\id 2CO
\h 2 Corintios
\toc1 2 Corintios
\mt 2 Corintios
\c 1
\s Pablo cātzoꞌknuniꞌlh tī xalanīꞌn nac Corinto
\p
\v 1 Iccātzoꞌknuniꞌmāꞌn huāꞌmāꞌ carta quit Pablo ē nā Timoteo tī quintāꞌtincaꞌn. Quit ixapóstol Jesucristo ixpālacata Dios quilīhuiꞌlīlh quilīꞌapóstol. Iccātzoꞌknuniꞌyān huiꞌxinaꞌn tī tapaꞌksīniꞌyāꞌtit Dios ē tāꞌkēstokāꞌtit nac Corinto namakapāxuīꞌyāꞌtit Dios. Nā iccātzoꞌknuniꞌyāuj ixlīpōꞌktucaꞌn tī taꞌaꞌkaꞌīꞌ nac Acaya.
\v 2 Huiꞌxinaꞌn cacālakalhuꞌman Dios quinTātaꞌcaꞌn ē Māpaꞌksīniꞌ Jesucristo. Tzej calatapāꞌtit.
\s Pablo pātīniꞌlh
\p
\v 3 Ca mākaꞌtlīꞌca Dios tī ixTātaꞌ quiMāpaꞌksīniꞌcaꞌn Jesucristo. Dios lakalhuꞌmanīniꞌn ē quincāmaktāyayān.
\v 4 Dios quincāmākoꞌxamākaꞌtlīꞌyān pōꞌktu quilhtamacuj aꞌcxniꞌ pātīniꞌnāuj. Dios lacasquiꞌn nacāmākoꞌxamākaꞌtlīꞌyāuj āꞌmakapitzīn tī tapātīniꞌmāꞌnalh chuntzaꞌ chī Dios quincāmākoꞌxamākaꞌtlīꞌyān.
\v 5 Cristo pātīniꞌlh, ē nā quinaꞌn pātīniꞌnāuj. Cristo quincāmākoꞌxamākaꞌtlīꞌyān aꞌcxniꞌ pātīniꞌnāuj.
\v 6 Quit icpātīniꞌn, ē chuntzaꞌ tzē iccāmākoꞌxamākaꞌtlīꞌyān huiꞌxinaꞌn ē tzē iccāmaktāyayān naꞌaꞌkaꞌīꞌyāꞌtit āꞌchulāꞌ. Dios quimākoꞌxamākaꞌtlīꞌ, nā chuntzaꞌ tzē naꞌiccāmākoꞌxamākaꞌtlīꞌyān huiꞌxinaꞌn ē nā tzē naꞌiccāmaktāyayān aꞌcxniꞌ huiꞌxinaꞌn pātīniꞌnāꞌtit chī quit.
\v 7 Quit tzej iccaꞌtzī huiꞌxinaꞌn natāyaniꞌyāꞌtit masqui pātīniꞌmpāꞌnaꞌntit nā huiꞌxinaꞌn. Nā iccaꞌtzī nacātamākoꞌxamākaꞌtlīꞌyān.
\p
\v 8 Tāꞌtimīn, quit iclacasquiꞌn huiꞌxinaꞌn nacaꞌtzīyāꞌtit chī iclīpātīniꞌlh aꞌcxniꞌ xaꞌicuiꞌlachaꞌ nac Asia. Quit jātzaꞌ xaꞌictāyaniꞌ. Ictipuhuanli jātzaꞌ āꞌchulāꞌ xaꞌictilatamalh.
\v 9 Xaꞌicpuhuan naꞌicnītzaꞌ. Xaꞌiccaꞌtzī quit jātzaꞌ la tū xaꞌictlahua. Ūꞌtzaꞌ xmān Dios xaꞌiclīpāhuan. Xlaꞌ ūꞌtzaꞌ tī tzē cāmālacastālancuanī nīnīꞌn.
\v 10 Dios quimakapūtaxtūlh tzamāꞌ lījicuaꞌ. Tzēcus naquimakapūtaxtū Dios. Quit iccaꞌtzī Dios naquimakapūtaxtū aꞌcxniꞌ naꞌictahuiꞌlapala nac cāꞌlījicuaꞌ.
\v 11 Xmān ixlacasquiꞌnca huiꞌxinaꞌn naꞌorarlīyāꞌtit quimpālacata. Chuntzaꞌ naquilāmaktāyayāuj huiꞌxinaꞌn. Chuntzaꞌ aꞌcxniꞌ Dios naquisicuaꞌlanātlahua, lhūhuaꞌ tī natamaxquīꞌ Dios tapāxcatcaꞌtzīn, ixpālacata tū Dios māstāꞌnīꞌt chuntzaꞌ chī huiꞌxinaꞌn squiꞌniꞌtit.
\s Pablo huanli tū ixpālacata jā līꞌaꞌlh nac Corinto
\p
\v 12 Līpāxuhua icuīꞌlh ixpālacata quit iccaꞌtzī tzej ictlāꞌhuanīꞌt na milacpuꞌnaꞌiꞌtātcaꞌn ē nā na ixlacpuꞌnaꞌiꞌtātcaꞌn ixlīpōꞌktucaꞌn tachiꞌxcuhuīꞌt. Jā icaꞌkskāhuīꞌninīꞌt. Dios quimaxquīꞌlh talacapāstacniꞌ. Ūꞌtzaꞌ tzej iclīlatlāꞌhuan. Dios lakalhuꞌmanīniꞌn. Quimaxquīꞌnīꞌt talacapāstacniꞌ tū jā huaꞌchi ixtalacapāstacniꞌcaꞌn tachiꞌxcuhuīꞌt xalanīꞌn nac cāꞌquilhtamacuj.
\v 13 Tū iccātzoꞌknuniꞌyān huāꞌmāꞌ huanicuꞌtun xmān tū kexpaꞌtāꞌtit huiꞌxinaꞌn aꞌcxniꞌ nakelhtahuaꞌkaꞌyāꞌtit. Jā iccāhuanimāꞌn āꞌcatūhuālh tachihuīn. Quit iclacasquiꞌn huiꞌxinaꞌn tzej nakexpaꞌtāꞌtit tū ictzoꞌkmāꞌlh.
\v 14 Āꞌmakapitzīn huiꞌxinaꞌn caꞌtzīyāꞌtit chī nalīpāxuhuaꞌyāꞌtit quimpālacata aꞌcxniꞌ namimpala Māpaꞌksīniꞌ Jesús. Nā quit naꞌiclīpāxuhua mimpālacatacaꞌn.
\p
\v 15 Quit xaꞌiccaꞌtzī huāꞌmāꞌ, ē ūꞌtzaꞌ quit iclīpuhuanli naꞌiccālakaꞌmpalayāchāꞌn huiꞌxinaꞌn.
\v 16 Quit xaꞌiccātēlaktaxtucuꞌtunān huiꞌxinaꞌn aꞌcxniꞌ icmilh nac Macedonia. Nā icpuhuanli naꞌiccālakaꞌnāchāꞌn aꞌcxniꞌ xaꞌictaxtulh nac Macedonia. Ē chuntzaꞌ āꞌlīstān huiꞌxinaꞌn ixquilāmāmakxtoklēꞌuj nac Judea.
\v 17 Masqui icuanli xaꞌiccālakaꞌnchaꞌn huiꞌxinaꞌn, quit jāla icmākentaxtūlh. Ūꞌtzaꞌ talīhuan āꞌmakapitzīn palh quit xmān xaꞌicaꞌksaꞌnīniꞌmāꞌlh aꞌcxniꞌ icuanli xaꞌicaꞌncuꞌtun. Aꞌcxniꞌ quit iclīchihuīnaꞌn tū naꞌictlahua, jā icchihuīnaꞌn huaꞌchi chiꞌxcuhuīꞌn xalanīꞌn nac cāꞌquilhtamacuj. Xlacaꞌn tahuan ixlīcānaꞌ natatlahua catūhuālh masqui tacaꞌtzī jā catitamākentaxtūlh.
\v 18 Dios jā maktin talakpalī. Xlaꞌ caꞌtzī ixlīcānaꞌ tū icuan. Tū iccāhuaniyān huiꞌxinaꞌn tzē naꞌaꞌkaꞌīꞌyāꞌtit.
\v 19 Quit ē Silvano ē Timoteo xaꞌiccāmāsuꞌyuniꞌyān ixpālacata Jesucristo tī īꞌSkaꞌtaꞌ Dios. Tzē aꞌkaꞌīꞌcan tū huan Jesucristo. Xlaꞌ pōꞌktu quilhtamacuj huan tū ixlīcānaꞌ. Xlaꞌ jā maktin talakpalī.
\v 20 Ixlīpōꞌktu tū Dios huan natlahua, Jesucristo mākentaxtūkōꞌ. Ūꞌtzaꞌ līmaxquīꞌyāuj tapāxcatcaꞌtzīn Dios.
\v 21 Dios ūꞌtzaꞌ tī quimaktāya naꞌicaꞌkaꞌīꞌni niꞌ Jesucristo. Nā huiꞌxinaꞌn cāmaktāyayān tzej naꞌaꞌkaꞌīꞌyāꞌtit. Nā xlaꞌ quilacsacnīꞌt naꞌictāꞌscuja.
\v 22 Dios quincālakmacaminīꞌtaꞌn Espíritu Santo tī huīꞌlh na quilīstacnaꞌcaꞌn. Chuntzaꞌ tasuꞌyu tapaꞌksīniꞌyāuj Dios, ē huaꞌchi līxokohuiꞌlīnīꞌttzaꞌ quilīstacnaꞌcaꞌn.
\p
\v 23 Dios caꞌtzī palh ixlīcānaꞌ tū naꞌiccāhuaniyān. Palh quit xaꞌiccālakaꞌnchaꞌn cahuālh nac Corinto, quit xaꞌiccālacaquilhnīn huiꞌxinaꞌn. Ūꞌtzaꞌ jā iclīꞌaꞌlh. Dios caꞌtzī tū jā iclīꞌaꞌnchaꞌ.
\v 24 Quit jā iccāmāpaꞌksīcuꞌtunān chī huiꞌxinaꞌn aꞌkaꞌīꞌyāꞌtit. Huiꞌxinaꞌn tzejtzaꞌ aꞌkaꞌīꞌyāꞌtit. Xmān iccātlahuaniꞌcuꞌtunān tū nalīpāxuaꞌyāꞌtit.
\c 2
\p
\v 1 Ūꞌtzaꞌ quit iclīhuiꞌlīlh jā iccālakaꞌnchaꞌn huiꞌxinaꞌn palh ixlacasquiꞌnca xaꞌiccālacaquilhnīn. Palh quit xaꞌiccālacaquilhnīn, lacxtim ixlīlīpuhuanui quinaꞌn.
\v 2 Palh quit xaꞌiccāmālakaputzīn huiꞌxinaꞌn, jā tī ixaꞌnalh tī ixquimakapāxuīlh quit. Palh huiꞌxinaꞌn līpuhuanāꞌtit, quit jāla līpāxuhua iclatahuiꞌla.
\v 3 Ūꞌtzaꞌ jā iclīꞌaꞌlh. Xmān iccātzoꞌkniꞌn aꞌktin carta. Jā xaꞌicaꞌncuꞌtunāchaꞌ iccālacaquilhnīyān ē nūn xaꞌiccāmālakaputzīcuꞌtunān. Palh huiꞌxinaꞌn mākentaxtūyāꞌtit tū iccātzoꞌknuniꞌn, quit naꞌiclīpāxuhua ē nā huiꞌxinaꞌn nalīpāxuaꞌyāꞌtit.
\v 4 Quit xaꞌiclīpuhuan aꞌcxniꞌ iccātzoꞌknuniꞌn huiꞌxinaꞌn. Nā xaꞌiccalhuan ixpālacata xaꞌiccaꞌtzī ixcāmālakaputzīn tū xaꞌiccātzoꞌknuniꞌnīꞌtaꞌn. Jā xaꞌiccāmālakaputzīcuꞌtunān. Iclacasquiꞌnli huiꞌxinaꞌn nacaꞌtzīyāꞌtit chī quit iccāpāxquīꞌyān huiꞌxinaꞌn.
\s Ixlacasquiꞌnca namāsputūnuꞌniꞌcan chiꞌxcuꞌ tī jātzaꞌ tlahua tū jā tze
\p
\v 5 Tzamāꞌ chiꞌxcuꞌ tī tlahualh tū jā tze, xlaꞌ iclīlīpuhuanli, ixpālacata jā tze tū tlahualh. Āꞌchulāꞌ cāmālakaputzīnīꞌtaꞌn huiꞌxinaꞌn. Jā icuan palh milīpōꞌktucaꞌn huiꞌxinaꞌn cāmālakaputzīnīꞌtaꞌn. Palhāsāꞌ jā milīpōꞌktucaꞌn.
\v 6 Milīlhūhuaꞌcaꞌn huiꞌxinaꞌn makapātīnīnīꞌtaꞌntit tzamāꞌ chiꞌxcuꞌ. Chuhuaꞌj tzetzaꞌ. Jātzaꞌ camakapātīnīntit.
\v 7 Chuhuaꞌj camātzaꞌnkēnaꞌniꞌtit ē camākoꞌxamixīꞌtit. Palh jā chuntzaꞌ natlahuaꞌyāꞌtit, tzamāꞌ chiꞌxcuꞌ jāla catitāyaniꞌlh, ixpālacata nalīlīpuhuan.
\v 8 Ūꞌtzaꞌ iccālīsquiꞌniꞌyān huiꞌxinaꞌn camāsuꞌyuꞌtit chī pāxquīꞌyāꞌtit.
\v 9 Aꞌcxniꞌ quit iccāmacāꞌniꞌchān aꞌktin carta, quit iccaꞌtzīcuꞌtunli palh huiꞌxinaꞌn ixtlahuaꞌtit tū iccāhuanin ixpālacata tzamāꞌ chiꞌxcuꞌ. Iccaꞌtzīcuꞌtunli palh huiꞌxinaꞌn ixquilākexmatniꞌuj.
\v 10 Palh huiꞌxinaꞌn māsputūnuꞌniꞌyāꞌtit tzamāꞌ chiꞌxcuꞌ, nā quit naꞌicmāsputūnuꞌniꞌ. Palh quit icmāsputūnuꞌniꞌlh catīhuālh, mimpālacatacaꞌn icmāsputūnuꞌniꞌlh na ixlacatīn Cristo.
\v 11 Māsputūnuꞌniꞌyāuj ixpālacata jā lacasquiꞌnāuj naquincāskāhuīꞌyān skāhuīꞌniꞌ. Caꞌtzīyāuj skāhuīꞌniꞌ aꞌkskāhuīꞌnin.
\s Pablo tamakchuyīlh aꞌcxniꞌ ixuīꞌlh nac Troas
\p
\v 12 Quit ictētaxtulh nac Troas ixpālacata aꞌntzaꞌ icmāsuꞌyucuꞌtunli xatze tachihuīn tu īxlaꞌ Cristo. Aꞌcxniꞌ ictētaxtulh aꞌntzaꞌ, Dios ixlacāxtlahuakōꞌnīꞌttzaꞌ ixlīpōꞌktu aꞌntzaꞌ.
\v 13 Masqui tzej taxtulh, quit xaꞌictamakchuyīnīꞌt, ixpālacata quintāꞌtincaꞌn, Tito, jā chāꞌlh aꞌntzaꞌ chuntzaꞌ chī xaꞌiclacāxlanīꞌtaꞌuj. Ūꞌtzaꞌ iccālīmakxtekli xalanīꞌn nac Troas ē icmilh nac Macedonia ixpālacata icpuhuanli Tito ixchilh huāꞌtzāꞌ.
\s Ixtachihuīn Dios tzej taxtu
\p
\v 14 Maxquīꞌyāuj tapāxcatcaꞌtzīn Dios ixpālacata ixlīmāpaꞌksīn Cristo tzej lītaxtuyāchaꞌ tachihuīn tū icmāsuꞌyu. Xlaꞌ quimaktāya naꞌicmāsuꞌyu calhāxcuhuālh ixpālacata Cristo. Huāꞌmāꞌ tamāsuꞌyun huaꞌchi aꞌktin perfume tū muꞌcsun calhāxcuhuālh.
\v 15 Līpāxuhua Dios chī quinaꞌn icmāsuꞌyuyāuj ixtachihuīn Cristo. Quinaꞌn huaꞌchi aꞌktin jiniꞌ na ixpuꞌnancaꞌn tī taꞌaꞌkapūtaxtunīꞌttzaꞌ ē nā tī jānaꞌj taꞌaꞌkapūtaxtu.
\v 16 Na ixpuꞌnancaꞌn tī jānaꞌj taꞌaꞌkapūtaxtu, tzamāꞌ tamāsuꞌyun huaꞌchi catūhuālh tū muꞌcsun tū laknīcan. Na ixpuꞌnancaꞌn tī taꞌaꞌkapūtaxtunīꞌttzaꞌ, tzamāꞌ tamāsuꞌyun huaꞌchi aꞌktin perfume tū māstāꞌ latamat. Nūn chāꞌtin tī tzē ixlīmān namāsuꞌyu tū ixlaꞌ Cristo. Ixlacasquiꞌnca Dios namaktāya.
\v 17 Quit jā huaꞌchi tī taꞌaꞌkskāhuīꞌnin ē talakpalī tamāsuꞌyun tū ixlaꞌ Dios. Xlacaꞌn jā tzej tamāsuꞌyu ixpālacata xmān taꞌaꞌkskāhuīꞌtlajacuꞌtun. Quit iclīchihuīnaꞌn tū ixlīcānaꞌ na ixlacatīn Dios, ixpālacata xlaꞌ quimacamaxquīꞌnīꞌt naꞌictāꞌscuja Cristo.
\c 3
\s Aꞌktin xasāstiꞌ talacāxtlahuan
\p
\v 1 Palhāsāꞌ āꞌmakapitzīn natahuan quit kaꞌtlaꞌ icmakcaꞌtzī ē quilīchihuīnaꞌncan quinaꞌcstu. Jā ixlacasquiꞌnca quit naꞌiccāmaxquīꞌyān aꞌktin carta tū nahuan quit tzeya chiꞌxcuꞌ. Jā ixlacasquiꞌnca huiꞌxinaꞌn naquilāmaxquīꞌyāuj aꞌktin carta tū tzē naꞌiclēꞌn calhāxcuhuālh, chuntzaꞌ chī talēꞌn āꞌmakapitzīn.
\v 2 Huiꞌxinaꞌn huaꞌchi quincarta. Mimpālacatacaꞌn caꞌtzīcan tze tū ictlahua. Huāꞌmāꞌ carta tzē natalaktzīꞌn ē natalīkelhtahuaꞌkaꞌ ixlīpōꞌktucaꞌn tachiꞌxcuhuīꞌt. Huiꞌxinaꞌn huaꞌchi aꞌktin carta lītaxtuyāꞌtit tū tatzoꞌkniꞌ na quilīstacnaꞌ, ixpālacata quit iccālacapāstacān huiꞌxinaꞌn.
\v 3 Huiꞌxinaꞌn lītaxtuyāꞌtit huaꞌchi aꞌktin carta tū Cristo quimātzoꞌknīlh. Tzamāꞌ carta jā lītzoꞌkcanīꞌt tinta. Jā tzoꞌkcanīꞌt nac aꞌktin chihuix tū huaꞌchi lhtaꞌcaꞌlaꞌ. Espíritu Santo tī macamilh Dios xalakahuan, xlaꞌ cālakpalīniꞌn mintalacapāstacniꞌcaꞌn aꞌcxniꞌ iccāhuanin ixtachihuīn Jesucristo. Chuntzaꞌ tasuꞌyu tū tlahuanīꞌt Cristo mimpālacatacaꞌn.
\p
\v 4 Chuntzaꞌ icuan ixpālacata quit iccaꞌtzī tze tū icmāsuꞌyu na ixlacatīn Dios, ixpālacata Cristo quimacamaxquīꞌlh naꞌicmāsuꞌyu.
\v 5 Quit jā icuan xmān quinaꞌcstu tzē ictlahua huāꞌmāꞌ tascujūt. Dios quimaktāya ē ūꞌtzaꞌ tzē iclītlahua.
\v 6 Xlaꞌ ūꞌtzaꞌ tī quimaxquīꞌ talacapāstacniꞌ. Ūꞌtzaꞌ tzē iclīmāsuꞌyu xasāstiꞌ talacāxtlahuan tū Dios tlahuanīꞌt. Tzamāꞌ talacāxtlahuan jā huaꞌchi aꞌktin līmāpaꞌksīn tū tatzoꞌkniꞌ. Tzamāꞌ talacāxtlahuan līchihuīnaꞌn Espíritu Santo. Ixlīmāpaꞌksīn Dios māsuꞌyu ixlīpōꞌktucaꞌn tachiꞌxcuhuīꞌt takaꞌlhī ixcuentacaꞌn ē ūꞌtzaꞌ natalīnī. Espíritu Santo māstāꞌ xasāstiꞌ latamat.
\p
\v 7 Huāꞌmāꞌ līmāpaꞌksīn tū māsuꞌyu ixlacasquiꞌnca nanīcan, huāꞌmāꞌ tzoꞌkca pektuꞌ nac chihuix. Aꞌcxniꞌ maxquīꞌca Moisés tzamāꞌ līmāpaꞌksīn, aꞌnalh aꞌktin kaꞌtlaꞌ taxkaket. Ixlacan Moisés īꞌxkaka. Israelitas tī ixtayānaꞌlh aꞌntzaꞌ jāla ixtalaktzīꞌn chī īꞌxkaka ixpālacata ixcāmālakachiꞌxuaniꞌ. Huāꞌmāꞌ taxkaket līlacatzucu mixli. Chuntzaꞌ tzēhuanīꞌt ixuanīꞌt chī Dios māstāꞌlh huāꞌmāꞌ līmāpaꞌksīn.
\v 8 Āꞌchulāꞌ tzēhuanīꞌt tamāsuꞌyun tū Espíritu Santo quincāmaxquīꞌyān.
\v 9 Tzēhuanīꞌt ixuanīꞌt huāꞌmāꞌ līmāpaꞌksīn tū Dios ixmaxquīꞌnīꞌt Moisés masqui ūꞌtzaꞌ līcaꞌtzīcan tachiꞌxcuhuīꞌt nacāmakapātīnīncan. Āꞌchulāꞌ xatzēhuanīꞌt ixtachihuīn Jesucristo, ixpālacata huāꞌmāꞌ quincāmāsuꞌyuniꞌyān chī tzē nalīxapacan tū laclēꞌnāuj.
\v 10 Huāꞌmāꞌ līmāpaꞌksīn tzēhuanīꞌt ixuanīꞌt. Masqui tzēhuanīꞌt ixuanīꞌt, jāla mālakchāꞌnīcan ixtachihuīn Jesucristo.
\v 11 Palh līmāpaꞌksīn tzēhuanīꞌt ixuanīꞌt masqui jā makās ixtitāyaniꞌlh, āꞌchulāꞌ tzēhuanīꞌt tū jā catilaksputli. Ūꞌtzaꞌ xatze tachihuīn ixlaꞌ Jesucristo.
\p
\v 12 Quit lacatancs iccaꞌtzī huāꞌmāꞌ tachihuīn jā catilaksputli. Ūꞌtzaꞌ quit tzej iccālīmāsuꞌyuniꞌcuꞌtun tachiꞌxcuhuīꞌt.
\v 13 Quit jā ictlahua chī Moisés. Xlaꞌ ixtalakatlapa, ē chuntzaꞌ israelitas jāla ixtalaktzīꞌn chī ixtapānūniꞌ tū īꞌxkaka na ixlacan.
\v 14 Israelitas jā ixtacaꞌtzī tū ixuanicuꞌtun. Hasta chuhuaꞌj xlacaꞌn jā tacaꞌtzī tū huanicuꞌtun aꞌcxniꞌ talīkelhtahuaꞌkaꞌ ixtachihuīn Dios jā tatzoꞌkniꞌ talacāxtlahuan xalaꞌ makāstzaꞌ. Huāꞌmāꞌ tzē caꞌtzīyāuj tū huanicuꞌtun xmān palh tapaꞌksīniꞌyāuj Cristo.
\v 15 Hasta chuhuaꞌj israelitas jā tacaꞌtzī tū huanicuꞌtun aꞌcxniꞌ talīkelhtahuaꞌkaꞌ tū tzoꞌkli Moisés.
\v 16 Aꞌcxniꞌ chāꞌtin aꞌkaꞌīꞌniꞌ Māpaꞌksīniꞌ Jesucristo, tzētzaꞌ caꞌtzī tū huanicuꞌtun tū tzoꞌkli Moisés.
\v 17 Māpaꞌksīniꞌ Jesucristo, xlaꞌ chu chāꞌtin chī Espíritu Santo. Tī tatāꞌlatlāꞌhuan Espíritu Santo, xlacaꞌn jātzaꞌ cāmāpaꞌksī skāhuīꞌniꞌ.
\v 18 Quinaꞌn caꞌtzīyāujtzaꞌ tū huanicuꞌtun. Huaꞌchi jātzaꞌ talakatlapanīꞌtaꞌuj na quilacancaꞌn. Chuntzaꞌ huaꞌchi laktzīꞌnāuj Māpaꞌksīniꞌ Jesucristo aꞌktin nac hualhtin. Laktzīꞌnāuj chī ixlīkaꞌtlaꞌ ē chī ixlītze. Quinaꞌn lītalakpalītēlhayāuj chī Cristo. Ūꞌtzaꞌ huāꞌmāꞌ tū tlahuamāꞌlh Espíritu Santo.
\c 4
\p
\v 1 Dios lakalhuꞌmanīniꞌn, ē quimacamaxquīꞌlh xatze tachihuīn ixlaꞌ Jesucristo. Chuntzaꞌ jā ictaxlajuaniꞌ. Jā icmakxteka icmāsuꞌyu huāꞌmāꞌ xatze tachihuīn.
\v 2 Quit jā maktin ictlahua tū līmāxanaꞌ tū lakatzēꞌk tlahuacan. Jā icaꞌkskāhuīꞌnin. Jā iclakpalī ixtachihuīn Dios. Tzej icmāsuꞌyu tū ixlīcānaꞌ na ixlacatīn Dios. Ixlīpōꞌktucaꞌn tachiꞌxcuhuīꞌt tzē natacaꞌtzī ixlīcānaꞌ tū icmāsuꞌyu.
\v 3 Tī jā takexmatcuꞌtun xatze tachihuīn tū icmāsuꞌyu, ūꞌtunuꞌn nacāmakapātīnīncan.
\v 4 Xlacaꞌn tī jā taꞌaꞌkaꞌīꞌ xatze tachihuīn, xlacaꞌn jā tacaꞌtzī tū huanicuꞌtun. Skāhuīꞌniꞌ jā lacasquiꞌn xlacaꞌn natacaꞌtzī tū huanicuꞌtun. Ūꞌtzaꞌ jā talīcaꞌtzī tū huanicuꞌtun. Skāhuīꞌniꞌ huaꞌchi ixdioscaꞌn, ē ūꞌtzaꞌ ixcāmālakatzīꞌnīꞌt ē ūꞌtzaꞌ jāla talīlaktzīꞌn taxkaket tū xatze tachihuīn ixlaꞌ Cristo. Cristo xakaꞌtlaꞌ chī Dios.
\v 5 Tū icmāsuꞌyu quit, jā quit quilīchihuīnaꞌncan. Quit icmāsuꞌyu ixpālacata Jesucristo ūꞌtzaꞌ Māpaꞌksīniꞌ ē ixlacasquiꞌnca nalaktaquilhpūtayāuj. Quit iccāmaktāyayān huiꞌxinaꞌn. Ūꞌtzaꞌ tū Jesucristo lacasquiꞌn naꞌictlahua.
\v 6 Dios quincāmācaꞌtzīnīnīꞌtaꞌn tū ixlīcānaꞌ. Ūꞌtzaꞌ māxkakē quintalacapāstacniꞌcaꞌn. Xlaꞌ ūꞌtzaꞌ tī māstāꞌlh līmāpaꞌksīn natahuiꞌla taxkaket nac cāꞌquilhtamacuj. Ūꞌtzaꞌ lītahuīꞌlh taxkaket. Ē chuntzaꞌ ixquincāmāxkakētēlhān. Ūꞌtzaꞌ līcaꞌtzīyāuj chī Dios ixlīkaꞌtlaꞌ. Huāꞌmāꞌ caꞌtzīyāuj ixpālacata lakapasāuj Jesucristo.
\s Pablo ixlīpāhuan Dios
\p
\v 7 Xatze tachihuīn tū Dios quilīmacamaxquīꞌlh naꞌicmāsuꞌyu, kaꞌlhī lhūhuaꞌ ixtapalh. Quit quinaꞌcstu jā ickaꞌlhī talacapāstacniꞌ naꞌicmāsuꞌyu huāꞌmāꞌ tachihuīn. Quit huaꞌchi aꞌktin pūxkatniꞌ jā tojomāꞌlh tū kaꞌlhī ixtapalh. Chuntzaꞌ tasuꞌyu Dios ūꞌtzaꞌ tī kaꞌlhī lītliꞌhuiꞌqui ē jā quit.
\v 8 Masqui lhūhuaꞌ quit icpātīniꞌn, pōꞌktu quilhtamacuj tzē ictāyaniꞌ. Masqui makatunuꞌ jā iccaꞌtzī tū naꞌictlahua, jā ictaxlajuaniꞌ.
\v 9 Masqui quimputzastālaniꞌcan, Dios jā quimakxteka. Masqui makatunuꞌ quilīsnoꞌktamacatacan, jā tī quimaknī.
\v 10 Pōꞌktu quilhtamacuj lījicuaꞌ icuīꞌlh ixpālacata quimaknīcuꞌtuncan, chuntzaꞌ chī ixmaknīcuꞌtuncan Jesucristo. Aꞌntzaꞌ lītasuꞌyu quimaktāyamāꞌlh Jesucristo xalakahuan.
\v 11 Ictīlatlāꞌhuancus nac cāꞌquilhtamacuj, quimaknīcuꞌtuncan, ixpālacata quit ictāꞌscuja Jesucristo. Ūꞌtzaꞌ lītasuꞌyu Jesucristo quintāꞌlatlāꞌhuan.
\v 12 Quit icmāsuꞌyu xatze tachihuīn ixlaꞌ Jesucristo. Ūꞌtzaꞌ pōꞌktu quilhtamacuj quilīmaknīcuꞌtuncan. Huiꞌxinaꞌn kaꞌlhīꞌyāꞌtittzaꞌ xasāstiꞌ milatamatcaꞌn, ixpālacata quit iccāmāsuꞌyuniꞌn ixtachihuīn Cristo.
\p
\v 13 Tatzoꞌkniꞌ na ixtachihuīn Dios chī huanli chāꞌtin:
\q Quit icaꞌkaꞌīꞌlh, ē ūꞌtzaꞌ quit iclīchihuīnaꞌn chī ixlīkaꞌtlaꞌ Dios.
\m Quit nā icaꞌkaꞌīꞌnīꞌt, ē ūꞌtzaꞌ iccālīhuani āꞌmakapitzīn ixtachihuīn Dios.
\v 14 Quit iclīpāhuan xmān Dios, ixpālacata iccaꞌtzī Dios mālacastālancuanīlh Māpaꞌksīniꞌ Jesucristo. Nā iccaꞌtzī quit naquimālacastālancuanī, ixpālacata quit ictapaꞌksīniꞌ Jesucristo. Huiꞌxinaꞌn ē quit kēxtim naquincātalēꞌnān na ixlacatīn Dios.
\v 15 Ixlīpōꞌktu tū icpātīlh, quit icpātīkōꞌlh ixpālacata iclacasquiꞌnli huiꞌxinaꞌn naꞌaꞌkaꞌīꞌyāꞌtit. Chuntzaꞌ aꞌcxniꞌ lhūhuaꞌ huiꞌxinaꞌn naꞌaꞌkaꞌīꞌyāꞌtit, namaxquīꞌyāꞌtit tapāxcatcaꞌtzīn Dios ē namākaꞌtlīꞌyāꞌtit Dios.
\p
\v 16 Ūꞌtzaꞌ jā iclītaxlajuaniꞌ. Masqui quimacniꞌ taxlajuaniꞌtēlha, āꞌchulāꞌ icaꞌkaꞌīꞌ lakalī lakalī.
\v 17 Tū icpātīmāꞌlh huaꞌchi xmān macstiꞌnaꞌj ē huaꞌchi jā makās īcpātīmāꞌlh ixpālacata Dios quisicuaꞌlanātlahua pōꞌktu quilhtamacuj.
\v 18 Chuntzaꞌ icuan quit ixpālacata jā iclacapāstaca tū tasuꞌyu. Āꞌchulāꞌ iclacapāstaca tū jā tasuꞌyu. Tū tasuꞌyu nalaksputa. Tū jā tasuꞌyu jā catilaksputli.
\c 5
\p
\v 1 Quimacniꞌcaꞌn huaꞌchi aꞌktin aꞌcchic jā huiꞌlānaꞌuj. Quit iccaꞌtzī aꞌcxniꞌ nasputa quimacniꞌcaꞌn, Dios naquincāmaxquīꞌyān āꞌaꞌktin xasāstiꞌ quimacniꞌcaꞌn. Xasāstiꞌ quimacniꞌcaꞌn huaꞌchi quinchiccaꞌn nac aꞌkapūn. Tzamāꞌ chic ixtatlahuat Dios ē jā ixtatlahuatcaꞌn tachiꞌxcuhuīꞌt. Huāꞌmāꞌ chic jā maktin catilaksputli.
\v 2 Ūꞌtzaꞌ līpāstacāuj ixpālacata aꞌncuꞌtunāuj na quinchiccaꞌn nac aꞌkapūn.
\v 3 Jā capuhuanui jā nakaꞌlhīyāuj quimacniꞌcaꞌn aꞌcxniꞌ nanīyāuj. Nakaꞌlhīyāuj xasāstiꞌ quimacniꞌcaꞌn nac aꞌkapūn.
\v 4 Līhuan quinaꞌn kaꞌlhīꞌyāujcus quimacniꞌcaꞌn huāꞌtzāꞌ nac cāꞌquilhtamacuj, makcaꞌtzīyāuj taxlajuaniꞌyāuj chī pātīniꞌmāꞌnauj. Masqui jā ixmakxtekcuꞌtunui huāꞌmāꞌ macniꞌ, kaꞌlhīcuꞌtunāuj xasāstiꞌ quimacniꞌcaꞌn nac aꞌkapūn. Quimacniꞌcaꞌn tū kaꞌlhīyāuj chuhuaꞌj, nalaksputa. Xasāstiꞌ quimacniꞌcaꞌn tū Dios naquincāmaxquīꞌyān, ūꞌtzaꞌ tū jā catilaksputli.
\v 5 Dios quincālacāxtlahuanīꞌtaꞌn ē ūꞌtzaꞌ tzē nalīchāꞌnāuj nac aꞌkapūn. Quincāmacaminiꞌnīꞌtaꞌn Espíritu Santo. Ūꞌtzaꞌ līcaꞌtzīyāuj ixlīcānaꞌ natanūyāuj nac aꞌkapūn.
\p
\v 6 Chuntzaꞌ jā maktin taxlajuaniꞌyāuj. Caꞌtzīyāuj līhuan latlāꞌhuanāuj nac cāꞌquilhtamacuj, jānaꞌj tāꞌhuiꞌlānaꞌnchāuj Māpaꞌksīniꞌ Jesucristo nac aꞌkapūn.
\v 7 Chuhuaꞌj quinaꞌn jā latlāꞌhuanāuj chuntzaꞌ chī laktzīꞌnāuj. Latlāꞌhuanāuj chuntzaꞌ chī tū aꞌkaꞌīꞌyāuj.
\v 8 Chuntzaꞌ quinaꞌn jā taxlajuaniꞌyāuj. Makxtekcuꞌtunāuj huāꞌmāꞌ quimacniꞌcaꞌn ixpālacata lakchāꞌncuꞌtunāuj Māpaꞌksīniꞌ Jesucristo.
\v 9 Ūꞌtzaꞌ nalīhuiꞌlīyāuj natlahuayāuj tū Jesucristo lacasquiꞌn palh tāꞌhuiꞌlānaꞌnchāuj Dios nac aꞌkapūn ē palh huiꞌlānaꞌujcus nac cāꞌquilhtamacuj.
\v 10 Huāꞌmāꞌ līhuiꞌlīyāuj, ixpālacata ixlacasquiꞌnca quilīpōꞌktucaꞌn natāyayāuj na ixlacatīn Cristo. Xlaꞌ naquincāputzānaꞌnīyān chāꞌtunuꞌ quinaꞌn. Namaktīniꞌnāuj quilīpōꞌktucaꞌn chuntzaꞌ chī latāꞌkchokonīꞌtauj, palh tzej o palh jā tzej nac cāꞌquilhtamacuj.
\s Dios ixamigo cātlahuacuꞌtun tachiꞌxcuhuīꞌt
\p
\v 11 Quit iclakachiꞌxcuhuīꞌ Māpaꞌksīniꞌ Jesucristo ē ickexmatniꞌcuꞌtun. Ūꞌtzaꞌ quit iccālīmāꞌaꞌkaꞌīꞌnīcuꞌtun tachiꞌxcuhuīꞌt. Dios laktzīꞌn quilīstacnaꞌ. Quit icpuhuan nā huiꞌxinaꞌn caꞌtzīyāꞌtit quit ictlahuacuꞌtun tū tze.
\v 12 Quit jā kaꞌtlaꞌ icmakcaꞌtzī na milacatīncaꞌn. Jā ūꞌtzaꞌ iclīchihuīnaꞌmāꞌlh chuntzaꞌ. Xmān iclacasquiꞌn huiꞌxinaꞌn tzē naquilāmaktāyayāuj aꞌcxniꞌ naquimālacsuꞌyucan. Iclacasquiꞌn tzē nacākelhtīyāꞌtit tī quintamālacsuꞌyucuꞌtun. Xlacaꞌn tapuhuan lakaꞌtlaꞌ masqui jā tze ixlīstacnaꞌcaꞌn.
\v 13 Masqui makapitzīn tapuhuan quit icchuya ē masqui āꞌmakapitzīn tapuhuan tzej iclacapāstacnaꞌn, quit ictlahuacuꞌtun xmān tū nalīpāxuhua Dios. Iccāmaktāyacuꞌtunān huiꞌxinaꞌn ixpālacata iclacasquiꞌn huiꞌxinaꞌn āꞌchulāꞌ naꞌaꞌkaꞌīꞌyāꞌtit.
\v 14 Cristo quincāpāxquīꞌyān ē ūꞌtzaꞌ iclītlahuacuꞌtun tū xlaꞌ lacasquiꞌn. Quinaꞌn aꞌkaꞌīꞌyāuj Cristo līnīlh ixpālacatacaꞌn ixlīpōꞌktucaꞌn tachiꞌxcuhuīꞌt. Chuntzaꞌ līcaꞌtzīyāuj quilīpōꞌktucaꞌn ixnīuj.
\v 15 Cristo līnīlh quincāmakapūtaxtuyān. Chuntzaꞌ līhuan huiꞌlānaꞌuj, jā catilatāꞌkchokouj chuntzaꞌ chī xmān quintapuhuāncaꞌn. Ixlacasquiꞌnca nalatāꞌkchokoyāuj chuntzaꞌ chī ixtalacasquiꞌnīn Cristo. Ūꞌtzaꞌ nīlh quimpālacatacaꞌn ē lacastālancuanaꞌnli.
\v 16 Chuntzaꞌ jātzaꞌ iccālaktzīꞌn āꞌmakapitzīn chiꞌxcuhuīꞌn chuntzaꞌ chī talaktzīꞌn chiꞌxcuhuīꞌn xalanīꞌn nac cāꞌquilhtamacuj. Xapūla xaꞌicpuhuan Cristo lacxtim chī talacapāstaca xalanīꞌn nac cāꞌquilhtamacuj. Jātzaꞌ icpuhuan chuntzaꞌ.
\v 17 Palh chāꞌtin chiꞌxcuꞌ aꞌkaꞌīꞌniꞌ Cristo, chuntzaꞌ talakpalī ixtalacapāstacniꞌ ē xasāstiꞌ chiꞌxcuꞌ lītaxtu. Ixlīpōꞌktu tū xapūla laksputnīꞌttzaꞌ. Tzamāꞌ chiꞌxcuꞌ jātzaꞌ huaꞌchi xapūla. Pōꞌktutzaꞌ xasāstiꞌ ixtalacapāstacniꞌ.
\p
\v 18 Xmān Dios tī tzē lakpalī chāꞌtin chiꞌxcuꞌ. Chuhuaꞌj quinaꞌn ixamigo Dios ixpālacata Jesucristo xokolh tū ixlaclēꞌnāuj. Dios quincāmacamaxquīꞌnīꞌtaꞌn nacāmāsuꞌyuniꞌyāuj āꞌmakapitzīn chī tzē natalītaxtu ixamigo Dios.
\v 19 Ixpālacata Cristo, Dios ixamigo cātlahuacuꞌtun tachiꞌxcuhuīꞌt ē cāmātzaꞌnkēnaꞌniꞌcuꞌtun ixcuentacaꞌn. Quincāmacamaxquīꞌnīꞌtaꞌn nacāmāsuꞌyuniꞌyāuj āꞌmakapitzīn chiꞌxcuhuīꞌn chī tzē natalītaxtu ixamigo Dios.
\v 20 Chuhuaꞌj quit ictāꞌscuja Cristo. Huaꞌchi Dios ixchihuīnaꞌnli aꞌcxniꞌ iccāsquiꞌniꞌyān huiꞌxinaꞌn. Iccālīsquiꞌniꞌyān ixlīmāpaꞌksīn Cristo, catamakxtekniꞌtit Dios ixamigo nacātlahuayān.
\v 21 Masqui Cristo jā maktin tlahualh tū jā tze, Dios macamāstāꞌlh īSkaꞌtaꞌ namaknīcan. Ūꞌtzaꞌ nalīmāpānū quincuentacaꞌn Cristo. Chuntzaꞌ Dios xapa quincuentacaꞌn ē jātzaꞌ tū laclēꞌnāuj.
\c 6
\p
\v 1 Quit ictāꞌscuja Dios. Ūꞌtzaꞌ iccālīhuaniyān huiꞌxinaꞌn, jā chu tlakaj camaktīniꞌntit talakalhuꞌmān tū Dios cāmaxquīꞌcuꞌtunān.
\v 2 Tatzoꞌkniꞌ na ixtachihuīn Dios chī Dios huanli:
\q Quit ickexmatli chī quisquiꞌniꞌ tzamāꞌ quilhtamacuj aꞌcxniꞌ xaꞌicmaxquīꞌcuꞌtunān aꞌktin talakalhuꞌmān.
\q Quit icmaktāyan aꞌcxniꞌ xaꞌiccāmakapūtaxtūcuꞌtun tachiꞌxcuhuīꞌt.
\m Chuhuaꞌj tzē namaktīniꞌncan talakalhuꞌmān tū Dios māstāꞌ. Chuhuaꞌj tzē naꞌaꞌkapūtaxtucan.
\p
\v 3 Quit tzej iclatāꞌkchokocuꞌtun chuntzaꞌ chī talacasquiꞌn. Palh jā tzej iclatāꞌkchoko, nahuancan jā tze tū icmāsuꞌyu.
\v 4 Iclacasquiꞌn nacaꞌtzīcan quit tzej iclatlāꞌhuan chuntzaꞌ chī talacasquiꞌn tzej natalatāꞌkchoko tī tatāꞌscuja Dios. Ūꞌtzaꞌ quit līlacatzucu iclīpātī tū quinaꞌkspula. Lhūhuaꞌ icpātīniꞌnīꞌt. Quisputniꞌnīꞌt tū xaꞌicmaclacasquiꞌn. Lhūhuaꞌ tū jā tze quinaꞌkspulanīꞌt.
\v 5 Quimaksnoꞌkcanīꞌt. Quinchīꞌcanīꞌt. Iccātāꞌtalacxtucnīꞌt tachiꞌxcuhuīꞌt tī jā ixquintalaktzīꞌncuꞌtun. Palhaꞌ icscujnīꞌt. Iclakachuꞌhuāꞌlhtatanīꞌt. Makatunuꞌ jā xaꞌickaꞌlhī quilīhuaꞌt.
\v 6 Iclacasquiꞌn nacaꞌtzīcan quit tzej iclatlāꞌhuan chuntzaꞌ chī ixlacasquiꞌnca. Pōꞌktu tze quintalacapāstacniꞌ. Tzej iccaꞌtzī tū icmāsuꞌyu. Ictāyaniꞌ tū quintlahuaniꞌcan. Ē iclakalhuꞌmanīniꞌn. Ē quimaktaya Ēspíritu Santo. Ē iccāpāxquīꞌ āꞌmakapitzīn.
\v 7 Quit icmāsuꞌyu tū ixlīcānaꞌ. Iclīscuja ixlītliꞌhuiꞌqui Dios. Dios quimaktāya tzej naꞌiclatāꞌkchoko. Chuntzaꞌ jā quintiskāhuīꞌlh.
\v 8 Makapitzīn quintalakachiꞌxcuhuīꞌ; ē āꞌmakapitzīn quintalakmakaꞌn. Makapitzīn tahuan tze quit; ē āꞌmakapitzīn tahuan jā tze quit. Makapitzīn tahuan quit icaꞌkskāhuīꞌnin. Quit icuan xmān tū ixlīcānaꞌ.
\v 9 Masqui makapitzīn tapuhuan quit jā tū quintapalh, āꞌmakapitzīn tacaꞌtzī quit ictāꞌscuja Dios. Masqui maklhūhuaꞌ quit xaꞌictahuiꞌla nac cāꞌlījicuaꞌ ē huaꞌchi xaꞌicnīmāꞌlhtzaꞌ, chuhuaꞌj icuīꞌlhcus. Masqui quimputzastālaniꞌcan, jā quimaknīcan.
\v 10 Masqui quinaꞌkspulanīꞌt tū quimakalīpuhuan, pōꞌktu quilhtamacuj līpāxuhua icuīꞌlh. Masqui pobre quit, iccāmaxquīꞌ āꞌmakapitzīn tū āꞌchulāꞌ xatapalaxlaꞌ ē jā tumīn. Masqui jā tū ickaꞌlhī nac cāꞌquilhtamacuj, Dios quimaxquīꞌ chuntzaꞌ chī icmaclacasquiꞌn.
\p
\v 11 Quit lacatejtin iccātāꞌchihuīnaꞌnān huiꞌxinaꞌn xalanīꞌn nac Corinto. Quit iccāpāxquīꞌyān huiꞌxinaꞌn.
\v 12 Masqui huiꞌxinaꞌn jā quilāpāxquīꞌyāuj, quit iccāpāxquīꞌyān.
\v 13 Iccātāꞌchihuīnaꞌnān huiꞌxinaꞌn huaꞌchi quilacstīn. Iccāsquiꞌniꞌyān caquilāpāxquīꞌuj chī quit iccāpāxquīꞌyān huiꞌxinaꞌn.
\s Quinaꞌn huaꞌchi ixtemplo Dios
\p
\v 14 Jā aꞌktin cacātāꞌlatit tī jā taꞌaꞌkaꞌīꞌ. Xtum talatāꞌkchoko tī taꞌaꞌkaꞌīꞌ ē xtum talatāꞌkchoko tī jā taꞌaꞌkaꞌīꞌ. Jāla aꞌktin cātāꞌlacan. Taxkaket xtum ē cāꞌtziꞌsniꞌ nā xtum. Tū tze xtum ē nā tū jā tze nā xtum.
\v 15 Cristo jā tlahua tū tlahua skāhuīꞌniꞌ. Nā huan tī taꞌaꞌkaꞌī Cristo, xlacaꞌn jā talacapāstaca huaꞌchi tī jā taꞌaꞌkaꞌīꞌ.
\v 16 Jā tze laktaquilhpūtacan ídolos na ixtemplo Dios. Quinaꞌn huaꞌchi ixtemplo Dios xalakahuan. Dios huanīꞌt:
\q Quit naꞌictahuiꞌla na ixpuꞌnancaꞌn tī taꞌaꞌkaꞌīꞌ.
\q Naꞌiccātāꞌlatāꞌkchoko xlacaꞌn.
\q Xlacaꞌn quintachiꞌxcuhuīꞌt natahuan.
\m
\v 17 Ūꞌtzaꞌ līhuan Dios:
\q Catapānūniꞌtit tī tatlahua tū jā tze.
\q Jā catlahuaꞌtit tū tatlahua xlacaꞌn.
\q Jā caxaꞌmaꞌtit tū jā tze.
\q Chuntzaꞌ quilaꞌ nalītaxtuyāꞌtit huiꞌxinaꞌn.
\q 	
\v 18 	 Quit huaꞌchi minTātaꞌcaꞌn naꞌicuan.
\q Huiꞌxinaꞌn nalītaxtuyāꞌtit huaꞌchi quinkaꞌhuaꞌchan ē quintzuꞌmaꞌjan.
\q Chuntzaꞌ huanli Dios tī māpaꞌksīniꞌn.
\c 7
\p
\v 1 Tāꞌtimīn, chuntzaꞌ huanīꞌt Dios. Ūꞌtzaꞌ nalīmakxtekkōꞌyāuj ixlīpōꞌktu tū jā tze talanān. Nalīhuiꞌlīyāuj nalayāuj xatze ixpālacata nalakachiꞌxcuhuīꞌyāuj Dios.
\s Talakpalīlh ixtalacapāstacniꞌcaꞌn xalanīꞌn nac Corinto
\p
\v 2 Iccāsquiꞌniꞌyān huiꞌxinaꞌn naquilāpāxquīꞌyāuj. Nūn chāꞌtin ictlahuaniꞌnīꞌt tū jā tze. Nūn chāꞌtin icmāxtuyāhuanīꞌt. Nūn chāꞌtin icaꞌkskāhuīꞌmaktīnīꞌt catūhuālh.
\v 3 Aꞌcxniꞌ icuan huāꞌmāꞌ, jā icuan huiꞌxinaꞌn quilātlahuaniꞌnīꞌtaꞌuj tū jā tze. Iccāhuaninīꞌtaꞌntzaꞌ iccāpāxquīꞌyān huiꞌxinaꞌn. Naꞌiccāpāxquīꞌyān ictikaꞌlhīcus quilatamat ē hasta aꞌcxniꞌ naꞌicnī.
\v 4 Chuhuaꞌj quit iccaꞌtzī huiꞌxinaꞌn natlahuaꞌyāꞌtit chuntzaꞌ chī iccāhuaninīꞌtaꞌn. Chuntzaꞌ iccāhuani āꞌmakapitzīn chī huiꞌxinaꞌn tzej latlāꞌhuaꞌnāꞌtit. Iccaꞌtzī huiꞌxinaꞌn tzej latlāꞌhuaꞌnāꞌtit. Ūꞌtzaꞌ quit jā iclītamakchuyīnīꞌt. Icpāxuhua masqui icpātīniꞌmāꞌlh.
\p
\v 5 Aꞌcxniꞌ icchilh huāꞌtzāꞌ nac Macedonia ictamakchuyīlh. Lhūhuaꞌ tū quinaꞌkspulalh. Quintatāꞌlātlahualh. Xaꞌiclītamakchuyī. Jā xaꞌiccaꞌtzī palh natataspiꞌtpala tī ixtaꞌaꞌkaꞌīꞌmāꞌnalhcus.
\v 6 Dios cāmākoꞌxamākaꞌtlīꞌ tī tatamakchuyīnīꞌt. Dios makachilh Tito. Ūꞌtzaꞌ iclītakoꞌxamākaꞌtlīꞌlh.
\v 7 Āꞌchulāꞌ ictakoꞌxamākaꞌtlīꞌlh aꞌcxniꞌ iccaꞌtzīlh chī huiꞌxinaꞌn ixmākoꞌxamākaꞌtlīꞌnīꞌtaꞌntit Tito. Xlaꞌ quihuanilh chī huiꞌxinaꞌn quilālaktzīꞌncuꞌtunāuj ē chī līlīpuhuantit ixpālacata caꞌtzītit ixquilāmakalīpuhuanīꞌtaꞌuj. Quihuanilh chī huiꞌxinaꞌn quilālacapāstacāuj. Ūꞌtzaꞌ āꞌchulāꞌ iclīpāxualh.
\p
\v 8 Masqui huāꞌmāꞌ carta tū iccātzoꞌkniꞌn huiꞌxinaꞌn cāmālakaputzīn, quit icpuhuan tze chī iccātzoꞌknuniꞌnīꞌtaꞌn. Āꞌlīstān icpuhuanli jā xaꞌictzoꞌkli tzamāꞌ carta. Jātzaꞌ icpuhuan chuntzaꞌ. Chuhuaꞌj tasuꞌyu jā makās līpuhuantit.
\v 9 Chuhuaꞌj icpāxuhua. Jā ixpālacata huiꞌxinaꞌn līlīpuhuantit. Huiꞌxinaꞌn līlīpuhuantit ixpālacata mincuentacaꞌn. Chuntzaꞌ makxtektit tū jā tze. Ūꞌtzaꞌ iclīpāxuhua. Dios cālīmālakaputzīn mincuentacaꞌn. Chuntzaꞌ lītasuꞌyu jā iccātlahuaniꞌn tū jā tze aꞌcxniꞌ iccātzoꞌkniꞌn carta.
\v 10 Palh Dios mālacpuhuanī chāꞌtin chiꞌxcuꞌ jā tze chī latlāꞌhuan, ē palh huāꞌmāꞌ chiꞌxcuꞌ nalīpuhuan ē nalakpalī ixtalacapāstacniꞌ, chuntzaꞌ Dios namakapūtaxtū. Āꞌlīstān huāꞌmāꞌ chiꞌxcuꞌ jā catipuhualh palh jā tze chī aꞌkapūtaxtulh. Palh chāꞌtin chiꞌxcuꞌ līpuhuan ē palh jā kexmatniꞌcuꞌtun Dios, tzamāꞌ chiꞌxcuꞌ jā catiꞌaꞌkapūtaxtulh.
\v 11 Huiꞌxinaꞌn jā chuntzaꞌ. Aꞌcxniꞌ Dios cāmālakaputzīn, palaj tlahuaꞌtit tū ixtalacasquiꞌnīn. Squiꞌntit tamātzaꞌnkēnaꞌniꞌ. Caꞌtzītit tū ixtlahuaꞌnīꞌtaꞌntit huāꞌmāꞌ tū jā tze. Ixjicuaꞌniꞌyāꞌtit Dios. Quilālacapāstacui quit. Tlahuaꞌcuꞌtuntit tū naꞌiclīpāxuhua quit. Makapātīnīntit tī ixtlahuanīꞌt tū jā tze. Chuntzaꞌ lītasuꞌyu puhuaꞌntit jā tze tū ixtlahua tzamāꞌ chiꞌxcuꞌ.
\v 12 Quit ictzoꞌkli tzamāꞌ carta, ē jā xmān ixpālacata tī tlahualh tū jā tze, ē jā xmān ixpālacata tī tlahuaniꞌca tū jā tze. Quit ictzoꞌkli tzamāꞌ carta ixpālacata icmāsuꞌyucuꞌtunli na ixlacatīn Dios chī iccāmaktakalhcuꞌtunān huiꞌxinaꞌn.
\v 13 Ūꞌtzaꞌ quilīmākoꞌxamākaꞌtlīꞌca.
\p Tito ixlīpāxuhua mimpālacatacaꞌn. Ūꞌtzaꞌ nā iclīpāxuhua.
\v 14 Aꞌcxniꞌ jānaꞌj ixcālakaꞌnāchāꞌn Tito, icuanilh huiꞌxinaꞌn naquilākexmatniꞌyāuj. Chuhuaꞌj jā iclīmāxanaꞌn. Ixlīcānaꞌ chī icuanilh Tito. Ixlīpōꞌktu tū iccāhuaninīꞌtaꞌn huiꞌxinaꞌn, pōꞌktu ixlīcānaꞌ. Nā chuhuaꞌj tasuꞌyu ixlīcānaꞌ tū icuanilh Tito.
\v 15 Chuhuaꞌj Tito āꞌchulāꞌ cāpāxquīꞌyān huiꞌxinaꞌn ē cālacapāstacān chī huiꞌxinaꞌn lakachiꞌxcuhuīꞌtit ē kexpaꞌtniꞌtit tū cāhuanin.
\v 16 Chuntzaꞌ tasuꞌyu huiꞌxinaꞌn tlahuaꞌyāꞌtit tū tze, chuntzaꞌ chī icpuhuanli. Ūꞌtzaꞌ iclīpāxuhua.
\c 8
\s Chī māstāꞌca xatze tapuhuāt
\p
\v 1 Tāꞌtimīn, quit iclacasquiꞌn huiꞌxinaꞌn nacaꞌtzīyāꞌtit chī Dios cāsicuaꞌlanātlahualh tī taꞌaꞌkaꞌīꞌ xalanīꞌn nac Macedonia.
\v 2 Masqui xlacaꞌn ixtapātīniꞌmāꞌnalh, ixtapāxuhua. Chuntzaꞌ, masqui pobres ixtahuanīꞌt xlacaꞌn tamāstāꞌlh lhūhuaꞌ chī ixtapuhuatcaꞌn.
\v 3 Quit iclīchihuīnaꞌn jā lakcaꞌtzan huan tū tamāstāꞌlh. Tahuiꞌlīlh āꞌchulā huan tū ixlīmāstāꞌcaꞌn.
\v 4 Quincātasquiꞌniꞌn xaꞌicmaktīniꞌuj tumīn ē xaꞌiccālēꞌniꞌuj tāꞌtimīn xalanīꞌn nac Jerusalén tī ixcāmaktāyacuꞌtun.
\v 5 Xlacaꞌn āꞌchulāꞌ tatlahualh ē jā tū xaꞌicpuhuan quit. Xapūla tahuanilh Dios chī ixtatapaꞌksīniꞌ ē ixtatlahuacuꞌtun ixtalacasquiꞌnīn Dios. Nā ixtatlahuacuꞌtun tū iccāhuanilh chī lacasquiꞌn Dios.
\v 6 Chuntzaꞌ icsquiꞌniꞌlh Tito ixcālakaꞌnchaꞌn huiꞌxinaꞌn ē ixcāmaktāyan namākēstokkōꞌyāꞌtit tumīn tū namāstāꞌyāꞌtit. Ūꞌtzaꞌ tī cāmācaꞌtzīnīn huiꞌxinaꞌn namāstāꞌyāꞌtit.
\v 7 Huiꞌxinaꞌn pōꞌktu tzej tlahuaꞌyāꞌtit. Tzej aꞌkaꞌīꞌyāꞌtit. Tzej lakapasāꞌtit ixtachihuīn Dios ē tzej māsuꞌyuꞌyāꞌtit. Tlahuaꞌcuꞌtunāꞌtit ixtalacasquiꞌnīn Dios. Quilāpāxquīꞌyāuj. Chuhuaꞌj ixlacasquiꞌnca huiꞌxinaꞌn namāstāꞌyāꞌtit nacāmaktāyaꞌyāꞌtit āꞌmakapitzīn tāꞌtimīn.
\p
\v 8 Huāꞌmāꞌ tū iccāhuanincus jā aꞌktin līmāpaꞌksīn. Xmān iccāhuanimāꞌn chī āꞌmakapitzīn tamāstāꞌmāꞌnalh. Quit iclacasquiꞌn huiꞌxinaꞌn nacāmaxquīꞌyāꞌtit āꞌmakapitzīn tāꞌtimīn. Aꞌntzaꞌ nalītasuꞌyu chī huiꞌxinaꞌn cāpāxquīꞌyāꞌtit quintāꞌtimīncaꞌn.
\v 9 Huiꞌxinaꞌn caꞌtzīyāꞌtit chī quiMāpaꞌksīniꞌcaꞌn Jesucristo pāxquīꞌnin. Xlaꞌ masqui ixlīpōꞌktu tū aꞌnan nac cāꞌquilhtamacuj pōꞌktu ixlaꞌ, xlaꞌ xcamanīn hualh ixpālacata quincāpāxquīꞌyān. Chuntzaꞌ quinaꞌn quincālīricujuiꞌlīnīꞌtaꞌn tū ixtasicuaꞌlanātlahuan.
\p
\v 10 Naꞌiccāhuaniyān tū icpuhuan quit: Cāꞌtatzaꞌ huiꞌxinaꞌn ixmāstāꞌcuꞌtunāꞌtit tumīn. Xapūla tzucutit māstāꞌyāꞌtit. Xmān tzucutit mākēstokāꞌtit. Quit icpuhuan xatze nahuan palh huiꞌxinaꞌn namāstāꞌkōꞌyāꞌtit.
\v 11 Xapūla timāstāꞌcuꞌtuntit tumīn. Chuhuaꞌj camākentaxtūtit chuntzaꞌ chī tzē namāstāꞌyāꞌtit chāꞌtunuꞌ huiꞌxinaꞌn.
\v 12 Līpāxuhua Dios palh chāꞌtin ixtapāxuān līmāstāꞌ chuntzaꞌ chī tzē namāstāꞌ chāꞌtin. Dios, xlaꞌ jā quincāsquiꞌniꞌyān palh jā tū kaꞌlhīyāuj.
\p
\v 13 Jā iccāhuanimāꞌn huiꞌxinaꞌn namāstāꞌyāꞌtit ixlīpōꞌktu tū kaꞌlhīꞌyāꞌtit aꞌcxniꞌ nacāmaxquīꞌyāꞌtit tī jā tū takaꞌlhī.
\v 14 Tū icuan ūꞌtzaꞌ huāꞌmāꞌ: lacxtim catakaꞌlhīlh ixlīpōꞌktucaꞌn tāꞌtimīn. Chuhuaꞌj huiꞌxinaꞌn nacāmaxquīꞌyāꞌtit tī jā tū takaꞌlhī. Palh namin aꞌktin quilhtamacuj aꞌcxniꞌ huiꞌxinaꞌn jā catikaꞌlhīꞌtit nūn tū, xlacaꞌn nacātamaktāyayān huiꞌxinaꞌn. Chuntzaꞌ tze nahuan.
\v 15 Tatzoꞌkniꞌ na ixtachihuīn Dios:
\q Tī lhūhuaꞌ mākēstokli, jā quītāxtūniꞌlh.
\q Tī macstiꞌnaꞌj mākēstokli, jā sputniꞌlh.
\s Tito ē tī tatāꞌaꞌlh
\p
\v 16 Icmaxquīꞌ tapāxcatcaꞌtzīn Dios ixpālacata Tito lacasquiꞌn huiꞌxinaꞌn tzej nalatāꞌkchokoyāꞌtit chuntzaꞌ chī quit iclacasquiꞌn.
\v 17 Tito ixlīmān puhuanli nacālakaꞌnāchāꞌn huiꞌxinaꞌn. Aꞌcxniꞌ icuanilh caꞌaꞌnchaꞌ, xlaꞌ ixcālakaꞌncuꞌtunāchāꞌn.
\p
\v 18 Quit ictāꞌmacāꞌmāꞌlh Tito chāꞌtin quintāꞌtincaꞌn tī talakapaskōꞌ ixlīpōꞌktucaꞌn tī taꞌaꞌkaꞌīꞌ. Lhūhuaꞌ talīchihuīnaꞌn chī tzej māsuꞌyu xatze tachihuīn ixlaꞌ Jesucristo.
\v 19 Nā huāꞌmāꞌ quintāꞌtincaꞌn, talacsacli āꞌmakapitzīn tāꞌtimīn xalanīꞌn āꞌlacatunuꞌ nac templo āꞌtzāꞌ. Xlacaꞌn talacasquiꞌn Tito naquintāꞌaꞌn aꞌcxniꞌ quit naꞌiccālēꞌniꞌ tumīn tī jā tū takaꞌlhī tumīn nac Jerusalén. Huāꞌmāꞌ tumīn, nalīlakachiꞌxcuhuīꞌcan quiMāpaꞌksīniꞌcaꞌn Jesucristo. Nā nacaꞌtzīcan quinaꞌn cāmaktāyacuꞌtunāuj.
\v 20 Līskalalh naꞌicmākēstokāuj tumīn ixpālacata jā naquincātalēꞌksaꞌnān. Jā iclacasquiꞌn nahuancan jā icmākentaxtū tū quimacamaxquīꞌcan lhūhuaꞌ tumīn.
\v 21 Aꞌcxniꞌ icmākēstokāuj huāꞌmāꞌ tumīn, pōꞌktu tze ictlahuacuꞌtun na ixlacatīn Dios ē nā ixlacatīncaꞌn tachiꞌxcuhuīꞌt.
\p
\v 22 Naꞌiccālakmacāꞌnāchāꞌn huiꞌxinaꞌn tzamāꞌ chiꞌxcuhuīꞌn. Nā naꞌiccātāꞌmacāꞌn āꞌchāꞌtin quintāꞌtincaꞌn. Xlaꞌ mākentaxtūkōꞌ ixlīpōꞌktu tū macamaxquīꞌcan. Maklhūhuaꞌ iclaktzīꞌnīꞌt mākentaxtū. Chuhuaꞌj āꞌchulāꞌ mākentaxtūcuꞌtun tū macamaxquīꞌcanīꞌt, ixpālacata xlaꞌ caꞌtzī huiꞌxinaꞌn namākentaxtūyāꞌtit tū ixlacasquiꞌnca.
\v 23 Tito quintāꞌscuja. Tito ē quit iccāmaktāyanīꞌtaꞌn huiꞌxinaꞌn. Tāꞌtimīn tī natatāꞌaꞌn Tito, xlacaꞌn tamacāꞌnīꞌt tī taꞌaꞌkaꞌīꞌ xalanīꞌn huāꞌtzāꞌ. Xlacaꞌn tzej talatlāꞌhuan, ē ūꞌtzaꞌ līlakachiꞌxcuhuīꞌcan Cristo.
\v 24 Aꞌcxniꞌ natachāꞌnāchaꞌ Tito ē tāꞌtimīn, cacālakachiꞌxcuhuīꞌtit. Āꞌmakapitzīn tāꞌtimīn natalaktzīꞌn chī huiꞌxinaꞌn cāpāxquīꞌyāꞌtit. Chuntzaꞌ nacaꞌtzīcan ixlīcānaꞌ chī icuanīꞌt huiꞌxinaꞌn cāpāxquīꞌyāꞌtit tāꞌtimīn.
\c 9
\s Cāhuanica chī natamākēstoka tumīn
\p
\v 1 Jā ixlacasquiꞌnca quit naꞌiccāhuaniyān namākēstokāꞌtit tumīn tū nacālīmaktāyaꞌyāꞌtit tāꞌtimīn.
\v 2 Quit tzej iccaꞌtzī huiꞌxinaꞌn cāmaktāyacuꞌtunāꞌtit. Quit iccāhuaninīꞌt xalanīꞌn nac Macedonia chī tlahuaꞌyāꞌtit tū tze. Iccāhuaninīꞌt chī huiꞌxinaꞌn xalanīꞌn nac Acaya ixmāstāꞌcuꞌtunāꞌtit cāꞌtatzaꞌ. Aꞌcxniꞌ tacaꞌtzīlh huāꞌmāꞌ, nā tamāstāꞌcuꞌtunli xalanīꞌn nac Macedonia.
\v 3 Iccāhuaninīꞌt xlacaꞌn chī huiꞌxinaꞌn māstāꞌcuꞌtunāꞌtit tumīn. Chuntzaꞌ jā tze palh huiꞌxinaꞌn jā namākentaxtūyāꞌtit. Ūꞌtzaꞌ iccālīlakmacāꞌnchan tāꞌtimīn. Chuntzaꞌ huiꞌxinaꞌn namāstāꞌyāꞌtit tumīn chuntzaꞌ chī iccāhuaninīꞌt.
\v 4 Palh huiꞌxinaꞌn jā tlahuaꞌyāꞌtit ē palh āꞌmakapitzīn xalanīꞌn nac Macedonia naquintatāꞌaꞌn aꞌntzaꞌ, ē palh huiꞌxinaꞌn jānaꞌj mākēstokāꞌtit tumīn, quit naꞌictamāxanīꞌ ixpālacata iccāhuaninīꞌt chī huiꞌxinaꞌn namāstāꞌyāꞌtit tumīn. Nā huiꞌxinaꞌn namāxanaꞌnāꞌtit.
\v 5 Ūꞌtzaꞌ iclīpuhualh ixlacasquiꞌnca naꞌiccāhuani tāꞌtimīn naquintapūlaniꞌ. Chuntzaꞌ xlacaꞌn natamaktīniꞌn tumīn tū huiꞌxinaꞌn huaꞌnāꞌtit namāstāꞌyāꞌtit. Chuntzaꞌ natasuꞌyu huiꞌxinaꞌn māstāꞌyāꞌtit chī mintalacapāstacniꞌcaꞌn. Jā catitapuhuanli palh quit iccāsāmāmāstāꞌnīn tumīn.
\p
\v 6 Caꞌtzīyāuj tī macstiꞌnaꞌj natachaꞌn, xlacaꞌn nā macstiꞌnaꞌj natamakala. Tī lhūhuaꞌ natachaꞌn, xlacaꞌn lhūhuaꞌ natamakala. Nā chuntzaꞌ quinaꞌn aꞌcxniꞌ māstāꞌyāuj.
\v 7 Chāꞌtunuꞌ huiꞌxinaꞌn camāstāꞌtit chuntzaꞌ chī puhuaꞌnāꞌtit tzē namāstāꞌyāꞌtit. Jā lakcaꞌtzanaꞌj camāstāꞌtit. Jā catasuꞌyulh palh cātasāmāmāstāꞌnīyān. Dios cāpāxquīꞌ tī tamāstāꞌ cāꞌtapāxuān.
\v 8 Dios tzē nacāmaxquīꞌyān lhūhuaꞌ. Huiꞌxinaꞌn, masqui cāmaxquīꞌyāꞌtit āꞌmakapitzīn, huiꞌxinaꞌn nakaꞌlhīꞌyāꞌtit tū namaclacasquiꞌnāꞌtit.
\v 9 Tatzoꞌkniꞌ na ixtachihuīn Dios ixpālacata chāꞌtin tī tzeya chiꞌxcuꞌ:
\q Xlaꞌ lhūhuaꞌ cāmaxquīꞌ lacxcamanīnīꞌn.
\q Chuntzaꞌ pōꞌktu quilhtamacuj tzē nacāmaxquīꞌ.
\m
\v 10 Nā quinaꞌn, Dios quincāmaxquīꞌyān tū nachaꞌnāuj, ixpālacata ūꞌtzaꞌ Dios tī makastaca. Chuntzaꞌ nalīkaꞌlhīyāuj tū nahuaꞌyāuj ē nā tū nachaꞌmpalayāuj. Huiꞌxinaꞌn palh nacāmaxquīꞌyāꞌtit āꞌmakapitzīn tī jā tū takaꞌlhī, Dios nacāmaxquīꞌyān tū maclacasquiꞌnāꞌtit huiꞌxinaꞌn.
\v 11 Chuntzaꞌ Dios nacāsicuaꞌlanātlahuayān huiꞌxinaꞌn, ē chuntzaꞌ tzē namāstāꞌyāꞌtit lhūhuaꞌ. Chuntzaꞌ natamaxquīꞌ tapāxcatcaꞌtzīn Dios xlacaꞌn tī natamaktīniꞌn mintumīncaꞌn tū naꞌiccālēꞌniꞌ.
\v 12 Chuntzaꞌ ixpālacata tumīn tū huiꞌxinaꞌn namāstāꞌyāꞌtit, huiꞌxinaꞌn nacāmaktāyaꞌyāꞌtit ixtachiꞌxcuhuīꞌt Dios tī jā tū takaꞌlhī. Nā xlacaꞌn natamaxquīꞌ tapāxcatcaꞌtzīn Dios ixpālacata tū māstāꞌnīꞌtaꞌntit huiꞌxinaꞌn.
\v 13 Aꞌcxniꞌ nalaktzīꞌncan chī huiꞌxinaꞌn māstāꞌyāꞌtit, lhūhuaꞌ natamakapāxuī Dios. Natamakapāxuī Dios aꞌcxniꞌ natalaktzīꞌn chī huiꞌxinaꞌn ixlīcānaꞌ aꞌkaꞌīꞌyāꞌtit xatze tachihuīn ixlaꞌ Cristo, ē natalaktzīꞌn chī huiꞌxinaꞌn cāmaktāyaꞌyāꞌtit xlacaꞌn ē nā āꞌmakapitzīn huampala.
\v 14 Chuntzaꞌ xlacaꞌn nacātalīꞌorarlīyān ē nacātalacapāstacān huiꞌxinaꞌn ixpālacata Dios cāsicuaꞌlanātlahuanīꞌtaꞌn ē chuntzaꞌ huiꞌxinaꞌn tzē māstāꞌyāꞌtit tumīn.
\v 15 Namaxquīꞌyāuj tapāxcatcaꞌtzīn Dios ixpālacata xlaꞌ quincālakmacaminīꞌtaꞌn īꞌSkaꞌtaꞌ. Ūꞌtzaꞌ huaꞌchi aꞌktin talakalhuꞌmān tū xatapalaxlaꞌ. Jāla huanāuj chī huanīꞌt ixtapalh.
\c 10
\s Pablo apóstol ixuanīꞌt ē ūꞌtzaꞌ ixlīkaꞌlhī līmāpaꞌksīn
\p
\v 1 Quit, Pablo, iccāhuanicuꞌtunān catūhuālh. Āꞌmakapitzīn tahuan quit xalacatzucu icchihuīnaꞌn na milacatīncaꞌn. Nā tahuan quit iccālacaquilhnīyān aꞌcxniꞌ iccātzoꞌknuniꞌyān. Chuntzaꞌ chī Cristo lakalhuꞌmanīniꞌn, nā chuntzaꞌ quit xalacatzucu iccātāꞌchihuīnaꞌncuꞌtunān.
\v 2 Iccāhuanicuꞌtunān tzej calatāꞌkchokotit. Palh jā latāꞌkchokoyāꞌtit līlacatejtin, quit naꞌiccālacaquilhnīyān aꞌcxniꞌ naꞌiccālakaꞌnāchāꞌn. Palh huīꞌlh chāꞌtin chī huiꞌxinaꞌn tī huan quit iclatlāꞌhuan huaꞌchi catīhuālh chiꞌxcuꞌ ē quit ictlahua xmān tū quit iclacasquiꞌn, quit naꞌiclacaquilhnī xlaꞌ.
\v 3 Masqui quinaꞌn huiꞌlānaꞌuj nac cāꞌquilhtamacuj, xtum guerra tū tlahuayāuj. Jā huaꞌchi guerra tū tatlahua xalanīꞌn nac cāꞌquilhtamacuj.
\v 4 Xlacaꞌn talēꞌn tū natalīmaknī ixtāꞌlāquiclhlaktziꞌcaꞌn. Quinaꞌn jā tū lēꞌnāuj tū nalīmaknīyāuj. Xmān ixlīmāpaꞌksīn Dios tzē nacālīskāhuīꞌyāuj ixlīmāpaꞌksīn ixtāꞌlāquiclhlaktziꞌ Dios.
\v 5 Ixlīmāpaꞌksīn Dios tzē cālīskāhuīꞌyāuj ixtalacapāstacniꞌcaꞌn tī tatāꞌlātlahua Dios. Nā ixlīmāpaꞌksīn Dios tzē nalīskāhuīꞌyāuj ixlīpōꞌktu talacapāstacniꞌ tū cāmāmakchuyī tī taꞌaꞌkaꞌīꞌniꞌcuꞌtun Dios. Ixlīmāpaꞌksīn Dios tzē cālakpalīniꞌ ixtalacapāstacniꞌcaꞌn tachiꞌxcuhuīꞌt ē chuntzaꞌ natakexmatniꞌ Cristo.
\v 6 Aꞌcxniꞌ huiꞌxinaꞌn tzej nakexpaꞌtniꞌyāꞌtit Dios, quit naꞌiccāmakapātīnīn tī jā takexmatniꞌcuꞌtun.
\p
\v 7 Huiꞌxinaꞌn lacapāstacāꞌtit xmān tū tasuꞌyu. Na mimpuꞌnancaꞌn tahuiꞌlānaꞌlh tī quintatāꞌlātlahua ē tahuan xlacaꞌn tatāꞌscuja Cristo. Catacaꞌtzīlh xlacaꞌn nā quit ictāꞌscuja Cristo.
\v 8 Māpaꞌksīniꞌ Jesucristo quimaxquīꞌnīꞌt līmāpaꞌksīn. Jā icmāxanaꞌn iclīchihuīnaꞌn huāꞌmāꞌ līmāpaꞌksīn. Quimaxquīꞌnīꞌt huāꞌmāꞌ līmāpaꞌksīn. Ūꞌtzaꞌ tzē naꞌiccālīmaktāyayān huiꞌxinaꞌn chī aꞌkaꞌīꞌyāꞌtit. Jā quimaxquīꞌnīꞌt līmāpaꞌksīn naꞌiclactlahua chī aꞌkaꞌīꞌyāꞌtit.
\v 9 Chuntzaꞌ icuan, ixpālacata jā iclacasquiꞌn najicuaꞌnāꞌtit chī iccātzoꞌknuniꞌyān.
\v 10 Āꞌmakapitzīn na mimpuꞌnancaꞌn quintalīchihuīnaꞌn ē tahuan: “Aꞌcxniꞌ xlaꞌ quincāmacaminiꞌyān aꞌktin carta, palhaꞌ chihuīnaꞌn chī ixkaꞌlhī līmāpaꞌksīn. Aꞌcxniꞌ quincātāꞌhuiꞌlān xalacatzucu chihuīnaꞌn. Jāla tzej aꞌkchihuīnaꞌn.” Chuntzaꞌ tahuan.
\v 11 Tī chuntzaꞌ tachihuīnaꞌn, catacaꞌtzīlh huāꞌmāꞌ: chuntzaꞌ chī iccātzoꞌknuniꞌyān nac aꞌktin carta, chuntzaꞌ naꞌiccātāꞌchihuīnaꞌnān aꞌcxniꞌ naꞌiccālakaꞌnāchāꞌn.
\p
\v 12 Quit jāla icticātāꞌlāmālakchāꞌnīlh xlacaꞌn tī tapuhuan xalactze. Quit jā chuntzaꞌ chī tapuhuan xlacaꞌn xalactze ixpālacata talāmālakchāꞌnī. Jā tacaꞌtzī.
\v 13 Quit jā iclītakaꞌlhī aꞌcxniꞌ iclīchihuīnaꞌn tū ictlahuanīꞌt. Icscujnīꞌt xmān jā Dios quimāsuꞌyuniꞌnīꞌt naꞌicscuja. Dios quimācaꞌtzīnīlh naꞌicscuja nā nac Corinto jā mincāꞌlacchicniꞌcaꞌn.
\v 14 Quit xapūla iccāmācaꞌtzīnīn xatze tachihuīn ixlaꞌ Cristo. Aꞌcxniꞌ xaꞌiccāmāsuꞌyuniꞌyān huiꞌxinaꞌn huaꞌchi xaꞌicscujmāꞌlh nac līlēꞌk tū Dios quimāsuꞌyuniꞌlh. Jā līhuaꞌcaꞌlh icscujli nac līlēꞌk aꞌcxniꞌ iccālakaꞌnchan.
\v 15 Jā iclītakaꞌlhī ixtascujūtcaꞌn āꞌmakapitzīn masqui tū quit jā ictlahualh. Quit iclacasquiꞌn huiꞌxinaꞌn āꞌchulāꞌ naꞌaꞌkaꞌīꞌyāꞌtit. Chuntzaꞌ āꞌchulāꞌ tzē naꞌicscuja, chuntzaꞌ chī quimāsuꞌyuniꞌlh Dios tū naꞌictlahua.
\v 16 Chuntzaꞌ tzē naꞌiccāmāsuꞌyuniꞌ xatze tachihuīn ixlaꞌ Jesucristo tī tahuiꞌlānaꞌnchaꞌ āꞌchulāꞌ makat. Quit icmāsuꞌyucuꞌtun xatze tachihuīn jā jānaꞌj tī māsuꞌyunīꞌt. Chuntzaꞌ jā ictilītakaꞌlhīlh tascujūt tū tlahuanīꞌt āꞌchāꞌtin ē palh jā quit ictlahuanīꞌt.
\p
\v 17 Jā tze palh chāꞌtin nalītakaꞌlhī. Xatze palh namākaꞌtlīꞌ Dios.
\v 18 Palh chāꞌtin nahuan xlaꞌ tze tū tlahua, huāꞌmāꞌ jā tū ixtapalh. Xmān Dios nahuan palh tze tū tlahuanīꞌt chāꞌtin chiꞌxcuꞌ.
\c 11
\s Pablo cālīchihuīnaꞌnli tī xmān ixtaꞌaꞌkskāhuīꞌnin
\p
\v 1 Quit iclacasquiꞌn huiꞌxinaꞌn nakexpaꞌtāꞌtit līlacatzucu līhuan iccāhuaniyān tū ictlahuanīꞌt. Caquilālīpātīuj līlacatzucu, masqui huaꞌchi chāꞌtin lhkēnti tī ixaꞌcstu līchihuīnaꞌncan.
\v 2 Dios lacasquiꞌn huiꞌxinaꞌn jā catitaxtumlīniꞌtit Cristo. Nā quit ūꞌtzaꞌ iclacasquiꞌn. Quit iccāmaktāyan natapaꞌksīniꞌyāꞌtit Cristo. Chuntzaꞌ quit huaꞌchi catīhuālh tī squiꞌn chāꞌtin tzuꞌmaꞌjāt. Chuhuaꞌj huaꞌchi chāꞌtin tzuꞌmaꞌjāt tī pāxquīꞌ īꞌsquiꞌnīniꞌ, nā chuntzaꞌ ixlacasquiꞌnca huiꞌxinaꞌn napāxquīꞌyāꞌtit xmān Cristo.
\v 3 Quit icjicuaꞌn huiꞌxinaꞌn nacātaꞌaꞌkskāhuīꞌyān, chuntzaꞌ chī Eva aꞌkskāhuīꞌca. Skāhuīꞌniꞌ lītaxtulh lūhuaꞌ ē aꞌkskāhuīꞌlh Eva. Skāhuīꞌniꞌ caꞌtzī chī naꞌaꞌkskāhuīꞌnin. Palhāsāꞌ nacāꞌaꞌkskāhuīꞌyān nā huiꞌxinaꞌn, ē ūꞌtzaꞌ nalītalakaspiꞌtniꞌyāꞌtit Cristo.
\v 4 Icjicuaꞌniꞌ huāꞌmāꞌ ixpālacata huiꞌxinaꞌn kexpaꞌtāꞌtit tī cātalakminān ē catamāsuꞌyuniꞌyān āꞌxtum ē jā chī tū iccāmāsuꞌyuniꞌn quit tū ixlaꞌ Jesús. Xtum tū talīmāsuꞌyu chī Espíritu Santo. Jā ūꞌtzaꞌ tū iccāmāsuꞌyuniꞌn. Xtum tū talīmāsuꞌyu chī līꞌaꞌkapūtaxtucan. Jā chuntzaꞌ chī quit iccāmāsuꞌyuniꞌn.
\v 5 Tzamāꞌ chiꞌxcuhuīꞌn tahuan xlacaꞌn apóstoles. Xlacaꞌn jā quintalacatzāꞌla.
\v 6 Palhāsāꞌ jā tzēhuanīꞌt chī quit icaꞌkchihuīnaꞌn. Quit tzej iccaꞌtzī. Ixlīpōꞌktu iccāmāsuꞌyuniꞌnīꞌtaꞌn.
\p
\v 7 Quit jā iccāmātāꞌjīn huiꞌxinaꞌn aꞌcxniꞌ iccāmāsuꞌyuniꞌn xatze tachihuīn ixlaꞌ Dios. Quit palhaꞌ xaꞌiclīscujmāꞌlh quimacan līhuan xaꞌiccālīmāsuꞌyuniꞌyān ixtachihuīn Dios. ¿Ē jā tze tū ictlahualh?
\v 8 Līhuana quit xaꞌicscuja na mimpuꞌnaꞌiꞌtātcaꞌn, ixquintamacaminiꞌ tumīn tāꞌtimīn xalanīꞌn āꞌlacatunuꞌ cāꞌlacchicniꞌ. Quit iccāmaktīlh ixtumīncaꞌn naꞌiccālīmaktāyayān huiꞌxinaꞌn.
\v 9 Līhuana xaꞌiccātāꞌhuiꞌlan quit jā xaꞌiccāsquiꞌniꞌyān tumīn aꞌcxniꞌ xaꞌicmaclacasquiꞌn tamaktāy. Tāꞌtimīn xalanīꞌn nac Macedonia ixquintalīminiꞌ tū xaꞌicmaclacasquiꞌn. Chuntzaꞌ jā tū iccāmāmakasputūnīꞌtaꞌn huiꞌxinaꞌn. Ē jā maktin icticāsquiꞌniꞌn tū naꞌicuaꞌ.
\v 10 Jā icticāsquiꞌniꞌlh nūn tāꞌtimīn xalanīꞌn nac Acaya. Quit ictapaꞌksīniꞌ Cristo, ē ūꞌtzaꞌ iclīhuan tū ixlīcanaꞌ.
\v 11 Palhāsāꞌ āꞌmakapitzīn tapuhuan quit jā iccāpāxquīꞌyān huiꞌxinaꞌn ixpālacata jā iccāmaktīcuꞌtunān mintumīncaꞌn. Huāꞌmāꞌ jā ixlīcānaꞌ. Dios caꞌtzī iccāpāxquīꞌyān huiꞌxinaꞌn.
\p
\v 12 Jā iccāsquiꞌniꞌnīꞌtaꞌn tumīn tū naꞌiclīhuāꞌyan. Jā ictisquiꞌnli nūn maktin. Chuntzaꞌ xlacaꞌn tī tasquiꞌn tumīn jāla catitahualh palh tascuja chī quit.
\v 13 Tahuan xlacaꞌn apóstoles. Jā ixlīcānaꞌ. Xmān taꞌaꞌkskāhuīꞌnin aꞌcxniꞌ tamāsuꞌyu. Talacasquiꞌn nacālaktzīꞌncan huaꞌchi apóstoles tī tatāꞌscuja Cristo.
\v 14 Jā tipuhuanāꞌtit palh jā chuntzaꞌ catilalh. Skāhuīꞌniꞌ tzē talakpalī ē tzē lītaxtu huaꞌchi chāꞌtin ángel xalaꞌ nac aꞌkapūn.
\v 15 Nā tzē natatalakpalī tī tatāꞌscuja skāhuīꞌniꞌ. Huaꞌchi tze tū tatlahuamāꞌnalh masqui tū jā tze. Xlacaꞌn nataxokoniꞌ Dios tū tatlahuanīꞌt.
\s Chī pātīniꞌlh Pablo
\p
\v 16 Quit iccāhuanipalayān huiꞌxinaꞌn: Jā capuhuaꞌntit huiꞌxinaꞌn palh quit chāꞌtin lhkēnti ixpālacata quinaꞌcstu quilīchihuīnaꞌmāꞌca. Masqui capuhuanca palh quit chāꞌtin lhkēnti, caquilākexmatniꞌuj ē caquilāmakxtekui naꞌicchihuīnaꞌn.
\v 17 Caꞌtzīyāuj tī kaꞌtlaꞌ makcaꞌtzī, xlaꞌ chihuīnaꞌn huaꞌchi chāꞌtin lhkēnti, ē jā huaꞌchi chāꞌtin tī tapaꞌksīniꞌ Cristo. Tū naꞌicuan quit, huaꞌchi quit xakaꞌtlaꞌ icmakcaꞌtzī.
\v 18 Lhūhuaꞌ talītakaꞌlhī cātamāsuꞌyuniꞌcuꞌtunān huiꞌxinaꞌn. Nā quit naꞌiclītakaꞌlhī tū ictlahua quit.
\v 19 Huiꞌxinaꞌn masqui puhuaꞌnāꞌtit palh caꞌtzīyāꞌtit, cālīpātīyāꞌtit tzamāꞌ chiꞌxcuhuīꞌn tī huaꞌchi chāꞌtin lhkēnti.
\v 20 Huiꞌxinaꞌn cālīpātīyāꞌtit masqui xlacaꞌn cātamāpaꞌksīcuꞌtunān huiꞌxinaꞌn. Xlacaꞌn cātamaktīyān ixlīpōꞌktu tū kaꞌlhīꞌyāꞌtit. Xlacaꞌn cātamākexmatīyān. Xlacaꞌn cātalakmakaꞌnān huiꞌxinaꞌn. Cātalacalaꞌsān. Ē huiꞌxinaꞌn cālīpātīyāꞌtit.
\v 21 Quit jā chuntzaꞌ iccātlahuaniꞌnīꞌtaꞌn huiꞌxinaꞌn. Palh tze cahuālh tlahuacan tzamāꞌ, quit xaꞌicmāxanaꞌlh, ixpālacata jā ictlahualh chuntzaꞌ.
\p Xlacaꞌn talīchihuīnaꞌn tū tatlahuanīꞌt. Chuhuaꞌj quit naꞌiclīchihuīnaꞌn tū ictlahuanīꞌt quit, masqui natasuꞌyu palh kaꞌtlaꞌ icmakcaꞌtzī ē huaꞌchi chāꞌtin lhkēnti.
\v 22 Xlacaꞌn kaꞌtlaꞌ tamakcaꞌtzī ē tahuan xlacaꞌn hebreos. Nā quit hebreo. Tahuan xlacaꞌn israelitas. Nā quit israelita. Tahuan Abraham ixpapcaꞌn. Nā Abraham nā quimpap.
\v 23 Tahuan tatāꞌscuja Cristo. Quit āꞌchulāꞌ ictāꞌscuja Cristo. Chuntzaꞌ chī icchihuīnaꞌmāꞌlh huaꞌchi chāꞌtin lhkēnti. Xlacaꞌn jā tascujnīꞌt chī quit. Jā tapātīniꞌnīꞌt chī quit. Quintucscanīꞌt. Nā xaꞌictachīꞌn. Maklhūhuaꞌ quintimaknīcuꞌtunca. Xlacaꞌn jā tapātīniꞌnīꞌt chuntzaꞌ.
\v 24 Quintāꞌisraelitas quintamaksnoꞌkli puꞌxamacāujnaꞌjāstzaꞌ. Chuntzaꞌ quintatlahuaniꞌnīꞌt makquitzis.
\v 25 Maktuꞌtun tanūniꞌca quinkēniꞌccan. Maktin quincuctaꞌlaca. Maktuꞌtun tāꞌcnūlh barco tū xaꞌicpūꞌaꞌmāꞌlh. Aꞌktin quilhtamacuj ē aꞌktin tzīꞌsniꞌ xaꞌictojōmāꞌlh nac xcān aꞌcxniꞌ tāꞌcnūlh barco.
\v 26 Calhāxcuhuālh iclatāꞌkchokonīꞌt naꞌicmāsuꞌyu ixtachihuīn Dios. Nā ictahuiꞌlanīꞌt jā cāꞌlījicuaꞌ. Nā maklhūhuaꞌ ictacutnīꞌt nac kaꞌtlaꞌ xcān. Nā icaꞌnīꞌt jā ixtalatlāꞌhuan kaꞌlhānaꞌnīꞌn. Quintitamaknīcuꞌtunli quintāꞌisraelitas ē nā tī jā israelitas. Xaꞌiclatlāꞌhuan nac cāꞌlījicuaꞌ nac cāꞌlacchicniꞌ ē nac cāꞌquiꞌhuīꞌn ē nac mar. Ixquintamaknīcuꞌtun tī ixtahuan xlacaꞌn nā tāꞌtimīn.
\v 27 Ictlakuaꞌnīꞌt ē palhaꞌ icscujnīꞌt. Maklhūhuaꞌ iclakachuꞌhuāꞌlhtatanīꞌt. Ē nā ictziꞌncsnīnīꞌt ē nā ickelhpūtīnīꞌt maklhūhuaꞌ. Icpātīniꞌnīꞌt nac cāꞌlonkniꞌ. Makatunuꞌ jā xaꞌickaꞌlhī quiluꞌxuꞌ.
\p
\v 28 Jā xmān huāꞌmāꞌ. Pōꞌktu quilhtamacuj ictamakchuyīnīꞌt ē quincaꞌtzaniꞌnīꞌt na quilīstacnaꞌ ixpālacatacaꞌn tī taꞌaꞌkaꞌīꞌ.
\v 29 Palh catīhuālh jāla tzej latāꞌkchoko na ixtej Dios, quit iclakalhuꞌman. Palh catīhuālh tamakahuasa, quit iclīsītzīꞌ chī māmakahuasīca.
\v 30 Palh ixlacasquiꞌnca quit naquilīchihuīnaꞌncan quinaꞌcstu, quit iclīchihuīnaꞌncuꞌtun tū namāsuꞌyu quit jāla tū ictlahua quinaꞌcstu.
\v 31 Dios caꞌtzī ixlīcānaꞌ tū icuan. Xlaꞌ ūꞌtzaꞌ ixTātaꞌ quiMāpaꞌksīniꞌcaꞌn Jesucristo. Calakachiꞌxcuhuīꞌca pōꞌktu quilhtamacuj.
\v 32 Aꞌcxniꞌ quit xaꞌicuīꞌlh nac Damasco, aꞌntzaꞌ ixmāpaꞌksīniꞌn chāꞌtin gobernador tī ixuiꞌlīnīꞌt rey Aretas. Huāꞌmāꞌ gobernador cāyāhualh maktakaꞌlhnaꞌnīꞌn jā lactaxtucan nac cāꞌlacchicniꞌ. Ixquintachīꞌlēꞌncuꞌtun.
\v 33 Quilacmāxtuca aꞌktin nac lhuꞌcuꞌ tū ixuīꞌlh nac talhtaꞌm tū ixlīstiꞌliꞌcanīꞌt cāꞌlacchicniꞌ. Quimpūmāyujūca aꞌktin xakaꞌtlaꞌ aꞌkscahuiꞌ. Chuntzaꞌ iclītzāꞌlalh ē iclīꞌaꞌkapūtaxtulh.
\c 12
\s Chī lakachuyalh Pablo
\p
\v 1 Jā tze palh naꞌicuan kaꞌtlaꞌ quit. Xmān naꞌiccāhuaniyān tū quimāsuꞌyuniꞌlh Māpaꞌksīniꞌ Jesucristo ē tū iclaktzīꞌlh aꞌcxniꞌ iclakachuyalh.
\v 2 Kaꞌlhītzaꞌ aꞌkcāujtāꞌtiꞌ cāꞌta ē xaꞌicaꞌkaꞌīꞌnīꞌttzaꞌ Cristo, aꞌcxniꞌ quit quilēꞌnca nac aꞌkapūn jā huiꞌlachaꞌ Cristo. Jā iccaꞌtzī palh lēꞌnca quimacniꞌ o palh jā lēꞌnca. Xmān Dios caꞌtzī.
\v 3 Dios caꞌtzī palh lēꞌnca quimacniꞌ o palh xmān lēꞌnca quilīstacnaꞌ. Quit jā iccaꞌtzī.
\v 4 Quilēꞌnca nac aꞌkapūn. Aꞌntzaꞌ ickexmatli tachihuīn tū jāla icuan ixpālacata Dios jā quimakxteka naꞌicuani nūn chāꞌtin.
\v 5 Dios quintlahuaniꞌlh huāꞌmāꞌ, ē ūꞌtzaꞌ quit iclīmākaꞌtlīꞌ. Quit jā kaꞌtlaꞌ iclīmakcaꞌtzī tū quinaꞌkspulalh. Xmān naꞌiccāhuaniyān tū māsuꞌyu quit jāla tū ictlahua quinaꞌcstu.
\v 6 Palh quit ixquilīchihuīnaꞌnca tzej tū ictlahuanīꞌt, jā xaꞌicchihuīnaꞌnli huaꞌchi chāꞌtin lhkēnti, ixpālacata quit xmān iclīchihuīnaꞌn tū ixlīcānaꞌ. Jā quintilīchihuīnaꞌnca quit ixpālacata jā iclacasquiꞌn āꞌmakapitzīn natapuhuan quit xakaꞌtlaꞌ. Quit iclacasquiꞌn natacaꞌtzī palh quit tze ixpālacata chī iclatāꞌkchoko ē chī icchihuīnaꞌn.
\p
\v 7 Palhāsāꞌ quit kaꞌtlaꞌ xaꞌiclīmakcaꞌtzīlh chī iclakachuyanīꞌt. Ūꞌtzaꞌ Dios quilīmaxquīꞌlh aꞌktin tacaꞌtzanaꞌjuāꞌt. Huāꞌmāꞌ tacaꞌtzanaꞌjuāꞌt huaꞌchi aꞌktin lhtucuꞌ tū skāhuīꞌniꞌ, Satanás, yāhualh na quimacniꞌ. Dios quimaxquīꞌlh huāꞌmāꞌ tacaꞌtzanaꞌjuāꞌt ixpālacata jā lacasquiꞌnli quit kaꞌtlaꞌ naꞌicmakcaꞌtzī.
\v 8 Maktuꞌtun icsquiꞌniꞌlh Māpaꞌksīniꞌ Jesucristo ixquimāpānūniꞌlh huāꞌmāꞌ tacaꞌtzanaꞌjuāꞌt.
\v 9 Xlaꞌ quihuanilh: “Quit naꞌicmaktāyayān ē chuntzaꞌ natāyaniꞌyaꞌ. Aꞌcxniꞌ huiꞌx taxlajuaniꞌyaꞌ ē āꞌcxniꞌ tasuꞌyu quit ickaꞌlhī lītliꞌhuiꞌqui.” Chuntzaꞌ quihuanilh. Chuntzaꞌ tapāxuhuān naꞌictāyaniꞌ aꞌcxniꞌ ictaxlajuaniꞌ. Chuntzaꞌ lītasuꞌyu quit iclīscuja ixlītliꞌhuiꞌqui Cristo.
\v 10 Chuntzaꞌ icpāxuhua masqui ictaxlajuaniꞌ quit ē masqui quilakapalacan ē masqui quisputniꞌ tū icmaclacasquiꞌn ē masqui quimputzastālaniꞌcan ē masqui quinaꞌkspula tū jā tze. Aꞌcxniꞌ ictaxlajuaniꞌ quit, aꞌcxniꞌ tasuꞌyu Cristo quimaktāyamāꞌlh. Ūꞌtzaꞌ iclīpāxuhua.
\s Pablo ixcāpāstaca xalanīꞌn nac Corinto
\p
\v 11 Huaꞌchi quit chāꞌtin lhkēnti ixpālacata xmān quilīchihuīnaꞌncan quit. Xmān mimpālacatacaꞌn chuntzaꞌ iclīchihuīnaꞌn. Huiꞌxinaꞌn ixquilāmaktāyauj na ixlacatīncaꞌn tī tahuan xlacaꞌn apóstoles. Tī tapuhuan xlacaꞌn lakaꞌtlaꞌ apóstoles, xlacaꞌn jā quintalakatzāꞌla chī quit, masqui quit jā tū quintapalh.
\v 12 Aꞌcxniꞌ xaꞌicscuja na mimpuꞌnancaꞌn, tasuꞌyulh Dios ixquilīhuiꞌlīnīꞌt quilīꞌapóstol. Quit līlacatzucu xaꞌicscuja. Quit xaꞌictlahua līꞌaꞌcnīn. Huāꞌmāꞌ māsuꞌyulh Dios ixquilīhuiꞌlīnīꞌt quilīꞌapóstol.
\v 13 Xmān aꞌktin tū jā ictlahualh na mimpuꞌnancaꞌn tū ictlahualh na ixpuꞌnancaꞌn āꞌmakapitzīn tī taꞌaꞌkaꞌīꞌ. Ūꞌtzaꞌ huāꞌmāꞌ: Jā iccāsquiꞌniꞌn huiꞌxinaꞌn tū naꞌiclīhuāꞌyan. Palh huiꞌxinaꞌn puhuaꞌnāꞌtit jā tze huāꞌmāꞌ, caquilāmāsputūnuꞌniꞌuj.
\p
\v 14 Chuhuaꞌj ixlīmaktuꞌtun iclacapāstacniꞌ naꞌiccālakaꞌnāchāꞌn. Aꞌcxniꞌ naꞌicchāꞌn aꞌntzaꞌ, huiꞌxinaꞌn jā catixokotit tū naꞌicuaꞌ. Xmān iccāmaktāyacuꞌtunān huiꞌxinaꞌn naꞌaꞌkaꞌīꞌyāꞌtit āꞌchulāꞌ. Jā iclacasquiꞌn mintumīncaꞌn. Caꞌtzīyāuj camanaꞌ jāla tamāhuīꞌ ixtātaꞌcaꞌn. Xanatātaꞌnaꞌ tamāhuīꞌ ixcamanaꞌcaꞌn. Quit huaꞌchi mintātaꞌcaꞌn.
\v 15 Quit tapāxuhuān naꞌicmālaksputū tū ickaꞌlhī palh chuntzaꞌ naꞌaꞌkaꞌīꞌyāꞌtit āꞌchulāꞌ. Naꞌicscuja ē naꞌictlakuaꞌn. Masqui quit iccāpāxquīꞌyān, huiꞌxinaꞌn jā quilāpāxquīꞌyāuj.
\p
\v 16 Masqui jā iccāsquiꞌniꞌnīꞌtaꞌn nūn tū, āꞌmakapitzīn tahuan iccāꞌaꞌkskāhuīꞌmaktīnīꞌtaꞌn mintumīncaꞌn.
\v 17 Quit jā tū iccāꞌaꞌkskāhuīꞌmaktīn aꞌcxniꞌ iccālakmacāꞌnchaꞌn tī āꞌchāꞌtin.
\v 18 Quit icsquiꞌniꞌlh Tito ixcālakaꞌnchaꞌn huiꞌxinaꞌn. Xlaꞌ ictāꞌmacāꞌlh āꞌchāꞌtin quintāꞌtincaꞌn. Tito jā cāꞌaꞌkskāhuīꞌmaktīn nūn tū. Huiꞌxinaꞌn caꞌtzīyāꞌtit chī xaꞌiclatlāꞌhuan quit, nā chuntzaꞌ ixlatlāꞌhuan Tito. Quinaꞌn aꞌktin quintalacapāstacniꞌcaꞌn.
\p
\v 19 Palhāsāꞌ huiꞌxinaꞌn puhuaꞌnāꞌtit quit ictamaktāyamāꞌlh na milacatīncaꞌn. Jā chuntzaꞌ. Quit icchihuīnaꞌn na ixlacatīn Dios ē icchihuīnaꞌn chuntzaꞌ chī ixtalacasquiꞌnīn Cristo. Quit iccāpāxquīꞌyān huiꞌxinaꞌn. Iccāmaktāyacuꞌtunān tzej naꞌaꞌkaꞌīꞌyāꞌtit. Ūꞌtzaꞌ iclītlahuakōꞌ ixlīpōꞌktu mimpālacatacaꞌn.
\v 20 Quit iclītamakchuyī icpuhuan palhāsāꞌ aꞌcxniꞌ naꞌicchāꞌn aꞌntzaꞌ naꞌiccaꞌtzī huiꞌxinaꞌn jā tzej latlāꞌhuaꞌnāꞌtit. Palh jā tzej latlāꞌhuaꞌnāꞌtit, ixlacasquiꞌnca naꞌiccālacaquilhnīyān huiꞌxinaꞌn. Iclītamakchuyīnīꞌt icpuhuan palhāsāꞌ lāslokoyāꞌtit huiꞌxinaꞌn, ē lālakcaꞌtzanaꞌniꞌyāꞌtit ē lāsītzīꞌniꞌyāꞌtit ē lāquiclhlaktzīꞌnāꞌtit ē nā lālīchihuīnaꞌnāꞌtit ē lālēꞌksaꞌnāꞌtit ē lakaꞌtlaꞌ makcaꞌtzīyāꞌtit ē jā aꞌcxtim tahuiꞌlaꞌyāꞌtit.
\v 21 Quit iclītamakchuyī icpuhuan palhāsāꞌ aꞌcxniꞌ naꞌiccālakaꞌnāchāꞌn huiꞌxinaꞌn, quit naꞌiclīmāxanaꞌn na ixlacatīn Dios tū tlahuaꞌyāꞌtit huiꞌxinaꞌn. Quit naꞌiccalhuan palh lhūhuaꞌ huiꞌxinaꞌn tlahuanīꞌtaꞌntit tū jā tze ē palh jā makxtekcuꞌtunāꞌtit tū jā tze ē palh kaꞌlhīꞌyāꞌtitcus mintāꞌlāpāxquīꞌncaꞌn ē palh tlahuaꞌyāꞌtitcus tū jā tze mintalacapāstacniꞌcaꞌn.
\c 13
\s Pablo cāmāxquīꞌlh talacapāstacniꞌ
\p
\v 1 Chuhuaꞌj ixlīmaktuꞌtun naꞌiccālakaꞌnāchāꞌn huiꞌxinaꞌn. Huiꞌxinaꞌn caꞌtzīyāꞌtit aꞌcxniꞌ mālacsuꞌyucan chāꞌtin, talacasquiꞌn chāꞌtuꞌ o kelhatuꞌtun testigos.
\v 2 Naꞌiccāhuanipalayān āꞌmaktin tū iccāhuanin aꞌcxniꞌ xaꞌiccātāꞌhuiꞌlan huiꞌxinaꞌn ixlīmaktuꞌ. Masqui jā iccātāꞌhuiꞌlan chuhuaꞌj, naꞌiccāhuanipalayān huiꞌxinaꞌn tī tlahuanīꞌtaꞌntit tū jā tze ē āꞌmakapitzīn huampala chī huiꞌxinaꞌn. Naꞌiccāmakapātīnīn tī tatlahuatāꞌkchoko tū jā tze. Xlacaꞌn jā catitalakatzāꞌlalh chī naꞌiccāmakapātīnīn.
\v 3 Chuntzaꞌ huiꞌxinaꞌn nalaktzīꞌnāꞌtit quit iclīchihuīnaꞌn ixlīmāpaꞌksīn Cristo. Xlaꞌ jā catitaxlajuaniꞌlh na milacatīncaꞌn. Huiꞌxinaꞌn nalaktzīꞌnāꞌtit Cristo kaꞌlhī līmāpaꞌksīn.
\v 4 Huaꞌchi ixtaxlajuaniꞌ Cristo aꞌcxniꞌ nīlh nac cruz. Chuhuaꞌj xlaꞌ huīꞌlh. Dios maxquīꞌnīꞌt līmāpaꞌksīn. Quit ictapaꞌksīniꞌ Cristo, ē ūꞌtzaꞌ līlacatzucu iccālītāꞌchihuīnaꞌnīꞌtaꞌn. Huaꞌchi quit ictaxlajuaniꞌ. Huiꞌxinaꞌn nalaktzīꞌnāꞌtit quit iclīlatlāꞌhuan ixlīmāpaꞌksīn Dios, chuntzaꞌ chī Cristo.
\p
\v 5 Tzej calacapāstacnaꞌntit huiꞌxinaꞌn palh ixlīcānaꞌ aꞌkaꞌīꞌyāꞌtit huiꞌxinaꞌn. Camāsuꞌyuꞌtit palh ixlīcānaꞌ aꞌkaꞌīꞌyāꞌtit. Huiꞌxinaꞌn tzej caꞌtzīyāꞌtit palh ixlīcānaꞌ tāꞌlatlāꞌhuaꞌnāꞌtit Cristo. Palh jā tāꞌlatlāꞌhuaꞌnāꞌtit Cristo, huiꞌxinaꞌn jā tapaꞌksīniꞌyāꞌtit xlaꞌ.
\v 6 Huiꞌxinaꞌn nacaꞌtzīyāꞌtit quit ictapaꞌksīniꞌ Cristo ixpālacata quit ictāꞌlatlāꞌhuan xlaꞌ.
\v 7 Chuhuaꞌj icsquiꞌniꞌ Dios jātzaꞌ catlahuaꞌtit tū jā tze. Jā quincuenta palh āꞌmakapitzīn tapuhuan quit jā ickaꞌlhī līmāpaꞌksīn naꞌiccālacaquilhnīyān. Iclacasquiꞌn natlahuaꞌyāꞌtit tū tze. Huāꞌmāꞌ iclacasquiꞌn masqui chuntzaꞌ jā catitasuꞌyulh quit ickaꞌlhī līmāpaꞌksīn.
\v 8 Xmān ickaꞌlhī līmāpaꞌksīn naꞌictlahua tū īxtachihuīn Dios. Jā ickaꞌlhī līmāpaꞌksīn naꞌictlahua tū jā chī ixtachihuīn Dios.
\v 9 Icpāxuhua aꞌcxniꞌ huiꞌxinaꞌn tzej latlāꞌhuaꞌnāꞌtit na ixtej Dios. Huāꞌmāꞌ quimakapāxuī masqui chuntzaꞌ jā ixlacasquiꞌnca quit icmāsuꞌyu līmāpaꞌksīn tū Dios quimaxquīꞌlh naꞌiccālacaquilhnīyān. Xmān iclacasquiꞌn huiꞌxinaꞌn lactze nahuanāꞌtit.
\v 10 Ūꞌtzaꞌ iccālītzoꞌknuniꞌyān chuntzaꞌ nac carta aꞌcxniꞌ jānaꞌj xaꞌiccālakaꞌmpalayāchāꞌn. Quit jā iclacasquiꞌn naꞌiccālacaquilhnīyān aꞌcxniꞌ naꞌicchāꞌnāchaꞌ. Quit iclacasquiꞌn jā ixlacasquiꞌnca naꞌiccāmāsuꞌyuniꞌyān līmāpaꞌksīn tū quimaxquīꞌnīꞌt Māpaꞌksīniꞌ Jesucristo. Quimaxquīcaꞌnīꞌt huāꞌmāꞌ līmāpaꞌksīn naꞌiccāmaktāyayān chī tzej naꞌaꞌkaꞌīꞌyāꞌtit. Jā quimaxquīꞌcanīꞌt huāꞌmāꞌ līmāpaꞌksīn naꞌiccāmāmakchuyīyān huiꞌxinaꞌn chī aꞌkaꞌīꞌyāꞌtit.
\p
\v 11 Chuhuaꞌj, tāꞌtimīn, cakaꞌlhīꞌtit tapāxuhuān. Calīhuiꞌlīꞌtit tzej nalatāꞌkchokoyāꞌtit. Jā calakachipiniꞌtit. Chu aꞌktin calalh mintalacapāstacniꞌcaꞌn. Caꞌcs catahuiꞌlaꞌtit. Dios nacātāꞌtahuiꞌlayān huiꞌxinaꞌn. Xlaꞌ quincāpāxquīꞌyān ē quincāmaxquīꞌyān tze latamat.
\v 12 Calāsaludarlīꞌtit milīpōꞌktucaꞌn ixpālacata lītāꞌtimīn huiꞌxinaꞌn.
\v 13 Quintāꞌtimīncaꞌn xalanīꞌn huāꞌtzāꞌ cātamacāꞌniꞌyāchāꞌn aꞌntzaꞌ saludos milīpōꞌktucaꞌn huiꞌxinaꞌn.
\p
\v 14 Māpaꞌksīniꞌ Jesucristo cacāsicuaꞌlanātlahuan huiꞌxinaꞌn. Camakcaꞌtzītit chī cāpāxquīꞌyān Dios. Espíritu Santo cacātāꞌtahuiꞌlan chāꞌtunuꞌ huiꞌxinaꞌn. Chuntzaꞌ huiꞌxinaꞌn chu aꞌktin nalītaxtuyāꞌtit. Amén.