\id EPH
\h Efesios
\toc1 Efesios
\mt Efesios
\c 1
\s Pablo cāmacāꞌniꞌlh saludos tī ixtaꞌaꞌkaꞌīꞌ
\p
\v 1 Quit, Pablo, ictzoꞌka huāꞌmāꞌ carta. Quit ixapóstol Jesucristo, ixpālacata ūꞌtzaꞌ huāꞌmāꞌ ixtalacasquiꞌnīn Dios. Quit iccātzoꞌknuniꞌmāꞌn huiꞌxinaꞌn tī xalanīꞌn nac Efeso tī tapaꞌksīniꞌyāꞌtit Dios ē aꞌkaꞌīꞌniꞌyāꞌtit Cristo Jesús.
\v 2 Cacātasicuaꞌlanātlahuan Dios quinTātaꞌcaꞌn ē Māpaꞌksīniꞌ Jesucristo. Tzej calatapāꞌtit.
\s Dios quincāsicuaꞌlanātlahuayān ixpālacata Jesucristo
\p
\v 3 Camaxquīꞌuj tapāxcatcaꞌtzīn Dios, ixTātaꞌ quiMāpaꞌksīniꞌcaꞌn Jesucristo. Xlaꞌ quincāsicuaꞌlanātlahuanīꞌtaꞌn. Quincāmaxquīꞌnīꞌtaꞌn kempālhūhuaꞌ tasicuaꞌlanātlahuan tū xalaꞌ nac aꞌkapūn. Quincātlahuaniꞌnīꞌtaꞌn huāꞌmāꞌ ixpālacata tapaꞌksīniꞌyāuj Cristo.
\v 4 Aꞌcxniꞌ jānaꞌj ixtzucu cāꞌquilhtamacuj, Dios ixquincālacsacnīꞌtaꞌn quinaꞌn tī tapaꞌksīniꞌyāuj Cristo. Quincālacsacniꞌ ixpālacata quincātlahuacuꞌtunniꞌ xalactze, ixpālacata xlaꞌ ixlacasquiꞌn jā tū naꞌaꞌnan catūhuālh tū tzē naquincātalīmālacsuꞌyuyān na ixlacatīn Dios.
\v 5 Dios quincāpāxquīꞌyān, ē chuntzaꞌ xapūla puhuanli naquincātlahuayān ixlacstīn ixpālacata Jesucristo. Huāꞌmāꞌ ixtalacasquiꞌnīn.
\v 6 Ūꞌtzaꞌ nalīmākaꞌtlīꞌyāuj Dios ixpālacata xlaꞌ pāxquīꞌnin. Quincātlahuaniꞌnīꞌtaꞌn tzamāꞌ talakalhuꞌmān ixpālacata Jesucristo īꞌSkaꞌtaꞌ, tī Dios pāxquīꞌ.
\v 7 Cristo nīlh ē chuntzaꞌ quincālīmakapūtaxtūn. Nā Dios quincāmātzaꞌnkēnaꞌniꞌntzaꞌ quincuentacaꞌn. Dios quincātlahuaniꞌn huāꞌmāꞌ ixpālacata xlaꞌ lakalhuꞌmanīniꞌn.
\v 8 Dios lakalhuꞌmanīniꞌn, ē chuntzaꞌ xlaꞌ quincāmākexmatīn tū ixlīcānaꞌ ē tzej quincāmālacapāstaquīyān.
\v 9 Xapūla xmān Dios tzēꞌk ixcaꞌtzī tū ixpuhuan naquincātlahuaniꞌyān. Chuhuaꞌj quincāmācaꞌtzīnīnīꞌtaꞌn.
\v 10 Huāꞌmāꞌ tū Dios puhuanli, ūꞌtzaꞌ huāꞌmāꞌ: Aꞌcxniꞌ namin quilhtamacuj tū Dios lhcānīꞌt, xlaꞌ namacamaxquīꞌ Cristo ixlīpōꞌktu tū aꞌnan nac aꞌkapūn ē ixlīpōꞌktu tū aꞌnan nac cāꞌquilhtamacuj. Cristo nacāmāpaꞌksīkōꞌ ixlīpōꞌktu.
\p
\v 11 Dios tlahuakōꞌ ixlīpōꞌktu chuntzaꞌ chī ixtalacasquiꞌnīn. Xlaꞌ quincālacsacniꞌ ixpālacata ixtachiꞌxcuhuīꞌt quincātlahuacuꞌtunniꞌ.
\v 12 Chuntzaꞌ mākaꞌtlīꞌcan Dios quimpālacatacaꞌn quinaꞌn tī xapūla icaꞌkaꞌīꞌniꞌuj Cristo.
\v 13 Nā huiꞌxinaꞌn tī jā israelitas nā aꞌkaꞌīꞌniꞌtit Cristo aꞌcxniꞌ kexpaꞌttit xatze tachihuīn tū ixlīcānaꞌ. Ixpālacata huāꞌmāꞌ xatze tachihuīn, huiꞌxinaꞌn cātalīmakapūtaxtūn. Aꞌcxniꞌ huiꞌxinaꞌn aꞌkaꞌīꞌtit, Dios cāmaxquīꞌn Espíritu Santo, chuntzaꞌ chī ixmālacnūnīꞌt. Huāꞌmāꞌ līmāsuꞌyu Dios chuntzaꞌ nacāmakapūtaxtūkōꞌyān.
\v 14 Kaꞌlhīyāujtzaꞌ Espíritu Santo. Ūꞌtzaꞌ līcaꞌtzīyāuj namaktīniꞌnāuj tū Dios nacāmaxquīꞌ ixtachiꞌxcuhuīꞌt, chuntzaꞌ chī ixuanīꞌt xlaꞌ. Nā ixpālacata Espíritu Santo līcaꞌtzīyāuj ixlīcānaꞌ Dios naquincāmakapūtaxtūkōꞌyān quinaꞌn tī tapaꞌksīniꞌyāuj xlaꞌ. Ūꞌtzaꞌ nalīmākaꞌtlīꞌyāuj Dios.
\s Pablo squiꞌniꞌlh Dios ixpālacatacaꞌn tī ixtaꞌaꞌkaꞌīꞌ
\p
\v 15 Quihuanicanīꞌttzaꞌ chī aꞌkaꞌīꞌniꞌyāꞌtit quiMāpaꞌksīniꞌcaꞌn Jesús ē chī cāpāxquīꞌyāꞌtit ixlīpōꞌktucaꞌn tī tatapaꞌksīniꞌ Dios.
\v 16 Ūꞌtzaꞌ pōꞌktu quilhtamacuj iclīmaxquīꞌ tapāxcatcaꞌtzīn Dios mimpālacatacaꞌn, ē ictlahua oración mimpālacatacaꞌn.
\v 17 Icsquiꞌniꞌ Dios mimpālacatacaꞌn. Xlaꞌ ūꞌtzaꞌ quinTātaꞌcaꞌn ē kaꞌlhī līmāpaꞌksīn. Nā xlaꞌ ixDios quiMāpaꞌksīniꞌcaꞌn Jesucristo. Icsquiꞌniꞌ cacāmaxquīꞌn talacapāstacniꞌ tū ixlaꞌ Dios ē chī āꞌchulāꞌ nalakapasāꞌtit Dios.
\v 18 Nā icsquiꞌniꞌ Dios cacāmaxquīꞌn talacapāstacniꞌ ixpālacata tū kaꞌlhīpāꞌnaꞌntit ē ixpālacata xakaꞌtlaꞌ herencia tū naquincāmaxquīꞌyān quinaꞌn tī tapaꞌksīniꞌyāuj Dios.
\v 19 Nā cacāmākexmatīn huiꞌxinaꞌn palh Dios kaꞌlhī lhūhuaꞌ līmāpaꞌksīn. Chuntzaꞌ tzē naquincātlahuaniꞌyān lhūhuaꞌ quinaꞌn tī līpāhuanāuj Dios.
\v 20 Dios māsuꞌyulh ixlīmāpaꞌksīn aꞌcxniꞌ mālacastālancuanīlh Cristo ē lēꞌlh nac aꞌkapūn ē huiꞌlīlh na ixpekxtūcānaꞌj.
\v 21 Dios maxquīꞌlh lhūhuaꞌ līmāpaꞌksīn Cristo. Cristo cāmāpaꞌksīkōꞌ ixlīpōꞌktucaꞌn māpaꞌksīniꞌnīꞌn ē ixlīpōꞌktucaꞌn āꞌmakapitzīn tī takaꞌlhī līmāpaꞌksīn na ixlīpōꞌktu cāꞌquilhtamacuj ē nac aꞌkapūn. Huāꞌtzāꞌ nac cāꞌquilhtamacuj jā tī tī kaꞌlhī līmāpaꞌksīn chī Cristo. Jā catiꞌaꞌnalh tī nakaꞌlhī līmāpaꞌksīn chī xlaꞌ.
\v 22 Dios maxquīꞌlh ixlīmāpaꞌksīn Jesucristo. Ūꞌtzaꞌ namāpaꞌksīkōꞌ ixlīpōꞌktu tū aꞌnan. Ē nā maxquīꞌlh līmāpaꞌksīn nacāmāpaꞌksī ixlīpōꞌktucaꞌn tī taꞌaꞌkaꞌīꞌ.
\v 23 Tī taꞌaꞌkaꞌīꞌ, xlacaꞌn chī ixmacniꞌ Cristo. Xlaꞌ cātāꞌlahuīꞌlh xlacaꞌn. Xlaꞌ huīꞌlh na ixlīpōꞌktu cāꞌquilhtamacuj ē nac aꞌkapūn.
\c 2
\s Dios quincāmakapūtaxtūyān ixpālacata xlaꞌ pāxquīꞌnin
\p
\v 1 Dios cāmaxquīꞌnīꞌtaꞌn xasāstiꞌ milatamatcaꞌn. Xapūla huiꞌxinaꞌn huaꞌchi nīnīꞌn ixuaꞌnīꞌtaꞌntit, ixpālacata jā ixkexpaꞌtniꞌyāꞌtit Dios ē ixpālacata ixtlahuaꞌyāꞌtit tū jā tze.
\v 2 Xapūla huiꞌxinaꞌn ixlatlāꞌhuaꞌnāꞌtit huaꞌchi xalanīꞌn nac cāꞌquilhtamacuj. Ixkexpaꞌtniꞌyāꞌtit skāhuīꞌniꞌ. Xlaꞌ ūꞌtzaꞌ xapuxcuꞌ xlīpacs līmāpaꞌksīn tū jā tze, ē espíritu tī cāmātlahuī tū jā tze xlacaꞌn tī jā takexmatniꞌcuꞌtun Dios.
\v 3 Nā chuntzaꞌ quinaꞌn xapūla ixtlahuayāuj chī xlacaꞌn tī jā takexmatniꞌcuꞌtun Dios. Ixtlahuayāuj tū jā tze xmān chī quinaꞌn ixlacasquiꞌnāuj. Ixtlahuayāuj chuntzaꞌ chī jā tze quintalacapāstacniꞌcaꞌn ē chuntzaꞌ chī ixlacasquiꞌn quimacniꞌcaꞌn. Dios nacāmakapātīnīnkōꞌ ixlīpōꞌktucaꞌn tī tatlahua tū jā tze. Ē nā chuntzaꞌ ixquincāꞌaꞌkspulan quinaꞌn.
\v 4 Dios quincālakalhuꞌmanniꞌ ixpālacata quincāpāxquīꞌyān. Ē ūꞌtzaꞌ jā quinticātalīmakapātīnīn.
\v 5 Masqui huaꞌchi xanīn ixuanīꞌtaꞌuj ixpālacata quincuentacaꞌn, Dios quincāmaxquīꞌn xasāstiꞌ quilatamatcaꞌn chuntzaꞌ chī maxquīꞌlh ixlatamat Cristo aꞌcxniꞌ mālacastālancuanīlh. Dios nā chuntzaꞌ quincāmakapūtaxtūn quinaꞌn ixpālacata ixtalakalhuꞌmān.
\v 6 Dios mālacastālancuanīlh Cristo, ē nā quinaꞌn naquincāmālacastālancuanīyān. Ē chuntzaꞌ natāꞌtahuiꞌlayāuj Cristo nac aꞌkapūn.
\v 7 Ūꞌtzaꞌ huāꞌmāꞌ tlahualh Dios ixpālacata māsuꞌyucuꞌtunli pōꞌktu quilhtamacuj chī xlaꞌ pāxquīꞌnin. Ūꞌtzaꞌ huāꞌmāꞌ māsuꞌyulh aꞌcxniꞌ macamilh Cristo Jesús nanī quimpālacatacaꞌn.
\v 8 Huiꞌxinaꞌn līpāhuaꞌnāꞌtit Jesucristo, ē chuntzaꞌ Dios cāmakapūtaxtūn huiꞌxinaꞌn xmān ixpālacata cālakalhuꞌmanān. Jā tū tlahuaꞌtit huiꞌxinaꞌn. Xmān Dios tī cāmakapūtaxtūn. Huaꞌchi aꞌktin talakalhuꞌmān tū Dios cāmaxquīꞌn.
\v 9 Tū līꞌaꞌkapūtaxtucan, xlaꞌ huaꞌchi aꞌktin talakalhuꞌmān. Jāla lītlajacan. Chuntzaꞌ jā tī tī tzē kaꞌtlaꞌ nalīmakcaꞌtzī tū līꞌaꞌkapūtaxtucan.
\v 10 Dios quincātlahuanīꞌtaꞌn chu chāꞌtin chī Cristo, ē quincāmaxquīꞌnīꞌtaꞌn xasāstiꞌ quilatamatcaꞌn, ixpālacata lacasquiꞌn natlahuayāuj tū tze. Dios xapūla quincālīhuiꞌlīn xalactze nalatāꞌkchokoyāuj chī līlacatejtin.
\s Talacāxtlahuan
\p
\v 11 Calacapāstactit, huiꞌxinaꞌn tī jā israelitas, chī ixuanīꞌtaꞌntit xapūla. Israelitas cātamāpācuhuīn tachiꞌxcuhuīꞌt tī jā cātachuꞌcunīꞌtaꞌn. Xlacaꞌn tatachuꞌcu na ixmacniꞌcaꞌn tī chiꞌxcuhuīꞌn ixpālacata natamāsuꞌyu tatapaꞌksīniꞌtzaꞌ Dios. Ixlīmāncaꞌn cāhuanican chiꞌxcuhuīꞌn tī cāchuꞌcucanīꞌt.
\v 12 Xapūla huiꞌxinaꞌn jā ixtapaꞌksīniꞌyāꞌtit Cristo. Xmān israelitas tī ixtachiꞌxcuhuīꞌt Dios ixtahuanīꞌt. Xmān israelitas Dios ixcāmācaꞌtzīnī xapūla talacāxtlahuan. Xmān xlacaꞌn ixcāmācaꞌtzīnī Dios nacāmaxquīꞌ aꞌktin talakalhuꞌmān. Huiꞌxinaꞌn jā israelitas, ē ūꞌtzaꞌ jā līmaktīniꞌntit huāꞌmāꞌ. Huiꞌxinaꞌn ixlatlāꞌhuaꞌnāꞌtit nac cāꞌquilhtamacuj. Jā ixcaꞌtzīyāꞌtit palh Dios tzē ixcāmakapūtaxtūn. Jā ixlakapasāꞌtit Dios.
\v 13 Xapūla makat ixlatlāꞌhuaꞌnāꞌtit na ixlacatīn Dios. Chuhuaꞌj laktalacatzunaꞌjīnīꞌtaꞌntit Dios ixpālacata Cristo Jesús tī nīnīꞌt quimpālacatacaꞌn.
\v 14 Nā Cristo cāmākoꞌxamixīnīꞌt israelitas ē nā tī jā israelitas. Chu chāꞌtin cālīmāxtulh. Cristo cālacāxtlahualh.
\v 15 Cristo nīlh quimpālacatacaꞌn, ē chuntzaꞌ līlactlahualh ixtahuiꞌlatcaꞌn israelitas ixpālacata jā chuntzaꞌ līꞌaꞌkapūtaxtucan. Xmān Cristo tzē makapūtaxtūnuꞌn. Chuntzaꞌ jātzaꞌ tatāꞌlāquiclhlaktzīꞌn israelitas ē tī jā israelitas. Kempātuꞌ tachiꞌxcuhuīꞌt ixlanīꞌt. Cristo chāꞌtin cālīmāxtulh.
\v 16 Chu chāꞌtin cātlahualh israelitas ē tī jā israelitas. Cristo nīlh nac cruz, ē chuntzaꞌ cālīlacāxtlahualh Dios ē tachiꞌxcuhuīꞌt.
\p
\v 17 Cristo milh ē mācaꞌtzīnīniꞌlh chī caꞌcs natahuiꞌlacan. Chuntzaꞌ cāmācaꞌtzīnīlh israelitas tī ixtalakapasatzaꞌ Dios. Nā cāmācaꞌtzīnīlh xlacaꞌn tī jā israelitas, tī jānaꞌj ixtalakapasa Dios.
\v 18 Ixpālacata tū tlahualh Cristo, quilīpōꞌktucaꞌn quinaꞌn, tī israelitas ē tī jā israelitas, chuntzaꞌ tzē nalaktalacatzunaꞌjīyāuj Dios quinTātaꞌcaꞌn, ixpālacata Espíritu Santo tī quincāmaktāyamāꞌn.
\v 19 Huiꞌxinaꞌn tī jā israelitas, huaꞌchi makatiyātīꞌn ixuanīꞌtaꞌntit. Chuhuaꞌj tapaꞌksīniꞌyāꞌtit Dios ē kēxtim cātāꞌlanīꞌtaꞌntit israelitas tī taꞌaꞌkaꞌīꞌ. Nā huiꞌxinaꞌn ixlacstīntzaꞌ Dios.
\v 20 Dios tlahualh huaꞌchi aꞌktin templo. Huiꞌxinaꞌn huaꞌchi chihuixniꞌ tū lītapācnaꞌncan. Apóstoles ē ixaꞌkchihuīnaꞌnīꞌn Dios, xlacaꞌn huaꞌchi cimiento. Jesucristo huaꞌchi chihuix tū līmātzucucan cimiento.
\v 21 Ixpālacata Cristo, tzamāꞌ templo stactēlha. Ixlīpōꞌktu chihuix tzej cāhuiꞌlīcanīꞌt tū nala aꞌktin templo tū ixlaꞌ Māpaꞌksīniꞌ Dios ē pōꞌktu tze.
\v 22 Huiꞌxinaꞌn ē quilīpōꞌktucaꞌn tī tapaꞌksīniꞌyāuj Cristo, quinaꞌn huaꞌchi ixtemplo Dios, ixpālacata Espíritu Santo quincātāꞌhuiꞌlan.
\c 3
\s Pablo macamaxquīꞌca nacāmāsuꞌyuniꞌ tī jā israelitas
\p
\v 1 Quit, Pablo, ictāꞌscuja Cristo Jesús, ē ictachīꞌnīꞌt ixpālacata iccāmāsuꞌyuniꞌyān ixtachihuīn Dios huiꞌxinaꞌn tī jā israelitas.
\v 2 Huiꞌxinaꞌn caꞌtzīyāꞌtit Dios pāxquīꞌnin ē chuntzaꞌ quimacamaxquīꞌnīꞌt naꞌiccāmāsuꞌyuniꞌyān xatze tachihuīn huiꞌxinaꞌn tī jā israelitas.
\v 3 Huāꞌmāꞌ quimācaꞌtzīnīlh Dios masqui xapūla jā ixcaꞌtzīcan huāꞌmāꞌ. Macstiꞌnaꞌj huāꞌmāꞌ iccātzoꞌknuniꞌnīꞌtaꞌntzaꞌ huiꞌxinaꞌn.
\v 4 Aꞌcxniꞌ nalīkelhtahuaꞌkaꞌyāꞌtit tū iccātzoꞌknuniꞌmāꞌn, nacaꞌtzīyāꞌtit iccaꞌtzītzaꞌ tū jā ixcaꞌtzīcan xapūla ixpālacata Cristo.
\v 5 Tachiꞌxcuhuīꞌt tī ixtahuiꞌlānaꞌlh xapūla, xlacaꞌn jā ixtacaꞌtzī huāꞌmāꞌ tū Dios ixcātlahuaniꞌlh tī jā israelitas. Chuhuaꞌj Espíritu Santo cāmācaꞌtzīnīnīꞌt apóstoles ē ixaꞌkchihuīnaꞌnīꞌn Dios.
\v 6 Cāmācaꞌtzīnīnīꞌt chu chāꞌtin tī taꞌaꞌkaꞌīꞌ, israelitas ē tī jā israelitas. Ixlīpōꞌktucaꞌn talītaxtunīꞌt ixtachiꞌxcuhuīꞌt Dios. Ixlīpōꞌktucaꞌn Dios nacāsicuaꞌlanātlahua. Lacxtim natamaktīniꞌn tū Dios mālacnūnīꞌt ixpālacata xatze tachihuīn ixlaꞌ Cristo Jesús.
\p
\v 7 Dios quincālakalhuꞌmanān. Xlaꞌ kaꞌlhī līmāpaꞌksīn, ē quimacamaxquīꞌlh naꞌicmāsuꞌyu huāꞌmāꞌ xatze tachihuīn.
\v 8 Chuntzaꞌ Dios quimacamaxquīꞌlh, masqui quit āꞌchulāꞌ xamacstiꞌnaꞌj ē jā āꞌmakapitzīn tī tapaꞌksīniꞌyāuj Dios. Dios quimacamaxquīꞌlh naꞌiccāmāsuꞌyuniꞌ tī jā israelitas chī Cristo tzē tlahua ixlīpōꞌktu tū jāla caꞌtzīkōꞌcan ē āꞌchulāꞌ līhuaꞌcaꞌlh tzē tlahua.
\v 9 Quimacamaxquīꞌlh naꞌiccāmācaꞌtzīnī ixlīpōꞌktucaꞌn tū Dios puhuanīꞌt. Xapūla xmān Dios ixlīmān ixcaꞌtzī huāꞌmāꞌ aꞌcxniꞌ jānaꞌj ixtzucu cāꞌquilhtamacuj. Dios, ūꞌtzaꞌ cātlahuakōꞌlh ixlīpōꞌktu.
\v 10 Chuhuaꞌj ángeles tī takaꞌlhī līmāpaꞌksīn nac aꞌkapūn, xlacaꞌn natacaꞌtzī chī Dios cāmakapūtaxtū kelhalhūhuaꞌ tachiꞌxcuhuīꞌt ē cālīmāxtulh ixtachiꞌxcuhuīꞌt. Chuntzaꞌ ángeles natalīcaꞌtzī Dios kaꞌlhī lhūhuaꞌ talacapāstacniꞌ.
\v 11 Dios ixcaꞌtzītzaꞌ xapūla quilhtamacuj chī nacālīmakapūtaxtū tachiꞌxcuhuīꞌt. Chuntzaꞌ tlahualh ixpālacata quiMāpaꞌksīniꞌcaꞌn Jesucristo.
\v 12 Quinaꞌn līpāhuanāuj Jesucristo, ē chuntzaꞌ tzē nalaktalacatzunaꞌjīyāuj Dios ē jā namāxanaꞌnāuj.
\v 13 Chuntzaꞌ quit iclacasquiꞌn jā tī lakachipiniꞌyāꞌtit huiꞌxinaꞌn masqui icpātīniꞌmāꞌlh mimpālacatacaꞌn. Chuntzaꞌ nacātalīlakachiꞌxcuhuīꞌyān.
\s Cristo quincāpāxquīꞌyān
\p
\v 14 Chuntzaꞌ quit ictatzokostaniꞌ Dios ixTātaꞌ quiMāpaꞌksīniꞌcaꞌn Jesucristo.
\v 15 Xlaꞌ ūꞌtzaꞌ ixTātaꞌcaꞌn ixlīpōꞌktucaꞌn tī tahuiꞌlānaꞌlh nac cāꞌquilhtamacuj ē nac aꞌkapūn.
\v 16 Icsquiꞌniꞌ Dios cacāmātliꞌhuiꞌclhniꞌ Ēspíritu Santo. Huāꞌmāꞌ Dios tzē natlahua ixpālacata xlaꞌ kaꞌlhī lītliꞌhuiꞌqui.
\v 17 Nā icsquiꞌniꞌ Dios cacātāꞌlatāꞌkchokon Cristo ixpālacata līpāhuaꞌnāꞌtit xlaꞌ. Nā icsquiꞌniꞌ Dios cacāmaktāyan nacāpāxquīꞌyāꞌtit āꞌmakapitzīn.
\v 18 Nā icsquiꞌniꞌ Dios huiꞌxinaꞌn nacaꞌtzīyāꞌtit chī Cristo quincāpāxquīꞌyān. Catacaꞌtzīlh huāꞌmāꞌ ixlīpōꞌktucaꞌn tī tatapaꞌksīniꞌ Dios.
\v 19 Icsquiꞌn huiꞌxinaꞌn nakexpaꞌtāꞌtit chī Cristo quincāpāxquīꞌyān, masqui jā tī chāꞌtin tī tzē caꞌtzīkōꞌ. Chuntzaꞌ lactze nalītaxtuyāꞌtit chī Dios lacasquiꞌn.
\p
\v 20 Dios tzē natlahua lhūhuaꞌ quimpālacatacaꞌn. Jā caꞌtzīyāuj chī nasquiꞌnāuj ixlīpōꞌktu tū Dios tzē naquincātlahuaniꞌyān ē jāla lacapāstacāuj ixlīpōꞌktu tū Dios tzē naquincātlahuaniꞌyān, ixpālacata xlaꞌ kaꞌlhī līmāpaꞌksīn. Huāꞌmāꞌ līmāpaꞌksīn scuja na quilīstacnaꞌcaꞌn.
\v 21 Jā maktin catisputli chī namakapāxuīcan Dios ixpālacata Jesucristo ē quimpālacatacaꞌn quilīpōꞌktucaꞌn tī tapaꞌksīniꞌyāuj Cristo Jesús. Amén.
\c 4
\s Espíritu Santo chu chāꞌtin quincālīmāxtunīꞌtaꞌn
\p
\v 1 Quit, Pablo, iclītachīꞌnīꞌt ixpālacata ictāꞌscuja Dios quiMāpaꞌksīniꞌcaꞌn. Iccāsquiꞌniꞌyān calatāꞌkchokotit chuntzaꞌ chī minīꞌniꞌ nalatāꞌkchokoyāuj quinaꞌn tī Dios quincātaꞌsatīnīꞌtaꞌn.
\v 2 Jā kaꞌtlaꞌ camakcaꞌtzītit. Līlacatzucu cachihuīnaꞌntit. Cacālīpātītit āꞌmakapitzīn nac cāꞌtapāxquīꞌn.
\v 3 Espíritu Santo chu chāꞌtin cālīmāxtunīꞌtaꞌn. Chuntzaꞌ calīhuiꞌlīꞌtit līlacatejtin nalatahuiꞌlaꞌyāꞌtit. Jā titapāpitziyāꞌtit.
\v 4 Quinaꞌn tī tapaꞌksīniꞌyāuj Dios chu chāꞌtin chī quinaꞌn. Aꞌnan xmān chāꞌtin Espíritu Santo, ē chu aꞌktin tū kaꞌlhīmāꞌnauj tū nakaꞌlhīyāuj quilīpōꞌktucaꞌn tī Dios quincātaꞌsatīnīꞌtaꞌn.
\v 5 Xmān chāꞌtin Māpaꞌksīniꞌ Jesucristo. Chu aꞌktin tū aꞌkaꞌīꞌyāuj. Aꞌcxniꞌ aꞌkpaxāuj lacxtim māsuꞌyuyāuj palh aꞌkaꞌīꞌyāuj.
\v 6 Ē nā xmān chāꞌtin Dios. Xlaꞌ ūꞌtzaꞌ ixTātaꞌcaꞌn ixlīpōꞌktucaꞌn tachiꞌxcuhuīꞌt. Xlaꞌ māpaꞌksīkōꞌ. Calhāxcuhuālh huīꞌlh. Ē quincātāꞌhuiꞌlan quilīpōꞌktucaꞌn.
\p
\v 7 Dios quincāmaktāyayān namākentaxtūyāuj quintascujūtcaꞌn tū quincāmacamaxquīꞌnīꞌtaꞌn Cristo.
\v 8 Tatzoꞌkniꞌ na ixtachihuīn Dios:
\q Aꞌcxniꞌ aꞌlh nac aꞌkapūn, cālēꞌlh lhūhuaꞌ tachīꞌnīꞌn.
\q Cāmaxquīꞌlh tachiꞌxcuhuīꞌt tū ixlacasquiꞌnca natalītāꞌscuja.
\p
\v 9 Tī aꞌlh nac aꞌkapūn, ūꞌtzaꞌ Cristo. Xlaꞌ xapūla ixyujnīꞌtaꞌnchi nac cāꞌquilhtamacuj.
\v 10 Cristo yujchi nac cāꞌtiꞌyaꞌtnaꞌ ē nā xlaꞌ tahuaꞌcaꞌlh jā āꞌchulāꞌ tālhmāꞌn nac aꞌkapūn. Tahuaꞌcaꞌlh ixpālacata chuntzaꞌ tzē namāpaꞌksīniꞌnkōꞌ.
\v 11 Cristo chāꞌtunuꞌ cāmacamaxquīꞌlh ixtascujūtcaꞌn. Āꞌmakapitzīn cālīhuiꞌlīlh ixlīꞌapóstoles. Āꞌmakapitzīn cālīhuiꞌlīlh ixlīꞌaꞌkchihuīnaꞌcaꞌn. Āꞌmakapitzīn cāmaxquīꞌlh natamāsuꞌyu tū xatze tachihuīn. Āꞌmakapitzīn cālīhuiꞌlīlh xanapuxcuꞌnuꞌ nac templo. Āꞌmakapitzīn cāmaxquīꞌlh natamāsuꞌyu ixtachihuīn Dios.
\v 12 Huāꞌmāꞌ tlahualh ixpālacata xlaꞌ ixlacasquiꞌn tzej natatāꞌscuja tī tatapaꞌksīniꞌ Dios. Chuntzaꞌ āꞌchulāꞌ nataꞌaꞌkaꞌīꞌniꞌ Cristo.
\v 13 Xlaꞌ lacasquiꞌn quinaꞌn lacxtim tzej naꞌaꞌkaꞌīꞌyāuj, ē lacxtim nalakapaskōꞌyāuj īꞌSkaꞌtaꞌ Dios. Dios lacasquiꞌn āꞌchulāꞌ natlahuayāuj ixtalacasquiꞌnīn hasta jā namālakchāꞌnīyāuj chī Cristo.
\v 14 Jātzaꞌ chī lacstīn catihuanui. Lacstīn pōꞌktu taꞌaꞌkaꞌīꞌ tū cāhuanican masqui cāꞌaꞌkskāhuīꞌcan. Chuhuaꞌj taꞌaꞌnan āꞌmakapitzīn tī tacaꞌtzī taꞌaꞌkskāhuīꞌnin. Quincātamāsuꞌyuniꞌcuꞌtunān tū jā ixlīcānaꞌ.
\v 15 Ixlacasquiꞌnca quinaꞌn nahuanāuj xmān tū ixlīcānaꞌ. Aꞌcxniꞌ nahuanāuj tū ixlīcānaꞌ, namāsuꞌyūyāuj chī cāpāxquīꞌyāuj āꞌmakapitzīn. Ixlacasquiꞌnca āꞌchulāꞌ nahuanāuj chī Cristo. Xlaꞌ huaꞌchi aꞌktin aꞌkxāk ixpālacata xlaꞌ māpaꞌksīniꞌn.
\v 16 Quinaꞌn huaꞌchi aꞌktin macniꞌ. Quimacniꞌcaꞌn tlahua tū lacapāstaca quinaꞌkxākcaꞌn. Nā chuntzaꞌ quinaꞌn nakexmatniꞌyāuj Cristo. Lātatāꞌstucnīꞌtauj cāmāquilhtāstuca ixlīpōꞌktu macniꞌ. Palh ixlīpōꞌktu macniꞌ tascuja, chuntzaꞌ stactēlha ē lītatliꞌhuiꞌclhtēlha. Nā chuntzaꞌ quinaꞌn tī aꞌkaꞌīꞌniꞌyāuj Dios. Huaꞌchi aꞌktin macniꞌ lanīꞌtaꞌuj quinaꞌn ixpālacata chī lāpāxquīꞌyāuj. Chuntzaꞌ āꞌchulāꞌ naꞌaꞌkaꞌīꞌtēlhayāuj.
\s Xasāstiꞌ latamat tū māstāꞌ Cristo
\p
\v 17 Tū naꞌiccāhuaniyān ixtalacasquiꞌnīn quiMāpaꞌksīniꞌcaꞌn Jesucristo. Jātzaꞌ calatāꞌkchokotit chī talatlāꞌhuan āꞌmakapitzīn tī jā taꞌaꞌkaꞌīꞌ. Ixtalacapāstacniꞌcaꞌn xlacaꞌn jā tū ixtapalhcaꞌn.
\v 18 Xlacaꞌn jāla tzej talacapāstaca. Jā takaꞌlhī xasāstiꞌ ixlatamatcaꞌn tū Dios māstāꞌ. Jā takaꞌlhī, ixpālacata lacxumpin ē jā takexmata.
\v 19 Jātzaꞌ tamāxanaꞌn. Talīhuiꞌlīnīꞌt tatlahua tū jā tze. Līpāxuhua tatlahua ixlīpōꞌktu tū jā tze ē tū lacasquiꞌn ixmacniꞌcaꞌn.
\v 20 Jā chuntzaꞌ scaꞌtnīꞌtaꞌntit huiꞌxinaꞌn. Cristo, xlaꞌ jā chuntzaꞌ māsuꞌyu.
\v 21 Huiꞌxinaꞌn kexpaꞌtnīꞌtaꞌntit ixpālacata Cristo. Cātamāsuꞌyuniꞌnīꞌtaꞌn tū Cristo māsuꞌyulh. Huāꞌmāꞌ ūꞌtzaꞌ tū ixlīcānaꞌ.
\v 22 Chuhuaꞌj jātzaꞌ calatāꞌkchokotit chī ixlatlāꞌhuaꞌnāꞌtit xapūla aꞌcxniꞌ jānaꞌj ixlakapasāꞌtit Cristo ē ixtlahuaꞌyāꞌtit tū jā tze mintalacapāstacniꞌcaꞌn tū xmān ixlītaꞌaꞌkskāhuīꞌyāꞌtit.
\v 23 Chuhuaꞌj cakaꞌlhīꞌtit xasāstiꞌ mintalacapāstacniꞌcaꞌn.
\v 24 Calatāꞌkchokotit chuntzaꞌ chī xasāstiꞌ mintalacapāstacniꞌcaꞌn tū Dios cāmaxquīꞌn ē tū ixlaꞌ. Catlahuaꞌtit tū tze.
\p
\v 25 Jātzaꞌ cahuaꞌntit tāꞌksaꞌnīn. Calāhuaꞌniꞌtit tū ixlīcānaꞌ, ixpālacata chu chāꞌtin quinaꞌn tī tapaꞌksīniꞌyāuj Cristo.
\p
\v 26 Palh sītzīꞌyāꞌtit huiꞌxinaꞌn, jā catlahuaꞌtit tū jā tze ixpālacata mintasītziꞌcaꞌn. Jā tisītzīꞌyāꞌtit pōꞌktu quilhtamacuj.
\v 27 Jā catamakxtektit nacāꞌaꞌkskāhuīꞌyān skāhuīꞌniꞌ.
\p
\v 28 Jātzaꞌ cakaꞌlhānaꞌntit huiꞌxinaꞌn tī ixkaꞌlhānaꞌnāꞌtit. Cascujtit ē nahuāꞌyanāꞌtit. Chuntzaꞌ tzē namaktāyaꞌyāꞌtit āꞌmakapitzīn tī jā tū takaꞌlhī.
\p
\v 29 Jā cachīhuālh tihuaꞌnāꞌtit huiꞌxinaꞌn. Cahuaꞌntit xmān tū tze ē tū nacāmaktāya āꞌmakapitzīn. Chuntzaꞌ nacālīmaktāyaꞌyāꞌtit tī cātakexmatān huiꞌxinaꞌn.
\v 30 Jā catlahuaꞌtit tū nalīlīpuhuan Espíritu Santo. Espíritu Santo quincātāꞌhuiꞌlan, ē chuntzaꞌ caꞌtzīyāuj palh tapaꞌksīniꞌyāuj Dios. Nā caꞌtzīyāuj Dios naquincāmakapūtaxtūkōꞌyān ixpālacata kaꞌlhīyāuj Espíritu Santo.
\p
\v 31 Jātzaꞌ calacapāstactit tū cātatlahuaniꞌnīꞌtaꞌn āꞌmakapitzīn. Jātzaꞌ casītzīꞌtit. Jātzaꞌ cacālakapalaꞌtit āꞌmakapitzīn. Jātzaꞌ caꞌaꞌksaꞌnīniꞌntit. Jātzaꞌ tiquiclhlaktzīꞌnāꞌtit āꞌmakapitzīn.
\v 32 Xatze calāpāxquīꞌtit. Calālakalhuꞌmaꞌntit. Nā calāmātzaꞌnkēnaꞌniꞌtit chuntzaꞌ chī Dios cāmātzaꞌnkēnaꞌniꞌnīꞌtaꞌn huiꞌxinaꞌn ixpālacata Cristo.
\c 5
\s Ixlacasquiꞌnca lacatejtin natalatāꞌkchoko ixlacstīn Dios
\p
\v 1 Huiꞌxinaꞌn ixlacstīntzaꞌ Dios, ē xlaꞌ cāpāxquīꞌyān. Chuntzaꞌ huiꞌxinaꞌn natlahuaꞌyāꞌtit tū xlaꞌ lacasquiꞌn.
\v 2 Nalāpāxquīꞌyāꞌtit huiꞌxinaꞌn chuntzaꞌ chī Cristo quincāpāxquīꞌyān. Xlaꞌ quincāpāxquīꞌyān hasta nīlh nac cruz quimpālacatacaꞌn. Tamacamāstāꞌlh huaꞌchi aꞌktin talakalhuꞌmān na ixlacatīn Dios. Huāꞌmāꞌ līpāxuhualh Dios.
\p
\v 3 Huiꞌxinaꞌn ixtachiꞌxcuhuīꞌt Dios. Jā tilacapāstacāꞌtit tū jā tze. Jā tiputzayāꞌtit mintāꞌlāpāxquīꞌncaꞌn. Jā tilīchihuīnaꞌnāꞌtit tū jā līmacuan. Nūn macstiꞌnaꞌj natampiꞌlhīniꞌnāꞌtit.
\v 4 Jā tihuaꞌnāꞌtit tū jā tze tachihuīn. Jā tihuaꞌnāꞌtit tū jā tū ixtapalh. Jā tilīkelhkamānaꞌnāꞌtit tū jā tze tachihuīn. Pōꞌktu tzamāꞌ jā tū līmacuan. Xatze camaxquīꞌtit tapāxcatcaꞌtzīn Dios.
\v 5 Huiꞌxinaꞌn caꞌtzīyāꞌtittzaꞌ tī tatlahuatlāꞌhuan tū jā tze, jā catitatanūlh jā māpaꞌksīniꞌn Cristo ē Dios. Jā catitatanūlh tī takaꞌlhī ixtāꞌlāpāxquīꞌncaꞌn ē tī tatlahua tū jā tze ē tī talaktampiꞌlhīniꞌn ixlīpōꞌktu catūhuālh ē jā talacapāstaca Dios.
\v 6 Jā catamakxtektit nacātaꞌaꞌkskāhuīꞌyān huiꞌxinaꞌn, masqui makapitzīn tahuan tzē tlahuacan catūhuālh. Xlacaꞌn jā takexmatniꞌmāꞌnalh Dios. Dios nacāmakapātīnīn.
\v 7 Huiꞌxinaꞌn jā cacātāꞌtalacxtuctit xlacaꞌn.
\p
\v 8 Xapūla huiꞌxinaꞌn huaꞌchi ixlatlāꞌhuaꞌnāꞌtit nac cāꞌpucsuaꞌ. Chuhuaꞌj tapaꞌksīniꞌyāꞌtit Dios, ē chuntzaꞌ huaꞌchi tlāꞌhuaꞌmpāꞌnaꞌntittzaꞌ nac taxkaket. Chuntzaꞌ līlacatejtin calatāꞌkchokotit chuntzaꞌ chī xalanīꞌn nac taxkaket.
\v 9 Palh tlāꞌhuanāuj nac taxkaket, nalatāꞌkchokoyāuj chuntzaꞌ chī Dios lacasquiꞌn. Nā nahuanāuj tū ixlīcānaꞌ.
\v 10 Cacaꞌtzītit tū nalīpāxuhua Dios ē ūꞌtzaꞌ huāꞌmāꞌ catlahuaꞌtit.
\v 11 Jā catlahuaꞌtit tū jā tze huaꞌchi xalanīꞌn nac cāꞌpucsuaꞌ. Jā tū ixtapalh tū tatlahua xlacaꞌn. Xatze cacāmāsuꞌyuniꞌtit jā tze tū tatlahua.
\v 12 Līmāxanaꞌ līchihuīnaꞌncan tū xlacaꞌn tatlahua lakatzēꞌk.
\v 13 Nac taxkaket tzē cālīlaktzīꞌncan catūhuālh palh tze o jā tze.
\v 14 Chuntzaꞌ huanican tī jā aꞌkaꞌīꞌ:
\q Huiꞌx, huaꞌchi lhtatapāꞌt ē huaꞌchi xanīn huiꞌx.
\q Calakahuaꞌnti ē catāꞌkaquiꞌ ē Cristo namāxkakēniꞌyān.
\p
\v 15 Calīhuiꞌlīꞌtit līlacatejtin nalatāꞌkchokoyāꞌtit. Jā calatāꞌkchokotit huaꞌchi tī jā takexmata ixtachihuīn Dios. Līlacatejtin calatāꞌkchokotit, ixpālacata huiꞌxinaꞌn caꞌtzīyāꞌtittzaꞌ.
\v 16 Calīhuiꞌlīꞌtit natlahuaꞌyāꞌtit tū tze, tikaꞌlhīꞌyāꞌtit latamat. Chuhuaꞌj lhūhuaꞌ tachiꞌxcuhuīꞌt tatlahua tū jā tze.
\v 17 Tzej calacapāstacnaꞌntit. Cakexpaꞌttit tū ixtalacasquiꞌnīn Dios.
\v 18 Jā cakaꞌchīꞌtit. Tī takaꞌchī, xlacaꞌn tatlahua tū jā līmacuan. Xatze catamakxtekniꞌtit Espíritu Santo nacāmāpaꞌksīyān.
\v 19 Aꞌcxniꞌ nalātāꞌchihuīnaꞌnāꞌtit, camākaꞌtlīꞌtit Dios chuntzaꞌ chī nac salmos ē nā chuntzaꞌ chī nac himnos tū ixlaꞌ Dios. Capixtlīꞌniꞌtit ē calīmākaꞌtlīꞌtit Dios ixlīpōꞌktu milīstacnaꞌcaꞌn.
\v 20 Pōꞌktu quilhtamacuj camaxquīꞌtit tapāxcatcaꞌtzīn Dios quinTātaꞌcaꞌn ixlīpōꞌktu na ixtacuhuīniꞌ quiMāpaꞌksīniꞌcaꞌn Jesucristo.
\s Chī talīlatahuiꞌla chiꞌxcuꞌ ē ixpuscāt tī tatapaꞌksīniꞌ Cristo
\p
\v 21 Calālakachiꞌxcuhuīꞌtit huiꞌxinaꞌn ixpālacata lakachiꞌxcuhuīꞌyāꞌtit Dios.
\p
\v 22 Huiꞌxinaꞌn tī puscan, cakexpaꞌtniꞌtit minkōluꞌcaꞌn chuntzaꞌ chī quinan kexmatniꞌyāuj quiMāpaꞌksīniꞌcaꞌn Jesucristo.
\v 23 Xakōluꞌ māpaꞌksī ixpuscāt chuntzaꞌ chī Cristo cāmāpaꞌksī tī tatapaꞌksīniꞌ. Cristo cāmakapūtaxtūnīꞌt xlacaꞌn tī taꞌaꞌkaꞌīꞌ ē chuhuaꞌj xlaꞌ ūꞌtzaꞌ cālīmāpaꞌksī.
\v 24 Tī tatapaꞌksīniꞌ Cristo, xlacaꞌn takexmatniꞌ Cristo. Nā chuntzaꞌ puscan natakexmatniꞌ ixkōluꞌcaꞌn.
\p
\v 25 Huiꞌxinaꞌn tī chiꞌxcuhuīꞌn, cacāpāxquīꞌtit mimpuscātcaꞌn chuntzaꞌ chī Cristo cāpāxquīꞌ tī tatapaꞌksīniꞌ. Xlaꞌ nīlh nacāmakapūtaxtū.
\v 26 Nīlh ixpālacata xalactze quincālītlahuacuꞌtunniꞌ ixtachihuīn Dios. Ē māpānūcuꞌtunli quincuentacaꞌn. Chuhuaꞌj aꞌkpaxāuj ixpālacata xapacanīꞌttzaꞌ quincuentacaꞌn.
\v 27 Cristo cācāxuiꞌlīcuꞌtunli ixtachiꞌxcuhuīꞌt ixpālacata chuntzaꞌ natachāꞌn lactze na ixlacatīn. Lacasquiꞌn lactze ixtalakōꞌlh.
\v 28 Ixlacasquiꞌnca chiꞌxcuhuīꞌn natapāxquīꞌ ixpuscātcaꞌn chuntzaꞌ chī cāpāxquīꞌcan ixlīmāncaꞌn. Chāꞌtin chiꞌxcuꞌ tī pāxquīꞌ ixpuscāt, nā chuntzaꞌ pāxquīꞌcan ixlīmān.
\v 29 Jā tī chāꞌtin quiclhlaktzīꞌn ixmacniꞌ. Māhuīꞌcan ē maktakaꞌlhcan. Nā chuntzaꞌ Cristo cāmaktakaꞌlha tī ixtachiꞌxcuhuīꞌt.
\v 30 Cristo quincāmaktakaꞌlhān ixpālacata quinaꞌn huaꞌchi ixmacniꞌ Cristo.
\v 31 Tatzoꞌkniꞌ na ixtachihuīn Dios: “Chāꞌtin chiꞌxcuꞌ namakxteka ixtātaꞌ ē ixtzīꞌ. Natāꞌtalacxtimī ixpuscāt. Chuntzaꞌ aꞌktin macniꞌ natala ixchāꞌtuꞌcaꞌn.”
\v 32 Tzamāꞌ tachihuīn jicslīhuaꞌ kexmatcan. Quit icpuhuan līchihuīnaꞌn Cristo ē ixtachiꞌxcuhuīꞌt.
\v 33 Nā huanicuꞌtun ixlacasquiꞌnca chiꞌxcuhuīꞌn natapāxquīꞌ ixpuscātcaꞌn chuntzaꞌ chī cāpāxquīꞌcan ixlīmāncaꞌn. Ixlacasquiꞌnca puscan natalakachiꞌxcuhuīꞌ ixkōluꞌcaꞌn.
\c 6
\p
\v 1 Huiꞌxinaꞌn tī lacstīn cakexpaꞌtniꞌtit mintātaꞌcaꞌn ē mintzīꞌcaꞌn. Chuntzaꞌ ixlacasquiꞌnca ixpālacata chuntzaꞌ ixtalacasquiꞌnīn Dios.
\v 2 Dios huan nacāsicuaꞌlanātlahua tī tamākentaxtū huāꞌmāꞌ līmāpaꞌksīn. Huāꞌmāꞌ ūꞌtzaꞌ xapūla līmāpaꞌksīn tū chuntzaꞌ līchihuīnaꞌn Dios. Huāꞌmāꞌ līmāpaꞌksīn chuntzaꞌ huan: “Calakachiꞌxcuhuiꞌ mintātaꞌ ē mintzīꞌ.
\v 3 Chuntzaꞌ līpāxuhua nalatahuiꞌlaꞌyaꞌ. Ē chuntzaꞌ makās nalatapāꞌyaꞌ nac cāꞌquilhtamacuj.”
\p
\v 4 Huiꞌxinaꞌn tī xanatātanaꞌ ē xanatzīꞌtniꞌ, jā cacāmakasītzīꞌtit mincamanaꞌcaꞌn. Cacāmakastactit chuntzaꞌ chī Dios huan. Cacāmāsuꞌyuniꞌtit chī natakexmatniꞌ Dios.
\p
\v 5 Huiꞌxinaꞌn tī makscujnīꞌn, cakexpaꞌtniꞌtit tī cātāꞌscujāꞌtit. Cacālakachiꞌxcuhuīꞌtit ē cacājicuaꞌniꞌtit. Tzej cascujtit huaꞌchi ixtāꞌscujtit Cristo.
\p
\v 6 Tzej cascujtit ē jā xmān aꞌcxniꞌ cātalaktzīꞌmāꞌn tī tāꞌscujāꞌtit. Jā xmān xlacaꞌn nacāmakapāxuīꞌcuꞌtunāꞌtit. Tzej cascujtit ixpālacata namakapāxuīꞌyāꞌtit Dios, huaꞌchi Cristo ixtāꞌscujtit.
\v 7 Līpāxuhua cascujtit, huaꞌchi ixtāꞌscujtit Dios ē jā chiꞌxcuhuīꞌn.
\v 8 Huiꞌxinaꞌn caꞌtzīyāꞌtit quiMāpaꞌksīniꞌcaꞌn Jesucristo chuntzaꞌ nacāxoko chāꞌtunuꞌ chī tatlahuanīꞌt tū tze masqui tasācuaꞌ ē masqui māpaꞌksīniꞌ.
\p
\v 9 Huiꞌxinaꞌn tī māpaꞌksīniꞌnāꞌtit, tzej cacātāꞌlatapāꞌtit mintasācuaꞌcaꞌn. Jā nacāmekēꞌklhaꞌyāꞌtit. Calacapāstactit quiMāpaꞌksīniꞌcaꞌn huiꞌlachaꞌ nac aꞌkapūn. Xlaꞌ kēxtim cāmāpaꞌksī tasācuaꞌn ē tī tamāpaꞌksīniꞌn. Dios chu chāꞌtin cālaktzīꞌn.
\s Dios cāmaxquīꞌ ixlacstīn tū natalītamaktāya
\p
\v 10 Chuhuaꞌj, tāꞌtimīn, āꞌxmān iccāhuanicuꞌtunān kempātin. Jā titaxlajuaniꞌyāꞌtit chī aꞌkaꞌīꞌniꞌyāꞌtit Māpaꞌksīniꞌ Jesucristo. Xlaꞌ kaꞌlhī lītliꞌhuiꞌqui ē tzē nacāmaktāyayān.
\v 11 Catamakxtekniꞌtit Dios nacāmaktāyayān ē chuntzaꞌ jā caticāꞌaꞌkskāhuīꞌn skāhuīꞌniꞌ. Chī Dios quincālīmaktāyayān, ūꞌtzaꞌ huaꞌchi aꞌktin ixtaꞌlhaꞌāꞌn tū tamaclacasquiꞌn soldados aꞌcxniꞌ taꞌaꞌn nac guerra.
\v 12 Nā quinaꞌn huaꞌchi chāꞌtin tī aꞌn nac guerra. Quintāꞌlāquiclhlaktziꞌcaꞌn jā chiꞌxcuhuīꞌn. Quintāꞌlāquiclhlaktziꞌcaꞌn ūꞌtzaꞌ tū jā tzeya ūꞌniꞌ. Kaꞌlhī lītliꞌhuiꞌqui ē māpaꞌksīniꞌn nac tzamāꞌ cāꞌquilhtamacuj jā tlahuacan tū jā tze ē latlāꞌhuan nac cāꞌūꞌnīꞌn.
\v 13 Ūꞌtzaꞌ calītamakxtekniꞌtit Dios nacāmaxquīꞌyān tū nalītamaktāyaꞌyāꞌtit. Huāꞌmāꞌ huaꞌchi ixtaꞌlhaꞌāꞌncaꞌn ixlacstīn Dios. Chuntzaꞌ jā caticātaskāhuīꞌn mintāꞌlāquiclhlaktziꞌcaꞌn. Pōꞌktu quilhtamacuj skalalh catahuiꞌlaꞌtit. Palhāsāꞌ namimpala mintāꞌlāquiclhlaktziꞌcaꞌn. Palh skalalh tahuiꞌlaꞌyāꞌtit, huiꞌxinaꞌn jā caticātaskāhuīꞌn.
\v 14 Pōꞌktu quilhtamacuj skalalh catahuiꞌlaꞌtit. Camaktīniꞌntit tū Dios cāmaxquīꞌyān tū huaꞌchi ixtaꞌlhaꞌāꞌn chāꞌtin tropa. Chāꞌtin tropa tampātahuiꞌla aꞌktin cinturón ē lēꞌn tū namaktāya ixcuꞌxan. Nā huiꞌxinaꞌn ixlacasquiꞌnca nalakapasāꞌtit tū ixlīcānaꞌ ē xmān natlahuaꞌyāꞌtit tū tze.
\v 15 Tropa tatūnū botas aꞌcxniꞌ aꞌn calhāxcuhuālh. Huiꞌxinaꞌn līskalalh catahuiꞌlaꞌtit napināꞌtit namāsuꞌyuꞌyāꞌtit ixtachihuīn Dios.
\v 16 Tropa lēꞌn tū lītamaktāya. Tzamāꞌ jāla lakpusa flecha masqui taꞌlacan. Huiꞌxinaꞌn palh līpāhuaꞌnāꞌtit Dios, ūꞌtzaꞌ huaꞌchi tū lītamaktāyaꞌyāꞌtit. Chuntzaꞌ skāhuīꞌniꞌ jā caticāskāhuīꞌn.
\v 17 Tropa maclacasquiꞌn ixtāꞌknuꞌ xalīcāꞌn. Huiꞌxinaꞌn ixlacasquiꞌnca tzej nacaꞌtzīyāꞌtit Dios cāmakapūtaxtūnīꞌtaꞌntzaꞌ. Ūꞌtzaꞌ līcaꞌtzīyāꞌtit nalīskāhuīꞌyāꞌtit ixlīmāpaꞌksīn Dios. Huaꞌchi ūꞌtzaꞌ mintāꞌknuꞌcaꞌn xalīcāꞌn. Ixtachihuīn Dios, ūꞌtzaꞌ huaꞌchi aꞌktin espada tū Espíritu Santo cāmaxquīꞌyān.
\v 18 Pōꞌktu quilhtamacuj calīꞌorarlīniꞌtit Dios ixpālacata tū maclacasquiꞌnāꞌtit. Casquiꞌniꞌtit Dios nacāmaktāyayān. Catamakxtekniꞌtit Espíritu Santo nacāmaktāyayān naꞌorarlaꞌyāꞌtit. Skalalh catahuiꞌlaꞌtit. Jā tijiclhuaꞌyāꞌtit naꞌorarlaꞌyāꞌtit. Pōꞌktu quilhtamacuj cacālīꞌorarlīꞌtit ixlīpōꞌktucaꞌn ixlacstīn Dios.
\v 19 Nā calīꞌorarlīꞌtit quimpālacata. Caquilālīsquiꞌnui chī tzē naꞌicmāsuꞌyu ixtachihuīn Jesucristo ē jā tī caꞌicjicuaꞌniꞌlh.
\v 20 Dios quimacaminīꞌt naꞌicmāsuꞌyu xatze tachihuīn. Ūꞌtzaꞌ iclītachīꞌnīꞌt chuhuaꞌj. Casquiꞌniꞌtit Dios naquimaktāya jā naꞌicjicuaꞌn aꞌcxniꞌ naꞌicmāsuꞌyu, chuntzaꞌ chī ixlacasquiꞌnca.
\s Cāmacāꞌniꞌca saludos
\p
\v 21 Palhāsāꞌ huiꞌxinaꞌn caꞌtzīcuꞌtunāꞌtit chī iclīlahuīꞌlh ē tū ictlahuamāꞌlh. Pōꞌktu huāꞌmāꞌ nacāhuaniyān quintāꞌtincaꞌn Tíquico. Xlaꞌ tzej tāꞌscuja Dios.
\v 22 Ūꞌtzaꞌ iccālīlakmacāꞌnāchāꞌn huiꞌxinaꞌn. Nacāhuaniyān chī iclīlahuiꞌlānaꞌuj. Ē chuntzaꞌ nacāmāꞌaꞌkpuhuantīnīyān.
\p
\v 23 Icsquiꞌniꞌ Dios, quinTātaꞌcaꞌn, ē Māpaꞌksīniꞌ Jesucristo tzej calatapāꞌtit. Nā icsquiꞌniꞌ Dios cacāmaktāyan tzej naꞌaꞌkaꞌīꞌyāꞌtit ē nalāpāxquīꞌyāꞌtit.
\v 24 Dios cacāsicuaꞌlanātlahuakōꞌn milīpōꞌktucaꞌn tī līpāxquīꞌyāꞌtit quiMāpaꞌksīniꞌcaꞌn Jesucristo ixlīpōꞌktu milīstacnaꞌcaꞌn. Amén.