\id 2CO
\ide UTF8
\h 2 CORINTO
\toc1 2 CORINTO
\mt1 IXLHILAKATꞌUI ALHIQUI JU ATSꞌOKNUNICALH JU AMACHAKꞌAN CORINTO
\c 1
\s1 Ju Pablo amacꞌami ju amachakꞌan Corinto
\p
\v 1 Ju quitꞌin icPablo. Ju Dios quisacxtulh ni ixtamalakachan Cristo acva. Pus ju quitꞌin chai ju quilhilakꞌauꞌan Timoteo iclamacꞌamiyau ju uxijnan ju vachuꞌ lhilacꞌapꞌintꞌatꞌit ju Dios ju vilhchitꞌit ju lakꞌachakꞌan Corinto. Vachuꞌ icꞌamacꞌamiyau ju talhilacaꞌanta ju Dios ju tavilanancha chux ju xalacatꞌun Acaya.
\v 2 Ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
\s1 Ju Pablo na makꞌalhkꞌajnan
\p
\v 3 Chach junicalh ni xakꞌaich ju Dios ju ixpai ju quiꞌucxtinꞌan Jesucristo. Yuchach ju quintaꞌaktaijuyan lacaꞌamapaininti. Chai yuchach ju quintamatankꞌoxaxkꞌayayan.
\v 4 Yuchach ju quintamatankꞌoxaxkꞌayayan acsni alin ju quimakꞌalhkꞌajnatꞌan ni laich vachuꞌ camatankꞌoxaxkꞌayayau ju aliꞌin ju tatꞌajun makꞌalhkꞌajnin mas va tuchi ixtalakxtuch cava. Laich camatankꞌoxaxkꞌayayau ju aliꞌin ni quintamatankꞌoxaxkꞌayayan ju Dios.
\v 5 Pus tachi ju Cristo ni ixcaican pus va na va chun ju quijnanꞌan. Vachuꞌ xcaicanau. Para vachuꞌ yuchi ju Cristo ju quintamatankꞌoxaxkꞌayayan.
\v 6 Pus ni laich amatꞌankꞌoxaxkꞌayacꞌanaꞌitꞌit chai ni laich atꞌakꞌalhtꞌaxtꞌuyaꞌitꞌit yuchi iclhimakꞌalhkꞌajnanau ju quijnan. Chai ni quintamatankꞌoxaxkꞌayayan ju quijnan ju Dios pus vachuꞌ yuchi lai lhicꞌatsꞌayaꞌitꞌit ni catamatankꞌoxaxkꞌayayan ju uxijnan. Chai ju chunch vachuꞌ lai achꞌixꞌaꞌitꞌit ju tuꞌuꞌ makꞌalhkꞌajnat tachi ju iclhimakꞌalhkꞌajnanau ju quijnan.
\v 7 Pus ju quijnan slivasalh iclalhilaksiyau ni jantu tam anaꞌuntꞌit astan. Iclajunau chunch ni iccꞌatsayau ni vachuꞌ catamatankꞌoxaxkꞌayayan ju Dios ju uxijnan acsni makꞌalhkꞌajnanatꞌit tachi ju quintamatankꞌoxaxkꞌayayan ju quijnan acsni icmakꞌalhkꞌajnanau.
\p
\v 8 Iclacasqꞌuinau ji quiꞌalakꞌavin ni acꞌatsꞌatꞌit ta yu xacmakꞌalhkꞌajnanau ju quijnan acsni xacvilhchau ju xalacatꞌun Asia. Slivasalh na xacmakꞌalhkꞌajnanau ni tachi ju va jantu lai actastucniyau xaclhiulayau. Chai xacnonau ni ca acniyauch.
\v 9 Vasalh xacnonau ni ca vatsꞌalhti acniyau. Para ju Dios lacasqꞌuilh ni chunch accꞌatsayau ni jantu va quiꞌakstu quincꞌan ju aclhilaksichokocau. Alai yuchi ju Dios aclhilaksiu. Yuchach ju lai malokꞌoni ju tam xamatiꞌ mas nitach.
\v 10 Pus Dios ju xaquintamakꞌalhtaxtuyan mas xacnonau ni ca vatsꞌalhti acniyau. Chai yuchach ju iclhilaksiyau ni va tachi aquintamakꞌalhtaxtuyan.
\v 11 Pus ju uxijnan vachuꞌ quilaꞌaktaijuyauch acsni tꞌapꞌaininiyatꞌit ju Dios ju quilacata quijnan. Chai ni na pumalhu ju catasqꞌuiniyaꞌ lamapainin ju Dios ju quilacata quijnan pus na pumalhu ju catajunaꞌ lakꞌailaktsꞌiuch ju Dios ju quilacata quijnan ni quintanavinitan lamapainin ju Dios.
\s1 Ju Pablo jantu lai vatsꞌalhti xaꞌanacha ju lakꞌachakꞌan Corinto
\p
\v 12 Yuchi ju ani ju iclhikꞌachanau. Laꞌixlhichux quiꞌalhunut quincꞌan iccꞌatsayau ni salaka xactꞌonau laꞌixꞌucxlacapuꞌan ju yuꞌunch ju jantucaꞌ talhilacaꞌanta ju Cristo. Chai jantu tuꞌuꞌ atumpa xacpastꞌacꞌau. Va xacꞌaꞌaktaijuputunau ju yuꞌunch. Chai ju uxijnan kꞌoxich cꞌatsꞌayatꞌit ni slivasalh xacnaviyau cuenta ni salaka actsucu acsni xaclatꞌavilau ju uxijnan. Para jantu lai salaka xactsucuyau ju va laquintacꞌatsan quiꞌakstu quincꞌan. Alai Dios ju xaquintaꞌaktaijuyan laꞌixꞌamapaininti ni lai chun xactsucuyau.
\v 13 Jantu tuꞌuꞌ atumpa nomputun ju tuchi iclaꞌatsꞌoknunitau. Va yuchi tachi ju laktsꞌintꞌatꞌit chai tachi ju machꞌakxayatꞌit. Chai iclacasqꞌuinauch ni va tachi chunch ju amachꞌakxayaꞌitꞌit.
\v 14 Ju uxijnan aktsꞌiya aquilalhikꞌachanau acsni caminchokoyaꞌ ju quiꞌucxtinꞌan Jesús mas alin ju aliꞌin sia milhiꞌuxijnan ju tanajun ju chavai ni jantu aquintitalhikꞌachalh. Pus ju quitꞌin vachuꞌ aclalhikꞌachanauch ju uxijnan ju acs avilhchan.
\p
\v 15 Chai ni xaccꞌatsai ni aktsꞌiya tuꞌuꞌ lalhiulayau pus yuchi paktꞌui xaclalhilakꞌamputunachau. Chai ju chunch paktꞌui ixlackꞌachau ni ixlalaktsꞌiu.
\v 16 Xacnajunta ni xactapasatilachalh lamilakꞌachakꞌan acsni icꞌalh ju xalacatꞌun Macedonia. Chai acsni xactaxtuchokochalh ju xalacatꞌun Macedonia pus xaclalaktsꞌinchokochauch aktam ju uxijnan. Chai ju chunch laich xaquilaꞌaktaiju acsni xacꞌalh ju laxaꞌestado Judea.
\v 17 Ju uxijnan ca laich nonatꞌit ni ca va tam tam xacnajun acsni icpastaclh ju chunch. Para jantu lai chunch xacnavi. Ca laich nonatꞌit ni chunch iclai tachi ju talai ju jantucaꞌ talhilacaꞌanta ju Cristo. Ju yuꞌunch ni laich tanajun ni calayaꞌ mas jantu.
\v 18 Para jantu chun iclai. Pus ju Dios lai lhilaksican ni camuctaxtuyaꞌ tuchi najunta. Chai vana va chun lai quilalhilaksiyau ju quitꞌin ni ixlapanac icjunita. Vachuꞌ sok ju quinchivinti. Jantu va tam tam xaclajunau.
\v 19 Pus ju quitꞌin chai ju Silvano chai ju Timoteo iclajuntau ju uxijnan ixlacata ju Jesucristo istsꞌalh Dios. Chai ju yuchi jantu va tam tam najun. Ju yuchi aktsꞌiya najun ju stavasalanti.
\v 20 Pus tachi chun ju ixchivinti ju xtakta ju makꞌanchich ju Dios si uctaxtuta laꞌisꞌatsucunti ju Cristo. Chai lai lakꞌayayau ju Dios ni lacaꞌiniyau ixchivinti ju istsꞌalh.
\v 21 Yuchi ju Dios ju quintaꞌaktaijuyan ni laich cachꞌakꞌokꞌakꞌalhiyau ju Cristo. Quintaꞌaktaijuyan ju quijnan chai vachuꞌ taꞌaktaijuyan ju uxijnan. Chai yuchi ju Dios ju quintasacxtutan ni acnaviniyau ju ixlhichꞌalhcat.
\v 22 Chai isꞌaskꞌatꞌan quintanavitan ju quijnan chai ju uxijnan vachuꞌ. Chai quintaxtaknitan ju Spiritu Santu ju tꞌajun laquiꞌalhunutꞌan ni laich capucꞌatsayauch ni aquintamuctaxtuniyan chux tuchi quintakꞌalhtasunitan.
\p
\v 23 Ju Dios kꞌox cꞌatsai ta yu junita ju quiꞌatalacpastꞌacꞌat. Ju yuchi cꞌatsai ni jantu xaclamamaxaniputunau. Yuchi jantu xaclhiꞌanacha ju lakꞌachakꞌan Corinto junta vilatꞌit tachi ju pꞌulhnan xacpastacta.
\v 24 Para tun va atꞌinaꞌuntꞌit ni va tapꞌastu iclajumputunau tuchi lai alacꞌaꞌiyaꞌitꞌit. Jantu chun icnaviputun. Iccꞌatsaich ni ixlhichux miꞌalhunutꞌan ju lhilacꞌapꞌinatꞌit ju Jesús. Para va iclaꞌaktaijuputunau ni laich palai akꞌachꞌanaꞌitꞌit.
\c 2
\p
\v 1 Ju quitꞌin chani xacnajun ju laquiꞌalhunut. Xacnajun ni jantuch aktam xaclalakꞌanchokoputunachau acsni va xaclhamakꞌaninin tuchꞌi xanaviyatꞌit.
\v 2 Ni iclamamakꞌaniniu ju uxijnan pus matiꞌ apumatam ju lai aquimakꞌankꞌachayaꞌ. Va uxijnan.
\v 3 Jantucaꞌ xacꞌamputunacha ni xacnajun ni ca va lai xacꞌamakꞌaninilh ni xaclaktsꞌilh tuchꞌi ju layatꞌit. Pus yuchi iclalhilakꞌakꞌaimauch lacatsꞌunin acsni iclaꞌatsꞌoknuniu pꞌulhnan. Ju chunch acsni aclalakchaꞌanau ju uxijnan pus jantu aclhiꞌamakꞌanininaꞌ tuchꞌi layatꞌit. Alai va aquilamakꞌankꞌachayau ju quitꞌin. Pus iccꞌatsai ni vachuꞌ akꞌachꞌanaꞌitꞌit ju minchuxꞌan acsni iclalhikꞌachanauch ju uxijnan.
\v 4 Pus acsni iclaꞌatsꞌoknunitau ju anuꞌ alhiqui slivasalh ni xaclalhamakꞌanininau chai slivasalh na xaquixcani ju quiꞌalhunut tus na ickꞌalhulh. Jantiyuꞌ ju iclalhiꞌatsꞌoknuniu ni va aclamaꞌamakꞌaniniputu. Alai va xaclacasqꞌuin ni apꞌucꞌatsꞌayaꞌitꞌit ni vasalh na iclamapainiyau ju uxijnan.
\s1 Ju Pablo alacjuni ni catamacꞌacxanilh ju anuꞌ alactuꞌunuꞌ
\p
\v 5 Ju anuꞌ lapanac ju xaꞌalactuꞌunun jantu quitꞌin ju xaquilhimamakꞌanini ju tuchi xanavi. Alai uxijnan ju xatamamakꞌaniniyan. Para ca palai kꞌox ni acnaulh ni va aliꞌin lamilhiꞌuxijnanꞌan ju amamakꞌaninicalh. Ju chunch jantu na lhu icmucꞌani ixtalakꞌalhin ju anuch alactuꞌunuꞌ.
\v 6 Pus ju uxijnan ni mamakꞌalhkꞌajnitꞌatꞌit ju anuꞌ alactuꞌunuꞌ acsni xatꞌakꞌaixtꞌokꞌatꞌit pus kꞌoxich. Pus ju chavai jantu tasqꞌuini ni amamakꞌalhkꞌajnitꞌit aliꞌ.
\v 7 Pus ju chavai amacꞌacxanitꞌit chai amatankꞌoxaxkꞌayatꞌit. Jantu xcai ni va camacomputunach ju ixti Dios ni na caꞌamakꞌaninilh.
\v 8 Yuchi iclalhijunau ni amalacꞌasunitꞌit ju chavai ni vasalh mapꞌainiyatꞌit ju anuꞌ lapanac.
\v 9 Pus acsni iclaꞌatsꞌoknunitauch ju anuꞌ alhiqui ixlacata ju anuꞌ lhamakꞌan va xaclalaktsꞌimputunau. Va xaccꞌatsaputunch ni vasalh lai lacꞌaꞌiyatꞌit tachi chun ju iclajunau u jantu.
\v 10 Pus va tichi chavaich ju macꞌacxanitꞌatꞌit ju uxijnan pus vachuꞌ ju quitꞌin icmacꞌacxanita. Pus ni alinch xamatiꞌ lamilhiꞌuxijnan ju quilactuꞌuta pus icmacꞌacxanita ni macꞌacxanitꞌatꞌit ju uxijnan. Icmacꞌacxanita ni iccꞌatsai ni Cristo ju laktsꞌin tuchi icnavi.
\v 11 Calamacꞌacxaniu ni tuꞌuꞌ lanaviyau. Ju chunch jantu lai aquintaꞌokxchokꞌoyan ju Satanás. Pus kꞌoxich cꞌatsayau ta yu laich ju yuchi.
\s1 Na ixꞌamakꞌaninin ju Pablo acsni ixvi ju lakꞌachakꞌan Troas
\p
\v 12 Pus ju quitꞌin xacꞌajumputun ju amachakꞌan Troas ixlacata ju Cristo. Chai acsni icchaꞌalh ju anch pus ju Dios quiꞌaktaiju ni laich xacꞌajuni lhu lapanacni ju ixchivinti Dios.
\v 13 Para jantu xackꞌachan ni tucaꞌ xaquilakchinchokoi ju quilakꞌauꞌan Tito. Pus yuchi iclhiꞌalacmacꞌami ju amachakꞌan anch chai ictaxtucha. Icꞌalh ju xalacatꞌun Macedonia.
\s1 Lai ictꞌalalhajayau ju macxcai
\p
\v 14 Para icjuni lakꞌailaktsꞌiuch ju Dios ni yuchach ju aktsꞌiya quintaꞌaktaijuyan ni lai tꞌalalhajayau ju macxcai ni va lakatam tꞌajuntau ju Cristo. Chai ju Dios vachuꞌ quintaꞌaktaijuyan ni laich icꞌajuniu tachi chun ju lapanacni ixlacata ju Cristo. Chai ju anuꞌ chivinti ixlacata ju Cristo chunch junita tachi ju tuꞌuꞌ ju na saksi acamin ju na makat ujtaican.
\v 15 Pus ju quijnan chunch icjuntau tachi ju tuꞌuꞌ ju na saksi acamin chai ju Dios na kꞌox quintalhiulayan acsni icꞌajunau ju lapanacni ixlacata ju Cristo. Pus na saksi ju chivinti ixlacata ju Cristo mas jantu si catatakꞌalhtaxtuyaꞌ ni jantu cataꞌanaꞌ ju lacajipi. Va aliꞌin ju catatakꞌalhtaxtuyaꞌ.
\v 16 Pus ju saksi chivinti ixlacata ju Cristo chunch junita tachi ju tuꞌuꞌ lhinin ixlacata yuꞌunch ju catamakꞌalhkꞌajnankꞌalhiyaꞌ. Para ixlacataꞌan ju tatakꞌalhtaxtuta chunch junita tachi ju tuꞌuꞌ ju na can acamin ju xtꞌakꞌa ju atsucunti ju conkꞌalhiyaꞌ. Pus slivasalh na tsꞌinqꞌui ju ani lhichꞌalhcat.
\v 17 Para ju quijnan lai icnaviyau ni jantu chun iclayau tachi ju aliꞌin ju jantu sok taꞌamalaninin ixchivinti Dios. Pus ju quijnan ni va lakatam ictꞌajuntau ju Cristo pus icnonau ixchivinti Dios laꞌixlhichux quiꞌalhunut quincꞌan. Chai ni iccꞌatsayau ni Dios ju xaquintamalakachayachin pus tachi ju va jun laꞌixꞌucxlacapuꞌ yuchi ju icchivinau.
\c 3
\s1 Alin ju sastꞌi chivinti ju quintalhitꞌatakꞌoxitan ju Dios
\p
\v 1 Acsni iclajunau ni soknicꞌa ju icꞌamalaninin ca va nonatꞌit ni iclajunchokopalau aktam ni va tachi tam xakꞌai icjunita. Para ju quitꞌin jantu icmaktasqꞌuini tuꞌuꞌ alhiqui ju aclaxtakniyau junta catajunan tichi chavaich ju quitꞌin. Nin yuchi ni acmaktasqꞌuinilh tuꞌuꞌ alhiqui ju aquilaxtakniu ixlacata akꞌantam junta nonatꞌit ni quilamispayauch. Pus mas tamaktasqꞌuini ju chunch alhiqui ju aliꞌin para ju quitꞌin jantu.
\v 2 Jantu icmaktasqꞌuini ju tuꞌuꞌ ju chunch ni chunch junita ju miꞌatsucuntiꞌan tachi ju tuꞌuꞌ alhiqui ju najun tichi lapanac ju quitꞌin. Chai ju quitꞌin lana iccꞌatsai ni vasalh ixlapanac Cristo icjunita ni tam untꞌatꞌit ju chavai. Chai mas va tichi cavalhch vachuꞌ lai calaktsꞌilh ju miꞌatsucuntiꞌan chai cacꞌatsayaꞌ ni tam xaꞌunatꞌit acsni xalacꞌaꞌiyatꞌit ju ixchivinti Dios ju iclajuntau.
\v 3 Chai tachi ju va jun Cristo ju xatsꞌokꞌa ju alhiqui junta najun tichi lapanac ju quitꞌin ni yuchach ju xatamapaxaniyan ju miꞌatsucuntiꞌan acsni xalacꞌaꞌiyatꞌit ju chivinti ju xaclajunau. Va yuchi ni jantu xaꞌatsꞌoknun ju yuchi laca tuꞌuꞌ tinta. Alai tachi ju va jun xaꞌatsꞌoknun lamiꞌalhunutꞌan ju iSpiritu Santu Dios ju lakꞌajunta. Chunch xalhixajacha ni yuchi ju xatamapaxaniyan ju miꞌatsucuntiꞌan. Chai jantu chun xaꞌatsꞌoknun tachi acsni atsꞌoknulh ju ixlhamapꞌaksin Dios lacalhtꞌakꞌalh chiux. Ju chavai ju yuchi atsꞌoknulh ixchivinti lamiꞌalhunutꞌan.
\p
\v 4 Ixlhichux quiꞌalhunut iccꞌatsai ni Dios ju quisacxtulh ni ixlapanac acva. Chai iclhilaksi ju Cristo ni yuchi ju aquiꞌaktaijuyaꞌ.
\v 5 Ju quitꞌin jantu iclhilaksichokocan quiꞌakstu. Pus iccꞌatsai ni jantu lai icnavi ju ixlhichꞌalhcat ju Dios ju va laquiꞌakstu. Alai yuchi ju Dios ju quiꞌaktaijui ni lai icnavi ju tuꞌuꞌ ixlacata yuchi.
\v 6 Chai yuchach ju quiꞌaktaijui ni lai kꞌox icꞌamalani ju lapanacni ju sastꞌi chivinti ju quintalhitꞌatakꞌoxitan ju Dios. Jantiyuꞌ ni vana canaviyau tachi ju najun laꞌixlhamapꞌaksin ju Moisés ju tsꞌokcanta. Alai yuchi ju canaviyau tachi ju najun ju Spiritu Santu. Pus ju ixlhamapꞌaksin Moisés acsni lhilaksican va puꞌalin quimakꞌalhkꞌajnatꞌan junta jonkꞌalhita ni lakꞌalhiyau. Para ju Spiritu Santu xtꞌakꞌa ju atsucunti ju jonkꞌalhita lactꞌiyan.
\p
\v 7 Pus ju anuꞌ lhamapꞌaksin ju tsꞌoklh ju Moisés ju puꞌalin quimakꞌalhkꞌajnatꞌan junta jonkꞌalhita ixkꞌekꞌeꞌulacanta lacalhtꞌakꞌalh chiux. Chai acsni tavanan axtaknilh ju lapanacni ju Moisés pus na xlapꞌapꞌa ixmaktajita ju ixꞌucxpuꞌ. Chai ju istꞌaꞌisraelitanin jantu lai ixtalaktsꞌini ju ixꞌucxpuꞌ. Para jantu maktaikꞌalhi.
\v 8 Pus ni chunch ju tapasalh ju acsni ja va a ti yuchach jantu lai palai kꞌox cajunaꞌ ju chavai ju tuchi navi ju Spiritu Santu laquiꞌalhunutꞌan.
\v 9 Pus ni na cꞌusich istasui acsni tavanan xtakcalh ju anuꞌ lhamapꞌaksin ju puꞌalin ju makꞌalhkꞌajnat junta jonkꞌalhita pus palai cꞌus junita ju chivinti junta najun ta yu laich aquintalaktsꞌinan ju Dios ni soknicꞌa juntau laꞌixmacni ju yuchi.
\v 10 Pus vasalh. Ju makꞌanchich na cꞌusich istasui acsni xtaklh ju anuꞌ lhamapꞌaksin. Para ju chavai jantu chunch junita ni palai kꞌox junita ju chivinti junta najun ta yu lai aquintalaktsꞌinan ni soknicꞌa juntau.
\v 11 Pus na cꞌus istasui acsni xtakcalh ju anuꞌ lhamapꞌaksin ju jantu lhilaksikꞌalhican. Chai ni chunch ixjunita ju acsnich pus ja va a ti yuchach jantu palai cꞌus junita ju chivinti ju calhilaksikꞌalhicanaꞌ.
\p
\v 12 Chai ni iclacaꞌiyau ni chunch junita ju sastꞌi chivinti ju quintalhitꞌatakꞌoxitan ju Dios pus vas icꞌajunau ju lapanacni chai jantu ictalhananau.
\v 13 Jantu chun iclayau tachi ju lalh ju lijunto Moisés. Ju yuchi acsni tavanan taxtucha junta quitꞌachivinilh ju Dios va lhilakpuxtakcalh pumpuꞌ ni va slapꞌapꞌa ixmaktajita ju ixꞌucxpuꞌ. Va jantu ixlacasqꞌuin ni catalaktsꞌilh ju istꞌaꞌisraelitanin acsni tavanan camixaꞌ ju ixꞌucxpuꞌ.
\v 14 Para ju israelitanin jantu tavanan lai tamachakxa tuchi ixꞌajumputun ju Dios acsni axtaknilh ju anuꞌ lhamapꞌaksin. Jantu lai tamachakxa ni na va pꞌas ixjunita ju ixꞌalhunutꞌan. Chai tus chavai tachi ju va alakpuchꞌicanta ni jantu vas tamachakxai tuchi nomputun ixchivinti Dios ju istsꞌokcanta makꞌanch. Jantu lai tamachakxai ni jantu talhilacaꞌamputun ju Cristo. Para acsni lhilacaꞌancan ju yuchi tachi ju va alakpuxkꞌotcan chai tamachakxai tuchi ixnomputun ixchivinti Dios.
\v 15 Pus tus chavai tachi ju va alakpuchꞌicanta ixtacꞌatsanꞌan acsni takꞌasmatꞌa ju ixchivinti Dios ju tsꞌoklh ju lijunto Moisés. Lana jantu lai tamachakxai tuchi ju nomputun.
\v 16 Para acsni tavanan talhilacaꞌan ju quiꞌucxtinꞌan Cristo pus tachi ju va alakpuxkꞌotnican ju ixtacꞌatsanꞌan ni laich tamachakxai.
\v 17 Pus ju quiꞌucxtinꞌan Cristo chai ju Spiritu Santu va lakatam tꞌajunita. Chai ju pacxanta ju Spiritu Santu laꞌixꞌalhunut pus jantu tasqꞌuini ni vanach canaulh ni salaka calaktsꞌincanaꞌ laꞌixmacni Dios ni camuctaxtuyaꞌ tachi ju najun laꞌixlhamapꞌaksin ju Moisés.
\v 18 Chai tachi chun ju quijnanꞌan lakpuxkꞌotnicantauch ju quintacꞌatsanꞌan chai cꞌatsayau ni vasalh xakꞌai ju Cristo. Chai lacsni lacsni palai salaka jun ju quiꞌatsucuntiꞌan tus calaktsꞌincanau ni salaka juntau tachi ju Cristo. Pus yuchi ju Spiritu Santu ju quintaꞌulhtuyan chunch.
\c 4
\p
\v 1 Pus ju Dios quintaꞌaktaijun laꞌixꞌamapaininti ni xaquintaxtakniyan ju ani lhichꞌalhcat ni acꞌajuniu ju lapanacni ixlacata ju Cristo. Pus ixlhiyuchi jantu tavanan lai actinaju ni na tsꞌinqꞌui chai jantu actitailhiꞌau.
\v 2 Ju quijnan jantu va sek icnaviyau tuꞌuꞌ ju va astan aclhimaxanau. Nin acꞌokxchokꞌo xamatiꞌ. Nin acmapaxau ixchivinti Dios. Para vas icnonau ju ixchivinti Dios. Chai ni chunch iclayau pus tachi chun ju lapanacni tacꞌatsai laꞌixꞌalhunutꞌan ni stavasalanti tuchi icnonau. Chai isꞌakstu Dios vachuꞌ cꞌatsai.
\v 3 Para ni alin lapanacni ju tanajun ni jantu lai tamachakxai acsni icꞌajunau ta yu lai putakꞌalhtaxtucan pus yuꞌunchach ju catatsꞌankꞌakꞌalhiyaꞌ.
\v 4 Chai jantu lai tamachakxai ni yuchi ju lhacaticuru ju lhinajun ju ani lacamunutpaꞌ chai yuchach ju lakꞌalhinita ju ixtacꞌatsanꞌan ju jantu talhilacaꞌamputun ju Cristo. Ju chunch jantu lai tamachakxai ju chivinti junta lakꞌayacan ju Cristo ju ixtꞌachunch junita tachi ju quimpaiꞌan Dios.
\v 5 Ju quitꞌin acsni iclamalaniyau jantu iclajunau ni xakꞌai icjuntau. Alai iclajunau ni tasqꞌuini ni anavitꞌit ju Cristo Jesús miꞌucxtinꞌan. Chai ju quitꞌin va milapanacꞌan icjunita va ixlacata ni icmapaini ju Jesús.
\v 6 Dios ju naulh ni caꞌalilh ju atuncunuꞌ ju ani lacamunutpaꞌ. Chai yuchach ju vachuꞌ quintalhimalacpucujutan ni laich camispayau ni vasalh yuchi ju xakꞌai ju Dios.
\s1 Tasqꞌuini ni calhilaksiyau ju Dios
\p
\v 7 Pus ju quijnanꞌan aktamixnin makꞌayau ju quintuminꞌan laca tuꞌuꞌ xalu ju jantu laklhu ixtapalh. Pus vana va chun ju Dios. Ju yuchi quintaxtaknitan ju ani kꞌai lhichꞌalhcat mas jantu tuꞌuꞌ quintapalhni quincꞌan laꞌixmacni ju yuchi. Ju chunch ju lapanacni catacꞌatsayaꞌ ni ixtachaput Dios junita ju icpunaviyau ixlhichꞌalhcat. Jantiyuꞌ quiꞌanuꞌ quijnan.
\v 8 Na tasui ixtachaput Dios laquiꞌatsucunti quincꞌan acsni na tijlhu alin ju quilhamakꞌan quincꞌan para aktsꞌiya lai ictakꞌalhtaxtuyau. Aktamixnin jantu iccꞌatsayau ta yu aclayau para iccꞌatsayau ni aktsꞌiya kꞌox cajunaꞌ.
\v 9 Mas quintamamakꞌalhkꞌajniyan ju lapanacni para ju Dios jantu aquintamacoꞌulayan. Mas quintachꞌapayan ju lapanacni ni tanajun ni aquintamakniyan para jantu lakꞌaꞌi ju Dios.
\v 10 Pus tachi ju tamamakꞌalhkꞌajni ju Cristo tus tamakni pus vana va chunch quintaꞌulhtuputunan ju lapanacni. Chai ni chunch ju tapasai laquiꞌatsucunti quincꞌan pus putasui ni tꞌajun ju Jesús. Chai yuchi ju quintaꞌaktaijuyan.
\v 11 Ju quijnan acsni ictꞌonau pus va tachi quintamaknipututꞌonanch va ixlacata ni iclhilacaꞌantauch ju Jesús. Ju chunch laquilacatuna quincꞌan ju caniyaꞌ catasuyaꞌ ni tꞌajun ju Jesús.
\v 12 Pus ju quijnan va tachi iclhimaknipututꞌoncanau ixlacata ju Jesús. Para iclhilakꞌaꞌiyau ni chunch quintaꞌulhtuyan ju lapanacni ni lai caꞌalinach ju miꞌatsucuntiꞌan jonkꞌalhita ju lactꞌiyan.
\p
\v 13 Para mas chunch ju tapasai laquiꞌatsucunti quincꞌan para ju quijnan iclhilaksiyau ju Dios tachi ju lalh ju makꞌaniya lapanac ju David ixjuncan. Ju yuchi chani tsꞌoklh ju lacaꞌalhiqui: “Ju quitꞌin iclhilaksich ju Dios. Yuchi icꞌalhijuni ju lapanacni ixchivinti”. Chunch ju naulh ju yuchi. Pus vachuꞌ ju quijnan iclhilaksiyau ju Dios chai yuchi icꞌalhijunau ju lapanacni ixchivinti.
\v 14 Pus iccꞌatsayau ni Dios ju macxtuchokolh ju quiꞌucxtinꞌan Jesús acsni ixnita. Chai yuchi ju aquintamacxtuchokoyan vachuꞌ ju quijnanꞌan va ixlacaꞌatalh ni lhilacaꞌantauch ju yuchi. Chai aquintalhiꞌanan junta vilhcha ju Dios.
\v 15 Pus chunch icmakꞌalhkꞌajnanauch ju va milacataꞌan. Chai ni palai lhu sia uxijnan ju catalhilacaꞌanaꞌ ju Cristo pus palai lhu catajunilh lakꞌailaktsꞌiuch ju Dios ni na kꞌai ju ixꞌamapaininti ju anavinilh ju yuꞌunch. Chai ju chunch palai calakꞌayacanaꞌ ju Dios.
\p
\v 16 Pus yuchi jantu jeks iclhiꞌuyau. Mas jantu na tachapun junita ju chavai ju quilacatuna quincꞌan para tuncujun tuncujun palai iclhilaksiyau ju Dios laꞌixlhichux quiꞌalhunut quincꞌan.
\v 17 Jantu jeks icꞌuyau ju quijnan ni iccꞌatsayau ni va pantsꞌiquis icmakꞌalhkꞌajnanau ju ani lacamunutpaꞌ. Chai jantu lai actinaju ni vasalh na tsꞌinqꞌui ixjunita ju quimakꞌalhkꞌajnat quincꞌan. Jantu lai chunch actinaju ni iccꞌatsayau ni astan ju lactꞌiyan palai na kꞌox atsucunti ju aquintaxtakniyan ju Dios ni icmakꞌalhkꞌajnantauch ju ani. Chai ju anuꞌ kꞌox atsucunti conkꞌalhiyach.
\v 18 Jantu tsꞌinqꞌui catilhiulau ju quimakꞌalhkꞌajnatꞌan ni lacapastactꞌonau ju xataxtokni lactꞌiyan ju jantu lai laktsꞌincan. Jantiyuꞌ ju canaviyau cuenta ju xataxtokni ju ani lacamunutpaꞌ ju jantu jonkꞌalhita. Pus va pantsꞌiquis ju lai laktsꞌinau ju xataxtokni ju ani lacamunutpaꞌ. Para ju xataxtokni ju lactꞌiyan jonkꞌalhita.
\c 5
\p
\v 1 Pus mas icmakꞌalhkꞌajnanau ju ani jantu jeks icꞌuyau ni iccꞌatsayau ju ani. Ju quilacatunaꞌan chunch junita tachi ju tuꞌuꞌ pacꞌatsꞌa junta va pantsꞌiquis lai tsucucan. Chai mas capuchꞌiyaꞌ ju quilacatunaꞌan para cꞌatsayau ni alin alakatam quilacatunaꞌan ju lactꞌiyan. Chai jantu va quintꞌalapanacꞌan ju navita ju yuchi. Alai Dios ju navita. Chai ju yuchi chunch junita tachi ju tuꞌuꞌ kꞌoxi chakaꞌ ju jonkꞌalhita.
\v 2 Pus ni tꞌonaucaꞌ ju ani laquilacatunaꞌan pus va tachi amakꞌanininau ni lacasqꞌuinau ni caxtaknicanau ju xalacatuna lactꞌiyan.
\v 3 Chai ni caxtaknicanau ju quilacatunaꞌan ju xanavin lactꞌiyan pus ju chunch jantu va isꞌakstu ju catsucuyaꞌ ju quintacuvinꞌan.
\v 4 Acsni tꞌonaucaꞌ ju ani laquilacatunaꞌan ju tachi tuꞌuꞌ pacꞌatsꞌa junita pus slivasalh lhaꞌamakꞌanininau ni lacasqꞌuinau ju quilacatunaꞌan ju xanavin lactꞌiyan. Para jantu lhamakꞌanininau ni va macomputunauch ju ani quilacatunaꞌan. Alai va lacasqꞌuinau ju sastꞌi quilacatunaꞌan ju xanavin lactꞌiyan. Pus ju chunch ju quilacatunaꞌan ju lai ni camapaxanicanauch. Caꞌalinaꞌ ju quiꞌatsucuntiꞌan ju conkꞌalhiyanta ju lactꞌiyan.
\v 5 Pus ju Dios quintaxtakniputunan ju sastꞌi quilacatunaꞌan ju lactꞌiyan chai yuchi ju xaquintalhinaviyan. Chai ni quintaxtaknitan ju Spiritu Santu pus pucꞌatsayau ni aktsꞌiya aquintamuctaxtuniyan ju ixchivinti.
\p
\v 6 Pus yuchi lhicꞌatsayau ni vasalh caꞌalinaꞌ ju sastꞌi quilacatunaꞌan ju lactꞌiyan. Chai cꞌatsayau ni jantucaꞌ vilau laꞌixꞌucxlacapuꞌ ju quiꞌucxtinꞌan Jesús acsni tꞌonaucaꞌ ju ani laquilacatunaꞌan.
\v 7 Pus va lacaꞌiniyau ixchivinti Dios junta quintajunan ni chunch cajunaꞌ ju astan. Jantucaꞌ lai laktsꞌinau ju ani taxtokni laquilakchulhꞌan. Para aktsꞌiya lacaꞌiyau ni chunchach cajunaꞌ.
\v 8 Chai ni vasalh lacaꞌiyau ni chunch cajunaꞌ ju lactꞌiyan pus yuchi palai kꞌox lhilhiulayau ni va caniyau chai anch catsucuyau junta vilhcha ju quiꞌucxtinꞌan Jesús.
\v 9 Chai ni iccꞌatsayau ni vasalh acꞌanau junta vilhcha ju Jesús pus ixlhichux quiꞌalhunut quincꞌan ictsucuputunau tachi ju kꞌoxich calhiulayaꞌ ju yuchi mas anicaꞌ ju icvilau u acsni acchaꞌanau junta vilhcha ju yuchi. Chai tasqꞌuini ni vana va chun ju atsꞌucꞌutꞌit.
\v 10 Pus chunch ju ictsucuputunau ni aktsꞌiya catalacasunikꞌoyau quinchuxꞌan laꞌixpuꞌucxtin ju Cristo. Ju chunch ju pumatamin caꞌamaklhtayananach tachi ju lhijunch ixlacata ju tuchi xanavi acsni ixtꞌajuncaꞌ ju ani lacamunutpaꞌ u kꞌox ju xanavi u jantu.
\s1 Lai navichokocan ixꞌamigojni ju Dios
\p
\v 11 Chai ni ictalhoni ju Dios pus yuchi iclhiꞌamalacaꞌiniputunau ju lapanacni ju ixchivinti Dios. Chai ju Dios cꞌatsakꞌojui tis atsucuntich icpacxantau. Chai ca vachuꞌ cꞌatsꞌayatꞌit ju uxijnan.
\v 12 Jantu va iclajunchokoyau ni lackꞌoxin lapanacni icjuntau. Alai va iclajunau ni ictꞌonau navinin ju kꞌox chai ju chunch caꞌalinaꞌ tuchi laich alhikꞌalhtꞌayaꞌitꞌit ju lapanacni ju talakꞌayai ju ixtꞌalapanacni ju tamalacasui tachi lackꞌoxin lapanacni tajunita. Talakꞌayai ju yuꞌunch mas jantu tanavi cuenta ta yu junita ju ixꞌalhunutꞌan.
\v 13 Pus mas icjuncanauch ni va iclakachapuyau para va tapunajun chunch ni slivasalh ixlhichux quiꞌalhunut quincꞌan iclakꞌayaputunau ju Dios. U ni icjuncanauch ni kꞌox ju quinchivinti quincꞌan pus chunch iclayau ni lai aclaꞌaktaijuyau ju uxijnan.
\v 14 Mas va tuchi icnaviyau yuchi ju Dios ju iclakꞌayaputunau ni iccꞌatsayau ni slivasalh na quintamapainiyan ju Cristo. Pus acsni tavanan nilh ju Cristo iccꞌatsayau ni ixꞌokxtapalh va tachi chun ju lapanacni. Chai ju chavai ju Dios quintalhilhcatan ni tachi ju va nitauch tachi chun ju quijnanꞌan ju lhilacaꞌantauch ju Cristo.
\v 15 Pus ju Cristo nilh ixlacata chux ju lapanacni. Chai ni chunch ju xalai pus ju chavai tasqꞌuini ni jantu va ixkꞌachat isꞌakstuꞌan catanavi ju titatꞌajuncaꞌ ju talhilaksita ju Jesús. Alai catanavinilh ixkꞌachat ju Cristo ni yuchi ju nilh ixlacataꞌan chai lokꞌonchokolh junta ixmacnucanta.
\v 16 Pus ju Jesucristo ni quinichilh lhichux pus yuchi jantu vana lai lhinaviyau cuenta ta yu tamalacasui ju lapanacni ju ani lacamunutpaꞌ. Ju makꞌanch ju quitꞌin vachuꞌ xacnajunta ni va lapanac ixjunita ju Jesús. Para ju chavai iccꞌatsai ni vasalh Dios junita.
\v 17 Pus ni alin xamatiꞌ ju lhilacaꞌanta ju Cristo pus sastꞌi atsucunti ju pacxanta. Ju makꞌaniya ixꞌatalacpastꞌacꞌat mapaxanikꞌocanta. Chux tasastꞌikꞌota.
\p
\v 18 Pus yuchi ju Dios ju quintaꞌulhtuyan ju chunch. Chai yuchi ju quintanavichokon ixꞌamigojni va ixlacata ni nilh ju Cristo ju quilacataꞌan. Vachuꞌ yuchi ju Dios ju quintajuntan ju quijnan ni acꞌajuniu ju lapanacni ni lai ixꞌamigojni catava ju Dios.
\v 19 Ju chunch chani ju nomputun. Acsni tavanan nilh ju Cristo pus chunch ju pulasoknicꞌa ju Dios ta yu laich apunavi ixꞌamigojni tachi chun ju lapanacni. Chai yuchi pulasoknicꞌa ta yu laich caꞌapumacꞌacxanilh ixtalakꞌalhinꞌan. Chai ju yuchi quintaxtaknitan ju quijnan ju ani lhichꞌalhcat ni acꞌajuniu ju lapanacni ni laich ixꞌamigojni catava ju Dios.
\v 20 Pus yuchi ju Cristo ju quintamalakachatan. Chai acsni icnonau ixlacata ju Cristo pus tachi ju va jun isꞌakstu Dios ju taxakꞌalayan. Pus iclatapaininiyau minchuxꞌan tachi ju ixnaulh ju Cristo ni vanach tivi cava ju ani lacamunutpaꞌ. Icꞌatapainini ju lapanacni ni catalhilacaꞌalh ju Cristo ni laich Ixꞌamigojni catava ju Dios.
\v 21 Pus ju Cristo jantu tavanan alactuꞌunulh. Para ju Dios lhilaktsꞌilh tachi ju alactuꞌunuꞌ ju va quilacataꞌan. Chai ju chunch acsni lhilacaꞌanauch ju Cristo pus ju Dios quintalaktsꞌinan ni soknicꞌach juntau laꞌixmacni.
\c 6
\p
\v 1 Ju quijnan kꞌaixtam ictꞌachꞌalhcatnanau ju Dios. Chai iclatapaininiyau ni jantu asamakꞌantꞌit ju lamapainin ju tanaviniputunan ju Dios.
\v 2 Pus chani najun laꞌixchivinti Dios junta tsꞌokcanta:
\q1 Ickꞌasmatnin acsni xacnaviputun lamapainin.
\q1 Icꞌaktaijun acsni xacꞌamakꞌalhtaxtunumputunch.
\m Chunch ju najun laꞌixchivinti Dios junta tsꞌokcanta. Chai iclajunau ni chavaich ju avilhchan acsni anaviniputun lamapainin ju Dios. Chavaich ju avilhchan acsni amakꞌalhtaxtunumputun.
\p
\v 3 Pus ju quijnan ixlapanacni Dios icjuntau. Chai jantu tuꞌuꞌ icnaviyau ju lai capukꞌalhkꞌoslh apumatam chai ixlhiyuchi jantu calacaꞌiputulh ju ixchivinti Dios. Chai ju chunch jantu lai va kꞌaya calhichivincanaꞌ ju quilhichꞌalhcat quincꞌan.
\v 4 Alai tachi chun ju icnaviyau ju quijnan chunch icnaviyau ta yu laich catapucꞌatsayaꞌ ju lapanacni ni vasalh ixlapanacni Dios icjuntau. Lana jantu jeks xacꞌuyau acsni na xacmakꞌalhkꞌajnanau. Nin acsni matiꞌ ixjunita ju quintuꞌuꞌ quincꞌan. Nin acsni lana jantu xaccꞌatsayau ta yu aclayau.
\v 5 Nin acsni xaclakanekmacanauch. Nin acsni xactꞌalhnucantauch. Nin acsni xaquintamakniputunan ixtalhavat lapanacni. Jantu jeks xacꞌuyau acsni na lhu ixꞌalin ju quilhichꞌalhcat quincꞌan. Nin acsni jantu lai xaclhilhtatakꞌoyau ju quilhichꞌalhcat quincꞌan. Nin acsni jantu lai xaclhivenkꞌoyau ju quilhichꞌalhcat quincꞌan.
\v 6 Vachuꞌ icpumalacasuputunau ni ixlapanacni Dios icjuntau acsni na salaka ju quiꞌatsucunti quincꞌan chai na icmispayau ju stavasalanti. Chai caputasuyaꞌ ni ixlapanacni Dios icjuntau acsni icchꞌixau mas va tuchi quintanaviyan ju lapanacni. Chai acsni icmalacasuyau ju quilhikꞌox lapanac. Chai acsni tasui laquiꞌatsucunti quincꞌan ni tꞌajun ju Spiritu Santu laquiꞌalhunut quincꞌan. Chai acsni tasui ni vasalh icmapainiyau ju quintꞌalapanacni.
\v 7 Vachuꞌ tasui ni vasalh ixlapanacni Dios icjuntau acsni iclajuntau ju ixchivinti Dios chai ju yuchi stavasalanti. Vachuꞌ putasui ni ixlapanacni Dios icjuntau acsni tasui ixtachaput ju Dios laquiꞌatsucunti quincꞌan. Chai va ixlacaꞌatalh ni salaka junita ju quiꞌatsucunti quincꞌan pus yuchi ju icpusastꞌucꞌau tachi chun ju macxcai ju min laquiꞌatsucunti quincꞌan.
\v 8 Vachuꞌ ictalacasuyau ni ixlapanacni Dios icjuntau acsni iclakꞌayacanau chai acsni jantu tuꞌuꞌ iclhiulacanau. Acsni macxcai quintalhichivinan ju lapanacni chai acsni tanajun ni kꞌox lapanacni icjuntau. Ictalacasuyau ni vasalh ixlapanacni Dios icjuntau acsni tanajun ju lapanacni ni va icꞌaꞌokxchokꞌonunau mas jantu. Mas vasalh ixlapanacni Dios icjuntau.
\v 9 Ictalacasuyau ni ixlapanacni Dios icjuntau acsni tanajun ju lapanacni ni jantu tuꞌuꞌ ju quintapalhni quincꞌan mas na lhu quintachꞌakꞌokꞌayan. Vachuꞌ acsni va tachi quintamaknipututꞌonan ju lapanacni para jantu lai quintamakniyan. Ictalacasuyau ni ixlapanacni Dios icjuntau acsni icmamakꞌalhkꞌajnicanauch para jantu quintamakniyan.
\v 10 Mas icꞌamakꞌanininau para va tachi ickꞌachanauch. Mas na kꞌox icquilhpatiyau para na pumalhu ju icꞌaxtaknita ju stavasalanti makꞌalit ju alin laꞌixmacni Dios. Mas lana matiꞌ ju quintuꞌuꞌ ju ani para laꞌixmacni Dios alinkꞌojui chux.
\p
\v 11 Ji quiꞌalakꞌavin amachakꞌan Corinto iclajunkꞌotauch ta yu iccꞌatsanau. Slivasalh iclamapainiyau.
\v 12 Ju quijnan slivasalh tuꞌuꞌ iclalhiulayau ju uxijnan. Para ju uxijnan jantu tuꞌuꞌ quilalhiulayau ju quijnan.
\v 13 Pus ju quitꞌin iclaxakꞌalayau tachi ju va quiꞌaskꞌatꞌan untꞌatꞌit. Pus tachi ju iclamapainiyau ju uxijnan pus vana va chun aquilamapainiuch ju quijnan.
\s1 Tꞌajun ju Dios laquiꞌalhunutꞌan
\p
\v 14 Tun tꞌiꞌamaꞌamigoxlatꞌit tam xamatiꞌ ju jantu lhilacaꞌanta ju Cristo. Jantu lai chun atꞌilatꞌit ni jantu lai va lakatam catitꞌava ixꞌatalacpastꞌacꞌat ju naviputun ju soknicꞌa chai ju naviputun ju jantu kꞌox. Jantu lai va lakatam catitꞌava ju ixꞌatalacpastꞌacꞌat ju alhtanantacaꞌ tachi ju va lacaꞌatatsꞌisni ni jantucaꞌ mispai ju Cristo chai ju alhtananta lacaꞌatuncunuꞌ ni mispaich ju yuchi.
\v 15 Jantu lai va lakatam catitꞌava ju ixꞌatalacpastꞌacꞌat ju Cristo ju va ixꞌatalacpastꞌacꞌat ju lhacaticuru. Jantu lai va lakatam catitꞌava ju ixꞌatalacpastꞌacꞌat ju lhilacaꞌanta ju Cristo ju va jantu lhilacaꞌanta.
\v 16 Jantu lai actitꞌamanu ju tuꞌuꞌ santo ju lacpujitat junta lakꞌayacan ju Dios. Pus ju quijnanꞌan chunch juntau tachi ju tuꞌuꞌ pujitat junta lakꞌayacan ju Dios. Chunch juntau tachi ju naulh isꞌakstu ju Dios laꞌixchivinti junta tsꞌokcanta. Ju anch ma chani naulh:
\q1 Ju yuchi ma catsucuyaꞌ laꞌixꞌalhunutꞌan chai ma caꞌalactꞌaꞌalhtananaꞌ.
\q1 Chai ma isDiosꞌan cajunaꞌ.
\q1 Chai ju yuꞌunch ma ixlapanacni catajunaꞌ.
\m Chunch ma najun ju Dios.
\v 17 Chai yuchi vachuꞌ lhinajun ju Dios ju chavai lacaꞌalacatam atsꞌoknut. Ma chani najun:
\q1 Ma tamch atsꞌucꞌutꞌit. Ma jantu vana va chun anavitꞌit tachi ju tanavi ju jantucaꞌ talhilacaꞌanta ju yuchi.
\q1 Ma lana jantu tuꞌuꞌ anavitꞌit ju jantu kꞌox.
\q1 Ju chunch ma cataꞌamaklhtayananan.
\q1
\v 18 Chai ma mimpaiꞌan cajunaꞌ.
\q1 Chai ju uxijnan ma isꞌaskꞌatꞌan aꞌunaꞌitꞌit.
\q1 Ma chunch ju najun ju Dios ju lai navikꞌojui tachi chun ju taxtokni.
\c 7
\p
\v 1 Pus ji quiꞌalakꞌavin ju na iclamapainiyau ni quintakꞌalhtasunitan ju Dios ni chunch aquintaꞌulhtuyan pus camacaju tachi chun ju aquintamalhquiliquin ju quiꞌatsucuntiꞌan chai tachi chun ju macxcai atalacpastꞌacꞌat. Pus ni talhoniyau ju Dios pus lana salaka catsucu.
\s1 Tamch junita ju chavai isꞌatsucuntiꞌan ju amachakꞌan Corinto
\p
\v 2 Aquilalaktsꞌiuch ni miꞌamigojniꞌan icjuntau. Jantu xamatiꞌ tuꞌuꞌ icnavinitau macxcai. Jantu xamatiꞌ icmakꞌalhkꞌosutau laꞌisꞌatsucunti. Jantu xamatiꞌ icꞌokxchokꞌomaxtunitau ju ixtumin.
\v 3 Para jantu iclajunau ju ani chivinti ni va aclajumputu ni tachi ju va nontꞌatꞌit ni chunchach ju iclatau. Jantu lai actilamucꞌaniu ju mintalakꞌalhinꞌan ni iclajuntau ni slivasalh tuꞌuꞌ iclalhiulayau ju uxijnan. Va lai anch actsucukꞌalhi junta vilhchitꞌit chai anch acnicha.
\v 4 Ju quitꞌin lana iclajunkꞌotauch ta yu iccꞌatsanau. Icꞌajuni ju aliꞌin lapanacni ni na kꞌox tachi ju layatꞌit. Nin lacatsꞌunin jantu iclalhamakꞌanininau ju chavai. Alai slivasalh na ickꞌachanch mas ictꞌajun makꞌalhkꞌajnaꞌ ju ani.
\p
\v 5 Pus acsni icmiu ju ani ju xalacatꞌun Macedonia pus lana jantu lai lhikꞌach xactsucuyau. Pus ju lapanacni na xaquintatꞌalakꞌayan chai ju quijnan na xactalhananau.
\v 6 Para Dios ju matankꞌoxaxkꞌayai ju va taꞌamakꞌaninin. Chai yuchach ju quintamatankꞌoxaxkꞌayan ni xalakꞌaꞌi ni xaquintalakminan ju Tito.
\v 7 Chai jantu va yuꞌ ju xaclhikꞌachanau ni iclaktsꞌinchokoch ju Tito. Para iclhikꞌachanauch ni xaquintajunan ju yuchi ni na kꞌoxich lhiulai ta yu xalayatꞌit. Quijuni ni ma slivasalh quilalaktsꞌimputunau. Chai ma slivasalh na xamakꞌanininatꞌit ixlacata ju tuchi xatapasai. Chai ma navipꞌutꞌunatꞌit tachi ju xaclajunau. Pus ni quijuni ju chunch pus palai ickꞌachanch.
\p
\v 8 Mas iclamaꞌamakꞌaniniuch lacaꞌalhiqui ju xaclamacaꞌaniyachau para ju chavai jantu icnajun ni palai kꞌox ixva ni jantu xaclamacaꞌanichau ju anuꞌ chivinti. Ju pꞌulhnan vasalh chunch xacnajunta acsni iclaktsꞌilh ni na xalhiꞌamakꞌanininatꞌit ju anuꞌ alhiqui. Para va pantsꞌiquis ju xaꞌamakꞌanininatꞌit.
\v 9 Pus ju chavai na ickꞌachanch. Para jantiyuꞌ ju iclhikꞌachan ni va iclamaꞌamakꞌaniniuch. Alai va iclhikꞌachan ni xamakꞌanininatꞌit ixlacata ju miꞌalactuꞌuntiꞌan chai macꞌontꞌatꞌit ju macxcai ju ixnaviyatꞌit. Ju uxijnan ixꞌamakꞌanininatꞌit tachi ju kꞌoxich lhiulai ju Dios. Pus ju chunch jantu tuꞌuꞌ macxcai xaclanaviniyau ju quitꞌin ni xaclamaꞌamakꞌaniniuch.
\v 10 Pus tam xamatiꞌ ju navi tuꞌuꞌ alactuꞌunti para astan caꞌamakꞌanininaꞌ tachi ju kꞌachani ju Dios pus camaconach ju macxcai chai calhilacaꞌanach ju Jesús ni camakꞌalhtaxtuyach. Chai ju macajunta ju macxcai va ixlacaꞌatalh ni ixꞌamamakꞌaninicanta pus takꞌalhtaxtuta chai jantu lai catinaulh astan ni jantu alai chun ixtapasalh laꞌisꞌatsucunti. Para ju lhamakꞌaninin tuchi tapasata laꞌisꞌatsucunti para ni jantu tam capastꞌacꞌaꞌ ixlacata ju ixꞌalactuꞌunti pus ju yuchi catsꞌankꞌakꞌalhiyach.
\v 11 Pus ju uxijnan ni xaꞌamakꞌanininatꞌit ixlacata miꞌalactuꞌuntiꞌan tachi ju kꞌoxich lhiulai ju Dios pus alaktsꞌintꞌit ta yu xajun ju miꞌatsucuntiꞌan ju chavai. Pus ixlhichux miꞌalhunutꞌan ixlakꞌoxipꞌutꞌunatꞌit ju anuꞌ alactuꞌunti. Lana ixnonatꞌit ni jantu kꞌox xalhiulayatꞌit tachi ju xalai ju anuꞌ lapanac ju makvi lamilhiꞌuxijnan. Chai na ixlhitꞌalhkꞌamtꞌatꞌit ni lai chunch xalai ju anuꞌ lapanac. Chai na kꞌox xatꞌalhanantꞌit. Slivasalh ixlakꞌoxipꞌutꞌunatꞌit ju anuꞌ lhamakꞌan. Ixlacꞌasqꞌuinatꞌit ni camapalaꞌ ju ixtapalh ixꞌalactuꞌunti ju anuꞌ lapanac chai lana mamakꞌalhkꞌajnitꞌit. Pus ni chunch ju ixlayatꞌit pus putasui ni salaka untꞌatꞌit ju chavai ixlacata ju anuꞌ lhamakꞌan.
\v 12 Pus acsni tavanan iclaꞌatsꞌoknunitau ju anuꞌ alhiqui jantu va yuꞌ ju iclalhiꞌatsꞌoknunitau ni amamakꞌalhkꞌajnitꞌit ju anuꞌ ju xanavi ju alactuꞌunti. Nin va yuchi ni alakꞌoxiyaꞌitꞌit ju ixlhamakꞌan ju navinicalh alactuꞌunti. Ju tucan iclalhiꞌatsꞌoknunitauch yuchi ni apꞌucꞌatsꞌayaꞌitꞌit ni vasalh tuꞌuꞌ quilalhiulayau. Chai cꞌatsai ju Dios ni vasalh chunch ju quilalhiulayau.
\v 13 Pus ni xaquilaquiclacaꞌiyau ju quinchivinti pus slivasalh na ickꞌachan.
\p Para jantu va yuꞌ ju iclhikꞌachan ju tuchꞌi xanaviyatꞌit. Para vachuꞌ iclhikꞌachan ni na kꞌachanch ju chavai ju Tito ju milacataꞌan ni slivasalh na kꞌox xaꞌamaklhtꞌayananatꞌit ju yuchi.
\v 14 Pus ju quitꞌin xacjunita ju Tito ni na lackꞌoxin lapanacni untꞌatꞌit chai jantu xaquilamamaxaniyau. Pus tachi chun ju xaclajunau si stavasalanti. Pus chunchach vachuꞌ ju tuchi xacjuni ju Tito ju milacataꞌan stavasalanti lhixajcha.
\v 15 Chai ju chavai ju yuchi palai tuꞌuꞌ talhiulayan ni pastꞌacꞌa ni xalacꞌaꞌiniyatꞌitch chux tuchi xatajunan chai ni kꞌox xaꞌamaklhtꞌayananatꞌit chai xatꞌalhoniyatꞌit chai stunin ixnavikꞌopꞌutꞌunatꞌit tachi ju kꞌoxich calhiulayaꞌ ju yuchi.
\v 16 Pus na iclhikꞌachanch ni aktsꞌiya lai iclalhilaksiyauch ju uxijnan.
\c 8
\s1 Na lhu taxtaknilh ju quilhpatinin
\p
\v 1 Pus ji quiꞌalakꞌavin iclajumputunau ni va ixlacaꞌatalh ni anavinita lamapainin ju Dios ju yuꞌunch ju talhilacaꞌanta ju Cristo ju tavilanancha ju xalacatꞌun Macedonia yuchi talhinaviputun ju aꞌaktaijunti.
\v 2 Pus ju yuꞌunch mas slivasalh na ixtamakꞌalhkꞌajnan para ju chavai na takꞌachanch. Chai mas na kꞌox quilhpatinin tajunita para ixlaquilhtu lhu lana ju taxtaklh ju ixtuminꞌan ni taꞌaktaijuputun ju aliꞌin.
\v 3 Pus quitꞌin quiꞌakstu iccꞌatsai ni chunch ju taxtaklich tachi ju laich ixtachaꞌan. Pus palai lhu taxtaklh va laꞌixꞌalhunutꞌan. Palai jantu tachi ju xacmachakxai ni laich cataxtaklh.
\v 4 Quintatapaininilh ni laich cataꞌaktaiju ju quilhpatinin amachakꞌan Jerusalén ju vachuꞌ talhilacaꞌanta ju Cristo.
\v 5 Chai jantu va yuchi ni va lacatsꞌunin tumin ju xataxtꞌakꞌa tachi ju xacpastꞌacꞌa ju quitꞌin ni laich catanavi. Para pꞌulhnan tamakꞌaxtaknikꞌolh ju isꞌatsucuntiꞌan ju quiꞌucxtinꞌan Jesús chai astan quintalhilaksin ju quijnan. Yuchi ju Dios ju xaꞌamapastꞌacꞌani ni laich chunch catalalh.
\v 6 Pus ju uxijnan cꞌatsꞌayatꞌit ni yuchi ju Tito ju pꞌulhnan tajunan ni casaccanaꞌ ju tumin ju caꞌalhikꞌailaktsꞌincanaꞌ ju quilhpatinin ju amachakꞌan Jerusalén. Chai yuchi iclhitapaininilh ju yuchi ni catalakꞌanchokoyan ju uxijnan chai camuctaxtulh tuchi xataiꞌulai lamilhiꞌuxijnan. Ju chunch laich vachuꞌ axtꞌakꞌaꞌitꞌit tachi ju pꞌulhnan ixnonatꞌit.
\v 7 Pus ju uxijnan na kꞌox junita ju miꞌatsucuntiꞌan laꞌixmacni Dios. Pus ixlhichux ju miꞌalhunutꞌan ju lhilacꞌapꞌinatꞌit ju Jesús. Chai laich amalanininatꞌit ju ixchivinti Dios. Chai kꞌox mispꞌayatꞌit ju stavasalanti. Chai slivasalh navipꞌutꞌunatꞌit tachi ju machꞌakxayatꞌit ni kꞌox calhiula ju Dios. Chai slivasalh ni quilamapainiu ju quijnan. Chai ni kꞌox junita ju miꞌatsucuntiꞌan ixlacata tachi chun ju ani taxtokni pus tasqꞌuini ni vachuꞌ kꞌox anaviyaꞌitꞌit ixlacata ju anuꞌ ju alhiꞌaktꞌaiꞌuyaꞌitꞌit ju aliꞌin.
\p
\v 8 Pus ju quitꞌin jantu va tapꞌastu iclajunau ni axtꞌaktꞌit ju anuꞌ lhakꞌailaktsꞌin. Va iclacasqꞌuin ni acꞌatsꞌayaꞌitꞌit tuchi talalh ju amachakꞌan Macedonia. Chai ni vachuꞌ axtꞌakꞌaꞌitꞌit ju uxijnan pus caputasuyach ni vasalh amapꞌainininatꞌit.
\v 9 Chai lhijunch ni chunchach ju alatꞌit ni cꞌatsꞌayatꞌit ni slivasalh ni kꞌai ju amapaininti ju quintanavinitan ju quiꞌucxtinꞌan Jesucristo. Ju yuchi slivasalh makꞌaliꞌ ixjunita ju lactꞌiyan. Para ju yuchi maconkꞌocha chux ju anuꞌ makꞌalit chai na kꞌox lhiquilhpatiniꞌ quitsucuchilh ju ani lacamunutpaꞌ. Chai yuchi xalhimaconkꞌoyacha chux ju ixmakꞌalit chai quilhpatiniꞌ va ni laich makꞌalinin aꞌunaꞌitꞌit laꞌixmacni Dios.
\p
\v 10 Pus iclajunau ni aktsꞌiya kꞌox cajunaꞌ ju milacataꞌan ni amuctꞌaxtꞌutꞌit ju xatꞌaiꞌulayatꞌit ju cꞌatach. Ixnonatꞌit ni isacpꞌutꞌunatꞌit ju tumin ixlacata ju quilhpatinin chai ixlhichux ju miꞌalhunutꞌan ju xatꞌaiꞌulayatꞌit.
\v 11 Pus ju chavai amuctꞌaxtꞌutꞌit. Ni chunch ju xapꞌastꞌacꞌatꞌit pus axtꞌaktꞌit tachi ju laich chaꞌan.
\v 12 Pus ni vasalh ixlhichux ju quiꞌalhunut ju icxtakputunch ju tuꞌuꞌ mas va lacatsꞌunin ni jantu lhu alin pus ju Dios kꞌox calhiulayaꞌ. Ju yuchi jantu lhu casqꞌuiniyaꞌ ju jantu lhu alin.
\p
\v 13 Jantu iclajunau ni va alhimakꞌalhkꞌajnantꞌit ju lamimaktasqꞌuinitꞌan ju va ixꞌaꞌaktaijuca ju aliꞌin.
\v 14 Iclacasqꞌuin ni vaklhtam chun aꞌuntꞌit. Ju chavai ju uxijnan alin ju mintuminꞌan ju lai apꞌuꞌaktꞌaiꞌutꞌit ju alin ixmaktasqꞌuinitꞌan. Chai astan jantu xcai ni caꞌalilh ju mimaktasqꞌuinitꞌan chai ju acsnich ju yuꞌunch laich cataꞌaktaijuyan ju uxijnan. Ju chunch vaklhtam chunch aꞌunaꞌitꞌit.
\p
\v 15 Chai ni vaklhtam chun aꞌunaꞌitꞌit pus chunchach vachuꞌ cajunaꞌ ju miꞌatsucuntiꞌan tachi ju isꞌatsucuntiꞌan ju israelitanin acsni tasaclh ju mana. Pus chani najun laꞌixchivinti Dios junta tsꞌokcanta: “Ju na lhu saclh ju vaiti jantu tuꞌuꞌ xamaxajniyacha. Chai ju palai lacatsꞌunin saclh pus jantu tuꞌuꞌ makꞌancꞌacxlh”. Chunch najun laꞌixchivinti Dios.
\s1 Ju Tito chai ju aliꞌin cataꞌanaꞌ maconin ju tumin
\p
\v 16 Pus icjuni lakꞌailaktsꞌiuch ju Dios ni vana va chunch pastꞌacꞌa ju Tito ju milacataꞌan tachi ju quitꞌin. Pus ju yuchi vachuꞌ lacasqꞌuin ni kꞌox ju atsꞌucꞌuyaꞌitꞌit laꞌixmacni Dios.
\v 17 Chai laꞌisꞌakstu slivasalh na ixꞌamputunacha junta vilhchitꞌit. Chai acsni icjunilh ni na kꞌox cava ni catalakꞌantachan pus quinquiclacaꞌilh.
\p
\v 18 Chai kꞌaixtam actꞌamalakachayanta apumatam ju quilakꞌauꞌan. Pus tachi chun ju lapanacni ju talhilacaꞌanta ju Cristo chux tacꞌatsakꞌo ni na lai amalaninin ixchivinti Dios ju yuchi.
\v 19 Chai jantu va yuchi. Para tachi chun ju talhilacaꞌanta ju Cristo yuꞌunch ju tasacxtulh ju anuꞌ quilakꞌauꞌan ni laich aquintꞌaꞌanaꞌ acsni acꞌanaꞌ axtakniniꞌ ju ani lhakꞌailaktsꞌin ju amachakꞌan Jerusalén. Chai ni caꞌaktaijuyau ju quilhpatinin pus chux ju lapanacni catanonaꞌ ni vasalh xakꞌai ju quiꞌucxtinꞌan Jesús chai catapucꞌatsayach ni vachuꞌ na aꞌaktaijunumputunau.
\v 20 Pus va iclacasqꞌuin ni camakꞌalh vachuꞌ ju anuꞌ quilakꞌauꞌan acsni acꞌaxtakniyanta ju tumin ju amachakꞌan Jerusalén. Ju chunch jantu lai xamatiꞌ aquintimucꞌanilh ju quintalakꞌalhin ixlacata ju anuꞌ tumin ni na laklhu.
\v 21 Ju quitꞌin si sok icnaviputun. Jantu va yuchi ni cacꞌatsayaꞌ ju quiꞌucxtinꞌan Jesús ni sok icnavi para vachuꞌ chunch catacꞌatsa ju quintꞌalapanacni.
\p
\v 22 Vachuꞌ caꞌalactꞌaꞌanaꞌ apumatam ju quilakꞌauꞌan. Ju quitꞌin na paklhu iclaktsꞌintanuta chai iccꞌatsai ni slivasalh naviniputun ixlhichꞌalhcat ju Dios. Chai ju chavai ni na talhilaksiyan ni amuctꞌaxtꞌuyaꞌitꞌit pus palai naviputun ju ani lhichꞌalhcat.
\v 23 Ni xamatiꞌ lhasacminin ju Tito laich aꞌunaꞌitꞌit ni yuchi ju quintꞌachꞌalhcatnaꞌ. Yuchi ju quiꞌaktaijui acsni iclajunau ixchivinti Dios. Chai ni xamatiꞌ caꞌalhasacmininach ju aliꞌin quilhiꞌalakꞌavinꞌan ju alactꞌaꞌanta ju yuchi pus laich aꞌunaꞌitꞌit ni yuꞌunch ju talhilacaꞌanta Jesús ju taꞌasacxtulh. Chai ixlacaꞌatalh ni na salaka ju isꞌatsucuntiꞌan ju yuꞌunch pus ju lapanacni talakꞌayai ju Cristo.
\v 24 Pus ju chavai lhuch axtꞌakniyaꞌitꞌit ju tumin. Ju chunch catapucꞌatsayach ju yuꞌunch chai ju aliꞌin lapanacni ju talhilacaꞌanta ju Cristo ni vasalh amapꞌaininin. Vachuꞌ catacꞌatsayaꞌ ni slivasalh ju xacꞌajunich acsni xaclalakꞌayayauch.
\c 9
\s1 Saccan ju tumin
\p
\v 1 Jantu tasqꞌuini ni aclajunchokoyau tuꞌuꞌ ixlacata ju tumin ju capuꞌaktaijucanaꞌ ju quilhpatinin ju talhilacaꞌanta ju Cristo ju amachakꞌan Jerusalén.
\v 2 Pus ju quitꞌin iccꞌatsai ni ixlhichux ju miꞌalhunutꞌan ju xtꞌakpꞌutꞌunatꞌit ju tumin. Chai icꞌalacjunita ju amachakꞌan Macedonia ni cꞌatach ju ixtꞌakpꞌutꞌunatꞌit ju uxijnan ju amachakꞌan xalacatꞌun Acaya untꞌatꞌit. Chai ni ixlhichux ju miꞌalhunutꞌan ju ixtꞌakpꞌutꞌunatꞌit pus na lhu ju talaktsꞌintan chai vachuꞌ tanaulh ni cataxtꞌakꞌaꞌ.
\v 3 Para ixlaquilhtu icꞌamalakachanitachan ju quiꞌalakꞌavin ni laich alakꞌasiꞌulayaꞌitꞌit ju tumin. Ju chunch caꞌuctaxtuyaꞌ tuchi icꞌajuni ju aliꞌin ni icꞌajuni ni lakꞌasiꞌulatꞌatꞌit ju tumin.
\v 4 Pus jantu xcai ni aquintatꞌaꞌancha ju amachakꞌan Macedonia. Chai jantu xcai ni catalhitajun ni jantu lakꞌasiꞌulatꞌatꞌit ju milhakꞌailaktsꞌinꞌan. Pus ju chunch na aquilamamaxaniu ni icꞌajunita ju lapanacni ni chunchach ju aꞌulhtꞌuyaꞌitꞌit. Va icnajun ni aquilamamaxaniu ni va jantu icnomputun ni vachuꞌ ju uxijnan amaxananaꞌitꞌit.
\v 5 Pus ni jantu iclacasqꞌuin ni xamatiꞌ camamaxanicalh yuchi iclhiꞌatapaininilh ju quiꞌalakꞌavinꞌan ni pꞌulhnan catalakchaꞌantachan ju uxijnan. Astanch aclalakꞌanchau ju quitꞌin. Ju chunch ju yuꞌunch cataꞌaktaijuyan ni laich alakꞌasiꞌulayaꞌitꞌit ju milhakꞌailaktsꞌinꞌan ju nontꞌatꞌit ni xtꞌakpꞌutꞌunatꞌit. Chai ju chunch catasuyach ni jantu va lacatapꞌastu ju xtꞌakꞌatꞌit. Para laꞌixlhichux ju miꞌalhunutꞌan ju xtꞌakꞌatꞌit.
\p
\v 6 Para iclajumputunau ju ani. Ju tam lapanac ju va lacatsꞌunin chꞌan ju xatꞌin pus va lacatsꞌunin ju makꞌaixtꞌokꞌa ju xatocꞌat ju ixꞌachꞌananti. Chai tam lapanac ju na lhu achꞌananan pus na lhu makꞌaixtꞌokꞌa ju xatocꞌat ju ixꞌachꞌananti. Pus vana va chun laquiꞌatsucuntiꞌan. Ju tam lapanac ni va lacatsꞌunin xtꞌakꞌa ju ixtumin pus ju Dios va lacatsꞌunin caxtakniyaꞌ ju ixkꞌachat. Para ju lapanac ju na lhu xtꞌakꞌa ju ixtumin pus ju Dios na lhu caxtakniyaꞌ ju ixkꞌachat.
\v 7 Pus ju pumatamin ju uxijnan chach xtaklh tachi ju kꞌoxich lhiulai laꞌixꞌalhunut. Jantu va lacaꞌamakꞌanit. Nin yuchi ni tachi ju va lacatapꞌastu ju caxtaklh. Ju Dios mapaini ju lapanac ju laꞌixꞌalhunut xtꞌakꞌa ju tuꞌuꞌ.
\v 8 Ju Dios na tachapun. Chai ju yuchi lai catanaviniyan lhu lamapainin. Ju chunch aktsꞌiya apꞌacxanaꞌitꞌit tachi chun ju taxtokni ju maktasqꞌuiniyatꞌit. Chai vachuꞌ lhu caꞌalinaꞌ ju lai apꞌunaviyaꞌitꞌit tachi chun ju kꞌox tachi acsni apꞌunaviniyaꞌitꞌit lamapainin ju alin ixmaktasqꞌuinitꞌan.
\v 9 Pus ju miꞌatsucuntiꞌan chunch cajunaꞌ tachi isꞌatsucunti ju lapanac ju lhichivincanta laꞌixchivinti Dios junta tsꞌokcanta junta chani najun:
\q1 Ju yuchi ma na lhu xaꞌaꞌaktaijui ju quilhpatinin.
\q1 Chai ju tuchi kꞌox ju xanavi ma pastackꞌalhican.
\m Chunch najun laꞌixchivinti Dios junta tsꞌokcanta.
\v 10 Pus Dios ju xtakni ju xatꞌin ju achꞌananaꞌ. Chai quintaxtakniyan ju xkapavati ju uyau. Chai yuchach ju cataxtakniyan chux tachi ju maktasqꞌuiniyatꞌit chai cataxtakniyan aliꞌ ni laich aꞌaktꞌaiꞌuyaꞌitꞌit ju aliꞌin ju alin ixmaktasqꞌuinitꞌan. Ju chunch na lhu laich anaviyaꞌitꞌit ju kꞌox.
\v 11 Chai ju Dios yuchi catalhixtakniyan ju mimakꞌalitꞌan ni laich apꞌuꞌaktꞌaiꞌuyaꞌitꞌit ju aliꞌin. Chai ni lhu ju aquilaxtakniyau ju mintuminꞌan ixlacata ju quilhpatinin pus na pumalhu catajunaꞌ ju Dios lakꞌailaktsꞌiuch.
\v 12 Chai acsni axtꞌakꞌaꞌitꞌit ju milhakꞌailaktsꞌinꞌan jantu va yuchi ni lai amakꞌosuniyaꞌitꞌit ju ixmaktasqꞌuinitꞌan ju vachuꞌ talhilacaꞌanta ju Cristo para vachuꞌ ixlacata yuchi na lhu catajunaꞌ lakꞌailaktsꞌiuch ju Dios.
\v 13 Chai ni axtꞌakniyaꞌitꞌit ju quilhpatinin amachakꞌan Jerusalén ju milhakꞌailaktsꞌinꞌan pus ju yuꞌunch catalakꞌayayaꞌ ju Dios ni putasui ni vasalh lacꞌaꞌiniyatꞌit ju ixchivinti Cristo tachi ju nonatꞌit. Vachuꞌ catalakꞌayayaꞌ ju Dios ni lhu xaꞌaktꞌaiꞌuyatꞌit ju yuꞌunch chai tachi chun ju aliꞌin ju vachuꞌ talhilacaꞌanta ju Jesús.
\v 14 Chai ju yuꞌunch catatapaininiyaꞌ ju Dios ju milacataꞌan. Chai vachuꞌ na catamapainiyan ju uxijnan ni na kꞌai amapaininti ju tamanaviniyan ju Dios.
\v 15 Pus vasalh chunch. Para jantu tuꞌuꞌ ixtꞌachunch cava tachi ju anuꞌ lamapainin ju quintanavinitan ju Dios acsni makꞌaxtaklh ju Jesús ju quilacataꞌan. Cajuniu lakꞌailaktsꞌiuch ju yuchi.
\c 10
\s1 Alin ixtachaput ju Pablo
\p
\v 1 Ju quitꞌin icPablo chai iclatapaininiyau. Pus ju Cristo jantu jeks ixꞌui chai kꞌox lapanac ixjunita. Chai vachuꞌ chunch icjumputun ju quitꞌin. Para ju aliꞌin lamilhiꞌuxijnan tanajun ni ma na ictalhanan acsni iclatꞌavilau. Para ju laquiꞌalhiqui ju iclaꞌatsꞌoknunitau ma na icjokꞌat.
\v 2 Iclatapaininiyau ni kꞌox atsꞌucꞌutꞌit ni jantu catasqꞌuiniyaꞌ ni aclatalacasuniyau tachi ju na va icjokꞌat acsni aclalaktsꞌinchokoyau. Alin ju quintachaput ni laich acꞌatalacasuniyaꞌ ni na icjokꞌat ju yuꞌunch ju tanajun ni va quinkꞌachat quiꞌakstu ju icnavi.
\v 3 Pus vasalh va lapanacni icjuntau para jantu iclasayau tachi ju va lhilapanac.
\v 4 Ju icpulasayau jantiyuꞌ tachi ju tapulasai ju va lapanacni. Icpulasayau ju tachaput ju quintaxtakniyan ju Dios. Chai ju chunch lai tꞌalalhajayau tachi chun ju tasastꞌucꞌa ixchivinti Dios.
\v 5 Ju lapanacni ju jantu sok taꞌalacpastacnan pus ju quitꞌin lai icꞌamasuni ni jantu soknicꞌa ju chunch. Chai ju aliꞌin sia yuꞌunch catalacaꞌiyach ixchivinti Dios. Chai alin lapanacni ju talhilaksi ju tuꞌuꞌ ju alin laꞌisꞌatsucuntiꞌan chai ju yuchi va taꞌasastucnun ni jantu talhilacaꞌamputun ju Dios. Pus ju quitꞌin lai icꞌamasuni ni jantu kꞌox ju chunch. Chai ju aliꞌin sia yuꞌunch catalacaꞌiyaꞌ ixchivinti Dios. Pus laꞌixtachaput Dios icꞌamakꞌasmatni ju aliꞌin ixchivinti Cristo chai taquiclacaꞌi ju yuchi.
\v 6 Icnajun ni acmamakꞌalhkꞌajniyaꞌ va tichi chavaich ju jantu lai lacaꞌi. Va yuchi ni cꞌacxach ni kꞌoxich aquilaquiclacaꞌiu ju uxijnan.
\p
\v 7 Alacpꞌastꞌacnantꞌit. Ja va yuchi ju naviyatꞌit cuenta tachi ju va anicꞌa tatalacasuniyan ju lapanacni. Pus ni xamatiꞌ najun ni ixꞌanuch ju Cristo junita pus chach pastacchokolh isꞌakstu. Chach cꞌatsa ni vachuꞌ ixꞌanuꞌ Cristo icjunita tachi ju yuchi ni ixꞌanuꞌ Cristo junita.
\v 8 Ju quitꞌin jantu actimaxanalh mas palai aclajunau ixlacata ju tachaput ju quixtaknita ju quiꞌucxtin Jesús. Para jantiyuꞌ ju xaquilhixtakni ju quintachaput ni va aclalakꞌalhiniyau ju miꞌatsucuntiꞌan. Alai yuchi ni aclaꞌaktaijuyau ni laich palai alhilacꞌapꞌinaꞌitꞌit ju yuchi.
\v 9 Aktsꞌiya alin ju quintachaput. Para jantu va yuchi tachi ju tanajun ni ma va anicꞌa iclamakꞌesvayauch ju laquiꞌalhiqui ju iclaꞌatsꞌoknunitauch.
\v 10 Ju yuꞌunch tanajun ni ma na tsꞌinqꞌui ju quinchivinti ju icꞌatsꞌoknun chai ma na amakꞌesvanan. Para acsni anch iclatꞌavilau ma tachi ju va jantu tuꞌuꞌ quintapalhni iclamalacasuniyau chai ma tachi ju va matich ju quintachaput.
\v 11 Pus chach tacꞌatsa ju yuꞌunch ju chunch tanajun ni aclamuctaxtunikꞌoyau chux tachi ju iclajuntau laquiꞌatsꞌoknut. Pus tuchi xaclajunau acsni jantu anch xaclatꞌavilau pus acnaviyaꞌ acsni tavanan aclalakꞌantachauch.
\p
\v 12 Ju quijnan jantu lai actinaju ni na lackꞌoxin icjuntau tachi ju yuꞌunch ni sala tanajun ni na lackꞌoxin lapanacni tajunita. Para va lhitonto tachi ju talai ni va tanajun ni va yuꞌunch ju lackꞌoxin lapanacni tajunita chai tuchi tanavi ju yuꞌunch ma va yuchi ju soknicꞌa. Jantu tuꞌuꞌ talhiulai tuchi najun ju Dios.
\v 13 Ju quijnan jantu va kꞌaya iclhitakꞌayayau ju tuꞌuꞌ lhichꞌalhcat ju jantu icnavitau. Va yuchi ju aclhitakꞌayayau ju icnavitau lacalhichꞌalhcat ju quintaxtaknitan ju Dios. Chai icquilachau junta vilhchitꞌit ju uxijnan ni chunch ju xalacasqꞌuin ju Dios.
\v 14 Jantu va kꞌaya icquilachau junta vilhchitꞌit tachi ju va jantuch quintajuntan ju Dios ni anch acchꞌalhcatnanchau. Pus acsni lacatam lacatam xacꞌantꞌonau nonin ixchivinti Dios pus quitꞌin ju pꞌulhnan xaclajunau ju uxijnan ixchivinti Dios junta vilhchitꞌit.
\v 15 Chai jantu iclhitakꞌayayau ju lhichꞌalhcat ju akꞌantam navita ni acnajuch ni quijnan ju icnavitauch. Para chani ju icpastꞌacꞌau. Acsni palai alhilacꞌapꞌinaꞌitꞌit ju Cristo pus laich aquilaꞌaktaijuyau ni laich acꞌanau alacatam para vana va anch junta aquintamalakachayan ju Dios.
\v 16 Icꞌamputunau palai lhiꞌavinti junta vilatꞌit ni laich acꞌajuniu ju lapanacni ju amachakꞌan anch ju chivinti ixlacata ju Cristo. Jantu icꞌamputunau nonin ixchivinti Dios junta tatꞌajun amalaninin ju aliꞌin chai astan acnaju ni quijnanch ju xacꞌamalanikꞌoyau chai na kꞌaich aclhicꞌatsau.
\p
\v 17 Ni xamatiꞌ lhitakꞌayaputun tuꞌuꞌ jantu calhitakꞌayalh tuchi ju navita. Alai calakꞌaya ju Dios. Calhilakꞌaya ju tuchi navita ju yuchi.
\v 18 Pus ju va lakꞌayachokocan isꞌakstu jantu nomputun ni vasalh tuꞌuꞌ xanavi. Para acsni canonaꞌ ju Dios ni kꞌox ju xanavi tam xamatiꞌ pus cꞌatsacan ni vasalh kꞌox.
\c 11
\s1 Alin ju tatalacasui tachi ju vasalh ixtamalakachan Jesús
\p
\v 1 Iccꞌatsai ni va lhitonto ni va aclhilakꞌayachokocalh quiꞌakstu. Para ixlaquilhtu slivasalh iclacasqꞌuin ni aquilakꞌasmatniuch lacatsꞌunin acsni aclakꞌayachokocanaꞌ quiꞌakstu.
\v 2 Aquilachꞌixniuch ni na iclalhacchaꞌanau ju uxijnan tachi ju Dios talhacchaꞌanan. Ju tam lapanac acsni catꞌatakꞌoxiyaꞌ ju tam tsꞌalh ni caxtakniyaꞌ ju tam istsiꞌ pus na lhistꞌacꞌa ju istsiꞌ ni jantu catꞌachivinaꞌ apumatam. Pus vana va chun ju quitꞌin. Quitꞌin ju xaclamalhilacaꞌaniyau ju uxijnan ju Cristo. Chai iclacasqꞌuin ni salaka atsꞌucꞌutꞌit laꞌixmacni tachi ju anuꞌ atsiꞌ ni salaka tsucui laꞌixmacni ju anuꞌ tsꞌalh.
\v 3 Pus ju lhacaticuru okxchokꞌolh ju Eva acsni na cꞌus atalacasunilh chai na cꞌus ju junilh. Chai ju quitꞌin na iclalhimaktalhananau. Jantu xcai ni vachuꞌ alakꞌalhinicꞌantꞌit ju miꞌatalacpastꞌacꞌatꞌan chai jantu vana ixlhichux miꞌalhunutꞌan ju alhilacꞌapꞌinaꞌitꞌit ju Cristo.
\v 4 Pus ju uxijnan kꞌasmatꞌatꞌit ju tamin nonin atumpa chivinti ixlacata ju Cristo. Jantiyuꞌ tachi ju iclajuntauch ju quijnan. Chai ju uxijnan lakꞌaꞌiyatꞌit acsni tasui lamiꞌatsucuntiꞌan ixtachaput akꞌantam. Jantiyuꞌ ju anuꞌ Spiritu Santu ju tanun lamiꞌalhunutꞌan. Chai kꞌasmatꞌatꞌit acsni tajunan atumpa chivinti. Jantiyuꞌ ju chivinti ixlacata ju Cristo ju iclajuntauch ju quijnan. Pus yuchi iclalhijunau ni vachuꞌ tasqꞌuini ni aquilakꞌasmatniuch ju quitꞌin.
\v 5 Pus ju anuch lapanacni ju chꞌakꞌokꞌayatꞌit tanajun ni yuꞌunch ju xalackꞌajin ixtamalakachan ju Jesús. Palai jantu ju quitꞌin. Para jantu lai actinaulh ni palai xalackꞌajin tajunita ju yuꞌunch.
\v 6 Mas jantu lai kꞌox icchivinin tachi ju yuꞌunch para icmachakxai ju ixtaxtokni Dios. Chai ju uxijnan pꞌucꞌatsꞌatꞌit ni vasalh icmachakxai ixtaxtokni Dios acsni iclajuntau ixchivinti.
\p
\v 7 Pus tꞌas nonatꞌit. Ja alactuꞌunti ju icnavita ni jantu iclhitakꞌaya acsni iclajuniu ixchivinti Dios chai jantu iclajuniu ni aquilaxtakniyau ju tuꞌuch ixlacata ju quimaktasqꞌuinit. Alai va quiꞌakstu icchꞌalhcatnalh ixlacata ju quimaktasqꞌuinit ni laich palai aclaꞌaktaijuyau laꞌixchivinti Dios.
\v 8 Icꞌamaklhtayanalh ju ixtuminꞌan ju aliꞌin lapanacni ju vachuꞌ talhilacaꞌanta Jesús ni laich aclajunau ju ixchivinti Dios ju uxijnan.
\v 9 Chai mas aktamixnin na ixꞌalin ju quimaktasqꞌuinit para acsni xaclatꞌavilau ju uxijnan jantu xamatiꞌ ju milhiꞌuxijnan ju xacsqꞌuini tuꞌuꞌ. Alai yuꞌunchach ju quiꞌalakꞌavinꞌan ju xataminacha ju xalacatꞌun Macedonia quintaxtaknilh ju tuchi xacmaktasqꞌuini. Jantu tavanan tuꞌuꞌ xaclasqꞌuinitau ju uxijnan chai chunchach ju actailhiꞌankꞌalhiyaꞌ.
\v 10 Ju Cristo cꞌatsai ni icnajun ju stavasalanti. Pus ju quitꞌin na kꞌoxich iclhiulai ni jantu tavanan iclasqꞌuiniu tuꞌuꞌ ju uxijnan amachakꞌan xalacatꞌun Acaya. Chai jantu tavanan lai xamatiꞌ catinaulh ni icꞌamaklhtayanalh ju mintuminꞌan.
\v 11 Chai jantiyuꞌ ni va jantu iclamapainiyau chai yuchi jantu iclhiꞌamaklhtayanamputun ju mintuminꞌan. Dios kꞌox cꞌatsai ni na iclamapainiyau.
\p
\v 12 Pus tachi ju icnavi actailhiꞌanach. Ju chunch acpuꞌachakxmamactaniyaꞌ ju ixchivintiꞌan ju yuꞌunch ju quintapuxconiputun ju quintalakꞌalhin. Ju yuꞌunch tanajun ni taꞌamaklhtayanan ixtalhajaꞌan ni ixtamalakachan Jesús tajunita. Para jantu lai aquintitamalani ni vana va chun aclalh va ixlacaꞌatalh ni tanajun ni chunch catapucꞌatsayaꞌ ju lapanacni ni vasalh ixtamalakachan Jesús icjunita.
\v 13 Pus ju yuꞌunch jantu vasalh ixtamalakachan Jesús tajunita. Ju yuꞌunch va taꞌaꞌokxchokꞌonun chai va tatalacasui tachi ju vasalh ixtamalakachan Jesús mas jantu.
\v 14 Para jantu alhamakꞌaninintꞌit ni alin ju lapanacni ju chunch talai. Pus mas yuchi ju lhacaticuru talacasui tachi ju ixꞌanquilh Dios ju tꞌajun lacaꞌatuncunuꞌ.
\v 15 Chai ni chunchach ju lai ju yuchi pus jantu alhamakꞌaninintꞌit ni vana va chun talai ju ixlapanacni. Vachuꞌ tatalacasui tachi ju ixnavini soknicꞌa mas jantu. Para laꞌixꞌaclanti ju isꞌatsucuntiꞌan caꞌamacaꞌancanaꞌ junta lhijun ni cataꞌalh ni jantu vasalh ixtanavi ju soknicꞌa.
\s1 Na lhu xamakꞌalhkꞌajnan ju Pablo
\p
\v 16 Aktam iclajunchokopalauch ni jantu iclacasqꞌuin ni xamatiꞌ canaulh ni va ictonto ni va iclakꞌayachokoputuncan lacatsꞌunin laquiꞌakstu. Para mas chunch quilalaktsꞌinau aquilakꞌasmatniuch ju tonto quinchivinti.
\v 17 Ju tuchi acnonaꞌ jantu chun tachi ju tachivinin ju chꞌakꞌokꞌai ju Jesús. Alai icchivinin tachi ju tam tonto acsni iclajunau ni vachuꞌ icxakꞌaich.
\v 18 Pus na pumalhu ju talhitakꞌayachokoi isꞌakstuꞌan ni tanajun ni jantu va tam xamatiꞌ ju yuꞌunch. Pus ni chunch ju talai ju yuꞌunch pus vachuꞌ aclakꞌayachokocanaꞌ quiꞌakstu.
\v 19 Pus ju uxijnan ni sala na acꞌatsꞌanantꞌatꞌit pus alhilakꞌaꞌitꞌit ju quilhitonto.
\v 20 Alaktsꞌintꞌitch. Ju uxijnan lakꞌaꞌiyatꞌit ni xamatiꞌ va xalapanac tanaviyan chai acsni taꞌokxchokꞌotaiꞌiniyan ju mintuminꞌan. Lakꞌaꞌiyatꞌit acsni taꞌokxchokꞌoyan chai acsni xamatiꞌ tatalacasuniyan tachi tam xakꞌai mas jantu. Chai lakꞌaꞌiyatꞌit acsni xamatiꞌ talakxtansayan.
\v 21 Pus ju quitꞌin icnajun ni lana jantu lai xaclanaviyau ju chunch.
\p Para ni alin ju tuꞌuꞌ laꞌisꞌatsucuntiꞌan ju talhitakꞌayai pus vachuꞌ ju quitꞌin. Alin ju tuchi lai aclhitakꞌayayaꞌ. Ju quitꞌin icchivinin tachi ju tam tonto.
\v 22 Ju yuꞌunch ja hebreonin tajunita. Pus vachuꞌ ju quitꞌin. Ju yuꞌunch ja israelitanin tajunita. Pus vachuꞌ ju quitꞌin. Ju yuꞌunch ja makꞌaniya ixꞌapapanatnich ju Abraham tajunita. Pus vachuꞌ ju quitꞌin.
\v 23 Ju yuꞌunch ja ixlapanacni Cristo. Pus ju quitꞌin palai lhu icnavita ixlhichꞌalhcat ju Cristo. Palai jantu ju yuꞌunch. Para acsni icnajun ju chunch va icchivinin tachi ju va iclakachapui. Pus ju quitꞌin slivasalh lhu ju icchꞌalhcatnanita ju Dios. Na paklhu ju iclakanekmacanta. Chai lana na kꞌox paklhu ju ictꞌalhnucanta. Chai na paklhu ju xacmakniputuncan.
\v 24 Pakquis quintachꞌapalh ju quintꞌaꞌisraelitanin chai ju paktamin pakpꞌuxamcaunajatsan ju xaquintanekꞌe lacaꞌaxtakꞌan.
\v 25 Chai paktꞌutu xacꞌulanicanta lacasnivenkꞌe qꞌuiu. Chai paktam xaclacatꞌalhmacanta. Paktꞌutu takꞌalhilh ju barco ju xacpuꞌanta chai xcayama ictakꞌalhtaxtulh. Chai tam atatsꞌisni a tam avilhchan xactꞌajun junta talhman lacaꞌalama.
\v 26 Na kankalhu ju icꞌalhtananta ju lacati. Chai na paklhu xcayama ictapasalh lacatalhavanaxcan. Chai icꞌalhtanalh junta na lhitalhan ixjunita ni na ixtaꞌalin ju akꞌalhonin. Vachuꞌ va xcayama ictakꞌalhtaxtulh acsni xaquintamakniputun ju quintꞌaꞌisraelitanin chai acsni xaquintamakniputun ju yuꞌunch ju jantu israelitanin tajunita. Chai aktamixnin xacmakniputuncan acsni xacvi ju lakꞌachakꞌan. Chai aktamixnin va xcayama ictakꞌalhtaxtulh junta va apakniu ixjunita chai vachuꞌ acsni xacꞌanta lacabarco lacaꞌalama. Chai aktamixnin va xcayama ictakꞌalhtaxtulh acsni xaquintamakniputun ju jantu vasalh quilhiꞌalakꞌavin laꞌixmacni Cristo mas chunch ixtatalacasuputun.
\v 27 Na lhu xacchꞌalhcatnan laquimacaꞌ chai na xacmakꞌalhkꞌajnan. Na paklhu xackꞌalhcujta chai na paklhu xacchavatꞌajun chai xacquicxixtꞌajun. Na paklhu matich ixjunita tuchi acꞌulh. Icmakꞌalhkꞌajnalh lacalhicꞌasnin chai acsni jantu lhu ixjunita ju quimpumpuꞌ.
\p
\v 28 Chai jantu va yuchi ni iclhimakꞌalhkꞌajnanta laquilacatuna. Para vachuꞌ tuncujun tuncujun slivasalh na lhu alin ju quiꞌatalacpastꞌacꞌat acsni icpuxcajui ta yu laich acꞌaꞌaktaijuyaꞌ tachi chun ju talhilacaꞌanta ju Cristo.
\v 29 Ni alin xamatiꞌ ju jantucaꞌ kꞌox machakxai ju ixchivinti Dios pus ja jantu vachuꞌ icmachakxai ta yu cꞌatsan chai na quilhixcani ju quiꞌalhunut. Ni alin xamatiꞌ ju makꞌalhkꞌosucan ja jantu quitꞌin ju na ictalhkꞌamni ju amakꞌalhkꞌosunuꞌ.
\v 30 Pus ni tasqꞌuini ni aclhitakꞌaya tuꞌuꞌ pus aclhitakꞌayayaꞌ ju putasui ni matich ju quintachaput.
\v 31 Calakꞌayakꞌalhicanaꞌ ju isDios chai ixpai ju quiꞌucxtinꞌan Jesucristo. Chai ju yuchi kꞌoxich cꞌatsai ni jantu ictaꞌaklhtamai acsni icnajun tachi ju iclajuntau.
\v 32 Pus acsni xacvilhcha ju lakꞌachakꞌan Damasco pus ju ixgobernador ju xakꞌai ucxtin Aretas lhinaulh ixlhistꞌacꞌa ju lakꞌachakꞌan ni va xaquinchꞌapaputunch.
\v 33 Para ixꞌalin ju lacchakaꞌ ju ixtatꞌalachꞌapata ju xakꞌex ju lakꞌachakꞌan. Pus ictakꞌalhtaxtulh acsni icputaxtulh laxaventana lakatam chakaꞌ ju ixtꞌalachꞌapata ju kꞌex chai ictajulh lacakꞌai malhavacalh. Chai ju aliꞌin quintamakꞌalhtaju. Chai chunch ju icputakꞌalhtaxtulh acsni xaquimakniputun ju anuꞌ gobernador.
\c 12
\s1 Junima yuchi ju amasunicalh ju Pablo
\p
\v 1 Jantu tuꞌuꞌ icpulhajai ni iclakꞌayachokocan quiꞌakstu. Para ixlaquilhtu aclalhijunau ju chavai ju tuchi iclaktsꞌintach tachi ju va laquilhtatat chai ju tuchi quimacꞌatsanitach ju quiꞌucxtin Jesús.
\v 2 Laꞌixtachaput ju Cristo tapasalh ju ani ju aclajunau. Pus ju chavai tapasata lakacautꞌatꞌi cꞌata ju xaclhiꞌancanta ju lactꞌiyan. Ju quitꞌin jantu iccꞌatsai u va yuchi ju quintacuvin ju quilalh ju lactꞌiyan u chux ju quilacatuna ju quilalh. Va yuchi ju Dios ju cꞌatsai.
\v 3 Para ju quitꞌin iccꞌatsai ni xaclhiꞌancanta ju lactꞌiyan. Chai acsni iclhiꞌancalh ju anch jantu iccꞌatsai u va yuchi ju quintacuvin ju quilalh ju lactꞌiyan u chux ju quilacatuna ju quilalh. Va yuchi ju Dios ju cꞌatsai.
\v 4 Chai acsni iclhiꞌancalh ju talaclhman junta paraíso juncan pus anch ickꞌasmatcha ju chivinti ju jantu xalacasqꞌuin ju Dios ni xamatiꞌ acjunilh.
\v 5 Ju quitꞌin aclakꞌayachokocanaꞌ quiꞌakstu ixlacata ju tuchi xaquinavi ju Dios. Para ju va tuꞌuch ju icnavita quiꞌakstu jantu actilhitakꞌaya. Va yuchi aclhitakꞌayayaꞌ ju putasui ni matich ju quintachaput.
\v 6 Mas aclakꞌayachokocalh quiꞌakstu jantu lai va tonto activa va ixlacaꞌatalh ni yuchi ju stavasalanti ju acnaulh. Para jantu chun actilalh ni jantu iclacasqꞌuin ni xamatiꞌ palai aquilakꞌaya va ixlacata ju ani quinchivinti ju iclajunau. Va iclacasqꞌuin ni catacꞌatsa ni chunch icjunita tachi ju quintalaktsꞌin chai tachi ju quintakꞌasmatni.
\p
\v 7 Chai ni slivasalh na cꞌus ixjunita ju xaquimalacasuni ju Dios ju lactꞌiyan pus vachuꞌ lakꞌaꞌi ni acxtaknicalh lakatam makꞌalhkꞌajnat ju na quixcani tachi acsni tanun tuꞌuꞌ alhtucunuꞌ laquiꞌacanitꞌan. Ju chunch jantu lai actilhitakꞌaya tachi ju jantu lhijun ju tuchi xaquimasuni ju Dios. Chai vachuꞌ ju yuchi va tachi aquimapastꞌacꞌani ni va lapanac icjunita. Lakꞌaꞌinicalh ju lhacaticuru ni yuchi ju aquixtaknilh ju ani makꞌalhkꞌajnat.
\v 8 Pus paktꞌutu ictapaininilh ju quiꞌucxtin Jesús ni aquimakꞌosunilh ju ani makꞌalhkꞌajnat.
\v 9 Para ju yuchi chani quijuni: “Ju quitꞌin va tachi acꞌaktaijuyan laquiꞌamapaininti. Acsni va matich ju mintachaput pus acsnich ju tasui ni na ictachapun ju quitꞌin ni icꞌaktaijuyan”. Chunch ju xaquijuni. Chai ni chunch pus lhikꞌach acmakꞌalhkꞌajnanaꞌ ni laich caputasuyach laquiꞌatsucunti ixtachaput ju Dios.
\v 10 Yuchi iclhikꞌachan acsni lana matich ju quintachaput ni lai acnavilh ju tuꞌuꞌ chai acsni macxcai quintalhichivinin ju lapanacni va ixlacaꞌatalh ni icchꞌakꞌokꞌai ju Cristo. Vachuꞌ iclhikꞌachan acsni lana matiꞌ ju quintuꞌuꞌ chai acsni na quintalhixcajich ju lapanacni chai acsni na icmakꞌalhkꞌajnan va ixlacaꞌatalh ni icchꞌakꞌokꞌai ju Cristo. Pus acsni lana matich ju quintachaput pus acsnich ju quixtakni ju ixtachaput ju Dios chai yuchi iclhikꞌachan acsni icmakꞌalhkꞌajnan.
\s1 Ju Pablo alhamakꞌaninin ju amachakꞌan Corinto ju talhilacaꞌanta ju Jesús
\p
\v 11 Tachi ju va tonto icchivinin ni iclakꞌayachokocan quiꞌakstu. Para istasqꞌuini ni chunch aclalh ni lana tachi ju va jantu tuꞌuꞌ quilalhiulayau. Palai kꞌox ixva ni vas ixnaꞌuntꞌit ni vachuꞌ ixlapanac ju Cristo icjunita. Pus ju quitꞌin mas lana jantu tuꞌuꞌ ju quintapalhni ju va laquiꞌakstu para jantu tuꞌuꞌ quincꞌacxni ni lai xamatiꞌ canaulh ni jantu vachuꞌ ixtamalakachan Cristo icjunita tachi ju yuꞌunch ju tatalacasuniyan tachi ju va xalackꞌajin ixtamalakachan ju Cristo tajunita.
\v 12 Acsni xaclatꞌavilhchau lana istasui ni vasalh ixtamalakachan ju Cristo icjunta. Ju uxijnan laktsꞌintꞌit ni xacchꞌixkꞌojui tachi chun ju macxai ju ixꞌalin laquiꞌatsucunti. Chai xacnavi ju tuꞌuꞌ ju laich catapucꞌatsa ju lapanacni ni vasalh Dios ju xaquimalakachayachilh chai xacnavi ju tuꞌuꞌ lhamakꞌan chai ju tuꞌuꞌ ju istasui ni laꞌixtachaput Dios ju xacchꞌalhcatnan.
\v 13 Jantu tuꞌuꞌ icnavita ju alacatam ju jantu icnavita lamilhiꞌuxijnanꞌan vachuꞌ. Va yuchi ni jantu xaclamaklhtaitauch tuꞌuꞌ ju uxijnan tachi ju xacꞌamaklhtajita ju aliꞌin. Lamapainin aquilamacꞌacxaniuch junima talakꞌalhin.
\p
\v 14 Ju chavai iclakasivi ni icnajun ni ixlaktꞌutuch aclalakꞌantachauch ju uxijnan. Chai lana icnajun ni jantu tuꞌuꞌ aclasqꞌuiniyau ju uxijnan. Chunch icnaviputun ni jantiyuꞌ ju mintuminꞌan ju icpuxcajui. Alai va iclacasqꞌuin ni atꞌakꞌalhtꞌaxtꞌuyaꞌitꞌit ju uxijnan. Pus tachi ju lacan ju ani lacamunutpaꞌ jantiyuꞌ ju tam askꞌatꞌa ju xtakni ju tuchi maktasqꞌuini ju tam ixpai. Alai yuchi ju xapai ju xtakni ju tuchi maktasqꞌuini ju tam isꞌaskꞌatꞌa. Pus vana va chun ju quitꞌin. Iclaꞌaktaijuputunau ni tachi ju va quiꞌaskꞌatꞌan iclalhiulayau laꞌixmacni Cristo.
\v 15 Ju quitꞌin lacalhikꞌach acmacaꞌanaꞌ ju quintumin chai mas chux quiꞌatsucunti aclhitapꞌuxputunach va ixlacaꞌatalh ni iclacasqꞌuin ni alhilacꞌapꞌitꞌit ju Cristo. Chunch aclayaꞌ mas tasui tachi ju va palai jantu tuꞌuꞌ quilalhiulayau ju quitꞌin acsni slivasalh na tuꞌuꞌ iclalhiulayau ju uxijnan.
\p
\v 16 Para mas jantu tuꞌuꞌ xaclasqꞌuiniyau ju uxijnan para ju aliꞌin lamilhiꞌuxijnan tanajun ni va iclaꞌokxchokꞌomaxtuniu ju mintuminꞌan acsni iclamalakachanichau ju aliꞌin quiꞌalakꞌavinꞌan.
\v 17 Tachi chun ju iclamalakachanichau jantu xamatiꞌ xataꞌokxchokꞌomaxtuniyan ju mintuminꞌan.
\v 18 Ictapaininilh ju Tito ni catalakꞌanchan. Chai ictꞌamalakachacha apumatam quilhilakꞌauꞌan. Chai ju uxijnan cꞌatsꞌayatꞌit ni jantu xataꞌokxchokꞌomaxtuniyan ju mintuminꞌan. Cꞌatsꞌayatꞌit ni va ixtꞌachunch ju ixꞌalhunut ju Tito tachi ju quiꞌalhunut. Chai va ixtꞌachunch ju chꞌalhcatnan ju yuchi tachi ju quitꞌin.
\p
\v 19 Ca va nonchꞌokꞌopꞌalatꞌit ni va iclacasqꞌuin ni anonaꞌitꞌit ju uxijnan ni matiꞌ ju quintalakꞌalhin. Para jantu. Ju quitꞌin ni iclhilaksita ju Cristo pus va yuchi ju Dios ju iclacasqꞌuin ni canaulh ni matiꞌ ju quintalakꞌalhin. Pus tachi chun ju icnavi ji quiꞌalakꞌavin si icnavi ni palai lai alhilacꞌapꞌitꞌit ju Jesús.
\v 20 Pus ju quitꞌin na iclalhamakꞌanininau. Pus acsni tavanan acchaꞌananta jantu xcai ni aclalhitaju ju uxijnan tachi ju jantu iclacasqꞌuin. Chai ju chun tasqꞌuini ni aclalh tachi ju jantu kꞌox alhiulayaꞌitꞌit. Jantu xcai ni vana alaclakꞌaꞌitꞌit chai alaclalhacchipꞌinitꞌit tuꞌuꞌ chai alaclamaktꞌalhkꞌamantꞌit. Jantu xcai ni alaclasatꞌit chai macxcai chivinti alaclaꞌunitꞌit chai alapꞌuxcꞌonitꞌit ju talakꞌalhin. Jantu xcai ni kꞌai acꞌatsꞌatꞌit chai lana jantu alalacꞌaꞌiniyatꞌit.
\v 21 Acsni aclalakꞌanchokopalhtachau chai aclalhitajuyau ni chunch ju layatꞌit pus na aquimamaxanilh ju Dios ni vanach alactuꞌununatꞌit ju uxijnan. Slivasalh acꞌamakꞌanininaꞌ ni va caꞌalilh ju aliꞌin ju taꞌalactuꞌununta para jantu tavanan tamacajunta ju ixꞌalactuꞌuntiꞌan. Ju aliꞌin tatꞌatsucui ju jantu ixꞌamachakaꞌan u jantu ixpapaꞌan. Chai ju aliꞌin tatailhiꞌanta tachi ju aktsꞌiyach ixlantichꞌan.
\c 13
\s1 Amacꞌaminin ju Pablo
\p
\v 1 Ju chavai ixlhipaktꞌutuch ju aclalakꞌantachauch. Chai ju acsnich acꞌamucꞌaniyaꞌ ixtalakꞌalhinꞌan ju lapanacni para va acsni alin pumatꞌui u pumatꞌutu lapanacni ju vasalh talaktsꞌinta acsni tavanan taꞌalactuꞌunulh.
\v 2 Tachi ju iclajuntau ixlacata ju yuꞌunch ju na ixtaꞌalactuꞌunun acsni xaclatꞌavilhchau ju ixlhipaktꞌui pus vana va chun ju iclajunchokopalau ju chavai mas jantu anch iclatꞌavilau. Icꞌajunich ju yuꞌunch ju vanach na taꞌalactuꞌunun ni jantu xamatiꞌ ju sia yuꞌunch catakꞌalhtaxtuyaꞌ acsni tavanan aclalakꞌanchokotachau.
\v 3 Chunch ju acnaviyaꞌ ni va quilapuxconiyau ta yu laich apꞌucꞌatsꞌayaꞌitꞌit ni vasalh ixchivinti Cristo ju iclajunau. Jantu lai atꞌinaꞌuntꞌit ni jantu tamasunitan ju ixtachaput ju Cristo. Ju yuchi na lhu tamasunitan ju ixtachaput lamilhiꞌuxijnan.
\v 4 Ju Cristo acsni tavanan maquilhtacalh ju lacacurus va lhilakꞌaꞌilh ni catasu tachi ju va matich ju ixtachaput ixjunita. Para ju chavai ju yuchi tꞌajun laꞌixtachaput ju Dios. Pus vana va chun ju quitꞌin. Ju uxijnan quilalaktsꞌinau tachi ju va matich ju quintachaput ju quitꞌin. Para ni iclhilaksita ju yuchi pus alaktsꞌinaꞌitꞌit ni vasalh laꞌixtachaput ju Dios ju icchꞌalhcatnan acsni tavanan aclalakꞌantachau.
\p
\v 5 Alaktsꞌintꞌanuchꞌokꞌocꞌantꞌit miꞌakstuꞌan. Acꞌatsꞌatꞌit ni vasalh lhilacꞌapꞌinatꞌit ju Cristo u jantu. Ja va jantu cꞌatsꞌayatꞌit ni tꞌajun ju Jesucristo lamiꞌalhunutꞌan ni vasalh lhilacꞌapꞌinatꞌit ju yuchi. Para ni jantu pus jantu tꞌajun ju yuchi lamiꞌalhunutꞌan.
\v 6 Pus mas cꞌatsꞌayatꞌit ni lhilacꞌapꞌinatꞌit ju Cristo u jantu para iclacasqꞌuin ni acꞌatsꞌatꞌit ni vasalh ixtamalakachan ju Cristo ju quitꞌin.
\v 7 Ju quitꞌin ictapainini ju Dios ni jantu anavitꞌit tuꞌuꞌ macxcai. Para jantu icpunajun chunch ni acpulakꞌayacalh quiꞌakstu. Alinch ju quintachaput ni laich aclalakꞌakꞌaimayau ni alactꞌuꞌununatꞌit. Para palai kꞌox cava ni sok atsꞌucꞌuyaꞌitꞌit mas aquilalaktsꞌinau ju quitꞌin tachi ju va matich ju quintachaput ni matiꞌ tuꞌuꞌ ju lai aclalhilakꞌakꞌaimau.
\v 8 Pus ju quitꞌin va yuchi ju kꞌox ju aclanaviniyau ni naviyatꞌit tachi ju najun laꞌixchivinti Dios. Chai ju yuchi stavasalanti. Va acsnich ju lai aclalakꞌakꞌaimayau ni va jantu anavitꞌit tachi ju najun ju anch.
\v 9 Na iclhikꞌachan acsni tasui lamiꞌatsucuntiꞌan ni ixlhichux ju miꞌalhunutꞌan ju lhilacꞌapꞌinatꞌit ju Cristo mas lai aquilalaktsꞌinau ju chunch tachi ju va matich ju quintachaput laꞌixmacni Cristo ni jantu tuꞌuꞌ alin ju lai aclalhilakꞌakꞌaimayau. Chai vachuꞌ ictapainini ju Dios ni lana soknicꞌa cajunaꞌ ju miꞌatsucuntiꞌan.
\v 10 Pus ni jantu anch iclatꞌavilau pus va iclaꞌatsꞌoknuniyau ju ani chivinti. Ju chunch acsni tavanan aclalaktsꞌintachau ta tsꞌa jantu lakꞌoxikꞌotꞌatꞌit ju lhamakꞌan chai jantu catasqꞌuiniyaꞌ ni aclalakꞌakꞌaimayau. Jantu catasqꞌuiniyaꞌ ni aclamalacasuniyau ju tachaput ju quixtaknita ju quiꞌucxtin Jesús. Para ju yuchi quixtaknilh ju quintachaput ni laich aclaꞌaktaijuyau. Jantiyuꞌ ni va aclalakꞌalhiniyau ju miꞌatsucuntiꞌan.
\p
\v 11 Pus va yuchi ju ani iclajumputunau ji quiꞌalakꞌavin. Alakꞌoxitꞌit ju lhamakꞌan ju alin lamilhiꞌuxijnanꞌan. Alamapꞌaksitꞌit. Va lakatam aꞌuntꞌit. Jantu va alaclakꞌaꞌitꞌit. Ju chunch ju Dios catatꞌatolanch. Yuchach ju cataꞌaktaijuyan ni alamapꞌainiyaꞌitꞌit chai ni jantu alalakꞌaꞌitꞌit.
\v 12 Alamacꞌamitꞌitch pumatamin pumatamin. Va kꞌoxich alamacꞌamitꞌit tachi ju lhijunch ni lhiꞌalakꞌavin untꞌatꞌit.
\v 13 Tachi chun ju lapanacni ju ani tavilanalh ju talhilacaꞌanta ju Cristo tamacꞌamiyan.
\p
\v 14 Ictapainini ju quiꞌucxtinꞌan Jesucristo ni va tachi catanaviniyan lamapainin. Chai ictapainini ju quimpaiꞌan Dios ni catamasuniyan ju ixꞌamapaininti. Chai ictapainini ju Spiritu Santu ni na miꞌamigoꞌan cajunaꞌ. Vasalh chunch ictapainini.