\id COL
\ide UTF8
\h COLOSAS
\toc1 COLOSAS
\mt1 JU ALHIQUI JU ATSꞌOKNUNICALH JU AMACHAKꞌAN COLOSAS
\c 1
\s1 Ju Pablo amacꞌami ju amachakꞌan Colosas
\p
\v 1 Ju quitꞌin icPablo. Ixtamalakachan ju Jesucristo icjunita ni chunch ju xalacasqꞌuin ju Dios. Chai vachuꞌ ani quintꞌavi ju quilakꞌauꞌan Timoteo.
\v 2 Pus va iclamacꞌamiyau ju uxijnan ji quiꞌalakꞌavin ju vilhchitꞌit ju lakꞌachakꞌan Colosas. Ju uxijnan vachuꞌ lhilacꞌapꞌintꞌatꞌit ju Cristo. Pus ictapainini ju quimpaiꞌan Dios ni cataꞌaktaijuyan ju uxijnan lacaꞌamapaininti chai catalhistacniyan ju miꞌalhunutꞌan ni jantu calacꞌalh.
\s1 Ju Pablo sqꞌuini ju Dios ixlacataꞌan ju yuꞌunch
\p
\v 3 Acsni ictapaininiyau ju Dios ixpai ju Jesucristo ju milacataꞌan pus va tachi icxtakniyau lakꞌailaktsꞌiuch ni xalhilacꞌapꞌinatꞌit ju yuchi.
\v 4 Va icpunonau chunch ni ickꞌasmatꞌau ni lhilacꞌapꞌintꞌatꞌit ju Cristo Jesús chai ni mapꞌainiyatꞌit tachi chun ju aliꞌin ju vachuꞌ talhilacaꞌanta ju Dios.
\v 5 Chunch ju layatꞌit ni vasalh lacꞌaꞌiyatꞌit ni aktsꞌiya aquintaxtakniyan ju Dios tuchi quintakꞌalhtasunitan ni aquintaxtaknitachan ju lactꞌiyan. Pus makꞌanchich kꞌasmatꞌatꞌit ju chivinti ju stavasalanti junta najun ta yu lai putakꞌalhtaxtucan. Chai acsnich vachuꞌ kꞌasmatꞌatꞌit ixlacata ju anuꞌ ju quintakꞌalhtasunitan ju Dios.
\v 6 Chai ju anuꞌ chivinti ju uncꞌantꞌatꞌit ju uxijnan vachuꞌ kꞌasmatkꞌocanta ixlhilacaputsꞌun ju lacamunutpaꞌ. Chai yuchach ju chivinti ju amapaxani isꞌatsucuntiꞌan tachi chun ju talacaꞌita. Chai palai lhu ju tatꞌajun lacaꞌinin ju anuꞌ chivinti. Chai vana va chun tamapaxanitan ju Dios ju miꞌatsucuntiꞌan tus acsni kꞌasmatꞌatꞌit ni tanavinitan lamapainin ju Dios. Chai ju uxijnan lacꞌaꞌitꞌatꞌit ni vasalh lamapainin ju xatanaviniyan.
\v 7 Chunchach ju tamasunin ju Epafras. Ju yuchi vachuꞌ navini ixlhichꞌalhcat ju Dios tachi ju quijnan. Chai na icmapainiyau. Chai ju yuchi na muctaxtui laꞌixlhichꞌalhcat ju Cristo lamilhiꞌuxijnan mas jantu lai xacꞌanachau laꞌaktaijunin ju quijnan.
\v 8 Yuchi ju quintamavasalanin ni quilamapainiyau. Chai ni tꞌajun ju Spiritu Santu lamiꞌalhunutꞌan vachuꞌ pus yuchi lai quilalhimapainiyau ju quijnan.
\p
\v 9 Pus ni icjuncantauch ni lhilacꞌapꞌinatꞌit ju Jesucristo pus yuchi jantu tavanan iclhiꞌastacnanau ixtapaininica ju Dios ju milacataꞌan. Icsqꞌuiniyauch ni vasalh catamamispaniyan tuchi lacasqꞌuin ju Dios ni anaviyaꞌitꞌit. Icsqꞌuiniyauch ni yuchi ju Spiritu Santu ju cataxtakniyan ju kꞌox mintacꞌatsanꞌan ni laich amachꞌakxayaꞌitꞌit ixkꞌachat ju Dios.
\v 10 Ju chunch laich atsꞌucꞌuyaꞌitꞌit tachi ju lhijunch ni lhilacꞌapꞌintꞌatꞌit ju quiꞌucxtinꞌan Jesús. Chai mas va tuchꞌi naviyatꞌit laich anaviyaꞌitꞌit tachi ju slivasalh kꞌox calhiulayaꞌ ju yuchi. Chai ju chunch vachuꞌ lai anaviyaꞌitꞌit tijpachux ju kꞌox chai lai palai amispꞌayaꞌitꞌit ju Dios.
\v 11 Vachuꞌ icsqꞌuinauch ni slivasalh ixlhichux ju miꞌalhunutꞌan ju alhilacꞌapꞌitꞌit ju Dios. Chai lai chunch alatꞌit ni na kꞌai ju ixtachaput ju Dios. Chai ni na pꞌas lhilaksiyatꞌit ju Dios pus lai achꞌixkꞌoyaꞌitꞌit mas va tuchi camilh lamiꞌatsucuntiꞌan chai jantu jeks aꞌuyaꞌitꞌit. Alai va tachi akꞌachꞌanaꞌitꞌit.
\v 12 Vachuꞌ lai aꞌunaꞌitꞌit lakꞌailaktsꞌiuch ju quimpaiꞌan Dios ni yuchi ju quintalakꞌoxinin ju quiꞌatsucuntiꞌan ni laich vachuꞌ camakꞌamaklhtayananau ju tuchi najunta ju yuchi ni aquintaxtakniyan tachi chun ju quijnanꞌan ju lhilacaꞌantauch ju Jesús. Chai ju tuchi aquintaxtakniyan anchach ju makꞌatacha junta vilhcha ju Dios junta vasalh atuncunuꞌ junita.
\v 13 Pus yuchi ju Dios ju quintamakꞌalhtaxtun acsni ixtꞌonaucaꞌ laꞌixtachaput ju lhinajun lacaꞌatatsꞌisni. Chai ju chavai yuchi ju Jesucristo ju lhinajun laquiꞌatsucuntiꞌan. Yuchi ju istsꞌalh Dios junita. Chai ju Dios na mapaini ju yuchi.
\v 14 Chai ni lhilacaꞌanauch ju yuchi pus quintamalakxtutanch laꞌixꞌacꞌalhni. Chai quintamacꞌacxanitan ju quiꞌalactuꞌuntiꞌan.
\s1 Lhiꞌamigojni tꞌajunchokotauch ju Dios
\p
\v 15 Mas jantu lai laktsꞌincan ju Dios para ju istsꞌalh ju Jesucristo juncan amalacasunilh ju lapanacni ta yu junita ju ixpai ni vana va chunch junita ju yuchi. Pus ju Jesús yuchi ju pꞌulh ixtꞌajun. Astan anavicalh tachi chun ju taxtokni.
\v 16 Yuchi ju anavikꞌo tachi chun ju taxtokni ju alin ju lactꞌiyan chai ju alin ju ani lacatꞌun. Chux ju lai laktsꞌincan chai ju jantu lai laktsꞌincan. Yuchi ju anavikꞌo ju anquilhnin ju tatolai laꞌixpuꞌucxtinꞌan chai ju aliꞌin anquilhnin ju tamaklhinajun chai ju xalactꞌicstꞌin ucxtinin sia yuꞌunch chai tachi chun ju anquilhnin ju alin ixtachaputꞌan. Yuchi ju Jesús ju anavikꞌo chai va ixlacata isꞌakstu ju lhinavilh chunch.
\v 17 Ju Cristo aktsꞌiya ixtꞌajunch mas tucaꞌ ixꞌalin ju ani taxtokni. Chai yuchi ju alhistackꞌojui tachi chun ju taxtokni ju chavai ni catatailhiꞌalh tachi ju ixꞌalhcanicantach.
\v 18 Chai tachi ju quiꞌaktsulhꞌan ni yuchi ju lhinonkꞌojui chux quilacatunaꞌan pus vana va chun ju Cristo. Laich acnaulh ni ixlacatuna Cristo juntau tachi chun ju quijnanꞌan ju lhilacaꞌantauch ju yuchi. Chai yuchi ju quiꞌaktsulhꞌan junita ni yuchi ju quintalhijunkꞌoyan laquiꞌatsucuntiꞌan. Yuchach ju quintaxtakniyan ju sastꞌi quiꞌatsucuntiꞌan. Chai ni yuchi ju pꞌulhnan lokꞌonchokolh laꞌixꞌaninti chai jantu tavanan xanichokoi tachi ju talalh ju aliꞌin ju ixꞌamalokꞌonicanta pus yuchi xakꞌai lhijunita tachi chun ju taxtokni.
\v 19 Pus ju quimpaiꞌan Dios lacasqꞌuilh ni lana catalacasu ju Jesús laꞌisꞌatsucunti ju ani lacamunutpaꞌ tachi ju junita isꞌakstu ju xapai.
\v 20 Vachuꞌ lacasqꞌuilh ju Dios ni laꞌixlacata ju Cristo laich caꞌapunavichokoyaꞌ ixꞌamigojni tachi chun ju lapanacni. Chai lhikꞌoxamixlh acsni taxtunilh ixꞌacꞌalhni ju Cristo lacacurus. Pus laꞌixlacata ju Cristo laich canavikꞌoyaꞌ ixꞌamigojni Dios tachi chun ju tatꞌajun ju ani lacamunutpaꞌ. Chai vachuꞌ laꞌixlacata ju Cristo tachi chun ju taxtokni ju ani lacamunutpaꞌ laich cajunchokoyaꞌ tachi ju ilhcata ju Dios ju pꞌulhnan.
\p
\v 21 Pus ju makꞌanchich vachuꞌ ju uxijnan jantu ismispꞌapꞌutꞌunatꞌit ju Dios. Ju lamiꞌalhunutꞌan va ixtꞌalaxcꞌayatꞌit ju Dios ni ixnaviyatꞌit ju macxcai taxtokni.
\v 22 Para ju chavai ju Jesús tanavitan ixꞌamigojni ju Dios laꞌixꞌaninti acsni xtucmucꞌacalh ixlacatuna ju lacacurus. Ju chunch ni laich catalhiꞌanan laꞌixꞌucxlacapuꞌ chai ju anch alhimispꞌacꞌanaꞌitꞌit ni vasalh isꞌaskꞌatꞌan Dios untꞌatꞌit chai salaka untꞌatꞌit chai matich ju mintalakꞌalhinꞌan.
\v 23 Chunch ju catanaviyan ni va tachi alhilacꞌapꞌinaꞌitꞌit ju Jesús ixlhichux ju miꞌalhunutꞌan chai jantu va tam tam anonaꞌitꞌit chai jantu va amacꞌonaꞌitꞌit ixchivinti Dios ju ixꞌuncꞌantꞌatꞌit. Yuchi ju anuꞌ chivinti ju najun ni lai amakꞌalhtꞌaxtꞌucꞌanaꞌitꞌit. Chai ju uxijnan kꞌasmatꞌatꞌit ju anuꞌ chivinti chai vachuꞌ alacjuncanta tachi chun ju lapanacni ju tatꞌajun ju ani lacamunutpaꞌ. Pus ju quitꞌin icPablo. Chai vachuꞌ icxtaknicanta ju quilhichꞌalhcat ni acꞌamalaninilh ju lapanacni ju ani ixchivinti Dios.
\s1 Ju Pablo xtaknicalh ju lhichꞌalhcat
\p
\v 24 Na ickꞌachan mas ictꞌajun makꞌalhkꞌajnaꞌ ju milacataꞌan ni laich alhilacꞌapꞌitꞌit ju Cristo. Ictꞌajun makꞌalhkꞌajnaꞌ tachi ju Cristo ni makꞌalhkꞌajnanta ju quilacataꞌan quinchuxꞌan. Iclhimakꞌalhkꞌajnan vachuꞌ ixlacaꞌatalh ju ixlacatuna ju Cristo. Pus ju ixlacatuna ju Cristo nomputun ni yuꞌunch ju talhilacaꞌanta ju yuchi.
\v 25 Dios ju quisacxtuta ni amamakaꞌunuꞌ acva ixlacataꞌan ju yuꞌunch ju tatꞌajun lhilacaꞌanin ju Jesús. Iclhixtaknicanta ju ani lhichꞌalhcat ni aclajunkꞌoyauch ju uxijnan tachi chun ju ixchivinti Dios.
\v 26 Aclajunau ju uxijnan ju anuꞌ chivinti ju jantu tavanan ixꞌamavasalanicanta ju lapanacni ju makꞌanch ixtatꞌajun. Para ju chavai amavasalanicanta tachi chun ju talhilacaꞌantach ju Cristo.
\v 27 Pus ju uxijnan ju jantu israelitanin untꞌatꞌit ju Dios talacasqꞌuinin ni amachꞌakxayaꞌitꞌit ni slivasalh na kꞌox ju anuꞌ chivinti ju jantu ixmavasalacanta. Chai ju yuchi slivasalh na kꞌox junita ju milacataꞌan ju uxijnan. Pus ju anuꞌ chivinti najun ni tꞌajun ju Cristo lamiꞌalhunutꞌan vachuꞌ. Chai ixlhiyuchi cꞌatsꞌayatꞌit istavasalanti ni achꞌipꞌinaꞌitꞌit ju lactꞌiyan junta slivasalh kꞌox junita.
\p
\v 28 Ju quijnan iclajunau ixlacata ju Cristo. Chai icꞌalhimapꞌaksiyau tachi chun ju lapanacni chai icꞌamalaniyau tachi chun ju lapanacni lacakꞌox tacꞌatsanti. Chunch iclayau ni va iclacasqꞌuinau ni chunch lana catatsuculh tachi ju kꞌachani ju Cristo.
\v 29 Yuchach ju ictꞌajun lhichꞌalhcatnaꞌ chai slivasalh laꞌixlhichux quiꞌalhunut icnavi ju yuchi lacatachaput ju quixtakni ju Cristo.
\c 2
\p
\v 1 Iclacasqꞌuin ni acꞌatsꞌatꞌit ni slivasalh na iclhamakꞌaninin ju milacataꞌan chai ixlacataꞌan ju tavilanancha lakꞌachakꞌan Laodicea chai ixlacataꞌan tachi chun ju aliꞌin ju jantucaꞌ quintamispai.
\v 2 Iclacasqꞌuin ni alhilacꞌapꞌitꞌit ju Cristo ixlhichux ju miꞌalhunutꞌan ju uxijnan. Chai vana va chun catalalh ju aliꞌin. Iclacasqꞌuin ni va lakatamch aꞌuntꞌit va ixlacaꞌatalh ni vasalh lamapꞌainiyatꞌit chai slivasalh machꞌakxayatꞌit ixchivinti Dios ixlacata ju Cristo. Yuchach ju jantu ixꞌamavasalanican ju lapanacni ju makꞌanchich.
\v 3 Pus laꞌixmacni Cristo alinkꞌojui tachi chun ju atalaninti chai ju acꞌatsanti.
\v 4 Iclajunau chunch ni jantu xamatiꞌ cataꞌokxchokꞌoyan laca tuꞌuꞌ cꞌusi chivinti ju catajunin tachi ju va vasalh mas jantu.
\v 5 Pus mas jantu iclatꞌavilhchau para va tachi iclapastꞌacꞌau. Chai na iclhikꞌachanch ni iccꞌatsa ni va lakatamch untꞌatꞌit chai ni ixlhichux miꞌalhunutꞌan ju lhilacꞌapꞌintꞌatꞌit ju Cristo.
\p
\v 6 Acsni pꞌulhnan uncꞌantꞌit ju chivinti ixlacata ju Jesucristo pus lana lacꞌaꞌitꞌit. Pus chach tasu lamiꞌatsucuntiꞌan ju chavai ni va lakatam tꞌaꞌuntꞌatꞌit ju yuchi.
\v 7 Jantu tavanan acꞌaptꞌit ni va lakatam tꞌaꞌuntꞌatꞌit ju Cristo. Chai palai palai atsꞌucꞌutꞌit tachi ju kꞌachani ju yuchi. Ju chunch jantu xamatiꞌ lai catamacꞌapꞌaniyan ixchivinti Dios ju masunicꞌantꞌatꞌitch. Chai va tachi aꞌunitꞌit lakꞌailaktsꞌiuch ju Dios.
\s1 Alin ju sastꞌi atsucunti laꞌixmacni ju Cristo
\p
\v 8 Alhistꞌaccꞌantꞌit ni jantu xamatiꞌ cataꞌokxchokꞌoyan ju va laꞌixꞌatalanintiꞌan isꞌakstuꞌan chai laꞌixchivintiꞌan ju jantu slivasalh. Ju yuꞌunch va tajunan ju ixꞌatalaninti ju ixtꞌalapanacniꞌan ixlacata ju xataxtokni ju ani lacamunutpaꞌ ju va kꞌaya talakꞌayai tachi ju tuꞌuꞌ mas jantu lhitapalai. Jantu chunch ju tachivinin tachi ju ixnajun ju Cristo.
\p
\v 9 Pus ju Cristo Dios junita.
\v 10 Chai ni tꞌajun ju yuchi lamiꞌalhunutꞌan pus jantu tuꞌuꞌ makꞌancꞌacxatꞌit. Yuchi ju alhijonkꞌojui tachi chun ju anquilhnin chai tachi chun ju tachaput ju alin.
\v 11 Chai ni ixꞌanuꞌ untꞌatꞌit ju Cristo pus tachi ju va chꞌucꞌucꞌantꞌatꞌit. Para jantu va laꞌixmacaꞌ ju tam lapanac. Pus tachi ju va chꞌucꞌucꞌantꞌatꞌit ni jantuch vana naviyatꞌit ju alactuꞌunti tachi ju ixlayatꞌit. Chunch ju ulhtꞌucꞌantꞌatꞌit va ixlacaꞌatalh ni lhilacꞌapꞌintꞌatꞌit ju Cristo.
\v 12 Pus acsni akpaxau pus ju Dios quintalhilhcatan ni tachi ju va kꞌaixtam tꞌaꞌacnuyau ju Cristo chai tachi ju va tꞌalokꞌonchokotauch ju yuchi. Chunch ju quintalhilhcatan ju Dios ni lhilacaꞌanauch ju yuchi ni na tachapun chai ni yuchach ju malokꞌoni ju Cristo laꞌixꞌaninti.
\v 13 Pus ju makꞌanchich ju Dios ixtalaktsꞌinan ni tachi ju va ixnitꞌatꞌit va ixlacaꞌatalh ju miꞌalactuꞌuntiꞌan chai va ixlacaꞌatalh ni jantu ismispꞌapꞌutꞌunatꞌit ju Dios ni jantu israelitanin untꞌatꞌit. Para ju chavai ni lhilacꞌapꞌintꞌatꞌit ju Cristo pus ju Dios taxtaknitan ju sastꞌi miꞌatsucuntiꞌan chai tamacꞌacxanitan ju miꞌalactuꞌuntiꞌan.
\v 14 Pus ju Dios xacakꞌo ju anuꞌ lhamapꞌaksin ju xaquintamucꞌaniyan ju quintalakꞌalhinꞌan ni jantu lai xanaviyau. Makꞌosu acsni xtujcalh ju Cristo ju lacacurus.
\v 15 Pus acsni nilh ju Cristo ju lacacurus pus ju Dios taiꞌinilh ixtachaput ju xaꞌucxtin lhacaticurulhni chai ju salactꞌicstꞌin lhacaticurulhni. Chai amalacasu ni alhajacalh. Alhajanalh ju Cristo.
\s1 Yuchi ju anavitꞌit cuenta ju xataxtokni ju lactꞌiyan
\p
\v 16 Chai ni laꞌixꞌaninti xacakꞌo ju Cristo ju anuꞌ lhamapꞌaksin ju jantu lai xanaviyau pus jantu alacꞌasqꞌuinitꞌit ni xamatiꞌ cataꞌulaniyan ju mintalakꞌalhinꞌan ixlacata tuchꞌi uyatꞌit u ixlacata tuchꞌi kꞌotꞌatꞌit u va ixlacaꞌatalh ni jantu maklacꞌaꞌiniyatꞌit ju tuꞌuꞌ cꞌatan ju chin lakatamin cꞌata u lakatamin malhquiyuꞌ u ni jantu lhilaksiyatꞌit ju avilhchan paꞌastacni tachi ju ixnajun lacalhamapꞌaksin ju tsꞌokꞌula ju Moisés.
\v 17 Pus tachi chun ju ani taxtokni va ixpucꞌatsacan tuchi ju caminach astan. Para ju chavai ni quinitachilh ju Cristo pus jantu va na tasqꞌuini ni catailhiꞌancalh tachi ju ixlacan acsni tucaꞌ ixquiniyachilh ju yuchi.
\v 18 Jantu alakꞌaꞌinitꞌit ni xamatiꞌ cataꞌulaniyan ju mintalakꞌalhinꞌan ni jantu chun layatꞌit tachi ju yuꞌunch. Pus ju yuꞌunch tanajun ni jantu tuꞌuꞌ ixtapalhniꞌan ni laich catalakꞌaya ju tucan Dios. Alai va anquilhnin ju talakꞌayai. Chai tanajun ni palai tamispai ixtaxtokni Dios ni amavasalanicanta tachi ju va laꞌilhtatatꞌan. Va kꞌaya talhitakꞌayai ju ixtacꞌatsanꞌan ju va lhilapanac junita.
\v 19 Ju yuꞌunch jantu talhilaksi ju Cristo ju tucan saꞌaktsulh junita tachi chun ju talhilacaꞌanta ju yuchi. Para yuchach ju axtaknikꞌojui ixtachaputꞌan ju talhilacaꞌanta yuchi. Chai yuchi ju va lakatam anavikꞌojui ju ixlapanacni. Chai yuchi ju aꞌaktaijui ni laich palai palai catamispa ju Dios tachi ju kꞌox lhiulai ju yuchi.
\p
\v 20 Pus ju chavai ju Dios talhilhcatan ni tachi ju va nitꞌatꞌit ni nilh ju Cristo ixtapalh miꞌalactuꞌuntiꞌan. Chai ju chavai jantu tasqꞌuini ni vana alakꞌayatꞌit ju xataxtokni ju ani lacamunutpaꞌ. Para tajuch ni vana va chun ju tsꞌucꞌupꞌalatꞌit tachi ju aliꞌin ju jantucaꞌ talhilaksita ju Jesús. Tajuch ni vanach navipꞌalatꞌit tachi ju tanajun ju yuꞌunch.
\v 21 Ju yuꞌunch ni va tajumpalan ni alin tuꞌuꞌ ju jantu lai achꞌapꞌayaꞌitꞌit chai alin tuꞌuꞌ ju jantu lai aꞌuyaꞌitꞌit chai alin ju jantu lai apꞌiclayaꞌitꞌit.
\v 22 Para tachi chun ju ani chivinti ju tajunan va isꞌakstuꞌan taxapalaxtui. Jantu ixchivinti Dios ju tanajun. Va putasui ni jantu vasalh ju tanajun ni jantiyuꞌ ju xavaiti ju lhitapalai ni va tapasai.
\v 23 Pus tachi chun ju tanavi tachi ju tanajun ju anuꞌ lapanacni aktsꞌiya talhitalacasuich tachi ju vasalh atalaninin tajunita. Ju yuꞌunch tanajunch ta yu acpulakꞌayau ju Dios. Chai tanajun ni ma va lacatꞌicstꞌi accꞌatsa. Chai tanajun ni ma jantu acnavinilh ju ixkꞌachat ju quilacatunaꞌan. Para mas chunch ju acnavi jantu lai aquintixacanilh ju amacxcai ju alin laquiꞌalhunut.
\c 3
\p
\v 1 Ju chavai ju Cristo vanin tꞌavilhcha ju Dios ju lactꞌiyan. Chai ju Dios talhilhcatan ju uxijnan ni tachi ju va tꞌalokꞌonchꞌokꞌotꞌatꞌit ju Cristo. Pus yuchi lhitasqꞌuini ni ixtaxtokni Dios ju anavitꞌit cuenta ju uxijnan.
\v 2 Yuchi ju palai anavitꞌit cuenta ju xataxtokni lactꞌiyan. Jantiyuꞌ ju va xataxtokni ju ani lacamunutpaꞌ.
\v 3 Pus ju Dios talhilhcatan tachi ju va tꞌanitꞌatꞌit ju Cristo. Chai ju chavai alin ju sastꞌi miꞌatsucuntiꞌan ni lhilacꞌapꞌintꞌatꞌit ju Cristo chai isꞌaskꞌatꞌan Dios untꞌatꞌit.
\v 4 Pus yuchi ju Cristo ju quintaxtaknitan ju sastꞌi quiꞌatsucuntiꞌan. Chai acsni tavanan caminchokoyaꞌ ju yuchi pus ju uxijnan vachuꞌ atꞌatꞌalacꞌasuyaꞌitꞌit ju yuchi. Chai vachuꞌ xalackꞌajin aꞌunaꞌitꞌit.
\s1 Ta yu ixjunita ju quiꞌatsucuntiꞌan chai ta yu junita ju chavai
\p
\v 5 Chai ni chunch junita ju quiꞌatsucuntiꞌan ju chavai pus yuchi alhitsꞌucꞌutꞌit tachi ju vasalh nitꞌatꞌit ixlacata ju xataxtokni ju ani lacamunutpaꞌ. Jantu atꞌatsꞌucꞌutꞌit ju jantu miꞌamachakaꞌan u ju jantu mimpapaꞌan. Nin lai anavitꞌit ju aliꞌ alactuꞌunti ju ixtꞌachunch cava. Jantu akꞌachꞌanitꞌit tachi chun ju atsiꞌin. Nin yuchi ni caꞌalilh ju macxcai miꞌatalacpastꞌacꞌatꞌan. Chai jantu alhacchꞌipꞌitꞌit tuꞌuꞌ. Ni va chunch alatꞌit pus tachi ju va midiosꞌan navitꞌatꞌit ju miꞌalintaꞌan.
\v 6 Pus va ixlacata ni chunch ju taꞌalactuꞌunun ju lapanacni ju jantu taquiclacaꞌiputun ju Dios yuchi alhiꞌulanicanta ixtalakꞌalhinꞌan chai caꞌamamakꞌalhkꞌajnicanaꞌ.
\v 7 Chai ju uxijnan vachuꞌ chunch ju ixlayatꞌit ju pꞌulhnan.
\v 8 Para ju chavai amacꞌaꞌuntꞌit tachi chun ju ani taxtokni. Jantuch vana atꞌalhkꞌamantꞌit. Jantu alhilakꞌachꞌapꞌutꞌit tuꞌuꞌ. Jantu alaxcꞌaꞌitꞌit. Jantu anaꞌuntꞌit macxcai chivinti ixlacata akꞌantam. Jantu anaꞌuntꞌit tuꞌuꞌ macxcai chivinti.
\v 9 Jantu vana alaꞌunitꞌit taꞌaklhtamat ni cꞌaptꞌatꞌit ju miꞌatsucuntiꞌan tachi ju ixlayatꞌit acsni tucaꞌ ismispꞌayatꞌit ju Jesucristo.
\v 10 Para ju chavai sastꞌi ju miꞌatsucuntiꞌan. Chai palai palai mispꞌayatꞌit ju Dios tus acsni cachinaꞌ avilhchan acsni apꞌastꞌacꞌaꞌitꞌit tachi ju apastacnan ju Dios ju tanavitan.
\v 11 Pus sia quijnanꞌan ju sastꞌi junita ju quiꞌatsucuntiꞌan jantu lhitapalai ni israelitanin juntau u ni jantu israelitanin. Jantu lhitapalai ni chꞌucꞌucantau u ni jantu cachꞌucꞌucau. Jantu tuꞌuꞌ nomputun mas atalanininta cava u ni jantu tuꞌuꞌ mispai. Jantu tuꞌuꞌ nomputun mas va xalapanac junita. Nin yuchi ju isꞌakstu chꞌalhcatnan. Va yuchi ju Cristo ju tapalai chai yuchi ju tꞌajun laquiꞌalhunutꞌan quinchuxꞌan ju lhilacaꞌantauch ju yuchi.
\p
\v 12 Pus Dios ju tasacxtutan ni isꞌaskꞌatꞌan aꞌunaꞌitꞌit chai ju yuchi na tamapainiyan. Pus yuchi lhitasqꞌuini ni kꞌeu acꞌatsꞌantꞌit. Chai amalacꞌasutꞌit ju milhikꞌox lapanacꞌan. Atꞌalacꞌatꞌicstꞌitꞌit. Kꞌoxich atꞌalalhipꞌitꞌit lhichux. Chai achꞌixkꞌotꞌit tachi chun ju macxcai.
\v 13 Achꞌixtꞌit ni tuꞌuꞌ tanaviyan tam xamatiꞌ. Chai alamacꞌacxanitꞌit acsni tuꞌuꞌ lanaviniyatꞌit macxcai. Ju Cristo ni quintamacꞌacxaninch pus vachuꞌ chunch alanavitꞌit ju uxijnan.
\v 14 Chai ju tucan tasqꞌuini yuchi ni na alamapꞌainitꞌit. Ju chunch ni kꞌoxich atsꞌucꞌuyaꞌitꞌit chai va lakatam cajunaꞌ ju miꞌatalacpastꞌacꞌatꞌan.
\v 15 Pus acsni alin tuꞌuꞌ lhamakꞌan lamilhiꞌuxijnanꞌan pus apꞌuxcꞌaꞌutꞌit tamalhch ju alatꞌit ta yu laich kꞌox apꞌulalhipꞌitꞌit. Chai ju Cristo cataꞌaktaijuyan ni jantu atꞌalakꞌaꞌitꞌit ju aliꞌin. Pus ju uxijnan lhisacxtꞌucꞌantꞌatꞌit ni kꞌox alalhipꞌitꞌit minchuxꞌan ni tachi ju va lakatam lacatuna untꞌatꞌit ni si lhilacꞌapꞌintꞌatꞌit ju Cristo. Vachuꞌ tasqꞌuini ni va tachi aꞌunitꞌit lakꞌailaktsꞌiuch ju Dios.
\p
\v 16 Va tachi anavitꞌit cuenta tuchi ixnajun ju Cristo. Kꞌox amachꞌakxatꞌit acsni lamalaniyatꞌit chai acsni lamapꞌaksiyatꞌit. Chai alamalanitꞌit ixchivinti Dios chai alamapꞌaksitꞌit acsni milhpꞌayatꞌit ju salmos chai acsni lakꞌayapꞌutꞌunatꞌit ju Dios laca tuꞌuꞌ milhpat. Laꞌixlhichux miꞌalhunutꞌan amilhpꞌanitꞌit ju Dios chai aꞌunitꞌit lakꞌailaktsꞌiuch ixlacata chux ju taxtaknitan.
\v 17 Chai va tuchi ixtalakxtuch ju naviyatꞌit chunch ju anavitꞌit tachi ju kꞌox calhiulayaꞌ ju quiꞌucxtinꞌan Jesús. Chai va tuchi ixtalakxtuch ju nonatꞌit chunch ju achꞌivinintꞌit tachi ju kꞌox calhiulayaꞌ ju yuchi. Chai axtꞌaknitꞌit lakꞌailaktsꞌiuch ju quimpaiꞌan Dios ixlacata tachi chun ju quintaxtakniyan.
\s1 Chani cava ju isꞌatsucuntiꞌan ju talhilacaꞌanta ju Jesucristo
\p
\v 18 Ju uxijnan ju icꞌantꞌatꞌit aqꞌuiclacꞌaꞌitꞌit ju mimpapaꞌan tachi ju lhijunch ni lhilacꞌapꞌintꞌatꞌit ju Jesús.
\v 19 Ju uxijnan ji papanin amapꞌainitꞌitch ju miꞌamachakaꞌan chai jantu atꞌalakꞌaꞌitꞌit ju yuchi.
\v 20 Chai ju uxijnan ji askꞌatꞌan aqꞌuiclacꞌaꞌitꞌit ju mimpaiꞌan chai ju minatiꞌan tachi chun ju tajunan. Aqꞌuiclacꞌaꞌitꞌit ni na kꞌox lhiulai ju Jesús acsni chunch ju layatꞌit.
\v 21 Ju uxijnan ji xalacpaꞌitni jantu na va lhu ju akꞌaꞌitꞌit ju miꞌaskꞌatꞌan. Pus ni chunch ju alatꞌit jantu xcai ni va jeks cataꞌulh.
\v 22 Chai ju uxijnan ji xalapanacni aqꞌuiclacꞌaꞌitꞌit tachi chun ju catalhijunan ju miꞌucxtinꞌan ju ani lacamunutpaꞌ. Va tachi kꞌox achꞌalhcꞌatnantꞌit. Jantu va acsnich ju kꞌox achꞌalhcꞌatnantꞌit acsni va talaktsꞌinan ju miꞌucxtinꞌan ni laich catanaulh ni lackꞌoxin lapanacni untꞌatꞌit. Alai va tachi kꞌox achꞌalhcꞌatnanitꞌit ni tꞌalhoniyatꞌit ju Dios.
\v 23 Tachi chun ju naviyatꞌit pus ixlhichux ju miꞌalhunutꞌan ju anavitꞌitch tachi ju va jun Dios ju chꞌalhcꞌatnaniyatꞌit. Jantu chun tachi ju va mintꞌalapanacni ju chꞌalhcꞌatnaniyatꞌit.
\v 24 Pus chunchach ju alatꞌit ni cꞌatsꞌayatꞌit ni yuchi ju Cristo ju catamapalhniyan. Yuchi ni apꞌinaꞌitꞌit ju lactꞌiyan ni achꞌalhcꞌatnaniyaꞌitꞌit ju Cristo ju vasalh miꞌucxtinꞌan junita.
\v 25 Para ju navi ju macxcai calhimapalhnicanaꞌ ixlacata ju macxcai ju xanavi. Chai ju Dios jantu xamatiꞌ ju va pumacatami camapaini.
\c 4
\p
\v 1 Chai ju uxijnan ji lapanacni ju alin ju tanaviniyan ju milhichꞌalhcatꞌan anavinitꞌitch ju soknicꞌa chai tachi ju lhijunch. Apꞌastꞌactꞌit ni vachuꞌ alin ju miꞌucxtinꞌan ju lactꞌiyan.
\p
\v 2 Va tachi atꞌachꞌivinitꞌit ju Dios chai anavitꞌit cuenta tuchꞌi unatꞌit chai aꞌunitꞌit lakꞌailaktsꞌiuch.
\v 3 Atꞌapꞌaininitꞌit ju Dios vachuꞌ ju quilacata quijnan ni laich acꞌajunau ju lapanacni ixlacata ju Cristo. Laich acmavasalayau ixchivinti Dios ju jantu ixꞌamavasalanicanta ju lapanacni ju makꞌanchich. Pus va ixlacata ni icnajun ju anuꞌ chivinti yuchi tachꞌin iclhijunita.
\v 4 Asqꞌuintꞌit ni laich acꞌamavasalaniyaꞌ ni laich catamachakxayaꞌ. Chunch acchivinaꞌ tachi ju lhijun ni acnaulh.
\p
\v 5 Lacakꞌox acꞌatsanti atꞌalalhiꞌitꞌit ju yuꞌunch ju jantucaꞌ tamispai ju Jesucristo. Jantu va alhakꞌamanantꞌit ju mimpantsꞌiquisꞌan.
\v 6 Va tachi kꞌox alalhixakꞌalatꞌit. Na can achꞌivinintꞌit. Ju chunch lai acꞌatsꞌayaꞌitꞌit ta yu laich apꞌuꞌakꞌalhtꞌayananaꞌitꞌit ju pumatamin ju catasacmiyan tuꞌuꞌ ixlacata ju Cristo.
\s1 Ju Pablo amacꞌaminin
\p
\v 7 Yuchi ju Tíquico ju catamacꞌatsanikꞌoyan ta yu icjunita. Ju yuchi quilakꞌauꞌan junita ju na mapainicanta chai ju yuchi na quiꞌaktaijui chai lai lhilaksican. Chai ju yuchi quintꞌanavi ixlhichꞌalhcat ju Jesús.
\v 8 Pus icmalakachanitachan ju Tíquico ni lai acꞌatsꞌatꞌit ta yu icjuntau chai ni lai catamatankꞌoxaxkꞌayayan ju yuchi.
\v 9 Chai ju Onésimo catꞌaꞌananta ju yuchi. Ju yuchi quilakꞌauꞌan junita chai ju yuchi muctaxtui laꞌixtaxtokni Dios chai na icmapainiyau. Chai ju yuchi mintꞌaꞌamachakꞌanꞌan junita. Pus ju yuꞌunch catamacꞌatsanikꞌoyan tachi chun ju tꞌajun tapasanaꞌ ju ani.
\p
\v 10 Ju Aristarco ju ictꞌatꞌalhnucanta tamacꞌamiyan. Vachuꞌ ju Marcos ixlhilakꞌau ju Bernabé tamacꞌamiyan. Pus iclalhimapꞌaksitauch ixlacata ju yuchi. Acsni tavanan catalakchaꞌanan pus lhikꞌach amaklhtꞌayanantꞌit.
\v 11 Vachuꞌ tamacꞌamiyan ju Jesús ju vachuꞌ Justo juncan. Ju yuꞌunch quintꞌaꞌisraelitanin quincꞌan tajunita chai talhilacaꞌanta ju Cristo. Pus va yuꞌunchach ju quintatꞌachꞌalhcatnan ixꞌajunica ju lapanacni ixchivinti Dios. Matich apumatam ju sia yuꞌunch ju quintatꞌachꞌalhcatnan. Pus ju anuꞌ ixpumatꞌutuꞌan slivasalh na quintamatankꞌoxaxkꞌayai.
\v 12 Vachuꞌ tamacꞌamiyan ju Epafras ju vachuꞌ mintꞌaꞌamachakꞌanꞌan junita. Chai ju yuchi ixlapanac Cristo junita vachuꞌ. Pus ju yuchi va tachi tapaininich ju Dios ju milacataꞌan ni atsꞌucꞌuyaꞌitꞌit tachi ju kꞌachani ju Cristo chai ni anaviyaꞌitꞌit tachi chun ju lacasqꞌuin ju Dios.
\v 13 Chai quitꞌin quiꞌakstu iclaktsꞌinta ju yuchi ni slivasalh na tapainini ju Dios ju milacataꞌan ju uxijnan chai ixlacataꞌan ju tavilanancha ju lakꞌachakꞌanixni Laodicea chai Hierápolis.
\v 14 Vachuꞌ tamacꞌamiyan ju Lucas ju acꞌuchꞌunuꞌ ju na mapainicanta. Chai vachuꞌ tamacꞌamiyan ju Demas.
\p
\v 15 Amacꞌamitꞌit ju quiꞌalakꞌavinꞌan ju tavilanancha ju lakꞌachakꞌan Laodicea. Vachuꞌ amacꞌamitꞌit ju quilakꞌauꞌan atsiꞌ Ninfas chai tachi chun ju talhilacaꞌanta ju Cristo ju tatakꞌaixtꞌokꞌach laꞌixchakaꞌ.
\v 16 Pus ju ani atsꞌoknut alhiqui acsni akꞌasmatkꞌoyaꞌitꞌit ju uxijnan amalakꞌachꞌayaꞌitꞌit ju lakꞌachakꞌan Laodicea. Chach takꞌasmatꞌanta vachuꞌ ju yuꞌunch ju talhilacaꞌanta ju Cristo ju tavilanancha ju anch. Chai ju alhiqui ju icꞌatsꞌoknunita ju amachakꞌan Laodicea catamalakachanitachin ju uxijnan. Pus akꞌasmatꞌaꞌitꞌit vachuꞌ ju yuchi tuchi najunch.
\v 17 Chai aꞌunaꞌitꞌit ju Arquipo ni camuctaxtu ju lhichꞌalhcat ju xaxtakni ju ixꞌucxtin Jesús.
\p
\v 18 Ju quitꞌin icPablo chai tus ani apumatam xaquiꞌatsꞌoknuni ju ani alhiqui. Para ju chavai quitꞌin quiꞌakstu aclaꞌatsꞌoknuniyau chai aclamacꞌamiyau. Apꞌastꞌactꞌit ni tachꞌin icjunita. Ictapainini ju Dios ni cataxtakniyan ju kꞌox miꞌatsucuntiꞌan. Vasalh chunch iclacasqꞌuin.