\id 1TH
\ide UTF8
\h 1 TESALÓNICA
\toc1 1 TESALÓNICA
\mt1 JU PꞌULHNAN ALHIQUI JU ATSꞌOKNUNICALH JU AMACHAKꞌAN TESALÓNICA
\c 1
\s1 Amacꞌamican ju amachakꞌan Tesalónica
\p
\v 1 Ju quijnan icPablo chai icSilvano chai icTimoteo ju ani icvilau. Va iclamacꞌamiyau ju uxijnan ju vilhchitꞌit ju lakꞌachakꞌan Tesalónica. Pus ju uxijnan va lakatam tꞌaꞌuntꞌatꞌit ju quimpaiꞌan Dios chai ju quiꞌucxtinꞌan Jesucristo. Pus icꞌatapainini ju yuꞌunch ni catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan.
\s1 Isꞌatsucuntiꞌan chun junita tachi ju tuꞌuꞌ lhilaktsꞌintaiti
\p
\v 2 Pus va ta pakchux ju ictꞌachivinau ju Dios icjunau lakꞌailaktsꞌiuch ju milacataꞌan. Chai ictapaininiyau ju yuchi ju milacataꞌan.
\v 3 Icxtakniyau lakꞌailaktsꞌiuch ju quimpaiꞌan Dios ni va tachi icpastꞌacꞌau ju lhichꞌalhcat ju naviyatꞌit va ixlacaꞌatalh ni lhilacꞌapꞌintꞌatꞌit ju Jesús. Vachuꞌ va tachi icpastꞌacꞌauch ju tuchꞌi naviyatꞌit mas xkꞌopꞌatꞌit va ixlacaꞌatalh ni mapꞌainiyatꞌit ju Jesús. Vachuꞌ jantu lai iccꞌapꞌau ni lana jantu jeks uyatꞌit va ixlacaꞌatalh ni lhilaksiyatꞌit ju quiꞌucxtinꞌan Jesucristo ni cataxtakniyan ju miꞌatsucuntiꞌan ju conkꞌalhiyanta ju lactꞌiyan tachi ju takꞌalhtasunitan.
\v 4 Iccꞌatsayau ni Dios ju tasacxtutan ji quiꞌalakꞌavin chai na tamapainiyan.
\v 5 Icpunonau chunch ni istasui ixtachaput ju Spiritu Santu lamiꞌatsucuntiꞌan acsni xaclajunau ju chivinti ixlacata ju Jesús. Jantu chun xatapasai tachi acsni va noncan va tuꞌuch chivinti. Pus ixlhichux quiꞌalhunut quincꞌan xaccꞌatsayau ni yuchi ju Spiritu Santu ju ixtꞌajun chꞌalhcatnaꞌ lamiꞌalhunutꞌan ju uxijnan. Chai acsni xaclatꞌavilau pus lana istasui laquiꞌatsucunti quincꞌan ni stavasalanti ju xaclajunau.
\p
\v 6 Vachuꞌ icpucꞌatsayau ni tasacxtutan ju Dios ni vachuꞌ chunch ju latꞌit tachi ju iclayau ju quijnan chai tachi ju lalh ju quiꞌucxtinꞌan Jesús. Pus vachuꞌ taꞌaktaijutan ju Spiritu Santu ni laich xakꞌachꞌanatꞌit mas na tamamakꞌalhkꞌajniyan ju lapanacni va ixlacata ni lacꞌaꞌinitꞌit ju ixchivinti Dios.
\v 7 Chai ni chunch ju latꞌit ju uxijnan pus ju miꞌatsucuntiꞌan valhch tachi tuꞌuꞌ xalhilaktsꞌintaiti ixlacataꞌan tachi chun ju talhilacaꞌanta ju Cristo amachakꞌan xalacatꞌun Macedonia chai amachakꞌan xalacatꞌun Acaya.
\v 8 Chai uxijnan ju makpꞌitsꞌitꞌit ixchivinti ju quiꞌucxtinꞌan Jesús. Chai jantu va anch ju xalacatꞌun Macedonia chai Acaya para vanta anchach cꞌatsacan ni lhilacꞌapꞌintꞌatꞌit ju Dios. Chai ju chunch pus jantu tasqꞌuini ni tuꞌuꞌ acꞌajunilh ju lapanacni ju milacataꞌan.
\v 9 Ju yuꞌunch tanajun ta yu xaclayau acsni iclalakchiu ju uxijnan. Vachuꞌ tanajun ta yu pꞌumacꞌaꞌuntꞌit ju misantoqꞌuiuꞌan chai lhilacꞌapꞌitꞌit ju Dios chai makꞌaxtꞌaknikꞌotꞌit ju miꞌatsucuntiꞌan ju yuchi. Yuchach ju lakꞌajunta chai stavasalanti Dios junita.
\v 10 Vachuꞌ ju uxijnan pꞌacxanatꞌit ju istsꞌalh Dios ju caminanta lactꞌiyan. Yuchach ju malokꞌonilh ju Dios acsni ixnita. Yuchi ju Jesús ju aquintamakꞌalhtaxtuyan ni jantu camakꞌalhkꞌajnanauch tachi ju catamakꞌalhkꞌajnanaꞌ ju aliꞌin acsni caꞌamalacasuniyaꞌ ju ixtalhkꞌamti ju Dios.
\c 2
\s1 Ju Pablo na ixchꞌalhcatnan ju lakꞌachakꞌan Tesalónica
\p
\v 1 Ju uxijnan ji quiꞌalakꞌavin miꞌakstuꞌan cꞌatsꞌayatꞌit ni aktsꞌiya ixlhitapalai tuchi xacnaviyachau lamilhiꞌuxijnanꞌan.
\v 2 Pus miꞌakstuꞌan cꞌatsꞌayatꞌit ni icmamakꞌalhkꞌajnicanchauch chai icmamaxanicanchauch ju lakꞌachakꞌan Filipos acsni tucaꞌ xaclalakꞌanachau ju uxijnan. Para ju quiDiosꞌan quintamakꞌosunin ju quintalhanti quincꞌan ni laich xaclajunau ju uxijnan ta yu lai putakꞌalhtaxtucan. Laich xaclajunau chunch mas quintalhixcajinch ju aliꞌin mintꞌaꞌamachakꞌan.
\v 3 Pus ju tuchi iclalhimapꞌaksiyau yuchach ju stavasalanti chai jantu va xaclamalacaꞌiniputunau ju tuꞌuꞌ taꞌaklhtamat chivinti nin yuchi ni va aclaꞌokxchokꞌomaxtuniputu ju mintuminꞌan.
\v 4 Alai yuchi ju Dios ju quintalaktsꞌintanun chai ni kꞌoxich quintalhiulan pus quintaxtaknitan ju lhichꞌalhcat ni acnaju ju ixchivinti Dios. Pus yuchi lhichivinau tachi ju kꞌachanich ju Dios. Jantu chun icnonau tachi ju va kꞌoxich catalhiula ju tam quintꞌalapanac.
\v 5 Ju Dios cꞌatsai chai vachuꞌ ju uxijnan cꞌatsꞌayatꞌit ni jantu na va cꞌus lapanacni xaclatalacasuniyau ni va xaclapuꞌokxchokꞌoputu ju chivinti ju xaclajunau. Chai Dios ju cꞌatsai chai vachuꞌ ju uxijnan cꞌatsꞌayatꞌit ni jantu va xaclaꞌokxchokꞌosqꞌuiniputunau ju mintuminꞌan.
\v 6 Jantu xacpuxcoyau ta yu laich aquintapulakꞌayan ju lapanacni. Nin uxijnan nin yuchi ju akꞌantam lapanac. Jantu chunch xaclayau mas ca laich chunch aclau ni ixtamalakachan Cristo icjuntau.
\v 7 Alai chunch xaclayau tachi ju tam chakoꞌulh ju na mapaini ju isꞌaskꞌatꞌan chai na alhistꞌacꞌa.
\v 8 Chai ni slivasalh na xaclamapainiyau ju uxijnan pus jantu va yuchi ju ixchivinti Dios ju xaclaxtakniputunauch para vachuꞌ xaclhitapꞌuxputunau mas quiꞌatsucunti quincꞌan ju va milacataꞌan. Chunch xacnaviputunau ni aktsꞌiya tuꞌuꞌ xaclalhiulayau ju uxijnan.
\v 9 Ju uxijnan pꞌastꞌacꞌatꞌit ni xaclamasuniyau ixchivinti Dios para vachuꞌ xacchꞌalhcatnanau ta yu xacpulhajayau ju quivaiti quincꞌan. Chai na xacxkꞌopau. Tsꞌis chai tuncuj xacchꞌalhcatnanau. Ju chunch jantu xamatiꞌ ju milhiꞌuxijnan xacmaxcayaniyau ju ixꞌalhunut ju quimavaca quincꞌan acsni xaclajunau ixchivinti Dios.
\p
\v 10 Ju uxijnan ju lhilacꞌapꞌinatꞌit ju Cristo cꞌatsꞌayatꞌit chai vachuꞌ Dios cꞌatsai ni na salaka chai na soknicꞌa ixjunita ju quiꞌatsucunti quincꞌan acsni xaclatꞌavilau. Chai lana matich ixjunita ju quintalakꞌalhin quincꞌan.
\v 11 Cꞌatsꞌayatꞌit ni na xaclamapꞌaksiyau chai xaclamatankꞌoxaxkꞌayayau ju pumatamin ju uxijnan tachi ju lai tam xapai ni na mapaini ju isꞌaskꞌatꞌa.
\v 12 Xaclajunau chunch ni atsꞌucꞌuyaꞌitꞌit tachi ju lhijunch ni lhilacꞌapꞌintꞌatꞌit ju Dios. Yuchach ju tatꞌasanitan ni laich atꞌanuyaꞌitꞌit ju lactꞌiyan junta lhinajun ju yuchi chai laich alaktsꞌinaꞌitꞌit ni vasalh xakꞌaich ju yuchi.
\p
\v 13 Pus acsni tavanan iclamakꞌasmatnitachau ju ixchivinti Dios pus ju uxijnan lana lacꞌaꞌitꞌit ni ixchivinti Dios junita. Chai vasalh chunch junita. Pus jantu xalacꞌaꞌiyatꞌit ni ixchivinti cava ju va tam quintꞌalapanacꞌan. Chai yuchi va tachi iclhixtakniyau lakꞌailaktsꞌiuch ju Dios. Chai ju anuꞌ ixchivinti Dios va tachi chꞌalhcatnan lamiꞌalhunutꞌan ju uxijnan ju lacꞌaꞌiniyatꞌitch.
\v 14 Pus ju uxijnan ji quiꞌalakꞌavin vana va chun chꞌixatꞌit ju makꞌalhkꞌajnat tachi ju talalh ju yuꞌunch ju talhilacaꞌanta ju Dios chai ju Cristo Jesús ju tavilanancha ju xaꞌestado Judea. Ju uxijnan vana va chun makꞌalhkꞌajnanatꞌit laꞌixmacaꞌan ju mintꞌaꞌamachakꞌanꞌan tachi ju yuꞌunch ni tamakꞌalhkꞌajnalh laꞌixmacaꞌan ju istꞌaꞌisraelitanin.
\v 15 Pus yuꞌunch ju israelitanin ju tamakni ju quiꞌucxtinꞌan Jesús chai ju ixlapanacni Dios ju ixtanajun ixchivinti chai vachuꞌ quintaxcauxtuyan ju quijnan. Pus ju Dios lana jantu kꞌox lhiulai tachi ju talai ju yuꞌunch. Chai ju yuꞌunch ixtꞌalaxcaichꞌan tajunita tachi chun ju lapanacni.
\v 16 Pus ju yuꞌunch jantu quintalakꞌaꞌiniyan ni acꞌajuniu ixchivinti Dios ju jantu israelitanin acsni icꞌajuniu ni laich catatakꞌalhtaxtulh. Chai ni chunch ju talalh pus na talhava ju ixtalakꞌalhinꞌan. Para cachinaꞌ avilhchan acsni caꞌamalacasuniyaꞌ ju yuꞌunch ju ixtalhkꞌamti ju Dios.
\s1 Ju Pablo anchokoputun ju lakꞌachakꞌan Tesalónica
\p
\v 17 Pus ju quijnan ji quiꞌalakꞌavin mas jantu lalaktsꞌinau pantsꞌiquis ju laquiꞌucxlacapuꞌan para jantu tavanan ju iclacaptau. Chai ni pantsꞌiquis xajun ju jantu xalalaktsꞌinauch pus yuchi slivasalh ixlhichux quiꞌalhunut quincꞌan iclalaktsꞌinchokoputunau ju uxijnan.
\v 18 Pus ju quijnan slivasalh na xaclalakꞌamputunachau ju uxijnan. Pus ju quitꞌin icPablo chai ju quitꞌin na paklhu xacnavi talakmaskꞌatinti ni xacꞌancha. Para va xaquintanchajnitꞌajun ju lhacaticuru.
\v 19 Iccꞌatsayau ni milacataꞌan ackꞌachanau acsni caminchokoyaꞌ ju quiꞌucxtinꞌan Jesús. Chai iccꞌatsayau ni va milacataꞌan aclaktsꞌincanau ni icmuctaxtutauch laꞌixlhichꞌalhcat ju Dios.
\v 20 Pus na kꞌox quintalhichivinan ju quijnan va milacataꞌan ju uxijnan. Chai uxijnan ju iclalhikꞌachanau.
\c 3
\p
\v 1 Pus acsni jantuch lai aliꞌ icpacxauch ni na sokꞌoch xaccꞌatsaputunau ta yu untꞌatꞌit pus icpastacvi ni actolauch va quiꞌakstu quincꞌan ju lakꞌachakꞌan Atenas.
\v 2 Chai icmalakachachauch ju Timoteo ju quilhilakꞌauꞌan junita chai ixlapanac Dios ju vachuꞌ najun ju chivinti ixlacata ju Cristo. Ju yuchi catamapꞌaksiyan chai cataꞌaktaijuyan ni jantu xamatiꞌ catamacꞌapꞌaniyan ju Cristo.
\v 3 Ju chunch jantu xamatiꞌ lai catamakꞌantalhanayan ixlacata junima makꞌalhkꞌajnat. Pus uxijnan miꞌakstuꞌan cꞌatsꞌayatꞌit ni chunch ju lhilhcanicantauch ni camakꞌalhkꞌajnanau ju quijnanꞌan ju lhilacaꞌantauch ju Jesús.
\v 4 Pus acsni xaclatꞌavilaucaꞌ va tsa xaclajunauch ni caꞌalinaꞌ ju quimakꞌalhkꞌajnatꞌan. Chai cꞌatsꞌayatꞌit ni chunchach ju tapasalh.
\v 5 Pus vachuꞌ ju quitꞌin jantu lai palai makꞌan xacpacxan ni jantu sai iclalaktsꞌinau. Pus yuchi iclhimalakachatachalh ju Timoteo ni cacꞌatsacha ni vana lhilacꞌapꞌinatꞌit ju Cristo u jantu. Xacnajun ni jantu xcai ni catamacꞌapꞌanin ju aꞌokxchokꞌonu lhacaticuru ni jantuch vana alhilacꞌapꞌitꞌit ju Jesús. Chai ni chunch cava ixlatꞌit pus jantu tuꞌuꞌ ixtilhitapalalh ju quilhichꞌalhcat quincꞌan lamilhiꞌuxijnan.
\p
\v 6 Para ju chavai taspꞌitchokocha ju Timoteo. Chinchokolh junta icvilau chai slivasalh na ickꞌachauch ni quintamacꞌatsaninch ni vanach lhilacꞌapꞌinatꞌit ju Jesús chai na amapꞌainininatꞌit. Pus quintajunan ni aktsꞌiya va tachi quilapastꞌacꞌauch ju quijnan. Ma quilalaktsꞌimputunauch ju quijnan tachi ju vachuꞌ ju quijnan iclalaktsꞌimputunau ju uxijnan.
\v 7 Pus ji quiꞌalakꞌavin mas na xaquintaꞌamamakꞌaniniyan ju lapanacni chai xaquintamamakꞌalhkꞌajniyan para ju chavai na ickꞌachanauch. Pus palai lai icchꞌixkꞌoyau chux ni iccꞌatsayau ju chavai ni va tachi lhilacꞌapꞌinatꞌit ju Cristo ju uxijnan.
\v 8 Pus ju chavai lhikꞌach ictꞌonau ni ixlhichux miꞌalhunutꞌan ju lhilacꞌapꞌinatꞌit ju quiꞌucxtinꞌan Jesús.
\v 9 Jantu lai icxtakniyau lakꞌailaktsꞌiuch ju Dios tachi ju lhijunch ni na kꞌai ju xanavi ju milacaꞌatalhꞌan ju uxijnan. Pus slivasalh na iclhikꞌachanau ju milacataꞌan ju uxijnan laꞌixmacni ju quiDiosꞌan.
\v 10 Pus va tachi icsqꞌuiniyau ju Dios ni laich calalaktsꞌinchoko. Chai laich aclaꞌaktaijuch ixlacata ju tuꞌuꞌ ju tacꞌacxnitancaꞌ ju lacasastꞌi miꞌatsucuntiꞌan.
\p
\v 11 Pus ictapainini ju quimpaiꞌan Dios chai ju quiꞌucxtinꞌan Jesucristo ni aquintaꞌaktaijuyan ni lai aclaꞌanchau laktsꞌinin.
\v 12 Vachuꞌ ictapainini ju quiꞌucxtinꞌan Jesucristo ni lhuch cataxtakniyan ju miꞌamapainintiꞌan ni laich vasalh alamapꞌainiyaꞌitꞌit ju uxijnan chai vachuꞌ lai amapꞌainiyaꞌitꞌit tachi chun ju lapanacni. Chai iclacasqꞌuin ni chunch ju alatꞌit tachi ju quijnan ni vachuꞌ iclamapainiyau ju uxijnan.
\v 13 Chai ju chunch pus ju Cristo cataꞌaktaijuyan ni jantu tavanan amacꞌonaꞌitꞌit ixti ju Dios. Chai ni jantu amacꞌonaꞌitꞌit ju ixti Dios pus salaka aꞌunaꞌitꞌit laꞌixꞌucxlacapuꞌ ju quimpaiꞌan Dios acsni caminach ju quiꞌucxtinꞌan Jesucristo acsni caꞌalactꞌaminach tachi chun ju tavilanancha ju lactꞌiyan.
\c 4
\s1 Alin ju atsucunti ju kꞌachani ju Dios
\p
\v 1 Pus ji quiꞌalakꞌavin ju quitꞌin ixtamalakachan ju quiꞌucxtinꞌan Jesús icjunita. Chai yuchi iclalhiquilhtapujuyau chai iclalhimapꞌaksiyau ni atꞌailhipꞌitꞌitch tachi ju xaclajunau acsni xaclajunau ta yu cavalh ju miꞌatsucuntiꞌan. Ta yu kꞌoxich capulhiula ju Dios. Chai iccꞌatsayau ni chunchach ju naviyatꞌit. Para va iclacasqꞌuinau ni palai atꞌailhipꞌitꞌit.
\p
\v 2 Ju uxijnan mispꞌayatꞌit ju lhamapꞌaksin ju iclaxtaknitau tachi ju quintamamachakxanitan ju quiꞌucxtinꞌan Jesús.
\v 3 Pus ju ixkꞌachat ju Dios yuchi ni salaka cava ju miꞌatsucuntiꞌan. Ju chunch va nomputun ni jantu apꞌuxcꞌaꞌutꞌit ju minavinꞌan.
\v 4 Chai ju Dios lacasqꞌuin ni cacꞌatsa pumatamin ju uxijnan ta yu laich capupuxcaulh ju tam ixꞌamachakaꞌ tachi ju lhijunch ni taxacanitan ju miꞌalhunutꞌan ju Dios. Chai cacꞌatsa ta yu laich caputasuyaꞌ ni vasalh tuꞌuꞌ lhiulayatꞌit ju miꞌamachakaꞌan.
\v 5 Jantiyuꞌ alhipꞌuxcꞌaꞌutꞌit laꞌixtachaput ju amacxcai atalacpastꞌacꞌat tachi ju talai ju lapanacni ju jantu tamispai ju Dios.
\v 6 Para ni jantu chunch ju alatꞌit tachi ju iclajuntau pus lai alakꞌalhiyaꞌitꞌit ju quinchivinti chai lai alactꞌuꞌuyaꞌitꞌit tam milhilakꞌauꞌan. Pus ju quiꞌucxtinꞌan Dios yuchi ju amamapalani tachi chun ju tanavi ju chunch alactuꞌunti. Chai ju quitꞌin chunch xaclajunau chai xaclalhimapꞌaksiyauch.
\v 7 Pus tasqꞌuini ni salaka catsucu ni yuchi quintalhitꞌasanitan ju Dios. Jantiyuꞌ ni va caꞌalactuꞌunuch.
\v 8 Pus ju jantu tuꞌuꞌ lhiulai ju ani lhamapꞌaksin va nomputunch ni jantu tuꞌuꞌ lhiulai ju Dios mas yuchi ju quintaxtaknitanch ju iSpiritu Santu ju tꞌajun laquiꞌalhunutꞌan. Yuchi ju Dios ju jantu tuꞌuꞌ lhiulacan. Jantiyuꞌ ju va ixtꞌalapanac ju xcaji.
\p
\v 9 Pus jantu tasqꞌuini ni aclaꞌatsꞌoknuniu ju uxijnan ixlacata ju amapaininti tachi ju lhilakꞌauch ni isꞌakstu ju Dios ju xatamalaniyan ju uxijnan ni alamapꞌainiyaꞌitꞌit.
\v 10 Chai chunchach ju naviniyatꞌit tachi chun ju miꞌalakꞌavinꞌan ju tavilanancha ju xalacatꞌun Macedonia. Para iclatapaininiyau ji quiꞌalakꞌavin ni palai alamapꞌainitꞌit.
\v 11 Apꞌuxcꞌaꞌutꞌit ju kꞌox atsucunti ju jantu va lacalasat. Anavitꞌit ju milhichꞌalhcatꞌan miꞌakstuꞌan. Jantu va atꞌanutꞌit junta jantu mincuentaꞌan. Apꞌuchꞌalhcꞌatnantꞌit ju mimacaꞌan tachi ju iclalhimapꞌaksitauch.
\v 12 Ju chunch ju yuꞌunch ju jantucaꞌ talhilacaꞌanta ju Cristo catalaktsꞌinan ni soknicꞌa ju miꞌatsucuntiꞌan chai jantu tasqꞌuini ni apumatam catamavayan ni lhaꞌatꞌatꞌit miꞌakstuꞌan tuchꞌi maktꞌasqꞌuiniyatꞌit.
\s1 Ju Cristo caminchokoyaꞌ
\p
\v 13 Vachuꞌ ji quiꞌalakꞌavin iclacasqꞌuinau ni amachꞌakxatꞌit ixlacataꞌan ju tanita. Ju chunch ni jantu alhamakꞌanininaꞌitꞌit tachi ju talai ju aliꞌin ju jantu catitalaktsꞌincha ju Cristo ju lactꞌiyan.
\v 14 Pus lacaꞌiyau ni nilh ju Jesús chai taꞌacxtuchokolh junta ixmacnucanta. Chai vachuꞌ lacaꞌiyau ni Dios ju caꞌalactꞌalhiminach ju Jesús tachi chun ju ixtalhilacaꞌanta ju yuchi acsni ixtitatꞌajuncaꞌ.
\p
\v 15 Pus iclajunauch ju ani ixchivinti ju quiꞌucxtinꞌan Jesús. Pus ju quijnanꞌan ju tꞌonaucaꞌ acsni caminchokoyach ju quiꞌucxtinꞌan Jesús jantu lai catiꞌapꞌulhniu ju yuꞌunch ju tanitach.
\v 16 Pus isꞌakstu ju quiꞌucxtinꞌan Jesús ju aquintatꞌasaniyan acsni caminanta ju lactꞌiyan. Chai cachivinaꞌ ju xakꞌai anquilh. Chai caskꞌolhcanaꞌ laꞌiskꞌolh ju Dios. Chai ju tanitach ju ixtalhilacaꞌanta ju Cristo catalokꞌonchokoyach pꞌulhnan.
\v 17 Astan ju quijnanꞌan ju titꞌonaucaꞌ va kꞌaixtamch catꞌalhiꞌancanau lacaꞌataputsꞌi. Caꞌanauch pakxtoknin ju quiꞌucxtinꞌan ju talaclhman. Chai catꞌatolhkꞌalhitachauch ju quiꞌucxtinꞌan.
\v 18 Pus alalhimatankꞌoxaxkꞌayatꞌit ju chunch chivinti.
\c 5
\p
\v 1 Jantu tasqꞌuini ji quiꞌalakꞌavin ni actilalhiꞌatsꞌoknuniu tavananch tucan ju caminchokoyaꞌ ju Cristo u ta yu cajunaꞌ ju acsnich avilhchan.
\v 2 Jantu tasqꞌuini ni tuꞌuꞌ aclajunau ni uxijnan miꞌakstuꞌan kꞌoxich cꞌatsꞌayatꞌit ni jantu xamatiꞌ cꞌatsai tavanan tucan ju lai camilh. Pus ju yuchi vatsꞌalhti caminaꞌ acsni jantu xamatiꞌ najun ni lai camilh. Capuminaꞌ tachi ju tam akꞌalhonaꞌ ju min acsni jantu xamatiꞌ najun ni lai camilh.
\v 3 Acsni calacnoncanach ni va lhikꞌachach ju ani chai matich ju talhanti pus ju acsnich va tam pantsꞌiquis caminach ju ixmakꞌalhkꞌajnatꞌan chai jantu lai xamatiꞌ catitakꞌalhtaxtulh. Pus chunch catapasayaꞌ tachi ju tapasai laꞌisꞌatsucunti ju tam chakoꞌulh ni chin ju ixꞌamaklakꞌavanti. Va tam pantsꞌiquis chin ju ixmakꞌalhkꞌajnat chai jantu lai catitakꞌalhtaxtulh laꞌixmakꞌalhkꞌajnat.
\v 4 Para ju uxijnan ji quiꞌalakꞌavin jantu tꞌonatꞌit ju lacaꞌatatsꞌisni. Ju uxijnan cꞌatsꞌayatꞌit ni caminchokoyaꞌ ju Cristo. Chai yuchi jantu lai va sek catilhichilh tachi ju tam akꞌalhonaꞌ ju min acsni jantu xamatiꞌ najun ni lai camilh.
\v 5 Pus ju uxijnan cꞌatsꞌayatꞌit ni caminchokoyaꞌ ju Cristo ni lhilacꞌapꞌintꞌatꞌit ju yuchi. Chai apꞌinaꞌitꞌit ju lactꞌiyan junta si atuncunuꞌ junita. Ju quijnanꞌan ju lhilacaꞌanauch ju Cristo jantu tꞌonau lacaꞌatatsꞌisni nin lai caꞌau junta jonkꞌalhita putsꞌista.
\v 6 Pus tasqꞌuini ni calacpucujvich. Chai skala catsucu. Jantu chun calau tachi ju aliꞌin ju lana jantu tuꞌuꞌ tanavi cuenta.
\v 7 Pus chani ju tapasai laquiꞌatsucuntiꞌan ju ani lacamunutpaꞌ. Pus tsꞌis ju laclhtatacan chai tsꞌis ju lactꞌakꞌapꞌacan. Pus vana va chun laꞌixmacni Dios. Ju tatꞌajun lacaꞌatatsꞌisni ni jantucaꞌ tamispai ju Cristo pus tachi ju va talhtatanan laꞌisꞌatsucuntiꞌan chai tachi ju va tatꞌakꞌapꞌanita ju ixtacꞌatsanꞌan.
\v 8 Para ju quijnanꞌan ju tꞌonau lacaꞌatuncunuꞌ tasqꞌuini ni caꞌacꞌatsanauch. Pus chani calau ni jantu aquintatꞌalalhajayan ju macxcai. Tasqꞌuini ni calhistacchokocau. Chai lai chunch calau acsni pꞌas calhilaksiyau ju Jesús chai camapainininau. Chai chunch cajunau tachi ju tam taropa ju lakchꞌi ju tsasnat ixcujuꞌ ni jantu lai catitanunilh ju flecha. Tasqꞌuini ni calhistacchokocau. Chai lai chunch calau acsni calhistꞌacꞌau ju quintacꞌatsanꞌan acsni calhilaksiyau ixchivinti Dios ni aktsꞌiya aquintamakꞌalhtaxtuyan. Chai chunch cajunau tachi ju tam taropa ju aktanui ju tsasnat ixꞌaktanut ni jantu lai tapasani ju flecha.
\v 9 Pus lai calhilaksiyau ju Dios ni aquintamakꞌalhtaxtuyan ni jantu quintalhilhcaꞌulanin ju Dios ni va camakꞌalhkꞌajnankꞌalhiyau. Para quintalhilhcaꞌulanin ni catakꞌalhtaxtuyau va ixlacaꞌatalh quiꞌucxtinꞌan Jesucristo.
\v 10 Pus ju yuchi nilh ju quilacataꞌan. Ju chunch mas tꞌonaucaꞌ ju ani lacamunutpaꞌ u mas caniyau para aktsꞌiya astan catsucutachauch ju lactꞌiyan junta vilhcha ju yuchi.
\v 11 Pus ni cꞌatsꞌayatꞌit ni caminchokoyaꞌ ju Cristo chai ni cꞌatsꞌayatꞌit ni apꞌinaꞌitꞌit ju lactꞌiyan pus yuchi palai alhitꞌailhipꞌitꞌit tachi ju aktsꞌiya layatꞌit acsni lamakꞌankꞌachꞌayatꞌit chai laꞌaktꞌaiꞌuyatꞌit ni lai palai alhilacꞌapꞌitꞌit ju Cristo.
\s1 Ju Pablo amapꞌaksinin
\p
\v 12 Chai iclatapaininiyau ji quiꞌalakꞌavin ni atꞌalhonitꞌit ju tachꞌalhcatnaniyan ju uxijnan. Pus ju yuꞌunch miꞌucxtinꞌan tajunita laꞌixmacni ju quiꞌucxtinꞌan Jesús chai yuꞌunch ju tamapꞌaksiyan.
\v 13 Vasalh tuꞌuꞌ alhiulatꞌit ju yuꞌunch chai amapꞌainitꞌit va ixlacaꞌatalh ixlhichꞌalhcatꞌan. Tun tꞌilaxcꞌaꞌitꞌit ju pumatamin ju uxijnan.
\p
\v 14 Vachuꞌ iclalhimapꞌaksiyau ni amapꞌaksiyaꞌitꞌit ju jantu tachꞌalhcatnamputun. Chai ju yuꞌunch ju va tatalhanan aꞌunitꞌit ni jantu na va catatalhanalh. Aꞌaktꞌaiꞌutꞌit ju na xcai tasastꞌucꞌa ju macxcai acsni tuꞌuꞌ mapastꞌacꞌanican. Jantu jeks aꞌunitꞌit xamatiꞌ.
\p
\v 15 Alaktsꞌintꞌitch. Tun xamatiꞌ camapuspꞌitlh ju macxcai. Alai va tachi alanavinitꞌit ju kꞌox ju milhiꞌuxijnanꞌan. Chai vachuꞌ va tachi anavinitꞌit ju kꞌox tachi chun ju lapanacni.
\p
\v 16 Va tachi akꞌachꞌantꞌit.
\v 17 Jantu tavanan amamactꞌatꞌit ju ixtꞌachivininca ju Dios.
\v 18 Aꞌunitꞌit lakꞌailaktsꞌiuch ju Dios mas va tuchi camilh lamiꞌatsucuntiꞌan ni lacasqꞌuin ju Dios ni chunchach ju anaviyaꞌitꞌit uxijnan ju lhilacꞌapꞌinatꞌit ju Cristo Jesús.
\p
\v 19 Jantu asastꞌuctꞌit ju tuchi naviputun ju Spiritu Santu lamiꞌalhunutꞌan.
\v 20 Jantu alacmajkꞌantꞌit ju ixchivinti Dios ju catajunan apumatam.
\v 21 Para alaktsꞌintꞌanutꞌit tachi chun ju taxtokni u kꞌox u jantu. Chai alacꞌaꞌitꞌit ju kꞌox laꞌixlhichux miꞌalhunutꞌan.
\v 22 Para lana amacꞌaꞌuntꞌit tachi chun ju macxcai.
\p
\v 23 Chai yuchi ju Dios ju cataꞌaktaijuyan ni jantu calacꞌanaꞌ ju miꞌalhunutꞌan. Chai ictapainini ju yuchi ni isꞌakstu salaka catanaviniyan chux ju miꞌatsucuntiꞌan. Chai catalhistacniyan ju mintacꞌatsanꞌan chai ju mintacuvinꞌan chai ju milacatunaꞌan. Ju chunch matich cajunaꞌ ju mintalakꞌalhinꞌan acsni tavanan caminchokoyach ju quiꞌucxtinꞌan Jesucristo.
\v 24 Chai iccꞌatsai ni chunch ju caꞌuctaxtuyaꞌ lamiꞌatsucuntiꞌan ni lai lhilaksican ju Dios. Yuchach ju tatꞌasanin chai yuchach ju catanavinikꞌoyan chux tuchi icsqꞌuinita.
\s1 Amacꞌaminin ju Pablo
\p
\v 25 Quiꞌalakꞌavin va tachi atꞌachꞌivinintꞌit ju Dios ju quilacata quincꞌan.
\p
\v 26 Amacꞌamitꞌit chux ju quiꞌalakꞌavinꞌan lacaꞌamapaininti.
\p
\v 27 Iclalhimapꞌaksiyau ni amakꞌasmatꞌayaꞌitꞌit tachi chun ju quiꞌalakꞌavinꞌan junima alhiqui. Ju quiꞌucxtinꞌan Jesús cacꞌatsayaꞌ ni jantu chun alayaꞌitꞌit.
\p
\v 28 Pus ictapainini ju quiꞌucxtinꞌan Jesucristo ni catanaviniyan lamapainin ju uxijnan.