\id 2JN
\ide UTF8
\h 2 XIVAN
\toc1 2 XIVAN
\mt1 IXLHILAKATꞌUI ALHIQUI JU ATSꞌOKNULH JU XIVAN
\c 1
\s1 Lamapainiyau va ixlacata ni lacaꞌiyau ju stavasalanti
\p
\v 1 Ju quitꞌin icmaklhinajun lacatalhavat ju talhilacaꞌanta ju Jesús. Va icmacꞌamiyan ju uxintꞌi ji lakꞌau atsiꞌ. Pus Dios ju sacxtutan. Pus vachuꞌ icꞌatsꞌoknuni ju miꞌaskꞌatꞌan. Slivasalh iclamapainiyau. Chai jantu va quitꞌin para vachuꞌ tachi chun ju tamispaich ju stavasalanti. Yuchi ju ixchivinti Dios.
\v 2 Chai yuchi iclalhimapainiyau ni lacaꞌiyau ju stavasalanti ixlhichux quiꞌalhunutꞌan chai calacaꞌikꞌalhiyau.
\v 3 Ju quimpaiꞌan Dios chai ju quiꞌucxtinꞌan Jesucristo ju istsꞌalh Dios junita yuꞌunch ju catanaviniyan lamapainin chai cataꞌaktaijuyan laꞌixꞌamapainintiꞌan chai cataꞌaktaijuyan ni jantu calacꞌanaꞌ ju miꞌalhunutꞌan. Chai yuchi catalhinaviniyan ju chunch va ixlacata ni qꞌuiclacꞌaꞌitꞌatꞌit ju stavasalanti chai lamapꞌainiyatꞌit.
\p
\v 4 Slivasalh na ickꞌachan ni ickꞌasmatꞌa ni chunch ju tatsucui ju aliꞌin miꞌaskꞌatꞌan tachi ju najun laꞌixchivinti Dios. Chai ju yuchi stavasalanti. Talacaꞌita ju lhamapꞌaksin ju quintaxtaknitan ju quimpaiꞌan Dios.
\v 5 Chai ju chavai ji lakꞌau ictapaininiyan ni camapainiyau ju aliꞌin ju vachuꞌ talhilacaꞌan ju Cristo. Chai ju ani jantu sastꞌi lhamapꞌaksin ju icꞌatsꞌoknuniyan. Para yuchi ju aktsꞌiya mispatauch ju quijnanꞌan tus acsni tavanan lhilacaꞌanchau ju Cristo.
\v 6 Chai acsni lamapainiyau pus naviyau tachi ju najun laꞌixlhamapꞌaksin ju Dios. Pus laꞌixlhamapꞌaksin najun ni calamapainiu. Chai ju uxijnan chunch ju kꞌasmatꞌatꞌit tus acsni tavanan lhilacꞌapꞌitꞌit ju Cristo.
\s1 Alin lapanacni ju va taꞌaꞌokxchokꞌonun
\p
\v 7 Pus iclalhijunau chunch ni na lhu alin ju lapanacni ju va taꞌaꞌokxchokꞌonun. Chai ju yuꞌunch va makpitsicanta ju ani lacamunutpaꞌ. Ju yuꞌunch jantu talacaꞌi ni quitsucuchilh ju Jesucristo ju ani lacamunutpaꞌ chai talacasu tachi lapanac. Yuchach ju ixnoncan camalakachatachilh ju Dios. Pus ju yuꞌunch va aꞌokxchokꞌonin tajunita. Va tatalacasui tachi ju Cristo para va talakꞌalhiputun tuchi navita ju yuchi.
\v 8 Pus alhistꞌaccꞌantꞌit ni jantu xamatiꞌ cataꞌokxchokꞌon. Ni va aꞌokxchꞌokꞌocꞌanaꞌitꞌit pus catsꞌankꞌayaꞌ ju lhichꞌalhcat ju xacnaviyau ju lamilhiꞌuxijnan. Para ni va tachi alhilacꞌapꞌitꞌit ju stavasalanti pus amaklhtꞌayananaꞌitꞌit chux ju kꞌox ju quintaxtakniputunan ju Dios ju lactꞌiyan.
\p
\v 9 Chai va tichi chavaich ju lacatam capulhiꞌalh ju ixchivinti Cristo chai jantu vana calacaꞌi tachi ju ismasui ju Cristo pus ju yuchi jantu ixꞌamigo ju Dios. Para va tichi chavaich ju va tachi calacaꞌiyaꞌ ju ixchivinti ju Cristo pus ju yuchi ixꞌamigo junita ju quimpaiꞌan Dios. Chai vachuꞌ ixꞌamigo junita ju lakatami istsꞌalh ju Cristo juncan.
\v 10 Ni xamatiꞌ talakminan chai tajunan ni va tamalaniputunan ixchivinti Dios para ni jantu lacaꞌi tachi ju ismasui ju Cristo pus jantu alacꞌasqꞌuinitꞌit ni catavi laminchakaꞌan. Nin lai amalakꞌavitꞌit.
\v 11 Pus ju va malakꞌavi ju chunch talacaꞌi pus tachi ju va tꞌanavi ju ixꞌalactuꞌunti.
\s1 Ju Xivan macꞌami ju ixlakꞌau atsiꞌ laꞌixmacni Cristo
\p
\v 12 Na lhu taxtokni ju iclajumputunau para jantu iclaꞌatsꞌoknuniputunau va lacaꞌalhiqui chai lacatinta. Va iclaꞌamputunachau laktsꞌinin ju uxijnan. Ju chunch lai calacchivinauch laquiꞌucxlacapuꞌan. Ju chunch slivasalh caꞌalinaꞌ ju quinkꞌachatꞌan.
\p
\v 13 Ju isꞌaskꞌatꞌan ju milakꞌau atsiꞌ tamacꞌamiyan. Ju milakꞌau atsiꞌ Dios ju sacxtuta ni isꞌaskꞌatꞌa cava vachuꞌ. Ca va yuchach.