\id 3JN
\ide UTF8
\h 3 XIVAN
\toc1 3 XIVAN
\mt1 IXLHILAKATꞌUTU ALHIQUI JU ATSꞌOKNULH JU XIVAN
\c 1
\s1 Ju Xivan najun ni na soknicꞌa ju isꞌatsucunti ju Gayo
\p
\v 1 Ju quitꞌin icmaklhinajun lacatalhavat ju talhilacaꞌanta ju Jesús. Va icmacꞌamiyan ju uxintꞌi ji quiꞌamigo Gayo. Slivasalh na icmapainiyan.
\p
\v 2 Ji quiꞌamigo ictapainini ju Dios ju milacata ni kꞌox atsꞌucꞌuyaꞌ. Chai ju uxintꞌi ni palai palai tꞌaꞌun chꞌapanaꞌ ixchivinti Dios pus ictapainini ju yuchi ni vana va chun kꞌox cajunaꞌ ju miꞌatsucunti chai jantu jintaꞌ caxcanin.
\v 3 Slivasalh na xaclhikꞌachan acsni tamilh ju quiꞌalakꞌavin chai quintajunilh ni vanach lhilacꞌapꞌin ju ixchivinti Dios. Ju yuchi stavasalanti. Chai tasui ni vasalh lhilacꞌapꞌintꞌa ju Jesús ni muctꞌaxtꞌui tachi ju najun laꞌixchivinti Dios. Chai yuchach ju stavasalanti.
\v 4 Matiꞌ tuꞌuꞌ ju palai iclhikꞌachan. Va yuchi acsni ickꞌasmatꞌa ni tamuctaxtui tachi ju najun laꞌixchivinti Dios tachi ju va quiꞌaskꞌatꞌan icꞌalaktsꞌin. Chai ixchivinti ju Dios stavasalanti.
\p
\v 5 Ji quiꞌamigo na kꞌox ju navi ju uxintꞌi acsni tuꞌuꞌ alhiꞌaktꞌaiꞌui ju quilhiꞌalakꞌavinꞌan ju tapasatilai laminchakaꞌ mas jantuch amispꞌai ju yuꞌunch.
\v 6 Ju yuꞌunch taꞌalacjuni ju vachuꞌ talhilacaꞌanta ju Cristo ju ani tavilanalh ni ma na amapꞌaininin ju uxintꞌi. Chai na kꞌox ju anaviyaꞌ ni tuꞌuꞌ alhiꞌaktꞌaiꞌuyaꞌ ju yuꞌunch ixlacata ju lacati. Chai lhijunch ni chunch ju aꞌulhtꞌunin ni tanavini ixlhichꞌalhcat ju Dios.
\v 7 Ju yuꞌunch va lacatam lacatam taꞌucxuntꞌajun ni va taꞌamamispaniputun ju lapanacni ixlacata ju Jesús. Para jantu tasqꞌuiniputun lamapainin laca lacatsꞌunin aꞌaktaijunti ju jantucaꞌ talhilacaꞌan ju Cristo.
\v 8 Pus yuchi lhitasqꞌuini ni caꞌaꞌaktaiju ju quijnanꞌan ju yuꞌunch ju chunch talhichꞌalhcatnan. Ju chunch tachi ju va jun atꞌachꞌalhcatnanauch ju yuꞌunch acsni tanajun ju ixchivinti Dios. Chai yuchach ju stavasalanti.
\s1 Va kꞌaya lai ju Diótrefes
\p
\v 9 Icꞌatsꞌoknunita ju mintꞌaꞌamachakꞌan ju talhilacaꞌanta ju Jesús para ju Diótrefes va xakꞌaich jumputun ju sia lhiyuꞌunch. Ju yuchi jantu tuꞌuꞌ quintalhiulayan.
\v 10 Chai ni chunch ju lai ju yuchi pus acsni acꞌananta acꞌamapastꞌacꞌaniyach ju quiꞌalakꞌavinꞌan ju tuchi navich ju Diótrefes. Ju yuchi va kꞌaya najun chai macxcai chivinti ju xaquintalhichivinan ju quijnan. Chai jantu va yuchi ju navich. Para vachuꞌ jantu amaklhtayanan ju quiꞌalakꞌavinꞌan ju tachaꞌanacha. Chai vachuꞌ jantu alakꞌaꞌini ju aliꞌin ni cataꞌamaklhtayanalh. Chai ju taꞌamaklhtayanamputun ju quiꞌalakꞌavinꞌan pus ju Diótrefes jantu alacasqꞌuini ni camaktakꞌaixtoklich ju talhilacaꞌan ju Cristo.
\p
\v 11 Ji quiꞌamigo jantu chunch ju anavitꞌi ju uxintꞌi tachi ju tanavi ju yuꞌunch ju va macxcai talai. Para chunch anavitꞌi tachi ju yuꞌunch ju tanavi ju kꞌox. Ju va tachi macxcai navi jantu mispai ju Dios.
\s1 Na kꞌox lhilaktsꞌintaiti junita ju isꞌatsucunti ju Demetrio
\p
\v 12 Chux ju lapanacni tanajun ni na kꞌox lapanac ju Demetrio. Chai laꞌisꞌatsucunti lana tasui ni vasalh quiclacaꞌita ju ixchivinti Dios. Chai ju yuchi slivasalh. Vachuꞌ ju quijnan icnonau ni na kꞌox lapanac ju Demetrio chai ju uxijnan cꞌatsꞌayatꞌit ni vas icnonau.
\s1 Ju Xivan macꞌami ju ixꞌamigo
\p
\v 13 Na lhu taxtokni ju xacꞌatsꞌoknuniputunan para jantu actiꞌatsꞌoknunin va lacatinta chai lacapatsꞌoknu.
\v 14 Vatsꞌalhti iclakꞌamputunachan chai calacchivinauch lacaꞌucxlacapuꞌ.
\p
\v 15 Ictapainini ju Dios ni jantu calacꞌalh ju miꞌalhunut. Tamacꞌamiyan ju quiꞌamigojniꞌan ju ani tavilanalh. Chai amacꞌamitꞌachich ju uxintꞌi ju pumatamin quiꞌamigojniꞌan ju tavilanancha anch. Ca va yuchach.