\id GAL
\ide UTF8
\h GALACIA
\toc1 GALACIA
\mt1 JU ALHIQUI JU ATSꞌOKNUNICALH JU AMACHAKꞌAN GALACIA
\c 1
\s1 Ju Pablo amacꞌami ju amachakꞌan Galacia
\p
\v 1 Ju quitꞌin icPablo. Ixtamalakachan Jesús icjunita. Jantu quintꞌalapanacni ju quintamalakachatachilh nin pumatam quintꞌalapanac ju quisacxtuta ni ixtamalakachan Jesús acva. Alai yuꞌunch ju Jesucristo chai quimpaiꞌan Dios ju quintamalakachatachilh. Yuchi ju Dios ju malokꞌonichokolh ju Jesús laꞌixꞌaninti.
\v 2 Pus ju quitꞌin chai tachi chun ju lhiꞌalakꞌavin ju quintatꞌavi iclamacꞌamiyau tachi chun ju uxijnan ju lhilacꞌapꞌinatꞌit ju Jesús ju vilhchitꞌit ju xalacatꞌun Galacia.
\v 3 Icꞌatapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
\v 4 Pus ju Jesucristo tamakꞌaxtakchokolh isꞌakstu ixlacata quiꞌalactuꞌuntiꞌan. Chai chunch ju lalh ni laich aquintamakꞌalhtaxtuyan ju ani lacamunutpaꞌ junta na lhu alin ju alactuꞌunti. Chai chunch ju lalh ju Jesús ni chunch ju ixlacasqꞌuinta ju quimpaiꞌan Dios.
\v 5 Chach lakꞌayacalhch ju yuchi tus va tavananch. Vasalh iclacasqꞌuin ni chunch ju caꞌulhtucalh.
\s1 Matiꞌ atumpa ju lai aquintamakꞌalhtaxtun
\p
\v 6 Na iclhamakꞌaninin ni vatsꞌalhti xamacꞌonatꞌit ju Dios. Laich xalacꞌaꞌiyatꞌit atumpa chivinti chai nonatꞌit ni amakꞌalhtꞌaxtꞌucꞌanaꞌitꞌit ni alacꞌaꞌiyaꞌitꞌit ju chunch. Laich chunch xalayatꞌit mas tasacxtutan ju Dios va ixlacaꞌatalh ni tanavinitan kꞌai lamapainin ju Cristo.
\v 7 Para jantu vasalh ni caꞌalilh tuꞌuꞌ atumpa chivinti ju aquintajunan ta yu laich catakꞌalhtaxtu. Va yuchi ni taꞌalin ju lapanacni ju talakꞌalhiniputunan ju miꞌatalacpastꞌacꞌatꞌan. Ju yuꞌunch va tamapaxaputun ju ixchivinti Dios ixlacata ju Cristo.
\v 8 Para ju Dios caxcayaꞌ va tichi cavalhch ju laich catajunan atumpa chivinti junta tajunan ni alin atumpa ju apꞌutꞌakꞌalhtꞌaxtꞌuyaꞌitꞌit. Jantiyuꞌ tachi ju iclajuntauch ju quitꞌin. Pus ni caꞌalilh tam xamatiꞌ ju chunch calalh pus ju Dios caxcailh. Mas quitꞌin cava u mas camincha lactꞌiyan pumatam anquilh ju chunch catajunin.
\v 9 Pus ju chavai aclajunchokoyau aktam tachi ju xaclajunau makꞌanchich. Ni xamatiꞌ catajunan atumpa chivinti ni jantiyuꞌ tachi ju aktsꞌiya lacꞌaꞌitꞌatꞌit pus ju Dios caxcayaꞌ.
\p
\v 10 Pus ni icnajun ju chunch pus lana tasui ni iclacasqꞌuin ni yuchi ju Dios ju kꞌox aquilhiula. Jantiyuꞌ ni va kꞌox aquintalhiula ju quintꞌalapanacni. Chai putasui ni jantiyuꞌ ju quintꞌalapanacni ju icꞌanaviniputun ixkꞌachatꞌan. Pus ni va acꞌanavinilh cava ju ixkꞌachatꞌan ju quintꞌalapanacni pus jantu ixlapanac ju Cristo acva.
\s1 Chani ju pujunlh ixtamalakachan Jesús ju Pablo
\p
\v 11 Pus ji quiꞌalakꞌavin iclacasqꞌuin ni acꞌatsꞌatꞌit ni jantu va ixchivinti ju va tam lapanac ju iclajuntauch acsni iclajuntau ta yu laich atꞌakꞌalhtꞌaxtꞌuyaꞌitꞌit.
\v 12 Pus jantu xamatiꞌ tam quintꞌalapanacꞌan ju quijunilh ju anuꞌ chivinti. Nin yuchi ni va tam lapanac cava ju quimalanilh. Alai isꞌakstu ju Jesucristo ju quimavasalanilh ju anuꞌ chivinti.
\p
\v 13 Ju uxijnan kꞌasmatꞌatꞌit ta yu ixjunita ju quiꞌatsucunti ju makꞌanchich acsni xaclacaꞌi tachi ju talacaꞌi ju quintꞌaꞌisraelitanin. Cꞌatsꞌayatꞌit ni slivasalh na xacꞌalhimakchapui ju ixtalhilacaꞌanta ju Cristo. Tus xacnajunta ni xacꞌamaknikꞌo.
\v 14 Chai palai xacmuctaxtui laꞌixꞌatalanintiꞌan ju quintꞌaꞌisraelitanin. Palai jantu ju aliꞌin tsꞌalan ju quintꞌatsucunin ixtajunita. Pus palai xacnaviputun tachi ju quintamalanitan ju quilacpaꞌitni quincꞌan. Palai jantu ju aliꞌin.
\v 15-16 Pus ju Dios quisacxtulh acsni tucaꞌ xactsucui. Chai va ixlacata ni na kꞌai ju ixꞌamapaininti pus yuchi astan quilhilhcaꞌula ni ixtamalakachan acva. Pus chilh avilhchan acsni lacasqꞌuilh ju Dios ni acmispalh ju istsꞌalh ni laich aclajunau ju uxijnan ju jantu israelitanin untꞌatꞌit ta yu laich atꞌakꞌalhtꞌaxtꞌuyaꞌitꞌit. Pus ju acsnich lana jantu xamatiꞌ ju va quintꞌalapanac ju icsqꞌuinilh lamapainin ni aquijunilh ni kꞌox ju acnaviyaꞌ u jantu.
\v 17 Nin yuchi ni acꞌalh ju lakꞌachakꞌan Jerusalén alaktsꞌiniꞌ ju yuꞌunch ju ixtamalakachan Jesús ixtajunita. Jantu icꞌalactꞌachivinilh mas pꞌulhnan asacxtucalh ju yuꞌunch ni ixtamalakachan catava. Astan ju quitꞌin. Alai ictaxtulh ju lakꞌachakꞌan Damasco. Chai icquitolhcha pantsꞌiquis ju xalacatꞌun Arabia. Astan icminchokolh ju lakꞌachakꞌan Damasco.
\p
\v 18 Tus acsni taꞌaktsalh lakatꞌutu cꞌata acsnicaꞌ ju icquilalh ju lakꞌachakꞌan Jerusalén. Va icꞌalh laktsꞌiniꞌ ju Pitaluꞌ juncan chai ictꞌatolhcha lakacauquis avilhchan.
\v 19 Para jantu iclaktsꞌincha xamatiꞌ akꞌantam ixtamalakachan Jesús. Va yuchi ju Jacobo ispꞌisekꞌe ju quiꞌucxtinꞌan Jesús.
\v 20 Pus Dios cꞌatsai ni stavasalanti tachi chun ju ani ju iclaꞌatsꞌoknunitau. Jantu va iclaꞌokxchokꞌoyau.
\p
\v 21 Pus ju astan icꞌampa ju xalacatꞌun ju Siria chai ju xalacatꞌun ju Cilicia.
\v 22 Pus jantu xaquintamispai ju ixtalhilacaꞌanta ju Cristo ju ixtavilanancha ju xaꞌestado Judea.
\v 23 Va yuchi ni ixtakꞌasmatꞌach ni icꞌajunilh ju lapanacni ju chavai ni catalhilacaꞌalh ju Jesús mas na xacmamactaputunch ju chunch chivinti ju makꞌanchich. Mas na xacꞌalhimakchapui ju makꞌanchich ju ixtalhilacaꞌanta ju chunch.
\v 24 Pus ni takꞌasmatlh ju chunch pus na ixtalakꞌayai ju Dios ni tam xajun ju quiꞌatsucunti.
\c 2
\s1 Ju aliꞌin ixtamalakachan Jesús lhikꞌach taꞌamaklhtayanalh ju Pablo
\p
\v 1 Ju astan acsni tapasalh lakacautꞌatꞌi cꞌata icꞌanchokopa aktam ju lakꞌachakꞌan Jerusalén. Ju acsni quintꞌaꞌalh ju Bernabé. Chai vachuꞌ ickꞌailhiꞌalh ju Tito.
\v 2 Chai yuchi iclhiꞌalh ni isꞌakstu ju Dios ju xaquijunita ni acꞌalh alactꞌachiviniꞌ ju quintꞌaꞌisraelitanin. Chai pꞌulhnan icꞌajunilh va isꞌakstuꞌan ju xalackꞌajin sia yuꞌunch ju talhilacaꞌanta ju Jesús tuchi iclajunau ju uxijnan ju jantu israelitanin untꞌatꞌit. Chunch icnavilh ni jantu xaclacasqꞌuin ni catalakꞌalhi ju tuchi xacnavi nin catasastuclh ju lhichꞌalhcat ju xacnaviputun sia milhiꞌuxijnan ju jantu israelitanin untꞌatꞌit. Chai ju astan chunch icꞌajunilh vachuꞌ ixtalhavatꞌan.
\v 3 Pus ju Tito xaquintꞌaꞌanta chai ju yuchi jantu israelita junita.
\v 4 Pus jantu xaclacasqꞌuinau ni cachꞌucꞌunicalh ju ixꞌaxtꞌakꞌa ju Tito mas chunch ixtanajun ju aliꞌin lapanacni ju ixtavilanancha anch ju ixtatalacasui tachi ju lhiꞌalakꞌavinch mas jantu. Pus ju yuꞌunch va xaquintaputankꞌajlaktsꞌimputunan u ni vasalh jantu naviyau ju makꞌaniya ixlhamapꞌaksin Moisés ju chavai ni lhilacaꞌantauch ju Jesús u jantu. Ju yuꞌunch va xaquintajumputunan ni tapꞌastu acnaviyau tachi ju najun lacalhamapꞌaksin.
\v 5 Para nin lacatsꞌunin jantu xacꞌanaviniyau ju ixkꞌachatꞌan ni jantu xaclacasqꞌuinau ni camapaxanicalh ju chivinti ixlacata ju Jesús ju iclajuntauch ju uxijnan.
\p
\v 6 Para ju yuꞌunch ju ixnoncanch ni xalackꞌajin ixtajunita junta ictakꞌaixtokvi jantu tuꞌuꞌ sastꞌi lhamapꞌaksin quintaxtaknilh. Pus mas noncan ni xalackꞌajin tajunita jantu lai actinaulh ni va ixlacataꞌan ju yuꞌunch tam acpastaclh. Pus ju Dios vaklhtam chun alaktsꞌin tachi chun ju lapanacni.
\v 7 Pus ju anuch xalackꞌajin jantu tuꞌuꞌ sastꞌi lhamapꞌaksin quintaxtaknilh ni tamachakxa ni Dios ju xaquijunita ni aclajuniu ju uxijnan ju jantu israelitanin untꞌatꞌit ju chivinti ixlacata Jesús. Tamachakxalh ni yuchach ju quilhichꞌalhcat junita tachi ju Pitaluꞌ ni xtaknilh ixlhichꞌalhcat ni caꞌajunilh ju istꞌaꞌisraelitanin ju chivinti ixlacata Jesús.
\v 8 Pus yuchi ju Dios ju malakachalh ju Pitaluꞌ ni caꞌalh amasuniniꞌ ju istꞌaꞌisraelitanin ixlacata ju Jesús chai vana yuchi ju quimalakachalh ju quitꞌin ni aclamasuniu ju uxijnan ju jantu israelitanin untꞌatꞌit.
\p
\v 9 Pus ju Jacobo chai ju Pitaluꞌ chai ju Xivan xalackꞌajin ixtajunita sia yuꞌunch ju ixtalhilacaꞌanta ju Cristo ju anch. Chai ju yuꞌunch acsni tamachakxa ni na kꞌai lamapainin ju xaquinavinita ju Dios ni xaquixtaknita ju ani lhichꞌalhcat pus jantu tuꞌuꞌ sastꞌi lhamapꞌaksin ju xaquintajunan. Va yuchi ni quintajunin ju quitꞌin chai ju Bernabé ni ixcompañerojni icjuntau. Chai tanajunch ni quijnan ju aclajunauch ju uxijnan ixchivinti Dios. Uxijnan ju jantu israelitanin untꞌatꞌit. Chai ju yuꞌunch ma catalacjunaꞌ ju istꞌaꞌisraelitaninꞌan.
\v 10 Va yuchi ni quintajuninch ni acꞌaꞌaktaijuyauch ju quilhpatinin para aktsꞌiya chunchach ju xacnaviputunau.
\s1 Ju Pablo kꞌailh ju Pitaluꞌ ju lakꞌachakꞌan Antioquía
\p
\v 11 Para ju astan acsni milhch ju Pitaluꞌ ju lakꞌachakꞌan Antioquía pus ickꞌailh laꞌixꞌucxlacapuꞌ ni va ixꞌalin ju ixtalakꞌalhin.
\v 12 Pus ju yuchi va lakputam xaꞌalactꞌavajin ju jantu israelitanin. Para acsni tachilh ju aliꞌin ixlapanacni ju Jacobo ju istꞌaꞌisraelitanin ixtajunita pus ju Pitaluꞌ jantu vana alactꞌavailh ju jantu israelitanin ni va ixnajunch ni ca jantu kꞌox catalhiula ju anuꞌ istꞌaꞌisraelitanin ni na ixtalhilaksi ixlhamapꞌaksin ju Moisés.
\v 13 Ju yuchi lana jantu ixmalacasuputun tuchi vasalhch ixlacaꞌich. Pus chunch vachuꞌ talalh ju aliꞌin istꞌaꞌisraelitanin amachakꞌan anch ni talaktsꞌilh ta yu ixlaich ju Pitaluꞌ. Tus mas yuchi ju Bernabé vachuꞌ chunch navilh ni laktsꞌilh ju Pitaluꞌ chai ju aliꞌin ni chunchach ixtalai.
\v 14 Para acsni iclaktsꞌilh ni jantu sok ixtalai tachi ju najun laꞌixchivinti Dios pus chani icjuni ju Pitaluꞌ laꞌixꞌucxlacapuꞌan ixtalhavat ju talhilacaꞌanta Jesús: “Ju uxintꞌi ji Pitaluꞌ israelitaꞌat chai lai xamacꞌaꞌun tachi ju aktsꞌiya lhilanitauch chai laich navi tachi ju talai ju jantu israelitanin tajunita. Pus ni chunch ju lai pus tajuch ni va tapꞌastu ju aꞌuni ju yuꞌunch ju jantu israelitanin ni catanavilh tachi ju lhilanitauch ju quijnanꞌan ju israelitanin juntau.”
\p
\v 15 Ju quijnanꞌan ji Pitaluꞌ israelitanin juntau chai mispayau ixchivinti Dios ju tsꞌokcanta. Jantu chun juntau tachi ju yuꞌunch ju jantu israelitanin tajunita ju jantu tamispai ixchivinti Dios.
\v 16 Para ju quijnanꞌan cꞌatsayau ni jantu xamatiꞌ lai salaka calhimispacalh laꞌixmacni Dios ni va canavilh tachi ju najun lacalhamapꞌaksin ju tsꞌoklh ju Moisés. Va acsnich ju salaka lai calhimispacalh laꞌixmacni Dios tam xamatiꞌ acsni lhilaksich ju Jesucristo. Pus ju quijnanꞌan mas israelitanin juntau lhilaksitauch ju Jesucristo ni laich salaka calhimispacau laꞌixmacni Dios va ixlacaꞌatalh ni lhilaksitauch ju Cristo. Jantu ixlhiyuchi ni va navitauch tachi ju najun lacalhamapꞌaksin. Pus jantu lai xamatiꞌ calhimispacalh ni salaka laꞌixmacni Dios va ixlacaꞌatalh ni canavi cava tachi ju najun laꞌixlhamapꞌaksin Dios.
\p
\v 17 Pus ju quijnanꞌan nonau ni salaka quintalhimispayan ju Dios acsni lhilaksiyau ju Jesucristo. Jantiyuꞌ ni va lai canaviu tachi ju najun laꞌixlhamapꞌaksin. Para ju chunch jantu nomputun ni laich caꞌalactuꞌununau va ixlacaꞌatalh ni jantu lhilaksiyau ju lhamapꞌaksin ju tsꞌoklh ju Moisés. Jantu tavanan lai actinaulh ju chunch.
\v 18 Pus ni icꞌalacjunita ju lapanacni ni jantu tasqꞌuini ni catanavi tachi ju najun laꞌixlhamapꞌaksin Dios ni laich salaka calhimispacalh laꞌixmacni Dios para ni astan aktam acꞌajunchokopa ni tasqꞌuini ni catanavi pus ju chunch talakꞌalhin ni jantu slivasalh.
\v 19 Pus ju quitꞌin iccꞌatsai ni jantu tavanan lai salaka aquilhimispa ju Dios va laꞌixnavica ju ixlhamapꞌaksin ni jantu lai icnavi. Pus yuchi jantu vana iclhilhilaksi ju lhamapꞌaksin ju chavai. Alai ictsucui tachi ju najun ju Dios ju chavai.
\v 20 Pus tachi ju va icnilh quilhilhcata ju Dios acsni tavanan xtuccalh ju Cristo ju lacacurus. Chai ixlhiyuchi jantu vana lai actinavi ju quinkꞌachat quiꞌakstu. Pus ju chavai mas ictꞌajun para jantu va laquintachaput quiꞌakstu ju icnavi ju kꞌox. Alai laꞌixtachaput ju Cristo ju tꞌajun laquiꞌalhunut. Chai ju quiꞌatsucunti chunch junita ju chavai va ixlacaꞌatalh ni iclhilaksich ju istsꞌalh Dios. Yuchach ju quimapainita chai makꞌaxtaklh isꞌatsucunti ju va quimakꞌalhtaxtucach.
\v 21 Pus ju quitꞌin jantu icmalacasuputun tachi ju va jantu tuꞌuꞌ aclhiula ju lamapainin ju quinavinita ju Dios. Para chunch acmalacasu ni acnaulh ni tasqꞌuini ni acnavilh tachi ju najun lacalhamapꞌaksin ni laich salaka aclhimispacalh laꞌixmacni Dios. Pus ni chunch aclalh pus jantu lhitapalai ixva ju ixꞌaninti ju Cristo. Chunch ju icjunilh ju Pitaluꞌ.
\c 3
\s1 Tasqꞌuini ni calhilaksiyau ju Cristo. Jantu calhilaksiyau ju lhamapꞌaksin
\p
\v 1 Na kꞌox tontojni untꞌatꞌit ji amachakꞌan Galacia ni laich xalakꞌaꞌiyatꞌit ni xataꞌokxchokꞌoyan ju aliꞌin. Pus ju quitꞌin lana vas iclajuntauch ni quinichilh ju Jesucristo ju milacataꞌan.
\v 2 Pus va yuchi ju ani ju iccꞌatsaputun. Tꞌas nonatꞌit. Ja yuchi lhiꞌamaklhtꞌayanantꞌatꞌit ju Spiritu Santu ni xanaviyatꞌit tachi ju najun lacalhamapꞌaksin. U yuchi ni xalacꞌaꞌiyatꞌit ju chivinti ixlacata ju Jesús.
\v 3 Ja na va xcai lacꞌaꞌiyatꞌit. Alaktsꞌintꞌit. Ju uxijnan tꞌaiꞌulatꞌatꞌit ju sastꞌi miꞌatsucuntiꞌan laꞌixtachaput ju Spiritu Santu. Pus ju chavai ja va nonatꞌit ni palai atsꞌucꞌuyaꞌitꞌit tachi ju kꞌachani ju Cristo ni anaviyaꞌitꞌit tachi ju najun lacalhamapꞌaksin ju tsꞌoklh ju Moisés.
\v 4 Pus ja lana jantu xapꞌuꞌalacpꞌastꞌacnanatꞌit ju tuchi xatapasai lamiꞌatsucuntiꞌan. Na kꞌox cava ni vasalh xapꞌuꞌalacpꞌastꞌacnanatꞌit.
\v 5 Ju Dios taxtaknitan ju Spiritu Santu chai tanavinitan kꞌai lhamakꞌan ju lamiꞌucxlacapuꞌan. Para jantiyuꞌ lhinavi ju va ixlacaꞌatalh ni va naviyatꞌit tachi ju najun lacalhamapꞌaksin. Alai yuchi lhinavi chunch va ixlacaꞌatalh ni lacꞌaꞌitꞌit ju chivinti ixlacata ju Jesús.
\p
\v 6 Tachi ju lalh ju makꞌaniya lapanac ju Abraham ixjuncan. Ju yuchi ni lacaꞌinilh ixchivinti Dios pus ju Dios salaka lhilhca.
\v 7 Pus apꞌucꞌatsꞌatꞌit ni vachuꞌ caꞌalaktsꞌincanaꞌ tachi ju vasalh ixꞌapapanatnich ju Abraham tachi chun ju vachuꞌ talacaꞌi ju ixchivinti Dios.
\v 8 Pus ju Dios makꞌanch iscꞌatsai ni calaktsꞌinaꞌ ni salaka laꞌixmacni tachi chun ju catalhilacaꞌanach ju Jesús mas uxijnan ju jantu israelitanin untꞌatꞌit. Yuchi lhijunilh ju ani chivinti ju Abraham ta yu cataputakꞌalhtaxtuyach ju lapanacni. Ma chani junilh ju Dios: “Va ixlacaꞌatalh ni xaqꞌuinqꞌuiclacꞌaꞌi ju quinchivinti pus laich capuꞌalinaꞌ ju kꞌox isꞌatsucuntiꞌan tachi chun ju lapanacni”. Chunch ju junilh ju Dios ju Abraham.
\v 9 Pus lana tasui ni yuꞌunchach ju talhilacaꞌanta ju Jesús ju axtaknican ju kꞌox isꞌatsucuntiꞌan tachi ju amaklhtayanalh ju Abraham ni vachuꞌ lhilacaꞌalh ju Dios.
\p
\v 10 Para amucꞌanicanta ixtalakꞌalhinꞌan tachi chun ju tanajun ni salaka calaktsꞌincanaꞌ ni canaviyaꞌ tachi ju najun lacalhamapꞌaksin. Chunch ju aꞌulhtucanta ni chani najun ixchivinti Dios junta tsꞌokcanta: “Amucꞌanicanta ixtalakꞌalhinꞌan tachi chun ju jantu stunin tanavikꞌojui tachi ju najun lacalhamapꞌaksin”. Chunch ma naulh ju Dios.
\v 11 Pus jantu xamatiꞌ lai salaka catilaktsꞌincalh laꞌixmacni Dios va ixlacata ni canavi cava tachi ju najun lacalhamapꞌaksin. Chai tasui ni stavasalanti ju iclajunau ni chani ju tsꞌokcanta laꞌixchivinti Dios: “Ju lapanac ju lhilaksich ju Dios salaka calaktsꞌincanaꞌ laꞌixmacni chai caꞌalinaꞌ ju isꞌatsucunti ju conkꞌalhiyanta lactꞌiyan”. Chunch ju najun laꞌixchivinti Dios.
\v 12 Pus ju ixlhamapꞌaksin Moisés jantu najun ni salaka calaktsꞌincanaꞌ ju lhilacaꞌanta ju Dios. Alai va najun ni caꞌalinaꞌ isꞌatsucunti ju conkꞌalhiyanta lactꞌiyan ni canavikꞌo chux tachi ju najun ju anch.
\p
\v 13 Para ju Cristo quintamalakxtutan junta jonkꞌalhita makꞌalhkꞌajnat. Yuchi ju makꞌalhkꞌajnalh istatsꞌinqꞌuit ju quintalakꞌalhinꞌan ju ixmucꞌanicantauch va ixlacata ni jantu lai ixmuctaxtuyau tachi ju najun lacalhamapꞌaksin. Chai mavasalacanta ni chunch ju navicalh ni chanich ju najun laꞌixchivinti Dios ju tsꞌokcanta: “Ju Dios ma alaktsꞌin tachi alactuꞌunin tachi chun ju lapanacni ju axtucmucꞌacan lacacurus”. Chunch najun laꞌixchivinti Dios.
\v 14 Pus ju Jesús lakꞌaꞌilh ni chunch ju caꞌulhtucalh ni laich capꞌuꞌamaklhtꞌayananaꞌitꞌit ju kꞌox miꞌatsucuntiꞌan tachi chun ju uxijnan ju jantu israelitanin untꞌatꞌit. Yuchi ju kꞌox atsucunti ju kꞌalhtasunilh ju Abraham. Chai quinchuxꞌan laich caꞌamaklhtayananauch ju Spiritu Santu ju quintakꞌalhtasunitan ju Dios ni lhilacaꞌanauch ju Jesús.
\s1 Ju lhamapꞌaksin chai ixchivinti Dios
\p
\v 15 Alaktsꞌintꞌit tachi ju layau mas va lapanacni juntau. Ju ixtꞌiyunꞌan lapanacni ni catalakꞌoxiyaꞌ tuꞌuꞌ chivinti lacapuꞌucxtin chai cataꞌulayach ju ixtapakaꞌutꞌan pus ju apumatam jantu lai catilakꞌalhilh nin lai catilalhava.
\v 16 Pus ju Dios akꞌalhtasunilh ju Abraham chai pumatam ju makꞌaniya ixpapanti ixjunita ni laꞌixlacataꞌan ju yuꞌunch caꞌalinaꞌ ju kꞌox isꞌatsucuntiꞌan ju lapanacni. Pus ju Dios jantu juni ni ma va ixlacataꞌan ixchuxꞌan ju ixꞌapapanatnich laich kꞌox cajunaꞌ ju isꞌatsucuntiꞌan ju lapanacni. Alai ma va juni ni ixlacata va pumatam ju ixpapanti. Chai ju yuchi Cristo junita.
\v 17 Pus tachi ju tuꞌuꞌ ixchivinti tam lapanac ni jantu lai catilakꞌalhinicalh ni ulanicanta ju ixtapakaꞌut pus vana va chunch laꞌixmacni Dios. Ju yuchi kꞌalhtasunilh ju Abraham ni laꞌixlacata yuchi lhikꞌach catatsucuyaꞌ tachi chun ju lapanacni. Chai astan acsni ixtapasata lakatꞌatꞌi cientos a lakapꞌuxamcau cꞌata pus ju yuchi axtaknilh ju ixlapanacni ixlhamapꞌaksin. Para ju anuꞌ lhamapꞌaksin jantu lai taꞌaklhtamat catinavi ju anuꞌ chivinti ju kꞌalhtasunilh ju Dios ju Abraham.
\v 18 Ni laich cava salaka acva laꞌixmacni Dios ni acnavikꞌo tachi ju najun lacalhamapꞌaksin pus ju chunch va taꞌaklhtamat lhimalacxtucan ju anuꞌ chivinti ju kꞌalhtasunilh ju Dios ju Abraham. Pus ju Dios kꞌalhtasunilh ju Abraham ni salaka calaktsꞌinaꞌ ju yuchi mas jantu tuꞌuꞌ xanavi.
\p
\v 19 Pus ni chunch junita pus laich aquilalhisacmiyau tajuch ni va astaniya xaquintaxtakniyan ju lhamapꞌaksin ju quijnan ju israelitanin icjuntau. Pus ju Dios xtaklh ju lhamapꞌaksin ni laich catapucꞌatsayaꞌ ni na alactuꞌunin tajunita. Para quintaxtaknitachan ju lhamapꞌaksin tus acsni chilh ju makꞌaniya ixpapanti Abraham ju Cristo juncan. Yuchi ju ixkꞌalhtasunita ni laꞌixlacata tachi chun ju lapanacni laich kꞌox catatsuculh. Pus ju Dios amalakachachilh ju ixꞌanquilhnin ju taxtaknilh ju Moisés ju anuꞌ lhamapꞌaksin. Chai ju Moisés axtaknilh ju lapanacni.
\v 20 Acsni tavanan xtaklh ju lhamapꞌaksin ju Dios pus yuchi ju Moisés ju axakꞌalalh ju lapanacni laꞌixlacata Dios. Para acsni tavanan kꞌalhtasunilh ixchivinti ju Dios ju Abraham pus va isꞌakstu ju Dios ju xakꞌalalh ju Abraham.
\s1 Tajuch ni xtakcalh ju anuꞌ lhamapꞌaksin
\p
\v 21 Pus ju lhamapꞌaksin tachi ju va tꞌalaxcaji ju chivinti ju kꞌalhtasunilh ju Dios ju Abraham. Para jantu tavanan lai actinaulh ju chunch. Ni ixꞌalilh ju lhamapꞌaksin ju laich caꞌixpulhajau ju sastꞌi quiꞌatsucuntiꞌan ni laich cava ixnaviu pus ca laich xaquintalaktsꞌinan ju Dios ni salaka ixjuntau laꞌixmacni ni ixnaviuch tachi ju najunch ju anch.
\v 22 Para ni matiꞌ tuꞌuꞌ lhamapꞌaksin ju chunch pus yuchi lhinajun ju Dios ni si alactuꞌunin juntau quinchuxꞌan quijnanꞌan. Chunch ju najun laꞌixchivinti ju tsꞌokcanta. Chai ju Dios chunch ju navilh ni laich caꞌaxtakniyaꞌ ju sastꞌi isꞌatsucuntiꞌan tachi chun ju lapanacni va yuchi ni catalhilacaꞌalh ju Jesucristo. Caꞌaxtakniyaꞌ tachi ju akꞌalhtasunilh.
\p
\v 23 Pus acsni tucaꞌ ixnoncan ni takꞌalhtaxtucan acsni lhilacaꞌancan ju Jesús pus ju lhamapꞌaksin va tachi xaquintaꞌulaniyan ju quintalakꞌalhin quincꞌan ju israelitanin icjuntau. Chunch xaquintaꞌulhtuyan tus acsni tavanan quilachilh ju Cristo chai juncantauch ni lai takꞌalhtaxtuyau ni lhilacaꞌanauch ju yuchi.
\v 24 Pus va ixlacaꞌatalh ni jantu lai xamuctaxtuyau tachi ju tsꞌokcanta lacalhamapꞌaksin yuchi jantu lai xaquintalhilaktsꞌinan ju Dios ni salaka juntau laꞌixmacni. Chai yuchi xalhicꞌatsayau ni na maktasqꞌuiniyau ju Cristo. Chai ni lhilaksiyau ju yuchi pus ju Dios salaka quintalaktsꞌinan.
\v 25 Pus ju chavai ni quilachilh ju Cristo chai lai lhilacaꞌancan ju yuchi pus jantu vana maktasqꞌuinican ju anuꞌ lhamapꞌaksin ju xaquintamasuniyan ni na xamaktasqꞌuiniyau ju yuchi.
\p
\v 26 Ju chavai quinchuxꞌan isꞌaskꞌatꞌan Dios juntau va ixlacaꞌatalh ni lhilaksiyauch ju Cristo Jesús.
\v 27 Pus tachi chun ju uxijnan ju lhiꞌakpꞌaxtꞌatꞌit va ixlacaꞌatalh ni va lakatam ixtꞌaꞌumpꞌutꞌunatꞌit ju Cristo pus isꞌaskꞌatꞌan Dios untꞌatꞌit tachi ju Cristo ni istsꞌalh Dios junita vachuꞌ.
\v 28 Laꞌixmacni Dios vaklhtam chun juntau. Ju yuchi jantu navi cuenta u israelitanin juntau u jantu. U va xalapanacni juntau u yuchi ju matiꞌ ixꞌucxtin. Ju yuchi jantu navi cuenta u jokꞌatni juntau u chakolun. Ju Dios vaklhtam chun quintalaktsꞌinan ni lhilacaꞌantauch ju Cristo.
\v 29 Chai ju uxijnan ni ixꞌanuꞌ Cristo untꞌatꞌit pus ju Dios talaktsꞌinan tachi ju vasalh ixꞌapapanatnich Abraham untꞌatꞌit. Chai ixlhiyuchi amaklhtꞌayananaꞌitꞌit tuchi kꞌalhtasunita ju Dios ju Abraham.
\c 4
\p
\v 1 Pus chanich iclajumputunau. Acsni va lacatꞌicstꞌicaꞌ junita ju anuꞌ tsꞌalh ju caꞌamaklhtayananaꞌ ju ixmakꞌalit ju lijunto ixpai pus laktsꞌincantacaꞌ tachi ju va xalapanac junita ni jantucaꞌ lai lhinajun. Chunch ju laktsꞌincantacaꞌ mas yuchi ju amanavinch chux.
\v 2 Alin ju talhistꞌacꞌa ju anuꞌ tsꞌalh. Chai alin ju talhistacni ju ixꞌalinta tus acsni cachinach ju avilhchan ju lhcata ju lijunto ixpai.
\v 3 Chai vana va chun ju quijnan ju israelitanin icjuntau. Acsni tucaꞌ ixmin ju Cristo pus chunch ixjuntau tachi ju anuꞌ tsꞌalh. Va ixnaviyau tachi ju xaquintamalanitan ju makꞌaniya quilacpai quincꞌan.
\v 4 Para acsni chaꞌalh ju avilhchan ju ilhcata ju Dios pus malakachachilh ju istsꞌalh. Chai ju yuchi pumaktasu pumatam chakoꞌulh. Chai ni israelita ixjunita vachuꞌ pus ixnavi tachi ju najun lacalhamapꞌaksin.
\v 5 Chai chunch ju tsuculh ju yuchi ni lai aquintamakꞌalhtaxtun ju quijnan ju xaclhilaksiyauch ju lhamapꞌaksin. Chai ju yuchi lakꞌoxilh ta yu laich cajumvi isꞌaskꞌatꞌan Dios vachuꞌ tachi chun ju quijnan ju israelitanin icjuntau.
\p
\v 6 Chai ni isꞌaskꞌatꞌanch Dios juntau pus yuchi quintalhimalakachanichinch ju iSpiritu Santu ju istsꞌalh laquiꞌalhunutꞌan. Chai ni tꞌajun ju yuchi laquiꞌalhunutꞌan pus yuchi lai quimpai lhixakꞌalayau ju Dios.
\v 7 Pus ju chavai jantuch quintalaktsꞌinan tachi ju va tam xalapanac. Alai quintalhimispayan ni isꞌaskꞌatꞌan juntau. Chai ni isꞌaskꞌatꞌan juntau pus amaklhtayanantauch tuchi quintakꞌalhtasunitan tachi chun ju quijnanꞌan ju lhilacaꞌantauch ju Cristo.
\s1 Ju Pablo alhamakꞌaninin yuꞌunch ju talhilacaꞌanta ju Cristo
\p
\v 8 Ju makꞌanch acsni jantucaꞌ ismispꞌayatꞌit ju Dios va kꞌaya ixlhilacꞌapꞌinatꞌit ju tuꞌuꞌ ju jantu vasalh diosnin tajunita.
\v 9 Para ju chavai mispꞌayatꞌitch ju tucan Dios. U ca palai kꞌox ni aclajunau ni tamispayan ju Dios. Chai ni tamispayan ju Dios tas tucan untꞌatꞌit ni laich lhilacꞌapꞌinchꞌokꞌopꞌutꞌunatꞌit ju anuꞌ lhamapꞌaksin ju matich ixtachaput ni laich catamakꞌalhtaxtun. Yuchi ju va jantu lai taꞌaktaijuyan. Aktam va lacꞌasqꞌuinatꞌit ni yuchi ju catajunan tuchi laich anaviyaꞌitꞌit.
\v 10 Ju uxijnan vanach tꞌalhoniyatꞌit ju aliꞌ cꞌatan chai ju aliꞌ avilhchan chai ju aliꞌ malhquiyuꞌ chai ju aliꞌ cꞌata tachi ju najun laꞌixlhamapꞌaksin ju Moisés. Chunchach ju layatꞌit ni nonatꞌit ni na kꞌoxich lhiulai ju Dios ju chunch.
\v 11 Pus ju quitꞌin icnajun ni ca jantu tuꞌuꞌ ixtapalhni cajunaꞌ ju milacataꞌan ju tuchi xcayama iclamalacaꞌiniu ixlacata ju Cristo ni vanach atꞌalhoniyaꞌitꞌit ju makꞌaniya lhamapꞌaksin.
\p
\v 12 Quiꞌalakꞌavin ju chavai chunch iclai tachi ju uxijnan ixlayatꞌit ju pꞌulhnan. Jantu iclhilaksi ju ixlhamapꞌaksin ju Moisés. Pus na iclatapaininiyau ni chunch ju alachꞌokꞌotꞌit. Jantuch alhilaksitꞌit ju anuꞌ lhamapꞌaksin. Pus acsni xaclatꞌavilhchau pꞌulhnan jantu tuꞌuꞌ macxcai xaquilanaviyau.
\v 13 Pus ju uxijnan cꞌatsꞌayatꞌit ni na xactakꞌankꞌai acsni pꞌulhnan icchaꞌalh lamilakꞌachakꞌanꞌan. Chai yuchi iclhitolhcha ju anch chai yuchi lai xaclalhijunau ixchivinti Dios.
\v 14 Chai jantu quilalhilacmackꞌau nin yuchi ni aquilalhitsꞌisiu ju quintakꞌankꞌat ju xacpacxanta ju acsnich. Alai quilaꞌamaklhtayanau tachi ju va jun ixꞌanquilh Dios xacjunita. Chai tachi ju va jun isꞌakstu ju Jesucristo.
\v 15 Para ju chavai tijuch ju xatꞌapꞌasayatꞌit ni jantuch vanach kꞌox quilalaktsꞌinau. Ju pꞌulhnan xaccꞌatsai ni na xaquilamapainiyau. Yuchi iclhicꞌatsalh ni na xaquilamapainiyau ni va laich ixmaxtꞌutꞌit ju milakchulhꞌan chai xaquilaxtakniputunauch ni na xaclacpuxcaich.
\v 16 Pus ju chavai ja va mintꞌalaxcaiꞌan xacjun ni xaclajunauch ju stavasalanti.
\p
\v 17 Pus ju anuꞌ israelitanin va talhacchaꞌaniyan. Para jantu kꞌox tachi ju tapastꞌacꞌa ju yuꞌunch. Pus ju yuꞌunch va talacasqꞌuin ni aquilamacoyajuch. Chai achꞌakꞌokꞌatꞌit ju yuꞌunch.
\v 18 Aktsꞌiya kꞌox ni talakxcavatayan ixlacata ju kꞌox mas va tavananch cava. Para jantu kꞌox ni va acsnich ju talakxcavatayan acsni iclatꞌavilau.
\v 19 Quiꞌaskꞌatꞌan aktam ictꞌompalai makꞌalhkꞌajnaꞌ ju milacataꞌan ju uxijnan tus acsni catasuyaꞌ lamiꞌatsucuntiꞌan ni ixlhichux miꞌalhunutꞌan ju alhilacꞌapꞌinaꞌitꞌit ju Cristo.
\v 20 Va laich aclatꞌatolhchau ju chavai. Chai acpuxcaulh ta yu laich aclalhixakꞌalau ju laich apꞌumachꞌakxatꞌit. Pus jantu icmachakxai tuchꞌi ju pꞌastꞌacꞌatꞌit.
\s1 Tachi ju talalh ju Agar chai ju Sara
\p
\v 21 Aquilajuniuch ju uxijnan ju na lhilaksipꞌutꞌunatꞌit ju ixlhamapꞌaksin ju Moisés. Ja va jantu kꞌasmatꞌatꞌit tachi ju najun ju anuꞌ lhamapꞌaksin.
\v 22 Pus chanich ju xatsꞌokꞌulai ju Moisés. Ju Abraham ma ixꞌalin pumatꞌui istsꞌalan. Ju ixnati ju kꞌantam istsꞌalh ma va isquitiꞌ ixjunita chai ju Abraham va ixtamajuta ju yuchi. Para ju ixnati ju pumatam istsꞌalh ma ixꞌamachakaꞌ Abraham ixjunita. Chai ju yuchi jantu va ixtamajuta.
\v 23 Pus ju istsꞌalh ju ismaksquitiꞌ ixjunita ma chunch ju putasu tachi ju putasucan ju va lhilapanac. Para ju isꞌaskꞌatꞌa ju ixꞌamachakaꞌ Abraham ma tasu acsni va uctaxtulh ixchivinti ju ixkꞌalhtasunita ju Dios ju Abraham.
\v 24 Pus ju ani chivinti ju xatsꞌokꞌulai ju Moisés quintamasuniputunan ju tuꞌuꞌ. Chanich ju nomputun. Pus ixtꞌiyunꞌan chakolun chunch tajunita tachi ju lakatꞌui chivinti ju alactꞌatakꞌoxilh ju Dios ju makꞌaniya lapanacni. Ju lakatam xtakcancha xalactalhpa Sinaí acsni axtaknilh ju lapanacni ju ixlhamapꞌaksin. Chai ju yuchi chunch junita tachi ju Agar ni xajonkꞌalhi va xalapanac. Chai ju yuꞌunch ju talhilaksich ju anuꞌ lhamapꞌaksin vachuꞌ tachi xalapanacni tajunita ni tanavi tachi ju najun ju anch para jantu tavanan lai cataputakꞌalhtaxtuyaꞌ.
\v 25 Pus ju Agar chunch junita tachi ju anuꞌ xalactalhpa Sinaí laxalacatꞌun Arabia tachi ju iclajuntau. Chai ju anuꞌ xalactalhpa chunch junita tachi ju israelitanin ju talakꞌayai ju Dios ju lakꞌachakꞌan Jerusalén ju chavai. Pus ju yuꞌunch vachuꞌ tachi xalapanacni tajunita ni tanavi tachi ju najun lacalhamapꞌaksin para jantu tavanan lai cataputakꞌalhtaxtuyaꞌ.
\v 26 Chai ju ixlhilakatꞌui chivinti ju alactꞌatakꞌoxilh ju Dios ju makꞌaniya lapanacni yuchi ju tꞌatakꞌoxilh ju Abraham. Pus ju yuchi chunch junita tachi ju Sara ju jantu xalapanac ixjunita. Jantu va ixtamajuta ju Abraham. Chai ju yuchi chunch junita tachi ju quijnanꞌan ju calakꞌayatachau ju Dios laxalakꞌachakꞌan Jerusalén ju vilhcha lactꞌiyan ni makꞌalhtaxtucantauch.
\v 27 Pus chani ju tsꞌokcanta laꞌixchivinti Dios:
\q1 Akꞌachꞌach ju uxintꞌi ju va miꞌakstu. Ju jantu amaskꞌatꞌanan.
\q1 Pꞌas atꞌas laminkꞌachat ju uxintꞌi ju jantu amaklakꞌavanan.
\q1 Pus palai lhu ju isꞌaskꞌatꞌan ju va macoꞌulacanta.
\q1 Palai jantu ju alin ixpapa.
\m Chunch ju tsꞌokcanta laꞌixchivinti Dios.
\p
\v 28 Pus ji quiꞌalakꞌavin ju Dios muctaxtulh ixchivinti acsni tavanan tsuculh ju isꞌaskꞌatꞌa ju Sara mas jantu lai ixꞌalin ju isꞌaskꞌatꞌa. Chai vana va chun aquintamuctaxtuniyan ixchivinti ni najunta ni isꞌaskꞌatꞌan aquintanaviyan.
\v 29 Pus acsni tatsuculh ixtꞌiyunꞌan istsꞌalan ju Abraham pus pumatam ixmaktasutach tachi ju maktasucan ju va lhilapanac. Chai ju yuchi acsni kꞌaich tsꞌalh va pus lhimakchapulh ju anuch ju puꞌamaklakꞌavanalh tachi ju kꞌalhtasunilh ju Dios ju Abraham. Pus vana va chun ju chavai. Alin lapanacni ju talhilaksi ju lhamapꞌaksin chai ju yuꞌunch quintatꞌalaxcayan ju quijnanꞌan ju lhilaksiyau ixchivinti Dios junta najun ni va laꞌixmacni Cristo isꞌaskꞌatꞌan Dios juntau.
\v 30 Para ju uxijnan ja va jantu pꞌastꞌacꞌatꞌit tachi ju najun laꞌixchivinti Dios ju tsꞌokcanta. Ja va jantu pꞌastꞌacꞌatꞌit ni chani najun: “Atꞌixcꞌauxtꞌuch ju xalapanac ju va ixtamocanta. Atꞌaxcꞌauxtꞌuch ju istsꞌalh. Ju istsꞌalh ju va xalapanac jantu lai tuꞌuꞌ catixtaknicalh. Para ju istsꞌalh ju tucan miꞌamachakaꞌ ju jantu va ixtꞌamaꞌutꞌa yuchach ju laich caxtaknicanaꞌ ju miꞌalinta”. Chunch ju najun laꞌixchivinti Dios.
\v 31 Pus ji quiꞌalakꞌavin ju ani chivinti ixlacata ju istsꞌalan Abraham chanich ju quintamamachakxaniputunan. Pus ju quijnanꞌan jantu chun juntau tachi ju istsꞌalh ju va xalapanac ixjunita ni laich canaju ni tasqꞌuini ni canaviu tachi ju quintajunan ju makꞌaniya lhamapꞌaksin. Alai chunch juntau tachi istsꞌalh ju tucan ixꞌamachakach Abraham ixjunita. Chai lhilaksiyau ixchivinti Dios junta najun ni laꞌixmacni Cristo isꞌaskꞌatꞌan Dios juntau.
\c 5
\s1 Pꞌas alhilaksitꞌit isꞌakstu ju Cristo
\p
\v 1 Ju Cristo yuchi lhiquinichilh ni jantu tasqꞌuini ni vana canaviu tachi ju najun laꞌixlhamapꞌaksin ju Moisés. Pus pꞌas alhilaksitꞌit isꞌakstu ju Cristo. Jantu alakꞌaꞌitꞌit ni xamatiꞌ catamalacaꞌiniyan ni tasqꞌuini ni anaviyaꞌitꞌit tachi ju najun lacalhamapꞌaksin.
\p
\v 2 Ju quitꞌin icPablo chai aquilakꞌasmatniu tuchi iclajunau. Acsni va alakꞌaꞌiyaꞌitꞌit ni achꞌucꞌucꞌanaꞌitꞌit tachi ju najun lacalhamapꞌaksin pus jantu lhitapalai ni xani ju Cristo ju milacataꞌan.
\v 3 Pus aktam iclajunchokopalau. Tachi chun ju lapanacni ju talakꞌaꞌi ni caꞌachꞌucꞌucalh pus tasqꞌuini ni stunin catanavikꞌo tachi chun ju najun lacalhamapꞌaksin ju tsꞌoklh ju Moisés. Jantu va yuchi ni caꞌachꞌucꞌucalh.
\v 4 Pus ju uxijnan ni va lacꞌasqꞌuinatꞌit ni salaka catalaktsꞌinan ju Dios va ixlacaꞌatalh ni naviyatꞌit tachi ju najun lacalhamapꞌaksin pus ju chunch ju Cristo jantu lai tuꞌuꞌ catitalhaꞌaktaijun. Nin yuchi ju Dios jantu lai catitanavinin lamapainin.
\v 5 Pus ju quijnan ni iclhilacaꞌanau ju Cristo pus iccꞌatsayau ni yuchi ju Spiritu Santu ju aquintalasoknicꞌayan laꞌixmacni Dios.
\v 6 Pus ni lhilacaꞌantauch ju Cristo Jesús pus jantuch lhitapalai ni acchꞌucꞌucalh u jantu. Va yuchi ju lhitapalai ni aclhilacaꞌalh ju Jesucristo chai caputasulh laquiꞌatsucunti ni vasalh iclhilacaꞌanta ju yuchi ni na icꞌamapaininin. Va yuchi ju lhitapalai laꞌixmacni Dios.
\p
\v 7 Pus ju uxijnan kꞌox ixtꞌonatꞌit. Para va alin ju lapanacni ju xataꞌokxchokꞌoyan ni jantuch vana lacꞌaꞌipꞌutꞌunatꞌit ju stavasalanti ixlacata ju Cristo.
\v 8 Ju anuꞌ chivinti ju tapuꞌokxchokꞌoputunan jantu ixꞌanuꞌ ju Dios ju tasacxtutan.
\v 9 Tun tꞌicꞌaptꞌit ju ani chivinti ju chani noncan: “Ma mas va lacatsꞌunin aclakmuju ju saskꞌajni pus laktanukꞌojui chux ju sasquitit”.
\v 10 Para ju quitꞌin iclhilaksi ju quiꞌucxtinꞌan Jesús ni yuchi ju cataꞌaktaijuyan ni jantu tavanan amapꞌaxaniyaꞌitꞌit ju miꞌatalacpastꞌacꞌatꞌan. Para ju anuꞌ ju talakꞌalhiniputunan ju miꞌatalacpastꞌacꞌatꞌan camamakꞌalhkꞌajnicanaꞌ mas va tichi chavaich cava.
\p
\v 11 Pus ju quitꞌin ji quiꞌalakꞌavin ni vanach acnaulh ni tasqꞌuini ni cachꞌucꞌucalh tam xamatiꞌ pus jantuch aquintalhimakchapulh ju quintꞌaꞌisraelitanin. Jantu tuꞌuꞌ cataxcanilh ju quintꞌaꞌisraelitanin ni acnaulh ju chunch mas vachuꞌ acꞌajunilh ju lapanacni ni tasqꞌuini ni catalhilaksilh ju Cristo ni yuchi ju nilh ixlacataꞌan.
\v 12 Ca vak tachi kꞌox cava ni lana catalakꞌalhinikꞌo ju ixlacatunaꞌan ju anuꞌ lapanacni ju talakꞌalhiniputunan ju miꞌatalacpastꞌacꞌatꞌan ni tajunan ni tasqꞌuini ni achꞌucꞌucꞌanatꞌit.
\p
\v 13 Pus ju uxijnan ji quiꞌalakꞌavin ju Dios talhisacxtutan ni isꞌaskꞌatꞌan aꞌunaꞌitꞌit. Jantu vana tasqꞌuini ni anaviyaꞌitꞌit tachi ju najun lacalhamapꞌaksin. Para ju chunch jantu va nomputun ni laich anavitꞌit ju macxcai miꞌatalacpastꞌacꞌatꞌan va ixlacaꞌatalh ni jantu lhilaksiyatꞌit ju lhamapꞌaksin. Alai tasqꞌuini ni lacaꞌamapaininti alaꞌaktꞌaiꞌutꞌit ju milhiꞌuxijnan.
\v 14 Pus laich apꞌumuctꞌaxtꞌuyaꞌitꞌit tachi chun ju najun lacalhamapꞌaksin va yuchi ni anaviyaꞌitꞌit va lakatam chivinti ju tsꞌokcanta ju anch. Yuchi ni amapꞌainitꞌit ju mintꞌalapanac tachi ju va jun miꞌakstuchꞌan ju mapꞌainichꞌokꞌocꞌantꞌit.
\v 15 Para acsni laclakꞌayatꞌit chai va laclasayatꞌit ju pumatamin pus alaktsꞌintꞌitch. Jantu xcai ni va alamacoyokꞌotꞌit ju pumatamin milhiꞌuxijnan.
\s1 Alin ju kꞌachani ju makꞌaniya quiꞌatsucuntiꞌan
\p
\v 16 Pus iclajunau ni chunch ju atsꞌucꞌutꞌit tachi ju tamapastꞌacꞌaniyan ju Spiritu Santu chai ju chunch jantu anaviyaꞌitꞌit ju macxcai ju alin lamiꞌalhunutꞌan.
\v 17 Pus ju macxcai ju alin laquiꞌalhunutꞌan va tꞌalasai ju ixkꞌachat ju Spiritu Santu. Chai ju ixkꞌachat ju Spiritu Santu va tꞌalasai ju macxcai ju alin laquiꞌalhunutꞌan. Chai ni va talaclasai pus yuchi jantu lai lhinaviyatꞌit ju kꞌox ju navipꞌutꞌunatꞌit.
\v 18 Para ni anaviyaꞌitꞌit tuchi lacasqꞌuin ju Spiritu Santu pus jantuch vana tasqꞌuini ni alhilaksitꞌit ju lhamapꞌaksin ju tsꞌoklh ju Moisés.
\p
\v 19 Pus lana tasui tamalh ju macxcai ju alin laquiꞌalhunutꞌan. Yuchach acsni xamatiꞌ jantu lhilacaꞌan tam ixꞌamachakaꞌ u ni jantu lhilacaꞌan tam ixpapa. Chai lhu alactuꞌunti ju ixtꞌachun ju tanavi.
\v 20 U va talhilacaꞌan ju tuꞌuꞌ santo. U ni alhicujnun. U taꞌaxcayanan. U talaclakꞌaji. U taꞌalhacchaꞌanan. U talhilakachapui tuꞌuꞌ. U va ixkꞌachat isꞌakstuꞌan ju tanavi. U na taꞌamaktalhkꞌamanan ni va talhacchaꞌan.
\v 21 U talhacchaꞌani ixtaxtokni ju akꞌantam. U amakninin. U tatꞌakꞌapꞌai. U aliꞌ macxcai ju va ixtꞌachunch tachi ju ani. Pus aktam iclajunchokopalau tachi ju xaclajunauch pꞌulhnan. Ju yuꞌunch ju tanavi ju chunch taxtokni jantu lai catitaꞌalh ju lactꞌiyan junta lhinajun ju Dios.
\p
\v 22 Para vachuꞌ tasui ni tꞌajun ju Spiritu Santu laquiꞌalhunutꞌan acsni amapainininau. Chai acsni kꞌachanau. Chai acsni jantu lacꞌan ju quiꞌalhunutꞌan. Chai acsni chꞌixkꞌoyau ju macxcai. Chai acsni va tachi kꞌox lapanacni talacasuyau. Chai acsni naviyau lamapainin. Chai acsni muctaxtuyau ju quinchivintiꞌan.
\v 23 Chai acsni palai talacatꞌicstꞌiyau. Chai acsni lai kꞌaichokocanau quiꞌakstuꞌan. Pus acsni naviyau tachi chun ju ani taxtokni pus matiꞌ ju lhamapꞌaksin ju lai aquintaꞌulanin ju quintalakꞌalhinꞌan va ixlacaꞌatalh ni naviyau ju chunch.
\v 24 Pus ju quijnanꞌan ju lhilaksiyauch ju Cristo jantuch vana naviyau ju macxcai quiꞌatalacpastꞌacꞌatꞌan. Alai laktsꞌinau ju makꞌaniya quiꞌatsucuntiꞌan tachi ju va nita ni nita ju Jesús quiꞌokxtapalhꞌan. Chai ju chavai jantu tasqꞌuini ni vana canaviyau ju ixkꞌachaniyau ju pꞌulhnan.
\v 25 Chai ni quintaxtaknitan ju sastꞌi quiꞌatsucuntiꞌan ju Spiritu Santu pus tasqꞌuini ni yuchach ju calhinonkꞌo chux laquiꞌatsucuntiꞌan.
\p
\v 26 Chai jantu va kꞌaya calhitakꞌayau tuꞌuꞌ. Acsni xamatiꞌ chunch lai pus ju aliꞌin va talhitalhkꞌaman ni va si xakꞌai tajumputun.
\c 6
\s1 Alaꞌaktꞌaiꞌutꞌit
\p
\v 1 Ji quiꞌalakꞌavin ni cꞌatsacan ni vasalh caꞌalactuꞌunulh pumatam ju vachuꞌ lhilacaꞌanta ju Cristo pus ju uxijnan ju lhinonkꞌojui ju Spiritu Santu lamiꞌalhunutꞌan asayaꞌutꞌit tachi ju lhikꞌox lapanac canavi ni jantu caxcanilh ixꞌalhunut laminchivintiꞌan. Para vachuꞌ alhistꞌacchꞌokꞌocꞌantꞌit miꞌakstuꞌan. Jantu xcai ni vachuꞌ anaviyaꞌitꞌit ju tuꞌuꞌ macxcai.
\v 2 Alaꞌaktꞌaiꞌutꞌit ni alin ixlhamakꞌan tam xamatiꞌ. Chai ni chunch ju alatꞌit pus amuctꞌaxtꞌuyaꞌitꞌit tachi ju najun laꞌixlhamapꞌaksin ju Cristo.
\p
\v 3 Pus ni alin tam xamatiꞌ ju na kꞌai cꞌatsai mas jantu tuꞌuꞌ ixtapalhni pus va isꞌakstu okxchokꞌochokocan.
\v 4 Pus ju pumatamin tasqꞌuini ni calaktsꞌintanucalh laꞌisꞌakstu tuchi laich navi. Jantu va calaktsꞌintailh laꞌisꞌatsucunti akꞌantam. Ju chunch alinch ju ixkꞌachat ixlacata tuchi navich isꞌakstu. Chai jantu va ixlacata ni palaich kꞌox calhiulachokocalh isꞌakstu. Palaich jantu ju tam ixtꞌalapanac.
\v 5 Pus tasqꞌuini ni pumatamin canaviyaꞌ ixlhichꞌalhcat isꞌakstu.
\p
\v 6 Ju amalanicanta ju ixchivinti Dios chach taꞌaktaiju ju amamakaꞌunuꞌ. Chach aktaijucalh ju amamakaꞌunuꞌ. Chach taxtaknilh tachi chun ju kꞌox.
\p
\v 7 Jantu aꞌokxchꞌokꞌocꞌantꞌit. Jantu xamatiꞌ lai catilhitsꞌiꞌilh ju Dios. Tachi ju tuꞌuꞌ tꞌin ju acchꞌanaꞌ pus yuchach ju acxkꞌaꞌiyaꞌ.
\v 8 Pus chunchach vachuꞌ ju laquiꞌatsucuntiꞌan. Ju va tachi navitꞌajun ju macxcai ju mapastꞌacꞌani ixꞌalhunut pus yuchach ju capuꞌamaklhtayananaꞌ ju ixꞌaninti junta jonkꞌalhita makꞌalhkꞌajnat. Para va tichi chavaich ju navitꞌajun ju kꞌachani ju Spiritu Santu pus isꞌakstu ju Spiritu Santu ju caxtakniyaꞌ ju isꞌatsucunti ju conkꞌalhiyanta lactꞌiyan.
\v 9 Pus jantu jeks caꞌuniu ixnavica ju kꞌox. Pus ni catailhiꞌanau ixnavica ju kꞌox pus cachinaꞌ ju avilhchan ju lhcata ju Dios acsni aquintaxtakniyan ju quintalhajaꞌan.
\v 10 Pus yuchi caꞌalhinaviniuch ju kꞌox tachi chun ju lapanacni va tapakchux ju lai canaviu. Para palai na lhu ju kꞌox canaviniuch ju quilhiꞌalakꞌavinꞌan laꞌixmacni Jesús.
\s1 Amacꞌaminin ju Pablo
\p
\v 11 Tus ani akꞌantam xaquiꞌatsꞌoknuni. Para ju chavai quitꞌin ju aclaꞌatsꞌoknuniyau laquimacaꞌ. Chai alaktsꞌintꞌit ni slivasalh na lackꞌai ju quiletra. Pus yuchi alhicꞌatsꞌayaꞌitꞌit ni vasalh quitꞌin ju iclaꞌatsꞌoknuniyau.
\v 12 Ju yuꞌunch ju va tapꞌastu tajunan ni achꞌucꞌucꞌantꞌit va tapujunan chunch ni kꞌox catalhiula ju ixtꞌalapanacni chai jantu caꞌamamakꞌalhkꞌajnicanaꞌ. Vachuꞌ jantu talhimakꞌalhkꞌajnamputun ni catanaulh ni tasqꞌuini ni calhilacaꞌancalh ju Cristo ni yuchi ju nilh lacacurus ju quilacataꞌan.
\v 13 Para nin yuꞌunch ju chunch tajunan jantu tamuctaxtukꞌojui chux tachi ju najun lacalhamapꞌaksin mas achꞌucꞌucanta ju yuꞌunch. Alai va talacasqꞌuin ni achꞌucꞌucꞌantꞌit vachuꞌ ju uxijnan chai ju chunch laich catalhitakꞌayayaꞌ ni navitꞌatꞌit tachi ju xatajunan.
\v 14 Pus ju quitꞌin lana jantu tuꞌuꞌ iclhitakꞌayaputun. Va yuchi ju tuꞌuꞌ iclhiulai ni quinichilh ju quiꞌucxtinꞌan Cristo ju quilacataꞌan. Chai ni iclhilaksich ju Cristo ni nilh ju lacacurus ju quilacata pus jantu tuꞌuꞌ iclhiulai ju taxtokni ju ani lacamunutpaꞌ ju talhitakꞌayai ju quintꞌalapanacni. Pus ju yuchi jantu lai aquixtakniyaꞌ tuꞌuꞌ kꞌox.
\v 15 Pus ni lhilacaꞌantauch ju Cristo pus jantu tuꞌuꞌ quintalhiꞌaktaijuyan mas ixchꞌucꞌucau u jantu. Va yuchi ju lhitapalai ni quixtaknita ju sastꞌi quiꞌatsucunti ju Jesús.
\v 16 Ictapainini ju Dios ni cataꞌaktaijuyan lacaꞌamapaininti chai ni jantu calacꞌalh ju miꞌalhunutꞌan tachi chun ju uxijnan ju chunch tsꞌucꞌuyatꞌit tachi ju iclajuntauch ju ani. Vachuꞌ chunch ictapaini ixlacata ju aliꞌin ju vasalh isꞌaskꞌatꞌan Dios tajunita.
\p
\v 17 Pus ju atipuꞌanta jantu iclacasqꞌuin ni xamatiꞌ casamakꞌalh ju quinchivinti. Pus laquilacatuna tasuicaꞌ junta xaquintalakanekmai ju aliꞌin lapanacni va ixlacata ni icꞌajuni ju lapanacni ixchivinti Jesús.
\p
\v 18 Ji quiꞌalakꞌavin ictapainini ju quiꞌucxtinꞌan Jesucristo ni catanaviniyan lamapainin minchuxꞌan ju uxijnan. Slivasalh chunch ju iclacasqꞌuin.