\id PHP
\ide UTF8
\h FILIPOS
\toc1 FILIPOS
\mt1 JU ALHIQUI JU ATSꞌOKNUNICALH JU AMACHAKꞌAN FILIPOS
\c 1
\s1 Ju Pablo amacꞌami ju amachakꞌan Filipos
\p
\v 1 Ju quitꞌin icPablo chai quintꞌavi ju Timoteo. Ixlapanacni ju Jesucristo icjuntau. Chai iclamacꞌamiyau ju uxijnan ju lhinonatꞌit lacatalhavat chai ju aꞌaktꞌaiꞌununatꞌit lacatalhavat ju talhilacaꞌanta ju Cristo. Vachuꞌ iclamacꞌamiyau tachi chun ju aliꞌin uxijnan ju vachuꞌ lhilacꞌapꞌinatꞌit ju Cristo Jesús ju vilhchitꞌit ju lakꞌachakꞌan Filipos.
\v 2 Ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
\s1 Ju Pablo sqꞌuini ju Dios ixlacataꞌan ju talhilacaꞌanta ju Cristo
\p
\v 3 Pus va ta pakchux ju iclapastꞌacꞌau ju uxijnan icxtakni lakꞌailaktsꞌiuch ju quiDios ju milacataꞌan.
\v 4 Chai va ta pakchux ju icsqꞌuini ju Dios ju milacataꞌan slivasalh na ickꞌachan.
\v 5 Icxtakni lakꞌailaktsꞌiuch ju Dios ju milacataꞌan ni na lhu aꞌaktaijunti xaquilaxtakniyau ni laich xacpumakpitsi ju chivinti ixlacata ju Cristo tus acsni lacꞌaꞌichitꞌit tus chavai.
\v 6 Yuchi ju Dios ju taiꞌulata ju kꞌox lhichꞌalhcat ju tanaviniyan ni laich palai alhilacꞌapꞌinaꞌitꞌit ju Jesús chai lana iccꞌatsai ni yuchi ju catailhiꞌanaꞌ tus acsni cachinaꞌ ju avilhchan acsni caminchokoyaꞌ ju Jesucristo.
\v 7 Chai lhijunch ni chunchach acpastaclh ju milacataꞌan ni laꞌixlhichux quiꞌalhunut iclamapainiyau. Vachuꞌ lhijunch ni aclamapainiu ni va kꞌaixtam quintanaviniyan lamapainin ju Dios chai vachuꞌ ni quilaꞌaktaijuyau acsni ictꞌalhnucanta ju chavai. Vachuꞌ quilaꞌaktaijuch acsni xaclhiꞌancanta lacapuꞌucxtin chai icꞌamavasalanilh ju lapanacni ni stavasalanti ju ixchivinti Dios.
\v 8 Pus ju Dios kꞌox cꞌatsai ni vasalh iclamapainiyau minchuxꞌan ju uxijnan. Chun iclamapainiyau tachi ju tamapainiyan ju Jesucristo.
\v 9 Ju tucan icsqꞌuini ju Dios ju milacataꞌan yuchi ni amapꞌaininintꞌit. Para vachuꞌ icsqꞌuini ni palai lhu caꞌalilh ju mintacꞌatsanꞌan chai ju miꞌamachakxantiꞌan.
\v 10 Ju chunch aktsꞌiya laich asacxtꞌuyaꞌitꞌit ju kꞌox. Chai ju chunch salaka aꞌunaꞌitꞌit lamiꞌatsucuntiꞌan chai jantu amakꞌalhkꞌosuyaꞌitꞌit xamatiꞌ tus acsni caminchokoyaꞌ ju Cristo.
\v 11 Ju chunch ju Jesucristo cataꞌaktaijuyan ni lai sok atsꞌucꞌuyaꞌitꞌit. Chai ni chunch junita ju miꞌatsucuntiꞌan pus calakꞌayacanaꞌ ju Dios chai catanonach ju lapanacni ni slivasalh xakꞌai ju yuchi.
\s1 Ju Pablo najun ni va yuchi ju Cristo ju lhitapalai laꞌisꞌatsucunti
\p
\v 12 Iclacasqꞌuinch ji quiꞌalakꞌavin ni acꞌatsꞌatꞌit ni na lhu takꞌasmatlh ju chivinti ixlacata ju Cristo va ixlacaꞌatalh ni ictꞌalhnucanta ju chavai.
\v 13 Pus tachi chun ju ixtaropajni ju ucxtin chai ju aliꞌin lapanacni ju ani tavilanalh si tacꞌatsakꞌojui ni va ixlacaꞌatalh ni iclhilacaꞌanta ju Cristo yuchi iclhitꞌalhnucanta.
\v 14 Chai ju chavai na lacatsꞌunin ju quiꞌalakꞌavin ju titatalhanancaꞌ. Ju chavai na lhu alin ju palai jokꞌat tacꞌatsan chai tanajun ixchivinti Dios chai jantu tatalhanan. Chunch talai va ixlacaꞌatalh ni talaktsꞌin ni quilhistꞌacꞌa ju Cristo chai yuchi palai talhilhilaksi ju yuchi.
\p
\v 15 Vasalh alin lapanacni ju tanajun ju chivinti ixlacata ju Cristo va ixlacaꞌatalh ni talhacchaꞌani ju tuchi lai xacnavi chai va quintaxcaji. Para ju aliꞌin na kꞌox ju ixꞌatalacpastꞌacꞌatꞌan acsni tanajun ju chivinti ixlacata ju Cristo.
\v 16 Ju aliꞌin tanajun ju chivinti ixlacata ju Cristo para va ixlacaꞌatalh ni va palaich acꞌamakꞌaninilh tanajun lacapulachꞌin ni va yuꞌunchach ju palai lhu caꞌachꞌakꞌokꞌacalh. Chai aquintamacoyaulh ju quitꞌin. Para lana jantu kꞌox tachi ju tapastꞌacꞌa ju yuꞌunch.
\v 17 Para ju aliꞌin lapanacni tanajun ju chivinti va ixlacaꞌatalh ni quintamapaini. Tacꞌatsai ni icxtaknicalh ju lhichꞌalhcat ni acꞌamavasalaniyaꞌ ju lapanacni ni stavasalanti ju chivinti ixlacata ju Cristo.
\v 18 Ju quitꞌin ickꞌachan mas jantu kꞌox talai ju aliꞌin. Iclhikꞌachan ni aktsꞌiya tanajun ju chivinti ixlacata ju Cristo.
\p Chai va tachi ackꞌachanach.
\v 19 Pus iccꞌatsai ni kꞌox acxajanta ni sqꞌuiniyatꞌit ju Dios ju quilacata chai ni quiꞌaktaijui ju Spiritu Santu.
\v 20 Slivasalh iclacasqꞌuin ni jantu tuꞌuꞌ acnaviyaꞌ ju lai aclhimaxananaꞌ astan. Pus tachi ju aktsꞌiya xacnajun ju chivinti ixlacata ju Cristo chai jantu xactalhanan pus vana va chun aclayaꞌ ju chavai. Chai ju chunch calakꞌayacalh ju Cristo ixlacata quiꞌatsucunti mas acniyaꞌ u actitsuculhcaꞌ lacatsꞌunin.
\v 21 Pus ni ictꞌajuncaꞌ pantsꞌiquis pus va lakatam taxtokni ju icnaviputun. Va icnaviniputun ju ixkꞌachat ju Cristo. Para ni acniyaꞌ pus palai kꞌox cajunaꞌ ju quilacata.
\v 22 Para ni actitsucuyaꞌ alacatsꞌunin pus laich icꞌamalacaꞌini ju aliꞌin ixlacata ju Cristo. Pus ju chunch jantu iccꞌatsai tamalhch ju acsacxtuyaꞌ. U acniputunach u jantu.
\v 23 Pus na lhu alin ju quiꞌatalacpastꞌacꞌat. Na icniputun ni laich actꞌatolanta ju Cristo. Ju chunch palai kꞌox cava ju quilacata.
\v 24 Para palai tasqꞌuini ni actitsuculhcaꞌ alacatsꞌunin ni laich aclaꞌaktaijuyau ju uxijnan.
\v 25 Chai ni iccꞌatsai ni quilamaktasqꞌuiniyaucaꞌ pus iccꞌatsai ni actsucuyacaꞌ alacatsꞌunin ni laich aclaꞌaktaijuyau ni laich palai alhilacꞌapꞌinaꞌitꞌit ju Cristo chai palai alhikꞌachꞌanaꞌitꞌit.
\v 26 Chai acsni tavanan calalaktsꞌinchokoyau pus laich alhilakꞌayayaꞌitꞌit ju Cristo Jesús ni quimaxtulh lacapulachꞌin.
\p
\v 27 Para aktsꞌiya atsꞌucꞌutꞌit tachi ju lhijunch ni lhilacꞌapꞌinatꞌit ju Cristo. Ju chunch mas aclaꞌantachau laktsꞌinin u jantu para ackꞌasmatlich ju milacataꞌan ni va tachi lhilacꞌapꞌinatꞌit ju Cristo chai va lakatam untꞌatꞌit. Vachuꞌ ackꞌasmatlich ni laꞌaktꞌaiꞌuyatꞌit ni jantu tuꞌuꞌ catamacꞌapꞌaniyan ni jantu alhilacꞌapꞌitꞌit ju chivinti ixlacata ju Cristo.
\v 28 Jantu alakꞌaꞌitꞌit ni catamakꞌantalhanayan ju taxcayan. Chai ni taxcayan pus pumachakxacan ni catatsꞌankꞌakꞌalhiyach ju yuꞌunch. Chai ju uxijnan ni laich achꞌixaꞌitꞌit tuchi tapumamakꞌalhkꞌajniyan pus apꞌucꞌatsꞌayaꞌitꞌit ni yuchi ju Dios ju taꞌaktaijuyan chai aktsꞌiya catamakꞌalhtaxtuyan.
\v 29 Pus ju Dios jantu va yuꞌ xatalhisacxtuyan ni laich xalhilacꞌapꞌinaꞌitꞌit ju Cristo. Para vachuꞌ talhisacxtuyan ni laich amakꞌalhkꞌajnanaꞌitꞌit ixlacata yuchi.
\v 30 Pus ju uxijnan chai ju quitꞌin vaklhtam chun mamakꞌalhkꞌajnicanau ixlacata yuchi. Pus ju uxijnan quilalaktsꞌiuch acsni xacmamakꞌalhkꞌajnican. Chai ju chavai kꞌasmatꞌatꞌit ni vana va chun ju icmamakꞌalhkꞌajnican.
\c 2
\s1 Ju Cristo mas xakꞌai ixjunita talacatꞌicstꞌi ju quilacataꞌan
\p
\v 1 Pus ju uxijnan aktsꞌiya tamatankꞌoxaxkꞌayatan ju Cristo. Chai na kꞌachꞌanatꞌit ni tamapainiyan ju yuchi. Chai ju Spiritu Santu tꞌajun lamiꞌalhunutꞌan. Chai ju Dios tanavinitan kꞌai lamapainin.
\v 2 Pus ni chunch ju tanavinitan ju Dios pus aquilamakꞌankꞌachayau ju quitꞌin. Va lakatam aꞌuntꞌit chai alamapꞌainitꞌit. Chach va lakatam valh ju miꞌatalacpastꞌacꞌatꞌan chai chach va lakatamch valh ju tuchꞌi navipꞌutꞌunatꞌit. Chai ni anaviyaꞌitꞌit ju chunch pus slivasalh na ackꞌachanach.
\v 3 Jantu anavitꞌit ju va minkꞌachatꞌan miꞌakstuꞌan nin yuchi ni laich anavitꞌit tuꞌuꞌ va ixlacaꞌatalh ni xakꞌai atꞌalacꞌasuyaꞌitꞌit. Alai va atꞌalacꞌatꞌicstꞌitꞌit. Chai palai kꞌox alhiulatꞌit ju mintꞌalapanac. Palai jantu miꞌakstuꞌan.
\v 4 Jantu va yuchi ju anavitꞌit cuenta ta yu laich kꞌox atsꞌucꞌuyaꞌitꞌit miꞌakstuꞌan. Para vachuꞌ anavitꞌit cuenta ta yu laich apꞌuꞌaktꞌaiꞌutꞌit ju aliꞌin.
\p
\v 5 Chach chunch va ju miꞌatalacpastꞌacꞌatꞌan tachi ju ixjunita ixꞌatalacpastꞌacꞌat ju Cristo Jesús.
\v 6 Ju yuchi mas ixtꞌachunchach junita ju Dios para maconchalhcaꞌ ju ixpuxakꞌai ju lactꞌiyan.
\v 7 Chai lakꞌaꞌilh ni jantu catalacasu pantsꞌiquis tachi ju Dios. Talacasuchilh ju ani tachi ju tam xalapanac acsni tavanan lapanac quitsucuchilh ju ani lacamunutpaꞌ.
\v 8 Chai acsni lapanac tsucuchilh ju ani pus talacatꞌicstꞌichokolh aliꞌ. Quiclacaꞌinilh tachi ju ixnajunta ju Dios chai lakꞌaꞌilh ni tamakni mas na lhimaxan tamapasalh ni tachi ju tam kꞌai alactuꞌunuꞌ taꞌulhtulh ni tamaknilh ju lacacurus.
\v 9 Chai ni chunchach ju xanavi ju Jesús pus ju Dios slivasalh lakꞌaya chai lhimapakaꞌulh xakꞌai. Matiꞌ apumatam ju ixtꞌachunch junita.
\v 10 Ju chunch tachi chun ju tavilanancha lactꞌiyan chai ju quijnanꞌan ju tꞌonau ju ani lacatꞌun chai ju taꞌanta lacajipi cataꞌaktsokotaniyau ju Jesús acsni calakꞌayayauch.
\v 11 Chai tachi chun ju lapanacni catanonaꞌ ni yuchach ju ucxtin ju Jesucristo. Chai ju chunch calakꞌayacanaꞌ ju quimpaiꞌan Dios.
\s1 Ju talhilacaꞌanta ju Cristo chunch tajunita tachi ju tuꞌuꞌ maclhcu
\p
\v 12 Pus ji quiꞌalakꞌavin ju uxijnan aktsꞌiya xaquilaquiclacaꞌiyauch acsni xaclatꞌavilhchaucaꞌ. Chai ju chavai ni jantu iclatꞌavilhchau pus palai tasqꞌuini ni aquilaquiclacaꞌiu. Chai ju chavai ni alin ju sastꞌi miꞌatsucuntiꞌan pus chunchach ju atsꞌucꞌutꞌit tachi ju kꞌachani ju Dios. Chai atꞌalhonitꞌit.
\v 13 Pus yuchi ju Dios ju chꞌalhcatnan lamiꞌalhunutꞌan ni anavinipꞌutꞌunaꞌitꞌit ju ixkꞌachat chai ju yuchi cataꞌaktaijuyan ni laich anaviyaꞌitꞌit.
\p
\v 14 Tachi chun ju najun ju Dios ni anavitꞌit pus anavitꞌit. Para jantu va lacatalhkꞌamti. Chai jantu va lakatꞌui anavitꞌit ju miꞌatalacpastꞌacꞌatꞌan.
\v 15 Ju chunch jantu lai xamatiꞌ catitamucꞌanin ju mintalakꞌalhinꞌan. Chai salaka atsꞌucꞌutꞌit ni isꞌaskꞌatꞌan Dios untꞌatꞌit. Chunch ju atsꞌucꞌutꞌit mas anch ju tꞌonatꞌit junta taꞌalin ju lapanacni ju na taꞌalactuꞌunun. Pus ju laꞌixꞌucxlacapuꞌan ju yuꞌunch ju uxijnan chunch ju untꞌatꞌit tachi ju tuꞌuꞌ maclhcu ju mapulhcui junta na putsꞌista.
\v 16 Chai lamiꞌatsucuntiꞌan ju uxijnan amasuniyaꞌitꞌit ju aliꞌin ni lai xtꞌakꞌa ju Dios ju atsucunti jonkꞌalhita. Chai ni chunch ju atsꞌucꞌuyaꞌitꞌit pus aclhikꞌachanach acsni tavanan caminchokoyaꞌ ju Cristo. Accꞌatsayaꞌ ni jantu tsꞌankꞌata ju lhichꞌalhcat ju xacnavi lamilhiꞌuxijnan para aktsꞌiya lhitapalata ni xaclajunau ixchivinti Dios.
\v 17 Pus ju uxijnan ni chunch ju atsꞌucꞌuyaꞌitꞌit tachi ju iclajuntau pus ju miꞌatsucuntiꞌan chunch cajunaꞌ tachi ju tuꞌuꞌ lhakꞌailaktsꞌin laꞌixmacni Dios. Chai ju quitꞌin mas tasqꞌuini ni acmaknicanaꞌ para aclhikꞌachanach ni chunch cajunlh ju miꞌatsucuntiꞌan. Chai ju uxijnan vachuꞌ akꞌachꞌanaꞌitꞌit astan.
\v 18 Pus kꞌaixtamch quilatꞌakꞌachanau ju quitꞌin mas chunch ju catapasayaꞌ ju laquiꞌatsucunti chai ni chunch cajunaꞌ ju miꞌatsucuntiꞌan.
\s1 Timoteo chai Epafrodito ixꞌalactꞌavilhcha ju Pablo
\p
\v 19 Pus chani ju icpastꞌacꞌa ni va calacasqꞌuinaꞌ ju quiꞌucxtin Jesús. Pus icnajun ni acmalakachayanta ju Timoteo. Ju chunch acsni caquitaspꞌitꞌanta pus aquijunaꞌ ta yu tꞌonatꞌit chai aclhikꞌachanach. Jantu xamatiꞌ ju ani tavilanalh ju chunch alacpastacnan tachi ju quitꞌin. Va yuchi ju Timoteo. Ju yuchi vachuꞌ lacasqꞌuin ni kꞌox atsꞌucꞌuyaꞌitꞌit laꞌixmacni Dios.
\v 20 Para matiꞌ xamatiꞌ akꞌantam ju chunch alacpastacnan.
\v 21 Ju aliꞌin ju ani tavilanalh va tanaviputun ixkꞌachatꞌan isꞌakstuꞌan. Jantu tanaviputun ixlhichꞌalhcat ju Cristo Jesús.
\v 22 Para ju uxijnan mispꞌayatꞌit ju Timoteo chai cꞌatsꞌayatꞌit ni na kꞌox lapanac ju yuchi. Pus ju yuchi quintꞌachꞌalhcatnalh ismasuca ju chivinti ixlacata ju Jesús. Ju yuchi quiꞌaktaiju tachi ju aktaijui ixpai ju tam tsꞌalh.
\v 23 Pus icnajun ni lana acmalakachayanta ju yuchi acsni accꞌatsayach ta yu aquintalakꞌoxiniyaꞌ ju quilhamakꞌan.
\v 24 Chunch aclayaꞌ mas iclhilaksi ju quiꞌucxtinꞌan Jesús ni vachuꞌ lai vatsꞌalhti acꞌancha quitꞌin quiꞌakstu.
\p
\v 25 Pus iccꞌatsai ni aktsꞌiya tasqꞌuini ni lana acmalakachachokoyanta ju Epafrodito. Ju yuchi quilakꞌau junita chai quintꞌachꞌalhcatnaꞌ ixnajunca ixchivinti Dios. Pus ju uxijnan malakꞌachꞌanichitꞌit ju ani ni laich aquixtakniyaꞌ ju tumin ju xamakꞌaixtꞌokꞌatꞌit ju ixlacata quimaktasqꞌuinit chai ni lai aquiꞌaktaijuyaꞌ.
\v 26 Pus ju yuchi na talaktsꞌinchokoputunan minchuxꞌan ju uxijnan. Vachuꞌ na ixꞌamakꞌaninin acsni cꞌatsalh ni cꞌatsꞌachitꞌit ni na ixtakꞌankꞌai.
\v 27 Pus vasalh na ixtakꞌankꞌai. Na ixniputun. Para ju Dios aktaijulh lacaꞌamapaininti. Chai jantu va yuchi ju aktaiju para vachuꞌ ju quitꞌin ni jantu caꞌalilh palai lhu ju quiꞌamakꞌanit.
\v 28 Pus ni na ixlhamakꞌanininatꞌit pus yuchi palai vatsꞌalhti iclhimalakachaputunacha ju Epafrodito. Ju chunch acsni alaktsꞌinchꞌokꞌoyaꞌitꞌit akꞌachꞌanaꞌitꞌit. Chai ju quitꞌin palai jantu na lhu acꞌamakꞌanininaꞌ ni accꞌatsayaꞌ ni lhikꞌach amaklhtꞌayananchꞌokꞌoyaꞌitꞌit.
\v 29 Pus acsni cachaꞌananta lhikꞌach amaklhtꞌaꞌitꞌit chai axtꞌaknitꞌit lakꞌailaktsꞌiuch ju Dios. Alakꞌayatꞌit ju tam lapanac ju chunch junita.
\v 30 Chunch alhilaktsꞌintꞌit ni laꞌixlhichꞌalhcat ju Cristo va lacatsꞌunin lana na ixniputun. Jantu tuꞌuꞌ xalhiulai ju isꞌatsucunti ni laich xaquiꞌaktaijui. Ju yuchi navilh ju jantu lai xanaviyatꞌit ni jantu ani ju vilatꞌit.
\c 3
\s1 Ju atsucunti ju vasalh soknicꞌa chani junita
\p
\v 1 Pus ju chavai ji quiꞌalakꞌavin alhikꞌachꞌantꞌit ju Jesucristo. Ju quitꞌin jantu jeks icꞌui mas aktam aclaꞌatsꞌoknunichokoyau ju tuchi xaclajunau makꞌanchich. Pus ni aclajunchokoyau ca laich aktꞌaiꞌucꞌanatꞌit ni jantu aꞌokxchꞌokꞌocꞌanaꞌitꞌit.
\v 2 Alhistꞌaccꞌantꞌit ni jantu cataꞌokxchokꞌoyan ju anuch lapanacni ju na lhquiliqui ju isꞌatsucuntiꞌan chai ju tanavi ju macxcai chai ju tanajun ni takꞌalhtaxtuputuncan ma aktsꞌiya tasqꞌuini ni acchꞌucꞌucalh tachi ju talai ju quintꞌaꞌisraelitanin ni laich cataputasuyaꞌ ni ixlapanacni Dios tajunita.
\v 3 Para ju quijnanꞌan pumalacasuyau ni ixlapanacni Dios juntau ni lakꞌayayau ju yuchi laquiꞌalhunutꞌan ju salaka junita. Lakꞌayayau ju Dios tachi ju quintajunan ju Spiritu Santu. Chai lhikꞌachanau ju Cristo Jesús ni yuchach ju quintamakꞌalhtaxtuyan. Jantu lhilaksiyau ju tuꞌuꞌ ju lai canaviu ju va laquiꞌakstuꞌan ju lai caputakꞌalhtaxtu.
\v 4 Ni alin tam xamatiꞌ ju laich calhilaksichokocalh isꞌakstu chai canaulh ni laich caꞌixnavilh tuꞌuꞌ ju ixlhiyuchi ju Dios caꞌixmakꞌalhtaxtulh pus ca quitꞌinch ju laich acnaulh ju chunch ni na xacmuctaxtui tachi ju najun lacalhamapꞌaksin.
\v 5 Pus xacpacxanta lakatsajin avilhchan acsni icchꞌucꞌucalh. Chai ju quitꞌin stavasalanti israelita icjunita. Makꞌaniya ixpapanti Benjamín icjunita. Ju quimpai quinati ixtachivinin ju lhihebreo chai vachuꞌ chunch ju icchivinin. Chai xaclhilaksi ju ixlhamapꞌaksinꞌan ju fariseonin. Chai ju yuꞌunch lana ixtamuctaxtukꞌojui ju ixlhamapꞌaksin ju Moisés.
\v 6 Chai ni tapꞌastu xaclacasqꞌuin ni ixtalhonicalh ju ixlhamapꞌaksin ju Moisés yuchi iclhiꞌamamakꞌalhkꞌajni ju ixtalhilacaꞌanta ju Cristo ni xacnajun ni jantu chun ixtalai ju yuꞌunch. Pus jantu xamatiꞌ ju lai xaquijuni ni jantu icmuctaxtukꞌota tachi chun ju najun lacalhamapꞌaksin.
\v 7 Para tachi chun ju ani taxtokni ju na kꞌoxich xaclhiulai pus ju chavai jantu tuꞌuꞌ iclhiulai va ixlacata ni icmispai ju Cristo.
\v 8 Pus vasalh. Tachi chun ju ani taxtokni jantu tuꞌuꞌ iclhiulai va ixlacaꞌatalh ni icmispai ju chavai ju tuꞌuꞌ ju palai kꞌox. Yuchi ju quiꞌucxtin Cristo Jesús. Pus va ixlacata yuchi icmaconkꞌota tachi chun ju anuꞌ taxtokni ju kꞌoxich xaclhiulai. Chai tachi ju va amacxtalh icꞌalhiulai ni laich acmispayaꞌ alai ju Cristo.
\v 9 Icmaconkꞌota ni laich va lakatam actꞌava ju yuchi. Chai ju chunch vachuꞌ alinch ju soknicꞌa quiꞌatsucunti ju quixtaknita ju Dios acsni iclhilacaꞌalh ju Cristo. Ju chavai jantu icnajun ni lai soknicꞌa acva va ixlacata ni icnavi tachi ju najun lacalhamapꞌaksin.
\v 10 Slivasalh icmispaputun ju Cristo. Pus ju Cristo lokꞌonchokolh acsni ixmacnucanta chai iclacasqꞌuin ni catasu laquiꞌatsucunti ixtachaput ju yuchi chai ni laich acchꞌixlh ju makꞌalhkꞌajnat tachi ju lalh ju yuchi. Chai iclacasqꞌuin ni caꞌuctaxtulh laquiꞌatsucunti ni tachi ju va icnita ixlacata ju alactuꞌunti tachi ju quilhcata ju Dios.
\v 11 Ju quitꞌin icnavikꞌoputun tachi ju najun ju Dios ni laich aquimalokꞌonichokolh ju yuchi laquiꞌaninti.
\s1 Tasqꞌuini ni calhistacchokocauch ni laich cachaꞌanau ju lactꞌiyan
\p
\v 12 Jantu icnajun ni icchaꞌanta ju chunch ju laquiꞌatsucunti nin yuchi ni lai acnaulh ni na icsoknicꞌa. Para ictailhiꞌanch ni tsꞌa ma laich acmuctaxtu laquiꞌatsucunti tachi ju quilhcanita ju Cristo Jesús.
\v 13 Pus ji quiꞌalakꞌavin ju quitꞌin jantu icnajun ni icchaꞌanta ju chunch ju laquiꞌatsucunti. Para chani ju iclai. Ju tapasata ju laquiꞌatsucunti iccapkꞌotach. Chai va yuchi ju icnavi cuenta ta yu laich palai soknicꞌa actsucuyaꞌ.
\v 14 Ixlhichux quiꞌalhunut icnavi cuenta ta yu laich acpuchaꞌanaꞌ ju lhikꞌox tachi ju lhcata ju Dios. Chai ju chunch acsni acchaꞌananta ju lactꞌiyan junta aquintatꞌasaniyan ju Dios pus laich acꞌamaklhtayananaꞌ ju quintalhaja. Yuchi ni actꞌatolaꞌ ju Cristo ni iclhilaksita ju yuchi.
\p
\v 15 Pus tachi chun ju quijnanꞌan ju tsucuyau tachi ju kꞌachani ju Cristo tasqꞌuini ni chunch ju calau tachi ju iclajuntau. Para ni jantu chun ju machꞌakxayatꞌit pus ju Dios catamamachakxaniyan ni vasalh chunch junita tachi ju iclajuntau.
\v 16 Va yuchi ni tasqꞌuini ni camuctaxtuyau chux tachi ju machakxayau ju chavai.
\p
\v 17 Quiꞌalakꞌavin chunchach ju atsꞌucꞌutꞌit tachi ju quilalaktsꞌinau ju quiꞌatsucunti. Chai anavitꞌit cuenta ju aliꞌin ju chunch tatꞌajun vachuꞌ.
\v 18 Na paklhu xaclajunau ni na lhu taꞌalin ju lapanacni ju ixtꞌalaxcai Cristo tajunita. Lana jantu tuꞌuꞌ talhiulai mas quinichilh ju Cristo ju lacacurus. Chai aktam aclajunchokopalau ju chunch chai na ickꞌalhun acsni iclaꞌatsꞌoknuniyau ju chunch.
\v 19 Pus ju yuꞌunch catatsꞌankꞌakꞌalhiyaꞌ. Pus va ixkꞌachatꞌan isꞌakstuꞌan tanaviputun. Talhitakꞌayai ju yuchi ju alai tasqꞌuini ni caꞌixtalhimaxanalh. Va yuchi ju xataxtokni ju ani lacamunutpaꞌ ju tapastactꞌajun.
\v 20 Para ju quijnanꞌan amachakꞌan lactꞌiyan juntau. Chai pacxanauch ju quiꞌamakꞌalhtaxtunuꞌan ju cataxtuyanta. Yuchi ju quiꞌucxtinꞌan Jesucristo.
\v 21 Chai ju yuchi aquintamapaxaniyan ju quilacatunaꞌan ju na tsamai. Chai aquintaxtakniyan quilacatunaꞌan tachi ixlacatuna ju yuchi. Chai ju yuchi na cꞌus junita. Pus ju Jesús alin ju ixtachaput chai yuchi lai aquintalhinaviyan chunch. Chai ni alin ixtachaput pus lai vachuꞌ tꞌalalhajai tachi chun ju taxtokni.
\c 4
\s1 Tasqꞌuini ni aktsꞌiya calhikꞌachanau ju quiꞌucxtinꞌan Jesús
\p
\v 1 Pus ni chunch cajunaꞌ ju quiꞌatsucuntiꞌan astan yuchi iclalhijunau ni va tachi alhilacꞌapꞌitꞌit ju Jesucristo. Pus ju uxijnan slivasalh tuꞌuꞌ iclalhiulayau chai na iclalaktsꞌimputunauch. Na iclalhikꞌachanau chai tachi ju va lhakꞌailaktsꞌin ju xaqꞌuixtakni ju Dios ni laich xalhilacꞌapꞌinatꞌit ju Cristo ju uxijnan.
\p
\v 2 Ictapainini ju Evodia chai ju Síntique ni va lakatamch catanavilh ixꞌatalacpastꞌacꞌatꞌan tachi ju lhijunch ni ixtꞌiyunꞌan talhilacaꞌanta ju Jesucristo.
\v 3 Chai ictapaininiyan ju uxintꞌi ju vasalh quintꞌachꞌalhcatnaꞌ unitꞌa. Ictapaininiyan ni aꞌaktꞌaiꞌutꞌich ju anuch chakolun ni laich va lakatam catava. Pus ju yuꞌunch quintatꞌachꞌalhcatnanta kꞌaixtam ixnajunca ju chivinti ixlacata ju Cristo. Vachuꞌ tatꞌachꞌalhcatnanta ju Clemente chai ju aliꞌinch ju quintatꞌachꞌalhcatnanta vachuꞌ ju quitꞌin. Chai ixtapakaꞌutꞌan ju yuꞌunch si taꞌokslanankꞌojui junta taꞌokslanan ju ixtapakaꞌutꞌan tachi chun ju alin isꞌatsucuntiꞌan ju conkꞌalhiyanta ju lactꞌiyan.
\p
\v 4 Va tachi alhikꞌachꞌantꞌit ju Jesús. Aktam iclajunchokopalau ni akꞌachꞌantꞌitch.
\v 5 Chach tacꞌatsa tachi chun ju lapanacni ni lackꞌoxin lapanacni untꞌatꞌit. Apꞌastꞌactꞌit ni va tsꞌalhti caminaꞌ ju quiꞌucxtinꞌan Cristo.
\p
\v 6 Jantu tavanan tuꞌuꞌ alhamakꞌaninintꞌit ju tuchi tapasai lamiꞌatsucuntiꞌan. Alai aꞌunitꞌit ju Dios mas va tuchi ixtalakxtuch cava. Atꞌapꞌaininitꞌit chai vachuꞌ aꞌunitꞌit lakꞌailaktsꞌiuch.
\v 7 Chai ju chunch ju Dios catalhistacniyan ju miꞌalhunutꞌan ni jantu calacꞌanaꞌ. Chai ju chunch slivasalh na kꞌox acꞌatsꞌananaꞌitꞌit. Pus jantu lai machakxacan tas tucan va ti jonkꞌota ju ixꞌaꞌaktaijunti ju Dios ni lai quintaꞌaktaijuyan ni jantu tavanan calacꞌanaꞌ ju quiꞌalhunutꞌan. Pus ju Dios ni talhistacniyan ju miꞌalhunutꞌan tachi chun ju uxijnan ju lhilacꞌapꞌintꞌatꞌit ju Cristo Jesús pus jantu na va lhu caꞌalinaꞌ ju miꞌatalacpastꞌacꞌatꞌan.
\s1 Va yuchi ju kꞌox ju capastacvi
\p
\v 8 Pus va yuchi ju ani ju iclajumputunau ji quiꞌalakꞌavin. Pus apꞌastꞌactꞌit tachi chun ju stavasalanti chai tachi chun ju kꞌox chai tachi chun ju soknicꞌa chai tachi chun ju jantu macxcai atalacpastꞌacꞌat chai tachi chun ju cꞌus alhiulacan chai tachi chun ju kꞌox ixlacata ju aliꞌin. Apꞌastꞌactꞌit tachi chun ju kꞌox alhiulacan chai tachi chun ju lai pulakꞌayacan ju Dios.
\p
\v 9 Pus anavitꞌit ju tuchi iclamasunitauch chai tuchꞌi lanitꞌatꞌit chai tuchi iclajuntau chai tuchꞌi laktsꞌintꞌatꞌit ni icnavich. Chai ju chunch ju Dios catatꞌatolanch. Yuchi ju quintalhistacniyan ju quiꞌalhunutꞌan ni jantu calacꞌanaꞌ.
\s1 Ju amachakꞌan Filipos taxtaknilh ixlhakꞌailaktsꞌinꞌan ju Pablo
\p
\v 10 Slivasalh na ickꞌachan laꞌixmacni ju quiꞌucxtin Jesús ni quilapastacchokoyauch ju quitꞌin. Ca aktsꞌiya xaquilapastꞌacꞌauch para tus chavai ju lai xaquilaꞌaktaijuyau.
\v 11 Jantu icpunajun chunch ni va ixꞌalin ju quimaktasqꞌuinit. Pus ju quitꞌin iclanitach ni laich ackꞌachanach acsni alinch ju quintumin chai acsni matich tuꞌuꞌ.
\v 12 Icmispai ju lhiquilhpatiniꞌ chai icmispai ju lhimakꞌaliꞌ. Icmispakꞌota mas va ta cava ju quiꞌatsucuntiꞌan. Icmispata ju avilhchan acsni xaclhilatach. Chai icmispata ju avilhchan acsni na xacchavanita. Chai icmispata ju avilhchan acsni ixꞌalin ju quintuꞌuꞌ. Chai icmispata ju avilhchan acsni na xacmakꞌalhkꞌajnan laquimaktasqꞌuinit.
\v 13 Pus ju quitꞌin sich kꞌox iclhiulai mas va tuchi min laquiꞌatsucunti va ixlacaꞌatalh ni yuchi ju Cristo ju quiꞌaktaijui ni chunch accꞌatsa.
\v 14 Pus mas icmispata chux para na kꞌoxich ju navitꞌatꞌit ni xaquilaꞌaktaijuyau laquimakꞌalhkꞌajnat ju ixꞌalin ju chavai.
\p
\v 15 Chai ju uxijnan ji amachakꞌan Filipos cꞌatsꞌayatꞌit ni jantu xamatiꞌ sia yuꞌunch ju talhilacaꞌanta ju Cristo ju quintaꞌaktaiju lacatumin acsni ictaxtucha lamintꞌunꞌan junta Macedonia juncan chai ictaiꞌulalh ixnajunca ju chivinti ixlacata ju Jesús. Va uxijnan ju xaquilaꞌaktaijuyau.
\v 16 Chai acsni xacvilhchalhcaꞌ ju lakꞌachakꞌan Tesalónica jantu va paktam ju xaquilalhikꞌailaktsꞌinau tuꞌuꞌ ixlacata ju quimaktasqꞌuinit.
\v 17 Para jantu va yuchi ju iclalhipuxcoyau ni aquilaxtakniyau tuꞌuꞌ. Alai iclacasqꞌuin ni cataxtakniyan ju Dios palai kꞌox miꞌatsucuntiꞌan ni xtꞌakꞌatꞌit ju milhakꞌailaktsꞌinꞌan.
\v 18 Pus ju chavai alinkꞌojui chux tuchi icmaktasqꞌuini. Na kꞌox ictꞌajun ju chavai. Pus va ixlacaꞌatalh ni icꞌamaklhtayanantach ju tuchꞌi malhipꞌinitꞌit ju Epafrodito acsni malakꞌachꞌatꞌit pus lana jantu tuꞌuꞌ icmaktasqꞌuini aliꞌ. Ju milhakꞌailaktsꞌinꞌan ju xaquilaxtakniyau ju quitꞌin tachi ju va jun Dios ju xalhikꞌailaktsꞌinatꞌit. Chai ju yuchi slivasalh na kꞌoxich lhiulai.
\v 19 Chai yuchi ju quiDios ju cataxtakniyan tachi chun ju makꞌancꞌacxatꞌit. Slivasalh na kꞌox ju cataxtakniyan ni na lhu alin ju kꞌox laꞌixmacni ju Cristo Jesús.
\v 20 Chach lakꞌayacalh ju quimpaiꞌan Dios tus va tavananch cava. Vasalh chunch caꞌulhtucalh.
\s1 Ju Pablo amacꞌaminin
\p
\v 21 Amacꞌamitꞌit tachi chun ju yuꞌunch ju talhilacaꞌanta ju Jesucristo ju tavilanancha ju anch. Chai tachi chun ju quiꞌalakꞌavinꞌan ju quintatꞌavilanch ani tamacꞌamiyan ju uxijnan.
\v 22 Tachi chun ju lapanacni ju amachakꞌan ani ju talhilacaꞌanta ju Cristo tamacꞌamiyan. Chai ju palai taꞌapastacnan yuꞌunch ju tachꞌalhcatnan laꞌixchakaꞌ ju kꞌai ucxtin César.
\p
\v 23 Ictapainini ju quiꞌucxtinꞌan Jesucristo ni catanaviniyan lamapainin minchuxꞌan ju uxijnan.