\id 2TI
\ide UTF8
\h 2 TIMOTEO
\toc1 2 TIMOTEO
\mt1 IXLHILAKATꞌUI ALHIQUI JU ATSꞌOKNUNICALH JU TIMOTEO
\c 1
\s1 Ju Pablo macꞌami ju Timoteo
\p
\v 1 Ju quitꞌin icPablo. Ixtamalakachan ju Jesucristo icjunita ni chunch ju xalacasqꞌuin ju Dios. Pus ju yuchi lacasqꞌuilh ni ixtamalakachan acva ni kꞌalhtasu ni caxtakniyaꞌ ju isꞌatsucunti jonkꞌalhi va tichi chavaich ju lhilacaꞌanta ju Cristo Jesús.
\v 2 Pus icmacꞌamiyan ji Timoteo. Ju uxintꞌi tachi ju va quintsꞌalhꞌat unitꞌa chai na icmapainiyan. Pus ictapainini ju quimpaiꞌan Dios chai ju quiꞌucxtinꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunut.
\s1 Aꞌunch ju aliꞌin ixlacata ju Cristo
\p
\v 3 Ju quitꞌin icchꞌalhcatnani ju Dios lacasalaka atalacpastꞌacꞌat tachi ju ixtalai ju quilacpaiꞌan ju makꞌanchich. Chai icjuni ju Dios lakꞌailaktsꞌiuch ju milacata. Pus jantu tavanan iccꞌapꞌan acsni ictꞌachivinin ju Dios ju tsꞌis chai ju tuncuj.
\v 4 Pus acsni icpastꞌacꞌa ta yu kꞌalhu acsni iclamacaju pus na iclaktsꞌimputunan ni lai slivasalh aclhikꞌachanaꞌ.
\v 5 Pus icpastꞌacꞌa ni ixlhichux miꞌalhunut ju lhilacꞌapꞌin ju Jesús. Pus ju pꞌulhnan xatalacaꞌi yuchi ju xakꞌai minati Loida chai ju minatich Eunice. Chai ju chavai iccꞌatsai ni vachuꞌ lhilacꞌapꞌintꞌa ju Jesús ju uxintꞌi.
\p
\v 6 Pus yuchi iclhimapastꞌacꞌaniyan ni atꞌailhipꞌich ixꞌamasunica ju lapanacni ixchivinti Dios ni yuchi ju Dios ju xalhikꞌailaktsꞌinan ju kꞌox miꞌaktsulh ni laich anaviyaꞌ ju chun lhichꞌalhcat. Chai acsnich ju xaxtꞌaknicꞌan ju anuꞌ lhichꞌalhcat acsni icmokslanin ju quimacaꞌ lamilacatuna ni capucꞌatsacalh ni ixlapanac Dios xaꞌun.
\v 7 Icpujunan chunch ni jantu quintaxtaknitan ju Dios ju alhunut ju va catalhanalh. Alai quintaxtaknitan ju alhunut ju tachapun. Vachuꞌ quintaꞌaktaijutan ni lai amapainininau chai lai lhistacchokocanau quiꞌakstuꞌan.
\v 8 Pus tun tꞌitꞌamaxan ju ixchivinti ju quiꞌucxtinꞌan Jesús nin yuchi ju quitꞌin mas xalacasqꞌuin ju Jesús ni actꞌalhnucalh. Para laꞌixtachaput ju Dios aqꞌuintꞌamakꞌalhkꞌaj ixlacata ju chivinti junta najun tichi chavaich ju Cristo.
\v 9 Pus Dios ju quintamakꞌalhtaxtun chai quintatꞌasaninch ni salakach cajunau laquiꞌatsucuntiꞌan. Chai jantiyuꞌ ju quintalhiꞌulhtutan chunch va ixlacata ni caꞌixnaviu tuꞌuꞌ ju kꞌox. Alai chunch quintaꞌulhtutan ni chunch ju xalacasqꞌuin ju yuchi. Pus mas jantucaꞌ ixnavican ju lacamunutpaꞌ pus ju yuchi xaquintanavinitan lamapainin ixlacata ju Cristo Jesús.
\v 10 Para va chavaicaꞌ ju malacasucanta ju anuꞌ lamapainin ju quintanavinitan. Talacasu acsni quilachilh ju quiꞌamakꞌalhtaxtunuꞌan Jesucristo. Pus ixlacata yuchi jantu tasqꞌuini ni canikꞌalhiu. Para laꞌixchivinti Dios quintajuntan ni alin ju quiꞌatsucuntiꞌan ju jonkꞌalhita ni lhilacaꞌanau ju Cristo.
\p
\v 11 Pus ju quitꞌin iclhcaꞌulacanta ni acnonaꞌ ju ani ixchivinti Dios ixlacata ju Jesús. Chai yuchi ju quisacxtulh ni ixtamalakachan acva ixlacata ju ani chivinti chai ni acꞌamalaniyach ju lapanacni ixlacata yuchi.
\v 12 Chai ni icꞌajuni ju lapanacni ju ani chivinti pus yuchi iclhimakꞌalhkꞌajnan ju chavai. Para jantu icmaxanan ni icmispai tichi chavaich ju iclhilacaꞌanta. Chai slivasalh iclacaꞌi ni tachapun ju yuchi. Lai aquilhistacniyaꞌ ju sastꞌi quiꞌatsucunti tus acsni caminchokoyaꞌ ju yuchi. Pus ju quitꞌin iclhilaksich ni chunch ju aquiꞌulhtuyaꞌ.
\p
\v 13 Tun tꞌimapꞌaxa ju soknicꞌa chivinti ju icjuntan. Va tachi alhilaksitꞌich ju Cristo Jesús chai lacaꞌamapaininti aꞌunch ju aliꞌin ju ixchivinti.
\v 14 Jantu alakꞌaꞌitꞌi ni xamatiꞌ camapaxalh ju ixchivinti Dios ju xtꞌaknicꞌantꞌa ni aꞌunaꞌ ju lapanacni. Chai lai chunch alatꞌi laꞌixtachaput ju Spiritu Santu ju tꞌajun laquiꞌalhunutꞌan.
\p
\v 15 Ju uxintꞌi cꞌatsꞌaich ni ixchuxꞌan ju amachakꞌan Asia quintamacauꞌulalh. Ju sia yuꞌunch yuchi ju Figelo chai ju Hermógenes.
\v 16 Pus ictapainini ju quiꞌucxtinꞌan Jesús ni caꞌaꞌaktaijuyaꞌ lacaꞌamapaininti ju tatanumanalh laꞌixchakaꞌ ju Onesíforo ni na paklhu xaquintamakꞌankꞌachai. Jantu xatalhimaxanan mas ictꞌalhnucanta.
\v 17 Pus ju yuchi acsni chilh ju ani lakꞌachakꞌan Roma slivasalh quimpuxcaulh chai quilhitajulh.
\v 18 Vachuꞌ ictapainini ju quiꞌucxtinꞌan Jesús ni capastꞌacꞌaꞌ ju lamapainin ju xaquinavini ju Onesíforo ju anuꞌ avilhchan acsni camakꞌosaspitcanaꞌ ju lapanacni. Pus uxintꞌi ju kꞌox cꞌatsꞌai ni na quiꞌaktaijulh ju yuchi ju lakꞌachakꞌan Efeso acsni ixvilhchau ju anch.
\c 2
\s1 Chani lai ju vasalh ixlapanac Jesús junita
\p
\v 1 Ju Cristo Jesús navinitan lamapainin ju uxintꞌi ji quintsꞌalh. Pus apꞌutꞌachꞌapꞌutꞌich ju yuchi.
\v 2 Pus ju uxintꞌi na paklhu xakꞌasmatꞌa ju quinchivinti chai na pumalhu vachuꞌ tacꞌatsai ni yuchach ju stavasalanti. Pus yuchach ju amalanichꞌokꞌoyaꞌich ju anuꞌ lapanacni ju alaktsꞌinch ni laich catamuctaxtuyaꞌ. Ju chunch ni laich cataꞌamalaniyaꞌ vachuꞌ ju aliꞌin.
\p
\v 3 Pus achꞌixtꞌich ju makꞌalhkꞌajnat ju axtꞌaknicꞌanaꞌ va ixlacaꞌatalh ni anonaꞌ ixchivinti Dios. Achꞌixtꞌich tachi ju lai tam taropa ju makꞌalhkꞌajnan lacalhilucut. Pus vachuꞌ ixtaropajni juntau ju Dios chai yuchi ju quincapitánꞌan junita.
\v 4 Pus ju tam taropa ju tꞌonacha lacalhilucut jantu tuꞌuꞌ navi cuenta ixlacata ju atumpa atsucunti. Va yuchi ju navi cuenta ju tuchi kꞌox calhiulayaꞌ ju ixꞌucxtin. Pus tasqꞌuini ni vana va chun calau laꞌixmacni ju Dios. Jantu va yuchi ju canaviu cuenta ju xataxtokni ju ani lacamunutpaꞌ.
\v 5 Chai vana va chun tachi chun ju takꞌamanan. Ni jantu sok takꞌamanan tachi ju lhijun ju xalhamapꞌaksin pus jantu tuꞌuꞌ talhajai. Pus tasqꞌuini ni vana va chun calau laꞌixmacni Dios. Acsni jantu naviyau cuenta tachi ju lhijun laꞌixlhamapꞌaksin Dios pus jantu lai tuꞌuꞌ calhajatachau ju lactꞌiyan.
\v 6 Chai ju tam lapanac ju na lhixkꞌopta ixꞌachꞌananti pus yuchi ju pꞌulhnan caꞌamaklhtayananach ju xatocꞌat. Pus tasqꞌuini ni vana va chun calau laꞌixmacni ju Dios. Acsni slivasalh laꞌixlhichux quiꞌalhunutꞌan canaviniyau ju ixlhichꞌalhcat pus calaktsꞌinau ju xalhiꞌut ju quilhichꞌalhcatꞌan ju ani lacamunutpaꞌ.
\v 7 Apꞌastꞌactꞌich ju ani ju icjunan chai yuchi ju miꞌucxtin Jesús ju camamachakxaniyan tuchi ju nomputun.
\p
\v 8 Apꞌastꞌactꞌich ni makꞌaniya ixpapanti ju kꞌai ucxtin David ixjunita ju Jesucristo. Chai ju yuchi lokꞌonchokolh junta ixmacnucanta. Chai icꞌajuni ju lapanacni ni ixlacata yuchi lai takꞌalhtaxtucan.
\v 9 Chai va ixlacata ni chunch icꞌajuni ju lapanacni pus na icmamakꞌalhkꞌajnican. Tus tachꞌin quintanavi tachi ju va icꞌalactuꞌunuch. Para ju ixchivinti Dios makpitsicanta ixlhilacaputsꞌun ju lacamunutpaꞌ. Jantu lai xamatiꞌ tachꞌin navi ju yuchi.
\v 10 Chai yuchi chux iclhimakꞌalhkꞌajnan va ixlacataꞌan ju asacxtulh ju Dios. Chai ju chunch ju yuꞌunch lai catatakꞌalhtaxtuyaꞌ ni catalhilacaꞌanaꞌ ju Cristo Jesús. Chai vachuꞌ laich catatꞌatolhkꞌalhiyanta ju Cristo ju lactꞌiyan.
\q1
\v 11 Vasalh junima chivinti.
\q1 Ni quintalhilhcatan ju Dios ni tachi ju va tꞌanitauch ju Cristo acsni tavanan xtujcalh ju yuchi ju lacacurus pus vachuch catꞌatolhtachau ju yuchi ju lactꞌiyan.
\q1
\v 12 Ni jantu tavanan cꞌapꞌau ju Cristo mas va tuchi min laquiꞌatsucuntiꞌan pus vachuꞌ catꞌataꞌucxtinitachau ju yuchi ju lactꞌiyan.
\q1 Ni canonau ni jantu mispayau ju yuchi pus ju yuchi vachuꞌ canonaꞌ ni jantu quintamispayan ju quijnanꞌan.
\q1
\v 13 Mas jantu muctaxtuyau ju quijnanꞌan para ju yuchi aktsꞌiya camuctaxtuyaꞌ tuchi najunta. Ju yuchi jantu tavanan lai tam catinaulh astan.
\s1 Chunch alatꞌi tachi ju tam chꞌalhcatnaꞌ
\p
\v 14 Amapꞌastꞌacꞌanitꞌi ju yuꞌunch ju talhilacaꞌanta ju Jesús tachi chun ju icjuntan ju uxintꞌi. Pus ju quiꞌucxtinꞌan Dios quintalaktsꞌinan tachi chun ju naviyau. Chai yuchi iclhijunan ni amapꞌaksitꞌich ni jantu catalhilasalh ju tuꞌuꞌ ju va chivinti junita. Ju chunch jantu lhitapalai. Alai va alakꞌalhini ixꞌatalacpastꞌacꞌatꞌan ju tatꞌajun kꞌasmatnin.
\v 15 Va yuchi ju anavitꞌi cuenta ta yu laich atꞌalacꞌasunin ju Dios ta yu kꞌoxich capulhiulayan. Chunch ju alatꞌi tachi ju tam chꞌalhcatnaꞌ ju jantu lai mamaxanican ixlacata ju tuchi navita. Sok amasunin ju ixchivinti Dios. Yuchach ju stavasalanti.
\v 16 Amacꞌauch ju chivinti ju jantu lai xamatiꞌ catiꞌaktaiju ni laich camispa ju Dios chai ju tuꞌuꞌ chivinti ju jantu lhitapalai. Pus ju chunch tachivinin va palai palai catacꞌapꞌaꞌ ju Dios. Yuchi iclhijunan ni amacꞌauch ju chunch ju uxintꞌi.
\v 17 Chai ju ixchivintiꞌan ju yuꞌunch va palai palai calakꞌalhiniyaꞌ ju isꞌatsucuntiꞌan tachi ju tuꞌuꞌ tsꞌitsꞌi ju va puchꞌiꞌan. Chai chunchach ju tachivinin ju Himeneo chai ju Fileto.
\v 18 Ju ixtꞌiyunꞌan makyuꞌunch tajunita ju lapanacni ju jantu sok taꞌamalaninin. Pus ju yuꞌunch va tanajun ni alokꞌonchokocantach ju lapanacni ju chavai chai jantu aktam catilokꞌonchokocalh. Chai ni chunch tanajun pus tamalacaꞌinita ju aliꞌin chai taꞌamacꞌapꞌanita ju ixchivinti Dios.
\v 19 Pus cꞌatsacan ni xtakni ixtachaput ju Dios tachi chun ju talhilacaꞌan ju yuchi ni chani najun laꞌixchivinti ju tsꞌokcanta: “Ju Dios mispai ju ixꞌanuch tajunita”. Chai alacatam chani najun: “Chach macaulh ju alactuꞌunti tachi chun ju tanajun ni talhilacaꞌanta ju ixꞌucxtinꞌan Jesús”. Chunch ju najun chai yuchi pucꞌatsayau ni vasalh alin ixtachaput ju Dios.
\p
\v 20 Pus ju lacakꞌai chakaꞌ jantu va yuchi ju alin ju puchꞌalhcatna ju oro lhinavicanta chai ju plata lhinavicanta. Para vachuꞌ alin ju puchꞌalhcatna ju va qꞌuiu lhinavicanta chai ju va tꞌun lhinavicanta. Pus ju lhinavicanta oro chai plata vasalh lhitapalai. Para ju lhinavicanta qꞌuiu chai ju lhinavicanta tꞌun jantu na chun tapalai.
\v 21 Pus ju quijnanꞌan chunch juntau tachi ju ani puchꞌalhcatna. Pus ni alin xamatiꞌ ju lana jantu caꞌamalakꞌavi ju yuꞌunch ju jantu sok masui ju ixchivinti Dios pus calhimispacanaꞌ ni lhitapalai ju laꞌixmacni Dios. Va ixꞌanuꞌ isꞌakstu Dios cajunaꞌ chai laich capunaviyaꞌ ju ixlhichꞌalhcat. Chai kꞌox cajunaꞌ ixlacata va tuchi kꞌoxi lhichꞌalhcat ju xtakniputun ju Dios.
\p
\v 22 Ni jantuch vana navi ju chavai tachi ju va puꞌaskꞌatꞌa pus atꞌailhipꞌich ju chunch. Vachuꞌ atꞌailhipꞌich ixpuxcajuca ta yu laich soknicꞌa capujunlh ju miꞌatsucunti laꞌixmacni Dios. Chai va tachi alhilacꞌapꞌi ju Jesucristo. Chai va tachi amapꞌainininch. Chai jantu lana atꞌalakꞌaꞌitꞌich xamatiꞌ. Chunch ju alatꞌi ni vachuꞌ chunch talai ju yuꞌunch ju vasalh talhilaksi ju Dios chai salaka junita ju ixꞌalhunutꞌan.
\v 23 Jantu anavitꞌi cuenta ju va jantu taꞌacꞌatsananta chai ju va jantu taꞌamachakxanan. Jantu anavitꞌi cuenta ni cꞌatsꞌaich ni va puꞌalin lhilucut ju chunch chivinti.
\v 24 Chai tasqꞌuini ni jantu va lasani lapanacni catava ju ixlapanacni ju quiꞌucxtinꞌan Jesús. Alai tasqꞌuini ni kꞌox lapanac cava lhichux chai laich camalaninilh chai laich cachꞌixlh ju makꞌalhkꞌajnat.
\v 25 Chai tasqꞌuini ni lacalhikꞌox caꞌalacjunilh ju yuꞌunch ju jantu kꞌaixtam tatꞌaꞌan. Chunch caꞌalactꞌalalh ni jantu xcai ni Dios caꞌalacxtaknilh tumpa ixꞌatalacpastꞌacꞌatꞌan ta yu laich catapumispa ju stavasalanti.
\v 26 Ju chunch catamachakxayaꞌ ni va aꞌokxchokꞌolh ju lhacaticuru. Chai catacꞌatsayaꞌ ni yuchi ju lhacaticuru ju ixlhinajun laꞌisꞌatsucuntiꞌan chai ixtanavini ixkꞌachat ju yuchi.
\c 3
\s1 Chanich catajunaꞌ ju lapanacni acsni caminchokoyaꞌ ju Jesús
\p
\v 1 Amachꞌakxatꞌich ju ani. Acsni vanin chimputun ju avilhchan acsni caminchokoyaꞌ ju Cristo pus na lhu caꞌalinaꞌ ju makꞌalhkꞌajnat.
\v 2 Pus caꞌalinaꞌ ju lapanacni ju va isꞌakstuꞌan caꞌamapainichokocanach. Chai catakꞌachaniyaꞌ ju tumin. Chai catanonaꞌ ni palai lackꞌoxin tajunita. Palai jantu ju aliꞌin. Chai jantu tuꞌuꞌ catalhiulayaꞌ ju ixtꞌalapanacꞌan. Chai macxcai chivinti catanonaꞌ. Chai jantu cataquiclacaꞌiyaꞌ ju ixpaiꞌan ixnatiꞌan. Chai jantu tuꞌuꞌ catalhiulayaꞌ ju lhakꞌailaktsꞌinch ju anavinicanta. Chai jantu tuꞌuꞌ catalhiulayaꞌ ju ixtaxtokni Dios.
\v 3 Chai jantu catamapainiyaꞌ ju ixtꞌalapanacꞌan. Chai jantu lai caꞌamakꞌoxamixicanaꞌ. Chai va kꞌaya catalhichivinach ju ixtꞌalapanacꞌan. Chai jantu lai amapꞌaksichokocan isꞌakstuꞌan. Chai kꞌai tajunita catajunaꞌ. Chai jantu catakꞌachaniyach ju kꞌox.
\v 4 Catamakꞌaxtꞌakꞌach ju ixtꞌalapanacꞌan. Chai jantu tuꞌuꞌ catakꞌasmatꞌaꞌ. Chai na kꞌai catacꞌatsayaꞌ va laꞌisꞌakstuꞌan. Chai palai tuꞌuꞌ catalhiulayaꞌ ju ixkꞌachat ju lacamunutpaꞌ. Palai jantu ju Dios.
\v 5 Catatalacasuyach tachi ju vasalh talhilacaꞌanta ju Dios para lana jantu catasuyaꞌ ju ixtachaput Dios laꞌisꞌatsucuntiꞌan.
\p Pus alackꞌostꞌi ju yuꞌunch.
\v 6 Pus sia yuꞌunch alin ju taꞌaꞌokxchokꞌonun. Ju yuꞌunch tatanui laꞌixchakaꞌan ju chakolun ju va jantu taꞌacꞌatsananta chai taꞌamalacaꞌini ixchivintiꞌan. Pus ju anuch chakolun na lhu alactuꞌunti ju tanavita. Para tapuxcajui aliꞌ taxtokni ju jantu soknicꞌa.
\v 7 Pus ju yuꞌunch takꞌasmatni ixchivinti va tichi chavaich para jantu tavanan lai tamachakxai ju stavasalanti ixlacata ju Cristo.
\v 8 Pus ju makꞌanchich ju Janes chai ju Jambres tatꞌalakꞌailh ju Moisés. Pus chunchach vachuꞌ talai ju ani lapanacni. Jantu kꞌox talhiulai ju stavasalanti ixlacata ju Cristo. Jantuch kꞌox ju ixꞌatalacpastꞌacꞌatꞌan ju yuꞌunch. Pus lana tasui ni jantu talhilacaꞌanta ju Cristo.
\v 9 Para tachi ju tatapasalh ju ixtꞌalaxcai ju Moisés acsni tasu ni va aꞌokxchokꞌonin ixtajunita pus vana va chunch catapasayaꞌ ixlacataꞌan ju ani aꞌokxchokꞌonin. Jantu lai catatailhiꞌanaꞌ ju ixꞌaꞌokxchokꞌontiꞌan. Aktsꞌiya catasuyach ni va lakachapunin tajunita.
\s1 Ju Pablo mapꞌaksi ju Timoteo
\p
\v 10 Para ju uxintꞌi cꞌatsꞌatꞌa ta yu xacꞌamalaninin chai ta yu ixjunita ju quiꞌatsucunti chai tuchi xacnaviputun chai ni vasalh iclhilacaꞌanta ju Jesucristo. Chai cꞌatsꞌatꞌa ni jantu tavanan jeks xacꞌui. Cꞌatsꞌatꞌa ni na xacꞌamapaininin chai xacchꞌixkꞌojui tachi chun ju macxcai.
\v 11 Cꞌatsꞌatꞌa ta yu xacxcaicanta chai ta yu xacmakꞌalhkꞌajnan. Cꞌatsꞌatꞌa tuchi ictapasalh ju lakꞌachakꞌanixni Antioquía chai Iconio chai Listra. Cꞌatsꞌatꞌa ta yu xaquintamamakꞌalhkꞌajni. Para lhichux quimakꞌalhtaxtulh ju quiꞌucxtin Jesús.
\v 12 Pus tachi chun ju tatsucuputun tachi ju kꞌachani ju Cristo Jesús camamakꞌalhkꞌajnicanaꞌ.
\v 13 Para ju na taꞌalactuꞌunun chai ju taꞌaꞌokxchokꞌonun palai kꞌai junita catajunaꞌ. Ju yuꞌunch cataꞌaꞌokxchokꞌonunach ju aliꞌin chai caꞌokxchokꞌocanaꞌ isꞌakstuꞌan.
\p
\v 14 Para ju uxintꞌi va tachi alacꞌaꞌitꞌi ju tuchi lanitꞌach chai cꞌatsꞌaich ni stavasalanti chai cꞌatsꞌaich tichi chavaꞌitnich ju tamalanitan.
\v 15 Pus tus milhitalacatꞌicstꞌin ju mispꞌatꞌa ju ixchivinti Dios ju tsꞌokcanta. Anchach ju pucꞌatsacan ni lai takꞌalhtaxtucan acsni maklacaꞌanican ju Cristo Jesús.
\v 16 Pus tachi chun ju ixchivinti Dios ju tsꞌokcanta isꞌakstu ju Dios ju amaꞌatsꞌokꞌulani ju lapanacni. Chai ni chunch junita ju ixchivinti Dios pus anchach ju pulanican ju kꞌox chai pucꞌatsacan junta jantu soknicꞌa ju laquiꞌatsucuntiꞌan. Chai ni laktsꞌincan ju ixchivinti Dios pus lai pulakꞌoxican ju quiꞌatsucuntiꞌan. Chai anchach ju pulanican ju atsucunti ju kꞌox lhiulai ju Dios.
\v 17 Chai ni chunch junita ixchivinti Dios pus jantu tuꞌuꞌ cꞌacxni laꞌisꞌatsucunti ju ixlapanac ju Dios ni lai cacꞌatsa ju ixkꞌachat ju Dios chai lai canaviyaꞌ.
\c 4
\p
\v 1 Ju quiꞌucxtinꞌan Jesucristo camakꞌosaspitaꞌ ju lapanacni ju tatꞌajun chai ju tanitach. Chai yuchi ju caminchokoyaꞌ chai caꞌalinach ju ixpuꞌucxtin. Pus ju yuchi chai ju Dios quintalaktsꞌinan acsni icmapꞌaksiyan.
\v 2 Icjunan ni amalanitꞌich ju ixchivinti Dios. Amalanitꞌich acsni kꞌox talhiulai ju lapanacni chai mas jantu kꞌox talhiulai. Amalacꞌaꞌinitꞌi ju lapanacni ixchivinti Dios. Chai alakꞌakꞌaimatꞌi ju va tsa taꞌalactuꞌunun. Chai aqꞌuilhtꞌapꞌuꞌutꞌich ju jantu taꞌalacaꞌininan. Para acsni chunch alatꞌi pus jantu jeks aꞌunin ju lapanacni.
\v 3 Chunch ju alatꞌi ni caminaꞌ avilhchan acsni jantu lana catakꞌasmatputunaꞌ ju lapanacni ju ixchivinti Dios ju soknicꞌa junita. Alai va catakꞌasmatputunach ju tuꞌuꞌ ju cꞌus. Chai catamakꞌaixtꞌokꞌaꞌ ju amalaninin ju catanonach tachi ju takꞌachani ju yuꞌunch.
\v 4 Chai jantu catakꞌasmatꞌaꞌ ju stavasalanti ixlacata ju Cristo para catakꞌasmatꞌaꞌ ju tuꞌuꞌ ju va chivinti junita. Ju jantu slivasalh.
\v 5 Para ju uxintꞌi va tachi kꞌoxich alaccꞌatsꞌan. Achꞌixtꞌich mas va tuchi makꞌalhkꞌajnat. Aꞌunch ju lapanacni ixlacata ju Jesús. Amuctꞌaxtꞌutꞌich ju laꞌixlhichꞌalhcat Dios.
\p
\v 6 Chunch ju alatꞌi ni chinta ju avilhchan acsni acniyach ju quitꞌin ixlacata ju Cristo. Acmaconach ju ani lacamunutpaꞌ.
\v 7 Pus ju quitꞌin vasalh ictastucnikꞌota ju macxcai. Icnavikꞌolh chux tuchi xaclhcaꞌulanicanta. Ju quitꞌin iclacaꞌinikꞌolhch ju ixchivinti Dios.
\v 8 Pus ju lactꞌiyan acxtaknicananta ju quintalhaja ni sok xactsucui ju ani lacamunutpaꞌ. Yuchi ju quiꞌucxtin Jesús ju aquixtakniyach acsni cachinach ju anuꞌ avilhchan laꞌixꞌaclanti ju lacamunutpaꞌ. Chai quiꞌucxtinꞌan yuchi ju navi ju soknicꞌa. Chai jantu va quitꞌin ju acxtaknicanaꞌ para vachuꞌ caꞌaxtakniyaꞌ ju yuꞌunch ju tapacxantajich ju Jesús acsni caminchokoyaꞌ.
\s1 Tapaininican ju Timoteo
\p
\v 9 Ni laich cava pus vatsꞌalhti aqꞌuilaktꞌatꞌi.
\v 10 Pus ju quilakꞌauꞌan Demas kꞌachanilh ju taxtokni ju alin ju ani lacamunutpaꞌ chai quimacaulh. Alh ju lakꞌachakꞌan Tesalónica. Chai ju Crescente alh ju xalacatꞌun Galacia. Chai ju Tito alh ju xalacatꞌun Dalmacia.
\v 11 Va yuchi ju Lucas ju quintꞌavi. Pus atꞌasaninch vachuꞌ ju Marcos chai aqꞌuintꞌalaktꞌanaꞌich ni na lai quiꞌaktaijui ju yuchi lacalhichꞌalhcat.
\v 12 Ju Tíquico icmalakachalh ju lakꞌachakꞌan Efeso.
\v 13 Acsni atꞌanaꞌ alhitꞌanaꞌich ju quilakchꞌit ju icmacontacha lakꞌachakꞌan Troas laꞌixchakaꞌ ju Carpo. Vachuꞌ alhitꞌanaꞌ ju kꞌalhtankꞌai alhiqui. Para ju palai icmaktasqꞌuini yuchi ju alhiqui ju tsꞌapscanta.
\p
\v 14 Ju Alejandro ju puchꞌalhcatnan cobre slivasalh na xaquisastꞌucꞌa lacalhichꞌalhcat. Para ju quiꞌucxtinꞌan Dios camamapalaniyaꞌ tachi ju lhijunch ixlacata ju tuchi talakꞌalhin xaquinavini.
\v 15 Pus vachuꞌ ju uxintꞌi alaccꞌatsꞌan ju ixlacata ju yuchi. Ju yuchi slivasalh na tꞌalasai ju quinchivintiꞌan.
\p
\v 16 Acsni pꞌulhnan icchivimakꞌancalh jantu xamatiꞌ quiꞌaktaiju. Ixchuxꞌan va quintamacoyokꞌo. Para ictapainini ju Dios ni jantu caꞌalaclhixcailh mas chunch xaquintanavich.
\v 17 Mas chunch quintanavilh ju aliꞌin para ju quiꞌucxtin Dios quintꞌatayalh chai quixtaknilh ju tachaput ni laich xacnajun ixchivinti. Chai takꞌasmatlich tachi chun ju jantu israelitanin tajunita. Chai ju Dios quimakꞌalhtaxtulh ni va xaquintamakniputun.
\v 18 Chai ju quiꞌucxtin Dios aquimakꞌalhtaxtuyaꞌ ni jantu aquintanaviyaꞌ tuꞌuꞌ macxcai. Chai aquilhiꞌanaꞌ junta lhinajun ju yuchi ju lactꞌiyan. Chach lakꞌayacalh ju yuchi tus va tavanan. Vasalh iclacasqꞌuin ni chunch caꞌulhtucalh.
\s1 Amacꞌaminin ju Pablo
\p
\v 19 Amacꞌamitꞌi ju Aquila chai ju Prisca ju ixꞌamachakach junita. Vachuꞌ amacꞌamitꞌi ju yuꞌunch ju tatanumanalh laꞌixchakaꞌ ju Onesíforo.
\v 20 Ju Erasto tolhcha ju lakꞌachakꞌan Corinto. Chai ju Trófimo icmacontacha ju lakꞌachakꞌan Mileto ni va ixtakꞌankꞌai.
\v 21 Atꞌatꞌich acsni jantucaꞌ lhicꞌasnin jun ni laich calayaꞌ. Ju Eubulo macꞌamiyan. Vachuꞌ ju Pudente chai ju Lino chai ju Claudia chai tachi chun ju lhiꞌalakꞌavin ju ani tavilanalh.
\p
\v 22 Pus ictapainini ju quiꞌucxtinꞌan Jesucristo ni catolach ju yuchi lamiꞌalhunut. Vachuꞌ ictapainini ju Dios ni catanaviniyan lamapainin minchuxꞌan ju uxijnan. Vasalh iclacasqꞌuin ni chunch aꞌulhtꞌucꞌanaꞌitꞌit.