\id 1PE
\ide UTF8
\h 1 PITALUꞌ
\toc1 1 PITALUꞌ
\mt1 JU PꞌULHNAN ALHIQUI JU ATSꞌOKNULH JU PITALUꞌ
\c 1
\s1 Ju Pitaluꞌ amacꞌami ju lapanacni ju talhilacaꞌanta ju Jesús
\p
\v 1 Ju quitꞌin icPitaluꞌ. Ixtamalakachan ju Jesucristo icjunita. Chai va iclamacꞌamiyau ju uxijnan ju vachuꞌ lhilacꞌapꞌinatꞌit ju Jesús. Ju uxijnan amachakꞌan makat untꞌatꞌit para makpꞌitsꞌicꞌantꞌatꞌitcaꞌ ju xalacatꞌun Ponto chai ju xalacatꞌun Galacia chai Capadocia chai Asia chai Bitinia.
\v 2 Ju quimpaiꞌan Dios cꞌatsai tuchi catapasayaꞌ mas tucaꞌ tapasai. Pus yuchi ju makꞌanch tasacxtutan ni ixꞌanuꞌ anavicꞌanaꞌitꞌit laꞌixtachaput ju Spiritu Santu. Ju chunch lai aqꞌuiclacꞌaꞌiyaꞌitꞌit ju Dios chai laich cataxacaniyan mintalakꞌalhinꞌan ni lhilacꞌapꞌinatꞌit ju Jesucristo ni nilh ju milacataꞌan. Pus ictapainini ju Dios ni palai catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan ju uxijnan.
\s1 Lai lhilaksiyau ju Dios
\p
\v 3 Chach kꞌox lhichivinincalh ju isDios chai ixpai ju quiꞌucxtinꞌan Jesucristo. Slivasalh na kꞌai ju ixꞌamapaininti ni lai xaquintaꞌaktaijuyan. Pus quintaxtaknitan sastꞌi quiꞌatsucuntiꞌan chai ixlhiyuchi lai lhilaksiyau ju Dios ni aktsꞌiya aquintaxtakniyanch chux tuchi quintakꞌalhtasunitan ni aquintaxtakniyan. Chai cꞌatsayau ni chunch ju aquintaꞌulhtuyan va ixlacaꞌatalh ni taꞌacxtuchokolh ju Jesucristo junta ixmacnucanta.
\v 4 Chai tachi chun ju kꞌox ju pastacta ju Dios ju quilacataꞌan aquintaxtaknitachan ju lactꞌiyan. Chai ju yuchi conkꞌalhiyanta. Chai jantu lai lhquiliquin chai na kꞌox conkꞌalhiyaꞌ.
\v 5 Chai ju quijnan ni lhilaksiyau ju Dios pus ju yuchi aquintalhistꞌacꞌan laꞌixtachaput. Chai aquintalhistackꞌalhiyan tus acsni aquintaxtakniyan ju ixtaꞌaktsanti ju sastꞌi quiꞌatsucuntiꞌan ju lactꞌiyan. Chai ju anuꞌ sastꞌi quiꞌatsucuntiꞌan lakasivi chai aquintamasuniyan ju Dios acsni cachinaꞌ ixꞌaclanti ju lacamunutpaꞌ.
\p
\v 6 Chai yuchi alhikꞌachꞌantꞌit mas jantu xcai ni tasqꞌuini ni amakꞌaninintꞌit pantsꞌiquis ju chavai. Amakꞌaninintꞌit ni na tijlhu macxcai ju pꞌulaktsꞌintꞌanucꞌanatꞌit.
\v 7 Va laktsꞌintꞌanucꞌanatꞌit ni caputasuyach ni vasalh lhilacꞌapꞌinatꞌit ju Cristo. Pus palai lhitapalai ni catasu ni vasalh lhilacꞌapꞌinatꞌit ju Cristo. Palai jantu ju va tuꞌuꞌ oro ni catasu ni vasalh oro. Ju yuchi mas jantu tsucukꞌalhi para mapasacan ju lacajipi acsni laktsꞌintanucan. Ja va a ti quijnanꞌan jantu calaktsꞌintanucanau laca tuꞌuꞌ macxcai. Chai ni tasui ni stavasalanti lhilacꞌapꞌinatꞌit ju Cristo pus ju Dios catajunan ni na kꞌox ju navitꞌatꞌit chai catalakꞌayayan chai kꞌoxich catalhiulayan acsni tavanan catalacasuchokoyach ju Jesucristo.
\p
\v 8 Chai ju chavai mas jantucaꞌ laktsꞌinatꞌit ju Jesús para mapꞌainiyatꞌit. Chai ju chavai mas jantucaꞌ laktsꞌinatꞌit para lhilacꞌapꞌinatꞌit chai alin ju minkꞌachatꞌan ju matiꞌ ixtꞌachunch ju ani lacamunutpaꞌ. Va anch ju lactꞌiyan ju minacha ju chunch.
\v 9 Chai ni lhilacꞌapꞌinatꞌit ju Cristo pus atꞌakꞌalhtꞌaxtꞌuyaꞌitꞌit chai jantu apꞌinaꞌitꞌit ju lacamakꞌalhkꞌajnat ju jonkꞌalhitach.
\p
\v 10 Ju makꞌanch ju Dios amaꞌatsꞌoknunilh ixlapanacni ju ixchivinti. Ju yuꞌunch ixtachivinin ixlacata ju lamapainin ju quintanavinitan ju Dios. Para jantu kꞌox ixtamachakxai tuchi ixtanajun. Pus na talhasacminilh chai ixlhichux ixꞌalhunutꞌan tapuxcaulhch lacaꞌalhiqui ta yu laich takꞌalhtaxtucan lacamakꞌalhkꞌajnat junta jonkꞌalhita.
\v 11 Pus yuchi ju iSpiritu Santu ju Cristo ju alacmaꞌatsꞌokꞌulani lacaꞌalhiqui ju ixlapanacni. Chai ixꞌajuni ni catanaulh ni Dios camalakachayaꞌ pumatam ju camamakꞌalhkꞌajnicanaꞌ chai astan calakꞌayacanach. Para ju yuꞌunch jantu tamachakxa ni yuchi ju Jesús ju ixtalhichivinin. Pus va tapuxcaulh lacaꞌalhiqui ni va ixtacꞌatsaputun tis chavaich ju ixlhichivincan chai tavananch ju catapasayaꞌ ju chunch.
\v 12 Pus ju anuch makꞌaniya lapanacni ju ixtanajun ixchivinti Dios ixꞌamavasalanican ni jantu lana acsni ju catapasayaꞌ ju tuchi ixtanajun. Para chavai acsni tꞌonau ju quijnanꞌan. Chai tachi ju yuꞌunch ni laꞌixtachaput ju Spiritu Santu ju tachivinilh pus vana va chun ju yuꞌunch ju tajuntan ju chavai ju chivinti ixlacata ju Cristo. Vachuꞌ tachivinin laꞌixtachaput ju Spiritu Santu ju malakachacantachilh. Ju minchalh ju lactꞌiyan. Chai ni na kꞌai lhamakꞌan ju ani chivinti ixlacata ju Cristo pus mas yuꞌunch ju anquilhnin na tamachakxaputun ixlacata ixmakꞌalhkꞌajnat ju Cristo chai acsni calakꞌayacanaꞌ.
\s1 Ju Dios lacasqꞌuin ni salaka cava ju quiꞌatsucuntiꞌan
\p
\v 13 Chai ni slivasalh na kꞌai lamapainin ju quintanavinitan ju Dios pus ixlhichux miꞌalhunutꞌan alacꞌaꞌitꞌit ni catalaktsꞌaniyan ju anuꞌ lamapainin ju Dios. Pus acsnich ju cataꞌaktsayach acsni catalacasuchokoyach ju Jesucristo. Chai ni caminchokoyaꞌ ju yuchi pus lhitasqꞌuini ni skꞌala atsꞌucꞌutꞌit chai alaccꞌatsꞌanantꞌit.
\v 14 Chai ni isꞌaskꞌatꞌan Dios untꞌatꞌit pus aqꞌuiclacꞌaꞌitꞌit. Jantu anavichꞌokꞌotꞌit ju macxcai tachi ju ixkꞌachꞌaniyatꞌit makꞌanchich acsni tucaꞌ ixmachꞌakxayatꞌit ju ixchivinti Dios.
\v 15 Pus yuchi ju Dios ju tasacxtutan ni isꞌaskꞌatꞌan aꞌunaꞌitꞌit. Chai tachi ju yuchi ni salaka isꞌatsucunti pus vachuꞌ chunch atsꞌucꞌutꞌit ju uxijnan mas va tuchi ju naviyatꞌit.
\v 16 Chunchach ju atsꞌucꞌutꞌit ni chunchach ju tsꞌokcanta laꞌixchivinti Dios junta chani najun ju yuchi: “Ma salaka atsꞌucꞌutꞌit ni salaka junita ju isꞌatsucunti ju yuchi”. Ma chunch ju najun ju Dios.
\p
\v 17 Chai ni lhixakꞌalayatꞌit ju Dios tachi ju mimpaiꞌan pus alhitꞌalacꞌasutꞌitch ni tꞌalhoniyatꞌit chux tuncujun acsni makvilatꞌitcaꞌ ju ani lacamunutpaꞌ. Chunch ju alatꞌit ni vaklhtam chun alaktsꞌintanui ju yuchi ju lapanacni tuchi ju navich ju pumatamin.
\v 18 Chai cꞌatsꞌayatꞌit ni Dios ju tamalakxtutan ni jantu tasqꞌuini ni vana anavitꞌit ju mincostumbreꞌan ju jantu lhitapalai. Ju anuꞌ costumbre ju ixtamacontilanitan ju milacpaiꞌan. Chai cꞌatsꞌayatꞌit ni jantu lhimalakxtꞌucꞌantꞌatꞌit ju va laca tuꞌuꞌ oro u laca tuꞌuꞌ plata ju lai takꞌalhi.
\v 19 Para lhimalakxtꞌucꞌantꞌatꞌit ju ixꞌacꞌalhni ju Cristo. Chai ju ixꞌacꞌalhni ju yuchi na laklhu ixtapalh. Pus ju aliꞌin quintꞌaꞌisraelitaninꞌan tamakninicaꞌ ju Dios ixborregoꞌan ju jantu xatakꞌalhin tajunita nin capacxalh ju tuꞌuꞌ istsꞌitsꞌi. Chai ju anuꞌ borrego ixtapalh va ixꞌalactuꞌuntiꞌan ju anuch lapanacni. Pus vana va chun ju Cristo. Ju yuchi na salaka junita chai ju yuchi nilh ixtapalh ju quiꞌalactuꞌuntiꞌan.
\v 20 Ju Cristo ilhcaꞌulacantacha ni caniyaꞌ acsni tucaꞌ ixnavicanacha ju lacamunutpaꞌ. Para va chavaicaꞌ laꞌixlhiꞌaclanti ju lacamunutpaꞌ malacasucalh ju milacataꞌan.
\v 21 Chai ni quinichilh ju Cristo pus ju uxijnan lhilacꞌapꞌinatꞌit ju Dios. Yuchi ju Dios ju macxtuchokolh ju Jesús laꞌixꞌaninti chai lakꞌayalh. Chai ni chunch ju lalh ju Dios pus ixlhichux miꞌalhunutꞌan laich lhilacꞌapꞌinatꞌit ju yuchi chai laich acꞌatsꞌayaꞌitꞌit ni aktsꞌiya cataxtakniyan tachi chun ju takꞌalhtasunitan.
\p
\v 22 Ixchivinti Dios stavasalanti. Chai ju chavai ni qꞌuiclacꞌaꞌitꞌatꞌit pus chꞌakꞌanicꞌantꞌatꞌit ju miꞌalhunutꞌan chai lai lamapꞌainiyatꞌit islivasalh ju milhiꞌalakꞌavinꞌan. Pus alamapꞌainitꞌitch minchuxꞌan ju laꞌistavasalanti ixlhichux miꞌalhunutꞌan.
\v 23 Ju xapꞌulasastꞌinicꞌanatꞌit ju miꞌatsucuntiꞌan jantu va ixlacata tam mintꞌalapanacꞌan ju va caniyaꞌ. Para tasastꞌichokolh ju miꞌatsucuntiꞌan acsni qꞌuiclacꞌaꞌitꞌatꞌit ju ixchivinti Dios. Chai ju anuꞌ chivinti conkꞌalhiyach. Chai acsni quiclacaꞌiniyau pus alin ju quiꞌatsucuntiꞌan ju jonkꞌalhita.
\v 24 Ju ixchivinti Dios chani najun:
\q1 Tachi chun ju lapanacni ma tachi ju tuꞌuꞌ achꞌitin tajunita.
\q1 Chai tachi chun ju alin laꞌisꞌatsucuntiꞌan ju na talhitakꞌayai ma chunch junita tachi ju tuꞌuꞌ ixꞌaxanat achꞌitin.
\q1 Acsni xixach ju xaꞌachꞌitin pus minacha ju ixꞌaxanat.
\q1
\v 25 Para ixchivinti ju quiꞌucxtinꞌan Dios ma jonkꞌalhita.
\m Ma chunch najun laꞌixchivinti Dios. Pus vasalh chunch junita laquiꞌatsucuntiꞌan. Acsni niyau jantu tuꞌuꞌ ixtapalh jun ju tuchi ixlhitakꞌayayau. Para ju chivinti ixlacata ju Cristo ju uncꞌantꞌatꞌit jonkꞌalhita.
\c 2
\p
\v 1 Chai ni taxtaknitan ju sastꞌi miꞌatsucuntiꞌan ju Dios pus jantuch alanavinitꞌit tuꞌuꞌ macxcai. Jantu alaꞌokxchꞌokꞌotꞌit. Jantuch va tam tam amalacꞌasutꞌit. Jantu alhacchꞌipꞌitꞌit tuꞌuꞌ. Chai jantuch vana alhichꞌivinintꞌit ju akꞌantam.
\v 2 Aꞌuntꞌit tachi ju tam askꞌatꞌa ju va ancaꞌ lakꞌajunta. Ju yuchi va tsa tsꞌiquiputun. Pus vana va chun alatꞌit ju uxijnan. Va tsa tsa alaktsꞌintꞌit ju ixchivinti Dios. Ju yuchi jantu va aꞌokxchokꞌonti. Chai yuchach ju cataꞌaktaijuyan ni lai palai alhilacꞌapꞌinaꞌitꞌit ju Cristo. Chai vachuꞌ palai lai atsꞌucꞌuyaꞌitꞌit tachi ju kꞌachani ju Dios.
\v 3 Pus chunch aꞌunaꞌitꞌit va ixlacaꞌatalh ni cꞌatsꞌayatꞌit ni na kꞌox ju miꞌucxtinꞌan Dios.
\s1 Ju Cristo chunch junita tachi ju tuꞌuꞌ chiux
\p
\v 4 Ju uxijnan lhilacꞌapꞌitꞌit ju Jesús. Chai ju yuchi chunch junita tachi ju tuꞌuꞌ chiux ju lhiyocan chakaꞌ ju istasacmackꞌanta ju ixyonin chakaꞌ. Pus vana va chunch taꞌulhtulh ju Cristo. Ju lapanacni vachuꞌ jantu tuꞌuꞌ talhiula ju yuchi. Para ju Dios sacxtulh chai slivasalh na tapalai ju yuchi.
\v 5 Chai ju uxijnan vachuꞌ chunch untꞌatꞌit tachi ju tuꞌuꞌ chiux ju sacxtucan acsni yocan ju tuꞌuꞌ chakaꞌ. Pus ju Dios tasacxtutan. Chai tachi ju va ixchakaꞌ tanaviyan ni yuchi ju Spiritu Santu ju tꞌajun lamiꞌalhunutꞌan. Chai vachuꞌ ixpalijni Dios untꞌatꞌit chai naviyatꞌit ixlhichꞌalhcat. Chai ni ixpalijni untꞌatꞌit pus laich lakꞌayayatꞌit tachi ju kꞌoxich lhiulai ju yuchi va ixlacaꞌatalh ni lhilacꞌapꞌinatꞌit ju Jesucristo.
\v 6 Vachuꞌ chani ixnajunta ju Dios laꞌixchivinti ju tsꞌokcanta:
\q1 Ju yuchi najun ni ma ulai ju lakꞌachakꞌan Sion pumatam lapanac.
\q1 Chai ju yuchi ma chunch junita tachi ju tuꞌuꞌ lhtakꞌalh chiux ju makꞌastumucꞌacanta chakaꞌ junta tsꞌokcanta tuchi cꞌata ju yocanta.
\q1 Chai yuchi ma sacxtulh ju Dios chai ma na laklhu ixtapalhni.
\q1 Pus ju calhilacaꞌanach ju yuchi ma jantu lai astan catinaulh ni jantu kꞌox tachi ju xalai.
\m Chunch ma najun ju Dios.
\v 7 Pus ju uxijnan ju lhilacꞌapꞌinatꞌit ju Jesús slivasalh ni na tuꞌuꞌ lhiulayatꞌit. Para ju jantucaꞌ talhilacaꞌan pus uctaxtui laꞌisꞌatsucuntiꞌan tachi ju tsꞌokcanta laꞌixchivinti Dios junta ma chani najun:
\q1 Ju anuꞌ chiux ju tasacmackꞌalh ju ixyonin chakaꞌ
\q1 astan valhch ju chiux ju makꞌastumucꞌacanta chakaꞌ junta tsꞌokcanta tuchi cꞌatach ju yocanta.
\m Chunch najun laꞌixchivinti Dios. Chai ju chunch va nomputun ni vana va chun taꞌulhtui ju Cristo ju yuꞌunch ju jantu talhilacaꞌamputun. Va talakmackꞌan.
\v 8 Chai ju Dios vachuꞌ najun ni vachuꞌ valh ju Cristo tachi ju tuꞌuꞌ chiux ju pukꞌalhkꞌoscan chai tachi ju tuꞌuꞌ lhkajani chiux ju lai putaꞌakkꞌajucan. Pus tachi ju va tapukꞌalhkꞌos ju Jesús ni jantu taquiclacaꞌiputun ju ixchivinti Dios. Chai ju Dios alhcata ni catakꞌalhkꞌosaꞌ ju chunch talai.
\s1 Ju aliꞌin lapanacni isꞌaskꞌatꞌan Dios tajunita
\p
\v 9 Para ju uxijnan Dios ju tasacxtutan ni isꞌaskꞌatꞌan aꞌunaꞌitꞌit. Chai ixpalijni ju kꞌai ucxtin Dios aꞌunaꞌitꞌit. Chai aꞌunaꞌitꞌit lapanacni ju salaka ixꞌalhunutꞌan chai ixlapanacni Dios aꞌunaꞌitꞌit. Chunch ju taꞌulhtutan ju Dios ni laich alakꞌayayaꞌitꞌit ju yuchi laꞌixꞌucxlacapuꞌan ju mintꞌalapanacniꞌan acsni aꞌunaꞌitꞌit tachi chun ju kꞌox ju navita ju yuchi. Alakꞌayayaꞌitꞌit ju Dios ju tamapaxanitanch ju makꞌaniya miꞌatsucuntiꞌan ju na ixkꞌachani ju alactuꞌunti. Chai taxtaknitan ju sastꞌi miꞌatsucuntiꞌan ju slivasalh na kꞌox.
\v 10 Pus ju makꞌanchich jantu uxijnan ju tasacxtun ju Dios. Alai aliꞌin ju asacxtucalh. Para ju chavai ixlapanacni Dios untꞌatꞌit. Ju makꞌanch jantu ixꞌaktꞌaiꞌucꞌantꞌatꞌit lacaꞌamapaininti. Para ju chavai ju Dios taꞌaktaijutan laꞌixꞌamapaininti.
\s1 Anavinitꞌit ju ixkꞌachat ju Dios
\p
\v 11 Ju uxijnan ji quiꞌalakꞌavin va iclajumputunau ju ani. Pus ni ixlapanacni Dios untꞌatꞌit pus amachakꞌan lactꞌiyan untꞌatꞌit. Tachi ju va tꞌonatꞌit tapasatilanin ju ani lacamunutpaꞌ. Pus ixlhiyuchi iclatapaininiyau ni amacꞌaꞌuntꞌit ju macxcai ixkꞌachat ju milacatunaꞌan. Ju yuchi va tꞌalasai ju sastꞌi quiꞌatsucuntiꞌan ju quintaxtaknitan ju Dios.
\v 12 Va tachi kꞌox atsꞌucꞌutꞌit laꞌixꞌucxlacapuꞌan ju jantucaꞌ talhilacaꞌanta ju Cristo. Ju chunch mas catalacnonach ju chavai ni va alactuꞌunin untꞌatꞌit para astanch catalakꞌayayach ju Dios ni catalaktsꞌinach ju kꞌox miꞌatsucuntiꞌan. Chai vachuꞌ catalakꞌayayach ju Dios acsni caꞌalacxtakniyaꞌ ju kꞌox ixtacꞌatsanꞌan ju Dios chai catalhilacaꞌanach ju Cristo.
\p
\v 13 Chai ni cꞌatsacan ni lhilacꞌapꞌintꞌatꞌit ju Cristo pus aqꞌuiclacꞌaꞌitꞌitch tachi chun ju xalackꞌajin ju ani lacamunutpaꞌ. Aqꞌuiclacꞌaꞌitꞌit ju xakꞌai tucan ju ani lacamunutpaꞌ.
\v 14 Vachuꞌ aqꞌuiclacꞌaꞌitꞌit ju gobernadornin ju amalakachai ju xakꞌai tucan. Pus yuchi alhimalakachacanta ni cataꞌulaniyach ixtalakꞌalhinꞌan ju alactuꞌunin chai catalakꞌayayach ju tanavich ju kꞌox.
\v 15 Pus ju Dios lacasqꞌuin ni apꞌukꞌelhchꞌapꞌayaꞌitꞌit ju ixquilhniꞌan ju lapanacni ju va kꞌaya talhichivinan mas jantu tacꞌatsai tuchi tanajun. Chunch ju lai anaviniyaꞌitꞌit acsni na kꞌox ju atsꞌucꞌuyaꞌitꞌit.
\p
\v 16 Ju chavai jantu tasqꞌuini ni vana canaviu tachi ju najun laꞌixlhamapꞌaksin ju Moisés. Para jantu anaꞌuntꞌit ni ixlhiyuchi laich anaviyaꞌitꞌit va tuchi alactuꞌunti ju navipꞌutꞌunatꞌit. Alai atsꞌucꞌutꞌitch tachi ju vasalh xalapanacni untꞌatꞌit laꞌixmacni Dios.
\v 17 Atꞌalhonitꞌit tachi chun ju lapanacni. Amapꞌainitꞌit ju vachuꞌ talhilacaꞌanta ju Cristo. Atꞌalhonitꞌit ju Dios. Atꞌalhonitꞌit ju xakꞌai tucan ju ani lacamunutpaꞌ.
\s1 Alaktsꞌintꞌaꞌitꞌit ju Cristo
\p
\v 18 Ju uxijnan ju va xalapanacni untꞌatꞌit aqꞌuiclacꞌaꞌitꞌitch ju miꞌucxtinꞌan chai atꞌalhonitꞌit. Para jantu va yuꞌunch ju aqꞌuiclacꞌaꞌitꞌit chai atꞌalhonitꞌit ju va lackꞌoxin lapanacni tajunita chai ju na lai taꞌamapaininin. Para vachuꞌ atꞌalhonitꞌit chai aqꞌuiclacꞌaꞌitꞌit ju na kꞌai tajunita.
\v 19 Pus ju Dios na kꞌoxich lhiulai acsni xamatiꞌ ju lhilacaꞌanta ju Cristo tastucni acsni mamakꞌalhkꞌajnican mas jantu slivasalh ni tuꞌuꞌ canavi. Pus ju anuꞌ lapanac yuchi lhitastucni ni cꞌatsai ni laktsꞌinch ju Dios.
\v 20 Para acsni lhilakꞌanekmacꞌanatꞌit ju va miꞌalactuꞌuntiꞌan chai tꞌastꞌucniyatꞌit pus tis chavaich ju lai catajunin ni kꞌoxich ju naviyatꞌit. Para acsni lhimamakꞌalhkꞌajnicꞌanatꞌit ju va ixnavica ju tuꞌuꞌ kꞌox chai tꞌastꞌucniyatꞌit pus ju Dios na kꞌoxich lhiulai ju chunch.
\v 21 Pus yuchi talhisacxtutan ju Dios. Ju yuchi lacasqꞌuin ni atꞌastꞌucniyaꞌitꞌit acsni amamakꞌalhkꞌajnicꞌanaꞌitꞌit mas navitꞌatꞌit ju kꞌox ni vana va chun makꞌalhkꞌajnalh ju Cristo ju quilacataꞌan. Ju yuchi quintamaconinch ju lhilaktsꞌintaiti ni laich canaviu tachi ju navilh ju yuchi.
\v 22 Ju yuchi jantu tavanan alactuꞌunulh nin canaulh taꞌaklhtamat chivinti.
\v 23 Ju yuchi acsni ixtajuni macxcai chivinti jantu ixꞌalhimapuspꞌitni tuꞌuꞌ macxcai chivinti. Acsni ixtamamakꞌalhkꞌajni pus ju yuchi jantu ajuni ni caꞌamamapꞌalhniyach. Alai va ixmakꞌaxtakni ju ixlhamakꞌan laꞌixmacni Dios ni yuchi ju sok lakꞌoxi ju tuꞌuꞌ lhamakꞌan.
\v 24 Tachi chun ju quiꞌalactuꞌuntiꞌan mucꞌanikꞌocalh ju Cristo acsni xtucnicalh ju ixlacatuna ju lacacurus. Chunch ju navinicalh ni jantu vana catailhiꞌanau ju quiꞌalactuꞌuntiꞌan para canaviu ju soknicꞌa. Chai ni macꞌatsanicalh ju Cristo pus yuchi ju xapuꞌalinch ju sastꞌi quiꞌatsucuntiꞌan.
\v 25 Pus ju uxijnan chunch ixꞌuntꞌatꞌit tachi ju tuꞌuꞌ borregojni ju jantu tachꞌakꞌokꞌai ju ixꞌucxtinꞌan. Ju uxijnan vachuꞌ jantu ixchꞌakꞌokꞌatꞌit ju Cristo. Para ju chavai ni xalhilacꞌapꞌinatꞌit ju yuchi pus tachi ju va laktꞌanchꞌokꞌotꞌit ju miꞌalhistacnaꞌan. Chai yuchi ju talhistacniyan ju miꞌalhunutꞌan ni jantu atꞌitsꞌankꞌakꞌalhitꞌit astan.
\c 3
\s1 Ju alin ixlakꞌauꞌan tasqꞌuini ni chani catatsuculh
\p
\v 1 Vachuꞌ chun ju uxijnan ji chakolun ju icꞌantꞌatꞌit. Aqꞌuiclacꞌaꞌitꞌit ju mimpapaꞌan. Pus ju chunch mas tucaꞌ talacaꞌita ju ixchivinti Dios ju mimpapaꞌan para catalhilacaꞌanaꞌ ju Cristo acsni catalaktsꞌinaꞌ ju kꞌox miꞌatsucuntiꞌan mas jantu tuꞌuꞌ aꞌunitꞌit.
\v 2 Ju yuꞌunch catalhilacaꞌanaꞌ ju Cristo acsni catalaktsꞌinaꞌ ni salaka ju miꞌatsucuntiꞌan chai ni tꞌalhoniyatꞌit ju Dios.
\v 3 Jantu va yuchi ju anavitꞌit cuenta ju milacatunaꞌan. Ju tam xamatiꞌ jantu acsnich ju na cꞌus tasui acsni maxantilai ju ixꞌai u lhu calacatocꞌalh ju tuꞌuꞌ oro u na kꞌox camalakchꞌini.
\v 4 Alai yuchi ju na cꞌus putalacasui ju tam lapanac acsni na kꞌox ju minacha laꞌixpulacni ixꞌalhunut. Yuchi ni va seknicꞌa lapanac cava. Yuchi ju ani ju ixmaxantilaca ju quiꞌatsucuntiꞌan chai ju yuchi jantu lai takꞌalhi. Chai yuchi ju slivasalh kꞌox lhiulai ju Dios.
\v 5 Ju makꞌanch chunchach ju ixtalhimaxantilai isꞌatsucuntiꞌan ju chakolun ju ixtalhilacaꞌanta ju Dios. Ju yuꞌunch ixtalhilaksi ju Dios chai ixtaquiclacaꞌi ju ixpapaꞌan.
\v 6 Tachi ju Sara. Ju yuchi ixꞌamachakaꞌ ixjunita ju makꞌaniya ixlapanac Dios ju Abraham ixjuncan. Ju yuchi quiclacaꞌilh ju ixpapa chai lhixakꞌalalh ucxtin. Pus ju chavai tachi ju va isꞌatsiꞌin untꞌatꞌit ni vachuꞌ anaviyaꞌitꞌit ju kꞌox chai jantu tuꞌuꞌ atꞌalhoniyaꞌitꞌit.
\p
\v 7 Vachuꞌ ju uxijnan xapapaninch ju alin ju miꞌamachakaꞌan. Kꞌox atꞌatsꞌucꞌutꞌit ju miꞌamachakaꞌan chai alakꞌayatꞌitch. Acꞌatsꞌatꞌitch ni na tachapun untꞌatꞌit ju uxijnan para ju tam chakoꞌulh jantu na chun tachapun ju ixlacatuna. Chunchach ju alatꞌit ni mintꞌiyunꞌan ju amaklhtꞌayanantꞌatꞌit ju lamapainin ju tanavinitan ju Dios acsni taxtaknitan ju miꞌatsucuntiꞌan ju conkꞌalhiyanta ju lactꞌiyan. Pus ni chunch ju atꞌatsꞌucꞌutꞌit ju miꞌamachakaꞌan pus jantu xtuꞌuꞌ catasastucniyan acsni atꞌachꞌivinaꞌitꞌit ju Dios.
\s1 Aktamixnin mamakꞌalhkꞌajnican mas navican ju kꞌox
\p
\v 8 Pus vachuch iclajumputunau ju ani. Va lakatamch anavitꞌit ju miꞌalhunutꞌan. Chach taxcaniyan vachuꞌ ju miꞌalhunutꞌan acsni apumatam tꞌajun makꞌalhkꞌajnaꞌ. Alamapꞌainitꞌit tachi ju lhiꞌalakꞌavinch. Chach na tꞌayeka va ju miꞌalhunutꞌan. Jantu alhitꞌakꞌayatꞌit ju tuꞌuꞌ.
\v 9 Jantu alamapꞌuspꞌitnitꞌit ju macxcai acsni tuꞌuꞌ macxcai ju anavicꞌanaꞌitꞌit. Nin yuchi ni lai aꞌunitꞌit macxcai chivinti ju tajunan macxcai chivinti. Alai va asqꞌuinitꞌit ju Dios ni caꞌaxtakniyaꞌ kꞌox isꞌatsucuntiꞌan. Asqꞌuintꞌit ju kꞌox ixlacataꞌan ni cꞌatsꞌayatꞌit ni Dios tasacxtutan ni vachuꞌ axtꞌaknicꞌanaꞌitꞌit ju kꞌox miꞌatsucuntiꞌan.
\v 10 Pus chani najun laꞌixchivinti Dios ju tsꞌokcanta:
\q1 Ma va tichi chavaich ju lacasqꞌuin ni lhikꞌach chai kꞌox cava ju isꞌatsucunti
\q1 pus ma calhistaclh ju isimakꞌat. Ma jantu canaulh ju macxcai nin taꞌaklhtamat chivinti.
\q1
\v 11 Ma jantu canavi tuꞌuꞌ macxcai. Ma va yuchi ju canavi ju kꞌox.
\q1 Ma capuxcaulh ixlhichux ixꞌalhunut ta yu laich kꞌox catꞌaꞌucxuntsuculh ju aliꞌin.
\q1
\v 12 Ma chunchach ju calalh ni cꞌatsai ni quiꞌucxtinꞌan
\q1 Dios alhistactꞌajun ju soknicꞌa ixꞌalhunutꞌan laꞌixmacni yuchi.
\q1 Chai akꞌasmatni ju yuꞌunch ni tuꞌuꞌ tasqꞌuini.
\q1 Para ju quiꞌucxtinꞌan Dios ma va kꞌotꞌitꞌi alaktsꞌin tachi chun ju tanavi ju amacxcai.
\m Chunch ju najun laꞌixchivinti Dios.
\p
\v 13 Pus na lacatsꞌunin ju lai catanavinin ju amacxcai ni slivasalh anavitꞌit ju kꞌox ju laꞌixlhichux ju miꞌalhunutꞌan.
\v 14 Para mas tuꞌuch alhimakꞌalhkꞌajnantꞌit acsni anaviyaꞌitꞌit ju kꞌox pus lana na akꞌachꞌanaꞌitꞌit. Jantu atꞌalhonitꞌit acsni va catamakꞌesvaputunan. Nin calacꞌalh ju miꞌalhunutꞌan.
\v 15 Alai alakꞌayatꞌit ju quiꞌucxtinꞌan Cristo chai alacꞌaꞌinitꞌit ju yuchi. Chai va tachi anavitꞌit cuenta ta yu laich alhikꞌalhtꞌayaꞌitꞌit ni xamatiꞌ catasacmiyan tajuch ni va lacꞌaꞌiyatꞌit ni catamakꞌalhtaxtuyan ju Dios. Para va kꞌoxich akꞌalhtꞌayanantꞌit. Jantu alhitꞌakꞌayatꞌit ju tuchꞌi mispꞌayatꞌit. Atꞌalhonitꞌit ju Dios.
\v 16 Jantu tuꞌuꞌ anavitꞌit ju va catalhixcanichokon ju miꞌalhunutꞌan. Ju chunch mas catalhichivininan tachi ju va alactuꞌunin untꞌatꞌit para catamaxananach astan ni laich va kꞌaya xatalhichivinanch ju kꞌox miꞌatsucuntiꞌan ju uxijnan ju lhilacꞌapꞌinatꞌit ju Cristo.
\v 17 Ni va calacasqꞌuilh ju Dios ni amamakꞌalhkꞌajnicꞌanaꞌitꞌit pus palai kꞌox ni amamakꞌalhkꞌajnicꞌanaꞌitꞌit mas navitꞌatꞌit ju kꞌox. Palai jantu ni amamakꞌalhkꞌajnicꞌanaꞌitꞌit acsni navitꞌatꞌit ju amacxcai.
\p
\v 18 Pus vachuꞌ ju Cristo makꞌalhkꞌajnalh. Ju yuchi va paktam nilh ixlacata ju quiꞌalactuꞌuntiꞌan. Yuchi ju soknicꞌa isꞌatsucunti makꞌalhkꞌajnalh ju quilacataꞌan ju jantu soknicꞌa junita ju quiꞌatsucuntiꞌan. Chunch ju lalh ni lai isꞌaskꞌatꞌan Dios cajumvi. Pus ju Cristo nilh laꞌixlacatuna para acsni lokꞌonchokolh amaklhtayananchokolh ju isꞌatsucunti tachi ju aktsꞌiya ixjunita ju lactꞌiyan.
\v 19 Para acsni tucaꞌ ixꞌamaklhtayananchokota ju isꞌatsucunti tachi ju aktsꞌiya ixjunitach ju lactꞌiyan pus ju Cristo quilalh junta ixꞌatꞌalhnucanta ju aliꞌin tacuvin. Aquijunilh ixchivinti Dios.
\v 20 Ixtacuvinꞌan ixtajunita ju makꞌaniya lapanacni ju ixtatꞌajun acsni ixtꞌajun naviniꞌ ju ixbarco ju Noé. Ju yuꞌunch jantu ixtaquiclacaꞌita ju Dios mas ixꞌapacxantaji ni catalhilacaꞌalh chai jantu jeks ixꞌaꞌuni. Pus ju acsnich na lacatsꞌunin ju tatakꞌalhtaxtulh acsni akmuxtucalh. Va pumatsajin lapanacni.
\v 21 Chai tachi ju yuꞌunch ni tatakꞌalhtaxtulh ju lacxcan pus vana va chun ju nomputun acsni akpaxtauch. Acsni akpaxtauch putasui ni Dios ju quintamakꞌalhtaxtutanch va ixlacaꞌatalh ni taꞌacxtuchokolh ju Jesucristo junta ixmacnucanta. Acsni akpaxtauch jantu va yuꞌ ni va cachꞌakꞌacalh ju quilacatunaꞌan ju laca tuꞌuꞌ xcan. Para va nomputun ni lacasqꞌuinauch ni kꞌox cava ju quiꞌalhunutꞌan ju laꞌixmacni Dios.
\v 22 Pus ju Jesucristo acsni taꞌacxtuchokolh junta ixmacnucanta tanulh ju lactꞌiyan chai ju chavai vanin tꞌavilhcha ju Dios. Chai ju anquilhnin chai ju xaꞌucxtinin anch chai ju xalackꞌajinch anch taquiclacaꞌi ju yuchi.
\c 4
\s1 Ju Dios quintaxtaknitan kꞌox quintacꞌatsanꞌan
\p
\v 1 Ju Cristo makꞌalhkꞌajnalh ju quilacataꞌan acsni quitsuouchilh ju ani lacamunutpaꞌ. Pus vana alhilakꞌaꞌitꞌit ju uxijnan acsni tamamakꞌalhkꞌajniyan ju lapanacni mas navitꞌatꞌit ju kꞌox. Pus ju chunch mamakꞌalhkꞌajnican tasui ni vasalhch macajunta ju macxcai.
\v 2 Chai ju yuchi mas tꞌajuncaꞌ ju ani lacamunutpaꞌ para jantuch vana yuꞌ ju navi ju macxcai ixꞌatalacpastꞌacꞌat. Alai yuchi ju canaviyaꞌ ju kꞌachani ju Dios.
\v 3 Pus acsni tucaꞌ ixlhilacꞌapꞌinatꞌit ju Cristo pus ixnaviyatꞌit va tuchi ixtalakxtuch tachi ju talai ju jantucaꞌ talhilacaꞌanta ju yuchi. Pus ixnaviyatꞌit tachi chun ju alactuꞌunti ju ispꞌastꞌacꞌatꞌit. Chai ixnaviyatꞌit ju macxcai ixkꞌachat ju milacatunaꞌan. Chai ixtꞌakꞌapꞌayatꞌit. Chai ixpꞌinatꞌit junta lai cꞌatan junta va kꞌaya ixlayatꞌit. Chai va tachi ixꞌalactꞌatꞌakꞌapꞌatꞌonatꞌit ju aliꞌin. Chai ixlakꞌayayatꞌit ju misantoꞌan tachi ju jantu lhijun laꞌixlhamapꞌaksin Dios. Para kꞌoxich ju chavai. Jantu lhijun ni vana va chunch ju alatꞌit.
\v 4 Pus ju chavai ju yuꞌunch ju jantucaꞌ talhilacaꞌanta ju Cristo na va talhamakꞌaninin ni jantu vanach alactꞌanaviyatꞌit ju alactuꞌunti tachi ju ixtꞌanaviyatꞌit pꞌulhnan. Chai na macxcai chivinti ju talhichivinan.
\v 5 Para ju yuꞌunch catajunach ju Jesucristo tajuch ni va chunch ju xataꞌulhtuyan. Chai ju yuchi lakasivi ni caꞌamucꞌanikꞌalhiyaꞌ ixꞌalactuꞌuntiꞌan ju lapanacni ju tatꞌajuncaꞌ chai ju tanitach.
\v 6 Yuchi alhijunicalh ixlacata ju Cristo ju lapanacni ju tanitach ju chavai ni laich catatsucuyanta ju ixtacuvinꞌan ju lactꞌiyan. Chai mas caniyaꞌ ju ixlacatunaꞌan tachi ju nican ju ani lacamunutpaꞌ para catatsucukꞌalhiyanta lactꞌiyan tachi ju Dios ni jonkꞌalhita.
\p
\v 7 Vaninch minta ju ixꞌaclanti ju lacamunutpaꞌ. Pus ixlhiyuchi chunch ju atsꞌucꞌutꞌitch ta yu apꞌutꞌalacꞌasutꞌit ni acꞌatsꞌanantꞌatꞌit. Akꞌaichꞌokꞌocꞌantꞌit miꞌakstuꞌan. Chai atꞌachꞌivinintꞌit ju Dios.
\v 8 Chai ju tucan tasqꞌuini yuchi ni alamapꞌainitꞌit ixlhichux miꞌalhunutꞌan. Ju vasalh amapaininin na lhu macꞌacxai ixtalakꞌalhin ju akꞌantam.
\v 9 Alamalakꞌavitꞌit ju milhiꞌalakꞌavinꞌan laꞌixmacni Cristo ju tachin laminchakaꞌan. Chai jantu lacatalhkꞌamti ju anavitꞌit ju chunch.
\v 10 Ju Dios taxtaknitan pumatamin ju uxijnan lakatamin lhakꞌailaktsꞌin. Pus apꞌuꞌaktꞌaiꞌutꞌit ju aliꞌin tachi ju lhijunch ni canavilh tam lapanac ju lai lhistꞌacꞌa ju lhakꞌailaktsꞌin ju xtaknita ju Dios ni jantu va camakꞌatsꞌankꞌa. Chai ju Dios tijtam tijtam ju xtꞌakꞌa ju lhakꞌailaktsꞌin.
\v 11 Tachi ju tam lapanac ju xtaknican ju lhakꞌailaktsꞌin ni lai amalaninin ixchivinti Dios. Pus ni xtaknicanta ju chunch lhakꞌailaktsꞌin chach naulh tachi ju va junch Dios ju chivinin. U ni xamatiꞌ xtaknicanta ju lhakꞌailaktsꞌin ni lai aꞌaktaijunun chach cꞌatsa ni Dios ju xaxtakni ju ixtachaput ni laich caꞌaꞌaktaijunulh. Ju chunch mas va tuchi ju canaviyau ju quijnanꞌan ju lhilacaꞌanauch ju Jesús capulakꞌayacanaꞌ ju Dios. Ju yuchi alin ixtachaput ju va jonkꞌalhita chai aktsꞌiya tasqꞌuini ni calakꞌayacalh ju yuchi tus va tavananch.
\s1 Chanich ju anaviyaꞌitꞌit acsni amamakꞌalhkꞌajnicꞌanaꞌitꞌit
\p
\v 12 Ji quiꞌalakꞌavin jantu alhamakꞌaninintꞌit acsni makꞌalhkꞌajnanatꞌit laca tuꞌuꞌ tsꞌinqꞌui makꞌalhkꞌajnat. Jantu anaꞌuntꞌit ni jantu chun tapasacan laquiꞌatsucuntiꞌan ju chꞌakꞌokꞌayau ju Jesús.
\v 13 Alai va alhikꞌachꞌantꞌit acsni mamakꞌalhkꞌajnicꞌanatꞌit. Acꞌatsꞌatꞌit ni vana va chun tamamakꞌalhkꞌajnilh ju Cristo. Chai ni mamakꞌalhkꞌajnicꞌanatꞌit ju chavai pus vachuꞌ slivasalh akꞌachꞌanaꞌitꞌit acsni tavanan catasuyach ni yuchach ju Cristo ju tucan xakꞌai.
\v 14 Ni macxcai lhichꞌivincꞌanatꞌit va ixlacata ni lhilacꞌapꞌinatꞌit ju Cristo va alhikꞌachꞌantꞌitch. Yuchi lai alhikꞌachꞌantꞌit ni tꞌajun lamiꞌalhunutꞌan ju iSpiritu Santu ju Dios. Yuchach ju minchalh ju lactꞌiyan. Chai yuchach ju taxtakniyan ju mintachaputꞌan ni lai alhikꞌachꞌanaꞌitꞌit. Pus ju aliꞌin lapanacni macxcai chivinti talhichivinin ju Dios para ju uxijnan lakꞌayayatꞌit.
\v 15 Para tun xamatiꞌ ju milhiꞌuxijnan amamakꞌalhkꞌajnicꞌantꞌit va ixlacata ju amakninti u ixlacata ju akꞌalhaꞌunti nin ixlhiyuchi ni va navitꞌach ju tuꞌuꞌ ju jantu kꞌox u nin ixlhiyuchi ni va kꞌaya atꞌanutꞌich junta jantu mincuenta.
\v 16 Para acsni xamatiꞌ camamakꞌalhkꞌajnicanaꞌ ju va ixlacata ni maklacaꞌanitach ju Cristo pus jantu camaxanalh. Alai va caxtaknilh lakꞌailaktsꞌiuch ju Dios ni laich makꞌalhkꞌajnan va ixlacata ni lhilacaꞌanta ju Cristo.
\p
\v 17 Ju chavai chilh ju avilhchan acsni cataiꞌulayaꞌ ju ixlaktsꞌintanuca ju isꞌaskꞌatꞌan Dios. Chai ni pꞌulhnan calaktsꞌintanucanau ju quijnanꞌan ju lhilacaꞌanauch ju Cristo pus painiꞌitnich ju yuꞌunch ju jantu talacaꞌita ju ixchivinti Dios ixlacata ju Cristo.
\v 18 Pus ju quijnanꞌan ju soknicꞌa junita ju quiꞌatsucuntiꞌan mas makꞌalhkꞌajnanau ju ani para aktsꞌiya catakꞌalhtaxtukꞌalhiyau. Pus ni chunch tapasai laquiꞌatsucuntiꞌan ju quijnanꞌan pus tas va catijunach ju isꞌatsucuntiꞌan ju jantu talhilacaꞌanta ju Cristo chai ju va taꞌalactuꞌununch.
\v 19 Pus ju na tamakꞌalhkꞌajnan va ixlacaꞌatalh ni chunch ju lhilhcata ju Dios ju ixlacataꞌan pus chach va tachi tanavilh ju kꞌox chai chach tamakꞌaxtaknikꞌo isꞌatsucuntiꞌan ju Dios. Chach talhilaksilh ju Dios ni yuchi ju axtaknilh ju isꞌatsucuntiꞌan chai ju yuchi aktsꞌiya muctaxtui ju ixchivinti.
\c 5
\s1 Amapꞌaksican ju talhilacaꞌanta ju Jesús
\p
\v 1 Ju quitꞌin icmaklhinajun lacatalhavat ju talhilacaꞌanta ju Jesús. Chai iclaktsꞌilh ju ixmakꞌalhkꞌajnat ju Cristo chai acmaklakꞌayacanaꞌ ju Cristo acsni calaktsꞌinau ni calakꞌayacanaꞌ ju yuchi. Pus iclamapꞌaksiputunau ju uxijnan ju vachuꞌ lhinonatꞌit lacatalhavat ju talhilacaꞌanta ju Jesús.
\v 2 Kꞌoxich alhistꞌactꞌitch ju lapanacni junta chꞌalhcꞌatnanatꞌit ju uxijnan. Ju yuꞌunch mas talhilacaꞌanta ju Dios para chunch tajunita tachi ju tuꞌuꞌ borregojni. Na tamaktasqꞌuini ju ixꞌalhistꞌacꞌaꞌan. Chai ju uxijnan chunch untꞌatꞌit tachi ju xaꞌalhistacnin. Pus alhistꞌactꞌit lacakꞌachatch. Chai ni va nonatꞌitch ni va lacatapꞌastu ju amanavinicꞌantꞌit pus jantu anavitꞌit. Chai jantiyuꞌ alhiꞌamaklhtꞌayanantꞌit ju ixlhichꞌalhcat Dios ni va apꞌulhaꞌapꞌutꞌuntꞌit. Va ixlhichux miꞌalhunutꞌan ju anavitꞌit ju ixlhichꞌalhcat.
\v 3 Jantu atꞌalacꞌasutꞌit tachi ju tam xakꞌai ju va kꞌai junita. Jantu atꞌalacꞌasutꞌit chun laꞌixꞌucxlacapuꞌan ju lapanacni ju taxtaknitan ju Dios ni alhistꞌacꞌaꞌitꞌit. Alai va atsꞌucꞌutꞌit tachi lakatam lhilaktsꞌintaiti ixlacataꞌan ju yuꞌunch ju alhistꞌacꞌatꞌit.
\v 4 Chai acsni catalacasuchokoyach ju Cristo ju tucan xakꞌai alhistacnaꞌ pus ju uxijnan ju alhistꞌacꞌatꞌit ju lapanacni ju tachi borregojni tajunita pus axtꞌaknicꞌanaꞌitꞌit ju mintalhajaꞌan. Yuchi ni alakꞌayakꞌalhicꞌanaꞌitꞌit.
\p
\v 5 Vachuꞌ ju uxijnan ji tsꞌalan. Aqꞌuiclacꞌaꞌitꞌit ju talhinajun lacatalhavat ju talhilacaꞌanta ju Cristo. Chux ju uxijnan alaqꞌuiclacꞌaꞌitꞌit chai jantu kꞌai alhicꞌatsꞌatꞌit tuꞌuꞌ. Chunch alatꞌit ni chani ju tsꞌokcanta:
\q1 Ju Dios ma na xcaji ju va talhitakꞌayai tuꞌuꞌ.
\q1 Para ma aꞌaktaijui lacaꞌamapaininti ju jantu tuꞌuꞌ talhitakꞌayai.
\m
\v 6 Pus jantu tuꞌuꞌ alhitꞌakꞌayatꞌit ni cꞌatsꞌayatꞌit ni na tachapun ju Dios. Chai ni jantu tuꞌuꞌ alhitꞌakꞌayayaꞌitꞌit pus ju yuchi catalakꞌayayan acsni cachinaꞌ ju avilhchan ju lhcata ju yuchi.
\v 7 Aꞌunitꞌit ju Dios tachi chun ju lhamakꞌanininatꞌit ni aktsꞌiya tuꞌuꞌ talhiulayan.
\p
\v 8 Acꞌatsꞌanantꞌit. Chai skꞌala atsꞌucꞌutꞌit. Chunch ju alatꞌit ni yuchi ju lhacaticuru ju mintꞌalaxcaiꞌan junita. Chai ju yuchi chun lai tachi ju tuꞌuꞌ maktiliꞌ ju tꞌasai ni chavani. Ju lhacaticuru va puxcolhitꞌajun tichi chavaich ju lai catꞌalalhajalh.
\v 9 Pus asamakꞌantꞌit ju tuchi tamapastꞌacꞌaniyan ju lhacaticuru. Slivasalh ixlhichux ju miꞌalhunutꞌan alhilacꞌapꞌitꞌit ju Cristo. Acꞌatsꞌatꞌitch ni vana va chun tatꞌajun makꞌalhkꞌajnin ju aliꞌin milhiꞌalakꞌavinꞌan laꞌixmacni Cristo tachi ju makꞌalhkꞌajnanatꞌit ju uxijnan. Si chun tamakꞌalhkꞌajnan mas vanta anchach cava.
\v 10 Para Dios ju aꞌaktaijunun lacaꞌamapaininti. Chai isꞌakstu ju cataxtakniyan ixtachaput ni chunch aꞌuntꞌit tachi ju aktsꞌiya lacasqꞌuin ju yuchi. Chai yuchi ju cataꞌaktaijuyan ni va tachi alhilacꞌapꞌitꞌit ju yuchi mas va tuchi camilh. Chai cataxtakniyan ixtachaput ju yuchi. Chai cataꞌaktaijuyan ni jantu tavanan alhilacꞌapꞌinaꞌitꞌit tuꞌuꞌ atumpa. Va yuchi ju Cristo. Chai yuchach ju tasacxtutan ni laich atꞌanuyaꞌitꞌit ju lactꞌiyan junta alin ju stavasalanti atuncunuꞌ junta va jonkꞌalhita. Chai lai atꞌanuyaꞌitꞌit ju anch va ixlacaꞌatalh ni lhilacꞌapꞌinatꞌit ju Jesucristo. Anchach ju atꞌanuyaꞌitꞌit astan acsni makꞌalhkꞌajnantꞌit pantsꞌiquis ju ani lacamunutpaꞌ.
\v 11 Yuchach ju Dios ju alin ixtachaput ju jonkꞌalhita. Chach lakꞌayacalh ju yuchi tus va tavananch. Chunch vasalh cava.
\s1 Ju Pitaluꞌ amacꞌami ixꞌamigojni
\p
\v 12 Yuchi ju Silvano ju catalhiꞌaniyan ju ani ju iclaꞌatsꞌoknuniyau ju uxijnan. Ju quitꞌin icnajun ni yuchi ju quilakꞌauꞌan ju lai lhilaksican. Pus va lacatsꞌunin ju iclaꞌatsꞌoknuniyau. Iclamapꞌaksiyau. Chai iclajunauch ni stavasalanti ju xaclajunau acsni iclajuniu ni chunch ju quintapuꞌaktaijun ju Dios laꞌixꞌamapaininti. Pus va tachi alhilacꞌapꞌitꞌit ju yuchi.
\p
\v 13 Pus ju vachuꞌ talhilacaꞌanta ju Cristo ju ani tavilanalh lakꞌachakꞌan Babilonia asacxtuta vachuꞌ ju Dios tachi ju tasacxtutan ju uxijnan. Ju yuꞌunch chai ju Marcos taꞌamacꞌaminin. Ju Marcos tachi ju va quintsꞌalh iclaktsꞌin.
\v 14 Alamacꞌamitꞌit ju pumatamin lacaꞌamapaininti.
\p Ictapainini ju Dios ni cataꞌaktaijuyan ni jantu calacꞌalh ju miꞌalhunutꞌan tachi chun ju uxijnan ju lhilacꞌapꞌinatꞌit ju Jesucristo. Chunchach vasalh cava.