\id 2TH
\ide UTF8
\h 2 TESALÓNICA
\toc1 2 TESALÓNICA
\mt1 IXLHILAKATꞌUI ALHIQUI JU ATSꞌOKNUNICALH JU AMACHAKꞌAN TESALÓNICA
\c 1
\s1 Amacꞌamican ju amachakꞌan Tesalónica
\p
\v 1 Ju quijnan icPablo chai icSilvano chai icTimoteo. Va kꞌaixtam icvilau ju ani chai va iclamacꞌamiyau ju uxijnan ju lhilacꞌapꞌinatꞌit ju Jesús ju vilhchitꞌit ju lakꞌachakꞌan Tesalónica. Ju uxijnan va lakatam tꞌaꞌuntꞌatꞌit ju quimpaiꞌan Dios chai ju quiꞌucxtinꞌan Jesucristo.
\v 2 Pus ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan ju lamapainin chai cataꞌaktaijuyan ni jantu calacꞌalh ju miꞌalhunutꞌan.
\s1 Caꞌaꞌulanicanaꞌ ixtalakꞌalhinꞌan ju alactuꞌunin
\p
\v 3 Aktsꞌiya tasqꞌuini ni va tachi acjunau ju Dios lakꞌailaktsꞌiuch ju milacataꞌan ji quiꞌalakꞌavin. Chai chunchach ju iclayau. Chai lhijunch ni chunch ju acjunau ju yuchi ni palai lhilacꞌapꞌinatꞌit ju Jesucristo ju chavai chai palai na lamapꞌainiyatꞌit ju pumatamin ju uxijnan.
\v 4 Pus ixlhiyuchi ju quijnan kꞌox iclalhichivinau ju uxijnan laꞌixꞌucxlacapuꞌ ju aliꞌin ju vachuꞌ talhilacaꞌanta ju Cristo. Icꞌajunau ni chꞌixkꞌoyatꞌit ju mimakꞌalhkꞌajnatꞌan chai va tachi lhilacꞌapꞌinatꞌit ju Cristo mas na lhixcꞌaicꞌanatꞌit chai na lhimamakꞌalhkꞌajnicꞌanatꞌit.
\v 5 Ni chunch ju layatꞌit pus anchach ju putalacasuich ni sok navi ju Dios acsni najun ni kꞌox alhiulacꞌanaꞌitꞌit ni laich atꞌanuyaꞌitꞌit junta lhinajun ju yuchi. Pus ixlacata yuchi ju lhimakꞌalhkꞌajnanatꞌit vachuꞌ ju chavai.
\p
\v 6 Chai vachuꞌ sok navi ju Dios acsni amamakꞌalhkꞌajni ju tamamakꞌalhkꞌajniyanch.
\v 7 Chai ju uxijnan mas mamakꞌalhkꞌajnicꞌanatꞌit ju chavai para vaktam caꞌastacnankꞌoyau acsni catalacasuyach ju quiꞌucxtinꞌan Jesús. Ju yuchi acsni caminanta ju lactꞌiyan lapꞌapꞌa camaktayaꞌ junta catꞌaminaꞌ ju ixꞌanquilhnin. Chai catasuyach ni na tachapun ju yuchi.
\v 8 Ju yuchi caminaꞌ amamakꞌalhkꞌajnikꞌalhiniꞌ ju jantu tatalhoni ju Dios chai ju jantu lai talacaꞌi ju ixchivinti Dios ixlacata ju quiꞌucxtinꞌan Jesucristo.
\v 9 Ju yuꞌunch catamapalaꞌ isꞌakstuꞌan ju ixtapalh ixtalakꞌalhinꞌan laꞌixmakꞌalhkꞌajnatꞌan junta jonkꞌalhitach chai jantu lai tavanan catitalaktsꞌinilh ju ixꞌucxpuꞌ ju quiꞌucxtinꞌan Jesucristo nin lai catalaktsꞌilh ni na kꞌai ju ixtachaput.
\v 10 Chai ju acsnich avilhchan ju tavilanancha lactꞌiyan catalakꞌayayach ju Cristo va ixlacaꞌatalh isꞌatsucuntiꞌan ju ixlapanacni. Chai ju acsnich avilhchan vachuꞌ catalhamakꞌanininaꞌ ju Cristo va ixlacaꞌatalh isꞌatsucuntiꞌan tachi chun ju talhilacaꞌalh ju yuchi. Chai vachuch ju uxijnan makyuꞌunch untꞌatꞌit ni xalacꞌaꞌiyatꞌit ju quinchivinti ju xaclajunau.
\p
\v 11 Chai iclacasqꞌuinau ni catasuyaꞌ lamiꞌatsucuntiꞌan ni vasalh lhilaksiyatꞌit ju Cristo. Pus yuchi iclhisqꞌuiniyauch ju Dios ju milacataꞌan ni chunch catanaviniyan ju miꞌatsucuntiꞌan tachi ju kꞌoxich calhiulayaꞌ ju yuchi ni tatꞌasanitan ni ixꞌanuch aꞌunaꞌitꞌit. Vachuꞌ icsqꞌuini ni laꞌixtachaput yuchi ju catamamuctaxtuniyanch tachi chun ju kꞌox ju navipꞌutꞌunatꞌit chai tachi chun ju ixlhichꞌalhcat Dios ju navipꞌutꞌunatꞌit va ixlacaꞌatalh ni lhilacꞌapꞌintꞌatꞌitch ju Jesús.
\v 12 Ju chunch ju quiꞌucxtinꞌan Jesucristo calhilakꞌayacanach ju lamiꞌatsucuntiꞌan. Chai ju uxijnan laꞌixlacata ju yuchi alakꞌayacꞌanaꞌitꞌit vachuꞌ. Pus chunch ju catapasayaꞌ va ixlacaꞌatalh ni taꞌaktaijuyanch ju quiDiosꞌan chai ju quiꞌucxtinꞌan Jesucristo lacaꞌamapaininti.
\c 2
\s1 Jantu tuꞌuꞌ calhiulacanaꞌ ju ixlhamapꞌaksin Dios
\p
\v 1 Ji quiꞌalakꞌavin iclajumputunau ixlacata ju anuꞌ avilhchan acsni caminchokoyach ju quiꞌucxtinꞌan Jesucristo chai kꞌaixtam calakꞌanau ju yuchi.
\v 2 Pus iclatapaininiyau ni jantu va aꞌoktantsꞌankꞌatꞌit ju lamiꞌatalacpastꞌacꞌatꞌan. Nin yuchi ni lai alhitꞌalhanantꞌit ju tuꞌuꞌ chivinti junta tanajun ni lana chinta ju avilhchan acsni caminchokoyaꞌ ju quiꞌucxtinꞌan Jesús. Jantu chun alatꞌit mas tanajun ni ma chunch quijuni ju Spiritu Santu. U ma chunch icꞌajuni ju aliꞌin. U ma chunch iclaꞌatsꞌoknunitau.
\v 3 Tun xamatiꞌ cataꞌokxchokꞌon. Pus pucꞌatsacan ni vanin minta ju anuꞌ avilhchan acsni caminchokoyaꞌ ju Jesús acsni na lhu catanonach ni jantuch talhilacaꞌamputun ju Cristo. Vachuꞌ pꞌulhnan catalacasuyach ju anuꞌ lapanac ju lana jantu tuꞌuꞌ calhiulayaꞌ ju ixlhamapꞌaksin Dios. Yuchach ju anuꞌ ju lhilhcacanta ni catsꞌankꞌakꞌalhiyach.
\v 4 Ju yuchi na kꞌai cacꞌatsayaꞌ ju va laꞌisꞌakstu. Chai ju yuchi calaclhikꞌalhtsoyaꞌ tachi chun ju dios ajuncan mas jantu vasalh Dios tajunita. Chai calactꞌalakꞌayach ju talhilaksi ju Dios. Chai catolach laꞌixpujitat Dios. Calhitalacasuyach tachi ju vasalh Dios mas jantu.
\p
\v 5 Ja va jantu pꞌastꞌacꞌatꞌit ni chunch ju xaclajunau acsni xaclatꞌavilaucaꞌ ju uxijnan.
\v 6 Chai ju uxijnan cꞌatsꞌayatꞌit ni tucaꞌ lakꞌaꞌinican ni laich catalacasu. Pus acsnich ju calakꞌaꞌinicanach acsni cachinach ju avilhchan ju alhcanilh ju Dios.
\v 7 Pus mas chavai alin ju jantu tuꞌuꞌ talhiulai ju ixlhamapꞌaksin Dios mas jantucaꞌ lai machakxacan tajuch ni va chunch ju talai. Chai jantucaꞌ lai talacasui ju anuꞌ lapanac ju lana jantu tuꞌuꞌ calhiulayaꞌ ixlhamapꞌaksin Dios. Tus acsnich ju lai catapasayaꞌ ju chunch acsni camakꞌosucanach ju anuch ju asastucnun ju chavai.
\v 8 Chai acsnicaꞌ ju catalacasuyach ju anuꞌ lapanac. Para ju Jesús laꞌixtachaput ju ixchivinti capumakniyaꞌ ju anuꞌ lapanac. Pus mas va yuchi ni caminchokoyaꞌ ju Jesús pus lana caniyaꞌ ju anuꞌ lapanac.
\v 9 Pus acsni catalacasuyaꞌ ju anuꞌ lapanac ju lana jantu tuꞌuꞌ lhiulai ju ixlhamapꞌaksin Dios pus lana chunch calayaꞌ tachi ju lai ju Satanás. Chai acsni catalacasuyach pus camalacasuyaꞌ ju ixtachaput. Chai camalacasuyach ju tuꞌuꞌ ju caꞌapumamachakxaniputunaꞌ ju lapanacni ni jantu va lapanac junita ju yuchi. Chai vachuꞌ canaviyaꞌ ju kꞌai lhamakꞌan. Para tachi chun ju ani taxtokni chunchach ju canaviyaꞌ ni va caꞌapuꞌokxchokꞌoputunach ju lapanacni.
\v 10 Chai ju yuchi canaviyaꞌ tachi chun ju aꞌokxchokꞌonti va ixlacaꞌatalhꞌan ju lapanacni ju tatꞌajun tsꞌankꞌakꞌalhinin. Chai caꞌapunavicanaꞌ chunch va ixlacaꞌatalh ni jantu tavanan tuꞌuꞌ talhiulata ju stavasalanti ixlacata ju Cristo mas ajunicalh ta yu laich caꞌixtaputakꞌalhtaxtulh.
\v 11 Chai ni chunch catalayaꞌ pus ju Dios calhilakꞌaꞌiyaꞌ ni caꞌalilh ju aꞌokxchokꞌonti ni chach talacaꞌi ju va taꞌaklhtamat. Catalacaꞌiniyaꞌ ju anuꞌ lapanac acsni canonaꞌ ni yuchach ju Dios.
\v 12 Pus ju chunch caꞌapuꞌulanicanaꞌ ixtalakꞌalhinꞌan tachi chun ju jantuch talacaꞌita ju stavasalanti ixlacata ju Cristo. Alai va yuchi ixtakꞌachani ju jantu kꞌox.
\s1 Ju aliꞌin asacxtucalh ni catatakꞌalhtaxtuyaꞌ
\p
\v 13 Pus ju Dios na tamapainiyan ju uxijnan ji quiꞌalakꞌavin. Chai ju quijnan lhijun ni va tachi acjuniuch ju Dios lakꞌailaktsꞌiuch ju milacataꞌan ji quiꞌalakꞌavin ni tasacxtutan ju Dios tus laꞌixputaiꞌulacan lacamunutpaꞌ ni laich atꞌakꞌalhtꞌaxtꞌuyaꞌitꞌit. Vachuꞌ tasacxtutan ni laich catalasastꞌiniyan ju miꞌalhunutꞌan ju Spiritu Santu chai laich lhilacꞌapꞌinatꞌit ju stavasalanti ixlacata ju Jesucristo.
\v 14 Pus ju Dios lacasqꞌuin ni alaktsꞌinaꞌitꞌit ni vasalh xakꞌai junita ju quiꞌucxtinꞌan Jesucristo chai yuchi xatalhitꞌasaniyan laꞌixchivinti Dios ju iclajunauch.
\p
\v 15 Pus ji quiꞌalakꞌavin va tachi alhilacꞌapꞌitꞌitch chai va tachi apꞌastꞌactꞌitch ju anuch amalaninti ju iclamalanitau laquiꞌatsꞌoknut quincꞌan chai laquinchivinti quincꞌan.
\v 16 Pus isꞌakstu ju quiꞌucxtinꞌan Jesucristo chai quimpaiꞌan Dios ju quintamapainitan. Chai yuꞌunch ju quintamatankꞌoxaxkꞌayakꞌalhiyan. Chai quintaꞌaktaijuyan ni laich va tachi calhilaksiyauch ju yuchi ni aquintalhiꞌanan ju lactꞌiyan. Chai chux ju ani quintanaviniyan va ixlacata ni xaquintanaviniyan lamapainin.
\v 17 Pus ictapainini ju yuꞌunch ni catamatankꞌoxaxkꞌayayan chai tachapunch catanaviyan ni laich anaviyaꞌitꞌit tachi chun ju kꞌox chai va yuchi ju kꞌox chivinti ju anonaꞌitꞌit.
\c 3
\s1 Atapaininican ni catatꞌachivinaꞌ ju Dios ju ixlacata
\p
\v 1 Vachuꞌ iclajumputunau ji quiꞌalakꞌavin ni asqꞌuinitꞌit ju Dios ju quilacata quincꞌan. Chach makpitsicalh ju ixchivinti ju quiꞌucxtinꞌan chai chach lakꞌayacalh tachi ju navicanta lamilhiꞌuxijnanꞌan.
\v 2 Vachuꞌ asqꞌuintꞌit ni laich actakꞌalhtaxtuyau laꞌixmacaꞌan ju lapanacni ju na kꞌai tajunita. Alin lapanacni ju chunch tajunita ni jantu si lhilacaꞌancan ju Jesús.
\v 3 Ju Dios muctaxtui ju najunta. Chai ju yuchi cataꞌaktaijuyan chai catalhistꞌacꞌan ni jantu cataꞌokxchokꞌoyan ju lhacaticuru.
\v 4 Pus iclhilaksiyauch ju quiꞌucxtinꞌan Jesucristo ni yuchi ju cataꞌaktaijuyan ni laich atꞌailhipꞌinaꞌitꞌit ju tuchi iclajuntauch.
\v 5 Pus ictapainini ju quiꞌucxtinꞌan Jesús ni yuchi ju cataꞌaktaijuyan ni laich amapꞌainininaꞌitꞌit tachi ju amapaininin ju Dios chai laich achꞌixkꞌoyaꞌitꞌit tachi chun ju macxcai tachi ju lalh ju Cristo.
\s1 Tasqꞌuini ni pumatamin cachꞌalhcatnalh
\p
\v 6 Chai iclajunauch ji quiꞌalakꞌavin laꞌixtapakaꞌut ju quiꞌucxtinꞌan Jesucristo ni jantu amalakꞌavitꞌit tachi chun ju quiꞌalakꞌavinꞌan ju va tamalheknin. Ju jantu tachꞌalhcatnamputun. Jantu chun talai tachi ju xaclalhimapꞌaksiyauch ju uxijnan.
\v 7 Pus ju uxijnan miꞌakstuꞌan cꞌatsꞌayatꞌit ni tasqꞌuini ni anavitꞌit tachi ju laktsꞌintꞌatꞌit laquiꞌatsucunti quincꞌan. Pus ju quijnan jantu va kꞌaya xaclacꞌucxuntꞌonau acsni xaclatꞌavilau ju uxijnan.
\v 8 Jantu tavanan va lacaꞌamapaininti acꞌuniu ixvaiti tam xamatiꞌ ju lamilhiꞌuxijnan. Alai xacchꞌalhcatnanauch lacalhichꞌalhcat ju tuncuj chai ju tsꞌis. Chai na xacxkꞌopꞌau. Ju chunch ni jantu xamatiꞌ xaclhimamakꞌalhkꞌajniyau ju lamilhiꞌuxijnan ju va quimavacach quincꞌan.
\v 9 Pus jantu va ixlhiyuchi xacnaviyau chunch ni va jantuch calhiva ju lhamapꞌaksin ni acxtaknicauch ju tuꞌuꞌ vaiti. Alai yuchi xaclhinaviyau chun ni va xacputalacasuputunau ju stavasalanti ni chunchach ju anaviyaꞌitꞌit vachuꞌ.
\v 10 Pus acsni xaclatꞌavilaucaꞌ ju uxijnan xaclajunau ni jantuch cavailh va tichi chavaich ju jantuch chꞌalhcatnamputun.
\v 11 Pus icmacꞌatsanicantauch ni taꞌalin ju lamilhiꞌuxijnan ju jantu tachꞌalhcatnamputun. Lana jantu tuꞌuꞌ tanaviputun. Va kꞌaya tatanui junta jantu ixlhicꞌatsatꞌan.
\v 12 Para vachuꞌ tꞌajun ju quiꞌucxtinꞌan Jesucristo laꞌixꞌalhunutꞌan ju yuꞌunch. Pus yuꞌunch ju icꞌamapꞌaksiyau laꞌixtapakaꞌut ju quiꞌucxtinꞌan Jesucristo. Chai kꞌasi icꞌajunau ni va seknicꞌa lapanacni catava chai catachꞌalhcatnalh. Chai yuchi ju cataꞌuyach ju va talhajatach laꞌisꞌakstuꞌan.
\p
\v 13 Chai ju uxijnan ji quiꞌalakꞌavin jantu jeks aꞌutꞌit ju ixnavica ju kꞌox.
\v 14 Para ni caꞌalilh xamatiꞌ ju jantu calacaꞌiyaꞌ ju quinchivinti quincꞌan ju iclajuntauch ju ani lacaꞌatsꞌoknut pus amispꞌatꞌitch tichi chavaich chai jantu amalakꞌavitꞌit. Chunch ju alatꞌit ni tsꞌa ma camaxanalh.
\v 15 Para jantu alhixcꞌaꞌitꞌit tachi ju va mintꞌalaxcaiꞌan cava. Va amapꞌaksitꞌit tachi ju va milakꞌauꞌan.
\s1 Ju Pablo sqꞌuini ju Dios ixlacataꞌan
\p
\v 16 Yuchi ju quiꞌucxtinꞌan Jesús ju aꞌaktaijunun ni jantu calacꞌalh ju quiꞌalhunutꞌan. Chai ju quitꞌin ictapainini ju yuchi ni isꞌakstu va tachi cataꞌaktaijuyan ni jantu calacꞌanaꞌ ju miꞌalhunutꞌan mas va tuchi camilh lamiꞌatsucuntiꞌan. Vachuꞌ ictapainini ju quiꞌucxtinꞌan Jesús ni catatꞌatolanch ju minchuxꞌan ju uxijnan.
\p
\v 17 Pus ju quitꞌin icPablo. Chai tus ani apumatam xaquiꞌatsꞌoknuni ju ani alhiqui. Para ju chavai laquimacaꞌ quiꞌakstu iclaꞌatsꞌoknuniyau ju ani chivinti acsni iclamacꞌamiyau. Chai laquiꞌatsꞌoknut putasui ni quiꞌanuch tachi chun ju alhiqui ju iclaꞌatsꞌoknunitau ni chunchach ju iclhaꞌatsꞌoknun.
\v 18 Ictapainini ju quiꞌucxtinꞌan Jesucristo ni catanaviniyan lamapainin minchuxꞌan ju uxijnan.