\id EPH
\ide UTF8
\h EFESO
\toc1 EFESO
\mt1 JU ALHIQUI JU ATSꞌOKNUNICALH JU AMACHAKꞌAN EFESO
\c 1
\s1 Ju Pablo amacꞌami ju amachakꞌan Efeso
\p
\v 1 Ju quitꞌin icPablo chai Dios ju lacasqꞌuilh ni ixtamalakachan acva. Iclamacꞌamiyau ju uxijnan ju isꞌaskꞌatꞌan Dios untꞌatꞌit ju vilhchitꞌit ju lakꞌachakꞌan Efeso. Ju uxijnan vachuꞌ lhilacꞌapꞌintꞌatꞌit ju Cristo.
\v 2 Ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
\s1 Ju Cristo xtꞌakꞌa tachi chun ju kꞌox
\p
\v 3 Chach lakꞌayacalh ju Dios ixpai ju quiꞌucxtinꞌan Jesucristo. Ju yuchi quintaxtaknitan tachi chun ju kꞌox va ixlacaꞌatalh ni lhilacaꞌanauch ju Cristo. Chai ju tuchi quintaxtaknitan ju yuchi pus lactꞌiyan ju xaminacha.
\v 4 Pus quintanavitan chunch va ixlacaꞌatalh ni Dios ju quintasacxtun makꞌanch acsni tucaꞌ ixnavican ju lacamunutpaꞌ ni va lakatam catꞌajumvi ju Cristo. Pus ju yuchi va islacasqꞌuin ni laich ixꞌanuꞌ cajumvi chai laich aquintalaktsꞌinan tachi ju va matich ju quiꞌalactuꞌuntiꞌan chai yuchi quintalhisacxtun.
\v 5 Tus makꞌanchich ixnajunta ju Dios laꞌixꞌamapaininti ni aquintanaviyan isꞌaskꞌatꞌan va ixlacata ju Jesucristo. Chai va ixlacata ni chunch ju xakꞌachani pus chunch ju lalh.
\v 6 Pus ni laich calakꞌayacalh ixlacata ju kꞌai ixꞌamapaininti ju quintanavinitan yuchi xaquintalhinaviyan isꞌaskꞌatꞌan. Lana lhu quintanavinitan ju lamapainin acsni quintanavin isꞌaskꞌatꞌan va ixlacata ni lhilacaꞌantauch ju istsꞌalh ju na mapaini.
\v 7 Yuchach ju quintamalakxtun laꞌixꞌacꞌalhni. Chai ni slivasalh na kꞌai ju ixꞌamapaininti ju quintamasunitan pus quintamacꞌacxaninch ju quiꞌalactuꞌuntiꞌan.
\v 8 Chai ju anuꞌ kꞌai ixꞌamapaininti ju quintamasunitan jantu va yuchi ni quintamakꞌalhtaxtun. Para vachuꞌ lhu xaquintaxtakniyan ju atalaninti chai acꞌatsanti.
\v 9 Chai vachuꞌ quintamavasalanin ju ixkꞌachat ju jantu ixꞌamavasalanicanta ju lapanacni ju makꞌanchich. Quintamavasalanin tuchi ilhcata ni canaviyaꞌ ju Cristo.
\v 10 Pus tus makꞌanchich ixnajunta ni caꞌulacanach ju Cristo ixpuxaꞌucxtin tachi chun ju xataxtokni ju alin lactꞌiyan chai ju alinch ju lacatꞌun. Chai chux ju ani caꞌuctaxtuyaꞌ acsni cataꞌaktsayaꞌ ju avilhchan tachi ju ilhcata ju Dios.
\p
\v 11 Chai va ixlacata ni lhilacaꞌantau ju Cristo pus ju Dios aquintaxtakniyan ju ixmakꞌalit. Na makꞌanch chunch ispastacta ju Dios ju quilacataꞌan chai ju yuchi aktsꞌiya navikꞌojui chux tachi ju kꞌachani.
\v 12 Ju Dios yuchi quintalhisacxtutan makꞌanch ni laich aclakꞌayayau ni yuchi ju tucan xakꞌai. Aclakꞌayayau ju quijnan ju pꞌulhnan iclhilacaꞌantauch ju Cristo.
\v 13 Chai vachuꞌ ju uxijnan lacꞌaꞌitꞌatꞌit acsni kꞌasmatꞌatꞌit ju chivinti ju stavasalanti junta najun ta yu laich putakꞌalhtaxtucan junta jonkꞌalhita makꞌalhkꞌajnat. Chai acsni lacꞌaꞌitꞌatꞌit pus ju Dios taxtaknin ju anuꞌ ju apꞌucꞌatsꞌayaꞌitꞌit ni vasalh ixꞌanuꞌ untꞌatꞌit. Yuchi ju Spiritu Santu ju ixkꞌalhtasuta ju Dios.
\v 14 Xtaknicantauch ju Spiritu Santu ju chavai ni laich cacꞌatsayau ni vasalh aquintaxtakniyan tachi chun ju kꞌalhtasuta ju Dios. Chai acsnich ju aquintaxtakniyan acsni matich lana cajunaꞌ ju quiꞌalactuꞌuntiꞌan ni alin ju sastꞌi quilacatunaꞌan. Chai ju chunch palai calakꞌayayau ju Dios ju tucan xakꞌai.
\s1 Ju Pablo tapainini ju Dios ixlacataꞌan ju amachakꞌan Efeso
\p
\v 15 Pus ju quitꞌin ickꞌasmatlh ni ixlhichux ju miꞌalhunutꞌan ju lhilacꞌapꞌintꞌatꞌit ju quiꞌucxtinꞌan Jesús chai na amapꞌainiyatꞌit tachi chun ju vachuꞌ talhilacaꞌanta ju yuchi.
\v 16 Pus yuchi va tachi iclhijunich ju Dios lakꞌailaktsꞌiuch ju milacataꞌan chai icsqꞌuini ju Dios ju milacataꞌan acsni ictꞌachivinin ju yuchi.
\v 17 Ictapainini ju Dios ixpai ju quiꞌucxtinꞌan Jesucristo. Yuchi ju xakꞌai tucan. Icsqꞌuini ni cataxtakniyan ju kꞌox mintacꞌatsanꞌan ni laich amachꞌakxayaꞌitꞌit ixtaxtokni Dios. Chai ju chunch palai lai amispꞌayaꞌitꞌit ju yuchi ta tucan junita.
\v 18 Icsqꞌuini ni catamalacpucujunin ju mintacꞌatsanꞌan ni laich amachꞌakxayaꞌitꞌit tuchi ixtalakxtuch ju lacꞌaꞌiyatꞌit ni cataxtakniyan ju Dios ju lactꞌiyan chai tuchi lhilhcꞌacꞌantꞌatꞌit. Vachuꞌ icsqꞌuini ju Dios ni laich amachꞌakxayaꞌitꞌit ni slivasalh na kꞌox ju anuꞌ ju caꞌaxtaknicanaꞌ tachi chun ju isꞌaskꞌatꞌan tajunita.
\v 19-20 Chai icsqꞌuini ni laich acꞌatsꞌayaꞌitꞌit ni slivasalh na kꞌai ju ixtachaput ju quilacataꞌan ju lhilacaꞌantauch ju yuchi. Chai ju ixtachaput ju na kꞌai ju quilacataꞌan vana va yuꞌ ju malacasulh ju Dios acsni malokꞌonichokolh ju Cristo acsni ixnitach chai acsni ulacha lactꞌiyan vanin junta vi ju yuchi.
\v 21 Anch ulacalh ju Cristo ni palai xakꞌai navicanta ju yuchi. Palai jantu tachi chun ju xaꞌanquilhnin lactꞌiyan ju talhinajun. Jantu xamatiꞌ ju tꞌajun ju chavai ju ixtꞌachunch cava nin lai caꞌalilh astan xamatiꞌ ju ixtꞌachunch cajunaꞌ.
\v 22 Chai ju Dios yuchi lhiꞌula ni yuchi ju calhinonkꞌoyach tachi chun ju taxtokni. Chai lhilhcaꞌula ju yuchi tachi saꞌaktsulh tachi chun ju talhilacaꞌanta ju Cristo.
\v 23 Pus tachi chun ju talhilacaꞌanta ju Cristo tachi ixlacatuna tajunita ni yuchi ju alhijuni chai laꞌixmacni yuchi va lakatam tatꞌajunita. Chai ju Cristo vi mas vanta anchach cava.
\c 2
\s1 Takꞌalhtaxtucan va ixlacata ixꞌamapaininti Dios
\p
\v 1 Acsni ixmucꞌanicꞌantꞌatꞌit ju miꞌanintiꞌan ixlacata ju miꞌalactuꞌuntiꞌan chai mintalakꞌalhinꞌan acsnich ju taxtaknitan ju Dios ju sastꞌi miꞌatsucuntiꞌan.
\v 2 Acsni tucaꞌ ismispꞌayatꞌit ju Cristo pus vachuꞌ chunch ixlayatꞌit tachi ju talai ju jantucaꞌ talhilacaꞌanta ju yuchi. Ixnaviniyatꞌit ixkꞌachat ju xaꞌucxtin lhacaticurulhni. Chai yuchach ju vachuꞌ chꞌalhcatnan laꞌixꞌalhunutꞌan ju jantu taquiclacaꞌiputun ju Dios.
\v 3 Pus ju makꞌanchich vachuꞌ chunch ixlayau ju quijnanꞌan. Ixnaviyauch tachi chun ju macxcai ju ixkꞌachaniyau. Chai ixnaviyau ju macxcai ixkꞌachat ju quilacatunaꞌan chai ju quiꞌatalacpastꞌacꞌatꞌan. Pus tus acsni istsucutachauch ixlhijunch ni calhitalhkꞌamalh ju Dios tachi ju ixlayauch. Chai si lana chun ixjunkꞌotauch.
\v 4 Para ju Dios slivasalh na lai aꞌaktaijunun lacaꞌamapaininti chai slivasalh na quintamapainin.
\v 5 Pus mas ixmucꞌanicantauch ju quiꞌanintiꞌan va ixlacata ju quiꞌalactuꞌuntiꞌan para ju Dios quintaxtaknitan ju sastꞌi quiꞌatsucuntiꞌan ni lhilacaꞌantauch ju Cristo. Pus va yuchi ni quintanavinitan lamapainin ju Dios yuchi lai xalhitakꞌalhtaxtuyau junta jonkꞌalhita makꞌalhkꞌajnat.
\v 6 Tachi ju Cristo ni xtaknichokocalh isꞌatsucunti acsni ixnita pus vana va chun ju quijnanꞌan. Quintaxtaknitan ju sastꞌi quiꞌatsucuntiꞌan chai ju chavai ju Dios quintalaktsꞌinan tachi ju va anch tꞌavilhchau ju Cristo Jesús ju lactꞌiyan.
\v 7 Chunch ju quintanavinin ju Dios ni caputalacasukꞌalhiyach ni slivasalh quintaꞌaktaijutan lacakꞌai ixꞌamapaininti acsni quintanavinin ju kꞌox va ixlacaꞌatalh ni lhilacaꞌantauch ju Cristo Jesús.
\v 8 Takꞌalhtaxtutauch lacamakꞌalhkꞌajnat junta jonkꞌalhita va ixlacaꞌatalh ni quintaꞌaktaijutanch ju Dios lacaꞌamapaininti acsni lhilacaꞌantauch ju Cristo. Para jantiyuꞌ quintalhinavinitan chunch va ixlacaꞌatalh ni navitau tuꞌuꞌ. Alai va quintalhikꞌailaktsꞌintan ju Dios ju ixꞌamapaininti.
\v 9 Jantu lai putakꞌalhtaxtuyau va ixlacaꞌatalh ni canaviuch ju kꞌox. Ni lai chunch cava ixputakꞌalhtaxtu pus ca laich ixtalhitakꞌaya ju aliꞌin ni ixtacꞌatsa ni laich ixtatakꞌalhtaxtulh va laꞌisꞌakstuꞌan.
\v 10 Para isꞌakstu ju Dios ju quintamakꞌalhtaxtuyan. Chai acsni lhilacaꞌanau ju Cristo pus quintaxtakniyan sastꞌi quiꞌatsucuntiꞌan ni lai naviyau ju kꞌox tachi ju ixlhilhcaꞌulata ju Dios ni canaviu.
\s1 Matiꞌ ju lakꞌaiti laꞌixmacni ju Cristo
\p
\v 11 Apꞌastꞌactꞌit ni jantu israelitanin untꞌatꞌit. Chai ju quintꞌaꞌisraelitanin ju achꞌucꞌucanta jantu ixtatꞌalaxakꞌalaputunan ni jantu chꞌucꞌucꞌantꞌatꞌit.
\v 12 Apꞌastꞌactꞌit ni jantucaꞌ ismispꞌayatꞌit ju Cristo ju acsnich. Chai ni jantu quintꞌaꞌisraelitanin untꞌatꞌit pus jantu ixmaktꞌanuyatꞌit ju ixlacata tuchi xaquintalhitꞌatakꞌoxitan ju Dios ju quijnan ju israelitanin icjuntau. Jantucaꞌ iscꞌatsꞌayatꞌit ni laich caꞌalilh ju miꞌatsucuntiꞌan ju lactꞌiyan. Chai mas ixvilatꞌit ju ani lacamunutpaꞌ para jantucaꞌ ismispꞌayatꞌit ju tucan Dios.
\v 13 Pus ju makꞌanchich ixtꞌalaxcai ixꞌuntꞌatꞌit ju Dios. Para ju chavai ni quinichilh ju Cristo pus maꞌamigoxlacꞌantꞌatꞌit va ixlacaꞌatalh ni lhilacꞌapꞌintꞌatꞌit ju Jesús.
\v 14 Pus yuchi ju Cristo ju xtꞌakꞌa ju atsucunti ju lhikꞌach junta matiꞌ ju lakꞌaiti. Yuchi ju va lakatam quintanavin ju quijnan ju israelitanin icjuntau chai ju uxijnan ju jantu israelitanin untꞌatꞌit. Chai yuchi ju makꞌosulh ju anuꞌ ju quilhmaktꞌui xaquintanavitan.
\v 15 Acsni quinichilh ju ani ju Cristo pus mamixilh ju laxcaiti ju ixꞌalin sia lhiquijnanꞌan va ixlacata ju lhamapꞌaksin junta ixnajun tuchich ju lai navican chai ta yu canavicalh. Chai ju chunch va lakatam quintanavin ju quijnan ju israelitanin icjuntau chai ju uxijnan ju jantu israelitanin untꞌatꞌit. Va lakatam juntau ni quintaxtaknikꞌojun ju sastꞌi quiꞌatsucuntiꞌan laꞌixmacni ju yuchi. Ju chunch matiꞌ ju laxcaiti.
\v 16 Chai ni quinichilh ju Cristo pus ju chunch apunavichokolh ixꞌamigojni ju Dios ju quintꞌaꞌisraelitanin chai ju jantu israelitanin. Chai vachuꞌ pumamixikꞌo ju laxcaiti ju ixꞌalin sia quijnanꞌan. Chai ju chavai laktsꞌincantauch tachi ju va lakatam lacatuna ju quintꞌiyunꞌan.
\p
\v 17 Pus ju Cristo quilachilh chai quintajunin ni matanꞌula ixꞌalhunut ju Dios. Quintajunin ju israelitanin icjuntau ju vanin xacvilau laꞌixmacni Dios. Vachuꞌ tajunin ju uxijnan ju jantu israelitanin untꞌatꞌit ju na makat ixtꞌonatꞌit laꞌixmacni Dios.
\v 18 Pus laꞌixmacni Cristo ju uxijnan ju jantu israelitanin untꞌatꞌit chai ju quijnan ju israelitanin icjuntau laich xakꞌalayau ju Dios tachi ju quimpaiꞌan. Chai vana yuꞌ ju Spiritu Santu ju taꞌaktaijuyan ju uxijnan tachi ju quintaꞌaktaijuyan ju quijnan.
\v 19 Ju makꞌanch jantu makyuꞌunch ixꞌuntꞌatꞌit ju isꞌaskꞌatꞌan Dios. Para ju chavai lhilakꞌamispꞌacꞌanatꞌit ni isꞌaskꞌatꞌan untꞌatꞌit.
\v 20 Chai tachi ju va ixchakaꞌ Dios juntau. Ju uxijnan chunch untꞌatꞌit tachi ju xatantuꞌ chakaꞌ. Chai ju ixtamalakachan Dios chai ju lapanacni ju tanajun ixchivinti Dios chunch tajunita tachi ju xatantun ni yuꞌunch ju tajunin ixchivinti Dios. Chai ju Cristo Jesús chunch junita tachi ju tuꞌuꞌ chiux ju makꞌastumucꞌacanta chakaꞌ junta tsꞌokcanta tuchi cꞌatach ju yocanta.
\v 21 Chai va ixlacata ni lhilacꞌapꞌinatꞌit ju Cristo pus chunch untꞌatꞌit tachi ju tuꞌuꞌ chakaꞌ ju sok yocanta. Chai ni palai amispꞌayaꞌitꞌit ju Dios pus chunch ju aꞌunaꞌitꞌit tachi ju kꞌai ixpujitat Dios ni vasalh tꞌajun ju yuchi lamiꞌalhunutꞌan.
\v 22 Chai ixlacata ni lhilacꞌapꞌinatꞌit ju Cristo vachuꞌ ju uxijnan pus ju Dios quintanavitan tachi lakatam chakaꞌ junta tꞌajun ju yuchi. Pus ixchakaꞌ Dios juntau ni tꞌajun laquiꞌalhunutꞌan ju Spiritu Santu.
\c 3
\s1 Ju Pablo amalani ju jantu israelitanin
\p
\v 1 Ju quitꞌin icPablo. Ixlapanac ju Jesucristo. Chai tachꞌin icjunita ju chavai va ixlacaꞌatalh ni iclajuniu ni laich lhilacꞌapꞌinatꞌit ju Cristo ju uxijnan ju jantu israelitanin untꞌatꞌit.
\v 2 Ca aktsꞌiya kꞌasmatꞌatꞌit ni quinavinita lamapainin ju Dios chai quixtaknilh ju lhichꞌalhcat ni laich aclajunau ni laich atꞌakꞌalhtꞌaxtꞌuyaꞌitꞌit ni alhilacꞌapꞌinaꞌitꞌit ju Jesús.
\v 3 Chai cꞌatsꞌayatꞌit ni quintalacasunilh ju Cristo chai quimamachakxanilh ju anuꞌ chivinti ixlacata ju yuchi ju jantu lai ixmachakxacanta ju makꞌanchich. Pus iclaꞌatsꞌoknunitau lacatsꞌunin ixlacata ju yuchi.
\v 4 Chai acsni alaktsꞌinaꞌitꞌit ju tuchi iclaꞌatsꞌoknunitau pus amachꞌakxayaꞌitꞌit tuchi iccꞌatsai ixlacata ju Cristo ju jantu iscꞌatsacanta ju makꞌanchich.
\v 5 Pus jantu ixꞌamamachakxanicanta ju lapanacni ju ixtatꞌajun makꞌanchich. Para ju chavai yuchi ju Spiritu Santu ju amavasalani ju ixtamalakachan ju Cristo chai ju lapanacni ju tanajun ixchivinti.
\v 6 Pus ju anuꞌ ju jantu lai ixmachakxacan ju makꞌanchich yuchach ju ani. Ju uxijnan ju jantu israelitanin untꞌatꞌit chai ju quijnan ju israelitanin icjuntau va kꞌaixtam caꞌamaklhtayananau chux ju makꞌalit ju xtꞌakꞌa ju Dios. Chai tachi chun ju quijnanꞌan si ixlacatuna Cristo juntau. Chai tachi chun ju chivinti ju quintatꞌatakꞌoxitan ju Dios ju quijnan ju israelitanin icjuntau vachuꞌ milacataꞌan ju uxijnan ju jantu israelitanin untꞌatꞌit acsni kꞌasmatꞌatꞌit ju ixchivinti Dios chai lhilacꞌapꞌinatꞌit ju Cristo.
\v 7 Dios ju quisacxtulh ni ixlapanac acva ni laich acꞌajunilh ju lapanacni ju ani chivinti. Chai quinavinilh lamapainin chai quixtaknilh ixtachaput ni laich acnavi.
\v 8 Pus ju Dios quinavinilh lamapainin ni laich iclajunau ju uxijnan ju jantu israelitanin untꞌatꞌit ju ixchivinti junta najun ni slivasalh na kꞌai ju makꞌalit ju alin laꞌixmacni ju Cristo. Chai quinavinilh ju ani lamapainin mas jantu tuꞌuꞌ quintapalhni iclaktsꞌinchokocan quiꞌakstu ni na xacnavi ju alactuꞌunti ju pꞌulhnan. Palai jantu tuꞌuꞌ quintapalhni ju quitꞌin. Palai xalackꞌajin tajunita tachi chun ju aliꞌin ju talhilacaꞌanta ju Cristo.
\v 9 Para quinavinilh ju Dios lamapainin ni laich acꞌamavasalanilh va tichi cavalhch tuchi ju nomputun ju chivinti ixlacata ju Cristo ju jantu ixmachakxacanta ju makꞌanchich. Pus ju makꞌanchich ju Dios jantu xamatiꞌ ixmavasalanita ju anuꞌ chivinti. Yuchi ju Dios ju navikꞌota tachi chun ju taxtokni.
\v 10 Jantu ixmavasalata ju makꞌanchich ni laich catacꞌatsayach ju chavai ju anquilhnin chai ju alin ixtachaputꞌan ju lactꞌiyan ni na tijlhu ju pastꞌacꞌa ju Dios ni canavi. Catapucꞌatsayaꞌ ni catalaktsꞌinaꞌ tachi chun ju anavinita ju lapanacni ju talhilacaꞌanta ju Cristo.
\v 11 Pus ju Dios aktsꞌiya ispastacta ni chunch cajunaꞌ chai ixnajunta ni laꞌixmacni quiꞌucxtinꞌan Cristo Jesús ju caꞌuctaxtuyaꞌ.
\v 12 Pus va ixlacaꞌatalh ni lhilacaꞌantauch ju Cristo jantu talhananau acsni tꞌachivinau ju Dios chai lai junau va tuchi ixtalakxtuch ju jumputunau.
\v 13 Chai ni vasalh chunch juntau laꞌixmacni Cristo pus iclatapaininiyau ni jantu tam anaꞌuntꞌit va ixlacaꞌatalh ni na icmakꞌalhkꞌajnan va ixlacata ni iclajunau ixchivinti Dios. Alai acꞌatsꞌatꞌit ni lakꞌayacꞌantꞌatꞌit ni na tuꞌuꞌ talhiulayan ju Dios ni xalacasqꞌuin ni acmamakꞌalhkꞌajnicalh ju milacataꞌan.
\s1 Ixꞌamapaininti ju Cristo
\p
\v 14 Acsni icpastꞌacꞌa tuchi navita ju Dios pus ictaꞌaktsokotani ju yuchi ju ixpai ju quiꞌucxtinꞌan Jesucristo junita.
\v 15 Pus ju Dios quimpaiꞌan junita tachi chun ju vilau ju ani lacamunutpaꞌ chai tachi chun ju tavilanancha lactꞌiyan.
\v 16 Pus ju Dios slivasalh ni yuchi ju xakꞌai. Chai yuchi iclhitapainini ni tachapun catanaviniyan ju miꞌalhunutꞌan. Chai yuchi ju Spiritu Santu ju cataꞌaktaijuyan ni chunch aꞌunaꞌitꞌit.
\v 17 Iclhitapainini ni catsucuyach ju Cristo lamiꞌalhunutꞌan ni lhilacꞌapꞌintꞌatꞌit ju yuchi. Chai icsqꞌuini ni caꞌalilh ju miꞌamapainintiꞌan ju jantu tuꞌuꞌ lai catamacꞌapꞌanin.
\v 18 Ju chunch ju uxijnan chai tachi chun ju aliꞌin ju talhilacaꞌanta ju Cristo laich amachꞌakxayaꞌitꞌit ta anchach ju ti chaꞌankꞌota ju ixꞌamapaininti Dios.
\v 19 Iclacasqꞌuin ni amachꞌakxatꞌit ni slivasalh na tamapainiyan ju Cristo mas jantu lai tavanan amachꞌakxayaꞌitꞌit tas va ti chaꞌankꞌotach ju ixꞌamapaininti. Ju chunch ju Dios cataxtaknikꞌoyan tachi chun ju kꞌox ju axtaknican ju talhilacaꞌanta ju Jesús.
\p
\v 20 Ju Dios na tachapun. Chai pucꞌatsayau ni na alin ju ixtachaput acsni pastꞌacꞌau tachi chun ju quintaꞌulhtutan laꞌixmacni Cristo. Chai yuchi lhicꞌatsayau ni Dios palai lai kꞌox quintanaviyan. Jantu va chun ju quintaxtakniyan tachi ju sqꞌuiniyau u tachi ju pastꞌacꞌau.
\v 21 Chach talakꞌaya ju Dios tachi chun ju talhilacaꞌanta ju Jesús. Chach lakꞌayacalh tus va tavananch cava. Vasalh iclacasqꞌuin ni chunch ju canavicalh.
\c 4
\s1 Va lakatam juntau ni si pacxankꞌotau ju Spiritu Santu
\p
\v 1 Ju quitꞌin tachꞌin icjunita ni iclhilacaꞌanta ju quiꞌucxtinꞌan Jesús. Pus iclatapaininiyau ni chunch ju atsꞌucꞌutꞌit tachi ju lhijunch ni catatsuculh ju asacxtuta ju Dios. Pus vachuꞌ tasacxtutan ju Dios ju uxijnan.
\v 2 Jantu alhitꞌakꞌayatꞌit tuꞌuꞌ. Alamalacꞌasunitꞌit ju milhikꞌox lapanacꞌan. Alachꞌixnitꞌit ju macxcai va ixlacaꞌatalh ni lamapꞌainiyatꞌit.
\v 3 Slivasalh ixlhichux miꞌalhunutꞌan anavitꞌit talacmaskꞌatꞌin ta yu laich va chꞌanxtamch apꞌulalhipꞌitꞌit chai jantu alaclasatꞌit. Ju chunch vasalh va lakatamch aꞌunaꞌitꞌit laꞌixtachaput ju Spiritu Santu.
\v 4 Ju quijnanꞌan ju lhilacaꞌantauch ju Cristo tachi ju va lakatam lacatuna juntau. Chai va lakatam ju Spiritu Santu. Chai ni quintasacxtutan ju Dios pus va lakatam taxtokni ju pacxanau ni aquintaxtakniyan. Chai cꞌatsayau ni vasalh caꞌamaklhtayananau ju anuꞌ ju quintakꞌalhtasunitan ju Dios.
\v 5 Va pumatam ju quiꞌucxtinꞌan. Va pumatam ju lhilacaꞌantauch. Chai va lakatam amakpaxanti ju alin.
\v 6 Va pumatam ju Dios. Yuchi ju quimpaiꞌan quilhichuxꞌan. Yuchi ju lhinonkꞌojui tachi chun ju taxtokni. Chai yuchi ju chꞌalhcatnan quilacataꞌan ju lhilacaꞌantauch ju yuchi. Chai yuchi ju tꞌajun laquiꞌalhunutꞌan.
\p
\v 7 Ju pumatamin quijnanꞌan quintaxtaknitan tuchi lhichꞌalhcat ju kꞌoxich lhiulai ju yuchi.
\v 8 Pus yuchi lhichivincanta ju Cristo laꞌixchivinti Dios ju tsꞌokcanta junta chani najun:
\q1 Acsni anchokolh ju lactꞌiyan alhiꞌalh ju tachi va tachꞌinin ixtajunita.
\q1 Chai axtaknilh lhakꞌailaktsꞌin ju lapanacni ju ani lacamunutpaꞌ.
\m Chunch ju najun laꞌixchivinti Dios ju tsꞌokcanta.
\p
\v 9 Pus junta najun ni anchokolh ju lactꞌiyan ca aktsꞌiya nomputun ni pꞌulhnan quilachilh ju ani lacatꞌun. Chai quinavichilh ju lhichꞌalhcat ju ilhcanicanta.
\v 10 Chai ju anuꞌ ju quilachilh ju ani lacatꞌun vana yuchi ju anchokolh ju lactꞌiyan. Chai ju chavai yuchi ju vi mas vanta anchach cava.
\v 11 Chai isꞌakstu ju Cristo ju quintaxtaknitan ju ixlhichꞌalhcat ju pumatamin pumatamin. Ju aliꞌin axtaknican ju lhichꞌalhcat ni ixtamalakachan catajunaꞌ. Ju aliꞌin axtaknican ni catanonaꞌ ixchivinti Dios. Ju aliꞌin axtaknican ni catamavasalayaꞌ ixchivinti Dios ju tsꞌokcanta. Chai ju aliꞌin axtaknican ni catalhinaulh lacatalhavat ju talhilacaꞌanta ju Cristo. Chai ju aliꞌin axtaknican ni cataꞌamalaninilh ixchivinti Dios.
\v 12 Chai quintaxtaknin ju ani ju pumatamin ni lai palai canaviyau ju ixlhichꞌalhcat ju Dios. Ju chunch ju aliꞌin ju talhilacaꞌanta ju Cristo palai pꞌas catalhilacaꞌanaꞌ.
\v 13 Chai ni laich va lakatam cajumvi tachi chun ju quijnanꞌan ju lhilacaꞌanauch ju Jesús chai ni vasalh laich catsucuyau tachi ju kꞌachani ju istsꞌalh Dios yuchi xaquintalhixtakniyan ju ani. Chai ni chunch catsucuyau pus cachaꞌanaꞌ ju quiꞌatalacpastꞌacꞌatꞌan tachi ixꞌatalacpastꞌacꞌat tam lapanac ju vasalh tsucui tachi ju kꞌachani ju Cristo. Chai astan cachinaꞌ ju avilhchan ni chunch cajunau tachi ju junita ju Cristo.
\v 14 Pus jantu chun calau tachi ju tam askꞌatꞌa. Pantsꞌiquis kꞌachaniyau ju ani atalaninti. Chai apantsꞌiquis atumpa ju kꞌachanipalau. Chai lacaꞌiniyau ju ixꞌaꞌokxchokꞌonti ju lapanacni ju na lai tapuꞌokxchokꞌonun ju jantu stavasalanti.
\v 15 Alai va tachi canonau ju stavasalanti ni lamapainiyau. Ju chunch palai chunch cajunau tachi ju Cristo ju saꞌaktsulh junita tachi chun ju talhilacaꞌanta ju yuchi.
\v 16 Tachi ju quilacatunaꞌan mas na tijlhu alin ju ixtaxtokni para ni alin ju quiꞌasivicꞌan pus va lakatam junita. Chai ju lakatamin taxtokni aktaijui ixtꞌataxtokni tachi ju xtakni ju ixtachaput ju quiꞌaktsulhꞌan. Pus vana va chun ju quijnanꞌan ju ixlacatuna Cristo juntau. Acsni calhilaksiyau ju Cristo ju saꞌaktsulh junita pus va lakatam cajunau chai calaꞌaktaijuyau lacatachaput ju quintaxtakniyan pumatamin ju Cristo. Chai calamapainiyau chai palai pꞌas calhilacaꞌanau ju yuchi.
\s1 Ju sastꞌi atsucunti laꞌixmacni Cristo
\p
\v 17 Pus ju ani iclajunau laꞌixtapakaꞌut ju quiꞌucxtinꞌan Jesús. Jantu vana atsꞌucꞌutꞌit tachi ju aliꞌin ju vachuꞌ jantu israelitanin tajunita ju jantucaꞌ talhilacaꞌanta ju Cristo. Jantu lhitapalai tachi ju taꞌalacpastacnan ju yuꞌunch.
\v 18 Ju yuꞌunch jantu lai tamachakxai ixtaxtokni Dios. Jantu tapacxanta ju atsucunti jonkꞌalhita ju xtꞌakꞌa ju Dios ni lana jantu lai tamachakxai va ixlacaꞌatalh ni na va pꞌas ju ixꞌalhunutꞌan.
\v 19 Ju yuꞌunch ni jantu lana lai tamaxanan pus yuchi va lakachapu talhilhitapꞌuxtach isꞌatsucuntiꞌan. Lana lacalhikꞌach tanavi ju va tuchi alactuꞌunti ju kꞌachani ju ixlacatunaꞌan.
\v 20 Para jantu chun xatamasuniyan ju Cristo ju uxijnan.
\v 21 Pus ju uxijnan aktsꞌiya kꞌasmatꞌatꞌit ixlacata ju Jesús. Chai malanicꞌantꞌatꞌit ixlacata yuchi. Chai ju tuchi naulh ju yuchi stavasalanti.
\v 22 Pus amacꞌonkꞌotꞌit ju macxcai tachi ju ixtꞌailhipꞌintꞌatꞌit ju makꞌanch. Tachi ju ixlayatꞌit acsni tucaꞌ ixlhilacꞌapꞌintꞌatꞌit ju Jesucristo. Pus ixꞌalilh ju mimakꞌalhkꞌajnatꞌan jonkꞌalhita ni ixtꞌailhipꞌitꞌit ju chunch. Pus ju alactuꞌunti ju ixnavipꞌutꞌunatꞌit ju acsni va ixtaꞌokxchokꞌoyan.
\v 23 Pus chach lasastꞌikꞌocalh ju miꞌatalacpastꞌacꞌatꞌan.
\v 24 Chai amalacꞌasutꞌit ni vasalh sastꞌi ju miꞌatsucuntiꞌan. Slivasalh soknicꞌa chai salaka atsꞌucꞌutꞌit tachi ju kꞌachani ju Dios.
\p
\v 25 Chai ni chunch cajunaꞌ ju miꞌatsucuntiꞌan pus tasqꞌuini ni amacꞌaꞌuntꞌit ju taꞌaklhtamat. Alai va yuchi ju stavasalanti ju alaꞌunitꞌitch ju pumatamin mintꞌalapanacni ni tachi ju va lakatam lacatuna juntau.
\p
\v 26 Acsni tꞌalhkꞌamnatꞌit pus alhistꞌacchꞌokꞌocꞌantꞌit miꞌakstuꞌan ni jantu alactꞌuꞌununtꞌit. Chai vatsꞌalhti acꞌaptꞌit ni alin ju mintalhkꞌamtiꞌan.
\v 27 Jantu alacꞌasqꞌuinitꞌit ju lhacaticuru ni catamanavinin alactuꞌunti.
\p
\v 28 Ju akꞌalhonaꞌ jantuch vana caꞌakꞌalhaunalh. Alai va kꞌox lhichꞌalhcat ju canavilh laꞌixmacaꞌ. Ju chunch laich capacxanaꞌ ju tuchi caxtakniyaꞌ ju tꞌajun makꞌalhkꞌajnaꞌ laꞌixmaktasqꞌuinit.
\p
\v 29 Jantu tuꞌuꞌ macxcai chivinti anaꞌuntꞌit. Alai va yuchi ju kꞌox chivinti ju anaꞌuntꞌit tachi ju laich apꞌuꞌaktꞌaiꞌuyaꞌitꞌit ju aliꞌin ni laich palai catatsuculh tachi ju kꞌachani ju Dios. Ju chunch ju Dios caꞌaxtakniyaꞌ ju kꞌox isꞌatsucuntiꞌan ju catakꞌasmatniyanch.
\v 30 Jantu amamakꞌaninitꞌit ju iSpiritu Santu Dios. Ju uxijnan xtꞌaknicꞌantꞌatꞌit ju yuchi ni alhacꞌatsꞌanantꞌit ni vasalh amalakxtꞌucꞌanaꞌitꞌit acsni cachinaꞌ ju anuꞌ avilhchan.
\p
\v 31 Jantu kꞌai aꞌuntꞌit. Jantu atꞌalhkꞌamantꞌit. Jantu alakꞌaꞌitꞌit nin pꞌas alaxakꞌalatꞌit lacatalhkꞌamti. Jantu alaclaꞌunitꞌit macxcai chivinti. Amacꞌaꞌuntꞌit tachi chun ju macxcai.
\v 32 Alai alaꞌaktꞌaiꞌutꞌitch. Pakꞌeunicꞌa aꞌuntꞌit. Alamacꞌacxanitꞌit ju pumatamin milhiꞌuxijnan tachi ju Dios ni tamacꞌacxanitan ni lhilacꞌapꞌintꞌatꞌit ju Cristo.
\c 5
\s1 Chani catatsucuyaꞌ ju isꞌaskꞌatꞌan Dios
\p
\v 1 Alaktsꞌintꞌaꞌitꞌit ju Dios ni isꞌaskꞌatꞌan untꞌatꞌit chai ju yuchi na tamapainiyan.
\v 2 Alamapꞌainitꞌit tachi ju Cristo ni quintamapaininch chai tamakꞌaxtakchokolh isꞌakstu ju quilacataꞌan. Ju yuchi valhch tachi ju tuꞌuꞌ atapacxat ju ixtamaknini ju Dios ju makꞌanch chai tachi ju tuꞌuꞌ lhakꞌailaktsꞌin ju na cꞌus acamin ju na kꞌachani ju Dios.
\p
\v 3 Ju chavai ni isꞌaskꞌatꞌan Dios untꞌatꞌit pus chunchach ju atsꞌucꞌutꞌit. Pus nin lacatsꞌunin jantu catasu lamiꞌatsucuntiꞌan ju ixpuxcajuca ju minavinꞌan. Nin tuꞌuꞌ atumpa alactuꞌunti ju ixtꞌachunch cava. Nin yuchi ni alhacchꞌiꞌitꞌit tuꞌuꞌ. Nin yuchi ni lai alhilhichꞌivincꞌantꞌit ju chunch atsucunti.
\v 4 Vachuꞌ jantu lhijun ni anaꞌuntꞌit ju macxcai chivinti. Nin yuchi ni lai achꞌivinintꞌit tachi tam xamatiꞌ ju jantu acꞌatsananta. Nin yuchi ni lai akꞌalhkꞌamanachꞌivin ju tuꞌuꞌ macxcai. Ju chunch jantu kꞌox. Alai aꞌunitꞌit lakꞌailaktsꞌiuch ju Dios.
\v 5 Pus ju uxijnan cꞌatsꞌayatꞌit ni laꞌixpuꞌucxtinꞌan Cristo chai Dios jantu tuꞌuꞌ caꞌaxtaknicanaꞌ ju lapanacni ju tatꞌatsucui ju jantu ixꞌamachakaꞌan u ju chakolun ju tatꞌatsucui ju jantu ixpapaꞌan. Nin yuꞌunch ju tanavi ju tuꞌuꞌ atumpa alactuꞌunti ju ixtꞌachunch cava. Nin yuꞌunch ju talhacchaꞌan tuꞌuꞌ. Ju chunch talai pus tachi ju va isdiosꞌan tanavita ju chun alactuꞌunti.
\v 6 Alaccꞌatsꞌanantꞌit. Jantu xamatiꞌ cataꞌokxchokꞌon lacatuꞌuꞌ chivinti ju jantu slivasalh. Pus ju Dios amamakꞌalhkꞌajni ju va jantu lai talacaꞌi chai ju tanavi ju alactuꞌunti tachi ju iclajuntau.
\v 7 Pus jantu amaꞌamigoxlatꞌit ju chunch talai.
\p
\v 8 Ju makꞌanch acsni tucaꞌ ixlhilacꞌapꞌintꞌatꞌit ju Cristo pus chunch vachuꞌ ixꞌuntꞌatꞌit tachi ju yuꞌunch ni vachuꞌ tachi ju va istsꞌistacaꞌ ju lamintacꞌatsanꞌan. Para ju chavai ni lhilacꞌapꞌintꞌatꞌit ju Cristo pus ju yuchi tamalacpucujunitan ju mintacꞌatsanꞌan. Pus chunch ju atsꞌucꞌutꞌit tachi ju lhijun ni tamalacpucujunitan ju mintacꞌatsanꞌan.
\v 9 Chai ni tamalacpucujutan ju Cristo pus tasqꞌuini ni caꞌalilhch lamiꞌatsucuntiꞌan tachi chun ju kꞌox chai ju soknicꞌa chai ju stavasalanti.
\v 10 Apꞌuxcꞌaꞌutꞌit ta yu laich atsꞌucꞌutꞌit tachi ju kꞌachanich ju quiꞌucxtinꞌan Jesús.
\v 11 Jantu atꞌanavitꞌit tuꞌuꞌ alactuꞌunti ju jantucaꞌ alacmalacpucujunicanta ju ixtacꞌatsanꞌan. Ju alactuꞌunti jantu tavanan xtꞌakꞌa tuꞌuꞌ ju kꞌox. Alai aꞌunitꞌit ni jantu kꞌox tachi ju talai.
\v 12 Na lhimaxan ni va aclajuniu tuchi sek tanavi ju yuꞌunch.
\v 13 Pus lacaꞌatuncunuꞌ tasukꞌojui ta yu junita ju tuꞌuꞌ. Pus ju ixchivinti Dios chunch junita tachi ju atuncunuꞌ ni quintamapulhcuniyan ju laquintacꞌatsanꞌan.
\v 14 Pus yuchi lhinoncan chani:
\q1 Alacpꞌucꞌujtꞌitch ju uxijnan ju tachi ju va lhtꞌatꞌayatꞌit lamiꞌatsucuntiꞌan.
\q1 Jantu vana chun alatꞌit tachi ju talai ju jantucaꞌ tamispai ju Jesús.
\q1 Chai ni chunch ju alatꞌit pus ju Cristo catamalacpucujuniyan ju mintacꞌatsanꞌan.
\m Chunch ju lhinoncan.
\p
\v 15 Pus ixlhichux miꞌalhunutꞌan anavitꞌit cuenta ta yu atsꞌucꞌuyaꞌitꞌit. Jantu atsꞌucꞌutꞌit tachi ju va tam tonto. Alai atsꞌucꞌutꞌit tachi tam xamatiꞌ ju na acꞌatsananta.
\v 16 Chux avilhchan anavitꞌit cuenta ta yu laich apꞌunaviyaꞌitꞌit ju kꞌox. Chun ju alatꞌit ni na alin ju alactuꞌunti ju chavai.
\v 17 Pus ixlhiyuchach jantu va lhitonto alatꞌit para amachꞌakxatꞌit tuchi ju lacasqꞌuin ju miꞌucxtinꞌan Jesús ni anavitꞌit.
\v 18 Jantu alactꞌakꞌapꞌatꞌit. Ju chunch laich caꞌalilh lhu ju mintalakꞌalhinꞌan. Alai chach lhinonkꞌo ju Spiritu Santu lamiꞌatsucuntiꞌan.
\v 19 Chai ni yuchi ju lhinonkꞌojui lamiꞌatsucuntiꞌan pus alaꞌunitꞌit ju milhiꞌuxijnanꞌan ju salmos. Chai alakꞌayatꞌit ju Dios lacamilhpat. Chai amilhpꞌanitꞌit ju quiꞌucxtinꞌan Jesús ixlhichux miꞌalhunutꞌan.
\v 20 Chai aktsꞌiya aꞌunitꞌit lakꞌailaktsꞌiuch ju quimpaiꞌan Dios mas va tuchi catamacaminiyan. Aꞌunitꞌit lakꞌailaktsꞌiuch laꞌixtapakaꞌut ju quiꞌucxtinꞌan Jesucristo.
\s1 Ta yu catatsuculh ju papanin chai ju chakolun
\p
\v 21 Ni tꞌalhoniyatꞌit ju Dios pus alaqꞌuiclacꞌaꞌitꞌit ju pumatamin.
\p
\v 22 Ju uxijnan ju icꞌantꞌatꞌit ni qꞌuiclacꞌaꞌiyatꞌit ju quiꞌucxtinꞌan Jesús pus vana va chun aqꞌuiclacꞌaꞌitꞌit ju mimpapaꞌan.
\v 23 Tachi ju tuꞌuꞌ quiꞌaktsulhꞌan ni lhinonkꞌojui laquilacatunaꞌan pus vana va chun ju tam jokꞌat. Yuchi ju lhinajun laꞌisꞌatsucunti ju ixꞌamachakaꞌ. Chai vachuꞌ chunch ju Cristo. Ju yuchi lhinajun laquiꞌatsucuntiꞌan tachi chun ju lhilacaꞌantauch ju yuchi ni tachi ixlacatuna juntau. Chai yuchi ju quintamakꞌalhtaxtutan ni jantu catiꞌau junta jonkꞌalhita makꞌalhkꞌajnat.
\v 24 Pus ju quijnanꞌan ju lhilacaꞌantau ju Cristo ni quiclacaꞌiyau ju yuchi pus chunchach vachuꞌ catalalh ju aꞌicantach. Cataquiclacaꞌilh ju ixpapaꞌan tachi chun ju canonaꞌ.
\p
\v 25 Chai ju uxijnan ju xapapanin untꞌatꞌit amapꞌainitꞌit ju miꞌamachakaꞌan tachi ju Cristo ni quintamapainiyan tachi chun ju lhilacaꞌantauch ju yuchi. Chai tamakꞌaxtakchokolh isꞌakstu ju quilacataꞌan.
\v 26 Chai yuchi lhitamakꞌaxtaklh ni laich ixꞌanuꞌ cajumvi ju quijnanꞌan ju lhilacaꞌantauch ju yuchi. Chai ju yuchi quintachakꞌanitan ju quiꞌalhunutꞌan acsni lacaꞌinitau ju ixchivinti. Chai acsni akpaxau pus va pumalacasuputunau ni chunch ju quintaꞌulhtutan ju Cristo.
\v 27 Ju chunch ju quijnanꞌan ju lhilacaꞌantauch ju yuchi pus slivasalh kꞌox aquintalhiulayan. Chai aquintalaktsꞌinan ni jantu tuꞌuꞌ ju va lhquiliqui cava ju laquiꞌatsucuntiꞌan. Chai jantu jintaꞌ ju va catakꞌalhi u tuꞌuꞌ atumpa ju ixtꞌachunch cava. Alai salaka aquintalaktsꞌinan chai matich ju quintalakꞌalhinꞌan laꞌixmacni ju yuchi.
\v 28 Pus ju xapapanin catamapaini ju ixꞌamachakaꞌan tachi ju va jun ixlacatunaꞌan isꞌakstuꞌan. Pus ju mapaini ixꞌamachakaꞌ isꞌakstu ju mapainichokocan.
\v 29 Jantu xamatiꞌ ju va jantu kꞌox calhiulachokolh ixlacatuna. Alai kꞌoxich mavai chai kꞌoxich lhistꞌacꞌa. Pus ju Cristo vana va chun ju quintanaviyan ju quijnanꞌan ju lhilacaꞌantauch ju yuchi.
\v 30 Chunch quintaꞌulhtuyan ni tachi ixpuchꞌalhcatna ixlacatuna juntau.
\v 31 Pus tsꞌokcanta laꞌixchivinti Dios junta najun ni calhimaconaꞌ ju ixpai chai ixnati tam tsꞌalh chai catꞌatalakxtꞌokꞌach ju ixꞌamachakach chai ju ixtꞌiyunꞌan va lakatam acanit catajunaꞌ.
\v 32 Iclajunau chunch ni tsꞌa ma palai lai amachꞌakxayaꞌitꞌit ta yu junita ju quiꞌatsucuntiꞌan laꞌixmacni Cristo tachi chun ju quijnanꞌan ju lhilacaꞌantauch ju yuchi. Ju ani chivinti aktsꞌiya na xcai machakxacan.
\v 33 Para vachuꞌ chani iclajumputunau. Ju pumatamin ju uxijnan amapꞌainitꞌit ju miꞌamachakaꞌan tachi ju va jun miꞌakstuꞌan ju mapꞌainichꞌokꞌocꞌanatꞌit. Chai ju chakolun cataquiclacaꞌi ju ixpapaꞌan.
\c 6
\p
\v 1 Ju uxijnan ju askꞌatꞌan untꞌatꞌit alacꞌaꞌinitꞌit ju mimpaiꞌan minatiꞌan tachi ju lhijun ni lhilacꞌapꞌinatꞌit ju Cristo. Aktsꞌiya tasqꞌuini ni chunch ju alatꞌit.
\v 2 Atꞌalhonitꞌit ju mimpaiꞌan chai ju minatichꞌan. Ju ani lhamapꞌaksin yuchi ju pꞌulhnan naulh ju Dios chai ju acsnich vachuꞌ kꞌalhtasunilh tuꞌuꞌ va tichi chavaich ju camuctaxtulh.
\v 3 Ju Dios naulh ni lhikꞌach catsucuyaꞌ chai na makꞌanch ju catsucuyaꞌ ju ani lacamunutpaꞌ va tichi chavaich ju quiclacaꞌi ju ixpai ixnati.
\p
\v 4 Chai ju uxijnan ji xalacpaꞌitni jantu amaktꞌalhkꞌamantꞌit ju miꞌaskꞌatꞌan. Alai akꞌaꞌitꞌit lacakꞌox chivinti acsni tuꞌuꞌ tanavi. Chai amalanitꞌit tachi ju kꞌoxich calhiula ju quiꞌucxtinꞌan Jesús.
\p
\v 5 Chai ju uxijnan ji xalapanacni aqꞌuiclacꞌaꞌitꞌit ju miꞌucxtinꞌan ju ani lacamunutpaꞌ. Atꞌalhonitꞌit chai kꞌox anavinitꞌit ju ixlhichꞌalhcatꞌan. Chai ju tuchꞌi naviyatꞌit ixlhichux miꞌalhunutꞌan ju anavitꞌit tachi ju va jun Cristo ju chꞌalhcꞌatnaniyatꞌit.
\v 6 Jantu va acsnich ju kꞌoxich achꞌalhcꞌatnantꞌit acsni talaktsꞌinan ju miꞌucxtinꞌan ni nonatꞌit ni kꞌox catalhiulayan ju chunch. Alai chunch ju alatꞌit tachi ju va jun Cristo ju chꞌalhcꞌatnaniyatꞌit. Ixlhichux miꞌalhunutꞌan anavinitꞌit ju ixkꞌachat ju Dios.
\v 7 Lacalhikꞌach anavitꞌit ju milhichꞌalhcatꞌan tachi ju va junch Cristo ju chꞌalhcꞌatnaniyatꞌit. Jantu va tam mintꞌalapanac.
\v 8 Acꞌatsꞌatꞌit ni camapalhniyaꞌ ju quiꞌucxtinꞌan Jesús va tichi chavaich ju canaviyaꞌ ju tuꞌuꞌ kꞌox. Mas xalapanac junita u jantu xalapanac cava.
\p
\v 9 Chai ju uxijnan ju lhinonatꞌit lacatuꞌuꞌ lhichꞌalhcat vachuꞌ kꞌox atꞌalalhipꞌitꞌit ju milapanacni. Jantu amakꞌantꞌalhanatꞌit. Acꞌatsꞌatꞌit ni vachuꞌ alin ju miꞌucxtinꞌan ju vilhcha lactꞌiyan. Yuchi ju Cristo. Chai ju yuchi vachuꞌ ixꞌucxtinꞌan junita ju milapanacni. Chai ju yuchi jantu va pumacatami amapaininin.
\s1 Alin ta yu lai pusastuccan ju macxcai
\p
\v 10 Va yuchi ju ani ju iclajumputunau ji quiꞌalakꞌavin. Pꞌas alhilacꞌapꞌitꞌit ju Cristo. Na alin ixtachaput ju yuchi chai laich cataꞌaktaijuyan.
\v 11 Ju taropajni acsni taꞌan tꞌalasanin xamatiꞌ pus stunin tamalakchꞌininkꞌojui ju tuchi tapusastꞌucꞌa ju flecha. Pus vachuꞌ chunch alatꞌit ju uxijnan. Amaklhtꞌaꞌitꞌit chux tachi chun ju quintaxtaknitan ju Dios ju lai capusastꞌucꞌau ju macxcai. Ju chunch va tachi pꞌas alhilacꞌapꞌinaꞌitꞌit ju Cristo mas va tuchi catamapastꞌacꞌaniyan ju lhacaticuru ni va taꞌokxchokꞌoputunan.
\v 12 Chai ni jantiyuꞌ ju tꞌalasayau ju va quintꞌalapanacniꞌan pus yuchi alhiꞌamaklhtꞌayanantꞌit ju apꞌusastꞌucꞌaꞌitꞌit ju macxcai. Yuchi ju quintaxtaknitan ju Dios. Pus ju tꞌalasayau yuꞌunch ju talhinajun lacaꞌatatsꞌisni ju ani lacamunutpaꞌ. Chai ju aliꞌin sia yuꞌunch na alin ixtachaputꞌan. Chai vachuꞌ sia yuꞌunch alin ju xalactꞌicstꞌi ucxtinin. Chai vachuꞌ tꞌalasayau ju macxcai un ju tꞌajun ju ani lacamunutpaꞌ.
\v 13 Ni laich asastꞌucꞌaꞌitꞌit ju quintꞌalasanꞌan acsni catamapastꞌacꞌaniputunan ju tuꞌuꞌ macxcai pus yuchi iclalhijunau ni yuchi alhiꞌamaklhtꞌayanantꞌit ju lai apꞌusastꞌucꞌaꞌitꞌit ju macxcai. Yuchi ju quintaxtaknitan ju Dios. Chai ju chunch acsni atꞌalalhaꞌayaꞌitꞌit ju macxcai pus va tachi pꞌas lhilaksiyatꞌit ju Cristo.
\v 14 Pus pꞌas alhilacꞌapꞌitꞌit ju Cristo. Chai ju uxijnan ni mispꞌayatꞌit ixchivinti Dios pus lakꞌasivilatꞌit tachi ju tam taropa ju pꞌas chꞌi ju iscinturón acsni canaꞌ lasanaꞌ. Chai ni salaka junita ju miꞌatsucuntiꞌan laꞌixmacni Dios pus matiꞌ cunaꞌ junta lai cataputꞌalalhajayan ju lhacaticuru. Ju chunch aꞌunaꞌitꞌit tachi ju tam taropa ju lakchꞌi ju tsasnat xcujuꞌ ni jantu lai catitanunilh ju flecha.
\v 15 Chai va tachi alakꞌasitsꞌucꞌutꞌit ni laich acꞌatsꞌayaꞌitꞌit ta yu laich alacpꞌumavasalaniyaꞌitꞌit ju aliꞌin ni laich ixꞌamigojni catajunaꞌ ju Dios. Chai ju chunch aꞌunaꞌitꞌit tachi ju tam taropa ju lakasivi ixlacata ju lasat ni chꞌantanui ju iszapato.
\v 16 Para ju palai maktꞌasqꞌuiniyatꞌit yuchi ni pꞌas alhilaksitꞌit ju Dios. Chai ju chunch aꞌunaꞌitꞌit tachi ju tam taropa ju chꞌapata ju quiclhtayai tsasnat ju lai pusastꞌucꞌa ju flecha. Chai ju uxijnan ni pꞌas lhilaksiyatꞌit ju Dios pus vachuꞌ lai asastꞌucꞌaꞌitꞌit mas va tuchi macxcai ju catamacaminiyan ju lhacaticuru.
\v 17 Chai ni cꞌatsꞌayatꞌit ni vasalh tamakꞌalhtaxtutan ju Jesús pus lakꞌasi atsꞌucꞌutꞌitch chai ju chunch jantu xamatiꞌ lai catamacꞌapꞌaniyan ju tuchꞌi lacꞌaꞌiyatꞌit. Chai ju chunch aꞌunaꞌitꞌit tachi ju tam taropa ju aktanui ju tsasnat ixꞌaktanut ni jantu lai catitapasanilh ju flecha. Chai alhipꞌitꞌit ju anuꞌ ju lai apꞌusastꞌucꞌaꞌitꞌit ju macxcai. Yuchi ju quintaxtaknitan ju Spiritu Santu. Yuchi ju ixchivinti Dios. Ju yuchi chunch junita tachi ju lhman isꞌespadaꞌan ju taropajni.
\v 18 Chai va tachi atꞌachꞌivinintꞌit ju Dios. Atꞌachꞌivinintꞌit chai atꞌapꞌaininitꞌit. Chai ju Spiritu Santu cataꞌaktaijuyan ni sok atꞌachꞌivinaꞌitꞌit. Skala atsꞌucꞌutꞌit acsni tꞌachꞌivinatꞌit ju Dios. Chai jantu alhokꞌontꞌit mas jantu sai amaklhtꞌayananatꞌit ju tuchꞌi sqꞌuiniyatꞌit. Vachuꞌ asqꞌuinitꞌit ju Dios ixlacataꞌan tachi chun ju talhilacaꞌanta ju Jesús.
\v 19 Vachuꞌ atꞌapꞌaininitꞌit ju Dios ju quilacata. Chach quixtaknilh ju acnonach ni laich acmavasalayaꞌ ju ixlacata ju Jesucristo. Acmavasalayaꞌ ju chivinti ju jantu lai ixmachakxacan ju pꞌulhnan. Vachuꞌ asqꞌuinitꞌit ju Dios ni aquiꞌaktaijulh ni jantu actalhanalh acsni icchivinin ixlacata ju yuchi.
\v 20 Ju quitꞌin mas ixtamalakachan Cristo icjunita para ictꞌalhnucanta va ixlacaꞌatalh ni xacꞌajuni ju lapanacni ixlacata ju Cristo. Asqꞌuinitꞌit ju Dios ni aquiꞌaktaiju ni va tachi acꞌajunilh ju lapanacni ixlacata ju yuchi tachi ju lhijunch ni aclalh chai jantu actalhanalh.
\s1 Amacꞌaminin ju Pablo
\p
\v 21 Ju Tíquico quilakꞌauꞌan junita ju na mapainiyau. Chai ju yuchi navi ixlhichꞌalhcat ju quiꞌucxtinꞌan Jesús vachuꞌ chai lai lhilaksican. Pus ju yuchi catajunan tuchi tꞌajun tapasanaꞌ ju laquiꞌatsucunti chai tuchi ictꞌajun naviniꞌ.
\v 22 Pus ni laich acꞌatsꞌatꞌit ta yu icjuntau chai laich catamatankꞌoxaxkꞌayayan ju Tíquico pus yuchi iclalhimalakachaniyachau.
\p
\v 23 Ictapainini ju quimpaiꞌan Dios chai ju quiꞌucxtinꞌan Jesucristo ni cataꞌaꞌaktaiju ju quiꞌalakꞌavinꞌan laꞌixmacni Cristo ni jantu calacꞌalh ju ixꞌalhunutꞌan chai cataꞌamapaininilh chai pꞌas catalhilaksilh ju Dios.
\v 24 Ictapainini ju Dios ni caꞌanavinilh lamapainin tachi chun ju tamapaini ju quiꞌucxtinꞌan Jesucristo laꞌixlhichux ixꞌalhunutꞌan. Vasalh chunch iclacasqꞌuin ni caꞌanavinilh ju Dios.