\id 2PE
\ide UTF8
\h 2 PITALUꞌ
\toc1 2 PITALUꞌ
\mt1 IXLHILAKATꞌUI ALHIQUI JU ATSꞌOKNULH JU PITALUꞌ
\c 1
\s1 Ju Pitaluꞌ atsꞌoknuni ju aliꞌin ju vachuꞌ talhilacaꞌanta ju Jesús
\p
\v 1 Ju quitꞌin icSimón Pitaluꞌ. Ju quitꞌin xalapanac icjunita laꞌixmacni ju Jesucristo. Chai ixtamalakachan icjunita. Va iclamacꞌamiyau ju uxijnan ju taꞌaktaijutan ju Dios ni laich vachuꞌ xalhilacꞌapꞌinatꞌit ju Jesús. Pus ju quijnan chai vachuꞌ ju uxijnan na tuꞌuꞌ lhiulayau ni lai lhilaksiyau ju Dios. Pus ju quiDiosꞌan chai ju quiꞌamakꞌalhtaxtunuꞌan Jesucristo sok tanavi acsni talacasqꞌuin ni takꞌalhtaxtuyau acsni lhilaksiyau ju Jesús.
\v 2 Pus ictapainini ju Dios ni palai lhu catanavinin lamapainin chai palai cataꞌaktaijuyan ni jantu calacꞌalh ju miꞌalhunutꞌan. Chai chunch ju catapasayaꞌ lamiꞌatsucuntiꞌan ni palai amispꞌayaꞌitꞌit ju Dios chai ju quiꞌucxtinꞌan Jesucristo.
\s1 Chanich junita isꞌatsucuntiꞌan ju talhilacaꞌanta ju Jesucristo
\p
\v 3 Ju Dios na tachapun. Chai yuchach ju quintaꞌaktaijuyan laquiꞌatsucuntiꞌan ni lai tsucuyau tachi ju kꞌachani ju yuchi mas va tuchi catapasalh. Chai quintaꞌaktaijuyan va ixlacata ni mispayauch ju Cristo. Pus acsnich ju xalhilacaꞌanau ju yuchi acsni quintamacꞌatsanitan ni yuchach ju xakꞌai tucan chai slivasalh na kꞌox.
\v 4 Chai ni chunch junita ju Cristo pus vachuꞌ quintaxtaknitan ju ixchivinti ju slivasalh na kꞌox chai lhitapalai. Chai va ixlacaꞌatalh ni lacaꞌiniyau ju ixchivinti ni aquintaꞌaktaijuyan pus laich macaju ju macxcai ju alin ju ani lacamunutpaꞌ va ixlacaꞌatalh ju macxcai quiꞌatalacpastꞌacꞌatꞌan. Vachuꞌ lai cakꞌachanikꞌoyau tachi chun ju taxtokni ju vachuꞌ kꞌachani ju Cristo.
\v 5 Pus ni chunch aquintaꞌaktaijuyan ju Cristo ni lhilacaꞌanauch ju yuchi pus tasqꞌuini ni ixlhichux quiꞌalhunutꞌan canaviu cuenta ta yu lai soknicꞌa cava ju quiꞌatsucuntiꞌan. Chai ni soknicꞌa ju quiꞌatsucuntiꞌan pus tasqꞌuini ni cacꞌatsau tamalhch ju kꞌox lhiulai ju Cristo chai tamalhch ju jantu.
\v 6 Chai ni cꞌatsayauch tamalhch ju kꞌox lhiulai ju Cristo chai tamalhch ju jantu kꞌox pus tasqꞌuini ni cakꞌaichokocau quiꞌakstuꞌan. Chai ni cakꞌaichokocau quiꞌakstuꞌan pus tasqꞌuini ni vachuꞌ catastucniyau ju quimakꞌalhkꞌajnatꞌan chai jantu jeks caꞌuniu. Chai ni catastucniyau ju quimakꞌalhkꞌajnatꞌan chai jantu jeks caꞌuniyau pus tasqꞌuini ni vachuꞌ stunin canavinikꞌoyau ju ixkꞌachat ju Dios.
\v 7 Chai ni stunin canavinikꞌoyau ju ixkꞌachat ju Dios pus tasqꞌuini ni vachuꞌ camapainiyau ju vachuꞌ talhilacaꞌanta ju Cristo. Chai ni camapainiyau ju vachuꞌ talhilacaꞌanta ju Cristo pus tasqꞌuini ni vachuꞌ camapainiyau ju aliꞌin lapanacni.
\p
\v 8 Chai ni chunch junita ju quiꞌatsucuntiꞌan chai ni va tachi palai chunch catasuyaꞌ pus aktsꞌiya lhitapalai ju quiꞌatsucuntiꞌan. Chai ni mispayauch ju Jesús pus ju yuchi aquintaxtakniyan ju ixtachaput ni laich canaviyau ju ixlhichꞌalhcat.
\v 9 Para ju tam lapanac ju jantu chun junita ju isꞌatsucunti pus na tsꞌistacaꞌ ju laꞌixꞌalhunut. Lana jantuch pastacpalai ta yu ixjunita ju isꞌatsucunti ju makꞌanchich. Jantu vasalh laꞌixlhichux ixꞌalhunut lhilacaꞌamputun ju Dios. Va captach ni xacꞌanicanta ju ixꞌalactuꞌunti ju xanavi.
\v 10 Pus ji quiꞌalakꞌavin yuchi alhitꞌalacꞌasutꞌit laꞌixlhichux miꞌalhunutꞌan ni vasalh tasacxtutan ju Dios chai talhcaꞌulatan ni isꞌaskꞌatꞌan aꞌunaꞌitꞌit. Chai ni tasui lamiꞌatsucuntiꞌan tachi chun ju ani taxtokni pus jantu atꞌitsꞌankꞌatꞌit.
\v 11 Chai ni chunch junita ju miꞌatsucuntiꞌan pus slivasalh lhikꞌach atꞌanuyaꞌitꞌit ju lactꞌiyan junta lhinajun ju quiꞌucxtinꞌan chai quiꞌamakꞌalhtaxtunuꞌan Jesucristo. Chai ju yuchi jonkꞌalhita ucxtin.
\p
\v 12 Pus yuchi va tachi aclalhimapastꞌacꞌaniyau junima taxtokni. Chunch aclayaꞌ mas mispꞌayatꞌitch chai ixlhichux miꞌalhunutꞌan lhilacꞌapꞌintꞌatꞌit ju stavasalanti ju masunicꞌantꞌatꞌit.
\v 13 Chai iccꞌatsai ni lhijunch ni aclamalacpucujuchokoch ju lamintacꞌatsanꞌan acsni iclamapastꞌacꞌaniyau ju ani taxtokni. Chai chunch aclanaviyau ni ictitꞌajuncaꞌ.
\v 14 Pus iccꞌatsai ni jantu makꞌan actitsuculh ni chunch ju quimavasalanilh ju quiꞌucxtinꞌan Jesucristo.
\v 15 Chai vachuꞌ ixlhichux quiꞌalhunut acpuxcoyaꞌ ta yu laich va tachi apꞌastꞌacꞌaꞌitꞌit ju ani taxtokni mas acniyach.
\s1 Ju aliꞌin talaktsꞌilh ni vasalh xakꞌai ju Jesús
\p
\v 16 Acsni xaclajunau ni yuchi tucan ju xakꞌai ju quiꞌucxtinꞌan Jesucristo chai ni caminchokoyaꞌ ju yuchi jantu xaclajunau ixchivinti ju tam lapanac ju va isꞌakstu calakꞌoxi ni tachi ju va stavasalanti catasu. Ju quijnan iccꞌatsayau ni xakꞌai ju Jesucristo ni laquilakchulh quincꞌan ju iclaktsꞌiuch ni chunch junita.
\v 17 Pus iclaktsꞌiuch ni xlapꞌapꞌapꞌa talacasu ju ixlacatuna. Chai icpumachakxauch ni vasalh chunch junita. Chai ickꞌasmatvich acsni chivinilh ju Dios. Tus lactꞌiyan mincha ju ixchivinti chai naulh ni xakꞌai junita ju Jesús acsni chani naulh: “Yuchach ju ani ju quintsꞌalh ju na icmapaini. Na kꞌox iclhiulai ju yuchi”. Chunch naulh ju Dios.
\v 18 Chai ju quijnan ickꞌasmatvich ju anuꞌ chivinti ju mincha lactꞌiyan acsni kꞌaixtam xactꞌavilau ju Jesús ju anuꞌ akstijun junta isacxtuta ju Dios ni anch camavasalayanta ni vasalh xakꞌai ju istsꞌalh.
\p
\v 19 Ju makꞌaniya ixlapanacni Dios na lhu chivinti ixtanajun ixlacata ju tuchi catapasayaꞌ astan. Chai ju chavai iclaktsꞌiuch ni stavasalanti ju tuchi ixtanajun. Chai na kꞌoxich tachi ju naviyatꞌit ni na naviyatꞌit cuenta ju ani ixchivintiꞌan. Ju yuꞌunch quintamalacpucujun junta jantucaꞌ lai ixmachakxayau. Chai tasqꞌuini ni va tachi anavitꞌit cuenta ju ixchivintiꞌan tus acsni cachinchokoyaꞌ ju Cristo.
\v 20 Para ju tucan tasqꞌuini yuchi ni amachꞌakxatꞌit ju ani. Matiꞌ tuꞌuꞌ ju ixchivinti Dios ju ixtanajunch makꞌanch ju camavasala ju va isꞌakstu tam lapanac.
\v 21 Jantu lai chunch catilalh ni matiꞌ ixchivinti Dios ju va ixtalakꞌoxinti lapanac cava. Para ixlapanacni Dios tachivinilh tachi ju ajunilh ju Spiritu Santu.
\c 2
\s1 Alin ju aꞌokxchokꞌoni amamakaꞌunin
\p
\v 1 Para ju makꞌanchich ixtaꞌalin vachuꞌ ju sia yuꞌunch ju quintꞌaꞌisraelitanin ju va ixtatalacasui tachi ju yuꞌunch ju ixtanajun ixchivinti Dios mas jantu. Pus vana va chun ju lamilhiꞌuxijnan. Caꞌalinaꞌ ju aꞌokxchokꞌoni amamakaꞌunin. Ju yuꞌunch va catanonaꞌ tuꞌuꞌ tachi ju va stavasalanti para va aꞌokxchokꞌonti chivinti junita. Ju yuꞌunch jantu vas tachivinin acsni tanajun ixlacata ixꞌucxtinꞌan Jesús ju amakꞌalhtaxtunulh. Pus ju chunch isꞌakstuꞌan tapuxcolakxtui ju ixmakꞌalhkꞌajnatꞌan ju vatsꞌalhti cachinaꞌ.
\v 2 Chai na pumalhu vachuꞌ va lhilakachapui catatsucuyaꞌ tachi ju talai ju aꞌokxchokꞌoni amamakaꞌunin. Chai yuchi macxcai chivinti calhichivincanaꞌ ju ixti Dios mas stavasalanti ju yuchi.
\v 3 Chai ni na talhacchaꞌaniyan pus cataꞌaꞌokxchokꞌomaxtuniyan ju mintuminꞌan laꞌixchivintiꞌan. Pus ni akꞌasmatnitꞌit tachi ju va stavasalanti alhiulatꞌit. Para makꞌanchich ixꞌamucꞌanicanta ixtalakꞌalhinꞌan chai aktsꞌiya caꞌalinaꞌ ju ixmakꞌalhkꞌajnatꞌan ju jonkꞌalhita.
\p
\v 4 Pus ju Dios jantu amacꞌacxanilh ju anquilhnin ju na taꞌalactuꞌunulh. Para amacaꞌancalh ju lacajipi. Alacchꞌimacaꞌalh lacaꞌatatsꞌisni. Anchach alacmakꞌacanta tus acsni camakꞌosaspitcanach.
\v 5 Chai jantu amacꞌacxanilh ju makꞌaniya lapanacni. Va yuchi ju makꞌalhtaxtulh ju Noé ju ajuni ju lapanacni ixlacata ju soknicꞌa atsucunti. Vachuꞌ amakꞌalhtaxtulh ju aliꞌin ixpumatujunꞌan lapanacni. Tatakꞌalhtaxtulh acsni milh ju akmuxtut ju ixlhilacaputsꞌun ju lacamunutpaꞌ. Tatsꞌankꞌakꞌo ju jantu ixtatalhoni ju Dios.
\v 6 Vachuꞌ ju Dios amucꞌanilh ixtalakꞌalhinꞌan ju amachakꞌan lakꞌachakꞌan Sodoma chai Gomorra acsni amaclalh. Va lhcꞌacꞌa va ju anuch lakꞌachakꞌanixni. Chunch ju navilh ju Dios ni va capuꞌamalacpastacniyaꞌ ju catatsucuyaꞌ astan ju jantuch catatalhoniyaꞌ ju Dios.
\v 7 Para ju Dios amakꞌalhtaxtulh pumatam lapanac ju Lot ixjuncan. Ju yuchi ixchaꞌanta ju lakꞌachakꞌan Sodoma chai na soknicꞌa ixjunita ju isꞌatsucunti ju yuchi laꞌixmacni Dios. Ju yuchi na jeks ixtamavatach va ixlacaꞌatalh ju macxcai alactuꞌunti ju ixtanavi ju yuꞌunch ju jantu tuꞌuꞌ ixtalhiulai ju lhamapꞌaksin.
\v 8 Pus ju anuꞌ lapanac ju Lot ixjuncan ni na va soknicꞌa ixjunita ju isꞌatsucunti laꞌixmacni Dios chai ni anch ju ixtꞌajun ju lakꞌachakꞌan Sodoma pus va tachi ixꞌamakꞌaninin. Va ixlhiꞌamakꞌaninin ju tuchi islaktsꞌin chai tuchi iskꞌasmatꞌa ju ixtanavi ju amachakꞌan anch ni lana jantu tuꞌuꞌ ixtalhiulai ju ixlhamapꞌaksin Dios.
\v 9 Pus ju Dios ni amakꞌalhtaxtulh ju Noé chai ju Lot pus tasui ni cꞌatsai ju Dios ta yu laich capumakꞌalhtaxtuyaꞌ ju tatalhoni ju yuchi acsni amapastꞌacꞌanican ju tuꞌuꞌ alactuꞌunti. Ju Dios vachuꞌ cꞌatsai ta yu lai capumakꞌayaꞌ ju alactuꞌunin tus acsni cachinaꞌ ju avilhchan acsni camakꞌosaspitcanach ju lapanacni. Chai mas tucaꞌ chin ju anuꞌ avilhchan amamakꞌalhkꞌajni.
\p
\v 10 Para palai catamakꞌalhkꞌajnanaꞌ ju yuꞌunch ju va tanavini ju macxcai ixkꞌachat ixlacatunaꞌan. Va lhitsꞌisita tanavi. Jantuch tuꞌuꞌ talhiulai ju lhamapꞌaksin. Jantu xamatiꞌ tatalhoni. Jantu lai talacaꞌi. Jantu tatalhoni ixlhichivininca ju amacxcai ju tavilanancha ju lactꞌiyan.
\v 11 Para ju anquilhnin jantu macxcai talhiꞌachivimakꞌan ju chunch talai. Jantu tajuni ju quiꞌucxtinꞌan Dios. Jantu chun talai ju anquilhnin mas palai tachapunin ju yuꞌunch chai palai xalackꞌajin. Palai jantu ju va lapanacni.
\p
\v 12 Ju tuꞌuꞌ atapacxat yuchi lhiꞌalin ni laich cachꞌapacalh chai laich camaknicalh. Chai talakꞌan ju tuꞌuꞌ skꞌapa ju aꞌulanican. Pus vana va chun ju anuch lapanacni. Chunch ju tatsucui tachi ju tuꞌuꞌ tonto atapacxat. Isꞌakstuꞌan tapuxcolakxtui ixmakꞌalhkꞌajnatꞌan junta jonkꞌalhita ni na macxcai talhichivinin ju tavilanancha ju lactꞌiyan mas jantu tamachakxai ta talhijunitach.
\v 13 Cataꞌamaklhtayananaꞌ ju ixtalhajaꞌan ixꞌalactuꞌuntiꞌan. Ju yuꞌunch na kꞌoxich talhiulai acsni va lhilakachapuꞌ talai mas tuncuj. Ju yuꞌunch chunch tajunita tachi ju tuꞌuꞌ lhquiliqui. Tachi ju tuꞌuꞌ ju na takꞌalhitach. Ju yuꞌunch va tachi taꞌalactuꞌunun chai na kꞌox talhiulai acsni taꞌokxchokꞌoyan ju uxijnan acsni va kꞌaixtam tatꞌavenan tachi ju va vasalh miꞌalakꞌavinꞌan tajunita.
\p
\v 14 Ju yuꞌunch acsni talaktsꞌin tam atsiꞌ va ixꞌalactuꞌuntiꞌan tapastꞌacꞌa. Va tachi taꞌalactuꞌunun laꞌixlakchulhꞌan. Va taꞌokxchokꞌoi ju apumatam ju jantu lai kꞌaichokocan isꞌakstu. Na talanitach ixlhacchaꞌantiꞌan. Pus ju yuꞌunch aktsꞌiya camamakꞌalhkꞌajnikꞌalhicanaꞌ.
\v 15 Ju yuꞌunch tamacajuntach ju ti ju soknicꞌa. Tatsꞌankꞌatach. Chunch ju talai tachi ju lalh ju makꞌaniya lapanac ju Balaam ixjuncan. Istsꞌalh ju Beor. Ju yuchi kꞌox ixlhiulata ju tumin ju ixlhajalh ni laich cava ixnavilh ju macxai.
\v 16 Para ju yuchi kꞌajicalh ixlacata ixꞌalactuꞌunti. Pus ju puru ju ixpuꞌanta xakꞌala. Chivinilh tachi ju tam lapanac. Manunilh ixtalhanti laꞌixꞌalhunut ju anuꞌ lapanac ju ixnajun ixchivinti Dios ni jantu catailhiꞌalh ju ixlhilakachapuꞌ.
\p
\v 17 Pus ju anuch alactuꞌunin lapanacni chunch tajunita tachi ju tuꞌuꞌ pos ju lhilaksican ni laich caꞌicalh ju xcan. Para va puxixta. Pus vana va chun ju yuꞌunch. Jantu lai alhilaksican ni tuꞌuꞌ kꞌox chivinti aquijunilh. Chai chunch tajunita tachi ju tuꞌuꞌ ataputsꞌi ju vaklhun alacmatsꞌalatꞌoncan lacaꞌun. Jantu tavanan lhimin ju xcan. Pus ju yuꞌunch vachuꞌ va taꞌaꞌokxchokꞌonun. Para makꞌacanta ixlacataꞌan junta jonkꞌalhitach atatsꞌisni.
\v 18 Slivasalh na cꞌus tachivinin ju yuꞌunch mas jantu tuꞌuꞌ nomputun ju ixchivintiꞌan. Tapuꞌokxchokꞌoi ju ixtꞌalapanacniꞌan ju va ancaꞌ tamacaulh ju aliꞌin ixtꞌalapanacniꞌan ju pꞌulhnan na ixtatꞌaꞌalactuꞌunun. Tanajun ni laich navican ju macxcai ixkꞌachat ju quilacatunaꞌan.
\v 19 Ju yuꞌunch taꞌajuni ju lapanacni ni laich catanavi va tuchi tanaviputun. Para isꞌakstuꞌan jantu lai chunch tanavipalai. Jantu lai tanavi ju kꞌox. Va yuchi ju alactuꞌunti ju tanavi ni va yuchi ju alin laꞌixꞌalhunutꞌan. Pus ju tuchi alin laquiꞌalhunutꞌan yuchi ju va tsa tsa naviputunau laquiꞌatsucuntiꞌan.
\v 20 Ni xamatiꞌ camacaulh ju alactuꞌunti ju alin ju lacamunutpaꞌ va ixlacaꞌatalh ni mispaich ju quiꞌucxtinꞌan chai quiꞌamakꞌalhtaxtunuꞌan Jesucristo para ni aktam catanuchokopa lacaꞌalactuꞌunti chai calhinonchokopa laꞌisꞌatsucunti ju macxcai ju alin laꞌixꞌalhunut pus palai takꞌalhi ju isꞌatsucunti. Palai jantu chun ixjunita acsni tucaꞌ ismispai ju Jesús.
\v 21 Palai kꞌox ixva ni jantu tavanan ismispa ju xati ju kꞌox atsucunti. Palai macxcai ni mispaich chai astan va macajun ju ixlhamapꞌaksin Dios ju ixtaknicanta.
\v 22 Pus ni va astaniya macajun ju ixlhamapꞌaksin Dios pus vasalh chunch xajcha laꞌisꞌatsucunti tachi ju noncan junta chani najun: “Ju xkꞌoi laich uchokoi ixpꞌatꞌat. Chai ju pꞌaxni mas acpaxa catatꞌaspitchokoyaꞌ lacapulhkꞌom”.
\c 3
\s1 Ju Jesucristo caminchokoyaꞌ
\p
\v 1 Ji quiꞌalakꞌavin iclajumputunau ju ani. Ju ani yuchi ju ixlhilakatꞌui alhiqui ju iclaꞌatsꞌoknuniu. Chai chux lakatꞌui alhiqui iclapumalacpucujuchokoputunau ju salaka mintacꞌatsanꞌan.
\v 2 Pus ju makꞌaniya lapanacni ju ixtanajun ixchivinti Dios na lhu chivinti ixtanajun. Chai ju quijnan ju ixtamalakachan Jesús icjuntau iclajuntau na lhu ixchivinti ju quiꞌucxtinꞌan chai quiꞌamakꞌalhtaxtunuꞌan Jesús. Pus iclaꞌatsꞌoknuniu ni laich aclamapastꞌacꞌaniyau ju tuchi iclajuntau chai tuchi ixtanajun ju makꞌaniya lapanacni.
\p
\v 3 Pus pꞌulhnan acꞌatsꞌatꞌit ju ani. Acsni vanin minta ju avilhchan acsni caminchokoyaꞌ ju Cristo pus cataꞌalinach ju lapanacni ju catalhitsꞌiꞌinaꞌ ixtaxtokni Dios. Chai catanaviyaꞌ ju macxcai ixkꞌachat ixlacatunaꞌan.
\v 4 Chai chani catanonach: “Tajuch ni jantuch min ju Jesús ni sala najunta ni caminchokoyaꞌ. Tus acsni tanita ju milacpaꞌitniꞌan jantu tuꞌuꞌ tapaxata. Chunch ju tailhiꞌancanta tachi ju ixjunita tus acsni navicantachalhch ju lacamunutpaꞌ”. Chunch ju catanonach.
\v 5 Para alin tuchi ju tacapputun. Ju yuꞌunch tacꞌatsai ni laꞌixchivinti Dios alilh ju lactꞌiyan ju makꞌanchich. Chai ju xcan ju ixma ju ani lacamunutpaꞌ ju Dios punavilh ju lacatꞌun.
\v 6 Pus ju yuꞌunch tanajun ni jantu tuꞌuꞌ tapaxata para va tacapputun ni akmuxtucalh ju lacamunutpaꞌ ju ixꞌalin ju acsnich chai ju lapanacni tanitajukꞌolh ju lacxcan.
\v 7 Pus ju lactꞌiyan chai ju lacatꞌun ju alin ju chavai vana laꞌixchivinti Dios ju makꞌacanta tus acsni calacxavacanach. Makꞌacanta tus acsni cachinach ju avilhchan acsni camakꞌosaspitcanach ju lapanacni chai acsni camacaꞌancanaꞌ laꞌixmakꞌalhkꞌajnatꞌan ju yuꞌunch ju jantu tatalhoni ju Dios.
\p
\v 8 Pus ji quiꞌalakꞌavin jantu acꞌaptꞌit ni jantu chun putekꞌeꞌanta ju Dios ju avilhchan tachi ju quijnanꞌan. Ju yuchi lhilhcai tam avilhchan tachi ju tam milh cꞌata cava. Chai ju tam milh cꞌata ju yuchi lhilhcai tachi ju va lakatam avilhchan cava.
\v 9 Jantiyuꞌ ni va jantu sai camimputulh ju quiꞌucxtinꞌan Cristo tachi ju quintakꞌalhtasunitan. Jantu chun lai mas chun tanajun ju aliꞌin. Para ju yuchi lacsni quintalhiꞌanan. Jantu lacasqꞌuin ni xamatiꞌ catitsꞌankꞌa. Ju yuchi lacasqꞌuin ni chux tamch catapastaclh chai catalhilacaꞌalh ju yuchi.
\p
\v 10 Ju tam akꞌalhonaꞌ chin ju tsꞌis acsni jantu cꞌatsacan ni lai cachilh. Pus vana va chun cajunaꞌ ju anuꞌ avilhchan acsni caminchokoyaꞌ ju Cristo chai caꞌamakꞌosaspitkꞌocanaꞌ ju lapanacni. Jantu xamatiꞌ cacꞌatsayaꞌ ni acsnich ju lai camilh ju yuchi. Chai ju acsnich na pꞌas camacatꞌonaꞌ acsni catsꞌankꞌayaꞌ ju tꞌiyan. Chai tachi chun ju taxtokni na scacata catajunaꞌ chai cataxtꞌajkꞌoyaꞌ. Chai ju lacatꞌun chai tachi chun ju alinch ju anch calhcukꞌoyaꞌ.
\p
\v 11 Pus ni catsꞌankꞌakꞌoyaꞌ tachi chun ju ani taxtokni pus tasqꞌuini ni salaka aꞌuntꞌit lamiꞌatsucuntiꞌan. Chai atꞌalhonitꞌit ju Dios.
\v 12 Tasqꞌuini ni apꞌacxantꞌaꞌitꞌit ju Cristo chai slivasalh alacꞌasqꞌuintꞌit ni vatsꞌalhti cachilh ju anuꞌ avilhchan acsni caminchokoyaꞌ ju quiꞌucxtinꞌan Cristo chai caꞌamakꞌosaspitcanach ju lapanacni. Pus ju acsnich calhcukꞌoyaꞌ ju tꞌiyan. Catsꞌankꞌakꞌoyaꞌ. Chai ju xataxtokni ni na cascacayaꞌ pus caxtꞌajkꞌoyaꞌ.
\v 13 Para ju quijnanꞌan pacxantaitauch ju sastꞌi tꞌiyan chai ju sastꞌi lacatꞌun tachi ju quintakꞌalhtasunitan ju Dios. Chai ju anch va si salaka cajunaꞌ.
\p
\v 14 Ju uxijnan ji quiꞌalakꞌavin ni pꞌacxanatꞌit ju Cristo ni caminchokoyaꞌ chai catasastꞌichokoyaꞌ ju tꞌiyan chai ju lacatꞌun pus ixlhichux miꞌalhunutꞌan alhistꞌaccꞌantꞌit. Ju chunch acsni caminchokoyaꞌ ju yuchi pus jantu lhquiliqui cajunaꞌ ju miꞌatsucuntiꞌan. Alai salaka cajunaꞌ laꞌixmacni ju yuchi. Vachuꞌ catalaktsꞌinan ju Dios ni jantu va atꞌalakꞌaitꞌonatꞌit ju aliꞌin.
\v 15 Amachꞌakxatꞌit ni yuchi jantu sai lhiminta ju Cristo ni va lacasqꞌuin ni palai lhu catatakꞌalhtaxtulh ju lapanacni chai jantu cataꞌalh ju lacajipi. Chai vana va chun ju taꞌatsꞌoknunitan ju quilakꞌauꞌan Pablo ju na mapainiyau. Chunch ju atsꞌoknunta ju yuchi ni Dios ju xtaknilh ju kꞌox ixtacꞌatsan.
\v 16 Chai vana va chun ju lhichivinin ju ixꞌamapaininti Dios laca aliꞌ ixꞌalhiqui ju atsꞌoknunta ju Pablo. Chai laꞌixꞌalhiqui ju yuchi na alin ju chivinti ju na xcai machakxacan. Chai ju jantu kꞌox tamachakxai chai ju va tam tam tanajun pus mas tamachakxai para tanajun ni jantu chun nomputun ju ixchivinti. Chunch tanajun ni va jantu tanaviputun. Chai chunch vachuꞌ taꞌulhtui ju aliꞌ ixchivinti Dios ju tsꞌokcanta. Para ju chunch talai catatsꞌankꞌakꞌalhiyaꞌ.
\p
\v 17 Para ju uxijnan ji quiꞌalakꞌavin ni cꞌatsꞌayatꞌit ni chunch ju talai ju yuꞌunch ju va taꞌaꞌokxchokꞌonun pus alhistꞌaccꞌantꞌit. Jantu xcai ni aꞌokxchꞌokꞌocꞌantꞌit laꞌixchivintiꞌan ju anuch alactuꞌunin lapanacni. Chai ju chunch va acꞌapꞌaꞌitꞌit ju tuchi pꞌas lhilacꞌapꞌinatꞌit ju chavai.
\v 18 Alai va palai lhu amachꞌakxatꞌit ju lamapainin ju quintanaviniyan ju Dios. Chai palai amispꞌatꞌit ju quiꞌucxtinꞌan chai quiꞌamakꞌalhtaxtunuꞌan Jesucristo. Chach lakꞌayacalh ju yuchi ju chavai chai tus va tavananch. Chunch vasalh cava.