\id PHM
\ide UTF8
\h FILEMÓN
\toc1 FILEMÓN
\mt1 JU ALHIQUI JU ATSꞌOKNUNICALH JU FILEMÓN
\c 1
\s1 Ju Pablo macꞌami ju Filemón
\p
\v 1 Ju quitꞌin icPablo. Tachꞌin icjunita va ixlacaꞌatalh ni icꞌajuni ju lapanacni ixlacata ju Cristo Jesús. Pus ju quitꞌin chai ju quilakꞌauꞌan Timoteo iclamacꞌamiyau ju uxintꞌi ji Filemón. Ju uxintꞌi na tuꞌuꞌ iclalhiulayau chai quintꞌachꞌalhcatnaꞌ unitꞌa laꞌixlhichꞌalhcat ju Dios.
\v 2 Vachuꞌ icmacꞌamiyau ju quilakꞌauꞌan atsiꞌ Apia chai ju Arquipo ju vachuꞌ ajuni ju lapanacni ixchivinti Dios. Vachuꞌ icꞌamacꞌamiyau ixchuxꞌan ju talhilacaꞌanta ju Cristo ju tatakꞌaixtꞌokꞌa laminchakaꞌ.
\v 3 Ictapainini ju Dios ni va tachi catanaviniyan lamapainin chai va tachi cataꞌaktaijuyan ni jantu calacꞌalh ju miꞌalhunutꞌan.
\s1 Ju Filemón na ixꞌamapaininin chai na ixlhilacaꞌanta ju Jesús
\p
\v 4 Pus va tapakchux ictꞌachivinin ju Dios pus icjuni lakꞌailaktsꞌiuch ju milacata.
\v 5 Chunch iclai ni icmacꞌatsanicanta ni na lhilacꞌapꞌinch ju Jesús chai slivasalh na amapꞌaini tachi chun ju lapanacni ju talhilacaꞌanta ju yuchi vachuꞌ.
\v 6 Ictapainini ju Dios ixlacataꞌan ju yuꞌunch ju xatalhilacaꞌan ju Jesús va ixlacaꞌatalh ni talaktsꞌinan ni lhilacꞌapꞌin ju uxintꞌi. Vachuꞌ iclacasqꞌuin ni catacꞌatsayaꞌ ju yuꞌunch ni yuchi ju Cristo Jesús ju xataxtakniyan ju kꞌox miꞌatsucuntiꞌan.
\v 7 Pus ji quilakꞌau na iclhikꞌachanch chai na quimpumatankꞌoxaxkꞌayai acsni iccꞌatsai ni na amapꞌaininin ju uxintꞌi chai acsni iccꞌatsai ni na takꞌachan ju aliꞌin ju vachuꞌ talhilacaꞌanta ju Jesús. Talhikꞌachan tuchi ju aꞌunitꞌa ju uxintꞌi.
\s1 Ju Pablo tapaini ixlacata ju Onésimo ju xalapanac ixjunita
\p
\v 8 Pus alinch ju quintachaput ni ixtamalakachan Jesús icjunita chai laich acjunin tuchi lhijunch ni anaviyaꞌ.
\v 9 Para jantu chunch actilalh. Alai va actapaininiyan ni aqꞌuinaviniyaꞌ lamapainin va ixlacaꞌatalh ni tuꞌuꞌ lalhiulayau. Ju chavai na icpapach chai ictꞌalhnucantach va ixlacaꞌatalh ni xacꞌajuni ju lapanacni ixlacata ju Cristo Jesús.
\v 10 Va ictapaininiputunan ixlacata ju Onésimo. Ju yuchi tachi quintsꞌalh junita ni quitꞌin ju icjunilh ixchivinti Dios ju ani junta ictꞌalhnucanta chai ju yuchi lhilacaꞌalh ju Jesús.
\p
\v 11 Iccꞌatsai ni jantu xaꞌaktaijuyan ju pꞌulhnan. Para ju chavai quiꞌaktaijui ju quitꞌin chai caꞌaktaijuyan vachuꞌ ju uxintꞌi.
\v 12 Pus ju chavai icmalakachanichokoyachan. Amaklhtꞌayanch ni slivasalh na icmapaini ju yuchi.
\v 13 Ju quitꞌin va laich acchꞌapaꞌula tachi ju va qꞌuimalakꞌachꞌanitꞌachitꞌach. Ju chunch tachi ju va junch uxintꞌi ju aqꞌuinchꞌalhcꞌatnanilh ju ani junta ictꞌalhnucanta va ixlacaꞌatalh ni xacꞌajuni ju lapanacni ju chivinti ixlacata ju Jesús.
\v 14 Para jantu tuꞌuꞌ icnaviputun ni jantu tuꞌuꞌ xaqꞌuiꞌuni. Ju chunch ju lamapainin ju aqꞌuinavinipꞌutꞌu jantu chunch cava tachi ju va lacatapꞌastu ju acsqꞌuinin. Va iclacasqꞌuin ni vasalh laꞌixlhichux miꞌalhunut ju anaviyaꞌ.
\v 15 Jantu xcai ni yuchi xalhimacoꞌulayan ju Onésimo lakatꞌui lakatꞌutu malhquiyuꞌ ni laich amaklhtꞌayanankꞌalhiyaꞌ.
\v 16 Para ju chavai jantu alaktsꞌi ju yuchi tachi ju va milapanac junita. Ju chavai alaktsꞌintꞌich tachi tam xamatiꞌ ju na tuꞌuꞌ lhiulatꞌi. Ju chavai acꞌatsꞌatꞌich ni milakꞌau junita laꞌixmacni Jesús. Pus ju quitꞌin slivasalh icmapaini. Pus ja va a ti uxintꞌi jantu atꞌimapꞌainitꞌi ni mintꞌalapanac junita chai ju chavai vachuꞌ milakꞌau laꞌixmacni ju Jesús junita.
\p
\v 17 Pus ni miꞌamigo qꞌuilhimispꞌai pus amaklhtꞌayanch ju Onésimo tachi ju va junch quitꞌin cava.
\v 18 Chai ni navinitan tuꞌuꞌ macxcai u tuꞌuꞌ lhiꞌaniyan pus quitꞌin ju acmapalaꞌ.
\v 19 Quitꞌin quiꞌakstu ictsꞌokꞌulatach ju ani chivinti junta icjunan ni quitꞌinch ju acmapalaꞌ ni tuꞌuꞌ lhiꞌaniyan. Para tun tꞌicꞌaptꞌi ni palai kꞌai lamapainin ju xacnaviniyan acsni tavanan icmasunin ixchivinti Dios chai xalhilacꞌapꞌin ju Jesús.
\v 20 Pus ji quilakꞌau aqꞌuinavininch ju ani lamapainin ju icsqꞌuiniyan ni vachuꞌ lhilacꞌapꞌintꞌach ju Jesús tachi ju quitꞌin. Chai ni quilakꞌauꞌat laꞌixmacni ju Cristo pus amakꞌankꞌachꞌatꞌi ju quiꞌalhunut.
\p
\v 21 Pus ni iccꞌatsaich ni alacꞌaꞌiyaꞌich ju tuchi icjunan yuchi iclhiꞌatsꞌoknunitanch ju ani chivinti. Chai iccꞌatsaich ni jantu va yuchi ju anaviyaꞌ tachi ju icjunan para palai lhu ju anaviyaꞌ.
\v 22 Vachuꞌ aqꞌuilakꞌasilakꞌoxinin junta lai acꞌastacnanaꞌ. Pus ni va tachi atꞌapꞌaininiyaꞌ ju Dios ju quilacata ta tsꞌa jantu calacasqꞌuinaꞌ ju Dios ni laich acꞌantachau lalaktsꞌinin.
\s1 Amacꞌaminin ju Pablo
\p
\v 23 Macꞌamiyan ju Epafras ju quintꞌatachꞌin junita ni vachuꞌ ajuni ju lapanacni ixlacata ju Cristo Jesús.
\v 24 Vachuꞌ taꞌamacꞌaminin ju Marcos chai ju Aristarco chai ju Demas chai ju Lucas. Ju yuꞌunch vachuꞌ tajuni ju lapanacni ixlacata ju Jesús.
\p
\v 25 Ictapainini ju Jesucristo ni catanaviniyan lamapainin minchuxꞌan ju uxijnan. Vasalh chunch icsqꞌuini.