\id 1TI
\ide UTF8
\h 1 TIMOTEO
\toc1 1 TIMOTEO
\mt1 JU PꞌULHNAN ALHIQUI JU ATSꞌOKNUNICALH JU TIMOTEO
\c 1
\s1 Ju Pablo macꞌami ju Timoteo
\p
\v 1 Ju quitꞌin icPablo. Ixlapanac ju Jesucristo icjunita. Chai yuchi ju Dios ju quijuni ni acꞌajunilh ju lapanacni ixchivinti. Pus yuchi ju Dios ju quintamakꞌalhtaxtun chai yuchi ju Cristo Jesús ju lhilaksiyau ni aquintalhiꞌanan ju lactꞌiyan.
\v 2 Pus va icmacꞌamiyan ji Timoteo lacaꞌatsꞌoknut. Ju uxintꞌi tachi vasalh quintsꞌalhꞌat unitꞌa ni quitꞌin ju icmalacaꞌinin ju ixchivinti Dios. Pus ictapainini ju quimpaiꞌan Dios chai ju quiꞌucxtinꞌan Cristo Jesús ni catanaviniyan lamapainin chai cataꞌaktaijuyan lacaꞌamapaininti chai cataꞌaktaijuyan ni jantu calacꞌalh ju miꞌalhunut.
\s1 Alin ju lapanacni ju jantu sok taꞌamalaninin
\p
\v 3 Pus tachi ju icjunin acsni icꞌalh ju xalacatꞌun Macedonia pus aktam acjunchokopalan lacaꞌatsꞌoknut. Atꞌaꞌulhcaꞌ ju lakꞌachakꞌan Efeso. Ju chunch laich aꞌunaꞌ ju aliꞌin ni jantu catamasulh ju lhamapꞌaksin ju jantu soknicꞌa.
\v 4 Nin yuchi ni lai na tuꞌuꞌ catalhiula ju va chivintich. Nin yuchi ni catalhitakꞌaya ju tuchi tanajunch ni tanavita ju makꞌaniya ixlacpaiꞌan mas jantu. Pus jantu tavanan lai catitamatankꞌaxtukꞌo ju chunch. Chai ju chunch atalacpastꞌacꞌat puꞌalin va asacminti. Jantiyuꞌ ju lai catiꞌaꞌaktaiju ixmakpitsica ju ixchivinti Dios junta najun ni calhilacaꞌau ju Jesús.
\p
\v 5 Para ju Dios quintaxtaknitan ju ani lhichꞌalhcat ni laich caꞌaꞌaktaijuyaꞌ ju Dios ju lapanacni ni laich cataꞌamapaininilh. Chai laich cataꞌamapaininilh acsni na salaka ju ixꞌalhunutꞌan chai acsni jantu tuꞌuꞌ tanavita ju laich catalhixcanilh ixꞌalhunutꞌan chai acsni slivasalh talhilacaꞌan ju Jesús.
\v 6 Para ni jantu chun ixjunita ju isꞌatsucuntiꞌan ju aliꞌin lapanacni pus yuchi jantu sok xatalhiꞌan. Jantu tamasui ixchivinti Dios. Alai yuchi ju tamasui ju va tuꞌuꞌ chivinti ju jantu lhitapalai.
\v 7 Ju yuꞌunch taꞌamalaninimputun ju lhamapꞌaksin ju tsꞌoklh ju Moisés para nin yuꞌunch jantu tamachakxai ju ixchivintiꞌan tuchi tanajun nin yuchi ju tuchi pꞌas tanajun ni stavasalanti.
\p
\v 8 Pus cꞌatsayau ni na lai aquintaꞌaktaijuyan ju ixlhamapꞌaksin ju Moisés acsni camavasalanicanau.
\v 9 Pus ju vasalh machakxai ju anuꞌ lhamapꞌaksin cꞌatsai ni jantu lhinavicanta ju va ixlacataꞌan ju lackꞌoxin lapanacni. Alai yuchi lhinavicalh ixlacataꞌan ju jantu tuꞌuꞌ talhiulai ju lhamapꞌaksin chai ju jantu lai talacaꞌi chai ju jantu tuꞌuꞌ talhiulai ju Dios chai ju na taꞌalactuꞌunun chai ju jantu tuꞌuꞌ alhiulanan chai ju tanajun macxcai chivinti chai ju tamakni ju ixpaiꞌan chai ixnatiꞌan chai ju tamakni ju ixtꞌalapanacꞌan.
\v 10 Vachuꞌ navicanta ixlacataꞌan ju va tapuxcajui ixnavinꞌan chai ju talalactuꞌui sia papanin u sia chakolun chai ju va taꞌokxkꞌalhajui ixtꞌalapanacꞌan chai ju tanajun taꞌaklhtamat chai ju va kꞌaya tamucꞌani ixtalakꞌalhin apumatam chai ju tanavi tachi chun atumpa alactuꞌunti ju jantu lhijun lacasoknicꞌa lhamapꞌaksin ni catanavi.
\v 11 Pus ju ixchivinti Dios ixlacata ju Cristo najun ni ixlacataꞌan yuꞌunch ju puꞌalilh ju lhamapꞌaksin. Pus laꞌixchivinti Dios putasui ni slivasalh xakꞌai ju paxcat Dios. Chai yuchach ixchivinti Dios ju icxtaknicanta quitꞌin ni laich acꞌamasunilh ju lapanacni.
\s1 Ju Pablo juni lakꞌailaktsꞌiuch ju Cristo
\p
\v 12 Pus ju quitꞌin icjuni lakꞌailaktsꞌiuch ju Jesucristo ju quiꞌucxtinꞌan ni yuchi ju xaquixtakni ju quintachaput ni laich acnavilh ju ani lhichꞌalhcat. Pus ju yuchi cꞌatsaich ni lai acmuctaxtuyaꞌ. Yuchi quilhixtaknilh ju ixlhichꞌalhcat.
\v 13 Chunch quiꞌulhtulh ju Jesús mas na macxcai xaclhichivinin ju Dios ju makꞌanchich chai xacꞌalhimakchapui ju ixtalhilacaꞌanta ju Cristo chai na macxcai chivinti xacꞌajuni. Para ju Dios quiꞌaktaiju lacaꞌamapaininti va ixlacaꞌatalh ni jantu xacmachakxai tuchi xacnavi acsni tucaꞌ xaclhilacaꞌanta ju Cristo.
\v 14 Pus na lhu lana xaquinavini lamapainin ju quiꞌucxtinꞌan Cristo. Chai yuchi iclhilhilacaꞌalh ju Jesús chai alilh ju amapaininti laquiꞌalhunut. Yuchi ju alin laꞌixmacni Cristo Jesús.
\p
\v 15 Pus ju ani chivinti ju aclajunau stavasalanti chai lhijun ni calacaꞌiyau ixlhichux quiꞌalhunutꞌan. Yuchi ni quilachilh ju Cristo Jesús ju ani lacamunutpaꞌ ni caꞌamakꞌalhtaxtulh ju alactuꞌunin. Chai tachi chun ju alactuꞌunin ju alin pus quitꞌin ju palai xacꞌalactuꞌunun.
\v 16 Pus ju Jesucristo ixꞌapumalacasuniputun ju lapanacni laquiꞌatsucunti ni jantu tavanan jeks ui ju yuchi. Yuchi xaquilhiꞌaktaijui ju quitꞌin lacaꞌamapaininti mas palai na xacꞌalactuꞌunun ju quitꞌin. Chai astan cataꞌalinaꞌ ju lapanacni ju vachuꞌ catalhilacaꞌanaꞌ ju Jesucristo chai ixlhiyuchi caꞌalinaꞌ ju isꞌatsucuntiꞌan jonkꞌalhita lactꞌiyan.
\v 17 Tus mas va tavananch catalhonicalh chai calakꞌayacalh ju Dios. Pus ju yuchi jonkꞌalhita xakꞌai ucxtin. Chai ju yuchi jantu lai ni. Chai jantu lai laktsꞌincan. Pus va yuchi ju Dios junita. Vasalh chunch junita.
\p
\v 18 Ju ani lhamapꞌaksin icxtakniyan ji quintsꞌalh Timoteo tachi ju tanaulh ju milacata ju yuꞌunch ju tachivinin ixchivinti Dios. Chai ju anuꞌ ixchivinti Dios ju tanaulh ju yuꞌunch caꞌaktaijuyan ni lai apꞌusastꞌucꞌaꞌ ju macxcai. Para va tachi alhilacꞌapꞌich ju Cristo chai jantu tuꞌuꞌ anavitꞌi ju calhixcaniyan ju miꞌalhunut.
\v 19 Jantu chun alatꞌi tachi ju talalh ju aliꞌin. Ju yuꞌunch jantu tanavilh ju kꞌox mas ixtacꞌatsai ni istasqꞌuini ni catanavi. Jantu ixlhichux ixꞌalhunutꞌan talhilaksi ju Dios. Chai yuchi lana talhicapkꞌolh ju Dios.
\v 20 Pus pumatꞌui sia yuꞌunch ju chunch tanavilh yuchi ju Himeneo chai ju Alejandro. Pus ju quitꞌin icꞌajuni ju ixlapanacni Dios ni jantu catamalakꞌavi ju yuꞌunch. Chach amamakꞌalhkꞌajni ju lhacaticuru. Ta tsꞌa jantu catapucꞌatsayach ni jantu kꞌox ni macxcai catalhichivinilh ixchivinti Dios.
\c 2
\s1 Ta yu tꞌachivincan ju Dios
\p
\v 1 Pus pꞌulhnan iclamapꞌaksiyau ni atꞌapꞌaininitꞌit ju Dios chai atꞌachꞌivinintꞌit chai asqꞌuinitꞌit ju Dios chai aꞌunitꞌit lakꞌailaktsꞌiuch. Chunch alatꞌit ixlacataꞌan tachi chun ju lapanacni.
\v 2 Vachuꞌ chunch alatꞌit ixlacataꞌan ju xalackꞌajin chai ixlacataꞌan ixchuxꞌan ju ucxtinin. Ju chunch ni laich kꞌox catsucuyau. Jantu caꞌalilh ju laclakꞌaiti para lai catalhoniu ju Dios chai lai kꞌox catꞌalalhiꞌau ju quintꞌalapanacniꞌan.
\v 3 Chai tachi chun ju ani na kꞌoxich lhiulai ju quiꞌamakꞌalhtaxtunuꞌan Dios.
\v 4 Ju yuchi lacasqꞌuinch ni catatakꞌalhtaxtulh tachi chun ju lapanacni chai catamispalh ju stavasalanti chivinti ixlacata ju Cristo.
\v 5 Pus va pumatam ju Dios. Chai va pumatam ju lai apumaꞌamigoxla ju lapanacni ju Dios. Yuchi ju malakachacanchilh ju ani ni lapanac catsucuyaꞌ. Yuchi ju Jesucristo.
\v 6 Yuchach ju tamakꞌaxtaklh isꞌakstu ju quilacataꞌan quinchuxꞌan ni laich aquintalhimalakxtun. Chai chunchach ju ajunilh ju lapanacni acsni chilh ju avilhchan ju ilhcaꞌulacanta.
\v 7 Chai ju quitꞌin icsacxtucanta ni acnonach ju chivinti ixlacata ju Jesús chai ixtamalakachan acva chai acꞌamamakaꞌuyach ju yuꞌunch ju jantu israelitanin tajunita. Acꞌajunach ni catalhilacaꞌalh ju Jesús chai catalacaꞌilh ju stavasalanti ixlacata ju yuchi. Pus jantu va kꞌaya icnajun. Vasalh ixtamalakachan Jesús icjunita ixlacataꞌan ju yuꞌunch ju jantu israelitanin tajunita.
\p
\v 8 Pus iclacasqꞌuinch ni yuꞌunch ju jokꞌatni catatꞌachivinilh ju Dios vanta anchach cava junta tatakꞌaixtꞌokꞌa ju talhilacaꞌanta ju Jesús. Para tasqꞌuini ni salaka cava ju isꞌatsucuntiꞌan laꞌixmacni Dios chai jantu xamatiꞌ catꞌalatalhkꞌamnilh nin catꞌalaxcailh akꞌantam.
\v 9 Vachuꞌ iclacasqꞌuin ni catalakchꞌilh ju ixpumpuꞌan ju chakolun tachi ju va kꞌoxich. Jantiyuꞌ ju va capumamaxanicalh u va caputalacasu tachi ju va lakachapui. Chai jantu ixlhiyuchi camaxantila ju ixꞌaiꞌan ni va catalhitakꞌaya ni na cꞌusich catasu. Nin yuchi ni catalacatocꞌalh oro u plata u catalakchꞌi ixpumpuꞌan ju na laklhu ixtapalh va ixlacaꞌatalh ni tachi tam xakꞌai catalacasu.
\v 10 Alai catanavi kꞌox lhichꞌalhcat tachi ju lhijunch ni catanavi ju chakolun ju tanajun ni tatalhoni ju Dios. Yuchach ju catalhimaxantila isꞌatsucuntiꞌan.
\v 11 Ju chakolun chach va sek tatavi lacatalhavat acsni tꞌoncan chivinca. Chai catatalhonilh ju ixlhamapꞌaksinꞌan ju jokꞌatni.
\v 12 Ju lacatalhavat jantu iclacasqꞌuin ni cataꞌamalaninilh ixchivinti Dios ju chakolun. Caꞌamalanicalh ju jokꞌatni. Nin yuchi ni lai xamatiꞌ caꞌamapꞌaksinin. Alai va sek catatavi.
\v 13 Ju chakolun jantu chunch catalalh ni pꞌulhnan navicalh ju Adán. Astan ju Eva.
\v 14 Chai jantiyuꞌ ju Adán ju ixꞌokxchokꞌocanta. Alai yuchi ju chakoꞌulh ju okxchokꞌocalh chai yuchi ju pꞌulhnan alactuꞌunuꞌ va.
\v 15 Pus ixlhiyuchi jantu kꞌox ni va cataꞌamalaninilh ixchivinti Dios lacatalhavat. Ju ixlhichꞌalhcatꞌan ju yuꞌunch yuchi ni catalakꞌayalh ju isꞌaskꞌatꞌan chai catamalanilh ju kꞌox chai catalhilacaꞌankꞌalhilh ju Jesús. Cataꞌamapaininilh. Catatsuculh tachi ju kꞌox lhiulai ju Dios. Chai jantu va kꞌaya catatalacasu. Pus ni catamuctaxtukꞌoyaꞌ ju chunch pus catatakꞌalhtaxtuyaꞌ.
\c 3
\s1 Chani catatsuculh ju talhinajun lacatalhavat
\p
\v 1 Slivasalh ju anuꞌ chivinti junta najun ni na kꞌox lhichꞌalhcat ju naviputun ni xamatiꞌ lhinomputun lacatalhavat ju talhilacaꞌanta ju Jesucristo.
\v 2 Pus tasqꞌuini ni jantu tuꞌuꞌ catamalacasu ju macxcai ju yuꞌunch ju talhinomputun lacatalhavat ju talhilacaꞌanta ju Cristo. Chai vachuꞌ tasqꞌuini ni va pumatamch ixꞌamachakaꞌ cava chai calhistacchokocalh isꞌakstu. Chai tasqꞌuini ni na acꞌatsananta cava chai na seknicꞌa lapanac cava chai yau cajunilh xamatiꞌ acsni lakacujtilaputun laꞌixchakaꞌ. Vachuꞌ tasqꞌuini ni na laich caꞌamalaninilh.
\v 3 Chai tasqꞌuini ni jantu cakꞌachanilh ju tꞌakꞌapꞌat chai jantu vatsꞌalhti calhitalhkꞌamalh ju tuꞌuꞌ. Alai cachꞌixkꞌo ju macxcai. Vachuꞌ jantu lasani lapanac cava chai jantu cakꞌachanilh ju tumin.
\v 4 Kꞌox calhinaulh ju laꞌixchakaꞌ chai cataquiclacaꞌi ju isꞌaskꞌatꞌan chai catatalhonilh.
\v 5 Pus ju jantu lai lhistꞌacꞌa ju laꞌixpulacni ixchakaꞌ tas caꞌalhimapꞌaksiyach ju aliꞌin ju vachuꞌ talhilacaꞌanta ju Cristo.
\v 6 Vachuꞌ jantu lai catilhinaulh lacatalhavat ju jantucaꞌ makꞌan lhilacaꞌanta ju Cristo. Jantu xcai ni va calhitakꞌaya tachi ju lalh ju lhacaticuru. Chai ju chunch pus vachuꞌ caꞌulanicalh ixtalakꞌalhin tachi ju navicalh ju lhacaticuru.
\v 7 Vachuꞌ tasqꞌuini ni kꞌox lapanac catalhiula ju jantucaꞌ talhilacaꞌanta ju Cristo. Jantu xcai ni va kꞌaya catalhichivinilh chai ju chunch lai camalactuꞌuni acsni caꞌokxchokꞌolh ju lhacaticuru.
\s1 Chani catatsuculh ju taꞌaꞌaktaijunun lacatalhavat
\p
\v 8 Pus chunchach vachuꞌ ju diácononin ju taꞌaktaijui ju taꞌamalaninin. Tasqꞌuini ni seknicꞌa lapanacni catava. Chai jantu cataꞌacxputꞌiyunulh laꞌixchivintiꞌan. Jantu catakꞌachanilh ju pinquin. Jantu cataꞌokxchokꞌosqꞌuinlh ju tumin. Ju chun slivasalh na lhimaxan.
\v 9 Chai tasqꞌuini ni cataquiclacaꞌilh ju ixchivinti Dios. Chai ju yuchi jantu lai machakxacan ju va laquiꞌakstuꞌan. Chai ni tanajun ni taquiclacaꞌi ju ixchivinti Dios pus tasqꞌuini ni jantu tuꞌuꞌ catanavilh ju lai catalhixcanilh ixꞌalhunutꞌan.
\v 10 Para pꞌulhnan acsni tucaꞌ xtaknican ju ixlhichꞌalhcat tasqꞌuini ni calaktsꞌintanucanach ju taꞌaꞌaktaijunumputun. Chai ni soknicꞌa ju isꞌatsucuntiꞌan pus laich cataꞌaꞌaktaijununaꞌ.
\v 11 Pus chunchach vachuꞌ ju chakolun ju taꞌaꞌaktaijunumputun. Jantu va lakachapuni chakolun catava. Nin yuchi ni lai catamapuchokolh ju chivinti. Calhistacchokocalh isꞌakstuꞌan chai tasqꞌuini ni lai calhilaksicalh ni catamuctaxtuyaꞌ tachi chun ju tanaviputun.
\v 12 Pus ju anuꞌ aꞌaktaijunin va pumatam ixꞌamachakaꞌ catapacxalh. Chai tasqꞌuini ni cataquiclacaꞌi ju isꞌaskꞌatꞌan chai kꞌox calhinaulh laꞌixchakaꞌ.
\v 13 Pus tachi chun ju tachꞌalhcatnan lacatalhavat ni kꞌoxich catanaviyaꞌ ju lhichꞌalhcat pus kꞌox capulhiulacanaꞌ chai jantu catatalhananaꞌ acsni catajunaꞌ ju lapanacni ni catalhilacaꞌalh ju Cristo.
\s1 Ju makꞌanchich jantu xacmachakxayau ixlacata ju Cristo
\p
\v 14 Pus xacnajunta ni vatsꞌalhti xaclakꞌanchan ji Timoteo. Para alai va acꞌatsꞌoknuniyan ju tuchi xacjumputunan.
\v 15 Ju chunch mas jantu lai vatsꞌalhti acꞌananta para laich acꞌatsꞌayaꞌ ta yu catalalaktsꞌinaꞌ ju isꞌaskꞌatꞌan Dios. Pus ju yuꞌunch chunch tajunita tachi ixpujitat Dios ju lakꞌajunta ni tꞌajun ju yuchi laꞌixꞌalhunutꞌan. Chai ju yuꞌunch chunch tajunita tachi ju tuꞌuꞌ xatantun chakaꞌ ju na makat machꞌanꞌacnucanta. Pus laich acnaulh ni chunch tajunita ni pꞌas talhilaksi ju ixchivinti Dios chai jantu tuꞌuꞌ lai catiꞌamacꞌapꞌani. Chai ju chunch pus lai tasui ni slivasalh ju ixchivinti Dios.
\v 16 Pus ju makꞌanchich jantu iscꞌatsayau ta yu laich takꞌalhtaxtucan. Para ju chavai machakxayau. Chai na tasqꞌuini ni cacꞌatsayau tuchi lacaꞌiyauch ixlacata ju Cristo. Pus lacaꞌiyau ni talacasu ju Dios ju ani lacamunutpaꞌ acsni lapanac quitsucuchilh ju istsꞌalh. Yuchi ju Jesucristo. Chai ju Dios masulh ni na soknicꞌa junita ju isꞌatsucunti ju istsꞌalh. Chai ju anquilhnin talaktsꞌilh. Chai ajunicalh tachi chun ju lapanacni ixlacata ju yuchi. Chai tachi chun ju yuꞌunch va aliꞌin ju talhilaksilh ju yuchi. Chai ju yuchi lhiꞌanchokocalh ju lactꞌiyan junta slivasalh na kꞌox.
\c 4
\s1 Alin ju jantu talacaꞌi ju chivinti ixlacata ju Cristo
\p
\v 1 Ju Spiritu Santu vas naulh laꞌixchivintiꞌan ju lapanacni ju tanajun ixchivinti acsni naulh ni cataꞌalinach astanch ju lapanacni ju catacꞌapꞌaꞌ ju chivinti ixlacata ju Cristo. Chai catakꞌasmatniyach ju aꞌokxchokꞌoni amamakaꞌunin. Chai catalacaꞌiyaꞌ ixchivinti ju lhacaticuru.
\v 2 Chai ju anuch lapanacni catamasuyaꞌ ju anuꞌ chivinti tachi ju va istavasalanti mas va aꞌokxchokꞌonti. Pus mas taꞌokxchokꞌoi ixtꞌalapanacni nin lacatsꞌunin jantu alhixcani ixꞌalhunutꞌan.
\v 3 Ju yuꞌunch va catanonaꞌ ni jantu kꞌox ni tamakꞌaxtokcan chai ma alin vaiti ju jantu lai ucan. Chunch catanonaꞌ mas yuchi ju Dios ju navikꞌota tachi chun ju quilacatunaꞌan chai tachi chun ju vaiti. Chai yuchi lhinavicalh ni laich caꞌamaklhtayananauch chai cajunauch lakꞌailaktsꞌiuch ju Dios tachi chun ju quijnanꞌan ju lhilacaꞌantauch ju Cristo chai mispayauch ju stavasalanti.
\v 4 Pus tachi chun ju navita ju Dios si kꞌox. Chai jantu tasqꞌuini ni tuꞌuꞌ aclacmackꞌalh. Va yuchi ni aclhixtaknilh lakꞌailaktsꞌiuch ju Dios acsni icꞌamaklhtayananch tuꞌuꞌ.
\v 5 Pus isꞌakstu Dios ju naulh ni na kꞌox tachi chun ju ani taxtokni. Chai acsni icꞌamaklhtayanan tuꞌuꞌ ni icjuni lakꞌailaktsꞌiuch ju yuchi pus jantu talakꞌalhin icnavi acsni icꞌui.
\s1 Chani calalh ju Timoteo
\p
\v 6 Ni chunch ju alhimasuni ju quiꞌalakꞌavinꞌan pus na kꞌox amalaniniꞌ aꞌunaꞌ laꞌixmacni Cristo. Chai palai tachapun capujunaꞌ ju mintacꞌatsan ju chivinti junta najun tichi chavaich ju lhilaksiyau. Vachuꞌ palai tachapun capujunaꞌ ju mintacꞌatsan ju kꞌox lhamapꞌaksin ju tꞌaꞌun muctaxtunuꞌ.
\v 7 Nin lacatsꞌunin jantu anavitꞌi cuenta ju anuꞌ chivinti ju tatꞌajun nonin ju aꞌokxchokꞌoni amamakaꞌunin. Pus ju ixchivintiꞌan jantu lai catiꞌaktaiju xamatiꞌ ni laich camispa ju Dios ni va chivintich junita. Jantu anavitꞌi cuenta. Alai va yuchi ju anavitꞌi cuenta ta yu laich atsꞌucꞌu tachi ju kꞌachani ju Dios.
\v 8 Ju quintꞌalapanacniꞌan acsni talhitalacaxnuj ju tuꞌuꞌ pus va ixlacatunaꞌan ju talhilachapui. Para ju palai tasqꞌuini yuchi ni acnavi tachi ju kꞌachani ju Dios. Yuchach ju quintaꞌaktaijuyan laquiꞌatsucuntiꞌan ju ani lacamunutpaꞌ chai ixlacata ju quiꞌatsucuntiꞌan ju caꞌalinach astan.
\v 9 Pus slivasalh junima chivinti chai lhijunch ni catalacaꞌilh tachi chun ju lapanacni.
\v 10 Pus icnaviputunau tachi ju kꞌachani ju Dios chai yuchi iclhichꞌalhcatnanau chai ixlhichux quintachaput quincꞌan icsastꞌucꞌau ju macxcai. Chai icnaviyau chunch ni iclhilacaꞌantauch ju Dios ju lakꞌajunta. Pus va yuchi ju lai amakꞌalhtaxtunun chai yuchi ju quintamakꞌalhtaxtun ni lhilacaꞌanauch ju yuchi.
\p
\v 11 Pus chunch ju alhimapꞌaksitꞌi chai chunchach ju amalanitꞌi ju lapanacni.
\v 12 Chai mas va antacaꞌ ju mintakꞌayanti para jantu tuꞌuꞌ anavitꞌi ta yu laich jantu tuꞌuꞌ capulhiulayan xamatiꞌ. Alai atꞌalacꞌasutꞌich tachi ju kꞌox lhilaktsꞌintaiti ixlacataꞌan ju talhilacaꞌanta ju Jesús. Amalacꞌasuninch ni na kꞌox ju chꞌivinin chai ni salaka ju miꞌatsucunti chai ni na amapꞌaininin chai ni lacꞌaꞌinikꞌoꞌui ixchivinti Dios chai ni tꞌalhonich ju Dios.
\v 13 Chai ni jantucaꞌ lai icꞌanacha pus va tsa anavitꞌi cuenta ixlaktsꞌinca ju ixchivinti Dios junta tatakꞌaixtꞌokꞌa ju talhilacaꞌanta ju Cristo. Vachuꞌ amapꞌaksitꞌich ju yuꞌunch chai amasunin ju ixchivinti Dios.
\v 14 Jantu alakꞌaꞌitꞌi ni xamatiꞌ calakꞌalhinin ju kꞌox mintacꞌatsan ju xalhikꞌailaktsꞌinan ju Dios laꞌixchivintiꞌan ju tanajun ixchivinti. Chai ju yuꞌunch ju talhinajun lacatalhavat tamokslanin ju ixmacaꞌan ni cacꞌatsacalh ni xtꞌaknicꞌantꞌa ju milhichꞌalhcat ni aꞌunaꞌ ju lapanacni ixchivinti Dios.
\p
\v 15 Va tachi anavitꞌich tachi chun ju ani taxtokni ju icjuntan. Chai anavitꞌich ixlhichux ju miꞌalhunut. Ju chunch catalaktsꞌinan ixchuxꞌan ni tꞌaꞌun palaich mispanaꞌ ixchivinti Dios.
\v 16 Alhistꞌacchꞌokꞌocꞌach miꞌakstu. Chai vachuꞌ anavitꞌi cuenta tuchꞌi amalaniyaꞌ ju lapanacni. Ju chunch atꞌakꞌalhtꞌaxtꞌuyaꞌ ju uxintꞌi chai vachuꞌ catatakꞌalhtaxtuyaꞌ ju yuꞌunchach ju catakꞌasmatniyanch.
\c 5
\s1 Chanich caꞌalactꞌaꞌalh ju vachuꞌ talhilacaꞌanta ju Cristo
\p
\v 1 Jantu tavanan alakꞌakꞌaimatꞌi ju va papach. Alai amasunin tuchi najun laꞌixchivinti Dios tachi ju va junch mimpai ju tꞌaꞌun juniniꞌ. Chai ju mintꞌachuncaꞌ amapꞌaksitꞌi tachi ju va miꞌalakꞌavinch.
\v 2 Chai ju na lactꞌacuninch chunch ju amasunin tuchi najun laꞌixchivinti Dios tachi ju alatꞌi ni minati cava. Chai ju va atsiꞌincaꞌ amapꞌaksitꞌi tachi ju va miꞌalakꞌavinch. Para jantu va yuchi ni va tumpa alhipꞌastꞌactꞌi.
\p
\v 3 Atꞌalhoninch chai aꞌaktꞌaiꞌutꞌich ju animacontilacanta ju vasalh va isꞌakstuꞌan tatꞌajun.
\v 4 Para ju tam chakoꞌulh ju nimacontilacanta ni catꞌanimacontilacalh isꞌaskꞌatꞌa u tam ixpapanti pus chach yuꞌunch ju taꞌaktaiju ju laꞌixmaktasqꞌuinit. Pus lhijunch ni catamapuspꞌitnilh ju ixpaiꞌan u ixnatiꞌan tuchi tamakꞌalhkꞌajnalh ixlakꞌayacaꞌan. Chai ju Dios na kꞌoxich lhiulai acsni chunch lai ju tam askꞌatꞌa.
\v 5 Para ju tam chakoꞌulh ju va nimacontilacanta chai ju va isꞌakstu tꞌajun lhilaksi ju Dios chai va tachi tapaininich chai va tachi tꞌachivininch tsꞌis chai tuncuj.
\v 6 Para ju tam chakoꞌulh mas nimacontilacanta ju na kꞌachani ixtaxtokni ju ani lacamunutpaꞌ pus mas tꞌajuncaꞌ para ju Dios laktsꞌin ni tachi ju va nita.
\v 7 Pus yuchi ju alhimapꞌaksitꞌi ju lapanacni. Ju chunch ni matich cajunaꞌ ixꞌalactuꞌuntiꞌan ixlacata ju ani taxtokni.
\v 8 Pus ju tam xamatiꞌ ni jantu caꞌaktaiju ju ixpai ixnati u ixlakꞌau u ixpuxlimti u ixcucu u ixquin u yuꞌunch ju tatanumanalh laꞌixchakaꞌ laꞌixmaktasqꞌuinitꞌan pus lana putalacasui ni jantu slivasalh ni lhilacaꞌanta ju ixchivinti Dios. Va palai lakꞌalhini ixlhamapꞌaksin ju Dios ju yuchi. Palai jantu ju jantucaꞌ lhilacaꞌanta ju Cristo.
\p
\v 9 Laich catsꞌokꞌulanicalh ixtapakaꞌut tam chakoꞌulh ju nimacontilacanta ni caꞌaktaijucalhch ju pacxanta sesenta cꞌata chai va pumatam ixpapa ixjunita.
\v 10 Vachuꞌ tasqꞌuini ni catanaulh chux ju lapanacni ni na ixnavi lamapainin. Chai tasqꞌuini ni alakꞌayalh ju isꞌaskꞌatꞌan chai yauch ixꞌajuni ni xamatiꞌ ixlakacujtilaputun laꞌixchakaꞌ chai ixꞌachꞌalhcatnani ju ixlapanacni Dios mas va lacatꞌicstꞌi ixlhicꞌatsai chai ixꞌaꞌaktaijui ju na ixtamakꞌalhkꞌajnan chai va tachi ixnavich tachi chun ju amapaininti. Pus ni ixnavi tachi chun ju ani pus lai tsꞌokꞌulanican ixtapakaꞌut.
\p
\v 11 Para ju animacontilacanta ju va palaicaꞌ atsiꞌin jantu atsꞌokꞌulatꞌi. Pus ju aliꞌin sia yuꞌunch catamacomputunach ju lhichꞌalhcat ju tanaulh ni tanaviputun ixlacata ju Cristo chai catatamakꞌaxtokchokoputunach. Ni chunch catanavi pus matich cunaꞌ ispantsꞌiquisꞌan ni lai lhu catanavi ju ixlhichꞌalhcat Dios.
\v 12 Chai ju chunch caꞌulanicanaꞌ ixtalakꞌalhinꞌan ni tamacaulich ju lhichꞌalhcat ju ixtakꞌalhtasuta ni catanaviyaꞌ.
\v 13 Vachuꞌ tapusmani ni jantu tuꞌuꞌ tanaviputun. Va taꞌatalacnunun ju lakꞌachakꞌanixni. Chai jantu va yuchi ni jantu tachꞌalhcatnan para va tamapuchokoi ju chivinti chai tatachꞌanui junta jantu ixcuentaꞌan chai talhichivinin ju taxtokni ju jantu lhijun ni catanaulh.
\v 14 Pus ni chunch ju talai ju va atsiꞌincaꞌ ju animacontilacanta pus yuchi iclhinajun ni chach aꞌicalh. Chach taꞌalilh ju isꞌaskꞌatꞌaꞌan chai chach kꞌox talhistaclh ju laꞌixchakaꞌan. Ju chunch jantu tuꞌuꞌ catiꞌalilh ju laich aquintapulhichivinin ju jantucaꞌ talhilacaꞌanta ju Cristo.
\v 15 Icjunan chunch ni aktsꞌiya tachꞌakꞌokꞌachokolh ju lhacaticuru ju aliꞌin.
\p
\v 16 Pus ju tam lapanac u tam chakoꞌulh ju lhilacaꞌanta ju Cristo ni alin ixnati u ixlakꞌau ju va nimacontilacanta chach aꞌaktaiju laꞌixmaktasqꞌuinit. Ju chunch ju ixtalhavatꞌan ju talhilacaꞌanta ju Cristo lai cataꞌaktaijuyaꞌ ju animacontilacanta ju vasalh va quilhpatinin tajunita ni lana va isꞌakstuꞌan. Jantu tasqꞌuini ni cataꞌaktaiju ju alin tam xamatiꞌ.
\p
\v 17 Tasqꞌuini ni slivasalh catalhonicalh ju lapanacni ju tamuctaxtui laꞌixlhichꞌalhcatꞌan acsni talhinajun lacatalhavat ju talhilacaꞌanta ju Cristo. Vachuꞌ caꞌaꞌaktaijucalh laꞌixmaktasqꞌuinitꞌan. Chai palai catalhonicalh chai palai caꞌaꞌaktaijucalh ju yuꞌunch ju tanajun ixchivinti Dios vachuꞌ chai taꞌamalaninin ixlhichux ixꞌalhunutꞌan.
\v 18 Pus chunch aꞌulhtꞌutꞌi ni chani najun laꞌixchivinti Dios: “Jantu amakꞌankꞌatꞌanutꞌi tuꞌuꞌ ju mivacax acsni tꞌajun pꞌakxnaꞌ ju cebada”. Chunch ju najun. Chai ju alacatam chani najun: “Lhijunch ni camapalacalh ixtapalh ixlhichꞌalhcat ju lapanac ju chꞌalhcatnan”. Chunch ju najun.
\p
\v 19 Pus jantu anavitꞌi cuenta ni xamatiꞌ lhichivinin pumatam ju lhinajun lacatalhavat. Va acsnich ju lai akꞌasmatniyaꞌ acsni catanonach tachi pumatꞌui u pumatꞌutu ni talaktsꞌilh acsni xanavi ju anuꞌ alactuꞌunti.
\v 20 Para ju yuꞌunch ju talhinajun para ixlaquilhtu va tsa taꞌalactuꞌunun akꞌaich laꞌixꞌucxlacapuꞌan ju aliꞌin ju talhinajun. Ju chunch ju aliꞌin catatalhananach vachuꞌ.
\v 21 Pus ju Dios chai ju Jesucristo chai ju anquilhnin ju asacxtucanta si quintalaktsꞌinan tuchi naviyau. Pus yuchi iclhitapaininiyan ni amuctꞌaxtꞌutꞌich tachi chun ju ani taxtokni ju icjuntan. Vaklhtam chun alaktsꞌi ju lapanacni. Jantu va pumacatami amapꞌainitꞌi.
\v 22 Jantu va sokꞌo axtꞌaknin ju ixlhichꞌalhcat ju tam xamatiꞌ ni calhinaulh lacatalhavat. Pus ni vatsꞌalhti caxtaknicalh ju ixlhichꞌalhcat chai astan jantu sok catailhiꞌalh pus aꞌulanicꞌanaꞌ ju mintalakꞌalhin ju uxintꞌi. Alai salaka aꞌuntꞌi ju uxintꞌi.
\p
\v 23 Ju atipuꞌanta jantu va xcan ju akꞌotꞌi. Para akꞌotꞌi lacatsꞌunin vino vachuꞌ ni cacꞌuchꞌulh ju mimpajan ni va tsa tꞌakꞌankꞌai.
\p
\v 24 Ju ixꞌalactuꞌunti ju aliꞌin lapanacni lana tasui. Chai ju aliꞌin mas jantucaꞌ lai tasui ju macxcai ju tanavi para astan aktsꞌiya catatalacasuyach acsni cachinaꞌ ju avilhchan ju lhcata ju Dios.
\v 25 Pus chunchach vachuꞌ ju kꞌoxi lhichꞌalhcat ju tanavi ju aliꞌin. Ju aliꞌ lana tasui. Chai ju aliꞌ tulai vatsꞌalhti tasui. Para astan cacꞌatsacanaꞌ ni tanavita ju kꞌox.
\c 6
\p
\v 1 Tachi chun ju lapanacni ju talhilacaꞌanta ju Cristo ju astꞌacanta catatalhonilh ju ixꞌucxtinꞌan. Ju chunch jantu va kꞌaya calhichivinincanaꞌ ju ixtapakaꞌut ju Dios nin yuchi ju ixchivinti.
\v 2 Pus ni vachuꞌ lhilacaꞌanta ju Cristo ju ixꞌucxtinꞌan pus ju xalapanacni jantu lai catitanaulh ni jantu tuꞌuꞌ talhiulai ju ixꞌucxtinꞌan va ixlacaꞌatalh ni vachuꞌ talhilacaꞌanta ju Cristo ju yuꞌunch. Alai va palai kꞌox catachꞌalhcatnanilh ni taꞌaktaijui xamatiꞌ ju vachuꞌ lhilacaꞌanta ju Cristo chai ni tatꞌalamapaini. Pus icjunan ni chunchach ju amalanitꞌi chai chunchach ju alhimapꞌaksitꞌi ju lapanacni.
\s1 Ju lhilacaꞌanta ju Cristo lhikꞌach catsuculh
\p
\v 3 Pus jantu xcai ni caꞌalilh xamatiꞌ ju amalaninin atumpa chivinti chai jantu chun najun tachi ju ixchivinti quiꞌucxtinꞌan Jesucristo ju sok junita chai jantu najun ta yu laich caputsuculh tachi ju kꞌoxich lhiulai ju Dios.
\v 4 Pus ni chunch ju chivinin tam xamatiꞌ pus ju yuchi na lhitakꞌayatach mas jantu tuꞌuꞌ mispai. Va lhilakachapui ju lakꞌaiti chai lasat ixlacata ju tuꞌuꞌ lacatsꞌunin chivinti. Para ju chunch va puꞌalin ju alhacchaꞌanti chai lakꞌaiti chai tachi chun ju macxcai chivinti ixlacata apumatam chai tamucꞌani ixtalakꞌalhin mas jantu slivasalh.
\v 5 Chai lana jantu tavanan tamamactai ju laclakꞌaiti. Pus na takꞌalhinitach ju ixꞌatalacpastꞌacꞌatꞌan ju lapanacni ju chunch talai chai va tamacajunta ju stavasalanti. Ju yuꞌunch va tapulhajaputun ju tuchi tamalani ju lapanacni ixlacata ju Dios. Para ju uxintꞌi amacꞌauch ju yuꞌunch.
\v 6 Pus ju palai kꞌox ju lhajayau yuchi ni kꞌox lhiulai ju Dios ju quiꞌatsucuntiꞌan chai lhikꞌach catsucuyau. Jantu va yuchi ju ixmakꞌaixtꞌokꞌach ju tumin ju capastactsucu.
\v 7 Pus tasqꞌuini ni jantu va yuchi ju tumin ju canaviyau cuenta ni jantu tuꞌuꞌ lhimintau ju ani lacamunutpaꞌ chai acsni caniyau jantu tuꞌuꞌ calhiꞌanau.
\v 8 Pus ni alinch ju quimpumpuꞌan chai quivaitiꞌan pus calhikꞌachauch.
\v 9 Para ju va makꞌaliꞌ tajumputun na paklhu amapastꞌacꞌanican ju macxcai chai aꞌokxchokꞌocanta. Chai na tijlhu taxtokni ju talacasqꞌuin mas jantu lhitapalai chai mas na macxcai. Pus yuchach ju taputakꞌalhini ju isꞌatsucuntiꞌan chai taputsꞌankꞌakꞌalhi ju lapanacni.
\v 10 Pus ni na kꞌachaniyau ju tumin pus anchach ju na lhu puꞌalin ju quiꞌalactuꞌuntiꞌan. Ju aliꞌin ni yuchach ju tumin ju na takꞌachani pus jantuch vana talhilacaꞌanta ju Jesús. Chai na lhu talhimakꞌalhkꞌajnanchokoi isꞌakstuꞌan ju chavai.
\v 11 Para ju uxintꞌi ni ixlapanac Diosꞌat pus amacꞌauch tachi chun ju ani taxtokni.
\s1 Va tachi asastꞌuctꞌich ju macxcai
\p Yuchi ju anavitꞌi cuenta ta yu laich soknicꞌa aꞌuntꞌi chai ta yu kꞌox calhiula ju Dios ju miꞌatsucunti. Chai vachuꞌ va tachi alhilacꞌapꞌich ju Dios. Chai va tachi amapꞌainininch chai achꞌixkꞌoꞌ mas va tuchi camilh lamiꞌatsucunti. Chai jantu alhitꞌakꞌayatꞌi tuꞌuꞌ.
\v 12 Chai ni lhilacꞌapꞌintꞌa ju Cristo pus ixlhichux ju miꞌalhunut asastꞌuctꞌi ju macxcai ju va camacꞌapꞌaniputunan ju Cristo. Chai va tachi anavitꞌich cuenta ju miꞌatsucunti jonkꞌalhita ju lhitꞌasanicꞌantꞌa. Chai miꞌakstu nauch laꞌixꞌucxlacapuꞌan ixtalhavat lapanacni ni lhilacꞌapꞌintꞌa ju Cristo.
\v 13 Pus Dios ju axtaknikꞌojui isꞌatsucuntiꞌan tachi chun ju taxtokni. Chai ju Jesucristo naulh tichi lapanac junita laꞌixꞌucxlacapuꞌ ju Poncio Pilato. Pus ju yuꞌunch quintalaktsꞌinan acsni icmapꞌaksiyan.
\v 14 Pus icjunan ni amuctꞌaxtꞌukꞌoch ju ixchivinti Dios. Chai jantu amalhqꞌuiliqꞌuitꞌi nin yuchi ni lai macxcai calhichivinincalh ju va milacata. Chunchach ju alatꞌi tus acsni caminchokoyaꞌ ju quiꞌucxtinꞌan Jesucristo.
\v 15 Chai yuchi ju Dios ju lhcata ju anuꞌ avilhchan chai yuchi ju camalacasuyach ju Jesucristo acsni cachinach ju anuꞌ avilhchan. Pus yuchi ju Dios ju lhinonkꞌojui chux. Matich apumatam tachi ju yuchi chai na kꞌoxich lhichivincan ju yuchi. Yuchi ju palai kꞌai ucxtin tachi chun ju ucxtinin chai yuchi ju palai xakꞌai tachi chun ju xalackꞌajin.
\v 16 Va yuchach ju jantu lai ni. Chai ju yuchi tꞌajun lacaꞌatuncunuꞌ junta jantu lai xamatiꞌ lakchaꞌan. Ju yuchi jantu xamatiꞌ laktsꞌinta nin xamatiꞌ lai catalaktsꞌilh tachi ju juntau ju chavai. Yuchi ju talhonikꞌocan. Chai yuchi ju alin ixtachaput ju jonkꞌalhita. Slivasalh chunch ju junita.
\p
\v 17 Pus amapꞌaksitꞌich ju makꞌalinin ju ani lacamunutpaꞌ ni jantu catalhitakꞌaya ju ixmakꞌalitꞌan. Nin yuchi ni lai catalhilaksi ju ixmakꞌalitꞌan ju lai tsꞌankꞌai lhi tꞌuxam. Aꞌunitꞌich ni alai yuchi ju Dios ju catalhilaksi. Yuchach ju quintaxtaknikꞌoyan tachi chun ju taxtokni ju maktasqꞌuiniyau ni laich calhikꞌachanauch. Chai jantu va quintalhcaxtakniyan.
\v 18 Pus aꞌunitꞌi ju makꞌalinin ni catanavilh ju kꞌox. Chai lhu catanavilh ju lamapainin. Chai jantu va lacatapꞌastu cataxtaknilh ju ixtuminꞌan ju vasalh tamaktasqꞌuini. Alai va lacakꞌachat ju catapuꞌaktaiju ju ixtuminꞌan.
\v 19 Chai ju chunch na lhu catamakꞌayaꞌ ju stavasalanti ixmakꞌalitꞌan ju lactꞌiyan. Chai caꞌalinaꞌ ju isꞌatsucuntiꞌan ju lactꞌiyan ni jantu talhilaksi ju ixtuminꞌan.
\s1 Ju va yuchach lhamapꞌaksin ju junicalh ju Timoteo
\p
\v 20 Ju uxintꞌi ji Timoteo kꞌoxich alhistꞌactꞌi ju ixchivinti Dios ju xtꞌaknicꞌantꞌa ni amasuniyaꞌ ju aliꞌin. Jantu alakꞌaꞌitꞌi ni xamatiꞌ camapaxalh. Chai amacꞌauch ju chivinti ju jantu lai aktaijui xamatiꞌ ni camispa ju Dios chai ixchivintiꞌan ju lapanacni ju tanajun ni na kꞌox atalaninin tajunita mas jantu.
\v 21 Chai icpujunan chunch ni talhilacaꞌalh ju chunch chivinti ju aliꞌin chai jantu talhitajuta ixti ju Dios.
\p Pus ictapainini ju Dios ni caꞌaktaijuyan lacaꞌamapaininti. Vasalh iclacasqꞌuin ni chunch caꞌulhtuyan.