\id 1CO
\h 1 Corintios
\toc1 1 Corintios
\mt 1 Corintios
\c 1
\s Pablo cātzoꞌknuniꞌlh xalanīꞌn nac Corinto tī ixtaꞌaꞌkaꞌīꞌniꞌ Cristo
\p
\v 1 Quit Pablo, ē quilacsacnīꞌt Jesucristo ixapóstol naꞌicuan chuntzaꞌ chī ixtalacasquiꞌnīn Dios. Ictzoꞌknumāꞌlh ē nā quintāꞌtincaꞌn Sóstenes nā xlaꞌ huīꞌlh huāꞌtzāꞌ.
\v 2 Huāꞌmāꞌ carta iccāmacāꞌniꞌyāchān milīpōꞌktucaꞌn tī aꞌkaꞌīꞌniꞌyāꞌtit ixtachihuīn Dios ē xalanīꞌn nac Corinto. Iccātzoꞌknuniꞌyān huiꞌxinaꞌn tī cāsicuaꞌlanātlahuanīꞌtaꞌn Cristo Jesús. Xlaꞌ cālacsacnīꞌtaꞌn ē ixlaꞌ Dios huanīꞌtaꞌntittzaꞌ ē ixlīpōꞌktucaꞌn tī taꞌaꞌkaꞌīꞌ xalaꞌ calhāhuālh nac cāꞌquilhtamacuj. Xlacaꞌn talaktaquilhpūta Dios ē ixlakalīyān tasquiꞌniꞌ cacāmaktāyalh chī huiꞌxinaꞌn nā squiꞌniꞌyāꞌtit.
\v 3 Dios quinTātaꞌcaꞌn ē quiMāpaꞌksīniꞌcaꞌn Jesucristo cacālakalhuꞌmaniꞌ. Tzej calatapāꞌtit.
\s Pablo māstāꞌlh tapāxcatcaꞌtzīn ixpālacata Cristo cāsicuaꞌlanātlahualh
\p
\v 4 Pōꞌktu quilhtamacuj icmaxquīꞌ tapāxcatcaꞌtzīn quinDios mimpālacatacaꞌn. Dios cāmaxquīꞌnīꞌtaꞌn talakalhuꞌmān ē ūꞌtzaꞌ huāꞌmāꞌ talakalhuꞌmān cāmaxquīꞌn ixpālacata tapaꞌksīniꞌyaꞌtit Cristo Jesús.
\v 5 Huiꞌxinaꞌn tapaꞌksīniꞌyāꞌtit Cristo, ē ūꞌtzaꞌ Dios lhūhuaꞌ cālīmāscaꞌtīyān. Chuntzaꞌ tzej kexpatāꞌtit ē chuntzaꞌ nacālīmāsuꞌyuniꞌyāꞌtit āꞌmakapitzīn.
\v 6 Ixlīpōꞌktu huāꞌmāꞌ Dios cātlahuaniꞌn ixpālacata cuenta tlahuaꞌtit ē aꞌkaꞌīꞌtit tū iccāmāsuꞌyuniꞌn tū ixlaꞌ Cristo.
\v 7 Nā chuntzaꞌ huiꞌxinaꞌn jā tū cāmakasputān chī Dios quincāsicuaꞌlanātlahuayān līhuan kaꞌlhīꞌpāꞌnaꞌntit quilhtamacuj tū napūmin quiMāpaꞌksīniꞌcaꞌn Jesucristo.
\v 8 Nā xlaꞌ nacāmaktāyayān hasta aꞌcxniꞌ nasputa cāꞌquilhtamacuj ē chuntzaꞌ jā tū naꞌaꞌnan tū nacātalīmālacsuꞌyuyān aꞌcxniꞌ nacāputzānaꞌnī Jesucristo.
\v 9 Dios pōꞌktu quilhtamacuj mākentaxtū tū mālacnū ē xlaꞌ cālacsacnīꞌtaꞌn ē chuntzaꞌ chāꞌtin nalītaxtuyāꞌtit Jesucristo, īꞌSkaꞌtaꞌ Dios, tī quiMāpaꞌksīniꞌcaꞌn.
\s Tī ixtaꞌaꞌkaꞌīꞌ tatalacpitzilh
\p
\v 10 Tāꞌtimīn, iccāsquiꞌniꞌyān ixpālacata ixlītliꞌhuiꞌqui Jesucristo ē iccāsquiꞌniꞌyān talakalhuꞌmān milacxtimcaꞌn nahuaꞌnāꞌtit ē jā titalacpitziyāꞌtit. Cakaꞌlhīꞌtit aꞌktin mintalacapāstacniꞌcaꞌn milīpōꞌktucaꞌn ē aꞌktin mintapuhuātcaꞌn.
\v 11 Tachilh huāꞌtzāꞌ tī xalanīꞌn na ixchic Cloé. Xlacaꞌn quintamācaꞌtzīnīlh huiꞌxinaꞌn lāquilhniꞌyāꞌtit.
\v 12 Ūꞌtzaꞌ huanicuꞌtun huiꞌxinaꞌn jā lacxtim huaꞌnāꞌtit. Makapitzīn tahuan: “Quit icstālaniꞌ Pablo.” Āꞌmakapitzīn tahuampala: “Quit icstālaniꞌ Apolos.” Āꞌmakapitzīn tahuampala: “Quit icstālaniꞌ Pedro.” Āꞌmakapitzīn tahuampala: “Quit icstālaniꞌ Cristo.”
\v 13 ¿Ē tapāpitzinīꞌt Cristo? ¿Ē quit icnīlh nac cruz mimpālacatacaꞌn? ¿Ē quit iccāmāꞌkpaxīn naquilālīstālaniꞌyāuj?
\v 14 Icmaxquīꞌ tapāxcatcaꞌtzīn Dios jā iccāmāꞌkpaxīlh nūn chāꞌtin tī huiꞌxinaꞌn, xmān Crispo ē Gayo.
\v 15 Chuntzaꞌ jā tī chāꞌtin tzē nahuan quit iccāmāꞌkpaxīlh naquintastālaniꞌlh.
\v 16 Nā iccāmāꞌkpaxīlh xalanīꞌn na ixchic Estéfanas. Jā iccaꞌtzī palh icmāꞌkpaxīnīꞌt āꞌchāꞌtin.
\v 17 Cristo jā quimacaminīꞌt naꞌicmāꞌkpaxīniꞌn. Quimacamilh naꞌiclīmāsuꞌyu ixtachihuīn Dios. Jā iclīmāsuꞌyu xalakaꞌtlaꞌ tachihuīn. Palh chuntzaꞌ xaꞌictlahualh, xaꞌiclakmakaꞌlh Cristo tī pātīniꞌlh nac cruz.
\s Cristo lītasuꞌyu ixlītliꞌhuiꞌqui Dios
\p
\v 18 Tī taꞌaꞌmāꞌnalh nac pūpātīn ixpālacata jā taꞌaꞌkaꞌīꞌniꞌ Dios, xlacaꞌn tapuhuan jā ixlacasquiꞌnca namāsuꞌyucan Cristo nīlh nac cruz. Quinaꞌn tī Cristo quincāmakapūtaxtūnīꞌtaꞌntzaꞌ puhuanāuj tū māsuꞌyucan chī līnīlh Cristo nac cruz, ūꞌtzaꞌ ixlītliꞌhuiꞌqui Dios.
\v 19 Chuntzaꞌ tatzoꞌkniꞌ na ixtachihuīn Dios:
\q Naꞌicmālaksputū ixlīpōꞌktu tū tacaꞌtzī xalakaꞌtlaꞌ chiꞌxcuhuīꞌn.
\q Ūꞌtzaꞌ jā tū ixtapalh.
\q Naꞌiccāmāpānūniꞌ pōꞌktu ixlīskalalhcaꞌn tī āꞌchulāꞌ tacaꞌtzī.
\p
\v 20 Chuhuaꞌj ¿chī natalītaxtu tī lakskalalhnaꞌ ē mākelhtahuaꞌkēꞌniꞌnīꞌn? ¿Chī natalīla tī tzē talīchihuīnaꞌn catūhuālh? ¿Ē jā tamāxanaꞌn na ixlacatīn Dios? Dios āꞌchulāꞌ caꞌtzī. Chuntzaꞌ ixtalacapāstacniꞌcaꞌn xalanīꞌn na cāꞌquilhtamacuj huaꞌchi tachuyā na ixlacatīn Dios.
\v 21 Masqui skalalh tachiꞌxcuhuīꞌt, jāla chuntzaꞌ talīlakapasa Dios. Xlaꞌ jā makxteka chuntzaꞌ nalīlakapascan. Xlaꞌ līhuiꞌlīlh cāmakapūtaxtū ixlīpōꞌktucaꞌn tī taꞌaꞌkaꞌīꞌniꞌ ixtachihuīn tū icmāsuꞌyumāꞌnauj masqui āꞌmakapitzīn tahuan tachuyā.
\p
\v 22 Israelitas talacasquiꞌn catatlahualh aꞌktin tū līꞌaꞌcnīcan ūꞌtunuꞌn tī tamāsuꞌyu ixtachihuīn Dios. Tī jā israelitas taputza tī āꞌchulāꞌ tacaꞌtzī. Palh jā chuntzaꞌ, jā taꞌaꞌkaꞌīꞌniꞌcuꞌtun ixtachihuīn Dios.
\v 23 Quinaꞌn icmāsuꞌyuyāuj chī Cristo nīlh nac cruz. Ūꞌtzaꞌ cālīmāmakchuyīlh israelitas ixpālacata jā takexmatcuꞌtun. Xlacaꞌn tī jā israelitas tapuhuan tachuyā.
\v 24 Tī Dios cālacsacli ē xlacaꞌn taꞌaꞌkaꞌīꞌ, masqui israelitas ē masqui jā israelitas, tacaꞌtzī Cristo kaꞌlhī ixlītliꞌhuiꞌqui Dios ē ixtalacapāstacniꞌ Dios.
\v 25 Ixtalacapāstacniꞌcaꞌn chiꞌxcuhuīꞌn jāla catitamālakchāꞌnīlh ixtalacapāstacniꞌ Dios. Chiꞌxcuhuīꞌn tapuhuan Dios huaꞌchi jā ixkaꞌlhī ixlītliꞌhuiꞌqui chī Cristo nīlh nac cruz. Dios āꞌchulāꞌ māpaꞌksīniꞌn ē jā chiꞌxcuhuīꞌn.
\v 26 Cuenta catlahuaꞌtit māniꞌ huiꞌxinaꞌn, tāꞌtimīn. Na milacpuꞌnaꞌiꞌtātcaꞌn huiꞌxinaꞌn tī Dios cālacsacniꞌ jā lhūhuaꞌ tī xalakskalalhnaꞌ ixtahuanīꞌt aꞌcxniꞌ taꞌaꞌkaꞌīꞌlh. Jā lhūhuaꞌ ixtahuiꞌlanalh tī māpaꞌksīniꞌnīꞌn ixtahuanīꞌt aꞌcxniꞌ taꞌaꞌkaꞌīꞌlh ē jā lhūhuaꞌ ixtahuiꞌlanalh tī lakaꞌtlaꞌn chiꞌxcuhuīꞌn ixtahuanīꞌt.
\v 27 Dios cālacsacli tī xlaꞌ cālacasquīꞌn masqui puhuancan jā tacaꞌtzī. Cālacsacli nacālīmāmāxanīꞌ tī āꞌchulāꞌ tacaꞌtzī. Dios cālacsacli tī puhuancan jā lactliꞌhuiꞌqui nacālīmāmāxanīꞌ tī xalactliꞌhuiꞌquin.
\v 28 Dios cālacsacli tī cāpuhuanican xlacaꞌn jā lakaꞌtlaꞌn chiꞌxcuhuīꞌn ē tī cālakmakaꞌncanīꞌt huaꞌchi jā tū ixtapalhcaꞌn ē chuntzaꞌ tzē natalīmālaksputū tū cāpuhuanican ixlacasquiꞌnca.
\v 29 Nā chuntzaꞌ jā tī chāꞌtin tzē kaꞌtlaꞌ nalīmakcaꞌtzī na ixlacatīn Dios.
\v 30 Huiꞌxinaꞌn tapaꞌksīniꞌyāꞌtit Cristo Jesús xmān ixlītliꞌhuiꞌqui Dios. Ūꞌtzaꞌ quincālīmāsuꞌyuniꞌn ixtalacasquiꞌnīn. Dios quincālaktzīꞌnān lactze quinaꞌn. Dios quincāmāpānūniꞌn quincuentacaꞌn ē ūꞌtzaꞌ quincālīmakapūtaxtuyān.
\v 31 Chuntzaꞌ tatzoꞌkniꞌ na ixtachihuīn Dios:
\q Tī kaꞌtlaꞌ makcaꞌtzī, kaꞌtlaꞌ calīmakcaꞌtzīlh tū quincātlahuaniꞌnīꞌtaꞌn Māpaꞌksīniꞌ.
\c 2
\s Māsuꞌyuca chī līxtokohuaꞌcaꞌca Cristo
\p
\v 1 Chuntzaꞌ aꞌcxniꞌ pūla icchāꞌlh ē iccātaꞌchihuīnaꞌn, jā iccāmāsuꞌyuniꞌn huaꞌchi chāꞌtin xakaꞌtlaꞌ aꞌkchihuīnaꞌ. Jā kaꞌtlaꞌ quintachihuīn ē nūn lhūhuaꞌ quintalacapāstacniꞌ, aꞌcxniꞌ xaꞌiccāmāsuꞌyuniꞌyān tū ixlīcānaꞌ ixlaꞌ Dios ē tū jā ixtasuꞌyu hasta chuhuaꞌj.
\v 2 Quit iclīhuiꞌlīlh jā tū quimacaꞌtzi, xmān Jesucristo tī maknīca nac cruz.
\v 3 Quit huaꞌchi jā tliꞌhuiꞌqui xaꞌicuanīꞌt aꞌcxniꞌ xaꞌiccātāꞌhuiꞌlān ē xaꞌicjicuaꞌn ē xaꞌicxpipi.
\v 4 Quintachihuīn ē chī xaꞌiccāmāscaꞌtīyān jā chī ixlaꞌ xakaꞌtlaꞌ aꞌkchihuīnaꞌ tī āꞌchulāꞌ caꞌtzī. Palh chuntzaꞌ cahuālh xaꞌiccāmāscaꞌtīn, jā ixtitasuꞌyulh chī īꞌscujmāꞌlh Espíritu Santo ē ixlītliꞌhuiꞌqui Dios. Espíritu Santo quimāsuꞌyuniꞌlh tachihuīn ē iclīchihuīnaꞌnli ixlītliꞌhuiꞌqui.
\v 5 Chuntzaꞌ jā nalīꞌaꞌkaꞌīyāꞌtit ixtalacapāstacniꞌcaꞌn chiꞌxcuhuīꞌn. Xmān nalīꞌaꞌkaꞌīꞌyāꞌtit ixlītliꞌhuiꞌqui Dios.
\s Dios cālīmāsuꞌyuniꞌ tachiꞌxcuhuīꞌt Espíritu Santo
\p
\v 6 Na ixlacpuꞌnaꞌiꞌtātcaꞌn tī tzej takexmata ixtachihuīn Dios, tasuꞌyu chī iccaꞌtzī. Quintalacapāstacniꞌ jā chuntzaꞌ chī ixlacaꞌn xanapuxcuꞌnuꞌ xalanīꞌn nac cāꞌquilhtamacuj. Xlacaꞌn natalaksputa.
\v 7 Iclīchihuīnaꞌnāuj ixtalacapāstacniꞌ Dios tū jānaꞌj ixcaꞌtzīcan. Talacapāstacniꞌ ūꞌtzaꞌ huāꞌmāꞌ: Aꞌcxniꞌ jānaꞌj tū ixaꞌnan cāꞌquilhtamacuj, xmān ixtalacapāstacniꞌ Dios ixuanīꞌt nakaꞌlhīyāuj quilatamatcaꞌn tū jā catilaksputli.
\v 8 Jā tī chāꞌtin māpaꞌksīnīꞌn xalaꞌ nac cāꞌquilhtamacuj takexmatnīꞌt huāꞌmāꞌ tū jānaꞌj ixcaꞌtzīcan. Palh ixtakexmatli cahuālh, jā maktin ixtaxtokohuaꞌcaꞌlh Māpaꞌksīniꞌ tī āꞌchulāꞌ xakaꞌtlaꞌ.
\v 9 Chuntzaꞌ tatzoꞌkniꞌ na ixtachihuīn Dios:
\q Jā tī chāꞌtin laktzīꞌnīꞌt
\q ē jā tī chāꞌtin kexmatnīꞌt
\q ē jā tī chāꞌtin puhuanīꞌt tū Dios cāxuiꞌlīnīꞌt ixpālacatacaꞌn tī tapāxquīꞌ.
\m
\v 10 Dios ixlīcānaꞌ quincālīmāsuꞌyuniꞌn Espíritu Santo ē jā tū mātzēꞌkniꞌcanīꞌt Espíritu. Xlaꞌ caꞌtzī hasta ixtalacapāstacniꞌ Dios ē chī līhuīꞌlh Dios.
\p
\v 11 ¿Tīchu caꞌtzī tū lacpuhuan chāꞌtin chiꞌxcuꞌ? Xmān ixlīmān caꞌtzī. Chuntzaꞌ jā tī chāꞌtin tzē caꞌtzī ixtalacapāstacniꞌ Dios; xmān ixEspíritu Dios cāꞌtzī.
\v 12 Dios quincāmaxquīꞌnīꞌtaꞌn Espíritu tī ixlaꞌ Dios ē jā ixlacaꞌn chiꞌxcuhuīꞌn. Chuntzaꞌ tzē nakexmatāuj chī Dios quincālakalhuꞌmanān ē quincāmaxquīꞌyān talacapāstacniꞌ.
\v 13 Jā icmāsuꞌyuyāuj chuntzaꞌ chī tamāsuꞌyu tachiꞌxcuhuīꞌt masqui tacaꞌtzī catūhuālh. Quinaꞌn iccāmāsuꞌyuniꞌyāuj tū quincāmāsuꞌyuniꞌyān Espíritu. Chuntzaꞌ iccāmāsuꞌyuniꞌyāuj xlacaꞌn tī takaꞌlhī Espíritu Santo ē xlacaꞌn takexmata tū ixlaꞌ Dios.
\p
\v 14 Chāꞌtin chiꞌxcuꞌ tī jā kaꞌlhī xasāstiꞌ ixlatamat xmān lacapāstaca tū xalaꞌ nac cāꞌquilhtamacuj. Jāla maktīniꞌn tū māsuꞌyu Espíritu Santo. Lacpuhuan huaꞌchi tachuyā. Jāla kexmata ixpālacata xmān Espíritu Santo līkexmatcan.
\v 15 Espíritu Santo cātanūniꞌnīꞌttzaꞌ chiꞌxcuꞌhuīꞌn tī ixlaꞌ Dios ē chuntzaꞌ talīkexmata tū āꞌchulāꞌ ixlacasquiꞌnca. Chiꞌxcuꞌ tī jā kaꞌlhī xasāstiꞌ ixlatamat jāla caꞌtzī chī lītalakpalī tī kaꞌlhī xasāstiꞌ ixlatamat.
\v 16 Tatzoꞌkniꞌ na ixtachihuīn Dios:
\q ¿Tīchu lakapasnīꞌt ixtalacapāstacniꞌ Māpaꞌksīniꞌ Dios?
\q ¿Tīchu tzē namāsuꞌyuniꞌ tū natlahua?
\m Quinaꞌn iclacapāstacnāuj chī Cristo lacasquiꞌn.
\c 3
\s Chī ixlatamatcaꞌn tī tatāꞌscuja Dios
\p
\v 1 Chuntzaꞌ, tāꞌtimīn, jāla iccāhuanin chī xaꞌiccāhuani xlacaꞌn tī takexmata Espíritu Santo. Ixlacasquiꞌnca huiꞌxinaꞌn naꞌiccāhuaniyān chī tatzucumāꞌnalhcus taꞌaꞌkaꞌīꞌniꞌ ixtachihuīn Dios ē tī tatlahuamāꞌnalhcus tū xmān xlacaꞌn talacasquiꞌn. Huiꞌxinaꞌn huaꞌchi lacstīn.
\v 2 Nā huaꞌchi skaꞌtaꞌ jānaꞌj la laktzaka quinīt ē xmān huaꞌ ixtziꞌquīꞌ, chuntzaꞌ jāla iccāmāsuꞌyuniꞌn tū jicslīhuaꞌ nakexpatatit. Jāla catiscaꞌttit. Nūn chuhuaꞌj jā iccāmāsuꞌyuniꞌyān tū jicslīhuaꞌ nakexpatatit.
\v 3 Lacapāstacnaꞌnāꞌtitcus huaꞌchi tī jānaꞌj taꞌaꞌkaꞌīꞌ. Palh lāquilhnīpāꞌnaꞌntitcus ē lāsītzīꞌniꞌyāꞌtit ē lāquiclhlaktzīꞌnāꞌtitcus, tasuꞌyu tlahuaꞌyāꞌtitcus tū xmān mintapāxuhuāncaꞌn. Latāꞌkchokoyāꞌtit huaꞌchi xalanīꞌn nac cāꞌquilhtamacuj.
\v 4 Makapitzīn chī huiꞌxinaꞌn tahuan: “Quit icstālaniꞌ Pablo.” Āꞌmakapitzīn tahuampala: “Quit icstālaniꞌ Apolos.” Aꞌcxniꞌ chuntzaꞌ huaꞌnātit tapāpitzipāꞌnantit huaꞌchi xalanīꞌn nac cāꞌquilhtamacuj.
\p
\v 5 Aꞌcxniꞌ iccāmāsuꞌyuniꞌn, jā iccāmāsuꞌyuniꞌn naquilāstālaniꞌyāuj. Apolos jā cāmāsuꞌyuniꞌn nastālaniꞌyāꞌtit xlaꞌ. Quinaꞌn xmān īꞌscujnuꞌnīꞌn Dios. Quit iccāmāsuꞌyuniꞌn ixtachihuīn Dios ē huixinaꞌn aꞌkaꞌīꞌtit. Chāꞌtunuꞌ quinaꞌn ictlahuáuj quintascujūtcaꞌn tū Dios quincāmaxquīꞌn.
\v 6 Quit ictzuculh iccāmāsuꞌyuniꞌyān ixtachihuīn Dios. Āꞌlīstān milh Apolos. Nā xlaꞌ māsuꞌyupālh ixtachihuīn Dios. Dios ixcāmāꞌaꞌkaꞌīꞌnīmāꞌn. Ūꞌtzaꞌ huaꞌchi quit icchaꞌnli ixtachihuīn Dios ē Apolos muꞌnulh ē Dios makastacli ē tahuaꞌcaꞌlh huāꞌmāꞌ tachaꞌnān.
\v 7 Chuntzaꞌ tī chaꞌnli ē tī muꞌnulh, xlacaꞌn chu lacxtim ixpālacata xmān Dios ūꞌtzaꞌ maxquīꞌ īꞌstacat.
\v 8 Tī chaꞌn ē tī muꞌnu lacxtim īꞌscujnuꞌnīꞌn. Chāꞌtunuꞌ namaktīniꞌn ixtatlaj chuntzaꞌ chī scujli.
\v 9 Chuntzaꞌ quinaꞌn īꞌscujnuꞌnīꞌn ixpālacata ictāꞌscujāuj Dios ē huiꞌxinaꞌn huaꞌchi ixtacuxtu Dios jā chaꞌncan ixtachihuīn Dios. Xlaꞌ maktakaꞌlhmāꞌlh ē natahuaꞌcaꞌ.
\p Nā huiꞌxinaꞌn huaꞌchi aꞌktin chic tū ixlaꞌ Dios ē tū yāhuamāꞌcacus.
\v 10 Dios quilacsacli ē quimāsuꞌyuniꞌlh chī naꞌicmāsuꞌyu ixtachihuīn jā jā maktin kexmatcanīꞌt. Āꞌlīstān milh āꞌchāꞌtin. Nā xlaꞌ māsuꞌyulh ixtachihuīn Dios. Ūꞌtzaꞌ huaꞌchi quit chāꞌtin tī ictlahualh ixlītzucuniꞌ chic. Āꞌchāꞌtin namin nayāhua tzamāꞌ chic. Ūꞌtzaꞌ ixlīlacasquiꞌnca chāꞌtunuꞌ cuenta catlahualh tūchu nalīcāxtlahua tzamāꞌ chic.
\v 11 Xmān aꞌktin ixlītzucuniꞌ huāꞌmāꞌ chic tū ixlaꞌ Dios tū yāhuamāꞌcacus. Ūꞌtzaꞌ huāꞌmāꞌ tū iccāmāsuꞌyuniꞌn ixpālacata Jesucristo ē chī pātīniꞌlh nac cruz.
\v 12 Kempālhūhuaꞌ namāsuꞌyucan tū ixlaꞌ Dios, chuntzaꞌ chī aꞌktin chic kempālhūhuaꞌ nalīcāxtlahuacan. Makapitzīn natalīcāxtlahua oro o plata o xatze chihuix tū tāyaniꞌ. Āꞌmakapitzīn natalīcāxtlahua quiꞌhuiꞌ o matlūꞌc o seket tū jā tāyaniꞌ.
\v 13 Nachin aꞌktin quilhtamacuj aꞌcxniꞌ natasuꞌyu tū talīscujli chāꞌtunuꞌ. Aꞌcxniꞌ namin tzamāꞌ quilhtamacuj natzucu huaꞌchi macscut ē chuntzaꞌ chī oro ē plata tatāyaniꞌ macscut, chu chuntzaꞌ ixtascujūt xatze mākelhtahuaꞌkēꞌniꞌ nā natāyaniꞌ.
\v 14 Palh ixtascujūt chāꞌtin natāyaniꞌ, xlaꞌ namaktīniꞌn ixtatlaj.
\v 15 Palh jā tāyaniꞌ ixtascujūt chāꞌtin, nasputniꞌ ixtatlaj. Masqui namālaksputūniꞌ ixtatlaj, Dios namakapūtaxtū chuntzaꞌ huaꞌchi chiꞌxcuꞌ tī naꞌaꞌkapūtaxtu aꞌcxniꞌ lhcumāꞌlh ixchic ē nalhcukōꞌ ixlīpōꞌktu tū ixkaꞌlhī.
\p
\v 16 ¿Ē jā caꞌtzīyāꞌtit milīpōꞌktucaꞌn huiꞌxinaꞌn huaꞌchi ixtemplo Dios? Espíritu Santo huīꞌlh na milīstacnaꞌcaꞌn.
\v 17 Nā palh chāꞌtin natlahuaniꞌ tū jā tze ixtemplo Dios, Dios namālaksputū xlaꞌ ixpālacata ixtemplo Dios xatasicuaꞌlanātlahua. Huiꞌxinaꞌn lītaxtutit ixtemplo Dios aꞌcxniꞌ aꞌkaꞌīꞌtit.
\p
\v 18 Jā cataꞌaꞌkskāhuīꞌtit minaꞌcstucaꞌn. Palh chāꞌtin na milacpuꞌnaꞌiꞌtātcaꞌn lacpuhuan skalalh xlaꞌ ixpālacata tū aꞌnan nac cāꞌquilhtamacuj, calalh huaꞌchi jā tū ixcaꞌtzī. Chuntzaꞌ tzē nascaꞌta tū āꞌchulāꞌ ixlacasquiꞌnca.
\v 19 Tzamāꞌ talacapāstacniꞌ tū xalaꞌ nac cāꞌquilhtamacuj Dios cālaktzīꞌn huaꞌchi tachuyā. Chuntzaꞌ tatzoꞌkniꞌ:
\q Tī tapuhuan lakskalalhnaꞌ, ūꞌtunuꞌn Dios nacāmātlahuanī
\q tū natalītaꞌaꞌkskāhuīꞌ ixaꞌcstucaꞌn ixlīlakskalalhcaꞌn aꞌcxniꞌ tatlahuacuꞌtun ixtalacapāstacniꞌcaꞌn
\q ē chuntzaꞌ jāla catitamākentaxtūlh.
\m
\v 20 Tatzoꞌkniꞌ huampala:
\q Māpaꞌksīniꞌ Dios cālakapasniꞌ ixtalacapāstacniꞌcaꞌn
\q tī lakskalalhnaꞌ
\q ē cālaktzīꞌn huaꞌchi jā tū ixtapalhcaꞌn.
\m
\v 21 Chuntzaꞌ jā kaꞌtlaꞌ catimakcaꞌtzītit ixpālacata tū tlahualh catīhuālh chiꞌxcuꞌ o tū māsuꞌyulh. Ixlīpōꞌktu catūhuālh milacaꞌn.
\v 22 Ixlīpōꞌktu catūhuālh milacaꞌn ē tzē naꞌiccālīmaktāyayān. Pablo ē Apolos ē Pedro, quilīpōꞌktucaꞌn tzē naiccālīmaktāyayān huiꞌxinan. Nā milacaꞌn cāꞌquilhtamacuj ixpālacata tzē nacālīmaktāyayān. Masqui huiꞌlāꞌnaꞌntitcus ē masqui canīꞌtit, Dios nacāmaktāyayān. Tū lamāꞌlh ē tū nalacus, pōꞌktu ūꞌtzaꞌ tzē nacālīmaktāyayān.
\v 23 Pōꞌktu milacaꞌn ixpālacata huiꞌxiꞌnaꞌn tapaꞌksīniꞌyāꞌtit Cristo, ē Cristo tapaꞌksīniꞌ Dios.
\c 4
\s Ixtascujūtcaꞌn apóstoles
\p
\v 1 Quinaꞌn tī apóstoles, caquincātalaktzīꞌn quinaꞌn īꞌscujnuꞌnīꞌn Cristo tī quincāmacamaxquīꞌnīꞌtan quintascujūtcaꞌn ē ūꞌtzaꞌ naꞌicmāsuꞌyuyāuj tū ixlaꞌ Dios ē tū Dios quincāmācaꞌtzīnīn.
\v 2 Tī macamaxquīꞌcanīꞌt tascujūt ixlacasquiꞌnca xlaꞌ tzej namākentaxtū tū līmāpaꞌksīcanīꞌt.
\v 3 Quit jā quimacaꞌtzi tū puhuaꞌnāꞌtit. Ē quit jā quimacaꞌtzi tū tapuhuan āꞌmakapitzīn tachiꞌxcuhuīꞌt quimpalacata. Quit jāla naꞌicuan palh tze o jā tze quit.
\v 4 Masqui icmakcaꞌtzī palh jā tū iclaclēꞌn palhāsāꞌ iclaclēꞌn. Dios nahuan palh iclaclēꞌn.
\v 5 Aꞌcxniꞌ jānaꞌj min Māpaꞌksīniꞌ Jesucristo, jā catipuhuaꞌntit palh tze o jā tze āꞌchāꞌtin ixpālacata tū tlahualh. Aꞌcxniꞌ namin Māpaꞌksīniꞌ, xlaꞌ namālakxkakēniꞌnkōꞌ ixlīpōꞌktu catūhuālh tū tatzēꞌknīꞌt jā cāꞌpucsuaꞌ. Namāsuꞌyukōꞌ ixlīpōꞌktu tū tapuhuan tachiꞌxcuhuīꞌt ē tū tatlahuacuꞌtun. Tzamāꞌ quilhtamacuj Dios nacāmākaꞌtlīꞌ chāꞌtunuꞌ ixpālacata xatze tū tatlahuanīꞌt.
\p
\v 6 Tāꞌtimīn, ixlīpōꞌktu huaꞌmāꞌ iccātzoꞌknuniꞌnīꞌtaꞌn quimpālacatacaꞌn quit ē Apolos. Ūꞌtzaꞌ huaꞌchi tū iccālīpūlaniꞌmāꞌn nalīscaꞌtāꞌtit chī tzej nakexpatniꞌyāꞌtit ixtachihuīn Dios tū tzoꞌkcanīꞌt. Chuntzaꞌ jā kaꞌtlaꞌ tilīmakcaꞌtzīyāꞌtit ixpālacata chāꞌtin mākelhtahuaꞌkēꞌniꞌ ē jā catilakmakaꞌntit āꞌchāꞌtin.
\v 7 Jā tipuhuaꞌnaꞌtit palh huiꞌxinaꞌn āꞌchulāꞌ xatze. Pōꞌktu tū kaꞌlhīꞌyāꞌtit Dios cāmaxquīꞌnīꞌtaꞌn. Jā tlaꞌjanīꞌtaꞌntit. Jā kaꞌtlaꞌ tilīmakcaꞌtzīyāꞌtit tū cāmaxquīꞌnīꞌtaꞌn Dios.
\p
\v 8 Makcaꞌtzīyāꞌtit huaꞌchi jā tū caticāsputniꞌn ē makcaꞌtzīyāꞌtit huaꞌchi kaꞌlhīꞌyāꞌtit ixlīpōꞌktu tū maclacasquiꞌnāꞌtit. Puhuaꞌnāꞌtit tzē natapaꞌksīyāꞌtit minaꞌcstucaꞌn ē quilāmakxteknīꞌtaꞌuj. Jātzaꞌ lacasquiꞌnāꞌtit naꞌiccāmaktāyayān. Xatze palh ixlīcānaꞌ ixmāpaꞌksīniꞌntit cahuālh ixpālacata quinaꞌn tzē xaꞌiccātāꞌmāpaꞌksīniꞌn.
\v 9 Palhāsāꞌ Dios lacasquiꞌn quinaꞌn apóstoles ictasuꞌyuyāuj huaꞌchi chiꞌxcuhuīꞌn tī āꞌchulāꞌ xatalakmakaꞌ ē huaꞌchi tī līhuiꞌlīcan namaknīcan. Quincātatlahuanīꞌtaꞌn huaꞌchi tū nalīstānaꞌncan nac cāꞌquilhtamacuj ē na ixlacatīncaꞌn ángeles ē tachiꞌxcuhuīꞌt. Quincātalaktzīꞌnān huaꞌchi tī jā tū quintapalhcaꞌn.
\v 10 Huancan quinaꞌn laclhkēntin ixpālacata Cristo. Ē huiꞌxinaꞌn puhuaꞌnāꞌtit caꞌtzīyāꞌtit tū ixlaꞌ Cristo. Huancan quinaꞌn xaxlajuananiꞌn ē huiꞌxinaꞌn tī iccātzoꞌknuniꞌyān kaꞌlhīꞌyāꞌtit lītliꞌhuiꞌqui. Huiꞌxinaꞌn cātalakachiꞌxcuhuīꞌyān ē quinaꞌn xatalakmakaꞌ.
\v 11 Hasta chuhuaꞌj quinaꞌn ictziꞌncsāuj ē ickelhpūtīyāuj ē jātzaꞌ tze quiluꞌxuꞌcaꞌn. Quincātatucsān ē ictejelatlāꞌhuanāuj.
\v 12 Palhaꞌ icscujāuj naꞌiclīhuāꞌyanāuj, ē ictlakuaꞌnāuj. Aꞌcxniꞌ quincātalakapalayān, quinaꞌn icsquiꞌniꞌyāuj Dios ixpālacatacaꞌn. Aꞌcxniꞌ quincātamakapātīniꞌnān, quinaꞌn ictāyaniꞌyāuj.
\v 13 Aꞌcxniꞌ jā tze quincātalīchihuīnaꞌnān, quinaꞌn lacatejtin ickelhtīniꞌnāuj. Hasta chuhuaꞌj cāꞌlhūhuaꞌlacatīn quinaꞌn huaꞌchi paꞌlhxtum iclanīꞌtauj ē huaꞌchi xatancaꞌchiꞌ ixlīpōꞌktu tū lakmakaꞌncan.
\p
\v 14 Jā iccālīmāmāxanīꞌcuꞌtunāꞌn tū iccātzoꞌknuniꞌyān. Iccātzoꞌknuniꞌyān huāꞌmāꞌ naꞌiccāmācaꞌtzīnīyān tū natlahuaꞌyāꞌtit. Iccāpāxquīꞌyān huaꞌchi quincamanaꞌ.
\v 15 Masqui ixcākaꞌlhīꞌtit aꞌkcāuj mil tī nacātamāsuꞌyuniꞌyān ixpālacata Cristo, xmān chāꞌtin huaꞌchi mintātaꞌcaꞌn. Quit mintātaꞌcaꞌn ixpālacata Cristo ē xatze tachihuīn tū iccāmāscaꞌtīyān.
\v 16 Ūꞌtzaꞌ iccālīsquiꞌniꞌyān caquilāmakscaꞌtxtūj chī nalītahuiꞌlayāꞌtit.
\p
\v 17 Ūꞌtzaꞌ huāꞌmāꞌ iccālīlakmacāꞌnchān Timoteo. Nā xlaꞌ lītaxtulh huaꞌchi quinkahuaꞌcha ixpālacata quiMāpaꞌksīniꞌ ē laktzaꞌ icpāxquīꞌ ē xlaꞌ mākentaxtū ixtalacasquiꞌnīn Dios. Timoteo nacāmāpāstaquīyān chī iclīlatlāꞌhuan ē ickexmatniꞌ Cristo ē chuntzaꞌ chī iccāmāsuꞌyuniꞌmāꞌlh āꞌmakapitzīn nā chuntzaꞌ xlacaꞌn natalīlatāꞌkchoko. Chuntzaꞌ chi icmāsuꞌyu calhāxcuhuālh nac templo.
\v 18 Makapitzīn huiꞌxinaꞌn kaꞌtlaꞌ līmakcaꞌtzīyāꞌtit ixpālacata puhuaꞌnāꞌtit: “Jā catimilh Pablo.”
\v 19 Palh Dios lacasquiꞌn, palaj naꞌiccālakaꞌnāchān ē naꞌiclakapasa ixlītliꞌhuiꞌquicaꞌn xlacaꞌn tī kaꞌtlaꞌ tamakcaꞌtzī o palh xmān tahuan.
\v 20 Natasuꞌyu tīchu tatapaꞌksīniꞌ Dios. Natasuꞌyu ixpālacata tū tzē talītlahua ixlītliꞌhuiꞌqui Dios, ē jā xmān tū tahuan chiꞌxcuhuīꞌn.
\v 21 ¿Tūchu lacasquiꞌnāꞌtit aꞌcxniꞌ naꞌiccālakaꞌnāchān? ¿Lacasquiꞌnāꞌtit naꞌicmin naꞌiccācastigarlīyān o lacasquiꞌnāꞌtit naꞌiccāpāxquīꞌyān ē naꞌiccālakalhuꞌmanān?
\c 5
\s Makapātīnīca tī ixtlahua tū jā tze
\p
\v 1 Ixlīcānaꞌ caꞌtzīcan aꞌnan na milacpuꞌnaꞌiꞌtātcaꞌn chāꞌtin jā tzeya chiꞌxcuꞌ. Xlaꞌ tāꞌtahuīꞌlh ixtūtzīꞌ. Ē tī jā taꞌaꞌkaꞌīꞌ jā chuntzaꞌ talamāꞌnalh.
\v 2 Huiꞌxinaꞌn jā māxaꞌnaꞌnāꞌtit ē nūn līpuhuanāꞌtit ixpālacata huaꞌmā tū jā tze. Ixtamacxtutit na milacpuꞌnaꞌiꞌtātcaꞌn tzamāꞌ chiꞌxcuꞌ tī kaꞌlhī ixtāꞌlāpāxquīꞌn.
\v 3 Quit masqui jā aꞌntzaꞌ icuīꞌlh aꞌcxniꞌ talacxtimīyāꞌtit, iccālacapāstacmāꞌn. Chuntzaꞌ huaꞌchi icuiꞌlachaꞌ ē icputzānaꞌnīnīꞌtaꞌnchaꞌtzaꞌ.
\v 4 Aꞌcxniꞌ takēstokchipitit ixpālacata quiMāpaꞌksīniꞌcaꞌn Jesucristo ē cātāꞌhuiꞌlan ixlītliꞌhuiꞌqui, ē aꞌcxniꞌ huaꞌchi xaꞌicuiꞌlachaꞌ, ixpālacata iccālacapāstacmāꞌn,
\v 5 catamacxtutit na milacpuꞌnaꞌiꞌtātcaꞌn tzamāꞌ chiꞌxcuꞌ. Namacamaxquīꞌyāꞌtit Skāꞌhuīꞌniꞌ ē xlaꞌ namakapātīniꞌn ixmacniꞌ ē namakapūtaxtūcan ixlīstacnaꞌ aꞌcxniꞌ namimpala Māpaꞌksīniꞌ Jesucristo.
\p
\v 6 Jā tze chī kaꞌtlaꞌ makcaꞌtzīyāꞌtit. ¿Ē jā caꞌtzīyāꞌtit macstiꞌnaꞌj levadura laklhtāyakōꞌ ixlīpōꞌktu tasquit? Chuntzaꞌ ixcuenta chāꞌtin chiꞌxcuꞌ nacāmāpasīkōꞌyān milīpōꞌktucaꞌn ixpālacata ūꞌtzaꞌ nacāmāsuꞌyuniꞌ āꞌmakapitzīn.
\v 7 Camakxtektit ixlīpōꞌktu tū jā tze. Ūꞌtzaꞌ huaꞌchi xaxcuꞌta levadura. Camāxtutit xlaꞌ ē chuntzaꞌ nalītaxtuyāꞌtit huaꞌchi xasāstiꞌ tasquit tū jā kaꞌlhī levadura. Ixlacasquiꞌnca lactze nahuaꞌnātit ixpālacata maknīcanīꞌt Cristo quimpālacatacaꞌn chuntzaꞌ chī maknīcan purecuꞌ tū nalīlakatāyanaꞌncan aꞌcxniꞌ pascua.
\v 8 Aꞌcxniꞌ tlahuacan ixcāꞌtaniꞌcaꞌn israelitas tū huanican pascua, makaꞌncan xamakās levadura ē huaꞌcan xasāstiꞌ pāntzīn tū jā kaꞌlhī levadura. Chuntzaꞌ calaktaquilhpūtauj Dios. Ixlacasquiꞌnca pūla camakxtekui tū jā tze talacapāstacniꞌ ē pōꞌktu tū jā tze. Catahuiꞌlauj līlacatejtin. Chuntzaꞌ calaktaquilhpūtauj Dios.
\p
\v 9 Iccātzoꞌknuniꞌnīꞌtaꞌntzaꞌ aꞌktin carta jā caticātāꞌtalacxtuctit tī tatlahua tū jā tze.
\v 10 Jā xaꞌicuanicuꞌtun xalanīꞌn tzamāꞌ cāꞌquilhtamacuj tī tatlahua tū jā tze. Ē jā xaꞌicuanicuꞌtun tī xalanīꞌn nac cāꞌquilhtamacuj ē tatampiꞌlhīniꞌn ē taꞌaꞌkskāhuīꞌkaꞌlhānaꞌn. Nūn xaꞌicuanicuꞌtun jā caticātāꞌtalacxtuctit xalanīꞌn nac cāꞌquilhtamacuj tī talakachiꞌxcuhuīꞌ ixídoloscaꞌn. Palh jā ixcātāꞌtalacxtuctit jā tī chāꞌtin xlacaꞌn, ixlacasquiꞌnca namakxtekātit huāꞌmāꞌ cāꞌquilhtamacuj.
\v 11 Tū iccātzoꞌknuniꞌnīꞌtaꞌn ūꞌtzaꞌ huāꞌmāꞌ: Palh chāꞌtin tī aꞌkaꞌīꞌniꞌ ixtachihuīn Dios ē nā xlaꞌ tlahua tū jā tze, jā catitāꞌtalacxtuctit. Palh chāꞌtin tī aꞌkaꞌīꞌ ē tlahua tū jā tze o tampiꞌlhīniꞌn o lakachiꞌxcuhuīꞌ ixídolo, jā catitāꞌtalacxtuctit ē jā titāꞌhuāꞌyaꞌnāꞌtit. Jā titāꞌhuāꞌyaꞌnāꞌtit tī aꞌkaꞌīꞌ ē xlaꞌ lakapalanaꞌn o kaꞌchī o kaꞌlhānaꞌn.
\v 12-13 ¿Ē quimacaꞌtzi naꞌiccālīputzānaꞌniꞌ tī jā taꞌaꞌkaꞌīꞌniꞌ ixtachihuīn Dios? Tī jā taꞌaꞌkaꞌīꞌ, xlacaꞌn Dios nacāputzānaꞌniꞌ. Ixlacasquiꞌnca huiꞌxinaꞌn naputzānaꞌnīꞌyāꞌtit tī taꞌaꞌkaꞌīꞌ. Chuntzaꞌ catamacxtutit na milacpuꞌnaꞌiꞌtātcaꞌn tzamāꞌ chiꞌxcuꞌ tī tlahua huāꞌmāꞌ tū jā tze.
\c 6
\s Tī tāꞌtalacapūꞌniꞌ na ixlacatīncaꞌn jueces tī jā taꞌaꞌkaꞌīꞌ
\p
\v 1 Aꞌcxniꞌ chāꞌtin putzānaꞌnīcuꞌtun catūhuālh āꞌchāꞌtin tī aꞌkaꞌīꞌ, līmāxanaꞌ palh ixmālacapūꞌlh na ixlacatīncaꞌn tī jā taꞌaꞌkaꞌīꞌ. Ixtaputzānaꞌnīlh tī tāꞌtapaꞌksīniꞌ Dios.
\v 2 Huiꞌxinaꞌn tī tāꞌtapaꞌksīyāꞌtit Dios nacāputzānaꞌnīꞌyāꞌtit tachiꞌxcuhuīꞌt aꞌcxniꞌ nasputa cāꞌquilhtamacuj. Palh huiꞌxinaꞌn nacāputzānaꞌnīꞌyāꞌtit ixlīpōꞌktucaꞌn xalanīꞌn nac cāꞌquilhtamacuj, nā tzē naputzānaꞌnīꞌyāꞌtit tū jā ixlacasquiꞌnca.
\v 3 ¿Ē jā caꞌtzīyāꞌtit quinaꞌn nacāputzānaꞌnīyāuj ángeles? Palh nacāputzānaꞌnīyāuj ángeles, āꞌchulāꞌ tzē nacāputzānaꞌnīyāuj tū xalaꞌ nac cāꞌquilhtamacuj.
\v 4 Chuntzaꞌ palh ixlacasquiꞌnca naputzānaꞌnīꞌyāꞌtit catūhuālh xalaꞌ nac cāꞌquilhtamacuj, ¿tū ixpālacata lacasquiꞌnāꞌtit nacātaputzānaꞌniꞌyān chiꞌxcuhuīꞌn tī jā cālakachiꞌxcuhuīꞌcan na ixlacatīncaꞌn tī taꞌaꞌkaꞌīꞌ?
\v 5 Huāꞌmāꞌ iccāhuaniyān naꞌiccāmāmāxanīꞌyān. ¿Ē jā huīꞌlh chāꞌtin na milacpuꞌnaꞌiꞌtātcaꞌn tī tzē nacāputzānaꞌnīyān huiꞌxinaꞌn tī lītāꞌtimīn?
\v 6 Caꞌtzīyāꞌtit huīꞌlh. Chuntzaꞌ jā tze chī tlahuaꞌyāꞌtit aꞌcxniꞌ chāꞌtin tī aꞌkaꞌīꞌ ē namālacapūꞌ āꞌchāꞌtin xatāꞌtin ē nalacāxtlahuaꞌyāꞌtit na ixlacatīncaꞌn tī jā taꞌaꞌkaꞌīꞌ.
\p
\v 7 Lāmālacapūꞌyāꞌtit lītāꞌtimīn ē chuntzaꞌ tasuꞌyu jā mākentaxtūyāꞌtit ixtalacasquiꞌnīn Dios ē lhūhuaꞌcus cāsputniꞌyān. Ixlīpātītit tū jā tze tū cātatlahuaniꞌn. Ixtāyaꞌniꞌtit chī cātaꞌaꞌkskāhuīꞌmaktīn.
\v 8 Huiꞌxinaꞌn lātlahuaꞌniꞌyāꞌtit tū jā tze ē cāꞌaꞌkskāhuīꞌmaktīyāꞌtit masqui mintāꞌtincaꞌn.
\p
\v 9 ¿Ē jā caꞌtzīyāꞌtit tī tatlahua tū jā tze, xlacaꞌn jāla catitatanūlh jā Dios māpaꞌksīniꞌnkōꞌ? Jā titaꞌaꞌkskāhuīꞌyāꞌtit minaꞌcstucaꞌn. Tī takaꞌlhī ixtāꞌlāpāxquīꞌncaꞌn ē tī tatlahua tū jā tze ē tī talaktaquilhpūta ídolos, xlacaꞌn jāla catitatanūlh jā Dios māpaꞌksīniꞌnkōꞌ. Nā tī talātahuiꞌlānaꞌlh līlacchiꞌxcuhuīꞌn ē tī tala līpuscāt, xlacaꞌn jāla catitatanūlh jā Dios māpaꞌksīniꞌnkōꞌ.
\v 10 Nā tī takaꞌlhānaꞌn ē tī talakcaꞌtzan catūhuālh ē tī takaꞌchī jāla catitatanūlh jā Dios māpaꞌksīniꞌnkōꞌ. Nā tī talakapalanaꞌn ē tī taꞌaꞌkskāhuīꞌmaktīniꞌn catūhuālh jāla catitatanūlh jā Dios māpaꞌksīniꞌnkōꞌ. Nūn tī chāꞌtin xlacaꞌn catitatanūlh jā Dios māpaꞌksīniꞌnkōꞌ.
\v 11 Chuntzaꞌ ixtlahuaꞌyāꞌtit makapitzīn huiꞌxinaꞌn. Chuhuaꞌj Dios cālacsacnīꞌtaꞌn ē cāxapaniꞌnīꞌtaꞌn mincuentacaꞌn ē lacasquiꞌn natlahuaꞌyāꞌtit ixtalacasquiꞌnīn. Chuhuaꞌj Dios cālaktzīꞌnān lacuantzaꞌ huiꞌxinaꞌn ixpālacata ixlītliꞌhuiꞌqui quiMāpaꞌksīniꞌcaꞌn Jesucristo ē ixpālacata ixlītliꞌhuiꞌqui ixEspíritu quinDioscaꞌn.
\s Ixlacasquiꞌnca Dios namāpaꞌksī quimacniꞌcaꞌn
\p
\v 12 Tzē naꞌicuan: “Ickaꞌlhī līmāpaꞌksīn ē tzē naꞌictlahua ixlīpōꞌktu catūhuālh tū iclacasquiꞌn.” Masqui xaꞌicuanli, jā ixlīpōꞌktu tū ictlahuacuꞌtun nacāmaktāya āꞌmakapitzīn. Tzē naꞌicuan: “Tzē naꞌictlahua catūxcuhuālh tū iclacasquiꞌn. Masqui xaꞌicuanli, jā ictlahuacuꞌtun catūhuālh tū jāla naꞌicmakxteka āꞌlīstān ē ūꞌtzaꞌ naquilīskāhuīꞌ.”
\v 13 Nā nahuancan: “Quimpāncaꞌn maclacasquiꞌn līhuaꞌ ē huīꞌlh līhuaꞌ ixpālacata quimpāncaꞌn”, nahuancan. Chī kempātuꞌ jā catitatāyaniꞌlh pōꞌktu quilhtamacuj. Namin aꞌktin quilhtamacuj aꞌcxniꞌ Dios nacāmālakuanī chī kempātuꞌ. Dios tlahualh quimacniꞌcaꞌn nalīlakachiꞌxcuhuīꞌyāuj xlaꞌ. Xlaꞌ quincāmaxquīꞌyān tū maclacasquiꞌn quimacniꞌcaꞌn. Jā lacasquiꞌn nalītlahuayāuj tū jā tze quimacniꞌcaꞌn.
\v 14 Chuntzaꞌ chī Dios mālacastālancuanīlh ixmacniꞌ Māpaꞌksīniꞌ Jesucristo nā chuntzaꞌ nalīmālacastālancuanī quimacniꞌcaꞌn ixlītliꞌhuiꞌqui.
\p
\v 15 ¿Ē jā caꞌtzīyāꞌtit quimacniꞌcaꞌn tāꞌtapaꞌksī Cristo? Quimacniꞌ tū tapaꞌksīniꞌ Cristo, ¿chī naꞌiclītāꞌtalacxtimī chāꞌtin puscāt xalaꞌ nac cāꞌtejen? Jā maktin ictitlahualh.
\v 16 ¿Ē jā caꞌtzīyāꞌtit aꞌcxniꞌ chāꞌtin chiꞌxcuꞌ tāꞌtalacxtimī chāꞌtin puscāt tī xalaꞌ nac cāꞌtejen chu aꞌktin macniꞌ natahuan aꞌcxniꞌ natāꞌtalacxtimī? Chuntzaꞌ tatzoꞌkniꞌ na ixtachihuīn Dios:
\q Ixchāꞌtuꞌcaꞌn chu aꞌktin macniꞌ natahuan.
\m
\v 17 Aꞌcxniꞌ natamacamāstāꞌniꞌyaꞌ Jesús, minchāꞌtuꞌcaꞌn nalītaxtuyāꞌtit chu aꞌktin līstacnaꞌ.
\p
\v 18 Jā catlahuaꞌtit tū jā tze. Aꞌcxniꞌ chāꞌtin kaꞌlhī ixtāꞌlāpāxquīꞌn, xlaꞌ ixaꞌcstu lactlahua ixmacniꞌ.
\v 19 Caꞌtzīyāꞌtit Dios cāmaxquīꞌnīꞌtaꞌn Espíritu Santo ē chī xlaꞌ tanūmāꞌlh na milīstacnaꞌcaꞌn, chuntzaꞌ mimacniꞌcaꞌn lanīꞌt ixtemplo Espíritu Santo. Ixlacasquiꞌnca Dios namāpaꞌksīniꞌn aꞌntzaꞌ. Huiꞌxinaꞌn jā tapaꞌksīyāꞌtit mēꞌcstucaꞌn; tapaꞌksīniꞌyāꞌtit Dios.
\v 20 Tapalaxlaꞌ cālītamāhuanīꞌtaꞌn aꞌcxniꞌ Jesucristo xokolh nac cruz. Ūꞌtzaꞌ tū lītlahuaꞌyāꞌtit mimacniꞌcaꞌn calīlakachiꞌxcuhuīꞌtit Dios ixpālacata tapaꞌksīniꞌyāꞌtit Dios.
\c 7
\s Ixpālacata chī tamakaxtokcan
\p
\v 1 Tū quilātzoꞌknuniꞌuj, chuhuaꞌj iccākelhtīyān. Tze palh chāꞌtin chiꞌxcuꞌ jā maktin tāꞌtalacxtimī chāꞌtin puscāt.
\v 2 Masqui tze chuntzaꞌ, ixpālacata lhūhuaꞌ aꞌnan tī takaꞌlhī ixtāꞌlāpāxquīꞌncaꞌn, cakaꞌlhīlh chāꞌtin chiꞌxcuꞌ xmān chāꞌtin ixpuscāt ē chāꞌtin puscāt cakaꞌlhīlh xmān chāꞌtin ixkōluꞌ.
\v 3 Camākentaxtūlh chāꞌtunuꞌ chiꞌxcuhuīꞌn tū ixlacasquiꞌnca ixpālacata ixpuscātcaꞌn. Chuntzaꞌ chāꞌtunuꞌ puscan camākentaxtūlh tū ixlacasquiꞌnca ixpālacata ixkōluꞌcaꞌn.
\v 4 Puscāt jātzaꞌ ixlīmān māpaꞌksī ixmacniꞌ; ixkōluꞌ nā tāꞌmāpaꞌksī. Nā chuntzaꞌ chiꞌxcuꞌ jātzaꞌ ixlīmān māpaꞌksī ixmacniꞌ; nā īxpuscāt tāꞌmāpaꞌksī.
\v 5 Palh chiꞌxcuꞌ ē ixpuscāt āꞌchulāꞌ natatlahuacuꞌtun oración, tzē natachihuīnaꞌn jā natalātāꞌlhtata jā aꞌklhūhuaꞌ quilhtamacuj, ē jā makās. Palh makās jā natalātāꞌlhtata, skāhuīꞌniꞌ nacālīlaktzīꞌncuꞌtun ixpālacata jā catitatāyaniꞌlh.
\p
\v 6 Ūꞌtzaꞌ huāꞌmāꞌ iccāhuaniyān tzē tlahuacan. Jā iccāmāpaꞌksīmāꞌn.
\v 7 Iclacasquiꞌn ixlīpōꞌktucaꞌn tachiꞌxcuhuīꞌt ixtalalh chuntzaꞌ chī quit. Dios cāmaxquīꞌ chāꞌtunuꞌ chiꞌxcuhuīꞌn chī tzē natalatāꞌkchoko. Chāꞌtin tzē natlahua catūhuālh ē āꞌchāꞌtin natlahua tū āꞌxtum. Chāꞌtin natamakaxtoka ē āꞌchāꞌtin jā ixlacasquiꞌnca natamakaxtoka.
\p
\v 8 Iccāhuaniyān huiꞌxinaꞌn tī jā āꞌtamakaxtokaꞌtit ē tī cānīmakaꞌncanīꞌttzaꞌ, tze palh natahuiꞌlaꞌyāꞌtit chuntzaꞌ chī quit.
\v 9 Palh chāꞌtin jā catitāyaniꞌlh ixlīmān, xatze catamakaxtokli ixpālacata jā pōꞌktu quilhtamacuj nalacapāstaca tū lacasquiꞌn ixmacniꞌ.
\p
\v 10 Huiꞌxinaꞌn tī tamakaxtoknīꞌtaꞌntittzaꞌ, iccāmāpaꞌksīyān ē jā xmān quit. Nā Māpaꞌksīniꞌ nā xlaꞌ cāmāpaꞌksīyān jā catitamakxtekli ixkōluꞌcaꞌn puscan.
\v 11 Palh makxteknīꞌttzaꞌ ixkōluꞌ chāꞌtin puscāt, catahuiꞌlh ixlīmān o catāꞌtahuiꞌlapālh ixkōluꞌ. Chiꞌxcuꞌ jā catimakxtekli ixpuscāt.
\p
\v 12 Chuhuaꞌj xmān quit iccāhuaniyān āꞌmakapitzīn huiꞌxinaꞌn ē jātzaꞌ Māpaꞌksīniꞌ. Palh chāꞌtin chiꞌxcuꞌ aꞌkaꞌīꞌniꞌ ixtachihuīn Dios ē ixpuscāt jā aꞌkaꞌīꞌ, jā catimakxtekli ixpuscāt palh xlaꞌ tāꞌtahuiꞌlacuꞌtun.
\v 13 Chāꞌtin puscāt tī aꞌkaꞌīꞌ, jā catimakxtekli ixkōluꞌ tī jā aꞌkaꞌīꞌ palh xlaꞌ tāꞌtahuiꞌlacuꞌtun.
\v 14 Masqui chiꞌxcuꞌ jā aꞌkaꞌīꞌniꞌ Dios, ixpālacata ixpuscāt tī aꞌkaꞌīꞌ, māxtumlīcanīꞌt chiꞌxcuꞌ ē tzē nala ixlaꞌ Dios. Nā puscāt tī jā aꞌkaꞌīꞌ māxtumlīcanīꞌt ē tzē nala ixlaꞌ Dios ixpālacata ixkōluꞌ tī aꞌkaꞌīꞌ. Palh jā chuntzaꞌ cahuālh, mincamanaꞌcaꞌn ixtalalh huaꞌchi tī jā taꞌaꞌkaꞌīꞌ. Chuhuaꞌj laktzīꞌncan huaꞌchi tī taꞌaꞌkaꞌīꞌ.
\v 15 Chiꞌxcuꞌ tī jā aꞌkaꞌīꞌ ē palh makxtekcuꞌtun ixpuscāt, camakxtekli naꞌaꞌn. Puscāt tī jā aꞌkaꞌīꞌ ē palh makxtekcuꞌtun ixkōluꞌ, camakxtekli naꞌaꞌn. Dios lacasquiꞌn tze calatahuiꞌlauj quinaꞌn.
\v 16 ¿Chi līcaꞌtzīyaꞌ, puscāt, palh tzē namakapūtaxtūcan minkōluꞌ? ¿Ē chī līcaꞌtzīyaꞌ, chiꞌxcuꞌ, palh tzē namakapūtaxtūcan mimpuscāt?
\p
\v 17 Chuntzaꞌ chī ixuiꞌla aꞌcxniꞌ pūla aꞌkaꞌīꞌnīꞌtaꞌ, chuntzaꞌ catahuiꞌla, xmān nalatāꞌkchokoyaꞌ chī Dios lacasquiꞌn. Ūꞌtzaꞌ icmāsuꞌyu na ixlīpōꞌktu templo.
\v 18 Palh huiꞌx xatachuꞌcutzaꞌ chī cālīlakapascan israelitas aꞌcxniꞌ pūla aꞌkaꞌīꞌniꞌnīꞌtaꞌ ixtachihuīn Dios, chuntzaꞌ catahuiꞌla. Palh jā xatachuꞌcutzaꞌ aꞌcxniꞌ pūla aꞌkaꞌīꞌnīꞌtaꞌ, nā chuntzaꞌ catahuiꞌla.
\v 19 Palh xatachuꞌcutzaꞌ o palh jā xatachuꞌcu, xlaꞌ jā tū huanicuꞌtun. Tū āꞌchulāꞌ ixlacasquiꞌnca, ūꞌtzaꞌ tlahuacan ixtalacasquiꞌnīn Dios.
\v 20 Chāꞌtunuꞌ calātachokolh na ixtascujūt tū ixkaꞌlhī aꞌcxniꞌ pūla aꞌkaꞌīꞌniꞌlh ixtachihuīn Dios.
\v 21 Palh xatastāꞌmaka tasācuaꞌ ixuaꞌnīꞌtaꞌ aꞌcxniꞌ aꞌkaꞌīꞌnīꞌta, jā tilīpuhuaꞌnaꞌ. Palh mintēcu namakxtekāniꞌ, capit.
\v 22 Tī tasācuaꞌ ixuanīꞌt aꞌcxniꞌ aꞌkaꞌīꞌlh, ūꞌtzaꞌ Dios laktzīꞌn huaꞌchi jā tasācuaꞌ ixuanīꞌt. Tī jā xatastāꞌmaka tasācuaꞌ ixuanīꞌt aꞌcxniꞌ aꞌkaꞌīꞌlh, ūꞌtzaꞌ nahuan xatastāꞌmaka ixtasācuaꞌ Cristo.
\v 23 Tāꞌtimīn, Dios xlaꞌ tapalaxlaꞌ cālītamāhuanīꞌtaꞌn ixpālacata Jesucristo xokolh nac cruz. Ūꞌtzaꞌ jā catilītamakxtektit nacātamāpaꞌksīyān chiꞌxcuhuīꞌn. Xmān Dios nacāmāpaꞌksīyān.
\v 24 Tāꞌtimīn, chuntzaꞌ chī ixuanīꞌtaꞌntit aꞌcxniꞌ aꞌkaꞌīꞌtit, chuntzaꞌ natahuiꞌlayāꞌtit masqui tamakaxtoknīꞌtaꞌntittzaꞌ o jānaꞌj āꞌtamakaxtokatit, ē masqui xatastāꞌmaka tasācuaꞌ o jā tasācuaꞌ. Xmān chuhuaꞌj ixlacasquiꞌnca Dios nacāmākextimīyān.
\p
\v 25 Masqui Māpaꞌksīniꞌ jā quimaxquīꞌlh līmāpaꞌksīn ixpālacata tī jānaꞌj āꞌtamakaxtoka, tzē naꞌaꞌkaꞌīꞌniꞌyāꞌtit tū iccāhuaniyān ixpālacata Dios quilakalhuꞌmanli ē quilacsacli.
\v 26 Icpuhuan tze palh chāꞌtunuꞌ ixtahuīꞌlh chuntzaꞌ chī quit icuīꞌlh. Chuntzaꞌ tze ixpālacata mimāꞌlh aꞌktin quilhtamacuj tū napūpātīniꞌnāuj.
\v 27 Palh kaꞌlhīꞌyaꞌ mimpuscāt, jā catimakxtekti ē palh jā kaꞌlhīꞌyaꞌ mimpuscāt, jā caputza.
\v 28 Palh natamakaxtokcuꞌtunaꞌ, ūꞌtzaꞌ tze. Palh chāꞌtin tzuꞌmaꞌjāt natamakaxtokcuꞌtun, ūꞌtzaꞌ tze. Masqui tze, āꞌchulāꞌ jisclīhuaꞌ ixpālacatacaꞌn xlacaꞌn tī tatamakaxtoknīꞌttzaꞌ aꞌcxniꞌ namin huāꞌmāꞌ quilhtamacuj. Quit jā iclacasquiꞌn napātīniꞌnāꞌtit.
\p
\v 29 Tāꞌtimīn, jātzaꞌ makās natahuiꞌlayāuj nac cāꞌquilhtamacuj. Ūꞌtzaꞌ iccālīhuaniyān tī kaꞌlhī ixpuscāt catāꞌscujli Dios huaꞌchi jā ixkaꞌlhīlh.
\v 30 Jātzaꞌ makās nasputa huāꞌmāꞌ cāꞌquilhtamacuj. Jātzaꞌ makās nacalhuaꞌnāꞌtit ē jātzaꞌ makās napāxuhuaꞌyāꞌtit ē jātzaꞌ makās natamāhuaꞌnaꞌnāꞌtit. Ūꞌtzaꞌ calīputzatit tū natāyaniꞌ pōꞌktu quilhtamacuj.
\v 31 Makapitzīn tī takaꞌlhī ixlīstāꞌcaꞌn, pōꞌktu quilhtamacuj talacapāstacmāꞌnalh ixlīstāꞌcaꞌn. Huiꞌxinaꞌn tī aꞌkaꞌīꞌyāꞌtit, jā chuntzaꞌ calītaxtutit chī xlacaꞌn. Tū xalaꞌ nac cāꞌquilhtamacuj jā catitāyaniꞌlh.
\p
\v 32 Jā iclacasquiꞌn huiꞌxinaꞌn tū nalīꞌāꞌktuyunaꞌntit. Chiꞌxcuꞌ tī jā āꞌtamakaxtoka, xlaꞌ cuenta natlahua chī tzē namakapāxuhua Māpaꞌksīniꞌ.
\v 33 Chiꞌxcuꞌ tī tamakaxtoknīꞌttzaꞌ jā xmān lacapāstaca Dios; nā lacapāstaca tū xalaꞌ nac cāꞌquilhtamacuj ixpālacata ixfamilia. Cuenta tlahua chī namakapāxuhua ixpuscāt. Chuntzaꞌ kempātuꞌ ixtalacapāstacniꞌ.
\v 34 Tzuꞌmaꞌjāt tī jā āꞌtamakaxtoka o puscāt tī jātzaꞌ kaꞌlhī ixkōluꞌ, ūꞌtzaꞌ tzē cuenta natlahua chī nalītlahua ixtalacasquiꞌnīn Māpaꞌksīniꞌ. Pōꞌktu tū natlahua ē tū nalacapāstaca nalīlakachiꞌxcuhuīꞌ Dios. Puscāt tī tamakaxtoknīꞌttzaꞌ jā xmān lacapāstaca Dios. Nā lacapāstaca tū xalaꞌ nac cāꞌquilhtamacuj ixpālacata ixfamilia. Nā cuenta tlahua chī namakapāxuī ixkōluꞌ.
\p
\v 35 Ūꞌtzaꞌ iccāhuaniyān ixpālacata iccāmaktāyacuꞌtunān. Jā iccāhuiꞌlīniꞌcuꞌtunān chuntzaꞌ chī aꞌcxniꞌ cāꞌaꞌksuꞌyucan cahuāyuj. Iclacasquiꞌn pōꞌktu quilhtamacuj natlahuaꞌyāꞌtit tū tze ixpālacata xmān mākentaxtūcuꞌtunāꞌtit ixtalacasquiꞌnīn Dios.
\p
\v 36 Palh chāꞌtin chiꞌxcuꞌ lacpuhuan jā tze ixpālacata jā āꞌtamakaxtoka ixtzuꞌmaꞌjāt ē xlaꞌ kaꞌtlaꞌtzaꞌ ē ixlacasquiꞌncatzaꞌ natamakaxtoka, catlahualh tū lacasquiꞌn. Jā tlahuamāꞌlh tū jā tze. Camāmakaxtokli ixtzuꞌmaꞌjāt.
\v 37 Palh chāꞌtin chiꞌxcuꞌ līhuiꞌlīnīꞌt jā catimāmakaxtokli ixtzuꞌmaꞌjāt ē lacpuhuan jā ixlacasquiꞌnca natamakaxtoka ixtzuꞌmaꞌjāt, ūꞌtzaꞌ tze. Māpaꞌksī xatātaꞌ jā camāmakaxtokli.
\v 38 Chuntzaꞌ tī māmakaxtoka ixtzuꞌmaꞌjāt, tze tlahua, ē āꞌchulāꞌ tze tlahua tī jā māmakaxtoka ixtzuꞌmaꞌjāt.
\p
\v 39 Puscāt jāla catimakxtekli ixkōluꞌ palh huīꞌlhcus. Palh nīnīꞌttzaꞌ ixkōluꞌ, tzē natamakaxtokpala āꞌmaktin, xmān ixlacasquiꞌnca ūꞌtzaꞌ tī aꞌkaꞌīꞌniꞌ ixtachihuīn Dios.
\v 40 Quit icpuhuan āꞌchulāꞌ napāxuhua palh jātzaꞌ natamakaxtoka. Icpuhuan chuntzaꞌ quimāsuꞌyuniꞌlh Espíritu Santo.
\c 8
\s Līhuaꞌ tū cālakahuiꞌlīcan ídolos
\p
\v 1 Chuhuaꞌj iccāhuaniyān ixpālacata līhuaꞌ tū cālakahuiꞌlīcanīꞌt ídolos. Huiꞌxinaꞌn huaꞌnāꞌtit: “Quilīpōꞌktucaꞌn lacacaꞌtzīyāuj ē kaꞌlhīyāuj talacapāstacniꞌ”, huaꞌnāꞌtit. Quit iccāhuaniyān: “Calacapāstactit. Kaꞌtlaꞌ makcaꞌtzīcan palh xmān kaꞌlhīcan lhūhuaꞌ talacapāstacniꞌ.” Tū cāmaktāyayān milīpōꞌktucaꞌn, ūꞌtzaꞌ palh lāpāxquīꞌcan.
\v 2 Palh chāꞌtin lacpuhuan cāꞌtzī catūhuālh, xlaꞌ jānaꞌj caꞌtzī chī ixlacasquiꞌnca nacaꞌtzī.
\v 3 Palh chāꞌtin pāxquīꞌ Dios, Dios caꞌtzī palh xlaꞌ tapaꞌksīniꞌ.
\p
\v 4 Iccāhuaniyān ixpālacata līhuaꞌ tū cālakahuiꞌlīcanīꞌt ídolos. Quinaꞌn caꞌtzīyāuj ídolo jā lakahuan ē xmān huīꞌlh chāꞌtin Dios tī xalakahuan.
\v 5 Huīꞌlh tī cāmāpācuhuīcan dioses nac aꞌkapūn o nac cāꞌtiꞌyaꞌtnaꞌ. Masqui huancan lhūhuaꞌ huīꞌlh dioses ē lhūhuaꞌ māpaꞌksīniꞌnīꞌn,
\v 6 quinaꞌn caꞌtzīyāuj xmān chāꞌtin quinDioscaꞌn ē ūꞌtzaꞌ tī xaTātaꞌ. Xlaꞌ cāmālacatzuculh ixlīpōꞌktu catūhuālh. Quinaꞌn huiꞌlānaꞌuj namākaꞌtlīꞌyāuj ē nalakachiꞌxcuhuīꞌyāuj. Quinaꞌn caꞌtzīyāuj xmān chāꞌtin Māpaꞌksīniꞌ Jesucristo ē xlaꞌ cācāxuiꞌlīkōꞌlh ixlīpōꞌktu catūhuālh ē quinaꞌn huiꞌlānaꞌuj ixpālacata.
\p
\v 7 Jā tacaꞌtzī huāꞌmāꞌ ixlīpōꞌktucaꞌn tī taꞌaꞌkaꞌīꞌ. Makapitzīn tapuhuan tatlahua tū jā tze aꞌcxniꞌ tahuaꞌ quinīt tū lakahuiꞌlīcanīꞌt ídolos. Ūꞌtzaꞌ tapuhuan ixpālacata xapūla ixtalaktaquilhpūta ídolos aꞌcxniꞌ jānaꞌj ixtaꞌaꞌkaꞌīꞌ. Hasta chuhuaꞌj chuntzaꞌ tapuhuan huāꞌmāꞌ quinīt ixlaꞌ ídolo. Tahuan jā tze palh huaꞌcan ixpālacata xlacaꞌn jānaꞌj tacaꞌtzī tū tze ē tū jā tze.
\v 8 Quinīt jā quincālactlahuayān na ixlacatīn Dios. Chu lacxtim chī quincālaktzīnān masqui nahuaꞌyāuj quinīt tū ixlaꞌ ídolo ē masqui jā nahuaꞌyāuj.
\v 9 Ixlacasquiꞌnca cuenta natlahuaꞌyāꞌtit tū tlahuaꞌpāꞌnaꞌntit ixpālacatacaꞌn tī jānaꞌj tzej taꞌaꞌkaꞌīꞌ ē jā namātlahuīꞌyāꞌtit tū jā tze āꞌchāꞌtin.
\v 10 Huiꞌx caꞌtzīyaꞌ ē palh nahuāꞌyaꞌnaꞌ aꞌntzaꞌ jā laktaquilhpūtacan ídolos, palhāsāꞌ nalaktzīꞌnān chāꞌtin ti aꞌkaꞌīꞌ ē jānaꞌj caꞌtzī tū tze ē tū jā tze. Huiꞌx tzej caꞌtzīyaꞌ, ē aꞌcxniꞌ xlaꞌ nalaktzīꞌnāꞌn nalīhuiꞌlī nahuaꞌ tū lakahuiꞌlīcanīꞌt ídolos masqui makcaꞌtzī tlahuamāꞌlh tū jā tze.
\v 11 Chuntzaꞌ mintāꞌtin tī jā tzej aꞌkaꞌīꞌ, natlahua tū jā tze. Chuntzaꞌ natamakahuasa ixpālacata tū huiꞌx tlaꞌhuaꞌyaꞌ. Cristo nīlh ixpālacata mintāꞌtin.
\v 12 Chuntzaꞌ huiꞌx tlahuaniꞌpāꞌt tū jā tze Cristo aꞌcxniꞌ māmakchuyīyaꞌ mintāꞌtin ixpālacata tū puhuan xlaꞌ ē chuntzaꞌ mātlahuīꞌyaꞌ tū jā tze.
\v 13 Palh nalītamakahuasa chāꞌtin quintāꞌtin ixpālacata quinīt tū icuaꞌ, jā maktin ictihuaꞌlh quinīt.
\c 9
\s Tū tzē ixtatlahua apóstoles
\p
\v 1 Caꞌtzīyāꞌtit quit apóstol ē quit libre. ¿Ē jā iclaktzīꞌnīꞌt quiMāpaꞌksīniꞌcaꞌn Jesucristo? Quit iccāmāsuꞌyuniꞌn chī Dios quimacamaxquīꞌnīꞌt ē ūꞌtzaꞌ līꞌaꞌkaꞌīꞌtit.
\v 2 Masqui na ixlacatīncaꞌn āꞌmakapitzīn quit jā apóstol, huiꞌxinaꞌn jāla catihuaꞌntit chī xlacaꞌn. Huiꞌxinaꞌn aꞌkaꞌīꞌtit aꞌcxniꞌ iccāmāsuꞌyuniꞌn ixtachihuīn Dios ē chuntzaꞌ lītasuꞌyu quit apóstol.
\p
\v 3 Aꞌcxniꞌ quinaꞌksaꞌncan, ictamaktāya ē chuntzaꞌ iccākelhtī:
\v 4 ¿Ē jā ixlacasquiꞌnca palh naquintamāhuīꞌ tī iccāmāsuꞌyuniꞌ?
\v 5 ¿Ē jā ickaꞌlhī talacasquiꞌnīꞌn lacxtim naꞌictlahua chī āꞌmakapitzīn apóstoles aꞌcxniꞌ icmāsuꞌyu ixtachihuīn Dios? Chāꞌtunuꞌ nalēꞌn ixpuscāt aꞌcxniꞌ naꞌaꞌn calhāxcuhuālh namāsuꞌyu ixtachihuīn Dios. Chuntzaꞌ tatlahua āꞌmakapitzīn apóstoles ē ixtāꞌtimīn Jesús ē nā Pedro.
\v 6 ¿Ē xmān quit ē Bernabé jāla iccāmakxtekāuj naquincātamāhuīꞌyān? ¿Ē ixlacasquiꞌnca xmān quinaꞌn icscujāuj naꞌicxokoyāuj quilīhuaꞌtcaꞌn?
\v 7 Tī tanū ixlīsoldado, ¿ē jā xokocan? Tī chaꞌn pūlactin tachaꞌnān, xlaꞌ tzē nahuaꞌ ixtahuaꞌcaꞌt. Ē tī cāmaktakaꞌlha purecuꞌ, xlaꞌ nahuaꞌ xaquinīt.
\v 8 Tū iccāhuaniyān jā xmān ixtalacapāstacniꞌcaꞌn chiꞌxcuhuīꞌn. Nā chuntzaꞌ na ixlīmāpaꞌksīn Moisés.
\v 9 Chuntzaꞌ tatzoꞌkniꞌ na ixtachihuīn Dios jā huanican līmāpaꞌksīn:
\q Jā caquilhuiꞌliꞌ ixbosal minanimalh tū lacchiꞌntamāꞌlh trigo tū lītlahuacan harina.
\q Namakxtekaꞌ nahuaꞌ.
\m Jā xmān ixpālacata animalh līhuanli Dios chuntzaꞌ.
\v 10 Nā huanli quimpālacatacaꞌn. Tī cuxtu ē tī chaꞌn chu lacxtim takaꞌlhīmāꞌnalh hasta aꞌcxniꞌ nalanānaꞌn ē natahuaꞌ xatzaꞌktzaꞌ.
\v 11 Palh quinaꞌn iccāmāsuꞌyuniꞌyān ixtachihuīn Dios tū tāyaniꞌ pōꞌktu quilhtamacuj, ¿ē kaꞌtlaꞌ catūhuālh palh naquilāmaxquīꞌyāuj macstiꞌnaꞌj tū huiꞌxinaꞌn kaꞌlhīꞌyāꞌtit ē tū jā tāyaniꞌ pōꞌktu quilhtamacuj?
\v 12 Palh cāmāpitziniꞌyāꞌtit āꞌmakapitzīn mimākelhtahuaꞌkēꞌniꞌcaꞌn, āꞌchulāꞌ ixquilāmāpitziniꞌuj quinaꞌn. Quinaꞌn āꞌchulāꞌ ickaꞌlhīyāuj talacasquiꞌnīꞌn. Quinaꞌn jā maktin iccāsquiꞌniꞌn iꞌxquilāmāpitziniꞌuj.
\p Xatze quinaꞌn ictāyaniꞌuj ixlīpōꞌktu ixpālacata jā naꞌaꞌnan tū nacāmāmakchuyī tī nataꞌaꞌkaꞌīꞌ xatze tachihuīn ixlaꞌ Jesucristo.
\v 13 ¿Ē jā caꞌtzīyāꞌtit tī tamaktāyanaꞌn xakaꞌtlaꞌ na ixtemplocaꞌn israelitas, xlacaꞌn natahuaꞌ tū līmincanīꞌt nac templo? Tī natamaktāyanaꞌn nac pūmacamāstāꞌn, xlacaꞌn nā natahuaꞌ macstiꞌnaꞌj tū huiꞌlīnicanīꞌt nac pūmacamāstāꞌn.
\v 14 Chuntzaꞌ chī ixpālacata mākelhtahuaꞌkēꞌniꞌ. Tī tascaꞌtmāꞌnalh ixtachihuīn Dios natamāhuīꞌ tī cāmāsuꞌyuniꞌmāꞌlh. Chuntzaꞌ huanli Māpaꞌksīniꞌ.
\v 15 Quit jā iccāsquiꞌniꞌnīꞌtaꞌn naquilāmaxquīꞌyāuj tū icmaclacasquiꞌn. Quit jā iccātzoꞌknuniꞌmāꞌn natzucuyāꞌtit naquilāmaxquīꞌyāuj tū icmaclacasquiꞌn. Xatze xaꞌicnīlh ē jā naquimaktīcan tū kaꞌtlaꞌ iclīmakcaꞌtzī. Ūꞌtzaꞌ kaꞌtlaꞌ iclīmakcaꞌtzī: Jā maktin iccāsquiꞌniꞌnīꞌtāꞌn tū icmaclacasquiꞌn.
\p
\v 16 Masqui icmāsuꞌyu ixtachihuīn Dios, jāla kaꞌtlaꞌ iclīmakcaꞌtzī ixpālacata chuntzaꞌ quimacamaxquīꞌca. Koxaꞌ ictila palh jā naꞌicmāsuꞌyu ixtachihuīn Dios.
\v 17 Palh xaꞌicmāsuꞌyulh ixtachihuīn Dios ixpālacata chuntzaꞌ quintapuhuān, quintapāxuhuān ixlanīꞌt huaꞌchi quintatlaj. Quit ixlacasquiꞌnca naꞌicmāsuꞌyu ixtachihuīn Dios. Ūꞌtzaꞌ quimacamaxquīꞌca.
\v 18 ¿Tūchu quintatlaj? Ūꞌtzaꞌ huāꞌmā: Libre quit ē jā iccāmātaꞌjīyān aꞌcxniꞌ iccāmāsuꞌyuniꞌyān ixtachihuīn Dios masqui tzē xaꞌiccāsquiꞌniꞌn catūhuālh.
\p
\v 19 Jā tu īcmaklaclēꞌn chāꞌtin chiꞌxcuꞌ ē chuntzaꞌ jā tī chāꞌtin chiꞌxcuꞌ tzē naquimāpaꞌksī. Chuntzaꞌ libre quit. Masqui libre quit, iclītaxtu huaꞌchi ixtasācuaꞌcaꞌn ixlīpōꞌktucaꞌn tachiꞌxcuhuīꞌt. Chuntzaꞌ naquintakexmata aꞌcxniꞌ naꞌiccāmāsuꞌyuniꞌ ixtachihuīn Dios ē nataꞌaꞌkaꞌīꞌ.
\v 20 Na ixlacpuꞌnaꞌiꞌtātcaꞌn israelitas quit iclatāꞌkchokolh huaꞌchi israelita ē chuntzaꞌ natalīꞌaꞌkaꞌīꞌ. Na ixlacpuꞌnaꞌiꞌtātcaꞌn tī tamākentaxtūcuꞌtun ixlīmāpaꞌksīn Moisés quit iclatāꞌkchokolh huaꞌchi xaꞌicmākentaxtūcuꞌtunli līmāpaꞌksīn, masqui quit iccaꞌtzī jā ixlacasquiꞌnca naꞌicmākentaxtū līmāpaꞌksīn. Chuntzaꞌ palhāsāꞌ naꞌiccāmāꞌaꞌkaꞌīꞌnī xlacaꞌn tī tamākentaxtūcuꞌtun ixlīmāpaꞌksīn Moisés.
\v 21 Na ixlacpuꞌnaꞌiꞌtātcaꞌn tī jā talakapasa ixlīmāpaꞌksīn Moisés quit iclatāꞌkchokolh huaꞌchi ūꞌtunuꞌn. Masqui jā ixlacasquiꞌnca naꞌicmākentaxtū ixlīmāpaꞌksīn Moisés, ixlacasquiꞌnca naꞌicmākentaxtū ixlīmāpaꞌksīn Cristo. Chuntzaꞌ palhāsāꞌ naꞌiccāmāꞌaꞌkaꞌīꞌnī ixtachihuīn Dios tī jā talakapasa ixlīmāpaꞌksīn Moisés.
\v 22 Na ixlacpuꞌnaꞌiꞌtātcaꞌn xlacaꞌn tī jānaꞌj tacaꞌtzī tū tze o tū jā tze, iclatāꞌkchokolh huaꞌchi xlacaꞌn ixpālacata tzē naꞌiccāmāsuꞌyuniꞌ. Palhāsāꞌ naꞌiccāmāꞌaꞌkaꞌīꞌnī. Huaꞌchi catīhuālh chiꞌxcuꞌ iclatāꞌkchokolh ē chuntzaꞌ natakexmata tū icmāsuꞌyumāꞌlh ē nataꞌaꞌkaꞌīꞌ.
\v 23 Pōꞌktu huāꞌmāꞌ ictlahuamāꞌlh naꞌicmāsuꞌyu ixtachihuīn Dios. Chuntzaꞌ āꞌmakapitzīn naquintatāꞌpāxuhua ixpālacata Dios quincālakalhuꞌman.
\p
\v 24 Caꞌtzīyāꞌtittzaꞌ tī tatanū nac talālīskāhuīꞌ cuenta tatlahua chī natatuꞌjnun ixpālacata xmān chāꞌtin natlaja ixpremio. Chuntzaꞌ natlahuaꞌyāꞌtit. Cakexpatniꞌtit Dios natlaꞌjaꞌyāꞌtit.
\v 25 Tī tanūcuꞌtun nac talālīskāhuīꞌ ixlacasquiꞌnca nalaktahuakaꞌ ē tzej natamaktakaꞌlha. Tī natlaja, namaxquīꞌcan aꞌktin corona tū palaj nascāca. Tū naquincātamaxquīꞌyān quinaꞌn tī nalīhuiꞌlīyāuj natlahuayāuj ixtalacasquiꞌnīn Dios, xlaꞌ natāyaniꞌ pōꞌktu quilhtamacuj.
\v 26 Ūꞌtzaꞌ iclīhuiꞌlīlh ictlahua ixtalacasquiꞌnīn Dios ē iclīhuiꞌlīlh naꞌictlaja. Quit ixlīcānaꞌ iclīhuiꞌlīlh ictlaja. Quit ja huaꞌchi tī tucsnuꞌncuꞌtun ē xmān nac ūꞌniꞌ tētaxtu.
\v 27 Quit iclīhuiꞌlīlh ictlahua ixtalacasquiꞌnīn Dios ē quit icmakapātīnīn quimacniꞌ. Chuntzaꞌ tzē naꞌiclīmāpaꞌksī quimacniꞌ. Chuntzaꞌ ictlahua ixpālacata jā tze palh quinaꞌcstu quit jala icmākentaxtū ixtalacasquiꞌnīn Dios chuntzaꞌ chī iccāmāsuꞌyunilh āꞌmakapītzīn.
\c 10
\s Jā tze palh laktaquilhpūtacan ídolos
\p
\v 1 Jā iclacasquiꞌn napātzaꞌnkāꞌyāꞌtit tū cāꞌaꞌkspulalh quilakmakānīꞌn tī tatāꞌaꞌlh Moisés. Ixlīpōꞌktucaꞌn tastālaniꞌlh poklhnuꞌ tū Dios cāpūlaniꞌlh. Ē tatētaxtulh nac mar tū māpācuhuīcan Xatzuꞌtzoꞌko Mar.
\v 2 Xlacaꞌn tastālaniꞌlh poklhnuꞌ ē cātujan tatētaxtulh nac mar. Chuntzaꞌ huaꞌchi taꞌaꞌkpaxli aꞌntzaꞌ ē īꞌscujnuꞌnīꞌn Moisés tahuanli.
\v 3 Ixlīpōꞌktucaꞌn tahuaꞌlh maná. Ūꞌtzaꞌ līhuat tū Dios macamilh ixlakalīyān. Ixlīpōꞌktucaꞌn lacxtim tahuaꞌlh xcān tū Dios māxtulh nac chihuix.
\v 4 Huāꞌmāꞌ chihuix huaꞌchi Cristo tī cāmaxquīꞌlh ixlīpōꞌktu tū ixtamaclacasquiꞌn calhāxcuhuālh na ixtejcaꞌn.
\v 5 Masqui Dios tzej ixcāmaktakaꞌlha, xlacaꞌn jā tamakapāxuīlh ē ūꞌtzaꞌ ixtalīnītēlha nac cāꞌtzayaꞌnca tiꞌyaꞌt.
\p
\v 6 Tzamāꞌ tū cāꞌaꞌkspulalh quilakmakānīꞌn, pōꞌktu quincātamāsuꞌyuniꞌyān jā catilacasquinui tū jā tze chī xlacaꞌn talacasquiꞌnli.
\v 7 Makapitzīn xlacaꞌn tatatzokostaniꞌlh ídolo. Chuntzaꞌ tatzoꞌknīꞌt ixpālacatacaꞌn tī tatatzokostaniꞌlh ídolo:
\q Tachiꞌxcuhuīꞌt tatahuiꞌlalh ē tahuāꞌyalh ē takoꞌtnūlh.
\q Aꞌcxniꞌ tahuāꞌyankōꞌlh, tatzuculh talakastānaꞌn.
\m Jā catitatzokostaniꞌtit ídolos chī xlacaꞌn.
\v 8 Makapitzīn xlacaꞌn tatlahualh tū jā tze ē aꞌktin quilhtamacuj tanīlh puꞌxamatuꞌtun mil. Jā catitlahuaꞌtit tū jā tze chī xlacaꞌn tatlahualh.
\v 9 Makapitzīn xlacaꞌn tajicsmāhuīꞌlh Dios ē ūꞌtzaꞌ cālīlakxcamaknīlh lhūhuaꞌ lūhuaꞌ. Jā cajicsmāhuīꞌtit Māpaꞌksiniꞌ chī tatlahualh xlacaꞌn.
\v 10 Makapitzīn xlacaꞌn talīquilhnilh Moisés ē milh ángel tī cāmālaksputūkōꞌlh. Huiꞌxinaꞌn, jā catitlahuaꞌtit chī xlacaꞌn.
\p
\v 11 Ixlīpōꞌktu tū cāꞌaꞌkspulalh xlacaꞌn ūꞌtzaꞌ talīmāsuꞌyu quimpālacatacaꞌn. Tzoꞌkuiꞌlīca chī naquincātalīmācaꞌtzīnīyān chī natlahuayāuj quinaꞌn tī huiꞌlānaꞌuj aꞌcxniꞌ jātzaꞌ lakmaj nasputa tzamāꞌ cāꞌquilhtamacuj.
\v 12 Ūꞌtzaꞌ tī lacpuhuan tze xlaꞌ ē jā natlahua tū jā tze, cuenta catlahualh. Xamaktin tzē natlahua tū jā tze.
\v 13 Catūxcuhuālh tū naꞌaꞌkspulayān ūꞌtzaꞌ nalīlaktzīꞌnān ē ūꞌtzaꞌ chu lacxtim tū tzē naꞌaꞌkspula āꞌchāꞌtin. Tzē nalīpāhuaꞌnaꞌ Dios ixpālacata xlaꞌ jā catimakxtekli nalīlaktzīꞌncaꞌnaꞌ hasta aꞌcxniꞌ jātzaꞌ tāyaniꞌyaꞌ. Xlaꞌ namāhuixcānīyān ē chuntzaꞌ nalītāyaniꞌyaꞌ ē chuntzaꞌ nalīꞌaꞌkapūtaxtuyaꞌ.
\p
\v 14 Iccātzoꞌknuniꞌmāꞌn huāꞌmāꞌ ixpālacata iccāpāxquīꞌyān huiꞌxinaꞌn. Camakxtektit tū ixlaꞌ ídolos ē jā tilaktaquilhpūtayāꞌtit.
\v 15 Huiꞌxinaꞌn tzē lacapāstacnaꞌnāꞌtit. Capuhuaꞌntit minaꞌcstucaꞌn palh tze o jā tze tū iccāhuaniyān.
\v 16 Aꞌcxniꞌ huaꞌcan Santa Cena, māstāꞌyāuj tapāxcatcaꞌtzīn ixpālacata tū tojōmāꞌlh nac vaso. Quilīpōꞌktucaꞌn huaꞌyāuj tū tojōmāꞌlh. Ūꞌtzaꞌ huanicuꞌtun quinaꞌn tāꞌtalacxtimīyāuj Cristo tī makaꞌlh ixkaꞌlhniꞌ. Pāntzīn tū cheꞌkeyāuj ē huaꞌyāuj nā ūꞌtzaꞌ huanicuꞌtun tāꞌtalacxtimīuj Cristo ixpālacata quilīpōꞌktucaꞌn huaꞌuj ixmacniꞌ.
\v 17 Xmān mactin pāntzīn tū māpitzican, chuntzaꞌ quilīpōꞌktucaꞌn tī tapaꞌksīniꞌyāuj Cristo quinaꞌn chu aꞌktin macniꞌ lauj ixpālacata quilīpōꞌktucaꞌn huaꞌuj tzamāꞌ pāntzīn.
\p
\v 18 Capāstactit chī tatlahua tī cāmāpacuhuīcan israelitas. Aꞌcxniꞌ tahuaꞌ quinīt tū huiꞌlīcanīꞌt nac pūmacamāstāꞌn, tāꞌtalacxtimī Dios ixpālacata pūmacamāstāꞌn ixlaꞌ Dios.
\v 19 ¿Tūchu icmāsuꞌyumāꞌlh? ¿Ē iccāhuanimān ídolo kaꞌlhī ixlītliꞌhuiꞌqui o ixofrenda ídolo tzē nacāmaktāyayān?
\v 20 Jā chuntzaꞌ iccāhuanin. Iccāhuanicuꞌtunān tū talakahuiꞌlī ídolo tī jā israelitas, xlacaꞌn talakahuiꞌlīmāꞌnalh tū jā tzeya ūꞌnīꞌ tū cāmāpaꞌksī skāhuīꞌniꞌ. Jā talakahuiꞌlīmāꞌnalh Dios. Quit jā iclacasquiꞌn natāꞌtalacxtimīꞌyāꞌtit skāhuīꞌniꞌ.
\v 21 Palh tzej aꞌkaꞌīꞌyāꞌtit, jāla catipūkoꞌtnuꞌntit ixvasocaꞌn Māpaꞌksīniꞌ nac Santa Cena ē nā ixvasocaꞌn ídolos. Ē jāla catihuāꞌyantit na ixmesa Māpaꞌksīniꞌ nac Santa Cena ē nā na ixmesacaꞌn ídolos.
\v 22 ¿Ē huiꞌxinan palhāsāꞌ makasītzīꞌcuꞌtunāꞌtit Māpaꞌksīniꞌ? Āꞌchulāꞌ xlaꞌ māpaꞌksīniꞌn ē jā quinaꞌn.
\s Nacālacapāstacāuj āꞌmakapitzīn
\p
\v 23 Masqui tzē tlahuacan catūxcuhuālh, huiꞌlapālh catūhuālh tū jā minīꞌniꞌ tlahuacan ē jā cāmaktāya tī taꞌaꞌkaꞌīꞌniꞌ ixtachihuīn Dios.
\v 24 Jā catipuhuaꞌntit pōꞌktu: “¿Tūchu āꞌchulāꞌ tze quimpālacata?” Nā napuhuaꞌnāꞌtit: “¿Tūchu āꞌchulāꞌ tze ixpālacata āꞌchāꞌtin?”
\p
\v 25 Aꞌcxniꞌ tamāhuaꞌyaꞌ quinīt nac lītamāuj, jā catikelhasquiꞌniꞌ palh lakahuiꞌlīcanīꞌt ídolo. Tzē nahuaꞌyaꞌ ē jā tū tilacpuꞌhuaꞌnaꞌ.
\v 26 Dios tlahualh cāꞌquilhtamacuj ē ixlīpōꞌktu tū aꞌnan huāꞌtzāꞌ.
\p
\v 27 Palh chāꞌtin minamigo jā aꞌkaꞌīꞌniꞌ ixtachihuīn Dios ē tāꞌhuāꞌyancuꞌtunān ē palh pincuꞌtunaꞌ na ixchic, cahuaꞌt catūxcuhuālh tū namaxquīꞌcaꞌnaꞌ. Jā cakelhasquiꞌniꞌ palh lakahuiꞌlīcanīꞌt ídolo.
\v 28 Palh chāꞌtin nahuaniyān: “Huāꞌmāꞌ quinīt lakahuiꞌlīcanīꞌt ídolo”, jā catihuaꞌt ixpālacata tī mācaꞌtzīnīꞌyān. Palhāsāꞌ xlaꞌ lacpuhuan jāla huaꞌcan. Huiꞌx caꞌtzīyaꞌ jā tū catilīlanīꞌn palh nahuaꞌyaꞌ; tī mācaꞌtzīnīyān, xlaꞌ jā caꞌtzī.
\v 29 Ūꞌtza iclīhuanin jā cahuaꞌt ixpālacata tī mācaꞌtzīnīyān.
\p Chāꞌtin tzē nakelhasquiꞌnīniꞌn: “¿Tū iclītlahuaniꞌ cuenta tū lacpuhuan āꞌchāꞌtin ixpālacata tū tze ē tū jā tze aꞌcxniꞌ quit ictlahuacuꞌtun catūhuālh?
\v 30 Palh pūla naꞌicmaxquīꞌ tapāxcatcaꞌtzīn Dios aꞌcxniꞌ naꞌicuaꞌ catūxcuhuālh, ¿chī quilīchihuīnancan tū iclīmaxquīꞌnīꞌt tapāxcatcaꞌtzīn Dios?” Chuntzaꞌ tzē nakelhasquiꞌnīniꞌn.
\v 31 Chuntzaꞌ catūxcuhuālh tū natlahuaꞌyāꞌtit, ūꞌtzaꞌ natlahuaꞌyāꞌtit ixpālacata āꞌmakapitzīn natamakapāxuī Dios. Aꞌcxniꞌ huāꞌyaꞌmpāꞌnaꞌntit ē aꞌcxniꞌ koꞌtnuꞌnāꞌtit, natlahuaꞌyāꞌtit ixpālacata āꞌmakapitzīn natamakapāxuī Dios.
\v 32 Jā titlahuaꞌyāꞌtit jā tū tū nacāmāmakchuyīn israelitas nūn griegos nūn xlacaꞌn tī tatāꞌtapaꞌksī Dios.
\v 33 Quit iccālīmakapāxuīcuꞌtun ixlīpōꞌktucaꞌn tachiꞌxcuhuīꞌt catūxcuhuālh ictlahuamāꞌlh. Jā icputzamāꞌlh xmān tū tze quimpālacata; nā icputzamāꞌlh tū tze ixpālacata āꞌmakapitzīn ē chuntzaꞌ tzē natalīꞌaꞌkaꞌīꞌniꞌ ixtachihuīn Dios ē nacāmakapūtaxtūcan.
\c 11
\p
\v 1 Caquilāmakscaꞌtui chuntzaꞌ chī quit icmakscaꞌtli Cristo.
\s Ixpālacata puscan aꞌntzaꞌ jā takēstokcan
\p
\v 2 Chuhuaꞌj tāꞌtimīn, tze chī huiꞌxinaꞌn quilālacapāstacāuj ē mākentaxtūyāꞌtit tū iccāmāsuꞌyuniꞌnīꞌtaꞌn.
\v 3 Iclacasquiꞌn nacaꞌtzīyāꞌtit Cristo cāmāpaꞌksī chāꞌtunuꞌ chiꞌxcuꞌhuīꞌn; ē chiꞌxcuꞌ māpaꞌksī ixpuscāt; ē Dios māpaꞌksī Cristo.
\v 4 Aꞌcxniꞌ chiꞌxcuꞌ orarlīmāꞌlh o līchihuīnaꞌmāꞌlh catūhuālh tū Dios māsuꞌyuniꞌlh ē palh jā tāꞌkxtu ixtāꞌknuꞌ, xlaꞌ jā lakachiꞌxcuhuīꞌ ixMāpaꞌksīniꞌ.
\v 5 Aꞌcxniꞌ puscāt orarlīmāꞌlh o līchihuīnaꞌmāꞌlh catūhuālh tū Dios māsuꞌyuniꞌlh, ixlacasquiꞌnca natacuctlapa. Palh jā natacuctlapa puscāt, tamāxaniꞌ ixlīmān ē chu chuntzaꞌ lacxtim huaꞌchi taꞌaꞌksitnīꞌt.
\v 6 Palh chāꞌtin puscāt jā tacuctlapacuꞌtun, caꞌaꞌksitca; ē ixpālacata līmāxanaꞌ taꞌaꞌksita puscāt, catacuctlapalh.
\v 7 Tū tlahua chiꞌxcuꞌ, ūꞌtzaꞌ tzē nalimākaꞌtlīꞌcan Dios ē tū tlahua puscāt, ūꞌtzaꞌ nalīlakachiꞌxcuhuīꞌcan ixkōluꞌ.
\v 8 Dios jā tlahualh pūla puscāt. Pūla tlahualh chiꞌxcuꞌ ē lītlahualh puscāt ixtāpālucut chiꞌxcuꞌ.
\v 9 Chuntzaꞌ Dios jā tlahualh chiꞌxcuꞌ ixpālacata puscāt. Tlahualh puscāt ixpālacata chiꞌxcuꞌ.
\v 10 Ūꞌtzaꞌ ixlīlacasquiꞌnca puscāt natacuctlapa. Chuntzaꞌ lakachiꞌxcuhuīꞌ ixkōluꞌ ē ángeles.
\v 11 Na ixlacatīn Dios, chiꞌxcuꞌ ē puscāt chu lacxtim, ē talāmaclacasquiꞌn chāꞌtunuꞌ.
\v 12 Xapūla puscāt Dios māxtulh na ixtāpālucut chiꞌxcuꞌ ē chuhuaꞌj puscāt mālacatuncuhuīꞌ chāꞌtin skaꞌta kaꞌhuaꞌcha. Dios, xlaꞌ mālacatzuculh ixlīpōꞌktu catūhuālh tū aꞌnan.
\p
\v 13 Huiꞌxinaꞌn minaꞌcstucaꞌn calīhuiꞌlīꞌtit. ¿Ē puhuaꞌnāꞌtit minīꞌniꞌ palh puscāt naꞌorarlī ē jā tacuctlapanīꞌt?
\v 14 ¿Ē jā līmāxanaꞌ palh pūlhmāꞌn ixyaꞌj chiꞌxcuꞌ?
\v 15 Puscāt kaꞌtlaꞌ nalīmakcaꞌtzī ixyaꞌj xapūlhmāꞌn. Ūꞌtzaꞌ lītacuctlapa.
\v 16 Palh chāꞌtin līchihuīnaꞌncuꞌtun ixpālacata tacuctlapacan, nahuaniyāꞌtit: “Quinaꞌn iclīsmanīnīꞌtaꞌuj puscan natatacuctlapa aꞌcxniꞌ taꞌorarlīmāꞌnalh”, nahuaniyāꞌtit. Chuntzaꞌ līsmanīcan calhāxcuhuālh jā makapāxuīcan Dios.
\s Tlahuaca tū jā minīꞌniꞌ aꞌcxniꞌ huaꞌcan Santa Cena
\p
\v 17 Chuhuaꞌj iccālacaquilhnīyān ē ixpālacata huāꞌmāꞌ: Aꞌcxniꞌ takēstokāꞌtit, tlahuaꞌyāꞌtit tū jā minīꞌniꞌ ē tū jā lālīmaktāyaꞌyāꞌtit.
\v 18 Xapūla iccāhuaniyān tū quihuanica. Aꞌcxniꞌ takēstokāꞌtit, huiꞌxinaꞌn tapāpitziyāꞌtit na milacpuꞌnaꞌiꞌtātcaꞌn. Macstiꞌnaꞌj icaꞌkaꞌīꞌ tū tahuan.
\v 19 Palhāsāꞌ ixlacasquiꞌnca natapāpitziyāꞌtit ē chuntzaꞌ natasuꞌyu tīchu ixlīcānaꞌ tamakapāxuī Dios.
\v 20 Aꞌcxniꞌ takēstokāꞌtit, tasuꞌyu palh jā huaꞌpāꞌnaꞌntit ixCena Māpaꞌksīniꞌ.
\v 21 Aꞌcxniꞌ huiꞌxinaꞌn huaꞌyāꞌtit, chāꞌtunuꞌ palaj tayayāꞌtit milīhuaꞌcaꞌn tū lītaꞌnīꞌtaꞌntit. Chuntzaꞌ chāꞌtin tī jā tū kaꞌlhī, xlaꞌ natziꞌncsa ē āꞌchāꞌtin nakaꞌsa ē hasta nakaꞌchī.
\v 22 ¿Ē jā kaꞌlhīꞌyāꞌtit minchiccaꞌn jā tzē nahuāꞌyaꞌnāꞌtit ē nakoꞌtnūꞌnāꞌtit? Jā tze chī tlahuaꞌpāꞌnaꞌntit ixpālacata chuntzaꞌ cālakmakaꞌnāꞌtit āꞌmakapitzīn tī taꞌaꞌkaꞌīꞌ ē tatakēstoknīꞌt. Cāmāmāxaꞌnīꞌyāꞌtit tī jā takaꞌlhī ixlīhuaꞌcaꞌn. ¿Chī naꞌiccāhuaniyān palh tze tū tlahuaꞌyāꞌtit? Jā icticāhuanin, nūn maktin.
\s IxCena Māpaꞌksīniꞌ
\r Mt. 26:26‑29; Mr. 14:22‑25; Lc. 22:14‑20
\p
\v 23 Quit iccāmāsuꞌyuniꞌn tū quimāscaꞌtīlh Māpaꞌksīniꞌ ē ūꞌtzaꞌ huāꞌmāꞌ. Tzamāꞌ tzīꞌsa aꞌcxniꞌ ixmacamāstāꞌmāꞌca namaknīcan, Māpaꞌksīniꞌ Jesús tayalh pāntzīn aꞌcxniꞌ ixtahuāꞌyamāꞌnalh.
\v 24 Māstāꞌlh tapāxcatcaꞌtzīn ixpālacata pāntzīn ē cheꞌkelh ē māpitzīlh ē cāhuanilh ixapóstoles: “Catayaꞌtit ē cahuaꞌtit. Huāꞌmāꞌ quimacniꞌ tū icmacamāstāꞌ mimpālacatacaꞌn. Nahuaꞌyāꞌtit chuntzaꞌ chī huaꞌyāuj chuhuaꞌj ixpālacata naquilālīlacapāstactēlhayāuj.”
\v 25 Chu chuntzaꞌ tlahuapalh vaso aꞌcxniꞌ tahuāꞌyankōꞌlh. Tayalh ē māstāꞌlh tapāxcatcaꞌtzīn ē cāhuanilh: “Tū tojōmāꞌlh nac huāꞌmāꞌ vaso ūꞌtzaꞌ xasāstiꞌ ixtalacāxtlahuan Dios lītaxtu ē tū līlaccāxtlanīꞌt quinkaꞌlhniꞌ. Napūhuaꞌyāꞌtit chuntzaꞌ chī pūhuaꞌyāuj chuhuaꞌj naquilālīlacapāstactēlhayāuj.” Chuntzaꞌ cāhuanilh.
\v 26 Makatunuꞌ nahuaꞌyāꞌtit chuntzaꞌ huāꞌmāꞌ pāntzīn ē napūhuaꞌyāꞌtit chuntzaꞌ huāꞌmāꞌ vaso, namāsuꞌyuyāꞌtit chī nīlh Māpaꞌksīniꞌ quimpālacatacaꞌn. Chuntzaꞌ catlahuaꞌtit hasta aꞌcxniꞌ nataspiꞌta Māpaꞌksīniꞌ.
\s Chī nahuaꞌcan Santa Cena
\p
\v 27 Catīxcuhuālh tī nahuaꞌ huāꞌmāꞌ pāntzīn ē catīxcuhuālh tī napūhuaꞌ huāꞌmāꞌ vaso, catlahualh chī ixlacasquiꞌnca. Ūꞌtzaꞌ huanicuꞌtun ixlacasquiꞌnca tzej nalatāꞌkchoko na ixlacatīn Dios. Palh jā chuntzaꞌ natlahuacan, nalakmakaꞌncan ixmacniꞌ ē ixkaꞌlhniꞌ Jesús.
\v 28 Ixlacasquiꞌnca chāꞌtunuꞌ tī nahuaꞌ pāntzīn ē napūhuaꞌ vaso pūla nalacapāstaca palh tzej latlāꞌhuan na ixlacatīn Dios. Palh jā tzej latlāꞌhuan na ixlacatīn Dios, pūla casquiꞌnli namātzankenāniꞌcan ē chuntzaꞌ tzē nahuaꞌ pāntzīn ē tzē napūhuaꞌ vaso.
\v 29 Chuntzaꞌ tī nahuaꞌ pāntzīn ē napūhuaꞌ vaso ē palh jā caꞌtzī tū huanicuꞌtun tū tlahuamāꞌlh, xlaꞌ aꞌcstutlahuacan. Xlaꞌ jā caꞌtzī huāꞌmāꞌ līhuat huaꞌchi ixlakxoko ixmacniꞌ ē ixkaꞌlhniꞌ Māpaꞌksīniꞌ. Huiꞌxinaꞌn jā cuenta tlahuaꞌyāꞌtit tū huanicuꞌtun ixCena Māpaꞌksīniꞌ.
\v 30 Ūꞌtzaꞌ lhūhuaꞌ na milacpuꞌnaꞌiꞌtātcaꞌn jā lactliꞌhuiꞌquīn ē ūꞌtzaꞌ talītaꞌjatatla ē āꞌmakapitzīn tanīlh.
\v 31 Palh quinaꞌn ixpuhuanui: “¿Chā tzej o ja tzej iclatlāꞌhuan na ixlacatīn Dios?”, palh chuntzaꞌ ixpuhuanui, jā ixquinticāstacyāhuan.
\v 32 Dios cuenta quincātlahuayān ē quincāstacyāhuayānꞌ ē chuntzaꞌ nalīscaꞌtāuj. Chuntzaꞌ jā catiꞌaꞌuj nac pūpātīn huaꞌchi xlacaꞌn tī jā taꞌaꞌkaꞌīꞌniꞌ ixtachihuīn Dios.
\p
\v 33 Tāꞌtimīn, aꞌcxniꞌ natakēstokāꞌtit nahuāꞌyaꞌnāꞌtit, jā palaj titayaꞌyāꞌtit milīhuaꞌcaꞌn. Cacākaꞌlhīꞌtit āꞌmakapitzīn.
\v 34 Palh tziꞌncsa chāꞌtin, cahuāꞌyalh pūla na ixchic. Chuntzaꞌ jā natlahuaꞌyāꞌtit tū minaꞌcstucaꞌn nalīlactlahuaꞌyāꞌtit jā takēstokāꞌtit. Āꞌmakapitzīn catūhuālh naꞌiccālacāxtlahua aꞌcxniꞌ naꞌicaꞌnāchaꞌ.
\c 12
\s Tascujūt tū cāmaxquīꞌ Espíritu Santo chāꞌtunuꞌ chiꞌxcuhuīꞌn
\p
\v 1 Chuhuaꞌj iclacasquiꞌn nacaꞌtzīyāꞌtit ixpālacata tū māstāꞌ Espíritu Santo.
\p
\v 2 Caꞌtzīyāꞌtit aꞌcxniꞌ jānaꞌj ixaꞌkaꞌīꞌniꞌyāꞌtit ixtachihuīn Dios, ixcātaꞌaꞌkskāhuīꞌyān ē chuntzaꞌ ixcātalīmāxtuyān na ixtej Dios nalaktatzokostayāꞌtit ídolos. Huaꞌchi saꞌj ixpinīꞌtaꞌntit cālakachiꞌxcuhuīꞌyāꞌtit ídolos tū jāla caticāmaktāyan.
\v 3 Iccāmāsuꞌyunicuꞌtunān tī kaꞌlhī ixEspíritu Dios jāla catilakapalalh ixtacuhuīniꞌ Jesús. Ē palh jā ixmāsuꞌyuniꞌlh Espíritu Santo, jā tī chāꞌtin tzē ixuanli Jesús xlaꞌ ūꞌtzaꞌ Māpaꞌksīniꞌ.
\p
\v 4 Masqui xtumnuꞌ ixtascujūtcaꞌn chāꞌtunuꞌ chiꞌxcuꞌhuīn, xmān chāꞌtin Espíritu Santo tī cāmaxquīꞌlh.
\v 5 Xtumnuꞌ ixtalacapāstacniꞌcaꞌn chāꞌtunuꞌ ē xmān chāꞌtin quiMāpaꞌksīniꞌcaꞌn tī scujniꞌmāꞌnauj.
\v 6 Xtum chī chāꞌtunuꞌ tatāꞌscuja Dios ē ixlīmān Dios tī māsuꞌyu ixlītliꞌhuiꞌqui aꞌcxniꞌ chiꞌxcuhuīꞌn tatāꞌscuja.
\v 7 Tasuꞌyu Espíritu Santo cāmaxquīꞌ ixlītliꞌhuiꞌqui chāꞌtunuꞌ chī natalīmaktāya āꞌmakapitzīn.
\v 8 Chāꞌtin tzej caꞌtzī chī nalīmāsuꞌyu tū ixlīcānaꞌ ixpālacata Dios ē chī Dios lacasquiꞌn nalatāꞌkchokoyāuj chātunuꞌ quinaꞌn. Āꞌchāꞌtin tzej caꞌtzī chī namāsuꞌyu tū jicslīhuaꞌ līkexmatniꞌcan na ixtachihuīn Dios. Tī cāmāscaꞌtīlh chāꞌtunuꞌ, xmān chāꞌtin ē ūꞌtzaꞌ Espíritu Santo.
\v 9 Espíritu Santo māsuꞌyu chāꞌtin chī līpāhuan Dios aꞌcxniꞌ tlahua oración ē caꞌtzī Dios namaxquīꞌ tū nasquiꞌniꞌ. Āꞌchāꞌtin tzē nacāmātzeyī taꞌjatatlanīꞌn ixpālacata Espíritu Santo.
\v 10 Chāꞌtin tzē natlahua tū natalīꞌaꞌcnī chiꞌxcuhuīꞌn ē āꞌchāꞌtin tzē nahuan tū Dios mācaꞌtzīnīlh. Āꞌchāꞌtin huampala tzē nacaꞌtzī tīchu cāmāchihuīnī āꞌmakapitzīn, palh Espíritu Santo o palh aꞌkskāhuīꞌniꞌnīꞌn. Āꞌchāꞌtin tzē nachihuīnaꞌn xtum tachihuīn tū jā maktin chihuīnaꞌnīꞌt. Āꞌchāꞌtin tzē nakexmata ē nahuan tū huanicuꞌtun xtum tachihuīn.
\v 11 Ixlīpōꞌktu tzamāꞌ catūhuālh ixtascujūt ixEspíritu Dios. Chu chuntzaꞌ chī lacasquiꞌn Espíritu Santo chu chuntzaꞌ cāmāsuꞌyuniꞌ chāꞌtunuꞌ tū natatlahua.
\s Quilīpōꞌktucaꞌn tī aꞌkaꞌīꞌyāuj huaꞌchi chu aꞌktin macniꞌ
\p
\v 12 Chāꞌtunuꞌ chiꞌxcuhuīꞌn xmān aꞌktin ixmacniꞌcaꞌn. Lhūhuaꞌ xalacpītzun kaꞌlhī quimacniꞌcaꞌn huaꞌchi quimacancaꞌn ē quilakastapuncaꞌn ē quintujancaꞌn. Ixlīpōꞌktu tzamāꞌ chu aꞌktin quimacniꞌcaꞌn. Nā chuntzaꞌ quinaꞌn lanīꞌtauj huaꞌchi xalacpītzun ixmacniꞌ Cristo.
\v 13 Quilīpōꞌktucaꞌn tī aꞌkaꞌīꞌyāuj ixtachihuīn Dios, quinaꞌn lanīꞌtauj huaꞌchi chu aꞌktin macniꞌ aꞌcxniꞌ Dios quincāmaxquīꞌn Espíritu Santo. Quilīpōꞌktucaꞌn masqui israelitas o griegos ē masqui xatastāꞌmaka tasācuaꞌ o jā tasācuaꞌ, quilīpōꞌktucaꞌn tī aꞌkaꞌīꞌyāuj chu aꞌktin lanīꞌtauj aꞌcxniꞌ maktīniꞌuj Espíritu Santo.
\p
\v 14 Kempāhūhuaꞌ xalacpītzun quimacniꞌcaꞌn. Jā xmān kaꞌlhīyāuj quimacancaꞌn. Nā kaꞌlhīyāuj quintujancaꞌn ē quiꞌaꞌkaꞌxkoꞌlhcaꞌn ē chuntzaꞌ natalīlakōꞌ chu aꞌktin macniꞌ.
\v 15 Palh tujan ixuanli: “Quit jā ixmacan huāꞌmāꞌ macniꞌ ē chuntzaꞌ quit jā ixlaꞌ macniꞌ”, chuntzaꞌ jā ixlīcānaꞌ. Masqui chuntzaꞌ ixuanli, chu ūꞌtzaꞌ macniꞌ.
\v 16 Palh aꞌkaꞌxkoꞌlh ixuanli: “Quit jā ixlakastapun huāꞌmāꞌ macniꞌ ē chuntzaꞌ quit jā ixlaꞌ macniꞌ”, chuntzaꞌ jā ixlīcānaꞌ. Masqui chuntzaꞌ ixuanli, chu ūꞌtzaꞌ macniꞌ.
\v 17 ¿Chī ixlīkexmatui palh xmān ixkaꞌlhīuj quilakastapuncaꞌn? ¿Chī ixlīkenkahuanaꞌuj palh quimacniꞌcaꞌn pōꞌktu aꞌkaꞌxkoꞌlh ixuanli?
\v 18 Chuntunca quimacniꞌcaꞌn chuntzaꞌ chī Dios cācāxtlahualh. Xlaꞌ cācāxtlahualh chuntzaꞌ chī xlaꞌ lacasquiꞌnli ē kaꞌlhī ixlīpōꞌktu xalacpītzun.
\v 19 Palh pōꞌktu quimacniꞌcaꞌn ixlalh cahuālh xmān aꞌktin xalacpītzun huaꞌchi aꞌkaꞌxkoꞌlh, jā tzē ixtasuꞌyulh aꞌktin macniꞌ.
\v 20 Chuntzaꞌ lhūhuaꞌ ixlacpītzun quimacniꞌcaꞌn ē xmān aꞌktin macniꞌ lanīꞌt.
\p
\v 21 Chuntzaꞌ quilakastapuncaꞌn jāla catihuanilh quimacancaꞌn: “Huiꞌx jā icmaclacasquiꞌnān.” Nūn quinaꞌkxākcaꞌn jāla catihuanilh quintujancaꞌn: “Huiꞌx jā icmaclacasquiꞌnān.”
\v 22 Masqui jā lacxtim tasuꞌyu ixlītliꞌhuiꞌqui aꞌkatunuꞌ xalacpītzun quimacniꞌcaꞌn chu lacxtim talacasquiꞌn.
\v 23 Huīꞌlh na quimacniꞌcaꞌn jā jā minīꞌniꞌ tasuꞌyu. Tzej mālhekēꞌyāuj pōꞌktu quilhtamacuj. Chuntzaꞌ tzej maktakaꞌlhāuj ē lakachiꞌxcuhuīꞌyāuj jā līmāxanaꞌ tasuꞌyu.
\v 24 Xalacpītzun tū jā līmāxanaꞌ tasuꞌyu, jā cuenta tlahuayāuj. Dios tzej cāxtlahualh ixlīpōꞌktu quimacniꞌcaꞌn ē chuntzaꞌ nalakachiꞌxcuhuīꞌyāuj jā huancan jā ixlacasquiꞌnca.
\v 25 Jāla cāmāxtumlīcan xalacpītzun quimacniꞌcaꞌn ixpālacata xalacpītzun talāmaktāya. Chuntzaꞌ quintujancaꞌn ē quimacancaꞌn ē quilakastapuncaꞌn talāmaktāya.
\v 26 Aꞌcxniꞌ tatakāhuīꞌ quintujancaꞌn o quimacancaꞌn, ixlīpōꞌktu quimacniꞌcaꞌn tatāꞌpātīniꞌn. Palh nalakachiꞌxcuhuīꞌcan quintujancaꞌn o quimacancaꞌn, tatāꞌpāxuhua ixlīpōꞌktu quimacniꞌcaꞌn.
\p
\v 27 Chuhuaꞌj huiꞌxinaꞌn huaꞌchi xalacpītzun ixmacniꞌ Cristo ē ixlacasquiꞌnca chāꞌtunuꞌ nalāmaktāyaꞌyāꞌtit. Chāꞌtunuꞌ kaꞌlhīꞌyāꞌtit mintalacapāstacniꞌcaꞌn.
\v 28 Chāꞌtunuꞌ tī aꞌkaꞌīꞌniꞌ ixtachihuīn Dios, xlaꞌ cāmaxquīꞌlh ixtascujūtcaꞌn. Xapūla Dios cāhuiꞌlīlh makapitzīn ixlīꞌapóstolcaꞌn tī āꞌchulāꞌ ixlacasquiꞌnca ē ixlīkempātuꞌ cāhuiꞌlīlh chī aꞌkchihuīnaꞌnīꞌn ē ixlīkempātuꞌtun cāhuiꞌlīlh ixlīmākelhtahuaꞌkēꞌniꞌnīꞌncaꞌn. Nā Dios cāhuiꞌlīlh āꞌmakapitzīn tī tzē natatlahua tū līꞌaꞌcnīn ē cāhuiꞌlīlh āꞌmakapitzīn tī tzē natamātzeyī taꞌjatatlanīꞌn. Nā āꞌmakapitzīn cāhuiꞌlīlh natamaktāyanaꞌn ē āꞌmakapitzīn cāhuiꞌlīlh natala xapuxcuꞌ tī taꞌaꞌkaꞌīꞌ. Cāhuiꞌlīlh huampala āꞌmakapitzīn tī tzē natachihuīnaꞌn xtum tachichuīn.
\v 29 ¿Ē ixlīpōꞌktucaꞌn apóstoles tahuanīꞌt? ¿Ē ixlīpōꞌktucaꞌn aꞌkchihuīnaꞌnīꞌn tahuanīꞌt? ¿Ē ixlīpōꞌktucaꞌn mākelhtahuaꞌkēꞌniꞌnīꞌn tahuanīꞌt? ¿Ē ixlīpōꞌktucaꞌn natatlahua tū līꞌaꞌcnīn? Jā maktin nala chuntzaꞌ.
\v 30 Ixlīpōꞌktucaꞌn jāla natamātzeyīniꞌn. Ixlīpōꞌktucaꞌn jāla natachihuīnaꞌn xtum tachihuin. Nūn ixlīpōꞌktucaꞌn jāla catitahuanli tū huanicuꞌtun xtum tachihuīn.
\v 31 Caputzaꞌtit chī nakaꞌlhīꞌyāꞌtit mintascujūtcaꞌn tū āꞌchulāꞌ tze. Ē chuhuaꞌj naꞌiccāmāsuꞌyuniꞌyān tū āꞌchulāꞌ līhuaꞌcaꞌ xatze.
\c 13
\s Chī nacāpāxquīꞌyāuj āꞌmakapitzīn
\p
\v 1 Palh ixchihuīnaꞌuj kempālhūhuaꞌ tachihuīn ē nā chī tachihuīnaꞌn ángeles, jā tū līmacuan palh jā ixcāpāxquīꞌuj āꞌmakapitzīn. Quintachihuīncaꞌn huaꞌchi līcāꞌn ixuanlī tū palhaꞌ macasāꞌnan ē pucsmakahuaniniꞌn palh jā cāpāxquīꞌyāuj āꞌmakapitzīn.
\v 2 Masqui tzej ixlīmāsuꞌyūj ixtachihuīn Dios ixlītliꞌhuiꞌqui Espíritu Santo, ē masqui ixcaꞌtzīuj tū huanicuꞌtun talacapāstacniꞌ tū tatzēꞌknīꞌt, ē palh ixcaꞌtzīkōꞌuj kempālhūhuaꞌ catūhuālh, ūꞌtzaꞌ jā tū ixquinticālīmaktāyan palh jā ixcāpāxquīꞌuj āꞌmakapitzīn. Huampala palh ixlīpāhuanui Dios ē ixcaꞌtzīuj tzē īꞌsquiꞌniꞌuj camālacxijli aꞌktin sipej ē ixtalacxijli, jā tū quintapalhcaꞌn palh jā ixcāpāxquīꞌuj āꞌmakapitzīn.
\v 3 Palh ixcāstāꞌkōꞌuj tū kaꞌlhīyāuj ē ixcāmāpitziniꞌuj tī cāsputniꞌ ixlīhuatcaꞌn ē palh ixmacamāstāꞌuj quimacniꞌcaꞌn naquincātalhcuyuyān, jā tū līmacuan ixtlahuáuj tzamāꞌ palh jā ixcāpāxquīꞌuj āꞌmakapitzīn.
\p
\v 4 Tī cāpāxquīꞌ āꞌmakapitzīn nalīpātīniꞌkōꞌ ē jā nalīsītzīꞌ. Xlaꞌ nalakalhuꞌmanīniꞌn ē jā tū catipuhuanli masqui āꞌmakapitzīn āꞌchulāꞌ takaꞌlhī. Nā xlaꞌ jā kaꞌtlaꞌ makcaꞌtzī ē jā ixlīmān napuhuan xlaꞌ xatze.
\v 5 Tī cāpāxquīꞌ āꞌmakapitzīn jā natlahua tū jā minīꞌniꞌ nūn nalacpuhuan tū xmān ūꞌtzaꞌ minīꞌniꞌ. Xlaꞌ jā tū catilīsītzīꞌlh ē jā namālakxokonīꞌcuꞌtun tū tlahuaniꞌcanīꞌt tū jā tze.
\v 6 Nā xlaꞌ jā nalīpāxuhua aꞌcxniꞌ tlahuacan tū jā tze; nalīpāxuhua aꞌcxniꞌ tlahuacan tū xatze.
\v 7 Tī cāpāxquīꞌ āꞌmakapitzīn, xlaꞌ natāyaniꞌkōꞌ catūxcuhuālh tū nalaniꞌ. Napuhuan tze āꞌmakapitzīn ē jā palaj nacālīmālacsuꞌyucuꞌtun. Xlaꞌ napuhuan āꞌlīstān natatlahua tū tze. Masqui napātīniꞌn, jā catimakxtekli nacāpāxquīꞌ āꞌmakapitzīn.
\p
\v 8 Tapāxquīꞌn jā maktin catisputli. Nasputa ixtachihuīn tī māsuꞌyu ixtachihuīn Dios. Nā natasputa kempālhūhuaꞌ tachihuīn tū aꞌnan nac cāꞌquilhtamacuj. Nasputa ixlīpōꞌktu tū chiꞌxcuhuīꞌn tzē natacaꞌtzī.
\v 9 Jā ketzī chī caꞌtzīyāuj chuhuaꞌj ē jā ketzī chī māsuꞌyuyāuj chuhuaꞌj ixtachihuīn Dios.
\v 10 Namin aꞌktin quilhtamacuj aꞌcxniꞌ nacaꞌtzīkōꞌyāuj ixlīpōꞌktu ē aꞌcxniꞌ jātzaꞌ namaclacasquiꞌnāuj tū caꞌtzīyāuj chuhuaꞌj ē tū jā ketzī.
\p
\v 11 Aꞌcxniꞌ skaꞌtaꞌcus xaꞌicuanīꞌt, huaꞌchi chāꞌtin skaꞌtaꞌ xaꞌicchihuīnaꞌn. Huaꞌchī chāꞌtin kaꞌhuaꞌcha xaꞌicpuhuan ē xaꞌiclacapāstacnaꞌn. Aꞌcxniꞌ ictachiꞌxcuhuīꞌlīlh, icmakxtekli chī xaꞌicuanīꞌt quilīskaꞌtaꞌ.
\v 12 Chuhuaꞌj jā tzej lakapasāuj Dios, xmān huaꞌchi ixlaktzīꞌuj ixtaxkaket nac xaslamama līcāꞌn. Namin aꞌktin quilhtamacuj aꞌcxniꞌ nalaktzīꞌnāuj Dios cālacan. Chuhuaꞌj macstiꞌnaꞌj caꞌtzīyāuj chī līhuīꞌlh Dios; aꞌcxniꞌ namin tzamāꞌ quilhtamacuj, nalakapasāuj Dios chuntzaꞌ chī xlaꞌ quincālakapaskōꞌyān.
\v 13 Chuntzaꞌ kempātuꞌtun catūhuālh tū ixlacasquiꞌnca pōꞌktu quilhtamacuj. Ixlacasquiꞌnca nalīpāhuanāuj ē naꞌaꞌkaꞌīꞌniꞌyāuj Dios; ixlacasquiꞌnca napuhuanāuj Dios namākentaxtū tū huanīꞌt; ē ixlacasquiꞌnca nacāpāxquīꞌyāuj āꞌmakapitzīn. Tū āꞌchulāꞌ ixlacasquiꞌnca, ūꞌtzaꞌ cāpāxquīꞌyāuj āꞌmakapitzīn.
\c 14
\s Chihuīnaꞌncan āꞌxtum tachihuīn
\p
\v 1 Caputzatit chī nacālīpāxquīꞌyāꞌtit āꞌmakapitzin ē calacasquiꞌntit tū Espíritu Santo cāmaxquīꞌyan. Aꞌktin tascujūt tū māstāꞌ Espíritu Santo, ūꞌtzaꞌ tzē māsuꞌyu ixtachihuīn Dios. Āꞌchulāꞌ calacasquiꞌntit huāꞌmāꞌ tascujūt ē jā āꞌmakapitzīn.
\v 2 Aꞌcxniꞌ chāꞌtin chihuīnaꞌn xtum tachihuīn tū jā scaꞌtnīꞌt, xlaꞌ xmān tāꞌchihuīnaꞌmāꞌlh Dios ē jā cātāꞌchihuīnaꞌmāꞌlh chiꞌxcuhuīꞌn ixpālacata jā tī caꞌtzī tū huanicuꞌtun. Espíritu Santo māchihuīnī.
\v 3 Tī līmāsuꞌyu ixtachihuīn Dios ixlītliꞌhuiꞌqui Espíritu Santo, xlaꞌ cātāꞌchihuīnaꞌn chiꞌxcuhuīꞌn. Chuntzaꞌ nacāmāsuꞌyuniꞌ ē nacāmaktāya ē nacāmāhuixcānī.
\v 4 Tī chihuīnaꞌn xtum tachihuīn tū jā scaꞌtnīꞌt, ūꞌtzaꞌ xmān tahuixcānī ixlīmān. Tī māsuꞌyu ixtachihuīn Dios, ūꞌtzaꞌ cāmāhuixcānī ixlīpōꞌktucaꞌn tī taꞌaꞌkaꞌīꞌ.
\p
\v 5 Iclacasquiꞌn milīpōꞌktucaꞌn ixchihuīnaꞌntit xtumnuꞌ tachihuīn tū jā ixcaꞌtzīyāꞌtit. Āꞌchulāꞌ iclacasquiꞌn ixmāsuꞌyuꞌtit ixtachihuīn Dios. Āꞌchulāꞌ ixlacasquiꞌnca tī līmāsuꞌyu ixtachihuīn Dios ē jā tī xmān chihuīnaꞌn xtumnuꞌ tachihuīn ē jāla nahuan tū huanicuꞌtun tzamāꞌ xtum tachihuīn. Xmān palh tzē nahuan tū huanicuꞌtun tzamāꞌ tachihuīn ē chuntzaꞌ nacāmaktāya ixlīpōꞌktucaꞌn tī taꞌaꞌkaꞌīꞌ, xmān chuntzaꞌ tze palh nachihuīnaꞌn xtum tachihuīn tū jā caꞌtzīꞌ.
\v 6 Palh naꞌicaꞌnāchaꞌ ē naꞌicchihuīnaꞌn xtum tachihuīn, ¿chī naꞌiccālīmaktāyayān? Palh jā naꞌiccāhuaniyān tū Dios quimāsuꞌyuniꞌlh o tū icscaꞌtli tū ixlaꞌ Dios, ¿chī naꞌiccālīmaktāyayān? Palh jā naꞌiccāhuaniyān ixtachihuīn Dios o palh jā iccāmāsuꞌyuniꞌyān, ¿chī naꞌiccālīmaktāyayān?
\p
\v 7 Aꞌcxniꞌ skoliꞌcan ē aꞌcxniꞌ slaꞌknancan, kexmatāuj chī sāꞌnan. Palh jā tzej skoliꞌcan, jāla caꞌtzīcan tū huanicuꞌtun.
\v 8 Palh jā tzej līskoliꞌcan trompeta, soldado jā catikexmatli ē jā catitāꞌkaquīꞌlh ē jā catitacāxli naꞌaꞌn nalātaꞌla.
\v 9 Chuntzaꞌ huiꞌxinaꞌn. Palh jāla kexmatcan mintachihuīncaꞌn, ¿chī nalīcaꞌtzīcan tū huanicuꞌtun? Huaꞌchi xmān nachihuīnaꞌnāꞌtit nac ūꞌnīꞌ.
\v 10 Kempālhūhuaꞌ tachihuīn chihuīnaꞌncan nac cāꞌquilhtamacuj ē chāꞌtunuꞌ kexmata tū ixtachihuīn.
\v 11 Palh jāla ickexmata ixtachihuīn āꞌchāꞌtin, quit iclanīꞌt huaꞌchi xaminiꞌ ixpālacata xlaꞌ ē xlaꞌ xaminiꞌ lanīꞌt quimpālacata.
\v 12 Huiꞌxinaꞌn naputzayātit tzamāꞌ talakalhuꞌmān tū māstāꞌ Espíritu Santo. Chuntzaꞌ calacasquiꞌntit nacāmaxquīꞌyān tzamāꞌ talakalhuꞌmān tū āꞌchulāꞌ xatze. Ūꞌtzaꞌ tū cāmāhuixcānī tī taꞌaꞌkaꞌīꞌ.
\p
\v 13 Chuntzaꞌ tī nachihuīnaꞌn xtum tachihuīn tū jā scaꞌtnīꞌt, casquiꞌniꞌlh Dios namaktāya nacamāsuꞌyuniꞌ āꞌmakapitzīn tū huanicuꞌtun.
\v 14 Palh xtum quintachihuīn aꞌcxniꞌ icorarlīmāꞌlh, xmān quilīstacnaꞌ caꞌtzī tū huanicuꞌtun. Jā scujmāꞌlh quintalacapāstacniꞌ ē jā tī chāꞌtin icmaktāyamāꞌlh.
\v 15 ¿Chī naꞌiclītlahua? Naꞌiclīꞌorarlī quilīstacnaꞌ ē nā naꞌicmāscujū quintalacapāstacniꞌ ē chuntzaꞌ naꞌiccāmaktāya tī takexmatmāꞌnalh. Naꞌiclīpixtlīꞌ quilīstacnaꞌ ē nā naꞌiclīpixtlīꞌ quintalacapāstacniꞌ ē ānā chuntzaꞌ tī takexmatmāꞌnalh natacaꞌtzī tū huanicuꞌtun.
\v 16 Palh chihuīnaꞌnaꞌ xtum tachihuīn aꞌcxniꞌ māstāꞌyaꞌ tapāxcatcaꞌtzīn, xmān milīstacnaꞌ makapāxuīmāꞌlh Dios, ē āꞌmakapitzīn jāla takexmata. ¿Chī tzē nalīhuan catīhuālh: “Amén”, palh jāla caꞌtzī tū huanicuꞌtun tū huanīꞌtaꞌ?
\v 17 Masqui huiꞌx tzej maxquīꞌpāꞌt tapāxcatcaꞌtzīn Dios, jā maktāyaꞌyaꞌ āꞌchāꞌtin.
\v 18 Quit tzē icchihuīnaꞌn xtum tachihuīn tū jā icscaꞌtnīꞌt. Icmaxquīꞌ tapāxcatcaꞌtzīn Dios quit āꞌchulāꞌ tzē icchihuīnaꞌn xtum tachihuīn ē jā huiꞌxinan.
\v 19 Aꞌntzaꞌ jā tatakēstoka tī taꞌaꞌkaꞌīꞌ, icchihuīnaꞌncuꞌtun macstiꞌnaꞌj tachihuīn tū kexmatcan ē ūꞌtzaꞌ nacālīmāsuꞌyuniꞌ. Jā icchihuīnaꞌcuꞌtun lhūhuaꞌ xtum tachihuīn tū jā catilītamaktāyalh āꞌchāꞌtin.
\p
\v 20 Jā catipuhuaꞌntit huaꞌchi lacstīn tī jā takexmata; napuhuaꞌnāꞌtit huaꞌchi lacstīn tī jānaꞌj tacaꞌtzī tatlahua tū jā tze. Aꞌcxniꞌ lacapāstacpāꞌnaꞌntit, calacapāstacnaꞌntit huaꞌchi chiꞌxcuhuīꞌn. Xlacaꞌn tacaꞌtzī tū āꞌchulāꞌ ixlacasquiꞌnca.
\v 21 Tatzoꞌkniꞌ na ixtachihuīn Dios ē Dios huanli chuntzaꞌ:
\q Naꞌiccātāꞌchihuīnaꞌn tzamāꞌ israelitas.
\q Naꞌiccāmacamin tī xtum ixtachihuīncaꞌn ē tī makatiyātīꞌn.
\q Quit naꞌiccāmāchihuīnī.
\q Nūn chuntzaꞌ jā quintitakexmatniꞌcuꞌtunli tzamāꞌ israelitas.
\m
\v 22 Chuntzaꞌ aꞌcxniꞌ chihuīnaꞌncan xtum tachihuīn tū jā kexmatcan, ūꞌtzaꞌ nacālīmāsuꞌyuniꞌ ixlītliꞌhuiꞌqui Dios xlacaꞌn tī jā taꞌaꞌkaꞌīꞌ ē talaktzīꞌmāꞌnalh aꞌktin līꞌaꞌcnīn. Aꞌcxniꞌ līmāsuꞌyucan ixtachihuīn Dios ixlītliꞌhuiꞌqui Espíritu Santo, ūꞌtzaꞌ cālīmāsuꞌyuniꞌyān ixlītliꞌhuiꞌqui Dios huiꞌxinaꞌn tī aꞌkaꞌīꞌyāꞌtit.
\v 23 Palh milīpōꞌktucaꞌn tī aꞌkaꞌīꞌyāꞌtit ixtakēstoktit ē palh milīpōꞌktucaꞌn ixchihuīꞌnāꞌtit xtum tachihuīn tū jā ixcaꞌtzīyāꞌtit, ē palh ixtanūlh catīhuālh chiꞌxcuꞌ o tī jā aꞌkaꞌīꞌ, ¿ē jā nahuan chuyaꞌyāꞌtit?
\v 24 Palh milīpōꞌktucaꞌn ixmāsuꞌyutit ixtachihuīn Dios ē aꞌcxniꞌ natanū catihuālh chiꞌxcuꞌ o chāꞌtin tī jā aꞌkaꞌīꞌ, xlaꞌ tzē nakexmata tū māsuꞌyupāꞌnaꞌntit. Chuntzaꞌ nalīcaꞌtzī xlaꞌ jā tze na ixlacatīn Dios.
\v 25 Nā nacaꞌtzī jā tū catimātzēꞌkli ixlacatīn Dios. Chuntzaꞌ nalīlaktatzokosta namakapāxuī Dios ē nahuan: “Ixlīcānaꞌ Dios huīꞌlh na milacpuꞌnaꞌiꞌtātcaꞌn.”
\s Chī chāꞌtunuꞌ natachihuīnaꞌn aꞌcxniꞌ takēstokcan
\p
\v 26 Ūꞌtzaꞌ huāꞌmāꞌ tū natlahuaꞌyāꞌtit aꞌcxniꞌ natakēstokāꞌtit: Chāꞌtunuꞌ napuhuaꞌnāꞌtit tū napixtlīꞌyāꞌtit o jā namāsuꞌyuꞌyāꞌtit na ixtachihuīn Dios. Chāꞌtin tzē namāsuꞌyu tū Dios māsuꞌyuniꞌlh. Āꞌchāꞌtin tzē nachihuīnaꞌn xtum tachihuīn tū jā scaꞌtnīꞌt o tzē namāsuꞌyu tū huanicuꞌtun xtum tachihuīn. Catūxcuhuālh tū tlahuacan, calalh ūꞌtzaꞌ tū nacālīmaktāya tī tatakēstoka.
\v 27 Palh tahuīꞌlanalh tī natachihuīnaꞌn xtum tachihuīn, catachihuīnaꞌnli līchāꞌtunuꞌ ē xmān chāꞌtuꞌ o chāꞌtuꞌtun ē catalālīlakpalītēlhalh. Nā caꞌaꞌnalh chāꞌtin tī namāsuꞌyu tū huanicuꞌtun.
\v 28 Palh jā tī aꞌnan tī tzē namāsuꞌyu tū huanicuꞌtun xtum tachihuīn, cacaꞌcsla cahuanli tī tzē chihuīnaꞌn xtum tachihuīn. Ixaꞌcstu catāꞌchihuīnaꞌnli Dios ē jā aꞌntzaꞌ jā takēstokcan.
\v 29 Chāꞌtuꞌ o chāꞌtuꞌtun tzē natamāsuꞌyu ixtachihuīn Dios. Āꞌmakapitzīn tzej catakexmatli natacaꞌtzī palh Dios ixlīcānaꞌ cāmāsuꞌyuniꞌlh tī tachihuīnaꞌn.
\v 30 Palh huīꞌlh āꞌchāꞌtin ē nā Dios mācaꞌtzīnī xlaꞌ tū namāsuꞌyu, tī chihuīnaꞌmāꞌlhcus jātzaꞌ catichihuīnaꞌnli. Palaj nachihuīnaꞌnkōꞌ aꞌcxniꞌ tasuꞌyu chihuīnaꞌncuꞌtun āꞌchāꞌtin.
\v 31 Līchāꞌtunuꞌ namāsuꞌyuyāꞌtit ixtachihuīn Dios. Chuntzaꞌ nacāmāscaꞌtīcan ixlīpōꞌktucaꞌn ē nacāmāhuixcānīcan.
\v 32 Tī līmāsuꞌyumāꞌlh ixtachihuīn Dios ixlītliꞌhuiꞌqui Espíritu Santo, xlaꞌ tzē naquilhcaꞌcsla aꞌcxniꞌ caꞌtzī Dios namāchihuīnī āꞌchāꞌtin.
\v 33 Dios lacasquiꞌn lacatejtin natlahuacan ē jā lacasquiꞌn xamaktin natachihuīnaꞌn.
\p Calhāxcuhuālh tatakēstoka tī taꞌaꞌkaꞌīꞌ ixtachihuīn Dios, chuntzaꞌ tlahuacan.
\v 34 Caꞌcs natatahuiꞌla puscan. Jā cacāmakxtekca natachihuīnaꞌn xlacaꞌn. Puscan catakexmatli chī tatzoꞌkniꞌ na ixlīmāpaꞌksīncaꞌn israelitas jā huan puscan jā catitamāpaꞌksīlh chiꞌxcuhuīꞌn.
\v 35 Palh chāꞌtin puscāt scaꞌtcuꞌtun catūhuālh, cakelhasquiꞌnīlh ixkōluꞌ aꞌcxniꞌ tahuiꞌlānaꞌlh na ixchiccaꞌn. Līmāxanaꞌ palh puscan natachihuīnaꞌn jā takēstokcanīꞌt namakapāxuīcan Dios.
\p
\v 36 Calacapāstactit huāꞌmāꞌ. Na mincāꞌlacchicniꞌcaꞌn jā aꞌntzaꞌ pūla māsuꞌyuca ixtachihuīn Dios. Jā xmān huiꞌxinaꞌn kexpatnīꞌtaꞌntit. ¿Tū ixpālacata puhuaꞌnāꞌtit caꞌtzīyāꞌtit chī ixlacasquiꞌnca talatāꞌkchoko tī taꞌaꞌkaꞌīꞌ?
\v 37 Makapitzīn puhuaꞌnāꞌtit tzē māsuꞌyuyāꞌtit ixtachihuīn Dios o puhuaꞌnāꞌtit Espíritu Santo cāmaxquīꞌnīꞌtaꞌn aꞌktin talakalhuꞌmān. Cacaꞌtzītit huiꞌxinaꞌn tū iccātzoꞌknuniꞌyān, ūꞌtzaꞌ ixlīmāpaꞌksīn quiMāpaꞌksīniꞌcaꞌn.
\v 38 Palh catīhuālh jā kexmatcuꞌtun ixtachihuīn Dios, calatachokolh chī ixtapāxuān.
\p
\v 39 Tāꞌtimin, caputzaꞌtit chī nalīmāsuꞌyuyāꞌtit ixtachihuīn Dios ē jā timāmakchuyīyāꞌtit tī tzē chihuīnaꞌn xtum tachihuīn.
\v 40 Ixlīpōꞌktu tū natlahuaꞌyāꞌtit, catlahuaꞌtit chuntzaꞌ chī ixlacasquiꞌnca ē chuntzaꞌ chī minīꞌniꞌ.
\c 15
\s Chī līlacastālancuanaꞌlh Cristo
\p
\v 1 Chuhuaꞌj iccāmālacapāstaquīyān xatze tachihuīn tū iccāmāsuꞌyuniꞌnīꞌtaꞌn. Huiꞌxinaꞌn maktīniꞌnīꞌtaꞌntit ē aꞌkaꞌīꞌnīꞌtaꞌntit.
\v 2 Ūꞌtzaꞌ tū iccāmāsuꞌyuniꞌnīꞌtaꞌn līꞌaꞌkapūtaxtutit palh jā chu tlakaj aꞌkaꞌīꞌnīꞌtaꞌntit.
\p
\v 3 Iccāmāsuꞌyuniꞌnīꞌtaꞌn tū ixlacasquiꞌnca ē tū quimāscaꞌtīcanīꞌt. Ūꞌtzaꞌ huāꞌmāꞌ; Cristo nīlh ixpālacata quincuentacaꞌn chuntzaꞌ chī tzoꞌkcanīꞌt makāstzaꞌ na ixtachihuīn Dios.
\v 4 Mācnūcanīꞌt Cristo ē ixlīꞌaꞌktuꞌtun quilhtamacuj mālacastālancuanīca. Chuntzaꞌ tatzoꞌknīꞌt na ixtachihuīn Dios.
\v 5 Aꞌcxniꞌ lacastālancuanaꞌnlitzaꞌ, apóstol tī pūla laktzīꞌlh Cristo, ūꞌtzaꞌ Pedro. Āꞌlīstān ixlīpoꞌktucaꞌn apóstoles talaktzīꞌlh.
\v 6 Āꞌlīstān huampala huaꞌchi lakaquitzīs ciento āꞌmakapitzīn ixtachiꞌxcuhuīꞌt xamaktin talaktzīꞌlh. Lhūhuaꞌ xlacaꞌn tahuiꞌlānaꞌlhcus ē āꞌmakapitzīn tasputlitzaꞌ.
\v 7 Āꞌlīstān huampala Jacobo nā laktzīꞌlh ē huampala ixlīpōꞌktucaꞌn apóstoles talaktzīꞌlh.
\p
\v 8 Āꞌxmān quit iclaktzīꞌlh Cristo. Quit huaꞌchi chāꞌtin skaꞌtaꞌ tī xatamāyujūn ē jā aꞌcchāꞌlh ixmālhcuyuꞌ.
\v 9 Quit huaꞌchi apóstol tī āꞌchulaꞌ xastancu. Āꞌmakapitzīn apóstoles āꞌchulāꞌ lakaꞌtlaꞌ ē jā quit. Aꞌcxniꞌ jānaꞌj xaꞌicaꞌkaꞌīꞌ xaꞌiccāmakapātīnīn tī ixtaꞌaꞌkaꞌīꞌ. Ūꞌtzaꞌ jā quilīminīꞌniꞌn palh apóstol quihuanica.
\v 10 Dios quilakalhuꞌmanli ē ūꞌtza apóstol iclīhuanli. Jātzaꞌ xmān quilakalhuꞌmanli ixpālacata quit āꞌchulāꞌ iꞌcscujli ē jā āꞌmakapitzīn apóstoles. Jā quilīmān icscujli. Dios quilakalhuꞌmanli ē ūꞌtzaꞌ quimaktāyalh chī icscujli.
\v 11 Masqui āꞌmakapitzīn apóstoles o masqui quit, quilīpōꞌktucaꞌn icmāsuꞌyuyāuj xatze tachihuīn ixlaꞌ Jesucristo ē huiꞌxinaꞌn aꞌkaꞌīꞌnīꞌtaꞌntit.
\s Natalacastālancuanaꞌn nīnīꞌn
\p
\v 12 Palh icmāsuꞌyuyāuj chī Cristo lacastālancuanaꞌnli, ¿chī tzē nalīhuaꞌnāꞌtit makapitzīn huiꞌxinaꞌn jā tī chāꞌtin nalacastālancuanaꞌn?
\v 13 Palh jā tī chāꞌtin cahuālh ixlacastālancuanaꞌnli, chuntzaꞌ jā ixtilacastālancuanaꞌnli Cristo.
\v 14 Ē palh Cristo jā ixtilacastālancuanaꞌnli, jā ixlīcānaꞌ tū icmāsuꞌyumāꞌnauj ē jā tū līmacuan ixaꞌkaꞌīꞌtit.
\v 15 Nā chuntzaꞌ quinaꞌn xaꞌicuanui tū jā ixlīcānaꞌ ixpālacata Dios chī icmāsuꞌyuyāuj Dios mālacastālancuanīlh Cristo. Chuntzaꞌ xaꞌicmāsuꞌyūj tū jā ixlīcānaꞌ palh jā tī chāꞌtin cahuālh ixlacastālancuanaꞌnli.
\v 16 Palh jā tī chāꞌtin cahuālh nalacastālancuanaꞌn, nūn Cristo jā ixlacastālancuanaꞌnli.
\v 17 Palh Cristo jā cahuālh lacastālancuanaꞌnli, jā tū līmacuan ixaꞌkaꞌīꞌtit. Jānaꞌj ixticātamātzaꞌnkēnaꞌnīn mincuentacaꞌn.
\v 18 Palh jā cahuālh lacastālancuanaꞌncan, chuntzaꞌ tī tanīlhtzaꞌ masqui ixtatāꞌtapaꞌksīlh Cristo, ixtaꞌaꞌlh nac pūpātīn.
\v 19 Palh jā ixkaꞌlhīuj quilatamatcaꞌn tū jā catilaksputli ixpālacata līpāhuanāuj Cristo, āꞌchulāꞌ koxa tīlayāuj quinaꞌn ē jā ixlīpōꞌktucaꞌn āꞌmakapitzīn tachiꞌxcuhuīꞌt.
\p
\v 20 Ixlīcānaꞌ chī mālacastālancuanīca Cristo ē laktaxtulh nac cāꞌlīnīn. Chuntzaꞌ cāpūlaniꞌlh tī taꞌaꞌkaꞌīꞌlh ē tanīlhtzaꞌ ē natalacastālancuanaꞌmpala.
\v 21 Adán tlahualh tū jā tze ē ūꞌtzaꞌ talītzuculh tanī tachiꞌxcuhuīꞌt. Cristo nīlh nac cruz ē chuntzaꞌ natalīlacastālancuanaꞌn tachiꞌxcuhuīꞌt ē natakaꞌlhī ixlatamatcaꞌn tū jā catilaksputli.
\v 22 Adán quixuꞌnapapcaꞌn ixuanīꞌt, ē chuntzaꞌ quilīpōꞌktucaꞌn nanīyāuj. Ixlīpōꞌktucaꞌn tī tatāꞌtapaꞌksī Cristo, xlacaꞌn natalacastālancuanaꞌn.
\v 23 Chāꞌtunuꞌ kaꞌlhī ixquilhtamacuj aꞌcxniꞌ napūlacastālancuanaꞌn. Tī xapūla lacastālancuanaꞌnli, ūꞌtzaꞌ Cristo. Aꞌcxniꞌ namimpala Cristo, natalacastālancuanaꞌn xlacaꞌn tī tatāꞌtapaꞌksī Cristo.
\v 24 Cristo nacāmālaksputukōꞌ ixlītliꞌhuiꞌquicaꞌn ixlīpōꞌktucaꞌn āꞌmakapitzīn ē aꞌcxniꞌ nacāskāhuīꞌkōꞌtzaꞌ ixlīpōꞌktucaꞌn tī quiclh talaktziꞌn xlaꞌ, palaj tunca xlaꞌ namacamaxquīꞌkōꞌ Dios ixlītliꞌhuiꞌqui. Aꞌcxniꞌ nala huāꞌmāꞌ, aꞌcxniꞌ ixlīsputniꞌ cāquilhtamacuj.
\v 25 Ixlacasquiꞌnca Cristo namāpaꞌksīniꞌn hasta nacāskāhuīꞌkōꞌ ixlīpōꞌktu ti quiclh talaktziꞌn xlaꞌ.
\v 26 Tī āꞌxmān naskāhuīꞌcan, ūꞌtzaꞌ līnīn.
\v 27 Ixlīpōꞌktu catūhuālh tū aꞌnan Dios cāmaxquīꞌlh Cristo nacāmāpaꞌksīkōꞌ. Aꞌntzaꞌ jā huan ixtachihuīn Dios nacāmāpaꞌksīkōꞌ, ūꞌtzaꞌ jā huanicuꞌtun Cristo namāpaꞌksī Dios. Dios ūꞌtzaꞌ tī māstāꞌlh lītliꞌhuiꞌqui.
\v 28 Pūla nacāskāhuīꞌkōꞌ ixlīpōꞌktucaꞌn ti quiclh talaktziꞌn Cristo. Aꞌcxniꞌ xlaꞌ nacāmāpaꞌksīkōꞌ, aꞌcxniꞌ Cristo tī īꞌSkaꞌtaꞌ Dios ixaꞌcstu natamacamāstāꞌniꞌ Dios. Chuntzaꞌ namākentaxtukōꞌ chī ixtalacasquiꞌnīn Dios. Chuntzaꞌ tī ixlīmān namāpaꞌksīniꞌnkōꞌ calhāxcuhuālh, ūꞌtzaꞌ Dios.
\p
\v 29 Palh jā cahuālh lacastālancuanaꞌncan, ¿tū tapuhuamāꞌnalh xlacaꞌn tī taꞌaꞌkpaxa natamaktāya tī tanīlh? ¿Chī talīꞌaꞌkpaxa ixpālacata tī tanīlh palh jā tapuhuan natalacastālancuanaꞌn?
\p
\v 30 Lakalīyān lījicuaꞌ icuīꞌlh. Palh jā lacastālancuanaꞌncan, ¿tū ixpālacata chuntzaꞌ icuīꞌlh?
\v 31 Lakalīyān quintamaknīcuꞌtun. Huāꞌmāꞌ ixlīcānaꞌ ē nā ixlīcānaꞌ chī kaꞌtlaꞌ iclīmakcaꞌtzī mimpālacatacaꞌn. Kaꞌtlaꞌ iclīmakcatzī ixpālacata tāꞌtapaꞌksīꞌyāꞌtit Jesucristo quiMāpaꞌksīniꞌcaꞌn.
\v 32 Līlhūhuaꞌ huāꞌtzāꞌ nac cāꞌlacchicniꞌ Efeso huaꞌchi huaꞌnaꞌnīꞌn chī ixquintamaknīcuꞌtun. Palh jā cahuālh lacastālancuanaꞌncan ¿tū ixpālacata naꞌiclītāyaniꞌ chuntzaꞌ chī iclīpātīniꞌmāꞌlh huāꞌtzaꞌ nac cāꞌquilhtamacuj? Xatze naꞌictlahua chī huancan: “Nahuāꞌyanāuj ē nakōꞌtnuꞌnāuj. Lakalī nanīyāuj.”
\p
\v 33 Jā catāꞌkskahuīꞌtit. Chuntzaꞌ chī huancan: “Tī līlacatejtin latlāꞌhuan ē nacātāꞌtalacxtuca xlacaꞌn tī jā tze, xlaꞌ nala ixtāꞌchuntzaꞌcaꞌn xlacaꞌn tī jā tze.”
\v 34 Tzej calacapāstactit ē cuenta catlahuaꞌtit ē jātzaꞌ catlahuaꞌtit tū jā tze. Huīꞌlh āꞌmakapitzīn na milacpuꞌnaꞌiꞌtātcaꞌn tī jānaꞌj taꞌaꞌkaꞌīꞌ ixtachihuīn Dios ē jā tacaꞌtzī chī līhuīꞌlh Dios. Ūꞌtzaꞌ iccāhuaniyān naꞌiccālīmāmāxanīꞌyān.
\s Chī natalīlacastālancuanaꞌn nīnīꞌn
\p
\v 35 Āꞌmakapitzīn natakelhasquiꞌnīniꞌn: “¿Chī tzē natalīlacastālancuanaꞌn tī tanīlh? ¿Chī natala ixmacniꞌcaꞌn aꞌcxniꞌ natalacastālancuanaꞌn?”
\v 36 Calacapāstacnaꞌntit. Aꞌcxniꞌ nachaꞌnāꞌtit līchaꞌnat, namāꞌcnūyāꞌtit nac tiꞌyaꞌt ē namasa xakoꞌxkaꞌ ē chuntzaꞌ napuꞌn.
\v 37 Tū chaꞌnāꞌtit jā tasuꞌyu huaꞌchi tū nataxtu. Nachaꞌnāꞌtit xalīchaꞌnat cuxiꞌ o stapun o catūxcuhuālh tū māscāquīcanīꞌt. Tū napuꞌn, xlaꞌ scaꞌyāꞌhuaꞌ ē tzēhuanīꞌt.
\v 38 Dios cāmaxquīꞌ chī nalīstaca ē chī ixtalacasquiꞌnīn. Xtum tasuꞌyu xāhuat ē xtum tasuꞌyu xapaꞌlhmaꞌ stapun. Kempālhūhuaꞌ līchaꞌnat ē xtum tatasuꞌyu pūlacatunuꞌ chī tastaca.
\v 39 Nā aꞌnan kempālhūhuaꞌ macniꞌ. Aꞌnan ixmacniꞌcaꞌn tachiꞌxcuhuīꞌt ē aꞌnan ixmacniꞌcaꞌn animalh ē aꞌnan ixmacniꞌcaꞌn squīꞌtiꞌ ē ixmacniꞌcaꞌn spūnīꞌn. Chāꞌtunuꞌ xtum ixmacniꞌcaꞌn.
\v 40 Aꞌnan ixmacniꞌ tī huīꞌlh nac aꞌkapūn ē ixmacniꞌ tī huīꞌlh nac tiꞌyaꞌt. Xtum chī ixlītzēhuanīꞌt macniꞌ xalaꞌ nac aꞌkapūn ē xtum chī ixlītzēhuanīꞌt macniꞌ xalaꞌ nac tiꞌyaꞌt.
\v 41 Xtum chī ixlītzēhuanīꞌt chiꞌchiniꞌ ē xtum chī ixlītzēhuanīꞌt mālhcuyuꞌ ē staꞌcu. Nā xtum chī ixlītzēhuanīꞌt aꞌkatunuꞌ staꞌcu. Aꞌkatunuꞌ macniꞌ xtum ixlītzēhuanīꞌt.
\v 42 Chuntzaꞌ aꞌkspula aꞌcxniꞌ lacastālancuanaꞌncan. Nacāmāꞌcnūcan quimacniꞌcaꞌn ē natamasa. Aꞌcxniꞌ nalacastālancuanaꞌnāuj, xtum natala quimacniꞌcaꞌn ē jātzaꞌ catitamasli.
\v 43 Quimacniꞌcaꞌn tū nacāmāꞌcnūcan jā tze; xasāstiꞌ quimacniꞌcaꞌn tzēhuanīꞌt natala ē nataxkaka. Xaxlajuaniꞌ quimacniꞌcaꞌn tū nacāmāꞌcnūcan; aꞌcxniꞌ natalacastālancuanaꞌn lactliꞌhuiꞌquīn natahuan.
\v 44 Quimacniꞌcaꞌn tū kaꞌlhīyāuj huāꞌtzaꞌ nac cāꞌquilhtamacuj xmān macniꞌ ē nacāmāꞌcnūcan aꞌcxniꞌ nanīyāuj. Aꞌcxniꞌ nalacastālancuanaꞌnāuj, Dios naquincāmaxquīꞌyān xasāstiꞌ quimacniꞌcaꞌn tū espiritual. Kaꞌlhīyāuj quimacniꞌcaꞌn xalaꞌ huātzaꞌ nac cāꞌquilhtamacuj; nā nakaꞌlhīyāuj quimacniꞌcaꞌn xalaꞌ nac aꞌkapūn.
\q 	
\v 45 	 Chuntzaꞌ tatzoꞌkniꞌ na ixtachihuīn Dios:
\q Pūla tlahuaca chāꞌtin chiꞌxcuꞌ.
\q Nā maxquīꞌca ixlatamat.
\q Huiꞌlīniꞌca ixtacuhuīniꞌ Adán.
\m Dios suꞌnulh na ixquiniꞌ ē chuntzaꞌ lakahuanli ē tahuīꞌlh. Āꞌlīstān lacatuncuhuīꞌlh Jesucristo tī quincāmaxquīꞌn xasāstiꞌ quilatamatcaꞌn.
\v 46 Pūla kaꞌlhīyāuj quimacniꞌcaꞌn tū xalaꞌ huāꞌtzāꞌ nac cāꞌquilhtamacuj ē tū natanī. Āꞌlīstān nakaꞌlhīyāuj xasāstiꞌ quimacniꞌcaꞌn xalaꞌ nac aꞌkapūn.
\v 47 Xapūla chiꞌxcuꞌ ūꞌtzaꞌ Adán ē Dios lītlahualh xapokxniꞌ tiꞌyaꞌt. Āꞌchāꞌtin chiꞌxcuꞌ ūꞌtzaꞌ Jesucristo ē xlaꞌ minchaꞌ nac aꞌkapūn.
\v 48 Chuntzaꞌ chī ixuanīꞌt ixmacniꞌ Adán chu lacxtim chī quimacniꞌcaꞌn quinaꞌn tī xalanīꞌn nac cāꞌquilhtamacuj. Nā chuntzaꞌ ixlīpōꞌktucaꞌn tī tatāꞌtapaꞌksī Cristo natakaꞌlhī xasāstiꞌ ixmacniꞌcaꞌn huaꞌchi ixmacniꞌ Cristo.
\v 49 Chuntzaꞌ chī nac huāꞌmāꞌ cāꞌquilhtamacuj lītasuꞌyuyāuj Adán, nā chuntzaꞌ nac aꞌkapūn nalītasuꞌyuyāuj Cristo tī minchaꞌ nac aꞌkapūn.
\p
\v 50 Chuhuaꞌj iccāhuaniyān quimacniꞌcaꞌn tū kaꞌlhī kaꞌlhniꞌ ē quinīt jāla catitanūlh jā Dios māpaꞌksīniꞌnkōꞌ. Quimacniꞌcaꞌn tū natamasa jāla catitatanūlh jā tahuiꞌlanaꞌlh tī takaꞌlhī ixlatamatcaꞌn tū jā catilaksputli.
\v 51 Cakexpaꞌttit. Naꞌiccāhuaniyān tū ixtatzēꞌknīꞌt. Quilīpōꞌktucaꞌn jā catinīuj. Quilīpōꞌktucaꞌn nalakpalīcan quimacniꞌcaꞌn.
\v 52 Aꞌcxniꞌ ixlīsputniꞌ cāꞌquilhtamacuj ē nasāꞌnan trompeta, xamaktin naquincāꞌaꞌkspulayān huaꞌchi aꞌcxniꞌ natalakatzīꞌyāuj ē nalacahuānaꞌmpalayāuj. Nasāꞌnan trompeta ē tī tanīnīꞌttzaꞌ natalacastālancuanaꞌn ē natakaꞌlhī ixmacniꞌcaꞌn xasāstiꞌ tū jā maktin catitamasli. Quilīpōꞌktucaꞌn naquincātalakpalīniꞌyān quimacniꞌcaꞌn.
\v 53 Quimacniꞌcaꞌn tū tzē natamasa kaꞌlhī natalakpalī ē xasāstiꞌ natahuan ē jā maktin catitamasli. Quimacniꞌcaꞌn tū natanī ixlacasquiꞌnca xasāstiꞌ natahuan ē jā catitalaksputli.
\v 54 Aꞌcxniꞌ quimacniꞌcaꞌn tū natamasa natalakpalī ē xasāstiꞌ natahuan ē jā catitamasli ē aꞌcxniꞌ quimacniꞌcaꞌn tū natanī natalakpalī ē jā catitanīlh, aꞌcxniꞌ namākentaxtūcan tū tatzoꞌknīꞌt chuntzaꞌ:
\q Taskāhuīꞌnīꞌt līnīn.
\q Ē chuntzaꞌ quincātalīmālakahuanīyān.
\m
\v 55 ¿Jā huīꞌlh ixlītliꞌhuiꞌqui līnīn? Sputlitzaꞌ. ¿Tīchu nacaꞌtzaniꞌ ixpālacata līnīn? Jā tī chāꞌtin.
\v 56 Tzamāꞌ tū jā tze ūꞌtzaꞌ nalīnīyāuj. Tachiꞌxcuhuīꞌt jā takexmatniꞌ ixlīmāpaꞌksīn Dios. Chuntzaꞌ lītasuꞌyu huaꞌchi tū jā tze cāmāpaꞌksīmāꞌlh. Lītasuꞌyu ixpālacata tachiꞌxcuhuīꞌt jā takexmatniꞌlh ixlīmāpaꞌksīn Dios.
\v 57 Icmaxquīꞌ tapāxcatcaꞌtzīn Dios chī līskahuīꞌyāuj līnīn ixpālacata ixlītliꞌhuiꞌqui quiMāpaꞌksīniꞌcaꞌn Jesucristo.
\p
\v 58 Tāꞌtimīn, iccāpāxquīꞌyān. Ūꞌtzaꞌ iccālīhuaniyān jā catamakxtektit tū nacāmāmakchuyīyān ē nacālīmāpānūniꞌyān tū aꞌkaꞌīꞌnīꞌtaꞌntit. Pōꞌktu quilhtamacuj tzej nascuꞌjāꞌtit ixpālacata Māpaꞌksīniꞌ. Caꞌtzīyāꞌtit tū natlahuaꞌyāꞌtit ixpālacata Māpaꞌksīniꞌ jā catilaksputli.
\c 16
\s Tumīn tū namākēstokcan
\p
\v 1 Chuhuaꞌj iccāhuaniyān ixpālacata tumīn tū namākēstokāꞌtit ē tū nacālīmaktāyayāꞌtit tī taꞌaꞌkaꞌīꞌ xalanīꞌn nac Judea. Chuntzaꞌ chī iccāhuani tī tatakēstoka jā huanican Galacia, nā chuntzaꞌ natlahuaꞌyāꞌtit.
\v 2 Cāꞌdomingo namāquīꞌtēlhaꞌyāꞌtit macstiꞌnaꞌj mintumīncaꞌn tū tlajanīꞌtaꞌntit tzamāꞌ semana. Chuntzaꞌ aꞌcxniꞌ naꞌicaꞌnāchaꞌ, xmān namākēstokāꞌtit tū māquīꞌnīꞌtaꞌntittzaꞌ.
\v 3 Huiꞌxinaꞌn cacālacsaꞌctit chiꞌxcuhuīꞌn tī lactze ē xlacaꞌn natalēꞌn minofrendacaꞌn. Quit naꞌiccāmaxquīꞌ aꞌktin caꞌpsnap ē naꞌiccāmacāꞌniꞌ nac Jerusalén.
\v 4 Palh minīꞌniꞌ naꞌicaꞌn, naquintatāꞌaꞌn xlacaꞌn.
\s Pablo aꞌncuꞌtun āꞌlacatin
\p
\v 5 Naꞌictētaxtutēlha nac cāꞌlacchicniꞌ jā huanican Macedonia ē āꞌlīstān naꞌiccālakaꞌnāchān.
\v 6 Palhāsāꞌ lakmaj naꞌictachokoyāchaꞌ na mincāꞌlacchicniꞌcaꞌn o palhāsāꞌ aꞌntzaꞌ icuīꞌlāchaꞌ nahuan aꞌcxniꞌ nalonknun. Chuntzaꞌ huiꞌxinaꞌn tzē naquilāmaktāyayāuj aꞌcxniꞌ naꞌictaxtupala calhāxcuhuālh naꞌicaꞌncuꞌtun.
\v 7 Jā iclacasquiꞌn xmān naꞌictētaxtu aꞌcxniꞌ naꞌiccālakaꞌnāchān. Iccātāꞌtachokocuꞌtunāchān lakmaꞌj palh Dios lacasquiꞌn.
\v 8 Naꞌictachoko huāꞌtzāꞌ nac Efeso hasta cāꞌtaniꞌ tū māpācuhuīcan Pentecostés.
\v 9 Calhāxcuhuālh nac huāꞌmāꞌ cāꞌlacchicniꞌ tzē naꞌicmāsuꞌyu ixtachihuīn Dios masqui lhūhuaꞌ tahuiꞌlānaꞌlh tī quintaquiclhlaktziꞌn.
\p
\v 10 Aꞌcxniꞌ nachāꞌnāchaꞌ Timoteo, calakachiꞌxcuhuīꞌtit ē tzej camaktīniꞌntit ixpālacata jā namāxanaꞌn. Tzej camakamaktīniꞌnchipitit ixpālacata xlaꞌ tāꞌscujmāꞌlh Māpaꞌksīniꞌ chuntzaꞌ chī quit.
\v 11 Jā tī chāꞌtin calakmakaꞌlh. Tzej namaktāyaꞌyāꞌtit naquilakmin. Quit ickaꞌlhīmāꞌlh ē nā iccātāꞌkaꞌlhīmāꞌlh āꞌmakapitzīn tī taꞌaꞌkaꞌīꞌ.
\p
\v 12 Ē quintāꞌtincaꞌn Apolos, icsquiꞌnli cacātāꞌaꞌlh āꞌmakapitzīn tī nacālakaꞌnāchān. Jā ixtalacasquiꞌnīn ixuanīꞌt naꞌaꞌnāchaꞌ chuhuaꞌj. Naꞌaꞌn aꞌcxniꞌ nakaꞌlhī quilhtamacuj.
\s Āꞌxmān saludos
\p
\v 13 Catamaktakaꞌlhtit. Jā tilakpalīꞌyāꞌtit tū aꞌkaꞌīꞌnīꞌtaꞌntit. Calatāꞌkchokotit chuntzaꞌ chī cāminīꞌniꞌ chiꞌxcuhuīꞌn ē catahuiꞌxcāꞌnīꞌtit.
\v 14 Catūxcuhuālh tū natlahuaꞌyāꞌtit, catlahuaꞌtit ixpālacata cāpāxquīꞌyāꞌtit āꞌmakapitzīn.
\p
\v 15 Caꞌtzīyāꞌtit Estéfanas ē ixlīpōꞌktu ixfamilia xlacaꞌn xapūla tī taꞌaꞌkaꞌīꞌlh aꞌcxniꞌ icmāsuꞌyulh ixtachihuīn Dios jā huanican Acaya. Xlacaꞌn talīhuiꞌlīlh nacāmaktāya āꞌmakapitzīn tī taꞌaꞌkaꞌīꞌlh.
\v 16 Iccāsquiꞌniꞌyān cacākexpatniꞌtit xlacaꞌn ē cacākexpatniꞌtit chāꞌtunuꞌ tī tzej tatāꞌscuja ē tamaktāya āꞌmakapitzīn tī taꞌaꞌkaꞌīꞌ.
\v 17 Iclīpāxuhua ixpālacata tachilh huāꞌtzāꞌ Estéfanas ē Fortunato ē Acaico. Xlacaꞌn milakxokocaꞌn ixpālacata quintalakmilh ē huaꞌchi chuntzaꞌ iccālaktzīꞌkōꞌn.
\v 18 Xlacaꞌn quintamakapāxuīlh ē nā nacātamakapāxuīyān huiꞌxinaꞌn. Nacālakachiꞌxcuhuīꞌyāꞌtit chiꞌxcuhuīꞌn tī chuntzaꞌ chī xlacaꞌn.
\p
\v 19 Tī taꞌaꞌkaꞌīꞌ ē xalanīꞌn calhāxcuhuālh jā huanican Asia, xlacaꞌn cātamacāꞌniꞌyāchān saludos. Aquila ē Priscila tī ixpuscāt nā cātamacāꞌniꞌyāchān saludos ixpālacata Māpaꞌksīniꞌ. Nā chu lacxtim ixlīpōꞌktucaꞌn tī tatakēstoka na ixchiccaꞌn.
\v 20 Ixlīpōꞌktucaꞌn tī taꞌaꞌkaꞌīꞌ cātamacāꞌniꞌyāchān saludos. Nā huiꞌxinaꞌn nalāsaludarlīꞌyāꞌtit.
\p
\v 21 Chuhuaꞌj quit naꞌictzoꞌka huāꞌmāꞌ. Quit, Pablo, iccāmacāꞌniꞌyāchān saludos.
\p
\v 22 Palh chāꞌtin jā pāxquīꞌ Māpaꞌksīniꞌ Jesucristo, camakapātīnīnca nac pūpātīn. Camilh quiMāpaꞌksīniꞌcaꞌn.
\p
\v 23 Cacāsicuaꞌlanātlahuan Māpaꞌksīniꞌ Jesucristo.
\v 24 Iccāpāxquīꞌkōꞌyān ixpālacata Jesucristo. Amén.