\id GAL
\h Gálatas
\toc1 Gálatas
\mt Gálatas
\c 1
\s Pablo cāmacāꞌniꞌlh saludos xalanīꞌn nac Galacia tī ixtaꞌaꞌkaꞌīꞌ
\p
\v 1 Quit, Pablo, ictzoꞌkmāꞌlh huāꞌmāꞌ caꞌpsnap. Quit apóstol. Tī quilīhuiꞌlīnīꞌt quilīꞌapóstol jā chāꞌtin chiꞌxcuꞌ. Nūn chāꞌtin chiꞌxcuꞌ quilacsacli palh apóstol naꞌiclītaxtu. Tī quilīhuiꞌlīnīꞌt quilīꞌapóstol xlaꞌ ūꞌtzaꞌ Jesucristo ē nā quinTātaꞌcaꞌn Dios tī mālacastālancuanīlh Jesucristo.
\v 2 Quit ē ixlīpōꞌktucaꞌn tāꞌtimīn tī quintatāꞌlahuiꞌlānaꞌlh, quinaꞌn pūla iccāmacāꞌniꞌyāchāꞌn saludos huiꞌxinaꞌn xalanīꞌn nac Galacia tī aꞌkaꞌīꞌyāꞌtit.
\v 3 Cacāsicuaꞌlanātlahuan huiꞌxinaꞌn quinTātaꞌcaꞌn Dios ē Māpaꞌksīniꞌ Jesucristo. Dios cacāmaxquīꞌn tze latamat.
\v 4 Jesucristo tamacamāstāꞌlh ixaꞌcstu aꞌcxniꞌ nīlh ixpālacata quincuentacaꞌn. Ixquincāmakapūtaxtūcuꞌtunān tzamāꞌ cāꞌquilhtamacuj tū jā tze. Chuntzaꞌ tlahualh Jesucristo ixpālacata chuntzaꞌ ixtalacasquiꞌnīn quinTātaꞌcaꞌn Dios.
\v 5 ¡Camakapāxuīca Dios pōꞌktu quilhtamacuj! Amén.
\s Jā aꞌnampala āꞌkempātin tamāsuꞌyun tū tzē nalīꞌaꞌkapūtaxtucan
\p
\v 6 Quit iccālīꞌaꞌcnīyān huiꞌxinaꞌn chī palaj tamakatīniꞌpāꞌnaꞌntit Dios. Tzamāꞌ ūꞌtzaꞌ tī cātaꞌsaniꞌn huiꞌxinaꞌn ixpālacata Cristo quincātlahuaniꞌn aꞌktin talakalhuꞌmān ē nīlh quimpālacatacaꞌn. Chuhuaꞌj huiꞌxinaꞌn stālaniꞌpāꞌnaꞌntit xaxtumtzaꞌ tamāsuꞌyun chī nalīꞌaꞌkapūtaxtucan.
\v 7 Quinaꞌn caꞌtzīyāuj palh jā ixlīcānaꞌ aꞌnampala āꞌkempātin tamāsuꞌyun chī nalīꞌaꞌkapūtaxtucan. Aꞌnan makapitzīn chiꞌxcuhuīꞌn tī talakpalīcuꞌtun huāꞌmāꞌ tamāsuꞌyun tū ixlaꞌ Jesucristo. Chuntzaꞌ xlacaꞌn cātamāmakchuyīmāꞌn huiꞌxinaꞌn.
\v 8 Palh catīhuālh cāmāsuꞌyuniꞌyān āꞌkempātin tamāsuꞌyun chī nalīꞌaꞌkapūtaxtucan, xlaꞌ Dios camakapātīnīnli ūꞌtzaꞌ. Capātīniꞌlh masqui chāꞌtin ángel xalaꞌ nac aꞌkapūn tī māsuꞌyu huāꞌmāꞌ ē masqui chāꞌtin quinaꞌn.
\v 9 Iccāhuaninīꞌtaꞌntzaꞌ ē chuhuaꞌj naꞌiccāhuanipalayān: Palh chāꞌtin cāmāsuꞌyuniꞌyān huiꞌxinaꞌn āꞌkempātin tamāsuꞌyun chī nalīꞌaꞌkapūtaxtucan ē jā chuntzaꞌ chī xapūla maktīniꞌntit, xlaꞌ Dios camakapātīnīꞌlh.
\p
\v 10 Tū iclīchihuīnaꞌmāꞌlh aꞌntzaꞌ tasuꞌyu jā iclīchihuīnaꞌn xmān ūꞌtzaꞌ tū takexmatcuꞌtun tachiꞌxcuhuīꞌt. Jā chuntzaꞌ. Quit ictlahuacuꞌtun tū xmān ixtalacasquiꞌnīn Dios. ¿Ē quit xmān tachiꞌxcuhuīꞌt iccāmakapāxuīcuꞌtun? Palh quit cahuālh xmān tachiꞌxcuhuīꞌt iccāmakapāxuīcuꞌtun quit jā Cristo xaꞌictikexmatniꞌlh.
\s Dios huiꞌlīlh Pablo ixlīꞌapóstol
\p
\v 11 Tāꞌtimīn, quit iclacasquiꞌn nacaꞌtzīyāꞌtit huāꞌmāꞌ. Xatze tachihuīn tū icmāsuꞌyu quit, huāꞌmāꞌ jā ūꞌtzaꞌ ixtalacapāstacniꞌcaꞌn tachiꞌxcuhuīꞌt.
\v 12 Jā quimācaꞌtzīnīlh chāꞌtin chiꞌxcuꞌ. Jā chāꞌtin chiꞌxcuꞌ quimāsuꞌyuniꞌlh. Tunca Jesucristo ūꞌtzaꞌ quimācaꞌtzīnīlh.
\p
\v 13 Huiꞌxinaꞌn cātahuaninīꞌtaꞌntzaꞌ chī quit xaꞌiclīlatlāꞌhuan xapūla aꞌcxniꞌ xaꞌicstālaniꞌ ixtamāsuꞌyuncaꞌn israelitas. Huiꞌxinaꞌn caꞌtzīyāꞌtittzaꞌ chī quit xaꞌiccāputzastālaniꞌ tī ixtaꞌaꞌkaꞌīꞌniꞌ Jesucristo. Quit jā xaꞌiccālakalhuꞌman. Quit xaꞌiclactlahuacuꞌtun huāꞌmāꞌ tamāsuꞌyun tū ixlaꞌ Jesucristo.
\v 14 Chī taꞌaꞌkaꞌīꞌ israelitas quit āꞌchulāꞌ xaꞌiccatzī ē jā āꞌmakapitzīn quintāꞌisraelitas tī ixtakaꞌlhī ixcāꞌtacaꞌn huaꞌchi chī quit. Quit āꞌchulāꞌ xaꞌiccākexmatniꞌ ixtamāsuꞌyuncaꞌn quinapapanaꞌ israelitas.
\v 15 Dios quilakalhuꞌmanli, ē quilacsacli apóstol naꞌiclītaxtu aꞌcxniꞌ jānaꞌj xaꞌiclacatuncuhuīꞌ. Quintaꞌsaniꞌlh naꞌictāꞌscuja ūꞌtzaꞌ.
\v 16 Chuntzaꞌ chī Dios lacasquiꞌnli xlaꞌ chuntzaꞌ quimāsuꞌyuniꞌlh Jesucristo tī īꞌSkaꞌtaꞌ Dios. Ūꞌtzaꞌ tlahualh ixpālacata quit nā chuntzaꞌ tzē naꞌiccāmāsuꞌyuniꞌ xlacaꞌn tī jā israelitas xatze tachihuīn ixlaꞌ Jesucristo. Aꞌcxniꞌ Dios quimālakapasnīlh īꞌSkaꞌtaꞌ, jā icquīsquiꞌniꞌlh talacapāstacniꞌ āꞌchāꞌtin chiꞌxcuꞌ.
\v 17 Jā iccālakaꞌlh apóstoles nac Jerusalén tī apóstoles ixtahuanīꞌttzaꞌ xapūla. Quit jā chuntzaꞌ ictlahualh. Palaj tunca icaꞌlh nac Arabia ē āꞌlīstān ictaspiꞌtpālh nac Damasco.
\p
\v 18 Ixlīꞌaꞌktuꞌtun cāꞌta iclakaꞌlh apóstol Pedro nac Jerusalén. Aꞌntzaꞌ ictāꞌtachokolh xlaꞌ xmān cāujquitzismaꞌj.
\v 19 Jā iclaktzīꞌlh āꞌchāꞌtin apóstol, xmān Jacobo ixtāꞌtin Māpaꞌksīniꞌ Jesús.
\v 20 Ixlīcānaꞌ tū ictzoꞌkmāꞌlh. Iccāhuanimāꞌn huāꞌmāꞌ na iꞌxlacatīn Dios. Jā iccāꞌaꞌkskāhuīꞌmāꞌn.
\p
\v 21 Āꞌlīstān icaꞌlh jā tapaꞌksīniꞌ nac Siria ē Cilicia.
\v 22 Jānaꞌj ixquintalakapasa tī ixtaꞌaꞌkaꞌīꞌniꞌ Cristo xalanīꞌn nac Judea.
\v 23 Xlacaꞌn xmān ixtakexmata chī ixuancan: “Ūꞌtzaꞌ tzamāꞌ chiꞌxcuꞌ tī ixquincāputzastālaniꞌyān xapūla, chuhuaꞌj xlaꞌ līchihuīnaꞌntlāꞌhuan tamāsuꞌyun ixpālacata Cristo tū xapūla ixmālaksputūcuꞌtun.”
\v 24 Xalanīꞌn nac Judea aꞌcxniꞌ takexmatli huāꞌmāꞌ, ixtamakapāxuī Dios quimpālacata.
\c 2
\s Āꞌmakapitzīn apóstoles talakatīlh chī Pablo ixmāsuꞌyumāꞌlh ixtachihuīn Dios
\p
\v 1 Āꞌlīstān ixlīlakacāujtāꞌtiꞌ cāꞌta icaꞌmpālh nac Jerusalén āꞌmaktin huampala ē quintāꞌaꞌlh Bernabé. Nā iclēꞌlh Tito.
\v 2 Aꞌntzaꞌ icquīlalh ixpālacata Dios ixquimācaꞌtzīnīnīꞌt ixlacasquiꞌnca naꞌicaꞌn. Ē aꞌntzaꞌ nac Jerusalén ictakēstokui xmān quit ē tī xanapuxcuꞌnuꞌ. Quit iccāhuanilh chī quit xaꞌiccāmāsuꞌyuniꞌ tī jā israelitas xatze tachihuīn ixlaꞌ Jesucristo. Chuntzaꞌ ictlahualh ixpālacata jā xaꞌiclacasquiꞌn chu tlakaj chī xaꞌicmāsuꞌyumāꞌlh ē chī icmāsuꞌyumāꞌlh chuhuaꞌj.
\v 3 Xlacaꞌn jā quintatāꞌlālīhuanilh chī xaꞌiccāmāsuꞌyuniꞌmāꞌlh jā ixlacasquiꞌnca natastālaniꞌ ixtahuiꞌlatcaꞌn israelitas, xlacaꞌn tī jā israelitas. Nā Tito tī ixquintāꞌlahuīꞌlh, jā huanica palh ixlacasquiꞌnca nachuꞌcucan, chuntzaꞌ chī ixtahuiꞌlatcaꞌn israelitas, ē masqui Tito jā israelita ixuanīꞌt.
\v 4 Xlaꞌ jā chuꞌcuca masqui ixtalacasquiꞌn makapitzīn tī jā ixlīcānaꞌ tāꞌtimīn. Xlacaꞌn ixquincātatāꞌtanūnīꞌtaꞌn xmān naquincātakexmatxtuyān. Xmān ixtacaꞌtzīcuꞌtun chī jā ixlacasquiꞌnca natlahuayāuj chī ixtahuiꞌlatcaꞌn israelitas quinaꞌn tī tapaꞌksīniꞌyāuj Cristo Jesús. Xlacaꞌn ixtalacasquiꞌn quinaꞌn natlahuayāuj ixtahuiꞌlatcaꞌn israelitas.
\v 5 Quinaꞌn jā icmakxtekui naquincātaskāhuīꞌyān nūn macstiꞌnaꞌj. Quinaꞌn xaꞌiclacasquiꞌnāuj huiꞌxinaꞌn āꞌchulāꞌ nacaꞌtzītēlhaꞌyāꞌtit tū ixlīcānaꞌ xatze tachihuīn ixlaꞌ Jesucristo.
\p
\v 6 Xanapuxcuꞌnuꞌ tī cālakachiꞌxcuhuīꞌcan, xlacaꞌn jā quintahuanilh ixlacasquiꞌnca naꞌiclakpalī tū xaꞌicmāsuꞌyu. Quit jā quincuenta palh cālakachiꞌxcuhuīꞌcan o jā cālakachiꞌxcuhuīꞌcan. Dios lakapasa quilīstacnaꞌcaꞌn ē jā laktzīꞌn xmān tū talaktzīꞌn tachiꞌxcuhuīꞌt.
\v 7 Xlacaꞌn jā quintahuanilh naꞌiclakpalī tū xaꞌicmāsuꞌyu. Xlacaꞌn tacaꞌtzīlh palh Dios quimacamaxquīꞌnīꞌt naꞌiccāmāsuꞌyuniꞌ xatze tachihuīn tī jā israelitas chuntzaꞌ chī Dios ixmacamaxquīꞌnīꞌt Pedro nacāmāsuꞌyuniꞌ israelitas xatze tachihuīn.
\v 8 Chuntzaꞌ chī Dios mātliꞌhuiꞌclhli Pedro ē līhuiꞌlīlh ixlīꞌapóstol chī nacāmāsuꞌyuniꞌ israelitas ē nā quit quimātliꞌhuiꞌclhli ē quilīhuiꞌlīlh quilīꞌapóstol chī naꞌiccāmāsuꞌyuniꞌ tī jā israelitas.
\p
\v 9 Jacobo ē Pedro ē Juan ixcālaktzīꞌncan huaꞌchi xanapuxcuꞌnuꞌ. Aꞌcxniꞌ xlacaꞌn tacaꞌtzīlh Dios ixquimacamaxquīꞌnīꞌt huāꞌmāꞌ tascujūt, ē quintamakachiꞌpalh quit ē Bernabé. Chuntzaꞌ tatlahualh ixpālacata quilīpōꞌktucaꞌn xaꞌicchihuīnaꞌnīꞌtauj quinaꞌn naꞌicscujāuj na ixpuꞌnancaꞌn tī jā israelitas ē xlacaꞌn natascuja na ixpuꞌnancaꞌn israelitas.
\v 10 Xmān quincātahuanin jā naꞌicpātzaꞌnkāyāuj naꞌiccāmaktāyayāuj tī lacxcamanīnīꞌn. Nā chuntzaꞌ quit xaꞌictlahuacuꞌtun.
\s Pablo tāꞌlāhuanilh Pedro nac Antioquía
\p
\v 11 Aꞌcxniꞌ Pedro milh nac Antioquía quit cāꞌlacan ictāꞌlāhuanilh ixpālacata xlaꞌ jā tze chī ixtlahuamāꞌlh.
\v 12 Xapūla Pedro ixcātāꞌhuāꞌyan xlacaꞌn tī jā israelitas, masqui xlacaꞌn jā cāchuꞌcucanīꞌt chuntzaꞌ chī ixtahuiꞌlatcaꞌn israelitas. Āꞌlīstān aꞌcxniꞌ tamilh israelitas tī cāmacamilh Jacobo, Pedro tatampūxtulh ē jātzaꞌ cātāꞌhuāꞌyalh. Xlaꞌ ixcājicuaꞌniꞌ israelitas ixpālacata xlacaꞌn ixtahuan ixlacasquiꞌnca nacāchuꞌcucan xlacaꞌn tī jā israelitas.
\v 13 Āꞌmakapitzīn tāꞌtimīn tī israelitas ē xlacaꞌn tatzuculh tatlahua lacxtim chī ixtlahua Pedro. Nā xlacaꞌn tatlahualh aꞌktuꞌ ixlacancaꞌn. Nā Bernabé chu aꞌktin cātāꞌlalh.
\v 14 Tū ixtatlahuamāꞌnalh, quit iccaꞌtzīlh jā chuntzaꞌ chī huan xatze tachihuīn tū ixlaꞌ Dios. Aꞌcxniꞌ iccaꞌtzīlh huāꞌmāꞌ, quit icuanilh Pedro na ixlacatīncaꞌn ixlīpōꞌktucaꞌn: “Huiꞌx nā israelita. Ixlaꞌyaꞌ chī tī jā israelitas ē jā chī israelita. ¿Tū ixpālacata lacasquiꞌnaꞌ natatlahua ixtahuiꞌlatcaꞌn israelitas xlacaꞌn tī jā israelitas?” Chuntzaꞌ icuanilh Pedro.
\s Ixlīpōꞌktucaꞌn tī taꞌaꞌkaꞌīꞌ Dios chu lacxtim chī cāmakapūtaxtūcan
\p
\v 15 Quinaꞌn israelitas iclīlacatuncuhuīꞌnīꞌtauj. Quinaꞌn jā chī āꞌmakapitzīn tachiꞌxcuhuīꞌt tī takaꞌlhī ixcuentacaꞌn.
\v 16 Caꞌtzīyāuj Dios cāmāpānūniꞌ ixcuentacaꞌn xmān xlacaꞌn tī talīpāhuan Jesucristo, ē jā xlacaꞌn tī xmān tamākentaxtūcuꞌtun līmāpaꞌksīn tū Dios cāmaxquīꞌlh israelitas. Chuntzaꞌ quinaꞌn nā līpāhuanāuj Jesucristo. Dios quincāmāpānūniꞌnīꞌtaꞌn quincuentacaꞌn ixpālacata līpāhuanāuj Jesucristo ē jā ixpālacata kexmatniꞌyāuj huāꞌmāꞌ līmāpaꞌksīn. Jā tī chāꞌtin tī Dios māpānūniꞌ ixcuenta xmān ixpālacata mākentaxtūcuꞌtun līmāpaꞌksīn.
\p
\v 17 Quinaꞌn iclīpāhuanāuj Jesucristo, ē iccaꞌtzīyāuj xmān chuntzaꞌ Dios quincāmāpānūniꞌyān quincuentacaꞌn. Jātzaꞌ iclīpāhuanāuj līmāpaꞌksīn tū Dios cāmaxquīꞌlh israelitas. Ūꞌtzaꞌ makapitzīn talīhuan quinaꞌn iclaclēꞌnauj ē nā tahuan Cristo quincāmātlahuīmāꞌn tū jā tze. Ūꞌtzaꞌ jā ixlīcānaꞌ. Cristo jā quincāmātlahuīyān tū jā tze.
\v 18 Palh quit naꞌicmākēnū huāꞌmāꞌ līmāpaꞌksīn ē āꞌlīstān naꞌicaꞌkaꞌīꞌpala tzamāꞌ līmāpaꞌksīn, chuntzaꞌ natasuꞌyu quit iclaclēꞌn.
\v 19 Quit iccaꞌtzīlh jāla icmākentaxtūkōꞌ līmāpaꞌksīn tū Dios cāmaxquīꞌlh israelitas. Ūꞌtzaꞌ jātzaꞌ iclīpāhuan huāꞌmāꞌ līmāpaꞌksīn. Chuhuaꞌj quit iclatlāꞌhuan chī ixtalacasquiꞌnīn Dios.
\v 20 Quit huaꞌchi icnīnīꞌttzaꞌ ē huaꞌchi quintāꞌxtokohuaꞌcaꞌcanīꞌttzaꞌ Cristo. Huaꞌchi jātzaꞌ quit icuīꞌlh ē xmāntzaꞌ Cristo huīꞌlh na quilīstacnaꞌ. Quit iclīpāhuan īꞌSkaꞌtaꞌ Dios ē chuntzaꞌ quit iclīhuīꞌlh chuhuaꞌj. Xlaꞌ quimpāxquīꞌlh ē līnīlh quimpālacata.
\v 21 Quit jā iclakmakaꞌn ixtalakalhuꞌmān Dios. Palh chāꞌtin mākentaxtūcuꞌtun līmāpaꞌksīn ē xmān ūꞌtzaꞌ ixlīmāpānūniꞌca cahuālh ixcuenta, chuntzaꞌ chu tlakaj ixnīlh Cristo.
\c 3
\s Xatze līpāhuancan Jesucristo ē jā līmāpaꞌksīn
\p
\v 1 ¿Chu jā kaꞌlhīꞌyāꞌtit milīstacnaꞌcaꞌn nalīlacapāstacnaꞌnāꞌtit? ¿Tīchu cātamāmakchuyīn huiꞌxinaꞌn, tāꞌtimīn, xalanīꞌn nac Galacia? Jātzaꞌ kexpaꞌtniꞌyāꞌtit tū ixlīcānaꞌ. Huiꞌxinaꞌn ixlīcānaꞌ icticāhuanin chī Jesucristo xtokohuaꞌcaꞌca nac cruz.
\v 2 Caquilāhuaniuj huāꞌmāꞌ: ¿Chī līmaktīniꞌntit Espíritu Santo? Jā cātamaxquīꞌn ixpālacata kexpaꞌtniꞌtit huāꞌmāꞌ līmāpaꞌksīn tū Dios cāmaxquīꞌlh israelitas. Cātamaxquīꞌn Espíritu Santo ixpālacata kexpaꞌttit xatze tachihuīn ixlaꞌ Jesucristo.
\v 3 ¿Tū ixpālacata huiꞌxinaꞌn jā aꞌcxtuncuhuīꞌ caꞌtzīyāꞌtit? Huiꞌxinaꞌn tzucutit līstālaniꞌyāꞌtit na ixtej Dios ixlītliꞌhuiꞌqui Espíritu Santo. ¿Chī līpuhuaꞌnāꞌtit jātzaꞌ maclacasquiꞌnāꞌtit ixlītliꞌhuiꞌqui Espíritu Santo? ¿Chī līpuhuaꞌnāꞌtit minaꞌcstucaꞌn tzē namākentaxtūyāꞌtit tū lacasquiꞌn Dios?
\v 4 Chuhuaꞌj tasuꞌyu jā tū cālīmacuaniꞌyān tū līpātīniꞌnīꞌtaꞌntit. Jā chuntzaꞌ icpuhuan quit.
\v 5 Dios cāmaxquīꞌyān Espíritu Santo ē Dios tlahua līꞌaꞌcnīn na milacatīncaꞌn. ¿Chī ixpālacata tlahua chuntzaꞌ? Jā tlahua ixpālacata kexpatniꞌtit līmāpaꞌksīn. Tlahua chuntzaꞌ ixpālacata huiꞌxinaꞌn kexpatnīꞌtaꞌntit ē aꞌkaꞌīꞌnīꞌtaꞌntit palh ixlīcānaꞌ xatze tachihuīn.
\p
\v 6 Ixtachihuīn Dios huan: “Abraham ixlīpāhuan Dios. Ūꞌtzaꞌ Dios līlaktzīꞌlh tze Abraham.”
\v 7 Ixlacasquiꞌnca huiꞌxinaꞌn nacaꞌtzīyāꞌtit tī ixlīcānaꞌ īꞌxūꞌnātāꞌnatnaꞌ Abraham, ūꞌtunuꞌn tī ixlīcānaꞌ talīpāhuan Dios.
\v 8 Chuntzaꞌ tatzoꞌkniꞌ na ixtachihuīn Dios tū Dios natlahua. Tatzoꞌkniꞌ chī Dios nacāmāpānūniꞌ ixcuentacaꞌn xlacaꞌn tī natalīpāhuan Dios masqui xlacaꞌn jā israelitas. Hasta xapūla Dios mācaꞌtzīnīlh Abraham chī nacālīsicuaꞌlanātlahuacan tachiꞌxcuhuīꞌt. Huanilh: “Mimpālacata huiꞌx ixlīpōꞌktucaꞌn tachiꞌxcuhuīꞌt xalanīꞌn nac cāꞌquilhtamacuj nacāsicuaꞌlanātlahuacan.”
\v 9 Ūꞌtzaꞌ cālīsicuaꞌlanātlahuacan xlacaꞌn tī talīpāhuan Dios chuntzaꞌ chī Abraham. Xlaꞌ ixlīpāhuan Dios ē sicuaꞌlanātlahuaca.
\p
\v 10 Āꞌmakapitzīn tamākentaxtūcuꞌtun līmāpaꞌksīn ixpālacata tapuhuan chuntzaꞌ Dios nacāmāpānūniꞌ ixcuentacaꞌn. Xlacaꞌn nacāmakapātīnīncan. Chuntzaꞌ tatzoꞌkniꞌ na ixtachihuīn Dios: “Ixlīpōꞌktucaꞌn tī jā tamākentaxtū pōꞌktu quilhtamacuj ixlīpōꞌktu tū huīꞌlh nac caꞌpsnap jā tatzoꞌkniꞌ līmāpaꞌksīn, xlacaꞌn nacāmakapātīnīncan.”
\v 11 Chuntzaꞌ līkexmatcan Dios jā catimāpānūniꞌlh ixcuenta jā tī chāꞌtin tī xmān mākentaxtūcuꞌtun līmāpaꞌksīn. Tatzoꞌkniꞌ na ixtachihuīn Dios: “Ixlīpōꞌktucaꞌn tī Dios cāmāpānūniꞌ ixcuentacaꞌn ixpālacata chī talīpāhuan Dios, xlacaꞌn pōꞌktu quilhtamacuj natakaꞌlhī xasāstiꞌ ixlatamatcaꞌn.”
\v 12 Huāꞌmāꞌ līmāpaꞌksīn tū Dios cāmaxquīꞌlh israelitas, makapitzīn tamākentaxtūcuꞌtun. Tī talīpāhuan līmāpaꞌksīn, xlacaꞌn jā talīpāhuan Cristo. Tī talīpāhuancuꞌtun huāꞌmāꞌ līmāpaꞌksīn, palh takaꞌlhīcuꞌtun ixlatamatcaꞌn tū jā catilaksputli, ixlacasquiꞌnca natamākentaxtū ixlīpōꞌktu huāꞌmāꞌ līmāpaꞌksīn.
\p
\v 13 Dios nacāmakapātīnīn ixlīpōꞌktucaꞌn tī jā natamākentaxtū ixlīpōꞌktu tū huan nac līmāpaꞌksīn. Quinaꞌn ixlaclēꞌnāuj ixpālacata quinaꞌn jā mākentaxtūyāuj līmāpaꞌksīn. Cristo quincāmakapūtaxtūn huāꞌmāꞌ tapātīn ixpālacata xlaꞌ xokokōꞌlh tū quinaꞌn ixlaclēꞌnāuj. Chuntzaꞌ tatzoꞌkniꞌ na ixtachihuīn Dios: “Ixlīpōꞌktucaꞌn tī cāxtokohuaꞌcaꞌcanīꞌt nac cruz aꞌntzaꞌ taxokoniꞌmāꞌnalh Dios.”
\v 14 Cristo xokokōꞌlh nac cruz. Chuntzaꞌ nā xlacaꞌn tī jā israelitas nā xlacaꞌn tzē nacāsicuaꞌlanātlahuacan chu chuntzaꞌ chī Dios sicuaꞌlanātlahualh Abraham chuntzaꞌ chī Dios ixuaninīꞌt Abraham xapūla. Nā chuntzaꞌ Cristo tlahualh huāꞌmāꞌ ē chuntzaꞌ quilīpōꞌktucaꞌn, ixpālacata līpāhuanāuj xlaꞌ, tzē namaktīniꞌnāuj Espíritu Santo chuntzaꞌ chī Dios huanli namāstāꞌ.
\s Līmāpaꞌksīn jāla lactlahua talacāxtlahuan tū Dios huiꞌlīlh xapūla
\p
\v 15 Tāꞌtimīn, naꞌiccāhuaniyān tū huaꞌchi lītalaclhsaja. Aꞌcxniꞌ quinaꞌn tlahuayāuj aꞌktin contrato o aꞌktin talacāxtlahuan ē firmarlīyāuj, chuntzaꞌ jā tī chāꞌtin catilactlahualh ē jā tī chāꞌtin tzē natzoꞌkpala āꞌaꞌktin tachihuīn.
\v 16 Nā chuntzaꞌ huāꞌmāꞌ talacāxtlahuan tū tlahualh Dios aꞌcxniꞌ huanilh Abraham nasicuaꞌlanātlahua xlaꞌ ē chāꞌtin īꞌxūꞌnātāꞌnat. Ixtachihuīn Dios jā huan: “īꞌxūꞌnātāꞌnatnaꞌ.” Tū huan: “chāꞌtin īꞌxūꞌnātāꞌnat.” Ūꞌtzaꞌ huanicuꞌtun Cristo.
\v 17 Tū iccāhuaniyān ūꞌtzaꞌ huāꞌmāꞌ: Dios huanilh Abraham ixlīpōꞌktucaꞌn tī natalīpāhuan Dios, xlacaꞌn nataꞌaꞌkapūtaxtu. Ūꞌtzaꞌ huaꞌchi talacāxtlahuan tū Dios tāꞌtlahualh Abraham. Ixlīꞌaꞌktāꞌtiꞌ ciento āꞌpuxamacāuj cāꞌta Dios maxquīꞌlh līmāpaꞌksīn Moisés. Chuntzaꞌ līmāpaꞌksīn jāla catilactlahualh talacāxtlahuan tū Dios tāꞌtlahualh Abraham.
\v 18 Palh Dios ixquincāsicuaꞌlanātlahuan xmān ixpālacata kexmatniꞌyāuj huāꞌmāꞌ līmāpaꞌksīn tū maxquīꞌca āꞌlīstān, chuntzaꞌ ixlaclalh talacāxtlahuan tū Dios tāꞌtlahualh Abraham. Dios sicuaꞌlanātlahuanīꞌt Abraham xmān ixpālacata Abraham ixlīpāhuan Dios.
\p
\v 19 ¿Tū lītalacasquiꞌn līmāpaꞌksīn tū maxquīꞌca Moisés? Āꞌlīstān huiꞌlīca huāꞌmāꞌ līmāpaꞌksīn ē ūꞌtzaꞌ līcaꞌtzīyāuj quinaꞌn lēꞌnāuj cuenta. Huāꞌmāꞌ līmāpaꞌksīn ixmaclacasquiꞌncan xmān hasta aꞌcxniꞌ milh Jesucristo tī īꞌxūꞌnātāꞌnat Abraham. Tzamāꞌ īꞌxūꞌnātāꞌnat Abraham, ūꞌtzaꞌ tī Dios ixlīchihuīnaꞌnīꞌt xapūla aꞌcxniꞌ tāꞌtlahualh talacāxtlahuan Abraham. Ángeles cāmāpaꞌksīca natamastāꞌ līmāpaꞌksīn. Ē maxquīꞌca Moisés. Moisés cāmaxquīꞌlh tachiꞌxcuhuīꞌt israelitas.
\v 20 Dios jā ixmaclacasquiꞌn tī namaktāya aꞌcxniꞌ tāꞌcāxtlahualh Abraham aꞌktin talacāxtlahuan. Ūꞌtzaꞌ cāxtlahualh.
\s Līmāpaꞌksīn jāla cāmaxquīꞌ xasāstiꞌ ixlatamatcaꞌn tachiꞌxcuhuīꞌt
\p
\v 21 Quit jā icchihuīnaꞌmāꞌlh palh līmāpaꞌksīn tāꞌlālīhuani tū Dios mālacnū ixpālacata talacāxtlahuan. Palh ixmāstāꞌca cahuālh aꞌktin līmāpaꞌksīn tū tzē ixmāstāꞌlh xasāstiꞌ quilatamatcaꞌn, chuntzaꞌ tzē ixquincāmāpānūniꞌn quincuentacaꞌn xmān ixpālacata huāꞌmāꞌ līmāpaꞌksīn.
\v 22 Ixtachihuīn Dios huan ixlīpōꞌktucaꞌn tachiꞌxcuhuīꞌt talēꞌn cuenta. Ixpālacata huāꞌmāꞌ līmāpaꞌksīn, tasuꞌyu palh ixlīpōꞌktucaꞌn talēꞌn cuenta ē ixlīpōꞌktucaꞌn huaꞌchi tachīꞌnīꞌn tī jāla talaktaxtu. Chuntzaꞌ tī talīpāhuan Jesucristo, xmān xlacaꞌn nataꞌaꞌkapūtaxtu.
\p
\v 23 Aꞌcxniꞌ jānaꞌj ixāꞌmin Jesucristo, quinaꞌn huaꞌchi tachīꞌnīꞌn ixuanīꞌtauj ixpālacata quinaꞌn jāla mākentaxtūyāuj tū huan līmāpaꞌksīn. Huaꞌchi tachīꞌnīꞌn ixuanīꞌtauj ē jāla ixlaktaxtuyāuj hasta aꞌcxniꞌ quincātamācaꞌtzīnīn chī naꞌaꞌkaꞌīꞌyāuj Jesucristo tī tzē makapūtaxtūnuꞌn.
\v 24 Huāꞌmāꞌ līmāpaꞌksīn xlaꞌ huaꞌchi chāꞌtin tī pūla. Ixquincāmāsuꞌyuniꞌyān ixtej Dios hasta aꞌcxniꞌ milh Jesucristo ē caꞌtzīuj chī nalīpāhuanāuj xlaꞌ ē chuntzaꞌ tzē naquincāmāpānūniꞌyān quincuentacaꞌn.
\v 25 Chuhuaꞌj chilhtzaꞌ quilhtamacuj ē līpāhuanāuj Cristo. Chuhuaꞌj jātzaꞌ maclacasquiꞌnāuj līmāpaꞌksīn.
\p
\v 26 Huiꞌxinaꞌn aꞌkaꞌīꞌnīꞌtaꞌntit Jesucristo makapūtaxtūnuꞌn ē ūꞌtzaꞌ ixlacstīn Dios līhuaꞌntit.
\v 27 Milīpōꞌktucaꞌn huiꞌxinaꞌn tī aꞌkpaxnīꞌtaꞌntit ūꞌtzaꞌ lītasuꞌyu palh aꞌkaꞌīꞌniꞌnīꞌtaꞌntit Cristo ē chu chāꞌtin lītaxtutit chī Cristo.
\v 28 Palh huiꞌxinaꞌn tāꞌtalacxtimīꞌtit Cristo, chuntzaꞌ milīpōꞌktucaꞌn huiꞌxinaꞌn xmān chu chāꞌtin lītaxtutit. Kēxtimtzaꞌ talalh israelitas ē tī jā israelitas; kēxtimtzaꞌ tī huaꞌchi xatastāꞌmaka ē tī jā xatastāꞌmaka; kēxtimtzaꞌ talalh chiꞌxcuhuīꞌn ē puscan.
\v 29 Palh huiꞌxinaꞌn tapaꞌksīniꞌyāꞌtit Cristo, huiꞌxinaꞌn huaꞌchi īꞌxūꞌnātāꞌnatnaꞌ Abraham. Chuntzaꞌ nā namaktīniꞌnāꞌtit tū Dios mālacnūniꞌnīꞌt Abraham.
\c 4
\p
\v 1 Chuhuaꞌj naꞌiccāhuaniyān tū huaꞌchi lītalaclhsaja. Chāꞌtin kaꞌhuaꞌcha aꞌcxniꞌ jānaꞌj maktīniꞌn ixherencia, xlaꞌ jālanaꞌj māpaꞌksīniꞌn. Chuntzaꞌ xlaꞌ huaꞌchicus chāꞌtin tasācuaꞌ, masqui ūꞌtzaꞌ ixtēcuꞌ nahuan.
\v 2 Aꞌcxniꞌ macstiꞌnaꞌjcus tzamāꞌ kaꞌhuaꞌcha, āꞌmakapitzīn tamaktakaꞌlha, ē cāmacamaxquīꞌcan ixlīpōꞌktu tū ixlaꞌ nahuan hasta aꞌcxniꞌ huāꞌmāꞌ quilhtamacuj tū līlhcānaꞌnīꞌt ixtātaꞌ.
\v 3 Nā chuntzaꞌ quinaꞌn. Xapūla quinaꞌn jānaꞌj tzej ixcaꞌtzīyāuj tū ixlaꞌ Dios; huaꞌchi lacstīn ixuanīꞌtaꞌuj. Xapūla kexmatniꞌuj ixtahuiꞌlatcaꞌn ē ixtamāsuꞌyuncaꞌn tachiꞌxcuhuīꞌt.
\v 4 Aꞌcxniꞌ chilh tzamāꞌ quilhtamacuj tū ixlīlacsacnīꞌt Dios macamilh īꞌSkaꞌtaꞌ. Xlaꞌ mālacatuncuhuīꞌnīlh chāꞌtin puscāt. Ē īꞌSkaꞌtaꞌ Dios īꞌstālaniꞌ ixtahuiꞌlatcaꞌn israelitas.
\v 5 Chuntzaꞌ xlaꞌ milh naquincāmakapūtaxtūyān ixpālacata ixuiꞌlānaꞌuj ixtampīn nac līmāpaꞌksīn. Ūꞌtzaꞌ līmilh īꞌSkaꞌtaꞌ Dios ē chuntzaꞌ quinaꞌn tzē ixlacstīn Dios nahuanāuj.
\p
\v 6 Dios macamilh Espíritu Santo na quilīstacnaꞌcaꞌn. Chuntzaꞌ tzē nahuaniyāuj Dios: “¡QuinTātaꞌcaꞌn!” Ē chuntzaꞌ lītasuꞌyu quinaꞌn ixlacstīn Dios.
\v 7 Chuhuaꞌj quinaꞌn jātzaꞌ huaꞌchi tasācuaꞌ. Quinaꞌn ixlacstīn Dios. Chuhuaꞌj quinaꞌn ixlacstīn Dios ē naquincāmaxquīꞌyān quiherenciacaꞌn ixpālacata Cristo.
\s Pablo cālīꞌaꞌkatuyunli tī ixtaꞌaꞌkaꞌīꞌnīꞌt
\p
\v 8 Xapūla aꞌcxniꞌ jānaꞌj ixlakapasāꞌtit Dios, huiꞌxinaꞌn ixuiꞌlāꞌnaꞌntit na ixlīmāpaꞌksīn tī jā diosnuꞌ.
\v 9 Chuhuaꞌj huiꞌxinaꞌn lakapasāꞌtittzaꞌ Dios, ē Dios nā cālakapasāntzaꞌ. Huiꞌxinaꞌn lakapasāꞌtit Dios, ē ¿chī lītlahuaꞌcuꞌtumpalaꞌyāꞌtit mintahuiꞌlatcaꞌn? Mintahuiꞌlatcaꞌn jāla caticāmaktāyan ē jā tū ixlīmacua. ¿Ē chī nalīstālaniꞌpalaꞌyāꞌtit?
\v 10 Huiꞌxinaꞌn maclacapiniꞌyāꞌtit makapitzīn quilhtamacuj ē mālhcuyuꞌ ē cāꞌta. Ē nā tlahuaꞌyāꞌtit āꞌmakapitzīn cāꞌtaniꞌ.
\v 11 Quit icjicuaꞌn palhāsāꞌ chu tlakaj icscujli na mimpuꞌnancaꞌn.
\p
\v 12 Tāꞌtimīn, iccāsquiꞌniꞌyān calītaxtutit chuntzaꞌ chī quit. Masqui quit chāꞌtin israelita, jātzaꞌ icstālaniꞌ ixtahuiꞌlatcaꞌn israelitas. Huiꞌxinaꞌn tī jā israelitas jā ixlacasquiꞌnca nalītzucuyāꞌtit tlahuaꞌyāꞌtit ixtahuiꞌlatcaꞌn israelitas. Huiꞌxinaꞌn jā tū quilātlahuaniꞌnīꞌtauj tū jā tze.
\v 13 Huiꞌxinaꞌn caꞌtzīyāꞌtit xaꞌiclītaꞌjatatlamāꞌlh ē ūꞌtzaꞌ iccālīmāsuꞌyuniꞌn xapūla xatze tachihuīn ixlaꞌ Jesucristo.
\v 14 Huiꞌxinaꞌn jā quilālakmakaꞌuj ē masqui jā līlaktzīꞌncuꞌtu xaꞌicuanīꞌt ixpālacata xaꞌictaꞌjatatla. Quilālīmaktīniꞌuj huaꞌchi chāꞌtin ángel tī Dios macamilh ē huaꞌchi chī Jesucristo.
\v 15 ¿Ē jā lacapāstacāꞌtit huiꞌxinaꞌn chī ixpāxuhuaꞌyāꞌtit aꞌcxniꞌ xaꞌiccātāꞌhuiꞌlachāꞌn? ¿Chī cāꞌaꞌkspulanīꞌtaꞌn huiꞌxinaꞌn? Quit icuan palh tzē cahuālh huiꞌxinaꞌn ixmāxtutit milakastapuncaꞌn ē ixquilāmaxquīꞌuj.
\v 16 Chuhuaꞌj huiꞌxinaꞌn quilālaktzīꞌnāuj huaꞌchi mintāꞌlāquiclhlaktziꞌcaꞌn ixpālacata quit iccāhuaniyān tū ixlīcānaꞌ. ¿Tū ixpālacata quilālaktzīꞌnāuj chuntzaꞌ?
\p
\v 17 Tzamāꞌ chiꞌxcuhuīꞌn tī cātlahuacuꞌtunān ixamigocaꞌn, tasuꞌyu palh xlacaꞌn cātamaktāyacuꞌtunān. Jā ixlīcānaꞌ. Xlacaꞌn xmān cātamāxtumlīcuꞌtunān. Chuntzaꞌ huiꞌxinaꞌn xmān ūꞌtunuꞌn nacālakachiꞌxcuhuīꞌyāꞌtit.
\v 18 Tze palh āꞌmakapitzīn cātlahuacuꞌtunān ixamigocaꞌn huiꞌxinaꞌn aꞌcxniꞌ iccātāꞌhuiꞌlan ē aꞌcxniꞌ jā icuiꞌlachaꞌ. Xmān ixlīcānaꞌ cacātamaktāyan.
\v 19 Quilacstīn, cāꞌtzīyāuj chī chāꞌtin puscāt pātīniꞌn aꞌcxniꞌ tahuiꞌla īꞌskaꞌtaꞌ. Nā chuntzaꞌ icpātīniꞌmāꞌlh hasta jā natasuꞌyu huiꞌxinaꞌn nalatahuiꞌlayāꞌtit chī tī takexmatniꞌ Cristo.
\v 20 Tze cahuālh palh xaꞌiccātāꞌtahuiꞌlachaꞌn huiꞌxinaꞌn, ē xtum xaꞌiccātāꞌchihuīnaꞌn. Quit iccālītamakchuyīmāꞌn huiꞌxinaꞌn.
\s Pablo līchihuīnaꞌnli Agar ē Sara
\p
\v 21 Huiꞌxinaꞌn mākentaxtūcuꞌtunāꞌtit līmāpaꞌksīn tū Dios maxquīꞌlh Moisés. Chuhuaꞌj caquilāhuaniuj huāꞌmāꞌ: ¿Chī jā līkexmatāꞌtit tū huan ixtachihuīn Dios jā tatzoꞌkniꞌ līmāpaꞌksīn?
\v 22 Ixtachihuīn Dios huan Abraham ixcākaꞌlhī chāꞌtuꞌ ixcamanaꞌ. Chāꞌtin kaꞌhuaꞌcha Agar ixuanican ixtzīꞌ. Tzamāꞌ puscāt xatastāꞌmaka ixuanīꞌt. Āꞌchāꞌtin kaꞌhuaꞌcha huampala jā xatastāꞌmaka ixtzīꞌ ixuanīꞌt.
\v 23 Īꞌskaꞌtaꞌ Agar lacatuncuhuīꞌlh chu huaꞌchi chī talacatuncuhuīꞌ āꞌmakapitzīn lacstīn. Jā chuntzaꞌ āꞌchāꞌtin. Aꞌcxniꞌ lacatuncuhuīꞌlh īꞌskaꞌtaꞌ huāꞌmāꞌ puscāt tī jā xatastāꞌmaka īxuanīꞌt, chuntzaꞌ Dios līmākentaxtūlh tū ixuanīꞌt. Ūꞌtzaꞌ tū Dios ixmālacnūnīꞌt.
\v 24 Huāꞌmāꞌ huaꞌchi aꞌktin līlaktzīꞌntēn. Huāꞌmāꞌ chāꞌtuꞌ puscan xlacaꞌn huaꞌchi aꞌktuꞌ talacāxtlahuan ixtahuanīꞌt. Huāꞌmāꞌ xatastāꞌmaka tī ixtacuhuīniꞌ Agar, xlaꞌ ūꞌtzaꞌ huaꞌchi aꞌktin talacāxtlahuan tū cāxtlahuaca nac sipej tū huanican Sinaí. Aꞌntzaꞌ nac Sinaí maxquīꞌca Moisés huāꞌmāꞌ līmāpaꞌksīn. Tī talīpāhuan līmāpaꞌksīn, xlacaꞌn huaꞌchi ixlacstīn Agar, ixpālacata xlacaꞌn jā ixaꞌcstucaꞌn tatapaꞌksī.
\v 25 Agar lītaxtu Sinaí tū huīꞌlh nac Arabia. Nā Agar huaꞌchi Jerusalén. Xlacaꞌn tī tatapaꞌksī nac Jerusalén, nā xlacaꞌn talīpāhuan līmāpaꞌksīn. Nā xlacaꞌn jā ixtalaktaxtunīꞌt.
\v 26 Jā chuntzaꞌ tzamāꞌ Jerusalén xalaꞌ nac aꞌkapūn. Quinaꞌn tapaꞌksīyāuj nac tzamāꞌ Jerusalén. Ē quinaꞌn līlaktaxtunīꞌtauj.
\v 27 Ixtachihuīn Dios huan:
\q Capāxuhualh huāꞌmāꞌ puscāt tī jānaꞌj kaꞌlhī īꞌskaꞌtaꞌ.
\q Calītaꞌsalh cāꞌtapāxuhuān tī jānaꞌj mālacatuncuhuīꞌnī chāꞌtin skaꞌtaꞌ.
\q Capāxuhualh ixpālacata xlaꞌ.
\q Masqui makxtekca, āꞌchulāꞌ nacākaꞌlhī ixlacstīn ē jā ūꞌtzaꞌ tī kaꞌlhī ixkōluꞌ.
\p
\v 28 Dios mākentaxtūlh tū ixuanīꞌt. Ūꞌtzaꞌ līlacatuncuhuīꞌlh Isaac. Nā quinaꞌn, tāꞌtimīn, lītaxtūj ixlacstīn Dios, ixpālacata Dios mākentaxtūlh tū huanli.
\v 29 Tzamāꞌ quilhtamacuj, kaꞌhuaꞌcha tī lacatuncuhuīꞌlh chuntzaꞌ chī āꞌmakapitzīn, xlaꞌ ixlakapala skaꞌtaꞌ tī lacatuncuhuīꞌlh ixpālacata Espíritu Santo. Chuntzaꞌ aꞌkspulamāꞌlh chuhuaꞌj. Quincātalakapalayān quinaꞌn tī līkaꞌlhīyāuj xasāstiꞌ quilatamatcaꞌn ixlīmāpaꞌksīn Espíritu Santo.
\v 30 Caꞌtzīyāuj tū huan ixtachihuīn Dios: “Catlakamaꞌcapi tzamāꞌ puscāt tī xatastāꞌmaka ē nā ixkaꞌhuaꞌcha. Ixkaꞌhuaꞌcha xatastāꞌmaka jāla catitāꞌtapitzilh herencia tī jā xatastāꞌmaka. Xmān ixkaꞌhuaꞌcha huāꞌmāꞌ puscāt tī jā xatastāꞌmaka, ūꞌtzaꞌ namaktīniꞌn herencia.”
\v 31 Chuntzaꞌ tāꞌtimīn, quinaꞌn jā huaꞌchi ixlacstīn huāꞌmāꞌ puscāt xatastāꞌmaka. Quinaꞌn huaꞌchi ixlacstīn puscāt tī jā xatastāꞌmaka.
\c 5
\s Tī talīpāhuan Cristo jātzaꞌ talīpāhuan līmāpaꞌksīn
\p
\v 1 Chuhuaꞌj quinaꞌn xalactaxtunīꞌn ixpālacata tū tlahualh Cristo. Chuntzaꞌ jā catixlajuanaꞌntit. Jātzaꞌ xatastāꞌmaka tilapalaꞌyāꞌtit.
\p
\v 2 Cuenta catlahuaꞌtit tū iccāhuaniyān quit, Pablo. Palh huiꞌxinaꞌn natamakxtekāꞌtit nacātachuꞌcuyān ē ūꞌtzaꞌ nalīpāhuanāꞌtit, chuntzaꞌ huaꞌchi jā tū līmacuan tū tlahualh Cristo.
\v 3 Iccāhuanipalayān: Catīxcuhuālh tī lacasquiꞌn nachuꞌcucan, xlaꞌ ūꞌtzaꞌ līcuesa namākentaxtūkōꞌ ixlīpōꞌktu tū huan ixlīmāpaꞌksīn Dios.
\v 4 Makapitzīn chī huiꞌxinaꞌn tlahuacuꞌtunāꞌtit tū huan huāꞌmāꞌ līmāpaꞌksīn, ixpālacata puhuaꞌnāꞌtit chuntzaꞌ nacāmāpānūniꞌyān mincuentacaꞌn. Palh chuntzaꞌ tlahuaꞌyāꞌtit, taxtumlīniꞌnīꞌtaꞌntit Cristo ē makxteknīꞌtaꞌntit ixtalakalhuꞌmān Dios.
\v 5 Espíritu Santo quincāmācaꞌtzīnīn chī Dios quincāmāpānūniꞌnīꞌtaꞌn quincuentacaꞌn, ixpālacata līpāhuanāuj Jesucristo.
\v 6 Palh tapaꞌksīniꞌyāuj Jesucristo, jā tū līmacuan palh naquincātachuꞌcuyān o palh jā naquincātachuꞌcuyān. Tū ixlacasquiꞌnca nalīpāhuanāuj Jesucristo. Ē ūꞌtzaꞌ nalālīpāxquīꞌyāuj.
\p
\v 7 Huiꞌxinaꞌn tzej ixtlāꞌhuaꞌmpāꞌnaꞌntit na ixtej Dios. Iccālīꞌaꞌcnīyān huiꞌxinaꞌn chī tamakxtektit cātamāmakchuyīn. Jātzaꞌ tzej kexpaꞌtniꞌyāꞌtit xatze tachihuīn tū ixlīcānaꞌ.
\v 8 Huāꞌmāꞌ tū xlacaꞌn cātamāsuꞌyuniꞌn, jā ixlaꞌ Dios. Dios ūꞌtzaꞌ tī cālacsacnīꞌtaꞌn.
\v 9 Xlacaꞌn tī cātamāmakchuyīmāꞌn, xlacaꞌn huaꞌchi levadura. Caꞌtzīyāuj macstiꞌnaꞌj levadura māxcuꞌtūkōꞌ ixlīpōꞌktu tasquit.
\v 10 Quinaꞌn lacxtim aꞌkaꞌīꞌyāuj Māpaꞌksīniꞌ Jesucristo. Ūꞌtzaꞌ quit iclīcaꞌtzī huiꞌxinaꞌn āꞌchulāꞌ nalacapāstacāꞌtit chuntzaꞌ chī iclacapāstaca quit. Tī cātamāmakchuyīmāꞌn, xlacaꞌn nataxokoniꞌ Dios, ē catīxcuxtīhuālh.
\p
\v 11 Quit, tāꞌtimīn, palh cahuālh xaꞌiccāmāsuꞌyuniꞌn ixlacasquiꞌnca nachuꞌcucan, chuntzaꞌ jā ixquimputzastālaniꞌca. Xlacaꞌn tasītzīꞌ ixpālacata quit icmāsuꞌyu xmān Cristo nīlh nac cruz ē chuntzaꞌ xokolh quincuentacaꞌn.
\v 12 Tī cātamāmakchuyītlāꞌhuanān huiꞌxinaꞌn ixpālacata lāchuꞌcucan, quit iclacasquiꞌn xlacaꞌn cacātatapānūniꞌkōꞌn.
\p
\v 13 Dios cālacsacniꞌ huiꞌxinaꞌn, tāꞌtimīn, ē chuntzaꞌ līlactaxtutit huiꞌxinaꞌn. Masqui xalactaxtunīꞌn huiꞌxinaꞌn, jā tze palh natlahuaꞌyāꞌtit tū jā tze mintalacapāstacniꞌcaꞌn. Xatze calāpāxquīꞌtit ē chuntzaꞌ tzē nalāmaktāyaꞌyāꞌtit.
\v 14 Aꞌnan aꞌktin līmāpaꞌksīn tū huan: “Nacāpāxquīꞌyaꞌ āꞌmakapitzīn chuntzaꞌ chī pāxquīꞌcaꞌnaꞌ minaꞌcstu.” Tī takexmatniꞌ huāꞌmāꞌ līmāpaꞌksīn, chuntzaꞌ tamākentaxtū ixlīpōꞌktu tū tatzoꞌkniꞌ nac līmāpaꞌksīn.
\v 15 Palh huiꞌxinaꞌn lālacatāquīꞌyāꞌtit ē lālīstaꞌlaniꞌyāꞌtit, cuenta catlahuaꞌtit jā nalāmālaksputūyāꞌtit huiꞌxinaꞌn.
\s Espíritu Santo quincāmāsuꞌyuniꞌyān chī nalatāꞌkchokoyāuj
\p
\v 16 Tū iccāhuanimāꞌn ūꞌtzaꞌ huāꞌmāꞌ: Ē calatāꞌkchokotit chuntzaꞌ chī Espíritu Santo cāmāsuꞌyuniꞌyān. Chuntzaꞌ jātzaꞌ catitlahuaꞌtit mintalacapāstacniꞌcaꞌn tū jā tze.
\v 17 Tū jā tze quintalacapāstacniꞌcaꞌn ūꞌtzaꞌ ixtāꞌlāquiclhlaktziꞌ Espíritu Santo. Ē Espíritu Santo nā ixtāꞌlāquiclhlaktziꞌ tū jā tze. Chī aꞌktuꞌ tāꞌlāquiclhlaktzīꞌn. Ē ūꞌtzaꞌ jāla lītlahuaꞌyāꞌtit tū lacasquiꞌnāꞌtit.
\v 18 Palh huiꞌxinaꞌn nakexpaꞌtniꞌyāꞌtit Espíritu Santo, jātzaꞌ caticāmāpaꞌksīn tū xapūla līmāpaꞌksīn.
\p
\v 19 Caꞌtzīyāuj chī jā tze tū tatlahua tachiꞌxcuhuīꞌt tī jā takexmatniꞌ Dios. Xlacaꞌn taputza ixtāꞌlāpāxquīꞌncaꞌn. Pōꞌktu jā tze ixtalacapāstacniꞌcaꞌn. Xlacaꞌn jā aꞌcxtuncuhuīꞌ tacaꞌtzī.
\v 20 Xlacaꞌn talaktaquilhpūta ídolos ē taxantilhlīniꞌn. Xlacaꞌn talāquiclhlaktzīꞌn ē talālīsītzīꞌniꞌ ē talālakcaꞌtzaniꞌ. Palaj tunca tasītzīꞌ. Xmān ixaꞌcstucaꞌn cālīpāhuancan. Ē ixaꞌcstucaꞌn talāmāxtumlī.
\v 21 Xalīlactampiꞌlhīn. Tamaknīniꞌn, ē takaꞌchī, ē talīlakastānaꞌn tū jā tze. Āꞌchulāꞌ catūhuālh tatlahuapala. Chī xaꞌiccāhuaniyān xapūla, chuntzaꞌ iccāhuanipalayān: tī chuntzaꞌ tatlahua jāla catitatanūlh jā Dios māpaꞌksīniꞌn.
\p
\v 22 Jā chuntzaꞌ ixlīlatcaꞌn tī takexmatniꞌ Espíritu Santo. Espíritu Santo cāmaktāya. Chuntzaꞌ xlacaꞌn tapāxquīꞌ āꞌmakapitzīn ē takaꞌlhī tapāxuhuān. Caꞌcs tahuiꞌlānaꞌlh. Talīpātī āꞌmakapitzīn. Tze tacaꞌtzī. Jā lactampiꞌlhīniꞌn. Tamākentaxtū tū tahuan.
\v 23 Xlacaꞌn jā kaꞌtlaꞌ tamakcaꞌtzī. Tzē aꞌcstu tatapaꞌksī. Jā tū aꞌktin līmāpaꞌksīn tū nahuan jā catitlahuaca chuntzaꞌ.
\v 24 Tī tatapaꞌksīniꞌ Cristo, xlacaꞌn jātzaꞌ tatamakxteka nacāmāpaꞌksī ixtalacapāstacniꞌcaꞌn tū jā xatze. Huaꞌchi tamaknīlh ixtalacapāstacniꞌcaꞌn tū jā tze, chuntzaꞌ chī xtokohuaꞌcaꞌcan chāꞌtin nac cruz.
\v 25 Espíritu Santo quincāmaxquīꞌn xasāstiꞌ quilatamatcaꞌn. Ūꞌtzaꞌ ixlacasquiꞌnca nakexmatniꞌyāuj ē nalatāꞌkchokoyāuj chuntzaꞌ chī quincāmāsuꞌyuniꞌyān Espíritu Santo.
\p
\v 26 Jā kaꞌtlaꞌ catimakcaꞌtzīuj ē jā caticātāꞌlāhuaniuj ē jā cacālakcaꞌtzanāniꞌuj āꞌmakapitzīn.
\c 6
\s Ixlacasquiꞌnca nalāmaktāyaꞌyāꞌtit
\p
\v 1 Tāꞌtimīn, palh chāꞌtin laktzīꞌncan tlahuamāꞌlh catūhuālh tū jā tze, huiꞌxinaꞌn tī latlāꞌhuaꞌnāꞌtit chuntzaꞌ chī Dios lacasquiꞌn, camaktāyaꞌtit ē chuntzaꞌ nacāxla. Jā kaꞌtlaꞌ tilīmakcaꞌtzīyāꞌtit aꞌcxniꞌ namaktāyaꞌyāꞌtit. Cacuentatlahuaꞌtit huiꞌxinaꞌn jā titamakahuasāꞌtit nā huiꞌxinaꞌn.
\v 2 Calāmaktāyaꞌtit natāyaniꞌyāꞌtit. Chuntzaꞌ namākentaxtūyāꞌtit tū ixlīmāpaꞌksīn Cristo.
\p
\v 3 Palh chāꞌtin lacpuhuan xlaꞌ āꞌchulāꞌ xatze ē jā āꞌmakapitzīn ē palh jā ixlīcānaꞌ, xlaꞌ ixlīmān taꞌaꞌkskāhuīꞌmāꞌlh.
\v 4 Chāꞌtunuꞌ nalacapāstaca palh tzej latlāꞌhuan o jā tzej. Palh ūꞌtzaꞌ uꞌcxcaꞌtzī tzej latlāꞌhuan, xlaꞌ līpāxuhua natahuiꞌla. Jā ixlacasquiꞌnca cuenta natlahua palh xlaꞌ āꞌchulāꞌ xatze o palh āꞌchāꞌtin āꞌchulāꞌ xatze.
\v 5 Chāꞌtunuꞌ natalēꞌn ixtacuꞌcaꞌcaꞌn. Natakelhtīniꞌn ixpālacata chī talīlatlāꞌhuan.
\p
\v 6 Tī cāmāsuꞌyuniꞌcan ixtachihuīn Dios, xlacaꞌn natamaxquīꞌ macstiꞌnaꞌj tī tamāsuꞌyu ixtachihuīn Dios.
\p
\v 7 Huiꞌxinaꞌn jā cataꞌaꞌkskāhuīꞌtit minaꞌcstucaꞌn. Dios, jā tī chāꞌtin catiskāhuīꞌlh. Tū Dios nahuan, ūꞌtzaꞌ nala. Caꞌtzīyāuj tū nachaꞌn chāꞌtin chiꞌxcuꞌ, ūꞌtzaꞌ namakala.
\v 8 Palh chāꞌtin tlahuatlāꞌhuan tū jā tze ixtalacapāstacniꞌ, xlaꞌ ūꞌtzaꞌ namakala līnīn. Palh chāꞌtin tlahua ixtalacasquiꞌnīn Espíritu Santo, xlaꞌ nakaꞌlhī xasāstiꞌ ixlatamat tū jā catilaksputli.
\v 9 Jā catlakuaꞌniꞌuj tlahuayāuj tū xatze. Palh quinaꞌn jā namakxtekāuj natlahuayāuj tū xatze, tzej namakalayāuj aꞌcxniꞌ namin tzamāꞌ quilhtamacuj tū līlacsaccanīꞌt.
\v 10 Ūꞌtzaꞌ nacālītlahuaniꞌyāuj ixlīpōꞌktucaꞌn tachiꞌxcuhuīꞌt tū tze, pōꞌktu quilhtamacuj aꞌcxniꞌ tzē tlahuayāuj. Āꞌchulāꞌ nacātlahuaniꞌyāuj tū tze tāꞌtimīn tī taꞌaꞌkaꞌīꞌniꞌ Dios.
\s Pablo māstāꞌlh talacapāstacniꞌ
\p
\v 11 Calaktzīꞌntit chī ixlīlakaꞌtlaꞌ letras iccātzoꞌknuniꞌmāꞌn. Māniꞌ quimacan iclītzoꞌkmāꞌlh.
\v 12 Xlacaꞌn tī tzej tatasuꞌyucuꞌtun na ixlacatīncaꞌn tachiꞌxcuhuīꞌt, ē ūꞌtunuꞌn tī līcuesa tahuan nacātachuꞌcuyān. Chuntzaꞌ tatlahua ixpālacata jā talacasquiꞌn nacāputzastālaniꞌcan. Jā tapātīniꞌncuꞌtun chī tapātīniꞌn tī taꞌaꞌkaꞌīꞌ palh xmān Cristo tzē makapūtaxtūnuꞌn, ixpālacata xlaꞌ nīlh nac cruz.
\v 13 Ūꞌtunuꞌn tī cāchuꞌcucanīꞌt, xlacaꞌn jā tamākentaxtūkōꞌ ixlīpōꞌktu līmāpaꞌksīn tū Dios maxquīꞌlh Moisés. Xlacaꞌn talacasquiꞌn huiꞌxinaꞌn cacātachuꞌcun. Chuntzaꞌ xlacaꞌn tzē kaꞌtlaꞌ natalīmakcaꞌtzī mimpālacatacaꞌn huiꞌxinaꞌn cātachuꞌcunīꞌtaꞌn.
\v 14 Quit jā kaꞌtlaꞌ iclīmakcaꞌtzīcuꞌtun nūn tū; xmān icmāsuꞌyucuꞌtun chī līnīlh quiMāpaꞌksīniꞌcaꞌn Jesucristo nac cruz. Ictapaꞌksīniꞌ Cristo; quit jātzaꞌ quimāpaꞌksī tū xalaꞌ nac cāꞌquilhtamacuj. Huāꞌmāꞌ cāꞌquilhtamacuj jātzaꞌ quincuenta.
\v 15 Tapaꞌksīniꞌyāuj Cristo Jesús, chuntzaꞌ lacxtim palh chuꞌcucan o palh jā chuꞌcucan. Tū ixlacasquiꞌnca ūꞌtzaꞌ huāꞌmāꞌ: Nakaꞌlhīyāuj xasāstiꞌ quilatamatcaꞌn.
\v 16 Chuhuaꞌj ixlīpōꞌktucaꞌn tī talatlāꞌhuan chuntzaꞌ chī tzamāꞌ talacapāstacniꞌ, ē nā ixlīpōꞌktucaꞌn ixtachiꞌxcuhuīꞌt Dios, cacālakalhuꞌmanli Dios, ē cacāmakapāxuīlh na ixlīstacnaꞌcaꞌn.
\p
\v 17 Chuhuaꞌj jātzaꞌ chāꞌtin caquimāmakchuyīlh. Aꞌntzaꞌ jā ictakāhuīꞌnīꞌt ūꞌtzaꞌ lītasuꞌyu quit ictapaꞌksīniꞌ Māpaꞌksīniꞌ Jesús.
\p
\v 18 Tāꞌtimīn, milīpōꞌktucaꞌn huiꞌxinaꞌn cacāsicuaꞌlanātlahuakōꞌn quiMāpaꞌksīniꞌcaꞌn Jesucristo. Amén.