\id REV
\ide UTF8
\h JU AMAVASALACALH
\toc1 JU AMAVASALACALH
\mt1 JU AMAVASALANICALH JU XIVAN
\c 1
\s1 Yuchi ju Jesús ju mavasalanilh ju Xivan ju chivinti
\p
\v 1 Ju quitꞌin icXivan ixlapanac ju Jesucristo. Pus ju Dios mavasalanilh ju ani chivinti ju Jesucristo ni laich caꞌamasuniyaꞌ ju ixlapanacni tachi chun ju taxtokni ju vasalh catapasayaꞌ. Chai jantu makꞌan cativa tus catapasayaꞌ ju ani taxtokni. Pus ju Jesucristo quimalakachanichilh pumatam anquilh chai yuchi ju quijunilh ni actsꞌokꞌulayaꞌ tachi chun ju ani taxtokni.
\v 2 Pus ju quitꞌin ictsokꞌulata ixchivinti Dios chai tuchi naulich ju Jesucristo chai tachi chun ju taxtokni ju iclaktsꞌilh.
\p
\v 3 Na kꞌachan va tichi chavaich ju najun ju ani chivinti ju ictsꞌokꞌulata junta icnaulh tuchi catapasayaꞌ. Chai na takꞌachan tachi chun ju takꞌasmatꞌa ju ani chivinti chai talacaꞌi ju chivinti ju ictsꞌokꞌulata. Na takꞌachan ni vanin chinta ju avilhchan acsni caꞌuctaxtuyaꞌ tachi chun ju ani taxtokni ju ictsꞌokꞌulata.
\s1 Amacꞌamican ju quilhmactujun ju talhilacaꞌanta ju Jesucristo
\p
\v 4 Ju quitꞌin icXivan chai iclamacꞌamiyau ju uxijnan ju lhilacꞌapꞌinatꞌit ju Jesús ju lakatujun lakꞌachakꞌanixni vilatꞌit ju laxalacatꞌun Asia. Ju Dios tꞌajun tus va tavananch chai yuchi ju caminaꞌ astan. Pus ju Spiritu Santu chunch junita tachi ju anuꞌ lakatujun maclhcu ju lacya laꞌixꞌucxlacapuꞌ ju kꞌai putolan junta lhinajun ju Dios. Pus ju Spiritu Santu chai ju Dios cataꞌaktaijuyan lacaꞌamapaininti chai cataꞌaktaijuyan ni jantu calacꞌalh ju miꞌalhunutꞌan.
\v 5 Vachuꞌ ju Jesucristo cataꞌaktaijuyan. Pus yuchi ju lana vas najun tuchi cꞌatsai. Chai yuchi ju pꞌulhnan lokꞌonchokolh acsni ixnita. Chai yuchi ju alhijuni tachi chun ju ucxtinin ju ani lacamunutpaꞌ. Chai yuchi ju quintamapainiyan chai quintachꞌakꞌanin ju quiꞌalactuꞌuntiꞌan acsni taxtunilh ju ixꞌacꞌalhni ju lacacurus.
\v 6 Chai yuchi ju quintalhilhcaꞌulatan ni ucxtinin catꞌajumvi ju yuchi. Chai vachuꞌ quintalhilhcaꞌulatan ni palijni cajumvi ni lai calakꞌayayau ju Dios. Chai yuchach ju ixpai vachuꞌ ju Cristo. Pus yuchach ju va tachi calakꞌayacalh ni alin ixtachaput jonkꞌalhita. Vasalh chunch junita.
\p
\v 7 Pus yuchi ju Cristo ju caminchokoyaꞌ lacaꞌataputsꞌi chai tachi chun ju lapanacni catalaktsꞌinaꞌ. Chux ju yuꞌunch ju talhtokꞌolh acsni ixtꞌajun ju ani lacamunutpaꞌ. Chai tijpachux ju lapanacni ju alin ju ani lacamunutpaꞌ pꞌas catalactꞌasayaꞌ va ixlacata yuchi. Slivasalh chunch ju catapasayaꞌ.
\p
\v 8 Pus ju Jesucristo chani najun: “Ju quitꞌin xactꞌajunch tus acsni maticaꞌ tuꞌuꞌ ixjunita chai actsucukꞌalhiyaꞌ tus mas va tavananch. Chai quitꞌin ju acminchokopalaꞌ astan. Quitꞌin ju lai icnavikꞌojui tachi chun ju taxtokni”.
\s1 Ju Xivan laktsꞌilh ju Cristo
\p
\v 9 Pus ju quitꞌin ju ictꞌajun atsꞌoknuꞌ ju ani alhiqui milakꞌauꞌan Xivan icjunita. Pus tachi ju uxijnan makꞌalhkꞌajnanatꞌit chai lhinajun ju Jesucristo lamiꞌatsucuntiꞌan chai chꞌixkꞌoyatꞌit tachi chun ju macxcai va ixlacaꞌatalh ni lhilacꞌapꞌinatꞌit ju Jesús pus vachuꞌ chunch iclai ju quitꞌin. Pus ju quitꞌin xacvi lacalacatꞌicstꞌi lacatꞌun laꞌixtampusni alama. Chai ju anuꞌ lacatꞌun Patmos juncan. Pus ju quitꞌin tachꞌin xacjunita ju anch va ixlacaꞌatalh ni xacnajun ixchivinti Dios chai xacꞌajuni ju lapanacni ixlacata ju Jesús.
\v 10 Pus lhitumincu ixjunita acsni lakꞌayacan ju quiꞌucxtinꞌan Jesús. Chai ju Spiritu Santu quimakꞌasmatni lakatam chivinti ju xachivincan ju laquimpulacan. Lana na pꞌas ju chivinilh tachi acsni na pꞌas suncan ju tuꞌuꞌ skꞌolh ni va xaquimamachakxaniputun ni jantu va xamatiꞌ ju xaquixakꞌalai.
\v 11 Chai chani ju quijuni:
\p ―Ju quitꞌin xactꞌajunch tus acsni maticaꞌ tuꞌuꞌ ixjunita chai actsucukꞌalhiyaꞌ tus mas va tavananch. Atsꞌokꞌulatꞌi lacaꞌalhiqui ju tuchꞌi alaktsꞌinaꞌ. Chai amalakꞌachꞌaninch ju quintalhilacaꞌanta ju tavilanancha ju ani lakatujun lakꞌachakꞌanixni laxalacatꞌun Asia. Anch ju Efeso chai ju Esmirna chai ju Pérgamo chai ju Tiatira chai ju Sardis chai ju Filadelfia chai ju Laodicea. ―Chunch ju xaquijuni ju xaquixakꞌalai.
\p
\v 12 Pus ju quitꞌin ictalakaspꞌitlh ni va xaclaktsꞌimputun tichi chavaich ju xaquixakꞌalai. Chai acsni ictalakaspꞌitlh pus iclaktsꞌilh lakatujun ixputayan cantila ju si oro ixtajunita.
\v 13 Chai laꞌixlacaitat junta ixlacya ixputayan cantila ixya pumatam ju va ixtꞌachunch ixjunita tachi ju yuchi ju malakachachilh ju Dios ni lapanac catsucuyaꞌ ju ani lacamunutpaꞌ. Chai ju yuchi ixlakchꞌita ju lhman ixpumpuꞌ ju ixꞌakxtakmanikꞌota ju ixchꞌajaꞌ. Chai vachuꞌ ixtanquilhakchꞌimucꞌacanta ju liston ju oro ixjunita.
\v 14 Chai ju ixꞌai slivasalh na xnapapa ixjunita. Chun tachi ju tuꞌuꞌ apamat borrego ju na xnapapa junita u tachi ju tuꞌuꞌ miqui. Chai kꞌai lam lam ixtalakpuyajui tachi ju tuꞌuꞌ xaꞌalapnaꞌ jipi.
\v 15 Chai ju ixchꞌajaꞌ lana kꞌox slamnicꞌa ixjunita tachi ju tuꞌuꞌ kꞌoxi tsasnat ju va ancaꞌ camaxtucalh lacajipi. Chai ju laꞌixchivinti lana istasui ni na alin ju ixtachaput. Chunch tachi ju ixkꞌasmatca istꞌasat ju tuꞌuꞌ talhavanti xcan.
\v 16 Chai ixchꞌapata laꞌixlhicana lakatujun stꞌacu. Chai ju laꞌixquilhni ixtaxtui lakatam espada ju na lhman ixjunita chai acxputꞌui ixquicxtui. Chai ju ixꞌucxpuꞌ na slamnicꞌa ixjunita tachi ju avilhchan acsni na pꞌas maktaji.
\p
\v 17 Chai ju quitꞌin acsni iclaktsꞌilh pus lana tin ictaꞌaktalh. Chai tachi ju va xanin ictama laꞌixchꞌajaꞌ acsni ictaꞌaktalh. Pus ju yuchi quimokslanilh ixmacaꞌ laꞌixlhicana laquilacatuna chai chani quijuni:
\p ―Jantu atꞌalhan. Quitꞌin ju xactꞌajun tus acsni maticaꞌ tuꞌuꞌ ixjunita chai actsucukꞌalhiyaꞌ tus mas va tavananch.
\v 18 Chai ictꞌajun ju chavai. Chai mas xacnita para ictꞌajun chai actsucukꞌalhiyaꞌ. Chai quitꞌin ju icnajun tichi chavaich ju caniyaꞌ chai quitꞌin ju icchꞌapata ju xallave junta taꞌan ju tanita.
\v 19 Pus atsꞌokꞌulatꞌich ju tuchꞌi xalaktsꞌin chai ta yu junita ju aliꞌ taxtokni ju chavai chai ju tuchi catapasayaꞌ astan.
\v 20 Pus chanich ju nomputun ju anuꞌ ju jantu lai xamachꞌakxai ixlacata ju anuꞌ lakatujun stꞌacu ju laktsꞌintꞌa laquilhicana chai ju anuꞌ lakatujun ixputayan cantila ju si oro ixtajunita. Pus ju anuꞌ lakatujun stꞌacu pulaktsꞌipaxcavacan ju talhistꞌacꞌa ju quintalhilaksi ju tavilanancha ju lakatujun lakꞌachakꞌanixni. Chai ju ixputayan cantila ju laktsꞌintꞌa pulaktsꞌipaxcavacan ju quilhmaktujun ju quintalhilaksi.
\c 2
\s1 Ju chivinti ju ajuni ju amachakꞌan Efeso
\p
\v 1 Ju xaqꞌuitꞌachivinin vachuꞌ chani ju quijuni:
\p ―Chanich atsꞌoknunin ju alhistꞌacꞌa ju quintalhilaksi ju tavilanancha ju lakꞌachakꞌan Efeso: “Ma chanich tajunan ju yuchi ju chꞌapata ju lakatujun stꞌacu laꞌixlhicana chai ju alhtanatꞌajun laꞌixlacaitat junta lacya ju lakatujun ixputayan cantila ju si oro tajunita.
\v 2 Ma cꞌatsai ju yuchi tuchꞌi naviyatꞌit. Ma cꞌatsai ta yu chꞌalhcꞌatnanatꞌit ju ixlacata chai ni chꞌixkꞌoyatꞌit ju macxcai. Chai ma cꞌatsai ni lana jantu laktsꞌimpꞌutꞌunatꞌit ju na kꞌai tajunita. Chai ma alaktsꞌintꞌanutꞌatꞌit ju tanajunch ni ixtamalakachan tajunita mas jantu chai alhitꞌaꞌutꞌatꞌit ni va aꞌokxchokꞌonin.
\v 3 Chai ma cꞌatsai ni chꞌixkꞌoyatꞌit va tuchi makꞌalhkꞌajnat. Chai ma chꞌalhcꞌatnanatꞌit ju ixlacata. Chai ma jantu tavanan xkꞌopꞌatꞌit.
\v 4 Para ma alin ju tuchi jantu kꞌox tapulhiulayan. Ma yuchi ni jantuch vana amapꞌainininatꞌit tachi ju ixlayatꞌit ju pꞌulhnan.
\v 5 Pus ma apꞌastꞌactꞌit ta yu ixlayatꞌit ju makꞌanchich acsni na ixmapꞌainiyatꞌit ju yuchi. Chai ma tamch apꞌastꞌactꞌit. Chai ma chunchach ju alachꞌokꞌotꞌit tachi ju ixlayatꞌit acsni ixlhilacꞌapꞌintꞌatꞌitcaꞌ ju yuchi. Chai ni jantu tamch apꞌastꞌacꞌaꞌitꞌit pus ma va tam pantsꞌiquis catalakminan ju yuchi chai ma catamakꞌosuniyan ju ixputayan ju mincantilaꞌan.
\v 6 Para ju tuchꞌi naviyatꞌit ma alin lacatsꞌunin ju kꞌachani ju yuchi. Ma yuchi ni lana jantu kꞌox lhiulayatꞌit tuchi tanavi ju nicolaítanin. Chai ju yuchi ma vachuꞌ jantu kꞌox lhiulai tuchi tanavi ju yuꞌunch.
\v 7 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu. Tuchi ajuni ju talhilaksi ju yuchi ju xaquimaꞌatsꞌokni ju ani chivinti. Pus ju casastꞌucꞌaꞌ ju macxcai ma caxtaknicanaꞌ ju xatocꞌat ju qꞌuiu ju xtꞌakꞌa ju atsucunti ju conkꞌalhiyanta ju lactꞌiyan junta vilhcha ju Dios. Ma yuchi ju caxtakniyaꞌ ju xaquimaꞌatsꞌokni ju ani chivinti”. Chunch ju quijuni ni acꞌajunilh ju amachakꞌan Efeso.
\s1 Ju chivinti ju atsꞌoknunilh ju amachakꞌan Esmirna
\p
\v 8 Chai ju yuchi ju xaquimaꞌatsꞌokni ju ani chivinti vachuꞌ chani quijuni: “Chani atsꞌoknunin ju anuꞌ ju alhistꞌacꞌa ju quintalhilaksi ju tavilanancha ju lakꞌachakꞌan Esmirna. Ma chani tajunan ju ixtꞌajun tus acsni maticaꞌ tuꞌuꞌ ixjunita chai catsucukꞌalhiyaꞌ tus mas va tavananch. Yuchi ju ixnita para lokꞌonchokolh.
\v 9 Ju yuchi ma cꞌatsakꞌojui tuchꞌi naviyatꞌit chai tuchꞌi lhimakꞌalhkꞌajnanatꞌit. Chai ma cꞌatsai ni nonatꞌit ni na quilhpatinin untꞌatꞌit mas jantu vasalh quilhpatinin untꞌatꞌit. Alai ma na makꞌalinin untꞌatꞌit. Chai ju yuchi ma cꞌatsai tuchi macxcai chivinti tajunan ju talhitapakaꞌuchokoi isꞌakstuꞌan ni israelitanin mas jantu vasalh israelitanin tajunita. Alai ma va Satanás ju tachꞌakꞌokꞌai.
\v 10 Pus ma jantu atꞌalhonitꞌit ju alhimakꞌalhkꞌajnanaꞌitꞌit. Pus ju lhacaticuru ma caꞌamapastꞌacꞌaniyaꞌ ju lapanacni ni catalhinonaꞌ ixtꞌalhnuca ju aliꞌin lamilhiꞌuxijnan. Chai ni jantu acꞌapꞌaꞌitꞌit ju yuchi mas chunch cataꞌulhtuyan pus ma catasuyaꞌ ni vasalh lhilacꞌapꞌinatꞌit ju xaquimaꞌatsꞌokni ju ani chivinti. Chai ma tachi lakacau avilhchan ju amamakꞌalhkꞌajnicꞌanaꞌitꞌit. Para va tachi alhilaksitꞌit ju yuchi mas amaknicꞌanaꞌitꞌit chai ju yuchi ma cataxtakniyan ju mintalhajaꞌan. Ma yuchi ni caꞌalinaꞌ ju miꞌatsucuntiꞌan jonkꞌalhita lactꞌiyan.
\v 11 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu. Tuchi ajuni ju talhilaksi ju xaquimaꞌatsꞌokni ju ani chivinti. Pus ju casastꞌucꞌaꞌ ju macxcai ma jantu catinilh ju ixlaktꞌui”. Chunch ju quijuni ni acꞌajunilh ju amachakꞌan Esmirna.
\s1 Ju chivinti ju atsꞌoknunilh ju amachakꞌan Pérgamo
\p
\v 12 Chai ju xaquimaꞌatsꞌokni ju ani chivinti vachuꞌ chani quijuni: “Atsꞌoknunin ju quintalhilaksi ju tavilanancha ju lakꞌachakꞌan Pérgamo. Ma chani tajunan ju quilhtaxtuta lakatam espada ju acxputꞌui quicxtui.
\v 13 Ma cꞌatsakꞌojui tuchꞌi ju naviyatꞌit. Chai ma cꞌatsai ni anchach ju tꞌonatꞌit junta lhinajun ju Satanás. Chai ma cꞌatsai ni mas anch ju tꞌonatꞌit para va tachi lhilaksiyatꞌit ju yuchi ju xaquimaꞌatsꞌokni ju ani alhiqui. Chai ma jantu tavanan nontꞌatꞌit ni jantu mispꞌayatꞌit ju yuchi mas acsni maknicalh lamilhiꞌuxijnan ju Antipas ju vasalh ixlapanac ixjunita. Ma anchach ju maknicalh junta lhinajun ju Satanás.
\v 14 Para ma alin lacatsꞌunin ju naviyatꞌit ju jantu kꞌox lhiulai ju yuchi. Pus ma alin ju lamilhiꞌuxijnan ju talacaꞌini ju ixlhamapꞌaksin ju makꞌaniya lapanac ju Balaam ixjuncan. Yuchach ju junilh ju kꞌai ucxtin Balac ta yu laich caꞌapumakꞌalhkꞌosuyach ju israelitanin. Ju Balaam va ajunilh ni laich cataꞌulh ju lhivai ju ixlhakꞌailaktsꞌincanta ju santo chai ni laich catatꞌatsuculh va tichi chavaich.
\v 15 Pus ma vana va chunch tanavi ju aliꞌin ju lamilhiꞌuxijnan. Chai vachuꞌ ma va talacaꞌini ju ixlhamapꞌaksinꞌan ju nicolaítanin. Chai lana jantu kꞌox lhiulai ju yuchi ju xaquimaꞌatsꞌokni ju ani alhiqui.
\v 16 Pus ma tamch apꞌastꞌactꞌit. U ni jantu pus ma vatsꞌalhti catalakminan ju uxijnan ju yuchi ju xaquimaꞌatsꞌokni ju ani chivinti chai ma catatꞌalasayan. Ma capulasayaꞌ ju espada ju taxtui laꞌixquilhni.
\v 17 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu. Tuchi ajuni ju talhilaksi ju xaquimaꞌatsꞌokni ju ani chivinti. Pus ju casastꞌucꞌaꞌ ju macxcai ma caxtaknicanach ju vaiti ju makꞌanicantacha ju lactꞌiyan. Ma yuchi ju caxtakniyaꞌ ju xaquimaꞌatsꞌokni ju ani chivinti. Chai ma vachuꞌ caxtakniyaꞌ lakatam xnapapa chiux junta tsꞌokcanta ju sastꞌi ixtapakaꞌut. Chai ju anuꞌ tapakaꞌut ma jantu xamatiꞌ mispai. Va yuchi ju caꞌamaklhtayananach”. Chunch ju quijuni ni acꞌajunilh ju amachakꞌan Pérgamo.
\s1 Ju chivinti ju atsꞌoknunilh ju amachakꞌan Tiatira
\p
\v 18 Chai ju xaquimaꞌatsꞌokni ju ani chivinti vachuꞌ chani quijuni: “Chani atsꞌoknunin ju alhistꞌacꞌa ju quintalhilaksi ju tavilanancha ju lakꞌachakꞌan Tiatira. Ma chani tajunan ju istsꞌalh Dios ju kꞌai lam lam talakpuyajui tachi ju tuꞌuꞌ xaꞌalapnaꞌ jipi. Chai ju ixchꞌajaꞌ ma lana kꞌox slamnicꞌa junita tachi ju tuꞌuꞌ kꞌoxi tsasnat ju va ancaꞌ camaxtucalh lacajipi.
\v 19 Pus ju yuchi ma cꞌatsai tuchꞌi naviyatꞌit. Chai ma cꞌatsai ni na amapꞌainininatꞌit chai vasalh lhilaksiyatꞌit ju yuchi. Chai chꞌalhcꞌatnaniyatꞌit chai chꞌixkꞌoyatꞌit tachi chun ju macxcai. Chai ma vachuꞌ cꞌatsai ni palai lhu ju chꞌalhcꞌatnaniyatꞌit ju chavai. Ma palai jantu acsni pꞌulhnan xalhilacꞌapꞌinatꞌit.
\v 20 Para ma alin lacatsꞌunin ju jantu kꞌox lhiulai ju yuchi. Ma yuchi ni va yauch unitꞌit ju anuꞌ chakoꞌulh ju Jezabel juncan ni laich catavi lamilhiꞌuxijnan. Chai ju yuchi va tajunan ni laich najun ixchivinti Dios mas jantu. Chai ju yuchi amalani chai aꞌokxchokꞌoi ju ixlapanacni ju anuꞌ ju xaquimaꞌatsꞌokni ju ani chivinti. Ma va ajuni ni laich catatꞌatsuculh va tichi chavaich chai ma lai cataꞌulh ju lhivai ju ixlhakꞌailaktsꞌincanta santo.
\v 21 Pus ma na lakalhu avilhchan ju xapacxan ni camacaulich ju alactuꞌunti ju navi ni va tꞌatꞌajun va tichi chavaich. Para ma lana jantu tam pastacputun.
\v 22 Pus ju yuchi ju xaquimaꞌatsꞌokni ju ani chivinti ma caxtakniyaꞌ ju Jezabel ju na macxcai ixtakꞌankꞌat. Chai tachi chun ju talanita ju chunch atsucunti laꞌixmacni yuchi ma caꞌaxtakniyaꞌ ju kꞌai ixmakꞌalhkꞌajnatꞌan vachuꞌ. Ma chunch ju canaviyaꞌ ni jantu catamaconaꞌ ju tuchi tanavich.
\v 23 Chai tachi chun ju isꞌaskꞌatꞌan ju anuꞌ chakoꞌulh ma lana caꞌamakniyach. Pus ju chunch tachi chun ju talhilaksi ju yuchi ju xaquimaꞌatsꞌokni ju ani chivinti ma catacꞌatsayach ni ma yuchach ju alaktsꞌintanuni ju tuchi takꞌachani ju lapanacni chai tuchi tapastꞌacꞌa. Chai ma yuchach ju cataxtakniyan ju pumatamin milhiꞌuxijnan tachi ju lhijunch ixlacata ju tuchi xanavi ju kꞌantam kꞌantam.
\v 24 Pus ju yuchi ma taxakꞌalayan ju uxijnan ju amachakꞌan Tiatira ju jantu lacꞌaꞌinitꞌatꞌit ju ixlhamapꞌaksin ju anuꞌ chakoꞌulh ju Jezabel juncan. Jantu ixlanipꞌutꞌunatꞌit mas ixtajunan ni yuchach ju palai kꞌox tucan lhamapꞌaksin mas va ixꞌanuch ju Satanás. Pus uxijnan ju ma taxakꞌalayan. Ma jantu tuꞌuꞌ atumpa tsꞌinqꞌui lhamapꞌaksin ju cataxtakniyan.
\v 25 Ma va yuchi ni atꞌailhipꞌitꞌit tachi ju layatꞌit tus acsni caminchokoyaꞌ ju yuchi.
\v 26 Pus ju casastꞌucꞌaꞌ ju macxcai chai ju camuctaxtuyaꞌ tachi ju najunta ju yuchi pus ma caxtakniyaꞌ ju ixtachaput ni laich calhijonkꞌoyaꞌ ixlhilacaputsꞌun ju lacamunutpaꞌ.
\v 27 Ju ixpai ju xaquimaꞌatsꞌokni ju ani chivinti xtaknita ju ixtachaput. Chai ju yuchi ma caxtakniyaꞌ vachuꞌ ixtachaput ju casastꞌucꞌaꞌ ju macxcai. Chai ju yuchi ma calhinonaꞌ. Para ju lapanacni ju jantu talacaꞌini ma chunch ju caꞌaꞌulhtuyaꞌ tachi acsni lhinekcan ju tuꞌuꞌ xalu.
\v 28 Chai ju casastꞌucꞌaꞌ ju macxcai ma vachuꞌ caxtaknicanaꞌ ju kꞌai stꞌacu ju xajachilh vatsꞌisin.
\v 29 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu. Tuchi ajuni ju talhilaksi ju xaquimaꞌatsꞌokni ju ani chivinti”. Pus chunch ju quijuni ni acꞌajunilh ju amachakꞌan Tiatira.
\c 3
\s1 Ju chivinti ju atsꞌoknunilh ju amachakꞌan Sardis
\p
\v 1 Chai ju yuchi ju xaquimaꞌatsꞌokni ju ani chivinti vachuꞌ chani quijuni: “Chani atsꞌoknunin ju anuꞌ ju alhistꞌacꞌa ju quintalhilaksi ju tavilanancha ju lakꞌachakꞌan Sardis. Ma chani tajunan ju anuꞌ ju malakachai ju Spiritu Santu chai ju chꞌapata ju lakatujun stꞌacu. Pus ju yuchi ma cꞌatsai tuchꞌi naviyatꞌit. Chai mas noncanch ni lhilaksiyatꞌit ju Dios para jantu slivasalh. Alai tachi ju va nitꞌatꞌit.
\v 2 Pus ma alacpꞌucꞌuchꞌokꞌotꞌitch. Chai ma alaꞌaktꞌaiꞌutꞌitch ni tachapun aꞌunchꞌokꞌoyaꞌitꞌit. Chai ju chunch ma jantu acꞌapkꞌalhiyaꞌitꞌit ju Dios. Ma chunch ju alatꞌit ni laktsꞌinta ju tuchꞌi naviyatꞌit ju xaquimaꞌatsꞌokni ju ani chivinti. Chai ma najun ni jantu soknicꞌa lhiulai ju Dios tachi ju naviyatꞌit.
\v 3 Pus ma apꞌastꞌactꞌit ta yu xapꞌuꞌamaklhtꞌayananatꞌit ixchivinti Dios chai ni lhikꞌach ju xakꞌasmatꞌatꞌit. Pus ma alacꞌaꞌikꞌalhitꞌit. Chai ma tamch apꞌastꞌactꞌit ixlacata tuchꞌi naviyatꞌit. Chai ni jantu alacpꞌucꞌuꞌaꞌitꞌit pus ma catalakminan ju xaquimaꞌatsꞌokni ju ani chivinti. Ma tachi tam akꞌalhonaꞌ ju catalakminan chai ma lana jantu acꞌatsꞌayaꞌitꞌit tavanan ju lai camilh.
\v 4 Para ma alin lacatsꞌunin ju milhiꞌuxijnan ju vilatꞌit lakꞌachakꞌan Sardis ju jantu talhimalhquiliquita ixpumpuꞌan ju tuchꞌi naviyatꞌit ju uxijnan. Chai ju yuꞌunch ma catatꞌaꞌalhtananaꞌ lactꞌiyan ju xaquimaꞌatsꞌokni ju ani chivinti. Ma na xnapapa cajunaꞌ ju ixpumpuꞌan. Chai ma lhijunch ni chunch caꞌamalakchꞌinincalh.
\v 5 Pus ju casastꞌucꞌaꞌ ju macxcai ma camalakchꞌinincanaꞌ ju xnapapa pumpuꞌ. Chai ma jantu catixacacalh ju ixtapakaꞌut lacaꞌalhiqui junta tsꞌokcanta ixtapakaꞌutꞌan tachi chun ju alin isꞌatsucuntiꞌan jonkꞌalhita. Chai laꞌixꞌucxlacapuꞌ ju Dios chai laꞌixꞌucxlacapuꞌan ju ixꞌanquilhnin canoncanaꞌ ni talhilaksi ju xaquimaꞌatsꞌokni ju ani alhiqui.
\v 6 Pus ju alin ju ixpakꞌasmatni ma chach kꞌasmatlh ju tuchi najun ju Spiritu Santu. Tuchi ajuni ju talhilaksi ju xaquimaꞌatsꞌokni ju ani chivinti”. Pus chunch ju quijuni ni acꞌajunilh ju amachakꞌan Sardis.
\s1 Ju chivinti ju atsꞌoknunilh ju amachakꞌan Filadelfia
\p
\v 7 Chai ju yuchi ju xaquimaꞌatsꞌokni ju ani chivinti vachuꞌ chani quijuni: “Chani atsꞌoknunin ju anuꞌ ju alhistꞌacꞌa ju quintalhilaksi ju tavilanancha ju lakꞌachakꞌan Filadelfia. Ma chani tajunan ju yuchi ju na salaka junita chai ju va tachi najun ju istavasalanti. Yuchi ju chꞌapata ju llave ju ixtaknita ju Dios ju kꞌai ucxtin David. Chai ju yuchi ju chꞌapata ju anuꞌ llave acsni malhtekꞌai tuꞌuꞌ malhtich pus ma jantu lai xamatiꞌ malacchauchokoi. Chai acsni malacchajui tuꞌuꞌ malhtich ju yuchi pus ma jantu lai xamatiꞌ malhtekꞌai.
\v 8 Pus ju yuchi ma cꞌatsai tuchꞌi naviyatꞌit. Pus ma tamalhtekꞌanitan ju malhtich junta lai chꞌalhcꞌatnanatꞌit chai ma jantu lai xamatiꞌ catamalacchoniyan. Chai ma cꞌatsai ju yuchi ni tachapun untꞌatꞌit lacatsꞌunin. Chai mas va chunch untꞌatꞌit para lacꞌaꞌitꞌatꞌit ju ixchivinti chai jantu tavanan nontꞌatꞌit ni jantu ixlapanacni untꞌatꞌit.
\v 9 Pus ma alin ju talakꞌayai ju Satanás chai tanajun ni israelitanin tajunita mas jantu. Va tanajun taꞌaklhtamat chivinti. Pus ju xaquimaꞌatsꞌokni ju ani chivinti ma catamalakachanitachan ju yuꞌunch chai ma catataquilhputaniyan ju uxijnan. Chai ma catanonaꞌ ni na tamapainiyan ju Dios.
\v 10 Pus ni ma xalacꞌaꞌiyatꞌit ju ixchivinti ju xaquimaꞌatsꞌokni ju ani chivinti chai xachꞌixkꞌoyatꞌit ju macxcai pus ju yuchi ma vachuꞌ catalhistꞌacꞌan acsni caꞌalinaꞌ ju makꞌalhkꞌajnat ixlhilacaputsꞌun ju lacamunutpaꞌ. Ma yuchi calhiꞌalinaꞌ ju makꞌalhkꞌajnat ni ma calaktsꞌintanucanach ju lapanacni ju tatꞌajun ju ani lacamunutpaꞌ.
\v 11 Pus ma jantu makꞌan cajunaꞌ tus caminchokoyaꞌ ju yuchi. Pus ma alacꞌaꞌikꞌalhitꞌit tuchꞌi xtꞌaknicꞌantꞌatꞌit. Ju chunch ma lai amakꞌalhtꞌayananaꞌitꞌit ju mintalhajaꞌan miꞌakstuꞌan. Jantu va akꞌantam caxtaknicalh.
\v 12 Pus ju casastꞌucꞌaꞌ ju macxcai ma tachi ju tuꞌuꞌ xatantun ixpujitat Dios canavicanaꞌ. Ma lana jantu tavanan catitaxtulh ju anch. Chai ma calhimichicanaꞌ laꞌixkꞌaimacan ixtapakaꞌut ju Dios chai ixtapakaꞌut ju ixlakꞌachakꞌan ju Dios. Ma yuchi ju sastꞌi lakꞌachakꞌan Jerusalén ju caminanta ju lactꞌiyan junta vilhcha ju Dios. Chai vachuꞌ ma catsꞌokꞌulaniyach ju sastꞌi ixtapakaꞌut ju xaquimaꞌatsꞌokni ju ani chivinti.
\v 13 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu. Tuchi ajuni ju talhilaksi ju xaquimaꞌatsꞌokni ju ani chivinti”. Pus chunch ju quijuni ni acꞌajunilh ju amachakꞌan Filadelfia.
\s1 Ju chivinti ju atsꞌoknunilh ju amachakꞌan Laodicea
\p
\v 14 Chai ju xaquimaꞌatsꞌokni ju ani alhiqui vachuꞌ chani quijuni: “Chani atsꞌoknunin ju anuꞌ ju alhistꞌacꞌa ju quintalhilaksi ju tavilanancha ju lakꞌachakꞌan Laodicea. Ma chanich najun ju stavasalanti najun. Ma yuchi ju lai lhilaksican chai yuchi ju navikꞌolh tachi chun ju taxtokni ju ixnajunta ju Dios ni caꞌalilh.
\v 15 Ju yuchi ma cꞌatsai tuchꞌi naviyatꞌit. Pus ju uxijnan ma jantu ixlhichux ju miꞌalhunutꞌan ju lhilacꞌapꞌimpꞌutꞌunatꞌit ju yuchi. Nin yuchi ni ma amacꞌompꞌutꞌutꞌit ju macxcai. Pus ma palai kꞌox caꞌixva ni lana ixlhilacꞌapꞌitꞌit ixlhichux miꞌalhunutꞌan. U lana asamakꞌantꞌit.
\v 16 Para ju uxijnan ni jantu ixlhichux miꞌalhunutꞌan ju lhilacꞌapꞌimpꞌutꞌunatꞌit pus ju yuchi ma vachuꞌ catasamakꞌananch.
\v 17 Pus ju uxijnan ma nonatꞌit ni na makꞌalinin untꞌatꞌit. Ma nonatꞌit ni na lhu ju makꞌaixtꞌoktꞌatꞌit ju mimakꞌalitꞌan. Chai ma va nonatꞌit ni jantu tuꞌuꞌ maktasqꞌuiniyatꞌit. Ma chunch ju nonatꞌit para ma jantu machꞌakxayatꞌit ni Dios talaktsꞌinan tachi ju lana na makꞌalhkꞌajnanatꞌit chai painiꞌitnich untꞌatꞌit chai quilhpatinin untꞌatꞌit chai alakꞌachꞌixnin untꞌatꞌit chai lana matich ju mimpumpuꞌan.
\v 18 Para ju yuchi ma taquilhtapujuyan ni atꞌamonin ju yuchi ju oro ju lakꞌoxicanta lacajipi. Ju chunch ma vasalh makꞌalinin aꞌunaꞌitꞌit. Chai ma atꞌamonin ju xnapapa pumpuꞌ ni laich alakchꞌiyaꞌitꞌit. Chai ju chunch jantu amaxananaꞌitꞌit va ixlacaꞌatalh ni va kꞌai tsasau aꞌunaꞌitꞌit. Chai ma atꞌamonin ju cꞌuchꞌu ju laich amucꞌayaꞌitꞌit lamilakchulhꞌan ni laich vasalh alacꞌavananaꞌitꞌit.
\v 19 Pus ju yuchi acsni vasalh mapaini tam xamatiꞌ pus ma kꞌaji acsni jantu sok an chai mamakꞌalhkꞌajni. Pus ma yuchi talhijunan ni ixlhichux ju miꞌalhunutꞌan tamch apꞌastꞌactꞌit ixlacata tuchꞌi naviyatꞌit.
\v 20 Pus ju yuchi ju xaquimaꞌatsꞌokni ju ani alhiqui ma ya lacamalhtich lhimakspaꞌ chai xakꞌalai ju tanun pulacni. Chai ni xamatiꞌ cakꞌasmatniyaꞌ ju ixchivinti chai camalhtekꞌanilh pus ju yuchi ma catanuyaꞌ chai ma catꞌavenach.
\v 21 Pus va tichi chavaich ju casastꞌucꞌaꞌ ju macxcai ma calakꞌaꞌicanaꞌ ni catꞌatolaꞌ laꞌixpuꞌucxtin ju xaquimaꞌatsꞌokni ju ani chivinti tachi ju yuchi ni sastuclh ju macxcai chai tꞌavi ju ixpai ju laꞌixpuꞌucxtin.
\v 22 Pus ju alin ju ixpakꞌasmatni ma chach kꞌasmatlh ju tuchi najun ju Spiritu Santu. Tuchi ajuni ju talhilaksi ju xaquimaꞌatsꞌokni ju ani chivinti”.
\c 4
\s1 Lakꞌayacan ju Dios ju lactꞌiyan
\p
\v 1 Acsni quintꞌachivinkꞌolh ju xaquimaꞌatsꞌokni ju ani alhiqui pus astan iclaktsꞌilh ni ilhtekꞌai lakatam malhtich ju lactꞌiyan. Chai ickꞌasmatnichokolh ixchivinti ju xaquimaꞌatsꞌokni ju ani chivinti. Chai ju iskꞌasmatca ju anuꞌ chivinti chunch ixjunita tachi ju istꞌasat ju tuꞌuꞌ skꞌolh. Chai chani quijuni:
\p ―Asokꞌoch ani chai acmasuniyan ju tuchi vasalh catapasayaꞌ astan. ―Chunch ju xaquijuni.
\p
\v 2 Pus icꞌalh chai ju Spiritu Santu tachapun xaquinavi ni lai xaclaktsꞌin ju lactꞌiyan ixputolan ju kꞌai ucxtin. Chai anch ixvi ju Dios.
\v 3 Chai ju yuchi chun slamnicꞌa istasui tachi ju tuꞌuꞌ chiux ju jaspe juncan. Chai vachuꞌ slapulh istasui tachi ju tuꞌuꞌ chiux ju sardis juncan. Vachuꞌ ixtalakachoko ju putolan istasui lakatam quilhmacchat. Chai ju yuchi stakꞌau istasui tachi ju tuꞌuꞌ chiux ju esmeralda juncan.
\v 4 Chai ixtalakachoko ju anuꞌ xakꞌai putolan ixꞌalin alakapꞌuxamtꞌatꞌi putolan. Chai ixtapuvilanalh pumapꞌuxamtꞌatꞌi lackꞌajin papaninch. Sich ixtalakchꞌita ju na xnapapa ixpumpuꞌan. Chai ixtalacpatanumanalh ixcoronaꞌan ju si oro ixjunita.
\v 5 Chai ju lacakꞌai putolan ixtaxtui ju makꞌalipniꞌ. Vachuꞌ ixtaxtui ixchivintiꞌan ju anuꞌ ju ixtachivinin. Chai na pꞌas istꞌasai ju tꞌajin. Chai laꞌixꞌucxlacapuꞌ ju kꞌai putolan ixmaktajita lakatujun maclhcu. Yuchach ju ixpupastaccan ju Spiritu Santu.
\v 6 Chai laꞌixꞌucxlacapuꞌ ju anuꞌ kꞌai putolan ixma ju tuꞌuꞌ tachi lakatam kꞌai atantsꞌin. Para na kꞌox stalankꞌa ixjunita.
\p Chai laꞌixtalakachoko ju anuꞌ kꞌai putolan ixꞌalin lakatꞌatꞌi atapacxat. Pumatam laꞌixꞌucxlacapuꞌ. Pumatam laꞌixpulacan. Pumatam laꞌixlhicana. Chai pumatam laꞌixlhimacx. Chai ju anuꞌ lakatꞌatꞌi atapacxat si lana lakchulh ixtajunita laꞌixꞌucxlacapuꞌan chai laꞌixpulacanꞌan.
\v 7 Pus ju xapꞌulhnan atapacxat chunch istasui tachi ju tuꞌuꞌ león. Chai ju ixlhilakatꞌui atapacxat chunch istasui tachi ju satsꞌalh vacax. Ju ixlhilakatꞌutu atapacxat ixpacxanta ixꞌucxpuꞌ tachi ixꞌucxpuꞌ lapanac. Chai ju ixlhilakatꞌatꞌi atapacxat chunch istasui tachi ju tuꞌuꞌ kꞌatsꞌokꞌo ju alhtꞌilitnin.
\v 8 Chai ju pumatamin ju anuꞌ lakatꞌatꞌi atapacxat ixpacxanta lakachaxan ixpakꞌachuꞌan. Chai laꞌixkꞌelhtankꞌajpuꞌ ju ixpakꞌachuꞌan chai laꞌixꞌucxni va si lakchulh ixjunita. Chai tontacuj chai tontatsꞌis va tachi ixtamilhpai. Lana jantu tavanan ju jantu tamilhpa. Ixtanajun:
\q1 Salaka. Salaka. Salaka ju kꞌai ucxtin Dios ju lai navikꞌojui tachi chun ju taxtokni.
\q1 Yuchi ju ixtꞌajun tus acsni maticaꞌ tuꞌuꞌ ixjunita chai yuchi ju catsucukꞌalhiyaꞌ tus mas va tavananch.
\p
\v 9 Pus ju anuꞌ atapacxat ixtalakꞌayai chai ixtajunich lakꞌailaktsꞌiuch ju Dios ju ixvi lacakꞌai putolan. Yuchach ju tꞌonkꞌalhi.
\v 10 Pus va ta pakchux ju chunch ixtalai ju anuꞌ atapacxat pus ju pumapꞌuxamtꞌatꞌi papanin ixtataꞌaktsokotaich laꞌixꞌucxlacapuꞌ ju Dios ju ixvi lacakꞌai putolan. Yuchi ju jonkꞌalhita. Chai ixtalakꞌayai. Chai ixtalakamamai ixcoronaꞌan laꞌixꞌucxlacapuꞌ ju Dios chai ixtamilhpani. Chani ixtajuni:
\q1
\v 11 Ji quiꞌucxtin chai quiDios aktsꞌiya lhijunch ni alakꞌayacꞌanaꞌ chai ni atꞌalhonicꞌanaꞌ.
\q1 Chai ni alinch ju mintachaput pus lhijunch ni chunch ju aꞌulhtꞌucꞌanaꞌ ni uxintꞌi ju navikꞌotꞌa tachi chun ju taxtokni chai laminkꞌachat ju alinkꞌo.
\c 5
\s1 Ju Askꞌatꞌa Borrego chꞌapalh ju alhiqui
\p
\v 1 Chai iclaktsꞌilh ju anuꞌ ju ixvi lacakꞌai putolan ni ixchꞌapata laꞌixlhicana lakatam alhiqui ju ispasmilhcanta. Chai ju anuꞌ alhiqui istsꞌokcanta laꞌixpulacni chai laꞌixmacan. Chai lacatujun ixlakalamcanta.
\v 2 Chai iclaktsꞌilh pumatam anquilh ju na tachapun ixjunita. Chai ju yuchi na pꞌas ixtꞌajun chiviniꞌ ni laich cakꞌasmatkꞌocalh. Chani ixtꞌajun nonaꞌ:
\p ―Tis chavaich ju lhijunch ni laich camalamaconi junta lam lakxtokcanta junima alhiqui chai laich capuxkꞌotlh.
\p
\v 3 Para jantu lai xamatiꞌ ixpuxkꞌotꞌa ju anuꞌ alhiqui. Nin anch ju lactꞌiyan nin anch ju lacatꞌun nin anch laxtankꞌajni ju lacatꞌun. Nin caꞌalilh xamatiꞌ ju lai catꞌachivinilh.
\v 4 Chai ju quitꞌin slivasalh xackꞌalhun ni jantu ixlhitajucanta xamatiꞌ ju ixlhijun ni laich capuxkꞌotli ju anuꞌ alhiqui nin yuchi ni lai catꞌachivinilh.
\v 5 Pus ju acsnich pumatam sia yuꞌunch ju papanin ju ixtavilanancha anch chani quijuni:
\p ―Jantu akꞌalh. Ju Jesús sastuclich ju macxcai. Chai ju yuchi xaleón junita sia yuꞌunch ju makꞌaniya ixtamaskꞌatꞌanti ju Judá chai ju kꞌai ucxtin David. Chai ni sastuclich ju macxcai ju yuchi pus laich calamamaconiyaꞌ junta lacatujun lakalamcanta chai lai capuxkꞌotꞌaꞌ ju alhiqui.
\p
\v 6 Chai iclaktsꞌilh lakatam Askꞌatꞌa Borrego. Anch ixya laꞌixlacaitat junta ixvi ju kꞌai putolan chai junta ixtayanancha ju lakatꞌatꞌi atapacxat chai junta ixtavilanancha ju papaninch. Chai ju anuꞌ Askꞌatꞌa Borrego chunch istasui tachi ju va ixmaknicanta. Chai ju yuchi ixꞌalin lakatujun ixꞌakalokot chai lakatujun ixlakchulh. Pus ju anuꞌ lakchulh yuchi ju Spiritu Santu ju malakachai ju Dios ixlhilacaputsꞌun ju lacamunutpaꞌ.
\v 7 Pus ju anuꞌ Askꞌatꞌa Borrego alh. Chai amaklhtayanalh ju alhiqui ju ixchꞌapata laꞌixlhicana ju anuch ju ixvi lacakꞌai putolan.
\v 8 Chai acsni amaklhtayanalh ju alhiqui ju Askꞌatꞌa Borrego pus ju anuꞌ ixpumatꞌatꞌiꞌan atapacxat chai ixpumapꞌuxamtꞌatꞌiꞌan papanin tataꞌaktsokotanilh laꞌixꞌucxlacapuꞌ ju anuꞌ Borrego. Chai pumatamin ju yuꞌunch ixtachꞌapata ixlhisanꞌan ju arpa juncan chai ixpumapꞌunꞌan ju si oro ixjunita. Chai anchach ju ixtaxavai ixpumꞌan. Chai ju pum yuchach ixchivintiꞌan ju ixlapanacni Dios ju ani lacamunutpaꞌ ju tuchi tapuxakꞌalai ju Dios.
\v 9 Chai ju anuꞌ atapacxat chai ju papaninch tamilhpa lakatam sastꞌi milhpat. Chani ixtanajun:
\q1 Lhijunch ni uxintꞌi ju achꞌapꞌa ju alhiqui chai alamamacꞌonitꞌi junta lakalamcanta.
\q1 Lhijunch ni chunch ju alatꞌi ni ixmaknicꞌantꞌa ju uxintꞌi.
\q1 Chai laminꞌacꞌalhni alhimalakxtꞌutꞌa ju lapanacni ju talhilaksich ju Dios.
\q1 Amalakxtꞌutꞌa sia yuꞌunch ju tachivinin tijpachux chivinti
\q1 chai sia yuꞌunch ju tatꞌajun ixlhilacaputsꞌun ju lacamunutpaꞌ.
\q1
\v 10 Chai ju uxintꞌi aꞌulatꞌa kꞌai ucxtinin.
\q1 Chai vachuꞌ aꞌulatꞌa ju palijni ni catalakꞌayayach ju quiDiosꞌan.
\q1 Chai ju yuꞌunch catalhinonaꞌ ju lacamunutpaꞌ.
\b
\p
\v 11 Pus ju acsnich iclaktsꞌilh lhu lana ju anquilhnin. Jantu lai ixputekꞌekꞌocan ni lana na lhu istasui. Pus ju yuꞌunch anch ixtayanancha laꞌixlacaitat junta ixvi ju kꞌai putolan chai junta ixtayanancha ju atapacxat chai ju papanin. Chai ickꞌasmatlh ni ixtachivinin ju anquilhnin.
\v 12 Pꞌas ixtachivinin ni laich cakꞌasmatkꞌocalh. Chai chani ixtanajun:
\q1 Ixmaknicanta ju Askꞌatꞌa Borrego.
\q1 Chai lhijunch ni calakꞌayacalh.
\q1 Catanonach ni yuchi ju alin ixmakꞌalit chai na kꞌox ixtacꞌatsan chai na alin ixtachaput.
\q1 Pus yuchi lhijunch ni calakꞌayacalh chai catalhonicalh.
\b
\p
\v 13 Chai ickꞌasmatlh ni ixtachivinin tachi chun ju taxtokni ju navita ju Dios ju tatꞌajun ju lactꞌiyan chai ju lacatꞌun chai ju laxtankꞌajni ju lacatꞌun chai ju lacaꞌalama. Ixchuxꞌan chani ixtanajun:
\q1 Ju vi lacakꞌai putolan chai ju Askꞌatꞌa Borrego yuꞌunchach ju tucan xalackꞌajin.
\q1 Chach atalhonikꞌalhicalh. Chai chach alakꞌayakꞌalhicalh.
\q1 Chach noncalh ni na alin ixtachaputꞌan.
\m Chunch ju tanaulh.
\p
\v 14 Chai ju ixpumatꞌatꞌiꞌan atapacxat ixtanajun ni chunch vasalh caꞌanavicalh. Chai ju papanin lana tataꞌaktsokotanilh. Chai talakꞌaya.
\c 6
\s1 Lacatujun ju lakalamcalh ju alhiqui
\p
\v 1 Pus iclaktsꞌilh ju Askꞌatꞌa Borrego acsni malamaconi junta ixlamcanta lacatam. Chai ickꞌasmatlh ixchivinti pumatam sia yuꞌunch ju ixpumatꞌatꞌiꞌan atapacxat. Chai acsni chivinilh na pꞌas istꞌasai tachi acsnich tꞌasai ju tꞌajin. Chani ju quijuni:
\p ―Asokꞌoch. Alaktsꞌich ju ani.
\p
\v 2 Pus icꞌalh. Chai iclaktsꞌilh lakatam caballo ju na xnapapa ixjunita. Chai ju lapanac ju ixpujucꞌalh ixchꞌapata ixꞌakxmuti chai ixtaknicanta lakatam ixcorona. Pus taxtulh. Chai junta alh lasanaꞌ jantu tavanan istsꞌankꞌai.
\p
\v 3 Chai ju Askꞌatꞌa Borrego acsni malamaconilh ju ixlhilacatꞌui junta ixlamcanta pus ickꞌasmatlh ju ixchivinti ju ixlhipumatꞌui atapacxat. Chai ju yuchi quijuni:
\p ―Asokꞌoch. Alaktsꞌich ju ani.
\p
\v 4 Chai icꞌalh. Chai lana taxtuchokolh alakatam caballo ju na slapulh ixjunita. Chai ju lapanac ju ixpujucꞌalh ixtaknicanta ixpokꞌai ni laich camalasani ju lapanacni ixlhilacaputsꞌun ju lacamunutpaꞌ. Ju chunch ju lapanacni catalamakniyach. Chai ju anuꞌ ju ixpujucꞌalh ju caballo xtaknicalh lakatam kꞌai espada.
\p
\v 5 Chai ju Askꞌatꞌa Borrego acsni malamaconi ju ixlhilacatꞌutu junta ixlamcanta pus ickꞌasmatlh ixchivinti ju ixlhipumatꞌutu atapacxat. Chai ju yuchi quijuni:
\p ―Asokꞌoch. Alaktsꞌich ju ani.
\p Pus icꞌalh. Chai iclaktsꞌilh alakatam caballo ju na tsꞌiti ixjunita. Chai ju lapanac ju ixpujucꞌalh ixchꞌapata lakatam pamakchꞌixni laꞌixmacaꞌ.
\v 6 Chai ickꞌasmatlh lakatam chivinti tachi ju va anch ixminacha junta ixtayananchalh ju pumatꞌatꞌi atapacxat. Chai chani ixnajun:
\p ―Ju tam kilo ju trigo lhistꞌacan tachi ju lhajacan tamin avilhchan lacalhichꞌalhcat. Chai lakatꞌutu kilo ju cebada lhistꞌacan tachi ju lhajacan tam avilhchan lacalhichꞌalhcat. Para jantu catilhitapalalh ju aceite nin yuchi ju vino. ―Chunch ju naulh ju xachivinin.
\p
\v 7 Pus ju Askꞌatꞌa Borrego acsni malamaconi ju ixlhilacatꞌatꞌi junta lamcanta pus ickꞌasmatlh ixchivinti ju ixlhipumatꞌatꞌi atapacxat. Chai ju yuchi quijuni:
\p ―Asokꞌoch. Alaktsꞌich ju ani.
\p
\v 8 Pus icꞌalh. Chai iclaktsꞌilh alakatam caballo ju na istakta. Chai ju lapanac ju ixpujucꞌalh ixjuncan aninti. Chai ju alasaninin tachꞌakꞌokꞌalh. Chai xtaknicalh ju lapanac ixpokꞌai ni laich calhinaulh ixmaknica tam cuarto tachi chun ju lapanacni ju ixtatꞌajun ixlhilacaputsꞌun ju lacamunutpaꞌ. Laich caꞌamakni lacamachita chai lacachavanti chai lacatakꞌankꞌat chai caꞌamamakninin ju maktilin ju alin ju lacamunutpaꞌ.
\p
\v 9 Chai ju Askꞌatꞌa Borrego acsni malamaconilh ju ixlhilacaquis junta ixlamcanta pus icꞌalacꞌavanalh laꞌixtankꞌapuꞌ junta ixavanican ju Dios ju pum. Chai ju anch iclaktsꞌilh ju ixtacuvinꞌan ju lapanacni ju ixꞌamaknicanta va ixlacaꞌatalh ni ixtalacaꞌita ixchivinti Dios chai ni ixtajuni ju anuꞌ chivinti ju ixtꞌalapanacni.
\v 10 Chai ju yuꞌunch na pꞌas tachivinilh acsni chani tanaulh:
\p ―Ji quiꞌucxtin ju uxintꞌi na salakaꞌat. Chai aktsꞌiya muctꞌaxtꞌui ju minchivinti. Pus tus tavananch ju alaktsꞌintꞌanuyaꞌ ju quilhamakꞌan quincꞌan chai amamalakchꞌavaniyaꞌich ixlacata ju quinꞌacꞌalhni quincꞌan ju lapanacni ju tatꞌajun ju lacamunutpaꞌ. ―Chunch tanaulh ju anuꞌ tacuvin.
\p
\v 11 Pus ju acsnich axtaknicalh ju yuꞌunch xnapapa ixpumpuꞌan ju pumatamin. Chai ajunicalh ni catapacxalhcaꞌ atilacatsꞌunin tus acsni catataꞌaktsayach ixtꞌaxalapanacni chai ixlhiꞌalakꞌavinꞌan ju vachuꞌ chunch catapuniyaꞌ tachi ju yuꞌunch.
\p
\v 12 Chai iclaktsꞌilh ju Askꞌatꞌa Borrego acsni malamaconilh ixlhilacachaxan junta ixlamcanta chai lana na pꞌas tataclh ju lacatꞌun. Chai ju avilhchan lana na smalaka va tachi ju tuꞌuꞌ tsꞌiti pumpuꞌ. Chai ju malhquiyuꞌ lana na lapulh va tachi ju acꞌalhni.
\v 13 Chai ju stꞌacu tapataju. Tamachilh ju lacatꞌun tachi ju tuꞌuꞌ xalhiꞌut qꞌuiu ni jopꞌon patajui ni sunui ju un.
\v 14 Chai ju lactꞌiyan lana matich va tachi acsni pasmilhcan ju tuꞌuꞌ alhiqui. Chai tachi chun ju talhpa chai tachi chun ju lactꞌicstꞌi lacatꞌun lacaꞌalama si amakꞌosukꞌocalh.
\v 15 Pus ju acsnich ju xaꞌucxtinin ju ani lacamunutpaꞌ chai ju xalackꞌajinch chai ju xaꞌucxtinin taropajni chai ju makꞌalinin chai ju lactachapunin chai tachi chun ju lapanacni mas xalapanacni ixtajunita chai vachuꞌ ju yuꞌunch ju matiꞌ ixjunita ixꞌucxtinꞌan sich lana tatankꞌanukꞌo junta pulhucucu talhpa ixjunita chai junta lacvi ju chiux ju lacaqꞌuivin.
\v 16 Chai chani ixtajuni ju anuꞌ lactalhpa chai ju anuꞌ chiux:
\p ―Apꞌatꞌaꞌutꞌitch. Aquilatantꞌalhmauch. Chach jantu aquintalaktsꞌin ju yuchi ju vi lacakꞌai putolan. Chai chach jantu aclaktsꞌiu ixtalhkꞌamti ju Askꞌatꞌa Borrego.
\v 17 Chunch aquilaꞌulhtuch ni chilh ju avilhchan acsni aquintamamakꞌalhkꞌajniyan ju Dios. Chai tis chavaich ju lai casastꞌucꞌaꞌ ju yuchi.
\c 7
\s1 Amichikꞌocanta ixlapanacni Dios
\p
\v 1 Chai acsni tapasakꞌolh ju ani taxtokni pus iclaktsꞌilh pumatꞌatꞌi anquilhnin. Chai ju yuꞌunch ixtayanalh laꞌixmakastutꞌatꞌi ju lacamunutpaꞌ chai istasastꞌucꞌach ju un ju ixajachilh ju makastutꞌatꞌi ju lacamunutpaꞌ. Ju chunch jantu catilalh ju un ju ani lacatꞌun nin anch ju lacaꞌalama nin yuchi ni lai casunulh ju qꞌuiu.
\v 2 Chai iclaktsꞌilh apumatam anquilh ju ixminacha junta xajachilh ju avilhchan. Chai ju yuchi ixchꞌapata ixpamichin ju Dios ju lakꞌajunta. Chai lana na pꞌas axakꞌala ju anuꞌ ixpumatꞌatꞌiꞌan anquilhnin ju ixꞌaxtaknicanta ju ixpokꞌaiꞌan ni laich catalakꞌalhiyaꞌ ju lacatꞌun chai ju alama.
\p
\v 3 Chai ju anuꞌ anquilh ajuni:
\p ―Tucaꞌ alakꞌalhitꞌit ju lacatꞌun nin yuchi ju alama nin yuchi ju qꞌuiu. Chach ictimichikꞌoyau ju ixlapanacni Dios laꞌismuntsanꞌan.
\p
\v 4 Chai ickꞌasmatlh ta pumachux ju ixꞌamichican. Chaꞌalh tam cientos a cuarenta y cuatro milh lapanacni. Asacxtucalh sia yuꞌunch ixꞌapapanatnich ju pumacautꞌuiꞌan istsꞌalan ju Israel.
\v 5 Lakacautꞌui milh amichicalh ju ixꞌapapanatnich ju Judá. Chai lakacautꞌui milh ju ixꞌapapanatnich ju Rubén. Chai lakacautꞌui milh ju ixꞌapapanatnich ju Gad.
\v 6 Chai lakacautꞌui milh amichicalh ju ixꞌapapanatnich ju Aser. Chai lakacautꞌui milh ju ixꞌapapanatnich ju Neftalí. Chai lakacautꞌui milh ju ixꞌapapanatnich ju Manasés.
\v 7 Chai lakacautꞌui milh ju ixꞌapapanatnich ju Simeón. Chai lakacautꞌui milh ju ixꞌapapanatnich ju Leví. Chai lakacautꞌui milh ju ixꞌapapanatnich ju Isacar.
\v 8 Chai lakacautꞌui milh ju ixꞌapapanatnich ju Zabulón. Chai lakacautꞌui milh ju ixꞌapapanatnich ju José. Chai lakacautꞌui milh ju ixꞌapapanatnich ju Benjamín.
\s1 Na lhu ju ixtalakchꞌita xnapapa ixpumpuꞌan
\p
\v 9 Chai acsni tapasakꞌolh ju ani taxtokni pus iclaktsꞌilh aliꞌin lhu lapanacni. Jantu lai xamatiꞌ ixꞌaputꞌekꞌekꞌojui. Ixtataxtutacha ixlhilacaputsꞌun ju lacamunutpaꞌ junta ixtachꞌanxtaminin chai ixtachivinin tijpachux chivinti. Chai ju anuch lapanacni ixtayanalh laꞌixꞌucxlacapuꞌ ju Dios ju ixvi lacakꞌai putolan chai laꞌixꞌucxlacapuꞌ ju anuꞌ Askꞌatꞌa Borrego. Chai ixtalakchꞌita xnapapa ju ixpumpuꞌan chai ixtachꞌapata ixꞌaxtacnaꞌan.
\v 10 Chai na pꞌas ixtachivinin ni laich cakꞌasmatkꞌocalh. Chani ixtanajun:
\q1 Ju quiDiosꞌan vi lacakꞌai putolan.
\q1 Pus ju yuchi chai ju Askꞌatꞌa Borrego yuꞌunch ju taꞌamakꞌalhtaxtunun.
\m
\v 11 Chai chux ju anquilhnin ixtayanankꞌo ixtalakachoko junta ixvi ju Dios lacakꞌai putolan chai junta ixtayanalh ju papanin chai ixpumatꞌatꞌiꞌan atapacxat. Chai ju anuꞌ anquilhnin tataquilhputalh laꞌixꞌucxlacapuꞌ ju Dios junta ixvi lacakꞌai putolan chai talakꞌayalh ju yuchi.
\v 12 Tanaulh:
\q1 Vasalh chanich canavicalh ju quiDiosꞌan.
\q1 Chach xtaknikꞌalhicalh lakꞌailaktsꞌiuch.
\q1 Chai chach lakꞌayakꞌalhicalh ni yuꞌunch ju tacꞌatsakꞌojui tachi chun ju taxtokni.
\q1 Chach talhonikꞌalhicalh yuchi ju lai navikꞌojui tachi chun ju taxtokni.
\q1 Vasalh chach navikꞌalhicalh chunch.
\p
\v 13 Pus ju acsnich pumatam sia yuꞌunch ju papaninch quixakꞌala. Quisacmi:
\p ―Tis chavaꞌitnich ju ani tayanalh ju talakchꞌita sasnapapa ixpumpuꞌan. Tas anchach ju tamintacha.
\p
\v 14 Chai ju quitꞌin icjuni:
\p ―Uxintꞌich ju cꞌatsꞌai.
\p Chai ju yuchi quijuni:
\p ―Pus yuꞌunch ju ani ju tamintacha lacakꞌai makꞌalhkꞌajnat chai tamakpatach ju ixpumpuꞌan chai lhixnapapantach laꞌixꞌacꞌalhni ju Askꞌatꞌa Borrego.
\v 15 Yuchi talhiyanalh ju laꞌixꞌucxlacapuꞌ ju kꞌai putolan junta vi ju Dios. Chai tachꞌalhcatnanich tontacuj chai tontatsꞌis junta lakꞌayacan ju yuchi. Chai ju Dios ju vi lacakꞌai putolan yuchi ju vanin caꞌalactꞌatolaꞌ ju tayanalh laꞌixꞌucxlacapuꞌ ni caꞌalhistꞌacꞌach.
\v 16 Jantu tavanan catitachavanilh nin yuchi ni lai cataquicxixli. Jantu catitalhini ju ixmacxcat ju avilhchan nin yuchi ni cataꞌucsacꞌatsa ju ixmacxcat.
\v 17 Jantu chun catitapasalh ni isꞌakstu ju Askꞌatꞌa Borrego ju calhistꞌacꞌaꞌ. Yuchach ju ya laꞌixꞌucxlacapuꞌ ju kꞌai putolan. Chai yuchi ju caꞌapꞌulhniyach. Chai caꞌalhiꞌanach junta lhu ma ju xcan ju jantu lai xixa. Chai ju Dios yuchi ju camakꞌosuyaꞌ ju amakꞌanita chai jantu xamatiꞌ cakꞌalhununaꞌ.
\c 8
\s1 Malamaconi ju ixlhilacatujun junta lamcanta
\p
\v 1 Acsni malamaconilh ju Askꞌatꞌa Borrego ju ixlhilacatujun junta lamcanta pus lana sek tajunkꞌo tachi chun ju ixtavilanalh ju lactꞌiyan. Tachi paitat hora sek tajunlh.
\v 2 Pus ju acsnich iclaktsꞌilh ju anuꞌ ixpumatujunꞌan anquilhnin ju ixtayanalh laꞌixꞌucxlacapuꞌ ju Dios chai axtaknicalh lakatamin iskꞌolhꞌan.
\v 3 Chai milh apumatam anquilh chai taya laꞌixꞌucxlacapuꞌ junta xavanican ju Dios ju pum. Pus anch laꞌixꞌucxlacapuꞌ ju kꞌai putolan ixjunita. Chai ju anuꞌ anquilh ixchꞌapata lakatam pumapꞌun si oro. Chai na lhu xaxtaknican ju pum ni laich caxavayaꞌ junta xavanican ju Dios ju pum. Chai acsni ixtatꞌajun tꞌachivinin ju Dios tachi chun ju ixlapanacni acsnich ju lhu ixavai ju ixpum.
\v 4 Pus ju xajin ju pum ju ixtꞌajun tꞌacutnuꞌ lacapumapꞌun ju ixchꞌapata ju anuꞌ anquilh alh junta ixvi ju Dios. Va lhiyaulh ixchivintiꞌan ju ixlapanacni Dios acsni ixtatꞌachivinin.
\v 5 Pus ju acsnich ju anquilh lhiꞌanchokolh ixpumapꞌun junta xavanican ju Dios ju pum chai mujulh ju jipi. Astan ju yuchi xtꞌekꞌemacamilh ju jipi ju lacatꞌun. Chai lana tꞌasalh ju tꞌajin. Chai na pꞌas lacchivinincalh. Chai makꞌalipnilh. Chai tataclh ju lacatꞌun.
\s1 Pumatujun anquilhnin tasunulh ju iskꞌolhꞌan
\p
\v 6 Pus ju acsnich ju ixpumatujunꞌan anquilhnin ju ixtachꞌapata lakatamin iskꞌolhꞌan lana talalhcayaulh ni va ixtaꞌasanamputunch.
\p
\v 7 Pus ju xapꞌulhnan anquilh sunulh ju iskꞌolh chai lana tamachilh ju lacatꞌun ju chajꞌit chai ju jipi. Va lhiyalhch acꞌalhni. Pus lana lhculh ju lacamunutpaꞌ. Para jantu chaꞌalh paitat ju lhculh. Chai anch junta lhculh pus lhcukꞌo chux ju qꞌuiu chai chux ju achꞌitin ju stakꞌau ixjunita.
\p
\v 8 Chai ju ixlhipumatꞌui anquilh sunulh ju iskꞌolh chai ju tuꞌuꞌ tachi ju kꞌai talhpa maktaitavi chai macaꞌancalh lacaꞌalama. Chai na lhu ju xaxcan alama ju lapa acꞌalhni. Para nin ixpaitat ju alama jantu xachaꞌan ju acꞌalhni.
\v 9 Chai anch junta lapa acꞌalhni pus tanikꞌo tachi chun ju atapacxat ju ixtatꞌajun ju anch. Chai lana takꞌalhikꞌo ju barco ju ixtaꞌanta ju anch.
\p
\v 10 Chai ju ixlhipumatꞌutu anquilh sunulh ju iskꞌolh chai mincha lactꞌiyan lakatam kꞌai stꞌacu. Na kꞌai ixmactaiminta tachi tuꞌuꞌ maclhcu. Chai tajuchilh junta acxtui ju kꞌai xcan chai ju xkꞌati. Para jantu tajulh nin ixpaitat ixlhilacaputsꞌun ju lacamunutpaꞌ junta acxtui ju kꞌai xcan chai ju xkꞌati.
\v 11 Pus ju anuꞌ kꞌai stꞌacu Ajenjo juncan. Chai ju kꞌai xcan ju alin ju lacatꞌun lana na sunch va tachi ju achꞌitin ju ajenjo juncan. Para jantu chaꞌalh paitat ju kꞌai xcan ju alin ju ixlhilacaputsꞌun ju lacamunutpaꞌ ju na sun va. Chai na lhu lapanacni talhini ju xcan ni lana na sun va.
\p
\v 12 Chai ju ixlhipumatꞌatꞌi anquilh sunulh ju iskꞌolh chai lana takꞌalhilh lacatsꞌunin ju avilhchan para jantu chaꞌalh paitat ju takꞌalhi. Chai vana va chunch tapasalh lacamalhquiyuꞌ. Takꞌalhilh lacatsꞌunin para jantu chaꞌalh paitat ju takꞌalhi. Chai vana va chun tapasalh ju stꞌacu. Takꞌalhi lacatsꞌunin para jantu chaꞌalh paitat ju takꞌalhi. Pus ju chunch pus lana jantu isꞌaktsai tachi ju aktsꞌiya ixtamapulhcui. Pus ju tamin avilhchan lakatꞌatꞌi hora na istsꞌista. Chai vana va chun ju tsꞌis. Lakatꞌatꞌi hora jantu lai istasui nin yuchi ju stꞌacu.
\p
\v 13 Pus ju acsnich iclaktsꞌilh lakatam kꞌatsꞌokꞌo ju ixꞌalhtꞌilitnitꞌajun laꞌixlacaitat lactꞌiyan. Chai ickꞌasmatlh acsni na pꞌas istꞌasaꞌanta. Ixnajun:
\p ―Painiꞌitnich. Painiꞌitnich. Painiꞌitnich catajunaꞌ ju tatꞌajun ju lacamunutpaꞌ acsni cataskꞌolach ju ixpumatꞌutuꞌan anquilhnin ju titacꞌacx.
\c 9
\p
\v 1 Pus ju ixlhipumaquis anquilh sunulh ju iskꞌolh chai iclaktsꞌilh ni patajulh lakatam stꞌacu. Tamacha ju lacatꞌun. Chai xtaknicalh ju anuꞌ stꞌacu ju xallave junta na makat lhokꞌonkꞌoꞌanta. Lana jantu lai cꞌatsacan tas tus anch ju chaꞌan.
\v 2 Pus ju yuchi malhtekꞌa junta na makat lhokꞌonkꞌoꞌanta. Chai lana na lhu xajchilh ju jin. Chunch tachi ju tuꞌuꞌ jin ju taxtui lacahorno. Pus lana lakapuchꞌapakꞌo ju avilhchan. Chai tachi ju va paitat tsꞌis va va ixlacaꞌatalh ju xajin ju taxtulh junta na makat lhokꞌonkꞌoꞌanta.
\v 3 Chai lacajin taxtulh ju silek. Chai taꞌakpitsilh ju lacatꞌun. Chai axtaknicalh ju yuꞌunch ixtachaputꞌan tachi ixtachaput ju tuꞌuꞌ statsucu ju alin ju lacamunutpaꞌ.
\v 4 Chai ajunicalh ni ma jantu catalakꞌalhi ju atsꞌin ju alin ju lacamunutpaꞌ nin ju tuꞌuꞌ ju stakꞌau cava nin tuꞌuꞌ qꞌuiu. Ma va yuꞌunch ju lai catamamakꞌalhkꞌajni ju lapanacni ju jantu amichita ju Dios laꞌismuntsanꞌan.
\v 5 Chai ajunicalh ni ma laich cataꞌamamakꞌalhkꞌajni ju lapanacni lakaquis malhquiyuꞌ. Para ma jantu lai catiꞌamakni. Pus ju ixmakꞌalhkꞌajnatꞌan chunch ixjunita tachi ju tuꞌuꞌ statsucu acsni atsꞌacꞌanan.
\v 6 Chai ju acsni avilhchan ju lapanacni na cataniputunach para jantu lai catitani.
\p
\v 7 Pus ju anuꞌ silek ixtꞌachunch ixtatasui tachi ju tuꞌuꞌ caballo ju mucꞌanicanta ju tsasnat pumpuꞌ acsni an lacalhilucut. Chai laꞌisꞌaktsulhꞌan ixmucꞌacanta ju tuꞌuꞌ tachi ixcoronaꞌan ju si oro. Chai ju ixꞌucxpuꞌan tachi ixꞌucxpuꞌ lapanac ixtajunita.
\v 8 Chai ixꞌaiꞌan chun ixjunita tachi ixꞌai tam chakoꞌulh. Chai istatsalatꞌan chun ixtajunita tachi istatsalat ju tuꞌuꞌ león.
\v 9 Chai laꞌixtanquilhakni ixjucꞌanilh ju tuꞌuꞌ tachi tsasnat. Chai ju ixpakꞌachu ixmacatꞌajun tachi istꞌasat lhu carro ju taxakꞌamai ju caballo acsni taꞌan lacalhilucut.
\v 10 Chai ixꞌalin isꞌistaꞌan tachi isꞌista ju statsucu chai ixꞌalin ixpatsꞌacꞌanꞌan. Chai laꞌisꞌistaꞌan anchach ju ixꞌalin ju ixtachaputꞌan ni lai cataꞌamamakꞌalhkꞌajniyaꞌ ju lapanacni. Para ajunicalh ni va lakaquis malhquiyuꞌ lai cataꞌamamakꞌalhkꞌajniyaꞌ ju lapanacni.
\v 11 Chai alin ixꞌucxtinꞌan ju anuꞌ silek. Yuchi ju xaꞌanquilh junta na makat lhokꞌonkꞌoꞌanta. Junta jantu lai cꞌatsacan tas tus anch ju chaꞌan. Ju ixtapakaꞌut ju anuꞌ anquilh lacalhihebreo Abadón juncan. Chai lacalhigriego ma Apolión juncan. Ju chunch va nomputun ni amakniniꞌ junita.
\p
\v 12 Pus tapasalh ju xapꞌulhnan makꞌalhkꞌajnat. Chai timinta alakatꞌui makꞌalhkꞌajnat.
\p
\v 13 Pus ju acsnich ju ixlhipumachaxan anquilh sunulh ju iskꞌolh chai ickꞌasmatlh lakatam chivinti ju taxtucha ju laxmakꞌastunuxni mixa ju tsupilin makꞌastuya. Yuchach ju mixa junta xavanican ju Dios ju pum. Chai ju anuꞌ tachi mixa ixjunita oro ixlhimanicanta chai ixvi laꞌixꞌucxlacapuꞌ ju Dios.
\v 14 Pus ju anuꞌ ju ixchivinin xakꞌalalh ixlhipumachaxan anquilh ju ixchꞌapata ju iskꞌolh. Junich:
\p ―Axkꞌotꞌich ju ixpumatꞌatꞌiꞌan anquilhnin ju alacchꞌiyocanta laꞌixquilhtuꞌ kꞌai xcan ju Eufrates juncan.
\p
\v 15 Pus lana axkꞌotlh ju ixpumatꞌatꞌiꞌan anquilhnin. Pus yuꞌunch ju ixꞌalaclhcaꞌulacanta ixlacata ju anuꞌ pantsꞌiquis chai ju anuꞌ avilhchan chai ju anuꞌ malhquiyuꞌ chai ju anuꞌ cꞌata ni laich catamakni lhu lana ju lapanacni. Para jantu ixchaꞌanta nin paitat tachi chun ju lapanacni ju tatꞌajun ju ixlhilacaputsꞌun ju lacamunutpaꞌ ju camaknicanaꞌ.
\v 16 Pus ju anuꞌ anquilhnin tapꞌulhnilh ju taropajni ju ixtapuꞌanta ixcaballoꞌan. Chai ju anuꞌ taropajni ixtachaꞌanta lakatꞌui cientos millón. Pus ickꞌasmatlh ni chunch aputekꞌecalh.
\p
\v 17 Pus chani istasui ju caballojni ju iclaktsꞌilh tachi ju va laquinꞌaklakꞌavanti. Pus ju ixtajucꞌanalh lacacaballo ixtalactanquilhakvilanalh ju tsasnat ju slapulh ixjunita. Chai azul chai xkavau ixjunita. Chai ju isꞌaktsulhꞌan ju caballojni chunch istasui tachi isꞌaktsulh león. Chai laꞌixquilhniꞌan ixtapuquilhtaxtui ju jipi chai jin chai azufre.
\v 18 Chai ju ani lakatꞌutu makꞌalhkꞌajnat tapunilh lhu ju lapanacni. Para jantu chaꞌalh nin paitat tachi chun ju lapanacni ju tatꞌajun ixlhilacaputsꞌun ju lacamunutpaꞌ. Yuchi ju amaknilh ju jipi chai ju jin chai ju azufre ju ixtaquilhtaxtui ju caballojni.
\v 19 Pus alin ixtachaputꞌan ju caballojni laꞌixquilhniꞌan chai laꞌisꞌistaꞌan. Pus ju isꞌistaꞌan chunch ixtajunita tachi ju tuꞌuꞌ lu ju alin isꞌaktsulh chai yuchi ju taputacꞌatsani ju lapanacni.
\p
\v 20 Pus ju aliꞌin lapanacni ju jantu xatalhini ju ani makꞌalhkꞌajnat jantu tavanan tam ixtapastꞌacꞌa ixlacata tuchi ixtanavi. Va tachi ixtalhilacaꞌan ju macxcai un chai ju santo ju lhinavicanta oro chai plata chai ju atumpa tsasnat chai ju va chiux chai ju va qꞌuiu. Chunch ixtalai mas jantu lai taꞌalacꞌavanan ju isantoꞌan nin lai catakꞌasmatnalh nin yuchi ni lai cataꞌalhtanalh.
\v 21 Chai jantu tavanan tam xatapastꞌacꞌa ixlacata ju ixꞌamaknintiꞌan nin yuchi ni ixꞌalhicujnutꞌan nin yuchi ni va ixtatꞌatꞌajun va tichi chavaich nin yuchi ni ixtaꞌakꞌalhonan.
\c 10
\s1 Pumatam anquilh ixchꞌapata lakatam alhiqui
\p
\v 1 Pus ju acsnich iclaktsꞌilh apumatam anquilh ju na tachapun ixjunita. Chai ju yuchi mincha lactꞌiyan. Va milh lacaꞌataputsꞌi. Chai lakatam quilhmacchat ixlacpajucalh. Chai ju ixꞌucxpuꞌ chunch istasui tachi ju avilhchan. Chai ju ixchꞌajaꞌ chunch ixtajunita tachi ju tuꞌuꞌ makꞌakꞌai tantun ju na maktajita.
\v 2 Chai ixchꞌapata lakatam lacatꞌicstꞌi alhiqui ju ixtapuxkꞌota. Chai laꞌixlhichꞌancana putachꞌanju lacaꞌalama. Chai laꞌixlhichꞌanmacx putachꞌantalh lacatꞌun.
\v 3 Chai lana kꞌox pꞌas ju chivinilh tachi acsni na pꞌas tꞌasai ju tuꞌuꞌ kꞌai león. Chunchach ju chivinilh ni laich cakꞌasmatkꞌocalh ixlhilacaputsꞌun ju lacamunutpaꞌ. Chai acsni tꞌasalh ju anuꞌ anquilh pus paktujun tꞌasalh ju tꞌajin.
\v 4 Chai acsni istꞌasakꞌolhch paktujun ju tꞌajin pus ju quitꞌin xactsꞌokꞌulaputun tuchi naulh. Para ickꞌasmatlh lakatam chivinti ju mincha lactꞌiyan ju chani xaquijuni:
\p ―Jantu atsꞌokꞌulatꞌi. Va amakꞌatꞌich lamiꞌalhunut ju tuchi xanajun ju tꞌajin acsni xatꞌasai paktujun.
\p
\v 5 Chai ju anuꞌ anquilh ju iclaktsꞌilh ni ixya lacaꞌalama chai lacatꞌun macꞌalh ju lactꞌiyan laꞌixlhicana.
\v 6 Chai lhipastacli ju Dios ixpumavasalaca ixchivinti. Lhipastaclh ju Dios ju tꞌonkꞌalhi. Yuchi ju navilh ju tꞌiyan chai tachi chun ju taxtokni ju alin ju anch. Chai yuchi ju navilh ju lacatꞌun chai tachi chun ju taxtokni ju alin ju ani. Chai yuchi ju navilh ju lacatꞌun chai tachi chun ju taxtokni ju alin ju anch. Pus lhipastacli ju Dios chai naulh ni jantuch aliꞌ tuꞌuꞌ cꞌacx. Va yuchi ni caꞌuctaxtukꞌoyach tachi chun ju ispastacta ju Dios.
\v 7 Para acsni cachinaꞌ ju avilhchan acsni casunaꞌ ju iskꞌolh ju ixlhipumatujun anquilh acsnich ju cacꞌatsacanaꞌ ju tuchi ixꞌajuni ju Dios ju ixlapanacni para jantu tavanan lai tamachakxa.
\p
\v 8 Pus ju acsnich ju anuꞌ chivinti ju ickꞌasmatlh ju minchalh lactꞌiyan aktam quixakꞌalachokopa. Quijuni:
\p ―Inchich iniꞌ ju alhiqui ju tapuxkꞌota laꞌixmacaꞌ ju anuꞌ anquilh ju chꞌanjui ixtachꞌantam lacaꞌalama chai ju ixtachꞌantam lacatꞌunch.
\p
\v 9 Pus iclakꞌalh ju anquilh chai icjunilh ni aquixtaknilh ju lacatꞌicstꞌi alhiqui. Chai ju yuchi quijuni:
\p ―Nich. Aꞌutꞌich. Na sun cajunaꞌ lamimpajan para ju laminquilhni slivasalh na saksi cajunaꞌ tachi ju tuꞌuꞌ tꞌaxcat.
\p
\v 10 Pus ju quitꞌin icꞌamaklhtayanalh ju lacatꞌicstꞌi alhiqui laꞌixmacaꞌ ju anquilh chai lana icꞌulh. Chai vasalh na saksi iclhiula laquinquilhni. Lana chun tachi ju tuꞌuꞌ tꞌaxcat. Para acsni icꞌokꞌolh pus na sunch va laquimpajan.
\v 11 Chai icjunicalh:
\p ―Aktsꞌiya tasqꞌuini ni aꞌunchꞌokꞌoyaꞌich ju lapanacni tuchi catapasayaꞌ. Aꞌunch ju lapanacni ju tatꞌajun ixlhilacaputsꞌun ju lacamunutpaꞌ chai ju tachivinin tijpachux chivinti chai ju kꞌai ucxtinin.
\c 11
\s1 Maknicalh ixtꞌiyunꞌan lapanacni
\p
\v 1 Pus acsnich icxtaknicalh kꞌantam actiyac ju pulhcacan tuꞌuꞌ. Chai icjunicalh:
\p ―Akꞌostꞌaꞌulh chai alhcꞌatꞌich ju ixpujitat Dios chai junta xavanican ju pum ju Dios. Vachuꞌ apꞌutꞌekꞌe ju anch taꞌan lakꞌayanin ju Dios.
\v 2 Para jantu alhcꞌayapꞌi ju laꞌismakspaꞌ ju pujitat. Ju anch axtaknican ju yuꞌunch ju jantu talakꞌayai ju Dios. Chai lakatꞌutu cꞌata a paitat catalhinonaꞌ ju yuꞌunch ju lakꞌachakꞌan junta lakꞌayacan ju Dios.
\v 3 Chai acꞌaxtakniyaꞌ ixtachaputꞌan ixtꞌiyunꞌan quilapanacni. Ju chunch laich catanonaꞌ ju quinchivinti tam milh a lakatꞌui cientos a sesenta avilhchan. Chai catalakchꞌiyaꞌ ju pumpuꞌ tachi ju talakchꞌi ju na taꞌamakꞌaninin.
\p
\v 4 Yuꞌunch ju tachi akꞌatꞌui xaqꞌuiu olivo tajunita. Chai tachi ju lakatꞌui ixputayan cantila ju ya laꞌixꞌucxlacapuꞌ ju Dios ju amanavin ju lacamunutpaꞌ junita.
\v 5 Chai ni xamatiꞌ calactuꞌuputunaꞌ pus lana taxtui ju alapnaꞌ laꞌixquilhniꞌan ju ixtꞌiyunꞌan lapanacni. Chai lana amakni ju ixtꞌalaxcaiꞌan. Pus ni xamatiꞌ calactuꞌuputunaꞌ chunchach ju capuniyaꞌ.
\v 6 Chai ju yuꞌunch ixtꞌiyunꞌan lapanacni axtaknicanta ju ixtachaputꞌan ni laich catanonaꞌ ni jantu caminaꞌ ju xcan tachi chun ju avilhchan ju catatsucuyaꞌ nonin ixchivinti Dios. Chai vachuꞌ alin ixtachaputꞌan ni lai catalapalakꞌo acꞌalhni ju xcan. Chai lai caꞌamamakꞌalhkꞌajni ju lapanacni tijpachux ju makꞌalhkꞌajnat va tapakchux ju catanaviputunaꞌ.
\v 7 Chai acsni catanavikꞌoyaꞌ ixlhichꞌalhcatꞌan ixnajunca ixchivinti Dios pus ju maktiliꞌ ju cataxtuyaꞌ junta na makat lhokꞌonkꞌoꞌanta caꞌalactꞌalasayaꞌ ju yuꞌunch. Chai calhajananaꞌ ju yuchi. Chai caꞌamakniyach ju ixtꞌiyunꞌan lapanacni.
\v 8 Chai ixlacatunaꞌan catamayaꞌ lacati ju lakꞌachakꞌan junta maknicalh lacacurus ju Jesús. Pus ju Dios najun ni chunch junita ju anuꞌ lakꞌachakꞌan tachi ju lakꞌachakꞌan Sodoma chai tachi ju lacatꞌun Egipto.
\v 9 Pus ju lapanacni ju tatꞌajun ixlhilacaputsꞌun ju lacamunutpaꞌ chai ju tachivinin tijpachux chivinti catalaktsꞌiniyach ju ixlacatunaꞌan lakatꞌutu avilhchan a paitat. Ju anuꞌ ixtꞌiyunꞌan ju xaꞌamaknican. Chai jantu calacasqꞌuincanaꞌ ni lai caꞌancalh amacnuca.
\v 10 Chai ju lapanacni ju tatꞌajun ju ani lacatꞌun catalhikꞌachanach ixlacataꞌan ju yuꞌunch. Chai catalhicꞌataniyaꞌ chai catalapuxtakniyaꞌ lhakꞌailaktsꞌin. Chunch ju catanaviyaꞌ ni na ixtaꞌamamakꞌalhkꞌajni ju lapanacni ju ixtatꞌajun ju ani lacamunutpaꞌ ju anuꞌ ixtꞌiyunꞌan ixlapanacni Dios.
\v 11 Para acsni tapasalh ju anuꞌ lakatꞌutu avilhchan a paitat pus ju Dios axtaknichokolh isꞌatsucuntiꞌan chai lana takꞌostavi junta ixtamanalh. Chai na kꞌox tatalhanalh ju talaktsꞌilh.
\v 12 Pus ju acsnich ixtꞌiyunꞌan takꞌasmatlh lakatam chivinti ju minchalh lactꞌiyan. Na pꞌas ju chivinilh ni laich catakꞌasmatꞌaꞌ. Chanich ju ajuni:
\p ―Atꞌatꞌitch ju ani.
\p Chai lana tapuꞌalh ju ataputsꞌi ju lactꞌiyan. Chai na kꞌoxich talaktsꞌilh ju ixtꞌalaxcaiꞌan.
\v 13 Chai ju anuꞌ pantsꞌiquis lana na pꞌas tataclh ju lacatꞌun. Chai ju tamin cientos chakaꞌ ju ixyanalh ju anuꞌ lakꞌachakꞌan lakacavin chakaꞌ takꞌalhikꞌo junta lai. Chai acsni tataclh ju lacatꞌun pus tani lakatujun milh lapanacni. Chai ju aliꞌin na tatalhanalh chai talakꞌaya ju Dios ju vilhcha lactꞌiyan.
\p
\v 14 Pus chunch ju tapasalh ju ixlhilakatꞌui makꞌalhkꞌajnat chai vatsꞌalhti caꞌalinaꞌ ju ixlhilakatꞌutu.
\s1 Ju ixlhipumatujun anquilh sunulh ju iskꞌolh
\p
\v 15 Pus ju acsnich sunulh ju iskꞌolh ju ixlhipumatujun anquilh. Chai lana na pumalhu ju na pꞌas ixtachivinacha ju lactꞌiyan ni laich cakꞌasmatkꞌocalh. Ixtanajun:
\q1 Ju chavai quiDiosꞌan chai ju Cristo catamalacasuyaꞌ ixtachaputꞌan.
\q1 Chai catalhinonkꞌalhiyaꞌ ixlhilacaputsꞌun ju lacamunutpaꞌ.
\m
\v 16 Pus ju ixpumapꞌuxamtꞌatꞌi papanin ixtavilanalh lacakꞌai ixputolanꞌan laꞌixꞌucxlacapuꞌ Dios. Pus ju yuꞌunch lana tataquilhputanilh ju Dios chai talakꞌayalh.
\v 17 Ixtajuni:
\q1 Ji quiꞌucxtin Dios ju lai navikꞌoꞌui tachi chun ju taxtokni uxintꞌi ju ixtꞌaꞌun tus acsni maticaꞌ tuꞌuꞌ ixjunita chai atsꞌucꞌukꞌalhiyaꞌ tus mas va tavananch.
\q1 Pus iclaxtakniyau lakꞌailaktsꞌiuch ni chꞌapꞌatꞌa ju mimpokꞌai chai lhinaꞌunch ju chavai.
\q1
\v 18 Pus ju lapanacni ju tatꞌajun ixlhilacaputsꞌun ju lacamunutpaꞌ tatalhkꞌamalh.
\q1 Para vachuꞌ tꞌalhkꞌamch ju uxintꞌi.
\q1 Chai chilh ju chavai ju avilhchan acsni calaktsꞌintanucanach ju tanitach.
\q1 Vachuꞌ chilh ju avilhchan acsni axtꞌakniyaꞌ ixtalhajaꞌan ju milapanacni chai ju ixtanajun ju minchivinti chai ju salaka alaktsꞌin chai ju na tatalhoniyan.
\q1 Axtꞌaknikꞌoyaꞌ chux. Mas yuꞌunch ju jantu tuꞌuꞌ ixtapalhniꞌan chai vachuꞌ yuꞌunch ju xalackꞌajin tajunita.
\q1 Chai chilh ju chavai ju avilhchan acsni amamakꞌalhkꞌajniyaꞌ ju na ixtaꞌamamakꞌalhkꞌajninin ju lacamunutpaꞌ.
\p
\v 19 Pus ju acsnich ju lactꞌiyan lana malhtekꞌacalh ju laꞌixpujitat Dios chai istasui laꞌixpulacni ju kꞌai pꞌaklat junta ixmakꞌacanta ju chivinti ju ixꞌalaclhitꞌatakꞌoxita ju Dios ju israelitanin. Chai lana makꞌalipnilh. Chai na pꞌas lacchivinincalh. Chai tꞌasalh ju tꞌajin. Chai tataclh ju lacatꞌun. Chai tamachilh ju chajꞌit.
\c 12
\s1 Tasulh pumatam chakoꞌulh chai lakatam kꞌai lu
\p
\v 1 Chai alilh ju lactꞌiyan lakatam kꞌai lhamakꞌan. Yuchi ni tasu pumatam chakoꞌulh ju ixlakchꞌita ju avilhchan. Chai ixpuchꞌantai ju malhquiyuꞌ. Chai laꞌisꞌaktsulh ixꞌalin ixcorona junta ixmucꞌacanta lakacautꞌui stꞌacu.
\v 2 Chai ixpacxanta isꞌaskꞌatꞌa. Chai ni na ixtꞌajun makꞌalhkꞌajnaꞌ pus na pꞌas istꞌasai ni va laich sokꞌon camaklakꞌavanalh.
\v 3 Chai tasuchokopa alakatam lhamakꞌan ju lactꞌiyan. Yuchi ni tasu lakatam makakꞌai lu ju na slapulh ixjunita. Chai ju yuchi ixpacxanta lakatujun isꞌaktsulh chai lakacau ixꞌakalokot chai lakatamin ixcorona laꞌixlacꞌaktsulh.
\v 4 Chai ju anuꞌ kꞌai lu laꞌisꞌista amapatajuni ju stꞌacu. Tatamachilh tus lacatꞌun. Para jantu ixchaꞌanta paitat ju stꞌacu ju patajulh. Chai ju anuꞌ kꞌai lu taya laꞌixꞌucxlacapuꞌ ju anuꞌ chakoꞌulh ju na ixlokꞌomputunch ni va caꞌixꞌunilh ju isꞌaskꞌatꞌa ju ixmaklakꞌaulich.
\v 5 Pus ju chakoꞌulh maklakꞌaulh pumatam tsꞌalh. Yuchach ju kꞌai ucxtin catalhimispayaꞌ tachi chun ju lapanacni. Chai ju tuchi canonaꞌ ju yuchi yuchach ju cataquiclacaꞌiyaꞌ ju lapanacni. Para ju isꞌaskꞌatꞌa ju anuꞌ chakoꞌulh lhiꞌancalh junta vilhcha ju Dios tus lacakꞌai ixputolan.
\v 6 Chai ju anuꞌ chakoꞌulh atsꞌalaꞌalh junta va aseknicꞌa junta ixlakꞌoxinita ju Dios. Anchach junta lai camavacalh tam milh a lakatꞌui cientos a sesenta avilhchan.
\p
\v 7 Chai alilh ju kꞌai lasat ju lactꞌiyan. Pus ju Miqui yuchi ju lhinajun laꞌixtalhavatꞌan ixꞌanquilhnin Dios. Pus ju yuchi chai ju ixꞌanquilhnin tatꞌalasalh ju makakꞌai lu chai ju ixꞌanquilhnin ju makakꞌai lu.
\v 8 Para tatsꞌankꞌa ju makakꞌai lu chai ixꞌanquilhnin. Chai jantu lai tatsuculh ju lactꞌiyan.
\v 9 Pus lana tixcoxtucalh ju lactꞌiyan ju kꞌai lu. Yuchach ju anuꞌ lu ju makꞌaniya ixtꞌajunch. Yuchach ju lhacaticuru chai Satanás juncan. Yuchach ju aꞌokxchokꞌoi tachi chun ju lapanacni. Pus acsni lhajacalh ju makakꞌai lu acsnich ju tin macamincalh tus ani lacatꞌun. Chai ju ixꞌanquilhnin alactꞌamacamincalh.
\p
\v 10 Chai ickꞌasmatlh ni na pꞌas ixchivincan ju lactꞌiyan ni laich cakꞌasmatkꞌocalh. Ixnajun:
\p ―Ju chavai chilh ju avilhchan acsni caꞌamakꞌalhtaxtuyaꞌ ixlapanacni ju Dios. Catasuyaꞌ ni vasalh alin ju ixtachaputꞌan ju Dios chai ju Cristo. Pus putasui ni alin ixtachaputꞌan ni tixcauxtucalh ju ixꞌachivixtꞌakꞌa ju quiꞌalakꞌavinꞌan. Tontacuj chai tontatsꞌis ixꞌan achivixtaknaꞌ laꞌixmacni Dios.
\v 11 Para ju quiꞌalakꞌavinꞌan tatꞌalalhajalh ju anuꞌ kꞌai lu. Tapulhajalh ixꞌacꞌalhni ju anuꞌ Askꞌatꞌa Borrego chai laꞌixchivintiꞌan junta ixtanajun ni laꞌixlhichux ixꞌalhunutꞌan ixtalhilaksi ju Jesucristo. Chai ju yuꞌunch jantu tuꞌuꞌ ixtalhiulai ju isꞌatsucuntiꞌan mas catanilhch.
\v 12 Pus ni alhajanalh ju Cristo pus yuchi calhiꞌalinaꞌ ju kꞌachat ju lactꞌiyan. Na catakꞌachanach tachi chun ju tatꞌajun ju anch. Para painiꞌitnich ju uxijnan ju tꞌonatꞌit ju lacatꞌun chai ju lacaꞌalama. Painiꞌitnich untꞌatꞌit ni taquilakquilatachin ju uxijnan ju lhacaticuru. Chai slivasalh talhkꞌaman ju yuchi ni cꞌatsai ni jantu makꞌan catichꞌalhcatnalh. ―Chunch ju naulh ju anuꞌ ju ixchivinin.
\p
\v 13 Chai ju kꞌai lu acsni tixcolhimincalh tus lacatꞌun pus lana chꞌakꞌokꞌaxma ju anuꞌ chakoꞌulh ju ixmaklakꞌajunta istsꞌalh.
\v 14 Para lana xtaknicalh lakatꞌui ixpakꞌachu ju anuꞌ chakoꞌulh. Chunch ixjunita ju ixpakꞌachu tachi ixpakꞌachu ju kꞌai kꞌatsꞌokꞌo. Ju chunch ni lai capulackꞌosmakꞌanaꞌ ju kꞌai lu. Laich caꞌalhtꞌilitniꞌalh junta aseknicꞌa junta ixlakꞌoxinita ju Dios. Anchach junta lai camavacalh lakatꞌutu cꞌata a paitat.
\v 15 Chai ju anuꞌ kꞌai lu tsuculh quilhtaxtunuꞌ ju xcan tachi ju tuꞌuꞌ kꞌai xcan. Chai ju xcan taima ju anuꞌ chakoꞌulh ni va ixlacasqꞌuin ju kꞌai lu ni camuxtulh ju anuꞌ chakoꞌulh.
\v 16 Para ju lacatꞌun aktaijulh ju chakoꞌulh. Pus lana lakchꞌuchꞌuꞌokꞌo ju xcan. Chai maxixilh ju kꞌai xcan ju ixquilhtaxtuta ju kꞌai lu.
\v 17 Pus ju acsnich ju kꞌai lu slivasalh tꞌalaxcailich ju anuꞌ chakoꞌulh. Pus alh alactꞌalasanaꞌ ju aliꞌin isꞌaskꞌatꞌan ju anuꞌ chakoꞌulh. Yuꞌunch ju tamuctaxtui tachi ju najun laꞌixlhamapꞌaksin ju Dios chai va tachi talhilacaꞌanta ju Jesucristo.
\c 13
\s1 Tasu lakatꞌui maktilin
\p
\v 1 Pus ju quitꞌin ictachꞌantalh lacacucu laꞌixquilhtuꞌ alama. Chai iclaktsꞌilh ni tacutlh lacaꞌalama lakatam maktiliꞌ. Chai ixꞌalin lakacau ixꞌakalokot chai lakatujun isꞌaktsulh chai lakatamin ixcorona laꞌixꞌakalokot. Chai ju lakatamin isꞌaktsulh ju yuchi ixmuntiꞌulacanta ju tapakaꞌut ju lana jantu kꞌox lhiulai ju Dios.
\v 2 Pus ju anuꞌ maktiliꞌ ju iclaktsꞌilh chunch ixjunita ju ixlacatuna tachi ju tuꞌuꞌ leopardo. Chai ju ixchꞌajaꞌ chunch ixjunita tachi ixchꞌajaꞌ ju tuꞌuꞌ oso. Chai ju ixquilhni chunch ixjunita tachi ixquilhni ju tuꞌuꞌ león. Chai ju kꞌai lu xtaknilh ju ani maktiliꞌ ixtachaput chai ixpuꞌucxtin.
\v 3 Pus na iscꞌatsani ju anuꞌ maktiliꞌ ju lakatam ju isꞌaktsulh. Chai istasui tachi ju va lai caꞌixpuni. Para macaxnilh junta iscꞌatsani. Chai tachi chun ju lapanacni ju tatꞌajun ju ani lacatꞌun tachꞌakꞌokꞌalh ju anuꞌ maktiliꞌ chai na talhamakꞌaninilh.
\v 4 Pus ju lapanacni talakꞌayalh ju kꞌai lu ni ixtaknita ixtachaput ju maktiliꞌ. Vachuꞌ talakꞌayalh ju maktiliꞌ. Ixtanajun:
\p ―Tis chavaich ju laich ixtꞌachunch cava ju maktiliꞌ. Chai tis chavaich ju lai catꞌalasa ju yuchi.
\p
\v 5 Chai ju maktiliꞌ xtaknicalh ixtachaput ni laich na jokꞌat cachivinilh chai vachuꞌ canaulh macxcai chivinti ixlacata ju Dios. Chai yau junicalh ni laich cachꞌalhcatnanaꞌ lakatꞌutu cꞌata a paitat.
\v 6 Pus na macxcai chivinti ixnajun ixlacata Dios chai ixlacata ju ixpujitat Dios chai ixlacataꞌan ju tatꞌajun ju lactꞌiyan.
\v 7 Chai yau junicalh ni laich caꞌalactꞌalasa ju talhilacaꞌanta ju Cristo chai laich caꞌalhajanalh. Chai vachuꞌ xtaknicalh ixtachaput ni ixꞌucxtinꞌan cava tachi chun ju lapanacni ju tatꞌajun ixlhilacaputsꞌun ju lacamunutpaꞌ chai ju tachivinin tijpachux chivinti.
\v 8 Chai tachi chun ju lapanacni ju tatꞌajun ju ani lacamunutpaꞌ catalakꞌayayaꞌ ju anuꞌ maktiliꞌ. Para alin ju lapanacni ju atsꞌokꞌulacanta laꞌixꞌalhiqui ju Askꞌatꞌa Borrego ju ixmaknicanta. Chai anch ju najun tichi chavaich ju alin isꞌatsucunti jonkꞌalhita. Chai ixtapakaꞌut ju kꞌantam kꞌantam anch ju istsꞌokꞌulacanta tus acsni tucaꞌ ixnavicantacha ju lacamunutpaꞌ. Pus ju yuꞌunch ju anch atsꞌokꞌulacanta jantu catitalakꞌaya ju anuꞌ maktiliꞌ.
\p
\v 9 Pus ni xamatiꞌ alin ixpakꞌasmatni chach kꞌasmatlh.
\v 10 Ju talhiꞌan lacapulachꞌin ixtꞌalapanac pus vana va chunch ju canavicanaꞌ. Chai ju lacamachita amakninin pus lacamachita capumaknichokocanaꞌ. Pus yuchi lhitasqꞌuini ni catachꞌixlh ju makꞌalhkꞌajnat ju talhilacaꞌanta ju Dios chai va tachi catalhilaksilhch ju yuchi.
\p
\v 11 Pus ju acsnich iclaktsꞌilh alakatam maktiliꞌ ju taꞌacxtulh ju lacatꞌun. Chai ixꞌalin lakatꞌui lactꞌicstꞌi ixꞌakalokot tachi ixꞌakalokot ju tuꞌuꞌ askꞌatꞌa borrego. Chai chunch ju ixchivinin tachi ju ixchivinin ju anuꞌ makakꞌai lu.
\v 12 Chai ixꞌalin ixtachaput tachi ju xapꞌulhnan maktiliꞌ. Chai tavilh laꞌixpuꞌucxtin laꞌixꞌucxlacapuꞌ ju xapꞌulhnan maktiliꞌ chai tapꞌastu ajuni ju lapanacni ni catalakꞌayalh ju xapꞌulhnan maktiliꞌ. Yuchi ju macaxnilh junta iscꞌatsani chai istasui tachi ju va lai caꞌixnilh.
\v 13 Chai ju anuꞌ ixlhilakatꞌui maktiliꞌ na lai ixnavi ju tuꞌuꞌ lhamakꞌan. Mas yuchi ju jipi lai ixmakꞌalhtajui ju lactꞌiyan. Ixchin ju lacatꞌun laꞌixꞌalacꞌavantiꞌan ju lapanacni.
\v 14 Chai yau junicalh ni laich canavi laꞌixꞌucxlacapuꞌ ju xapꞌulhnan maktiliꞌ ju tuꞌuꞌ lhamakꞌan. Chai yuchi ju apuꞌokxchokꞌolh ju lapanacni ju ani lacamunutpaꞌ. Va ajuni ni catalapalaxtulh tachi ixlacatuna ju anuꞌ maktiliꞌ ju iscꞌatsani lacamachita para jantu xani.
\v 15 Chai ixtaknicanta ixtachaput ni laich caxtakniyaꞌ isꞌatsucunti ju anuꞌ lapalaxtucanta tachi ixlacatuna ju maktiliꞌ. Pus ju chunch ju anuꞌ ju ixlapalaxtucanta naulh ni camaknicanaꞌ va tichi chavaich ju jantu calakꞌayayaꞌ ju yuchi.
\v 16 Chai ju ixlhipumatꞌui maktiliꞌ lhinaulh ni camichicalh tachi chun ju lapanacni laꞌixlhicana ixlacmacaꞌan u laꞌismuntsanꞌan. Chux ju xalactꞌicstꞌin chai ju xalackꞌajin. Chux ju makꞌalinin chai ju quilhpatinin. Chux ju matiꞌ ixꞌucxtinꞌan chai ju va xalapanacni ixtajunita.
\v 17 Pus ju chunch jantu lai xamatiꞌ catitamaulh ju tuꞌuꞌ u castꞌalh ju tuꞌuꞌ ni jantu michicanta. Pus ju ixꞌalhimichican yuchi ixtapakaꞌut ju maktiliꞌ ju istsꞌokcanta lacachivinti u lacaꞌaputekꞌenta ju alhimispacan ju anuꞌ maktiliꞌ.
\v 18 Pus na tasqꞌuini ju kꞌox acꞌatsanti ni lai machakxacan ju ani. Pus ju na lai amachakxanan laich camispayaꞌ ixꞌaputekꞌenti ju maktiliꞌ. Pus ju anuꞌ aputekꞌenti nomputun ixtapakaꞌut tam xamatiꞌ. Pus ju anuꞌ aputekꞌenti yuchi ju lakachaxan cientos a sesenta y seis.
\c 14
\s1 Lhu lapanacni tamilhpa
\p
\v 1 Pus ju acsnich iclaktsꞌilh ju Askꞌatꞌa Borrego ni ixyacha laxatalhpa Sion. Chai vachuꞌ ixtayanancha tam cientos a cuarenta y cuatro milh lapanacni. Chai si ixtalacapavilanankꞌo ixtapakaꞌut ju Askꞌatꞌa Borrego chai ixtapakaꞌut ju ixpai.
\v 2 Chai ickꞌasmatlh lakatam chivinti ju mincha lactꞌiyan. Chai istꞌasat chunch ixjunita tachi ixtalhavanti xcan chai tachi istꞌasat ju tꞌajin acsni na pꞌas tꞌasai. Ju anuꞌ chivinti ju ickꞌasmatlh chunch ixjunita tachi acsni na lhu sacan ju arpa.
\v 3 Chai ixtamilhpaich lakatam sastꞌi milhpat laꞌixꞌucxlacapuꞌ ju kꞌai putolan junta ixvi ju Dios chai laꞌixꞌucxlacapuꞌan ju pumatꞌatꞌi atapacxat chai laꞌixꞌucxlacapuꞌan ju papanin. Chai jantu xamatiꞌ lai xalani ju anuꞌ milhpat. Va yuꞌunch ju lapanacni ju ixtachaꞌanta tam cientos a cuarenta y cuatro milh. Yuꞌunch ju ixꞌalacmakꞌalhtaxtucanta ju lacamunutpaꞌ.
\v 4 Yuꞌunch ju jantu tavanan ixtamacajunta ju Dios. Va tachi ixtalhilaksita ju yuchi. Chai yuꞌunchach ju tachꞌakꞌokꞌai ju Askꞌatꞌa Borrego mas vanta anchach ju caꞌalh. Yuꞌunchach ju pꞌulhnan alhimalakxtucanta sia ju lapanacni ju tatꞌajun ju ani lacamunutpaꞌ ni laich ixlapanacni catava ju Dios chai ju Askꞌatꞌa Borrego.
\v 5 Chai ju yuꞌunch jantu tavanan ixtaꞌaꞌokxchokꞌonun. Na salaka tajunita.
\s1 Chani tanaulh ju ixpumatꞌutuꞌan anquilhnin
\p
\v 6 Pus ju acsnich iclaktsꞌilh apumatam anquilh ju alhtꞌilitniꞌalh laꞌixlacaitat lactꞌiyan. Chai ixlhiꞌanta ju chivinti ixlacata ju Cristo ju jantu tavanan catimapaxacalh. Chai ju anquilh yuchi lhilhiꞌanta ni laich caꞌajunilh tachi chun ju lapanacni ju tatꞌajun ixlhilacaputsꞌun ju lacamunutpaꞌ chai ju tachivinin tijpachux chivinti.
\v 7 Chai ju anuꞌ anquilh na pꞌas chivinilh ni laich cakꞌasmatkꞌocalh. Naulh:
\p ―Atꞌalhonitꞌit ju Dios chai alakꞌayatꞌit ni chilh ju pantsꞌiquis acsni camucꞌacanaꞌ ju talakꞌalhin. Alhilacꞌapꞌitꞌit ju yuchi ju navita ju tꞌiyan chai ju lacatꞌun chai ju alama chai junta taꞌacxtui ju xcan.
\p
\v 8 Chai apumatam anquilh chꞌakꞌokꞌalh ju xapꞌulhnan anquilh. Chai ixnajun:
\p ―Taiꞌinicalh ixtachaput ju kꞌai lakꞌachakꞌan Babilonia ni yuchi ju xaꞌamalanikꞌojui tachi chun ju lapanacni ixkꞌachanica ju alactuꞌunti tachi ju ixnavi ju yuchi.
\p
\v 9-10 Chai ixlhipumatꞌutu anquilh chꞌakꞌokꞌalh chai na pꞌas chivinilh ni laich cakꞌasmatkꞌocalh. Pus na pꞌas quilhuꞌalh ni xamatiꞌ calakꞌayayaꞌ ju maktiliꞌ chai ju lapalaxtucanta tachi ixlacatuna ju anuꞌ maktiliꞌ chai ni calakꞌaꞌiyaꞌ ni camichicalh laꞌismuntsan u laꞌixmacaꞌ pus ju yuchi ma slivasalh camakꞌalhkꞌajnanaꞌ laꞌixtalhkꞌamti ju Dios. Chai ma lana matiꞌ cajunaꞌ ju ixꞌamapainicaꞌan ju acsnich. Ma na camamakꞌalhkꞌajnicanaꞌ lacajipi chai lacaꞌazufre laꞌixꞌucxlacapuꞌan ixꞌanquilhnin Dios chai laꞌixꞌucxlacapuꞌ ju Askꞌatꞌa Borrego.
\v 11 Chai junta tamakꞌalhkꞌajnan ju yuꞌunch ma va tachi jinilatach. Chai ma jantu tavanan catitaꞌastacnalh ju yuꞌunch ju tamaklacaꞌanita ju anuꞌ maktiliꞌ chai ju anuꞌ ju talapalaxtulh tachi ixlacatuna ju maktiliꞌ chai ju alhimichicanta ixtapakaꞌut ju anuꞌ maktiliꞌ. Ma tontacuj chai tontatsꞌis catamakꞌalhkꞌajnanaꞌ.
\v 12 Pus ma yuchi lhitasqꞌuini ni catachꞌixlh ju makꞌalhkꞌajnat ju talhilacaꞌanta ju Cristo. Ma cataquiclacaꞌiyach ixlhamapꞌaksin ju Dios chai ma va tachi catalhilacaꞌanaꞌ ju Jesús.
\p
\v 13 Chai ickꞌasmatlh lakatam chivinti ju minchalh lactꞌiyan. Chai quijuni:
\p ―Chanich atsꞌokꞌulatꞌi: “Ma na takꞌachan ju tani ju talhilacaꞌankꞌalhita ju Jesús”. Chai ju Spiritu Santu ma chani najun: “Ma na takꞌachan ni taꞌastacnantach ju chavai mas na tamakꞌalhkꞌajnanta ixnavinica ixlhichꞌalhcat ju Dios chai mas na talhixkꞌopta. Para pastacnikꞌalhican tuchi ixtanavinita acsni ixtavilanalhcaꞌ ju ani lacamunutpaꞌ”.
\s1 Manucanta ju machita lacalhitai
\p
\v 14 Pus ju acsnich iclaktsꞌilh ju xnapapa ataputsꞌi. Chai laꞌixꞌucxni ju anuꞌ ataputsꞌi ixvi pumatam ju chunch istasui tachi ju yuchi ju malakachachilh ju Dios ni lapanac catsucuyaꞌ ju ani lacamunutpaꞌ. Chai ixꞌalin ixcorona si oro chai ixchꞌapata lakatam machita ju na quicxtui chai akxaxcꞌavincꞌa.
\v 15 Chai apumatam anquilh taxtuchilh lacakꞌai pujitat chai na pꞌas chivinilh acsni xakꞌala ju anuꞌ ju ixvi lacaꞌataputsꞌi. Chunch ju chivinilh ni laich cakꞌasmatkꞌocalh. Chai junich:
\p ―Amanutꞌich ju mimachita lacalhitai. Achꞌakxꞌitꞌich ju xatocꞌat ju achꞌananti. Pus chilh ju avilhchan tachi ju lai apꞌuchꞌakxꞌitꞌi ni na cꞌatꞌatach ju xatocꞌat. ―Chunch ju naulh ju anquilh.
\p
\v 16 Pus ju anuꞌ ju ixvi lacaꞌataputsꞌi lana macatachini ju ixmachita ju lacatꞌun. Chai lana puchakxꞌikꞌo ju xaꞌachꞌananti.
\p
\v 17 Chai taxtulh apumatam anquilh lacakꞌai pujitat ju yacha lactꞌiyan. Chai vachuꞌ ixchꞌapata ixmachita ju na ixquicxtui.
\v 18 Pus ju acsnich taxtulh apumatam anquilh junta xavanican ju Dios ju pum. Chai ixꞌalin ixtachaput ni lai camamactayani ju jipi vanta anchach. Chai ju yuchi lana na pꞌas ju chivinilh acsni xakꞌala ju anuꞌ ixchꞌapata ixmachita ju na ixquicxtui. Junich:
\p ―Amanutꞌich ju mimachita lacalhitai. Apꞌuchꞌakxtꞌich ju xalhiꞌut ju xaqꞌuiu uvas ju lacatꞌun ni na cꞌatꞌatach ju xaꞌuvas. ―Chunch ju naulh ju anquilh.
\p
\v 19 Pus ju anquilh puchꞌalhcatnalh ju ixmachita ju ani lacatꞌun chai lana puchakxꞌikꞌo ju xaꞌuvas ju ani lacamunutpaꞌ. Chai macaꞌankꞌo lacakꞌai puchꞌipni ni lai camaxtunicanaꞌ ju xaxcan. Ju chunch va nomputun ni slivasalh na caꞌamamakꞌalhkꞌajnininaꞌ ju Dios laꞌixtalhkꞌamti.
\v 20 Pus ju anuꞌ kꞌai puchꞌipni ixya lacamacni ju lakꞌachakꞌan. Chai ju anuꞌ lacapuchꞌipni si acꞌalhni ju taxtulh tus chaꞌalh laꞌixkꞌalhtsan ju caballo. Chunch ju ixlhikꞌalhtankꞌai xajun. Chai alhtanalh ju acꞌalhni lakatꞌutu cientos kilómetros.
\c 15
\s1 Chanich junita ju lakatujun makꞌalhkꞌajnat
\p
\v 1 Chai iclaktsꞌilh alakatam lhamakꞌan ju lactꞌiyan. Chai slivasalh na kꞌai lhamakꞌan ixjunita. Pus iclaktsꞌilh ixpumatujunꞌan anquilhnin chai pumatamin ju sia yuꞌunch ixtachꞌapata lakatamin makꞌalhkꞌajnat ju tamacamimputun ju ani lacatꞌun. Chai ju ani lakatujun makꞌalhkꞌajnat va yuchach cajunaꞌ. Yuchach ju capumaclayaꞌ ju Dios ju makꞌalhkꞌajnat ju axtakni ju lapanacni ju ani lacatꞌun.
\p
\v 2 Pus iclaktsꞌilh tachi tuꞌuꞌ atantsꞌin ju na stalankꞌa ixjunita. Para istasui tachi ju va ixlhiya ju jipi. Chai anch ixtayanalh laꞌixquilhtuꞌ ju anuꞌ atantsꞌin ju lapanacni ju jantu ixtanavinita ixkꞌachat ju anuꞌ maktiliꞌ chai ju anuꞌ lapalaxtucanta tachi ju maktiliꞌ. Chai vachuꞌ jantu ixtalakꞌaꞌita ni caꞌamichicalh laxalhaputꞌekꞌenti ixtapakaꞌut ju anuꞌ maktiliꞌ. Chai ju yuꞌunch ixtachꞌapata ju ixꞌarpaꞌan. Yuchi ju ixꞌaxtaknita ju Dios.
\v 3 Chai ixtamilhpaich ixmilhpat ju Moisés junta istsꞌokꞌulata. Ju Moisés ixlapanac Dios ixjunita. Chai vachuꞌ ixtamilhpai ixmilhpat ju Askꞌatꞌa Borrego. Ixtanajun:
\q1 Slivasalh na kꞌai lhamakꞌan ju tuchꞌi navi ju uxintꞌi ji ucxtin Dios ju lai navikꞌoꞌui tachi chun ju taxtokni.
\q1 Soknicꞌa ju navi tuꞌuꞌ chai aktsꞌiya muctꞌaxtꞌui ju minchivinti ju uxintꞌi ju kꞌai ixꞌucxtin unitꞌa tachi chun ju amachakꞌan lacamunutpaꞌ.
\q1
\v 4 Tis chavaich ju jantu catalhoniyan chai jantu calakꞌayayan ju uxintꞌi ji ucxtin ni va uxintꞌi ju salakaꞌat.
\q1 Pus tachi chun ju lapanacni ju tatꞌajun ju ani lacamunutpaꞌ catalakminanch chai catalakꞌayayan.
\q1 Chunch ju aꞌulhtꞌucꞌanaꞌ ni laktsꞌincꞌantꞌa ni na soknicꞌa ju navi.
\p
\v 5 Chai acsni tapasakꞌo ju ani taxtokni pus iclaktsꞌilh ni ilhtekꞌai ju kꞌai pujitat lactꞌiyan. Anchach junta vi ju Dios chai anch junta ixmakꞌacanta ju lhtꞌakꞌalh chiux junta istsꞌokcanta ju lhamapꞌaksin.
\v 6 Pus lacpujitat tataxtulh ju ixpumatujunꞌan anquilhnin ju ixtachꞌapata lakatamin makꞌalhkꞌajnat ju ixmacamimputun ju lacatꞌun. Chai ju yuꞌunch ixtalakchꞌita ju kꞌoxi ixpumpuꞌan ju slivasalh na xnapapa ixjunita. Chai ixꞌatanquilhakchꞌimucꞌacanta ju liston ju oro ixjunita.
\v 7 Chai pumatam ju ixlhipumatꞌatꞌiꞌan atapacxat axtaknikꞌo ju ixpumatujunꞌan anquilhnin lakatamin ixpumapꞌunꞌan si oro. Chai ju anuꞌ pumapꞌun isꞌaktsamanta ju makꞌalhkꞌajnat ju camacaminaꞌ ju Dios ju tꞌonkꞌalhi.
\v 8 Chai ju anuꞌ pujitat na aktsamalh ju jin chai malacasucalh ni yuchi ju Dios ju tachapun chai yuchi ju xakꞌai tucan. Chai jantu lai xamatiꞌ ixtanui ju anch lacpujitat tus catapasakꞌoyach ju anuꞌ lakatujun makꞌalhkꞌajnat ju ixtachꞌapata ju ixpumatujunꞌan anquilhnin.
\c 16
\s1 Lakatujun makꞌalhkꞌajnat axtꞌekꞌemacamilh ju lacatꞌun
\p
\v 1 Pus ju acsnich ickꞌasmatlh lakatam chivinti ju minchalh lacpujitat. Chani ajuni ju ixpumatujunꞌan anquilhnin:
\p ―Inchitꞌit. Axtꞌekꞌemacꞌapꞌitꞌit ju lacatꞌun ju makꞌalhkꞌajnat ju xalhinajun ju Dios ixmacaꞌanca. Yuchi ju tajun lacalakatujun mimpumapꞌunꞌan.
\p
\v 2 Pus alh ju xapꞌulhnan anquilh chai xtꞌekꞌemacamilh ju lacatꞌun ju tuchi ixtajun laꞌixpumapꞌun. Chai lana alilh ju macxcai istsꞌitsꞌiꞌan ju lapanacni ju ixtapacxanta ixlhamichin ju maktiliꞌ chai tamaklacaꞌanilh ju ixlapalaxtucanta tachi ixlacatuna ju anuꞌ maktiliꞌ.
\p
\v 3 Pus ju ixlhipumatꞌui anquilh vachuꞌ xtꞌekꞌemacamilh ju lacaꞌalama ju tuchi ixtajun laꞌixpumapꞌun. Chai lana tapalakꞌo acꞌalhni tachi ju tamai acꞌalhni junta lamaknican. Pus tachi chun ju atapacxat ju ixtꞌajun lacaꞌalama tanikꞌo.
\p
\v 4 Chai ixlhipumatꞌutu anquilh vachuꞌ xtꞌekꞌemacamilh ju lacxcan ju tuchi ixtajun laꞌixpumapꞌun. Vachuꞌ taju junta taꞌacxtui ju xcan. Pus lana si acꞌalhni jonkꞌo.
\v 5 Chai ickꞌasmatlh ni chivinilh ju anquilh ju lakꞌalhilh ju xcan. Chani naulh:
\p ―Aktsꞌiya soknicꞌa ju navi acsni xtꞌakꞌa ju chunch makꞌalhkꞌajnat ji uxintꞌi ju na salakaꞌat. Ju uxintꞌi tꞌaꞌun chai tus va tavananch ixtꞌaꞌun.
\v 6 Chunch icjunan ni yuꞌunch ju amamakꞌalhkꞌajni ju chavai ju taꞌamaxtunilh ixꞌacꞌalhniꞌan ju milapanacni chai ju ixtanajun ju minchivinti. Chai ju chavai ju uxintꞌi amakꞌotꞌutꞌa ju xcan ju lapꞌalatꞌi acꞌalhni. Pus ixlhijunch ni chunch ju caꞌaꞌulhtucalh.
\p
\v 7 Chai ickꞌasmatlh lakatam chivinti ju taxtuchalh junta ixavanican ju Dios ju pum. Chai chani naulh:
\p ―Ji ucxtin Dios ju lai navikꞌoꞌui tachi chun ju taxtokni ju uxintꞌi aktsꞌiya muctꞌaxtꞌui ju minchivinti chai sok ju navi acsni xtꞌakꞌa ju makꞌalhkꞌajnat. ―Chunch ju naulh.
\p
\v 8 Pus ju ixlhipumatꞌatꞌi anquilh xtꞌekꞌemacaꞌalh ju lacaꞌavilhchan ju tuchi ixtajun laꞌixpumapꞌun. Chai xtaknicalh ju avilhchan ixtachaput ni laich slivasalh caꞌalacamaccha ju lapanacni chai catalackꞌaimakataxtulh.
\v 9 Pus ju lapanacni slivasalh na talaclacacha ju lacaꞌascꞌunuꞌ. Chai na macxcai chivinti tajunilh ju Dios ju ixlhinajun ni caꞌalilh ju chunch makꞌalhkꞌajnat. Para nin chunch jantu tavanan tam tapastaclh nin yuchi ni laich catalakꞌaya.
\p
\v 10 Chai ju ixlhipumaquis anquilh xtꞌekꞌemacamilh laꞌixputolan ju maktiliꞌ ju tuchi ixtajun laꞌixpumapꞌun. Pus lana putsꞌiskꞌo junta ixlhinajun ju anuꞌ maktiliꞌ ju ixtacutcha lacaꞌalama. Chai ju lapanacni na ixtapakꞌatsꞌi ju isimakꞌatꞌan ni na ixtamakꞌalhkꞌajnan.
\v 11 Chai tajuni macxcai chivinti ju Dios ju vilhcha lactꞌiyan ni ixtatꞌajun makꞌalhkꞌajnin ni na lhu lana ixꞌalin ju istsꞌitsꞌiꞌan. Para mas chunch ju ixtamakꞌalhkꞌajnan jantu tavanan tam tapastaclh ixlacata ju tuchi ixtanavi.
\p
\v 12 Pus ju ixlhipumachaxan anquilh xtꞌekꞌemacamilh laxakꞌai xcan Eufrates ju tuchi ixtajun laꞌixpumapꞌun. Pus lana xixkꞌo ju xcan. Ju chunch ni jantu xcai catatapasayaꞌ ju xaꞌucxtinin ju cataminanta ju lhichꞌatoꞌanta ni va cataminaꞌ lasanin.
\p
\v 13 Chai iclaktsꞌilh pumatꞌutu lhacaticurulhni. Ju pumatam taxtulh laꞌixquilhni ju kꞌai lu. Chai pumatam taxtulh laꞌixquilhni ju maktiliꞌ. Chai apumatam taxtulh laꞌixquilhni ju anuꞌ lapanac ju istasui tachi ixlapanac Dios mas jantu. Chai ju anuꞌ ixpumatꞌutuꞌan chunch istasui tachi ju tuꞌuꞌ venkꞌen.
\v 14 Pus ju yuꞌunch lhacaticurulhni tajunita. Chai lai tanavi ju tuꞌuꞌ lhamakꞌan. Pus talakꞌan ju xalackꞌajin ucxtinin ixlhilacaputsꞌun ju lacamunutpaꞌ ni va tamakꞌaixtokputun ni laich catalasayaꞌ acsni cachinaꞌ ju kꞌai avilhchan. Ju acsnich catatꞌalasayaꞌ ju Dios ju lai navikꞌojui tachi chun ju taxtokni.
\v 15 Acsnich ju caminaꞌ ju Jesús tachi ju naulh. Chunch tachi tam akꞌalhonaꞌ ni chin acsni jantu cꞌatsacan ni laich cachilh ju acs pantsꞌiquis. Pus na kꞌachanch ju skꞌala tsucui chai lhistꞌacꞌa ju snapapa ixpumpuꞌ ni jantu va kꞌai tsasau cajunlh chai camaxanalh ni matiꞌ ju xnapapa ju ixpumpuꞌ.
\v 16 Pus amakꞌaixtokcalh ju xalackꞌajin ucxtinin junta Armagedón juncan lacalhihebreo.
\p
\v 17 Chai ju ixlhipumatujun anquilh xtꞌekꞌemacaꞌalh ju lacaꞌun ju tuchi ixtajun laꞌixpumapꞌun. Chai lana taxtulh lakatam chivinti lacpujitat. Anchach junta ixya ju kꞌai putolan. Chai ixnajun:
\p ―Va yuchach ju ani ju makꞌalhkꞌajnat.
\p
\v 18 Chai lana makꞌalipnilh. Chai na pꞌas lacchivincalh. Chai na pꞌas tꞌasalh ju tꞌajin. Chai na pꞌas tataclh ju lacatꞌun. Pus tus acsni tavanan alilh ju lapanacni ju ani lacamunutpaꞌ jantu tavanan ixlaktsꞌincanta ni catataclh ju lacatꞌun tachi ju lalh ju acsni.
\v 19 Pus ju anuꞌ kꞌai lakꞌachakꞌan ju Babilonia ixjuncan pumakatꞌutu pupaklh chai takꞌalhikꞌo. Chai tachi chun ju kꞌai lakꞌachakꞌanixni ixlhilacaputsꞌun ju lacamunutpaꞌ lana takꞌalhikꞌo. Chai ju Dios pastaclh ju talakꞌalhin ju ixtanavita ju amachakꞌan ju anuꞌ kꞌai lakꞌachakꞌan. Chai naulh ni vasalh camispayaꞌ ixtatsꞌinqꞌuit ju ixtalhkꞌamti.
\v 20 Pus tachi chun ju lactꞌicstꞌi lacatꞌun ju ixvi lacaꞌalama tatsꞌankꞌakꞌo. Chai matiꞌ va ju talhpa.
\v 21 Chai lackꞌai chajꞌit ju minchalh lactꞌiyan. Ixtatsꞌinqꞌui tachi tꞌupꞌuxam kilo ju lakatamin. Chai ju lapanacni tajuni macxcai chivinti ju Dios ixlacata ju makꞌalhkꞌajnat ju alilh ni tamachilh ju chajꞌit. Slivasalh na kꞌai lhitalhan va.
\c 17
\s1 Mucꞌanicalh ixtalakꞌalhin ju alactuꞌunu chakoꞌulh
\p
\v 1 Pus ju acsnich quilakmilh pumatam sia yuꞌunch ju anquilhnin ju ixtachꞌapata ju lakatamin ixpumapꞌunꞌan. Chai quijuni:
\p ―Asokꞌoch. Chai acmasuniyanch ju ixmakꞌalhkꞌajnat ju anuꞌ alactuꞌunu chakoꞌulh ju na lhu puvi ju xcan.
\v 2 Yuchach ju tatꞌaꞌalactuꞌununta ju xalackꞌajin ucxtinin ju lacamunutpaꞌ. Chai tachi chun ju lapanacni ju tatꞌajun ju ani lacamunutpaꞌ tachi ju va talhitꞌakꞌapꞌatach ju va ixkꞌachanicach ju ixꞌalactuꞌuntiꞌan ju xaꞌamasuni ju anuꞌ chakoꞌulh.
\p
\v 3 Chai ju Spiritu Santu xaquimapaxanita ju quiꞌalacꞌavanti chai iclaktsꞌilh ju ani tachi ju va laquiꞌaklakꞌavanti. Pus tachi ju va quilhiꞌalh ju anuꞌ anquilh junta na aseknicꞌa ixjunita. Chai iclaktsꞌilh pumatam chakoꞌulh ju ixpujucꞌalh lakatam maktiliꞌ ju na slapulh ixjunita. Chai laꞌixlacatuna ju anuꞌ maktiliꞌ si lana istsꞌokꞌulacanta macxcai tapakaꞌut. Chai ixꞌalin lakatujun isꞌaktsulh chai lakacau ixꞌakalokot.
\v 4 Chai ju chakoꞌulh ixlhimalakchꞌininta morado chai slapulh pumpuꞌ. Chai ixlhimaxantilacanta ju oro chai aliꞌ lactꞌicstꞌi chiux ju na laklhu ixtapalh chai ju perlas. Chai ixchꞌapata lakatam tasa si oro. Ju yuchi na ixꞌaktsamanta ju tuchi na tsꞌisi ju Dios chai ju tuchi na lhquiliqui ju navi laꞌixꞌalactuꞌunti.
\v 5 Chai ixmuntitsꞌokcanta lakatam tapakaꞌut ju jantu lai machakxacan. Chai ixnajun: “Xakꞌai Babilonia. Ixnatiꞌan ju lakachapu tꞌacunin chai ju taxtokni ju na lhitsꞌisit ju alin ju ani lacamunutpaꞌ”.
\v 6 Chai iclaktsꞌilh ju anuꞌ chakoꞌulh ni na ixlhitꞌakꞌapꞌatach ju ixꞌacꞌalhniꞌan ju lapanacni ju ixtalhilacaꞌanta ju Jesús ni ixlhinajuntach ixꞌamaknica. Chai acsni iclaktsꞌilh slivasalh iclhamakꞌaninilh ju tuchi xacmasunicanta.
\v 7 Para ju anquilh quijuni:
\p ―Tajuch ni va lhamakꞌanininch ju anuꞌ chakoꞌulh. Quitꞌin ju acmavasalaniyan ju ixlacata ju anuꞌ chakoꞌulh chai ixlacata ju anuꞌ maktiliꞌ ju pujucꞌalh. Yuchi ju alin lakatujun isꞌaktsulh chai lakacau ixꞌakalokot.
\v 8 Pus ju anuꞌ slapulh maktiliꞌ ju xalaktsꞌin ixtꞌajun para ju chavai nitach. Para cataꞌacxtuchokotachilh junta na makat lhokꞌonkꞌoꞌanta. Para aktsꞌiya camaclacanaꞌ. Chai na catalhamakꞌanininaꞌ ju maktꞌiliꞌ ju lapanacni ju tatꞌajun ju lacamunutpaꞌ acsni catalaktsꞌinchokoyaꞌ ju anuꞌ maktiliꞌ. Para ju chunch catalayaꞌ jantu atsꞌokꞌulacanta lacaꞌalhiqui junta najun tichi chavaꞌitnich ju alin ju isꞌatsucuntiꞌan ju jonkꞌalhita. Pus ixtapakaꞌutꞌan ju kꞌantam kꞌantam ju alin isꞌatsucunti jonkꞌalhita istsꞌokꞌulacantacha tus acsni tucaꞌ ixnavicanta ju lacamunutpaꞌ. Para ju aliꞌin lapanacni catalhamakꞌanininaꞌ ju maktiliꞌ ni talaktsꞌinchokoi ju yuchi. Tacꞌatsai ni ixtꞌajun para nilh chai ju chavai tꞌonchokoi.
\p
\v 9 Pus ju ani na tasqꞌuini ju kꞌox acꞌatsanti ni acmachakxa. Pus ju anuꞌ lakatujun isꞌaktsulh ju maktiliꞌ yuchi ju laktsꞌipaxcavacan ju anuꞌ lakatujun talhpa junta vi ju chakoꞌulh.
\v 10 Vachuꞌ laktsꞌipaxcavacan ixpumatujunꞌan kꞌai ucxtinin. Pus ju ixpumaquisiꞌan alhajacalh. Ju pumatam tꞌajuncaꞌ. Ju pumatam tucaꞌ tasui. Para acsni caminach jantu makꞌan catolaꞌ laꞌixpuꞌucxtin.
\v 11 Chai ju anuꞌ maktiliꞌ ju ixtꞌajun chai nitach ju chavai yuchach ju ixlhipumatsajin ucxtin cajunaꞌ. Ixtꞌalapanac cajunaꞌ ju ixlhipumatujunꞌan ju pꞌulhnan ixtatꞌajun. Para vachuꞌ camaclacanaꞌ.
\p
\v 12 Chai ju anuꞌ lakacau ixꞌakalokot ju anuꞌ slapulh maktiliꞌ ju laktsꞌintꞌa yuchi laktsꞌipaxcavacan ju ixpumacauꞌan ucxtinin. Ju yuꞌunch tucaꞌ axtaknican ixpuꞌucxtinꞌan. Para catꞌaꞌaxtaknicanaꞌ ju maktiliꞌ ixpokꞌaiꞌan chai va tam hora ju lai catalhinonaꞌ.
\v 13 Ju yuꞌunch va lakatam junita ixꞌatalacpastꞌacꞌatꞌan. Chai taxtakni ixpokꞌaiꞌan ju anuꞌ maktiliꞌ.
\v 14 Chai ju yuꞌunch catatꞌalasayaꞌ ju Askꞌatꞌa Borrego. Para ju Askꞌatꞌa Borrego calhajananaꞌ ni yuchi ju tucan ucxtin tachi chun ju ucxtinin. Chai yuchi ju tucan xakꞌai tachi chun ju xalackꞌajin. Chai ju alactꞌavi atꞌasanicanta chai asacxtucanta chai na tamuctaxtui ju ixchivinti ju yuchi.
\p
\v 15 Chai vachuꞌ chani quijunilh ju anquilh:
\p ―Ju anuꞌ xcan ju laktsꞌintꞌa junta ixvi ju anuꞌ alactuꞌunu chakoꞌulh yuchi laktsꞌipaxcavacan tachi chun ju lapanacni ju tatꞌajun ixlhilacaputsꞌun ju lacamunutpaꞌ chai tachivinin tijpachux chivinti.
\v 16 Chai ju anuꞌ lakacau akalokot ju laktsꞌintꞌa ju ixlaccꞌatujucalh ju anuꞌ maktiliꞌ cataxcayach ju chakoꞌulh. Chai ixlacataꞌan ju yuꞌunch camaconicanaꞌ ju anuꞌ chakoꞌulh. Chai ju yuchi va kꞌai tsasau camaconicanaꞌ. Chai ju lakacau akalokot chai ju maktiliꞌ tachi ju va catakꞌaiꞌuyach ixꞌacanit chai catalacxavayach ju caxajanta.
\v 17 Chunch ju catanaviyaꞌ ni Dios ju xaꞌamapastꞌacꞌani ni chunch ju catalalh tachi ju lhilhcata ju yuchi. Pus ju anuꞌ lakacau akalokot catanaviyaꞌ tachi ju lhilhcata ju Dios acsni va lakatam cajunaꞌ ixꞌatalacpastꞌacꞌatꞌan chai acsni cataxtakniyaꞌ ixpuꞌucxtinꞌan ju maktiliꞌ tus acsni caꞌuctaxtuyanta ju ixchivinti Dios.
\v 18 Chai ju anuꞌ chakoꞌulh ju laktsꞌintꞌa laktsꞌipaxcavacan ju kꞌai lakꞌachakꞌan ju alhijuni tachi chun ju xalackꞌajin ucxtinin ju ani lacamunutpaꞌ. ―Chunch ju xaquijuni ju anquilh.
\c 18
\s1 Takꞌalhikꞌo ju lakꞌachakꞌan Babilonia
\p
\v 1 Chai acsni tapasakꞌolh ju ani taxtokni pus iclaktsꞌilh apumatam anquilh ni taxtucha ju lactꞌiyan. Milhch ju lacatꞌun. Chai ixpacxanta ju kꞌai ixtachaput. Chai ju ani lacatꞌun lana mapulhcukꞌo laꞌixꞌamatuncunit.
\v 2 Chai na pꞌas chivinilh ni laich cakꞌasmatkꞌocalh. Chai chani naulh:
\p ―Lakꞌalhikꞌocalh ju kꞌai lakꞌachakꞌan Babilonia. Valhch ixchakaꞌan ju lhacaticurulhni. Vachuꞌ anch tatanumanalh tachi chun ju tsꞌokꞌo ju va lhitsꞌisi tavajin.
\v 3 Chunchach ju ulhtucalh ju anuꞌ lakꞌachakꞌan ni yuꞌunch ju amachakꞌan anch ju xataꞌamalanikꞌojui tachi chun ju lapanacni ixkꞌachanica ju alactuꞌunti tachi ju ixtanavi ju yuꞌunch. Chai ju xalackꞌajin ucxtinin ju lacamunutpaꞌ tatꞌaꞌalactuꞌunulh ju yuꞌunch. Chai ju saꞌastꞌanin ju lacamunutpaꞌ na makꞌalinin tapujunita ni va ixtalhakꞌamanan ixtuminꞌan ju amachakꞌan ju anuꞌ lakꞌachakꞌan.
\p
\v 4 Pus ju acsnich ickꞌasmatlh alakatam chivinti ju mincha lactꞌiyan ju chani ixnajun:
\p ―Atꞌaxtꞌutꞌit ju anch ji quilapanacni. Jantu xcai ni vachuꞌ amaknavitꞌit ju alactuꞌunti. Jantu xcai ni atꞌamakꞌalhkꞌajnantꞌit ju yuꞌunch vachuꞌ.
\v 5 Pus ju ixꞌalactuꞌuntiꞌan ju amachakꞌan ju anuꞌ lakꞌachakꞌan chaꞌanta tus lactꞌiyan. Chai ju Dios jantu tavanan xacꞌapꞌa ju alactuꞌunti ju xatanavi. ―Chunch ju naulh ju xachivinin.
\p
\v 6 Pus ni na ixtaꞌalactuꞌunun ju amachakꞌan ju anuꞌ lakꞌachakꞌan yuchi chani alhijunicalh ju anquilhnin:
\p ―Pus chunch ju axtꞌaknitꞌit ju makꞌalhkꞌajnat tachi ju ixtaxtꞌakꞌach ju yuꞌunch. Paktꞌui amamapꞌalanitꞌit ju makꞌalhkꞌajnat tachi ju ixtaꞌalacnavich ju aliꞌin. Chai ju vino ju taꞌamakꞌotꞌunulh yuꞌunch pus ju chavai amakꞌotꞌutꞌit ju vino ju palai tucan sunilhcꞌacꞌa.
\v 7 Chai tachi ju yuꞌunch ni na kꞌai ixtacꞌatsan chai na lhu ixtaꞌalactuꞌunun pus vana va chun lhu amamakꞌalhkꞌajnitꞌit chai lhu amamakꞌaninitꞌit ju yuꞌunch. Pus ju yuꞌunch tanajun laꞌixꞌalhunutꞌan ni xalackꞌajin tajunita chai jantu va amaconcanta chai jantu tavanan cataꞌamakꞌanininaꞌ.
\v 8 Chai ni tanajun ju chunch pus ixlhiyuchi lana va tam pantsꞌiquis caꞌalinaꞌ ju ixmakꞌalhkꞌajnatꞌan. Cataniyaꞌ ju lapanacni. Chai caꞌalinaꞌ ju amakꞌanit chai ju chavanti. Chai calhcukꞌoyaꞌ ju lakꞌachakꞌan. Chunch ju canavicanaꞌ ni na tachapun ju ucxtin Dios. Chai yuchach ju amucꞌani ju ixtalakꞌalhinꞌan. ―Chunch ju ajunicalh ju anquilhnin.
\p
\v 9 Chai na catalackꞌalhunach. Chai ai ai catanonaꞌ ju xalackꞌajin ucxtinin ju lacamunutpaꞌ ju tatꞌaꞌalactuꞌunulh ju yuꞌunch chai tatꞌanavilh ju ixkꞌachatꞌan. Chunch ju catanaviyaꞌ acsni catalaktsꞌinaꞌ ju xajin ni catsucuyaꞌ lhcunuꞌ ju lakꞌachakꞌan.
\v 10 Na makat catatayayaꞌ ni va tatalhonich ju ixmakꞌalhkꞌajnatꞌan ju amachakꞌan ju anuꞌ lakꞌachakꞌan. Chai chanich ju catanonaꞌ:
\p ―Painich ju xakꞌai lakꞌachakꞌan Babilonia. Na tachapun ixjunita. Para va tam pantsꞌiquis xamin ju ixmakꞌalhkꞌajnat.
\p
\v 11 Chai tachi chun ju saꞌastꞌanin ju ixlhilacaputsꞌun ju lacamunutpaꞌ na catalhikꞌalhunach ju yuchi. Chai ai ai catanonaꞌ. Chunch ju catanaviyaꞌ ni matich ju ixꞌatamonaꞌan.
\v 12 Na istastꞌai ju oro chai plata chai chiux ju na laklhu ixtapalh ixjunita chai ju perlas chai ju kꞌoxiya pumpuꞌ ju lino juncan chai ju morado pumpuꞌ chai ju pumpuꞌ ju seda juncan chai ju lakslapulh pumpuꞌ chai tachi chun ju qꞌuiu ju na kꞌox acamin chai tachi chun ju taxtokni ju navicanta lacakꞌai istatsalat ju elefante chai tachi chun ju taxtokni ju lhinavicanta qꞌuiu ju na laklhu ixtapalh chai ju cobre chai ju tsasnat hierro chai ju chiux ju marmol juncan.
\v 13 Vachuꞌ istastꞌai ju canela chai ju aliꞌ xalhalakꞌoxin vaiti chai ju pum chai ju perfume chai ju vino chai ju aceite chai ju harina chai ju trigo chai ju vacax chai borrego chai caballo chai carro chai xalapanacni. Va istastꞌai ixtꞌalapanacniꞌan. Chai ju isꞌastꞌacan mas ixtachꞌalhcatnan para jantu tuꞌuꞌ ixtalhajai ni va ixꞌatamocanta.
\v 14 Pus ju anuꞌ astꞌanin chani catajunach ju amachakꞌan ju anuꞌ kꞌai lakꞌachakꞌan:
\p ―Tachi chun ju lhiꞌut ju na ixꞌupꞌutꞌunatꞌit cꞌacxtach ju chavai. Chai tachi chun ju taxtokni ju na lackꞌox ixjunita chai ju na cꞌus istasui tacꞌacxkꞌolh. Chai jantu tavanan atꞌalaktsꞌinchꞌokꞌotꞌit. ―Chunch ju catanonaꞌ ju astꞌanin.
\p
\v 15 Chai ju istastꞌai ju anch ju lakꞌachakꞌan ju ani taxtokni chai ju na makꞌalinin xatapujun na makat catatayayaꞌ ni na catatalhoniyaꞌ ju ixmakꞌalhkꞌajnatꞌan ju amachakꞌan ju anuꞌ lakꞌachakꞌan. Na catakꞌalhunaꞌ. Chai ai ai catanonaꞌ.
\v 16 Vachuꞌ chani catanonach:
\p ―Painiꞌitnich ju amachakꞌan ju anuꞌ kꞌai lakꞌachakꞌan ju na ixꞌalin ju lackꞌoxi ixpumpuꞌan ju lino juncan chai ju lacmoradonicꞌa ixpumpuꞌan chai lacslapulh ixpumpuꞌan. Chai na ixtalhachꞌachꞌinincanta ju oro chai ju lacatꞌicstꞌi chiux ju na laklhu ixtapalh chai ju perlas.
\v 17 Para va tam pantsꞌiquis tsꞌankꞌakꞌolh tachi chun ju ani ixmakꞌalitꞌan.
\p Chai vachuꞌ na makat catatayayaꞌ tachi chun ju amanavin barco chai ju tapuꞌalhtananch ju barco chai ju tachꞌalhcatnan lacabarco chai tachi chun ju tachꞌalhcatnan lacaꞌalama.
\v 18 Chai acsni catalaktsꞌinaꞌ ju xajin ni tꞌajun lhcunuꞌ pus na pꞌas catalacchivinaꞌ ni na cataꞌamakꞌanininaꞌ. Catanonach:
\p ―Matiꞌ alakatam lakꞌachakꞌan ju ixtꞌachunch cava tachi ju anuꞌ kꞌai lakꞌachakꞌan. ―Chunch ju catanonaꞌ.
\p
\v 19 Chai catamucꞌayaꞌ ju pokxni laꞌisꞌaktsulhꞌan ni cacꞌatsacanaꞌ ni na taꞌamakꞌaninin. Chai na catalackꞌalhunaꞌ. Chai ai ai catalacnonaꞌ. Pꞌas catachivinaꞌ acsni chani catanonaꞌ:
\p ―Painich ju kꞌai lakꞌachakꞌan. Tachi chun ju quijnan ju amanavin barco icjuntau xacpuchꞌalhcatnanau lacaꞌalama chai na makꞌalinin xacpujuntau ju ixmakꞌalitꞌan ju amachakꞌan ju anuꞌ lakꞌachakꞌan. Para va tam pantsꞌiquis ju takꞌalhikꞌo ju lakꞌachakꞌan.
\p
\v 20 Alhikꞌachꞌantꞌit ji amachakꞌan lactꞌiyan chai ju uxijnan ju lhilacꞌapꞌinatꞌit ju Jesús chai ju uxijnan ju ixtamalakachan Jesús untꞌatꞌit chai ju uxijnan ju nonatꞌit ixchivinti Dios. Chunch ju alatꞌit ni milacataꞌan ju xamamakꞌalhkꞌajni ju Dios ju anuꞌ lakꞌachakꞌan.
\p
\v 21 Pus ju acsnich pumatam anquilh ju na tachapun ixjunita chꞌapalh lakatam chiux tachi ju tuꞌuꞌ kꞌai xvati. Chai tarr macaꞌalh lacaꞌalama. Naulh:
\p ―Tachi ju anuꞌ chiux ni lacatachaput ju makꞌancalh chai taꞌacnukꞌalhi lacxcan pus chunch vachuꞌ canavicanaꞌ ju Babilonia ju anuꞌ kꞌai lakꞌachakꞌan. Chai vachuꞌ jantu tavanan lai catitasuchokolh.
\v 22 Chai jantu tavanan catikꞌasmatcalh ju anch ju isꞌasanti arpa nin yuchi ju milhpat nin yuchi ju skꞌolh. Vana jantu tavanan calhitajucalh anch ju ixnavini tijpachux lhichꞌalhcat. Chai jantu catikꞌasmatcalh ju anch ni calacsquiticalh.
\v 23 Jantu tavanan catimapulhcu ju anch tuꞌuꞌ maclhcu. Nin yuchi ni cakꞌasmatcalh ju anch ju ixchivintiꞌan ju na talackꞌachan ni va ancaꞌ tamakꞌaxtꞌokꞌa. Chunch cajunaꞌ mas xalackꞌajin ixtajunita ju saꞌastꞌanin ju anch lakꞌachakꞌan. Chai tachi chun ju lapanacni ju tatꞌajun ixlhilacaputsꞌun ju lacamunutpaꞌ alacpuꞌokxchokꞌolh laꞌixꞌalhicujnut.
\p
\v 24 Chai laꞌixpulacni ju anuꞌ lakꞌachakꞌan amaknicancha ju ixtanajun ixchivinti Dios chai ju ixtalhilacaꞌanta ju Jesús. Chai ju amachakꞌan anch yuꞌunch ju talhinaulh ixꞌamaknicaꞌan tachi chun ju ixlapanacni Dios ju ixtatꞌajun ixlhilacaputsꞌun ju lacamunutpaꞌ.
\c 19
\p
\v 1 Chai acsni tapasakꞌolh ju ani taxtokni pus ickꞌasmatlh lhu chivinti tachi ju na va lhu lapanacni ixtachivinin ju lactꞌiyan. Ixtanajun:
\q1 Calakꞌayauch ju Dios.
\q1 Yuchach ju xaquintamakꞌalhtaxtuyan.
\q1 Chai yuchach ju calakꞌayacalh.
\q1 Chai yuchach ju alin ixtachaput.
\q1
\v 2 Yuchi calhiꞌulhtucanaꞌ chunch ni aktsꞌiya muctaxtui ju ixchivinti chai sok navi acsni xtꞌakꞌa ju tuꞌuꞌ makꞌalhkꞌajnat.
\q1 Pus xtaknilh ju ixmakꞌalhkꞌajnat ju kꞌai alactuꞌunu chakoꞌulh ju lakꞌalhita ju lacamunutpaꞌ laꞌixꞌalactuꞌunti.
\q1 Chai ju quiDiosꞌan vachuꞌ amamapalhni ixꞌacꞌalhniꞌan ju ixlapanacni.
\p
\v 3 Chai aktam tanonchokopa ju ixtalhavatꞌan:
\p ―Calakꞌayau ju Dios ni jantu tavanan lakmixa ju xajin junta tꞌajun lhcunuꞌ ju anuꞌ lakꞌachakꞌan.
\p
\v 4 Pus ju ixpumapꞌuxamtꞌatꞌiꞌan papanin chai ju ixpumatꞌatꞌiꞌan atapacxat tataꞌaktsokotanilh chai talakꞌayalh ju Dios ju vi lacakꞌai ixputolan. Ixtajuni:
\p ―Vachuꞌ iclacasqꞌuinau ni chunch ju caꞌulhtucalh ju Dios. Vachuꞌ calakꞌayayau.
\p
\v 5 Chai vachuꞌ ju lacakꞌai putolan mincha lakatam chivinti junta naulh:
\q1 Alakꞌayatꞌit ju quiDiosꞌan tachi chun ju uxijnan ju ixlapanacni untꞌatꞌit.
\q1 Chux ju uxijnan ju tꞌalhoniyatꞌit mas xalactꞌicstꞌin untꞌatꞌit chai vachuꞌ ju uxijnan ju xalackꞌajin untꞌatꞌit.
\s1 Macꞌatanicalh ju Askꞌatꞌa Borrego
\p
\v 6 Pus ju acsnich ickꞌasmatlh ju chivinti tachi ju na va lhu ixlacchivincanch. Chai ju iskꞌasmatca chunch ixjunita tachi ju tuꞌuꞌ atalhavana xcan. Tachi acsni na tꞌasai ju tꞌajin. Pus ju yuꞌunch chani ixtanajun:
\q1 Calakꞌayau ni yuchi ju lhinajun.
\q1 Yuchi ju quiꞌucxtinꞌan Dios ju lai navikꞌojui tachi chun ju taxtokni.
\q1
\v 7 Cakꞌachanauch chai calakꞌayauch ju yuchi ni chilh ju ixputamakꞌaxtokni ju Askꞌatꞌa Borrego chai malakchꞌininkꞌotach ju isꞌasqꞌuininti.
\q1
\v 8 Chai xtaknicalh ju yuchi ju kꞌoxi pumpuꞌ ju lino juncan. Chai ju yuchi na xlipnicꞌa junita chai na snakꞌankꞌa.
\m Pus ju anuꞌ na kꞌoxi pumpuꞌ laktsipaxcavacan ju tuꞌuꞌ kꞌox ju tanavita ju talhilacaꞌanta ju Jesús.
\p
\v 9 Chai ju anquilh quijuni:
\p ―Atsꞌokꞌulatꞌich ju acjunan: “Ma na takꞌachan ju caꞌatꞌasanicanach lacalacvaiti acsni catamakꞌaxtꞌokꞌaꞌ ju Askꞌatꞌa Borrego”.
\p Vachuꞌ chani quijuni:
\p ―Ju ani chivinti slivasalh ni yuchi ju Dios ju chunch xanajun.
\p
\v 10 Pus ju acsnich ictaꞌaktsokotanilh vanin laꞌixchꞌajaꞌ ju anuꞌ anquilh ni va xaclakꞌayaputun. Para ju yuchi quijuni:
\p ―Jantu chun aqꞌuiꞌulhtꞌu ni va mintꞌaxalapanac icjunita chai ixtꞌaxalapanac ju miꞌalakꞌavin ju tajuni ju lapanacni ixlacata ju Jesús. Alai yuchi ju Dios ju alakꞌayatꞌi. ―Chunch ju xaquijuni ju anquilh.
\p Pus ju ixlapanac Dios junita yuchi ju vas najun ju chivinti ixlacata ju Jesús.
\s1 Tasu lakatam caballo ju na xnapapa
\p
\v 11 Chai iclaktsꞌilh ju tꞌiyan ni ilhtekꞌai chai ixya lakatam caballo ju na xnapapa. Chai ju ixpujucꞌalh yuchi ju lai lhilaksican chai najun ju stavasalanti. Chai ju yuchi acsni lakꞌoxi tuꞌuꞌ lhamakꞌan chai acsni lasai pus sok ju navi.
\v 12 Chai ju yuchi kꞌai lam lam ixtalakpuyajui tachi ju tuꞌuꞌ xaꞌalapnaꞌ jipi. Chai na lhu ixꞌalin ju ixcorona. Chai ju anuꞌ tapakaꞌut ju ixvilhnilh jantu xamatiꞌ ixmachakxai. Va isꞌakstu ixmachakxai.
\v 13 Chai ixlakchꞌita lakatam ixpumpuꞌ ju lana istsꞌamkꞌota acꞌalhni. Chai ju ixpujucꞌalh ju caballo lhimapakaꞌucanta ixchivinti Dios.
\v 14 Chai tachi chun ju xataropajni lactꞌiyan si lacxnapapa caballo ixtapuchꞌakꞌokꞌata chai ixtalakchꞌita lackꞌoxi pumpuꞌ ju lino juncan. Chai na xnapapa chai na salaka ixjunita.
\v 15 Chai ju xaꞌapꞌulanaꞌ ixquilhtaxtuta lakatam espada ju na quicxtui. Yuchi ju caꞌaputꞌalasayaꞌ ju lapanacni ju tatꞌajun ixlhilacaputsꞌun ju lacamunutpaꞌ. Chai ju tuchi canonaꞌ ju yuchi pus yuchach ju cataquiclacaꞌiyaꞌ ju lapanacni. Pus yuchach ju caꞌamamakꞌalhkꞌajniyaꞌ ju lapanacni laꞌixtalhkꞌamti ju Dios.
\v 16 Chai laꞌixpumpuꞌ chai laꞌixkꞌatuꞌ lacvilhnilh ixtapakaꞌut. Chani najun: “Yuchi ju ani ju palai xakꞌai tachi chun ju xalackꞌajin. Chai yuchi ju palai xakꞌai ucxtin tachi chun ju ucxtinin”.
\p
\v 17 Pus ju acsnich iclaktsꞌilh pumatam anquilh ju ixya lacaꞌavilhchan. Chai na pꞌas axakꞌala tachi chun ju tsꞌokꞌo. Ajuni:
\p ―Atꞌatꞌit. Atꞌakꞌaixtꞌoktꞌit ni canaviyaꞌ lakatam kꞌai lacvaiti ju Dios.
\v 18 Laich aꞌuniyaꞌitꞌit ju ixꞌacanitꞌan ju xalackꞌajin chai ju xaꞌucxtinin taropajni chai ixꞌacanitꞌan ju lactachapunin lapanacni chai ixꞌacanitꞌan ju caballo chai ju ixtapujucꞌanalh chai ixꞌacanitꞌan va tichi chavaich. Yuꞌunch ju matiꞌ ixꞌucxtinꞌan chai yuꞌunch ju va xalapanacni tajunita. Yuꞌunch ju salactꞌicstꞌin chai ju xalackꞌajin.
\p
\v 19 Chai iclaktsꞌilh ni ixtatakꞌaixtokta ju maktiliꞌ ju ixtacuttacha lacaꞌalama chai ju xalackꞌajin ucxtinin ju ani lacamunutpaꞌ chai chux ju ixtaropajniꞌan. Va catatꞌalasayaꞌ ju pujucꞌalh ju xnapapa caballo chai ixtaropajni ju yuchi.
\v 20 Pus tachꞌinin tava ju maktiliꞌ chai ju lapanac ju istasui tachi ixlapanac Dios mas jantu. Yuchi ju ixnavich ju tuꞌuꞌ lhamakꞌan laꞌixꞌucxlacapuꞌ ju maktiliꞌ chai ixꞌalacpuꞌokxchokꞌota ju lapanacni ju ixꞌalhimichicanta ixtapakaꞌut ju maktiliꞌ chai yuꞌunch ju ixtalakꞌayai ju ixlapalaxtuta tachi ixlacatuna ju anuꞌ maktiliꞌ. Pus ju maktiliꞌ chai ju anuꞌ aꞌokxchokꞌonu lapanac vaklhtam amacaꞌancalh xalakꞌajun junta maktajita jipi lacaꞌazufre.
\v 21 Chai ju aliꞌin tapuni ju espada ju taxtui laꞌixquilhni ju ixpujucꞌalh ju xnapapa caballo. Pus tachi chun ju tsꞌokꞌo na talhilalh ju anuꞌ acanit.
\c 20
\s1 Chani xajun ju lacamunutpaꞌ tam milh cꞌata
\p
\v 1 Pus ju acsnich iclaktsꞌilh pumatam anquilh ju minchalh lactꞌiyan. Chai ixchꞌapata ju xallave junta na makat lhokꞌonkꞌoꞌanta. Vachuꞌ ixchꞌapata ju makakꞌai cadena.
\v 2 Chai ju anuꞌ anquilh chꞌapalh ju kꞌai lu ju na makꞌanchich ixtꞌajun. Yuchach ju lhacaticuru chai Satanás juncan. Chai chꞌiꞌula tam milh cꞌata.
\v 3 Chai lana tin macaꞌalh junta makat lhokꞌonkꞌoꞌanta. Chai malakachinu. Chai lana mucꞌalh ju ixpamichin ju kꞌai ucxtin laxamalhtich junta malakachinu. Ju chunch ni jantuch lai xamatiꞌ camaklhtekꞌaniyaꞌ ni lai cataxtulh ni caꞌaꞌokxchokꞌochokolh ju lapanacni tus ni calaktsayanta tam milh cꞌata. Acsni calaktsayach pus tasqꞌuini ni camacajuncalh pantsꞌiquis.
\p
\v 4 Pus ju acsnich iclaktsꞌilh ju lackꞌai putolan chai ixtapuvilanalh ju lapanacni ju axtaknicalh ixtachaputꞌan ni laich catalakꞌoxiyaꞌ ju tuꞌuꞌ lhamakꞌan. Chai iclaktsꞌilh ixtacuvinꞌan ju ixꞌalacꞌacchꞌucꞌupꞌuxcanta va ixlacaꞌatalh ni ixtanajun ni ixtalhilaksi ju Jesús chai ni ixtaꞌajuni ju lapanacni ixchivinti Dios. Chai ju yuꞌunch jantu ixtalakꞌayata ju anuꞌ maktiliꞌ nin yuchi ju ixlapalaxtucanta ixlacatuna ju maktiliꞌ nin yuchi ni caꞌamuntiꞌulacalh ixtapakaꞌut ju maktiliꞌ nin caꞌulanicalh laꞌixmacaꞌan. Pus ju yuꞌunch talokꞌonchokolh laꞌixꞌanintiꞌan chai tatꞌataꞌucxtini ju Cristo tam milh cꞌata.
\v 5 Yuꞌunch ju pꞌulhnan amalokꞌonichokocalh laꞌixꞌanintiꞌan. Para ju aliꞌin aninin catalokꞌonchokoyaꞌ laꞌixꞌanintiꞌan acsni caꞌaclayaꞌ tam milh cꞌata.
\v 6 Slivasalh na talackꞌachan chai salaka tajunita ju makyuꞌunch tajunita ju pꞌulan amalokꞌonichokocalh laꞌixꞌanintiꞌan. Ju yuꞌunch jantu catitani ju ixlhipaktꞌui. Alai yuꞌunch palijni catajunaꞌ ju catalakꞌayayaꞌ ju Dios chai ju Cristo. Chai catatꞌataꞌucxtiniyach ju Cristo tam milh cꞌata.
\p
\v 7 Chai acsni aclalhch ju tam milh cꞌata pus ju Satanás maxtucalh laꞌixpulachꞌin.
\v 8 Chai taxtulh. Alh aꞌokxchokꞌonuꞌ ju lapanacni ju tatꞌajun ixlhilacaputsꞌun ju lacamunutpaꞌ. Aꞌokxchokꞌomakꞌaixtoklh ju Gog chai ju Magog ni catalasalh. Pus ju yuꞌunch lana na ilhuꞌan ixtajunita. Chunch ilhilhuꞌan ixtajunita tachi ju tuꞌuꞌ xacucu alama.
\v 9 Chai laꞌixlhilacaputsꞌun ju lacamunutpaꞌ tatakꞌaixtoklh. Chai talakꞌaxcꞌavitnu talakachoko ju ixlapanacni Dios junta ixtatꞌajun ju lakꞌachakꞌan ju na mapaini ju Dios. Para ju Dios macamilh ju jipi chai lana alacmaknikꞌo ju anuꞌ talakꞌaxcꞌavitnunun.
\v 10 Chai ju lhacaticuru ju ixꞌaꞌokxchokꞌota ju yuꞌunch lana tin macaꞌancalh junta na kꞌai maktajita lacaꞌazufre. Anch junta ixtatanumanalh ju anuꞌ maktiliꞌ chai ju anuꞌ lapanac ju ixlhitalacasuich tachi ixlapanac Dios. Pus caꞌamamakꞌalhkꞌajnikꞌalhicanaꞌ tontatsꞌis chai tontacuj.
\s1 Alaktsꞌintanucalh tachi chun ju lapanacni
\p
\v 11 Pus ju acsnich iclaktsꞌilh lakatam kꞌai putolan ju na xnapapa ixjunita. Vachuꞌ iclaktsꞌilh ju ixvi ju anch. Chai ju acsnich vachuꞌ iclaktsꞌilh ju lacatꞌun chai ju lactꞌiyan ni lana tatsꞌankꞌakꞌo.
\v 12 Chai iclaktsꞌilh ju tanita ni ixtayanalh laꞌixꞌucxlacapuꞌ ju anuꞌ kꞌai putolan mas yuꞌunch ju xalackꞌajin chai ju salactꞌicstꞌin. Chai ju lackꞌalhtankꞌai alhiqui apuxkꞌotcalh. Chai vachuꞌ puxkꞌotcalh alakatam alhiqui. Yuchach ju alhiqui junta atsꞌokꞌulanicanta ixtapakaꞌutꞌan tachi chun ju alin isꞌatsucuntiꞌan jonkꞌalhita. Chai tachi chun ju ixtanita amucꞌanicalh ixtalakꞌalhinꞌan ixlacata ju taxtokni ju tsꞌokcanta lacaꞌalhiqui ni anchach istsꞌokꞌulakꞌocanta tuchi tanavita ju kꞌantam kꞌantam.
\v 13 Chai tachi chun ju lapanacni ju ixtanitajumanalh lacaꞌalama talokꞌonchokolh. Chai vachuꞌ tachi chun ju aliꞌin ju ixtanita. Chai ixchuxꞌan amucꞌanicalh ju ixtalakꞌalhinꞌan ixlacata tuchi navitach ju pumatamin. Chai tachi chun ju ani amacaꞌancalh ju lacajipi.
\v 14 Chai ju acsni jantu tavanan catini xamatiꞌ. Para junta catamakꞌalhkꞌajnankꞌalhiyaꞌ yuchach ju ixlhipaktꞌui aninti juncan.
\v 15 Chai vachuꞌ amacaꞌancalh lacajipi tachi chun ju jantu alhitajunicalh ixtapakaꞌutꞌan lacaꞌalhiqui junta tsꞌokꞌulanicanta ixtapakaꞌutꞌan ju alin isꞌatsucuntiꞌan jonkꞌalhita.
\c 21
\s1 Alilh ju sastꞌi tꞌiyan chai ju sastꞌi lacatꞌun
\p
\v 1 Pus ju acsnich iclaktsꞌilh lakatam sastꞌi tꞌiyan chai lakatam sastꞌi lacatꞌun. Pus ju pꞌulhnan tꞌiyan chai ju pꞌulhnan lacatꞌun tatsꞌankꞌakꞌolh chai matich ixjunita ju alama.
\v 2 Pus ju quitꞌin icXivan chai quitꞌin ju iclaktsꞌilh ju ixlakꞌachakꞌan Dios ni minchalh lactꞌiyan. Dios ju macamilh. Chai yuchach ju sastꞌi Jerusalén junita. Slivasalh na cꞌus istasui. Chun tachi ju tam atsiꞌ ju na cꞌus malakchꞌinin ixlacata ixlhitꞌataviti.
\v 3 Chai ickꞌasmatlh lakatam chivinti ju taxtucha ju lactꞌiyan. Na pꞌas ju chivinilh ni laich cakꞌasmatkꞌocalh. Chai chani naulh:
\p ―Ju chavai ju Dios catsucuyaꞌ junta tatꞌajun ju lapanacni. Ju Dios anch ju camaktsucuyaꞌ. Chai ju yuꞌunch ixlapanacni catajunaꞌ. Chai isꞌakstu ju Dios caꞌalactꞌatolhkꞌalhiyach chai isDiosꞌan cajunaꞌ.
\v 4 Chai matich cajunaꞌ ju kꞌalhut. Chai jantu xamatiꞌ caniyaꞌ. Chai jantu xamatiꞌ caꞌamakꞌanininaꞌ nin yuchi ni lai cakꞌalhulh nin yuchi ni lai jintaꞌ caxcanilh. Jantu catiꞌalilh tuꞌuꞌ ju chunch ni tapasakꞌota ju xapꞌulhnan taxtokni.
\p
\v 5 Chai ju yuchi ju ixvi laꞌixputolan ju xakꞌai ucxtin chani naulh:
\p ―Quitꞌin ju iclasastꞌikꞌojui tachi chun ju taxtokni.
\p Vachuꞌ chani ju quijunilh:
\p ―Atsꞌokꞌulatꞌich tachi chun ju ani taxtokni ni lai lhilaksican ju ani chivinti chai stavasalanti junita.
\p
\v 6 Chai vachuꞌ chani ju quijunilh:
\p ―Icnavikꞌolhch tachi chun ju taxtokni. Ju quitꞌin xactꞌajun tus acsni maticaꞌ tuꞌuꞌ ixjunita chai actsucukꞌalhiyaꞌ tus mas va tavananch. Pus ni xamatiꞌ na quicxixa pus acxtakniyaꞌ ju xcan ju va aclhikꞌailaktsꞌinaꞌ. Anchach acꞌiyaꞌ junta taxtui ju xcan ju xtꞌakꞌa ju atsucunti jonkꞌalhita. Laich cakꞌotꞌaꞌ chai jantu catimapalalh tuꞌuꞌ.
\v 7 Chai ju casastꞌucꞌaꞌ ju macxcai sich ixꞌanuꞌ cajunaꞌ tachi chun ju taxtokni. Chai ju quitꞌin isDios acjunaꞌ. Chai ju yuchi quintsꞌalh cajunaꞌ.
\v 8 Para tachi chun ju va tatalhanan chai ixlhiyuchi jantu tachꞌakꞌokꞌakꞌalhiputun ju Jesús chai yuꞌunch ju jantu talhilaksita ju Jesús chai yuꞌunch ju na alactuꞌunun chai ju amakninin chai ju tatꞌatꞌajun va tichi chavaich chai ju alhicujnin chai ju va tamaklacaꞌani ju tuꞌuꞌ santo chai tachi chun ju tanajun taꞌaklhtamat chivinti sich camacaꞌancanaꞌ lacajipi junta na maktajita lacaꞌazufre. Yuchach ju ixlhipaktꞌui aninti. ―Ma chunchach ju quijuni ju Dios ni actsꞌokꞌula.
\s1 Alilh ju sastꞌi Jerusalén
\p
\v 9 Pus ju acsnich quilakmilh pumatam sia yuꞌunch ju ixpumatujunꞌan anquilhnin ju ixtachꞌapata ju lakatamin ixpumapꞌunꞌan ju isꞌaktsamanta lakatamin makꞌalhkꞌajnat ju va yuchach cajunaꞌ. Chai ju anuꞌ anquilh chani quijuni:
\p ―Asokꞌoch chai acmasuniyan ju isꞌasqꞌuininti ju ixꞌamachakaꞌ cajunaꞌ ju Askꞌatꞌa Borrego.
\p
\v 10 Pus ju Spiritu Santu quimapaxanilh ju quiꞌalacꞌavanti chai ju anuꞌ anquilh quilhiꞌalh junta vi ju kꞌai talhpa junta na putankꞌai ixjunita. Chai ju anch quimasunilh ju kꞌai ixlakꞌachakꞌan Dios ju Jerusalén juncan. Ixtꞌonachilh takꞌalhtajuchiniꞌ ju ani lacatꞌun. Minchalh ju lactꞌiyan junta vilhcha ju Dios.
\v 11 Chai ju anch lakꞌachakꞌan kꞌai xlapꞌapꞌa ixmaktaji ni vachuꞌ anch ju ixtꞌajun ju Dios. Ixmaktaji tachi ju tuꞌuꞌ kꞌoxi chiux ju slivasalh laklhu ixtapalh. Chun tachi ju tuꞌuꞌ chiux ju jaspe juncan. Chai na stalankꞌa ixjunita tachi ju tuꞌuꞌ vaso.
\v 12 Chai ixꞌulacanta kꞌex ju na putankꞌai ixjunita. Chai ixꞌalin lakacautꞌui xamalhtich. Chai ju lacalakatamin malhtich ixtayanalh pumatamin anquilh. Chai ju lacalakatamin malhtich istsꞌokꞌulacanta ixtapakaꞌutꞌan ju ixpumacautꞌuiꞌan istsꞌalan ju makꞌaniya lapanac ju Israel ixjuncan.
\v 13 Ju lhichꞌatoꞌanta ixꞌalin lakatꞌutu xamalhtich. Chai ju lhinorte ixꞌalin lakatꞌutu xamalhtich. Chai ju lhisur ixꞌalin lakatꞌutu xamalhtich. Chai ju lhitsꞌastꞌai ixꞌalin vachuꞌ lakatꞌutu xamalhtich.
\v 14 Chai ju xakꞌex ju anuꞌ lakꞌachakꞌan lakacautꞌiyun chiux ixlachꞌapata ju ixlhiputankꞌai junta putachꞌanꞌacnui. Chai ju lakatamin ju anuꞌ chiux anch istsꞌokꞌulacanta ixtapakaꞌutꞌan ixpumacautꞌuiꞌan ju ixtamalakachan ju Askꞌatꞌa Borrego.
\p
\v 15 Chai ju xaquintꞌachivinin ixchꞌapata lakatam palhcan ju si oro. Yuchi ju capulhcayaꞌ ju lakꞌachakꞌan chai ju xamalhtich chai ju xakꞌex.
\v 16 Chai ju lakꞌachakꞌan va makꞌastutꞌatꞌi ixjunita. Chai vaklhtam chun ixjunita ju ixlhilhman chai ixlhipokꞌai. Pus ju anuꞌ anquilh pulhcalh ju lakꞌachakꞌan ju anuꞌ palhcan. Pus chaꞌalh lakatꞌui milh a lakatꞌui cientos kilómetro. Ju ixlhilhman chai ju ixlhipokꞌai chai ju ixlhiputankꞌai vaklhtam chun ju alhcanti.
\v 17 Chai vachuꞌ lhcalh ju xakꞌex. Chaꞌalh sesenta y cuatro metro. Chunch ju putꞌekꞌelh ju anquilh tachi ju taꞌaputꞌekꞌenin ju lapanacni.
\p
\v 18 Ju ixlhinavicanta ju kꞌex si yuꞌ ju chiux ju jaspe juncan. Chai ju lakꞌachakꞌan si oro ixjunita. Chai slapꞌapꞌa ixmaktaji ju lacascꞌun tachi ju tuꞌuꞌ vaso.
\v 19 Chai junta putachꞌanꞌacnui ju xakꞌex ju lakꞌachakꞌan yuchi ju putachꞌanꞌacnui tijpachux ju chiux ju na laklhu ixtapalh tajunita. Ju pꞌulhnan ulacalh yuchi ju jaspe. Chai ju ixꞌokslai ju anch yuchi ju zafiro. Chai astan yuchi ju ágata ixlhiꞌulacanta. Chai astan yuchi ju esmeralda.
\v 20 Astan ju ónice. Astan ju cornalina. Astan ju crisólito. Astan ju berilo. Astan ju topacio. Astan ju crisoprasa. Astan ju jacinto. Chai ju ixlhilakacautꞌui ju tavi laꞌixꞌucxni chux yuchi ju amatiste.
\v 21 Chai ju lakacautꞌui xamalhtich lakatamin perla ixjunita. Ju lakatamin malhtich lakatamin perla ixjunita. Chai ju xati ju anuꞌ lakꞌachakꞌan si oro ixjunita. Chai na slapꞌapꞌa ixmaktaji lacascꞌun tachi ju tuꞌuꞌ vaso.
\p
\v 22 Chai jantu iclaktsꞌilh tuꞌuꞌ pujitat ju anch ni vanta anchach ju anuꞌ lakꞌachakꞌan ixvi ju Dios ju lai navikꞌojui tachi chun ju taxtokni. Vachuꞌ vanta anchach ixvi ju Askꞌatꞌa Borrego.
\v 23 Chai ju anuꞌ lakꞌachakꞌan jantu ixmaktasqꞌuini ni camapulhcu ju tuꞌuꞌ avilhchan nin malhquiyuꞌ ni Dios ju maputuncunita ju anch. Chai ju Askꞌatꞌa Borrego yuchi ju xamaclhcu.
\v 24 Chai laꞌixꞌamatuncunit cataꞌalhtananaꞌ tachi chun ju amachakꞌan kꞌai lakꞌachakꞌanixni ju amakꞌalhtaxtucanta. Chai tachi chun ju xalackꞌajin ucxtinin ju ani lacamunutpaꞌ catalhiminach ju anch ju ixmakꞌalitꞌan ni catapulakꞌayayach ju Dios.
\v 25 Chai ju xamalhtich jantu tavanan camalacchonicanaꞌ ju tuncuj. Chai ju anch matiꞌ cajunaꞌ ju atatsꞌisni.
\v 26 Chai tachi chun ju lapanacni ju tatꞌajun ixlhilacaputsꞌun ju lacamunutpaꞌ catalakꞌayayach ju Dios.
\v 27 Para jantu tavanan lai catitanu ju anch ju tuꞌuꞌ lhquiliqui nin xamatiꞌ ju navi ju tuꞌuꞌ ju na tsꞌisi ju Dios nin xamatiꞌ ju najun taꞌaklhtamat. Va yuꞌunch ju lai tatanui anch ju atsꞌokꞌulacanta ixtapakaꞌutꞌan laꞌixꞌalhiqui ju Askꞌatꞌa Borrego. Yuchi ju alhiqui junta najun tichi chavaich ju alin isꞌatsucunti jonkꞌalhita.
\c 22
\p
\v 1 Pus ju acsnich quimasunilh ju kꞌai xcan ju xtꞌakꞌa ju atsucunti jonkꞌalhita. Chai ju anuꞌ xcan na stalankꞌa ixjunita tachi ju tuꞌuꞌ vaso. Chai anch ju ixtaxtui laꞌixputolanꞌan ju kꞌai ucxtin Dios chai ju Askꞌatꞌa Borrego.
\v 2 Chai ju anuꞌ xcan va sok ixchꞌakꞌokꞌai ju xati ju anuch lakꞌachakꞌan. Chai ju quilhtumacatam ju anuꞌ kꞌai xcan lacya ju xaqꞌuiu ju xtꞌakꞌa ju atsucunti jonkꞌalhita. Chai ju aquilhtumacatutam xcan vana. Chai ju anuꞌ qꞌuiu pakcautꞌui ixtꞌakꞌa ju xatocꞌat ju tamin cꞌata. Paktamin ju tamin malhquiyuꞌ. Chai tachi chun ju lapanacni ju tatꞌajun ixlhilacaputsꞌun ju lacamunutpaꞌ ixtalhitacꞌuchꞌui ju xaxkꞌoi ju anuꞌ qꞌuiu.
\v 3 Chai ju anch jantu catiꞌalilh tuꞌuꞌ ju alactuꞌunti. Jantu lai catiꞌalilh tuꞌuꞌ ju chunch ni anch vi ju ixputolanꞌan ju kꞌai ucxtin Dios chai ju Askꞌatꞌa Borrego. Chai ju ixlapanacni catalakꞌayayaꞌ.
\v 4 Chai catalaktsꞌinaꞌ ju ixꞌucxpuꞌ ju Dios. Chai ju ixtapakaꞌut caꞌalhimichicanaꞌ ju ixlapanacni laꞌismuntsanꞌan.
\v 5 Chai ju anch matich cajunaꞌ ju atatsꞌisni. Chai jantu catamaktasqꞌuiniyaꞌ ju tuꞌuꞌ maclhcu nin avilhchan ni yuchi ju kꞌai ucxtin Dios ju amapulhcuni. Chai ju ixlapanacni Dios catatꞌataꞌucxtinikꞌalhiyaꞌ ju yuchi.
\s1 Vaninch minta ju avilhchan acsni caminchokoyaꞌ ju Cristo
\p
\v 6 Chai ju anuꞌ anquilh chani ju quijuni:
\p ―Tachi chun ju ani chivinti lai lhilaksican chai stavasalanti junita. Pus ju makꞌanchich ju Dios amapastꞌacꞌani ju ixlapanacni ju tuchi catanaulh. Chai ju chavai ju yuchi amalakachalh ju ixꞌanquilh ni laich catacꞌatsayaꞌ ju ixlapanacni ju tuchi vasalh catapasayaꞌ. Chai jantu makꞌan cativa tus catapasayaꞌ ju anuꞌ taxtokni.
\p
\v 7 Chai jantu makꞌan cativa tus acsni caminaꞌ ju Jesús. Chai na kꞌachan ju yuchi ju caquiclacaꞌiyaꞌ ju ixchivinti Dios ju tsꞌokcanta ju ani. ―Chunch xaquijuni ju anquilh.
\p
\v 8 Pus ju quitꞌin icXivan chai quitꞌin ju ickꞌasmatlh chai iclaktsꞌilh tachi chun ju ani taxtokni. Chai acsni ickꞌasmatlh chai iclaktsꞌilh ju ani taxtokni pus lana ictaꞌaktsokotalh laꞌixchꞌanchꞌajaꞌ ju anuꞌ anquilh. Va xaclakꞌayaputun ju yuchi ju xaquimasunikꞌojui ju ani taxtokni.
\v 9 Para ju yuchi chani quijuni:
\p ―Jantu chun aqꞌuiꞌulhtꞌu. Ju quitꞌin va mintꞌaxalapanac icjunita. Chai ixtꞌachunchꞌan icjunita tachi ju milhiꞌalakꞌavin ju tanajun ixchivinti Dios chai ju taquiclacaꞌi tachi chun ju chivinti ju tsꞌokcanta ju ani. Yuchach ju Dios ju alakꞌayatꞌi.
\p
\v 10 Chai quijumpa:
\p ―Tun va atꞌilaclamtꞌi junima alhiqui junta tsꞌokcanta ixchivinti Dios. Jantu chunch alatꞌi ni vaninch chinta ju avilhchan acsni cataiꞌulacanaꞌ ju taxtokni ju tsꞌokcanta ju anch.
\v 11 Ju na alactuꞌunun pus chach tailhiꞌalh ixnavica ju alactuꞌunti. Chai ju na lhquiliqui ju ixꞌatalacpastꞌacꞌat chach tailhiꞌalh ju chunch. Chai ju soknicꞌa ju isꞌatsucunti chach va tachi navi ju soknicꞌa. Chai ju salaka ju isꞌatsucunti chach jonkꞌalhi chunch.
\p
\v 12 Chai ju Jesús chani quijuni:
\p ―Vaninch chinta ju avilhchan acsni acminaꞌ chai aclhiminaꞌ ju ixtalhajaꞌan tachi chun ju lapanacni. Acꞌalhimapalach ju tuchi navitach ju kꞌantam kꞌantam.
\v 13 Ju quitꞌin xactꞌajun tus acsni maticaꞌ tuꞌuꞌ ixjunita chai actsucukꞌalhiyach tus mas va tavananch. ―Chunch ju quijunilh ju Jesús.
\p
\v 14 Na takꞌachan ju tachꞌakꞌatꞌajun ju ixpumpuꞌan ni va tachi snapapa catajunaꞌ. Pus yuꞌunch ju laich catapꞌuxaꞌ ju xatocꞌat ju qꞌuiu ju xtꞌakꞌa ju atsucunti jonkꞌalhi. Chai lai cataputanuyaꞌ ju xalacmalhtich ju lakꞌachakꞌan.
\v 15 Para lacamacni tatꞌajun ju va ixtꞌachunch tajunita tachi ju tuꞌuꞌ atapacxat chai ju alhicujnin chai ju tatꞌatꞌajun va tichi chavaich chai ju amakninin chai ju tamaklacaꞌani ju tuꞌuꞌ santo chai tachi chun ju takꞌachani ixnajunca ju taꞌaklhtamat chivinti.
\p
\v 16 Chai ju Jesús quijunchokopa:
\p ―Ju quitꞌin icJesús chai icmalakachanichin ju quiꞌanquilh ju caxtakniyan ju ani chivinti ixlacataꞌan ju yuꞌunch ju quintalhilaksi. Ju quitꞌin ixtamaskꞌatꞌanti makꞌaniya kꞌai ucxtin David icjunita. Vachuꞌ tachi ju kꞌai stꞌacu icjunita. Yuchi ju vatsꞌisin xajachilh. ―Chunch ju xaquijuni ju Jesús.
\p
\v 17 Pus ju Spiritu Santu chai ju tachi isꞌasqꞌuininti Jesús junita tanajun:
\p ―Asokꞌoch.
\p Chai ju kꞌasmatꞌa ju anuꞌ chivinti chach vachuꞌ chunch cajunilh ju aliꞌin. Chai ju na quicxixta chach milh. Chai ju kꞌotputun ju xcan ju xtꞌakꞌa ju atsucunti jonkꞌalhita pus chach kꞌotlh. Chai ju Dios jantu tuꞌuꞌ achꞌinin.
\p
\v 18 Pus ju quitꞌin pꞌas icꞌajuni tachi chun ju takꞌasmatꞌa ju ixchivinti Dios ju tsꞌokcanta ju ani. Chai slivasalh ju icꞌajuni. Ni xamatiꞌ calalhavayaꞌ ju ani chivinti pus ju Dios calalhavaniyaꞌ ju makꞌalhkꞌajnat ju tsꞌokcanta ju ani lacaꞌalhiqui.
\v 19 Chai ni xamatiꞌ caxacamakꞌanaꞌ ju tuꞌuꞌ ixchivinti Dios ju tsꞌokcanta ju ani lacaꞌalhiqui pus ju Dios caxacaxtuyaꞌ junta istsꞌokcanta ju ixpuꞌalilh ju isꞌatsucunti jonkꞌalhi chai jantu lai catitanu ju laꞌixlakꞌachakꞌan Dios.
\p
\v 20 Pus ju najun ni stavasalanti tachi chun ju ani chivinti yuchi ju chani najun:
\p ―Jantuch makꞌan cativa tus acminach.
\p Chunch ju najun chai vachuꞌ iclacasqꞌuin ni vatsꞌalhti camilh.
\p
\v 21 Ju quiꞌucxtin Jesús caꞌanaviniyaꞌ lamapainin tachi chun ju lapanacni ju talhilaksi ju Dios. Slivasalh chunch.