\id TIT
\ide UTF8
\h TITO
\toc1 TITO
\mt1 JU ALHIQUI JU ATSꞌOKNUNICALH JU TITO
\c 1
\s1 Ju Pablo macꞌami ju Tito
\p
\v 1 Ju quitꞌin icPablo. Ixlapanac Dios icjunita chai ixtamalakachan ju Jesucristo ni acꞌaꞌaktaijuyach ju asacxtuta ju Dios ni catalhilacaꞌanach ju yuchi chai catamispayach ju stavasalanti ixlacata ju Cristo. Chai ju chunch pus ju isꞌatsucuntiꞌan chunch cajunaꞌ tachi ju kꞌachanich ju Dios.
\v 2 Chai chunch icꞌajuni ju lapanacni ni laich vachuꞌ caꞌalinaꞌ ju isꞌatsucuntiꞌan ju conkꞌalhiyanta ju lactꞌiyan. Pus ju Dios chunch ju ilhcaꞌulata acsni tucaꞌ ixnavi ju lacamunutpaꞌ. Chai ju yuchi jantu lai aꞌokxchokꞌonun.
\v 3 Pus mas makꞌanchich ju ispastacta ju Dios ni aquintaxtakniyan ju anuꞌ atsucunti para va chavaicaꞌ chilh ju avilhchan ju ilhcaꞌulata ju Dios acsni xalakꞌaꞌich ni cacꞌatsacalh ta yu laich capuꞌalilh ju anuꞌ atsucunti. Chai Dios ju quiꞌamakꞌalhtaxtunuꞌan junita chai yuchi ju quijunilh ni acꞌajunilh ju lapanacni ju ani ixchivinti.
\v 4 Va icmacꞌamiyan ji Tito. Ju uxintꞌi tachi ju va vasalh quintsꞌalhꞌat ni quitꞌin ju xacjunan ixchivinti Dios chai ni lacꞌaꞌinich ju yuchi pus ju chavai lhilacꞌapꞌintꞌa ju Cristo tachi ju quitꞌin. Ictapainini ju quimpaiꞌan Dios chai ju quiꞌamakꞌalhtaxtunuꞌan Jesucristo ni catanaviniyan lamapainin chai cataꞌaktaijuyan ni jantu calacꞌalh ju miꞌalhunut.
\s1 Ju Tito ixchꞌalhcatnan ju xalacatꞌun Creta
\p
\v 5 Acsni ictaxtucha ju xalacatꞌun Creta va xaclacasqꞌuin ni isꞌasacxtꞌu ju ixticꞌacx ju catalhinaulh laꞌixtalhavat lapanacni ju talhilacaꞌanta ju Cristo ju lakatamin lakatamin lakꞌachakꞌan tachi ju iclhimapꞌaksitanch. Chai yuchi iclhimacontan ju anch ju xalacatꞌun Creta.
\v 6 Pus yuchach ju asacxtꞌu ju salaka ju isꞌatsucunti chai va pumatam ixꞌamachakaꞌ. Vachuꞌ tasqꞌuini ni si catalhilacaꞌalh ju Jesús ju isꞌaskꞌatꞌan chai jantu alhimispacan ni va kꞌaya catalalh nin alhimispacan ni va jantu catalacaꞌi.
\v 7 Pus ju lhinajun lacatalhavat ni navini ixlhichꞌalhcat ju Dios pus aktsꞌiya tasqꞌuini ni jantu tuꞌuꞌ camalacasu ju macxcai. Chai jantu va ixkꞌachat isꞌakstu ju capuxcaulh. Jantu lana vatsꞌalhti calhitalhkꞌamalh ju tuꞌuꞌ. Jantu catꞌakꞌapꞌa. Chai jantu va lasani lapanac cava. Chai jantu na cakꞌachanilh ju tumin.
\v 8 Chai tasqꞌuini ni yau cajunilh xamatiꞌ acsni lakacujtilaputun laꞌixchakaꞌ. Vachuꞌ na cakꞌachanilh ju kꞌox. Chai na caꞌacꞌatsanalh. Chai sok cajunlh ju isꞌatsucunti. Chai salaka junita ju isꞌatsucunti laꞌixmacni Dios. Chai tasqꞌuini ni lai cakꞌaichokocalh isꞌakstu.
\v 9 Vachuꞌ tasqꞌuini ni vasalh caquiclacaꞌi ju ixchivinti Dios tachi ju lhimalanicanta. Ju chunch ni lai sok caꞌamalaniyaꞌ ju aliꞌin chai lai caꞌamasuniyaꞌ ju stavasalanti ju tanajun ni jantu kꞌox ju ixchivinti Dios.
\p
\v 10 Pus tasqꞌuini ni chunch cajunlh isꞌatsucuntiꞌan ju yuꞌunch ju talhinajun ni na lhu alin ju lana jantu talacaꞌi. Ju jantu talacaꞌi tajuni ju aliꞌin lapanacni ju chivinti ju jantu lhitapalai chai va taꞌaꞌokxchokꞌonun. Pus yuꞌunch ju quintꞌaꞌisraelitanin quincꞌan ju palai chunch tachivinin.
\v 11 Pus tasqꞌuini ni jantuch alacꞌasqꞌuinin ni laich cataꞌamalaninilh ju yuꞌunch. Pus taꞌamalacaꞌinikꞌojui ixtaꞌaklhtamatchivintiꞌan tachi chun ju tatanumanalh lacalakatamin chakaꞌ. Para jantu lhijun ni caꞌamalanicalh ju lapanacni ju ixchivintiꞌan ni jantu soknicꞌa chai na va takꞌachani ju tumin.
\p
\v 12 Pus pumatam atalaniniꞌ sia yuꞌunch ju amachakꞌan xalacatꞌun Creta chani naulh: “Ju amachakꞌan Creta va tachi tanajunch taꞌaklhtamat chivinti. Chai va isꞌakstuꞌan ju mapainichokocan chai va ixvaitiꞌan ju tapastactꞌajun para ni va tamalheknin”. Ma chunch ju naulh ju anuꞌ lapanac.
\v 13 Chai vas xanajun. Chai ixlhiyuchi tasqꞌuini ni pꞌas alakꞌakꞌaimatꞌi. Ju chunch pꞌas catalhilaksiyaꞌ ju stavasalanti ixlacata ju Cristo.
\v 14 Aꞌunch ni jantuch cataquiclacaꞌilh tuꞌuꞌ ju va chivintich ju tanajun ju quintꞌaꞌisraelitanin. Nin yuchi ju ixlhamapꞌaksinꞌan ju lapanacni ju jantu takꞌachani ju stavasalanti ixlacata ju Cristo.
\p
\v 15 Pus ju salaka isꞌatsucunti laꞌixmacni Dios si kꞌox lhiulai tachi chun ju taxtokni ju navita ju Dios. Para ju na taꞌalactuꞌunun chai ju jantu talhilacaꞌanta ju Cristo pus tachi chun ju taxtokni va si macxcai talhipastꞌacꞌa ni na lhquiliqui junita ju ixtacꞌatsanꞌan chai lana jantu tuꞌuꞌ lhixcani ju ixꞌalhunutꞌan.
\v 16 Ju yuꞌunch tanajun ni tamispai ju Dios para laꞌisꞌatsucuntiꞌan lana tasui ni jantu slivasalh ni catamispa ju Dios. Pus ju yuꞌunch na kꞌai tajunita. Jantu lai talacaꞌi chai lana jantu lai tanavi tuꞌuꞌ ju kꞌox calhiula ju Dios.
\c 2
\s1 Chani lhijunita ju soknicꞌa lhamapꞌaksin
\p
\v 1 Para ju uxintꞌi chunch ju anauch tachi ju najunch lacasoknicꞌa lhamapꞌaksin.
\v 2 Aꞌunaꞌich ju na papaninch ni catalhistacchokocalh isꞌakstuꞌan. Chai seknicꞌa lapanacni catava. Chai cataꞌacꞌatsanalh. Vachuꞌ pꞌas catalhilaksi ju Cristo chai slivasalh cataꞌamapaininilh. Chai laich catachꞌixkꞌo mas va tuchi camilh laꞌisꞌatsucuntiꞌan.
\v 3 Aꞌunaꞌich vachuꞌ ju tꞌacunin ni catamalacasu tachi ju kꞌoxich lhiulai ju Dios. Jantu va catapuxcautsuculh ju chivinti. Jantu catatꞌakꞌapꞌa. Chach tajunlh tachi ju tuꞌuꞌ xalhilaktsꞌintaiti.
\v 4 Ju chunch laich catamalaniyaꞌ ju va atsiꞌincaꞌ ni catatꞌalamapaini ju ixpapaꞌan chai catamapaini ju isꞌaskꞌatꞌanꞌan.
\v 5 Vachuꞌ lai catamalaniyaꞌ ni cataꞌacꞌatsanalh chai salaka catava. Chai catalhistaclh ju ixchakaꞌan. Chai kꞌox lapanacni catava. Chai cataquiclacaꞌi ju ixpapaꞌan. Chai ni chunch ju catatsucuyaꞌ ju atsiꞌin pus jantu lai xamatiꞌ macxcai catalhichivinilh ju ixchivinti Dios.
\p
\v 6 Vachuꞌ amapꞌaksitꞌich ju tsꞌalan ni cataꞌacꞌatsanalh.
\v 7 Chai ju uxintꞌi ixlhichux ju miꞌatsucunti chunchach ju atsꞌucꞌu tachi ju tuꞌuꞌ xalhilaktsꞌintaiti ixlacataꞌan ju aliꞌin. Amalanitꞌich ju stavasalanti. Chai acsni axakꞌalayaꞌ ju lapanacni pus jantu va alhakꞌamanaꞌaxakꞌalatꞌi.
\v 8 Chunch ju achꞌivinch tachi ju jantu lai xamatiꞌ catijunin ni jantu sok ju naꞌun. Ju chunch ju jantu lacaꞌi ju quinchivintiꞌan camaxananach ni jantu lai tuꞌuꞌ lhitajui macxcai ju laich aquintapulhichivinan quinchuxꞌan ju va milacata.
\p
\v 9 Amapꞌaksitꞌi ju xalapanacni ni cataquiclacaꞌi ju ixꞌucxtinꞌan mas va tuchi caꞌalhijunicalhch ni catanavi. Chai laꞌixlhichux ixꞌalhunutꞌan catanavilh ju lhichꞌalhcat tachi ju kꞌachanich ju ixꞌucxtinꞌan. Chai jantu catasaspitnilh ju alhijuni.
\v 10 Jantu catakꞌalhonilh tuꞌuꞌ. Alai catamalacasulh ta yu laich caꞌapulhilaksicanaꞌ. Chai ni chunch ju catatsuculh pus cataputalacasuyach ju laꞌisꞌatsucuntiꞌan ni na kꞌoxich ju ixꞌamalaninti ju quiDiosꞌan quiꞌamakꞌalhtaxtunuꞌan.
\p
\v 11 Pus ju Dios quintamasunitan ju lamapainin ju quintanaviniputunan. Yuchi ni laich catatakꞌalhtaxtuyaꞌ mas va tichi chavaich cava.
\v 12 Chai ni machakxayau ni na kꞌai ju anuꞌ lamapainin ju quintanavinitan ju Dios pus yuchi lhimacomputunau ju xakꞌachat ju lacamunutpaꞌ chai tachi chun ju aliꞌ taxtokni ju jantu kꞌox lhiulai ju Dios. Chai kꞌaichokocanau quiꞌakstuꞌan chai soknicꞌa jun ju quiꞌatsucuntiꞌan chai tasui ni vasalh talhoniyau ju Dios.
\v 13 Vachuꞌ chunch ju catsucu tachi ju caputasuyach ni vasalh pacxanauch ju anuꞌ avilhchan acsni caꞌuctaxtuyaꞌ ju tuchi quintakꞌalhtasunitan ju Dios. Yuchi ni caminchokoyaꞌ ju quiDiosꞌan Jesucristo ju quiꞌamakꞌalhtaxtunuꞌan junita. Chai catasuyaꞌ ni yuchi ju xakꞌai tucan.
\v 14 Pus ju yuchi tamakꞌaxtakchokolh isꞌakstu ju quilacataꞌan ni laich camacaju ju macxcai atsucunti. Chai aquintachꞌakꞌaniyan ju quiꞌalhunutꞌan ni ixꞌanuch cajumvi chai ni slivasalh canaviputu ju kꞌox.
\p
\v 15 Chai ni alin ju mintachaput ni xakꞌaiꞌat pus vas anauch tachi chun ju ani chivinti chai yuchi ju alhimapꞌaksitꞌi ju lapanacni ni catanavi. Chai alakꞌakꞌaimatꞌi ju jantu sok taꞌan. Tachi chun ju anaviyaꞌ jantu tuꞌuꞌ anavitꞌi tachi ju va jantu tuꞌuꞌ catapulhiulayan ju lapanacni.
\c 3
\s1 Tasqꞌuini ni chani catalalh ju talhilacaꞌanta ju Cristo
\p
\v 1 Amapꞌastꞌacꞌanitꞌich ju yuꞌunch ju talhilacaꞌanta ju Cristo ni catatalhonilh ju ucxtinin chai ju aliꞌin xalackꞌajin. Chai catalacaꞌinilh chai catanavinilh va tuchi kꞌox lhichꞌalhcat ju caꞌalhijunicalh.
\v 2 Amapꞌastꞌacꞌanitꞌich ni jantu catanaulh macxcai ixlacata akꞌantam. Nin yuchi ni va lasani lapanacni catava. Alai na kꞌox lapanacni catava chai va kꞌox caꞌatꞌalalhiꞌalh tachi chun ju lapanacni.
\p
\v 3 Chunch ju calactꞌalalhiꞌau ju aliꞌin ni vachuꞌ jantu ixꞌacꞌatsanantauch ju quijnanꞌan ju pꞌulhnan. Chai jantu lai ixlacaꞌiyau. Na ixꞌokxchokꞌocantau vachuꞌ. Va yuchi ixnaviyau ju macxcai atalacpastꞌacꞌat chai tachi chun ju xakꞌachat ju ani lacamunutpaꞌ. Na ixꞌalactuꞌununau chai na ixlhacchaꞌanau ju ixꞌanuchꞌan ju aliꞌin. Jantu kꞌox ixlhiulacanau chai jantu tuꞌuꞌ ixꞌalhiulayau ju aliꞌin.
\v 4 Para chilh avilhchan acsni quintamalacasunin ni na kꞌox lapanac junita ju Dios quiꞌamakꞌalhtaxtunuꞌan chai na quintamapainiyan ju quijnanꞌan chai tachi chun ju lapanacni.
\v 5 Pus quintamakꞌalhtaxtun. Para jantu va ixlacaꞌatalh ni xanaviyau ju tuꞌuꞌ ju kꞌox cava. Alai va ixlacata ni xaquintaꞌaktaijuputunan va laꞌixꞌamapaininti. Pus quintamakꞌalhtaxtun acsni quintachꞌakꞌanin ju quiꞌalhunutꞌan chai quintaxtaknitan ju sastꞌi quiꞌatsucuntiꞌan. Chai yuchi ju Spiritu Santu ju quintaxtaknitan ju sastꞌi quiꞌatsucuntiꞌan. Chai yuchi ju Spiritu Santu ju quintalasastꞌikꞌoyan.
\v 6 Pus ju Dios lhu quintaxtaknitan ju ixtachaput ju Spiritu Santu va ixlacata ju quiꞌamakꞌalhtaxtunuꞌan Jesucristo.
\v 7 Pus ni quintanavinitan lamapainin ju Dios chai quintalaktsꞌinan ni soknicꞌa juntau pus ju chavai cꞌatsayau ni vasalh aquintaxtaknitachan ju lactꞌiyan ju ixlaktsan ju quiꞌatsucuntiꞌan ju jonkꞌalhita.
\p
\v 8 Pus slivasalh ju ani ju icjuntan. Chai iclacasqꞌuin ni lana vas aꞌunch ju lapanacni ju talhilacaꞌanta ju Cristo tachi chun ju ani taxtokni. Ju chunch ju yuꞌunch va tachi catanaviyaꞌ cuenta ixnavica ju kꞌox. Pus tachi chun ju icjuntan si na kꞌox chai na caꞌaꞌaktaijuyaꞌ tachi chun ju lapanacni ni laich catanavi.
\v 9 Para lana jantu atꞌalhilacchꞌivin ju lapanacni ju tasacmiyan ju tuꞌuꞌ ju va tonto chivinti. Vachuꞌ jantu atꞌalhilacchꞌivin ju talhilaclakꞌaji tuchi tanajun ni tanavita ju makꞌaniya ixlacpaiꞌan mas jantu. Vachuꞌ jantu atꞌalhilacchꞌivin ju lapanacni acsni talaclakꞌaji chai talaclhilasai tuchi ju nomputun ixlhamapꞌaksin ju Moisés. Jantu anavitꞌi ju chunch ni jantu tuꞌuꞌ pulanican nin lai caꞌaktaiju xamatiꞌ laꞌisꞌatsucunti.
\p
\v 10 Ni alin xamatiꞌ ju va puxcajui lakꞌaiti lacatalhavat ju talhilacaꞌanta ju Cristo ni quilhmactꞌui canaviputulh pus paktꞌui ju akꞌai. Ni jantu xalacaꞌi ni xakꞌaꞌich paktꞌui pus jantu atꞌalalhipꞌi ju anuꞌ lapanac.
\v 11 Pus ju uxintꞌi miꞌakstu cꞌatsꞌaich ni va lakꞌalhinicanta ju istacꞌatsan ju anuꞌ lapanac chai na alactuꞌununch. Pus ju tuchi ixnaviputun ju yuchi lana putasui ni alinch ju ixtalakꞌalhin.
\s1 Ajuncan ni catalakchaꞌananch ju aliꞌin lapanacni
\p
\v 12 Acsni acmalakachanitachan ju Artemas u yuchi ju Tíquico pus vatsꞌalhti aqꞌuilaktꞌanaꞌ ju uxintꞌi ju lakꞌachakꞌan Nicópolis ni icnajun ni anchach ju actolanta ju lacalhicꞌasnin.
\v 13 Acsni catachaꞌananta ju Zenas ju lhaꞌatalanininta ju ixlhamapꞌaksinꞌan ju romanonin chai ju Apolos pus aꞌunch ju milhiꞌalakꞌavin laꞌixmacni Cristo ni cataꞌaꞌaktaijuyach ni jantu tuꞌuꞌ catamakꞌancꞌacxayaꞌ ixlacata ju lacati acsni catataxtuchokoyanta.
\v 14 Chai ju chunch vachuꞌ ju yuꞌunch ju talhilacaꞌanta ju Cristo ju tavilanancha anch catapulaniyaꞌ ju ixnavica ju kꞌox acsni alin ju ixmaktasqꞌuinit tam xamatiꞌ. Chai ju chunch cacꞌatsacanaꞌ ni na kꞌox ju isꞌatsucuntiꞌan ju talhilacaꞌanta ju Cristo.
\s1 Amacꞌaminin ju Pablo
\p
\v 15 Tachi chun ju lapanacni ju quintatꞌavi tamacꞌamiyan. Vachuꞌ amacꞌamitꞌich ju quilhiꞌalakꞌavin ju tavilanancha ju anch. Pus ictapainini ju Dios ni catanaviniyan lamapainin minchuxꞌan ju uxijnan. Vasalh iclacasqꞌuin ni chunch cataꞌulhtuyan.