\id 1CO
\ide UTF8
\h 1 CORINTO
\toc1 1 CORINTO
\mt1 JU PꞌULHNAN ALHIQUI JU ATSꞌOKNUNICALH JU AMACHAKꞌAN CORINTO
\c 1
\s1 Ju Pablo amacꞌami ju amachakꞌan Corinto
\p
\v 1 Ju quitꞌin icPablo. Pus ju Dios naulh ni ixtamalakachan acva ju Jesucristo. Chai yuchi ju quilhitꞌasanilh laꞌixlhichꞌalhcat. Pus ju quitꞌin chai pumatam ju quilhilakꞌau ju Sóstenes juncan iclaꞌatsꞌoknuniyau ju ani alhiqui.
\v 2 Va iclamacꞌamiyau ju uxijnan ju vilhchitꞌit ju lakꞌachakꞌan Corinto ju lhilacꞌapꞌinatꞌit ju Cristo. Pus ju Cristo Jesús taxacanitan ju miꞌalhunutꞌan acsni lhilacꞌapꞌitꞌit ju yuchi. Chai Dios ju tasacxtun ni ixlapanacni aꞌunaꞌitꞌit. Vachuꞌ icꞌamacꞌamiyau tachi chun ju talhilacaꞌantach ju Jesucristo mas vanta anchach catatolhcha. Ju Jesucristo vachuꞌ kꞌai ixꞌucxtinꞌan junita ju yuꞌunch tachi ju quijnanꞌan.
\v 3 Ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
\s1 Na lhu quintanavinitan lamapainin ju Cristo ni lhilacaꞌanau ju yuchi
\p
\v 4 Va tachi icjuni lakꞌailaktsꞌiuch ju quimpaiꞌan Dios ju milacataꞌan ni xatanaviniyan lamapainin acsni tavanan lhilacꞌapꞌitꞌit ju Jesucristo.
\v 5 Chai ni lhilacꞌapꞌinatꞌit ju Cristo pus Dios taxtaknitan ju miꞌatsucuntiꞌan ju palai kꞌox. Ju chavai na lai mavasalayatꞌit ju ixchivinti Dios. Chai na lai machꞌakxayatꞌit.
\v 6 Chai ni tam xajun ju miꞌatsucuntiꞌan pus putasui ni stavasalanti ju chivinti ju icnonau ixlacata ju Jesús.
\v 7 Chai ni xatanaviniyan lamapainin ju Dios pus jantu tuꞌuꞌ tamakꞌancꞌacxniyan tachi chun ju lhakꞌailaktsꞌin ju xtꞌakꞌa ju Dios. Chai pꞌacxantꞌayatꞌitcaꞌ ju quiꞌucxtinꞌan Jesucristo tus acsni caminaꞌ.
\v 8 Pus Dios ju cataxtakniyan vachuꞌ ju mintachaputꞌan ni laich alhilacꞌapꞌinkꞌalhiyaꞌitꞌit ju Cristo tus laꞌixꞌaclanti ju miꞌatsucuntiꞌan. Ju chunch jantuch lai aꞌulanicꞌanaꞌitꞌit ju mintalakꞌalhinꞌan acsni tavanan caminchokoyaꞌ ju Jesucristo.
\v 9 Ju Dios muctaxtui ju ixchivinti. Chai yuchach ju tatꞌasanitan ni kꞌox ixꞌamigojnich aꞌunaꞌitꞌit ju Jesucristo. Ju yuchi istsꞌalh Dios junita chai vachuꞌ quiꞌucxtinꞌan junita.
\s1 Alin ju lakꞌaiti sia yuꞌunch ju talhilacaꞌanta ju Jesús
\p
\v 10 Pus iclatapaininiyau ji quiꞌalakꞌavin ni vachuꞌ lhilacꞌapꞌinatꞌit ju quiꞌucxtinꞌan Jesucristo. Pus tachi minchuxꞌan va lakatamch aꞌuntꞌit. Jantu quilhmactꞌui quilhmactꞌutu aꞌuntꞌit. Va chꞌanxtam aꞌuntꞌit ju lamintacꞌatsanꞌan. Chai va lakatamch taxtokni ju alhilaksitꞌit.
\v 11 Iclapujunau chunch ji quiꞌalakꞌavin ni quintajunilh ju tavilanancha laꞌixchakaꞌ ju Cloé ni va laclakꞌaꞌitꞌit ju uxijnan.
\v 12 Ju aliꞌin lamilhiꞌuxijnan ma tanajun ni quintachꞌakꞌokꞌai ju quitꞌin. Chai ju aliꞌin ma tanajun ni yuchi ju Apolos ju tachꞌakꞌokꞌai. Chai ju aliꞌin ma tanajun ni ma yuchi ju Pitaluꞌ ju tachꞌakꞌokꞌai. Chai ju aliꞌin ma tanajun ni yuchi ju Cristo ju tachꞌakꞌokꞌai.
\v 13 Para ja na va pumalhu alin ju Cristo. Ja quitꞌin ju xacmaquilhtacanta ju lacacurus ixlacata ju mintalakꞌalhinꞌan. Ja laquintapakaꞌut ju lhimakpꞌaxacꞌantꞌatꞌit.
\v 14 Icxtakni lakꞌailaktsꞌiuch ju Dios ni jantu xamatiꞌ ju uxijnan ju icmakpaxata. Va yuchi ju juncan Crispo chai ju juncan Gayo.
\v 15 Ju chunch jantu lai xamatiꞌ canonaꞌ ni makpꞌaxacꞌantꞌatꞌit laquintapakaꞌut.
\v 16 Chai vachuꞌ icꞌamakpaxata ju yuꞌunch ju ixtatanumanalh laꞌixchakaꞌ ju Estéfanas. Para jantu icpastꞌacꞌa ni caꞌalilh apumatam ju acmakpaxa.
\v 17 Jantiyuꞌ ju quilhimalakachatachilh ju Cristo ni va acꞌamakpaxanalh. Ju yuchi quimalakachatachilh ni acmasu ju chivinti junta najun ta yu laich takꞌalhtaxtucan. Para ma jantu acnaulh laca tuꞌuꞌ cꞌusi chivinti tachi ju tachivinin ju atalaninin. Ma va vas acnaulh ni nilh ju Cristo ju quilacataꞌan. Ju chunch cacꞌatsacanach ni na tachapun ju ani chivinti chai va yuchi ju lai amakꞌalhtaxtunun.
\s1 Yuchi ju Cristo ju pacxanta ixtachaput chai ixtacꞌatsan ju Dios
\p
\v 18 Pus ju quijnan icꞌajuniu ju lapanacni ni quinichilh ju Cristo ju quilacataꞌan. Para ju lapanacni ju aktsꞌiya catatsꞌankꞌakꞌalhiyaꞌ ni jantu talhilacaꞌamputun ju Cristo pus tanajun ni va lhilakachapuꞌ ju anuꞌ chivinti. Para ju quijnanꞌan ju takꞌalhtaxtutauch cꞌatsayau ni va yuchach ju chivinti ju tachapun ni va yuchi ju lai aquintamakꞌalhtaxtuyan.
\v 19 Chunch iclapujunau ni jantu lhitapalai ni va kꞌaya aclhilaksi ju va ixꞌatalaninti ju va lapanac ni chani ma najun ju Dios junta tsꞌokcanta ju ixchivinti:
\q1 Ju yuchi ma calakꞌalhiniyaꞌ ju ixchivintiꞌan ju lapanacni ju tanajun ni na atalaninin tajunita.
\q1 Chai ma jantu tuꞌuꞌ ixtapalhni canaviniyaꞌ ixꞌatalacpastꞌacꞌatꞌan ju yuꞌunch.
\m Chunch ma najun junta tsꞌokcanta ju ixchivinti.
\p
\v 20 Pus ju chavai tas anchach ju alin ju lapanacni ju laich tanajun ni na taꞌacꞌatsananta. Tas anchach ju alin ju laich tanajun ni na tamispaich ju ixlhamapꞌaksin ju Moisés. Tas anchach ju alin ju laich tanajun ni tacꞌatsai tamalhch ju stavasalanti chai tamalhch ju jantu. Pus matiꞌ ju lapanacni ju vasalh chunch tajunita ni Dios ju malacasuta ni jantu lhitapalai ju xaꞌatalaninti ju va lhilapanac.
\v 21 Ju Dios cꞌatsai tuchi ju navi. Chai ju yuchi jantu lacasqꞌuilh ni va laꞌixꞌatalanintiꞌan isꞌakstuꞌan lai catalhilacaꞌalh ju yuchi ju lapanacni. Alai na kꞌox xalhiulai ju Dios ni catatakꞌalhtaxtulh tachi chun ju takꞌasmatꞌa ju ixchivinti chai talhilacaꞌanta ju Cristo. Ju yuꞌunch talacaꞌich ju anuꞌ chivinti mas tanajun ju aliꞌin ni va lakachapu chivinti.
\p
\v 22 Ju quintꞌaꞌisraelitanin tanajun ni va lakachapu chivinti ju chunch. Chai chunch tapunajun ni na pꞌas tasqꞌuini ju Dios ju tuꞌuꞌ ju laich catalaktsꞌilh chai catapucꞌatsa ju stavasalanti. Chai vana va chun nonatꞌit ju uxijnan ju jantu israelitanin untꞌatꞌit. Chai ju uxijnan pꞌunonatꞌit chunch ni jantu lai lacꞌaꞌiyatꞌit tuꞌuꞌ ju jantu lai machꞌakxayatꞌit.
\v 23 Para ju quijnan icꞌajunau ju lapanacni ni ixmaquilhtacanta ju Cristo ixlacataꞌan. Pus ju quintꞌaꞌisraelitanin tanajun ni lana jantu kꞌox ju ani chivinti. Chai ju uxijnan ju jantu israelitanin untꞌatꞌit va lhitsꞌiꞌinatꞌit.
\v 24 Para tachi chun ju asacxtuta ju Dios u quintꞌaꞌisraelitanin u jantu si tamachakxakꞌojui ni yuchach ju Cristo ju pacxanta ixtachaput ju Dios chai ixtacꞌatsan.
\v 25 Pus ju tasui tachi ju va ixlakachaput Dios yuchi ju palai kꞌox atalaninti. Palai jantu ju va xaꞌatalaninti lhilapanac. Chai junta tasui tachi ju va jantu tachapun ju Dios anchach ju palai alin ixtachaput. Jantu chun tachi ju ixtachaput ju va lhilapanac.
\p
\v 26 Pus alaktsꞌintꞌitch ji quiꞌalakꞌavin. Tachi chun ju uxijnan ju tasacxtutan ju Dios na lacatsꞌunin ju lamilhiꞌuxijnan ju lai catanaulh ju lapanacni ni atalaninin untꞌatꞌit. Na lacatsꞌunin ju lamilhiꞌuxijnan ju lai cajunicalh ni xalackꞌajin untꞌatꞌit laꞌixꞌucxlacapuꞌan ju mintꞌalapanacni. Na lacatsꞌunin ju lamilhiꞌuxijnan ju laich calhimispacalh ni jantu va xamatiꞌ ju mimpaiꞌan.
\v 27 Alai yuꞌunch ju asacxtulh ju Dios ju alhimispacan tachi ju va tonto lapanacni. Yuchi alhisacxtulh ju yuꞌunch ni va apumamaxani ju xaꞌatalaninin ju ani lacamunutpaꞌ. Chai yuꞌunch ju asacxtulh ju Dios ju jantu tuꞌuꞌ ixtapalhniꞌan ixꞌalhiulacan laꞌixmacniꞌan ju ixtꞌalapanacni. Chunch ju lalh ni camamaxanilh ju na xalackꞌajin tajunita.
\v 28 Chai ju Dios asacxtulh ju yuꞌunch ju jantu xalackꞌajin ju ani lacamunutpaꞌ chai ju jantu tuꞌuꞌ alhiulacanta chai ju lana jantu ixꞌalaktsꞌimputuncan. Chai alhisacxtulh ju yuꞌunch ni caputasuyaꞌ ni jantu lhitapalai ni na kꞌai accꞌatsa.
\v 29 Chai ju chunch jantu lai xamatiꞌ kꞌai cacꞌatsa laꞌixmacni Dios.
\v 30 Isꞌakstu ju Dios xatanaviyan ni va lakatam tꞌaꞌuntꞌatꞌit ju Cristo Jesús. Chai ni va xaquintamasuniputunan ju kꞌai ixtacꞌatsan ju Dios pus yuchi lhimalakachatachilh ju Jesús ju ani. Ju chunch lai salaka jun ju quiꞌatsucuntiꞌan laꞌixmacni yuchi chai lai aquintachakꞌaniyan ju quiꞌalhunutꞌan chai lai quintamalakxtuyan laꞌixꞌacꞌalhni.
\v 31 Chunch ju navilh ju Dios ni caꞌuctaxtulh tachi ju najun junta tsꞌokcanta junta chani najun: “Ni xamatiꞌ lhitakꞌayaputun tuꞌuꞌ pus ma alai chach lakꞌaya ju Dios”.
\c 2
\s1 Ju chivinti ju najun ni nilh ju Cristo
\p
\v 1 Pus ji quiꞌalakꞌavin acsni iclaquilakquilachau ju uxijnan xaclajunau ju ixchivinti Dios. Para jantu xaclajunau laca tuꞌuꞌ cꞌusi chivinti nin laꞌixꞌatalaninti ju va lhilapanac.
\v 2 Chunch xaclai ni xacnajunta ni lana jantu tuꞌuꞌ atumpa ju aclajunau ju uxijnan. Va yuchi ni aclajunau ni tamaquilhtalh lacacurus ju Jesucristo ju quilacataꞌan.
\v 3 Chai acsni xaclatꞌavilau ju uxijnan lana jantu xaclhilaksichokocan quiꞌakstu. Alai na xactalhanan chai na xacꞌaxqꞌuipꞌipꞌitnin.
\v 4 Chai acsni xaclajunau tuꞌuꞌ chai acsni xaclamasuniyau tuꞌuꞌ jantu tavanan xaclamalacaꞌiniputunau laca tuꞌuꞌ cꞌus chivinti tachi ju ixchivinti tam atalaniniꞌ. Alai istasui ixtachaput ju Dios laquinchivinti chai yuchi ju Spiritu Santu ju xaquiꞌaktaijui.
\v 5 Ju chunch jantu va ixlacata ixꞌatalaninti tam lapanac ju alacꞌaꞌiyaꞌitꞌit. Alai alacꞌaꞌiyaꞌitꞌit ixchivinti Dios ni alaktsꞌinaꞌitꞌit ixtachaput ju Dios.
\s1 Yuchi ju Spiritu Santu ju quintamamachakxaniyan ixchivinti Dios
\p
\v 6 Pus ju vasalh talhilacaꞌanta ju Cristo icꞌajunau ju vasalh atalaninti. Para jantiyuꞌ ju ixꞌatalaninti ju va lhilapanac. Nin ixꞌanuꞌan cava ju xalackꞌajin ju ani lacamunutpaꞌ. Pus cachinaꞌ avilhchan acsni jantu vana xalackꞌajin catajunaꞌ chai cacapcanaꞌ ju ixchivintiꞌan ju ixtanajun.
\v 7 Pus ju chivinti ju icnajun yuchi ju kꞌox ixꞌatalacpastꞌacꞌat ju Dios junta najun ni aquintaxtakniyan ju quiꞌatsucuntiꞌan ju jonkꞌalhita. Chunch ispastacta ju Dios mas tucaꞌ ixnavican ju lacamunutpaꞌ. Para jantu sai amavasalanicalh ju lapanacni.
\v 8 Para ju xalackꞌajin ju ani lacamunutpaꞌ jantu tamachakxai ju anuꞌ ju ispastacta ju Dios. Ni caꞌixtamachakxa pus jantu tavanan ixtamaquilhta lacacurus ju slivasalh cꞌus lapanac junita. Yuchi ju Jesús.
\v 9 Pus icnajun tachi ju tsꞌokcanta junta chani najun:
\q1 Ju Dios ma lakꞌoxita ju tuꞌuꞌ ju slivasalh kꞌox ixlacataꞌan ju tamapaini ju yuchi.
\q1 Ju va tam lapanac ma jantu tavanan laktsꞌinta tuꞌuꞌ ju ixtꞌachunch cava nin cakꞌasmatlh nin capastaclh ni caꞌalilh ju tuꞌuꞌ ju chunch.
\m Chunch ju najun junta tsꞌokcanta.
\v 10 Para ju Dios quintaxtaknitan ju Spiritu Santu chai yuchach ju quintamamachakxaniyan ju ani taxtokni. Pus ju Spiritu Santu mispakꞌojui tachi chun ju taxtokni. Mispakꞌojui chux ju ixꞌatalacpastꞌacꞌat ju Dios.
\p
\v 11 Jantu xamatiꞌ lai cꞌatsani tuchi pastꞌacꞌach ju akꞌantam lapanac. Va isꞌakstu ju lapanac cꞌatsai tuchi ju pastꞌacꞌa laꞌixꞌalhunut. Pus vana va chunch jantu lai xamatiꞌ cꞌatsani ju ixꞌatalacpastꞌacꞌat ju Dios. Va yuchi ju Spiritu Santu.
\v 12 Pus ju quijnanꞌan jantiyuꞌ ju xaꞌatalaninti va lhilapanac ju pumachakxayau ju ixtaxtokni Dios. Para ju Dios quintaxtaknitan ju Spiritu Santu chai yuchach ju quintamamachakxaniyan ju tuchi quintalhikꞌailaktsꞌintan ju Dios.
\v 13 Chai ju tuchi quintamamachakxaniyan ju Spiritu Santu pus yuchach ju icnonau. Jantiyuꞌ ju icnonau ju iclanitau ju va laquiꞌakstu quincꞌan. Pus acsni iclajunau ju ixtaxtokni Dios ju uxijnan ju pꞌacxantꞌatꞌit ju Spiritu Santu lamiꞌalhunutꞌan pus va yuchi iclajunau ju quintamamachakxanitanch ju Spiritu Santu.
\p
\v 14 Pus ju tam lapanac ju jantucaꞌ lhilacaꞌanta ju Jesús jantu lacaꞌiputun ju ixchivinti ju Spiritu Santu. Ju yuchi va lakachapu chivinti lhiulai. Chai jantucaꞌ lai catimachakxa ju yuchi ni va yuchi ju Spiritu Santu ju amamachakxaninin ju ixtaxtokni Dios.
\v 15 Para ju tam lapanac ju pacxanta ju Spiritu Santu laꞌixꞌalhunut laich machakxai ixchivinti Dios chai lai sacxtui ju kꞌox ju canavi. Chai ju jantucaꞌ lhilacaꞌanta ju Cristo jantu lai machakxani ju isꞌatsucunti ju ixtꞌalapanac ju lhilacaꞌanta ju Cristo.
\v 16 Pus chani ju tsꞌokcanta laꞌixchivinti Dios: “Tis chavaich ju lai camachakxanilh ju ixꞌatalacpastꞌacꞌat ju Dios ni laich canaulh ni camalaniyaꞌ tuꞌuꞌ ju yuchi”. Chunch ju najun laꞌixchivinti Dios. Para ju quijnanꞌan ju pacxantauch ju Spiritu Santu machakxayau ju ixꞌatalacpastꞌacꞌat ju Cristo.
\c 3
\s1 Taꞌalincaꞌ ju va tachi askꞌatꞌancaꞌ tajunita laꞌixmacni Dios
\p
\v 1 Pus ji quiꞌalakꞌavin acsni xaclatꞌavilau jantu lai xaclalhixakꞌalayau tachi ju xakꞌalacan ju makꞌanch talhitamakaꞌuta ixchivinti Dios. Va chunch xaclalhixakꞌalayau tachi ju yuꞌunch ju va ancaꞌ talhilacaꞌanta ju Cristo.
\v 2 Xaclanaviyau tachi ju tam askꞌatꞌa ju jantucaꞌ lai ui ju lhivai. Va lechecaꞌ ju kꞌotꞌa. Pus vana va chun ju uxijnan. Va xaclajunau ixtaxtokni Dios ju jantu na xcai machakxacan ni jantucaꞌ lai ixmachꞌakxayatꞌit ju palai lhixcai. Chai mas tus chavai jantucaꞌ lai machꞌakxayatꞌit.
\v 3 Tucaꞌ lai machꞌakxayatꞌit ju palai lhixcai ni jantucaꞌ kꞌox macꞌontꞌatꞌit tachi ju talai ju jantucaꞌ talhilacaꞌanta ju Jesús. Pus alincaꞌ ju lamilhiꞌuxijnan ju taꞌalhacchaꞌanan chai ju talaclakꞌaji chai ju jantu va lakatam tanavita ju ixꞌatalacpastꞌacꞌatꞌan. Pus ni chunch ju layatꞌit pus lana tasui ni vanach tꞌonatꞌitcaꞌ tachi ju tatsucui ju jantucaꞌ talhilacaꞌanta ju Jesús.
\v 4 Pus ju pumatam lamilhiꞌuxijnan najun ni ma quitꞌin ju quinchꞌakꞌokꞌai. Chai ju apumatam najun ni ma yuchi ju Apolos ju chꞌakꞌokꞌai. Pus ni chunch ju layatꞌit pus va naviyatꞌit tachi ju talai ju jantucaꞌ talhilacaꞌanta ju Jesús.
\s1 Alin ju tatꞌanavi ixlhichꞌalhcat ju Dios ju Pablo
\p
\v 5 Pus tis quintalakxtuch. Tis ixtalakxtuch ju Apolos. Ju quijnan va ixlapanacni Dios icjuntau. Chai va xaclajunau ixchivinti Dios ni lai xalhilacꞌapꞌinatꞌit ju Cristo. Pus icnaviyau ju lhichꞌalhcat ju xaquintaxtakniyan ju Dios ju pumatamin ju quijnan.
\v 6 Quitꞌin ju pꞌulhnan iclajuniu ju ixchivinti Dios chai ju Apolos taꞌaktaijun ni laich palai xamachꞌakxayatꞌit ju ixchivinti Dios. Pus tachi ju va jun icchꞌantach ju chivinti chai tachi ju va jun tikꞌavalh ju achꞌananti ju Apolos. Para isꞌakstu ju Dios ju taꞌaktaijutan ni laich xalhilacꞌapꞌinatꞌit ju Cristo chai lai palai palai lhilaksiyatꞌit.
\v 7 Pus ju chunch va nomputun ni jantu tuꞌuꞌ ixtalakxtu ju najun ixchivinti Dios. Nin yuchi ju mavasalai ju ixchivinti. Va yuchi ju Dios ju lai lhilaksican ni yuchi ju quintaꞌaktaijuyan ni lai lhilacaꞌanau ju Cristo chai lai palai palai lhilaksiyau ju yuchi.
\v 8 Pus ju najun ixchivinti Dios chai ju mavasalai ju ixchivinti vaklhtam chun tajunita. Chai sia sia caꞌaxtaknicanaꞌ ju ixtalhajaꞌan tachi ju tachꞌalhcatnanta.
\v 9 Ju quijnan va kꞌaixtam icchꞌalhcatnanau laꞌixlhichꞌalhcat Dios. Chai ju uxijnan ju lhilacꞌapꞌintꞌatꞌit ju Cristo tachi ju tuꞌuꞌ puꞌachꞌananti untꞌatꞌit junta icchꞌalhcatnanau.
\p U vachuꞌ lai acnaulh ni chunch untꞌatꞌit tachi ju tuꞌuꞌ kꞌai chakaꞌ ju tꞌajun yonaꞌ ju Dios.
\v 10 Pus ju quitꞌin chunch icjunita tachi ju xaꞌucxtin ju na mispai ixyajuca chakaꞌ. Pus quitꞌin acsni tavanan iclajuniu ixchivinti Dios pus tachi ju va icpokꞌajta ju lacatꞌun chai icyaulh ju xatantun ni yuchi ju lhichꞌalhcat ju xaquixtakni ju Dios. Chai ju astan ni tamilh ju aliꞌin ju tamavasalanin ju chivinti pus tachi ju va tatailhiꞌan lacatsꞌunin junta xacmamactata ixyajuca ju chakaꞌ. Para pumatamin pumatamin calaktsꞌilh tuchi ju capulaputankꞌayayaꞌ ju ani chakaꞌ.
\v 11 Junta yocan ju tuꞌuꞌ chakaꞌ jantu lai lacatꞌui machꞌantacan. Pus vana va chun ju quimaklacaꞌanitꞌan. Jantu lai lakatꞌui cativa. Va pumatamch ju lai lhilacaꞌanau. Va yuchi ju Jesucristo.
\v 12 Pus yuchi ju Jesucristo ju puchꞌantayau ni yuchi ju maklacaꞌaniyau. Chai ju aliꞌin ju tamavasalai ixchivinti Dios tachi ju va talaputankꞌayaputun ixchakaꞌ Dios. Para tachi chun ju yuꞌunch tasqꞌuini ni kꞌox catanavi cuenta tuchi catalhilaputankꞌayayach. Ju aliꞌin ni sok tamavasalai pus tachi ju va talhilaputankꞌayai laca tuꞌuꞌ oro chai laca tuꞌuꞌ plata chai laca tuꞌuꞌ chiux ju na laklhu ixtapalh. Para ju aliꞌin ju jantu sok tamavasalai pus tachi ju va talhilaputankꞌayaputun ju ixchakaꞌ Dios laca tuꞌuꞌ qꞌuiu u laca tuꞌuꞌ achꞌitin u laca tuꞌuꞌ xaxixni atsꞌin.
\v 13 Para acsni cachinaꞌ ju avilhchan acsni camakꞌosaspitcanach ju lapanacni pus acsnich ju catasuyaꞌ ju tuchi lhilaputankꞌayalhch ju ixchakaꞌ Dios ju pumatamin ju mavasalalh ixchivinti Dios. Pus ju ixlhichꞌalhcat ju pumatamin calaktsꞌintanucanach laca tuꞌuꞌ jipi. Chai caputasuyach ju ixlhichꞌalhcat ju kꞌantam kꞌantam u kꞌox ju navita u jantu.
\v 14 Chai acsni tavanan calaktsꞌintanucanaꞌ laca tuꞌuꞌ jipi ixlhichꞌalhcat ju kꞌantam kꞌantam pus ni xamatiꞌ kꞌox caxajanta pus camaklhtayananaꞌ ju ixtalhaja.
\v 15 Para ni va calhcukꞌoyach ju tuchi xalhilaputankꞌayai ju ixchakaꞌ Dios pus matich cajunaꞌ ju ixtalhaja. Va yuchi ni catakꞌalhtaxtuyach ju yuchi. Para chunch cajunaꞌ tachi tam xamatiꞌ ju xcayama takꞌalhtaxtui acsni tꞌajun lhcunuꞌ ju ixchakaꞌ.
\p
\v 16 Ja va jantu cꞌatsꞌayatꞌit ni tachi ixpujitat Dios untꞌatꞌit minchuxꞌan ju uxijnan. Ja jantu cꞌatsꞌayatꞌit ni tꞌajun ju Spiritu Santu lamiꞌalhunutꞌan ju pumatamin ju uxijnan.
\v 17 Tachi ju iclajuntau. Ju uxijnan tachi ixpujitat Dios untꞌatꞌit minchuxꞌan ju uxijnan. Chai ju ixpujitat Dios na salaka. Pus ni xamatiꞌ catalakꞌalhiniputunan ju miꞌatalacpastꞌacꞌatꞌan ni tajunan ju chivinti ju jantu sok pus Dios ju camamakꞌalhkꞌajnikꞌalhiyaꞌ.
\p
\v 18 Tun xamatiꞌ ju milhiꞌuxijnan cataꞌokxchokꞌolh isꞌakstu. Ni alin ju milhiꞌuxijnan ju na atalaniniꞌ calhitalacasuputulh ju ani lacamunutpaꞌ pus tasqꞌuini ni cacꞌatsa ni jantu tuꞌuꞌ lhitapalai ju xaꞌatalaninti ju ani lacamunutpaꞌ. Ju chunch laich camispayaꞌ ju atalaninti ju istavasalanti ju xtꞌakꞌa ju Dios.
\v 19 Pus ju xaꞌatalaninti ju va lhilapanac jantu tuꞌuꞌ lhiulai ju Dios. Tasui ni chunchach ju lhiulai ju Dios ni chanich ju tsꞌokcanta laꞌixchivinti junta chani najun: “Ju Dios ma calacasqꞌuinach ni catapukꞌalhkꞌosaꞌ ixchivintiꞌan isꞌakstuꞌan ju atalaninin”. Chunch ma najun ju Dios.
\v 20 Chai ju alacatam junta tsꞌokcanta ma chani najun ju Dios: “Ju yuchi ma amispanikꞌojui ju ixꞌatalacpastꞌacꞌatꞌan ju tanajun ni atalaninin tajunita. Chai ma cꞌatsai ni jantu lhitapalai ju ixꞌatalanintiꞌan ju yuꞌunch”. Chunch ma najun ju Dios.
\v 21 Tun va alakꞌayatꞌit ju tam mintꞌalapanacꞌan ni laich anaꞌuntꞌit ni yuchach ju achꞌakꞌokꞌatꞌit. Jantu chun alatꞌit ni taxtaknikꞌotan ju Dios tachi chun ju taxtokni.
\v 22 Ju quitꞌin chai ju Apolos chai ju Pitaluꞌ va milapanacni icjuntau. Chai ju Dios taxtaknitan tachi chun ju taxtokni ju alin ju ani lacamunutpaꞌ ni laich cataꞌaktaijuyan. Pus ni lakꞌaꞌi ju Dios ni tꞌonatꞌitcaꞌ u ni aniyaꞌitꞌit pus ju Dios chunch navi ni va pastꞌacꞌa ju kꞌox ju milacataꞌan. Chai vana va chun pastꞌacꞌa ixlacata ju tuchi tꞌajun tapasanaꞌ ju chavai lamiꞌatsucuntiꞌan chai ju tuchi catapasayaꞌ astan.
\v 23 Chai ju uxijnan ixꞌanuꞌ Cristo untꞌatꞌit. Chai ju Cristo ixꞌanuch Dios junita.
\c 4
\s1 Chani tanavi ixtamalakachan ju Jesús
\p
\v 1 Tachi chun ju uxijnan acꞌatsꞌatꞌit ni va ixlapanacni Cristo icjuntau. Va icmavasalayau ju ixchivinti Dios ju jantu lai ixmachakxacan ju makꞌanchich.
\v 2 Chai tachi chun ju mavasalai ju ixchivinti Dios tasqꞌuini ni lai calhilaksicalh.
\v 3 Para ju quitꞌin jantu icnavi cuenta tuchꞌi nonatꞌit ju quilacata u tuchi tanajun ju aliꞌin. Nin quiꞌakstu quitꞌin jantu lai actinaulh ni icnavita ju kꞌox u jantu.
\v 4 Mas tachi ju va sok icꞌanta iclhiulai para jantu lai vas actinaulh ni chunch ju najun ju Dios u jantu. Va yuchi isꞌakstu ju Cristo ju lai canaulh ni icnavi ju kꞌox u jantu.
\v 5 Pus ni va yuchi ju Cristo ju lai najun ni kꞌox ju navicanta tuꞌuꞌ u jantu pus jantucaꞌ lai xamatiꞌ catinaulh ni kꞌox u jantu ju tuchi navi ju akꞌantam. Jantucaꞌ lai chun catinaulh ni jantucaꞌ chin ju anuꞌ avilhchan acsni caminaꞌ ju quiꞌucxtinꞌan Jesús. Ju acsnich ju yuchi camalacasukꞌoyach ta yu cꞌatsancan laquiꞌalhunutꞌan chai tijuch ju xapastꞌacꞌau laquiꞌalhunutꞌan. Chai ju acsnich ni cꞌatsai ju Dios tuchi xanavi ju kꞌantam kꞌantam pus calakꞌayayaꞌ ju pumatamin tachi ju lhijunch.
\p
\v 6 Pus ji quiꞌalakꞌavin iclhichivininta ju quiꞌatsucunti chai isꞌatsucunti ju Apolos ni lai apꞌumachꞌakxatꞌit ju tuchi xaclajumputunau. Ju chunch lai atsꞌucꞌuyaꞌitꞌit tachi ju najun laꞌixchivinti Dios ju tsꞌokcanta. Vachuꞌ jantu alhitꞌakꞌayatꞌit ni chꞌakꞌokꞌayatꞌit ju pumatam chai jantu alhixcꞌaꞌitꞌit ju va akꞌantam tachꞌakꞌokꞌai.
\v 7 Pus tajuch ni va nonatꞌit ni palai lackꞌoxin lapanacni untꞌatꞌit. Palai jantu ju aliꞌin. Pus lana jantuꞌ tuꞌuꞌ alin ju lamiꞌatsucuntiꞌan ju jantu va axtꞌaknicꞌantꞌatꞌit. Chai ni va xtꞌaknicꞌantꞌatꞌit tꞌas ni va lhitꞌakꞌayapꞌalatꞌit. Ju chunch tachi ju va jantu va xtꞌaknicꞌantꞌatꞌit.
\p
\v 8 Ju uxijnan nonatꞌit ni makꞌalinin untꞌatꞌit ju chavai chai jantu tuꞌuꞌ tacꞌacxniyan. Mas ca jantu vasalh. Chai nonatꞌit ni kꞌai ucxtinin untꞌatꞌit. Mas ca jantu vasalh. Chai nonatꞌit ni quilapuꞌinitauch. Pus vak tachi kꞌox ixva ni vasalh kꞌai ucxtinin ixꞌuntꞌit. Ju chunch laich vachuꞌ aclatꞌataꞌucxtiniyauch ju quijnan.
\v 9 Pus ju quitꞌin iclhiulai ni quintamalacasutan ju Dios tachi ju va jantu tuꞌuꞌ quintapalhni quincꞌan ju ixtamalakachan icjuntau. Icꞌulhtucantauch tachi ju lapanacni ju amucꞌanicanta ixꞌanintiꞌan va ixlacata ni taꞌalactuꞌununta. Ju lapanacni ju ani lacamunutpaꞌ chai ju anquilhnin va quintalhalakastꞌananan.
\v 10 Ju lapanacni quintalaktsꞌinan tachi ju va tontojni icjuntau va ixlacata ni icnonau ixchivinti ju Cristo. Para ju uxijnan nonatꞌit ni palai na machꞌakxayatꞌit ixchivinti Cristo. Nonatꞌit ni palai lhilaksiyatꞌit ju Cristo ju uxijnan. Ma palai jantu ju quijnan. Nonatꞌit ni tachi ju va xalackꞌajin untꞌatꞌit para ju quijnan ma tachi ju va amacxtalh iclaktsꞌincanauch.
\v 11 Tus chavai na iclacchavanau. Chai na icquicxixau. Chai matich ju quimpumpuꞌ quincꞌan. Chai iclakanekmacanauch ju quijnan. Chai matich junta lai acnaulh ni quinchakaꞌ quincꞌan junita.
\v 12 Chai ju quijnan na icxkꞌopꞌauch acsni icchꞌalhcatnanchokoyau ju laquimaktasqꞌuinit quincꞌan. Chai acsni icjuncanau macxcai chivinti pus icsqꞌuiniyau ju Dios ju kꞌox ju ixlacataꞌan. Chai acsni iclhichꞌakꞌokꞌaxmacanau va ixlacata ni iclhilacaꞌantauch ju Cristo pus va icchꞌixauch.
\v 13 Chai acsni na macxcai chivinti ju iclhichivincanauch pus va si kꞌoxi chivinti ju iclhakꞌalhtayananauch. Tus chavai iclaktsꞌinkꞌalhicanauch tachi ju va xaꞌamacxtalh ju ani lacamunutpaꞌ. Tachi ju tuꞌuꞌ ju va tamackꞌanch ju lapanacni.
\p
\v 14 Jantiyuꞌ ju iclalhiꞌatsꞌoknuniyau ju ani chivinti ni va aclapumamaxaniputu. Alai va iclamapꞌaksiputunau ni na iclamapainiyau chai tachi ju va quiꞌaskꞌatꞌan iclalaktsꞌinau.
\v 15 Pus mas lakacau milh cava ju tamalaniyan ixchivinti Cristo para va quitꞌin ju pꞌulhnan iclajuntau ju anuꞌ chivinti. Chai ni quitꞌin ju pꞌulhnan iclajuniu ju ixchivinti Dios chai lhilacꞌapꞌintꞌatꞌit ju Cristo pus tachi ju va quiꞌaskꞌatꞌan iclalaktsꞌinau.
\v 16 Pus yuchi iclalhitapaininiyau ni chunch ju alatꞌit tachi ju iclai ju quitꞌin.
\p
\v 17 Chai ni vasalh iclacasqꞌuin ni chunch ju alatꞌit pus yuchi iclhimalakachacha ju Timoteo. Ju yuchi iclaktsꞌin tachi ju va quintsꞌalh ni quitꞌin ju icjunilh ju ixchivinti Dios chai yuchi lhilhilacaꞌalh ju Jesús. Chai ju yuchi vasalh muctaxtui laꞌixlhamapꞌaksin ju Cristo. Pus yuchi ju catamapastꞌacꞌanichokoyan ta yu junita ju quiꞌatsucunti ni iclhilacaꞌanta ju Cristo. Chai catamapastꞌacꞌaniyan ni jantu icmapaxai ju tuchi icꞌamasuni ju lapanacni ju talhilacaꞌanta ju Cristo mas vanta anchach catatavi.
\v 18 Pus ju aliꞌin lamilhiꞌuxijnan na talhitakꞌayatach ni tanajun ni na quintamakꞌesvata chai ixlhiyuchi jantu lai tavanan actiꞌanchokochau lalaktsꞌinin.
\v 19 Para aktsꞌiyach vatsꞌalhti acꞌantachau lalaktsꞌinin ni calacasqꞌuinaꞌ ju quiꞌucxtinꞌan Dios. Chai ju acsnich jantu va ixchivintiꞌan ju acꞌakꞌasmatniyaꞌ ju anuch ju na talhitakꞌayata ju ixꞌatalanintiꞌan. Para vachuꞌ accꞌatsayaꞌ tuchi laich tanavi.
\v 20 Pus ni vasalh lhinajun ju Dios laꞌixꞌalhunut ju tam lapanac pus lana tasui laꞌisꞌatsucunti. Jantu va yuꞌ ni najun ni lhinajun ju Jesús laꞌisꞌatsucunti.
\v 21 Pus tꞌas nonatꞌit. Ni atꞌailhipꞌinaꞌitꞌit tachi ju aktsꞌiya layatꞌit pus aclalakakꞌaimayau acsni aclalakchaꞌanchokoyau. Para ni kꞌoxich atsꞌucꞌuyaꞌitꞌit pus aclamasuniyau ni vasalh iclamapainiyau chai ni na kꞌox ju quiꞌalhunut acsni aclalakchaꞌanchokoyau. Pus tasmalhch ju lacꞌasqꞌuinatꞌit ju kꞌoxich alhiulayaꞌitꞌit.
\c 5
\s1 Aꞌulanitꞌit ixtalakꞌalhin ju na alactuꞌunun
\p
\v 1 Noncan ni alin pumatam lamilhiꞌuxijnan ju laich xatꞌatsucui ju ixtunati. Para mas sia yuꞌunch ju jantucaꞌ talhilacaꞌanta ju Jesús jantu xamatiꞌ lai chunch calalh.
\v 2 Para ju uxijnan na lhitꞌakꞌayayatꞌit ni nonatꞌit ni na lackꞌoxin untꞌatꞌit. Palai kꞌox caꞌixva ni na ixlhamakꞌaninintꞌit ju anuꞌ ju xanavi ju chunch alactuꞌunti. Pus ju chavai amakꞌosutꞌitch ju anuꞌ alactuꞌunuꞌ lamilhiꞌuxijnan.
\v 3 Pus ju quitꞌin laꞌixtapakaꞌut ju Cristo icmucꞌanita ju ixtalakꞌalhin ju anuꞌ lapanac mas jantu anch iclatꞌavilhchau. Para va ixtꞌachunch mas ani ju icvi.
\v 4 Pus amakꞌaixtꞌokꞌaꞌitꞌit ju uxijnan laꞌixtapakaꞌut ju quiꞌucxtinꞌan Jesucristo. Chai ju uxijnan cꞌatsꞌayatꞌit tuchi xacnaulh ni anch cava icvilhcha. Chai Cristo ju cataxtakniyan ju ixtachaput ni laich anaviyaꞌitꞌit tuchi iclajunau.
\v 5 Pus amakꞌaxtꞌaknitꞌit ju anuꞌ lapanac ju lhacaticuru. Chach mamakꞌalhkꞌajni pantsꞌiquis. Ju chunch mas camakꞌalhkꞌajnanaꞌ ju laꞌixlacatuna para ju ixtacuvin catakꞌalhtaxtuyaꞌ acsni cachinaꞌ ju avilhchan acsni caminchokoyaꞌ ju quiꞌucxtinꞌan Jesús.
\p
\v 6 Lana jantu kꞌox ni va lhitꞌakꞌayayatꞌit ni nonatꞌit ni lackꞌoxin untꞌatꞌit. Ja jantu cꞌatsꞌayatꞌit ju chivinti ju chani noncan: “Mas va lacatsꞌunin tuꞌuꞌ ju na skꞌajtach ni aclhiyaulh ju tuꞌuꞌ atumpa pus laich lamaskꞌajkꞌojui chux”. Ju chunch nomputun ni mas va lacatsꞌunin caꞌalilh ju alactuꞌunti sia milhiꞌuxijnan para lai talakꞌalhinikꞌoyan ju mintacꞌatsanꞌan minchuxꞌan.
\v 7 Pus yuchi iclalhijunau ni atꞌamacxtꞌuyaꞌitꞌit ju anuꞌ alactuꞌunuꞌ ju lamilhiꞌuxijnan. Ju chunch ni salaka aꞌunchꞌokꞌoyaꞌitꞌit. Pus ju quintꞌaꞌisraelitanin taꞌui ju xkapavati ju jantu lhiyocanta ju xatꞌin acsni chin ju anuꞌ cꞌatan ixpupastaccan ju anuꞌ atatsꞌisni acsni tatakꞌalhtaxtulh laꞌixꞌanintiꞌan ju xalackꞌajin istsꞌalan ju makꞌaniya quintꞌaꞌisraelitanin. Pus ju uxijnan ni atꞌamacxtꞌuyaꞌitꞌit ju anuꞌ alactuꞌunuꞌ lamilhiꞌuxijnan pus chunch aꞌunaꞌitꞌit tachi ju anuꞌ xkapavati ju jantu lhiyocanta ju xatꞌin ni calamaskꞌaja. Chai ju acs cꞌatan vachuꞌ tamakni ixborregoꞌan. Chai ju Cristo valh tachi ju quimborregoꞌan acsni maknicalh ixlacata ju quiꞌalactuꞌuntiꞌan.
\v 8 Pus tachi ju yuꞌunch acsni tavanan chin ju anuꞌ cꞌatan tamaxtukꞌojui chux ju xatꞌin xkapavati laꞌixchakaꞌan pus vana va chun ju quijnanꞌan. Camaxtukꞌoyau vachuꞌ chux ju alactuꞌunti ju alin laquiꞌatsucuntiꞌan. Jantu vana canaviyau tachi ju aktsꞌiya ixlayau. Jantu canaviyau ju tuꞌuꞌ macxcai nin tuꞌuꞌ alactuꞌunti. Alai salaka cava ju quiꞌatsucuntiꞌan chai soknicꞌa.
\p
\v 9 Pus lacaꞌalakatam alhiqui ju iclaꞌatsꞌoknunitau ju uxijnan iclajuniu ni jantu amaꞌamigoxlatꞌit ju yuꞌunch ju tatꞌatꞌajun ju jantu ixꞌamachakaꞌan u ju jantu ixpapaꞌan.
\v 10 Para jantu xaclajumputunau ni va jantuch lana lai atꞌalaxakꞌalatꞌit ju jantucaꞌ talhilacaꞌanta ju Cristo ju va lakachapu tatꞌajun chai ju va taꞌalhacchaꞌanan chai ju va taꞌakꞌalhonan chai ju va talhilacaꞌanta ju va tuꞌuꞌ santo. Pus ni jantuch lana lai ixꞌatꞌachꞌivinintꞌit ju yuꞌunch pus ca istasqꞌuini ni ixtꞌaxtꞌutꞌit ju ani lacamunutpaꞌ.
\v 11 Alai yuchi iclajuntau ni jantu atꞌaꞌalhtꞌanantꞌit tam milakꞌauꞌan ju lhilacaꞌanta ju Cristo ni va calakachaputsuculh u va caꞌalhacchaꞌanalh u va calhilacaꞌalh ju tuꞌuꞌ santo u ju va najun macxcai chivinti ixlacata ju akꞌantam u ju va catꞌakꞌapꞌa u ju va akꞌalhaunaꞌ. Pus ni alin xamatiꞌ lamilhiꞌuxijnan ju chunch lai pus jantu lana atꞌavaꞌintꞌit ju yuchi.
\v 12 Pus jantu lhijun ni lai acꞌamucꞌanilh ixtalakꞌalhinꞌan ju jantucaꞌ talhilacaꞌanta ju Cristo. Isꞌakstu Dios ju caꞌamucꞌaniyaꞌ ixtalakꞌalhinꞌan ju yuꞌunch. Para tasqꞌuini ni amucꞌaniyaꞌitꞌit ixtalakꞌalhinꞌan ju talhilacaꞌanta ju Cristo para ni va ixlaquilhtu titaꞌalactuꞌunun.
\v 13 Pus atꞌamacxtꞌutꞌit ju anuꞌ alactuꞌunuꞌ ju vi lamilhiꞌuxijnan.
\c 6
\s1 Lalhiꞌancan lacapuꞌucxtin
\p
\v 1 Ju uxijnan ni alin tuꞌuꞌ milhamakꞌanꞌan na lhimaxan ni va pꞌinatꞌit chꞌivintꞌanuninin ju ixtalakꞌalhin ju akꞌantam laꞌixꞌucxlacapuꞌan ju ucxtinin ju jantucaꞌ talhilacaꞌanta ju Cristo. Palai kꞌox cava ni laꞌixꞌucxlacapuꞌan ju talhilacaꞌanta ju Cristo ju alakꞌoxitꞌit ju milhamakꞌanꞌan.
\v 2 Ja va jantu cꞌatsꞌayatꞌit ni caꞌamucꞌaniyau ixtalakꞌalhinꞌan ju lapanacni tachi chun ju quijnanꞌan ju lhilacaꞌantauch ju Cristo. Ucxtinin cajunau acsni tavanan caminchokoyaꞌ ju Cristo. Pus ni ucxtinin aꞌunaꞌitꞌit ju acsnich ja jantu lai lakꞌoxiyatꞌit ju tuꞌuꞌ lhamakꞌan ju chavai ju va lacatꞌicstꞌi.
\v 3 Ja jantu cꞌatsꞌayatꞌit ni camucꞌaniyau ju ixtalakꞌalhinꞌan ju anquilhnin. Pus ja va a ti yuchach ju lhamakꞌan ju alin lamiꞌatsucuntiꞌan jantu lai alakꞌoxitꞌit sia milhiꞌuxijnan ju lhilacꞌapꞌinatꞌit ju Cristo.
\v 4 Ni alin tuꞌuꞌ lhamakꞌan ju lamiꞌatsucuntiꞌan tajuch ni va laich apꞌinaꞌitꞌit alaktsꞌinin ju jantu talhilacaꞌanta ju Cristo. Pus ju yuꞌunch jantu tacꞌatsai ta yu catapulakꞌoxilh ju ixlhamakꞌanꞌan ju talhilacaꞌanta ju Cristo.
\v 5 Va iclapujunau chunch ni jantu atꞌailhipꞌitꞌit ju chunch atalacpastꞌacꞌat. Pus ju lamilhiꞌuxijnanꞌan ja lana matiꞌ xamatiꞌ ju atalaniniꞌ cava ju lai catalakꞌoxinin ju milhamakꞌanꞌan sia lhiꞌalakꞌavinch laꞌixmacni Cristo.
\v 6 Ju uxijnan ju lhiꞌalakꞌavin untꞌatꞌit ja vasalh tasqꞌuini ni alachꞌivimakꞌanaꞌitꞌit ju laꞌixꞌucxlacapuꞌan ju ucxtinin ju jantu talhilacaꞌanta ju Cristo.
\p
\v 7 Para lana tasui ni na alin ju mintalakꞌalhinꞌan ni va laclakꞌayatꞌit ju milhiꞌakstuꞌan. Palai kꞌox cava ni va alamacꞌacxaniyatꞌit ni tuꞌuꞌ talakꞌalhin ju lanaviniyatꞌit. Palai kꞌox ni va alhilakꞌaꞌitꞌit mas akꞌalhaunicꞌantꞌit ju mintuꞌuꞌan.
\v 8 Para ju uxijnan jantu chun layatꞌit. Alai miꞌakstuꞌan lanaviniyatꞌit tuꞌuꞌ talakꞌalhin chai lakꞌalhauniyatꞌit ju tuꞌuꞌ mas ixꞌanuꞌ ju milhiꞌalakꞌavinꞌan.
\p
\v 9 Ja lana jantu cꞌatsꞌayatꞌit ni jantu lai catitanu junta lhinajun ju Dios ju va jantu sok tatꞌaꞌanta ju ixtꞌalapanac. Jantu aꞌokxchꞌokꞌocꞌantꞌit ixlacata tachi chun ju ani taxtokni. Jantu lai catitanu junta lhinajun ju Dios ju tapuxcajui ixnavinꞌan. Nin yuꞌunch ju talhilacaꞌanta ju tuꞌuꞌ santo. Nin yuꞌunch ju papanin ju tatꞌatsucui ju jantu ixꞌamachakaꞌan. Nin yuꞌunch ju chakolun ju tatꞌatsucui ju jantu ixpapaꞌan. Nin yuꞌunch ju papanin ju tꞌalalactuꞌui ju ixtꞌajokꞌat.
\v 10 Jantu lai catitatanu junta lhinajun ju Dios ju va taꞌakꞌalhaunan. Nin yuꞌunch ju talhacchaꞌani ju ixꞌanuꞌ ju apumatam. Nin yuꞌunch ju tꞌakꞌapꞌanin. Nin yuꞌunch ju tanajun macxcai chivinti ixlacata apumatam. Nin yuꞌunch ju va taꞌokxchokꞌomaxtuni ju ixꞌanuꞌ ju akꞌantam. Ju chun tanavi jantu xamatiꞌ sia yuꞌunch lai catitanu junta lhinajun ju Dios.
\v 11 Pus chunchach ixꞌuntꞌatꞌit ju aliꞌin lamilhiꞌuxijnan. Para ju chavai chꞌakꞌanicꞌantꞌatꞌit ju miꞌalhunutꞌan. Ju chavai ixꞌanuꞌ Dios untꞌatꞌit. Chai ju Dios talaktsꞌinan ni soknicꞌa untꞌatꞌit. Chunch untꞌatꞌit ju chavai laꞌixtachaput ju Spiritu Santu va ixlacaꞌatalh ni xalhilacꞌapꞌinatꞌit ju Jesús.
\s1 Tasqꞌuini ni na salaka catsucu
\p
\v 12 Ju aliꞌin tanajun ni laich navikꞌocan tachi chun ju naviputuncan. Pus vasalh. Para jantu si lai caꞌaktaijun. Chai mas lai acnavikꞌo va tuchi ixtalakxtuch para ju quitꞌin jantu icnavikꞌoputun tachi chun ju taxtokni ju min laquiꞌatalacpastꞌacꞌat.
\v 13 Ju Dios quintaxtaknitan ju vaiti ixlacata ju quimpajanꞌan. Chai quintanavinitan ju quimpajanꞌan ni catajulhch ju quivaitiꞌan. Para cachinaꞌ avilhchan acsni jantu camaktasqꞌuiniyau ju tuꞌuꞌ vaiti. Pus ju Dios jantiyuꞌ lhixtaknilh ixlacatuna ju tam jokꞌat ni laich va kꞌaya catꞌatsuculh ju jantu ixꞌamachakaꞌ. Chai jantu lhixtaknilh ixlacatuna ju tam chakoꞌulh ni lai va kꞌaya catꞌatsuculh ju jantu ixpapa. Alai yuchi quintalhixtaknitan ju quilacatunaꞌan ni ixꞌanuch ju Cristo cajunlh. Chai yuchach ju lhistꞌacꞌa.
\v 14 Chai mas caniyau para ju Dios aquintamacxtunichokoyan ju quilacatunaꞌan laꞌixtachaput. Chunch aquintaꞌulhtuyan tachi ju ulhtulh ju Jesús acsni macxtuchokolh ju ixlacatuna junta ixmacnucanta.
\p
\v 15 Pus ja va jantu cꞌatsꞌayatꞌit ta yu tꞌajuntau ju Cristo. Pus ju quilacatunaꞌan ixꞌanuch ju Cristo. Chai ju milacatunaꞌan ni ixꞌanuch ju Cristo pus ja lai vanach atꞌitꞌaꞌalactꞌuꞌunumpꞌalatꞌit ju va xanavinch lacati. Jantu lhijun ni lai acnavi ju chunch.
\v 16 Ja va jantu machꞌakxayatꞌit. Pus ju tam lapanac acsni tꞌatsucui tam chakoꞌulh ju xanavin lacati pus va lakatam lacatuna tajunita. Chunch tajunita tachi ju najun laꞌixchivinti Dios ju tsꞌokcanta junta chani najun: “Ju ixtꞌiyunꞌan va lakatamch lacatuna catajunaꞌ”. Chunch ju najun laꞌixchivinti Dios.
\v 17 Para ju ixlhichux ixꞌalhunut makꞌaxtaknita ju isꞌatsucunti ju ixꞌucxtin Jesús pus va lakatam tꞌajunita laꞌixtachaput ju Spiritu Santu.
\p
\v 18 Pus ni chunch tꞌaꞌuntꞌatꞌit ju Cristo pus nin lacatsꞌunin jantu apꞌastꞌactꞌit ixpuxcajuca ju minavinꞌan. Pus tachi chun ju aliꞌ alactuꞌunti ju canavi ju jokꞌat jantu na chun lakꞌalhini ju isꞌatsucunti. Para ju tꞌatsucui ju jantu ixꞌamachakaꞌ pus va isꞌakstu lakꞌalhichokoi ju isꞌatsucunti.
\v 19 Ja va jantu cꞌatsꞌayatꞌit ni ixꞌanuꞌ Dios junita ju milacatunaꞌan ni taxtaknitan ju Spiritu Santu chai yuchi ju tꞌajun lamiꞌalhunutꞌan. Pus ju milacatunaꞌan jantu miꞌanuꞌan miꞌakstuꞌan.
\v 20 Ju uxijnan na laklhu lhitꞌamocꞌantꞌatꞌit ni nitꞌa ju milacataꞌan ju Jesús. Pus yuchi iclalhijunau ni chunch ju atsꞌucꞌutꞌit chai chunch ju apꞌastꞌactꞌit tachi ju laich calakꞌayacalh ju Dios ju milacataꞌan. Chunch alatꞌit ni ixꞌanuch Dios ju milacatunaꞌan chai ju miꞌalhunutꞌan.
\c 7
\s1 Amapꞌaksinti ixlacata ju tamakꞌaxtꞌokꞌat
\p
\v 1 Pus ju chavai aclajunau ixlacata ju anuꞌ taxtokni ju xaquilasacmiyau acsni quilaꞌatsꞌoknuniu. Pus tachi ju tꞌajun tapasanaꞌ ju chavai lamiꞌatsucuntiꞌan pus na kꞌox cava ni jantu catamakꞌaxtoklh ju tam tsꞌalh.
\v 2 Para va ixlacaꞌatalh ni na lhu catalhava ju alactuꞌunti ni jantu catamakꞌaxtokcalh pus palai kꞌox cava ni pumatamin jokꞌat capacxalh ixꞌamachakaꞌ. Chai ju pumatamin chakoꞌulh caꞌalilh ju istꞌatsucunuꞌ.
\v 3 Ju jokꞌat catꞌatsuculh ju ixꞌamachakaꞌ tachi ju lhilhcata ju Dios. Chai vana va chun ju tam chakoꞌulh. Ju yuchi vachuꞌ catꞌatsuculh ju ixpapa tachi ju lhilhcata ju Dios.
\v 4 Ju tam chakoꞌulh jantu lai catilhikꞌalhtsꞌaulh ju ixlacatuna ni alin ju ixpapa. Chai vana va chun ju tam jokꞌat. Jantu lai catilhikꞌalhtsꞌaulh ju ixlacatuna ni alin ju ixꞌamachakaꞌ.
\v 5 Ju tam lapanac ju alin ixꞌamachakaꞌ jantu lhijun ni alacatam canavi ju ixputaman. Para ju mintꞌiyunꞌan ni va tꞌascꞌaꞌapꞌutꞌunatꞌit lakatꞌutu lakatꞌatꞌi avilhchan ni laich palai atꞌachꞌivinintꞌit ju Dios pus laich. Para acsni atꞌachꞌivinkꞌoyaꞌitꞌit ju Dios pus va lakatamch anavichꞌokꞌotꞌit ju mimputamanꞌan. Ju va makꞌan alakꞌacꞌujtsꞌucꞌutꞌit ju va miꞌakstuꞌan jantu xcai ni cataꞌokxchokꞌon ju lhacaticuru chai alactꞌuꞌununaꞌitꞌit.
\p
\v 6 Pus jantu iclajunau ni lana atꞌamakꞌaxtꞌoktꞌit. Va iclajumputunau ni laich atꞌamakꞌaxtꞌokꞌaꞌitꞌit ni chunch ju lapꞌutꞌunatꞌit.
\v 7 Para ca vak tachi kꞌox cava ni chunchach ju catatsuculh ju chavai tachi chun ju jokꞌatni tachi ju quitꞌin ni va quiꞌakstu ictꞌajun. Para jantu si axtakninicanta ju chunch atsucunti. Ju pumatamin tam ju axtaknicanta ju isꞌatsucuntiꞌan.
\p
\v 8 Pus chani icꞌajumputun ju va isꞌakstucaꞌan tatꞌajun chai ju chakolun ju va animacontilacantach. Vak tachi kꞌox cava ni va isꞌakstuꞌan catatsucukꞌalhi ju chavai tachi ju ictꞌajun ju quitꞌin ni va quiꞌakstu ictꞌajun.
\v 9 Para ni jantu lai akꞌaichokocan isꞌakstuꞌan pus palai kꞌox ni caꞌaꞌicalh. Palai jantu kꞌox ni na va catamakꞌalhkꞌajnalh ni lana jantu lai tatsucui ju va isꞌakstuꞌan.
\p
\v 10 Pus ju tuchi icꞌajuni ju tamakꞌaxtoknunch jantu va quiꞌakstu ju icnajun. Para vana va chun ju naulh ju Cristo. Pus icꞌajuni ju chakolun ju aꞌicanta ni jantu catamacaulh ju ixpapaꞌan.
\v 11 Para ju tam chakoꞌulh acsni vaclhun taxtuich laꞌixchakaꞌ pus tasqꞌuini ni vasalh va isꞌakstu catsuculh. U ni jantu va isꞌakstu ju tsucuputun pus chach lakꞌanchokolh ju ixpapa. Chai tam jokꞌat jantu lai catixcoxtulh ju ixꞌamachakaꞌ.
\p
\v 12 Ju chavai aclajunau tuchi kꞌox iclhiulai ni anaviyaꞌitꞌit. Para ju yuchi va quinchivinti quiꞌakstu junita. Jantiyuꞌ ju Jesús ju naulh ni chunchach ju alatꞌit. Pus ju tam quilakꞌauꞌan ju alin ixꞌamachakaꞌ ju jantucaꞌ lhilacaꞌanta ju Jesús chai ni tꞌalakꞌachanich pus jantuch catꞌalamacaulh.
\v 13 Chai ju tam chakoꞌulh ni alinch ju ixpapa ju jantucaꞌ lhilacaꞌanta ju Jesús chai ni tꞌalakꞌachanich pus jantuch camacaulh.
\v 14 Ju tam lapanac mas jantu lhilacaꞌanta ju Cristo para ni lhilacaꞌanta ju Cristo ju ixꞌamachakaꞌ pus ju Dios xtakni ju kꞌox isꞌatsucunti ju lapanac ni isꞌaskꞌatꞌa Dios junita ju ixꞌamachakaꞌ. Chai vana va chun ju tam chakoꞌulh. Mas jantu lhilacaꞌanta ju Cristo ju yuchi para ni lhilacaꞌanta ju Cristo ju ixpapa pus xtakni ju Dios ju kꞌox isꞌatsucunti ni isꞌaskꞌatꞌa Dios junita ju ixpapa. Pus ni jantu chun cava pus jantu kꞌox cava ju isꞌatsucuntiꞌan ju isꞌaskꞌatꞌaꞌan.
\v 15 Para ju tam chakoꞌulh ju jantu lhilacaꞌanta ju Cristo ni amaconananch pus chach ancha. Jantu tapꞌastu ni catꞌatsuculh ju ixpapa ju lhilacaꞌanta ju Cristo. Chai vana va chun ju tam quilakꞌauꞌan atsiꞌ ju lhilacaꞌanta ju Cristo. Ni xcoxtucanta laꞌixchakaꞌ va ixlacaꞌatalh ni jantu lhilacaꞌanta ju Cristo ju ixpapa pus chach macaulh. Ju Dios lacasqꞌuin ni lhikꞌach catsucu. Jantu va lacalakꞌaiti.
\v 16 Pus ju uxintꞌi ji chakoꞌulh ni tapꞌastu tꞌatsꞌucꞌupꞌutꞌun ju mimpapa ni lhilacꞌapꞌinch ju Jesús ja cꞌatsꞌaich ni aktsꞌiya camakꞌalhtaxtuyaꞌ ju Dios ju mimpapa ju va milacata. Chai ju uxintꞌi ji lapanac ni tapꞌastu tꞌatsꞌucꞌupꞌutꞌun ju miꞌamachakaꞌ va ixlacaꞌatalh ni lhilacꞌapꞌinch ju Jesús ja cꞌatsꞌaich ni aktsꞌiya camakꞌalhtaxtuyaꞌ ju miꞌamachakaꞌ ju va milacata.
\p
\v 17 Ju uxijnan acsni tavanan xalhilacꞌapꞌinatꞌit ju Jesús va tuchi lhichꞌalhcat ju ixnaviyatꞌit ju pumatamin ju milhiꞌuxijnan pus chunchach ju atꞌailhipꞌitꞌit. Va tuchi lhichꞌalhcat ju ixnavi ju pumatamin pumatamin ju uxijnan. Chai chunch ju iclhamapꞌaksinin tachi chun ju talhilacaꞌanta ju Cristo.
\v 18 Ni alin xamatiꞌ ju ixchꞌucꞌunicanta ju ixꞌaxtꞌakꞌa acsni tavanan lhilacaꞌalh ju Jesús pus chach chunch jonkꞌalhi. U ni alin xamatiꞌ ju jantu ixchꞌucꞌunicanta ju ixꞌaxtꞌakꞌa acsni tavanan lhilacaꞌalh ju Cristo pus jantu calhinaulh ixchꞌucꞌuca.
\v 19 Jantu lhitapalai ni chꞌucꞌucanta u jantu. Va yuchi ju lhitapalai ni canaviu tachi ju najun ju Dios.
\v 20 Ni jantu lhikꞌalhtsajui ju Dios ju anuꞌ lhichꞌalhcat ju ixtꞌajun naviniꞌ xamatiꞌ acsni lhilacaꞌalh ju Cristo pus jantu tasqꞌuini ni camapaxalh ixlhichꞌalhcat va ixlacaꞌatalh ni lhilacaꞌalh ju yuchi.
\v 21 Ja va ixtꞌamocꞌantꞌa chai va xalapanac ixꞌunitꞌa acsni tavanan lhilacꞌapꞌi ju Cristo. Pus jantu alhamakꞌanin. Para ni cajunin ju miꞌucxtin ni lai atꞌaxtꞌuyaꞌ u laich amapꞌuspꞌitnin ju ixlhitamotan pus atꞌaxtꞌu.
\v 22 Pus ju yuchi ju xalapanac ixjunita acsni tavanan lhilacaꞌalh ju Cristo pus ju chavai ju Dios laktsꞌin ni ixlapanac junita. Jantu va ixlapanac akꞌantam ixtꞌalapanac. Chai vana va chun ju jantu xalapanac ixjunita acsni tavanan lhilacaꞌalh ju Cristo. Pus ju chavai ixlapanac Cristo junita.
\v 23 Ju Dios na laklhu ju talhitamotan. Pus yuchi alhicꞌatsꞌatꞌit ni yuchi ju miꞌucxtinꞌan junita. Jantu va mintꞌalapanacniꞌan.
\v 24 Ji quiꞌalakꞌavin ni jantu lhikꞌalhtsajui ju Dios ju lhichꞌalhcat ju ixtꞌonatꞌit navinin acsni tavanan lhilacꞌapꞌitꞌit ju Cristo pus atꞌailhipꞌitꞌit pumatamin ju uxijnan ju milhichꞌalhcatꞌan. Chai acꞌatsꞌatꞌit ni Dios ju tatꞌavilan.
\p
\v 25 Pus ju chavai aclajunau ixlacata ju va isꞌakstuꞌancaꞌ tatꞌajun. Pus ju Jesús jantu tuꞌuꞌ ju quijuni ixlacata ju yuꞌunch. Para ju Jesús quiꞌaktaijulh laꞌixꞌamapaininti chai lai lhilaksiyatꞌit ju quinchivinti. Pus ju quitꞌin aclajunau tuchi kꞌox iclhiulai ni catanavi.
\v 26 Pus va ixlacaꞌatalh ni na quintamamakꞌalhkꞌajniyan ju chavai ju lapanacni yuchi iclhinajun ni ca kꞌoxich cava ni va isꞌakstuꞌan catatsuculh ju va isꞌakstuꞌancaꞌ tatꞌajun.
\v 27 Para ju alinch ju ixꞌamachakaꞌ pus jantu capastaclh ni laich camacaulh. Chai ju matich ju ixꞌamachakaꞌ pus tucaꞌ capuxcaulh ju ixꞌamachakaꞌ.
\v 28 Para ni catamakꞌaxtoklh tam xamatiꞌ pus jantu alactuꞌunti ju navi. Nin yuchi ju tam atsiꞌ jantu alactuꞌunti ju navi ni xaꞌican. Para ni na va alin ju chavai ju quimakꞌalhkꞌajnatꞌan pus palai catamakꞌalhkꞌajnanaꞌ ni ixtꞌiyunꞌan tajunita. Chai ju quitꞌin ni jantu iclacasqꞌuin ni na lhuch amakꞌalhkꞌajnantꞌit pus yuchi iclalhijunau ni palai kꞌox ni jantucaꞌ atꞌamakꞌaxtꞌoktꞌit.
\p
\v 29 Pus ji quiꞌalakꞌavin iclajunau ni jantu lhu avilhchan ju quintaxtaknitan ju Dios ju lai capunaviniyau ju ixlhichꞌalhcat. Pus yuchi iclalhijunau ju ani. Pus ju alin ixꞌamachakaꞌan jantu va yuchi ju catapastaclh. Para vachuꞌ catanavilh cuenta ixtaxtokni Dios.
\v 30 Chai ju na talackꞌalhun jantu va ixꞌamakꞌanit ju catapastackꞌalhi. Chai ju na talackꞌachan jantu va ixkꞌachatꞌan ju catapastackꞌalhi. Chai ju na taꞌalactamonan jantu va yuchi ju catapastackꞌalhi. Jantu chun alatꞌit ni va xanavin lacamunutpaꞌ junita tachi chun ju ani taxtokni.
\v 31 Chai jantu na lhuch achꞌalhcꞌatnantꞌit va ixlacaꞌatalh ni anaꞌuntꞌit ni na kꞌox atsꞌucꞌuyaꞌitꞌit ju ani lacamunutpaꞌ. Jantu chunch alatꞌit ni jantu tuꞌuꞌ ju lai cajonkꞌalhi ju ani lacamunutpaꞌ.
\p
\v 32 Pus ju quitꞌin jantu iclacasqꞌuin ni tuꞌuꞌ caꞌalilh lamiꞌatsucuntiꞌan ju alhamakꞌaninintꞌit. Pus ju tam tsꞌalh ju va isꞌakstucaꞌ tꞌajun na navi cuenta ju ixlhichꞌalhcat ju Dios. Va puxcajui ta yu laich canavinilh ixkꞌachat ju Dios.
\v 33 Para ju alin ixꞌamachakaꞌ vachuꞌ navi cuenta ju xataxtokni ju ani lacamunutpaꞌ. Va puxcajui ta yu laich kꞌox caputꞌalalhiꞌalh ju ixꞌamachakaꞌ.
\v 34 Vachuꞌ na tam ju isꞌatsucunti ju tam chakoꞌulh ju alin ixpapa chai tam atsiꞌ ju va isꞌakstucaꞌ tꞌajun. Pus ju va isꞌakstucaꞌ tꞌajun na navi cuenta ju ixtaxtokni ju ixꞌucxtin Dios. Va puxcajui ta yu laich salaka capujunlh ju ixlacatuna chai chux ixꞌacꞌatsanti laꞌixmacni Dios. Para ju alin ixpapa vachuꞌ navi cuenta ju ixtaxtokni ju ani lacamunutpaꞌ ta yu laich kꞌox caputꞌalalhiꞌalh ju ixpapa.
\p
\v 35 Pus iclapujunau chunch ni va iclaꞌaktaijuputunauch. Jantiyuꞌ ni va aclapumakꞌantalhanaputu laquilhamapꞌaksin. Va iclajunau ta yu lai kꞌox atsꞌucꞌuyaꞌitꞌit tachi ju kꞌachani ju Dios chai jantu tuꞌuꞌ catasastꞌucꞌan.
\p
\v 36 Para ni alin pumatam xapai ju alin ju istsiꞌ ju tꞌajun takꞌayanaꞌ chai na tamakꞌaxtokputun chai ju xapai cꞌatsai ni palai kꞌox cava ni catamakꞌaxtoklh pus jantu talakꞌalhin canavi ni caxtaklh ju istsiꞌ. Chach tamakꞌaxtoklh.
\v 37 Para na kꞌox navi ju tam xapai ju va lakatam navita ju ixꞌalhunut chai ixlhichux ixꞌalhunut najunta ni jantu catixtaklh ju istsiꞌ ju va chavai. Chai ju istsiꞌ ni tucaꞌ tamakꞌaxtokputun pus yuchi jantu lhixtaknicanta ju tam tsꞌalh.
\v 38 Pus kꞌox navi ju tam xapai ju caxtꞌakꞌaꞌ mas chavai ju istsiꞌ. Para palai kꞌox navi ju jantu caxtꞌakꞌaꞌ ju va chavai lana ju istsiꞌ ni va tꞌoncan makꞌalhkꞌajnanca.
\p
\v 39 Ju lhamapꞌaksin najun ni jantu lai catimacaulh ju ixpapa ju tam chakoꞌulh acsni tꞌajuncaꞌ ju istꞌatsucunuꞌ. Para acsni va caniyach ju istꞌatsucunuꞌ pus ju acsnich ju anuꞌ chakoꞌulh lai catꞌatamakꞌaxtokchokolh va tichi chavaich ju cakꞌachanilh. Va yuchi ni vachuꞌ calhilacaꞌalh ju Jesús ju anuꞌ lapanac.
\v 40 Para icnajunch ni palai lhikꞌach cajunlh ju isꞌatsucunti ni va isꞌakstu ju catsuculh ju chavai. Chai iclhiulai ni vachuꞌ chun ju najun ju Spiritu Santu.
\c 8
\s1 Ju lhamapꞌaksin ixlacata ju lhivai ju lhikꞌailaktsꞌincanta ju santo
\p
\v 1 Pus ju chavai aclajunau ixlacata tuchi xaquilalhisacmiyau ixlacata ju lhivai ju lhikꞌailaktsꞌincanta ju santo. Vasalh ni cꞌatsayau ni jantu tuꞌuꞌ ixtapalhni ju va santo. Para ju lapanac ju najun ni na acꞌatsananta pus na lhitakꞌayai tuchi cꞌatsai. Para ju na amapaininin aktaijui ju ixtꞌalapanac ni lai palai catsuculh tachi ju kꞌachani ju Dios.
\v 2 Ju tam lapanac ju najun ni na lai amachakxanan jantu slivasalh ni caꞌamachakxanalh tachi ju lhijunch ni camachakxa.
\v 3 Para va tichi chavaich ju mapaini ju Dios pus ju Dios mispaich ni isꞌaskꞌatꞌa junita.
\p
\v 4 Pus ju chavai aclamavasalaniyau ixlacata ju lhivai ju lhikꞌailaktsꞌincanta ju santo. Cꞌatsayau ni jantu tuꞌuꞌ ixtapalhni ju va santo. Chai jantu pumalhu ju Dios. Va pumatam.
\v 5 Para ju lactꞌiyan chai ju ani lacamunutpaꞌ na tijlhu alin ju talhilaksi ju lapanacni tachi isdiosꞌan chai na tijlhu ju tatalhoni.
\v 6 Para ju quijnanꞌan va lakatam ju quiDiosꞌan. Yuchi ju xapai ju lhinaulh ixnavica tachi chun ju taxtokni. Chai quintanavitan ju quijnanꞌan ni laich calakꞌayayauch ju yuchi. Chai vachuꞌ va pumatam ju quiꞌucxtinꞌan. Yuchi ju Jesucristo. Chai yuchach ju navikꞌolh tachi chun ju taxtokni. Chai yuchach ju quintaxtaknitan ju sastꞌi quiꞌatsucuntiꞌan.
\p
\v 7 Para jantu si tamachakxai ni va pumatam ju Dios. Ju aliꞌin ju talhilacaꞌanta ju Cristo na tatalhonicaꞌ ju santo chai titanajuncaꞌ ni ca tachi ju va alin ixtachaput ju anuꞌ santo. Pus acsni taꞌui ju yuꞌunch ju lhivai ju ixlhikꞌailaktsꞌincanta ju santo pus tachi ju va alactuꞌunti talhiulai.
\v 8 Para jantu va ixlacata tuꞌuꞌ vaiti ju uyau ju kꞌox aquintapulhiulayan ju Dios. Jantu lai palai kꞌox catipujumvi ni cavajiu u ni jantu. Nin yuchi ni lai palai alactuꞌunin catipujumvi.
\v 9 Para alaktsꞌintꞌitch. Ju uxijnan lai uyatꞌit ju anuꞌ lhivai ju lhikꞌailaktsꞌincanta ju santo chai jantu talakꞌalhin lhiulayatꞌit. Para jantu xcai ni capukꞌalhkꞌoslh apumatam ju jantucaꞌ kꞌox machakxai u talakꞌalhin cava u jantu ni caꞌulh.
\v 10 Ju uxijnan machꞌakxayatꞌit ni jantu tuꞌuꞌ ju santo. Para ju apumatam ju titalhonicaꞌ ju santo ni catalaktsꞌinan acsni makvilatꞌit lacamixa laꞌixpujitatꞌan ju talhilacaꞌanta ju santo ja jantu lai caꞌokxchokꞌomakꞌulh ju anuꞌ lhivai ju titalhonicaꞌ.
\v 11 Pus ju uxijnan machꞌakxayatꞌit ni jantu tuꞌuꞌ ju santo chai jantu talakꞌalhin ni uyatꞌit ju lhivai ju ixlhikꞌailaktsꞌincanta ju santo. Para jantu xcai ni va milacataꞌan caꞌalactuꞌunulh tam milhiꞌalakꞌavinꞌan. Chai ju Cristo nilh ju ixlacata vachuꞌ. Jantu va milacataꞌan miꞌakstuꞌan.
\v 12 Pus ju uxijnan tachi ju va lactꞌuꞌuyatꞌit xajacha ju miꞌalakꞌavinꞌan va ixlacata ni naviyatꞌit ju tuꞌuꞌ ju talakꞌalhin talhiulai. Chai ni talaktsꞌintayanch pus tanavich vachuꞌ. Chai acsni lactꞌuꞌuyatꞌit ju yuꞌunch pus yuchi ju Cristo ju tucan lactꞌuꞌuyatꞌit.
\v 13 Pus ni capukꞌalhkꞌosaꞌ tam quilakꞌau va ixlacaꞌatalh ni acꞌulh ju tuꞌuꞌ lhivai ju ixlhikꞌailaktsꞌincanta ju santo pus jantu tavanan actiꞌulh ju anuꞌ lhivai. Ju chunch jantu lai acmalactuꞌuni tam quilakꞌau.
\c 9
\s1 Tuchi lai tanavi ixtamalakachan ju Cristo
\p
\v 1 Ju quitꞌin ixtamalakachan ju Cristo icjunita. Chai lai icnavikꞌojui tachi chun ju lai tanavi ju aliꞌin ixtamalakachan ju Jesús. Ju quitꞌin vachuꞌ iclaktsꞌilh ju quiꞌucxtinꞌan Jesucristo tachi ju talaktsꞌinta tachi chun ju aliꞌin ixtamalakachan. Chai mavasalata ju Cristo ni ixtamalakachan icjunita ni laich xalhilacꞌapꞌinatꞌit ju yuchi acsni xaclajunau ju ixchivinti.
\v 2 Mas tanajun ju aliꞌin ni jantu ixtamalakachan Cristo icjunita para ju uxijnan cꞌatsꞌayatꞌit ni vasalh chunch icjunita. Pus ni xalhilacꞌapꞌinatꞌit ju quiꞌucxtinꞌan Cristo laquinchivinti pus yuchi lhicꞌatsꞌayatꞌit ni ixtamalakachan Cristo icjunita.
\v 3 Chai chunchach ju iclhakꞌalhtayanan va tichi chavaich ju quisacmi ni vasalh ixtamalakachan Cristo icjunita.
\p
\v 4 Acsni quintamavai ju yuꞌunch ju icꞌajuni ixchivinti Dios pus lai icꞌui chai lai ickꞌotꞌa tachi chun ju quintaxtakni.
\v 5 Ni va caꞌixꞌalilh ju quiꞌamachakaꞌ pus lai xactꞌaꞌalh junta icꞌan amasuninin ixchivinti Dios. Pus ni chunch ju talai ju aliꞌin ixtamalakachan ju Cristo chai ju Pitaluꞌ chai ju ixꞌapꞌisekꞌen ju Jesús pus vachuꞌ lai chunch xaclalh.
\v 6 Ja va aquijnanchꞌas ju jantu lhijun ni acmacaju ju quilhichꞌalhcat quincꞌan chai aquilamavauch ni iclajunauch ixchivinti Dios.
\v 7 Tis taropach ju laich calasa ni jantu caxtaknicalh ju ixtalhaja. Chai ju tam achꞌananaꞌ ja jantu anch taxtuchokoi ju ixvaiti ju laꞌixlhichꞌalhcat. Chai ju tam lapanac ni alin ju ixborregojni ja jantu cakꞌotꞌaꞌ ju ixleche ju ixborregojni.
\v 8 Pus acsni iclajunau ju chunch jantu va ixchivinti tam quintꞌalapanac ju icnajun. Para vachuꞌ chunch najun ju lhamapꞌaksin ju tsꞌoklh ju Moisés.
\v 9 Pus chani najun laꞌixlhamapꞌaksin ju Moisés: “Ma jantu amakꞌenkꞌatꞌanutꞌi ju tuꞌuꞌ ju mivacax acsni tꞌajun putayanaꞌ ju cebada acsni papꞌakxcan. Chach sacꞌulh lacatsꞌunin”. Chunch ju najun laꞌixlhamapꞌaksin ju Moisés. Pus acsni naulh ju Dios ni chunch ju catsꞌoklh ju Moisés jantu va yuchi ju vacax ju ispastacta.
\v 10 Alai naulh ju chunch ni laich camachakxayau ta yu lhijunch ni calanaviu laquiꞌatsucuntiꞌan. Pus ju tanavi ixcuxtuꞌan laich catalhilaksich ni anch catasuchokoyaꞌ ju ixvaitiꞌan. Chai vana va chun ju ixlakneknin cebada. Ju yuꞌunch talhilaksich ni anch ju catasuchokoyach ju ixvaitiꞌan vachuꞌ.
\v 11 Pus ju quijnan acsni iclajunau ju ixchivinti Dios pus tachi ju va icchꞌanauch ju anuꞌ chivinti lamiꞌalhunutꞌan. Chai ja jantu lhijun ni aquilaꞌaktaijuch lacatsꞌunin ju laquimaktasqꞌuinit quincꞌan.
\v 12 Ju aliꞌin amamakaꞌunin ni lai aktꞌaiꞌuyatꞌit laꞌixmaktasqꞌuinitꞌan ja va a ti quijnanch ju jantu lai aquintilaꞌaktaiju ju laquimaktasqꞌuinit quincꞌan.
\p Pus mas lhijunch ni chunch aquilaꞌulhtu para jantu tavanan tuꞌuꞌ iclasqꞌuinitauch ju uxijnan. Alai va iclhilakꞌaꞌitauch ju quimakꞌalhkꞌajnat quincꞌan acsni ixꞌalin ju quimaktasqꞌuinit quincꞌan. Ju chunch jantu tuꞌuꞌ lai catiꞌasastucnilh ju lapanacni acsni acnonau ju chivinti ixlacata ju Cristo.
\v 13 Ju uxijnan cꞌatsꞌayatꞌit ni anch ju tasuchokoi ixvaitiꞌan tachi chun ju tachꞌalhcatnan laquimpujitatꞌan ju israelitanin juntau. Chai vana va chun ju tamakchꞌalhcatnanch junta maknican ju atapacxat ju lhikꞌailaktsꞌincan ju Dios. Vachuch anch ju tasuchokoi ju ixvaitiꞌan.
\v 14 Pus vana va chun ju lhamapꞌaksinilh ju quiꞌucxtinꞌan Jesús. Ju yuchi najun ni anch ju catasuchokoyach ju ixvaitiꞌan tachi chun ju tanajun ju chivinti ixlacata ju Cristo.
\v 15 Para ju quitꞌin jantu tavanan icnavita ju chunch mas chunchach ju naulh ju Jesús. Chai jantiyuꞌ ju iclalhiꞌatsꞌoknuniyau ju chavai ni chunchach ju aquilanaviniu ju quitꞌin. Lana jantu kꞌox iclhiulai ni xamatiꞌ aquintaiꞌinilh ju quinkꞌachat ni laich iclajunau ju ixchivinti Dios chai jantu tuꞌuꞌ iclasqꞌuiniyau. Pus ni va aclasqꞌuiniu ju tuꞌuꞌ pus palai kꞌox iclhiulai ni lanach alai va acnilh.
\p
\v 16 Pus acsni icnajun ju chivinti ixlacata ju Jesús jantu lai iclhitakꞌayai ni iccꞌatsai ni tasqꞌuini ni chunch ju aclalh. Pus ni jantu acmuctaxtu ju ismasuca ju anuꞌ chivinti ca na aquimamakꞌalhkꞌajni ju Dios ni yuchach ju xaquixtakni ju ani lhichꞌalhcat.
\v 17 Pus ni va quiꞌakstu cava ju icsacxtuta ju ani lhichꞌalhcat pus ca laich caꞌixꞌalilh ju quintalhaja. Para jantu va quiꞌakstu ju icsacxtuta ju ani quilhichꞌalhcat. Alai Dios ju quinavita ixlapanac chai quixtaknita ju lhichꞌalhcat ni acꞌajunilh ju lapanacni ixlacata ju istsꞌalh. Yuchi ju Jesús. Chai tasqꞌuini ni acmuctaxtuyaꞌ.
\v 18 Pus mas quixtaknita ju ani lhichꞌalhcat ju Dios chai mas naulh ju Jesús ni anchach ju lai acvenchokolh para ju quitꞌin jantu icpulhajaputun ixchivinti Dios acsni icꞌajuni ju lapanacni ixlacata ju Jesús. Chai ju quintalhaja yuchi ni na alin ju quinkꞌachat ni lai va chunch icꞌajuni ju lapanacni ixchivinti Dios.
\p
\v 19 Pus ju quitꞌin jantu ixlapanac icjunita tam xamatiꞌ ju va quintꞌalapanac junita. Para icchꞌalhcatnani tachi chun ju lapanacni ni tsꞌa ma lai palai lhu catalhilacaꞌalh ju Jesús.
\v 20 Acsni icꞌalactꞌavi ju quintꞌaꞌisraelitanin pus chunch iclai tachi ju talai ju yuꞌunch. Ju yuꞌunch talhilaksi ju makꞌaniya ixlhamapꞌaksin ju Dios. Pus vachuꞌ chunch icnavi tachi ju najun ju anch mas iccꞌatsai ni jantu tasqꞌuini ni vana chun acnavilh. Para chunch iclai ni tsꞌa ma laich palai aquintakꞌasmatnilh acsni icꞌajuni ixlacata ju Cristo.
\v 21 Chai acsni icꞌalactꞌavi ju yuꞌunch ju jantu tavanan tamispata ju makꞌaniya ixlhamapꞌaksin Dios pus jantu vachuꞌ chunch iclai tachi ju najun ju anch. Para mas chunch iclai jantu icnajun ni jantu ictalhoni ju ixlhamapꞌaksin Dios. Aktsꞌiya icnaviputun tachi ju najunta ju Cristo. Para va chunch iclai ni tsꞌa ma palai lai aquintakꞌasmatnilh ju yuꞌunch acsni icꞌajuni ixlacata ju Jesús.
\v 22 Acsni ictꞌaꞌucxuntꞌajun ju yuꞌunch ju jantucaꞌ kꞌox tamachakxai ixchivinti Dios pus vachuꞌ chunch ju iclai tachi ju talai ju yuꞌunch junta jantu tꞌalasai ixchivinti Dios. Chunch ju iclai ni tsꞌa ma laich palai aquintakꞌasmatnilh acsni icꞌajuni ixlacata ju Jesús. Tachi ju junitach ju kꞌantam kꞌantam pus chunchach vachuꞌ icmaktalacasui ju quitꞌin. Tsꞌa ma laich catalhilacaꞌalh ju Cristo ju aliꞌin lapanacni ju chunch.
\v 23 Chai icpunavi chunch ni palai lhu catalacaꞌiniyaꞌ ju ixchivinti Dios ixlacata ju Cristo. Chai vachuꞌ laich acꞌaꞌaktaijuyaꞌ ju aliꞌin ixmakpitsica ju ixchivinti Dios.
\p
\v 24 Ju uxijnan cꞌatsꞌayatꞌit ta yu talai ju talalhajai laca tuꞌuꞌ atsꞌalhti. Cꞌatsꞌayatꞌit ni ixchuxꞌan ju na taꞌatsꞌalai para va pumatam ju lhajai. Pus chunchach vachuꞌ alatꞌit ju pumatamin ju uxijnan. Chunch ju atsꞌucꞌutꞌit tachi ju laich alhaꞌayaꞌitꞌit ju anuꞌ ju caxtꞌakꞌaꞌ ju Dios ju lactꞌiyan.
\v 25 Tachi chun ju tanaviputun talakmaskꞌatin laca tuꞌuꞌ atsꞌalhti slivasalh ni na talhistꞌacꞌach ju ixlacatunaꞌan ni na tachapunin catajunaꞌ. Ju yuꞌunch chunch talaich ni taꞌalhajanamputun ni laich cataꞌamaklhtayanalh lakatam corona mas vatsꞌalhti catakꞌalhiyaꞌ ju anuꞌ corona. Pus ja va a ti quijnanchꞌan jantu catilhistacvi ju quiꞌatsucuntiꞌan ni calhajayau ju quijnanꞌan lakatam corona ju jantu lai tavanan catakꞌalhiyaꞌ.
\v 26 Pus ju tam tsꞌalh ju navi talakmaskꞌatin lacaꞌatsꞌalhti sok an junta lhcanicanta ni laich calhajayaꞌ. Pus vachuꞌ chunch ju quitꞌin. Chunch ju ictsucui tachi ju lhcata ju Jesús ni laich aclhajayaꞌ ju kꞌox ju alin ju lactꞌiyan. Chai ju tam tsꞌalh ju navi talakmaskꞌatin ta yu laich capulhajayaꞌ acsni tꞌalasai tam istꞌatsꞌalh jantu va kꞌaya macꞌan. Pus vachuꞌ chunch ju iclai laquiꞌatsucunti. Slivasalh ictꞌalasai ju macxcai ju alin laquiꞌalhunut.
\v 27 Quitꞌin quiꞌakstu ickꞌaichokoi ju macxcai quiꞌatalacpastꞌacꞌat. Jantu iclakꞌaꞌi ni aquimalactuꞌuni ju macxcai ju alin laquiꞌalhunut. Ni jantu chun aclalh pus ju Dios jantu aquintixtakniputulh ju quintalhaja ju lactꞌiyan mas xacꞌajunich ju lapanacni ju ixchivinti.
\c 10
\s1 Ajuncan ni va yuchi ju Dios ju calhilaksicalh
\p
\v 1 Iclacasqꞌuin ji quiꞌalakꞌavin ni apꞌastꞌactꞌit tuchi tapasalh laꞌisꞌatsucuntiꞌan ju makꞌaniya quilacpaꞌitniꞌan. Cꞌatsꞌayatꞌit ni Dios ju apꞌulhnilh ixchuxꞌan lacaꞌataputsꞌi. Chai acsni tataxtulh ju xalacatꞌun Egipto pus ixchuxꞌan tatapasakꞌolh ju lacalacatꞌicstꞌi alama acsni maxixilh ju xcan ju Dios.
\v 2 Pus tachi ju quijnanꞌan acsni akpaxtauch laꞌixmacni ju Jesús va nomputun ni lhilaksiyauch ju yuchi pus vana va chunch ju yuꞌunch. Ca laich acnaulh ni ixchuxꞌan ju yuꞌunch taꞌakpaxlh laꞌixmacni ju Moisés ni talhilaksilh ju yuchi acsni tavanan tachꞌakꞌokꞌalh ju anuꞌ ataputsꞌi chai acsni tavanan tatapasalh lacaꞌalama.
\v 3 Chai ixchuxꞌan taꞌulh ju vaiti ju axtaknilh ju Dios. Ju mincha lactꞌiyan.
\v 4 Vachuꞌ ixchuxꞌan takꞌotkꞌo ju anuꞌ xcan ju axtaknilh ju Dios. Pus takꞌotlh ju xcan ju taxtulh lacachiux. Cristo ju axtaknilh ju anuꞌ xcan chai yuchi ju ixꞌalactꞌaꞌanta.
\v 5 Pus mas chunch ixꞌaꞌulhtucan para ju Dios jantu kꞌox alhiula ni va jantu lai ixtaquiclacaꞌi. Pus yuchi alhimakni ju Dios junta matich tuꞌuꞌ ixjunita.
\p
\v 6 Pus tasqꞌuini ni caꞌalacpastacnau acsni laktsꞌinau ju tuchi tapasalh laꞌisꞌatsucuntiꞌan ju yuꞌunch. Ju chunch jantu vana calacasqꞌuinau ju taxtokni ju jantu kꞌox lhiulai ju Dios tachi ju ixtalai ju yuꞌunch.
\v 7 Pus yuchi iclalhijunau ni jantu va kꞌaya alhilacꞌapꞌitꞌit ju santo tachi ju ixtalai ju aliꞌin sia yuꞌunch. Chunch ju talalh tachi ju tsꞌokcanta laꞌixchivinti Dios junta chani najun: “Ju lapanacni ma tatavi chai tatsuculh lacvenin. Chai tatsuculh lackꞌotnin. Chai acsni tavenkꞌo tataya chai tatsuculh atꞌinin ni tamacꞌatani ju isantoꞌan ju ixtanavita”. Chunch ju najun laꞌixchivinti Dios.
\v 8 Nin yuchi ni lai catꞌatsucuch ju jantu quiꞌamachakaꞌan u jantu quimpapaꞌan tachi ju talalh ju aliꞌin sia yuꞌunch. Pus tanilh lakapꞌuxamtꞌutu milh ju yuꞌunch ju va tam avilhchan ni chunch ju talalh.
\v 9 Nin yuchi ni calaktsꞌintanuyau ju Cristo ni vasalh camuctaxtuyaꞌ ju ixchivinti u jantu tachi ju talalh ju aliꞌin sia yuꞌunch. Pus ju Dios na lhu macamilh ju lu chai taꞌatsꞌacalh ju lapanacni chai na lhu tani.
\v 10 Nin yuchi ni canaju ni jantu kꞌox ju tuchi quintaxtaknin ju Dios tachi ju tanaulh ju aliꞌin sia yuꞌunch. Pus na lhu amaknilh ju anquilh ju malakachalh ju Dios ni chunch ju talalh.
\p
\v 11 Pus ni chunch ju tapasalh laꞌisꞌatsucuntiꞌan ju yuꞌunch pus tasqꞌuini ni caꞌalacpastacnau vachuꞌ ju quijnanꞌan ju tꞌonau ju chavai acsni vanin minta ju avilhchan acsni caminchokoyaꞌ ju Cristo. Pus ju Dios lhinaulh istsꞌokꞌulaca laꞌixchivinti tachi ju tanavilh ju yuꞌunch ni jantu vana va chun catailhiꞌau tachi ju talalh ju yuꞌunch.
\v 12 Pus ni chunch ju tatapasalh ju makꞌaniya lapanacni pus ju lapanac ju najun ni jantu tavanan lai cakꞌalhkꞌosaꞌ laꞌisꞌatsucunti tasqꞌuini ni kꞌox calhistacchokocalh. Jantu xcai ni lhi tꞌuxam vachuꞌ cakꞌalhkꞌoslh.
\v 13 Pus mas va tuchi macxcai ju mapꞌastꞌacꞌanicꞌanatꞌit acꞌatsꞌatꞌit ni na lhu ju mintꞌalapanacni tasastucta ju chunch macxcai. Chai ju Dios lai lhilaksican. Chai ju yuchi jantu calacasqꞌuinaꞌ ni va lhuch amapꞌastꞌacꞌanicꞌanaꞌitꞌit tachi ju jantu lai asastꞌucꞌaꞌitꞌit. Para acsni va amapꞌastꞌacꞌanicꞌanaꞌitꞌit ju tuꞌuꞌ macxcai pus ju Dios catamasuniyan ta yu laich apꞌusamakꞌanaꞌitꞌit. Ju chunch jantu tasqꞌuini ni anaviyaꞌitꞌit.
\p
\v 14 Pus iclajunau ji quiꞌalakꞌavin ni lana nin lacatsꞌunin jantu alhilacꞌapꞌitꞌit ju santo. Va yuchi ju Dios ju vilhcha talaclhman ju alhilaksitꞌit.
\v 15 Chunch iclalhixakꞌalayau ni iccꞌatsai ni na lai amachꞌakxananatꞌit. Pus kꞌox apꞌastꞌactꞌit ju tuchi iclajunau.
\v 16 Pus acsni kꞌotꞌau ju anuꞌ vino ju ixpupastaccan ixꞌaninti ju Cristo pus pꞌulhnan xtakniyau ju Dios lakꞌailaktsꞌiuch. Chai acsni kꞌotꞌau va nomputun ni quinchuxꞌan lhilaksiyauch ju ixꞌacꞌalhni ni yuchi ju quintaxacanikꞌotan ju quintalakꞌalhinꞌan. Chai acsni chꞌekꞌeꞌiyau chai uyau ju anuꞌ xkapavati ixpupastaccan ixlacatuna ju Cristo va nomputun ni lhilaksiyau ixꞌaninti ju Cristo ju quilacataꞌan.
\v 17 Pus ju anuꞌ xkapavati ju chꞌekꞌeꞌiyau va lakatamch. Pus ju quijnanꞌan ni va lakatam xkapavati ju uyau pus tachi ju va lakatam lacatuna juntau mas quilhuꞌan juntau.
\p
\v 18 Alaktsꞌintꞌitch tachi ju talai ju ixpalijniꞌan ju quintꞌaꞌisraelitanin. Acsni kꞌaixtam taꞌuich lacatsꞌunin ju anuꞌ atapacxat ju talacxavanich ju Dios pus va nomputun ni va lakatam junita ixꞌatalacpastꞌacꞌatꞌan acsni talakꞌayai ju Dios.
\v 19-20 Ju yuꞌunch ju jantucaꞌ talhilacaꞌanta ju Cristo talhikꞌailaktsꞌin ju lhivai ju isantoꞌan. Para jantiyuꞌ ju Dios ju stavasalanti ju talhikꞌailaktsꞌin. Alai lhacaticuru ju talhikꞌailaktsꞌin. Pus ju anuꞌ santo ju talhilaksi jantu tuꞌuꞌ ixtapalhni ni jantu lakꞌajunta. Chai ju lhivai ju talhikꞌailaktsꞌin jantu ta junita mas acꞌulh. Para ju tam lapanac ju jantucaꞌ lhilacaꞌanta ju Jesús ni caxtakniyan ju anuꞌ lhivai chai ni atꞌaꞌuyaꞌ pus catanonaꞌ ju aliꞌin ni vachuꞌ va maklacꞌapꞌini ju santo. Chai ju chunch talakꞌalhin.
\v 21 Jantu lai atꞌikꞌotꞌit ju vino acsni pupastaccan ju ixꞌaninti ju Cristo acsni vanach amakkꞌotꞌaꞌitꞌit ju alhikꞌailaktsꞌincanta ju lhacaticuru acsni navinican ixcꞌatan. Jantu lai aꞌuyaꞌitꞌit ju anuꞌ xkapavati ju pupastaccan ixlacatuna ju Cristo acsni vanach amakꞌuyaꞌitꞌit ju lhivai ju lhikꞌailaktsꞌincanta ju lhacaticuru.
\v 22 Ni chunch ju layatꞌit pus ja va laktsꞌintꞌanupꞌutꞌunatꞌit ju Dios ni calhitalhkꞌamalh. Ja va nonatꞌit ni palai tachapunin untꞌatꞌit ju uxijnan. Palai jantu ju Dios.
\s1 Chani ju lai navican
\p
\v 23 Ju aliꞌin tanajun ni laich navikꞌocan tachi chun ju taxtokni ju naviputuncan. Pus vasalh. Para jantu si lai caꞌaktaijun. Vasalh ni lai navikꞌocan tachi chun ju taxtokni ju naviputuncan. Para jantu si lai caꞌaktaijun ni lai palai alhilacꞌapꞌi ju Cristo.
\v 24 Para jantu kꞌox ni va canaviyau tachi ju kꞌachaniyau quiꞌakstuꞌan. Alai tasqꞌuini ni vachuꞌ capastꞌacꞌau ta yu laich capuꞌaꞌaktaijuyau ju aliꞌin.
\p
\v 25 Tachi chun ju lhivai ju stꞌacan ju laclhitamau laich aꞌuyaꞌitꞌit. Chai jantu tasqꞌuini ni asacminintꞌit ni ixlhikꞌailaktsꞌincanta ju santo u jantu.
\v 26 Lai chunch alatꞌit ni si ixꞌanuꞌ Dios junita chux ju lacamunutpaꞌ chai tachi chun ju taxtokni ju alin ju anich. Si ixꞌanuꞌ.
\p
\v 27 Acsni catakꞌailhiꞌanan vaiti xamatiꞌ ju jantucaꞌ lhilacaꞌanta ju Cristo laich atꞌaꞌitꞌit. Chai tachi chun ju catalakꞌaꞌulayanch aꞌuyaꞌitꞌit. Nin lai asacmitꞌit ni ixlhikꞌailaktsꞌincanta ju santo u jantu.
\v 28 Para ju vachuꞌ anch makvajin ni va catajunin ni ixlhikꞌailaktsꞌincantach ju santo ju anuꞌ lhivai ju xtꞌaknicꞌantꞌatꞌit pus jantuch aꞌutꞌit. Chunch alatꞌit ni va talhonicaꞌ ju santo ju anuꞌ xajunan chai va lai makꞌalhkꞌosutꞌit ni va aꞌutꞌit ju uxijnan.
\v 29 Mas laich aꞌutꞌit ni jantu tꞌalhoniyatꞌit ju uxijnan para jantu lhijun ni chunch alatꞌit ni talakꞌalhin calhiula apumatam.
\p Para laich aquilasacmiyau chai aquilajunau: “Tajuch ni jantu lai icꞌui ju lhivai va ixlacata akꞌantam ju jantu lai ui.
\v 30 Pus ni icxtakni lakꞌailaktsꞌiuch ju Dios ixlacata ju tuchi icꞌui pus tajuch ni va talakꞌalhin calhiulayaꞌ ju apumatam ni acꞌulh ni icjunita lakꞌailaktsꞌiuch ju Dios”. Chunch ju lai aquilajunau.
\v 31 Pus chani iclajunau. Acsni avenaꞌitꞌit chai acsni akꞌotꞌaꞌitꞌit tuꞌuꞌ u tuꞌuꞌ atumpa anaviyaꞌitꞌit pus chunch ju anaviyaꞌitꞌit tachi ju laich catapunonaꞌ ju aliꞌin lapanacni ni Dios ju xakꞌai.
\v 32 Chunchach ju amalacꞌasutꞌit ju lamiꞌatsucuntiꞌan ta yu jantu catapukꞌalhkꞌosan ju tatalhonicaꞌ ju makꞌaniya ixlhamapꞌaksin Dios. Nin yuꞌunch ju jantucaꞌ talhilacaꞌanta ju Cristo. Nin yuꞌunch ju talhilacaꞌanta ju Cristo.
\v 33 Pus tachi chun ju icnavi ju quitꞌin jantu va quinkꞌachat quiꞌakstu ju icnavi. Alai junta jantu tꞌalasai ixchivinti Dios pus icnavini ixkꞌachat ju quintꞌalapanac ni tsꞌa ma laich catalhilacaꞌalh ju Jesús.
\c 11
\p
\v 1 Pus chunchach ju alatꞌit lamiꞌatsucuntiꞌan tachi ju iclai ju quitꞌin. Chai ju quitꞌin isꞌatsucunti Cristo ju quilhilaktsꞌintaiti icnavita.
\s1 Chanich ju catalalh ju chakolun
\p
\v 2 Na kꞌox iclhiulai ji quiꞌalakꞌavin ni pꞌastꞌackꞌoyatꞌit tachi chun ju iclajuntauch chai naviyatꞌit tachi chun ju iclamalanitauch.
\v 3 Para va iclacasqꞌuin ni amispꞌatꞌit ni yuchi ju Dios ju saꞌaktsulh junita laꞌisꞌatsucunti ju Cristo. Chai yuchi ju Cristo ju saꞌaktsulh junita laꞌisꞌatsucunti tachi chun ju jokꞌatni ju talhilacaꞌanta ju Cristo. Chai ju jokꞌat saꞌaktsulh junita laꞌisꞌatsucunti tam chakoꞌulh.
\v 4 Pus na lhimaxan acsni aktanun ju ixꞌaktanut tam jokꞌat acsni tꞌachivinin ju Dios chai acsni najun ixchivinti Dios.
\v 5 Chai vachuꞌ na lhimaxan ni jantu lakpaxtakcanta ju tam chakoꞌulh acsni tꞌachivinin ju Dios chai acsni najun ixchivinti Dios. Pus ni jantu lakpaxtakcanta pus va ixtꞌachunchach junita tachi acsni va casitmakꞌalh ju ixꞌai.
\v 6 Ju tam chakoꞌulh ni jantu lakpaxtakputuncan pus chach lana lakpalipipi va. Para ni lhimaxan lhiulai ni va casitlh ju ixꞌai u ni va lakpalipipich cava pus yuchi calhilakpaxtakcalh.
\v 7 Ju tam jokꞌat jantu catilakpaxtakcalh ni navicalh tachi ju Dios. Chai laꞌisꞌatsucunti putasui ni vasalh kꞌai ju Dios. Chai laꞌisꞌatsucunti tam chakoꞌulh putasui ni na kꞌai ju jokꞌat.
\v 8 Pus ju Dios acsni tavanan navilh ju pꞌulhnan jokꞌat jantu laꞌixlacatuna ju chakoꞌulh ju maxtulh. Alai laꞌixlacatuna ju jokꞌat ju maxtulh ju pꞌulhnan chakoꞌulh.
\v 9 Chai ju pꞌulhnan jokꞌat jantiyuꞌ lhinavicalh ni caꞌixꞌalilh tam chakoꞌulh ju va ixmaktasqꞌuinich ju ixlakꞌau. Alai yuchi lhinavicalh ju chakoꞌulh ni na ixmaktasqꞌuinich ixlakꞌau ju anuꞌ jokꞌat.
\v 10 Pus ixlhiyuchach ju tam chakoꞌulh calhilakpaxtakcalh ni anch ju caputasuyaꞌ ni maklacaꞌanita ju ixpapa. Vachuꞌ yuchi chunch calhilalh va ixlacata ju anquilhnin ju anch tavilanalh.
\v 11 Para ju Dios lhilhcata ju isꞌatsucuntiꞌan ixtꞌiyunꞌan ni talamaktasqꞌuini.
\v 12 Pus ju pꞌulhnan chakoꞌulh laꞌixlacatuna ju jokꞌat ju maxtucalh. Chai ju chavai laꞌixmacni ju chakoꞌulh ju lakꞌajun ju jokꞌat. Para Dios ju anavikꞌo chux ixtꞌiyunꞌan.
\p
\v 13 Pus aquilajunau. Ja lhijun ni catꞌachivinilh ju Dios ju tam chakoꞌulh acsni jantu lakpaxtakcanta.
\v 14 Ju va lamintacꞌatsanꞌan miꞌakstuꞌan ja jantu lai machꞌakxayatꞌit ni lhimaxan catasu ju tam jokꞌat ni calakꞌaya ju ixꞌai.
\v 15 Para ju tam chakoꞌulh ni lakꞌayanicantach ju ixꞌai pus ixmakꞌoxinch junita ju chakoꞌulh. Tachi ju va ixlhilakpaxtakcanch junita ni laklhman ju ixꞌai.
\v 16 Para ni alin tam xamatiꞌ ju va lhilasaputun ju ani chivinti pus camachakxa ni va chunch ju iclhilanitauch ju quijnan chai ju aliꞌin lapanacni ju talhilacaꞌanta ju Cristo.
\s1 Jantu kꞌox talai ju aliꞌin acsni tatakꞌaixtꞌokꞌa ni pastaccan ixꞌaninti ju Jesús
\p
\v 17 Pus ju chavai iclajumputunau ixlacata tuchꞌi layatꞌit acsni tꞌakꞌaixtꞌokꞌatꞌit. Pus lana jantu kꞌox iclhiulai tachi ju layatꞌit. Pus acsni tꞌakꞌaixtꞌokꞌatꞌit jantu laꞌaktꞌaiꞌuyatꞌit. Alai va lhilakꞌalhipꞌalatꞌit ju miꞌatsucuntiꞌan.
\v 18 Ickꞌasmatꞌa ju quitꞌin ni jantu va quilhmactam untꞌatꞌit acsni tꞌakꞌaixtꞌokꞌatꞌit ju lamimpujitatꞌan. Chai paitat iclacaꞌi ni chunch ju untꞌatꞌit.
\v 19 Para ca aktsꞌiya tasqꞌuini ni jantu va quilhmactam aꞌuntꞌit. Ju chunch cataputasuyach ju vasalh tanaviniputun ixkꞌachat ju Dios chai tichi chavaich ju jantu.
\v 20 Pus ju uxijnan tꞌakꞌaixtꞌokꞌatꞌit chai nonatꞌit ni kꞌotpꞌutꞌunatꞌit ju vino chai upꞌutꞌunatꞌit ju xkapavati ju ixpupastaccan ixꞌaninti ju Jesús. Para jantu vasalh pꞌastꞌacꞌatꞌit ju ixꞌaninti ju Jesús ni quilhmaclhu untꞌatꞌit.
\v 21 Pus ju uxijnan acsni venatꞌit pus ju pumatamin pumatamin va isꞌakstu uchokoi ju lhiminta mas jantucaꞌ tolhkꞌocan junta vencan. Pus ju chunch ju aliꞌin jantuch lai talhilai. Chai ju aliꞌin lhu takꞌotꞌa ju vino chai talactꞌakꞌapꞌaich.
\v 22 Chunch ju layatꞌit tachi ju va matich ju minchakaꞌan junta lai avaꞌintꞌit chai lai akꞌotꞌit ju vino. Tachi ju va jantu tuꞌuꞌ lalhiulayatꞌit ju uxijnan ju aliꞌin ju talhilacaꞌanta ju Cristo vachuꞌ. Chai va amamaxaniyatꞌit ju quilhpatinin ni jantu na lhu talhimin ju ixvaitiꞌan. Pus tas aclajunauch. Ju uxijnan ja nonatꞌit ni kꞌoxich aclhiulayaꞌ ju chunch. Pus iclajunau ni lana jantu kꞌox iclhiulai tachi ju layatꞌit.
\s1 Ta yu taiꞌulalh ju vaiti ixpupastaccan ixꞌaninti ju Jesús
\p
\v 23 Pus isꞌakstu Jesús ju quijuni tuchi iclamasunitauch ixlacata ju vaiti ju pupastaccan ixꞌaninti. Pus ju anuꞌ atatsꞌisni acsni makꞌaxtakcalh ju Jesús pus ju yuchi chꞌapalh lakatam xkapavati.
\v 24 Chai acsni xtaknilh lakꞌailaktsꞌiuch ju Dios pus lana chꞌekꞌelh ju xkapavati chai ma ajunilh ju ixꞌamamakaꞌui: “Axakꞌatꞌaꞌitꞌit. Aꞌutꞌitch. Ju ani xkapavati ju iclaxtakniyau yuchi ju quilacatuna ju acxtꞌakꞌaꞌ ju milacataꞌan. Va tsa chani alatꞌit ni laich apꞌupꞌastꞌacꞌaꞌitꞌit ju quiꞌaninti ju milacataꞌan”. Ma chunch ju ajuni ju Jesús.
\v 25 Chai ju astan acsni tavenkꞌolhch pus ju Jesús chꞌapalh ju vaso ju ixputajun ju vino chai ma ajuni ju ixꞌamamakaꞌui: “Ju ani ma vino yuchi ju quiꞌacꞌalhni ju mavasalai ju sastꞌi chivinti ju iclalhitꞌatakꞌoxiyauch ju uxijnan. Pus va ta pakchux ju akꞌotꞌaꞌitꞌit va aquilapupastꞌacꞌauch ju quitꞌin”. Chunch ju quimavasalanilh isꞌakstu ju Jesús.
\v 26 Pus iclajunau ni va ta pakchux ju aꞌuyaꞌitꞌit ju ani xkapavati chai akꞌotꞌaꞌitꞌit ju ani vino pus va apꞌumalacꞌasuyaꞌitꞌit ni vasalhch nilh ju Jesús ju milacataꞌan. Chai chunch ju atꞌailhipꞌitꞌit tus acsni caminchokoyaꞌ ju yuchi.
\s1 Chani alatꞌit acsni va pꞌastꞌacpꞌutꞌunatꞌit ixꞌaninti ju Jesús
\p
\v 27 Chai ni chunch ju naulh ju Jesús pus na kꞌai talakꞌalhin canavi va tichi chavaich ju jantu kꞌox junita ju isꞌatsucunti laꞌixmacni Dios acsni caꞌuyaꞌ ju anuꞌ xkapavati chai cakꞌotꞌaꞌ ju anuꞌ vino ju ixpupastaccan ixꞌaninti ju Jesús. Tachi ju va jantu tuꞌuꞌ ixtapalhni lhiulai ixlacatuna chai ixꞌacꞌalhni ju Jesús.
\v 28 Pus va ta pakchux ju cakꞌotꞌaꞌ ju vino chai caꞌuyaꞌ ju xkapavati pus tasqꞌuini ni cacꞌatsa ju pumatamin pumatamin ta yu junita ju ixꞌalhunut isꞌakstu laꞌixmacni Dios u alin ixtalakꞌalhin ju jantu macꞌacxanicanta u jantu.
\v 29 Pus ni xamatiꞌ cakꞌotꞌaꞌ ju anuꞌ vino chai caꞌuyaꞌ ju anuꞌ xkapavati chai jantu canavi cuenta ni chunchach ju pupastaccan ixꞌaninti ju Jesús pus isꞌakstu ulanichokocan ixtalakꞌalhin.
\v 30 Chai ni alin ju sia milhiꞌuxijnan ju chunch ixtalai pus ixlhiyuchi na lhu alin ju lamilhiꞌuxijnan ju jantu lactachapunin tajunita chai ju va talactakꞌankꞌai chai na lhu ju tapunita.
\v 31 Pus ni va cacꞌatsauch ta yu junita ju quiꞌalhunutꞌan laꞌixmacni Dios chai jantu va kꞌaya calauch pus ju chunch ju Dios jantu aquintamamakꞌalhkꞌajniyan.
\v 32 Para acsni quintamamakꞌalhkꞌajniyan ju Dios pus ju yuchi va lacasqꞌuin ni camacajuch ju macxcai. Chai ju chunch pus jantu aquintamamakꞌalhkꞌajniyan ju Dios tachi ju caꞌamamakꞌalhkꞌajnikꞌalhiyach ju jantu talhilacaꞌanta ju Jesús.
\p
\v 33 Pus ji quiꞌalakꞌavin acsni tꞌakꞌaixtꞌokꞌatꞌit acsni upꞌutꞌunatꞌit ju anuꞌ ixpupastaccan ixꞌaninti ju Jesús pus alapꞌacxantꞌitch acsni avenaꞌitꞌit.
\v 34 Chai ni xamatiꞌ ju na chavani pus chach venchalh laꞌixchakaꞌ. Pus ni chunch ju alatꞌit pus ju Dios jantu catamamakꞌalhkꞌajniyan. Pus ju aliꞌ taxtokni astan aclajunau acsni aclalakchaꞌanchokoyauch.
\c 12
\s1 Ju tuchi xtꞌakꞌa ju Spiritu Santu
\p
\v 1 Iclacasqꞌuin ji quiꞌalakꞌavin ni amachꞌakxatꞌit ixlacata ju lhakꞌailaktsꞌin ju quintaxtakniyan ju Spiritu Santu.
\p
\v 2 Pus apꞌastꞌactꞌit. Acsni jantucaꞌ ixlhilacꞌapꞌinatꞌit ju Jesús ixmalacꞌaꞌinicꞌantꞌatꞌit ni na tuꞌuꞌ ju santo mas jantu lai chivinin.
\v 3 Pus iclacasqꞌuin ni lai amachꞌakxayaꞌitꞌit ta yu pucꞌatsacan ni tꞌajun chiviniꞌ tam lapanac laꞌixtachaput ju Spiritu Santu. Chai yuchi iclalhijunau ju ani. Acsni xamatiꞌ chivininch laꞌixtachaput ju Spiritu Santu pus jantu lai chani catinaulh: “Chach mamakꞌalhkꞌajnikꞌalhicalh ju Jesús”. Chai jantu lai xamatiꞌ catinaulh ni lhilaksich ju Jesús chai yuchach ju ixꞌucxtin ni jantu caꞌaktaijulh ju Spiritu Santu ni lai chunch canaulh.
\p
\v 4 Na tijlhu alin ju lhakꞌailaktsꞌin ju xtꞌakꞌa ju Spiritu Santu ixlacata ixlhichꞌalhcat ju Dios. Para va pumatam ju xtꞌakꞌa. Va yuchi ju Spiritu Santu.
\v 5 Chai na tijlhu alin ju lhichꞌalhcat laꞌixmacni Dios para va pumatam ju chꞌalhcatnanican. Va yuchi ju Jesús.
\v 6 Chai yuchi ju Dios ju axtakni ju pumatamin tijtamin lhichꞌalhcat. Chai isꞌakstu ju Dios ju quintaxtakniyan ju quintachaputꞌan ni lai naviyau ju tuchi lhichꞌalhcat ju quintalhcaꞌulanitan ju yuchi.
\v 7 Pus laꞌisꞌatsucuntiꞌan ju pumatamin pumatamin tasui ixtachaput ju Spiritu Santu ni laich caꞌapuꞌaktaiju ju aliꞌin.
\v 8 Pus ju pumatam xtaknicanta ju lhakꞌailaktsꞌin ni na acꞌatsananta chai laich sok amalaninin ixchivinti Dios. Chai ju apumatam xtaknicanta ixlhakꞌailaktsꞌin ni na lai masui ixchivinti Dios junta palai xcai machakxacan. Chai yuchi ju Spiritu Santu ju axtakni ixtꞌiyunꞌan ju ixlhakꞌailaktsꞌinꞌan.
\v 9 Chai ju apumatam xtaknicanta ju ixlhakꞌailaktsꞌin ni ixlhichux ixꞌalhunut ju lhilaksi ixchivinti Dios ni vasalh camuctaxtuyaꞌ tachi ju najun ju yuchi. Chai vana yuꞌ ju Spiritu Santu ju xtaknita ju ani lhakꞌailaktsꞌin. Chai ju apumatam xtaknicanta ju ixlhakꞌailaktsꞌin ni lai palaich anavi ju takꞌankꞌanin. Para vana yuꞌ ju Spiritu Santu ju xtakni ju chunch lhakꞌailaktsꞌin.
\v 10 Ju apumatam xtaknicanta ju ixlhakꞌailaktsꞌin ni laich navi ju tuꞌuꞌ lhamakꞌan. Chai ju apumatam xtaknicanta ju lhakꞌailaktsꞌin ni laich najun ixchivinti Dios. Chai apumatam xtaknicanta ixlhakꞌailaktsꞌin ni lai camispa ni yuchi ju Spiritu Santu ju axakꞌalai ju lapanacni u jantu. Chai ju apumatam xtaknicanta ixlhakꞌailaktsꞌin ni laich cachivinaꞌ atumpa chivinti mas jantu aktam chivininta ju chunch. Chai ju apumatam xtaknicanta ixlhakꞌailaktsꞌin ni laich camavasalayaꞌ ju anuꞌ chivinti.
\v 11 Para tachi chun ju ani lhakꞌailaktsꞌin isꞌakstu ju Spiritu Santu ju xtꞌakꞌa chai yuchi ju alhvakxtaknikꞌojui ju pumatamin tachi ju kꞌoxich lhiulai isꞌakstu.
\s1 Tachi chun ju quijnan va lakatam lacatuna juntau
\p
\v 12 Ju quilacatunaꞌan va lakatam. Para na lhu ju ixpuchꞌalhcatna. Para mas na lhu ju ixpuchꞌalhcatna va lakatamch lacatuna junita. Pus vana va chun tachi chun ju talhilacaꞌanta ju Cristo.
\v 13 Acsni tavanan akpaxtauch pus ju Spiritu Santu quintanavinitan tachi ju va lakatam lacatuna juntau ju quijnanꞌan ju lhilacaꞌantauch ju Cristo ni si pacxankꞌotauch ju anuꞌ Spiritu Santu. Va lakatam lacatuna juntau mas israelitanin juntau u jantu israelitanin. Mas xalapanac juntau u tam xamatiꞌ ju matiꞌ ixꞌucxtin.
\p
\v 14 Na lakalhu ju ixpuchꞌalhcatna ju quilacatunaꞌan. Jantu va lakatam.
\v 15 Pus ni laich cava cachivinilh ju quinchꞌajaꞌan laich chani canaulh: “Ju quitꞌin jantu ixpuchꞌalhcatna ju lacatuna ni jantu icmacaꞌ”. Para mas chunch ju canaulh jantu nomputun ni jantu vasalh lacalacatuna ju tinui.
\v 16 U ni laich cava cachivinilh ju quiꞌakꞌaxkꞌolhꞌan laich chani canaulh: “Ju quitꞌin jantu ixpuchꞌalhcatna ju lacatuna ni jantu iclakchulh”. Para mas chunch ju canaulh jantu nomputun ni jantu lacalacatuna ju tinui.
\v 17 Pus ni va si lakchulh cava ju quilacatunaꞌan tas anchach ju capakꞌasmatnau. U ni va si akꞌaxkꞌolh cava ju quilacatunaꞌan tas anchach ju capaxaniu.
\v 18 Para ju Dios lhilhcaꞌulata ju lakatamin xataxtokni ju quilacatunaꞌan tachi ju kꞌoxich lhiula ju yuchi.
\v 19 Ni va lakatam ixpuchꞌalhcatna ju lacatuna ixva pus matiꞌ ixva ju lacatuna.
\v 20 Pus ju Dios mas quintaxtaknitan na lhu ju ixpuchꞌalhcatna ju quilacatunaꞌan para va lakatam lacatuna junita.
\p
\v 21 Chai ju quilakchulhꞌan ni laich cava cachivinilh jantu lai catijunilh ju quimacaꞌan: “Jantu icmaktasqꞌuiniyan”. Nin yuchi ju quiꞌaktsulhꞌan ni laich cava cachivinilh jantu lai catijunilh ju quinchꞌajaꞌan: “Jantu icmaktasqꞌuiniyan ju uxintꞌi”.
\v 22 Tachi chun ju pacxantau ju laquilacatunaꞌan alin ju tasui tachi ju va jantu na lhu cachꞌalhcatnalh. Para yuchach ju palai maktasqꞌuiniyau.
\v 23 Chai alin ju pacxantau ju laquilacatunaꞌan ju palai jantu tuꞌuꞌ lhiulayau. Para yuchach ju palai maxantilayau. Chai alin ju ixpuchꞌalhcatna ju quilacatunaꞌan ju jantu lhijun ni calaktsꞌincalh chai ju yuchi kꞌox malakchꞌiniyau.
\v 24 Para ju ixpuchꞌalhcatna ju quilacatunaꞌan ju na cꞌus pus jantu tasqꞌuini ni acmaxantilalh. Chai ju puchꞌalhcatna ju palai jantu tuꞌuꞌ lhiulacan pus yuchi ju palai maxantilayau.
\v 25 Ju chunch ju ixpuchꞌalhcatna ju quilacatunaꞌan jantu talaclasai. Alai va talalhistꞌacꞌa.
\v 26 Chai acsni camakꞌalhkꞌajnanaꞌ lakatam ixpuchꞌalhcatna ju quilacatunaꞌan pus chux quilacatunaꞌan vachuꞌ makꞌalhkꞌajnan. Chai acsni cajuncanaꞌ lakatam ixpuchꞌalhcatna ju quilacatunaꞌan ni na kꞌox pus chux ju quilacatunaꞌan na kꞌachan.
\p
\v 27 Pus vana va chun ju uxijnan. Ju uxijnan tachi ixlacatuna Cristo untꞌatꞌit. Chai pumatamin ju uxijnan tijtamin tijtamin lhichꞌalhcat ju canaviyaꞌ.
\v 28 Pus junta takꞌaixtꞌokꞌau ju quijnanꞌan ju lhilacaꞌantauch ju Cristo alin ju tucan ixtamalakachan Jesús tajunita. Chai alin ju laich tanajun ixchivinti Dios mas jantu tucan ixtamalakachan Jesús tajunita. Chai alin ju na lai taꞌamalaninin. Chai alin ju na lai tanavi ju tuꞌuꞌ lhamakꞌan. Chai ju aliꞌin lai palai tanavi ju takꞌankꞌanin. Chai ju aliꞌin na tacꞌatsai ta yu laich apuꞌaktaijui ju aliꞌin. Chai ju aliꞌin laich talhinajun lacatalhavat ju talhilacaꞌanta ju Jesús. Chai vachuꞌ alin ju lai tachivinin atumpa chivinti mas jantu aktam tachivininta ju chunch.
\v 29 Para alaktsꞌintꞌit. Jantu si ixtamalakachan ju Jesús tajunita. Jantu si ixnonin ixchivinti Dios tajunita. Jantu si lai taꞌamalaninin. Jantu si lai tanavi lhamakꞌan.
\v 30 Jantu si lai palai anavi ju takꞌankꞌanin. Jantu si lai tanajun atumpa chivinti ju jantu aktam tachivininta. Chai jantu si lai tamavasalai ju anuꞌ chivinti.
\v 31 Pus ixlhichux ju miꞌalhunutꞌan anavitꞌit cuenta ta yu laich apꞌuꞌamaklhtꞌayananaꞌitꞌit ju palai lackꞌox lhakꞌailaktsꞌin ju xtꞌakꞌa ju Spiritu Santu. Para ju quitꞌin aclajunau ta yu palai kꞌox lana ju alayaꞌitꞌit.
\c 13
\s1 Ju amapaininti
\p
\v 1 Mas laich acchivinilh tijpachux chivinti ju alin ju ani lacamunutpaꞌ chai mas laich acchivinilh tachi ju tachivinin ju anquilhnin para ni matiꞌ ju quiꞌamapaininti pus jantu tuꞌuꞌ ju quintapalhni. Va chunch acva tachi ju tuꞌuꞌ tsasnat ju anicꞌach va kꞌasmatnicanch ju istꞌasat.
\v 2 Chai mas na kꞌox lai acnaulh ju ixchivinti Dios chai mas lai acmachakxa ixtaxtokni Dios ju jantu lai ixmachakxacan ju makꞌanchich chai mas acmispakꞌo tachi chun ju atalaninti chai mas ixlhichux quiꞌalhunut aclhilaksi ju Dios chai acsni acsqꞌuinilh laich aquimalakxtinunilh ju kꞌai talhpa para ni matiꞌ ju quiꞌamapaininti pus jantu tuꞌuꞌ quintapalhni.
\v 3 Chai mas acxtakkꞌo ju quimakꞌalit va ixmavaca ju quilhpatinin chai mas aclhitapꞌuxlh ju quilacatuna ni calacxavacalh para ni matiꞌ ju quiꞌamapaininti pus jantu tuꞌuꞌ quilhitapalhni.
\p
\v 4 Ju na amapaininin jantu jeks ui. Chai kꞌox lapanac junita. Ju na amapaininin jantu tuꞌuꞌ lhacchaꞌan. Chai jantu talacasui tachi ju tam xakꞌai chai jantu lhitakꞌayai tuꞌuꞌ.
\v 5 Ju na amapaininin jantu tuꞌuꞌ navi ju va calhimaxanalh astan. Chai jantu va isꞌakstu mapainichokocan. Jantu lana lhitalhkꞌaman ju tuꞌuꞌ chai jantu pastackꞌalhi ju tuꞌuꞌ macxcai ju navicanta.
\v 6 Ju na amapaininin jantiyuꞌ ju lhikꞌachan ju jantu soknicꞌa ju navita akꞌantam. Yuchi ju lhikꞌachan ju soknicꞌa.
\v 7 Ju na amapaininin si chꞌixkꞌojui. Chai ju yuchi jantu vatsꞌalhti mucꞌani ixtalakꞌalhin ju tam ixtꞌalapanac. Chai ju na amapaininin va tachi lacaꞌi ni kꞌox cajunaꞌ astan mas va tuchi tanavich ju lapanacni. Chai ju na amapaininin tastucnikꞌojui tachi chun ju min laꞌisꞌatsucunti.
\p
\v 8 Ju amapaininti jantu tavanan caticꞌacxlh. Para cachinaꞌ avilhchan acsni jantu camaktasqꞌuiniyau ju ixnajunca ixchivinti Dios chai ixnajunca atumpa chivinti mas jantu aktam chivincanta ju chunch. Chai jantu camaktasqꞌuiniyau ju atalaninti tachi ju mispayau ju chavai.
\v 9 Ju chavai na va lacatsꞌunin ju mispayau chai jantu lai mavasalakꞌoyau ju ixtaxtokni Dios ni jantu mispakꞌoyau ju chavai.
\v 10 Para acsni caminchokoyaꞌ ju Cristo chai camispakꞌoyau tachi chun ju taxtokni pus ju atalaninti ju mispayau ju chavai jantu tuꞌuꞌ ixtapalhni cajunaꞌ.
\p
\v 11 Pus ju quiꞌatsucuntiꞌan tachi ju mispayau ju chavai chai tachi ju cajunaꞌ ju astan chunch junita tachi isꞌatsucunti ju tam askꞌatꞌa ni tapaxaꞌanta ju ixꞌatalacpastꞌacꞌat. Ju quitꞌin acsni va askꞌatꞌacaꞌ xacjunita xacchivinin tachi ju tam askꞌatꞌa. Xacꞌalacpastacnan tachi ju tam askꞌatꞌa. Chai xacꞌamachakxanan tachi ju tam askꞌatꞌa. Para ju chavai ni kꞌaich lapanac icjunita pus icmacontilakꞌolhch tachi chun ju va lhiꞌaskꞌatꞌa. Pus vana va chun ju quiꞌamachakxantiꞌan. Camapaxanicanau acsni cachaꞌanau ju lactꞌiyan.
\v 12 Ju chavai ju quiꞌamachakxantiꞌan chunch junita tachi acsni laktsꞌinchokocanau laca tuꞌuꞌ speo ju jantu kꞌox. Jantu lai kꞌox mispayau ta yu juntau. Para acsni cachaꞌanau ju lactꞌiyan pus lana vas camispayau ju ixtaxtokni Dios ni lana calaktsꞌinau ju Dios laꞌixꞌucxlacapuꞌ. Ju chavai na lacatsꞌunin ju machakxayau. Para acsni cachaꞌanau ju lactꞌiyan pus vas camispayau ju ixtaxtokni Dios tachi ju Dios ni vas quintamispayan ju chavai.
\v 13 Pus va tachi calhilacaꞌanauch ju Cristo. Chai va tachi calacaꞌiyau ni aquintaxtakniyan ju tuchi quintakꞌalhtasunitan ju Dios. Chai va tachi caꞌamapainininau. Para va lakatamch ju ani ju palai lhitapalai. Yuchi ni na acꞌamapaininilh.
\c 14
\s1 Chivinin lacatumpa chivinti
\p
\v 1 Ju tucan anavitꞌit cuenta yuchi ni alamapꞌainitꞌit ju milhiꞌuxijnan. Para vachuꞌ asqꞌuinitꞌit ju Dios ju lhakꞌailaktsꞌin ju xtꞌakꞌa ju Spiritu Santu. Chai ju palai kꞌox lhakꞌailaktsꞌin ju laich asqꞌuinitꞌit yuchi ni laich anaꞌuntꞌit ixchivinti Dios.
\v 2 Pus ju tam lapanac ju xtaknicanta ju lhakꞌailaktsꞌin ni laich chivinin ju chivinti ju jantu aktam ixchivininta pus jantiyuꞌ ju xakꞌalai ju ixtꞌalapanacni. Alai Dios ju tꞌachivinin ni jantu xamatiꞌ machakxai tuchi najun. Ju yuchi vasalh chivinin laꞌixlhichux ixꞌalhunut para va yuchi ju Dios ju machakxai.
\v 3 Para palai kꞌox navi ju anuꞌ lapanac ju xtaknicanta ju lhakꞌailaktsꞌin ni lai najun ixchivinti Dios. Pus ju yuchi alactꞌachivinin ju ixtꞌalapanacni. Chai laꞌixchivinti alacꞌaktaijui ni laich palai catalhilacaꞌalh ju Cristo chai alacmapꞌaksi chai amatankꞌoxaxkꞌayai.
\v 4 Para ju chivinin ju chivinti ju jantu aktam ixchivininta pus va isꞌakstu ju aktaijuchokocan. Para ju anuꞌ lapanac ju najun ixchivinti Dios aꞌaktaijui ju ixtalhavat ju talhilacaꞌanta ju Cristo.
\p
\v 5 Na kꞌox iclhiulai ni laich caꞌixnaꞌuntꞌit minchuxꞌan ju chivinti ju jantu aktam ixchꞌivinatꞌit. Para palai kꞌox iclhiulai ni laich anaꞌuntꞌit ixchivinti Dios. Pus yuchach ju palai xakꞌai ju canaulh ixchivinti Dios. Palai jantu ju va chivinin ju chivinti ju jantu aktam ixchivininta. Para ni camalakpusucalh ju anuꞌ chivinti pus ju chunch vaklhtam chun catava ixtꞌiyunꞌan ni vachuꞌ caꞌaꞌaktaiju ju talhilacaꞌanta ju Cristo laꞌixchivinti.
\v 6 Pus ji quiꞌalakꞌavin mas acꞌanchalh chai aclalhixakꞌalau ju chivinti ju jantu lai machꞌakxayatꞌit pus tis kꞌoxich ju lai aclanaviniu. Jantu lai actilaꞌaktaiju ni jantu vas aclamasuniyau tuchi quimasunitach ju Dios. Chai jantu lai actilaꞌaktaiju ni jantu aclajuniu ju tuꞌuꞌ laꞌixchivinti Dios ju tasqꞌuini ni amachꞌakxatꞌit. Jantu lai actilaꞌaktaiju ni jantu vas aclamalaniyau ta yu kꞌox atsꞌucꞌuyaꞌitꞌit laꞌixmacni Dios.
\p
\v 7 Alaktsꞌintꞌitch. Mas va tuꞌuꞌ skꞌolh u tuꞌuꞌ lhisan ni jantu vas catꞌasayaꞌ pus jantu lai cꞌatsacan tuchi ju skꞌolhcanch u tuchi ju sacanch.
\v 8 Chai tachi ju tam taropa acsni skꞌoli acsni va alin ju lasat. Ni jantu sok camakꞌantꞌasayaꞌ ju iskꞌolh pus jantu xamatiꞌ lai calakasitsucuyaꞌ ixꞌanca lacalasat.
\v 9 Pus vana va chun ju uxijnan. Ni jantu nonatꞌit ju chivinti ju lai tamachakxai ju aliꞌin tas laich catapucꞌatsayaꞌ ju tuchꞌi alacꞌunatꞌit. Tachi ju va jantu xamatiꞌ xakꞌalayatꞌit.
\v 10 Na tijlhu chivinti alin ju ani lacamunutpaꞌ para ju lapanacni ju tachivinin lakatamin lakatamin si tamachakxai tuchi tanajun.
\v 11 Pus ju quitꞌin acsni jantu lai icmachakxani ju ixchivinti ju apumatam pus tachi ju va makat amachakach aquilaktsꞌinaꞌ. Chai ju tꞌajun chiviniꞌ va amachakach makat iclhiulai vachuꞌ.
\v 12 Para ni slivasalh lacꞌasqꞌuinatꞌit ju lhakꞌailaktsꞌin ju xtꞌakꞌa ju Spiritu Santu pus yuchi ju asqꞌuinitꞌit ta yu laich apꞌuꞌaktꞌaiꞌuyaꞌitꞌit ju yuꞌunch ju talhilacaꞌanta ju Cristo ni palai catalhilaksi ju yuchi.
\p
\v 13 Pus ju chivinin ju chivinti ju jantu aktam ixchivininta pus chach sqꞌuinilh ju Dios ni laich vachuꞌ camavasala.
\v 14 Pus ju quitꞌin ni actꞌachivinilh ju Dios laca tuꞌuꞌ chivinti ju jantu aktam icchivininta pus ju quiꞌalhunut tꞌajun nonaꞌ para jantu iccꞌatsai tuchi ictꞌajun nonaꞌ.
\v 15 Pus tasqꞌuini ni chani aclalh. Actꞌachivinaꞌ ju Dios laꞌixlhichux ju quiꞌalhunut. Para laquinchivinti. Acmilhpayaꞌ laꞌixlhichux ju quiꞌalhunut. Para laquinchivinti.
\v 16 Pus ni va lakꞌayayatꞌit ju Dios laꞌixlhichux ju miꞌalhunutꞌan laca tuꞌuꞌ chivinti ju jantu aktam ixchꞌivinatꞌit pus ju mintꞌalapanac ju jantu machakxai ju anuꞌ chivinti tas laich caxtaknilh vachuꞌ lakꞌailaktsꞌiuch ju Dios. Jantu lai ni jantu machakxai tuchꞌi naꞌun.
\v 17 Pus ju uxintꞌi vasalh tꞌaꞌun xtakniniꞌ lakꞌailaktsꞌiuch ju Dios para ju tatꞌajun kꞌasmatnin tulai apuꞌaktaijucan ni jantu lai tamachakxai tuchꞌi naꞌun.
\v 18 Pus ju quitꞌin icxtakni lakꞌailaktsꞌiuch ju Dios ni palai lhu icchivinin ju chivinti ju jantu aktam icchivininta. Palai jantu ju uxijnan.
\v 19 Para laꞌixtalhavat ju talhilacaꞌanta ju Jesús palai kꞌox iclhiulai ni acchivinilh mas va lakaquis chivinti ju lai machakxacan ni laich acꞌamalaninilh ju aliꞌin. Palai jantu kꞌox iclhiulai mas lakacau milh cava ju acchivinilh lacatuꞌuꞌ chivinti ju jantu aktam icchivininta chai ju jantu tamachakxai ju aliꞌin.
\p
\v 20 Jantu chun alacpꞌastꞌacnantꞌit ji quiꞌalakꞌavin tachi ju tam askꞌatꞌa ju jantucaꞌ kꞌox alacpastacnan. Alai alacpꞌastꞌacnantꞌit tachi ju tam kꞌaya lapanac ju acꞌatsanantach. Va ixlacata ju miꞌalactuꞌuntiꞌan chunch atsꞌucꞌutꞌit tachi ju tam askꞌatꞌa ju va tsꞌiquicaꞌ ju jantucaꞌ pastꞌacꞌa ju tuꞌuꞌ macxcai.
\v 21 Pus ju laꞌixlhamapꞌaksin Dios ju makꞌanch istsꞌokcanta najunta ni ma chanich ixnajun ju Dios: “Ma caꞌalacxakꞌalayaꞌ ju ani lapanacni laꞌixchivintiꞌan ju amachakꞌan alacatam. Chai ju yuꞌunch ma jantu lai catamachakxayaꞌ ixchivintiꞌan. Para nin chunch ma jantu catakꞌasmatniputunaꞌ ju Dios”. Chunch ju naulh ju Dios laꞌixꞌalhiqui.
\v 22 Pus ju chunch lai acmachakxa ni jantu axakꞌalai ju Dios ju talhilacaꞌanta yuchi lacatuꞌuꞌ chivinti ju jantu tamachakxai. Alai yuꞌunch ju axakꞌalacan lacatuꞌuꞌ atumpa chivinti ju lana jantu lai taꞌalacaꞌinin. Tsꞌa ma catatalhanalh chai cataꞌalacpastacnalh. Para acsni noncan ixchivinti Dios laꞌixchivintiꞌan ju anch tavilanalh pus aꞌaktaijucan ju talhilacaꞌanta ju Jesús. Jantiyuꞌ ni va caꞌapumapastꞌacꞌanicalh ju lana jantu lai talacaꞌi.
\v 23 Pus acsni tꞌakꞌaixtꞌokꞌatꞌit minchuxꞌan ju lhilacꞌapꞌinatꞌit ju Cristo chai tsꞌucꞌuyatꞌit chivinin ju chivinti ju jantu tamachakxai ju aliꞌin chai ni catatanucha ju jantucaꞌ talhilacaꞌanta ju Cristo u ju jantucaꞌ tamachakxai ixchivinti Dios ja jantu lai catanaulh ni ca va lakachapunin untꞌatꞌit.
\v 24 Para ni minchuxꞌan tꞌonatꞌit nonin ixchivinti Dios chai catanucha pumatam ju jantucaꞌ lhilacaꞌanta ju Jesús u tam xamatiꞌ ju jantu machakxai ixchivinti Dios pus laminchivintiꞌan capumachakxayaꞌ ni alactuꞌunuꞌ junita chai caꞌalacpastacnanaꞌ.
\v 25 Chai capucꞌatsakꞌoyaꞌ tachi chun ju alactuꞌunti ju makꞌata laꞌixꞌalhunut. Chai catakꞌentayaꞌ ni calakꞌayayaꞌ vachuꞌ ju Dios chai cajunach ni yuchi ju Dios ju xakꞌaich. Chai canonach ni slivasalh tꞌajun ju Dios lamilhiꞌuxijnan.
\s1 Tachi chun ju taxtokni kꞌoxich anavitꞌit
\p
\v 26 Pus chanich iclajumputunau. Acsni tavanan atꞌakꞌaixtꞌokꞌaꞌitꞌit pus ju pumatamin lamilhiꞌuxijnan caꞌatꞌamilhpaputunach ju aliꞌin. Ju apumatam alin tuchi amalaniputun ju aliꞌin. Ju apumatam ajumputun ixchivinti Dios. Apumatam chivimputun ju chivinti ju jantu aktam ixchivininta. Chai ju apumatam va malakpusuputun ju anuꞌ chivinti. Para tachi chun ju naviyatꞌit chunchach ju alayaꞌitꞌit ta yu laich apꞌuꞌaktꞌaiꞌuyaꞌitꞌit ju aliꞌin ni palai catalhilacaꞌalh ju Jesús.
\v 27 Acsni alin ju lapanacni ju tachivimputun ju chivinti ju jantu aktam tachivininta pus tasqꞌuini ni va pumatꞌui u pumatꞌutu catachivinilh. Para va pumatamin pumatamin. Chai vachuꞌ tasqꞌuini ni caꞌalilh pumatam ju camalakpusuyach ju anuꞌ chivinti.
\v 28 Para lacatalhavat ni matiꞌ tichi chavaich ju laich camalakpusu ju anuꞌ chivinti pus chach alai va sek tavi ju anuꞌ ju chivimputun. Chach tꞌachivinilh ju Dios va isꞌakstu laꞌixꞌalhunut.
\v 29 Chai vana va chun ju tanajun ixchivinti Dios. Tasqꞌuini ni va pumatꞌui u pumatꞌutu ju catachivinilh. Para va pumatamin pumatamin. Chai ju aliꞌinch catalaktsꞌintanu ju ixchivintiꞌan u sok u jantu.
\v 30 Chai ni alin apumatam ju tuꞌuꞌ masunita ju Dios pus chach mamacta ixchivinti ju tꞌajun chiviniꞌ ni laich cachivinilh ju va acsnicaꞌ mapastꞌacꞌanicanta ju tuchi canonaꞌ.
\v 31 Pus tachi chun ju uxijnan ju xtꞌaknicꞌantꞌatꞌit ixlhakꞌailaktsꞌin ju Spiritu Santu ni laich nonatꞌit ixchivinti Dios laich achꞌivinkꞌoyaꞌitꞌit. Para va pumatamin pumatamin. Chai ju chunch minchuxꞌan alaniyaꞌitꞌit aliꞌ ixchivinti Dios chai minchuxꞌan palai alhilacꞌapꞌinaꞌitꞌit ju Cristo.
\v 32 Pus ju xtaknicanta ixlhakꞌailaktsꞌin ju Spiritu Santu ni laich najun ixchivinti Dios laich pacxan pantsꞌiquis. Jantu tasqꞌuini ni lanach cachivinilh acsni mapastꞌacꞌanican tuꞌuꞌ.
\v 33 Ju Dios jantu chunch manavini tam xamatiꞌ ni jantu kꞌachani ju yuchi ni na pumalhu catachivinilh ju vaktam. Ju yuchi kꞌachani acsni va pumatamin catachivinilh.
\p Chani talai tachi quilhmacchux ju talhilacaꞌanta ju Jesús.
\v 34 Tachi chun ju chakolun lamilhiꞌuxijnan va sekch catatavi lacatalhavat. Jantu axtaknicanta lhamapꞌaksin ni laich catachivinilh. Ju yuꞌunch va calhijuncanaꞌ ni chunch ju najun laꞌixchivinti Dios ju tsꞌokcanta makꞌanch.
\v 35 Chai ni tuꞌuꞌ ju machakxaputun xamatiꞌ pus chach sacmicha ju istꞌatsucunuꞌ laꞌixchakaꞌ. Na lhimaxan cava ni va cachivinilh ju tam chakoꞌulh junta kꞌaixtokcan.
\p
\v 36 Tachi ju layatꞌit tachi ju va nonatꞌit ni uxijnan ju pꞌulhnan xanonatꞌit ixchivinti Dios. Mas jantu. Chai tachi ju va nonatꞌit ni matiꞌ aliꞌitni ju talhilacaꞌanta ju yuchi. Pus ni chunch ju malacꞌasuyatꞌit tachi ju va nonatꞌit ni va uxijnan ju lai nonatꞌit ta yu lhijun ni canavicalh lacatalhavat.
\v 37 Pus ju lamilhiꞌuxijnan ni taꞌalin ju tanajun ni axtaknicanta ju ixlhakꞌailaktsꞌin ju Spiritu Santu ni laich najun ixchivinti Dios u ni taꞌalin ju tanajun ni axtaknicanta ju aliꞌ ixlhakꞌailaktsꞌin ju Spiritu Santu pus chach tacꞌatsa ni yuchach ju ani ju stavasalanti ixlhamapꞌaksin ju Jesús ju iclaꞌatsꞌoknuniyau ju ani lacaꞌalhiqui. Chai tasqꞌuini ni chunch ju catanavi tachi ju iclajunau.
\v 38 Para ni alin xamatiꞌ ju jantu lacaꞌiputun ni ixlhamapꞌaksin Jesús cava ju ani ju iclajuntau pus jantu aqꞌuiclacꞌaꞌitꞌit ju yuchi.
\p
\v 39 Pus chunchach ji quiꞌalakꞌavin. Asqꞌuinitꞌitch ju Dios ni laich anonaꞌitꞌit ixchivinti. Chai jantu akꞌalhtsꞌaꞌutꞌit ni xamatiꞌ cachivimputulh ju chivinti ju jantu aktam ixchivininta.
\v 40 Para tachi chun ju anaviyaꞌitꞌit lacatalhavat tasqꞌuini ni chunch ju anavitꞌit tachi ju lhijunch. Chai va pumatamin pumatamin ju cachivinilh.
\c 15
\s1 Lokꞌonchokolh ju Cristo
\p
\v 1 Ju chavai ji quiꞌalakꞌavin iclamapastꞌacꞌaniyau ju uxijnan ju chivinti ixlacata ju Cristo ju xaclajuntauch. Chai yuchach ju xalacꞌaꞌiyatꞌit chai tus chavai lacꞌaꞌikꞌalhiyatꞌit.
\v 2 Chai ni alacꞌaꞌikꞌalhiyaꞌitꞌit pus atꞌakꞌalhtꞌaxtꞌuyaꞌitꞌit. Para ni jantu vasalh alacꞌaꞌiyaꞌitꞌit pus jantu lai atꞌitꞌakꞌalhtꞌaxtꞌutꞌit.
\p
\v 3 Pus iclajuntau ju palai tasqꞌuini ni amispꞌatꞌit. Yuchi ju icmasunicanta vachuꞌ. Iclajuntau ni nilh ju Cristo laquintalakꞌalhinꞌan. Chunch ju muctaxtulh tachi ju istsꞌokcanta makꞌanchich laꞌixchivinti Dios.
\v 4 Vachuꞌ iclajuntauch ni macnucalh ju Jesús. Para acsni ixtapasata lakatꞌutu avilhchan pus ju yuchi taꞌacxtuchokolh junta ixmacnucanta. Chai vana chunch ju muctaxtulh tachi ju istsꞌokcanta laꞌixchivinti Dios ju makꞌanchich.
\v 5 Chai iclajuntau ni acsni tavanan taꞌacxtuchokolh pus yuchi ju Pitaluꞌ ju talacasunilh. Chai astan atalacasunilh ju ixtamalakachan.
\v 6 Chai ju astanch acsni talacasuchokolh ju Cristo pus talaktsꞌilh aliꞌin ju quilhiꞌalakꞌavinꞌan laꞌixmacni Cristo ju va kꞌaixtamch ixtavilanalh. Pus ju yuꞌunch ixtapasatach lakaquis cientos lapanacni. Sich talaktsꞌinkꞌo ju Cristo. Pus ju chavai ju aliꞌin sia yuꞌunch titatꞌajuncaꞌ. Para ju aliꞌinch tanitach ju chavai.
\v 7 Chai ju astan va isꞌakstu ju talacasunilh ju Jacobo. Chai astan atalacasunikꞌolhch ixchuxꞌan ju ixtamalakachan.
\p
\v 8 Chai ju laꞌixpuꞌaclantich quintalacasunilh ju quitꞌin mas na kꞌox lhitsꞌisit xacjunita laquiꞌalactuꞌunti.
\v 9 Pus quitꞌin ju palai jantu tuꞌuꞌ quintapalhni tachi chun ju aliꞌin ixtamalakachan ju Jesús. Lana jantu lhijun ni aclhixakꞌalacalh ixtamalakachan Jesús ni va xacꞌalaclhimakchapui ju yuꞌunch ju ixtalhilacaꞌanta ju yuchi.
\v 10 Para ju Dios quinavinilh lamapainin. Yuchi iclhijunita ixtamalakachan ju Jesús. Chai na lhitapalalh ju lamapainin ju xaquinavini ju Dios. Pus palai lhu icchꞌalhcatnanta ju quitꞌin. Palai jantu ju aliꞌin ixtamalakachan ju Jesús. Para jantu va laquiꞌakstu ju icnavita. Alai lai lhu ju icchꞌalhcatnan va ixlacata ni Dios ju quinavinilh lamapainin chai quiꞌaktaiju.
\v 11 Para jantu tuꞌuꞌ nomputun u ni quitꞌin ju palai icchꞌalhcatnanta u yuꞌunchach ju aliꞌin ixtamalakachan ju Jesús. Yuchach ju lhitapalai ni va lakatam chivinti ju icnonau chai yuchach ju lacꞌaꞌitꞌatꞌit.
\s1 Ju tanitach catataꞌacxtuchokoyaꞌ
\p
\v 12 Pus ju quitꞌin iclajuntau ni taꞌacxtuchokolh ju Cristo junta ixmacnucanta. Chai tas talhinajunch ju aliꞌin ju milhiꞌuxijnan ni jantu lai xamatiꞌ taꞌacxtuchokoi ju nitach.
\v 13 Pus ni jantu cava lai catataꞌacxtuchokolh ju tanita pus ca jantu vasalh ni taꞌacxtuchokolh ju Cristo.
\v 14 Chai ju Cristo ni jantu caꞌixmacxtuchokolh ju Dios junta ixmacnucanta pus jantu ixlhitapalalh ju tuchi icnonau ni lai takꞌalhtaxtucan. Chai jantu ixlhitapalalh ni ixlhilacꞌapꞌintꞌit ju Cristo.
\v 15 Chai ni jantu caꞌixtaꞌacxtuchokolh ju Cristo pus ca va xaclhitalacasuch tachi ju lapanacni ju tanajun taꞌaklhtamat chivinti ixlacata ju Dios acsni icnonau ni Dios ju macxtuchokolh ju Cristo. Para ni sala jantu lai taꞌacxtuchokoi ju tanita pus ca jantaꞌas slivasalh ni macxtuchokolh ju Cristo ju Dios.
\v 16 Pus ni jantu cava caꞌamacxtuchokocanaꞌ ju tanitach pus nin ca yuchi ju Cristo jantu ixtitaꞌacxtuchokolh.
\v 17 Chai ni jantu caꞌixmacxtuchokocalh ju Cristo pus jantu ixlhitapalalh ni lhilacꞌapꞌintꞌatꞌit ju yuchi. Jantu caꞌixtꞌakꞌalhtꞌaxtꞌutꞌit.
\v 18 Ni jantu caꞌixmacxtuchokocalh ju Cristo pus caꞌixtatsꞌankꞌakꞌalhi tachi chun ju ixtalhilacaꞌanta ju yuchi chai ju tanita ju chavai.
\v 19 Ni lhilacaꞌantauch ju Cristo para ni matiꞌ tuꞌuꞌ caꞌixjunlh ju astan acsni caniyau pus painiꞌitnich caꞌixjumvi. Lana jantu lhitapalai caꞌixva ni lhilacaꞌantauch ju yuchi.
\p
\v 20 Para ju Cristo vasalh macxtuchokocalh mas ixnita. Chai yuchi ju pꞌulhnan taꞌacxtuchokolh lacaꞌaninti. Chai tachi chun ju quijnanꞌan ju lhilacaꞌantauch ju yuchi vachuꞌ camacxtuchokocanau.
\v 21 Pus va ixlacata ju Adán ju niyau ju chavai. Chai vachuꞌ va ixlacata ju Cristo catalhitaꞌacxtuchokoyaꞌ ju tanita.
\v 22 Pus va ixlacaꞌatalh ni ixꞌapapanatnich Adán juntau yuchi lhiniyau. Chai vachuꞌ va ixlacaꞌatalh ni lhilacaꞌanau ju Cristo yuchi calhitaꞌacxtuchokoyauch mas caniyauch.
\v 23 Para va quilhmactamin ju camacxtuchokocanaꞌ. Pꞌulhnan macxtucalh ju Cristo. Chai astan aquijnanꞌan ju lhilacaꞌantauch ju yuchi aquintamacxtuchokoyan acsni caminchokoyach ju yuchi.
\v 24 Chai ju acsnich ixꞌaclantich cajunaꞌ ju lacamunutpaꞌ. Chai ju acsnich ju Cristo camakꞌosukꞌoyaꞌ tachi chun ju xalackꞌajin chai tachi chun ju puꞌucxtin chai tachi chun ju tachaput ju alinch ju ani lacamunutpaꞌ. Chai astanch ju yuchi caxtakniyach ju ixtachaput ju quimpaiꞌan Dios chai yuchach ju calhinonkꞌoyach chux.
\v 25 Pus tasqꞌuini ni yuchi ju Cristo ju calhinonaꞌ tus ni caꞌatꞌalalhajakꞌoyaꞌ chux ju ixtꞌalaxcai.
\v 26 Chai ju va yuchach ixtꞌalaxcai ju catꞌalalhajayaꞌ yuchi ni jantu xamatiꞌ catini tavanan.
\v 27 Pus ju Dios naulh ni yuchi ju Cristo ju calhinonkꞌoyaꞌ tachi chun ju taxtokni. Para acsni naulh ju Dios ju chunch pus jantu nomputun ni va calhijuncanaꞌ ju Dios ni yuchach ju xaxtakni ju ixpuxakꞌai.
\v 28 Chai ju Cristo acsni catꞌalalhajakꞌoyaꞌ tachi chun ju taxtokni pus ju astan ju yuchi ni istsꞌalh Dios junita pus calacasqꞌuinach ni calhijunicalh. Calhinonaꞌ ju ixpai Dios ni yuchi ju xamatꞌalalhajai tachi chun ju taxtokni. Chai ju chunch quimpaiꞌan Dios ju xakꞌai tucan cajunaꞌ.
\p
\v 29 Ni nonatꞌit ni jantu lai tataꞌacxtuchokoi ju tanitach pus tijuch ju talhiꞌakpax ixlacata ju tam xamatiꞌ ju va nitach tachi ju talai ju aliꞌin sia milhiꞌuxijnan. Tajuch ni chunch talai ni sala jantu lai tataꞌacxtuchokoi ju tanitach.
\p
\v 30 Pus ni vasalh tachi ju nonatꞌit ni jantu lai tataꞌacxtuchokoi ju tanitach ca va lakꞌaich iclhilakꞌaꞌi ni va xcaich ictakꞌalhtaxtui chux avilhchan va ixnajunca ixchivinti Dios.
\v 31 Para aktsꞌiya camacxtuchokocanaꞌ ju tanitach. Chai slivasalh na iclalhikꞌachanau ni iccꞌatsai ni atꞌakꞌalhtꞌaxtꞌuyaꞌitꞌit ni xalhilacꞌapꞌinatꞌit ju Cristo Jesús. Chai vana va chun islivasalh ni quintamaknipututꞌajun ju lapanacni chux avilhchan.
\v 32 Pus acsni xacvilhcha ju lakꞌachakꞌan Efeso chai quintamamakꞌalhkꞌajni ju lapanacni ca laich acnaulh ni tachi ju va maktilinch ixtalai. Para ni sala jantuch lai tataꞌacxtuchokoi ju tanita pus ca jantu tuꞌuꞌ lhajacan ni lhilakꞌaꞌican ju chunch. Chai ca laich vachuꞌ canaju tachi ju noncan: “Cavenauch. Calacꞌakꞌotnuch. Ju lhi tꞌuxam caniyauch”. Ca laich chunch canaju ni vasalh caꞌixva ni jantu lai tataꞌacxtuchokoi ju tanita.
\p
\v 33 Tun cataꞌokxchokꞌon xamatiꞌ. Apꞌastꞌactꞌit ju chivinti ju chani noncan: “Ni na kꞌox quiꞌamigo acnavi ju kꞌai junita pus vachuꞌ aquimalhquiliquinilh ju quiꞌatalacpastꞌacꞌat”. Chunch ju noncan.
\v 34 Pus acꞌatsꞌanantꞌit lamiꞌatsucuntiꞌan. Chai jantu anavitꞌit ju alactuꞌunti. Pus alin ju lapanacni ju lamilhiꞌuxijnan ju jantucaꞌ tamispai ju Dios. Chunch ju iclajunau ni va iclamamaxaniputunau ni laich xalakꞌaꞌiyatꞌit ni catanu lamilhiꞌuxijnan ju va kꞌaya tanajun.
\s1 Chani catajunaꞌ ju tanita acsni tavanan catataꞌacxtuchokoyaꞌ
\p
\v 35 Pus ju aliꞌin laich chani catanaulh: “Tas laich catalhitaꞌacxtuchokolh ju tanita. Tis lacatunach ju laich cataputalacasuchokoyaꞌ”.
\v 36 Pus va tontojni ju chunch tanajun. Alaktsꞌintꞌitch ju tuꞌuꞌ quincuxiꞌan. Acsni chꞌanau ju xatꞌin pus yuchi ju ixꞌaxtꞌakꞌa ju puchꞌitaꞌacnui. Para ju ixꞌalhunut yuchach ju capꞌunaꞌ.
\v 37 Chai ju tuchi chꞌanatꞌit jantiyuꞌ ju pꞌulhuchꞌanchꞌokꞌoyatꞌit ju cꞌatꞌatꞌach. Alai yuchi ju xatꞌin cebada u tuꞌuꞌ atumpa xatꞌin ju chꞌanatꞌit.
\v 38 Chai ju tijtamin tꞌin Dios ju xtaknita ta yu catalacasuyach. Chai ju tijtamin tijtamin tamch ju tasui acsni pꞌun.
\v 39 Pus chunchach vachuꞌ tachi chun ju acanit. Jantu va lakatam acanit ju alin. Ju aliꞌ acanit ixꞌacanitꞌan ju lapanacni junita. Ju aliꞌ acanit ixꞌacanitꞌan ju atapacxat. Ju aliꞌ acanit ixꞌacanitꞌan ju tsꞌokꞌo. Ju aliꞌ acanit ixꞌacanitꞌan ju pamata.
\v 40 Chai alin ju xataxtokni ju lactꞌiyan. Chai alin ju xalactaxtokni ju ani lacamunutpaꞌ. Para tachi ju cꞌusich tasui ju xataxtokni ju lactꞌiyan jantu ixtꞌachun cꞌusi tasui ju xataxtokni ju ani lacatꞌun.
\v 41 Pus ju avilhchan tam ju mapulhcui. Chai ju malhquiyuꞌ tam ju mapulhcui. Chai ju stꞌacun tam ju tamapulhcui. Chai mas sia yuꞌunch ju stꞌacun si tam tamapulhcui.
\v 42 Pus vana va chun ju quilacatunaꞌan. Tam junita ju chavai chai tam cajunaꞌ ju astan. Macnucan ju quilacatunaꞌan ju catsꞌankꞌayaꞌ. Para acsni cataꞌacxtuchokoyach tam cajunaꞌ. Ju acsnich jantu tavanan lai catini.
\v 43 Ju quilacatunaꞌan acsni macnucanta jantuch tuꞌuꞌ ixtapalhni. Para acsni camacxtuchokocanaꞌ na cꞌus cajunaꞌ. Ju quilacatunaꞌan acsni macnucanta matich ju ixtachaput. Para acsni camacxtuchokocanaꞌ tachapun cajunaꞌ.
\v 44 Ju quilacatunaꞌan ju macnucanta va xalacatuna lacamunutpaꞌ. Para acsni camacxtuchokocanach pus xalacatuna lactꞌiyan cajunanta. Alin ju xalacatuna lacamunutpaꞌ. Chai alin ju xalacatuna ju lactꞌiyan.
\p
\v 45 Ju ixchivinti Dios ju tsꞌokcanta najun ni xtaknicalh ixlacatuna ju pꞌulhnan lapanac. Yuchi ju Adán. Chunch ma najun laꞌixchivinti Dios. Chai astan milh apumatam lapanac tachi ju Adán. Yuchi ju Cristo. Para ju yuchi xtꞌakꞌa ju atsucunti ju conkꞌalhiyanta ju lactꞌiyan.
\v 46 Pus jantiyuꞌ ju pꞌulhnan xtaknicantau ju xalacatuna ju lactꞌiyan. Alai yuchi ju xalacatuna lacamunutpaꞌ ju pꞌulhnan xtaknicantau. Astan ju xalacatuna lactꞌiyan.
\v 47 Ju pꞌulhnan lapanac tꞌun ju lhinavicalh ju ixlacatuna chai anich lacatꞌun ju ixtꞌajun. Para ju astan milh ju Cristo. Chai ju yuchi lactꞌiyan ju mincha.
\v 48 Chai tachi chun ju quijnanꞌan ju ani vilau lacamunutpaꞌ pacxantau ju quilacatunaꞌan tachi ixjunita ju ixlacatuna ju Adán ni va tꞌun lhinavicalh ju ixlacatuna. Para tachi chun ju catataꞌacxtuchokoyaꞌ chai cataꞌanaꞌ ju lactꞌiyan pus chunch cajunaꞌ ixlacatunaꞌan tachi ixlacatuna ju Cristo.
\v 49 Pus ni chunch junita ju quilacatunaꞌan ju chavai tachi ju xalacatuna ju ani lacamunutpaꞌ pus vana va chun cajunaꞌ ju quilacatunaꞌan tachi ju xalacatuna ju lactꞌiyan astan.
\p
\v 50 Pus chanich iclajumputunau ji quiꞌalakꞌavin. Ju quilacatunaꞌan tachi ju junita ju chavai jantu lai catitanu ju lactꞌiyan junta lhinajun ju Dios. Ju quilacatunaꞌan ju lai ni jantu lai catitanu junta jantu nican.
\v 51 Aclajunau lakatam chivinti ju jantu ixmachakxacanta ju makꞌanchich. Ju aliꞌin sia quijnanꞌan ju lhilacaꞌantauch ju Jesús jantu catitani. Para quinchuxꞌan si aquintaxtaknikꞌoyan ju Dios ju sastꞌi quilacatunaꞌan.
\v 52 Va tam pantsꞌiquis catapasayaꞌ ju ani lhamakꞌan. Tachi acsni actsꞌimtalacpuyaulh. Acsnich ju tamch cajunau acsni va yuchach casuncanaꞌ ju skꞌolh. Pus ju skꞌolh catꞌasayaꞌ chai ju acsnich caꞌamacxtukꞌocanach ju tanita ju ixtalhilacaꞌanta ju Cristo. Chai caꞌaxtaknicanaꞌ ju sastꞌi ixlacatunaꞌan ju jantu lai capuchꞌiyaꞌ. Chai ju quijnanꞌan ju titꞌonaucaꞌ vachuꞌ aquintamapaxaniyan ju quilacatunaꞌan.
\v 53 Pus ju quilacatunaꞌan ju lai puchꞌi tasqꞌuini ni camapaxanicau. Tasqꞌuini ni caxtaknicau ju lacatuna ju jantu lai puchꞌi. Chai ju quilacatunaꞌan ju lai ni tasqꞌuini ni camapaxanicau. Tasqꞌuini ni caxtaknicauch ju jantu lai ni.
\v 54 Pus aktsꞌiya camapaxanikꞌocanau ju ani quilacatunaꞌan ju lai puchꞌi. Caxtaknicanauch ju quilacatunaꞌan ju jantu lai puchꞌi. Chai ju quilacatunaꞌan ju lai ni camapaxanicanau. Caxtaknicanauch ju quilacatunaꞌan ju jantu lai ni. Pus acsni chunch aquintaꞌulhtuyan ju Dios pus ju acsnich caꞌuctaxtuyach ju chivinti ju tsꞌokcanta laꞌixchivinti Dios junta ma najun ni ma tꞌalalhajacanta ju aninti. Chunch ju najun ju anch.
\v 55 Pus ju acsnich matich cajunaꞌ ju aninti. Jantu vana lai aquintatꞌalalhajayan ju aninti.
\v 56 Pus ju chavai niyau ni alactuꞌununau. Chai alactuꞌununau ni naviyau ju lhikꞌalhtsajui ju ixlhamapꞌaksin Dios.
\v 57 Para icjuni lakꞌailaktsꞌiuch ju Dios ni lai tꞌalalhajayau ju alactuꞌunti ni nilh ju quiꞌucxtinꞌan Jesucristo ju quilacataꞌan.
\p
\v 58 Pus ni chunch ji quiꞌalakꞌavin pus va lakatamch anavitꞌit ju miꞌalhunutꞌan. Alhilacꞌapꞌinkꞌalhitꞌitch ju Cristo. Chai va tachi anavinitꞌit ju ixlhichꞌalhcat ju Jesús. Chunch ju alatꞌit ni cꞌatsꞌayatꞌit ni jantu tavanan catsꞌankꞌayaꞌ ju tuchꞌi naviniyatꞌit ju Jesús.
\c 16
\s1 Ju tumin ju caꞌalhikꞌailaktsꞌincanaꞌ ju quilhpatinin
\p
\v 1 Iclajumputunau ixlacata ju anuꞌ tumin ju caxtaknicanach ju quilhiꞌalakꞌavin laꞌixmacni ju Cristo ju amachakꞌan Jerusalén ju quilhpatinin tajunita. Chunch anavitꞌit vachuꞌ tachi ju icꞌalacjunita ju talhilacaꞌanta ju Jesús ju amachakꞌan xalacatꞌun Galacia.
\v 2 Chux lhitumincu pumatamin ju uxijnan alhitꞌanaꞌitꞌit junta tꞌakꞌaixtꞌokꞌatꞌit ju tumin tachi ju laich axtꞌakꞌaꞌitꞌit. Pus tichi chavaich ju laklhu lhajai ju tamin semana pus palai laklhu caxtꞌakꞌaꞌ. Chai ju palai lacatsꞌunin lhajai pus palai lacatsꞌunin caxtꞌakꞌaꞌ. Chai ni chunch ju anaviyaꞌitꞌit pus jantu va acsnich ju apꞌusacꞌaꞌitꞌit ju tumin acsni acchaꞌananta.
\v 3 Pus ju uxijnan asacxtꞌuyaꞌitꞌit ju lapanacni ju amalhipꞌiniyaꞌitꞌit ju tumin ju alhikꞌailaktsꞌinaꞌitꞌit ju amachakꞌan Jerusalén. Chai ju quitꞌin acsni acchaꞌananta laich acꞌamachꞌapayoyaꞌ ju quiꞌalhiqui junta acꞌajunach ju amachakꞌan Jerusalén tichi chavaich ju anuꞌ lapanacni ju talhiꞌanta ju tumin.
\v 4 Chai ni kꞌox cava ni acꞌalactꞌaꞌalh pus laich acꞌalactꞌaꞌanaꞌ.
\s1 Ju Pablo ajuni tavananch ju laich cachaꞌalh ju anch
\p
\v 5 Ju quitꞌin acꞌanaꞌ ju xalacatꞌun Macedonia. Chai acsni aclacaputocꞌakꞌoyaꞌ ju anch pus astan aclalaktsꞌintachauch ju uxijnan.
\v 6 Chai ju acsnich ca laich cava ni aclatꞌatolhchau lakatꞌui lakatꞌutu malhquiyuꞌ. U ni jantu pus ca laich cava ni aclatꞌatolhchau chux ju lacalhicꞌasnin. Ju chunch pus ju uxijnan laich aquilaꞌaktaijuyau ixlacata ju lacati mas vanta anchach ju acꞌamputunach.
\v 7 Pus jantu iclacasqꞌuin ni va actapasatilacha ju chavai ju lamilakꞌachakꞌanꞌan. Iclatꞌatolhputunachau lakatꞌui lakatꞌutu malhquiyuꞌ ni chunch ju calacꞌasqꞌuilh ju quiꞌucxtin Jesús.
\v 8 Para ju chavai actolacaꞌ ju ani lakꞌachakꞌan Efeso tus acsni cachinaꞌ ju xacꞌatan Pentecostés. Acsnich ju actaxtuyach.
\v 9 Tucaꞌ ictaxtuputun ju ani ni na lhu alin ju takꞌasmatputun ixchivinti Dios chai vachuꞌ na lhu ju talhaxcayanan ixchivinti Dios.
\p
\v 10 Chai ni cachaꞌananta ju Timoteo pus amalakꞌavitꞌit. Chunch alatꞌit ni vachuꞌ navi ju yuchi ixlhichꞌalhcat ju Jesús tachi ju quitꞌin.
\v 11 Tun xamatiꞌ ju va jantu tuꞌuꞌ calhiula. Alai aꞌaktꞌaiꞌutꞌitch ni lai lhikꞌach aquilaktsꞌinchokolh. Pus ju quitꞌin icpacxantajich ju yuchi ni icnajun ni caꞌalactꞌaminach ju aliꞌin quilhiꞌalakꞌavinꞌan.
\p
\v 12 Pus na ictapaininilh ju quilakꞌauꞌan Apolos ni caꞌalactꞌaꞌalh ju aliꞌin quiꞌalakꞌavinꞌan acsni xataꞌanacha. Para jantu xaꞌamputunacha ju chavai. Najun ni caꞌananta acsni va caꞌalinach ju ispantsꞌiquis.
\s1 Ju Pablo amapꞌaksi ju ixꞌamigojni
\p
\v 13 Alhistꞌaccꞌantꞌit ni jantu xamatiꞌ cataꞌokxchokꞌon. Va tachi alhilacꞌapꞌinaꞌitꞌit ju Jesús. Aꞌuntꞌit tachi ju jokꞌatni ju jantu tuꞌuꞌ tatalhoni. Achꞌixkꞌotꞌit mas va tuchi camilh lamiꞌatsucuntiꞌan.
\v 14 Tachi chun ju naviyatꞌit chunch ju anaviyaꞌitꞌit tachi ju caputasuyach ni vasalh lamapꞌainiyatꞌit.
\p
\v 15 Chai iclatapaininiyau ji quiꞌalakꞌavin. Ju uxijnan mispꞌayatꞌit ju tatanumanalh laꞌixchakaꞌ ju Estéfanas. Yuꞌunchach ju pꞌulhnan talhilacaꞌalh ju Cristo tachi chun ju amachakꞌan laxatꞌun Acaya. Chai ju yuꞌunch lana tamakꞌaxtaknikꞌota ju Jesús ju isꞌatsucuntiꞌan va ixꞌaꞌaktaijuca ju quilhiꞌalakꞌavinꞌan laꞌixmacni Jesús.
\v 16 Pus lamapainin iclasqꞌuiniyau. Aqꞌuiclacꞌaꞌitꞌit ju anuch lapanacni chai tachi chun ju aliꞌin ju taꞌaꞌaktaijunun chai ju tanavini ixlhichꞌalhcat ju Jesús.
\v 17 Na iclhikꞌachanch ni tamilh ju Estéfanas chai ju Fortunato chai ju Acaico. Pus ju yuꞌunch quintamakꞌankꞌachalh tachi ju ixlatꞌit ni laich cava ixtꞌatꞌit vachuꞌ.
\v 18 Ju yuꞌunch quintaꞌaktaiju ni lai palai aclhilacaꞌalh ju Cristo. Chai vana va chun taꞌaktaijuyan ju uxijnan. Pus aktsꞌiya tasqꞌuini ni alakꞌamispꞌatꞌit ju yuꞌunch.
\p
\v 19 Tachi chun ju amachakꞌan xalacatꞌun Asia ju talhilacaꞌanta Jesús tamacꞌamiyan. Vachuꞌ ju Aquila chai ju Priscila ju ixꞌamachakach junita. Ju yuꞌunch tamacꞌamiyan laꞌixtapakaꞌut ju Jesús. Chai chux taꞌamacꞌaminin ju talhilacaꞌanta ju Jesús ju tatakꞌaixtꞌokꞌa laꞌixchakaꞌ ju Aquila.
\v 20 Taꞌamacꞌaminin chux ju quiꞌalakꞌavinꞌan ju anich tavilanalh. Kꞌox alamacꞌamitꞌit pumatamin pumatamin ju uxijnan tachi ju lhijunch ni lhiꞌalakꞌavin untꞌatꞌit.
\p
\v 21 Ju quitꞌin icPablo. Pus tus ani icmaꞌatsꞌokni apumatam. Para ju chavai quiꞌakstu aclaꞌatsꞌoknuniyau lakatam lakatꞌui chivinti junta aclamacꞌamiyau.
\p
\v 22 Ju jantu mapaini ju quiꞌucxtinꞌan Jesús chach mamakꞌalhkꞌajnikꞌalhicalh. Chach minchokolh ju Jesús.
\p
\v 23 Ictapainini ju Jesucristo ni cataꞌaktaijuyan laꞌixꞌamapaininti.
\v 24 Na iclamapainiyau ju uxijnan ni vachuꞌ lhilacꞌapꞌintꞌatꞌit ju Cristo Jesús. Vasalh chunch tachi ju iclajunau.