ ju ixtalakꞌalhinꞌan chai vachuꞌ quilapanacni catajunaꞌ tachi ju aliꞌin ju quintalhilacaꞌanta”. Chunch xaquijuni.
\s1 Ju Pablo quiclacaꞌi tuchi juni ju Dios
\p
\v 19 Pus ji ucxtin Agripa iclacaꞌinikꞌo chux tachi ju quijuni ju Jesús acsni quixakꞌalacha tus lactꞌiyan.
\v 20 Pus pꞌulhnan icꞌajunilh ixchivinti Dios ju amachakꞌan Damasco chai astan ju amachakꞌan Jerusalén. Chai astan icꞌajunilh ju lapanacni ju ixtatꞌajun ixlhilacaputsꞌun ju xaꞌestado Judea. Vachuꞌ icꞌajunilh ixchivinti Dios ju yuꞌunch ju jantu israelitanin tajunita. Icꞌajunkꞌo ni catamacaulh ju macxcai isꞌatsucuntiꞌan chai catachꞌakꞌokꞌalh ju Dios chai catanavilh ju kꞌox. Ju chunch caputasuyach ni vasalh tamacaulh ju macxcai chai tachꞌakꞌokꞌata ju Dios.
\v 21 Chai va ixlacaꞌatalh ni chunch xacꞌajuni ju lapanacni quintaquilhichꞌapalh ju quintꞌaꞌisraelitanin lacakꞌai pujitat chai xaquintamakniputun.
\v 22 Para tus chavai quiꞌaktaijuta ju Dios. Yuchi iclhitailhiꞌanta ixꞌajunica ixchivinti Dios ju xalackꞌajin chai ju yuꞌunch ju jantu tuꞌuꞌ ixtapalhniꞌan. Chai jantu tuꞌuꞌ icnajun. Va yuchi icnajun tachi ju ixnajun ju Moisés chai tachi ju ixtanajun ju makꞌaniya lapanacni ju ixtanajun ixchivinti Dios acsni ixtanajun tuchi ju catapasayaꞌ.
\v 23 Pus ju yuꞌunch ixtanajun chai ju quitꞌin vachuꞌ icnajun ni aktsꞌiya istasqꞌuini ni camakꞌalhkꞌajnalh ju anuꞌ ju ixnoncan ni camalakachayachilh ju Dios. Chai canilh chai yuchi ju pꞌulhnan calokꞌonchokolh laꞌixꞌaninti. Ju chunch catacꞌatsayaꞌ ju quintꞌaꞌamachivinti chai ju aliꞌin lapanacni ni catatakꞌalhtaxtuyaꞌ chai jantu catitaꞌalh ju lacajipi ju catalhilacaꞌanach ju yuchi.
\s1 Ju Pablo ixmalhilacaꞌaniputun ju Jesús ju kꞌai ucxtin Agripa
\p
\v 24 Pus acsni ixtꞌajun nonaꞌ junima chivinti ju Pablo pus ju Festo pꞌas chivinilh. Juncanch ju Pablo:
\p ―Va lakꞌachꞌapꞌuich ju uxintꞌi. Na takꞌalhinitach ju miꞌaktsulh ni na lhu xalhitꞌamakꞌaꞌui.
\p
\v 25 Para ju Pablo junich:
\p ―Jantu va iclakachapui ji ucxtin Festo. Laquintakꞌoxiti ju icchivinin chai stavasalanti ju tuchi icnajun.
\v 26 Ju ani vi kꞌai ucxtin Agripa cꞌatsakꞌojui junima taxtokni. Yuchi jantu iclhitalhanan acsni icnajun ju chunch laꞌixꞌucxlacapuꞌ ju yuchi. Iccꞌatsai ni cꞌatsakꞌojui junima taxtokni ni jantu va sek xanavi tuꞌuꞌ ju Jesús.
\v 27 Ju uxintꞌi ji ucxtin Agripa ja lacꞌaꞌich ju ixchivintiꞌan ju makꞌaniya lapanacni ju ixtanajun ixchivinti Dios. Iccꞌatsai ni lacꞌaꞌich.
\p
\v 28 Pus ju acsnich ju Agripa juni:
\p ―Ju uxintꞌi ca va naꞌunch ni vatsꞌalhti aqꞌuimalacꞌaꞌiniyaꞌ chai aclhilacaꞌanach ju Jesús.
\p
\v 29 Chai ju Pablo junich:
\p ―Kꞌoxich ni vatsꞌalhti ju alacꞌaꞌiyaꞌ. Chai vana kꞌox mas va lacsnich ju alacꞌaꞌiyaꞌ. Va yuchi ni calacasqꞌuinach ju Dios ni vachuꞌ alacꞌaꞌitꞌi ju uxintꞌi tachi ju iclacaꞌich ju quitꞌin. Chai vachuꞌ catalacaꞌilh chux ju quintatꞌajun kꞌasmatninin. Va yuchi ni jantu iclacasqꞌuin ni tachꞌin aꞌuntꞌit tachi ju icjunita.
\p
\v 30 Pus acsni nonkꞌo junima chivinti ju Pablo pus lana tataya ju tucan xakꞌai Agripa chai ju ucxtin Festo chai ju Berenice chai chux ju anch ixtavilanalh.
\v 31 Chai acsni tataxtulh talaclajunich:
\p ―Ju ani ya lapanac jantu tuꞌuꞌ navita talakꞌalhin ju lai calhimapalalh laꞌixꞌaninti nin lai calhitꞌalhnucalh.
\p
\v 32 Chai ju Agripa chani juni ju Festo:
\p ―Laich ixmacaju ju ani ya lapanac ni jantu cava sqꞌuinlh ni yuchi ju César ju calakꞌoxinilh ju ixlhamakꞌan.
\c 27
\s1 Malakachacalh ju Pablo ju lakꞌachakꞌan Roma
\p
\v 1 Pus astan tanaulh ni catamalakachayanta ju xalacatꞌun Italia ju Pablo. Pus amakꞌaxtaknilh ju yuchi chai ju aliꞌin tachꞌinin laꞌixmacaꞌ ju xacapitán ixtaropajni ju kꞌai ucxtin Augusto. Pus ju anuꞌ capitán Julio ixjuncan. Chai ju quitꞌin vachuꞌ ictꞌaꞌalh ju Pablo. Ju quitꞌin icLucas.
\v 2 Vachuꞌ xaquintatꞌaꞌantan pumatam ju Aristarco ixjuncan. Ju yuchi amachakaꞌ Tesalónica ixjunita laxalacatꞌun Macedonia. Pus ictajuch ju lacabarco ju ixmintacha ju lakꞌachakꞌan Adramitio chai ixꞌamputun ju lakatamin lakꞌachakꞌan ju vi laꞌixquilhtuꞌ ju xalacatꞌun Asia. Chai ictaxtuchauch.
\v 3 Chai acsni alakatam avilhchan jumpa pus icchaꞌauch ju lakꞌachakꞌan Sidón. Pus ju Julio na kꞌox ixtꞌalalhiꞌanta ju Pablo chai yau junilh ni caꞌalh alaktsꞌiniꞌ ixꞌamigojni chai laich cataꞌaktaiju laꞌixmaktasqꞌuinit.
\v 4 Pus ictajuchokoch lacabarco. Ictaxtuch. Para na pꞌas ixlai ju un chai jantu lai pꞌas ixꞌan ju barco. Pus acsni icchaꞌauch junta ixvi ju lacatꞌicstꞌi lacatꞌun lacaꞌalama junta Chipre juncan pus ictapasauch ixlhiꞌaclackꞌoi junta palai jantu pꞌas ixlai ju un.
\v 5 Va xacquilhtuꞌantauch ju lacxcan lacabarco. Vanin xacꞌanau ju xalacatꞌun Cilicia chai ju xalacatꞌun Panfilia chai icchaꞌauch ju lakꞌachakꞌan Mira xalacatꞌun Licia.
\p
\v 6 Pus ju anch ju capitán lhitajulh alakatam barco. Ju yuchi ixmintacha ju lakꞌachakꞌan Alejandría chai ixꞌamputun ju xalacatꞌun Italia. Pus ju capitán quintajunin ni actajuch ju anch. Chai ictꞌatajuch. Icꞌauch.
\v 7 Pus na lakalhu avilhchan va lacsni xacꞌalhtananau chai xcayama icchaꞌauch vanin ju lakꞌachakꞌan Gnido. Para ni na pꞌas ixlai ju un pus icpuꞌauch vanin ju xalacatꞌun Salmón ju vanin ixtꞌavi ju lacatꞌicstꞌi lacatꞌun ju vachuꞌ lacaꞌalama ixvi. Ju anch Creta juncan. Ju anch jantu na pꞌas ixlai ju un.
\v 8 Pus xacquilhtuꞌantauch lacxcan lacabarco tus xcayama icxajchauch ju lakꞌachakꞌan junta Buenos Puertos juncan. Ju yuchi vanin ixtꞌavi ju lakꞌachakꞌan Lasea.
\p
\v 9 Pus ni na lhu xaquintamamaktilatan ju un pus na ixtapasaputun ju avilhchan acsni laicaꞌ alhtanan ju barco ni va catsucuyach ju un. Pus yuchi chani alhijuni ju lapanacni ju Pablo:
\p
\v 10 ―Quintꞌalapanacni ni caꞌalhtananchokopalau ju lacabarco jantu xcai ni tuꞌuꞌ catapasalh. Laich catsꞌankꞌa ju tacꞌucꞌat chai ju barco chai jantu xcai ni vachuꞌ ju quijnanꞌan canitajuyau ju lacxcan.
\p
\v 11 Para ju capitán jantu xalacaꞌini ixchivinti ju Pablo. Alai yuꞌunch ju alacaꞌinilh ju ixmalhtanai ju barco chaich ju amanavin barco.
\v 12 Chai ni va tachi ixlai ju un ju anch ju lacalhicꞌasnin pus na lacatsꞌunin lapanacni ju jantu ixtataxtuputun ju anch. Tachi chun ju ixtatajumanalh lacabarco ixtanajun ni palai kꞌox ni cataxtuch. Tsꞌa ma laich capuxajchau ju lakꞌachakꞌan Fenice ju vachuꞌ vi ju xalacatꞌun Creta. Ju anch vachuꞌ lai astacnancan ju barco. Chai ju un ju minacha ju lhitsꞌastai chai ju lhichꞌatoꞌanta jantu lai ixtanui ju anch. Ixtanajun ni laich cataꞌastacnalh ju anch tus catapasayaꞌ ju avilhchan acsni na lai ju un ju lacaꞌalama.
\s1 Na pꞌas lalh ju un lacaꞌalama
\p
\v 13 Pus acsni va lacsni ixlai ju un ju ixminacha ju lhichꞌatoꞌanta pus ju lapanacni ixtanajun ni ca laich cataꞌalhtanampa. Pus ictaxtuch chai xacquilhtuꞌantauch ju lacxcan.
\v 14 Para ni pantsꞌiquis va na pꞌas lana xalai ju un ju xaminacha lacatꞌun. Chai slivasalh na neklh ju barco.
\v 15 Pus ju un chꞌapaꞌula ju barco. Jantu lai isastꞌucꞌa ju un. Pus ni jantu lai ixmalhtanacan ju barco pus lana macaulh ni chach sun lhiꞌalh ju un vanta anchach ju casunlhiꞌalh.
\v 16 Chai acsni ictapasauch vanin lacalacatꞌicstꞌi lacatꞌun junta Clauda ixjuncan pus ju un jantu pꞌas ixlai ju anch. Ju anchach xcayama icxakꞌamacutuch ju lacatꞌicstꞌi barco ju ixakꞌamalhiꞌanta ju kꞌai barco.
\v 17 Icmujuch lacakꞌai barco chai ju astan ju lapanacni talakachꞌilh ju kꞌai barco lacalasu ni va ixtanajun ni jantu xcai ni calaclhvakaꞌ ni na pꞌas ixnekꞌa ju xcan. Chai na va ixtatalhanan ni va laich casunlhiꞌalh lacacucu junta Sirte juncan. Pus yuchi talhipꞌuxnilh ju kꞌai pumpuꞌ ju ixpuꞌalhtananch ju barco acsni ixtanui ju un. Ixtanajun ni jantu makat casunlhiꞌalh ju barco ju chunch.
\v 18 Chai acsni tuncunchokolh ni vana va chun ixlai ju un pus tamamuxtulh ju lacxcan ju xatacꞌucꞌat.
\v 19 Chai ju ixlhilakatꞌutu avilhchan ju quijnan laquimacach quincꞌan icmamuxtu ju ixpuchꞌalhcat ju barco.
\v 20 Na lhu avilhchan jantu lai xaclaktsꞌinau ju avilhchan nin yuchi ju stꞌacu. Va tachi ixtꞌajun ju kꞌai un. Jantuch va tilacatsꞌunin xacnonauch ni ca jantuch catitacutchauch.
\p
\v 21 Na lhu avilhchan jantu xacventauch. Pus astan ju Pablo taya laꞌixlacaitat ju lapanacni chai alacjuni:
\p ―Quintꞌalapanacni na kꞌox ca ixva ni xaquilakꞌasmatniu ju quinchivinti. Jantu caꞌixtaxtuchauch ju lakꞌachakꞌan Creta. Jantu caꞌixmiuch makꞌalhkꞌajnin ju ani. Chai jantu caꞌixmiu makꞌatsꞌankꞌanin ju ani taxtokni.
\v 22 Para jantu amakꞌaninintꞌit. Mas catsꞌankꞌayaꞌ ju barco para jantu xamatiꞌ ju quilhiquijnan ju canitajuyau ju lacxcan.
\v 23 Pus ju quitꞌin ixlapanac Dios icjunita chai yuchach ju icchꞌalhcatnani. Pus ju lhiyaxch tsꞌis ju yuchi quimalakachanitachilh ju ixꞌanquilh.
\v 24 Ju yuchi quijuni: “Jantu atꞌalhan ji Pablo. Tasqꞌuini ni atꞌalacꞌasunitꞌachiꞌ ju César. Chai ju va milacata ju uxintꞌi ju Dios jantu calacasqꞌuinaꞌ ni xamatiꞌ catini tachi chun ju tatꞌaꞌantan ju lacabarco”. Chunch quijuni ju Dios.
\v 25 Pus ju chavai ji quintꞌalapanacni jantuch amakꞌaninintꞌit. Ju quitꞌin icquiclacaꞌi ju Dios ni chunch ju catapasayaꞌ tachi ju xaquijunich.
\v 26 Para ju un sun aquintalhiꞌanan lacalakatam lacatꞌicstꞌi lacatꞌun ju vi lacaꞌalama. ―Chunch ju ajuni ju lapanacni ju Pablo.
\p
\v 27 Pus lakatꞌui semana xacꞌucxuntꞌonau lacabarco ju lacaꞌalama. Astan icchaꞌauch ju xaꞌalama Adria para ju un va tachi ixnekta ju barco. Pus acsni chaꞌalh paitat tsꞌis ju ixmalhtananin barco ixtalhiulai ni vanin xacchaꞌamputunau ju lacatꞌun.
\v 28 Pus talhcalh ju ixlhiputankꞌai ju xcan chai chaꞌalh lakapꞌuxamcauchaxan metro. Acsni taꞌalhtanampa alacatsꞌunin aktam talhcachokopa chai ju acsnich chaꞌalh lakapꞌuxamtujun metro.
\v 29 Na ixtatalhananch ni va laich casunlhiꞌancalh ju barco lakꞌakchiuxin chai calaclalh. Pus laꞌixlhipulacan ju barco tamujulh lacxcan lakatꞌatꞌi tsasnat ju ixꞌachꞌicanta lacalasu. Ju chunch chꞌapayaulh ju barco. Na ixtalhamakꞌaninin. Ixtanajun ni sokꞌo catunculh.
\v 30 Ju ixmalhtananin barco ixtaꞌatsꞌalhputunch. Va ixtalaich tachi ju va catamuju ju tsasnat ju cachꞌapayaulh ju barco laꞌixlhiꞌaktsulh ju barco. Para va ixtatꞌajun munin ju lacatꞌicstꞌi barco ju lacxcan ni ixtanajun ni catapuꞌanach.
\v 31 Para ju Pablo alacjunich ju xacapitán chai ju taropajni:
\p ―Ni catataxtuyach lacabarco ju yuꞌunch pus ju uxijnan jantu lai atꞌitꞌakꞌalhtꞌaxtꞌutꞌit.
\p
\v 32 Pus ju acsnich ju taropajni tachakxlh ju xalaso ju lacatꞌicstꞌi barco chai tamamuxtulh.
\p
\v 33 Chai acsni tsuculh tuncunuꞌ pus ju Pablo alacjunich ni chach tavailh. Ajunich:
\p ―Ju chavai lakatꞌui semana xajun ju lhistꞌactꞌit ju barco. Jantu lhtꞌatꞌatꞌatꞌit sin tuꞌuꞌ utꞌatꞌit.
\v 34 Pus iclatapaininiyau ni avaꞌintꞌitch. Ju chunch caꞌalinaꞌ ju mintachaputꞌan ni laich atꞌakꞌalhtꞌaxtꞌuyaꞌitꞌit. Jantu xamatiꞌ catini chai nin lacatsꞌunin jantu catacꞌatsaniyaꞌ.
\p
\v 35 Chai acsni nonkꞌo ju chunch ju Pablo pus chꞌapalh lakatam xkapavati. Xtaknilh lakꞌailaktsꞌiuch ju Dios laꞌixꞌucxlacapuꞌan ixchuxꞌan. Astan chꞌekꞌeꞌilh lacatsꞌunin chai tsuculh vainaꞌ.
\v 36 Pus acsnicaꞌ ju takꞌachalh ixchuxꞌan chai vachuch tavailh.
\v 37 Xacjuntau tachi lakatꞌui cientos a setenta y seis lapanacni ju lacabarco.
\v 38 Chai acsni talhilakꞌo pus tatsuculh munin lacxcan ju trigo ju ixlhiꞌanta ju barco. Ju chunch palai chapakꞌa cava ju barco.
\s1 Laclalhch ju barco
\p
\v 39 Chai acsni tunculh talaktsꞌilh ju tꞌun para jantu istamispai taꞌanchach. Para talaktsꞌilh laꞌixquilhtuꞌ tꞌun ni jantu na ixlucunun ju xcan chai na ixꞌalin ju cucu. Pus anchach ju ixtalhiꞌamputun ju barco ni va laich caꞌixlalh.
\v 40 Pus ju anuꞌ tsasnat ju ixtajuya lacxcan ni cachꞌapayaulh ju barco tachakxnilh. Anch ju tajukꞌalhi ju lacxcan. Chai taxkꞌotlh ju anuꞌ lacqꞌuiu ju sok ixtapumalhtanai ju barco. Va ixtanajun ni sok ixtalhiꞌalh ju barco ju lacacucu. Chai ju anuꞌ kꞌai pumpuꞌ tamamakꞌastꞌanilh lasaꞌaktsulh ju barco ni laich catanu ju un. Chai ju barco tsuculh anaꞌ junta jantu na pꞌas ixlucunun ju xcan.
\v 41 Para anchach talapakxtoklh lakatꞌui xcan chai na kꞌalhtankꞌai ixjunita ju cucu. Pus ju barco taquincaꞌacnulh lacacucu. Chai ju laꞌixlhiꞌaktsulh na pꞌas tavi chai laꞌixtampꞌin ixtalaklhvak laꞌixtachaput ju alama.
\v 42 Pus ju taropajni ixtanajunch ni caꞌamaknicalh ju tachꞌinin. Ju chunch jantuch xamatiꞌ camakꞌanxqꞌuivitnitacutlh chai caꞌatsꞌalalh.
\v 43 Para ju xacapitán ixmakꞌalhtaxtuputun ju Pablo. Yuchi jantu alhilakaꞌinilh ni caꞌalakmaknicalh. Va ajunich ni pꞌulhnan catajuyaꞌ lacxcan tachi chun ju lai camakꞌanxqꞌuivitnilhch. Chach tacutcha lacatꞌun.
\v 44 Pus ju jantu lai xamakꞌanxqꞌuivitnin tapuꞌalh ju tuꞌuꞌ lhtꞌakꞌalaqꞌuiu. Ju aliꞌin tachꞌapalh ju xalacqꞌuiu barco chai tapuꞌalh yuchi. Pus chunch icputakꞌalhtaxtukꞌojuch chai ictacutchauch quinchux quincꞌan ju lacatꞌun.
\c 28
\s1 Ju Pablo ixvi laxalacatꞌun Malta
\p
\v 1 Acsni ictacutchauch ju lacaꞌalama ju amachakꞌan anch quintajunan ni Malta ixjuncan ju anuꞌ lacatꞌun.
\v 2 Pus ju lapanacni amachakꞌan anch jantu va ti lacatsꞌunin quintamapainin. Tamalhcula ni na ixlai ju xcan chai na lhicꞌasnin ixjunita. Chai quintajunan ni acskꞌonvi.
\v 3 Pus ju Pablo vachuꞌ ixtꞌajun makmakxtoknuꞌ ju qꞌuiu. Chai tꞌampꞌulhch. Pus lacaqꞌuiu ju xatꞌampꞌui ixꞌalin lakatam lu. Chai ni na ichilh lacajipi pus taxtulh chai livik mactaquilhnu ju Pablo.
\v 4 Pus ju lapanacni ju amachakꞌan anch talaktsꞌilh ju lu ni macquilhtaich laꞌixmacaꞌ ju Pablo chai talaclajunich sia yuꞌunch:
\p ―Ju ani lapanac ca va amakniniꞌ junita. Chai mas takꞌalhtaxtulh ju lacaꞌalama para ju Dios jantu lacasqꞌuin ni vanach catsuculh.
\p
\v 5 Para ju Pablo cꞌalhapꞌuxlh ju lu chai macaꞌalh lacajipi. Chai jantu tuꞌuꞌ tapasalh.
\v 6 Pus tachi chun ju anch ixtayanalh ixtanajunch ni ca cacꞌununiyaꞌ ju ixmacaꞌ u cataꞌaktayaꞌ xanin va tam pantsꞌiquis. Para na panicni ixtapacxan. Chai acsni talaktsꞌilh ni jantu tuꞌuꞌ tapasalh pus tam tapastaclh. Ixtanajun ni ca va dios ju yuchi.
\p
\v 7 Pus ju xaꞌucxtin ju anuꞌ lacatꞌun Publio ixjuncan. Chai vanin junta ictacutchauch lacaꞌalama na lhu ixꞌalin ju ixlacatꞌun. Pus ju yuchi quintajunan ni acꞌauch lacachakaꞌ ju anch. Chai lakatꞌutu avilhchan va lacalhikꞌach xaquintamavayan.
\v 8 Pus ju ixpai ju Publio ixma laꞌixputaman. Na ixtakꞌankꞌai. Va ixchꞌapata ascacanaꞌ chai istipus. Pus ju Pablo lakꞌalh. Tꞌachivinilh ju Dios chai mokslanilh ixmacaꞌ laꞌixꞌucxni ixlacatuna chai lana palai va.
\v 9 Chai ni talaktsꞌilh ni palaich va ju ixpai ju Publio pus vachuꞌ ju aliꞌin amachakꞌan anch ju va ixtalactakꞌankꞌai talakmilh ju Pablo chai palaich anavikꞌocalh.
\v 10 Chai ju yuꞌunch na lhu lhakꞌailaktsꞌin xaquintaxtakniyan. Chai acsni ictajuchokochauch laca alakatam barco quintaxtaknin chux tachi chun ju xacmaktasqꞌuiniyauch.
\s1 Chaꞌalh ju Pablo ju lakꞌachakꞌan Roma
\p
\v 11 Acsni tapasalh lakatꞌutu malhquiyuꞌ ictaju laca alakatam barco ju ixmintacha Alejandría. Vachuꞌ va isꞌastacnanta ju anch lacalhicꞌasnin junta xacvilau. Istsꞌokꞌulanicanta laꞌisꞌaktsulh ju barco lakatꞌui isꞌaktsulh isdiosꞌan. Ju pumatam Cástor ixjuncan chai ju pumatam Pólux ixjuncan.
\v 12 Pus ictaxtuch chai icchaꞌauch lakꞌachakꞌan Siracusa. Chai ju anch ictolhchau lakatꞌutu avilhchan.
\v 13 Chai ictajuchokoch lacabarco. Ictaxtuch ju anch chai xacquilhtuꞌantauch ju lacxcan tus icchaꞌauch ju lakꞌachakꞌan Regio. Acsni tuncunchokolh lalh ju un ju minachalh ju lhisur. Pus ictaxtuchokoch chai ixlhilakatꞌui avilhchan icpuchaꞌauch ju lakꞌachakꞌan Puteoli. Chai anchach ju ictacutchauch ju lacabarco chai astan va lacatꞌun ju icpuꞌau.
\v 14 Ju anch iclhitajuchau ju quilhiꞌalakꞌavin laꞌixmacni Jesús. Chai ju yuꞌunch kꞌasi quintajuninch ni acꞌalactꞌatolhchau tachi tam semana. Chai ictolhchau. Astan ictaxtuchokopalau chai icchꞌapachokopalau ju xati Roma.
\v 15 Pus ju quilhiꞌalakꞌavinꞌan laꞌixmacni Jesús ju ixtavilanancha lakꞌachakꞌan Roma takꞌasmatlh ni icmintauch ju lacati. Pus ju aliꞌin quintaquipakxtokchin tus ju lakꞌachakꞌan junta Tres Tabernas ixjuncan. Ju aliꞌin palai makat quintaquipakxtokchin. Pus ju Pablo acsni alaktsꞌilh ju yuꞌunch lana xtaknilh lakꞌailaktsꞌiuch ju Dios chai na kꞌachalh.
\v 16 Pus acsni icchaꞌauch ju Roma ju xacapitán amakꞌaxtaklh ju tachꞌinin. Axtaknilh ju xaꞌucxtin ixtaropajni ju kꞌai ucxtin. Para ju Pablo yau junicalh ni va isꞌakstu catanu lacachakaꞌ ju ismatsꞌisqꞌuinlh. Va pumatam taropa tꞌaꞌalh ni calhistaclh.
\s1 Ju Pablo ajuni ju amachakꞌan Roma ixchivinti Dios
\p
\v 17 Chai acsni tapasalh lakatꞌutu avilhchan pus ju Pablo alactꞌasanilh ju xalackꞌajin istꞌaꞌisraelitanin. Chai acsni tatakꞌaixtoklh chani alacjuni:
\p ―Ju quitꞌin ji quintꞌalapanacni jantu tuꞌuꞌ iclanavinitau talakꞌalhin ju uxijnan ju quintꞌaꞌisraelitanin untꞌatꞌit. Nin yuchi ni acsamakꞌalh tachi ju quintamalanitan ju makꞌaniya quilacpaꞌitniꞌan. Para mas jantu tuꞌuꞌ icnavita para tachꞌin xacnavicantacha ju lakꞌachakꞌan Jerusalén chai xacmakꞌaxtaknicanta laꞌixmacaꞌan ju romanonin.
\v 18 Pus ju yuꞌunch acsni quintamakꞌosaspitlh xaquintamacomputunch ni jantu tuꞌuꞌ talakꞌalhin ju xaquintalhitajuni ju lai aclhimapalalh ju quiꞌaninti.
\v 19 Para ju quintꞌaꞌisraelitaninꞌan jantu ixtalakꞌaꞌi ni acmacajuncalh. Pus tapꞌastu icsqꞌuinlh ni yuchi ju César ju aquilakꞌoxinilh ju quilhamakꞌan para jantu va icꞌamucꞌaniputun tuꞌuꞌ talakꞌalhin ju quintꞌaꞌamachakꞌan.
\v 20 Pus yuchi iclhilatꞌasaniyau ni xaclalaktsꞌimputunau chai xaclatꞌachivimputunau. Va xaclajumputunau ni tachꞌin icnavicanta lacacadena va ixlacaꞌatalh ni iclhilacaꞌanta ju yuchi ju xaquintajuntan ju Dios ni aquintamalakachanitachan ju quijnanꞌan ju israelitanin juntau ni aquintamakꞌalhtaxtuyan.
\p
\v 21 Chai ju lapanacni tajunich:
\p ―Pus ju quijnan jantu icꞌamaklhtayanantauch tuꞌuꞌ alhiqui ju milacata ju tuꞌuch caminchalh ju Judea. Chai jantu xamatiꞌ ju quiꞌalakꞌavin ju laich camilh xtaknaꞌ tuꞌuꞌ chivinti ni lai catanaulh tuꞌuꞌ macxcai ju milacata ju uxintꞌi.
\v 22 Para iccꞌatsayauch ni ixlhilacaputsꞌun ju lacamunutpaꞌ va tatꞌalaxcaji ju talacaꞌi tachi ju lacꞌaꞌich ju uxintꞌi. Pus yuchi iclhilakꞌasmatniputunauch tuchꞌi lacꞌaꞌich ju uxintꞌi.
\p
\v 23 Pus talhcaꞌulanilh lakatam avilhchan chai ju acsnich na lhu talakmilh ju Pablo junta ixtanun. Chai vatsꞌisin tus tokꞌoxai ju yuchi ixꞌalacjuni ixlacata ju Dios ni lhinomputun laꞌisꞌatsucuntiꞌan ju lapanacni. Ixꞌamavasalani tuchi ixnajun ju Moisés laꞌixlhamapꞌaksin. Chai ixꞌamavasalani ju tuchi ixtanajun ju makꞌaniya lapanacni ju ixtanajun ixchivinti Dios. Va ixꞌalacmalacaꞌiniputun ni Jesús vasalh yuchi ju anuch ju ixnoncan camalakachatachilh ju Dios.
\v 24 Pus ju aliꞌinch talacaꞌilh tuchi ixꞌajuni ju Pablo. Para ju aliꞌin jantu talacaꞌilh.
\v 25 Chai acsni jantu lai va lakatam ixtanavi ixꞌatalacpastꞌacꞌatꞌan pus va ixtataxtuputun ju yuꞌunch ju jantu kꞌox ixtalhiulai ixchivinti ju Pablo. Para ju Pablo chani ajuni:
\p ―Ju Spiritu Santu xtaknilh ju chivinti ju ixnajun ju makꞌaniya lapanac ju Isaías ixjuncan. Ju yuchi ixnajun ixchivinti Dios. Chai vas ju ajuni ju makꞌaniya quilacpaꞌitniꞌan.
\q1
\v 26 Ju Isaías junicalh ni calakꞌalh ju anuꞌ lapanacni chai caꞌalacjunach ni ma slivasalh catakꞌasmatꞌaꞌ para ma jantu catitamachakxayaꞌ.
\q1 Ma slivasalh catalaktsꞌinaꞌ tuꞌuꞌ para ma jantu tavanan catanavini cuenta ju tuchi talaktsꞌinta.
\q1
\v 27 Ma na pꞌas tanavita ju ixꞌalhunutꞌan ni jantu tamachakxaputun.
\q1 Ma jantu takꞌasmatputun ni jantu tanaviputun.
\q1 Ma jantu talaktsꞌimputun tuꞌuꞌ ni jantu talacaꞌiputun ju tuchi catalaktsꞌilh.
\q1 Ma jantu tamacomputun ju macxcai isꞌatsucuntiꞌan ni laich caꞌamacꞌacxanilh ju Dios ixtalakꞌalhinꞌan.
\m Ma chunch ju naulh ju Dios.
\m
\v 28 Pus ju chavai acꞌatsꞌatꞌit ni chavai chai atipuꞌanta acꞌajunau ju jantu quintꞌaꞌisraelitaninꞌan ta yu laich caꞌamakꞌalhtaxtuyaꞌ ju Dios ni jantu catitaꞌalh ju lacajipi. Chai ju yuꞌunch catalacaꞌiyaꞌ.
\p
\v 29 Pus acsni naulh junima chivinti ju Pablo pus ju istꞌaꞌisraelitanin tataxtulh chai na lhu chivinti ixtalaclajuni ju sia ixlhiꞌakstuꞌan.
\p
\v 30 Pus ju Pablo tolhcha ju lakꞌachakꞌan Roma lakatꞌui cꞌata lacachakaꞌ ju ismatsꞌisquinta. Chai kꞌox alactꞌachivinilh tachi chun ju ixtalakminch ju anch.
\v 31 Va lhikꞌach ixꞌajuni ju lapanacni ni lhinomputun ju Dios laꞌisꞌatsucuntiꞌan. Chai ixꞌajuni ixlacata ju kꞌai ixꞌucxtin ju Jesucristo juncan. Chai jantu xamatiꞌ xajuni ni jantu chunch catilalh.