\id 1JN
\ide UTF8
\h 1 XIVAN
\toc1 1 XIVAN
\mt1 JU PꞌULHNAN ALHIQUI JU ATSꞌOKNULH JU XIVAN
\c 1
\s1 Ju chivinti ixlacata ju atsucunti ju jonkꞌalhita lactꞌiyan
\p
\v 1 Ju Jesús ixtꞌajun acsni tucaꞌ ixꞌalin ju lacamunutpaꞌ. Para ju quijnan ickꞌasmatꞌauch ju ixchivinti chai iclaktsꞌintauch ju yuchi laquilakchulh quincꞌan. Va tsa tsa xaclaktsꞌinauch acsni ixvi ju ani lacamunutpaꞌ. Chai iclakchaꞌauch ju yuchi laquimacaꞌ quincꞌan. Ju yuchi xtꞌakꞌa ju kꞌox atsucunti. Chai quintamamachakxanin ta yu junita ju ixꞌalhunut ju quimpaiꞌan Dios.
\v 2 Chai ju yuchi ju lai xtꞌakꞌa ju kꞌox atsucunti quitsucuchilh ju ani. Chai iclajunauch ni vasalh iclaktsꞌiuch ju quijnan. Chai iclajunau ixlacata ju yuchi ju lai xtꞌakꞌa ju kꞌox atsucunti. Ju yuchi va jonkꞌalhita. Ju yuchi ixtꞌavilhcha ju quimpaiꞌan Dios chai lapanac quitsucuchilh ju ani lacamunutpaꞌ.
\v 3 Chai ju tuchi iclaktsꞌintauch chai ju ickꞌasmatꞌauch pus yuchach ju iclajunau ju uxijnan. Ju chunch ju uxijnan vachuꞌ aꞌunaꞌitꞌit ixꞌamigojni ju quimpaiꞌan Dios chai ju istsꞌalh ju Jesucristo juncan. Tachi ju quijnan ni ixꞌamigojni icjuntau vachuꞌ.
\v 4 Pus va iclacasqꞌuinau ni slivasalh akꞌachꞌanaꞌitꞌit. Yuchi iclalhiꞌatsꞌoknuniyau ju ani taxtokni.
\s1 Va yuchi ju atuncunuꞌ ju alin junta vilhcha ju Dios
\p
\v 5 Pus ju ani chivinti ju aclajunau ju uxijnan yuchi ju quintajuntan isꞌakstu ju Jesús. Ma va yuchi ju atuncunuꞌ ju alin junta vilhcha ju Dios. Nin lacatsꞌunin ma matiꞌ ju atatsꞌisni.
\v 6 Pus ju quijnanꞌan taꞌaklhtamat canaju chai jantu vasalh canaviu ju stavasalanti ni canaju ni ixꞌamigojni Dios juntau para ni va alactuꞌununau. Ju chunch tachi ju va tsꞌistacaꞌ laquiꞌalhunutꞌan ni jantu lai sok anau.
\v 7 Pus junta vilhcha ju Dios si atuncunuꞌ junita. Chai ju quijnanꞌan ni naviyau ju kꞌox pus tachi ju va putuncujun junita laquiꞌalhunutꞌan. Chai ju chunch kꞌox ixꞌamigojni juntau ju aliꞌin ju vachuꞌ talhilacaꞌanta ju Cristo. Chai ju chunch vachuꞌ quintaxacanikꞌoyan tachi chun ju macxcai laquiꞌalhunutꞌan va ixlacaꞌatalh ni nilh ju Jesucristo istsꞌalh Dios ju quilacataꞌan.
\p
\v 8 Para ni va canaju ni matiꞌ ju quiꞌalactuꞌuntiꞌan pus va okxchokꞌocanau quiꞌakstuꞌan. Jantu nonau ju stavasalanti.
\v 9 Para ni cajunkꞌoju tachi chun ju quiꞌalactuꞌuntiꞌan ju Dios pus ju yuchi aquintamacꞌacxaniyan ju quiꞌalactuꞌuntiꞌan chai aquintaxacanikꞌoyan tachi chun ju amacxcai. Pus ju yuchi aktsꞌiya muctaxtui tuchi najunta. Chai soknicꞌa ju navi acsni quintamacꞌacxaniyan ju quiꞌalactuꞌuntiꞌan. Pus lai quintamacꞌacxaniyan ju quiꞌalactuꞌuntiꞌan va ixlacaꞌatalh ni quinichilh ju Cristo ju quilacataꞌan.
\v 10 Para ni va canaju ni jantu alactuꞌununau pus tachi ju va nonau ni taꞌaklhtamat najun ju Dios chai lana jantu lacaꞌiniyau ju ixchivinti.
\c 2
\s1 Yuchi ju Cristo ju quintaꞌaktaijuyan
\p
\v 1 Ju uxijnan tachi ju va quiꞌaskꞌatꞌan untꞌatꞌit. Chai jantu iclacasqꞌuin ni alactꞌuꞌununtꞌit. Yuchi iclalhiꞌatsꞌoknuniyau ju ani. Para ni caꞌalactuꞌunulh tam xamatiꞌ pus alin ju quintaꞌaktaijuyan laꞌixmacni quimpaiꞌan Dios. Yuchi ju Jesucristo ju na soknicꞌa ju isꞌatsucunti.
\v 2 Chai ju yuchi acsni tavanan nilh pus matanꞌula ixꞌalhunut ju Dios ixlacata ju quiꞌalactuꞌuntiꞌan acsni mapalalh ju quiꞌalactuꞌuntiꞌan. Chai jantu va quilacata quiꞌakstuꞌan ju nilh para vachuꞌ ixlacata tachi chun ju lapanacni ju ani lacamunutpaꞌ.
\p
\v 3 Chai cꞌatsayau ni mispayauch ju Dios acsni quiclacaꞌiyau ju ixlhamapꞌaksin ju yuchi.
\v 4 Para ni xamatiꞌ canonaꞌ ni mispai ju Dios para ni jantu quiclacaꞌi ju ixlhamapꞌaksin pus ju yuchi va taꞌaklhtamai. Jantu najun ju stavasalanti.
\v 5 Para va tichi chavaich ju quiclacaꞌi ju ixchivinti Dios putasui ni ixlhichux ixꞌalhunut ju mapaini ju Dios. Chai chani ju lhicꞌatsayau ni vasalh va lakatam tꞌajuntau ju Cristo.
\v 6 Va tichi chavaich ju najun ni va lakatam tꞌajunita ju Cristo tasqꞌuini ni catsuculh tachi ju ixtꞌajun ju yuchi acsni ixtꞌajun ju ani lacamunutpaꞌ.
\s1 Ju sastꞌi lhamapꞌaksin
\p
\v 7 Quiꞌalakꞌavin jantu iclaꞌatsꞌoknuniyau tuꞌuꞌ sastꞌi lhamapꞌaksin acsni iclajunau ni alamapꞌainitꞌit. Alai yuchi ju aktsꞌiya mispꞌayatꞌit tus acsni tavanan lhilacꞌapꞌitꞌit ju Cristo. Chai yuchi ju chavai ju iclajunchokopalau. Pus ju anuꞌ lhamapꞌaksin ju aktsꞌiya mispꞌayatꞌit yuchach ju chivinti ju iskꞌasmatꞌatꞌit tus acsni tavanan lhilacꞌapꞌitꞌit ju Cristo.
\v 8 Para mas chunch ca aktsꞌiya laich acnaulh ni sastꞌi junima lhamapꞌaksin ju iclajunau. Tachi ju va sastꞌi ixjunita acsni quintaxtaknitan ju Jesús. Chai ju uxijnan amaklhtꞌayanantꞌatꞌit ju anuꞌ lhamapꞌaksin tachi ju va sastꞌi. Chai vasalh sastꞌi junita ni tam xajun ju quiꞌatsucuntiꞌan ni mispayau ju Dios ju vasalh quintamalacpucujunitan quintacꞌatsanꞌan. Tꞌajun tapasanaꞌ ju anuꞌ avilhchan acsni na tsꞌista ixjunita laquintacꞌatsanꞌan ni na ixꞌalactuꞌununau.
\p
\v 9 Para ju najun ni vasalh lhilacaꞌanta ju Cristo para ni va xcaji ju tam ixlhilakꞌau laꞌixmacni Cristo pus ju yuchi aktsꞌiya tsꞌistacaꞌ laꞌixtacꞌatsan ni vanach navi ju macxcai.
\v 10 Para ju tꞌalamapaini tam ixlakꞌau pus ju yuchi alhtanan lacaꞌatuncunuꞌ ni navi ju kꞌox chai jantu tuꞌuꞌ alin ju laꞌisꞌatsucunti ju lai capukꞌalhkꞌoslh apumatam.
\v 11 Va tichi chavaich ju xcaji ju tam ixlakꞌau pus aktsꞌiya na tsꞌistacaꞌ ju laꞌixtacꞌatsan ni va axcayanan. Lana lacaꞌatatsꞌisni ju tꞌajun chai jantu cꞌatsai taꞌanchach ju cachaꞌanaꞌ ju laꞌisꞌatsucunti. Jantu lai cꞌatsai ni na va tsꞌista ju laꞌixtacꞌatsan ni va axcayanan.
\p
\v 12 Ju uxijnan tachi ju va quiꞌaskꞌatꞌan untꞌatꞌit. Chai ni macꞌacxanicꞌantꞌatꞌit ju miꞌalactuꞌuntiꞌan va ixlacaꞌatalh ni lhilacꞌapꞌintꞌatꞌit ju Jesús pus yuchi iclalhiꞌatsꞌoknuniyau ju uxijnan.
\v 13 Chai ju uxijnan ji quiꞌacucun mispꞌayatꞌit ju Cristo ju tꞌajun tus acsni maticaꞌ ixjunita ju lacamunutpaꞌ. Chai yuchi iclalhiꞌatsꞌoknuniyauch ju uxijnan. Chai ju uxijnan ji paitat lapanacni tꞌalalhaꞌatꞌatꞌit ju lhacaticuru. Chai yuchi iclalhiꞌatsꞌoknuniyauch ju uxijnan.
\p Chai ju uxijnan ji quiꞌaskꞌatꞌan mispꞌayatꞌitch ju quimpaiꞌan Dios. Chai yuchi iclalhiꞌatsꞌoknuniyauch ju uxijnan.
\v 14 Chai ju uxijnan ji kꞌaya lapanacni mispꞌayatꞌit ju Cristo ju tꞌajun tus acsni maticaꞌ ixjunita ju lacamunutpaꞌ. Chai yuchi iclalhiꞌatsꞌoknuniyauch ju uxijnan. Chai ju uxijnan ji paitat lapanacni lai sastꞌucꞌatꞌit ju macxcai chai slivasalh mispꞌayatꞌit ju ixchivinti Dios chai tꞌalalhaꞌatꞌatꞌitch ju lhacaticuru. Chai yuchi iclalhiꞌatsꞌoknuniyauch ju uxijnan.
\p
\v 15 Jantu va yuꞌ ju anavitꞌit cuenta ju xataxtokni ju ani lacamunutpaꞌ. Nin yuchi ni akꞌachꞌanitꞌit tachi ju talai ju amachakꞌan ju ani lacamunutpaꞌ ju jantucaꞌ talhilacaꞌanta ju Jesús. Pus va tichi chavaich ju va yuchi canavi cuenta ju xataxtokni ju ani lacamunutpaꞌ pus ju chunch tasui ni jantu slivasalh ni camapaini ju Dios.
\v 16 Tachi chun ju taxtokni ju takꞌachani ju jantucaꞌ talhilacaꞌanta ju Jesús si xanavin lacamunutpaꞌ tajunita. Ju yuꞌunch takꞌachanicaꞌ tachi chun ju macxcai ju kꞌachani ju quilacatunaꞌan chai tachi chun ju tuꞌuꞌ ju lhacchaꞌanau acsni laktsꞌinau chai acsni va xalackꞌajin jumputunau laꞌixmacni ju aliꞌin quintꞌalapanacniꞌan. Ju ani si xanavin lacamunutpaꞌ tajunita. Jantiyuꞌ ju quimpaiꞌan Dios ju xtꞌakꞌa ju ani taxtokni.
\v 17 Para ju lacamunutpaꞌ catapasayaꞌ. Chai chux ju xataxtokni ju ani ju na tapuxcajui ju lapanacni vachuꞌ catsꞌankꞌayaꞌ. Para va tichi chavaich ju canaviyaꞌ ju ixkꞌachat ju Dios caꞌalinaꞌ isꞌatsucunti ju conkꞌalhiyanta ju lactꞌiyan.
\s1 Alin ju tanajun ju stavasalanti chai alin ju tanajun ju taꞌaklhtamat
\p
\v 18 Quiꞌaskꞌatꞌan vaninch ju ixꞌaclanti ju lacamunutpaꞌ. Chai ju uxijnan kꞌasmatꞌatꞌit ni caminaꞌ ju catalacasuyaꞌ tachi ju Cristo mas jantiyuꞌ. Chai ju yuchi va calakꞌalhiputunaꞌ ju tuchi navita ju Cristo. Pus mas chavai na lhu taꞌalinch ju talakꞌalhiputun ju tuchi navita ju Cristo. Yuchi lhicꞌatsayauch ni vaninch ju ixꞌaclanti ju lacamunutpaꞌ.
\v 19 Pus ju yuꞌunch ju talakꞌalhiputun ju tuchi navita ju Cristo tataxtuta laquilhiquijnanꞌan va ixlacaꞌatalh ni jantu vasalh quilakꞌauꞌan ixtajunita. Pus ni lhiquijnanꞌan ixtava jantu ixtataxtulh. Para yuchi talhitaxtulh ni chunch ju capucꞌatsacanach ni jantu vasalh quiꞌalakꞌavinꞌan tajunita ju anuꞌ lapanacni ju talakꞌalhiputun ju tuchi navita ju Cristo. Nin tachi pumatam.
\p
\v 20 Para ju uxijnan Cristo taxtaknitan ju Spiritu Santu chai minchuxꞌan mispꞌayatꞌit ju ixchivinti Dios. Chai ju yuchi stavasalanti.
\v 21 Jantiyuꞌ ju iclalhiꞌatsꞌoknuniyau ni va jantu amispꞌatꞌit ju stavasalanti. Yuchach ju ixchivinti Dios. Para ju uxijnan mispꞌayatꞌit ju stavasalanti chai cꞌatsꞌayatꞌit ni jantu lai stavasalanti cativa ju tuꞌuꞌ taꞌaklhtamat. Chai yuchi iclalhiꞌatsꞌoknunitau ju uxijnan.
\p
\v 22 Pus ju taꞌaklhtamat ju palai kꞌai cava yuchi ni canaulh tam xamatiꞌ ni Jesús jantiyuꞌ ju Cristo ju ixnoncan camalakachatachilh ju Dios. Ju najun ni Dios jantu quimpaiꞌan chai ju Jesús jantiyuꞌ ju istsꞌalh yuchach ju va lakꞌalhiputun ju tuchi navita ju Cristo.
\v 23 Va tichi chavaich ju najun ni jantu lhilacaꞌamputun ju istsꞌalh Dios pus jantu lai vachuꞌ ixꞌamigo cativa ju quimpaiꞌan Dios. Para va tichi chavaich ju najun ni lhilacaꞌanta ju istsꞌalh Dios pus ju yuchi ixꞌamigo junita ju quimpaiꞌan Dios.
\p
\v 24 Pus ixchivinti Dios ju kꞌasmatꞌatꞌit acsni pꞌulhnan lacꞌaꞌitꞌit pus yuchach ju alacꞌaꞌikꞌalhitꞌit. Chai ni alacꞌaꞌikꞌalhiyaꞌitꞌit ixchivinti Dios ju kꞌasmatꞌatꞌit acsni pꞌulhnan lacꞌaꞌitꞌit pus islivasalh ixꞌamigojni aꞌunaꞌitꞌit ju quimpaiꞌan Dios chai ju istsꞌalh.
\v 25 Chai ju Jesucristo quintakꞌalhtasunitan ni aquintaxtakniyan ju quiꞌatsucuntiꞌan ju conkꞌalhiyanta ju lactꞌiyan.
\p
\v 26 Iclaꞌatsꞌoknunitau ju ani taxtokni ni va iclajumputunau ni alin ju taꞌaꞌokxchokꞌoputunan.
\v 27 Para ju Cristo taxtaknitan ju uxijnan ju Spiritu Santu chai ju yuchi tꞌonkꞌalhi lamiꞌalhunutꞌan. Chai yuchi jantu lhimaktasqꞌuiniyatꞌit ni xamatiꞌ catamasuniyan tichi chavaich ju najun ju istavasalanti chai tichi chavaich ju najun ju taꞌaklhtamat chivinti. Isꞌakstu ju Spiritu Santu ju catamasuniyan tachi chun ju taxtokni. Chai ju yuchi aktsꞌiya najun ju stavasalanti. Jantu va taꞌaklhtamat chivinti ju najun ju yuchi. Chai tachi ju tamasuniyan ju Spiritu Santu pus chunchach ju alatꞌit. Kꞌox ixꞌamigojni aꞌuntꞌit ju Cristo.
\p
\v 28 Pus ji quiꞌaskꞌatꞌan kꞌoxich atꞌalalhiꞌitꞌit ju Cristo. Ju chunch acsni tavanan caminchokoyaꞌ ju yuchi pus lhikꞌach calakꞌanau chai jantu catimaxananiu laꞌixꞌucxlacapuꞌ.
\v 29 Ju uxijnan cꞌatsꞌayatꞌit ni si soknicꞌa navikꞌojui ju Dios. Chai yuchi lai vachuꞌ lhicꞌatsꞌayatꞌit ni isꞌaskꞌatꞌa Dios junita va tichi chavaich ju navi ju soknicꞌa.
\c 3
\s1 Ju quijnanꞌan isꞌaskꞌatꞌan Dios juntau
\p
\v 1 Alaktsꞌintꞌit. Slivasalh na quintamapainiyan ju quimpaiꞌan Dios. Chai tasui ni vasalh quintamapainiyan ni lacasqꞌuinch ni calhimispacanauch ni isꞌaskꞌatꞌan juntau. Chai ju lapanacni ju jantucaꞌ talhilacaꞌanta ju Cristo jantu tacꞌatsai ni isꞌaskꞌatꞌan Dios juntau va ixlacata ni jantu tamispai ju yuchi.
\v 2 Ji quiꞌalakꞌavin tachi chun ju quijnanꞌan ju lhilacaꞌanauch ju Cristo isꞌaskꞌatꞌan Dios juntau ju chavai. Chai mas tucaꞌ mavasalanicanau ta yu tucan cajunauch astan para cꞌatsayau ni chunch cajunau tachi ju Cristo acsni tavanan caminchokoyaꞌ ju yuchi. Chai chunch cajunau ju acsnich ni calaktsꞌinauch ju yuchi ta yu junitach.
\v 3 Chai tachi chun ju talhilaksi ju Cristo ni chunch catajunaꞌ tachi ju junita ju yuchi pus salaka tanavitꞌajun isꞌatsucuntiꞌan va ixlacata ni salaka junita ju isꞌatsucunti ju Cristo.
\p
\v 4 Para tachi chun ju tanavitꞌajun ju alactuꞌunti tamalaclai ju ixlhamapꞌaksin Dios. Pus ju jantu muctaxtui tachi ju najun laꞌixlhamapꞌaksin Dios pus alactuꞌunti ju navi.
\v 5 Chai ju uxijnan cꞌatsꞌayatꞌit ni yuchi lapanac quilhitsucuchilh ju Cristo ni laich aquintaxacanikꞌoyan ju quiꞌalactuꞌuntiꞌan. Para ju yuchi jantu tavanan alactuꞌunulh.
\v 6 Pus tachi chun ju kꞌox tꞌalalhiꞌanta ju Jesús jantu va tsa alactuꞌunun. Para va tichi chavaich cava ju va tsa alactuꞌunun jantu tavanan machakxata tichi lapanac ju Jesús nin calhilacaꞌalh ju yuchi.
\v 7 Quiꞌaskꞌatꞌan tun xamatiꞌ cataꞌokxchokꞌon. Ju va tsa navi ju soknicꞌa yuchi lhinavi ni lasoknicꞌanitach ju ixꞌalhunut ju Dios tachi ju Cristo ni soknicꞌa ju yuchi vachuꞌ.
\v 8 Para ju va tsa alactuꞌunun pus isꞌaskꞌatꞌa lhacaticuru junita. Pus ju lhacaticuru va tsa alactuꞌunun tus acsni alactuꞌununtacha ju makꞌanchich. Para vachuꞌ yuchi lhiquitsucuchilh ju ani tachi lapanac ju istsꞌalh Dios ni jantuch vana tasqꞌuini ni catanavi ju alactuꞌunti ju talhilacaꞌanta ju Cristo tachi ju amanaviniputun ju lhacaticuru.
\p
\v 9 Va tichi chavaich ju vasalh isꞌaskꞌatꞌa Dios junita jantu va tsa alactuꞌunun ni xtaknita ju Dios ju sastꞌi isꞌatsucunti. Pus jantu lai va tsa alactuꞌunun ni isꞌaskꞌatꞌa Dios junita.
\v 10 Pus chani ju apumispacanch tichi chavaꞌitnich ju isꞌaskꞌatꞌanch Dios tajunita chai tichi chavaꞌitnich ju isꞌaskꞌatꞌan ju lhacaticuru tajunita. Pus tachi chun ju jantu tanavi ju soknicꞌa chai ju jantu tamapaini tam ixlhilakꞌauꞌan pus jantu isꞌaskꞌatꞌan Dios tajunita.
\s1 Calamapainiuch ju pumatamin ju quijnanꞌan
\p
\v 11 Pus tus acsni tavanan lhilacꞌapꞌitꞌit ju Cristo kꞌasmatꞌachitꞌit ju chivinti junta najun ni calamapainiuch ju pumatamin.
\v 12 Jantu chun calau tachi ju lalh ju makꞌaniya lapanac ju Caín ixjuncan. Ju yuchi isꞌaskꞌatꞌa lhacaticuru ixjunita chai maknilh ju ixlakꞌau. Pus ja cꞌatsꞌayatꞌit tuchi ju lhimaknilh ju ixlakꞌau. Yuchi xalhimakni ni va jantu kꞌox ixjunita ju isꞌatsucunti isꞌakstu chai ju isꞌatsucunti ju ixlakꞌau na soknicꞌa ixjunita.
\p
\v 13 Quiꞌalakꞌavin jantu alhamakꞌaninintꞌit acsni cataxcayan ju jantucaꞌ talhilacaꞌanta ju Cristo.
\v 14 Ju quijnanꞌan cꞌatsayau ni takꞌalhtaxtutauch junta jonkꞌalhita makꞌalhkꞌajnat chai alin sastꞌi quiꞌatsucuntiꞌan. Chai pucꞌatsayau ju chunch ni mapainiyau ju quilhiꞌalakꞌavinꞌan. Pus ju jantu mapaini ju tam ixlhilakꞌau pus jantucaꞌ takꞌalhtaxtui lacamakꞌalhkꞌajnat ju jonkꞌalhita.
\v 15 Pus va tichi chavaich ju jantu catꞌalalaktsꞌimputulh ju tam ixlhilakꞌau pus va ixtꞌachunch junita tachi ju amakniniꞌ. Chai ju uxijnan cꞌatsꞌayatꞌit ni maticaꞌ ju isꞌatsucunti ju conkꞌalhiyanta lactꞌiyan ju tam amakniniꞌ.
\v 16 Ju Cristo quintamasunitan ju istavasalanti amapaininti acsni isꞌakstu makꞌaxtaklh ju isꞌatsucunti ju quilacataꞌan. Pus vachuꞌ ju quijnanꞌan tasqꞌuini ni camakꞌaxtakputuch ju quiꞌatsucuntiꞌan laꞌixlacataꞌan ju aliꞌin ju vachuꞌ talhilacaꞌanta ju Cristo.
\v 17 Para ju tam lapanac ju alin ixmakꞌalit ju ani lacamunutpaꞌ chai ni cacꞌatsa ni alin ju ixmaktasqꞌuinit ju apumatam ju vachuꞌ lhilacaꞌanta ju Cristo para ni jantu pakꞌeunicꞌa ixꞌalhunut chai ni jantu caꞌaktaijuputulh pus tas aclhinaulich ni vasalh mapaini ju Dios ju anuꞌ lapanac.
\v 18 Quiꞌaskꞌatꞌan jantu anicꞌa va calajuniu ni lamapainiyau. Tasqꞌuini ni calamapainiu ixlhichux quiꞌalhunutꞌan chai calapumasuniu ni lamapainiyau ni laꞌaktaijuyau.
\s1 Lhikꞌach lai xakꞌalayau ju Dios
\p
\v 19 Chai ni chunch calayau pus pucꞌatsayau ni lacaꞌitauch ju stavasalanti. Yuchi ju ixchivinti Dios. Chai jantu tuꞌuꞌ calhimakꞌantalhanayau ju laquiꞌalhunutꞌan acsni tꞌachivinau ju Dios.
\v 20 Para mas cꞌatsayau ni aktamixnin quintacꞌacxnitan ju quiꞌamapainintiꞌan para tasqꞌuini ni calhilaksiyau ju Dios. Ju yuchi cꞌatsai ni vasalh mapainiyau. Ju yuchi cꞌatsakꞌojui tachi chun ju taxtokni.
\v 21 Ji quiꞌalakꞌavin ni jantu tuꞌuꞌ navitau ju laich calhamakꞌanininau astan pus lhikꞌach lai xakꞌalayau ju Dios.
\v 22 Chai ju chunch va tuchi ixtalakxtuch ju casqꞌuiniyau ju yuchi pus aquintaxtakniyan va ixlacaꞌatalh ni muctaxtuyau tachi ju najun laꞌixlhamapꞌaksin chai naviyauch tachi ju kꞌachani ju yuchi.
\v 23 Chai yuchi ju ani ju quintajuntan ju Dios ni canaviu. Quintajuntan ni calhilaksiyau ju istsꞌalh. Yuchi ju Jesucristo. Chai calamapainiuch ju pumatamin tachi ju quintalhimapꞌaksitan ju Cristo.
\v 24 Pus ju navi tachi ju najun laꞌixlhamapꞌaksin ju Dios pus ixꞌamigo junita ju Dios chai ju Dios tꞌajun laꞌixꞌalhunut. Pus ju Spiritu Santu ju quintaxtaknitan yuchi ju quintamavasalaniyan ni tꞌajun ju Dios laquiꞌalhunutꞌan.
\c 4
\s1 Alin ju anuꞌ ju va lakꞌalhiputun tuchi navita ju Jesús
\p
\v 1 Ji quiꞌalakꞌavin jantu alacꞌaꞌikꞌotꞌit ixchivintiꞌan tachi chun ju lapanacni ju tanajun ni tachivinin ixchivinti Dios. Pꞌulhnan kꞌox alaktsꞌintꞌit junta tsꞌokꞌulacanta ixchivinti Dios ni vasalh chunch tachi ju taꞌamasuninin ju yuꞌunch u jantu. Chunch anavitꞌit va ixlacata ni na lhu ju tatalacasui ju ani lacamunutpaꞌ tachi ju yuꞌunch ju tanajun ixchivinti Dios mas jantu vasalh ni ixchivinti Dios ju tanajun ju yuꞌunch.
\v 2 Pus chani ju apꞌumispꞌayaꞌitꞌit ni vasalh ixchivinti ju Spiritu Santu ju tꞌajun nonaꞌ ju anuꞌ lapanac u jantu. Pus tachi chun ju lapanacni ju talhilaksi ju Jesús ni yuchach ju Cristo ju ixnoncan camalakachatachilh ju Dios chai talacaꞌi ni quitsucuchilh ju yuchi tachi tam lapanac ju ani lacamunutpaꞌ chai ni chunch ju tajuni ju lapanacni pus putasui ni tꞌajun ju Spiritu Santu laꞌixꞌalhunutꞌan.
\v 3 Para tachi chun ju lapanacni ju jantu talhilaksi ju Jesús chai chunch ju taꞌamalaninin pus ju Spiritu Santu jantu tꞌajun laꞌixꞌalhunutꞌan ju yuꞌunch. Chai ju yuꞌunch va tachivinin tachi ju chivinin ju anuꞌ lapanac ju talacasui tachi ju Cristo para alai va lakꞌalhiputun tuchi navita ju yuchi. Chai ju uxijnan kꞌasmatꞌatꞌit ni noncan ni caminaꞌ ju yuchi. Chai mas chavai tatꞌajun ju lapanacni ju ani lacamunutpaꞌ ju taꞌamalaninin tachi ju caꞌamalaniyaꞌ ju anuꞌ lapanac ju catalacasuyaꞌ tachi ju Cristo para alai va calakꞌalhiputunaꞌ tuchi navita ju yuchi.
\p
\v 4 Quiꞌaskꞌatꞌan ju uxijnan isꞌaskꞌatꞌan Dios untꞌatꞌit. Chai jantu taꞌokxchokꞌotan ju yuꞌunch ju jantu vasalh ixchivinti Dios tanajun. Pus palai tachapun ju Dios ju tꞌajun lamiꞌalhunutꞌan. Palai jantu ju lhacaticuru ju tꞌajun ju ani lacamunutpaꞌ. Yuchi jantu talhiꞌokxchokꞌoyan.
\v 5 Pus ju yuꞌunch ju jantu vasalh ixchivinti Dios ju taꞌamalaninin pus va taꞌalacpastacnan tachi ju taꞌalacpastacnan ju jantucaꞌ talhilacaꞌanta ju Cristo. Chai yuchi talhichivinin ju xataxtokni ju ani lacamunutpaꞌ. Chai ixlhiyuchi takꞌasmatni ju aliꞌin lapanacni ju vachuꞌ jantucaꞌ talhilacaꞌanta ju Cristo.
\v 6 Para ju quijnan isꞌaskꞌatꞌan Dios icjuntau. Chai ju lapanacni ju tamispai ju Dios pus quintakꞌasmatniyanch. Para ju jantu isꞌaskꞌatꞌan Dios jantu quintakꞌasmatniyan. Yuchi alhimispayauch tichi chavaꞌitnich ju taꞌamalaninin tachi ju ajuni ju Spiritu Santu chai tichi chavaꞌitnich ju va taꞌaꞌokxchokꞌonun.
\s1 Ju Dios na amapaininin
\p
\v 7 Ji quiꞌalakꞌavin calamapainiu ni Dios ju xtꞌakꞌa ju chun atalacpastꞌacꞌat. Chai va tichi chavaich ju tꞌalamapaini ju ixtꞌalapanac pus isꞌaskꞌatꞌa Dios junita chai mispai ju Dios.
\v 8 Para ju jantu amapaininin pus jantucaꞌ mispai ju Dios. Ju Dios ni na amapaininin.
\v 9 Chani ju pumasunicau ju ixꞌamapaininti Dios ju quilacataꞌan ni malakachachilh ju Dios ju lakatami istsꞌalh ju ani lacamunutpaꞌ ni laich caꞌalilh ju quiꞌatsucuntiꞌan ju conkꞌalhiyanta lactꞌiyan va laꞌixꞌaninti ju Jesús.
\v 10 Ju Dios quintamasunitan ni slivasalh quintamapainin mas tucaꞌ ixmapainiyau ju yuchi. Ju yuchi quintamapainiyan chai macamilh ju lakatami istsꞌalh ju matanꞌula ixꞌalhunut ju Dios ixlacata ju quiꞌalactuꞌuntiꞌan acsni tavanan nilh. Ju chunch ju yuchi mapalalh ixtapalh ju quiꞌalactuꞌuntiꞌan.
\p
\v 11 Ji quiꞌalakꞌavin ni chunch ju quintapumapainitan ju Dios pus tasqꞌuini ni vachuch calamapainiu ju quijnanꞌan.
\v 12 Jantu xamatiꞌ laktsꞌinta ju Dios. Para ni calamapainiu ju quijnanꞌan pus Dios ju tꞌajun laquiꞌalhunutꞌan chai tasui ni slivasalh mapainiyau ju Dios.
\v 13 Ju Dios quintaxtaknitan ju iSpiritu Santu. Chai yuchi lai lhicꞌatsayau ni ixꞌamigojni juntau ju Dios chai ni tꞌajunch ju yuchi laquiꞌalhunutꞌan.
\v 14 Chai ju quijnan iclaktsꞌintauch ju istsꞌalh Dios chai icꞌajuniuch ju lapanacni ni macaminta ju quimpaiꞌan Dios ju istsꞌalh. Chai yuchi lhimilh ni laich caꞌalacmakꞌalhtaxtulh tachi chun ju lapanacni ju catamaklacaꞌaniyach ju yuchi.
\v 15 Pus va tichi chavaich ju najun ni yuchi ju istsꞌalh Dios ju Jesús pus ju Dios tꞌajun laꞌixꞌalhunut chai ju yuchi ixꞌamigo Dios junita.
\p
\v 16 Chai ju quijnanꞌan cꞌatsayauch chai lacaꞌiyauch ni quintamapainiyan ju Dios. Pus Dios ju na amapaininin. Chai ju amapaininin pus ixꞌamigo Dios junita chai ju Dios tꞌajun laꞌixꞌalhunut.
\v 17 Chai acsni vasalh mapainiyau ju Dios pus jantu catalhoniyau ju anuꞌ avilhchan acsni caꞌamakꞌosaspitcanach tachi chun ju lapanacni. Jantu catalhoniyau ni vachuꞌ chunch quintamapainiyan ju quijnanꞌan mas vilaucaꞌ ju ani lacamunutpaꞌ tachi ju mapaini ju Jesucristo.
\v 18 Chai ni vasalh cꞌatsayau ni quintamapainiyan ju Dios pus jantu catalhananau. Ni va talhananau pus va nonau ni aquintamamakꞌalhkꞌajniyan ixlacata ju tuchi navitauch. Para ni slivasalh lacaꞌiyau ni quintamapainiyan ju Dios pus jantu talhoniyau ju tuchi aquintanaviyan. Pus ni va talhananau va nomputun ni jantu vasalh mapainiyau ju Dios.
\p
\v 19 Pus ju quijnanꞌan yuchi lhimapainiyau ju Dios ni pꞌulhnan quintamapainin ju yuchi.
\v 20 Para ni xamatiꞌ najun ni mapaini ju Dios para ni va xcaji ju tam ixlhilakꞌau pus va taꞌaklhtaman. Pus ju jantu mapaini ju tam ixlhilakꞌau ju tꞌalalaktsꞌin ja va a ti yuchach lai catimapaini ju Dios ni jantu tavanan laktsꞌinta.
\v 21 Chai ju quijnanꞌan mispayauch ju ixlhamapꞌaksin Dios junta ma chani najun: “Ju vasalh mapaini ju Dios pus ma vachuꞌ camapaini ju ixlhilakꞌau”.
\c 5
\s1 Lai tꞌalalhajayau ju macxcai ju alin ju ani lacamunutpaꞌ
\p
\v 1 Isꞌaskꞌatꞌan Dios juntau tachi chun ju lacaꞌiyauch ni yuchi ju Jesús ju ixnoncan camalakachatachilh ju Dios. Chai tachi chun ju tamapaini ju quimpaiꞌan Dios pus vachuꞌ taꞌamapaini ju aliꞌin ju talhilacaꞌanta ju Cristo ni vachuꞌ isꞌaskꞌatꞌan Dios tajunita.
\v 2 Pus chani ju pumispayau ni vasalh amapainiyauch ju isꞌaskꞌatꞌan Dios. Pus ni mapainiyau ju Dios chai quiclacaꞌiyau ju ixlhamapꞌaksin pus vachuꞌ amapainiyau ju isꞌaskꞌatꞌan.
\v 3 Chai chani ju putasui ni vasalh mapainiyau ju Dios acsni naviyau tachi ju najun laꞌixlhamapꞌaksin. Chai jantu xcai lhiulayau ixmuctaxtuca tachi ju najun laꞌixlhamapꞌaksin ju yuchi.
\v 4 Tachi chun ju isꞌaskꞌatꞌan Dios lai tamacajun ju macxcai atsucunti ju alin ju ani lacamunutpaꞌ. Chai yuchi lai lhimaconau ju macxcai atsucunti va ixlacata ni lhilaksiyau ju Cristo Jesús.
\v 5 Para jantu si lai tamacajun ju macxcai atsucunti ju alin ju ani lacamunutpaꞌ. Va yuchi ju lai macajun ju lacaꞌich ni yuchi ju Jesús ju Cristo ju ixnoncan camalakachatachilh ju Dios chai ni yuchi istsꞌalh Dios junita.
\s1 Alin ju tamavasalai ni vasalh istsꞌalh Dios ju Jesucristo
\p
\v 6 Pus ju Jesucristo yuchach ju quimakpaxacalh chai quinichilh ju ani lacamunutpaꞌ. Jantu va yuchi ni quimakpaxacalh para vachuꞌ quinichilh. Chai yuchi ju Spiritu Santu ju quintamavasalaniyan laquiꞌalhunutꞌan ni chunch ju tapasalh laꞌisꞌatsucunti. Chai ju Spiritu Santu yuchach ju najun ju istavasalanti.
\v 7 Alin pumatꞌutu ju tavilanancha lactꞌiyan ju tanajun ni vasalh istsꞌalh Dios ju Jesús. Yuchi ju quimpaiꞌan Dios chai yuchi ju Jesús ju quintaquimamachakxanichin laꞌisꞌatsucunti ta yu junita ju ixꞌalhunut ju Dios. Chai vachuꞌ chunch najun ju Spiritu Santu. Chai ju ani pumatꞌutu si tanajun ni vasalh istsꞌalh Dios ju Jesús.
\v 8 Chai vachuꞌ ju ani lacamunutpaꞌ ju Spiritu Santu najun ni vasalh istsꞌalh Dios ju Jesús. Chai vachuꞌ chunch ju nomputun acsni tavanan akpaxlh ju Jesús chai acsni tavanan nilh ju yuchi. Pus ju Spiritu Santu chai acsni chunch ju tapasalh laꞌisꞌatsucunti ju Jesús va lakatam taxtokni ju tamavasalai. Va tamavasalai ni vasalh istsꞌalh Dios ju Jesús.
\v 9 Pus ju quijnanꞌan lai lacaꞌiniyau ju ixchivinti ju akꞌantam quintꞌalapanacꞌan. Chai ni chunch ju layau pus aktsꞌiya tasqꞌuini ni calacaꞌiniyau ju ixchivinti Dios ni yuchi ju palai xakꞌai lhichux. Chai ju Dios najunta ni yuchach ju istsꞌalh ju Jesús juncan.
\v 10 Pus ju lhilacaꞌanta ju istsꞌalh Dios cꞌatsai laꞌixꞌalhunut ni vasalh istsꞌalh Dios ju Jesús. Para ju jantu lacaꞌita ju ixchivinti Dios pus tachi ju va najun ni taꞌaklhtamat najun ju Dios ni jantu lacaꞌita ju ixchivinti junta najunta ni yuchach ju istsꞌalh.
\v 11 Pus chani najun ju Dios: “Ma quintaxtaknitan ju quiꞌatsucuntiꞌan ju conkꞌalhiyanta tus lactꞌiyan. Chai ju ani atsucunti ma quintaxtaknitan acsni lhilacaꞌantauch ju istsꞌalh”. Ma chunch najun ju Dios.
\v 12 Pus ju ixlhichux ixꞌalhunut maklacaꞌanita ju istsꞌalh Dios alin ju isꞌatsucunti ju conkꞌalhiyanta lactꞌiyan. Para ju jantu ixlhichux ixꞌalhunut maklacaꞌanita ju istsꞌalh Dios pus matiꞌ ju isꞌatsucunti ju caꞌixjonkꞌalhicha ju lactꞌiyan.
\s1 Ju Xivan amapꞌaksi ju lapanacni
\p
\v 13 Pus ju ani taxtokni iclaꞌatsꞌoknuniu ju uxijnan ju maklacꞌapꞌinitꞌatꞌit ju istsꞌalh Dios. Chai yuchi iclalhiꞌatsꞌoknuniu ni apꞌucꞌatsꞌayaꞌitꞌit ni alin ju miꞌatsucuntiꞌan ju conkꞌalhiyanta ju lactꞌiyan.
\p
\v 14 Chai jantu talhananau acsni tꞌachivinau ju Dios. Para cꞌatsayau ni quintakꞌasmatniyan ju Dios acsni tuꞌuꞌ casqꞌuiniyau tachi ju kꞌoxich lhiulai ju yuchi.
\v 15 Chai ni vasalh cꞌatsayau ni quintakꞌasmatniyan acsni tuꞌuꞌ sqꞌuiniyau tachi ju kꞌoxich lhiulai ju yuchi pus vachuꞌ cꞌatsayau ni aquintaxtakniyan ju tuchi sqꞌuiniyauch.
\p
\v 16 Ni canavi tuꞌuꞌ alactuꞌunti xamatiꞌ ju anicꞌach va najun ni lhilacaꞌanta ju Cristo chai ni calaktsꞌilh apumatam ju vasalh lhilacaꞌanta ju Cristo pus ju yuchi lai casqꞌuiniyaꞌ ju Dios ixlacata ju anuꞌ alactuꞌunuꞌ ni jantu canavichokolh tuꞌuꞌ macxcai chai caꞌalilh ju isꞌatsucunti jonkꞌalhita. Pus laich casqꞌuinilh ixlacata apumatam ni jantu navita ju alactuꞌunti ju jantu lai macꞌacxai ju Dios. Alin ju alactuꞌunti ju jantu lai macꞌacxai ju Dios. Ni xamatiꞌ navita ju chunch alactuꞌunti jantu iclajunau ni asqꞌuinitꞌit ju Dios ixlacata ju yuchi.
\v 17 Tachi chun ju jantu sok navican yuchi ju alactuꞌunti. Para va lakatam alactuꞌunti ju jantu lai macꞌacxacan.
\p
\v 18 Cꞌatsayau ni jantu va tsa alactuꞌunun ju isꞌaskꞌatꞌa Dios. Para ju istsꞌalh Dios lhistꞌacꞌa ju lhilacaꞌanta yuchi chai ju lhacaticuru jantu lai ta catinavi.
\p
\v 19 Cꞌatsayau ni isꞌaskꞌatꞌan Dios juntau. Para tachi chun ju jantucaꞌ talhilacaꞌanta ju Cristo tanavinitꞌajuncaꞌ ixkꞌachat ju lhacaticuru.
\p
\v 20 Chai cꞌatsayau ni quilatachilh ju istsꞌalh Dios chai quintaxtaknitan ju kꞌox quintacꞌatsanꞌan ni laich camispauch ju yuchi ju laꞌistavasalanti Dios junita. Chai ju quijnanꞌan ixꞌamigojni juntau ju istavasalanti Dios ni lhilacaꞌantauch ju lakatami istsꞌalh ju Jesucristo juncan. Yuchach ju istavasalanti Dios chai yuchi ju xtꞌakꞌa ju atsucunti ju conkꞌalhiyanta ju lactꞌiyan.
\v 21 Quiꞌaskꞌatꞌan jantuch va kꞌaya amaklacꞌapꞌinitꞌit ju jantu vasalh Dios. Chunch vasalh cava.