\id JUD
\ide UTF8
\h JUDAS
\toc1 JUDAS
\mt1 JU ALHIQUI JU ATSꞌOKNULH JU JUDAS
\c 1
\s1 Ju Judas amacꞌami ju asacxtuta ju Dios
\p
\v 1 Ju quitꞌin icJudas. Xalapanac icjunita laꞌixmacni ju Jesucristo. Vachuꞌ ixlakꞌau ju Jacobo icjunita. Pus iclamacꞌamiyau ju uxijnan ju tasacxtutan ju quimpaiꞌan Dios. Chai ju yuchi na tamapainiyan. Chai catalhistꞌacꞌan ni va tachi alhilacꞌapꞌinaꞌitꞌit ju Jesucristo.
\v 2 Icsqꞌuini ju Dios ni palai cataꞌaktaijuyan laꞌixꞌamapaininti chai palai cataꞌaktaijuyan ni jantu calacꞌanaꞌ ju miꞌalhunutꞌan chai palai catamapainiyan ju yuchi.
\s1 Alin ju lapanacni ju tamalani ju chivinti ju jantu slivasalh
\p
\v 3 Ju uxijnan ji quiꞌamigojni na xaclaꞌatsꞌoknuniputunau chai xaclajumputunau ta yu lai putakꞌalhtaxtucan ni jantu ancan ju lacajipi. Para tasqꞌuini ni alai aclaꞌatsꞌoknuniu chai pꞌas aclajuniu ni ixlhichux ju miꞌalhunutꞌan jantu alakꞌaꞌitꞌit ni xamatiꞌ catalakꞌalhinin ju miꞌatalacpastꞌacꞌatꞌan ni jantuch vana alhilacꞌapꞌitꞌit ju Jesucristo. Pus ju ixchivinti Dios ju lacaꞌiyau tachi chun ju quijnanꞌan ju isꞌaskꞌatꞌan Dios juntau pus Dios ju quintaxtaknitan chai jantu catimapaxalh astan.
\v 4 Tasqꞌuini ni aclajuniu ni jantu xanaviyatꞌit cuenta acsni tavanan sek tatanucha lamilhiꞌuxijnan ju aliꞌin lapanacni. Ju yuꞌunch lana jantu tatalhoni ju Dios. Chai tanajun ni va ixlacaꞌatalh ni na lai navi lamapainin ju Dios pus yuchi lai lhinavican lhu ju alactuꞌunti. Pus acsni tanajun ju chunch va jantu vas tachivinin acsni tanajun ixlacata ju Jesucristo. Para ju quijnanꞌan ixlapanacni juntau chai va yuchach ju quiꞌucxtinꞌan junita. Pus mas chunch talai ju yuꞌunch para makꞌanchich istsꞌokꞌulacanta ni camamakꞌalhkꞌajnicanaꞌ ju lapanacni ju chunch tajunita.
\p
\v 5 Va iclamapastꞌacꞌaniputunau ju ani ju aktsꞌiya mispꞌayatꞌitch. Pus ju quiꞌucxtinꞌan Dios amakꞌalhtaxtulh ju quintꞌaꞌisraelitanin ju xalacatꞌun Egipto. Ju yuꞌunch ixlapanacni ixtajunita. Para astanch amaknikꞌolhch ju jantu lai ixtalacaꞌi.
\v 6 Chai ju aliꞌin anquilhnin jantu talhistaclh ju ixpuꞌucxtinꞌan ju ixꞌaxtaknicanta. Alai va tamacaulh ju ixchakaꞌan. Pus ju chavai ju Dios amakꞌatacaꞌ ju yuꞌunch lacaꞌatatsꞌisni. Anch ju atꞌalhnukꞌalhita tus acsni cachinaꞌ ju anuꞌ avilhchan acsni camakꞌosaspitcanach.
\v 7 Chai vana va chunch amamakꞌalhkꞌajni ju amachakꞌan Sodoma chai ju amachakꞌan Gomorra chaich ju amachakꞌan ju aliꞌ lakꞌachakꞌanixni ju vanin ixtꞌalachꞌapata. Slivasalh na ixtaꞌalinch ju ixnavinꞌan chai ixtalalactuꞌui sia lhijokꞌat chai ixtalalactuꞌui sia lhichakolun. Pus mas chavai lai titasui ta yu xaꞌamamakꞌalhkꞌajni ju Dios. Ju yuchi lana amaclakꞌo lacajipi. Chai ni chunch ju aꞌulhtucalh pus va quintamapastꞌacꞌaniyan ni alin ju alapnaꞌ ju jantu lai mixa tavanan. Chai anch ju camamakꞌalhkꞌajnicanaꞌ ju jantu tamacomputun ixꞌalactuꞌuntiꞌan.
\p
\v 8 Para ju anuꞌ lapanacni ju tatanulh lamilhiꞌuxijnan mas tacꞌatsai ni chunch ju aꞌulhtucalh ju makꞌaniya lapanacni ju ixtaꞌalactuꞌunun para ixlaquilhtu taꞌalactuꞌunun. Va tanajun ni Dios ju amapastꞌacꞌani ju tuchi tanajun mas jantu. Chai va talakꞌalhi ju ixlacatunaꞌan. Chai jantu tuꞌuꞌ talhiulai ju tam xakꞌai. Chai macxcai chivinti talhichivinin ju tavilanancha lactꞌiyan.
\v 9 Para nin yuchi ju xakꞌai anquilh ju Miqui juncan jantu chun lalh. Ju yuchi acsni tavanan tꞌalakꞌailh ju lhacaticuru ixlacata ixlacatuna ju lijunto Moisés jantu lai xamucꞌani ixtalakꞌalhin lacamacxcai chivinti. Va yuchi ni junilh ni yuchi ju ucxtin Jesús ju cakꞌayaꞌ.
\v 10 Para ju anuch lapanacni ju tavilanancha lamilhiꞌuxijnan macxcai talhichivinin ju tavilanancha lactꞌiyan mas jantu tamachakxai ta yu talhijunitach. Para ju taxtokni ju tamachakxai va laꞌisꞌakstuꞌan tachi ju talai ju tuꞌuꞌ atapacxat yuchi ju tapulhitajui ixmakꞌalhkꞌajnatꞌan junta jonkꞌalhita.
\p
\v 11 Painiꞌitnich ju yuꞌunch. Ju yuꞌunch lana jantu kꞌox ju isꞌatsucuntiꞌan. Chunch tajunita tachi ju ixjunita ju isꞌatsucunti ju makꞌaniya lapanac ju Caín ixjuncan. Chai vachuꞌ talai tachi ju lalh ju makꞌaniya lapanac ju Balaam ixjuncan. Ju yuꞌunch vachuꞌ va tapulhajaputun ju chivinti ju jantu soknicꞌa. Chai vachuꞌ talhitajulh ju ixmakꞌalhkꞌajnatꞌan junta jonkꞌalhita ni jantu taquiclacaꞌiputun ju ixlhamapꞌaksin Dios tachi ju lalh ju makꞌaniya lapanac ju Coré ixjuncan. Ju yuchi vachuꞌ va samakꞌalh ju ixlhamapꞌaksin Dios chai yuchi lhimaknicalh.
\v 12 Ju yuꞌunch na lhimaxan talai acsni tatꞌavenan ju lamincꞌatanꞌan. Va isꞌakstuꞌan ju talacvenchokoi. Jantu xamatiꞌ tatalhoni. Va tanavi tachi ju takꞌachani isꞌakstuꞌan. Ju yuꞌunch chunch tajunita tachi ju tuꞌuꞌ ataputsꞌi ju va lacatam lacatam alaclhiꞌanch ju un chai jantu tavanan lhimin ju xcan. Pus ju yuꞌunch vachuꞌ va taꞌaꞌokxchokꞌonun. Chai ju yuꞌunch lana jantu tuꞌuꞌ taxtꞌakꞌa ju kꞌox. Chunch tajunita tachi ju tuꞌuꞌ qꞌuiu ju jantu xtꞌakꞌa ju tuꞌuꞌ xatocꞌat mas chinta ju avilhchan ni caxtaklh tuꞌuꞌ. Chai jantu va yuchi ni xaxixa para vachuꞌ tipulhumakꞌancanch. Pus ju anuꞌ aꞌokxchokꞌoni amamakaꞌunin tachi ju va tanitach vachuꞌ ni matiꞌ ju kꞌox laꞌisꞌatsucuntiꞌan.
\v 13 Chai chunch tajunita tachi ju tuꞌuꞌ alama. Acsni lucunun ju yuchi pus na lhu lhimin ju amacxtalh. Pus vachuꞌ chunch ju yuꞌunch. Va yuchi ju talhimin ju jantu kꞌox atsucunti. Chai lana jantu lai tuꞌuꞌ vas cꞌatsacan laꞌixchivintiꞌan ju yuꞌunch. Pus mas yuchi ju kꞌai stꞌacu jantu caꞌokxchokꞌon tuchi horach atatsꞌisni ju xajachilh. Para ju aꞌokxchokꞌoni lapanacni na lai cataꞌokxchokꞌon laꞌixtaꞌaklhtamatꞌan. Para ju Dios lakꞌoxita junta jonkꞌalhita atatsꞌisni ixlacataꞌan ju lapanacni ju chunch tajunita.
\p
\v 14 Ju pꞌulhnan lapanac Adán ixjuncan. Chai ju yuchi alilh ju isꞌaskꞌatꞌa chai ju istsꞌalh vachuꞌ alilh ju istsꞌalh. Chai acsni chaꞌalh ju ixlhitantalaktujun pus ju yuchi Enoc junicalh. Pus ju yuchi naulh ixchivinti Dios junta najun tuchi catapasayaꞌ laꞌisꞌatsucuntiꞌan ju lapanacni ju chunch tajunita tachi ju iclajuntauch. Ma chani ixnajunch: “Ma mintach ju ucxtin Dios. Ma tꞌaminta ixtalhavat ixlapanacni.
\v 15 Chai ma camakꞌosaspitcanach tachi chun ju lapanacni. Chai ma tachi chun ju jantu tatalhoni ju Dios ma camucꞌanicanaꞌ tachi chun ju ixtalakꞌalhinꞌan ni va tanavita tachi ju jantu kꞌachani ju Dios. Pus ni lana jantu tatalhoni ju Dios ma yuchi jantu talhinavi tachi ju kꞌachani ju yuchi. Chai ma vachuꞌ caꞌamucꞌanicanaꞌ ixtalakꞌalhinꞌan ni na macxcai chivinti ju ma talhichivinilh ju Dios ju anuꞌ alactuꞌuni lapanacni. Pus ni lana jantu tatalhoni ju Dios ma yuchi macxcai talhilhichivinilh ju yuchi”. Ju Enoc naulh ni ma chunch ixnajun ju Dios.
\v 16 Pus ju lapanacni ju chunch tajunita va tachi kꞌotꞌin tacꞌatsantach. Jantu tuꞌuꞌ kꞌox talhiulai. Tanavitꞌajun ju macxcai ixꞌatalacpastꞌacꞌatꞌan isꞌakstuꞌan. Tachivinin tachi ju na va taꞌacꞌatsananta mas jantu. Na kꞌoxich talhixakꞌalai ju aliꞌin ni va tapulhajaputun.
\s1 Ju Judas amapꞌaksi ju lapanacni ju vachuꞌ talhilacaꞌanta ju Jesús
\p
\v 17 Para uxijnan ji quiꞌalakꞌavin apꞌastꞌactꞌit ju chivinti ju pꞌulhnan ixtanajunta ju ixtamalakachan ju quiꞌucxtinꞌan Jesucristo.
\v 18 Ju yuꞌunch chani tajuntan: “Ma acsni vaninch cachinaꞌ ju avilhchan acsni caminchokoyaꞌ ju Cristo pus ma cataꞌalinach ju catalhitsꞌiꞌinaꞌ ju ixtaxtokni Dios. Ma yuchach ju catanaviyach ju macxcai ixꞌatalacpastꞌacꞌatꞌan ju jantu kꞌachani ju Dios.
\v 19 Ju yuꞌunch ma va amaktalhkꞌamaninch. Va taꞌalacpastacnan tachi ju aliꞌin lapanacni ju jantucaꞌ talhilacaꞌanta ju Jesús. Ma jantu tanun ju Spiritu Santu laꞌixꞌalhunutꞌan”. Ma chunch ju tajuntan ju ixtamalakachan ju Jesús.
\p
\v 20 Para uxijnan ji quiꞌalakꞌavin palai tachapun aꞌuntꞌit lacasastꞌi miꞌatsucuntiꞌan. Chai lai chunch alatꞌit ni palai palai alaniyaꞌitꞌit ju ixchivinti Dios. Atꞌachꞌivinintꞌit ju Dios laꞌixtachaput ju Spiritu Santu.
\v 21 Va tachi aqꞌuiclacꞌaꞌitꞌit ju ixchivinti Dios. Ju chunch va tachi catamapainiyan ju Dios. Chunchach ju atsꞌucꞌutꞌit acsni pꞌacxantꞌayatꞌitcaꞌ ju Jesucristo tus acsni cachinaꞌ ju avilhchan acsni cataꞌaktaijuchokopalan lacaꞌamapaininti chai catalaktsaniyan ju miꞌatsucuntiꞌan ju jonkꞌalhita lactꞌiyan.
\p
\v 22 Aꞌaktꞌaiꞌutꞌit lacaꞌamapaininti ju jantucaꞌ tacꞌatsai u slivasalh u jantu ju ixchivinti Dios.
\v 23 Ju tam xamatiꞌ ni tꞌajunch cava lakxonaꞌ pus vatsꞌalhtich acmakꞌalhtaxtulh. Pus vana va chun alatꞌit ixlacataꞌan ju aliꞌin ju tatꞌajuncaꞌ laꞌixꞌalactuꞌuntiꞌan. Va tsa tsa alacꞌunitꞌitch. Tsꞌa ma laich catatakꞌalhtaxtulh. Chai ju aliꞌin aꞌaktꞌaiꞌutꞌit lacaꞌamapaininti para vachuꞌ alhistꞌaccꞌantꞌit. Jantu xcai ni vachuꞌ chunch alatꞌit tachi ju talai ju yuꞌunch. Na alhitsꞌisitꞌit ju ixꞌalactuꞌuntiꞌan.
\s1 Ju Judas lakꞌayai ju Dios
\p
\v 24 Ju Dios na tachapun. Chai ju yuchi lai talhistꞌacꞌan ni jantu akꞌalhkꞌosaꞌitꞌit. Vachuꞌ lai salaka catanaviniyan ju miꞌalhunutꞌan. Chai lhikꞌach catalhiꞌanan junta vilhcha ju yuchi.
\v 25 Va pumatam ju Dios. Yuchi ju quintamakꞌalhtaxtuyan acsni lhilacaꞌanau ju quiꞌamakꞌalhtaxtunuꞌan. Yuchi ju Jesucristo. Chai va yuchi ju mispakꞌojui tachi chun ju taxtokni. Pus yuchach ju lakꞌayacan. Chai yuchach ju xakꞌai tucan. Chai yuchach ju alin ju ixtachaput. Chai yuchach ju lhinonkꞌojui chux mas makꞌanchich chai chavai chai tus va tavanan cava. Vasalh chunch junita.