\id JAS
\ide UTF8
\h SANTIAGO
\toc1 SANTIAGO
\mt1 JU ALHIQUI JU ATSꞌOKNULH JU SANTIAGO
\c 1
\s1 Ju Santiago amacꞌami ju ixtꞌaꞌamachivinti ju amakpitsicanta
\p
\v 1 Ju quitꞌin icSantiago. Ixlapanac icjunita ju Dios chai ju quiꞌucxtinꞌan Jesucristo. Va iclamacꞌamiyau ju uxijnan ju quintꞌaꞌamachivinti untꞌatꞌit ju vachuꞌ lhilacꞌapꞌintꞌatꞌit ju Cristo para va makpꞌitsꞌicꞌantꞌatꞌit ju ani lacamunutpaꞌ.
\s1 Dios ju amamachakxaninin tamalhch ju kꞌox lhiulai chai tamalhch ju jantu
\p
\v 2 Quiꞌalakꞌavin slivasalh alhikꞌachꞌantꞌit acsni tijlhu alin ju makꞌalhkꞌajnat ju lamiꞌatsucuntiꞌan.
\v 3 Alhikꞌachꞌantꞌit ni cꞌatsꞌayatꞌit ni palai lai atꞌastꞌucnitꞌit va tuchi camilh lamiꞌatsucuntiꞌan acsni va tachi alhilacꞌapꞌitꞌit ju Dios mas amakꞌalhkꞌajnantꞌit.
\v 4 Pus jantu asamakꞌantꞌit ju tuꞌuꞌ makꞌalhkꞌajnat ju taxtakniyan ju Dios. Lhikꞌach amaklhtꞌaꞌitꞌit. Chai acsni tavanan lai chunch alatꞌit pus tasui ni ixlhichux miꞌalhunutꞌan ju lhilacꞌapꞌintꞌatꞌit ju Cristo chai jantu tuꞌuꞌ tamakꞌancꞌacxnitan laꞌixmacni Dios.
\p
\v 5 Ni alin xamatiꞌ ju milhiꞌuxijnan ju tulai machakxai tamalhch ju kꞌox lhiulai ju Dios chai tamalhch ju jantu pus chach tapainini ju Dios chai ju yuchi camamachakxaniyaꞌ. Ju Dios na lai amamachakxaninin chai ju yuchi jantu kꞌaji ju tapaininich.
\v 6 Para acsni catapaininiyaꞌ tasqꞌuini ni calacaꞌiyach ni camamachakxaniyaꞌ ju Dios. Jantu va tam tam canaulh. Ju va tam tam najun chai jantu va lakatam navita ju ixꞌalhunut pus chunch junita tachi ju xcan acsni lacatam lacatam sun lhiꞌan ju un.
\v 7 Pus ju lapanac ju chunch lai jantu canaulh ni caxtakniyaꞌ ju tuchi xasqꞌuini ju quiꞌucxtinꞌan Dios.
\v 8 Pus ju anuꞌ lapanac ju lakatꞌui navi ixꞌatalacpastꞌacꞌat jantu lai tuꞌuꞌ vas najun.
\p
\v 9 Ju tam quilhilakꞌauꞌan laꞌixmacni Jesús ju va quilhpatiniꞌ chach lhikꞌachalh ni lakꞌayacanta ni navicanta isꞌaskꞌatꞌa Dios.
\v 10 Chai ju tam quilhilakꞌauꞌan ju na makꞌaliꞌ chach lhikꞌachalh ni malacatꞌicstꞌicalh ni jantu tuꞌuꞌ lhiulacan ni lhilacaꞌanta ju Cristo. Pus ju Dios mamachakxani ni jantu tuꞌuꞌ ixtapalh ju ixmakꞌalit. Chai mamachakxani ni va tam pantsꞌiquis lai canilh. Chai chunch ju catapasalh laꞌisꞌatsucunti tachi ju tuꞌuꞌ xanti ju va tsꞌalhti xixa.
\v 11 Acsni caxajtachilh ju avilhchan ni na lhiꞌichich cajunaꞌ pus ju xaxanti capatajuniyaꞌ. Chai jantu vana na cꞌusich tasui. Pus vana va chun ju tam makꞌaliꞌ. Lai canilh va tam pantsꞌiquis mas tꞌajun makꞌaixtoknuꞌ ju ixmakꞌalit.
\s1 Tasqꞌuini ni catastucnikꞌoyau ju quimakꞌalhkꞌajnatꞌan
\p
\v 12 Na kꞌachan ju lapanac ju lai tastucni ju ixmakꞌalhkꞌajnat. Jantu najun ni va ixlhiyuchi camaconaꞌ ixti ju Dios. Pus ju yuchi acsni laktsꞌintanucanta chai tasui ni lai tastucni ju makꞌalhkꞌajnat chai jantu tam najun mas mamakꞌalhkꞌajnican pus caꞌamaklhtayananach ju ixtalhaja ju akꞌalhtasunitach ju Dios tachi chun ju vasalh tamapaini. Yuchi ni caꞌalinaꞌ ju isꞌatsucunti ju conkꞌalhiyanta ju lactꞌiyan.
\v 13 Ni alin xamatiꞌ ju mapastꞌacꞌanican ju tuꞌuꞌ macxcai pus jantu catinaulh ni Dios ju mapastꞌacꞌani chai ixlhiyuchi lai canavilh. Ju Dios jantu lai mapastꞌacꞌanican ju tuꞌuꞌ macxcai nin camapastꞌacꞌani tuꞌuꞌ macxcai ju akꞌantam.
\v 14 Para ni na lhu tanun ju macxcai ju laquiꞌalhunutꞌan ju naviputunau pus yuchi va tsa lhipastꞌacꞌau ju macxcai. Chai ni na kꞌox ju lhiulayau ju pastꞌacꞌau pus putaꞌokxchokꞌoyau.
\v 15 Chai acsni kꞌachaniyau ju tuꞌuꞌ macxcai pus alactuꞌununau acsni naviyauch. Chai acsni va tsa caꞌalactuꞌunulh tam xamatiꞌ pus yuchi lhimacaꞌancan junta jonkꞌalhita makꞌalhkꞌajnat.
\p
\v 16 Ji quiꞌalakꞌavin jantu atꞌaꞌokxchꞌokꞌotꞌit. Ju Dios jantu xtꞌakꞌa ju tuꞌuꞌ macxcai.
\v 17 Para tachi chun ju xtaknicantau ju kꞌox chai tachi chun ju xtaknicantau ju aktsai talaclhman ju minacha. Yuchi ju Dios ju macamin. Yuchi ju navikꞌolh tachi chun ju tamapulhcui. Pus ju anuꞌ ju mapulhcui aktamixnin kꞌox mapulhcui chai aktamixnin jantu kꞌox lai tasui. Para ju Dios jantu va tam tam junita. Nin lacatsꞌunin ju va astan tam canaulh.
\v 18 Ju yuchi laꞌixkꞌachat isꞌakstu quintanavitan isꞌaskꞌatꞌan acsni lacaꞌiniuch ju ixchivinti. Chai ju yuchi stavasalanti. Chai ni quintanavitan isꞌaskꞌatꞌan pus alin tuꞌuꞌ ju palai kꞌox ju aquintaxtakniyan ju quijnanꞌan. Palai jantu na chun catiꞌaxtaknilh tachi chun ju aliꞌ taxtokni ju navita ju Dios ju ani lacatꞌun.
\s1 Tasqꞌuini ni chani cava ju quiꞌatsucuntiꞌan ni vasalh talhoniyau ju Dios
\p
\v 19 Ji quiꞌalakꞌavin tasqꞌuini ni tachi chun ju quijnanꞌan va lhikꞌach cakꞌasmatꞌauch ju ixchivinti Dios. Para jantu vatsꞌalhti canonau ju tuꞌuꞌ chai jantu vatsꞌalhti catalhkꞌamnau.
\v 20 Pus ni va catalhkꞌamnau jantu lai aquintajunan ju Dios ni sok ju naviyau.
\v 21 Pus ixlhiyuchi amacꞌaꞌuntꞌit tachi chun ju macxcai chai tachi chun ju tamalhquiliquiniyan ju miꞌatsucuntiꞌan. Chai alacꞌaꞌikꞌotꞌit chux ixchivinti Dios ju kꞌasmatꞌatꞌit chai jantu asamakꞌantꞌit. Pus ni alacꞌaꞌikꞌoyaꞌitꞌit pus atꞌakꞌalhtꞌaxtꞌuyaꞌitꞌit.
\p
\v 22 Para amuctꞌaxtꞌutꞌit tachi ju najun laꞌixchivinti Dios. Tun va anaꞌuntꞌit ni va yuchi ju tasqꞌuini ni akꞌasmatꞌit. Ni va chunch ju anaꞌuntꞌit pus va okxchꞌokꞌocꞌanatꞌit miꞌakstuꞌan.
\v 23 Ni alin xamatiꞌ ju va kꞌasmatꞌa ju ixchivinti Dios para ni jantu muctaxtui tachi ju najun pus ju yuchi chunch junita tachi tam lapanac ju laktsꞌin ixmakꞌantsastꞌilit laca tuꞌuꞌ speo.
\v 24 Ju yuchi laktsꞌinchokocan isꞌakstu chai an alacatam chai lana cꞌapꞌa ta yu junitach ju ixꞌucxpuꞌ.
\v 25 Pus lhikꞌach catsucuyaꞌ ju lapanac ju kꞌasmatꞌa ixchivinti Dios chai va tachi navi cuenta chai muctaxtui chai jantu va cꞌapꞌa ju tuchi kꞌasmatꞌa. Pus ixchivinti Dios sok najun chai acsni lacaꞌinican ju yuchi pus palai jantu na tachapun jun ju alactuꞌunti laquiꞌatsucuntiꞌan.
\p
\v 26 Ni xamatiꞌ najun ni lakꞌayai ju Dios para ni jantu lhistꞌacꞌa ju isimakꞌat pus va okxchokꞌocan isꞌakstu. Jantu lhitapalai mas najun ni lakꞌayai ju Dios.
\v 27 Pus ju quimpaiꞌan Dios najun ni xamatiꞌ talhoni laꞌixlhichux ixꞌalhunut chai tachi ju kꞌachani ju yuchi pus chach alh aꞌaktaijunuꞌ ju quilhpatinin askꞌatꞌan ju alin ixmaktasqꞌuinitꞌan chai ju chakolun ju animacontilacanta. Vachuꞌ calhistaccalh ni jantu vana va chun calalh tachi ju talai ju jantucaꞌ talhilacaꞌanta ju Cristo.
\c 2
\s1 Vaklhtam chun alaktsꞌintꞌit ju mintꞌalapanacniꞌan
\p
\v 1 Quiꞌalakꞌavin ju uxijnan vachuꞌ lhilacꞌapꞌintꞌatꞌit ju quiꞌucxtinꞌan Jesucristo ju xakꞌai junita ju lactꞌiyan. Pus tasqꞌuini ni vaklhtam chun alaktsꞌintꞌit ju mintꞌalapanacniꞌan.
\v 2 Junta tꞌakꞌaixtꞌokꞌatꞌit jantu xcai ni catanucha pumatam lapanac ju mactanun ixmactanut ju si oro chai na kꞌox malakchꞌininta. Chai vachuꞌ catanucha pumatam quilhpatiniꞌ ju jantu kꞌox malakchꞌininta.
\v 3 Para jantu kꞌox cava ni palaich tuꞌuꞌ alhiulatꞌit ju na kꞌox malakchꞌininta chai chanich aꞌunitꞌit: “Anich atꞌaꞌulh ju uxintꞌi lacakꞌox putolan”. Para ju anuꞌ quilhpatiniꞌ chanich aꞌunitꞌit: “Anuch atꞌayachiꞌ ju uxintꞌi u ani atꞌaꞌulh lacatꞌun vanin laquintantsꞌi”.
\v 4 Pus acsni chun ju aꞌulhtꞌutꞌit lana tasui ni jantu vaklhtam chun ju laktsꞌinatꞌit ju mintꞌalapanacniꞌan. Chai ju chunch va untꞌatꞌit tachi ju tam ucxtin ju va kꞌachani tumin.
\p
\v 5 Para alaktsꞌintꞌit ji quiꞌalakꞌavin. Ju Dios asacxtuta ju aliꞌin quilhpatinin. Chai ju yuꞌunch palai makꞌalinin tajunita laꞌixmacni Dios ni talhilaksich ju Jesucristo. Palai jantu ju tatasui tachi makꞌalinin ju ani lacamunutpaꞌ. Chai ju yuꞌunch catatanuyanta ju lactꞌiyan junta lhinajun ju Dios. Pus ju Dios kꞌalhtasuta ni laich catatanuyanta tachi chun ju tamapaini ju yuchi.
\v 6 Para ju uxijnan ni jantu vaklhtam chun laktsꞌinatꞌit ju tamin junta tꞌakꞌaixtꞌokꞌatꞌit pus pꞌutꞌalacꞌasuyatꞌit tachi ju va jantu tuꞌuꞌ lhiulayatꞌit ju quilhpatinin. Para jantu yuꞌunch ju na quintalhimakchapuyan. Alai yuꞌunch ju makꞌalinin ju quintalhimakchapuyan chai quintachivimakꞌanan ju quijnanꞌan lacapuꞌucxtin.
\v 7 Chai yuꞌunchach ju tanajun macxcai chivinti ixlacata ju Cristo. Chai ju quijnanꞌan ni isꞌaskꞌatꞌan jumpalhtau.
\p
\v 8 Pus na kꞌoxich ju naviyatꞌit acsni vasalh muctꞌaxtꞌuyatꞌit tachi ju najun laꞌixlhamapꞌaksin ju quiꞌucxtinꞌan Dios. Pus ju anch najun ni amapꞌainitꞌit ju mintꞌalapanacꞌan tachi ju va jun miꞌakstuchꞌan ju mapꞌainichꞌokꞌocꞌanatꞌit.
\v 9 Para ni jantu vaklhtam chun ju alaktsꞌinatꞌit ju lapanacni pus alactuꞌunti ju naviyatꞌit. Chai laktsꞌincꞌantꞌatꞌit lacalhamapꞌaksin tachi ju alactuꞌunin untꞌatꞌit.
\v 10 Pus va tichi chavaich ju navi mas va lakatam talakꞌalhin lakꞌalhi ju lhamapꞌaksin mas camuctaxtukꞌo chux ju aliꞌ tachi ju najun ju anch.
\v 11 Pus Dios ju naulh ni jantu atꞌatsꞌucꞌutꞌit ju jantu miꞌamachakaꞌan u ju jantu mimpapaꞌan. Chai yuchi ju vachuꞌ naulh ni jantu alamaknitꞌit. Pus ju uxintꞌi mas jantu amaknitꞌi tam lapanac para ni tꞌatsꞌucꞌui ju jantu mimpapa u ju jantu miꞌamachakaꞌ pus lakꞌalhitꞌach ju ixlhamapꞌaksin Dios.
\v 12 Pus chunchach ju achꞌivinintꞌit chai chunchach ju atsꞌucꞌutꞌit tachi ju lhijunch ni alaktsꞌincꞌanaꞌitꞌit laꞌixlhamapꞌaksin Dios. Pus ju ixchivinti Dios sok najun chai acsni lacaꞌinican ju yuchi pus palai jantu na tachapun jun ju alactuꞌunti laquiꞌatsucuntiꞌan.
\v 13 Pus acsni camakꞌosaspitcanach ju lapanacni pus ju jantu ixꞌaꞌaktaijunun lacaꞌamapaininti pus nin yuchi jantu caꞌaktaijucanaꞌ lacaꞌamapaininti. Para ju aꞌaktaijunun lacaꞌamapaininti pus caꞌaktaijucanaꞌ vachuꞌ lacaꞌamapaininti acsni camakꞌosaspitcanach.
\s1 Jantu lhitapalai quiꞌalacaꞌinti ni jantu acnavi ju kꞌox
\p
\v 14 Quiꞌalakꞌavin jantu lhitapalai ni xamatiꞌ najun ni lhilacaꞌanta ju Jesús para ni jantu navi ju kꞌox. Ju anicꞌach va najun ju chunch jantu catitakꞌalhtaxtulh ni jantu caꞌalh ju lacajipi.
\v 15 Jantu xcai ni caꞌalilh tam milakꞌau laꞌixmacni Jesús ju matiꞌ ixpumpuꞌ chai jantu lhijun ju ixvaiti ju caꞌulh tuncujun tuncujun.
\v 16 Chai ju pumatam ju milhiꞌuxijnan jantu xcai ni va chani cajunilh: “Asta lhich. Ta tsꞌa jantu alhitꞌaꞌuyaꞌ ju mimpumpuꞌ ju casastucnin ju lhicꞌasnin chai laich alhitꞌaꞌuyaꞌ ju na canch alhivenaꞌ”. Pus ni va chunch ju cajunilh para ni jantu caxtaknilh tuꞌuꞌ ju maktasqꞌuini pus tis kꞌoxich ju navini.
\v 17 Pus ju chunch navi jantu lhitapalai mas najunch ni lhilacaꞌanta ju Jesús.
\p
\v 18 Para jantu xcai ni xamatiꞌ chani canaulh: “Ma alin lapanacni ju talhilacaꞌanta ju Jesús mas jantu tuꞌuꞌ kꞌox ju tanavi. Para ju aliꞌin ma va yuchi ni tanavi ju kꞌox”. Pus ni xamatiꞌ chunch canaulh chani acjunilh: “Ni jantu tuꞌuꞌ kꞌox ju navi pus tas laich acpucꞌatsayach ni vasalh lhilacꞌapꞌintꞌach ju Jesús. Ju quitꞌin acpulamasuniyau ni vasalh iclhilacaꞌanta ju Jesús ju tuchi kꞌox icnavi”.
\v 19 Pus ju aliꞌin lamilhiꞌuxijnan tanajun ni jantu tasqꞌuini ni acnavi tuꞌuꞌ ju kꞌox. Va yuchi ni aclacaꞌilh ni va pumatam ju Dios. Na kꞌoxich. Para jantu va yuchi ju lacasqꞌuin ju Dios. Alaktsꞌintꞌit ju lhacaticurulhni. Ju yuꞌunch talacaꞌi ni va pumatam ju Dios chai na taꞌaxqꞌuipꞌipꞌitnin ni na tatalhoni tuchi caꞌanaviyaꞌ ju Dios.
\v 20 Ja lana jantu machꞌakxayatꞌit ji tontojni lapanacni ju chunch nonatꞌit. Ja va jantu machꞌakxayatꞌit ni jantu lhitapalai ni acnaulh ni iclhilacaꞌanta ju Jesús acsni jantu acnavi tuꞌuꞌ ju kꞌox.
\v 21 Alaktsꞌintꞌit ju makꞌaniya quimpaiꞌan Abraham. Ju Dios laktsꞌilh ni na salaka ixjunita ju ixꞌalhunut laꞌixmacni acsni makꞌaxtaklh ju istsꞌalh ju Isaac ixjuncan. Ju yuchi ixmucꞌata ju istsꞌalh junta ixmakniputun tachi ju junilh ju Dios.
\v 22 Pus lana tasui ni lhilacaꞌalh ju Dios ju Abraham para vachuꞌ navilh ju kꞌox. Pus ju tuchi navilh putasulh ni vasalh ixlhilacaꞌanta ju Dios.
\v 23 Chai acsni navilh ju chunch ju Abraham pus uctaxtulh junta chani tsꞌokcanta laꞌixchivinti Dios: “Ju Abraham ni quiclacaꞌilh ju Dios pus ju yuchi ma laktsꞌilh ni na salaka ixjunita ju ixꞌalhunut laꞌixmacni yuchi”. Chunch ju najun junta tsꞌokꞌulacanta ju ixchivinti Dios. Pus ju Abraham lhimispacalh ixꞌamigo Dios.
\p
\v 24 Pus lana tasui ni Dios jantu laktsꞌin ni soknicꞌa cava ju isꞌatsucunti tam lapanac acsni anicꞌach va najun ni lhilacaꞌanta ju yuchi. Para ju yuchi laktsꞌin ni soknicꞌa ju isꞌatsucunti acsni vachuꞌ navi ju kꞌox.
\v 25 Chai vana va chun ju anuꞌ chakoꞌulh ju Rahab ixjuncan. Ju yuchi xanavin lacati ixjunita. Para ju Dios laktsꞌilh ni soknicꞌa ixjunita ju isꞌatsucunti acsni amaklhtayanalh ju israelitanin ju ixꞌamalakachatachilh ju Josué. Chai amakꞌalhtaxtulh laꞌixmacaꞌan ju ixꞌatꞌalaxcaiꞌan acsni apumalakachachokolh kakꞌantamch ti acsni taꞌanchokolh junta ixtamintacha.
\v 26 Tachi ju quilacatunaꞌan ni jantu tuꞌuꞌ ixtapalhni jun acsni va niyau chai taxtui ju quintacuvinꞌan pus vana va chun ju quijnanꞌan ju nonau ni lhilacaꞌantau ju Jesús. Jantu tuꞌuꞌ ixtapalhni ju quinchivintiꞌan ni canonau ni lhilacaꞌanauch ju yuchi ni jantu naviyau tuꞌuꞌ ju kꞌox.
\c 3
\s1 Laquinquilhniꞌan nonau ju macxcai
\p
\v 1 Quiꞌalakꞌavin palai kꞌox cava ni jantu lhu milhiꞌuxijnan ju aꞌuntꞌit amamakaꞌunin. Cꞌatsꞌayatꞌit ni palai aquintamamakꞌalhkꞌajniyan ju Dios ju quijnan ju amamakaꞌunin icjuntau ni jantu sok acꞌamalanininau. Palai jantu ju va lapanacni.
\v 2 Quinchuxꞌan quijnanꞌan na paklhu ju kꞌalhkꞌosau ju laquiꞌatsucuntiꞌan. Ni alin cava xamatiꞌ ju jantu cakꞌalhkꞌoslh laꞌixchivinti pus ju yuchi vasalh salakach cava ju isꞌatsucunti. Chai laich calhistackꞌo tachi chun ju ixlacatuna.
\v 3 Ju quijnanꞌan maquilhtanuyau ixfreno ju caballo ni laich camalacaꞌiniuch. Chai mas va lacatꞌicstꞌi ju freno para lai lhinonkꞌojui chux ixlacatuna.
\v 4 Vachuꞌ chunch ju barco. Mas na kꞌai chai na lai sun lhiꞌan ju kꞌai un chai mas va lacatꞌicstꞌi ju qꞌuiu ju pulacnavilhiꞌancan para lai pulhiꞌan ju amanavin vanta anchach ju pulhiꞌamputun.
\v 5 Pus vachuꞌ na lacatꞌicstꞌi ju quisimakꞌatꞌan para na lai alakꞌalhinin. Alaktsꞌintꞌit ju jipi. Mas va lacatꞌicstꞌi ju acmama ju lacaqꞌuivin na kꞌai ju calhcuyaꞌ.
\v 6 Pus ju quisimakꞌatꞌan tachi ju tuꞌuꞌ jipi junita. Pus ju macxcai chivinti ju nonau anchach ju minacha junta alin ju jipi junta jonkꞌalhita makꞌalhkꞌajnat. Va ixlacata quisimakꞌatꞌan na lhu pꞌun ju amacxcai. Ju yuchi tanun laquilacatunaꞌan chai lai lakꞌalhikꞌojui chux ju quilacatunaꞌan. Chai vachuꞌ lai lakꞌalhini isꞌatsucunti ju aliꞌin lapanacni.
\v 7 Tachi chun ju atapacxat chai ju tuꞌuꞌ tsꞌokꞌo chai ju tuꞌuꞌ tsapu chai ju tuꞌuꞌ atumpa atapacxat ju alin ju lacaꞌalama lai mamansulacan chai tamamansulata ju lapanacni.
\v 8 Para jantu xamatiꞌ lai mamansulai ju quisimakꞌatꞌan ju va laꞌisꞌakstu. Ju quisimakꞌatꞌan na kꞌai junita. Chai jantu lai malacaꞌinican tuꞌuꞌ. Ju laquisimakꞌatꞌan lai lakꞌalhiniyau isꞌatsucunti apumatam.
\v 9 Laquisimakꞌatꞌan nonau ni na kꞌox ju quimpaiꞌan Dios. Chai vana yuꞌ ju pujunchokoyau macxcai ju tam quintꞌalapanacꞌan ju ixtꞌachunch navicanta tachi ju Dios. Lai acnaulh ni ixtꞌachunch Dios ju navicantauch ni alacpastꞌacꞌau chai amapainiyau chai lhitsꞌisiyau ju tuꞌuꞌ macxcai tachi ju lai ju Dios.
\v 10 Pus laquinquilhniꞌan lai nonau ju kꞌox chai lai nonau ju macxcai chivinti. Pus ji quiꞌalakꞌavin jantu kꞌox ni chunch ju layau.
\v 11 Junta taxtui ju xcan jantu lai tijtꞌui ixtacanit cava. Jantu lai na canch cava chai vana na xkꞌejni cava.
\v 12 Quiꞌalakꞌavin ju tuꞌuꞌ xaqꞌuiu higo jantu lai catixtaklh ju xatocꞌat ju olivos. Chai ju xaqꞌuiu uvas jantu lai catixtaklh ju xalhiꞌut ju higo. Pus chunchach vachuꞌ junta taxtui ju xcan. Jantu lai skꞌokꞌo cava chai vana na canch. Pus vana va chun ju quinquilhniꞌan. Jantu lai chꞌatꞌui atinaulh.
\s1 Ju kꞌox tacꞌatsan lactꞌiyan ju minacha
\p
\v 13 Ju lamilhiꞌuxijnan ja alin lapanacni ju na taꞌacꞌatsananta chai taꞌamachakxanan. Ni alin pus catasuyaꞌ ni vasalh taꞌacꞌatsananta ni na kꞌox ju isꞌatsucuntiꞌan. Chai caputasuyaꞌ acsni jantu talhitakꞌayai ju tuꞌuꞌ kꞌox ju tanavita.
\v 14 Para ni na axcꞌayananatꞌit chai va navipꞌutꞌunatꞌit minkꞌachatꞌan miꞌakstuꞌan pus jantu anaꞌuntꞌit ni na acꞌatsꞌanantꞌatꞌit. Pus ni nonatꞌit ni acꞌatsꞌanantꞌatꞌit mas alin ju chunch atalacpastꞌacꞌat lamiꞌalhunutꞌan pus va tꞌaꞌaklhtꞌamayatꞌit.
\v 15 Ju lapanac ju chunch lai jantu lai catinaulh ni yuchi ju Dios ju xtaknilh ju istacꞌatsan. Ju chun tacꞌatsan va xaꞌatalacpastꞌacꞌat ju ani lacamunutpaꞌ. Va laꞌixꞌalhunut isꞌakstu ju minacha. Chai yuchi ju lhacaticuru ju mapastꞌacꞌani ju chunch.
\v 16 Pus junta taꞌalin ju lapanacni ju taꞌaxcayanan chai va ixkꞌachatꞌan isꞌakstuꞌan ju tanaviputun pus vachuꞌ alin ju lasat chai tachi chun ju amacxcai.
\v 17 Para ju Dios vilhcha lactꞌiyan chai yuchach ju xtꞌakꞌa ju kꞌox tacꞌatsan. Chai ju xtaknican ju chunch tacꞌatsan na salaka ju ixꞌatalacpastꞌacꞌat. Chai ju yuchi jantu kꞌachani ju lasat. Na cꞌus lapanac junita. Chai lai malacaꞌinican tuꞌuꞌ. Na aꞌaktaijunun lacaꞌamapaininti. Chai va tachi navich ju kꞌox. Ju yuchi vaklhtam chun alaktsꞌin ju ixtꞌalapanacni chai jantu acxputꞌiyunun.
\v 18 Chai ju anuꞌ lapanacni ju jantu takꞌachani ju lasat para kꞌox alactꞌalalhiꞌan ju aliꞌin lapanacni pus soknicꞌa jun ju isꞌatsucuntiꞌan isꞌakstuꞌan.
\c 4
\s1 Jantu chun calau tachi ju talai ju aliꞌin lapanacni
\p
\v 1 Ju uxijnan na laclasayatꞌit chai na laclakꞌayatꞌit. Para ju yuchi minacha lamiꞌalhunutꞌan junta va talaclasai ju miꞌatalacpastꞌacꞌatꞌan ju navipꞌutꞌunatꞌit. Va talaclasai ni alin ju kꞌox chai alin vachuꞌ ju jantu kꞌox.
\v 2 Pus alin ju tuchꞌi pꞌacxampꞌutꞌunatꞌit chai ni jantu lai amaklhtꞌayananatꞌit pus va lai alamaknitꞌit. Chai lhacchꞌiꞌinatꞌit ju ixtaxtokni ju aliꞌin chai ni jantu lai latꞌaiꞌiniyatꞌit pus va laclakꞌayatꞌit chai lasayatꞌit. Para va jantu pꞌacxantꞌatꞌit tuchꞌi lacꞌasqꞌuinatꞌit ni va jantu sqꞌuiniyatꞌit ju Dios.
\v 3 Chai acsni sqꞌuiniyatꞌit ju Dios jantu amaklhtꞌayananatꞌit ni jantu kꞌox ju miꞌatalacpastꞌacꞌatꞌan. Pus va lhu ju lacꞌasqꞌuinatꞌit ni lai alhakꞌamanantꞌit.
\v 4 Ju uxijnan chunch untꞌatꞌit tachi ju tam chakoꞌulh ju lactuꞌui ju ixpapa. Ju uxijnan lactꞌuꞌuyatꞌit ju Dios ni va kꞌachꞌaniyatꞌit ju xataxtokni ju ani lacamunutpaꞌ. Tachi ju va jantu cꞌatsꞌayatꞌit ni ixtꞌalaxcai Dios junita va tichi chavaich ju na kꞌachani tachi ju talai ju jantucaꞌ talhilacaꞌanta ju Jesús. Pus va tichi chavaich ju najun ni yuchach ju kꞌachani tachi ju takꞌachani ju yuꞌunch ju jantucaꞌ talhilacaꞌanta ju Jesús pus ju yuchi ixtꞌalaxcai Dios junita.
\v 5 Jantu va anaꞌuntꞌit ni va kꞌaya najun ixchivinti Dios ju tsꞌokꞌulacanta junta ma chani najun: “Ju iSpiritu Santu Dios ju tꞌajun laquiꞌalhunutꞌan ma na lacasqꞌuin ni ixꞌanuꞌ cajonkꞌo chux ju quiꞌatsucuntiꞌan”.
\v 6 Para mas aktamixnin jantu xtaknikꞌoyau chux ju quiꞌatsucuntiꞌan para ju Dios kꞌai lamapainin quintanaviniyan ni laich xtaknikꞌoyau ju quiꞌatsucuntiꞌan. Yuchi lhinajun ju Dios laꞌixchivinti ju tsꞌokꞌulacanta ni ma va alacmajkꞌan ju va talhitakꞌayai ju tuꞌuꞌ. Para ma anavini lamapainin ju jantu tuꞌuꞌ talhitakꞌayai.
\v 7 Pus yuchi alhilakꞌaꞌitꞌit ni calhinonkꞌoyaꞌ ju Dios chux ju miꞌatsucuntiꞌan. Asamakꞌantꞌit ju tuchi tamapastꞌacꞌaniyan ju lhacaticuru chai ju yuchi catalackꞌosan.
\v 8 Ixlhichux miꞌalhunutꞌan va tachi apꞌastꞌactꞌit ju Dios chai ju yuchi va tachi cataꞌaktaijuyan. Ji alactuꞌunin amacꞌaꞌuntꞌit ju alactuꞌunti ju va tsa tsa naviyatꞌit. Pus uxijnan ju mapꞌainipꞌutꞌunatꞌit ju Dios chai vana navipꞌutꞌunatꞌit ju xataxtokni ju ani lacamunutpaꞌ salaka anavitꞌit ju miꞌalhunutꞌan laꞌixmacni Dios.
\v 9 Chach taxcanin ju miꞌalhunutꞌan ixlacata ju tuchi amacxcai ju navitꞌatꞌit. Amakꞌaninintꞌit chai alackꞌalhuntꞌitch. Jantuch vana alactsꞌiꞌintꞌit. Para alackꞌalhuntꞌit. Jantu vana alackꞌachꞌantꞌit. Para amakꞌaninintꞌitch ixlacata ju tuchi amacxcai ju navitꞌatꞌit.
\v 10 Atꞌalacꞌatꞌicstꞌitꞌit laꞌixmacni ju quiꞌucxtinꞌan Dios chai ju yuchi catalakꞌayayan ju lactꞌiyan.
\s1 Jantu macxcai alalhichꞌivinintꞌit
\p
\v 11 Quiꞌalakꞌavin jantu macxcai alhichꞌivinintꞌit ju apumatam. Pus va tichi chavaich ju macxcai lhichivinin ju tam ixlhilakꞌau laꞌixmacni Cristo chai najun ni talakꞌalhin tuchi ju xanavi ju yuchi pus va samakꞌan ju ixlhamapꞌaksin ju Dios junta najun ni calamapainiu ju quijnanꞌan. Tachi ju va canaulh ni jantu chun najun laꞌixlhamapꞌaksin Dios. Chai ni chunch ju navi ju anuꞌ lapanac pus tachi ju va najun ni palai machakxai ju tuꞌuꞌ kꞌox ju canavilh xamatiꞌ. Tachi ju va palai jantu vas najun ju tuꞌuꞌ lhamapꞌaksin.
\v 12 Para va pumatam ju xtaklh ju lhamapꞌaksin. Yuchi ju Dios. Chai va yuchi ju lai mucꞌani ixtalakꞌalhin tam xamatiꞌ. Va yuchi ju lai makꞌalhtaxtui xamatiꞌ u mamakꞌalhkꞌajni. Pus ju uxintꞌi tis chavaichꞌat ni naꞌun ni vachuꞌ lai mucꞌani ixtalakꞌalhin ju mintꞌalapanac.
\s1 Jantu vas anaꞌuntꞌit ju tuchꞌi anaviyaꞌitꞌit lhi tꞌuxam
\p
\v 13 Pus apꞌacxantꞌitcaꞌ lacatsꞌunin ju uxijnan ju chani nonatꞌit: “Ju chavai u lhi acꞌanauch ju anuꞌ lakꞌachakꞌan. Chai anchach ju actolhtachau tachi tam cꞌata. Chai acmalakxtutachauch ju lhistꞌat chai lhu aclhajayau”.
\v 14 Para ju uxijnan jantu cꞌatsꞌayatꞌit tuchi catapasayaꞌ ju alhi. Ju quiꞌatsucuntiꞌan chunch junita tachi ju ixpuquilhau ju tuꞌuꞌ ju tasui pantsꞌiquis chai vatsꞌalhti lakmixchokoi.
\v 15 Palai kꞌox cava ni chanich anaꞌuntꞌit: “Ni calacasqꞌuinach ju quiꞌucxtinꞌan Dios pus catsucuyauch chai chani chani canaviyau”.
\v 16 Para ju uxijnan alai va lhitꞌakꞌayayatꞌit ju tuchi vas nonatꞌit ni anaviyaꞌitꞌit. Para ju chunch na talakꞌalhin.
\v 17 Pus mas acmispa ju kꞌox para ni jantu icnavi pus alactuꞌunti ju icnavi.
\c 5
\s1 Akꞌaican ju makꞌalinin ju talhilaksi ju ixtuminꞌan
\p
\v 1 Pus ju chavai ji makꞌalinin ju lhilaksiyatꞌit ju mintuminꞌan alackꞌalhuntꞌit. Alactꞌasatꞌit ixlacata ju mimakꞌalhkꞌajnatꞌan ju caminaꞌ astan.
\v 2 Ju mimakꞌalitꞌan chunch junita tachi ju tuꞌuꞌ ju na puchꞌitach. Ju mimpumpuꞌan chunch junita tachi ju tuꞌuꞌ pumpuꞌ ju na pacxanta ju xaꞌatsꞌacanaꞌ.
\v 3 Ju miꞌoroꞌan chai ju mimplataꞌan na lacjokstach. Chai ni na jokstach pus anchach caputasuyach ju mintalakꞌalhinꞌan ni na lhu xamakꞌayatꞌit ju mimakꞌalitꞌan. Chai tachi ju tuꞌuꞌ jipi ni na lai lakꞌalhi ju tuꞌuꞌ pus vana va chun ju mimakꞌalitꞌan. Ni va yuchi ju alhilaksitꞌit pus catalakꞌalhiniyan ju miꞌatsucuntiꞌan. Na lhu xamakꞌaixtꞌokꞌatꞌit ju mimakꞌalitꞌan ju chavai avilhchan mas vanin ixꞌaclanti ju lacamunutpaꞌ.
\v 4 Pus ju chꞌalhcatnin ju chakxꞌi ju micebadaꞌan va aꞌokxchꞌokꞌotꞌit ju uxijnan. Jantu aktsai ju xaꞌamapꞌalatꞌit. Chai ju ixtalhajaꞌan ju makꞌatꞌatꞌit cataꞌulaniyan ju mintalakꞌalhinꞌan laꞌixmacni Dios. Chai ju chꞌalhcatnin na talactꞌasai. Chai ju Dios akꞌasmatnilh ju istꞌasatꞌan. Chai ju yuchi xaꞌucxtin junita ixtalhavat taropajni ju si anquilhnin tajunita.
\v 5 Pus ju uxijnan jantu tuꞌuꞌ ixtacꞌacxnitan ju ani lacamunutpaꞌ. Na ixnaviyatꞌit tachi ju ixkꞌachꞌaniyatꞌit. Chunchach junita ju miꞌalhunutꞌan ju chavai tachi ju tuꞌuꞌ atapacxat ju lakꞌonuncantach ni camaknicanach. Ju uxijnan vachuꞌ amamakꞌalhkꞌajnicꞌanaꞌitꞌit.
\v 6 Ju uxijnan mucꞌanitꞌatꞌit ixtalakꞌalhinꞌan ju lapanacni ju soknicꞌa junita isꞌatsucuntiꞌan. Chai lhinaꞌuntꞌit ixmaknicaꞌan. Chai ju yuꞌunch jantu tasastucnitan.
\s1 Jantu jeks aꞌutꞌit. Atꞌachꞌivinintꞌit ju Dios
\p
\v 7 Pus ji quiꞌalakꞌavin jantu jeks aꞌutꞌit mas chunch taꞌulhtuyan. Cꞌatsꞌayatꞌit ni aktsꞌiya caminchokoyaꞌ ju quiꞌucxtinꞌan Jesucristo. Alaktsꞌintꞌit tachi ju lai ju tam cuxtu lapanac. Ju yuchi jantu jeks ui mas jantu sai amaklhtayanan ju xatocꞌat ju ixꞌachꞌananti. Ju yuchi va pacxan tus calayaꞌ ju xcan ju min acsni va ancaꞌ chꞌanlh chai ju xcan ju astan min ni laich catakꞌayayaꞌ ju ixꞌachꞌananti.
\v 8 Pus vachuꞌ chunch atsꞌucꞌutꞌit ju uxijnan. Jantu jeks aꞌutꞌit chai ixlhichux miꞌalhunutꞌan alhilaksitꞌit ju Jesucristo. Cꞌatsꞌatꞌit ni vaninch minta ju avilhchan acsni caminchokoyaꞌ ju yuchi.
\v 9 Jantu alasamucꞌanitꞌit ixlacata ju mimakꞌalhkꞌajnatꞌan. Jantu xcai ni caꞌalilh ju mintalakꞌalhinꞌan ju chunch. Chai ju Jesús yuchi ju tucan kꞌai ucxtin chai ju yuchi vatsꞌalhti caminaꞌ.
\v 10 Quiꞌalakꞌavin alaktsꞌintꞌit ju makꞌaniya ixlapanacni Dios ju ixtanajun ixchivinti. Ju yuꞌunch tajunita tachi ju tuꞌuꞌ lhilaktsꞌintaiti ixlacata quiꞌatsucuntiꞌan ju quijnanꞌan. Ju yuꞌunch jantu jeks xataꞌui mas na lhu ixꞌamamakꞌalhkꞌajnican.
\v 11 Ju quijnanꞌan nonau ni na kꞌox ju isꞌatsucuntiꞌan ju lapanacni ju lai tatastucni ixmakꞌalhkꞌajnatꞌan. Pus ju uxijnan kꞌasmatꞌatꞌit ta yu lai xatastucni ju ixmakꞌalhkꞌajnat ju anuꞌ makꞌaniya lapanac ju Job ixjuncan. Chai vachuꞌ laktsꞌintꞌatꞌit ni na kꞌox ju isꞌatsucunti ju xaxtakni astan ju Dios. Pus ju quiꞌucxtinꞌan Dios chunch ju navilh ni jantu kꞌai junita chai na lai amapaininin.
\p
\v 12 Para ji quiꞌalakꞌavin alin ju tuꞌuꞌ ju na tasqꞌuini ni anavitꞌit. Yuchi ni acꞌaptꞌit ju ixlhipastꞌacꞌa ju Dios ju va tuꞌuch lacatsꞌunin ju naviyatꞌit. Nin yuchi ni lai alhipꞌastꞌactꞌit ju tuꞌuꞌ ju ani lacatꞌun nin yuchi ju tuꞌuꞌ atumpa ju va ixpumavasalacan ju minchivintiꞌan. Vas alaꞌunitꞌit mas va a u jantu. Para ni va lhipꞌastꞌacꞌatꞌit ju Dios u tuꞌuꞌ atumpa ju va ixpumavasalacan ju minchivintiꞌan pus ju Dios catamucꞌaniyan ju mintalakꞌalhinꞌan.
\p
\v 13 Ni alin xamatiꞌ ju milhiꞌuxijnan ju na makꞌalhkꞌajnan chach tapaininilh ju Dios ni caꞌaktaiju. Chai ni alin xamatiꞌ ju na kꞌachan pus chach lakꞌaya ju Dios lacamilhpat.
\v 14 Ni alin xamatiꞌ ju milhiꞌuxijnan ju takꞌankꞌai chach tꞌasanilh ju talhinajun laꞌixtalhavat ju talhilacaꞌanta ju Jesús. Chai anch junta ma ju takꞌankꞌan catasqꞌuiniyach ju Dios ixlacata ju anuꞌ takꞌankꞌan. Chai catalacamucꞌayach ju aceite laꞌixtapakaꞌut ju quiꞌucxtinꞌan Jesús.
\v 15 Chai ni ixlhichux ixꞌalhunutꞌan talacaꞌi ni akꞌasmatni ju Dios acsni tasqꞌuini lamapainin ixlacata ju anuꞌ takꞌankꞌan pus palai cajunaꞌ ju yuchi. Isꞌakstu ju quiꞌucxtinꞌan Jesús ju camakꞌostolayaꞌ. Chai ni alin ju alactuꞌunti ju xanavi chai yuchi lhitakꞌankꞌai pus camacꞌacxanicanach.
\v 16 Alatꞌapꞌaininitꞌit ju milhiꞌuxijnanꞌan ixlacata tuꞌuꞌ macxcai ju lanavinitꞌatꞌit. Chai asqꞌuinitꞌit ixꞌaꞌaktaijunti ju Dios ixlacata ju akꞌantam. Ju chunch ni lai palaich aꞌunaꞌitꞌit acsni atakꞌankꞌayaꞌitꞌit. Ju tam xamatiꞌ ju soknicꞌa isꞌatsucunti laꞌixmacni Dios acsni ixlhichux ixꞌalhunut casqꞌuinilh tuꞌuꞌ ju Dios pus na lhu ju canavinicanach.
\v 17 Ju Elías vachuꞌ va lapanac ixjunita tachi ju quijnanꞌan. Chai ju yuchi ixlhichux ixꞌalhunut ju sqꞌuinilh ju Dios ni jantu calalh ju xcan. Chai lakatꞌutu cꞌata a lakachaxan malhquiyuꞌ jantu lalh ju xcan ju anch.
\v 18 Chai aktam tꞌachivinchokopa ju Dios chai lachokolh ju xcan chai alilh ju xaꞌachꞌananti ju ani lacatꞌun.
\p
\v 19-20 Quiꞌalakꞌavin jantu xcai ni xamatiꞌ ju milhiꞌuxijnan ju va camacaulh ju ixti Dios. Mas yuchi ju stavasalanti. Chai ju apumatam ni caꞌaktaijulhch ni calhilaksichokolh ju Jesús pus chach cꞌatsa ju ani. Pus ju anuꞌ ju xaꞌaktaijui ju anuꞌ alactuꞌunuꞌ acsni ixcapputun ju ixti ju Dios pus puꞌaktaiju ni lai xatakꞌalhtaxtui junta caꞌixjonkꞌalhita ixmakꞌalhkꞌajnat chai na lhu xamacꞌacxanican ju ixꞌalactuꞌunti ju anuꞌ ju xaꞌalactuꞌununta.